੬. ਸੇਨਾਸਨਕ੍ਖਨ੍ਧਕਂ
ਵਿਹਾਰਾਨੁਜਾਨਨਕਥਾ
੨੯੪. ਸੇਨਾਸਨਕ੍ਖਨ੍ਧਕੇ – ਅਪਞ੍ਞਤ੍ਤਂ ਹੋਤੀਤਿ ਅਨਨੁਞ੍ਞਾਤਂ ਹੋਤਿ. ਵਿਹਾਰੋ ਨਾਮ ਅਡ੍ਢਯੋਗਾਦਿਮੁਤ੍ਤਕੋ ਅਵਸੇਸਾਵਾਸੋ. ਅਡ੍ਢਯੋਗੋਤਿ ਸੁਪਣ੍ਣਵਙ੍ਕਗੇਹਂ. ਪਾਸਾਦੋਤਿ ਦੀਘਪਾਸਾਦੋ. ਹਮ੍ਮਿਯਨ੍ਤਿ ਉਪਰਿਆਕਾਸਤਲੇ ਪਤਿਟ੍ਠਿਤਕੂਟਾਗਾਰੋ ਪਾਸਾਦੋਯੇਵ. ਗੁਹਾਤਿ ਇਟ੍ਠਕਾਗੁਹਾ ਸਿਲਾਗੁਹਾ ਦਾਰੁਗੁਹਾ ਪਂਸੁਗੁਹਾ. ਆਗਤਾਨਾਗਤਸ੍ਸ ਚਾਤੁਦ੍ਦਿਸਸ੍ਸ ਸਙ੍ਘਸ੍ਸਾਤਿ ਆਗਤਸ੍ਸ ਚ ਅਨਾਗਤਸ੍ਸ ਚ ਚਤੂਸੁ ਦਿਸਾਸੁ ਅਪ੍ਪਟਿਹਤਚਾਰਸ੍ਸ ਚਾਤੁਦ੍ਦਿਸਸ੍ਸ ਸਙ੍ਘਸ੍ਸ.
੨੯੫. ਅਨੁਮੋਦਨਗਾਥਾਸੁ – ਸੀਤਂ ਉਣ੍ਹਨ੍ਤਿ ਉਤੁਵਿਸਭਾਗਵਸੇਨ ਵੁਤ੍ਤਂ. ਸਿਸਿਰੇ ਚਾਪਿ ਵੁਟ੍ਠਿਯੋਤਿ ਏਤ੍ਥ ਸਿਸਿਰੋਤਿ ਸਮ੍ਫੁਸਿਤਕਵਾਤੋ ਵੁਚ੍ਚਤਿ. ਵੁਟ੍ਠਿਯੋਤਿ ਉਜੁਕਮੇਘਵੁਟ੍ਠਿਯੋ ਏਵ. ਏਤਾਨਿ ਸਬ੍ਬਾਨਿ ਪਟਿਹਨ੍ਤੀਤਿ ਇਮਿਨਾਵ ਪਦੇਨ ਯੋਜੇਤਬ੍ਬਾਨਿ.
ਪਟਿਹਞ੍ਞਤੀਤਿ ਵਿਹਾਰੇਨ ਪਟਿਹਞ੍ਞਤਿ. ਲੇਣਤ੍ਥਨ੍ਤਿ ਨਿਲੀਯਨਤ੍ਥਂ. ਸੁਖਤ੍ਥਨ੍ਤਿ ਸੀਤਾਦਿਪਰਿਸ੍ਸਯਾਭਾਵੇਨ ਸੁਖਵਿਹਾਰਤ੍ਥਂ. ਝਾਯਿਤੁਞ੍ਚ ਵਿਪਸ੍ਸਿਤੁਨ੍ਤਿ ਇਦਮ੍ਪਿ ਪਦਦ੍ਵਯਂ ‘‘ਸੁਖਤ੍ਥਞ੍ਚਾ’’ਤਿ ਇਮਿਨਾਵ ਪਦੇਨ ਯੋਜੇਤਬ੍ਬਂ. ਇਦਞ੍ਹਿ ਵੁਤ੍ਤਂ ਹੋਤਿ – ਸੁਖਤ੍ਥਞ੍ਚ ਵਿਹਾਰਦਾਨਂ, ਕਤਮਂ ਸੁਖਤ੍ਥਂ? ਝਾਯਿਤੁਂ ਵਿਪਸ੍ਸਿਤੁਞ੍ਚ ਯਂ ਸੁਖਂ, ਤਦਤ੍ਥਂ. ਅਥ ਵਾ ਪਰਪਦੇਨਪਿ ਯੋਜੇਤਬ੍ਬਂ – ਝਾਯਿਤੁਞ੍ਚ ਵਿਪਸ੍ਸਿਤੁਞ੍ਚ ਵਿਹਾਰਦਾਨਂ; ਇਧ ਝਾਯਿਸ੍ਸਨ੍ਤਿ ਵਿਪਸ੍ਸਿਸ੍ਸਨ੍ਤੀਤਿ ਦਦਤੋ ਵਿਹਾਰਦਾਨਂ ਸਙ੍ਘਸ੍ਸ ਅਗ੍ਗਂ ਬੁਦ੍ਧੇਨ ਵਣ੍ਣਿਤਂ. ਵੁਤ੍ਤਞ੍ਹੇਤਂ – ‘‘ਸੋ ਚ ਸਬ੍ਬਦਦੋ ਹੋਤਿ, ਯੋ ਦਦਾਤਿ ਉਪਸ੍ਸਯ’’ਨ੍ਤਿ (ਸਂ. ਨਿ. ੧.੪੨).
ਯਸ੍ਮਾ ਚ ਅਗ੍ਗਂ ਵਣ੍ਣਿਤਂ, ‘‘ਤਸ੍ਮਾ ਹਿ ਪਣ੍ਡਿਤੋ ਪੋਸੋ’’ਤਿ ਗਾਥਾ. ਵਾਸਯੇਤ੍ਥ ਬਹੁਸ੍ਸੁਤੇਤਿ ਏਤ੍ਥ ਵਿਹਾਰੇ ਪਰਿਯਤ੍ਤਿਬਹੁਸ੍ਸੁਤੇ ਚ ਪਟਿਵੇਧਬਹੁਸ੍ਸੁਤੇ ਚ ਵਾਸੇਯ੍ਯ. ਤੇਸਂ ਅਨ੍ਨਞ੍ਚਾਤਿ ਯਂ ਤੇਸਂ ਅਨੁਚ੍ਛਵਿਕਂ ਅਨ੍ਨਞ੍ਚ ਪਾਨਞ੍ਚ ਵਤ੍ਥਾਨਿ ਚ ਮਞ੍ਚਪੀਠਾਦਿਸੇਨਾਸਨਾਨਿ ਚ, ਤਂ ਸਬ੍ਬਂ ਤੇਸੁ ਉਜੁਭੂਤੇਸੁ ਅਕੁਟਿਲਚਿਤ੍ਤੇਸੁ. ਦਦੇਯ੍ਯਾਤਿ ਨਿਦਹੇਯ੍ਯ. ਤਞ੍ਚ ਖੋ ਵਿਪ੍ਪਸਨ੍ਨੇਨ ਚੇਤਸਾ ਨ ਚਿਤ੍ਤਪ੍ਪਸਾਦਂ ਵਿਰਾਧੇਤ੍ਵਾ, ਏਵਂ ਵਿਪ੍ਪਸਨ੍ਨਚਿਤ੍ਤਸ੍ਸ ਹਿ ਤੇ ਤਸ੍ਸ ਧਮ੍ਮਂ ਦੇਸੇਨ੍ਤਿ…ਪੇ… ਪਰਿਨਿਬ੍ਬਾਤਿ ਅਨਾਸਵੋਤਿ.
੨੯੬. ਆਵਿਞ੍ਛਨਚ੍ਛਿਦ੍ਦਂ ਆਵਿਞ੍ਛਨਰਜ੍ਜੁਨ੍ਤਿ ਏਤ੍ਥ ਰਜ੍ਜੁ ਨਾਮ ਸਚੇਪਿ ਦੀਪਿਨਙ੍ਗੁਟ੍ਠੇਨ ਕਤਾ ਹੋਤਿ, ਵਟ੍ਟਤਿਯੇਵ; ਨ ਕਾਚਿ ਨ ਵਟ੍ਟਤਿ. ਤੀਣਿ ਤਾਲ਼ਾਨੀਤਿ ਤਿਸ੍ਸੋ ਕੁਞ੍ਚਿਕਾਯੋ. ਯਨ੍ਤਕਂ ਸੂਚਿਕਨ੍ਤਿ ਏਤ੍ਥ ਯਂ ਯਂ ਜਾਨਾਤਿ ਤਂ ਤਂ ਯਨ੍ਤਕਂ, ਤਸ੍ਸ ਵਿਵਰਣਸੂਚਿਕਞ੍ਚ ਕਾਤੁਂ ਵਟ੍ਟਤਿ. ਵੇਦਿਕਾਵਾਤਪਾਨਂ ਨਾਮ ਚੇਤਿਯੇ ਵੇਦਿਕਾਸਦਿਸਂ. ਜਾਲਵਾਤਪਾਨਂ ਨਾਮ ਜਾਲਕਬਦ੍ਧਂ. ਸਲਾਕਵਾਤਪਾਨਂ ਨਾਮ ਥਮ੍ਭਕਵਾਤਪਾਨਂ. ਚਕ੍ਕਲਿਕਨ੍ਤਿ ਏਤ੍ਥ ਚੋਲ਼ਕਪਾਦਪੁਞ੍ਛਨਂ ਬਨ੍ਧਿਤੁਂ ਅਨੁਜਾਨਾਮੀਤਿ ਅਤ੍ਥੋ. ਵਾਤਪਾਨਭਿਸੀਤਿ ਵਾਤਪਾਨਪ੍ਪਮਾਣੇਨ ਭਿਸਿਂ ਕਤ੍ਵਾ ਬਨ੍ਧਿਤੁਂ ਅਨੁਜਾਨਾਮੀਤਿ ਅਤ੍ਥੋ. ਮਿਡ੍ਢਿਨ੍ਤਿ ਮਿਡ੍ਢਕਂ. ਬਿਦਲਮਞ੍ਚਕਨ੍ਤਿ ਵੇਤ੍ਤਮਞ੍ਚਂ; ਵੇਲ਼ੁਵਿਲੀਵੇਹਿ ਵਾ ਵੀਤਂ.
੨੯੭. ਆਸਨ੍ਦਿਕੋਤਿ ਚਤੁਰਸ੍ਸਪੀਠਂ ਵੁਚ੍ਚਤਿ. ਉਚ੍ਚਕਮ੍ਪਿ ਆਸਨ੍ਦਿਕਨ੍ਤਿ ਵਚਨਤੋ ਏਕਤੋਭਾਗੇਨ ਦੀਘਪੀਠਮੇਵ ਹਿ ਅਟ੍ਠਙ੍ਗੁਲਪਾਦਕਂ ਵਟ੍ਟਤਿ, ਚਤੁਰਸ੍ਸਆਸਨ੍ਦਿਕੋ ਪਨ ਪਮਾਣਾਤਿਕ੍ਕਨ੍ਤੋਪਿ ਵਟ੍ਟਤੀਤਿ ਵੇਦਿਤਬ੍ਬੋ. ਸਤ੍ਤਙ੍ਗੋ ਨਾਮ ਤੀਸੁ ਦਿਸਾਸੁ ਅਪਸ੍ਸਯਂ ਕਤ੍ਵਾ ਕਤਮਞ੍ਚੋ, ਅਯਮ੍ਪਿ ਪਮਾਣਾਤਿਕ੍ਕਨ੍ਤੋ ਵਟ੍ਟਤਿ. ਭਦ੍ਦਪੀਠਨ੍ਤਿ ਵੇਤ੍ਤਮਯਂ ਪੀਠਂ ਵੁਚ੍ਚਤਿ. ਪੀਠਿਕਾਤਿ ਪਿਲੋਤਿਕਾਬਦ੍ਧਪੀਠਮੇਵ. ਏਲ਼ਕਪਾਦਪੀਠਂ ਨਾਮ ਦਾਰੁਪਟ੍ਟਿਕਾਯ ਉਪਰਿ ਪਾਦੇ ਠਪੇਤ੍ਵਾ ਭੋਜਨਫਲਕਂ ਵਿਯ ਕਤਪੀਠਂ ਵੁਚ੍ਚਤਿ. ਆਮਲਕਵਟ੍ਟਿਕਪੀਠਂ ਨਾਮ ਆਮਲਕਾਕਾਰੇਨ ਯੋਜਿਤਂ ਬਹੁਪਾਦਕਪੀਠਂ. ਇਮਾਨਿ ਤਾਵ ਪਾਲ਼ਿਯਂ ਆਗਤਪੀਠਾਨਿ. ਦਾਰੁਮਯਂ ਪਨ ਸਬ੍ਬਂ ਪੀਠਂ ਵਟ੍ਟਤੀਤਿ ਅਯਮੇਤ੍ਥ ਵਿਨਿਚ੍ਛਯੋ. ਕੋਚ੍ਛਨ੍ਤਿ ਉਸਿਰਮਯਂ ਵਾ ਮੁਞ੍ਜਪਬ੍ਬਜਮਯਂ ਵਾ.
ਅਟ੍ਠਙ੍ਗੁਲਪਰਮਂ ਮਞ੍ਚਪਟਿਪਾਦਕਨ੍ਤਿ ਏਤ੍ਥ ਮਨੁਸ੍ਸਾਨਂ ਪਮਾਣਙ੍ਗੁਲਮੇਵ ਅਟ੍ਠਙ੍ਗੁਲਂ. ਚਿਮਿਲਿਕਾ ਨਾਮ ਪਰਿਕਮ੍ਮਕਤਾਯ ਭੂਮਿਯਾ ਛਵਿਸਂਰਕ੍ਖਣਤ੍ਥਾਯ ਅਤ੍ਥਰਣਂ ਵੁਚ੍ਚਤਿ. ਰੁਕ੍ਖਤੂਲਨ੍ਤਿ ਸਿਮ੍ਬਲਿਰੁਕ੍ਖਾਦੀਨਂ ਯੇਸਂ ਕੇਸਞ੍ਚਿ ਰੁਕ੍ਖਾਨਂ ਤੂਲਂ. ਲਤਾਤੂਲਨ੍ਤਿ ਖੀਰਵਲ੍ਲਿਆਦੀਨਂ ਯਾਸਂ ਕਾਸਞ੍ਚਿ ਵਲ੍ਲੀਨਂ ਤੂਲਂ. ਪੋਟਕਿਤੂਲਨ੍ਤਿ ਪੋਟਕਿਤਿਣਾਦੀਨਂ ਯੇਸਂ ਕੇਸਞ੍ਚਿ ਤਿਣਜਾਤਿਕਾਨਂ ਅਨ੍ਤਮਸੋ ਉਚ੍ਛੁਨਲ਼ਾਦੀਨਮ੍ਪਿ ਤੂਲਂ. ਏਤੇਹਿ ਤੀਹਿ ਸਬ੍ਬਭੂਤਗਾਮਾ ਸਙ੍ਗਹਿਤਾ ਹੋਨ੍ਤਿ. ਰੁਕ੍ਖਵਲ੍ਲਿਤਿਣਜਾਤਿਯੋ ਹਿ ਮੁਞ੍ਚਿਤ੍ਵਾ ਅਞ੍ਞੋ ਭੂਤਗਾਮੋ ਨਾਮ ਨਤ੍ਥਿ, ਤਸ੍ਮਾ ਯਸ੍ਸ ਕਸ੍ਸਚਿ ਭੂਤਗਾਮਸ੍ਸ ਤੂਲਂ ਬਿਮ੍ਬੋਹਨੇ ਵਟ੍ਟਤਿ, ਭਿਸਿਂ ਪਨ ਪਾਪੁਣਿਤ੍ਵਾ ਸਬ੍ਬਮ੍ਪੇਤਂ ਅਕਪ੍ਪਿਯਤੂਲਨ੍ਤਿ ਵੁਚ੍ਚਤਿ. ਨ ਕੇਵਲਞ੍ਚ ਬਿਮ੍ਬੋਹਨੇ ਏਤਂ ਤੂਲਮੇਵ, ਹਂਸਮੋਰਾਦੀਨਂ ਸਬ੍ਬਸਕੁਣਾਨਂ ਸੀਹਾਦੀਨਂ ਸਬ੍ਬਚਤੁਪ੍ਪਦਾਨਞ੍ਚ ਲੋਮਮ੍ਪਿ ਵਟ੍ਟਤਿ. ਪਿਯਙ੍ਗੁਪੁਪ੍ਫਬਕੁਲ਼ਪੁਪ੍ਫਾਦਿ ਪਨ ਯਂਕਿਞ੍ਚਿ ਪੁਪ੍ਫਂ ਨ ਵਟ੍ਟਤਿ. ਤਮਾਲਪਤ੍ਤਂ ਸੁਦ੍ਧਮੇਵ ਨ ਵਟ੍ਟਤਿ, ਮਿਸ੍ਸਕਂ ਪਨ ਵਟ੍ਟਤਿ. ਭਿਸੀਨਂ ਅਨੁਞ੍ਞਾਤਂ ਪਞ੍ਚਵਿਧਂ ਉਣ੍ਣਾਦਿਤੂਲਮ੍ਪਿ ਵਟ੍ਟਤਿ.
ਅਦ੍ਧਕਾਯਿਕਾਨੀਤਿ ਉਪਡ੍ਢਕਾਯਪ੍ਪਮਾਣਾਨਿ, ਯੇਸੁ ਕਟਿਤੋ ਪਟ੍ਠਾਯ ਯਾਵ ਸੀਸਂ ਉਪਦਹਨ੍ਤਿ. ਸੀਸਪ੍ਪਮਾਣਂ ਨਾਮ ਯਸ੍ਸ ਵਿਤ੍ਥਾਰਤੋ ਤੀਸੁ ਕਣ੍ਣੇਸੁ ਦ੍ਵਿਨ੍ਨਂ ਕਣ੍ਣਾਨਂ ਅਨ੍ਤਰਂ ਮਿਨੀਯਮਾਨਂ ਵਿਦਤ੍ਥਿ ਚੇਵ ਚਤੁਰਙ੍ਗੁਲਞ੍ਚ ਹੋਤਿ, ਮਜ੍ਝਟ੍ਠਾਨਂ ਮੁਟ੍ਠਿਰਤਨਂ ਹੋਤਿ. ਦੀਘਤੋ ਪਨ ਦਿਯਡ੍ਢਰਤਨਂ ਵਾ ਦ੍ਵਿਰਤਨਂ ਵਾਤਿ ਕੁਰੁਨ੍ਦਿਯਂ ਵੁਤ੍ਤਂ. ਅਯਂ ਸੀਸਪ੍ਪਮਾਣਸ੍ਸ ਉਕ੍ਕਟ੍ਠਪਰਿਚ੍ਛੇਦੋ. ਇਤੋ ਉਦ੍ਧਂ ਨ ਵਟ੍ਟਤਿ, ਹੇਟ੍ਠਾ ਪਨ ਵਟ੍ਟਤਿ. ਅਗਿਲਾਨਸ੍ਸ ਸੀਸੁਪਧਾਨਞ੍ਚ ਪਾਦੁਪਧਾਨਞ੍ਚਾਤਿ ਦ੍ਵਯਮੇਵ ਵਟ੍ਟਤਿ. ਗਿਲਾਨਸ੍ਸ ਬਿਮ੍ਬੋਹਨਾਨਿ ਸਨ੍ਥਰਿਤ੍ਵਾ ਉਪਰਿ ਪਚ੍ਚਤ੍ਥਰਣਂ ਕਤ੍ਵਾ ਨਿਪਜ੍ਜਿਤੁਮ੍ਪਿ ਵਟ੍ਟਤਿ. ‘‘ਯਾਨਿ ਪਨ ਭਿਸੀਨਂ ਅਨੁਞ੍ਞਾਤਾਨਿ ਪਞ੍ਚ ਕਪ੍ਪਿਯਤੂਲਾਨਿ, ਤੇਹਿ ਬਿਮ੍ਬੋਹਨਂ ਮਹਨ੍ਤਮ੍ਪਿ ਵਟ੍ਟਤੀ’’ਤਿ ਫੁਸ੍ਸਦੇਵਤ੍ਥੇਰੋ ਆਹ. ਵਿਨਯਧਰਉਪਤਿਸ੍ਸਤ੍ਥੇਰੋ ਪਨ ‘‘ਬਿਮ੍ਬੋਹਨਂ ਕਰਿਸ੍ਸਾਮੀ’ਤਿ ਕਪ੍ਪਿਯਤੂਲਂ ਵਾ ਅਕਪ੍ਪਿਯਤੂਲਂ ਵਾ ਪਕ੍ਖਿਪਿਤ੍ਵਾ ਕਰੋਨ੍ਤਸ੍ਸ ਪਮਾਣਮੇਵ ਵਟ੍ਟਤੀ’’ਤਿ ਆਹ.
ਪਞ੍ਚ ਭਿਸਿਯੋਤਿ ਪਞ੍ਚਹਿ ਉਣ੍ਣਾਦੀਹਿ ਪੂਰਿਤਭਿਸਿਯੋ. ਤੂਲਗਣਨਾਯ ਹਿ ਏਤਾਸਂ ਗਣਨਾ ਵੁਤ੍ਤਾ. ਤਤ੍ਥ ਉਣ੍ਣਗ੍ਗਹਣੇਨ ਨ ਕੇਵਲਂ ਏਲ਼ਕਲੋਮਮੇਵ ਗਹਿਤਂ, ਠਪੇਤ੍ਵਾ ਮਨੁਸ੍ਸਲੋਮਂ ਯਂਕਿਞ੍ਚਿ ਕਪ੍ਪਿਯਾਕਪ੍ਪਿਯਮਂਸਜਾਤੀਨਂ ਪਕ੍ਖਿਚਤੁਪ੍ਪਦਾਨਂ ਲੋਮਂ, ਸਬ੍ਬਂ ਇਧ ਉਣ੍ਣਗ੍ਗਹਣੇਨੇਵ ਗਹਿਤਂ. ਤਸ੍ਮਾ ਛਨ੍ਨਂ ਚੀਵਰਾਨਂ ਛਨ੍ਨਂ ਅਨੁਲੋਮਚੀਵਰਾਨਞ੍ਚ ਅਞ੍ਞਤਰੇਨ ਭਿਸਿਚ੍ਛਵਿਂ ਕਤ੍ਵਾ ਤਂ ਸਬ੍ਬਂ ਪਕ੍ਖਿਪਿਤ੍ਵਾ ਭਿਸਿਂ ਕਾਤੁਂ ਵਟ੍ਟਤਿ. ਏਲ਼ਕਲੋਮਾਨਿ ਪਨ ਅਪਕ੍ਖਿਪਿਤ੍ਵਾ ਕਮ੍ਬਲਮੇਵ ਚਤੁਗ੍ਗੁਣਂ ਵਾ ਪਞ੍ਚਗੁਣਂ ਵਾ ਪਕ੍ਖਿਪਿਤ੍ਵਾ ਕਤਾਪਿ ਉਣ੍ਣਭਿਸਿਸਙ੍ਖ੍ਯਮੇਵ ਗਚ੍ਛਤਿ.
ਚੋਲ਼ਭਿਸਿਆਦੀਸੁ ਯਂਕਿਞ੍ਚਿ ਨਵਚੋਲ਼ਂ ਵਾ ਪੁਰਾਣਚੋਲ਼ਂ ਵਾ ਸਂਹਰਿਤ੍ਵਾ ਵਾ ਅਨ੍ਤੋ ਪਕ੍ਖਿਪਿਤ੍ਵਾ ਵਾ ਕਤਾ ਚੋਲ਼ਭਿਸਿ, ਯਂਕਿਞ੍ਚਿ ਵਾਕਂ ਪਕ੍ਖਿਪਿਤ੍ਵਾ ਕਤਾ ਵਾਕਭਿਸਿ, ਯਂਕਿਞ੍ਚਿ ਤਿਣਂ ਪਕ੍ਖਿਪਿਤ੍ਵਾ ਕਤਾ ਤਿਣਭਿਸਿ, ਅਞ੍ਞਤ੍ਰ ਸੁਦ੍ਧਤਮਾਲਪਤ੍ਤਂ ਯਂਕਿਞ੍ਚਿ ਪਣ੍ਣਂ ਪਕ੍ਖਿਪਿਤ੍ਵਾ ਕਤਾ ਪਣ੍ਣਭਿਸੀਤਿ ਵੇਦਿਤਬ੍ਬਾ. ਤਮਾਲਪਤ੍ਤਂ ਪਨ ਅਞ੍ਞੇਨ ਮਿਸ੍ਸਮੇਵ ਵਟ੍ਟਤਿ, ਸੁਦ੍ਧਂ ਨ ਵਟ੍ਟਤਿ. ਭਿਸਿਯਾ ਪਮਾਣਨਿਯਮੋ ਨਤ੍ਥਿ, ਮਞ੍ਚਭਿਸਿ ਪੀਠਭਿਸਿ ਭੂਮਤ੍ਥਰਣਭਿਸਿ ਚਙ੍ਕਮਨਭਿਸਿ ਪਾਦਪੁਞ੍ਛਨਭਿਸੀਤਿ ਏਤਾਸਂ ਅਨੁਰੂਪਤੋ ਸਲ੍ਲਕ੍ਖੇਤ੍ਵਾ ਅਤ੍ਤਨੋ ਰੁਚਿਵਸੇਨ ਪਮਾਣਂ ਕਾਤਬ੍ਬਂ. ਯਂ ਪਨੇਤਂ ਉਣ੍ਣਾਦਿਪਞ੍ਚਵਿਧਤੂਲਮ੍ਪਿ ਭਿਸਿਯਂ ਵਟ੍ਟਤਿ, ਤਂ ‘‘ਮਸੂਰਕੇਪਿ ਵਟ੍ਟਤੀ’’ਤਿ ਕੁਰੁਨ੍ਦਿਯਂ ਵੁਤ੍ਤਂ. ਏਤੇਨ ਮਸੂਰਕਂ ਪਰਿਭੁਞ੍ਜਿਤੁਂ ਵਟ੍ਟਤੀਤਿ ਸਿਦ੍ਧਂ ਹੋਤਿ.
ਮਞ੍ਚਭਿਸਿਂ ਪੀਠੇ ਸਨ੍ਥਰਨ੍ਤੀਤਿ ਮਞ੍ਚਭਿਸਿਂ ਪੀਠੇ ਅਤ੍ਥਰਨ੍ਤਿ; ਅਤ੍ਥਰਣਤ੍ਥਾਯ ਹਰਨ੍ਤੀਤਿ ਯੁਜ੍ਜਤਿ. ਉਲ੍ਲੋਕਂ ਅਕਰਿਤ੍ਵਾਤਿ ਹੇਟ੍ਠਾ ਚਿਮਿਲਿਕਂ ਅਦਤ੍ਵਾ. ਫੋਸਿਤੁਨ੍ਤਿ ਰਜਨੇਨ ਵਾ ਹਲਿਦ੍ਦਿਯਾ ਵਾ ਉਪਰਿ ਫੁਸਿਤਾਨਿ ਦਾਤੁਂ. ਭਤ੍ਤਿਕਮ੍ਮਨ੍ਤਿ ਭਿਸਿਚ੍ਛਵਿਯਾ ਉਪਰਿ ਭਤ੍ਤਿਕਮ੍ਮਂ. ਹਤ੍ਥਭਤ੍ਤਿਨ੍ਤਿ ਪਞ੍ਚਙ੍ਗੁਲਿਭਤ੍ਤਿਂ.
੨੯੮. ਇਕ੍ਕਾਸਨ੍ਤਿ ਰੁਕ੍ਖਨਿਯ੍ਯਾਸਂ ਵਾ ਸਿਲੇਸਂ ਵਾ. ਪਿਟ੍ਠਮਦ੍ਦਨ੍ਤਿ ਪਿਟ੍ਠਖਲਿਂ. ਕੁਣ੍ਡਕਮਤ੍ਤਿਕਨ੍ਤਿ ਕੁਣ੍ਡਕਮਿਸ੍ਸਕਮਤ੍ਤਿਕਂ. ਸਾਸਪਕੁਟ੍ਟਨ੍ਤਿ ਸਾਸਪਪਿਟ੍ਠਂ. ਸਿਤ੍ਥਤੇਲਕਨ੍ਤਿ ਵਿਲੀਨਮਧੁਸਿਤ੍ਥਕਂ. ਅਚ੍ਚੁਸ੍ਸਨ੍ਨਂ ਹੋਤੀਤਿ ਬਿਨ੍ਦੁ ਬਿਨ੍ਦੁ ਹੁਤ੍ਵਾ ਤਿਟ੍ਠਤਿ. ਪਚ੍ਚੁਦ੍ਧਰਿਤੁਨ੍ਤਿ ਪੁਞ੍ਛਿਤੁਂ. ਗਣ੍ਡੁਮਤ੍ਤਿਕਨ੍ਤਿ ਗਣ੍ਡੁਪ੍ਪਾਦਗੂਥਮਤ੍ਤਿਕਂ. ਕਸਾਵਨ੍ਤਿ ਆਮਲਕਹਰੀਤਕਾਨਂ ਕਸਾਵਂ.
੨੯੯. ਨ ਭਿਕ੍ਖਵੇ ਪਟਿਭਾਨਚਿਤ੍ਤਨ੍ਤਿ ਏਤ੍ਥ ਨ ਕੇਵਲਂ ਇਤ੍ਥਿਪੁਰਿਸਰੂਪਮੇਵ, ਤਿਰਚ੍ਛਾਨਰੂਪਮ੍ਪਿ ਅਨ੍ਤਮਸੋ ਗਣ੍ਡੁਪ੍ਪਾਦਰੂਪਮ੍ਪਿ ਭਿਕ੍ਖੁਨੋ ਸਯਂ ਕਾਤੁਂ ਵਾ ‘‘ਕਰੋਹੀ’’ਤਿ ਵਤ੍ਤੁਂ ਵਾ ਨ ਵਟ੍ਟਤਿ, ‘‘ਉਪਾਸਕ ਦ੍ਵਾਰਪਾਲਂ ਕਰੋਹੀ’’ਤਿ ਵਤ੍ਤੁਮ੍ਪਿ ਨ ਲਬ੍ਭਤਿ. ਜਾਤਕਪਕਰਣਅਸਦਿਸਦਾਨਾਦੀਨਿ ਪਨ ਪਸਾਦਨੀਯਾਨਿ ਨਿਬ੍ਬਿਦਾਪਟਿਸਂਯੁਤ੍ਤਾਨਿ ਵਾ ਵਤ੍ਥੂਨਿ ਪਰੇਹਿ ਕਾਰਾਪੇਤੁਂ ਲਬ੍ਭਤਿ. ਮਾਲਾਕਮ੍ਮਾਦੀਨਿ ਸਯਮ੍ਪਿ ਕਾਤੁਂ ਲਬ੍ਭਤਿ.
੩੦੦. ਅਲ਼ਕਮਨ੍ਦਾਤਿ ਏਕਙ੍ਗਣਾ ਮਨੁਸ੍ਸਾਭਿਕਿਣ੍ਣਾ. ਤਯੋ ਗਬ੍ਭੇਤਿ ਏਤ੍ਥ ਸਿਵਿਕਾਗਬ੍ਭੋਤਿ ਚਤੁਰਸ੍ਸਗਬ੍ਭੋ. ਨਾਲ਼ਿਕਾਗਬ੍ਭੋਤਿ ਵਿਤ੍ਥਾਰਤੋ ਦਿਗੁਣਤਿਗੁਣਾਯਾਮੋ ਦੀਘਗਬ੍ਭੋ. ਹਮ੍ਮਿਯਗਬ੍ਭੋਤਿ ਆਕਾਸਤਲੇ ਕੂਟਾਗਾਰਗਬ੍ਭੋ ਵਾ ਮੁਣ੍ਡਚ੍ਛਦਨਗਬ੍ਭੋ ਵਾ.
ਕਲਙ੍ਕਪਾਦਕਨ੍ਤਿ ਰੁਕ੍ਖਂ ਵਿਜ੍ਝਿਤ੍ਵਾ ਤਤ੍ਥ ਖਾਣੁਕੇ ਆਕੋਟੇਤ੍ਵਾ ਕਤਂ, ਤਂ ਆਹਰਿਮਂ ਭਿਤ੍ਤਿਪਾਦਂ ਜਿਣ੍ਣਕੁਟ੍ਟਪਾਦਸ੍ਸ ਉਪਤ੍ਥਮ੍ਭਨਤ੍ਥਂ ਭੂਮਿਯਂ ਪਤਿਟ੍ਠਾਪੇਤੁਂ ਅਨੁਜਾਨਾਮੀਤਿ ਅਤ੍ਥੋ. ਪਰਿਤ੍ਤਾਣਕਿਟਿਕਨ੍ਤਿ ਵਸ੍ਸਪਰਿਤ੍ਤਾਣਤ੍ਥਂ ਕਿਟਿਕਂ. ਉਦ੍ਦਸੁਧਨ੍ਤਿ ਵਚ੍ਛਕਗੋਮਯੇਨ ਚੇਵ ਛਾਰਿਕਾਯ ਚ ਸਦ੍ਧਿਂ ਮਦ੍ਦਿਤਮਤ੍ਤਿਕਂ.
ਆਲ਼ਿਨ੍ਦੋ ਨਾਮ ਪਮੁਖਂ ਵੁਚ੍ਚਤਿ. ਪਘਨਂ ਨਾਮ ਯਂ ਨਿਕ੍ਖਮਨ੍ਤਾ ਚ ਪਵਿਸਨ੍ਤਾ ਚ ਪਾਦੇਹਿ ਹਨਨ੍ਤਿ, ਤਸ੍ਸ ਵਿਹਾਰਦ੍ਵਾਰੇ ਉਭਤੋ ਕੁਟ੍ਟਂ ਨੀਹਰਿਤ੍ਵਾ ਕਤਪਦੇਸਸ੍ਸੇਤਂ ਅਧਿਵਚਨਂ, ‘‘ਪਘਾਨ’’ਨ੍ਤਿਪਿ ਵੁਚ੍ਚਤਿ. ਪਕੁਟ੍ਟਨ੍ਤਿ ਮਜ੍ਝੇ ਗਬ੍ਭਸ੍ਸ ਸਮਨ੍ਤਾ ਪਰਿਯਾਗਾਰੋ ਵੁਚ੍ਚਤਿ. ‘‘ਪਕੁਟ’’ਨ੍ਤਿਪਿ ਪਾਠੋ. ਓਸਾਰਕਨ੍ਤਿ ਅਨਾਲ਼ਿਨ੍ਦਕੇ ਵਿਹਾਰੇ ਵਂਸਂ ਦਤ੍ਵਾ ਤਤੋ ਦਣ੍ਡਕੇ ਓਸਾਰੇਤ੍ਵਾ ਕਤਛਦਨਪਮੁਖਂ. ਸਂਸਾਰਣਕਿਟਿਕੋ ਨਾਮ ਚਕ੍ਕਲਯੁਤ੍ਤੋ ਕਿਟਿਕੋ.
੩੦੧. ਪਾਨੀਯਭਾਜਨਨ੍ਤਿ ਪਿਵਨ੍ਤਾਨਂ ਪਾਨੀਯਦਾਨਭਾਜਨਂ. ਉਲ਼ੁਙ੍ਕੋ ਚ ਥਾਲਕਞ੍ਚ ਪਾਨੀਯਸਙ੍ਖਸ੍ਸ ਅਨੁਲੋਮਾਨਿ.
੩੦੩. ਅਪੇਸੀਤਿ ਦੀਘਦਾਰੁਮ੍ਹਿ ਖਾਣੁਕੇ ਪਵੇਸੇਤ੍ਵਾ ਕਣ੍ਟਕਸਾਖਾਹਿ ਵਿਨਨ੍ਧਿਤ੍ਵਾ ਕਤਂ ਦ੍ਵਾਰਥਕਨਕਂ. ਪਲਿਘੋਤਿ ਗਾਮਦ੍ਵਾਰੇਸੁ ਵਿਯ ਚਕ੍ਕਯੁਤ੍ਤਂ ਦ੍ਵਾਰਥਕਨਕਂ.
੩੦੫. ਅਸ੍ਸਤਰੀਹਿ ਯੁਤ੍ਤਾ ਰਥਾ ਅਸ੍ਸਤਰੀਰਥਾ. ਆਮੁਤ੍ਤਮਣਿਕੁਣ੍ਡਲਾਤਿ ਆਮੁਤ੍ਤਮਣਿਕੁਣ੍ਡਲਾਨਿ.
ਪਰਿਨਿਬ੍ਬੁਤੋਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ. ਸੀਤਿਭੂਤੋਤਿ ਕਿਲੇਸਾਤਪਾਭਾਵੇਨ ਸੀਤਿਭੂਤੋ. ਨਿਰੂਪਧੀਤਿ ਕਿਲੇਸੁਪਧਿਅਭਾਵੇਨ ਨਿਰੂਪਧੀਤਿ ਵੁਚ੍ਚਤਿ.
ਸਬ੍ਬਾ ਆਸਤ੍ਤਿਯੋ ਛੇਤ੍ਵਾਤਿ ਰੂਪਾਦੀਸੁ ਵਾ ਵਿਸਯੇਸੁ ਸਬ੍ਬਭਵੇਸੁ ਵਾ ਪਤ੍ਥਨਾਯੋ ਛਿਨ੍ਦਿਤ੍ਵਾ. ਹਦਯੇ ਦਰਨ੍ਤਿ ਚਿਤ੍ਤੇ ਕਿਲੇਸਦਰਥਂ ਵਿਨੇਤ੍ਵਾ. ਵੇਯ੍ਯਾਯਿਕਨ੍ਤਿ ਵਯਕਰਣਂ ਵੁਚ੍ਚਤਿ.
੩੦੭. ਆਦੇਯ੍ਯਵਾਚੋਤਿ ਤਸ੍ਸ ਵਚਨਂ ਬਹੂ ਜਨਾ ਆਦਿਯਿਤਬ੍ਬਂ ਸੋਤਬ੍ਬਂ ਮਞ੍ਞਨ੍ਤੀਤਿ ਅਤ੍ਥੋ. ਆਰਾਮੇ ਅਕਂਸੂਤਿ ਯੇ ਸਧਨਾ, ਤੇ ਅਤ੍ਤਨੋ ਧਨੇਨ ਅਕਂਸੁ. ਯੇ ਮਨ੍ਦਧਨਾ ਚੇਵ ਅਧਨਾ ਚ, ਤੇਸਂ ਧਨਂ ਅਦਾਸਿ. ਇਤਿ ਸੋ ਸਤਸਹਸ੍ਸਕਹਾਪਣੇ ਸਤਸਹਸ੍ਸਗ੍ਘਨਕਞ੍ਚ ਭਣ੍ਡਂ ਦਤ੍ਵਾ ਪਞ੍ਚਚਤ੍ਤਾਲੀਸਯੋਜਨਿਕੇ ਅਦ੍ਧਾਨੇ ਯੋਜਨੇ ਯੋਜਨੇ ਵਿਹਾਰਪਤਿਟ੍ਠਾਨਂ ਕਤ੍ਵਾ ਸਾਵਤ੍ਥਿਂ ਅਗਮਾਸਿ.
ਕੋਟਿਸਨ੍ਥਰਂ ਸਨ੍ਥਰਾਪੇਸੀਤਿ ਕਹਾਪਣਕੋਟਿਯਾ ਕਹਾਪਣਕੋਟਿਂ ਪਟਿਪਾਦੇਤ੍ਵਾ ਸਨ੍ਥਰਿ. ਯੇ ਤਤ੍ਥ ਰੁਕ੍ਖਾ ਵਾ ਪੋਕ੍ਖਰਣਿਯੋ ਵਾ ਤੇਸਂ ਪਰਿਕ੍ਖੇਪਪ੍ਪਮਾਣਂ ਗਹੇਤ੍ਵਾ ਅਞ੍ਞਸ੍ਮਿਂ ਠਾਨੇ ਸਨ੍ਥਰਿਤ੍ਵਾ ਅਦਾਸਿ. ਏਵਮਸ੍ਸ ਅਟ੍ਠਾਰਸਕੋਟਿਕਂ ਨਿਧਾਨਂ ਪਰਿਕ੍ਖਯਂ ਅਗਮਾਸਿ.
ਕੁਮਾਰਸ੍ਸ ਏਤਦਹੋਸੀਤਿ ਗਹਪਤਿਨੋ ਏਵਂ ਬਹੁਧਨਂ ਚਜਨ੍ਤਸ੍ਸਾਪਿ ਮੁਖਸ੍ਸ ਵਿਪ੍ਪਸਨ੍ਨਾਕਾਰਂ ਦਿਸ੍ਵਾ ਏਤਂ ਅਹੋਸਿ. ਕੋਟ੍ਠਕਂ ਮਾਪੇਸੀਤਿ ਸਤ੍ਤਭੂਮਿਕਂ ਦ੍ਵਾਰਕੋਟ੍ਠਕਪਾਸਾਦਂ ਮਾਪੇਸਿ.
ਅਥ ਖੋ ਅਨਾਥਪਿਣ੍ਡਿਕੋ ਗਹਪਤਿ ਜੇਤਵਨੇ ਵਿਹਾਰੇ ਕਾਰਾਪੇਸਿ…ਪੇ… ਮਣ੍ਡਪੇ ਕਾਰਾਪੇਸੀਤਿ ਅਪਰਾਹਿਪਿ ਅਟ੍ਠਾਰਸਹਿ ਕੋਟੀਹਿ ਏਤੇ ਵਿਹਾਰਾਦਯੋ ਕਾਰਾਪੇਸਿ ਅਟ੍ਠਕਰੀਸਪ੍ਪਮਾਣਾਯ ਭੂਮਿਯਾ. ਵਿਪਸ੍ਸਿਸ੍ਸ ਹਿ ਭਗਵਤੋ ਪੁਨਬ੍ਬਸੁਮਿਤ੍ਤੋ ਗਹਪਤਿ ਯੋਜਨਪ੍ਪਮਾਣਂ ਭੂਮਿਂ ਸੁਵਣ੍ਣਿਟ੍ਠਕਾਸਨ੍ਥਰੇਨ ਕਿਣਿਤ੍ਵਾ ਵਿਹਾਰਂ ਕਾਰਾਪੇਸਿ. ਸਿਖਿਸ੍ਸ ਪਨ ਸਿਰਿਵਡ੍ਢੋ ਗਹਪਤਿ ਤਿਗਾਵੁਤਪ੍ਪਮਾਣਂ ਸੁਵਣ੍ਣਯਟ੍ਠਿਸਨ੍ਥਰੇਨ, ਵੇਸ੍ਸਭੁਸ੍ਸ ਸੋਤ੍ਥਿਜੋ ਗਹਪਤਿ ਅਡ੍ਢਯੋਜਨਪ੍ਪਮਾਣਂ ਸੁਵਣ੍ਣਫਾਲਸਨ੍ਥਰੇਨ, ਕਕੁਸਨ੍ਧਸ੍ਸ ਪਨ ਅਚ੍ਚੁਤੋ ਗਹਪਤਿ ਗਾਵੁਤਪ੍ਪਮਾਣਂ ਸੁਵਣ੍ਣਹਤ੍ਥਿਪਦਸਨ੍ਥਰੇਨ, ਕੋਣਾਗਮਨਸ੍ਸ ਉਗ੍ਗੋ ਗਹਪਤਿ ਅਡ੍ਢਗਾਵੁਤਪ੍ਪਮਾਣਂ ਸੁਵਣ੍ਣਿਟ੍ਠਕਾਸਨ੍ਥਰੇਨ, ਕਸ੍ਸਪਸ੍ਸ ਸੁਮਙ੍ਗਲੋ ਗਹਪਤਿ ਵੀਸਤਿਉਸਭਪ੍ਪਮਾਣਂ ਸੁਵਣ੍ਣਕਚ੍ਛਪਸਨ੍ਥਰੇਨ, ਅਮ੍ਹਾਕਂ ਭਗਵਤੋ ਸੁਦਤ੍ਤੋ ਗਹਪਤਿ ਅਟ੍ਠਕਰੀਸਪ੍ਪਮਾਣਂ ਭੂਮਿਂ ਕਹਾਪਣਸਨ੍ਥਰੇਨ ਕਿਣਿਤ੍ਵਾ ਵਿਹਾਰਂ ਕਾਰਾਪੇਸੀਤਿ; ਏਵਂ ਅਨੁਪੁਬ੍ਬੇਨ ਪਰਿਹਾਯਨ੍ਤਿ ਸਮ੍ਪਤ੍ਤਿਯੋਤਿ ਅਲਮੇਵ ਸਬ੍ਬਸਮ੍ਪਤ੍ਤੀਸੁ ਵਿਰਜ੍ਜਿਤੁਂ ਅਲਂ ਵਿਮੁਚ੍ਚਿਤੁਨ੍ਤਿ.
੩੦੮. ਖਣ੍ਡਨ੍ਤਿ ਭਿਨ੍ਨੋਕਾਸੋ. ਫੁਲ੍ਲਨ੍ਤਿ ਫਲਿਤੋਕਾਸੋ. ਪਟਿਸਙ੍ਖਰਿਸ੍ਸਤੀਤਿ ਪਾਕਤਿਕਂ ਕਰਿਸ੍ਸਤਿ. ਲਦ੍ਧਨਵਕਮ੍ਮੇਨ ਪਨ ਭਿਕ੍ਖੁਨਾ ਵਾਸਿਫਰਸੁਨਿਖਾਦਨਾਦੀਨਿ ਗਹੇਤ੍ਵਾ ਸਯਂ ਨ ਕਾਤਬ੍ਬਂ, ਕਤਾਕਤਂ ਜਾਨਿਤਬ੍ਬਂ.
੩੧੦. ਪਿਟ੍ਠਿਤੋ ਪਿਟ੍ਠਿਤੋ ਗਨ੍ਤ੍ਵਾਤਿ ਥੇਰੋ ਕਿਰ ਗਿਲਾਨੇ ਪਟਿਜਗ੍ਗਨ੍ਤੋ ਜਿਣ੍ਣੇ ਵੁਡ੍ਢੇ ਸਙ੍ਗਣ੍ਹਨ੍ਤੋ ਸਬ੍ਬਪਚ੍ਛਤੋ ਆਗਚ੍ਛਤਿ. ਇਦਮਸ੍ਸ ਚਾਰਿਤ੍ਤਂ. ਤੇਨ ਵੁਤ੍ਤਂ – ‘‘ਪਿਟ੍ਠਿਤੋ ਪਿਟ੍ਠਿਤੋ ਗਨ੍ਤ੍ਵਾ’’ਤਿ. ਅਗ੍ਗਾਸਨਨ੍ਤਿ ਥੇਰਾਸਨਂ. ਅਗ੍ਗੋਦਕਨ੍ਤਿ ਦਕ੍ਖਿਣੋਦਕਂ. ਅਗ੍ਗਪਿਣ੍ਡਨ੍ਤਿ ਸਙ੍ਘਤ੍ਥੇਰਪਿਣ੍ਡਂ. ਅਨ੍ਤਰਾ ਸਤ੍ਥੀਨਂ ਕਰਿਤ੍ਵਾਤਿ ਚਤੁਨ੍ਨਂ ਪਾਦਾਨਂ ਅਨ੍ਤਰੇ ਕਰਿਤ੍ਵਾ.
੩੧੫. ਪਤਿਟ੍ਠਾਪੇਸੀਤਿ ਅਟ੍ਠਾਰਸਕੋਟਿਪਰਿਚ੍ਚਾਗਂ ਕਤ੍ਵਾ ਪਤਿਟ੍ਠਾਪੇਸਿ. ਏਵਂ ਸਬ੍ਬਾਪਿ ਚਤੁਪਣ੍ਣਾਸਕੋਟਿਯੋ ਪਰਿਚ੍ਚਜਿ.
ਵਿਹਾਰਾਨੁਜਾਨਨਕਥਾ ਨਿਟ੍ਠਿਤਾ.
ਆਸਨਪ੍ਪਟਿਬਾਹਨਾਦਿਕਥਾ
੩੧੬. ਵਿਪ੍ਪਕਤਭੋਜਨੋਤਿ ਅਨ੍ਤਰਘਰੇ ਵਾ ਵਿਹਾਰੇ ਵਾ ਅਰਞ੍ਞੇ ਵਾ ਯਤ੍ਥ ਕਤ੍ਥਚਿ ਭੁਞ੍ਜਮਾਨੋ ਭਿਕ੍ਖੁ ਅਨਿਟ੍ਠਿਤੇ ਭੋਜਨੇ ਨ ਵੁਟ੍ਠਾਪੇਤਬ੍ਬੋ. ਅਨ੍ਤਰਘਰੇ ਪਚ੍ਛਾ ਆਗਤੇਨ ਭਿਕ੍ਖਂ ਗਹੇਤ੍ਵਾ ਗਨ੍ਤਬ੍ਬਂ. ਸਚੇ ਮਨੁਸ੍ਸਾ ਵਾ ਭਿਕ੍ਖੂ ਵਾ ‘‘ਪਵਿਸਥਾ’’ਤਿ ਵਦਨ੍ਤਿ, ‘‘ਮਯਿ ਪਵਿਸਨ੍ਤੇ ਭਿਕ੍ਖੂ ਉਟ੍ਠਹਿਸ੍ਸਨ੍ਤੀ’’ਤਿ ਵਤ੍ਤਬ੍ਬਂ. ‘‘ਏਥ, ਭਨ੍ਤੇ, ਆਸਨਂ ਅਤ੍ਥੀ’’ਤਿ ਵੁਤ੍ਤੇਨ ਪਨ ਪਵਿਸਿਤਬ੍ਬਂ. ਸਚੇ ਕੋਚਿ ਕਿਞ੍ਚਿ ਨ ਵਦਤਿ, ਆਸਨਸਾਲਂ ਗਨ੍ਤ੍ਵਾ ਅਤਿਸਮੀਪਂ ਅਗਨ੍ਤ੍ਵਾ ਸਭਾਗਟ੍ਠਾਨੇ ਠਾਤਬ੍ਬਂ. ਓਕਾਸੇ ਕਤੇ ‘‘ਪਵਿਸਥਾ’’ਤਿ ਵੁਤ੍ਤੇਨ ਪਨ ਪਵਿਸਿਤਬ੍ਬਂ. ਸਚੇ ਪਨ ਯਂ ਆਸਨਂ ਤਸ੍ਸ ਪਾਪੁਣਾਤਿ, ਤਤ੍ਥ ਅਭੁਞ੍ਜਨ੍ਤੋ ਭਿਕ੍ਖੁ ਨਿਸਿਨ੍ਨੋ ਹੋਤਿ, ਤਂ ਉਟ੍ਠਾਪੇਤੁਂ ਵਟ੍ਟਤਿ. ਯਾਗੁਖਜ੍ਜਕਾਦੀਸੁ ਪਨ ਯਂਕਿਞ੍ਚਿ ਪਿਵਿਤ੍ਵਾ ਵਾ ਖਾਦਿਤ੍ਵਾ ਵਾ ਯਾਵ ਅਞ੍ਞੋ ਆਗਚ੍ਛਤਿ, ਤਾਵ ਨਿਸਿਨ੍ਨਂ ਰਿਤ੍ਤਹਤ੍ਥਮ੍ਪਿ ਵੁਟ੍ਠਾਪੇਤੁਂ ਨ ਵਟ੍ਟਤਿ. ਵਿਪ੍ਪਕਤਭੋਜਨੋਯੇਵ ਹਿ ਸੋ ਹੋਤਿ.
ਸਚੇ ਵੁਟ੍ਠਾਪੇਤੀਤਿ ਸਚੇ ਆਪਤ੍ਤਿਂ ਅਤਿਕ੍ਕਮਿਤ੍ਵਾਪਿ ਵੁਟ੍ਠਾਪੇਤਿਯੇਵ. ਪਵਾਰਿਤੋ ਚ ਹੋਤੀਤਿ ਯਂ ਸੋ ਵੁਟ੍ਠਾਪੇਤਿ, ਅਯਞ੍ਚ ਭਿਕ੍ਖੁ ਪਵਾਰਿਤੋ ਚ ਹੋਤਿ, ਤੇਨ ਵਤ੍ਤਬ੍ਬੋ – ‘‘ਗਚ੍ਛ ਉਦਕਂ ਆਹਰਾਹੀ’’ਤਿ. ਵੁਡ੍ਢਤਰਞ੍ਹਿ ਭਿਕ੍ਖੁਂ ਆਣਾਪੇਤੁਂ ਇਦਮੇਵ ਏਕਂ ਠਾਨਨ੍ਤਿ. ਸਚੇ ਸੋ ਉਦਕਮ੍ਪਿ ਨ ਆਹਰਤਿ, ਤਤੋ ਯਞ੍ਚ ਨਵਕਤਰੇਨ ਕਤ੍ਤਬ੍ਬਂ, ਤਂ ਦਸ੍ਸੇਨ੍ਤੋ ‘‘ਸਾਧੁਕਂ ਸਿਤ੍ਥਾਨੀ’’ਤਿਆਦਿਮਾਹ.
ਗਿਲਾਨਸ੍ਸ ਪਤਿਰੂਪਂ ਸੇਯ੍ਯਨ੍ਤਿ ਏਤ੍ਥ ਯੋ ਕਾਸਭਗਨ੍ਦਰਾਤਿਸਾਰਾਦੀਹਿ ਗਿਲਾਨੋ ਹੋਤਿ, ਖੇਲ਼ਮਲ੍ਲਕਵਚ੍ਚਕਪਾਲਾਦੀਨਿ ਠਪੇਤਬ੍ਬਾਨਿ ਹੋਨ੍ਤਿ. ਕੁਟ੍ਠਿ ਵਾ ਹੋਤਿ, ਸੇਨਾਸਨਂ ਦੂਸੇਤਿ; ਏਵਰੂਪਸ੍ਸ ਹੇਟ੍ਠਾਪਾਸਾਦਪਣ੍ਣਸਾਲਾਦੀਸੁ ਅਞ੍ਞਤਰਂ ਏਕਮਨ੍ਤਂ ਸੇਨਾਸਨਂ ਦਾਤਬ੍ਬਂ. ਯਸ੍ਮਿਂ ਵਸਨ੍ਤੇ ਸੇਨਾਸਨਂ ਨ ਦੁਸ੍ਸਤਿ, ਤਸ੍ਸ ਵਰਸੇਯ੍ਯਾਪਿ ਦਾਤਬ੍ਬਾਵ. ਯੋਪਿ ਸਿਨੇਹਪਾਨਵਿਰੇਚਨਨਤ੍ਥੁਕਮ੍ਮਾਦੀਸੁ ਯਂਕਿਞ੍ਚਿ ਭੇਸਜ੍ਜਂ ਕਰੋਤਿ, ਸਬ੍ਬੋ ਸੋ ਗਿਲਾਨੋਯੇਵ, ਤਸ੍ਸਾਪਿ ਸਲ੍ਲਕ੍ਖੇਤ੍ਵਾ ਪਤਿਰੂਪਂ ਸੇਨਾਸਨਂ ਦਾਤਬ੍ਬਂ. ਲੇਸਕਪ੍ਪੇਨਾਤਿ ਅਪ੍ਪਕੇਨ ਸੀਸਾਬਾਧਾਦਿਮਤ੍ਤੇਨ. ਭਿਕ੍ਖੂ ਗਣੇਤ੍ਵਾਤਿ ‘‘ਏਤ੍ਤਕਾ ਨਾਮ ਭਿਕ੍ਖੂ’’ਤਿ ਵਿਹਾਰੇ ਭਿਕ੍ਖੂਨਂ ਪਰਿਚ੍ਛੇਦਂ ਞਤ੍ਵਾ.
ਆਸਨਪ੍ਪਟਿਬਾਹਨਾਦਿਕਥਾ ਨਿਟ੍ਠਿਤਾ.
ਸੇਨਾਸਨਗ੍ਗਾਹਕਥਾ
੩੧੮. ਸੇਯ੍ਯਾਤਿ ਮਞ੍ਚਟ੍ਠਾਨਾਨਿ ਵੁਚ੍ਚਨ੍ਤਿ. ਸੇਯ੍ਯਗ੍ਗੇਨਾਤਿ ਸੇਯ੍ਯਾਪਰਿਚ੍ਛੇਦੇਨ, ਵਸ੍ਸੂਪਨਾਯਿਕਦਿਵਸੇ ਕਾਲਂ ਘੋਸੇਤ੍ਵਾ ਏਕਮਞ੍ਚਟ੍ਠਾਨਂ ਏਕਸ੍ਸ ਭਿਕ੍ਖੁਨੋ ਗਾਹੇਤੁਂ ਅਨੁਜਾਨਾਮੀਤਿ ਅਤ੍ਥੋ. ਸੇਯ੍ਯਗ੍ਗੇਨ ਗਾਹੇਨ੍ਤਾਤਿ ਸੇਯ੍ਯਾਪਰਿਚ੍ਛੇਦੇਨ ਗਾਹਿਯਮਾਨਾ. ਸੇਯ੍ਯਾ ਉਸ੍ਸਾਰਯਿਂਸੂਤਿ ਮਞ੍ਚਟ੍ਠਾਨਾਨਿ ਅਤਿਰੇਕਾਨਿ ਅਹੇਸੁਂ. ਵਿਹਾਰਗ੍ਗਾਦੀਸੁਪਿ ਏਸੇਵ ਨਯੋ. ਅਨੁਭਾਗਨ੍ਤਿ ਪੁਨ ਅਪਰਮ੍ਪਿ ਭਾਗਂ ਦਾਤੁਂ. ਅਤਿਮਨ੍ਦੇਸੁ ਹਿ ਭਿਕ੍ਖੂਸੁ ਏਕੇਕਸ੍ਸ ਭਿਕ੍ਖੁਨੋ ਦ੍ਵੇ ਤੀਣਿ ਪਰਿਵੇਣਾਨਿ ਦਾਤਬ੍ਬਾਨਿ. ਨ ਅਕਾਮਾ ਦਾਤਬ੍ਬੋਤਿ ਅਨਿਚ੍ਛਾਯ ਨ ਦਾਤਬ੍ਬੋ. ਤਤ੍ਥ ਵਸ੍ਸੂਪਨਾਯਿਕਦਿਵਸੇ ਗਹਿਤੇ ਅਨੁਭਾਗੇ ਪਚ੍ਛਾ ਆਗਤਾਨਂ ਨ ਅਤ੍ਤਨੋ ਅਰੁਚਿਯਾ ਸੋ ਅਨੁਭਾਗੋ ਦਾਤਬ੍ਬੋ. ਸਚੇ ਪਨ ਯੇਨ ਗਹਿਤੋ, ਸੋ ਚ ਅਤ੍ਤਨੋ ਰੁਚਿਯਾ ਤਂ ਅਨੁਭਾਗਂ ਵਾ ਪਠਮਭਾਗਂ ਵਾ ਦੇਤਿ, ਵਟ੍ਟਤਿ.
ਨਿਸ੍ਸੀਮੇ ਠਿਤਸ੍ਸਾਤਿ ਉਪਚਾਰਸੀਮਤੋ ਬਹਿ ਠਿਤਸ੍ਸ. ਅਨ੍ਤੋ ਉਪਚਾਰਸੀਮਾਯ ਪਨ ਦੂਰੇ ਠਿਤਸ੍ਸਾਪਿ ਲਬ੍ਭਤਿਯੇਵ. ਸੇਨਾਸਨਂ ਗਹੇਤ੍ਵਾਤਿ ਵਸ੍ਸੂਪਨਾਯਿਕਦਿਵਸੇ ਗਹੇਤ੍ਵਾ. ਸਬ੍ਬਕਾਲਂ ਪਟਿਬਾਹਨ੍ਤੀਤਿ ਚਤੁਮਾਸਚ੍ਚਯੇਨ ਉਤੁਕਾਲੇਪਿ ਪਟਿਬਾਹਨ੍ਤਿ. ਤੀਸੁ ਸੇਨਾਸਨਗ੍ਗਾਹੇਸੁ ਪੁਰਿਮਕੋ ਚ ਪਚ੍ਛਿਮਕੋ ਚਾਤਿ ਇਮੇ ਦ੍ਵੇ ਗਾਹਾ ਥਾਵਰਾ.
ਅਨ੍ਤਰਾਮੁਤ੍ਤਕੇ ਅਯਂ ਵਿਨਿਚ੍ਛਯੋ – ਏਕਸ੍ਮਿਂ ਵਿਹਾਰੇ ਮਹਾਲਾਭਸੇਨਾਸਨਂ ਹੋਤਿ. ਸੇਨਾਸਨਸਾਮਿਕਾ ਵਸ੍ਸੂਪਗਤਂ ਭਿਕ੍ਖੁਂ ਸਬ੍ਬਪਚ੍ਚਯੇਹਿ ਸਕ੍ਕਚ੍ਚਂ ਉਪਟ੍ਠਹਿਤ੍ਵਾ ਪਵਾਰੇਤ੍ਵਾ ਗਮਨਕਾਲੇ ਬਹੁਂ ਸਮਣਪਰਿਕ੍ਖਾਰਂ ਦੇਨ੍ਤਿ. ਮਹਾਥੇਰਾ ਦੂਰਤੋਪਿ ਆਗਨ੍ਤ੍ਵਾ ਵਸ੍ਸੂਪਨਾਯਿਕਦਿਵਸੇ ਤਂ ਗਹੇਤ੍ਵਾ ਫਾਸੁਂ ਵਸਿਤ੍ਵਾ ਵੁਤ੍ਥਵਸ੍ਸਾ ਲਾਭਂ ਗਣ੍ਹਿਤ੍ਵਾ ਪਕ੍ਕਮਨ੍ਤਿ. ਆਵਾਸਿਕਾ ‘‘ਮਯਂ ਏਤ੍ਥੁਪ੍ਪਨ੍ਨਂ ਲਾਭਂ ਨ ਲਭਾਮ, ਨਿਚ੍ਚਂ ਆਗਨ੍ਤੁਕਮਹਾਥੇਰਾਵ ਲਭਨ੍ਤਿ, ਤੇਯੇਵ ਨਂ ਆਗਨ੍ਤ੍ਵਾ ਪਟਿਜਗ੍ਗਿਸ੍ਸਨ੍ਤੀ’’ਤਿ ਪਲੁਜ੍ਜਨ੍ਤਮ੍ਪਿ ਨ ਓਲੋਕੇਨ੍ਤਿ. ਭਗਵਾ ਤਸ੍ਸ ਪਟਿਜਗ੍ਗਨਤ੍ਥਂ ‘‘ਅਪਰਜ੍ਜੁਗਤਾਯ ਪਵਾਰਣਾਯ ਆਯਤਿਂ ਵਸ੍ਸਾਵਾਸਤ੍ਥਾਯ ਅਨ੍ਤਰਾਮੁਤ੍ਤਕੋ ਗਾਹੇਤਬ੍ਬੋ’’ਤਿ ਆਹ.
ਤਂ ਗਾਹੇਨ੍ਤੇਨ ਸਙ੍ਘਤ੍ਥੇਰੋ ਵਤ੍ਤਬ੍ਬੋ – ‘‘ਭਨ੍ਤੇ ਅਨ੍ਤਰਾਮੁਤ੍ਤਕਸੇਨਾਸਨਂ ਗਣ੍ਹਥਾ’’ਤਿ. ਸਚੇ ਗਣ੍ਹਾਤਿ, ਦਾਤਬ੍ਬਂ; ਨੋ ਚੇ ਏਤੇਨੇਵ ਉਪਾਯੇਨ ਅਨੁਥੇਰਂ ਆਦਿਂ ਕਤ੍ਵਾ ਯੋ ਗਣ੍ਹਾਤਿ, ਤਸ੍ਸ ਅਨ੍ਤਮਸੋ ਸਾਮਣੇਰਸ੍ਸਾਪਿ ਦਾਤਬ੍ਬਂ. ਤੇਨ ਤਂ ਸੇਨਾਸਨਂ ਅਟ੍ਠਮਾਸੇ ਪਟਿਜਗ੍ਗਿਤਬ੍ਬਂ. ਛਦਨਭਿਤ੍ਤਿਭੂਮੀਸੁ ਯਂ ਕਿਞ੍ਚਿ ਖਣ੍ਡਂ ਵਾ ਫੁਲ੍ਲਂ ਵਾ ਹੋਤਿ, ਤਂ ਸਬ੍ਬਂ ਪਟਿਸਙ੍ਖਰਿਤਬ੍ਬਂ. ਉਦ੍ਦੇਸਪਰਿਪੁਚ੍ਛਾਦੀਹਿ ਦਿਵਸਂ ਖੇਪੇਤ੍ਵਾ ਰਤ੍ਤਿਂ ਤਤ੍ਥ ਵਸਿਤੁਮ੍ਪਿ ਵਟ੍ਟਤਿ. ਰਤ੍ਤਿਂ ਪਰਿਵੇਣੇ ਵਸਿਤ੍ਵਾ ਤਤ੍ਥ ਦਿਵਸਂ ਖੇਪੇਤੁਮ੍ਪਿ ਵਟ੍ਟਤਿ. ਰਤ੍ਤਿਨ੍ਦਿਵਂ ਤਤ੍ਥੇਵ ਵਸਿਤੁਮ੍ਪਿ ਵਟ੍ਟਤਿ. ਉਤੁਕਾਲੇ ਆਗਤਾਨਂ ਵੁਡ੍ਢਾਨਂ ਨ ਪਟਿਬਾਹਿਤਬ੍ਬਂ. ਵਸ੍ਸੂਪਨਾਯਿਕਦਿਵਸੇ ਪਨ ਸਮ੍ਪਤ੍ਤੇ ਸਚੇ ਸਙ੍ਘਤ੍ਥੇਰੋ ‘‘ਮਯ੍ਹਂ ਇਦਂ ਸੇਨਾਸਨਂ ਦੇਥਾ’’ਤਿ ਵਦਤਿ, ਨ ਲਭਤਿ. ‘‘ਭਨ੍ਤੇ, ਇਦਂ ਅਨ੍ਤਰਾਮੁਤ੍ਤਕਂ ਗਹੇਤ੍ਵਾ ਅਟ੍ਠਮਾਸੇ ਏਕੇਨ ਭਿਕ੍ਖੁਨਾ ਪਟਿਜਗ੍ਗਿਤ’’ਨ੍ਤਿ ਵਤ੍ਵਾ ਨ ਦਾਤਬ੍ਬਂ. ਅਟ੍ਠਮਾਸੇ ਪਟਿਜਗ੍ਗਕਭਿਕ੍ਖੁਸ੍ਸੇਵ ਗਹਿਤਂ ਹੋਤਿ.
ਯਸ੍ਮਿਂ ਪਨ ਸੇਨਾਸਨੇ ਏਕਸਂਵਚ੍ਛਰੇ ਦ੍ਵਿਕ੍ਖਤ੍ਤੁਂ ਪਚ੍ਚਯੇ ਦੇਨ੍ਤਿ ਛਮਾਸਚ੍ਚਯੇਨ ਛਮਾਸਚ੍ਚਯੇਨ, ਤਂ ਅਨ੍ਤਰਾਮੁਤ੍ਤਕਂ ਨ ਗਾਹੇਤਬ੍ਬਂ. ਯਸ੍ਮਿਂ ਵਾ ਤਿਕ੍ਖਤ੍ਤੁਂ ਦੇਨ੍ਤਿ ਚਤੁਮਾਸਚ੍ਚਯੇਨ ਚਤੁਮਾਸਚ੍ਚਯੇਨ, ਯਸ੍ਮਿਂ ਵਾ ਚਤੁਕ੍ਖਤ੍ਤੁਂ ਦੇਨ੍ਤਿ ਤੇਮਾਸਚ੍ਚਯੇਨ ਤੇਮਾਸਚ੍ਚਯੇਨ, ਤਂ ਅਨ੍ਤਰਾਮੁਤ੍ਤਕਂ ਨ ਗਾਹੇਤਬ੍ਬਂ. ਪਚ੍ਚਯੇਨੇਵ ਹਿ ਤਂ ਪਟਿਜਗ੍ਗਨਂ ਲਭਿਸ੍ਸਤਿ. ਯਸ੍ਮਿਂ ਪਨ ਏਕਸਂਵਚ੍ਛਰੇ ਸਕਿਦੇਵ ਬਹੁਪਚ੍ਚਯੇ ਦੇਨ੍ਤਿ, ਏਤਂ ਅਨ੍ਤਰਾਮੁਤ੍ਤਕਂ ਗਾਹੇਤਬ੍ਬਨ੍ਤਿ. ਅਯਂ ਤਾਵ ਅਨ੍ਤੋਵਸ੍ਸੇ ਵਸ੍ਸੂਪਨਾਯਿਕਦਿਵਸੇਨ ਪਾਲ਼ਿਯਂ ਆਗਤਸੇਨਾਸਨਗ੍ਗਾਹਕਥਾ.
ਅਯਂ ਪਨ ਸੇਨਾਸਨਗ੍ਗਾਹੋ ਨਾਮ ਦੁਵਿਧੋ ਹੋਤਿ – ਉਤੁਕਾਲੇ ਚ ਵਸ੍ਸਾਵਾਸੇ ਚ. ਤਤ੍ਥ ਉਤੁਕਾਲੇ ਤਾਵ ਕੇਚਿ ਆਗਨ੍ਤੁਕਾ ਭਿਕ੍ਖੂ ਪੁਰੇਭਤ੍ਤਂ ਆਗਚ੍ਛਨ੍ਤਿ, ਕੇਚਿ ਪਚ੍ਛਾਭਤ੍ਤਂ ਪਠਮਯਾਮਂ ਵਾ ਮਜ੍ਝਿਮਯਾਮਂ ਵਾ ਪਚ੍ਛਿਮਯਾਮਂ ਵਾ ਯੇ ਯਦਾ ਆਗਚ੍ਛਨ੍ਤਿ, ਤੇਸਂ ਤਦਾਵ ਭਿਕ੍ਖੂ ਉਟ੍ਠਾਪੇਤ੍ਵਾ ਸੇਨਾਸਨਂ ਦਾਤਬ੍ਬਂ. ਅਕਾਲੋ ਨਾਮ ਨਤ੍ਥਿ. ਸੇਨਾਸਨਪਞ੍ਞਾਪਕੇਨ ਪਨ ਪਣ੍ਡਿਤੇਨ ਭਵਿਤਬ੍ਬਂ, ਏਕਂ ਵਾ ਦ੍ਵੇ ਵਾ ਮਞ੍ਚਟ੍ਠਾਨਾਨਿ ਠਪੇਤਬ੍ਬਾਨਿ. ਸਚੇ ਵਿਕਾਲੇ ਏਕੋ ਵਾ ਦ੍ਵੇ ਵਾ ਥੇਰਾ ਆਗਚ੍ਛਨ੍ਤਿ, ਤੇ ਵਤ੍ਤਬ੍ਬਾ – ‘‘ਭਨ੍ਤੇ, ਆਦਿਤੋ ਪਟ੍ਠਾਯ ਵੁਟ੍ਠਾਪਿਯਮਾਨੇ ਸਬ੍ਬੇਪਿ ਭਿਕ੍ਖੂ ਉਬ੍ਭਣ੍ਡਿਕਾ ਭਵਿਸ੍ਸਨ੍ਤਿ, ਤੁਮ੍ਹੇ ਅਮ੍ਹਾਕਂ ਵਸਨਟ੍ਠਾਨੇਯੇਵ ਵਸਥਾ’’ਤਿ.
ਬਹੂਸੁ ਪਨ ਆਗਤੇਸੁ ਵੁਟ੍ਠਾਪੇਤ੍ਵਾ ਪਟਿਪਾਟਿਯਾ ਦਾਤਬ੍ਬਂ. ਸਚੇ ਏਕੇਕਂ ਪਰਿਵੇਣਂ ਪਹੋਤਿ, ਏਕੇਕਂ ਪਰਿਵੇਣਂ ਦਾਤਬ੍ਬਂ. ਤਤ੍ਥ ਅਗ੍ਗਿਸਾਲਦੀਘਸਾਲਮਣ੍ਡਲਮਾਲਾਦਯੋ ਸਬ੍ਬੇਪਿ ਤਸ੍ਸੇਵ ਪਾਪੁਣਨ੍ਤਿ. ਏਵਂ ਅਪ੍ਪਹੋਨ੍ਤੇ ਪਾਸਾਦਗ੍ਗੇਨ ਦਾਤਬ੍ਬਂ. ਪਾਸਾਦੇਸੁ ਅਪ੍ਪਹੋਨ੍ਤੇਸੁ ਓਵਰਕਗ੍ਗੇਨ ਦਾਤਬ੍ਬਂ. ਓਵਰਕੇਸੁ ਅਪ੍ਪਹੋਨ੍ਤੇਸੁ ਸੇਯ੍ਯਗ੍ਗੇਨ ਦਾਤਬ੍ਬਂ. ਸੇਯ੍ਯਗ੍ਗੇਸੁ ਅਪ੍ਪਹੋਨ੍ਤੇਸੁ ਮਞ੍ਚਟ੍ਠਾਨੇਨ ਦਾਤਬ੍ਬਂ. ਮਞ੍ਚਟ੍ਠਾਨੇ ਅਪ੍ਪਹੋਨ੍ਤੇ ਏਕਪੀਠਕਟ੍ਠਾਨਵਸੇਨ ਦਾਤਬ੍ਬਂ. ਭਿਕ੍ਖੁਨੋ ਪਨ ਠਿਤੋਕਾਸਮਤ੍ਤਂ ਨ ਗਾਹੇਤਬ੍ਬਂ. ਏਤਞ੍ਹਿ ਸੇਨਾਸਨਂ ਨਾਮ ਨ ਹੋਤਿ. ਪੀਠਕਟ੍ਠਾਨੇ ਪਨ ਅਪ੍ਪਹੋਨ੍ਤੇ ਏਕਂ ਮਞ੍ਚਟ੍ਠਾਨਂ ਵਾ ਪੀਠਕਟ੍ਠਾਨਂ ਵਾ ਵਾਰੇਨ ਵਾਰੇਨ ਗਹੇਤ੍ਵਾ ‘‘ਭਨ੍ਤੇ, ਵਿਸ੍ਸਮਥਾ’’ਤਿ ਤਿਣ੍ਣਂ ਜਨਾਨਂ ਦਾਤਬ੍ਬਂ, ਨ ਹਿ ਸਕ੍ਕਾ ਸੀਤਸਮਯੇ ਸਬ੍ਬਰਤ੍ਤਿਂ ਅਜ੍ਝੋਕਾਸੇ ਵਸਿਤੁਂ. ਮਹਾਥੇਰੇਨ ਪਠਮਯਾਮਂ ਵਿਸ੍ਸਮਿਤ੍ਵਾ ਨਿਕ੍ਖਮਿਤ੍ਵਾ ਦੁਤਿਯਤ੍ਥੇਰਸ੍ਸ ਵਤ੍ਤਬ੍ਬਂ – ‘‘ਆਵੁਸੋ, ਇਧ ਪਵਿਸਾਹੀ’’ਤਿ. ਸਚੇ ਮਹਾਥੇਰੋ ਨਿਦ੍ਦਾਗਰੁਕੋ ਹੋਤਿ, ਕਾਲਂ ਨ ਜਾਨਾਤਿ, ਉਕ੍ਕਾਸਿਤ੍ਵਾ ਦ੍ਵਾਰਂ ਆਕੋਟੇਤ੍ਵਾ ‘‘ਭਨ੍ਤੇ, ਕਾਲੋ ਜਾਤੋ, ਸੀਤਂ ਅਨੁਦਹਤੀ’’ਤਿ ਵਤ੍ਤਬ੍ਬਂ. ਤੇਨ ਨਿਕ੍ਖਮਿਤ੍ਵਾ ਓਕਾਸੋ ਦਾਤਬ੍ਬੋ, ਅਦਾਤੁਂ ਨ ਲਭਤਿ. ਦੁਤਿਯਤ੍ਥੇਰੇਨਪਿ ਮਜ੍ਝਿਮਯਾਮਂ ਵਿਸ੍ਸਮਿਤ੍ਵਾ ਪੁਰਿਮਨਯੇਨੇਵ ਇਤਰਸ੍ਸ ਦਾਤਬ੍ਬਂ. ਨਿਦ੍ਦਾਗਰੁਕੋ ਵੁਤ੍ਤਨਯੇਨੇਵ ਵੁਟ੍ਠਾਪੇਤਬ੍ਬੋ. ਏਵਂ ਏਕਰਤ੍ਤਿਂ ਏਕਮਞ੍ਚਟ੍ਠਾਨਂ ਤਿਣ੍ਣਂ ਦਾਤਬ੍ਬਂ. ਜਮ੍ਬੁਦੀਪੇ ਪਨ ਏਕਚ੍ਚੇ ਭਿਕ੍ਖੂ ‘‘ਸੇਨਾਸਨਂ ਨਾਮ ਮਞ੍ਚਟ੍ਠਾਨਂ ਵਾ ਪੀਠਟ੍ਠਾਨਂ ਵਾ ਕਿਞ੍ਚਿਦੇਵ ਕਸ੍ਸਚਿ ਸਪ੍ਪਾਯਂ ਹੋਤਿ, ਕਸ੍ਸਚਿ ਅਸਪ੍ਪਾਯ’’ਨ੍ਤਿ ਆਗਨ੍ਤੁਕਾ ਹੋਨ੍ਤੁ ਵਾ ਮਾ ਵਾ, ਦੇਵਸਿਕਂ ਸੇਨਾਸਨਂ ਗਾਹੇਨ੍ਤਿ. ਅਯਂ ਉਤੁਕਾਲੇ ਸੇਨਾਸਨਗ੍ਗਾਹੋ ਨਾਮ.
ਵਸ੍ਸਾਵਾਸੇ ਪਨ ਅਤ੍ਥਿ ਆਗਨ੍ਤੁਕਵਤ੍ਤਂ, ਅਤ੍ਥਿ ਆਵਾਸਿਕਵਤ੍ਤਂ, ਆਗਨ੍ਤੁਕੇਨ ਤਾਵ ਸਕਟ੍ਠਾਨਂ ਮੁਞ੍ਚਿਤ੍ਵਾ ਅਞ੍ਞਤ੍ਥ ਗਨ੍ਤ੍ਵਾ ਵਸਿਤੁਕਾਮੇਨ ਵਸ੍ਸੂਪਨਾਯਿਕਦਿਵਸਮੇਵ ਤਤ੍ਥ ਨ ਗਨ੍ਤਬ੍ਬਂ. ਵਸਨਟ੍ਠਾਨਂ ਵਾ ਹਿ ਤਤ੍ਰ ਸਮ੍ਬਾਧਂ ਭਵੇਯ੍ਯ, ਭਿਕ੍ਖਾਚਾਰੋ ਵਾ ਨ ਸਮ੍ਪਜ੍ਜੇਯ੍ਯ, ਤੇਨ ਨ ਫਾਸੁਂ ਵਿਹਰੇਯ੍ਯ. ਤਸ੍ਮਾ ‘‘ਇਦਾਨਿ ਮਾਸਮਤ੍ਤੇਨ ਵਸ੍ਸੂਪਨਾਯਿਕਾ ਭਵਿਸ੍ਸਤੀ’’ਤਿ ਤਂ ਵਿਹਾਰਂ ਪਵਿਸਿਤਬ੍ਬਂ. ਤਤ੍ਥ ਮਾਸਮਤ੍ਤਂ ਵਸਨ੍ਤੋ ਸਚੇ ਉਦ੍ਦੇਸਤ੍ਥਿਕੋ ਉਦ੍ਦੇਸਸਮ੍ਪਤ੍ਤਿਂ ਸਲ੍ਲਕ੍ਖੇਤ੍ਵਾ, ਸਚੇ ਕਮ੍ਮਟ੍ਠਾਨਿਕੋ ਕਮ੍ਮਟ੍ਠਾਨਸਪ੍ਪਾਯਤਂ ਸਲ੍ਲਕ੍ਖੇਤ੍ਵਾ, ਸਚੇ ਪਚ੍ਚਯਤ੍ਥਿਕੋ ਪਚ੍ਚਯਲਾਭਂ ਸਲ੍ਲਕ੍ਖੇਤ੍ਵਾ ਅਨ੍ਤੋਵਸ੍ਸੇ ਸੁਖਂ ਵਸਿਸ੍ਸਤਿ.
ਸਕਟ੍ਠਾਨਤੋ ਚ ਤਤ੍ਥ ਗਚ੍ਛਨ੍ਤੇਨ ਨ ਗੋਚਰਗਾਮੋ ਘਟ੍ਟੇਤਬ੍ਬੋ, ਨ ਤਤ੍ਥ ਮਨੁਸ੍ਸਾ ਵਤ੍ਤਬ੍ਬਾ – ‘‘ਤੁਮ੍ਹੇ ਨਿਸ੍ਸਾਯ ਸਲਾਕਭਤ੍ਤਾਦੀਨਿ ਵਾ ਯਾਗੁਖਜ੍ਜਕਾਦੀਨਿ ਵਾ ਵਸ੍ਸਾਵਾਸਿਕਂ ਵਾ ਨਤ੍ਥਿ, ਅਯਂ ਚੇਤਿਯਸ੍ਸ ਪਰਿਕ੍ਖਾਰੋ, ਅਯਂ ਉਪੋਸਥਾਗਾਰਸ੍ਸ, ਇਦਂ ਤਾਲ਼ਞ੍ਚੇਵ ਸੂਚਿ ਚ ਸਮ੍ਪਟਿਚ੍ਛਥ ਤੁਮ੍ਹਾਕਂ ਵਿਹਾਰ’’ਨ੍ਤਿ. ਸੇਨਾਸਨਂ ਪਨ ਜਗ੍ਗਿਤ੍ਵਾ ਦਾਰੁਭਣ੍ਡਮਤ੍ਤਿਕਾਭਣ੍ਡਾਨਿ ਪਟਿਸਾਮੇਤ੍ਵਾ ਗਮਿਯਵਤ੍ਤਂ ਪੂਰੇਤ੍ਵਾ ਗਨ੍ਤਬ੍ਬਂ. ਏਵਂ ਗਚ੍ਛਨ੍ਤੇਨਾਪਿ ਦਹਰੇਹਿ ਪਤ੍ਤਚੀਵਰਭਣ੍ਡਿਕਾਯੋ ਉਕ੍ਖਿਪਾਪੇਤ੍ਵਾ ਤੇਲਨਾਲ਼ਿਕਤ੍ਤਰਦਣ੍ਡਾਦੀਨਿ ਗਾਹਾਪੇਤ੍ਵਾ ਛਤ੍ਤਂ ਪਗ੍ਗਯ੍ਹ ਅਤ੍ਤਾਨਂ ਦਸ੍ਸੇਨ੍ਤੇਨ ਗਾਮਦ੍ਵਾਰੇਨੇਵ ਨ ਗਨ੍ਤਬ੍ਬਂ, ਪਟਿਚ੍ਛਨ੍ਨੇਨ ਅਟਵਿਮਗ੍ਗੇਨ ਗਨ੍ਤਬ੍ਬਂ. ਅਟਵਿਮਗ੍ਗੇ ਅਸਤਿ ਗੁਮ੍ਬਾਦੀਨਿ ਮਦ੍ਦਨ੍ਤੇਨ ਨ ਗਨ੍ਤਬ੍ਬਂ, ਗਮਿਯਵਤ੍ਤਂ ਪਨ ਪੂਰੇਤ੍ਵਾ ਵਿਤਕ੍ਕਂ ਛਿਨ੍ਦਿਤ੍ਵਾ ਸੁਦ੍ਧਚਿਤ੍ਤੇਨ ਗਮਨਵਤ੍ਤੇਨੇਵ ਗਨ੍ਤਬ੍ਬਂ. ਸਚੇ ਪਨ ਗਾਮਦ੍ਵਾਰੇਨ ਮਗ੍ਗੋ ਹੋਤਿ, ਗਚ੍ਛਨ੍ਤਞ੍ਚ ਨਂ ਸਪਰਿਵਾਰਂ ਦਿਸ੍ਵਾ ਮਨੁਸ੍ਸਾ ‘‘ਅਮ੍ਹਾਕਂ ਥੇਰੋ ਵਿਯਾ’’ਤਿ ਉਪਧਾਵਿਤ੍ਵਾ ‘‘ਕੁਹਿਂ, ਭਨ੍ਤੇ, ਸਬ੍ਬਪਰਿਕ੍ਖਾਰੇ ਗਹੇਤ੍ਵਾ ਗਚ੍ਛਥਾ’’ਤਿ ਵਦਨ੍ਤਿ, ਤੇਸੁ ਚੇ ਏਕੋ ਏਵਂ ਵਦਤਿ – ‘‘ਵਸ੍ਸੂਪਨਾਯਿਕਕਾਲੋ ਨਾਮਾਯਂ, ਯਤ੍ਥ ਅਨ੍ਤੋਵਸ੍ਸੇ ਨਿਬਦ੍ਧਭਿਕ੍ਖਾਚਾਰੋ ਭਣ੍ਡਪਟਿਚ੍ਛਾਦਨਞ੍ਚ ਲਬ੍ਭਤਿ, ਤਤ੍ਥ ਭਿਕ੍ਖੂ ਗਚ੍ਛਨ੍ਤੀ’’ਤਿ. ਤਸ੍ਸ ਚੇ ਸੁਤ੍ਵਾ ਤੇ ਮਨੁਸ੍ਸਾ ‘‘ਭਨ੍ਤੇ, ਇਮਸ੍ਮਿਮ੍ਪਿ ਗਾਮੇ ਜਨੋ ਭੁਞ੍ਜਤਿ ਚੇਵ ਨਿਵਾਸੇਤਿ ਚ, ਮਾ ਅਞ੍ਞਤ੍ਥ ਗਚ੍ਛਥਾ’’ਤਿ ਵਤ੍ਵਾ ਮਿਤ੍ਤਾਮਚ੍ਚੇ ਪਕ੍ਕੋਸਾਪੇਤ੍ਵਾ ਸਬ੍ਬੇ ਸਮ੍ਮਨ੍ਤਯਿਤ੍ਵਾ ਵਿਹਾਰੇ ਨਿਬਦ੍ਧਵਤ੍ਤਞ੍ਚ ਸਲਾਕਭਤ੍ਤਾਦੀਨਿ ਚ ਵਸ੍ਸਾਵਾਸਿਕਞ੍ਚ ਪਟ੍ਠਪੇਤ੍ਵਾ ‘‘ਇਧੇਵ ਭਨ੍ਤੇ ਵਸਥਾ’’ਤਿ ਯਾਚਨ੍ਤਿ, ਸਬ੍ਬਂ ਸਾਦਿਤੁਂ ਵਟ੍ਟਤਿ. ਸਬ੍ਬਞ੍ਹੇਤਂ ਕਪ੍ਪਿਯਞ੍ਚੇਵ ਅਨਵਜ੍ਜਞ੍ਚ. ਕੁਰੁਨ੍ਦਿਯਂ ਪਨ ‘‘‘ਕੁਹਿਂ ਗਚ੍ਛਥਾ’ਤਿ ਵੁਤ੍ਤੇ ‘ਅਸੁਕਟ੍ਠਾਨ’ਨ੍ਤਿ ਵਤ੍ਵਾ, ‘ਕਸ੍ਮਾ ਤਤ੍ਥ ਗਚ੍ਛਥਾ’ਤਿ ਵੁਤ੍ਤੇ ‘ਕਾਰਣਂ ਆਚਿਕ੍ਖਿਤਬ੍ਬ’’’ਨ੍ਤਿ ਵੁਤ੍ਤਂ. ਉਭਯਮ੍ਪਿ ਪਨੇਤ੍ਥ ਸੁਦ੍ਧਚਿਤ੍ਤਤ੍ਤਾਵ ਅਨਵਜ੍ਜਂ. ਇਦਂ ਆਗਨ੍ਤੁਕਵਤ੍ਤਂ ਨਾਮ.
ਇਦਂ ਪਨ ਆਵਾਸਿਕਵਤ੍ਤਂ – ਪਟਿਕਚ੍ਚੇਵ ਹਿ ਆਵਾਸਿਕੇਹਿ ਵਿਹਾਰੋ ਜਗ੍ਗਿਤਬ੍ਬੋ. ਖਣ੍ਡਫੁਲ੍ਲਪਟਿਸਙ੍ਖਰਣਪਰਿਭਣ੍ਡਾਨਿ ਕਾਤਬ੍ਬਾਨਿ. ਰਤ੍ਤਿਟ੍ਠਾਨਦਿਵਾਟ੍ਠਾਨਵਚ੍ਚਕੁਟਿਪਸ੍ਸਾਵਟ੍ਠਾਨਾਨਿ ਪਧਾਨਘਰਵਿਹਾਰਮਗ੍ਗੋਤਿ ਇਮਾਨਿ ਸਬ੍ਬਾਨਿ ਪਟਿਜਗ੍ਗਿਤਬ੍ਬਾਨਿ, ਚੇਤਿਯੇ ਸੁਧਾਕਮ੍ਮਂ ਮੁਦ੍ਦਵੇਦਿਕਾਯ ਤੇਲਮਕ੍ਖਨਂ ਮਞ੍ਚਪੀਠਪਟਿਜਗ੍ਗਨਨ੍ਤਿ ਇਦਮ੍ਪਿ ਸਬ੍ਬਂ ਕਾਤਬ੍ਬਂ – ‘‘ਵਸ੍ਸਂ ਵਸਿਤੁਕਾਮਾ ਆਗਨ੍ਤ੍ਵਾ ਉਦ੍ਦੇਸਪਰਿਪੁਚ੍ਛਾਕਮ੍ਮਟ੍ਠਾਨਾਨੁਯੋਗਾਦੀਨਿ ਕਰੋਨ੍ਤਾ ਸੁਖਂ ਵਸਿਸ੍ਸਨ੍ਤੀ’’ਤਿ. ਕਤਪਰਿਕਮ੍ਮੇਹਿ ਆਸਾਲ਼੍ਹੀਜੁਣ੍ਹਪਞ੍ਚਮਿਤੋ ਪਟ੍ਠਾਯ ਵਸ੍ਸਾਵਾਸਿਕਂ ਪੁਚ੍ਛਿਤਬ੍ਬਂ. ਕਤ੍ਥ ਪੁਚ੍ਛਿਤਬ੍ਬਂ? ਯਤੋ ਪਕਤਿਯਾ ਲਬ੍ਭਤਿ. ਯੇਹਿ ਪਨ ਨ ਦਿਨ੍ਨਪੁਬ੍ਬਂ, ਤੇ ਪੁਚ੍ਛਿਤੁਂ ਨ ਵਟ੍ਟਤਿ. ਕਸ੍ਮਾ ਪੁਚ੍ਛਿਤਬ੍ਬਂ? ਕਦਾਚਿ ਹਿ ਮਨੁਸ੍ਸਾ ਦੇਨ੍ਤਿ, ਕਦਾਚਿ ਦੁਬ੍ਭਿਕ੍ਖਾਦੀਹਿ ਉਪਦ੍ਦੁਤਾ ਨ ਦੇਨ੍ਤਿ. ਤਤ੍ਥ ਯੇ ਨ ਦਸ੍ਸਨ੍ਤਿ, ਤੇ ਅਪੁਚ੍ਛਿਤ੍ਵਾ ਵਸ੍ਸਾਵਾਸਿਕੇ ਗਾਹਿਤੇ ਗਾਹਿਤਭਿਕ੍ਖੂਨਂ ਲਾਭਨ੍ਤਰਾਯੋ ਹੋਤਿ, ਤਸ੍ਮਾ ਪੁਚ੍ਛਿਤ੍ਵਾਵ ਗਾਹੇਤਬ੍ਬਂ, ਪੁਚ੍ਛਨ੍ਤੇਨ ‘‘ਤੁਮ੍ਹਾਕਂ ਵਸ੍ਸਾਵਾਸਿਕਗ੍ਗਾਹਕਕਾਲੋ ਉਪਕਟ੍ਠੋ’’ਤਿ ਵਤ੍ਤਬ੍ਬਂ. ਸਚੇ ਵਦਨ੍ਤਿ ‘‘ਭਨ੍ਤੇ, ਇਮਂ ਸਂਵਚ੍ਛਰਂ ਛਾਤਕਾਦੀਹਿ ਉਪਦ੍ਦੁਤਮ੍ਹ, ਨ ਸਕ੍ਕੋਮ ਦਾਤੁ’’ਨ੍ਤਿ ਵਾ ‘‘ਯਂ ਮਯਂ ਪੁਬ੍ਬੇ ਦੇਮ, ਤਤੋ ਊਨਤਰਂ ਦਸ੍ਸਾਮਾ’’ਤਿ ਵਾ ‘‘ਇਦਾਨਿ ਕਪ੍ਪਾਸੋ ਸੁਲਭੋ, ਯਂ ਪੁਬ੍ਬੇ ਦੇਮ, ਤਤੋ ਬਹੁਤਰਂ ਦਸ੍ਸਾਮਾ’’ਤਿ ਵਾ ਵਦਨ੍ਤਿ, ਤਂ ਸਲ੍ਲਕ੍ਖੇਤ੍ਵਾ ਤਦਨੁਰੂਪੇਨ ਨਯੇਨ ਤੇਸਂ ਤੇਸਂ ਸੇਨਾਸਨੇ ਭਿਕ੍ਖੂਨਂ ਵਸ੍ਸਾਵਾਸਿਕਂ ਗਾਹੇਤਬ੍ਬਂ.
ਸਚੇ ਮਨੁਸ੍ਸਾ ਵਦਨ੍ਤਿ – ‘‘ਯਸ੍ਸ ਅਮ੍ਹਾਕਂ ਵਸ੍ਸਾਵਾਸਿਕਂ ਪਾਪੁਣਾਤਿ, ਸੋ ਤੇਮਾਸਂ ਪਾਨੀਯਂ ਉਪਟ੍ਠਾਪੇਤੁ, ਵਿਹਾਰਮਗ੍ਗਂ ਜਗ੍ਗਤੁ, ਚੇਤਿਯਙ੍ਗਣਬੋਧਿਯਙ੍ਗਣਾਨਿ ਜਗ੍ਗਤੁ, ਬੋਧਿਰੁਕ੍ਖੇ ਉਦਕਂ ਆਸਿਞ੍ਚਤੂ’’ਤਿ, ਯਸ੍ਸ ਤਂ ਪਾਪੁਣਾਤਿ, ਤਸ੍ਸ ਆਚਿਕ੍ਖਿਤਬ੍ਬਂ. ਯੋ ਪਨ ਗਾਮੋ ਪਟਿਕ੍ਕਮ੍ਮ ਯੋਜਨਦ੍ਵਿਯੋਜਨਨ੍ਤਰੇ ਹੋਤਿ, ਤਤ੍ਰ ਚੇ ਕੁਲਾਨਿ ਉਪਨਿਕ੍ਖੇਪਂ ਠਪੇਤ੍ਵਾ ਵਿਹਾਰੇ ਵਸ੍ਸਾਵਾਸਿਕਂ ਦੇਨ੍ਤਿਯੇਵ, ਤਾਨਿ ਕੁਲਾਨਿ ਅਪੁਚ੍ਛਿਤ੍ਵਾਪਿ ਤੇਸਂ ਸੇਨਾਸਨੇ ਵਤ੍ਤਂ ਕਤ੍ਵਾ ਵਸਨ੍ਤਸ੍ਸ ਵਸ੍ਸਾਵਾਸਿਕਂ ਗਾਹੇਤਬ੍ਬਂ. ਸਚੇ ਪਨ ਤੇਸਂ ਸੇਨਾਸਨੇ ਪਂਸੁਕੂਲਿਕੋ ਵਸਤਿ, ਆਗਤਞ੍ਚ ਤਂ ਦਿਸ੍ਵਾ ‘‘ਤੁਮ੍ਹਾਕਂ ਵਸ੍ਸਾਵਾਸਿਕਂ ਦੇਮਾ’’ਤਿ ਵਦਨ੍ਤਿ, ਤੇਨ ਸਙ੍ਘਸ੍ਸ ਆਚਿਕ੍ਖਿਤਬ੍ਬਂ. ਸਚੇ ਤਾਨਿ ਕੁਲਾਨਿ ਸਙ੍ਘਸ੍ਸ ਦਾਤੁਂ ਨ ਇਚ੍ਛਨ੍ਤਿ, ‘‘ਤੁਮ੍ਹਾਕਂਯੇਵ ਦੇਮਾ’’ਤਿ ਵਦਨ੍ਤਿ, ਸਭਾਗੋ ਭਿਕ੍ਖੁ ‘‘ਵਤ੍ਤਂ ਕਤ੍ਵਾ ਗਣ੍ਹਾਹੀ’’ਤਿ ਵਤ੍ਤਬ੍ਬੋ. ਪਂਸੁਕੂਲਿਕਸ੍ਸ ਪਨੇਤਂ ਨ ਵਟ੍ਟਤਿ, ਇਤਿ ਸਦ੍ਧਾਦੇਯ੍ਯੇ ਦਾਯਕਮਨੁਸ੍ਸਾ ਪੁਚ੍ਛਿਤਬ੍ਬਾ.
ਤਤ੍ਰੁਪ੍ਪਾਦੇ ਪਨ ਕਪ੍ਪਿਯਕਾਰਕਾ ਪੁਚ੍ਛਿਤਬ੍ਬਾ. ਕਥਂ ਪੁਚ੍ਛਿਤਬ੍ਬਾ? ‘‘ਕਿਂ, ਆਵੁਸੋ, ਸਙ੍ਘਸ੍ਸ ਭਣ੍ਡਪਟਿਚ੍ਛਾਦਨਂ ਭਵਿਸ੍ਸਤੀ’’ਤਿ. ਸਚੇ ਵਦਨ੍ਤਿ – ‘‘ਭਵਿਸ੍ਸਤਿ, ਭਨ੍ਤੇ, ਏਕੇਕਸ੍ਸ ਨਵਹਤ੍ਥਂ ਸਾਟਕਂ ਦਸ੍ਸਾਮ, ਵਸ੍ਸਾਵਾਸਿਕਂ ਗਾਹੇਥਾ’’ਤਿ, ਗਾਹੇਤਬ੍ਬਂ. ਸਚੇਪਿ ਵਦਨ੍ਤਿ – ‘‘ਸਾਟਕਂ ਨਤ੍ਥਿ; ਵਤ੍ਥੁ ਪਨ ਅਤ੍ਥਿ, ਗਾਹੇਥ, ਭਨ੍ਤੇ’’ਤਿ, ਵਤ੍ਥੁਮ੍ਹਿ ਸਨ੍ਤੇਪਿ ਗਾਹੇਤੁਂ ਵਟ੍ਟਤਿਯੇਵ. ਕਪ੍ਪਿਯਕਾਰਕਾਨਞ੍ਹਿ ਹਤ੍ਥੇ ‘‘ਕਪ੍ਪਿਯਭਣ੍ਡਂ ਪਰਿਭੁਞ੍ਜਥਾ’’ਤਿ ਦਿਨ੍ਨਵਤ੍ਥੁਤੋ ਯਂ ਯਂ ਕਪ੍ਪਂ, ਤਂ ਤਂ ਸਬ੍ਬਂ ਪਰਿਭੁਞ੍ਜਿਤੁਂ ਅਨੁਞ੍ਞਾਤਂ.
ਯਂ ਪਨੇਤ੍ਥ ਪਿਣ੍ਡਪਾਤਤ੍ਥਾਯ ਗਿਲਾਨਪਚ੍ਚਯਤ੍ਥਾਯ ਵਾ ਉਦ੍ਦਿਸ੍ਸ ਦਿਨ੍ਨਂ, ਤਂ ਚੀਵਰੇ ਉਪਨਾਮੇਨ੍ਤੇਹਿ ਸਙ੍ਘਸੁਟ੍ਠੁਤਾਯ ਅਪਲੋਕੇਤ੍ਵਾ ਉਪਨਾਮੇਤਬ੍ਬਂ. ਸੇਨਾਸਨਤ੍ਥਾਯ ਉਦ੍ਦਿਸ੍ਸ ਦਿਨ੍ਨਂ ਗਰੁਭਣ੍ਡਂ ਹੋਤਿ, ਚੀਵਰਵਸੇਨੇਵ ਚਤੁਪਚ੍ਚਯਵਸੇਨ ਵਾ ਦਿਨ੍ਨਂ ਚੀਵਰੇ ਉਪਨਾਮੇਨ੍ਤਾਨਂ ਅਪਲੋਕਨਕਮ੍ਮਕਿਚ੍ਚਂ ਨਤ੍ਥਿ, ਅਪਲੋਕਨਕਮ੍ਮਂ ਕਰੋਨ੍ਤੇਹਿ ਚ ਪੁਗ੍ਗਲਵਸੇਨੇਵ ਕਾਤਬ੍ਬਂ, ਸਙ੍ਘਵਸੇਨ ਨ ਕਾਤਬ੍ਬਂ. ਜਾਤਰੂਪਰਜਤਵਸੇਨਾਪਿ ਆਮਕਧਞ੍ਞਵਸੇਨ ਵਾ ਅਪਲੋਕਨਕਮ੍ਮਂ ਨ ਵਟ੍ਟਤਿ. ਕਪ੍ਪਿਯਭਣ੍ਡਵਸੇਨ ਚੀਵਰਤਣ੍ਡੁਲਾਦਿਵਸੇਨੇਵ ਚ ਵਟ੍ਟਤਿ. ਤਂ ਪਨ ਏਵਂ ਕਤ੍ਤਬ੍ਬਂ – ‘‘ਇਦਾਨਿ ਸੁਭਿਕ੍ਖਂ ਸੁਲਭਪਿਣ੍ਡਂ, ਭਿਕ੍ਖੂ ਚੀਵਰੇਨ ਕਿਲਮਨ੍ਤਿ, ਏਤ੍ਤਕਂ ਨਾਮ ਤਣ੍ਡੁਲਭਾਗਂ ਭਿਕ੍ਖੂਨਂ ਚੀਵਰਂ ਕਾਤੁਂ ਰੁਚ੍ਚਤੀ’’ਤਿ. ‘‘ਗਿਲਾਨਪਚ੍ਚਯੋ ਸੁਲਭੋ ਗਿਲਾਨੋ ਵਾ ਨਤ੍ਥਿ, ਏਤ੍ਤਕਂ ਨਾਮ ਤਣ੍ਡੁਲਭਾਗਂ ਭਿਕ੍ਖੂਨਂ ਚੀਵਰਂ ਕਾਤੁਂ ਰੁਚ੍ਚਤੀ’’ਤਿ.
ਏਵਂ ਚੀਵਰਪਚ੍ਚਯਂ ਸਲ੍ਲਕ੍ਖੇਤ੍ਵਾ ਸੇਨਾਸਨਸ੍ਸ ਕਾਲੇ ਘੋਸਿਤੇ ਸਨ੍ਨਿਪਤਿਤੇ ਸਙ੍ਘੇ ਸੇਨਾਸਨਗ੍ਗਾਹਕੋ ਸਮ੍ਮਨ੍ਨਿਤਬ੍ਬੋ. ਸਮ੍ਮਨ੍ਨਨ੍ਤੇਨ ਚ ਦ੍ਵੇ ਸਮ੍ਮਨ੍ਨਿਤਬ੍ਬਾਤਿ ਵੁਤ੍ਤਂ. ਏਵਞ੍ਹਿ ਨਵਕੋ ਵੁਡ੍ਢਤਰਸ੍ਸ, ਵੁਡ੍ਢੋ ਚ ਨਵਕਸ੍ਸ ਗਾਹੇਸ੍ਸਤਿ. ਮਹਨ੍ਤੇ ਪਨ ਮਹਾਵਿਹਾਰਸਦਿਸੇ ਵਿਹਾਰੇ ਤਯੋ ਚਤ੍ਤਾਰੋ ਜਨਾ ਸਮ੍ਮਨ੍ਨਿਤਬ੍ਬਾ. ਕੁਰੁਨ੍ਦਿਯਂ ਪਨ ‘‘ਅਟ੍ਠਪਿ ਸੋਲ਼ਸਪਿ ਜਨੇ ਸਮ੍ਮਨ੍ਨਿਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਤੇਸਂ ਸਮ੍ਮੁਤਿ ਕਮ੍ਮਵਾਚਾਯਪਿ ਅਪਲੋਕਨੇਨਪਿ ਵਟ੍ਟਤਿਯੇਵ.
ਤੇਹਿ ਸਮ੍ਮਤੇਹਿ ਭਿਕ੍ਖੂਹਿ ਸੇਨਾਸਨਂ ਸਲ੍ਲਕ੍ਖੇਤਬ੍ਬਂ, ਚੇਤਿਯਘਰਂ ਬੋਧਿਘਰਂ ਆਸਨਘਰਂ ਸਮ੍ਮੁਞ੍ਜਨਿਅਟ੍ਟੋ ਦਾਰੁਅਟ੍ਟੋ ਵਚ੍ਚਕੁਟਿ ਇਟ੍ਠਕਸਾਲਾ ਵਡ੍ਢਕਿਸਾਲਾ ਦ੍ਵਾਰਕੋਟ੍ਠਕੋ ਪਾਨੀਯਮਾਲ਼ੋ ਮਗ੍ਗੋ ਪੋਕ੍ਖਰਣੀਤਿ ਏਤਾਨਿ ਹਿ ਅਸੇਨਾਸਨਾਨਿ, ਵਿਹਾਰੋ ਅਡ੍ਢਯੋਗੋ ਪਾਸਾਦੋ ਹਮ੍ਮਿਯਂ ਗੁਹਾ ਮਣ੍ਡਪੋ ਰੁਕ੍ਖਮੂਲਂ ਵੇਲ਼ੁਗੁਮ੍ਬੋਤਿ ਇਮਾਨਿ ਸੇਨਾਸਨਾਨਿ, ਤਾਨਿ ਗਾਹੇਤਬ੍ਬਾਨਿ. ਗਾਹੇਨ੍ਤੇਨ ਚ ‘‘ਪਠਮਂ ਭਿਕ੍ਖੂ ਗਣੇਤੁਂ, ਭਿਕ੍ਖੂ ਗਣੇਤ੍ਵਾ ਸੇਯ੍ਯਾ ਗਣੇਤੁ’’ਨ੍ਤਿ ਏਤ੍ਥ ਵੁਤ੍ਤਨਯੇਨ ਗਾਹੇਤਬ੍ਬਾਨਿ. ਸਚੇ ਸਙ੍ਘਿਕੋ ਚ ਸਦ੍ਧਾਦੇਯ੍ਯੋ ਚਾਤਿ ਦ੍ਵੇ ਚੀਵਰਪਚ੍ਚਯਾ ਹੋਨ੍ਤਿ, ਤੇਸੁ ਯਂ ਭਿਕ੍ਖੂ ਪਠਮਂ ਗਣ੍ਹਿਤੁਂ ਇਚ੍ਛਨ੍ਤਿ, ਤਂ ਗਾਹੇਤ੍ਵਾ ਤਸ੍ਸ ਠਿਤਿਕਤੋ ਪਟ੍ਠਾਯ ਇਤਰੋ ਗਾਹੇਤਬ੍ਬੋ.
ਸਚੇ ਪਨ ਭਿਕ੍ਖੂਨਂ ਅਪ੍ਪਤਾਯ ਪਰਿਵੇਣਗ੍ਗੇਨ ਸੇਨਾਸਨੇ ਗਾਹਿਯਮਾਨੇ ਏਕਂ ਪਰਿਵੇਣਂ ਮਹਾਲਾਭਂ ਹੋਤਿ, ਦਸ ਵਾ ਦ੍ਵਾਦਸ ਵਾ ਚੀਵਰਾਨਿ ਲਭਨ੍ਤਿ, ਤਂ ਵਿਜਟੇਤ੍ਵਾ ਅਞ੍ਞੇਸੁ ਅਲਾਭਕੇਸੁ ਆਵਾਸੇਸੁ ਪਕ੍ਖਿਪਿਤ੍ਵਾ ਅਞ੍ਞੇਸਮ੍ਪਿ ਭਿਕ੍ਖੂਨਂ ਗਾਹੇਤਬ੍ਬਨ੍ਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨਾਹ – ‘‘ਨ ਏਵਂ ਕਾਤਬ੍ਬਂ, ਮਨੁਸ੍ਸਾ ਹਿ ਅਤ੍ਤਨੋ ਆਵਾਸਜਗ੍ਗਨਤ੍ਥਾਯ ਪਚ੍ਚਯਂ ਦੇਨ੍ਤਿ, ਤਸ੍ਮਾ ਅਞ੍ਞੇਹਿ ਭਿਕ੍ਖੂਹਿ ਤਤ੍ਥ ਪਵਿਸਿਤਬ੍ਬ’’ਨ੍ਤਿ. ਸਚੇ ਪਨੇਤ੍ਥ ਮਹਾਥੇਰੋ ਪਟਿਕ੍ਕੋਸਤਿ – ‘‘ਮਾਵੁਸੋ, ਏਵਂ ਗਾਹੇਥ, ਭਗਵਤੋ ਅਨੁਸਿਟ੍ਠਿਂ ਕਰੋਥ, ਵੁਤ੍ਤਞ੍ਹੇਤਂ ਭਗਵਤਾ – ‘ਅਨੁਜਾਨਾਮਿ, ਭਿਕ੍ਖਵੇ, ਪਰਿਵੇਣਗ੍ਗੇਨ ਗਾਹੇਤੁ’’’ਨ੍ਤਿ ਤਸ੍ਸ ਪਟਿਕ੍ਕੋਸਨਾਯ ਅਟ੍ਠਤ੍ਵਾ ‘‘ਭਨ੍ਤੇ ਭਿਕ੍ਖੂ ਬਹੂ, ਪਚ੍ਚਯੋ ਮਨ੍ਦੋ, ਸਙ੍ਗਹਂ ਕਾਤੁਂ ਵਟ੍ਟਤੀ’’ਤਿ ਤਂ ਸਞ੍ਞਾਪੇਤ੍ਵਾ ਗਾਹੇਤਬ੍ਬਮੇਵ.
ਗਾਹੇਨ੍ਤੇਨ ਚ ਸਮ੍ਮਤੇਨ ਭਿਕ੍ਖੁਨਾ ਮਹਾਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਏਵਂ ਵਤ੍ਤਬ੍ਬਂ – ‘‘ਭਨ੍ਤੇ, ਤੁਮ੍ਹਾਕਂ ਸੇਨਾਸਨਂ ਪਾਪੁਣਾਤਿ, ਗਣ੍ਹਥ ਪਚ੍ਚਯਂ ਧਾਰੇਥਾ’’ਤਿ. ‘‘ਅਸੁਕਕੁਲਸ੍ਸ ਪਚ੍ਚਯੋ ਅਸੁਕਸੇਨਾਸਨਞ੍ਚ ਮਯ੍ਹਂ ਪਾਪੁਣਾਤਿ, ਆਵੁਸੋ’’ਤਿ, ‘‘ਪਾਪੁਣਾਤਿ, ਭਨ੍ਤੇ, ਗਣ੍ਹਥ ਨ’’ਨ੍ਤਿ, ‘‘ਗਣ੍ਹਾਮਿ, ਆਵੁਸੋ’’ਤਿ, ਗਹਿਤਂ ਹੋਤਿ. ਸਚੇ ਪਨ ‘‘ਗਹਿਤਂ ਵੋ, ਭਨ੍ਤੇ’’ਤਿ ਵੁਤ੍ਤੇ ‘‘ਗਹਿਤਂ ਮੇ’’ਤਿ ਵਾ ‘‘ਗਣ੍ਹਿਸ੍ਸਥ, ਭਨ੍ਤੇ’’ਤਿ ਵੁਤ੍ਤੇ ‘‘ਗਣ੍ਹਿਸ੍ਸਾਮੀ’’ਤਿ ਵਾ ਵਦਤਿ, ‘‘ਅਗਹਿਤਂ ਹੋਤੀ’’ਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨਾਹ – ‘‘ਅਤੀਤਾਨਾਗਤਵਚਨਂ ਵਾ ਹੋਤੁ, ਵਤ੍ਤਮਾਨਵਚਨਂ ਵਾ, ਸਤੁਪ੍ਪਾਦਮਤ੍ਤਆਲਯਕਰਣਮਤ੍ਤਮੇਵ ਚੇਤ੍ਥ ਪਮਾਣਂ, ਤਸ੍ਮਾ ਗਹਿਤਮੇਵ ਹੋਤੀ’’ਤਿ.
ਯੋਪਿ ਪਂਸੁਕੂਲਿਕੋ ਭਿਕ੍ਖੁ ਸੇਨਾਸਨਂ ਗਹੇਤ੍ਵਾ ਪਚ੍ਚਯਂ ਵਿਸ੍ਸਜ੍ਜੇਤਿ, ਅਯਮ੍ਪਿ ਨ ਅਞ੍ਞਸ੍ਮਿਂ ਆਵਾਸੇ ਪਕ੍ਖਿਪਿਤਬ੍ਬੋ. ਤਸ੍ਮਿਂਯੇਵ ਪਰਿਵੇਣੇ ਅਗ੍ਗਿਸਾਲਾਯ ਵਾ ਦੀਘਸਾਲਾਯ ਵਾ ਰੁਕ੍ਖਮੂਲੇ ਵਾ ਅਞ੍ਞਸ੍ਸ ਗਾਹੇਤੁਂ ਵਟ੍ਟਤਿ. ਪਂਸੁਕੂਲਿਕੋ ‘‘ਵਸਾਮੀ’’ਤਿ ਸੇਨਾਸਨਂ ਜਗ੍ਗਿਸ੍ਸਤਿ, ਇਤਰੋ ‘‘ਪਚ੍ਚਯਂ ਗਣ੍ਹਾਮੀ’’ਤਿ, ਏਵਂ ਦ੍ਵੀਹਿ ਕਾਰਣੇਹਿ ਸੇਨਾਸਨਂ ਸੁਜਗ੍ਗਿਤਤਰਂ ਭਵਿਸ੍ਸਤਿ. ਮਹਾਪਚ੍ਚਰਿਯਂ ਪਨ ਵੁਤ੍ਤਂ – ‘‘ਪਂਸੁਕੂਲਿਕੇ ਵਾਸਤ੍ਥਾਯ ਸੇਨਾਸਨਂ ਗਣ੍ਹਨ੍ਤੇ ਸੇਨਾਸਨਗ੍ਗਾਹਾਪਕੇਨ ਵਤ੍ਤਬ੍ਬਂ – ‘ਭਨ੍ਤੇ, ਇਧ ਪਚ੍ਚਯੋ ਅਤ੍ਥਿ, ਸੋ ਕਿਂ ਕਾਤਬ੍ਬੋ’ਤਿ. ਤੇਨ ‘ਹੇਟ੍ਠਾ ਅਞ੍ਞਂ ਗਾਹਾਪੇਹੀ’ਤਿ ਵਤ੍ਤਬ੍ਬੋ. ਸਚੇ ਪਨ ਕਿਞ੍ਚਿ ਅਵਤ੍ਵਾਵ ਵਸਤਿ, ਵੁਤ੍ਥਵਸ੍ਸਸ੍ਸ ਚ ਪਾਦਮੂਲੇ ਠਪੇਤ੍ਵਾ ਸਾਟਕਂ ਦੇਨ੍ਤਿ, ਵਟ੍ਟਤਿ. ਅਥ ਵਸ੍ਸਾਵਾਸਿਕਂ ਦੇਮਾਤਿ ਵਦਨ੍ਤਿ, ਤਸ੍ਮਿਂ ਸੇਨਾਸਨੇ ਵਸ੍ਸਂਵੁਤ੍ਥਭਿਕ੍ਖੂਨਂ ਪਾਪੁਣਾਤੀ’’ਤਿ. ਯੇਸਂ ਪਨ ਸੇਨਾਸਨਂ ਨਤ੍ਥਿ; ਕੇਵਲਂ ਪਚ੍ਚਯਮੇਵ ਦੇਨ੍ਤਿ, ਤੇਸਂ ਪਚ੍ਚਯਂ ਅਵਸ੍ਸਾਵਾਸਿਕੇ ਸੇਨਾਸਨੇ ਗਾਹੇਤੁਂ ਵਟ੍ਟਤਿ.
ਮਨੁਸ੍ਸਾ ਥੂਪਂ ਕਤ੍ਵਾ ਵਸ੍ਸਾਵਾਸਿਕਂ ਗਾਹਾਪੇਨ੍ਤਿ, ਥੂਪੋ ਨਾਮ ਅਸੇਨਾਸਨਂ, ਤਸ੍ਸ ਸਮੀਪੇ ਰੁਕ੍ਖੇ ਵਾ ਮਣ੍ਡਪੇ ਵਾ ਉਪਨਿਬਨ੍ਧਿਤ੍ਵਾ ਗਾਹਾਪੇਤਬ੍ਬਂ. ਤੇਨ ਭਿਕ੍ਖੁਨਾ ਚੇਤਿਯਂ ਪਟਿਜਗ੍ਗਿਤਬ੍ਬਂ. ਬੋਧਿਰੁਕ੍ਖਬੋਧਿਘਰਆਸਨਘਰਸਮ੍ਮੁਞ੍ਜਨਿਅਟ੍ਟਦਾਰੁਅਟ੍ਟਵਚ੍ਚਕੁਟਿਦ੍ਵਾਰਕੋਟ੍ਠਕਪਾਨੀਯਮਾਲ਼ਕਦਨ੍ਤਕਟ੍ਠਮਾਲ਼ਕੇਸੁਪਿ ਏਸੇਵ ਨਯੋ. ਭੋਜਨਸਾਲਾ ਪਨ ਸੇਨਾਸਨਮੇਵ, ਤਸ੍ਮਾ ਤਂ ਏਕਸ੍ਸ ਵਾ ਬਹੂਨਂ ਵਾ ਪਰਿਚ੍ਛਿਨ੍ਦਿਤ੍ਵਾ ਗਾਹੇਤੁਂ ਵਟ੍ਟਤੀਤਿ ਸਬ੍ਬਮਿਦਂ ਵਿਤ੍ਥਾਰੇਨ ਮਹਾਪਚ੍ਚਰਿਯਂ ਵੁਤ੍ਤਂ.
ਸੇਨਾਸਨਗ੍ਗਾਹਾਪਕੇਨ ਪਨ ਪਾਟਿਪਦਅਰੁਣਤੋ ਪਟ੍ਠਾਯ ਯਾਵ ਪੁਨ ਅਰੁਣਂ ਨ ਭਿਜ੍ਜਤਿ ਤਾਵ ਗਾਹੇਤਬ੍ਬਂ, ਇਦਞ੍ਹਿ ਸੇਨਾਸਨਗ੍ਗਾਹਸ੍ਸ ਖੇਤ੍ਤਂ. ਸਚੇ ਪਾਤੋਵ ਗਾਹਿਤੇ ਸੇਨਾਸਨੇ ਅਞ੍ਞੋ ਵਿਤਕ੍ਕਚਾਰਿਕੋ ਭਿਕ੍ਖੁ ਆਗਨ੍ਤ੍ਵਾ ਸੇਨਾਸਨਂ ਯਾਚਤਿ, ‘‘ਗਹਿਤਂ, ਭਨ੍ਤੇ, ਸੇਨਾਸਨਂ, ਵਸ੍ਸੂਪਗਤੋ ਸਙ੍ਘੋ, ਰਮਣੀਯੋ ਵਿਹਾਰੋ, ਰੁਕ੍ਖਮੂਲਾਦੀਸੁ ਯਤ੍ਥ ਇਚ੍ਛਥ ਤਤ੍ਥ ਵਸਥਾ’’ਤਿ ਵਤ੍ਤਬ੍ਬੋ. ਵਸ੍ਸੂਪਗਤੇਹਿ ਅਨ੍ਤੋਵਸ੍ਸੇ ਨਿਬਦ੍ਧਵਤ੍ਤਂ ਠਪੇਤ੍ਵਾ ਵਸ੍ਸੂਪਗਤਾ ਭਿਕ੍ਖੂ ‘‘ਸਮ੍ਮੁਞ੍ਜਨਿਯੋ ਬਨ੍ਧਥਾ’’ਤਿ ਵਤ੍ਤਬ੍ਬਾ. ਸੁਲਭਾ ਚੇ ਦਣ੍ਡਕਾ ਚੇਵ ਸਲਾਕਾਯੋ ਚ ਹੋਨ੍ਤਿ, ਏਕੇਕੇਨ ਛ ਪਞ੍ਚ ਮੁਟ੍ਠਿਸਮ੍ਮੁਞ੍ਜਨਿਯੋ, ਦ੍ਵੇ ਤਿਸ੍ਸੋ ਯਟ੍ਠਿਸਮ੍ਮੁਞ੍ਜਨਿਯੋ ਵਾ ਬਨ੍ਧਿਤਬ੍ਬਾ. ਦੁਲ੍ਲਭਾ ਚੇ ਹੋਨ੍ਤਿ, ਦ੍ਵੇ ਤਿਸ੍ਸੋ ਮੁਟ੍ਠਿਸਮ੍ਮੁਞ੍ਜਨਿਯੋ ਏਕਾ ਯਟ੍ਠਿਸਮ੍ਮੁਞ੍ਜਨੀ ਬਨ੍ਧਿਤਬ੍ਬਾ. ਸਾਮਣੇਰੇਹਿ ਪਞ੍ਚ ਪਞ੍ਚ ਉਕ੍ਕਾ ਕੋਟ੍ਟੇਤਬ੍ਬਾ. ਵਸਨਟ੍ਠਾਨੇ ਕਸਾਵਪਰਿਭਣ੍ਡਂ ਕਾਤਬ੍ਬਂ.
ਵਤ੍ਤਂ ਕਰੋਨ੍ਤੇਹਿ ਪਨ ‘‘ਨ ਉਦ੍ਦਿਸਿਤਬ੍ਬਂ, ਨ ਉਦ੍ਦਿਸਾਪੇਤਬ੍ਬਂ, ਨ ਸਜ੍ਝਾਯੋ ਕਾਤਬ੍ਬੋ, ਨ ਪਬ੍ਬਾਜੇਤਬ੍ਬਂ, ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਧਮ੍ਮਸਵਨਂ ਕਾਤਬ੍ਬਂ, ਸਬ੍ਬੇਵ ਹਿ ਏਤੇ ਪਪਞ੍ਚਾ. ਨਿਪ੍ਪਪਞ੍ਚਾ ਹੁਤ੍ਵਾ ਸਮਣਧਮ੍ਮਮੇਵ ਕਰਿਸ੍ਸਾਮਾ’’ਤਿ ਵਾ ‘‘ਸਬ੍ਬੇ ਤੇਰਸ ਧੁਤਙ੍ਗਾਨਿ ਸਮਾਦਿਯਨ੍ਤੁ, ਸੇਯ੍ਯਂ ਅਕਪ੍ਪੇਤ੍ਵਾ ਠਾਨਚਙ੍ਕਮੇਹਿ ਵੀਤਿਨਾਮੇਨ੍ਤੁ, ਮੂਗਬ੍ਬਤਂ ਗਣ੍ਹਨ੍ਤੁ, ਸਤ੍ਤਾਹਕਰਣੀਯੇਨ ਗਤਾਪਿ ਭਾਜਨੀਯਭਣ੍ਡਂ ਲਭਨ੍ਤੂ’’ਤਿ ਵਾ ਏਵਰੂਪਂ ਅਧਮ੍ਮਿਕਵਤ੍ਤਂ ਨ ਕਾਤਬ੍ਬਂ. ਏਵਂ ਪਨ ਕਾਤਬ੍ਬਂ – ਪਰਿਯਤ੍ਤਿਧਮ੍ਮੋ ਨਾਮ ਤਿਵਿਧਮ੍ਪਿ ਸਦ੍ਧਮ੍ਮਂ ਪਤਿਟ੍ਠਾਪੇਤਿ; ਤਸ੍ਮਾ ਸਕ੍ਕਚ੍ਚਂ ਉਦ੍ਦਿਸਥ, ਉਦ੍ਦਿਸਾਪੇਥ, ਸਜ੍ਝਾਯਂ ਕਰੋਥ, ਪਧਾਨਘਰੇ ਵਸਨ੍ਤਾਨਂ ਸਙ੍ਘਟ੍ਟਨਂ ਅਕਤ੍ਵਾ ਅਨ੍ਤੋਵਿਹਾਰੇ ਨਿਸੀਦਿਤ੍ਵਾ ਉਦ੍ਦਿਸਥ, ਉਦ੍ਦਿਸਾਪੇਥ, ਸਜ੍ਝਾਯਂ ਕਰੋਥ, ਧਮ੍ਮਸਵਨਂ ਸਮਿਦ੍ਧਂ ਕਰੋਥ, ਪਬ੍ਬਾਜੇਨ੍ਤਾ ਸੋਧੇਤ੍ਵਾ ਪਬ੍ਬਾਜੇਥ, ਸੋਧੇਤ੍ਵਾ ਉਪਸਮ੍ਪਾਦੇਥ, ਸੋਧੇਤ੍ਵਾ ਨਿਸ੍ਸਯਂ ਦੇਥ, ਏਕੋਪਿ ਹਿ ਕੁਲਪੁਤ੍ਤੋ ਪਬ੍ਬਜ੍ਜਂ ਉਪਸਮ੍ਪਦਞ੍ਚ ਲਭਿਤ੍ਵਾ ਸਕਲਸਾਸਨਂ ਪਤਿਟ੍ਠਾਪੇਤਿ, ਅਤ੍ਤਨੋ ਥਾਮੇਨ ਯਤ੍ਤਕਾਨਿ ਸਕ੍ਕੋਥ ਤਤ੍ਤਕਾਨਿ ਧੁਤਙ੍ਗਾਨਿ ਸਮਾਦਿਯਥ. ਅਨ੍ਤੋਵਸ੍ਸਂ ਨਾਮੇਤਂ ਸਕਲਦਿਵਸਂ ਰਤ੍ਤਿਯਾ ਚ ਪਠਮਪਚ੍ਛਿਮਯਾਮੇਸੁ ਅਪ੍ਪਮਤ੍ਤੇਹਿ ਭਵਿਤਬ੍ਬਂ, ਵੀਰਿਯਂ ਆਰਭਿਤਬ੍ਬਂ. ਪੋਰਾਣਕਮਹਾਥੇਰਾਪਿ ਸਬ੍ਬਪਲਿਬੋਧੇ ਛਿਨ੍ਦਿਤ੍ਵਾ ਅਨ੍ਤੋਵਸ੍ਸੇ ਏਕਚਾਰਿਕਵਤ੍ਤਂ ਪੂਰਯਿਂਸੁ, ਭਸ੍ਸੇ ਮਤ੍ਤਂ ਜਾਨਿਤ੍ਵਾ ਦਸਵਤ੍ਥੁਕਕਥਂ ਦਸਅਸੁਭਦਸਾਨੁਸ੍ਸਤਿਅਟ੍ਠਤਿਂਸਾਰਮ੍ਮਣਕਥਞ੍ਚ ਕਾਤੁਂ ਵਟ੍ਟਤਿ, ਆਗਨ੍ਤੁਕਾਨਂ ਵਤ੍ਤਂ ਕਾਤੁਂ ਸਤ੍ਤਾਹਕਰਣੀਯੇਨ ਗਤਾਨਂ ਅਪਲੋਕੇਤ੍ਵਾ ਦਾਤੁਂ ਵਟ੍ਟਤੀਤਿ ਏਵਰੂਪਂ ਵਤ੍ਤਂ ਕਾਤਬ੍ਬਂ.
ਅਪਿਚ ਭਿਕ੍ਖੂ ਓਵਦਿਤਬ੍ਬਾ – ‘‘ਵਿਗ੍ਗਾਹਿਕਪਿਸੁਣਫਰੁਸਵਚਨਾਨਿ ਮਾ ਵਦਥ, ਦਿਵਸੇ ਦਿਵਸੇ ਸੀਲਾਨਿ ਆਵਜ੍ਜੇਨ੍ਤਾ ਚਤੁਰਾਰਕ੍ਖਂ ਅਹਾਪੇਨ੍ਤਾ ਮਨਸਿਕਾਰਬਹੁਲਾ ਵਿਹਰਥਾ’’ਤਿ. ਦਨ੍ਤਕਟ੍ਠਖਾਦਨਵਤ੍ਤਂ ਆਚਿਕ੍ਖਿਤਬ੍ਬਂ, ਚੇਤਿਯਂ ਵਾ ਬੋਧਿਂ ਵਾ ਵਨ੍ਦਨ੍ਤੇਨ ਗਨ੍ਧਮਾਲਂ ਵਾ ਪੂਜੇਨ੍ਤੇਨ ਪਤ੍ਤਂ ਵਾ ਥਵਿਕਾਯ ਪਕ੍ਖਿਪਨ੍ਤੇਨ ਨ ਕਥੇਤਬ੍ਬਂ, ਭਿਕ੍ਖਾਚਾਰਵਤ੍ਤਂ ਆਚਿਕ੍ਖਿਤਬ੍ਬਂ – ‘‘ਅਨ੍ਤੋਗਾਮੇ ਮਨੁਸ੍ਸੇਹਿ ਸਦ੍ਧਿਂ ਪਚ੍ਚਯਸਞ੍ਞੁਤ੍ਤਕਥਾ ਵਾ ਵਿਸਭਾਗਕਥਾ ਵਾ ਨ ਕਥੇਤਬ੍ਬਾ, ਰਕ੍ਖਿਤਿਨ੍ਦ੍ਰਿਯੇਹਿ ਭਵਿਤਬ੍ਬਂ, ਖਨ੍ਧਕਵਤ੍ਤਞ੍ਚ ਸੇਖਿਯਵਤ੍ਤਞ੍ਚ ਪੂਰੇਤਬ੍ਬ’’ਨ੍ਤਿ ਏਵਰੂਪਾ ਬਹੁਕਾਪਿ ਨਿਯ੍ਯਾਨਿਕਕਥਾ ਆਚਿਕ੍ਖਿਤਬ੍ਬਾਤਿ.
ਪਚ੍ਛਿਮਵਸ੍ਸੂਪਨਾਯਿਕਦਿਵਸੇ ਪਨ ਸਚੇ ਕਾਲਂ ਘੋਸੇਤ੍ਵਾ ਸਨ੍ਨਿਪਤਿਤੇ ਸਙ੍ਘੇ ਕੋਚਿ ਦਸਹਤ੍ਥਂ ਵਤ੍ਥਂ ਆਹਰਿਤ੍ਵਾ ਵਸ੍ਸਾਵਾਸਿਕਂ ਦੇਤਿ, ਆਗਨ੍ਤੁਕੋ ਸਚੇ ਭਿਕ੍ਖੁ ਸਙ੍ਘਤ੍ਥੇਰੋ ਹੋਤਿ, ਤਸ੍ਸ ਦਾਤਬ੍ਬਂ. ਨਵਕੋ ਚੇ ਹੋਤਿ, ਸਮ੍ਮਤੇਨ ਭਿਕ੍ਖੁਨਾ ਸਙ੍ਘਤ੍ਥੇਰੋ ਵਤ੍ਤਬ੍ਬੋ – ‘‘ਸਚੇ ਭਨ੍ਤੇ ਇਚ੍ਛਥ, ਪਠਮਭਾਗਂ ਮੁਞ੍ਚਿਤ੍ਵਾ ਇਦਂ ਵਤ੍ਥਂ ਗਣ੍ਹਥਾ’’ਤਿ, ਅਮੁਞ੍ਚਨ੍ਤਸ੍ਸ ਨ ਦਾਤਬ੍ਬਂ. ਸਚੇ ਪਨ ਪੁਬ੍ਬੇ ਗਾਹਿਤਂ ਮੁਞ੍ਚਿਤ੍ਵਾ ਗਣ੍ਹਾਤਿ, ਦਾਤਬ੍ਬਂ. ਏਤੇਨੇਵੁਪਾਯੇਨ ਦੁਤਿਯਤ੍ਥੇਰਤੋ ਪਟ੍ਠਾਯ ਪਰਿਵਤ੍ਤੇਤ੍ਵਾ ਪਤ੍ਤਟ੍ਠਾਨੇ ਆਗਨ੍ਤੁਕਸ੍ਸ ਦਾਤਬ੍ਬਂ. ਸਚੇ ਪਠਮਵਸ੍ਸੂਪਗਤਾ ਦ੍ਵੇ ਤੀਣਿ ਚਤ੍ਤਾਰਿ ਪਞ੍ਚ ਵਾ ਵਤ੍ਥਾਨਿ ਅਲਤ੍ਥੁਂ, ਲਦ੍ਧਂ ਲਦ੍ਧਂ ਏਤੇਨੇਵੁਪਾਯੇਨ ਵਿਸ੍ਸਜ੍ਜਾਪੇਤ੍ਵਾ ਯਾਵ ਆਗਨ੍ਤੁਕਸ੍ਸ ਸਮਕਂ ਹੋਤਿ, ਤਾਵ ਦਾਤਬ੍ਬਂ. ਤੇਨ ਪਨ ਸਮਕੇ ਲਦ੍ਧੇ ਅਵਸਿਟ੍ਠੋ ਅਨੁਭਾਗੋ ਥੇਰਾਸਨੇ ਦਾਤਬ੍ਬੋ. ਪਚ੍ਚੁਪ੍ਪਨ੍ਨੇ ਲਾਭੇ ਸਤਿ ਠਿਤਿਕਾਯ ਗਾਹੇਤੁਂ ਕਤਿਕਂ ਕਾਤੁਂ ਵਟ੍ਟਤਿ.
ਸਚੇ ਦੁਬ੍ਭਿਕ੍ਖਂ ਹੋਤਿ, ਦ੍ਵੀਸੁਪਿ ਵਸ੍ਸੂਪਨਾਯਿਕਾਸੁ ਵਸ੍ਸੂਪਗਤਾ ਭਿਕ੍ਖੂ ਭਿਕ੍ਖਾਯ ਕਿਲਮਨ੍ਤਾ ‘‘ਆਵੁਸੋ, ਇਧ ਵਸਨ੍ਤਾ ਸਬ੍ਬੇਵ ਕਿਲਮਾਮ, ਸਾਧੁ ਵਤ ਦ੍ਵੇਭਾਗਾ ਹੋਮ, ਯੇਸਂ ਞਾਤਿਪਵਾਰਿਤਟ੍ਠਾਨਾਨਿ ਅਤ੍ਥਿ, ਤੇ ਤਤ੍ਥ ਵਸਿਤ੍ਵਾ ਪਵਾਰਣਾਯ ਆਗਨ੍ਤ੍ਵਾ ਅਤ੍ਤਨੋ ਪਤ੍ਤਂ ਵਸ੍ਸਾਵਾਸਿਕਂ ਗਣ੍ਹਨ੍ਤੂ’’ਤਿ ਵਦਨ੍ਤਿ, ਤੇਸੁ ਯੇ ਤਤ੍ਥ ਵਸਿਤ੍ਵਾ ਪਵਾਰਣਾਯ ਆਗਚ੍ਛਨ੍ਤਿ, ਤੇਸਂ ਅਪਲੋਕੇਤ੍ਵਾ ਵਸ੍ਸਾਵਾਸਿਕਂ ਦਾਤਬ੍ਬਂ. ਸਾਦਿਯਨ੍ਤਾਪਿ ਹਿ ਤੇ ਨੇਵ ਵਸ੍ਸਾਵਾਸਿਕਸ੍ਸ ਸਾਮਿਨੋ, ਖੀਯਨ੍ਤਾਪਿ ਚ ਆਵਾਸਿਕਾ ਨੇਵ ਅਦਾਤੁਂ ਲਭਨ੍ਤਿ. ਕੁਰੁਨ੍ਦਿਯਂ ਪਨ ਵੁਤ੍ਤਂ – ‘‘ਕਤਿਕਵਤ੍ਤਂ ਕਾਤਬ੍ਬਂ – ‘ਸਬ੍ਬੇਸਂ ਨੋ ਇਧ ਯਾਗੁਭਤ੍ਤਂ ਨਪ੍ਪਹੋਤਿ, ਸਭਾਗਟ੍ਠਾਨੇ ਵਸਿਤ੍ਵਾ ਆਗਚ੍ਛਥ, ਤੁਮ੍ਹਾਕਂ ਪਤ੍ਤਂ ਵਸ੍ਸਾਵਾਸਿਕਂ ਲਭਿਸ੍ਸਥਾ’ਤਿ. ਤਞ੍ਚੇ ਏਕੋ ਪਟਿਬਾਹਤਿ, ਸੁਪਟਿਬਾਹਿਤਂ; ਨੋ ਚੇ ਪਟਿਬਾਹਤਿ, ਕਤਿਕਾ ਸੁਕਤਾ. ਪਚ੍ਛਾ ਤੇਸਂ ਤਤ੍ਥ ਵਸਿਤ੍ਵਾ ਆਗਤਾਨਂ ਅਪਲੋਕੇਤ੍ਵਾ ਦਾਤਬ੍ਬਂ, ਅਪਲੋਕਨਕਾਲੇ ਪਟਿਬਾਹਿਤੁਂ ਨ ਲਬ੍ਭਤੀ’’ਤਿ. ਪੁਨਪਿ ਵੁਤ੍ਤਂ – ‘‘ਸਚੇ ਵਸ੍ਸੂਪਗਤੇਸੁ ਏਕਚ੍ਚਾਨਂ ਵਸ੍ਸਾਵਾਸਿਕੇ ਅਪਾਪੁਣਨ੍ਤੇ ਭਿਕ੍ਖੂ ਕਤਿਕਂ ਕਰੋਨ੍ਤਿ – ‘ਛਿਨ੍ਨਵਸ੍ਸਾਨਂ ਵਸ੍ਸਾਵਾਸਿਕਞ੍ਚ ਇਦਾਨਿ ਉਪ੍ਪਜ੍ਜਨਕਵਸ੍ਸਾਵਾਸਿਕਞ੍ਚ ਇਮੇਸਂ ਦਾਤੁਂ ਰੁਚ੍ਚਤੀ’ਤਿ ਏਵਂ ਕਤਿਕਾਯ ਕਤਾਯ ਗਾਹਿਤਸਦਿਸਮੇਵ ਹੋਤਿ, ਉਪ੍ਪਨ੍ਨੁਪ੍ਪਨ੍ਨਂ ਤੇਸਮੇਵ ਦਾਤਬ੍ਬ’’ਨ੍ਤਿ.
ਤੇਮਾਸਂ ਪਾਨੀਯਂ ਉਪਟ੍ਠਾਪੇਤ੍ਵਾ ਵਿਹਾਰਮਗ੍ਗਚੇਤਿਯਙ੍ਗਣਬੋਧਿਯਙ੍ਗਣਾਨਿ ਜਗ੍ਗਿਤ੍ਵਾ ਬੋਧਿਰੁਕ੍ਖੇ ਉਦਕਂ ਸਿਞ੍ਚਿਤ੍ਵਾ ਪਕ੍ਕਨ੍ਤੋਪਿ ਵਿਬ੍ਭਨ੍ਤੋਪਿ ਵਸ੍ਸਾਵਾਸਿਕਂ ਲਭਤਿਯੇਵ. ਭਤਿਨਿਵਿਟ੍ਠਞ੍ਹਿ ਤੇਨ ਕਤਂ. ਸਙ੍ਘਿਕਂ ਪਨ ਅਪਲੋਕਨਕਮ੍ਮਂ ਕਤ੍ਵਾ ਗਾਹਿਤਂ ਅਨ੍ਤੋਵਸ੍ਸੇ ਵਿਬ੍ਭਨ੍ਤੋਪਿ ਲਭਤੇਵ. ਪਚ੍ਚਯਵਸੇਨ ਗਾਹਿਤਂ ਪਨ ਨ ਲਭਤੀਤਿ ਵਦਨ੍ਤਿ.
ਸਚੇ ਵੁਤ੍ਥਵਸ੍ਸੋ ਦਿਸਂਗਮਿਕੋ ਭਿਕ੍ਖੁ ਆਵਾਸਿਕਸ੍ਸ ਹਤ੍ਥਤੋ ਕਿਞ੍ਚਿਦੇਵ ਕਪ੍ਪਿਯਭਣ੍ਡਂ ਗਹੇਤ੍ਵਾ ‘‘ਅਸੁਕਕੁਲੇ ਮਯ੍ਹਂ ਵਸ੍ਸਾਵਾਸਿਕਂ ਪਤ੍ਤਂ, ਤਂ ਗਣ੍ਹਥਾ’’ਤਿ ਵਤ੍ਵਾ ਗਤਟ੍ਠਾਨੇ ਵਿਬ੍ਭਮਤਿ, ਵਸ੍ਸਾਵਾਸਿਕਂ ਸਙ੍ਘਿਕਂ ਹੋਤਿ. ਸਚੇ ਪਨ ਮਨੁਸ੍ਸੇ ਸਮ੍ਮੁਖਾ ਸਮ੍ਪਟਿਚ੍ਛਾਪੇਤ੍ਵਾ ਗਚ੍ਛਤਿ, ਲਭਤਿ. ‘‘ਇਦਂ ਵਸ੍ਸਾਵਾਸਿਕਂ ਅਮ੍ਹਾਕਂ ਸੇਨਾਸਨੇ ਵੁਤ੍ਥਭਿਕ੍ਖੁਨੋ ਦੇਮਾ’’ਤਿ ਵੁਤ੍ਤੇ, ਯਸ੍ਸ ਗਾਹਿਤਂ ਤਸ੍ਸੇਵ ਹੋਤਿ. ਸਚੇ ਪਨ ਸੇਨਾਸਨਸਾਮਿਕਸ੍ਸ ਪਿਯਕਮ੍ਯਤਾਯ ਪੁਤ੍ਤਧੀਤਾਦਯੋ ਬਹੂਨਿ ਵਤ੍ਥਾਨਿ ਆਹਰਿਤ੍ਵਾ ‘‘ਅਮ੍ਹਾਕਂ ਸੇਨਾਸਨੇ ਦੇਮਾ’’ਤਿ ਦੇਨ੍ਤਿ, ਤਤ੍ਥ ਵਸ੍ਸੂਪਗਤਸ੍ਸ ਏਕਮੇਵ ਵਤ੍ਥਂ ਦਾਤਬ੍ਬਂ, ਸੇਸਾਨਿ ਸਙ੍ਘਿਕਾਨਿ ਹੋਨ੍ਤਿ, ਵਸ੍ਸਾਵਾਸਿਕਟ੍ਠਿਤਿਕਾਯ ਗਾਹੇਤਬ੍ਬਾਨਿ. ਠਿਤਿਕਾਯ ਅਸਤਿ ਥੇਰਾਸਨਤੋ ਪਟ੍ਠਾਯ ਗਾਹੇਤਬ੍ਬਾਨਿ. ਸੇਨਾਸਨੇ ਵਸ੍ਸੂਪਗਤਂ ਭਿਕ੍ਖੁਂ ਨਿਸ੍ਸਾਯ ਉਪ੍ਪਨ੍ਨੇਨ ਚਿਤ੍ਤਪ੍ਪਸਾਦੇਨ ਬਹੂਨਿ ਵਤ੍ਥਾਨਿ ਆਹਰਿਤ੍ਵਾ ‘‘ਸੇਨਾਸਨਸ੍ਸ ਦੇਮਾ’’ਤਿ ਦਿਨ੍ਨੇਸੁਪਿ ਏਸੇਵ ਨਯੋ. ਸਚੇ ਪਨ ਪਾਦਮੂਲੇ ਠਪੇਤ੍ਵਾ ‘‘ਏਤਸ੍ਸ ਭਿਕ੍ਖੁਨੋ ਦੇਮਾ’’ਤਿ ਵਦਨ੍ਤਿ, ਤਸ੍ਸੇਵ ਹੋਨ੍ਤਿ.
ਏਕਸ੍ਸ ਗੇਹੇ ਦ੍ਵੇ ਵਸ੍ਸਾਵਾਸਿਕਾਨਿ – ਪਠਮਭਾਗੋ ਸਾਮਣੇਰਸ੍ਸ ਗਾਹਿਤੋ ਹੋਤਿ, ਦੁਤਿਯੋ ਥੇਰਾਸਨੇ. ਸੋ ਏਕਂ ਦਸਹਤ੍ਥਂ, ਏਕਂ ਅਟ੍ਠਹਤ੍ਥਂ ਸਾਟਕਂ ਪੇਸੇਤਿ ‘‘ਵਸ੍ਸਾਵਾਸਿਕਂ ਪਤ੍ਤਭਿਕ੍ਖੂਨਂ ਦੇਥਾ’’ਤਿ ਵਿਚਿਨਿਤ੍ਵਾ ਵਰਭਾਗਂ ਸਾਮਣੇਰਸ੍ਸ ਦਤ੍ਵਾ ਅਨੁਭਾਗੋ ਥੇਰਾਸਨੇ ਦਾਤਬ੍ਬੋ. ਸਚੇ ਪਨ ਉਭੋਪਿ ਘਰਂ ਨੇਤ੍ਵਾ ਭੋਜੇਤ੍ਵਾ ਸਯਮੇਵ ਪਾਦਮੂਲੇ ਠਪੇਤਿ, ਯਂ ਯਸ੍ਸ ਦਿਨ੍ਨਂ, ਤਦੇਵ ਤਸ੍ਸ ਹੋਤਿ.
ਇਤੋ ਪਰਂ ਮਹਾਪਚ੍ਚਰਿਯਂ ਆਗਤਨਯੋ ਹੋਤਿ – ‘‘ਏਕਸ੍ਸ ਘਰੇ ਦਹਰਸਾਮਣੇਰਸ੍ਸ ਵਸ੍ਸਾਵਾਸਿਕਂ ਪਾਪੁਣਾਤਿ, ਸੋ ਚੇ ਪੁਚ੍ਛਤਿ – ‘ਅਮ੍ਹਾਕਂ ਵਸ੍ਸਾਵਾਸਿਕਂ ਕਸ੍ਸ ਪਤ੍ਤ’ਨ੍ਤਿ, ‘ਸਾਮਣੇਰਸ੍ਸਾ’ਤਿ ਅਵਤ੍ਵਾ ‘ਦਾਨਕਾਲੇ ਜਾਨਿਸ੍ਸਸੀ’ਤਿ ਵਤ੍ਵਾ ਦਾਨਦਿਵਸੇ ਏਕਂ ਮਹਾਥੇਰਂ ਪੇਸੇਤ੍ਵਾ ਨੀਹਰਾਪੇਤਬ੍ਬਂ. ਸਚੇ ਯਸ੍ਸ ਵਸ੍ਸਾਵਾਸਿਕਂ ਪਤ੍ਤਂ, ਸੋ ਵਿਬ੍ਭਮਤਿ ਵਾ ਕਾਲਂ ਵਾ ਕਰੋਤਿ, ਮਨੁਸ੍ਸਾ ਚੇ ਪੁਚ੍ਛਨ੍ਤਿ – ‘ਕਸ੍ਸ ਅਮ੍ਹਾਕਂ ਵਸ੍ਸਾਵਾਸਿਕਂ ਪਤ੍ਤ’ਨ੍ਤਿ, ਤੇਸਂ ਯਥਾਭੂਤਂ ਆਚਿਕ੍ਖਿਤਬ੍ਬਂ. ਸਚੇ ਤੇ ਵਦਨ੍ਤਿ – ‘ਤੁਮ੍ਹਾਕਂ ਦੇਮਾ’ਤਿ, ਤਸ੍ਸ ਭਿਕ੍ਖੁਨੋ ਪਾਪੁਣਾਤਿ. ਅਥ ਸਙ੍ਘਸ੍ਸ ਵਾ ਗਣਸ੍ਸ ਵਾ ਦੇਨ੍ਤਿ, ਸਙ੍ਘਸ੍ਸ ਵਾ ਗਣਸ੍ਸ ਵਾ ਪਾਪੁਣਾਤਿ. ਸਚੇ ਵਸ੍ਸੂਪਗਤਾ ਸੁਦ੍ਧਪਂਸੁਕੂਲਿਕਾਯੇਵ ਹੋਨ੍ਤਿ, ਆਨੇਤ੍ਵਾ ਦਿਨ੍ਨਂ ਵਸ੍ਸਾਵਾਸਿਕਂ ਸੇਨਾਸਨਪਰਿਕ੍ਖਾਰਂ ਵਾ ਕਤ੍ਵਾ ਠਪੇਤਬ੍ਬਂ, ਬਿਮ੍ਬੋਹਨਾਦੀਨਿ ਵਾ ਕਾਤਬ੍ਬਾਨੀ’’ਤਿ. ਇਦਂ ਨੇਵਾਸਿਕਵਤ੍ਤਂ.
ਸੇਨਾਸਨਗ੍ਗਾਹਕਥਾ ਨਿਟ੍ਠਿਤਾ.
ਉਪਨਨ੍ਦਵਤ੍ਥੁਕਥਾ
੩੧੯. ਉਪਨਨ੍ਦਵਤ੍ਥੁਸ੍ਮਿਂ – ਤਤ੍ਥ ਤਯਾ ਮੋਘਪੁਰਿਸ ਗਹਿਤਂ ਇਧ ਮੁਤ੍ਤਂ, ਇਧ ਤਯਾ ਗਹਿਤਂ ਤਤ੍ਰ ਮੁਤ੍ਤਨ੍ਤਿ ਏਤ੍ਥ ਅਯਮਤ੍ਥੋ – ਯਂ ਤਯਾ ਤਤ੍ਥ ਸੇਨਾਸਨਂ ਗਹਿਤਂ, ਤਂ ਤੇ ਗਣ੍ਹਨ੍ਤੇਨੇਵ ਇਧ ਮੁਤ੍ਤਂ ਹੋਤਿ. ‘‘ਇਧ ਦਾਨਾਹਂ, ਆਵੁਸੋ, ਮੁਞ੍ਚਾਮੀ’’ਤਿ ਵਦਨ੍ਤੇਨ ਪਨ ਤਂ ਤਤ੍ਰਾਪਿ ਮੁਤ੍ਤਂ. ਏਵਂ ਤ੍ਵਂ ਉਭਯਤ੍ਥ ਪਰਿਬਾਹਿਰੋਤਿ.
ਅਯਂ ਪਨੇਤ੍ਥ ਵਿਨਿਚ੍ਛਯੋ – ਗਹਣੇਨ ਗਹਣਂ ਪਟਿਪ੍ਪਸ੍ਸਮ੍ਭਤਿ, ਗਹਣੇਨ ਆਲਯੋ ਪਟਿਪ੍ਪਸ੍ਸਮ੍ਭਤਿ, ਆਲਯੇਨ ਗਹਣਂ ਪਟਿਪ੍ਪਸ੍ਸਮ੍ਭਤਿ, ਆਲਯੇਨ ਆਲਯੋ ਪਟਿਪ੍ਪਸ੍ਸਮ੍ਭਤਿ. ਕਥਂ? ਇਧੇਕਚ੍ਚੋ ਵਸ੍ਸੂਪਨਾਯਿਕਦਿਵਸੇ ਏਕਸ੍ਮਿਂ ਵਿਹਾਰੇ ਸੇਨਾਸਨਂ ਗਹੇਤ੍ਵਾ ਸਾਮਨ੍ਤਵਿਹਾਰਂ ਗਨ੍ਤ੍ਵਾ ਤਤ੍ਰਾਪਿ ਗਣ੍ਹਾਤਿ, ਤਸ੍ਸ ਇਮਿਨਾ ਗਹਣੇਨ ਪੁਰਿਮਂ ਗਹਣਂ ਪਟਿਪ੍ਪਸ੍ਸਮ੍ਭਤਿ. ਅਪਰੋ ‘‘ਇਧ ਵਸਿਸ੍ਸਾਮੀ’’ਤਿ ਆਲਯਮਤ੍ਤਂ ਕਤ੍ਵਾ ਸਾਮਨ੍ਤਵਿਹਾਰਂ ਗਨ੍ਤ੍ਵਾ ਤਤ੍ਥ ਸੇਨਾਸਨਂ ਗਣ੍ਹਾਤਿ, ਤਸ੍ਸ ਇਮਿਨਾ ਗਹਣੇਨ ਪੁਰਿਮੋ ਆਲਯੋ ਪਟਿਪ੍ਪਸ੍ਸਮ੍ਭਤਿ. ਏਕੋ ‘‘ਇਧ ਵਸਿਸ੍ਸਾਮੀ’’ਤਿ ਸੇਨਾਸਨਂ ਵਾ ਗਹੇਤ੍ਵਾ ਆਲਯਂ ਵਾ ਕਤ੍ਵਾ ਸਾਮਨ੍ਤਵਿਹਾਰਂ ਗਨ੍ਤ੍ਵਾ ‘‘ਇਧੇਵ ਦਾਨਿ ਵਸਿਸ੍ਸਾਮੀ’’ਤਿ ਆਲਯਂ ਕਰੋਤਿ, ਇਚ੍ਚਸ੍ਸ ਆਲਯੇਨ ਵਾ ਗਹਣਂ ਆਲਯੇਨ ਵਾ ਆਲਯੋ ਪਟਿਪ੍ਪਸ੍ਸਮ੍ਭਤਿ, ਸਬ੍ਬਤ੍ਥ ਪਚ੍ਛਿਮੇ ਗਹਣੇ ਵਾ ਆਲਯੇ ਵਾ ਤਿਟ੍ਠਤਿ. ਯੋ ਪਨ ‘‘ਏਕਸ੍ਮਿਂ ਵਿਹਾਰੇ ਸੇਨਾਸਨਂ ਗਹੇਤ੍ਵਾ ਅਞ੍ਞਸ੍ਮਿਂ ਵਿਹਾਰੇ ਵਸਿਸ੍ਸਾਮੀ’’ਤਿ ਗਚ੍ਛਤਿ, ਤਸ੍ਸ ਉਪਚਾਰਸੀਮਾਤਿਕ੍ਕਮੇ ਸੇਨਾਸਨਗ੍ਗਾਹੋ ਪਟਿਪ੍ਪਸ੍ਸਮ੍ਭਤਿ. ਯਦਿ ਪਨ ‘‘ਤਤ੍ਥ ਫਾਸੁ ਭਵਿਸ੍ਸਤਿ, ਵਸਿਸ੍ਸਾਮਿ; ਨੋ ਚੇ, ਆਗਮਿਸ੍ਸਾਮੀ’’ਤਿ ਗਨ੍ਤ੍ਵਾ ਅਫਾਸੁਭਾਵਂ ਞਤ੍ਵਾ ਪਚ੍ਚਾਗਚ੍ਛਤਿ, ਵਟ੍ਟਤਿ.
੩੨੦. ਤਿਵਸ੍ਸਨ੍ਤਰੇਨਾਤਿ ਏਤ੍ਥ ਤਿਵਸ੍ਸਨ੍ਤਰੋ ਨਾਮ ਯੋ ਦ੍ਵੀਹਿ ਵਸ੍ਸੇਹਿ ਮਹਨ੍ਤਤਰੋ ਵਾ ਦਹਰਤਰੋ ਵਾ ਹੋਤਿ. ਯੋ ਪਨ ਏਕੇਨ ਵਸ੍ਸੇਨ ਮਹਨ੍ਤਤਰੋ ਵਾ ਦਹਰਤਰੋ ਵਾ ਹੋਤਿ, ਯੋ ਵਾ ਸਮਾਨਵਸ੍ਸੋ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥਿ. ਇਮੇ ਸਬ੍ਬੇ ਏਕਸ੍ਮਿਂ ਮਞ੍ਚੇ ਵਾ ਪੀਠੇ ਵਾ ਦ੍ਵੇ ਦ੍ਵੇ ਹੁਤ੍ਵਾ ਨਿਸੀਦਿਤੁਂ ਲਭਨ੍ਤਿ. ਯਂ ਤਿਣ੍ਣਂ ਪਹੋਤਿ, ਤਂ ਸਂਹਾਰਿਮਂ ਵਾ ਹੋਤੁ ਅਸਂਹਾਰਿਮਂ ਵਾ, ਤਥਾਰੂਪੇ ਅਪਿ ਫਲਕਖਣ੍ਡੇ ਅਨੁਪਸਮ੍ਪਨ੍ਨੇਨਾਪਿ ਸਦ੍ਧਿਂ ਨਿਸੀਦਿਤੁਂ ਵਟ੍ਟਤਿ.
ਹਤ੍ਥਿਨਖਕਨ੍ਤਿ ਹਤ੍ਥਿਕੁਮ੍ਭੇ ਪਤਿਟ੍ਠਿਤਂ; ਏਵਂ ਕਤਸ੍ਸ ਕਿਰੇਤਂ ਨਾਮਂ. ਸਬ੍ਬਂ ਪਾਸਾਦਪਰਿਭੋਗਨ੍ਤਿ ਸੁਵਣ੍ਣਰਜਤਾਦਿਵਿਚਿਤ੍ਰਾਨਿ ਕਵਾਟਾਨਿ ਮਞ੍ਚਪੀਠਾਨਿ ਤਾਲਵਣ੍ਟਾਨਿ ਸੁਵਣ੍ਣਰਜਤਮਯਪਾਨੀਯਘਟਪਾਨੀਯਸਰਾਵਾਨਿ ਯਂਕਿਞ੍ਚਿ ਚਿਤ੍ਤਕਮ੍ਮਕਤਂ, ਸਬ੍ਬਂ ਵਟ੍ਟਤਿ. ‘‘ਪਾਸਾਦਸ੍ਸ ਦਾਸਿਦਾਸਂ ਖੇਤ੍ਤਵਤ੍ਥੁਂ ਗੋਮਹਿਂਸਂ ਦੇਮਾ’’ਤਿ ਵਦਨ੍ਤਿ, ਪਾਟੇਕ੍ਕਂ ਗਹਣਕਿਚ੍ਚਂ ਨਤ੍ਥਿ, ਪਾਸਾਦੇ ਪਟਿਗ੍ਗਹਿਤੇ ਪਟਿਗ੍ਗਹਿਤਮੇਵ ਹੋਤਿ. ਗੋਨਕਾਦੀਨਿ ਸਙ੍ਘਿਕਵਿਹਾਰੇ ਵਾ ਪੁਗ੍ਗਲਿਕਵਿਹਾਰੇ ਵਾ ਮਞ੍ਚਪੀਠਕੇਸੁ ਅਤ੍ਥਰਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਨ੍ਤਿ. ਧਮ੍ਮਾਸਨੇ ਪਨ ਗਿਹਿਵਿਕਟਨਿਹਾਰੇਨ ਲਬ੍ਭਨ੍ਤਿ, ਤਤ੍ਰਾਪਿ ਨਿਪਜ੍ਜਿਤੁਂ ਨ ਵਟ੍ਟਤਿ.
ਉਪਨਨ੍ਦਵਤ੍ਥੁਕਥਾ ਨਿਟ੍ਠਿਤਾ.
ਅਵਿਸ੍ਸਜ੍ਜਿਯਵਤ੍ਥੁਕਥਾ
੩੨੧. ਪਞ੍ਚਿਮਾਨੀਤਿ ਰਾਸਿਵਸੇਨ ਪਞ੍ਚ, ਸਰੂਪਵਸੇਨ ਪਨੇਤਾਨਿ ਬਹੂਨਿ ਹੋਨ੍ਤਿ. ਤਤ੍ਥ ਆਰਾਮੋ ਨਾਮ ਪੁਪ੍ਫਾਰਾਮੋ ਵਾ ਫਲਾਰਾਮੋ ਵਾ. ਆਰਾਮਵਤ੍ਥੁ ਨਾਮ ਤੇਸਂਯੇਵ ਆਰਾਮਾਨਂ ਅਤ੍ਥਾਯ ਪਰਿਚ੍ਛਿਨ੍ਦਿਤ੍ਵਾ ਠਪਿਤੋਕਾਸੋ; ਤੇਸੁ ਵਾ ਆਰਾਮੇਸੁ ਵਿਨਟ੍ਠੇਸੁ ਤੇਸਂ ਪੋਰਾਣਕਭੂਮਿਭਾਗੋ. ਵਿਹਾਰੋ ਨਾਮ ਯਂਕਿਞ੍ਚਿ ਪਾਸਾਦਾਦਿਸੇਨਾਸਨਂ. ਵਿਹਾਰਵਤ੍ਥੁ ਨਾਮ ਤਸ੍ਸ ਪਤਿਟ੍ਠਾਨੋਕਾਸੋ. ਮਞ੍ਚੋ ਨਾਮ – ਮਸਾਰਕੋ, ਬੁਨ੍ਦਿਕਾਬਦ੍ਧੋ, ਕੁਲ਼ੀਰਪਾਦਕੋ ਆਹਚ੍ਚਪਾਦਕੋਤਿ ਇਮੇਸਂ ਪੁਬ੍ਬੇ ਵੁਤ੍ਤਾਨਂ ਚਤੁਨ੍ਨਂ ਮਞ੍ਚਾਨਂ ਅਞ੍ਞਤਰੋ. ਪੀਠਂ ਨਾਮ ਮਸਾਰਕਾਦੀਨਂਯੇਵ ਚਤੁਨ੍ਨਂ ਪੀਠਾਨਂ ਅਞ੍ਞਤਰਂ. ਭਿਸਿ ਨਾਮ ਉਣ੍ਣਭਿਸਿਆਦੀਨਂ ਪਞ੍ਚਨ੍ਨਂ ਅਞ੍ਞਤਰਾ. ਬਿਮ੍ਬੋਹਨਂ ਨਾਮ ਵੁਤ੍ਤਪ੍ਪਕਾਰਾਨਂ ਬਿਮ੍ਬੋਹਨਾਨਂ ਅਞ੍ਞਤਰਂ. ਲੋਹਕੁਮ੍ਭੀ ਨਾਮ ਕਾਲ਼ਲੋਹੇਨ ਵਾ ਤਮ੍ਬਲੋਹੇਨ ਵਾ ਯੇਨ ਕੇਨਚਿ ਲੋਹੇਨ ਕਤਾ ਕੁਮ੍ਭੀ. ਲੋਹਭਾਣਕਾਦੀਸੁਪਿ ਏਸੇਵ ਨਯੋ. ਏਤ੍ਥ ਪਨ ਭਾਣਕਨ੍ਤਿ ਅਰਞ੍ਜਰੋ ਵੁਚ੍ਚਤਿ. ਵਾਰਕੋਤਿ ਘਟੋ. ਕਟਾਹਂ ਕਟਾਹਮੇਵ. ਵਾਸਿਆਦੀਸੁ ਵਲ੍ਲਿਆਦੀਸੁ ਚ ਦੁਵਿਞ੍ਞੇਯ੍ਯਂ ਨਾਮ ਨਤ੍ਥਿ. ਏਵਂ –
ਦ੍ਵਿਸਙ੍ਗਹਾਨਿ ਦ੍ਵੇ ਹੋਨ੍ਤਿ, ਤਤਿਯਂ ਚਤੁਸਙ੍ਗਹਂ;
ਚਤੁਤ੍ਥਂ ਨਵਕੋਟ੍ਠਾਸਂ, ਪਞ੍ਚਮਂ ਅਟ੍ਠਭੇਦਨਂ.
ਇਤਿ ਪਞ੍ਚਹਿ ਰਾਸੀਹਿ, ਪਞ੍ਚਨਿਮ੍ਮਲਲੋਚਨੋ;
ਪਞ੍ਚਵੀਸਵਿਧਂ ਨਾਥੋ, ਗਰੁਭਣ੍ਡਂ ਪਕਾਸਯਿ.
ਤਤ੍ਰਾਯਂ ਵਿਨਿਚ੍ਛਯਕਥਾ – ਇਦਞ੍ਹਿ ਸਬ੍ਬਮ੍ਪਿ ਗਰੁਭਣ੍ਡਂ ਇਧ ਅਵਿਸ੍ਸਜ੍ਜਿਯਂ, ਕੀਟਾਗਿਰਿਵਤ੍ਥੁਸ੍ਮਿਂ ‘‘ਅਵੇਭਙ੍ਗਿਯ’’ਨ੍ਤਿ ਵੁਤ੍ਤਂ. ਪਰਿਵਾਰੇ ਪਨ –
‘‘ਅਵਿਸ੍ਸਜ੍ਜਿਯਂ ਅਵੇਭਙ੍ਗਿਯਂ, ਪਞ੍ਚ ਵੁਤ੍ਤਾ ਮਹੇਸਿਨਾ;
ਵਿਸ੍ਸਜ੍ਜੇਨ੍ਤਸ੍ਸ ਪਰਿਭੁਞ੍ਜਨ੍ਤਸ੍ਸ ਅਨਾਪਤ੍ਤਿ,
ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੭੯) –
ਆਗਤਂ. ਤਸ੍ਮਾ ਮੂਲਚ੍ਛੇਜ੍ਜਵਸੇਨ ਅਵਿਸ੍ਸਜ੍ਜਿਯਂ ਅਵੇਭਙ੍ਗਿਯਞ੍ਚ ਪਰਿਵਤ੍ਤਨਵਸੇਨ ਪਨ ਵਿਸ੍ਸਜ੍ਜੇਨ੍ਤਸ੍ਸ ਪਰਿਭੁਞ੍ਜਨ੍ਤਸ੍ਸ ਚ ਅਨਾਪਤ੍ਤੀਤਿ ਏਵਮੇਤ੍ਥ ਅਧਿਪ੍ਪਾਯੋ ਵੇਦਿਤਬ੍ਬੋ.
ਤਤ੍ਰਾਯਂ ਅਨੁਪੁਬ੍ਬਿਕਥਾ – ਇਦਂ ਤਾਵ ਪਞ੍ਚਵਿਧਮ੍ਪਿ ਚੀਵਰਪਿਣ੍ਡਪਾਤਭੇਸਜ੍ਜਤ੍ਥਾਯ ਉਪਨੇਤੁਂ ਨ ਵਟ੍ਟਤਿ. ਥਾਵਰੇਨ ਚ ਥਾਵਰਂ ਗਰੁਭਣ੍ਡੇਨ ਚ ਗਰੁਭਣ੍ਡਂ ਪਰਿਵਤ੍ਤੇਤੁਂ ਵਟ੍ਟਤਿ. ਥਾਵਰੇ ਪਨ ਖੇਤ੍ਤਂ ਵਤ੍ਥੁ ਤਲ਼ਾਕਂ ਮਾਤਿਕਾਤਿ ਏਵਰੂਪਂ ਭਿਕ੍ਖੁਸਙ੍ਘਸ੍ਸ ਵਿਚਾਰੇਤੁਂ ਵਾ ਸਮ੍ਪਟਿਚ੍ਛਿਤੁਂ ਵਾ ਅਧਿਵਾਸੇਤੁਂ ਵਾ ਨ ਵਟ੍ਟਤਿ, ਕਪ੍ਪਿਯਕਾਰਕੇਹੇਵ ਵਿਚਾਰਿਤਤੋ ਕਪ੍ਪਿਯਭਣ੍ਡਂ ਵਟ੍ਟਤਿ. ਆਰਾਮੇਨ ਪਨ ਆਰਾਮਂ ਆਰਾਮਵਤ੍ਥੁਂ ਵਿਹਾਰਂ ਵਿਹਾਰਵਤ੍ਥੁਨ੍ਤਿ ਇਮਾਨਿ ਚਤ੍ਤਾਰਿ ਪਰਿਵਤ੍ਤੇਤੁਂ ਵਟ੍ਟਤਿ.
ਤਤ੍ਰਾਯਂ ਪਰਿਵਤ੍ਤਨਨਯੋ – ਸਙ੍ਘਸ੍ਸ ਨਾਲ਼ਿਕੇਰਾਰਾਮੋ ਦੂਰੇ ਹੋਤਿ, ਕਪ੍ਪਿਯਕਾਰਕਾ ਵਾ ਬਹੁਤਰਂ ਖਾਦਨ੍ਤਿ. ਯਮ੍ਪਿ ਨ ਖਾਦਨ੍ਤਿ, ਤਤੋ ਸਕਟਵੇਤਨਂ ਦਤ੍ਵਾ ਅਪ੍ਪਮੇਵ ਹਰਨ੍ਤਿ. ਅਞ੍ਞੇਸਂ ਪਨ ਤਸ੍ਸ ਆਰਾਮਸ੍ਸ ਅਵਿਦੂਰਗਾਮਵਾਸੀਨਂ ਮਨੁਸ੍ਸਾਨਂ ਵਿਹਾਰਸ੍ਸ ਸਮੀਪੇ ਆਰਾਮੋ ਹੋਤਿ, ਤੇ ਸਙ੍ਘਂ ਉਪਸਙ੍ਕਮਿਤ੍ਵਾ ਸਕੇਨ ਆਰਾਮੇਨ ਤਂ ਆਰਾਮਂ ਯਾਚਨ੍ਤਿ, ਸਙ੍ਘੇਨ ‘‘ਰੁਚ੍ਚਤਿ ਸਙ੍ਘਸ੍ਸਾ’’ਤਿ ਅਪਲੋਕੇਤ੍ਵਾ ਸਮ੍ਪਟਿਚ੍ਛਿਤਬ੍ਬੋ. ਸਚੇਪਿ ਭਿਕ੍ਖੂਨਂ ਰੁਕ੍ਖਸਹਸ੍ਸਂ ਹੋਤਿ, ਮਨੁਸ੍ਸਾਨਂ ਪਞ੍ਚ ਸਤਾਨਿ, ‘‘ਤੁਮ੍ਹਾਕਂ ਆਰਾਮੋ ਖੁਦ੍ਦਕੋ’’ਤਿ ਨ ਵਤ੍ਤਬ੍ਬਂ. ਕਿਞ੍ਚਾਪਿ ਹਿ ਅਯਂ ਖੁਦ੍ਦਕੋ, ਅਥ ਖੋ ਇਤਰਤੋ ਬਹੁਤਰਂ ਆਯਂ ਦੇਤਿ. ਸਚੇਪਿ ਸਮਕਮੇਵ ਦੇਤਿ; ਏਵਮ੍ਪਿ ਇਚ੍ਛਿਤਿਚ੍ਛਿਤਕ੍ਖਣੇ ਪਰਿਭੁਞ੍ਜਿਤੁਂ ਸਕ੍ਕਾਤਿ ਗਹੇਤਬ੍ਬਮੇਵ. ਸਚੇ ਪਨ ਮਨੁਸ੍ਸਾਨਂ ਬਹੁਤਰਾ ਰੁਕ੍ਖਾ ਹੋਨ੍ਤਿ, ‘‘ਨਨੁ ਤੁਮ੍ਹਾਕਂ ਬਹੁਤਰਾ ਰੁਕ੍ਖਾ’’ਤਿ ਵਤ੍ਤਬ੍ਬਂ. ਸਚੇ ‘‘ਅਤਿਰੇਕਂ ਅਮ੍ਹਾਕਂ ਪੁਞ੍ਞਂ ਹੋਤੁ, ਸਙ੍ਘਸ੍ਸ ਦੇਮਾ’’ਤਿ ਵਦਨ੍ਤਿ, ਜਾਨਾਪੇਤ੍ਵਾ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਭਿਕ੍ਖੂਨਂ ਰੁਕ੍ਖਾ ਫਲਧਾਰਿਨੋ, ਮਨੁਸ੍ਸਾਨਂ ਰੁਕ੍ਖਾ ਨ ਤਾਵ ਫਲਂ ਗਣ੍ਹਨ੍ਤਿ, ਕਿਞ੍ਚਾਪਿ ਨ ਗਣ੍ਹਨ੍ਤਿ, ਨ ਚਿਰੇਨ ਗਣ੍ਹਿਸ੍ਸਨ੍ਤੀਤਿ ਸਮ੍ਪਟਿਚ੍ਛਿਤਬ੍ਬਮੇਵ. ਮਨੁਸ੍ਸਾਨਂ ਰੁਕ੍ਖਾ ਫਲਧਾਰਿਨੋ, ਭਿਕ੍ਖੂਨਂ ਨ ਤਾਵ ਫਲਂ ਗਣ੍ਹਨ੍ਤਿ, ‘‘ਨਨੁ ਤੁਮ੍ਹਾਕਂ ਰੁਕ੍ਖਾ ਫਲਧਾਰਿਨੋ’’ਤਿ ਵਤ੍ਤਬ੍ਬਂ. ਸਚੇ ‘‘ਗਣ੍ਹਥ, ਭਨ੍ਤੇ, ਅਮ੍ਹਾਕਂ ਪੁਞ੍ਞਂ ਭਵਿਸ੍ਸਤੀ’’ਤਿ ਦੇਨ੍ਤਿ, ਜਾਨਾਪੇਤ੍ਵਾ ਸਮ੍ਪਟਿਚ੍ਛਿਤੁਂ ਵਟ੍ਟਤਿ; ਏਵਂ ਆਰਾਮੇਨ ਆਰਾਮੋ ਪਰਿਵਤ੍ਤੇਤਬ੍ਬੋ. ਏਤੇਨੇਵ ਨਯੇਨ ਆਰਾਮਵਤ੍ਥੁਪਿ ਵਿਹਾਰੋਪਿ ਵਿਹਾਰਵਤ੍ਥੁਪਿ ਆਰਾਮੇਨ ਪਰਿਵਤ੍ਤੇਤਬ੍ਬਂ. ਆਰਾਮਵਤ੍ਥੁਨਾ ਚ ਮਹਨ੍ਤੇਨ ਵਾ ਖੁਦ੍ਦਕੇਨ ਵਾ ਆਰਾਮਆਰਾਮਵਤ੍ਥੁ ਵਿਹਾਰਵਿਹਾਰਵਤ੍ਥੂਨਿ.
ਕਥਂ ਵਿਹਾਰੇਨ ਵਿਹਾਰੋ ਪਰਿਵਤ੍ਤੇਤਬ੍ਬੋ? ਸਙ੍ਘਸ੍ਸ ਅਨ੍ਤੋਗਾਮੇ ਗੇਹਂ ਹੋਤਿ, ਮਨੁਸ੍ਸਾਨਂ ਵਿਹਾਰਮਜ੍ਝੇ ਪਾਸਾਦੋ, ਉਭੋਪਿ ਅਗ੍ਘੇਨ ਸਮਕਾ, ਸਚੇ ਮਨੁਸ੍ਸਾ ਤੇਨ ਪਾਸਾਦੇਨ ਤਂ ਗੇਹਂ ਯਾਚਨ੍ਤਿ, ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਭਿਕ੍ਖੂਨਂ ਚੇ ਮਹਗ੍ਘਤਰਂ ਗੇਹਂ ਹੋਤਿ, ‘‘ਮਹਗ੍ਘਤਰਂ ਅਮ੍ਹਾਕਂ ਗੇਹ’’ਨ੍ਤਿ ਵੁਤ੍ਤੇ ‘‘ਕਿਞ੍ਚਾਪਿ ਮਹਗ੍ਘਤਰਂ, ਪਬ੍ਬਜਿਤਾਨਂ ਅਸਾਰੁਪ੍ਪਂ, ਨ ਸਕ੍ਕਾ ਤਤ੍ਥ ਪਬ੍ਬਜਿਤੇਹਿ ਵਸਿਤੁਂ, ਇਦਂ ਪਨ ਸਾਰੁਪ੍ਪਂ ਗਣ੍ਹਥਾ’’ਤਿ ਵਦਨ੍ਤਿ; ਏਵਮ੍ਪਿ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਸਚੇ ਪਨ ਮਨੁਸ੍ਸਾਨਂ ਮਹਗ੍ਘਂ ਹੋਤਿ, ‘‘ਨਨੁ ਤੁਮ੍ਹਾਕਂ ਗੇਹਂ ਮਹਗ੍ਘ’’ਨ੍ਤਿ ਵਤ੍ਤਬ੍ਬਂ. ‘‘ਹੋਤੁ, ਭਨ੍ਤੇ, ਅਮ੍ਹਾਕਂ ਪੁਞ੍ਞਂ ਭਵਿਸ੍ਸਤਿ, ਗਣ੍ਹਥਾ’’ਤਿ ਵੁਤ੍ਤੇ ਪਨ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਏਵਂ ਵਿਹਾਰੇਨ ਵਿਹਾਰੋ ਪਰਿਵਤ੍ਤੇਤਬ੍ਬੋ. ਏਤੇਨੇਵ ਨਯੇਨ ਵਿਹਾਰਵਤ੍ਥੁਪਿ ਆਰਾਮੋਪਿ ਆਰਾਮਵਤ੍ਥੁਪਿ ਵਿਹਾਰੇਨ ਪਰਿਵਤ੍ਤੇਤਬ੍ਬਂ. ਵਿਹਾਰਵਤ੍ਥੁਨਾ ਚ ਮਹਗ੍ਘੇਨ ਵਾ ਅਪ੍ਪਗ੍ਘੇਨ ਵਾ ਵਿਹਾਰਵਿਹਾਰਵਤ੍ਥੁਆਰਾਮਆਰਾਮਵਤ੍ਥੂਨਿ. ਏਵਂ ਤਾਵ ਥਾਵਰੇਨ ਥਾਵਰਪਰਿਵਤ੍ਤਨਂ ਵੇਦਿਤਬ੍ਬਂ.
ਗਰੁਭਣ੍ਡੇਨ ਗਰੁਭਣ੍ਡਪਰਿਵਤ੍ਤਨੇ ਪਨ ਮਞ੍ਚਪੀਠਂ ਮਹਨ੍ਤਂ ਵਾ ਹੋਤੁ ਖੁਦ੍ਦਕਂ ਵਾ, ਅਨ੍ਤਮਸੋ ਚਤੁਰਙ੍ਗੁਲਪਾਦਕਂ ਵਾ ਗਾਮਦਾਰਕੇਹਿ ਪਂਸ੍ਵਾਗਾਰਕੇਸੁ ਕੀਲ਼ਨ੍ਤੇਹਿ ਕਤਮ੍ਪਿ ਸਙ੍ਘਸ੍ਸ ਦਿਨ੍ਨਕਾਲਤੋ ਪਟ੍ਠਾਯ ਗਰੁਭਣ੍ਡਂ ਹੋਤਿ. ਸਚੇਪਿ ਰਾਜਰਾਜਮਹਾਮਤ੍ਤਾਦਯੋ ਏਕਪ੍ਪਹਾਰੇਨੇਵ ਮਞ੍ਚਸਤਂ ਵਾ ਮਞ੍ਚਸਹਸ੍ਸਂ ਵਾ ਦੇਨ੍ਤਿ, ਸਬ੍ਬੇ ਕਪ੍ਪਿਯਮਞ੍ਚਾ ਸਮ੍ਪਟਿਚ੍ਛਿਤਬ੍ਬਾ, ਸਮ੍ਪਟਿਚ੍ਛਿਤ੍ਵਾ ਵੁਡ੍ਢਪਟਿਪਾਟਿਯਾ ‘‘ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਥਾ’’ਤਿ ਦਾਤਬ੍ਬਾ, ਪੁਗ੍ਗਲਿਕਵਸੇਨ ਨ ਦਾਤਬ੍ਬਾ. ਅਤਿਰੇਕਮਞ੍ਚੇ ਭਣ੍ਡਾਗਾਰਾਦੀਸੁ ਪਞ੍ਞਪੇਤ੍ਵਾ ਪਤ੍ਤਚੀਵਰਂ ਨਿਕ੍ਖਿਪਿਤੁਮ੍ਪਿ ਵਟ੍ਟਤਿ. ਬਹਿਸੀਮਾਯ ‘‘ਸਙ੍ਘਸ੍ਸ ਦੇਮਾ’’ਤਿ ਦਿਨ੍ਨਮਞ੍ਚੋ ਸਙ੍ਘਤ੍ਥੇਰਸ੍ਸ ਵਸਨਟ੍ਠਾਨੇ ਦਾਤਬ੍ਬੋ. ਤਤ੍ਥ ਚੇ ਬਹੂ ਮਞ੍ਚਾ ਹੋਨ੍ਤਿ, ਮਞ੍ਚੇਨ ਕਮ੍ਮਂ ਨਤ੍ਥਿ; ਯਸ੍ਸ ਵਸਨਟ੍ਠਾਨੇ ਕਮ੍ਮਂ ਅਤ੍ਥਿ, ਤਤ੍ਥ ‘‘ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਥਾ’’ਤਿ ਦਾਤਬ੍ਬੋ. ਮਹਗ੍ਘੇਨ ਸਤਗ੍ਘਨਕੇਨ ਵਾ ਸਹਸ੍ਸਗ੍ਘਨਕੇਨ ਵਾ ਸਤਸਹਸ੍ਸਗ੍ਘਨਕੇਨ ਵਾ ਮਞ੍ਚੇਨ ਅਞ੍ਞਂ ਮਞ੍ਚਸਤਂ ਲਭਤਿ, ਪਰਿਵਤ੍ਤੇਤ੍ਵਾ ਗਹੇਤਬ੍ਬਂ. ਨ ਕੇਵਲਂ ਮਞ੍ਚੇਨ ਮਞ੍ਚੋਯੇਵ, ਆਰਾਮਆਰਾਮਵਤ੍ਥੁਵਿਹਾਰਵਿਹਾਰਵਤ੍ਥੁਪੀਠਭਿਸਿਬਿਮ੍ਬੋਹਨਾਨਿਪਿ ਪਰਿਵਤ੍ਤੇਤੁਂ ਵਟ੍ਟਨ੍ਤਿ. ਏਸ ਨਯੋ ਪੀਠਭਿਸਿਬਿਮ੍ਬੋਹਨੇਸੁਪਿ. ਏਤੇਸੁ ਹਿ ਕਪ੍ਪਿਯਾਕਪ੍ਯਿਯਂ ਵੁਤ੍ਤਨਯਮੇਵ. ਤਤ੍ਥ ਅਕਪ੍ਪਿਯਂ ਨ ਪਰਿਭੁਞ੍ਜਿਤਬ੍ਬਂ, ਕਪ੍ਪਿਯਂ ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਿਤਬ੍ਬਂ. ਅਕਪ੍ਪਿਯਂ ਵਾ ਮਹਗ੍ਘਂ ਕਪ੍ਪਿਯਂ ਵਾ ਪਰਿਵਤ੍ਤੇਤ੍ਵਾ ਵੁਤ੍ਤਵਤ੍ਥੂਨਿ ਗਹੇਤਬ੍ਬਾਨਿ. ਅਗਰੁਭਣ੍ਡੁਪਗਂ ਪਨ ਭਿਸਿਬਿਮ੍ਬੋਹਨਂ ਨਾਮ ਨਤ੍ਥਿ.
ਲੋਹਕੁਮ੍ਭੀ ਲੋਹਭਾਣਕਂ ਲੋਹਕਟਾਹਨ੍ਤਿ ਇਮਾਨਿ ਤੀਣਿ ਮਹਨ੍ਤਾਨਿ ਵਾ ਹੋਨ੍ਤੁ ਖੁਦ੍ਦਕਾਨਿ ਵਾ ਅਨ੍ਤਮਸੋ ਪਸਤਮਤ੍ਤਉਦਕਗਣ੍ਹਨਕਾਨਿਪਿ ਗਰੁਭਣ੍ਡਾਨਿਯੇਵ. ਲੋਹਵਾਰਕੋ ਪਨ ਕਾਲ਼ਲੋਹਤਮ੍ਬਲੋਹਵਟ੍ਟਲੋਹਕਂਸਲੋਹਾਨਂ ਯੇਨ ਕੇਨਚਿ ਕਤੋ ਸੀਹਲ਼ਦੀਪੇ ਪਾਦਗਣ੍ਹਨਕੋ ਭਾਜੇਤਬ੍ਬੋ. ਪਾਦੋ ਚ ਨਾਮ ਮਗਧਨਾਲ਼ਿਯਾ ਪਞ੍ਚਨਾਲ਼ਿਮਤ੍ਤਂ ਗਣ੍ਹਾਤਿ, ਤਤੋ ਅਧਿਕਗਣ੍ਹਨਕੋ ਗਰੁਭਣ੍ਡਂ. ਇਮਾਨਿ ਤਾਵ ਪਾਲ਼ਿਯਂ ਆਗਤਾਨਿ ਲੋਹਭਾਜਨਾਨਿ.
ਪਾਲ਼ਿਯਂ ਪਨ ਅਨਾਗਤਾਨਿਪਿ ਭਿਙ੍ਗਾਰਪਟਿਗ੍ਗਹਉਲ਼ੁਙ੍ਕਦਬ੍ਬਿਕਟਚ੍ਛੁਪਾਤਿਤਟ੍ਟਕਸਰਕਸਮੁਗ੍ਗਅਙ੍ਗਾਰਕਪਲ੍ਲਧੂਮਕਟਚ੍ਛੁਆਦੀਨਿ ਖੁਦ੍ਦਕਾਨਿ ਵਾ ਮਹਨ੍ਤਾਨਿ ਵਾ ਸਬ੍ਬਾਨਿ ਗਰੁਭਣ੍ਡਾਨਿ. ਪਤ੍ਤੋ, ਅਯਥਾਲਕਂ, ਤਮ੍ਬਲੋਹਥਾਲਕਨ੍ਤਿ ਇਮਾਨਿ ਪਨ ਭਾਜਨੀਯਾਨਿ. ਕਂਸਲੋਹਵਟ੍ਟਲੋਹਭਾਜਨਵਿਕਤਿ ਸਙ੍ਘਿਕਪਰਿਭੋਗੇਨ ਵਾ ਗਿਹਿਵਿਕਟਾ ਵਾ ਵਟ੍ਟਤਿ, ਪੁਗ੍ਗਲਿਕਪਰਿਭੋਗੇਨ ਨ ਵਟ੍ਟਤਿ. ਕਂਸਲੋਹਾਦਿਭਾਜਨਂ ਸਙ੍ਘਸ੍ਸ ਦਿਨ੍ਨਮ੍ਪਿ ਹਿ ਪਾਰਿਹਾਰਿਯਂ ਨ ਵਟ੍ਟਤਿ. ‘‘ਗਿਹਿਵਿਕਟਨਿਹਾਰੇਨੇਵ ਪਰਿਭੁਞ੍ਜਿਤਬ੍ਬ’’ਨ੍ਤਿ ਮਹਾਪਚ੍ਚਰਿਯਂ ਵੁਤ੍ਤਂ.
ਠਪੇਤ੍ਵਾ ਪਨ ਭਾਜਨਵਿਕਤਿਂ ਅਞ੍ਞਸ੍ਮਿਮ੍ਪਿ ਕਪ੍ਪਿਯਲੋਹਭਣ੍ਡੇ – ਅਞ੍ਜਨੀ, ਅਞ੍ਜਨਿਸਲਾਕਾ, ਕਣ੍ਣਮਲਹਰਣੀ, ਸੂਚਿ, ਪਣ੍ਣਸੂਚਿ, ਖੁਦ੍ਦਕੋ, ਪਿਪ੍ਫਲਕੋ, ਖੁਦ੍ਦਕਂ, ਆਰਕਣ੍ਟਕਂ, ਕੁਞ੍ਚਿਕਾ, ਤਾਲ਼ਂ, ਕਤ੍ਤਰਯਟ੍ਠਿ ਵੇਧਕੋ, ਨਤ੍ਥੁਦਾਨਂ, ਭਿਨ੍ਦਿਵਾਲੋ, ਲੋਹਕੂਟੋ, ਲੋਹਕੁਟ੍ਟਿ, ਲੋਹਗੁਲ਼ੋ, ਲੋਹਪਿਣ੍ਡਿ, ਲੋਹਚਕ੍ਕਲਿਕਂ, ਅਞ੍ਞਮ੍ਪਿ ਵਿਪ੍ਪਕਤਲੋਹਭਣ੍ਡਂ ਭਾਜਨੀਯਂ. ਧੂਮਨੇਤ੍ਤਫਾਲਦੀਪਰੁਕ੍ਖਦੀਪਕਪਲ੍ਲਕਓਲਮ੍ਬਕਦੀਪਇਤ੍ਥਿਪੁਰਿਸਤਿਰਚ੍ਛਾਨਗਤਰੂਪਕਾਨਿ ਪਨ ਅਞ੍ਞਾਨਿ ਵਾ ਭਿਤ੍ਤਿਚ੍ਛਦਨਕਵਾਟਾਦੀਸੁ ਉਪਨੇਤਬ੍ਬਾਨਿ, ਅਨ੍ਤਮਸੋ ਲੋਹਖਿਲਕਂ ਉਪਾਦਾਯ ਸਬ੍ਬਾਨਿ ਲੋਹਭਣ੍ਡਾਨਿ ਗਰੁਭਣ੍ਡਾਨਿਯੇਵ ਹੋਨ੍ਤਿ, ਅਤ੍ਤਨਾ ਲਦ੍ਧਾਨਿਪਿ ਪਰਿਹਰਿਤ੍ਵਾ ਪੁਗ੍ਗਲਿਕਪਰਿਭੋਗੇਨ ਨ ਪਰਿਭੁਞ੍ਜਿਤਬ੍ਬਾਨਿ, ਸਙ੍ਘਿਕਪਰਿਭੋਗੇਨ ਵਾ ਗਿਹਿਵਿਕਟਾਨਿ ਵਾ ਵਟ੍ਟਨ੍ਤਿ. ਤਿਪੁਭਣ੍ਡੇਪਿ ਏਸੇਵ ਨਯੋ. ਖੀਰਪਾਸਾਣਮਯਾਨਿ ਤਟ੍ਟਕਸਰਕਾਦੀਨਿ ਗਰੁਭਣ੍ਡਾਨਿਯੇਵ.
ਘਟਕੋ ਪਨ ਤੇਲਭਾਜਨਂ ਵਾ ਪਾਦਗਣ੍ਹਨਕਤੋ ਅਤਿਰੇਕਮੇਵ ਗਰੁਭਣ੍ਡਂ. ਸੁਵਣ੍ਣਰਜਤਹਾਰਕੂਟਜਾਤਿਫਲਿਕਭਾਜਨਾਨਿ ਗਿਹਿਵਿਕਟਾਨਿਪਿ ਨ ਵਟ੍ਟਨ੍ਤਿ, ਪਗੇਵ ਸਙ੍ਘਿਕਪਰਿਭੋਗੇਨ ਵਾ ਪੁਗ੍ਗਲਿਕਪਰਿਭੋਗੇਨ ਵਾ. ਸੇਨਾਸਨਪਰਿਭੋਗੇ ਪਨ ਆਮਾਸਮ੍ਪਿ ਅਨਾਮਾਸਮ੍ਪਿ ਸਬ੍ਬਂ ਵਟ੍ਟਤਿ.
ਵਾਸਿਆਦੀਸੁ ਯਾਯ ਵਾਸਿਯਾ ਠਪੇਤ੍ਵਾ ਦਣ੍ਡਕਟ੍ਠਚ੍ਛੇਦਨਂ ਵਾ ਉਚ੍ਛੁਤਚ੍ਛਨਂ ਵਾ ਅਞ੍ਞਂ ਮਹਾਕਮ੍ਮਂ ਕਾਤੁਂ ਨ ਸਕ੍ਕਾ, ਅਯਂ ਭਾਜਨੀਯਾ. ਤਤੋ ਮਹਤ੍ਤਰੀ ਯੇਨ ਕੇਨਚਿ ਆਕਾਰੇਨ ਕਤਾ ਵਾਸਿ ਗਰੁਭਣ੍ਡਮੇਵ. ਫਰਸੁ ਪਨ ਅਨ੍ਤਮਸੋ ਵੇਜ੍ਜਾਨਂ ਸਿਰਾਵੇਧਨਫਰਸੁਪਿ ਗਰੁਭਣ੍ਡਮੇਵ. ਕੁਠਾਰਿਯਂ ਫਰਸੁਸਦਿਸੋ ਏਵ ਵਿਨਿਚ੍ਛਯੋ. ਯਾ ਪਨ ਆਵੁਧਸਙ੍ਖੇਪੇਨ ਕਤਾ, ਅਯਂ ਅਨਾਮਾਸਾ. ਕੁਦਾਲੋ ਅਨ੍ਤਮਸੋ ਚਤੁਰਙ੍ਗੁਲਮਤ੍ਤੋਪਿ ਗਰੁਭਣ੍ਡਮੇਵ. ਨਿਖਾਦਨਂ ਚਤੁਰਸ੍ਸਮੁਖਂ ਵਾ ਹੋਤੁ ਦੋਣਿਮੁਖਂ ਵਾ ਵਙ੍ਕਂ ਵਾ ਉਜੁਕਂ ਵਾ, ਅਨ੍ਤਮਸੋ ਸਮ੍ਮੁਞ੍ਜਨਿਦਣ੍ਡਕਵੇਧਨਮ੍ਪਿ ਦਣ੍ਡਬਦ੍ਧਂ ਚੇ, ਗਰੁਭਣ੍ਡਮੇਵ. ਸਮ੍ਮੁਞ੍ਜਨਿਦਣ੍ਡਖਣਨਕਂ ਪਨ ਅਦਣ੍ਡਕਂ ਫਲਮਤ੍ਤਮੇਵ, ਯਂ ਸਕ੍ਕਾ ਸਿਪਾਟਿਕਾਯ ਪਕ੍ਖਿਪਿਤ੍ਵਾ ਪਰਿਹਰਿਤੁਂ, ਤਂ ਭਾਜਨੀਯਂ. ਸਿਖਰਮ੍ਪਿ ਨਿਖਾਦਨੇਨੇਵ ਸਙ੍ਗਹਿਤਂ. ਯੇਹਿ ਮਨੁਸ੍ਸੇਹਿ ਵਿਹਾਰੇ ਵਾਸਿਆਦੀਨਿ ਦਿਨ੍ਨਾਨਿ ਹੋਨ੍ਤਿ, ਤੇ ਚ ਘਰੇ ਦਡ੍ਢੇ ਵਾ ਚੋਰੇਹਿ ਵਾ ਵਿਲੁਤ੍ਤੇ ‘‘ਦੇਥ ਨੋ, ਭਨ੍ਤੇ, ਉਪਕਰਣੇ, ਪੁਨ ਪਾਕਤਿਕੇ ਕਰਿਸ੍ਸਾਮਾ’’ਤਿ ਵਦਨ੍ਤਿ, ਦਾਤਬ੍ਬਾ. ਸਚੇ ਆਹਰਨ੍ਤਿ, ਨ ਵਾਰੇਤਬ੍ਬਾ; ਅਨਾਹਰਨ੍ਤਾਪਿ ਨ ਚੋਦੇਤਬ੍ਬਾ.
ਕਮ੍ਮਾਰਤਟ੍ਟਕਾਰਚੁਨ੍ਦਕਾਰਨਲ਼ਕਾਰਮਣਿਕਾਰਪਤ੍ਤਬਨ੍ਧਕਾਨਂ ਅਧਿਕਰਣਿਮੁਟ੍ਠਿਕਸਣ੍ਡਾਸਤੁਲਾਦੀਨਿ ਸਬ੍ਬਾਨਿ ਲੋਹਮਯਉਪਕਰਣਾਨਿ ਸਙ੍ਘੇ ਦਿਨ੍ਨਕਾਲਤੋ ਪਟ੍ਠਾਯ ਗਰੁਭਣ੍ਡਾਨਿ. ਤਿਪੁਕੋਟ੍ਟਕਸੁਵਣ੍ਣਕਾਰਚਮ੍ਮਕਾਰਉਪਕਰਣੇਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਤਿਪੁਕੋਟ੍ਟਕਉਪਕਰਣੇਸੁਪਿ ਤਿਪੁਚ੍ਛੇਦਨਸਤ੍ਥਕਂ, ਸੁਵਣ੍ਣਕਾਰਉਪਕਰਣੇਸੁ ਸੁਵਣ੍ਣਚ੍ਛੇਦਨਸਤ੍ਥਕਂ, ਚਮ੍ਮਕਾਰਉਪਕਰਣੇਸੁ ਕਤਪਰਿਕਮ੍ਮਚਮ੍ਮਛਿਦ੍ਦਨਕਂ ਖੁਦ੍ਦਕਸਤ੍ਥਕਨ੍ਤਿ ਇਮਾਨਿ ਭਾਜਨੀਯਭਣ੍ਡਾਨਿ. ਨਹਾਪਿਤਤੁਨ੍ਨਕਾਰਉਪਕਰਣੇਸੁਪਿ ਠਪੇਤ੍ਵਾ ਮਹਾਕਤ੍ਤਰਿਂ ਮਹਾਸਣ੍ਡਾਸਂ ਮਹਾਪਿਪ੍ਫਲਕਞ੍ਚ ਸਬ੍ਬਂ ਭਾਜਨੀਯਂ. ਮਹਾਕਤ੍ਤਰਿਆਦੀਨਿ ਗਰੁਭਣ੍ਡਾਨਿ.
ਵਲ੍ਲਿਆਦੀਸੁ ਵੇਤ੍ਤਵਲ੍ਲਿਆਦਿਕਾ ਯਾ ਕਾਚਿ ਅਡ੍ਢਬਾਹੁਪ੍ਪਮਾਣਾ ਵਲ੍ਲਿ ਸਙ੍ਘਸ੍ਸ ਦਿਨ੍ਨਾ ਵਾ ਤਤ੍ਥਜਾਤਕਾ ਵਾ ਰਕ੍ਖਿਤਗੋਪਿਤਾ ਗਰੁਭਣ੍ਡਂ ਹੋਤਿ, ਸਾ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਕਤੇ ਸਚੇ ਅਤਿਰੇਕਾ ਹੋਤਿ, ਪੁਗ੍ਗਲਿਕਕਮ੍ਮੇਪਿ ਉਪਨੇਤੁਂ ਵਟ੍ਟਤਿ; ਅਰਕ੍ਖਿਤਾ ਪਨ ਗਰੁਭਣ੍ਡਮੇਵ ਨ ਹੋਤਿ. ਸੁਤ੍ਤਮਕਚਿਵਾਕਨਾਲ਼ਿਕੇਰਹੀਰਚਮ੍ਮਮਯਾ ਰਜ੍ਜੁਕਾ ਵਾ ਯੋਤ੍ਤਾਨਿ ਵਾ ਵਾਕੇ ਚ ਨਾਲ਼ਿਕੇਰਹੀਰੇ ਚ ਵਟ੍ਟੇਤ੍ਵਾ ਕਤਾ ਏਕਵਟ੍ਟਾ ਵਾ ਦ੍ਵਿਵਟ੍ਟਾ ਵਾ ਸਙ੍ਘਸ੍ਸ ਦਿਨ੍ਨਕਾਲਤੋ ਪਟ੍ਠਾਯ ਗਰੁਭਣ੍ਡਂ. ਸੁਤ੍ਤਂ ਪਨ ਅਵਟ੍ਟੇਤ੍ਵਾ ਦਿਨ੍ਨਂ ਮਕਚਿਵਾਕਨਾਲ਼ਿਕੇਰਹੀਰਾ ਚ ਭਾਜਨੀਯਾ. ਯੇਹਿ ਪਨੇਤਾਨਿ ਰਜ੍ਜੁਕਯੋਤ੍ਤਾਦੀਨਿ ਦਿਨ੍ਨਾਨਿ ਹੋਨ੍ਤਿ, ਤੇ ਅਤ੍ਤਨੋ ਕਰਣੀਯੇਨ ਹਰਨ੍ਤਾ ਨ ਵਾਰੇਤਬ੍ਬਾ.
ਯੋ ਕੋਚਿ ਅਨ੍ਤਮਸੋ ਅਟ੍ਠਙ੍ਗੁਲਸੂਚਿਦਣ੍ਡਮਤ੍ਤੋਪਿ ਵੇਲ਼ੁ ਸਙ੍ਘਸ੍ਸ ਦਿਨ੍ਨੋ ਵਾ ਤਤ੍ਥਜਾਤਕੋ ਵਾ ਰਕ੍ਖਿਤਗੋਪਿਤੋ ਗਰੁਭਣ੍ਡਂ, ਸੋਪਿ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਕਤੇ ਅਤਿਰੇਕੋ ਪੁਗ੍ਗਲਿਕਕਮ੍ਮੇ ਦਾਤੁਂ ਵਟ੍ਟਤਿ. ਪਾਦਗਣ੍ਹਨਕਤੇਲਨਾਲ਼ਿ ਪਨ ਕਤ੍ਤਰਯਟ੍ਠਿ, ਉਪਾਹਨਦਣ੍ਡਕੋ, ਛਤ੍ਤਦਣ੍ਡੋ, ਛਤ੍ਤਸਲਾਕਾਤਿ ਇਦਮੇਤ੍ਥ ਭਾਜਨੀਯਭਣ੍ਡਂ. ਦਡ੍ਢਗੇਹਮਨੁਸ੍ਸਾ ਗਣ੍ਹਿਤ੍ਵਾ ਗਚ੍ਛਨ੍ਤਾ ਨ ਵਾਰੇਤਬ੍ਬਾ. ਰਕ੍ਖਿਤਗੋਪਿਤਂ ਵੇਲ਼ੁਂ ਗਣ੍ਹਨ੍ਤੇਨ ਸਮਕਂ ਵਾ ਅਤਿਰੇਕਂ ਵਾ ਥਾਵਰਂ ਅਨ੍ਤਮਸੋ ਤਂਅਗ੍ਘਨਕਮ੍ਪਿ ਫਾਤਿਕਮ੍ਮਂ ਕਤ੍ਵਾ ਗਹੇਤਬ੍ਬੋ. ਫਾਤਿਕਮ੍ਮਂ ਅਕਤ੍ਵਾ ਗਣ੍ਹਨ੍ਤੇਨ ਤਤ੍ਥੇਵ ਵਲ਼ਞ੍ਜੇਤਬ੍ਬੋ, ਗਮਨਕਾਲੇ ਸਙ੍ਘਿਕਾਵਾਸੇ ਠਪੇਤ੍ਵਾ ਗਨ੍ਤਬ੍ਬਂ. ਅਸਤਿਯਾ ਗਹੇਤ੍ਵਾ ਗਤੇਨ ਪਹਿਣਿਤ੍ਵਾ ਦਾਤਬ੍ਬੋ. ਦੇਸਨ੍ਤਰਂ ਗਤੇਨ ਸਮ੍ਪਤ੍ਤਵਿਹਾਰੇ ਸਙ੍ਘਿਕਾਵਾਸੇ ਠਪੇਤਬ੍ਬੋ.
ਤਿਣਨ੍ਤਿ ਮੁਞ੍ਜਂ ਪਬ੍ਬਜਞ੍ਚ ਠਪੇਤ੍ਵਾ ਅਵਸੇਸਂ ਯਂਕਿਞ੍ਚਿ ਤਿਣਂ. ਯਤ੍ਥ ਪਨ ਤਿਣਂ ਨਤ੍ਥਿ, ਤਤ੍ਥ ਪਣ੍ਣੇਹਿ ਛਾਦੇਨ੍ਤਿ; ਤਸ੍ਮਾ ਪਣ੍ਣਮ੍ਪਿ ਤਿਣੇਨੇਵ ਸਙ੍ਗਹਿਤਂ. ਇਤਿ ਮੁਞ੍ਜਾਦੀਸੁ ਯਂਕਿਞ੍ਚਿ ਮੁਟ੍ਠਿਪ੍ਪਮਾਣਮ੍ਪਿ ਤਿਣਂ ਤਾਲਪਣ੍ਣਾਦੀਸੁ ਚ ਏਕਂ ਪਣ੍ਣਮ੍ਪਿ ਸਙ੍ਘਸ੍ਸ ਦਿਨ੍ਨਂ ਵਾ ਤਤ੍ਥਜਾਤਕਂ ਵਾ ਬਹਾਰਾਮੇ ਸਙ੍ਘਸ੍ਸ ਤਿਣਵਤ੍ਥੁਤੋ ਜਾਤਤਿਣਂ ਵਾ ਰਕ੍ਖਿਤਗੋਪਿਤਂ ਗਰੁਭਣ੍ਡਂ ਹੋਤਿ, ਤਮ੍ਪਿ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਕਤੇ ਅਤਿਰੇਕਂ ਪੁਗ੍ਗਲਿਕਕਮ੍ਮੇ ਦਾਤੁਂ ਵਟ੍ਟਤਿ. ਦਡ੍ਢਗੇਹਮਨੁਸ੍ਸਾ ਗਹੇਤ੍ਵਾ ਗਚ੍ਛਨ੍ਤਾ ਨ ਵਾਰੇਤਬ੍ਬਾ. ਅਟ੍ਠਙ੍ਗੁਲਪ੍ਪਮਾਣੋਪਿ ਰਿਤ੍ਤਪੋਤ੍ਥਕੋ ਗਰੁਭਣ੍ਡਮੇਵ.
ਮਤ੍ਤਿਕਾ ਪਕਤਿਮਤ੍ਤਿਕਾ ਵਾ ਹੋਤੁ ਪਞ੍ਚਵਣ੍ਣਾ ਵਾ ਸੁਧਾ ਵਾ ਸਜ੍ਜੁਰਸਕਙ੍ਗੁਟ੍ਠਸਿਲੇਸਾਦੀਸੁ ਵਾ ਯਂਕਿਞ੍ਚਿ, ਦੁਲ੍ਲਭਟ੍ਠਾਨੇ ਆਨੇਤ੍ਵਾ ਵਾ ਦਿਨ੍ਨਂ ਤਤ੍ਥਜਾਤਕਂ ਵਾ ਰਕ੍ਖਿਤਗੋਪਿਤਂ ਤਾਲਫਲਪਕ੍ਕਮਤ੍ਤਂ ਗਰੁਭਣ੍ਡਂ ਹੋਤਿ. ਤਮ੍ਪਿ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਨਿਟ੍ਠਿਤੇ ਅਤਿਰੇਕਂ ਪੁਗ੍ਗਲਿਕਕਮ੍ਮੇ ਦਾਤੁਂ ਵਟ੍ਟਤਿ. ਹਿਙ੍ਗੁਹਿਙ੍ਗੁਲਕਹਰਿਤਾਲਮਨੋਸਿਲਞ੍ਜਨਾਨਿ ਪਨ ਭਾਜਨੀਯਭਣ੍ਡਾਨਿ.
ਦਾਰੁਭਣ੍ਡੇ ਯੋ ਕੋਚਿ ਅਟ੍ਠਙ੍ਗੁਲਸੂਚਿਦਣ੍ਡਮਤ੍ਤੋਪਿ ਦਾਰੁਭਣ੍ਡਕੋ ਦਾਰੁਦੁਲ੍ਲਭਟ੍ਠਾਨੇ ਸਙ੍ਘਸ੍ਸ ਦਿਨ੍ਨੋ ਵਾ ਤਤ੍ਥਜਾਤਕੋ ਵਾ ਰਕ੍ਖਿਤਗੋਪਿਤੋ, ਅਯਂ ਗਰੁਭਣ੍ਡਂ ਹੋਤੀਤਿ ਕੁਰੁਨ੍ਦਿਯਂ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ਸਬ੍ਬਮ੍ਪਿ ਦਾਰੁਵੇਲ਼ੁਚਮ੍ਮਪਾਸਾਣਾਦਿਵਿਕਤਿਂ ਦਾਰੁਭਣ੍ਡੇਨ ਸਙ੍ਗਣ੍ਹਿਤ੍ਵਾ ‘‘ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਆਸਨ੍ਦਿਕੋ ਉਪ੍ਪਨ੍ਨੋ ਹੋਤੀ’’ਤਿ ਇਤੋ ਪਟ੍ਠਾਯ ਦਾਰੁਭਣ੍ਡਵਿਨਿਚ੍ਛਯੋ ਵੁਤ੍ਤੋ.
ਤਤ੍ਰਾਯਂ ਅਤ੍ਥੁਦ੍ਧਾਰੋ, ਆਸਨ੍ਦਿਕੋ, ਸਤ੍ਤਙ੍ਗੋ, ਭਦ੍ਦਪੀਠਂ, ਪੀਠਿਕਾ, ਏਲ਼ਕਪਾਦਕਪੀਠਂ, ਆਮਲਕਵਟ੍ਟਕਪੀਠਂ, ਫਲਕਂ, ਕੋਚ੍ਛਂ, ਪਲਾਲਪੀਠਕਨ੍ਤਿ ਇਮੇਸੁ ਤਾਵ ਯਂਕਿਞ੍ਚਿ ਖੁਦ੍ਦਕਂ ਵਾ ਹੋਤੁ ਮਹਨ੍ਤਂ ਵਾ, ਸਙ੍ਘਸ੍ਸ ਦਿਨ੍ਨਂ ਗਰੁਭਣ੍ਡਂ ਹੋਤਿ. ਪਲਾਲਪੀਠੇਨ ਚੇਤ੍ਥ ਕਦਲਿਪਤ੍ਤਾਦਿਪੀਠਾਨਿਪਿ ਸਙ੍ਗਹਿਤਾਨਿ. ਬ੍ਯਗ੍ਘਚਮ੍ਮਓਨਦ੍ਧਮ੍ਪਿ ਵਾਲ਼ਰੂਪਪਰਿਕ੍ਖਿਤ੍ਤਂ, ਰਤਨਪਰਿਸਿਬ੍ਬਿਤਂ, ਕੋਚ੍ਛਕਂ ਗਰੁਭਣ੍ਡਮੇਵ.
ਵਙ੍ਕਫਲਕਂ, ਦੀਘਫਲਕਂ, ਚੀਵਰਧੋਵਨਫਲਕਂ, ਘਟ੍ਟਨਫਲਕਂ, ਘਟ੍ਟਨਮੁਗ੍ਗਰੋ, ਦਨ੍ਤਕਟ੍ਠਚ੍ਛੇਦਨਗਣ੍ਠਿਕਾ, ਦਣ੍ਡਮੁਗ੍ਗਰੋ, ਅਮ੍ਬਣਂ, ਰਜਨਦੋਣਿ, ਉਦਕਪਟਿਚ੍ਛਕੋ, ਦਾਰੁਮਯੋ ਵਾ ਦਨ੍ਤਮਯੋ ਵਾ ਵੇਲ਼ੁਮਯੋ ਵਾ ਸਪਾਦਕੋਪਿ ਅਪਾਦਕੋਪਿ ਸਮੁਗ੍ਗੋ, ਮਞ੍ਜੂਸਾ, ਪਾਦਗਣ੍ਹਨਕਤੋ ਅਤਿਰੇਕਪ੍ਪਮਾਣੋ ਕਰਣ੍ਡੋ, ਉਦਕਦੋਣਿ, ਉਦਕਕਟਾਹਂ, ਉਲ਼ੁਙ੍ਕੋ, ਕਟਚ੍ਛੁ, ਪਾਨੀਯਸਰਾਵਂ, ਪਾਨੀਯਸਙ੍ਖੋਤਿ ਏਤੇਸੁਪਿ ਯਂਕਿਞ੍ਚਿ ਸਙ੍ਘੇ ਦਿਨ੍ਨਂ ਗਰੁਭਣ੍ਡਂ. ਸਙ੍ਖਥਾਲਕਂ ਪਨ ਭਾਜਨੀਯਂ, ਤਥਾ ਦਾਰੁਮਯੋ ਉਦਕਤੁਮ੍ਬੋ.
ਪਾਦਕਥਲਿਕਮਣ੍ਡਲਂ ਦਾਰੁਮਯਂ ਵਾ ਹੋਤੁ ਚੋਲ਼ਪਣ੍ਣਾਦਿਮਯਂ ਵਾ ਸਬ੍ਬਂ ਗਰੁਭਣ੍ਡਂ. ਆਧਾਰਕੋ ਪਤ੍ਤਪਿਧਾਨਂ, ਤਾਲਵਣ੍ਟਂ, ਬੀਜਨੀ, ਚਙ੍ਕੋਟਕਂ, ਪਚ੍ਛਿ, ਯਟ੍ਠਿਸਮ੍ਮੁਞ੍ਜਨੀ ਮੁਟ੍ਠਿਸਮ੍ਮੁਞ੍ਜਨੀਤਿ ਏਤੇਸੁਪਿ ਯਂਕਿਞ੍ਚਿ ਖੁਦ੍ਦਕਂ ਵਾ ਮਹਨ੍ਤਂ ਵਾ ਦਾਰੁਵੇਲ਼ੁਪਣ੍ਣਚਮ੍ਮਾਦੀਸੁ ਯੇਨ ਕੇਨਚਿ ਕਤਂ ਗਰੁਭਣ੍ਡਮੇਵ.
ਥਮ੍ਭਤੁਲਾਸੋਪਾਨਫਲਕਾਦੀਸੁ ਦਾਰੁਮਯਂ ਵਾ ਪਾਸਾਣਮਯਂ ਵਾ ਯਂਕਿਞ੍ਚਿ ਗੇਹਸਮ੍ਭਾਰਰੂਪਂ, ਯੋ ਕੋਚਿ ਕਟਸਾਰਕੋ, ਯਂਕਿਞ੍ਚਿ ਭੂਮਤ੍ਥਰਣਂ, ਯਂਕਿਞ੍ਚਿ ਅਕਪ੍ਪਿਯਚਮ੍ਮਂ, ਸਬ੍ਬਂ ਸਙ੍ਘੇ ਦਿਨ੍ਨਂ ਗਰੁਭਣ੍ਡਂ, ਭੂਮਤ੍ਥਰਣਂ ਕਾਤੁਂ ਵਟ੍ਟਤਿ. ਏਲ਼ਕਚਮ੍ਮਂ ਪਨ ਪਚ੍ਚਤ੍ਥਰਣਗਤਿਕਂ ਹੋਤਿ, ਤਮ੍ਪਿ ਗਰੁਭਣ੍ਡਮੇਵ. ਕਪ੍ਪਿਯਚਮ੍ਮਾਨਿ ਭਾਜਨੀਯਾਨਿ. ਕੁਰੁਨ੍ਦਿਯਂ ਪਨ ‘‘ਸਬ੍ਬਂ ਮਞ੍ਚਪ੍ਪਮਾਣਂ ਚਮ੍ਮਂ ਗਰੁਭਣ੍ਡ’’ਨ੍ਤਿ ਵੁਤ੍ਤਂ.
ਉਦੁਕ੍ਖਲਂ, ਮੁਸਲਂ, ਸੁਪ੍ਪਂ, ਨਿਸਦਂ, ਨਿਸਦਪੋਤੋ, ਪਾਸਾਣਦੋਣਿ, ਪਾਸਾਣਕਟਾਹਂ, ਤੁਰਿਵੇਮਭਸ੍ਤਾਦਿ ਸਬ੍ਬਂ ਪੇਸਕਾਰਾਦਿਭਣ੍ਡਂ, ਸਬ੍ਬਂ ਕਸਿਭਣ੍ਡਂ, ਸਬ੍ਬਂ ਚਕ੍ਕਯੁਤ੍ਤਕਯਾਨਂ ਗਰੁਭਣ੍ਡਮੇਵ. ਮਞ੍ਚਪਾਦੋ, ਮਞ੍ਚਅਟਨੀ, ਪੀਠਪਾਦੋ, ਪੀਠਅਟਨੀ, ਵਾਸਿਫਰਸੁਆਦੀਨਂ ਦਣ੍ਡਾਤਿ ਏਤੇਸੁ ਯਂਕਿਞ੍ਚਿ ਵਿਪ੍ਪਕਤਤਚ੍ਛਨਕਮ੍ਮਂ ਅਨਿਟ੍ਠਿਤਮੇਵ ਭਾਜਨੀਯਂ, ਤਚ੍ਛਿਤਮਟ੍ਠਂ ਪਨ ਗਰੁਭਣ੍ਡਂ ਹੋਤਿ. ਅਨੁਞ੍ਞਾਤਵਾਸਿਯਾ ਪਨ ਦਣ੍ਡੋ ਛਤ੍ਤਮੁਟ੍ਠਿਪਣ੍ਣਂ ਕਤ੍ਤਰਯਟ੍ਠਿ ਉਪਾਹਨਾ ਅਰਣਿਸਹਿਤਂ ਧਮ੍ਮਕਰਣੋ ਪਾਦਗਣ੍ਹਨਕਤੋ ਅਨਤਿਰਿਤ੍ਤਂ ਆਮਲਕਤੁਮ੍ਬਂ ਆਮਲਕਘਟੋ ਲਾਬੁਕਤੁਮ੍ਬਂ ਲਾਬੁਘਟੋ ਵਿਸਾਣਕਤੁਮ੍ਬਨ੍ਤਿ ਸਬ੍ਬਮੇਤਂ ਭਾਜਨੀਯਂ, ਤਤੋ ਮਹਨ੍ਤਤਰਂ ਗਰੁਭਣ੍ਡਂ.
ਹਤ੍ਥਿਦਨ੍ਤੋ ਵਾ ਯਂਕਿਞ੍ਚਿ ਵਿਸਾਣਂ ਵਾ ਅਤਚ੍ਛਿਤਂ ਯਥਾਜਾਤਮੇਵ ਭਾਜਨੀਯਂ, ਤੇਹਿ ਕਤਮਞ੍ਚਪਾਦਾਦੀਸੁ ਪੁਰਿਮਸਦਿਸੋਯੇਵ ਵਿਨਿਚ੍ਛਯੋ. ਤਚ੍ਛਿਤਨਿਟ੍ਠਿਤੋਪਿ ਹਿਙ੍ਗੁਕਰਣ੍ਡਕੋ ਅਞ੍ਜਨਕਰਣ੍ਡਕੋ ਗਣ੍ਠਿਕਾ ਵਿਧੋ ਅਞ੍ਜਨੀ ਅਞ੍ਜਨਿਸਲਾਕਾ ਉਦਕਪੁਞ੍ਛਨੀਤਿ ਇਦਂ ਸਬ੍ਬਂ ਭਾਜਨੀਯਮੇਵ.
ਮਤ੍ਤਿਕਾਭਣ੍ਡੇ ਸਬ੍ਬਂ ਮਨੁਸ੍ਸਾਨਂ ਉਪਭੋਗਪਰਿਭੋਗਂ ਘਟਪਿਠਰਾਦਿਕੁਲਾਲਭਾਜਨਂ ਪਤ੍ਤਕਟਾਹਂ ਅਙ੍ਗਾਰਕਟਾਹਂ ਧੂਮਦਾਨਕਂ ਦੀਪਰੁਕ੍ਖਕੋ ਦੀਪਕਪਲ੍ਲਿਕਾ ਚਯਨਿਟ੍ਠਕਾ ਛਦਨਿਟ੍ਠਕਾ ਥੂਪਿਕਾਤਿ ਸਙ੍ਘਸ੍ਸ ਦਿਨ੍ਨਕਾਲਤੋ ਪਟ੍ਠਾਯ ਗਰੁਭਣ੍ਡਂ, ਪਾਦਗਣ੍ਹਨਕਤੋ ਅਨਤਿਰਿਤ੍ਤਪ੍ਪਮਾਣੋ ਪਨ ਘਟਕੋ ਪਤ੍ਤਂ ਥਾਲਕਂ ਕਞ੍ਚਨਕੋ ਕੁਣ੍ਡਿਕਾਤਿ ਇਦਮੇਤ੍ਥ ਭਾਜਨੀਯਭਣ੍ਡਂ. ਯਥਾ ਚ ਮਤ੍ਤਿਕਾਭਣ੍ਡੇ; ਏਵਂ ਲੋਹਭਣ੍ਡੇਪਿ ਕੁਣ੍ਡਿਕਾ ਭਾਜਨੀਯਕੋਟ੍ਠਾਸਮੇਵ ਭਜਤੀਤਿ ਅਯਮੇਤ੍ਥ ਅਨੁਪੁਬ੍ਬਿਕਥਾ.
ਅਵਿਸ੍ਸਜ੍ਜਿਯਵਤ੍ਥੁਕਥਾ ਨਿਟ੍ਠਿਤਾ.
ਨਵਕਮ੍ਮਦਾਨਕਥਾ
੩੨੩. ਭਣ੍ਡਿਕਾਟ੍ਠਪਨਮਤ੍ਤੇਨਾਤਿ ਦ੍ਵਾਰਬਾਹਾਨਂ ਉਪਰਿ ਕਪੋਤਭਣ੍ਡਿਕਯੋਜਨਮਤ੍ਤੇਨ. ਪਰਿਭਣ੍ਡਕਰਣਮਤ੍ਤੇਨਾਤਿ ਗੋਮਯਪਰਿਭਣ੍ਡਕਸਾਵਪਰਿਭਣ੍ਡਕਰਣਮਤ੍ਤੇਨ. ਧੂਮਕਾਲਿਕਨ੍ਤਿ ਇਦਂ ਯਾਵਸ੍ਸ ਚਿਤਕਧੂਮੋ ਨ ਪਞ੍ਞਾਯਤਿ, ਤਾਵ ਅਯਂ ਵਿਹਾਰੋ ਏਤਸ੍ਸੇਵਾਤਿ ਏਵਂ ਧੂਮਕਾਲੇ ਅਪਲੋਕੇਤ੍ਵਾ ਕਤਪਰਿਯੋਸਿਤਂ ਵਿਹਾਰਂ ਦੇਨ੍ਤਿ. ਵਿਪ੍ਪਕਤਨ੍ਤਿ ਏਤ੍ਥ ਵਿਪ੍ਪਕਤੋ ਨਾਮ ਯਾਵ ਗੋਪਾਨਸਿਯੋ ਨ ਆਰੋਹਨ੍ਤਿ. ਗੋਪਾਨਸੀਸੁ ਪਨ ਆਰੁਲ਼੍ਹਾਸੁ ਬਹੁਕਤੋ ਨਾਮ ਹੋਤਿ, ਤਸ੍ਮਾ ਤਤੋ ਪਟ੍ਠਾਯ ਨ ਦਾਤਬ੍ਬੋ, ਕਿਞ੍ਚਿਦੇਵ ਸਮਾਦਪੇਤ੍ਵਾ ਕਾਰੇਸ੍ਸਤਿ. ਖੁਦ੍ਦਕੇ ਵਿਹਾਰੇ ਕਮ੍ਮਂ ਓਲੋਕੇਤ੍ਵਾ ਛਪ੍ਪਞ੍ਚਵਸ੍ਸਿਕਨ੍ਤਿ ਕਮ੍ਮਂ ਓਲੋਕੇਤ੍ਵਾ ਚਤੁਹਤ੍ਥਵਿਹਾਰੇ ਚਤੁਵਸ੍ਸਿਕਂ, ਪਞ੍ਚਹਤ੍ਥੇ ਪਞ੍ਚਵਸ੍ਸਿਕਂ, ਛਹਤ੍ਥੇ ਛਵਸ੍ਸਿਕਂ ਦਾਤਬ੍ਬਂ. ਅਡ੍ਢਯੋਗੋ ਪਨ ਯਸ੍ਮਾ ਸਤ੍ਤਟ੍ਠਹਤ੍ਥੋ ਹੋਤਿ, ਤਸ੍ਮਾ ਏਤ੍ਥ ‘‘ਸਤ੍ਤਟ੍ਠਵਸ੍ਸਿਕ’’ਨ੍ਤਿ ਵੁਤ੍ਤਂ. ਸਚੇ ਪਨ ਸੋ ਨਵਹਤ੍ਥੋ ਹੋਤਿ ਨਵਵਸ੍ਸਿਕਮ੍ਪਿ ਦਾਤਬ੍ਬਂ. ਮਹਲ੍ਲਕੇ ਪਨ ਦਸਹਤ੍ਥੇ ਏਕਾਦਸਹਤ੍ਥੇ ਵਿਹਾਰੇ ਵਾ ਪਾਸਾਦੇ ਵਾ ਦਸਵਸ੍ਸਿਕਂ ਵਾ ਏਕਾਦਸਵਸ੍ਸਿਕਂ ਵਾ ਦਾਤਬ੍ਬਂ. ਦ੍ਵਾਦਸਹਤ੍ਥੇ ਪਨ ਤਤੋ ਅਧਿਕੇ ਵਾ ਲੋਹਪਾਸਾਦਸਦਿਸੇਪਿ ਦ੍ਵਾਦਸਵਸ੍ਸਿਕਮੇਵ ਦਾਤਬ੍ਬਂ, ਨ ਤਤੋ ਉਤ੍ਤਰਿ.
ਨਵਕਮ੍ਮਿਕੋ ਭਿਕ੍ਖੁ ਅਨ੍ਤੋਵਸ੍ਸੇ ਤਂ ਆਵਾਸਂ ਲਭਤਿ, ਉਤੁਕਾਲੇ ਪਟਿਬਾਹਿਤੁਂ ਨ ਲਭਤਿ. ਸਚੇ ਸੋ ਆਵਾਸੋ ਜੀਰਤਿ, ਆਵਾਸਸਾਮਿਕਸ੍ਸ ਵਾ ਤਸ੍ਸ ਵਂਸੇ ਉਪ੍ਪਨ੍ਨਸ੍ਸ ਵਾ ਕਸ੍ਸਚਿ ਕਥੇਤਬ੍ਬਂ – ‘‘ਆਵਾਸੋ ਤੇ ਨਸ੍ਸਤਿ, ਜਗ੍ਗਥ ਏਤਂ ਆਵਾਸ’’ਨ੍ਤਿ. ਸਚੇ ਸੋ ਨ ਸਕ੍ਕੋਤਿ, ਭਿਕ੍ਖੂਹਿ ਞਾਤੀ ਵਾ ਉਪਟ੍ਠਾਕੇ ਵਾ ਸਮਾਦਪੇਤ੍ਵਾ ਜਗ੍ਗਿਤਬ੍ਬੋ. ਸਚੇ ਤੇਪਿ ਨ ਸਕ੍ਕੋਨ੍ਤਿ, ਸਙ੍ਘਿਕੇਨ ਪਚ੍ਚਯੇਨ ਜਗ੍ਗਿਤਬ੍ਬੋ. ਤਸ੍ਮਿਮ੍ਪਿ ਅਸਤਿ ਏਕਂ ਆਵਾਸਂ ਵਿਸ੍ਸਜ੍ਜੇਤ੍ਵਾ ਅਵਸੇਸਾ ਜਗ੍ਗਿਤਬ੍ਬਾ. ਬਹੂ ਵਿਸ੍ਸਜ੍ਜੇਤ੍ਵਾ ਏਕਂ ਸਣ੍ਠਾਪੇਤੁਮ੍ਪਿ ਵਟ੍ਟਤਿਯੇਵ.
ਦੁਬ੍ਭਿਕ੍ਖੇ ਭਿਕ੍ਖੂਸੁ ਪਕ੍ਕਨ੍ਤੇਸੁ ਸਬ੍ਬੇ ਆਵਾਸਾ ਨਸ੍ਸਨ੍ਤਿ, ਤਸ੍ਮਾ ਏਕਂ ਵਾ ਦ੍ਵੇ ਵਾ ਤਯੋ ਵਾ ਆਵਾਸੇ ਵਿਸ੍ਸਜ੍ਜੇਤ੍ਵਾ ਤਤੋ ਯਾਗੁਭਤ੍ਤਚੀਵਰਾਦੀਨਿ ਪਰਿਭੁਞ੍ਜਨ੍ਤੇਹਿ ਸੇਸਾਵਾਸਾ ਜਗ੍ਗਿਤਬ੍ਬਾਯੇਵ. ਕੁਰੁਨ੍ਦਿਯਂ ਪਨ ਵੁਤ੍ਤਂ ‘‘ਸਙ੍ਘਿਕੇ ਪਚ੍ਚਯੇ ਅਸਤਿ ਏਕੋ ਭਿਕ੍ਖੁ ‘ਤੁਯ੍ਹਂ ਏਕਂ ਮਞ੍ਚਟ੍ਠਾਨਂ ਗਹੇਤ੍ਵਾ ਜਗ੍ਗਾਹੀ’ਤਿ ਵਤ੍ਤਬ੍ਬੋ. ਸਚੇ ਬਹੁਤਰਂ ਇਚ੍ਛਤਿ, ਤਿਭਾਗਂ ਵਾ ਉਪਡ੍ਢਭਾਗਂ ਵਾ ਦਤ੍ਵਾਪਿ ਜਗ੍ਗਾਪੇਤਬ੍ਬਂ. ਅਥ ‘ਥਮ੍ਭਮਤ੍ਤਮੇਵੇਤ੍ਥ ਅਵਸਿਟ੍ਠਂ, ਬਹੁਕਮ੍ਮਂ ਕਾਤਬ੍ਬ’ਨ੍ਤਿ ਨ ਇਚ੍ਛਤਿ, ‘ਤੁਯ੍ਹਂ ਪੁਗ੍ਗਲਿਕਮੇਵ ਕਤ੍ਵਾ ਜਗ੍ਗ; ਏਵਮ੍ਪਿ ਹਿ ਸਙ੍ਘਸ੍ਸ ਭਣ੍ਡਕਟ੍ਠਪਨਟ੍ਠਾਨਂ ਨਵਕਾਨਞ੍ਚ ਵਸਨਟ੍ਠਾਨਂ ਲਭਿਸ੍ਸਤੀ’ਤਿ ਜਗ੍ਗਾਪੇਤਬ੍ਬੋ. ਏਵਂ ਜਗ੍ਗਿਤੋ ਪਨ ਤਸ੍ਮਿਂ ਜੀਵਨ੍ਤੇ ਪੁਗ੍ਗਲਿਕੋ ਹੋਤਿ, ਮਤੇ ਸਙ੍ਘਿਕੋਯੇਵ. ਸਚੇ ਸਦ੍ਧਿਵਿਹਾਰਿਕਾਨਂ ਦਾਤੁਕਾਮੋ ਹੋਤਿ, ਕਮ੍ਮਂ ਓਲੋਕੇਤ੍ਵਾ ਤਿਭਾਗਂ ਵਾ ਉਪਡ੍ਢਂ ਵਾ ਪੁਗ੍ਗਲਿਕਂ ਕਤ੍ਵਾ ਜਗ੍ਗਾਪੇਤਬ੍ਬੋ. ਏਵਞ੍ਹਿ ਸਦ੍ਧਿਵਿਹਾਰਿਕਾਨਂ ਦਾਤੁਂ ਲਭਤਿ. ਏਵਂ ਜਗ੍ਗਨਕੇ ਪਨ ਅਸਤਿ ‘ਏਕਂ ਆਵਾਸਂ ਵਿਸ੍ਸਜ੍ਜੇਤ੍ਵਾ’ਤਿਆਦਿਨਾ ਨਯੇਨ ਜਗ੍ਗਾਪੇਤਬ੍ਬੋ’’ਤਿ.
ਇਦਮ੍ਪਿ ਚ ਅਞ੍ਞਂ ਤਤ੍ਥੇਵ ਵੁਤ੍ਤਂ – ਦ੍ਵੇ ਭਿਕ੍ਖੂ ਸਙ੍ਘਿਕਂ ਭੂਮਿਂ ਗਹੇਤ੍ਵਾ ਸੋਧੇਤ੍ਵਾ ਸਙ੍ਘਿਕਂ ਸੇਨਾਸਨਂ ਕਰੋਨ੍ਤਿ. ਯੇਨ ਸਾ ਭੂਮਿ ਪਠਮਂ ਗਹਿਤਾ, ਸੋ ਸਾਮੀ. ਉਭੋਪਿ ਪੁਗ੍ਗਲਿਕਂ ਕਰੋਨ੍ਤਿ, ਸੋਯੇਵ ਸਾਮੀ. ਸੋ ਸਙ੍ਘਿਕਂ ਕਰੋਤਿ, ਇਤਰੋ ਪੁਗ੍ਗਲਿਕਂ ਕਰੋਤਿ, ਅਞ੍ਞਂ ਚੇ ਬਹੁਂ ਸੇਨਾਸਨਟ੍ਠਾਨਂ ਅਤ੍ਥਿ, ਪੁਗ੍ਗਲਿਕਂ ਕਰੋਨ੍ਤੋਪਿ ਨ ਵਾਰੇਤਬ੍ਬੋ. ਅਞ੍ਞਸ੍ਮਿਂ ਪਨ ਤਾਦਿਸੇ ਪਟਿਰੂਪੇ ਠਾਨੇ ਅਸਤਿ ਤਂ ਪਟਿਬਾਹਿਤ੍ਵਾ ਸਙ੍ਘਿਕਂ ਕਰੋਨ੍ਤੇਨੇਵ ਕਾਤਬ੍ਬਂ. ਯਂ ਪਨ ਤਸ੍ਸ ਤਤ੍ਥ ਵਯਕਮ੍ਮਂ ਕਤਂ, ਤਂ ਦਾਤਬ੍ਬਂ. ਸਚੇ ਪਨ ਕਤਾਵਾਸੇ ਵਾ ਆਵਾਸਕਰਣਟ੍ਠਾਨੇ ਵਾ ਛਾਯੂਪਗਫਲੂਪਗਰੁਕ੍ਖਾ ਹੋਨ੍ਤਿ, ਅਪਲੋਕੇਤ੍ਵਾ ਹਾਰੇਤਬ੍ਬਾ. ਪੁਗ੍ਗਲਿਕਾ ਚੇ ਹੋਨ੍ਤਿ, ਸਾਮਿਕਾ ਆਪੁਚ੍ਛਿਤਬ੍ਬਾ; ਨੋ ਚੇ ਦੇਨ੍ਤਿ, ਯਾਵਤਤਿਯਂ ਆਪੁਚ੍ਛਿਤ੍ਵਾ ‘‘ਰੁਕ੍ਖਅਗ੍ਘਨਕਮੂਲਂ ਦਸ੍ਸਾਮਾ’’ਤਿ ਹਾਰੇਤਬ੍ਬਾ.
ਯੋ ਪਨ ਸਙ੍ਘਿਕਵਲ੍ਲਿਮਤ੍ਤਮ੍ਪਿ ਅਗ੍ਗਹੇਤ੍ਵਾ ਆਹਰਿਮੇਨ ਉਪਕਰਣੇਨ ਸਙ੍ਘਿਕਾਯ ਭੂਮਿਯਾ ਪੁਗ੍ਗਲਿਕਵਿਹਾਰਂ ਕਾਰੇਤਿ, ਉਪਡ੍ਢਂ ਸਙ੍ਘਿਕਂ ਹੋਤਿ; ਉਪਡ੍ਢਂ ਪੁਗ੍ਗਲਿਕਂ. ਪਾਸਾਦੋ ਚੇ ਹੋਤਿ, ਹੇਟ੍ਠਾਪਾਸਾਦੋ ਸਙ੍ਘਿਕੋ; ਉਪਰਿ ਪੁਗ੍ਗਲਿਕੋ. ਸਚੇ ਸੋ ਹੇਟ੍ਠਾਪਾਸਾਦਂ ਇਚ੍ਛਤਿ, ਤਸ੍ਸ ਹੋਤਿ. ਅਥ ਹੇਟ੍ਠਾ ਚ ਉਪਰਿ ਚ ਇਚ੍ਛਤਿ, ਉਭਯਤ੍ਥ ਉਪਡ੍ਢਂ ਲਭਤਿ. ਦ੍ਵੇ ਸੇਨਾਸਨਾਨਿ ਕਾਰੇਤਿ – ਏਕਂ ਸਙ੍ਘਿਕਂ, ਏਕਂ ਪੁਗ੍ਗਲਿਕਂ. ਸਚੇ ਵਿਹਾਰੇ ਉਟ੍ਠਿਤੇਨ ਦਬ੍ਬਸਮ੍ਭਾਰੇਨ ਕਾਰੇਤਿ, ਤਤਿਯਭਾਗਂ ਲਭਤਿ. ਸਚੇ ਅਕਤਟ੍ਠਾਨੇ ਚਯਂ ਵਾ ਪਮੁਖਂ ਵਾ ਕਰੋਤਿ, ਬਹਿਕੁਟ੍ਟੇ ਉਪਡ੍ਢਂ ਸਙ੍ਘਸ੍ਸ, ਉਪਡ੍ਢਂ ਤਸ੍ਸ. ਅਥ ਮਹਨ੍ਤਂ ਵਿਸਮਂ ਪੂਰੇਤ੍ਵਾ ਅਪਦੇ ਪਦਂ ਦਸ੍ਸੇਤ੍ਵਾ ਕਤਂ ਹੋਤਿ, ਅਨਿਸ੍ਸਰੋ ਤਤ੍ਥ ਸਙ੍ਘੋ.
ਏਕਂ ਵਰਸੇਯ੍ਯਨ੍ਤਿ ਏਤ੍ਥ ਨਵਕਮ੍ਮਦਾਨਟ੍ਠਾਨੇ ਵਾ ਵਸ੍ਸਗ੍ਗੇਨ ਪਤ੍ਤਟ੍ਠਾਨੇ ਵਾ ਯਂ ਇਚ੍ਛਤਿ, ਤਂ ਏਕਂ ਵਰਸੇਯ੍ਯਂ ਅਨੁਜਾਨਾਮੀਤਿ ਅਤ੍ਥੋ.
ਪਰਿਯੋਸਿਤੇ ਪਕ੍ਕਮਤਿ ਤਸ੍ਸੇਵੇਤਨ੍ਤਿ ਪੁਨ ਆਗਨ੍ਤ੍ਵਾ ਵਸਨ੍ਤਸ੍ਸ ਅਨ੍ਤੋਵਸ੍ਸਂ ਤਸ੍ਸੇਵ ਤਂ; ਅਨਾਗਚ੍ਛਨ੍ਤਸ੍ਸ ਪਨ ਸਦ੍ਧਿਵਿਹਾਰਿਕਾਦਯੋ ਗਹੇਤੁਂ ਨ ਲਭਨ੍ਤਿ.
ਨਵਕਮ੍ਮਦਾਨਕਥਾ ਨਿਟ੍ਠਿਤਾ.
ਅਞ੍ਞਤ੍ਰਪਟਿਭੋਗਪਟਿਕ੍ਖੇਪਾਦਿਕਥਾ
੩੨੪. ਨਾਤਿਹਰਨ੍ਤੀਤਿ ਅਞ੍ਞਤ੍ਰ ਹਰਿਤ੍ਵਾ ਨ ਪਰਿਭੁਞ੍ਜਨ੍ਤਿ. ਗੁਤ੍ਤਤ੍ਥਾਯਾਤਿ ਯਂ ਤਤ੍ਥ ਮਞ੍ਚਪੀਠਾਦਿ, ਤਸ੍ਸ ਗੁਤ੍ਤਤ੍ਥਾਯ, ਤਂ ਅਞ੍ਞਤ੍ਰ ਹਰਿਤੁਂ ਅਨੁਜਾਨਾਮੀਤਿ ਅਤ੍ਥੋ. ਤਸ੍ਮਾ ਤਂ ਅਞ੍ਞਤ੍ਰ ਹਰਿਤ੍ਵਾ ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਨ੍ਤਸ੍ਸ ਨਟ੍ਠਂ ਸੁਨਟ੍ਠਂ, ਜਿਣ੍ਣਂ ਸੁਜਿਣ੍ਣਂ. ਸਚੇ ਅਰੋਗਂ ਤਸ੍ਮਿਂ ਵਿਹਾਰੇ ਪਟਿਸਙ੍ਖਤੇ ਪੁਨ ਪਾਕਤਿਕਂ ਕਾਤਬ੍ਬਂ. ਪੁਗ੍ਗਲਿਕਪਰਿਭੋਗੇਨ ਪਰਿਭੁਞ੍ਜਤੋ ਨਟ੍ਠਂ ਵਾ ਜਿਣ੍ਣਂ ਵਾ ਗੀਵਾ ਹੋਤਿ, ਤਸ੍ਮਿਂ ਪਟਿਸਙ੍ਖਤੇ ਦਾਤਬ੍ਬਮੇਵ. ਸਚੇ ਤਤੋ ਗੋਪਾਨਸਿਆਦੀਨਿ ਗਹੇਤ੍ਵਾ ਅਞ੍ਞਸ੍ਮਿਂ ਸਙ੍ਘਿਕਾਵਾਸੇ ਯੋਜੇਨ੍ਤਿ, ਸੁਯੋਜਿਤਾਨਿ. ਪੁਗ੍ਗਲਿਕਾਵਾਸੇ ਯੋਜੇਨ੍ਤੇਹਿ ਪਨ ਮੂਲਂ ਵਾ ਦਾਤਬ੍ਬਂ, ਪਟਿਪਾਕਤਿਕਂ ਵਾ ਕਾਤਬ੍ਬਂ ਛਡ੍ਡਿਤਵਿਹਾਰਤੋ ਮਞ੍ਚਪੀਠਾਦੀਨਿ ਥੇਯ੍ਯਚਿਤ੍ਤੇਨ ਗਣ੍ਹਨ੍ਤੋ ਉਦ੍ਧਾਰੇਯੇਵ ਭਣ੍ਡਗ੍ਘੇਨ ਕਾਰੇਤਬ੍ਬੋ. ਪੁਨ ਆਵਾਸਿਕਕਾਲੇ ਦਸ੍ਸਾਮੀਤਿ ਗਹੇਤ੍ਵਾ ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਨ੍ਤਸ੍ਸ ਨਟ੍ਠਂ ਸੁਨਟ੍ਠਂ, ਜਿਣ੍ਣਂ ਸੁਜਿਣ੍ਣਂ. ਅਰੋਗਞ੍ਚੇ ਪਾਕਤਿਕਂ ਕਾਤਬ੍ਬਂ. ਪੁਗ੍ਗਲਿਕਪਰਿਭੋਗੇਨ ਪਰਿਭੁਞ੍ਜਨ੍ਤਸ੍ਸ ਨਟ੍ਠਂ ਗੀਵਾ ਹੋਤਿ. ਤਤੋ ਦ੍ਵਾਰਵਾਤਪਾਨਾਦੀਨਿ ਸਙ੍ਘਿਕਾਵਾਸੇ ਵਾ ਪੁਗ੍ਗਲਿਕਾਵਾਸੇ ਵਾ ਯੋਜਿਤਾਨਿ ਪਟਿਦਾਤਬ੍ਬਾਨਿਯੇਵ.
ਫਾਤਿਕਮ੍ਮਤ੍ਥਾਯਾਤਿ ਵਡ੍ਢਿਕਮ੍ਮਤ੍ਥਾਯ. ਫਾਤਿਕਮ੍ਮਞ੍ਚੇਤ੍ਥ ਸਮਕਂ ਵਾ ਅਤਿਰੇਕਂ ਵਾ ਅਗ੍ਘਨਕਂ ਮਞ੍ਚਪੀਠਾਦਿਸੇਨਾਸਨਮੇਵ ਵਟ੍ਟਤਿ.
ਚਕ੍ਕਲਿਕਨ੍ਤਿ ਕਮ੍ਬਲਾਦੀਹਿ ਵੇਠੇਤ੍ਵਾ ਕਤਚਕ੍ਕਲਿਕਂ. ਅਲ੍ਲੇਹਿ ਪਾਦੇਹੀਤਿ ਯੇਹਿ ਅਕ੍ਕਨ੍ਤਟ੍ਠਾਨੇ ਉਦਕਂ ਪਞ੍ਞਾਯਤਿ, ਏਵਰੂਪੇਹਿ ਪਾਦੇਹਿ ਪਰਿਭਣ੍ਡਕਤਭੂਮਿ ਵਾ ਸੇਨਾਸਨਂ ਵਾ ਨ ਅਕ੍ਕਮਿਤਬ੍ਬਂ. ਸਚੇ ਪਨ ਉਦਕਸਿਨੇਹਮਤ੍ਤਮੇਵ ਪਞ੍ਞਾਯਤਿ, ਨ ਉਦਕਂ, ਵਟ੍ਟਤਿ. ਪਾਦਪੁਞ੍ਛਨਿਂ ਪਨ ਅਲ੍ਲਪਾਦੇਹਿਪਿ ਅਕ੍ਕਮਿਤੁਂ ਵਟ੍ਟਤਿਯੇਵ. ਸਉਪਾਹਨੇਨ ਧੋਤਪਾਦੇਹਿ ਅਕ੍ਕਮਿਤਬ੍ਬਟ੍ਠਾਨੇਯੇਵ ਨ ਵਟ੍ਟਤਿ.
ਚੋਲ਼ਕੇਨ ਪਲਿਵੇਠੇਤੁਨ੍ਤਿ ਸੁਧਾਭੂਮਿਯਂ ਵਾ ਪਰਿਭਣ੍ਡਭੂਮਿਯਂ ਵਾ ਸਚੇ ਤਟ੍ਟਿਕਾ ਵਾ ਕਟਸਾਰਕੋ ਵਾ ਨਤ੍ਥਿ, ਚੋਲ਼ਕੇਨ ਪਾਦਾ ਵੇਠੇਤਬ੍ਬਾ, ਤਸ੍ਮਿਂ ਅਸਤਿ ਪਣ੍ਣਮ੍ਪਿ ਅਤ੍ਥਰਿਤੁਂ ਵਟ੍ਟਤਿ. ਕਿਞ੍ਚਿ ਅਨਤ੍ਥਰਿਤ੍ਵਾ ਠਪੇਨ੍ਤਸ੍ਸ ਪਨ ਦੁਕ੍ਕਟਂ. ਯਦਿ ਪਨ ਤਤ੍ਥ ਨੇਵਾਸਿਕਾ ਅਨਤ੍ਥਤਾਯਪਿ ਭੂਮਿਯਾ ਠਪੇਨ੍ਤਿ, ਅਧੋਤਪਾਦੇਹਿਪਿ ਵਲ਼ਞ੍ਜੇਨ੍ਤਿ, ਤਥੇਵ ਵਲ਼ਞ੍ਜੇਤੁਂ ਵਟ੍ਟਤਿ.
ਨ ਭਿਕ੍ਖਵੇ ਪਰਿਕਮ੍ਮਕਤਾ ਭਿਤ੍ਤੀਤਿ ਸੇਤਭਿਤ੍ਤਿ ਵਾ ਚਿਤ੍ਤਕਮ੍ਮਕਤਾ ਵਾ. ਨ ਕੇਵਲਞ੍ਚ ਭਿਤ੍ਤਿਮੇਵ, ਦ੍ਵਾਰਮ੍ਪਿ ਵਾਤਪਾਨਮ੍ਪਿ ਅਪਸ੍ਸੇਨਫਲਕਮ੍ਪਿ ਪਾਸਾਣਤ੍ਥਮ੍ਭਮ੍ਪਿ ਰੁਕ੍ਖਤ੍ਥਮ੍ਭਮ੍ਪਿ ਚੀਵਰੇਨ ਵਾ ਕੇਨਚਿ ਵਾ ਅਪ੍ਪਟਿਚ੍ਛਾਦੇਤ੍ਵਾ ਅਪਸ੍ਸਯਿਤੁਂ ਨ ਲਬ੍ਭਤਿਯੇਵ.
ਧੋਤਪਾਦਕਾਤਿ ਧੋਤਪਾਦਕਾ ਹੁਤ੍ਵਾ ਧੋਤੇਹਿ ਪਾਦੇਹਿ ਅਕ੍ਕਮਿਤਬ੍ਬਟ੍ਠਾਨੇ ਨਿਪਜ੍ਜਿਤੁਂ ਕੁਕ੍ਕੁਚ੍ਚਾਯਨ੍ਤਿ. ‘‘ਧੋਤਪਾਦਕੇ’’ਤਿਪਿ ਪਾਠੋ. ਧੋਤੇਹਿ ਪਾਦੇਹਿ ਅਕ੍ਕਮਿਤਬ੍ਬਟ੍ਠਾਨਸ੍ਸੇਤਂ ਅਧਿਵਚਨਂ. ਪਚ੍ਚਤ੍ਥਰਿਤ੍ਵਾਤਿ ਪਰਿਭਣ੍ਡਕਤਂ ਭੂਮਿਂ ਵਾ ਭੂਮਤ੍ਥਰਣਸੇਨਾਸਨਂ ਵਾ ਸਙ੍ਘਿਕਮਞ੍ਚਪੀਠਂ ਵਾ ਅਤ੍ਤਨੋ ਸਨ੍ਤਕੇਨ ਪਚ੍ਚਤ੍ਥਰਣੇਨ ਪਚ੍ਚਤ੍ਥਰਿਤ੍ਵਾਵ ਨਿਪਜ੍ਜਿਤਬ੍ਬਂ. ਸਚੇ ਨਿਦ੍ਦਾਯਤੋਪਿ ਪਚ੍ਚਤ੍ਥਰਣੇ ਸਙ੍ਕੁਟਿਤੇ ਕੋਚਿ ਸਰੀਰਾਵਯਵੋ ਮਞ੍ਚਂ ਵਾ ਪੀਠਂ ਵਾ ਫੁਸਤਿ, ਆਪਤ੍ਤਿਯੇਵ. ਲੋਮੇਸੁ ਪਨ ਲੋਮਗਣਨਾਯ ਆਪਤ੍ਤਿਯੇਵ. ਪਰਿਭੋਗਸੀਸੇਨ ਅਪਸ੍ਸਯਨ੍ਤਸ੍ਸਾਪਿ ਏਸੇਵ ਨਯੋ. ਹਤ੍ਥਤਲਪਾਦਤਲੇਹਿ ਪਨ ਫੁਸਿਤੁਂ ਵਾ ਅਕ੍ਕਮਿਤੁਂ ਵਾ ਵਟ੍ਟਤਿ. ਮਞ੍ਚਪੀਠਂ ਨੀਹਰਨ੍ਤਸ੍ਸ ਕਾਯੇ ਪਟਿਹਞ੍ਞਤਿ, ਅਨਾਪਤ੍ਤਿ.
ਅਞ੍ਞਤ੍ਰਪਰਿਭੋਗਪਟਿਕ੍ਖੇਪਾਦਿਕਥਾ ਨਿਟ੍ਠਿਤਾ.
ਸਙ੍ਘਭਤ੍ਤਾਦਿਅਨੁਜਾਨਨਕਥਾ
੩੨੫. ਨ ਸਕ੍ਕੋਨ੍ਤਿ ਸਙ੍ਘਭਤ੍ਤਂ ਕਾਤੁਨ੍ਤਿ ਸਕਲਸ੍ਸ ਸਙ੍ਘਸ੍ਸ ਭਤ੍ਤਂ ਕਾਤੁਂ ਨ ਸਕ੍ਕੋਨ੍ਤਿ. ਉਦ੍ਦੇਸਭਤ੍ਤਨ੍ਤਿਆਦੀਸੁ ‘‘ਏਕਂ ਵਾ ਦ੍ਵੇ ਵਾ…ਪੇ… ਦਸ ਵਾ ਭਿਕ੍ਖੂ ਸਙ੍ਘਤੋ ਉਦ੍ਦਿਸਿਤ੍ਵਾ ਦੇਥਾ’’ਤਿ ਏਵਂ ਉਦ੍ਦੇਸੇਨ ਲਦ੍ਧਭਿਕ੍ਖੂਨਂ ਭਤ੍ਤਂ ਕਾਤੁਂ ਇਚ੍ਛਨ੍ਤਿ. ਅਪਰੇ ਤਥੇਵ ਭਿਕ੍ਖੂ ਪਰਿਚ੍ਛਿਨ੍ਦਿਤ੍ਵਾ ਨਿਮਨ੍ਤੇਤ੍ਵਾ ਤੇਸਂ ਭਤ੍ਤਂ ਕਾਤੁਂ ਇਚ੍ਛਨ੍ਤਿ. ਅਪਰੇ ਸਲਾਕਾਯੋ ਛਿਨ੍ਦਿਤ੍ਵਾ, ਅਪਰੇ ਪਕ੍ਖਿਕਂ ਉਪੋਸਥਿਕਂ ਪਾਟਿਪਦਿਕਨ੍ਤਿ ਏਵਂ ਨਿਯਾਮੇਤ੍ਵਾ, ਏਕਸ੍ਸ ਵਾ ਦ੍ਵਿਨ੍ਨਂ ਵਾ…ਪੇ… ਦਸਨ੍ਨਂ ਵਾ ਭਿਕ੍ਖੂਨਂ ਭਤ੍ਤਂ ਕਾਤੁਂ ਇਚ੍ਛਨ੍ਤਿ. ਇਤਿ ਏਤਾਨਿ ਭਤ੍ਤਾਨਿ ਉਦ੍ਦੇਸਭਤ੍ਤਂ ਨਿਮਨ੍ਤਨਨ੍ਤਿ ਇਮਂ ਵੋਹਾਰਂ ਪਤ੍ਤਾਨਿ. ਯਸ੍ਮਾ ਪਨ ਤੇ ਸਚੇਪਿ ਦੁਬ੍ਭਿਕ੍ਖੇ ਨ ਸਕ੍ਕੋਨ੍ਤਿ, ਸੁਭਿਕ੍ਖੇ ਜਾਤੇ ਪਨ ਪੁਨ ਸਙ੍ਘਭਤ੍ਤਂ ਕਾਤੁਂ ਸਕ੍ਖਿਸ੍ਸਨ੍ਤਿ, ਤਸ੍ਮਾ ਭਗਵਾ ਤਮ੍ਪਿ ਅਨ੍ਤੋ ਕਤ੍ਵਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਭਤ੍ਤਂ ਉਦ੍ਦੇਸਭਤ੍ਤ’’ਨ੍ਤਿਆਦਿਮਾਹ.
ਤਤ੍ਥ ਸਙ੍ਘਭਤ੍ਤੇ ਠਿਤਿਕਾ ਨਾਮ ਨਤ੍ਥਿ, ਤਸ੍ਮਾ ‘‘ਅਮ੍ਹਾਕਂ ਅਜ੍ਜ ਦਸ ਦ੍ਵਾਦਸ ਦਿਵਸਾ ਭੁਞ੍ਜਨ੍ਤਾਨਂ ਇਦਾਨਿ ਅਞ੍ਞਤੋ ਭਿਕ੍ਖੂ ਆਨੇਥਾ’’ਤਿ ਨ ਏਵਂ ਤਤ੍ਥ ਵਤ੍ਤਬ੍ਬਂ. ‘‘ਪੁਰਿਮਦਿਵਸੇਸੁ ਅਮ੍ਹੇਹਿ ਨ ਲਦ੍ਧਂ, ਇਦਾਨਿ ਤਂ ਅਮ੍ਹਾਕਂ ਗਾਹੇਥਾ’’ਤਿ ਏਵਮ੍ਪਿ ਵਤ੍ਤੁਂ ਨ ਲਬ੍ਭਤਿ. ਤਞ੍ਹਿ ਆਗਤਾਗਤਾਨਂ ਪਾਪੁਣਾਤਿਯੇਵ.
ਸਙ੍ਘਭਤ੍ਤਾਦਿਅਨੁਜਾਨਨਕਥਾ ਨਿਟ੍ਠਿਤਾ.
ਉਦ੍ਦੇਸਭਤ੍ਤਕਥਾ
ਉਦ੍ਦੇਸਭਤ੍ਤਾਦੀਸੁ ਪਨ ਅਯਂ ਨਯੋ – ਰਞ੍ਞਾ ਵਾ ਰਾਜਮਹਾਮਤ੍ਤੇਨ ਵਾ ਸਙ੍ਘਤੋ ਉਦ੍ਦਿਸਿਤ੍ਵਾ ‘‘ਏਤ੍ਤਕੇ ਭਿਕ੍ਖੂ ਆਨੇਥਾ’’ਤਿ ਪਹਿਤੇ ਕਾਲਂ ਘੋਸੇਤ੍ਵਾ ਠਿਤਿਕਾ ਪੁਚ੍ਛਿਤਬ੍ਬਾ. ਸਚੇ ਅਤ੍ਥਿ, ਤਤੋ ਪਟ੍ਠਾਯ ਗਾਹੇਤਬ੍ਬਂ; ਨੋ ਚੇ, ਥੇਰਾਸਨਤੋ ਪਟ੍ਠਾਯ ਗਾਹੇਤਬ੍ਬਂ. ਉਦ੍ਦੇਸਕੇਨ ਪਿਣ੍ਡਪਾਤਿਕਾਨਮ੍ਪਿ ਨ ਅਤਿਕ੍ਕਾਮੇਤਬ੍ਬਂ. ਤੇ ਪਨ ਧੁਤਙ੍ਗਂ ਰਕ੍ਖਨ੍ਤਾ ਸਯਮੇਵ ਅਤਿਕ੍ਕਮਿਸ੍ਸਨ੍ਤਿ; ਏਵਂ ਗਾਹਿਯਮਾਨੇ ਅਲਸਜਾਤਿਕਾ ਮਹਾਥੇਰਾ ਪਚ੍ਛਾ ਆਗਚ੍ਛਨ੍ਤਿ, ‘‘ਭਨ੍ਤੇ, ਵੀਸਤਿਵਸ੍ਸਾਨਂ ਗਾਹਿਯਤਿ, ਤੁਮ੍ਹਾਕਂ ਠਿਤਿਕਾ ਅਤਿਕ੍ਕਨ੍ਤਾ’’ਤਿ ਨ ਵਤ੍ਤਬ੍ਬਾ, ਠਿਤਿਕਂ ਠਪੇਤ੍ਵਾ ਤੇਸਂ ਗਾਹੇਤ੍ਵਾ ਪਚ੍ਛਾ ਠਿਤਿਕਾਯ ਗਾਹੇਤਬ੍ਬਂ. ‘‘ਅਸੁਕਵਿਹਾਰੇ ਬਹੁਂ ਉਦ੍ਦੇਸਭਤ੍ਤਂ ਉਪ੍ਪਨ੍ਨ’’ਨ੍ਤਿ ਸੁਤ੍ਵਾ ਯੋਜਨਨ੍ਤਰਿਕਵਿਹਾਰਤੋਪਿ ਭਿਕ੍ਖੂ ਆਗਚ੍ਛਨ੍ਤਿ, ਸਮ੍ਪਤ੍ਤਸਮ੍ਪਤ੍ਤਾਨਂ ਠਿਤਟ੍ਠਾਨਤੋ ਪਟ੍ਠਾਯ ਗਾਹੇਤਬ੍ਬਂ. ਅਸਮ੍ਪਤ੍ਤਾਨਮ੍ਪਿ ਉਪਚਾਰਸੀਮਂ ਪਵਿਟ੍ਠਾਨਂ ਅਨ੍ਤੇਵਾਸਿਕਾਦੀਸੁ ਗਣ੍ਹਨ੍ਤੇਸੁ ਗਾਹੇਤਬ੍ਬਮੇਵ. ਬਹਿਉਪਚਾਰਸੀਮਾਯ ਠਿਤਾਨਂ ਗਾਹੇਥਾਤਿ ਵਦਨ੍ਤਿ, ਨ ਗਾਹੇਤਬ੍ਬਂ. ਸਚੇ ਪਨ ਉਪਚਾਰਸੀਮਂ ਓਕ੍ਕਨ੍ਤੇਹਿ ਏਕਾਬਦ੍ਧਾ ਹੁਤ੍ਵਾ ਅਤ੍ਤਨੋ ਵਿਹਾਰਦ੍ਵਾਰੇ ਵਾ ਅਨ੍ਤੋਵਿਹਾਰੇਯੇਵ ਵਾ ਹੋਨ੍ਤਿ, ਪਰਿਸਾਵਸੇਨ ਵਡ੍ਢਿਤਾ ਨਾਮ ਸੀਮਾ ਹੋਤਿ, ਤਸ੍ਮਾ ਗਾਹੇਤਬ੍ਬਂ. ਸਙ੍ਘਨਵਕਸ੍ਸ ਦਿਨ੍ਨੇਪਿ ਪਚ੍ਛਾ ਆਗਤਾਨਂ ਗਾਹੇਤਬ੍ਬਮੇਵ. ਦੁਤਿਯਭਾਗੇ ਪਨ ਥੇਰਾਸਨਂ ਆਰੁਲ਼੍ਹੇ ਪੁਨ ਆਗਤਾਨਂ ਪਠਮਭਾਗੋ ਨ ਪਾਪੁਣਾਤਿ, ਦੁਤਿਯਭਾਗਤੋ ਵਸ੍ਸਗ੍ਗੇਨ ਗਾਹੇਤਬ੍ਬਂ.
ਏਕਸ੍ਮਿਂ ਵਿਹਾਰੇ ਏਕਂ ਭਤ੍ਤੁਦ੍ਦੇਸਟ੍ਠਾਨਂ ਪਰਿਚ੍ਛਿਨ੍ਦਿਤ੍ਵਾ ਗਾਵੁਤਪ੍ਪਮਾਣਾਯਪਿ ਉਪਚਾਰਸੀਮਾਯ ਯਤ੍ਥ ਕਤ੍ਥਚਿ ਆਰੋਚਿਤਂ ਉਦ੍ਦੇਸਭਤ੍ਤਂ, ਤਸ੍ਮਿਂਯੇਵ ਭਤ੍ਤੁਦ੍ਦੇਸਟ੍ਠਾਨੇ ਗਾਹੇਤਬ੍ਬਂ. ਏਕੋ ਏਕਸ੍ਸ ਭਿਕ੍ਖੁਨੋ ਪਹਿਣਾਤਿ ‘‘ਸ੍ਵੇਪਿ ਸਙ੍ਘਤੋ ਉਦ੍ਦਿਸਿਤ੍ਵਾ ਦਸ ਭਿਕ੍ਖੂ ਪਹਿਣਥਾ’’ਤਿ, ਤੇਨ ਸੋ ਅਤ੍ਥੋ ਭਤ੍ਤੁਦ੍ਦੇਸਕਸ੍ਸ ਆਰੋਚੇਤਬ੍ਬੋ. ਸਚੇ ਤਂ ਦਿਵਸਂ ਪਮੁਸ੍ਸਤਿ, ਦੁਤਿਯਦਿਵਸੇ ਪਾਤੋਵ ਆਰੋਚੇਤਬ੍ਬੋ. ਅਥ ਪਮੁਸ੍ਸਿਤ੍ਵਾਵ ਪਿਣ੍ਡਾਯ ਪਵਿਸਨ੍ਤੋ ਸਰਤਿ, ਯਾਵ ਉਪਚਾਰਸੀਮਂ ਨਾਤਿਕ੍ਕਮਤਿ, ਤਾਵ ਯਾ ਭੋਜਨਸਾਲਾਯ ਪਕਤਿਟ੍ਠਿਤਿਕਾ, ਤਸ੍ਸਾਯੇਵ ਵਸੇਨ ਗਾਹੇਤਬ੍ਬਂ. ਸਚੇਪਿ ਉਪਚਾਰਸੀਮਂ ਅਤਿਕ੍ਕਨ੍ਤਾ ਭਿਕ੍ਖੂ ਚ ਉਪਚਾਰਸੀਮਟ੍ਠਕੇਹਿ ਏਕਾਬਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਦ੍ਵਾਦਸਹਤ੍ਥਨ੍ਤਰਂ ਅਵਿਜਹਿਤ੍ਵਾ ਗਚ੍ਛਨ੍ਤਿ, ਪਕਤਿਟ੍ਠਿਤਿਕਾਯ ਵਸੇਨ ਗਾਹੇਤਬ੍ਬਂ. ਭਿਕ੍ਖੂਨਂ ਪਨ ਤਾਦਿਸੇ ਏਕਾਬਦ੍ਧੇ ਅਸਤਿ ਬਹਿਉਪਚਾਰਸੀਮਾਯ ਯਸ੍ਮਿਂ ਠਾਨੇ ਸਰਤਿ, ਤਤ੍ਥ ਨਵਂ ਠਿਤਿਕਂ ਕਤ੍ਵਾ ਗਾਹੇਤਬ੍ਬਂ. ਅਨ੍ਤੋਗਾਮੇ ਆਸਨਸਾਲਾਯ ਸਰਨ੍ਤੇਨ ਆਸਨਸਾਲਾਯ ਠਿਤਿਕਾਯ ਗਾਹੇਤਬ੍ਬਂ. ਯਤ੍ਥ ਕਤ੍ਥਚਿ ਸਰਿਤ੍ਵਾ ਗਾਹੇਤਬ੍ਬਮੇਵ, ਅਗਾਹੇਤੁਂ ਨ ਵਟ੍ਟਤਿ. ਨ ਹਿ ਏਤਂ ਦੁਤਿਯਦਿਵਸੇ ਲਬ੍ਭਤੀਤਿ.
ਸਚੇ ਸਕਵਿਹਾਰਤੋ ਅਞ੍ਞਂ ਵਿਹਾਰਂ ਗਚ੍ਛਨ੍ਤੇ ਭਿਕ੍ਖੂ ਦਿਸ੍ਵਾ ਕੋਚਿ ਉਦ੍ਦੇਸਭਤ੍ਤਂ ਉਦ੍ਦਿਸਾਪੇਤਿ, ਯਾਵ ਅਨ੍ਤੋਉਪਚਾਰੇ ਵਾ ਉਪਚਾਰਸੀਮਟ੍ਠਕੇਹਿ ਸਦ੍ਧਿਂ ਵੁਤ੍ਤਨਯੇਨ ਏਕਾਬਦ੍ਧਾ ਵਾ ਹੋਨ੍ਤਿ, ਤਾਵ ਸਕਵਿਹਾਰੇ ਠਿਤਿਕਾਵਸੇਨੇਵ ਗਾਹੇਤਬ੍ਬਂ. ਬਹਿਉਪਚਾਰੇ ਠਿਤਾਨਂ ਦਿਨ੍ਨਂ ਪਨ ‘‘ਸਙ੍ਘਤੋ ਭਨ੍ਤੇ ਏਤ੍ਤਕੇ ਨਾਮ ਭਿਕ੍ਖੂ ਉਦ੍ਦਿਸਥਾ’’ਤਿ ਵੁਤ੍ਤੇ ਸਮ੍ਪਤ੍ਤਾਨਂ ਗਾਹੇਤਬ੍ਬਂ. ਤਤ੍ਥ ਦ੍ਵਾਦਸਹਤ੍ਥਨ੍ਤਰਂ ਅਵਿਜਹਿਤ੍ਵਾ ਏਕਾਬਦ੍ਧਨਯੇਨ ਦੂਰੇ ਠਿਤਾਪਿ ਸਮ੍ਪਤ੍ਤਾਯੇਵਾਤਿ ਵੇਦਿਤਬ੍ਬਂ. ਸਚੇ ਯਂ ਵਿਹਾਰਂ ਗਚ੍ਛਨ੍ਤਿ, ਤਤ੍ਥ ਪਵਿਟ੍ਠਾਨਂ ਆਰੋਚੇਨ੍ਤਿ, ਤਸ੍ਸ ਵਿਹਾਰਸ੍ਸ ਠਿਤਿਕਾਵਸੇਨ ਗਾਹੇਤਬ੍ਬਂ. ਸਚੇਪਿ ਗਾਮਦ੍ਵਾਰੇ ਵਾ ਵੀਥਿਯਂ ਵਾ ਚਤੁਕ੍ਕੇ ਵਾ ਅਨ੍ਤਰਘਰੇ ਵਾ ਭਿਕ੍ਖੂ ਦਿਸ੍ਵਾ ਕੋਚਿ ਸਙ੍ਘੁਦ੍ਦੇਸਂ ਆਰੋਚੇਤਿ, ਤਸ੍ਮਿਂ ਤਸ੍ਮਿਂ ਠਾਨੇ ਅਨ੍ਤੋਉਪਚਾਰਗਤਾਨਂ ਗਾਹੇਤਬ੍ਬਂ.
ਘਰੂਪਚਾਰੋ ਚੇਤ੍ਥ ‘‘ਏਕਂ ਘਰਂ ਏਕੂਪਚਾਰਂ, ਏਕਂ ਘਰਂ ਨਾਨੂਪਚਾਰਂ, ਨਾਨਾਘਰਂ ਏਕੂਪਚਾਰਂ, ਨਾਨਾਘਰਂ ਨਾਨੂਪਚਾਰ’’ਨ੍ਤਿ ਇਮੇਸਂ ਵਸੇਨ ਵੇਦਿਤਬ੍ਬੋ. ਤਤ੍ਥ ਯਂ ਏਕਕੁਲਸ੍ਸ ਘਰਂ ਏਕਵਲ਼ਞ੍ਜਂ ਹੋਤਿ, ਤਂ ਸੁਪ੍ਪਪਾਤਪਰਿਚ੍ਛੇਦਸ੍ਸ ਅਨ੍ਤੋ ਏਕੂਪਚਾਰਂ ਨਾਮ. ਤਤ੍ਥੁਪ੍ਪਨ੍ਨੋ ਉਦ੍ਦੇਸਲਾਭੋ ਤਸ੍ਮਿਂ ਉਪਚਾਰੇ ਭਿਕ੍ਖਾਚਾਰਵਤ੍ਤੇਨਪਿ ਠਿਤਾਨਂ ਸਬ੍ਬੇਸਂ ਪਾਪੁਣਾਤਿ, ਏਤਂ ‘‘ਏਕਂ ਘਰਂ ਏਕੂਪਚਾਰਂ’’ ਨਾਮ.
ਯਂ ਪਨ ਏਕਂ ਘਰਂ ਦ੍ਵਿਨ੍ਨਂ ਭਰਿਯਾਨਂ ਸੁਖਵਿਹਾਰਤ੍ਥਾਯ ਮਜ੍ਝੇ ਭਿਤ੍ਤਿਂ ਉਟ੍ਠਾਪੇਤ੍ਵਾ ਨਾਨਾਦ੍ਵਾਰਵਲ਼ਞ੍ਜਂ ਕਤਂ, ਤਤ੍ਥੁਪ੍ਪਨ੍ਨੋ ਉਦ੍ਦੇਸਲਾਭੋ ਭਿਤ੍ਤਿਅਨ੍ਤਰਿਕਸ੍ਸ ਨ ਪਾਪੁਣਾਤਿ, ਤਸ੍ਮਿਂ ਤਸ੍ਮਿਂ ਠਾਨੇ ਨਿਸਿਨ੍ਨਸ੍ਸੇਵ ਪਾਪੁਣਾਤਿ, ਏਤਂ ‘‘ਏਕਂ ਘਰਂ ਨਾਨੂਪਚਾਰਂ’’ ਨਾਮ.
ਯਸ੍ਮਿਂ ਪਨ ਘਰੇ ਬਹੂ ਭਿਕ੍ਖੂ ਨਿਮਨ੍ਤੇਤ੍ਵਾ ਅਨ੍ਤੋਗੇਹਤੋ ਪਟ੍ਠਾਯ ਏਕਾਬਦ੍ਧੇ ਕਤ੍ਵਾ ਪਟਿਵਿਸ੍ਸਕਘਰਾਨਿਪਿ ਪੂਰੇਤ੍ਵਾ ਨਿਸੀਦਾਪੇਨ੍ਤਿ, ਤਤ੍ਥੁਪ੍ਪਨ੍ਨੋ ਉਦ੍ਦੇਸਲਾਭੋ ਸਬ੍ਬੇਸਂ ਪਾਪੁਣਾਤਿ. ਯਮ੍ਪਿ ਨਾਨਾਕੁਲਸ੍ਸ ਨਿਵੇਸਨਂ ਮਜ੍ਝੇ ਭਿਤ੍ਤਿਂ ਅਕਤ੍ਵਾ ਏਕਦ੍ਵਾਰੇਨੇਵ ਵਲ਼ਞ੍ਜਨ੍ਤਿ, ਤਤ੍ਰਾਪਿ ਏਸੇਵ ਨਯੋ. ਏਤਂ ‘‘ਨਾਨਾਘਰਂ ਏਕੂਪਚਾਰਂ’’ ਨਾਮ.
ਯੋ ਪਨ ਨਾਨਾਨਿਵੇਸਨੇਸੁ ਨਿਸਿਨ੍ਨਾਨਂ ਭਿਕ੍ਖੂਨਂ ਉਦ੍ਦੇਸਲਾਭੋ ਉਪ੍ਪਜ੍ਜਤਿ, ਕਿਞ੍ਚਾਪਿ ਭਿਤ੍ਤਿਚ੍ਛਿਦ੍ਦੇਨ ਭਿਕ੍ਖੂ ਦਿਸ੍ਸਨ੍ਤਿ, ਤਸ੍ਮਿਂ ਤਸ੍ਮਿਂ ਨਿਵੇਸਨੇ ਨਿਸਿਨ੍ਨਾਨਂਯੇਵ ਪਾਪੁਣਾਤਿ, ਏਤਂ ‘‘ਨਾਨਾਘਰਂ ਨਾਨੂਪਚਾਰਂ’’ ਨਾਮ.
ਯੋ ਪਨ ਗਾਮਦ੍ਵਾਰਵੀਥਿਚਤੁਕ੍ਕੇਸੁ ਅਞ੍ਞਤਰਸ੍ਮਿਂ ਠਾਨੇ ਉਦ੍ਦੇਸਭਤ੍ਤਂ ਲਭਿਤ੍ਵਾ ਅਞ੍ਞਸ੍ਮਿਂ ਭਿਕ੍ਖੁਸ੍ਮਿਂ ਅਸਤਿ ਅਤ੍ਤਨੋਵ ਪਾਪੁਣਾਪੇਤ੍ਵਾ ਦੁਤਿਯਦਿਵਸੇਪਿ ਤਸ੍ਮਿਂਯੇਵ ਠਾਨੇ ਅਞ੍ਞਂ ਲਭਤਿ, ਤੇਨ ਯਂ ਅਞ੍ਞਂ ਨਵਕਂ ਵਾ ਵੁਡ੍ਢਂ ਵਾ ਭਿਕ੍ਖੁਂ ਪਸ੍ਸਤਿ, ਤਸ੍ਸ ਗਾਹੇਤਬ੍ਬਂ. ਸਚੇ ਕੋਚਿ ਨਤ੍ਥਿ, ਅਤ੍ਤਨੋਵ ਪਾਪੇਤ੍ਵਾ ਭੁਞ੍ਜਿਤਬ੍ਬਂ.
ਸਚੇ ਆਸਨਸਾਲਾਯ ਨਿਸੀਦਿਤ੍ਵਾ ਕਾਲਂ ਪਟਿਮਾਨੇਨ੍ਤੇਸੁ ਭਿਕ੍ਖੂਸੁ ਕੋਚਿ ਆਗਨ੍ਤ੍ਵਾ ‘‘ਸਙ੍ਘੁਦ੍ਦੇਸਪਤ੍ਤਂ ਦੇਥ, ਉਦ੍ਦੇਸਪਤ੍ਤਂ ਦੇਥ, ਸਙ੍ਘਤੋ ਉਦ੍ਦਿਸਿਤ੍ਵਾ ਪਤ੍ਤਂ ਦੇਥ, ਸਙ੍ਘਿਕਂ ਪਤ੍ਤਂ ਦੇਥਾ’’ਤਿ ਵਾ ਵਦਤਿ, ਉਦ੍ਦੇਸਪਤ੍ਤਂ ਠਿਤਿਕਾਯ ਗਾਹੇਤ੍ਵਾ ਦਾਤਬ੍ਬਂ. ‘‘ਸਙ੍ਘੁਦ੍ਦੇਸਭਿਕ੍ਖੁਂ ਦੇਥ, ਸਙ੍ਘਤੋ ਉਦ੍ਦਿਸਿਤ੍ਵਾ ਭਿਕ੍ਖੁਂ ਦੇਥ, ਸਙ੍ਘਿਕਂ ਭਿਕ੍ਖੁਂ ਦੇਥਾ’’ਤਿ ਵੁਤ੍ਤੇਪਿ ਏਸੇਵ ਨਯੋ.
ਉਦ੍ਦੇਸਕੋ ਪਨੇਤ੍ਥ ਪੇਸਲੋ ਲਜ੍ਜੀ ਮੇਧਾਵੀ ਇਚ੍ਛਿਤਬ੍ਬੋ, ਤੇਨ ਤਿਕ੍ਖਤ੍ਤੁਂ ਠਿਤਿਕਂ ਪੁਚ੍ਛਿਤ੍ਵਾ ਸਚੇ ਕੋਚਿ ਠਿਤਿਕਂ ਜਾਨਨ੍ਤੋ ਨਤ੍ਥਿ, ਥੇਰਾਸਨਤੋ ਗਾਹੇਤਬ੍ਬਂ. ਸਚੇ ਪਨ ‘‘ਅਹਂ ਜਾਨਾਮਿ, ਦਸਵਸ੍ਸੇਨ ਲਦ੍ਧ’’ਨ੍ਤਿ ਕੋਚਿ ਭਣਤਿ, ‘‘ਅਤ੍ਥਾਵੁਸੋ, ਦਸਵਸ੍ਸਾ ਭਿਕ੍ਖੂ’’ਤਿ ਪੁਚ੍ਛਿਤਬ੍ਬਂ. ਸਚੇ ਤਸ੍ਸ ਸੁਤ੍ਵਾ ‘‘ਦਸਵਸ੍ਸਮ੍ਹ ਦਸਵਸ੍ਸਮ੍ਹਾ’’ਤਿ ਬਹੂ ਆਗਚ੍ਛਨ੍ਤਿ, ‘‘ਤੁਯ੍ਹਂ ਪਾਪੁਣਾਤਿ, ਤੁਯ੍ਹਂ ਪਾਪੁਣਾਤੀ’’ਤਿ ਅਵਤ੍ਵਾ ‘‘ਸਬ੍ਬੇ ਅਪ੍ਪਸਦ੍ਦਾ ਹੋਥਾ’’ਤਿ ਵਤ੍ਵਾ ਪਟਿਪਾਟਿਯਾ ਠਪੇਤਬ੍ਬਾ. ਠਪੇਤ੍ਵਾ ‘‘ਕਤਿ ਇਚ੍ਛਥਾ’’ਤਿ ਉਪਾਸਕੋ ਪੁਚ੍ਛਿਤਬ੍ਬੋ. ‘‘ਏਤ੍ਤਕੇ ਨਾਮ, ਭਨ੍ਤੇ, ਭਿਕ੍ਖੂ’’ਤਿ ਵੁਤ੍ਤੇ ‘‘ਤੁਯ੍ਹਂ ਪਾਪੁਣਾਤਿ, ਤੁਯ੍ਹਂ ਪਾਪੁਣਾਤੀ’’ਤਿ ਅਵਤ੍ਵਾ ਸਬ੍ਬਨਵਕਸ੍ਸ ਵਸ੍ਸਗ੍ਗਞ੍ਚ ਉਤੁ ਚ ਦਿਵਸਭਾਗੋ ਚ ਛਾਯਾ ਚ ਪੁਚ੍ਛਿਤਬ੍ਬਾ. ਸਚੇ ਛਾਯਾਯਪਿ ਪੁਚ੍ਛਿਯਮਾਨਾਯ ਅਞ੍ਞੋ ਵੁਡ੍ਢਤਰੋ ਆਗਚ੍ਛਤਿ, ਤਸ੍ਸ ਦਾਤਬ੍ਬਂ. ਅਥ ਛਾਯਂ ਪੁਚ੍ਛਿਤ੍ਵਾ ‘‘ਤੁਯ੍ਹਂ ਪਾਪੁਣਾਤੀ’’ਤਿ ਵੁਤ੍ਤੇ ਵੁਡ੍ਢਤਰੋ ਆਗਚ੍ਛਤਿ, ਨ ਲਭਤਿ. ਕਥਾਪਪਞ੍ਚੇਨ ਹਿ ਨਿਸਿਨ੍ਨਸ੍ਸਾਪਿ ਨਿਦ੍ਦਾਯਨ੍ਤਸ੍ਸਾਪਿ ਗਾਹਿਤਂ ਸੁਗ੍ਗਾਹਿਤਂ, ਅਤਿਕ੍ਕਨ੍ਤਂ ਸੁਅਤਿਕ੍ਕਨ੍ਤਂ, ਭਾਜਨੀਯਭਣ੍ਡਞ੍ਹਿ ਨਾਮੇਤਂ ਸਮ੍ਪਤ੍ਤਸ੍ਸੇਵ ਪਾਪੁਣਾਤਿ, ਤਤ੍ਥ ਸਮ੍ਪਤ੍ਤਭਾਵੋ ਉਪਚਾਰੇਨ ਪਰਿਚ੍ਛਿਨ੍ਦਿਤਬ੍ਬੋ. ਆਸਨਸਾਲਾਯ ਚ ਅਨ੍ਤੋਪਰਿਕ੍ਖੇਪੋ ਉਪਚਾਰੋ, ਤਸ੍ਮਿਂ ਠਿਤਸ੍ਸ ਲਾਭੋ ਪਾਪੁਣਾਤੀਤਿ.
ਕੋਚਿ ਆਸਨਸਾਲਤੋ ਅਟ੍ਠ ਉਦ੍ਦੇਸਪਤ੍ਤੇ ਆਹਰਾਪੇਤ੍ਵਾ ਸਤ੍ਤ ਪਤ੍ਤੇ ਪਣੀਤਭੋਜਨਾਨਂ ਏਕਂ ਉਦਕਸ੍ਸ ਪੂਰੇਤ੍ਵਾ ਆਸਨਸਾਲਾਯਂ ਪਹਿਣਾਤਿ, ਗਹੇਤ੍ਵਾ ਆਗਤਾ ਕਿਞ੍ਚਿ ਅਵਤ੍ਵਾ ਭਿਕ੍ਖੂਨਂ ਹਤ੍ਥੇਸੁ ਪਤਿਟ੍ਠਾਪੇਤ੍ਵਾ ਪਕ੍ਕਮਨ੍ਤਿ. ਯੇਨ ਯਂ ਲਦ੍ਧਂ, ਤਸ੍ਸੇਵ ਤਂ ਹੋਤਿ. ਯੇਨ ਪਨ ਉਦਕਂ ਲਦ੍ਧਂ, ਤਸ੍ਸ ਅਤਿਕ੍ਕਨ੍ਤਮ੍ਪਿ ਠਿਤਿਕਂ ਠਪੇਤ੍ਵਾ ਅਞ੍ਞਂ ਉਦ੍ਦੇਸਭਤ੍ਤਂ ਗਾਹੇਤਬ੍ਬਂ. ਤਞ੍ਚ ਲੂਖਂ ਵਾ ਲਭਤੁ ਪਣੀਤਂ ਵਾ ਤਿਚੀਵਰਪਰਿਵਾਰਂ ਵਾ, ਤਸ੍ਸੇਵੇਤਂ. ਈਦਿਸੋ ਹਿਸ੍ਸ ਪੁਞ੍ਞਵਿਸੇਸੋ. ਉਦਕਂ ਪਨ ਯਸ੍ਮਾ ਆਮਿਸਂ ਨ ਹੋਤਿ, ਤਸ੍ਮਾ ਅਞ੍ਞਂ ਉਦ੍ਦੇਸਭਤ੍ਤਂ ਲਬ੍ਭਤਿ.
ਸਚੇ ਪਨ ਤੇ ਗਹੇਤ੍ਵਾ ਆਗਤਾ ‘‘ਇਦਂ ਕਿਰ ਭਨ੍ਤੇ ਸਬ੍ਬਂ ਭਾਜੇਤ੍ਵਾ ਭੁਞ੍ਜਥਾ’’ਤਿ ਵਤ੍ਵਾ ਗਚ੍ਛਨ੍ਤਿ, ਸਬ੍ਬੇਹਿ ਭਾਜੇਤ੍ਵਾ ਭੁਞ੍ਜਿਤ੍ਵਾ ਉਦਕਂ ਪਾਤਬ੍ਬਂ. ਸਙ੍ਘਤੋ ਉਦ੍ਦਿਸਿਤ੍ਵਾ ‘‘ਅਟ੍ਠ ਮਹਾਥੇਰੇ ਦੇਥ, ਮਜ੍ਝਿਮੇ ਦੇਥ, ਨਵਕੇ ਦੇਥ, ਪਰਿਪੁਣ੍ਣਵਸ੍ਸਸਾਮਣੇਰੇ ਦੇਥ, ਮਜ੍ਝਿਮਭਾਣਕਾਦਯੋ ਦੇਥ, ਮਯ੍ਹਂ ਞਾਤਿਭਿਕ੍ਖੂ ਦੇਥਾ’’ਤਿ ਵਦਨ੍ਤਸ੍ਸ ਪਨ ‘‘ਉਪਾਸਕ, ਤ੍ਵਂ ਏਵਂ ਵਦਸਿ, ਠਿਤਿਕਾਯ ਪਨ ਤੇਸਂ ਨ ਪਾਪੁਣਾਤੀ’’ਤਿ ਵਤ੍ਵਾ ਠਿਤਿਕਾਵਸੇਨੇਵ ਦਾਤਬ੍ਬਾ. ਦਹਰਸਾਮਣੇਰੇਹਿ ਪਨ ਉਦ੍ਦੇਸਭਤ੍ਤੇਸੁ ਲਦ੍ਧੇਸੁ ਸਚੇ ਦਾਯਕਾਨਂ ਘਰੇ ਮਙ੍ਗਲਂ ਹੋਤਿ, ‘‘ਤੁਮ੍ਹਾਕਂ ਆਚਰਿਯੁਪਜ੍ਝਾਯੇ ਪੇਸੇਥਾ’’ਤਿ ਵਤ੍ਤਬ੍ਬਂ.
ਯਸ੍ਮਿਂ ਪਨ ਉਦ੍ਦੇਸਭਤ੍ਤੇ ਪਠਮਭਾਗੋ ਸਾਮਣੇਰਾਨਂ ਪਾਪੁਣਾਤਿ, ਅਨੁਭਾਗੋ ਮਹਾਥੇਰਾਨਂ, ਨ ਤਤ੍ਥ ਸਾਮਣੇਰਾ ‘‘ਮਯਂ ਪਠਮਭਾਗਂ ਲਭਿਮ੍ਹਾ’’ਤਿ ਪੁਰਤੋ ਗਨ੍ਤੁਂ ਲਭਨ੍ਤਿ, ਯਥਾਪਟਿਪਾਟਿਯਾ ਏਵ ਗਨ੍ਤਬ੍ਬਂ. ‘‘ਸਙ੍ਘਤੋ ਉਦ੍ਦਿਸਿਤ੍ਵਾ ‘ਤੁਮ੍ਹੇ ਏਥਾ’ਤਿ ਵੁਤ੍ਤੇ ‘ਮਯ੍ਹਂ ਅਞ੍ਞਦਾਪਿ ਜਾਨਿਸ੍ਸਸਿ, ਠਿਤਿਕਾ ਪਨ ਏਵਂ ਗਚ੍ਛਤੀ’’’ਤਿ ਠਿਤਿਕਾਵਸੇਨੇਵ ਗਾਹੇਤਬ੍ਬਂ. ਅਥ ‘‘ਸਙ੍ਘੁਦ੍ਦੇਸਪਤ੍ਤਂ ਦੇਥਾ’’ਤਿ ਵਤ੍ਵਾ ਅਗਾਹਿਤੇਯੇਵ ਪਤ੍ਤੇ ਯਸ੍ਸ ਕਸ੍ਸਚਿ ਪਤ੍ਤਂ ਗਹੇਤ੍ਵਾ ਪੂਰੇਤ੍ਵਾ ਆਹਰਤਿ, ਆਹਟਮ੍ਪਿ ਠਿਤਿਕਾਯ ਏਵ ਗਾਹੇਤਬ੍ਬਂ.
ਏਕੋ ‘‘ਸਙ੍ਘੁਦ੍ਦੇਸਪਤ੍ਤਂ ਆਹਰਾ’’ਤਿ ਪੇਸਿਤੋ ‘‘ਭਨ੍ਤੇ, ਏਕਂ ਪਤ੍ਤਂ ਦੇਥ, ਨਿਮਨ੍ਤਨਭਤ੍ਤਂ ਆਹਰਿਸ੍ਸਾਮੀ’’ਤਿ ਵਦਤਿ, ਸੋ ਚੇ ਉਦ੍ਦੇਸਭਤ੍ਤਘਰਤੋ ਅਯਂ ਆਗਤੋਤਿ ਞਤ੍ਵਾ ਭਿਕ੍ਖੂਹਿ ‘‘ਨਨੁ ਤ੍ਵਂ ਅਸੁਕਘਰਤੋ ਆਗਤੋ’’ਤਿ ਵੁਤ੍ਤੋ ‘‘ਆਮ, ਭਨ੍ਤੇ, ਨ ਨਿਮਨ੍ਤਨਭਤ੍ਤਂ, ਉਦ੍ਦੇਸਭਤ੍ਤ’’ਨ੍ਤਿ ਭਣਤਿ, ਠਿਤਿਕਾਯ ਗਹੇਤਬ੍ਬਂ. ਯੋ ਪਨ ‘‘ਏਕਂ ਪਤ੍ਤਂ ਆਹਰਾ’’ਤਿ ਵੁਤ੍ਤੋ ‘‘‘ਕਿ’ਨ੍ਤਿ ਵਤ੍ਵਾ ਆਹਰਾਮੀ’’ਤਿ ਵਤ੍ਵਾ ‘‘ਯਥਾ ਤੇ ਰੁਚ੍ਚਤੀ’’ਤਿ ਵੁਤ੍ਤੋ ਆਗਚ੍ਛਤਿ, ਅਯਂ ਵਿਸ੍ਸਟ੍ਠਦੂਤੋ ਨਾਮ. ਉਦ੍ਦੇਸਪਤ੍ਤਂ ਵਾ ਪਟਿਪਾਟਿਪਤ੍ਤਂ ਵਾ ਪੁਗ੍ਗਲਿਕਪਤ੍ਤਂ ਵਾ ਯਂ ਇਚ੍ਛਤਿ, ਤਂ ਤਸ੍ਸ ਦਾਤਬ੍ਬਂ. ਏਕੋ ਬਾਲੋ ਅਬ੍ਯਤ੍ਤੋ ‘‘ਉਦ੍ਦੇਸਪਤ੍ਤਂ ਆਹਰਾ’’ਤਿ ਪੇਸਿਤੋ ਵਤ੍ਤੁਂ ਨ ਜਾਨਾਤਿ, ਤੁਣ੍ਹੀਭੂਤੋ ਤਿਟ੍ਠਤਿ, ਸੋ ‘‘ਕਸ੍ਸ ਸਨ੍ਤਿਕਂ ਆਗਤੋਸੀ’’ਤਿ ਵਾ ‘‘ਕਸ੍ਸ ਪਤ੍ਤਂ ਹਰਿਸ੍ਸਸੀ’’ਤਿ ਵਾ ਨ ਵਤ੍ਤਬ੍ਬੋ. ਏਵਞ੍ਹਿ ਵੁਤ੍ਤੋ ਪੁਚ੍ਛਾਸਭਾਗੇਨ ‘‘ਤੁਮ੍ਹਾਕਂ ਸਨ੍ਤਿਕਂ ਆਗਤੋਮ੍ਹੀ’’ਤਿ ‘‘ਤੁਮ੍ਹਾਕਂ ਪਤ੍ਤਂ ਹਰਿਸ੍ਸਾਮੀ’’ਤਿ ਵਾ ਵਦੇਯ੍ਯ, ਤਤੋ ਤਂ ਭਿਕ੍ਖੁਂ ਅਞ੍ਞੇ ਭਿਕ੍ਖੂ ਜਿਗੁਚ੍ਛਨ੍ਤਾ ਨ ਓਲੋਕੇਯ੍ਯੁਂ. ‘‘ਕੁਹਿਂ ਗਚ੍ਛਸਿ, ਕਿਂ ਕਰੋਨ੍ਤੋ ਆਹਿਣ੍ਡਸੀ’’ਤਿ ਪਨ ਵਤ੍ਤਬ੍ਬੋ. ਤਸ੍ਸ ‘‘ਉਦ੍ਦੇਸਪਤ੍ਤਤ੍ਥਾਯ ਆਗਤੋਮ੍ਹੀ’’ਤਿ ਵਦਨ੍ਤਸ੍ਸ ਗਾਹੇਤ੍ਵਾ ਪਤ੍ਤੋ ਦਾਤਬ੍ਬੋ.
ਏਕਾ ਕੂਟਟ੍ਠਿਤਿਕਾ ਨਾਮ ਹੋਤਿ. ਰਞ੍ਞੋ ਵਾ ਹਿ ਰਾਜਮਹਾਮਤ੍ਤਸ੍ਸ ਵਾ ਗੇਹੇ ਅਤਿਪਣੀਤਾਨਿ ਅਟ੍ਠ ਉਦ੍ਦੇਸਭਤ੍ਤਾਨਿ ਨਿਚ੍ਚਂ ਦਿਯ੍ਯਨ੍ਤਿ, ਤਾਨਿ ਏਕਚਾਰਿਕਭਤ੍ਤਾਨਿ ਕਤ੍ਵਾ ਭਿਕ੍ਖੂ ਵਿਸੁਂ ਠਿਤਿਕਾਯ ਪਰਿਭੁਞ੍ਜਨ੍ਤਿ. ਏਕਚ੍ਚੇ ਭਿਕ੍ਖੂ ‘‘ਸ੍ਵੇ ਦਾਨਿ ਅਮ੍ਹਾਕਂ ਪਾਪੁਣਿਸ੍ਸਨ੍ਤੀ’’ਤਿ ਅਤ੍ਤਨੋ ਠਿਤਿਕਂ ਸਲ੍ਲਕ੍ਖੇਤ੍ਵਾ ਗਤਾ, ਤੇਸੁ ਅਨਾਗਤੇਸੁਯੇਵ ਅਞ੍ਞੇ ਆਗਨ੍ਤੁਕਾ ਭਿਕ੍ਖੂ ਆਗਨ੍ਤ੍ਵਾ ਆਸਨਸਾਲਾਯ ਨਿਸੀਦਨ੍ਤਿ; ਤਙ੍ਖਣਞ੍ਞੇਵ ਰਾਜਪੁਰਿਸਾ ਆਗਨ੍ਤ੍ਵਾ ‘‘ਪਣੀਤਭਤ੍ਤਪਤ੍ਤੇ ਦੇਥਾ’’ਤਿ ਵਦਨ੍ਤਿ. ਆਗਨ੍ਤੁਕਾ ਠਿਤਿਕਂ ਅਜਾਨਨ੍ਤਾ ਗਾਹੇਨ੍ਤਿ. ਤਙ੍ਖਣਞ੍ਞੇਵ ਚ ਠਿਤਿਕਂ ਜਾਨਨਕਭਿਕ੍ਖੂ ਆਗਨ੍ਤ੍ਵਾ ‘‘ਕਿਂ ਗਾਹੇਥਾ’’ਤਿ ਵਦਨ੍ਤਿ. ‘‘ਰਾਜਗੇਹੇ ਪਣੀਤਭਤ੍ਤ’’ਨ੍ਤਿ. ‘‘ਕਤਿਵਸ੍ਸਤੋ ਪਟ੍ਠਾਯਾ’’ਤਿ? ‘‘ਏਤ੍ਤਕਵਸ੍ਸਤੋ ਨਾਮਾ’’ਤਿ. ‘‘ਮਾ ਗਾਹੇਥਾ’’ਤਿ ਨਿਵਾਰੇਤ੍ਵਾ ਠਿਤਿਕਾਯ ਗਾਹੇਤਬ੍ਬਂ. ਗਾਹਿਤੇ ਆਗਤੇਹਿਪਿ ਪਤ੍ਤਦਾਨਕਾਲੇ ਆਗਤੇਹਿਪਿ ਦਿਨ੍ਨਕਾਲੇ ਆਗਤੇਹਿਪਿ ਰਾਜਗੇਹਤੋ ਪਤ੍ਤੇ ਪੂਰੇਤ੍ਵਾ ਆਹਟਕਾਲੇ ਆਗਤੇਹਿਪਿ ਰਾਜਾ ‘‘ਅਜ੍ਜ ਭਿਕ੍ਖੂਯੇਵ ਆਗਚ੍ਛਨ੍ਤੂ’’ਤਿ ਪੇਸੇਤ੍ਵਾ ਭਿਕ੍ਖੂਨਂਯੇਵ ਹਤ੍ਥੇ ਪਿਣ੍ਡਪਾਤਂ ਦੇਤਿ; ਏਵਂ ਦਿਨ੍ਨਪਿਣ੍ਡਪਾਤਂ ਗਹੇਤ੍ਵਾ ਆਗਤਕਾਲੇ ਆਗਤੇਹਿਪਿ ਠਿਤਿਕਂ ਜਾਨਨਕਭਿਕ੍ਖੂਹਿ ‘‘ਮਾ ਭੁਞ੍ਜਿਤ੍ਥਾ’’ਤਿ ਵਾਰੇਤ੍ਵਾ ਠਿਤਿਕਾਯਮੇਵ ਗਾਹੇਤਬ੍ਬਂ.
ਅਥ ਨੇ ਰਾਜਾ ਭੋਜੇਤ੍ਵਾ ਪਤ੍ਤੇਪਿ ਨੇਸਂ ਪੂਰੇਤ੍ਵਾ ਦੇਤਿ, ਯਂ ਆਹਟਂ ਤਂ ਠਿਤਿਕਾਯ ਗਾਹੇਤਬ੍ਬਂ. ਸਚੇ ਪਨ ‘‘ਮਾ ਤੁਚ੍ਛਹਤ੍ਥਾ ਗਚ੍ਛਨ੍ਤੂ’’ਤਿ ਥੋਕਮੇਵ ਪਤ੍ਤੇਸੁ ਪਕ੍ਖਿਤ੍ਤਂ ਹੋਤਿ, ਤਂ ਨ ਗਾਹੇਤਬ੍ਬਂ. ਅਥ ਭੁਞ੍ਜਿਤ੍ਵਾ ਤੁਚ੍ਛਪਤ੍ਤਾਵ ਆਗਚ੍ਛਨ੍ਤਿ, ਯਂ ਤੇਹਿ ਭੁਤ੍ਤਂ, ਤਂ ਨੇਸਂ ਗੀਵਾ ਹੋਤੀਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨਾਹ – ‘‘ਗੀਵਾਕਿਚ੍ਚਂ ਏਤ੍ਥ ਨਤ੍ਥਿ, ਠਿਤਿਕਂ ਪਨ ਅਜਾਨਨ੍ਤੇਹਿ ਯਾਵ ਜਾਨਨਕਾ ਆਗਚ੍ਛਨ੍ਤਿ, ਤਾਵ ਨਿਸੀਦਿਤਬ੍ਬਂ ਸਿਯਾ; ਏਵਂ ਸਨ੍ਤੇਪਿ ਭੁਤ੍ਤਂ ਸੁਭੁਤ੍ਤਂ, ਇਦਾਨਿ ਪਤ੍ਤਟ੍ਠਾਨੇਨ ਗਾਹੇਤਬ੍ਬ’’ਨ੍ਤਿ.
ਏਕੋ ਤਿਚੀਵਰਪਰਿਵਾਰੋ ਸਤਗ੍ਘਨਕੋ ਪਿਣ੍ਡਪਾਤੋ ਅਵਸ੍ਸਿਕਸ੍ਸ ਭਿਕ੍ਖੁਨੋ ਪਤ੍ਤੋ, ਵਿਹਾਰੇ ਚ ‘‘ਏਵਰੂਪੋ ਪਿਣ੍ਡਪਾਤੋ ਅਵਸ੍ਸਿਕਸ੍ਸ ਪਤ੍ਤੋ’’ਤਿ ਲਿਖਿਤ੍ਵਾ ਠਪੇਸੁਂ. ਅਥ ਸਟ੍ਠਿਵਸ੍ਸਚ੍ਚਯੇਨ ਅਞ੍ਞੋ ਤਥਾਰੂਪੋ ਪਿਣ੍ਡਪਾਤੋ ਉਪ੍ਪਨ੍ਨੋ, ਅਯਂ ਕਿਂ ਅਵਸ੍ਸਿਕਟ੍ਠਿਤਿਕਾਯ ਗਾਹੇਤਬ੍ਬੋ, ਉਦਾਹੁ ਸਟ੍ਠਿਵਸ੍ਸਿਕਟ੍ਠਿਤਿਕਾਯਾਤਿ. ਸਟ੍ਠਿਵਸ੍ਸਿਕਟ੍ਠਿਤਿਕਾਯਾਤਿ ਵੁਤ੍ਤਂ, ਅਯਞ੍ਹਿ ਭਿਕ੍ਖੁ ਠਿਤਿਕਂ ਗਹੇਤ੍ਵਾਯੇਵ ਵਡ੍ਢਿਤੋਤਿ.
ਏਕੋ ਉਦ੍ਦੇਸਭਤ੍ਤਂ ਭੁਞ੍ਜਿਤ੍ਵਾ ਸਾਮਣੇਰੋ ਜਾਤੋ, ਪੁਨ ਤਂ ਭਤ੍ਤਂ ਸਾਮਣੇਰਟ੍ਠਿਤਿਕਾਯ ਪਤ੍ਤਂ ਗਣ੍ਹਿਤੁਂ ਲਭਤਿ. ਅਯਂ ਕਿਰ ਅਨ੍ਤਰਾਭਟ੍ਠਕੋ ਨਾਮ. ਯੋ ਪਨ ਪਰਿਪੁਣ੍ਣਵਸ੍ਸੋ ਸਾਮਣੇਰੋ ‘‘ਸ੍ਵੇ ਉਦ੍ਦੇਸਭਤ੍ਤਂ ਲਭਿਸ੍ਸਤੀ’’ਤਿ ਅਜ੍ਜੇਵ ਉਪਸਮ੍ਪਜ੍ਜਤਿ, ਅਤਿਕ੍ਕਨ੍ਤਾ ਤਸ੍ਸ ਠਿਤਿਕਾ. ਏਕਸ੍ਸ ਭਿਕ੍ਖੁਨੋ ਉਦ੍ਦੇਸਭਤ੍ਤਂ ਪਤ੍ਤਂ, ਪਤ੍ਤੋ ਚਸ੍ਸ ਨ ਤੁਚ੍ਛੋ ਹੋਤਿ, ਸੋ ਅਞ੍ਞਸ੍ਸ ਸਮੀਪੇ ਨਿਸਿਨ੍ਨਸ੍ਸ ਪਤ੍ਤਂ ਦਾਪੇਤਿ, ਤਞ੍ਚੇ ਥੇਯ੍ਯਾਯ ਹਰਨ੍ਤਿ, ਗੀਵਾ ਹੋਤਿ. ਸਚੇ ਪਨ ਸੋ ਭਿਕ੍ਖੁ ‘‘ਮਯ੍ਹਂ ਪਤ੍ਤਂ ਦਮ੍ਮੀ’’ਤਿ ਸਯਮੇਵ ਦੇਤਿ, ਅਸ੍ਸ ਗੀਵਾ ਨ ਹੋਤਿ. ਅਥਾਪਿ ਤੇਨ ਭਤ੍ਤੇਨ ਅਨਤ੍ਥਿਕੋ ਹੁਤ੍ਵਾ ‘‘ਅਲਂ ਮਯ੍ਹਂ, ਤਵੇਤਂ ਭਤ੍ਤਂ ਦਮ੍ਮਿ, ਪਤ੍ਤਂ ਪੇਸੇਤ੍ਵਾ ਆਹਰਾਪੇਹੀ’’ਤਿ ਅਞ੍ਞਂ ਵਦਤਿ, ਯਂ ਤਤੋ ਆਹਰੀਯਤਿ ਸਬ੍ਬਂ ਪਤ੍ਤਸਾਮਿਕਸ੍ਸ ਹੋਤਿ. ਪਤ੍ਤਞ੍ਚੇ ਥੇਯ੍ਯਾਯ ਹਰਨ੍ਤਿ, ਸੁਹਟੋ; ਭਤ੍ਤਸ੍ਸ ਦਿਨ੍ਨਤ੍ਤਾ ਗੀਵਾ ਨ ਹੋਤਿ.
ਵਿਹਾਰੇ ਦਸ ਭਿਕ੍ਖੂ ਹੋਨ੍ਤਿ, ਤੇਸੁ ਨਵ ਪਿਣ੍ਡਪਾਤਿਕਾ, ਏਕੋ ਸਾਦਿਯਨਕੋ. ‘‘ਦਸ ਉਦ੍ਦੇਸਪਤ੍ਤੇ ਦੇਥਾ’’ਤਿ ਵੁਤ੍ਤੇ ਪਿਣ੍ਡਪਾਤਿਕਾ ਗਹੇਤੁਂ ਨ ਇਚ੍ਛਨ੍ਤਿ. ਇਤਰੋ ਭਿਕ੍ਖੁ ‘‘ਸਬ੍ਬਾਨਿ ਮਯ੍ਹਂ ਪਾਪੁਣਨ੍ਤੀ’’ਤਿ ਗਣ੍ਹਾਤਿ, ਠਿਤਿਕਾ ਨ ਹੋਤਿ. ਏਕੇਕਂ ਚੇ ਪਾਪੇਤ੍ਵਾ ਗਣ੍ਹਾਤਿ, ਠਿਤਿਕਾ ਤਿਟ੍ਠਤਿ. ਏਵਂ ਗਾਹੇਤ੍ਵਾ ਦਸਹਿਪਿ ਪਤ੍ਤੇਹਿ ਆਹਰਾਪੇਤ੍ਵਾ ‘‘ਭਨ੍ਤੇ, ਮਯ੍ਹਂ ਸਙ੍ਗਹਂ ਕਰੋਥਾ’’ਤਿ ਨਵ ਪਤ੍ਤੇ ਪਿਣ੍ਡਪਾਤਿਕਾਨਂ ਦੇਤਿ, ਭਿਕ੍ਖੁਦਤ੍ਤਿਯਂ ਨਾਮੇਤਂ, ਗਣ੍ਹਿਤੁਂ ਵਟ੍ਟਤਿ.
ਸਚੇ ਸੋ ਉਪਾਸਕੋ ‘‘ਭਨ੍ਤੇ, ਘਰਂ ਆਗਨ੍ਤਬ੍ਬ’’ਨ੍ਤਿ ਵਦਤਿ, ਸੋ ਚ ਭਿਕ੍ਖੁ ਤੇ ਭਿਕ੍ਖੂ ‘‘ਏਥ, ਭਨ੍ਤੇ, ਮਯ੍ਹਂ ਸਹਾਯਾ ਹੋਥਾ’’ਤਿ ਤਸ੍ਸ ਘਰਂ ਗਚ੍ਛਤਿ. ਯਂ ਤਤ੍ਥ ਲਭਤਿ, ਸਬ੍ਬਂ ਤਸ੍ਸੇਵ ਹੋਤਿ. ਇਤਰੇ ਤੇਨ ਦਿਨ੍ਨਂ ਲਭਨ੍ਤਿ. ਅਥ ਨੇਸਂ ਘਰੇਯੇਵ ਨਿਸੀਦਾਪੇਤ੍ਵਾ ਦਕ੍ਖਿਣੋਦਕਂ ਦਤ੍ਵਾ ਯਾਗੁਖਜ੍ਜਕਾਦੀਨਿ ਦੇਨ੍ਤਿ, ‘‘ਭਨ੍ਤੇ, ਯਂ ਮਨੁਸ੍ਸਾ ਦੇਨ੍ਤਿ, ਤਂ ਗਣ੍ਹਥਾ’’ਤਿ ਤਸ੍ਸ ਭਿਕ੍ਖੁਨੋ ਵਚਨੇਨੇਵ ਇਤਰੇਸਂ ਵਟ੍ਟਤਿ. ਭੁਤ੍ਤਾਵੀਨਂ ਪਤ੍ਤੇ ਪੂਰੇਤ੍ਵਾ ਗਣ੍ਹਿਤ੍ਵਾ ਗਮਨਤ੍ਥਾਯ ਦੇਨ੍ਤਿ, ਸਬ੍ਬਂ ਤਸ੍ਸੇਵ ਭਿਕ੍ਖੁਨੋ ਹੋਤਿ, ਤੇਨ ਦਿਨ੍ਨਂ ਇਤਰੇਸਂ ਵਟ੍ਟਤਿ.
ਯਦਿ ਪਨ ਤੇ ਵਿਹਾਰੇਯੇਵ ਤੇਨ ਭਿਕ੍ਖੁਨਾ ‘‘ਭਨ੍ਤੇ, ਮਯ੍ਹਂ ਭਿਕ੍ਖਂ ਗਣ੍ਹਥ, ਮਨੁਸ੍ਸਾਨਞ੍ਚ ਵਚਨਂ ਕਾਤੁਂ ਵਟ੍ਟਤੀ’’ਤਿ ਵੁਤ੍ਤਾ ਗਚ੍ਛਨ੍ਤਿ, ਯਂ ਤਤ੍ਥ ਭੁਞ੍ਜਨ੍ਤਿ ਚੇਵ ਨੀਹਰਨ੍ਤਿ ਚ, ਸਬ੍ਬਂ ਤਂ ਤਸ੍ਸੇਵ ਸਨ੍ਤਕਂ. ਅਥਾਪਿ ‘‘ਮਯ੍ਹਂ ਭਿਕ੍ਖਂ ਗਣ੍ਹਥਾ’’ਤਿ ਅਵੁਤ੍ਤਾ ‘‘ਮਨੁਸ੍ਸਾਨਂ ਵਚਨਂ ਕਾਤੁਂ ਵਟ੍ਟਤੀ’’ਤਿ ਗਚ੍ਛਨ੍ਤਿ, ਤਤ੍ਰ ਚੇ ਏਕਸ੍ਸ ਮਧੁਰੇਨ ਸਰੇਨ ਅਨੁਮੋਦਨਂ ਕਰੋਨ੍ਤਸ੍ਸ ਸੁਤ੍ਵਾ ਥੇਰਾਨਞ੍ਚ ਉਪਸਮੇ ਪਸੀਦਿਤ੍ਵਾ ਬਹੁਂ ਸਮਣਪਰਿਕ੍ਖਾਰਂ ਦੇਨ੍ਤਿ, ਅਯਂ ਥੇਰੇਸੁ ਪਸਾਦੇਨ ਉਪ੍ਪਨ੍ਨੋ ‘‘ਅਕਤਭਾਗੋ’’ ਨਾਮ, ਤਸ੍ਮਾ ਸਬ੍ਬੇਸਂ ਪਾਪੁਣਾਤਿ.
ਏਕੋ ਸਙ੍ਘਤੋ ਉਦ੍ਦਿਸਾਪੇਤ੍ਵਾ ਠਿਤਿਕਾਯ ਗਾਹਿਤਂ ਪਤ੍ਤਂ ਹਰਿਤ੍ਵਾ ਪਣੀਤਸ੍ਸ ਖਾਦਨੀਯਭੋਜਨੀਯਸ੍ਸ ਪੂਰੇਤ੍ਵਾ ਆਹਰਿਤ੍ਵਾ ‘‘ਇਮਂ, ਭਨ੍ਤੇ, ਸਬ੍ਬੋ ਸਙ੍ਘੋ ਪਰਿਭੁਞ੍ਜਤੂ’’ਤਿ ਦੇਤਿ, ਸਬ੍ਬੇਹਿ ਭਾਜੇਤ੍ਵਾ ਪਰਿਭੁਞ੍ਜਿਤਬ੍ਬਂ. ਪਤ੍ਤਸਾਮਿਕਸ੍ਸ ਪਨ ਅਤਿਕ੍ਕਨ੍ਤਮ੍ਪਿ ਠਿਤਿਕਂ ਠਪੇਤ੍ਵਾ ਅਞ੍ਞਂ ਉਦ੍ਦੇਸਭਤ੍ਤਂ ਦਾਤਬ੍ਬਂ. ਅਥ ‘‘ਪਠਮਂਯੇਵ ਸਬ੍ਬਂ ਸਙ੍ਘਿਕਂ ਪਤ੍ਤਂ ਦੇਥਾ’’ਤਿ ਵਦਤਿ, ਏਕਸ੍ਸ ਲਜ੍ਜਿਭਿਕ੍ਖੁਨੋ ਸਨ੍ਤਕੋ ਪਤ੍ਤੋ ਦਾਤਬ੍ਬੋ. ਆਹਰਿਤ੍ਵਾ ਚ ‘‘ਸਬ੍ਬੋ ਸਙ੍ਘੋ ਪਰਿਭੁਞ੍ਜਤੂ’’ਤਿ ਵੁਤ੍ਤੇ ਭਾਜੇਤ੍ਵਾ ਪਰਿਭੁਞ੍ਜਿਤਬ੍ਬਂ.