੯. ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕਂ

ਪਾਤਿਮੋਕ੍ਖੁਦ੍ਦੇਸਯਾਚਨਕਥਾ

੩੮੩. ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕੇ – (ਨਨ੍ਦਿਮੁਖਿਯਾ ਰਤ੍ਤਿਯਾਤਿ ਅਰੁਣੁਟ੍ਠਿਤਕਾਲੇਪਿ ਹਿ ਨਨ੍ਦਿਮੁਖਾ ਵਿਯ ਰਤ੍ਤਿ ਖਾਯਤਿ. ਤੇਨਾਹ ‘‘ਨਨ੍ਦਿਮੁਖਿਯਾ ਰਤ੍ਤਿਯਾ’’ਤਿ. ਅਨ੍ਤੋਪੂਤਿਨ੍ਤਿ ਅਤ੍ਤਚਿਤ੍ਤਸਨ੍ਤਾਨੇ ਕਿਲੇਸਪੂਤਿਭਾਵੇਨ ਅਨ੍ਤੋਪੂਤਿਂ. ਅਵਸ੍ਸੁਤਨ੍ਤਿ ਕਿਲੇਸਵਸ੍ਸਨਵਸੇਨ ਅਵਸ੍ਸੁਤਂ. ਕਸਮ੍ਬੁਕਜਾਤਨ੍ਤਿ ਆਕਿਣ੍ਣਦੋਸਤਾਯ ਸਂਕਿਲਿਟ੍ਠਜਾਤਂ.) ਯਾਵ ਬਾਹਾਗਹਣਾਪਿ ਨਾਮਾਤਿ ‘‘ਅਪਰਿਸੁਦ੍ਧਾ ਆਨਨ੍ਦ ਪਰਿਸਾ’’ਤਿ ਵਚਨਂ ਸੁਤ੍ਵਾਯੇਵ ਹਿ ਤੇਨ ਪਕ੍ਕਮਿਤਬ੍ਬਂ ਸਿਯਾ, ਏਵਂ ਅਪਕ੍ਕਮਿਤ੍ਵਾ ਯਾਵ ਬਾਹਾਗਹਣਾਪਿ ਨਾਮ ਸੋ ਮੋਘਪੁਰਿਸੋ ਆਗਮੇਸ੍ਸਤਿ, ਅਚ੍ਛਰਿਯਮਿਦਨ੍ਤਿ ਦਸ੍ਸੇਤਿ.

੩੮੪. ਨ ਆਯਤਕੇਨੇਵ ਪਪਾਤੋਤਿ ਨ ਪਠਮਮੇਵ ਗਮ੍ਭੀਰੋ; ਅਨੁਪੁਬ੍ਬੇਨ ਗਮ੍ਭੀਰੋਤਿ ਅਤ੍ਥੋ. ਠਿਤਧਮ੍ਮੋ ਵੇਲਂ ਨਾਤਿਵਤ੍ਤਤੀਤਿ ਵੀਚੀਨਂ ਓਸਕ੍ਕਨਕਨ੍ਦਰਂ ਮਰਿਯਾਦਵੇਲਂ ਨਾਤਿਕ੍ਕਮਤਿ. ਤੀਰਂ ਵਾਹੇਤੀਤਿ ਤੀਰਤੋ ਅਪ੍ਪੇਤਿ; ਉਸ੍ਸਾਰੇਤੀਤਿ ਅਤ੍ਥੋ. ਅਞ੍ਞਾਪਟਿਵੇਧੋਤਿ ਅਰਹਤ੍ਤਪ੍ਪਤ੍ਤਿ.

੩੮੫. ਛਨ੍ਨਮਤਿਵਸ੍ਸਤੀਤਿ ਆਪਤ੍ਤਿਂ ਆਪਜ੍ਜਿਤ੍ਵਾ ਪਟਿਚ੍ਛਾਦੇਨ੍ਤੋ ਅਞ੍ਞਂ ਨਵਂ ਆਪਤ੍ਤਿਂ ਆਪਜ੍ਜਤਿ ਇਦਮੇਤਂ ਸਨ੍ਧਾਯ ਵੁਤ੍ਤਂ. ਵਿਵਟਂ ਨਾਤਿਵਸ੍ਸਤੀਤਿ ਆਪਤ੍ਤਿਂ ਆਪਜ੍ਜਿਤ੍ਵਾ ਵਿਵਰਨ੍ਤੋ ਅਞ੍ਞਂ ਨਾਪਜ੍ਜਤਿ ਇਦਮੇਤਂ ਸਨ੍ਧਾਯ ਵੁਤ੍ਤਂ.

ਪਾਤਿਮੋਕ੍ਖੁਦ੍ਦੇਸਯਾਚਨਕਥਾ ਨਿਟ੍ਠਿਤਾ.

ਪਾਤਿਮੋਕ੍ਖਸਵਨਾਰਹਕਥਾ

੩੮੬. ਠਪਿਤਂ ਹੋਤਿ ਪਾਤਿਮੋਕ੍ਖਨ੍ਤਿ ਏਤ੍ਥ ਪੁਰੇ ਵਾ ਪਚ੍ਛਾ ਵਾ ਠਪਿਤਮ੍ਪਿ ਅਟ੍ਠਪਿਤਂ ਹੋਤਿ, ਖੇਤ੍ਤੇ ਠਪਿਤਮੇਵ ਪਨ ਠਪਿਤਂ ਨਾਮ ਹੋਤਿ. ਤਸ੍ਮਾ ‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਅਜ੍ਜੁਪੋਸਥੋ ਪਨ੍ਨਰਸੋ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਉਪੋਸਥਂ ਕਰੇਯ੍ਯਾ’’ਤਿ ਏਤ੍ਥ ਯਾਵ ਰੇ-ਕਾਰਂ ਭਣਤਿ, ਤਾਵ ਠਪੇਤਬ੍ਬਂ, ਇਦਞ੍ਹਿ ਖੇਤ੍ਤਂ. ਯ੍ਯ-ਕਾਰੇ ਪਨ ਵੁਤ੍ਤੇ ਠਪੇਨ੍ਤੇਨ ਪਚ੍ਛਾ ਠਪਿਤਂ ਨਾਮ ਹੋਤਿ. ‘‘ਸੁਣਾਤੁ ਮੇ’’ਤਿ ਅਨਾਰਦ੍ਧੇਯੇਵ ਠਪੇਨ੍ਤੇਨ ਪੁਰੇ ਠਪਿਤਂ ਹੋਤਿ.

ਪਾਤਿਮੋਕ੍ਖਸਵਨਾਰਹਕਥਾ ਨਿਟ੍ਠਿਤਾ.

ਧਮ੍ਮਿਕਾਧਮ੍ਮਿਕਪਾਤਿਮੋਕ੍ਖਟ੍ਠਪਨਕਥਾ

੩੮੭. ਅਮੂਲਿਕਾਯ ਸੀਲਵਿਪਤ੍ਤਿਯਾ ਪਾਤਿਮੋਕ੍ਖਂ ਠਪੇਤਿ ਅਕਤਾਯਾਤਿ ਤੇਨ ਪੁਗ੍ਗਲੇਨ ਸਾ ਵਿਪਤ੍ਤਿ ਕਤਾ ਵਾ ਹੋਤੁ ਅਕਤਾ ਵਾ, ਪਾਤਿਮੋਕ੍ਖਟ੍ਠਪਨਕਸ੍ਸ ਸਞ੍ਞਾਅਮੂਲਿਕਵਸੇਨ ਅਮੂਲਿਕਾ ਹੋਤਿ. ਕਤਾਕਤਾਯਾਤਿ ਕਤਞ੍ਚ ਅਕਤਞ੍ਚ ਉਭਯਂ ਗਹੇਤ੍ਵਾ ਵੁਤ੍ਤਂ.

ਧਮ੍ਮਿਕਂ ਸਾਮਗ੍ਗਿਂ ਨ ਉਪੇਤੀਤਿ ਕਮ੍ਮਂ ਕੋਪੇਤੁਕਾਮਤਾਯ ਸਙ੍ਘਸ੍ਸ ਕਮ੍ਮੇ ਕਰੀਯਮਾਨੇ ਨੇਵ ਆਗਚ੍ਛਤਿ, ਨ ਛਨ੍ਦਂ ਦੇਤਿ, ਸਮ੍ਮੁਖੀਭੂਤੋਵ ਪਟਿਕ੍ਕੋਸਤਿ, ਤੇਨ ਦੁਕ੍ਕਟਂ ਆਪਜ੍ਜਤਿ. ਇਚ੍ਚਸ੍ਸਾਪਿ ਸਾਪਤ੍ਤਿਕਸ੍ਸੇਵ ਪਾਤਿਮੋਕ੍ਖਂ ਠਪਿਤਂ ਹੋਤਿ. ਪਚ੍ਚਾਦਿਯਤੀਤਿ ‘‘ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ ਪਚ੍ਚਾਦਿਯਤਿ, ਤੇਨ ਉਕ੍ਕੋਟਨਕੇਨ ਪਾਚਿਤ੍ਤਿਯਂ ਆਪਜ੍ਜਤਿ. ਇਚ੍ਚਸ੍ਸਾਪਿ ਸਾਪਤ੍ਤਿਕਸ੍ਸੇਵ ਪਾਤਿਮੋਕ੍ਖਂ ਠਪਿਤਂ ਹੋਤਿ.

ਧਮ੍ਮਿਕਾਧਮ੍ਮਿਕਪਾਤਿਮੋਕ੍ਖਟ੍ਠਪਨਕਥਾ ਨਿਟ੍ਠਿਤਾ.

ਧਮ੍ਮਿਕਪਾਤਿਮੋਕ੍ਖਟ੍ਠਪਨਕਥਾ

੩੮੮. ਯੇਹਿ ਆਕਾਰੇਹਿ ਯੇਹਿ ਲਿਙ੍ਗੇਹਿ ਯੇਹਿ ਨਿਮਿਤ੍ਤੇਹੀਤਿ ਏਤ੍ਥ ਮਗ੍ਗੇਨਮਗ੍ਗਪਟਿਪਾਦਨਾਦੀਸੁ ਆਕਾਰਾਦਿਸਞ੍ਞਾ ਵੇਦਿਤਬ੍ਬਾ. ਤੇਨ ਦਿਟ੍ਠੇਨ ਤੇਨ ਸੁਤੇਨ ਤਾਯ ਪਰਿਸਙ੍ਕਾਯਾਤਿ ਏਤ੍ਥ ਦਿਟ੍ਠਞ੍ਚ ਸੁਤਞ੍ਚ ਪਾਲ਼ਿਯਂ ਆਗਤਮੇਵ. ਸਚੇ ਪਨ ਤੇਹਿ ਦਿਟ੍ਠਸੁਤੇਹਿ ਪਰਿਸਙ੍ਕਂ ਉਪ੍ਪਾਦੇਯ੍ਯ, ਤਂ ਸਨ੍ਧਾਯ ਵੁਤ੍ਤਂ ‘‘ਤਾਯ ਪਰਿਸਙ੍ਕਾਯਾ’’ਤਿ.

ਧਮ੍ਮਿਕਪਾਤਿਮੋਕ੍ਖਟ੍ਠਪਨਕਥਾ ਨਿਟ੍ਠਿਤਾ.

ਅਤ੍ਤਾਦਾਨਅਙ੍ਗਕਥਾ

੩੯੮. ਅਤ੍ਤਾਦਾਨਂ ਆਦਾਤੁਕਾਮੇਨਾਤਿ ਏਤ੍ਥ ਸਾਸਨਂ ਸੋਧੇਤੁਕਾਮੋ ਭਿਕ੍ਖੁ ਯਂ ਅਧਿਕਰਣਂ ਅਤ੍ਤਨਾ ਆਦਿਯਤਿ, ਤਂ ਅਤ੍ਤਾਦਾਨਨ੍ਤਿ ਵੁਚ੍ਚਤਿ. ਅਕਾਲੋ ਇਮਂ ਅਤ੍ਤਾਦਾਨਂ ਆਦਾਤੁਨ੍ਤਿ ਏਤ੍ਥ ਰਾਜਭਯਂ ਚੋਰਭਯਂ ਦੁਬ੍ਭਿਕ੍ਖਭਯਂ ਵਸ੍ਸਾਰਤ੍ਤੋਤਿ ਅਯਂ ਅਕਾਲੋ, ਵਿਪਰੀਤੋ ਕਾਲੋ.

ਅਭੂਤਂ ਇਦਂ ਅਤ੍ਤਾਦਾਨਨ੍ਤਿ ਅਸਨ੍ਤਮਿਦਂ, ਮਯਾ ਅਧਮ੍ਮੋ ਵਾ ਧਮ੍ਮੋਤਿ, ਧਮ੍ਮੋ ਵਾ ਅਧਮ੍ਮੋਤਿ, ਅਵਿਨਯੋ ਵਾ ਵਿਨਯੋਤਿ, ਵਿਨਯੋ ਵਾ ਅਵਿਨਯੋਤਿ, ਦੁਸ੍ਸੀਲੋ ਵਾ ਪੁਗ੍ਗਲੋ ਸੀਲਵਾਤਿ, ਸੀਲਵਾ ਵਾ ਦੁਸ੍ਸੀਲੋਤਿ ਗਹਿਤੋਤਿ ਅਤ੍ਥੋ; ਵਿਪਰਿਯਾਯੇਨ ਭੂਤਂ ਵੇਦਿਤਬ੍ਬਂ. ਅਨਤ੍ਥਸਂਹਿਤਂ ਇਦਂ ਅਤ੍ਤਾਦਾਨਨ੍ਤਿ ਏਤ੍ਥ ਯਂ ਜੀਵਿਤਨ੍ਤਰਾਯਾਯ ਵਾ ਬ੍ਰਹ੍ਮਚਰਿਯਨ੍ਤਰਾਯਾਯ ਵਾ ਸਂਵਤ੍ਤਤਿ, ਇਦਂ ਅਨਤ੍ਥਸਂਹਿਤਂ, ਵਿਪਰੀਤਂ ਅਤ੍ਥਸਂਹਿਤਂ ਨਾਮ.

ਨ ਲਭਿਸ੍ਸਾਮਿ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂਤਿ ਅਪ੍ਪੇਕਦਾ ਹਿ ਰਾਜਭਯਾਦੀਸੁ ਏਵਰੂਪਾ ਅਤ੍ਤਨੋ ਪਕ੍ਖਸ੍ਸ ਉਪਤ੍ਥਮ੍ਭਕਾ ਭਿਕ੍ਖੂ ਲਦ੍ਧੁਂ ਨ ਸਕ੍ਕਾ ਹੋਨ੍ਤਿ, ਤਂ ਸਨ੍ਧਾਯ ਵੁਤ੍ਤਂ ‘‘ਨ ਲਭਿਸ੍ਸਾਮੀ’’ਤਿ. ਅਪ੍ਪੇਕਦਾ ਪਨ ਖੇਮਸੁਭਿਕ੍ਖਾਦੀਸੁ ਲਦ੍ਧੁਂ ਸਕ੍ਕਾ ਹੋਨ੍ਤਿ, ਤਂ ਸਨ੍ਧਾਯ ‘‘ਲਭਿਸ੍ਸਾਮੀ’’ਤਿ ਵੁਤ੍ਤਂ.

ਭਵਿਸ੍ਸਤਿ ਸਙ੍ਘਸ੍ਸ ਤਤੋਨਿਦਾਨਂ ਭਣ੍ਡਨਨ੍ਤਿ ਕੋਸਮ੍ਬਕਾਨਂ ਵਿਯ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਚ ਭਵਿਸ੍ਸਤੀਤਿ. ਪਚ੍ਛਾਪਿ ਅਵਿਪ੍ਪਟਿਸਾਰਕਰਂ ਭਵਿਸ੍ਸਤੀਤਿ ਸੁਭਦ੍ਦਂ ਵੁਡ੍ਢਪਬ੍ਬਜਿਤਂ ਨਿਗ੍ਗਹੇਤ੍ਵਾ ਪਞ੍ਚਸਤਿਕਸਙ੍ਗੀਤਿਂ ਕਰੋਨ੍ਤਸ੍ਸ ਮਹਾਕਸ੍ਸਪਤ੍ਥੇਰਸ੍ਸੇਵ, ਦਸਵਤ੍ਥੁਕੇ ਅਧਿਕਰਣੇ ਦਸਭਿਕ੍ਖੁਸਹਸ੍ਸਾਨਿ ਨਿਗ੍ਗਹੇਤ੍ਵਾ ਸਤ੍ਤਸਤਿਕਸਙ੍ਗੀਤਿਂ ਕਰੋਨ੍ਤਸ੍ਸ ਆਯਸ੍ਮਤੋ ਯਸਸ੍ਸੇਵ, ਸਟ੍ਠਿਭਿਕ੍ਖੁਸਹਸ੍ਸਾਨਿ ਨਿਗ੍ਗਹੇਤ੍ਵਾ ਸਹਸ੍ਸਿਕਸਙ੍ਗੀਤਿਂ ਕਰੋਨ੍ਤਸ੍ਸ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰਸ੍ਸੇਵ ਚ ਪਚ੍ਛਾ ਸਮਨੁਸ੍ਸਰਣਕਰਣਂ ਹੋਤਿ, ਸਾਸਨਸ੍ਸ ਚ ਵਿਗਤੁਪਕ੍ਕਿਲੇਸਚਨ੍ਦਿਮਸੂਰਿਯਸਸ੍ਸਿਰਿਕਤਾਯ ਸਂਵਤ੍ਤਤਿ.

ਅਤ੍ਤਾਦਾਨਅਙ੍ਗਕਥਾ ਨਿਟ੍ਠਿਤਾ.

ਚੋਦਕੇਨਪਚ੍ਚਵੇਕ੍ਖਿਤਬ੍ਬਧਮ੍ਮਕਥਾ

੩੯੯. ਅਚ੍ਛਿਦ੍ਦੇਨ ਅਪ੍ਪਟਿਮਂਸੇਨਾਤਿਆਦੀਸੁ ਯੇਨ ਗਹਟ੍ਠਪਬ੍ਬਜਿਤੇਸੁ ਯੋ ਕੋਚਿ ਪਹਟੋ ਵਾ ਹੋਤਿ, ਗਿਹੀਨਂ ਗਣ੍ਡਫਾਲਨਾਦੀਨਿ ਵੇਜ੍ਜਕਮ੍ਮਾਨਿ ਵਾ ਕਤਾਨਿ, ਤਸ੍ਸ ਕਾਯਸਮਾਚਾਰੋ ਉਪਚਿਕਾਹਿ ਖਾਯਿਤਤਾਲਪਣ੍ਣਮਿਵ ਛਿਦ੍ਦੋ ਚ ਪਟਿਮਾਸਿਤੁਂ ਯਤ੍ਥ ਕਤ੍ਥਚਿ ਗਹੇਤ੍ਵਾ ਆਕਡ੍ਢਿਤੁਂ ਸਕ੍ਕੁਣੇਯ੍ਯਤਾਯ ਸਪ੍ਪਟਿਮਂਸੋ ਚ ਹੋਤਿ, ਵਿਪਰੀਤੋ ਅਚ੍ਛਿਦ੍ਦੋ ਅਪ੍ਪਟਿਮਂਸੋਤਿ ਵੇਦਿਤਬ੍ਬੋਤਿ. ਵਚੀਸਮਾਚਾਰੋ ਪਨ ਮੁਸਾਵਾਦਓਮਸਵਾਦਪੇਸੁਞ੍ਞਅਮੂਲਕਾਨੁਦ੍ਧਂਸਨਾਦੀਹਿ ਛਿਦ੍ਦੋ ਚ ਸਪ੍ਪਟਿਮਂਸੋ ਚ ਹੋਤਿ, ਵਿਪਰੀਤੋ ਅਚ੍ਛਿਦ੍ਦੋ ਅਪ੍ਪਟਿਮਂਸੋ.

ਮੇਤ੍ਤਂ ਨੁ ਖੋ ਮੇ ਚਿਤ੍ਤਨ੍ਤਿ ਪਲਿਬੋਧੇ ਛਿਨ੍ਦਿਤ੍ਵਾ ਕਮ੍ਮਟ੍ਠਾਨਭਾਵਨਾਨੁਯੋਗੇਨ ਅਧਿਗਤਂ ਮੇਤ੍ਤਚਿਤ੍ਤਂ. ਅਨਾਘਾਤਨ੍ਤਿ ਆਘਾਤਵਿਰਹਿਤਂ, ਵਿਕ੍ਖਮ੍ਭਨਵਸੇਨ ਵਿਹਤਾਘਾਤਨ੍ਤਿ ਅਤ੍ਥੋ. ਇਦਂ ਪਨਾਵੁਸੋ ਕਤ੍ਥ ਵੁਤ੍ਤਂ ਭਗਵਤਾਤਿ ਇਦਂ ਸਿਕ੍ਖਾਪਦਂ ਕਤਰਸ੍ਮਿਂ ਨਗਰੇ ਵੁਤ੍ਤਨ੍ਤਿ ਅਤ੍ਥੋ.

ਚੋਦਕੇਨਪਚ੍ਚਵੇਕ੍ਖਿਤਬ੍ਬਧਮ੍ਮਕਥਾ ਨਿਟ੍ਠਿਤਾ.

ਚੋਦਕੇਨਉਪਟ੍ਠਾਪੇਤਬ੍ਬਕਥਾ

੪੦੦. ਕਾਲੇਨ ਵਕ੍ਖਾਮੀਤਿਆਦੀਸੁ ਏਕੋ ਏਕਂ ਓਕਾਸਂ ਕਾਰੇਤ੍ਵਾ ਚੋਦੇਨ੍ਤੋ ਕਾਲੇਨ ਵਦਤਿ ਨਾਮ. ਸਙ੍ਘਮਜ੍ਝਗਣਮਜ੍ਝਸਲਾਕਗ੍ਗਯਾਗੁਅਗ੍ਗਵਿਤਕ੍ਕਮਾਲ਼ਕਭਿਕ੍ਖਾਚਾਰਮਗ੍ਗਆਸਨਸਾਲਾਦੀਸੁ ਉਪਟ੍ਠਾਕੇਹਿ ਪਰਿਵਾਰਿਤਕ੍ਖਣੇ ਵਾ ਚੋਦੇਨ੍ਤੋ ਅਕਾਲੇਨ ਵਦਤਿ ਨਾਮ. ਤਚ੍ਛੇਨ ਵਦਨ੍ਤੋ ਭੂਤੇਨ ਵਦਤਿ ਨਾਮ. ‘‘ਅਮ੍ਭੋ ਮਹਲ੍ਲਕ, ਪਰਿਸਾਵਚਰ, ਪਂਸੁਕੂਲਿਕ, ਧਮ੍ਮਕਥਿਕ, ਪਤਿਰੂਪਂ ਤਵ ਇਦ’’ਨ੍ਤਿ ਵਦਨ੍ਤੋ ਫਰੁਸੇਨ ਵਦਤਿ ਨਾਮ. ਕਾਰਣਨਿਸ੍ਸਿਤਂ ਪਨ ਕਤ੍ਵਾ ‘‘ਭਨ੍ਤੇ ਮਹਲ੍ਲਕਤ੍ਥ, ਪਰਿਸਾਵਚਰਾ, ਪਂਸੁਕੂਲਿਕਾ, ਧਮ੍ਮਕਥਿਕਤ੍ਥ, ਪਤਿਰੂਪਂ ਤੁਮ੍ਹਾਕਂ ਇਦ’’ਨ੍ਤਿ ਵਦਨ੍ਤੋ ਸਣ੍ਹੇਨ ਵਦਤਿ ਨਾਮ. ਕਾਰਣਨਿਸ੍ਸਿਤਂ ਕਤ੍ਵਾ ਵਦਨ੍ਤੋ ਅਤ੍ਥਸਂਹਿਤੇਨ ਵਦਤਿ ਨਾਮ. ਮੇਤ੍ਤਚਿਤ੍ਤੋ ਵਕ੍ਖਾਮਿ ਨੋ ਦੋਸਨ੍ਤਰੋਤਿ ਮੇਤ੍ਤਚਿਤ੍ਤਂ ਉਪਟ੍ਠਪੇਤ੍ਵਾ ਵਕ੍ਖਾਮਿ, ਨ ਦੁਟ੍ਠਚਿਤ੍ਤੋ ਹੁਤ੍ਵਾ.

ਚੋਦਕੇਨਉਪਟ੍ਠਾਪੇਤਬ੍ਬਕਥਾ ਨਿਟ੍ਠਿਤਾ.

ਚੋਦਕਚੁਦਿਤਕਪਟਿਸਂਯੁਤ੍ਤਕਥਾ

੪੦੧. ਅਜ੍ਝਤ੍ਤਂ ਮਨਸਿਕਰਿਤ੍ਵਾਤਿ ਅਤ੍ਤਨੋ ਚਿਤ੍ਤੇ ਉਪ੍ਪਾਦੇਤ੍ਵਾ. ਕਾਰੁਞ੍ਞਤਾਤਿ ਕਰੁਣਾਭਾਵੋ. ਇਮਿਨਾ ਕਰੁਣਞ੍ਚ ਕਰੁਣਾਪੁਬ੍ਬਭਾਗਞ੍ਚ ਦਸ੍ਸੇਤਿ. ਹਿਤੇਸਿਤਾਤਿ ਹਿਤਗਵੇਸਨਤਾ. ਅਨੁਕਮ੍ਪਿਤਾਤਿ ਤੇਨ ਹਿਤੇਨ ਸਂਯੋਜਨਤਾ. ਦ੍ਵੀਹਿਪਿ ਮੇਤ੍ਤਞ੍ਚ ਮੇਤ੍ਤਾਪੁਬ੍ਬਭਾਗਞ੍ਚ ਦਸ੍ਸੇਤਿ. ਆਪਤ੍ਤਿਵੁਟ੍ਠਾਨਤਾਤਿ ਆਪਤ੍ਤਿਤੋ ਵੁਟ੍ਠਾਪੇਤ੍ਵਾ ਸੁਦ੍ਧਨ੍ਤੇ ਪਤਿਟ੍ਠਾਪਨਾ. ਵਤ੍ਥੁਂ ਚੋਦੇਤ੍ਵਾ ਸਾਰੇਤ੍ਵਾ ਪਟਿਞ੍ਞਂ ਆਰੋਪੇਤ੍ਵਾ ਯਥਾਪਟਿਞ੍ਞਾਯ ਕਮ੍ਮਕਰਣਂ ਵਿਨਯਪੁਰੇਕ੍ਖਾਰਤਾ ਨਾਮ. ਇਮੇ ਪਞ੍ਚ ਧਮ੍ਮੇਤਿ ਯੇ ਏਤੇ ਕਾਰੁਞ੍ਞਤਾਤਿਆਦਿਨਾ ਨਯੇਨ ਵੁਤ੍ਤਾ, ਇਮੇ ਪਞ੍ਚ ਧਮ੍ਮੇ ਅਜ੍ਝਤ੍ਤਂ ਮਨਸਿ ਕਰਿਤ੍ਵਾ ਪਰੋ ਚੋਦੇਤਬ੍ਬੋਤਿ.

ਸਚ੍ਚੇ ਚ ਅਕੁਪ੍ਪੇ ਚਾਤਿ ਵਚੀਸਚ੍ਚੇ ਚ ਅਕੁਪ੍ਪਨਤਾਯ ਚ. ਚੁਦਿਤਕੇਨ ਹਿ ਸਚ੍ਚਞ੍ਚ ਵਤ੍ਤਬ੍ਬਂ, ਕੋਪੋ ਚ ਨ ਕਾਤਬ੍ਬੋ. ਨੇਵ ਅਤ੍ਤਨਾ ਕੁਜ੍ਝਿਤਬ੍ਬੋ, ਨ ਪਰੋ ਘਟ੍ਟੇਤਬ੍ਬੋਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਚੋਦਕਚੁਦਿਤਕਪਟਿਸਂਯੁਤ੍ਤਕਥਾ ਨਿਟ੍ਠਿਤਾ.

ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.