੫. ਚਮ੍ਮਕ੍ਖਨ੍ਧਕਂ

ਸੋਣਕੋਲ਼ਿਵਿਸਵਤ੍ਥੁਕਥਾ

੨੪੨. ਚਮ੍ਮਕ੍ਖਨ੍ਧਕੇ – ਇਸ੍ਸਰਿਯਾਧਿਪਚ੍ਚਨ੍ਤਿ ਇਸ੍ਸਰਭਾਵੇਨ ਚ ਅਧਿਪਤਿਭਾਵੇਨ ਚ ਸਮਨ੍ਨਾਗਤਂ. ਰਜ੍ਜਨ੍ਤਿ ਰਾਜਭਾਵਂ, ਰਞ੍ਞਾ ਕਤ੍ਤਬ੍ਬਕਿਚ੍ਚਂ ਵਾ. ਸੋਣੋ ਨਾਮ ਕੋਲ਼ਿਵਿਸੋਤਿ ਏਤ੍ਥ ਸੋਣੋਤਿ ਤਸ੍ਸ ਨਾਮਂ; ਕੋਲ਼ਿਵਿਸੋਤਿ ਗੋਤ੍ਤਂ. ਪਾਦਤਲੇਸੁ ਲੋਮਾਨੀਤਿ ਰਤ੍ਤੇਸੁ ਪਾਦਤਲੇਸੁ ਸੁਖੁਮਾਨਿ ਅਞ੍ਜਨਵਣ੍ਣਾਨਿ ਕਮ੍ਮਚਿਤ੍ਤੀਕਤਾਨਿ ਲੋਮਾਨਿ ਜਾਤਾਨਿ ਹੋਨ੍ਤਿ. ਸੋ ਕਿਰ ਪੁਬ੍ਬੇ ਅਸੀਤਿਸਹਸ੍ਸਾਨਂ ਪੁਰਿਸਾਨਂ ਜੇਟ੍ਠਪੁਰਿਸੋ ਹੁਤ੍ਵਾ ਤੇਹਿ ਸਦ੍ਧਿਂ ਪਚ੍ਚੇਕਬੁਦ੍ਧਸ੍ਸ ਵਸਨਟ੍ਠਾਨੇ ਪਣ੍ਣਸਾਲਂ ਕਤ੍ਵਾ ਅਤ੍ਤਨੋ ਸਸ੍ਸਿਰਿਕਂ ਉਣ੍ਣਪਾਵਾਰਕਂ ਪਚ੍ਚੇਕਬੁਦ੍ਧਸ੍ਸ ਪਾਦੇਹਿ ਅਕ੍ਕਮਨਟ੍ਠਾਨੇ ਪਾਦਪੁਞ੍ਛਨਿਕਂ ਕਤ੍ਵਾ ਠਪੇਸਿ. ਤੇਮਾਸਂ ਪਨ ਸਬ੍ਬੇਵ ਪਚ੍ਚੇਕਬੁਦ੍ਧਂ ਉਪਟ੍ਠਹਿਂਸੁ. ਅਯਂ ਤਸ੍ਸ ਚ ਤੇਸਞ੍ਚ ਅਸੀਤਿਯਾ ਗਾਮਿਕਸਹਸ੍ਸਾਨਂ ਪੁਬ੍ਬਯੋਗੋ.

ਅਸੀਤਿਗਾਮਿਕਸਹਸ੍ਸਾਨੀਤਿ ਤੇਸੁ ਗਾਮੇਸੁ ਵਸਨ੍ਤਾਨਂ ਕੁਲਪੁਤ੍ਤਾਨਂ ਅਸੀਤਿਸਹਸ੍ਸਾਨਿ. ਕੇਨਚਿਦੇਵ ਕਰਣੀਯੇਨਾਤਿ ਕੇਨਚਿ ਕਰਣੀਯੇਨ ਵਿਯ; ਨ ਪਨਸ੍ਸ ਕਿਞ੍ਚਿ ਕਰਣੀਯਂ ਅਤ੍ਥਿ ਅਞ੍ਞਤ੍ਰ ਤਸ੍ਸ ਦਸ੍ਸਨਾ. ਰਾਜਾ ਕਿਰ ਤਾਨਿਪਿ ਅਸੀਤਿਕੁਲਪੁਤ੍ਤਸਹਸ੍ਸਾਨਿ ਸਨ੍ਨਿਪਾਤਾਪੇਨ੍ਤੋ ‘‘ਏਵਂ ਅਪਰਿਸਙ੍ਕਨ੍ਤੋ ਸੋਣੋ ਆਗਮਿਸ੍ਸਤੀ’’ਤਿ ਸਨ੍ਨਿਪਾਤਾਪੇਸਿ. ਦਿਟ੍ਠਧਮ੍ਮਿਕੇ ਅਤ੍ਥੇਤਿ ‘‘ਕਸਿਵਣਿਜ੍ਜਾਦੀਨਿ ਧਮ੍ਮੇਨ ਕਤ੍ਤਬ੍ਬਾਨਿ, ਮਾਤਾਪਿਤਰੋ ਧਮ੍ਮੇਨ ਪੋਸਿਤਬ੍ਬਾ’’ਤਿ ਏਵਮਾਦਿਨਾ ਨਯੇਨ ਇਧਲੋਕਹਿਤੇ ਅਤ੍ਥੇ ਅਨੁਸਾਸਿਤ੍ਵਾ. ਸੋ ਨੋ ਭਗਵਾਤਿ ਸੋ ਅਮ੍ਹਾਕਂ ਭਗਵਾ ਤੁਮ੍ਹੇ ਸਮ੍ਪਰਾਯਿਕੇ ਅਤ੍ਥੇ ਅਨੁਸਾਸਿਸ੍ਸਤੀਤਿ ਅਤ੍ਥੋ.

ਭਗਵਨ੍ਤਂ ਪਟਿਵੇਦੇਮੀਤਿ ਭਗਵਨ੍ਤਂ ਜਾਨਾਪੇਮਿ. ਪਾਟਿਕਾਯ ਨਿਮੁਜ੍ਜਿਤ੍ਵਾਤਿ ਸੋਪਾਨਸ੍ਸ ਹੇਟ੍ਠਾ ਅਡ੍ਢਚਨ੍ਦਪਾਸਾਣੇ ਨਿਮੁਜ੍ਜਿਤ੍ਵਾ. ਯਸ੍ਸ ਦਾਨਿ ਭਨ੍ਤੇ ਭਗਵਾ ਕਾਲਂ ਮਞ੍ਞਤੀਤਿ ਯਸ੍ਸ ਤੇਸਂ ਹਿਤਕਿਰਿਯਤ੍ਥਸ੍ਸ ਭਗਵਾ ਕਾਲਂ ਜਾਨਾਤਿ. ਵਿਹਾਰਪਚ੍ਛਾਯਾਯਨ੍ਤਿ ਵਿਹਾਰਪਚ੍ਚਨ੍ਤੇ ਛਾਯਾਯਂ. ਸਮਨ੍ਨਾਹਰਨ੍ਤੀਤਿ ਪਸਾਦਵਸੇਨ ਪੁਨਪ੍ਪੁਨਂ ਮਨਸਿ ਕਰੋਨ੍ਤਿ. ਭਿਯ੍ਯੋਸੋਮਤ੍ਤਾਯਾਤਿ ਭਿਯ੍ਯੋਸੋਮਤ੍ਤਾਯ ਪੁਨ ਵਿਸਿਟ੍ਠਤਰਂ ਦਸ੍ਸੇਹੀਤਿ ਅਤ੍ਥੋ. ਅਨ੍ਤਰਧਾਯਤੀਤਿ ਅਦਸ੍ਸਨਂ ਹੋਤਿ.

ਸੋਣਸ੍ਸ ਪਬ੍ਬਜ੍ਜਾਕਥਾ

੨੪੩. ਲੋਹਿਤੇਨ ਫੁਟੋ ਹੋਤੀਤਿ ਲੋਹਿਤੇਨ ਮਕ੍ਖਿਤੋ ਹੋਤਿ. ਗਵਾਘਾਤਨਨ੍ਤਿ ਯਤ੍ਥ ਗਾਵੋ ਹਞ੍ਞਨ੍ਤਿ, ਤਾਦਿਸੋਤਿ ਅਤ੍ਥੋ. ਕੁਸਲੋ ਨਾਮ ਵੀਣਾਯ ਵਾਦਨਕੁਸਲੋ. ਵੀਣਾਯ ਤਨ੍ਤਿਸ੍ਸਰੇਤਿ ਵੀਣਾਯ ਤਨ੍ਤਿਯਾ ਸਰੇ. ਅਚ੍ਚਾਯਤਾਤਿ ਅਤਿਆਯਤਾ ਖਰਮੁਚ੍ਛਿਤਾ. ਸਰਵਤੀਤਿ ਸਰਸਮ੍ਪਨ੍ਨਾ. ਕਮ੍ਮਞ੍ਞਾਤਿ ਕਮ੍ਮਕ੍ਖਮਾ. ਅਤਿਸਿਥਿਲਾਤਿ ਮਨ੍ਦਮੁਚ੍ਛਨਾ. ਸਮੇ ਗੁਣੇ ਪਤਿਟ੍ਠਿਤਾਤਿ ਮਜ੍ਝਿਮੇ ਸਰੇ ਠਪੇਤ੍ਵਾ ਮੁਚ੍ਛਿਤਾ. ਵੀਰਿਯਸਮਤਂ ਅਧਿਟ੍ਠਹਾਤਿ ਵੀਰਿਯਸਮ੍ਪਯੁਤ੍ਤਸਮਤਂ ਅਧਿਟ੍ਠਾਹਿ, ਵੀਰਿਯਂ ਸਮਥੇਨ ਯੋਜੇਹੀਤਿ ਅਤ੍ਥੋ. ਇਨ੍ਦ੍ਰਿਯਾਨਞ੍ਚ ਸਮਤਂ ਪਟਿਵਿਜ੍ਝਾਤਿ ਸਦ੍ਧਾਦੀਨਂ ਇਨ੍ਦ੍ਰਿਯਾਨਂ ਸਮਤਂ ਸਮਭਾਵਂ. ਤਤ੍ਥ ਸਦ੍ਧਂ ਪਞ੍ਞਾਯ, ਪਞ੍ਞਞ੍ਚ ਸਦ੍ਧਾਯ, ਵੀਰਿਯਂ ਸਮਾਧਿਨਾ, ਸਮਾਧਿਞ੍ਚ ਵੀਰਿਯੇਨ ਯੋਜਯਮਾਨੋ ਇਨ੍ਦ੍ਰਿਯਾਨਂ ਸਮਤਂ ਪਟਿਵਿਜ੍ਝ. ਤਤ੍ਥ ਚ ਨਿਮਿਤ੍ਤਂ ਗਣ੍ਹਾਹੀਤਿ ਤਸ੍ਮਿਂ ਸਮਥੇ ਸਤਿ, ਯੇਨ ਆਦਾਸੇ ਮੁਖਬਿਮ੍ਬੇਨੇਵ ਨਿਮਿਤ੍ਤੇਨ ਉਪ੍ਪਜ੍ਜਿਤਬ੍ਬਂ, ਤਂ ਸਮਥਨਿਮਿਤ੍ਤਂ ਵਿਪਸ੍ਸਨਾਨਿਮਿਤ੍ਤਂ ਮਗ੍ਗਨਿਮਿਤ੍ਤਂ ਫਲਨਿਮਿਤ੍ਤਞ੍ਚ ਗਣ੍ਹਾਹਿ, ਨਿਬ੍ਬਤ੍ਤੇਹੀਤਿ ਅਤ੍ਥੋ.

੨੪੪. ਅਞ੍ਞਂ ਬ੍ਯਾਕਰੇਯ੍ਯਨ੍ਤਿ ਅਰਹਾ ਅਹਨ੍ਤਿ ਜਾਨਾਪੇਯ੍ਯਂ. ਛ ਠਾਨਾਨੀਤਿ ਛ ਕਾਰਣਾਨਿ. ਅਧਿਮੁਤ੍ਤੋ ਹੋਤੀਤਿ ਪਟਿਵਿਜ੍ਝਿਤ੍ਵਾ ਪਚ੍ਚਕ੍ਖਂ ਕਤ੍ਵਾ ਠਿਤੋ ਹੋਤਿ. ਨੇਕ੍ਖਮ੍ਮਾਧਿਮੁਤ੍ਤੋਤਿਆਦਿ ਸਬ੍ਬਂ ਅਰਹਤ੍ਤਵਸੇਨ ਵੁਤ੍ਤਂ. ਅਰਹਤ੍ਤਞ੍ਹਿ ਸਬ੍ਬਕਿਲੇਸੇਹਿ ਨਿਕ੍ਖਨ੍ਤਤ੍ਤਾ ਨੇਕ੍ਖਮ੍ਮਂ, ਤੇਹੇਵ ਪਵਿਵਿਤ੍ਤਤ੍ਤਾ ਪਵਿਵੇਕੋ, ਬ੍ਯਾਪਜ੍ਜਾਭਾਵਤੋ ਅਬ੍ਯਾਪਜ੍ਜਂ, ਉਪਾਦਾਨਸ੍ਸ ਖਯਨ੍ਤੇ ਉਪ੍ਪਨ੍ਨਤ੍ਤਾ ਉਪਾਦਾਨਕ੍ਖਯੋ, ਤਣ੍ਹਾਕ੍ਖਯਨ੍ਤੇ ਉਪ੍ਪਨ੍ਨਤ੍ਤਾ ਤਣ੍ਹਕ੍ਖਯੋ, ਸਮ੍ਮੋਹਾਭਾਵਤੋ ਅਸਮ੍ਮੋਹੋਤਿ ਚ ਵੁਚ੍ਚਤਿ.

ਕੇਵਲਂ ਸਦ੍ਧਾਮਤ੍ਤਕਨ੍ਤਿ ਪਟਿਵੇਧਰਹਿਤਂ ਕੇਵਲਂ ਪਟਿਵੇਧਪਞ੍ਞਾਯ ਅਸਮ੍ਮਿਸ੍ਸਂ ਸਦ੍ਧਾਮਤ੍ਤਕਂ. ਪਟਿਚਯਨ੍ਤਿ ਪੁਨਪ੍ਪੁਨਂ ਕਰਣੇਨ ਵੁਡ੍ਢਿਂ. ਵੀਤਰਾਗਤ੍ਤਾਤਿ ਮਗ੍ਗਪ੍ਪਟਿਵੇਧੇਨ ਰਾਗਸ੍ਸ ਵਿਗਤਤ੍ਤਾਯੇਵ ਨੇਕ੍ਖਮ੍ਮਸਙ੍ਖਾਤਂ ਅਰਹਤ੍ਤਂ ਪਟਿਵਿਜ੍ਝਿਤ੍ਵਾ ਠਿਤੋ ਹੋਤਿ. ਫਲਸਮਾਪਤ੍ਤਿਵਿਹਾਰੇਨੇਵ ਵਿਹਰਤਿ, ਤਨ੍ਨਿਨ੍ਨਮਾਨਸੋਯੇਵ ਹੋਤੀਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ.

ਲਾਭਸਕ੍ਕਾਰਸਿਲੋਕਨ੍ਤਿ ਚਤੁਪਚ੍ਚਯਲਾਭਞ੍ਚ ਤੇਸਂਯੇਵ ਸੁਕਤਭਾਵਞ੍ਚ ਵਣ੍ਣਭਣਨਞ੍ਚ. ਨਿਕਾਮਯਮਾਨੋਤਿ ਇਚ੍ਛਮਾਨੋ ਪਤ੍ਥਯਮਾਨੋ. ਪਵਿਵੇਕਾਧਿਮੁਤ੍ਤੋਤਿ ਵਿਵੇਕੇ ਅਧਿਮੁਤ੍ਤੋ ਅਹਨ੍ਤਿ ਏਵਂ ਅਰਹਤ੍ਤਂ ਬ੍ਯਾਕਰੋਤੀਤਿ ਅਤ੍ਥੋ.

ਸੀਲਬ੍ਬਤਪਰਾਮਾਸਨ੍ਤਿ ਸੀਲਞ੍ਚ ਵਤਞ੍ਚ ਪਰਾਮਸਿਤ੍ਵਾ ਗਹਿਤਗਹਣਮਤ੍ਤਂ. ਸਾਰਤੋ ਪਚ੍ਚਾਗਚ੍ਛਨ੍ਤੋਤਿ ਸਾਰਭਾਵੇਨ ਜਾਨਨ੍ਤੋ. ਅਬ੍ਯਾਪਜ੍ਜਾਧਿਮੁਤ੍ਤੋਤਿ ਅਬ੍ਯਾਪਜ੍ਜਂ ਅਰਹਤ੍ਤਂ ਬ੍ਯਾਕਰੋਤੀਤਿ ਅਤ੍ਥੋ. ਇਮਿਨਾਵ ਨਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ.

ਭੁਸਾਤਿ ਬਲਵਨ੍ਤੋ. ਨੇਵਸ੍ਸ ਚਿਤ੍ਤਂ ਪਰਿਯਾਦਿਯਨ੍ਤੀਤਿ ਏਤਸ੍ਸ ਖੀਣਾਸਵਸ੍ਸ ਚਿਤ੍ਤਂ ਗਹੇਤ੍ਵਾ ਠਾਤੁਂ ਨ ਸਕ੍ਕੋਨ੍ਤਿ. ਅਮਿਸ੍ਸੀਕਤਨ੍ਤਿ ਅਮਿਸ੍ਸਕਤਂ. ਕਿਲੇਸਾਹਿ ਆਰਮ੍ਮਣੇਨ ਸਦ੍ਧਿਂ ਚਿਤ੍ਤਂ ਮਿਸ੍ਸਂ ਕਰੋਨ੍ਤਿ, ਤੇਸਂ ਅਭਾਵਾ ਅਮਿਸ੍ਸੀਕਤਂ. ਠਿਤਨ੍ਤਿ ਪਤਿਟ੍ਠਿਤਂ. ਆਨੇਞ੍ਜਪ੍ਪਤ੍ਤਨ੍ਤਿ ਅਚਲਨਪ੍ਪਤ੍ਤਂ. ਵਯਞ੍ਚਸ੍ਸਾਨੁਪਸ੍ਸਤੀਤਿ ਤਸ੍ਸ ਚਿਤ੍ਤਸ੍ਸ ਉਪ੍ਪਾਦਮ੍ਪਿ ਵਯਮ੍ਪਿ ਪਸ੍ਸਤਿ.

ਨੇਕ੍ਖਮ੍ਮਂ ਅਧਿਮੁਤ੍ਤਸ੍ਸਾਤਿ ਅਰਹਤ੍ਤਂ ਪਟਿਵਿਜ੍ਝਿਤ੍ਵਾ ਠਿਤਸ੍ਸ. ਸੇਸਪਦੇਹਿਪਿ ਅਰਹਤ੍ਤਮੇਵ ਕਥਿਤਂ. ਉਪਾਦਾਨਕ੍ਖਯਸ੍ਸਾਤਿ ਉਪਯੋਗਤ੍ਥੇ ਸਾਮਿਵਚਨਂ. ਅਸਮ੍ਮੋਹਞ੍ਚ ਚੇਤਸੋਤਿ ਚਿਤ੍ਤਸ੍ਸ ਚ ਅਸਮ੍ਮੋਹਂ ਅਧਿਮੁਤ੍ਤਸ੍ਸ. ਦਿਸ੍ਵਾ ਆਯਤਨੁਪ੍ਪਾਦਨ੍ਤਿ ਆਯਤਨਾਨਂ ਉਪ੍ਪਾਦਞ੍ਚ ਵਯਞ੍ਚ ਦਿਸ੍ਵਾ. ਸਮ੍ਮਾ ਚਿਤ੍ਤਂ ਵਿਮੁਚ੍ਚਤੀਤਿ ਸਮ੍ਮਾ ਹੇਤੁਨਾ ਨਯੇਨ ਇਮਾਯ ਵਿਪਸ੍ਸਨਾਯ ਪਟਿਪਤ੍ਤਿਯਾ ਫਲਸਮਾਪਤ੍ਤਿਵਸੇਨ ਚਿਤ੍ਤਂ ਵਿਮੁਚ੍ਚਤਿ, ਨਿਬ੍ਬਾਨਾਰਮ੍ਮਣੇ ਅਧਿਮੁਚ੍ਚਤਿ. ਸਨ੍ਤਚਿਤ੍ਤਸ੍ਸਾਤਿ ਨਿਬ੍ਬੁਤਚਿਤ੍ਤਸ੍ਸ. ਤਾਦਿਨੋਤਿ ਇਟ੍ਠਾਨਿਟ੍ਠੇ ਅਨੁਨਯਪਟਿਘੇਹਿ ਅਕਮ੍ਪਿਯਤ੍ਤਾ ਤਾਦੀ, ਤਸ੍ਸ ਤਾਦਿਨੋ.

ਦਿਗੁਣਾਦਿਉਪਾਹਨਪਟਿਕ੍ਖੇਪਕਥਾ

੨੪੫. ਅਞ੍ਞਂ ਬ੍ਯਾਕਰੋਨ੍ਤੀਤਿ ਅਰਹਤ੍ਤਂ ਬ੍ਯਾਕਰੋਨ੍ਤਿ. ਅਤ੍ਥੋ ਚ ਵੁਤ੍ਤੋਤਿ ਯੇਨ ਅਰਹਾਤਿ ਞਾਯਤਿ, ਸੋ ਅਤ੍ਥੋ ਵੁਤ੍ਤੋ. ਸੁਤ੍ਤਤ੍ਥੋ ਪਨ ਸੁਤ੍ਤਵਣ੍ਣਨਤੋਯੇਵ ਗਹੇਤਬ੍ਬੋ. ਅਤ੍ਤਾ ਚ ਅਨੁਪਨੀਤੋਤਿ ਅਹਂ ਅਰਹਾਤਿ ਏਵਂ ਬ੍ਯਞ੍ਜਨਵਸੇਨ ਅਤ੍ਤਾ ਨ ਉਪਨੀਤੋ. ਅਥ ਚ ਪਨਿਧੇਕਚ੍ਚੇ ਮੋਘਪੁਰਿਸਾਤਿ ਅਞ੍ਞੇ ਪਨ ਤੁਚ੍ਛਪੁਰਿਸਾ ਹਸਮਾਨਾ ਵਿਯ ਅਸਨ੍ਤਮੇਵ ਅਞ੍ਞਂ ਵਚਨਮਤ੍ਤੇਨ ਸਨ੍ਤਂ ਕਤ੍ਵਾ ਬ੍ਯਾਕਰੋਨ੍ਤਿ. ਏਕਪਲਾਸਿਕਨ੍ਤਿ ਏਕਪਟਲਂ. ਅਸੀਤਿਸਕਟਵਾਹੇਤਿ ਏਤ੍ਥ ਦ੍ਵੇ ਸਕਟਭਾਰਾ ਏਕੋ ਵਾਹੋਤਿ ਵੇਦਿਤਬ੍ਬੋ. ਸਤ੍ਤਹਤ੍ਥਿਕਞ੍ਚ ਅਨੀਕਨ੍ਤਿ ਏਤ੍ਥ ਛ ਹਤ੍ਥਿਨਿਯੋ ਏਕੋ ਚ ਹਤ੍ਥੀਤਿ ਇਦਮੇਕਂ ਅਨੀਕਂ. ਈਦਿਸਾਨਿ ਸਤ੍ਤ ਅਨੀਕਾਨਿ ਸਤ੍ਤਹਤ੍ਥਿਕਂ ਅਨੀਕਂ ਨਾਮ. ਦਿਗੁਣਾਤਿ ਦ੍ਵਿਪਟਲਾ. ਤਿਗੁਣਾਤਿ ਤਿਪਟਲਾ. ਗਣਙ੍ਗੁਣੂਪਾਹਨਾਤਿ ਚਤੁਪਟਲਤੋ ਪਟ੍ਠਾਯ ਵੁਚ੍ਚਤਿ.

ਸਬ੍ਬਨੀਲਿਕਾਦਿਪਟਿਕ੍ਖੇਪਕਥਾ

੨੪੬. ਸਬ੍ਬਨੀਲਿਕਾਤਿ ਸਬ੍ਬਾਵ ਨੀਲਿਕਾ. ਏਸ ਨਯੋ ਸਬ੍ਬਪੀਤਿਕਾਦੀਸੁਪਿ. ਤਤ੍ਥ ਚ ਨੀਲਿਕਾ ਉਮਾਪੁਪ੍ਫਵਣ੍ਣਾ ਹੋਤਿ, ਪੀਤਿਕਾ ਕਣਿਕਾਰਪੁਪ੍ਫਵਣ੍ਣਾ, ਲੋਹਿਤਿਕਾ ਜਯਸੁਮਨਪੁਪ੍ਫਵਣ੍ਣਾ, ਮਞ੍ਜਿਟ੍ਠਿਕਾ ਮਞ੍ਜਿਟ੍ਠਵਣ੍ਣਾ ਏਵ, ਕਣ੍ਹਾ ਅਦ੍ਦਾਰਿਟ੍ਠਕਵਣ੍ਣਾ, ਮਹਾਰਙ੍ਗਰਤ੍ਤਾ ਸਤਪਦਿਪਿਟ੍ਠਿਵਣ੍ਣਾ, ਮਹਾਨਾਮਰਤ੍ਤਾ ਸਮ੍ਭਿਨ੍ਨਵਣ੍ਣਾ ਹੋਤਿ ਪਣ੍ਡੁਪਲਾਸਵਣ੍ਣਾ. ਕੁਰੁਨ੍ਦਿਯਂ ਪਨ ‘‘ਪਦੁਮਪੁਪ੍ਫਵਣ੍ਣਾ’’ਤਿ ਵੁਤ੍ਤਾ. ਏਤਾਸੁ ਯਂਕਿਞ੍ਚਿ ਲਭਿਤ੍ਵਾ ਰਜਨਂ ਚੋਲ਼ਕੇਨ ਪੁਞ੍ਛਿਤ੍ਵਾ ਵਣ੍ਣਂ ਭਿਨ੍ਦਿਤ੍ਵਾ ਧਾਰੇਤੁਂ ਵਟ੍ਟਤਿ. ਅਪ੍ਪਮਤ੍ਤਕੇਪਿ ਭਿਨ੍ਨੇ ਵਟ੍ਟਤਿਯੇਵ.

ਨੀਲਕਵਦ੍ਧਿਕਾਤਿ ਯਾਸਂ ਵਦ੍ਧਾਯੇਵ ਨੀਲਾ. ਏਸੇਵ ਨਯੋ ਸਬ੍ਬਤ੍ਥ. ਏਤਾਪਿ ਵਣ੍ਣਭੇਦਂ ਕਤ੍ਵਾ ਧਾਰੇਤਬ੍ਬਾ. ਖਲ੍ਲਕਬਦ੍ਧਾਤਿ ਪਣ੍ਹਿਪਿਧਾਨਤ੍ਥਂ ਤਲੇ ਖਲ੍ਲਕਂ ਬਨ੍ਧਿਤ੍ਵਾ ਕਤਾ. ਪੁਟਬਦ੍ਧਾਤਿ ਯੋਨਕਉਪਾਹਨਾ ਵੁਚ੍ਚਤਿ, ਯਾ ਯਾਵਜਙ੍ਘਤੋ ਸਬ੍ਬਪਾਦਂ ਪਟਿਚ੍ਛਾਦੇਤਿ. ਪਾਲਿਗੁਣ੍ਠਿਮਾਤਿ ਪਲਿਗੁਣ੍ਠਿਤ੍ਵਾ ਕਤਾ; ਯਾ ਉਪਰਿ ਪਾਦਮਤ੍ਤਮੇਵ ਪਟਿਚ੍ਛਾਦੇਤਿ, ਨ ਜਙ੍ਘਂ. ਤੂਲਪੁਣ੍ਣਿਕਾਤਿ ਤੂਲਪਿਚੁਨਾ ਪੂਰੇਤ੍ਵਾ ਕਤਾ. ਤਿਤ੍ਤਿਰਪਤ੍ਤਿਕਾਤਿ ਤਿਤ੍ਤਿਰਪਤ੍ਤਸਦਿਸਾ ਵਿਚਿਤ੍ਤਬਦ੍ਧਾ. ਮੇਣ੍ਡਵਿਸਾਣਵਦ੍ਧਿਕਾਤਿ ਕਣ੍ਣਿਕਟ੍ਠਾਨੇ ਮੇਣ੍ਡਕਸਿਙ੍ਗਸਣ੍ਠਾਨੇ ਵਦ੍ਧੇ ਯੋਜੇਤ੍ਵਾ ਕਤਾ. ਅਜਵਿਸਾਣਵਦ੍ਧਿਕਾਦੀਸੁਪਿ ਏਸੇਵ ਨਯੋ. ਵਿਚ੍ਛਿਕਾਲ਼ਿਕਾਪਿ ਤਤ੍ਥੇਵ ਵਿਚ੍ਛਿਕਨਙ੍ਗੁਟ੍ਠਸਣ੍ਠਾਨੇ ਵਦ੍ਧੇ ਯੋਜੇਤ੍ਵਾ ਕਤਾ. ਮੋਰਪਿਞ੍ਛਪਰਿਸਿਬ੍ਬਿਤਾਤਿ ਤਲੇਸੁ ਵਾ ਵਦ੍ਧੇਸੁ ਵਾ ਮੋਰਪਿਞ੍ਛੇਹਿ ਸੁਤ੍ਤਕਸਦਿਸੇਹਿ ਪਰਿਸਿਬ੍ਬਿਤਾ. ਚਿਤ੍ਰਾਤਿ ਵਿਚਿਤ੍ਰਾ; ਏਤਾਸੁ ਯਂਕਿਞ੍ਚਿ ਲਭਿਤ੍ਵਾ, ਸਚੇ ਤਾਨਿ ਖਲ੍ਲਕਾਦੀਨਿ ਅਪਨੇਤ੍ਵਾ ਸਕ੍ਕਾ ਹੋਨ੍ਤਿ ਵਲ਼ਞ੍ਜਿਤੁਂ, ਵਲ਼ਞ੍ਜੇਤਬ੍ਬਾ. ਤੇਸੁ ਪਨ ਸਤਿ ਵਲ਼ਞ੍ਜਨ੍ਤਸ੍ਸ ਦੁਕ੍ਕਟਂ. ਸੀਹਚਮ੍ਮਪਰਿਕ੍ਖਟਾ ਨਾਮ ਪਰਿਯਨ੍ਤੇਸੁ ਚੀਵਰੇ ਅਨੁਵਾਤਂ ਵਿਯ ਸੀਹਚਮ੍ਮਂ ਯੋਜੇਤ੍ਵਾ ਕਤਾ. ਲੂਵਕਚਮ੍ਮਪਰਿਕ੍ਖਟਾਤਿ ਪਕ੍ਖਿਬਿਲ਼ਾਲਚਮ੍ਮਪਰਿਕ੍ਖਟਾ. ਏਤਾਸੁਪਿ ਯਾ ਕਾਚਿ ਲਭਿਤ੍ਵਾ ਤਂ ਚਮ੍ਮਂ ਅਪਨੇਤ੍ਵਾ ਧਾਰੇਤਬ੍ਬਾ.

੨੪੭. ਓਮੁਕ੍ਕਨ੍ਤਿ ਪਟਿਮੁਞ੍ਚਿਤ੍ਵਾ ਅਪਨੀਤਂ. ਨਵਾਤਿ ਅਪਰਿਭੁਤ੍ਤਾ.

ਅਜ੍ਝਾਰਾਮੇਉਪਾਹਨਪਟਿਕ੍ਖੇਪਕਥਾ

੨੪੮. ਅਭਿਜੀਵਨਿਕਸ੍ਸਾਤਿ ਯੇਨ ਸਿਪ੍ਪੇਨ ਅਭਿਜੀਵਨ੍ਤਿ, ਜੀਵਿਕਂ ਕਪ੍ਪੇਨ੍ਤਿ, ਤਸ੍ਸ ਕਾਰਣਾਤਿ ਅਤ੍ਥੋ. ਇਧ ਖੋ ਤਂ ਭਿਕ੍ਖਵੇਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ, ਇਧ ਖੋ ਭਿਕ੍ਖਵੇ ਸੋਭੇਯ੍ਯਾਥਾਤਿ ਅਤ੍ਥੋ. ਯਂ ਤੁਮ੍ਹੇਤਿ ਯੇ ਤੁਮ੍ਹੇ. ਅਥ ਵਾ ਯਦਿ ਤੁਮ੍ਹੇਤਿ ਵੁਤ੍ਤਂ ਹੋਤਿ. ਯਦਿਸਦ੍ਦਸ੍ਸ ਹਿ ਅਤ੍ਥੇ ਅਯਂ ਨਿਪਾਤੋ. ਆਚਰਿਯੇਸੂਤਿਆਦਿਮ੍ਹਿ ਪਬ੍ਬਜ੍ਜਾਚਰਿਯੋ, ਉਪਸਮ੍ਪਦਾਚਰਿਯੋ, ਨਿਸ੍ਸਯਾਚਾਰਿਯੋ, ਉਦ੍ਦੇਸਾਚਰਿਯੋਤਿ ਇਮੇ ਚਤ੍ਤਾਰੋਪਿ ਇਧ ਆਚਰਿਯਾ ਏਵ. ਅਵਸ੍ਸਿਕਸ੍ਸ ਛਬ੍ਬਸ੍ਸੋ ਆਚਰਿਯਮਤ੍ਤੋ. ਸੋ ਹਿ ਚਤੁਵਸ੍ਸਕਾਲੇ ਤਂ ਨਿਸ੍ਸਾਯ ਵਚ੍ਛਤਿ; ਏਵਂ ਏਕਵਸ੍ਸਸ੍ਸ ਸਤ੍ਤਵਸ੍ਸੋ, ਦੁਵਸ੍ਸਸ੍ਸ ਅਟ੍ਠਵਸ੍ਸੋ, ਤਿਵਸ੍ਸਸ੍ਸ ਨਵਵਸ੍ਸੋ, ਚਤੁਵਸ੍ਸਸ੍ਸ ਦਸਵਸ੍ਸੋ. ਇਮੇਪਿ ਆਚਰਿਯਮਤ੍ਤਾ ਏਵ. ਉਪਜ੍ਝਾਯਸ੍ਸ ਸਨ੍ਦਿਟ੍ਠਸਮ੍ਭਤ੍ਤਾ ਪਨ ਸਹਾਯਭਿਕ੍ਖੂ, ਯੇ ਵਾ ਪਨ ਕੇਚਿ ਦਸਹਿ ਵਸ੍ਸੇਹਿ ਮਹਨ੍ਤਤਰਾ ਤੇ ਸਬ੍ਬੇਪਿ ਉਪਜ੍ਝਾਯਮਤ੍ਤਾ ਨਾਮ. ਏਤ੍ਤਕੇਸੁ ਭਿਕ੍ਖੂਸੁ ਅਨੁਪਾਹਨੇਸੁ ਚਙ੍ਕਮਨ੍ਤੇਸੁ ਸਉਪਾਹਨਸ੍ਸ ਚਙ੍ਕਮਤੋ ਆਪਤ੍ਤਿ.

੨੪੯. ਪਾਦਖੀਲਾਬਾਧੋ ਨਾਮ ਪਾਦਤੋ ਖੀਲਸਦਿਸਂ ਮਂਸਂ ਨਿਕ੍ਖਨ੍ਤਂ ਹੋਤਿ.

੨੫੧. ਤਿਣਪਾਦੁਕਾਤਿ ਯੇਨ ਕੇਨਚਿ ਤਿਣੇਨ ਕਤਪਾਦੁਕਾ. ਹਿਨ੍ਤਾਲਪਾਦੁਕਾਤਿ ਖਜ੍ਜੂਰੀਪਤ੍ਤੇਹਿ ਕਤਪਾਦੁਕਾ; ਹਿਨ੍ਤਾਲਪਤ੍ਤੇਹਿਪਿ ਨ ਵਟ੍ਟਤਿਯੇਵ. ਕਮਲਪਾਦੁਕਾਤਿ ਕਮਲਤਿਣਂ ਨਾਮ ਅਤ੍ਥਿ, ਤੇਨ ਕਤਪਾਦੁਕਾ; ਉਸੀਰਪਾਦੁਕਾਤਿਪਿ ਵਦਨ੍ਤਿ. ਕਮ੍ਬਲਪਾਦੁਕਾਤਿ ਉਣ੍ਣਾਹਿ ਕਤਪਾਦੁਕਾ. ਅਸਙ੍ਕਮਨੀਯਾਤਿ ਭੂਮਿਯਂ ਸੁਪ੍ਪਤਿਟ੍ਠਿਤਾ ਨਿਚ੍ਚਲਾ ਅਸਂਹਾਰਿਯਾ.

੨੫੨. ਅਙ੍ਗਜਾਤਂ ਛੁਪਨ੍ਤੀਤਿ ਅਙ੍ਗਜਾਤੇਨੇਵ ਅਙ੍ਗਜਾਤਂ ਛੁਪਨ੍ਤਿ. ਓਗਾਹੇਤ੍ਵਾ ਮਾਰੇਨ੍ਤੀਤਿ ਅਨ੍ਤੋ ਉਦਕੇ ਦਲ਼੍ਹਂ ਗਹੇਤ੍ਵਾ ਮਾਰੇਨ੍ਤਿ.

ਯਾਨਾਦਿਪਟਿਕ੍ਖੇਪਕਥਾ

੨੫੩. ਇਤ੍ਥਿਯੁਤ੍ਤੇਨਾਤਿ ਧੇਨੁਯੁਤ੍ਤੇਨ. ਪੁਰਿਸਨ੍ਤਰੇਨਾਤਿ ਪੁਰਿਸਸਾਰਥਿਨਾ. ਪੁਰਿਸਯੁਤ੍ਤੇਨਾਤਿ ਗੋਣਯੁਤ੍ਤੇਨ. ਇਤ੍ਥਨ੍ਤਰੇਨਾਤਿ ਇਤ੍ਥਿਸਾਰਥਿਨਾ. ਗਙ੍ਗਾਮਹਿਯਾਯਾਤਿ ਗਙ੍ਗਾਮਹਕੀਲ਼ਿਕਾਯ. ਪੁਰਿਸਯੁਤ੍ਤਂ ਹਤ੍ਥਵਟ੍ਟਕਨ੍ਤਿ ਏਤ੍ਥ ਪੁਰਿਸਯੁਤ੍ਤਂ ਇਤ੍ਥਿਸਾਰਥਿ ਵਾ ਹੋਤੁ, ਪੁਰਿਸਸਾਰਥਿ ਵਾ ਵਟ੍ਟਤਿ. ਹਤ੍ਥਵਟ੍ਟਕਂ ਪਨ ਇਤ੍ਥਿਯੋ ਵਾ ਵਟ੍ਟੇਨ੍ਤੁ ਪੁਰਿਸਾ ਵਾ, ਵਟ੍ਟਤਿਯੇਵ. ਯਾਨੁਗ੍ਘਾਤੇਨਾਤਿ ਯਾਨਂ ਅਭਿਰੁਹਨ੍ਤਸ੍ਸ ਸਬ੍ਬੋ ਕਾਯੋ ਚਲਤਿ ਤਪ੍ਪਚ੍ਚਯਾ. ਸਿਵਿਕਨ੍ਤਿ ਪੀਠਕਸਿਵਿਕਂ. ਪਾਟਙ੍ਕਿਨ੍ਤਿ ਵਂਸੇ ਲਗ੍ਗੇਤ੍ਵਾ ਕਤਂ ਪਟਪੋਤਲਿਕਂ.

੨੫੪. ਉਚ੍ਚਾਸਯਨਮਹਾਸਯਨਨਾਨੀਤਿ ਏਤ੍ਥ ਉਚ੍ਚਾਸਯਨਨ੍ਤਿ ਪਮਾਣਾਤਿਕ੍ਕਨ੍ਤਂ ਮਞ੍ਚਂ. ਮਹਾਸਯਨਨ੍ਤਿ ਅਕਪ੍ਪਿਯਤ੍ਥਰਣਂ, ਆਸਨ੍ਦੀਆਦੀਸੁ ਆਸਨ੍ਦੀਤਿ ਪਮਾਣਾਤਿਕ੍ਕਨ੍ਤਾਸਨਂ. ਪਲ੍ਲਙ੍ਕੋਤਿ ਪਾਦੇਸੁ ਵਾਲ਼ਰੂਪਾਨਿ ਠਪੇਤ੍ਵਾ ਕਤੋ. ਗੋਨਕੋਤਿ ਦੀਘਲੋਮਕੋ ਮਹਾਕੋਜਵੋ; ਚਤੁਰਙ੍ਗੁਲਾਧਿਕਾਨਿ ਕਿਰ ਤਸ੍ਸ ਲੋਮਾਨਿ. ਚਿਤ੍ਤਕਾਤਿ ਵਾਨਚਿਤ੍ਰੋ ਉਣ੍ਣਾਮਯਤ੍ਥਰਣੋ. ਪਟਿਕਾਤਿ ਉਣ੍ਣਾਮਯੋ ਸੇਤਤ੍ਥਰਣੋ. ਪਟਲਿਕਾਤਿ ਘਨਪੁਪ੍ਫਕੋ ਉਣ੍ਣਾਮਯਲੋਹਿਤਤ੍ਥਰਣੋ; ਯੋ ਆਮਲਕਪਟ੍ਟੋਤਿਪਿ ਵੁਚ੍ਚਤਿ. ਤੂਲਿਕਾਤਿ ਪਕਤਿਤੂਲਿਕਾਯੇਵ. ਵਿਕਤਿਕਾਤਿ ਸੀਹਬ੍ਯਗ੍ਘਾਦਿਰੂਪਵਿਚਿਤ੍ਰੋ ਉਣ੍ਣਾਮਯਤ੍ਥਰਣੋ. ਉਦ੍ਦਲੋਮੀਤਿ ਏਕਤੋ ਉਗ੍ਗਤਲੋਮਂ ਉਣ੍ਣਾਮਯਤ੍ਥਰਣਂ; ‘‘ਉਦ੍ਧਲੋਮੀ’’ਤਿਪਿ ਪਾਠੋ. ਏਕਨ੍ਤਲੋਮੀਤਿ ਉਭਤੋ ਉਗ੍ਗਤਲੋਮਂ ਉਣ੍ਣਾਮਯਤ੍ਥਰਣਂ. ਕਟ੍ਟਿਸ੍ਸਨ੍ਤਿ ਰਤਨਪਰਿਸਿਬ੍ਬਿਤਂ ਕੋਸੇਯ੍ਯਕਟ੍ਟਿਸ੍ਸਮਯਂ ਪਚ੍ਚਤ੍ਥਰਣਂ. ਕੋਸੇਯ੍ਯਨ੍ਤਿ ਰਤਨਪਰਿਸਿਬ੍ਬਿਤਂ ਕੋਸਿਯਸੁਤ੍ਤਮਯਂ ਪਚ੍ਚਤ੍ਥਰਣਂ; ਸੁਦ੍ਧਕੋਸੇਯ੍ਯਂ ਪਨ ਵਟ੍ਟਤਿ.

ਕੁਤ੍ਤਕਨ੍ਤਿ ਸੋਲ਼ਸਨ੍ਨਂ ਨਾਟਕਿਤ੍ਥੀਨਂ ਠਤ੍ਵਾ ਨਚ੍ਚਨਯੋਗ੍ਗਂ ਉਣ੍ਣਾਮਯਅਤ੍ਥਰਣਂ. ਹਤ੍ਥਤ੍ਥਰਅਸ੍ਸਤ੍ਥਰਾਤਿ ਹਤ੍ਥਿਅਸ੍ਸਪਿਟ੍ਠੀਸੁ ਅਤ੍ਥਰਣਕਅਤ੍ਥਰਣਾ ਏਵ. ਰਥਤ੍ਥਰੇਪਿ ਏਸੇਵ ਨਯੋ. ਅਜਿਨਪ੍ਪਵੇਣੀਤਿ ਅਜਿਨਚਮ੍ਮੇਹਿ ਮਞ੍ਚਪ੍ਪਮਾਣੇਨ ਸਿਬ੍ਬਿਤ੍ਵਾ ਕਤਾ ਪਵੇਣੀ. ਕਦਲੀਮਿਗਪਵਰਪਚ੍ਚਤ੍ਥਰਣਨ੍ਤਿ ਕਦਲੀਮਿਗਚਮ੍ਮਂ ਨਾਮ ਅਤ੍ਥਿ, ਤੇਨ ਕਤਂ ਪਵਰਪਚ੍ਚਤ੍ਥਰਣਂ, ਉਤ੍ਤਮਪਚ੍ਚਤ੍ਥਰਣਨ੍ਤਿ ਅਤ੍ਥੋ. ਤਂ ਕਿਰ ਸੇਤਵਤ੍ਥਸ੍ਸ ਉਪਰਿ ਕਦਲੀਮਿਗਚਮ੍ਮਂ ਪਤ੍ਥਰਿਤ੍ਵਾ ਸਿਬ੍ਬਿਤ੍ਵਾ ਕਰੋਨ੍ਤਿ. ਸਉਤ੍ਤਰਚ੍ਛਦਨ੍ਤਿ ਸਹ ਉਤ੍ਤਰਚ੍ਛਦਨੇਨ; ਉਪਰਿਬਦ੍ਧੇਨ ਰਤ੍ਤਵਿਤਾਨੇਨ ਸਦ੍ਧਿਨ੍ਤਿ ਅਤ੍ਥੋ. ਸੇਤਵਿਤਾਨਮ੍ਪਿ ਹੇਟ੍ਠਾ ਅਕਪ੍ਪਿਯਪਚ੍ਚਤ੍ਥਰਣੇ ਸਤਿ ਨ ਵਟ੍ਟਤਿ, ਅਸਤਿ ਪਨ ਵਟ੍ਟਤਿ. ਉਭਤੋਲੋਹਿਤਕੂਪਧਾਨਨ੍ਤਿ ਸੀਸੂਪਧਾਨਞ੍ਚ ਪਾਦੂਪਧਾਨਞ੍ਚਾਤਿ ਮਞ੍ਚਸ੍ਸ ਉਭਤੋਲੋਹਿਤਕੂਪਧਾਨਂ, ਏਤਂ ਨ ਕਪ੍ਪਤਿ. ਯਂ ਪਨ ਏਕਮੇਵ ਉਪਧਾਨਂ ਉਭੋਸੁ ਪਸ੍ਸੇਸੁ ਰਤ੍ਤਂ ਵਾ ਹੋਤਿ, ਪਦੁਮਵਣ੍ਣਂ ਵਾ ਚਿਤ੍ਰਂ ਵਾ, ਸਚੇ ਪਮਾਣਯੁਤ੍ਤਂ, ਵਟ੍ਟਤਿ. ਮਹਾਉਪਧਾਨਂ ਪਨ ਪਟਿਕ੍ਖਿਤ੍ਤਂ.

ਸਬ੍ਬਚਮ੍ਮਪਟਿਕ੍ਖੇਪਾਦਿਕਥਾ

੨੫੫. ਦੀਪਿਚ੍ਛਾਪੋਤਿ ਦੀਪਿਪੋਤਕੋ. ਓਗੁਮ੍ਫਿਯਨ੍ਤੀਤਿ ਭਿਤ੍ਤਿਦਣ੍ਡਕਾਦੀਸੁ ਵੇਠੇਤ੍ਵਾ ਬਨ੍ਧਨ੍ਤਿ.

੨੫੬. ਅਭਿਨਿਸੀਦਿਤੁਨ੍ਤਿ ਅਭਿਨਿਸ੍ਸਾਯ ਨਿਸੀਦਿਤੁਂ; ਅਪਸ੍ਸਯਂ ਕਤ੍ਵਾ ਨਿਸੀਦਿਤੁਨ੍ਤਿ ਅਤ੍ਥੋ. ਗਿਲਾਨੇਨ ਭਿਕ੍ਖੁਨਾ ਸਉਪਾਹਨੇਨਾਤਿ ਏਤ੍ਥ ਗਿਲਾਨੋ ਨਾਮ ਯੋ ਨ ਸਕ੍ਕੋਤਿ ਅਨੁਪਾਹਨੋ ਗਾਮਂ ਪਵਿਸਿਤੁਂ.

੨੫੭. ਕੁਰਰਘਰੇਤਿ ਏਵਂਨਾਮਕੇ ਨਗਰੇ; ਏਤੇਨਸ੍ਸ ਗੋਚਰਗਾਮੋ ਵੁਤ੍ਤੋ. ਪਪਤਕੇ ਪਬ੍ਬਤੇਤਿ ਪਪਤਨਾਮਕੇ ਪਬ੍ਬਤੇ; ਏਤੇਨਸ੍ਸ ਨਿਵਾਸਨਟ੍ਠਾਨਂ ਵੁਤ੍ਤਂ. ਸੋਣੋਤਿ ਤਸ੍ਸ ਨਾਮਂ. ਕੋਟਿਅਗ੍ਘਨਕਂ ਪਨ ਕਣ੍ਣਪਿਲ਼ਨ੍ਧਨਕਂ ਧਾਰੇਤਿ, ਤਸ੍ਮਾ ‘‘ਕੁਟਿਕਣ੍ਣੋ’’ਤਿ ਵੁਚ੍ਚਤਿ; ਕੋਟਿਕਣ੍ਣੋਤਿ ਅਤ੍ਥੋ. ਪਾਸਾਦਿਕਨ੍ਤਿ ਪਸਾਦਜਨਕਂ. ਪਸਾਦਨੀਯਨ੍ਤਿ ਇਦਂ ਤਸ੍ਸੇਵ ਅਤ੍ਥਵੇਵਚਨਂ. ਉਤ੍ਤਮਦਮਥਸਮਥਨ੍ਤਿ ਉਤ੍ਤਮਂ ਦਮਥਞ੍ਚ ਸਮਥਞ੍ਚ ਪਞ੍ਞਞ੍ਚ ਸਮਾਧਿਞ੍ਚ ਕਾਯੂਪਸਮਞ੍ਚ ਚਿਤ੍ਤੂਪਸਮਞ੍ਚਾਤਿਪਿ ਅਤ੍ਥੋ. ਦਨ੍ਤਨ੍ਤਿ ਸਬ੍ਬੇਸਂ ਵਿਸੂਕਾਯਿਕਵਿਪ੍ਫਨ੍ਦਿਤਾਨਂ ਉਪਚ੍ਛਿਨ੍ਨਤ੍ਤਾ ਦਨ੍ਤਂ; ਖੀਣਕਿਲੇਸਨ੍ਤਿ ਅਤ੍ਥੋ. ਗੁਤ੍ਤਨ੍ਤਿ ਸਂਵਰਗੁਤ੍ਤਿਯਾ ਗੁਤ੍ਤਂ. ਸਨ੍ਤਿਨ੍ਦ੍ਰਿਯਨ੍ਤਿ ਯਤਿਨ੍ਦ੍ਰਿਯਂ. ਨਾਗਨ੍ਤਿ ਆਗੁਵਿਰਹਿਤਂ. ਤਿਣ੍ਣਂ ਮੇ ਵਸ੍ਸਾਨਂ ਅਚ੍ਚਯੇਨਾਤਿ ਮਮ ਪਬ੍ਬਜ੍ਜਾਦਿਵਸਤੋ ਪਟ੍ਠਾਯ ਤਿਣ੍ਣਂ ਵਸ੍ਸਾਨਂ ਅਚ੍ਚਯੇਨ. ਉਪਸਮ੍ਪਦਂ ਅਲਤ੍ਥਨ੍ਤਿ ਅਹਂ ਉਪਸਮ੍ਪਦਂ ਅਲਭਿਂ. ਕਣ੍ਹੁਤ੍ਤਰਾਤਿ ਕਣ੍ਹਮਤ੍ਤਿਕੁਤ੍ਤਰਾ; ਉਪਰਿ ਵਡ੍ਢਿਤਕਣ੍ਹਮਤ੍ਤਿਕਾਤਿ ਅਤ੍ਥੋ. ਗੋਕਣ੍ਟਕਹਤਾਤਿ ਗੁਨ੍ਨਂ ਖੁਰੇਹਿ ਅਕ੍ਕਨ੍ਤਭੂਮਿਤੋ ਸਮੁਟ੍ਠਿਤੇਹਿ ਗੋਕਣ੍ਟਕੇਹਿ ਉਪਹਤਾ. ਤੇ ਕਿਰ ਗੋਕਣ੍ਟਕੇ ਏਕਪਟਲਿਕਾ ਉਪਾਹਨਾ ਰਕ੍ਖਿਤੁਂ ਨ ਸਕ੍ਕੋਨ੍ਤਿ; ਏਵਂ ਖਰਾ ਹੋਨ੍ਤਿ. ਏਰਗੂ, ਮੋਰਗੂ, ਮਜ੍ਜਾਰੂ, ਜਨ੍ਤੂਤਿ ਇਮਾ ਚਤਸ੍ਸੋਪਿ ਤਿਣਜਾਤਿਯੋ; ਏਤੇਹਿ ਕਟਸਾਰਕੇ ਚ ਤਟ੍ਟਿਕਾਯੋ ਚ ਕਰੋਨ੍ਤਿ. ਏਤ੍ਥ ਏਰਗੂਤਿ ਏਰਕਤਿਣਂ; ਤਂ ਓਲ਼ਾਰਿਕਂ. ਮੋਰਗੂਤਿਣਂ ਤਮ੍ਬਸੀਸਂ ਮੁਦੁਕਂ ਸੁਖਸਮ੍ਫਸ੍ਸਂ, ਤੇਨ ਕਤਤਟ੍ਟਿਕਾ ਨਿਪਜ੍ਜਿਤ੍ਵਾ ਵੁਟ੍ਠਿਤਮਤ੍ਤੇ ਪੁਨ ਉਦ੍ਧੁਮਾਤਾ ਹੁਤ੍ਵਾ ਤਿਟ੍ਠਤਿ. ਮਜ੍ਜਾਰੁਨਾ ਸਾਟਕੇਪਿ ਕਰੋਨ੍ਤਿ. ਜਨ੍ਤੁਸ੍ਸ ਮਣਿਸਦਿਸੋ ਵਣ੍ਣੋ ਹੋਤਿ. ਸੇਨਾਸਨਂ ਪਞ੍ਞਪੇਸੀਤਿ ਭਿਸਿਂ ਵਾ ਕਟਸਾਰਕਂ ਵਾ ਪਞ੍ਞਪੇਸਿ; ਪਞ੍ਞਪੇਤ੍ਵਾ ਚ ਪਨ ਸੋਣਸ੍ਸ ਆਰੋਚੇਤਿ – ‘‘ਆਵੁਸੋ ਸਤ੍ਥਾ ਤਯਾ ਸਦ੍ਧਿਂ ਏਕਾਵਾਸੇ ਵਸਿਤੁਕਾਮੋ, ਗਨ੍ਧਕੁਟਿਯਂਯੇਵ ਤੇ ਸੇਨਾਸਨਂ ਪਞ੍ਞਤ੍ਤ’’ਨ੍ਤਿ.

੨੫੮. ਅਯਂ ਖ੍ਵਸ੍ਸ ਕਾਲੋਤਿ ਅਯਂ ਖੋ ਕਾਲੋ ਭਵੇਯ੍ਯ. ਪਰਿਦਸ੍ਸੀਤਿ ਪਰਿਦਸ੍ਸੇਸਿ. ‘‘ਇਦਞ੍ਚਿਦਞ੍ਚ ਵਦੇਯ੍ਯਾਸੀਤਿ ਯਂ ਮੇ ਉਪਜ੍ਝਾਯੋ ਜਾਨਾਪੇਸਿ, ਤਸ੍ਸ ਅਯਂ ਕਾਲੋ ਭਵੇਯ੍ਯ, ਹਨ੍ਦ ਦਾਨਿ ਆਰੋਚੇਮਿ ਤਂ ਸਾਸਨ’’ਨ੍ਤਿ ਅਯਮੇਤ੍ਥ ਅਧਿਪ੍ਪਾਯੋ.

੨੫੯. ਵਿਨਯਧਰਪਞ੍ਚਮੇਨਾਤਿ ਅਨੁਸ੍ਸਾਵਨਾਚਰਿਯਪਞ੍ਚਮੇਨ. ਅਨੁਜਾਨਾਮਿ ਭਿਕ੍ਖਵੇ ਸਬ੍ਬਪਚ੍ਚਨ੍ਤਿਮੇਸੁ ਜਨਪਦੇਸੁ ਗੁਣਙ੍ਗੁਣੂਪਾਹਨਨ੍ਤਿ ਏਤ੍ਥ ਮਨੁਸ੍ਸਚਮ੍ਮਂ ਠਪੇਤ੍ਵਾ ਯੇਨ ਕੇਨਚਿ ਚਮ੍ਮੇਨ ਉਪਾਹਨਾ ਵਟ੍ਟਤਿ. ਉਪਾਹਨਕੋਸਕਸਤ੍ਥਕੋਸਕਕੁਞ੍ਚਿਕਕੋਸਕੇਸੁਪਿ ਏਸੇਵ ਨਯੋ. ਚਮ੍ਮਾਨਿ ਅਤ੍ਥਰਣਾਨੀਤਿ ਏਤ੍ਥ ਪਨ ਯਂਕਿਞ੍ਚਿ ਏਲ਼ਕਚਮ੍ਮਂ ਅਜਚਮ੍ਮਞ੍ਚ ਅਤ੍ਥਰਿਤ੍ਵਾ ਨਿਪਜ੍ਜਿਤੁਂ ਵਾ ਨਿਸੀਦਿਤੁਂ ਵਾ ਵਟ੍ਟਤਿ. ਮਿਗਚਮ੍ਮੇ ਏਣੀਮਿਗੋ ਵਾਤਮਿਗੋ ਪਸਦਮਿਗੋ ਕੁਰਙ੍ਗਮਿਗੋ ਮਿਗਮਾਤੁਕੋ ਰੋਹਿਤਮਿਗੋਤਿ ਏਤੇਸਂਯੇਵ ਚਮ੍ਮਾਨਿ ਵਟ੍ਟਨ੍ਤਿ. ਅਞ੍ਞੇਸਂ ਪਨ –

ਮਕ੍ਕਟੋ ਕਾਲ਼ਸੀਹੋ ਚ, ਸਰਭੋ ਕਦਲੀਮਿਗੋ;

ਯੇ ਚ ਵਾਲ਼ਮਿਗਾ ਕੇਚਿ, ਤੇਸਂ ਚਮ੍ਮਂ ਨ ਵਟ੍ਟਤਿ.

ਤਤ੍ਥ ਵਾਲ਼ਮਿਗਾਤਿ ਸੀਹਬ੍ਯਗ੍ਘਅਚ੍ਛਤਰਚ੍ਛਾ; ਨ ਕੇਵਲਞ੍ਚ ਏਤੇਸਂਯੇਵ, ਯੇਸਂ ਪਨ ਚਮ੍ਮਂ ਵਟ੍ਟਤੀਤਿ ਵੁਤ੍ਤਂ, ਤੇ ਠਪੇਤ੍ਵਾ ਅਵਸੇਸਾ ਅਨ੍ਤਮਸੋ ਗੋਮਹਿਂਸਸਸਬਿਲ਼ਾਰਾਦਯੋਪਿ ਸਬ੍ਬੇ ਇਮਸ੍ਮਿਂ ਅਤ੍ਥੇ ਵਾਲ਼ਮਿਗਾਤ੍ਵੇਵ ਵੇਦਿਤਬ੍ਬਾ. ਏਤੇਸਞ੍ਹਿ ਸਬ੍ਬੇਸਂ ਚਮ੍ਮਂ ਨ ਵਟ੍ਟਤਿ. ਨ ਤਾਵ ਤਂ ਗਣਨੂਪਗਂ ਯਾਵ ਨ ਹਤ੍ਥਂ ਗਚ੍ਛਤੀਤਿ ਯਾਵ ਆਹਰਿਤ੍ਵਾ ਵਾ ਨ ਦਿਨ੍ਨਂ, ਤੁਮ੍ਹਾਕਂ ਭਨ੍ਤੇ ਚੀਵਰਂ ਉਪ੍ਪਨ੍ਨਨ੍ਤਿ ਪਹਿਣਿਤ੍ਵਾ ਵਾ ਨਾਰੋਚਿਤਂ, ਤਾਵ ਗਣਨਂ ਨ ਉਪੇਤਿ. ਸਚੇ ਅਨਧਿਟ੍ਠਿਤਂ, ਵਟ੍ਟਤਿ; ਅਧਿਟ੍ਠਿਤਞ੍ਚ ਗਣਨਂ ਨ ਉਪੇਤੀਤਿ ਅਤ੍ਥੋ. ਯਦਾ ਪਨ ਆਨੇਤ੍ਵਾ ਵਾ ਦਿਨ੍ਨਂ ਹੋਤਿ, ਉਪ੍ਪਨ੍ਨਨ੍ਤਿ ਵਾ ਸੁਤਂ, ਤਤੋ ਪਟ੍ਠਾਯ ਦਸਾਹਮੇਵ ਪਰਿਹਾਰਂ ਲਭਤੀਤਿ.

ਚਮ੍ਮਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.