੮. ਵਤ੍ਤਕ੍ਖਨ੍ਧਕਂ

ਆਗਨ੍ਤੁਕਵਤ੍ਤਕਥਾ

੩੫੭. ਵਤ੍ਤਕ੍ਖਨ੍ਧਕੇ ਇਦਾਨਿ ਆਰਾਮਂ ਪਵਿਸਿਸ੍ਸਾਮੀਤਿ ਇਮਿਨਾ ਉਪਚਾਰਸੀਮਸਮੀਪਂ ਦਸ੍ਸੇਤਿ; ਤਸ੍ਮਾ ਉਪਚਾਰਸੀਮਂ ਪਤ੍ਵਾ ਉਪਾਹਨਾਓਮੁਞ੍ਚਨਾਦਿ ਸਬ੍ਬਂ ਕਾਤਬ੍ਬਂ. ਗਹੇਤ੍ਵਾਤਿ ਉਪਾਹਨਦਣ੍ਡਕੇਨ ਗਹੇਤ੍ਵਾ. ਪਟਿਕ੍ਕਮਨ੍ਤੀਤਿ ਸਨ੍ਨਿਪਤਨ੍ਤਿ. ਵਿਸ੍ਸਜ੍ਜੇਤਬ੍ਬਨ੍ਤਿ ਪਤ੍ਥਰਿਤਬ੍ਬਂ. ਗੋਚਰੋ ਪੁਚ੍ਛਿਤਬ੍ਬੋਤਿ ‘‘ਗੋਚਰਗਾਮੋ ਆਸਨ੍ਨੇ ਉਦਾਹੁ ਦੂਰੇ, ਕਾਲਸ੍ਸੇਵ ਪਿਣ੍ਡਾਯ ਚਰਿਤਬ੍ਬਂ ਉਦਾਹੁ ਦਿਵਾ’’ਤਿ ਏਵਂ ਭਿਕ੍ਖਾਚਾਰੋ ਪੁਚ੍ਛਿਤਬ੍ਬੋ. ਅਗੋਚਰੋ ਨਾਮ ਮਿਚ੍ਛਾਦਿਟ੍ਠਿਕਾਨਂ ਵਾ ਗਾਮੋ ਪਰਿਚ੍ਛਿਨ੍ਨਭਿਕ੍ਖੋ ਵਾ ਗਾਮੋ; ਯਤ੍ਥ ਏਕਸ੍ਸ ਵਾ ਦ੍ਵਿਨ੍ਨਂ ਵਾ ਭਿਕ੍ਖਾ ਦਿਯ੍ਯਤਿ, ਸੋਪਿ ਪੁਚ੍ਛਿਤਬ੍ਬੋ. ਪਾਨੀਯਂ ਪੁਚ੍ਛਿਤਬ੍ਬਨ੍ਤਿ ‘‘ਕਿਂ ਇਮਿਸ੍ਸਾ ਪੋਕ੍ਖਰਣਿਯਾ ਪਾਨੀਯਂਯੇਵ ਪਿਵਨ੍ਤਿ, ਨਹਾਨਾਦਿਪਰਿਭੋਗਮ੍ਪਿ ਕਰੋਨ੍ਤੀ’’ਤਿ ਏਵਂ ਪਾਨੀਯਞ੍ਚੇਵ ਪਰਿਭੋਜਨੀਯਞ੍ਚ ਪੁਚ੍ਛਿਤਬ੍ਬਂ. ਕੇਸੁਚਿ ਠਾਨੇਸੁ ਵਾਲ਼ਮਿਗਾ ਵਾ ਅਮਨੁਸ੍ਸਾ ਵਾ ਹੋਨ੍ਤਿ, ਤਸ੍ਮਾ ‘‘ਕਂ ਕਾਲਂ ਪਵਿਸਿਤਬ੍ਬਂ, ਕਂ ਕਾਲਂ ਨਿਕ੍ਖਮਿਤਬ੍ਬ’’ਨ੍ਤਿ ਪੁਚ੍ਛਿਤਬ੍ਬਂ.

ਬਹਿ ਠਿਤੇਨਾਤਿ ਬਹਿ ਨਿਕ੍ਖਮਨ੍ਤਸ੍ਸ ਅਹਿਨੋ ਵਾ ਅਮਨੁਸ੍ਸਸ੍ਸ ਵਾ ਮਗ੍ਗਂ ਦਤ੍ਵਾ ਠਿਤੇਨ ਨਿਲ੍ਲੋਕੇਤਬ੍ਬੋ. ਸਚੇ ਉਸ੍ਸਹਤਿ ਸੋਧੇਤਬ੍ਬੋਤਿ ਯਦਿ ਸਕ੍ਕੋਤਿ, ਸਬ੍ਬੋ ਵਿਹਾਰੋ ਸੋਧੇਤਬ੍ਬੋ. ਅਸਕ੍ਕੋਨ੍ਤੇਨ ਅਤ੍ਤਨੋ ਵਸਨੋਕਾਸੋ ਜਗ੍ਗਿਤਬ੍ਬੋ. ਸਬ੍ਬਂ ਸੋਧੇਤੁਂ ਸਕ੍ਕੋਨ੍ਤਸ੍ਸ ਪਨ ਦਸ੍ਸਿਤੇ ਵਿਹਾਰਸੋਧਨਵਤ੍ਤੇ ਵਿਨਿਚ੍ਛਯੋ ਮਹਾਖਨ੍ਧਕੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਆਗਨ੍ਤੁਕਵਤ੍ਤਕਥਾ ਨਿਟ੍ਠਿਤਾ.

ਆਵਾਸਿਕਵਤ੍ਤਕਥਾ

੩੫੯. ਆਵਾਸਿਕਵਤ੍ਤੇ – ਆਸਨਂ ਪਞ੍ਞਪੇਤਬ੍ਬਨ੍ਤਿ ਏਵਮਾਦਿ ਸਬ੍ਬਂ ਵੁਡ੍ਢਤਰੇ ਆਗਤੇ ਚੀਵਰਕਮ੍ਮਂ ਵਾ ਨਵਕਮ੍ਮਂ ਵਾ ਠਪੇਤ੍ਵਾਪਿ ਕਾਤਬ੍ਬਂ. ਚੇਤਿਯਙ੍ਗਣਂ ਸਮ੍ਮਜ੍ਜਨ੍ਤੇਨ ਸਮ੍ਮਜ੍ਜਨਿਂ ਨਿਕ੍ਖਿਪਿਤ੍ਵਾ ਤਸ੍ਸ ਵਤ੍ਤਂ ਕਾਤੁਂ ਆਰਭਿਤਬ੍ਬਂ. ਪਣ੍ਡਿਤੋ ਹਿ ਆਗਨ੍ਤੁਕੋ ‘‘ਸਮ੍ਮਜ੍ਜਾਹਿ ਤਾਵ ਚੇਤਿਯਙ੍ਗਣ’’ਨ੍ਤਿ ਵਕ੍ਖਤਿ. ਗਿਲਾਨਭੇਸਜ੍ਜਂ ਕਰੋਨ੍ਤੇਨ ਪਨ ਸਚੇ ਨਾਤਿਆਤੁਰੋ ਗਿਲਾਨੋ ਹੋਤਿ, ਭੇਸਜ੍ਜਂ ਅਕਤ੍ਵਾ ਵਤ੍ਤਮੇਵ ਕਾਤਬ੍ਬਂ. ਮਹਾਗਿਲਾਨਸ੍ਸ ਪਨ ਭੇਸਜ੍ਜਮੇਵ ਕਾਤਬ੍ਬਂ. ਪਣ੍ਡਿਤੋ ਹਿ ਆਗਨ੍ਤੁਕੋ ‘‘ਕਰੋਹਿ ਤਾਵ ਭੇਸਜ੍ਜ’’ਨ੍ਤਿ ਵਕ੍ਖਤਿ. ਪਾਨੀਯੇਨ ਪੁਚ੍ਛਨ੍ਤੇਨ ਸਚੇ ਸਕਿਂ ਆਨੀਤਂ ਪਾਨੀਯਂ ਸਬ੍ਬਂ ਪਿਵਤਿ, ‘‘ਪੁਨ ਆਨੇਮੀ’’ਤਿ ਪੁਚ੍ਛਿਤਬ੍ਬੋਯੇਵ. ਅਪਿਚ ਬੀਜਨੇਨਪਿ ਬੀਜਿਤਬ੍ਬੋ, ਬੀਜਨ੍ਤੇਨ ਸਕਿਂ ਪਾਦਪਿਟ੍ਠਿਯਂ ਬੀਜਿਤ੍ਵਾ ਸਕਿਂ ਮਜ੍ਝੇ ਸਕਿਂ ਸੀਸੇ ਬੀਜਿਤਬ੍ਬਂ, ‘‘ਅਲਂ ਹੋਤੂ’’ਤਿ ਵੁਤ੍ਤੇਨ ਤਤੋ ਮਨ੍ਦਤਰਂ ਬੀਜਿਤਬ੍ਬਂ. ਪੁਨ ‘‘ਅਲ’’ਨ੍ਤਿ ਵੁਤ੍ਤੇਨ ਤਤੋ ਮਨ੍ਦਤਰਂ ਬੀਜਿਤਬ੍ਬਂ. ਤਤਿਯਵਾਰਂ ਵੁਤ੍ਤੇਨ ਬੀਜਨੀ ਠਪੇਤਬ੍ਬਾ. ਪਾਦਾਪਿਸ੍ਸ ਧੋਵਿਤਬ੍ਬਾ, ਧੋਵਿਤ੍ਵਾ ਸਚੇ ਅਤ੍ਤਨੋ ਤੇਲਂ ਅਤ੍ਥਿ, ਤੇਨ ਮਕ੍ਖੇਤਬ੍ਬਾ. ਨੋ ਚੇ ਅਤ੍ਥਿ, ਤਸ੍ਸ ਸਨ੍ਤਕੇਨ ਮਕ੍ਖੇਤਬ੍ਬਾ. ਉਪਾਹਨਾਪੁਞ੍ਛਨਂ ਪਨ ਅਤ੍ਤਨੋ ਰੁਚਿਵਸੇਨ ਕਾਤਬ੍ਬਂ. ਤੇਨੇਵ ਹੇਤ੍ਥ ‘‘ਸਚੇ ਉਸ੍ਸਹਤੀ’’ਤਿ ਵੁਤ੍ਤਂ. ਤਸ੍ਮਾ ਉਪਾਹਨਾ ਅਪੁਞ੍ਛਨ੍ਤਸ੍ਸਾਪਿ ਅਨਾਪਤ੍ਤਿ. ‘‘ਕਤ੍ਥ ਮਯ੍ਹਂ ਸੇਨਾਸਨਂ ਪਾਪੁਣਾਤੀ’’ਤਿ ਪੁਚ੍ਛਿਤੇਨ ਸੇਨਾਸਨਂ ਪਞ੍ਞਪੇਤਬ੍ਬਂ, ‘‘ਏਤਂ ਤੁਮ੍ਹਾਕਂ ਸੇਨਾਸਨਂ ਪਾਪੁਣਾਤੀ’’ਤਿ ਏਵਂ ਆਚਿਕ੍ਖਿਤਬ੍ਬਨ੍ਤਿ ਅਤ੍ਥੋ. ਪਪ੍ਫੋਟੇਤ੍ਵਾ ਹਿ ਪਤ੍ਥਰਿਤੁਂ ਪਨ ਵਟ੍ਟਤਿਯੇਵ.

ਨਵਕਸ੍ਸ ਵਤ੍ਤੇ – ਪਾਨੀਯਂ ਆਚਿਕ੍ਖਿਤਬ੍ਬਨ੍ਤਿ ‘‘ਏਤਂ ਪਾਨੀਯਂ ਗਹੇਤ੍ਵਾ ਪਿਵਾਹੀ’’ਤਿ ਆਚਿਕ੍ਖਿਤਬ੍ਬਂ. ਪਰਿਭੋਜਨੀਯੇਪਿ ਏਸੇਵ ਨਯੋ. ਸੇਸਂ ਪੁਰਿਮਸਦਿਸਮੇਵ. ਮਹਾਆਵਾਸੇਪਿ ਅਤ੍ਤਨੋ ਸਨ੍ਤਿਕਂ ਸਮ੍ਪਤ੍ਤਸ੍ਸ ਆਗਨ੍ਤੁਕਸ੍ਸ ਵਤ੍ਤਂ ਅਕਾਤੁਂ ਨ ਲਭਤਿ.

ਆਵਾਸਿਕਵਤ੍ਤਕਥਾ ਨਿਟ੍ਠਿਤਾ.

ਗਮਿਕਵਤ੍ਤਕਥਾ

੩੬੦. ਗਮਿਕਵਤ੍ਤੇਸੁ ਦਾਰੁਭਣ੍ਡਨ੍ਤਿ ਸੇਨਾਸਨਕ੍ਖਨ੍ਧਕੇ ਵੁਤ੍ਤਂ ਮਞ੍ਚਪੀਠਾਦਿ. ਮਤ੍ਤਿਕਾਭਣ੍ਡਮ੍ਪਿ ਰਜਨਭਾਜਨਾਦਿ ਸਬ੍ਬਂ ਤਤ੍ਥ ਵੁਤ੍ਤਪ੍ਪਭੇਦਮੇਵ. ਤਂ ਸਬ੍ਬਂ ਅਗ੍ਗਿਸਾਲਾਯ ਵਾ ਅਞ੍ਞਤਰਸ੍ਮਿਂ ਵਾ ਗੁਤ੍ਤਟ੍ਠਾਨੇ ਪਟਿਸਾਮੇਤ੍ਵਾ ਗਨ੍ਤਬ੍ਬਂ. ਅਨੋਵਸ੍ਸਕੇ ਪਬ੍ਭਾਰੇਪਿ ਠਪੇਤੁਂ ਵਟ੍ਟਤਿ. ਸੇਨਾਸਨਂ ਆਪੁਚ੍ਛਿਤਬ੍ਬਨ੍ਤਿ ਏਤ੍ਥ ਯਂ ਪਾਸਾਣਪਿਟ੍ਠਿਯਂ ਵਾ ਪਾਸਾਣਤ੍ਥਮ੍ਭੇਸੁ ਵਾ ਕਤਸੇਨਾਸਨਂ, ਯਤ੍ਥ ਉਪਚਿਕਾ ਨਾਰੋਹਨ੍ਤਿ, ਤਂ ਅਨਾਪੁਚ੍ਛਨ੍ਤਸ੍ਸਾਪਿ ਅਨਾਪਤ੍ਤਿ. ਚਤੂਸੁ ਪਾਸਾਣਕੇਸੂਤਿਆਦਿ ਉਪਚਿਕਾਨਂ ਉਪ੍ਪਤ੍ਤਿਟ੍ਠਾਨੇ ਪਣ੍ਣਸਾਲਾਦਿਸੇਨਾਸਨੇ ਕਤ੍ਤਬ੍ਬਾਕਾਰਦਸ੍ਸਨਤ੍ਥਂ ਵੁਤ੍ਤਂ. ਅਪ੍ਪੇਵ ਨਾਮ ਅਙ੍ਗਾਨਿਪਿ ਸੇਸੇਯ੍ਯੁਨ੍ਤਿ ਅਯਂ ਅਜ੍ਝੋਕਾਸੇ ਠਪਿਤਮ੍ਹਿ ਆਨਿਸਂਸੋ. ਓਵਸ੍ਸਕਗੇਹੇ ਪਨ ਤਿਣੇਸੁ ਚ ਮਤ੍ਤਿਕਾਪਿਣ੍ਡੇਸੁ ਚ ਉਪਰਿ ਪਤਨ੍ਤੇਸੁ ਮਞ੍ਚਪੀਠਾਨਂ ਅਙ੍ਗਾਨਿਪਿ ਵਿਨਸ੍ਸਨ੍ਤਿ.

ਗਮਿਕਵਤ੍ਤਕਥਾ ਨਿਟ੍ਠਿਤਾ.

ਅਨੁਮੋਦਨਵਤ੍ਤਕਥਾ

੩੬੨. ਅਨੁਮੋਦਨਵਤ੍ਥੁਸ੍ਮਿਂ ਇਦ੍ਧਂ ਅਹੋਸੀਤਿ ਸਮ੍ਪਨ੍ਨਂ ਅਹੋਸਿ. ਚਤੂਹਿ ਪਞ੍ਚਹੀਤਿ ਸਙ੍ਘਤ੍ਥੇਰੇਨ ਅਨੁਮੋਦਨਤ੍ਥਾਯ ਨਿਸਿਨ੍ਨੇ ਹੇਟ੍ਠਾ ਪਟਿਪਾਟਿਯਾ ਚਤੂਹਿ ਨਿਸੀਦਿਤਬ੍ਬਂ. ਅਨੁਥੇਰੇ ਨਿਸਿਨ੍ਨੇ ਮਹਾਥੇਰੇਨ ਚ ਹੇਟ੍ਠਾ ਚ ਤੀਹਿ ਨਿਸੀਦਿਤਬ੍ਬਂ. ਪਞ੍ਚਮੇ ਨਿਸਿਨ੍ਨੇ ਉਪਰਿ ਚਤੂਹਿ ਨਿਸੀਦਿਤਬ੍ਬਂ. ਸਙ੍ਘਤ੍ਥੇਰੇਨ ਹੇਟ੍ਠਾ ਦਹਰਭਿਕ੍ਖੁਸ੍ਮਿਂ ਅਜ੍ਝਿਟ੍ਠੇਪਿ ਸਙ੍ਘਤ੍ਥੇਰਤੋ ਪਟ੍ਠਾਯ ਚਤੂਹਿ ਨਿਸੀਦਿਤਬ੍ਬਮੇਵ. ਸਚੇ ਪਨ ਅਨੁਮੋਦਕੋ ਭਿਕ੍ਖੁ ‘‘ਗਚ੍ਛਥ ਭਨ੍ਤੇ, ਆਗਮੇਤਬ੍ਬਕਿਚ੍ਚਂ ਨਤ੍ਥੀ’’ਤਿ ਵਦਤਿ, ਗਨ੍ਤੁਂ ਵਟ੍ਟਤਿ. ਮਹਾਥੇਰੇਨ ‘‘ਗਚ੍ਛਾਮ ਆਵੁਸੋ’’ਤਿ ਵੁਤ੍ਤੇ ‘‘ਗਚ੍ਛਥਾ’’ਤਿ ਵਦਤਿ, ਏਵਮ੍ਪਿ ਵਟ੍ਟਤਿ. ‘‘ਬਹਿਗਾਮੇ ਆਗਮੇਸ੍ਸਾਮਾ’’ਤਿ ਆਭੋਗਂ ਕਤ੍ਵਾਪਿ ਬਹਿਗਾਮਂ ਗਨ੍ਤ੍ਵਾ ਅਤ੍ਤਨੋ ਨਿਸ੍ਸਿਤਕੇ ‘‘ਤੁਮ੍ਹੇ ਤਸ੍ਸ ਆਗਮਨਂ ਆਗਮੇਥਾ’’ਤਿ ਵਤ੍ਵਾਪਿ ਗਨ੍ਤੁਂ ਵਟ੍ਟਤਿਯੇਵ. ਸਚੇ ਪਨ ਮਨੁਸ੍ਸਾ ਅਤ੍ਤਨੋ ਰੁਚਿਕੇਨ ਏਕੇਨ ਅਨੁਮੋਦਨਂ ਕਾਰੇਨ੍ਤਿ, ਨੇਵ ਤਸ੍ਸ ਅਨੁਮੋਦਤੋ ਆਪਤ੍ਤਿ, ਨ ਮਹਾਥੇਰਸ੍ਸ ਭਾਰੋ ਹੋਤਿ. ਉਪਨਿਸਿਨ੍ਨਕਥਾਯਮੇਵ ਹਿ ਮਨੁਸ੍ਸੇਸੁ ਕਥਾਪੇਨ੍ਤੇਸੁ ਮਹਾਥੇਰੋ ਆਪੁਚ੍ਛਿਤਬ੍ਬੋ, ਮਹਾਥੇਰੇਨ ਚ ਅਨੁਮੋਦਨਾਯ ਅਜ੍ਝਿਟ੍ਠੋਵ ਆਗਮੇਤਬ੍ਬੋਤਿ ਇਦਮੇਤ੍ਥ ਲਕ੍ਖਣਂ. ਵਚ੍ਚਿਤੋਤਿ ਸਞ੍ਜਾਤਵਚ੍ਚੋ; ਵਚ੍ਚਪੀਲ਼ਿਤੋਤਿ ਅਧਿਪ੍ਪਾਯੋ.

ਅਨੁਮੋਦਨਵਤ੍ਤਕਥਾ ਨਿਟ੍ਠਿਤਾ.

ਭਤ੍ਤਗ੍ਗਵਤ੍ਤਕਥਾ

੩੬੪. ਭਤ੍ਤਗ੍ਗਵਤ੍ਤੇ ‘‘ਅਨ੍ਤੋਗਾਮੋ ਵਾ ਹੋਤੁ ਵਿਹਾਰੋ ਵਾ, ਮਨੁਸ੍ਸਾਨਂ ਪਰਿਵੇਸਨਟ੍ਠਾਨਂ ਗਚ੍ਛਨ੍ਤੇਨ ਚੀਵਰਂ ਪਾਰੁਪਿਤ੍ਵਾ ਕਾਯਬਨ੍ਧਨਂ ਬਨ੍ਧਨਮੇਵ ਵਟ੍ਟਤੀ’’ਤਿ ਅਟ੍ਠਕਥਾਸੁ ਵੁਤ੍ਤਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜਾਤਿ ਥੇਰੇ ਭਿਕ੍ਖੂ ਅਤਿਅਲ੍ਲੀਯਿਤ੍ਵਾ ਨ ਨਿਸੀਦਿਤਬ੍ਬਂ. ਸਚੇ ਮਹਾਥੇਰਸ੍ਸ ਨਿਸਿਨ੍ਨਾਸਨੇਨ ਸਮਕਂ ਆਸਨਂ ਹੋਤਿ, ਬਹੂਸੁ ਆਸਨੇਸੁ ਸਤਿ ਏਕਂ ਦ੍ਵੇ ਆਸਨਾਨਿ ਠਪੇਤ੍ਵਾ ਨਿਸੀਦਿਤਬ੍ਬਂ. ਭਿਕ੍ਖੂ ਗਣੇਤ੍ਵਾ ਪਞ੍ਞਤ੍ਤਾਸਨੇਸੁ ਅਨਿਸੀਦਿਤ੍ਵਾ ਮਹਾਥੇਰੇਨ ਨਿਸੀਦਾਤਿ ਵੁਤ੍ਤੇਨ ਨਿਸੀਦਿਤਬ੍ਬਂ. ਨੋ ਚੇ ਮਹਾਥੇਰੋ ਵਦਤਿ, ‘‘ਇਦਂ, ਭਨ੍ਤੇ, ਆਸਨਂ ਉਚ੍ਚ’’ਨ੍ਤਿ ਵਤ੍ਤਬ੍ਬਂ. ‘‘ਨਿਸੀਦਾ’’ਤਿ ਵੁਤ੍ਤੇ ਨਿਸੀਦਿਤਬ੍ਬਂ. ਸਚੇ ਪਨ ਏਵਂ ਆਪੁਚ੍ਛਿਤੇਪਿ ਨ ਵਦਤਿ, ਨਿਸੀਦਨ੍ਤਸ੍ਸ ਅਨਾਪਤ੍ਤਿ; ਮਹਾਥੇਰਸ੍ਸੇਵ ਆਪਤ੍ਤਿ. ਨਵਕੋ ਹਿ ਏਵਰੂਪੇ ਆਸਨੇ ਅਨਾਪੁਚ੍ਛਾ ਨਿਸੀਦਨ੍ਤੋ ਆਪਜ੍ਜਤਿ, ਥੇਰੋ ਆਪੁਚ੍ਛਿਤੇ ਅਨਨੁਜਾਨਨ੍ਤੋ. ਨ ਸਙ੍ਘਾਟਿਂ ਓਤ੍ਥਰਿਤ੍ਵਾਤਿ ਨ ਸਙ੍ਘਾਟਿਂ ਅਵਤ੍ਥਰਿਤ੍ਵਾ ਨਿਸੀਦਿਤਬ੍ਬਂ.

ਉਭੋਹਿ ਹਤ੍ਥੇਹੀਤਿ ਪਤ੍ਤਧੋਵਨਉਦਕਂ ਸਨ੍ਧਾਯ ਵੁਤ੍ਤਂ. ਦਕ੍ਖਿਣੋਦਕਂ ਪਨ ਪੁਰਤੋ ਆਧਾਰਕੇ ਪਤ੍ਤਂ ਠਪੇਤ੍ਵਾ ਗਹੇਤਬ੍ਬਂ. ਸਾਧੁਕਨ੍ਤਿ ਉਦਕਸਦ੍ਦਂ ਅਕਰੋਨ੍ਤੇਨ.

ਸੂਪਸ੍ਸ ਓਕਾਸੋਤਿ ਯਥਾ ਸੂਪਸ੍ਸ ਓਕਾਸੋ ਹੋਤਿ; ਏਵਂ ਮਤ੍ਤਾਯ ਓਦਨੋ ਗਣ੍ਹਿਤਬ੍ਬੋਤਿ ਅਤ੍ਥੋ. ਸਮਕਂ ਸਮ੍ਪਾਦੇਹੀਤਿ ਇਦਂ ਨ ਕੇਵਲਂ ਸਪ੍ਪਿਆਦੀਸੁਯੇਵ ਓਦਨੇਪਿ ਵਤ੍ਤਬ੍ਬਂ. ਸਪ੍ਪਿਆਦੀਸੁ ਪਨ ਯਂ ਅਪ੍ਪਂ ਹੋਤਿ ਏਕਸ੍ਸ ਵਾ ਦ੍ਵਿਨ੍ਨਂ ਵਾ ਅਨੁਰੂਪਕਂ, ਤਂ ਸਬ੍ਬੇਸਂ ਸਮਕਂ ਸਮ੍ਪਾਦੇਹੀਤਿ ਵੁਤ੍ਤੇ ਮਨੁਸ੍ਸਾਨਂ ਵਿਹਸਾ ਹੋਤਿ, ਤਸ੍ਮਾ ਤਾਦਿਸਂ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਗਹੇਤ੍ਵਾ ਸੇਸਂ ਨ ਗਹੇਤਬ੍ਬਂ.

ਨ ਤਾਵ ਥੇਰੇਨ ਭੁਞ੍ਜਿਤਬ੍ਬਨ੍ਤਿ ਇਦਂ ਯਂ ਪਰਿਚ੍ਛਿਨ੍ਨਭਿਕ੍ਖੁਕਂ ਭਤ੍ਤਗ੍ਗਂ, ਯਤ੍ਥ ਮਨੁਸ੍ਸਾ ਸਬ੍ਬੇਸਂ ਪਾਪੇਤ੍ਵਾ ਦਾਤੁਕਾਮਾ ਹੋਨ੍ਤਿ, ਤਂ ਸਨ੍ਧਾਯ ਵੁਤ੍ਤਂ. ਯਂ ਪਨ ਮਹਾਭਤ੍ਤਗ੍ਗਂ ਹੋਤਿ, ਯਤ੍ਥ ਏਕਸ੍ਮਿਂ ਪਦੇਸੇ ਭੁਞ੍ਜਨ੍ਤਿ, ਏਕਸ੍ਮਿਂ ਪਦੇਸੇ ਉਦਕਂ ਦਿਯ੍ਯਤਿ, ਤਤ੍ਥ ਯਥਾਸੁਖਂ ਭੁਞ੍ਜਿਤਬ੍ਬਂ.

ਨ ਤਾਵ ਉਦਕਨ੍ਤਿ ਇਦਂ ਹਤ੍ਥਧੋਵਨਉਦਕਂ ਸਨ੍ਧਾਯ ਵੁਤ੍ਤਂ. ਅਨ੍ਤਰਾ ਪਿਪਾਸਿਤੇਨ ਪਨ ਗਲੇ ਵਿਲਗ੍ਗਾਮਿਸੇਨ ਵਾ ਪਾਨੀਯਂ ਪਿਵਿਤ੍ਵਾ ਹਤ੍ਥਾ ਨ ਧੋਵਿਤਬ੍ਬਾ. ਸਚੇ ਮਨੁਸ੍ਸਾ ‘‘ਧੋਵਥ ਭਨ੍ਤੇ ਪਤ੍ਤਞ੍ਚ ਹਤ੍ਥੇ ਚਾ’’ਤਿ ਵਦਨ੍ਤਿ, ਭਿਕ੍ਖੂ ਵਾ ‘‘ਤੁਮ੍ਹੇ ਉਦਕਂ ਗਣ੍ਹਥਾ’’ਤਿ ਵਦਨ੍ਤਿ, ਵਟ੍ਟਤਿ.

ਨਿਵਤ੍ਤਨ੍ਤੇਨਾਤਿ ਭਤ੍ਤਗ੍ਗਤੋ ਉਟ੍ਠਾਯ ਨਿਵਤ੍ਤਨ੍ਤੇਨ ਸਙ੍ਘੇਨ ਏਵਂ ਨਿਵਤ੍ਤਿਤਬ੍ਬਨ੍ਤਿ ਦਸ੍ਸੇਤਿ. ਕਥਂ? ‘‘ਨਵਕੇਹੀ’’ਤਿ ਸਬ੍ਬਂ ਦਟ੍ਠਬ੍ਬਂ. ਸਮ੍ਬਾਧੇਸੁ ਹਿ ਘਰੇਸੁ ਮਹਾਥੇਰਾਨਂ ਨਿਕ੍ਖਮਨੋਕਾਸੋ ਨ ਹੋਤਿ, ਤਸ੍ਮਾ ਏਵਂ ਵੁਤ੍ਤਂ. ਏਵਂ ਨਿਵਤ੍ਤਨ੍ਤੇਹਿ ਪਨ ਨਵਕੇਹਿ ਗੇਹਦ੍ਵਾਰੇ ਠਤ੍ਵਾ ਥੇਰੇਸੁ ਨਿਕ੍ਖਨ੍ਤੇਸੁ ਪਟਿਪਾਟਿਯਾ ਗਨ੍ਤਬ੍ਬਂ. ਸਚੇ ਪਨ ਮਹਾਥੇਰਾ ਧੁਰੇ ਨਿਸਿਨ੍ਨਾ ਹੋਨ੍ਤਿ, ਨਵਕਾ ਅਨ੍ਤੋਗੇਹੇ, ਥੇਰਾਸਨਤੋ ਪਟ੍ਠਾਯ ਪਟਿਪਾਟਿਯਾ ਏਵ ਨਿਕ੍ਖਮਿਤਬ੍ਬਂ. ਕਾਯੇਨ ਕਾਯਂ ਅਘਟ੍ਟੇਨ੍ਤੇਨ ਯਥਾ ਅਨ੍ਤਰੇਨ ਮਨੁਸ੍ਸਾ ਗਨ੍ਤੁਂ ਸਕ੍ਕੋਨ੍ਤਿ, ਏਵਂ ਵਿਰਲ਼ਾਯ ਪਟਿਪਾਟਿਯਾ ਗਨ੍ਤਬ੍ਬਂ.

ਭਤ੍ਤਗ੍ਗਵਤ੍ਤਕਥਾ ਨਿਟ੍ਠਿਤਾ.

ਪਿਣ੍ਡਚਾਰਿਕਵਤ੍ਤਕਥਾ

੩੬੬. ਪਿਣ੍ਡਚਾਰਿਕਵਤ੍ਤੇ – ਕਮ੍ਮਂ ਵਾ ਨਿਕ੍ਖਿਪਤੀਤਿ ਕਪ੍ਪਾਸਂ ਵਾ ਸੁਪ੍ਪਂ ਵਾ ਮੁਸਲਂ ਵਾ ਯਂ ਗਹੇਤ੍ਵਾ ਕਮ੍ਮਂ ਕਰੋਨ੍ਤਿ, ਠਿਤਾ ਵਾ ਨਿਸਿਨ੍ਨਾ ਵਾ ਹੋਨ੍ਤਿ, ਤਂ ਨਿਕ੍ਖਿਪਤਿ. ਨ ਚ ਭਿਕ੍ਖਾਦਾਯਿਕਾਯਾਤਿ ਇਤ੍ਥੀ ਵਾ ਹੋਤੁ ਪੁਰਿਸੋ ਵਾ, ਭਿਕ੍ਖਾਦਾਨਸਮਯੇ ਮੁਖਂ ਨ ਉਲ੍ਲੋਕੇਤਬ੍ਬਂ.

ਪਿਣ੍ਡਚਾਰਿਕਵਤ੍ਤਕਥਾ ਨਿਟ੍ਠਿਤਾ.

ਆਰਞ੍ਞਿਕਵਤ੍ਤਕਥਾ

੩੬੮. ਆਰਞ੍ਞਿਕਵਤ੍ਤੇ – ਸੇਨਾਸਨਾ ਓਤਰਿਤਬ੍ਬਨ੍ਤਿ ਵਸਨਟ੍ਠਾਨਤੋ ਨਿਕ੍ਖਮਿਤਬ੍ਬਂ.

ਪਤ੍ਤਂ ਥਵਿਕਾਯ ਪਕ੍ਖਿਪਿਤ੍ਵਾਤਿ ਏਤ੍ਥ ਸਚੇ ਬਹਿਗਾਮੇ ਉਦਕਂ ਨਤ੍ਥਿ, ਅਨ੍ਤੋਗਾਮੇਯੇਵ ਭਤ੍ਤਕਿਚ੍ਚਂ ਕਤ੍ਵਾ ਅਥ ਬਹਿਗਾਮੇ ਅਤ੍ਥਿ, ਬਹਿਗਾਮੇ ਭਤ੍ਤਕਿਚ੍ਚਂ ਕਤ੍ਵਾ ਪਤ੍ਤੋ ਧੋਵਿਤ੍ਵਾ ਵੋਦਕੋ ਕਤ੍ਵਾ ਥਵਿਕਾਯ ਪਕ੍ਖਿਪਿਤਬ੍ਬੋ.

ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਨ੍ਤਿ ਸਚੇ ਭਾਜਨਾਨਿ ਨਪ੍ਪਹੋਨ੍ਤਿ, ਪਾਨੀਯਮੇਵ ਪਰਿਭੋਜਨੀਯਮ੍ਪਿ ਕਤ੍ਵਾ ਉਪਟ੍ਠਾਪੇਤਬ੍ਬਂ. ਭਾਜਨਂ ਅਲਭਨ੍ਤੇਨ ਵੇਲ਼ੁਨਾਲ਼ਿਕਾਯਪਿ ਉਪਟ੍ਠਾਪੇਤਬ੍ਬਂ. ਤਮ੍ਪਿ ਅਲਭਨ੍ਤਸ੍ਸ ਯਥਾ ਸਮੀਪੇ ਉਦਕਆਵਾਟੋ ਹੋਤਿ, ਏਵਂ ਕਾਤਬ੍ਬਂ. ਅਰਣਿਸਹਿਤੇ ਸਤਿ ਅਗ੍ਗਿਂ ਅਕਾਤੁਮ੍ਪਿ ਵਟ੍ਟਤਿ. ਯਥਾ ਚ ਆਰਞ੍ਞਿਕਸ੍ਸ, ਏਵਂ ਕਨ੍ਤਾਰਪ੍ਪਟਿਪਨ੍ਨਸ੍ਸਾਪਿ ਅਰਣਿਸਹਿਤਂ ਇਚ੍ਛਿਤਬ੍ਬਂ. ਗਣਵਾਸਿਨੋ ਪਨ ਤੇਨ ਵਿਨਾਪਿ ਵਟ੍ਟਤਿ. ਨਕ੍ਖਤ੍ਤਾਨੇਵ ਨਕ੍ਖਤ੍ਤਪਦਾਨਿ.

ਆਰਞ੍ਞਿਕਵਤ੍ਤਕਥਾ ਨਿਟ੍ਠਿਤਾ.

ਸੇਨਾਸਨਵਤ੍ਤਕਥਾ

੩੬੯. ਸੇਨਾਸਨਵਤ੍ਤੇ – ਦ੍ਵਾਰਂ ਨਾਮ ਯਸ੍ਮਾ ਮਹਾਵਲ਼ਞ੍ਜਂ, ਤਸ੍ਮਾ ਤਤ੍ਥ ਆਪੁਚ੍ਛਨਕਿਚ੍ਚਂ ਨਤ੍ਥਿ, ਸੇਸਾਨਿ ਪਨ ਉਦ੍ਦੇਸਦਾਨਾਦੀਨਿ ਆਪੁਚ੍ਛਿਤ੍ਵਾਵ ਕਾਤਬ੍ਬਾਨਿ. ਦੇਵਸਿਕਮ੍ਪਿ ਆਪੁਚ੍ਛਿਤੁਂ ਵਟ੍ਟਤਿ. ਅਥਾਪਿ ‘‘ਭਨ੍ਤੇ ਆਪੁਚ੍ਛਿਤਮੇਵ ਹੋਤੂ’’ਤਿ ਵੁਤ੍ਤੇ ਵੁਡ੍ਢਤਰੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਤਿ, ਸਯਮੇਵ ਵਾ ‘‘ਤ੍ਵਂ ਯਥਾਸੁਖਂ ਵਿਹਰਾਹੀ’’ਤਿ ਵਦਤਿ; ਏਵਮ੍ਪਿ ਵਟ੍ਟਤਿ. ਸਭਾਗਸ੍ਸ ਵਿਸ੍ਸਾਸੇਨਾਪਿ ਵਟ੍ਟਤਿਯੇਵ. ਯੇਨ ਵੁਡ੍ਢੋ ਤੇਨ ਪਰਿਵਤ੍ਤਿਤਬ੍ਬਨ੍ਤਿ ਵੁਡ੍ਢਾਭਿਮੁਖੇਨ ਪਰਿਵਤ੍ਤਿਤਬ੍ਬਂ. ਭੋਜਨਸਾਲਾਦੀਸੁਪਿ ਏਵਮੇਵ ਪਟਿਪਜ੍ਜਿਤਬ੍ਬਂ.

ਸੇਨਾਸਨਵਤ੍ਤਕਥਾ ਨਿਟ੍ਠਿਤਾ.

ਜਨ੍ਤਾਘਰਵਤ੍ਤਾਦਿਕਥਾ

੩੭੧. ਜਨ੍ਤਾਘਰਵਤ੍ਤੇ – ਪਰਿਭਣ੍ਡਨ੍ਤਿ ਬਹਿਜਗਤਿ.

੩੭੩. ਆਚਮਨਵਤ੍ਥੁਸ੍ਮਿਂ – ਸਤਿ ਉਦਕੇਤਿ ਏਤ੍ਥ ਸਚੇ ਉਦਕਂ ਅਤ੍ਥਿ, ਪਟਿਚ੍ਛਨ੍ਨਟ੍ਠਾਨਂ ਪਨ ਨਤ੍ਥਿ, ਭਾਜਨੇਨ ਨੀਹਰਿਤ੍ਵਾ ਆਚਮਿਤਬ੍ਬਂ. ਭਾਜਨੇ ਅਸਤਿ ਪਤ੍ਤੇਨ ਨੀਹਰਿਤਬ੍ਬਂ. ਪਤ੍ਤੇਪਿ ਅਸਤਿ ਅਸਨ੍ਤਂ ਨਾਮ ਹੋਤਿ. ‘‘ਇਦਂ ਅਤਿਵਿਵਟਂ ਪੁਰਤੋ ਅਞ੍ਞਂ ਉਦਕਂ ਭਵਿਸ੍ਸਤੀ’’ਤਿ ਗਤਸ੍ਸ ਉਦਕਂ ਅਲਭਨ੍ਤਸ੍ਸੇਵ ਭਿਕ੍ਖਾਚਾਰਵੇਲਾ ਹੋਤਿ, ਕਟ੍ਠੇਨ ਵਾ ਕੇਨਚਿ ਵਾ ਪੁਞ੍ਛਿਤ੍ਵਾ ਗਨ੍ਤਬ੍ਬਂ, ਭੁਞ੍ਜਿਤੁਮ੍ਪਿ ਅਨੁਮੋਦਨਮ੍ਪਿ ਕਾਤੁਂ ਵਟ੍ਟਤਿ. ਆਗਤਪਟਿਪਾਟਿਯਾਤਿ ਵਚ੍ਚਕੁਟਿਯਂ ਪਸ੍ਸਾਵਟ੍ਠਾਨੇ ਨ੍ਹਾਨਤਿਤ੍ਥੇਤਿ ਤੀਸੁਪਿ ਆਗਤਪਟਿਪਾਟਿਯੇਵ ਪਮਾਣਂ.

੩੭੪. ਵਚ੍ਚਕੁਟਿਵਤ੍ਤੇ – ਨ ਦਨ੍ਤਕਟ੍ਠਂ ਖਾਦਨ੍ਤੇਨਾਤਿ ਅਯਂ ਵਚ੍ਚਕੁਟਿਯਾਪਿ ਅਵਚ੍ਚਕੁਟਿਯਾਪਿ ਸਬ੍ਬਤ੍ਥੇਵ ਪਟਿਕ੍ਖੇਪੋ. ਨ ਫਰੁਸੇਨ ਕਟ੍ਠੇਨਾਤਿ ਫਾਲਿਤਕਟ੍ਠੇਨ ਵਾ ਖਰੇਨ ਵਾ ਗਣ੍ਠਿਕੇਨ ਵਾ ਕਣ੍ਟਕੇਨ ਵਾ ਸੁਸਿਰੇਨ ਵਾ ਪੂਤਿਨਾ ਵਾ ਨ ਅਵਲੇਖਿਤਬ੍ਬਂ. ਅਵਲੇਖਨਕਟ੍ਠਂ ਪਨ ਅਗ੍ਗਹੇਤ੍ਵਾ ਪਵਿਟ੍ਠਸ੍ਸ ਆਪਤ੍ਤਿ ਨਤ੍ਥਿ.

ਨ ਆਚਮਨਸਰਾਵਕੇਤਿ ਸਬ੍ਬਸਾਧਾਰਣਟ੍ਠਾਨਂ ਸਨ੍ਧਾਯੇਤਂ ਵੁਤ੍ਤਂ. ਤਤ੍ਰ ਹਿ ਅਞ੍ਞੇ ਅਞ੍ਞੇ ਆਗਚ੍ਛਨ੍ਤਿ, ਤਸ੍ਮਾ ਉਦਕਂ ਨ ਸੇਸੇਤਬ੍ਬਂ. ਯਂ ਪਨ ਸਙ੍ਘਿਕੇਪਿ ਵਿਹਾਰੇ ਏਕਦੇਸੇ ਨਿਬਦ੍ਧਗਮਨਤ੍ਥਾਯ ਕਤਂ ਠਾਨਂ ਹੋਤਿ ਪੁਗ੍ਗਲਿਕਟ੍ਠਾਨਂ ਵਾ, ਤਸ੍ਮਿਂ ਵਟ੍ਟਤਿ. ਵਿਰੇਚਨਂ ਪਿਵਿਤ੍ਵਾ ਪੁਨਪ੍ਪੁਨਂ ਪਵਿਸਨ੍ਤਸ੍ਸਾਪਿ ਵਟ੍ਟਤਿਯੇਵ.

ਊਹਤਾਤਿ ਊਹਦਿਤਾ; ਬਹਿ ਵਚ੍ਚਮਕ੍ਖਿਤਾਤਿ ਅਤ੍ਥੋ. ਧੋਵਿਤਬ੍ਬਾਤਿ ਉਦਕਂ ਆਹਰਿਤ੍ਵਾ ਧੋਵਿਤਬ੍ਬਾ. ਉਦਕਂ ਅਤ੍ਥਿ, ਭਾਜਨਂ ਨਤ੍ਥਿ, ਅਸਨ੍ਤਂ ਨਾਮ ਹੋਤਿ. ਭਾਜਨਂ ਅਤ੍ਥਿ, ਉਦਕਂ ਨਤ੍ਥਿ, ਏਤਮ੍ਪਿ ਅਸਨ੍ਤਂ. ਉਭਯੇ ਪਨ ਅਸਤਿ ਅਸਨ੍ਤਮੇਵ, ਕਟ੍ਠੇਨ ਵਾ ਕੇਨਚਿ ਵਾ ਪੁਞ੍ਛਿਤ੍ਵਾ ਗਨ੍ਤਬ੍ਬਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਜਨ੍ਤਾਘਰਵਤ੍ਤਾਦਿਕਥਾ ਨਿਟ੍ਠਿਤਾ.

ਵਤ੍ਤਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.