੪. ਪਵਾਰਣਾਕ੍ਖਨ੍ਧਕਂ

ਅਫਾਸੁਕਵਿਹਾਰਕਥਾ

੨੦੯. ਪਵਾਰਣਾਕ੍ਖਨ੍ਧਕੇ – ਨੇਵ ਆਲਪੇਯ੍ਯਾਮ ਨ ਸਲ੍ਲਪੇਯ੍ਯਾਮਾਤਿ ਏਤ੍ਥ ਆਲਾਪੋ ਨਾਮ ਪਠਮਵਚਨਂ; ਸਲ੍ਲਾਪੋ ਪਚ੍ਛਿਮਵਚਨਂ. ਹਤ੍ਥਵਿਲਙ੍ਘਕੇਨਾਤਿ ਹਤ੍ਥੁਕ੍ਖੇਪਕੇਨ. ਪਸੁਸਂਵਾਸਨ੍ਤਿ ਪਸੂਨਂ ਵਿਯ ਸਂਵਾਸਂ. ਪਸਵੋਪਿ ਹਿ ਅਤ੍ਤਨੋ ਉਪ੍ਪਨ੍ਨਂ ਸੁਖਦੁਕ੍ਖਂ ਅਞ੍ਞਮਞ੍ਞਸ੍ਸ ਨ ਆਰੋਚੇਨ੍ਤਿ, ਪਟਿਸਨ੍ਥਾਰਂ ਨ ਕਰੋਨ੍ਤਿ, ਤਥਾ ਏਤੇਪਿ ਨ ਅਕਂਸੁ; ਤਸ੍ਮਾ ਨੇਸਂ ਸਂਵਾਸੋ ‘‘ਪਸੁਸਂਵਾਸੋ’’ਤਿ ਵੁਚ੍ਚਤਿ. ਏਸ ਨਯੋ ਸਬ੍ਬਤ੍ਥ. ਨ ਭਿਕ੍ਖਵੇ ਮੂਗਬ੍ਬਤਂ ਤਿਤ੍ਥਿਯਸਮਾਦਾਨਨ੍ਤਿ ‘‘ਇਮਂ ਤੇਮਾਸਂ ਨ ਕਥੇਤਬ੍ਬ’’ਨ੍ਤਿ ਏਵਰੂਪਂ ਵਤਸਮਾਦਾਨਂ ਨ ਕਾਤਬ੍ਬਂ; ਅਧਮ੍ਮਕਤਿਕਾ ਹੇਸਾ. ਅਞ੍ਞਮਞ੍ਞਾਨੁਲੋਮਤਾਤਿ ਅਞ੍ਞਮਞ੍ਞਂ ਵਤ੍ਤੁਂ ਅਨੁਲੋਮਭਾਵੋ. ‘‘ਵਦਨ੍ਤੁ ਮਂ ਆਯਸ੍ਮਨ੍ਤੋ’’ਤਿ ਹਿ ਵਦਨ੍ਤਂ ਸਕ੍ਕਾ ਹੋਤਿ ਕਿਞ੍ਚਿ ਵਤ੍ਤੁਂ; ਨ ਇਤਰਂ. ਆਪਤ੍ਤਿਵੁਟ੍ਠਾਨਤਾ ਵਿਨਯਪੁਰੇਕ੍ਖਾਰਤਾਤਿ ਆਪਤ੍ਤੀਹਿ ਵੁਟ੍ਠਾਨਭਾਵੋ ਵਿਨਯਂ ਪੁਰਤੋ ਕਤ੍ਵਾ ਚਰਣਭਾਵੋ. ‘‘ਵਦਨ੍ਤੁ ਮਂ ਆਯਸ੍ਮਨ੍ਤੋ’’ਤਿ ਹਿ ਏਵਂ ਵਦਨ੍ਤੋ ਆਪਤ੍ਤੀਹਿ ਵੁਟ੍ਠਹਿਸ੍ਸਤਿ, ਵਿਨਯਞ੍ਚ ਪੁਰਕ੍ਖਤ੍ਵਾ ਵਿਹਰਿਸ੍ਸਤੀਤਿ ਵੁਚ੍ਚਤਿ.

੨੧੦. ਸੁਣਾਤੁ ਮੇ ਭਨ੍ਤੇ ਸਙ੍ਘੋ ਅਜ੍ਜ ਪਵਾਰਣਾ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰੇਯ੍ਯਾਤਿ ਅਯਂ ਸਬ੍ਬਸਙ੍ਗਾਹਿਕਾ ਨਾਮ ਞਤ੍ਤਿ; ਏਵਞ੍ਹਿ ਵੁਤ੍ਤੇ ਤੇਵਾਚਿਕਂ ਦ੍ਵੇਵਾਚਿਕਂ ਏਕਵਾਚਿਕਞ੍ਚ ਪਵਾਰੇਤੁਂ ਵਟ੍ਟਤਿ. ਸਮਾਨਵਸ੍ਸਿਕਂ ਨ ਵਟ੍ਟਤਿ. ‘‘ਤੇਵਾਚਿਕਂ ਪਵਾਰੇਯ੍ਯਾ’’ਤਿ ਵੁਤ੍ਤੇ ਪਨ ਤੇਵਾਚਿਕਮੇਵ ਵਟ੍ਟਤਿ, ਅਞ੍ਞਂ ਨ ਵਟ੍ਟਤਿ. ‘‘ਦ੍ਵੇਵਾਚਿਕਂ ਪਵਾਰੇਯ੍ਯਾ’’ਤਿ ਵੁਤ੍ਤੇ ਦ੍ਵੇਵਾਚਿਕਞ੍ਚ ਤੇਵਾਚਿਕਞ੍ਚ ਵਟ੍ਟਤਿ, ਏਕਵਾਚਿਕਞ੍ਚ ਸਮਾਨਵਸ੍ਸਿਕਞ੍ਚ ਨ ਵਟ੍ਟਤਿ. ‘‘ਏਕਵਾਚਿਕਂ ਪਵਾਰੇਯ੍ਯਾ’’ਤਿ ਵੁਤ੍ਤੇ ਪਨ ਏਕਵਾਚਿਕ-ਦ੍ਵੇਵਾਚਿਕ-ਤੇਵਾਚਿਕਾਨਿ ਵਟ੍ਟਨ੍ਤਿ, ਸਮਾਨਵਸ੍ਸਿਕਮੇਵ ਨ ਵਟ੍ਟਤਿ. ‘‘ਸਮਾਨਵਸ੍ਸਿਕ’’ਨ੍ਤਿ ਵੁਤ੍ਤੇ ਸਬ੍ਬਂ ਵਟ੍ਟਤਿ.

੨੧੧. ਅਚ੍ਛਨ੍ਤੀਤਿ ਨਿਸਿਨ੍ਨਾਵ ਹੋਨ੍ਤਿ, ਨ ਉਟ੍ਠਹਨ੍ਤਿ. ਤਦਮਨ੍ਤਰਾਤਿ ਤਦਨ੍ਤਰਾ; ਤਾਵਤਕਂ ਕਾਲਨ੍ਤਿ ਅਤ੍ਥੋ.

ਪਵਾਰਣਾਭੇਦਕਥਾ

੨੧੨. ਚਾਤੁਦ੍ਦਸਿਕਾ ਚ ਪਨ੍ਨਰਸਿਕਾ ਚਾਤਿ ਏਤ੍ਥ ਚਾਤੁਦ੍ਦਸਿਕਾਯ ‘‘ਅਜ੍ਜ ਪਵਾਰਣਾ ਚਾਤੁਦ੍ਦਸੀ’’ਤਿ ਏਵਂ ਪੁਬ੍ਬਕਿਚ੍ਚਂ ਕਾਤਬ੍ਬਂ, ਪਨ੍ਨਰਸਿਕਾਯ ‘‘ਅਜ੍ਜ ਪਵਾਰਣਾ ਪਨ੍ਨਰਸੀ’’ਤਿ.

ਪਵਾਰਣਕਮ੍ਮੇਸੁ ਸਚੇ ਏਕਸ੍ਮਿਂ ਵਿਹਾਰੇ ਪਞ੍ਚਸੁ ਭਿਕ੍ਖੂਸੁ ਵਸਨ੍ਤੇਸੁ ਏਕਸ੍ਸ ਪਵਾਰਣਂ ਆਹਰਿਤ੍ਵਾ ਚਤ੍ਤਾਰੋ ਗਣਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਚਤੂਸੁ ਤੀਸੁ ਵਾ ਵਸਨ੍ਤੇਸੁ ਏਕਸ੍ਸ ਪਵਾਰਣਂ ਆਹਰਿਤ੍ਵਾ ਤਯੋ ਵਾ ਦ੍ਵੇ ਵਾ ਸਙ੍ਘਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਸਬ੍ਬਮੇਤਂ ਅਧਮ੍ਮੇਨਵਗ੍ਗਂ ਪਵਾਰਣਕਮ੍ਮਂ.

ਸਚੇ ਪਨ ਸਬ੍ਬੇਪਿ ਪਞ੍ਚ ਜਨਾ ਏਕਤੋ ਸਨ੍ਨਿਪਤਿਤ੍ਵਾ ਗਣਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਚਤ੍ਤਾਰੋ ਤਯੋ ਵਾ ਦ੍ਵੇ ਵਾ ਵਸਨ੍ਤਾ ਏਕਤੋ ਸਨ੍ਨਿਪਤਿਤ੍ਵਾ ਸਙ੍ਘਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਸਬ੍ਬਮੇਤਂ ਅਧਮ੍ਮੇਨਸਮਗ੍ਗਂ ਪਵਾਰਣਕਮ੍ਮਂ.

ਸਚੇ ਪਞ੍ਚਸੁ ਜਨੇਸੁ ਏਕਸ੍ਸ ਪਵਾਰਣਂ ਆਹਰਿਤ੍ਵਾ ਚਤ੍ਤਾਰੋ ਸਙ੍ਘਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਚਤੂਸੁ ਤੀਸੁ ਵਾ ਏਕਸ੍ਸ ਪਵਾਰਣਂ ਆਹਰਿਤ੍ਵਾ ਤਯੋ ਵਾ ਦ੍ਵੇ ਵਾ ਗਣਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਸਬ੍ਬਮੇਤਂ ਧਮ੍ਮੇਨਵਗ੍ਗਂ ਪਵਾਰਣਕਮ੍ਮਂ.

ਸਚੇ ਪਨ ਸਬ੍ਬੇਪਿ ਪਞ੍ਚ ਜਨਾ ਏਕਤੋ ਸਨ੍ਨਿਪਤਿਤ੍ਵਾ ਸਙ੍ਘਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਚਤ੍ਤਾਰੋ ਵਾ ਤਯੋ ਵਾ ਏਕਤੋ ਸਨ੍ਨਿਪਤਿਤ੍ਵਾ ਗਣਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਦ੍ਵੇ ਅਞ੍ਞਮਞ੍ਞਂ ਪਵਾਰੇਨ੍ਤਿ, ਏਕਕੋ ਵਸਨ੍ਤੋ ਅਧਿਟ੍ਠਾਨਪਵਾਰਣਂ ਕਰੋਤਿ, ਸਬ੍ਬਮੇਤਂ ਧਮ੍ਮੇਨਸਮਗ੍ਗਂ ਨਾਮ ਪਵਾਰਣਕਮ੍ਮਨ੍ਤਿ.

ਪਵਾਰਣਾਦਾਨਾਨੁਜਾਨਨਕਥਾ

੨੧੩. ਦਿਨ੍ਨਾ ਹੋਤਿ ਪਵਾਰਣਾਤਿ ਏਤ੍ਥ ਏਵਂ ਦਿਨ੍ਨਾਯ ਪਵਾਰਣਾਯ ਪਵਾਰਣਾਹਾਰਕੇਨ ਸਙ੍ਘਂ ਉਪਸਙ੍ਕਮਿਤ੍ਵਾ ਏਵਂ ਪਵਾਰੇਤਬ੍ਬਂ – ‘‘ਤਿਸ੍ਸੋ ਭਨ੍ਤੇ ਭਿਕ੍ਖੁ ਸਙ੍ਘਂ ਪਵਾਰੇਤਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਤੁ ਤਂ ਭਨ੍ਤੇ ਸਙ੍ਘੋ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਤਿ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਭਨ੍ਤੇ ਤਿਸ੍ਸੋ ਭਿਕ੍ਖੁ ਸਙ੍ਘਂ ਪਵਾਰੇਤਿ…ਪੇ… ਪਟਿਕਰਿਸ੍ਸਤੀ’’ਤਿ. ਸਚੇ ਪਨ ਵੁਡ੍ਢਤਰੋ ਹੋਤਿ, ‘‘ਆਯਸ੍ਮਾ ਭਨ੍ਤੇ ਤਿਸ੍ਸੋ’’ਤਿ ਵਤ੍ਤਬ੍ਬਂ; ਏਵਞ੍ਹਿ ਤੇਨ ਤਸ੍ਸਤ੍ਥਾਯ ਪਵਾਰਿਤਂ ਹੋਤੀਤਿ.

ਪਵਾਰਣਂ ਦੇਨ੍ਤੇਨ ਛਨ੍ਦਮ੍ਪਿ ਦਾਤੁਨ੍ਤਿ ਏਤ੍ਥ ਛਨ੍ਦਦਾਨਂ ਉਪੋਸਥਕ੍ਖਨ੍ਧਕੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਧਾਪਿ ਚ ਛਨ੍ਦਦਾਨਂ ਅਵਸੇਸਕਮ੍ਮਤ੍ਥਾਯ. ਤਸ੍ਮਾ ਸਚੇ ਪਵਾਰਣਂ ਦੇਨ੍ਤੋ ਛਨ੍ਦਂ ਦੇਤਿ, ਵੁਤ੍ਤਨਯੇਨ ਆਹਟਾਯ ਪਵਾਰਣਾਯ ਤੇਨ ਚ ਭਿਕ੍ਖੁਨਾ ਸਙ੍ਘੇਨ ਚ ਪਵਾਰਿਤਮੇਵ ਹੋਤਿ. ਅਥ ਪਵਾਰਣਮੇਵ ਦੇਤਿ, ਨ ਛਨ੍ਦਂ, ਤਸ੍ਸ ਚ ਪਵਾਰਣਾਯ ਆਰੋਚਿਤਾਯ ਸਙ੍ਘੇਨ ਚ ਪਵਾਰਿਤੇ ਸਬ੍ਬੇਸਂ ਸੁਪ੍ਪਵਾਰਿਤਂ ਹੋਤਿ, ਅਞ੍ਞਂ ਪਨ ਕਮ੍ਮਂ ਕੁਪ੍ਪਤਿ. ਸਚੇ ਛਨ੍ਦਮੇਵ ਦੇਤਿ ਨ ਪਵਾਰਣਂ, ਸਙ੍ਘਸ੍ਸ ਪਵਾਰਣਾ ਚ ਸੇਸਕਮ੍ਮਾਨਿ ਚ ਨ ਕੁਪ੍ਪਨ੍ਤਿ, ਤੇਨ ਪਨ ਭਿਕ੍ਖੁਨਾ ਅਪ੍ਪਵਾਰਿਤਂ ਹੋਤਿ. ਪਵਾਰਣਦਿਵਸੇ ਪਨ ਬਹਿਸੀਮਾਯਂ ਪਵਾਰਣਂ ਅਧਿਟ੍ਠਹਿਤ੍ਵਾ ਆਗਤੇਨਪਿ ਛਨ੍ਦੋ ਦਾਤਬ੍ਬੋ, ਤੇਨ ਸਙ੍ਘਸ੍ਸ ਪਵਾਰਣਕਮ੍ਮਂ ਨ ਕੁਪ੍ਪਤਿ.

੨੧੮. ਅਜ੍ਜ ਮੇ ਪਵਾਰਣਾਤਿ ਏਤ੍ਥ ਸਚੇ ਚਾਤੁਦ੍ਦਸਿਕਾ ਹੋਤਿ, ‘‘ਅਜ੍ਜ ਮੇ ਪਵਾਰਣਾ ਚਾਤੁਦ੍ਦਸੀ’’ਤਿ ਸਚੇ ਪਨ੍ਨਰਸਿਕਾ ‘‘ਅਜ੍ਜ ਮੇ ਪਵਾਰਣਾ ਪਨ੍ਨਰਸੀ’’ਤਿ ਏਵਂ ਅਧਿਟ੍ਠਾਤਬ੍ਬਂ.

੨੧੯. ਤਦਹੁਪਵਾਰਣਾਯ ਆਪਤ੍ਤਿਨ੍ਤਿਆਦਿ ਵੁਤ੍ਤਨਯਮੇਵ.

ਅਨਾਪਤ੍ਤਿਪਨ੍ਨਰਸਕਾਦਿਕਥਾ

੨੨੨. ਪੁਨ ਪਵਾਰੇਤਬ੍ਬਨ੍ਤਿ ਪੁਨ ਪੁਬ੍ਬਕਿਚ੍ਚਂ ਕਤ੍ਵਾ ਞਤ੍ਤਿਂ ਠਪੇਤ੍ਵਾ ਸਙ੍ਘਤ੍ਥੇਰਤੋ ਪਟ੍ਠਾਯ ਪਵਾਰੇਤਬ੍ਬਂ. ਸੇਸਂ ਉਪੋਸਥਕ੍ਖਨ੍ਧਕਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੨੨੮. ਆਗਨ੍ਤੁਕੇਹਿ ਆਵਾਸਿਕਾਨਂ ਅਨੁਵਤ੍ਤਿਤਬ੍ਬਨ੍ਤਿ ‘‘ਅਜ੍ਜ ਪਵਾਰਣਾ ਚਾਤੁਦ੍ਦਸੀ’’ਤਿ ਏਤਦੇਵ ਪੁਬ੍ਬਕਿਚ੍ਚਂ ਕਾਤਬ੍ਬਂ. ਪਨ੍ਨਰਸਿਕਵਾਰੇਪਿ ਏਸੇਵ ਨਯੋ. ਆਵਾਸਿਕੇਹਿ ਨਿਸ੍ਸੀਮਂ ਗਨ੍ਤ੍ਵਾ ਪਵਾਰੇਤਬ੍ਬਨ੍ਤਿ ਅਸ੍ਸਾਵਸਾਨੇ ਅਯਂ ਪਾਲ਼ਿਮੁਤ੍ਤਕਵਿਨਿਚ੍ਛਯੋ – ਸਚੇ ਪੁਰਿਮਿਕਾਯ ਪਞ੍ਚ ਭਿਕ੍ਖੂ ਵਸ੍ਸਂ ਉਪਗਤਾ, ਪਚ੍ਛਿਮਿਕਾਯਪਿ ਪਞ੍ਚ, ਪੁਰਿਮੇਹਿ ਞਤ੍ਤਿਂ ਠਪੇਤ੍ਵਾ ਪਵਾਰਿਤੇ ਪਚ੍ਛਿਮੇਹਿ ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋ, ਨ ਏਕਸ੍ਮਿਂ ਉਪੋਸਥਗ੍ਗੇ ਦ੍ਵੇ ਞਤ੍ਤਿਯੋ ਠਪੇਤਬ੍ਬਾ. ਸਚੇਪਿ ਪਚ੍ਛਿਮਿਕਾਯ ਉਪਗਤਾ ਚਤ੍ਤਾਰੋ ਤਯੋ ਦ੍ਵੇ ਏਕੋ ਵਾ ਹੋਤਿ, ਏਸੇਵ ਨਯੋ. ਅਥ ਪੁਰਿਮਿਕਾਯ ਚਤ੍ਤਾਰੋ ਪਚ੍ਛਿਮਿਕਾਯਪਿ ਚਤ੍ਤਾਰੋ ਤਯੋ ਦ੍ਵੇ ਏਕੋ ਵਾ ਏਸੇਵ ਨਯੋ. ਅਥਾਪਿ ਪੁਰਿਮਿਕਾਯ ਤਯੋ, ਪਚ੍ਛਿਮਿਕਾਯਪਿ ਤਯੋ ਦ੍ਵੇ ਵਾ, ਏਸੇਵ ਨਯੋ. ਇਦਞ੍ਹੇਤ੍ਥ ਲਕ੍ਖਣਂ – ਸਚੇ ਪੁਰਿਮਿਕਾਯ ਉਪਗਤੇਹਿ ਪਚ੍ਛਿਮਿਕਾਯ ਉਪਗਤਾ ਥੋਕਤਰਾ ਚੇਵ ਹੋਨ੍ਤਿ ਸਮਸਮਾ ਚ, ਸਙ੍ਘਪਵਾਰਣਾਯ ਗਣਂ ਪੂਰੇਨ੍ਤਿ, ਸਙ੍ਘਪਵਾਰਣਾਵਸੇਨ ਞਤ੍ਤਿ ਠਪੇਤਬ੍ਬਾਤਿ.

ਸਚੇ ਪਨ ਪੁਰਿਮਿਕਾਯ ਤਯੋ, ਪਚ੍ਛਿਮਿਕਾਯ ਏਕੋ ਹੋਤਿ, ਤੇਨ ਸਦ੍ਧਿਂ ਤੇ ਚਤ੍ਤਾਰੋ ਹੋਨ੍ਤਿ, ਚਤੁਨ੍ਨਂ ਸਙ੍ਘਞਤ੍ਤਿਂ ਠਪੇਤ੍ਵਾ ਪਵਾਰੇਤੁਂ ਨ ਵਟ੍ਟਤਿ. ਗਣਞਤ੍ਤਿਯਾ ਪਨ ਸੋ ਗਣਪੂਰਕੋ ਹੋਤਿ, ਤਸ੍ਮਾ ਗਣਵਸੇਨ ਞਤ੍ਤਿਂ ਠਪੇਤ੍ਵਾ ਪੁਰਿਮੇਹਿ ਪਵਾਰੇਤਬ੍ਬਂ. ਇਤਰੇਨ ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋ. ਸਚੇ ਪੁਰਿਮਿਕਾਯ ਦ੍ਵੇ ਪਚ੍ਛਿਮਿਕਾਯ ਦ੍ਵੇ ਵਾ ਏਕੋ ਵਾ ਹੋਤਿ, ਏਸੇਵ ਨਯੋ. ਸਚੇ ਪੁਰਿਮਿਕਾਯ ਏਕੋ, ਪਚ੍ਛਿਮਿਕਾਯਪਿ ਏਕੋ ਹੋਤਿ, ਏਕੇਨ ਏਕਸ੍ਸ ਸਨ੍ਤਿਕੇ ਪਵਾਰੇਤਬ੍ਬਂ, ਏਕੇਨ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋ. ਸਚੇ ਪਨ ਪੁਰਿਮਵਸ੍ਸੂਪਗਤੇਹਿ ਪਚ੍ਛਿਮਵਸ੍ਸੂਪਗਤਾ ਏਕੇਨਪਿ ਅਧਿਕਤਰਾ ਹੋਨ੍ਤਿ, ਪਠਮਂ ਪਾਤਿਮੋਕ੍ਖਂ ਉਦ੍ਦਿਸਿਤ੍ਵਾ ਪਚ੍ਛਾ ਥੋਕਤਰੇਹਿ ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ.

ਕਤ੍ਤਿਕਚਾਤੁਮਾਸਿਨਿਯਾ ਪਵਾਰਣਾਯ ਪਨ ਸਚੇ ਪਠਮਂ ਵਸ੍ਸੂਪਗਤੇਹਿ ਮਹਾਪਵਾਰਣਾਯ ਪਵਾਰਿਤੇਹਿ ਪਚ੍ਛਾ ਉਪਗਤਾ ਅਧਿਕਤਰਾ ਵਾ ਸਮਸਮਾ ਵਾ ਹੋਨ੍ਤਿ, ਪਵਾਰਣਾਞਤ੍ਤਿਂ ਠਪੇਤ੍ਵਾ ਪਵਾਰੇਤਬ੍ਬਂ. ਤੇਹਿ ਪਵਾਰਿਤੇ ਪਚ੍ਛਾ ਇਤਰੇਹਿ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋ. ਅਥ ਮਹਾਪਵਾਰਣਾਯ ਪਵਾਰਿਤਾ ਬਹੂ ਭਿਕ੍ਖੂ ਹੋਨ੍ਤਿ, ਪਚ੍ਛਿਮਵਸ੍ਸੂਪਗਤਾ ਥੋਕਤਰਾ ਵਾ ਏਕੋ ਵਾ, ਪਾਤਿਮੋਕ੍ਖੇ ਉਦ੍ਦਿਟ੍ਠੇ ਪਚ੍ਛਾ ਤੇਸਂ ਸਨ੍ਤਿਕੇ ਤੇਨ ਪਵਾਰੇਤਬ੍ਬਂ.

੨੩੩. ਨ ਚ ਭਿਕ੍ਖਵੇ ਅਪ੍ਪਵਾਰਣਾਯ ਪਵਾਰੇਤਬ੍ਬਂ, ਅਞ੍ਞਤ੍ਰ ਸਙ੍ਘਸਾਮਗ੍ਗਿਯਾਤਿ ਏਤ੍ਥ ਕੋਸਮ੍ਬਕਸਾਮਗ੍ਗੀਸਦਿਸਾਵ ਸਾਮਗ੍ਗੀ ਵੇਦਿਤਬ੍ਬਾ. ‘‘ਅਜ੍ਜ ਪਵਾਰਣਾ ਸਾਮਗ੍ਗੀ’’ਤਿ ਏਵਞ੍ਚੇਤ੍ਥ ਪੁਬ੍ਬਕਿਚ੍ਚਂ ਕਾਤਬ੍ਬਂ. ਯੇ ਪਨ ਕਿਸ੍ਮਿਞ੍ਚਿਦੇਵ ਅਪ੍ਪਮਤ੍ਤਕੇ ਪਵਾਰਣਂ ਠਪੇਤ੍ਵਾ ਸਮਗ੍ਗਾ ਹੋਨ੍ਤਿ, ਤੇਹਿ ਪਵਾਰਣਾਯਮੇਵ ਪਵਾਰਣਾ ਕਾਤਬ੍ਬਾ. ਸਾਮਗ੍ਗੀਪਵਾਰਣਂ ਕਰੋਨ੍ਤੇਹਿ ਚ ਪਠਮਪਵਾਰਣਂ ਠਪੇਤ੍ਵਾ ਪਾਟਿਪਦਤੋ ਪਟ੍ਠਾਯ ਯਾਵ ਕਤ੍ਤਿਕਚਾਤੁਮਾਸਿਨੀ ਪੁਣ੍ਣਮਾ, ਏਤ੍ਥਨ੍ਤਰੇ ਕਾਤਬ੍ਬਾ, ਤਤੋ ਪਚ੍ਛਾ ਵਾ ਪੁਰੇ ਵਾ ਨ ਵਟ੍ਟਤਿ.

ਦ੍ਵੇਵਾਚਿਕਾਦਿਪਵਾਰਣਾਕਥਾ

੨੩੪. ਦ੍ਵੇਵਾਚਿਕਂ ਪਵਾਰੇਤੁਨ੍ਤਿ ਏਤ੍ਥ ਞਤ੍ਤਿਂ ਠਪੇਨ੍ਤੇਨਾਪਿ ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ ਸਙ੍ਘੋ ਦ੍ਵੇਵਾਚਿਕਂ ਪਵਾਰੇਯ੍ਯਾ’’ਤਿ ਵਤ੍ਤਬ੍ਬਂ, ਏਕਵਾਚਿਕੇ ‘‘ਏਕਵਾਚਿਕਂ ਪਵਾਰੇਯ੍ਯਾ’’ਤਿ, ਸਮਾਨਵਸ੍ਸਿਕੇਪਿ ‘‘ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿ ਵਤ੍ਤਬ੍ਬਂ, ਏਤ੍ਥ ਚ ਬਹੂਪਿ ਸਮਾਨਵਸ੍ਸਾ ਏਕਤੋ ਪਵਾਰੇਤੁਂ ਲਭਨ੍ਤਿ.

ਪਵਾਰਣਾਠਪਨਕਥਾ

੨੩੬. ਭਾਸਿਤਾਯ ਲਪਿਤਾਯ ਅਪਰਿਯੋਸਿਤਾਯਾਤਿ ਏਤ੍ਥ ਸਬ੍ਬਸਙ੍ਗਾਹਿਕਞ੍ਚ ਪੁਗ੍ਗਲਿਕਞ੍ਚਾਤਿ ਦੁਵਿਧਂ ਪਵਾਰਣਾਠਪਨਂ. ਤਤ੍ਥ ਸਬ੍ਬਸਙ੍ਗਾਹਿਕੇ ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ…ਪੇ… ਸਙ੍ਘੋ ਤੇਵਾਚਿਕਂ ਪਵਾਰੇ’’ ਇਤਿ ਸੁਕਾਰਤੋ ਯਾਵ ਰੇਕਾਰੋ, ਤਾਵ ਭਾਸਿਤਾ ਲਪਿਤਾ ਅਪਰਿਯੋਸਿਤਾਵ ਹੋਤਿ ਪਵਾਰਣਾ. ਏਤ੍ਥਨ੍ਤਰੇ ਏਕਪਦੇਪਿ ਠਪੇਨ੍ਤੇਨ ਠਪਿਤਾ ਹੋਤਿ ਪਵਾਰਣਾ. ‘ਯ੍ਯ’ਕਾਰੇ ਪਨ ਪਤ੍ਤੇ ਪਰਿਯੋਸਿਤਾ ਹੋਤਿ, ਤਸ੍ਮਾ ਤਤੋ ਪਟ੍ਠਾਯ ਠਪੇਨ੍ਤੇਨ ਠਪਿਤਾਪਿ ਅਟ੍ਠਪਿਤਾ ਹੋਤਿ. ਪੁਗ੍ਗਲਿਕਠਪਨੇ ਪਨ – ‘‘ਸਙ੍ਘਂ ਭਨ੍ਤੇ ਪਵਾਰੇਮਿ…ਪੇ… ਤਤਿਯਮ੍ਪਿ ਭਨ੍ਤੇ ਸਙ੍ਘਂ ਪਵਾਰੇਮਿ ਦਿਟ੍ਠੇਨ ਵਾ…ਪੇ… ਪਸ੍ਸਨ੍ਤੋ ਪਟੀ’’ਤਿ ਸਙ੍ਕਾਰਤੋ ਯਾਵ ਅਯਂ ਸਬ੍ਬਪਚ੍ਛਿਮੋ ‘ਟਿ’ਕਾਰੋ ਤਾਵ ਭਾਸਿਤਾ ਲਪਿਤਾ ਅਪਰਿਯੋਸਿਤਾਵ ਹੋਤਿ ਪਵਾਰਣਾ, ਏਤ੍ਥਨ੍ਤਰੇ ਏਕਪਦੇਪਿ ਠਪੇਨ੍ਤੇਨ ਠਪਿਤਾ ਹੋਤਿ ਪਵਾਰਣਾ, ‘‘ਕਰਿਸ੍ਸਾਮੀ’’ਤਿ ਵੁਤ੍ਤੇ ਪਨ ਪਰਿਯੋਸਿਤਾ ਹੋਤਿ, ਤਸ੍ਮਾ ‘‘ਕਰਿਸ੍ਸਾਮੀ’’ਤਿ ਏਤਸ੍ਮਿਂ ਪਦੇ ਪਤ੍ਤੇ ਠਪਿਤਾਪਿ ਅਟ੍ਠਪਿਤਾ ਹੋਤਿ. ਏਸ ਨਯੋ ਦ੍ਵੇਵਾਚਿਕਏਕਵਾਚਿਕਸਮਾਨਵਸ੍ਸਿਕਾਸੁਪਿ. ਏਤਾਸੁਪਿ ਹਿ ਟਿਕਾਰਾਵਸਾਨਂਯੇਵ ਠਪਨਖੇਤ੍ਤਨ੍ਤਿ.

੨੩੭. ਅਨੁਯੁਞ੍ਜਿਯਮਾਨੋਤਿ ‘‘ਕਿਮ੍ਹਿ ਨਂ ਠਪੇਸੀ’’ਤਿ ਪਰਤੋ ਵੁਤ੍ਤਨਯੇਨ ਪੁਚ੍ਛਿਯਮਾਨੋ. ਓਮਦ੍ਦਿਤ੍ਵਾਤਿ ਏਤਾਨਿ ‘‘ਅਲਂ ਭਿਕ੍ਖੁ ਮਾ ਭਣ੍ਡਨ’’ਨ੍ਤਿਆਦੀਨਿ ਵਚਨਾਨਿ ਵਤ੍ਵਾ, ਵਚਨੋਮਦ੍ਦਨਾ ਹਿ ਇਧ ਓਮਦ੍ਦਨਾਤਿ ਅਧਿਪ੍ਪੇਤਾ. ਅਨੁਦ੍ਧਂਸਿਤਂ ਪਟਿਜਾਨਾਤੀਤਿ ‘‘ਅਮੂਲਕੇਨ ਪਾਰਾਜਿਕੇਨ ਅਨੁਦ੍ਧਂਸਿਤੋ ਅਯਂ ਮਯਾ’’ਤਿ ਏਵਂ ਪਟਿਜਾਨਾਤਿ. ਯਥਾਧਮ੍ਮਨ੍ਤਿ ਸਙ੍ਘਾਦਿਸੇਸੇਨ ਅਨੁਦ੍ਧਂਸਨੇ ਪਾਚਿਤ੍ਤਿਯਂ; ਇਤਰੇਹਿ ਦੁਕ੍ਕਟਂ. ਨਾਸੇਤ੍ਵਾਤਿ ਲਿਙ੍ਗਨਾਸਨਾਯ ਨਾਸੇਤ੍ਵਾ.

੨੩੮. ਸਾਸ੍ਸ ਯਥਾਧਮ੍ਮਂ ਪਟਿਕਤਾਤਿ ਏਤ੍ਤਕਮੇਵ ਵਤ੍ਵਾ ਪਵਾਰੇਥਾਤਿ ਵਤ੍ਤਬ੍ਬਾ, ਅਸੁਕਾ ਨਾਮ ਆਪਤ੍ਤੀਤਿ ਇਦਂ ਪਨ ਨ ਵਤ੍ਤਬ੍ਬਂ, ਏਤਞ੍ਹਿ ਕਲਹਸ੍ਸ ਮੁਖਂ ਹੋਤਿ.

ਵਤ੍ਥੁਠਪਨਾਦਿਕਥਾ

੨੩੯. ਇਦਂ ਵਤ੍ਥੁ ਪਞ੍ਞਾਯਤਿ ਨ ਪੁਗ੍ਗਲੋਤਿ ਏਤ੍ਥ ਚੋਰਾ ਕਿਰ ਅਰਞ੍ਞਵਿਹਾਰੇ ਪੋਕ੍ਖਰਣਿਤੋ ਮਚ੍ਛੇ ਗਹੇਤ੍ਵਾ ਪਚਿਤ੍ਵਾ ਖਾਦਿਤ੍ਵਾ ਅਗਮਂਸੁ. ਸੋ ਤਂ ਵਿਪ੍ਪਕਾਰਂ ਦਿਸ੍ਵਾ ਆਰਾਮੇ ਵਾ ਕਿਞ੍ਚਿ ਧੁਤ੍ਤੇਨ ਕਤਂ ਵਿਪ੍ਪਕਾਰਂ ਦਿਸ੍ਵਾ ‘‘ਭਿਕ੍ਖੁਸ੍ਸ ਇਮਿਨਾ ਕਮ੍ਮੇਨ ਭਵਿਤਬ੍ਬ’’ਨ੍ਤਿ ਸਲ੍ਲਕ੍ਖੇਤ੍ਵਾ ਏਵਮਾਹ. ਵਤ੍ਥੁਂ ਠਪੇਤ੍ਵਾ ਸਙ੍ਘੋ ਪਵਾਰੇਯ੍ਯਾਤਿ ‘‘ਯਦਾ ਤਂ ਪੁਗ੍ਗਲਂ ਜਾਨਿਸ੍ਸਾਮ, ਤਦਾ ਨਂ ਚੋਦੇਸ੍ਸਾਮ. ਇਦਾਨਿ ਪਨ ਸਙ੍ਘੋ ਪਵਾਰੇਤੂ’’ਤਿ ਅਯਮੇਤ੍ਥ ਅਤ੍ਥੋ. ਇਦਾਨੇਵ ਨਂ ਵਦੇਹੀਤਿ ਸਚੇ ਇਮਿਨਾ ਵਤ੍ਥੁਨਾ ਕਞ੍ਚਿ ਪੁਗ੍ਗਲਂ ਪਰਿਸਙ੍ਕਸਿ, ਇਦਾਨੇਵ ਨਂ ਅਪਦਿਸਾਹੀਤਿ ਅਤ੍ਥੋ. ਸਚੇ ਅਪਦਿਸਤਿ, ਤਂ ਪੁਗ੍ਗਲਂ ਅਨੁਵਿਜ੍ਜਿਤ੍ਵਾ ਪਵਾਰੇਤਬ੍ਬਂ; ਨੋ ਚੇ ਅਪਦਿਸਤਿ, ਉਪਪਰਿਕ੍ਖਿਤ੍ਵਾ ਜਾਨਿਸ੍ਸਾਮਾਤਿ ਪਵਾਰੇਤਬ੍ਬਂ.

ਅਯਂ ਪੁਗ੍ਗਲੋ ਪਞ੍ਞਾਯਤਿ ਨ ਵਤ੍ਥੂਤਿ ਏਤ੍ਥ ਏਕੋ ਭਿਕ੍ਖੁ ਮਾਲਾਗਨ੍ਧਵਿਲੇਪਨੇਹਿ ਚੇਤਿਯਂ ਵਾ ਪੂਜੇਸਿ, ਅਰਿਟ੍ਠਂ ਵਾ ਪਿਵਿ, ਤਸ੍ਸ ਤਦਨੁਰੂਪੋ ਸਰੀਰਗਨ੍ਧੋ ਅਹੋਸਿ; ਸੋ ਤਂ ਗਨ੍ਧਂ ਸਨ੍ਧਾਯ ‘‘ਇਮਸ੍ਸ ਭਿਕ੍ਖੁਨੋ ਏਵਰੂਪੋ ਸਰੀਰਗਨ੍ਧੋ’’ਤਿ ਵਤ੍ਥੁਂ ਪਕਾਸੇਨ੍ਤੋ ਏਵਮਾਹ. ਪੁਗ੍ਗਲਂ ਠਪੇਤ੍ਵਾ ਸਙ੍ਘੋ ਪਵਾਰੇਯ੍ਯਾਤਿ ਏਤਂ ਪੁਗ੍ਗਲਂ ਠਪੇਤ੍ਵਾ ਸਙ੍ਘੋ ਪਵਾਰੇਤੁ. ਇਦਾਨੇਵ ਨਂ ਵਦੇਹੀਤਿ ਯਂ ਤ੍ਵਂ ਪੁਗ੍ਗਲਂ ਠਪੇਸਿ, ਤਸ੍ਸ ਪੁਗ੍ਗਲਸ੍ਸ ਇਦਾਨੇਵ ਦੋਸਂ ਵਦ. ਸਚੇ ਅਯਮਸ੍ਸ ਦੋਸੋਤਿ ਵਦਤਿ, ਤਂ ਪੁਗ੍ਗਲਂ ਸੋਧੇਤ੍ਵਾ ਪਵਾਰੇਤਬ੍ਬਂ. ਅਥ ਨਾਹਂ ਜਾਨਾਮੀਤਿ ਵਦਤਿ, ਉਪਪਰਿਕ੍ਖਿਤ੍ਵਾ ਜਾਨਿਸ੍ਸਾਮਾਤਿ ਪਵਾਰੇਤਬ੍ਬਂ.

ਇਦਂ ਵਤ੍ਥੁ ਚ ਪੁਗ੍ਗਲੋ ਚ ਪਞ੍ਞਾਯਤੀਤਿ ਪੁਰਿਮਨਯੇਨੇਵ ਚੋਰੇਹਿ ਮਚ੍ਛੇ ਗਹੇਤ੍ਵਾ ਪਚਿਤ੍ਵਾ ਪਰਿਭੁਤ੍ਤਟ੍ਠਾਨਞ੍ਚ ਗਨ੍ਧਾਦੀਹਿ ਨਹਾਨਟ੍ਠਾਨਞ੍ਚ ਦਿਸ੍ਵਾ ‘‘ਪਬ੍ਬਜਿਤਸ੍ਸ ਕਮ੍ਮ’’ਨ੍ਤਿ ਮਞ੍ਞਮਾਨੋ ਸੋ ਏਵਮਾਹ. ਇਦਾਨੇਵ ਨਂ ਵਦੇਹੀਤਿ ਇਦਾਨੇਵ ਤੇਨ ਵਤ੍ਥੁਨਾ ਪਰਿਸਙ੍ਕਿਤਂ ਪੁਗ੍ਗਲਂ ਵਦੇਹਿ; ਇਦਂ ਪਨ ਉਭਯਮ੍ਪਿ ਦਿਸ੍ਵਾ ਦਿਟ੍ਠਕਾਲਤੋ ਪਟ੍ਠਾਯ ਵਿਨਿਚ੍ਛਿਨਿਤ੍ਵਾਵ ਪਵਾਰੇਤਬ੍ਬਂ. ਕਲ੍ਲਂ ਵਚਨਾਯਾਤਿ ਕਲ੍ਲਂ ਚੋਦਨਾਯ; ਚੋਦੇਤੁਂ ਵਟ੍ਟਤੀਤਿ ਅਤ੍ਥੋ. ਕਸ੍ਮਾ? ਪਵਾਰਣਤੋ ਪੁਬ੍ਬੇ ਅਵਿਨਿਚ੍ਛਿਤਤ੍ਤਾ ਪਚ੍ਛਾ ਚ ਦਿਸ੍ਵਾ ਚੋਦਿਤਤ੍ਤਾਤਿ. ਉਕ੍ਕੋਟਨਕਂ ਪਾਚਿਤ੍ਤਿਯਨ੍ਤਿ ਇਦਞ੍ਹਿ ਉਭਯਂ ਪੁਬ੍ਬੇ ਪਵਾਰਣਾਯ ਦਿਸ੍ਵਾ ਵਿਨਿਚ੍ਛਿਨਿਤ੍ਵਾਵ ਭਿਕ੍ਖੂ ਪਵਾਰੇਨ੍ਤਿ, ਤਸ੍ਮਾ ਪੁਨ ਤਂ ਉਕ੍ਕੋਟੇਨ੍ਤਸ੍ਸ ਆਪਤ੍ਤਿ.

ਭਣ੍ਡਨਕਾਰਕਵਤ੍ਥੁਕਥਾ

੨੪੦. ਦ੍ਵੇ ਤਯੋ ਉਪੋਸਥੇ ਚਾਤੁਦ੍ਦਸਿਕੇ ਕਾਤੁਨ੍ਤਿ ਏਤ੍ਥ ਚਤੁਤ੍ਥਪਞ੍ਚਮਾ ਦ੍ਵੇ, ਤਤਿਯੋ ਪਨ ਪਕਤਿਯਾਪਿ ਚਤੁਦ੍ਦਸਿਕੋਯੇਵਾਤਿ. ਤਸ੍ਮਾ ਤਤਿਯਚਤੁਤ੍ਥਾ ਵਾ ਤਤਿਯਚਤੁਤ੍ਥਪਞ੍ਚਮਾ ਵਾ ਦ੍ਵੇ ਤਯੋ ਚਾਤੁਦ੍ਦਸਿਕਾ ਕਾਤਬ੍ਬਾ. ਅਥ ਚਤੁਤ੍ਥੇ ਕਤੇ ਸੁਣਨ੍ਤਿ, ਪਞ੍ਚਮੋ ਚਾਤੁਦ੍ਦਸਿਕੋ ਕਾਤਬ੍ਬੋ. ਏਵਮ੍ਪਿ ਦ੍ਵੇ ਚਾਤੁਦ੍ਦਸਿਕਾ ਹੋਨ੍ਤਿ. ਏਵਂ ਕਰੋਨ੍ਤਾ ਭਣ੍ਡਨਕਾਰਕਾਨਂ ਤੇਰਸੇ ਵਾ ਚਾਤੁਦ੍ਦਸੇ ਵਾ ਇਮੇ ਪਨ੍ਨਰਸੀਪਵਾਰਣਂ ਪਵਾਰੇਸ੍ਸਨ੍ਤਿ. ਏਵਂ ਪਵਾਰੇਨ੍ਤੇਹਿ ਚ ਬਹਿਸੀਮਾਯ ਸਾਮਣੇਰੇ ਠਪੇਤ੍ਵਾ ‘‘ਤੇ ਆਗਚ੍ਛਨ੍ਤੀ’’ਤਿ ਸੁਤ੍ਵਾ ਲਹੁਂ ਲਹੁਂ ਸਨ੍ਨਿਪਤਿਤ੍ਵਾ ਪਵਾਰੇਤਬ੍ਬਂ. ਏਤਮਤ੍ਥਂ ਦਸ੍ਸੇਤੁਂ ‘‘ਤੇ ਚੇ ਭਿਕ੍ਖਵੇ…ਪੇ… ਤਥਾ ਕਰੋਨ੍ਤੂ’’ਤਿ ਵੁਤ੍ਤਂ.

ਅਸਂਵਿਹਿਤਾਤਿ ਸਂਵਿਦਹਨਰਹਿਤਾ ਆਗਮਨਜਾਨਨਤ੍ਥਾਯ ਅਕਤਸਂਵਿਦਹਿਤਾ; ਅਵਿਞ੍ਞਾਤਾਵ ਹੁਤ੍ਵਾਤਿ ਅਤ੍ਥੋ. ਤੇਸਂ ਵਿਕ੍ਖਿਤ੍ਵਾਤਿ ‘‘ਕਿਲਨ੍ਤਤ੍ਥ ਮੁਹੁਤ੍ਤਂ ਵਿਸ੍ਸਮਥਾ’’ਤਿਆਦਿਨਾ ਨਯੇਨ ਸਮ੍ਮੋਹਂ ਕਤ੍ਵਾਤਿ ਅਤ੍ਥੋ. ਨੋ ਚੇ ਲਭੇਥਾਤਿ ਨੋ ਚੇ ਬਹਿਸੀਮਂ ਗਨ੍ਤੁਂ ਲਭੇਯ੍ਯੁਂ; ਭਣ੍ਡਨਕਾਰਕਾਨਂ ਸਾਮਣੇਰੇਹਿ ਚ ਦਹਰਭਿਕ੍ਖੂਹਿ ਚ ਨਿਰਨ੍ਤਰਂ ਅਨੁਬਦ੍ਧਾਵ ਹੋਨ੍ਤਿ. ਆਗਮੇ ਜੁਣ੍ਹੇਤਿ ਯਂ ਸਨ੍ਧਾਯ ਆਗਮੇ ਜੁਣ੍ਹੇ ਪਵਾਰੇਯ੍ਯਾਮਾਤਿ ਞਤ੍ਤਿਂ ਠਪੇਸੁਂ, ਤਸ੍ਮਿਂ ਆਗਮੇ ਜੁਣ੍ਹੇ ਕੋਮੁਦਿਯਾ ਚਾਤੁਮਾਸਿਨਿਯਾ ਅਕਾਮਾ ਪਵਾਰੇਤਬ੍ਬਂ, ਅਵਸ੍ਸਂ ਪਵਾਰੇਤਬ੍ਬਂ, ਨ ਹਿ ਤਂ ਅਤਿਕ੍ਕਮਿਤ੍ਵਾ ਪਵਾਰੇਤੁਂ ਲਬ੍ਭਤਿ. ਤੇਹਿ ਚੇ ਭਿਕ੍ਖਵੇ ਭਿਕ੍ਖੂਹਿ ਪਵਾਰਿਯਮਾਨੇਤਿ ਏਵਂ ਚਾਤੁਮਾਸਿਨਿਯਾ ਪਵਾਰਿਯਮਾਨੇ.

ਪਵਾਰਣਾਸਙ੍ਗਹਕਥਾ

੨੪੧. ਅਞ੍ਞਤਰੋ ਫਾਸੁਵਿਹਾਰੋਤਿ ਤਰੁਣਸਮਥੋ ਵਾ ਤਰੁਣਵਿਪਸ੍ਸਨਾ ਵਾ. ਪਰਿਬਾਹਿਰਾ ਭਵਿਸ੍ਸਾਮਾਤਿ ਅਨਿਬਦ੍ਧਰਤ੍ਤਿਟ੍ਠਾਨਦਿਵਾਟ੍ਠਾਨਾਦਿਭਾਵੇਨ ਭਾਵਨਾਨੁਯੋਗਂ ਸਮ੍ਪਾਦੇਤੁਂ ਅਸਕ੍ਕੋਨ੍ਤਾ ਬਾਹਿਰਾ ਭਵਿਸ੍ਸਾਮ. ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤਬ੍ਬਨ੍ਤਿ ਇਮਿਨਾ ਛਨ੍ਦਦਾਨਂ ਪਟਿਕ੍ਖਿਪਤਿ. ਭਿਨ੍ਨਸ੍ਸ ਹਿ ਸਙ੍ਘਸ੍ਸ ਸਮਗ੍ਗਕਰਣਕਾਲੇ ਤਿਣਵਤ੍ਥਾਰਕਸਮਥੇ ਇਮਸ੍ਮਿਞ੍ਚ ਪਵਾਰਣਾਸਙ੍ਗਹੇਤਿ ਇਮੇਸੁ ਤੀਸੁ ਠਾਨੇਸੁ ਛਨ੍ਦਂ ਦਾਤੁਂ ਨ ਵਟ੍ਟਤਿ. ਪਵਾਰਣਾਸਙ੍ਗਹੋ ਨਾਮਾਯਂ ਵਿਸ੍ਸਟ੍ਠਕਮ੍ਮਟ੍ਠਾਨਾਨਂ ਥਾਮਗਤਸਮਥਵਿਪਸ੍ਸਨਾਨਂ ਸੋਤਾਪਨ੍ਨਾਦੀਨਞ੍ਚ ਨ ਦਾਤਬ੍ਬੋ. ਤਰੁਣਸਮਥਵਿਪਸ੍ਸਨਾਲਾਭਿਨੋ ਪਨ ਸਬ੍ਬੇ ਵਾ ਹੋਨ੍ਤੁ, ਉਪਡ੍ਢਾ ਵਾ, ਏਕਪੁਗ੍ਗਲੋ ਵਾ ਏਕਸ੍ਸਪਿ ਵਸੇਨ ਦਾਤਬ੍ਬੋਯੇਵ. ਦਿਨ੍ਨੇ ਪਵਾਰਣਾਸਙ੍ਗਹੇ ਅਨ੍ਤੋਵਸ੍ਸੇ ਪਰਿਹਾਰੋਵ ਹੋਤਿ, ਆਗਨ੍ਤੁਕਾ ਤੇਸਂ ਸੇਨਾਸਨਂ ਗਹੇਤੁਂ ਨ ਲਭਨ੍ਤਿ. ਤੇਹਿਪਿ ਛਿਨ੍ਨਵਸ੍ਸੇਹਿ ਨ ਭਵਿਤਬ੍ਬਂ, ਪਵਾਰੇਤ੍ਵਾ ਪਨ ਅਨ੍ਤਰਾਪਿ ਚਾਰਿਕਂ ਪਕ੍ਕਮਿਤੁਂ ਲਭਨ੍ਤੀਤਿ ਦਸ੍ਸਨਤ੍ਥਂ ‘‘ਤੇਹਿ ਚੇ ਭਿਕ੍ਖਵੇ’’ਤਿਆਦਿਮਾਹ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਵਾਰਣਾਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.