੧੦. ਭਿਕ੍ਖੁਨਿਕ੍ਖਨ੍ਧਕਂ

ਮਹਾਪਜਾਪਤਿਗੋਤਮੀਵਤ੍ਥੁਕਥਾ

੪੦੨. ਭਿਕ੍ਖੁਨਿਕ੍ਖਨ੍ਧਕੇ – ਅਲਂ ਗੋਤਮਿ ਮਾ ਤੇ ਰੁਚ੍ਚੀਤਿ ਕਸ੍ਮਾ ਪਟਿਕ੍ਖਿਪਤਿ, ਨਨੁ ਸਬ੍ਬੇਸਮ੍ਪਿ ਬੁਦ੍ਧਾਨਂ ਚਤਸ੍ਸੋ ਪਰਿਸਾ ਹੋਨ੍ਤੀਤਿ? ਕਾਮਂ ਹੋਨ੍ਤਿ, ਕਿਲਮੇਤ੍ਵਾ ਪਨ ਅਨੇਕਕ੍ਖਤ੍ਤੁਂ ਯਾਚਿਤੇਨ ਅਨੁਞ੍ਞਾਤਂ ਪਬ੍ਬਜ੍ਜਂ ‘‘ਦੁਕ੍ਖੇਨ ਲਦ੍ਧਾ ਅਯਂ ਅਮ੍ਹੇਹੀ’’ਤਿ ਸਮ੍ਮਾ ਪਰਿਪਾਲੇਸ੍ਸਨ੍ਤੀਤਿ ਭਦ੍ਦਕਂ ਕਤ੍ਵਾ ਅਨੁਜਾਨਿਤੁਕਾਮੋ ਪਟਿਕ੍ਖਿਪਤਿ. ਅਟ੍ਠਗਰੁਧਮ੍ਮਕਥਾ ਮਹਾਵਿਭਙ੍ਗੇਯੇਵ ਕਥਿਤਾ.

੪੦੩. ਕੁਮ੍ਭਥੇਨਕੇਹੀਤਿ ਕੁਮ੍ਭੇ ਦੀਪਂ ਜਾਲੇਤ੍ਵਾ ਤੇਨ ਆਲੋਕੇਨ ਪਰਘਰੇ ਭਣ੍ਡਂ ਵਿਚਿਨਿਤ੍ਵਾ ਥੇਨਕਚੋਰੇਹਿ.

ਸੇਤਟ੍ਠਿਕਾ ਨਾਮ ਰੋਗਜਾਤੀਤਿ ਏਕੋ ਪਾਣਕੋ ਨਾਲ਼ਿਮਜ੍ਝਗਤਂ ਕਣ੍ਡਂ ਵਿਜ੍ਝਤਿ, ਯੇਨ ਵਿਦ੍ਧਤ੍ਤਾ ਨਿਕ੍ਖਨ੍ਤਮ੍ਪਿ ਸਾਲਿਸੀਸਂ ਖੀਰਂ ਗਹੇਤੁਂ ਨ ਸਕ੍ਕੋਤਿ.

ਮਞ੍ਜਿਟ੍ਠਿਕਾ ਨਾਮ ਰੋਗਜਾਤੀਤਿ ਉਚ੍ਛੂਨਂ ਅਨ੍ਤੋਰਤ੍ਤਭਾਵੋ. ਮਹਤੋ ਤਲ਼ਾਕਸ੍ਸ ਪਟਿਕਚ੍ਚੇਵ ਆਲ਼ਿਨ੍ਤਿ ਇਮਿਨਾ ਪਨ ਏਤਮਤ੍ਥਂ ਦਸ੍ਸੇਤਿ – ਯਥਾ ਮਹਤੋ ਤਲ਼ਾਕਸ੍ਸ ਆਲ਼ਿਯਾ ਅਬਦ੍ਧਾਯਪਿ ਕਿਞ੍ਚਿ ਉਦਕਂ ਤਿਟ੍ਠੇਯ੍ਯ, ਪਠਮਮੇਵ ਬਦ੍ਧਾਯ ਪਨ ਯਂ ਅਬਦ੍ਧਪਚ੍ਚਯਾ ਨ ਤਿਟ੍ਠੇਯ੍ਯ, ਤਮ੍ਪਿ ਤਿਟ੍ਠੇਯ੍ਯ; ਏਵਮੇਵ ਯੇ ਇਮੇ ਅਨੁਪ੍ਪਨ੍ਨੇ ਵਤ੍ਥੁਸ੍ਮਿਂ ਪਟਿਕਚ੍ਚੇਵ ਅਵੀਤਿਕ੍ਕਮਨਤ੍ਥਾਯ ਗਰੁਧਮ੍ਮਾ ਪਞ੍ਞਤ੍ਤਾ. ਤੇਸੁ ਅਪਞ੍ਞਤ੍ਤੇਸੁਪਿ ਮਾਤੁਗਾਮਸ੍ਸ ਪਬ੍ਬਜਿਤਤ੍ਤਾ ਪਞ੍ਚੇਵ ਵਸ੍ਸਸਤਾਨਿ ਸਦ੍ਧਮ੍ਮੋ ਤਿਟ੍ਠੇਯ੍ਯ. ਪਟਿਕਚ੍ਚੇਵ ਪਞ੍ਞਤ੍ਤਤ੍ਤਾ ਪਨ ਅਪਰਾਨਿਪਿ ਪਞ੍ਚਵਸ੍ਸਸਤਾਨਿ ਠਸ੍ਸਤੀਤਿ ਏਵਂ ਪਠਮਂ ਵੁਤ੍ਤਂ ਵਸ੍ਸਸਹਸ੍ਸਮੇਵ ਠਸ੍ਸਤੀਤਿ. ਵਸ੍ਸਸਹਸ੍ਸਨ੍ਤਿ ਚੇਤਂ ਪਟਿਸਮ੍ਭਿਦਾਪਭੇਦਪ੍ਪਤ੍ਤਖੀਣਾਸਵਵਸੇਨੇਵ ਵੁਤ੍ਤਂ. ਤਤੋ ਪਨ ਉਤ੍ਤਰਿਮ੍ਪਿ ਸੁਕ੍ਖਵਿਪਸ੍ਸਕਖੀਣਾਸਵਵਸੇਨ ਵਸ੍ਸਸਹਸ੍ਸਂ, ਅਨਾਗਾਮਿਵਸੇਨ ਵਸ੍ਸਸਹਸ੍ਸਂ, ਸਕਦਾਗਾਮਿਵਸੇਨ ਵਸ੍ਸਸਹਸ੍ਸਂ, ਸੋਤਾਪਨ੍ਨਵਸੇਨ ਵਸ੍ਸਸਹਸ੍ਸਨ੍ਤਿ ਏਵਂ ਪਞ੍ਚਵਸ੍ਸਸਹਸ੍ਸਾਨਿ ਪਟਿਵੇਧਸਦ੍ਧਮ੍ਮੋ ਠਸ੍ਸਤਿ. ਪਰਿਯਤ੍ਤਿਧਮ੍ਮੋਪਿ ਤਾਨਿਯੇਵ. ਨ ਹਿ ਪਰਿਯਤ੍ਤਿਯਾ ਅਸਤਿ ਪਟਿਵੇਧੋ ਅਤ੍ਥਿ, ਨਾਪਿ ਪਰਿਯਤ੍ਤਿਯਾ ਸਤਿ ਪਟਿਵੇਧੋ ਨ ਹੋਤਿ; ਲਿਙ੍ਗਂ ਪਨ ਪਰਿਯਤ੍ਤਿਯਾ ਅਨ੍ਤਰਹਿਤਾਯਪਿ ਚਿਰਂ ਪਵਤ੍ਤਿਸ੍ਸਤੀਤਿ.

ਮਹਾਪਜਾਪਤਿਗੋਤਮੀਵਤ੍ਥੁਕਥਾ ਨਿਟ੍ਠਿਤਾ.

ਭਿਕ੍ਖੁਨੀਉਪਸਮ੍ਪਦਾਨੁਜਾਨਨਕਥਾ

੪੦੪. ਅਨੁਜਾਨਾਮਿ ਭਿਕ੍ਖਵੇ ਭਿਕ੍ਖੂਹਿ ਭਿਕ੍ਖੁਨਿਯੋ ਉਪਸਮ੍ਪਾਦੇਤੁਨ੍ਤਿ ਇਮਾਯ ਅਨੁਪਞ੍ਞਤ੍ਤਿਯਾ ਭਿਕ੍ਖੂ ਪਞ੍ਚਸਤਾ ਸਾਕਿਯਾਨਿਯੋ ਮਹਾਪਜਾਪਤਿਯਾ ਸਦ੍ਧਿਵਿਹਾਰਿਨਿਯੋ ਕਤ੍ਵਾ ਉਪਸਮ੍ਪਾਦੇਸੁਂ. ਇਤਿ ਤਾ ਸਬ੍ਬਾਪਿ ਏਕਤੋਉਪਸਮ੍ਪਨ੍ਨਾ ਨਾਮ ਅਹੇਸੁਂ. ਯੇ ਖੋ ਤ੍ਵਂ ਗੋਤਮੀਤਿ ਇਮਿਨਾ ਓਵਾਦੇਨ ਗੋਤਮੀ ਅਰਹਤ੍ਤਂ ਪਤ੍ਤਾ.

੪੦੯. ਕਮ੍ਮਂ ਨ ਕਰੀਯਤੀਤਿ ਤਜ੍ਜਨੀਯਾਦਿ ਸਤ੍ਤਵਿਧਮ੍ਪਿ ਕਮ੍ਮਂ ਨ ਕਰੀਯਤਿ. ਖਮਾਪੇਨ੍ਤੀਤਿ ਨ ਪੁਨ ਏਵਂ ਕਰਿਸ੍ਸਾਮੀਤਿ ਖਮਾਪੇਨ੍ਤਿ.

੪੧੦. ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਕਮ੍ਮਂ ਰੋਪੇਤ੍ਵਾ ਨਿਯ੍ਯਾਦੇਤੁਨ੍ਤਿ ਏਤ੍ਥ ਤਜ੍ਜਨੀਯਾਦੀਸੁ ‘‘ਇਦਂ ਨਾਮ ਕਮ੍ਮਂ ਏਤਿਸ੍ਸਾ ਕਾਤਬ੍ਬ’’ਨ੍ਤਿ ਏਵਂ ਰੋਪੇਤ੍ਵਾ ‘‘ਤਂ ਦਾਨਿ ਤੁਮ੍ਹੇਵ ਕਰੋਥਾ’’ਤਿ ਨਿਯ੍ਯਾਦੇਤਬ੍ਬਂ. ਸਚੇ ਪਨ ਅਞ੍ਞਸ੍ਮਿਂ ਰੋਪਿਤੇ ਅਞ੍ਞਂ ਕਰੋਨ੍ਤਿ, ‘‘ਤਜ੍ਜਨੀਯਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤੀ’’ਤਿ ਏਤ੍ਥ ਵੁਤ੍ਤਨਯੇਨ ਕਾਰੇਤਬ੍ਬਤਂ ਆਪਜ੍ਜਨ੍ਤਿ.

੪੧੧. ਕਦ੍ਦਮੋਦਕੇਨਾਤਿ ਏਤ੍ਥ ਨ ਕੇਵਲਂ ਕਦ੍ਦਮੋਦਕੇਨ, ਵਿਪ੍ਪਸਨ੍ਨਉਦਕਰਜਨਕਦ੍ਦਮਾਦੀਸੁਪਿ ਯੇਨ ਕੇਨਚਿ ਓਸਿਞ੍ਚਨ੍ਤਸ੍ਸ ਦੁਕ੍ਕਟਮੇਵ. ਅਵਨ੍ਦਿਯੋ ਸੋ ਭਿਕ੍ਖਵੇ ਭਿਕ੍ਖੁ ਭਿਕ੍ਖੁਨਿਸਙ੍ਘੇਨ ਕਾਤਬ੍ਬੋਤਿ ਭਿਕ੍ਖੁਨੁਪਸ੍ਸਯੇ ਸਨ੍ਨਿਪਤਿਤ੍ਵਾ ‘‘ਅਸੁਕੋ ਨਾਮ ਅਯ੍ਯੋ ਭਿਕ੍ਖੁਨੀਨਂ ਅਪਸਾਦਨੀਯਂ ਦਸ੍ਸੇਤਿ, ਏਤਸ੍ਸ ਅਯ੍ਯਸ੍ਸ ਅਵਨ੍ਦਿਯਕਰਣਂ ਰੁਚ੍ਚਤੀ’’ਤਿ ਏਵਂ ਤਿਕ੍ਖਤ੍ਤੁਂ ਸਾਵੇਤਬ੍ਬਂ. ਏਤ੍ਤਾਵਤਾ ਅਵਨ੍ਦਿਯੋ ਕਤੋ ਹੋਤਿ. ਤਤੋ ਪਟ੍ਠਾਯ ਯਥਾ ਸਾਮਣੇਰੇ ਦਿਸ੍ਵਾ ਨ ਵਨ੍ਦਨ੍ਤਿ; ਏਵਮੇਵ ਦਿਸ੍ਵਾਪਿ ਨ ਵਨ੍ਦਿਤਬ੍ਬੋ. ਤੇਨ ਭਿਕ੍ਖੁਨਾ ਸਮ੍ਮਾ ਵਤ੍ਤਨ੍ਤੇਨ ਭਿਕ੍ਖੁਨੁਪਸ੍ਸਯਂ ਆਗਨ੍ਤ੍ਵਾ ਵਿਹਾਰੇਯੇਵ ਸਙ੍ਘਂ ਵਾ ਗਣਂ ਵਾ ਏਕਪੁਗ੍ਗਲਂ ਵਾ ਉਪਸਙ੍ਕਮਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਭਿਕ੍ਖੁਨਿਸਙ੍ਘੋ ਮਯ੍ਹਂ ਖਮਤੂ’’ਤਿ ਖਮਾਪੇਤਬ੍ਬਂ. ਤੇਨ ਭਿਕ੍ਖੁਨਾ ਭਿਕ੍ਖੁਨੀਨਂ ਸਨ੍ਤਿਕਂ ਆਗਨ੍ਤ੍ਵਾ ‘‘ਏਸੋ ਭਿਕ੍ਖੁ ਤੁਮ੍ਹੇ ਖਮਾਪੇਤੀ’’ਤਿ ਵਤ੍ਤਬ੍ਬਂ. ਤਤੋ ਪਟ੍ਠਾਯ ਸੋ ਵਨ੍ਦਿਤਬ੍ਬੋ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਂ ਪਨ ਕਮ੍ਮਵਿਭਙ੍ਗੇ ਵਕ੍ਖਾਮ.

ਓਭਾਸੇਨ੍ਤੀਤਿ ਅਸਦ੍ਧਮ੍ਮੇਨ ਓਭਾਸੇਨ੍ਤਿ. ਭਿਕ੍ਖੁਨੀਹਿ ਸਦ੍ਧਿਂ ਸਮ੍ਪਯੋਜੇਨ੍ਤੀਤਿ ਭਿਕ੍ਖੁਨੀਹਿ ਸਦ੍ਧਿਂ ਪੁਰਿਸੇ ਅਸਦ੍ਧਮ੍ਮੇਨ ਸਮ੍ਪਯੋਜੇਨ੍ਤਿ. ਅਵਨ੍ਦਿਯਕਰਣਂ ਵੁਤ੍ਤਨਯਮੇਵ. ਆਵਰਣਨ੍ਤਿ ਵਿਹਾਰਪ੍ਪਵੇਸਨੇ ਨਿਵਾਰਣਂ. ਓਵਾਦਂ ਠਪੇਤੁਨ੍ਤਿ ਏਤ੍ਥ ਨ ਭਿਕ੍ਖੁਨੁਪਸ੍ਸਯਂ ਗਨ੍ਤ੍ਵਾ ਠਪੇਤਬ੍ਬੋ. ਓਵਾਦਤ੍ਥਾਯ ਪਨ ਆਗਤਾ ਭਿਕ੍ਖੁਨਿਯੋ ਵਤ੍ਤਬ੍ਬਾ ‘‘ਅਸੁਕਾ ਨਾਮ ਭਿਕ੍ਖੁਨੀ ਸਾਪਤ੍ਤਿਕਾ, ਤਸ੍ਸਾ ਓਵਾਦਂ ਠਪੇਮਿ, ਮਾ ਤਾਯ ਸਦ੍ਧਿਂ ਉਪੋਸਥਂ ਕਰਿਤ੍ਥਾ’’ਤਿ. ਕਾਯਵਿਵਰਣਾਦੀਸੁਪਿ ਦਣ੍ਡਕਮ੍ਮਂ ਵੁਤ੍ਤਨਯਮੇਵ.

੪੧੩. ਨ ਭਿਕ੍ਖਵੇ ਭਿਕ੍ਖੁਨਿਯਾ ਓਵਾਦੋ ਨ ਗਨ੍ਤਬ੍ਬੋਤਿਆਦਿ ਭਿਕ੍ਖੁਨਿਵਿਭਙ੍ਗਵਣ੍ਣਨਾਯਂ ਵੁਤ੍ਤਮੇਵ.

੪੧੬. ਫਾਸੁਕਾ ਨਮੇਨ੍ਤੀਤਿ ਗਿਹਿਦਾਰਿਕਾਯੋ ਵਿਯ ਘਨਪਟ੍ਟਕੇਨ ਕਾਯਬਨ੍ਧਨੇਨ ਫਾਸੁਕਾ ਨਮਨਤ੍ਥਾਯ ਬਨ੍ਧਨ੍ਤਿ. ਏਕਪਰਿਯਾਕਤਨ੍ਤਿ ਏਕਵਾਰਂ ਪਰਿਕ੍ਖਿਪਨਕਂ.

ਵਿਲੀਵੇਨ ਪਟ੍ਟੇਨਾਤਿ ਸਣ੍ਹੇਹਿ ਵੇਲ਼ੁਵਿਲੀਵੇਹਿ ਕਤਪਟ੍ਟੇਨ. ਦੁਸ੍ਸਪਟ੍ਟੇਨਾਤਿ ਸੇਤਵਤ੍ਥਪਟ੍ਟੇਨ. ਦੁਸ੍ਸਵੇਣਿਯਾਤਿ ਦੁਸ੍ਸੇਨ ਕਤਵੇਣਿਯਾ. ਦੁਸ੍ਸਵਟ੍ਟਿਯਾਤਿ ਦੁਸ੍ਸੇਨ ਕਤਵਟ੍ਟਿਯਾ. ਚੋਲ਼ਪਟ੍ਟਾਦੀਸੁ ਚੋਲ਼ਕਾਸਾਵਂ ਚੋਲ਼ਨ੍ਤਿ ਵੇਦਿਤਬ੍ਬਂ.

ਅਟ੍ਠਿਲ੍ਲੇਨਾਤਿ ਗੋਜਙ੍ਘਟ੍ਠਿਕੇਨ. ਜਘਨਨ੍ਤਿ ਕਟਿਪ੍ਪਦੇਸੋ ਵੁਚ੍ਚਤਿ. ਹਤ੍ਥਂ ਕੋਟ੍ਟਾਪੇਨ੍ਤੀਤਿ ਅਗ੍ਗਬਾਹਂ ਕੋਟ੍ਟਾਪੇਤ੍ਵਾ ਮੋਰਪਤ੍ਤਾਦੀਹਿ ਚਿਤ੍ਤਾਲਙ੍ਕਾਰਂ ਕਰੋਨ੍ਤਿ. ਹਤ੍ਥਕੋਚ੍ਛਨ੍ਤਿ ਪਿਟ੍ਠਿਹਤ੍ਥਂ. ਪਾਦਨ੍ਤਿ ਜਙ੍ਘਂ. ਪਾਦਕੋਚ੍ਛਨ੍ਤਿ ਪਿਟ੍ਠਿਪਾਦਂ.

੪੧੭. ਮੁਖਲਿਮ੍ਪਨਾਦੀਨਿ ਵੁਤ੍ਤਨਯਾਨੇਵ. ਅਵਙ੍ਗਂ ਕਰੋਨ੍ਤੀਤਿ ਅਕ੍ਖੀ ਅਞ੍ਜਨ੍ਤਿਯੋ ਅਵਙ੍ਗਦੇਸੇ ਅਧੋਮੁਖਂ ਲੇਖਂ ਕਰੋਨ੍ਤਿ. ਵਿਸੇਸਕਨ੍ਤਿ ਗਣ੍ਡਪ੍ਪਦੇਸੇ ਵਿਚਿਤ੍ਰਸਣ੍ਠਾਨਂ ਵਿਸੇਸਕਂ ਕਰੋਨ੍ਤਿ. ਓਲੋਕੇਨ੍ਤੀਤਿ ਵਾਤਪਾਨਂ ਵਿਵਰਿਤ੍ਵਾ ਵੀਥਿਂ ਓਲੋਕੇਨ੍ਤਿ. ਸਾਲੋਕੇ ਤਿਟ੍ਠਨ੍ਤੀਤਿ ਦ੍ਵਾਰਂ ਵਿਵਰਿਤ੍ਵਾ ਉਪਡ੍ਢਕਾਯਂ ਦਸ੍ਸੇਨ੍ਤਿਯੋ ਤਿਟ੍ਠਨ੍ਤਿ. ਨਚ੍ਚਨ੍ਤਿ ਨਟਸਮਜ੍ਜਂ ਕਾਰੇਨ੍ਤਿ. ਵੇਸਿਂ ਵੁਟ੍ਠਾਪੇਨ੍ਤੀਤਿ ਗਣਿਕਂ ਵੁਟ੍ਠਾਪੇਨ੍ਤਿ. ਪਾਨਾਗਾਰਂ ਠਪੇਨ੍ਤੀਤਿ ਸੁਰਂ ਵਿਕ੍ਕਿਣਨ੍ਤਿ. ਸੂਨਂ ਠਪੇਨ੍ਤੀਤਿ ਮਂਸਂ ਵਿਕ੍ਕਿਣਨ੍ਤਿ. ਆਪਣਨ੍ਤਿ ਨਾਨਾਭਣ੍ਡਾਨਂ ਅਨੇਕਵਿਧਂ ਆਪਣਂ ਪਸਾਰੇਨ੍ਤਿ. ਦਾਸਂ ਉਪਟ੍ਠਾਪੇਨ੍ਤੀਤਿ ਦਾਸਂ ਗਹੇਤ੍ਵਾ ਤੇਨ ਅਤ੍ਤਨੋ ਵੇਯ੍ਯਾਵਚ੍ਚਂ ਕਾਰੇਨ੍ਤਿ. ਦਾਸੀਆਦੀਸੁਪਿ ਏਸੇਵ ਨਯੋ. ਹਰਿਤਕਪਕ੍ਕਿਕਂ ਪਕਿਣਨ੍ਤੀਤਿ ਹਰਿਤਕਞ੍ਚੇਵ ਪਕ੍ਕਞ੍ਚ ਪਕਿਣਨ੍ਤਿ; ਪਕਿਣ੍ਣਕਾਪਣਂ ਪਸਾਰੇਨ੍ਤੀਤਿ ਵੁਤ੍ਤਂ ਹੋਤਿ.

੪੧੮. ਸਬ੍ਬਨੀਲਕਾਦਿਕਥਾ ਕਥਿਤਾਯੇਵ.

੪੧੯. ਭਿਕ੍ਖੁਨੀ ਚੇ, ਭਿਕ੍ਖਵੇ, ਕਾਲਂ ਕਰੋਨ੍ਤੀਤਿਆਦੀਸੁ ਅਯਂ ਪਾਲ਼ਿਮੁਤ੍ਤਕਵਿਨਿਚ੍ਛਯੋ – ਸਚੇ ਹਿ ਪਞ੍ਚਸੁ ਸਹਧਮ੍ਮਿਕੇਸੁ ਯੋ ਕੋਚਿ ਕਾਲਂ ਕਰੋਨ੍ਤੋ ‘‘ਮਮਚ੍ਚਯੇਨ ਮਯ੍ਹਂ ਪਰਿਕ੍ਖਾਰੋ ਉਪਜ੍ਝਾਯਸ੍ਸ ਹੋਤੁ, ਆਚਰਿਯਸ੍ਸ ਹੋਤੁ, ਸਦ੍ਧਿਵਿਹਾਰਿਕਸ੍ਸ ਹੋਤੁ, ਅਨ੍ਤੇਵਾਸਿਕਸ੍ਸ ਹੋਤੁ, ਮਾਤੁ ਹੋਤੁ, ਪਿਤੁ ਹੋਤੁ, ਅਞ੍ਞਸ੍ਸ ਵਾ ਯਸ੍ਸ ਕਸ੍ਸਚਿ ਹੋਤੂ’’ਤਿ ਵਦਤਿ ਤੇਸਂ ਨ ਹੋਤਿ, ਸਙ੍ਘਸ੍ਸੇਵ ਹੋਤਿ. ਨ ਹਿ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਅਚ੍ਚਯਦਾਨਂ ਰੁਹਤਿ, ਗਿਹੀਨਂ ਪਨ ਰੁਹਤਿ. ਭਿਕ੍ਖੁ ਹਿ ਭਿਕ੍ਖੁਨਿਵਿਹਾਰੇ ਕਾਲਂ ਕਰੋਤਿ, ਤਸ੍ਸ ਪਰਿਕ੍ਖਾਰੋ ਭਿਕ੍ਖੂਨਂਯੇਵ ਹੋਤਿ. ਭਿਕ੍ਖੁਨੀ ਭਿਕ੍ਖੁਵਿਹਾਰੇ ਕਾਲਂ ਕਰੋਤਿ, ਤਸ੍ਸਾ ਪਰਿਕ੍ਖਾਰੋ ਭਿਕ੍ਖੁਨੀਨਂਯੇਵ ਹੋਤਿ.

੪੨੦. ਪੁਰਾਣਮਲ੍ਲੀਤਿ ਪੁਰਾਣੇ ਗਿਹਿਕਾਲੇ ਮਲ੍ਲਕਸ੍ਸ ਭਰਿਯਾ. ਪੁਰਿਸਬ੍ਯਞ੍ਜਨਨ੍ਤਿ ਪੁਰਿਸਨਿਮਿਤ੍ਤਂ, ਛਿਨ੍ਨਂ ਵਾ ਹੋਤੁ ਅਚ੍ਛਿਨ੍ਨਂ ਵਾ, ਪਟਿਚ੍ਛਨ੍ਨਂ ਵਾ ਅਪ੍ਪਟਿਚ੍ਛਨ੍ਨਂ ਵਾ. ਸਚੇ ਏਤਸ੍ਮਿਂ ਠਾਨੇ ਪੁਰਿਸਬ੍ਯਞ੍ਜਨਨ੍ਤਿ ਚਿਤ੍ਤਂ ਉਪ੍ਪਾਦੇਤ੍ਵਾ ਉਪਨਿਜ੍ਝਾਯਤਿ, ਦੁਕ੍ਕਟਂ.

੪੨੧. ਅਤ੍ਤਨੋ ਪਰਿਭੋਗਤ੍ਥਾਯ ਦਿਨ੍ਨਂ ਨਾਮ ਯਂ ‘‘ਤੁਮ੍ਹੇਯੇਵ ਪਰਿਭੁਞ੍ਜਥਾ’’ਤਿ ਵਤ੍ਵਾ ਦਿਨ੍ਨਂ, ਤਂ ਅਞ੍ਞਸ੍ਸ ਦਦਤੋ ਦੁਕ੍ਕਟਂ. ਅਗ੍ਗਂ ਗਹੇਤ੍ਵਾ ਪਨ ਦਾਤੁਂ ਵਟ੍ਟਤਿ. ਸਚੇ ਅਸਪ੍ਪਾਯਂ, ਸਬ੍ਬਂ ਅਪਨੇਤੁਂ ਵਟ੍ਟਤਿ. ਚੀਵਰਂ ਏਕਾਹਂ ਵਾ ਦ੍ਵੀਹਂ ਵਾ ਪਰਿਭੁਞ੍ਜਿਤ੍ਵਾ ਦਾਤੁਂ ਵਟ੍ਟਤਿ. ਪਤ੍ਤਾਦੀਸੁਪਿ ਏਸੇਵ ਨਯੋ.

ਭਿਕ੍ਖੂਨਂ ਸਨ੍ਨਿਧਿਂ ਭਿਕ੍ਖੁਨੀਹਿ ਪਟਿਗ੍ਗਾਹਾਪੇਤ੍ਵਾਤਿ ਹਿਯ੍ਯੋ ਪਟਿਗ੍ਗਹੇਤ੍ਵਾ ਠਪਿਤਮਂਸਂ ਅਜ੍ਜ ਅਞ੍ਞਸ੍ਮਿਂ ਅਨੁਪਸਮ੍ਪਨ੍ਨੇ ਅਸਤਿ ਭਿਕ੍ਖੂਹਿ ਪਟਿਗ੍ਗਾਹਾਪੇਤ੍ਵਾ ਭਿਕ੍ਖੁਨੀਹਿ ਪਰਿਭੁਞ੍ਜਿਤਬ੍ਬਂ. ਭਿਕ੍ਖੂਹਿ ਪਟਿਗ੍ਗਹਿਤਞ੍ਹਿ ਭਿਕ੍ਖੁਨੀਨਂ ਅਪ੍ਪਟਿਗ੍ਗਹਿਤਕਟ੍ਠਾਨੇ ਤਿਟ੍ਠਤਿ, ਭਿਕ੍ਖੁਨੀਨਂ ਪਟਿਗ੍ਗਹਿਤਮ੍ਪਿ ਭਿਕ੍ਖੂਸੁ ਏਸੇਵ ਨਯੋ.

੪੨੬. ਆਸਨਂ ਸਂਕਸਾਯਨ੍ਤਿਯੋ ਕਾਲਂ ਵੀਤਿਨਾਮੇਸੁਨ੍ਤਿ ਅਞ੍ਞਂ ਵੁਟ੍ਠਾਪੇਤ੍ਵਾ ਅਞ੍ਞਂ ਨਿਸੀਦਾਪੇਨ੍ਤਿਯੋ ਭੋਜਨਕਾਲਂ ਅਤਿਕ੍ਕਾਮੇਸੁਂ.

ਅਟ੍ਠਨ੍ਨਂ ਭਿਕ੍ਖੁਨੀਨਂ ਯਥਾਵੁਡ੍ਢਨ੍ਤਿ ਏਤ੍ਥ ਸਚੇ ਪੁਰੇ ਅਟ੍ਠਸੁ ਨਿਸਿਨ੍ਨਾਸੁ ਤਾਸਂ ਅਬ੍ਭਨ੍ਤਰਿਮਾ ਅਞ੍ਞਾ ਆਗਚ੍ਛਤਿ, ਸਾ ਅਤ੍ਤਨੋ ਨਵਕਂ ਉਟ੍ਠਾਪੇਤ੍ਵਾ ਨਿਸੀਦਿਤੁਂ ਲਭਤਿ. ਯਾ ਪਨ ਅਟ੍ਠਹਿਪਿ ਨਵਕਤਰਾ, ਸਾ ਸਚੇਪਿ ਸਟ੍ਠਿਵਸ੍ਸਾ ਹੋਤਿ, ਆਗਤਪਟਿਪਾਟਿਯਾਵ ਨਿਸੀਦਿਤੁਂ ਲਭਤਿ. ਅਞ੍ਞਤ੍ਥ ਸਬ੍ਬਤ੍ਥ ਯਥਾਵੁਡ੍ਢਂ ਨ ਪਟਿਬਾਹਿਤਬ੍ਬਨ੍ਤਿ ਠਪੇਤ੍ਵਾ ਭਤ੍ਤਗ੍ਗਂ ਅਞ੍ਞਸ੍ਮਿਂ ਚਤੁਪਚ੍ਚਯਭਾਜਨੀਯਟ੍ਠਾਨੇ ‘‘ਅਹਂ ਪੁਬ੍ਬੇ ਆਗਤਾ’’ਤਿ ਵੁਡ੍ਢਂ ਪਟਿਬਾਹਿਤ੍ਵਾ ਕਿਞ੍ਚਿ ਨ ਗਹੇਤਬ੍ਬਂ; ਯਥਾਵੁਡ੍ਢਮੇਵ ਵਟ੍ਟਤਿ. ਪਵਾਰਣਾਕਥਾ ਕਥਿਤਾਯੇਵ.

੪੨੯. ਇਤ੍ਥਿਯੁਤ੍ਤਨ੍ਤਿਆਦੀਹਿ ਸਬ੍ਬਯਾਨਾਨਿ ਅਨੁਞ੍ਞਾਤਾਨਿ. ਪਾਟਙ੍ਕਿਨ੍ਤਿ ਪਟਪੋਟ੍ਟਲਿਕਂ.

੪੩੦. ਦੂਤੇਨ ਉਪਸਮ੍ਪਦਾ ਦਸਨ੍ਨਂ ਅਨ੍ਤਰਾਯਾਨਂ ਯੇਨ ਕੇਨਚਿ ਵਟ੍ਟਤਿ. ਕਮ੍ਮਵਾਚਾਪਰਿਯੋਸਾਨੇ ਸਾ ਭਿਕ੍ਖੁਨੀ ਭਿਕ੍ਖੁਨੁਪਸ੍ਸਯੇ ਠਿਤਾ ਵਾ ਹੋਤੁ ਨਿਪਨ੍ਨਾ ਵਾ ਜਾਗਰਾ ਵਾ ਨਿਦ੍ਦਂ ਓਕ੍ਕਨ੍ਤਾ ਵਾ, ਉਪਸਮ੍ਪਨ੍ਨਾਵ ਹੋਤਿ. ਤਾਵਦੇਵ ਛਾਯਾਦੀਨਿ ਆਗਤਾਯ ਦੂਤਭਿਕ੍ਖੁਨਿਯਾ ਆਚਿਕ੍ਖਿਤਬ੍ਬਾਨਿ.

੪੩੧. ਉਦੋਸਿਤੋਤਿ ਭਣ੍ਡਸਾਲਾ. ਨ ਸਮ੍ਮਤੀਤਿ ਨਪ੍ਪਹੋਤਿ. ਉਪਸ੍ਸਯਨ੍ਤਿ ਘਰਂ. ਨਵਕਮ੍ਮਨ੍ਤਿ ਸਙ੍ਘਸ੍ਸਤ੍ਥਾਯ ਭਿਕ੍ਖੁਨਿਯਾ ਨਵਕਮ੍ਮਮ੍ਪਿ ਕਾਤੁਂ ਅਨੁਜਾਨਾਮੀਤਿ ਅਤ੍ਥੋ.

੪੩੨. ਤਸ੍ਸਾ ਪਬ੍ਬਜਿਤਾਯਾਤਿ ਤਸ੍ਸਾ ਪਬ੍ਬਜਿਤਕਾਲੇ. ਯਾਵ ਸੋ ਦਾਰਕੋ ਵਿਞ੍ਞੁਤਂ ਪਾਪੁਣਾਤੀਤਿ ਯਾਵ ਖਾਦਿਤੁਂ ਭੁਞ੍ਜਿਤੁਂ ਨਹਾਯਿਤੁਞ੍ਚ ਮਣ੍ਡਿਤੁਞ੍ਚ ਅਤ੍ਤਨੋ ਧਮ੍ਮਤਾਯ ਸਕ੍ਕੋਤੀਤਿ ਅਤ੍ਥੋ.

ਠਪੇਤ੍ਵਾ ਸਾਗਾਰਨ੍ਤਿ ਸਹਗਾਰਸੇਯ੍ਯਮਤ੍ਤਂ ਠਪੇਤ੍ਵਾ. ਯਥਾ ਅਞ੍ਞਸ੍ਮਿਂ ਪੁਰਿਸੇ; ਏਵਂ ਦੁਤਿਯਿਕਾਯ ਭਿਕ੍ਖੁਨਿਯਾ ਤਸ੍ਮਿਂ ਦਾਰਕੇ ਪਟਿਪਜ੍ਜਿਤਬ੍ਬਨ੍ਤਿ ਦਸ੍ਸੇਤਿ. ਮਾਤਾ ਪਨ ਨਹਾਪੇਤੁਂ ਪਾਯੇਤੁਂ ਭੋਜੇਤੁਂ ਮਣ੍ਡੇਤੁਂ ਉਰੇ ਕਤ੍ਵਾ ਸਯਿਤੁਞ੍ਚ ਲਭਤਿ.

੪੩੪. ਯਦੇਵ ਸਾ ਵਿਬ੍ਭਨ੍ਤਾਤਿ ਯਸ੍ਮਾ ਸਾ ਵਿਬ੍ਭਨ੍ਤਾ ਅਤ੍ਤਨੋ ਰੁਚਿਯਾ ਖਨ੍ਤਿਯਾ ਓਦਾਤਾਨਿ ਵਤ੍ਥਾਨਿ ਨਿਵਤ੍ਥਾ, ਤਸ੍ਮਾਯੇਵ ਸਾ ਅਭਿਕ੍ਖੁਨੀ, ਨ ਸਿਕ੍ਖਾਪਚ੍ਚਕ੍ਖਾਨੇਨਾਤਿ ਦਸ੍ਸੇਤਿ. ਸਾ ਪੁਨ ਉਪਸਮ੍ਪਦਂ ਨ ਲਭਤਿ.

ਸਾ ਆਗਤਾ ਨ ਉਪਸਮ੍ਪਾਦੇਤਬ੍ਬਾਤਿ ਨ ਕੇਵਲਂ ਨ ਉਪਸਮ੍ਪਾਦੇਤਬ੍ਬਾ, ਪਬ੍ਬਜ੍ਜਮ੍ਪਿ ਨ ਲਭਤਿ. ਓਦਾਤਾਨਿ ਗਹੇਤ੍ਵਾ ਵਿਬ੍ਭਨ੍ਤਾ ਪਨ ਪਬ੍ਬਜ੍ਜਾਮਤ੍ਤਂ ਲਭਤਿ.

ਅਭਿਵਾਦਨਨ੍ਤਿਆਦੀਸੁ ਪੁਰਿਸਾ ਪਾਦੇ ਸਮ੍ਬਾਹਨ੍ਤਾ ਵਨ੍ਦਨ੍ਤਿ, ਕੇਸੇ ਛਿਨ੍ਦਨ੍ਤਿ, ਨਖੇ ਛਿਨ੍ਦਨ੍ਤਿ, ਵਣਪਟਿਕਮ੍ਮਂ ਕਰੋਨ੍ਤਿ, ਤਂ ਸਬ੍ਬਂ ਕੁਕ੍ਕੁਚ੍ਚਾਯਨ੍ਤਾ ਨ ਸਾਦਿਯਨ੍ਤੀਤਿ ਅਤ੍ਥੋ. ਤਤ੍ਰੇਕੇ ਆਚਰਿਯਾ ‘‘ਸਚੇ ਏਕਤੋ ਵਾ ਉਭਤੋ ਵਾ ਅਵਸ੍ਸੁਤਾ ਹੋਨ੍ਤਿ ਸਾਰਤ੍ਤਾ, ਯਥਾਵਤ੍ਥੁਕਮੇਵ’’. ਏਕੇ ਆਚਰਿਯਾ ‘‘ਨਤ੍ਥਿ ਏਤ੍ਥ ਆਪਤ੍ਤੀ’’ਤਿ ਵਦਨ੍ਤਿ. ਏਵਂ ਆਚਰਿਯਵਾਦਂ ਦਸ੍ਸੇਤ੍ਵਾ ਇਦਂ ਓਦਿਸ੍ਸ ਅਨੁਞ੍ਞਾਤਂ ਵਟ੍ਟਤੀਤਿ ਅਟ੍ਠਕਥਾਸੁ ਵੁਤ੍ਤਂ. ਤਂ ਪਮਾਣਂ. ‘‘ਅਨੁਜਾਨਾਮਿ ਭਿਕ੍ਖਵੇ ਸਾਦਿਤੁ’’ਨ੍ਤਿ ਹਿ ਵਚਨੇਨੇਵ ਤਂ ਕਪ੍ਪਿਯਂ.

੪੩੫. ਪਲ੍ਲਙ੍ਕੇਨ ਨਿਸੀਦਨ੍ਤੀਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸੀਦਨ੍ਤਿ. ਅਡ੍ਢਪਲ੍ਲਙ੍ਕਨ੍ਤਿ ਏਕਂ ਪਾਦਂ ਆਭੁਜਿਤ੍ਵਾ ਕਤਪਲ੍ਲਙ੍ਕਂ. ਹੇਟ੍ਠਾ ਵਿਵਟੇ ਉਪਰਿ ਪਟਿਚ੍ਛਨ੍ਨੇਤਿ ਏਤ੍ਥ ਸਚੇ ਕੂਪੋ ਖਤੋ ਹੋਤਿ, ਉਪਰਿ ਪਨ ਪਦਰਮਤ੍ਤਮੇਵ ਸਬ੍ਬਦਿਸਾਸੁ ਪਞ੍ਞਾਯਤਿ, ਏਵਰੂਪੇਪਿ ਵਟ੍ਟਤਿ.

੪੩੬. ਕੁਕ੍ਕੁਸਂ ਮਤ੍ਤਿਕਨ੍ਤਿ ਕੁਣ੍ਡਕਞ੍ਚੇਵ ਮਤ੍ਤਿਕਞ੍ਚ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.

ਭਿਕ੍ਖੁਨੀਉਪਸਮ੍ਪਦਾਨੁਜਾਨਨਕਥਾ ਨਿਟ੍ਠਿਤਾ.

ਭਿਕ੍ਖੁਨਿਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.