੫. ਖੁਦ੍ਦਕਵਤ੍ਥੁਕ੍ਖਨ੍ਧਕਂ

ਖੁਦ੍ਦਕਵਤ੍ਥੁਕਥਾ

੨੪੩. ਖੁਦ੍ਦਕਵਤ੍ਥੁਕ੍ਖਨ੍ਧਕੇ – ਮਲ੍ਲਮੁਟ੍ਠਿਕਾਤਿ ਮੁਟ੍ਠਿਕਮਲ੍ਲਾ. ਗਾਮਮੁਦ੍ਦਵਾਤਿ ਛਵਿਰਾਗਮਣ੍ਡਨਾਨੁਯੁਤ੍ਤਾ ਨਾਗਰਿਕਮਨੁਸ੍ਸਾ. ਗਾਮਮੋਦ੍ਦਵਾਤਿਪਿ ਪਾਠੋ; ਏਸੇਵਤ੍ਥੋ. ਥਮ੍ਭੇਤਿ ਨ੍ਹਾਨਤਿਤ੍ਥੇ ਨਿਖਣਿਤ੍ਵਾ ਠਪਿਤਤ੍ਥਮ੍ਭੇ.

ਕੁਟ੍ਟੇਤਿ ਇਟ੍ਠਕਾਸਿਲਾਦਾਰੁਕੁਟ੍ਟਾਨਂ ਅਞ੍ਞਤਰਸ੍ਮਿਂ. ਅਟ੍ਟਾਨੇ ਨ੍ਹਾਯਨ੍ਤੀਤਿ ਏਤ੍ਥ ਅਟ੍ਟਾਨਂ ਨਾਮ ਰੁਕ੍ਖਂ ਫਲਕਂ ਵਿਯ ਤਚ੍ਛੇਤ੍ਵਾ ਅਟ੍ਠਪਦਾਕਾਰੇਨ ਰਾਜਿਯੋ ਛਿਨ੍ਦਿਤ੍ਵਾ ਨ੍ਹਾਨਤਿਤ੍ਥੇ ਨਿਖਣਨ੍ਤਿ, ਤਤ੍ਥ ਚੁਣ੍ਣਾਨਿ ਆਕਿਰਿਤ੍ਵਾ ਮਨੁਸ੍ਸਾ ਕਾਯਂ ਘਂਸਨ੍ਤਿ. ਗਨ੍ਧਬ੍ਬਹਤ੍ਥਕੇਨਾਤਿ ਨ੍ਹਾਨਤਿਤ੍ਥੇ ਠਪਿਤੇਨ ਦਾਰੁਮਯਹਤ੍ਥੇਨ, ਤੇਨ ਕਿਰ ਚੁਣ੍ਣਾਨਿ ਗਹੇਤ੍ਵਾ ਮਨੁਸ੍ਸਾ ਸਰੀਰਂ ਘਂਸਨ੍ਤਿ. ਕੁਰੁਵਿਨ੍ਦਕਸੁਤ੍ਤਿਯਾਤਿ ਕੁਰੁਵਿਨ੍ਦਕਪਾਸਾਣਚੁਣ੍ਣਾਨਿ ਲਾਖਾਯ ਬਨ੍ਧਿਤ੍ਵਾ ਕਤਗੁਲ਼ਿਕਕਲਾਪਕੋ ਵੁਚ੍ਚਤਿ, ਤਂ ਉਭੋਸੁ ਅਨ੍ਤੇਸੁ ਗਹੇਤ੍ਵਾ ਸਰੀਰਂ ਘਂਸਨ੍ਤਿ. ਵਿਗ੍ਗਯ੍ਹ ਪਰਿਕਮ੍ਮਂ ਕਾਰਾਪੇਨ੍ਤੀਤਿ ਅਞ੍ਞਮਞ੍ਞਂ ਸਰੀਰੇਨ ਸਰੀਰਂ ਘਂਸਨ੍ਤਿ. ਮਲ੍ਲਕਂ ਨਾਮ ਮਕਰਦਨ੍ਤਕੇ ਛਿਨ੍ਦਿਤ੍ਵਾ ਮਲ੍ਲਕਮੂਲਸਣ੍ਠਾਨੇਨ ਕਤਂ ਮਲ੍ਲਕਨ੍ਤਿ ਵੁਚ੍ਚਤਿ, ਇਦਂ ਗਿਲਾਨਸ੍ਸਾਪਿ ਨ ਵਟ੍ਟਤਿ.

੨੪੪. ਅਕਤਮਲ੍ਲਕਂ ਨਾਮ ਦਨ੍ਤੇ ਅਚ੍ਛਿਨ੍ਦਿਤ੍ਵਾ ਕਤਂ, ਇਦਂ ਅਗਿਲਾਨਸ੍ਸੇਵ ਨ ਵਟ੍ਟਤਿ; ਇਟ੍ਠਕਾਖਣ੍ਡਂ ਪਨ ਕਪਾਲਖਣ੍ਡਂ ਵਾ ਵਟ੍ਟਤਿ. ਉਕ੍ਕਾਸਿਕਨ੍ਤਿ ਵਤ੍ਥਵਟ੍ਟਿਂ; ਤਸ੍ਮਾ ਨ੍ਹਾਯਨ੍ਤਸ੍ਸ ਯਸ੍ਸ ਕਸ੍ਸਚਿ ਨ੍ਹਾਨਸਾਟਕਵਟ੍ਟਿਯਾ ਪਿਟ੍ਠਿਂ ਘਂਸਿਤੁਂ ਵਟ੍ਟਤਿ. ਪੁਥੁਪਾਣਿਕਨ੍ਤਿ ਹਤ੍ਥਪਰਿਕਮ੍ਮਂ ਵੁਚ੍ਚਤਿ, ਤਸ੍ਮਾ ਸਬ੍ਬੇਸਂ ਹਤ੍ਥੇਨ ਪਿਟ੍ਠਿਪਰਿਕਮ੍ਮਂ ਕਾਤੁਂ ਵਟ੍ਟਤਿ.

੨੪੫. ਵਲ੍ਲਿਕਾਤਿ ਕਣ੍ਣਤੋ ਨਿਕ੍ਖਨ੍ਤਮੁਤ੍ਤੋਲਮ੍ਬਕਾਦੀਨਂ ਏਤਂ ਅਧਿਵਚਨਂ; ਨ ਕੇਵਲਞ੍ਚ ਵਲ੍ਲਿਕਾ ਏਵ, ਯਂਕਿਞ੍ਚਿ ਕਣ੍ਣਪਿਲ਼ਨ੍ਧਨਂ ਅਨ੍ਤਮਸੋ ਤਾਲਪਣ੍ਣਮ੍ਪਿ ਨ ਵਟ੍ਟਤਿ. ਪਾਮਙ੍ਗਨ੍ਤਿ ਯਂਕਿਞ੍ਚਿ ਪਲਮ੍ਬਕਸੁਤ੍ਤਂ. ਕਣ੍ਠਸੁਤ੍ਤਕਨ੍ਤਿ ਯਂਕਿਞ੍ਚਿ ਗੀਵੂਪਗਆਭਰਣਂ. ਕਟਿਸੁਤ੍ਤਕਨ੍ਤਿ ਯਂਕਿਞ੍ਚਿ ਕਟਿਪਿਲ਼ਨ੍ਧਨਂ ਅਨ੍ਤਮਸੋ ਸੁਤ੍ਤਤਨ੍ਤੁਮਤ੍ਤਮ੍ਪਿ. ਓਵਟ੍ਟਿਕਨ੍ਤਿ ਵਲਯਂ. ਕਾਯੂਰਾਦੀਨਿ ਪਾਕਟਾਨੇਵ, ਅਕ੍ਖਕਾਨਂ ਹੇਟ੍ਠਾ ਬਾਹਾਭਰਣਂ ਯਂਕਿਞ੍ਚਿ ਆਭਰਣਂ ਨ ਵਟ੍ਟਤਿ.

੨੪੬. ਦੁਮਾਸਿਕਂ ਵਾ ਦੁਵਙ੍ਗੁਲਂ ਵਾਤਿ ਏਤ੍ਥ ਸਚੇ ਕੇਸਾ ਅਨ੍ਤੋਦ੍ਵੇਮਾਸੇ ਦ੍ਵਙ੍ਗੁਲਂ ਪਾਪੁਣਨ੍ਤਿ, ਅਨ੍ਤੋਦ੍ਵੇਮਾਸੇਵ ਛਿਨ੍ਦਿਤਬ੍ਬਾ. ਦ੍ਵਙ੍ਗੁਲੇਹਿ ਅਤਿਕ੍ਕਾਮੇਤੁਂ ਨ ਵਟ੍ਟਤਿ. ਸਚੇਪਿ ਨ ਦੀਘਾ, ਦ੍ਵੇਮਾਸਤੋ ਏਕਦਿਵਸਮ੍ਪਿ ਅਤਿਕ੍ਕਾਮੇਤੁਂ ਨ ਵਟ੍ਟਤਿਯੇਵ; ਏਵਮਯਂ ਉਭਯੇਨਪਿ ਉਕ੍ਕਟ੍ਠਪਰਿਚ੍ਛੇਦੋਵ ਵੁਤ੍ਤੋ, ਤਤੋ ਓਰਂ ਪਨ ਨਵਟ੍ਟਨਭਾਵੋ ਨਾਮ ਨਤ੍ਥਿ.

ਕੋਚ੍ਛੇਨ ਓਸਣ੍ਠੇਨ੍ਤੀਤਿ ਕੋਚ੍ਛੇਨ ਓਲਿਖਿਤ੍ਵਾ ਸਨ੍ਨਿਸੀਦਾਪੇਨ੍ਤਿ. ਫਣਕੇਨਾਤਿ ਦਨ੍ਤਮਯਾਦੀਸੁ ਯੇਨ ਕੇਨਚਿ. ਹਤ੍ਥਫਣਕੇਨਾਤਿ ਹਤ੍ਥੇਨੇਵ ਫਣਕਿਚ੍ਚਂ ਕਰੋਨ੍ਤਾ ਅਙ੍ਗੁਲੀਹਿ ਓਸਣ੍ਠੇਨ੍ਤਿ. ਸਿਤ੍ਥਤੇਲਕੇਨਾਤਿ ਮਧੁਸਿਤ੍ਥਕਨਿਯ੍ਯਾਸਾਦੀਸੁ ਯੇਨ ਕੇਨਚਿ ਚਿਕ੍ਕਲੇਨ. ਉਦਕਤੇਲਕੇਨਾਤਿ ਉਦਕਮਿਸ੍ਸਕੇਨ ਤੇਲੇਨ. ਮਣ੍ਡਨਤ੍ਥਾਯ ਸਬ੍ਬਤ੍ਥ ਦੁਕ੍ਕਟਂ, ਉਦ੍ਧਲੋਮੇਨ ਪਨ ਅਨੁਲੋਮਨਿਪਾਤਨਤ੍ਥਂ ਹਤ੍ਥਂ ਤੇਮੇਤ੍ਵਾ ਸੀਸਂ ਪੁਞ੍ਛਿਤਬ੍ਬਂ. ਉਣ੍ਹਾਭਿਤਤ੍ਤਰਜਸਿਰਾਨਮ੍ਪਿ ਅਲ੍ਲਹਤ੍ਥੇਨ ਪੁਞ੍ਛਿਤੁਂ ਵਟ੍ਟਤਿ.

੨੪੭. ਨ ਭਿਕ੍ਖਵੇ ਆਦਾਸੇ ਵਾ ਉਦਕਪਤ੍ਤੇ ਵਾਤਿ ਏਤ੍ਥ ਕਂਸਪਤ੍ਤਾਦੀਨਿਪਿ ਯੇਸੁ ਮੁਖਨਿਮਿਤ੍ਤਂ ਪਞ੍ਞਾਯਤਿ, ਸਬ੍ਬਾਨਿ ਆਦਾਸਸਙ੍ਖਮੇਵ ਗਚ੍ਛਨ੍ਤਿ. ਕਞ੍ਜਿਯਾਦੀਨਿਪਿ ਚ ਉਦਕਪਤ੍ਤਸਙ੍ਖਮੇਵ. ਤਸ੍ਮਾ ਯਤ੍ਥ ਕਤ੍ਥਚਿ ਓਲੋਕੇਨ੍ਤਸ੍ਸ ਦੁਕ੍ਕਟਂ. ਆਬਾਧਪਚ੍ਚਯਾਤਿ ‘‘ਸਞ੍ਛਵਿ ਨੁ ਖੋ ਮੇ ਵਣੋ, ਉਦਾਹੁ ਨ ਤਾਵਾ’’ਤਿ ਜਾਨਨਤ੍ਥਂ; ‘‘ਜਿਣ੍ਣੋ ਨੁ ਖੋਮ੍ਹਿ ਨੋ’’ਤਿ ਏਵਂ ਆਯੁਸਙ੍ਖਾਰਂ ਓਲੋਕਨਤ੍ਥਮ੍ਪਿ ਵਟ੍ਟਤੀਤਿ ਵੁਤ੍ਤਂ.

ਮੁਖਂ ਆਲਿਮ੍ਪਨ੍ਤੀਤਿ ਵਿਪ੍ਪਸਨ੍ਨਛਵਿਰਾਗਕਰੇਹਿ ਮੁਖਾਲੇਪਨੇਹਿ ਆਲਿਮ੍ਪਨ੍ਤਿ. ਉਮ੍ਮਦ੍ਦੇਨ੍ਤੀਤਿ ਨਾਨਾਉਮ੍ਮਦ੍ਦਨੇਹਿ ਉਮ੍ਮਦ੍ਦੇਨ੍ਤਿ. ਚੁਣ੍ਣੇਨ੍ਤੀਤਿ ਮੁਖਚੁਣ੍ਣਕੇਨ ਮਕ੍ਖੇਨ੍ਤਿ. ਮਨੋਸਿਲਿਕਾਯ ਮੁਖਂ ਲਞ੍ਛੇਨ੍ਤੀਤਿ ਮਨੋਸਿਲਾਯ ਤਿਲਕਾਦੀਨਿ ਲਞ੍ਛਨਾਨਿ ਕਰੋਨ੍ਤਿ, ਤਾਨਿ ਹਰਿਤਾਲਾਦੀਹਿਪਿ ਨ ਵਟ੍ਟਨ੍ਤਿਯੇਵ. ਅਙ੍ਗਰਾਗਾਦਯੋ ਪਾਕਟਾਯੇਵ. ਸਬ੍ਬਤ੍ਥ ਦੁਕ੍ਕਟਂ.

੨੪੮. ਨ ਭਿਕ੍ਖਵੇ ਨਚ੍ਚਂ ਵਾਤਿਆਦੀਸੁ ਯਂਕਿਞ੍ਚਿ ਨਚ੍ਚਂ ਅਨ੍ਤਮਸੋ ਮੋਰਨਚ੍ਚਮ੍ਪਿ ਦਸ੍ਸਨਾਯ ਗਚ੍ਛਨ੍ਤਸ੍ਸ ਦੁਕ੍ਕਟਂ. ਸਯਮ੍ਪਿ ਨਚ੍ਚਨ੍ਤਸ੍ਸ ਵਾ ਨਚ੍ਚਾਪੇਨ੍ਤਸ੍ਸ ਵਾ ਦੁਕ੍ਕਟਮੇਵ. ਗੀਤਮ੍ਪਿ ਯਂਕਿਞ੍ਚਿ ਨਟਗੀਤਂ ਵਾ ਸਾਧੁਗੀਤਂ ਵਾ ਅਨ੍ਤਮਸੋ ਦਨ੍ਤਗੀਤਮ੍ਪਿ ‘‘ਯਂ ਗਾਯਿਸ੍ਸਾਮਾ’’ਤਿ ਪੁਬ੍ਬਭਾਗੇ ਓਕੂਜਨ੍ਤਾ ਕਰੋਨ੍ਤਿ, ਏਤਮ੍ਪਿ ਨ ਵਟ੍ਟਤਿ. ਸਯਂ ਗਾਯਨ੍ਤਸ੍ਸਾਪਿ ਗਾਯਾਪੇਨ੍ਤਸ੍ਸਾਪਿ ਦੁਕ੍ਕਟਮੇਵ. ਵਾਦਿਤਮ੍ਪਿ ਯਂਕਿਞ੍ਚਿ ਨ ਵਟ੍ਟਤਿ. ਯਂ ਪਨ ਨਿਟ੍ਠੁਭਨ੍ਤੋ ਵਾ ਸਾਸਙ੍ਕੇ ਵਾ ਠਿਤੋ ਅਚ੍ਛਰਿਕਂ ਵਾ ਫੋਟੇਤਿ, ਪਾਣਿਂ ਵਾ ਪਹਰਤਿ, ਤਤ੍ਥ ਅਨਾਪਤ੍ਤਿ. ਸਬ੍ਬਂ ਅਨ੍ਤਰਾਰਾਮੇ ਠਿਤਸ੍ਸ ਪਸ੍ਸਤੋ ਅਨਾਪਤ੍ਤਿ. ‘‘ਪਸ੍ਸਿਸ੍ਸਾਮੀ’’ਤਿ ਵਿਹਾਰਤੋ ਵਿਹਾਰਂ ਗਚ੍ਛਨ੍ਤਸ੍ਸ ਆਪਤ੍ਤਿਯੇਵ. ਆਸਨਸਾਲਾਯ ਨਿਸਿਨ੍ਨੋ ਪਸ੍ਸਤਿ, ਅਨਾਪਤ੍ਤਿ. ‘‘ਪਸ੍ਸਿਸ੍ਸਾਮੀ’’ਤਿ ਉਟ੍ਠਹਿਤ੍ਵਾ ਗਚ੍ਛਤੋ ਆਪਤ੍ਤਿ. ਵੀਥਿਯਂ ਠਤ੍ਵਾ ਗੀਵਂ ਪਰਿਵਤ੍ਤੇਤ੍ਵਾ ਪਸ੍ਸਤੋਪਿ ਆਪਤ੍ਤਿਯੇਵ.

੨੪੯. ਸਰਕੁਤ੍ਤਿਨ੍ਤਿ ਸਰਕਿਰਿਯਂ. ਭਙ੍ਗੋ ਹੋਤੀਤਿ ਅਲਦ੍ਧਂ ਉਪ੍ਪਾਦੇਤੁਂ ਨ ਸਕ੍ਕੋਤਿ; ਲਦ੍ਧਂ ਸਮਾਪਜ੍ਜਿਤੁਂ. ਪਚ੍ਛਿਮਾ ਜਨਤਾਤਿ ਅਮ੍ਹਾਕਂ ਆਚਰਿਯਾਪਿ ਉਪਜ੍ਝਾਯਾਪਿ ਏਵਂ ਗਾਯਿਂਸੂਤਿ ਪਚ੍ਛਿਮੋ ਜਨੋ ਦਿਟ੍ਠਾਨੁਗਤਿਂ ਆਪਜ੍ਜਤਿ; ਤਥੇਵ ਗਾਯਤਿ. ਨ ਭਿਕ੍ਖਵੇ ਆਯਤਕੇਨਾਤਿ ਏਤ੍ਥ ਆਯਤਕੋ ਨਾਮ ਤਂ ਤਂ ਵਤ੍ਤਂ ਭਿਨ੍ਦਿਤ੍ਵਾ ਅਕ੍ਖਰਾਨਿ ਵਿਨਾਸੇਤ੍ਵਾ ਪਵਤ੍ਤੋ. ਧਮ੍ਮੇ ਪਨ ਸੁਤ੍ਤਨ੍ਤਵਤ੍ਤਂ ਨਾਮ ਅਤ੍ਥਿ, ਜਾਤਕਵਤ੍ਤਂ ਨਾਮ ਅਤ੍ਥਿ, ਗਾਥਾਵਤ੍ਤਂ ਨਾਮ ਅਤ੍ਥਿ, ਤਂ ਵਿਨਾਸੇਤ੍ਵਾ ਅਤਿਦੀਘਂ ਕਾਤੁਂ ਨ ਵਟ੍ਟਤਿ. ਚਤੁਰਸ੍ਸੇਨ ਵਤ੍ਤੇਨ ਪਰਿਮਣ੍ਡਲਾਨਿ ਪਦਬ੍ਯਞ੍ਜਨਾਨਿ ਦਸ੍ਸੇਤਬ੍ਬਾਨਿ. ਸਰਭਞ੍ਞਨ੍ਤਿ ਸਰੇਨ ਭਣਨਂ. ਸਰਭਞ੍ਞੇ ਕਿਰ ਤਰਙ੍ਗਵਤ੍ਤਧੋਤਕਵਤ੍ਤਗਲਿਤਵਤ੍ਤਾਦੀਨਿ ਦ੍ਵਤ੍ਤਿਂਸ ਵਤ੍ਤਾਨਿ ਅਤ੍ਥਿ. ਤੇਸੁ ਯਂ ਇਚ੍ਛਤਿ, ਤਂ ਕਾਤੁਂ ਲਭਤਿ. ਸਬ੍ਬੇਸਂ ਪਦਬ੍ਯਞ੍ਜਨਂ ਅਵਿਨਾਸੇਤ੍ਵਾ ਵਿਕਾਰਂ ਅਕਤ੍ਵਾ ਸਮਣਸਾਰੁਪ੍ਪੇਨ ਚਤੁਰਸ੍ਸੇਨ ਨਯੇਨ ਪਵਤ੍ਤਨਂਯੇਵ ਲਕ੍ਖਣਂ.

ਬਾਹਿਰਲੋਮਿਂ ਉਣ੍ਣਿਨ੍ਤਿ ਉਣ੍ਣਲੋਮਾਨਿ ਬਹਿ ਕਤ੍ਵਾ ਉਣ੍ਣਪਾਵਾਰਂ ਪਾਰੁਪਨ੍ਤਿ; ਤਥਾ ਧਾਰੇਨ੍ਤਸ੍ਸ ਦੁਕ੍ਕਟਂ. ਲੋਮਾਨਿ ਅਨ੍ਤੋ ਕਤ੍ਵਾ ਪਾਰੁਪਿਤੁਂ ਵਟ੍ਟਤਿ. ਸਮਣਕਪ੍ਪਕਥਾ ਭੂਤਗਾਮਸਿਕ੍ਖਾਪਦਵਣ੍ਣਨਾਯਂ ਵੁਤ੍ਤਾ.

੨੫੧. ਨ ਭਿਕ੍ਖਵੇ ਅਤ੍ਤਨੋ ਅਙ੍ਗਜਾਤਨ੍ਤਿ ਅਙ੍ਗਜਾਤਂ ਛਿਨ੍ਦਨ੍ਤਸ੍ਸੇਵ ਥੁਲ੍ਲਚ੍ਚਯਂ. ਅਞ੍ਞਂ ਪਨ ਕਣ੍ਣਨਾਸਾਅਙ੍ਗੁਲਿਆਦਿਂ ਯਂਕਿਞ੍ਚਿ ਛਿਨ੍ਦਨ੍ਤਸ੍ਸ ਤਾਦਿਸਂ ਵਾ ਦੁਕ੍ਖਂ ਉਪ੍ਪਾਦੇਨ੍ਤਸ੍ਸ ਦੁਕ੍ਕਟਂ. ਅਹਿਕੀਟਦਟ੍ਠਾਦੀਸੁ ਪਨ ਅਞ੍ਞਆਬਾਧਪਚ੍ਚਯਾ ਵਾ ਲੋਹਿਤਂ ਵਾ ਮੋਚੇਨ੍ਤਸ੍ਸ ਛਿਨ੍ਦਨ੍ਤਸ੍ਸ ਵਾ ਅਨਾਪਤ੍ਤਿ.

੨੫੨. ਚਨ੍ਦਨਗਣ੍ਠਿ ਉਪ੍ਪਨ੍ਨਾ ਹੋਤੀਤਿ ਚਨ੍ਦਨਘਟਿਕਾ ਉਪ੍ਪਨ੍ਨਾ ਹੋਤਿ. ਸੋ ਕਿਰ ਉਦ੍ਧਞ੍ਚ ਅਧੋ ਚ ਜਾਲਾਨਿ ਪਰਿਕ੍ਖਿਪਾਪੇਤ੍ਵਾ ਗਙ੍ਗਾਯ ਨਦਿਯਾ ਕੀਲ਼ਤਿ, ਤਸ੍ਸ ਨਦੀਸੋਤੇਨ ਵੁਯ੍ਹਮਾਨਾ ਚਨ੍ਦਨਗਣ੍ਠਿ ਆਗਨ੍ਤ੍ਵਾ ਜਾਲੇ ਲਗ੍ਗਾ, ਤਮਸ੍ਸ ਪੁਰਿਸਾ ਆਹਰਿਤ੍ਵਾ ਅਦਂਸੁ; ਏਵਂ ਸਾ ਉਪ੍ਪਨ੍ਨਾ ਹੋਤਿ. ਇਦ੍ਧਿਪਾਟਿਹਾਰਿਯਨ੍ਤਿ ਏਤ੍ਥ ਵਿਕੁਬ੍ਬਨਿਦ੍ਧਿਪਾਟਿਹਾਰਿਯਂ ਪਟਿਕ੍ਖਿਤ੍ਤਂ, ਅਧਿਟ੍ਠਾਨਿਦ੍ਧਿ ਪਨ ਅਪ੍ਪਟਿਕ੍ਖਿਤ੍ਤਾਤਿ ਵੇਦਿਤਬ੍ਬਾ.

ਨ ਭਿਕ੍ਖਵੇ ਸੋਵਣ੍ਣਮਯੋ ਪਤ੍ਤੋਤਿਆਦੀਸੁ ਸਚੇਪਿ ਗਿਹੀ ਭਤ੍ਤਗ੍ਗੇ ਸੁਵਣ੍ਣਤਟ੍ਟਿਕਾਦੀਸੁ ਬ੍ਯਞ੍ਜਨਂ ਕਤ੍ਵਾ ਉਪਨਾਮੇਨ੍ਤਿ, ਆਮਸਿਤੁਮ੍ਪਿ ਨ ਵਟ੍ਟਤਿ. ਫਲਿਕਮਯਕਾਚਮਯਕਂਸਮਯਾਨਿ ਪਨ ਤਟ੍ਟਿਕਾਦੀਨਿ ਭਾਜਨਾਨਿ ਪੁਗ੍ਗਲਿਕਪਰਿਭੋਗੇਨੇਵ ਨ ਵਟ੍ਟਨ੍ਤਿ, ਸਙ੍ਘਿਕਪਰਿਭੋਗੇਨ ਵਾ ਗਿਹਿਵਿਕਟਾਨਿ ਵਾ ਵਟ੍ਟਨ੍ਤਿ. ‘‘ਤਮ੍ਬਲੋਹਮਯੋਪਿ ਪਤ੍ਤੋਵ ਨ ਵਟ੍ਟਤਿ, ਥਾਲਕਂ ਪਨ ਵਟ੍ਟਤੀ’’ਤਿ ਇਦਂ ਸਬ੍ਬਂ ਕੁਰੁਨ੍ਦਿਯਂ ਵੁਤ੍ਤਂ. ਮਣਿਮਯੋਤਿ ਏਤ੍ਥ ਪਨ ਇਨ੍ਦਨੀਲਾਦਿਮਣਿਮਯੋ ਵੁਤ੍ਤੋ. ਕਂਸਮਯੋਤਿ ਏਤ੍ਥ ਵਟ੍ਟਲੋਹਮਯੋਪਿ ਸਙ੍ਗਹਿਤੋ.

੨੫੩. ਲਿਖਿਤੁਨ੍ਤਿ ਤਨੁਕਰਣਤ੍ਥਾਯੇਤਂ ਵੁਤ੍ਤਂ. ਪਕਤਿਮਣ੍ਡਲਨ੍ਤਿ ਮਕਰਦਨ੍ਤਚ੍ਛਿਨ੍ਨਕਮਣ੍ਡਲਮੇਵ.

੨੫੪. ਆਵਟ੍ਟਿਤ੍ਵਾਤਿ ਅਞ੍ਞਮਞ੍ਞਂ ਪਹਰਿਤ੍ਵਾ. ਪਤ੍ਤਾਧਾਰਕਨ੍ਤਿ ਏਤ੍ਥ ‘‘ਦਨ੍ਤਵਲ੍ਲਿਵੇਤ੍ਤਾਦੀਹਿ ਕਤੇ ਭੂਮਿਆਧਾਰਕੇ ਤਯੋ, ਦਾਰੁਆਧਾਰਕੇ ਦ੍ਵੇ ਪਤ੍ਤੇ ਉਪਰੂਪਰਿ ਠਪੇਤੁਂ ਵਟ੍ਟਤੀ’’ਤਿ ਕੁਰੁਨ੍ਦਿਯਂ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ਵੁਤ੍ਤਂ – ‘‘ਭੂਮਿਆਧਾਰਕੇ ਤਿਣ੍ਣਂ ਪਤ੍ਤਾਨਂ ਅਨੋਕਾਸੋ, ਦ੍ਵੇ ਠਪੇਤੁਂ ਵਟ੍ਟਤਿ. ਦਾਰੁਆਧਾਰਕਦਣ੍ਡਾਧਾਰਕੇਸੁਪਿ ਸੁਸਜ੍ਜਿਤੇਸੁ ਏਸੇਵ ਨਯੋ. ਭਮਕੋਟਿਸਦਿਸੋ ਪਨ ਦਾਰੁਆਧਾਰਕੋ ਤੀਹਿ ਦਣ੍ਡਕੇਹਿ ਬਦ੍ਧੋ ਦਣ੍ਡਕਾਧਾਰੋ ਚ ਏਕਸ੍ਸਪਿ ਪਤ੍ਤਸ੍ਸ ਅਨੋਕਾਸੋ, ਤਤ੍ਥ ਠਪੇਤ੍ਵਾਪਿ ਹਤ੍ਥੇਨ ਗਹੇਤ੍ਵਾ ਏਵ ਨਿਸੀਦਿਤਬ੍ਬਂ. ਭੂਮਿਯਂ ਪਨ ਨਿਕ੍ਕੁਜ੍ਜਿਤ੍ਵਾ ਏਕਮੇਵ ਠਪੇਤਬ੍ਬ’’ਨ੍ਤਿ.

ਮਿਡ੍ਢਨ੍ਤੇਤਿ ਆਲਿਨ੍ਦਕਮਿਡ੍ਢਿਕਾਦੀਨਂ ਅਨ੍ਤੇ. ਸਚੇ ਪਨ ਪਰਿਵਤ੍ਤੇਤ੍ਵਾ ਤਤ੍ਥੇਵ ਪਤਿਟ੍ਠਾਤਿ, ਏਵਰੂਪਾਯ ਵਿਤ੍ਥਿਣ੍ਣਾਯ ਮਿਡ੍ਢਿਯਾ ਠਪੇਤੁਂ ਵਟ੍ਟਤਿ. ਪਰਿਭਣ੍ਡਨ੍ਤੇਤਿ ਬਾਹਿਰਪਸ੍ਸੇ ਕਤਾਯ ਤਨੁਕਮਿਡ੍ਢਿਕਾਯ ਅਨ੍ਤੇ. ਮਿਡ੍ਢਿਯਂ ਵੁਤ੍ਤਨਯੇਨੇਵੇਤ੍ਥਾਪਿ ਵਿਨਿਚ੍ਛਯੋ ਵੇਦਿਤਬ੍ਬੋ.

ਚੋਲ਼ਕਨ੍ਤਿ ਯਂ ਪਤ੍ਥਰਿਤ੍ਵਾ ਪਤ੍ਤੋ ਠਪੀਯਤਿ; ਤਸ੍ਮਿਂ ਪਨ ਅਸਤਿ ਕਟਸਾਰਕੇ ਵਾ ਤਟ੍ਟਿਕਾਯ ਵਾ ਮਤ੍ਤਿਕਾਪਰਿਭਣ੍ਡਕਤਾਯ ਭੂਮਿਯਾ ਵਾ ਯਤ੍ਥ ਨ ਦੁਸ੍ਸਤਿ, ਤਥਾਰੂਪਾਯ ਵਾਲਿਕਾਯ ਵਾ ਠਪੇਤੁਂ ਵਟ੍ਟਤਿ. ਪਂਸੁਰਜਾਦੀਸੁ ਪਨ ਖਰਭੂਮਿਯਂ ਵਾ ਠਪੇਨ੍ਤਸ੍ਸ ਦੁਕ੍ਕਟਂ. ਪਤ੍ਤਮਾਲ਼ਕਂ ਇਟ੍ਠਕਾਹਿ ਵਾ ਦਾਰੂਹਿ ਵਾ ਕਾਤੁਂ ਵਟ੍ਟਤਿ. ਪਤ੍ਤਕੁਣ੍ਡੋਲਿਕਾਤਿ ਮਹਾਮੁਖਕੁਣ੍ਡਸਣ੍ਠਾਨਾ ਭਣ੍ਡਕੁਕ੍ਖਲਿਕਾ ਵੁਚ੍ਚਤਿ. ਯੋ ਲਗ੍ਗੇਯ੍ਯਾਤਿ ਯਤ੍ਥ ਕਤ੍ਥਚਿ ਲਗ੍ਗੇਨ੍ਤਸ੍ਸ ਦੁਕ੍ਕਟਮੇਵ. ਚੀਵਰਵਂਸੇਪਿ ਬਨ੍ਧਿਤ੍ਵਾ ਠਪੇਤੁਂ ਨ ਵਟ੍ਟਤਿ. ਭਣ੍ਡਕਟ੍ਠਪਨਤ੍ਥਮੇਵ ਵਾ ਕਤਂ ਹੋਤੁ ਨਿਸੀਦਨਸਯਨਤ੍ਥਂ ਵਾ ਯਤ੍ਥ ਕਤ੍ਥਚਿ ਮਞ੍ਚੇ ਵਾ ਪੀਠੇ ਵਾ ਠਪੇਨ੍ਤਸ੍ਸ ਦੁਕ੍ਕਟਂ, ਅਞ੍ਞੇਨ ਪਨ ਭਣ੍ਡਕੇਨ ਸਦ੍ਧਿਂ ਬਨ੍ਧਿਤ੍ਵਾ ਠਪੇਤੁਂ ਵਟ੍ਟਤਿ. ਅਟਨਿਯਂ ਬਨ੍ਧਿਤ੍ਵਾ ਓਲਮ੍ਬੇਤੁਂ ਵਾ ਵਟ੍ਟਤਿ, ਬਨ੍ਧਿਤ੍ਵਾਪਿ ਉਪਰਿ ਠਪੇਤੁਂ ਨ ਵਟ੍ਟਤਿਯੇਵ. ਸਚੇ ਪਨ ਮਞ੍ਚੋ ਵਾ ਪੀਠਂ ਵਾ ਉਕ੍ਖਿਪਿਤ੍ਵਾ ਚੀਵਰਵਂਸਾਦੀਸੁ ਅਟ੍ਟਕਛਨ੍ਨੇਨ ਠਪਿਤਂ ਹੋਤਿ, ਤਤ੍ਥ ਠਪੇਤੁਂ ਵਟ੍ਟਤਿ. ਅਂਸਵਦ੍ਧਨਕੇਨ ਅਂਸਕੂਟੇ ਲਗ੍ਗੇਤ੍ਵਾ ਅਙ੍ਕੇ ਠਪੇਤੁਂ ਵਟ੍ਟਤਿ. ਛਤ੍ਤੇ ਭਤ੍ਤਪੂਰੋਪਿ ਅਂਸਕੂਟੇ ਲਗ੍ਗਿਤਪਤ੍ਤੋਪਿ ਠਪੇਤੁਂ ਨ ਵਟ੍ਟਤਿ, ਭਣ੍ਡਕੇਨ ਪਨ ਸਦ੍ਧਿਂ ਬਨ੍ਧਿਤ੍ਵਾ ਵਾ ਅਟ੍ਟਕਂ ਕਤ੍ਵਾ ਵਾ ਠਪਿਤੇ ਯੋ ਕੋਚਿ ਠਪੇਤੁਂ ਵਟ੍ਟਤਿ.

੨੫੫. ਪਤ੍ਤਹਤ੍ਥੇਨਾਤਿ ਏਤ੍ਥ ਨ ਕੇਵਲਂ ਯਸ੍ਸ ਪਤ੍ਤੋ ਹਤ੍ਥੇ, ਸੋ ਏਵ ਪਤ੍ਤਹਤ੍ਥੋ, ਨ ਕੇਵਲਞ੍ਚ ਕਵਾਟਮੇਵ ਪਣਾਮੇਤੁਂ ਨ ਲਭਤਿ; ਅਪਿਚ ਖੋ ਪਨ ਹਤ੍ਥੇ ਵਾ ਪਿਟ੍ਠਿਪਾਦੇ ਵਾ ਯਤ੍ਥ ਕਤ੍ਥਚਿ ਸਰੀਰਾਵਯਵੇ ਪਤ੍ਤਸ੍ਮਿਂ ਸਤਿ ਹਤ੍ਥੇਨ ਵਾ ਪਾਦੇਨ ਵਾ ਸੀਸੇਨ ਵਾ ਯੇਨ ਕੇਨਚਿ ਸਰੀਰਾਵਯਵੇਨ ਕਵਾਟਂ ਵਾ ਪਣਾਮੇਤੁਂ ਘਟਿਕਂ ਵਾ ਉਕ੍ਖਿਪਿਤੁਂ ਸੂਚਿਂ ਵਾ ਕੁਞ੍ਚਿਕਾਯ ਅਪਾਪੁਰਿਤੁਂ ਨ ਲਭਤਿ. ਅਂਸਕੂਟੇ ਪਨ ਪਤ੍ਤਂ ਲਗ੍ਗੇਤ੍ਵਾ ਯਥਾਸੁਖਂ ਅਵਾਪੁਰਿਤੁਂ ਲਭਤਿ.

ਤੁਮ੍ਬਕਟਾਹਨ੍ਤਿ ਲਾਬੁਕਟਾਹਂ ਵੁਚ੍ਚਤਿ, ਤਂ ਪਰਿਹਰਿਤੁਂ ਨ ਵਟ੍ਟਤਿ. ਲਭਿਤ੍ਵਾ ਪਨ ਤਾਵਕਾਲਿਕਂ ਪਰਿਭੁਞ੍ਜਿਤੁਂ ਵਟ੍ਟਤਿ. ਘਟਿਕਟਾਹੇਪਿ ਏਸੇਵ ਨਯੋ. ਘਟਿਕਟਾਹਨ੍ਤਿ ਘਟਿਕਪਾਲਂ. ਅਭੁਂ ਮੇਤਿ ਉਤ੍ਰਾਸਵਚਨਮੇਤਂ. ਸਬ੍ਬਪਂਸੁਕੂਲਿਕੇਨਾਤਿ ਏਤ੍ਥ ਚੀਵਰਞ੍ਚ ਮਞ੍ਚਪੀਠਞ੍ਚ ਪਂਸੁਕੂਲਂ ਵਟ੍ਟਤਿ, ਅਜ੍ਝੋਹਰਣੀਯਂ ਪਨ ਦਿਨ੍ਨਕਮੇਵ ਗਹੇਤਬ੍ਬਂ.

ਚਲਕਾਨੀਤਿ ਚਬ੍ਬੇਤ੍ਵਾ ਅਪਵਿਦ੍ਧਾਮਿਸਾਨਿ. ਅਟ੍ਠਿਕਾਨੀਤਿ ਮਚ੍ਛਮਂਸਅਟ੍ਠਿਕਾਨਿ. ਉਚ੍ਛਿਟ੍ਠੋਦਕਨ੍ਤਿ ਮੁਖਵਿਕ੍ਖਾਲਨੋਦਕਂ. ਏਤੇਸੁ ਯਂਕਿਞ੍ਚਿ ਪਤ੍ਤੇਨ ਨੀਹਰਨ੍ਤਸ੍ਸ ਦੁਕ੍ਕਟਂ. ਪਤ੍ਤਂ ਪਟਿਗ੍ਗਹਂ ਕਤ੍ਵਾ ਹਤ੍ਥਂ ਧੋਵਿਤੁਮ੍ਪਿ ਨ ਲਭਤਿ. ਹਤ੍ਥਧੋਤਪਾਦਧੋਤਉਦਕਮ੍ਪਿ ਪਤ੍ਤੇ ਆਕਿਰਿਤ੍ਵਾ ਨੀਹਰਿਤੁਂ ਨ ਵਟ੍ਟਤਿ. ਅਨੁਚ੍ਛਿਟ੍ਠਂ ਸੁਦ੍ਧਪਤ੍ਤਂ ਉਚ੍ਛਿਟ੍ਠਹਤ੍ਥੇਨ ਗਣ੍ਹਿਤੁਂ ਨ ਵਟ੍ਟਤਿ, ਵਾਮਹਤ੍ਥੇਨ ਪਨੇਤ੍ਥ ਉਦਕਂ ਆਸਿਞ੍ਚਿਤ੍ਵਾ ਏਕਂ ਉਦਕਗਣ੍ਡੁਸਂ ਗਹੇਤ੍ਵਾ ਉਚ੍ਛਿਟ੍ਠਹਤ੍ਥੇਨ ਗਣ੍ਹਿਤੁਂ ਵਟ੍ਟਤਿ. ਏਤ੍ਤਾਵਤਾਪਿ ਹਿ ਸੋ ਉਚ੍ਛਿਟ੍ਠਪਤ੍ਤੋ ਹੋਤਿ, ਹਤ੍ਥਂ ਪਨ ਬਹਿ ਉਦਕੇਨ ਵਿਕ੍ਖਾਲੇਤ੍ਵਾ ਗਹੇਤੁਂ ਵਟ੍ਟਤਿ. ਮਚ੍ਛਮਂਸਫਲਾਫਲਾਦੀਨਿ ਖਾਦਨ੍ਤੋ ਯਂ ਤਤ੍ਥ ਅਟ੍ਠਿਂ ਵਾ ਚਲਕਂ ਵਾ ਛਡ੍ਡੇਤੁਕਾਮੋ ਹੋਤਿ, ਤਂ ਪਤ੍ਤੇ ਠਪੇਤੁਂ ਨ ਲਭਤਿ. ਯਂ ਪਨ ਪਟਿਖਾਦਿਤੁਕਾਮੋ ਹੋਤਿ, ਤਂ ਪਤ੍ਤੇ ਠਪੇਤੁਂ ਲਭਤਿ. ਅਟ੍ਠਿਕਕਣ੍ਟਕਾਦੀਨਿ ਤਤ੍ਥੇਵ ਕਤ੍ਵਾ ਹਤ੍ਥੇਨ ਲੁਞ੍ਚਿਤ੍ਵਾ ਖਾਦਿਤੁਂ ਵਟ੍ਟਤਿ. ਮੁਖਤੋ ਨੀਹਟਂ ਪਨ ਯਂਕਿਞ੍ਚਿ ਪੁਨ ਖਾਦਿਤੁਕਾਮੋ ਹੋਤਿ, ਤਂ ਪਤ੍ਤੇ ਠਪੇਤੁਂ ਨ ਲਭਤਿ. ਸਿਙ੍ਗਿਵੇਰਨਾਲ਼ਿਕੇਰਖਣ੍ਡਾਨਿ ਡਂਸਿਤ੍ਵਾ ਪੁਨ ਠਪੇਤੁਂ ਲਭਤਿ.

੨੫੬. ਨਮਤਕਨ੍ਤਿ ਸਤ੍ਥਕਵੇਠਨਕਂ ਪਿਲੋਤਿਕਖਣ੍ਡਂ. ਦਣ੍ਡਸਤ੍ਥਕਨ੍ਤਿ ਪਿਪ੍ਫਲਕਂ ਵਾ ਅਞ੍ਞਮ੍ਪਿ ਵਾ ਯਂਕਿਞ੍ਚਿ ਦਣ੍ਡਂ ਯੋਜੇਤ੍ਵਾ ਕਤਸਤ੍ਥਕਂ.

ਕਣ੍ਣਕਿਤਾ ਹੋਨ੍ਤੀਤਿ ਮਲਗ੍ਗਹਿਤਾ ਹੋਨ੍ਤਿ. ਕਿਣ੍ਣੇਨ ਪੂਰੇਤੁਨ੍ਤਿ ਕਿਣ੍ਣਚੁਣ੍ਣੇਨ ਪੂਰੇਤੁਂ. ਸਤ੍ਤੁਯਾਤਿ ਹਲਿਦ੍ਦਿਮਿਸ੍ਸਕੇਨ ਪਿਟ੍ਠਚੁਣ੍ਣੇਨ. ਸਰਿਤਕਨ੍ਤਿ ਪਾਸਾਣਚੁਣ੍ਣਂ ਵੁਚ੍ਚਤਿ; ਤੇਨ ਪੂਰੇਤੁਂ ਅਨੁਜਾਨਾਮੀਤਿ ਅਤ੍ਥੋ. ਮਧੁਸਿਤ੍ਥਕੇਨ ਸਾਰੇਤੁਨ੍ਤਿ ਮਧੁਸਿਤ੍ਥਕੇਨ ਮਕ੍ਖੇਤੁਂ. ਸਰਿਤਕਂ ਪਰਿਭਿਜ੍ਜਤੀਤਿ ਤਂ ਮਕ੍ਖਿਤਮਧੁਸਿਤ੍ਥਕਂ ਭਿਜ੍ਜਤਿ. ਸਰਿਤਸਿਪਾਟਿਕਨ੍ਤਿ ਮਧੁਸਿਤ੍ਥਕਪਿਲੋਤਿਕਂ; ਸਤ੍ਥਕੋਸਕਸਿਪਾਟਿਯਾ ਪਨ ਸਰਿਤਸਿਪਾਟਿਕਾਯ ਅਨੁਲੋਮਾਤਿ ਕੁਰੁਨ੍ਦਿਯਂ ਵੁਤ੍ਤਂ. ਕਥਿਨਨ੍ਤਿ ਨਿਸ੍ਸੇਣਿਮ੍ਪਿ ਤਤ੍ਥ ਅਤ੍ਥਰਿਤਬ੍ਬਕਟਸਾਰਕਕਿਲਞ੍ਜਾਨਂ ਅਞ੍ਞਤਰਮ੍ਪਿ. ਕਥਿਨਰਜ੍ਜੁਨ੍ਤਿ ਯਾਯ ਦੁਪਟ੍ਟਚੀਵਰਂ ਸਿਬ੍ਬਨ੍ਤਾ ਕਥਿਨੇ ਚੀਵਰਮ੍ਪਿ ਬਨ੍ਧਨ੍ਤਿ. ਕਥਿਨਂ ਨਪ੍ਪਹੋਤੀਤਿ ਦੀਘਸ੍ਸ ਭਿਕ੍ਖੁਨੋ ਪਮਾਣੇਨ ਕਤਂ ਕਥਿਨਂ; ਤਤ੍ਥ ਰਸ੍ਸਸ੍ਸ ਭਿਕ੍ਖੁਨੋ ਚੀਵਰਂ ਪਤ੍ਥਰਿਯਮਾਨਂ ਨਪ੍ਪਹੋਤਿ, ਅਨ੍ਤੋਯੇਵ ਹੋਤਿ; ਦਣ੍ਡਕੇ ਨ ਪਾਪੁਣਾਤੀਤਿ ਅਤ੍ਥੋ. ਦਣ੍ਡਕਥਿਨਨ੍ਤਿ ਤਸ੍ਸ ਮਜ੍ਝੇ ਇਤਰਸ੍ਸ ਭਿਕ੍ਖੁਨੋ ਪਮਾਣੇਨ ਅਞ੍ਞਂ ਨਿਸ੍ਸੇਣਿਂ ਬਨ੍ਧਿਤੁਂ ਅਨੁਜਾਨਾਮੀਤਿ ਅਤ੍ਥੋ.

ਬਿਦਲਕਨ੍ਤਿ ਦਣ੍ਡਕਥਿਨਪ੍ਪਮਾਣੇਨ ਕਟਸਾਰਕਸ੍ਸ ਪਰਿਯਨ੍ਤੇ ਪਟਿਸਂਹਰਿਤ੍ਵਾ ਦੁਗੁਣਕਰਣਂ. ਸਲਾਕਨ੍ਤਿ ਦੁਪਟ੍ਟਚੀਵਰਸ੍ਸ ਅਨ੍ਤਰੇ ਪਵੇਸਨਸਲਾਕਂ. ਵਿਨਨ੍ਧਨਰਜ੍ਜੁਨ੍ਤਿ ਮਹਾਨਿਸ੍ਸੇਣਿਯਾ ਸਦ੍ਧਿਂ ਖੁਦ੍ਦਕਂ ਨਿਸ੍ਸੇਣਿਂ ਵਿਨਨ੍ਧਿਤੁਂ ਰਜ੍ਜੁਂ. ਵਿਨਨ੍ਧਨਸੁਤ੍ਤਨ੍ਤਿ ਖੁਦ੍ਦਕਨਿਸ੍ਸੇਣਿਯਾ ਚੀਵਰਂ ਵਿਨਨ੍ਧਿਤੁਂ ਸੁਤ੍ਤਕਂ. ਵਿਨਨ੍ਧਿਤ੍ਵਾ ਚੀਵਰਂ ਸਿਬ੍ਬੇਤੁਨ੍ਤਿ ਤੇਨ ਸੁਤ੍ਤਕੇਨ ਤਤ੍ਥ ਚੀਵਰਂ ਵਿਨਨ੍ਧਿਤ੍ਵਾ ਸਿਬ੍ਬਿਤੁਂ. ਵਿਸਮਾ ਹੋਨ੍ਤੀਤਿ ਕਾਚਿ ਖੁਦ੍ਦਕਾ ਹੋਨ੍ਤਿ, ਕਾਚਿ ਮਹਨ੍ਤਾ. ਕਲ਼ਿਮ੍ਭਕਨ੍ਤਿ ਪਮਾਣਸਞ੍ਞਾਕਰਣਂ ਯਂਕਿਞ੍ਚਿ ਤਾਲਪਣ੍ਣਾਦਿਂ. ਮੋਘਸੁਤ੍ਤਕਨ੍ਤਿ ਵਡ੍ਢਕੀਨਂ ਦਾਰੂਸੁ ਕਾਲ਼ਸੁਤ੍ਤੇਨ ਵਿਯ ਹਲਿਦ੍ਦਿਸੁਤ੍ਤੇਨ ਸਞ੍ਞਾਕਰਣਂ. ਅਙ੍ਗੁਲਿਯਾ ਪਟਿਗ੍ਗਣ੍ਹਨ੍ਤੀਤਿ ਸੂਚਿਮੁਖਂ ਅਙ੍ਗੁਲਿਯਾ ਪਟਿਚ੍ਛਨ੍ਤਿ. ਪਟਿਗ੍ਗਹਨ੍ਤਿ ਅਙ੍ਗੁਲਿਕੋਸਕਂ.

੨੫੭. ਆਵੇਸਨਵਿਤ੍ਥਕਂ ਨਾਮ ਯਂਕਿਞ੍ਚਿ ਪਾਤਿਚਙ੍ਕੋਟਕਾਦਿ. ਉਚ੍ਚਵਤ੍ਥੁਕਨ੍ਤਿ ਪਂਸੁਂ ਆਕਿਰਿਤ੍ਵਾ ਉਚ੍ਚਵਤ੍ਥੁਕਂ ਕਾਤੁਂ ਅਨੁਜਾਨਾਮੀਤਿ ਅਤ੍ਥੋ. ਓਗੁਮ੍ਫੇਤ੍ਵਾ ਉਲ੍ਲਿਤ੍ਤਾਵਲਿਤ੍ਤਂ ਕਾਤੁਨ੍ਤਿ ਛਦਨਂ ਓਧੁਨਿਤ੍ਵਾ ਘਨਦਣ੍ਡਕਂ ਕਤ੍ਵਾ ਅਨ੍ਤੋ ਚੇਵ ਬਹਿ ਚ ਮਤ੍ਤਿਕਾਯ ਲਿਮ੍ਪਿਤੁਨ੍ਤਿ ਅਤ੍ਥੋ. ਗੋਘਂਸਿਕਾਯਾਤਿ ਵੇਲ਼ੁਂ ਵਾ ਰੁਕ੍ਖਦਣ੍ਡਂ ਵਾ ਅਨ੍ਤੋਕਤ੍ਵਾ ਤੇਨ ਸਦ੍ਧਿਂ ਸਙ੍ਘਰਿਤੁਨ੍ਤਿ ਅਤ੍ਥੋ. ਬਨ੍ਧਨਰਜ੍ਜੁਨ੍ਤਿ ਤਥਾ ਸਙ੍ਘਰਿਤਸ੍ਸ ਬਨ੍ਧਨਰਜ੍ਜੁਂ.

੨੫੮. ਕਟਚ੍ਛੁਪਰਿਸ੍ਸਾਵਨਂ ਨਾਮ ਤੀਸੁ ਦਣ੍ਡਕੇਸੁ ਵਿਨਨ੍ਧਿਤ੍ਵਾ ਕਤਂ.

੨੫੯. ਯੋ ਨ ਦਦੇਯ੍ਯਾਤਿ ਅਪਰਿਸ੍ਸਾਵਨਕਸ੍ਸੇਵ ਯੋ ਨ ਦਦਾਤਿ, ਤਸ੍ਸ ਆਪਤ੍ਤਿ. ਯੋ ਪਨ ਅਤ੍ਤਨੋ ਹਤ੍ਥੇ ਪਰਿਸ੍ਸਾਵਨੇ ਵਿਜ੍ਜਮਾਨੇਪਿ ਯਾਚਤਿ, ਤਸ੍ਸ ਨ ਅਕਾਮਾ ਦਾਤਬ੍ਬਂ. ਦਣ੍ਡਪਰਿਸ੍ਸਾਵਨਨ੍ਤਿ ਰਜਕਾਨਂ ਖਾਰਪਰਿਸ੍ਸਾਵਨਂ ਵਿਯ ਚਤੂਸੁ ਪਾਦੇਸੁ ਬਦ੍ਧਨਿਸ੍ਸੇਣਿਕਾਯ ਸਾਟਕਂ ਬਨ੍ਧਿਤ੍ਵਾ ਮਜ੍ਝੇਦਣ੍ਡਕੇ ਉਦਕਂ ਆਸਿਞ੍ਚਿਤਬ੍ਬਂ, ਤਂ ਉਭੋਪਿ ਕੋਟ੍ਠਾਸੇ ਪੂਰੇਤ੍ਵਾ ਪਰਿਸ੍ਸਵਤਿ. ਓਤ੍ਥਰਕਂ ਨਾਮ ਯਂ ਉਦਕੇ ਓਤ੍ਥਰਿਤ੍ਵਾ ਘਟਕੇਨ ਉਦਕਂ ਗਣ੍ਹਨ੍ਤਿ, ਤਞ੍ਹਿ ਚਤੂਸੁ ਦਣ੍ਡਕੇਸੁ ਵਤ੍ਥਂ ਬਨ੍ਧਿਤ੍ਵਾ ਉਦਕੇ ਚਤ੍ਤਾਰੋ ਖਾਣੁਕੇ ਨਿਖਣਿਤ੍ਵਾ ਤੇਸੁ ਬਨ੍ਧਿਤ੍ਵਾ ਸਬ੍ਬਪਰਿਯਨ੍ਤੇ ਉਦਕਤੋ ਮੋਚੇਤ੍ਵਾ ਮਜ੍ਝੇ ਓਤ੍ਥਰਿਤ੍ਵਾ ਘਟੇਨ ਉਦਕਂ ਗਣ੍ਹਨ੍ਤਿ. ਮਕਸਕੁਟਿਕਾਤਿ ਚੀਵਰਕੁਟਿਕਾ ਵੁਚ੍ਚਤਿ.

੨੬੦. ਅਭਿਸਨ੍ਨਕਾਯਾਤਿ ਸੇਮ੍ਹਾਦਿਦੋਸੁਸ੍ਸਨ੍ਨਕਾਯਾ. ਅਗ੍ਗਲ਼ਵਟ੍ਟਿ ਨਾਮ ਦ੍ਵਾਰਬਾਹਾਯ ਸਮਪ੍ਪਮਾਣੋਯੇਵ ਅਗ੍ਗਲ਼ਤ੍ਥਮ੍ਭੋ ਵੁਚ੍ਚਤਿ, ਯਤ੍ਥ ਤੀਣਿ ਚਤ੍ਤਾਰਿ ਛਿਦ੍ਦਾਨਿ ਕਤ੍ਵਾ ਸੂਚਿਯੋ ਦੇਨ੍ਤਿ. ਕਪਿਸੀਸਕਂ ਨਾਮ ਦ੍ਵਾਰਬਾਹਂ ਵਿਜ੍ਝਿਤ੍ਵਾ ਤਤ੍ਥ ਪਵੇਸਿਤੋ ਅਗ੍ਗਲ਼ਪਾਸਕੋ ਵੁਚ੍ਚਤਿ. ਸੂਚਿਕਾਤਿ ਤਤ੍ਥ ਮਜ੍ਝੇ ਛਿਦ੍ਦਂ ਕਤ੍ਵਾ ਪਵੇਸਿਤਾ. ਘਟਿਕਾਤਿ ਉਪਰਿ ਯੋਜਿਤਾ. ਮਣ੍ਡਲਿਕਂ ਕਾਤੁਨ੍ਤਿ ਨੀਚਵਤ੍ਥੁਕਂ ਚਿਨਿਤੁਂ. ਧੂਮਨੇਤ੍ਤਨ੍ਤਿ ਧੂਮਨਿਕ੍ਖਮਨਛਿਦ੍ਦਂ. ਵਾਸੇਤੁਨ੍ਤਿ ਗਨ੍ਧੇਨ ਵਾਸੇਤੁਂ. ਉਦਕਟ੍ਠਾਨਨ੍ਤਿ ਉਦਕਤ੍ਥਪਨਟ੍ਠਾਨਂ. ਤਤ੍ਥ ਘਟੇਨ ਉਦਕਂ ਠਪੇਤ੍ਵਾ ਸਰਾਵਕੇਨ ਵਲ਼ਞ੍ਜੇਤਬ੍ਬਂ. ਕੋਟ੍ਠਕੋਤਿ ਦ੍ਵਾਰਕੋਟ੍ਠਕੋ.

੨੬੧. ਤਿਸ੍ਸੋ ਪਟਿਚ੍ਛਾਦਿਯੋਤਿ ਏਤ੍ਥ ਜਨ੍ਤਾਘਰਪਟਿਚ੍ਛਾਦਿ ਚ ਉਦਕਪਟਿਚ੍ਛਾਦਿ ਚ ਪਰਿਕਮ੍ਮਂ ਕਰੋਨ੍ਤਸ੍ਸੇਵ ਵਟ੍ਟਤਿ, ਸੇਸੇਸੁ ਅਭਿਵਾਦਨਾਦੀਸੁ ਨ ਵਟ੍ਟਤਿ. ਵਤ੍ਥਪਟਿਚ੍ਛਾਦਿ ਸਬ੍ਬਕਮ੍ਮੇਸੁ ਵਟ੍ਟਤਿ. ਉਦਕਂ ਨ ਹੋਤੀਤਿ ਨ੍ਹਾਨੋਦਕਂ ਨ ਹੋਤਿ.

੨੬੨. ਤੁਲਨ੍ਤਿ ਪਣ੍ਣਿਕਾਨਂ ਵਿਯ ਉਦਕਉਬ੍ਬਾਹਨਕਤੁਲਂ. ਕਰਕਟਕੋ ਵੁਚ੍ਚਤਿ ਗੋਣੇ ਵਾ ਯੋਜੇਤ੍ਵਾ ਹਤ੍ਥੇਹਿ ਵਾ ਗਹੇਤ੍ਵਾ ਦੀਘਵਰਤ੍ਤਾਦੀਹਿ ਆਕਡ੍ਢਨਯਨ੍ਤਂ. ਚਕ੍ਕਵਟ੍ਟਕਨ੍ਤਿ ਅਰਹਟਘਟਿਯਨ੍ਤਂ. ਚਮ੍ਮਖਣ੍ਡਂ ਨਾਮ ਤੁਲਾਯ ਵਾ ਕਰਕਟਕੇ ਵਾ ਯੋਜੇਤਬ੍ਬਕਂ ਚਮ੍ਮਭਾਜਨਂ. ਪਾਕਟਾ ਹੋਤੀਤਿ ਅਪਰਿਕ੍ਖਿਤ੍ਤਾ ਹੋਤਿ. ਉਦਕਪੁਞ੍ਛਨੀਤਿ ਦਣ੍ਡਮਯਾਪਿ ਵਿਸਾਣਮਯਾਪਿ ਦਾਰੁਮਯਾਪਿ ਵਟ੍ਟਤਿ, ਤਸ੍ਸਾ ਅਸਤਿ ਚੋਲ਼ਕੇਨਾਪਿ ਉਦਕਂ ਪਚ੍ਚੁਦ੍ਧਰਿਤੁਂ ਵਟ੍ਟਤਿ.

੨੬੩. ਉਦਕਮਾਤਿਕਨ੍ਤਿ ਉਦਕਸ੍ਸ ਆਗਮਨਮਾਤਿਕਂ. ਨਿਲ੍ਲੇਖਜਨ੍ਤਾਘਰਂ ਨਾਮ ਆਵਿਦ੍ਧਪਕ੍ਖਪਾਸਕਂ ਵੁਚ੍ਚਤਿ, ਗੋਪਾਨਸੀਨਂ ਉਪਰਿ ਮਣ੍ਡਲੇ ਪਕ੍ਖਪਾਸਕੇ ਠਪੇਤ੍ਵਾ ਕਤਕੂਟਚ੍ਛਦਨਸ੍ਸੇਤਂ ਨਾਮਂ. ਚਾਤੁਮਾਸਂ ਨਿਸੀਦਨੇਨਾਤਿ ਨਿਸੀਦਨੇਨ ਚਤ੍ਤਾਰੋ ਮਾਸੇ ਨ ਵਿਪ੍ਪਵਸਿਤਬ੍ਬਨ੍ਤਿ ਅਤ੍ਥੋ.

੨੬੪. ਪੁਪ੍ਫਾਭਿਕਿਣ੍ਣੇਸੂਤਿ ਪੁਪ੍ਫੇਹਿ ਸਨ੍ਥਤੇਸੁ. ਨਮਤਕਂ ਨਾਮ ਏਲ਼ਕਲੋਮੇਹਿ ਕਤਂ ਅਵਾਯਿਮਂ ਚਮ੍ਮਖਣ੍ਡਪਰਿਹਾਰੇਨ ਪਰਿਭੁਞ੍ਜਿਤਬ੍ਬਂ. ਆਸਿਤ੍ਤਕੂਪਧਾਨਂ ਨਾਮ ਤਮ੍ਬਲੋਹੇਨ ਵਾ ਰਜਤੇਨ ਵਾ ਕਤਾਯ ਪੇਲ਼ਾਯ ਏਤਂ ਅਧਿਵਚਨਂ, ਪਟਿਕ੍ਖਿਤ੍ਤਤ੍ਤਾ ਪਨ ਦਾਰੁਮਯਾਪਿ ਨ ਵਟ੍ਟਤਿ. ਮਲ਼ੋਰਿਕਾਤਿ ਦਣ੍ਡਧਾਰਕੋ ਵੁਚ੍ਚਤਿ. ਯਟ੍ਠਿਆਧਾਰਕਪਣ੍ਣਾਧਾਰਕਪਚ੍ਛਿਕਪਿਟ੍ਠਾਨਿਪਿ ਏਤ੍ਥੇਵ ਪਵਿਟ੍ਠਾਨਿ. ਆਧਾਰਕਸਙ੍ਖੇਪਗਮਨਤੋ ਹਿ ਪਟ੍ਠਾਯ ਛਿਦ੍ਦਂ ਵਿਦ੍ਧਮ੍ਪਿ ਅਵਿਦ੍ਧਮ੍ਪਿ ਵਟ੍ਟਤਿਯੇਵ. ਏਕਭਾਜਨੇਤਿ ਏਤ੍ਥ ਸਚੇ ਏਕੋ ਭਿਕ੍ਖੁ ਭਾਜਨਤੋ ਫਲਂ ਵਾ ਪੂਵਂ ਵਾ ਗਹੇਤ੍ਵਾ ਗਚ੍ਛਤਿ, ਤਸ੍ਮਿਂ ਅਪਗਤੇ ਇਤਰਸ੍ਸ ਸੇਸਕਂ ਭੁਞ੍ਜਿਤੁਂ ਵਟ੍ਟਤਿ. ਇਤਰਸ੍ਸਾਪਿ ਤਸ੍ਮਿਂ ਖੀਣੇ ਪੁਨ ਗਹੇਤੁਂ ਵਟ੍ਟਤਿ.

੨੬੫. ਅਟ੍ਠਹਙ੍ਗੇਹੀਤਿ ਏਤ੍ਥ ਏਕੇਕੇਨਪਿ ਅਙ੍ਗੇਨ ਸਮਨ੍ਨਾਗਤਸ੍ਸ ਅਨ੍ਤੋਸੀਮਾਯ ਵਾ ਨਿਸ੍ਸੀਮਂ ਗਨ੍ਤ੍ਵਾ ਨਦੀਆਦੀਸੁ ਵਾ ਨਿਕ੍ਕੁਜ੍ਜਿਤੁਂ ਵਟ੍ਟਤਿਯੇਵ. ਏਵਂ ਨਿਕ੍ਕੁਜ੍ਜਿਤੇ ਪਨ ਪਤ੍ਤੇ ਤਸ੍ਸ ਗੇਹੇ ਕੋਚਿ ਦੇਯ੍ਯਧਮ੍ਮੋ ਨ ਗਹੇਤਬ੍ਬੋ – ‘‘ਅਸੁਕਸ੍ਸ ਗੇਹੇ ਭਿਕ੍ਖਂ ਮਾ ਗਣ੍ਹਿਤ੍ਥਾ’’ਤਿ ਅਞ੍ਞੇਸੁ ਵਿਹਾਰੇਸੁਪਿ ਪੇਸੇਤਬ੍ਬਂ. ਉਕ੍ਕੁਜ੍ਜਨਕਾਲੇ ਪਨ ਯਾਵਤਤਿਯਂ ਯਾਚਾਪੇਤ੍ਵਾ ਹਤ੍ਥਪਾਸਂ ਵਿਜਹਾਪੇਤ੍ਵਾ ਞਤ੍ਤਿਦੁਤਿਯਕਮ੍ਮੇਨ ਉਕ੍ਕੁਜ੍ਜਿਤਬ੍ਬੋ.

੨੬੮. ਪੁਰਕ੍ਖਤ੍ਵਾਤਿ ਅਗ੍ਗਤੋ ਕਤ੍ਵਾ. ਸਂਹਰਨ੍ਤੂਤਿ ਸਂਹਰਿਯਨ੍ਤੁ. ਚੇਲਪਟਿਕਨ੍ਤਿ ਚੇਲਸਨ੍ਥਰਂ. ਸੋ ਕਿਰ ‘‘ਸਚੇ ਅਹਂ ਪੁਤ੍ਤਂ ਲਚ੍ਛਾਮਿ, ਅਕ੍ਕਮਿਸ੍ਸਤਿ ਮੇ ਭਗਵਾ ਚੇਲਪਟਿਕ’’ਨ੍ਤਿ ਇਮਿਨਾ ਅਜ੍ਝਾਸਯੇਨ ਸਨ੍ਥਰਿ, ਅਭਬ੍ਬੋ ਚੇਸ ਪੁਤ੍ਤਲਾਭਾਯ; ਤਸ੍ਮਾ ਭਗਵਾ ਨ ਅਕ੍ਕਮਿ. ਯਦਿ ਅਕ੍ਕਮੇਯ੍ਯ, ਪਚ੍ਛਾ ਪੁਤ੍ਤਂ ਅਲਭਨ੍ਤੋ ‘‘ਨਾਯਂ ਸਬ੍ਬਞ੍ਞੂ’’ਤਿ ਦਿਟ੍ਠਿਂ ਗਣ੍ਹੇਯ੍ਯ. ਇਦਂ ਤਾਵ ਭਗਵਤੋ ਅਨਕ੍ਕਮਨੇ ਕਾਰਣਂ. ਯਸ੍ਮਾ ਪਨ ਭਿਕ੍ਖੂਪਿ ਯੇ ਅਜਾਨਨ੍ਤਾ ਅਕ੍ਕਮੇਯ੍ਯੁਂ, ਤੇ ਗਿਹੀਨਂ ਪਰਿਭੂਤਾ ਭਵੇਯ੍ਯੁਂ; ਤਸ੍ਮਾ ਭਿਕ੍ਖੂ ਪਰਿਭਵਤੋ ਮੋਚੇਤੁਂ ਸਿਕ੍ਖਾਪਦਂ ਪਞ੍ਞਪੇਸਿ. ਇਦਂ ਸਿਕ੍ਖਾਪਦਪਞ੍ਞਾਪਨੇ ਕਾਰਣਂ.

ਮਙ੍ਗਲਤ੍ਥਾਯ ਯਾਚਿਯਮਾਨੇਨਾਤਿ ਅਪਗਤਗਬ੍ਭਾ ਵਾ ਹੋਤੁ ਗਰੁਗਬ੍ਭਾ ਵਾ, ਏਵਰੂਪੇਸੁ ਠਾਨੇਸੁ ਮਙ੍ਗਲਤ੍ਥਾਯ ਯਾਚਿਯਮਾਨੇਨ ਅਕ੍ਕਮਿਤੁਂ ਵਟ੍ਟਤਿ. ਧੋਤਪਾਦਕਂ ਨਾਮ ਪਾਦਧੋਵਨਟ੍ਠਾਨੇ ਧੋਤੇਹਿ ਪਾਦੇਹਿ ਅਕ੍ਕਮਨਤ੍ਥਾਯ ਪਚ੍ਚਤ੍ਥਰਣਂ ਅਤ੍ਥਤਂ ਹੋਤਿ, ਤਂ ਅਕ੍ਕਮਿਤੁਂ ਵਟ੍ਟਤਿ.

੨੬੯. ਕਤਕਂ ਨਾਮ ਪਦੁਮਕਣ੍ਣਿਕਾਕਾਰਂ ਪਾਦਘਂਸਨਤ੍ਥਂ ਕਣ੍ਟਕੇ ਉਟ੍ਠਾਪੇਤ੍ਵਾ ਕਤਂ. ਤਂ ਵਟ੍ਟਂ ਵਾ ਹੋਤੁ ਚਤੁਰਸ੍ਸਾਦਿਭੇਦਂ ਵਾ, ਬਾਹੁਲਿਕਾਨੁਯੋਗਤ੍ਤਾ ਪਟਿਕ੍ਖਿਤ੍ਤਮੇਵ, ਨੇਵ ਪਟਿਗ੍ਗਹੇਤੁਂ ਨ ਪਰਿਭੁਞ੍ਜਿਤੁਂ ਵਟ੍ਟਤਿ. ਸਕ੍ਖਰਾਤਿ ਪਾਸਾਣੋ ਵੁਚ੍ਚਤਿ; ਪਾਸਾਣਫੇਣਕੋਪਿ ਵਟ੍ਟਤਿ. ਵਿਧੂਪਨਨ੍ਤਿ ਵੀਜਨੀ ਵੁਚ੍ਚਤਿ. ਤਾਲਵਣ੍ਟਂ ਪਨ ਤਾਲਪਣ੍ਣੇਹਿ ਵਾ ਕਤਂ ਹੋਤੁ ਵੇਲ਼ੁਦਨ੍ਤਵਿਲੀਵੇਹਿ ਵਾ ਮੋਰਪਿਞ੍ਛੇਹਿ ਵਾ ਚਮ੍ਮਵਿਕਤੀਹਿ ਵਾ ਸਬ੍ਬਂ ਵਟ੍ਟਤਿ. ਮਕਸਬੀਜਨੀ ਦਨ੍ਤਮਯਵਿਸਾਣਮਯਦਣ੍ਡਕਾਪਿ ਵਟ੍ਟਤਿ, ਵਾਕਮਯਬੀਜਨਿਯਾ ਕੇਤਕਪਾਰੋਹਕੁਨ੍ਤਾਲਪਣ੍ਣਾਦਿਮਯਾਪਿ ਸਙ੍ਗਹਿਤਾ.

੨੭੦. ਗਿਲਾਨਸ੍ਸ ਛਤ੍ਤਨ੍ਤਿ ਏਤ੍ਥ ਯਸ੍ਸ ਕਾਯਡਾਹੋ ਵਾ ਪਿਤ੍ਤਕੋਪੋ ਵਾ ਹੋਤਿ, ਚਕ੍ਖੁ ਵਾ ਦੁਬ੍ਬਲਂ, ਅਞ੍ਞੋ ਵਾ ਕੋਚਿ ਆਬਾਧੋ ਵਿਨਾ ਛਤ੍ਤੇਨ ਉਪ੍ਪਜ੍ਜਤਿ, ਤਸ੍ਸ ਗਾਮੇ ਵਾ ਅਰਞ੍ਞੇ ਵਾ ਛਤ੍ਤਂ ਵਟ੍ਟਤਿ. ਵਸ੍ਸੇ ਪਨ ਚੀਵਰਗੁਤ੍ਤਤ੍ਥਂ ਵਾਲ਼ਮਿਗਚੋਰਭਯੇਸੁ ਚ ਅਤ੍ਤਗੁਤ੍ਤਤ੍ਥਮ੍ਪਿ ਵਟ੍ਟਤਿ. ਏਕਪਣ੍ਣਚ੍ਛਤ੍ਤਂ ਪਨ ਸਬ੍ਬਤ੍ਥੇਵ ਵਟ੍ਟਤਿ.

ਅਸਿਸ੍ਸਾਤਿ ਅਸਿ ਅਸ੍ਸ. ਵਿਜ੍ਜੋਤਲਤੀਤਿ ਵਿਜ੍ਜੋਤਤਿ. ਦਣ੍ਡਸਮ੍ਮੁਤਿਨ੍ਤਿ ਏਤ੍ਥ ਪਮਾਣਯੁਤ੍ਤੋ ਚਤੁਹਤ੍ਥੋਯੇਵ ਦਣ੍ਡੋ ਸਮ੍ਮਨ੍ਨਿਤ੍ਵਾ ਦਾਤਬ੍ਬੋ. ਤਤੋ ਊਨਾਤਿਰਿਤ੍ਤੋ ਵਿਨਾਪਿ ਸਮ੍ਮੁਤਿਯਾ ਸਬ੍ਬੇਸਂ ਵਟ੍ਟਤਿ. ਸਿਕ੍ਕਾ ਪਨ ਅਗਿਲਾਨਸ੍ਸ ਨ ਵਟ੍ਟਤਿ, ਗਿਲਾਨਸ੍ਸਾਪਿ ਸਮ੍ਮਨ੍ਨਿਤ੍ਵਾਵ ਦਾਤਬ੍ਬਾ.

੨੭੩. ਰੋਮਨ੍ਥਕਸ੍ਸਾਤਿ ਏਤ੍ਥ ਠਪੇਤ੍ਵਾ ਰੋਮਨ੍ਥਕਂ ਸੇਸਾਨਂ ਆਗਤਂ ਉਗ੍ਗਾਰਂ ਮੁਖੇ ਸਨ੍ਧਾਰੇਤ੍ਵਾ ਗਿਲਨ੍ਤਾਨਂ ਆਪਤ੍ਤਿ. ਸਚੇ ਪਨ ਅਸਨ੍ਧਾਰਿਤਮੇਵ ਪਰਗਲਂ ਗਚ੍ਛਤਿ, ਵਟ੍ਟਤਿ.

ਯਂ ਦਿਯ੍ਯਮਾਨਨ੍ਤਿ ਯਂ ਦਾਯਕੇਹਿ ਦਿਯ੍ਯਮਾਨਂ ਪਟਿਗ੍ਗਹਿਤਭਾਜਨਤੋ ਬਹਿ ਪਤਿਤਂ, ਤਂ ਭਿਕ੍ਖੁਨਾ ਸਾਮਂ ਗਹੇਤ੍ਵਾ ਪਰਿਭੁਞ੍ਜਿਤੁਂ ਅਨੁਜਾਨਾਮੀਤਿ ਅਤ੍ਥੋ. ਇਦਂ ਭੋਜਨਵਗ੍ਗੇ ਵਣ੍ਣਿਤਮੇਵ.

੨੭੪. ਕੁਪ੍ਪਂ ਕਰਿਸ੍ਸਾਮੀਤਿ ਸਦ੍ਦਂ ਕਰਿਸ੍ਸਾਮਿ. ਨਖਾਦੀਹਿ ਨਖਚ੍ਛੇਦਨੇ ਆਪਤ੍ਤਿ ਨਤ੍ਥਿ, ਅਨੁਰਕ੍ਖਣਤ੍ਥਂ ਪਨ ਨਖਚ੍ਛੇਦਨਂ ਅਨੁਞ੍ਞਾਤਂ. ਵੀਸਤਿਮਟ੍ਠਨ੍ਤਿ ਵੀਸਤਿਪਿ ਨਖੇ ਲਿਖਿਤਮਟ੍ਠੇ ਕਾਰਾਪੇਨ੍ਤਿ. ਮਲਮਤ੍ਤਨ੍ਤਿ ਨਖਤੋ ਮਲਮਤ੍ਤਂ ਅਪਕਡ੍ਢਿਤੁਂ ਅਨੁਜਾਨਾਮੀਤਿ ਅਤ੍ਥੋ.

੨੭੫. ਖੁਰਸਿਪਾਟਿਕਨ੍ਤਿ ਖੁਰਕੋਸਕਂ. ਮਸ੍ਸੁਂ ਕਪ੍ਪਾਪੇਨ੍ਤੀਤਿ ਕਤ੍ਤਰਿਯਾ ਮਸ੍ਸੁਂ ਛੇਦਾਪੇਨ੍ਤਿ. ਮਸ੍ਸੁਂ ਵਡ੍ਢਾਪੇਨ੍ਤੀਤਿ ਮਸ੍ਸੁਂ ਦੀਘਂ ਕਾਰੇਨ੍ਤਿ. ਗੋਲੋਮਿਕਨ੍ਤਿ ਹਨੁਕਮ੍ਹਿ ਦੀਘਂ ਕਤ੍ਵਾ ਠਪਿਤਂ ਏਲ਼ਕਮਸ੍ਸੁ ਵੁਚ੍ਚਤਿ. ਚਤੁਰਸ੍ਸਕਨ੍ਤਿ ਚਤੁਕੋਣਂ. ਪਰਿਮੁਖਨ੍ਤਿ ਉਰੇ ਲੋਮਸਂਹਰਣਂ. ਅਡ੍ਢਦੁਕਨ੍ਤਿ ਉਦਰੇ ਲੋਮਰਾਜਿਟ੍ਠਪਨਂ. ਆਪਤ੍ਤਿ ਦੁਕ੍ਕਟਸ੍ਸਾਤਿ ਮਸ੍ਸੁਕਪ੍ਪਾਪਨਾਦੀਸੁ ਸਬ੍ਬਤ੍ਥ ਆਪਤ੍ਤਿ ਦੁਕ੍ਕਟਸ੍ਸ. ਆਬਾਧਪ੍ਪਚ੍ਚਯਾ ਸਮ੍ਬਾਧੇ ਲੋਮਨ੍ਤਿ ਗਣ੍ਡਵਣਰੁਧਿਆਦਿਆਬਾਧਪ੍ਪਚ੍ਚਯਾ. ਕਤ੍ਤਰਿਕਾਯਾਤਿ ਗਣ੍ਡਵਣਰੁਧਿਸੀਸਰੋਗਾਬਾਧਪ੍ਪਚ੍ਚਯਾ. ਸਕ੍ਖਰਾਦੀਹਿ ਨਾਸਿਕਾਲੋਮਗ੍ਗਾਹਾਪਨੇ ਆਪਤ੍ਤਿ ਨਤ੍ਥਿ. ਅਨੁਰਕ੍ਖਣਤ੍ਥਂ ਪਨ ਸਣ੍ਡਾਸੋ ਅਨੁਞ੍ਞਾਤੋ. ਨ ਭਿਕ੍ਖਵੇ ਪਲਿਤਂ ਗਾਹਾਪੇਤਬ੍ਬਨ੍ਤਿ ਏਤ੍ਥ ਯਂ ਭਮੁਕਾਯ ਵਾ ਨਲਾਟੇ ਵਾ ਦਾਠਿਕਾਯ ਵਾ ਉਗ੍ਗਨ੍ਤ੍ਵਾ ਬੀਭਚ੍ਛਂ ਠਿਤਂ, ਤਾਦਿਸਂ ਲੋਮਂ ਪਲਿਤਂ ਵਾ ਅਪਲਿਤਂ ਵਾ ਗਾਹਾਪੇਤੁਂ ਵਟ੍ਟਤਿ.

੨੭੭. ਕਂਸਪਤ੍ਥਰਿਕਾਤਿ ਕਂਸਭਣ੍ਡਵਾਣਿਜਾ. ਬਨ੍ਧਨਮਤ੍ਤਨ੍ਤਿ ਵਾਸਿਕਤ੍ਤਰਯਟ੍ਠਿਆਦੀਨਂ ਬਨ੍ਧਨਮਤ੍ਤਂ.

੨੭੮. ਨ ਭਿਕ੍ਖਵੇ ਅਕਾਯਬਨ੍ਧਨੇਨਾਤਿ ਏਤ੍ਥ ਅਬਨ੍ਧਿਤ੍ਵਾ ਨਿਕ੍ਖਮਨ੍ਤੇਨ ਯਤ੍ਥ ਸਰਤਿ, ਤਤ੍ਥ ਬਨ੍ਧਿਤਬ੍ਬਂ. ਆਸਨਸਾਲਾਯ ਬਨ੍ਧਿਸ੍ਸਾਮੀਤਿ ਗਨ੍ਤੁਂ ਵਟ੍ਟਤਿ. ਸਰਿਤ੍ਵਾ ਯਾਵ ਨ ਬਨ੍ਧਤਿ, ਨ ਤਾਵ ਪਿਣ੍ਡਾਯ ਚਰਿਤਬ੍ਬਂ. ਕਲਾਬੁਕਂ ਨਾਮ ਬਹੁਰਜ੍ਜੁਕਂ. ਦੇਡ੍ਡੁਭਕਂ ਨਾਮ ਉਦਕਸਪ੍ਪਸੀਸਸਦਿਸਂ. ਮੁਰਜਂ ਨਾਮ ਮੁਰਜਵਟ੍ਟਿਸਣ੍ਠਾਨਂ ਵੇਠੇਤ੍ਵਾ ਕਤਂ. ਮਦ੍ਦਵੀਣਂ ਨਾਮ ਪਾਮਙ੍ਗਸਣ੍ਠਾਨਂ. ਈਦਿਸਞ੍ਹਿ ਏਕਮ੍ਪਿ ਨ ਵਟ੍ਟਤਿ, ਪਗੇਵ ਬਹੂਨਿ. ਪਟ੍ਟਿਕਂ ਸੂਕਰਨ੍ਤਕਨ੍ਤਿ ਏਤ੍ਥ ਪਕਤਿਵੀਤਾ ਵਾ ਮਚ੍ਛਕਣ੍ਟਕਵਾਯਿਮਾ ਵਾ ਪਟ੍ਟਿਕਾ ਵਟ੍ਟਤਿ, ਸੇਸਾ ਕੁਞ੍ਜਰਚ੍ਛਿਕਾਦਿਭੇਦਾ ਨ ਵਟ੍ਟਨ੍ਤਿ. ਸੂਕਰਨ੍ਤਕਂ ਨਾਮ ਕੁਞ੍ਜਿਕਾਕੋਸਕਸਣ੍ਠਾਨਂ ਹੋਤਿ. ਏਕਰਜ੍ਜੁਕਂ ਪਨ ਮੁਦ੍ਦਿਕਕਾਯਬਨ੍ਧਨਞ੍ਚ ਸੂਕਰਨ੍ਤਕਂ ਅਨੁਲੋਮੇਤਿ. ਅਨੁਜਾਨਾਮਿ ਭਿਕ੍ਖਵੇ ਮੁਰਜਂ ਮਦ੍ਦਵੀਣਨ੍ਤਿ ਇਦਂ ਦਸਾਸੁਯੇਵ ਅਨੁਞ੍ਞਾਤਂ. ਪਾਮਙ੍ਗਦਸਾ ਚੇਤ੍ਥ ਚਤੁਨ੍ਨਂ ਉਪਰਿ ਨ ਵਟ੍ਟਤਿ. ਸੋਭਣਂ ਨਾਮ ਵੇਠੇਤ੍ਵਾ ਮੁਖਵਟ੍ਟਿਸਿਬ੍ਬਨਂ. ਗੁਣਕਂ ਨਾਮ ਮੁਦਿਙ੍ਗਸਣ੍ਠਾਨੇਨ ਸਿਬ੍ਬਨਂ; ਏਵਂ ਸਿਬ੍ਬਿਤਾ ਹਿ ਅਨ੍ਤਾ ਥਿਰਾ ਹੋਨ੍ਤਿ. ਪਵਨਨ੍ਤੋਤਿ ਪਾਸਨ੍ਤੋ ਵੁਚ੍ਚਤਿ.

੨੮੦. ਹਤ੍ਥਿਸੋਣ੍ਡਕਂ ਨਾਮ ਨਾਭਿਮੂਲਤੋ ਹਤ੍ਥਿਸੋਣ੍ਡਸਣ੍ਠਾਨਂ ਓਲਮ੍ਬਕਂ ਕਤ੍ਵਾ ਨਿਵਤ੍ਥਂ ਚੋਲ਼ਿਕਇਤ੍ਥੀਨਂ ਨਿਵਾਸਨਂ ਵਿਯ. ਮਚ੍ਛਵਾਲ਼ਕਂ ਨਾਮ ਏਕਤੋ ਦਸਨ੍ਤਂ ਏਕਤੋ ਪਾਸਨ੍ਤਂ ਓਲਮ੍ਬੇਤ੍ਵਾ ਨਿਵਤ੍ਥਂ. ਚਤੁਕਣ੍ਣਕਂ ਨਾਮ ਉਪਰਿ ਦ੍ਵੇ, ਹੇਟ੍ਠਤੋ ਦ੍ਵੇਤਿ ਏਵਂ ਚਤ੍ਤਾਰੋ ਕਣ੍ਣੇ ਦਸ੍ਸੇਤ੍ਵਾ ਨਿਵਤ੍ਥਂ. ਤਾਲਵਣ੍ਟਕਂ ਨਾਮ ਤਾਲਵਣ੍ਟਾਕਾਰੇਨ ਸਾਟਕਂ ਓਲਮ੍ਬੇਤ੍ਵਾ ਨਿਵਾਸਨਂ. ਸਤਵਲਿਕਂ ਨਾਮ ਦੀਘਸਾਟਕਂ ਅਨੇਕਕ੍ਖਤ੍ਤੁਂ ਓਭਞ੍ਜਿਤ੍ਵਾ ਓਵਟ੍ਟਿਕਂ ਕਰੋਨ੍ਤੇਨ ਨਿਵਤ੍ਥਂ, ਵਾਮਦਕ੍ਖਿਣਪਸ੍ਸੇਸੁ ਵਾ ਨਿਰਨ੍ਤਰਂ ਵਲਿਯੋ ਦਸ੍ਸੇਤ੍ਵਾ ਨਿਵਤ੍ਥਂ. ਸਚੇ ਪਨ ਜਾਣੁਤੋ ਪਟ੍ਠਾਯ ਏਕਾ ਵਾ ਦ੍ਵੇ ਵਾ ਵਲਿਯੋ ਪਞ੍ਞਾਯਨ੍ਤਿ, ਵਟ੍ਟਤਿ.

ਸਂਵੇਲ੍ਲਿਯਂ ਨਿਵਾਸੇਨ੍ਤੀਤਿ ਮਲ੍ਲਕਮ੍ਮਕਾਰਾਦਯੋ ਵਿਯ ਕਚ੍ਛਂ ਬਨ੍ਧਿਤ੍ਵਾ ਨਿਵਾਸੇਨ੍ਤਿ; ਏਵਂ ਨਿਵਾਸੇਤੁਂ ਗਿਲਾਨਸ੍ਸਪਿ ਮਗ੍ਗਪ੍ਪਟਿਪਨ੍ਨਸ੍ਸਪਿ ਨ ਵਟ੍ਟਤਿ. ਯਮ੍ਪਿ ਮਗ੍ਗਂ ਗਚ੍ਛਨ੍ਤਾ ਏਕਂ ਵਾ ਦ੍ਵੇ ਵਾ ਕੋਣੇ ਉਕ੍ਖਿਪਿਤ੍ਵਾ ਅਨ੍ਤਰਵਾਸਕਸ੍ਸ ਉਪਰਿ ਲਗ੍ਗੇਨ੍ਤਿ, ਅਨ੍ਤੋ ਵਾ ਏਕਂ ਕਾਸਾਵਂ ਤਥਾ ਨਿਵਾਸੇਤ੍ਵਾ ਬਹਿ ਅਪਰਂ ਨਿਵਾਸੇਨ੍ਤਿ, ਸਬ੍ਬਂ ਨ ਵਟ੍ਟਤਿ. ਗਿਲਾਨੋ ਪਨ ਅਨ੍ਤੋ ਕਾਸਾਵਸ੍ਸ ਓਵਟ੍ਟਿਕਂ ਦਸ੍ਸੇਤ੍ਵਾ ਅਪਰਂ ਉਪਰਿ ਨਿਵਾਸੇਤੁਂ ਲਭਤਿ. ਅਗਿਲਾਨੇਨ ਦ੍ਵੇ ਨਿਵਾਸੇਨ੍ਤੇਨ ਸਗੁਣਂ ਕਤ੍ਵਾ ਨਿਵਾਸੇਤਬ੍ਬਾਨਿ. ਇਤਿ ਯਞ੍ਚ ਇਧ ਪਟਿਕ੍ਖਿਤ੍ਤਂ, ਯਞ੍ਚ ਸੇਖਿਯਵਣ੍ਣਨਾਯਂ; ਤਂ ਸਬ੍ਬਂ ਵਜ੍ਜੇਤ੍ਵਾ ਨਿਬ੍ਬਿਕਾਰਂ ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤਬ੍ਬਂ. ਯਂਕਿਞ੍ਚਿ ਵਿਕਾਰਂ ਕਰੋਨ੍ਤੋ ਦੁਕ੍ਕਟਾ ਨ ਮੁਚ੍ਚਤਿ. ਨ ਭਿਕ੍ਖਵੇ ਗਿਹਿਪਾਰੁਤਂ ਪਾਰੁਪਿਤਬ੍ਬਨ੍ਤਿ ਏਵਂ ਪਟਿਕ੍ਖਿਤ੍ਤਂ ਗਿਹਿਪਾਰੁਤਂ ਅਪਾਰੁਪਿਤ੍ਵਾ, ਉਭੋ ਕਣ੍ਣੇ ਸਮਂ ਕਤ੍ਵਾ ਪਾਰੁਪਨਂ ਪਰਿਮਣ੍ਡਲਪਾਰੁਪਨਂ ਨਾਮ, ਤਂ ਪਾਰੁਪਿਤਬ੍ਬਂ.

ਤਤ੍ਥ ਯਂਕਿਞ੍ਚਿ ਸੇਤਪਟਪਾਰੁਤਂ ਪਰਿਬ੍ਬਾਜਕਪਾਰੁਤਂ ਏਕਸਾਟਕਪਾਰੁਤਂ ਸੋਣ੍ਡਪਾਰੁਤਂ ਅਨ੍ਤੇਪੁਰਿਕਪਾਰੁਤਂ ਮਹਾਜੇਟ੍ਠਕਪਾਰੁਤਂ ਕੁਟਿਪਵੇਸਕਪਾਰੁਤਂ ਬ੍ਰਾਹ੍ਮਣਪਾਰੁਤਂ ਪਾਲ਼ਿਕਾਰਕਪਾਰੁਤਨ੍ਤਿ ਏਵਮਾਦਿ ਪਰਿਮਣ੍ਡਲਲਕ੍ਖਣਤੋ ਅਞ੍ਞਥਾ ਪਾਰੁਤਂ, ਸਬ੍ਬਮੇਤਂ ਗਿਹਿਪਾਰੁਤਂ ਨਾਮ. ਤਸ੍ਮਾ ਯਥਾ ਸੇਤਪਟਾ ਅਡ੍ਢਪਾਲਕਨਿਗਣ੍ਠਾ ਪਾਰੁਪਨ੍ਤਿ, ਯਥਾ ਚ ਏਕਚ੍ਚੇ ਪਰਿਬ੍ਬਾਜਕਾ ਉਰਂ ਵਿਵਰਿਤ੍ਵਾ ਦ੍ਵੀਸੁ ਅਂਸਕੂਟੇਸੁ ਪਾਵੁਰਣਂ ਠਪੇਨ੍ਤਿ, ਯਥਾ ਚ ਏਕਸਾਟਕਾ ਮਨੁਸ੍ਸਾ ਨਿਵਤ੍ਥਸਾਟਕਸ੍ਸ ਏਕੇਨਨ੍ਤੇਨ ਪਿਟ੍ਠਿਂ ਪਾਰੁਪਿਤ੍ਵਾ ਉਭੋ ਕਣ੍ਣੇ ਉਭੋਸੁ ਅਂਸਕੂਟੇਸੁ ਠਪੇਨ੍ਤਿ, ਯਥਾ ਚ ਸੁਰਾਸੋਣ੍ਡਾਦਯੋ ਸਾਟਕੇਨ ਗੀਵਂ ਪਰਿਕ੍ਖਿਪਨ੍ਤਾ ਉਭੋ ਅਨ੍ਤੇ ਉਦਰੇ ਵਾ ਓਲਮ੍ਬੇਨ੍ਤਿ; ਪਿਟ੍ਠਿਯਂ ਵਾ ਖਿਪਨ੍ਤਿ, ਯਥਾ ਚ ਅਨ੍ਤੇਪੁਰਿਕਾਯੋ ਅਕ੍ਖਿਤਾਰਕਮਤ੍ਤਂ ਦਸ੍ਸੇਤ੍ਵਾ ਓਗੁਣ੍ਠਿਕਂ ਪਾਰੁਪਨ੍ਤਿ, ਯਥਾ ਚ ਮਹਾਜੇਟ੍ਠਾ ਦੀਘਸਾਟਕਂ ਨਿਵਾਸੇਤ੍ਵਾ ਤਸ੍ਸੇਵ ਏਕੇਨਨ੍ਤੇਨ ਸਕਲਸਰੀਰਂ ਪਾਰੁਪਨ੍ਤਿ, ਯਥਾ ਚ ਕਸ੍ਸਕਾ ਖੇਤ੍ਤਕੁਟਿਂ ਪਵਿਸਨ੍ਤਾ ਸਾਟਕਂ ਪਲਿਵੇਠੇਤ੍ਵਾ ਉਪਕਚ੍ਛਕੇ ਪਕ੍ਖਿਪਿਤ੍ਵਾ ਤਸ੍ਸੇਵ ਏਕੇਨਨ੍ਤੇਨ ਸਰੀਰਂ ਪਾਰੁਪਨ੍ਤਿ, ਯਥਾ ਚ ਬ੍ਰਾਹ੍ਮਣਾ ਉਭਿਨ੍ਨਂ ਉਪਕਚ੍ਛਕਾਨਂ ਅਨ੍ਤਰੇਨ ਸਾਟਕਂ ਪਵੇਸੇਤ੍ਵਾ ਅਂਸਕੂਟੇਸੁ ਪਕ੍ਖਿਪਨ੍ਤਿ, ਯਥਾ ਚ ਪਾਲ਼ਿਕਾਰਕੋ ਭਿਕ੍ਖੁ ਏਕਂਸਪਾਰੁਪਨੇਨ ਪਾਰੁਤਂ ਵਾਮਬਾਹੁਂ ਵਿਵਰਿਤ੍ਵਾ ਚੀਵਰਂ ਅਂਸਕੂਟਂ ਆਰੋਪੇਤਿ; ਏਵਂ ਅਪਾਰੁਪਿਤ੍ਵਾ ਸਬ੍ਬੇਪਿ ਏਤੇ ਅਞ੍ਞੇ ਚ ਏਵਰੂਪੇ ਪਾਰੁਪਨਦੋਸੇ ਵਜ੍ਜੇਤ੍ਵਾ ਨਿਬ੍ਬਿਕਾਰਂ ਪਰਿਮਣ੍ਡਲਂ ਪਾਰੁਪਿਤਬ੍ਬਂ. ਤਥਾ ਅਪਾਰੁਪਿਤ੍ਵਾ ਆਰਾਮੇ ਵਾ ਅਨ੍ਤਰਘਰੇ ਵਾ ਅਨਾਦਰੇਨ ਯਂਕਿਞ੍ਚਿ ਵਿਕਾਰਂ ਕਰੋਨ੍ਤਸ੍ਸ ਦੁਕ੍ਕਟਂ.

੨੮੧. ਮੁਣ੍ਡਵਟ੍ਟੀਤਿ ਯਥਾ ਰਞ੍ਞੋ ਕੁਹਿਞ੍ਚਿ ਗਚ੍ਛਤੋ ਪਰਿਕ੍ਖਾਰਭਣ੍ਡਵਹਨਮਨੁਸ੍ਸਾਤਿ ਅਧਿਪ੍ਪਾਯੋ. ਅਨ੍ਤਰਾਕਾਜਨ੍ਤਿ ਮਜ੍ਝੇ ਲਗ੍ਗੇਤ੍ਵਾ ਦ੍ਵੀਹਿ ਵਹਿਤਬ੍ਬਭਾਰਂ.

੨੮੨. ਅਚਕ੍ਖੁਸ੍ਸਨ੍ਤਿ ਚਕ੍ਖੂਨਂ ਹਿਤਂ ਨ ਹੋਤਿ; ਪਰਿਹਾਨਿਂ ਜਨੇਤਿ. ਨਚ੍ਛਾਦੇਤੀਤਿ ਨ ਰੁਚ੍ਚਤਿ. ਅਟ੍ਠਙ੍ਗੁਲਪਰਮਨ੍ਤਿ ਮਨੁਸ੍ਸਾਨਂ ਪਮਾਣਙ੍ਗੁਲੇਨ ਅਟ੍ਠਙ੍ਗੁਲਪਰਮਂ. ਅਤਿਮਟਾਹਕਨ੍ਤਿ ਅਤਿਖੁਦ੍ਦਕਂ.

੨੮੩. ਦਾਯਂ ਆਲਿਮ੍ਪੇਨ੍ਤੀਤਿ ਤਿਣਵਨਾਦੀਸੁ ਅਗ੍ਗਿਂ ਦੇਨ੍ਤਿ. ਪਟਗ੍ਗਿਨ੍ਤਿ ਪਟਿਅਗ੍ਗਿਂ. ਪਰਿਤ੍ਤਨ੍ਤਿ ਅਪ੍ਪਹਰਿਤਕਰਣੇਨ ਵਾ ਪਰਿਖਾਖਣਨੇਨ ਵਾ ਪਰਿਤ੍ਤਾਣਂ. ਏਤ੍ਥ ਪਨ ਅਨੁਪਸਮ੍ਪਨ੍ਨੇ ਸਤਿ ਸਯਂ ਅਗ੍ਗਿਂ ਦਾਤੁਂ ਨ ਲਭਤਿ, ਅਸਤਿ ਅਗ੍ਗਿਮ੍ਪਿ ਦਾਤੁਂ ਲਭਤਿ, ਭੂਮਿਂ ਤਚ੍ਛੇਤ੍ਵਾ ਤਿਣਾਨਿਪਿ ਹਰਿਤੁਂ, ਪਰਿਖਮ੍ਪਿ ਖਣਿਤੁਂ, ਅਲ੍ਲਸਾਖਂ ਭਞ੍ਜਿਤ੍ਵਾਪਿ ਅਗ੍ਗਿਂ ਨਿਬ੍ਬਾਪੇਤੁਂ ਲਭਤਿ, ਸੇਨਾਸਨਂ ਪਤ੍ਤਂ ਵਾ ਅਪ੍ਪਤ੍ਤਂ ਵਾ ਤਥਾ ਨਿਬ੍ਬਾਪੇਤੁਂ ਲਭਤਿਯੇਵ. ਉਦਕੇਨ ਪਨ ਕਪ੍ਪਿਯੇਨੇਵ ਲਭਤਿ, ਨ ਇਤਰੇਨ.

੨੮੪. ਸਤਿ ਕਰਣੀਯੇਤਿ ਸੁਕ੍ਖਕਟ੍ਠਾਦਿਗ੍ਗਹਣਕਿਚ੍ਚੇ ਸਤਿ. ਪੋਰਿਸਿਯਨ੍ਤਿ ਪੁਰਿਸਪ੍ਪਮਾਣਂ. ਆਪਦਾਸੂਤਿ ਵਾਲ਼ਮਿਗਾਦਯੋ ਵਾ ਦਿਸ੍ਵਾ ਮਗ੍ਗਮੂਲ਼੍ਹੋ ਵਾ ਦਿਸਾ ਓਲੋਕੇਤੁਕਾਮੋ ਹੁਤ੍ਵਾ ਦਵਡਾਹਂ ਵਾ ਉਦਕੋਘਂ ਵਾ ਆਗਚ੍ਛਨ੍ਤਂ ਦਿਸ੍ਵਾ ਏਵਰੂਪਾਸੁ ਆਪਦਾਸੁ ਅਤਿਉਚ੍ਚਮ੍ਪਿ ਰੁਕ੍ਖਂ ਆਰੋਹਿਤੁਂ ਵਟ੍ਟਤਿ.

੨੮੫. ਕਲ੍ਯਾਣਵਾਕ੍ਕਰਣਾਤਿ ਮਧੁਰਸਦ੍ਦਾ. ਛਨ੍ਦਸੋ ਆਰੋਪੇਮਾਤਿ ਵੇਦਂ ਵਿਯ ਸਕ੍ਕਤਭਾਸਾਯ ਵਾਚਨਾਮਗ੍ਗਂ ਆਰੋਪੇਮ. ਸਕਾਯ ਨਿਰੁਤ੍ਤਿਯਾਤਿ ਏਤ੍ਥ ਸਕਾ ਨਿਰੁਤ੍ਤਿ ਨਾਮ ਸਮ੍ਮਾਸਮ੍ਬੁਦ੍ਧੇਨ ਵੁਤ੍ਤਪ੍ਪਕਾਰੋ ਮਾਗਧਿਕੋ ਵੋਹਾਰੋ.

੨੮੬. ਲੋਕਾਯਤਂ ਨਾਮ ਸਬ੍ਬਂ ਉਚ੍ਛਿਟ੍ਠਂ, ਸਬ੍ਬਂ ਅਨੁਚ੍ਛਿਟ੍ਠਂ, ਸੇਤੋ ਕਾਕੋ, ਕਾਲ਼ੋ ਬਕੋ; ਇਮਿਨਾ ਚ ਇਮਿਨਾ ਚ ਕਾਰਣੇਨਾਤਿ ਏਵਮਾਦਿਨਿਰਤ੍ਥਕਕਾਰਣਪਟਿਸਂਯੁਤ੍ਤਂ ਤਿਤ੍ਥਿਯਸਤ੍ਥਂ.

੨੮੮. ਅਨ੍ਤਰਾ ਅਹੋਸੀਤਿ ਅਨ੍ਤਰਿਤਾ ਅਹੋਸਿ ਪਟਿਚ੍ਛਨ੍ਨਾ.

੨੮੯. ਆਬਾਧਪ੍ਪਚ੍ਚਯਾਤਿ ਯਸ੍ਸ ਆਬਾਧਸ੍ਸ ਲਸੁਣਂ ਭੇਸਜ੍ਜਂ; ਤਪ੍ਪਚ੍ਚਯਾਤਿ ਅਤ੍ਥੋ.

੨੯੦. ਪਸ੍ਸਾਵਪਾਦੁਕਨ੍ਤਿ ਏਤ੍ਥ ਪਾਦੁਕਾ ਇਟ੍ਠਕਾਹਿਪਿ ਸਿਲਾਹਿਪਿ ਦਾਰੂਹਿਪਿ ਕਾਤੁਂ ਵਟ੍ਟਤਿ. ਵਚ੍ਚਪਾਦੁਕਾਯਪਿ ਏਸੇਵ ਨਯੋ. ਪਰਿਵੇਣਨ੍ਤਿ ਵਚ੍ਚਕੁਟਿਪਰਿਕ੍ਖੇਪਬ੍ਭਨ੍ਤਰਂ.

੨੯੩. ਯਥਾਧਮ੍ਮੋ ਕਾਰੇਤਬ੍ਬੋਤਿ ਦੁਕ੍ਕਟਵਤ੍ਥੁਮ੍ਹਿ ਦੁਕ੍ਕਟੇਨ ਪਾਚਿਤ੍ਤਿਯਵਤ੍ਥੁਮ੍ਹਿ ਪਾਚਿਤ੍ਤਿਯੇਨ ਕਾਰੇਤਬ੍ਬੋ. ਪਹਰਣਤ੍ਥਂ ਕਤਂ ਪਹਰਣੀਤਿ ਵੁਚ੍ਚਤਿ, ਯਸ੍ਸ ਕਸ੍ਸਚਿ ਆਵੁਧਸਙ੍ਖਾਤਸ੍ਸੇਤਂ ਅਧਿਵਚਨਂ, ਤਂ ਠਪੇਤ੍ਵਾ ਅਞ੍ਞਂ ਸਬ੍ਬਂ ਲੋਹਭਣ੍ਡਂ ਅਨੁਜਾਨਾਮੀਤਿ ਅਤ੍ਥੋ. ਕਤਕਞ੍ਚ ਕੁਮ੍ਭਕਾਰਿਕਞ੍ਚਾਤਿ ਏਤ੍ਥ ਕਤਕਂ ਵੁਤ੍ਤਮੇਵ. ਕੁਮ੍ਭਕਾਰਿਕਞ੍ਚਾਤਿ ਧਨਿਯਸ੍ਸੇਵ ਸਬ੍ਬਮਤ੍ਤਿਕਾਮਯਕੁਟਿ ਵੁਚ੍ਚਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਖੁਦ੍ਦਕਵਤ੍ਥੁਕਥਾ ਨਿਟ੍ਠਿਤਾ.

ਖੁਦ੍ਦਕਵਤ੍ਥੁਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.