੭. ਸਙ੍ਘਭੇਦਕਕ੍ਖਨ੍ਧਕਂ

ਛਸਕ੍ਯਪਬ੍ਬਜ੍ਜਾਕਥਾ

੩੩੦. ਸਙ੍ਘਭੇਦਕਕ੍ਖਨ੍ਧਕੇ ਅਭਿਞ੍ਞਾਤਾ ਅਭਿਞ੍ਞਾਤਾਤਿ ਪਾਕਟਾ ਪਾਕਟਾ. ਸਕ੍ਯਕੁਮਾਰਾ ਨਾਮ ਕਾਲ਼ੁਦਾਯਿਪ੍ਪਭੁਤਯੋ ਦਸ ਦੂਤਾ ਸਦ੍ਧਿਂ ਪਰਿਵਾਰੇਹਿ ਅਞ੍ਞੇ ਚ ਬਹੂ ਜਨਾ. ਅਮ੍ਹਾਕਨ੍ਤਿ ਅਮ੍ਹੇਸੁ; ਅਮ੍ਹਾਕਂ ਕੁਲਤੋਤਿ ਵਾ ਵੁਤ੍ਤਂ ਹੋਤਿ. ਘਰਾਵਾਸਤ੍ਥਂ ਅਨੁਸਾਸਿਸ੍ਸਾਮੀਤਿ ਘਰਾਵਾਸੇ ਯਂ ਕਤ੍ਤਬ੍ਬਂ, ਤਂ ਜਾਨਾਪੇਸ੍ਸਾਮਿ. ਉਦਕਂ ਨਿਨ੍ਨੇਤਬ੍ਬਨ੍ਤਿ ਯਥਾ ਉਦਕਂ ਸਬ੍ਬਟ੍ਠਾਨੇ ਸਮਂ ਹੋਤਿ, ਏਵਂ ਕਾਤਬ੍ਬਂ. ਨਿਦ੍ਧਾਪੇਤਬ੍ਬਨ੍ਤਿ ਤਿਣਾਨਿ ਉਦ੍ਧਰਿਤਬ੍ਬਾਨਿ. ਭੁਸਿਕਾ ਉਦ੍ਧਰਾਪੇਤਬ੍ਬਾਤਿ ਸੁਖੁਮਪਲਾਲਮਿਸ੍ਸਧਞ੍ਞਾ ਪਲਾਲਿਕਾ ਪਲਾਪੇਤਬ੍ਬਾ. ਓਪੁਨਾਪੇਤਬ੍ਬਨ੍ਤਿ ਸੁਖੁਮਪਲਾਲਂ ਅਪਨੇਤਬ੍ਬਂ. ਤ੍ਵਞ੍ਞੇਵ ਘਰਾਵਾਸਤ੍ਥੇਨ ਉਪਜਾਨਾਹੀਤਿ ਤ੍ਵਞ੍ਞੇਵ ਘਰਾਵਾਸਤ੍ਥਂ ਜਾਨਾਹਿ. ਅਹਂ ਤਯਾ ਯਥਾਸੁਖਂ ਪਬ੍ਬਜਾਹੀਤਿ ਏਤ੍ਥ ਅਹਂ ਤਯਾ ਸਦ੍ਧਿਂ ਪਬ੍ਬਜਿਸ੍ਸਾਮੀਤਿ ਸਹਾਯਸਿਨੇਹੇਨ ਸਹਸਾ ਵਤ੍ਤੁਕਾਮੋ ਹੁਤ੍ਵਾ ਪੁਨ ਰਜ੍ਜਸਿਰਿਲੋਭੇਨ ਪਰਿਕਡ੍ਢਿਯਮਾਨਹਦਯੋ ‘‘ਅਹਂ ਤਯਾ’’ਤਿ ਏਤ੍ਤਕਮੇਵ ਵਤ੍ਵਾ ਸੇਸਂ ਵਤ੍ਤੁਂ ਨਾਸਕ੍ਖੀਤਿ ਏਵਮਤ੍ਥੋ ਵੇਦਿਤਬ੍ਬੋ.

੩੩੧. ਨਿਪ੍ਪਾਤਿਤਾਤਿ ਨਿਕ੍ਖਮਿਤਾ. ਮਾਨਸ੍ਸਿਨੋਤਿ ਮਾਨਸ੍ਸਯਿਨੋ; ਮਾਨਨਿਸ੍ਸਿਤਾਤਿ ਵੁਤ੍ਤਂ ਹੋਤਿ.

੩੩੨. ਯਸ੍ਸਨ੍ਤਰਤੋ ਨ ਸਨ੍ਤਿ ਕੋਪਾਤਿ ਤਤਿਯਮਗ੍ਗੇਨ ਸਮੂਹਤਤ੍ਤਾ ਯਸ੍ਸ ਚਿਤ੍ਤੇ ਕੋਪਾ ਨ ਸਨ੍ਤਿ. ਯਸ੍ਮਾ ਪਨ ਭਵੋਤਿ ਸਮ੍ਪਤ੍ਤਿ, ਵਿਭਵੋਤਿ ਵਿਪਤ੍ਤਿ; ਤਥਾ ਭਵੋਤਿ ਵੁਡ੍ਢਿ, ਵਿਭਵੋਤਿ ਹਾਨਿ; ਭਵੋਤਿ ਸਸ੍ਸਤਂ, ਵਿਭਵੋਤਿ ਉਚ੍ਛੇਦੋ; ਭਵੋਤਿ ਪੁਞ੍ਞਂ, ਵਿਭਵੋਤਿ ਪਾਪਂ; ਵਿਭਵੋਤਿ ਚ ਅਭਵੋਤਿ ਚ ਅਤ੍ਥਤੋ ਏਕਮੇਵ, ਤਸ੍ਮਾ ਇਤਿਭਵਾਭਵਤਞ੍ਚ ਵੀਤਿਵਤ੍ਤੋਤਿ ਏਤ੍ਥ ਯਾ ਏਸਾ ਸਮ੍ਪਤ੍ਤਿਵਿਪਤ੍ਤਿਵੁਡ੍ਢਿਹਾਨਿਸਸ੍ਸਤੁਚ੍ਛੇਦਪੁਞ੍ਞਪਾਪਵਸੇਨ ਇਤਿ ਅਨੇਕਪ੍ਪਕਾਰਾ ਭਵਾਭਵਤਾ ਵੁਚ੍ਚਤਿ; ਚਤੂਹਿਪਿ ਮਗ੍ਗੇਹਿ ਯਥਾਸਮ੍ਭਵਂ ਤੇਨ ਤੇਨ ਨਯੇਨ ਤਂ ਇਤਿਭਵਾਭਵਤਞ੍ਚ ਵੀਤਿਵਤ੍ਤੋਤਿ ਏਵਮਤ੍ਥੋ ਦਟ੍ਠਬ੍ਬੋ. ਨਾਨੁਭਵਨ੍ਤੀਤਿ ਨ ਸਮ੍ਪਾਪੁਣਨ੍ਤਿ; ਤਸ੍ਸ ਦਸ੍ਸਨਂ ਦੇਵਾਨਮ੍ਪਿ ਦੁਲ੍ਲਭਨ੍ਤਿ ਅਧਿਪ੍ਪਾਯੋ.

੩੩੩. ਅਹਿਮੇਖਲਿਕਾਤਿ ਅਹਿਂ ਕਟਿਯਂ ਬਨ੍ਧਿਤ੍ਵਾ. ਉਚ੍ਛਙ੍ਗੇਤਿ ਅਙ੍ਕੇ.

੩੩੪. ਸਮ੍ਮਨ੍ਨਤੀਤਿ ਸਮ੍ਮਾਨੇਤਿ. ਯਂ ਤੁਮੋ ਕਰਿਸ੍ਸਤੀਤਿ ਯਂ ਸੋ ਕਰਿਸ੍ਸਤਿ.

ਛਸਕ੍ਯਪਬ੍ਬਜ੍ਜਾਕਥਾ ਨਿਟ੍ਠਿਤਾ.

ਪਕਾਸਨੀਯਕਮ੍ਮਾਦਿਕਥਾ

੩੩੬. ਖੇਲ਼ਾਸਕਸ੍ਸਾਤਿ ਏਤ੍ਥ ਮਿਚ੍ਛਾਜੀਵੇਨ ਉਪ੍ਪਨ੍ਨਪਚ੍ਚਯਾ ਅਰਿਯੇਹਿ ਵਨ੍ਤਬ੍ਬਾ ਖੇਲ਼ਸਦਿਸਾ, ਤਥਾਰੂਪੇ ਪਚ੍ਚਯੇ ਅਯਂ ਅਜ੍ਝੋਹਰਤੀਤਿ ਕਤ੍ਵਾ ਖੇਲ਼ਾਸਕੋਤਿ ਭਗਵਤਾ ਵੁਤ੍ਤੋ.

੩੪੦. ਪਤ੍ਥਦ੍ਧੇਨ ਕਾਯੇਨਾਤਿ ਪੋਤ੍ਥਕਰੂਪਸਦਿਸੇਨ ਨਿਚ੍ਚਲੇਨ ਕਾਯੇਨ.

੩੪੨. ਮਯਂ ਖੋ ਭਣੇ ਰਾਜਞਾਤਕਾ ਨਾਮਾਤਿ ਰਾਜਾ ਅਮ੍ਹੇ ਜਾਨਾਤੀਤਿ ਰਾਜਞਾਤਕਸ੍ਸ ਭਾਵੇਨ ਅਤ੍ਤਾਨਂ ਉਕ੍ਕਂਸਨ੍ਤੋ ਆਹ. ਪਹਟ੍ਠਕਣ੍ਣਵਾਲੋਤਿ ਬਨ੍ਧਨੇ ਨਿਚ੍ਚਲੇ ਕਤ੍ਵਾ.

ਦੁਕ੍ਖਞ੍ਹਿ ਕੁਞ੍ਜਰ ਨਾਗਮਾਸਦੋਤਿ ਭੋ ਕੁਞ੍ਜਰ ਬੁਦ੍ਧਨਾਗਂ ਆਸਾਦਨਂ ਵਧਕਚਿਤ੍ਤੇਨ ਉਪਗਮਨਂ ਨਾਮ ਦੁਕ੍ਖਂ. ਨਾਗਹਤਸ੍ਸਾਤਿ ਬੁਦ੍ਧਨਾਗਂ ਘਾਤਕਸ੍ਸ.

ਪਟਿਕੁਟਿਯੋਵ ਓਸਕ੍ਕੀਤਿ ਤਥਾਗਤਾਭਿਮੁਖੋਯੇਵ ਪਿਟ੍ਠਿਮੇਹਿ ਪਾਦੇਹਿ ਅਵਸਕ੍ਕਿ. ਅਲਕ੍ਖਿਕੋਤਿ ਏਤ੍ਥ ਨ ਲਕ੍ਖੇਤੀਤਿ ਅਲਕ੍ਖਿਕੋ; ਨ ਜਾਨਾਤੀਤਿ ਅਤ੍ਥੋ, ਅਹਂ ਪਾਪਕਮ੍ਮਂ ਕਰੋਮੀਤਿ ਨ ਜਾਨਾਤਿ. ਨ ਲਕ੍ਖਿਤਬ੍ਬੋਤਿ ਵਾ ਅਲਕ੍ਖਿਕੋ; ਨ ਪਸ੍ਸਿਤਬ੍ਬੋਤਿ ਅਤ੍ਥੋ.

੩੪੩. ਤਿਕਭੋਜਨਨ੍ਤਿ ਏਤ੍ਥ ਤੀਹਿ ਜਨੇਹਿ ਭੁਞ੍ਜਿਤਬ੍ਬਭੋਜਨਂ. ਤਂ ਪਞ੍ਞਾਪੇਸ੍ਸਾਮੀਤਿ ਤਂ ਅਨੁਜਾਨਿਸ੍ਸਾਮਿ. ਗਣਭੋਜਨੇ ਪਨ ਯਥਾਧਮ੍ਮੋ ਕਾਰੇਤਬ੍ਬੋਤਿ. ਪਞ੍ਚਵਤ੍ਥੁਯਾਚਨਕਥਾ ਸਙ੍ਘਾਦਿਸੇਸਵਣ੍ਣਨਾਯਂ ਵੁਤ੍ਤਾ. ਕਪ੍ਪਨ੍ਤਿ ਆਯੁਕਪ੍ਪਂ. ਬ੍ਰਹ੍ਮਂ ਪੁਞ੍ਞਨ੍ਤਿ ਸੇਟ੍ਠਂ ਪੁਞ੍ਞਂ. ਕਪ੍ਪਂ ਸਗ੍ਗਮ੍ਹੀਤਿ ਆਯੁਕਪ੍ਪਮੇਵ.

ਪਕਾਸਨੀਯਕਮ੍ਮਾਦਿਕਥਾ ਨਿਟ੍ਠਿਤਾ.

ਸਙ੍ਘਭੇਦਕਕਥਾ

੩੪੪. ਅਥ ਖੋ ਦੇਵਦਤ੍ਤੋ ਸਙ੍ਘਂ ਭਿਨ੍ਦਿਤ੍ਵਾਤਿ ਸੋ ਕਿਰ ਏਵਂ ਸਲਾਕਂ ਗਾਹੇਤ੍ਵਾ ਤਤ੍ਥੇਵ ਆਵੇਣਿਕਂ ਉਪੋਸਥਂ ਕਤ੍ਵਾ ਗਤੋ, ਤੇਨੇਤਂ ਵੁਤ੍ਤਂ.

੩੪੫. ਪਿਟ੍ਠਿ ਮੇ ਆਗਿਲਾਯਤੀਤਿ ਚਿਰਨਿਸਜ੍ਜਾਯ ਵੇਦਨਾਭਿਭੂਤਾ ਬਾਧਤਿ. ਤਮਹਂ ਆਯਮਿਸ੍ਸਾਮੀਤਿ ਤਂ ਅਹਂ ਪਸਾਰੇਸ੍ਸਾਮਿ. ਆਦੇਸਨਾਪਾਟਿਹਾਰਿਯਾਨੁਸਾਸਨੀ ਨਾਮ ‘‘ਏਵਮ੍ਪਿ ਤੇ ਮਨੋ, ਤਥਾਪਿ ਤੇ ਮਨੋ’’ਤਿ ਏਵਂ ਪਰਸ੍ਸ ਚਿਤ੍ਤਂ ਜਾਨਿਤ੍ਵਾ ਤਦਨੁਰੂਪਾ ਧਮ੍ਮਦੇਸਨਾ.

੩੪੬. ਮਮਾਨੁਕੁਬ੍ਬਨ੍ਤਿ ਮਮਾਨੁਕਿਰਿਯਂ ਕੁਰੁਮਾਨੋ. ਕਪਣੋਤਿ ਦੁਕ੍ਖਿਤੋ. ਮਹਾਵਰਾਹਸ੍ਸਾਤਿ ਮਹਾਨਾਗਸ੍ਸ. ਮਹਿਂ ਵਿਕੁਬ੍ਬਤੋਤਿ ਪਥਵਿਂ ਪਦਾਲੇਨ੍ਤਸ੍ਸ. ਭਿਸਂ ਘਸਮਾਨਸ੍ਸਾਤਿ ਭਿਸਂ ਖਾਦਨ੍ਤਸ੍ਸ. ਨਦੀਸੁ ਜਗ੍ਗਤੋਤਿ ਏਤ੍ਥ ਸੋ ਕਿਰ ਹਤ੍ਥਿਨਾਗੋ ਸਾਯਨ੍ਹਸਮਯਂ ਤਂ ਨਦਿਨਾਮਕਂ ਪੋਕ੍ਖਰਣਿਂ ਓਗਾਹੇਤ੍ਵਾ ਕਿਲਨ੍ਤੋ ਸਬ੍ਬਰਤ੍ਤਿਂ ਵੀਤਿਨਾਮੇਸਿ, ਜਾਲਿਕਂ ਕਰੋਤਿ, ਤੇਨ ਵੁਤ੍ਤਂ ‘‘ਨਦੀਸੁ ਜਗ੍ਗਤੋ’’ਤਿ.

੩੪੭. ਸੁਤਾਤਿ ਸੋਤਾ. ਅਸਨ੍ਦਿਦ੍ਧੋ ਚ ਅਕ੍ਖਾਤੀਤਿ ਨਿਸ੍ਸਨ੍ਦੇਹੋ ਹੁਤ੍ਵਾ ਅਕ੍ਖਾਤਿ ਅਨੁਸਨ੍ਧਿਵਸੇਨ ਯੋਜੇਤ੍ਵਾ ਯੋਜੇਤ੍ਵਾ.

੩੫੦. ਅਪਾਯੇ ਨਿਬ੍ਬਤ੍ਤਿਸ੍ਸਤੀਤਿ ਆਪਾਯਿਕੋ. ਏਵਂ ਨੇਰਯਿਕੋ. ਕਪ੍ਪਂ ਠਸ੍ਸਤੀਤਿ ਕਪ੍ਪਟ੍ਠੋ. ਇਦਾਨਿ ਬੁਦ੍ਧਸਹਸ੍ਸੇਨਾਪਿ ਤਿਕਿਚ੍ਛਿਤੁਂ ਨ ਸਕ੍ਕਾਤਿ ਅਤੇਕਿਚ੍ਛੋ.

ਮਾ ਜਾਤੁ ਕੋਚਿ ਲੋਕਸ੍ਮਿਨ੍ਤਿ ਮਾ ਕਦਾਚਿਪਿ ਕੋਚਿ ਸਤ੍ਤੋ ਲੋਕਸ੍ਮਿਂ. ਉਦਪਜ੍ਜਥਾਤਿ ਉਪਪਜ੍ਜਥ. ਜਲਂਵ ਯਸਸਾ ਅਟ੍ਠਾਤਿ ਯਸਸਾ ਜਲਨ੍ਤੋ ਵਿਯ ਠਿਤੋ. ਦੇਵਦਤ੍ਤੋਤਿ ਮੇ ਸੁਤਨ੍ਤਿ ‘‘ਈਦਿਸੋ ਦੇਵਦਤ੍ਤੋ’’ਤਿ ਭਗਵਤਾ ਸੁਤਮ੍ਪਿ ਅਤ੍ਥਿ, ਤਦੇਵ ਗਹੇਤ੍ਵਾ ਇਦਂ ਵੁਤ੍ਤਂ. ਸੋ ਪਮਾਦਮਨੁਚਿਣ੍ਣੋਤਿ ਏਤ੍ਥ ਪਮਾਦਂ ਅਨੁਚਿਨਾਤੀਤਿ ਅਨੁਚਿਣ੍ਣੋ, ਪਮਾਦੋ ਅਪ੍ਪਹੀਨੋਤਿ ਅਤ੍ਥੋ. ਆਸਜ੍ਜ ਨਨ੍ਤਿ ਪਾਪਕੇਨ ਚਿਤ੍ਤੇਨ ਪਤ੍ਵਾ, ਵਿਸੋਸੇਤ੍ਵਾਤਿ ਵਾ ਅਤ੍ਥੋ. ਅਵੀਚਿਨਿਰਯਂ ਪਤ੍ਤੋਤਿ ਇਦਂ ਪਨ ਆਸੀਸਾਯਂ ਅਤੀਤਵਚਨਂ. ਭੇਸ੍ਮਾਤਿ ਭਯਾਨਕੋ.

ਸਙ੍ਘਭੇਦਕਕਥਾ ਨਿਟ੍ਠਿਤਾ.

ਉਪਾਲਿਪਞ੍ਹਾਕਥਾ

੩੫੧. ਏਕਤੋ ਉਪਾਲਿ ਏਕੋਤਿ ਧਮ੍ਮਵਾਦਿਪਕ੍ਖੇ ਏਕੋ. ਏਕਤੋ ਦ੍ਵੇਤਿ ਅਧਮ੍ਮਵਾਦਿਪਕ੍ਖੇ ਦ੍ਵੇ. ਚਤੁਤ੍ਥੋ ਅਨੁਸ੍ਸਾਵੇਤੀਤਿ ਸਙ੍ਘਂ ਭਿਨ੍ਦਿਸ੍ਸਾਮੀਤਿ ਅਧਮ੍ਮਵਾਦਿਚਤੁਤ੍ਥੋ ਹੁਤ੍ਵਾ ਅਨੁਸ੍ਸਾਵੇਤਿ; ਅਨੁਨਯਨ੍ਤੋ ਸਾਵੇਤਿ ‘‘ਨ ਤੁਮ੍ਹਾਕਂਯੇਵ ਨਰਕਭਯਂ ਅਤ੍ਥਿ, ਅਮ੍ਹਾਕਮ੍ਪਿ ਅਤ੍ਥਿ, ਨ ਅਮ੍ਹਾਕਂ ਅਵੀਚਿਮਗ੍ਗੋ ਪਿਹਿਤੋ, ਨ ਮਯਂ ਅਕੁਸਲਾ ਨ ਭਾਯਾਮ. ਯਦਿ ਹਿ ਅਯਂ ਅਧਮ੍ਮੋ ਅਵਿਨਯੋ ਅਸਤ੍ਥੁਸਾਸਨਂ ਵਾ ਭਵੇਯ੍ਯ, ਨ ਮਯਂ ਗਣ੍ਹੇਯ੍ਯਾਮਾ’’ਤਿਆਦਿਨਾ ਨਯੇਨ ‘‘ਅਧਮ੍ਮਂ ਧਮ੍ਮੋ’’ਤਿ ਏਵਂ ਅਟ੍ਠਾਰਸ ਭੇਦਕਰਵਤ੍ਥੂਨਿ ਬੋਧੇਤੀਤਿ ਅਤ੍ਥੋ. ਸਲਾਕਂ ਗਾਹੇਤੀਤਿ ਏਵਂ ਅਨੁਸ੍ਸਾਵੇਤ੍ਵਾ ਪਨ ‘‘ਇਦਂ ਗਣ੍ਹਥ, ਇਦਂ ਰੋਚੇਥਾ’’ਤਿ ਵਦਨ੍ਤੋ ਸਲਾਕਂ ਗਾਹੇਤਿ.

ਏਕਤੋ ਉਪਾਲਿ ਦ੍ਵੇ ਹੋਨ੍ਤੀਤਿਆਦੀਸੁਪਿ ਏਸੇਵ ਨਯੋ. ਏਵਂ ਖੋ ਉਪਾਲਿ ਸਙ੍ਘਰਾਜਿ ਚੇਵ ਹੋਤਿ ਸਙ੍ਘਭੇਦੋ ਚਾਤਿ ਏਵਂ ਹੋਤਿ; ਨ ਪਨ ਏਤ੍ਤਾਵਤਾ ਸਙ੍ਘੋ ਭਿਨ੍ਨੋ ਹੋਤਿ.

ਭਿਕ੍ਖੁ ਖੋ ਉਪਾਲਿ ਪਕਤਤ੍ਤੋ ਸਮਾਨਸਂਵਾਸਕੋ ਸਮਾਨਸੀਮਾਯਂ ਠਿਤੋ ਸਙ੍ਘਂ ਭਿਨ੍ਦਤੀਤਿ ਏਤ੍ਥ ਸਿਯਾ ਏਵਂ ‘‘ਦੇਵਦਤ੍ਤੋ ਕਥਂ ਪਕਤਤ੍ਤੋ’’ਤਿ. ਕਥਂ ਤਾਵ ਨ ਪਕਤਤ੍ਤੋ, ਰਞ੍ਞੋ ਘਾਤਾਪਿਤਤ੍ਤਾ ਰੁਹਿਰੁਪ੍ਪਾਦਸ੍ਸ ਚ ਕਤਤ੍ਤਾਤਿ? ਤਤ੍ਥ ਵਦਾਮ – ਆਣਤ੍ਤਿਯਾ ਤਾਵ ਵਿਰਦ੍ਧਤ੍ਤਾ ਰਞ੍ਞੋ ਘਾਤਾਪਨਂ ਨਤ੍ਥਿ. ‘‘ਤੇਨ ਹਿ ਤ੍ਵਂ, ਕੁਮਾਰ, ਪਿਤਰਂ ਹਨ੍ਤ੍ਵਾ ਰਾਜਾ ਹੋਹਿ, ਅਹਂ ਭਗਵਨ੍ਤਂ ਹਨ੍ਤ੍ਵਾ ਬੁਦ੍ਧੋ ਭਵਿਸ੍ਸਾਮੀ’’ਤਿ ਏਵਞ੍ਹਿ ਤਸ੍ਸ ਆਣਤ੍ਤਿ. ਕੁਮਾਰੋ ਪਨ ਰਾਜਾ ਹੁਤ੍ਵਾ ਪਚ੍ਛਾ ਪਿਤਰਂ ਮਾਰੇਸਿ; ਏਵਂ ਤਾਵ ਆਣਤ੍ਤਿਯਾ ਵਿਰਦ੍ਧਤ੍ਤਾ ਰਞ੍ਞੋ ਘਾਤਾਪਨਂ ਨਤ੍ਥਿ. ਰੁਹਿਰੁਪ੍ਪਾਦੇ ਪਨ ਕਤਮਤ੍ਤੇਯੇਵ ਰੁਹਿਰੁਪ੍ਪਾਦਪਚ੍ਚਯਾ ਭਗਵਤਾ ਅਭਬ੍ਬਤਾ ਨ ਵੁਤ੍ਤਾ, ਨ ਚ ਸਕ੍ਕਾ ਭਗਵਤੋ ਵਚਨਂ ਵਿਨਾਯੇਵ ਤਸ੍ਸ ਅਭਬ੍ਬਤਾ ਆਰੋਪੇਤੁਂ.

‘‘ਰੁਹਿਰੁਪ੍ਪਾਦਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋ’’ਤਿ –

ਇਦਂ ਪਨ ਭਗਵਤਾ ਸਙ੍ਘਭੇਦਤੋ ਪਚ੍ਛਾ ਵੁਤ੍ਤਂ, ਤਸ੍ਮਾ ਪਕਤਤ੍ਤੇਨੇਵ ਤੇਨ ਸਙ੍ਘੋ ਭਿਨ੍ਨੋਤਿ.

ਅਧਮ੍ਮਂ ਧਮ੍ਮੋਤਿ ਦੀਪੇਨ੍ਤੀਤਿਆਦੀਸੁ ਅਟ੍ਠਾਰਸਸੁ ਭੇਦਕਰਵਤ੍ਥੂਸੁ ਸੁਤ੍ਤਨ੍ਤਪਰਿਯਾਯੇਨ ਤਾਵ ਦਸ ਕੁਸਲਕਮ੍ਮਪਥਾ ਧਮ੍ਮੋ, ਦਸ ਅਕੁਸਲਕਮ੍ਮਪਥਾ ਅਧਮ੍ਮੋ. ਤਥਾ ਚਤ੍ਤਾਰੋ ਸਤਿਪਟ੍ਠਾਨਾ, ਚਤ੍ਤਾਰੋ ਸਮ੍ਮਪ੍ਪਧਾਨਾ, ਚਤ੍ਤਾਰੋ ਇਦ੍ਧਿਪਾਦਾ, ਪਞ੍ਚਿਨ੍ਦ੍ਰਿਯਾਨਿ, ਪਞ੍ਚ ਬਲਾਨਿ, ਸਤ੍ਤ ਬੋਜ੍ਝਙ੍ਗਾ, ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋਤਿ ਸਤ੍ਤਤਿਂਸ ਬੋਧਿਪਕ੍ਖਿਯਧਮ੍ਮਾ ਧਮ੍ਮੋ ਨਾਮ; ਤਯੋ ਸਤਿਪਟ੍ਠਾਨਾ, ਤਯੋ ਸਮ੍ਮਪ੍ਪਧਾਨਾ, ਤਯੋ ਇਦ੍ਧਿਪਾਦਾ, ਛ ਇਨ੍ਦ੍ਰਿਯਾਨਿ, ਛ ਬਲਾਨਿ, ਅਟ੍ਠ ਬੋਜ੍ਝਙ੍ਗਾ, ਨਵਙ੍ਗਿਕੋ ਮਗ੍ਗੋਤਿ ਚ ਚਤ੍ਤਾਰੋ ਉਪਾਦਾਨਾ, ਪਞ੍ਚ ਨੀਵਰਣਾ, ਸਤ੍ਤ ਅਨੁਸਯਾ, ਅਟ੍ਠ ਮਿਚ੍ਛਤ੍ਤਾਤਿ ਚ ਅਯਂ ਅਧਮ੍ਮੋ.

ਤਤ੍ਥ ਯਂਕਿਞ੍ਚਿ ਏਕਂ ਅਧਮ੍ਮਕੋਟ੍ਠਾਸਂ ਗਹੇਤ੍ਵਾ ‘‘ਇਮਂ ਅਧਮ੍ਮਂ ਧਮ੍ਮੋਤਿ ਕਰਿਸ੍ਸਾਮ; ਏਵਂ ਅਮ੍ਹਾਕਂ ਆਚਰਿਯਕੁਲਂ ਨਿਸ੍ਸਾਯ ਨਿਯ੍ਯਾਨਿਕਂ ਭਵਿਸ੍ਸਤਿ, ਮਯਞ੍ਚ ਲੋਕੇ ਪਾਕਟਾ ਭਵਿਸ੍ਸਾਮਾ’’ਤਿ ਤਂ ਅਧਮ੍ਮਂ ‘‘ਧਮ੍ਮੋ ਅਯ’’ਨ੍ਤਿ ਕਥਯਨ੍ਤਾ ਅਧਮ੍ਮਂ ਧਮ੍ਮੋਤਿ ਦੀਪੇਨ੍ਤਿ ਨਾਮ. ਤਥੇਵ ਧਮ੍ਮਕੋਟ੍ਠਾਸੇਸੁ ਚ ਏਕਂ ਗਹੇਤ੍ਵਾ ਅਯਂ ਅਧਮ੍ਮੋਤਿ ਕਥੇਨ੍ਤਾ ਧਮ੍ਮਂ ਅਧਮ੍ਮੋਤਿ ਦੀਪੇਨ੍ਤਿ ਨਾਮ. ਵਿਨਯਪਰਿਯਾਯੇਨ ਪਨ ਭੂਤੇਨ ਵਤ੍ਥੁਨਾ ਚੋਦੇਤ੍ਵਾ ਸਾਰੇਤ੍ਵਾ ਯਥਾਪਟਿਞ੍ਞਾਯ ਕਾਤਬ੍ਬਂ ਕਮ੍ਮਂ ਧਮ੍ਮੋ ਨਾਮ, ਅਭੂਤੇਨ ਵਤ੍ਥੁਨਾ ਅਚੋਦੇਤ੍ਵਾ ਅਸਾਰੇਤ੍ਵਾ ਅਪਟਿਞ੍ਞਾਯ ਕਾਤਬ੍ਬਂ ਕਮ੍ਮਂ ਅਧਮ੍ਮੋ ਨਾਮ.

ਸੁਤ੍ਤਨ੍ਤਪਰਿਯਾਯੇਨ ਰਾਗਵਿਨਯੋ ਦੋਸਵਿਨਯੋ ਮੋਹਵਿਨਯੋ ਸਂਵਰੋ ਪਹਾਨਂ ਪਟਿਸਙ੍ਖਾਤਿ ਅਯਂ ਵਿਨਯੋ ਨਾਮ, ਰਾਗਾਦੀਨਂ ਅਵਿਨਯੋ ਅਸਂਵਰੋ ਅਪ੍ਪਹਾਨਂ ਅਪ੍ਪਟਿਸਙ੍ਖਾਤਿ ਅਯਂ ਅਵਿਨਯੋ ਨਾਮ. ਵਿਨਯਪਰਿਯਾਯੇਨ ਵਤ੍ਥੁਸਮ੍ਪਤ੍ਤਿ ਞਤ੍ਤਿਸਮ੍ਪਤ੍ਤਿ ਅਨੁਸ੍ਸਾਵਨਸਮ੍ਪਤ੍ਤਿ ਸੀਮਾਸਮ੍ਪਤ੍ਤਿ ਪਰਿਸਾਸਮ੍ਪਤ੍ਤੀਤਿ ਅਯਂ ਵਿਨਯੋ ਨਾਮ, ਵਤ੍ਥੁਵਿਪਤ੍ਤਿ…ਪੇ… ਪਰਿਸਾਵਿਪਤ੍ਤੀਤਿ ਅਯਂ ਅਵਿਨਯੋ ਨਾਮ.

ਸੁਤ੍ਤਨ੍ਤਪਰਿਯਾਯੇਨ ਚਤ੍ਤਾਰੋ ਸਤਿਪਟ੍ਠਾਨਾ… ਅਟ੍ਠਙ੍ਗਿਕੋ ਮਗ੍ਗੋਤਿ ਇਦਂ ਭਾਸਿਤਂ ਲਪਿਤਂ ਤਥਾਗਤੇਨ; ਤਯੋ ਸਤਿਪਟ੍ਠਾਨਾ, ਤਯੋ ਸਮ੍ਮਪ੍ਪਧਾਨਾ, ਤਯੋ ਇਦ੍ਧਿਪਾਦਾ, ਛ ਇਨ੍ਦ੍ਰਿਯਾਨਿ, ਛ ਬਲਾਨਿ, ਅਟ੍ਠ ਬੋਜ੍ਝਙ੍ਗਾ, ਨਵਙ੍ਗਿਕੋ ਮਗ੍ਗੋਤਿ ਇਦਂ ਅਭਾਸਿਤਂ ਅਲਪਿਤਂ ਤਥਾਗਤੇਨ. ਵਿਨਯਪਰਿਯਾਯੇਨ ਚਤ੍ਤਾਰੋ ਪਾਰਾਜਿਕਾ, ਤੇਰਸ ਸਙ੍ਘਾਦਿਸੇਸਾ, ਦ੍ਵੇ ਅਨਿਯਤਾ, ਤਿਂਸ ਨਿਸ੍ਸਗ੍ਗਿਯਾ ਪਾਚਿਤ੍ਤਿਯਾਤਿ ਇਦਂ ਭਾਸਿਤਂ ਲਪਿਤਂ ਤਥਾਗਤੇਨ; ਤਯੋ ਪਾਰਾਜਿਕਾ, ਚੁਦ੍ਦਸ ਸਙ੍ਘਾਦਿਸੇਸਾ, ਤਯੋ ਅਨਿਯਤਾ, ਏਕਤ੍ਤਿਂਸ ਨਿਸ੍ਸਗ੍ਗਿਯਾ ਪਾਚਿਤ੍ਤਿਯਾਤਿ ਇਦਂ ਅਭਾਸਿਤਂ ਅਲਪਿਤਂ ਤਥਾਗਤੇਨ.

ਸੁਤ੍ਤਨ੍ਤਪਰਿਯਾਯੇਨ ਦੇਵਸਿਕਂ ਫਲਸਮਾਪਤ੍ਤਿਸਮਾਪਜ੍ਜਨਂ, ਮਹਾਕਰੁਣਾਸਮਾਪਤ੍ਤਿਸਮਾਪਜ੍ਜਨਂ, ਬੁਦ੍ਧਚਕ੍ਖੁਨਾ ਲੋਕਵੋਲੋਕਨਂ, ਅਟ੍ਠੁਪ੍ਪਤ੍ਤਿਵਸੇਨ ਸੁਤ੍ਤਨ੍ਤਦੇਸਨਾ, ਜਾਤਕਕਥਾਤਿ ਇਦਂ ਆਚਿਣ੍ਣਂ; ਨ ਦੇਵਸਿਕਂ ਫਲਸਮਾਪਤ੍ਤਿਸਮਾਪਜ੍ਜਨਂ…ਪੇ… ਨ ਜਾਤਕਕਥਾਤਿ ਇਦਂ ਅਨਾਚਿਣ੍ਣਂ. ਵਿਨਯਪਰਿਯਾਯੇਨ ਨਿਮਨ੍ਤਿਤਸ੍ਸ ਵਸ੍ਸਾਵਾਸਂ ਵਸਿਤ੍ਵਾ ਅਪਲੋਕੇਤ੍ਵਾ ਚਾਰਿਯਪਕ੍ਕਮਨਂ, ਪਵਾਰੇਤ੍ਵਾ ਚਾਰਿਯਪਕ੍ਕਮਨਂ, ਆਗਨ੍ਤੁਕੇਹਿ ਸਦ੍ਧਿਂ ਪਠਮਂ ਪਟਿਸਨ੍ਥਾਰਕਰਣਨ੍ਤਿ ਇਦਂ ਆਚਿਣ੍ਣਂ; ਤਸ੍ਸੇਵ ਆਚਿਣ੍ਣਸ੍ਸ ਅਕਰਣਂ ਅਨਾਚਿਣ੍ਣਂ ਨਾਮ.

ਸੁਤ੍ਤਨ੍ਤਪਰਿਯਾਯੇਨ ਚਤ੍ਤਾਰੋ ਸਤਿਪਟ੍ਠਾਨਾ…ਪੇ… ਅਟ੍ਠਙ੍ਗਿਕੋ ਮਗ੍ਗੋਤਿ ਇਦਂ ਪਞ੍ਞਤ੍ਤਂ ਨਾਮ; ਤਯੋ ਸਤਿਪਟ੍ਠਾਨਾ…ਪੇ… ਨਵਙ੍ਗਿਕੋ ਮਗ੍ਗੋਤਿ ਇਦਂ ਅਪਞ੍ਞਤ੍ਤਂ ਨਾਮ. ਵਿਨਯਪਰਿਯਾਯੇਨ ਚਤ੍ਤਾਰੋ ਪਾਰਾਜਿਕਾ…ਪੇ… ਤਿਂਸ ਨਿਸ੍ਸਗ੍ਗਿਯਾ ਪਾਚਿਤ੍ਤਿਯਾਤਿ ਇਦਂ ਪਞ੍ਞਤ੍ਤਂ ਨਾਮ; ਤਯੋ ਪਾਰਾਜਿਕਾ…ਪੇ… ਏਕਤ੍ਤਿਂਸ ਨਿਸ੍ਸਗ੍ਗਿਯਾ ਪਾਚਿਤ੍ਤਿਯਾਤਿ ਇਦਂ ਅਪਞ੍ਞਤ੍ਤਂ ਨਾਮ.

‘‘ਅਨਾਪਤ੍ਤਿ ਅਜਾਨਨ੍ਤਸ੍ਸ, ਅਥੇਯ੍ਯਚਿਤ੍ਤਸ੍ਸ, ਨ ਮਰਣਾਧਿਪ੍ਪਾਯਸ੍ਸ, ਅਨੁਲ੍ਲਪਨਾਧਿਪ੍ਪਾਯਸ੍ਸ, ਨ ਮੋਚਨਾਧਿਪ੍ਪਾਯਸ੍ਸਾ’’ਤਿ ਤਤ੍ਥ ਤਤ੍ਥ ਵੁਤ੍ਤਾ ਅਨਾਪਤ੍ਤਿ ਅਨਾਪਤ੍ਤਿ ਨਾਮ. ‘‘ਜਾਨਨ੍ਤਸ੍ਸ, ਥੇਯ੍ਯਚਿਤ੍ਤਸ੍ਸਾ’’ਤਿਆਦਿਨਾ ਨਯੇਨ ਵੁਤ੍ਤਾ ਆਪਤ੍ਤਿ ਆਪਤ੍ਤਿ ਨਾਮ. ਪਞ੍ਚਾਪਤ੍ਤਿਕ੍ਖਨ੍ਧਾ ਲਹੁਕਾਪਤ੍ਤਿ ਨਾਮ, ਦ੍ਵੇ ਆਪਤ੍ਤਿਕ੍ਖਨ੍ਧਾ ਗਰੁਕਾਪਤ੍ਤਿ ਨਾਮ. ਛ ਆਪਤ੍ਤਿਕ੍ਖਨ੍ਧਾ ਸਾਵਸੇਸਾਪਤ੍ਤਿ ਨਾਮ, ਏਕੋ ਪਾਰਾਜਿਕਾਪਤ੍ਤਿਕ੍ਖਨ੍ਧੋ ਅਨਵਸੇਸਾਪਤ੍ਤਿ ਨਾਮ. ਦ੍ਵੇ ਆਪਤ੍ਤਿਕ੍ਖਨ੍ਧਾ ਦੁਟ੍ਠੁਲ੍ਲਾਪਤ੍ਤਿ ਨਾਮ, ਪਞ੍ਚਾਪਤ੍ਤਿਕ੍ਖਨ੍ਧਾ ਅਦੁਟ੍ਠੁਲ੍ਲਾਪਤ੍ਤਿ ਨਾਮ.

ਪੁਰਿਮਨਯੇਨੇਵ ਪਨੇਤ੍ਥ ਵੁਤ੍ਤਪ੍ਪਕਾਰਂ ਧਮ੍ਮਂ ‘‘ਅਧਮ੍ਮੋ ਅਯ’’ਨ੍ਤਿ ਕਥਯਨ੍ਤਾ ‘‘ਧਮ੍ਮਂ ਅਧਮ੍ਮੋ’’ਤਿ ਦੀਪੇਨ੍ਤਿ ਨਾਮ. ਅਵਿਨਯਂ ‘‘ਵਿਨਯੋ ਅਯ’’ਨ੍ਤਿ…ਪੇ… ਅਦੁਟ੍ਠੁਲ੍ਲਾਪਤ੍ਤਿਂ ‘‘ਦੁਟ੍ਠੁਲ੍ਲਾਪਤ੍ਤਿ ਅਯ’’ਨ੍ਤਿ ਕਥਯਨ੍ਤਾ ‘‘ਅਦੁਟ੍ਠੁਲ੍ਲਾਪਤ੍ਤਿਂ ਦੁਟ੍ਠੁਲ੍ਲਾਪਤ੍ਤੀ’’ਤਿ ਦੀਪੇਨ੍ਤਿ ਨਾਮ. ਏਵਂ ‘‘ਅਧਮ੍ਮਂ ਧਮ੍ਮੋ’’ਤਿ ਵਾ…ਪੇ… ‘‘ਅਦੁਟ੍ਠੁਲ੍ਲਾਪਤ੍ਤਿਂ ਦੁਟ੍ਠੁਲ੍ਲਾਪਤ੍ਤੀ’’ਤਿ ਵਾ ਦੀਪੇਤ੍ਵਾ ਪਕ੍ਖਂ ਲਭਿਤ੍ਵਾ ਚਤੁਨ੍ਨਂ ਸਙ੍ਘਕਮ੍ਮਾਨਂ ਅਞ੍ਞਤਰਂ ਸਙ੍ਘਕਮ੍ਮਂ ਏਕਸੀਮਾਯਂ ਵਿਸੁਂ ਕਰੋਨ੍ਤੇਹਿ ਸਙ੍ਘੋ ਭਿਨ੍ਨੋ ਨਾਮ ਹੋਤਿ. ਤੇਨ ਵੁਤ੍ਤਂ – ‘‘ਤੇ ਇਮੇਹਿ ਅਟ੍ਠਾਰਸਹਿ ਵਤ੍ਥੂਹਿ ਅਪਕਸ੍ਸਨ੍ਤੀ’’ਤਿਆਦਿ.

ਤਤ੍ਥ ਅਪਕਸ੍ਸਨ੍ਤੀਤਿ ਪਰਿਸਂ ਆਕਡ੍ਢਨ੍ਤਿ, ਵਿਜਟੇਨ੍ਤਿ, ਏਕਮਨ੍ਤਂ ਉਸ੍ਸਾਰੇਨ੍ਤਿ ਚ. ਅਵਪਕਾਸਨ੍ਤੀਤਿ ਅਤਿ ਵਿਯ ਪਕਾਸੇਨ੍ਤਿ ਯਥਾ ਵਿਸਂਸਟ੍ਠਾਵ ਹੋਨ੍ਤਿ, ਏਵਂ ਕਰੋਨ੍ਤਿ. ਆਵੇਨਿਨ੍ਤਿ ਵਿਸੁਂ. ਏਤ੍ਤਾਵਤਾ ਖੋ ਉਪਾਲਿ ਸਙ੍ਘੋ ਭਿਨ੍ਨੋ ਹੋਤੀਤਿ ਏਵਂ ਅਟ੍ਠਾਰਸਸੁ ਭੇਦਕਰਵਤ੍ਥੂਸੁ ਯਂਕਿਞ੍ਚਿ ਏਕਮ੍ਪਿ ਵਤ੍ਥੁਂ ਦੀਪੇਤ੍ਵਾ ਤੇਨ ਤੇਨ ਕਾਰਣੇਨ ‘‘ਇਮਂ ਗਣ੍ਹਥ, ਇਮਂ ਰੋਚੇਥਾ’’ਤਿ ਸਞ੍ਞਾਪੇਤ੍ਵਾ ਸਲਾਕਂ ਗਾਹਾਪੇਤ੍ਵਾ ਵਿਸੁਂ ਸਙ੍ਘਕਮ੍ਮੇ ਕਤੇ ਸਙ੍ਘੋ ਭਿਨ੍ਨੋ ਹੋਤਿ. ਪਰਿਵਾਰੇ ਪਨ ‘‘ਪਞ੍ਚਹਿ ਉਪਾਲਿ ਆਕਾਰੇਹਿ ਸਙ੍ਘੋ ਭਿਜ੍ਜਤੀ’’ਤਿਆਦਿ ਵੁਤ੍ਤਂ, ਤਸ੍ਸ ਇਮਿਨਾ ਇਧ ਵੁਤ੍ਤੇਨ ਸਙ੍ਘਭੇਦਲਕ੍ਖਣੇਨ ਅਤ੍ਥਤੋ ਨਾਨਾਕਰਣਂ ਨਤ੍ਥਿ. ਤਂ ਪਨਸ੍ਸ ਨਾਨਾਕਰਣਾਭਾਵਂ ਤਤ੍ਥੇਵ ਪਕਾਸਯਿਸ੍ਸਾਮ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਉਪਾਲਿਪਞ੍ਹਾਕਥਾ ਨਿਟ੍ਠਿਤਾ.

ਸਙ੍ਘਭੇਦਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.