ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਵਿਨਯਪਿਟਕੇ

ਚੂਲ਼ਵਗ੍ਗ-ਅਟ੍ਠਕਥਾ

੧. ਕਮ੍ਮਕ੍ਖਨ੍ਧਕਂ

ਤਜ੍ਜਨੀਯਕਮ੍ਮਕਥਾ

੧. ਚੂਲ਼ਵਗ੍ਗਸ੍ਸ ਪਠਮੇ ਕਮ੍ਮਕ੍ਖਨ੍ਧਕੇ ਤਾਵ ਪਣ੍ਡੁਕਲੋਹਿਤਕਾਤਿ ਪਣ੍ਡੁਕੋ ਚੇਵ ਲੋਹਿਤਕੋ ਚਾਤਿ ਛਬ੍ਬਗ੍ਗਿਯੇਸੁ ਦ੍ਵੇ ਜਨਾ; ਤੇਸਂ ਨਿਸ੍ਸਿਤਕਾਪਿ ਪਣ੍ਡੁਕਲੋਹਿਤਕਾਤ੍ਵੇਵ ਪਞ੍ਞਾਯਨ੍ਤਿ. ਬਲਵਾਬਲਵਂ ਪਟਿਮਨ੍ਤੇਥਾਤਿ ਸੁਟ੍ਠੁਬਲਵਂ ਪਟਿਵਦਥ. ਅਲਮਤ੍ਥਤਰਾਤਿ ਸਮਤ੍ਥਤਰਾ.

ਤਜ੍ਜਨੀਯਕਮ੍ਮਕਥਾ ਨਿਟ੍ਠਿਤਾ.

ਅਧਮ੍ਮਕਮ੍ਮਦ੍ਵਾਦਸਕਕਥਾ

੪. ਅਸਮ੍ਮੁਖਾ ਕਤਨ੍ਤਿਆਦੀਸੁ ਸਙ੍ਘਧਮ੍ਮਵਿਨਯਪੁਗ੍ਗਲਸਮ੍ਮੁਖਾਨਂ ਵਿਨਾ ਕਤਂ, ਚੁਦਿਤਕਂ ਅਪ੍ਪਟਿਪੁਚ੍ਛਿਤ੍ਵਾ ਕਤਂ, ਤਸ੍ਸੇਵ ਅਪ੍ਪਟਿਞ੍ਞਾਯ ਕਤਂ. ਅਦੇਸਨਾਗਾਮਿਨਿਯਾਤਿ ਪਾਰਾਜਿਕਾਪਤ੍ਤਿਯਾ ਵਾ ਸਙ੍ਘਾਦਿਸੇਸਾਪਤ੍ਤਿਯਾ ਵਾ. ਏਤ੍ਥ ਪੁਰਿਮਕੇਸੁ ਤੀਸੁ ਤਿਕੇਸੁ ਨਵ ਪਦਾ ਅਧਮ੍ਮੇਨਕਤਂ ਵਗ੍ਗੇਨਕਤਨ੍ਤਿ ਇਮੇਹਿ ਸਦ੍ਧਿਂ ਏਕੇਕਂ ਗਹੇਤ੍ਵਾ ਨਵ ਤਿਕਾ ਵੁਤ੍ਤਾ. ਏਵਂ ਸਬ੍ਬੇਪਿ ਦ੍ਵਾਦਸ ਤਿਕਾ ਹੋਨ੍ਤਿ. ਪਟਿਪਕ੍ਖਵਸੇਨ ਸੁਕ੍ਕਪਕ੍ਖੇਸੁਪਿ ਏਤੇਯੇਵ ਦ੍ਵਾਦਸ ਤਿਕਾ ਵੁਤ੍ਤਾ.

੬. ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹੀਤਿ ਪਬ੍ਬਜਿਤਾਨਂ ਅਨਨੁਚ੍ਛਵਿਕੇਹਿ ਸਹਸੋਕਿਤਾਦੀਹਿ ਗਿਹਿਸਂਸਗ੍ਗੇਹਿ.

ਤਿਣ੍ਣਂ, ਭਿਕ੍ਖਵੇ, ਭਿਕ੍ਖੂਨਨ੍ਤਿਆਦਿ ਏਕੇਕੇਨਾਪਿ ਅਙ੍ਗੇਨ ਤਜ੍ਜਨੀਯਕਮ੍ਮਂ ਕਾਤੁਂ ਵਟ੍ਟਤੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਤਜ੍ਜਨੀਯਸ੍ਸ ਹਿ ਵਿਸੇਸੇਨ ਭਣ੍ਡਨਕਾਰਕਤ੍ਤਂ ਅਙ੍ਗਂ, ਨਿਯਸ੍ਸਸ੍ਸ ਅਭਿਣ੍ਹਾਪਤ੍ਤਿਕਤ੍ਤਂ, ਪਬ੍ਬਾਜਨੀਯਸ੍ਸ ਕੁਲਦੂਸਕਤ੍ਤਂ ਵੁਤ੍ਤਂ. ਇਮੇਸੁ ਪਨ ਤੀਸੁ ਅਙ੍ਗੇਸੁ ਯੇਨ ਕੇਨਚਿ ਸਬ੍ਬਾਨਿਪਿ ਕਾਤੁਂ ਵਟ੍ਟਤਿ. ਯਦਿ ਏਵਂ ਯਂ ਚਮ੍ਪੇਯ੍ਯਕ੍ਖਨ੍ਧਕੇ ਵੁਤ੍ਤਂ – ‘‘ਤਜ੍ਜਨੀਯਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ…ਪੇ… ਉਪਸਮ੍ਪਦਾਰਹਂ ਅਬ੍ਭੇਤਿ; ਏਵਂ ਖੋ ਉਪਾਲਿ ਅਧਮ੍ਮਕਮ੍ਮਂ ਹੋਤਿ ਅਵਿਨਯਕਮ੍ਮਂ, ਏਵਞ੍ਚ ਪਨ ਸਙ੍ਘੋ ਸਾਤਿਸਾਰੋ ਹੋਤੀ’’ਤਿ ਇਦਂ ਵਿਰੁਜ੍ਝਤੀਤਿ. ਇਦਞ੍ਚ ਨ ਵਿਰੁਜ੍ਝਤਿ. ਕਸ੍ਮਾ? ਵਚਨਤ੍ਥਨਾਨਤ੍ਤਤੋ, ‘‘ਤਜ੍ਜਨੀਯਕਮ੍ਮਾਰਹਸ੍ਸਾ’’ਤਿ ਇਮਸ੍ਸ ਹਿ ਵਚਨਸ੍ਸ ਕਮ੍ਮਸਨ੍ਨਿਟ੍ਠਾਨਂ ਅਤ੍ਥੋ. ‘‘ਤਿਣ੍ਣਂ, ਭਿਕ੍ਖਵੇ’’ਤਿਆਦਿਵਚਨਸ੍ਸ ਅਙ੍ਗਸਮ੍ਭਵੋ, ਤਸ੍ਮਾ ਯਦਾ ਸਙ੍ਘੇਨ ਸਨ੍ਨਿਪਤਿਤ੍ਵਾ ‘‘ਇਦਂ ਨਾਮ ਇਮਸ੍ਸ ਭਿਕ੍ਖੁਨੋ ਕਮ੍ਮਂ ਕਰੋਮਾ’’ਤਿ ਸਨ੍ਨਿਟ੍ਠਾਨਂ ਕਤਂ ਹੋਤਿ, ਤਦਾ ਕਮ੍ਮਾਰਹੋ ਨਾਮ ਹੋਤਿ. ਤਸ੍ਸ ਇਮਿਨਾ ਲਕ੍ਖਣੇਨ ਤਜ੍ਜਨੀਯਾਦਿਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਾਦਿਕਰਣਂ ਅਧਮ੍ਮਕਮ੍ਮਞ੍ਚੇਵ ਅਵਿਨਯਕਮ੍ਮਞ੍ਚਾਤਿ ਵੇਦਿਤਬ੍ਬਂ. ਯਸ੍ਸ ਪਨ ਭਣ੍ਡਨਕਾਰਕਾਦੀਸੁ ਅਙ੍ਗੇਸੁ ਅਞ੍ਞਤਰਂ ਅਙ੍ਗਂ ਅਤ੍ਥਿ, ਤਸ੍ਸ ਆਕਙ੍ਖਮਾਨੋ ਸਙ੍ਘੋ ਯਥਾਨੁਞ੍ਞਾਤੇਸੁ ਅਙ੍ਗੇਸੁ ਚ ਕਮ੍ਮੇਸੁ ਚ ਯੇਨ ਕੇਨਚਿ ਅਙ੍ਗੇਨ ਯਂਕਿਞ੍ਚਿ ਕਮ੍ਮਂ ਵਵਤ੍ਥਪੇਤ੍ਵਾ ਤਂ ਭਿਕ੍ਖੁਂ ਕਮ੍ਮਾਰਹਂ ਕਤ੍ਵਾ ਕਮ੍ਮਂ ਕਰੇਯ੍ਯ. ਅਯਮੇਤ੍ਥ ਵਿਨਿਚ੍ਛਯੋ. ਏਵਂ ਪੁਬ੍ਬੇਨਾਪਰਂ ਸਮੇਤਿ.

ਤਤ੍ਥ ਕਿਞ੍ਚਾਪਿ ਤਜ੍ਜਨੀਯਕਮ੍ਮੇ ਭਣ੍ਡਨਕਾਰਕਵਸੇਨ ਕਮ੍ਮਵਾਚਾ ਵੁਤ੍ਤਾ, ਅਥ ਖੋ ਬਾਲਸ੍ਸ ਅਬ੍ਯਤ੍ਤਸ੍ਸ ਆਪਤ੍ਤਿਬਹੁਲਸ੍ਸ ਤਜ੍ਜਨੀਯਕਮ੍ਮਂ ਕਰੋਨ੍ਤੇਨ ਬਾਲਅਬ੍ਯਤ੍ਤਵਸੇਨੇਵ ਕਮ੍ਮਵਾਚਾ ਕਾਤਬ੍ਬਾ. ਏਵਞ੍ਹਿ ਭੂਤੇਨ ਵਤ੍ਥੁਨਾ ਕਤਂ ਕਮ੍ਮਂ ਹੋਤਿ, ਨ ਚ ਅਞ੍ਞਸ੍ਸ ਕਮ੍ਮਸ੍ਸ ਵਤ੍ਥੁਨਾ. ਕਸ੍ਮਾ? ਯਸ੍ਮਾ ਇਦਮ੍ਪਿ ਅਨੁਞ੍ਞਾਤਨ੍ਤਿ. ਏਸ ਨਯੋ ਸਬ੍ਬਤ੍ਥ. ਅਟ੍ਠਾਰਸ ਸਮ੍ਮਾਵਤ੍ਤਨਵਤ੍ਥੂਨਿ ਪਾਰਿਵਾਸਿਕਕ੍ਖਨ੍ਧਕੇ ਵਣ੍ਣਯਿਸ੍ਸਾਮ.

ਅਧਮ੍ਮਕਮ੍ਮਦ੍ਵਾਦਸਕਕਥਾ ਨਿਟ੍ਠਿਤਾ.

ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਾਦਿਕਥਾ

੮. ਲੋਮਂ ਪਾਤੇਨ੍ਤੀਤਿ ਪਨ੍ਨਲੋਮਾ ਹੋਨ੍ਤਿ; ਭਿਕ੍ਖੂ ਅਨੁਵਤ੍ਤਨ੍ਤੀਤਿ ਅਤ੍ਥੋ. ਨੇਤ੍ਥਾਰਂ ਵਤ੍ਤਨ੍ਤੀਤਿ ਨਿਤ੍ਥਰਨ੍ਤਾਨਂ ਏਤਨ੍ਤਿ ਨੇਤ੍ਥਾਰਂ; ਯੇਨ ਸਕ੍ਕਾ ਨਿਸ੍ਸਾਰਣਾ ਨਿਤ੍ਥਰਿਤੁਂ, ਤਂ ਅਟ੍ਠਾਰਸਵਿਧਂ ਸਮ੍ਮਾਵਤ੍ਤਨਂ ਵਤ੍ਤਨ੍ਤੀਤਿ ਅਤ੍ਥੋ. ਕਿਤ੍ਤਕਂ ਕਾਲਂ ਵਤ੍ਤਂ ਪੂਰੇਤਬ੍ਬਨ੍ਤਿ? ਦਸ ਵਾ ਪਞ੍ਚ ਵਾ ਦਿਵਸਾਨਿ. ਇਮਸ੍ਮਿਞ੍ਹਿ ਕਮ੍ਮਕ੍ਖਨ੍ਧਕੇ ਏਤ੍ਤਕੇਨ ਵਤ੍ਤਂ ਪੂਰਿਤਮੇਵ ਹੋਤਿ.

ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਾਦਿਕਥਾ ਨਿਟ੍ਠਿਤਾ.

ਨਿਯਸ੍ਸਕਮ੍ਮਕਥਾ

੧੧. ਸੇਯ੍ਯਸਕਵਤ੍ਥੁਸ੍ਮਿਂ – ਅਪਿਸ੍ਸੁ ਭਿਕ੍ਖੂ ਪਕਤਾਤਿ ਅਪਿਸ੍ਸੁ ਭਿਕ੍ਖੂ ਨਿਚ੍ਚਂ ਬ੍ਯਾਵਟਾ ਹੋਨ੍ਤਿ. ਸੇਸਂ ਤਜ੍ਜਨੀਯੇ ਵੁਤ੍ਤਸਦਿਸਮੇਵ.

ਨਿਯਸ੍ਸਕਮ੍ਮਕਥਾ ਨਿਟ੍ਠਿਤਾ.

ਪਬ੍ਬਾਜਨੀਯਕਮ੍ਮਕਥਾ

੨੧. ਅਸ੍ਸਜਿਪੁਨਬ੍ਬਸੁਕਵਤ੍ਥੁ ਸਙ੍ਘਾਦਿਸੇਸਵਣ੍ਣਨਾਯਂ ਵੁਤ੍ਤਂ.

੨੭. ਕਾਯਿਕੇਨ ਦਵੇਨਾਤਿਆਦੀਸੁ ਪਨੇਤ੍ਥ ਕਾਯਿਕੋ ਦਵੋ ਨਾਮ ਕਾਯਕੀਲ਼ਾ ਵੁਚ੍ਚਤਿ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਕਾਯਿਕੋ ਅਨਾਚਾਰੋ ਨਾਮ ਕਾਯਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਵੀਤਿਕ੍ਕਮੋ ਵੁਚ੍ਚਤਿ. ਸੇਸਦ੍ਵਯੇਪਿ ਏਸੇਵ ਨਯੋ. ਕਾਯਿਕਂ ਉਪਘਾਤਿਕਂ ਨਾਮ ਕਾਯਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਸ੍ਸ ਅਸਿਕ੍ਖਨਭਾਵੇਨ ਉਪਹਨਨਂ ਵੁਚ੍ਚਤਿ; ਨਾਸਨਂ ਵਿਨਾਸਨਨ੍ਤਿ ਅਤ੍ਥੋ. ਸੇਸਦ੍ਵਯੇਪਿ ਏਸੇਵ ਨਯੋ. ਕਾਯਿਕੋ ਮਿਚ੍ਛਾਜੀਵੋ ਨਾਮ ਪਟਿਕ੍ਖਿਤ੍ਤਵੇਜ੍ਜਕਮ੍ਮਾਦਿਵਸੇਨ ਤੇਲਪਚਨਅਰਿਟ੍ਠਪਚਨਾਦੀਨਿ. ਵਾਚਸਿਕੋ ਮਿਚ੍ਛਾਜੀਵੋ ਨਾਮ ਗਿਹੀਨਂ ਸਾਸਨਸਮ੍ਪਟਿਚ੍ਛਨਾਰੋਚਨਾਦੀਨਿ. ਕਾਯਿਕਵਾਚਸਿਕੋ ਨਾਮ ਤਦੁਭਯਂ. ਸੇਸਂ ਤਜ੍ਜਨੀਯੇ ਵੁਤ੍ਤਨਯਮੇਵ.

ਪਬ੍ਬਾਜਨੀਯਕਮ੍ਮਕਥਾ ਨਿਟ੍ਠਿਤਾ.

ਪਟਿਸਾਰਣੀਯਕਮ੍ਮਕਥਾ

੩੩. ਸੁਧਮ੍ਮਵਤ੍ਥੁਸ੍ਮਿਂ ਪਨ – ਅਨਪਲੋਕੇਤ੍ਵਾਤਿ ਨ ਆਪੁਚ੍ਛਿਤ੍ਵਾ. ਏਤਦਵੋਚਾਤਿ ਕਿਂ ਤੇ ਗਹਪਤਿ ਥੇਰਾਨਂ ਪਟਿਯਤ੍ਤਨ੍ਤਿ ਸਬ੍ਬਂ ਵਿਵਰਾਪੇਤ੍ਵਾ ਦਿਸ੍ਵਾ ਏਤਂ ਅਵੋਚ. ਏਕਾ ਚ ਖੋ ਇਧ ਨਤ੍ਥਿ ਯਦਿਦਂ ਤਿਲਸਂਗੁਲ਼ਿਕਾਤਿ ਯਾ ਅਯਂ ਤਿਲਸਕ੍ਖਲਿਕਾ ਨਾਮ ਵੁਚ੍ਚਤਿ, ਸਾ ਨਤ੍ਥੀਤਿ ਅਤ੍ਥੋ. ਤਸ੍ਸ ਕਿਰ ਗਹਪਤਿਨੋ ਵਂਸੇ ਆਦਿਮ੍ਹਿ ਏਕੋ ਪੂਵਿਯੋ ਅਹੋਸਿ. ਤੇਨ ਨਂ ਥੇਰੋ ਜਾਤਿਯਾ ਖੁਂਸੇਤੁਕਾਮੋ ਏਵਮਾਹ. ਯਦੇਵ ਕਿਞ੍ਚੀਤਿ ਏਵਂ ਬਹੁਂ ਬੁਦ੍ਧਵਚਨਂ ਰਤਨਂ ਪਹਾਯ ਕਿਞ੍ਚਿਦੇਵ ਤਿਲਸਂਗੁਲ਼ਿਕਾਵਚਨਂ ਭਾਸਿਤਂ. ਕੁਕ੍ਕੁਟਪੋਤਕਉਦਾਹਰਣੇਨ ਇਦਂ ਦਸ੍ਸੇਤਿ ‘‘ਯਥਾ ਸੋ ਨੇਵ ਕਾਕਵਸ੍ਸਿਤਂ ਨ ਕੁਕ੍ਕੁਟਵਸ੍ਸਿਤਂ ਅਕਾਸਿ, ਏਵਂ ਤਯਾਪਿ ਨੇਵ ਭਿਕ੍ਖੁਵਚਨਂ ਨ ਗਿਹਿਵਚਨਂ ਵੁਤ੍ਤ’’ਨ੍ਤਿ.

ਪਟਿਸਾਰਣੀਯਕਮ੍ਮਕਥਾ ਨਿਟ੍ਠਿਤਾ.

ਅਧਮ੍ਮਕਮ੍ਮਾਦਿਦ੍ਵਾਦਸਕਕਥਾ

੩੭. ਅਸਮ੍ਮੁਖਾ ਕਤਨ੍ਤਿਆਦਯੋ ਤਿਕਾ ਵੁਤ੍ਤਪ੍ਪਕਾਰਾ ਏਵ.

੩੯. ਅਙ੍ਗਸਮਨ੍ਨਾਗਮੋ ਪੁਰਿਮੇਹਿ ਅਸਦਿਸੋ. ਤਤ੍ਥ ਯਥਾ ਲਾਭਂ ਨ ਲਭਨ੍ਤਿ; ਏਵਂ ਪਰਿਸਕ੍ਕਨ੍ਤੋ ਪਰਕ੍ਕਮਨ੍ਤੋ ਅਲਾਭਾਯ ਪਰਿਸਕ੍ਕਤਿ ਨਾਮ. ਏਸ ਨਯੋ ਅਨਤ੍ਥਾਦੀਸੁ. ਤਤ੍ਥ ਅਨਤ੍ਥੋਤਿ ਅਤ੍ਥਭਙ੍ਗੋ. ਅਨਾਵਾਸੋਤਿ ਤਸ੍ਮਿਂ ਠਾਨੇ ਅਵਸਨਂ. ਗਿਹੀਨਂ ਬੁਦ੍ਧਸ੍ਸ ਅਵਣ੍ਣਨ੍ਤਿ ਗਿਹੀਨਂ ਸਨ੍ਤਿਕੇ ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ. ਧਮ੍ਮਿਕਂ ਪਟਿਸ੍ਸਵਂ ਨ ਸਚ੍ਚਾਪੇਤੀਤਿ ਯਥਾ ਸਚ੍ਚੋ ਹੋਤਿ, ਏਵਂ ਨ ਕਰੋਤਿ; ਵਸ੍ਸਾਵਾਸਂ ਪਟਿਸ੍ਸੁਣਿਤ੍ਵਾ ਨ ਗਚ੍ਛਤਿ, ਅਞ੍ਞਂ ਵਾ ਏਵਰੂਪਂ ਕਰੋਤਿ. ਪਞ੍ਚਨ੍ਨਂ ਭਿਕ੍ਖਵੇਤਿਆਦਿ ਏਕਙ੍ਗੇਨਪਿ ਕਮ੍ਮਾਰਹਭਾਵਦਸ੍ਸਨਤ੍ਥਂ ਵੁਤ੍ਤਂ. ਸੇਸਮੇਤ੍ਥ ਉਤ੍ਤਾਨਤ੍ਥਞ੍ਚੇਵ, ਤਜ੍ਜਨੀਯੇ ਚ ਵੁਤ੍ਤਨਯਮੇਵ.

ਅਧਮ੍ਮਕਮ੍ਮਾਦਿਦ੍ਵਾਦਸਕਕਥਾ ਨਿਟ੍ਠਿਤਾ.

ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਥਾ

੪੬. ਛਨ੍ਨਵਤ੍ਥੁਸ੍ਮਿਂ – ਆਵਾਸਪਰਮ੍ਪਰਞ੍ਚ ਭਿਕ੍ਖਵੇ ਸਂਸਥਾਤਿ ਸਬ੍ਬਾਵਾਸੇਸੁ ਆਰੋਚੇਥ.

੫੦. ਭਣ੍ਡਨਕਾਰਕੋਤਿਆਦੀਸੁ ਭਣ੍ਡਨਾਦਿਪਚ੍ਚਯਾ ਆਪਨ੍ਨਂ ਆਪਤ੍ਤਿਂ ਰੋਪੇਤ੍ਵਾ ਤਸ੍ਸਾ ਅਦਸ੍ਸਨੇਯੇਵ ਕਮ੍ਮਂ ਕਾਤਬ੍ਬਂ. ਤਿਕਾ ਵੁਤ੍ਤਪ੍ਪਕਾਰਾ ਏਵ.

੫੧. ਸਮ੍ਮਾਵਤ੍ਤਨਾਯਂ ਪਨੇਤ੍ਥ ਤੇਚਤ੍ਤਾਲੀਸ ਵਤ੍ਤਾਨਿ. ਤਤ੍ਥ ਨ ਅਨੁਦ੍ਧਂਸੇਤਬ੍ਬੋਤਿ ਨ ਚੋਦੇਤਬ੍ਬੋ. ਨ ਭਿਕ੍ਖੁ ਭਿਕ੍ਖੂਹੀਤਿ ਅਞ੍ਞੋ ਭਿਕ੍ਖੁ ਅਞ੍ਞੇਹਿ ਭਿਕ੍ਖੂਹਿ ਨ ਭਿਨ੍ਦਿਤਬ੍ਬੋ. ਨ ਗਿਹਿਦ੍ਧਜੋਤਿ ਓਦਾਤਵਤ੍ਥਾਨਿ ਅਚ੍ਛਿਨ੍ਨਦਸਪੁਪ੍ਫਦਸਾਨਿ ਚ ਨ ਧਾਰੇਤਬ੍ਬਾਨਿ. ਨ ਤਿਤ੍ਥਿਯਦ੍ਧਜੋਤਿ ਕੁਸਚੀਰਾਦੀਨਿ ਨ ਧਾਰੇਤਬ੍ਬਾਨਿ. ਨ ਆਸਾਦੇਤਬ੍ਬੋਤਿ ਨ ਅਪਸਾਦੇਤਬ੍ਬੋ. ਅਨ੍ਤੋ ਵਾ ਬਹਿ ਵਾਤਿ ਵਿਹਾਰਸ੍ਸ ਅਨ੍ਤੋ ਵਾ ਬਹਿ ਵਾ. ਨ ਤਿਤ੍ਥਿਯਾਦਿਪਦਤ੍ਤਯਂ ਉਤ੍ਤਾਨਮੇਵ. ਸੇਸਂ ਸਬ੍ਬਂ ਪਾਰਿਵਾਸਿਕਕ੍ਖਨ੍ਧਕੇ ਵਣ੍ਣਯਿਸ੍ਸਾਮ. ਸੇਸਂ ਤਜ੍ਜਨੀਯੇ ਵੁਤ੍ਤਨਯਮੇਵ. ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਇਮਿਨਾ ਸਦਿਸਮੇਵ.

੬੫. ਅਰਿਟ੍ਠਵਤ੍ਥੁ ਖੁਦ੍ਦਕਵਣ੍ਣਨਾਯਂ ਵੁਤ੍ਤਂ. ‘‘ਭਣ੍ਡਨਕਾਰਕੋ’’ਤਿਆਦੀਸੁ ਯਂ ਦਿਟ੍ਠਿਂ ਨਿਸ੍ਸਾਯ ਭਣ੍ਡਨਾਦੀਨਿ ਕਰੋਤਿ, ਤਸ੍ਸਾ ਅਪ੍ਪਟਿਨਿਸ੍ਸਗ੍ਗੇਯੇਵ ਕਮ੍ਮਂ ਕਾਤਬ੍ਬਂ. ਸੇਸਂ ਤਜ੍ਜਨੀਯੇ ਵੁਤ੍ਤਨਯਮੇਵ. ਸਮ੍ਮਾਵਤ੍ਤਨਾਯਮ੍ਪਿ ਹਿ ਇਧ ਤੇਚਤ੍ਤਾਲੀਸਂਯੇਵ ਵਤ੍ਤਾਨੀਤਿ.

ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਥਾ ਨਿਟ੍ਠਿਤਾ.

ਕਮ੍ਮਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

੨. ਪਾਰਿਵਾਸਿਕਕ੍ਖਨ੍ਧਕਂ

ਪਾਰਿਵਾਸਿਕਵਤ੍ਤਕਥਾ

੭੫. ਪਾਰਿਵਾਸਿਕਕ੍ਖਨ੍ਧਕੇ – ਪਾਰਿਵਾਸਿਕਾਤਿ ਪਰਿਵਾਸਂ ਪਰਿਵਸਨ੍ਤਾ. ਤਤ੍ਥ ਚਤੁਬ੍ਬਿਧੋ ਪਰਿਵਾਸੋ – ਅਪ੍ਪਟਿਚ੍ਛਨ੍ਨਪਰਿਵਾਸੋ, ਪਟਿਚ੍ਛਨ੍ਨਪਰਿਵਾਸੋ, ਸੁਦ੍ਧਨ੍ਤਪਰਿਵਾਸੋ, ਸਮੋਧਾਨਪਰਿਵਾਸੋਤਿ. ਤੇਸੁ ‘‘ਯੋ, ਭਿਕ੍ਖਵੇ, ਅਞ੍ਞੋਪਿ ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਤਿ ਪਬ੍ਬਜ੍ਜਂ, ਆਕਙ੍ਖਤਿ ਉਪਸਮ੍ਪਦਂ, ਤਸ੍ਸ ਚਤ੍ਤਾਰੋ ਮਾਸੇ ਪਰਿਵਾਸੋ ਦਾਤਬ੍ਬੋ’’ਤਿ (ਮਹਾਵ. ੮੬) ਏਵਂ ਮਹਾਖਨ੍ਧਕੇ ਵੁਤ੍ਤੋ ਤਿਤ੍ਥਿਯਪਰਿਵਾਸੋ ਅਪ੍ਪਟਿਚ੍ਛਨ੍ਨਪਰਿਵਾਸੋ ਨਾਮ. ਤਤ੍ਥ ਯਂ ਵਤ੍ਤਬ੍ਬਂ ਤਂ ਵੁਤ੍ਤਮੇਵ. ਅਯਂ ਪਨ ਇਧ ਅਨਧਿਪ੍ਪੇਤੋ. ਸੇਸਾ ਤਯੋ ਯੇਨ ਸਙ੍ਘਾਦਿਸੇਸਾਪਤ੍ਤਿ ਆਪਨ੍ਨਾ ਚੇਵ ਹੋਤਿ ਪਟਿਚ੍ਛਾਦਿਤਾ ਚ, ਤਸ੍ਸ ਦਾਤਬ੍ਬਾ. ਤੇਸੁ ਯਂ ਵਤ੍ਤਬ੍ਬਂ ਤਂ ਸਮੁਚ੍ਚਯਕ੍ਖਨ੍ਧਕੇ ਵਕ੍ਖਾਮ. ਏਤੇ ਪਨ ਇਧ ਅਧਿਪ੍ਪੇਤਾ. ਤਸ੍ਮਾ ਏਤੇਸੁ ਯਂਕਿਞ੍ਚਿ ਪਰਿਵਾਸਂ ਪਰਿਵਸਨ੍ਤਾ ‘‘ਪਾਰਿਵਾਸਿਕਾ’’ਤਿ ਵੇਦਿਤਬ੍ਬਾ.

ਪਕਤਤ੍ਤਾਨਂ ਭਿਕ੍ਖੂਨਨ੍ਤਿ ਠਪੇਤ੍ਵਾ ਨਵਕਤਰਂ ਪਾਰਿਵਾਸਿਕਂ ਅਵਸੇਸਾਨਂ ਅਨ੍ਤਮਸੋ ਮੂਲਾਯਪਟਿਕਸ੍ਸਨਾਰਹਾਦੀਨਮ੍ਪਿ. ਅਭਿਵਾਦਨਪਚ੍ਚੁਟ੍ਠਾਨਨ੍ਤਿ ਯਂ ਤੇ ਅਭਿਵਾਦਨਾਦਿਂ ਕਰੋਨ੍ਤਿ, ਤਂ ਸਾਦਿਯਨ੍ਤਿ, ਸਮ੍ਪਟਿਚ੍ਛਨ੍ਤਿ; ਨ ਪਟਿਕ੍ਖਿਪਨ੍ਤੀਤਿ ਅਤ੍ਥੋ. ਤਤ੍ਥ ਸਾਮੀਚਿਕਮ੍ਮਨ੍ਤਿ ਠਪੇਤ੍ਵਾ ਅਭਿਵਾਦਨਾਦੀਨਿ ਅਞ੍ਞਸ੍ਸ ਅਨੁਚ੍ਛਵਿਕਸ੍ਸ ਬੀਜਨਵਾਤਦਾਨਾਦਿਨੋ ਆਭਿਸਮਾਚਾਰਿਕਸ੍ਸੇਤਂ ਅਧਿਵਚਨਂ. ਆਸਨਾਭਿਹਾਰਨ੍ਤਿ ਆਸਨਸ੍ਸ ਅਭਿਹਰਣਂ, ਆਸਨਂ ਗਹੇਤ੍ਵਾ ਅਭਿਗਮਨਂ ਪਞ੍ਞਾਪਨਮੇਵ ਵਾ. ਸੇਯ੍ਯਾਭਿਹਾਰੇਪਿ ਏਸੇਵ ਨਯੋ. ਪਾਦੋਦਕਨ੍ਤਿ ਪਾਦਧੋਵਨਉਦਕਂ. ਪਾਦਪੀਠਨ੍ਤਿ ਧੋਤਪਾਦਟ੍ਠਪਨਕਂ. ਪਾਦਕਥਲਿਕਨ੍ਤਿ ਅਧੋਤਪਾਦਟ੍ਠਪਨਕਂ ਪਾਦਘਂਸਨਂ ਵਾ. ਆਪਤ੍ਤਿ ਦੁਕ੍ਕਟਸ੍ਸਾਤਿ ਸਦ੍ਧਿਵਿਹਾਰਿਕਾਨਮ੍ਪਿ ਸਾਦਿਯਨ੍ਤਸ੍ਸ ਦੁਕ੍ਕਟਮੇਵ, ਤਸ੍ਮਾ ਤੇ ਵਤ੍ਤਬ੍ਬਾ – ‘‘ਅਹਂ ਵਿਨਯਕਮ੍ਮਂ ਕਰੋਮਿ, ਮਯ੍ਹਂ ਵਤ੍ਤਂ ਮਾ ਕਰੋਥ, ਮਾ ਮਂ ਗਾਮਪ੍ਪਵੇਸਨਂ ਆਪੁਚ੍ਛਥਾ’’ਤਿ. ਸਚੇ ਸਦ੍ਧਾਪਬ੍ਬਜਿਤਾ ਕੁਲਪੁਤ੍ਤਾ ‘‘ਤੁਮ੍ਹੇ, ਭਨ੍ਤੇ, ਤੁਮ੍ਹਾਕਂ ਵਿਨਯਕਮ੍ਮਂ ਕਰੋਥਾ’’ਤਿ ਵਤ੍ਵਾ ਵਤ੍ਤਂ ਕਰੋਨ੍ਤਿ, ਗਾਮਪ੍ਪਵੇਸਨਮ੍ਪਿ ਆਪੁਚ੍ਛਨ੍ਤਿਯੇਵ, ਵਾਰਿਤਕਾਲਤੋ ਪਟ੍ਠਾਯ ਅਨਾਪਤ੍ਤਿ. ਮਿਥੁ ਯਥਾਵੁਡ੍ਢਨ੍ਤਿ ਪਾਰਿਵਾਸਿਕਭਿਕ੍ਖੂਨਂ ਅਞ੍ਞਮਞ੍ਞਂ ਯੋ ਯੋ ਵੁਡ੍ਢੋ ਤੇਨ ਤੇਨ ਨਵਕਤਰਸ੍ਸ ਸਾਦਿਤੁਂ.

ਪਞ੍ਚ ਯਥਾਵੁਡ੍ਢਨ੍ਤਿ ਪਕਤਤ੍ਤੇਹਿਪਿ ਸਦ੍ਧਿਂ ਵੁਡ੍ਢਪਟਿਪਾਟਿਯਾ ਏਵ. ਤਸ੍ਮਾ ਪਾਤਿਮੋਕ੍ਖੇ ਉਦ੍ਦਿਸ੍ਸਮਾਨੇ ਹਤ੍ਥਪਾਸੇ ਨਿਸੀਦਿਤੁਂ ਵਟ੍ਟਤਿ. ਮਹਾਪਚ੍ਚਰਿਯਂ ਪਨ ‘‘ਪਾਲ਼ਿਯਾ ਅਨਿਸੀਦਿਤ੍ਵਾ ਪਾਲ਼ਿਂ ਵਿਹਾਯ ਹਤ੍ਥਪਾਸਂ ਅਮੁਞ੍ਚਨ੍ਤੇਨ ਨਿਸੀਦਿਤਬ੍ਬ’’ਨ੍ਤਿ ਵੁਤ੍ਤਂ. ਪਾਰਿਸੁਦ੍ਧਿਉਪੋਸਥੇ ਕਰੀਯਮਾਨੇ ਸਙ੍ਘਨਵਕਟ੍ਠਾਨੇ ਨਿਸੀਦਿਤ੍ਵਾ ਤਤ੍ਥੇਵ ਨਿਸਿਨ੍ਨੇਨ ਅਤ੍ਤਨੋ ਪਾਲ਼ਿਯਾ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋ. ਪਵਾਰਣਾਯਪਿ ਸਙ੍ਘਨਵਕਟ੍ਠਾਨੇ ਨਿਸੀਦਿਤ੍ਵਾ ਤਤ੍ਥੇਵ ਨਿਸਿਨ੍ਨੇਨ ਅਤ੍ਤਨੋ ਪਾਲ਼ਿਯਾ ਪਵਾਰੇਤਬ੍ਬਂ. ਸਙ੍ਘੇਨ ਘਣ੍ਟਿਂ ਪਹਰਿਤ੍ਵਾ ਭਾਜੀਯਮਾਨਂ ਵਸ੍ਸਿਕਸਾਟਿਕਮ੍ਪਿ ਅਤ੍ਤਨੋ ਪਤ੍ਤਟ੍ਠਾਨੇ ਗਹੇਤੁਂ ਵਟ੍ਟਤਿ.

ਓਣੋਜਨਨ੍ਤਿ ਵਿਸ੍ਸਜ੍ਜਨਂ ਵੁਚ੍ਚਤਿ. ਸਚੇ ਹਿ ਪਾਰਿਵਾਸਿਕਸ੍ਸ ਦ੍ਵੇ ਤੀਣਿ ਉਦ੍ਦੇਸਭਤ੍ਤਾਦੀਨਿ ਪਾਪੁਣਨ੍ਤਿ, ਅਞ੍ਞਾ ਚਸ੍ਸ ਪੁਗ੍ਗਲਿਕਭਤ੍ਤਪਚ੍ਚਾਸਾ ਹੋਤਿ, ਤਾਨਿ ਪਟਿਪਾਟਿਯਾ ਗਹੇਤ੍ਵਾ ‘‘ਭਨ੍ਤੇ, ਹੇਟ੍ਠਾ ਗਾਹੇਥ, ਅਜ੍ਜ ਮਯ੍ਹਂ ਭਤ੍ਤਪਚ੍ਚਾਸਾ ਅਤ੍ਥਿ, ਸ੍ਵੇ ਗਣ੍ਹਿਸ੍ਸਾਮੀ’’ਤਿ ਵਤ੍ਵਾ ਵਿਸ੍ਸਜ੍ਜੇਤਬ੍ਬਾਨਿ. ਏਵਂ ਤਾਨਿ ਪੁਨਦਿਵਸੇਸੁ ਗਣ੍ਹਿਤੁਂ ਲਭਤਿ. ਪੁਨਦਿਵਸੇ ਸਬ੍ਬਪਠਮਂ ਏਤਸ੍ਸ ਦਾਤਬ੍ਬਨ੍ਤਿ ਕੁਰੁਨ੍ਦਿਯਂ ਵੁਤ੍ਤਂ. ਯਦਿ ਪਨ ਨ ਗਣ੍ਹਾਤਿ ਨ ਵਿਸ੍ਸਜ੍ਜੇਤਿ, ਪੁਨਦਿਵਸੇ ਨ ਲਭਤਿ, ਇਦਂ ਓਣੋਜਨਂ ਨਾਮ ਪਾਰਿਵਾਸਿਕਸ੍ਸੇਵ ਓਦਿਸ੍ਸ ਅਨੁਞ੍ਞਾਤਂ. ਕਸ੍ਮਾ? ਤਸ੍ਸ ਹਿ ਸਙ੍ਘਨਵਕਟ੍ਠਾਨੇ ਨਿਸਿਨ੍ਨਸ੍ਸ ਭਤ੍ਤਗ੍ਗੇ ਯਾਗੁਖਜ੍ਜਕਾਦੀਨਿ ਪਾਪੁਣਨ੍ਤਿ ਵਾ ਨ ਵਾ, ਤਸ੍ਮਾ ਸੋ ‘‘ਭਿਕ੍ਖਾਹਾਰੇਨ ਮਾ ਕਿਲਮਿਤ੍ਥਾ’’ਤਿ ਇਦਮਸ੍ਸ ਸਙ੍ਗਹਕਰਣਤ੍ਥਾਯ ਓਦਿਸ੍ਸ ਅਨੁਞ੍ਞਾਤਂ.

ਭਤ੍ਤਨ੍ਤਿ ਆਗਤਾਗਤੇਹਿ ਵੁਡ੍ਢਪਟਿਪਾਟਿਯਾ ਗਹੇਤ੍ਵਾ ਗਨ੍ਤਬ੍ਬਂ ਵਿਹਾਰੇ ਸਙ੍ਘਸ੍ਸ ਚਤੁਸ੍ਸਾਲਭਤ੍ਤਂ, ਏਤਂ ਯਥਾਵੁਡ੍ਢਂ ਲਭਤਿ. ਪਾਲ਼ਿਯਾ ਪਨ ਗਨ੍ਤੁਂ ਵਾ ਠਾਤੁਂ ਵਾ ਨ ਲਭਤਿ, ਤਸ੍ਮਾ ਪਾਲ਼ਿਤੋ ਓਸਕ੍ਕਿਤ੍ਵਾ ਹਤ੍ਥਪਾਸੇ ਠਿਤੇਨ ਹਤ੍ਥਂ ਪਸਾਰੇਤ੍ਵਾ ਯਥਾ ਸੇਨੋ ਨਿਪਤਿਤ੍ਵਾ ਗਣ੍ਹਾਤਿ, ਏਵਂ ਗਣ੍ਹਿਤਬ੍ਬਂ. ਆਰਾਮਿਕਸਮਣੁਦ੍ਦੇਸੇਹਿ ਆਹਰਾਪੇਤੁਂ ਨ ਲਭਤਿ. ਸਚੇ ਸਯਮੇਵ ਆਹਰਨ੍ਤਿ, ਵਟ੍ਟਤਿ. ਰਞ੍ਞੋ ਮਹਾਪੇਲ਼ਭਤ੍ਤੇਪਿ ਏਸੇਵ ਨਯੋ. ਚਤੁਸ੍ਸਾਲਭਤ੍ਤੇ ਪਨ ਸਚੇ ਓਣੋਜਨਂ ਕਤ੍ਤੁਕਾਮੋ ਹੋਤਿ, ਅਤ੍ਤਨੋ ਅਤ੍ਥਾਯ ਉਕ੍ਖਿਤ੍ਤੇ ਪਿਣ੍ਡੇ ‘‘ਅਜ੍ਜ ਮੇ ਭਤ੍ਤਂ ਅਤ੍ਥਿ, ਸ੍ਵੇ ਗਣ੍ਹਿਸ੍ਸਾਮੀ’’ਤਿ ਵਤ੍ਤਬ੍ਬਂ. ਪੁਨਦਿਵਸੇ ਦ੍ਵੇ ਪਿਣ੍ਡੇ ਲਭਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਉਦ੍ਦੇਸਭਤ੍ਤਾਦੀਨਿਪਿ ਪਾਲ਼ਿਤੋ ਓਸਕ੍ਕਿਤ੍ਵਾਵ ਗਹੇਤਬ੍ਬਾਨਿ. ਯਤ੍ਥ ਪਨ ਨਿਸੀਦਾਪੇਤ੍ਵਾ ਪਰਿਵਿਸਨ੍ਤਿ, ਤਤ੍ਥ ਸਾਮਣੇਰਾਨਂ ਜੇਟ੍ਠਕੇਨ ਭਿਕ੍ਖੂਨਂ ਸਙ੍ਘਨਵਕੇਨ ਹੁਤ੍ਵਾ ਨਿਸੀਦਿਤਬ੍ਬਂ.

੭੬. ਇਦਾਨਿ ਯਾ ਅਯਂ ਸਮ੍ਮਾਵਤ੍ਤਨਾ ਵੁਤ੍ਤਾ, ਤਤ੍ਥ ਨ ਉਪਸਮ੍ਪਾਦੇਤਬ੍ਬਨ੍ਤਿ ਉਪਜ੍ਝਾਯੇਨ ਹੁਤ੍ਵਾ ਨ ਉਪਸਮ੍ਪਾਦੇਤਬ੍ਬਂ; ਵਤ੍ਤਂ ਨਿਕ੍ਖਿਪਿਤ੍ਵਾ ਪਨ ਉਪਸਮ੍ਪਾਦੇਤੁਂ ਵਟ੍ਟਤਿ. ਆਚਰਿਯੇਨ ਹੁਤ੍ਵਾਪਿ ਕਮ੍ਮਵਾਚਾ ਨ ਸਾਵੇਤਬ੍ਬਾ, ਅਞ੍ਞਸ੍ਮਿਂ ਅਸਤਿ ਵਤ੍ਤਂ ਨਿਕ੍ਖਿਪਿਤ੍ਵਾ ਸਾਵੇਤੁਂ ਵਟ੍ਟਤਿ. ਨ ਨਿਸ੍ਸਯੋਤਿ ਆਗਨ੍ਤੁਕਾਨਂ ਨਿਸ੍ਸਯੋ ਨ ਦਾਤਬ੍ਬੋ. ਯੇਹਿਪਿ ਪਕਤਿਯਾਵ ਨਿਸ੍ਸਯੋ ਗਹਿਤੋ, ਤੇ ਵਤ੍ਤਬ੍ਬਾ – ‘‘ਅਹਂ ਵਿਨਯਕਮ੍ਮਂ ਕਰੋਮਿ, ਅਸੁਕਤ੍ਥੇਰਸ੍ਸ ਨਾਮ ਸਨ੍ਤਿਕੇ ਨਿਸ੍ਸਯਂ ਗਣ੍ਹਥ, ਮਯ੍ਹਂ ਵਤ੍ਤਂ ਮਾ ਕਰੋਥ, ਮਾ ਮਂ ਗਾਮਪ੍ਪਵੇਸਨਂ ਆਪੁਚ੍ਛਥਾ’’ਤਿ. ਸਚੇ ਏਵਂ ਵੁਤ੍ਤੇਪਿ ਕਰੋਨ੍ਤਿਯੇਵ, ਵਾਰਿਤਕਾਲਤੋ ਪਟ੍ਠਾਯ ਕਰੋਨ੍ਤੇਸੁਪਿ ਅਨਾਪਤ੍ਤਿ.

ਨ ਸਾਮਣੇਰੋਤਿ ਅਞ੍ਞੋ ਸਾਮਣੇਰੋ ਨ ਗਹੇਤਬ੍ਬੋ. ਉਪਜ੍ਝਂ ਦਤ੍ਵਾ ਗਹਿਤਸਾਮਣੇਰਾਪਿ ਵਤ੍ਤਬ੍ਬਾ – ‘‘ਅਹਂ ਵਿਨਯਕਮ੍ਮਂ ਕਰੋਮਿ, ਮਯ੍ਹਂ ਵਤ੍ਤਂ ਮਾ ਕਰੋਥ, ਮਾ ਮਂ ਗਾਮਪ੍ਪਵੇਸਨਂ ਆਪੁਚ੍ਛਥਾ’’ਤਿ. ਸਚੇ ਏਵਂ ਵੁਤ੍ਤੇਪਿ ਕਰੋਨ੍ਤਿਯੇਵ, ਵਾਰਿਤਕਾਲਤੋ ਪਟ੍ਠਾਯ ਕਰੋਨ੍ਤੇਸੁਪਿ ਅਨਾਪਤ੍ਤਿ. ਭਿਕ੍ਖੁਨੋਵਾਦਕਸਮ੍ਮੁਤਿ ਨਾਮ ਆਧਿਪਚ੍ਚਟ੍ਠਾਨਭੂਤਾਤਿ ਪਟਿਕ੍ਖਿਤ੍ਤਾ, ਤਸ੍ਮਾ ਭਿਕ੍ਖੁਸਙ੍ਘਸ੍ਸ ਵਤ੍ਤਬ੍ਬਂ – ‘‘ਭਨ੍ਤੇ, ਅਹਂ ਵਿਨਯਕਮ੍ਮਂ ਕਰੋਮਿ, ਭਿਕ੍ਖੁਨੋਵਾਦਕਂ ਜਾਨਾਥਾ’’ਤਿ, ਪਟਿਬਲਸ੍ਸ ਵਾ ਭਿਕ੍ਖੁਸ੍ਸ ਭਾਰੋ ਕਾਤਬ੍ਬੋ. ਆਗਤਾ ਭਿਕ੍ਖੁਨਿਯੋ ‘‘ਸਙ੍ਘਸਨ੍ਤਿਕਂ ਗਚ੍ਛਥ, ਸਙ੍ਘੋ ਵੋ ਓਵਾਦਦਾਯਕਂ ਜਾਨਿਸ੍ਸਤੀ’’ਤਿ ਵਾ ‘‘ਅਹਂ ਵਿਨਯਕਮ੍ਮਂ ਕਰੋਮਿ, ਅਸੁਕਭਿਕ੍ਖੁਸ੍ਸ ਨਾਮ ਸਨ੍ਤਿਕਂ ਗਚ੍ਛਥ, ਸੋ ਵੋ ਓਵਾਦਂ ਦਸ੍ਸਤੀ’’ਤਿ ਵਾ ਵਤ੍ਤਬ੍ਬਾ.

ਸਾ ਆਪਤ੍ਤੀਤਿ ਸੁਕ੍ਕਵਿਸ੍ਸਟ੍ਠਿਯਾ ਪਰਿਵਾਸੇ ਦਿਨ੍ਨੇ ਸੁਕ੍ਕਵਿਸ੍ਸਟ੍ਠਿ ਨਾਪਜ੍ਜਿਤਬ੍ਬਾ. ਅਞ੍ਞਾ ਵਾ ਤਾਦਿਸਿਕਾਤਿ ਕਾਯਸਂਸਗ੍ਗਾਦਿਗਰੁਕਾਪਤ੍ਤਿ. ਤਤੋ ਵਾ ਪਾਪਿਟ੍ਠਤਰਾਤਿ ਪਾਰਾਜਿਕਾਪਤ੍ਤਿ; ਸਤ੍ਤਸੁ ਹਿ ਆਪਤ੍ਤੀਸੁ ਦੁਬ੍ਭਾਸਿਤਾਪਤ੍ਤਿ ਪਾਪਿਟ੍ਠਾ; ਦੁਕ੍ਕਟਾਪਤ੍ਤਿ ਪਾਪਿਟ੍ਠਤਰਾ; ਦੁਕ੍ਕਟਾਪਤ੍ਤਿ ਪਾਪਿਟ੍ਠਾ, ਪਾਟਿਦੇਸਨੀਯਾਪਤ੍ਤਿ ਪਾਪਿਟ੍ਠਤਰਾਤਿ ਏਵਂ ਪਾਚਿਤ੍ਤਿਯਥੁਲ੍ਲਚ੍ਚਯਸਙ੍ਘਾਦਿਸੇਸਪਾਰਾਜਿਕਾਪਤ੍ਤੀਸੁ ਨਯੋ ਨੇਤਬ੍ਬੋ. ਤਾਸਂ ਵਤ੍ਥੂਸੁਪਿ ਦੁਬ੍ਭਾਸਿਤਵਤ੍ਥੁ ਪਾਪਿਟ੍ਠਂ, ਦੁਕ੍ਕਟਵਤ੍ਥੁ ਪਾਪਿਟ੍ਠਤਰਨ੍ਤਿ ਪੁਰਿਮਨਯੇਨੇਵ ਭੇਦੋ ਵੇਦਿਤਬ੍ਬੋ. ਪਣ੍ਣਤ੍ਤਿਵਜ੍ਜਸਿਕ੍ਖਾਪਦੇ ਪਨ ਵਤ੍ਥੁਪਿ ਆਪਤ੍ਤਿਪਿ ਪਾਪਿਟ੍ਠਾ. ਲੋਕਵਜ੍ਜੇ ਉਭਯਮ੍ਪਿ ਪਾਪਿਟ੍ਠਤਰਂ.

ਕਮ੍ਮਨ੍ਤਿ ਪਰਿਵਾਸਕਮ੍ਮਵਾਚਾ ਵੁਚ੍ਚਤਿ. ਤਂ ਕਮ੍ਮਂ ‘‘ਅਕਤਂ ਦੁਕ੍ਕਟ’’ਨ੍ਤਿਆਦੀਹਿ ਵਾ ‘‘ਕਿਂ ਇਦਂ ਕਮ੍ਮਂ ਨਾਮ ਕਸਿਕਮ੍ਮਂ ਗੋਰਕ੍ਖਕਮ੍ਮ’’ਨ੍ਤਿਆਦੀਹਿ ਵਾ ਵਚਨੇਹਿ ਨ ਗਰਹਿਤਬ੍ਬਂ. ਕਮ੍ਮਿਕਾਤਿ ਯੇਹਿ ਭਿਕ੍ਖੂਹਿ ਕਮ੍ਮਂ ਕਤਂ, ਤੇ ਵੁਚ੍ਚਨ੍ਤਿ, ਤੇ ‘‘ਬਾਲਾ ਅਬ੍ਯਤ੍ਤਾ’’ਤਿਆਦੀਹਿ ਵਚਨੇਹਿ ਨ ਗਰਹਿਤਬ੍ਬਾ. ਨ ਸਵਚਨੀਯਂ ਕਾਤਬ੍ਬਨ੍ਤਿ ਪਲਿਬੋਧਤ੍ਥਾਯ ਵਾ ਪਕ੍ਕੋਸਨਤ੍ਥਾਯ ਵਾ ਸਵਚਨੀਯਂ ਨ ਕਾਤਬ੍ਬਂ, ਪਲਿਬੋਧਤ੍ਥਾਯ ਹਿ ਕਰੋਨ੍ਤੋ ‘‘ਅਹਂ ਆਯਸ੍ਮਨ੍ਤਂ ਇਮਸ੍ਮਿਂ ਵਤ੍ਥੁਸ੍ਮਿਂ ਸਵਚਨੀਯਂ ਕਰੋਮਿ, ਇਮਮ੍ਹਾ ਆਵਾਸਾ ਏਕਪਦਮ੍ਪਿ ਮਾ ਪਕ੍ਕਾਮਿ, ਯਾਵ ਨ ਤਂ ਅਧਿਕਰਣਂ ਵੂਪਸਨ੍ਤਂ ਹੋਤੀ’’ਤਿ ਏਵਂ ਕਰੋਤਿ. ਪਕ੍ਕੋਸਨਤ੍ਥਾਯ ਕਰੋਨ੍ਤੋ ‘‘ਅਹਂ ਤੇ ਸਵਚਨੀਯਂ ਕਰੋਮਿ, ਏਹਿ ਮਯਾ ਸਦ੍ਧਿਂ ਵਿਨਯਧਰਾਨਂ ਸਮ੍ਮੁਖੀਭਾਵਂ ਗਚ੍ਛਾਮਾ’’ਤਿ ਏਵਂ ਕਰੋਤਿ; ਤਦੁਭਯਮ੍ਪਿ ਨ ਕਾਤਬ੍ਬਂ.

ਨ ਅਨੁਵਾਦੋਤਿ ਵਿਹਾਰੇ ਜੇਟ੍ਠਕਟ੍ਠਾਨਂ ਨ ਕਾਤਬ੍ਬਂ. ਪਾਤਿਮੋਕ੍ਖੁਦ੍ਦੇਸਕੇਨ ਵਾ ਧਮ੍ਮਜ੍ਝੇਸਕੇਨ ਵਾ ਨ ਭਵਿਤਬ੍ਬਂ. ਨਾਪਿ ਤੇਰਸਸੁ ਸਮ੍ਮੁਤੀਸੁ ਏਕਸਮ੍ਮੁਤਿਵਸੇਨਾਪਿ ਇਸ੍ਸਰਿਯਕਮ੍ਮਂ ਕਾਤਬ੍ਬਂ. ਨ ਓਕਾਸੋਤਿ ‘‘ਕਰੋਤੁ ਮੇ ਆਯਸ੍ਮਾ ਓਕਾਸਂ, ਅਹਂ ਤਂ ਵਤ੍ਤੁਕਾਮੋ’’ਤਿ ਏਵਂ ਪਕਤਤ੍ਤਸ੍ਸ ਓਕਾਸੋ ਨ ਕਾਰੇਤਬ੍ਬੋ, ਵਤ੍ਥੁਨਾ ਵਾ ਆਪਤ੍ਤਿਯਾ ਵਾ ਨ ਚੋਦੇਤਬ੍ਬੋ, ‘‘ਅਯਂ ਪੁਬ੍ਬੇ ਤੇ ਦੋਸੋ’’ਤਿ ਨ ਸਾਰੇਤਬ੍ਬੋ. ਨ ਭਿਕ੍ਖੂਹਿ ਸਮ੍ਪਯੋਜੇਤਬ੍ਬਨ੍ਤਿ ਅਞ੍ਞਮਞ੍ਞਂ ਯੋਜੇਤ੍ਵਾ ਕਲਹੋ ਨ ਕਾਰੇਤਬ੍ਬੋ.

ਪੁਰਤੋਤਿ ਸਙ੍ਘਤ੍ਥੇਰੇਨ ਹੁਤ੍ਵਾ ਪੁਰਤੋ ਨ ਗਨ੍ਤਬ੍ਬਂ, ਦ੍ਵਾਦਸਹਤ੍ਥਂ ਉਪਚਾਰਂ ਮੁਞ੍ਚਿਤ੍ਵਾ ਏਕਕੇਨ ਗਨ੍ਤਬ੍ਬਂ. ਨਿਸੀਦਨੇਪਿ ਏਸੇਵ ਨਯੋ. ਆਸਨਪਰਿਯਨ੍ਤੋਤਿ ਭਤ੍ਤਗ੍ਗਾਦੀਸੁ ਸਙ੍ਘਨਵਕਾਸਨਂ ਵੁਚ੍ਚਤਿ; ਸ੍ਵਾਸ੍ਸ ਦਾਤਬ੍ਬੋ, ਤਤ੍ਥ ਨਿਸੀਦਿਤਬ੍ਬਂ. ਸੇਯ੍ਯਾਪਰਿਯਨ੍ਤੋਤਿ ਸੇਯ੍ਯਾਨਂ ਪਰਿਯਨ੍ਤੋ, ਸਬ੍ਬਲਾਮਕਂ ਮਞ੍ਚਪੀਠਂ. ਅਯਞ੍ਹਿ ਵਸ੍ਸਗ੍ਗੇਨ ਅਤ੍ਤਨੋ ਪਤ੍ਤਟ੍ਠਾਨੇ ਸੇਯ੍ਯਂ ਗਹੇਤੁਂ ਨ ਲਭਤਿ. ਸਬ੍ਬਭਿਕ੍ਖੂਹਿ ਵਿਚਿਨਿਤ੍ਵਾ ਗਹਿਤਾਵਸੇਸਾ ਮਙ੍ਕੁਲਗੂਥਭਰਿਤਾ ਵੇਤ੍ਤਲਤਾਦਿਵਿਨਦ੍ਧਾ ਲਾਮਕਸੇਯ੍ਯਾ ਅਸ੍ਸ ਦਾਤਬ੍ਬਾ. ਵਿਹਾਰਪਰਿਯਨ੍ਤੋਤਿ ਯਥਾ ਚ ਸੇਯ੍ਯਾ, ਏਵਂ ਵਸਨਆਵਾਸੋਪਿ ਵਸ੍ਸਗ੍ਗੇਨ ਅਤ੍ਤਨੋ ਪਤ੍ਤਟ੍ਠਾਨੇ ਤਸ੍ਸ ਨ ਵਟ੍ਟਤਿ. ਸਬ੍ਬਭਿਕ੍ਖੂਹਿ ਵਿਚਿਨਿਤ੍ਵਾ ਗਹਿਤਾਵਸੇਸਾ ਪਨ ਰਜੋਹਤਭੂਮਿ ਜਤੁਕਮੂਸਿਕਭਰਿਤਾ ਪਣ੍ਣਸਾਲਾ ਅਸ੍ਸ ਦਾਤਬ੍ਬਾ. ਸਚੇ ਪਕਤਤ੍ਤਾ ਸਬ੍ਬੇ ਰੁਕ੍ਖਮੂਲਿਕਾ ਅਬ੍ਭੋਕਾਸਿਕਾ ਚ ਹੋਨ੍ਤਿ, ਛਨ੍ਨਂ ਨ ਉਪੇਨ੍ਤਿ, ਸਬ੍ਬੇਪਿ ਏਤੇਹਿ ਵਿਸ੍ਸਟ੍ਠਾਵਾਸਾ ਨਾਮ ਹੋਨ੍ਤਿ. ਤੇਸੁ ਯਂ ਇਚ੍ਛਤਿ, ਤਂ ਲਭਤਿ. ਵਸ੍ਸੂਪਨਾਯਿਕਦਿਵਸੇ ਪਚ੍ਚਯਂ ਏਕਪਸ੍ਸੇ ਠਤ੍ਵਾ ਵਸ੍ਸਗ੍ਗੇਨ ਗਣ੍ਹਿਤੁਂ ਲਭਤਿ. ਸੇਨਾਸਨਂ ਨ ਲਭਤਿ, ਨਿਬਦ੍ਧਵਸ੍ਸਾਵਾਸਿਕਂ ਸੇਨਾਸਨਂ ਗਣ੍ਹਿਤੁਕਾਮੇਨ ਵਤ੍ਤਂ ਨਿਕ੍ਖਿਪਿਤ੍ਵਾ ਗਹੇਤਬ੍ਬਂ.

ਤੇਨ ਚ ਸੋ ਸਾਦਿਤਬ੍ਬੋਤਿ ਯਂ ਅਸ੍ਸ ਆਸਨਾਦਿਪਰਿਯਨ੍ਤਂ ਭਿਕ੍ਖੂ ਦੇਨ੍ਤਿ, ਸੋ ਏਵ ਸਾਦਿਤਬ੍ਬੋ. ਪੁਰੇਸਮਣੇਨ ਵਾ ਪਚ੍ਛਾਸਮਣੇਨ ਵਾਤਿ ਞਾਤਿਪਵਾਰਿਤਟ੍ਠਾਨੇ ‘‘ਏਤ੍ਤਕੇ ਭਿਕ੍ਖੂ ਗਹੇਤ੍ਵਾ ਆਗਚ੍ਛਥਾ’’ਤਿ ਨਿਮਨ੍ਤਿਤੇਨ ‘‘ਭਨ੍ਤੇ, ਅਸੁਕਂ ਨਾਮ ਕੁਲਂ ਭਿਕ੍ਖੂ ਨਿਮਨ੍ਤੇਸਿ, ਏਥ ਤਤ੍ਥ ਗਚ੍ਛਾਮਾ’’ਤਿ ਏਵਂ ਸਂਵਿਧਾਯ ਭਿਕ੍ਖੂ ਪੁਰੇਸਮਣੇ ਵਾ ਪਚ੍ਛਾਸਮਣੇ ਵਾ ਕਤ੍ਵਾ ਨ ਗਨ੍ਤਬ੍ਬਂ. ‘‘ਭਨ੍ਤੇ, ਅਸੁਕਸ੍ਮਿਂ ਨਾਮ ਗਾਮੇ ਮਨੁਸ੍ਸਾ ਭਿਕ੍ਖੂਨਂ ਆਗਮਨਂ ਇਚ੍ਛਨ੍ਤਿ, ਸਾਧੁ ਵਤਸ੍ਸ ਸਚੇ ਤੇਸਂ ਸਙ੍ਗਹਂ ਕਰੇਯ੍ਯਾਥਾ’’ਤਿ ਏਵਂ ਪਨ ਪਰਿਯਾਯੇਨ ਕਥੇਤੁਂ ਵਟ੍ਟਤਿ.

ਨ ਆਰਞ੍ਞਿਕਙ੍ਗਨ੍ਤਿ ਆਗਤਾਗਤਾਨਂ ਆਰੋਚੇਤੁਂ ਹਰਾਯਮਾਨੇਨ ਆਰਞ੍ਞਿਕਧੁਤਙ੍ਗਂ ਨ ਸਮਾਦਾਤਬ੍ਬਂ. ਯੇਨਾਪਿ ਪਕਤਿਯਾ ਸਮਾਦਿਨ੍ਨਂ, ਤੇਨ ਦੁਤਿਯਂ ਭਿਕ੍ਖੁਂ ਗਹੇਤ੍ਵਾ ਅਰਞ੍ਞੇ ਅਰੁਣਂ ਉਟ੍ਠਾਪੇਤਬ੍ਬਂ, ਨ ਚ ਏਕਕੇਨ ਵਤ੍ਥਬ੍ਬਂ. ਤਥਾ ਭਤ੍ਤਗ੍ਗਾਦੀਸੁ ਆਸਨਪਰਿਯਨ੍ਤੇ ਨਿਸਜ੍ਜਾਯ ਹਰਾਯਮਾਨੇਨ ਪਿਣ੍ਡਪਾਤਿਕਧੁਤਙ੍ਗਮ੍ਪਿ ਨ ਸਮਾਦਾਤਬ੍ਬਂ. ਯੋ ਪਨ ਪਕਤਿਯਾਵ ਪਿਣ੍ਡਪਾਤਿਕੋ ਤਸ੍ਸ ਪਟਿਸੇਧੋ ਨਤ੍ਥਿ.

ਨ ਚ ਤਪ੍ਪਚ੍ਚਯਾਤਿ ‘‘ਨੀਹਟਭਤ੍ਤੋ ਹੁਤ੍ਵਾ ਵਿਹਾਰੇਯੇਵ ਨਿਸੀਦਿਤ੍ਵਾ ਭੁਞ੍ਜਨ੍ਤੋ ਰਤ੍ਤਿਯੋ ਗਣਯਿਸ੍ਸਾਮਿ, ਗਚ੍ਛਤੋ ਮੇ ਭਿਕ੍ਖੁਂ ਦਿਸ੍ਵਾ ਅਨਾਰੋਚੇਨ੍ਤਸ੍ਸ ਰਤ੍ਤਿਚ੍ਛੇਦੋ ਸਿਯਾ’’ਤਿ ਇਮਿਨਾ ਕਾਰਣੇਨ ਪਿਣ੍ਡਪਾਤੋ ਨ ਨੀਹਰਾਪੇਤਬ੍ਬੋ. ਮਾ ਮਂ ਜਾਨਿਂਸੂਤਿ ‘‘ਮਾ ਮਂ ਏਕਭਿਕ੍ਖੁਪਿ ਜਾਨਾਤੂ’’ਤਿ ਚ ਇਮਿਨਾ ਅਜ੍ਝਾਸਯੇਨ ਵਿਹਾਰੇ ਸਾਮਣੇਰੇਹਿ ਪਚਾਪੇਤ੍ਵਾ ਭੁਞ੍ਜਿਤੁਮ੍ਪਿ ਨ ਲਭਤਿ. ਗਾਮਂ ਪਿਣ੍ਡਾਯ ਪਵਿਸਿਤਬ੍ਬਮੇਵ. ਗਿਲਾਨਸ੍ਸ ਪਨ ਨਵਕਮ੍ਮਆਚਰਿਯੁਪਜ੍ਝਾਯਕਿਚ੍ਚਾਦਿਪਸੁਤਸ੍ਸ ਵਾ ਵਿਹਾਰੇਯੇਵ ਅਚ੍ਛਿਤੁਂ ਵਟ੍ਟਤਿ. ਸਚੇਪਿ ਗਾਮੇ ਅਨੇਕਸਤਾ ਭਿਕ੍ਖੂ ਵਿਚਰਨ੍ਤਿ, ਨ ਸਕ੍ਕਾ ਹੋਤਿ ਆਰੋਚੇਤੁਂ, ਗਾਮਕਾਵਾਸਂ ਗਨ੍ਤ੍ਵਾ ਸਭਾਗਟ੍ਠਾਨੇ ਵਸਿਤੁਂ ਵਟ੍ਟਤਿ.

ਆਗਨ੍ਤੁਕੇਨਾਤਿ ਕਞ੍ਚਿ ਵਿਹਾਰਂ ਗਤੇਨ ਤਤ੍ਥ ਭਿਕ੍ਖੂਨਂ ਆਰੋਚੇਤਬ੍ਬਂ. ਸਚੇ ਸਬ੍ਬੇ ਏਕਟ੍ਠਾਨੇ ਠਿਤੇ ਪਸ੍ਸਤਿ, ਏਕਟ੍ਠਾਨੇ ਠਿਤੇਨੇਵ ਆਰੋਚੇਤਬ੍ਬਂ. ਅਥ ਰੁਕ੍ਖਮੂਲਾਦੀਸੁ ਵਿਸੁਂ ਵਿਸੁਂ ਠਿਤਾ ਹੋਨ੍ਤਿ, ਤਤ੍ਥ ਤਤ੍ਥ ਗਨ੍ਤ੍ਵਾ ਆਰੋਚੇਤਬ੍ਬਂ. ਸਞ੍ਚਿਚ੍ਚ ਅਨਾਰੋਚੇਨ੍ਤਸ੍ਸ ਰਤ੍ਤਿਚ੍ਛੇਦੋ ਚ ਹੋਤਿ, ਵਤ੍ਤਭੇਦੇ ਚ ਦੁਕ੍ਕਟਂ. ਅਥ ਵਿਚਿਨਨ੍ਤੋ ਏਕਚ੍ਚੇ ਨ ਪਸ੍ਸਤਿ, ਰਤ੍ਤਿਚ੍ਛੇਦੋਵ ਹੋਤਿ, ਨ ਵਤ੍ਤਭੇਦਦੁਕ੍ਕਟਂ.

ਆਗਨ੍ਤੁਕਸ੍ਸਾਤਿ ਅਤ੍ਤਨੋ ਵਸਨਵਿਹਾਰਂ ਆਗਤਸ੍ਸਾਪਿ ਏਕਸ੍ਸ ਵਾ ਬਹੂਨਂ ਵਾ ਵੁਤ੍ਤਨਯੇਨੇਵ ਆਰੋਚੇਤਬ੍ਬਂ. ਰਤ੍ਤਿਚ੍ਛੇਦਵਤ੍ਤਭੇਦਾਪਿ ਚੇਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਸਚੇ ਆਗਨ੍ਤੁਕਾ ਮੁਹੁਤ੍ਤਂ ਵਿਸ੍ਸਮਿਤ੍ਵਾ ਵਾ ਅਵਿਸ੍ਸਮਿਤ੍ਵਾ ਏਵ ਵਾ ਵਿਹਾਰਮਜ੍ਝੇਨ ਗਚ੍ਛਨ੍ਤਿ, ਤੇਸਮ੍ਪਿ ਆਰੋਚੇਤਬ੍ਬਂ. ਸਚੇ ਤਸ੍ਸ ਅਜਾਨਨ੍ਤਸ੍ਸੇਵ ਗਚ੍ਛਨ੍ਤਿ, ਅਯਞ੍ਚ ਪਨ ਗਤਕਾਲੇ ਜਾਨਾਤਿ, ਗਨ੍ਤ੍ਵਾ ਆਰੋਚੇਤਬ੍ਬਂ. ਸਮ੍ਪਾਪੁਣਿਤੁਂ ਅਸਕ੍ਕੋਨ੍ਤਸ੍ਸ ਰਤ੍ਤਿਚ੍ਛੇਦੋਵ ਹੋਤਿ, ਨ ਵਤ੍ਤਭੇਦਦੁਕ੍ਕਟਂ. ਯੇਪਿ ਅਨ੍ਤੋਵਿਹਾਰਂ ਅਪ੍ਪਵਿਸਿਤ੍ਵਾ ਉਪਚਾਰਸੀਮਂ ਓਕ੍ਕਮਿਤ੍ਵਾ ਗਚ੍ਛਨ੍ਤਿ, ਅਯਞ੍ਚ ਨੇਸਂ ਛਤ੍ਤਸਦ੍ਦਂ ਵਾ ਉਕ੍ਕਾਸਿਤਸਦ੍ਦਂ ਵਾ ਖਿਪਿਤਸਦ੍ਦਂ ਵਾ ਸੁਤ੍ਵਾਵ ਆਗਨ੍ਤੁਕਭਾਵਂ ਜਾਨਾਤਿ, ਗਨ੍ਤ੍ਵਾ ਆਰੋਚੇਤਬ੍ਬਂ. ਗਤਕਾਲੇ ਜਾਨਨ੍ਤੇਨਪਿ ਅਨੁਬਨ੍ਧਿਤ੍ਵਾ ਆਰੋਚੇਤਬ੍ਬਮੇਵ. ਸਮ੍ਪਾਪੁਣਿਤੁਂ ਅਸਕ੍ਕੋਨ੍ਤਸ੍ਸ ਰਤ੍ਤਿਚ੍ਛੇਦੋਵ ਹੋਤਿ, ਨ ਵਤ੍ਤਭੇਦਦੁਕ੍ਕਟਂ. ਯੋਪਿ ਰਤ੍ਤਿਂਯੇਵ ਆਗਨ੍ਤ੍ਵਾ ਰਤ੍ਤਿਂਯੇਵ ਗਚ੍ਛਤਿ, ਸੋਪਿਸ੍ਸ ਰਤ੍ਤਿਚ੍ਛੇਦਂ ਕਰੋਤਿ, ਅਞ੍ਞਾਤਤ੍ਤਾ ਪਨ ਵਤ੍ਤਭੇਦਦੁਕ੍ਕਟਂ ਨਤ੍ਥਿ. ਸਚੇ ਅਜਾਨਿਤ੍ਵਾਵ ਅਬ੍ਭਾਨਂ ਕਰੋਤਿ, ਅਕਤਮੇਵ ਹੋਤੀਤਿ ਕੁਰੁਨ੍ਦਿਯਂ ਵੁਤ੍ਤਂ. ਤਸ੍ਮਾ ਅਧਿਕਾ ਰਤ੍ਤਿਯੋ ਗਹੇਤ੍ਵਾ ਕਾਤਬ੍ਬਂ, ਅਯਂ ਅਪਣ੍ਣਕਪਟਿਪਦਾ.

ਨਦੀਆਦੀਸੁ ਨਾਵਾਯ ਗਚ੍ਛਨ੍ਤਮ੍ਪਿ ਪਰਤੀਰੇ ਠਿਤਮ੍ਪਿ ਆਕਾਸੇਨ ਗਚ੍ਛਨ੍ਤਮ੍ਪਿ ਪਬ੍ਬਤਤਲਅਰਞ੍ਞਾਦੀਸੁ ਦੂਰੇ ਠਿਤਮ੍ਪਿ ਭਿਕ੍ਖੁਂ ਦਿਸ੍ਵਾ ਸਚੇ ‘‘ਭਿਕ੍ਖੂ’’ਤਿ ਵਵਤ੍ਥਾਨਂ ਅਤ੍ਥਿ, ਨਾਵਾਦੀਹਿ ਵਾ ਗਨ੍ਤ੍ਵਾ ਮਹਾਸਦ੍ਦਂ ਕਤ੍ਵਾ ਵਾ ਵੇਗੇਨ ਅਨੁਬਨ੍ਧਿਤ੍ਵਾ ਵਾ ਆਰੋਚੇਤਬ੍ਬਂ, ਅਨਾਰੋਚੇਨ੍ਤਸ੍ਸ ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦਦੁਕ੍ਕਟਞ੍ਚ. ਸਚੇ ਵਾਯਮਨ੍ਤੋਪਿ ਸਮ੍ਪਾਪੁਣਿਤੁਂ ਵਾ ਸਾਵੇਤੁਂ ਵਾ ਨ ਸਕ੍ਕੋਤਿ, ਰਤ੍ਤਿਚ੍ਛੇਦੋਵ ਹੋਤਿ, ਨ ਵਤ੍ਤਭੇਦਦੁਕ੍ਕਟਂ. ਸਙ੍ਘਸੇਨਾਭਯਤ੍ਥੇਰੋ ਪਨ ਵਿਸਯਾਵਿਸਯੇਨ ਕਥੇਤਿ – ‘‘ਵਿਸਯੇ ਕਿਰ ਅਨਾਰੋਚੇਨ੍ਤਸ੍ਸ ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦਦੁਕ੍ਕਟਞ੍ਚ ਹੋਤਿ, ਅਵਿਸਯੇ ਪਨ ਉਭਯਮ੍ਪਿ ਨਤ੍ਥੀ’’ਤਿ. ਕਰਵੀਕਤਿਸ੍ਸਤ੍ਥੇਰੋ ‘‘ਸਮਣੋ ਅਯਨ੍ਤਿ ਵਵਤ੍ਥਾਨਮੇਵ ਪਮਾਣਂ, ਸਚੇਪਿ ਅਵਿਸਯੋ ਹੋਤਿ, ਵਤ੍ਤਭੇਦਦੁਕ੍ਕਟਮੇਵ ਨਤ੍ਥਿ, ਰਤ੍ਤਿਚ੍ਛੇਦੋ ਪਨ ਹੋਤਿਯੇਵਾ’’ਤਿ ਆਹ.

ਉਪੋਸਥੇਤਿ ‘‘ਉਪੋਸਥਂ ਸਮ੍ਪਾਪੁਣਿਸ੍ਸਾਮਾ’’ਤਿ ਆਗਨ੍ਤੁਕਾ ਭਿਕ੍ਖੂ ਆਗਚ੍ਛਨ੍ਤਿ, ਇਦ੍ਧਿਯਾ ਗਚ੍ਛਨ੍ਤਾਪਿ ਉਪੋਸਥਭਾਵਂ ਞਤ੍ਵਾ ਓਤਰਿਤ੍ਵਾ ਉਪੋਸਥਂ ਕਰੋਨ੍ਤਿ, ਤਸ੍ਮਾ ਆਗਨ੍ਤੁਕਸੋਧਨਤ੍ਥਂ ਉਪੋਸਥਦਿਵਸੇ ਆਰੋਚੇਤਬ੍ਬਂ. ਪਵਾਰਣਾਯਪਿ ਏਸੇਵ ਨਯੋ. ਗਿਲਾਨੋਤਿ ਗਨ੍ਤੁਂ ਅਸਮਤ੍ਥੋ. ਦੂਤੇਨਾਤਿ ਏਤ੍ਥ ਅਨੁਪਸਮ੍ਪਨ੍ਨਂ ਪੇਸੇਤੁਂ ਨ ਵਟ੍ਟਤਿ, ਭਿਕ੍ਖੁਂ ਪੇਸੇਤ੍ਵਾ ਆਰੋਚਾਪੇਤਬ੍ਬਂ.

ਅਭਿਕ੍ਖੁਕੋ ਆਵਾਸੋਤਿ ਸੁਞ੍ਞਵਿਹਾਰੋ; ਯਤ੍ਥ ਏਕੋਪਿ ਭਿਕ੍ਖੁ ਨਤ੍ਥਿ, ਤਤ੍ਥ ਵਾਸਤ੍ਥਾਯ ਨ ਗਨ੍ਤਬ੍ਬਂ. ਨ ਹਿ ਤਤ੍ਥ ਵੁਤ੍ਥਰਤ੍ਤਿਯੋ ਗਣਨੂਪਿਕਾ ਹੋਨ੍ਤਿ, ਪਕਤਤ੍ਤੇਨ ਪਨ ਸਦ੍ਧਿਂ ਵਟ੍ਟਤਿ. ਦਸਵਿਧਨ੍ਤਰਾਯੇ ਪਨ ਸਚੇਪਿ ਰਤ੍ਤਿਯੋ ਗਣਨੂਪਿਕਾ ਨ ਹੋਨ੍ਤਿ, ਅਨ੍ਤਰਾਯਤੋ ਪਰਿਮੁਚ੍ਚਨਤ੍ਥਾਯ ਗਨ੍ਤਬ੍ਬਮੇਵ. ਤੇਨ ਵੁਤ੍ਤਂ – ‘‘ਅਞ੍ਞਤ੍ਰ ਅਨ੍ਤਰਾਯਾ’’ਤਿ. ਨਾਨਾਸਂਵਾਸਕੇਹਿ ਸਦ੍ਧਿਂ ਵਿਨਯਕਮ੍ਮਂ ਕਾਤੁਂ ਨ ਵਟ੍ਟਤਿ. ਤੇਸਂ ਅਨਾਰੋਚਨੇਪਿ ਰਤ੍ਤਿਚ੍ਛੇਦੋ ਨਤ੍ਥਿ, ਅਭਿਕ੍ਖੁਕਾਵਾਸਸਦਿਸਮੇਵ ਹੋਤਿ. ਤੇਨ ਵੁਤ੍ਤਂ – ‘‘ਯਤ੍ਥਸ੍ਸੁ ਭਿਕ੍ਖੂ ਨਾਨਾਸਂਵਾਸਕਾ’’ਤਿ. ਸੇਸਂ ਉਪੋਸਥਕ੍ਖਨ੍ਧਕੇ ਵੁਤ੍ਤਨਯਮੇਵ.

੮੧. ਏਕਚ੍ਛਨ੍ਨੇ ਆਵਾਸੇਤਿਆਦੀਸੁ ਆਵਾਸੋ ਨਾਮ ਵਸਨਤ੍ਥਾਯ ਕਤਸੇਨਾਸਨਂ. ਅਨਾਵਾਸੋ ਨਾਮ ਚੇਤਿਯਘਰਂ ਬੋਧਿਘਰਂ ਸਮ੍ਮੁਞ੍ਜਨਿਅਟ੍ਟਕੋ ਦਾਰੁਅਟ੍ਟਕੋ ਪਾਨੀਯਮਾਲ਼ੋ ਵਚ੍ਚਕੁਟਿ ਦ੍ਵਾਰਕੋਟ੍ਠਕੋਤਿ ਏਵਮਾਦਿ. ਤਤਿਯਪਦੇਨ ਤਦੁਭਯਮ੍ਪਿ ਗਹਿਤਂ. ਏਤੇਸੁ ਯਤ੍ਥ ਕਤ੍ਥਚਿ ਏਕਚ੍ਛਨ੍ਨੇ ਛਦਨਤੋ ਉਦਕਪਤਨਟ੍ਠਾਨਪਰਿਚ੍ਛਿਨ੍ਨੇ ਓਕਾਸੇ ਉਕ੍ਖਿਤ੍ਤਕੋ ਵਸਿਤੁਂ ਨ ਲਭਤਿ. ‘‘ਪਾਰਿਵਾਸਿਕੋ ਪਨ ਅਨ੍ਤੋਆਵਾਸੇਯੇਵ ਨ ਲਭਤੀ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ‘‘ਅਵਿਸੇਸੇਨ ਉਦਕਪਾਤੇਨ ਵਾਰਿਤ’’ਨ੍ਤਿ ਵੁਤ੍ਤਂ. ਕੁਰੁਨ੍ਦਿਯਂ ‘‘ਏਤੇਸੁ ਏਤ੍ਤਕੇਸੁ ਪਞ੍ਚਵਣ੍ਣਚ੍ਛਦਨਬਦ੍ਧਟ੍ਠਾਨੇਸੁ ਪਾਰਿਵਾਸਿਕਸ੍ਸ ਚ ਉਕ੍ਖਿਤ੍ਤਕਸ੍ਸ ਚ ਪਕਤਤ੍ਤੇਨ ਸਦ੍ਧਿਂ ਉਦਕਪਾਤੇਨ ਵਾਰਿਤ’’ਨ੍ਤਿ ਵੁਤ੍ਤਂ. ਤਸ੍ਮਾ ਨਾਨੂਪਚਾਰੇਪਿ ਏਕਚ੍ਛਨ੍ਨੇ ਨ ਵਟ੍ਟਤਿ. ਸਚੇ ਪਨੇਤ੍ਥ ਤਦਹੁਪਸਮ੍ਪਨ੍ਨੇਪਿ ਪਕਤਤ੍ਤੇ ਪਠਮਂ ਪਵਿਸਿਤ੍ਵਾ ਨਿਪਨ੍ਨੇ ਸਟ੍ਠਿਵਸ੍ਸੋਪਿ ਪਾਰਿਵਾਸਿਕੋ ਪਚ੍ਛਾ ਪਵਿਸਿਤ੍ਵਾ ਜਾਨਨ੍ਤੋ ਨਿਪਜ੍ਜਤਿ, ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦਦੁਕ੍ਕਟਞ੍ਚ. ਅਜਾਨਨ੍ਤਸ੍ਸ ਰਤ੍ਤਿਚ੍ਛੇਦੋਵ ਨ ਵਤ੍ਤਭੇਦਦੁਕ੍ਕਟਂ. ਸਚੇ ਪਨ ਤਸ੍ਮਿਂ ਪਠਮਂ ਨਿਪਨ੍ਨੇ ਪਚ੍ਛਾ ਪਕਤਤ੍ਤੋ ਪਵਿਸਿਤ੍ਵਾ ਨਿਪਜ੍ਜਤਿ, ਪਾਰਿਵਾਸਿਕੋ ਚ ਜਾਨਾਤਿ, ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦਦੁਕ੍ਕਟਞ੍ਚ. ਨੋ ਚੇ ਜਾਨਾਤਿ, ਰਤ੍ਤਿਚ੍ਛੇਦੋਵ ਨ ਵਤ੍ਤਭੇਦਦੁਕ੍ਕਟਂ.

ਵੁਟ੍ਠਾਤਬ੍ਬਂ ਨਿਮਨ੍ਤੇਤਬ੍ਬੋਤਿ ਤਦਹੁਪਸਮ੍ਪਨ੍ਨਮ੍ਪਿ ਦਿਸ੍ਵਾ ਵੁਟ੍ਠਾਤਬ੍ਬਮੇਵ; ਵੁਟ੍ਠਾਯ ਚ ‘‘ਅਹਂ ਇਮਿਨਾ ਸੁਖਨਿਸਿਨ੍ਨੋ ਵੁਟ੍ਠਾਪਿਤੋ’’ਤਿ ਪਰਮ੍ਮੁਖੇਨ ਨ ਗਨ੍ਤਬ੍ਬਂ, ‘‘ਇਦਂ ਆਚਰਿਯ-ਆਸਨਂ, ਏਤ੍ਥ ਨਿਸੀਦਥਾ’’ਤਿ ਏਵਂ ਨਿਮਨ੍ਤੇਤਬ੍ਬੋਯੇਵ. ਨਵਕੇਨ ਪਨ ‘‘ਮਹਾਥੇਰਂ ਓਬਦ੍ਧਂ ਕਰੋਮੀ’’ਤਿ ਪਾਰਿਵਾਸਿਕਤ੍ਥੇਰਸ੍ਸ ਸਨ੍ਤਿਕਂ ਨ ਗਨ੍ਤਬ੍ਬਂ. ਏਕਾਸਨੇਤਿ ਸਮਾਨਵਸ੍ਸਿਕਾਸਨੇ ਮਞ੍ਚੇ ਵਾ ਪੀਠੇ ਵਾ. ਨ ਛਮਾਯਂ ਨਿਸਿਨ੍ਨੇਤਿ ਪਕਤਤ੍ਤੇ ਭੂਮਿਯਂ ਨਿਸਿਨ੍ਨੇ ਇਤਰੇਨ ਅਨ੍ਤਮਸੋ ਤਿਣਸਨ੍ਥਾਰੇਪਿ ਉਚ੍ਚਤਰੇ ਵਾਲਿਕਾਤਲੇਪਿ ਵਾ ਨ ਨਿਸੀਦਿਤਬ੍ਬਂ, ਦ੍ਵਾਦਸਹਤ੍ਥਂ ਪਨ ਉਪਚਾਰਂ ਮੁਞ੍ਚਿਤ੍ਵਾ ਨਿਸੀਦਿਤੁਂ ਵਟ੍ਟਤਿ. ਏਕਚਙ੍ਕਮੇਤਿ ਸਹਾਯੇਨ ਵਿਯ ਸਦ੍ਧਿਂ ਚਙ੍ਕਮਨ੍ਤੋ ਏਕਸ੍ਮਿਂ ਚਙ੍ਕਮੇ.

ਛਮਾਯਂ ਚਙ੍ਕਮਨ੍ਤਨ੍ਤਿ ਛਮਾਯਂ ਚਙ੍ਕਮਨ੍ਤੇ, ਅਯਮੇਵ ਵਾ ਪਾਠੋ. ਅਯਂ ਪਨੇਤ੍ਥ ਅਤ੍ਥੋ – ਅਕਤਪਰਿਚ੍ਛੇਦਾਯ ਭੂਮਿਯਾ ਚਙ੍ਕਮਨ੍ਤੇ ਪਰਿਚ੍ਛੇਦਂ ਕਤ੍ਵਾ ਵਾਲਿਕਂ ਆਕਿਰਿਤ੍ਵਾ ਆਲਮ੍ਬਨਂ ਯੋਜੇਤ੍ਵਾ ਕਤਚਙ੍ਕਮੇ ਨੀਚੇਪਿ ਨ ਚਙ੍ਕਮਿਤਬ੍ਬਂ, ਕੋ ਪਨ ਵਾਦੋ ਇਟ੍ਠਕਾਚਯਸਮ੍ਪਨ੍ਨੇ ਵੇਦਿਕਾਪਰਿਕ੍ਖਿਤ੍ਤੇਤਿ! ਸਚੇ ਪਨ ਪਾਕਾਰਪਰਿਕ੍ਖਿਤ੍ਤੋ ਹੋਤਿ ਦ੍ਵਾਰਕੋਟ੍ਠਕਯੁਤ੍ਤੋ ਪਬ੍ਬਤਨ੍ਤਰਵਨਨ੍ਤਰਗੁਮ੍ਬਨ੍ਤਰੇਸੁ ਵਾ ਸੁਪ੍ਪਟਿਚ੍ਛਨ੍ਨੋ, ਤਾਦਿਸੇ ਚਙ੍ਕਮੇ ਚਙ੍ਕਮਿਤੁਂ ਵਟ੍ਟਤਿ. ਅਪ੍ਪਟਿਚ੍ਛਨ੍ਨੇਪਿ ਉਪਚਾਰਂ ਮੁਞ੍ਚਿਤ੍ਵਾ ਵਟ੍ਟਤਿ.

ਵੁਡ੍ਢਤਰੇਨਾਤਿ ਏਤ੍ਥ ਸਚੇ ਵੁਡ੍ਢਤਰੇ ਪਾਰਿਵਾਸਿਕੇ ਪਠਮਂ ਨਿਪਨ੍ਨੇ ਇਤਰੋ ਜਾਨਨ੍ਤੋ ਪਚ੍ਛਾ ਨਿਪਜ੍ਜਤਿ, ਰਤ੍ਤਿਚ੍ਛੇਦੋ ਚਸ੍ਸ ਹੋਤਿ ਵਤ੍ਤਭੇਦੇ ਚ ਦੁਕ੍ਕਟਂ. ਵੁਡ੍ਢਤਰਸ੍ਸ ਪਨ ਰਤ੍ਤਿਚ੍ਛੇਦੋਵ ਨ ਵਤ੍ਤਭੇਦਦੁਕ੍ਕਟਂ. ਅਜਾਨਿਤ੍ਵਾ ਨਿਪਜ੍ਜਤਿ, ਦ੍ਵਿਨ੍ਨਮ੍ਪਿ ਵਤ੍ਤਭੇਦੋ ਨਤ੍ਥਿ, ਰਤ੍ਤਿਚ੍ਛੇਦੋ ਪਨ ਹੋਤਿ. ਅਥ ਨਵਕਪਾਰਿਵਾਸਿਕੇ ਪਠਮਂ ਨਿਪਨ੍ਨੇ ਵੁਡ੍ਢਤਰੋ ਪਚ੍ਛਾ ਨਿਪਜ੍ਜਤਿ, ਨਵਕੋ ਚ ਜਾਨਾਤਿ, ਰਤ੍ਤਿ ਚਸ੍ਸ ਛਿਜ੍ਜਤਿ, ਵਤ੍ਤਭੇਦੇ ਚ ਦੁਕ੍ਕਟਂ ਹੋਤਿ. ਵੁਡ੍ਢਤਰਸ੍ਸ ਰਤ੍ਤਿਚ੍ਛੇਦੋਵ ਨ ਵਤ੍ਤਭੇਦੋ. ਨੋ ਚੇ ਜਾਨਾਤਿ, ਦ੍ਵਿਨ੍ਨਮ੍ਪਿ ਵਤ੍ਤਭੇਦੋ ਨਤ੍ਥਿ, ਰਤ੍ਤਿਚ੍ਛੇਦੋ ਪਨ ਹੋਤਿ. ਸਚੇ ਦ੍ਵੇਪਿ ਅਪਚ੍ਛਾਪੁਰਿਮਂ ਨਿਪਜ੍ਜਨ੍ਤਿ, ਵੁਡ੍ਢਤਰਸ੍ਸ ਰਤ੍ਤਿਚ੍ਛੇਦੋਵ ਇਤਰਸ੍ਸ ਵਤ੍ਤਭੇਦੋਪੀਤਿ ਕੁਰੁਨ੍ਦਿਯਂ ਵੁਤ੍ਤਂ. ਦ੍ਵੇ ਪਾਰਿਵਾਸਿਕਾ ਸਮਵਸ੍ਸਾ, ਏਕੋ ਪਠਮਂ ਨਿਪਨ੍ਨੋ, ਏਕੋ ਜਾਨਨ੍ਤੋਵ ਪਚ੍ਛਾ ਨਿਪਜ੍ਜਤਿ, ਰਤ੍ਤਿ ਚ ਛਿਜ੍ਜਤਿ, ਵਤ੍ਤਭੇਦੇ ਚ ਦੁਕ੍ਕਟਂ. ਪਠਮਂ ਨਿਪਨ੍ਨਸ੍ਸ ਰਤ੍ਤਿਚ੍ਛੇਦੋਵ ਨ ਵਤ੍ਤਭੇਦੋ. ਸਚੇ ਪਚ੍ਛਾ ਨਿਪਜ੍ਜਨ੍ਤੋਪਿ ਨ ਜਾਨਾਤਿ, ਦ੍ਵਿਨ੍ਨਮ੍ਪਿ ਵਤ੍ਤਭੇਦੋ ਨਤ੍ਥਿ, ਰਤ੍ਤਿਚ੍ਛੇਦੋ ਪਨ ਹੋਤਿ. ਸਚੇ ਦ੍ਵੇਪਿ ਅਪਚ੍ਛਾਪੁਰਿਮਂ ਨਿਪਜ੍ਜਨ੍ਤਿ, ਦ੍ਵਿਨ੍ਨਮ੍ਪਿ ਰਤ੍ਤਿਚ੍ਛੇਦੋਯੇਵ, ਨ ਵਤ੍ਤਭੇਦੋ. ਸਚੇ ਹਿ ਦ੍ਵੇ ਪਾਰਿਵਾਸਿਕਾ ਏਕਤੋ ਵਸੇਯ੍ਯੁਂ, ਤੇ ਅਞ੍ਞਮਞ੍ਞਸ੍ਸ ਅਜ੍ਝਾਚਾਰਂ ਞਤ੍ਵਾ ਅਗਾਰਵਾ ਵਾ ਵਿਪ੍ਪਟਿਸਾਰਿਨੋ ਵਾ ਹੁਤ੍ਵਾ ਪਾਪਿਟ੍ਠਤਰਂ ਵਾ ਆਪਤ੍ਤਿਂ ਆਪਜ੍ਜੇਯ੍ਯੁਂ ਵਿਬ੍ਭਮੇਯ੍ਯੁਂ ਵਾ, ਤਸ੍ਮਾ ਨੇਸਂ ਸਹਸੇਯ੍ਯਾ ਸਬ੍ਬਪ੍ਪਕਾਰੇਨ ਪਟਿਕ੍ਖਿਤ੍ਤਾ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਮੂਲਾਯਪਟਿਕਸ੍ਸਨਾਰਹਾਦਯੋ ਚੇਤ੍ਥ ਪਾਰਿਵਾਸਿਕਾਨਂ ਪਕਤਤ੍ਤਟ੍ਠਾਨੇ ਠਿਤਾਤਿ ਵੇਦਿਤਬ੍ਬਾ.

ਪਾਰਿਵਾਸਿਕਚਤੁਤ੍ਥੋ ਚੇ, ਭਿਕ੍ਖਵੇ, ਪਰਿਵਾਸਨ੍ਤਿ ਏਤ੍ਥ ਪਾਰਿਵਾਸਿਕਂ ਚਤੁਤ੍ਥਂ ਕਤ੍ਵਾ ਅਞ੍ਞਸ੍ਸ ਪਰਿਵਾਸਦਾਨਾਦੀਨਿ ਕਾਤੁਂ ਨ ਵਟ੍ਟਤਿ. ਏਤੇਸ੍ਵੇਵਾਯਂ ਗਣਪੂਰਕੋ ਨ ਹੋਤਿ, ਸੇਸਸਙ੍ਘਕਮ੍ਮੇਸੁ ਹੋਤਿ. ਗਣੇ ਪਨ ਅਪ੍ਪਹੋਨ੍ਤੇ ਵਤ੍ਤਂ ਨਿਕ੍ਖਿਪਾਪੇਤ੍ਵਾ ਗਣਪੂਰਕੋ ਕਾਤਬ੍ਬੋਤਿ.

੮੩. ਇਮਂ ਪਨ ਵਤ੍ਤਕਥਂ ਸੁਤ੍ਵਾ ਵਿਨਯਧਰਉਪਾਲਿਤ੍ਥੇਰਸ੍ਸ ਰਹੋਗਤਸ੍ਸ ਏਵਂ ਪਰਿਵਿਤਕ੍ਕੋ ਉਦਪਾਦਿ – ‘‘ਭਗਵਤਾ ਬਹੁ ਪਾਰਿਵਾਸਿਕਵਤ੍ਤਂ ਪਞ੍ਞਤ੍ਤਂ, ਕਤਿਹਿ ਨੁ ਖੋ ਏਤ੍ਥ ਕਾਰਣੇਹਿ ਰਤ੍ਤਿਚ੍ਛੇਦੋ ਹੋਤੀ’’ਤਿ! ਸੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਤਮਤ੍ਥਂ ਪੁਚ੍ਛਿ. ਭਗਵਾ ਚਸ੍ਸ ਬ੍ਯਾਕਾਸਿ. ਤੇਨ ਵੁਤ੍ਤਂ – ‘‘ਅਥ ਖੋ ਆਯਸ੍ਮਾ ਉਪਾਲਿ…ਪੇ… ਰਤ੍ਤਿਚ੍ਛੇਦਾ’’ਤਿ. ਤਤ੍ਥ ਸਹਵਾਸੋਤਿ ਯ੍ਵਾਯਂ ਪਕਤਤ੍ਤੇਨ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇਤਿਆਦਿਨਾ ਨਯੇਨ ਵੁਤ੍ਤੋ ਏਕਤੋ ਵਾਸੋ. ਵਿਪ੍ਪਵਾਸੋਤਿ ਏਕਕਸ੍ਸੇਵ ਵਾਸੋ. ਅਨਾਰੋਚਨਾਤਿ ਆਗਨ੍ਤੁਕਾਦੀਨਂ ਅਨਾਰੋਚਨਾ. ਏਤੇਸੁ ਤੀਸੁ ਏਕੇਕੇਨ ਕਾਰਣੇਨ ਰਤ੍ਤਿਚ੍ਛੇਦੋ ਹੋਤਿ.

੮੪. ਨ ਸਕ੍ਕੋਨ੍ਤੀਤਿ ਸਙ੍ਘਸ੍ਸ ਮਹਨ੍ਤਤਾਯ ਤਤ੍ਥ ਤਤ੍ਥ ਗਨ੍ਤ੍ਵਾ ਸਬ੍ਬੇਸਂ ਆਰੋਚੇਤੁਂ ਅਸਕ੍ਕੋਨ੍ਤਾ ਸੋਧੇਤੁਂ ਨ ਸਕ੍ਕੋਨ੍ਤਿ. ਪਰਿਵਾਸਂ ਨਿਕ੍ਖਿਪਾਮਿ, ਵਤ੍ਤਂ ਨਿਕ੍ਖਿਪਾਮੀਤਿ ਇਮੇਸੁ ਦ੍ਵੀਸੁ ਪਦੇਸੁ ਏਕੇਨਾਪਿ ਨਿਕ੍ਖਿਤ੍ਤੋਵ ਹੋਤਿ ਪਰਿਵਾਸੋ; ਦ੍ਵੀਹਿ ਸੁਨਿਕ੍ਖਿਤ੍ਤੋਯੇਵ. ਸਮਾਦਾਨੇਪਿ ਏਸੇਵ ਨਯੋ. ਏਵਂ ਵਤ੍ਤਂ ਸਮਾਦਿਯਿਤ੍ਵਾ ਪਰਿਵੁਤ੍ਥਪਰਿਵਾਸਸ੍ਸ ਮਾਨਤ੍ਤਂ ਗਣ੍ਹਤੋ ਪੁਨ ਵਤ੍ਤਸਮਾਦਾਨਕਿਚ੍ਚਂ ਨਤ੍ਥਿ, ਸਮਾਦਿਨ੍ਨਵਤ੍ਤੋਯੇਵ ਹੇਸ ਤਸ੍ਮਾਸ੍ਸ ਛਾਰਤ੍ਤਂ ਮਾਨਤ੍ਤਂ ਦਾਤਬ੍ਬਂ, ਚਿਣ੍ਣਮਾਨਤ੍ਤੋ ਅਬ੍ਭੇਤਬ੍ਬੋ. ਏਵਂ ਅਨਾਪਤ੍ਤਿਕੋ ਹੁਤ੍ਵਾ ਸੁਦ੍ਧਨ੍ਤੇ ਪਤਿਟ੍ਠਿਤੋ ਤਿਸ੍ਸੋ ਸਿਕ੍ਖਾ ਪੂਰੇਤ੍ਵਾ ਦੁਕ੍ਖਸ੍ਸਨ੍ਤਂ ਕਰਿਸ੍ਸਤੀਤਿ.

ਪਾਰਿਵਾਸਿਕਵਤ੍ਤਕਥਾ ਨਿਟ੍ਠਿਤਾ.

ਮੂਲਾਯਪਟਿਕਸ੍ਸਨਾਰਹਵਤ੍ਤਕਥਾ

੮੬. ਮੂਲਾਯਪਟਿਕਸ੍ਸਨਾਰਹਾ ਭਿਕ੍ਖੂ ਸਾਦਿਯਨ੍ਤਿ ਪਕਤਤ੍ਤਾਨਨ੍ਤਿ ਠਪੇਤ੍ਵਾ ਨਵਕਤਰਂ ਮੂਲਾਯਪਟਿਕਸ੍ਸਨਾਰਹਂ ਅਵਸੇਸਾਨਂ ਅਨ੍ਤਮਸੋ ਪਾਰਿਵਾਸਿਕਾਦੀਨਮ੍ਪਿ. ਇਮੇਸਞ੍ਹਿ ਪਾਰਿਵਾਸਿਕਮੂਲਾਯਪਟਿਕਸ੍ਸਨਾਰਹਮਾਨਤ੍ਤਾਰਹਮਾਨਤ੍ਤਾਚਾਰਿਕਬ੍ਭਾਨਾਰਹਾਨਂ ਪਞ੍ਚਨ੍ਨਂ ਠਪੇਤ੍ਵਾ ਅਤ੍ਤਨੋ ਅਤ੍ਤਨੋ ਨਵਕਤਰਂ, ਸੇਸਾ ਸਬ੍ਬੇ ਪਕਤਤ੍ਤਾ ਏਵ. ਕਸ੍ਮਾ? ਮਿਥੁ ਯਥਾਵੁਡ੍ਢਂ ਅਭਿਵਾਦਨਾਦੀਨਂ ਅਨੁਞ੍ਞਾਤਤ੍ਤਾ. ਤੇਨ ਵੁਤ੍ਤਂ – ‘‘ਅਵਸੇਸਾਨਂ ਅਨ੍ਤਮਸੋ ਪਾਰਿਵਾਸਿਕਾਦੀਨਮ੍ਪੀ’’ਤਿ. ਮੂਲਾਯਪਟਿਕਸ੍ਸਨਾਰਹਾਦਿਲਕ੍ਖਣਂ ਪਨ ਨੇਸਂ ਪਰਤੋ ਆਵਿਭਵਿਸ੍ਸਤਿ. ਸੇਸਮੇਤ੍ਥ ਇਤੋ ਪਰੇਸੁ ਚ ਮਾਨਤ੍ਤਾਰਹਾਦਿਵਤ੍ਤੇਸੁ ਪਾਰਿਵਾਸਿਕਵਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੮੭. ਮੂਲਾਯਪਟਿਕਸ੍ਸਨਾਰਹਚਤੁਤ੍ਥੋ ਚੇਤਿਆਦੀਸੁਪਿ ਯਥੇਵ ਪਾਰਿਵਾਸਿਕੋ; ਏਵਂ ਏਤੇਪਿ ਏਤੇਸੁ ਵਿਨਯਕਮ੍ਮੇਸੁ ਗਣਪੂਰਕਾ ਨ ਹੋਨ੍ਤਿ, ਸੇਸਸਙ੍ਘਕਮ੍ਮੇਸੁ ਹੋਨ੍ਤਿ.

ਮੂਲਾਯਪਟਿਕਸ੍ਸਨਾਰਹਵਤ੍ਤਕਥਾ ਨਿਟ੍ਠਿਤਾ.

ਮਾਨਤ੍ਤਚਾਰਿਕਵਤ੍ਤਕਥਾ

੯੦. ਮਾਨਤ੍ਤਚਾਰਿਕਸ੍ਸ ਵਤ੍ਤੇਸੁ ‘‘ਦੇਵਸਿਕਂ ਆਰੋਚੇਤਬ੍ਬ’’ਨ੍ਤਿ ਵਿਸੇਸੋ.

੯੨. ਰਤ੍ਤਿਚ੍ਛੇਦੇਸੁ ਊਨੇ ਗਣੇਤਿ ਏਤ੍ਥ ਗਣੋਤਿ ਚਤ੍ਤਾਰੋ ਵਾ ਅਤਿਰੇਕਾ ਵਾ; ਤਸ੍ਮਾ ਸਚੇਪਿ ਤੀਹਿ ਭਿਕ੍ਖੂਹਿ ਸਦ੍ਧਿਂ ਵਸਤਿ, ਰਤ੍ਤਿਚ੍ਛੇਦੋ ਹੋਤਿਯੇਵ. ਮਾਨਤ੍ਤਨਿਕ੍ਖੇਪਸਮਾਦਾਨੇਸੁ ਵੁਤ੍ਤਸਦਿਸੋਵ ਵਿਨਿਚ੍ਛਯੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਮਾਨਤ੍ਤਚਾਰਿਕਵਤ੍ਤਕਥਾ ਨਿਟ੍ਠਿਤਾ.

ਪਾਰਿਵਾਸਿਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

੩. ਸਮੁਚ੍ਚਯਕ੍ਖਨ੍ਧਕਂ

ਸੁਕ੍ਕਵਿਸ੍ਸਟ੍ਠਿਕਥਾ

੯੭. ਸਮੁਚ੍ਚਯਕ੍ਖਨ੍ਧਕੇ – ਛਾਰਤ੍ਤਂ ਮਾਨਤ੍ਤਨ੍ਤਿ ਏਤ੍ਥ ਚਤੁਬ੍ਬਿਧਂ ਮਾਨਤ੍ਤਂ – ਅਪ੍ਪਟਿਚ੍ਛਨ੍ਨਮਾਨਤ੍ਤਂ, ਪਟਿਚ੍ਛਨ੍ਨਮਾਨਤ੍ਤਂ, ਪਕ੍ਖਮਾਨਤ੍ਤਂ, ਸਮੋਧਾਨਮਾਨਤ੍ਤਨ੍ਤਿ. ਤਤ੍ਥ ਅਪ੍ਪਟਿਚ੍ਛਨ੍ਨਮਾਨਤ੍ਤਂ ਨਾਮ – ਯਂ ਅਪ੍ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਪਰਿਵਾਸਂ ਅਦਤ੍ਵਾ ਕੇਵਲਂ ਆਪਤ੍ਤਿਂ ਆਪਨ੍ਨਭਾਵੇਨੇਵ ਮਾਨਤ੍ਤਾਰਹਸ੍ਸ ਮਾਨਤ੍ਤਂ ਦਿਯ੍ਯਤਿ. ਪਟਿਚ੍ਛਨ੍ਨਮਾਨਤ੍ਤਂ ਨਾਮ – ਯਂ ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਪਰਿਵੁਤ੍ਥਪਰਿਵਾਸਸ੍ਸ ਦਿਯ੍ਯਤਿ. ਪਕ੍ਖਮਾਨਤ੍ਤਂ ਨਾਮ – ਯਂ ਪਟਿਚ੍ਛਨ੍ਨਾਯ ਵਾ ਅਪ੍ਪਟਿਚ੍ਛਨ੍ਨਾਯ ਵਾ ਆਪਤ੍ਤਿਯਾ ਅਦ੍ਧਮਾਸਂ ਭਿਕ੍ਖੁਨੀਨਂ ਦਿਯ੍ਯਤਿ. ਸਮੋਧਾਨਮਾਨਤ੍ਤਂ ਨਾਮ – ਯਂ ਓਧਾਯ ਏਕਤੋ ਕਤ੍ਵਾ ਦਿਯ੍ਯਤਿ. ਤੇਸੁ ਇਦਂ ‘‘ਅਪ੍ਪਟਿਚ੍ਛਨ੍ਨਾਯ ਛਾਰਤ੍ਤਂ ਮਾਨਤ੍ਤ’’ਨ੍ਤਿ ਵਚਨਤੋ ‘‘ਅਪ੍ਪਟਿਚ੍ਛਨ੍ਨਮਾਨਤ੍ਤ’’ਨ੍ਤਿ ਵੇਦਿਤਬ੍ਬਂ. ਤਂ ਦੇਨ੍ਤੇਨ ਸਚੇ ਏਕਂ ਆਪਤ੍ਤਿਂ ਆਪਨ੍ਨੋ ਹੋਤਿ, ਇਧ ਵੁਤ੍ਤਨਯੇਨ ਦਾਤਬ੍ਬਂ. ਸਚੇ ਦ੍ਵੇ ਵਾ ਤਿਸ੍ਸੋ ਵਾ ਤਤੁਤ੍ਤਰਿਂ ਵਾ ਆਪਨ੍ਨੋ, ਯਥੇਵ ‘‘ਏਕਂ ਆਪਤ੍ਤਿ’’ਨ੍ਤਿ ਵੁਤ੍ਤਂ; ਏਵਂ ‘‘ਦ੍ਵੇ ਆਪਤ੍ਤਿਯੋ, ਤਿਸ੍ਸੋ ਆਪਤ੍ਤਿਯੋ’’ਤਿ ਵਤ੍ਤਬ੍ਬਂ. ਤਤੁਤ੍ਤਰਿ ਪਨ ਸਚੇਪਿ ਸਤਂ ਵਾ ਸਹਸ੍ਸਂ ਵਾ ਹੋਤਿ, ‘‘ਸਮ੍ਬਹੁਲਾ’’ਤਿ ਵਤ੍ਤਬ੍ਬਂ. ਨਾਨਾਵਤ੍ਥੁਕਾਯੋਪਿ ਏਕਤੋ ਕਤ੍ਵਾ ਦਾਤਬ੍ਬਾ, ਤਾਸਂ ਦਾਨਵਿਧਿਂ ਪਰਿਵਾਸਦਾਨੇ ਕਥਯਿਸ੍ਸਾਮ.

ਏਵਂ ਆਪਤ੍ਤਿਵਸੇਨ ਕਮ੍ਮਵਾਚਂ ਕਤ੍ਵਾ ਦਿਨ੍ਨੇ ਮਾਨਤ੍ਤੇ ‘‘ਏਵਮੇਤਂ ਧਾਰਯਾਮੀ’’ਤਿ ਕਮ੍ਮਵਾਚਾਪਰਿਯੋਸਾਨੇ ਮਾਲ਼ਕਸੀਮਾਯਮੇਵ ‘‘ਮਾਨਤ੍ਤਂ ਸਮਾਦਿਯਾਮਿ, ਵਤ੍ਤਂ ਸਮਾਦਿਯਾਮੀ’’ਤਿ ਵੁਤ੍ਤਨਯੇਨ ਵਤ੍ਤਂ ਸਮਾਦਾਤਬ੍ਬਂ. ਵਤ੍ਤਂ ਸਮਾਦਿਯਿਤ੍ਵਾ ਤਤ੍ਥੇਵ ਸਙ੍ਘਸ੍ਸ ਆਰੋਚੇਤਬ੍ਬਂ, ਆਰੋਚੇਨ੍ਤੇਨ ਚ ਏਵਂ ਆਰੋਚੇਤਬ੍ਬਂ –

‘‘ਅਹਂ, ਭਨ੍ਤੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਸਞ੍ਚੇਤਨਿਕਂ ਸੁਕ੍ਕਵਿਸ੍ਸਟ੍ਠਿਂ ਅਪ੍ਪਟਿਚ੍ਛਨ੍ਨਂ, ਸੋਹਂ ਸਙ੍ਘਂ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸ੍ਸਟ੍ਠਿਯਾ ਅਪ੍ਪਟਿਚ੍ਛਨ੍ਨਾਯ ਛਾਰਤ੍ਤਂ ਮਾਨਤ੍ਤਂ ਯਾਚਿਂ, ਤਸ੍ਸ ਮੇ ਸਙ੍ਘੋ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸ੍ਸਟ੍ਠਿਯਾ ਅਪ੍ਪਟਿਚ੍ਛਨ੍ਨਾਯ ਛਾਰਤ੍ਤਂ ਮਾਨਤ੍ਤਂ ਅਦਾਸਿ. ਸੋਹਂ ਮਾਨਤ੍ਤਂ ਚਰਾਮਿ, ਵੇਦਯਾਮਹਂ, ਭਨ੍ਤੇ ‘ਵੇਦਯਤੀ’ਤਿ ਮਂ ਸਙ੍ਘੋ ਧਾਰੇਤੂ’’ਤਿ.

ਇਮਞ੍ਚ ਪਨ ਅਤ੍ਥਂ ਗਹੇਤ੍ਵਾ ਯਾਯ ਕਾਯਚਿ ਭਾਸਾਯ ਆਰੋਚੇਤੁਂ ਵਟ੍ਟਤਿਯੇਵ. ਆਰੋਚੇਤ੍ਵਾ ਸਚੇ ਨਿਕ੍ਖਿਪਿਤੁਕਾਮੋ, ਵੁਤ੍ਤਨਯੇਨੇਵ ਸਙ੍ਘਮਜ੍ਝੇ ਨਿਕ੍ਖਿਪਿਤਬ੍ਬਂ. ਮਾਲ਼ਕਤੋ ਭਿਕ੍ਖੂਸੁ ਨਿਕ੍ਖਨ੍ਤੇਸੁ ਏਕਸ੍ਸਪਿ ਸਨ੍ਤਿਕੇ ਨਿਕ੍ਖਿਪਿਤੁਂ ਵਟ੍ਟਤਿ. ਮਾਲ਼ਕਤੋ ਨਿਕ੍ਖਮਿਤ੍ਵਾ ਸਤਿਂ ਪਟਿਲਭਨ੍ਤੇਨ ਸਹਗਚ੍ਛਨ੍ਤਸ੍ਸ ਸਨ੍ਤਿਕੇ ਨਿਕ੍ਖਿਪਿਤਬ੍ਬਂ. ਸਚੇ ਸੋਪਿ ਪਕ੍ਕਨ੍ਤੋ, ਅਞ੍ਞਸ੍ਸ ਯਸ੍ਸ ਮਾਲ਼ਕੇ ਨਾਰੋਚਿਤਂ, ਤਸ੍ਸ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ. ਆਰੋਚੇਨ੍ਤੇਨ ਪਨ ਅਵਸਾਨੇ ‘‘ਵੇਦਯਤੀਤਿ ਮਂ ਆਯਸ੍ਮਾ ਧਾਰੇਤੂ’’ਤਿ ਵਤ੍ਤਬ੍ਬਂ. ਦ੍ਵਿਨ੍ਨਂ ਆਰੋਚੇਨ੍ਤੇਨ ‘‘ਆਯਸ੍ਮਨ੍ਤਾ ਧਾਰੇਨ੍ਤੂ’’ਤਿ, ਤਿਣ੍ਣਂ ਆਰੋਚੇਨ੍ਤੇਨ ‘‘ਆਯਸ੍ਮਨ੍ਤੋ ਧਾਰੇਨ੍ਤੂ’’ਤਿ ਵਤ੍ਤਬ੍ਬਂ. ਨਿਕ੍ਖਿਤ੍ਤਕਾਲਤੋ ਪਟ੍ਠਾਯ ਪਕਤਤ੍ਤਟ੍ਠਾਨੇ ਤਿਟ੍ਠਤਿ.

ਸਚੇ ਅਪ੍ਪਭਿਕ੍ਖੁਕੋ ਵਿਹਾਰੋ ਹੋਤਿ, ਸਭਾਗਾ ਭਿਕ੍ਖੂ ਵਸਨ੍ਤਿ, ਵਤ੍ਤਂ ਅਨਿਕ੍ਖਿਪਿਤ੍ਵਾ ਅਨ੍ਤੋਵਿਹਾਰੇਯੇਵ ਰਤ੍ਤਿਯੋ ਗਣੇਤਬ੍ਬਾ. ਅਥ ਨ ਸਕ੍ਕਾ ਸੋਧੇਤੁਂ, ਵੁਤ੍ਤਨਯੇਨੇਵ ਵਤ੍ਤਂ ਨਿਕ੍ਖਿਪਿਤ੍ਵਾ ਪਚ੍ਚੂਸਸਮਯੇ ਚਤੂਹਿ ਪਞ੍ਚਹਿ ਵਾ ਭਿਕ੍ਖੂਹਿ ਸਦ੍ਧਿਂ ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਤੋ, ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਮਹਾਮਗ੍ਗਤੋ ਓਕ੍ਕਮ੍ਮ ਗੁਮ੍ਬੇਨ ਵਾ ਵਤਿਯਾ ਵਾ ਪਟਿਚ੍ਛਨ੍ਨਟ੍ਠਾਨੇ ਨਿਸੀਦਿਤਬ੍ਬਂ. ਅਨ੍ਤੋਅਰੁਣੇਯੇਵ ਵੁਤ੍ਤਨਯੇਨ ਵਤ੍ਤਂ ਸਮਾਦਿਯਿਤ੍ਵਾ ਆਰੋਚੇਤਬ੍ਬਂ. ਸਚੇ ਅਞ੍ਞੋ ਕੋਚਿ ਭਿਕ੍ਖੁ ਕੇਨਚਿਦੇਵ ਕਰਣੀਯੇਨ ਤਂ ਠਾਨਂ ਆਗਚ੍ਛਤਿ, ਸਚੇ ਏਸ ਤਂ ਪਸ੍ਸਤਿ, ਸਦ੍ਦਂ ਵਾਸ੍ਸ ਸੁਣਾਤਿ, ਆਰੋਚੇਤਬ੍ਬਂ. ਅਨਾਰੋਚੇਨ੍ਤਸ੍ਸ ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦੋ ਚ.

ਅਥ ਦ੍ਵਾਦਸਹਤ੍ਥਂ ਉਪਚਾਰਂ ਓਕ੍ਕਮਿਤ੍ਵਾ ਅਜਾਨਨ੍ਤਸ੍ਸੇਵ ਗਚ੍ਛਤਿ, ਰਤ੍ਤਿਚ੍ਛੇਦੋ ਹੋਤਿ ਏਵ, ਵਤ੍ਤਭੇਦੋ ਪਨ ਨਤ੍ਥਿ. ਆਰੋਚਿਤਕਾਲਤੋ ਪਟ੍ਠਾਯ ਚ ਏਕਂ ਭਿਕ੍ਖੁਂ ਠਪੇਤ੍ਵਾ ਸੇਸੇਹਿ ਸਤਿ ਕਰਣੀਯੇ ਗਨ੍ਤੁਮ੍ਪਿ ਵਟ੍ਟਤਿ. ਅਰੁਣੇ ਉਟ੍ਠਿਤੇ ਤਸ੍ਸ ਭਿਕ੍ਖੁਸ੍ਸ ਸਨ੍ਤਿਕੇ ਵਤ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਸੋਪਿ ਕੇਨਚਿ ਕਮ੍ਮੇਨ ਪੁਰੇਅਰੁਣੇਯੇਵ ਗਚ੍ਛਤਿ, ਅਞ੍ਞਂ ਵਿਹਾਰਤੋ ਨਿਕ੍ਖਨ੍ਤਂ ਵਾ ਆਗਨ੍ਤੁਕਂ ਵਾ ਯਂ ਪਠਮਂ ਪਸ੍ਸਤਿ, ਤਸ੍ਸ ਸਨ੍ਤਿਕੇ ਆਰੋਚੇਤ੍ਵਾ ਵਤ੍ਤਂ ਨਿਕ੍ਖਿਪਿਤਬ੍ਬਂ. ਅਯਞ੍ਚ ਯਸ੍ਮਾ ਗਣਸ੍ਸ ਆਰੋਚੇਤ੍ਵਾ ਭਿਕ੍ਖੂਨਞ੍ਚ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਵ ਵਸਿ, ਤੇਨਸ੍ਸ ਊਨੇ ਗਣੇ ਚਰਣਦੋਸੋ ਵਾ ਵਿਪ੍ਪਵਾਸੋ ਵਾ ਨ ਹੋਤਿ. ਸਚੇ ਨ ਕਞ੍ਚਿ ਪਸ੍ਸਤਿ, ਵਿਹਾਰਂ ਗਨ੍ਤ੍ਵਾ ਅਤ੍ਤਨਾ ਸਦ੍ਧਿਂ ਗਤਭਿਕ੍ਖੂਸੁ ਏਕਸ੍ਸ ਸਨ੍ਤਿਕੇ ਨਿਕ੍ਖਿਪਿਤਬ੍ਬਨ੍ਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨ ‘‘ਯਂ ਪਠਮਂ ਪਸ੍ਸਤਿ, ਤਸ੍ਸ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ; ਅਯਂ ਨਿਕ੍ਖਿਤ੍ਤਵਤ੍ਤਸ੍ਸ ਪਰਿਹਾਰੋ’’ਤਿ ਆਹ.

ਏਵਂ ਛਾਰਤ੍ਤਂ ਮਾਨਤ੍ਤਂ ਅਖਣ੍ਡਂ ਚਰਿਤ੍ਵਾ ਯਤ੍ਥ ਸਿਯਾ ਵੀਸਤਿਗਣੋ ਭਿਕ੍ਖੁਸਙ੍ਘੋ, ਤਤ੍ਥ ਸੋ ਭਿਕ੍ਖੁ ਅਬ੍ਭੇਤਬ੍ਬੋ. ਅਬ੍ਭੇਨ੍ਤੇਹਿ ਚ ਪਠਮਂ ਅਬ੍ਭਾਨਾਰਹੋ ਕਾਤਬ੍ਬੋ. ਅਯਞ੍ਹਿ ਨਿਕ੍ਖਿਤ੍ਤਵਤ੍ਤਤ੍ਤਾ ਪਕਤਤ੍ਤਟ੍ਠਾਨੇ ਠਿਤੋ, ਪਕਤਤ੍ਤਸ੍ਸ ਚ ਅਬ੍ਭਾਨਂ ਕਾਤੁਂ ਨ ਵਟ੍ਟਤਿ, ਤਸ੍ਮਾ ਵਤ੍ਤਂ ਸਮਾਦਾਪੇਤਬ੍ਬੋ. ਵਤ੍ਤੇ ਸਮਾਦਿਨ੍ਨੇ ਅਬ੍ਭਾਨਾਰਹੋ ਹੋਤਿ. ਤੇਨਾਪਿ ਵਤ੍ਤਂ ਸਮਾਦਿਯਿਤ੍ਵਾ ਆਰੋਚੇਤ੍ਵਾ ਅਬ੍ਭਾਨਂ ਯਾਚਿਤਬ੍ਬਂ. ਅਨਿਕ੍ਖਿਤ੍ਤਵਤ੍ਤਸ੍ਸ ਪੁਨ ਵਤ੍ਤਸਮਾਦਾਨਕਿਚ੍ਚਂ ਨਤ੍ਥਿ. ਸੋ ਹਿ ਛਾਰਤ੍ਤਾਤਿਕ੍ਕਮੇਨੇਵ ਅਬ੍ਭਾਨਾਰਹੋ ਹੋਤਿ, ਤਸ੍ਮਾ ਸੋ ਅਬ੍ਭੇਤਬ੍ਬੋ. ਤਤ੍ਰ ਯ੍ਵਾਯਂ ‘‘ਏਵਞ੍ਚ ਪਨ, ਭਿਕ੍ਖਵੇ, ਅਬ੍ਭੇਤਬ੍ਬੋ’’ਤਿ ਪਾਲ਼ਿਯਂਯੇਵ ਅਬ੍ਭਾਨਵਿਧਿ ਵੁਤ੍ਤੋ, ਅਯਞ੍ਚ ਏਕਾਪਤ੍ਤਿਵਸੇਨ ਵੁਤ੍ਤੋ. ਸਚੇ ਪਨ ਦ੍ਵੇ ਤਿਸ੍ਸੋ ਸਮ੍ਬਹੁਲਾ ਵਾ ਏਕਵਤ੍ਥੁਕਾ ਵਾ ਨਾਨਾਵਤ੍ਥੁਕਾ ਵਾ ਆਪਤ੍ਤਿਯੋ ਹੋਨ੍ਤਿ, ਤਾਸਂ ਵਸੇਨ ਕਮ੍ਮਵਾਚਾ ਕਾਤਬ੍ਬਾ. ਏਵਂ ਅਪ੍ਪਟਿਚ੍ਛਨ੍ਨਮਾਨਤ੍ਤਂ ਦਾਤਬ੍ਬਂ. ਪਟਿਚ੍ਛਨ੍ਨਮਾਨਤ੍ਤਂ ਪਨ ਯਸ੍ਮਾ ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਪਰਿਵੁਤ੍ਥਪਰਿਵਾਸਸ੍ਸ ਦਾਤਬ੍ਬਂ ਹੋਤਿ, ਤਸ੍ਮਾ ਨਂ ਪਰਿਵਾਸਕਥਾਯਂਯੇਵ ਕਥਯਿਸ੍ਸਾਮ.

ਪਰਿਵਾਸਕਥਾ

੧੦੨. ‘‘ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਉਦਾਯਿਸ੍ਸ ਭਿਕ੍ਖੁਨੋ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸ੍ਸਟ੍ਠਿਯਾ ਏਕਾਹਪਟਿਚ੍ਛਨ੍ਨਾਯ ਏਕਾਹਪਰਿਵਾਸਂ ਦੇਤੂ’’ਤਿਆਦਿਨਾ ਨਯੇਨ ਪਾਲ਼ਿਯਂ ਅਨੇਕੇਹਿ ਆਕਾਰੇਹਿ ਪਰਿਵਾਸੋ ਚ ਮਾਨਤ੍ਤਞ੍ਚ ਵੁਤ੍ਤਂ. ਤਸ੍ਸ ਯਸ੍ਮਾ ਆਗਤਾਗਤਟ੍ਠਾਨੇ ਵਿਨਿਚ੍ਛਯੋ ਵੁਚ੍ਚਮਾਨੋ ਪਾਲ਼ਿ ਵਿਯ ਅਤਿਵਿਤ੍ਥਾਰਂ ਆਪਜ੍ਜਤਿ, ਨ ਚ ਸਕ੍ਕਾ ਹੋਤਿ ਸੁਖੇਨ ਪਰਿਗ੍ਗਹੇਤੁਂ, ਤਸ੍ਮਾ ਨਂ ਸਮੋਧਾਨੇਤ੍ਵਾ ਇਧੇਵ ਦਸ੍ਸਯਿਸ੍ਸਾਮ.

ਅਯਞ੍ਹਿ ਇਧ ਅਧਿਪ੍ਪੇਤੋ ਪਰਿਵਾਸੋ ਨਾਮ – ਪਟਿਚ੍ਛਨ੍ਨਪਰਿਵਾਸੋ, ਸੁਦ੍ਧਨ੍ਤਪਰਿਵਾਸੋ, ਸਮੋਧਾਨਪਰਿਵਾਸੋਤਿ ਤਿਵਿਧੋ ਹੋਤਿ. ਤਤ੍ਥ ਪਟਿਚ੍ਛਨ੍ਨਪਰਿਵਾਸੋ ਤਾਵ ਯਥਾਪਟਿਚ੍ਛਨ੍ਨਾਯ ਆਪਤ੍ਤਿਯਾ ਦਾਤਬ੍ਬੋ. ਕਸ੍ਸਚਿ ਹਿ ਏਕਾਹਪਟਿਚ੍ਛਨ੍ਨਾ ਆਪਤ੍ਤਿ ਹੋਤਿ ਯਥਾ ਅਯਂ ਉਦਾਯਿਤ੍ਥੇਰਸ੍ਸ, ਕਸ੍ਸਚਿ ਦ੍ਵੀਹਾਦਿਪਟਿਚ੍ਛਨ੍ਨਾ ਯਥਾ ਪਰਤੋ ਆਗਤਾ ਉਦਾਯਿਤ੍ਥੇਰਸ੍ਸੇਵ, ਕਸ੍ਸਚਿ ਏਕਾ ਆਪਤ੍ਤਿ ਹੋਤਿ ਯਥਾ ਅਯਂ, ਕਸ੍ਸਚਿ ਦ੍ਵੇ ਤਿਸ੍ਸੋ ਤਤੁਤ੍ਤਰਿ ਵਾ ਯਥਾ ਪਰਤੋ ਆਗਤਾ, ਤਸ੍ਮਾ ਪਟਿਚ੍ਛਨ੍ਨਪਰਿਵਾਸਂ ਦੇਨ੍ਤੇਨ ਪਠਮਂ ਤਾਵ ਪਟਿਚ੍ਛਨ੍ਨਭਾਵੋ ਜਾਨਿਤਬ੍ਬੋ.

ਅਯਞ੍ਹਿ ਆਪਤ੍ਤਿ ਨਾਮ ਦਸਹਾਕਾਰੇਹਿ ਪਟਿਚ੍ਛਨ੍ਨਾ ਹੋਤਿ. ਤਤ੍ਥਾਯਂ ਮਾਤਿਕਾ – ਆਪਤ੍ਤਿ ਚ ਹੋਤਿ ਆਪਤ੍ਤਿਸਞ੍ਞੀ ਚ, ਪਕਤਤ੍ਤੋ ਚ ਹੋਤਿ ਪਕਤਤ੍ਤਸਞ੍ਞੀ ਚ, ਅਨਨ੍ਤਰਾਯਿਕੋ ਚ ਹੋਤਿ ਅਨਨ੍ਤਰਾਯਿਕਸਞ੍ਞੀ ਚ, ਪਹੁ ਚ ਹੋਤਿ ਪਹੁਸਞ੍ਞੀ ਚ, ਛਾਦੇਤੁਕਾਮੋ ਚ ਹੋਤਿ ਛਾਦੇਤਿ ਚਾਤਿ.

ਤਤ੍ਥ ਆਪਤ੍ਤਿ ਚ ਹੋਤਿ ਆਪਤ੍ਤਿਸਞ੍ਞੀ ਚਾਤਿ ਯਂ ਆਪਨ੍ਨੋ, ਸਾ ਆਪਤ੍ਤਿਯੇਵ ਹੋਤਿ. ਸੋਪਿ ਚ ਤਤ੍ਥ ਆਪਤ੍ਤਿਸਞ੍ਞੀਯੇਵ. ਇਤਿ ਜਾਨਨ੍ਤੋ ਛਾਦੇਤਿ, ਛਨ੍ਨਾਵ ਹੋਤਿ. ਅਥ ਪਨਾਯਂ ਤਤ੍ਥ ਅਨਾਪਤ੍ਤਿਸਞ੍ਞੀ, ਅਚ੍ਛਨ੍ਨਾ ਹੋਤਿ, ਅਨਾਪਤ੍ਤਿ ਪਨ ਆਪਤ੍ਤਿਸਞ੍ਞਾਯਪਿ ਅਨਾਪਤ੍ਤਿਸਞ੍ਞਾਯਪਿ ਛਾਦੇਨ੍ਤੇਨਾਪਿ ਅਚ੍ਛਾਦਿਤਾਵ ਹੋਤਿ. ਲਹੁਕਂ ਵਾ ਗਰੁਕਾਤਿ ਗਰੁਕਂ ਵਾ ਲਹੁਕਾਤਿ ਛਾਦੇਤਿ, ਅਲਜ੍ਜਿਪਕ੍ਖੇ ਤਿਟ੍ਠਤਿ, ਆਪਤ੍ਤਿ ਪਨ ਅਚ੍ਛਨ੍ਨਾ ਹੋਤਿ. ਗਰੁਕਂ ਲਹੁਕਾਤਿ ਮਞ੍ਞਮਾਨੋ ਦੇਸੇਤਿ, ਨੇਵ ਦੇਸਿਤਾ ਹੋਤਿ, ਨ ਛਨ੍ਨਾ. ਗਰੁਕਂ ਗਰੁਕਾਤਿ ਞਤ੍ਵਾ ਛਾਦੇਤਿ, ਛਨ੍ਨਾ ਹੋਤਿ. ਗਰੁਕਲਹੁਕਭਾਵਂ ਨ ਜਾਨਾਤਿ, ਆਪਤ੍ਤਿਂ ਛਾਦੇਮੀਤਿ ਛਾਦੇਤਿ, ਛਨ੍ਨਾਵ ਹੋਤਿ.

ਪਕਤਤ੍ਤੋਤਿ ਤਿਵਿਧਂ ਉਕ੍ਖੇਪਨੀਯਕਮ੍ਮਂ ਅਕਤੋ – ਸੋ ਚੇ ਪਕਤਤ੍ਤਸਞ੍ਞੀ ਹੁਤ੍ਵਾ ਛਾਦੇਤਿ, ਛਨ੍ਨਾ ਹੋਤਿ. ਅਥ ‘‘ਮਯ੍ਹਂ ਸਙ੍ਘੇਨ ਕਮ੍ਮਂ ਕਤ’’ਨ੍ਤਿ ਅਪਕਤਤ੍ਤਸਞ੍ਞੀ ਹੁਤ੍ਵਾ ਛਾਦੇਤਿ, ਅਚ੍ਛਨ੍ਨਾ ਹੋਤਿ. ਅਪਕਤਤ੍ਤੇਨ ਪਕਤਤ੍ਤਸਞ੍ਞਿਨਾ ਵਾ ਅਪਕਤਤ੍ਤਸਞ੍ਞਿਨਾ ਵਾ ਛਾਦਿਤਾਪਿ ਅਚ੍ਛਨ੍ਨਾਵ ਹੋਤਿ. ਵੁਤ੍ਤਮ੍ਪਿ ਚੇਤਂ –

‘‘ਆਪਜ੍ਜਤਿ ਗਰੁਕਂ ਸਾਵਸੇਸਂ,

ਛਾਦੇਤਿ ਅਨਾਦਰਿਯਂ ਪਟਿਚ੍ਚ;

ਨ ਭਿਕ੍ਖੁਨੀ ਨੋ ਚ ਫੁਸੇਯ੍ਯ ਵਜ੍ਜਂ,

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੮੧);

ਅਯਞ੍ਹਿ ਪਞ੍ਹੋ ਉਕ੍ਖਿਤ੍ਤਕੇਨ ਕਥਿਤੋ.

ਅਨਨ੍ਤਰਾਯਿਕੋਤਿ ਯਸ੍ਸ ਦਸਸੁ ਅਨ੍ਤਰਾਯੇਸੁ ਏਕੋਪਿ ਨਤ੍ਥਿ, ਸੋ ਚੇ ਅਨਨ੍ਤਰਾਯਿਕਸਞ੍ਞੀ ਹੁਤ੍ਵਾ ਛਾਦੇਤਿ, ਛਨ੍ਨਾ ਹੋਤਿ. ਸਚੇਪਿ ਸੋ ਭੀਰੁਕਜਾਤਿਕਤਾਯ ਅਨ੍ਧਕਾਰੇ ਅਮਨੁਸ੍ਸਚਣ੍ਡਮਿਗਭਯੇਨ ਅਨ੍ਤਰਾਯਿਕਸਞ੍ਞੀ ਹੁਤ੍ਵਾ ਛਾਦੇਤਿ, ਅਚ੍ਛਨ੍ਨਾਵ ਹੋਤਿ. ਯਸ੍ਸ ਹਿ ਪਬ੍ਬਤਵਿਹਾਰੇ ਵਸਨ੍ਤਸ੍ਸ ਕਨ੍ਦਰਂ ਵਾ ਨਦਿਂ ਵਾ ਅਤਿਕ੍ਕਮਿਤ੍ਵਾ ਆਰੋਚੇਤਬ੍ਬਂ ਹੋਤਿ, ਅਨ੍ਤਰਾਮਗ੍ਗੇ ਚ ਚਣ੍ਡਵਾਲ਼ਅਮਨੁਸ੍ਸਾਦਿਭਯਂ ਅਤ੍ਥਿ, ਮਗ੍ਗੇ ਅਜਗਰਾ ਨਿਪਜ੍ਜਨ੍ਤਿ, ਨਦੀ ਪੂਰਾ ਹੋਤਿ, ਏਕਸ੍ਮਿਂ ਪਨ ਸਤਿਯੇਵ ਅਨ੍ਤਰਾਯੇ ਅਨ੍ਤਰਾਯਿਕਸਞ੍ਞੀ ਹੁਤ੍ਵਾ ਛਾਦੇਤਿ, ਅਚ੍ਛਨ੍ਨਾਵ ਹੋਤਿ. ਅਨ੍ਤਰਾਯਿਕਸ੍ਸ ਪਨ ਅਨ੍ਤਰਾਯਿਕਸਞ੍ਞਾਯ ਵਾ ਅਨਨ੍ਤਰਾਯਿਕਸਞ੍ਞਾਯ ਵਾ ਛਾਦਯਤੋ ਅਚ੍ਛਨ੍ਨਾਵ ਹੋਤਿ.

ਪਹੂਤਿ ਯੋ ਸਕ੍ਕੋਤਿ ਭਿਕ੍ਖੁਨੋ ਸਨ੍ਤਿਕਂ ਗਨ੍ਤੁਞ੍ਚੇਵ ਆਰੋਚੇਤੁਞ੍ਚ; ਸੋ ਚੇ ਪਹੁਸਞ੍ਞੀ ਹੁਤ੍ਵਾ ਛਾਦੇਤਿ, ਛਨ੍ਨਾ ਹੋਤਿ. ਸਚਸ੍ਸ ਮੁਖੇ ਅਪ੍ਪਮਤ੍ਤਕੋ ਗਣ੍ਡੋ ਵਾ ਹੋਤਿ, ਹਨੁਕਵਾਤੋ ਵਾ ਵਿਜ੍ਝਤਿ, ਦਨ੍ਤੋ ਵਾ ਰੁਜ੍ਜਤਿ, ਭਿਕ੍ਖਾ ਵਾ ਮਨ੍ਦਾ ਲਦ੍ਧਾ ਹੋਤਿ, ਤਾਵਤਕੇਨ ਪਨ ਨੇਵ ਵਤ੍ਤੁਂ ਨ ਸਕ੍ਕੋਤਿ ਨ ਗਨ੍ਤੁਂ; ਅਪਿਚ ਖੋ ਨ ਸਕ੍ਕੋਮੀਤਿ ਸਞ੍ਞੀ ਹੋਤਿ, ਅਯਂ ਪਹੁ ਹੁਤ੍ਵਾ ਅਪ੍ਪਹੁਸਞ੍ਞੀ ਨਾਮ. ਇਮਿਨਾ ਛਾਦਿਤਾਪਿ ਅਚ੍ਛਾਦਿਤਾ. ਅਪ੍ਪਹੁਨਾ ਪਨ ਵਤ੍ਤੁਂ ਵਾ ਗਨ੍ਤੁਂ ਵਾ ਅਸਮਤ੍ਥੇਨ ਪਹੁਸਞ੍ਞਿਨਾ ਵਾ ਅਪ੍ਪਹੁਸਞ੍ਞਿਨਾ ਵਾ ਛਾਦਿਤਾ ਹੋਤੁ, ਅਚ੍ਛਾਦਿਤਾਵ.

ਛਾਦੇਤੁਕਾਮੋ ਚ ਹੋਤਿ ਛਾਦੇਤਿ ਚਾਤਿ ਇਦਂ ਉਤ੍ਤਾਨਤ੍ਥਮੇਵ. ਸਚੇ ਪਨ ਛਾਦੇਸ੍ਸਾਮੀਤਿ ਧੁਰਨਿਕ੍ਖੇਪਂ ਕਤ੍ਵਾ ਪੁਰੇਭਤ੍ਤੇ ਵਾ ਪਚ੍ਛਾਭਤ੍ਤੇ ਵਾ ਪਠਮਯਾਮਾਦੀਸੁ ਵਾ ਲਜ੍ਜਿਧਮ੍ਮਂ ਓਕ੍ਕਮਿਤ੍ਵਾ ਅਨ੍ਤੋਅਰੁਣੇਯੇਵ ਆਰੋਚੇਤਿ, ਅਯਂ ਛਾਦੇਤੁਕਾਮੋ ਨ ਛਾਦੇਤਿ ਨਾਮ.

ਯਸ੍ਸ ਪਨ ਅਭਿਕ੍ਖੁਕੇ ਠਾਨੇ ਵਸਨ੍ਤਸ੍ਸ ਆਪਤ੍ਤਿਂ ਆਪਜ੍ਜਿਤ੍ਵਾ ਸਭਾਗਸ੍ਸ ਭਿਕ੍ਖੁਨੋ ਆਗਮਨਂ ਆਗਮੇਨ੍ਤਸ੍ਸ ਸਭਾਗਸਨ੍ਤਿਕਂ ਵਾ ਗਚ੍ਛਨ੍ਤਸ੍ਸ ਅਦ੍ਧਮਾਸੋਪਿ ਮਾਸੋਪਿ ਅਤਿਕ੍ਕਮਤਿ, ਅਯਂ ਨ ਛਾਦੇਤੁਕਾਮੋ ਛਾਦੇਤਿ ਨਾਮ, ਅਯਮ੍ਪਿ ਅਚ੍ਛਨ੍ਨਾਵ ਹੋਤਿ.

ਯੋ ਪਨ ਆਪਨ੍ਨਮਤ੍ਤੋਵ ਅਗ੍ਗਿਂ ਅਕ੍ਕਨ੍ਤਪੁਰਿਸੋ ਵਿਯ ਸਹਸਾ ਅਪਕ੍ਕਮਿਤ੍ਵਾ ਸਭਾਗਟ੍ਠਾਨਂ ਗਨ੍ਤ੍ਵਾ ਆਵਿ ਕਰੋਤਿ, ਅਯਂ ਨ ਛਾਦੇਤੁਕਾਮੋਵ ਨ ਛਾਦੇਤਿ ਨਾਮ. ਸਚੇ ਪਨ ਸਭਾਗਂ ਦਿਸ੍ਵਾਪਿ ‘‘ਅਯਂ ਮੇ ਉਪਜ੍ਝਾਯੋ ਵਾ ਆਚਰਿਯੋ ਵਾ’’ਤਿ ਲਜ੍ਜਾਯ ਨਾਰੋਚੇਤਿ, ਛਨ੍ਨਾਵ ਹੋਤਿ ਆਪਤ੍ਤਿ. ਉਪਜ੍ਝਾਯਾਦਿਭਾਵੋ ਹਿ ਇਧ ਅਪ੍ਪਮਾਣਂ ਅਵੇਰਿਸਭਾਗਮਤ੍ਤਮੇਵ ਪਮਾਣਂ, ਤਸ੍ਮਾ ਅਵੇਰਿਸਭਾਗਸ੍ਸ ਸਨ੍ਤਿਕੇ ਆਰੋਚੇਤਬ੍ਬਾ.

ਯੋ ਪਨ ਵਿਸਭਾਗੋ ਹੋਤਿ ਸੁਤ੍ਵਾ ਪਕਾਸੇਤੁਕਾਮੋ, ਏਵਰੂਪਸ੍ਸ ਉਪਜ੍ਝਾਯਸ੍ਸਾਪਿ ਸਨ੍ਤਿਕੇ ਨ ਆਰੋਚੇਤਬ੍ਬਾ. ਤਤ੍ਥ ਪੁਰੇਭਤ੍ਤਂ ਵਾ ਆਪਤ੍ਤਿਂ ਆਪਨ੍ਨੋ ਹੋਤੁ ਪਚ੍ਛਾਭਤ੍ਤਂ ਵਾ, ਦਿਵਾ ਵਾ ਰਤ੍ਤਿਂ ਵਾ ਯਾਵ ਅਰੁਣਂ ਨ ਉਗ੍ਗਚ੍ਛਤਿ ਤਾਵ ਆਰੋਚੇਤਬ੍ਬਂ. ਉਦ੍ਧਸ੍ਤੇ ਅਰੁਣੇ ਪਟਿਚ੍ਛਨ੍ਨਾ ਹੋਤਿ, ਪਟਿਚ੍ਛਾਦਨਪਚ੍ਚਯਾ ਚ ਦੁਕ੍ਕਟਂ ਆਪਜ੍ਜਤਿ. ਸਭਾਗਸਙ੍ਘਾਦਿਸੇਸਂ ਆਪਨ੍ਨਸ੍ਸ ਪਨ ਸਨ੍ਤਿਕੇ ਆਵਿ ਕਾਤੁਂ ਨ ਵਟ੍ਟਤਿ. ਸਚੇ ਆਵਿ ਕਰੋਤਿ, ਆਪਤ੍ਤਿ ਆਵਿਕਤਾ ਹੋਤਿ, ਦੁਕ੍ਕਟਾ ਪਨ ਨ ਮੁਚ੍ਚਤਿ, ਤਸ੍ਮਾ ਸੁਦ੍ਧਸ੍ਸ ਸਨ੍ਤਿਕੇ ਆਵਿਕਾਤਬ੍ਬਾ. ਆਵਿਕਰੋਨ੍ਤੋ ਚ ‘‘ਤੁਯ੍ਹਂ ਸਨ੍ਤਿਕੇ ਏਕਂ ਆਪਤ੍ਤਿਂ ਆਵਿਕਰੋਮੀ’’ਤਿ ਵਾ ‘‘ਆਚਿਕ੍ਖਾਮੀ’’ਤਿ ਵਾ ‘‘ਆਰੋਚੇਮੀ’’ਤਿ ਵਾ ‘‘ਮਮ ਏਕਂ ਆਪਤ੍ਤਿਂ ਆਪਨ੍ਨਭਾਵਂ ਜਾਨਾਹੀ’’ਤਿ ਵਾ ਵਦਤੁ, ‘‘ਏਕਂ ਗਰੁਕਾਪਤ੍ਤਿਂ ਆਵਿਕਰੋਮੀ’’ਤਿਆਦਿਨਾ ਵਾ ਨਯੇਨ ਵਦਤੁ, ਸਬ੍ਬੇਹਿਪਿ ਆਕਾਰੇਹਿ ਅਪ੍ਪਟਿਚ੍ਛਨ੍ਨਾਵ ਹੋਤੀਤਿ ਕੁਰੁਨ੍ਦਿਯਂ ਵੁਤ੍ਤਂ. ਸਚੇ ਪਨ ਲਹੁਕਾਪਤ੍ਤਿਂ ਆਵਿਕਰੋਮੀਤਿਆਦਿਨਾ ਨਯੇਨ ਵਦਤਿ, ਪਟਿਚ੍ਛਨ੍ਨਾ ਹੋਤਿ, ਵਤ੍ਥੁਂ ਆਰੋਚੇਤਿ, ਆਪਤ੍ਤਿਂ ਆਰੋਚੇਤਿ, ਉਭਯਂ ਆਰੋਚੇਤਿ, ਤਿਵਿਧੇਨਾਪਿ ਆਰੋਚਿਤਾਵ ਹੋਤਿ. ਇਤਿ ਇਮਾਨਿ ਦਸ ਕਾਰਣਾਨਿ ਉਪਲਕ੍ਖੇਤ੍ਵਾ ਪਟਿਚ੍ਛਨ੍ਨਪਰਿਵਾਸਂ ਦੇਨ੍ਤੇਨ ਪਠਮਮੇਵ ਪਟਿਚ੍ਛਨ੍ਨਭਾਵੋ ਜਾਨਿਤਬ੍ਬੋ.

ਤਤੋ ਪਟਿਚ੍ਛਨ੍ਨਦਿਵਸੇ ਚ ਆਪਤ੍ਤਿਯੋ ਚ ਸਲ੍ਲਕ੍ਖੇਤ੍ਵਾ ਸਚੇ ਏਕਾਹਪਟਿਚ੍ਛਨ੍ਨਾ ਹੋਤਿ – ‘‘ਅਹਂ, ਭਨ੍ਤੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਸਞ੍ਚੇਤਨਿਕਂ ਸੁਕ੍ਕਵਿਸ੍ਸਟ੍ਠਿਂ ਏਕਾਹਪਟਿਚ੍ਛਨ੍ਨ’’ਨ੍ਤਿ ਏਵਂ ਯਾਚਾਪੇਤ੍ਵਾ ਇਧ ਵੁਤ੍ਤਨਯੇਨੇਵ ਕਮ੍ਮਵਾਚਂ ਵਤ੍ਵਾ ਪਰਿਵਾਸੋ ਦਾਤਬ੍ਬੋ. ਅਥ ਦ੍ਵੀਹਤੀਹਾਦਿਪਟਿਚ੍ਛਨ੍ਨਾ ਹੋਤਿ, ਦ੍ਵੀਹਪਟਿਚ੍ਛਨ੍ਨਂ ਤੀਹਪਟਿਚ੍ਛਨ੍ਨਂ ਚਤੂਹਪਟਿਚ੍ਛਨ੍ਨਂ ਪਞ੍ਚਾਹਪਟਿਚ੍ਛਨ੍ਨਂ ਛਾਹਪਟਿਚ੍ਛਨ੍ਨਂ ਸਤ੍ਤਾਹਪਟਿਚ੍ਛਨ੍ਨਂ ਅਟ੍ਠਾਹਪਟਿਚ੍ਛਨ੍ਨਂ ਨਵਾਹਪਟਿਚ੍ਛਨ੍ਨਂ ਦਸਾਹਪਟਿਚ੍ਛਨ੍ਨਂ ਏਕਾਦਸਾਹਪਟਿਚ੍ਛਨ੍ਨਂ ਦ੍ਵਾਦਸਾਹਪਅਚ੍ਛਨ੍ਨਂ ਤੇਰਸਾਹਪਟਿਚ੍ਛਨ੍ਨਂ ਚੁਦ੍ਦਸਾਹਪਟਿਚ੍ਛਨ੍ਨਨ੍ਤਿ ਏਵਂ ਯਾਵ ਚੁਦ੍ਦਸ ਦਿਵਸਾਨਿ ਦਿਵਸਵਸੇਨ ਯੋਜਨਾ ਕਾਤਬ੍ਬਾ. ਪਞ੍ਚਦਸ ਦਿਵਸਾਨਿ ਪਟਿਚ੍ਛਨ੍ਨਾਯ ਪਕ੍ਖਪਟਿਚ੍ਛਨ੍ਨਨ੍ਤਿ ਵਤ੍ਵਾ ਯੋਜਨਾ ਕਾਤਬ੍ਬਾ. ਤਤੋ ਯਾਵ ਏਕੂਨਤਿਂਸਤਿਮੋ ਦਿਵਸੋ, ਤਾਵ ਅਤਿਰੇਕਪਕ੍ਖਪਟਿਚ੍ਛਨ੍ਨਨ੍ਤਿ.

ਤਤੋ ਮਾਸਪਟਿਚ੍ਛਨ੍ਨਂ ਅਤਿਰੇਕਮਾਸਪਟਿਚ੍ਛਨ੍ਨਂ ਦ੍ਵੇਮਾਸਪਟਿਚ੍ਛਨ੍ਨਂ ਅਤਿਰੇਕਦ੍ਵੇਮਾਸਪਟਿਚ੍ਛਨ੍ਨਂ ਤੇਮਾਸਪਟਿਚ੍ਛਨ੍ਨਂ ਅਤਿਰੇਕਤੇਮਾਸਪਟਿਚ੍ਛਨ੍ਨਂ ਚਤੁਮਾਸਪਟਿਚ੍ਛਨ੍ਨਂ ਅਤਿਰੇਕਚਤੁਮਾਸਪਟਿਚ੍ਛਨ੍ਨਂ ਪਞ੍ਚਮਾਸਪਟਿਚ੍ਛਨ੍ਨਂ ਅਤਿਰੇਕਪਞ੍ਚਮਾਸਪਟਿਚ੍ਛਨ੍ਨਂ ਛਮਾਸਪਟਿਚ੍ਛਨ੍ਨਂ ਅਤਿਰੇਕਛਮਾਸਪਟਿਚ੍ਛਨ੍ਨਂ ਸਤ੍ਤਮਾਸਪਟਿਚ੍ਛਨ੍ਨਂ ਅਤਿਰੇਕਸਤ੍ਤਮਾਸਪਟਿਚ੍ਛਨ੍ਨਂ ਅਟ੍ਠਮਾਸਪਟਿਚ੍ਛਨ੍ਨਂ ਅਤਿਰੇਕਅਟ੍ਠਮਾਸਪਟਿਚ੍ਛਨ੍ਨਂ ਨਵਮਾਸਪਟਿਚ੍ਛਨ੍ਨਂ ਅਤਿਰੇਕਨਵਮਾਸਪਟਿਚ੍ਛਨ੍ਨਂ ਦਸਮਾਸਪਟਿਚ੍ਛਨ੍ਨਂ ਅਤਿਰੇਕਦਸਮਾਸਪਟਿਚ੍ਛਨ੍ਨਂ ਏਕਾਦਸਮਾਸਪਟਿਚ੍ਛਨ੍ਨਂ ਅਤਿਰੇਕਏਕਾਦਸਮਾਸਪਟਿਚ੍ਛਨ੍ਨਨ੍ਤਿ ਏਵਂ ਯੋਜਨਾ ਕਾਤਬ੍ਬਾ. ਸਂਵਚ੍ਛਰੇ ਪਰਿਪੁਣ੍ਣੇ ਏਕਸਂਵਚ੍ਛਰਪਟਿਚ੍ਛਨ੍ਨਨ੍ਤਿ. ਤਤੋ ਪਰਂ ਅਤਿਰੇਕਏਕਸਂਵਚ੍ਛਰ… ਦ੍ਵੇਸਂਵਚ੍ਛਰ… ਅਤਿਰੇਕਦ੍ਵੇਸਂਵਚ੍ਛਰ… ਤਿਸਂਵਚ੍ਛਰ… ਅਤਿਰਕੇਤਿਸਂਵਚ੍ਛਰ… ਚਤੁਸਂਵਚ੍ਛਰ… ਅਤਿਰੇਕਚਤੁਸਂਵਚ੍ਛਰ… ਪਞ੍ਚਸਂਵਚ੍ਛਰ… ਅਤਿਰੇਕਪਞ੍ਚਸਂਵਚ੍ਛਰਪਟਿਚ੍ਛਨ੍ਨਨ੍ਤਿ ਏਵਂ ਯਾਵ ਸਟ੍ਠਿਸਂਵਚ੍ਛਰ… ਅਤਿਰੇਕਸਟ੍ਠਿਸਂਵਚ੍ਛਰਪਟਿਚ੍ਛਨ੍ਨਨ੍ਤਿ ਵਾ ਤਤੋ ਵਾ ਭਿਯ੍ਯੋਪਿ ਵਤ੍ਵਾ ਯੋਜਨਾ ਕਾਤਬ੍ਬਾ.

ਸਚੇ ਪਨ ਦ੍ਵੇ ਤਿਸ੍ਸੋ ਤਤੁਤ੍ਤਰਿ ਵਾ ਆਪਤ੍ਤਿਯੋ ਹੋਨ੍ਤਿ, ਯਥਾ ਇਧ ਏਕਂ ਆਪਤ੍ਤਿਨ੍ਤਿ ਵੁਤ੍ਤਂ; ਏਵਂ ਦ੍ਵੇ ਆਪਤ੍ਤਿਯੋ ਤਿਸ੍ਸੋ ਆਪਤ੍ਤਿਯੋਤਿ ਵਤ੍ਤਬ੍ਬਂ. ਤਤੋ ਪਰਂ ਪਨ ਸਤਂ ਵਾ ਹੋਤੁ ਸਹਸ੍ਸਂ ਵਾ, ਸਮ੍ਬਹੁਲਾਤਿ ਵਤ੍ਤੁਂ ਵਟ੍ਟਤਿ. ਨਾਨਾਵਤ੍ਥੁਕਾਸੁਪਿ ‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ – ਏਕਂ ਸੁਕ੍ਕਵਿਸ੍ਸਟ੍ਠਿਂ, ਏਕਂ ਕਾਯਸਂਸਗ੍ਗਂ, ਏਕਂ ਦੁਟ੍ਠੁਲ੍ਲਵਾਚਂ, ਏਕਂ ਅਤ੍ਤਕਾਮਂ, ਏਕਂ ਸਞ੍ਚਰਿਤ੍ਤਂ, ਏਕਾਹਪਟਿਚ੍ਛਨ੍ਨਾਯੋ’’ਤਿ ਏਵਂ ਗਣਨਵਸੇਨ ਵਾ ‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਨਾਨਾਵਤ੍ਥੁਕਾਯੋ ਏਕਾਹਪਟਿਚ੍ਛਨ੍ਨਾਯੋ’’ਤਿ ਏਵਂ ਵਤ੍ਥੁਕਿਤ੍ਤਨਵਸੇਨ ਵਾ, ‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਏਕਾਹਪਟਿਚ੍ਛਨ੍ਨਾਯੋ’’ਤਿ ਏਵਂ ਨਾਮਮਤ੍ਤਵਸੇਨ ਵਾ ਯੋਜਨਾ ਕਾਤਬ੍ਬਾ.

ਤਤ੍ਥ ਨਾਮਂ ਦੁਵਿਧਂ – ਸਜਾਤਿਸਾਧਾਰਣਞ੍ਚ ਸਬ੍ਬਸਾਧਾਰਣਞ੍ਚ. ਤਤ੍ਥ ਸਙ੍ਘਾਦਿਸੇਸੋਤਿ ਸਜਾਤਿਸਾਧਾਰਣਂ, ਆਪਤ੍ਤੀਤਿ ਸਬ੍ਬਸਾਧਾਰਣਂ; ਤਸ੍ਮਾ ‘‘ਸਮ੍ਬਹੁਲਾ ਆਪਤ੍ਤਿਯੋ ਆਪਜ੍ਜਿਂ ਏਕਾਹਪਟਿਚ੍ਛਨ੍ਨਾਯੋ’’ਤਿ ਏਵਂ ਸਬ੍ਬਸਾਧਾਰਣਨਾਮਵਸੇਨਪਿ ਵਤ੍ਤੁਂ ਵਟ੍ਟਤਿ. ਇਦਞ੍ਹਿ ਸਬ੍ਬਮ੍ਪਿ ਪਰਿਵਾਸਾਦਿਕਂ ਵਿਨਯਕਮ੍ਮਂ ਵਤ੍ਥੁਵਸੇਨ ਗੋਤ੍ਤਵਸੇਨ ਨਾਮਵਸੇਨ ਆਪਤ੍ਤਿਵਸੇਨ ਚ ਕਾਤੁਂ ਵਟ੍ਟਤਿਯੇਵ.

ਤਤ੍ਥ ‘‘ਸੁਕ੍ਕਵਿਸ੍ਸਟ੍ਠੀ’’ਤਿ ਵਤ੍ਥੁ ਚੇਵ ਗੋਤ੍ਤਞ੍ਚ. ‘‘ਸਙ੍ਘਾਦਿਸੇਸੋ’’ਤਿ ਨਾਮਞ੍ਚੇਵ ਆਪਤ੍ਤਿ ਚ. ‘‘ਕਾਯਸਂਸਗ੍ਗੋ’’ਤਿ ਵਤ੍ਥੁ ਚੇਵ ਗੋਤ੍ਤਞ੍ਚ. ‘‘ਸਙ੍ਘਾਦਿਸੇਸੋ’’ਤਿ ਨਾਮਞ੍ਚੇਵ ਆਪਤ੍ਤਿ ਚ, ਤਤ੍ਥ ‘‘ਸੁਕ੍ਕਵਿਸ੍ਸਟ੍ਠਿਂ ਕਾਯਸਂਸਗ੍ਗ’’ਨ੍ਤਿਆਦਿਨਾ ਵਚਨੇਨਾਪਿ ‘‘ਨਾਨਾਵਤ੍ਥੁਕਾਯੋ’’ਤਿ ਵਚਨੇਨਾਪਿ ਵਤ੍ਥੁ ਚੇਵ ਗੋਤ੍ਤਞ੍ਚ ਗਹਿਤਂ ਹੋਤਿ. ‘‘ਸਙ੍ਘਾਦਿਸੇਸੋ’’ਤਿ ਵਚਨੇਨਾਪਿ ‘‘ਆਪਤ੍ਤਿਯੋ’’ਤਿ ਵਚਨੇਨਾਪਿ ਨਾਮਞ੍ਚੇਵ ਆਪਤ੍ਤਿ ਚ ਗਹਿਤਾ ਹੋਤਿ. ਇਧ ਪਨ ਏਕਂ ਆਪਤ੍ਤਿਂ ਆਪਜ੍ਜਿਂ ਸਞ੍ਚੇਤਨਿਕਂ ‘‘ਸੁਕ੍ਕਵਿਸ੍ਸਟ੍ਠਿ’’ਨ੍ਤਿ ਨਾਮਮ੍ਪਿ ਵਤ੍ਥੁਗੋਤ੍ਤਾਨਿਪਿ ਗਹਿਤਾਨੇਵ. ਯਥਾ ਚ ਇਧ ‘‘ਅਯਂ ਉਦਾਯਿ ਭਿਕ੍ਖੂ’’ਤਿ ਵੁਤ੍ਤਂ; ਏਵਂ ਯੋ ਯੋ ਆਪਨ੍ਨੋ ਹੋਤਿ, ਤਸ੍ਸ ਤਸ੍ਸ ਨਾਮਂ ਗਹੇਤ੍ਵਾ ‘‘ਅਯਂ ਇਤ੍ਥਨ੍ਨਾਮੋ ਭਿਕ੍ਖੂ’’ਤਿ ਕਮ੍ਮਵਾਚਾ ਕਾਤਬ੍ਬਾ.

ਕਮ੍ਮਵਾਚਾਪਰਿਯੋਸਾਨੇ ਚ ਤੇਨ ਭਿਕ੍ਖੁਨਾ ਮਾਲ਼ਕਸੀਮਾਯਮੇਵ ‘‘ਪਰਿਵਾਸਂ ਸਮਾਦਿਯਾਮਿ, ਵਤ੍ਤਂ ਸਮਾਦਿਯਾਮੀ’’ਤਿ ਵੁਤ੍ਤਨਯੇਨੇਵ ਵਤ੍ਤਂ ਸਮਾਦਾਤਬ੍ਬਂ. ਸਮਾਦਿਯਿਤ੍ਵਾ ਤਤ੍ਥੇਵ ਸਙ੍ਘਸ੍ਸ ਆਰੋਚੇਤਬ੍ਬਂ, ਆਰੋਚੇਨ੍ਤੇਨ ਚ ਏਵਂ ਆਰੋਚੇਤਬ੍ਬਂ –

‘‘ਅਹਂ, ਭਨ੍ਤੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਸਞ੍ਚੇਤਨਿਕਂ ਸੁਕ੍ਕਵਿਸ੍ਸਟ੍ਠਿਂ ਏਕਾਹਪਟਿਚ੍ਛਨ੍ਨਂ, ਸੋਹਂ ਸਙ੍ਘਂ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸ੍ਸਟ੍ਠਿਯਾ ਏਕਾਹਪਟਿਚ੍ਛਨ੍ਨਾਯ ਏਕਾਹਪਰਿਵਾਸਂ ਯਾਚਿਂ, ਤਸ੍ਸ ਮੇ ਸਙ੍ਘੋ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸ੍ਸਟ੍ਠਿਯਾ ਏਕਾਹਪਟਿਚ੍ਛਨ੍ਨਾਯ ਏਕਾਹਪਰਿਵਾਸਂ ਅਦਾਸਿ, ਸੋਹਂ ਪਰਿਵਸਾਮਿ – ‘ਵੇਦਯਾਮਹਂ, ਭਨ੍ਤੇ, ਵੇਦਯਤੀ’ਤਿ ਮਂ ਸਙ੍ਘੋ ਧਾਰੇਤੂ’’ਤਿ.

ਇਮਞ੍ਚ ਪਨਤ੍ਥਂ ਗਹੇਤ੍ਵਾ ਯਾਯ ਕਾਯਚਿ ਭਾਸਾਯ ਆਰੋਚੇਤੁਂ ਵਟ੍ਟਤਿਯੇਵ. ਆਰੋਚੇਤ੍ਵਾ ਸਚੇ ਨਿਕ੍ਖਿਪਿਤੁਕਾਮੋ, ਵੁਤ੍ਤਨਯੇਨੇਵ ਸਙ੍ਘਮਜ੍ਝੇ ਨਿਕ੍ਖਿਪਿਤਬ੍ਬਂ. ਮਾਲ਼ਕਤੋ ਭਿਕ੍ਖੂਸੁ ਨਿਕ੍ਖਨ੍ਤੇਸੁ ਏਕਸ੍ਸਾਪਿ ਸਨ੍ਤਿਕੇ ਨਿਕ੍ਖਿਪਿਤੁਂ ਵਟ੍ਟਤਿ. ਮਾਲ਼ਕਤੋ ਨਿਕ੍ਖਮਿਤ੍ਵਾ ਸਤਿਂ ਪਟਿਲਭਨ੍ਤੇਨ ਸਹਗਚ੍ਛਨ੍ਤਸ੍ਸ ਸਨ੍ਤਿਕੇ ਨਿਕ੍ਖਿਪਿਤਬ੍ਬਂ. ਸਚੇ ਸੋਪਿ ਪਕ੍ਕਨ੍ਤੋ, ਅਞ੍ਞਸ੍ਸ ਯਸ੍ਸ ਮਾਲ਼ਕੇ ਨਾਰੋਚਿਤਂ, ਤਸ੍ਸ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ. ਆਰੋਚੇਨ੍ਤੇਨ ਚ ਅਵਸਾਨੇ ‘‘ਵੇਦਯਤੀਤਿ ਮਂ ਆਯਸ੍ਮਾ ਧਾਰੇਤੂ’’ਤਿ ਵਤ੍ਤਬ੍ਬਂ. ਦ੍ਵਿਨ੍ਨਂ ਆਰੋਚੇਨ੍ਤੇਨ ‘‘ਆਯਸ੍ਮਨ੍ਤਾ ਧਾਰੇਨ੍ਤੂ’’ਤਿ, ਤਿਣ੍ਣਂ ਆਰੋਚੇਨ੍ਤੇਨ ‘‘ਆਯਸ੍ਮਨ੍ਤੋ ਧਾਰੇਨ੍ਤੂ’’ਤਿ ਵਤ੍ਤਬ੍ਬਂ. ਨਿਕ੍ਖਿਤ੍ਤਕਾਲਤੋ ਪਟ੍ਠਾਯ ਪਕਤਤ੍ਤਟ੍ਠਾਨੇ ਤਿਟ੍ਠਤਿ.

ਸਚੇ ਅਪ੍ਪਭਿਕ੍ਖੁਕੋ ਵਿਹਾਰੋ ਹੋਤਿ, ਸਭਾਗਾ ਭਿਕ੍ਖੂ ਵਸਨ੍ਤਿ, ਵਤ੍ਤਂ ਅਨਿਕ੍ਖਿਪਿਤ੍ਵਾ ਵਿਹਾਰੇਯੇਵ ਰਤ੍ਤਿਪਰਿਗ੍ਗਹੋ ਕਾਤਬ੍ਬੋ. ਅਥ ਨ ਸਕ੍ਕਾ ਸੋਧੇਤੁਂ, ਵੁਤ੍ਤਨਯੇਨੇਵ ਵਤ੍ਤਂ ਨਿਕ੍ਖਿਪਿਤ੍ਵਾ ਪਚ੍ਚੂਸਸਮਯੇ ਏਕੇਨ ਭਿਕ੍ਖੁਨਾ ਸਦ੍ਧਿਂ ਮਾਨਤ੍ਤਵਣ੍ਣਨਾਯਂ ਵੁਤ੍ਤਨਯੇਨੇਵ ਉਪਚਾਰਸੀਮਂ ਅਤਿਕ੍ਕਮਿਤ੍ਵਾ ਮਹਾਮਗ੍ਗਾ ਓਕ੍ਕਮ੍ਮ ਪਟਿਚ੍ਛਨ੍ਨੇ ਠਾਨੇ ਨਿਸੀਦਿਤ੍ਵਾ ਅਨ੍ਤੋਅਰੁਣੇਯੇਵ ਵੁਤ੍ਤਨਯੇਨੇਵ ਵਤ੍ਤਂ ਸਮਾਦਿਯਿਤ੍ਵਾ ਤਸ੍ਸ ਭਿਕ੍ਖੁਨੋ ਪਰਿਵਾਸੋ ਆਰੋਚੇਤਬ੍ਬੋ. ਆਰੋਚੇਨ੍ਤੇਨ ਸਚੇ ਨਵਕਤਰੋ ਹੋਤਿ, ‘‘ਆਵੁਸੋ’’ਤਿ ਵਤ੍ਤਬ੍ਬਂ. ਸਚੇ ਵੁਡ੍ਢਤਰੋ, ‘‘ਭਨ੍ਤੇ’’ਤਿ ਵਤ੍ਤਬ੍ਬਂ. ਸਚੇ ਅਞ੍ਞੋ ਕੋਚਿ ਭਿਕ੍ਖੁ ਕੇਨਚਿਦੇਵ ਕਰਣੀਯੇਨ ਤਂ ਠਾਨਂ ਆਗਚ੍ਛਤਿ, ਸਚੇ ਏਸ ਤਂ ਪਸ੍ਸਤਿ, ਸਦ੍ਦਂ ਵਾਸ੍ਸ ਸੁਣਾਤਿ, ਆਰੋਚੇਤਬ੍ਬਂ; ਅਨਾਰੋਚੇਨ੍ਤਸ੍ਸ ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦੋ ਚ. ਅਥ ਦ੍ਵਾਦਸਹਤ੍ਥਂ ਉਪਚਾਰਂ ਓਕ੍ਕਮਿਤ੍ਵਾ ਅਜਾਨਨ੍ਤਸ੍ਸੇਵ ਗਚ੍ਛਤਿ, ਰਤ੍ਤਿਚ੍ਛੇਦੋਯੇਵ ਹੋਤਿ, ਵਤ੍ਤਭੇਦੋ ਪਨ ਨਤ੍ਥਿ.

ਉਗ੍ਗਤੇ ਅਰੁਣੇ ਵਤ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਸੋ ਭਿਕ੍ਖੁ ਕੇਨਚਿਦੇਵ ਕਰਣੀਯੇਨ ਪਕ੍ਕਨ੍ਤੋ ਹੋਤਿ, ਯਂ ਅਞ੍ਞਂ ਸਬ੍ਬਪਠਮਂ ਪਸ੍ਸਤਿ, ਤਸ੍ਸ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ. ਸਚੇ ਪਨ ਕਞ੍ਚਿ ਨ ਪਸ੍ਸਤਿ, ਵਿਹਾਰਂ ਗਨ੍ਤ੍ਵਾ ਅਤ੍ਤਨਾ ਸਦ੍ਧਿਂ ਗਤਭਿਕ੍ਖੁਸ੍ਸ ਸਨ੍ਤਿਕੇ ਨਿਕ੍ਖਿਪਿਤਬ੍ਬਨ੍ਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨ ‘‘ਯਂ ਪਠਮਂ ਪਸ੍ਸਤਿ, ਤਸ੍ਸ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ, ਅਯਂ ਨਿਕ੍ਖਿਤ੍ਤਵਤ੍ਤਸ੍ਸ ਪਰਿਹਾਰੋ’’ਤਿ ਆਹ.

ਏਵਂ ਯਤ੍ਤਕਾਨਿ ਦਿਵਸਾਨਿ ਆਪਤ੍ਤਿ ਪਟਿਚ੍ਛਨ੍ਨਾ ਹੋਤਿ, ਤਤ੍ਤਕਾਨਿ ਤਤੋ ਅਧਿਕਤਰਾਨਿ ਵਾ ਕੁਕ੍ਕੁਚ੍ਚਵਿਨੋਦਨਤ੍ਥਾਯ ਪਰਿਵਸਿਤ੍ਵਾ ਸਙ੍ਘਂ ਉਪਸਙ੍ਕਮਿਤ੍ਵਾ ਵਤ੍ਤਂ ਸਮਾਦਿਯਿਤ੍ਵਾ ਮਾਨਤ੍ਤਂ ਯਾਚਿਤਬ੍ਬਂ. ਅਯਞ੍ਹਿ ਵਤ੍ਤੇ ਸਮਾਦਿਨ੍ਨੇ ਏਵ ਮਾਨਤ੍ਤਾਰਹੋ ਹੋਤਿ ਨਿਕ੍ਖਿਤ੍ਤਵਤ੍ਤੇਨ ਪਰਿਵੁਤ੍ਥਤ੍ਤਾ. ਅਨਿਕ੍ਖਿਤ੍ਤਵਤ੍ਤਸ੍ਸ ਪਨ ਪੁਨ ਸਮਾਦਾਨਕਿਚ੍ਚਂ ਨਤ੍ਥਿ, ਸੋ ਹਿ ਪਟਿਚ੍ਛਨ੍ਨਦਿਵਸਾਤਿਕ੍ਕਮੇਨੇਵ ਮਾਨਤ੍ਤਾਰਹੋ ਹੋਤਿ, ਤਸ੍ਮਾ ਤਸ੍ਸ ਮਾਨਤ੍ਤਂ ਦਾਤਬ੍ਬਮੇਵ. ਇਦਂ ਪਟਿਚ੍ਛਨ੍ਨਮਾਨਤ੍ਤਂ ਨਾਮ. ਤਂ ਦੇਨ੍ਤੇਨ ਸਚੇ ਏਕਾਪਤ੍ਤਿ ਹੋਤਿ, ਪਾਲ਼ਿਯਂ ਵੁਤ੍ਤਨਯੇਨੇਵ ਦਾਤਬ੍ਬਂ. ਅਥ ਦ੍ਵੇ ਵਾ ਤਿਸ੍ਸੋ ਵਾ ‘‘ਸੋਹਂ ਪਰਿਵੁਤ੍ਥਪਰਿਵਾਸੋ ਸਙ੍ਘਂ ਦ੍ਵਿਨ੍ਨਂ ਆਪਤ੍ਤੀਨਂ ਤਿਸ੍ਸਨ੍ਨਂ ਆਪਤ੍ਤੀਨਂ ਏਕਾਹਪਟਿਚ੍ਛਨ੍ਨਾਨਂ ਛਾਰਤ੍ਤਂ ਮਾਨਤ੍ਤਂ ਯਾਚਾਮੀ’’ਤਿ ਪਰਿਵਾਸੇ ਵੁਤ੍ਤਨਯੇਨੇਵ ਆਪਤ੍ਤਿਯੋ ਚ ਦਿਵਸੇ ਚ ਸਲ੍ਲਕ੍ਖੇਤ੍ਵਾ ਯੋਜਨਾ ਕਾਤਬ੍ਬਾ.

ਅਪ੍ਪਟਿਚ੍ਛਨ੍ਨਾਪਤ੍ਤਿਂ ਪਟਿਚ੍ਛਨ੍ਨਾਪਤ੍ਤਿਯਾ ਸਮੋਧਾਨੇਤ੍ਵਾਪਿ ਦਾਤੁਂ ਵਟ੍ਟਤਿ. ਕਥਂ? ਪਟਿਚ੍ਛਨ੍ਨਾਯ ਏਕਾਹਪਰਿਵਾਸਂ ਵਸਿਤ੍ਵਾ –

‘‘ਅਹਂ, ਭਨ੍ਤੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਸਞ੍ਚੇਤਨਿਕਂ ਸੁਕ੍ਕਵਿਸ੍ਸਟ੍ਠਿਂ ਏਕਾਹਪਟਿਚ੍ਛਨ੍ਨਂ, ਸੋਹਂ ਸਙ੍ਘਂ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸ੍ਸਟ੍ਠਿਯਾ ਏਕਾਹਪਟਿਚ੍ਛਨ੍ਨਾਯ ਏਕਾਹਪਰਿਵਾਸਂ ਯਾਚਿਂ, ਤਸ੍ਸ ਮੇ ਸਙ੍ਘੋ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸ੍ਸਟ੍ਠਿਯਾ ਏਕਾਹਪਟਿਚ੍ਛਨ੍ਨਾਯ ਏਕਾਹਪਰਿਵਾਸਂ ਅਦਾਸਿ, ਸੋਹਂ ਪਰਿਵੁਤ੍ਥਪਰਿਵਾਸੋ. ਅਹਂ, ਭਨ੍ਤੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਸਞ੍ਚੇਤਨਿਕਂ ਸੁਕ੍ਕਵਿਸ੍ਸਟ੍ਠਿਂ ਅਪ੍ਪਟਿਚ੍ਛਨ੍ਨਂ. ਸੋਹਂ, ਭਨ੍ਤੇ, ਸਙ੍ਘਂ ਤਾਸਂ ਆਪਤ੍ਤੀਨਂ ਸਞ੍ਚੇਤਨਿਕਾਨਂ ਸੁਕ੍ਕਵਿਸ੍ਸਟ੍ਠੀਨਂ ਪਟਿਚ੍ਛਨ੍ਨਾਯ ਚ ਅਪ੍ਪਟਿਚ੍ਛਨ੍ਨਾਯ ਚ ਛਾਰਤ੍ਤਂ ਮਾਨਤ੍ਤਂ ਯਾਚਾਮੀ’’ਤਿ.

ਅਥਸ੍ਸ ਤਦਨੁਰੂਪਂ ਕਮ੍ਮਵਾਚਂ ਕਤ੍ਵਾ ਮਾਨਤ੍ਤਂ ਦਾਤਬ੍ਬਂ. ਸਚੇ ਪਟਿਚ੍ਛਨ੍ਨਾ ਦ੍ਵੇ, ਅਪ੍ਪਟਿਚ੍ਛਨ੍ਨਾ ਏਕਾ ‘‘ਪਟਿਚ੍ਛਨ੍ਨਾਨਞ੍ਚ ਅਪ੍ਪਟਿਚ੍ਛਨ੍ਨਾਯ ਚਾ’’ਤਿ ਵਤ੍ਤਬ੍ਬਂ. ਅਥ ਪਟਿਚ੍ਛਨ੍ਨਾ ਏਕਾ, ਅਪ੍ਪਟਿਚ੍ਛਨ੍ਨਾ ਦ੍ਵੇ, ‘‘ਪਟਿਚ੍ਛਨ੍ਨਾਯ ਚ ਅਪ੍ਪਟਿਚ੍ਛਨ੍ਨਾਨਞ੍ਚਾ’’ਤਿ ਵਤ੍ਤਬ੍ਬਂ. ਸਚੇ ਪਟਿਚ੍ਛਨ੍ਨਾਪਿ ਦ੍ਵੇ, ਅਪ੍ਪਟਿਚ੍ਛਨ੍ਨਾਪਿ ਦ੍ਵੇ, ‘‘ਪਟਿਚ੍ਛਨ੍ਨਾਨਞ੍ਚ ਅਪ੍ਪਟਿਚ੍ਛਨ੍ਨਾਨਞ੍ਚਾ’’ਤਿ ਵਤ੍ਤਬ੍ਬਂ. ਸਬ੍ਬਤ੍ਥ ਅਨੁਰੂਪਂ ਕਮ੍ਮਵਾਚਂ ਕਤ੍ਵਾ ਮਾਨਤ੍ਤਂ ਦਾਤਬ੍ਬਂ. ਚਿਣ੍ਣਮਾਨਤ੍ਤਸ੍ਸ ਚ ਤਦਨੁਰੂਪਮੇਵ ਕਮ੍ਮਵਾਚਂ ਕਤ੍ਵਾ ਅਬ੍ਭਾਨਂ ਕਾਤਬ੍ਬਂ. ਇਧ ਪਨ ਏਕਾਪਤ੍ਤਿਵਸੇਨ ਵੁਤ੍ਤਂ. ਇਤਿ ਯਂ ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਪਰਿਵਾਸਾਵਸਾਨੇ ਮਾਨਤ੍ਤਂ ਦਿਯ੍ਯਤਿ, ਇਦਂ ਪਟਿਚ੍ਛਨ੍ਨਮਾਨਤ੍ਤਂ ਨਾਮ. ਏਵਮੇਤ੍ਥ ਏਕੇਨੇਵ ਯੋਜਨਾਮੁਖੇਨ ਪਟਿਚ੍ਛਨ੍ਨਪਰਿਵਾਸੋ ਚ ਪਟਿਚ੍ਛਨ੍ਨਮਾਨਤ੍ਤਞ੍ਚ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਪਕ੍ਖਮਾਨਤ੍ਤਂ ਸਮੋਧਾਨਮਾਨਤ੍ਤਞ੍ਚ ਅਵਸੇਸਪਰਿਵਾਸਕਥਾਵਸਾਨੇ ਕਥਯਿਸ੍ਸਾਮ.

ਸੁਦ੍ਧਨ੍ਤਪਰਿਵਾਸੋ ਸਮੋਧਾਨਪਰਿਵਾਸੋਤਿ ਹਿ ਦ੍ਵੇ ਪਰਿਵਾਸਾ ਅਵਸੇਸਾ. ਤਤ੍ਥ ‘‘ਸੁਦ੍ਧਨ੍ਤਪਰਿਵਾਸੋ’’ ਨਾਮ ਪਰਤੋ ਅਧਮ੍ਮਿਕਮਾਨਤ੍ਤਚਾਰਾਵਸਾਨੇ ‘‘ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਨ੍ਨੋ ਹੋਤਿ, ਆਪਤ੍ਤਿਪਰਿਯਨ੍ਤਂ ਨ ਜਾਨਾਤਿ, ਰਤ੍ਤਿਪਰਿਯਨ੍ਤਂ ਨ ਜਾਨਾਤੀ’’ਤਿ ਇਮਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਪਰਿਵਾਸੋ. ਸੋ ਦੁਵਿਧੋ – ਚੂਲ਼ਸੁਦ੍ਧਨ੍ਤੋ, ਮਹਾਸੁਦ੍ਧਨ੍ਤੋਤਿ. ਦੁਵਿਧੋਪਿ ਚੇਸ ਰਤ੍ਤਿਪਰਿਚ੍ਛੇਦਂ ਸਕਲਂ ਵਾ ਏਕਚ੍ਚਂ ਵਾ ਅਜਾਨਨ੍ਤਸ੍ਸ ਚ ਅਸ੍ਸਰਨ੍ਤਸ੍ਸ ਚ ਤਤ੍ਥ ਵੇਮਤਿਕਸ੍ਸ ਚ ਦਾਤਬ੍ਬੋ. ਆਪਤ੍ਤਿਪਰਿਯਨ੍ਤਂ ਪਨ ਏਤ੍ਤਕਾ ਅਹਂ ਆਪਤ੍ਤਿਯੋ ਆਪਨ੍ਨੋਤਿ ਜਾਨਾਤੁ ਵਾ ਮਾ ਵਾ, ਅਕਾਰਣਮੇਤਂ.

ਤਤ੍ਥ ਯੋ ਉਪਸਮ੍ਪਦਤੋ ਪਟ੍ਠਾਯ ਅਨੁਲੋਮਕ੍ਕਮੇਨ ਵਾ ਆਰੋਚਿਤਦਿਵਸਤੋ ਪਟ੍ਠਾਯ ਪਟਿਲੋਮਕ੍ਕਮੇਨ ਵਾ ‘‘ਅਸੁਕਞ੍ਚ ਅਸੁਕਞ੍ਚ ਦਿਵਸਂ ਵਾ ਪਕ੍ਖਂ ਵਾ ਮਾਸਂ ਵਾ ਸਂਵਚ੍ਛਰਂ ਵਾ ਤਵ ਸੁਦ੍ਧਭਾਵਂ ਜਾਨਾਸੀ’’ਤਿ ਪੁਚ੍ਛਿਯਮਾਨੋ ‘‘ਆਮ, ਭਨ੍ਤੇ, ਜਾਨਾਮਿ, ਏਤ੍ਤਕਂ ਨਾਮ ਕਾਲਂ ਅਹਂ ਸੁਦ੍ਧੋ’’ਤਿ ਵਦਤਿ, ਤਸ੍ਸ ਦਿਨ੍ਨੋ ਸੁਦ੍ਧਨ੍ਤਪਰਿਵਾਸੋ ‘‘ਚੂਲ਼ਸੁਦ੍ਧਨ੍ਤੋ’’ਤਿ ਵੁਚ੍ਚਤਿ.

ਤਂ ਗਹੇਤ੍ਵਾ ਪਰਿਵਸਨ੍ਤੇਨ ਯਤ੍ਤਕਂ ਕਾਲਂ ਅਤ੍ਤਨੋ ਸੁਦ੍ਧਿਂ ਜਾਨਾਤਿ, ਤਤ੍ਤਕਂ ਅਪਨੇਤ੍ਵਾ ਅਵਸੇਸਂ ਮਾਸਂ ਵਾ ਦ੍ਵੇਮਾਸਂ ਵਾ ਪਰਿਵਸਿਤਬ੍ਬਂ. ਸਚੇ ਮਾਸਮਤ੍ਤਂ ਅਸੁਦ੍ਧੋਮ੍ਹੀਤਿ ਸਲ੍ਲਕ੍ਖੇਤ੍ਵਾ ਅਗ੍ਗਹੇਸਿ ਪਰਿਵਸਨ੍ਤੋ ਚ ਪੁਨ ਅਞ੍ਞਂ ਮਾਸਂ ਸਰਤਿ, ਤਮ੍ਪਿ ਮਾਸਂ ਪਰਿਵਸਿਤਬ੍ਬਮੇਵ. ਪੁਨ ਪਰਿਵਾਸਦਾਨਕਿਚ੍ਚਂ ਨਤ੍ਥਿ. ਅਥ ਦ੍ਵੇਮਾਸਂ ਅਸੁਦ੍ਧੋਮ੍ਹੀਤਿ ਸਲ੍ਲਕ੍ਖੇਤ੍ਵਾ ਅਗ੍ਗਹੇਸਿ, ਪਰਿਵਸਨ੍ਤੋ ਚ ਮਾਸਮਤ੍ਤਮੇਵਾਹਂ ਅਸੁਦ੍ਧੋਮ੍ਹੀਤਿ ਸਨ੍ਨਿਟ੍ਠਾਨਂ ਕਰੋਤਿ, ਮਾਸਮੇਵ ਪਰਿਵਸਿਤਬ੍ਬਂ. ਪੁਨ ਪਰਿਵਾਸਦਾਨਕਿਚ੍ਚਂ ਨਤ੍ਥਿ. ਅਯਞ੍ਹਿ ਸੁਦ੍ਧਨ੍ਤਪਰਿਵਾਸੋ ਨਾਮ ਉਦ੍ਧਮ੍ਪਿ ਆਰੋਹਤਿ, ਹੇਟ੍ਠਾਪਿ ਓਰੋਹਤਿ, ਇਦਮਸ੍ਸ ਲਕ੍ਖਣਂ. ਅਞ੍ਞਸ੍ਮਿਂ ਪਨ ਆਪਤ੍ਤਿਵੁਟ੍ਠਾਨੇ ਇਦਂ ਲਕ੍ਖਣਂ – ਯੋ ਅਪ੍ਪਟਿਚ੍ਛਨ੍ਨਂ ਆਪਤ੍ਤਿਂ ਪਟਿਚ੍ਛਨ੍ਨਾਤਿ ਵਿਨਯਕਮ੍ਮਂ ਕਰੋਤਿ, ਤਸ੍ਸ ਆਪਤ੍ਤਿ ਵੁਟ੍ਠਾਤਿ. ਯੋ ਪਟਿਚ੍ਛਨ੍ਨਂ ਅਪ੍ਪਟਿਚ੍ਛਨ੍ਨਾਤਿ ਵਿਨਯਕਮ੍ਮਂ ਕਰੋਤਿ, ਤਸ੍ਸ ਨ ਵੁਟ੍ਠਾਤਿ. ਅਚਿਰਪਟਿਚ੍ਛਨ੍ਨਂ ਚਿਰਪਟਿਚ੍ਛਨ੍ਨਾਤਿ ਕਰੋਨ੍ਤਸ੍ਸਾਪਿ ਵੁਟ੍ਠਾਤਿ. ਚਿਰਪਟਿਚ੍ਛਨ੍ਨਂ ਅਚਿਰਪਟਿਚ੍ਛਨ੍ਨਾਤਿ ਕਰੋਨ੍ਤਸ੍ਸ ਨ ਵੁਟ੍ਠਾਤਿ. ਏਕਂ ਆਪਤ੍ਤਿਂ ਆਪਜ੍ਜਿਤ੍ਵਾ ਸਮ੍ਬਹੁਲਾਤਿ ਕਰੋਨ੍ਤਸ੍ਸਾਪਿ ਵੁਟ੍ਠਾਤਿ, ਏਕਂ ਵਿਨਾ ਸਮ੍ਬਹੁਲਾਨਂ ਅਭਾਵਤੋ. ਸਮ੍ਬਹੁਲਾ ਪਨ ਆਪਜ੍ਜਿਤ੍ਵਾ ਏਕਂ ਆਪਜ੍ਜਿਨ੍ਤਿ ਕਰੋਨ੍ਤਸ੍ਸ ਨ ਵੁਟ੍ਠਾਤਿ.

ਯੋ ਪਨ ਯਥਾਵੁਤ੍ਤੇਨ ਅਨੁਲੋਮਪਟਿਲੋਮਨਯੇਨ ਪੁਚ੍ਛਿਯਮਾਨੋਪਿ ਰਤ੍ਤਿਪਰਿਯਨ੍ਤਂ ਨ ਜਾਨਾਤਿ ਨੇਵ ਸਰਤਿ ਵੇਮਤਿਕੋ ਵਾ ਹੋਤਿ, ਤਸ੍ਸ ਦਿਨ੍ਨੋ ਸੁਦ੍ਧਨ੍ਤਪਰਿਵਾਸੋ ‘‘ਮਹਾਸੁਦ੍ਧਨ੍ਤੋ’’ਤਿ ਵੁਚ੍ਚਤਿ. ਤਂ ਗਹੇਤ੍ਵਾ ਗਹਿਤਦਿਵਸਤੋ ਪਟ੍ਠਾਯ ਯਾਵ ਉਪਸਮ੍ਪਦਦਿਵਸੋ, ਤਾਵ ਰਤ੍ਤਿਯੋ ਗਣੇਤ੍ਵਾ ਪਰਿਵਸਿਤਬ੍ਬਂ. ਅਯਂ ਉਦ੍ਧਂ ਨਾਰੋਹਤਿ, ਹੇਟ੍ਠਾ ਪਨ ਓਰੋਹਤਿ. ਤਸ੍ਮਾ ਸਚੇ ਪਰਿਵਸਨ੍ਤੋ ਰਤ੍ਤਿਪਰਿਚ੍ਛੇਦੇ ਸਨ੍ਨਿਟ੍ਠਾਨਂ ਕਰੋਤਿ, ਮਾਸੋ ਵਾ ਸਂਵਚ੍ਛਰੋ ਵਾ ਮਯ੍ਹਂ ਆਪਨ੍ਨਸ੍ਸਾਤਿ ਮਾਸਂ ਵਾ ਸਂਵਚ੍ਛਰਂ ਵਾ ਪਰਿਵਸਿਤਬ੍ਬਂ. ਪਰਿਵਾਸਯਾਚਨਦਾਨਲਕ੍ਖਣਂ ਪਨੇਤ੍ਥ ਪਰਤੋ ਪਾਲ਼ਿਯਂ ਆਗਤਨਯੇਨੇਵ ਵੇਦਿਤਬ੍ਬਂ. ਕਮ੍ਮਵਾਚਾਪਰਿਯੋਸਾਨੇ ਵਤ੍ਤਸਮਾਦਾਨਮਾਨਤ੍ਤਅਬ੍ਭਾਨਾਨਿ ਵੁਤ੍ਤਨਯਾਨੇਵ. ਅਯਂ ਸੁਦ੍ਧਨ੍ਤਪਰਿਵਾਸੋ ਨਾਮ.

‘‘ਸਮੋਧਾਨਪਰਿਵਾਸੋ’’ ਨਾਮ ਤਿਵਿਧੋ ਹੋਤਿ – ਓਧਾਨਸਮੋਧਾਨੋ, ਅਗ੍ਘਸਮੋਧਾਨੋ, ਮਿਸ੍ਸਕਸਮੋਧਾਨੋਤਿ. ਤਤ੍ਥ ‘‘ਓਧਾਨਸਮੋਧਾਨੋ’’ ਨਾਮ – ਅਨ੍ਤਰਾਪਤ੍ਤਿਂ ਆਪਜ੍ਜਿਤ੍ਵਾ ਪਟਿਚ੍ਛਾਦੇਨ੍ਤਸ੍ਸ ਪਰਿਵੁਤ੍ਥਦਿਵਸੇ ਓਧੁਨਿਤ੍ਵਾ ਮਕ੍ਖੇਤ੍ਵਾ ਪੁਰਿਮਾਯ ਆਪਤ੍ਤਿਯਾ ਮੂਲਦਿਵਸਪਰਿਚ੍ਛੇਦੇ ਪਚ੍ਛਾ ਆਪਨ੍ਨਂ ਆਪਤ੍ਤਿਂ ਸਮੋਦਹਿਤ੍ਵਾ ਦਾਤਬ੍ਬਪਰਿਵਾਸੋ ਵੁਚ੍ਚਤਿ. ਸੋ ਪਰਤੋ ‘‘ਤੇਨ ਹਿ ਭਿਕ੍ਖਵੇ ਸਙ੍ਘੋ ਉਦਾਯਿਂ ਭਿਕ੍ਖੁਂ ਅਨ੍ਤਰਾ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸ੍ਸਟ੍ਠਿਯਾ ਪਞ੍ਚਾਹਪਟਿਚ੍ਛਨ੍ਨਾਯ ਮੂਲਾਯ ਪਟਿਕਸ੍ਸਿਤ੍ਵਾ ਪੁਰਿਮਾਯ ਆਪਤ੍ਤਿਯਾ ਸਮੋਧਾਨਪਰਿਵਾਸਂ ਦੇਤੂ’’ਤਿ ਇਤੋ ਪਟ੍ਠਾਯ ਵਿਤ੍ਥਾਰਤੋ ਪਾਲ਼ਿਯਂਯੇਵ ਆਗਤੋ.

ਅਯਂ ਪਨੇਤ੍ਥ ਵਿਨਿਚ੍ਛਯੋ – ਯੋ ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਪਰਿਵਾਸਂ ਗਹੇਤ੍ਵਾ ਪਰਿਵਸਨ੍ਤੋ ਵਾ ਮਾਨਤ੍ਤਾਰਹੋ ਵਾ ਮਾਨਤ੍ਤਂ ਚਰਨ੍ਤੋ ਵਾ ਅਬ੍ਭਾਨਾਰਹੋ ਵਾ ਅਞ੍ਞਂ ਆਪਤ੍ਤਿਂ ਆਪਜ੍ਜਿਤ੍ਵਾ ਪੁਰਿਮਾਯ ਆਪਤ੍ਤਿਯਾ ਸਮਾ ਵਾ ਊਨਤਰਾ ਵਾ ਰਤ੍ਤਿਯੋ ਪਟਿਚ੍ਛਾਦੇਤਿ, ਤਸ੍ਸ ਮੂਲਾਯਪਟਿਕਸ੍ਸਨੇਨ ਤੇ ਪਰਿਵੁਤ੍ਥਦਿਵਸੇ ਚ ਮਾਨਤ੍ਤਚਿਣ੍ਣਦਿਵਸੇ ਚ ਸਬ੍ਬੇ ਓਧੁਨਿਤ੍ਵਾ ਅਦਿਵਸੇ ਕਤ੍ਵਾ ਪਚ੍ਛਾ ਆਪਨ੍ਨਾਪਤ੍ਤਿਂ ਮੂਲਾਪਤ੍ਤਿਯਂ ਸਮੋਧਾਯ ਪਰਿਵਾਸੋ ਦਾਤਬ੍ਬੋ. ਤੇਨ ਸਚੇ ਮੂਲਾਪਤ੍ਤਿ ਪਕ੍ਖਪਟਿਚ੍ਛਨ੍ਨਾ, ਅਨ੍ਤਰਾਪਤ੍ਤਿ ਊਨਕਪਕ੍ਖਪਟਿਚ੍ਛਨ੍ਨਾ, ਪੁਨ ਪਕ੍ਖਮੇਵ ਪਰਿਵਾਸੋ ਪਰਿਵਸਿਤਬ੍ਬੋ. ਅਥਾਪਿ ਅਨ੍ਤਰਾਪਤ੍ਤਿ ਪਕ੍ਖਪਟਿਚ੍ਛਨ੍ਨਾਵ ਪਕ੍ਖਮੇਵ ਪਰਿਵਸਿਤਬ੍ਬਂ. ਏਤੇਨੁਪਾਯੇਨ ਯਾਵ ਸਟ੍ਠਿਵਸ੍ਸਪਟਿਚ੍ਛਨ੍ਨਾ ਮੂਲਾਪਤ੍ਤਿ, ਤਾਵ ਵਿਨਿਚ੍ਛਯੋ ਵੇਦਿਤਬ੍ਬੋ. ਸਟ੍ਠਿਵਸ੍ਸਾਨਿ ਪਰਿਵਸਿਤ੍ਵਾ ਮਾਨਤ੍ਤਾਰਹੋ ਹੁਤ੍ਵਾਪਿ ਹਿ ਏਕਦਿਵਸਂ ਅਨ੍ਤਰਾਪਤ੍ਤਿਂ ਪਟਿਚ੍ਛਾਦੇਤ੍ਵਾ ਪੁਨਪਿ ਸਟ੍ਠਿਵਸ੍ਸਾਨਿ ਪਰਿਵਾਸਾਰਹੋ ਹੋਤਿ.

ਸਚੇ ਪਨ ਅਨ੍ਤਰਾਪਤ੍ਤਿ ਮੂਲਾਪਤ੍ਤਿਤੋ ਅਤਿਰੇਕਪਟਿਚ੍ਛਨ੍ਨਾ ਹੋਤਿ, ਤਤ੍ਥ ‘‘ਕਿਂ ਕਾਤਬ੍ਬ’’ਨ੍ਤਿ ਵੁਤ੍ਤੇ ਮਹਾਸੁਮਤ੍ਥੇਰੋ ਆਹ – ‘‘ਅਤੇਕਿਚ੍ਛੋ ਅਯਂ ਪੁਗ੍ਗਲੋ, ਅਤੇਕਿਚ੍ਛੋ ਨਾਮ ਆਵਿਕਾਰਾਪੇਤ੍ਵਾ ਵਿਸ੍ਸਜ੍ਜੇਤਬ੍ਬੋ’’ਤਿ. ਮਹਾਪਦੁਮਤ੍ਥੇਰੋ ਪਨਾਹ – ‘‘ਕਸ੍ਮਾ ਅਤੇਕਿਚ੍ਛੋ ਨਾਮ, ਨਨੁ ਅਯਂ ਸਮੁਚ੍ਚਯਕ੍ਖਨ੍ਧਕੋ ਨਾਮ ਬੁਦ੍ਧਾਨਂ ਠਿਤਕਾਲਸਦਿਸੋ, ਆਪਤ੍ਤਿ ਨਾਮ ਪਟਿਚ੍ਛਨ੍ਨਾ ਵਾ ਹੋਤੁ ਅਪ੍ਪਟਿਚ੍ਛਨ੍ਨਾ ਵਾ ਸਮਕਊਨਤਰਅਤਿਰੇਕਪਟਿਚ੍ਛਨ੍ਨਾ ਵਾ ਵਿਨਯਧਰਸ੍ਸ ਕਮ੍ਮਵਾਚਂ ਯੋਜੇਤੁਂ ਸਮਤ੍ਥਭਾਵੋਯੇਵੇਤ੍ਥ ਪਮਾਣਂ, ਤਸ੍ਮਾ ਯਾ ਅਤਿਰੇਕਪਟਿਚ੍ਛਨ੍ਨਾ ਹੋਤਿ, ਤਂ ਮੂਲਾਪਤ੍ਤਿਂ ਕਤ੍ਵਾ ਤਤ੍ਥ ਇਤਰਂ ਸਮੋਧਾਯ ਪਰਿਵਾਸੋ ਦਾਤਬ੍ਬੋ’’ਤਿ. ਅਯਂ ‘‘ਓਧਾਨਸਮੋਧਾਨੋ’’ ਨਾਮ.

‘‘ਅਗ੍ਘਸਮੋਧਾਨੋ’’ ਨਾਮ ਸਮ੍ਬਹੁਲਾਸੁ ਆਪਤ੍ਤੀਸੁ ਯਾ ਏਕਾ ਵਾ ਦ੍ਵੇ ਵਾ ਤਿਸ੍ਸੋ ਵਾ ਸਮ੍ਬਹੁਲਾ ਵਾ ਆਪਤ੍ਤਿਯੋ ਸਬ੍ਬਚਿਰਪਟਿਚ੍ਛਨ੍ਨਾਯੋ, ਤਾਸਂ ਅਗ੍ਘੇਨ ਸਮੋਧਾਯ ਤਾਸਂ ਰਤ੍ਤਿਪਰਿਚ੍ਛੇਦਵਸੇਨ ਅਵਸੇਸਾਨਂ ਊਨਤਰਪਟਿਚ੍ਛਨ੍ਨਾਨਂ ਆਪਤ੍ਤੀਨਂ ਪਰਿਵਾਸੋ ਦਿਯ੍ਯਤਿ. ਅਯਂ ਵੁਚ੍ਚਤਿ ਅਗ੍ਘਸਮੋਧਾਨੋ. ਸੋਪਿ ਪਰਤੋ ‘‘ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਨ੍ਨੋ ਹੋਤਿ, ਏਕਾ ਆਪਤ੍ਤਿ ਏਕਾਹਪਟਿਚ੍ਛਨ੍ਨਾ ਏਕਾ ਆਪਤ੍ਤਿ ਦ੍ਵੀਹਪਟਿਚ੍ਛਨ੍ਨਾ’’ਤਿਆਦਿਨਾ ਨਯੇਨ ਪਾਲ਼ਿਯਂ ਆਗਤੋਯੇਵ.

ਯਸ੍ਸ ਪਨ ਸਤਂ ਆਪਤ੍ਤਿਯੋ ਦਸਾਹਪਟਿਚ੍ਛਨ੍ਨਾ, ਅਪਰਮ੍ਪਿ ਸਤਂ ਆਪਤ੍ਤਿਯੋ ਦਸਾਹਪਟਿਚ੍ਛਨ੍ਨਾਤਿ ਏਵਂ ਦਸਕ੍ਖਤ੍ਤੁਂ ਕਤ੍ਵਾ ਆਪਤ੍ਤਿਸਹਸ੍ਸਂ ਦਿਵਸਸਤਪਟਿਚ੍ਛਨ੍ਨਂ ਹੋਤਿ, ਤੇਨ ਕਿਂ ਕਾਤਬ੍ਬਨ੍ਤਿ? ਸਬ੍ਬਂ ਸਮੋਦਹਿਤ੍ਵਾ ਦਸ ਦਿਵਸੇ ਪਰਿਵਸਿਤਬ੍ਬਂ. ਏਵਂ ਏਕੇਨੇਵ ਦਸਾਹੇਨ ਦਿਵਸਸਤਮ੍ਪਿ ਪਰਿਵਸਿਤਮੇਵ ਹੋਤਿ. ਵੁਤ੍ਤਮ੍ਪਿ ਚੇਤਂ –

‘‘ਦਸਸਤਂ ਰਤ੍ਤਿਸਤਂ, ਆਪਤ੍ਤਿਯੋ ਛਾਦਯਿਤ੍ਵਾਨ;

ਦਸ ਰਤ੍ਤਿਯੋ ਵਸਿਤ੍ਵਾਨ, ਮੁਚ੍ਚੇਯ੍ਯ ਪਾਰਿਵਾਸਿਕੋ’’ਤਿ. (ਪਰਿ. ੪੭੭);

ਅਯਂ ਅਗ੍ਘਸਮੋਧਾਨੋ ਨਾਮ.

‘‘ਮਿਸ੍ਸਕਸਮੋਧਾਨੋ’’ ਨਾਮ – ਯੋ ਨਾਨਾਵਤ੍ਥੁਕਾ ਆਪਤ੍ਤਿਯੋ ਏਕਤੋ ਕਤ੍ਵਾ ਦਿਯ੍ਯਤਿ. ਤਤ੍ਰਾਯਂ ਨਯੋ –

‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਏਕਂ ਸੁਕ੍ਕਵਿਸ੍ਸਟ੍ਠਿਂ, ਏਕਂ ਕਾਯਸਂਸਗ੍ਗਂ, ਏਕਂ ਦੁਟ੍ਠੁਲ੍ਲਵਾਚਂ, ਏਕਂ ਅਤ੍ਤਕਾਮਂ, ਏਕਂ ਸਞ੍ਚਰਿਤ੍ਤਂ, ਏਕਂ ਕੁਟਿਕਾਰਂ, ਏਕਂ ਵਿਹਾਰਕਾਰਂ, ਏਕਂ ਦੁਟ੍ਠਦੋਸਂ, ਏਕਂ ਅਞ੍ਞਭਾਗਿਯਂ, ਏਕਂ ਸਙ੍ਘਭੇਦਂ, ਏਕਂ ਭੇਦਾਨੁਵਤ੍ਤਕਂ, ਏਕਂ ਦੁਬ੍ਬਚਂ, ਏਕਂ ਕੁਲਦੂਸਕਂ, ਸੋਹਂ, ਭਨ੍ਤੇ, ਸਙ੍ਘਂ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਯਾਚਾਮੀ’’ਤਿ –

ਤਿਕ੍ਖਤ੍ਤੁਂ ਯਾਚਾਪੇਤ੍ਵਾ ਤਦਨੁਰੂਪਾਯ ਕਮ੍ਮਵਾਚਾਯ ਪਰਿਵਾਸੋ ਦਾਤਬ੍ਬੋ.

ਏਤ੍ਥ ਚ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਨਾਨਾਵਤ੍ਥੁਕਾਯੋਤਿਪਿ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਨ੍ਤਿਪਿ ਏਵਂ ਪੁਬ੍ਬੇ ਵੁਤ੍ਤਨਯੇਨ ਵਤ੍ਥੁਵਸੇਨਪਿ ਗੋਤ੍ਤਵਸੇਨਪਿ ਨਾਮਵਸੇਨਪਿ ਆਪਤ੍ਤਿਵਸੇਨਪਿ ਯੋਜੇਤ੍ਵਾ ਕਮ੍ਮਵਾਚਂ ਕਾਤੁਂ ਵਟ੍ਟਤਿਯੇਵਾਤਿ ਅਯਂ ਮਿਸ੍ਸਕਸਮੋਧਾਨੋ. ਸਬ੍ਬਪਰਿਵਾਸਕਮ੍ਮਵਾਚਾਵਸਾਨੇ ਪਨ ਨਿਕ੍ਖਿਤ੍ਤਾਨਿਕ੍ਖਿਤ੍ਤਵਤ੍ਤਾਦਿਕਥਾ ਪੁਰਿਮਨਯੇਨੇਵ ਵੇਦਿਤਬ੍ਬਾਤਿ.

ਪਰਿਵਾਸਕਥਾ ਨਿਟ੍ਠਿਤਾ.

ਇਦਾਨਿ ਯਂ ਵੁਤ੍ਤਂ ‘‘ਪਕ੍ਖਮਾਨਤ੍ਤਞ੍ਚ ਸਮੋਧਾਨਮਾਨਤ੍ਤਞ੍ਚ ਅਵਸੇਸਪਰਿਵਾਸਕਥਾਵਸਾਨੇ ਕਥਯਿਸ੍ਸਾਮਾ’’ਤਿ, ਤਸ੍ਸੋਕਾਸੋ ਸਮ੍ਪਤ੍ਤੋ, ਤਸ੍ਮਾ ਵੁਚ੍ਚਤਿ – ‘‘ਪਕ੍ਖਮਾਨਤ੍ਤ’’ਨ੍ਤਿ ਭਿਕ੍ਖੁਨਿਯਾ ਦਾਤਬ੍ਬਮਾਨਤ੍ਤਂ. ਤਂ ਪਨ ਪਟਿਚ੍ਛਨ੍ਨਾਯਪਿ ਅਪ੍ਪਟਿਚ੍ਛਨ੍ਨਾਯਪਿ ਆਪਤ੍ਤਿਯਾ ਅਡ੍ਢਮਾਸਮੇਵ ਦਾਤਬ੍ਬਂ. ਵੁਤ੍ਤਞ੍ਹੇਤਂ – ‘‘ਗਰੁਧਮ੍ਮਂ ਅਜ੍ਝਾਪਨ੍ਨਾਯ ਭਿਕ੍ਖੁਨਿਯਾ ਉਭਤੋਸਙ੍ਘੇ ਪਕ੍ਖਮਾਨਤ੍ਤਂ ਚਰਿਤਬ੍ਬ’’ਨ੍ਤਿ (ਚੂਲ਼ਵ. ੪੦੩). ਤਂ ਪਨ ਭਿਕ੍ਖੁਨੀਹਿ ਅਤ੍ਤਨੋ ਸੀਮਂ ਸੋਧੇਤ੍ਵਾ ਵਿਹਾਰਸੀਮਾਯ ਵਾ ਵਿਹਾਰਸੀਮਂ ਸੋਧੇਤੁਂ ਅਸਕ੍ਕੋਨ੍ਤੀਹਿ ਖਣ੍ਡਸੀਮਾਯ ਵਾ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਚਤੁਵਗ੍ਗਗਣਂ ਸਨ੍ਨਿਪਾਤਾਪੇਤ੍ਵਾ ਦਾਤਬ੍ਬਂ. ਸਚੇ ਏਕਾ ਆਪਤ੍ਤਿ ਹੋਤਿ ਏਕਿਸ੍ਸਾ ਵਸੇਨ, ਸਚੇ ਦ੍ਵੇ ਵਾ ਤਿਸ੍ਸੋ ਵਾ ਸਮ੍ਬਹੁਲਾ ਵਾ ਏਕਵਤ੍ਥੁਕਾ ਵਾ ਨਾਨਾਵਤ੍ਥੁਕਾ ਵਾ ਤਾਸਂ ਤਾਸਂ ਵਸੇਨ ਵਤ੍ਥੁਗੋਤ੍ਤਨਾਮਆਪਤ੍ਤੀਸੁ ਯਂ ਯਂ ਇਚ੍ਛਤਿ ਤਂ ਤਂ ਆਦਾਯ ਯੋਜਨਾ ਕਾਤਬ੍ਬਾ.

ਤਤ੍ਰਿਦਂ ਏਕਾਪਤ੍ਤਿਵਸੇਨ ਮੁਖਮਤ੍ਤਦਸ੍ਸਨਂ, ਤਾਯ ਆਪਨ੍ਨਾਯ ਭਿਕ੍ਖੁਨਿਯਾ ਭਿਕ੍ਖੁਨਿਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੁਨੀਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਹਂ, ਅਯ੍ਯੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਗਾਮਨ੍ਤਰਂ, ਸਾਹਂ, ਅਯ੍ਯੇ, ਏਕਿਸ੍ਸਾ ਆਪਤ੍ਤਿਯਾ ਗਾਮਨ੍ਤਰਾਯ ਪਕ੍ਖਮਾਨਤ੍ਤਂ ਯਾਚਾਮੀ’’ਤਿ.

ਏਵਂ ਤਿਕ੍ਖਤ੍ਤੁਂ ਯਾਚਾਪੇਤ੍ਵਾ ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ ਅਯ੍ਯੇ ਸਙ੍ਘੋ, ਅਯਂ ਇਤ੍ਥਨ੍ਨਾਮਾ ਭਿਕ੍ਖੁਨੀ ਏਕਂ ਆਪਤ੍ਤਿਂ ਆਪਜ੍ਜਿ ਗਾਮਨ੍ਤਰਂ, ਸਾ ਸਙ੍ਘਂ ਏਕਿਸ੍ਸਾ ਆਪਤ੍ਤਿਯਾ ਗਾਮਨ੍ਤਰਾਯ ਪਕ੍ਖਮਾਨਤ੍ਤਂ ਯਾਚਤਿ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਏਕਿਸ੍ਸਾ ਆਪਤ੍ਤਿਯਾ ਗਾਮਨ੍ਤਰਾਯ ਪਕ੍ਖਮਾਨਤ੍ਤਂ ਦਦੇਯ੍ਯ, ਏਸਾ ਞਤ੍ਤਿ.

‘‘ਸੁਣਾਤੁ ਮੇ ਅਯ੍ਯੇ ਸਙ੍ਘੋ, ਅਯਂ…ਪੇ… ਦੁਤਿਯਮ੍ਪਿ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ. ਸੁਣਾਤੁ ਮੇ ਅਯ੍ਯੇ ਸਙ੍ਘੋ…ਪੇ… ਦੇਤਿ… ਦਿਨ੍ਨਂ ਸਙ੍ਘੇਨ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਏਕਿਸ੍ਸਾ ਆਪਤ੍ਤਿਯਾ ਗਾਮਨ੍ਤਰਾਯ ਪਕ੍ਖਮਾਨਤ੍ਤਂ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ; ਏਵਮੇਤਂ ਧਾਰਯਾਮੀ’’ਤਿ.

ਕਮ੍ਮਵਾਚਾਪਰਿਯੋਸਾਨੇ ਵਤ੍ਤਂ ਸਮਾਦਿਯਿਤ੍ਵਾ ਭਿਕ੍ਖੁਮਾਨਤ੍ਤਕਥਾਯ ਵੁਤ੍ਤਨਯੇਨੇਵ ਸਙ੍ਘਸ੍ਸ ਆਰੋਚੇਤ੍ਵਾ ਨਿਕ੍ਖਿਤ੍ਤਵਤ੍ਤਂ ਵਸਿਤੁਕਾਮਾਯ ਤਤ੍ਥੇਵ ਸਙ੍ਘਮਜ੍ਝੇ ਵਾ ਪਕ੍ਕਨ੍ਤਾਸੁ ਭਿਕ੍ਖੁਨੀਸੁ ਏਕਭਿਕ੍ਖੁਨਿਯਾ ਵਾ ਦੁਤਿਯਿਕਾਯ ਵਾ ਸਨ੍ਤਿਕੇ ਵੁਤ੍ਤਨਯੇਨੇਵ ਨਿਕ੍ਖਿਪਿਤਬ੍ਬਂ. ਅਞ੍ਞਿਸ੍ਸਾ ਪਨ ਆਗਨ੍ਤੁਕਾਯ ਸਨ੍ਤਿਕੇ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ. ਨਿਕ੍ਖਿਤ੍ਤਕਾਲਤੋ ਪਟ੍ਠਾਯ ਪਕਤਤ੍ਤਟ੍ਠਾਨੇ ਤਿਟ੍ਠਤਿ. ਪੁਨ ਸਮਾਦਿਯਿਤ੍ਵਾ ਅਰੁਣਂ ਉਟ੍ਠਾਪੇਨ੍ਤਿਯਾ ਪਨ ਭਿਕ੍ਖੁਨੀਨਂਯੇਵ ਸਨ੍ਤਿਕੇ ਵਸਿਤੁਂ ਨ ਲਭਤਿ. ‘‘ਉਭਤੋਸਙ੍ਘੇ ਪਕ੍ਖਮਾਨਤ੍ਤਂ ਚਰਿਤਬ੍ਬ’’ਨ੍ਤਿ ਹਿ ਵੁਤ੍ਤਂ. ਤਸ੍ਮਾ ਅਸ੍ਸਾ ਆਚਰਿਯੁਪਜ੍ਝਾਯਾਹਿ ਵਿਹਾਰਂ ਗਨ੍ਤ੍ਵਾ ਸਙ੍ਗਾਹਕਪਕ੍ਖੇ ਠਿਤੋ ਏਕੋ ਮਹਾਥੇਰੋ ਵਾ ਧਮ੍ਮਕਥਿਕੋ ਵਾ ਭਿਕ੍ਖੁ ਵਤ੍ਤਬ੍ਬੋ – ‘‘ਏਕਿਸ੍ਸਾ ਭਿਕ੍ਖੁਨਿਯਾ ਵਿਨਯਕਮ੍ਮਂ ਕਤ੍ਤਬ੍ਬਮਤ੍ਥਿ, ਤਤ੍ਰ ਨੋ ਅਯ੍ਯਾ, ਚਤ੍ਤਾਰੋ ਭਿਕ੍ਖੂ ਪੇਸੇਥਾ’’ਤਿ. ਸਙ੍ਗਹਂ ਅਕਾਤੁਂ ਨ ਲਬ੍ਭਤਿ, ਪੇਸੇਸ੍ਸਾਮੀਤਿ ਵਤ੍ਤਬ੍ਬਂ. ਚਤੂਹਿ ਪਕਤਤ੍ਤਭਿਕ੍ਖੁਨੀਹਿ ਮਾਨਤ੍ਤਚਾਰਿਨਿਂ ਭਿਕ੍ਖੁਨਿਂ ਗਹੇਤ੍ਵਾ ਅਨ੍ਤੋਅਰੁਣੇਯੇਵ ਨਿਕ੍ਖਮਿਤ੍ਵਾ ਗਾਮੂਪਚਾਰਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਮਗ੍ਗਾ ਓਕ੍ਕਮ੍ਮ ਗੁਮ੍ਬਵਤਿਆਦੀਹਿ ਪਟਿਚ੍ਛਨ੍ਨਟ੍ਠਾਨੇ ਨਿਸੀਦਿਤਬ੍ਬਂ. ਵਿਹਾਰੂਪਚਾਰਤੋਪਿ ਦ੍ਵੇ ਲੇਡ੍ਡੁਪਾਤਾ ਅਤਿਕ੍ਕਮਿਤਬ੍ਬਾ ਚਤੂਹਿ ਪਕਤਤ੍ਤਭਿਕ੍ਖੂਹਿਪਿ ਤਤ੍ਥ ਗਨ੍ਤਬ੍ਬਂ. ਗਨ੍ਤ੍ਵਾ ਪਨ ਭਿਕ੍ਖੁਨੀਹਿ ਸਦ੍ਧਿਂ ਨ ਏਕਟ੍ਠਾਨੇ ਨਿਸੀਦਿਤਬ੍ਬਂ, ਪਟਿਕ੍ਕਮਿਤ੍ਵਾ ਅਵਿਦੂਰਟ੍ਠਾਨੇ ਨਿਸੀਦਿਤਬ੍ਬਂ. ਕੁਰੁਨ੍ਦਿਮਹਾਪਚ੍ਚਰੀਸੁ ਪਨ ‘‘ਭਿਕ੍ਖੁਨੀਹਿਪਿ ਬ੍ਯਤ੍ਤਂ ਏਕਂ ਵਾ ਦ੍ਵੇ ਵਾ ਉਪਾਸਿਕਾਯੋ ਭਿਕ੍ਖੂਹਿਪਿ ਏਕਂ ਵਾ ਦ੍ਵੇ ਵਾ ਉਪਾਸਕੇ ਅਤ੍ਤਰਕ੍ਖਣਤ੍ਥਾਯ ਗਹੇਤ੍ਵਾ ਗਨ੍ਤਬ੍ਬ’’ਨ੍ਤਿ ਵੁਤ੍ਤਂ. ਕੁਰੁਨ੍ਦਿਯਂਯੇਵ ਚ ਭਿਕ੍ਖੁਨੁਪਸ੍ਸਯਸ੍ਸ ਚ ਵਿਹਾਰਸ੍ਸ ਚ ਉਪਚਾਰਂ ਮੁਞ੍ਚਿਤੁਂ ਵਟ੍ਟਤੀ’’ਤਿ ਵੁਤ੍ਤਂ, ਗਾਮਸ੍ਸਾਤਿ ਨ ਵੁਤ੍ਤਂ.

ਏਵਂ ਨਿਸਿਨ੍ਨੇਸੁ ਪਨ ਭਿਕ੍ਖੂਸੁ ਚ ਭਿਕ੍ਖੁਨੀਸੁ ਚ ਤਾਯ ਭਿਕ੍ਖੁਨਿਯਾ ‘‘ਮਾਨਤ੍ਤਂ ਸਮਾਦਿਯਾਮਿ, ਵਤ੍ਤਂ ਸਮਾਦਿਯਾਮੀ’’ਤਿ ਵਤ੍ਤਂ ਸਮਾਦਿਯਿਤ੍ਵਾ ਭਿਕ੍ਖੁਨੀਸਙ੍ਘਸ੍ਸ ਤਾਵ ਏਵਂ ਆਰੋਚੇਤਬ੍ਬਂ –

‘‘ਅਹਂ, ਅਯ੍ਯੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਗਾਮਨ੍ਤਰਂ, ਸਾਹਂ ਸਙ੍ਘਂ ਏਕਿਸ੍ਸਾ ਆਪਤ੍ਤਿਯਾ ਗਾਮਨ੍ਤਰਾਯ ਪਕ੍ਖਮਾਨਤ੍ਤਂ ਯਾਚਿਂ, ਤਸ੍ਸ ਮੇ ਸਙ੍ਘੋ ਏਕਿਸ੍ਸਾ ਆਪਤ੍ਤਿਯਾ ਗਾਮਨ੍ਤਰਾਯ ਪਕ੍ਖਮਾਨਤ੍ਤਂ ਅਦਾਸਿ, ਸਾਹਂ ਪਕ੍ਖਮਾਨਤ੍ਤਂ ਚਰਾਮਿ, ‘ਵੇਦਯਾਮਹਂ, ਅਯ੍ਯੇ, ਵੇਦਯਤੀ’ਤਿ ਮਂ ਸਙ੍ਘੋ ਧਾਰੇਤੂ’’ਤਿ.

ਤਤੋ ਭਿਕ੍ਖੁਸਙ੍ਘਸ੍ਸ ਸਨ੍ਤਿਕਂ ਗਨ੍ਤ੍ਵਾ ਏਵਂ ਆਰੋਚੇਤਬ੍ਬਂ – ‘‘ਅਹਂ, ਅਯ੍ਯਾ, ਏਕਂ ਆਪਤ੍ਤਿਂ ਆਪਜ੍ਜਿਂ …ਪੇ… ਵੇਦਯਾਮਹਂ, ਅਯ੍ਯਾ, ਵੇਦਯਤੀਤਿ ਮਂ ਸਙ੍ਘੋ ਧਾਰੇਤੂ’’ਤਿ. ਇਧਾਪਿ ਯਾਯ ਕਾਯਚਿ ਭਾਸਾਯ ਆਰੋਚੇਤੁਂ ਵਟ੍ਟਤਿ.

ਆਰੋਚੇਤ੍ਵਾ ਚ ਭਿਕ੍ਖੁਨਿਸਙ੍ਘਸ੍ਸੇਵ ਸਨ੍ਤਿਕੇ ਨਿਸੀਦਿਤਬ੍ਬਂ, ਆਰੋਚਿਤਕਾਲਤੋ ਪਟ੍ਠਾਯ ਭਿਕ੍ਖੂਨਂ ਗਨ੍ਤੁਂ ਵਟ੍ਟਤਿ. ਸਚੇ ਸਾਸਙ੍ਕਂ ਹੋਤਿ, ਭਿਕ੍ਖੁਨਿਯੋ ਤਤ੍ਥੇਵ ਠਾਨਂ ਪਚ੍ਚਾਸੀਸਨ੍ਤਿ, ਠਾਤਬ੍ਬਂ. ਸਚੇ ਅਞ੍ਞੋ ਭਿਕ੍ਖੁ ਵਾ ਭਿਕ੍ਖੁਨੀ ਵਾ ਤਂ ਠਾਨਂ ਏਤਿ, ਪਸ੍ਸਨ੍ਤਿਯਾ ਆਰੋਚੇਤਬ੍ਬਂ. ਨੋ ਚੇ ਆਰੋਚੇਤਿ, ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦਦੁਕ੍ਕਟਞ੍ਚ. ਸਚੇ ਅਜਾਨਨ੍ਤਿਯਾ ਏਵ ਉਪਚਾਰਂ ਓਕ੍ਕਮਿਤ੍ਵਾ ਗਚ੍ਛਤਿ, ਰਤ੍ਤਿਚ੍ਛੇਦੋਵ ਹੋਤਿ, ਨ ਵਤ੍ਤਭੇਦਦੁਕ੍ਕਟਂ. ਸਚੇ ਭਿਕ੍ਖੁਨਿਯੋ ਉਪਜ੍ਝਾਯਾਦੀਨਂ ਵਤ੍ਤਕਰਣਤ੍ਥਂ ਪਗੇਵ ਗਨ੍ਤੁਕਾਮਾ ਹੋਨ੍ਤਿ, ਰਤ੍ਤਿਵਿਪ੍ਪਵਾਸਗਣਓਹੀਯਨਗਾਮਨ੍ਤਰਾਪਤ੍ਤਿਰਕ੍ਖਣਤ੍ਥਂ ਏਕਂ ਭਿਕ੍ਖੁਨਿਂ ਠਪੇਤ੍ਵਾ ਗਨ੍ਤਬ੍ਬਂ. ਤਾਯ ਅਰੁਣੇ ਉਟ੍ਠਿਤੇ ਤਸ੍ਸਾ ਸਨ੍ਤਿਕੇ ਵਤ੍ਤਂ ਨਿਕ੍ਖਿਪਿਤਬ੍ਬਂ. ਏਤੇਨੁਪਾਯੇਨ ਅਖਣ੍ਡਾ ਪਞ੍ਚਦਸ ਰਤ੍ਤਿਯੋ ਮਾਨਤ੍ਤਂ ਚਰਿਤਬ੍ਬਂ.

ਅਨਿਕ੍ਖਿਤ੍ਤਵਤ੍ਤਾਯ ਪਨ ਪਾਰਿਵਾਸਿਕਕ੍ਖਨ੍ਧਕੇ ਵੁਤ੍ਤਨਯੇਨੇਵ ਸਮ੍ਮਾ ਵਤ੍ਤਿਤਬ੍ਬਂ. ਅਯਂ ਪਨ ਵਿਸੇਸੋ – ‘‘ਆਗਨ੍ਤੁਕਸ੍ਸ ਆਰੋਚੇਤਬ੍ਬ’’ਨ੍ਤਿ ਏਤ੍ਥ ਯਤ੍ਤਕਾ ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਤਂ ਗਾਮਂ ਭਿਕ੍ਖੂ ਵਾ ਭਿਕ੍ਖੁਨਿਯੋ ਵਾ ਆਗਚ੍ਛਨ੍ਤਿ, ਸਬ੍ਬੇਸਂ ਆਰੋਚੇਤਬ੍ਬਂ. ਅਨਾਰੋਚੇਨ੍ਤਿਯਾ ਰਤ੍ਤਿਚ੍ਛੇਦੋ ਚ ਵਤ੍ਤਭੇਦਦੁਕ੍ਕਟਞ੍ਚ. ਸਚੇਪਿ ਰਤ੍ਤਿਂ ਕੋਚਿ ਭਿਕ੍ਖੁ ਤਂ ਗਾਮੂਪਚਾਰਂ ਓਕ੍ਕਮਿਤ੍ਵਾ ਗਚ੍ਛਤਿ, ਰਤ੍ਤਿਚ੍ਛੇਦੋ ਹੋਤਿਯੇਵ, ਅਜਾਨਨਪਚ੍ਚਯਾ ਪਨ ਵਤ੍ਤਭੇਦਤੋ ਮੁਚ੍ਚਤਿ. ਕੁਰੁਨ੍ਦਿਆਦੀਸੁ ਪਨ ਅਨਿਕ੍ਖਿਤ੍ਤਵਤ੍ਤਭਿਕ੍ਖੂਨਂ ਵੁਤ੍ਤਨਯੇਨੇਵ ਕਥੇਤਬ੍ਬਨ੍ਤਿ ਵੁਤ੍ਤਂ. ਤਂ ਪਾਰਿਵਾਸਿਕਵਤ੍ਤਾਦੀਨਂ ਉਪਚਾਰਸੀਮਾਯ ਪਰਿਚ੍ਛਿਨ੍ਨਤ੍ਤਾ ਯੁਤ੍ਤਤਰਂ ਦਿਸ੍ਸਤਿ. ਉਪੋਸਥੇ ਆਰੋਚੇਤਬ੍ਬਂ, ਪਵਾਰਣਾਯ ਆਰੋਚੇਤਬ੍ਬਂ, ਚਤੁਨ੍ਨਂ ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਦੇਵਸਿਕਂ ਆਰੋਚੇਤਬ੍ਬਂ. ਸਚੇ ਭਿਕ੍ਖੂਨਂ ਤਸ੍ਮਿਂ ਗਾਮੇ ਭਿਕ੍ਖਾਚਾਰੋ ਸਮ੍ਪਜ੍ਜਤਿ, ਤਤ੍ਥੇਵ ਗਨ੍ਤਬ੍ਬਂ. ਨੋ ਚੇ ਸਮ੍ਪਜ੍ਜਤਿ, ਅਞ੍ਞਤ੍ਰ ਚਰਿਤ੍ਵਾਪਿ ਤਤ੍ਰ ਆਗਨ੍ਤ੍ਵਾ ਅਤ੍ਤਾਨਂ ਦਸ੍ਸੇਤ੍ਵਾ ਗਨ੍ਤਬ੍ਬਂ. ਬਹਿਗਾਮੇ ਵਾ ਸਙ੍ਕੇਤਟ੍ਠਾਨਂ ਕਾਤਬ੍ਬਂ – ‘‘ਅਸੁਕਸ੍ਮਿਂ ਨਾਮ ਠਾਨੇ ਅਮ੍ਹੇ ਪਸ੍ਸਿਸ੍ਸਸੀ’’ਤਿ. ਤਾਯ ਸਙ੍ਕੇਤਟ੍ਠਾਨਂ ਗਨ੍ਤ੍ਵਾ ਆਰੋਚੇਤਬ੍ਬਂ. ਸਙ੍ਕੇਤਟ੍ਠਾਨੇ ਅਦਿਸ੍ਵਾ ਵਿਹਾਰਂ ਗਨ੍ਤ੍ਵਾ ਆਰੋਚੇਤਬ੍ਬਂ. ਵਿਹਾਰੇ ਸਬ੍ਬਭਿਕ੍ਖੂਨਂ ਆਰੋਚੇਤਬ੍ਬਂ. ਸਚੇ ਸਬ੍ਬੇਸਂ ਸਕ੍ਕਾ ਨ ਹੋਤਿ ਆਰੋਚੇਤੁਂ, ਬਹਿਉਪਚਾਰਸੀਮਾਯ ਠਤ੍ਵਾ ਭਿਕ੍ਖੁਨਿਯੋ ਪੇਸੇਤਬ੍ਬਾ. ਤਾਹਿ ਆਨੀਤਾਨਂ ਚਤੁਨ੍ਨਂ ਭਿਕ੍ਖੂਨਂ ਆਰੋਚੇਤਬ੍ਬਂ. ਸਚੇ ਵਿਹਾਰੋ ਦੂਰੋ ਹੋਤਿ ਸਾਸਙ੍ਕੋ, ਉਪਾਸਕੇ ਚ ਉਪਾਸਿਕਾਯੋ ਚ ਗਹੇਤ੍ਵਾ ਗਨ੍ਤਬ੍ਬਂ. ਸਚੇ ਪਨ ਅਯਂ ਏਕਾ ਵਸਤਿ, ਰਤ੍ਤਿਵਿਪ੍ਪਵਾਸਂ ਆਪਜ੍ਜਤਿ, ਤਸ੍ਮਾਸ੍ਸਾ ਏਕਾ ਪਕਤਤ੍ਤਾ ਭਿਕ੍ਖੁਨੀ ਸਮ੍ਮਨ੍ਨਿਤ੍ਵਾ ਦਾਤਬ੍ਬਾ ਏਕਚ੍ਛਨ੍ਨੇ ਵਸਨਤ੍ਥਾਯ.

ਏਵਂ ਅਖਣ੍ਡਂ ਮਾਨਤ੍ਤਂ ਚਰਿਤ੍ਵਾ ਵੀਸਤਿਗਣੇ ਭਿਕ੍ਖੁਨਿਸਙ੍ਘੇ ਵੁਤ੍ਤਨਯੇਨੇਵ ਅਬ੍ਭਾਨਂ ਕਾਤਬ੍ਬਂ. ਸਚੇ ਮਾਨਤ੍ਤਂ ਚਰਮਾਨਾ ਅਨ੍ਤਰਾਪਤ੍ਤਿਂ ਆਪਜ੍ਜਤਿ, ਮੂਲਾਯ ਪਟਿਕਸ੍ਸਿਤ੍ਵਾ ਤਸ੍ਸਾ ਆਪਤ੍ਤਿਯਾ ਮਾਨਤ੍ਤਂ ਦਾਤਬ੍ਬਨ੍ਤਿ ਕੁਰੁਨ੍ਦਿਯਂ ਵੁਤ੍ਤਂ. ਇਦਂ ‘‘ਪਕ੍ਖਮਾਨਤ੍ਤਂ’’ ਨਾਮ.

‘‘ਸਮੋਧਾਨਮਾਨਤ੍ਤਂ’’ ਪਨ ਤਿਵਿਧਂ ਹੋਤਿ – ਓਧਾਨਸਮੋਧਾਨਂ, ਅਗ੍ਘਸਮੋਧਾਨਂ, ਮਿਸ੍ਸਕਸਮੋਧਾਨਨ੍ਤਿ. ਤਤ੍ਥ ਯਦੇਤਂ ਪਰਤੋ ਉਦਾਯਿਤ੍ਥੇਰਸ੍ਸ ਪਞ੍ਚਾਹਪਟਿਚ੍ਛਨ੍ਨਾਯ ਆਪਤ੍ਤਿਯਾ ਪਰਿਵਾਸਂ ਪਰਿਵਸਨ੍ਤਸ੍ਸ ਪਰਿਵਾਸੇ ਚ ਮਾਨਤ੍ਤਾਰਹਟ੍ਠਾਨੇ ਚ ਅਨ੍ਤਰਾਪਤ੍ਤਿਂ ਆਪਜ੍ਜਿਤ੍ਵਾ ਮੂਲਾਯਪਟਿਕਸ੍ਸਿਤਸ੍ਸ ‘‘ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਉਦਾਯਿਸ੍ਸ ਭਿਕ੍ਖੁਨੋ ਤਿਸ੍ਸਨ੍ਨਂ ਆਪਤ੍ਤੀਨਂ ਛਾਰਤ੍ਤਂ ਮਾਨਤ੍ਤਂ ਦੇਤੂ’’ਤਿ ਮਾਨਤ੍ਤਂ ਅਨੁਞ੍ਞਾਤਂ, ਇਦਂ ‘‘ਓਧਾਨਸਮੋਧਾਨਂ’’ ਨਾਮ. ਇਦਞ੍ਹਿ ਪੁਨਪ੍ਪੁਨਂ ਮੂਲਾਯਪਟਿਕਸ੍ਸਨੇਨ ਪਰਿਵੁਤ੍ਥਦਿਵਸੇ ਓਧੁਨਿਤ੍ਵਾ ਪੁਰਿਮਾਪਤ੍ਤੀਹਿ ਸਦ੍ਧਿਂ ਸਮੋਧਾਯ ਦਿਨ੍ਨਂ, ਤਸ੍ਮਾ ਓਧਾਨਸਮੋਧਾਨਨ੍ਤਿ ਵੁਚ੍ਚਤਿ. ਕੁਰੁਨ੍ਦਿਯਂ ਪਨ ‘‘ਸਮੋਧਾਨਪਰਿਵਾਸਂ ਵੁਤ੍ਥਸ੍ਸ ਦਾਤਬ੍ਬਂ ਮਾਨਤ੍ਤਂ ਸਮੋਧਾਨਮਾਨਤ੍ਤ’’ਨ੍ਤਿ ਵੁਤ੍ਤਂ. ਤਮ੍ਪਿ ਤੇਨ ਪਰਿਯਾਯੇਨ ਯੁਜ੍ਜਤਿ.

ਅਗ੍ਘਸਮੋਧਾਨਂ ਪਨ ਮਿਸ੍ਸਕਸਮੋਧਾਨਞ੍ਚ ਅਗ੍ਘਸਮੋਧਾਨਮਿਸ੍ਸਕਸਮੋਧਾਨਪਰਿਵਾਸਾਵਸਾਨੇ ਦਾਤਬ੍ਬਮਾਨਤ੍ਤਮੇਵ ਵੁਚ੍ਚਤਿ, ਤਂ ਪਰਿਵਾਸਕਮ੍ਮਵਾਚਾਨੁਸਾਰੇਨ ਯੋਜੇਤ੍ਵਾ ਦਾਤਬ੍ਬਂ. ਏਤ੍ਤਾਵਤਾ ਯਂ ਵੁਤ੍ਤਂ ‘‘ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਉਦਾਯਿਸ੍ਸ ਭਿਕ੍ਖੁਨੋ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸ੍ਸਟ੍ਠਿਯਾ ਏਕਾਹਪਟਿਚ੍ਛਨ੍ਨਾਯ ਏਕਾਹਪਰਿਵਾਸਂ ਦੇਤੂਤਿਆਦਿਨਾ ਨਯੇਨ ਪਾਲ਼ਿਯਂ ਅਨੇਕੇਹਿ ਆਕਾਰੇਹਿ ਪਰਿਵਾਸੋ ਚ ਮਾਨਤ੍ਤਞ੍ਚ ਵੁਤ੍ਤਂ, ਤਸ੍ਸ ਯਸ੍ਮਾ ਆਗਤਾਗਤਠਾਨੇ ਵਿਨਿਚ੍ਛਯੋ ਵੁਚ੍ਚਮਾਨੋ ਪਾਲ਼ਿ ਵਿਯ ਅਤਿਵਿਤ੍ਥਾਰਂ ਆਪਜ੍ਜਤਿ, ਨ ਚ ਸਕ੍ਕਾ ਹੋਤਿ ਸੁਖੇਨ ਪਰਿਗ੍ਗਹੇਤੁਂ, ਤਸ੍ਮਾ ਨਂ ਸਮੋਧਾਨੇਤ੍ਵਾ ਇਧੇਵ ਦਸ੍ਸੇਸ੍ਸਾਮਾ’’ਤਿ, ਤਦਿਦਂ ਅਤ੍ਥਤੋ ਸਮ੍ਪਾਦਿਤਂ ਹੋਤਿ.

ਪਟਿਚ੍ਛਨ੍ਨਪਰਿਵਾਸਕਥਾ

੧੦੨. ਇਦਾਨਿ ਯਾ ਤਾਵ ਅਯਂ ਪਟਿਚ੍ਛਨ੍ਨਾਯ ਏਕਿਸ੍ਸਾ ਆਪਤ੍ਤਿਯਾ ਵਸੇਨ ਪਾਲ਼ਿ ਵੁਤ੍ਤਾ, ਸਾ ਉਤ੍ਤਾਨਤ੍ਥਾਵ.

੧੦੮. ਤਤੋ ਪਰਂ ਦ੍ਵੀਹਤੀਹਚਤੂਹਪਞ੍ਚਾਹਪਟਿਚ੍ਛਨ੍ਨਾਨਂ ਵਸੇਨ ਪਾਲ਼ਿਂ ਵਤ੍ਵਾ ਪਞ੍ਚਾਹਪਟਿਚ੍ਛਨ੍ਨਾਯ ਪਰਿਵਾਸਤੋ ਪਟ੍ਠਾਯ ਅਨ੍ਤਰਾਪਤ੍ਤਿ ਦਸ੍ਸਿਤਾ. ਯਸ੍ਮਾ ਪਨ ਤਂ ਆਪਤ੍ਤਿਂ ਆਪਨ੍ਨੋ ਮੂਲਾਯਪਟਿਕਸ੍ਸਨਾਰਹੋ ਨਾਮ ਹੋਤਿ, ਤਸ੍ਮਾਸ੍ਸ ਤਤ੍ਥ ਮੂਲਾਯਪਟਿਕਸ੍ਸਨਂ ਅਨੁਞ੍ਞਾਤਂ. ਸਚੇ ਪਨ ਨਿਕ੍ਖਿਤ੍ਤਵਤ੍ਤੋ ਆਪਜ੍ਜਤਿ, ਮੂਲਾਯਪਟਿਕਸ੍ਸਨਾਰਹੋ ਨ ਹੋਤਿ. ਕਸ੍ਮਾ? ਯਸ੍ਮਾ ਨ ਸੋ ਪਰਿਵਸਨ੍ਤੋ ਆਪਨ੍ਨੋ, ਪਕਤਤ੍ਤਟ੍ਠਾਨੇ ਠਿਤੋ ਆਪਨ੍ਨੋ, ਤਸ੍ਮਾ ਤਸ੍ਸਾ ਆਪਤ੍ਤਿਯਾ ਵਿਸੁਂ ਮਾਨਤ੍ਤਂ ਚਰਿਤਬ੍ਬਂ. ਸਚੇ ਪਟਿਚ੍ਛਨ੍ਨਾ ਹੋਤਿ ਪਰਿਵਾਸੋਪਿ ਵਸਿਤਬ੍ਬੋ. ਯਞ੍ਚੇਤਂ ਮੂਲਾਯਪਟਿਕਸ੍ਸਨਂ ਵੁਤ੍ਤਂ, ਤਸ੍ਮਿਮ੍ਪਿ ਕਤੇ ਪਰਿਵੁਤ੍ਥਦਿਵਸਾ ਮਕ੍ਖਿਤਾ ਹੋਨ੍ਤਿ. ਇਤਿ ਪਰਿਵਾਸੇ ਅਨ੍ਤਰਾਪਤ੍ਤਿਂ ਦਸ੍ਸੇਤ੍ਵਾ ਪੁਨ ਮਾਨਤ੍ਤਾਰਹਸ੍ਸ ਅਨ੍ਤਰਾਪਤ੍ਤਿਂ ਦਸ੍ਸੇਤ੍ਵਾ ਮੂਲਾਯਪਟਿਕਸ੍ਸਨਂ ਵੁਤ੍ਤਂ, ਤਸ੍ਮਿਮ੍ਪਿ ਕਤੇ ਪਰਿਵੁਤ੍ਥਦਿਵਸਾ ਮਕ੍ਖਿਤਾਵ ਹੋਨ੍ਤਿ. ਤਤੋ ਪਰਿਵੁਤ੍ਥਪਰਿਵਾਸਸ੍ਸ ਤਾਸਂ ਤਿਸ੍ਸਨ੍ਨਮ੍ਪਿ ਆਪਤ੍ਤੀਨਂ ਸਮੋਧਾਨਮਾਨਤ੍ਤਂ ਦਸ੍ਸਿਤਂ. ਤਤੋ ਮਾਨਤ੍ਤਚਾਰਿਕਸ੍ਸ ਅਨ੍ਤਰਾਪਤ੍ਤਿਂ ਦਸ੍ਸੇਤ੍ਵਾ ਮੂਲਾਯਪਟਿਕਸ੍ਸਨਂ ਵੁਤ੍ਤਂ. ਤਸ੍ਮਿਂ ਪਨ ਪਟਿਕਸ੍ਸਨੇ ਕਤੇ ਮਾਨਤ੍ਤਚਿਣ੍ਣਦਿਵਸਾਪਿ ਪਰਿਵੁਤ੍ਥਦਿਵਸਾਪਿ ਮਕ੍ਖਿਤਾਵ ਹੋਨ੍ਤਿ. ਤਤੋ ਅਬ੍ਭਾਨਾਰਹਸ੍ਸ ਅਨ੍ਤਰਾਪਤ੍ਤਿਂ ਦਸ੍ਸੇਤ੍ਵਾ ਮੂਲਾਯਪਟਿਕਸ੍ਸਨਂ ਵੁਤ੍ਤਂ. ਤਸ੍ਮਿਮ੍ਪਿ ਕਤੇ ਸਬ੍ਬੇ ਤੇ ਮਕ੍ਖਿਤਾਵ ਹੋਨ੍ਤਿ. ਤਤੋ ਪਰਂ ਸਬ੍ਬਾ ਅਨ੍ਤਰਾਪਤ੍ਤਿਯੋ ਯੋਜੇਤ੍ਵਾ ਅਬ੍ਭਾਨਕਮ੍ਮਂ ਦਸ੍ਸਿਤਂ. ਏਵਂ ਪਟਿਚ੍ਛਨ੍ਨਵਾਰੇ ਏਕਾਹਪਟਿਚ੍ਛਨ੍ਨਾਦਿਵਸੇਨ ਪਞ੍ਚ, ਅਨ੍ਤਰਾਪਤ੍ਤਿਵਸੇਨ ਚਤਸ੍ਸੋਤਿ ਨਵ ਕਮ੍ਮਵਾਚਾ ਦਸ੍ਸਿਤਾ ਹੋਨ੍ਤਿ.

ਪਟਿਚ੍ਛਨ੍ਨਪਰਿਵਾਸਕਥਾ ਨਿਟ੍ਠਿਤਾ.