੬-੭. ਤਣ੍ਹਕ੍ਖਯਸੁਤ੍ਤਾਦਿਵਣ੍ਣਨਾ

੨੦੭-੨੦੮. ਛਟ੍ਠੇ ਏਤਦਵੋਚਾਤਿ ‘‘ਇਮਿਸ੍ਸਂ ਪਰਿਸਤਿ ਨਿਸਿਨ੍ਨੋ ਉਦਾਯਿਤ੍ਥੇਰੋ ਨਾਮ ਅਨੁਸਨ੍ਧਿਕੁਸਲੋ ਭਿਕ੍ਖੁ ਅਤ੍ਥਿ, ਸੋ ਮਂ ਪੁਚ੍ਛਿਸ੍ਸਤੀਤਿ ਭਗਵਤਾ ਓਸਾਪਿਤਦੇਸਨਂ ਞਤ੍ਵਾ ਦੇਸਨਾਨੁਸਨ੍ਧਿਂ ਘਟੇਸ੍ਸਾਮੀ’’ਤਿ ਪੁਚ੍ਛਨ੍ਤੋ ਏਤਂ ਅਵੋਚ. ਵਿਪੁਲਨ੍ਤਿਆਦਿ ਸਬ੍ਬਂ ਸੁਭਾਵਿਤਤ੍ਤਂ ਸਨ੍ਧਾਯ ਵੁਤ੍ਤਂ. ਸੁਭਾਵਿਤੋ ਹਿ ਸਤਿਸਮ੍ਬੋਜ੍ਝਙ੍ਗੋ ਵਿਪੁਲੋ ਚ ਮਹਗ੍ਗਤੋ ਚ ਅਪ੍ਪਮਾਣੋ ਚ ਅਬ੍ਯਾਪਜ੍ਜੋ ਚ ਨਾਮ ਹੋਤਿ. ਸੋ ਹਿ ਪਤ੍ਥਟਤ੍ਤਾ ਵਿਪੁਲੋ, ਮਹਨ੍ਤਭਾਵਂ ਗਤਤ੍ਤਾ ਮਹਗ੍ਗਤੋ, ਵਡ੍ਢਿਪਮਾਣਤ੍ਤਾ ਅਪ੍ਪਮਾਣੋ, ਨੀਵਰਣਾਨਂ ਦੂਰੀਭਾਵੇਨ ਬ੍ਯਾਪਾਦਰਹਿਤਤ੍ਤਾ ਅਬ੍ਯਾਪਜ੍ਝੋ ਨਾਮ ਹੋਤਿ. ਤਣ੍ਹਾਯ ਪਹਾਨਾ ਕਮ੍ਮਂ ਪਹੀਯਤੀਤਿ ਯਂ ਤਣ੍ਹਾਮੂਲਕਂ ਕਮ੍ਮਂ ਉਪ੍ਪਜ੍ਜੇਯ੍ਯ, ਤਂ ਤਣ੍ਹਾਪਹਾਨੇਨ ਪਹੀਯਤਿ. ਕਮ੍ਮਸ੍ਸ ਪਹਾਨਾ ਦੁਕ੍ਖਨ੍ਤਿ ਯਮ੍ਪਿ ਕਮ੍ਮਮੂਲਕਂ ਵਟ੍ਟਦੁਕ੍ਖਂ ਉਪ੍ਪਜ੍ਜੇਯ੍ਯ, ਤਂ ਕਮ੍ਮਪਹਾਨੇਨ ਪਹੀਯਤਿ. ਤਣ੍ਹਕ੍ਖਯਾਦਯੋ ਤਣ੍ਹਾਦੀਨਂਯੇਵ ਖਯਾ, ਅਤ੍ਥਤੋ ਪਨੇਤੇਹਿ ਨਿਬ੍ਬਾਨਂ ਕਥਿਤਨ੍ਤਿ ਵੇਦਿਤਬ੍ਬਂ. ਸਤ੍ਤਮਂ ਉਤ੍ਤਾਨਮੇਵ.