੪. ਸਮਥਕ੍ਖਨ੍ਧਕਂ

ਸਮ੍ਮੁਖਾਵਿਨਯਕਥਾ

੧੮੬-੧੮੭. ਸਮਥਕ੍ਖਨ੍ਧਕੇ – ‘‘ਅਧਮ੍ਮਵਾਦੀ ਪੁਗ੍ਗਲੋ’’ਤਿਆਦੀਨਿ ਛ ਮਾਤਿਕਾਪਦਾਨਿ ਨਿਕ੍ਖਿਪਿਤ੍ਵਾ ‘‘ਅਧਮ੍ਮਵਾਦੀ ਪੁਗ੍ਗਲੋ ਧਮ੍ਮਵਾਦਿਂ ਪੁਗ੍ਗਲਂ ਸਞ੍ਞਾਪੇਤੀ’’ਤਿਆਦਿਨਾ ਨਯੇਨ ਵਿਤ੍ਥਾਰੋ ਵੁਤ੍ਤੋ. ਤਤ੍ਥ ਸਞ੍ਞਾਪੇਤੀਤਿ ਕਾਰਣਪਤਿਰੂਪਕਾਨਿ ਵਤ੍ਵਾ ਪਰਿਤੋਸੇਤ੍ਵਾ ਜਾਨਾਪੇਤਿ. ਨਿਜ੍ਝਾਪੇਤੀਤਿ ਯਥਾ ਸੋ ਤਂ ਅਤ੍ਥਂ ਨਿਜ੍ਝਾਯਤਿ, ਓਲੋਕੇਤਿ; ਏਵਂ ਕਰੋਤਿ. ਪੇਕ੍ਖਤਿ ਅਨੁਪੇਕ੍ਖਤੀਤਿ ਯਥਾ ਸੋ ਤਂ ਅਤ੍ਥਂ ਪੇਕ੍ਖਤਿ ਚੇਵ ਪੁਨਪ੍ਪੁਨਞ੍ਚ ਪੇਕ੍ਖਤਿ; ਏਵਂ ਕਰੋਤਿ. ਦਸ੍ਸੇਤਿ ਅਨੁਦਸ੍ਸੇਤੀਤਿ ਤੇਸਞ੍ਞੇਵ ਪਰਿਯਾਯਵਚਨਾਨਿ. ਅਧਮ੍ਮੇਨ ਵੂਪਸਮ੍ਮਤੀਤਿ ਯਸ੍ਮਾ ਸੋ ਅਧਮ੍ਮਮੇਵ ‘‘ਅਯਂ ਧਮ੍ਮੋ’’ਤਿਆਦਿਨਾ ਨਯੇਨ ਮੋਹੇਤ੍ਵਾ ਦਸ੍ਸੇਤਿ, ਤਸ੍ਮਾ ਅਧਮ੍ਮੇਨ ਵੂਪਸਮ੍ਮਤਿ ਨਾਮ.

੧੮੮. ਧਮ੍ਮੇਨ ਵੂਪਸਮ੍ਮਤੀਤਿ ਯਸ੍ਮਾ ਧਮ੍ਮਵਾਦੀ ਧਮ੍ਮਮੇਵ ‘‘ਅਯਂ ਧਮ੍ਮੋ’’ਤਿਆਦਿਨਾ ਨਯੇਨ ਅਮੋਹੇਤ੍ਵਾ ਦਸ੍ਸੇਤਿ, ਤਸ੍ਮਾ ਧਮ੍ਮੇਨ ਵੂਪਸਮ੍ਮਤਿ ਨਾਮ.

ਸਮ੍ਮੁਖਾਵਿਨਯਕਥਾ ਨਿਟ੍ਠਿਤਾ.

ਸਤਿਵਿਨਯਕਥਾ

੧੯੫. ਪਞ੍ਚਿਮਾਨਿ ਭਿਕ੍ਖਵੇ ਧਮ੍ਮਿਕਾਨਿ ਸਤਿਵਿਨਯਸ੍ਸ ਦਾਨਾਨੀਤਿ ਏਤ੍ਥ ਸੁਦ੍ਧਸ੍ਸ ਅਨਾਪਤ੍ਤਿਕਸ੍ਸ ਦਾਨਂ ਏਕਂ, ਅਨੁਵਦਿਤਸ੍ਸ ਦਾਨਂ ਏਕਂ, ਯਾਚਿਤਸ੍ਸ ਦਾਨਂ ਏਕਂ, ਸਙ੍ਘੇਨ ਦਾਨਂ ਏਕਂ, ਧਮ੍ਮੇਨ ਸਮਗ੍ਗਦਾਨਂ ਏਕਨ੍ਤਿ ਏਵਂ ਪਞ੍ਚ. ਏਤਾਨਿ ਪਨ ਏਕੇਕਅਙ੍ਗਵਸੇਨ ਨ ਲਬ੍ਭਨ੍ਤਿ, ਤਸ੍ਮਾ ਦੇਸਨਾਮਤ੍ਤਮੇਵੇਤਂ, ਪਞ੍ਚਙ੍ਗਸਮਨ੍ਨਾਗਤਂ ਪਨ ਸਤਿਵਿਨਯਦਾਨਂ ਧਮ੍ਮਿਕਨ੍ਤਿ ਅਯਮੇਤ੍ਥ ਅਤ੍ਥੋ. ਤਤ੍ਥ ਚ ਅਨੁਵਦਨ੍ਤੀਤਿ ਚੋਦੇਨ੍ਤਿ. ਸੇਸਂ ਉਤ੍ਤਾਨਮੇਵ. ਅਯਂ ਪਨ ਸਤਿਵਿਨਯੋ ਖੀਣਾਸਵਸ੍ਸੇਵ ਦਾਤਬ੍ਬੋ ਨ ਅਞ੍ਞਸ੍ਸ, ਅਨ੍ਤਮਸੋ ਅਨਾਗਾਮਿਨੋਪਿ. ਸੋ ਚ ਖੋ ਅਞ੍ਞੇਨ ਚੋਦਿਯਮਾਨਸ੍ਸੇਵ, ਨ ਅਚੋਦਿਯਮਾਨਸ੍ਸ. ਦਿਨ੍ਨੇ ਚ ਪਨ ਤਸ੍ਮਿਂ ਚੋਦਕਸ੍ਸ ਕਥਾ ਨ ਰੁਹਤਿ. ਚੋਦੇਨ੍ਤੋਪਿ ‘‘ਅਯਂ ਖੀਣਾਸਵੋ ਸਤਿਵਿਨਯਲਦ੍ਧੋ, ਕੋ ਤੁਯ੍ਹਂ ਕਥਂ ਗਹੇਸ੍ਸਤੀ’’ਤਿ ਅਪਸਾਦੇਤਬ੍ਬਤਂ ਆਪਜ੍ਜਤਿ.

ਸਤਿਵਿਨਯਕਥਾ ਨਿਟ੍ਠਿਤਾ.

ਅਮੂਲ਼੍ਹਵਿਨਯਕਥਾ

੧੯੬. ਭਾਸਿਤਪਰਿਕ੍ਕਨ੍ਤਨ੍ਤਿ ਵਾਚਾਯ ਭਾਸਿਤਂ ਕਾਯੇਨ ਪਰਿਕ੍ਕਨ੍ਤਂ; ਪਰਿਕ੍ਕਮਿਤ੍ਵਾ ਕਤਨ੍ਤਿ ਅਤ੍ਥੋ. ਸਰਤਾਯਸ੍ਮਾ ਏਵਰੂਪਿਂ ਆਪਤ੍ਤਿਂ ਆਪਜ੍ਜਿਤਾਤਿ ਏਤ੍ਥ ਸਰਤੁ ਆਯਸ੍ਮਾ ਏਵਰੂਪਿਂ ਆਪਤ੍ਤਿਂ ਆਪਜ੍ਜਿਤਾ; ਆਯਸ੍ਮਾ ਏਵਰੂਪਿਯਾ ਆਪਤ੍ਤਿਯਾਤਿ ਅਯਮਤ੍ਥੋ. ਆਪਜ੍ਜਿਤ੍ਵਾਤਿ ਵਾ ਪਾਠੋ, ਤਸ੍ਸਤ੍ਥੋ – ਪਠਮਂ ਆਪਜ੍ਜਿਤ੍ਵਾ ਪਚ੍ਛਾ ਤਂ ਆਪਤ੍ਤਿਂ ਸਰਤੁ ਆਯਸ੍ਮਾਤਿ.

ਅਮੂਲ਼੍ਹਵਿਨਯਕਥਾ ਨਿਟ੍ਠਿਤਾ.

ਯੇਭੁਯ੍ਯਸਿਕਾਕਥਾ

੨੦੨. ਯੇਭੁਯ੍ਯਸਿਕਾਯ ਵੂਪਸਮੇਤੁਨ੍ਤਿ ਏਤ੍ਥ ਯਸ੍ਸਾ ਕਿਰਿਯਾਯ ਧਮ੍ਮਵਾਦਿਨੋ ਬਹੁਤਰਾ, ਏਸਾ ਯੇਭੁਯ੍ਯਸਿਕਾ ਨਾਮ.

੨੦੪. ਅਧਮ੍ਮਿਕਸਲਾਕਗ੍ਗਾਹੇਸੁ ਓਰਮਤ੍ਤਕਨ੍ਤਿ ਪਰਿਤ੍ਤਂ ਅਪ੍ਪਮਤ੍ਤਕਂ ਭਣ੍ਡਨਮਤ੍ਤਮੇਵ. ਨ ਚ ਗਤਿਗਤਨ੍ਤਿ ਦ੍ਵੇ ਤਯੋ ਆਵਾਸੇ ਨ ਗਤਂ, ਤਤ੍ਥ ਤਤ੍ਥੇਵ ਵਾ ਦ੍ਵਤ੍ਤਿਕ੍ਖਤ੍ਤੁਂ ਅਵਿਨਿਚ੍ਛਿਤਂ. ਨ ਚ ਸਰਿਤਸਾਰਿਤਨ੍ਤਿ ਦ੍ਵਤ੍ਤਿਕ੍ਖਤ੍ਤੁਂ ਤੇਹਿ ਭਿਕ੍ਖੂਹਿ ਸਯਂ ਸਰਿਤਂ ਵਾ ਅਞ੍ਞੇਹਿ ਸਾਰਿਤਂ ਵਾ ਨ ਹੋਤਿ. ਜਾਨਾਤੀਤਿ ਸਲਾਕਂ ਗਾਹੇਨ੍ਤੋ ਜਾਨਾਤਿ ‘‘ਅਧਮ੍ਮਵਾਦੀ ਬਹੁਤਰਾ’’ਤਿ. ਅਪ੍ਪੇਵ ਨਾਮਾਤਿ ਇਮਿਨਾ ਨੀਹਾਰੇਨ ਸਲਾਕਾਯ ਗਾਹਿਯਮਾਨਾਯ ‘‘ਅਪਿ ਨਾਮ ਅਧਮ੍ਮਵਾਦਿਨੋ ਬਹੁਤਰਾ ਅਸ੍ਸੂ’’ਤਿ ਅਯਮਸ੍ਸ ਅਜ੍ਝਾਸਯੋ ਹੋਤਿ. ਅਪਰੇਸੁਪਿ ਦ੍ਵੀਸੁ ਏਸੇਵ ਨਯੋ.

ਅਧਮ੍ਮੇਨ ਗਣ੍ਹਨ੍ਤੀਤਿ ਅਧਮ੍ਮਵਾਦਿਨੋ ‘‘ਏਵਂ ਮਯਂ ਬਹੂ ਭਵਿਸ੍ਸਾਮਾ’’ਤਿ ਦ੍ਵੇ ਦ੍ਵੇ ਸਲਾਕਾਯੋ ਗਣ੍ਹਨ੍ਤਿ. ਵਗ੍ਗਾ ਗਣ੍ਹਨ੍ਤੀਤਿ ਦ੍ਵੇ ਧਮ੍ਮਵਾਦਿਨੋ ਏਕਂ ਧਮ੍ਮਵਾਦਿਸਲਾਕਂ ਗਣ੍ਹਨ੍ਤਿ ‘‘ਏਵਂ ਧਮ੍ਮਵਾਦਿਨੋ ਨ ਬਹੂ ਭਵਿਸ੍ਸਨ੍ਤੀ’’ਤਿ ਮਞ੍ਞਮਾਨਾ. ਨ ਚ ਯਥਾਦਿਟ੍ਠਿਯਾ ਗਣ੍ਹਨ੍ਤੀਤਿ ਧਮ੍ਮਵਾਦਿਨੋ ਹੁਤ੍ਵਾ ‘‘ਬਲਵਪਕ੍ਖਂ ਭਜਿਸ੍ਸਾਮਾ’’ਤਿ ਅਧਮ੍ਮਵਾਦਿਸਲਾਕਂ ਗਣ੍ਹਨ੍ਤਿ. ਧਮ੍ਮਿਕਸਲਾਕਗ੍ਗਾਹੇਸੁ ਅਯਮੇਵਤ੍ਥੋ ਪਰਿਵਤ੍ਤੇਤ੍ਵਾ ਵੇਦਿਤਬ੍ਬੋ. ਏਵਂ ਸਲਾਕਂ ਗਾਹੇਤ੍ਵਾ ਸਚੇ ਬਹੁਤਰਾ ਧਮ੍ਮਵਾਦਿਨੋ ਹੋਨ੍ਤਿ; ਯਥਾ ਤੇ ਵਦਨ੍ਤਿ, ਏਵਂ ਤਂ ਅਧਿਕਰਣਂ ਵੂਪਸਮੇਤਬ੍ਬਂ, ਏਵਂ ਯੇਭੁਯ੍ਯਸਿਕਾਯ ਵੂਪਸਨ੍ਤਂ ਹੋਤਿ. ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੋ ਪਨ ਪਰਤੋਪਿ ਆਗਮਿਸ੍ਸਤਿ.

ਯੇਭੁਯ੍ਯਸਿਕਾਕਥਾ ਨਿਟ੍ਠਿਤਾ.

ਤਸ੍ਸਪਾਪਿਯਸਿਕਾਕਥਾ

੨੦੭. ਅਸੁਚੀਤਿ ਅਸੁਚੀਹਿ ਕਾਯਵਚੀਕਮ੍ਮੇਹਿ ਸਮਨ੍ਨਾਗਤੋ. ਅਲਜ੍ਜੀਤਿ ਸਞ੍ਚਿਚ੍ਚ ਆਪਜ੍ਜਨਾਦਿਨਾ ਅਲਜ੍ਜਿਲਕ੍ਖਣੇਨ ਸਮਨ੍ਨਾਗਤੋ. ਸਾਨੁਵਾਦੋਤਿ ਸਉਪਵਾਦੋ. ਇਤਿ ਇਮੇਸਞ੍ਚ ਤਿਣ੍ਣਂ ਅਙ੍ਗਾਨਂ ਵਸੇਨ ਤੀਣਿ ਕਰਣਾਨਿ, ਸਙ੍ਘੇਨ ਕਰਣਂ, ਧਮ੍ਮੇਨ ਸਮਗ੍ਗੇਨ ਕਰਣਨ੍ਤਿ ਇਮਾਨਿ ਚ ਦ੍ਵੇਤਿ ਪਞ੍ਚ ਤਸ੍ਸਪਾਪਿਯਸਿਕਾਕਮ੍ਮਸ੍ਸ ਕਰਣਾਨਿ ਨਾਮ ਹੋਨ੍ਤਿ. ਸੇਸਮੇਤ੍ਥ ਤਜ੍ਜਨੀਯਾਦੀਸੁ ਵੁਤ੍ਤਨਯਮੇਵ. ਅਯਂ ਪਨੇਤ੍ਥ ਵਚਨਤ੍ਥੋ – ਇਦਞ੍ਹਿ ਯੋ ਪਾਪੁਸ੍ਸਨ੍ਨਤਾਯ ਪਾਪਿਯੋ ਪੁਗ੍ਗਲੋ, ਤਸ੍ਸ ਕਤ੍ਤਬ੍ਬਤੋ ‘‘ਤਸ੍ਸਪਾਪਿਯਸਿਕਾਕਮ੍ਮ’’ਨ੍ਤਿ ਵੁਚ੍ਚਤਿ.

ਤਸ੍ਸਪਾਪਿਯਸਿਕਾਕਥਾ ਨਿਟ੍ਠਿਤਾ.

ਤਿਣਵਤ੍ਥਾਰਕਾਦਿਕਥਾ

੨੧੨. ਕਕ੍ਖਲ਼ਤ੍ਤਾਯ ਵਾਲ਼ਤ੍ਤਾਯਾਤਿ ਕਕ੍ਖਲ਼ਭਾਵਾਯ ਚੇਵ ਵਾਲ਼ਭਾਵਾਯ ਚ. ਭੇਦਾਯਾਤਿ ਸਙ੍ਘਭੇਦਾਯ. ਸਬ੍ਬੇਹੇਵ ਏਕਜ੍ਝਨ੍ਤਿ ਕਸ੍ਸਚਿ ਛਨ੍ਦਂ ਅਨਾਹਰਿਤ੍ਵਾ ਗਿਲਾਨੇਪਿ ਤਤ੍ਥੇਵ ਆਨੇਤ੍ਵਾ ਏਕਤੋ ਸਨ੍ਨਿਪਤਿਤਬ੍ਬਂ. ਤਿਣਵਤ੍ਥਾਰਕੇਨ ਵੂਪਸਮੇਯ੍ਯਾਤਿ ਏਤ੍ਥ ਇਦਂ ਕਮ੍ਮਂ ਤਿਣਵਤ੍ਥਾਰਕਸਦਿਸਤ੍ਤਾ ‘‘ਤਿਣਵਤ੍ਥਾਰਕੋ’’ਤਿ ਵੁਤ੍ਤਂ. ਯਥਾ ਹਿ ਗੂਥਂ ਵਾ ਮੁਤ੍ਤਂ ਵਾ ਘਟ੍ਟਿਯਮਾਨਂ ਦੁਗ੍ਗਨ੍ਧਤਾਯ ਬਾਧਤਿ, ਤਿਣੇਹਿ ਅਵਤ੍ਥਰਿਤ੍ਵਾ ਸੁਪ੍ਪਟਿਚ੍ਛਾਦਿਤਸ੍ਸ ਪਨਸ੍ਸ ਸੋ ਗਨ੍ਧੋ ਨ ਬਾਧਤਿ; ਏਵਮੇਵ ਯਂ ਅਧਿਕਰਣਂ ਮੂਲਾਨੁਮੂਲਂ ਗਨ੍ਤ੍ਵਾ ਵੂਪਸਮਿਯਮਾਨਂ ਕਕ੍ਖਲ਼ਤ੍ਤਾਯ ਵਾਲ਼ਤ੍ਤਾਯ ਭੇਦਾਯ ਸਂਵਤ੍ਤਤਿ, ਤਂ ਇਮਿਨਾ ਕਮ੍ਮੇਨ ਵੂਪਸਨ੍ਤਂ ਗੂਥਂ ਵਿਯ ਤਿਣਵਤ੍ਥਾਰਕੇਨ ਪਟਿਚ੍ਛਨ੍ਨਂ ਸੁਵੂਪਸਨ੍ਤਂ ਹੋਤੀਤਿ ਇਦਂ ਕਮ੍ਮਂ ਤਿਣਵਤ੍ਥਾਰਕਸਦਿਸਤ੍ਤਾ ‘‘ਤਿਣਵਤ੍ਥਾਰਕੋ’’ਤਿ ਵੁਤ੍ਤਂ.

੨੧੩. ਥੁਲ੍ਲਵਜ੍ਜਨ੍ਤਿ ਪਾਰਾਜਿਕਞ੍ਚੇਵ ਸਙ੍ਘਾਦਿਸੇਸਞ੍ਚ. ਗਿਹਿਪਟਿਸਂਯੁਤ੍ਤਨ੍ਤਿ ਗਿਹੀਨਂ ਹੀਨੇਨ ਖੁਂਸਨਵਮ੍ਭਨਧਮ੍ਮਿਕਪਟਿਸ੍ਸਵੇਸੁ ਆਪਨ੍ਨਂ ਆਪਤ੍ਤਿਂ.

੨੧੪. ਏਵਞ੍ਚ ਪਨ ਭਿਕ੍ਖਵੇ ਤੇ ਭਿਕ੍ਖੂ ਤਾਹਿ ਆਪਤ੍ਤੀਹਿ ਵੁਟ੍ਠਿਤਾ ਹੋਨ੍ਤੀਤਿ ਏਵਂ ਤਿਣਵਤ੍ਥਾਰਕਕਮ੍ਮਵਾਚਾਯ ਕਤਾਯ ਕਮ੍ਮਵਾਚਾਪਰਿਯੋਸਾਨੇ ਯਤ੍ਤਕਾ ਤਤ੍ਥ ਸਨ੍ਨਿਪਤਿਤਾ ਅਨ੍ਤਮਸੋ ਸੁਤ੍ਤਾਪਿ ਸਮਾਪਨ੍ਨਾਪਿ ਅਞ੍ਞਵਿਹਿਤਾਪਿ ਸਬ੍ਬੇ ਤੇ ਭਿਕ੍ਖੂ ਯਾਵ ਉਪਸਮ੍ਪਦਮਣ੍ਡਲਤੋ ਪਟ੍ਠਾਯ ਥੁਲ੍ਲਵਜ੍ਜਞ੍ਚ ਗਿਹਿਪਟਿਸਂਯੁਤ੍ਤਞ੍ਚ ਠਪੇਤ੍ਵਾ ਅਵਸੇਸਾ ਆਪਤ੍ਤਿਯੋ ਆਪਨ੍ਨਾ, ਸਬ੍ਬਾਹਿ ਤਾਹਿ ਆਪਤ੍ਤੀਹਿ ਵੁਟ੍ਠਿਤਾ ਹੋਨ੍ਤਿ. ਯੇ ਪਨ ‘‘ਨ ਮੇਤਂ ਖਮਤੀ’’ਤਿ ਅਞ੍ਞਮਞ੍ਞਂ ਦਿਟ੍ਠਾਵਿਕਮ੍ਮਂ ਕਰੋਨ੍ਤਿ, ਤੇਹਿ ਵਾ ਸਦ੍ਧਿਂ ਆਪਤ੍ਤਿਂ ਆਪਜ੍ਜਿਤ੍ਵਾਪਿ ਤਤ੍ਥ ਅਨਾਗਤਾ, ਆਗਨ੍ਤ੍ਵਾ ਵਾ ਛਨ੍ਦਂ ਦਤ੍ਵਾ ਪਰਿਵੇਣਾਦੀਸੁ ਨਿਸਿਨ੍ਨਾ, ਤੇ ਆਪਤ੍ਤੀਹਿ ਨ ਵੁਟ੍ਠਹਨ੍ਤਿ. ਤੇਨ ਵੁਤ੍ਤਂ – ‘‘ਠਪੇਤ੍ਵਾ ਦਿਟ੍ਠਾਵਿਕਮ੍ਮਂ ਠਪੇਤ੍ਵਾ ਯੇ ਨ ਤਤ੍ਥ ਹੋਨ੍ਤੀ’’ਤਿ.

ਤਿਣਵਤ੍ਥਾਰਕਾਦਿਕਥਾ ਨਿਟ੍ਠਿਤਾ.

ਅਧਿਕਰਣਕਥਾ

੨੧੫. ਭਿਕ੍ਖੁਨੀਨਂ ਅਨੁਪਖਜ੍ਜਾਤਿ ਭਿਕ੍ਖੁਨੀਨਂ ਅਨ੍ਤੋ ਪਵਿਸਿਤ੍ਵਾ. ਵਿਵਾਦਾਧਿਕਰਣਾਦੀਨਂ ਵਚਨਤ੍ਥੋ ਦੁਟ੍ਠਦੋਸਵਣ੍ਣਨਾਯਂ ਵੁਤ੍ਤੋਯੇਵ. ਵਿਪਚ੍ਚਤਾਯ ਵੋਹਾਰੋਤਿ ਚਿਤ੍ਤਦੁਕ੍ਖਤ੍ਥਂ ਵੋਹਾਰੋ; ਫਰੁਸਵਚਨਨ੍ਤਿ ਅਤ੍ਥੋ. ਯੋ ਤਤ੍ਥ ਅਨੁਵਾਦੋਤਿ ਯੋ ਤੇਸੁ ਅਨੁਵਦਨ੍ਤੇਸੁ ਉਪਵਾਦੋ. ਅਨੁਵਦਨਾਤਿ ਆਕਾਰਨਿਦਸ੍ਸਨਮੇਤਂ; ਉਪਵਦਨਾਤਿ ਅਤ੍ਥੋ. ਅਨੁਲ੍ਲਪਨਾ ਅਨੁਭਣਨਾਤਿ ਉਭਯਂ ਅਨੁਵਦਨਵੇਵਚਨਮਤ੍ਤਮੇਵ. ਅਨੁਸਮ੍ਪਵਙ੍ਕਤਾਤਿ ਪੁਨਪ੍ਪੁਨਂ ਕਾਯਚਿਤ੍ਤਵਾਚਾਹਿ ਤਤ੍ਥੇਵ ਸਮ੍ਪਵਙ੍ਕਤਾ; ਅਨੁਵਦਨਭਾਵੋਤਿ ਅਤ੍ਥੋ. ਅਬ੍ਭੁਸ੍ਸਹਨਤਾਤਿ ‘‘ਕਸ੍ਮਾ ਏਵਂ ਨ ਉਪਵਦਿਸ੍ਸਾਮਿ, ਉਪਵਦਿਸ੍ਸਾਮਿਯੇਵਾ’’ਤਿ ਉਸ੍ਸਾਹਂ ਕਤ੍ਵਾ ਅਨੁਵਦਨਾ. ਅਨੁਬਲਪ੍ਪਦਾਨਨ੍ਤਿ ਪੁਰਿਮਵਚਨਸ੍ਸ ਕਾਰਣਂ ਦਸ੍ਸੇਤ੍ਵਾ ਪਚ੍ਛਿਮਵਚਨੇਨ ਬਲਪ੍ਪਦਾਨਂ.

ਕਿਚ੍ਚਯਤਾ ਕਰਣੀਯਤਾਤਿ ਏਤ੍ਥ ਕਿਚ੍ਚਮੇਵ ਕਿਚ੍ਚਯਂ, ਕਿਚ੍ਚਯਸ੍ਸ ਭਾਵੋ ਕਿਚ੍ਚਯਤਾ, ਕਰਣੀਯਸ੍ਸ ਭਾਵੋ ਕਰਣੀਯਤਾ; ਉਭਯਮ੍ਪੇਤਂ ਸਙ੍ਘਕਮ੍ਮਸ੍ਸੇਵ ਅਧਿਵਚਨਂ. ਅਪਲੋਕਨਕਮ੍ਮਨ੍ਤਿਆਦਿ ਪਨ ਤਸ੍ਸੇਵ ਪਭੇਦਵਚਨਂ. ਤਤ੍ਥ ਅਪਲੋਕਨਕਮ੍ਮਂ ਨਾਮ ਸੀਮਟ੍ਠਕਸਙ੍ਘਂ ਸੋਧੇਤ੍ਵਾ ਛਨ੍ਦਾਰਹਾਨਂ ਛਨ੍ਦਂ ਆਹਰਿਤ੍ਵਾ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਤਿਕ੍ਖਤ੍ਤੁਂ ਸਾਵੇਤ੍ਵਾ ਕਤ੍ਤਬ੍ਬਕਮ੍ਮਂ. ਞਤ੍ਤਿਕਮ੍ਮਂ ਨਾਮ ਵੁਤ੍ਤਨਯੇਨੇਵ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਏਕਾਯ ਞਤ੍ਤਿਯਾ ਕਤ੍ਤਬ੍ਬਕਮ੍ਮਂ. ਞਤ੍ਤਿਦੁਤਿਯਕਮ੍ਮਂ ਨਾਮ ਵੁਤ੍ਤਨਯੇਨੇਵ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਏਕਾਯ ਞਤ੍ਤਿਯਾ ਏਕਾਯ ਚ ਅਨੁਸ੍ਸਾਵਨਾਯਾਤਿ ਏਵਂ ਞਤ੍ਤਿਦੁਤਿਯਾਯ ਅਨੁਸ੍ਸਾਵਨਾਯ ਕਤ੍ਤਬ੍ਬਕਮ੍ਮਂ. ਞਤ੍ਤਿਚਤੁਤ੍ਥਕਮ੍ਮਂ ਨਾਮ ਵੁਤ੍ਤਨਯੇਨੇਵ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਏਕਾਯ ਞਤ੍ਤਿਯਾ ਤੀਹਿ ਚ ਅਨੁਸ੍ਸਾਵਨਾਹੀਤਿ ਏਵਂ ਞਤ੍ਤਿਚਤੁਤ੍ਥਾਹਿ ਤੀਹਿ ਅਨੁਸ੍ਸਾਵਨਾਹਿ ਕਤ੍ਤਬ੍ਬਕਮ੍ਮਂ.

ਤਤ੍ਥ ਅਪਲੋਕਨਕਮ੍ਮਂ ਅਪਲੋਕੇਤ੍ਵਾਵ ਕਾਤਬ੍ਬਂ, ਞਤ੍ਤਿਕਮ੍ਮਾਦਿਵਸੇਨ ਨ ਕਾਤਬ੍ਬਂ. ਞਤ੍ਤਿਕਮ੍ਮਮ੍ਪਿ ਏਕਂ ਞਤ੍ਤਿਂ ਠਪੇਤ੍ਵਾਵ ਕਾਤਬ੍ਬਂ, ਅਪਲੋਕਨਕਮ੍ਮਾਦਿਵਸੇਨ ਨ ਕਾਤਬ੍ਬਂ. ਞਤ੍ਤਿਦੁਤਿਯਕਮ੍ਮਂ ਪਨ ਅਪਲੋਕੇਤ੍ਵਾ ਕਤ੍ਤਬ੍ਬਮ੍ਪਿ ਅਤ੍ਥਿ, ਅਕਤ੍ਤਬ੍ਬਮ੍ਪਿ ਅਤ੍ਥਿ. ਤਤ੍ਥ ਸੀਮਾਸਮ੍ਮੁਤਿ ਸੀਮਾਸਮੂਹਨਨਂ ਕਥਿਨਦਾਨਂ ਕਥਿਨੁਬ੍ਭਾਰੋ ਕੁਟਿਵਤ੍ਥੁਦੇਸਨਾ ਵਿਹਾਰਵਤ੍ਥੁਦੇਸਨਾਤਿ ਇਮਾਨਿ ਛ ਕਮ੍ਮਾਨਿ ਗਰੁਕਾਨਿ, ਅਪਲੋਕੇਤ੍ਵਾ ਕਾਤੁਂ ਨ ਵਟ੍ਟਨ੍ਤਿ. ਞਤ੍ਤਿਦੁਤਿਯਕਮ੍ਮਵਾਚਂ ਸਾਵੇਤ੍ਵਾਵ ਕਾਤਬ੍ਬਾਨਿ. ਅਵਸੇਸਾ ਤੇਰਸ ਸਮ੍ਮੁਤਿਯੋ ਸੇਨਾਸਨਗ੍ਗਾਹਕਮਤਕਚੀਵਰਦਾਨਾਦਿਸਮ੍ਮੁਤਿਯੋ ਚਾਤਿ ਏਵਰੂਪਾਨਿ ਲਹੁਕਕਮ੍ਮਾਨਿ ਅਪਲੋਕੇਤ੍ਵਾਪਿ ਕਾਤੁਂ ਵਟ੍ਟਨ੍ਤਿ. ਞਤ੍ਤਿਕਮ੍ਮਞਤ੍ਤਿਚਤੁਤ੍ਥਕਮ੍ਮਵਸੇਨ ਪਨ ਨ ਕਾਤਬ੍ਬਮੇਵ. ਞਤ੍ਤਿਚਤੁਤ੍ਥਕਮ੍ਮਂ ਞਤ੍ਤਿਞ੍ਚ ਤਿਸ੍ਸੋ ਚ ਕਮ੍ਮਵਾਚਾਯੋ ਸਾਵੇਤ੍ਵਾਵ ਕਾਤਬ੍ਬਂ, ਅਪਲੋਕਨਕਮ੍ਮਾਦਿਵਸੇਨ ਨ ਕਾਤਬ੍ਬਨ੍ਤਿ ਅਯਮੇਤ੍ਥ ਸਙ੍ਖੇਪੋ.

ਵਿਤ੍ਥਾਰਤੋ ਪਨ ਇਮਾਨਿ ਚਤ੍ਤਾਰਿ ਕਮ੍ਮਾਨਿ ‘‘ਕਤਿਹਾਕਾਰੇਹਿ ਵਿਪਜ੍ਜਨ੍ਤੀ’’ਤਿਆਦਿਨਾ ਨਯੇਨ ਪਰਿਵਾਰਾਵਸਾਨੇ ਕਮ੍ਮਵਗ੍ਗੇ ਏਤੇਸਂ ਵਿਨਿਚ੍ਛਯੋ ਆਗਤੋਯੇਵ. ਯਂ ਪਨ ਤਤ੍ਥ ਅਨੁਤ੍ਤਾਨਂ, ਤਂ ਕਮ੍ਮਵਗ੍ਗੇਯੇਵ ਵਣ੍ਣਯਿਸ੍ਸਾਮ. ਏਵਞ੍ਹਿ ਸਤਿ ਨ ਅਟ੍ਠਾਨੇ ਵਣ੍ਣਨਾ ਭਵਿਸ੍ਸਤਿ, ਆਦਿਤੋ ਪਟ੍ਠਾਯ ਚ ਤਸ੍ਸ ਤਸ੍ਸ ਕਮ੍ਮਸ੍ਸ ਵਿਞ੍ਞਾਤਤ੍ਤਾ ਸੁਵਿਞ੍ਞੇਯ੍ਯੋ ਭਵਿਸ੍ਸਤਿ.

੨੧੬. ਵਿਵਾਦਾਧਿਕਰਣਸ੍ਸ ਕਿਂ ਮੂਲਨ੍ਤਿਆਦੀਨਿ ਪਾਲ਼ਿਵਸੇਨੇਵ ਵੇਦਿਤਬ੍ਬਾਨਿ.

੨੨੦. ‘‘ਵਿਵਾਦਾਧਿਕਰਣਂ ਸਿਯਾ ਕੁਸਲ’’ਨ੍ਤਿਆਦੀਸੁ ਯੇਨ ਵਿਵਦਨ੍ਤਿ, ਸੋ ਚਿਤ੍ਤੁਪ੍ਪਾਦੋ ਵਿਵਾਦੋ, ਸਮਥੇਹਿ ਚ ਅਧਿਕਰਣੀਯਤਾਯ ਅਧਿਕਰਣਨ੍ਤਿ ਏਵਮਾਦਿਨਾ ਨਯੇਨ ਅਤ੍ਥੋ ਦਟ੍ਠਬ੍ਬੋ.

੨੨੨. ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤਂ, ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲਨ੍ਤਿ ਏਤ੍ਥ ਸਨ੍ਧਾਯ ਭਾਸਿਤਵਸੇਨ ਅਤ੍ਥੋ ਵੇਦਿਤਬ੍ਬੋ. ਯਸ੍ਮਿਞ੍ਹਿ ਪਥਵਿਖਣਨਾਦਿਕੇ ਆਪਤ੍ਤਾਧਿਕਰਣੇ ਕੁਸਲਚਿਤ੍ਤਂ ਅਙ੍ਗਂ ਹੋਤਿ, ਤਸ੍ਮਿਂ ਸਤਿ ਨ ਸਕ੍ਕਾ ਵਤ੍ਤੁਂ ‘‘ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ, ਤਸ੍ਮਾ ਨਯਿਦਂ ਅਙ੍ਗਪ੍ਪਹੋਨਕਚਿਤ੍ਤਂ ਸਨ੍ਧਾਯ ਵੁਤ੍ਤਂ. ਇਦਂ ਪਨ ਸਨ੍ਧਾਯ ਵੁਤ੍ਤਂ. ਯਂ ਤਾਵ ਆਪਤ੍ਤਾਧਿਕਰਣਂ ਲੋਕਵਜ੍ਜਂ, ਤਂ ਏਕਨ੍ਤਤੋ ਅਕੁਸਲਮੇਵ, ਤਤ੍ਥ ‘‘ਸਿਯਾ ਅਕੁਸਲ’’ਨ੍ਤਿ ਵਿਕਪ੍ਪੋ ਨਤ੍ਥਿ. ਯਂ ਪਨ ਪਣ੍ਣਤ੍ਤਿਵਜ੍ਜਂ, ਤਂ ਯਸ੍ਮਾ ਸਞ੍ਚਿਚ੍ਚ ‘‘ਇਮਂ ਆਪਤ੍ਤਿਂ ਵੀਤਿਕ੍ਕਮਾਮੀ’’ਤਿ ਵੀਤਿਕ੍ਕਮਨ੍ਤਸ੍ਸੇਵ ਅਕੁਸਲਂ ਹੋਤਿ, ਅਸਞ੍ਚਿਚ੍ਚ ਪਨ ਕਿਞ੍ਚਿ ਅਜਾਨਨ੍ਤਸ੍ਸ ਸਹਸੇਯ੍ਯਾਦਿਵਸੇਨ ਆਪਜ੍ਜਤੋ ਅਬ੍ਯਾਕਤਂ ਹੋਤਿ, ਤਸ੍ਮਾ ਤਤ੍ਥ ਸਞ੍ਚਿਚ੍ਚਾਸਞ੍ਚਿਚ੍ਚਵਸੇਨ ਇਮਂ ਵਿਕਪ੍ਪਭਾਵਂ ਸਨ੍ਧਾਯ ਇਦਂ ਵੁਤ੍ਤਂ – ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ, ਸਿਯਾ ਅਬ੍ਯਾਕਤਂ, ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ.

ਸਚੇ ਪਨ ‘‘ਯਂ ਕੁਸਲਚਿਤ੍ਤੋ ਆਪਜ੍ਜਤਿ, ਇਦਂ ਵੁਚ੍ਚਤਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਵਦੇਯ੍ਯ, ਅਚਿਤ੍ਤਕਾਨਂ ਪਨ ਏਲ਼ਕਲੋਮਪਦਸੋਧਮ੍ਮਾਦਿਸਮੁਟ੍ਠਾਨਾਨਮ੍ਪਿ ਕੁਸਲਚਿਤ੍ਤਂ ਆਪਜ੍ਜੇਯ੍ਯ, ਨ ਚ ਤਤ੍ਥ ਵਿਜ੍ਜਮਾਨਮ੍ਪਿ ਕੁਸਲਚਿਤ੍ਤਂ ਆਪਤ੍ਤਿਯਾ ਅਙ੍ਗਂ. ਕਾਯਵਚੀਵਿਞ੍ਞਤ੍ਤਿਵਸੇਨ ਪਨ ਚਲਿਤਪ੍ਪਵਤ੍ਤਾਨਂ ਕਾਯਵਾਚਾਨਂ ਅਞ੍ਞਤਰਮੇਵ ਅਙ੍ਗਂ, ਤਞ੍ਚ ਰੂਪਕ੍ਖਨ੍ਧਪਰਿਯਾਪਨ੍ਨਤ੍ਤਾ ਅਬ੍ਯਾਕਤਨ੍ਤਿ.

ਯਂ ਜਾਨਨ੍ਤੋਤਿਆਦਿਮ੍ਹਿ ਪਨ ਅਯਮਤ੍ਥੋ – ਯਂ ਚਿਤ੍ਤਂ ਆਪਤ੍ਤਿਯਾ ਅਙ੍ਗਂ ਹੋਤਿ, ਤੇਨ ਵਤ੍ਥੁਂ ਜਾਨਨ੍ਤੋ ‘‘ਇਦਂ ਵੀਤਿਕ੍ਕਮਾਮੀ’’ਤਿ ਚ ਵੀਤਿਕ੍ਕਮਾਕਾਰੇਨ ਸਦ੍ਧਿਂ ਜਾਨਨ੍ਤੋ ਸਞ੍ਜਾਨਨ੍ਤੋ ਵੀਤਿਕ੍ਕਮਚੇਤਨਾਵਸੇਨ ਚੇਤੇਤ੍ਵਾ ਪਕਪ੍ਪੇਤ੍ਵਾ ਉਪਕ੍ਕਮਵਸੇਨ ਮਦ੍ਦਨ੍ਤੋ ਅਭਿਵਿਤਰਿਤ੍ਵਾ ਨਿਰਾਸਙ੍ਕਚਿਤ੍ਤਂ ਪੇਸੇਤ੍ਵਾ ਯਂ ਆਪਤ੍ਤਾਧਿਕਰਣਂ ਵੀਤਿਕ੍ਕਮਂ ਆਪਜ੍ਜਤਿ, ਤਸ੍ਸ ਏਵਂ ਵੀਤਿਕ੍ਕਮਤੋ ਯੋ ਵੀਤਿਕ੍ਕਮੋ, ਇਦਂ ਵੁਚ੍ਚਤਿ ‘‘ਆਪਤ੍ਤਾਧਿਕਰਣਂ ਅਕੁਸਲ’’ਨ੍ਤਿ.

ਅਬ੍ਯਾਕਤਵਾਰੇਪਿ ਯਂ ਚਿਤ੍ਤਂ ਆਪਤ੍ਤਿਯਾ ਅਙ੍ਗਂ ਹੋਤਿ, ਤਸ੍ਸ ਅਭਾਵੇਨ ਅਜਾਨਨ੍ਤੋ ਵੀਤਿਕ੍ਕਮਾਕਾਰੇਨ ਚ ਸਦ੍ਧਿਂ ਅਜਾਨਨ੍ਤੋ ਅਸਞ੍ਜਾਨਨ੍ਤੋ ਆਪਤ੍ਤਿਅਙ੍ਗਭੂਤਾਯ ਵੀਤਿਕ੍ਕਮਚੇਤਨਾਯ ਅਭਾਵੇਨ ਅਚੇਤੇਤ੍ਵਾ ਸਞ੍ਚਿਚ੍ਚ ਮਦ੍ਦਨਸ੍ਸ ਅਭਾਵੇਨ ਅਨਭਿਵਿਤਰਿਤ੍ਵਾ ਨਿਰਾਸਙ੍ਕਚਿਤ੍ਤਂ ਅਪੇਸੇਤ੍ਵਾ ਯਂ ਆਪਤ੍ਤਾਧਿਕਰਣਂ ਵੀਤਿਕ੍ਕਮਂ ਆਪਜ੍ਜਤਿ, ਤਸ੍ਸ ਏਵਂ ਵੀਤਿਕ੍ਕਮਤੋ ਯੋ ਵੀਤਿਕ੍ਕਮੋ, ਇਦਂ ਵੁਚ੍ਚਤਿ ‘‘ਆਪਤ੍ਤਾਧਿਕਰਣਂ ਅਬ੍ਯਾਕਤ’’ਨ੍ਤਿ.

੨੨੪. ਅਯਂ ਵਿਵਾਦੋ ਨੋ ਅਧਿਕਰਣਨ੍ਤਿਆਦੀਸੁ ਸਮਥੇਹਿ ਅਧਿਕਰਣੀਯਤਾਯ ਅਭਾਵਤੋ ਨੋਅਧਿਕਰਣਨ੍ਤਿ ਏਵਮਤ੍ਥੋ ਵੇਦਿਤਬ੍ਬੋ.

ਅਧਿਕਰਣਕਥਾ ਨਿਟ੍ਠਿਤਾ.

ਅਧਿਕਰਣਵੂਪਸਮਨਸਮਥਕਥਾ

੨੨੮. ਯਾਵਤਿਕਾ ਚ ਭਿਕ੍ਖੂ ਕਮ੍ਮਪ੍ਪਤ੍ਤਾਤਿ ਏਤ੍ਥ ਚਤੁਵਗ੍ਗਕਰਣੇ ਕਮ੍ਮੇ ਚਤ੍ਤਾਰੋ, ਪਞ੍ਚਵਗ੍ਗਕਰਣੇ ਪਞ੍ਚ, ਦਸਵਗ੍ਗਕਰਣੇ ਦਸ, ਵੀਸਤਿਵਗ੍ਗਕਰਣੇ ਵੀਸਤਿ ਭਿਕ੍ਖੂ ਕਮ੍ਮਪ੍ਪਤ੍ਤਾਤਿ ਵੇਦਿਤਬ੍ਬਾ.

੨੩੦. ਸੁਪਰਿਗ੍ਗਹਿਤਨ੍ਤਿ ਸੁਟ੍ਠੁ ਪਰਿਗ੍ਗਹਿਤਂ ਕਤ੍ਵਾ ਸਮ੍ਪਟਿਚ੍ਛਿਤਬ੍ਬਂ. ਸਮ੍ਪਟਿਚ੍ਛਿਤ੍ਵਾ ਚ ਪਨ ‘‘ਅਜ੍ਜ ਭਣ੍ਡਕਂ ਧੋਵਾਮ, ਅਜ੍ਜ ਪਤ੍ਤਂ ਪਚਾਮ, ਅਜ੍ਜੇਕੋ ਪਲਿਬੋਧੋ ਅਤ੍ਥੀ’’ਤਿ ਮਾਨਨਿਗ੍ਗਹਤ੍ਥਾਯ ਕਤਿਪਾਹਂ ਅਤਿਕ੍ਕਾਮੇਤਬ੍ਬਂ.

੨੩੧. ਅਨਨ੍ਤਾਨਿ ਚੇਵ ਭਸ੍ਸਾਨਿ ਜਾਯਨ੍ਤੀਤਿ ਅਪਰਿਮਾਣਾਨਿ ਇਤੋ ਚਿਤੋ ਚ ਵਚਨਾਨਿ ਉਪ੍ਪਜ੍ਜਨ੍ਤਿ. ‘‘ਭਾਸਾਨੀ’’ਤਿਪਿ ਪਾਠੋ, ਅਯਮੇਵਤ੍ਥੋ. ਉਬ੍ਬਾਹਿਕਾਯ ਸਮ੍ਮਨ੍ਨਿਤਬ੍ਬੋਤਿ ਅਪਲੋਕੇਤ੍ਵਾ ਵਾ ਸਮ੍ਮਨ੍ਨਿਤਬ੍ਬੋ ਪਰਤੋ ਵੁਤ੍ਤਾਯ ਞਤ੍ਤਿਦੁਤਿਯਾਯ ਵਾ ਕਮ੍ਮਵਾਚਾਯ. ਏਵਂ ਸਮ੍ਮਤੇਹਿ ਪਨ ਭਿਕ੍ਖੂਹਿ ਵਿਸੁਂ ਵਾ ਨਿਸੀਦਿਤ੍ਵਾ ਤਸ੍ਸਾਯੇਵ ਵਾ ਪਰਿਸਾਯ ‘‘ਅਞ੍ਞੇਹਿ ਅਸਮ੍ਮਤੇਹਿ ਨ ਕਿਞ੍ਚਿ ਕਥੇਤਬ੍ਬ’’ਨ੍ਤਿ ਸਾਵੇਤ੍ਵਾ ਤਂ ਅਧਿਕਰਣਂ ਵਿਨਿਚ੍ਛਿਤਬ੍ਬਂ.

੨੩੩. ਤਤ੍ਰਾਸ੍ਸਾਤਿ ਤਸ੍ਸਂ ਪਰਿਸਤਿ ਭਵੇਯ੍ਯ. ਨੇਵ ਸੁਤ੍ਤਂ ਆਗਤਨ੍ਤਿ ਨ ਮਾਤਿਕਾ ਆਗਤਾ. ਨੋ ਸੁਤ੍ਤਵਿਭਙ੍ਗੋਤਿ ਵਿਨਯੋਪਿ ਨ ਪਗੁਣੋ. ਬ੍ਯਞ੍ਜਨਚ੍ਛਾਯਾਯ ਅਤ੍ਥਂ ਪਟਿਬਾਹਤੀਤਿ ਬ੍ਯਞ੍ਜਨਮਤ੍ਤਮੇਵ ਗਹੇਤ੍ਵਾ ਅਤ੍ਥਂ ਪਟਿਸੇਧੇਤਿ. ਜਾਤਰੂਪਰਜਤਖੇਤ੍ਤਵਤ੍ਥੁਪਟਿਗ੍ਗਹਣਾਦੀਸੁ ਵਿਨਯਧਰੇਹਿ ਭਿਕ੍ਖੂਹਿ ਆਪਤ੍ਤਿਯਾ ਕਾਰਿਯਮਾਨੇ ਦਿਸ੍ਵਾ ‘‘ਕਿਂ ਇਮੇ ਆਪਤ੍ਤਿਯਾ ਕਾਰੇਥ, ‘ਨਨੁ ਜਾਤਰੂਪਰਜਤਪਟਿਗ੍ਗਹਣਾ ਪਟਿਵਿਰਤੋ ਹੋਤੀ’ਤਿ ਏਵਂ ਸੁਤ੍ਤੇ ਪਟਿਵਿਰਤਿਮਤ੍ਤਮੇਵ ਵੁਤ੍ਤਂ, ਨਤ੍ਥਿ ਏਤ੍ਥ ਆਪਤ੍ਤੀ’’ਤਿ ਵਦਤਿ. ਅਪਰੋ ਧਮ੍ਮਕਥਿਕੋ ਸੁਤ੍ਤਸ੍ਸ ਆਗਤਤ੍ਤਾ ਓਲਮ੍ਬੇਤ੍ਵਾ ਨਿਵਾਸੇਨ੍ਤਾਨਂ ਆਪਤ੍ਤਿਯਾ ਆਰੋਪਿਯਮਾਨਾਯ ‘‘ਕਿਂ ਇਮੇਸਂ ਆਪਤ੍ਤਿਂ ਰੋਪੇਥ, ‘ਨਨੁ ਪਰਿਮਣ੍ਡਲਂ ਨਿਵਾਸੇਸ੍ਸਾਮੀਤਿ ਸਿਕ੍ਖਾ ਕਰਣੀਯਾ’ਤਿ ਏਵਂ ਸਿਕ੍ਖਾਕਰਣਮਤ੍ਤਮੇਵੇਤ੍ਥ ਵੁਤ੍ਤਂ, ਨਤ੍ਥਿ ਏਤ੍ਥ ਆਪਤ੍ਤੀ’’ਤਿ ਵਦਤਿ.

੨੩੪. ਯਥਾ ਬਹੁਤਰਾ ਭਿਕ੍ਖੂਤਿ ਏਤ੍ਥ ਏਕੇਨਪਿ ਅਧਿਕਾ ਬਹੁਤਰਾਵ ਕੋ ਪਨ ਵਾਦੋ ਦ੍ਵੀਹਿ ਤੀਹੀਤਿ.

ਅਧਿਕਰਣਵੂਪਸਮਨਸਮਥਕਥਾ ਨਿਟ੍ਠਿਤਾ.

ਤਿਵਿਧਸਲਾਕਗ੍ਗਾਹਕਥਾ

੨੩੫. ਸਞ੍ਞਤ੍ਤਿਯਾਤਿ ਸਞ੍ਞਾਪਨਤ੍ਥਾਯ. ਗੂਲ਼੍ਹਕਨ੍ਤਿਆਦੀਸੁ ਅਲਜ੍ਜੁਸ੍ਸਨ੍ਨਾਯ ਪਰਿਸਾਯ ਗੂਲ਼੍ਹਕੋ ਸਲਾਕਗ੍ਗਾਹੋ ਕਾਤਬ੍ਬੋ, ਲਜ੍ਜੁਸ੍ਸਨ੍ਨਾਯ ਪਰਿਸਾਯ ਵਿਵਟਕੋ, ਬਾਲੁਸ੍ਸਨ੍ਨਾਯ ਸਕਣ੍ਣਜਪ੍ਪਕੋ. ਵਣ੍ਣਾਵਣ੍ਣਾਯੋ ਕਤ੍ਵਾਤਿ ਧਮ੍ਮਵਾਦੀਨਞ੍ਚ ਅਧਮ੍ਮਵਾਦੀਨਞ੍ਚ ਸਲਾਕਾਯੋ ਨਿਮਿਤ੍ਤਸਞ੍ਞਂ ਆਰੋਪੇਤ੍ਵਾ ਅਞ੍ਞਮਞ੍ਞਂ ਵਿਸਭਾਗਾ ਕਾਤਬ੍ਬਾ. ਤਤੋ ਤਾ ਸਬ੍ਬਾਪਿ ਚੀਵਰਭੋਗੇ ਕਤ੍ਵਾ ਵੁਤ੍ਤਨਯੇਨ ਗਾਹੇਤਬ੍ਬਾ. ਦੁਗ੍ਗਹੋਤਿ ਪਚ੍ਚੁਕ੍ਕਡ੍ਢਿਤਬ੍ਬਨ੍ਤਿ ‘‘ਦੁਗ੍ਗਹਿਤਾ ਸਲਾਕਾਯੋ’’ਤਿ ਵਤ੍ਵਾ ਪੁਨ ਗਹੇਤ੍ਵਾ ਯਾਵਤਤਿਯਂ ਗਾਹੇਤਬ੍ਬਾ. ਸੁਗ੍ਗਹੋਤਿ ਸਾਵੇਤਬ੍ਬਨ੍ਤਿ ਏਕਸ੍ਮਿਮ੍ਪਿ ਧਮ੍ਮਵਾਦਿਮ੍ਹਿ ਅਤਿਰੇਕਜਾਤੇ ‘‘ਸੁਗ੍ਗਹਿਤਾ ਸਲਾਕਾਯੋ’’ਤਿ ਸਾਵੇਤਬ੍ਬਂ. ਯਥਾ ਚ ਤੇ ਧਮ੍ਮਵਾਦਿਨੋ ਵਦਨ੍ਤਿ ਤਥਾ ਤਂ ਅਧਿਕਰਣਂ ਵੂਪਸਮੇਤਬ੍ਬਨ੍ਤਿ. ਅਥ ਯਾਵਤਤਿਯਮ੍ਪਿ ਅਧਮ੍ਮਵਾਦਿਨੋਵ ਬਹੁਤਰਾ ਹੋਨ੍ਤਿ, ਅਜ੍ਜ ‘‘ਅਕਾਲੋ, ਸ੍ਵੇ ਜਾਨਿਸ੍ਸਾਮਾ’’ਤਿ ਵੁਟ੍ਠਹਿਤ੍ਵਾ ਅਲਜ੍ਜੀਨਂ ਪਕ੍ਖਭੇਦਤ੍ਥਾਯ ਧਮ੍ਮਵਾਦਿਪਕ੍ਖਂ ਪਰਿਯੇਸਿਤ੍ਵਾ ਪੁਨਦਿਵਸੇ ਸਲਾਕਗ੍ਗਾਹੋ ਕਾਤਬ੍ਬੋ. ਅਯਂ ਗੂਲ਼੍ਹਕੋ ਸਲਾਕਗ੍ਗਾਹੋ.

ਸਕਣ੍ਣਜਪ੍ਪਕੇ ਪਨ ਗਹਿਤੇ ਵਤ੍ਤਬ੍ਬੋਤਿ ਏਤ੍ਥ ਸਚੇ ਸਙ੍ਘਤ੍ਥੇਰੋ ਅਧਮ੍ਮਵਾਦਿਸਲਾਕਂ ਗਣ੍ਹਾਤਿ, ਸੋ ਏਵਂ ਅਵਬੋਧੇਤਬ੍ਬੋ – ‘‘ਭਨ੍ਤੇ, ਤੁਮ੍ਹੇ ਮਹਲ੍ਲਕਾ ਵਯੋਅਨੁਪ੍ਪਤ੍ਤਾ, ਤੁਮ੍ਹਾਕਂ ਏਤਂ ਨ ਯੁਤ੍ਤਂ, ਅਯਂ ਪਨ ਧਮ੍ਮਵਾਦਿਸਲਾਕਾ’’ਤਿ ਅਸ੍ਸ ਇਤਰਾ ਸਲਾਕਾ ਦਸ੍ਸੇਤਬ੍ਬਾ. ਸਚੇ ਸੋ ਤਂ ਗਣ੍ਹਾਤਿ, ਦਾਤਬ੍ਬਾ. ਅਥ ਨੇਵ ਅਵਬੁਜ੍ਝਤਿ, ਤਤੋ ‘‘ਮਾ ਕਸ੍ਸਚਿ ਆਰੋਚੇਹੀ’’ਤਿ ਵਤ੍ਤਬ੍ਬੋ. ਸੇਸਂ ਵੁਤ੍ਤਨਯਮੇਵ. ਵਿਵਟਕੋ ਵਿਵਟਤ੍ਥੋਯੇਵ.

ਤਿਵਿਧਸਲਾਕਗ੍ਗਾਹਕਥਾ ਨਿਟ੍ਠਿਤਾ.

ਤਸ੍ਸਪਾਪਿਯਸਿਕਾਵਿਨਯਕਥਾ

੨੩੮. ਪਾਰਾਜਿਕਸਾਮਨ੍ਤਂ ਵਾਤਿ ਏਤ੍ਥ ਮੇਥੁਨਧਮ੍ਮੇ ਪਾਰਾਜਿਕਸਾਮਨ੍ਤਂ ਨਾਮ ਦੁਕ੍ਕਟਂ ਹੋਤਿ. ਅਦਿਨ੍ਨਾਦਾਨਾਦੀਸੁ ਥੁਲ੍ਲਚ੍ਚਯਂ. ਨਿਬ੍ਬੇਠੇਨ੍ਤਨ੍ਤਿ ‘‘ਨ ਸਰਾਮੀ’’ਤਿ ਵਚਨੇਨ ਨਿਬ੍ਬੇਠਯਮਾਨਂ. ਅਤਿਵੇਠੇਤੀਤਿ ‘‘ਇਙ੍ਘਾਯਸ੍ਮਾ’’ਤਿਆਦਿਵਚਨੇਹਿ ਅਤਿਵੇਠਿਯਤਿ. ਸਰਾਮਿ ਖੋ ਅਹਂ ਆਵੁਸੋਤਿ ਪਾਰਾਜਿਕਪਟਿਚ੍ਛਾਦਨਤ੍ਥਾਯ ਏਵਂ ਪਟਿਜਾਨਾਤਿ. ਪੁਨ ਤੇਨ ਅਤਿਵੇਠਿਯਮਾਨੋ ‘‘ਸਰਾਮਿ ਖੋ’’ਤਿ ਪਟਿਞ੍ਞਂ ਦਤ੍ਵਾ ‘‘ਇਦਾਨਿ ਮਂ ਨਾਸੇਸ੍ਸਨ੍ਤੀ’’ਤਿ ਭਯੇਨ ‘‘ਦਵਾਯ ਮੇ’’ਤਿਆਦਿਮਾਹ. ਏਤਸ੍ਸ ਤਸ੍ਸਪਾਪਿਯਸਿਕਾਕਮ੍ਮਂ ਕਾਤਬ੍ਬਂ. ਸਚੇ ਸੀਲਵਾ ਭਵਿਸ੍ਸਤਿ, ਵਤ੍ਤਂ ਪਰਿਪੂਰੇਤ੍ਵਾ ਪਟਿਪ੍ਪਸ੍ਸਦ੍ਧਿਂ ਲਭਤਿ, ਨੋ ਚੇ ਤਥਾ ਨਾਸਿਤਕੋਵ ਭਵਿਸ੍ਸਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਤਸ੍ਸਪਾਪਿਯਸਿਕਾਵਿਨਯਕਥਾ ਨਿਟ੍ਠਿਤਾ.

ਸਮਥਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.