੬. ਭੇਸਜ੍ਜਕ੍ਖਨ੍ਧਕਂ
ਪਞ੍ਚਭੇਸਜ੍ਜਾਦਿਕਥਾ
੨੬੦. ਭੇਸਜ੍ਜਕ੍ਖਨ੍ਧਕੇ – ਸਾਰਦਿਕੇਨ ਆਬਾਧੇਨਾਤਿ ਸਰਦਕਾਲੇ ਉਪ੍ਪਨ੍ਨੇਨ ਪਿਤ੍ਤਾਬਾਧੇਨ, ਤਸ੍ਮਿਞ੍ਹਿ ਕਾਲੇ ਵਸ੍ਸੋਦਕੇਨਪਿ ਤੇਮੇਨ੍ਤਿ, ਕਦ੍ਦਮਮ੍ਪਿ ਮਦ੍ਦਨ੍ਤਿ, ਅਨ੍ਤਰਨ੍ਤਰਾ ਆਤਪੋਪਿ ਖਰੋ ਹੋਤਿ, ਤੇਨ ਤੇਸਂ ਪਿਤ੍ਤਂ ਕੋਟ੍ਠਬ੍ਭਨ੍ਤਰਗਤਂ ਹੋਤਿ. ਆਹਾਰਤ੍ਥਞ੍ਚ ਫਰੇਯ੍ਯਾਤਿ ਆਹਾਰਤ੍ਥਂ ਸਾਧੇਯ੍ਯ.
੨੬੧. ਨਚ੍ਛਾਦੇਨ੍ਤੀਤਿ ਨ ਜਿਰਨ੍ਤਿ, ਨ ਵਾਤਰੋਗਂ ਪਟਿਪ੍ਪਸ੍ਸਮ੍ਭੇਤੁਂ ਸਕ੍ਕੋਨ੍ਤਿ. ਸੇਨੇਸਿਤਾਨੀਤਿ ਸਿਨਿਦ੍ਧਾਨਿ. ਭਤ੍ਤਾਚ੍ਛਾਦਕੇਨਾਤਿ ਭਤ੍ਤਂ ਅਰੋਚਿਕੇਨ.
੨੬੨. ਅਚ੍ਛਵਸਨ੍ਤਿਆਦੀਸੁ ਨਿਸ੍ਸਗ੍ਗਿਯਵਣ੍ਣਨਾਯਂ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ. ਕਾਲੇ ਪਟਿਗ੍ਗਹਿਤਨ੍ਤਿਆਦੀਸੁ ਮਜ੍ਝਨ੍ਹਿਕੇ ਅਵੀਤਿਵਤ੍ਤੇ ਪਟਿਗ੍ਗਹੇਤ੍ਵਾ ਪਚਿਤ੍ਵਾ ਪਰਿਸ੍ਸਾਵੇਤ੍ਵਾ ਚਾਤਿ ਅਤ੍ਥੋ. ਤੇਲਪਰਿਭੋਗੇਨ ਪਰਿਭੁਞ੍ਜਿਤੁਨ੍ਤਿ ਸਤ੍ਤਾਹਕਾਲਿਕਤੇਲਪਰਿਭੋਗੇਨ ਪਰਿਭੁਞ੍ਜਿਤੁਂ.
੨੬੩. ਮੂਲਭੇਸਜ੍ਜਾਦਿ ਵਿਨਿਚ੍ਛਯੋਪਿ ਖੁਦ੍ਦਕਵਣ੍ਣਨਾਯਂ ਵੁਤ੍ਤੋਯੇਵ. ਤਸ੍ਮਾ ਇਧ ਯਂ ਯਂ ਪੁਬ੍ਬੇ ਅਵੁਤ੍ਤਂ ਤਂ ਤਦੇਵ ਵਣ੍ਣਯਿਸ੍ਸਾਮ. ਵਚਤ੍ਤਨ੍ਤਿ ਸੇਤਵਚਂ. ਨਿਸਦਂ ਨਿਸਦਪੋਤਕਨ੍ਤਿ ਪਿਸਨਸਿਲਾ ਚ ਪਿਸਨਪੋਤੋ ਚ. ਫਗ੍ਗਵਨ੍ਤਿ ਲਤਾਜਾਤਿ. ਨਤ੍ਤਮਾਲਨ੍ਤਿ ਕਰਞ੍ਜਂ. ਹਿਙ੍ਗੁਹਿਙ੍ਗੁਜਤੁਹਿਙ੍ਗੁਸਿਪਾਟਿਕਾ ਹਿਙ੍ਗੁਜਾਤਿਯੋਯੇਵ. ਤਕਤਕਪਤ੍ਤਿਤਕਪਣ੍ਣਿਯੋ ਲਾਖਾਜਾਤਿਯੋ.
ਸਾਮੁਦ੍ਦਨ੍ਤਿ ਸਮੁਦ੍ਦਤੀਰੇ ਵਾਲੁਕਾ ਵਿਯ ਸਨ੍ਤਿਟ੍ਠਤਿ. ਕਾਲ਼ਲੋਣਨ੍ਤਿ ਪਕਤਿਲੋਣਂ. ਸਿਨ੍ਧਵਨ੍ਤਿ ਸੇਤਵਣ੍ਣਂ ਪਬ੍ਬਤੇ ਉਟ੍ਠਹਤਿ. ਉਬ੍ਭਿਦਨ੍ਤਿ ਭੂਮਿਤੋ ਅਙ੍ਕੁਰਂ ਉਟ੍ਠਹਤਿ. ਬਿਲਨ੍ਤਿ ਦਬ੍ਬਸਮ੍ਭਾਰੇਹਿ ਸਦ੍ਧਿਂ ਪਚਿਤਂ, ਤਂ ਰਤ੍ਤਵਣ੍ਣਂ.
੨੬੪-੬. ਕਾਯੋ ਵਾ ਦੁਗ੍ਗਨ੍ਧੋਤਿ ਕਸ੍ਸਚਿ ਅਸ੍ਸਾਦੀਨਂ ਵਿਯ ਕਾਯਗਨ੍ਧੋ ਹੋਤਿ, ਤਸ੍ਸਾਪਿ ਸਿਰੀਸਕੋਸੁਮ੍ਬਾਦਿਚੁਣ੍ਣਾਨਿ ਵਾ ਗਨ੍ਧਚੁਣ੍ਣਾਨਿ ਵਾ ਸਬ੍ਬਾਨਿ ਵਟ੍ਟਨ੍ਤਿ. ਛਕਣਨ੍ਤਿ ਗੋਮਯਂ. ਰਜਨਨਿਪ੍ਪਕ੍ਕਨ੍ਤਿ ਰਜਨਕਸਟਂ. ਪਾਕਤਿਕਚੁਣ੍ਣਮ੍ਪਿ ਕੋਟ੍ਟੇਤ੍ਵਾ ਉਦਕੇਨ ਤੇਮੇਤ੍ਵਾ ਨ੍ਹਾਯਿਤੁਂ ਵਟ੍ਟਤਿ; ਏਤਮ੍ਪਿ ਰਜਨਨਿਪ੍ਪਕ੍ਕਸਙ੍ਖੇਪਮੇਵ ਗਚ੍ਛਤਿ.
ਆਮਕਮਂਸਞ੍ਚ ਖਾਦਿ ਆਮਕਲੋਹਿਤਞ੍ਚ ਪਿਵੀਤਿ ਨ ਤਂ ਭਿਕ੍ਖੁ ਖਾਦਿ ਨ ਪਿਵਿ, ਅਮਨੁਸ੍ਸੋ ਖਾਦਿਤ੍ਵਾ ਚ ਪਿਵਿਤ੍ਵਾ ਚ ਪਕ੍ਕਨ੍ਤੋ, ਤੇਨ ਵੁਤ੍ਤਂ – ‘‘ਤਸ੍ਸ ਸੋ ਅਮਨੁਸ੍ਸਿਕਾਬਾਧੋ ਪਟਿਪ੍ਪਸ੍ਸਮ੍ਭੀ’’ਤਿ.
ਅਞ੍ਜਨਨ੍ਤਿ ਸਬ੍ਬਸਙ੍ਗਾਹਿਕਵਚਨਮੇਤਂ. ਕਾਲ਼ਞ੍ਜਨਨ੍ਤਿ ਏਕਾ ਅਞ੍ਜਨਜਾਤਿ. ਰਸਞ੍ਜਨਂ ਨਾਨਾਸਮ੍ਭਾਰੇਹਿ ਕਤਂ. ਸੋਤਞ੍ਜਨਨ੍ਤਿ ਨਦੀਸੋਤਾਦੀਸੁ ਉਪ੍ਪਜ੍ਜਨਕਂ ਅਞ੍ਜਨਂ. ਗੇਰੁਕੋ ਨਾਮ ਸੁਵਣ੍ਣਗੇਰੁਕੋ. ਕਪਲ੍ਲਨ੍ਤਿ ਦੀਪਸਿਖਤੋ ਗਹਿਤਮਸਿ. ਅਞ੍ਜਨੂਪਪਿਂਸਨੇਹੀਤਿ ਅਞ੍ਜਨੇਨ ਸਦ੍ਧਿਂ ਏਕਤੋ ਪਿਂਸਿਤਬ੍ਬੇਹਿ, ਨ ਹਿ ਕਿਞ੍ਚਿ ਅਞ੍ਞਨੂਪਪਿਂਸਨਂ ਨ ਵਟ੍ਟਤਿ. ਚਨ੍ਦਨਨ੍ਤਿ ਲੋਹਿਤਚਨ੍ਦਨਾਦਿਕਂ ਯਂਕਿਞ੍ਚਿ. ਤਗਰਾਦੀਨਿ ਪਾਕਟਾਨਿ, ਅਞ੍ਞਾਨਿਪਿ ਨੀਲੁਪ੍ਪਲਾਦੀਨਿ ਵਟ੍ਟਨ੍ਤਿਯੇਵ.
ਅਟ੍ਠਿਮਯਨ੍ਤਿ ਮਨੁਸ੍ਸਟ੍ਠਿਂ ਠਪੇਤ੍ਵਾ ਅਵਸੇਸਅਟ੍ਠਿਮਯਂ. ਦਨ੍ਤਮਯਨ੍ਤਿ ਹਤ੍ਥਿਦਨ੍ਤਾਦਿਸਬ੍ਬਦਨ੍ਤਮਯਂ. ਵਿਸਾਣਮਯੇਪਿ ਅਕਪ੍ਪਿਯਂ ਨਾਮ ਨਤ੍ਥਿ, ਨਲ਼ਮਯਾਦਯੋ ਏਕਨ੍ਤਕਪ੍ਪਿਯਾਯੇਵ. ਸਲਾਕਟ੍ਠਾਨਿਯਨ੍ਤਿ ਯਤ੍ਥ ਸਲਾਕਂ ਓਦਹਨ੍ਤਿ, ਤਂ ਸੁਸਿਰਦਣ੍ਡਕਂ ਵਾ ਥਵਿਕਂ ਵਾ ਅਨੁਜਾਨਾਮੀਤਿ ਅਤ੍ਥੋ. ਅਂਸਬਦ੍ਧਕੋਤਿ ਅਞ੍ਜਨਿਤ੍ਥਵਿਕਾਯ ਅਂਸਬਦ੍ਧਕੋ. ਯਮਕਨਤ੍ਥੁਕਰਣਿਨ੍ਤਿ ਸਮਸੋਤਾਹਿ ਦ੍ਵੀਹਿ ਪਨਾਲ਼ਿਕਾਹਿ ਏਕਂ ਨਤ੍ਥੁਕਰਣਿਂ.
੨੬੭. ਅਨੁਜਾਨਾਮਿ ਭਿਕ੍ਖਵੇ ਤੇਲਪਾਕਨ੍ਤਿ ਯਂਕਿਞ੍ਚਿ ਭੇਸਜ੍ਜਪਕ੍ਖਿਤ੍ਤਂ ਸਬ੍ਬਂ ਅਨੁਞ੍ਞਾਤਮੇਵ ਹੋਤਿ. ਅਤਿਪਕ੍ਖਿਤ੍ਤਮਜ੍ਜਾਨੀਤਿ ਅਤਿਵਿਯ ਖਿਤ੍ਤਮਜ੍ਜਾਨਿ; ਬਹੁਂ ਮਜ੍ਜਂ ਪਕ੍ਖਿਪਿਤ੍ਵਾ ਯੋਜਿਤਾਨੀਤਿ ਅਤ੍ਥੋ.
ਅਙ੍ਗਵਾਤੋਤਿ ਹਤ੍ਥਪਾਦੇ ਵਾਤੋ. ਸਮ੍ਭਾਰਸੇਦਨ੍ਤਿ ਨਾਨਾਵਿਧਪਣ੍ਣਭਙ੍ਗਸੇਦਂ. ਮਹਾਸੇਦਨ੍ਤਿ ਮਹਨ੍ਤਂ ਸੇਦਂ; ਪੋਰਿਸਪ੍ਪਮਾਣਂ ਆਵਾਟਂ ਅਙ੍ਗਾਰਾਨਂ ਪੂਰੇਤ੍ਵਾ ਪਂਸੁਵਾਲਿਕਾਦੀਹਿ ਪਿਦਹਿਤ੍ਵਾ ਤਤ੍ਥ ਨਾਨਾਵਿਧਾਨਿ ਵਾਤਹਰਣਪਣ੍ਣਾਨਿ ਸਨ੍ਥਰਿਤ੍ਵਾ ਤੇਲਮਕ੍ਖਿਤੇਨ ਗਤ੍ਤੇਨ ਤਤ੍ਥ ਨਿਪਜ੍ਜਿਤ੍ਵਾ ਸਮ੍ਪਰਿਵਤ੍ਤਨ੍ਤੇਨ ਸਰੀਰਂ ਸੇਦੇਤੁਂ ਅਨੁਜਾਨਾਮੀਤਿ ਅਤ੍ਥੋ. ਭਙ੍ਗੋਦਕਨ੍ਤਿ ਨਾਨਾਪਣ੍ਣਭਙ੍ਗਕੁਥਿਤਂ ਉਦਕਂ; ਤੇਹਿ ਪਣ੍ਣੇਹਿ ਚ ਉਦਕੇਨ ਚ ਸਿਞ੍ਚਿਤ੍ਵਾ ਸਿਞ੍ਚਿਤ੍ਵਾ ਸੇਦੇਤਬ੍ਬੋ. ਉਦਕਕੋਟ੍ਠਕਨ੍ਤਿ ਉਦਕਕੋਟ੍ਠੇ ਚਾਟਿਂ ਵਾ ਦੋਣਿਂ ਵਾ ਉਣ੍ਹੋਦਕਸ੍ਸ ਪੂਰੇਤ੍ਵਾ ਤਤ੍ਥ ਪਵਿਸਿਤ੍ਵਾ ਸੇਦਕਮ੍ਮਕਰਣਂ ਅਨੁਜਾਨਾਮੀਤਿ ਅਤ੍ਥੋ.
ਪਬ੍ਬਵਾਤੋ ਹੋਤੀਤਿ ਪਬ੍ਬੇ ਪਬ੍ਬੇ ਵਾਤੋ ਵਿਜ੍ਝਤਿ. ਲੋਹਿਤਂ ਮੋਚੇਤੁਨ੍ਤਿ ਸਤ੍ਥਕੇਨ ਲੋਹਿਤਂ ਮੋਚੇਤੁਂ. ਪਜ੍ਜਂ ਅਭਿਸਙ੍ਖਰਿਤੁਨ੍ਤਿ ਯੇਨ ਫਾਲਿਤਪਾਦਾ ਪਾਕਤਿਕਾ ਹੋਨ੍ਤਿ; ਤਂ ਨਾਲ਼ਿਕੇਰਾਦੀਸੁ ਨਾਨਾਭੇਸਜ੍ਜਾਨਿ ਪਕ੍ਖਿਪਿਤ੍ਵਾ ਪਜ੍ਜਂ ਅਭਿਸਙ੍ਖਰਿਤੁਂ; ਪਾਦਾਨਂ ਸਪ੍ਪਾਯਭੇਸਜ੍ਜਂ ਪਚਿਤੁਨ੍ਤਿ ਅਤ੍ਥੋ. ਤਿਲਕਕ੍ਕੇਨ ਅਤ੍ਥੋਤਿ ਪਿਟ੍ਠੇਹਿ ਤਿਲੇਹਿ ਅਤ੍ਥੋ. ਕਬਲ਼ਿਕਨ੍ਤਿ ਵਣਮੁਖੇ ਸਤ੍ਤੁਪਿਣ੍ਡਂ ਪਕ੍ਖਿਪਿਤੁਂ. ਸਾਸਪਕੁਡ੍ਡੇਨਾਤਿ ਸਾਸਪਪਿਟ੍ਠੇਨ. ਵਡ੍ਢਮਂਸਨ੍ਤਿ ਅਧਿਕਮਂਸਂ ਆਣਿ ਵਿਯ ਉਟ੍ਠਹਤਿ. ਲੋਣਸਕ੍ਖਰਿਕਾਯ ਛਿਨ੍ਦਿਤੁਨ੍ਤਿ ਖੁਰੇਨ ਛਿਨ੍ਦਿਤੁਂ. ਵਿਕਾਸਿਕਨ੍ਤਿ ਤੇਲਰੁਨ੍ਧਨਪਿਲੋਤਿਕਂ. ਸਬ੍ਬਂ ਵਣਪਟਿਕਮ੍ਮਨ੍ਤਿ ਯਂਕਿਞ੍ਚਿ ਵਣਪਰਿਕਮ੍ਮਂ ਨਾਮ ਅਤ੍ਥਿ; ਸਬ੍ਬਂ ਅਨੁਜਾਨਾਮੀਤਿ ਅਤ੍ਥੋ.
੨੬੮. ਸਾਮਂ ਗਹੇਤ੍ਵਾਤਿ ਇਦਂ ਨ ਕੇਵਲਂ ਸਪ੍ਪਦਟ੍ਠਸ੍ਸੇਵ, ਅਞ੍ਞਸ੍ਮਿਮ੍ਪਿ ਦਟ੍ਠਵਿਸੇ ਸਤਿ ਸਾਮਂ ਗਹੇਤ੍ਵਾ ਪਰਿਭੁਞ੍ਜਿਤਬ੍ਬਂ; ਅਞ੍ਞੇਸੁ ਪਨ ਕਾਰਣੇਸੁ ਪਟਿਗ੍ਗਹਿਤਮੇਵ ਵਟ੍ਟਤਿ. ਕਤੋ ਨ ਪੁਨ ਪਟਿਗ੍ਗਹੇਤਬ੍ਬੋਤਿ ਸਚੇ ਭੂਮਿਪ੍ਪਤ੍ਤੋ, ਪਟਿਗ੍ਗਹੇਤਬ੍ਬੋ; ਅਪ੍ਪਤ੍ਤਂ ਪਨ ਗਹੇਤੁਂ ਵਟ੍ਟਤਿ.
੨੬੯. ਘਰਦਿਨ੍ਨਕਾਬਾਧੋਤਿ ਵਸੀਕਰਣਪਾਨਕਸਮੁਟ੍ਠਿਤਰੋਗੋ. ਸੀਤਾਲੋਲ਼ਿਨ੍ਤਿ ਨਙ੍ਗਲੇਨ ਕਸਨ੍ਤਸ੍ਸ ਫਾਲੇ ਲਗ੍ਗਮਤ੍ਤਿਕਂ ਉਦਕੇਨ ਆਲੋਲ਼ੇਤ੍ਵਾ ਪਾਯੇਤੁਂ ਅਨੁਜਾਨਾਮੀਤਿ ਅਤ੍ਥੋ.
ਦੁਟ੍ਠਗਹਣਿਕੋਤਿ ਵਿਪਨ੍ਨਗਹਣਿਕੋ; ਕਿਚ੍ਛੇਨ ਉਚ੍ਚਾਰੋ ਨਿਕ੍ਖਮਤੀਤਿ ਅਤ੍ਥੋ. ਆਮਿਸਖਾਰਨ੍ਤਿ ਸੁਕ੍ਖੋਦਨਂ ਝਾਪੇਤ੍ਵਾ ਤਾਯ ਛਾਰਿਕਾਯ ਪਗ੍ਘਰਿਤਂ ਖਾਰੋਦਕਂ. ਮੁਤ੍ਤਹਰੀਤਕਨ੍ਤਿ ਗੋਮੁਤ੍ਤਪਰਿਭਾਵਿਤਂ ਹਰੀਤਕਂ. ਅਭਿਸਨ੍ਨਕਾਯੋਤਿ ਉਸ੍ਸਨ੍ਨਦੋਸਕਾਯੋ. ਅਚ੍ਛਕਞ੍ਜਿਯਨ੍ਤਿ ਤਣ੍ਡੁਲੋਦਕਮਣ੍ਡੋ. ਅਕਟਯੁਸਨ੍ਤਿ ਅਸਿਨਿਦ੍ਧੋ ਮੁਗ੍ਗਪਚਿਤਪਾਨੀਯੋ. ਕਟਾਕਟਨ੍ਤਿ ਸੋਵ ਧੋਤਸਿਨਿਦ੍ਧੋ. ਪਟਿਚ੍ਛਾਦਨੀਯੇਨਾਤਿ ਮਂਸਰਸੇਨ.
ਗੁਲ਼ਾਦਿਅਨੁਜਾਨਨਕਥਾ
੨੭੨. ਸਚੇ ਭਿਕ੍ਖਵੇ ਪਕ੍ਕਾਪਿ ਮੁਗ੍ਗਾ ਜਾਯਨ੍ਤੀਤਿ ਪਕ੍ਕਾ ਮੁਗ੍ਗਾ ਸਚੇਪਿ ਜਾਯਨ੍ਤਿ, ਯਥਾਸੁਖਂ ਪਰਿਭੁਞ੍ਜਿਤਬ੍ਬਾ. ਪਕ੍ਕਤ੍ਤਾ ਹਿ ਤੇ ਕਪ੍ਪਿਯਾ ਏਵ.
੨੭੪. ਅਨ੍ਤੋਵੁਤ੍ਥਨ੍ਤਿ ਅਕਪ੍ਪਿਯਕੁਟਿਯਂ ਵੁਤ੍ਥਂ. ਸਾਮਂ ਪਕ੍ਕਨ੍ਤਿ ਏਤ੍ਥ ਯਂਕਿਞ੍ਚਿ ਆਮਿਸਂ ਭਿਕ੍ਖੁਨੋ ਪਚਿਤੁਂ ਨ ਵਟ੍ਟਤਿ. ਸਚੇਪਿਸ੍ਸ ਉਣ੍ਹਯਾਗੁਯਾ ਸੁਲਸਿਪਣ੍ਣਾਨਿ ਵਾ ਸਿਙ੍ਗਿਵੇਰਂ ਵਾ ਲੋਣਂ ਵਾ ਪਕ੍ਖਿਪਨ੍ਤਿ, ਤਮ੍ਪਿ ਚਾਲੇਤੁਂ ਨ ਵਟ੍ਟਤਿ, ‘‘ਯਾਗੁਂ ਨਿਬ੍ਬਾਪੇਮੀ’’ਤਿ ਪਨ ਚਾਲੇਤੁਂ ਵਟ੍ਟਤਿ. ਉਤ੍ਤਣ੍ਡੁਲਭਤ੍ਤਂ ਲਭਿਤ੍ਵਾਪਿ ਪਿਦਹਿਤੁਂ ਨ ਵਟ੍ਟਤਿ. ਸਚੇ ਪਨ ਮਨੁਸ੍ਸਾ ਪਿਦਹਿਤ੍ਵਾਵ ਦੇਨ੍ਤਿ, ਵਟ੍ਟਤਿ; ‘‘ਭਤ੍ਤਂ ਵਾ ਮਾ ਨਿਬ੍ਬਾਯਤੂ’’ਤਿ ਪਿਦਹਿਤੁਂ ਵਟ੍ਟਤਿ. ਖੀਰਤਕ੍ਕਾਦੀਸੁ ਪਨ ਸਕਿਂ ਕੁਥਿਤੇਸੁ ਅਗ੍ਗਿਂ ਦਾਤੁਂ ਵਟ੍ਟਤਿ, ਪੁਨਪਾਕਸ੍ਸ ਅਨੁਞ੍ਞਾਤਤ੍ਤਾ. ਉਕ੍ਕਪਿਣ੍ਡਕਾਪਿ ਖਾਦਨ੍ਤੀਤਿ ਬਿਲ਼ਾਮੂਸਿਕਗੋਧਾਮਙ੍ਗੁਸਾ ਖਾਦਨ੍ਤਿ. ਦਮਕਾਤਿ ਵਿਘਾਸਾਦਾ.
੨੭੬. ਤਤੋ ਨੀਹਟਨ੍ਤਿ ਯਤ੍ਥ ਨਿਮਨ੍ਤਿਤਾ ਭੁਞ੍ਜਨ੍ਤਿ, ਤਤੋ ਨੀਹਟਂ.
੨੭੮. ਵਨਟ੍ਠਂ ਪੋਕ੍ਖਰਟ੍ਠਨ੍ਤਿ ਵਨੇ ਚੇਵ ਪਦੁਮਿਨਿਗਚ੍ਛੇ ਚ ਜਾਤਂ. ਅਬੀਜਨ੍ਤਿ ਤਰੁਣਫਲਂ, ਯਸ੍ਸ ਬੀਜਂ ਨ ਅਙ੍ਕੁਰਂ ਜਨੇਤਿ. ਨਿਬ੍ਬਟ੍ਟਬੀਜਨ੍ਤਿ ਬੀਜਂ ਨਿਬ੍ਬਟ੍ਟੇਤ੍ਵਾ ਅਪਨੇਤ੍ਵਾ ਪਰਿਭੁਞ੍ਜਿਤਬ੍ਬਕਂ ਅਮ੍ਬਪਨਸਾਦਿ.
੨੭੯. ਦੁਰੋਪਯੋ ਵਣੋਤਿ ਦੁਕ੍ਖੇਨ ਰੁਹਤਿ, ਦੁਕ੍ਖੇਨ ਪਾਕਤਿਕੋ ਹੋਤੀਤਿ ਅਤ੍ਥੋ. ਦੁਪ੍ਪਰਿਹਾਰਂ ਸਤ੍ਥਨ੍ਤਿ ਸਮ੍ਬਾਧੇ ਦੁਕ੍ਖੇਨ ਸਤ੍ਥਂ ਪਰਿਹਰੇਯ੍ਯਂ. ਸਤ੍ਥਕਮ੍ਮਂ ਵਾ ਵਤ੍ਥਿਕਮ੍ਮਂ ਵਾਤਿ ਯਥਾਪਰਿਚ੍ਛਿਨ੍ਨੇ ਓਕਾਸੇ ਯੇਨ ਕੇਨਚਿ ਸਤ੍ਥੇਨ ਵਾ ਸੂਚਿਯਾ ਵਾ ਕਣ੍ਟਕੇਨ ਵਾ ਸਤ੍ਤਿਕਾਯ ਵਾ ਪਾਸਾਣਸਕ੍ਖਲਿਕਾਯ ਵਾ ਨਖੇਨ ਵਾ ਛਿਨ੍ਦਨਂ ਵਾ ਫਾਲਨਂ ਵਾ ਵਿਜ੍ਝਨਂ ਵਾ ਲੇਖਨਂ ਵਾ ਨ ਕਾਤਬ੍ਬਂ; ਸਬ੍ਬਞ੍ਹੇਤਂ ਸਤ੍ਥਕਮ੍ਮਮੇਵ ਹੋਤਿ. ਯੇਨ ਕੇਨਚਿ ਪਨ ਚਮ੍ਮੇਨ ਵਾ ਵਤ੍ਥੇਨ ਵਾ ਵਤ੍ਥਿਪੀਲ਼ਨਮ੍ਪਿ ਨ ਕਾਤਬ੍ਬਂ; ਸਬ੍ਬਞ੍ਹੇਤਂ ਵਤ੍ਥਿਕਮ੍ਮਮੇਵ ਹੋਤਿ. ਏਤ੍ਥ ਚ ਸਮ੍ਬਾਧਸ੍ਸ ਸਾਮਨ੍ਤਾ ਦ੍ਵਙ੍ਗੁਲਾਤਿ ਇਦਂ ਸਤ੍ਥਕਮ੍ਮਂਯੇਵ ਸਨ੍ਧਾਯ ਵੁਤ੍ਤਂ. ਵਤ੍ਥਿਕਮ੍ਮਂ ਪਨ ਸਮ੍ਬਾਧੇਯੇਵ ਪਟਿਕ੍ਖਿਤ੍ਤਂ. ਤਤ੍ਥ ਪਨ ਖਾਰਂ ਆਦਾਤੁਂ ਯੇਨ ਕੇਨਚਿ ਰਜ੍ਜੁਕੇਨ ਵਾ ਬਨ੍ਧਿਤੁਂ ਵਟ੍ਟਤਿ. ਯਦਿ ਤੇਨ ਛਿਜ੍ਜਤਿ, ਸੁਚ੍ਛਿਨ੍ਨਂ. ਅਣ੍ਡਵੁਡ੍ਢਿਰੋਗੇਪਿ ਸਤ੍ਥਕਮ੍ਮਂ ਨ ਵਟ੍ਟਤਿ, ਤਸ੍ਮਾ ਅਣ੍ਡਂ ਫਾਲੇਤ੍ਵਾ ਬੀਜਾਨਿ ਉਦ੍ਧਰਿਤ੍ਵਾ ‘‘ਅਰੋਗਂ ਕਰਿਸ੍ਸਾਮੀ’’ਤਿ ਨ ਕਤ੍ਤਬ੍ਬਂ. ਅਗ੍ਗਿਤਾਪਨਭੇਸਜ੍ਜਾਲਿਮ੍ਪਨੇਸੁ ਪਨ ਪਟਿਕ੍ਖੇਪੋ ਨਤ੍ਥਿ. ਵਚ੍ਚਮਗ੍ਗੇ ਭੇਸਜ੍ਜਮਕ੍ਖਿਤਾ ਆਦਾਨਵਟ੍ਟਿ ਵਾ ਵੇਲ਼ੁਨਾਲ਼ਿਕਾ ਵਾ ਵਟ੍ਟਤਿ, ਯਾਯ ਖਾਰਕਮ੍ਮਂ ਵਾ ਕਰੋਨ੍ਤਿ, ਤੇਲਂ ਵਾ ਪਵੇਸੇਨ੍ਤਿ.
੨੮੦. ਪਵਤ੍ਤਮਂਸਨ੍ਤਿ ਮਤਸ੍ਸ ਮਂਸਂ. ਮਾਘਾਤੋਤਿ ਤਂ ਦਿਵਸਂ ਨ ਲਬ੍ਭਾ ਕੇਨਚਿ ਕਿਞ੍ਚਿ ਜੀਵਿਤਾ ਵੋਰੋਪੇਤੁਂ. ਪੋਤ੍ਥਨਿਕਨ੍ਤਿ ਮਂਸਚ੍ਛੇਦਨਸਤ੍ਥਕਂ ਵੁਚ੍ਚਤਿ. ਕਿਮ੍ਪਿਮਾਯਾਤਿ ਕਿਮ੍ਪਿ ਇਮਾਯ. ਨ ਭਗਵਾ ਉਸ੍ਸਹਤੀਤਿ ਨ ਭਗਵਾ ਸਕ੍ਕੋਤਿ. ਯਤ੍ਰ ਹਿ ਨਾਮਾਤਿ ਯਸ੍ਮਾ ਨਾਮ. ਪਟਿਵੇਕ੍ਖੀਤਿ ਵੀਮਂਸਿ; ਪਟਿਪੁਚ੍ਛੀਤਿ ਵੁਤ੍ਤਂ ਹੋਤਿ. ਅਪ੍ਪਟਿਵੇਕ੍ਖਿਤ੍ਵਾਤਿ ਅਪ੍ਪਟਿਪੁਚ੍ਛਿਤ੍ਵਾ. ਸਚੇ ਪਨ ਅਸੁਕਮਂਸਨ੍ਤਿ ਜਾਨਾਤਿ, ਪਟਿਪੁਚ੍ਛਨਕਿਚ੍ਚਂ ਨਤ੍ਥਿ, ਅਜਾਨਨ੍ਤੇਨ ਪਨ ਪੁਚ੍ਛਿਤ੍ਵਾਵ ਖਾਦਿਤਬ੍ਬਂ.
ਹਤ੍ਥਿਮਂਸਾਦਿਪਟਿਕ੍ਖੇਪਕਥਾ
੨੮੧. ਸੁਨਖਮਂਸਨ੍ਤਿ ਏਤ੍ਥ ਅਰਞ੍ਞਕੋਕਾ ਨਾਮ ਸੁਨਖਸਦਿਸਾ ਹੋਨ੍ਤਿ, ਤੇਸਂ ਮਂਸਂ ਵਟ੍ਟਤਿ. ਯੋ ਪਨ ਗਾਮਸੁਨਖਿਯਾ ਵਾ ਕੋਕੇਨ ਕੋਕਸੁਨਖਿਯਾ ਵਾ ਗਾਮਸੁਨਖੇਨ ਸਂਯੋਗਾ ਉਪ੍ਪਨ੍ਨੋ, ਤਸ੍ਸ ਮਂਸਂ ਨ ਵਟ੍ਟਤਿ, ਸੋ ਹਿ ਉਭਯਂ ਭਜਤੀਤਿ. ਅਹਿਮਂਸਨ੍ਤਿ ਕਸ੍ਸਚਿ ਅਪਾਦਕਸ੍ਸ ਦੀਘਜਾਤਿਕਸ੍ਸ ਮਂਸਂ ਨ ਵਟ੍ਟਤਿ. ਸੀਹਮਂਸਾਦੀਨਿ ਪਾਕਟਾਨੇਵ.
ਏਤ੍ਥ ਚ ਮਨੁਸ੍ਸਮਂਸਂ ਸਜਾਤਿਤਾਯ ਪਟਿਕ੍ਖਿਤ੍ਤਂ, ਹਤ੍ਥਿਅਸ੍ਸਮਂਸਂ ਰਾਜਙ੍ਗਤਾਯ, ਸੁਨਖਮਂਸਞ੍ਚ ਅਹਿਮਂਸਞ੍ਚ ਪਟਿਕੂਲਤਾਯ, ਸੀਹਮਂਸਾਦੀਨਿ ਪਞ੍ਚ ਅਤ੍ਤਨੋ ਅਨੁਪਦ੍ਦਵਤ੍ਥਾਯਾਤਿ. ਇਮੇਸਂ ਮਨੁਸ੍ਸਾਦੀਨਂ ਦਸਨ੍ਨਂ ਮਂਸਮ੍ਪਿ ਅਟ੍ਠਿਪਿ ਲੋਹਿਤਮ੍ਪਿ ਚਮ੍ਮਮ੍ਪਿ ਲੋਮਮ੍ਪਿ ਸਬ੍ਬਂ ਨ ਵਟ੍ਟਤਿ, ਯਂਕਿਞ੍ਚਿ ਞਤ੍ਵਾ ਵਾ ਅਞਤ੍ਵਾ ਵਾ ਖਾਦਨ੍ਤਸ੍ਸ ਆਪਤ੍ਤਿਯੇਵ. ਯਦਾ ਜਾਨਾਤਿ, ਤਦਾ ਦੇਸੇਤਬ੍ਬਾ. ‘‘ਅਪੁਚ੍ਛਿਤ੍ਵਾ ਖਾਦਿਸ੍ਸਾਮੀ’’ਤਿ ਗਣ੍ਹਤੋ ਪਟਿਗ੍ਗਹਣੇ ਦੁਕ੍ਕਟਂ, ‘‘ਪੁਚ੍ਛਿਤ੍ਵਾ ਖਾਦਿਸ੍ਸਾਮੀ’’ਤਿ ਗਣ੍ਹਤੋ ਅਨਾਪਤ੍ਤਿ. ਉਦ੍ਦਿਸ੍ਸ ਕਤਂ ਪਨ ਜਾਨਿਤ੍ਵਾ ਖਾਦਨ੍ਤਸ੍ਸੇਵ ਆਪਤ੍ਤਿ, ਪਚ੍ਛਾ ਜਾਨਨ੍ਤੋ ਆਪਤ੍ਤਿਯਾ ਨ ਕਾਰੇਤਬ੍ਬੋਤਿ.
ਯਾਗੁਮਧੁਗੋਲ਼ਕਾਦਿਕਥਾ
੨੮੨. ਏਕਤ੍ਤਕੋਤਿ ਏਕਕੋ, ਨਤ੍ਥਿ ਮੇ ਦੁਤਿਯੋਤਿ ਅਤ੍ਥੋ. ਪਹੂਤਂ ਯਾਗੁਞ੍ਚ ਮਧੁਗੋਲ਼ਕਞ੍ਚ ਪਟਿਯਾਦਾਪੇਤ੍ਵਾਤਿ ਸੋ ਕਿਰ ਸਤਸਹਸ੍ਸਂ ਵਯਂ ਕਤ੍ਵਾ ਪਟਿਯਾਦਾਪੇਸਿ. ਅਨੁਮੋਦਨਾਗਾਥਾਪਰਿਯੋਸਾਨੇ ‘‘ਪਤ੍ਥਯਤਂ ਇਚ੍ਛਤ’’ਨ੍ਤਿ ਪਦਾਨਂ ‘‘ਅਲਮੇਵ ਦਾਤੁ’’ਨ੍ਤਿ ਇਮਿਨਾ ਸਮ੍ਬਨ੍ਧੋ. ਸਚੇ ਪਨ ‘‘ਪਤ੍ਥਯਤਾ ਇਚ੍ਛਤਾ’’ਤਿ ਪਾਠੋ ਅਤ੍ਥਿ, ਸੋਯੇਵ ਗਹੇਤਬ੍ਬੋ.
੨੮੩. ਭੋਜ੍ਜਯਾਗੁਨ੍ਤਿ ਯਾ ਪਵਾਰਣਂ ਜਨੇਤਿ. ਯਦਗ੍ਗੇਨਾਤਿ ਯਂ ਆਦਿਂ ਕਤ੍ਵਾ. ਸਗ੍ਗਾ ਤੇ ਆਰਦ੍ਧਾਤਿ ਸਗ੍ਗਨਿਬ੍ਬਤ੍ਤਕਪੁਞ੍ਞਂ ਉਪਚਿਤਨ੍ਤਿ ਅਤ੍ਥੋ. ਯਥਾਧਮ੍ਮੋ ਕਾਰੇਤਬ੍ਬੋਤਿ ਪਰਮ੍ਪਰਭੋਜਨੇਨ ਕਾਰੇਤਬ੍ਬੋ, ਭੋਜ੍ਜਯਾਗੁਯਾ ਹਿ ਪਵਾਰਣਾ ਹੋਤੀਤਿ.
੨੮੪. ਨਾਹਂ ਤਂ ਕਚ੍ਚਾਨਾਤਿ ਤਸ੍ਮਿਂ ਕਿਰ ਅਵਸਿਟ੍ਠਗੁਲ਼ੇ ਦੇਵਤਾ ਸੁਖੁਮੋਜਂ ਪਕ੍ਖਿਪਿਂਸੁ, ਸਾ ਅਞ੍ਞੇਸਂ ਪਰਿਣਾਮਂ ਨ ਗਚ੍ਛਤਿ, ਤਸ੍ਮਾ ਏਵਮਾਹ. ਗਿਲਾਨਸ੍ਸ ਗੁਲ਼ਨ੍ਤਿ ਤਥਾਰੂਪੇਨ ਬ੍ਯਾਧਿਨਾ ਗਿਲਾਨਸ੍ਸ ਪਚ੍ਛਾਭਤ੍ਤਂ ਗੁਲ਼ਂ ਅਨੁਜਾਨਾਮੀਤਿ ਅਤ੍ਥੋ.
ਪਾਟਲਿਗਾਮਵਤ੍ਥੁਕਥਾ
੨੮੫. ਸਬ੍ਬਸਨ੍ਥਰਿਨ੍ਤਿ ਯਥਾ ਸਬ੍ਬਂ ਸਨ੍ਥਤਂ ਹੋਤਿ, ਏਵਂ.
੨੮੬. ਸੁਨਿਧਵਸ੍ਸਕਾਰਾਤਿ ਸੁਨਿਧੋ ਚ ਵਸ੍ਸਕਾਰੋ ਚ ਦ੍ਵੇ ਬ੍ਰਾਹ੍ਮਣਾ ਮਗਧਰਞ੍ਞੋ ਮਹਾਮਤ੍ਤਾ ਮਹਾਮਚ੍ਚਾ. ਵਜ੍ਜੀਨਂ ਪਟਿਬਾਹਾਯਾਤਿ ਵਜ੍ਜਿਰਾਜਕੁਲਾਨਂ ਆਯਮੁਖਪਚ੍ਛਿਨ੍ਦਨਤ੍ਥਂ. ਵਤ੍ਥੂਨੀਤਿ ਘਰਵਤ੍ਥੂਨਿ. ਚਿਤ੍ਤਾਨਿ ਨਮਨ੍ਤਿ ਨਿਵੇਸਨਾਨਿ ਮਾਪੇਤੁਨ੍ਤਿ ਤਾ ਕਿਰ ਦੇਵਤਾ ਵਤ੍ਥੁਵਿਜ੍ਜਾਪਾਠਕਾਨਂ ਸਰੀਰੇ ਅਧਿਮੁਚ੍ਚਿਤ੍ਵਾ ਏਵਂ ਚਿਤ੍ਤਾਨਿ ਨਾਮੇਨ੍ਤਿ. ਕਸ੍ਮਾ? ਅਮ੍ਹਾਕਂ ਯਥਾਨੁਰੂਪਂ ਸਕ੍ਕਾਰਂ ਕਰਿਸ੍ਸਨ੍ਤੀਤਿ ਅਤ੍ਥੋ. ਤਾਵਤਿਂਸੇਹੀਤਿ ਲੋਕੇ ਕਿਰ ਸਕ੍ਕਂ ਦੇਵਰਾਜਾਨਂ ਵਿਸ੍ਸਕਮ੍ਮਞ੍ਚ ਉਪਾਦਾਯ ਤਾਵਤਿਂਸਾ ਪਣ੍ਡਿਤਾਤਿ ਸਦ੍ਦੋ ਅਬ੍ਭੁਗ੍ਗਤੋ, ਤੇਨੇਵਾਹ ਤਾਵਤਿਂਸੇਹੀਤਿ, ਤਾਵਤਿਂਸੇਹਿ ਸਦ੍ਧਿਂ ਮਨ੍ਤੇਤ੍ਵਾ ਵਿਯ ਮਾਪੇਨ੍ਤੀਤਿ ਅਤ੍ਥੋ. ਯਾਵਤਾ ਅਰਿਯਂ ਆਯਤਨਨ੍ਤਿ ਯਤ੍ਤਕਂ ਅਰਿਯਮਨੁਸ੍ਸਾਨਂ ਓਸਰਣਟ੍ਠਾਨਂ ਨਾਮ ਅਤ੍ਥਿ. ਯਾਵਤਾ ਵਣਿਪ੍ਪਥੋਤਿ ਯਤ੍ਤਕਂ ਵਾਣਿਜਾਨਂ ਆਭਤਭਣ੍ਡਸ੍ਸ ਰਾਸਿਵਸੇਨੇਵ ਕਯਵਿਕ੍ਕਯਟ੍ਠਾਨਂ ਨਾਮ ਅਤ੍ਥਿ. ਇਦਂ ਅਗ੍ਗਨਗਰਨ੍ਤਿ ਤੇਸਂ ਅਰਿਯਾਯਤਨਵਣਿਪ੍ਪਥਾਨਂ ਇਦਂ ਅਗ੍ਗਨਗਰਂ ਭਵਿਸ੍ਸਤਿ. ਪੁਟਭੇਦਨਨ੍ਤਿ ਪੁਟਭੇਦਨਟ੍ਠਾਨਂ ਮੋਚਨਟ੍ਠਾਨਨ੍ਤਿ ਵੁਤ੍ਤਂ ਹੋਤਿ. ਅਗ੍ਗਿਤੋ ਵਾਤਿਆਦੀਸੁ ਸਮੁਚ੍ਚਯਤ੍ਥੋ ਵਾ ਸਦ੍ਦੋ. ਤਤ੍ਰ ਹਿ ਏਕਸ੍ਸ ਕੋਟ੍ਠਾਸਸ੍ਸ ਅਗ੍ਗਿਤੋ, ਏਕਸ੍ਸ ਉਦਕਤੋ, ਏਕਸ੍ਸ ਅਬ੍ਭਨ੍ਤਰਤੋ, ਅਞ੍ਞਮਞ੍ਞਭੇਦਾ ਅਨ੍ਤਰਾਯੋ ਭਵਿਸ੍ਸਤਿ. ਉਲ਼ੁਮ੍ਪਨ੍ਤਿ ਪਾਰਗਮਨਤ੍ਥਾਯ ਆਣਿਯੋ ਆਕੋਟੇਤ੍ਵਾ ਕਤਂ. ਕੁਲ੍ਲਨ੍ਤਿ ਵਲ੍ਲਿਆਦੀਹਿ ਬਨ੍ਧਿਤ੍ਵਾ ਕਤਂ.
ਅਣ੍ਣਵਨ੍ਤਿ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਯੋਜਨਮਤ੍ਤਂ ਗਮ੍ਭੀਰਸ੍ਸ ਚ ਪੁਥੁਲ੍ਲਸ੍ਸ ਚ ਉਦਕਟ੍ਠਾਨਸ੍ਸੇਤਂ ਅਧਿਵਚਨਂ. ਸਰਨ੍ਤਿ ਇਧ ਨਦੀ ਅਧਿਪ੍ਪੇਤਾ. ਇਦਂ ਵੁਤ੍ਤਂ ਹੋਤਿ – ਯੇ ਗਮ੍ਭੀਰਂ ਵਿਤ੍ਥਤਂ ਤਣ੍ਹਾਸਰਂ ਤਰਨ੍ਤਿ, ਤੇ ਅਰਿਯਮਗ੍ਗਸਙ੍ਖਾਤਂ ਸੇਤੁਂ ਕਤ੍ਵਾਨ ਵਿਸਜ੍ਜ ਪਲ੍ਲਲਾਨਿ ਅਨਾਮਸਿਤ੍ਵਾਵ ਉਦਕਭਰਿਤਾਨਿ ਨਿਨ੍ਨਟ੍ਠਾਨਾਨਿ; ਅਯਂ ਪਨ ਇਦਂ ਅਪ੍ਪਮਤ੍ਤਕਂ ਉਦਕਂ ਉਤ੍ਤਰਿਤੁਕਾਮੋਪਿ ਕੁਲ੍ਲਞ੍ਹਿ ਪਰਿਜਨੋ ਬਨ੍ਧਤਿ, ਬੁਦ੍ਧਾ ਪਨ ਬੁਦ੍ਧਸਾਵਕਾ ਚ ਵਿਨਾ ਏਵ ਕੁਲ੍ਲੇਨ ਤਿਣ੍ਣਾ ਮੇਧਾਵਿਨੋ ਜਨਾਤਿ.
੨੮੭. ਅਨਨੁਬੋਧਾਤਿ ਅਬੁਜ੍ਝਨੇਨ. ਸਨ੍ਧਾਵਿਤਨ੍ਤਿ ਭਵਤੋ ਭਵਂ ਗਮਨਵਸੇਨ ਸਨ੍ਧਾਵਿਤਂ. ਸਂਸਰਿਤਨ੍ਤਿ ਪੁਨਪ੍ਪੁਨਂ ਗਮਨਵਸੇਨ ਸਂਸਰਿਤਂ. ਮਮਞ੍ਚੇਵ ਤੁਮ੍ਹਾਕਞ੍ਚਾਤਿ ਮਯਾ ਚ ਤੁਮ੍ਹੇਹਿ ਚ. ਅਥ ਵਾ ਸਨ੍ਧਾਵਿਤਂ ਸਂਸਰਿਤਨ੍ਤਿ ਸਨ੍ਧਾਵਨਂ ਸਂਸਰਣਂ ਮਮਞ੍ਚੇਵ ਤੁਮ੍ਹਾਕਞ੍ਚ ਅਹੋਸੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਸਂਸਿਤਨ੍ਤਿ ਸਂਸਰਿਤਂ. ਭਵਨੇਤ੍ਤਿ ਸਮੂਹਤਾਤਿ ਭਵਤੋ ਭਵਗਮਨਾ ਸਨ੍ਧਾਵਨਾ ਤਣ੍ਹਾਰਜ੍ਜੁ ਸੁਟ੍ਠੁ ਹਤਾ ਛਿਨ੍ਨਾ ਅਪ੍ਪਵਤ੍ਤਿਕਤਾ.
੨੮੯. ਨੀਲਾਤਿ ਇਦਂ ਸਬ੍ਬਸਙ੍ਗਾਹਕਂ. ਨੀਲਵਣ੍ਣਾਤਿਆਦਿ ਤਸ੍ਸੇਵ ਵਿਭਾਗਦਸ੍ਸਨਤ੍ਥਂ. ਤਤ੍ਥ ਨ ਤੇਸਂ ਪਕਤਿਵਣ੍ਣਾ ਨੀਲਾ, ਨੀਲਵਿਲੇਪਨਾਨਂ ਵਿਚਿਤ੍ਤਤਾਵਸੇਨੇਤਂ ਵੁਤ੍ਤਂ. ਪਟਿਵਟ੍ਟੇਸੀਤਿ ਪਹਾਰੇਸਿ. ਸਾਹਾਰਂ ਦਜ੍ਜੇਯ੍ਯਾਥਾਤਿ ਸਜਨਪਦਂ ਦਦੇਯ੍ਯਾਥ. ਅਙ੍ਗੁਲਿਂ ਫੋਟੇਸੁਨ੍ਤਿ ਅਙ੍ਗੁਲਿਂ ਚਾਲੇਸੁਂ. ਅਮ੍ਬਕਾਯਾਤਿ ਇਤ੍ਥਿਕਾਯ. ਓਲੋਕੇਥਾਤਿ ਪਸ੍ਸਥ. ਅਪਲੋਕੇਥਾਤਿ ਪੁਨਪ੍ਪੁਨਂ ਪਸ੍ਸਥ. ਉਪਸਂਹਰਥਾਤਿ ਉਪਨੇਥ. ਇਮਂ ਲਿਚ੍ਛਵਿਪਰਿਸਂ ਤੁਮ੍ਹਾਕਂ ਚਿਤ੍ਤੇਨ ਤਾਵਤਿਂਸਪਰਿਸਂ ਹਰਥ, ਤਾਵਤਿਂਸਸ੍ਸ ਸਮਕਂ ਕਤ੍ਵਾ ਪਸ੍ਸਥਾਤਿ ਅਤ੍ਥੋ.
ਸੀਹਸੇਨਾਪਤਿਵਤ੍ਥੁਆਦਿਕਥਾ
੨੯੦. ਧਮ੍ਮਸ੍ਸ ਚ ਅਨੁਧਮ੍ਮਂ ਬ੍ਯਾਕਰੋਨ੍ਤੀਤਿ ਭਗਵਤਾ ਵੁਤ੍ਤਕਾਰਣਸ੍ਸ ਅਨੁਕਾਰਣਂ ਕਥੇਨ੍ਤਿ. ਸਹਧਮ੍ਮਿਕੋ ਵਾਦਾਨੁਵਾਦੋਤਿ ਅਪਰੇਹਿ ਵੁਤ੍ਤਕਾਰਣੇਨ ਸਕਾਰਣੋ ਹੁਤ੍ਵਾ ਤੁਮ੍ਹਾਕਂ ਵਾਦੋ ਵਿਞ੍ਞੁਗਰਹਿਤਬ੍ਬਂ ਕਾਰਣਂ ਕੋਚਿ ਅਪ੍ਪਮਤ੍ਤਕੋਪਿ ਕਿਂ ਨ ਆਗਚ੍ਛਤਿ. ਇਦਂ ਵੁਤ੍ਤਂ ਹੋਤਿ ‘‘ਕਿਂ ਸਬ੍ਬਕਾਰੇਨਾਪਿ ਤੁਮ੍ਹਾਕਂ ਵਾਦੇ ਗਾਰਯ੍ਹਕਾਰਣਂ ਨਤ੍ਥੀ’’ਤਿ. ਅਨਬ੍ਭਕ੍ਖਾਤੁਕਾਮਾਤਿ ਅਭਿਭਵਿਤ੍ਵਾ ਨ ਆਚਿਕ੍ਖਿਤੁਕਾਮਾ.
੨੯੩. ਅਨੁਵਿਚ੍ਚਕਾਰਨ੍ਤਿ ਅਨੁਵਿਦਿਤ੍ਵਾ ਚਿਨ੍ਤੇਤ੍ਵਾ ਤੁਲਯਿਤ੍ਵਾ ਕਾਤਬ੍ਬਂ ਕਰੋਹੀਤਿ ਵੁਤ੍ਤਂ ਹੋਤਿ. ਞਾਤਮਨੁਸ੍ਸਾਨਨ੍ਤਿ ਲੋਕੇ ਪਾਕਟਾਨਂ. ਸਾਧੁ ਹੋਤੀਤਿ ਸੁਨ੍ਦਰਂ ਹੋਤਿ. ਪਟਾਕਂ ਪਰਿਹਰੇਯ੍ਯੁਨ੍ਤਿ ਪਟਾਕਂ ਉਕ੍ਖਿਪਿਤ੍ਵਾ ਨਗਰੇ ਘੋਸਨ੍ਤਾ ਆਹਿਣ੍ਡੇਯ੍ਯੁਂ. ਕਸ੍ਮਾ? ‘‘ਏਵਂ ਨੋ ਅਮ੍ਹਾਕਂ ਮਹਨ੍ਤਭਾਵੋ ਭਵਿਸ੍ਸਤੀ’’ਤਿ. ਓਪਾਨਭੂਤਨ੍ਤਿ ਪਟਿਯਤ੍ਤਉਦਪਾਨੋ ਵਿਯ ਠਿਤਂ. ਕੁਲਨ੍ਤਿ ਨਿਵੇਸਨਂ. ਦਾਤਬ੍ਬਂ ਮਞ੍ਞੇਯ੍ਯਾਸੀਤਿ ਮਾ ਇਮੇਸਂ ਦੇਯ੍ਯਧਮ੍ਮਂ ਉਪਚ੍ਛਿਨ੍ਦਿਤ੍ਥ, ਸਮ੍ਪਤ੍ਤਾਨਞ੍ਹਿ ਦਾਤਬ੍ਬਮੇਵਾਤਿ ਓਵਦਤਿ. ਓਕਾਰੋਤਿ ਅਵਕਾਰੋ ਲਾਮਕਭਾਵੋ. ਸਾਮੁਕ੍ਕਂਸਿਕਾਤਿ ਅਤ੍ਤਨਾਯੇਵ ਉਦ੍ਧਰਿਤ੍ਵਾ ਗਹਿਤਾ; ਅਸਾਧਾਰਣਂ ਅਞ੍ਞੇਸਨ੍ਤਿ ਅਤ੍ਥੋ. ਉਦ੍ਦਿਸ੍ਸ ਕਤਨ੍ਤਿ ਉਦ੍ਦਿਸਿਤ੍ਵਾ ਕਤਂ.
੨੯੪. ਪਟਿਚ੍ਚਕਮ੍ਮਨ੍ਤਿ ਅਤ੍ਤਾਨਂ ਪਟਿਚ੍ਚ ਕਤਨ੍ਤਿ ਅਤ੍ਥੋ. ਅਥ ਵਾ ਪਟਿਚ੍ਚਕਮ੍ਮਨ੍ਤਿ ਨਿਮਿਤ੍ਤਕਮ੍ਮਸ੍ਸੇਤਂ ਅਧਿਵਚਨਂ, ਤਂ ਪਟਿਚ੍ਚਕਮ੍ਮਂ ਏਤ੍ਥ ਅਤ੍ਥੀਤਿ ਮਂਸਮ੍ਪਿ ਪਟਿਚ੍ਚਕਮ੍ਮਨ੍ਤਿ ਵੁਤ੍ਤਂ. ਯੋ ਹਿ ਏਵਰੂਪਂ ਮਂਸਂ ਪਰਿਭੁਞ੍ਜਤਿ, ਸੋਪਿ ਤਸ੍ਸ ਕਮ੍ਮਸ੍ਸ ਦਾਯਾਦੋ ਹੋਤਿ, ਵਧਕਸ੍ਸ ਵਿਯ ਤਸ੍ਸਾਪਿ ਪਾਣਘਾਤਕਮ੍ਮਂ ਹੋਤੀਤਿ ਅਧਿਪ੍ਪਾਯੋ. ਜਿਰਿਦਨ੍ਤਿਤਿ ਜਿਰਨ੍ਤਿ ਅਬ੍ਭਾਚਿਕ੍ਖਨ੍ਤਾ ਨ ਜਿਰਨ੍ਤਿ, ਅਬ੍ਭਕ੍ਖਾਨਸ੍ਸ ਅਨ੍ਤਂ ਨ ਗਚ੍ਛਨ੍ਤੀਤਿ ਅਤ੍ਥੋ. ਤਿਕੋਟਿਪਰਿਸੁਦ੍ਧਕਥਾ ਸਙ੍ਘਭੇਦਸਿਕ੍ਖਾਪਦਵਣ੍ਣਨਾਯਂ ਵੁਤ੍ਤਾ.
ਕਪ੍ਪਿਯਭੂਮਿਅਨੁਜਾਨਨਕਥਾ
੨੯੫. ਸਕਟਪਰਿਵਟ੍ਟਨ੍ਤਿ ਸਕਟੇਹਿ ਪਰਿਕ੍ਖੇਪਂ ਵਿਯ ਕਤ੍ਵਾ ਅਚ੍ਛਨ੍ਤਿ. ਪਚ੍ਚਨ੍ਤਿਮਨ੍ਤਿ ਅਭਿਲਾਪਮਤ੍ਤਮੇਤਂ ‘‘ਯਂ ਸਙ੍ਘੋ ਆਕਙ੍ਖਤੀ’’ਤਿ ਵੁਤ੍ਤਤ੍ਤਾ ਪਨ ਧੁਰਵਿਹਾਰੋਪਿ ਸਮ੍ਮਨ੍ਨਿਤੁਂ ਵਟ੍ਟਤਿ, ਕਮ੍ਮਵਾਚਂ ਅਵਤ੍ਵਾ ਅਪਲੋਕਨੇਨਾਪਿ ਵਟ੍ਟਤਿਯੇਵ. ਕਾਕੋਰਵਸਦ੍ਦਨ੍ਤਿ ਤਤ੍ਥ ਤਤ੍ਥ ਪਵਿਟ੍ਠਾਨਂ ਆਮਿਸਖਾਦਨਤ੍ਥਾਯ ਅਨੁਪ੍ਪਗੇਯੇਵ ਸਨ੍ਨਿਪਤਿਤਾਨਂ ਕਾਕਾਨਂ ਓਰਵਸਦ੍ਦਂ. ਯਸੋਜੋ ਨਾਮ ਕਪਿਲਸੁਤ੍ਤਪਰਿਯੋਸਾਨੇ ਪਬ੍ਬਜਿਤਾਨਂ ਪਞ੍ਚਨ੍ਨਂ ਸਤਾਨਂ ਅਗ੍ਗਪੁਰਿਸੋ.
ਉਸ੍ਸਾਵਨਨ੍ਤਿਕਨ੍ਤਿਆਦੀਸੁ ਉਸ੍ਸਾਵਨਨ੍ਤਿਕਾ ਤਾਵ ਏਵਂ ਕਤ੍ਤਬ੍ਬਾ. ਯੋ ਥਮ੍ਭਾਨਂ ਵਾ ਉਪਰਿ ਭਿਤ੍ਤਿਪਾਦੇ ਵਾ ਨਿਖਨਿਤ੍ਵਾ ਵਿਹਾਰੋ ਕਰਿਯਤਿ, ਤਸ੍ਸ ਹੇਟ੍ਠਾ ਥਮ੍ਭਪਟਿਚ੍ਛਕਾ ਪਾਸਾਣਾ ਭੂਮਿਗਤਿਕਾ ਏਵ. ਪਠਮਥਮ੍ਭਂ ਪਨ ਪਠਮਭਿਤ੍ਤਿਪਾਦਂ ਵਾ ਪਤਿਟ੍ਠਾਪੇਨ੍ਤੇਹਿ ਬਹੂਹਿ ਸਮ੍ਪਰਿਵਾਰੇਤ੍ਵਾ ‘‘ਕਪ੍ਪਿਯਕੁਟਿਂ ਕਰੋਮ, ਕਪ੍ਪਿਯਕੁਟਿਂ ਕਰੋਮਾ’’ਤਿ ਵਾਚਂ ਨਿਚ੍ਛਾਰੇਨ੍ਤੇਹਿ ਮਨੁਸ੍ਸੇਸੁ ਉਕ੍ਖਿਪਿਤ੍ਵਾ ਪਤਿਟ੍ਠਾਪੇਨ੍ਤੇਸੁ ਆਮਸਿਤ੍ਵਾ ਵਾ ਸਯਂ ਉਕ੍ਖਿਪਿਤ੍ਵਾ ਵਾ ਥਮ੍ਭੇ ਵਾ ਭਿਤ੍ਤਿਪਾਦੋ ਵਾ ਪਤਿਟ੍ਠਾਪੇਤਬ੍ਬੋ. ਕੁਰੁਨ੍ਦਿਮਹਾਪਚ੍ਚਰੀਸੁ ਪਨ ‘‘ਕਪ੍ਪਿਯਕੁਟਿ ਕਪ੍ਪਿਯਕੁਟੀ’’ਤਿ ਵਤ੍ਵਾ ਪਤਿਟ੍ਠਾਪੇਤਬ੍ਬਨ੍ਤਿ ਵੁਤ੍ਤਂ. ਅਨ੍ਧਕਟ੍ਠਕਥਾਯਂ ‘‘ਸਙ੍ਘਸ੍ਸ ਕਪ੍ਪਿਯਕੁਟਿਂ ਅਧਿਟ੍ਠਾਮੀ’’ਤਿ ਵੁਤ੍ਤਂ. ਤਂ ਪਨ ਅਵਤ੍ਵਾਪਿ ਅਟ੍ਠਕਥਾਸੁ ਵੁਤ੍ਤਨਯੇਨ ਵੁਤ੍ਤੇ ਦੋਸੋ ਨਤ੍ਥਿ. ਇਦਂ ਪਨੇਤ੍ਥ ਸਾਧਾਰਣਲਕ੍ਖਣਂ, ਥਮ੍ਭਪਤਿਟ੍ਠਾਨਞ੍ਚ ਵਚਨਪਰਿਯੋਸਾਨਞ੍ਚ ਸਮਕਾਲਂ ਵਟ੍ਟਤਿ. ਸਚੇ ਹਿ ਅਨਿਟ੍ਠਿਤੇ ਵਚਨੇ ਥਮ੍ਭੋ ਪਤਿਟ੍ਠਾਤਿ, ਅਪ੍ਪਤਿਟ੍ਠਿਤੇ ਵਾ ਤਸ੍ਮਿਂ ਵਚਨਂ ਨਿਟ੍ਠਾਤਿ, ਅਕਤਾ ਹੋਤਿ ਕਪ੍ਪਿਯਕੁਟਿ. ਤੇਨੇਵ ਮਹਾਪਚ੍ਚਰਿਯਂ ਵੁਤ੍ਤਂ – ‘‘ਬਹੂਹਿ ਸਮ੍ਪਰਿਵਾਰੇਤ੍ਵਾ ਵਤ੍ਤਬ੍ਬਂ, ਅਵਸ੍ਸਞ੍ਹਿ ਏਤ੍ਥ ਏਕਸ੍ਸਪਿ ਵਚਨਨਿਟ੍ਠਾਨਞ੍ਚ ਥਮ੍ਭਪਤਿਟ੍ਠਾਨਞ੍ਚ ਏਕਤੋ ਭਵਿਸ੍ਸਤੀ’’ਤਿ.
ਇਟ੍ਠਕਸਿਲਾਮਤ੍ਤਿਕਾਕੁਟ੍ਟਿਕਾਸੁ ਪਨ ਕੁਟੀਸੁ ਹੇਟ੍ਠਾ ਚਯਂ ਬਨ੍ਧਿਤ੍ਵਾ ਵਾ ਅਬਨ੍ਧਿਤ੍ਵਾ ਵਾ ਕਰੋਨ੍ਤੁ, ਯਤੋ ਪਟ੍ਠਾਯ ਭਿਤ੍ਤਿਂ ਉਟ੍ਠਾਪੇਤੁਕਾਮਾ ਹੋਨ੍ਤਿ, ਤਂ ਸਬ੍ਬਪਠਮਂ ਇਟ੍ਠਕਂ ਵਾ ਸਿਲਂ ਵਾ ਮਤ੍ਤਿਕਾਪਿਣ੍ਡਂ ਵਾ ਗਹੇਤ੍ਵਾ ਵੁਤ੍ਤਨਯੇਨੇਵ ਕਪ੍ਪਿਯਕੁਟਿ ਕਾਤਬ੍ਬਾ. ਇਟ੍ਠਕਾਦਯੋ ਹਿ ਭਿਤ੍ਤਿਯਾ ਪਠਮਿਟ੍ਠਕਾਦੀਨਂ ਹੇਟ੍ਠਾ ਨ ਵਟ੍ਟਨ੍ਤਿ, ਥਮ੍ਭਾ ਪਨ ਉਪਰਿ ਉਗ੍ਗਚ੍ਛਨ੍ਤਿ, ਤਸ੍ਮਾ ਵਟ੍ਟਨ੍ਤਿ. ਅਨ੍ਧਕਟ੍ਠਕਥਾਯਂ ‘‘ਥਮ੍ਭੇਹਿ ਕਰਿਯਮਾਨੇ ਚਤੂਸੁ ਕੋਣੇਸੁ ਚਤ੍ਤਾਰੋ ਥਮ੍ਭਾ ਇਟ੍ਠਕਾਦਿਕੁਟ੍ਟੇ ਚਤੂਸੁ ਕੋਣੇਸੁ ਦ੍ਵੇ ਤਿਸ੍ਸੋ ਇਟ੍ਠਕਾ ਅਧਿਟ੍ਠਾਤਬ੍ਬਾ’’ਤਿ ਵੁਤ੍ਤਂ. ਤਥਾ ਪਨ ਅਕਤਾਯਪਿ ਦੋਸੋ ਨਤ੍ਥਿ, ਅਟ੍ਠਕਥਾਸੁ ਹਿ ਵੁਤ੍ਤਮੇਵ ਪਮਾਣਂ.
ਗੋਨਿਸਾਦਿਕਾ ਦੁਵਿਧਾ – ਆਰਾਮਗੋਨਿਸਾਦਿਕਾ, ਵਿਹਾਰਗੋਨਿਸਾਦਿਕਾਤਿ. ਤਾਸੁ ਯਤ੍ਥ ਨੇਵ ਆਰਾਮੋ ਨ ਸੇਨਾਸਨਾਨਿ ਪਰਿਕ੍ਖਿਤ੍ਤਾਨਿ ਹੋਨ੍ਤਿ, ਅਯਂ ‘‘ਆਰਾਮਗੋਨਿਸਾਦਿਕਾ’’ ਨਾਮ. ਯਤ੍ਥ ਸੇਨਾਸਨਾਨਿ ਸਬ੍ਬਾਨਿ ਵਾ ਏਕਚ੍ਚਾਨਿ ਵਾ ਪਰਿਕ੍ਖਿਤ੍ਤਾਨਿ, ਆਰਾਮੋ ਅਪਰਿਕ੍ਖਿਤ੍ਤੋ, ਅਯਂ ‘‘ਵਿਹਾਰਗੋਨਿਸਾਦਿਕਾ’’ ਨਾਮ. ਇਤਿ ਉਭਯਤ੍ਰਾਪਿ ਆਰਾਮਸ੍ਸ ਅਪਰਿਕ੍ਖਿਤ੍ਤਭਾਵੋਯੇਵ ਪਮਾਣਂ. ਆਰਾਮੋ ਪਨ ਉਪਡ੍ਢਪਰਿਕ੍ਖਿਤ੍ਤੋਪਿ ਬਹੁਤਰਂ ਪਰਿਕ੍ਖਿਤ੍ਤੋਪਿ ਪਰਿਕ੍ਖਿਤ੍ਤੋਯੇਵ ਨਾਮਾਤਿ ਕੁਰੁਨ੍ਦਿਮਹਆਪਚ੍ਚਰਿਯਾਦੀਸੁ ਵੁਤ੍ਤਂ. ਏਤ੍ਥ ਕਪ੍ਪਿਯਕੁਟਿਂ ਲਦ੍ਧੁਂ ਵਟ੍ਟਤਿ.
ਗਹਪਤੀਤਿ ਮਨੁਸ੍ਸਾ ਆਵਾਸਂ ਕਤ੍ਵਾ ‘‘ਕਪ੍ਪਿਯਕੁਟਿਂ ਦੇਮ, ਪਰਿਭੁਞ੍ਜਥਾ’’ਤਿ ਵਦਨ੍ਤਿ, ਏਸਾ ਗਹਪਤਿ ਨਾਮ. ‘‘ਕਪ੍ਪਿਯਕੁਟਿਂ ਕਾਤੁਂ ਦੇਮਾ’’ਤਿ ਵੁਤ੍ਤੇਪਿ ਵਟ੍ਟਤਿਯੇਵ. ਅਨ੍ਧਕਟ੍ਠਕਥਾਯਂ ਪਨ ‘‘ਯਸ੍ਮਾ ਭਿਕ੍ਖੁਂ ਠਪੇਤ੍ਵਾ ਸੇਸਸਹਧਮ੍ਮਿਕਾਨਂ ਸਬ੍ਬੇਸਞ੍ਚ ਦੇਵਮਨੁਸ੍ਸਾਨਂ ਹਤ੍ਥਤੋ ਪਟਿਗ੍ਗਹੋ ਚ ਸਨ੍ਨਿਧਿ ਚ ਅਨ੍ਤੋਵੁਤ੍ਥਞ੍ਚ ਤੇਸਂ ਸਨ੍ਤਕਂ ਭਿਕ੍ਖੁਸ੍ਸ ਵਟ੍ਟਤਿ, ਤਸ੍ਮਾ ਤੇਸਂ ਗੇਹਾਨਿ ਵਾ ਤੇਹਿ ਦਿਨ੍ਨਾ ਕਪ੍ਪਿਯਕੁਟਿ ਵਾ ਗਹਪਤੀਤਿ ਵੁਚ੍ਚਤੀ’’ਤਿ ਵੁਤ੍ਤਂ. ਪੁਨਪਿ ਵੁਤ੍ਤਂ – ‘‘ਭਿਕ੍ਖੁਸਙ੍ਘਸ੍ਸ ਵਿਹਾਰਂ ਠਪੇਤ੍ਵਾ ਭਿਕ੍ਖੁਨੁਪਸ੍ਸਯੋ ਵਾ ਆਰਾਮਿਕਾਨਂ ਵਾ ਤਿਤ੍ਥਿਯਾਨਂ ਵਾ ਦੇਵਤਾਨਂ ਵਾ ਨਾਗਾਨਂ ਵਾ ਅਪਿ ਬ੍ਰਹ੍ਮਾਨਂ ਵਿਮਾਨਂ ਕਪ੍ਪਿਯਕੁਟਿ ਹੋਤੀ’’ਤਿ, ਤਂ ਸੁਵੁਤ੍ਤਂ; ਸਙ੍ਘਸਨ੍ਤਕਮੇਵ ਹਿ ਭਿਕ੍ਖੁਸਨ੍ਤਕਂ ਵਾ ਗੇਹਂ ਗਹਪਤਿਕੁਟਿਕਾ ਨ ਹੋਤਿ. ਸਮ੍ਮੁਤਿਕਾ ਨਾਮ ਕਮ੍ਮਵਾਚਂ ਸਾਵੇਤ੍ਵਾ ਕਤਾਤਿ.
ਯਂ ਇਮਾਸੁ ਚਤੂਸੁ ਕਪ੍ਪਿਯਭੂਮੀਸੁ ਵੁਤ੍ਥਂ ਆਮਿਸਂ, ਤਂ ਸਬ੍ਬਂ ਅਨ੍ਤੋਵੁਤ੍ਥਸਙ੍ਖ੍ਯਂ ਨ ਗਚ੍ਛਤਿ. ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਅਨ੍ਤੋਵੁਤ੍ਥਅਨ੍ਤੋਪਕ੍ਕਮੋਚਨਤ੍ਥਞ੍ਹਿ ਕਪ੍ਪਿਯਕੁਟਿਯੋ ਅਨੁਞ੍ਞਾਤਾ. ਯਂ ਪਨ ਅਕਪ੍ਪਿਯਭੂਮਿਯਂ ਸਹਸੇਯ੍ਯਪ੍ਪਹੋਨਕੇ ਗੇਹੇ ਵੁਤ੍ਥਂ ਸਙ੍ਘਿਕਂ ਵਾ ਪੁਗ੍ਗਲਿਕਂ ਵਾ ਭਿਕ੍ਖੁਸ੍ਸ ਭਿਕ੍ਖੁਨਿਯਾ ਵਾ ਸਨ੍ਤਕਂ ਏਕਰਤ੍ਤਮ੍ਪਿ ਠਪਿਤਂ, ਤਂ ਅਨ੍ਤੋਵੁਤ੍ਥਂ; ਤਤ੍ਥ ਪਕ੍ਕਞ੍ਚ ਅਨ੍ਤੋਪਕ੍ਕਂ ਨਾਮ ਹੋਤਿ, ਏਤਂ ਨ ਕਪ੍ਪਤਿ. ਸਤ੍ਤਾਹਕਾਲਿਕਂ ਪਨ ਯਾਵਜੀਵਿਕਞ੍ਚ ਵਟ੍ਟਤਿ.
ਤਤ੍ਰਾਯਂ ਵਿਨਿਚ੍ਛਯੋ – ਸਾਮਣੇਰੋ ਭਿਕ੍ਖੁਸ੍ਸ ਤਣ੍ਡੁਲਾਦਿਕਂ ਆਮਿਸਂ ਆਹਰਿਤ੍ਵਾ ਕਪ੍ਪਿਯਕੁਟਿਯਂ ਨਿਕ੍ਖਿਪਿਤ੍ਵਾ ਪੁਨਦਿਵਸੇ ਪਚਿਤ੍ਵਾ ਦੇਤਿ, ਅਨ੍ਤੋਵੁਤ੍ਥਂ ਨ ਹੋਤਿ. ਤਤ੍ਥ ਅਕਪ੍ਪਿਯਕੁਟਿਯਂ ਨਿਕ੍ਖਿਤ੍ਤਸਪ੍ਪਿਆਦੀਸੁ ਯਂਕਿਞ੍ਚਿ ਪਕ੍ਖਿਪਿਤ੍ਵਾ ਦੇਤਿ, ਮੁਖਸਨ੍ਨਿਧਿ ਨਾਮ ਹੋਤਿ. ਮਹਾਪਚ੍ਚਰਿਯਂ ਪਨ ‘‘ਅਨ੍ਤੋਵੁਤ੍ਥਂ ਹੋਤੀ’’ਤਿ ਵੁਤ੍ਤਂ. ਤਤ੍ਥ ਨਾਮਮਤ੍ਤਮੇਵ ਨਾਨਾਕਰਣਂ. ਭਿਕ੍ਖੁ ਅਕਪ੍ਪਿਯਕੁਟਿਯਂ ਠਪਿਤਸਪ੍ਪਿਞ੍ਚ ਯਾਵਜੀਵਿਕਪਣ੍ਣਞ੍ਚ ਏਕਤੋ ਪਚਿਤ੍ਵਾ ਪਰਿਭੁਞ੍ਜਤਿ, ਸਤ੍ਤਾਹਂ ਨਿਰਾਮਿਸਂ ਵਟ੍ਟਤਿ. ਸਚੇ ਆਮਿਸਸਂਸਟ੍ਠਂ ਕਤ੍ਵਾ ਪਰਿਭੁਞ੍ਜਤਿ, ਅਨ੍ਤੋਵੁਤ੍ਥਞ੍ਚੇਵ ਸਾਮਂਪਾਕਞ੍ਚ ਹੋਤਿ. ਏਤੇਨੁਪਾਯੇਨ ਸਬ੍ਬਸਂਸਗ੍ਗਾ ਵੇਦਿਤਬ੍ਬਾ.
ਇਮਾ ਪਨ ਕਪ੍ਪਿਯਕੁਟਿਯੋ ਕਦਾ ਜਹਿਤਵਤ੍ਥੁਕਾ ਹੋਨ੍ਤਿ? ਉਸ੍ਸਾਵਨਨ੍ਤਿਕਾ ਤਾਵ ਯਾ ਥਮ੍ਭਾਨਂ ਉਪਰਿ ਭਿਤ੍ਤਿਪਾਦੇ ਵਾ ਨਿਖਣਿਤ੍ਵਾ ਕਤਾ, ਸਾ ਸਬ੍ਬੇਸੁ ਥਮ੍ਭੇਸੁ ਚ ਭਿਤ੍ਤਿਪਾਦੇਸੁ ਚ ਅਪਨੀਤੇਸੁ ਜਹਿਤਵਤ੍ਥੁਕਾ ਹੋਤਿ. ਸਚੇ ਪਨ ਥਮ੍ਭੇ ਵਾ ਭਿਤ੍ਤਿਪਾਦੇ ਵਾ ਪਰਿਵਤ੍ਤੇਨ੍ਤਿ, ਯੋ ਯੋ ਠਿਤੋ ਤਤ੍ਥ ਤਤ੍ਥ ਪਤਿਟ੍ਠਾਤਿ, ਸਬ੍ਬੇਸੁਪਿ ਪਰਿਵਤ੍ਤਿਤੇਸੁ ਅਜਹਿਤਵਤ੍ਥੁਕਾਵ ਹੋਤਿ. ਇਟ੍ਠਕਾਦੀਹਿ ਕਤਾ ਚਯਸ੍ਸ ਉਪਰਿ ਭਿਤ੍ਤਿਅਤ੍ਥਾਯ ਠਪਿਤਂ ਇਟ੍ਠਕਂ ਵਾ ਸਿਲਂ ਵਾ ਮਤ੍ਤਿਕਾਪਿਣ੍ਡਂ ਵਾ ਆਦਿਂਕਤ੍ਵਾ ਵਿਨਾਸਿਤਕਾਲੇ ਜਹਿਤਵਤ੍ਥੁਕਾ ਹੋਤਿ. ਯੇਹਿ ਪਨ ਇਟ੍ਠਕਾਦੀਹਿ ਅਧਿਟ੍ਠਿਤਾ, ਤੇਸੁ ਅਪਨੀਤੇਸੁਪਿ ਤਦਞ੍ਞਾਸੁ ਪਤਿਟ੍ਠਿਤਾਸੁ ਅਜਹਿਤਵਤ੍ਥੁਕਾਵ ਹੋਤਿ.
ਗੋਨਿਸਾਦਿਕਾ ਪਾਕਾਰਾਦੀਹਿ ਪਰਿਕ੍ਖੇਪੇ ਕਤੇ ਜਹਿਤਵਤ੍ਥੁਕਾ ਹੋਤਿ. ਪੁਨ ਤਸ੍ਮਿਂ ਆਰਾਮੇ ਕਪ੍ਪਿਯਕੁਟਿ ਲਦ੍ਧੁਂ ਵਟ੍ਟਤਿ. ਸਚੇ ਪਨ ਪੁਨਪਿ ਪਾਕਾਰਾਦਯੋ ਤਤ੍ਥ ਤਤ੍ਥ ਖਣ੍ਡਾ ਹੋਨ੍ਤਿ, ਤਤੋ ਤਤੋ ਗਾਵੋ ਪਵਿਸਨ੍ਤਿ, ਪੁਨ ਕਪ੍ਪਿਯਕੁਟਿ ਹੋਤਿ. ਇਤਰਾ ਪਨ ਦ੍ਵੇ ਗੋਪਾਨਸੀਮਤ੍ਤਂ ਠਪੇਤ੍ਵਾ ਸਬ੍ਬਸ੍ਮਿਂ ਛਦਨੇ ਵਿਨਟ੍ਠੇ ਜਹਿਤਵਤ੍ਥੁਕਾ ਹੋਨ੍ਤਿ. ਸਚੇ ਗੋਪਾਨਸੀਨਂ ਉਪਰਿ ਏਕਮ੍ਪਿ ਪਕ੍ਖਪਾਸਕਮਣ੍ਡਲਂ ਅਤ੍ਥਿ, ਰਕ੍ਖਤਿ.
ਯਤ੍ਰ ਪਨਿਮਾ ਚਤਸ੍ਸੋਪਿ ਕਪ੍ਪਿਯਭੂਮਿਯੋ ਨਤ੍ਥਿ, ਤਤ੍ਥ ਕਿਂ ਕਾਤਬ੍ਬਂ? ਅਨੁਪਸਮ੍ਪਨ੍ਨਸ੍ਸ ਦਤ੍ਵਾ ਤਸ੍ਸ ਸਨ੍ਤਕਂ ਕਤ੍ਵਾ ਪਰਿਭੁਞ੍ਜਿਤਬ੍ਬਂ. ਤਤ੍ਰਿਦਂ ਵਤ੍ਥੁ – ਕਰਵਿਕਤਿਸ੍ਸਤ੍ਥੇਰੋ ਕਿਰ ਵਿਨਯਧਰਪਾਮੋਕ੍ਖੋ ਮਹਾਸੀਵਤ੍ਥੇਰਸ੍ਸ ਸਨ੍ਤਿਕਂ ਅਗਮਾਸਿ. ਸੋ ਦੀਪਾਲੋਕੇਨ ਸਪ੍ਪਿਕੁਮ੍ਭਂ ਪਸ੍ਸਿਤ੍ਵਾ ‘‘ਭਨ੍ਤੇ ਕਿਮੇਤ’’ਨ੍ਤਿ ਪੁਚ੍ਛਿ. ਥੇਰੋ ‘‘ਆਵੁਸੋ ਗਾਮਤੋ ਸਪ੍ਪਿਕੁਮ੍ਭੋ ਆਭਤੋ, ਲੂਖਦਿਵਸੇ ਸਪ੍ਪਿਨਾ ਭੁਞ੍ਜਨਤ੍ਥਾਯਾ’’ਤਿ ਆਹ. ਤਤੋ ਨਂ ਤਿਸ੍ਸਤ੍ਥੇਰੋ ‘‘ਨ ਵਟ੍ਟਤਿ ਭਨ੍ਤੇ’’ਤਿ ਆਹ. ਥੇਰੋ ਪੁਨਦਿਵਸੇ ਪਮੁਖੇ ਨਿਕ੍ਖਿਪਾਪੇਸਿ. ਤਿਸ੍ਸਤ੍ਥੇਰੋ ਪੁਨ ਏਕਦਿਵਸੇ ਆਗਤੋ ਤਂ ਦਿਸ੍ਵਾ ਤਥੇਵ ਪੁਚ੍ਛਿਤ੍ਵਾ ‘‘ਭਨ੍ਤੇ ਸਹਸੇਯ੍ਯਪ੍ਪਹੋਨਕਟ੍ਠਾਨੇ ਠਪੇਤੁਂ ਨ ਵਟ੍ਟਤੀ’’ਤਿ ਆਹ. ਥੇਰੋ ਪੁਨਦਿਵਸੇ ਬਹਿ ਨੀਹਰਾਪੇਤ੍ਵਾ ਨਿਕ੍ਖਿਪਾਪੇਸਿ, ਤਂ ਚੋਰਾ ਹਰਿਂਸੁ. ਸੋ ਪੁਨ ਏਕਦਿਵਸਂ ਆਗਤਂ ਤਿਸ੍ਸਤ੍ਥੇਰਂ ਆਹ – ‘‘ਆਵੁਸੋ ਤਯਾ ‘ਨ ਵਟ੍ਟਤੀ’ਤਿ ਵੁਤ੍ਤੋ ਸੋ ਕੁਮ੍ਭੋ ਬਹਿ ਨਿਕ੍ਖਿਤ੍ਤੋ ਚੋਰੇਹਿ ਅਵਹਤੋ’’ਤਿ. ਤਤੋ ਨਂ ਤਿਸ੍ਸਤ੍ਥੇਰੋ ਆਹ – ‘‘ਨਨੁ ਭਨ੍ਤੇ ਅਨੁਪਸਮ੍ਪਨ੍ਨਸ੍ਸ ਦਾਤਬ੍ਬੋ ਅਸ੍ਸ, ਅਨੁਪਸਮ੍ਪਨ੍ਨਸ੍ਸ ਹਿ ਦਤ੍ਵਾ ਤਸ੍ਸ ਸਨ੍ਤਕਂ ਕਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤੀ’’ਤਿ.
੨੯੬-੯. ਮੇਣ੍ਡਕਵਤ੍ਥੁ ਉਤ੍ਤਾਨਮੇਵ. ਅਪਿ ਚੇਤ੍ਥ ਅਨੁਜਾਨਾਮਿ ਭਿਕ੍ਖਵੇ ਪਞ੍ਚ ਗੋਰਸੇਤਿ ਇਮੇ ਪਞ੍ਚ ਗੋਰਸੇ ਵਿਸੁਂ ਪਰਿਭੋਗੇਨ ਪਰਿਭੁਞ੍ਜਿਤੁਮ੍ਪਿ ਅਨੁਜਾਨਾਮੀਤਿ ਅਤ੍ਥੋ. ਪਾਥੇਯ੍ਯਂ ਪਰਿਯੇਸਿਤੁਨ੍ਤਿ ਏਤ੍ਥ ਸਚੇ ਕੇਚਿ ਸਯਮੇਵ ਞਤ੍ਵਾ ਦੇਨ੍ਤਿ, ਇਚ੍ਚੇਤਂ ਕੁਸਲਂ; ਨੋ ਚੇ ਦੇਨ੍ਤਿ, ਞਾਤਿਪਵਾਰਿਤਟ੍ਠਾਨਤੋ ਵਾ ਭਿਕ੍ਖਾਚਾਰਵਤ੍ਤੇਨ ਵਾ ਪਰਿਯੇਸਿਤਬ੍ਬਂ. ਤਥਾ ਅਲਭਨ੍ਤੇਨ ਅਞ੍ਞਾਤਿਕਅਪਵਾਰਿਤਟ੍ਠਾਨਤੋ ਯਾਚਿਤ੍ਵਾਪਿ ਗਹੇਤਬ੍ਬਂ. ਏਕਦਿਵਸੇਨ ਗਮਨੀਯੇ ਮਗ੍ਗੇ ਏਕਭਤ੍ਤਤ੍ਥਾਯ ਪਰਿਯੇਸਿਤਬ੍ਬਂ. ਦੀਘੇ ਅਦ੍ਧਾਨੇ ਯਤ੍ਤਕੇਨ ਕਨ੍ਤਾਰਂ ਨਿਤ੍ਥਰਤਿ, ਤਤ੍ਤਕਂ ਪਰਿਯੇਸਿਤਬ੍ਬਂ.
ਕੇਣਿਯਜਟਿਲਵਤ੍ਥੁਕਥਾ
੩੦੦. ਕਾਜੇਹਿ ਗਾਹਾਪੇਤ੍ਵਾਤਿ ਪਞ੍ਚਹਿ ਕਾਜਸਤੇਹਿ ਸੁਸਙ੍ਖਤਸ੍ਸ ਬਦਰਪਾਨਸ੍ਸ ਕੁਟਸਹਸ੍ਸਂ ਗਾਹਾਪੇਤ੍ਵਾ. ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾਤਿ ‘‘ਸਾਧੁ ਭਿਕ੍ਖਵੇ ਪਾਨਂ ਅਪਿਵਨ੍ਤਾ ਸਮਣਸ੍ਸ ਗੋਤਮਸ੍ਸ ਸਾਵਕਾ ਪਚ੍ਚਯਬਾਹੁਲ੍ਲਿਕਾਤਿ ਵਾਦਂ ਨ ਉਪ੍ਪਾਦਯਿਤ੍ਥ, ਮਯਿ ਚ ਗਾਰਵਂ ਅਕਤ੍ਥ, ਮਮ ਚ ਤੁਮ੍ਹੇਸੁ ਗਾਰਵਂ ਜਨਯਿਤ੍ਥ, ਇਤਿ ਵੋ ਅਹਂ ਇਮਿਨਾ ਕਾਰਣੇਨ ਸੁਟ੍ਠੁ ਪਸਨ੍ਨੋ’’ਤਿਆਦਿਨਾ ਨਯੇਨ ਧਮ੍ਮਿਂ ਕਥਂ ਕਤ੍ਵਾ ਅਨੁਜਾਨਾਮਿ ਭਿਕ੍ਖਵੇ ਅਟ੍ਠ ਪਾਨਾਨੀਤਿਆਦਿਮਾਹ.
ਤਤ੍ਥ ਅਮ੍ਬਪਾਨਨ੍ਤਿ ਆਮੇਹਿ ਵਾ ਪਕ੍ਕੇਹਿ ਵਾ ਅਮ੍ਬੇਹਿ ਕਤਪਾਨਂ. ਤਤ੍ਥ ਆਮੇਹਿ ਕਰੋਨ੍ਤੇਨ ਅਮ੍ਬਤਰੁਣਾਨਿ ਭਿਨ੍ਦਿਤ੍ਵਾ ਉਦਕੇ ਪਕ੍ਖਿਪਿਤ੍ਵਾ ਆਤਪੇ ਆਦਿਚ੍ਚਪਾਕੇਨ ਪਚਿਤ੍ਵਾ ਪਰਿਸ੍ਸਾਵੇਤ੍ਵਾ ਤਦਹੁਪਟਿਗ੍ਗਹਿਤੇਹਿ ਮਧੁਸਕ੍ਕਰਕਪ੍ਪੂਰਾਦੀਹਿ ਯੋਜੇਤ੍ਵਾ ਕਾਤਬ੍ਬਂ. ਏਵਂ ਕਤਂ ਪੁਰੇਭਤ੍ਤਮੇਵ ਕਪ੍ਪਤਿ. ਅਨੁਪਸਮ੍ਪਨ੍ਨੇਹਿ ਕਤਂ ਲਭਿਤ੍ਵਾ ਪਨ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਪਰਿਭੋਗੇਨਾਪਿ ਵਟ੍ਟਤਿ, ਪਚ੍ਛਾਭਤ੍ਤਂ ਨਿਰਾਮਿਸਪਰਿਭੋਗੇਨ ਯਾਵ ਅਰੁਣੁਗ੍ਗਮਨਾ ਵਟ੍ਟਤਿਯੇਵ. ਏਸ ਨਯੋ ਸਬ੍ਬਪਾਨੇਸੁ.
ਤੇਸੁ ਪਨ ਜਮ੍ਬੁਪਾਨਨ੍ਤਿ ਜਮ੍ਬੁਫਲੇਹਿ ਕਤਪਾਨਂ. ਚੋਚਪਾਨਨ੍ਤਿ ਅਟ੍ਠਿਕੇਹਿ ਕਦਲਿਫਲੇਹਿ ਕਤਪਾਨਂ. ਮੋਚਪਾਨਨ੍ਤਿ ਅਨਟ੍ਠਿਕੇਹਿ ਕਦਲਿਫਲੇਹਿ ਕਤਪਾਨਂ. ਮਧੁਕਪਾਨਨ੍ਤਿ ਮਧੁਕਾਨਂ ਜਾਤਿਰਸੇਨ ਕਤਪਾਨਂ; ਤਂ ਪਨ ਉਦਕਸਮ੍ਭਿਨ੍ਨਂ ਵਟ੍ਟਤਿ, ਸੁਦ੍ਧਂ ਨ ਵਟ੍ਟਤਿ. ਮੁਦ੍ਦਿਕਪਾਨਨ੍ਤਿ ਮੁਦ੍ਦਿਕਾ ਉਦਕੇ ਮਦ੍ਦਿਤ੍ਵਾ ਅਮ੍ਬਪਾਨਂ ਵਿਯ ਕਤਪਾਨਂ. ਸਾਲੂਕਪਾਨਨ੍ਤਿ ਰਤ੍ਤੁਪ੍ਪਲਨੀਲੁਪ੍ਪਲਾਦੀਨਂ ਸਾਲੂਕੇ ਮਦ੍ਦਿਤ੍ਵਾ ਕਤਪਾਨਂ. ਫਾਰੁਸਕਪਾਨਨ੍ਤਿ ਫਾਰੁਸਕਫਲੇਹਿ ਅਮ੍ਬਪਾਨਂ ਵਿਯ ਕਤਪਾਨਂ. ਇਮਾਨਿ ਅਟ੍ਠ ਪਾਨਾਨਿ ਸੀਤਾਨਿਪਿ ਆਦਿਚ੍ਚਪਾਕਾਨਿਪਿ ਵਟ੍ਟਨ੍ਤਿ, ਅਗ੍ਗਿਪਾਕਾਨਿ ਨ ਵਟ੍ਟਨ੍ਤਿ. ਧਞ੍ਞਫਲਰਸਨ੍ਤਿ ਸਤ੍ਤਨ੍ਨਂ ਧਞ੍ਞਾਨਂ ਫਲਰਸਂ. ਡਾਕਰਸਨ੍ਤਿ ਪਕ੍ਕਡਾਕਰਸਂ. ਯਾਵਕਾਲਿਕਪਤ੍ਤਾਨਞ੍ਹਿ ਪੁਰੇਭਤ੍ਤਂਯੇਵ ਰਸੋ ਕਪ੍ਪਤਿ. ਯਾਵਜੀਵਿਕਾਨਂ ਪਟਿਗ੍ਗਹੇਤ੍ਵਾ ਠਪਿਤਸਪ੍ਪਿਆਦੀਹਿ ਸਦ੍ਧਿਂ ਪਕ੍ਕਾਨਂ ਸਤ੍ਤਾਹਂ ਕਪ੍ਪਤਿ. ਸਚੇ ਪਨ ਸੁਦ੍ਧਉਦਕੇਨ ਪਚਤਿ, ਯਾਵਜੀਵਮ੍ਪਿ ਵਟ੍ਟਤਿ. ਖੀਰਾਦੀਹਿ ਪਨ ਸਦ੍ਧਿਂ ਪਚਿਤੁਂ ਨ ਵਟ੍ਟਤਿ. ਅਞ੍ਞੇਹਿ ਪਕ੍ਕਮ੍ਪਿ ਡਾਕਰਸਸਙ੍ਖ੍ਯਮੇਵ ਗਚ੍ਛਤਿ. ਕੁਰੁਨ੍ਦਿਯਂ ਪਨ ‘‘ਯਾਵਕਾਲਿਕਪਤ੍ਤਾਨਮ੍ਪਿ ਸੀਤੋਦਕੇਨ ਮਦ੍ਦਿਤ੍ਵਾ ਕਤਰਸੋ ਵਾ ਆਦਿਚ੍ਚਪਾਕੋ ਵਾ ਵਟ੍ਟਤੀ’’ਤਿ ਵੁਤ੍ਤਂ. ਠਪੇਤ੍ਵਾ ਮਧੁਕਪੁਪ੍ਫਰਸਨ੍ਤਿ ਏਤ੍ਥ ਮਧੁਕਪੁਪ੍ਫਰਸੋ ਅਗ੍ਗਿਪਾਕੋ ਵਾ ਹੋਤੁ ਆਦਿਚ੍ਚਪਾਕੋ ਵਾ, ਪਚ੍ਛਾਭਤ੍ਤਂ ਨ ਵਟ੍ਟਤਿ. ਪੁਰੇਭਤ੍ਤਮ੍ਪਿ ਯਂ ਪਾਨਂ ਗਹੇਤ੍ਵਾ ਮਜ੍ਜਂ ਕਰੋਨ੍ਤਿ, ਸੋ ਆਦਿਤੋ ਪਟ੍ਠਾਯ ਨ ਵਟ੍ਟਤਿ. ਮਧੁਕਪੁਪ੍ਫਂ ਪਨ ਅਲ੍ਲਂ ਵਾ ਸੁਕ੍ਖਂ ਵਾ ਭਜ੍ਜਿਤਂ ਵਾ ਤੇਨ ਕਤਫਾਣਿਤਂ ਵਾ ਯਤੋ ਪਟ੍ਠਾਯ ਮਜ੍ਜਂ ਨ ਕਰੋਨ੍ਤਿ, ਤਂ ਸਬ੍ਬਂ ਪੁਰੇਭਤ੍ਤਂ ਵਟ੍ਟਤਿ. ਉਚ੍ਛੁਰਸੋ ਨਿਕਸਟੋ ਪਚ੍ਛਾਭਤ੍ਤਂ ਵਟ੍ਟਤਿ. ਇਤਿ ਪਾਨਾਨਿ ਅਨੁਜਾਨਨ੍ਤੇਨ ਇਮੇਪਿ ਚਤ੍ਤਾਰੋ ਰਸਾ ਅਨੁਞ੍ਞਾਤਾਤਿ. ਅਗ੍ਗਿਹੁਤ੍ਤਮੁਖਾ ਯਞ੍ਞਾਤਿਆਦੀਸੁ ਅਗ੍ਗਿਹੁਤਂ ਸੇਟ੍ਠਂ, ਅਗ੍ਗਿਹੁਤਂ ਮੁਖਨ੍ਤਿ ਵੁਤ੍ਤਂ ਹੋਤਿ.
ਰੋਜਮਲ੍ਲਾਦਿਵਤ੍ਥੁਕਥਾ
੩੦੧-੨. ਰੋਜਵਤ੍ਥੁ ਉਤ੍ਤਾਨਤ੍ਥਮੇਵ. ਤਤ੍ਥ ਸਙ੍ਕਰਂ ਅਕਂਸੂਤਿ ਕਤਿਕਂ ਅਕਂਸੁ. ਉਲ਼ਾਰਂ ਖੋ ਤੇ ਇਦਨ੍ਤਿ ਸੁਨ੍ਦਰਂ ਖੋ ਤੇ ਇਦਂ. ਨਾਹਂ ਭਨ੍ਤੇ ਆਨਨ੍ਦ ਬਹੁਕਤੋਤਿ ਨਾਹਂ ਬੁਦ੍ਧਾਦਿਗਤਪਸਾਦਬਹੁਮਾਨੇਨ ਇਧਾਗਤੋਤਿ ਦਸ੍ਸੇਤਿ. ਸਬ੍ਬਞ੍ਚ ਡਾਕਨ੍ਤਿ ਸਪ੍ਪਿਆਦੀਹਿ ਪਕ੍ਕਂ ਵਾ ਅਪਕ੍ਕਂ ਵਾ ਯਂਕਿਞ੍ਚਿ ਡਾਕਂ. ਪਿਟ੍ਠਖਾਦਨੀਯਨ੍ਤਿ ਪਿਟ੍ਠਮਯਂ ਖਾਦਨੀਯਂ; ਰੋਜੋ ਕਿਰ ਇਦਂ ਉਭਯਮ੍ਪਿ ਸਤਸਹਸ੍ਸਂ ਵਯਂ ਕਤ੍ਵਾ ਪਟਿਯਾਦਾਪੇਸਿ.
੩੦੩. ਮਞ੍ਜੁਕਾਤਿ ਮਧੁਰਵਚਨਾ. ਪਟਿਭਾਨੇਯ੍ਯਕਾਤਿ ਸਕੇ ਸਿਪ੍ਪੇ ਪਟਿਭਾਨਸਮ੍ਪਨ੍ਨਾ. ਦਕ੍ਖਾਤਿ ਛੇਕਾ, ਅਨਲਸਾ ਵਾ. ਪਰਿਯੋਦਾਤਸਿਪ੍ਪਾਤਿ ਨਿਦ੍ਦੋਸਸਿਪ੍ਪਾ. ਨਾਲ਼ਿਯਾਵਾਪਕੇਨਾਤਿ ਨਾਲ਼ਿਯਾ ਚ ਆਵਾਪਕੇਨ ਚ. ਆਵਾਪਕੋ ਨਾਮ ਯਤ੍ਥ ਲਦ੍ਧਂ ਲਦ੍ਧਂ ਆਵਪਨ੍ਤਿ, ਪਕ੍ਖਿਪਨ੍ਤੀਤਿ ਵੁਤ੍ਤਂ ਹੋਤਿ. ਨ ਚ ਭਿਕ੍ਖਵੇ ਨਹਾਪਿਤਪੁਬ੍ਬੇਨ ਖੁਰਭਣ੍ਡਨ੍ਤਿ ਏਤ੍ਥ ਗਹੇਤ੍ਵਾ ਪਰਿਹਰਿਤੁਮੇਵ ਨ ਵਟ੍ਟਤਿ, ਅਞ੍ਞਸ੍ਸ ਸਨ੍ਤਕੇਨ ਕੇਸੇ ਛੇਦੇਤੁਂ ਵਟ੍ਟਤਿ. ਸਚੇ ਵੇਤਨਂ ਗਹੇਤ੍ਵਾ ਛਿਨ੍ਦਤਿ, ਨ ਵਟ੍ਟਤਿ. ਯੋ ਅਨਹਾਪਿਤਪੁਬ੍ਬੋ ਤਸ੍ਸ ਪਰਿਹਰਿਤੁਮ੍ਪਿ ਵਟ੍ਟਤਿ, ਤਂ ਵਾ ਅਞ੍ਞਂ ਵਾ ਗਹੇਤ੍ਵਾ ਕੇਸੇ ਛੇਦੇਤੁਮ੍ਪਿ ਵਟ੍ਟਤਿ.
੩੦੪. ਭਾਗਂ ਦਤ੍ਵਾਤਿ ਦਸਮਭਾਗਂ ਦਤ੍ਵਾ; ਇਦਂ ਕਿਰ ਜਮ੍ਬੁਦੀਪੇ ਪੋਰਾਣਕਚਾਰਿਤ੍ਤਂ, ਤਸ੍ਮਾ ਦਸਕੋਟ੍ਠਾਸੇ ਕਤ੍ਵਾ ਏਕੋ ਕੋਟ੍ਠਾਸੋ ਭੂਮਿਸਾਮਿਕਾਨਂ ਦਾਤਬ੍ਬੋ.
ਚਤੁਮਹਾਪਦੇਸਕਥਾ
੩੦੫. ਯਂ ਭਿਕ੍ਖਵੇ ਮਯਾ ਇਦਂ ਨ ਕਪ੍ਪਤੀਤਿ ਇਮੇ ਚਤ੍ਤਾਰੋ ਮਹਾਪਦੇਸੇ ਭਗਵਾ ਭਿਕ੍ਖੂਨਂ ਨਯਗ੍ਗਹਣਤ੍ਥਾਯ ਆਹ. ਤਤ੍ਥ ਧਮ੍ਮਸਙ੍ਗਾਹਕਤ੍ਥੇਰਾ ਸੁਤ੍ਤਂ ਗਹੇਤ੍ਵਾ ਪਰਿਮਦ੍ਦਨ੍ਤਾ ਇਦਂ ਅਦ੍ਦਸਂਸੁ. ਠਪੇਤ੍ਵਾ ਧਞ੍ਞਫਲਰਸਨ੍ਤਿ ਸਤ੍ਤਧਞ੍ਞਰਸਾਨਿ ਪਚ੍ਛਾਭਤ੍ਤਂ ਨ ਕਪ੍ਪਨ੍ਤੀਤਿ ਪਟਿਕ੍ਖਿਤ੍ਤਾਨਿ. ਤਾਲਨਾਲ਼ਿਕੇਰਪਨਸਲਬੁਜਅਲਾਬੁਕੁਮ੍ਭਣ੍ਡਪੁਸ੍ਸਫਲਤਿਪੁਸਫਲਏਲ਼ਾਲੁਕਾਨਿ, ਨਵ ਮਹਾਫਲਾਨਿ ਸਬ੍ਬਞ੍ਚ ਅਪਰਣ੍ਣਂ, ਧਞ੍ਞਗਤਿਕਮੇਵ. ਤਂ ਕਿਞ੍ਚਾਪਿ ਨ ਪਟਿਕ੍ਖਿਤ੍ਤਂ, ਅਥ ਖੋ ਅਕਪ੍ਪਿਯਂ ਅਨੁਲੋਮੇਤਿ, ਤਸ੍ਮਾ ਪਚ੍ਛਾਭਤ੍ਤਂ ਨ ਕਪ੍ਪਤਿ. ਅਟ੍ਠ ਪਾਨਾਨਿ ਅਨੁਞ੍ਞਾਤਾਨਿ. ਅਵਸੇਸਾਨਿ ਵੇਤ੍ਤਤਿਨ੍ਤਿਣਿਕਮਾਤੁਲੁਙ੍ਗਕਪਿਤ੍ਥਕੋਸਮ੍ਬਕਰਮਨ੍ਦਾਦਿਖੁਦ੍ਦਕਫਲਪਾਨਾਨਿ ਅਟ੍ਠਪਾਨਗਤਿਕਾਨੇਵ, ਤਾਨਿ ਕਿਞ੍ਚਾਪਿ ਨ ਅਨੁਞ੍ਞਾਤਾਨਿ, ਅਥ ਖੋ ਕਪ੍ਪਿਯਂ ਅਨੁਲੋਮੇਨ੍ਤਿ, ਤਸ੍ਮਾ ਕਪ੍ਪਨ੍ਤਿ. ਠਪੇਤ੍ਵਾ ਹਿ ਸਾਨੁਲੋਮਂ ਧਞ੍ਞਫਲਰਸਂ ਅਞ੍ਞਂ ਫਲਪਾਨਂ ਨਾਮ ਅਕਪ੍ਪਿਯਂ ਨਤ੍ਥਿ, ਸਬ੍ਬਂ ਯਾਮਕਾਲਿਕਂਯੇਵਾਤਿ ਕੁਰੁਨ੍ਦਿਯਂ ਵੁਤ੍ਤਂ.
ਭਗਵਤਾ ਛ ਚੀਵਰਾਨਿ ਅਨੁਞ੍ਞਾਤਾਨਿ. ਧਮ੍ਮਸਙ੍ਗਾਹਕਤ੍ਥੇਰੇਹਿ ਤੇਸਂ ਅਨੁਲੋਮਾਨਿ ਦੁਕੂਲਂ, ਪਤ੍ਤੁਣ੍ਣਂ, ਚੀਨਪਟ੍ਟਂ, ਸੋਮਾਰਪਟ੍ਟਂ, ਇਦ੍ਧਿਮਯਿਕਂ, ਦੇਵਦਤ੍ਤਿਯਨ੍ਤਿ ਅਪਰਾਨਿ ਛ ਅਨੁਞ੍ਞਾਤਾਨਿ. ਤਤ੍ਥ ‘‘ਪਤ੍ਤੁਣ੍ਣ’’ਨ੍ਤਿ ਪਤ੍ਤੁਣ੍ਣਦੇਸੇ ਪਾਣਕੇਹਿ ਸਞ੍ਜਾਤਵਤ੍ਥਂ. ਦ੍ਵੇ ਪਟਾ ਦੇਸਨਾਮੇਨੇਵ ਵੁਤ੍ਤਾ. ਤਾਨਿ ਤੀਣਿ ਕੋਸੇਯ੍ਯਸ੍ਸਾਨੁਲੋਮਾਨਿ. ਦੁਕੂਲਂ ਸਾਣਸ੍ਸ, ਇਤਰਾਨਿ ਦ੍ਵੇ ਕਪ੍ਪਾਸਿਕਸ੍ਸ ਵਾ ਸਬ੍ਬੇਸਂ ਵਾ.
ਭਗਵਤਾ ਏਕਾਦਸ ਪਤ੍ਤੇ ਪਟਿਕ੍ਖਿਪਿਤ੍ਵਾ ਦ੍ਵੇ ਪਤ੍ਤਾ ਅਨੁਞ੍ਞਾਤਾ – ਲੋਹਪਤ੍ਤੋ ਚੇਵ ਮਤ੍ਤਿਕਾਪਤ੍ਤੋ ਚ. ਲੋਹਥਾਲਕਂ, ਮਤ੍ਤਿਕਾਥਾਲਕਂ, ਤਮ੍ਬਲੋਹਥਾਲਕਨ੍ਤਿ ਤੇਸਂਯੇਵ ਅਨੁਲੋਮਾਨਿ. ਭਗਵਤਾ ਤਯੋ ਤੁਮ੍ਬਾ ਅਨੁਞ੍ਞਾਤਾ – ਲੋਹਤੁਮ੍ਬੋ, ਕਟ੍ਠਤੁਮ੍ਬੋ, ਫਲਤੁਮ੍ਬੋਤਿ. ਕੁਣ੍ਡਿਕਾ, ਕਞ੍ਚਨਕੋ, ਉਦਕਤੁਮ੍ਬੋਤਿ ਤੇਸਂਯੇਵ ਅਨੁਲੋਮਾਨਿ. ਕੁਰੁਨ੍ਦਿਯਂ ਪਨ ‘‘ਪਾਨੀਯਸਙ੍ਖਪਾਨੀਯਸਰਾਵਕਾਨਿ ਏਤੇਸਂ ਅਨੁਲੋਮਾਨੀ’’ਤਿ ਵੁਤ੍ਤਂ. ਪਟ੍ਟਿਕਾ, ਸੂਕਰਨ੍ਤਨ੍ਤਿ ਦ੍ਵੇ ਕਾਯਬਨ੍ਧਨਾਨਿ ਅਨੁਞ੍ਞਾਤਾਨਿ, ਦੁਸ੍ਸਪਟ੍ਟੇਨ ਰਜ੍ਜੁਕੇਨ ਚ ਕਤਕਾਯਬਨ੍ਧਨਾਨਿ ਤੇਸਂ ਅਨੁਲੋਮਾਨਿ. ਸੇਤਚ੍ਛਤ੍ਤਂ, ਕਿਲਞ੍ਜਚ੍ਛਤ੍ਤਂ, ਪਣ੍ਣਚ੍ਛਤ੍ਤਨ੍ਤਿ ਤੀਣਿ ਛਤ੍ਤਾਨਿ ਅਨੁਞ੍ਞਾਤਾਨਿ. ਏਕਪਣ੍ਣਚ੍ਛਤ੍ਤਂ ਤੇਸਂਯੇਵ ਅਨੁਲੋਮਨ੍ਤਿ ਇਮਿਨਾ ਨਯੇਨ ਪਾਲ਼ਿਞ੍ਚ ਅਟ੍ਠਕਥਞ੍ਚ ਅਨੁਪੇਕ੍ਖਿਤ੍ਵਾ ਅਞ੍ਞਾਨਿਪਿ ਕਪ੍ਪਿਯਾਕਪ੍ਪਿਯਾਨਂ ਅਨੁਲੋਮਾਨਿ ਵੇਦਿਤਬ੍ਬਾਨਿ.
ਤਦਹੁਪਟਿਗ੍ਗਹਿਤਂ ਕਾਲੇ ਕਪ੍ਪਤੀਤਿਆਦਿ ਸਬ੍ਬਂ ਸਮ੍ਭਿਨ੍ਨਰਸਂ ਸਨ੍ਧਾਯ ਵੁਤ੍ਤਂ. ਸਚੇ ਹਿ ਛਲ੍ਲਿਮ੍ਪਿ ਅਨਪਨੇਤ੍ਵਾ ਸਕਲੇਨੇਵ ਨਾਲ਼ਿਕੇਰਫਲੇਨ ਸਦ੍ਧਿਂ ਪਾਨਕਂ ਪਟਿਗ੍ਗਹਿਤਂ ਹੋਤਿ, ਨਾਲ਼ਿਕੇਰਂ ਅਪਨੇਤ੍ਵਾ ਤਂ ਵਿਕਾਲੇਪਿ ਕਪ੍ਪਤਿ. ਉਪਰਿ ਸਪ੍ਪਿਪਿਣ੍ਡਂ ਠਪੇਤ੍ਵਾ ਸੀਤਲਪਾਯਾਸਂ ਦੇਨ੍ਤਿ, ਯਂ ਪਾਯਾਸੇਨ ਅਸਂਸਟ੍ਠਂ ਸਪ੍ਪਿ, ਤਂ ਅਪਨੇਤ੍ਵਾ ਸਤ੍ਤਾਹਂ ਪਰਿਭੁਞ੍ਜਿਤੁਂ ਵਟ੍ਟਤਿ. ਬਦ੍ਧਮਧੁਫਾਣਿਤਾਦੀਸੁਪਿ ਏਸੇਵ ਨਯੋ. ਤਕ੍ਕੋਲਜਾਤਿਫਲਾਦੀਹਿ ਅਲਙ੍ਕਰਿਤ੍ਵਾ ਪਿਣ੍ਡਪਾਤਂ ਦੇਨ੍ਤਿ, ਤਾਨਿ ਉਦ੍ਧਰਿਤ੍ਵਾ ਧੋਵਿਤ੍ਵਾ ਯਾਵਜੀਵਂ ਪਰਿਭੁਞ੍ਜਿਤਬ੍ਬਾਨਿ. ਯਾਗੁਯਂ ਪਕ੍ਖਿਪਿਤ੍ਵਾ ਦਿਨ੍ਨਸਿਙ੍ਗਿਵੇਰਾਦੀਸੁਪਿ ਤੇਲਾਦੀਸੁ ਪਕ੍ਖਿਪਿਤ੍ਵਾ ਦਿਨ੍ਨਲਟ੍ਠਿਮਧੁਕਾਦੀਸੁਪਿ ਏਸੇਵ ਨਯੋ. ਏਵਂ ਯਂ ਯਂ ਅਸਮ੍ਭਿਨ੍ਨਰਸਂ ਹੋਤਿ, ਤਂ ਤਂ ਏਕਤੋ ਪਟਿਗ੍ਗਹਿਤਮ੍ਪਿ ਯਥਾ ਸੁਦ੍ਧਂ ਹੋਤਿ, ਤਥਾ ਧੋਵਿਤ੍ਵਾ ਵਾ ਤਚ੍ਛੇਤ੍ਵਾ ਵਾ ਤਸ੍ਸ ਤਸ੍ਸ ਕਾਲਵਸੇਨ ਪਰਿਭੁਞ੍ਜਿਤੁਂ ਵਟ੍ਟਤਿ.
ਸਚੇ ਪਨ ਸਮ੍ਭਿਨ੍ਨਰਸਂ ਹੋਤਿ ਸਂਸਟ੍ਠਂ, ਨ ਵਟ੍ਟਤਿ. ਯਾਵਕਾਲਿਕਞ੍ਹਿ ਅਤ੍ਤਨਾ ਸਦ੍ਧਿਂ ਸਮ੍ਭਿਨ੍ਨਰਸਾਨਿ ਤੀਣਿਪਿ ਯਾਮਕਾਲਿਕਾਦੀਨਿ ਅਤ੍ਤਨੋ ਸਭਾਵਂ ਉਪਨੇਤਿ, ਯਾਮਕਾਲਿਕਂ ਦ੍ਵੇਪਿ ਸਤ੍ਤਾਹਕਾਲਿਕਾਦੀਨਿ ਅਤ੍ਤਨੋ ਸਭਾਵਂ ਉਪਨੇਤਿ, ਸਤ੍ਤਾਹਕਾਲਿਕਮ੍ਪਿ ਅਤ੍ਤਨਾ ਸਦ੍ਧਿਂ ਸਂਸਟ੍ਠਂ ਯਾਵਜੀਵਿਕਂ ਅਤ੍ਤਨੋ ਸਭਾਵਞ੍ਞੇਵ ਉਪਨੇਤਿ; ਤਸ੍ਮਾ ਤੇਨ ਤਦਹੁਪਟਿਗ੍ਗਹਿਤੇਨ ਸਦ੍ਧਿਂ ਤਦਹੁਪਟਿਗ੍ਗਹਿਤਂ ਵਾ ਪੁਰੇਪਟਿਗ੍ਗਹਿਤਂ ਵਾ ਯਾਵਜੀਵਿਕਂ ਸਤ੍ਤਾਹਂ ਕਪ੍ਪਤਿ ਦ੍ਵੀਹਪਟਿਗ੍ਗਹਿਤੇਨ ਛਾਹਂ, ਤੀਹਪਟਿਗ੍ਗਹਿਤੇਨ ਪਞ੍ਚਾਹਂ…ਪੇ… ਸਤ੍ਤਾਹਪਟਿਗ੍ਗਹਿਤੇਨ ਤਦਹੇਵ ਕਪ੍ਪਤੀਤਿ ਵੇਦਿਤਬ੍ਬਂ. ਤਸ੍ਮਾਯੇਵ ਹਿ ‘‘ਸਤ੍ਤਾਹਕਾਲਿਕੇਨ ਭਿਕ੍ਖਵੇ ਯਾਵਜੀਵਿਕਂ ਤਦਹੁਪਟਿਗ੍ਗਹਿਤ’’ਨ੍ਤਿ ਅਵਤ੍ਵਾ ‘‘ਪਟਿਗ੍ਗਹਿਤਂ ਸਤ੍ਤਾਹਂ ਕਪ੍ਪਤੀ’’ਤਿ ਵੁਤ੍ਤਂ.
ਕਾਲਯਾਮਸਤ੍ਤਾਹਾਤਿਕ੍ਕਮੇਸੁ ਚੇਤ੍ਥ ਵਿਕਾਲਭੋਜਨਸਨ੍ਨਿਧਿਭੇਸਜ੍ਜਸਿਕ੍ਖਾਪਦਾਨਂ ਵਸੇਨ ਆਪਤ੍ਤਿਯੋ ਵੇਦਿਤਬ੍ਬਾ. ਇਮੇਸੁ ਚ ਪਨ ਚਤੂਸੁ ਕਾਲਿਕੇਸੁ ਯਾਵਕਾਲਿਕਂ ਯਾਮਕਾਲਿਕਨ੍ਤਿ ਇਦਮੇਵ ਦ੍ਵਯਂ ਅਨ੍ਤੋਵੁਤ੍ਥਕਞ੍ਚੇਵ ਸਨ੍ਨਿਧਿਕਾਰਕਞ੍ਚ ਹੋਤਿ, ਸਤ੍ਤਾਹਕਾਲਿਕਞ੍ਚ ਯਾਵਜੀਵਿਕਞ੍ਚ ਅਕਪ੍ਪਿਯਕੁਟਿਯਂ ਨਿਕ੍ਖਿਪਿਤੁਮ੍ਪਿ ਵਟ੍ਟਤਿ, ਸਨ੍ਨਿਧਿਮ੍ਪਿ ਨ ਜਨੇਤੀਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਭੇਸਜ੍ਜਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.