੧੦. ਕੋਸਮ੍ਬਕਕ੍ਖਨ੍ਧਕਂ

ਕੋਸਮ੍ਬਕਵਿਵਾਦਕਥਾ

੪੫੧. ਕੋਸਮ੍ਬਕਕ੍ਖਨ੍ਧਕੇ – ਤਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਂਸੂਤਿ ਏਤ੍ਥ ਅਯਮਨੁਪੁਬ੍ਬਿਕਥਾ – ਦ੍ਵੇ ਕਿਰ ਭਿਕ੍ਖੂ ਏਕਸ੍ਮਿਂ ਆਵਾਸੇ ਵਸਨ੍ਤਿ ਵਿਨਯਧਰੋ ਚ ਸੁਤ੍ਤਨ੍ਤਿਕੋ ਚ. ਤੇਸੁ ਸੁਤ੍ਤਨ੍ਤਿਕੋ ਭਿਕ੍ਖੁ ਏਕਦਿਵਸਂ ਵਚ੍ਚਕੁਟਿਂ ਪਵਿਟ੍ਠੋ ਆਚਮਨਉਦਕਾਵਸੇਸਂ ਭਾਜਨੇ ਠਪੇਤ੍ਵਾਵ ਨਿਕ੍ਖਮਿ. ਵਿਨਯਧਰੋ ਪਚ੍ਛਾ ਪਵਿਟ੍ਠੋ ਤਂ ਉਦਕਂ ਦਿਸ੍ਵਾ ਨਿਕ੍ਖਮਿਤ੍ਵਾ ਤਂ ਭਿਕ੍ਖੁਂ ਪੁਚ੍ਛਿ – ‘‘ਆਵੁਸੋ, ਤਯਾ ਇਦਂ ਉਦਕਂ ਠਪਿਤ’’ਨ੍ਤਿ? ‘‘ਆਮਾਵੁਸੋ’’ਤਿ. ‘‘ਕਿਂ ਤ੍ਵਂ ਏਤ੍ਥ ਆਪਤ੍ਤਿਭਾਵਂ ਨ ਜਾਨਾਸੀ’’ਤਿ? ‘‘ਆਮ, ਨ ਜਾਨਾਮੀ’’ਤਿ. ‘‘ਹੋਤਿ, ਆਵੁਸੋ ਏਤ੍ਥ ਆਪਤ੍ਤੀ’’ਤਿ? ‘‘ਸਚੇ ਹੋਤਿ, ਦੇਸਿਸ੍ਸਾਮੀ’’ਤਿ. ‘‘ਸਚੇ ਪਨ ਤੇ, ਆਵੁਸੋ, ਅਸਞ੍ਚਿਚ੍ਚ ਅਸਤਿਯਾ ਕਤਂ, ਨਤ੍ਥਿ ਆਪਤ੍ਤੀ’’ਤਿ. ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਅਹੋਸਿ.

ਵਿਨਯਧਰੋਪਿ ਅਤ੍ਤਨੋ ਨਿਸ੍ਸਿਤਕਾਨਂ ‘‘ਅਯਂ ਸੁਤ੍ਤਨ੍ਤਿਕੋ ਆਪਤ੍ਤਿਂ ਆਪਜ੍ਜਮਾਨੋਪਿ ਨ ਜਾਨਾਤੀ’’ਤਿ ਆਰੋਚੇਸਿ. ਤੇ ਤਸ੍ਸ ਨਿਸ੍ਸਿਤਕੇ ਦਿਸ੍ਵਾ ‘‘ਤੁਮ੍ਹਾਕਂ ਉਪਜ੍ਝਾਯੋ ਆਪਤ੍ਤਿਂ ਆਪਜ੍ਜਿਤ੍ਵਾਪਿ ਆਪਤ੍ਤਿਭਾਵਂ ਨ ਜਾਨਾਤੀ’’ਤਿ ਆਹਂਸੁ. ਤੇ ਗਨ੍ਤ੍ਵਾ ਅਤ੍ਤਨੋ ਉਪਜ੍ਝਾਯਸ੍ਸ ਆਰੋਚੇਸੁਂ. ਸੋ ਏਵਮਾਹ – ‘‘ਅਯਂ ਵਿਨਯਧਰੋ ਪੁਬ੍ਬੇ ਅਨਾਪਤ੍ਤੀ’’ਤਿ ਵਤ੍ਵਾ ‘‘ਇਦਾਨਿ ਆਪਤ੍ਤੀ’’ਤਿ ਵਦਤਿ. ਮੁਸਾਵਾਦੀ ਏਸੋਤਿ. ਤੇ ਗਨ੍ਤ੍ਵਾ ‘‘ਤੁਮ੍ਹਾਕਂ ਉਪਜ੍ਝਾਯੋ ਮੁਸਾਵਾਦੀ’’ਤਿ ਏਵਂ ਅਞ੍ਞਮਞ੍ਞਂ ਕਲਹਂ ਵਡ੍ਢਯਿਂਸੁ. ਤਤੋ ਵਿਨਯਧਰੋ ਓਕਾਸਂ ਲਭਿਤ੍ਵਾ ਤਸ੍ਸ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਅਕਾਸਿ. ਤੇਨ ਵੁਤ੍ਤਂ – ‘‘ਤਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਂਸੂ’’ਤਿ.

੪੫੩. ਭਿਨ੍ਨੋ ਭਿਕ੍ਖੁਸਙ੍ਘੋ ਭਿਨ੍ਨੋ ਭਿਕ੍ਖੁਸਙ੍ਘੋਤਿ ਏਤ੍ਥ ਨ ਤਾਵ ਭਿਨ੍ਨੋ; ਅਪਿਚ ਖੋ ਯਥਾ ਦੇਵੇ ਵੁਟ੍ਠੇ ‘‘ਇਦਾਨਿ ਸਸ੍ਸਂ ਨਿਪ੍ਫਨ੍ਨ’’ਨ੍ਤਿ ਵੁਚ੍ਚਤਿ, ਅਵਸ੍ਸਞ੍ਹਿ ਤਂ ਨਿਪ੍ਫਜ੍ਜਿਸ੍ਸਤਿ, ਏਵਮੇਵ ਇਮਿਨਾ ਕਾਰਣੇਨ ਆਯਤਿਂ ਅਵਸ੍ਸਂ ਭਿਜ੍ਜਿਸ੍ਸਤਿ, ਸੋ ਚ ਖੋ ਕਲਹਵਸੇਨ ਨ ਸਙ੍ਘਭੇਦਵਸੇਨ, ਤਸ੍ਮਾ ‘‘ਭਿਨ੍ਨੋ’’ਤਿ ਵੁਤ੍ਤਂ. ਸਮ੍ਭਮਅਤ੍ਥਵਸੇਨ ਚੇਤ੍ਥ ਆਮੇਡਿਤਂ ਵੇਦਿਤਬ੍ਬਂ.

੪੫੪. ਏਤਮਤ੍ਥਂ ਭਾਸਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮੀਤਿ ਕਸ੍ਮਾ ਏਵਂ ਭਾਸਿਤ੍ਵਾ ਪਕ੍ਕਾਮਿ? ਸਚੇ ਹਿ ਭਗਵਾ ਉਕ੍ਖੇਪਕੇ ਵਾ ‘‘ਅਕਾਰਣੇ ਤੁਮ੍ਹੇਹਿ ਸੋ ਭਿਕ੍ਖੁ ਉਕ੍ਖਿਤ੍ਤੋ’’ਤਿ ਵਦੇਯ੍ਯ, ਉਕ੍ਖਿਤ੍ਤਾਨੁਵਤ੍ਤਕੇ ਵਾ ‘‘ਤੁਮ੍ਹੇ ਆਪਤ੍ਤਿਂ ਆਪਨ੍ਨਾ’’ਤਿ ਵਦੇਯ੍ਯ, ‘‘ਏਤੇਸਂ ਭਗਵਾ ਪਕ੍ਖੋ, ਏਤੇਸਂ ਭਗਵਾ ਪਕ੍ਖੋ’’ਤਿ ਵਤ੍ਵਾ ਆਘਾਤਂ ਬਨ੍ਧੇਯ੍ਯੁਂ, ਤਸ੍ਮਾ ਤਨ੍ਤਿਮੇਵ ਠਪੇਤ੍ਵਾ ਏਤਮਤ੍ਥਂ ਭਾਸਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ.

੪੫੫. ਅਤ੍ਤਨਾ ਵਾ ਅਤ੍ਤਾਨਨ੍ਤਿ ਏਤ੍ਥ ਯੋ ਸਙ੍ਘੇਨ ਉਕ੍ਖੇਪਨੀਯਕਤਾਨਂ ਅਧਮ੍ਮਵਾਦੀਨਂ ਪਕ੍ਖੇ ਨਿਸਿਨ੍ਨੋ ‘‘ਤੁਮ੍ਹੇ ਕਿਂ ਭਣਥਾ’’ਤਿ ਤੇਸਞ੍ਚ ਇਤਰੇਸਞ੍ਚ ਲਦ੍ਧਿਂ ਸੁਤ੍ਵਾ ‘‘ਇਮੇ ਅਧਮ੍ਮਵਾਦਿਨੋ, ਇਤਰੇ ਧਮ੍ਮਵਾਦਿਨੋ’’ਤਿ ਚਿਤ੍ਤਂ ਉਪ੍ਪਾਦੇਤਿ, ਅਯਂ ਤੇਸਂ ਮਜ੍ਝੇ ਨਿਸਿਨ੍ਨੋਵ ਤੇਸਂ ਨਾਨਾਸਂਵਾਸਕੋ ਹੋਤਿ, ਕਮ੍ਮਂ ਕੋਪੇਤਿ, ਇਤਰੇਸਮ੍ਪਿ ਹਤ੍ਥਪਾਸਂ ਅਨਾਗਤਤ੍ਤਾ ਕੋਪੇਤਿ. ਏਵਂ ਅਤ੍ਤਨਾ ਵਾ ਅਤ੍ਤਾਨਂ ਨਾਨਾਸਂਵਾਸਕਂ ਕਰੋਤਿ. ਸਮਾਨਸਂਵਾਸਕਨ੍ਤਿ ਏਤ੍ਥਾਪਿ ਯੋ ਅਧਮ੍ਮਵਾਦੀਨਂ ਪਕ੍ਖੇ ਨਿਸਿਨ੍ਨੋ ‘‘ਅਧਮ੍ਮਵਾਦਿਨੋ ਇਮੇ, ਇਤਰੇ ਧਮ੍ਮਵਾਦਿਨੋ’’ਤਿ ਤੇਸਂ ਮਜ੍ਝਂ ਪਵਿਸਤਿ, ਯਤ੍ਥ ਵਾ ਤਤ੍ਥ ਵਾ ਪਨ ਪਕ੍ਖੇ ਨਿਸਿਨ੍ਨੋ ‘‘ਇਮੇ ਧਮ੍ਮਵਾਦਿਨੋ’’ਤਿ ਗਣ੍ਹਾਤਿ, ਅਯਂ ਅਤ੍ਤਨਾ ਵਾ ਅਤ੍ਤਾਨਂ ਸਮਾਨਸਂਵਾਸਕਂ ਕਰੋਤੀਤਿ ਵੇਦਿਤਬ੍ਬੋ.

੪੫੬. ਕਾਯਕਮ੍ਮਂ ਵਚੀਕਮ੍ਮਨ੍ਤਿ ਏਤ੍ਥ ਕਾਯੇਨ ਪਹਰਨ੍ਤਾ ਕਾਯਕਮ੍ਮਂ ਉਪਦਂਸੇਨ੍ਤਿ, ਫਰੁਸਂ ਵਦਨ੍ਤਾ ਵਚੀਕਮ੍ਮਂ ਉਪਦਂਸੇਨ੍ਤੀਤਿ ਵੇਦਿਤਬ੍ਬਾ. ਹਤ੍ਥਪਰਾਮਾਸਂ ਕਰੋਨ੍ਤੀਤਿ ਕੋਧਵਸੇਨ ਹਤ੍ਥੇਹਿ ਅਞ੍ਞਮਞ੍ਞਂ ਪਰਾਮਸਨਂ ਕਰੋਨ੍ਤਿ. ਅਧਮ੍ਮਿਯਾਯਮਾਨੇਤਿ ਅਧਮ੍ਮਿਯਾਨਿ ਕਿਚ੍ਚਾਨਿ ਕੁਰੁਮਾਨੇ. ਅਸਮ੍ਮੋਦਿਕਾਵਤ੍ਤਮਾਨਾਯਾਤਿ ਅਸਮ੍ਮੋਦਿਕਾਯ ਵਤ੍ਤਮਾਨਾਯ. ਅਯਮੇਵ ਵਾ ਪਾਠੋ. ਸਮ੍ਮੋਦਨਕਥਾਯ ਅਵਤ੍ਤਮਾਨਾਯਾਤਿ ਅਤ੍ਥੋ. ਏਤ੍ਤਾਵਤਾ ਨ ਅਞ੍ਞਮਞ੍ਞਨ੍ਤਿ ਏਤ੍ਥ ਦ੍ਵੇ ਪਨ੍ਤਿਯੋ ਕਤ੍ਵਾ ਉਪਚਾਰਂ ਮੁਞ੍ਚਿਤ੍ਵਾ ਨਿਸੀਦਿਤਬ੍ਬਂ, ਧਮ੍ਮਿਯਾਯਮਾਨੇ ਪਨ ਸਮ੍ਮੋਦਿਕਾਯ ਵਤ੍ਤਮਾਨਾਯ ਆਸਨਨ੍ਤਰਿਕਾਯ ਨਿਸੀਦਿਤਬ੍ਬਂ, ਏਕੇਕਂ ਆਸਨਂ ਅਨ੍ਤਰਂ ਕਤ੍ਵਾ ਨਿਸੀਦਿਤਬ੍ਬਂ.

੪੫੭-੪੫੮. ਮਾ ਭਣ੍ਡਨਨ੍ਤਿਆਦੀਸੁ ‘‘ਅਕਤ੍ਥਾ’’ਤਿ ਪਾਠਸੇਸਂ ਗਹੇਤ੍ਵਾ ‘‘ਮਾ ਭਣ੍ਡਨਂ ਅਕਤ੍ਥਾ’’ਤਿ ਏਵਮਤ੍ਥੋ ਦਟ੍ਠਬ੍ਬੋ. ਅਧਮ੍ਮਵਾਦੀਤਿ ਉਕ੍ਖਿਤ੍ਤਾਨੁਵਤ੍ਤਕੇਸੁ ਅਞ੍ਞਤਰੋ. ਅਯਂ ਪਨ ਭਿਕ੍ਖੁ ਭਗਵਤੋ ਅਤ੍ਥਕਾਮੋ, ਅਯਂ ਕਿਰਸ੍ਸ ਅਧਿਪ੍ਪਾਯੋ ‘‘ਇਮੇ ਭਿਕ੍ਖੂ ਕੋਧਾਭਿਭੂਤਾ ਸਤ੍ਥੁ ਵਚਨਂ ਨ ਗਣ੍ਹਨ੍ਤਿ, ਮਾ ਭਗਵਾ ਏਤੇ ਓਵਦਨ੍ਤੋ ਕਿਲਮਿਤ੍ਥਾ’’ਤਿ ਤਸ੍ਮਾ ਏਵਮਾਹ. ਭਗਵਾ ਪਨ ‘‘ਪਚ੍ਛਾਪਿ ਸਞ੍ਞਂ ਲਭਿਤ੍ਵਾ ਓਰਮਿਸ੍ਸਨ੍ਤੀ’’ਤਿ ਤੇਸਂ ਅਨੁਕਮ੍ਪਾਯ ਅਤੀਤਵਤ੍ਥੁਂ ਆਹਰਿਤ੍ਵਾ ਕਥੇਸਿ. ਤਤ੍ਥ ਅਨਤ੍ਥਤੋਤਿ ਅਨਤ੍ਥੋ ਅਤੋ; ਏਤਸ੍ਮਾ ਮੇ ਪੁਰਿਸਾ ਅਨਤ੍ਥੋਤਿ ਵੁਤ੍ਤਂ ਹੋਤਿ. ਅਥ ਵਾ ਅਨਤ੍ਥਤੋਤਿ ਅਨਤ੍ਥਦੋ. ਸੇਸਂ ਪਾਕਟਮੇਵ.

੪੬੪. ਪੁਥੁਸਦ੍ਦੋਤਿਆਦਿਗਾਥਾਸੁ ਪਨ ਪੁਥੁ ਮਹਾ ਸਦ੍ਦੋ ਅਸ੍ਸਾਤਿ ਪੁਥੁਸਦ੍ਦੋ. ਸਮਜਨੋਤਿ ਸਮਾਨੋ ਏਕਸਦਿਸੋ ਜਨੋ; ਸਬ੍ਬੋ ਚਾਯਂ ਭਣ੍ਡਨਕਾਰਕੋਜਨੋ ਸਮਨ੍ਤਤੋ ਸਦ੍ਦਨਿਚ੍ਛਾਰਣੇਨ ਪੁਥੁਸਦ੍ਦੋ ਚੇਵ ਸਦਿਸੋ ਚਾਤਿ ਵੁਤ੍ਤਂ ਹੋਤਿ. ਨ ਬਾਲੋ ਕੋਚਿ ਮਞ੍ਞਥਾਤਿ ਤਤ੍ਥ ਕੋਚਿ ਏਕੋਪਿ ‘‘ਅਹਂ ਬਾਲੋ’’ਤਿ ਨ ਮਞ੍ਞਿਤ੍ਥ; ਸਬ੍ਬੇਪਿ ਪਣ੍ਡਿਤਮਾਨਿਨੋਯੇਵ. ਨਾਞ੍ਞਂ ਭਿਯ੍ਯੋ ਅਮਞ੍ਞਰੁਨ੍ਤਿ ਕੋਚਿ ਏਕੋਪਿ ‘‘ਅਹਂ ਬਾਲੋ’’ਤਿ ਚ ਨ ਮਞ੍ਞਿਤ੍ਥ; ਭਿਯ੍ਯੋ ਚ ਸਙ੍ਘਸ੍ਮਿਂ ਭਿਜ੍ਜਮਾਨੇ ਅਞ੍ਞਮ੍ਪਿ ਏਕਂ ‘‘ਮਯ੍ਹਂ ਕਾਰਣਾ ਸਙ੍ਘੋ ਭਿਜ੍ਜਤੀ’’ਤਿ ਇਦਂ ਕਾਰਣਂ ਨ ਮਞ੍ਞਿਤ੍ਥਾਤਿ ਅਤ੍ਥੋ.

ਪਰਿਮੁਟ੍ਠਾਤਿ ਪਰਿਮੁਟ੍ਠਸ੍ਸਤਿਨੋ. ਵਾਚਾਗੋਚਰਭਾਣਿਨੋਤਿ ਰਾਕਾਰਸ੍ਸ ਰਸ੍ਸਾਦੇਸੋ ਕਤੋ, ਵਾਚਾਗੋਚਰਾ ਨ ਸਤਿਪਟ੍ਠਾਨਾਦਿਗੋਚਰਾ. ਭਾਣਿਨੋ ਚ ਕਥਂ ਭਾਣਿਨੋ? ਯਾਵਿਚ੍ਛਨ੍ਤਿ ਮੁਖਾਯਾਮਂ ਯਾਵ ਮੁਖਂ ਪਸਾਰੇਤੁਂ ਇਚ੍ਛਨ੍ਤਿ, ਤਾਵ ਪਸਾਰੇਤ੍ਵਾ ਭਾਣਿਨੋ, ਏਕੋਪਿ ਸਙ੍ਘਗਾਰਵੇਨ ਮੁਖਸਙ੍ਕੋਚਂ ਨ ਕਰੋਤੀਤਿ ਅਤ੍ਥੋ. ਯੇਨ ਨੀਤਾਤਿ ਯੇਨ ਕਲਹੇਨ ਇਮਂ ਨਿਲ੍ਲਜ੍ਜਭਾਵਂ ਨੀਤਾ. ਨ ਤਂ ਵਿਦੂਤਿ ਨ ਤਂ ਜਾਨਨ੍ਤਿ, ‘‘ਏਵਂ ਸਾਦੀਨਵੋ ਅਯ’’ਨ੍ਤਿ.

ਯੇ ਚ ਤਂ ਉਪਨਯ੍ਹਨ੍ਤੀਤਿ ਤਂ ‘‘ਅਕ੍ਕੋਚ੍ਛਿ ਮਂ, ਅਵਧਿ ਮ’’ਨ੍ਤਿਆਦਿਕਂ ਆਕਾਰਂ ਯੇ ਚ ਉਪਨਯ੍ਹਨ੍ਤਿ. ਸਨਨ੍ਤਨੋਤਿ ਪੋਰਾਣੋ.

ਪਰੇਤਿ ਪਣ੍ਡਿਤੇ ਠਪੇਤ੍ਵਾ ਤਤੋ ਅਞ੍ਞੇ ਭਣ੍ਡਨਕਾਰਕਾ ਪਰੇ ਨਾਮ. ਤੇ ਏਤ੍ਥ ਸਙ੍ਘਮਜ੍ਝੇ ਕਲਹਂ ਕਰੋਨ੍ਤਾ ‘‘ਮਯਂ ਯਮਾਮਸੇ ਉਪਯਮਾਮ; ਸਤਤਂ ਸਮਿਤਂ ਮਚ੍ਚੁਸਨ੍ਤਿਕਂ ਗਚ੍ਛਾਮਾ’’ਤਿ ਨ ਜਾਨਨ੍ਤਿ. ਯੇ ਚ ਤਤ੍ਥ ਵਿਜਾਨਨ੍ਤੀਤਿ ਯੇ ਤਤ੍ਥ ਪਣ੍ਡਿਤਾ ‘‘ਮਯਂ ਮਚ੍ਚੁਸਮੀਪਂ ਗਚ੍ਛਾਮਾ’’ਤਿ ਵਿਜਾਨਨ੍ਤਿ. ਤਤੋ ਸਮ੍ਮਨ੍ਤਿ ਮੇਧਗਾਤਿ ਏਵਞ੍ਹਿ ਤੇ ਜਾਨਨ੍ਤਾ ਯੋਨਿਸੋਮਨਸਿਕਾਰਂ ਉਪ੍ਪਾਦੇਤ੍ਵਾ ਮੇਧਗਾਨਂ ਕਲਹਾਨਂ ਵੂਪਸਮਾਯ ਪਟਿਪਜ੍ਜਨ੍ਤਿ.

ਅਟ੍ਠਿਚ੍ਛਿਨ੍ਨਾਤਿ ਅਯਂ ਗਾਥਾ ਬ੍ਰਹ੍ਮਦਤ੍ਤਞ੍ਚ ਦੀਘਾਵੁਕੁਮਾਰਞ੍ਚ ਸਨ੍ਧਾਯ ਵੁਤ੍ਤਾ. ਤੇਸਮ੍ਪਿ ਹੋਤਿ ਸਙ੍ਗਤਿ, ਕਸ੍ਮਾ ਤੁਮ੍ਹਾਕਂ ਨ ਹੋਤਿ, ਯੇਸਂ ਵੋ ਨੇਵ ਮਾਤਾਪਿਤੂਨਂ ਅਟ੍ਠੀਨਿ ਛਿਨ੍ਨਾਨਿ, ਨ ਪਾਣਾ ਹਤਾ, ਨ ਗਵਾਸ੍ਸਧਨਾਨਿ ਹਟਾਨੀਤਿ.

ਸਚੇ ਲਭੇਥਾਤਿਆਦਿਗਾਥਾ ਪਣ੍ਡਿਤਸਹਾਯਸ੍ਸ ਚ ਬਾਲਸਹਾਯਸ੍ਸ ਚ ਵਣ੍ਣਾਵਣ੍ਣਦੀਪਨਤ੍ਥਂ ਵੁਤ੍ਤਾ. ਅਭਿਭੁਯ੍ਯ ਸਬ੍ਬਾਨਿ ਪਰਿਸ੍ਸਯਾਨੀਤਿ ਪਾਕਟਪਰਿਸ੍ਸਯੇ ਚ ਪਟਿਚ੍ਛਨ੍ਨਪਰਿਸ੍ਸਯੇ ਚ ਅਭਿਭਵਿਤ੍ਵਾ ਤੇਨ ਸਦ੍ਧਿਂ ਅਤ੍ਤਮਨੋ ਸਤਿਮਾ ਚਰੇਯ੍ਯ.

ਰਾਜਾਵ ਰਟ੍ਠਂ ਵਿਜਿਤਨ੍ਤਿ ਯਥਾ ਅਤ੍ਤਨੋ ਵਿਜਿਤਂ ਰਟ੍ਠਂ ਮਹਾਜਨਕਰਾਜਾ ਚ ਅਰਿਨ੍ਦਮਮਹਾਰਾਜਾ ਚ ਪਹਾਯ ਏਕਕਾ ਚਰਿਂਸੁ; ਏਵਂ ਚਰੇਯ੍ਯਾਤਿ ਅਤ੍ਥੋ. ਮਾਤਙ੍ਗਰਞ੍ਞੇਵ ਨਾਗੋਤਿ ਮਾਤਙ੍ਗੋ ਅਰਞ੍ਞੇ ਨਾਗੋਵ. ਮਾਤਙ੍ਗੋਤਿ ਹਤ੍ਥੀ ਵੁਚ੍ਚਤਿ; ਨਾਗੋਤਿ ਮਹਨ੍ਤਾਧਿਵਚਨਮੇਤਂ. ਯਥਾ ਹਿ ਮਾਤੁਪੋਸਕੋ ਮਾਤਙ੍ਗਨਾਗੋ ਅਰਞ੍ਞੇ ਏਕੋ ਚਰਿ, ਨ ਚ ਪਾਪਾਨਿ ਅਕਾਸਿ. ਯਥਾ ਚ ਪਾਲਿਲੇਯ੍ਯਕੋ, ਏਵਂ ਏਕੋ ਚਰੇ, ਨ ਚ ਪਾਪਾਨਿ ਕਯਿਰਾਤਿ ਵੁਤ੍ਤਂ ਹੋਤਿ.

ਪਾਲਿਲੇਯ੍ਯਕਗਮਨਕਥਾ

੪੬੭. ਪਾਲਿਲੇਯ੍ਯਕੇ ਵਿਹਰਤਿ ਰਕ੍ਖਿਤਵਨਸਣ੍ਡੇਤਿ ਪਾਲਿਲੇਯ੍ਯਕਂ ਉਪਨਿਸ੍ਸਾਯ ਰਕ੍ਖਿਤਵਨਸਣ੍ਡੇ ਵਿਹਰਤਿ. ਹਤ੍ਥਿਨਾਗੋਤਿ ਮਹਾਹਤ੍ਥੀ. ਹਤ੍ਥਿਕਲਭੇਹੀਤਿ ਹਤ੍ਥਿਪੋਤਕੇਹਿ. ਹਤ੍ਥਿਚ੍ਛਾਪੇਹੀਤਿ ਖੀਰੂਪਕੇਹਿ ਦਹਰਪੋਤਕੇਹਿ. ਛਿਨ੍ਨਗ੍ਗਾਨੀਤਿ ਤੇਹਿ ਪੁਰਤੋ ਪੁਰਤੋ ਗਚ੍ਛਨ੍ਤੇਹਿ ਛਿਨ੍ਨਗ੍ਗਾਨਿ ਖਾਯਿਤਾਵਸੇਸਾਨਿ ਖਾਣੁਸਦਿਸਾਨਿ ਤਿਣਾਨਿ ਖਾਦਤਿ. ਓਭਗ੍ਗੋਭਗ੍ਗਨ੍ਤਿ ਤੇਨ ਹਤ੍ਥਿਨਾਗੇਨ ਉਚ੍ਚਟ੍ਠਾਨਤੋ ਭਞ੍ਜਿਤ੍ਵਾ ਭਞ੍ਜਿਤ੍ਵਾ ਪਾਤਿਤਂ. ਅਸ੍ਸ ਸਾਖਾਭਙ੍ਗਨ੍ਤਿ ਏਤਸ੍ਸ ਸਨ੍ਤਕਂ ਸਾਖਾਭਙ੍ਗਂ ਤੇ ਖਾਦਨ੍ਤਿ. ਆਵਿਲਾਨੀਤਿ ਤੇਹਿ ਪਠਮਤਰਂ ਓਤਰਿਤ੍ਵਾ ਪਿਵਨ੍ਤੇਹਿ ਆਲੁਲਿਤਾਨਿ ਕਦ੍ਦਮੋਦਕਾਨਿ ਪਿਵਤਿ. ਓਗਾਹਾਤਿ ਤਿਤ੍ਥਤੋ.

ਨਾਗਸ੍ਸ ਨਾਗੇਨਾਤਿ ਹਤ੍ਥਿਨਾਗਸ੍ਸ ਬੁਦ੍ਧਨਾਗੇਨ. ਈਸਾਦਨ੍ਤਸ੍ਸਾਤਿ ਰਥਈਸਾਸਦਿਸਦਨ੍ਤਸ੍ਸ. ਯਦੇਕੋ ਰਮਤੀ ਵਨੇਤਿ ਯਸ੍ਮਾ ਬੁਦ੍ਧਨਾਗੋ ਵਿਯ ਅਯਮ੍ਪਿ ਹਤ੍ਥਿਨਾਗੋ ਏਕੋ ਪਵਿਵਿਤ੍ਤੋ ਵਨੇ ਰਮਤਿ; ਤਸ੍ਮਾਸ੍ਸ ਨਾਗਸ੍ਸ ਨਾਗੇਨ ਚਿਤ੍ਤਂ ਸਮੇਤਿ, ਏਕੀਭਾਵਰਤਿਯਾ ਏਕਸਦਿਸਂ ਹੋਤੀਤਿ ਅਤ੍ਥੋ.

ਯਥਾਭਿਰਨ੍ਤਂ ਵਿਹਰਿਤ੍ਵਾਤਿ ਏਤ੍ਥ ਤੇਮਾਸਂ ਭਗਵਾ ਤਤ੍ਥ ਵਿਹਾਸੀਤਿ ਵੇਦਿਤਬ੍ਬੋ. ਏਤ੍ਤਾਵਤਾ ਕੋਸਮ੍ਬਕੇਹਿ ਕਿਰ ਉਬ੍ਬਾਲ਼੍ਹੋ ਭਗਵਾ ਤੇਮਾਸਂ ਅਰਞ੍ਞਂ ਪਵਿਸਿਤ੍ਵਾ ਵਸੀਤਿ ਸਬ੍ਬਤ੍ਥ ਕਥਾ ਪਤ੍ਥਟਾ ਅਹੋਸਿ.

ਅਥ ਖੋ ਕੋਸਮ੍ਬਕਾ ਉਪਾਸਕਾਤਿ ਅਥ ਖੋ ਇਮਂ ਕਥਾਸਲ੍ਲਾਪਂ ਸੁਤ੍ਵਾ ਕੋਸਮ੍ਬਿਵਾਸਿਨੋ ਉਪਾਸਕਾ.

ਅਟ੍ਠਾਰਸਵਤ੍ਥੁਕਥਾ

੪੬੮. ਅਧਮ੍ਮਂ ਧਮ੍ਮੋਤਿਆਦੀਨਿ ਅਟ੍ਠਾਰਸ ਭੇਦਕਰਵਤ੍ਥੂਨਿ ਸਙ੍ਘਭੇਦਕਕ੍ਖਨ੍ਧਕੇ ਵਣ੍ਣਯਿਸ੍ਸਾਮ.

੪੭੫. ਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਓਸਾਰੇਤ੍ਵਾਤਿ ਤਂ ਗਹੇਤ੍ਵਾ ਸੀਮਂ ਗਨ੍ਤ੍ਵਾ ਆਪਤ੍ਤਿਂ ਦੇਸਾਪੇਤ੍ਵਾ ਕਮ੍ਮਵਾਚਾਯ ਓਸਾਰੇਤ੍ਵਾ. ਤਾਵਦੇਵ ਉਪੋਸਥੋਤਿ ਤਂਦਿਵਸਮੇਵ ਉਪੋਸਥਕ੍ਖਨ੍ਧਕੇ ਵੁਤ੍ਤਨਯੇਨੇਵ ਸਾਮਗ੍ਗੀਉਪੋਸਥੋ ਕਾਤਬ੍ਬੋ.

੪੭੬. ਅਮੂਲਾ ਮੂਲਂ ਗਨ੍ਤ੍ਵਾਤਿ ਨ ਮੂਲਾ ਮੂਲਂ ਗਨ੍ਤ੍ਵਾ; ਤਂ ਵਤ੍ਥੁਂ ਅਵਿਨਿਚ੍ਛਿਨਿਤ੍ਵਾਤਿ ਅਤ੍ਥੋ. ਅਯਂ ਵੁਚ੍ਚਤਿ ਉਪਾਲਿ ਸਙ੍ਘਸਾਮਗ੍ਗੀ ਅਤ੍ਥਾਪੇਤਾ ਬ੍ਯਞ੍ਜਨੂਪੇਤਾਤਿ ਅਤ੍ਥਤੋ ਅਪਗਤਾ, ‘‘ਸਙ੍ਘਸਾਮਗ੍ਗੀ’’ਤਿ ਇਮਂ ਪਨ ਬ੍ਯਞ੍ਜਨਮਤ੍ਤਂ ਉਪੇਤਾ.

੪੭੭. ਸਙ੍ਘਸ੍ਸ ਕਿਚ੍ਚੇਸੂਤਿ ਸਙ੍ਘਸ੍ਸ ਕਰਣੀਯੇਸੁ ਉਪ੍ਪਨ੍ਨੇਸੁ. ਮਨ੍ਤਨਾਸੂਤਿ ਵਿਨਯਮਨ੍ਤਨਾਸੁ. ਅਤ੍ਥੇਸੁ ਜਾਤੇਸੂਤਿ ਵਿਨਯਅਤ੍ਥੇਸੁ ਉਪ੍ਪਨ੍ਨੇਸੁ. ਵਿਨਿਚ੍ਛਯੇਸੂਤਿ ਤੇਸਂਯੇਵ ਅਤ੍ਥਾਨਂ ਵਿਨਿਚ੍ਛਯੇਸੁ. ਮਹਤ੍ਥਿਕੋਤਿ ਮਹਾਉਪਕਾਰੋ. ਪਗ੍ਗਹਾਰਹੋਤਿ ਪਗ੍ਗਣ੍ਹਿਤੁਂ ਵੁਤ੍ਤੋ.

ਅਨਾਨੁਵਜ੍ਜੋ ਪਠਮੇਨ ਸੀਲਤੋਤਿਆਦਿਮ੍ਹਿਯੇਵ ਤਾਵ ਸੀਲਤੋ ਨ ਉਪਵਜ੍ਜੋ. ਅਵੇਕ੍ਖਿਤਾਚਾਰੋਤਿ ਅਪੇਕ੍ਖਿਤਾਚਾਰੋ; ਆਲੋਕਿਤੇ ਵਿਲੋਕਿਤੇ ਸਮ੍ਪਜਾਨਕਾਰੀਤਿਆਦਿਨਾ ਨਯੇਨ ਉਪਪਰਿਕ੍ਖਿਤਾਚਾਰੋ. ਅਟ੍ਠਕਥਾਸੁ ਪਨ ‘‘ਅਪ੍ਪਟਿਚ੍ਛਨ੍ਨਾਚਾਰੋ’’ਤਿ ਵੁਤ੍ਤਂ.

ਵਿਸਯ੍ਹਾਤਿ ਅਭਿਭਵਿਤ੍ਵਾ. ਅਨੁਯ੍ਯੁਤਂ ਭਣਨ੍ਤਿ ਅਨੁਞ੍ਞਾਤਂ ਅਨਪਗਤਂ ਭਣਨ੍ਤੋ. ਯਸ੍ਮਾ ਹਿ ਸੋ ਅਨੁਯ੍ਯੁਤਂ ਭਣਤਿ, ਉਸੂਯਾਯ ਵਾ ਅਗਤਿਗਮਨਵਸੇਨ ਵਾ ਕਾਰਣਾਪਗਤਂ ਨ ਭਣਤਿ, ਤਸ੍ਮਾ ਅਤ੍ਥਂ ਨ ਹਾਪੇਤਿ. ਉਸੂਯਾਯ ਪਨ ਅਗਤਿਗਮਨਵਸੇਨ ਵਾ ਭਣਨ੍ਤੋ ਅਤ੍ਥਂ ਹਾਪੇਤਿ, ਕਾਰਣਂ ਨ ਦੇਤਿ, ਤਸ੍ਮਾ ਸੋ ਪਰਿਸਗਤੋ ਛਮ੍ਭਤਿ ਚੇਵ ਵੇਧਤਿ ਚ. ਯੋ ਈਦਿਸੋ ਨ ਹੋਤਿ, ਅਯਂ ‘‘ਪਗ੍ਗਹਾਰਹੋ’’ਤਿ ਦਸ੍ਸੇਤਿ.

ਕਿਞ੍ਚ ਭਿਯ੍ਯੋ ‘‘ਤਥੇਵ ਪਞ੍ਹ’’ਨ੍ਤਿ ਗਾਥਾ, ਤਸ੍ਸਤ੍ਥੋ – ਯਥਾ ਚ ਅਨੁਯ੍ਯੁਤਂ ਭਣਨ੍ਤੋ ਅਤ੍ਥਂ ਨ ਹਾਪੇਤਿ, ਤਥੇਵ ਪਰਿਸਾਯ ਮਜ੍ਝੇ ਪਞ੍ਹਂ ਪੁਚ੍ਛਿਤੋ ਸਮਾਨੋ ਨ ਚੇਵ ਪਜ੍ਝਾਯਤਿ, ਨ ਚ ਮਙ੍ਕੁ ਹੋਤਿ. ਯੋ ਹਿ ਅਤ੍ਥਂ ਨ ਜਾਨਾਤਿ, ਸੋ ਪਜ੍ਝਾਯਤਿ. ਯੋ ਵਤ੍ਤੁਂ ਨ ਸਕ੍ਕੋਤਿ, ਸੋ ਮਙ੍ਕੁ ਹੋਤਿ. ਯੋ ਪਨ ਅਤ੍ਥਞ੍ਚ ਜਾਨਾਤਿ, ਵਤ੍ਤੁਞ੍ਚ ਸਕ੍ਕੋਤਿ; ਸੋ ਨ ਪਜ੍ਝਾਯਤਿ, ਨ ਮਙ੍ਕੁ ਹੋਤਿ. ਕਾਲਾਗਤਨ੍ਤਿ ਕਥੇਤਬ੍ਬਯੁਤ੍ਤਕਾਲੇ ਆਗਤਂ. ਬ੍ਯਾਕਰਣਾਰਹਨ੍ਤਿ ਪਞ੍ਹਸ੍ਸ ਅਤ੍ਥਾਨੁਲੋਮਤਾਯ ਬ੍ਯਾਕਰਣਾਨੁਚ੍ਛਵਿਕਂ. ਵਚੋਤਿ ਵਦਨ੍ਤੋ; ਏਵਰੂਪਂ ਵਚਨਂ ਭਣਨ੍ਤੋਤਿ ਅਤ੍ਥੋ. ਰਞ੍ਜੇਤੀਤਿ ਤੋਸੇਤਿ. ਵਿਞ੍ਞੂਪਰਿਸਨ੍ਤਿ ਵਿਞ੍ਞੂਨਂ ਪਰਿਸਂ.

ਆਚੇਰਕਮ੍ਹਿ ਚ ਸਕੇਤਿ ਅਤ੍ਤਨੋ ਆਚਰਿਯਵਾਦੇ. ਅਲਂ ਪਮੇਤੁਨ੍ਤਿ ਵੀਮਂਸਿਤੁਂ ਤਂ ਤਂ ਕਾਰਣਂ ਪਞ੍ਞਾਯ ਤੁਲਯਿਤੁਂ ਸਮਤ੍ਥੋ. ਪਗੁਣੋਤਿ ਕਤਪਰਿਚਯੋ ਲਦ੍ਧਾਸੇਵਨੋ. ਕਥੇਤਵੇਤਿ ਕਥੇਤਬ੍ਬੇ. ਵਿਰਦ੍ਧਿਕੋਵਿਦੋਤਿ ਵਿਰਦ੍ਧਟ੍ਠਾਨਕੁਸਲੋ.

ਪਚ੍ਚਤ੍ਥਿਕਾ ਯੇਨ ਵਜਨ੍ਤੀਤਿ ਅਯਂ ਗਾਥਾ ਯਾਦਿਸੇ ਕਥੇਤਬ੍ਬੇ ਪਗੁਣੋ, ਤਂ ਦਸ੍ਸੇਤੁਂ ਵੁਤ੍ਤਾ. ਅਯਞ੍ਹੇਤ੍ਥ ਅਤ੍ਥੋ – ਯਾਦਿਸੇਨ ਕਥਿਤੇਨ ਪਚ੍ਚਤ੍ਥਿਕਾ ਚ ਨਿਗ੍ਗਹਂ ਗਚ੍ਛਨ੍ਤਿ, ਮਹਾਜਨੋ ਚ ਸਞ੍ਞਪਨਂ ਗਚ੍ਛਤਿ; ਸਞ੍ਞਤ੍ਤਿਂ ਅਵਬੋਧਨਂ ਗਚ੍ਛਤੀਤਿ ਅਤ੍ਥੋ. ਯਞ੍ਚ ਕਥੇਨ੍ਤੋ ਸਕਂ ਆਦਾਯਂ ਅਤ੍ਤਨੋ ਆਚਰਿਯਵਾਦਂ ਨ ਹਾਪੇਤਿ, ਯਸ੍ਮਿਂ ਵਤ੍ਥੁਸ੍ਮਿਂ ਅਧਿਕਰਣਂ ਉਪ੍ਪਨ੍ਨਂ, ਤਦਨੁਰੂਪਂ ਅਨੁਪਘਾਤਕਰਂ ਪਞ੍ਹਂ ਬ੍ਯਾਕਰਮਾਨੋ ਤਾਦਿਸੇ ਕਥੇਤਬ੍ਬੇ ਪਗੁਣੋ ਹੋਤੀਤਿ.

ਦੂਤੇਯ੍ਯਕਮ੍ਮੇਸੁ ਅਲਨ੍ਤਿ ਅਟ੍ਠਹਿ ਦੂਤਙ੍ਗੇਹਿ ਸਮਨ੍ਨਾਗਤਤ੍ਤਾ ਸਙ੍ਘਸ੍ਸ ਦੂਤੇਯ੍ਯਕਮ੍ਮੇਸੁ ਸਮਤ੍ਥੋ. ਸੁਟ੍ਠੁ ਉਗ੍ਗਣ੍ਹਾਤੀਤਿ ਸਮੁਗ੍ਗਹੋ. ਇਦਂ ਵੁਤ੍ਤਂ ਹੋਤਿ – ਯਥਾ ਨਾਮ ਆਹੁਨਂ ਆਹੁਤਿਪਿਣ੍ਡਂ ਸਮੁਗ੍ਗਣ੍ਹਨ੍ਤਿ, ਏਵਂ ਪੀਤਿਸੋਮਨਸ੍ਸਜਾਤੇਨੇਵ ਚੇਤਸਾ ਸਙ੍ਘਸ੍ਸ ਕਿਚ੍ਚੇਸੁ ਸਮੁਗ੍ਗਹੋ, ਸਙ੍ਘਸ੍ਸਕਿਚ੍ਚੇਸੁ ਤਸ੍ਸ ਤਸ੍ਸ ਕਿਚ੍ਚਸ੍ਸ ਪਟਿਗ੍ਗਾਹਕੋਤਿ ਅਤ੍ਥੋ. ਕਰਂ ਵਚੋਤਿ ਵਚਨਂ ਕਰੋਨ੍ਤੋ. ਨ ਤੇਨ ਮਞ੍ਞਤੀਤਿ ਤੇਨ ਵਚਨਕਰਣੇਨ ‘‘ਅਹਂ ਕਰੋਮਿ, ਸਙ੍ਘਭਾਰਂ ਨਿਤ੍ਥਰਾਮੀ’’ਤਿ ਨ ਮਾਨਾਤਿਮਾਨਂ ਜਪ੍ਪੇਤਿ.

ਆਪਜ੍ਜਤਿ ਯਾਵਤਕੇਸੁ ਵਤ੍ਥੂਸੂਤਿ ਯਤ੍ਤਕੇਸੁ ਵਤ੍ਥੂਸੁ ਆਪਤ੍ਤਿਂ ਆਪਜ੍ਜਮਾਨੋ ਆਪਜ੍ਜਤਿ. ਹੋਤਿ ਯਥਾ ਚ ਵੁਟ੍ਠਿਤੀਤਿ ਤਸ੍ਸਾ ਚ ਆਪਤ੍ਤਿਯਾ ਯਥਾ ਵੁਟ੍ਠਾਨਂ ਹੋਤਿ. ਏਤੇ ਵਿਭਙ੍ਗਾਤਿ ਯੇਸੁ ਵਤ੍ਥੂਸੁ ਆਪਜ੍ਜਤਿ, ਯਥਾ ਚ ਵੁਟ੍ਠਾਨਂ ਹੋਤਿ, ਇਮੇਸਂ ਅਤ੍ਥਾਨਂ ਜੋਤਕਾ ਏਤੇ ਵਿਭਙ੍ਗਾ. ਉਭਯਸ੍ਸਾਤਿ ਉਭਯੇ ਅਸ੍ਸ. ਸ੍ਵਾਗਤਾਤਿ ਸੁਟ੍ਠੁ ਆਗਤਾ. ਆਪਤ੍ਤਿਵੁਟ੍ਠਾਨਪਦਸ੍ਸ ਕੋਵਿਦੋਤਿ ਆਪਤ੍ਤਿਵੁਟ੍ਠਾਨਕਾਰਣਕੁਸਲੋ.

ਯਾਨਿ ਚਾਚਰਨ੍ਤਿ ਯਾਨਿ ਚ ਭਣ੍ਡਨਕਾਰਣਾਦੀਨਿ ਆਚਰਨ੍ਤੋ ਤਜ੍ਜਨੀਯਕਮ੍ਮਾਦਿਵਸੇਨ ਨਿਸ੍ਸਾਰਣਂ ਗਚ੍ਛਤਿ. ਓਸਾਰਣਂ ਤਂਵੁਸਿਤਸ੍ਸ ਜਨ੍ਤੁਨੋਤਿ ਤਂ ਵਤ੍ਤਂ ਵੁਸਿਤਸ੍ਸ ਜਨ੍ਤੁਨੋ, ਯਾ ਓਸਾਰਣਾ ਕਾਤਬ੍ਬਾ, ਏਤਮ੍ਪਿ ਜਾਨਾਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਕੋਸਮ੍ਬਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਮਹਾਵਗ੍ਗਵਣ੍ਣਨਾ ਸਮਤ੍ਤਾ.

ਮਹਾਵਗ੍ਗ-ਅਟ੍ਠਕਥਾ ਨਿਟ੍ਠਿਤਾ.