੮. ਚੀਵਰਕ੍ਖਨ੍ਧਕਂ
ਜੀਵਕਵਤ੍ਥੁਕਥਾ
੩੨੬. ਚੀਵਰਕ੍ਖਨ੍ਧਕੇ – ਪਦਕ੍ਖਿਣਾਤਿ ਛੇਕਾ ਕੁਸਲਾ. ਅਭਿਸਟਾਤਿ ਅਭਿਗਤਾ. ਕੇਹਿ ਅਭਿਗਤਾਤਿ? ਅਤ੍ਥਿਕੇਹਿ ਅਤ੍ਥਿਕੇਹਿ ਮਨੁਸ੍ਸੇਹਿ; ਕਰਣਤ੍ਥੇ ਪਨ ਸਾਮਿਵਚਨਂ ਕਤ੍ਵਾ ‘‘ਅਤ੍ਥਿਕਾਨਂ ਅਤ੍ਥਿਕਾਨਂ ਮਨੁਸ੍ਸਾਨ’’ਨ੍ਤਿ ਵੁਤ੍ਤਂ. ਪਞ੍ਞਾਸਾਯ ਚ ਰਤ੍ਤਿਂ ਗਚ੍ਛਤੀਤਿ ਪਞ੍ਞਾਸ ਕਹਾਪਣੇ ਗਹੇਤ੍ਵਾ ਰਤ੍ਤਿਂ ਗਚ੍ਛਤਿ. ਨੇਗਮੋਤਿ ਕੁਟੁਮ੍ਬਿਯਗਣੋ.
੩੨੭. ਸਾਲਵਤਿਂ ਕੁਮਾਰਿਂ ਗਣਿਕਂ ਵੁਟ੍ਠਾਪੇਸੀਤਿ ਨਾਗਰਾ ਦ੍ਵੇ ਸਤਸਹਸ੍ਸਾਨਿ, ਰਾਜਾ ਸਤਸਹਸ੍ਸਨ੍ਤਿ ਤੀਣਿ ਸਤਸਹਸ੍ਸਾਨਿ, ਅਞ੍ਞਞ੍ਚ ਆਰਾਮੁਯ੍ਯਾਨਵਾਹਨਾਦਿਪਰਿਚ੍ਛੇਦਂ ਦਤ੍ਵਾ ਵੁਟ੍ਠਾਪੇਸੁਂ; ਗਣਿਕਟ੍ਠਾਨੇ ਠਪੇਸੁਨ੍ਤਿ ਅਤ੍ਥੋ. ਪਟਿਸਤੇਨ ਚ ਰਤ੍ਤਿਂ ਗਚ੍ਛਤੀਤਿ ਰਤ੍ਤਿਂ ਪਟਿਸਤੇਨ ਗਚ੍ਛਤਿ. ਗਿਲਾਨਂ ਪਟਿਵੇਦੇਯ੍ਯਨ੍ਤਿ ਗਿਲਾਨਭਾਵਂ ਜਾਨਾਪੇਯ੍ਯਂ. ਕਤ੍ਤਰਸੁਪ੍ਪੇਤਿ ਜਿਣ੍ਣਸੁਪ੍ਪੇ.
੩੨੮. ਕਾ ਮੇ ਦੇਵ ਮਾਤਾ, ਕੋ ਪਿਤਾਤਿ ਕਸ੍ਮਾ ਪੁਚ੍ਛਿ? ਤਂ ਕਿਰ ਅਞ੍ਞੇ ਰਾਜਦਾਰਕਾ ਕੀਲ਼ਨ੍ਤਾ ਕਲਹੇ ਉਟ੍ਠਿਤੇ ‘‘ਨਿਮ੍ਮਾਤਿਕੋ ਨਿਪ੍ਪਿਤਿਕੋ’’ਤਿ ਵਦਨ੍ਤਿ. ਯਥਾ ਚ ਅਞ੍ਞੇਸਂ ਦਾਰਕਾਨਂ ਛਣਾਦੀਸੁ ਚੁਲ਼ਮਾਤਾਮਹਾਮਾਤਾਦਯੋ ਕਿਞ੍ਚਿ ਪਣ੍ਣਾਕਾਰਂ ਪੇਸੇਨ੍ਤਿ, ਤਥਾ ਤਸ੍ਸ ਨ ਕੋਚਿ ਕਿਞ੍ਚਿ ਪੇਸੇਤਿ. ਇਤਿ ਸੋ ਤਂ ਸਬ੍ਬਂ ਚਿਨ੍ਤੇਤ੍ਵਾ ‘‘ਨਿਮ੍ਮਾਤਿਕੋਯੇਵ ਨੁ ਖੋ ਅਹ’’ਨ੍ਤਿ ਜਾਨਨਤ੍ਥਂ ‘‘ਕਾ ਮੇ ਦੇਵ ਮਾਤਾ, ਕੋ ਪਿਤਾ’’ਤਿ ਪੁਚ੍ਛਿ.
ਯਨ੍ਨੂਨਾਹਂ ਸਿਪ੍ਪਂ ਸਿਕ੍ਖੇਯ੍ਯਨ੍ਤਿ ਯਂਨੂਨ ਅਹਂ ਵੇਜ੍ਜਸਿਪ੍ਪਂ ਸਿਕ੍ਖੇਯ੍ਯਨ੍ਤਿ ਚਿਨ੍ਤੇਸਿ. ਤਸ੍ਸ ਕਿਰ ਏਤਦਹੋਸਿ – ‘‘ਇਮਾਨਿ ਖੋ ਹਤ੍ਥਿਅਸ੍ਸਸਿਪ੍ਪਾਦੀਨਿ ਪਰੂਪਘਾਤਪਟਿਸਂਯੁਤ੍ਤਾਨਿ, ਵੇਜ੍ਜਸਿਪ੍ਪਂ ਮੇਤ੍ਤਾਪੁਬ੍ਬਭਾਗਂ ਸਤ੍ਤਾਨਂ ਹਿਤਪਟਿਸਂਯੁਤ੍ਤ’’ਨ੍ਤਿ. ਤਸ੍ਮਾ ਵੇਜ੍ਜਸਿਪ੍ਪਮੇਵ ਸਨ੍ਧਾਯ ‘‘ਯਂਨੂਨਾਹਂ ਸਿਪ੍ਪਂ ਸਿਕ੍ਖੇਯ੍ਯ’’ਨ੍ਤਿ ਚਿਨ੍ਤੇਸਿ. ਅਪਿਚਾਯਂ ਇਤੋ ਕਪ੍ਪਸਤਸਹਸ੍ਸਸ੍ਸ ਉਪਰਿ ਪਦੁਮੁਤ੍ਤਰਸ੍ਸ ਭਗਵਤੋ ਉਪਟ੍ਠਾਕਂ ‘‘ਬੁਦ੍ਧੁਪਟ੍ਠਾਕੋ ਅਯ’’ਨ੍ਤਿ ਚਤੁਪਰਿਸਨ੍ਤਰੇ ਪਤ੍ਥਤਗੁਣਂ ਵੇਜ੍ਜਂ ਦਿਸ੍ਵਾ ‘‘ਅਹੋ ਵਤਾਹਮ੍ਪਿ ਏਵਰੂਪਂ ਠਾਨਨ੍ਤਰਂ ਪਾਪੁਣੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਦਾਨਂ ਦਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ‘‘ਅਹਮ੍ਪਿ ਭਗਵਾ ਤੁਮ੍ਹਾਕਂ ਉਪਟ੍ਠਾਕੋ ਅਸੁਕਵੇਜ੍ਜੋ ਵਿਯ ਅਨਾਗਤੇ ਬੁਦ੍ਧੁਪਟ੍ਠਾਕੋ ਭਵੇਯ੍ਯ’’ਨ੍ਤਿ ਪਤ੍ਥਨਮਕਾਸਿ. ਤਾਯ ਪੁਰਿਮਪਤ੍ਥਨਾਯ ਚੋਦਿਯਮਾਨੋਪੇਸ ਵੇਜ੍ਜਸਿਪ੍ਪਮੇਵ ਸਨ੍ਧਾਯ ‘‘ਯਂਨੂਨਾਹਂ ਸਿਪ੍ਪਂ ਸਿਕ੍ਖੇਯ੍ਯ’’ਨ੍ਤਿ ਚਿਨ੍ਤੇਸਿ.
੩੨੯. ਦਿਸਾਪਾਮੋਕ੍ਖੋਤਿ ਸਬ੍ਬਦਿਸਾਸੁ ਵਿਦਿਤੋ ਪਾਕਟੋ ਪਧਾਨੋ ਵਾਤਿ ਅਤ੍ਥੋ. ਤਸ੍ਮਿਞ੍ਚ ਸਮਯੇ ਤਕ੍ਕਸੀਲਤੋ ਵਾਣਿਜਾ ਅਭਯਰਾਜਕੁਮਾਰਂ ਦਸ੍ਸਨਾਯ ਅਗਮਂਸੁ. ਤੇ ਜੀਵਕੋ ‘‘ਕੁਤੋ ਤੁਮ੍ਹੇ ਆਗਤਾ’’ਤਿ ਪੁਚ੍ਛਿ. ‘‘ਤਕ੍ਕਸੀਲਤੋ’’ਤਿ ਵੁਤ੍ਤੇ ‘‘ਅਤ੍ਥਿ ਤਤ੍ਥ ਵੇਜ੍ਜਸਿਪ੍ਪਾਚਰਿਯੋ’’ਤਿ ਪੁਚ੍ਛਿ. ‘‘ਆਮ ਕੁਮਾਰ, ਤਕ੍ਕਸੀਲਾਯਂ ਦਿਸਾਪਾਮੋਕ੍ਖੋ ਵੇਜ੍ਜੋ ਪਟਿਵਸਤੀ’’ਤਿ ਸੁਤ੍ਵਾ ‘‘ਤੇਨ ਹਿ ਯਦਾ ਗਚ੍ਛਥ, ਮਯ੍ਹਂ ਆਰੋਚੇਯ੍ਯਾਥਾ’’ਤਿ ਆਹ. ਤੇ ਤਥਾ ਅਕਂਸੁ. ਸੋ ਪਿਤਰਂ ਅਨਾਪੁਚ੍ਛਾ ਤੇਹਿ ਸਦ੍ਧਿਂ ਤਕ੍ਕਸੀਲਂ ਅਗਮਾਸਿ. ਤੇਨ ਵੁਤ੍ਤਂ – ‘‘ਅਭਯਂ ਰਾਜਕੁਮਾਰਂ ਅਨਾਪੁਚ੍ਛਾ’’ਤਿਆਦਿ.
ਇਚ੍ਛਾਮਹਂ ਆਚਰਿਯ ਸਿਪ੍ਪਂ ਸਿਕ੍ਖਿਤੁਨ੍ਤਿ ਤਂ ਕਿਰ ਉਪਸਙ੍ਕਮਨ੍ਤਂ ਦਿਸ੍ਵਾ ਸੋ ਵੇਜ੍ਜੋ ‘‘ਕੋਸਿ ਤ੍ਵਂ ਤਾਤਾ’’ਤਿ ਪੁਚ੍ਛਿ. ਸੋ ‘‘ਬਿਮ੍ਬਿਸਾਰਮਹਾਰਾਜਸ੍ਸ ਨਤ੍ਤਾ ਅਭਯਕੁਮਾਰਸ੍ਸ ਪੁਤ੍ਤੋਮ੍ਹੀ’’ਤਿ ਆਹ. ‘‘ਕਸ੍ਮਾ ਪਨ ਤ੍ਵਮਸਿ ਤਾਤ ਇਧਾਗਤੋ’’ਤਿ, ਤਤੋ ਸੋ ‘‘ਤੁਮ੍ਹਾਕਂ ਸਨ੍ਤਿਕੇ ਸਿਪ੍ਪਂ ਸਿਕ੍ਖਿਤੁ’’ਨ੍ਤਿ ਵਤ੍ਵਾ ਇਚ੍ਛਾਮਹਂ ਆਚਰਿਯ ਸਿਪ੍ਪਂ ਸਿਕ੍ਖਿਤੁਨ੍ਤਿ ਆਹ. ਬਹੁਞ੍ਚ ਗਣ੍ਹਾਤੀਤਿ ਯਥਾ ਅਞ੍ਞੇ ਖਤ੍ਤਿਯਕੁਮਾਰਾਦਯੋ ਆਚਰਿਯਸ੍ਸ ਧਨਂ ਦਤ੍ਵਾ ਕਿਞ੍ਚਿ ਕਮ੍ਮਂ ਅਕਤ੍ਵਾ ਸਿਕ੍ਖਨ੍ਤਿਯੇਵ, ਨ ਸੋ ਏਵਂ. ਸੋ ਪਨ ਕਿਞ੍ਚਿ ਧਨਂ ਅਦਤ੍ਵਾ ਧਮ੍ਮਨ੍ਤੇਵਾਸਿਕੋਵ ਹੁਤ੍ਵਾ ਏਕਂ ਕਾਲਂ ਉਪਜ੍ਝਾਯਸ੍ਸ ਕਮ੍ਮਂ ਕਰੋਤਿ, ਏਕਂ ਕਾਲਂ ਸਿਕ੍ਖਤਿ. ਏਵਂ ਸਨ੍ਤੇਪਿ ਅਭਿਨੀਹਾਰਸਮ੍ਪਨ੍ਨੋ ਕੁਲਪੁਤ੍ਤੋ ਅਤ੍ਤਨੋ ਮੇਧਾਵਿਤਾਯ ਬਹੁਞ੍ਚ ਗਣ੍ਹਾਤਿ, ਲਹੁਞ੍ਚ ਗਣ੍ਹਾਤਿ, ਸੁਟ੍ਠੁ ਚ ਉਪਧਾਰੇਤਿ, ਗਹਿਤਞ੍ਚਸ੍ਸ ਨ ਸਮ੍ਮੁਸ੍ਸਤਿ.
ਸਤ੍ਤ ਚ ਮੇ ਵਸ੍ਸਾਨਿ ਅਧੀਯਨ੍ਤਸ੍ਸ ਨਯਿਮਸ੍ਸ ਸਿਪ੍ਪਸ੍ਸ ਅਨ੍ਤੋ ਪਞ੍ਞਾਯਤੀਤਿ ਏਤ੍ਥ ਅਯਂ ਕਿਰ ਜੀਵਕੋ ਯਤ੍ਤਕਂ ਆਚਰਿਯੋ ਜਾਨਾਤਿ, ਯਂ ਅਞ੍ਞੇ ਸੋਲ਼ਸਹਿ ਵਸ੍ਸੇਹਿ ਉਗ੍ਗਣ੍ਹਨ੍ਤਿ, ਤਂ ਸਬ੍ਬਂ ਸਤ੍ਤਹਿ ਵਸ੍ਸੇਹਿ ਉਗ੍ਗਹੇਸਿ. ਸਕ੍ਕਸ੍ਸ ਪਨ ਦੇਵਰਞ੍ਞੋ ਏਤਦਹੋਸਿ – ‘‘ਅਯਂ ਬੁਦ੍ਧਾਨਂ ਉਪਟ੍ਠਾਕੋ ਅਗ੍ਗਵਿਸ੍ਸਾਸਕੋ ਭਵਿਸ੍ਸਤਿ, ਹਨ੍ਦ ਨਂ ਭੇਸਜ੍ਜਯੋਜਨਂ ਸਿਕ੍ਖਾਪੇਮੀ’’ਤਿ ਆਚਰਿਯਸ੍ਸ ਸਰੀਰੇ ਅਜ੍ਝਾਵਸਿਤ੍ਵਾ ਯਥਾ ਠਪੇਤ੍ਵਾ ਕਮ੍ਮਵਿਪਾਕਂ ਅਵਸੇਸਰੋਗਂ ਏਕੇਨੇਵ ਭੇਸਜ੍ਜਯੋਗੇਨ ਤਿਕਿਚ੍ਛਿਤੁਂ ਸਕ੍ਕੋਤਿ, ਤਥਾ ਨਂ ਭੇਸਜ੍ਜਯੋਜਨਂ ਸਿਕ੍ਖਾਪੇਸਿ. ਸੋ ਪਨ ‘‘ਆਚਰਿਯਸ੍ਸ ਸਨ੍ਤਿਕੇ ਸਿਕ੍ਖਾਮੀ’’ਤਿ ਮਞ੍ਞਤਿ, ਤਸ੍ਮਾ ‘‘ਸਮਤ੍ਥੋ ਇਦਾਨਿ ਜੀਵਕੋ ਤਿਕਿਚ੍ਛਿਤੁ’’ਨ੍ਤਿ ਸਕ੍ਕੇਨ ਵਿਸ੍ਸਟ੍ਠਮਤ੍ਤੇ ਏਵਂ ਚਿਨ੍ਤੇਤ੍ਵਾ ਆਚਰਿਯਂ ਪੁਚ੍ਛਿ. ਆਚਰਿਯੋ ਪਨ ‘‘ਨ ਇਮਿਨਾ ਮਮਾਨੁਭਾਵੇਨ ਉਗ੍ਗਹਿਤਂ, ਦੇਵਤਾਨੁਭਾਵੇਨ ਉਗ੍ਗਹਿਤ’’ਨ੍ਤਿ ਞਤ੍ਵਾਵ ਤੇਨ ਹਿ ਭਣੇਤਿਆਦਿਮਾਹ. ਸਮਨ੍ਤਾ ਯੋਜਨਂ ਆਹਿਣ੍ਡਨ੍ਤੋਤਿ ਦਿਵਸੇ ਦਿਵਸੇ ਏਕੇਕੇਨ ਦ੍ਵਾਰੇਨ ਨਿਕ੍ਖਮਿਤ੍ਵਾ ਚਤ੍ਤਾਰੋ ਦਿਵਸੇ ਆਹਿਣ੍ਡਨ੍ਤੋ. ਪਰਿਤ੍ਤਂ ਪਾਥੇਯ੍ਯਂ ਪਾਦਾਸੀਤਿ ਅਪ੍ਪਮਤ੍ਤਕਂ ਅਦਾਸਿ. ਕਸ੍ਮਾ? ਤਸ੍ਸ ਕਿਰ ਏਤਦਹੋਸਿ – ‘‘ਅਯਂ ਮਹਾਕੁਲਸ੍ਸ ਪੁਤ੍ਤੋ ਗਤਮਤ੍ਤੋਯੇਵ ਪਿਤਿਪਿਤਾਮਹਾਨਂ ਸਨ੍ਤਿਕਾ ਮਹਾਸਕ੍ਕਾਰਂ ਲਭਿਸ੍ਸਤਿ, ਤਤੋ ਮਯ੍ਹਂ ਵਾ ਸਿਪ੍ਪਸ੍ਸ ਵਾ ਗੁਣਂ ਨ ਜਾਨਿਸ੍ਸਤਿ, ਅਨ੍ਤਰਾਮਗ੍ਗੇ ਪਨ ਖੀਣਪਾਥੇਯ੍ਯੋ ਸਿਪ੍ਪਂ ਪਯੋਜੇਤ੍ਵਾ ਅਵਸ੍ਸਂ ਮਯ੍ਹਞ੍ਚ ਸਿਪ੍ਪਸ੍ਸ ਚ ਗੁਣਂ ਜਾਨਿਸ੍ਸਤੀ’’ਤਿ ਪਰਿਤ੍ਤਂ ਦਾਪੇਸਿ.
ਸੇਟ੍ਠਿਭਰਿਯਾਦਿਵਤ੍ਥੁਕਥਾ
੩੩੦. ਪਸਤੇਨਾਤਿ ਏਕਹਤ੍ਥਪੁਟੇਨ. ਪਿਚੁਨਾਤਿ ਕਪ੍ਪਾਸਪਟਲੇਨ. ਯਤ੍ਰਹਿ ਨਾਮਾਤਿ ਯਾ ਨਾਮ. ਕਿਮ੍ਪਿਮਾਯਨ੍ਤਿ ਕਿਮ੍ਪਿ ਮੇ ਅਯਂ. ਉਪਜਾਨਾਮੇਤਸ੍ਸ ਸਂਯਮਸ੍ਸਾਤਿ ਕਤਸ੍ਸ ਚ ਰੋਗੂਪਸਮਸ੍ਸ ਚ ਉਪਕਾਰਂ ਜਾਨਾਮਾਤਿ ਅਧਿਪ੍ਪਾਯੋ.
੩੩੧. ਸਬ੍ਬਾਲਙ੍ਕਾਰਂ ਤੁਯ੍ਹਂ ਹੋਤੂਤਿ ਰਾਜਾ ਕਿਰ ‘‘ਸਚੇ ਇਮਂ ਗਣ੍ਹਿਸ੍ਸਤਿ, ਪਮਾਣਯੁਤ੍ਤੇ ਠਾਨੇ ਨਂ ਠਪੇਸ੍ਸਾਮਿ. ਸਚੇ ਨ ਗਣ੍ਹਿਸ੍ਸਤਿ, ਅਬ੍ਭਨ੍ਤਰਿਕਂ ਨਂ ਵਿਸ੍ਸਾਸਕਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਵਮਾਹ. ਅਭਯਕੁਮਾਰਸ੍ਸਾਪਿ ਨਾਟਕਾਨਮ੍ਪਿ ਚਿਤ੍ਤਂ ਉਪ੍ਪਜ੍ਜਿ ‘‘ਅਹੋ ਵਤ ਨ ਗਣ੍ਹੇਯ੍ਯਾ’’ਤਿ. ਸੋਪਿ ਤੇਸਂ ਚਿਤ੍ਤਂ ਞਤ੍ਵਾ ਵਿਯ ‘‘ਇਦਂ ਮੇ ਦੇਵ ਅਯ੍ਯਿਕਾਨਂ ਆਭਰਣਂ, ਨਯਿਦਂ ਮਯ੍ਹਂ ਗਣ੍ਹਿਤੁਂ ਪਤਿਰੂਪ’’ਨ੍ਤਿ ਵਤ੍ਵਾ ਅਲਂ ਦੇਵਾਤਿਆਦਿਮਾਹ. ਅਧਿਕਾਰਂ ਮੇ ਦੇਵੋ ਸਰਤੂਤਿ ਕਤਸ੍ਸ ਉਪਕਾਰਂ ਮੇ ਦੇਵੋ ਸਰਤੂਤਿ ਅਤ੍ਥੋ. ਰਾਜਾ ਪਸਨ੍ਨੋ ਸਬ੍ਬਾਕਾਰਸਮ੍ਪਨ੍ਨਂ ਗੇਹਞ੍ਚ ਅਮ੍ਬਵਨੁਯ੍ਯਾਨਞ੍ਚ ਅਨੁਸਂਵਚ੍ਛਰਂ ਸਤਸਹਸ੍ਸਉਟ੍ਠਾਨਕਂ ਗਾਮਞ੍ਚ ਮਹਾਸਕ੍ਕਾਰਞ੍ਚ ਦਤ੍ਵਾ ਤੇਨ ਹਿ ਭਣੇਤਿਆਦਿਮਾਹ.
ਰਾਜਗਹਸੇਟ੍ਠਿਵਤ੍ਥੁਕਥਾ
੩੩੨. ਸਕ੍ਖਿਸ੍ਸਸਿ ਪਨ ਤ੍ਵਂ ਗਹਪਤੀਤਿ ਕਸ੍ਮਾ ਆਹ? ਇਰਿਯਾਪਥਸਮ੍ਪਰਿਵਤ੍ਤਨੇਨ ਕਿਰ ਮਤ੍ਥਲੁਙ੍ਗਂ ਨ ਸਣ੍ਠਾਤਿ, ਅਸ੍ਸ ਚ ਤੀਹਿ ਸਤ੍ਤਾਹੇਹਿ ਨਿਚ੍ਚਲਸ੍ਸ ਨਿਪਨ੍ਨਸ੍ਸ ਮਤ੍ਥਲੁਙ੍ਗਂ ਸਣ੍ਠਹਿਸ੍ਸਤੀਤਿ ਞਤ੍ਵਾ ਅਪ੍ਪੇਵ ਨਾਮ ਸਤ੍ਤਸਤ੍ਤਮਾਸੇ ਪਟਿਜਾਨਿਤ੍ਵਾ ਸਤ੍ਤਸਤ੍ਤਦਿਵਸੇਪਿ ਨਿਪਜ੍ਜੇਯ੍ਯਾਤਿ ਨਂ ਏਵਮਾਹ. ਤੇਨੇਵ ਪਰਤੋ ਵੁਤ੍ਤਂ ‘‘ਅਪਿ ਚ ਪਟਿਕਚ੍ਚੇਵ ਮਯਾ ਞਾਤੋ’’ਤਿ. ਸੀਸਚ੍ਛਵਿਂ ਉਪ੍ਪਾਟੇਤ੍ਵਾਤਿ ਸੀਸਚਮ੍ਮਂ ਅਪਨੇਤ੍ਵਾ. ਸਿਬ੍ਬਿਨਿਂ ਵਿਨਾਮੇਤ੍ਵਾਤਿ ਸਿਬ੍ਬਿਨਿਂ ਵਿਵਰਿਤ੍ਵਾ. ਨਾਹਂ ਆਚਰਿਯ ਸਕ੍ਕੋਮੀਤਿ ਤਸ੍ਸ ਕਿਰ ਸਰੀਰੇ ਮਹਾਡਾਹੋ ਉਪ੍ਪਜ੍ਜਿ, ਤਸ੍ਮਾ ਏਵਮਾਹ. ਤੀਹਿ ਸਤ੍ਤਾਹੇਹੀਤਿ ਤੀਹਿ ਪਸ੍ਸੇਹਿ ਏਕੇਕੇਨ ਸਤ੍ਤਾਹੇਨ.
੩੩੩. ਜਨਂ ਉਸ੍ਸਾਰੇਤ੍ਵਾਤਿ ਜਨਂ ਨੀਹਰਾਪੇਤ੍ਵਾ.
ਪਜ੍ਜੋਤਰਾਜਵਤ੍ਥੁਕਥਾ
੩੩੪. ਜੇਗੁਚ੍ਛਂ ਮੇ ਸਪ੍ਪੀਤਿ ਅਯਂ ਕਿਰ ਰਾਜਾ ਵਿਚ੍ਛਿਕਸ੍ਸ ਜਾਤੋ, ਵਿਚ੍ਛਿਕਵਿਸਪਟਿਘਾਤਾਯ ਚ ਸਪ੍ਪਿ ਭੇਸਜ੍ਜਂ ਹੋਤਿ ਵਿਚ੍ਛਿਕਾਨਂ ਪਟਿਕੂਲਂ, ਤਸ੍ਮਾ ਏਵਮਾਹ. ਉਦ੍ਦੇਕਂ ਦਸ੍ਸਤੀਤਿ ਉਗ੍ਗਾਰਂ ਦਸ੍ਸਤਿ. ਪਞ੍ਞਾਸ ਯੋਜਨਿਕਾ ਹੋਤੀਤਿ ਪਞ੍ਞਾਸ ਯੋਜਨਾਨਿ ਗਨ੍ਤੁਂ ਸਮਤ੍ਥਾ ਹੋਤਿ. ਨ ਕੇਵਲਞ੍ਚਸ੍ਸ ਰਞ੍ਞੋ ਹਤ੍ਥਿਨੀਯੇਵ, ਨਾਲ਼ਾਗਿਰਿ ਨਾਮ ਹਤ੍ਥੀ ਯੋਜਨਸਤਂ ਗਚ੍ਛਤਿ, ਚੇਲਕਣ੍ਣੋ ਚ ਮੁਞ੍ਚਕੇਸੋ ਚਾਤਿ ਦ੍ਵੇ ਅਸ੍ਸਾ ਵੀਸਯੋਜਨਸਤਂ ਗਚ੍ਛਨ੍ਤਿ, ਕਾਕੋ ਦਾਸੋ ਸਟ੍ਠਿਯੋਜਨਾਨਿ ਗਚ੍ਛਤਿ.
ਏਕਸ੍ਸ ਕਿਰ ਕੁਲਪੁਤ੍ਤਸ੍ਸ ਅਨੁਪ੍ਪਨ੍ਨੇ ਬੁਦ੍ਧੇ ਏਕਦਿਵਸਂ ਭੁਞ੍ਜਿਤੁਂ ਨਿਸਿਨ੍ਨਸ੍ਸ ਪਚ੍ਚੇਕਬੁਦ੍ਧੋ ਦ੍ਵਾਰੇ ਠਤ੍ਵਾ ਅਗਮਾਸਿ, ਤਸ੍ਸੇਕੋ ਪੁਰਿਸੋ ‘‘ਪਚ੍ਚੇਕਬੁਦ੍ਧੋ ਆਗਨ੍ਤ੍ਵਾ ਗਤੋ’’ਤਿ ਆਰੋਚੇਸਿ. ਸੋ ਸੁਤ੍ਵਾ ‘‘ਗਚ੍ਛ, ਵੇਗੇਨ ਪਤ੍ਤਂ ਆਹਰਾ’’ਤਿ ਆਹਰਾਪੇਤ੍ਵਾ ਅਤ੍ਤਨੋ ਸਜ੍ਜਿਤਂ ਭਤ੍ਤਂ ਸਬ੍ਬਂ ਦਤ੍ਵਾ ਪੇਸੇਸਿ. ਇਤਰੋ ਤਂ ਆਹਰਿਤ੍ਵਾ ਪਚ੍ਚੇਕਬੁਦ੍ਧਸ੍ਸ ਹਤ੍ਥੇ ਠਪੇਤ੍ਵਾ ‘‘ਅਹਂ ਭਨ੍ਤੇ ਤੁਮ੍ਹਾਕਂ ਕਤੇਨ ਇਮਿਨਾ ਕਾਯਵੇਯ੍ਯਾਵਤਿਕੇਨ ਯਤ੍ਥ ਯਤ੍ਥ ਨਿਬ੍ਬਤ੍ਤੋਪਿ ਵਾਹਨਸਮ੍ਪਨ੍ਨੋ ਹੋਮੀ’’ਤਿ ਪਤ੍ਥਨਂ ਅਕਾਸਿ. ਸੋ ਅਯਂ ਏਤਰਹਿ ਪਜ੍ਜੋਤੋ ਨਾਮ ਰਾਜਾ ਜਾਤੋ, ਤਾਯ ਪਤ੍ਥਨਾਯ ਅਯਂ ਵਾਹਨਸਮ੍ਪਤ੍ਤਿ.
ਸਪ੍ਪਿਂ ਪਾਯੇਤ੍ਵਾਤਿ ਸਪ੍ਪਿਞ੍ਚ ਪਾਯੇਤ੍ਵਾ; ਪਰਿਚਾਰਿਕਾਨਞ੍ਚ ਆਹਾਰਾਚਾਰੇ ਵਿਧਿਂ ਆਚਿਕ੍ਖਿਤ੍ਵਾ. ਨਖੇਨ ਭੇਸਜ੍ਜਂ ਓਲੁਮ੍ਪੇਤ੍ਵਾਤਿ ਨਖੇਨ ਭੇਸਜ੍ਜਂ ਓਦਹਿਤ੍ਵਾ; ਪਕ੍ਖਿਪਿਤ੍ਵਾਤਿ ਅਤ੍ਥੋ. ਨਿਚ੍ਛਾਰੇਸੀਤਿ ਵਿਰੇਚੇਸਿ.
ਸਿਵੇਯ੍ਯਕਦੁਸ੍ਸਯੁਗਕਥਾ
੩੩੫. ਸਿਵੇਯ੍ਯਕਂ ਨਾਮ ਉਤ੍ਤਰਕੁਰੂਸੁ ਸਿਵਥਿਕਂ ਅਵਮਙ੍ਗਲਵਤ੍ਥਂ. ਤਤ੍ਥ ਕਿਰ ਮਨੁਸ੍ਸਾ ਮਤਂ ਤੇਨ ਵਤ੍ਥੇਨ ਵੇਠੇਤ੍ਵਾ ਨਿਕ੍ਖਿਪਨ੍ਤਿ, ਤਂ ‘‘ਮਂਸਪੇਸੀ’’ਤਿ ਸਲ੍ਲਕ੍ਖੇਤ੍ਵਾ ਹਤ੍ਥਿਸੋਣ੍ਡਕਸਕੁਣਾ ਉਕ੍ਖਿਪਿਤ੍ਵਾ ਹਿਮਵਨ੍ਤਕੂਟੇ ਠਪੇਤ੍ਵਾ ਵਤ੍ਥਂ ਅਪਨੇਤ੍ਵਾ ਖਾਦਨ੍ਤਿ. ਅਥ ਵਨਚਰਕਾ ਵਤ੍ਥਂ ਦਿਸ੍ਵਾ ਰਞ੍ਞੋ ਆਹਰਨ੍ਤਿ. ਏਵਮਿਦਂ ਪਜ੍ਜੋਤੇਨ ਲਦ੍ਧਂ. ਸਿਵਿਰਟ੍ਠੇ ਕੁਸਲਾ ਇਤ੍ਥਿਯੋ ਤੀਹਿ ਅਂਸੂਹਿ ਸੁਤ੍ਤਂ ਕਨ੍ਤਨ੍ਤਿ, ਤੇਨ ਸੁਤ੍ਤੇਨ ਵਾਯਿਤਵਤ੍ਥਂ ਏਤਨ੍ਤਿਪਿ ਵਦਨ੍ਤਿ.
ਸਮਤ੍ਤਿਂਸਵਿਰੇਚਨਕਥਾ
੩੩੬. ਸਿਨੇਹੇਥਾਤਿ ਕਿਂ ਪਨ ਭਗਵਤੋ ਕਾਯੋ ਲੂਖੋਤਿ ਨ ਲੂਖੋ? ਭਗਵਤੋ ਹਿ ਆਹਾਰੇ ਸਦਾ ਦੇਵਤਾ ਦਿਬ੍ਬੋਜਂ ਪਕ੍ਖਿਪਨ੍ਤਿ, ਸਿਨੇਹਪਾਨਂ ਪਨ ਸਬ੍ਬਤ੍ਥ ਦੋਸੇ ਤੇਮੇਤਿ, ਸਿਰਾ ਮੁਦੁਕਾ ਕਰੋਤਿ, ਤੇਨਾਯਂ ਏਵਮਾਹ. ਤੀਣਿ ਉਪ੍ਪਲਹਤ੍ਥਾਨੀਤਿ ਏਕਂ ਓਲ਼ਾਰਿਕਦੋਸਹਰਣਤ੍ਥਂ, ਏਕਂ ਮਜ੍ਝਿਮਦੋਸਹਰਣਤ੍ਥਂ, ਏਕਂ ਸੁਖੁਮਦੋਸਹਰਣਤ੍ਥਂ. ਨਚਿਰਸ੍ਸੇਵ ਪਕਤਤ੍ਤੋ ਅਹੋਸੀਤਿ ਏਵਂ ਪਕਤਤ੍ਤੇ ਪਨ ਕਾਯੇ ਨਾਗਰਾ ਦਾਨਂ ਸਮ੍ਪਾਦੇਸੁਂ. ਜੀਵਕੋ ਆਗਨ੍ਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਭਗਵਾ ਅਜ੍ਜ ਨਾਗਰਾ ਤੁਮ੍ਹਾਕਂ ਦਾਨਂ ਦਾਤੁਕਾਮਾ, ਮਾ ਅਨ੍ਤੋਗਾਮਂ ਪਿਣ੍ਡਾਯ ਪਵਿਸਥਾ’’ਤਿ. ਮਹਾਮੋਗ੍ਗਲ੍ਲਾਨਤ੍ਥੇਰੋ ਚਿਨ੍ਤੇਸਿ – ‘‘ਕੁਤੋ ਨੁ ਖੋ ਅਜ੍ਜ ਭਗਵਤੋ ਪਠਮਂ ਪਿਣ੍ਡਪਾਤੋ ਲਦ੍ਧੁਂ ਵਟ੍ਟਤੀ’’ਤਿ. ਤਤੋ ਚਿਨ੍ਤੇਸਿ – ‘‘ਸੋਣੋ ਸੇਟ੍ਠਿਪੁਤ੍ਤੋ ਖੇਤ੍ਤਪਰਿਕਮ੍ਮਤੋ ਪਟ੍ਠਾਯ ਅਞ੍ਞੇਹਿ ਅਸਾਧਾਰਣਾਨਂ ਖੀਰੋਦਕਸੇਚਨਸਂਵਦ੍ਧਾਨਂ ਗਨ੍ਧਸਾਲੀਨਂ ਓਦਨਂ ਭੁਞ੍ਜਤਿ, ਤਤੋ ਭਗਵਤੋ ਪਿਣ੍ਡਪਾਤਂ ਆਹਰਿਸ੍ਸਾਮੀ’’ਤਿ ਇਦ੍ਧਿਯਾ ਗਨ੍ਤ੍ਵਾ ਤਸ੍ਸ ਪਾਸਾਦਤਲੇ ਅਤ੍ਤਾਨਂ ਦਸ੍ਸੇਸਿ. ਸੋ ਥੇਰਸ੍ਸ ਪਤ੍ਤਂ ਗਹੇਤ੍ਵਾ ਪਣੀਤਂ ਪਿਣ੍ਡਪਾਤਂ ਅਦਾਸਿ. ਥੇਰਸ੍ਸ ਚ ਗਮਨਾਕਾਰਂ ਦਿਸ੍ਵਾ ‘‘ਭੁਞ੍ਜਥ ਭਨ੍ਤੇ’’ਤਿ ਆਹ. ਥੇਰੋ ਤਮਤ੍ਥਂ ਆਰੋਚੇਸਿ ‘‘ਭੁਞ੍ਜਥ ਭਨ੍ਤੇ, ਅਹਂ ਅਞ੍ਞਂ ਭਗਵਤੋ ਦਸ੍ਸਾਮੀ’’ਤਿ ਥੇਰਂ ਭੋਜੇਤ੍ਵਾ ਗਨ੍ਧੇਹਿ ਪਤ੍ਤਂ ਉਬ੍ਬਟ੍ਟੇਤ੍ਵਾ ਪਿਣ੍ਡਪਾਤਸ੍ਸ ਪੂਰੇਤ੍ਵਾ ਅਦਾਸਿ, ਤਂ ਥੇਰੋ ਆਹਰਿਤ੍ਵਾ ਭਗਵਤੋ ਅਦਾਸਿ.
ਰਾਜਾਪਿ ਖੋ ਬਿਮ੍ਬਿਸਾਰੋ ‘‘ਅਜ੍ਜ ਭਗਵਾ ਕਿਂ ਭੁਞ੍ਜਿਸ੍ਸਤੀ’’ਤਿ ਵਿਹਾਰਂ ਆਗਨ੍ਤ੍ਵਾ ਪਵਿਸਮਾਨੋਵ ਪਿਣ੍ਡਪਾਤਗਨ੍ਧਂ ਘਾਯਿਤ੍ਵਾ ਭੁਞ੍ਜਿਤੁਕਾਮੋ ਅਹੋਸਿ. ਭਗਵਤੋ ਦ੍ਵੀਸੁਯੇਵ ਪਿਣ੍ਡਪਾਤੇਸੁ ਭਾਜਨਗਤੇਸੁ ਦੇਵਤਾ ਓਜਂ ਪਕ੍ਖਿਪਿਂਸੁ – ਯਞ੍ਚ ਸੁਜਾਤਾ ਅਦਾਸਿ; ਯਞ੍ਚ ਪਰਿਨਿਬ੍ਬਾਨਕਾਲੇ ਚੁਨ੍ਦੋ ਕਮ੍ਮਾਰਪੁਤ੍ਤੋ; ਅਞ੍ਞੇਸੁ ਕਬਲ਼ੇ ਕਬਲ਼ੇ ਪਕ੍ਖਿਪਿਂਸੁ, ਤਸ੍ਮਾ ਭਗਵਾ ਰਞ੍ਞੋ ਇਚ੍ਛਂ ਜਾਨਿਤ੍ਵਾ ਅਪਕ੍ਖਿਤ੍ਤੋਜਮੇਵ ਥੋਕਂ ਪਿਣ੍ਡਪਾਤਂ ਰਞ੍ਞੋ ਦਾਪੇਸਿ. ਸੋ ਪਰਿਭੁਞ੍ਜਿਤ੍ਵਾ ਪੁਚ੍ਛਿ – ‘‘ਕਿਂ ਭਨ੍ਤੇ, ਉਤ੍ਤਰਕੁਰੁਤੋ ਆਭਤਂ ਭੋਜਨ’’ਨ੍ਤਿ? ‘‘ਨ ਮਹਾਰਾਜ, ਉਤ੍ਤਰਕੁਰੁਤੋ; ਅਪਿਚ ਖੋ ਤਵੇਵ ਰਟ੍ਠਵਾਸਿਨੋ ਗਹਪਤਿਪੁਤ੍ਤਸ੍ਸ ਭੋਜਨਂ ਏਤ’’ਨ੍ਤਿ ਵਤ੍ਵਾ ਸੋਣਸ੍ਸ ਸਮ੍ਪਤ੍ਤਿਂ ਆਚਿਕ੍ਖਿ. ਤਂ ਸੁਤ੍ਵਾ ਰਾਜਾ ਸੋਣਂ ਦਟ੍ਠੁਕਾਮੋ ਹੁਤ੍ਵਾ ਚਮ੍ਮਕ੍ਖਨ੍ਧਕੇ ਵੁਤ੍ਤਨਯੇਨ ਅਸੀਤਿਯਾ ਕੁਲਪੁਤ੍ਤਸਹਸ੍ਸੇਹਿ ਸਦ੍ਧਿਂ ਸੋਣਸ੍ਸ ਆਗਮਨਂ ਅਕਾਸਿ. ਤੇ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ਸੋਤਾਪਨ੍ਨਾ ਜਾਤਾ. ਸੋਣੋ ਪਨ ਪਬ੍ਬਜਿਤ੍ਵਾ ਅਰਹਤ੍ਤੇ ਪਤਿਟ੍ਠਿਤੋ. ਭਗਵਾਪਿ ਏਤਦਤ੍ਥਮੇਵ ਰਞ੍ਞੋ ਪਿਣ੍ਡਪਾਤਂ ਦਾਪੇਸਿ.
ਵਰਯਾਚਨਕਥਾ
੩੩੭. ਏਵਂ ਕਤਭਤ੍ਤਕਿਚ੍ਚੇ ਭਗਵਤਿ ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਤਂ ਸਿਵੇਯ੍ਯਕਂ ਦੁਸ੍ਸਯੁਗਂ ਆਦਾਯ…ਪੇ… ਏਤਦਵੋਚ. ਅਤਿਕ੍ਕਨ੍ਤਵਰਾਤਿ ਏਤ੍ਥ ਵਿਨਿਚ੍ਛਯੋ ਮਹਾਖਨ੍ਧਕੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਭਗਵਾ ਭਨ੍ਤੇ ਪਂਸੁਕੂਲਿਕੋ ਭਿਕ੍ਖੁਸਙ੍ਘੋ ਚਾਤਿ ਭਗਵਤੋ ਹਿ ਬੁਦ੍ਧਤ੍ਤਂ ਪਤ੍ਤਤੋ ਪਟ੍ਠਾਯ ਯਾਵ ਇਦਂ ਵਤ੍ਥਂ, ਏਤ੍ਥਨ੍ਤਰੇ ਵੀਸਤਿ ਵਸ੍ਸਾਨਿ ਨ ਕੋਚਿ ਗਹਪਤਿਚੀਵਰਂ ਸਾਦਿਯਿ, ਸਬ੍ਬੇ ਪਂਸੁਕੂਲਿਕਾਵ ਅਹੇਸੁਂ. ਤੇਨਾਯਂ ਏਵਮਾਹ. ਗਹਪਤਿਚੀਵਰਨ੍ਤਿ ਗਹਪਤੀਹਿ ਦਿਨ੍ਨਚੀਵਰਂ. ਧਮ੍ਮਿਯਾ ਕਥਾਯਾਤਿ ਵਤ੍ਥਦਾਨਾਨਿਸਂਸਪਟਿਸਂਯੁਤ੍ਤਾਯ ਕਥਾਯ. ਇਤਰੀਤਰੇਨਾਪੀਤਿ ਅਪ੍ਪਗ੍ਘੇਨਪਿ ਮਹਗ੍ਘੇਨਪਿ; ਯੇਨ ਕੇਨਚੀਤਿ ਅਤ੍ਥੋ. ਪਾਵਾਰੋਤਿ ਸਲੋਮਕੋ ਕਪ੍ਪਾਸਾਦਿਭੇਦੋ. ਅਨੁਜਾਨਾਮਿ ਭਿਕ੍ਖਵੇ ਕੋਜਵਨ੍ਤਿ ਏਤ੍ਥ ਪਕਤਿਕੋਜਵਮੇਵ ਵਟ੍ਟਤਿ, ਮਹਾਪਿਟ੍ਠਿਯਕੋਜਵਂ ਨ ਵਟ੍ਟਤਿ. ਮਹਾਪਿਟ੍ਠਿਯਕੋਜਵਨ੍ਤਿ ਉਣ੍ਣਾਮਯੋ ਪਾਵਾਰਸਦਿਸੋ ਕੋਜਵੋ.
ਕਮ੍ਬਲਾਨੁਜਾਨਨਾਦਿਕਥਾ
੩੩੮. ਕਾਸਿਰਾਜਾਤਿ ਕਾਸੀਨਂ ਰਾਜਾ; ਪਸੇਨਦਿਸ੍ਸ ਏਕਪਿਤਿਕਭਾਤਾ ਏਸ. ਅਡ੍ਢਕਾਸਿਯਨ੍ਤਿ ਏਤ੍ਥ ਕਾਸੀਤਿ ਸਹਸ੍ਸਂ ਵੁਚ੍ਚਤਿ ਤਂ ਅਗ੍ਘਨਕੋ ਕਾਸਿਯੋ. ਅਯਂ ਪਨ ਪਞ੍ਚਸਤਾਨਿ ਅਗ੍ਘਤਿ, ਤਸ੍ਮਾ ‘‘ਅਡ੍ਢਕਾਸਿਯੋ’’ਤਿ ਵੁਤ੍ਤੋ. ਤੇਨੇਵਾਹ – ‘‘ਉਪਡ੍ਢਕਾਸੀਨਂ ਖਮਮਾਨ’’ਨ੍ਤਿ.
੩੩੯. ਉਚ੍ਚਾਵਚਾਨੀਤਿ ਸੁਨ੍ਦਰਾਨਿ ਚ ਅਸੁਨ੍ਦਰਾਨਿ ਚ. ਭਙ੍ਗਂ ਨਾਮ ਖੋਮਾਦੀਹਿ ਪਞ੍ਚਹਿ ਸੁਤ੍ਤੇਹਿ ਮਿਸ੍ਸੇਤ੍ਵਾ ਕਤਂ; ਵਾਕਮਯਮੇਵਾਤਿਪਿ ਵਦਨ੍ਤਿ.
੩੪੦. ਏਕਂਯੇਵ ਭਗਵਤਾ ਚੀਵਰਂ ਅਨੁਞ੍ਞਾਤਂ ਨ ਦ੍ਵੇਤਿ ਤੇ ਕਿਰ ਇਤਰੀਤਰੇਨ ਚੀਵਰੇਨਾਤਿ ਏਤਸ੍ਸ ‘‘ਗਹਪਤਿਕੇਨ ਵਾ ਪਂਸੁਕੂਲੇਨ ਵਾ’’ਤਿ ਏਵਂ ਅਤ੍ਥਂ ਸਲ੍ਲਕ੍ਖਿਂਸੁ. ਨਾਗਮੇਸੁਨ੍ਤਿ ਯਾਵ ਤੇ ਸੁਸਾਨਤੋ ਆਗਚ੍ਛਨ੍ਤਿ, ਤਾਵ ਤੇ ਨ ਅਚ੍ਛਿਂਸੁ; ਪਕ੍ਕਮਿਂਸੁਯੇਵ. ਨਾਕਾਮਾ ਭਾਗਂ ਦਾਤੁਨ੍ਤਿ ਨ ਅਨਿਚ੍ਛਾਯ ਦਾਤੁਂ; ਯਦਿ ਪਨ ਇਚ੍ਛਨ੍ਤਿ, ਦਾਤਬ੍ਬੋ. ਆਗਮੇਸੁਨ੍ਤਿ ਉਪਚਾਰੇ ਅਚ੍ਛਿਂਸੁ. ਤੇਨਾਹ ਭਗਵਾ ਆਹ – ‘‘ਅਨੁਜਾਨਾਮਿ ਭਿਕ੍ਖਵੇ ਆਗਮੇਨ੍ਤਾਨਂ ਅਕਾਮਾ ਭਾਗਂ ਦਾਤੁ’’ਨ੍ਤਿ. ਯਦਿ ਪਨ ਮਨੁਸ੍ਸਾ ‘‘ਇਧਾਗਤਾ ਏਵ ਗਣ੍ਹਨ੍ਤੂ’’ਤਿ ਦੇਨ੍ਤਿ, ਸਞ੍ਞਾਣਂ ਵਾ ਕਤ੍ਵਾ ਗਚ੍ਛਨ੍ਤਿ ‘‘ਸਮ੍ਪਤ੍ਤਾ ਗਣ੍ਹਨ੍ਤੂ’’ਤਿ ਸਮ੍ਪਤ੍ਤਾਨਂ ਸਬ੍ਬੇਸਮ੍ਪਿ ਪਾਪੁਣਨ੍ਤਿ. ਸਚੇ ਛਡ੍ਡੇਤ੍ਵਾ ਗਤਾ, ਯੇਨ ਗਹਿਤਂ, ਸੋ ਏਵ ਸਾਮੀ. ਸਦਿਸਾ ਸੁਸਾਨਂ ਓਕ੍ਕਮਿਂਸੂਤਿ ਸਬ੍ਬੇ ਸਮਂ ਓਕ੍ਕਮਿਂਸੁ; ਏਕਦਿਸਾਯ ਵਾ ਓਕ੍ਕਮਿਂਸੂਤਿਪਿ ਅਤ੍ਥੋ. ਤੇ ਕਤਿਕਂ ਕਤ੍ਵਾਤਿ ਲਦ੍ਧਂ ਪਂਸੁਕੂਲਂ ਸਬ੍ਬੇ ਭਾਜੇਤ੍ਵਾ ਗਣ੍ਹਿਸ੍ਸਾਮਾਤਿ ਬਹਿਮੇਵ ਕਤਿਕਂ ਕਤ੍ਵਾ.
੩੪੨. ਚੀਵਰਪਟਿਗ੍ਗਾਹਕਨ੍ਤਿ ਯੋ ਗਹਪਤਿਕੇਹਿ ਸਙ੍ਘਸ੍ਸ ਦੀਯਮਾਨਂ ਚੀਵਰਂ ਗਣ੍ਹਾਤਿ. ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯਾਤਿਆਦੀਸੁ ਚੀਵਰਪਟਿਗ੍ਗਾਹਕੇਸੁ ਪਚ੍ਛਾ ਆਗਤਾਨਮ੍ਪਿ ਅਤ੍ਤਨੋ ਞਾਤਕਾਦੀਨਂ ਪਠਮਤਰਂ ਪਟਿਗ੍ਗਣ੍ਹਨ੍ਤੋ ਵਾ ਏਕਚ੍ਚਸ੍ਮਿਂ ਪੇਮਂ ਦਸ੍ਸੇਤ੍ਵਾ ਗਣ੍ਹਨ੍ਤੋ ਵਾ ਲੋਭਪਕਤਿਕਤਾਯ ਅਤ੍ਤਨੋ ਪਰਿਣਾਮੇਨ੍ਤੋ ਵਾ ਛਨ੍ਦਾਗਤਿਂ ਗਚ੍ਛਤਿ ਨਾਮ. ਪਠਮਤਰਂ ਆਗਤਸ੍ਸਾਪਿ ਕੋਧਵਸੇਨ ਪਚ੍ਛਾ ਗਣ੍ਹਨ੍ਤੋ ਵਾ ਦੁਗ੍ਗਤਮਨੁਸ੍ਸੇਸੁ ਅਵਮਞ੍ਞਂ ਕਤ੍ਵਾ ਗਣ੍ਹਨ੍ਤੋ ਵਾ ‘‘ਕਿਂ ਵੋ ਘਰੇ ਠਪਨੋਕਾਸੋ ਨਤ੍ਥਿ, ਤੁਮ੍ਹਾਕਂ ਸਨ੍ਤਕਂ ਗਹੇਤ੍ਵਾ ਗਚ੍ਛਥਾ’’ਤਿ ਏਵਂ ਸਙ੍ਘਸ੍ਸ ਲਾਭਨ੍ਤਰਾਯਂ ਕਰੋਨ੍ਤੋ ਵਾ ਦੋਸਾਗਤਿਂ ਗਚ੍ਛਤਿ ਨਾਮ. ਯੋ ਪਨ ਮੁਟ੍ਠਸ੍ਸਤਿ ਅਸਮ੍ਪਜਾਨੋ, ਅਯਂ ਮੋਹਾਗਤਿਂ ਗਚ੍ਛਤਿ ਨਾਮ. ਪਚ੍ਛਾ ਆਗਤਾਨਮ੍ਪਿ ਇਸ੍ਸਰਾਨਮ੍ਪਿ ਭਯੇਨ ਪਠਮਤਰਂ ਪਟਿਗ੍ਗਣ੍ਹਨ੍ਤੋ ਵਾ ‘‘ਚੀਵਰਪਟਿਗ੍ਗਾਹਕਟ੍ਠਾਨਂ ਨਾਮੇਤਂ ਭਾਰਿਯ’’ਨ੍ਤਿ ਸਨ੍ਤਸਨ੍ਤੋ ਵਾ ਭਯਾਗਤਿਂ ਗਚ੍ਛਤਿ ਨਾਮ. ‘‘ਮਯਾ ਇਦਞ੍ਚਿਦਞ੍ਚ ਗਹਿਤਂ, ਇਦਞ੍ਚਿਂਦਞ੍ਚ ਨ ਗਹਿਤ’’ਨ੍ਤਿ ਏਵਂ ਜਾਨਨ੍ਤੋ ਗਹਿਤਾਗਹਿਤਂ ਜਾਨਾਤਿ ਨਾਮ. ਤਸ੍ਮਾ ਯੋ ਨ ਛਨ੍ਦਾਗਤਿਆਦਿਵਸੇਨ ਗਚ੍ਛਤਿ, ਞਾਤਕਅਞ੍ਞਾਤਕਅਡ੍ਢਦੁਗ੍ਗਤੇਸੁ ਵਿਸੇਸਂ ਅਕਤ੍ਵਾ ਆਗਤਪਅਪਾਟਿਯਾ ਗਣ੍ਹਾਤਿ, ਸੀਲਾਚਾਰਪਟਿਪਤ੍ਤਿਯੁਤ੍ਤੋ ਹੋਤਿ, ਸਤਿਮਾ ਮੇਧਾਵੀ ਬਹੁਸ੍ਸੁਤੋ, ਸਕ੍ਕੋਤਿ ਦਾਯਕਾਨਂ ਵਿਸ੍ਸਟ੍ਠਵਾਚਾਯ ਪਰਿਮਣ੍ਡਲੇਹਿ ਪਦਬ੍ਯਞ੍ਜਨੇਹਿ ਅਨੁਮੋਦਨਂ ਕਰੋਨ੍ਤੋ ਪਸਾਦਂ ਜਨੇਤੁਂ, ਏਵਰੂਪੋ ਸਮ੍ਮਨ੍ਨਿਤਬ੍ਬੋ.
ਏਵਞ੍ਚ ਪਨ ਭਿਕ੍ਖਵੇ ਸਮ੍ਮਨ੍ਨਿਤਬ੍ਬੋਤਿ ਏਤ੍ਥ ਪਨ ਏਤਾਯ ਯਥਾਵੁਤ੍ਤਾਯ ਕਮ੍ਮਵਾਚਾਯਪਿ ਅਪਲੋਕਨੇਨਾਪਿ ਅਨ੍ਤੋਵਿਹਾਰੇ ਸਬ੍ਬਸਙ੍ਘਮਜ੍ਝੇਪਿ ਖਣ੍ਡਸੀਮਾਯਪਿ ਸਮ੍ਮਨ੍ਨਿਤੁਂ ਵਟ੍ਟਤਿਯੇਵ. ਏਵਂ ਸਮ੍ਮਤੇਨ ਚ ਵਿਹਾਰਪਚ੍ਚਨ੍ਤੇ ਵਾ ਪਧਾਨਘਰੇ ਵਾ ਨ ਅਚ੍ਛਿਤਬ੍ਬਂ. ਯਤ੍ਥ ਪਨ ਆਗਤਾਗਤਾ ਮਨੁਸ੍ਸਾ ਸੁਖਂ ਪਸ੍ਸਨ੍ਤਿ, ਤਾਦਿਸੇ ਧੁਰਵਿਹਾਰਟ੍ਠਾਨੇ ਬੀਜਨਿਂ ਪਸ੍ਸੇ ਠਪੇਤ੍ਵਾ ਸੁਨਿਵਤ੍ਥੇਨ ਸੁਪਾਰੁਤੇਨ ਨਿਸੀਦਿਤਬ੍ਬਨ੍ਤਿ.
ਤਤ੍ਥੇਵ ਉਜ੍ਝਿਤ੍ਵਾਤਿ ‘‘ਪਟਿਗ੍ਗਹਣਮੇਵ ਅਮ੍ਹਾਕਂ ਭਾਰੋ’’ਤਿ ਵਤ੍ਵਾ ਗਹਿਤਟ੍ਠਾਨੇਯੇਵ ਛਡ੍ਡੇਤ੍ਵਾ ਗਚ੍ਛਨ੍ਤਿ. ਚੀਵਰਨਿਦਹਕਨ੍ਤਿ ਚੀਵਰਪਟਿਸਾਮਕਂ. ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯਾਤਿਆਦੀਸੁ ਚੇਤ੍ਥ ਇਤੋ ਪਰਞ੍ਚ ਸਬ੍ਬਤ੍ਥ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ. ਸਮ੍ਮੁਤਿਵਿਨਿਚ੍ਛਯੋਪਿ ਕਥਿਤਾਨੁਸਾਰੇਨੇਵ ਜਾਨਿਤਬ੍ਬੋ.
ਭਣ੍ਡਾਗਾਰਸਮ੍ਮੁਤਿਆਦਿਕਥਾ
੩੪੩. ਵਿਹਾਰਂ ਵਾਤਿਆਦੀਸੁ ਯੋ ਆਰਾਮਮਜ੍ਝੇ ਆਰਾਮਿਕਸਾਮਣੇਰਾਦੀਹਿ ਅਵਿਵਿਤ੍ਤੋ ਸਬ੍ਬੇਸਂ ਸਮੋਸਰਣਟ੍ਠਾਨੇ ਵਿਹਾਰੋ ਵਾ ਅਡ੍ਢਯੋਗੋ ਵਾ ਹੋਤਿ, ਸੋ ਸਮ੍ਮਨ੍ਨਿਤਬ੍ਬੋ. ਪਚ੍ਚਨ੍ਤਸੇਨਾਸਨਂ ਪਨ ਨ ਸਮ੍ਮਨ੍ਨਿਤਬ੍ਬਂ. ਇਦਂ ਪਨ ਭਣ੍ਡਾਗਾਰਂ ਖਣ੍ਡਸੀਮਂ ਗਨ੍ਤ੍ਵਾ ਖਣ੍ਡਸੀਮਾਯ ਨਿਸਿਨ੍ਨੇਹਿ ਸਮ੍ਮਨ੍ਨਿਤੁਂ ਨ ਵਟ੍ਟਤਿ, ਵਿਹਾਰਮਜ੍ਝੇਯੇਵ ਸਮ੍ਮਨ੍ਨਿਤਬ੍ਬਂ.
ਗੁਤ੍ਤਾਗੁਤ੍ਤਞ੍ਚ ਜਾਨੇਯ੍ਯਾਤਿ ਏਤ੍ਥ ਯਸ੍ਸ ਤਾਵ ਛਦਨਾਦੀਸੁ ਕੋਚਿ ਦੋਸੋ ਨਤ੍ਥਿ, ਤਂ ਗੁਤ੍ਤਂ. ਯਸ੍ਸ ਪਨ ਛਦਨਤਿਣਂ ਵਾ ਛਦਨਿਟ੍ਠਕਾ ਵਾ ਯਤ੍ਥ ਕਤ੍ਥਚਿ ਪਤਿਤਾ, ਯੇਨ ਓਵਸ੍ਸਤਿ ਵਾ, ਮੂਸਿਕਾਦੀਨਂ ਵਾ ਪਵੇਸੋ ਹੋਤਿ, ਭਿਤ੍ਤਿਆਦੀਸੁ ਵਾ ਕਤ੍ਥਚਿ ਛਿਦ੍ਦਂ ਹੋਤਿ, ਉਪਚਿਕਾ ਵਾ ਉਟ੍ਠਹਨ੍ਤਿ, ਤਂ ਸਬ੍ਬਂ ਅਗੁਤ੍ਤਂ ਨਾਮ. ਤਂ ਸਲ੍ਲਕ੍ਖੇਤ੍ਵਾ ਪਟਿਸਙ੍ਖਰਿਤਬ੍ਬਂ. ਸੀਤਸਮਯੇ ਦ੍ਵਾਰਞ੍ਚ ਵਾਤਪਾਨਞ੍ਚ ਸੁਪਿਹਿਤਂ ਕਾਤਬ੍ਬਂ, ਸੀਤੇਨ ਹਿ ਚੀਵਰਾਨਿ ਕਣ੍ਣਕਿਤਾਨਿ ਹੋਨ੍ਤਿ. ਉਣ੍ਹਸਮਯੇ ਅਨ੍ਤਰਨ੍ਤਰਾ ਵਾਤਪ੍ਪਵੇਸਨਤ੍ਥਂ ਵਿਵਰਿਤਬ੍ਬਂ. ਏਵਂ ਕਰੋਨ੍ਤੋ ਹਿ ਗੁਤ੍ਤਾਗੁਤ੍ਤਂ ਜਾਨਾਤਿ ਨਾਮ.
ਇਮੇਹਿ ਪਨ ਚੀਵਰਪਟਿਗ੍ਗਾਹਕਾਦੀਹਿ ਤੀਹਿਪਿ ਅਤ੍ਤਨੋ ਵਤ੍ਤਂ ਜਾਨਿਤਬ੍ਬਂ. ਤਤ੍ਥ ਚੀਵਰਪਟਿਗ੍ਗਾਹਕੇਨ ਤਾਵ ਯਂ ਯਂ ਮਨੁਸ੍ਸਾ ‘‘ਕਾਲਚੀਵਰ’’ਨ੍ਤਿ ਵਾ ‘‘ਅਕਾਲਚੀਵਰ’’ਨ੍ਤਿ ਵਾ ‘‘ਅਚ੍ਚੇਕਚੀਵਰ’’ਨ੍ਤਿ ਵਾ ‘‘ਵਸ੍ਸਿਕਸਾਟਿਕ’’ਨ੍ਤਿ ਵਾ ‘‘ਨਿਸੀਦਨ’’ਨ੍ਤਿ ਵਾ ‘‘ਪਚ੍ਚਤ੍ਥਰਣ’’ਨ੍ਤਿ ਵਾ ‘‘ਮੁਖਪੁਞ੍ਛਨਚੋਲ਼’’ਨ੍ਤਿ ਵਾ ਦੇਨ੍ਤਿ, ਤਂ ਸਬ੍ਬਂ ਏਕਰਾਸਿਂ ਕਤ੍ਵਾ ਮਿਸ੍ਸੇਤ੍ਵਾ ਨ ਗਣ੍ਹਿਤਬ੍ਬਂ, ਵਿਸੁਂ ਵਿਸੁਂ ਕਤ੍ਵਾਵ ਗਣ੍ਹਿਤ੍ਵਾ ਚੀਵਰਨਿਦਹਕਸ੍ਸ ਤਥੇਵ ਆਚਿਕ੍ਖਿਤ੍ਵਾ ਦਾਤਬ੍ਬਂ. ਚੀਵਰਨਿਦਹਕੇਨਾਪਿ ਭਣ੍ਡਾਗਾਰਿਕਸ੍ਸ ਦਦਮਾਨੇਨ ਇਦਂ ਕਾਲਚੀਵਰਂ…ਪੇ… ਇਦਂ ਮੁਖਪੁਞ੍ਛਨਚੋਲ਼ਨ੍ਤਿ ਆਚਿਕ੍ਖਿਤ੍ਵਾਵ ਦਾਤਬ੍ਬਂ. ਭਣ੍ਡਾਗਾਰਿਕੇਨਾਪਿ ਤਥੇਵ ਵਿਸੁਂ ਵਿਸੁਂ ਵਿਯ ਸਞ੍ਞਾਣਂ ਕਤ੍ਵਾ ਠਪੇਤਬ੍ਬਂ. ਤਤੋ ਸਙ੍ਘੇਨ ‘‘ਕਾਲਚੀਵਰਂ ਆਹਰਾ’’ਤਿ ਵੁਤ੍ਤੇ ਕਾਲਚੀਵਰਮੇਵ ਦਾਤਬ੍ਬਂ…ਪੇ… ਮੁਖਪੁਞ੍ਛਨਚੋਲ਼ਕਂ ਆਹਰਾਤਿ ਵੁਤ੍ਤੇ ਤਦੇਵ ਦਾਤਬ੍ਬਂ.
ਇਤਿ ਭਗਵਤਾ ਚੀਵਰਪਟਿਗ੍ਗਾਹਕੋ ਅਨੁਞ੍ਞਾਤੋ, ਚੀਵਰਨਿਦਹਕੋ ਅਨੁਞ੍ਞਾਤੋ, ਭਣ੍ਡਾਗਾਰਂ ਅਨੁਞ੍ਞਾਤਂ, ਭਣ੍ਡਾਗਾਰਿਕੋ ਅਨੁਞ੍ਞਾਤੋ, ਨ ਬਾਹੁਲਿਕਤਾਯ ਨ ਅਸਨ੍ਤੁਟ੍ਠਿਯਾ; ਅਪਿਚ ਖੋ ਸਙ੍ਘਸ੍ਸਾਨੁਗ੍ਗਹਾਯ. ਸਚੇ ਹਿ ਆਹਟਾਹਟਂ ਗਹੇਤ੍ਵਾ ਭਿਕ੍ਖੂ ਭਾਜੇਯ੍ਯੁਂ, ਨੇਵ ਆਹਟਂ ਨ ਅਨਾਹਟਂ ਨ ਦਿਨ੍ਨਂ ਨਾਦਿਨ੍ਨਂ ਨ ਲਦ੍ਧਂ ਨਾਲਦ੍ਧਂ ਜਾਨੇਯ੍ਯੁਂ, ਆਹਟਾਹਟਂ ਥੇਰਾਸਨੇ ਵਾ ਦਦੇਯ੍ਯੁਂ, ਖਣ੍ਡਾਖਣ੍ਡਂ ਵਾ ਛਿਨ੍ਦਿਤ੍ਵਾ ਗਣ੍ਹੇਯ੍ਯੁਂ; ਏਵਂ ਸਤਿ ਅਯੁਤ੍ਤਪਰਿਭੋਗੋ ਚ ਹੋਤਿ, ਨ ਚ ਸਬ੍ਬੇਸਂ ਸਙ੍ਗਹੋ ਕਤੋ ਹੋਤਿ. ਭਣ੍ਡਾਗਾਰੇ ਪਨ ਚੀਵਰਂ ਠਪੇਤ੍ਵਾ ਉਸ੍ਸਨ੍ਨਕਾਲੇ ਏਕੇਕਸ੍ਸ ਭਿਕ੍ਖੁਨੋ ਤਿਚੀਵਰਂ ਵਾ ਦ੍ਵੇ ਦ੍ਵੇ ਵਾ ਏਕੇਕਂ ਵਾ ਚੀਵਰਂ ਦਸ੍ਸਨ੍ਤਿ, ਲਦ੍ਧਾਲਦ੍ਧਂ ਜਾਨਿਸ੍ਸਨ੍ਤਿ, ਅਲਦ੍ਧਭਾਵਂ ਞਤ੍ਵਾ ਸਙ੍ਗਹਂ ਕਾਤੁਂ ਮਞ੍ਞਿਸ੍ਸਨ੍ਤੀਤਿ.
ਨ ਭਿਕ੍ਖਵੇ ਭਣ੍ਡਾਗਾਰਿਕੋ ਵੁਟ੍ਠਾਪੇਤਬ੍ਬੋਤਿ ਏਤ੍ਥ ਅਞ੍ਞੇਪਿ ਅਵੁਟ੍ਠਾਪਨੀਯਾ ਜਾਨਿਤਬ੍ਬਾ. ਚਤ੍ਤਾਰੋ ਹਿ ਨ ਵੁਟ੍ਠਾਪੇਤਬ੍ਬਾ – ਵੁਡ੍ਢਤਰੋ, ਭਣ੍ਡਾਗਾਰਿਕੋ, ਗਿਲਾਨੋ, ਸਙ੍ਘਤੋ ਲਦ੍ਧਸੇਨਾਸਨੋਤਿ. ਤਤ੍ਥ ਵੁਡ੍ਢਤਰੋ ਅਤ੍ਤਨੋ ਵੁਡ੍ਢਤਾਯ ਨਵਕਤਰੇਨ ਨ ਵੁਟ੍ਠਾਪੇਤਬ੍ਬੋ, ਭਣ੍ਡਾਗਾਰਿਕੋ ਸਙ੍ਘੇਨ ਸਮ੍ਮਨ੍ਨਿਤ੍ਵਾ ਭਣ੍ਡਾਗਾਰਸ੍ਸ ਦਿਨ੍ਨਤਾਯ, ਗਿਲਾਨੋ ਅਤ੍ਤਨੋ ਗਿਲਾਨਤਾਯ, ਸਙ੍ਘੋ ਪਨ ਬਹੁਸ੍ਸੁਤਸ੍ਸ ਉਦ੍ਦੇਸਪਰਿਪੁਚ੍ਛਾਦੀਹਿ ਬਹੁਪਕਾਰਸ੍ਸ ਭਾਰਨਿਤ੍ਥਾਰਕਸ੍ਸ ਫਾਸੁਕਂ ਆਵਾਸਂ ਅਨੁਟ੍ਠਾਪਨੀਯਂ ਕਤ੍ਵਾ ਦੇਤਿ, ਤਸ੍ਮਾ ਸੋ ਉਪਕਾਰਤਾਯ ਚ ਸਙ੍ਘਤੋ ਲਦ੍ਧਤਾਯ ਚ ਨ ਵੁਟ੍ਠਾਪੇਤਬ੍ਬੋਤਿ.
ਉਸ੍ਸਨ੍ਨਂ ਹੋਤੀਤਿ ਬਹੁ ਰਾਸਿਕਤਂ ਹੋਤਿ, ਭਣ੍ਡਾਗਾਰਂ ਨ ਗਣ੍ਹਾਤਿ. ਸਮ੍ਮੁਖੀਭੂਤੇਨਾਤਿ ਅਨ੍ਤੋਉਪਚਾਰਸੀਮਾਯਂ ਠਿਤੇਨ. ਭਾਜੇਤੁਨ੍ਤਿ ਕਾਲਂ ਘੋਸੇਤ੍ਵਾ ਪਟਿਪਾਟਿਯਾ ਭਾਜੇਤੁਂ. ਕੋਲਾਹਲਂ ਅਕਾਸੀਤਿ ‘‘ਅਮ੍ਹਾਕਂ ਆਚਰਿਯਸ੍ਸ ਦੇਥ, ਉਪਜ੍ਝਾਯਸ੍ਸ ਦੇਥਾ’’ਤਿ ਏਵਂ ਮਹਾਸਦ੍ਦਂ ਅਕਾਸਿ. ਚੀਵਰਭਾਜਨਕਙ੍ਗੇਸੁ ਸਭਾਗਾਨਂ ਭਿਕ੍ਖੂਨਂ ਅਪਾਪੁਣਨ੍ਤਮ੍ਪਿ ਮਹਗ੍ਘਂ ਚੀਵਰਂ ਦੇਨ੍ਤੋ ਛਨ੍ਦਾਗਤਿਂ ਗਚ੍ਛਤਿ ਨਾਮ. ਅਞ੍ਞੇਸਂ ਵੁਡ੍ਢਤਰਾਨਂ ਪਾਪੁਣਨ੍ਤਮ੍ਪਿ ਮਹਗ੍ਘਂ ਚੀਵਰਂ ਅਦਤ੍ਵਾ ਅਪ੍ਪਗ੍ਘਂ ਦੇਨ੍ਤੋ ਦੋਸਾਗਤਿਂ ਗਚ੍ਛਤਿ ਨਾਮ. ਮੋਹਮੂਲ਼੍ਹੋ ਚੀਵਰਦਾਨਵਤ੍ਤਂ ਅਜਾਨਨ੍ਤੋ ਮੋਹਾਗਤਿਂ ਗਚ੍ਛਤਿ ਨਾਮ. ਮੁਖਰਾਨਂ ਨਵਕਾਨਮ੍ਪਿ ਭਯੇਨ ਅਪਾਪੁਣਨ੍ਤਮੇਵ ਮਹਗ੍ਘਂ ਚੀਵਰਂ ਦੇਨ੍ਤੋ ਭਯਾਗਤਿਂ ਗਚ੍ਛਤਿ ਨਾਮ. ਯੋ ਏਵਂ ਨ ਗਚ੍ਛਤਿ, ਸਬ੍ਬੇਸਂ ਤੁਲਾਭੂਤੋ ਪਮਾਣਭੂਤੋ ਮਜ੍ਝਤ੍ਤੋ ਹੋਤਿ, ਸੋ ਸਮ੍ਮਨ੍ਨਿਤਬ੍ਬੋ. ਭਾਜਿਤਾਭਾਜਿਤਨ੍ਤਿ ‘‘ਏਤ੍ਤਕਾਨਿ ਵਤ੍ਥਾਨਿ ਭਾਜਿਤਾਨਿ, ਏਤ੍ਤਕਾਨਿ ਅਭਾਜਿਤਾਨੀ’’ਤਿ ਜਾਨਨ੍ਤੋ ‘‘ਭਾਜਿਤਾਭਾਜਿਤਞ੍ਚ ਜਾਨੇਯ੍ਯਾ’’ਤਿ ਵੁਚ੍ਚਤਿ.
ਉਚ੍ਚਿਨਿਤ੍ਵਾਤਿ ‘‘ਇਦਂ ਥੂਲਂ, ਇਦਂ ਸਣ੍ਹਂ, ਇਦਂ ਘਨਂ, ਇਦਂ ਤਨੁਕਂ, ਇਦਂ ਪਰਿਭੁਤ੍ਤਂ, ਇਦਂ ਅਪਰਿਭੁਤ੍ਤਂ, ਇਦਂ ਦੀਘਤੋ ਏਤ੍ਤਕਂ ਪੁਥੁਲਤੋ ਏਤ੍ਤਕ’’ਨ੍ਤਿ ਏਵਂ ਵਤ੍ਥਾਨਿ ਵਿਚਿਨਿਤ੍ਵਾ. ਤੁਲਯਿਤ੍ਵਾਤਿ ‘‘ਇਦਂ ਏਤ੍ਤਕਂ ਅਗ੍ਘਤਿ, ਇਦਂ ਏਤ੍ਤਕ’’ਨ੍ਤਿ ਏਵਂ ਅਗ੍ਘਪਰਿਚ੍ਛੇਦਂ ਕਤ੍ਵਾ. ਵਣ੍ਣਾਵਣ੍ਣਂ ਕਤ੍ਵਾਤਿ ਸਚੇ ਸਬ੍ਬੇਸਂ ਏਕੇਕਮੇਵ ਦਸਗ੍ਘਨਕਂ ਪਾਪੁਣਾਤਿ, ਇਚ੍ਚੇਤਂ ਕੁਸਲਂ; ਨੋ ਚੇ ਪਾਪੁਣਾਤਿ, ਯਂ ਨਵ ਵਾ ਅਟ੍ਠ ਵਾ ਅਗ੍ਘਤਿ, ਤਂ ਅਞ੍ਞੇਨ ਏਕਅਗ੍ਘਨਕੇਨ ਚ ਦ੍ਵਿਅਗ੍ਘਨਕੇਨ ਚ ਸਦ੍ਧਿਂ ਬਨ੍ਧਿਤ੍ਵਾ ਏਤੇਨ ਉਪਾਯੇਨ ਸਮੇ ਪਟਿਵੀਸੇ ਠਪੇਤ੍ਵਾਤਿ ਅਤ੍ਥੋ. ਭਿਕ੍ਖੂ ਗਣੇਤ੍ਵਾ ਵਗ੍ਗਂ ਬਨ੍ਧਿਤ੍ਵਾਤਿ ਸਚੇ ਏਕੇਕਸ੍ਸ ਦਿਯਮਾਨੇ ਦਿਵਸੋ ਨਪ੍ਪਹੋਤਿ, ਦਸ ਦਸ ਭਿਕ੍ਖੂ ਗਣੇਤ੍ਵਾ ਦਸ ਦਸ ਚੀਵਰਪਟਿਵੀਸੇ ਏਕਵਗ੍ਗਂ ਬਨ੍ਧਿਤ੍ਵਾ ਏਕਂ ਭਣ੍ਡਿਕਂ ਕਤ੍ਵਾ ਏਵਂ ਚੀਵਰਪਟਿਵੀਸਂ ਠਪੇਤੁਂ ਅਨੁਜਾਨਾਮੀਤਿ ਅਤ੍ਥੋ. ਏਵਂ ਠਪਿਤੇਸੁ ਚੀਵਰਪਟਿਵੀਸੇਸੁ ਕੁਸੋ ਪਾਤੇਤਬ੍ਬੋ. ਤੇਹਿਪਿ ਭਿਕ੍ਖੂਹਿ ਪੁਨ ਕੁਸਪਾਤਂ ਕਤ੍ਵਾ ਭਾਜੇਤਬ੍ਬਂ.
ਸਾਮਣੇਰਾਨਂ ਉਪਡ੍ਢਪਟਿਵੀਸਨ੍ਤਿ ਏਤ੍ਥ ਯੇ ਸਾਮਣੇਰਾ ਅਤ੍ਤਿਸ੍ਸਰਾ ਭਿਕ੍ਖੁਸਙ੍ਘਸ੍ਸ ਕਤ੍ਤਬ੍ਬਕਮ੍ਮਂ ਨ ਕਰੋਨ੍ਤਿ, ਉਦ੍ਦੇਸਪਰਿਪੁਚ੍ਛਾਸੁ ਯੁਤ੍ਤਾ ਆਚਰਿਯੁਪਜ੍ਝਾਯਾਨਂਯੇਵ ਵਤ੍ਤਪਟਿਪਤ੍ਤਿਂ ਕਰੋਨ੍ਤਿ, ਅਞ੍ਞੇਸਂ ਨ ਕਰੋਨ੍ਤਿ, ਏਤੇਸਂਯੇਵ ਉਪਡ੍ਢਭਾਗੋ ਦਾਤਬ੍ਬੋ. ਯੇ ਪਨ ਪੁਰੇਭਤ੍ਤਞ੍ਚ ਪਚ੍ਛਾਭਤ੍ਤਞ੍ਚ ਭਿਕ੍ਖੁਸਙ੍ਘਸ੍ਸੇਵ ਕਤ੍ਤਬ੍ਬਕਿਚ੍ਚਂ ਕਰੋਨ੍ਤਿ, ਤੇਸਂ ਸਮਕੋ ਦਾਤਬ੍ਬੋ. ਇਦਞ੍ਚ ਪਿਟ੍ਠਿਸਮਯੇ ਉਪ੍ਪਨ੍ਨੇਨ ਭਣ੍ਡਾਗਾਰੇ ਠਪਿਤੇਨ ਅਕਾਲਚੀਵਰੇਨੇਵ ਕਥਿਤਂ. ਕਾਲਚੀਵਰਂ ਪਨ ਸਮਕਮੇਵ ਦਾਤਬ੍ਬਂ. ਤਤ੍ਰੁਪ੍ਪਾਦਵਸ੍ਸਾਵਾਸਿਕਂ ਸਮ੍ਮੁਞ੍ਜਨੀਬਨ੍ਧਨਾਦਿ ਸਙ੍ਘਸ੍ਸ ਫਾਤਿਕਮ੍ਮਂ ਕਤ੍ਵਾ ਗਹੇਤਬ੍ਬਂ. ਏਤਞ੍ਹੇਤ੍ਥ ਸਬ੍ਬੇਸਂ ਵਤ੍ਤਂ. ਭਣ੍ਡਾਗਾਰਿਕਚੀਵਰੇਪਿ ਸਚੇ ਸਾਮਣੇਰਾ ਆਗਨ੍ਤ੍ਵਾ ‘‘ਭਨ੍ਤੇ ਮਯਂ ਯਾਗੁਂ ਪਚਾਮ, ਭਤ੍ਤਂ ਪਚਾਮ, ਖਜ੍ਜਕਂ ਪਚਾਮ, ਅਪ੍ਪਹਰਿਤਕਂ ਕਰੋਮ, ਦਨ੍ਤਕਟ੍ਠਂ ਆਹਰਾਮ, ਰਙ੍ਗਛਲ੍ਲਿਂ ਕਪ੍ਪਿਯਂ ਕਤ੍ਵਾ ਦੇਮ, ਕਿਂ ਅਮ੍ਹੇਹਿ ਨ ਕਤਂ ਨਾਮਾ’’ਤਿ ਉਕ੍ਕੁਟ੍ਠਿਂ ਕਰੋਨ੍ਤਿ, ਸਮਭਾਗੋਵ ਦਾਤਬ੍ਬੋ. ਏਤਂ ਯੇ ਚ ਵਿਰਜ੍ਝਿਤ੍ਵਾ ਕਰੋਨ੍ਤਿ, ਯੇਸਞ੍ਚ ਕਰਣਭਾਵੋ ਨ ਪਞ੍ਞਾਯਤਿ, ਤੇ ਸਨ੍ਧਾਯ ਵੁਤ੍ਤਂ. ਕੁਰੁਨ੍ਦਿਯਂ ਪਨ ‘‘ਸਚੇ ਸਾਮਣੇਰਾ ‘ਕਸ੍ਮਾ ਮਯਂ ਭਨ੍ਤੇ ਸਙ੍ਘਕਮ੍ਮਂ ਨ ਕਰੋਮ, ਕਰਿਸ੍ਸਾਮਾ’ਤਿ ਯਾਚਨ੍ਤਿ, ਸਮਪਟਿਵੀਸੋ ਦਾਤਬ੍ਬੋ’’ਤਿ ਵੁਤ੍ਤਂ.
ਉਤ੍ਤਰਿਤੁਕਾਮੋਤਿ ਨਦਿਂ ਵਾ ਕਨ੍ਤਾਰਂ ਵਾ ਉਤ੍ਤਰਿਤੁਕਾਮੋ; ਸਤ੍ਥਂ ਲਭਿਤ੍ਵਾ ਦਿਸਾ ਪਕ੍ਕਮਿਤੁਕਾਮੋਤਿ ਅਤ੍ਥੋ. ਸਕਂ ਭਾਗਂ ਦਾਤੁਨ੍ਤਿ ਇਦਂ ਭਣ੍ਡਾਗਾਰਤੋ ਚੀਵਰਾਨਿ ਨੀਹਰਿਤ੍ਵਾ ਪੁਞ੍ਜੇ ਕਤੇ ਘਣ੍ਟਿਯਾ ਪਹਟਾਯ ਭਿਕ੍ਖੁਸਙ੍ਘੇ ਸਨ੍ਨਿਪਤਿਤੇ ਸਤ੍ਥਂ ਲਭਿਤ੍ਵਾ ਗਨ੍ਤੁਕਾਮੋ ‘‘ਸਤ੍ਥਤੋ ਮਾ ਪਰਿਹਾਯੀ’’ਤਿ ਏਤਮਤ੍ਥਂ ਸਨ੍ਧਾਯ ਵੁਤ੍ਤਂ. ਤਸ੍ਮਾ ਅਨੀਹਤੇਸੁ ਵਾ ਚੀਵਰੇਸੁ ਅਪ੍ਪਹਟਾਯ ਵਾ ਘਣ੍ਟਿਯਾ ਅਸਨ੍ਨਿਪਤਿਤੇ ਵਾ ਸਙ੍ਘੇ ਦਾਤੁਂ ਨ ਵਟ੍ਟਤਿ. ਚੀਵਰੇਸੁ ਪਨ ਨੀਹਤੇਸੁ ਘਣ੍ਟਿਂ ਪਹਰਿਤ੍ਵਾ ਭਿਕ੍ਖੁਸਙ੍ਘੇ ਸਨ੍ਨਿਪਤਿਤੇ ਚੀਵਰਭਾਜਕੇਨ ‘‘ਇਮਸ੍ਸ ਭਿਕ੍ਖੁਨੋ ਕੋਟ੍ਠਾਸੇਨ ਏਤ੍ਤਕੇਨ ਭਵਿਤਬ੍ਬ’’ਨ੍ਤਿ ਤਕ੍ਕੇਤ੍ਵਾ ਨਯਗ੍ਗਾਹੇਨ ਚੀਵਰਂ ਦਾਤਬ੍ਬਂ. ਤੁਲਾਯ ਤੁਲਿਤਮਿਵ ਹਿ ਸਮਸਮਂ ਦਾਤੁਂ ਨ ਸਕ੍ਕਾ, ਤਸ੍ਮਾ ਊਨਂ ਵਾ ਹੋਤੁ ਅਧਿਕਂ ਵਾ, ਏਵਂ ਤਕ੍ਕੇਨ ਨਯੇਨ ਦਿਨ੍ਨਂ ਸੁਦਿਨ੍ਨਂ. ਨੇਵ ਊਨਕਂ ਪੁਨ ਦਾਤਬ੍ਬਂ, ਨਾਤਿਰਿਤ੍ਤਂ ਪਟਿਗ੍ਗਣ੍ਹਿਤਬ੍ਬਨ੍ਤਿ.
ਅਤਿਰੇਕਭਾਗੇਨਾਤਿ ਦਸ ਭਿਕ੍ਖੂ ਹੋਨ੍ਤਿ, ਸਾਟਕਾਪਿ ਦਸੇਵ, ਤੇਸੁ ਏਕੋ ਦ੍ਵਾਦਸ ਅਗ੍ਘਤਿ, ਸੇਸਾ ਦਸਗ੍ਘਨਕਾ. ਸਬ੍ਬੇਸੁ ਦਸਗ੍ਘਨਕਵਸੇਨ ਕੁਸੇ ਪਾਤਿਤੇ ਯਸ੍ਸ ਭਿਕ੍ਖੁਨੋ ਦ੍ਵਾਦਸਗ੍ਘਨਕੋ ਕੁਸੋ ਪਾਤਿਤੋ, ਸੋ ‘‘ਏਤ੍ਤਕੇਨ ਮਮ ਚੀਵਰਂ ਪਹੋਤੀ’’ਤਿ ਤੇਨ ਅਤਿਰੇਕਭਾਗੇਨ ਗਨ੍ਤੁਕਾਮੋ ਹੋਤਿ. ਭਿਕ੍ਖੂ ‘‘ਅਤਿਰੇਕਂ ਆਵੁਸੋ ਸਙ੍ਘਸ੍ਸ ਸਨ੍ਤਕ’’ਨ੍ਤਿ ਵਦਨ੍ਤਿ, ਤਂ ਸੁਤ੍ਵਾ ਭਗਵਾ ‘‘ਸਙ੍ਘਿਕੇ ਚ ਗਣਸਨ੍ਤਕੇ ਚ ਅਪ੍ਪਕਂ ਨਾਮ ਨਤ੍ਥਿ, ਸਬ੍ਬਤ੍ਥ ਸਂਯਮੋ ਕਾਤਬ੍ਬੋ, ਗਣ੍ਹਨ੍ਤੇਨਾਪਿ ਕੁਕ੍ਕੁਚ੍ਚਾਯਿਤਬ੍ਬ’’ਨ੍ਤਿ ਦਸ੍ਸੇਤੁਂ ‘‘ਅਨੁਜਾਨਾਮਿ ਭਿਕ੍ਖਵੇ ਅਨੁਕ੍ਖੇਪੇ ਦਿਨ੍ਨੇ’’ਤਿ ਆਹ. ਤਤ੍ਥ ਅਨੁਕ੍ਖੇਪੋ ਨਾਮ ਯਂਕਿਞ੍ਚਿ ਅਨੁਕ੍ਖਿਪਿਤਬ੍ਬਂ ਅਨੁਪ੍ਪਦਾਤਬ੍ਬਂ ਕਪ੍ਪਿਯਭਣ੍ਡਂ; ਯਤ੍ਤਕਂ ਤਸ੍ਸ ਪਟਿਵੀਸੇ ਅਧਿਕਂ, ਤਤ੍ਤਕੇ ਅਗ੍ਘਨਕੇ ਯਸ੍ਮਿਂ ਕਿਸ੍ਮਿਞ੍ਚਿ ਕਪ੍ਪਿਯਭਣ੍ਡੇ ਦਿਨ੍ਨੇਤਿ ਅਤ੍ਥੋ.
ਵਿਕਲਕੇ ਤੋਸੇਤ੍ਵਾਤਿ ਏਤ੍ਥ ਚੀਵਰਵਿਕਲਕਂ ਪੁਗ੍ਗਲਵਿਕਲਕਨ੍ਤਿ ਦ੍ਵੇ ਵਿਕਲਕਾ. ਚੀਵਰਵਿਕਲਕਂ ਨਾਮ ਸਬ੍ਬੇਸਂ ਪਞ੍ਚ ਪਞ੍ਚ ਵਤ੍ਥਾਨਿ ਪਤ੍ਤਾਨਿ, ਸੇਸਾਨਿਪਿ ਅਤ੍ਥਿ, ਏਕੇਕਂ ਪਨ ਨ ਪਾਪੁਣਾਤਿ, ਛਿਨ੍ਦਿਤ੍ਵਾ ਦਾਤਬ੍ਬਾਨਿ. ਛਿਨ੍ਦਨ੍ਤੇਹਿ ਚ ਅਡ੍ਢਮਣ੍ਡਲਾਦੀਨਂ ਵਾ ਉਪਾਹਨਤ੍ਥਵਿਕਾਦੀਨਂ ਵਾ ਪਹੋਨਕਾਨਿ ਖਣ੍ਡਾਨਿ ਕਤ੍ਵਾ ਦਾਤਬ੍ਬਾਨਿ, ਹੇਟ੍ਠਿਮਪਰਿਚ੍ਛੇਦੇਨ ਚਤੁਰਙ੍ਗੁਲਵਿਤ੍ਥਾਰਮ੍ਪਿ ਅਨੁਵਾਤਪ੍ਪਹੋਨਕਾਯਾਮਂ ਖਣ੍ਡਂ ਕਤ੍ਵਾ ਦਾਤੁਂ ਵਟ੍ਟਤਿ, ਅਪਰਿਭੋਗਂ ਪਨ ਨ ਕਾਤਬ੍ਬਨ੍ਤਿ ਏਵਮੇਤ੍ਥ ਚੀਵਰਸ੍ਸ ਅਪ੍ਪਹੋਨਕਭਾਵੋ ਚੀਵਰਵਿਕਲਕਂ. ਛਿਨ੍ਦਿਤ੍ਵਾ ਦਿਨ੍ਨੇ ਪਨ ਤਂ ਤੋਸਿਤਂ ਹੋਤਿ, ਅਥ ਕੁਸਪਾਤੋ ਕਾਤਬ੍ਬੋ. ਸਚੇਪਿ ਏਕਸ੍ਸ ਭਿਕ੍ਖੁਨੋ ਕੋਟ੍ਠਾਸੇ ਏਕਂ ਵਾ ਦ੍ਵੇ ਵਾ ਵਤ੍ਥਾਨਿ ਨਪ੍ਪਹੋਨ੍ਤਿ, ਤਤ੍ਥ ਅਞ੍ਞਂ ਸਾਮਣਕਂ ਪਰਿਕ੍ਖਾਰਂ ਠਪੇਤ੍ਵਾ ਯੋ ਤੇਨ ਤੁਸ੍ਸਤਿ, ਤਸ੍ਸ ਤਂ ਭਾਗਂ ਦਤ੍ਵਾ ਪਚ੍ਛਾ ਕੁਸਪਾਤੋ ਕਾਤਬ੍ਬੋ. ਇਦਮ੍ਪਿ ਚੀਵਰਵਿਕਲਕਨ੍ਤਿ ਅਨ੍ਧਕਟ੍ਠਕਥਾਯਂ ਵੁਤ੍ਤਂ.
ਪੁਗ੍ਗਲਵਿਕਲਕਂ ਨਾਮ ਦਸ ਦਸ ਭਿਕ੍ਖੂ ਗਣੇਤ੍ਵਾ ਵਗ੍ਗਂ ਕਰੋਨ੍ਤਾਨਂ ਏਕੋ ਵਗ੍ਗੋ ਨ ਪੂਰਤਿ, ਅਟ੍ਠ ਵਾ ਨਵ ਵਾ ਹੋਨ੍ਤਿ, ਤੇਸਂ ਅਟ੍ਠ ਵਾ ਨਵ ਵਾ ਕੋਟ੍ਠਾਸਾ ‘‘ਤੁਮ੍ਹੇ ਇਮੇ ਗਹੇਤ੍ਵਾ ਵਿਸੁਂ ਭਾਜੇਥਾ’’ਤਿ ਦਾਤਬ੍ਬਾ. ਏਵਮਯਂ ਪੁਗ੍ਗਲਾਨਂ ਅਪ੍ਪਹੋਨਕਭਾਵੋ ਪੁਗ੍ਗਲਵਿਕਲਕਂ. ਵਿਸੁਂ ਦਿਨ੍ਨੇ ਪਨ ਤਂ ਤੋਸਿਤਂ ਹੋਤਿ, ਏਵਂ ਤੋਸੇਤ੍ਵਾ ਕੁਸਪਾਤੋ ਕਾਤਬ੍ਬੋਤਿ. ਅਥ ਵਾ ਵਿਕਲਕੇ ਤੋਸੇਤ੍ਵਾਤਿ ਯੋ ਚੀਵਰਵਿਭਾਗੋ ਊਨਕੋ, ਤਂ ਅਞ੍ਞੇਨ ਪਰਿਕ੍ਖਾਰੇਨ ਸਮਂ ਕਤ੍ਵਾ ਕੁਸਪਾਤੋ ਕਾਤਬ੍ਬੋ.
ਚੀਵਰਰਜਨਕਥਾ
੩੪੪. ਛਕਣੇਨਾਤਿ ਗੋਮਯੇਨ. ਪਣ੍ਡੁਮਤ੍ਤਿਕਾਯਾਤਿ ਤਮ੍ਬਮਤ੍ਤਿਕਾਯ. ਮੂਲਰਜਨਾਦੀਸੁ ਹਲਿਦ੍ਦਿਂ ਠਪੇਤ੍ਵਾ ਸਬ੍ਬਂ ਮੂਲਰਜਨਂ ਵਟ੍ਟਤਿ. ਮਞ੍ਜਿਟ੍ਠਿਞ੍ਚ ਤੁਙ੍ਗਹਾਰਞ੍ਚ ਠਪੇਤ੍ਵਾ ਸਬ੍ਬਂ ਖਨ੍ਧਰਜਨਂ ਵਟ੍ਟਤਿ. ਤੁਙ੍ਗਹਾਰੋ ਨਾਮ ਏਕੋ ਸਕਣ੍ਟਕਰੁਕ੍ਖੋ, ਤਸ੍ਸ ਹਰਿਤਾਲਵਣ੍ਣਂ ਖਨ੍ਧਰਜਨਂ ਹੋਤਿ. ਲੋਦ੍ਦਞ੍ਚ ਕਣ੍ਡੁਲਞ੍ਚ ਠਪੇਤ੍ਵਾ ਸਬ੍ਬਂ ਤਚਰਜਨਂ ਵਟ੍ਟਤਿ. ਅਲ੍ਲਿਪਤ੍ਤਂ ਨੀਲਿਪਤ੍ਤਞ੍ਚ ਠਪੇਤ੍ਵਾ ਸਬ੍ਬਂ ਪਤ੍ਤਰਜਨਂ ਵਟ੍ਟਤਿ. ਗਿਹਿਪਰਿਭੁਤ੍ਤਂ ਪਨ ਅਲ੍ਲਿਪਤ੍ਤੇਨ ਏਕਵਾਰਂ ਰਜਿਤੁਂ ਵਟ੍ਟਤਿ. ਕਿਂਸੁਕਪੁਪ੍ਫਞ੍ਚ ਕੁਸੁਮ੍ਭਪੁਪ੍ਫਞ੍ਚ ਠਪੇਤ੍ਵਾ ਸਬ੍ਬਂ ਪੁਪ੍ਫਰਜਨਂ ਵਟ੍ਟਤਿ. ਫਲਰਜਨੇ ਪਨ ਨ ਕਿਞ੍ਚਿ ਨ ਵਟ੍ਟਤਿ.
ਸੀਤੁਦਕਾਤਿ ਅਪਕ੍ਕਰਜਨਂ ਵੁਚ੍ਚਤਿ. ਉਤ੍ਤਰਾਲ਼ੁਮ੍ਪਨ੍ਤਿ ਵਟ੍ਟਾਧਾਰਕਂ, ਰਜਨਕੁਮ੍ਭਿਯਾ ਮਜ੍ਝੇ ਠਪੇਤ੍ਵਾ ਤਂ ਆਧਾਰਕਂ ਪਰਿਕ੍ਖਿਪਿਤ੍ਵਾ ਰਜਨਂ ਪਕ੍ਖਿਪਿਤੁਂ ਅਨੁਜਾਨਾਮੀਤਿ ਅਤ੍ਥੋ. ਏਵਞ੍ਹਿ ਕਤੇ ਰਜਨਂ ਨ ਉਤ੍ਤਰਤਿ. ਉਦਕੇ ਵਾ ਨਖਪਿਟ੍ਠਿਕਾਯ ਵਾਤਿ ਸਚੇ ਪਰਿਪਕ੍ਕਂ ਹੋਤਿ, ਉਦਕਪਾਤਿਯਾ ਦਿਨ੍ਨੋ ਥੇਵੋ ਸਹਸਾ ਨ ਵਿਸਰਤਿ, ਨਖਪਿਟ੍ਠਿਯਮ੍ਪਿ ਅਵਿਸਰਨ੍ਤੋ ਤਿਟ੍ਠਤਿ. ਰਜਨੁਲ਼ੁਙ੍ਕਨ੍ਤਿ ਰਜਨਉਲ਼ੁਙ੍ਕਂ. ਦਣ੍ਡਕਥਾਲਕਨ੍ਤਿ ਤਮੇਵ ਸਦਣ੍ਡਕਂ. ਰਜਨਕੋਲਮ੍ਬਨ੍ਤਿ ਰਜਨਕੁਣ੍ਡਂ. ਓਮਦ੍ਦਨ੍ਤੀਤਿ ਸਮ੍ਮਦ੍ਦਨ੍ਤਿ. ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤੁਨ੍ਤਿ ਯਾਵ ਰਜਨਬਿਨ੍ਦੁ ਗਲ਼ਿਤਂ ਨ ਛਿਜ੍ਜਤਿ, ਤਾਵ ਨ ਅਞ੍ਞਤ੍ਰ ਗਨ੍ਤਬ੍ਬਂ. ਪਤ੍ਥਿਨ੍ਨਨ੍ਤਿ ਅਤਿਰਜਿਤਤ੍ਤਾ ਥਦ੍ਧਂ. ਉਦਕੇ ਓਸਾਰੇਤੁਨ੍ਤਿ ਉਦਕੇ ਪਕ੍ਖਿਪਿਤ੍ਵਾ ਠਪੇਤੁਂ. ਰਜਨੇ ਪਨ ਨਿਕ੍ਖਨ੍ਤੇ ਤਂ ਉਦਕਂ ਛਡ੍ਡੇਤ੍ਵਾ ਚੀਵਰਂ ਮਦ੍ਦਿਤਬ੍ਬਂ. ਦਨ੍ਤਕਾਸਾਵਾਨੀਤਿ ਏਕਂ ਵਾ ਦ੍ਵੇ ਵਾ ਵਾਰੇ ਰਜਿਤ੍ਵਾ ਦਨ੍ਤਵਣ੍ਣਾਨਿ ਧਾਰੇਨ੍ਤਿ.
ਛਿਨ੍ਨਕਚੀਵਰਾਨੁਜਾਨਨਕਥਾ
੩੪੫. ਅਚ੍ਛਿਬਦ੍ਧਨ੍ਤਿ ਚਤੁਰਸ੍ਸਕੇਦਾਰਕਬਦ੍ਧਂ. ਪਾਲ਼ਿਬਦ੍ਧਨ੍ਤਿ ਆਯਾਮਤੋ ਚ ਵਿਤ੍ਥਾਰਤੋ ਚ ਦੀਘਮਰਿਯਾਦਬਦ੍ਧਂ. ਮਰਿਯਾਦਬਦ੍ਧਨ੍ਤਿ ਅਨ੍ਤਰਨ੍ਤਰਾ ਰਸ੍ਸਮਰਿਯਾਦਬਦ੍ਧਂ. ਸਿਙ੍ਘਾਟਕਬਦ੍ਧਨ੍ਤਿ ਮਰਿਯਾਦਾਯ ਮਰਿਯਾਦਂ ਵਿਨਿਵਿਜ੍ਝਿਤ੍ਵਾ ਗਤਟ੍ਠਾਨੇ ਸਿਙ੍ਘਾਟਕਬਦ੍ਧਂ; ਚਤੁਕ੍ਕਸਣ੍ਠਾਨਨ੍ਤਿ ਅਤ੍ਥੋ. ਸਂਵਿਦਹਿਤੁਨ੍ਤਿ ਕਾਤੁਂ. ਉਸ੍ਸਹਸਿ ਤ੍ਵਂ ਆਨਨ੍ਦਾਤਿ ਸਕ੍ਕੋਸਿ ਤ੍ਵਂ ਆਨਨ੍ਦ. ਉਸ੍ਸਹਾਮਿ ਭਗਵਾਤਿ ਤੁਮ੍ਹੇਹਿ ਦਿਨ੍ਨਨਯੇਨ ਸਕ੍ਕੋਮੀਤਿ ਦਸ੍ਸੇਤਿ. ਯਤ੍ਰ ਹਿ ਨਾਮਾਤਿ ਯੋ ਨਾਮ. ਕੁਸਿਮ੍ਪਿ ਨਾਮਾਤਿਆਦੀਸੁ ਕੁਸੀਤਿ ਆਯਾਮਤੋ ਚ ਵਿਤ੍ਥਾਰਤੋ ਚ ਅਨੁਵਾਤਾਦੀਨਂ ਦੀਘਪਤ੍ਤਾਨਮੇਤਂ ਅਧਿਵਚਨਂ. ਅਡ੍ਢਕੁਸੀਤਿ ਅਨ੍ਤਰਨ੍ਤਰਾ ਰਸ੍ਸਪਤ੍ਤਾਨਂ ਨਾਮਂ. ਮਣ੍ਡਲਨ੍ਤਿ ਪਞ੍ਚਖਣ੍ਡਿਕਚੀਵਰਸ੍ਸ ਏਕੇਕਸ੍ਮਿਂ ਖਣ੍ਡੇ ਮਹਾਮਣ੍ਡਲਂ. ਅਡ੍ਢਮਣ੍ਡਲਨ੍ਤਿ ਖੁਦ੍ਦਕਮਣ੍ਡਲਂ. ਵਿਵਟ੍ਟਨ੍ਤਿ ਮਣ੍ਡਲਞ੍ਚ ਅਡ੍ਢਮਣ੍ਡਲਞ੍ਚ ਏਕਤੋ ਕਤ੍ਵਾ ਸਿਬ੍ਬਿਤਂ ਮਜ੍ਝਿਮਖਣ੍ਡਂ.
ਅਨੁਵਿਵਟ੍ਟਨ੍ਤਿ ਤਸ੍ਸ ਉਭੋਸੁ ਪਸ੍ਸੇਸੁ ਦ੍ਵੇ ਖਣ੍ਡਾਨਿ. ਗੀਵੇਯ੍ਯਕਨ੍ਤਿ ਗੀਵਾਵੇਠਨਟ੍ਠਾਨੇ ਦਲ਼੍ਹੀਕਰਣਤ੍ਥਂ ਅਞ੍ਞਂ ਸੁਤ੍ਤਸਂਸਿਬ੍ਬਿਤਂ ਆਗਨ੍ਤੁਕਪਤ੍ਤਂ. ਜਙ੍ਘੇਯ੍ਯਕਨ੍ਤਿ ਜਙ੍ਘਪਾਪੁਣਨਟ੍ਠਾਨੇ ਤਥੇਵ ਸਂਸਿਬ੍ਬਿਤਂ ਪਤ੍ਤਂ. ਗੀਵਟ੍ਠਾਨੇ ਚ ਜਙ੍ਘਟ੍ਠਾਨੇ ਚ ਪਤ੍ਤਾਨਮੇਵੇਤਂ ਨਾਮਨ੍ਤਿਪਿ ਵਦਨ੍ਤਿ. ਬਾਹਨ੍ਤਨ੍ਤਿ ਅਨੁਵਿਵਟ੍ਟਾਨਂ ਬਹਿ ਏਕੇਕਂ ਖਣ੍ਡਂ. ਇਤਿ ਪਞ੍ਚਖਣ੍ਡਿਕਚੀਵਰੇਨੇਤਂ ਵਿਚਾਰਿਤਨ੍ਤਿ. ਅਥ ਵਾ ਅਨੁਵਿਵਟ੍ਟਨ੍ਤਿ ਵਿਵਟ੍ਟਸ੍ਸ ਏਕਪਸ੍ਸਤੋ ਦ੍ਵਿਨ੍ਨਂ ਏਕਪਸ੍ਸਤੋ ਦ੍ਵਿਨ੍ਨਨ੍ਤਿ ਚਤੁਨ੍ਨਮ੍ਪਿ ਖਣ੍ਡਾਨਮੇਤਂ ਨਾਮਂ. ਬਾਹਨ੍ਤਨ੍ਤਿ ਸੁਪ੍ਪਮਾਣਂ ਚੀਵਰਂ ਪਾਰੁਪਨ੍ਤੇਨ ਸਂਹਰਿਤ੍ਵਾ ਬਾਹਾਯ ਉਪਰਿ ਠਪਿਤਾ ਉਭੋ ਅਨ੍ਤਾ ਬਹਿਮੁਖਾ ਤਿਟ੍ਠਨ੍ਤਿ, ਤੇਸਂ ਏਤਂ ਨਾਮਂ. ਅਯਮੇਵ ਹਿ ਨਯੋ ਮਹਾਅਟ੍ਠਕਥਾਯਂ ਵੁਤ੍ਤੋਤਿ.
ਤਿਚੀਵਰਾਨੁਜਾਨਨਕਥਾ
੩੪੬. ਚੀਵਰੇਹਿ ਉਬ੍ਭਣ੍ਡਿਕੇਤਿ ਚੀਵਰੇਹਿ ਉਬ੍ਭਣ੍ਡੇ ਕਤੇ; ਯਥਾ ਉਕ੍ਖਿਤ੍ਤਭਣ੍ਡਾ ਹੋਨ੍ਤਿ ਏਵਂ ਕਤੇ; ਉਕ੍ਖਿਤ੍ਤਭਣ੍ਡਿਕਭਾਵਂ ਆਪਾਦਿਤੇਤਿ ਅਤ੍ਥੋ. ਚੀਵਰਭਿਸਿਨ੍ਤਿ ਏਤ੍ਥ ਭਿਸੀਤਿ ਦ੍ਵੇ ਤੀਣਿ ਏਕਤੋ ਕਤ੍ਵਾ ਭਿਸਿਸਙ੍ਖੇਪੇਨ ਸਂਹਰਿਤਚੀਵਰਾਨਿ ਵੁਤ੍ਤਾਨਿ. ਤੇ ਕਿਰ ਭਿਕ੍ਖੂ ‘‘ਦਕ੍ਖਿਣਾਗਿਰਿਤੋ ਭਗਵਾ ਲਹੁਂ ਪਟਿਨਿਵਤ੍ਤਿਸ੍ਸਤੀ’’ਤਿ ਤਤ੍ਥ ਗਚ੍ਛਨ੍ਤਾ ਜੀਵਕਵਤ੍ਥੁਸ੍ਮਿਂ ਲਦ੍ਧਚੀਵਰਾਨਿ ਠਪੇਤ੍ਵਾ ਅਗਮਂਸੁ. ਇਦਾਨਿ ਪਨ ਚਿਰੇਨ ਆਗਮਿਸ੍ਸਤੀਤਿ ਮਞ੍ਞਮਾਨਾ ਆਦਾਯ ਪਕ੍ਕਮਿਂਸੁ. ਅਨ੍ਤਰਟ੍ਠਕਾਸੂਤਿ ਮਾਘਸ੍ਸ ਚ ਫਗ੍ਗੁਣਸ੍ਸ ਚ ਅਨ੍ਤਰਾ ਅਟ੍ਠਸੁ. ਨ ਭਗਵਨ੍ਤਂ ਸੀਤਂ ਅਹੋਸੀਤਿ ਭਗਵਤੋ ਸੀਤਂ ਨਾਹੋਸਿ. ਏਤਦਹੋਸਿ ਯੇਪਿ ਖੋ ਤੇ ਕੁਲਪੁਤ੍ਤਾਤਿ ਨ ਭਗਵਾ ਅਜ੍ਝੋਕਾਸੇ ਅਨਿਸੀਦਿਤ੍ਵਾ ਏਤਮਤ੍ਥਂ ਨ ਜਾਨਾਤਿ, ਮਹਾਜਨਸਞ੍ਞਾਪਨਤ੍ਥਂ ਪਨ ਏਵਮਕਾਸਿ. ਸੀਤਾਲੁਕਾਤਿ ਸੀਤਪਕਤਿਕਾ; ਯੇ ਪਕਤਿਯਾਵ ਸੀਤੇਨ ਕਿਲਮਨ੍ਤਿ. ਦਿਗੁਣਂ ਸਙ੍ਘਾਟਿਨ੍ਤਿ ਦੁਪਟ੍ਟਂ ਸਙ੍ਘਾਟਿਂ. ਏਕਚ੍ਚਿਯਨ੍ਤਿ ਏਕਪਟ੍ਟਂ. ਇਤਿ ‘‘ਭਗਵਾ ਅਤ੍ਤਨਾ ਚਤੂਹਿ ਚੀਵਰੇਹਿ ਯਾਪੇਤਿ, ਅਮ੍ਹਾਕਂ ਪਨ ਤਿਚੀਵਰਂ ਅਨੁਜਾਨਾਤੀ’’ਤਿ ਵਚਨਸ੍ਸ ਓਕਾਸਂ ਉਪਚ੍ਛਿਨ੍ਦਿਤੁਂ ਦਿਗੁਣਂ ਸਙ੍ਘਾਟਿਂ ਅਨੁਜਾਨਾਤਿ, ਏਕਚ੍ਚਿਕੇ ਇਤਰੇ. ਏਵਞ੍ਹਿ ਨੇਸਂ ਚਤ੍ਤਾਰਿ ਭਵਿਸ੍ਸਨ੍ਤੀਤਿ.
ਅਤਿਰੇਕਚੀਵਰਾਦਿਕਥਾ
੩੪੮. ਅਗ੍ਗਲ਼ਂ ਅਚ੍ਛੁਪੇਯ੍ਯਨ੍ਤਿ ਛਿਦ੍ਦਟ੍ਠਾਨੇ ਪਿਲੋਤਿਕਖਣ੍ਡਂ ਲਗ੍ਗਾਪੇਯ੍ਯਂ. ਅਹਤਕਪ੍ਪਾਨਨ੍ਤਿ ਏਕਵਾਰਂ ਧੋਤਾਨਂ. ਉਤੁਦ੍ਧਟਾਨਨ੍ਤਿ ਉਤੁਤੋ ਦੀਘਕਾਲਤੋ ਉਦ੍ਧਟਾਨਂ ਹਤਵਤ੍ਥਕਾਨਂ, ਪਿਲੋਤਿਕਾਨਨ੍ਤਿ ਵੁਤ੍ਤਂ ਹੋਤਿ. ਪਾਪਣਿਕੇਤਿ ਅਨ੍ਤਰਾਪਣਤੋ ਪਤਿਤਪਿਲੋਤਿਕਚੀਵਰੇ. ਉਸ੍ਸਾਹੋ ਕਰਣੀਯੋਤਿ ਪਰਿਯੇਸਨਾ ਕਾਤਬ੍ਬਾ. ਪਰਿਚ੍ਛੇਦੋ ਪਨੇਤ੍ਥ ਨਤ੍ਥਿ, ਪਟ੍ਟਸਤਮ੍ਪਿ ਵਟ੍ਟਤਿ. ਸਬ੍ਬਮਿਦਂ ਸਾਦਿਯਨ੍ਤਸ੍ਸ ਭਿਕ੍ਖੁਨੋ ਵਸੇਨ ਵੁਤ੍ਤਂ. ਅਗ੍ਗਲ਼ਂ ਤੁਨ੍ਨਨ੍ਤਿ ਏਤ੍ਥ ਉਦ੍ਧਰਿਤ੍ਵਾ ਅਲ੍ਲੀਯਾਪਨਖਣ੍ਡਂ ਅਗ੍ਗਲ਼ਂ, ਸੁਤ੍ਤੇਨ ਸਂਸਿਬ੍ਬਿਤਂ ਤੁਨ੍ਨਂ; ਵਟ੍ਟੇਤ੍ਵਾ ਕਰਣਂ ਓਵਟ੍ਟਿਕਂ . ਕਣ੍ਡੁਸਕਂ ਵੁਚ੍ਚਤਿ ਮੁਦ੍ਦਿਕਾ. ਦਲ਼੍ਹੀਕਮ੍ਮਨ੍ਤਿ ਅਨੁਦ੍ਧਰਿਤ੍ਵਾਵ ਉਪਸ੍ਸਯਂ ਕਤ੍ਵਾ ਅਲ੍ਲੀਯਾਪਨਕਂ ਵਤ੍ਥਖਣ੍ਡਂ.
੩੪੯-੩੫੧. ਵਿਸਾਖਾਵਤ੍ਥੁ ਉਤ੍ਤਾਨਤ੍ਥਂ. ਤਤੋ ਪਰਂ ਪੁਬ੍ਬੇ ਵਿਨਿਚ੍ਛਿਤਮੇਵ. ਸੋਵਗ੍ਗਿਕਨ੍ਤਿ ਸਗ੍ਗਪ੍ਪਤ੍ਤਹੇਤੁਕਂ. ਤੇਨੇਵਾਹ ‘‘ਸੋਵਗ੍ਗਿਕ’’ਨ੍ਤਿ. ਸੋਕਂ ਅਪਨੇਤੀਤਿ ਸੋਕਨੁਦਂ. ਅਨਾਮਯਾਤਿ ਅਰੋਗਾ. ਸਗ੍ਗਮ੍ਹਿ ਕਾਯਮ੍ਹੀਤਿ ਸਗ੍ਗੋਪਪਨ੍ਨਾ.
੩੫੩. ਪੁਥੁਜ੍ਜਨਾ ਕਾਮੇਸੁ ਵੀਤਰਾਗਾਤਿ ਝਾਨਲਾਭਿਨੋ.
੩੫੬. ਸਨ੍ਦਿਟ੍ਠੋਤਿ ਦਿਟ੍ਠਮਤ੍ਤਕਮਿਤ੍ਤੋ. ਸਮ੍ਭਤ੍ਤੋਤਿ ਏਕਸਮ੍ਭੋਗੋ ਦਲ਼੍ਹਮਿਤ੍ਤੋ. ਆਲਪਿਤੋਤਿ ‘‘ਮਮ ਸਨ੍ਤਕਂ ਯਂ ਇਚ੍ਛੇਯ੍ਯਾਸਿ, ਤਂ ਗਣ੍ਹਾਹੀ’’ਤਿ ਏਵਂ ਵੁਤ੍ਤੋ. ਏਤੇਸੁ ਤੀਸੁ ਅਞ੍ਞਤਰਨਾਮੇਨ ਸਦ੍ਧਿਂ ਜੀਵਤਿ, ਗਹਿਤੇ ਅਤ੍ਤਮਨੋ ਹੋਤੀਤਿ ਇਮੇਹਿ ਗਹਿਤਵਿਸ੍ਸਾਸੋ ਰੁਹਤਿ.
ਪਚ੍ਛਿਮਵਿਕਪ੍ਪਨੁਪਗਚੀਵਰਾਦਿਕਥਾ
੩੫੯. ਪਂਸੁਕੂਲਕਤੋਤਿ ਕਤਪਂਸੁਕੂਲੋ. ਗਰੁਕੋ ਹੋਤੀਤਿ ਜਿਣ੍ਣਜਿਣ੍ਣਟ੍ਠਾਨੇ ਅਗ੍ਗਲ਼ਾਰੋਪਨੇਨ ਗਰੁਕੋ ਹੋਤਿ. ਸੁਤ੍ਤਲੂਖਂ ਕਾਤੁਨ੍ਤਿ ਸੁਤ੍ਤੇਨੇਵ ਅਗ੍ਗਲ਼ਂ ਕਾਤੁਨ੍ਤਿ ਅਤ੍ਥੋ. ਵਿਕਣ੍ਣੋ ਹੋਤੀਤਿ ਸੁਤ੍ਤਂ ਅਚ੍ਛੇਤ੍ਵਾ ਅਚ੍ਛੇਤ੍ਵਾ ਸਿਬ੍ਬਨ੍ਤਾਨਂ ਏਕੋ ਸਙ੍ਘਾਟਿਕੋਣੋ ਦੀਘੋ ਹੋਤਿ. ਵਿਕਣ੍ਣਂ ਉਦ੍ਧਰਿਤੁਨ੍ਤਿ ਦੀਘਕੋਣਂ ਛਿਨ੍ਦਿਤੁਂ. ਓਕਿਰਿਯਨ੍ਤੀਤਿ ਛਿਨ੍ਨਕੋਣਤੋ ਗਲ਼ਨ੍ਤਿ. ਅਨੁਵਾਤਂ ਪਰਿਭਣ੍ਡਨ੍ਤਿ ਅਨੁਵਾਤਞ੍ਚੇਵ ਪਰਿਭਣ੍ਡਞ੍ਚ. ਪਤ੍ਤਾ ਲੁਜ੍ਜਨ੍ਤੀਤਿ ਮਹਨ੍ਤੇਸੁ ਪਤ੍ਤਮੁਖੇਸੁ ਦਿਨ੍ਨਾਨਿ ਸੁਤ੍ਤਾਨਿ ਗਲ਼ਨ੍ਤਿ, ਤਤੋ ਪਤ੍ਤਾ ਲੁਜ੍ਜਨ੍ਤਿ. ਅਟ੍ਠਪਦਕਂ ਕਾਤੁਨ੍ਤਿ ਅਟ੍ਠਪਦਕਚ੍ਛਨ੍ਨੇਨ ਪਤ੍ਤਮੁਖਂ ਸਿਬ੍ਬਿਤੁਂ.
੩੬੦. ਅਨ੍ਵਾਧਿਕਮ੍ਪਿ ਆਰੋਪੇਤੁਨ੍ਤਿ ਆਗਨ੍ਤੁਕਪਤ੍ਤਮ੍ਪਿ ਦਾਤੁਂ. ਇਦਂ ਪਨ ਅਪ੍ਪਹੋਨਕੇ ਆਰੋਪੇਤਬ੍ਬਂ. ਸਚੇ ਪਹੋਤਿ, ਆਗਨ੍ਤੁਕਪਤ੍ਤਂ ਨ ਵਟ੍ਟਤਿ, ਛਿਨ੍ਦਿਤਬ੍ਬਮੇਵ.
੩੬੧. ਨ ਚ ਭਿਕ੍ਖਵੇ ਸਦ੍ਧਾਦੇਯ੍ਯਨ੍ਤਿ ਏਤ੍ਥ ਸੇਸਞਾਤੀਨਂ ਦੇਨ੍ਤੋ ਵਿਨਿਪਾਤੇਤਿਯੇਵ. ਮਾਤਾਪਿਤਰੋ ਪਨ ਸਚੇ ਰਜ੍ਜੇ ਠਿਤਾ ਪਤ੍ਥਯਨ੍ਤਿ, ਦਾਤਬ੍ਬਂ.
੩੬੨. ਗਿਲਾਨੋਤਿ ਗਿਲਾਨਤਾਯ ਗਹੇਤ੍ਵਾ ਗਨ੍ਤੁਂ ਅਸਮਤ੍ਥੋ. ਵਸ੍ਸਿਕਸਙ੍ਕੇਤਨ੍ਤਿ ਵਸ੍ਸਿਕੇ ਚਤ੍ਤਾਰੋ ਮਾਸੇ. ਨਦੀਪਾਰਨ੍ਤਿ ਨਦਿਯਾ ਪਾਰੇ ਭਤ੍ਤਂ ਭੁਞ੍ਜਿਤਬ੍ਬਂ ਹੋਤਿ. ਅਗ੍ਗਲ਼ਗੁਤ੍ਤਿਵਿਹਾਰੋਤਿ ਸਬ੍ਬੇਸ੍ਵੇਵ ਚੇਤੇਸੁ ਗਿਲਾਨਵਸ੍ਸਿਕਸਙ੍ਕੇਤਨਦੀਪਾਰਗਮਨਅਤ੍ਥਤਕਥਿਨਭਾਵੇਸੁ ਅਗ੍ਗਲ਼ਗੁਤ੍ਤਿਯੇਵ ਪਮਾਣਂ. ਗੁਤ੍ਤੇ ਏਵ ਹਿ ਵਿਹਾਰੇ ਏਤੇਸੁ ਕਾਰਣੇਸੁ ਨਿਕ੍ਖਿਪਿਤ੍ਵਾ ਬਹਿ ਗਨ੍ਤੁਂ ਵਟ੍ਟਤਿ, ਨ ਅਗੁਤ੍ਤੇ. ਆਰਞ੍ਞਕਸ੍ਸ ਪਨ ਵਿਹਾਰੋ ਨ ਸੁਗੁਤ੍ਤੋ ਹੋਤਿ, ਤੇਨ ਭਣ੍ਡੁਕ੍ਖਲਿਕਾਯ ਪਕ੍ਖਿਪਿਤ੍ਵਾ ਪਾਸਾਣਸੁਸਿਰ ਰੁਕ੍ਖਸੁਸਿਰਾਦੀਸੁ ਸੁਪ੍ਪਟਿਚ੍ਛਨ੍ਨੇਸੁ ਠਪੇਤ੍ਵਾ ਗਨ੍ਤਬ੍ਬਂ.
ਸਙ੍ਘਿਕਚੀਵਰੁਪ੍ਪਾਦਕਥਾ
੩੬੩. ਤੁਯ੍ਹੇਵ ਭਿਕ੍ਖੁ ਤਾਨਿ ਚੀਵਰਾਨੀਤਿ ਅਞ੍ਞਤ੍ਥ ਗਹੇਤ੍ਵਾ ਹਟਾਨਿਪਿ ਤੁਯ੍ਹੇਵ; ਨ ਤੇਸਂ ਅਞ੍ਞੋ ਕੋਚਿ ਇਸ੍ਸਰੋਤਿ. ਏਵਞ੍ਚ ਪਨ ਵਤ੍ਵਾ ਅਨਾਗਤੇਪਿ ਨਿਕ੍ਕੁਕ੍ਕੁਚ੍ਚਾ ਗਣ੍ਹਿਸ੍ਸਨ੍ਤੀਤਿ ਦਸ੍ਸੇਤੁਂ ਇਧ ਪਨਾਤਿਆਦਿਮਾਹ. ਤਸ੍ਸੇਵ ਤਾਨਿ ਚੀਵਰਾਨਿ ਯਾਵ ਕਥਿਨਸ੍ਸ ਉਬ੍ਭਾਰਾਤਿ ਸਚੇ ਗਣਪੂਰਕੇ ਭਿਕ੍ਖੂ ਲਭਿਤ੍ਵਾ ਕਥਿਨਂ ਅਤ੍ਥਤਂ ਹੋਤਿ, ਪਞ੍ਚਮਾਸੇ; ਨੋ ਚੇ ਅਤ੍ਥਤਂ ਹੋਤਿ, ਏਕਂ ਚੀਵਰਮਾਸਮੇਵ. ਯਂ ‘‘ਸਙ੍ਘਸ੍ਸ ਦੇਮਾ’’ਤਿ ਵਾ ਦੇਨ੍ਤਿ, ‘‘ਸਙ੍ਘਂ ਉਦ੍ਦਿਸ੍ਸ ਦੇਮਾ’’ਤਿ ਵਾ ਦੇਨ੍ਤਿ, ‘‘ਵਸ੍ਸਂਵੁਤ੍ਥਸਙ੍ਘਸ੍ਸ ਦੇਮਾ’’ਤਿ ਵਾ ਦੇਨ੍ਤਿ, ‘‘ਵਸ੍ਸਾਵਾਸਿਕਂ ਦੇਮਾ’’ਤਿ ਵਾ ਦੇਨ੍ਤਿ, ਸਚੇਪਿ ਮਤਕਚੀਵਰਂ ਅਵਿਭਜਿਤ੍ਵਾ ਤਂ ਵਿਹਾਰਂ ਪਵਿਸਨ੍ਤਿ, ਤਂ ਸਬ੍ਬਂ ਤਸ੍ਸੇਵ ਭਿਕ੍ਖੁਨੋ ਹੋਤਿ. ਯਮ੍ਪਿ ਸੋ ਵਸ੍ਸਾਵਾਸਤ੍ਥਾਯ ਵਡ੍ਢਿਂ ਪਯੋਜੇਤ੍ਵਾ ਠਪਿਤਉਪਨਿਕ੍ਖੇਪਤੋ ਵਾ ਤਤ੍ਰੁਪ੍ਪਾਦਤੋ ਵਾ ਵਸ੍ਸਾਵਾਸਿਕਂ ਗਣ੍ਹਾਤਿ, ਸਬ੍ਬਂ ਸੁਗ੍ਗਹਿਤਮੇਵ ਹੋਤਿ. ਇਦਮੇਤ੍ਥ ਲਕ੍ਖਣਂ, ਯੇਨ ਤੇਨਾਕਾਰੇਨ ਸਙ੍ਘਸ੍ਸ ਉਪ੍ਪਨ੍ਨਂ ਵਤ੍ਥਂ ਅਤ੍ਥਤਕਥਿਨਸ੍ਸ ਪਞ੍ਚਮਾਸੇ, ਅਨਤ੍ਥਤਕਥਿਨਸ੍ਸ ਏਕਂ ਚੀਵਰਮਾਸਂ ਪਾਪੁਣਾਤੀਤਿ. ਯਂ ਪਨ ‘‘ਇਦਂ ਇਧ ਵਸ੍ਸਂਵੁਤ੍ਥਸਙ੍ਘਸ੍ਸ ਦੇਮਾ’’ਤਿ ਵਾ ‘‘ਵਸ੍ਸਾਵਾਸਿਕਂ ਦੇਮਾ’’ਤਿ ਵਾ ਵਤ੍ਵਾ ਦਿਨ੍ਨਂ, ਤਂ ਅਨਤ੍ਥਤਕਥਿਨਸ੍ਸਾਪਿ ਪਞ੍ਚਮਾਸੇ ਪਾਪੁਣਾਤਿ. ਤਤੋ ਪਰਂ ਪਨ ਉਪ੍ਪਨ੍ਨਂ ਵਸ੍ਸਾਵਾਸਿਕਂ ਪੁਚ੍ਛਿਤਬ੍ਬਂ – ‘‘ਕਿਂ ਅਤੀਤਵਸ੍ਸੇ ਇਦਂ ਵਸ੍ਸਾਵਾਸਿਕਂ, ਉਦਾਹੁ ਅਨਾਗਤਵਸ੍ਸੇ’’ਤਿ! ਕਸ੍ਮਾ? ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾ.
ਉਤੁਕਾਲਨ੍ਤਿ ਵਸ੍ਸਾਨਤੋ ਅਞ੍ਞਂ ਕਾਲਂ. ਤਾਨਿ ਚੀਵਰਾਨਿ ਆਦਾਯ ਸਾਵਤ੍ਥਿਂ ਗਨ੍ਤ੍ਵਾਤਿ ਏਤ੍ਥ ਤਾਨਿ ਚੀਵਰਾਨਿ ਗਤਗਤਟ੍ਠਾਨੇ ਸਙ੍ਘਿਕਾਨੇਵ ਹੋਨ੍ਤਿ, ਭਿਕ੍ਖੂਹਿ ਦਿਟ੍ਠਮਤ੍ਤਮੇਵੇਤ੍ਥ ਪਮਾਣਂ. ਤਸ੍ਮਾ ਸਚੇ ਕੇਚਿ ਪਟਿਪਥਂ ਆਗਚ੍ਛਨ੍ਤਾ ‘‘ਕੁਹਿਂ ਆਵੁਸੋ ਗਚ੍ਛਸੀ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ‘‘ਕਿਂ ਆਵੁਸੋ ਮਯਂ ਸਙ੍ਘੋ ਨ ਹੋਮਾ’’ਤਿ ਤਤ੍ਥੇਵ ਭਾਜੇਤ੍ਵਾ ਗਣ੍ਹਨ੍ਤਿ, ਸੁਗ੍ਗਹਿਤਾਨਿ. ਸਚੇਪਿ ਏਸ ਮਗ੍ਗਾ ਓਕ੍ਕਮਿਤ੍ਵਾ ਕਞ੍ਚਿ ਵਿਹਾਰਂ ਵਾ ਆਸਨਸਾਲਂ ਵਾ ਪਿਣ੍ਡਾਯ ਚਰਨ੍ਤੋ ਏਕਂ ਗੇਹਮੇਵ ਵਾ ਪਵਿਸਤਿ, ਤਤ੍ਰ ਚ ਨਂ ਭਿਕ੍ਖੂ ਦਿਸ੍ਵਾ ਤਮਤ੍ਥਂ ਪੁਚ੍ਛਿਤ੍ਵਾ ਭਾਜੇਤ੍ਵਾ ਗਣ੍ਹਨ੍ਤਿ, ਸੁਗ੍ਗਹਿਤਾਨੇਵ.
ਅਧਿਟ੍ਠਾਤੁਨ੍ਤਿ ਏਤ੍ਥ ਅਧਿਟ੍ਠਹਨ੍ਤੇਨ ਵਤ੍ਤਂ ਜਾਨਿਤਬ੍ਬਂ. ਤੇਨ ਹਿ ਭਿਕ੍ਖੁਨਾ ਘਣ੍ਟਿਂ ਪਹਰਿਤ੍ਵਾ ਕਾਲਂ ਘੋਸੇਤ੍ਵਾ ਥੋਕਂ ਆਗਮੇਤ੍ਵਾ ਸਚੇ ਘਣ੍ਟਿਸਞ੍ਞਾਯ ਵਾ ਕਾਲਸਞ੍ਞਾਯ ਵਾ ਭਿਕ੍ਖੂ ਆਗਚ੍ਛਨ੍ਤਿ, ਤੇਹਿ ਸਦ੍ਧਿਂ ਭਾਜੇਤਬ੍ਬਾਨਿ. ਨੋ ਚੇ ਆਗਚ੍ਛਨ੍ਤਿ, ‘‘ਮਯ੍ਹਿਮਾਨਿ ਚੀਵਰਾਨਿ ਪਾਪੁਣਨ੍ਤੀ’’ਤਿ ਅਧਿਟ੍ਠਾਤਬ੍ਬਾਨਿ. ਏਵਂ ਅਧਿਟ੍ਠਿਤੇ ਸਬ੍ਬਾਨਿ ਤਸ੍ਸੇਵ ਹੋਨ੍ਤਿ, ਠਿਤਿਕਾ ਪਨ ਨ ਤਿਟ੍ਠਤਿ.
ਸਚੇ ਏਕੇਕਂ ਉਦ੍ਧਰਿਤ੍ਵਾ ‘‘ਅਯਂ ਪਠਮਭਾਗੋ ਮਯ੍ਹਂ ਪਾਪੁਣਾਤਿ, ਅਯਂ ਦੁਤਿਯਭਾਗੋ’’ਤਿ ਏਵਂ ਗਣ੍ਹਾਤਿ, ਗਹਿਤਾਨਿ ਚ ਸੁਗ੍ਗਹਿਤਾਨਿ ਹੋਨ੍ਤਿ, ਠਿਤਿਕਾ ਚ ਤਿਟ੍ਠਤਿ. ਏਵਂ ਪਾਪੇਤ੍ਵਾ ਗਣ੍ਹਨ੍ਤੇਨਾਪਿ ਅਧਿਟ੍ਠਿਤਮੇਵ ਹੋਤਿ. ਸਚੇ ਪਨ ਘਣ੍ਟਿਂ ਪਹਰਿਤ੍ਵਾ ਵਾ ਅਪ੍ਪਹਰਿਤ੍ਵਾ ਵਾ ਕਾਲਮ੍ਪਿ ਘੋਸੇਤ੍ਵਾ ਵਾ ਅਘੋਸੇਤ੍ਵਾ ਵਾ ‘‘ਅਹਮੇਵੇਤ੍ਥ ਮਯ੍ਹਮੇਵ ਇਮਾਨਿ ਚੀਵਰਾਨੀ’’ਤਿ ਗਣ੍ਹਾਤਿ, ਦੁਗ੍ਗਹਿਤਾਨਿ ਹੋਨ੍ਤਿ. ਅਥ ‘‘ਅਞ੍ਞੋ ਕੋਚਿ ਇਧ ਨਤ੍ਥਿ, ਮਯ੍ਹਂ ਏਤਾਨਿ ਪਾਪੁਣਨ੍ਤੀ’’ਤਿ ਗਣ੍ਹਾਤਿ, ਸੁਗ੍ਗਹਿਤਾਨਿ.
ਪਾਤਿਤੇ ਕੁਸੇਤਿ ਏਕਕੋਟ੍ਠਾਸੇ ਕੁਸਦਣ੍ਡਕੇ ਪਾਤਿਤਮਤ੍ਤੇ ਸਚੇਪਿ ਭਿਕ੍ਖੁਸਹਸ੍ਸਂ ਹੋਤਿ, ਗਹਿਤਮੇਵ ਨਾਮ ਚੀਵਰਂ. ਨਾਕਾਮਾ ਭਾਗੋ ਦਾਤਬ੍ਬੋ. ਸਚੇ ਪਨ ਅਤ੍ਤਨੋ ਰੁਚਿਯਾ ਦਾਤੁਕਾਮਾ ਹੋਨ੍ਤਿ, ਦੇਨ੍ਤੁ. ਅਨੁਭਾਗੇਪਿ ਏਸੇਵ ਨਯੋ.
ਸਚੀਵਰਾਨੀਤਿ ‘‘ਕਾਲਚੀਵਰਮ੍ਪਿ ਸਙ੍ਘਸ੍ਸ ਇਤੋਵ ਦਸ੍ਸਾਮ, ਵਿਸੁਂ ਸਜ੍ਜਿਯਮਾਨੇ ਅਤਿਚਿਰਂ ਹੋਤੀ’’ਤਿ ਖਿਪ੍ਪਂਯੇਵ ਸਚੀਵਰਾਨਿ ਭਤ੍ਤਾਨਿ ਅਕਂਸੁ. ਥੇਰੇ ਆਗਮ੍ਮ ਉਪ੍ਪਨ੍ਨਾਨੀਤਿ ਤੁਮ੍ਹੇਸੁ ਪਸਾਦੇਨ ਖਿਪ੍ਪਂ ਉਪ੍ਪਨ੍ਨਾਨਿ.
ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਦੇਨ੍ਤੀਤਿ ਸਕਲਮ੍ਪਿ ਚੀਵਰਕਾਲਂ ਸਣਿਕਂ ਸਣਿਕਂ ਦੇਨ੍ਤਿਯੇਵ. ਪੁਰਿਮੇਸੁ ਪਨ ਦ੍ਵੀਸੁ ਵਤ੍ਥੂਸੁ ਪਚ੍ਛਿਨ੍ਨਦਾਨਤ੍ਤਾ ਅਦਂਸੂਤਿ ਵੁਤ੍ਤਂ. ਸਮ੍ਬਹੁਲਾ ਥੇਰਾਤਿ ਵਿਨਯਧਰਪਾਮੋਕ੍ਖਥੇਰਾ. ਇਦਂ ਪਨ ਵਤ੍ਥੁਂ ਸਦ੍ਧਿਂ ਪੁਰਿਮੇਨ ਦ੍ਵੇਭਾਤਿਕਵਤ੍ਥੁਨਾ ਪਰਿਨਿਬ੍ਬੁਤੇ ਭਗਵਤਿ ਉਪ੍ਪਨ੍ਨਂ, ਇਮੇ ਚ ਥੇਰਾ ਦਿਟ੍ਠਪੁਬ੍ਬਾ ਤਥਾਗਤਂ, ਤਸ੍ਮਾ ਪੁਰਿਮੇਸੁ ਵਤ੍ਥੂਸੁ ਤਥਾਗਤੇਨ ਪਞ੍ਞਤ੍ਤਨਯੇਨੇਵ ਕਥੇਸੁਂ.
ਉਪਨਨ੍ਦਸਕ੍ਯਪੁਤ੍ਤਵਤ੍ਥੁਕਥਾ
੩੬੪. ਗਾਮਕਾਵਾਸਂ ਅਗਮਾਸੀਤਿ ਅਪ੍ਪੇਵ ਨਾਮ ਚੀਵਰਾਨਿ ਭਾਜੇਨ੍ਤਾ ਮਯ੍ਹਮ੍ਪਿ ਸਙ੍ਗਹਂ ਕਰੇਯ੍ਯੁਨ੍ਤਿ ਚੀਵਰਭਾਜਨਕਾਲਂ ਸਲ੍ਲਕ੍ਖੇਤ੍ਵਾਵ ਅਗਮਾਸਿ. ਸਾਦਿਯਿਸ੍ਸਸੀਤਿ ਗਣ੍ਹਿਸ੍ਸਸਿ. ਏਤ੍ਥ ਚ ਕਿਞ੍ਚਾਪਿ ਤਸ੍ਸ ਭਾਗੋ ਨ ਪਾਪੁਣਾਤਿ. ਅਥ ਖੋ ‘‘ਨਗਰਵਾਸਿਕੋ ਅਯਂ ਮੁਖਰੋ ਧਮ੍ਮਕਥਿਕੋ’’ਤਿ ਤੇ ਭਿਕ੍ਖੂ ‘‘ਸਾਦਿਯਿਸ੍ਸਸੀ’’ਤਿ ਆਹਂਸੁ. ਯੋ ਸਾਦਿਯੇਯ੍ਯ ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਪਨ ਕਿਞ੍ਚਾਪਿ ਲਹੁਕਾ ਆਪਤ੍ਤਿ, ਅਥ ਖੋ ਗਹਿਤਾਨਿ ਗਹਿਤਟ੍ਠਾਨੇ ਦਾਤਬ੍ਬਾਨਿ. ਸਚੇਪਿ ਨਟ੍ਠਾਨਿ ਵਾ ਜਿਣ੍ਣਾਨਿ ਵਾ ਹੋਨ੍ਤਿ, ਤਸ੍ਸੇਵ ਗੀਵਾ. ਦੇਹੀਤਿ ਵੁਤ੍ਤੇ ਅਦੇਨ੍ਤੋ ਧੁਰਨਿਕ੍ਖੇਪੇ ਭਣ੍ਡਗ੍ਘੇਨ ਕਾਰੇਤਬ੍ਬੋ.
ਏਕਾਧਿਪ੍ਪਾਯਨ੍ਤਿ ਏਕਂ ਅਧਿਪ੍ਪਾਯਂ; ਏਕਂ ਪੁਗ੍ਗਲਪਟਿਵੀਸਮੇਵ ਦੇਥਾਤਿ ਅਤ੍ਥੋ. ਇਦਾਨਿ ਯਥਾ ਸੋ ਦਾਤਬ੍ਬੋ, ਤਂ ਦਸ੍ਸੇਤੁਂ ਤਨ੍ਤਿਂ ਠਪੇਨ੍ਤੋ ਇਧ ਪਨਾਤਿਆਦਿਮਾਹ. ਤਤ੍ਥ ਸਚੇ ਅਮੁਤ੍ਰ ਉਪਡ੍ਢਂ ਅਮੁਤ੍ਰ ਉਪਡ੍ਢਨ੍ਤਿ ਏਕੇਕਸ੍ਮਿਂ ਏਕਾਹਮੇਕਾਹਂ ਵਾ ਸਤ੍ਤਾਹਂ ਸਤ੍ਤਾਹਂ ਵਾ ਸਚੇ ਵਸਤਿ, ਏਕੇਕਸ੍ਮਿਂ ਵਿਹਾਰੇ ਯਂ ਏਕੋ ਪੁਗ੍ਗਲੋ ਲਭਤਿ, ਤਤੋ ਤਤੋ ਉਪਡ੍ਢਂ ਉਪਡ੍ਢਂ ਦਾਤਬ੍ਬਂ. ਏਵਂ ਏਕਾਧਿਪ੍ਪਾਯੋ ਦਿਨ੍ਨੋ ਹੋਤਿ. ਯਤ੍ਥ ਵਾ ਪਨ ਬਹੁਤਰਨ੍ਤਿ ਸਚੇ ਏਕਸ੍ਮਿਂ ਵਿਹਾਰੇ ਵਸਨ੍ਤੋ ਇਤਰਸ੍ਮਿਂ ਸਤ੍ਤਾਹਵਾਰੇਨ ਅਰੁਣਮੇਵ ਉਟ੍ਠਾਪੇਤਿ, ਏਵਂ ਪੁਰਿਮਸ੍ਮਿਂ ਬਹੁਤਰਂ ਵਸਤਿ ਨਾਮ. ਤਸ੍ਮਾ ਤਤੋ ਬਹੁਤਰਂ ਵਸਿਤਵਿਹਾਰਤੋ ਤਸ੍ਸ ਪਟਿਵੀਸੋ ਦਾਤਬ੍ਬੋ. ਏਵਮ੍ਪਿ ਏਕਾਧਿਪ੍ਪਾਯੋ ਦਿਨ੍ਨੋ ਹੋਤਿ. ਇਦਞ੍ਚ ਨਾਨਾਲਾਭੇਹਿ ਨਾਨੂਪਚਾਰੇਹਿ ਏਕਸੀਮਵਿਹਾਰੇਹਿ ਕਥਿਤਂ, ਨਾਨਾਸੀਮਵਿਹਾਰੇ ਪਨ ਸੇਨਾਸਨਗ੍ਗਾਹੋ ਪਟਿਪ੍ਪਸ੍ਸਮ੍ਭਤਿ. ਤਸ੍ਮਾ ਤਤ੍ਥ ਚੀਵਰਪਟਿਵੀਸੋ ਨ ਪਾਪੁਣਾਤਿ. ਸੇਸਂ ਪਨ ਆਮਿਸਭੇਸਜ੍ਜਾਦਿ ਸਬ੍ਬਂ ਸਬ੍ਬਤ੍ਥ ਅਨ੍ਤੋਸੀਮਗਤਸ੍ਸ ਪਾਪੁਣਾਤਿ.
ਗਿਲਾਨਵਤ੍ਥੁਕਥਾ
੩੬੫. ਮਞ੍ਚਕੇ ਨਿਪਾਤੇਸੁਨ੍ਤਿ ਏਵਂ ਧੋਵਿਤ੍ਵਾ ਅਞ੍ਞਂ ਕਾਸਾਵਂ ਨਿਵਾਸੇਤ੍ਵਾ ਮਞ੍ਚਕੇ ਨਿਪਜ੍ਜਾਪੇਸੁਂ; ਨਿਪਜ੍ਜਾਪੇਤ੍ਵਾ ਚ ਪਨਾਯਸ੍ਮਾ ਆਨਨ੍ਦੋ ਮੁਤ੍ਤਕਰੀਸਕਿਲਿਟ੍ਠਂ ਕਾਸਾਵਂ ਧੋਵਿਤ੍ਵਾ ਭੂਮਿਯਂ ਪਰਿਭਣ੍ਡਂ ਅਕਾਸਿ. ਯੋ ਭਿਕ੍ਖਵੇ ਮਂ ਉਪਟ੍ਠਹੇਯ੍ਯ, ਸੋ ਗਿਲਾਨਂ ਉਪਟ੍ਠਹੇਯ੍ਯਾਤਿ ਯੋ ਮਂ ਓਵਾਦਾਨੁਸਾਸਨੀਕਰਣੇਨ ਉਪਟ੍ਠਹੇਯ੍ਯ, ਸੋ ਗਿਲਾਨਂ ਉਪਟ੍ਠਹੇਯ੍ਯ; ਮਮ ਓਵਾਦਕਾਰਕੇਨ ਗਿਲਾਨੋ ਉਪਟ੍ਠਾਤਬ੍ਬੋਤਿ ਅਯਮੇਵੇਤ੍ਥ ਅਤ੍ਥੋ. ਭਗਵਤੋ ਚ ਗਿਲਾਨਸ੍ਸ ਚ ਉਪਟ੍ਠਾਨਂ ਏਕਸਦਿਸਨ੍ਤਿ ਏਵਂ ਪਨੇਤ੍ਥ ਅਤ੍ਥੋ ਨ ਗਹੇਤਬ੍ਬੋ. ਸਙ੍ਘੇਨ ਉਪਟ੍ਠਾਤਬ੍ਬੋਤਿ ਯਸ੍ਸੇਤੇ ਉਪਜ੍ਝਾਦਯੋ ਤਸ੍ਮਿਂ ਵਿਹਾਰੇ ਨਤ੍ਥਿ, ਆਗਨ੍ਤੁਕੋ ਹੋਤਿ ਏਕਚਾਰਿਕੋ ਭਿਕ੍ਖੁ, ਸੋ ਸਙ੍ਘਸ੍ਸ ਭਾਰੋ, ਤਸ੍ਮਾ ਸਙ੍ਘੇਨ ਉਪਟ੍ਠਾਤਬ੍ਬੋ. ਨੋ ਚੇ ਉਪਟ੍ਠਹੇਯ੍ਯ, ਸਕਲਸ੍ਸ ਸਙ੍ਘਸ੍ਸ ਆਪਤ੍ਤਿ. ਵਾਰਂ ਠਪੇਤ੍ਵਾ ਜਗ੍ਗਨ੍ਤੇਸੁ ਪਨ ਯੋ ਅਤ੍ਤਨੋ ਵਾਰੇ ਨ ਜਗ੍ਗਤਿ, ਤਸ੍ਸੇਵ ਆਪਤ੍ਤਿ. ਸਙ੍ਘਤ੍ਥੇਰੋਪਿ ਵਾਰਕੋ ਨ ਮੁਚ੍ਚਤਿ. ਸਚੇ ਸਕਲੋ ਸਙ੍ਘੋ ਏਕਸ੍ਸ ਭਾਰਂ ਕਰੋਤਿ, ਏਕੋ ਵਾ ਵਤ੍ਤਸਮ੍ਪਨ੍ਨੋ ਭਿਕ੍ਖੁ ਅਹਮੇਵ ਜਗ੍ਗਿਸ੍ਸਾਮੀਤਿ ਪਟਿਜਗ੍ਗਤਿ, ਸਙ੍ਘੋ ਆਪਤ੍ਤਿਤੋ ਮੁਚ੍ਚਤਿ.
੩੬੬. ਅਭਿਕ੍ਕਮਨ੍ਤਂ ਵਾ ਅਭਿਕ੍ਕਮਤੀਤਿਆਦੀਸੁ ਵਡ੍ਢਨ੍ਤਂ ਵਾ ਆਬਾਧਂ ‘‘ਇਦਂ ਨਾਮ ਮੇ ਪਰਿਭੁਞ੍ਜਨ੍ਤਸ੍ਸ ਵਡ੍ਢਤਿ, ਇਦਂ ਪਰਿਭੁਞ੍ਜਨ੍ਤਸ੍ਸ ਪਰਿਹਾਯਤਿ, ਇਦਂ ਪਰਿਭੁਞ੍ਜਨ੍ਤਸ੍ਸ ਤਿਟ੍ਠਤੀ’’ਤਿ ਯਥਾਭੂਤਂ ਨਾਵਿਕਰੋਤੀਤਿ ਏਵਮਤ੍ਥੋ ਦਟ੍ਠਬ੍ਬੋ. ਨਾਲਨ੍ਤਿ ਨ ਪਤਿਰੂਪੋ, ਨ ਯੁਤ੍ਤੋ ਉਪਟ੍ਠਾਤੁਂ. ਭੇਸਜ੍ਜਂ ਸਂਵਿਧਾਤੁਨ੍ਤਿ ਭੇਸਜ੍ਜਂ ਯੋਜੇਤੁਂ ਅਸਮਤ੍ਥੋ ਹੋਤਿ. ਆਮਿਸਨ੍ਤਰੋਤਿ ਆਮਿਸਂ ਅਸ੍ਸ ਅਨ੍ਤਰਨ੍ਤਿ ਆਮਿਸਨ੍ਤਰੋ. ਅਨ੍ਤਰਨ੍ਤਿ ਕਾਰਣਂ ਵੁਚ੍ਚਤਿ; ਆਮਿਸਕਾਰਣਾ ਯਾਗੁਭਤ੍ਤਪਤ੍ਤਚੀਵਰਾਨਿ ਪਤ੍ਥੇਨ੍ਤੋ ਉਪਟ੍ਠਾਤੀਤਿ ਅਤ੍ਥੋ.
ਮਤਸਨ੍ਤਕਕਥਾ
੩੬੭. ਕਾਲਙ੍ਕਤੇਤਿ ਕਾਲਕਿਰਿਯਾਯ. ਗਿਲਾਨੁਪਟ੍ਠਾਕਾਨਂ ਦਾਤੁਨ੍ਤਿ ਏਤ੍ਥ ਅਨਨ੍ਤਰਂ ਵੁਤ੍ਤਾਯ ਕਮ੍ਮਵਾਚਾਯ ਦਿਨ੍ਨਮ੍ਪਿ ਅਪਲੋਕੇਤ੍ਵਾ ਦਿਨ੍ਨਮ੍ਪਿ ਦਿਨ੍ਨਮੇਵ ਹੋਤਿ, ਵਟ੍ਟਤਿ.
੩੬੯. ਯਂ ਤਤ੍ਥ ਲਹੁਭਣ੍ਡਂ ਯਂ ਤਤ੍ਥ ਗਰੁਭਣ੍ਡਨ੍ਤਿ ਏਤ੍ਥ ਲਹੁਭਣ੍ਡਗਰੁਭਣ੍ਡਾਨਂ ਨਾਨਾਕਰਣਂ ਪਰਤੋ ਵਣ੍ਣਯਿਸ੍ਸਾਮ. ਗਿਲਾਨੁਪਟ੍ਠਾਕਲਾਭੇ ਪਨ ਅਯਂ ਆਦਿਤੋ ਪਟ੍ਠਾਯ ਵਿਨਿਚ੍ਛਯੋ –
ਸਚੇ ਸਕਲੇ ਭਿਕ੍ਖੁਸਙ੍ਘੇ ਉਪਟ੍ਠਹਨ੍ਤੇ ਕਾਲਂ ਕਰੋਤਿ, ਸਬ੍ਬੇਪਿ ਸਾਮਿਕਾ. ਅਥ ਏਕਚ੍ਚੇਹਿ ਵਾਰੇ ਕਤੇ ਏਕਚ੍ਚੇਹਿ ਅਕਤੇਯੇਵ ਕਾਲਂ ਕਰੋਤਿ, ਤਤ੍ਥ ਏਕਚ੍ਚੇ ਆਚਰਿਯਾ ਵਦਨ੍ਤਿ – ‘‘ਸਬ੍ਬੇਪਿ ਅਤ੍ਤਨੋ ਵਾਰੇ ਸਮ੍ਪਤ੍ਤੇ ਕਰੇਯ੍ਯੁਂ, ਤਸ੍ਮਾ ਸਬ੍ਬੇਪਿ ਸਾਮਿਨੋ’’ਤਿ. ਏਕਚ੍ਚੇ ਵਦਨ੍ਤਿ – ‘‘ਯੇਹਿ ਜਗ੍ਗਿਤੋ ਤੇ ਏਵ ਲਭਨ੍ਤਿ, ਇਤਰੇ ਨ ਲਭਨ੍ਤੀ’’ਤਿ. ਸਾਮਣੇਰੇ ਕਾਲਙ੍ਕਤੇ ਸਚੇ ਚੀਵਰਂ ਅਤ੍ਥਿ, ਗਿਲਾਨੁਪਟ੍ਠਾਕਾਨਂ ਦਾਤਬ੍ਬਂ. ਨੋ ਚੇ ਅਤ੍ਥਿ ਯਂ ਅਤ੍ਥਿ, ਤਂ ਦਾਤਬ੍ਬਂ. ਅਞ੍ਞਸ੍ਮਿਂ ਪਰਿਕ੍ਖਾਰੇ ਸਤਿ ਚੀਵਰਭਾਗਂ ਕਤ੍ਵਾ ਦਾਤਬ੍ਬਂ.
ਭਿਕ੍ਖੁ ਚ ਸਾਮਣੇਰੋ ਚ ਸਚੇ ਸਮਂ ਉਪਟ੍ਠਹਿਂਸੁ, ਸਮਕੋ ਭਾਗੋ ਦਾਤਬ੍ਬੋ. ਅਥ ਸਾਮਣੇਰੋਵ ਉਪਟ੍ਠਹਤਿ, ਭਿਕ੍ਖੁਸ੍ਸ ਸਂਵਿਦਹਨਮਤ੍ਤਮੇਵ ਹੋਤਿ, ਸਾਮਣੇਰਸ੍ਸ ਜੇਟ੍ਠਕਭਾਗੋ ਦਾਤਬ੍ਬੋ. ਸਚੇ ਸਾਮਣੇਰੋ ਭਿਕ੍ਖੁਨਾ ਆਨੀਤਉਦਕੇਨ ਯਾਗੁਂ ਪਚਿਤ੍ਵਾ ਪਟਿਗ੍ਗਾਹਾਪਨਮਤ੍ਤਮੇਵ ਕਰੋਤਿ, ਭਿਕ੍ਖੁ ਉਪਟ੍ਠਹਤਿ, ਭਿਕ੍ਖੁਸ੍ਸ ਜੇਟ੍ਠਕਭਾਗੋ ਦਾਤਬ੍ਬੋ.
ਬਹੂ ਭਿਕ੍ਖੂ ਸਮਗ੍ਗਾ ਹੁਤ੍ਵਾ ਉਪਟ੍ਠਹਨ੍ਤਿ, ਸਬ੍ਬੇਸਂ ਸਮਕੋ ਭਾਗੋ ਦਾਤਬ੍ਬੋ. ਯੋ ਪਨੇਤ੍ਥ ਵਿਸੇਸੇਨ ਉਪਟ੍ਠਹਤਿ, ਤਸ੍ਸ ਵਿਸੇਸੋ ਕਾਤਬ੍ਬੋ. ਯੇਨ ਪਨ ਏਕਦਿਵਸਮ੍ਪਿ ਗਿਲਾਨੁਪਟ੍ਠਾਕਵਸੇਨ ਯਾਗੁਭਤ੍ਤਂ ਵਾ ਪਚਿਤ੍ਵਾ ਦਿਨ੍ਨਂ, ਨਹਾਨਂ ਵਾ ਪਟਿਯਾਦਿਤਂ, ਸੋਪਿ ਗਿਲਾਨੁਪਟ੍ਠਾਕੋਵ. ਯੋ ਸਮੀਪਂ ਅਨਾਗਨ੍ਤ੍ਵਾ ਭੇਸਜ੍ਜਤਣ੍ਡੁਲਾਦੀਨਿ ਪੇਸੇਤਿ, ਅਯਂ ਗਿਲਾਨੁਪਟ੍ਠਾਕੋ ਨ ਹੋਤਿ. ਯੋ ਪਰਿਯੇਸਿਤ੍ਵਾ ਗਾਹਾਪੇਤ੍ਵਾ ਆਗਚ੍ਛਤਿ, ਅਯਂ ਗਿਲਾਨੁਪਟ੍ਠਾਕੋਵ.
ਏਕੋ ਵਤ੍ਤਸੀਸੇਨ ਜਗ੍ਗਤਿ; ਏਕੋ ਪਚ੍ਚਾਸਾਯ, ਮਤਕਾਲੇ ਉਭੋਪਿ ਪਚ੍ਚਾਸੀਸਨ੍ਤਿ, ਉਭਿਨ੍ਨਮ੍ਪਿ ਦਾਤਬ੍ਬਂ. ਏਕੋ ਉਪਟ੍ਠਹਿਤ੍ਵਾ ਗਿਲਾਨਸ੍ਸ ਵਾ ਕਮ੍ਮੇਨ ਅਤ੍ਤਨੋ ਵਾ ਕਮ੍ਮੇਨ ਕਤ੍ਥਚਿ ਗਤੋ ‘‘ਪੁਨ ਆਗਨ੍ਤ੍ਵਾ ਜਗ੍ਗਿਸ੍ਸਾਮੀ’’ਤਿ, ਏਤਸ੍ਸਪਿ ਦਾਤਬ੍ਬਂ. ਏਕੋ ਚਿਰਂ ਉਪਟ੍ਠਹਿਤ੍ਵਾ ‘‘ਇਦਾਨਿ ਨ ਸਕ੍ਕੋਮੀ’’ਤਿ ਧੁਰਂ ਨਿਕ੍ਖਿਪਿਤ੍ਵਾ ਗਚ੍ਛਤਿ, ਸਚੇਪਿ ਤਂਦਿਵਸਮੇਵ ਗਿਲਾਨੋ ਕਾਲਂਕਰੋਤਿ, ਉਪਟ੍ਠਾਕਭਾਗੋ ਨ ਦਾਤਬ੍ਬੋ.
ਗਿਲਾਨੁਪਟ੍ਠਾਕੋ ਨਾਮ ਗਿਹਿ ਵਾ ਹੋਤੁ ਪਬ੍ਬਜਿਤੋ ਵਾ, ਅਨ੍ਤਮਸੋ ਮਾਤੁਗਾਮੋਪਿ, ਸਬ੍ਬੇ ਭਾਗਂ ਲਭਨ੍ਤਿ. ਸਚੇ ਤਸ੍ਸ ਭਿਕ੍ਖੁਨੋ ਪਤ੍ਤਚੀਵਰਮਤ੍ਤਮੇਵ ਹੋਤਿ, ਅਞ੍ਞਂ ਨਤ੍ਥਿ; ਸਬ੍ਬਂ ਗਿਲਾਨੁਪਟ੍ਠਾਕਾਨਂਯੇਵ ਦਾਤਬ੍ਬਂ. ਸਚੇਪਿ ਸਹਸ੍ਸਂ ਅਗ੍ਘਤਿ, ਅਞ੍ਞਂ ਪਨ ਬਹੁਮ੍ਪਿ ਪਰਿਕ੍ਖਾਰਂ ਤੇ ਨ ਲਭਨ੍ਤਿ; ਸਙ੍ਘਸ੍ਸੇਵ ਹੋਤਿ. ਅਵਸੇਸਂ ਭਣ੍ਡਂ ਬਹੁਕਞ੍ਚੇਵ ਮਹਗ੍ਘਞ੍ਚ, ਤਿਚੀਵਰਂ ਅਪ੍ਪਗ੍ਘਂ; ਤਤੋ ਗਹੇਤ੍ਵਾ ਤਿਚੀਵਰਪਰਿਕ੍ਖਾਰੋ ਦਾਤਬ੍ਬੋ. ਸਬ੍ਬਞ੍ਚੇਤਂ ਸਙ੍ਘਿਕਤੋਵ ਲਬ੍ਭਤਿ.
ਸਚੇ ਪਨ ਸੋ ਜੀਵਮਾਨੋਯੇਵ ਸਬ੍ਬਂ ਅਤ੍ਤਨੋ ਪਰਿਕ੍ਖਾਰਂ ਨਿਸ੍ਸਜ੍ਜਿਤ੍ਵਾ ਕਸ੍ਸਚਿ ਅਦਾਸਿ, ਕੋਚਿ ਵਾ ਵਿਸ੍ਸਾਸਂ ਅਗ੍ਗਹੇਸਿ, ਯਸ੍ਸ ਦਿਨ੍ਨਂ, ਯੇਨ ਚ ਗਹਿਤਂ, ਤਸ੍ਸੇਵ ਹੋਤਿ. ਤਸ੍ਸ ਰੁਚਿਯਾ ਏਵ ਗਿਲਾਨੁਪਟ੍ਠਾਕਾ ਲਭਨ੍ਤਿ, ਅਞ੍ਞੇਸਂ ਅਦਤ੍ਵਾ ਦੂਰੇ ਠਪਿਤਪਰਿਕ੍ਖਾਰਾਪਿ ਤਤ੍ਥ ਤਤ੍ਥ ਸਙ੍ਘਸ੍ਸੇਵ ਹੋਨ੍ਤਿ. ਦ੍ਵਿਨ੍ਨਂ ਸਨ੍ਤਕਂ ਹੋਤਿ ਅਵਿਭਤ੍ਤਂ, ਏਕਸ੍ਮਿਂ ਕਾਲਙ੍ਕਤੇ ਇਤਰੋ ਸਾਮੀ. ਬਹੂਨਮ੍ਪਿ ਸਨ੍ਤਕੇ ਏਸੇਵ ਨਯੋ. ਸਬ੍ਬੇਸੁ ਮਤੇਸੁ ਸਙ੍ਘਿਕਂ ਹੋਤਿ. ਸਚੇਪਿ ਅਵਿਭਜਿਤ੍ਵਾ ਸਦ੍ਧਿਵਿਹਾਰਿਕਾਦੀਨਂ ਦੇਨ੍ਤਿ ਅਦਿਨ੍ਨਮੇਵ ਹੋਤਿ. ਵਿਭਜਿਤ੍ਵਾ ਦਿਨ੍ਨਂ ਪਨ ਸੁਦਿਨ੍ਨਂ. ਤਂ ਤੇਸੁ ਮਤੇਸੁਪਿ ਸਦ੍ਧਿਵਿਹਾਰਿਕਾਦੀਨਂਯੇਵ ਹੋਤਿ, ਨ ਸਙ੍ਘਸ੍ਸ.
ਕੁਸਚੀਰਾਦਿਪਟਿਕ੍ਖੇਪਕਥਾ
੩੭੧. ਕੁਸਚੀਰਾਦੀਸੁ ਅਕ੍ਕਨਾਲ਼ਨ੍ਤਿ ਅਕ੍ਕਨਾਲ਼ਮਯਂ. ਪੋਤ੍ਥਕੋਤਿ ਮਕਚਿਮਯੋ ਵੁਚ੍ਚਤਿ. ਸੇਸਾਨਿ ਪਠਮਪਾਰਾਜਿਕਵਣ੍ਣਨਾਯਂ ਵੁਤ੍ਤਾਨਿ. ਤੇਸੁ ਪੋਤ੍ਥਕੇ ਏਵ ਦੁਕ੍ਕਟਂ. ਸੇਸੇਸੁ ਥੁਲ੍ਲਚ੍ਚਯਾਨੀਤਿ. ਅਕ੍ਕਦੁਸ੍ਸਕਦਲਿਦੁਸ੍ਸਏਰਕਦੁਸ੍ਸਾਨਿ ਪਨ ਪੋਤ੍ਥਕਗਤਿਕਾਨੇਵ.
੩੭੨. ਸਬ੍ਬਨੀਲਕਾਦੀਨਿ ਰਜਨਂ ਧੋਵਿਤ੍ਵਾ ਪੁਨ ਰਜਿਤ੍ਵਾ ਧਾਰੇਤਬ੍ਬਾਨਿ. ਨ ਸਕ੍ਕਾ ਚੇ ਹੋਨ੍ਤਿ ਧੋਵਿਤੁਂ, ਪਚ੍ਚਤ੍ਥਰਣਾਨਿ ਵਾ ਕਾਤਬ੍ਬਾਨਿ. ਦੁਪਟ੍ਟਚੀਵਰਸ੍ਸ ਵਾ ਮਜ੍ਝੇ ਦਾਤਬ੍ਬਾਨਿ. ਤੇਸਂ ਵਣ੍ਣਨਾਨਤ੍ਤਂ ਉਪਾਹਨਾਸੁ ਵੁਤ੍ਤਨਯਮੇਵ. ਅਚ੍ਛਿਨ੍ਨਦਸਦੀਘਦਸਾਨਿ ਦਸਾ ਛਿਨ੍ਦਿਤ੍ਵਾ ਧਾਰੇਤਬ੍ਬਾਨਿ. ਕਞ੍ਚੁਕਂ ਲਭਿਤ੍ਵਾ ਫਾਲੇਤ੍ਵਾ ਰਜਿਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਵੇਠਨੇਪਿ ਏਸੇਵ ਨਯੋ. ਤਿਰੀਟਕਂ ਪਨ ਰੁਕ੍ਖਛਲ੍ਲਿਮਯਂ; ਤਂ ਪਾਦਪੁਞ੍ਛਨਂ ਕਾਤੁਂ ਵਟ੍ਟਤਿ.
੩੭੪. ਪਤਿਰੂਪੇ ਗਾਹਕੇਤਿ ਸਚੇ ਕੋਚਿ ਭਿਕ੍ਖੁ ‘‘ਅਹਂ ਤਸ੍ਸ ਗਣ੍ਹਾਮੀ’’ਤਿ ਗਣ੍ਹਾਤਿ, ਦਾਤਬ੍ਬਨ੍ਤਿ ਅਤ੍ਥੋ. ਏਵਮੇਤੇਸੁ ਤੇਵੀਸਤਿਯਾ ਪੁਗ੍ਗਲੇਸੁ ਸੋਲ਼ਸ ਜਨਾ ਨ ਲਭਨ੍ਤਿ, ਸਤ੍ਤ ਜਨਾ ਲਭਨ੍ਤੀਤਿ.
ਸਙ੍ਘੇਭਿਨ੍ਨੇਚੀਵਰੁਪ੍ਪਾਦਕਥਾ
੩੭੬. ਸਙ੍ਘੋ ਭਿਜ੍ਜਤੀਤਿ ਭਿਜ੍ਜਿਤ੍ਵਾ ਕੋਸਮ੍ਬਕਭਿਕ੍ਖੂ ਵਿਯ ਦ੍ਵੇ ਕੋਟ੍ਠਾਸਾ ਹੋਨ੍ਤਿ. ਏਕਸ੍ਮਿਂ ਪਕ੍ਖੇਤਿ ਏਕਸ੍ਮਿਂ ਕੋਟ੍ਠਾਸੇ ਦਕ੍ਖਿਣੋਦਕਞ੍ਚ ਗਨ੍ਧਾਦੀਨਿ ਚ ਦੇਨ੍ਤਿ, ਏਕਸ੍ਮਿਂ ਚੀਵਰਾਨਿ. ਸਙ੍ਘਸ੍ਸੇਵੇਤਨ੍ਤਿ ਸਕਲਸ੍ਸ ਸਙ੍ਘਸ੍ਸ ਦ੍ਵਿਨ੍ਨਮ੍ਪਿ ਕੋਟ੍ਠਾਸਾਨਂ ਏਤਂ ਹੋਤਿ, ਘਣ੍ਟਿਂ ਪਹਰਿਤ੍ਵਾ ਦ੍ਵੀਹਿਪਿ ਪਕ੍ਖੇਹਿ ਏਕਤੋ ਭਾਜੇਤਬ੍ਬਂ. ਪਕ੍ਖਸ੍ਸੇਵੇਤਨ੍ਤਿ ਏਵਂ ਦਿਨ੍ਨੇ ਯਸ੍ਸ ਕੋਟ੍ਠਾਸਸ੍ਸ ਉਦਕਂ ਦਿਨ੍ਨਂ, ਤਸ੍ਸ ਉਦਕਮੇਵ ਹੋਤਿ; ਯਸ੍ਸ ਚੀਵਰਂ ਦਿਨ੍ਨਂ, ਤਸ੍ਸੇਵ ਚੀਵਰਂ. ਯਤ੍ਥ ਪਨ ਦਕ੍ਖਿਣੋਦਕਂ ਪਮਾਣਂ ਹੋਤਿ, ਤਤ੍ਥ ਏਕੋ ਪਕ੍ਖੋ ਦਕ੍ਖਿਣੋਦਕਸ੍ਸ ਲਦ੍ਧਤ੍ਤਾ ਚੀਵਰਾਨਿ ਲਭਤਿ, ਏਕੋ ਚੀਵਰਾਨਮੇਵ ਲਦ੍ਧਤ੍ਤਾਤਿ ਉਭੋਹਿਪਿ ਏਕਤੋ ਹੁਤ੍ਵਾ ਯਥਾਵੁਡ੍ਢਂ ਭਾਜੇਤਬ੍ਬਂ. ਇਦਂ ਕਿਰ ਪਰਸਮੁਦ੍ਦੇ ਲਕ੍ਖਣਨ੍ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਤਸ੍ਮਿਂਯੇਵ ਪਕ੍ਖੇਤਿ ਏਤ੍ਥ ਪਨ ਇਤਰੋ ਪਕ੍ਖੋ ਅਨਿਸ੍ਸਰੋਯੇਵ. ਚੀਵਰਪੇਸਨਵਤ੍ਥੂਨਿ ਪਾਕਟਾਨੇਵ.
ਅਟ੍ਠਚੀਵਰਮਾਤਿਕਾਕਥਾ
੩੭੯. ਇਦਾਨਿ ਆਦਿਤੋ ਪਟ੍ਠਾਯ ਵੁਤ੍ਤਚੀਵਰਾਨਂ ਪਟਿਲਾਭਖੇਤ੍ਤਂ ਦਸ੍ਸੇਤੁਂ ‘‘ਅਟ੍ਠਿਮਾ ਭਿਕ੍ਖਵੇ ਮਾਤਿਕਾ’’ਤਿਆਦਿਮਾਹ. ਸੀਮਾਯ ਦੇਤੀਤਿਆਦਿ ਪੁਗ੍ਗਲਾਧਿਟ੍ਠਾਨਨਯੇਨ ਵੁਤ੍ਤਂ. ਏਤ੍ਥ ਪਨ ਸੀਮਾਯ ਦਾਨਂ ਏਕਾ ਮਾਤਿਕਾ, ਕਤਿਕਾਯ ਦਾਨਂ ਦੁਤਿਯਾ…ਪੇ… ਪੁਗ੍ਗਲਸ੍ਸ ਦਾਨਂ ਅਟ੍ਠਮਾ. ਤਤ੍ਥ ਸੀਮਾਯ ਦਮ੍ਮੀਤਿ ਏਵਂ ਸੀਮਂ ਪਰਾਮਸਿਤ੍ਵਾ ਦੇਨ੍ਤੋ ਸੀਮਾਯ ਦੇਤਿ ਨਾਮ. ਏਸ ਨਯੋ ਸਬ੍ਬਤ੍ਥ.
ਸੀਮਾਯ ਦੇਤਿ, ਯਾਵਤਿਕਾ ਭਿਕ੍ਖੂ ਅਨ੍ਤੋਸੀਮਗਤਾ ਤੇਹਿ ਭਾਜੇਤਬ੍ਬਨ੍ਤਿਆਦਿਮ੍ਹਿ ਪਨ ਮਾਤਿਕਾਨਿਦ੍ਦੇਸੇ ਸੀਮਾਯ ਦੇਤੀਤਿ ਏਤ੍ਥ ਤਾਵ ਖਣ੍ਡਸੀਮਾ, ਉਪਚਾਰਸੀਮਾ, ਸਮਾਨਸਂਵਾਸਸੀਮਾ, ਅਵਿਪ੍ਪਵਾਸਸੀਮਾ, ਲਾਭਸੀਮਾ, ਗਾਮਸੀਮਾ, ਨਿਗਮਸੀਮਾ, ਨਗਰਸੀਮਾ, ਅਬ੍ਭਨ੍ਤਰਸੀਮਾ, ਉਦਕੁਕ੍ਖੇਪਸੀਮਾ, ਜਨਪਦਸੀਮਾ, ਰਟ੍ਠਸੀਮਾ, ਰਜ੍ਜਸੀਮਾ, ਦੀਪਸੀਮਾ, ਚਕ੍ਕਵਾਲ਼ਸੀਮਾਤਿ ਪਨ੍ਨਰਸ ਸੀਮਾ ਵੇਦਿਤਬ੍ਬਾ.
ਤਤ੍ਥ ਖਣ੍ਡਸੀਮਾ ਸੀਮਾਕਥਾਯਂ ਵੁਤ੍ਤਾਵ. ਉਪਚਾਰਸੀਮਾ ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪੇਨ ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨੇਨ ਪਰਿਚ੍ਛਿਨ੍ਨਾ ਹੋਤਿ. ਅਪਿਚ ਭਿਕ੍ਖੂਨਂ ਧੁਵਸਨ੍ਨਿਪਾਤਟ੍ਠਾਨਤੋ ਵਾ ਪਰਿਯਨ੍ਤੇ ਠਿਤਭੋਜਨਸਾਲਤੋ ਵਾ ਨਿਬਦ੍ਧਵਸਨਕਆਵਾਸਤੋ ਵਾ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਦ੍ਵਿਨ੍ਨਂ ਲੇਡ੍ਡੁਪਾਤਾਨਂ ਅਨ੍ਤੋ ਉਪਚਾਰਸੀਮਾ ਵੇਦਿਤਬ੍ਬਾ, ਸਾ ਪਨ ਆਵਾਸੇਸੁ ਵਡ੍ਢਨ੍ਤੇਸੁ ਵਡ੍ਢਤਿ, ਪਰਿਹਾਯਨ੍ਤੇਸੁ ਪਰਿਹਾਯਤਿ. ਮਹਾਪਚ੍ਚਰਿਯਂ ਪਨ ‘‘ਭਿਕ੍ਖੂਸੁਪਿ ਵਡ੍ਢਨ੍ਤੇਸੁ ਵਡ੍ਢਤੀ’’ਤਿ ਵੁਤ੍ਤਂ. ਤਸ੍ਮਾ ਸਚੇ ਵਿਹਾਰੇ ਸਨ੍ਨਿਪਤਿਤਭਿਕ੍ਖੂਹਿ ਸਦ੍ਧਿਂ ਏਕਾਬਦ੍ਧਾ ਹੁਤ੍ਵਾ ਯੋਜਨਸਤਮ੍ਪਿ ਪੂਰੇਤ੍ਵਾ ਨਿਸੀਦਨ੍ਤਿ, ਯੋਜਨਸਤਮ੍ਪਿ ਉਪਚਾਰਸੀਮਾਵ ਹੋਤਿ, ਸਬ੍ਬੇਸਂ ਲਾਭੋ ਪਾਪੁਣਾਤਿ. ਸਮਾਨਸਂਵਾਸਅਵਿਪ੍ਪਵਾਸਸੀਮਾਦ੍ਵਯਮ੍ਪਿ ਵੁਤ੍ਤਮੇਵ.
ਲਾਭਸੀਮਾ ਨਾਮ ਨੇਵ ਸਮ੍ਮਾਸਮ੍ਬੁਦ੍ਧੇਨ ਅਨੁਞ੍ਞਾਤਾ, ਨ ਧਮ੍ਮਸਙ੍ਗਾਹਕਤ੍ਥੇਰੇਹਿ ਠਪਿਤਾ; ਅਪਿਚ ਖੋ ਰਾਜਰਾਜਮਹਾਮਤ੍ਤਾ ਵਿਹਾਰਂ ਕਾਰੇਤ੍ਵਾ ਗਾਵੁਤਂ ਵਾ ਅਡ੍ਢਯੋਜਨਂ ਵਾ ਯੋਜਨਂ ਵਾ ਸਮਨ੍ਤਤੋ ਪਰਿਚ੍ਛਿਨ੍ਦਿਤ੍ਵਾ ‘‘ਅਯਂ ਅਮ੍ਹਾਕਂ ਵਿਹਾਰਸ੍ਸ ਲਾਭਸੀਮਾ’’ਤਿ ਨਾਮਲਿਖਿਤਕੇ ਥਮ੍ਭੇ ਨਿਖਣਿਤ੍ਵਾ ‘‘ਯਂ ਏਤ੍ਥਨ੍ਤਰੇ ਉਪ੍ਪਜ੍ਜਤਿ, ਸਬ੍ਬਂ ਤਂ ਅਮ੍ਹਾਕਂ ਵਿਹਾਰਸ੍ਸ ਦੇਮਾ’’ਤਿ ਸੀਮਂ ਠਪੇਨ੍ਤਿ, ਅਯਂ ਲਾਭਸੀਮਾ ਨਾਮ. ਗਾਮਨਿਗਮਨਗਰਅਬ੍ਭਨ੍ਤਰਉਦਕੁਕ੍ਖੇਪਸੀਮਾਪਿ ਵੁਤ੍ਤਾ ਏਵ. ਜਨਪਦਸੀਮਾ ਨਾਮ – ਕਾਸਿਕੋਸਲਰਟ੍ਠਾਦੀਨਂ ਅਨ੍ਤੋ ਬਹੂ ਜਨਪਦਾ ਹੋਨ੍ਤਿ, ਤਤ੍ਥ ਏਕੇਕੋ ਜਨਪਦਪਰਿਚ੍ਛੇਦੋ ਜਨਪਦਸੀਮਾ. ਰਟ੍ਠਸੀਮਾ ਨਾਮ ਕਾਸਿਕੋਸਲਾਦਿਰਟ੍ਠਪਰਿਚ੍ਛੇਦੋ. ਰਜ੍ਜਸੀਮਾ ਨਾਮ ‘‘ਚੋਲ਼ਭੋਗੋ ਕੇਰਲ਼ਭੋਗੋ’’ਤਿ ਏਵਂ ਏਕੇਕਸ੍ਸ ਰਞ੍ਞੋ ਆਣਾਪਵਤ੍ਤਿਟ੍ਠਾਨਂ. ਦੀਪਸੀਮਾ ਨਾਮ ਸਮੁਦ੍ਦਨ੍ਤੇਨ ਪਰਿਚ੍ਛਿਨ੍ਨਮਹਾਦੀਪਾ ਚ ਅਨ੍ਤਰਦੀਪਾ ਚ. ਚਕ੍ਕਵਾਲ਼ਸੀਮਾ ਨਾਮ ਚਕ੍ਕਵਾਲ਼ਪਬ੍ਬਤੇਨੇਵ ਪਰਿਚ੍ਛਿਨ੍ਨਾ.
ਏਵਮੇਤਾਸੁ ਸੀਮਾਸੁ ਖਣ੍ਡਸੀਮਾਯ ਕੇਨਚਿ ਕਮ੍ਮੇਨ ਸਨ੍ਨਿਪਤਿਤਂ ਸਙ੍ਘਂ ਦਿਸ੍ਵਾ ‘‘ਏਤ੍ਥੇਵ ਸੀਮਾਯ ਸਙ੍ਘਸ੍ਸ ਦੇਮੀ’’ਤਿ ਵੁਤ੍ਤੇ ਯਾਵਤਿਕਾ ਭਿਕ੍ਖੂ ਅਨ੍ਤੋਖਣ੍ਡਸੀਮਗਤਾ, ਤੇਹਿ ਭਾਜੇਤਬ੍ਬਂ. ਤੇਸਂਯੇਵ ਹਿ ਤਂ ਪਾਪੁਣਾਤਿ. ਅਞ੍ਞੇਸਂ ਸੀਮਨ੍ਤਰਿਕਾਯ ਵਾ ਉਪਚਾਰਸੀਮਾਯ ਵਾ ਠਿਤਾਨਮ੍ਪਿ ਨ ਪਾਪੁਣਾਤਿ. ਖਣ੍ਡਸੀਮਾਯ ਠਿਤੇ ਪਨ ਰੁਕ੍ਖੇ ਵਾ ਪਬ੍ਬਤੇ ਵਾ ਠਿਤਸ੍ਸ ਹੇਟ੍ਠਾ ਵਾ ਪਥਵੀਵੇਮਜ੍ਝਗਤਸ੍ਸ ਪਾਪੁਣਾਤਿਯੇਵ. ‘‘ਇਮਿਸ੍ਸਾ ਉਪਚਾਰਸੀਮਾਯ ਸਙ੍ਘਸ੍ਸ ਦਮ੍ਮੀ’’ਤਿ ਦਿਨ੍ਨਂ ਪਨ ਖਣ੍ਡਸੀਮਾਸੀਮਨ੍ਤਰਿਕਾਸੁ ਠਿਤਾਨਮ੍ਪਿ ਪਾਪੁਣਾਤਿ. ‘‘ਸਮਾਨਸਂਵਾਸਸੀਮਾਯ ਦਮ੍ਮੀ’’ਤਿ ਦਿਨ੍ਨਂ ਪਨ ਖਣ੍ਡਸੀਮਾਸੀਮਨ੍ਤਰਿਕਾਸੁ ਠਿਤਾਨਂ ਨ ਪਾਪੁਣਾਤਿ. ਅਵਿਪ੍ਪਵਾਸਸੀਮਾਲਾਭਸੀਮਾਸੁ ਦਿਨ੍ਨਂ ਤਾਸੁ ਸੀਮਾਸੁ ਅਨ੍ਤੋਗਤਾਨਂ ਪਾਪੁਣਾਤਿ. ਗਾਮਸੀਮਾਦੀਸੁ ਦਿਨ੍ਨਂ ਤਾਸਂ ਸੀਮਾਨਂ ਅਬ੍ਭਨ੍ਤਰੇ ਬਦ੍ਧਸੀਮਾਯ ਠਿਤਾਨਮ੍ਪਿ ਪਾਪੁਣਾਤਿ. ਅਬ੍ਭਨ੍ਤਰਸੀਮਾਉਦਕੁਕ੍ਖੇਪਸੀਮਾਸੁ ਦਿਨ੍ਨਂ ਤਤ੍ਥ ਅਨ੍ਤੋਗਤਾਨਂਯੇਵ ਪਾਪੁਣਾਤਿ. ਜਨਪਦਰਟ੍ਠਰਜ੍ਜਦੀਪਚਕ੍ਕਵਾਲ਼ਸੀਮਾਸੁਪਿ ਗਾਮਸੀਮਾਦੀਸੁ ਵੁਤ੍ਤਸਦਿਸੋਯੇਵ ਵਿਨਿਚ੍ਛਯੋ.
ਸਚੇ ਪਨ ਜਮ੍ਬੁਦੀਪੇ ਠਿਤੋ ‘‘ਤਮ੍ਬਪਣ੍ਣਿਦੀਪੇ ਸਙ੍ਘਸ੍ਸ ਦਮ੍ਮੀ’’ਤਿ ਦੇਤਿ, ਤਮ੍ਬਪਣ੍ਣਿਦੀਪਤੋ ਏਕੋਪਿ ਗਨ੍ਤ੍ਵਾ ਸਬ੍ਬੇਸਂ ਗਣ੍ਹਿਤੁਂ ਲਭਤਿ. ਸਚੇਪਿ ਤਤ੍ਰੇਵ ਏਕੋ ਸਭਾਗਭਿਕ੍ਖੁ ਸਭਾਗਾਨਂ ਭਾਗਂ ਗਣ੍ਹਾਤਿ, ਨ ਵਾਰੇਤਬ੍ਬੋ. ਏਵਂ ਤਾਵ ਯੋ ਸੀਮਂ ਪਰਾਮਸਿਤ੍ਵਾ ਦੇਤਿ, ਤਸ੍ਸ ਦਾਨੇ ਵਿਨਿਚ੍ਛਯੋ ਵੇਦਿਤਬ੍ਬੋ.
ਯੋ ਪਨ ਅਸੁਕਸੀਮਾਯਾਤਿ ਵਤ੍ਤੁਂ ਨ ਜਾਨਾਤਿ, ਕੇਵਲਂ ਸੀਮਾਤਿ ਵਚਨਮਤ੍ਤਮੇਵ ਜਾਨਨ੍ਤੋ ਵਿਹਾਰਂ ਗਨ੍ਤ੍ਵਾ ‘‘ਸੀਮਾਯ ਦਮ੍ਮੀ’’ਤਿ ਵਾ ‘‘ਸੀਮਟ੍ਠਕਸਙ੍ਘਸ੍ਸ ਦਮ੍ਮੀ’’ਤਿ ਵਾ ਭਣਤਿ, ਸੋ ਪੁਚ੍ਛਿਤਬ੍ਬੋ – ‘‘ਸੀਮਾ ਨਾਮ ਬਹੁਵਿਧਾ, ਕਤਰਸੀਮਂ ਸਨ੍ਧਾਯ ਭਣਸੀ’’ਤਿ? ਸਚੇ ਵਦਤਿ – ‘‘ਅਹਂ ਅਸੁਕਸੀਮਾਤਿ ਨ ਜਾਨਾਮਿ, ਸੀਮਟ੍ਠਕਸਙ੍ਘੋ ਭਾਜੇਤ੍ਵਾ ਗਣ੍ਹਾਤੂ’’ਤਿ ਕਤਰਸੀਮਾਯ ਭਾਜੇਤਬ੍ਬਂ? ਮਹਾਸੀਵਤ੍ਥੇਰੋ ਕਿਰਾਹ – ‘‘ਅਵਿਪ੍ਪਵਾਸਸੀਮਾਯਾ’’ਤਿ. ਤਤੋ ਨਂ ਆਹਂਸੁ – ‘‘ਅਵਿਪ੍ਪਵਾਸਸੀਮਾ ਨਾਮ ਤਿਯੋਜਨਾਪਿ ਹੋਤਿ, ਏਵਂ ਸਨ੍ਤੇ ਤਿਯੋਜਨੇ ਠਿਤਾ ਲਾਭਂ ਗਣ੍ਹਿਸ੍ਸਨ੍ਤਿ, ਤਿਯੋਜਨੇ ਠਤ੍ਵਾ ਆਗਨ੍ਤੁਕਵਤ੍ਤਂ ਪੂਰੇਤ੍ਵਾ ਆਰਾਮਂ ਪਵਿਸਿਤਬ੍ਬਂ ਭਵਿਸ੍ਸਤਿ, ਗਮਿਕੋ ਤਿਯੋਜਨਂ ਗਨ੍ਤ੍ਵਾ ਸੇਨਾਸਨਂ ਆਪੁਚ੍ਛਿਸ੍ਸਤਿ, ਨਿਸ੍ਸਯਪਟਿਪਨ੍ਨਸ੍ਸ ਤਿਯੋਜਨਾਤਿਕ੍ਕਮੇ ਨਿਸ੍ਸਯੋ ਪਟਿਪ੍ਪਸ੍ਸਮ੍ਭਿਸ੍ਸਤਿ, ਪਾਰਿਵਾਸਿਕੇਨ ਤਿਯੋਜਨਂ ਅਤਿਕ੍ਕਮਿਤ੍ਵਾ ਅਰੁਣਂ ਉਟ੍ਠਾਪੇਤਬ੍ਬਂ ਭਵਿਸ੍ਸਤਿ, ਭਿਕ੍ਖੁਨਿਯਾ ਤਿਯੋਜਨੇ ਠਤ੍ਵਾ ਆਰਾਮਪ੍ਪਵੇਸਨਂ ਆਪੁਚ੍ਛਿਤਬ੍ਬਂ ਭਵਿਸ੍ਸਤਿ, ਸਬ੍ਬਮ੍ਪੇਤਂ ਉਪਚਾਰਸੀਮਾਯ ਪਰਿਚ੍ਛੇਦਵਸੇਨੇਵ ਕਾਤੁਂ ਵਟ੍ਟਤਿ. ਤਸ੍ਮਾ ਉਪਚਾਰਸੀਮਾਯਮੇਵ ਭਾਜੇਤਬ੍ਬ’’ਨ੍ਤਿ.
ਕਤਿਕਾਯਾਤਿ ਸਮਾਨਲਾਭਕਤਿਕਾਯ. ਤੇਨੇਵਾਹ – ‘‘ਸਮ੍ਬਹੁਲਾ ਆਵਾਸਾ ਸਮਾਨਲਾਭਾ ਹੋਨ੍ਤੀ’’ਤਿ. ਤਤ੍ਰੇਵਂ ਕਤਿਕਾ ਕਾਤਬ੍ਬਾ, ਏਕਸ੍ਮਿਂ ਵਿਹਾਰੇ ਸਨ੍ਨਿਪਤਿਤੇਹਿ ਭਿਕ੍ਖੂਹਿ ਯਂ ਵਿਹਾਰਂ ਸਙ੍ਗਣ੍ਹਿਤੁਕਾਮਾ ਸਮਾਨਲਾਭਂ ਕਾਤੁਂ ਇਚ੍ਛਨ੍ਤਿ, ਤਸ੍ਸ ਨਾਮਂ ਗਹੇਤ੍ਵਾ ਅਸੁਕੋ ਨਾਮ ਵਿਹਾਰੋ ਪੋਰਾਣਕੋਤਿ ਵਾ ਬੁਦ੍ਧਾਧਿਵੁਤ੍ਥੋਤਿ ਵਾ ਅਪ੍ਪਲਾਭੋਤਿ ਵਾ ਯਂਕਿਞ੍ਚਿ ਕਾਰਣਂ ਵਤ੍ਵਾ ਤਂ ਵਿਹਾਰਂ ਇਮਿਨਾ ਵਿਹਾਰੇਨ ਸਦ੍ਧਿਂ ਏਕਲਾਭਂ ਕਾਤੁਂ ਸਙ੍ਘਸ੍ਸ ਰੁਚ੍ਚਤੀਤਿ ਤਿਕ੍ਖਤ੍ਤੁਂ ਸਾਵੇਤਬ੍ਬਂ. ਏਤ੍ਤਾਵਤਾ ਤਸ੍ਮਿਂ ਵਿਹਾਰੇ ਨਿਸਿਨ੍ਨੋਪਿ ਇਧ ਨਿਸਿਨ੍ਨੋਵ ਹੋਤਿ, ਤਸ੍ਮਿਂ ਵਿਹਾਰੇਪਿ ਸਙ੍ਘੇਨ ਏਵਮੇਵ ਕਾਤਬ੍ਬਂ. ਏਤ੍ਤਾਵਤਾ ਇਧ ਨਿਸਿਨ੍ਨੋਪਿ ਤਸ੍ਮਿਂ ਨਿਸਿਨ੍ਨੋਵ ਹੋਤਿ. ਏਕਸ੍ਮਿਂ ਲਾਭੇ ਭਾਜਿਯਮਾਨੇ ਇਤਰਸ੍ਮਿਂ ਠਿਤਸ੍ਸ ਭਾਗਂ ਗਹੇਤੁਂ ਵਟ੍ਟਤਿ. ਏਵਂ ਏਕੇਨ ਵਿਹਾਰੇਨ ਸਦ੍ਧਿਂ ਬਹੂਪਿ ਆਵਾਸਾ ਏਕਲਾਭਾ ਕਾਤਬ੍ਬਾ.
ਭਿਕ੍ਖਾਪਞ੍ਞਤ੍ਤਿਯਾਤਿ ਅਤ੍ਤਨੋ ਪਰਿਚ੍ਚਾਗਪਞ੍ਞਾਪਨਟ੍ਠਾਨੇ. ਤੇਨੇਵਾਹ – ‘‘ਯਤ੍ਥ ਸਙ੍ਘਸ੍ਸ ਧੁਵਕਾਰਾ ਕਰਿਯਨ੍ਤੀ’’ਤਿ. ਤਸ੍ਸਤ੍ਥੋ – ਯਸ੍ਮਿਂ ਵਿਹਾਰੇ ਇਮਸ੍ਸ ਚੀਵਰਦਾਯਕਸ੍ਸ ਸਨ੍ਤਕਂ ਸਙ੍ਘਸ੍ਸ ਪਾਕਵਟ੍ਟਂ ਵਾ ਵਤ੍ਤਤਿ, ਯਸ੍ਮਿਂ ਵਾ ਵਿਹਾਰੇ ਭਿਕ੍ਖੂ ਅਤ੍ਤਨੋ ਭਾਰਂ ਕਤ੍ਵਾ ਸਦਾ ਗੇਹੇ ਭੋਜੇਤਿ, ਯਤ੍ਥ ਵਾ ਅਨੇਨ ਆਵਾਸੋ ਕਾਰਿਤੋ, ਸਲਾਕਭਤ੍ਤਾਦੀਨਿ ਵਾ ਨਿਬਦ੍ਧਾਨਿ, ਯੇਨ ਪਨ ਸਕਲੋਪਿ ਵਿਹਾਰੋ ਪਤਿਟ੍ਠਾਪਿਤੋ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥਿ, ਇਮੇ ਧੁਵਕਾਰਾ ਨਾਮ. ਤਸ੍ਮਾ ਸਚੇ ਸੋ ‘‘ਯਤ੍ਥ ਮਯ੍ਹਂ ਧੁਵਕਾਰਾ ਕਰੀਯਨ੍ਤਿ, ਤਤ੍ਥ ਦਮ੍ਮੀ’’ਤਿ ਵਾ ‘‘ਤਤ੍ਥ ਦੇਥਾ’’ਤਿ ਵਾ ਭਣਤਿ, ਬਹੂਸੁ ਚੇਪਿ ਠਾਨੇਸੁ ਧੁਵਕਾਰਾ ਹੋਨ੍ਤਿ, ਸਬ੍ਬਤ੍ਥ ਦਿਨ੍ਨਮੇਵ ਹੋਤਿ.
ਸਚੇ ਪਨ ਏਕਸ੍ਮਿਂ ਵਿਹਾਰੇ ਭਿਕ੍ਖੂ ਬਹੁਤਰਾ ਹੋਨ੍ਤਿ, ਤੇਹਿ ਵਤ੍ਤਬ੍ਬਂ – ‘‘ਤੁਮ੍ਹਾਕਂ ਧੁਵਕਾਰੇ ਏਕਤ੍ਥ ਭਿਕ੍ਖੂ ਬਹੂ ਏਕਤ੍ਥ ਅਪ੍ਪਕਾ’’ਤਿ. ਸਚੇ ‘‘ਭਿਕ੍ਖੁਗਣਨਾਯ ਗਣ੍ਹਥਾ’’ਤਿ ਭਣਤਿ, ਤਥਾ ਭਾਜੇਤ੍ਵਾ ਗਣ੍ਹਿਤੁਂ ਵਟ੍ਟਤਿ. ਏਤ੍ਥ ਚ ਵਤ੍ਥਭੇਸਜ੍ਜਾਦਿ ਅਪ੍ਪਕਮ੍ਪਿ ਸੁਖੇਨ ਭਾਜਿਯਤਿ. ਯਦਿ ਪਨ ਮਞ੍ਚੋ ਵਾ ਪੀਠਕਂ ਵਾ ਏਕਮੇਵ ਹੋਤਿ, ਤਂ ਪੁਚ੍ਛਿਤ੍ਵਾ ਯਸ੍ਸ ਵਾ ਵਿਹਾਰਸ੍ਸ ਏਕਵਿਹਾਰੇਪਿ ਵਾ ਯਸ੍ਸ ਸੇਨਾਸਨਸ੍ਸ ਸੋ ਵਿਚਾਰੇਤਿ, ਤਤ੍ਥ ਦਾਤਬ੍ਬਂ. ਸਚੇ ‘‘ਅਸੁਕਭਿਕ੍ਖੁ ਗਣ੍ਹਾਤੂ’’ਤਿ ਵਦਤਿ, ਵਟ੍ਟਤਿ. ਅਥ ‘‘ਮਯ੍ਹਂ ਧੁਵਕਾਰੇ ਦੇਥਾ’’ਤਿ ਵਤ੍ਵਾ ਅਵਿਚਾਰੇਤ੍ਵਾਵ ਗਚ੍ਛਤਿ, ਸਙ੍ਘਸ੍ਸਾਪਿ ਵਿਚਾਰੇਤੁਂ ਵਟ੍ਟਤਿ. ਏਵਂ ਪਨ ਵਿਚਾਰੇਤਬ੍ਬਂ – ‘‘ਸਙ੍ਘਤ੍ਥੇਰਸ੍ਸ ਵਸਨਟ੍ਠਾਨੇ ਦੇਥਾ’’ਤਿ ਵਤ੍ਤਬ੍ਬਂ. ਸਚੇ ਤਸ੍ਸ ਸੇਨਾਸਨਂ ਪਰਿਪੁਣ੍ਣਂ ਹੋਤਿ, ਯਤ੍ਥ ਨਪ੍ਪਹੋਤਿ, ਤਤ੍ਥ ਦਾਤਬ੍ਬਂ. ਸਚੇ ਏਕੋ ਭਿਕ੍ਖੁ ‘‘ਮਯ੍ਹਂ ਵਸਨਟ੍ਠਾਨੇ ਸੇਨਾਸਨਪਰਿਭੋਗਭਣ੍ਡਂ ਨਤ੍ਥੀ’’ਤਿ ਵਦਤਿ, ਤਤ੍ਥ ਦਾਤਬ੍ਬਂ.
ਸਙ੍ਘਸ੍ਸ ਦੇਤੀਤਿ ਵਿਹਾਰਂ ਪਵਿਸਿਤ੍ਵਾ ‘‘ਇਮਾਨਿ ਚੀਵਰਾਨਿ ਸਙ੍ਘਸ੍ਸ ਦਮ੍ਮੀ’’ਤਿ ਦੇਤਿ. ਸਮ੍ਮੁਖੀਭੂਤੇਨਾਤਿ ਉਪਚਾਰਸੀਮਾਯ ਠਿਤੇਨ ਸਙ੍ਘੇਨ ਘਣ੍ਟਿਂ ਪਹਰਿਤ੍ਵਾ ਕਾਲਂ ਘੋਸੇਤ੍ਵਾ ਭਾਜੇਤਬ੍ਬਂ. ਸੀਮਟ੍ਠਸ੍ਸ ਅਸਮ੍ਪਤ੍ਤਸ੍ਸਾਪਿ ਭਾਗਂ ਗਣ੍ਹਨ੍ਤੋ ਨ ਵਾਰੇਤਬ੍ਬੋ. ਵਿਹਾਰੋ ਮਹਾ ਹੋਤਿ, ਥੇਰਾਸਨਤੋ ਪਟ੍ਠਾਯ ਵਤ੍ਥੇਸੁ ਦਿਯ੍ਯਮਾਨੇਸੁ ਅਲਸਜਾਤਿਕਾ ਮਹਾਥੇਰਾ ਪਚ੍ਛਾ ਆਗਚ੍ਛਨ੍ਤਿ, ‘‘ਭਨ੍ਤੇ ਵੀਸਤਿਵਸ੍ਸਾਨਂ ਦਿਯ੍ਯਤਿ, ਤੁਮ੍ਹਾਕਂ ਠਿਤਿਕਾ ਅਤਿਕ੍ਕਨ੍ਤਾ’’ਤਿ ਨ ਵਤ੍ਤਬ੍ਬਾ, ਠਿਤਿਕਂ ਠਪੇਤ੍ਵਾ ਤੇਸਂ ਦਤ੍ਵਾ ਪਚ੍ਛਾ ਠਿਤਿਕਾਯ ਦਾਤਬ੍ਬਂ.
ਅਸੁਕਵਿਹਾਰੇ ਕਿਰ ਬਹੁਂ ਚੀਵਰਂ ਉਪ੍ਪਨ੍ਨਨ੍ਤਿ ਸੁਤ੍ਵਾ ਯੋਜਨਨ੍ਤਰਿਕਵਿਹਾਰਤੋਪਿ ਭਿਕ੍ਖੂ ਆਗਚ੍ਛਨ੍ਤਿ, ਸਮ੍ਪਤ੍ਤਸਮ੍ਪਤ੍ਤਾਨਂ ਠਿਤਟ੍ਠਾਨਤੋ ਪਟ੍ਠਾਯ ਦਾਤਬ੍ਬਂ. ਅਸਮ੍ਪਤ੍ਤਾਨਮ੍ਪਿ ਉਪਚਾਰਸੀਮਂ ਪਵਿਟ੍ਠਾਨਂ ਅਨ੍ਤੇਵਾਸਿਕਾਦੀਸੁ ਗਣ੍ਹਨ੍ਤੇਸੁ ਦਾਤਬ੍ਬਮੇਵ. ‘‘ਬਹਿਉਪਚਾਰਸੀਮਾਯ ਠਿਤਾਨਂ ਦੇਥਾ’’ਤਿ ਵਦਨ੍ਤਿ, ਨ ਦਾਤਬ੍ਬਂ. ਸਚੇ ਪਨ ਉਪਚਾਰਸੀਮਂ ਓਕ੍ਕਨ੍ਤੇਹਿ ਏਕਾਬਦ੍ਧਾ ਹੁਤ੍ਵਾ ਅਤ੍ਤਨੋ ਵਿਹਾਰਦ੍ਵਾਰੇ ਵਾ ਅਨ੍ਤੋਵਿਹਾਰੇਯੇਵ ਵਾ ਹੋਨ੍ਤਿ, ਪਰਿਸਵਸੇਨ ਵਡ੍ਢਿਤਾ ਨਾਮ ਹੋਤਿ ਸੀਮਾ, ਤਸ੍ਮਾ ਦਾਤਬ੍ਬਂ. ਸਙ੍ਘਨਵਕਸ੍ਸ ਦਿਨ੍ਨੇਪਿ ਪਚ੍ਛਾ ਆਗਤਾਨਂ ਦਾਤਬ੍ਬਮੇਵ. ਦੁਤਿਯਭਾਗੇ ਪਨ ਥੇਰਾਸਨਂ ਆਰੁਲ਼੍ਹੇ ਆਗਤਾਨਂ ਪਠਮਭਾਗੋ ਨ ਪਾਪੁਣਾਤਿ, ਦੁਤਿਯਭਾਗਤੋ ਵਸ੍ਸਗ੍ਗੇਨ ਦਾਤਬ੍ਬਂ.
ਏਕਸ੍ਮਿਂ ਵਿਹਾਰੇ ਦਸ ਭਿਕ੍ਖੂ ਹੋਨ੍ਤਿ, ‘‘ਦਸ ਵਤ੍ਥਾਨਿ ਸਙ੍ਘਸ੍ਸ ਦੇਮਾ’’ਤਿ ਦੇਨ੍ਤਿ, ਪਾਟੇਕ੍ਕਂ ਭਾਜੇਤਬ੍ਬਾਨਿ. ਸਚੇ ‘‘ਸਬ੍ਬਾਨੇਵ ਅਮ੍ਹਾਕਂ ਪਾਪੁਣਨ੍ਤੀ’’ਤਿ ਗਹੇਤ੍ਵਾ ਗਚ੍ਛਨ੍ਤਿ, ਦੁਪ੍ਪਾਪਿਤਾਨਿ ਚੇਵ ਦੁਗ੍ਗਹਿਤਾਨਿ ਚ ਗਤਗਤਟ੍ਠਾਨੇ ਸਙ੍ਘਿਕਾਨੇਵ ਹੋਨ੍ਤਿ. ਏਕਂ ਪਨ ਉਦ੍ਧਰਿਤ੍ਵਾ ‘‘ਇਦਂ ਤੁਮ੍ਹਾਕਂ ਪਾਪੁਣਾਤੀ’’ਤਿ ਸਙ੍ਘਤ੍ਥੇਰਸ੍ਸ ਦਤ੍ਵਾ ‘‘ਸੇਸਾਨਿ ਅਮ੍ਹਾਕਂ ਪਾਪੁਣਨ੍ਤੀ’’ਤਿ ਗਹੇਤੁਂ ਵਟ੍ਟਤਿ.
ਏਕਮੇਵ ਵਤ੍ਥਂ ਸਙ੍ਘਸ੍ਸ ਦੇਮਾਤਿ ਆਹਰਨ੍ਤਿ, ਅਭਾਜੇਤ੍ਵਾਵ ਅਮ੍ਹਾਕਂ ਪਾਪੁਣਨ੍ਤੀਤਿ ਗਣ੍ਹਨ੍ਤਿ, ਦੁਪ੍ਪਾਪਿਤਞ੍ਚੇਵ ਦੁਗ੍ਗਹਿਤਞ੍ਚ. ਸਤ੍ਥਕੇਨ ਪਨ ਹਲਿਦ੍ਦਿਆਦਿਨਾ ਵਾ ਲੇਖਂ ਕਤ੍ਵਾ ਏਕਂ ਕੋਟ੍ਠਾਸਂ ‘‘ਇਮਂ ਠਾਨਂ ਤੁਮ੍ਹਾਕਂ ਪਾਪੁਣਾਤੀ’’ਤਿ ਸਙ੍ਘਤ੍ਥੇਰਸ੍ਸ ਪਾਪੇਤ੍ਵਾ ‘‘ਸੇਸਂ ਅਮ੍ਹਾਕਂ ਪਾਪੁਣਾਤੀ’’ਤਿ ਗਹੇਤੁਂ ਵਟ੍ਟਤਿ. ਯਂ ਪਨ ਵਤ੍ਥਸ੍ਸੇਵ ਪੁਪ੍ਫਂ ਵਾ ਵਲਿ ਵਾ, ਤੇਨ ਪਰਿਚ੍ਛੇਦਂ ਕਾਤੁਂ ਨ ਵਟ੍ਟਤਿ. ਸਚੇ ਏਕਂ ਤਨ੍ਤਂ ਉਦ੍ਧਰਿਤ੍ਵਾ ‘‘ਇਦਂ ਠਾਨਂ ਤੁਮ੍ਹਾਕਂ ਪਾਪੁਣਾਤੀ’’ਤਿ ਸਙ੍ਘਤ੍ਥੇਰਸ੍ਸ ਦਤ੍ਵਾ ‘‘ਸੇਸਂ ਅਮ੍ਹਾਕਂ ਪਾਪੁਣਾਤੀ’’ਤਿ ਗਣ੍ਹਨ੍ਤਿ, ਵਟ੍ਟਤਿ. ਖਣ੍ਡਂ ਖਣ੍ਡਂ ਛਿਨ੍ਦਿਤ੍ਵਾ ਭਾਜਿਯਮਾਨਂ ਵਟ੍ਟਤਿਯੇਵ.
ਏਕਭਿਕ੍ਖੁਕੇ ਵਿਹਾਰੇ ਸਙ੍ਘਸ੍ਸ ਚੀਵਰੇਸੁ ਉਪ੍ਪਨ੍ਨੇਸੁ ਸਚੇ ਪੁਬ੍ਬੇ ਵੁਤ੍ਤਨਯੇਨੇਵ ਸੋ ਭਿਕ੍ਖੁ ‘‘ਸਬ੍ਬਾਨਿ ਮਯ੍ਹਂ ਪਾਪੁਣਨ੍ਤੀ’’ਤਿ ਗਣ੍ਹਾਤਿ, ਸੁਗ੍ਗਹਿਤਾਨਿ, ਠਿਤਿਕਾ ਪਨ ਨ ਤਿਟ੍ਠਤਿ. ਸਚੇ ਏਕੇਕਂ ਉਦ੍ਧਰਿਤ੍ਵਾ ‘‘ਇਦਂ ਮਯ੍ਹਂ ਪਾਪੁਣਾਤੀ’’ਤਿ ਗਣ੍ਹਾਤਿ, ਠਿਤਿਕਾ ਤਿਟ੍ਠਤਿ. ਤਤ੍ਥ ਅਟ੍ਠਿਤਾਯ ਠਿਤਿਕਾਯ ਪੁਨ ਅਞ੍ਞਸ੍ਮਿਂ ਚੀਵਰੇ ਉਪ੍ਪਨ੍ਨੇ ਸਚੇ ਏਕੋ ਭਿਕ੍ਖੁ ਆਗਚ੍ਛਤਿ, ਮਜ੍ਝੇ ਛਿਨ੍ਦਿਤ੍ਵਾ ਦ੍ਵੀਹਿਪਿ ਗਹੇਤਬ੍ਬਂ. ਠਿਤਾਯ ਠਿਤਿਕਾਯ ਪੁਨ ਅਞ੍ਞਸ੍ਮਿਂ ਚੀਵਰੇ ਉਪ੍ਪਨ੍ਨੇ ਸਚੇ ਨਵਕਤਰੋ ਆਗਚ੍ਛਤਿ, ਠਿਤਿਕਾ ਹੇਟ੍ਠਾ ਓਰੋਹਤਿ. ਸਚੇ ਵੁਡ੍ਢਤਰੋ ਆਗਚ੍ਛਤਿ, ਠਿਤਿਕਾ ਉਦ੍ਧਂ ਆਰੋਹਤਿ. ਅਥਞ੍ਞੋ ਨਤ੍ਥਿ, ਪੁਨ ਅਤ੍ਤਨੋ ਪਾਪੇਤ੍ਵਾ ਗਹੇਤਬ੍ਬਂ.
‘‘ਸਙ੍ਘਸ੍ਸ ਦੇਮਾ’’ਤਿ ਵਾ ‘‘ਭਿਕ੍ਖੁਸਙ੍ਘਸ੍ਸ ਦੇਮਾ’’ਤਿ ਵਾ ਯੇਨ ਕੇਨਚਿ ਆਕਾਰੇਨ ਸਙ੍ਘਂ ਆਮਸਿਤ੍ਵਾ ਦਿਨ੍ਨਂ ਪਨ ਪਂਸੁਕੂਲਿਕਾਨਂ ਨ ਵਟ੍ਟਤਿ, ‘‘ਗਹਪਤਿਚੀਵਰਂ ਪਟਿਕ੍ਖਿਪਾਮਿ ਪਂਸੁਕੂਲਿਕਙ੍ਗਂ ਸਮਾਦਿਯਾਮੀ’’ਤਿ ਵੁਤ੍ਤਤ੍ਤਾ, ਨ ਪਨ ਅਕਪ੍ਪਿਯਤ੍ਤਾ. ਭਿਕ੍ਖੁਸਙ੍ਘੇਨ ਅਪਲੋਕੇਤ੍ਵਾ ਦਿਨ੍ਨਮ੍ਪਿ ਨ ਗਹੇਤਬ੍ਬਂ. ਯਂ ਪਨ ਭਿਕ੍ਖੁ ਅਤ੍ਤਨੋ ਸਨ੍ਤਕਂ ਦੇਤਿ, ਤਂ ਭਿਕ੍ਖੁਦਤ੍ਤਿਯਂ ਨਾਮ ਵਟ੍ਟਤਿ, ਪਂਸੁਕੂਲਂ ਪਨ ਨ ਹੋਤਿ. ਏਵਂ ਸਨ੍ਤੇਪਿ ਧੁਤਙ੍ਗਂ ਨ ਭਿਜ੍ਜਤਿ. ‘‘ਭਿਕ੍ਖੂਨਂ ਦੇਮ, ਥੇਰਾਨਂ ਦੇਮਾ’’ਤਿ ਵੁਤ੍ਤੇ ਪਨ ਪਂਸੁਕੂਲਿਕਾਨਮ੍ਪਿ ਵਟ੍ਟਤਿ. ‘‘ਇਦਂ ਵਤ੍ਥਂ ਸਙ੍ਘਸ੍ਸ ਦੇਮ, ਇਮਿਨਾ ਉਪਾਹਨਤ੍ਥਵਿਕਪਤ੍ਤਤ੍ਥਵਿਕਆਯੋਗਅਂਸਬਦ੍ਧਕਾਦੀਨਿ ਕਰੋਨ੍ਤੂ’’ਤਿ ਦਿਨ੍ਨਮ੍ਪਿ ਵਟ੍ਟਤਿ.
ਪਤ੍ਤਤ੍ਥਵਿਕਾਦੀਨਂ ਅਤ੍ਥਾਯ ਦਿਨ੍ਨਾਨਿ ਬਹੂਨਿਪਿ ਹੋਨ੍ਤਿ, ਚੀਵਰਤ੍ਥਾਯਪਿ ਪਹੋਨ੍ਤਿ, ਤਤੋ ਚੀਵਰਂ ਕਤ੍ਵਾ ਪਾਰੁਪਿਤੁਂ ਵਟ੍ਟਤਿ. ਸਚੇ ਪਨ ਸਙ੍ਘੋ ਭਾਜਿਤਾਤਿਰਿਤ੍ਤਾਨਿ ਵਤ੍ਥਾਨਿ ਛਿਨ੍ਦਿਤ੍ਵਾ ਉਪਾਹਨਤ੍ਥਵਿਕਾਦੀਨਂ ਅਤ੍ਥਾਯ ਭਾਜੇਤਿ, ਤਤੋ ਗਹੇਤੁਂ ਨ ਵਟ੍ਟਤਿ. ਸਾਮਿਕੇਹਿ ਵਿਚਾਰਿਤਮੇਵ ਹਿ ਵਟ੍ਟਤਿ, ਨ ਇਤਰਂ.
‘‘ਪਂਸੁਕੂਲਿਕਸਙ੍ਘਸ੍ਸ ਧਮਕਰਣਪਟਾਦੀਨਂ ਅਤ੍ਥਾਯ ਦੇਮਾ’’ਤਿ ਵੁਤ੍ਤੇਪਿ ਗਹੇਤੁਂ ਵਟ੍ਟਤਿ, ਪਰਿਕ੍ਖਾਰੋ ਨਾਮ ਪਂਸੁਕੂਲਿਕਾਨਮ੍ਪਿ ਇਚ੍ਛਿਤਬ੍ਬੋ. ਯਂ ਤਤ੍ਥ ਅਤਿਰੇਕਂ ਹੋਤਿ, ਤਂ ਚੀਵਰੇਪਿ ਉਪਨੇਤੁਂ ਵਟ੍ਟਤਿ. ਸੁਤ੍ਤਂ ਸਙ੍ਘਸ੍ਸ ਦੇਨ੍ਤਿ, ਪਂਸੁਕੂਲਿਕੇਹਿਪਿ ਗਹੇਤਬ੍ਬਂ. ਅਯਂ ਤਾਵ ਵਿਹਾਰਂ ਪਵਿਸਿਤ੍ਵਾ ‘‘ਇਮਾਨਿ ਚੀਵਰਾਨਿ ਸਙ੍ਘਸ੍ਸ ਦਮ੍ਮੀ’’ਤਿ ਦਿਨ੍ਨੇਸੁ ਵਿਨਿਚ੍ਛਯੋ.
ਸਚੇ ਪਨ ਬਹਿਉਪਚਾਰਸੀਮਾਯਂ ਅਦ੍ਧਾਨਪ੍ਪਟਿਪਨ੍ਨੇ ਭਿਕ੍ਖੂ ਦਿਸ੍ਵਾ ‘‘ਸਙ੍ਘਸ੍ਸ ਦਮ੍ਮੀ’’ਤਿ ਸਙ੍ਘਤ੍ਥੇਰਸ੍ਸ ਵਾ ਸਙ੍ਘਨਵਕਸ੍ਸ ਵਾ ਆਰੋਚੇਤਿ, ਸਚੇਪਿ ਯੋਜਨਂ ਫਰਿਤ੍ਵਾ ਪਰਿਸਾ ਠਿਤਾ ਹੋਤਿ, ਏਕਬਦ੍ਧਾ ਚੇ, ਸਬ੍ਬੇਸਂ ਪਾਪੁਣਾਤਿ. ਯੇ ਪਨ ਦ੍ਵਾਦਸਹਿ ਹਤ੍ਥੇਹਿ ਪਰਿਸਂ ਅਸਮ੍ਪਤ੍ਤਾ, ਤੇਸਂ ਨ ਪਾਪੁਣਾਤਿ.
ਉਭਤੋਸਙ੍ਘਸ੍ਸ ਦੇਤੀਤਿ ਏਤ੍ਥ ‘‘ਉਭਤੋਸਙ੍ਘਸ੍ਸ ਦਮ੍ਮੀ’’ਤਿ ਵੁਤ੍ਤੇਪਿ ‘‘ਦ੍ਵਿਧਾ ਸਙ੍ਘਸ੍ਸ ਦਮ੍ਮਿ, ਦ੍ਵਿਨ੍ਨਂ ਸਙ੍ਘਾਨਂ ਦਮ੍ਮਿ, ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨਿਸਙ੍ਘਸ੍ਸ ਚ ਦਮ੍ਮੀ’’ਤਿ ਵੁਤ੍ਤੇਪਿ ਉਭਤੋਸਙ੍ਘਸ੍ਸ ਦਿਨ੍ਨਮੇਵ ਹੋਤਿ. ਉਪਡ੍ਢਂ ਦਾਤਬ੍ਬਨ੍ਤਿ ਦ੍ਵੇਭਾਗੇ ਸਮੇ ਕਤ੍ਵਾ ਏਕੋ ਦਾਤਬ੍ਬੋ. ‘‘ਉਭਤੋਸਙ੍ਘਸ੍ਸ ਚ ਤੁਯ੍ਹਞ੍ਚ ਦਮ੍ਮੀ’’ਤਿ ਵੁਤ੍ਤੇ ਸਚੇ ਦਸ ਦਸ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਹੋਨ੍ਤਿ, ਏਕਵੀਸਤਿ ਪਟਿਵੀਸੇ ਕਤ੍ਵਾ ਏਕੋ ਪੁਗ੍ਗਲਸ੍ਸ ਦਾਤਬ੍ਬੋ, ਦਸ ਭਿਕ੍ਖੁਸਙ੍ਘਸ੍ਸ, ਦਸ ਭਿਕ੍ਖੁਨਿਸਙ੍ਘਸ੍ਸ ਯੇਨ ਪੁਗ੍ਗਲਿਕੋ ਲਦ੍ਧੋ ਸੋ ਸਙ੍ਘਤੋਪਿ ਅਤ੍ਤਨੋ ਵਸ੍ਸਗ੍ਗੇਨ ਗਹੇਤੁਂ ਲਭਤਿ. ਕਸ੍ਮਾ? ਉਭਤੋਸਙ੍ਘਗ੍ਗਹਣੇਨ ਗਹਿਤਤ੍ਤਾ.
‘‘ਉਭਤੋਸਙ੍ਘਸ੍ਸ ਚ ਚੇਤਿਯਸ੍ਸ ਚ ਦਮ੍ਮੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਇਧ ਪਨ ਚੇਤਿਯਸ੍ਸ ਸਙ੍ਘਤੋ ਪਾਪੁਣਨਕੋਟ੍ਠਾਸੋ ਨਾਮ ਨਤ੍ਥਿ, ਏਕਪੁਗ੍ਗਲਸ੍ਸ ਪਤ੍ਤਕੋਟ੍ਠਾਸਸਮੋਵ ਕੋਟ੍ਠਾਸੋ ਹੋਤਿ.
‘‘ਉਭਤੋਸਙ੍ਘਸ੍ਸ ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਪਨ ਦ੍ਵਾਵੀਸਤਿ ਕੋਟ੍ਠਾਸੇ ਕਤ੍ਵਾ ਦਸ ਭਿਕ੍ਖੂਨਂ, ਦਸ ਭਿਕ੍ਖੁਨੀਨਂ, ਏਕੋ ਪੁਗ੍ਗਲਸ੍ਸ, ਏਕੋ ਚੇਤਿਯਸ੍ਸ ਦਾਤਬ੍ਬੋ. ਤਤ੍ਥ ਪੁਗ੍ਗਲੋ ਸਙ੍ਘਤੋਪਿ ਅਤ੍ਤਨੋ ਵਸ੍ਸਗ੍ਗੇਨ ਪੁਨ ਗਹੇਤੁਂ ਲਭਤਿ, ਚੇਤਿਯਸ੍ਸ ਏਕੋਯੇਵ.
‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਨਞ੍ਚ ਦਮ੍ਮੀ’’ਤਿ ਵੁਤ੍ਤੇ ਪਨ ਨ ਮਜ੍ਝੇ ਭਿਨ੍ਦਿਤ੍ਵਾ ਦਾਤਬ੍ਬਂ, ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾ ਦਾਤਬ੍ਬਂ. ‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚਾ’’ਤਿ ਵੁਤ੍ਤੇ ਪਨ ਪੁਗ੍ਗਲੋ ਵਿਸੁਂ ਨ ਲਭਤਿ, ਪਾਪੁਣਨਟ੍ਠਾਨਤੋ ਏਕਮੇਵ ਲਭਤਿ. ਕਸ੍ਮਾ? ਭਿਕ੍ਖੁਸਙ੍ਘਗ੍ਗਹਣੇਨ ਗਹਿਤਤ੍ਤਾ. ‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਚੇਤਿਯਸ੍ਸ ਏਕਪੁਗ੍ਗਲਪਟਿਵੀਸੋ ਲਬ੍ਭਤਿ, ਪੁਗ੍ਗਲਸ੍ਸ ਵਿਸੁਂ ਨ ਲਬ੍ਭਤਿ, ਤਸ੍ਮਾ ਏਕਂ ਚੇਤਿਯਸ੍ਸ ਦਤ੍ਵਾ ਅਵਸੇਸਂ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾ ਭਾਜੇਤਬ੍ਬਂ.
‘‘ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਦਮ੍ਮੀ’’ਤਿ ਵੁਤ੍ਤੇਪਿ ਮਜ੍ਝੇ ਭਿਨ੍ਦਿਤ੍ਵਾ ਨ ਦਾਤਬ੍ਬਂ, ਪੁਗ੍ਗਲਗਣਨਾਯ ਏਵ ਵਿਭਜਿਤਬ੍ਬਂ. ‘‘ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਏਵਂ ਵੁਤ੍ਤੇਪਿ ਚੇਤਿਯਸ੍ਸ ਏਕਪੁਗ੍ਗਲਪਟਿਵੀਸੋ ਲਬ੍ਭਤਿ, ਪੁਗ੍ਗਲਸ੍ਸ ਵਿਸੁਂ ਨਤ੍ਥਿ, ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾ ਏਵ ਭਾਜੇਤਬ੍ਬਂ. ਯਥਾ ਚ ਭਿਕ੍ਖੁਸਙ੍ਘਂ ਆਦਿਂ ਕਤ੍ਵਾ ਨਯੋ ਨੀਤੋ, ਏਵਂ ਭਿਕ੍ਖੁਨਿਸਙ੍ਘਂ ਆਦਿਂ ਕਤ੍ਵਾਪਿ ਨੇਤਬ੍ਬੋ. ‘‘ਭਿਕ੍ਖੁਸਙ੍ਘਸ੍ਸ ਚ ਤੁਯ੍ਹਞ੍ਚਾ’’ਤਿ ਵੁਤ੍ਤੇ ਪੁਗ੍ਗਲਸ੍ਸ ਵਿਸੁਂ ਨ ਲਬ੍ਭਤਿ, ਵਸ੍ਸਗ੍ਗੇਨੇਵ ਗਹੇਤਬ੍ਬਂ. ‘‘ਭਿਕ੍ਖੁਸਙ੍ਘਸ੍ਸ ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਪਨ ਚੇਤਿਯਸ੍ਸ ਵਿਸੁਂ ਪਟਿਵੀਸੋ ਲਬ੍ਭਤਿ. ‘‘ਭਿਕ੍ਖੁਸਙ੍ਘਸ੍ਸ ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਚੇਤਿਯਸ੍ਸੇਵ ਲਬ੍ਭਤਿ, ਨ ਪੁਗ੍ਗਲਸ੍ਸ.
‘‘ਭਿਕ੍ਖੂਨਞ੍ਚ ਤੁਯ੍ਹਞ੍ਚਾ’’ਤਿ ਵੁਤ੍ਤੇਪਿ ਵਿਸੁਂ ਨ ਲਬ੍ਭਤਿ. ‘‘ਭਿਕ੍ਖੂਨਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਪਨ ਚੇਤਿਯਸ੍ਸ ਲਬ੍ਭਤਿ. ‘‘ਭਿਕ੍ਖੂਨਞ੍ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਚੇਤਿਯਸ੍ਸੇਵ ਵਿਸੁਂ ਲਬ੍ਭਤਿ, ਨ ਪੁਗ੍ਗਲਸ੍ਸ. ਭਿਕ੍ਖੁਨਿਸਙ੍ਘਂ ਆਦਿਂ ਕਤ੍ਵਾਪਿ ਏਵਮੇਵ ਯੋਜੇਤਬ੍ਬਂ.
ਪੁਬ੍ਬੇ ਬੁਦ੍ਧਪ੍ਪਮੁਖਸ੍ਸ ਉਭਤੋਸਙ੍ਘਸ੍ਸ ਦਾਨਂ ਦੇਨ੍ਤਿ, ਭਗਵਾ ਮਜ੍ਝੇ ਨਿਸੀਦਤਿ, ਦਕ੍ਖਿਣਤੋ ਭਿਕ੍ਖੂ ਵਾਮਤੋ ਭਿਕ੍ਖੁਨਿਯੋ ਨਿਸੀਦਨ੍ਤਿ, ਭਗਵਾ ਉਭਿਨ੍ਨਂ ਸਙ੍ਘਤ੍ਥੇਰੋ, ਤਦਾ ਭਗਵਾ ਅਤ੍ਤਨਾ ਲਦ੍ਧਪਚ੍ਚਯੇ ਅਤ੍ਤਨਾਪਿ ਪਰਿਭੁਞ੍ਜਤਿ, ਭਿਕ੍ਖੂਨਮ੍ਪਿ ਦਾਪੇਤਿ. ਏਤਰਹਿ ਪਨ ਪਣ੍ਡਿਤਮਨੁਸ੍ਸਾ ਸਧਾਤੁਕਂ ਪਟਿਮਂ ਵਾ ਚੇਤਿਯਂ ਵਾ ਠਪੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਉਭਤੋਸਙ੍ਘਸ੍ਸ ਦਾਨਂ ਦੇਨ੍ਤਿ. ਪਟਿਮਾਯ ਵਾ ਚੇਤਿਯਸ੍ਸ ਵਾ ਪੁਰਤੋ ਆਧਾਰਕੇ ਪਤ੍ਤਂ ਠਪੇਤ੍ਵਾ ਦਕ੍ਖਿਣੋਦਕਂ ਦਤ੍ਵਾ ਬੁਦ੍ਧਾਨਂ ਦੇਮਾਤਿ, ਤਤ੍ਥ ਯਂ ਪਠਮਂ ਖਾਦਨੀਯਂ ਭੋਜਨੀਯਂ ਦੇਨ੍ਤਿ, ਵਿਹਾਰਂ ਵਾ ਆਹਰਿਤ੍ਵਾ ਇਦਂ ਚੇਤਿਯਸ੍ਸ ਦੇਮਾਤਿ ਪਿਣ੍ਡਪਾਤਞ੍ਚ ਮਾਲਾਗਨ੍ਧਾਦੀਨਿ ਚ ਦੇਨ੍ਤਿ, ਤਤ੍ਥ ਕਥਂ ਪਟਿਪਜ੍ਜਿਤਬ੍ਬਨ੍ਤਿ? ਮਾਲਾਗਨ੍ਧਾਦੀਨਿ ਤਾਵ ਚੇਤਿਯੇ ਆਰੋਪੇਤਬ੍ਬਾਨਿ, ਵਤ੍ਥੇਹਿ ਪਟਾਕਾ, ਤੇਲੇਨ ਪਦੀਪਾ ਕਾਤਬ੍ਬਾ, ਪਿਣ੍ਡਪਾਤਮਧੁਫਾਣਿਤਾਦੀਨਿ ਪਨ ਯੋ ਨਿਬਦ੍ਧਚੇਤਿਯਜਗ੍ਗਕੋ ਹੋਤਿ ਪਬ੍ਬਜਿਤੋ ਵਾ ਗਹਟ੍ਠੋ ਵਾ, ਤਸ੍ਸੇਵ ਦਾਤਬ੍ਬਾਨਿ. ਨਿਬਦ੍ਧਜਗ੍ਗਕੇ ਅਸਤਿ ਆਹਟਭਤ੍ਤਂ ਠਪੇਤ੍ਵਾ ਵਤ੍ਤਂ ਕਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਉਪਕਟ੍ਠੇ ਕਾਲੇ ਭੁਞ੍ਜਿਤ੍ਵਾ ਪਚ੍ਛਾਪਿ ਵਤ੍ਤਂ ਕਾਤੁਂ ਵਟ੍ਟਤਿਯੇਵ.
ਮਾਲਾਗਨ੍ਧਾਦੀਸੁ ਚ ਯਂ ਕਿਞ੍ਚਿ ‘‘ਇਦਂ ਹਰਿਤ੍ਵਾ ਚੇਤਿਯਸ੍ਸਪੂਜਂ ਕਰੋਥਾ’’ਤਿ ਵੁਤ੍ਤੇ ਦੂਰਮ੍ਪਿ ਹਰਿਤ੍ਵਾ ਪੂਜੇਤਬ੍ਬਂ. ‘‘ਭਿਕ੍ਖਂ ਸਙ੍ਘਸ੍ਸ ਹਰਾ’’ਤਿ ਵੁਤ੍ਤੇਪਿ ਹਰਿਤਬ੍ਬਂ. ਸਚੇ ਪਨ ‘‘ਅਹਂ ਪਿਣ੍ਡਾਯ ਚਰਾਮਿ, ਆਸਨਸਾਲਾਯ ਭਿਕ੍ਖੂ ਅਤ੍ਥਿ, ਤੇ ਆਹਰਿਸ੍ਸਨ੍ਤੀ’’ਤਿ ਵੁਤ੍ਤੇ ‘‘ਭਨ੍ਤੇ ਤੁਯ੍ਹਂਯੇਵ ਦਮ੍ਮੀ’’ਤਿ ਵਦਤਿ, ਭੁਞ੍ਜਿਤੁਂ ਵਟ੍ਟਤਿ. ਅਥ ਪਨ ‘‘ਭਿਕ੍ਖੁਸਙ੍ਘਸ੍ਸ ਦਸ੍ਸਾਮੀ’’ਤਿ ਹਰਨ੍ਤਸ੍ਸ ਗਚ੍ਛਤੋ ਅਨ੍ਤਰਾਵ ਕਾਲੋ ਉਪਕਟ੍ਠੋ ਹੋਤਿ, ਅਤ੍ਤਨੋ ਪਾਪੇਤ੍ਵਾ ਭੁਞ੍ਜਿਤੁਂ ਵਟ੍ਟਤਿ.
ਵਸ੍ਸਂਵੁਟ੍ਠਸਙ੍ਘਸ੍ਸ ਦੇਤੀਤਿ ਵਿਹਾਰਂ ਪਵਿਸਿਤ੍ਵਾ ‘‘ਇਮਾਨਿ ਚੀਵਰਾਨਿ ਵਸ੍ਸਂਵੁਟ੍ਠਸਙ੍ਘਸ੍ਸ ਦਮ੍ਮੀ’’ਤਿ ਦੇਤਿ. ਯਾਵਤਿਕਾ ਭਿਕ੍ਖੂ ਤਸ੍ਮਿਂ ਆਵਾਸੇ ਵਸ੍ਸਂਵੁਟ੍ਠਾਤਿ ਯਤ੍ਤਕਾ ਵਸ੍ਸਚ੍ਛੇਦਂ ਅਕਤ੍ਵਾ ਪੁਰਿਮਵਸ੍ਸਂਵੁਟ੍ਠਾ, ਤੇਹਿ ਭਾਜੇਤਬ੍ਬਂ, ਅਞ੍ਞੇਸਂ ਨ ਪਾਪੁਣਾਤਿ. ਦਿਸਾਪਕ੍ਕਨ੍ਤਸ੍ਸਾਪਿ ਸਤਿ ਪਟਿਗ੍ਗਾਹਕੇ ਯਾਵ ਕਥਿਨਸ੍ਸੁਬ੍ਭਾਰਾ ਦਾਤਬ੍ਬਂ, ਅਨਤ੍ਥਤੇ ਪਨ ਕਥਿਨੇ ਅਨ੍ਤੋਹੇਮਨ੍ਤੇ ਏਵਞ੍ਚ ਵਤ੍ਵਾ ਦਿਨ੍ਨਂ, ਪਚ੍ਛਿਮਵਸ੍ਸਂਵੁਟ੍ਠਾਨਮ੍ਪਿ ਪਾਪੁਣਾਤੀਤਿ ਲਕ੍ਖਣਞ੍ਞੂ ਵਦਨ੍ਤਿ. ਅਟ੍ਠਕਥਾਸੁ ਪਨੇਤਂ ਨ ਵਿਚਾਰਿਤਂ.
ਸਚੇ ਪਨ ਬਹਿਉਪਚਾਰਸੀਮਾਯਂ ਠਿਤੋ ‘‘ਵਸ੍ਸਂਵੁਟ੍ਠਸਙ੍ਘਸ੍ਸ ਦਮ੍ਮੀ’’ਤਿ ਵਦਤਿ, ਸਮ੍ਪਤ੍ਤਾਨਂ ਸਬ੍ਬੇਸਂ ਪਾਪੁਣਾਤਿ. ਅਥ ‘‘ਅਸੁਕਵਿਹਾਰੇ ਵਸ੍ਸਂਵੁਟ੍ਠਸਙ੍ਘਸ੍ਸਾ’’ਤਿ ਵਦਤਿ, ਤਤ੍ਰ ਵਸ੍ਸਂਵੁਟ੍ਠਾਨਮੇਵ ਯਾਵ ਕਥਿਨਸ੍ਸੁਬ੍ਭਾਰਾ ਪਾਪੁਣਾਤਿ. ਸਚੇ ਪਨ ਗਿਮ੍ਹਾਨਂ ਪਠਮਦਿਵਸਤੋ ਪਟ੍ਠਾਯ ਏਵਂ ਵਦਤਿ, ਤਤ੍ਰ ਸਮ੍ਮੁਖੀਭੂਤਾਨਂ ਸਬ੍ਬੇਸਂ ਪਾਪੁਣਾਤਿ. ਕਸ੍ਮਾ? ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾ. ਅਨ੍ਤੋਵਸ੍ਸੇਯੇਵ ‘‘ਵਸ੍ਸਂ ਵਸਨ੍ਤਾਨਂ ਦਮ੍ਮੀ’’ਤਿ ਵੁਤ੍ਤੇ ਛਿਨ੍ਨਵਸ੍ਸਾ ਨ ਲਭਨ੍ਤਿ, ਵਸ੍ਸਂ ਵਸਨ੍ਤਾਵ ਲਭਨ੍ਤਿ. ਚੀਵਰਮਾਸੇ ਪਨ ‘‘ਵਸ੍ਸਂ ਵਸਨ੍ਤਾਨਂ ਦਮ੍ਮੀ’’ਤਿ ਵੁਤ੍ਤੇ ਪਚ੍ਛਿਮਿਕਾਯ ਵਸ੍ਸੂਪਗਤਾਨਂਯੇਵ ਪਾਪੁਣਾਤਿ, ਪੁਰਿਮਿਕਾਯ ਵਸ੍ਸੂਪਗਤਾਨਞ੍ਚ ਛਿਨ੍ਨਵਸ੍ਸਾਨਞ੍ਚ ਨ ਪਾਪੁਣਾਤਿ.
ਚੀਵਰਮਾਸਤੋ ਪਟ੍ਠਾਯ ਯਾਵ ਹੇਮਨ੍ਤਸ੍ਸ ਪਚ੍ਛਿਮੋ ਦਿਵਸੋ, ਤਾਵ ਵਸ੍ਸਾਵਾਸਿਕਂ ਦੇਮਾਤਿ ਵੁਤ੍ਤੇ ਕਥਿਨਂ ਅਤ੍ਥਤਂ ਵਾ ਹੋਤੁ ਅਨਤ੍ਥਤਂ ਵਾ ਅਤੀਤਵਸ੍ਸਂਵੁਟ੍ਠਾਨਮੇਵ ਪਾਪੁਣਾਤਿ. ਗਿਮ੍ਹਾਨਂ ਪਠਮਦਿਵਸਤੋ ਪਟ੍ਠਾਯ ਵੁਤ੍ਤੇ ਪਨ ਮਾਤਿਕਾ ਆਰੋਪੇਤਬ੍ਬਾ – ‘‘ਅਤੀਤਵਸ੍ਸਾਵਾਸਸ੍ਸ ਪਞ੍ਚ ਮਾਸਾ ਅਤਿਕ੍ਕਨ੍ਤਾ, ਅਨਾਗਤੋ ਚਤੁਮਾਸਚ੍ਚਯੇਨ ਭਵਿਸ੍ਸਤਿ, ਕਤਰਵਸ੍ਸਾਵਾਸਸ੍ਸ ਦੇਤੀ’’ਤਿ? ਸਚੇ ‘‘ਅਤੀਤਵਸ੍ਸਂਵੁਟ੍ਠਾਨਂ ਦਮ੍ਮੀ’’ਤਿ ਵਦਤਿ, ਤਂਅਨ੍ਤੋਵਸ੍ਸਂਵੁਟ੍ਠਾਨਮੇਵ ਪਾਪੁਣਾਤਿ, ਦਿਸਾਪਕ੍ਕਨ੍ਤਾਨਮ੍ਪਿ ਸਭਾਗਾ ਗਣ੍ਹਿਤੁਂ ਲਭਨ੍ਤਿ.
ਸਚੇ ‘‘ਅਨਾਗਤੇ ਵਸ੍ਸਾਵਾਸਿਕਂ ਦਮ੍ਮੀ’’ਤਿ ਵਦਤਿ, ਤਂ ਠਪੇਤ੍ਵਾ ਵਸ੍ਸੂਪਨਾਯਿਕਦਿਵਸੇ ਗਹੇਤਬ੍ਬਂ. ਅਥ ‘‘ਅਗੁਤ੍ਤੋ ਵਿਹਾਰੋ, ਚੋਰਭਯਂ ਅਤ੍ਥਿ, ਨ ਸਕ੍ਕਾ ਠਪੇਤੁਂ, ਗਣ੍ਹਿਤ੍ਵਾ ਵਾ ਆਹਿਣ੍ਡਿਤੁ’’ਨ੍ਤਿ ਵੁਤ੍ਤੇ ‘‘ਸਮ੍ਪਤ੍ਤਾਨਂ ਦਮ੍ਮੀ’’ਤਿ ਵਦਤਿ, ਭਾਜੇਤ੍ਵਾ ਗਹੇਤਬ੍ਬਂ. ਸਚੇ ਵਦਤਿ ‘‘ਇਤੋ ਮੇ ਭਨ੍ਤੇ ਤਤਿਯੇ ਵਸ੍ਸੇ ਵਸ੍ਸਾਵਾਸਿਕਂ ਨ ਦਿਨ੍ਨਂ, ਤਂ ਦਮ੍ਮੀ’’ਤਿ, ਤਸ੍ਮਿਂ ਅਨ੍ਤੋਵਸ੍ਸੇ ਵੁਟ੍ਠਭਿਕ੍ਖੂਨਂ ਪਾਪੁਣਾਤਿ. ਸਚੇ ਤੇ ਦਿਸਾ ਪਕ੍ਕਨ੍ਤਾ, ਅਞ੍ਞੋ ਵਿਸ੍ਸਾਸਿਕੋ ਗਣ੍ਹਾਤਿ, ਦਾਤਬ੍ਬਂ. ਅਥ ਏਕੋਯੇਵ ਅਵਸਿਟ੍ਠੋ, ਸੇਸਾ ਕਾਲਙ੍ਕਤਾ, ਸਬ੍ਬਂ ਏਕਸ੍ਸੇਵ ਪਾਪੁਣਾਤਿ. ਸਚੇ ਏਕੋਪਿ ਨਤ੍ਥਿ, ਸਙ੍ਘਿਕਂ ਹੋਤਿ, ਸਮ੍ਮੁਖੀਭੂਤੇਹਿ ਭਾਜੇਤਬ੍ਬਂ.
ਆਦਿਸ੍ਸ ਦੇਤੀਤਿ ਆਦਿਸਿਤ੍ਵਾ ਪਰਿਚ੍ਛਿਨ੍ਦਿਤ੍ਵਾ ਦੇਤਿ; ਯਾਗੁਯਾ ਵਾਤਿਆਦੀਸੁ ਅਯਮਤ੍ਥੋ – ਯਾਗੁਯਾ ਵਾ…ਪੇ… ਭੇਸਜ੍ਜੇ ਵਾ ਆਦਿਸ੍ਸ ਦੇਤਿ. ਤਤ੍ਰਾਯਂ ਯੋਜਨਾ – ਭਿਕ੍ਖੂ ਅਜ੍ਜਤਨਾਯ ਵਾ ਸ੍ਵਾਤਨਾਯ ਵਾ ਯਾਗੁਯਾ ਨਿਮਨ੍ਤੇਤ੍ਵਾ ਤੇਸਂ ਘਰਂ ਪਵਿਟ੍ਠਾਨਂ ਯਾਗੁਂ ਦੇਤਿ, ਯਾਗੁਂ ਦਤ੍ਵਾ ਪੀਤਾਯ ਯਾਗੁਯਾ ‘‘ਇਮਾਨਿ ਚੀਵਰਾਨਿ, ਯੇਹਿ ਮਯ੍ਹਂ ਯਾਗੁ ਪੀਤਾ, ਤੇਸਂ ਦਮ੍ਮੀ’’ਤਿ ਦੇਤਿ, ਯੇਹਿ ਨਿਮਨ੍ਤਿਤੇਹਿ ਯਾਗੁ ਪੀਤਾ, ਤੇਸਂਯੇਵ ਪਾਪੁਣਾਤਿ. ਯੇਹਿ ਪਨ ਭਿਕ੍ਖਾਚਾਰਵਤ੍ਤੇਨ ਘਰਦ੍ਵਾਰੇਨ ਗਚ੍ਛਨ੍ਤੇਹਿ ਵਾ ਘਰਂ ਪਵਿਟ੍ਠੇਹਿ ਵਾ ਯਾਗੁ ਲਦ੍ਧਾ, ਯੇਸਂ ਵਾ ਆਸਨਸਾਲਤੋ ਪਤ੍ਤਂ ਆਹਰਿਤ੍ਵਾ ਮਨੁਸ੍ਸੇਹਿ ਨੀਤਾ, ਯੇਸਂ ਵਾ ਥੇਰੇਹਿ ਪੇਸਿਤਾ, ਤੇਸਂ ਨ ਪਾਪੁਣਾਤਿ. ਸਚੇ ਪਨ ਨਿਮਨ੍ਤਿਤਭਿਕ੍ਖੂਹਿ ਸਦ੍ਧਿਂ ਅਞ੍ਞੇਪਿ ਬਹੂ ਆਗਨ੍ਤ੍ਵਾ ਅਨ੍ਤੋਗੇਹਞ੍ਚ ਬਹਿਗੇਹਞ੍ਚ ਪੂਰੇਤ੍ਵਾ ਨਿਸਿਨ੍ਨਾ, ਦਾਯਕੋ ਚ ਏਵਂ ਵਦਤਿ – ‘‘ਨਿਮਨ੍ਤਿਤਾ ਵਾ ਹੋਨ੍ਤੁ ਅਨਿਮਨ੍ਤਿਤਾ ਵਾ, ਯੇਸਂ ਮਯਾ ਯਾਗੁ ਦਿਨ੍ਨਾ, ਸਬ੍ਬੇਸਂ ਇਮਾਨਿ ਵਤ੍ਥਾਨਿ ਹੋਨ੍ਤੂ’’ਤਿ ਸਬ੍ਬੇਸਂ ਪਾਪੁਣਨ੍ਤਿ. ਯੇਹਿ ਪਨ ਥੇਰਾਨਂ ਹਤ੍ਥਤੋ ਯਾਗੁ ਲਦ੍ਧਾ, ਤੇਸਂ ਨ ਪਾਪੁਣਨ੍ਤਿ. ਅਥ ਸੋ ‘‘ਯੇਹਿ ਮਯ੍ਹਂ ਯਾਗੁ ਪੀਤਾ, ਸਬ੍ਬੇਸਂ ਹੋਨ੍ਤੂ’’ਤਿ ਵਦਤਿ, ਸਬ੍ਬੇਸਂ ਪਾਪੁਣਨ੍ਤਿ. ਭਤ੍ਤਖਾਦਨੀਯੇਸੁਪਿ ਏਸੇਵ ਨਯੋ.
ਚੀਵਰੇ ਵਾਤਿ ਪੁਬ੍ਬੇਪਿ ਯੇਨ ਵਸ੍ਸਂ ਵਾਸੇਤ੍ਵਾ ਭਿਕ੍ਖੂਨਂ ਚੀਵਰਂ ਦਿਨ੍ਨਪੁਬ੍ਬਂ ਹੋਤਿ, ਸੋ ਚੇ ਭਿਕ੍ਖੂ ਭੋਜੇਤ੍ਵਾ ਵਦਤਿ – ‘‘ਯੇਸਂ ਮਯਾ ਪੁਬ੍ਬੇ ਚੀਵਰਂ ਦਿਨ੍ਨਂ, ਤੇਸਂਯੇਵ ਇਮਂ ਚੀਵਰਂ ਵਾ ਸੁਤ੍ਤਂ ਵਾ ਸਪ੍ਪਿਮਧੁਫਾਣਿਤਾਦੀਨਿ ਵਾ ਹੋਨ੍ਤੂ’’ਤਿ, ਸਬ੍ਬਂ ਤੇਸਂਯੇਵ ਪਾਪੁਣਾਤਿ. ਸੇਨਾਸਨੇ ਵਾਤਿ ਯੋ ਮਯਾ ਕਾਰਿਤੇ ਵਿਹਾਰੇ ਵਾ ਪਰਿਵੇਣੇ ਵਾ ਵਸਤਿ, ਤਸ੍ਸਿਦਂ ਹੋਤੂ’’ਤਿ ਵੁਤ੍ਤੇ ਤਸ੍ਸੇਵ ਹੋਤਿ. ਭੇਸਜ੍ਜੇ ਵਾਤਿ ‘‘ਮਯਂ ਕਾਲੇਨ ਕਾਲਂ ਥੇਰਾਨਂ ਸਪ੍ਪਿਆਦੀਨਿ ਭੇਸਜ੍ਜਾਨਿ ਦੇਮ, ਯੇਹਿ ਤਾਨਿ ਲਦ੍ਧਾਨਿ, ਤੇਸਂਯੇਵਿਦਂ ਹੋਤੂ’’ਤਿ ਵੁਤ੍ਤੇ ਤੇਸਂਯੇਵ ਹੋਤਿ.
ਪੁਗ੍ਗਲਸ੍ਸ ਦੇਤੀਤਿ ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ ਏਵਂ ਪਰਮ੍ਮੁਖਾ ਵਾ ਪਾਦਮੂਲੇ ਠਪੇਤ੍ਵਾ ‘‘ਇਮਂ ਭਨ੍ਤੇ ਤੁਮ੍ਹਾਕਂ ਦਮ੍ਮੀ’’ਤਿ ਏਵਂ ਸਮ੍ਮੁਖਾ ਵਾ ਦੇਤਿ. ਸਚੇ ਪਨ ‘‘ਇਦਂ ਤੁਮ੍ਹਾਕਞ੍ਚ ਤੁਮ੍ਹਾਕਂ ਅਨ੍ਤੇਵਾਸਿਕਾਨਞ੍ਚ ਦਮ੍ਮੀ’’ਤਿ ਏਵਂ ਵਦਤਿ, ਥੇਰਸ੍ਸ ਚ ਅਨ੍ਤੇਵਾਸਿਕਾਨਞ੍ਚ ਪਾਪੁਣਾਤਿ. ਉਦ੍ਦੇਸਂ ਗਹੇਤੁਂ ਆਗਤੋ ਗਹੇਤ੍ਵਾ ਗਚ੍ਛਨ੍ਤੋ ਚ ਅਤ੍ਥਿ, ਤਸ੍ਸਾਪਿ ਪਾਪੁਣਾਤਿ. ‘‘ਤੁਮ੍ਹੇਹਿ ਸਦ੍ਧਿਂ ਨਿਬਦ੍ਧਚਾਰਿਕਭਿਕ੍ਖੂਨਂ ਦਮ੍ਮੀ’’ਤਿ ਵੁਤ੍ਤੇ ਉਦ੍ਦੇਸਨ੍ਤੇਵਾਸਿਕਾਨਂ ਵਤ੍ਤਂ ਕਤ੍ਵਾ ਉਦ੍ਦੇਸਪਰਿਪੁਚ੍ਛਾਦੀਨਿ ਗਹੇਤ੍ਵਾ ਵਿਚਰਨ੍ਤਾਨਂ ਸਬ੍ਬੇਸਂ ਪਾਪੁਣਾਤਿ. ਅਯਂ ਪੁਗ੍ਗਲਸ੍ਸ ਦੇਤੀਤਿ ਇਮਸ੍ਮਿਂ ਪਦੇ ਵਿਨਿਚ੍ਛਯੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਚੀਵਰਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.