੨. ਬੋਜ੍ਝਙ੍ਗਸਂਯੁਤ੍ਤਂ

੧. ਪਬ੍ਬਤਵਗ੍ਗੋ

੧. ਹਿਮਵਨ੍ਤਸੁਤ੍ਤਵਣ੍ਣਨਾ

੧੮੨. ਬੋਜ੍ਝਙ੍ਗਸਂਯੁਤ੍ਤਸ੍ਸ ਪਠਮੇ ਨਾਗਾਤਿ ਇਮੇਪਿ ਮਹਾਸਮੁਦ੍ਦਪਿਟ੍ਠੇ ਊਮਿਅਨ੍ਤਰਵਾਸਿਨੋਵ, ਨ ਵਿਮਾਨਟ੍ਠਕਨਾਗਾ. ਤੇਸਂ ਹਿਮਵਨ੍ਤਂ ਨਿਸ੍ਸਾਯ ਕਾਯਵਡ੍ਢਨਾਦਿਸਬ੍ਬਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਬੋਜ੍ਝਙ੍ਗੇਤਿ ਏਤ੍ਥ ਬੋਧਿਯਾ, ਬੋਧਿਸ੍ਸ ਵਾ ਅਙ੍ਗਾਤਿ ਬੋਜ੍ਝਙ੍ਗਾ. ਕਿਂ ਵੁਤ੍ਤਂ ਹੋਤਿ? ਯਾ ਹਿ ਅਯਂ ਧਮ੍ਮਸਾਮਗ੍ਗੀ, ਯਾਯ ਲੋਕਿਯਲੋਕੁਤ੍ਤਰਮਗ੍ਗਕ੍ਖਣੇ ਉਪ੍ਪਜ੍ਜਮਾਨਾਯ ਲੀਨੁਦ੍ਧਚ੍ਚਪਤਿਟ੍ਠਾਨਾਯੂਹਨ ਕਾਮਸੁਖਤ੍ਤਕਿਲਮਥਾਨੁਯੋਗਉਚ੍ਛੇਦਸਸ੍ਸਤਾਭਿਨਿਵੇਸਾਦੀਨਂ ਅਨੇਕੇਸਂ ਉਪਦ੍ਦਵਾਨਂ ਪਟਿਪਕ੍ਖਭੂਤਾਯ ਸਤਿਧਮ੍ਮਵਿਚਯਵੀਰਿਯਪੀਤਿਪਸ੍ਸਦ੍ਧਿਸਮਾਧਿਉਪੇਕ੍ਖਾਸਙ੍ਖਾਤਾਯ ਧਮ੍ਮਸਾਮਗ੍ਗਿਯਾ ਅਰਿਯਸਾਵਕੋ ਬੁਜ੍ਝਤੀਤਿ ਕਤ੍ਵਾ ਬੋਧੀਤਿ ਵੁਚ੍ਚਤਿ. ਬੁਜ੍ਝਤੀਤਿ ਕਿਲੇਸਸਨ੍ਤਾਨਨਿਦ੍ਦਾਯ ਉਟ੍ਠਹਤਿ, ਚਤ੍ਤਾਰਿ ਵਾ ਅਰਿਯਸਚ੍ਚਾਨਿ ਪਟਿਵਿਜ੍ਝਤਿ, ਨਿਬ੍ਬਾਨਮੇਵ ਵਾ ਸਚ੍ਛਿਕਰੋਤੀਤਿ ਵੁਤ੍ਤਂ ਹੋਤਿ. ਯਥਾਹ ‘‘ਸਤ੍ਤ ਬੋਜ੍ਝਙ੍ਗੇ ਭਾਵੇਤ੍ਵਾ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ’’ਤਿ (ਸਂ. ਨਿ. ੫.੩੭੮; ਦੀ. ਨਿ. ੩.੧੪੩). ਤਸ੍ਸਾ ਧਮ੍ਮਸਾਮਗ੍ਗਿਸਙ੍ਖਾਤਾਯ ਬੋਧਿਯਾ ਅਙ੍ਗਾਤਿ ਬੋਜ੍ਝਙ੍ਗਾ ਝਾਨਙ੍ਗਮਗ੍ਗਙ੍ਗਾਦਯੋ ਵਿਯ. ਯੋਪੇਸ ਯਥਾਵੁਤ੍ਤਪ੍ਪਕਾਰਾਯ ਏਤਾਯ ਧਮ੍ਮਸਾਮਗ੍ਗਿਯਾ ਬੁਜ੍ਝਤੀਤਿ ਕਤ੍ਵਾ ਅਰਿਯਸਾਵਕੋ ਬੋਧੀਤਿ ਵੁਚ੍ਚਤਿ, ਤਸ੍ਸ ਬੋਧਿਸ੍ਸ ਅਙ੍ਗਾਤਿਪਿ ਬੋਜ੍ਝਙ੍ਗਾ ਸੇਨਙ੍ਗਰਥਙ੍ਗਾਦਯੋ ਵਿਯ. ਤੇਨਾਹੁ ਅਟ੍ਠਕਥਾਚਰਿਯਾ – ‘‘ਬੁਜ੍ਝਨਕਸ੍ਸ ਪੁਗ੍ਗਲਸ੍ਸ ਅਙ੍ਗਾਤਿ ਵਾ ਬੋਜ੍ਝਙ੍ਗਾ’’ਤਿ.

ਅਪਿਚ ‘‘ਬੋਜ੍ਝਙ੍ਗਾਤਿ ਕੇਨਟ੍ਠੇਨ ਬੋਜ੍ਝਙ੍ਗਾ? ਬੋਧਾਯ ਸਂਵਤ੍ਤਨ੍ਤੀਤਿ ਬੋਜ੍ਝਙ੍ਗਾ, ਬੁਜ੍ਝਨ੍ਤੀਤਿ ਬੋਜ੍ਝਙ੍ਗਾ, ਅਨੁਬੁਜ੍ਝਨ੍ਤੀਤਿ ਬੋਜ੍ਝਙ੍ਗਾ, ਪਟਿਬੁਜ੍ਝਨ੍ਤੀਤਿ ਬੋਜ੍ਝਙ੍ਗਾ, ਸਮ੍ਬੁਜ੍ਝਨ੍ਤੀਤਿ ਬੋਜ੍ਝਙ੍ਗਾ’’ਇਚ੍ਚਾਦਿਨਾ (ਪਟਿ. ਮ. ੨.੧੭) ਪਟਿਸਮ੍ਭਿਦਾਨਯੇਨਾਪਿ ਬੋਜ੍ਝਙ੍ਗਤ੍ਥੋ ਵੇਦਿਤਬ੍ਬੋ.

ਸਤਿਸਮ੍ਬੋਜ੍ਝਙ੍ਗਨ੍ਤਿਆਦੀਸੁ ਪਨ ਪਸਤ੍ਥੋ ਸੁਨ੍ਦਰੋ ਚ ਬੋਜ੍ਝਙ੍ਗੋਤਿ ਸਮ੍ਬੋਜ੍ਝਙ੍ਗੋ. ਸਤਿਯੇਵ ਸਮ੍ਬੋਜ੍ਝਙ੍ਗੋਤਿ ਸਤਿਸਮ੍ਬੋਜ੍ਝਙ੍ਗੋ, ਤਂ ਸਤਿਸਮ੍ਬੋਜ੍ਝਙ੍ਗਨ੍ਤਿ ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਭਾਵੇਤੀਤਿ ਵਡ੍ਢੇਤਿ, ਅਤ੍ਤਨੋ ਚਿਤ੍ਤਸਨ੍ਤਾਨੇ ਪੁਨਪ੍ਪੁਨਂ ਜਨੇਤਿ, ਅਭਿਨਿਬ੍ਬਤ੍ਤੇਤੀਤਿ ਅਤ੍ਥੋ. ਵਿਵੇਕਨਿਸ੍ਸਿਤਨ੍ਤਿਆਦੀਨਿ ਕੋਸਲਸਂਯੁਤ੍ਤੇ ‘‘ਸਮ੍ਮਾਦਿਟ੍ਠਿਂ ਭਾਵੇਤਿ ਵਿਵੇਕਨਿਸ੍ਸਿਤ’’ਨ੍ਤਿ ਏਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ.

ਅਯਂ ਪਨ ਵਿਸੇਸੋ – ਤਤ੍ਥ ਤਦਙ੍ਗਵਿਵੇਕਨਿਸ੍ਸਿਤਂ, ਸਮੁਚ੍ਛੇਦਵਿਵੇਕਨਿਸ੍ਸਿਤਂ, ਨਿਸ੍ਸਰਣਵਿਵੇਕਨਿਸ੍ਸਿਤਨ੍ਤਿ, ਵਿਵੇਕਤ੍ਤਯਮੇਵ ਵੁਤ੍ਤਂ, ਬੋਜ੍ਝਙ੍ਗਭਾਵਨਂ ਪਤ੍ਵਾ ਪਨ ਪਞ੍ਚਵਿਧਵਿਵੇਕਨਿਸ੍ਸਿਤਮ੍ਪਿ ਏਕੇ ਵਣ੍ਣਯਨ੍ਤਿ. ਤੇ ਹਿ ਨ ਕੇਵਲਂ ਬਲਵਵਿਪਸ੍ਸਨਾਮਗ੍ਗਫਲਕ੍ਖਣੇਸੁ ਏਵ ਬੋਜ੍ਝਙ੍ਗੇ ਉਦ੍ਧਰਨ੍ਤਿ ਵਿਪਸ੍ਸਨਾਪਾਦਕ-ਕਸਿਣਜ੍ਝਾਨ-ਆਨਾਪਾਨਾਸੁਭ-ਬ੍ਰਹ੍ਮਵਿਹਾਰਜ੍ਝਾਨੇਸੁਪਿ ਉਦ੍ਧਰਨ੍ਤਿ, ਨ ਚ ਪਟਿਸਿਦ੍ਧਾ ਅਟ੍ਠਕਥਾਚਰਿਯੇਹਿ. ਤਸ੍ਮਾ ਤੇਸਂ ਮਤੇਨ ਏਤੇਸਂ ਝਾਨਾਨਂ ਪਵਤ੍ਤਿਕ੍ਖਣੇ ਕਿਚ੍ਚਤੋ ਏਵ ਵਿਕ੍ਖਮ੍ਭਨਵਿਵੇਕਨਿਸ੍ਸਿਤਂ. ਯਥਾ ਚ ਵਿਪਸ੍ਸਨਾਕ੍ਖਣੇ ‘‘ਅਜ੍ਝਾਸਯਤੋ ਨਿਸ੍ਸਰਣਵਿਵੇਕਨਿਸ੍ਸਿਤ’’ਨ੍ਤਿ ਵੁਤ੍ਤਂ, ਏਵਂ ਪਟਿਪਸ੍ਸਦ੍ਧਿਵਿਵੇਕਨਿਸ੍ਸਿਤਮ੍ਪਿ ਭਾਵੇਤੀਤਿ ਵਤ੍ਤੁਂ ਵਟ੍ਟਤਿ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਨਯਮੇਵ.

੨. ਕਾਯਸੁਤ੍ਤਵਣ੍ਣਨਾ

੧੮੩. ਦੁਤਿਯੇ ਆਹਾਰਟ੍ਠਿਤਿਕੋਤਿ ਪਚ੍ਚਯਟ੍ਠਿਤਿਕੋ. ਆਹਾਰਂ ਪਟਿਚ੍ਚਾਤਿ ਪਚ੍ਚਯਂ ਪਟਿਚ੍ਚ. ਸੁਭਨਿਮਿਤ੍ਤਨ੍ਤਿ ਸੁਭਮ੍ਪਿ ਸੁਭਨਿਮਿਤ੍ਤਂ, ਸੁਭਸ੍ਸ ਆਰਮ੍ਮਣਮ੍ਪਿ ਸੁਭਨਿਮਿਤ੍ਤਂ. ਅਯੋਨਿਸੋਮਨਸਿਕਾਰੋਤਿ ਅਨੁਪਾਯਮਨਸਿਕਾਰੋ ਉਪ੍ਪਥਮਨਸਿਕਾਰੋ ਅਨਿਚ੍ਚੇ ‘‘ਨਿਚ੍ਚ’’ਨ੍ਤਿ ਵਾ, ਦੁਕ੍ਖੇ ‘‘ਸੁਖ’’ਨ੍ਤਿ, ਅਨਤ੍ਤਨਿ ‘‘ਅਤ੍ਤਾ’’ਤਿ ਵਾ, ਅਸੁਭੇ ‘‘ਸੁਭ’’ਨ੍ਤਿ ਵਾ, ਮਨਸਿਕਾਰੋ. ਤਂ ਤਸ੍ਮਿਂ ਸੁਭਾਰਮ੍ਮਣੇ ਬਹੁਲਂ ਪਵਤ੍ਤਯਤੋ ਕਾਮਚ੍ਛਨ੍ਦੋ ਉਪ੍ਪਜ੍ਜਤਿ. ਤੇਨ ਵੁਤ੍ਤਂ ‘‘ਅਤ੍ਥਿ, ਭਿਕ੍ਖਵੇ, ਸੁਭਨਿਮਿਤ੍ਤ’’ਨ੍ਤਿਆਦਿ. ਏਵਂ ਸਬ੍ਬਨੀਵਰਣੇਸੁ ਯੋਜਨਾ ਵੇਦਿਤਬ੍ਬਾ.

ਪਟਿਘਨਿਮਿਤ੍ਤਨ੍ਤਿਆਦੀਸੁ ਪਨ ਪਟਿਘੋਪਿ ਪਟਿਘਨਿਮਿਤ੍ਤਂ ਪਟਿਘਾਰਮ੍ਮਣਮ੍ਪਿ. ਅਰਤੀਤਿ ਉਕ੍ਕਣ੍ਠਿਤਾ. ਯਂ ਸਨ੍ਧਾਯ ਵੁਤ੍ਤਂ – ‘‘ਤਤ੍ਥ ਕਤਮਾ ਅਰਤਿ? ਪਨ੍ਤੇਸੁ ਵਾ ਸੇਨਾਸਨੇਸੁ ਅਞ੍ਞਤਰਞ੍ਞਤਰੇਸੁ ਵਾ ਅਧਿਕੁਸਲੇਸੁ ਧਮ੍ਮੇਸੁ ਅਰਤਿ ਅਰਤਿਤਾ ਅਨਭਿਰਤਿ ਅਨਭਿਰਮਨਾ ਉਕ੍ਕਣ੍ਠਿਤਾ ਪਰਿਤਸ੍ਸਿਤਾ, ਅਯਂ ਵੁਚ੍ਚਤਿ ਅਰਤੀ’’ਤਿ (ਵਿਭ. ੮੫੬).

ਤਨ੍ਦੀਤਿ ਅਤਿਸੀਤਾਦਿਪਚ੍ਚਯਾ ਉਪ੍ਪਨ੍ਨਂ ਆਗਨ੍ਤੁਕਕਾਯਾਲਸਿਯਂ. ਯਸ੍ਮਿਂ ਉਪ੍ਪਨ੍ਨੇ ‘‘ਅਤਿਸੀਤਂ ਅਤਿਉਣ੍ਹਂ ਅਤਿਚ੍ਛਾਤੋਸ੍ਮਿ ਅਤਿਧਾਤੋਸ੍ਮਿ ਅਤਿਦੂਰਮਗ੍ਗਂ ਗਤੋਸ੍ਮੀ’’ਤਿ ਵਦਤਿ, ਯਂ ਸਨ੍ਧਾਯ ਵੁਤ੍ਤਂ ‘‘ਤਤ੍ਥ ਕਤਮਾ ਤਨ੍ਦਿ, ਯਾ ਤਨ੍ਦੀ ਤਨ੍ਦਿਯਨਾ ਤਨ੍ਦਿਮਨਕਤਾ ਆਲਸ੍ਯਂ ਆਲਸ੍ਯਾਯਨਾ ਆਲਸ੍ਯਾਯਿਤਤ੍ਤਂ, ਅਯਂ ਵੁਚ੍ਚਤਿ ਤਨ੍ਦੀ’’ਤਿ (ਵਿਭ. ੮੫੭).

ਵਿਜਮ੍ਭਿਤਾਤਿ ਕਿਲੇਸਵਸੇਨ ਕਾਯਵਿਨਮਨਾ. ਯਂ ਸਨ੍ਧਾਯ ਵੁਤ੍ਤਂ – ‘‘ਤਤ੍ਥ ਕਤਮਾ ਵਿਜਮ੍ਭਿਤਾ? ਯਾ ਕਾਯਸ੍ਸ ਜਮ੍ਭਨਾ ਵਿਜਮ੍ਭਨਾ ਆਨਮਨਾ ਵਿਨਮਨਾ ਸਨ੍ਨਮਨਾ ਪਣਮਨਾ ਬ੍ਯਾਧਿਯਕਂ, ਅਯਂ ਵੁਚ੍ਚਤਿ ਵਿਜਮ੍ਭਿਤਾ’’ਤਿ (ਵਿਭ. ੮੫੮).

ਭਤ੍ਤਸਮ੍ਮਦੋਤਿ ਭਤ੍ਤਪਰਿਲ਼ਾਹੋ. ਯਂ ਸਨ੍ਧਾਯ ਵੁਤ੍ਤਂ – ‘‘ਤਤ੍ਥ ਕਤਮੋ ਭਤ੍ਤਸਮ੍ਮਦੋ? ਯਾ ਭੁਤ੍ਤਾਵਿਸ੍ਸ ਭਤ੍ਤਮੁਚ੍ਛਾ ਭਤ੍ਤਕਿਲਮਥੋ ਭਤ੍ਤਪਰਿਲ਼ਾਹੋ ਕਾਯਦੁਟ੍ਠੁਲ੍ਲਂ, ਅਯਂ ਵੁਚ੍ਚਤਿ ਭਤ੍ਤਸਮ੍ਮਦੋ’’ਤਿ (ਵਿਭ. ੮੫੯).

ਚੇਤਸੋ ਚ ਲੀਨਤ੍ਤਨ੍ਤਿ ਚਿਤ੍ਤਸ੍ਸ ਲੀਯਨਾਕਾਰੋ, ਯਂ ਸਨ੍ਧਾਯ ਵੁਤ੍ਤਂ – ‘‘ਤਤ੍ਥ ਕਤਮਂ ਚੇਤਸੋ ਲੀਨਤ੍ਤਂ? ਯਾ ਚਿਤ੍ਤਸ੍ਸ ਅਕਲ੍ਯਤਾ ਅਕਮ੍ਮਞ੍ਞਤਾ ਓਲੀਯਨਾ ਸਲ੍ਲੀਯਨਾ ਲੀਨਂ ਲੀਯਨਾ ਲੀਯਿਤਤ੍ਤਂ ਥਿਨਂ ਥਿਯਨਾ ਥਿਯਿਤਤ੍ਤਂ ਚਿਤ੍ਤਸ੍ਸ, ਇਦਂ ਵੁਚ੍ਚਤਿ ਚੇਤਸੋ ਲੀਨਤ੍ਤ’’ਨ੍ਤਿ (ਵਿਭ. ੮੬੦).

ਚੇਤਸੋ ਅਵੂਪਸਮੋਤਿ ਯਥਾ ਨਾਮ ਵੀਤਚ੍ਚਿਕੋਪਿ ਅਙ੍ਗਾਰੋ ਨੇਵ ਤਾਵ ਸਨ੍ਨਿਸੀਦਤਿ ਪਤਾਪਂ ਕਰੋਤਿਯੇਵ, ਯਥਾ ਚ ਪਤ੍ਤਪਚਨਟ੍ਠਾਨੇ ਨੇਵ ਤਾਵ ਸਨ੍ਨਿਸੀਦਤਿ ਪਤਾਪਂ ਕਰੋਤਿਯੇਵ, ਏਵਂ ਚਿਤ੍ਤਸ੍ਸ ਅਵੂਪਸਨ੍ਤਾਕਾਰੋ, ਅਤ੍ਥਤੋ ਪਨੇਤਂ ਉਦ੍ਧਚ੍ਚਕੁਕ੍ਕੁਚ੍ਚਮੇਵ ਹੋਤਿ.

ਵਿਚਿਕਿਚ੍ਛਟ੍ਠਾਨੀਯਾ ਧਮ੍ਮਾਤਿ ਵਿਚਿਕਿਚ੍ਛਾਯ ਆਰਮ੍ਮਣਧਮ੍ਮਾ. ਅਯੋਨਿਸੋਮਨਸਿਕਾਰੋ ਸਬ੍ਬਤ੍ਥ ਵੁਤ੍ਤਨਯੋਵ. ਏਵਮੇਤ੍ਥ ਕਾਮਚ੍ਛਨ੍ਦੋ ਵਿਚਿਕਿਚ੍ਛਾਤਿ ਇਮੇ ਦ੍ਵੇ ਧਮ੍ਮਾ ਆਰਮ੍ਮਣੇਨ ਕਥਿਤਾ, ਬ੍ਯਾਪਾਦੋ ਆਰਮ੍ਮਣੇਨ ਚ ਉਪਨਿਸ੍ਸਯੇਨ ਚ, ਸੇਸਾ ਸਹਜਾਤੇਨ ਚ ਉਪਨਿਸ੍ਸਯੇਨ ਚਾਤਿ.

ਸਤਿਸਮ੍ਬੋਜ੍ਝਙ੍ਗਟ੍ਠਾਨੀਯਾ ਧਮ੍ਮਾਤਿ ਸਤਿਯਾ ਆਰਮ੍ਮਣਧਮ੍ਮਾ ਸਤ੍ਤਤਿਂਸ ਬੋਧਿਪਕ੍ਖਿਯਾ ਚ ਨਵ ਲੋਕੁਤ੍ਤਰਧਮ੍ਮਾ ਚ. ਤਤ੍ਥ ਯੋਨਿਸੋਮਨਸਿਕਾਰਬਹੁਲੀਕਾਰੋਤਿ ਤਤ੍ਥ ਉਪਾਯਮਨਸਿਕਾਰਸ੍ਸ ਪੁਨਪ੍ਪੁਨਂ ਕਰਣਂ.

ਕੁਸਲਾਕੁਸਲਾ ਧਮ੍ਮਾਤਿਆਦੀਸੁ ਕੁਸਲਾਤਿ ਕੋਸਲ੍ਲਸਮ੍ਭੂਤਾ ਅਨਵਜ੍ਜਸੁਖਵਿਪਾਕਾ. ਅਕੁਸਲਾਤਿ ਅਕੋਸਲ੍ਲਸਮ੍ਭੂਤਾ ਸਾਵਜ੍ਜਦੁਕ੍ਖਵਿਪਾਕਾ. ਸਾਵਜ੍ਜਾਤਿ ਅਕੁਸਲਾ. ਅਨਵਜ੍ਜਾਤਿ ਕੁਸਲਾ. ਹੀਨਪਣੀਤਕਣ੍ਹਸੁਕ੍ਕੇਸੁਪਿ ਏਸੇਵ ਨਯੋ. ਸਪ੍ਪਟਿਭਾਗਾਤਿ ਕਣ੍ਹਸੁਕ੍ਕਾਯੇਵ. ਕਣ੍ਹਾ ਹਿ ਕਣ੍ਹਵਿਪਾਕਦਾਨਤੋ, ਸੁਕ੍ਕਾ ਚ ਸੁਕ੍ਕਵਿਪਾਕਦਾਨਤੋ ਸਪ੍ਪਟਿਭਾਗਾ ਨਾਮ, ਸਦਿਸਵਿਪਾਕਕੋਟ੍ਠਾਸਾਤਿ ਅਤ੍ਥੋ. ਪਟਿਪਕ੍ਖਭੂਤਸ੍ਸ ਵਾ ਭਾਗਸ੍ਸ ਅਤ੍ਥਿਤਾਯ ਸਪ੍ਪਟਿਭਾਗਾ. ਕਣ੍ਹਾਨਞ੍ਹਿ ਸੁਕ੍ਕਾ ਪਟਿਪਕ੍ਖਭਾਗਾ, ਸੁਕ੍ਕਾਨਞ੍ਚ ਕਣ੍ਹਾ ਪਟਿਪਕ੍ਖਭਾਗਾਤਿ ਏਵਮ੍ਪਿ ਸਪ੍ਪਟਿਭਾਗਾ. ਸਪ੍ਪਟਿਬਾਹਿਤਟ੍ਠੇਨ ਵਾ ਸਪ੍ਪਟਿਭਾਗਾ. ਅਕੁਸਲਞ੍ਹਿ ਕੁਸਲਂ ਪਟਿਬਾਹਿਤ੍ਵਾ ਅਤ੍ਤਨੋ ਵਿਪਾਕਂ ਦੇਤਿ, ਕੁਸਲਞ੍ਚ ਅਕੁਸਲਂ ਪਟਿਬਾਹਿਤ੍ਵਾਤਿ ਏਵਮ੍ਪਿ ਕਣ੍ਹਸੁਕ੍ਕਾ ਸਪ੍ਪਟਿਭਾਗਾ.

ਆਰਮ੍ਭਧਾਤੂਤਿ ਪਠਮਾਰਮ੍ਭਵੀਰਿਯਂ. ਨਿਕ੍ਕਮਧਾਤੂਤਿ ਕੋਸਜ੍ਜਤੋ ਨਿਕ੍ਖਨ੍ਤਤ੍ਤਾ ਤਤੋ ਬਲਵਤਰਂ. ਪਰਕ੍ਕਮਧਾਤੂਤਿ ਪਰਂ ਪਰਂ ਠਾਨਂ ਅਕ੍ਕਮਨਤਾਯ ਤਤੋਪਿ ਬਲਵਤਰਨ੍ਤਿ ਤੀਹਿਪਿ ਪਦੇਹਿ ਵੀਰਿਯਮੇਵ ਕਥਿਤਂ.

ਪੀਤਿਸਮ੍ਬੋਜ੍ਝਙ੍ਗਟ੍ਠਾਨੀਯਾਤਿ ਪੀਤਿਯਾ ਆਰਮ੍ਮਣਧਮ੍ਮਾ. ਕਾਯਪਸ੍ਸਦ੍ਧੀਤਿ ਤਿਣ੍ਣਂ ਖਨ੍ਧਾਨਂ ਦਰਥਪਸ੍ਸਦ੍ਧਿ. ਚਿਤ੍ਤਪਸ੍ਸਦ੍ਧੀਤਿ ਵਿਞ੍ਞਾਣਕ੍ਖਨ੍ਧਸ੍ਸ ਦਰਥਪਸ੍ਸਦ੍ਧਿ. ਸਮਥਨਿਮਿਤ੍ਤਨ੍ਤਿ ਸਮਥੋਪਿ ਸਮਥਨਿਮਿਤ੍ਤਂ, ਆਰਮ੍ਮਣਮ੍ਪਿ. ਅਬ੍ਯਗ੍ਗਨਿਮਿਤ੍ਤਨ੍ਤਿ ਤਸ੍ਸੇਵ ਵੇਵਚਨਂ.

ਉਪੇਕ੍ਖਾਸਮ੍ਬੋਜ੍ਝਙ੍ਗਟ੍ਠਾਨੀਯਾਤਿ ਉਪੇਕ੍ਖਾਯ ਆਰਮ੍ਮਣਧਮ੍ਮਾ, ਅਤ੍ਥਤੋ ਪਨ ਮਜ੍ਝਤ੍ਤਾਕਾਰੋ ਉਪੇਕ੍ਖਾਟ੍ਠਾਨੀਯਾ ਧਮ੍ਮੋਤਿ ਵੇਦਿਤਬ੍ਬੋ. ਏਵਮੇਤ੍ਥ ਸਤਿਧਮ੍ਮਵਿਚਯਉਪੇਕ੍ਖਾਸਮ੍ਬੋਜ੍ਝਙ੍ਗਾ ਆਰਮ੍ਮਣੇਨ ਕਥਿਤਾ, ਸੇਸਾ ਆਰਮ੍ਮਣੇਨਪਿ ਉਪਨਿਸ੍ਸਯੇਨਪਿ.

੩. ਸੀਲਸੁਤ੍ਤਵਣ੍ਣਨਾ

੧੮੪. ਤਤਿਯੇ ਸੀਲਸਮ੍ਪਨ੍ਨਾਤਿ ਏਤ੍ਥ ਖੀਣਾਸਵਸ੍ਸ ਲੋਕਿਯਲੋਕੁਤ੍ਤਰਸੀਲਂ ਕਥਿਤਂ, ਤੇਨ ਸਮ੍ਪਨ੍ਨਾਤਿ ਅਤ੍ਥੋ. ਸਮਾਧਿਪਞ੍ਞਾਸੁਪਿ ਏਸੇਵ ਨਯੋ. ਵਿਮੁਤ੍ਤਿ ਪਨ ਫਲਵਿਮੁਤ੍ਤਿਯੇਵ. ਵਿਮੁਤ੍ਤਿਞਾਣਦਸ੍ਸਨਂ ਪਚ੍ਚਵੇਕ੍ਖਣਞਾਣਂ. ਏਵਮੇਤ੍ਥ ਸੀਲਾਦਯੋ ਤਯੋ ਲੋਕਿਯਲੋਕੁਤ੍ਤਰਾ, ਵਿਮੁਤ੍ਤਿ ਲੋਕੁਤ੍ਤਰਾਵ, ਵਿਮੁਤ੍ਤਿਞਾਣਦਸ੍ਸਨਂ ਲੋਕਿਯਮੇਵ.

ਦਸ੍ਸਨਮ੍ਪਾਹਨ੍ਤਿ ਦਸ੍ਸਨਮ੍ਪਿ ਅਹਂ. ਤਂ ਪਨੇਤਂ ਦਸ੍ਸਨਂ – ਚਕ੍ਖੁਦਸ੍ਸਨਂ, ਞਾਣਦਸ੍ਸਨਨ੍ਤਿ ਦੁਵਿਧਂ. ਤਤ੍ਥ ਪਸਨ੍ਨੇਹਿ ਚਕ੍ਖੂਹਿ ਅਰਿਯਾਨਂ ਦਸ੍ਸਨਂ ਓਲੋਕਨਂ ਚਕ੍ਖੁਦਸ੍ਸਨਂ ਨਾਮ. ਅਰਿਯੇਹਿ ਪਨ ਦਿਟ੍ਠਸ੍ਸ ਲਕ੍ਖਣਸ੍ਸ ਦਸ੍ਸਨਂ, ਪਟਿਵਿਦ੍ਧਸ੍ਸ ਚ ਪਟਿਵਿਜ੍ਝਨਂ ਝਾਨੇਨ ਵਾ ਵਿਪਸ੍ਸਨਾਯ ਵਾ ਮਗ੍ਗਫਲੇਹਿ ਵਾ ਞਾਣਦਸ੍ਸਨਂ ਨਾਮ. ਇਮਸ੍ਮਿਂ ਪਨੇਤ੍ਥ ਚਕ੍ਖੁਦਸ੍ਸਨਂ ਅਧਿਪ੍ਪੇਤਂ. ਅਰਿਯਾਨਞ੍ਹਿ ਪਸਨ੍ਨੇਹਿ ਚਕ੍ਖੂਹਿ ਓਲੋਕਨਮ੍ਪਿ ਬਹੁਕਾਰਮੇਵ. ਸਵਨਨ੍ਤਿ ‘‘ਅਸੁਕੋ ਨਾਮ ਖੀਣਾਸਵੋ ਅਸੁਕਸ੍ਮਿਂ ਨਾਮ ਰਟ੍ਠੇ ਵਾ ਜਨਪਦੇ ਵਾ ਗਾਮੇ ਵਾ ਨਿਗਮੇ ਵਾ ਵਿਹਾਰੇ ਵਾ ਲੇਣੇ ਵਾ ਵਸਤੀ’’ਤਿ ਕਥੇਨ੍ਤਾਨਂ ਸੋਤੇਨ ਸਵਨਂ, ਏਤਮ੍ਪਿ ਬਹੁਕਾਰਮੇਵ. ਉਪਸਙ੍ਕਮਨਨ੍ਤਿ ‘‘ਦਾਨਂ ਵਾ ਦਸ੍ਸਾਮਿ, ਪਞ੍ਹਂ ਵਾ ਪੁਚ੍ਛਿਸ੍ਸਾਮਿ, ਧਮ੍ਮਂ ਵਾ ਸੋਸ੍ਸਾਮਿ, ਸਕ੍ਕਾਰਂ ਵਾ ਕਰਿਸ੍ਸਾਮੀ’’ਤਿ ਏਵਰੂਪੇਨ ਚਿਤ੍ਤੇਨ ਅਰਿਯਾਨਂ ਉਪਸਙ੍ਕਮਨਂ. ਪਯਿਰੁਪਾਸਨਨ੍ਤਿ ਪਞ੍ਹਾਪਯਿਰੁਪਾਸਨਂ. ਅਰਿਯਾਨਂ ਗੁਣੇ ਸੁਤ੍ਵਾ ਤੇ ਉਪਸਙ੍ਕਮਿਤ੍ਵਾ ਨਿਮਨ੍ਤੇਤ੍ਵਾ ਦਾਨਂ ਦਤ੍ਵਾ ‘‘ਕਿਂ, ਭਨ੍ਤੇ, ਕੁਸਲ’’ਨ੍ਤਿਆਦਿਨਾ ਨਯੇਨ ਪਞ੍ਹਪੁਚ੍ਛਨਨ੍ਤਿ ਅਤ੍ਥੋ.

ਅਨੁਸ੍ਸਤਿਨ੍ਤਿ ਰਤ੍ਤਿਟ੍ਠਾਨਦਿਵਾਟ੍ਠਾਨੇਸੁ ਨਿਸਿਨ੍ਨਸ੍ਸ ‘‘ਇਦਾਨਿ ਅਰਿਯਾ ਲੇਣਗੁਹਮਣ੍ਡਪਾਦੀਸੁ ਝਾਨਵਿਪਸ੍ਸਨਾਮਗ੍ਗਫਲਸੁਖੇਹਿ ਵੀਤਿਨਾਮੇਨ੍ਤੀ’’ਤਿ ਅਨੁਸ੍ਸਰਣਂ. ਯੋ ਵਾ ਤੇਸਂ ਸਨ੍ਤਿਕੇ ਓਵਾਦੋ ਲਦ੍ਧੋ ਹੋਤਿ, ਤਂ ਆਵਜ੍ਜਿਤ੍ਵਾ ‘‘ਇਮਸ੍ਮਿਂ ਠਾਨੇ ਸੀਲਂ ਕਥਿਤਂ, ਇਮਸ੍ਮਿਂ ਸਮਾਧਿ, ਇਮਸ੍ਮਿਂ ਵਿਪਸ੍ਸਨਾ, ਇਮਸ੍ਮਿਂ ਮਗ੍ਗੋ, ਇਮਸ੍ਮਿਂ ਫਲ’’ਨ੍ਤਿ ਏਵਂ ਅਨੁਸ੍ਸਰਣਂ. ਅਨੁਪਬ੍ਬਜ੍ਜਨ੍ਤਿ ਅਰਿਯੇਸੁ ਚਿਤ੍ਤਂ ਪਸਾਦੇਤ੍ਵਾ ਘਰਾ ਨਿਕ੍ਖਮ੍ਮ ਤੇਸਂ ਸਨ੍ਤਿਕੇ ਪਬ੍ਬਜ੍ਜਂ. ਅਰਿਯਾਨਞ੍ਹਿ ਸਨ੍ਤਿਕੇ ਚਿਤ੍ਤਂ ਪਸਾਦੇਤ੍ਵਾ ਤੇਸਂਯੇਵ ਸਨ੍ਤਿਕੇ ਪਬ੍ਬਜਿਤ੍ਵਾ ਤੇਸਂਯੇਵ ਓਵਾਦਾਨੁਸਾਸਨਿਂ ਪਚ੍ਚਾਸੀਸਮਾਨਸ੍ਸ ਚਰਤੋਪਿ ਪਬ੍ਬਜ੍ਜਾ ਅਨੁਪਬ੍ਬਜ੍ਜਾ ਨਾਮ. ਅਰਿਯੇਸੁ ਪਸਾਦੇਨ ਅਞ੍ਞਤ੍ਥ ਪਬ੍ਬਜਿਤ੍ਵਾ ਅਰਿਯਾਨਂ ਸਨ੍ਤਿਕੇ ਓਵਾਦਾਨੁਸਾਸਨਿਂ ਪਚ੍ਚਾਸੀਸਮਾਨਸ੍ਸ ਚਰਤੋ ਪਬ੍ਬਜ੍ਜਾਪਿ ਅਨੁਪਬ੍ਬਜ੍ਜਾ ਨਾਮ. ਅਞ੍ਞੇਸੁ ਪਨ ਪਸਾਦੇਨ ਅਞ੍ਞੇਸਂਯੇਵ ਸਨ੍ਤਿਕੇ ਪਬ੍ਬਜਿਤ੍ਵਾ ਅਞ੍ਞੇਸਂਯੇਵ ਓਵਾਦਾਨੁਸਾਸਨਿਂ ਪਚ੍ਚਾਸੀਸਮਾਨਸ੍ਸ ਚਰਤੋ ਪਬ੍ਬਜ੍ਜਾ ਅਨੁਪਬ੍ਬਜ੍ਜਾ ਨਾਮ ਨ ਹੋਤਿ.

ਏਵਂ ਪਬ੍ਬਜਿਤੇਸੁ ਪਨ ਮਹਾਕਸ੍ਸਪਤ੍ਥੇਰਸ੍ਸ ਤਾਵ ਅਨੁਪਬ੍ਬਜ੍ਜਂ ਪਬ੍ਬਜਿਤਾ ਸਤਸਹਸ੍ਸਮਤ੍ਤਾ ਅਹੇਸੁਂ, ਤਥਾ ਥੇਰਸ੍ਸੇਵ ਸਦ੍ਧਿਵਿਹਾਰਿਕਸ੍ਸ ਚ ਚਨ੍ਦਗੁਤ੍ਤਤ੍ਥੇਰਸ੍ਸ, ਤਸ੍ਸਾਪਿ ਸਦ੍ਧਿਵਿਹਾਰਿਕਸ੍ਸ ਸੂਰਿਯਗੁਤ੍ਤਤ੍ਥੇਰਸ੍ਸ, ਤਸ੍ਸਾਪਿ ਸਦ੍ਧਿਵਿਹਾਰਿਕਸ੍ਸ ਅਸ੍ਸਗੁਤ੍ਤਤ੍ਥੇਰਸ੍ਸ, ਤਸ੍ਸਾਪਿ ਸਦ੍ਧਿਵਿਹਾਰਿਕਸ੍ਸ ਯੋਨਕਧਮ੍ਮਰਕ੍ਖਿਤਤ੍ਥੇਰਸ੍ਸ, ਤਸ੍ਸ ਪਨ ਸਦ੍ਧਿਵਿਹਾਰਿਕੋ ਅਸੋਕਰਞ੍ਞੋ ਕਨਿਟ੍ਠਭਾਤਾ ਤਿਸ੍ਸਤ੍ਥੇਰੋ ਨਾਮ ਅਹੋਸਿ, ਤਸ੍ਸ ਅਨੁਪਬ੍ਬਜ੍ਜਂ ਪਬ੍ਬਜਿਤਾ ਅਡ੍ਢਤੇਯ੍ਯਕੋਟਿਸਙ੍ਖਾ ਅਹੇਸੁਂ. ਮਹਿਨ੍ਦਤ੍ਥੇਰਸ੍ਸ ਅਨੁਪਬ੍ਬਜਿਤਾਨਂ ਗਣਨਪਰਿਚ੍ਛੇਦੋ ਨਤ੍ਥਿ. ਯਾਵਜ੍ਜਦਿਵਸਾ ਲਙ੍ਕਾਦੀਪੇ ਸਤ੍ਥਰਿ ਪਸਾਦੇਨ ਪਬ੍ਬਜਨ੍ਤਾ ਮਹਿਨ੍ਦਤ੍ਥੇਰਸ੍ਸੇਵ ਪਬ੍ਬਜ੍ਜਂ ਅਨੁਪਬ੍ਬਜਨ੍ਤਿ ਨਾਮ.

ਤਂ ਧਮ੍ਮਨ੍ਤਿ ਤਂ ਤੇਸਂ ਓਵਾਦਾਨੁਸਾਸਨੀਧਮ੍ਮਂ. ਅਨੁਸ੍ਸਰਤੀਤਿ ਸਰਤਿ. ਅਨੁਵਿਤਕ੍ਕੇਤੀਤਿ ਵਿਤਕ੍ਕਾਹਤਂ ਕਰੋਤਿ. ਆਰਦ੍ਧੋ ਹੋਤੀਤਿ ਪਰਿਪੁਣ੍ਣੋ ਹੋਤਿ. ਪਵਿਚਿਨਤੀਤਿਆਦਿ ਸਬ੍ਬਂ ਤਤ੍ਥ ਞਾਣਚਾਰਵਸੇਨੇਵ ਵੁਤ੍ਤਂ. ਅਥ ਵਾ ਪਵਿਚਿਨਤੀਤਿ ਤੇਸਂ ਤੇਸਂ ਧਮ੍ਮਾਨਂ ਲਕ੍ਖਣਂ ਵਿਚਿਨਤਿ. ਪਵਿਚਰਤੀਤਿ ਤਤ੍ਥ ਞਾਣਂ ਚਰਾਪੇਤਿ. ਪਰਿਵੀਮਂਸਮਾਪਜ੍ਜਤੀਤਿ ਵੀਮਂਸਨਂ ਓਲੋਕਨਂ ਗਵੇਸਨਂ ਆਪਜ੍ਜਤਿ.

ਸਤ੍ਤ ਫਲਾ ਸਤ੍ਤਾਨਿਸਂਸਾਤਿ ਉਭਯਮ੍ਪੇਤਂ ਅਤ੍ਥਤੋ ਏਕਂ. ਦਿਟ੍ਠੇਵ ਧਮ੍ਮੇ ਪਟਿਕਚ੍ਚ ਅਞ੍ਞਂ ਆਰਾਧੇਤੀਤਿ ਅਰਹਤ੍ਤਂ ਆਰਾਧੇਨ੍ਤੋ ਇਮਸ੍ਮਿਂਯੇਵ ਅਤ੍ਤਭਾਵੇ ਆਰਾਧੇਤਿ, ਤਞ੍ਚ ਖੋ ਪਟਿਕਚ੍ਚ, ਅਸਮ੍ਪਤ੍ਤੇਯੇਵ ਮਰਣਕਾਲੇਤਿ ਅਤ੍ਥੋ. ਅਥ ਮਰਣਕਾਲੇਤਿ ਅਥ ਮਰਣਸ੍ਸ ਆਸਨ੍ਨਕਾਲੇ.

ਅਨ੍ਤਰਾਪਰਿਨਿਬ੍ਬਾਯੀਤਿ ਯੋ ਆਯੁਵੇਮਜ੍ਝਂ ਅਨਤਿਕ੍ਕਮਿਤ੍ਵਾ ਪਰਿਨਿਬ੍ਬਾਯਤਿ, ਸੋ ਤਿਵਿਧੋ ਹੋਤਿ. ਕਪ੍ਪਸਹਸ੍ਸਾਯੁਕੇਸੁ ਤਾਵ ਅਵਿਹੇਸੁ ਨਿਬ੍ਬਤ੍ਤਿਤ੍ਵਾ ਏਕੋ ਨਿਬ੍ਬਤ੍ਤਦਿਵਸੇਯੇਵ ਅਰਹਤ੍ਤਂ ਪਾਪੁਣਾਤਿ. ਨੋ ਚੇ ਨਿਬ੍ਬਤ੍ਤਦਿਵਸੇ ਪਾਪੁਣਾਤਿ, ਪਠਮਸ੍ਸ ਪਨ ਕਪ੍ਪਸਤਸ੍ਸ ਮਤ੍ਥਕੇ ਪਾਪੁਣਾਤਿ. ਅਯਮੇਕੋ ਅਨ੍ਤਰਾਪਰਿਨਿਬ੍ਬਾਯੀ. ਅਪਰੋ ਏਵਂ ਅਸਕ੍ਕੋਨ੍ਤੋ ਦ੍ਵਿਨ੍ਨਂ ਕਪ੍ਪਸਤਾਨਂ ਮਤ੍ਥਕੇ ਪਾਪੁਣਾਤਿ, ਅਯਂ ਦੁਤਿਯੋ. ਅਪਰੋ ਏਵਮ੍ਪਿ ਅਸਕ੍ਕੋਨ੍ਤੋ ਚਤੁਨ੍ਨਂ ਕਪ੍ਪਸਤਾਨਂ ਮਤ੍ਥਕੇ ਪਾਪੁਣਾਤਿ, ਅਯਂ ਤਤਿਯੋ ਅਨ੍ਤਰਾਪਰਿਨਿਬ੍ਬਾਯੀ.

ਪਞ੍ਚਮਂ ਪਨ ਕਪ੍ਪਸਤਂ ਅਤਿਕ੍ਕਮਿਤ੍ਵਾ ਅਰਹਤ੍ਤਂ ਪਤ੍ਤੋ ਉਪਹਚ੍ਚਪਰਿਨਿਬ੍ਬਾਯੀ ਨਾਮ ਹੋਤਿ. ਅਤਪ੍ਪਾਦੀਸੁਪਿ ਏਸੇਵ ਨਯੋ. ਯਤ੍ਥ ਕਤ੍ਥਚਿ ਉਪ੍ਪਨ੍ਨੋ ਪਨ ਸਸਙ੍ਖਾਰੇਨ ਸਪ੍ਪਯੋਗੇਨ ਅਰਹਤ੍ਤਂ ਪਤ੍ਤੋ ਸਸਙ੍ਖਾਰਪਰਿਨਿਬ੍ਬਾਯੀ ਨਾਮ, ਅਸਙ੍ਖਾਰੇਨ ਅਪ੍ਪਯੋਗੇਨ ਪਤ੍ਤੋ ਅਸਙ੍ਖਾਰਪਰਿਨਿਬ੍ਬਾਯੀ ਨਾਮ. ਅਵਿਹਾਦੀਸੁਪਿ ਨਿਬ੍ਬਤ੍ਤੋ ਤਤ੍ਥ ਯਾਵਤਾਯੁਕਂ ਠਤ੍ਵਾ ਉਪਰੂਪਰਿ ਨਿਬ੍ਬਤ੍ਤਿਤ੍ਵਾ ਅਕਨਿਟ੍ਠਂ ਪਤ੍ਤੋ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਨਾਮ.

ਇਮਸ੍ਮਿਂ ਪਨ ਠਾਨੇ ਅਟ੍ਠਚਤ੍ਤਾਰੀਸ ਅਨਾਗਾਮਿਨੋ ਕਥੇਤਬ੍ਬਾ. ਅਵਿਹੇਸੁ ਹਿ ਤਯੋ ਅਨ੍ਤਰਾਪਰਿਨਿਬ੍ਬਾਯੀ, ਏਕੋ ਉਪਹਚ੍ਚਪਰਿਨਿਬ੍ਬਾਯੀ, ਏਕੋ ਉਦ੍ਧਂਸੋਤੋ ਅਕਨਿਟ੍ਠਗਾਮੀਤਿ ਪਞ੍ਚ ਹੋਨ੍ਤਿ. ਤੇ ਅਸਙ੍ਖਾਰਪਰਿਨਿਬ੍ਬਾਯਿਨੋ ਪਞ੍ਚ, ਸਸਙ੍ਖਾਰਪਰਿਨਿਬ੍ਬਾਯਿਨੋ ਪਞ੍ਚਾਤਿ ਦਸ ਹੋਨ੍ਤਿ, ਤਥਾ ਅਤਪ੍ਪਾਦੀਸੁ. ਅਕਨਿਟ੍ਠੇਸੁ ਪਨ ਉਦ੍ਧਂਸੋਤੋ ਨਤ੍ਥਿ, ਤਸ੍ਮਾ ਤਤ੍ਥ ਚਤ੍ਤਾਰੋ ਸਸਙ੍ਖਾਰਪਰਿਨਿਬ੍ਬਾਯੀ, ਚਤ੍ਤਾਰੋ ਅਸਙ੍ਖਾਰਪਰਿਨਿਬ੍ਬਾਯੀਤਿ ਅਟ੍ਠਾਤਿ ਏਵਂ ਅਟ੍ਠਚਤ੍ਤਾਲੀਸ ਹੋਨ੍ਤਿ. ਤੇਸਂ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਸਬ੍ਬਜੇਟ੍ਠੋ ਚੇਵ ਹੋਤਿ ਸਬ੍ਬਕਨਿਟ੍ਠੋ ਚ. ਕਥਂ? ਸੋ ਹਿ ਸੋਲ਼ਸਕਪ੍ਪਸਹਸ੍ਸਾਯੁਕਤ੍ਤਾ ਆਯੁਨਾ ਸਬ੍ਬੇਸਂ ਜੇਟ੍ਠੋ, ਸਬ੍ਬਪਚ੍ਛਾ ਅਰਹਤ੍ਤਂ ਪਾਪੁਣੀਤਿ ਸਬ੍ਬੇਸਂ ਕਨਿਟ੍ਠੋ. ਇਮਸ੍ਮਿਂ ਸੁਤ੍ਤੇ ਅਪੁਬ੍ਬਂ ਅਚਰਿਮਂ ਏਕਚਿਤ੍ਤਕ੍ਖਣਿਕਾ ਨਾਨਾਲਕ੍ਖਣਾ ਅਰਹਤ੍ਤਮਗ੍ਗਸ੍ਸ ਪੁਬ੍ਬਭਾਗਵਿਪਸ੍ਸਨਾ ਬੋਜ੍ਝਙ੍ਗਾ ਕਥਿਤਾ.

੪. ਵਤ੍ਥਸੁਤ੍ਤਵਣ੍ਣਨਾ

੧੮੫. ਚਤੁਤ੍ਥੇ ਸਤਿਸਮ੍ਬੋਜ੍ਝਙ੍ਗੋ ਇਤਿ ਚੇ ਮੇ ਹੋਤੀਤਿ ਸਤਿਸਮ੍ਬੋਜ੍ਝਙ੍ਗੋਤਿ ਏਵਂ ਚੇ ਮਯ੍ਹਂ ਹੋਤਿ. ਅਪ੍ਪਮਾਣੋਤਿ ਮੇ ਹੋਤੀਤਿ ਅਪ੍ਪਮਾਣੋਤਿ ਏਵਂ ਮੇ ਹੋਤਿ. ਸੁਸਮਾਰਦ੍ਧੋਤਿ ਸੁਪਰਿਪੁਣ੍ਣੋ. ਤਿਟ੍ਠਤੀਤਿ ਏਤ੍ਥ ਅਟ੍ਠਹਾਕਾਰੇਹਿ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ – ਉਪ੍ਪਾਦਂ ਅਨਾਵਜ੍ਜਿਤਤ੍ਤਾ ਅਨੁਪ੍ਪਾਦਂ ਆਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ, ਪਵਤ੍ਤਂ, ਅਪ੍ਪਵਤ੍ਤਂ, ਨਿਮਿਤ੍ਤਂ, ਅਨਿਮਿਤ੍ਤਂ ਸਙ੍ਖਾਰੇ ਅਨਾਵਜ੍ਜਿਤਤ੍ਤਾ, ਵਿਸਙ੍ਖਾਰਂ ਆਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤੀਤਿ. ਇਮੇਹਿ ਅਟ੍ਠਹਾਕਾਰੇਹਿ ਤਿਟ੍ਠਤੀਤਿ ਥੇਰੋ ਜਾਨਾਤਿ, ਵੁਤ੍ਤਾਕਾਰਵਿਪਰੀਤੇਹੇਵ ਅਟ੍ਠਹਾਕਾਰੇਹਿ ਚਵਨ੍ਤਂ ਚਵਤੀਤਿ ਪਜਾਨਾਤਿ. ਸੇਸਬੋਜ੍ਝਙ੍ਗੇਸੁਪਿ ਏਸੇਵ ਨਯੋ.

ਇਤਿ ਇਮਸ੍ਮਿਂ ਸੁਤ੍ਤੇ ਥੇਰਸ੍ਸ ਫਲਬੋਜ੍ਝਙ੍ਗਾ ਕਥਿਤਾ. ਯਦਾ ਹਿ ਥੇਰੋ ਸਤਿਸਮ੍ਬੋਜ੍ਝਙ੍ਗਂ ਸੀਸਂ ਕਤ੍ਵਾ ਫਲਸਮਾਪਤ੍ਤਿਂ ਸਮਾਪਜ੍ਜਤਿ, ਤਦਾ ਇਤਰੇ ਛ ਤਦਨ੍ਵਯਾ ਹੋਨ੍ਤਿ. ਯਦਾ ਧਮ੍ਮਵਿਚਯਾਦੀਸੁ ਅਞ੍ਞਤਰਂ, ਤਦਾਪਿ ਸੇਸਾ ਤਦਨ੍ਵਯਾ ਹੋਨ੍ਤੀਤਿ ਏਵਂ ਫਲਸਮਾਪਤ੍ਤਿਯਂ ਅਤ੍ਤਨੋ ਚਿਣ੍ਣਵਸਿਤਂ ਦਸ੍ਸੇਨ੍ਤੋ ਥੇਰੋ ਇਮਂ ਸੁਤ੍ਤਂ ਕਥੇਸੀਤਿ.

੫. ਭਿਕ੍ਖੁਸੁਤ੍ਤਵਣ੍ਣਨਾ

੧੮੬. ਪਞ੍ਚਮੇ ਬੋਧਾਯ ਸਂਵਤ੍ਤਨ੍ਤੀਤਿ ਬੁਜ੍ਝਨਤ੍ਥਾਯ ਸਂਵਤ੍ਤਨ੍ਤਿ. ਕਿਂ ਬੁਜ੍ਝਨਤ੍ਥਾਯ? ਮਗ੍ਗੇਨ ਅਸਙ੍ਖਤਂ ਨਿਬ੍ਬਾਨਂ, ਪਚ੍ਚਵੇਕ੍ਖਣਾਯ ਕਤਕਿਚ੍ਚਤਂ, ਮਗ੍ਗੇਨ ਵਾ ਕਿਲੇਸਨਿਦ੍ਦਾਤੋ ਪਬੁਜ੍ਝਨਤ੍ਥਾਯ, ਫਲੇਨ ਪਬੁਜ੍ਝਨਭਾਵਤ੍ਥਾਯਾਤਿਪਿ ਵੁਤ੍ਤਂ ਹੋਤਿ. ਤੇਨੇਵੇਤ੍ਥ ਨਿਬ੍ਬਾਨਸਚ੍ਛਿਕਿਰਿਯਾ ਕਿਲੇਸਪਹਾਨਪਚ੍ਚਵੇਕ੍ਖਣਾਤਿ ਸਬ੍ਬਂ ਦਸ੍ਸਿਤਂ.

੬-੭. ਕੁਣ੍ਡਲਿਯਸੁਤ੍ਤਾਦਿਵਣ੍ਣਨਾ

੧੮੭-੧੮੮. ਛਟ੍ਠੇ ਆਰਾਮਨਿਸ੍ਸਯੀਤਿ ਆਰਾਮਂ ਨਿਸ੍ਸਾਯ ਵਸਨਭਾਵੇਨ ਆਰਾਮਨਿਸ੍ਸਯੀ. ਪਰਿਸਾਵਚਰੋਤਿ ਪਰਿਸਾਯ ਅਵਚਰੋ. ਪਰਿਸਂ ਨਾਮ ਬਾਲਾਪਿ, ਪਣ੍ਡਿਤਾਪਿ ਓਸਰਨ੍ਤਿ, ਯੋ ਪਨ ਪਰਪ੍ਪਵਾਦਂ ਮਦ੍ਦਿਤ੍ਵਾ ਅਤ੍ਤਨੋ ਵਾਦਂ ਦੀਪੇਤੁਂ ਸਕ੍ਕੋਤਿ, ਅਯਂ ਪਰਿਸਾਵਚਰੋ ਨਾਮ. ਆਰਾਮੇਨ ਆਰਾਮਨ੍ਤਿ ਆਰਾਮੇਨੇਵ ਆਰਾਮਂ ਅਨੁਚਙ੍ਕਮਾਮਿ, ਨ ਬਾਹਿਰੇਨਾਤਿ ਅਤ੍ਥੋ. ਉਯ੍ਯਾਨੇਨ ਉਯ੍ਯਾਨਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਅਞ੍ਞੇਨ ਵਾ ਆਰਾਮੇਨ ਪਵਿਸਿਤ੍ਵਾ ਅਞ੍ਞਂ ਆਰਾਮਂ, ਅਞ੍ਞੇਨ ਉਯ੍ਯਾਨੇਨ ਅਞ੍ਞਂ ਉਯ੍ਯਾਨਨ੍ਤਿ ਅਯਮੇਤ੍ਥ ਅਤ੍ਥੋ. ਇਤਿਵਾਦਪ੍ਪਮੋਕ੍ਖਾਨਿਸਂਸਨ੍ਤਿ ‘‘ਏਵਂ ਪੁਚ੍ਛਾ ਹੋਤਿ, ਏਵਂ ਵਿਸ੍ਸਜ੍ਜਨਂ, ਏਵਂ ਗਹਣਂ, ਏਵਂ ਨਿਬ੍ਬੇਠਨ’’ਨ੍ਤਿ ਇਮਿਨਾ ਨਯੇਨ ਇਤਿਵਾਦੋ ਹੋਤਿ ਇਤਿਵਾਦਪ੍ਪਮੋਕ੍ਖੋਤਿ ਏਤਂ ਆਨਿਸਂਸਂ. ਉਪਾਰਮ੍ਭਾਨਿਸਂਸਨ੍ਤਿ ‘‘ਅਯਂ ਪੁਚ੍ਛਾਯ ਦੋਸੋ, ਅਯਂ ਵਿਸ੍ਸਜ੍ਜਨੇ’’ਤਿ ਏਵਂ ਵਾਦਦੋਸਾਨਿਸਂਸਂ.

ਕਥਂ ਭਾਵਿਤੋ ਚ, ਕੁਣ੍ਡਲਿਯ, ਇਨ੍ਦ੍ਰਿਯਸਂਵਰੋਤਿ ਸਤ੍ਥਾ ‘‘ਏਤ੍ਤਕਂ ਠਾਨਂ ਪਰਿਬ੍ਬਾਜਕੇਨ ਪੁਚ੍ਛਿਤਂ, ਇਦਾਨਿ ਪੁਚ੍ਛਿਤੁਂ ਨ ਸਕ੍ਕੋਤੀ’’ਤਿ ਞਤ੍ਵਾ ‘‘ਨ ਤਾਵ ਅਯਂ ਦੇਸਨਾ ਯਥਾਨੁਸਨ੍ਧਿਂ ਗਤਾ. ਇਦਾਨਿ ਨਂ ਯਥਾਨੁਸਨ੍ਧਿਂ ਪਾਪੇਸ੍ਸਾਮੀ’’ਤਿ ਸਯਮੇਵ ਪੁਚ੍ਛਨ੍ਤੋ ਇਮਂ ਦੇਸਨਂ ਆਰਭਿ. ਤਤ੍ਥ ਮਨਾਪਂ ਨਾਭਿਜ੍ਝਤੀਤਿ ਇਟ੍ਠਾਰਮ੍ਮਣਂ ਨਾਭਿਜ੍ਝਾਯਤਿ. ਨਾਭਿਹਂਸਤੀਤਿ ਨ ਸਾਮਿਸਾਯ ਤੁਟ੍ਠਿਯਾ ਅਭਿਹਂਸਤਿ. ਤਸ੍ਸ ਠਿਤੋ ਚ ਕਾਯੋ ਹੋਤਿ, ਠਿਤਂ ਚਿਤ੍ਤਂ ਅਜ੍ਝਤ੍ਤਨ੍ਤਿ ਤਸ੍ਸ ਨਾਮਕਾਯੋ ਚ ਚਿਤ੍ਤਞ੍ਚ ਗੋਚਰਜ੍ਝਤ੍ਤੇ ਠਿਤਂ ਹੋਤਿ. ਸੁਸਣ੍ਠਿਤਨ੍ਤਿ ਕਮ੍ਮਟ੍ਠਾਨਵਸੇਨ ਸੁਟ੍ਠੁ ਸਣ੍ਠਿਤਂ. ਸੁਵਿਮੁਤ੍ਤਨ੍ਤਿ ਕਮ੍ਮਟ੍ਠਾਨਵਿਮੁਤ੍ਤਿਯਾ ਸੁਵਿਮੁਤ੍ਤਂ. ਅਮਨਾਪਨ੍ਤਿ ਅਨਿਟ੍ਠਾਰਮ੍ਮਣਂ. ਨ ਮਙ੍ਕੁ ਹੋਤੀਤਿ ਤਸ੍ਮਿਂ ਨ ਮਙ੍ਕੁ ਹੋਤਿ. ਅਪ੍ਪਤਿਟ੍ਠਿਤਚਿਤ੍ਤੋਤਿ ਕਿਲੇਸਵਸੇਨ ਅਟ੍ਠਿਤਚਿਤ੍ਤੋ. ਅਦੀਨਮਾਨਸੋਤਿ ਦੋਮਨਸ੍ਸਵਸੇਨ ਅਦੀਨਚਿਤ੍ਤੋ. ਅਬ੍ਯਾਪਨ੍ਨਚੇਤਸੋਤਿ ਦੋਸਵਸੇਨ ਅਪੂਤਿਚਿਤ੍ਤੋ.

ਏਵਂ ਭਾਵਿਤੋ ਖੋ, ਕੁਣ੍ਡਲਿਯ, ਇਨ੍ਦ੍ਰਿਯਸਂਵਰੋ ਏਵਂ ਬਹੁਲੀਕਤੋ ਤੀਣਿ ਸੁਚਰਿਤਾਨਿ ਪਰਿਪੂਰੇਤੀਤਿ ਏਤ੍ਥ ਏਵਂ ਸੁਚਰਿਤਪੂਰਣਂ ਵੇਦਿਤਬ੍ਬਂ – ਇਮੇਸੁ ਤਾਵ ਛਸੁ ਦ੍ਵਾਰੇਸੁ ਅਟ੍ਠਾਰਸ ਦੁਚ੍ਚਰਿਤਾਨਿ ਹੋਨ੍ਤਿ. ਕਥਂ? ਚਕ੍ਖੁਦ੍ਵਾਰੇ ਤਾਵ ਇਟ੍ਠਾਰਮ੍ਮਣੇ ਆਪਾਥਗਤੇ ਕਾਯਙ੍ਗਵਾਚਙ੍ਗਾਨਿ ਅਚੋਪੇਤ੍ਵਾ ਤਸ੍ਮਿਂ ਆਰਮ੍ਮਣੇ ਲੋਭਂ ਉਪ੍ਪਾਦੇਨ੍ਤਸ੍ਸ ਮਨੋਦੁਚ੍ਚਰਿਤਂ ਹੋਤਿ. ਲੋਭਸਹਗਤੇਨ ਚਿਤ੍ਤੇਨ ‘‘ਅਹੋ ਵਤਿਦਂ ਇਟ੍ਠਂ ਕਨ੍ਤਂ ਮਨਾਪ’’ਨ੍ਤਿ ਭਣਨ੍ਤਸ੍ਸ ਵਚੀਦੁਚ੍ਚਰਿਤਂ, ਤਦੇਵ ਹਤ੍ਥੇਨ ਪਰਾਮਸਨ੍ਤਸ੍ਸ ਕਾਯਦੁਚ੍ਚਰਿਤਂ. ਸੇਸਦ੍ਵਾਰੇਸੁਪਿ ਏਸੇਵ ਨਯੋ.

ਅਯਂ ਪਨ ਵਿਸੇਸੋ – ਸੋਤਦ੍ਵਾਰਸ੍ਮਿਞ੍ਹਿ ਸਦ੍ਦਾਰਮ੍ਮਣਸ੍ਸ ਵਤ੍ਥੁਭੂਤਂ ਸਙ੍ਖਪਣਵਾਦਿਤੂਰਿਯਭਣ੍ਡਂ ਅਨਾਮਾਸਂ ਆਮਸਨ੍ਤਸ੍ਸ, ਘਾਨਦ੍ਵਾਰੇ ਗਨ੍ਧਾਰਮ੍ਮਣਸ੍ਸ ਵਤ੍ਥੁਭੂਤਂ ਗਨ੍ਧਮਾਲਾਦਿਂ, ਜਿਵ੍ਹਾਦ੍ਵਾਰੇ ਰਸਾਰਮ੍ਮਣਸ੍ਸ ਵਤ੍ਥੁਭੂਤਂ ਮਚ੍ਛਮਂਸਾਦਿਂ, ਕਾਯਦ੍ਵਾਰੇ ਫੋਟ੍ਠਬ੍ਬਾਰਮ੍ਮਣਸ੍ਸ ਵਤ੍ਥੁਭੂਤਂ ਵਤ੍ਥਤੂਲਕਪਾਵਾਰਾਦਿਂ, ਮਨੋਦ੍ਵਾਰੇ ਪਞ੍ਞਤ੍ਤਿਵਸੇਨ ਧਮ੍ਮਾਰਮ੍ਮਣਭੂਤਂ ਸਪ੍ਪਿਤੇਲਮਧੁਫਾਣਿਤਾਦਿਂ ਆਮਸਨ੍ਤਸ੍ਸ ਕਾਯਦੁਚ੍ਚਰਿਤਂ ਵੇਦਿਤਬ੍ਬਂ. ਸਙ੍ਖੇਪਤੋ ਪਨੇਤ੍ਥ ਛਸੁ ਦ੍ਵਾਰੇਸੁ ਕਾਯਵੀਤਿਕ੍ਕਮੋ ਕਾਯਦੁਚ੍ਚਰਿਤਂ, ਵਚੀਵੀਤਿਕ੍ਕਮੋ ਵਚੀਦੁਚ੍ਚਰਿਤਂ, ਮਨੋਵੀਤਿਕ੍ਕਮੋ ਮਨੋਦੁਚ੍ਚਰਿਤਨ੍ਤਿ ਤੀਣੇਵ ਦੁਚ੍ਚਰਿਤਾਨਿ ਹੋਨ੍ਤਿ.

ਅਯਂ ਪਨ ਭਿਕ੍ਖੁ ਅਤ੍ਤਨੋ ਭਾਵਨਾਪਟਿਸਙ੍ਖਾਨੇ ਠਿਤੋ ਇਮਾਨਿ ਦੁਚ੍ਚਰਿਤਾਨਿ ਸੁਚਰਿਤਂ ਕਤ੍ਵਾ ਵਿਪਰਿਣਾਮੇਤਿ. ਕਥਂ? ਚਕ੍ਖੁਦ੍ਵਾਰੇ ਤਾਵ ਇਟ੍ਠਾਰਮ੍ਮਣੇ ਆਪਾਥਗਤੇ ਕਾਯਙ੍ਗਵਾਚਙ੍ਗਾਨਿ ਅਚਾਲੇਤ੍ਵਾ ਰੂਪਾਰਮ੍ਮਣਂ ਵਿਪਸ੍ਸਨਂ ਪਟ੍ਠਾਪਯਤੋ ਮਨੋਸੁਚਰਿਤਂ ਹੋਤਿ, ਵਿਪਸ੍ਸਨਾਸਹਗਤੇਨ ਚਿਤ੍ਤੇਨ ਖਯਧਮ੍ਮਂ ਵਯਧਮ੍ਮਨ੍ਤਿ ਭਣਨ੍ਤਸ੍ਸ ਵਚੀਸੁਚਰਿਤਂ, ‘‘ਅਨਾਮਾਸਭਣ੍ਡਂ ਏਤ’’ਨ੍ਤਿ ਅਨਾਮਸਨ੍ਤਸ੍ਸ ਕਾਯਸੁਚਰਿਤਂ. ਸੇਸਦ੍ਵਾਰੇਸੁਪਿ ਏਸੇਵ ਨਯੋ. ਏਵਂ ਇਮਾਨਿ ਵਿਤ੍ਥਾਰਤੋ ਅਟ੍ਠਾਰਸ ਸੁਚਰਿਤਾਨਿ ਹੋਨ੍ਤਿ. ਸਙ੍ਖੇਪਤੋ ਪਨੇਤ੍ਥਾਪਿ ਛਸੁ ਦ੍ਵਾਰੇਸੁ ਕਾਯਸਂਵਰੋ ਕਾਯਸੁਚਰਿਤਂ, ਵਚੀਸਂਵਰੋ ਵਚੀਸੁਚਰਿਤਂ, ਮਨੋਸਂਵਰੋ ਮਨੋਸੁਚਰਿਤਨ੍ਤਿ ਤੀਣੇਵ ਸੁਚਰਿਤਾਨਿ ਹੋਨ੍ਤਿ. ਏਵਂ ਇਨ੍ਦ੍ਰਿਯਸਂਵਰੋ ਤੀਣਿ ਸੁਚਰਿਤਾਨਿ ਪਰਿਪੂਰੇਤੀਤਿ ਵੇਦਿਤਬ੍ਬੋ. ਏਤ੍ਤਾਵਤਾ ਸੀਲਾਨੁਰਕ੍ਖਿਤਂ ਇਨ੍ਦ੍ਰਿਯਸਂਵਰਸੀਲਂ ਕਥਿਤਂ.

ਕਾਯਦੁਚ੍ਚਰਿਤਂ ਪਹਾਯਾਤਿਆਦੀਸੁ ਤਿਵਿਧਂ ਕਾਯਦੁਚ੍ਚਰਿਤਂ, ਚਤੁਬ੍ਬਿਧਂ ਵਚੀਦੁਚ੍ਚਰਿਤਂ, ਤਿਵਿਧਂ ਮਨੋਦੁਚ੍ਚਰਿਤਂ. ਤਸ੍ਸ ਪਟਿਪਕ੍ਖਵਸੇਨ ਕਾਯਸੁਚਰਿਤਾਦੀਨਿ ਵੇਦਿਤਬ੍ਬਾਨਿ. ਏਤ੍ਤਾਵਤਾ ਕਾਯਸਂਵਰਵਚੀਸਂਵਰੇਹਿ ਪਾਤਿਮੋਕ੍ਖਸੀਲਂ, ਮਨੋਸਂਵਰੇਨ ਤੀਣਿ ਸੀਲਾਨੀਤਿ ਚਤੁਪਾਰਿਸੁਦ੍ਧਿਸੀਲਂ ਕਥਿਤਂ ਹੋਤਿ. ਸਕਲੇ ਪਨ ਇਮਸ੍ਮਿਂ ਸੁਤ੍ਤੇ ਸੁਚਰਿਤਮੂਲਕਾ ਸਤਿਪਟ੍ਠਾਨਾ ਲੋਕੁਤ੍ਤਰਮਿਸ੍ਸਕਾ, ਸਤ੍ਤਨ੍ਨਂ ਬੋਜ੍ਝਙ੍ਗਾਨਂ ਮੂਲਭੂਤਾ ਸਤਿਪਟ੍ਠਾਨਾ ਪੁਬ੍ਬਭਾਗਾ, ਤੇਪਿ ਸਤਿਪਟ੍ਠਾਨਮੂਲਕਾ ਬੋਜ੍ਝਙ੍ਗਾ ਪੁਬ੍ਬਭਾਗਾਵ. ਵਿਜ੍ਜਾਵਿਮੁਤ੍ਤਿਮੂਲਕਾ ਪਨ ਲੋਕੁਤ੍ਤਰਾਵ ਕਥਿਤਾਤਿ ਵੇਦਿਤਬ੍ਬਾ. ਸਤ੍ਤਮਂ ਉਤ੍ਤਾਨਮੇਵ.

੮. ਉਪਵਾਨਸੁਤ੍ਤਵਣ੍ਣਨਾ

੧੮੯. ਅਟ੍ਠਮੇ ਪਚ੍ਚਤ੍ਤਨ੍ਤਿ ਅਤ੍ਤਨਾਵ. ਯੋਨਿਸੋਮਨਸਿਕਾਰਾਤਿ ਯੋਨਿਸੋ ਮਨਸਿਕਾਰੇਨ. ਆਰਬ੍ਭਮਾਨੋਵਾਤਿ ਕੁਰੁਮਾਨੋਯੇਵ. ਸੁਵਿਮੁਤ੍ਤਨ੍ਤਿ ਕਮ੍ਮਟ੍ਠਾਨਵਿਮੁਤ੍ਤਿਯਾ ਸੁਟ੍ਠੁ ਵਿਮੁਤ੍ਤਂ. ਅਟ੍ਠਿਂਕਤ੍ਵਾਤਿ ਅਤ੍ਥਂ ਕਰਿਤ੍ਵਾ, ਅਤ੍ਥਿਕੋ ਹੁਤ੍ਵਾਤਿ ਵੁਤ੍ਤਂ ਹੋਤਿ.

੯. ਪਠਮਉਪ੍ਪਨ੍ਨਸੁਤ੍ਤਵਣ੍ਣਨਾ

੧੯੦. ਨਵਮੇ ਨਾਞ੍ਞਤ੍ਰ ਤਥਾਗਤਸ੍ਸ ਪਾਤੁਭਾਵਾਤਿ ਤਥਾਗਤਸ੍ਸ ਪਾਤੁਭਾਵਂ ਵਿਨਾ ਨ ਅਞ੍ਞਸ੍ਮਿਂ ਕਾਲੇ ਉਪ੍ਪਜ੍ਜਨ੍ਤੀਤਿ ਅਤ੍ਥੋ.

੧੦. ਦੁਤਿਯਉਪ੍ਪਨ੍ਨਸੁਤ੍ਤਵਣ੍ਣਨਾ

੧੯੧. ਦਸਮੇ ਨਾਞ੍ਞਤ੍ਰ ਸੁਗਤਵਿਨਯਾਤਿ ਸੁਗਤੋਵਾਦਂ ਵਿਨਾ ਨ ਉਪ੍ਪਜ੍ਜਨ੍ਤੀਤਿ.

ਪਬ੍ਬਤਵਗ੍ਗੋ.

੨. ਗਿਲਾਨਵਗ੍ਗੋ

੧-੩. ਪਾਣਸੁਤ੍ਤਾਦਿਵਣ੍ਣਨਾ

੧੯੨-੧੯੪. ਦੁਤਿਯਵਗ੍ਗਸ੍ਸ ਪਠਮੇ ਚਤ੍ਤਾਰੋ ਇਰਿਯਾਪਥੇ ਕਪ੍ਪੇਨ੍ਤੀਤਿ ਯੇਸਂ ਚਤ੍ਤਾਰੋ ਇਰਿਯਾਪਥਾ ਅਤ੍ਥਿ, ਤੇਸਂਯੇਵ ਵਸੇਨੇਤਂ ਵੁਤ੍ਤਂ. ਸੀਲਂ ਨਿਸ੍ਸਾਯਾਤਿ ਚਤੁਪਾਰਿਸੁਦ੍ਧਿਸੀਲਂ ਨਿਸ੍ਸਯਂ ਕਤ੍ਵਾ. ਸਤ੍ਤ ਬੋਜ੍ਝਙ੍ਗੇਤਿ ਸਹਵਿਪਸ੍ਸਨਕੇ ਮਗ੍ਗਬੋਜ੍ਝਙ੍ਗੇ. ਦੁਤਿਯਤਤਿਯਾਨਿ ਉਤ੍ਤਾਨਤ੍ਥਾਨੇਵ.

੪-੧੦. ਪਠਮਗਿਲਾਨਸੁਤ੍ਤਾਦਿਵਣ੍ਣਨਾ

੧੯੫-੨੦੧. ਚਤੁਤ੍ਥੇ ਤਥਾ ਪਹੀਨੋ ਚਾਯਸ੍ਮਤੋ ਮਹਾਕਸ੍ਸਪਸ੍ਸ ਸੋ ਆਬਾਧੋ ਅਹੋਸੀਤਿ ਥੇਰਸ੍ਸ ਕਿਰ ਇਮਂ ਬੋਜ੍ਝਙ੍ਗਭਾਵਨਂ ਸਾਧੁਕਂ ਸੁਣਨ੍ਤਸ੍ਸ ਏਤਦਹੋਸਿ ‘‘ਮਯ੍ਹਂ ਪਬ੍ਬਜਿਤਦਿਵਸਤੋ ਸਤ੍ਤਮੇ ਦਿਵਸੇ ਸਚ੍ਚਾਨਿ ਪਟਿਵਿਜ੍ਝਨ੍ਤਸ੍ਸ ਇਮੇ ਬੋਜ੍ਝਙ੍ਗਾ ਪਾਤੁਭੂਤਾ’’ਤਿ. ਅਥਸ੍ਸ ‘‘ਨਿਯ੍ਯਾਨਿਕਂ ਵਤ ਸਤ੍ਥੁਸਾਸਨ’’ਨ੍ਤਿ ਚਿਨ੍ਤਯਤੋ ਲੋਹਿਤਂ ਪਸੀਦਿ, ਉਪਾਦਾਰੂਪਂ ਵਿਸੁਦ੍ਧਂ ਅਹੋਸਿ, ਪੋਕ੍ਖਰਪਤ੍ਤੇ ਪਤਿਤਉਦਕਬਿਨ੍ਦੁ ਵਿਯ ਸਰੀਰਤੋ ਰੋਗੋ ਵਿਨਿਵਤ੍ਤਿਤ੍ਵਾ ਗਤੋ. ਤੇਨ ਵੁਤ੍ਤਂ ‘‘ਤਥਾ ਪਹੀਨੋ ਚਾਯਸ੍ਮਤੋ ਮਹਾਕਸ੍ਸਪਸ੍ਸ ਸੋ ਆਬਾਧੋ ਅਹੋਸੀ’’ਤਿ. ਪਞ੍ਚਮਛਟ੍ਠੇਸੁਪਿ ਏਸੇਵ ਨਯੋ. ਇਮੇਸਂ ਪਨ ਤਿਣ੍ਣਮ੍ਪਿ ਜਨਾਨਂ ਪਬ੍ਬਤਪਾਦੇ ਪੁਪ੍ਫਿਤਵਿਸਰੁਕ੍ਖਵਾਤਸਮ੍ਫਸ੍ਸੇਨ ਉਪ੍ਪਨ੍ਨੋ ਮਨ੍ਦਸੀਤਜਰੋ ਆਬਾਧੋਤਿ ਵੇਦਿਤਬ੍ਬੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਗਿਲਾਨਵਗ੍ਗੋ.

੩. ਉਦਾਯਿਵਗ੍ਗੋ

੧-੨. ਬੋਧਾਯਸੁਤ੍ਤਾਦਿਵਣ੍ਣਨਾ

੨੦੨-੨੦੩. ਤਤਿਯਵਗ੍ਗਸ੍ਸ ਪਠਮੇ ਕਿਤ੍ਤਾਵਤਾ ਨੁ ਖੋ, ਭਨ੍ਤੇ, ਬੋਜ੍ਝਙ੍ਗਾਤਿ ਵੁਚ੍ਚਨ੍ਤੀਤਿ ਭਨ੍ਤੇ, ਕਿਤ੍ਤਕੇਨ ਨੁ ਖੋ ਬੁਜ੍ਝਨਕਅਙ੍ਗਾ ਨਾਮ ਵੁਚ੍ਚਨ੍ਤੀਤਿ ਪੁਚ੍ਛਤਿ. ਬੋਧਾਯ ਸਂਵਤ੍ਤਨ੍ਤੀਤਿ ਬੁਜ੍ਝਨਤ੍ਥਾਯ ਸਂਵਤ੍ਤਨ੍ਤਿ. ਇਮਸ੍ਮਿਂ ਸੁਤ੍ਤੇ ਮਿਸ੍ਸਕਬੋਜ੍ਝਙ੍ਗਾ ਕਥਿਤਾ. ਦੁਤਿਯੇ ਧਮ੍ਮਪਰਿਚ੍ਛੇਦੋ ਕਥਿਤੋ.

੩-੫. ਠਾਨਿਯਸੁਤ੍ਤਾਦਿਵਣ੍ਣਨਾ

੨੦੪-੨੦੬. ਤਤਿਯੇ ਕਾਮਰਾਗਟ੍ਠਾਨਿਯਾਨਨ੍ਤਿ ਕਾਮਰਾਗਸ੍ਸ ਕਾਰਣਭੂਤਾਨਂ ਆਰਮ੍ਮਣਧਮ੍ਮਾਨਂ. ਬ੍ਯਾਪਾਦਟ੍ਠਾਨਿਯਾਦੀਸੁਪਿ ਏਸੇਵ ਨਯੋ. ਸਕਲਞ੍ਹਿ ਇਦਂ ਸੁਤ੍ਤਂ ਆਰਮ੍ਮਣੇਨੇਵ ਕਥਿਤਂ. ਪਠਮਵਗ੍ਗਸ੍ਸ ਦੁਤਿਯਸੁਤ੍ਤੇ ਵੁਤ੍ਤਪਰਿਚ੍ਛੇਦੋਪੇਤ੍ਥ ਲਬ੍ਭਤੇਵ. ਚਤੁਤ੍ਥੇ ਮਿਸ੍ਸਕਬੋਜ੍ਝਙ੍ਗਾ ਕਥਿਤਾ. ਪਞ੍ਚਮੇ ਅਪਰਿਹਾਨਿਯੇ ਧਮ੍ਮੇਤਿ ਅਪਰਿਹਾਨਿਕਰੇ ਸਭਾਵਧਮ੍ਮੇ.

੬-੭. ਤਣ੍ਹਕ੍ਖਯਸੁਤ੍ਤਾਦਿਵਣ੍ਣਨਾ

੨੦੭-੨੦੮. ਛਟ੍ਠੇ ਏਤਦਵੋਚਾਤਿ ‘‘ਇਮਿਸ੍ਸਂ ਪਰਿਸਤਿ ਨਿਸਿਨ੍ਨੋ ਉਦਾਯਿਤ੍ਥੇਰੋ ਨਾਮ ਅਨੁਸਨ੍ਧਿਕੁਸਲੋ ਭਿਕ੍ਖੁ ਅਤ੍ਥਿ, ਸੋ ਮਂ ਪੁਚ੍ਛਿਸ੍ਸਤੀਤਿ ਭਗਵਤਾ ਓਸਾਪਿਤਦੇਸਨਂ ਞਤ੍ਵਾ ਦੇਸਨਾਨੁਸਨ੍ਧਿਂ ਘਟੇਸ੍ਸਾਮੀ’’ਤਿ ਪੁਚ੍ਛਨ੍ਤੋ ਏਤਂ ਅਵੋਚ. ਵਿਪੁਲਨ੍ਤਿਆਦਿ ਸਬ੍ਬਂ ਸੁਭਾਵਿਤਤ੍ਤਂ ਸਨ੍ਧਾਯ ਵੁਤ੍ਤਂ. ਸੁਭਾਵਿਤੋ ਹਿ ਸਤਿਸਮ੍ਬੋਜ੍ਝਙ੍ਗੋ ਵਿਪੁਲੋ ਚ ਮਹਗ੍ਗਤੋ ਚ ਅਪ੍ਪਮਾਣੋ ਚ ਅਬ੍ਯਾਪਜ੍ਜੋ ਚ ਨਾਮ ਹੋਤਿ. ਸੋ ਹਿ ਪਤ੍ਥਟਤ੍ਤਾ ਵਿਪੁਲੋ, ਮਹਨ੍ਤਭਾਵਂ ਗਤਤ੍ਤਾ ਮਹਗ੍ਗਤੋ, ਵਡ੍ਢਿਪਮਾਣਤ੍ਤਾ ਅਪ੍ਪਮਾਣੋ, ਨੀਵਰਣਾਨਂ ਦੂਰੀਭਾਵੇਨ ਬ੍ਯਾਪਾਦਰਹਿਤਤ੍ਤਾ ਅਬ੍ਯਾਪਜ੍ਝੋ ਨਾਮ ਹੋਤਿ. ਤਣ੍ਹਾਯ ਪਹਾਨਾ ਕਮ੍ਮਂ ਪਹੀਯਤੀਤਿ ਯਂ ਤਣ੍ਹਾਮੂਲਕਂ ਕਮ੍ਮਂ ਉਪ੍ਪਜ੍ਜੇਯ੍ਯ, ਤਂ ਤਣ੍ਹਾਪਹਾਨੇਨ ਪਹੀਯਤਿ. ਕਮ੍ਮਸ੍ਸ ਪਹਾਨਾ ਦੁਕ੍ਖਨ੍ਤਿ ਯਮ੍ਪਿ ਕਮ੍ਮਮੂਲਕਂ ਵਟ੍ਟਦੁਕ੍ਖਂ ਉਪ੍ਪਜ੍ਜੇਯ੍ਯ, ਤਂ ਕਮ੍ਮਪਹਾਨੇਨ ਪਹੀਯਤਿ. ਤਣ੍ਹਕ੍ਖਯਾਦਯੋ ਤਣ੍ਹਾਦੀਨਂਯੇਵ ਖਯਾ, ਅਤ੍ਥਤੋ ਪਨੇਤੇਹਿ ਨਿਬ੍ਬਾਨਂ ਕਥਿਤਨ੍ਤਿ ਵੇਦਿਤਬ੍ਬਂ. ਸਤ੍ਤਮਂ ਉਤ੍ਤਾਨਮੇਵ.

੮. ਨਿਬ੍ਬੇਧਭਾਗਿਯਸੁਤ੍ਤਵਣ੍ਣਨਾ

੨੦੯. ਅਟ੍ਠਮੇ ਨਿਬ੍ਬੇਧਭਾਗਿਯਨ੍ਤਿ ਨਿਬ੍ਬਿਜ੍ਝਨਕੋਟ੍ਠਾਸਿਯਂ. ਸਤਿਸਮ੍ਬੋਜ੍ਝਙ੍ਗਂ ਭਾਵਿਤੇਨਾਤਿ ਸਤਿਸਮ੍ਬੋਜ੍ਝਙ੍ਗੇਨ ਭਾਵਿਤੇਨ, ਸਤਿਸਮ੍ਬੋਜ੍ਝਙ੍ਗਂ ਵਾ ਭਾਵੇਤ੍ਵਾ ਠਿਤੇਨ, ਏਵਮੇਤ੍ਥ ਮਗ੍ਗਬੋਜ੍ਝਙ੍ਗਾ ਮਿਸ੍ਸਕਾ. ਤੇਹਿ ਭਾਵਿਤਂ, ਤੇ ਵਾ ਭਾਵੇਤ੍ਵਾ ਠਿਤਂ ਚਿਤ੍ਤਂ ਨਿਬ੍ਬਤ੍ਤਿਤਲੋਕੁਤ੍ਤਰਮੇਵ. ਤਮ੍ਪਿ ਪਨ ਮਗ੍ਗਨਿਸ੍ਸਿਤਂ ਕਤ੍ਵਾ ਮਿਸ੍ਸਕਮੇਵ ਕਥੇਤੁਂ ਵਟ੍ਟਤਿ.

੯. ਏਕਧਮ੍ਮਸੁਤ੍ਤਵਣ੍ਣਨਾ

੨੧੦. ਨਵਮੇ ਸਂਯੋਜਨਵਿਨਿਬਨ੍ਧਾਤਿ ਸਂਯੋਜਨਸਙ੍ਖਾਤਾ ਵਿਨਿਬਨ੍ਧਾ. ਅਜ੍ਝੋਸਾਨਾਤਿ ਪਰਿਨਿਟ੍ਠਪੇਤ੍ਵਾ ਗਹਣਾ.

੧੦. ਉਦਾਯਿਸੁਤ੍ਤਵਣ੍ਣਨਾ

੨੧੧. ਦਸਮੇ ਅਬਹੁਕਤੋਤਿ ਅਕਤਬਹੁਮਾਨੋ. ਉਕ੍ਕੁਜ੍ਜਾਵਕੁਜ੍ਜਨ੍ਤਿ ਏਤ੍ਥ ਉਕ੍ਕੁਜ੍ਜਂ ਵੁਚ੍ਚਤਿ ਉਦਯੋ, ਅਵਕੁਜ੍ਜਂ ਵਯੋਤਿ ਉਦਯਬ੍ਬਯਵਸੇਨ ਪਰਿਵਤ੍ਤੇਨ੍ਤੋ ਸਮ੍ਮਸਨ੍ਤੋਤਿ ਦੀਪੇਤਿ. ਧਮ੍ਮੋ ਚ ਮੇ, ਭਨ੍ਤੇ, ਅਭਿਸਮਿਤੋਤਿ ਵਿਪਸ੍ਸਨਾਧਮ੍ਮੋ ਅਭਿਸਮਾਗਤੋ. ਮਗ੍ਗੋਤਿ ਵਿਪਸ੍ਸਨਾਮਗ੍ਗੋਵ. ਸਚੇ ਹਿ ਥੇਰੋ ਤਸ੍ਮਿਂ ਸਮਯੇ ਸੋਤਾਪਨ੍ਨੋ, ਉਪਰਿ ਤਿਣ੍ਣਂ ਮਗ੍ਗਾਨਂ ਅਤ੍ਥਾਯ, ਸਚੇ ਅਨਾਗਾਮੀ, ਅਰਹਤ੍ਤਮਗ੍ਗਸ੍ਸ ਅਤ੍ਥਾਯ ਅਯਂ ਵਿਪਸ੍ਸਨਾ ਵੇਦਿਤਬ੍ਬਾ. ਤਥਾ ਤਥਾ ਵਿਹਰਨ੍ਤਨ੍ਤਿ ਤੇਨ ਤੇਨਾਕਾਰੇਨ ਵਿਹਰਨ੍ਤਂ. ਤਥਤ੍ਤਾਯਾਤਿ ਤਥਾਭਾਵਾਯ. ਖੀਣਾ ਜਾਤੀਤਿਆਦੀਹਿ ਤਥਤ੍ਤਾਯਾਤਿ ਅਧਿਪ੍ਪੇਤਂ ਤਥਾਭਾਵਂ ਦਸ੍ਸੇਤਿ. ਪਚ੍ਚਵੇਕ੍ਖਣਤ੍ਥਾਯ ਉਪਨੀਯਤੀਤਿ ਹਿ ਏਤ੍ਥ ਅਧਿਪ੍ਪਾਯੋ, ਤਂ ਦਸ੍ਸੇਨ੍ਤੋ ਏਵਮਾਹ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਉਦਾਯਿਵਗ੍ਗੋ.

੪. ਨੀਵਰਣਵਗ੍ਗੋ

੩-੪. ਉਪਕ੍ਕਿਲੇਸਸੁਤ੍ਤਾਦਿਵਣ੍ਣਨਾ

੨੧੪-੨੧੫. ਚਤੁਤ੍ਥਵਗ੍ਗਸ੍ਸ ਤਤਿਯੇ ਨ ਚ ਪਭਸ੍ਸਰਨ੍ਤਿ ਨ ਚ ਪਭਾਵਨ੍ਤਂ. ਪਭਙ੍ਗੁ ਚਾਤਿ ਪਭਿਜ੍ਜਨਸਭਾਵਂ. ਅਯੋਤਿ ਕਾਲ਼ਲੋਹਂ. ਠਪੇਤ੍ਵਾ ਇਧ ਵੁਤ੍ਤਾਨਿ ਚਤ੍ਤਾਰਿ ਅਵਸੇਸਂ ਲੋਹਂ ਨਾਮ. ਸਜ੍ਝੂਤਿ ਰਜਤਂ. ਚਿਤ੍ਤਸ੍ਸਾਤਿ ਚਤੁਭੂਮਕਚਿਤ੍ਤਸ੍ਸ. ਲੋਕਿਯਸ੍ਸ ਤਾਵ ਉਪਕ੍ਕਿਲੇਸੋ ਹੋਤੁ, ਲੋਕੁਤ੍ਤਰਸ੍ਸ ਕਥਂ ਹੋਤੀਤਿ? ਉਪ੍ਪਜ੍ਜਿਤੁਂ ਅਪ੍ਪਦਾਨੇਨ. ਯਦਗ੍ਗੇਨ ਹਿ ਉਪ੍ਪਜ੍ਜਿਤੁਂ ਨ ਦੇਨ੍ਤਿ, ਤਦਗ੍ਗੇਨੇਵ ਤੇ ਲੋਕਿਯਸ੍ਸਾਪਿ ਲੋਕੁਤ੍ਤਰਸ੍ਸਾਪਿ ਉਪਕ੍ਕਿਲੇਸਾ ਨਾਮ ਹੋਨ੍ਤਿ. ਪਭਙ੍ਗੁ ਚਾਤਿ ਆਰਮ੍ਮਣੇ ਚੁਣ੍ਣਵਿਚੁਣ੍ਣਭਾਵੂਪਗਮਨੇਨ ਭਿਜ੍ਜਨਸਭਾਵਂ. ਅਨਾਵਰਣਾ ਅਨੀਵਰਣਾਤਿ ਕੁਸਲਧਮ੍ਮੇ ਨ ਆਵਰਨ੍ਤੀਤਿ ਅਨਾਵਰਣਾ, ਨ ਨੀਵਰਨ੍ਤਿ ਨ ਪਟਿਚ੍ਛਾਦੇਨ੍ਤੀਤਿ ਅਨੀਵਰਣਾ. ਚੇਤਸੋ ਅਨੁਪਕ੍ਕਿਲੇਸਾਤਿ ਚਤੁਭੂਮਕਚਿਤ੍ਤਸ੍ਸ ਅਨੁਪਕ੍ਕਿਲੇਸਾ.

੮. ਆਵਰਣਨੀਵਰਣਸੁਤ੍ਤਵਣ੍ਣਨਾ

੨੧੯. ਅਟ੍ਠਮੇ ਪਞ੍ਞਾਯ ਦੁਬ੍ਬਲੀਕਰਣਾਤਿ ਪਞ੍ਞਾਯ ਮਨ੍ਦਭਾਵਕਰਾ. ਨੀਵਰਣਾਨਞ੍ਹਿ ਅਭਿਣ੍ਹੁਪ੍ਪਾਦੇ ਸਤਿ ਅਨ੍ਤਰਨ੍ਤਰਾ ਉਪ੍ਪਜ੍ਜਮਾਨਾ ਪਞ੍ਞਾ ਦੁਬ੍ਬਲਾ ਹੋਤਿ ਮਨ੍ਦਾ ਅਵਿਸਦਾ.

ਪਞ੍ਚ ਨੀਵਰਣਾ ਤਸ੍ਮਿਂ ਸਮਯੇ ਨ ਹੋਨ੍ਤਿ. ਸਤ੍ਤਬੋਜ੍ਝਙ੍ਗਾ ਤਸ੍ਮਿਂ ਸਮਯੇ ਭਾਵਨਾਪਾਰਿਪੂਰਿਂ ਗਚ੍ਛਨ੍ਤੀਤਿ ਅਰਿਯਸਾਵਕਸ੍ਸ ਹਿ ਸਪ੍ਪਾਯਧਮ੍ਮਸ੍ਸਵਨਂ ਸੁਣਨ੍ਤਸ੍ਸ ਪਞ੍ਚ ਨੀਵਰਣਾ ਦੂਰੇ ਹੋਨ੍ਤਿ. ਸੋ ਸਚੇ ਤਸ੍ਮਿਂਯੇਵ ਠਾਨੇ ਵਿਸੇਸਂ ਨਿਬ੍ਬਤ੍ਤੇਤੁਂ ਸਕ੍ਕੋਤਿ, ਏਵਮਸ੍ਸ ਸਤ੍ਤ ਬੋਜ੍ਝਙ੍ਗਾ ਭਾਵਨਾਪਾਰਿਪੂਰਿਂ ਗਚ੍ਛਨ੍ਤਿ. ਨੋ ਚੇ ਸਕ੍ਕੋਤਿ, ਤਤੋ ਵੁਟ੍ਠਾਯ ਰਤ੍ਤਿਟ੍ਠਾਨਦਿਵਾਟ੍ਠਾਨਂ ਗਤੋ ਤਮੇਵ ਪੀਤਿਂ ਅਵਿਜਹਨ੍ਤੋ ਪਞ੍ਚ ਨੀਵਰਣੇ ਵਿਕ੍ਖਮ੍ਭੇਤ੍ਵਾ ਵਿਸੇਸਂ ਨਿਬ੍ਬਤ੍ਤੇਸ੍ਸਤਿ. ਤਤ੍ਥ ਅਸਕ੍ਕੋਨ੍ਤੋਪਿ ਯਾਵ ਸਤ੍ਤਦਿਵਸਬ੍ਭਨ੍ਤਰਾ ਤਮੇਵ ਪੀਤਿਂ ਅਵਿਜਹਨ੍ਤੋ ਨੀਵਰਣੇ ਵਿਕ੍ਖਮ੍ਭੇਤ੍ਵਾ ਵਿਸੇਸਂ ਨਿਬ੍ਬਤ੍ਤੇਸ੍ਸਤੀਤਿ ਇਦਂ ਸਨ੍ਧਾਯੇਤਂ ਵੁਤ੍ਤਂ. ਧਮ੍ਮਸ੍ਸਵਨਵਸੇਨ ਸਕਿਂ ਪੀਤਿਪਾਮੋਜ੍ਜਪਕ੍ਖਿਯਾ ਪਟਿਲਦ੍ਧਬੋਜ੍ਝਙ੍ਗਾ ਹਿ ਕਮ੍ਮਾਰਾਮਤਾਦੀਨਿ ਆਗਮ੍ਮ ਨਸ੍ਸਨ੍ਤਿ, ਤਥਾਰੂਪਂ ਪਨ ਉਤੁਸਪ੍ਪਾਯਾਦਿਂ ਲਭਿਤ੍ਵਾ ਪੁਨ ਉਪ੍ਪਜ੍ਜਨ੍ਤਾਪਿ ਤਸ੍ਮਿਂ ਸਮਯੇ ਭਾਵਨਾਪਾਰਿਪੂਰਿਂ ਗਚ੍ਛਨ੍ਤਿ ਇਚ੍ਚੇਵ ਵੁਚ੍ਚਤਿ.

੯. ਰੁਕ੍ਖਸੁਤ੍ਤਵਣ੍ਣਨਾ

੨੨੦. ਨਵਮੇ ਅਜ੍ਝਾਰੁਹਾਤਿ ਅਭਿਰੁਹਨਕਾ. ਕਚ੍ਛਕੋਤਿ ਅਟ੍ਠਿਕਚ੍ਛਕੋ. ਕਪਿਤ੍ਥਨੋਤਿ ਮਕ੍ਕਟਥਨਸਦਿਸਫਲੋ ਵਿਜਾਤਪਿਲਕ੍ਖੋ.

੧੦. ਨੀਵਰਣਸੁਤ੍ਤਵਣ੍ਣਨਾ

੨੨੧. ਦਸਮੇ ਅਨ੍ਧਕਰਣਾਤਿ ਅਨ੍ਧਭਾਵਕਰਣਾ. ਅਚਕ੍ਖੁਕਰਣਾਤਿ ਪਞ੍ਞਾਚਕ੍ਖੁਸ੍ਸ ਅਕਰਣਾ. ਪਞ੍ਞਾਨਿਰੋਧਿਕਾਤਿ ਪਞ੍ਞਾਯ ਨਿਰੋਧਨਾ. ਵਿਘਾਤਪਕ੍ਖਿਯਾਤਿ ਦੁਕ੍ਖਪਕ੍ਖਿਕਾ. ਅਨਿਬ੍ਬਾਨਸਂਵਤ੍ਤਨਿਕਾਤਿ ਨਿਬ੍ਬਾਨਤ੍ਥਾਯ ਅਸਂਵਤ੍ਤਨਿਕਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵ. ਸਕਲੇਪਿ ਇਮਸ੍ਮਿਂ ਵਗ੍ਗੇ ਮਿਸ੍ਸਕਬੋਜ੍ਝਙ੍ਗਾਵ ਕਥਿਤਾਤਿ.

ਨੀਵਰਣਵਗ੍ਗੋ.

੫. ਚਕ੍ਕਵਤ੍ਤਿਵਗ੍ਗੋ

੧. ਵਿਧਾਸੁਤ੍ਤਵਣ੍ਣਨਾ

੨੨੨. ਪਞ੍ਚਮਵਗ੍ਗਸ੍ਸ ਪਠਮੇ ਤਿਸ੍ਸੋ ਵਿਧਾਤਿ ਤਯੋ ਮਾਨਕੋਟ੍ਠਾਸਾ, ਮਾਨੋਯੇਵ ਵਾ. ਤਥਾ ਤਥਾ ਵਿਦਹਨਤੋ ਹਿ ਮਾਨੋਵ ਵਿਧਾਤਿ ਵੁਚ੍ਚਤਿ.

੨. ਚਕ੍ਕਵਤ੍ਤਿਸੁਤ੍ਤਵਣ੍ਣਨਾ

੨੨੩. ਦੁਤਿਯੇ ਰਞ੍ਞੋ, ਭਿਕ੍ਖਵੇ, ਚਕ੍ਕਵਤ੍ਤਿਸ੍ਸਾਤਿ ਏਤ੍ਥ ਅਤ੍ਤਨੋ ਸਿਰਿਸਮ੍ਪਤ੍ਤਿਯਾ ਰਾਜਤਿ, ਚਤੂਹਿ ਵਾ ਸਙ੍ਗਹਵਤ੍ਥੂਹਿ ਲੋਕਂ ਰਞ੍ਜੇਤੀਤਿ ਰਾਜਾ, ਤਸ੍ਸ ਰਞ੍ਞੋ. ‘‘ਪਵਤ੍ਤਤੁ ਭਵਂ ਚਕ੍ਕਰਤਨ’’ਨ੍ਤਿ ਪੁਞ੍ਞਾਨੁਭਾਵੇਨ ਅਬ੍ਭੁਗ੍ਗਤਾਯ ਵਾਚਾਯ ਚੋਦੇਨ੍ਤੋ ਚਕ੍ਕਂ ਵਤ੍ਤੇਤੀਤਿ ਚਕ੍ਕਵਤ੍ਤੀ, ਤਸ੍ਸ ਚਕ੍ਕਵਤ੍ਤਿਸ੍ਸ. ਪਾਤੁਭਾਵਾਤਿ ਪਾਤੁਭਾਵੇਨ. ਸਤ੍ਤਨ੍ਨਨ੍ਤਿ ਗਣਨਪਰਿਚ੍ਛੇਦੋ. ਰਤਨਾਨਨ੍ਤਿ ਪਰਿਚ੍ਛਿਨ੍ਨਅਤ੍ਥਦਸ੍ਸਨਂ. ਵਚਨਤ੍ਥੋ ਪਨੇਤ੍ਥ ਰਤਿਜਨਨਟ੍ਠੇਨ ਰਤਨਂ. ਅਪਿਚ –

‘‘ਚਿਤ੍ਤੀਕਤਂ ਮਹਗ੍ਘਞ੍ਚ, ਅਤੁਲਂ ਦੁਲ੍ਲਭਦਸ੍ਸਨਂ;

ਅਨੋਮਸਤ੍ਤਪਰਿਭੋਗਂ, ਰਤਨਂ ਤੇਨ ਵੁਚ੍ਚਤੀ’’ਤਿ.

ਚਕ੍ਕਰਤਨਸ੍ਸ ਚ ਨਿਬ੍ਬਤ੍ਤਕਾਲਤੋ ਪਟ੍ਠਾਯ ਅਞ੍ਞਂ ਦੇਵਟ੍ਠਾਨਂ ਨਾਮ ਨ ਹੋਤਿ, ਸਬ੍ਬੇਵ ਗਨ੍ਧਪੁਪ੍ਫਾਦੀਹਿ ਤਸ੍ਸੇਵ ਪੂਜਞ੍ਚ ਅਭਿਵਾਦਨਾਦੀਨਿ ਚ ਕਰੋਨ੍ਤੀਤਿ ਚਿਤ੍ਤੀਕਤਟ੍ਠੇਨ ਰਤਨਂ. ਚਕ੍ਕਰਤਨਸ੍ਸ ਚ ‘‘ਏਤ੍ਤਕਂ ਨਾਮ ਧਨਂ ਅਗ੍ਘਤੀ’’ਤਿ ਅਗ੍ਘੋ ਨਤ੍ਥਿ, ਇਤਿ ਮਹਗ੍ਘਟ੍ਠੇਨਾਪਿ ਰਤਨਂ. ਚਕ੍ਕਰਤਨਞ੍ਚ ਅਞ੍ਞੇਹਿ ਲੋਕੇ ਵਿਜ੍ਜਮਾਨਰਤਨੇਹਿ ਅਸਦਿਸਨ੍ਤਿ ਅਤੁਲਟ੍ਠੇਨ ਰਤਨਂ. ਯਸ੍ਮਾ ਪਨ ਯਸ੍ਮਿਂ ਕਪ੍ਪੇ ਬੁਦ੍ਧਾ ਉਪ੍ਪਜ੍ਜਨ੍ਤਿ, ਤਸ੍ਮਿਂਯੇਵ ਚਕ੍ਕਵਤ੍ਤਿਨੋ, ਬੁਦ੍ਧਾ ਚ ਕਦਾਚਿ ਕਰਹਚਿ ਉਪ੍ਪਜ੍ਜਨ੍ਤਿ, ਤਸ੍ਮਾ ਦੁਲ੍ਲਭਦਸ੍ਸਨਟ੍ਠੇਨ ਰਤਨਂ. ਤਦੇਤਂ ਜਾਤਿਰੂਪਕੁਲਇਸ੍ਸਰਿਯਾਦੀਹਿ ਅਨੋਮਸ੍ਸ ਉਲ਼ਾਰਸਤ੍ਤਸ੍ਸੇਵ ਉਪ੍ਪਜ੍ਜਤਿ, ਨ ਅਞ੍ਞਸ੍ਸਾਤਿ ਅਨੋਮਸਤ੍ਤਪਰਿਭੋਗਟ੍ਠੇਨਾਪਿ ਰਤਨਂ. ਯਥਾ ਚ ਚਕ੍ਕਰਤਨਂ, ਏਵਂ ਸੇਸਾਨਿਪੀਤਿ. ਤੇਨ ਵੁਤ੍ਤਂ –

‘‘ਚਿਤ੍ਤੀਕਤਂ ਮਹਗ੍ਘਞ੍ਚ, ਅਤੁਲਂ ਦੁਲ੍ਲਭਦਸ੍ਸਨਂ;

ਅਨੋਮਸਤ੍ਤਪਰਿਭੋਗਂ, ਰਤਨਂ ਤੇਨ ਵੁਚ੍ਚਤੀ’’ਤਿ.

ਪਾਤੁਭਾਵੋ ਹੋਤੀਤਿ ਨਿਬ੍ਬਤ੍ਤਿ ਹੋਤਿ. ਤਤ੍ਰਾਯਂ ਯੋਜਨਾ – ਚਕ੍ਕਵਤ੍ਤਿਸ੍ਸ ਪਾਤੁਭਾਵਾ ਸਤ੍ਤਨ੍ਨਂ ਰਤਨਾਨਂ ਪਾਤੁਭਾਵੋਤਿ ਅਯੁਤ੍ਤਂ. ਉਪ੍ਪਨ੍ਨਞ੍ਹਿ ਚਕ੍ਕਂ ਵਤ੍ਤੇਤ੍ਵਾ ਸੋ ਚਕ੍ਕਵਤ੍ਤੀ ਨਾਮ ਹੋਤੀਤਿ ਨਾਯੁਤ੍ਤਂ. ਕਸ੍ਮਾ? ਚਕ੍ਕਵਤ੍ਤਨਨਿਯਮਾਪੇਕ੍ਖਤਾਯ. ਯੋ ਹਿ ਨਿਯਮੇਨ ਚਕ੍ਕਂ ਵਤ੍ਤੇਸ੍ਸਤਿ, ਸੋ ਪਟਿਸਨ੍ਧਿਤੋ ਪਭੁਤਿ ‘‘ਚਕ੍ਕਵਤ੍ਤਿ ਪਾਤੁਭੂਤੋ’’ਤਿ ਵਤ੍ਤਬ੍ਬਤਂ ਆਪਜ੍ਜਤਿ. ਲਦ੍ਧਨਾਮਸ੍ਸ ਚ ਪੁਰਿਸਸ੍ਸ ਮੂਲੁਪ੍ਪਤ੍ਤਿਵਚਨਤੋਪਿ ਯੁਤ੍ਤਮੇਵੇਤਂ. ਯੋ ਹਿ ਏਸ ਚਕ੍ਕਵਤ੍ਤੀਤਿ ਲਦ੍ਧਨਾਮੋ ਸਤ੍ਤਵਿਸੇਸੋ, ਤਸ੍ਸ ਪਟਿਸਨ੍ਧਿਸਙ੍ਖਾਤੋ ਪਾਤੁਭਾਵੋਤਿ ਅਯਮੇਤ੍ਥ ਅਤ੍ਥੋ. ਤਸ੍ਸ ਹਿ ਪਾਤੁਭਾਵਾ ਰਤਨਾਨਿ ਪਾਤੁਭਵਨ੍ਤਿ. ਪਾਤੁਭੂਤੇਹਿ ਪਨ ਤੇਹਿ ਸਦ੍ਧਿਂ ਪਰਿਪਕ੍ਕੇ ਪੁਞ੍ਞਸਮ੍ਭਾਰੇ ਸੋ ਸਂਯੁਜ੍ਜਤਿ, ਤਦਾ ਲੋਕਸ੍ਸ ਤੇਸੁ ਪਾਤੁਭਾਵਚਿਤ੍ਤਂ ਉਪ੍ਪਜ੍ਜਤਿ. ਬਹੁਲਵਚਨਤੋ ਚਾਪਿ ਯੁਤ੍ਤਮੇਵੇਤਂ. ਯਦਾ ਹਿ ਲੋਕਸ੍ਸ ਤੇਸੁ ਪਾਤੁਭਾਵਸਞ੍ਞਾ ਉਪ੍ਪਜ੍ਜਤਿ, ਤਦਾ ਏਕਮੇਵ ਪਠਮਂ, ਪਚ੍ਛਾ ਇਤਰਾਨਿ ਛ ਪਾਤੁਭਵਨ੍ਤੀਤਿ ਬਹੁਲਵਚਨਤੋ ਚਾਪਿ ਏਤਂ ਯੁਤ੍ਤਂ. ਪਾਤੁਭਾਵਸ੍ਸ ਚ ਅਤ੍ਥਭੇਦਤੋਪਿ ਯੁਤ੍ਤਮੇਵੇਤਂ. ਨ ਕੇਵਲਞ੍ਹਿ ਪਾਤੁਭੂਤਮੇਵ ਪਾਤੁਭਾਵੋ, ਪਾਤੁਭਾਵਯਤੀਤਿ ਪਾਤੁਭਾਵੋ. ਅਯਂ ਪਾਤੁਭਾਵਸ੍ਸ ਅਤ੍ਥਭੇਦੋ. ਯਸ੍ਮਾ ਯੋ ਸੋ ਪੁਞ੍ਞਸਮ੍ਭਾਰੋ ਰਾਜਾਨਂ ਚਕ੍ਕਵਤ੍ਤਿਂ ਪਟਿਸਨ੍ਧਿਵਸੇਨ ਪਾਤੁਭਾਵਯਤਿ, ਤਸ੍ਮਾ ਰਞ੍ਞੋ ਚਕ੍ਕਵਤ੍ਤਿਸ੍ਸ ਪਾਤੁਭਾਵਾ. ਨ ਕੇਵਲਞ੍ਹਿ ਚਕ੍ਕਵਤ੍ਤਿਯੇਵ, ਇਮਾਨਿ ਪਨ ਸਤ੍ਤ ਰਤਨਾਨਿਪਿ ਪਾਤੁਭਵਨ੍ਤੀਤਿ ਅਯਮੇਤ੍ਥ ਅਤ੍ਥੋ. ਯਥੇਵ ਹਿ ਸੋ ਪੁਞ੍ਞਸਮ੍ਭਾਰੋ ਰਞ੍ਞੋ ਜਨਕਹੇਤੁ, ਏਵਂ ਰਤਨਾਨਮ੍ਪਿ ਪਰਿਯਾਯੇਨ ਉਪਨਿਸ੍ਸਯਹੇਤੂਤਿ ਯੁਤ੍ਤਮੇਵੇਤਂ ‘‘ਰਞ੍ਞੋ, ਭਿਕ੍ਖਵੇ, ਚਕ੍ਕਵਤ੍ਤਿਸ੍ਸ ਪਾਤੁਭਾਵਾ ਸਤ੍ਤਨ੍ਨਂ ਰਤਨਾਨਂ ਪਾਤੁਭਾਵੋ ਹੋਤੀ’’ਤਿ.

ਇਦਾਨਿ ਤੇਸਂ ਰਤਨਾਨਂ ਸਰੂਪਵਸੇਨ ਦਸ੍ਸਨਤ੍ਥਂ ਕਤਮੇਸਂ ਸਤ੍ਤਨ੍ਨਂ ਚਕ੍ਕਰਤਨਸ੍ਸਾਤਿਆਦਿਮਾਹ. ਤਤ੍ਥ ਚਕ੍ਕਰਤਨਸ੍ਸਾਤਿਆਦੀਸੁ ਅਯਂ ਸਙ੍ਖੇਪਾਧਿਪ੍ਪਾਯੋ – ਦ੍ਵਿਸਹਸ੍ਸਦੀਪਪਰਿਵਾਰਾਨਂ ਚਤੁਨ੍ਨਂ ਮਹਾਦੀਪਾਨਂ ਸਿਰਿਵਿਭਵਂ ਗਹੇਤ੍ਵਾ ਦਾਤੁਂ ਸਮਤ੍ਥਸ੍ਸ ਚਕ੍ਕਰਤਨਸ੍ਸ ਪਾਤੁਭਾਵੋ ਹੋਤਿ, ਤਥਾ ਪੁਰੇਭਤ੍ਤਮੇਵ ਸਾਗਰਪਰਿਯਨ੍ਤਂ ਪਥਵਿਂ ਅਨੁਪਰਿਯਾਯਨਸਮਤ੍ਥਸ੍ਸ ਵੇਹਾਸਙ੍ਗਮਸ੍ਸ ਹਤ੍ਥਿਰਤਨਸ੍ਸ, ਤਾਦਿਸਸ੍ਸੇਵ ਅਸ੍ਸਰਤਨਸ੍ਸ, ਚਤੁਰਙ੍ਗਸਮਨ੍ਨਾਗਤੇਪਿ ਅਨ੍ਧਕਾਰੇ ਯੋਜਨਪ੍ਪਮਾਣਂ ਅਨ੍ਧਕਾਰਂ ਵਿਧਮਿਤ੍ਵਾ ਆਲੋਕਦਸ੍ਸਨਸਮਤ੍ਥਸ੍ਸ ਮਣਿਰਤਨਸ੍ਸ, ਛਬ੍ਬਿਧਂ ਦੋਸਂ ਵਿਵਜ੍ਜੇਤ੍ਵਾ ਮਨਾਪਚਾਰਿਨੋ ਇਤ੍ਥਿਰਤਨਸ੍ਸ, ਯੋਜਨਪ੍ਪਮਾਣੇ ਪਦੇਸੇ ਅਨ੍ਤੋਪਥਵਿਗਤਾਨਂ ਨਿਧੀਨਂ ਦਸ੍ਸਨਸਮਤ੍ਥਸ੍ਸ ਗਹਪਤਿਰਤਨਸ੍ਸ, ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿਤ੍ਵਾ ਸਕਲਰਜ੍ਜਾਨੁਸਾਸਨਸਮਤ੍ਥਸ੍ਸ ਜੇਟ੍ਠਪੁਤ੍ਤਸਙ੍ਖਾਤਸ੍ਸ ਪਰਿਣਾਯਕਰਤਨਸ੍ਸ ਚ ਪਾਤੁਭਾਵੋ ਹੋਤੀਤਿ. ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰਤੋ ਪਨ ਤੇਸਂ ਚਕ੍ਕਰਤਨਾਦੀਨਂ ਪਾਤੁਭਾਵਵਿਧਾਨਂ ਮਹਾਸੁਦਸ੍ਸਨਾਦੀਸੁ ਸੁਤ੍ਤੇਸੁ ਆਗਤਮੇਵ. ਅਤ੍ਥੋਪਿਸ੍ਸ ਤੇਸਂ ਵਣ੍ਣਨਾਯ ਸਂਵਣ੍ਣਿਤੋਯੇਵ.

ਸਤਿਸਮ੍ਬੋਜ੍ਝਙ੍ਗਰਤਨਸ੍ਸਾਤਿਆਦੀਸੁ ਸਰਿਕ੍ਖਕਤਾ ਏਵਂ ਵੇਦਿਤਬ੍ਬਾ – ਯਥੇਵ ਹਿ ਚਕ੍ਕਵਤ੍ਤਿਨੋ ਚਕ੍ਕਰਤਨਂ ਸਬ੍ਬਰਤਨਾਨਂ ਪੁਰੇਚਰਂ, ਏਵਂ ਸਤਿਸਮ੍ਬੋਜ੍ਝਙ੍ਗਰਤਨਂ ਸਬ੍ਬੇਸਂ ਚਤੁਭੂਮਕਧਮ੍ਮਾਨਂ ਪੁਰੇਚਰਨ੍ਤਿ, ਪੁਰੇਚਰਣਟ੍ਠੇਨ ਚਕ੍ਕਵਤ੍ਤਿਰਞ੍ਞੋ ਚਕ੍ਕਰਤਨਸਦਿਸਂ ਹੋਤਿ. ਚਕ੍ਕਵਤ੍ਤਿਨੋ ਚ ਰਤਨੇਸੁ ਮਹਾਕਾਯੂਪਪਨ੍ਨਂ ਅਚ੍ਚੁਗ੍ਗਤਂ ਵਿਪੁਲਂ ਮਹਨ੍ਤਂ ਹਤ੍ਥਿਰਤਨਂ, ਇਦਮ੍ਪਿ ਧਮ੍ਮਵਿਚਯਸਮ੍ਬੋਜ੍ਝਙ੍ਗਰਤਨਂ ਮਹਨ੍ਤਂ ਧਮ੍ਮਕਾਯੂਪਪਨ੍ਨਂ ਅਚ੍ਚੁਗ੍ਗਤਂ ਵਿਪੁਲਂ ਮਹਨ੍ਤਨ੍ਤਿ ਹਤ੍ਥਿਰਤਨਸਦਿਸਂ ਹੋਤਿ. ਚਕ੍ਕਵਤ੍ਤਿਨੋ ਅਸ੍ਸਰਤਨਂ ਸੀਘਂ ਲਹੁ ਜਵਂ, ਇਦਮ੍ਪਿ ਵੀਰਿਯਸਮ੍ਬੋਜ੍ਝਙ੍ਗਰਤਨਂ ਸੀਘਂ ਲਹੁ ਜਵਨ੍ਤਿ ਇਮਾਯ ਸੀਘਲਹੁਜਵਤਾਯ ਅਸ੍ਸਰਤਨਸਦਿਸਂ ਹੋਤਿ. ਚਕ੍ਕਵਤ੍ਤਿਨੋ ਮਣਿਰਤਨਂ ਅਨ੍ਧਕਾਰਂ ਵਿਧਮਤਿ, ਆਲੋਕਂ ਦਸ੍ਸੇਤਿ, ਇਦਮ੍ਪਿ ਪੀਤਿਸਮ੍ਬੋਜ੍ਝਙ੍ਗਰਤਨਂ ਤਾਯ ਏਕਨ੍ਤਕੁਸਲਤ੍ਤਾ ਕਿਲੇਸਨ੍ਧਕਾਰਂ ਵਿਧਮਤਿ, ਸਹਜਾਤਪਚ੍ਚਯਾਦਿਵਸੇਨ ਞਾਣਾਲੋਕਂ ਦਸ੍ਸੇਤੀਤਿ ਇਮਿਨਾ ਅਨ੍ਧਕਾਰਵਿਧਮਨਆਲੋਕਦਸ੍ਸਨਭਾਵੇਨ ਮਣਿਰਤਨਸਦਿਸਂ ਹੋਤਿ.

ਚਕ੍ਕਵਤ੍ਤਿਨੋ ਇਤ੍ਥਿਰਤਨਂ ਕਾਯਚਿਤ੍ਤਦਰਥਂ ਪਟਿਪਸ੍ਸਮ੍ਭੇਤਿ, ਪਰਿਲ਼ਾਹਂ ਵੂਪਸਮੇਤਿ. ਇਦਮ੍ਪਿ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗਰਤਨਂ ਕਾਯਚਿਤ੍ਤਦਰਥਂ ਪਟਿਪਸ੍ਸਮ੍ਭੇਤਿ, ਪਰਿਲ਼ਾਹਂ ਵੂਪਸਮੇਤੀਤਿ ਇਤ੍ਥਿਰਤਨਸਦਿਸਂ ਹੋਤਿ. ਚਕ੍ਕਵਤ੍ਤਿਨੋ ਗਹਪਤਿਰਤਨਂ ਇਚ੍ਛਿਤਿਚ੍ਛਿਤਕ੍ਖਣੇ ਧਨਦਾਨੇਨ ਵਿਕ੍ਖੇਪਂ ਪਚ੍ਛਿਨ੍ਦਿਤ੍ਵਾ ਚਿਤ੍ਤਂ ਏਕਗ੍ਗਂ ਕਰੋਤਿ, ਇਦਮ੍ਪਿ ਸਮਾਧਿਸਮ੍ਬੋਜ੍ਝਙ੍ਗਰਤਨਂ ਯਥਿਚ੍ਛਿਤਾਦਿਵਸੇਨ ਅਪ੍ਪਨਂ ਸਮ੍ਪਾਦੇਤਿ, ਵਿਕ੍ਖੇਪਂ ਪਚ੍ਛਿਨ੍ਦਿਤ੍ਵਾ ਚਿਤ੍ਤਂ ਏਕਗ੍ਗਂ ਕਰੋਤੀਤਿ ਗਹਪਤਿਰਤਨਸਦਿਸਂ ਹੋਤਿ. ਚਕ੍ਕਵਤ੍ਤਿਨੋ ਚ ਪਰਿਣਾਯਕਰਤਨਂ ਸਬ੍ਬਤ੍ਥਕਿਚ੍ਚਸਮ੍ਪਾਦਨੇਨ ਅਪ੍ਪੋਸ੍ਸੁਕ੍ਕਤਂ ਕਰੋਤਿ. ਇਦਮ੍ਪਿ ਉਪੇਕ੍ਖਾਸਮ੍ਬੋਜ੍ਝਙ੍ਗਰਤਨਂ ਚਿਤ੍ਤੁਪ੍ਪਾਦਂ ਲੀਨੁਦ੍ਧਚ੍ਚਤੋ ਮੋਚੇਤ੍ਵਾ ਪਯੋਗਮਜ੍ਝਤ੍ਤੇ ਠਪਯਮਾਨਂ ਅਪ੍ਪੋਸ੍ਸੁਕ੍ਕਤਂ ਕਰੋਤੀਤਿ ਪਰਿਣਾਯਕਰਤਨਸਦਿਸਂ ਹੋਤਿ. ਇਤਿ ਇਮਸ੍ਮਿਂ ਸੁਤ੍ਤੇ ਚਤੁਭੂਮਕੋ ਸਬ੍ਬਸਙ੍ਗਾਹਿਕਧਮ੍ਮਪਰਿਚ੍ਛੇਦੋ ਕਥਿਤੋਤਿ ਵੇਦਿਤਬ੍ਬੋ.

੪-੧੦. ਦੁਪ੍ਪਞ੍ਞਸੁਤ੍ਤਾਦਿਵਣ੍ਣਨਾ

੨੨੫-੨੩੧. ਚਤੁਤ੍ਥੇ ਏਲ਼ਮੂਗੋਤਿ ਮੁਖੇਨ ਵਾਚਂ ਨਿਚ੍ਛਾਰੇਤੁਂ ਸਕ੍ਕੋਨ੍ਤੋਪਿ ਦੋਸੇਹਿ ਮੂਗੋ ਅਸਮ੍ਪਨ੍ਨਵਚਨੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਚਕ੍ਕਵਤ੍ਤਿਵਗ੍ਗੋ.

੬. ਸਾਕਚ੍ਛਵਗ੍ਗੋ

੧. ਆਹਾਰਸੁਤ੍ਤਵਣ੍ਣਨਾ

੨੩੨. ਛਟ੍ਠਵਗ੍ਗਸ੍ਸ ਪਠਮੇ ਅਯਮਾਹਾਰੋ ਅਨੁਪ੍ਪਨ੍ਨਸ੍ਸ ਵਾ ਸਤਿਸਮ੍ਬੋਜ੍ਝਙ੍ਗਸ੍ਸ ਉਪ੍ਪਾਦਾਯਾਤਿਆਦੀਸੁ ਅਯਂ ਪੁਰਿਮਨਯਤੋ ਵਿਸੇਸੋ. ਨ ਕੇਵਲਞ੍ਹਿ ਸਤਿਸਮ੍ਬੋਜ੍ਝਙ੍ਗਾਦੀਨਂ ਏਤੇ ਵੁਤ੍ਤਪ੍ਪਕਾਰਾਵ ਉਪ੍ਪਾਦਾਯ, ਉਪ੍ਪਨ੍ਨਾਨਂ ਵਾ ਭਾਵਨਾਯ ਪਾਰਿਪੂਰਿਯਾ ਪਚ੍ਚਯਾ ਹੋਨ੍ਤਿ, ਅਞ੍ਞੇਪਿ ਪਨ ਏਵਂ ਵੇਦਿਤਬ੍ਬਾ. ਅਪਰੇਪਿ ਹਿ ਚਤ੍ਤਾਰੋ ਧਮ੍ਮਾ ਸਤਿਸਮ੍ਬੋਜ੍ਝਙ੍ਗਸ੍ਸ ਉਪ੍ਪਾਦਾਯ ਸਂਵਤ੍ਤਨ੍ਤਿ ਸਤਿਸਮ੍ਪਜਞ੍ਞਂ ਮੁਟ੍ਠਸ੍ਸਤਿਪੁਗ੍ਗਲਪਰਿਵਜ੍ਜਨਤਾ ਉਪਟ੍ਠਿਤਸ੍ਸਤਿਪੁਗ੍ਗਲਸੇਵਨਤਾ ਤਦਧਿਮੁਤ੍ਤਤਾਤਿ. ਅਭਿਕ੍ਕਨ੍ਤਾਦੀਸੁ ਹਿ ਸਤ੍ਤਸੁ ਠਾਨੇਸੁ ਸਤਿਸਮ੍ਪਜਞ੍ਞੇਨ, ਭਤ੍ਤਨਿਕ੍ਖਿਤ੍ਤਕਾਕਸਦਿਸੇ ਮੁਟ੍ਠਸ੍ਸਤਿਪੁਗ੍ਗਲੇ ਪਰਿਵਜ੍ਜਨੇਨ, ਤਿਸ੍ਸਦਤ੍ਤਤ੍ਥੇਰਅਭਯਤ੍ਥੇਰਾਦਿਸਦਿਸੇ ਉਪਟ੍ਠਿਤਸ੍ਸਤਿਪੁਗ੍ਗਲੇ ਸੇਵਨੇਨ, ਠਾਨਨਿਸਜ੍ਜਾਦੀਸੁ ਸਤਿਸਮੁਟ੍ਠਾਪਨਤ੍ਥਂ ਨਿਨ੍ਨਪੋਣਪਬ੍ਭਾਰਚਿਤ੍ਤਤਾਯ ਚ ਸਤਿਸਮ੍ਬੋਜ੍ਝਙ੍ਗੋ ਉਪ੍ਪਜ੍ਜਤਿ. ਏਵਂ ਚਤੂਹਿ ਕਾਰਣੇਹਿ ਉਪ੍ਪਨ੍ਨਸ੍ਸ ਪਨਸ੍ਸ ਅਰਹਤ੍ਤਮਗ੍ਗੇਨ ਭਾਵਨਾਪਾਰਿਪੂਰੀ ਹੋਤਿ.

ਸਤ੍ਤ ਧਮ੍ਮਾ ਧਮ੍ਮਵਿਚਯਸਮ੍ਬੋਜ੍ਝਙ੍ਗਸ੍ਸ ਉਪ੍ਪਾਦਾਯ ਸਂਵਤ੍ਤਨ੍ਤਿ – ਪਰਿਪੁਚ੍ਛਕਤਾ ਵਤ੍ਥੁਵਿਸਦਕਿਰਿਯਾ ਇਨ੍ਦ੍ਰਿਯਸਮਤ੍ਤਪਟਿਪਾਦਨਾ ਦੁਪ੍ਪਞ੍ਞਪੁਗ੍ਗਲਪਰਿਵਜ੍ਜਨਾ ਪਞ੍ਞਵਨ੍ਤਪੁਗ੍ਗਲਸੇਵਨਾ ਗਮ੍ਭੀਰਞਾਣਚਰਿਯਪਚ੍ਚਵੇਕ੍ਖਣਾ ਤਦਧਿਮੁਤ੍ਤਤਾਤਿ. ਤਤ੍ਥ ਪਰਿਪੁਚ੍ਛਕਤਾਤਿ ਖਨ੍ਧਧਾਤੁਆਯਤਨਇਨ੍ਦ੍ਰਿਯਬਲਬੋਜ੍ਝਙ੍ਗਮਗ੍ਗਙ੍ਗਝਾਨਙ੍ਗਸਮਥਵਿਪਸ੍ਸਨਾਨਂ ਅਤ੍ਥਸਨ੍ਨਿਸ੍ਸਿਤਪਰਿਪੁਚ੍ਛਾਬਹੁਲਤਾ.

ਵਤ੍ਥੁਵਿਸਦਕਿਰਿਯਾਤਿ ਅਜ੍ਝਤ੍ਤਿਕਬਾਹਿਰਾਨਂ ਵਤ੍ਥੂਨਂ ਵਿਸਦਭਾਵਕਰਣਂ. ਯਦਾ ਹਿਸ੍ਸ ਕੇਸਨਖਲੋਮਾਨਿ ਦੀਘਾਨਿ ਹੋਨ੍ਤਿ, ਸਰੀਰਂ ਵਾ ਉਸ੍ਸਨ੍ਨਦੋਸਞ੍ਚੇਵ ਸੇਦਮਲਮਕ੍ਖਿਤਞ੍ਚ, ਤਦਾ ਅਜ੍ਝਤ੍ਤਿਕਵਤ੍ਥੁ ਅਵਿਸਦਂ ਹੋਤਿ ਅਪਰਿਸੁਦ੍ਧਂ. ਯਦਾ ਪਨ ਚੀਵਰਂ ਜਿਣ੍ਣਂ ਕਿਲਿਟ੍ਠਂ ਦੁਗ੍ਗਨ੍ਧਂ ਹੋਤਿ, ਸੇਨਾਸਨਂ ਵਾ ਉਕ੍ਲਾਪਂ, ਤਦਾ ਬਾਹਿਰਵਤ੍ਥੁ ਅਵਿਸਦਂ ਹੋਤਿ ਅਪਰਿਸੁਦ੍ਧਂ. ਤਸ੍ਮਾ ਕੇਸਾਦਿਛੇਦਨੇਨ ਉਦ੍ਧਂਵਿਰੇਚਨਅਧੋਵਿਰੇਚਨਾਦੀਹਿ ਸਰੀਰਸਲ੍ਲਹੁਕਭਾਵਕਰਣੇਨ ਉਚ੍ਛਾਦਨਨਹਾਪਨੇਨ ਚ ਅਜ੍ਝਤ੍ਤਿਕਵਤ੍ਥੁ ਵਿਸਦਂ ਕਾਤਬ੍ਬਂ. ਸੂਚਿਕਮ੍ਮਧੋਵਨਰਜਨਪਰਿਭਣ੍ਡਕਰਣਾਦੀਹਿ ਬਾਹਿਰਵਤ੍ਥੁ ਵਿਸਦਂ ਕਾਤਬ੍ਬਂ. ਏਤਸ੍ਮਿਞ੍ਹਿ ਅਜ੍ਝਤ੍ਤਿਕਬਾਹਿਰੇ ਵਤ੍ਥੁਮ੍ਹਿ ਅਵਿਸਦੇ ਉਪ੍ਪਨ੍ਨੇਸੁ ਚਿਤ੍ਤਚੇਤਸਿਕੇਸੁ ਞਾਣਮ੍ਪਿ ਅਵਿਸਦਂ ਅਪਰਿਸੁਦ੍ਧਂ ਹੋਤਿ ਅਪਰਿਸੁਦ੍ਧਾਨਿ ਦੀਪਕਪਲ੍ਲਕਵਟ੍ਟਿਤੇਲਾਨਿ ਨਿਸ੍ਸਾਯ ਉਪ੍ਪਨ੍ਨਦੀਪਸਿਖਾਯ ਓਭਾਸੋ ਵਿਯ. ਵਿਸਦੇ ਪਨ ਅਜ੍ਝਤ੍ਤਿਕਬਾਹਿਰੇ ਵਤ੍ਥੁਮ੍ਹਿ ਉਪ੍ਪਨ੍ਨੇਸੁ ਚਿਤ੍ਤਚੇਤਸਿਕੇਸੁ ਞਾਣਮ੍ਪਿ ਵਿਸਦਂ ਹੋਤਿ ਪਰਿਸੁਦ੍ਧਾਨਿ ਦੀਪਕਪਲ੍ਲਕਵਟ੍ਟਿਤੇਲਾਨਿ ਨਿਸ੍ਸਾਯ ਉਪ੍ਪਨ੍ਨਦੀਪਸਿਖਾਯ ਓਭਾਸੋ ਵਿਯ. ਤੇਨ ਵੁਤ੍ਤਂ – ‘‘ਵਤ੍ਥੁਵਿਸਦਕਿਰਿਯਾ ਧਮ੍ਮਵਿਚਯਸਮ੍ਬੋਜ੍ਝਙ੍ਗਸ੍ਸ ਉਪ੍ਪਾਦਾਯ ਸਂਵਤ੍ਤਤੀ’’ਤਿ.

ਇਨ੍ਦ੍ਰਿਯਸਮਤ੍ਤਪਟਿਪਾਦਨਾ ਨਾਮ ਸਦ੍ਧਾਦੀਨਂ ਇਨ੍ਦ੍ਰਿਯਾਨਂ ਸਮਭਾਵਕਰਣਂ. ਸਚੇ ਹਿਸ੍ਸ ਸਦ੍ਧਿਨ੍ਦ੍ਰਿਯਂ ਬਲਵਂ ਹੋਤਿ, ਇਤਰਾਨਿ ਮਨ੍ਦਾਨਿ, ਤਤੋ ਵੀਰਿਯਿਨ੍ਦ੍ਰਿਯਂ ਪਗ੍ਗਹਕਿਚ੍ਚਂ, ਸਤਿਨ੍ਦ੍ਰਿਯਂ ਉਪਟ੍ਠਾਨਕਿਚ੍ਚਂ, ਸਮਾਧਿਨ੍ਦ੍ਰਿਯਂ ਅਵਿਕ੍ਖੇਪਕਿਚ੍ਚਂ, ਪਞ੍ਞਿਨ੍ਦ੍ਰਿਯਂ ਦਸ੍ਸਨਕਿਚ੍ਚਂ ਕਾਤੁਂ ਨ ਸਕ੍ਕੋਤਿ. ਤਸ੍ਮਾ ਤਂ ਧਮ੍ਮਸਭਾਵਪਚ੍ਚਵੇਕ੍ਖਣੇਨ ਵਾ, ਯਥਾ ਵਾ ਮਨਸਿਕਰੋਤੋ ਬਲਵਂ ਜਾਤਂ, ਤਥਾ ਅਮਨਸਿਕਰਣੇਨ ਹਾਪੇਤਬ੍ਬਂ. ਵਕ੍ਕਲਿਤ੍ਥੇਰਵਤ੍ਥੁ ਚੇਤ੍ਥ ਨਿਦਸ੍ਸਨਂ. ਸਚੇ ਪਨ ਵੀਰਿਯਿਨ੍ਦ੍ਰਿਯਂ ਬਲਵਂ ਹੋਤਿ, ਅਥ ਨੇਵ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖਕਿਚ੍ਚਂ ਕਾਤੁਂ ਸਕ੍ਕੋਤਿ, ਨ ਇਤਰਾਨਿ ਇਤਰਕਿਚ੍ਚਭੇਦਂ. ਤਸ੍ਮਾ ਤਂ ਪਸ੍ਸਦ੍ਧਾਦਿਭਾਵਨਾਯ ਹਾਪੇਤਬ੍ਬਂ. ਤਤ੍ਥਾਪਿ ਸੋਣਤ੍ਥੇਰਸ੍ਸ ਵਤ੍ਥੁ ਦਸ੍ਸੇਤਬ੍ਬਂ. ਏਵਂ ਸੇਸੇਸੁਪਿ ਏਕਸ੍ਸ ਬਲਵਭਾਵੇ ਸਤਿ ਇਤਰੇਸਂ ਅਤ੍ਤਨੋ ਕਿਚ੍ਚੇਸੁ ਅਸਮਤ੍ਥਤਾ ਵੇਦਿਤਬ੍ਬਾ.

ਵਿਸੇਸਤੋ ਪਨੇਤ੍ਥ ਸਦ੍ਧਾਪਞ੍ਞਾਨਂ ਸਮਾਧਿਵੀਰਿਯਾਨਞ੍ਚ ਸਮਤਂ ਪਸਂਸਨ੍ਤਿ. ਬਲਵਸਦ੍ਧੋ ਹਿ ਮਨ੍ਦਪਞ੍ਞੋ ਮੁਧਪ੍ਪਸਨ੍ਨੋ ਹੋਤਿ, ਅਵਤ੍ਥੁਸ੍ਮਿਂ ਪਸੀਦਤਿ. ਬਲਵਪਞ੍ਞੋ ਪਨ ਮਨ੍ਦਸਦ੍ਧੋ ਕੇਰਾਟਿਕਪਕ੍ਖਂ ਭਜਤਿ, ਭੇਸਜ੍ਜਸਮੁਟ੍ਠਿਤੋ ਵਿਯ ਰੋਗੋ ਅਤੇਕਿਚ੍ਛੋ ਹੋਤਿ. ਚਿਤ੍ਤੁਪ੍ਪਾਦਮਤ੍ਤੇਨੇਵ ਕੁਸਲਂ ਹੋਤੀਤਿ ਅਤਿਧਾਵਿਤ੍ਵਾ ਦਾਨਾਦੀਨਿ ਅਕਰੋਨ੍ਤੋ ਨਿਰਯੇ ਉਪ੍ਪਜ੍ਜਤਿ. ਉਭਿਨ੍ਨਂ ਸਮਤਾਯ ਵਤ੍ਥੁਸ੍ਮਿਂਯੇਵ ਪਸੀਦਤਿ. ਬਲਵਸਮਾਧਿਂ ਪਨ ਮਨ੍ਦਵੀਰਿਯਂ ਸਮਾਧਿਸ੍ਸ ਕੋਸਜ੍ਜਪਕ੍ਖਤ੍ਤਾ ਕੋਸਜ੍ਜਂ ਅਭਿਭਵਤਿ. ਬਲਵਵੀਰਿਯਂ ਮਨ੍ਦਸਮਾਧਿਂ ਵੀਰਿਯਸ੍ਸ ਉਦ੍ਧਚ੍ਚਪਕ੍ਖਤ੍ਤਾ ਉਦ੍ਧਚ੍ਚਂ ਅਭਿਭਵਤਿ. ਸਮਾਧਿ ਪਨ ਵੀਰਿਯੇਨ ਸਂਯੋਜਿਤੋ ਕੋਸਜ੍ਜੇ ਪਤਿਤੁਂ ਨ ਲਭਤਿ, ਵੀਰਿਯਂ ਸਮਾਧਿਨਾ ਸਂਯੋਜਿਤਂ ਉਦ੍ਧਚ੍ਚੇ ਪਤਿਤੁਂ ਨ ਲਭਤਿ. ਤਸ੍ਮਾ ਤਦੁਭਯਂ ਸਮਂ ਕਾਤਬ੍ਬਂ. ਉਭਯਸਮਤਾਯ ਹਿ ਅਪ੍ਪਨਾ ਹੋਤਿ.

ਅਪਿ ਚ ਸਮਾਧਿਕਮ੍ਮਿਕਸ੍ਸ ਬਲਵਤੀਪਿ ਸਦ੍ਧਾ ਵਟ੍ਟਤਿ. ਏਵਂ ਸਦ੍ਦਹਨ੍ਤੋ ਓਕਪ੍ਪੇਨ੍ਤੋ ਅਪ੍ਪਨਂ ਪਾਪੁਣਿਸ੍ਸਤਿ. ਸਮਾਧਿਪਞ੍ਞਾਸੁ ਪਨ ਸਮਾਧਿਕਮ੍ਮਿਕਸ੍ਸ ਏਕਗ੍ਗਤਾ ਬਲਵਤੀ ਵਟ੍ਟਤਿ. ਏਵਞ੍ਹਿ ਸੋ ਅਪ੍ਪਨਂ ਪਾਪੁਣਾਤਿ. ਵਿਪਸ੍ਸਨਾਕਮ੍ਮਿਕਸ੍ਸ ਪਞ੍ਞਾ ਬਲਵਤੀ ਵਟ੍ਟਤਿ. ਏਵਞ੍ਹਿ ਸੋ ਲਕ੍ਖਣਪਟਿਵੇਧਂ ਪਾਪੁਣਾਤਿ. ਉਭਿਨ੍ਨਂ ਪਨ ਸਮਤਾਯਪਿ ਅਪ੍ਪਨਾ ਹੋਤਿਯੇਵ. ਸਤਿ ਪਨ ਸਬ੍ਬਤ੍ਥ ਬਲਵਤੀ ਵਟ੍ਟਤਿ. ਸਤਿ ਹਿ ਚਿਤ੍ਤਂ ਉਦ੍ਧਚ੍ਚਪਕ੍ਖਿਕਾਨਂ ਸਦ੍ਧਾਵੀਰਿਯਪਞ੍ਞਾਨਂ ਵਸੇਨ ਉਦ੍ਧਚ੍ਚਪਾਤਤੋ, ਕੋਸਜ੍ਜਪਕ੍ਖਿਕੇਨ ਚ ਸਮਾਧਿਨਾ ਕੋਸਜ੍ਜਪਾਤਤੋ ਰਕ੍ਖਤਿ. ਤਸ੍ਮਾ ਸਾ ਲੋਣਧੂਪਨਂ ਵਿਯ ਸਬ੍ਬਬ੍ਯਞ੍ਜਨੇਸੁ, ਸਬ੍ਬਕਮ੍ਮਿਕਅਮਚ੍ਚੋ ਵਿਯ ਚ ਸਬ੍ਬਰਾਜਕਿਚ੍ਚੇਸੁ ਸਬ੍ਬਤ੍ਥ ਇਚ੍ਛਿਤਬ੍ਬਾ. ਤੇਨਾਹ ‘‘ਸਤਿ ਚ ਪਨ ਸਬ੍ਬਤ੍ਥਿਕਾ ਵੁਤ੍ਤਾ ਭਗਵਤਾ. ਕਿਂ ਕਾਰਣਾ? ਚਿਤ੍ਤਞ੍ਹਿ ਸਤਿਪਟਿਸਰਣਂ, ਆਰਕ੍ਖਪਚ੍ਚੁਪਟ੍ਠਾਨਾ ਚ ਸਤਿ, ਨ ਵਿਨਾ ਸਤਿਯਾ ਚਿਤ੍ਤਸ੍ਸ ਪਗ੍ਗਹਨਿਗ੍ਗਹੋ ਹੋਤੀ’’ਤਿ.

ਦੁਪ੍ਪਞ੍ਞਪੁਗ੍ਗਲਪਰਿਵਜ੍ਜਨਾ ਨਾਮ ਖਨ੍ਧਾਦਿਭੇਦੇ ਅਨੋਗਾਲ਼੍ਹਪਞ੍ਞਾਨਂ ਦੁਮ੍ਮੇਧਪੁਗ੍ਗਲਾਨਂ ਆਰਕਾ ਪਰਿਵਜ੍ਜਨਂ. ਪਞ੍ਞਵਨ੍ਤਪੁਗ੍ਗਲਸੇਵਨਾ ਨਾਮ ਸਮਪਞ੍ਞਾਸਲਕ੍ਖਣਪਰਿਗ੍ਗਾਹਿਕਾਯ ਉਦਯਬ੍ਬਯਪਞ੍ਞਾਯ ਸਮਨ੍ਨਾਗਤਪੁਗ੍ਗਲਸੇਵਨਾ. ਗਮ੍ਭੀਰਞਾਣਚਰਿਯਪਚ੍ਚਵੇਕ੍ਖਣਾ ਨਾਮ ਗਮ੍ਭੀਰੇਸੁ ਖਨ੍ਧਾਦੀਸੁ ਪਵਤ੍ਤਾਯ ਗਮ੍ਭੀਰਪਞ੍ਞਾਯ ਪਭੇਦਪਚ੍ਚਵੇਕ੍ਖਣਾ. ਤਦਧਿਮੁਤ੍ਤਤਾ ਨਾਮ ਠਾਨਨਿਸਜ੍ਜਾਦੀਸੁ ਧਮ੍ਮਵਿਚਯਸਮ੍ਬੋਜ੍ਝਙ੍ਗਸਮੁਟ੍ਠਾਪਨਤ੍ਥਂ ਨਿਨ੍ਨਪੋਣਪਬ੍ਭਾਰਚਿਤ੍ਤਤਾ. ਏਵਂ ਉਪ੍ਪਨ੍ਨਸ੍ਸ ਪਨਸ੍ਸ ਅਰਹਤ੍ਤਮਗ੍ਗੇਨ ਭਾਵਨਾਪਾਰਿਪੂਰੀ ਹੋਤਿ.

ਏਕਾਦਸ ਧਮ੍ਮਾ ਵੀਰਿਯਸਮ੍ਬੋਜ੍ਝਙ੍ਗਸ੍ਸ ਉਪ੍ਪਾਦਾਯ ਸਂਵਤ੍ਤਨ੍ਤਿ – ਅਪਾਯਭਯਪਚ੍ਚਵੇਕ੍ਖਣਤਾ, ਆਨਿਸਂਸਦਸ੍ਸਾਵਿਤਾ, ਗਮਨਵੀਥਿਪਚ੍ਚਵੇਕ੍ਖਣਤਾ, ਪਿਣ੍ਡਪਾਤਾਪਚਾਯਨਤਾ, ਦਾਯਜ੍ਜਮਹਤ੍ਤਪਚ੍ਚਵੇਕ੍ਖਣਤਾ, ਸਤ੍ਥੁਮਹਤ੍ਤਪਚ੍ਚਵੇਕ੍ਖਣਤਾ, ਜਾਤਿਮਹਤ੍ਤਪਚ੍ਚਵੇਕ੍ਖਣਤਾ, ਸਬ੍ਰਹ੍ਮਚਾਰਿਮਹਤ੍ਤਪਚ੍ਚਵੇਕ੍ਖਣਤਾ, ਕੁਸੀਤਪੁਗ੍ਗਲਪਰਿਵਜ੍ਜਨਤਾ, ਆਰਦ੍ਧਵੀਰਿਯਪੁਗ੍ਗਲਸੇਵਨਤਾ, ਤਦਧਿਮੁਤ੍ਤਤਾਤਿ.

ਤਤ੍ਥ ‘‘ਨਿਰਯੇਸੁ ਪਞ੍ਚਵਿਧਬਨ੍ਧਨਕਮ੍ਮਕਾਰਣਤੋ ਪਟ੍ਠਾਯ ਮਹਾਦੁਕ੍ਖਂ ਅਨੁਭਵਨਕਾਲੇਪਿ, ਤਿਰਚ੍ਛਾਨਯੋਨਿਯਂ ਜਾਲਖਿਪਨਕੁਮੀਨਾਦੀਹਿ ਗਹਿਤਕਾਲੇਪਿ, ਪਾਜਨਕਣ੍ਟਕਾਦਿਪ੍ਪਹਾਰਤੁਨ੍ਨਸ੍ਸ ਪਨ ਸਕਟਵਹਨਾਦਿਕਾਲੇਪਿ, ਪੇਤ੍ਤਿਵਿਸਯੇ ਅਨੇਕਾਨਿਪਿ ਵਸ੍ਸਸਹਸ੍ਸਾਨਿ ਏਕਂ ਬੁਦ੍ਧਨ੍ਤਰਮ੍ਪਿ ਖੁਪ੍ਪਿਪਾਸਾਹਿ ਆਤੁਰੀਭੂਤਕਾਲੇਪਿ, ਕਾਲਕਞ੍ਚਿਕਅਸੁਰੇਸੁ ਸਟ੍ਠਿਹਤ੍ਥਅਸੀਤਿਹਤ੍ਥਪ੍ਪਮਾਣੇਨ ਅਟ੍ਠਿਚਮ੍ਮਮਤ੍ਤੇਨੇਵ ਅਤ੍ਤਭਾਵੇਨ ਵਾਤਾਤਪਾਦਿਦੁਕ੍ਖਾਨੁਭਵਨਕਾਲੇਪਿ ਨ ਸਕ੍ਕਾ ਵੀਰਿਯਸਮ੍ਬੋਜ੍ਝਙ੍ਗਂ ਉਪ੍ਪਾਦੇਤੁਂ. ਅਯਮੇਵ ਤੇ ਭਿਕ੍ਖੁ ਕਾਲੋ’’ਤਿ ਏਵਂ ਅਪਾਯਭਯਂ ਪਚ੍ਚਵੇਕ੍ਖਨ੍ਤਸ੍ਸਾਪਿ ਵੀਰਿਯਸਮ੍ਬੋਜ੍ਝਙ੍ਗੋ ਉਪ੍ਪਜ੍ਜਤਿ.

‘‘ਨ ਸਕ੍ਕਾ ਕੁਸੀਤੇਨ ਨਵਲੋਕੁਤ੍ਤਰਧਮ੍ਮਂ ਲਦ੍ਧੁਂ, ਆਰਦ੍ਧਵੀਰਿਯੇਨੇਵ ਸਕ੍ਕਾ ਅਯਮਾਨਿਸਂਸੋ ਵੀਰਿਯਸ੍ਸਾ’’ਤਿ ਏਵਂ ਆਨਿਸਂਸਦਸ੍ਸਾਵਿਨੋਪਿ ਉਪ੍ਪਜ੍ਜਤਿ. ‘‘ਸਬ੍ਬਬੁਦ੍ਧ-ਪਚ੍ਚੇਕਬੁਦ੍ਧ-ਮਹਾਸਾਵਕੇਹੇਵ ਗਤਮਗ੍ਗੋ ਤੇ ਗਨ੍ਤਬ੍ਬੋ. ਸੋ ਚ ਨ ਸਕ੍ਕਾ ਕੁਸੀਤੇਨ ਗਨ੍ਤੁ’’ਨ੍ਤਿ ਏਵਂ ਗਮਨਵੀਥਿਂ ਪਚ੍ਚਵੇਕ੍ਖਨ੍ਤਸ੍ਸਾਪਿ ਉਪ੍ਪਜ੍ਜਤਿ.

‘‘ਯੇ ਤਂ ਪਿਣ੍ਡਪਾਤਾਦੀਹਿ ਉਪਟ੍ਠਹਨ੍ਤਿ, ਇਮੇ ਤੇ ਮਨੁਸ੍ਸਾ ਨੇਵ ਞਾਤਕਾ, ਨ ਦਾਸਕਮ੍ਮਕਰਾ, ਨਾਪਿ ‘ਤਂ ਨਿਸ੍ਸਾਯ ਜੀਵਿਸ੍ਸਾਮਾ’ਤਿ ਤੇ ਪਣੀਤਾਨਿ ਪਿਣ੍ਡਪਾਤਾਦੀਨਿ ਦੇਨ੍ਤਿ. ਅਥ ਖੋ ਅਤ੍ਤਨੋ ਕਾਰਾਨਂ ਮਹਪ੍ਫਲਤਂ ਪਚ੍ਚਾਸੀਸਮਾਨਾ ਦੇਨ੍ਤਿ. ਸਤ੍ਥਾਰਾਪਿ ‘‘ਅਯਂ ਇਮੇ ਪਚ੍ਚਯੇ ਪਰਿਭੁਞ੍ਜਿਤ੍ਵਾ ਕਾਯਦਲ਼੍ਹਿਬਹੁਲੋ ਸੁਖਂ ਵਿਹਰਿਸ੍ਸਤੀ’’ਤਿ ਨ ਏਵਂ ਸਮ੍ਪਸ੍ਸਤਾ ਤੁਯ੍ਹਂ ਪਚ੍ਚਯਾ ਅਨੁਞ੍ਞਾਤਾ, ਅਥ ਖੋ ‘‘ਅਯਂ ਇਮੇ ਪਰਿਭੁਞ੍ਜਮਾਨੋਵ ਸਮਣਧਮ੍ਮਂ ਕਤ੍ਵਾ ਵਟ੍ਟਦੁਕ੍ਖਤੋ ਮੁਚ੍ਚਿਸ੍ਸਤੀ’ਤਿ ਤੇ ਪਚ੍ਚਯਾ ਅਨੁਞ੍ਞਾਤਾ, ਸੋ ਦਾਨਿ ਤ੍ਵਂ ਕੁਸੀਤੋ ਵਿਹਰਨ੍ਤੋ ਨ ਤਂ ਪਿਣ੍ਡਂ ਅਪਚਾਯਿਸ੍ਸਸਿ, ਆਰਦ੍ਧਵੀਰਿਯਸ੍ਸੇਵ ਹਿ ਪਿਣ੍ਡਪਾਤਾਪਚਾਯਨਂ ਨਾਮ ਹੋਤੀ’’ਤਿ ਏਵਂ ਪਿਣ੍ਡਪਾਤਾਪਚਾਯਨਂ ਪਚ੍ਚਵੇਕ੍ਖਨ੍ਤਸ੍ਸਾਪਿ ਉਪ੍ਪਜ੍ਜਤਿ ਮਹਾਮਿਤ੍ਤਤ੍ਥੇਰਸ੍ਸ ਵਿਯ.

ਥੇਰੋ ਕਿਰ ਕਸ੍ਸਕਲੇਣੇ ਨਾਮ ਪਟਿਵਸਤਿ. ਤਸ੍ਸੇਵ ਗੋਚਰਗਾਮੇ ਏਕਾ ਮਹਾਉਪਾਸਿਕਾ ਥੇਰਂ ਪੁਤ੍ਤਂ ਕਤ੍ਵਾ ਪਟਿਜਗ੍ਗਤਿ. ਸਾ ਏਕਦਿਵਸਂ ਅਰਞ੍ਞਂ ਗਚ੍ਛਨ੍ਤੀ ਧੀਤਰਂ ਆਹ – ‘‘ਅਮ੍ਮ, ਅਸੁਕਸ੍ਮਿਂ ਠਾਨੇ ਪੁਰਾਣਤਣ੍ਡੁਲਾ, ਅਸੁਕਸ੍ਮਿਂ ਖੀਰਂ, ਅਸੁਕਸ੍ਮਿਂ ਸਪ੍ਪਿ, ਅਸੁਕਸ੍ਮਿਂ ਫਾਣਿਤਂ, ਤਵ ਭਾਤਿਕਸ੍ਸ ਅਯ੍ਯਮਿਤ੍ਤਸ੍ਸ ਆਗਤਕਾਲੇ ਭਤ੍ਤਂ ਪਚਿਤ੍ਵਾ ਖੀਰਸਪ੍ਪਿਫਾਣਿਤੇਹਿ ਸਦ੍ਧਿਂ ਦੇਹਿ, ਤ੍ਵਞ੍ਚ ਭੁਞ੍ਜੇਯ੍ਯਾਸਿ, ਅਹਂ ਪਨ ਹਿਯ੍ਯੋ ਪਕ੍ਕਂ ਪਾਰਿਵਾਸਿਕਭਤ੍ਤਂ ਕਞ੍ਜਿਯੇਨ ਭੁਤ੍ਤਾਮ੍ਹੀ’’ਤਿ. ‘‘ਦਿਵਾ ਕਿਂ ਭੁਞ੍ਜਿਸ੍ਸਸਿ, ਅਮ੍ਮਾ’’ਤਿ? ‘‘ਸਾਕਪਣ੍ਣਂ ਪਕ੍ਖਿਪਿਤ੍ਵਾ ਕਣਤਣ੍ਡੁਲੇਹਿ ਅਮ੍ਬਿਲਯਾਗੁਂ ਪਚਿਤ੍ਵਾ ਠਪੇਹਿ, ਅਮ੍ਮਾ’’ਤਿ.

ਥੇਰੋ ਚੀਵਰਂ ਪਾਰੁਪਿਤ੍ਵਾ ਪਤ੍ਤਂ ਨੀਹਰਨ੍ਤੋਵ ਤਂ ਸਦ੍ਦਂ ਸੁਤ੍ਵਾ ਅਤ੍ਤਾਨਂ ਓਵਦਿ ‘‘ਮਹਾਉਪਾਸਿਕਾ ਕਿਰ ਕਞ੍ਜਿਯੇਨ ਪਾਰਿਵਾਸਿਕਭਤ੍ਤਂ ਭੁਞ੍ਜਿਤ੍ਵਾ ਦਿਵਾਪਿ ਕਣਪਣ੍ਣਮ੍ਬਿਲਯਾਗੁਂ ਭੁਞ੍ਜਿਸ੍ਸਤਿ, ਤੁਯ੍ਹਂ ਅਤ੍ਥਾਯ ਪਨ ਪੁਰਾਣਤਣ੍ਡੁਲਾਦੀਨਿ ਆਚਿਕ੍ਖਤਿ, ਤਂ ਨਿਸ੍ਸਾਯ ਖੋ ਪਨੇਸਾ ਨੇਵ ਖੇਤ੍ਤਂ ਨ ਵਤ੍ਥੁਂ ਨ ਭਤ੍ਤਂ ਨ ਵਤ੍ਥਂ ਪਚ੍ਚਾਸੀਸਤਿ, ਤਿਸ੍ਸੋ ਪਨ ਸਮ੍ਪਤ੍ਤਿਯੋ ਪਤ੍ਥਯਮਾਨਾ ਦੇਤਿ, ਤ੍ਵਂ ਏਤਿਸ੍ਸਾ ਤਾ ਸਮ੍ਪਤ੍ਤਿਯੋ ਦਾਤੁਂ ਸਕ੍ਖਿਸ੍ਸਸਿ, ਨ ਸਕ੍ਖਿਸ੍ਸਸੀਤਿ, ਅਯਂ ਖੋ ਪਨ ਪਿਣ੍ਡਪਾਤੋ ਤਯਾ ਸਰਾਗੇਨ ਸਦੋਸੇਨ ਸਮੋਹੇਨ ਨ ਸਕ੍ਕਾ ਗਣ੍ਹਿਤੁ’’ਨ੍ਤਿ ਪਤ੍ਤਂ ਥਵਿਕਾਯ ਪਕ੍ਖਿਪਿਤ੍ਵਾ ਗਣ੍ਠਿਕਂ ਮੁਞ੍ਚਿਤ੍ਵਾ ਨਿਵਤ੍ਤਿਤ੍ਵਾ ਕਸ੍ਸਕਲੇਣਮੇਵ ਗਨ੍ਤ੍ਵਾ ਪਤ੍ਤਂ ਹੇਟ੍ਠਾਮਞ੍ਚੇ, ਚੀਵਰਂ ਚੀਵਰਵਂਸੇ ਠਪੇਤ੍ਵਾ ‘‘ਅਰਹਤ੍ਤਂ ਅਪਾਪੁਣਿਤ੍ਵਾ ਨ ਨਿਕ੍ਖਮਿਸ੍ਸਾਮੀ’’ਤਿ ਵੀਰਿਯਂ ਅਧਿਟ੍ਠਹਿਤ੍ਵਾ ਨਿਸੀਦਿ. ਦੀਘਰਤ੍ਤਂ ਅਪ੍ਪਮਤ੍ਤੋ ਹੁਤ੍ਵਾ ਨਿਵੁਤ੍ਥਭਿਕ੍ਖੁ ਵਿਪਸ੍ਸਨਂ ਵਡ੍ਢੇਤ੍ਵਾ ਪੁਰੇਭਤ੍ਤਮੇਵ ਅਰਹਤ੍ਤਂ ਪਤ੍ਵਾ ਵਿਕਸਮਾਨਮਿਵ ਪਦੁਮਂ ਮਹਾਖੀਣਾਸਵੋ ਸਿਤਂ ਕਰੋਨ੍ਤੋਵ ਨਿਕ੍ਖਮਿ. ਲੇਣਦ੍ਵਾਰੇ ਰੁਕ੍ਖਮ੍ਹਿ ਅਧਿਵਤ੍ਥਾ ਦੇਵਤਾ –

‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;

ਯਸ੍ਸ ਤੇ ਆਸਵਾ ਖੀਣਾ, ਦਕ੍ਖਿਣੇਯ੍ਯੋਸਿ ਮਾਰਿਸਾ’’ਤਿ. –

ਉਦਾਨਂ ਉਦਾਨੇਤ੍ਵਾ ‘‘ਭਨ੍ਤੇ, ਪਿਣ੍ਡਾਯ ਪਵਿਟ੍ਠਾਨਂ ਤੁਮ੍ਹਾਦਿਸਾਨਂ ਅਰਹਨ੍ਤਾਨਂ ਭਿਕ੍ਖਂ ਦਤ੍ਵਾ ਮਹਲ੍ਲਕਿਤ੍ਥਿਯੋ ਦੁਕ੍ਖਾ ਮੁਚ੍ਚਿਸ੍ਸਨ੍ਤੀ’’ਤਿ ਆਹ. ਥੇਰੋ ਉਟ੍ਠਹਿਤ੍ਵਾ ਦ੍ਵਾਰਂ ਵਿਵਰਿਤ੍ਵਾ ਕਾਲਂ ਓਲੋਕੇਨ੍ਤੋ ‘‘ਪਾਤੋਯੇਵਾ’’ਤਿ ਞਤ੍ਵਾ ਪਤ੍ਤਚੀਵਰਂ ਆਦਾਯ ਗਾਮਂ ਪਾਵਿਸਿ.

ਦਾਰਿਕਾਪਿ ਭਤ੍ਤਂ ਸਮ੍ਪਾਦੇਤ੍ਵਾ ‘‘ਇਦਾਨਿ ਮੇ ਭਾਤਾ ਆਗਮਿਸ੍ਸਤਿ, ਇਦਾਨਿ ਆਗਮਿਸ੍ਸਤੀ’’ਤਿ ਦ੍ਵਾਰਂ ਓਲੋਕਯਮਾਨਾ ਨਿਸੀਦਿ. ਸਾ ਥੇਰੇ ਘਰਦ੍ਵਾਰਂ ਸਮ੍ਪਤ੍ਤੇ ਪਤ੍ਤਂ ਗਹੇਤ੍ਵਾ ਸਪ੍ਪਿਫਾਣਿਤਯੋਜਿਤਸ੍ਸ ਖੀਰਪਿਣ੍ਡਪਾਤਸ੍ਸ ਪੂਰੇਤ੍ਵਾ ਹਤ੍ਥੇ ਠਪੇਸਿ. ਥੇਰੋ ‘‘ਸੁਖਂ ਹੋਤੂ’’ਤਿ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸਾਪਿ ਤਂ ਓਲੋਕਯਮਾਨਾਵ ਅਟ੍ਠਾਸਿ. ਥੇਰਸ੍ਸ ਹਿ ਤਦਾ ਅਤਿਵਿਯ ਪਰਿਸੁਦ੍ਧੋ ਛਵਿਵਣ੍ਣੋ ਅਹੋਸਿ, ਵਿਪ੍ਪਸਨ੍ਨਾਨਿ ਇਨ੍ਦ੍ਰਿਯਾਨਿ, ਮੁਖਂ ਬਨ੍ਧਨਾ ਮੁਤ੍ਤਤਾਲਪਕ੍ਕਂ ਵਿਯ ਅਤਿਵਿਯ ਵਿਰੋਚਿਤ੍ਥ.

ਮਹਾਉਪਾਸਿਕਾ ਅਰਞ੍ਞਤੋ ਆਗਨ੍ਤ੍ਵਾ ‘‘ਕਿਂ, ਅਮ੍ਮ, ਭਾਤਿਕੋ ਤੇ ਆਗਤੋ’’ਤਿ ਪੁਚ੍ਛਿ. ਸਾ ਸਬ੍ਬਂ ਤਂ ਪਵਤ੍ਤਿਂ ਆਰੋਚੇਸਿ. ਉਪਾਸਿਕਾ ‘‘ਅਜ੍ਜ ਮੇ ਪੁਤ੍ਤਸ੍ਸ ਪਬ੍ਬਜਿਤਕਿਚ੍ਚਂ ਮਤ੍ਥਕਂ ਪਤ੍ਤ’’ਨ੍ਤਿ ਞਤ੍ਵਾ ‘‘ਅਭਿਰਮਤਿ ਤੇ, ਅਮ੍ਮ, ਭਾਤਾ ਬੁਦ੍ਧਸਾਸਨੇ, ਨ ਉਕ੍ਕਣ੍ਠਤੀ’’ਤਿ ਆਹ.

‘‘ਮਹਨ੍ਤਂ ਖੋ ਪਨੇਤਂ ਸਤ੍ਥੁਦਾਯਜ੍ਜਂ, ਯਦਿਦਂ ਸਤ੍ਤ ਅਰਿਯਧਨਾਨਿ ਨਾਮ, ਤਂ ਨ ਸਕ੍ਕਾ ਕੁਸੀਤੇਨ ਗਹੇਤੁਂ. ਯਥਾ ਹਿ ਵਿਪ੍ਪਟਿਪਨ੍ਨਂ ਪੁਤ੍ਤਂ ਮਾਤਾਪਿਤਰੋ ‘ਅਯਂ ਅਮ੍ਹਾਕਂ ਅਪੁਤ੍ਤੋ’ਤਿ ਪਰਿਬਾਹਿਰਂ ਕਰੋਨ੍ਤਿ, ਸੋ ਤੇਸਂ ਅਚ੍ਚਯੇਨ ਦਾਯਜ੍ਜਂ ਨ ਲਭਤਿ, ਏਵਂ ਕੁਸੀਤੋਪਿ ਇਦਂ ਅਰਿਯਧਨਦਾਯਜ੍ਜਂ ਨ ਲਭਤਿ, ਆਰਦ੍ਧਵੀਰਿਯੋਵ ਲਭਤੀ’’ਤਿ ਦਾਯਜ੍ਜਮਹਤ੍ਤਂ ਪਚ੍ਚਵੇਕ੍ਖਤੋਪਿ ਉਪ੍ਪਜ੍ਜਤਿ.

‘‘ਮਹਾ ਖੋ ਪਨ ਤੇ ਸਤ੍ਥਾ, ਸਤ੍ਥੁਨੋ ਹਿ ਤੇ ਮਾਤੁਕੁਚ੍ਛਿਸ੍ਮਿਂ ਪਟਿਸਨ੍ਧਿਗ੍ਗਹਣਕਾਲੇਪਿ ਅਭਿਨਿਕ੍ਖਮਨੇਪਿ ਅਭਿਸਮ੍ਬੋਧਿਯਮ੍ਪਿ ਧਮ੍ਮਚਕ੍ਕਪ੍ਪਵਤ੍ਤਨ-ਯਮਕਪਾਟਿਹਾਰਿਯ-ਦੇਵੋਰੋਹਨ-ਆਯੁਸਙ੍ਖਾਰਵੋਸ੍ਸਜ੍ਜਨੇਸੁਪਿ ਪਰਿਨਿਬ੍ਬਾਨਕਾਲੇਪਿ ਦਸਸਹਸ੍ਸਿਲੋਕਧਾਤੁ ਅਕਮ੍ਪਿਤ੍ਥ. ਯੁਤ੍ਤਂ ਨੁ ਖੋ ਤੇ ਏਵਰੂਪਸ੍ਸ ਸਤ੍ਥੁ ਸਾਸਨੇ ਪਬ੍ਬਜਿਤ੍ਵਾ ਕੁਸੀਤੇਨ ਭਵਿਤੁ’’ਨ੍ਤਿ ਏਵਂ ਸਤ੍ਥੁਮਹਤ੍ਤਂ ਪਚ੍ਚਵੇਕ੍ਖਤੋਪਿ ਉਪ੍ਪਜ੍ਜਤਿ.

‘‘ਜਾਤਿਯਾਪਿ ਤ੍ਵਂ ਇਦਾਨਿ ਨ ਲਾਮਕਜਾਤਿਕੋ, ਅਸਮ੍ਭਿਨ੍ਨਾਯ ਮਹਾਸਮ੍ਮਤਪਵੇਣਿਯਾ ਆਗਤਉਕ੍ਕਾਕਰਾਜਵਂਸੇ ਜਾਤੋਸਿ, ਸੁਦ੍ਧੋਦਨਮਹਾਰਾਜਸ੍ਸ ਚ ਮਹਾਮਾਯਾਦੇਵਿਯਾ ਚ ਨਤ੍ਤਾ, ਰਾਹੁਲਭਦ੍ਦਸ੍ਸ ਕਨਿਟ੍ਠੋ, ਤਯਾ ਨਾਮ ਏਵਰੂਪੇਨ ਜਿਨਪੁਤ੍ਤੇਨ ਹੁਤ੍ਵਾ ਨ ਯੁਤ੍ਤਂ ਕੁਸੀਤੇਨ ਵਿਹਰਿਤੁ’’ਨ੍ਤਿ ਏਵਂ ਜਾਤਿਮਹਤ੍ਤਂ ਪਚ੍ਚਵੇਕ੍ਖਤੋਪਿ ਉਪ੍ਪਜ੍ਜਤਿ.

‘‘ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਚੇਵ ਅਸੀਤਿ ਮਹਾਸਾਵਕਾ ਚ ਵੀਰਿਯੇਨੇਵ ਲੋਕੁਤ੍ਤਰਧਮ੍ਮਂ ਪਟਿਵਿਜ੍ਝਿਂਸੁ. ਤ੍ਵਂ ਪਨ ਏਤੇਸਂ ਸਬ੍ਰਹ੍ਮਚਾਰੀਨਂ ਮਗ੍ਗਂ ਪਟਿਪਜ੍ਜਸਿ, ਨ ਪਟਿਪਜ੍ਜਸੀ’’ਤਿ ਏਵਂ ਸਬ੍ਰਹ੍ਮਚਾਰਿਮਹਤ੍ਤਂ ਪਚ੍ਚਵੇਕ੍ਖਤੋਪਿ ਉਪ੍ਪਜ੍ਜਤਿ.

ਕੁਚ੍ਛਿਂ ਪੂਰੇਤ੍ਵਾ ਠਿਤਅਜਗਰਸਦਿਸੇ ਵਿਸ੍ਸਟ੍ਠਕਾਯਿਕਚੇਤਸਿਕਵੀਰਿਯੇ ਕੁਸੀਤਪੁਗ੍ਗਲੇ ਪਰਿਵਜ੍ਜੇਨ੍ਤਸ੍ਸਾਪਿ, ਆਰਦ੍ਧਵੀਰਿਯੇ ਪਹਿਤਤ੍ਤੇ ਪੁਗ੍ਗਲੇ ਸੇਵਨ੍ਤਸ੍ਸਾਪਿ ਠਾਨਨਿਸਜ੍ਜਾਦੀਸੁ ਵੀਰਿਯੁਪ੍ਪਾਦਨਤ੍ਥਂ ਨਿਨ੍ਨਪੋਣਪਬ੍ਭਾਰਚਿਤ੍ਤਸ੍ਸਾਪਿ ਉਪ੍ਪਜ੍ਜਤਿ. ਏਵਂ ਉਪ੍ਪਨ੍ਨਸ੍ਸ ਪਨਸ੍ਸ ਅਰਹਤ੍ਤਮਗ੍ਗੇਨ ਭਾਵਨਾਪਾਰਿਪੂਰੀ ਹੋਤਿ.

ਏਕਾਦਸ ਧਮ੍ਮਾ ਪੀਤਿਸਮ੍ਬੋਜ੍ਝਙ੍ਗਸ੍ਸ ਉਪ੍ਪਾਦਾਯ ਸਂਵਤ੍ਤਨ੍ਤਿ – ਬੁਦ੍ਧਾਨੁਸ੍ਸਤਿ ਧਮ੍ਮੋ, ਸਙ੍ਘੋ, ਸੀਲਂ, ਚਾਗੋ, ਦੇਵਤਾਨੁਸ੍ਸਤਿ, ਉਪਸਮਾਨੁਸ੍ਸਤਿ, ਲੂਖਪੁਗ੍ਗਲਪਰਿਵਜ੍ਜਨਤਾ, ਸਿਨਿਦ੍ਧਪੁਗ੍ਗਲਸੇਵਨਤਾ, ਪਸਾਦਨੀਯਸੁਤ੍ਤਨ੍ਤਪਚ੍ਚਵੇਕ੍ਖਣਤਾ, ਤਦਧਿਮੁਤ੍ਤਤਾਤਿ.

ਬੁਦ੍ਧਗੁਣੇ ਅਨੁਸ੍ਸਰਨ੍ਤਸ੍ਸਾਪਿ ਹਿ ਯਾਵ ਉਪਚਾਰਾ ਸਕਲਸਰੀਰਂ ਫਰਮਾਨੋ ਪੀਤਿਸਮ੍ਬੋਜ੍ਝਙ੍ਗੋ ਉਪ੍ਪਜ੍ਜਤਿ, ਧਮ੍ਮਸਙ੍ਘਗੁਣੇ ਅਨੁਸ੍ਸਰਨ੍ਤਸ੍ਸਾਪਿ, ਦੀਘਰਤ੍ਤਂ ਅਖਣ੍ਡਂ ਕਤ੍ਵਾ ਰਕ੍ਖਿਤਂ ਚਤੁਪਾਰਿਸੁਦ੍ਧਿਸੀਲਂ ਪਚ੍ਚਵੇਕ੍ਖਨ੍ਤਸ੍ਸਾਪਿ, ਗਿਹਿਨੋ ਦਸਸੀਲਪਞ੍ਚਸੀਲਾਨਿ ਪਚ੍ਚਵੇਕ੍ਖਨ੍ਤਸ੍ਸਾਪਿ, ਦੁਬ੍ਭਿਕ੍ਖਭਯਾਦੀਸੁ ਪਣੀਤਂ ਭੋਜਨਂ ਸਬ੍ਰਹ੍ਮਚਾਰੀਨਂ ਦਤ੍ਵਾ ‘‘ਏਵਂ ਨਾਮ ਅਦਮ੍ਹਾ’’ਤਿ ਚਾਗਂ ਪਚ੍ਚਵੇਕ੍ਖਨ੍ਤਸ੍ਸਾਪਿ, ਗਿਹਿਨੋਪਿ ਏਵਰੂਪੇ ਕਾਲੇ ਸੀਲਵਨ੍ਤਾਨਂ ਦਿਨ੍ਨਦਾਨਂ ਪਚ੍ਚਵੇਕ੍ਖਨ੍ਤਸ੍ਸਾਪਿ, ਯੇਹਿ ਗੁਣੇਹਿ ਸਮਨ੍ਨਾਗਤਾ ਦੇਵਤ੍ਤਂ ਪਤ੍ਤਾ, ਤਥਾਰੂਪਾਨਂ ਅਤ੍ਤਨਿ ਅਤ੍ਥਿਤਂ ਪਚ੍ਚਵੇਕ੍ਖਨ੍ਤਸ੍ਸਾਪਿ, ਸਮਾਪਤ੍ਤਿਯਾ ਵਿਕ੍ਖਮ੍ਭਿਤਾ ਕਿਲੇਸਾ ਸਟ੍ਠਿਪਿ ਸਤ੍ਤਤਿਪਿ ਵਸ੍ਸਾਨਿ ਨ ਸਮੁਦਾਚਰਨ੍ਤੀਤਿ ਪਚ੍ਚਵੇਕ੍ਖਨ੍ਤਸ੍ਸਾਪਿ, ਚੇਤਿਯਦਸ੍ਸਨਬੋਧਿਦਸ੍ਸਨਥੇਰਦਸ੍ਸਨੇਸੁ ਅਸਕ੍ਕਚ੍ਚਕਿਰਿਯਾਯ ਸਂਸੂਚਿਤਲੂਖਭਾਵੇ ਬੁਦ੍ਧਾਦੀਸੁ ਪਸਾਦਸਿਨੇਹਾਭਾਵੇਨ ਗਦ੍ਰਭਪਿਟ੍ਠਰਜਸਦਿਸੇ ਲੂਖਪੁਗ੍ਗਲੇ ਪਰਿਵਜ੍ਜੇਨ੍ਤਸ੍ਸਾਪਿ, ਬੁਦ੍ਧਾਦੀਸੁ ਪਸਾਦਬਹੁਲੇ ਮੁਦੁਚਿਤ੍ਤੇ ਸਿਨਿਦ੍ਧਪੁਗ੍ਗਲੇ ਸੇਵਨ੍ਤਸ੍ਸਾਪਿ, ਰਤਨਤ੍ਤਯਗੁਣਪਰਿਦੀਪਕੇ ਪਸਾਦਨੀਯੇ ਸੁਤ੍ਤਨ੍ਤੇ ਪਚ੍ਚਵੇਕ੍ਖਨ੍ਤਸ੍ਸਾਪਿ, ਠਾਨਨਿਸਜ੍ਜਾਦੀਸੁ ਪੀਤਿਉਪ੍ਪਾਦਨਤ੍ਥਂ ਨਿਨ੍ਨਪੋਣਪਬ੍ਭਾਰਚਿਤ੍ਤਸ੍ਸਾਪਿ ਉਪ੍ਪਜ੍ਜਤਿ. ਏਵਂ ਉਪ੍ਪਨ੍ਨਸ੍ਸ ਪਨਸ੍ਸ ਅਰਹਤ੍ਤਮਗ੍ਗੇਨ ਭਾਵਨਾਪਾਰਿਪੂਰੀ ਹੋਤਿ.

ਸਤ੍ਤ ਧਮ੍ਮਾ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗਸ੍ਸ ਉਪ੍ਪਾਦਾਯ ਸਂਵਤ੍ਤਨ੍ਤਿ – ਪਣੀਤਭੋਜਨਸੇਵਨਤਾ, ਉਤੁਸੁਖਸੇਵਨਤਾ, ਇਰਿਯਾਪਥਸੁਖਸੇਵਨਤਾ, ਮਜ੍ਝਤ੍ਤਪਯੋਗਤਾ, ਸਾਰਦ੍ਧਕਾਯਪੁਗ੍ਗਲਪਰਿਵਜ੍ਜਨਤਾ, ਪਸ੍ਸਦ੍ਧਕਾਯ-ਪੁਗ੍ਗਲਸੇਵਨਤਾ, ਤਦਧਿਮੁਤ੍ਤਤਾਤਿ.

ਪਣੀਤਞ੍ਹਿ ਸਿਨਿਦ੍ਧਂ ਭੋਜਨਂ ਭੁਞ੍ਜਨ੍ਤਸ੍ਸਾਪਿ, ਸੀਤੁਣ੍ਹੇਸੁ ਉਤੂਸੁ ਠਾਨਾਦੀਸੁ ਚ ਇਰਿਯਾਪਥੇਸੁ ਸਪ੍ਪਾਯਂ ਉਤੁਞ੍ਚ ਇਰਿਯਾਪਥਞ੍ਚ ਸੇਵਨ੍ਤਸ੍ਸਾਪਿ ਪਸ੍ਸਦ੍ਧਿ ਉਪ੍ਪਜ੍ਜਤਿ. ਯੋ ਪਨ ਮਹਾਪੁਰਿਸਜਾਤਿਕੋ ਸਬ੍ਬਉਤੁਇਰਿਯਾਪਥਕ੍ਖਮੋਵ ਹੋਤਿ, ਨ ਤਂ ਸਨ੍ਧਾਯੇਤਂ ਵੁਤ੍ਤਂ. ਯਸ੍ਸ ਸਭਾਗਵਿਸਭਾਗਤਾ ਅਤ੍ਥਿ, ਤਸ੍ਸੇਵ ਵਿਸਭਾਗੇ ਉਤੁਇਰਿਯਾਪਥੇ ਵਜ੍ਜੇਤ੍ਵਾ ਸਭਾਗੇ ਸੇਵਨ੍ਤਸ੍ਸ ਉਪ੍ਪਜ੍ਜਤਿ. ਮਜ੍ਝਤ੍ਤਪਯੋਗੋ ਵੁਚ੍ਚਤਿ ਅਤ੍ਤਨੋ ਚ ਪਰਸ੍ਸ ਚ ਕਮ੍ਮਸ੍ਸਕਤਪਚ੍ਚਵੇਕ੍ਖਣਾ. ਇਮਿਨਾ ਮਜ੍ਝਤ੍ਤਪਯੋਗੇਨ ਉਪ੍ਪਜ੍ਜਤਿ. ਯੋ ਲੇਡ੍ਡੁਦਣ੍ਡਾਦੀਹਿ ਪਰਂ ਵਿਹੇਠਯਮਾਨੋਵ ਵਿਚਰਤਿ, ਏਵਰੂਪਂ ਸਾਰਦ੍ਧਕਾਯਪੁਗ੍ਗਲਂ ਪਰਿਵਜ੍ਜੇਨ੍ਤਸ੍ਸਾਪਿ, ਸਂਯਤਪਾਦਪਾਣਿਂ ਪਸ੍ਸਦ੍ਧਕਾਯਂ ਪੁਗ੍ਗਲਂ ਸੇਵਨ੍ਤਸ੍ਸਾਪਿ, ਠਾਨਨਿਸਜ੍ਜਾਦੀਸੁ ਪਸ੍ਸਦ੍ਧਿਉਪ੍ਪਾਦਨਤ੍ਥਾਯ ਨਿਨ੍ਨਪੋਣਪਬ੍ਭਾਰਚਿਤ੍ਤਸ੍ਸਾਪਿ ਉਪ੍ਪਜ੍ਜਤਿ. ਏਵਂ ਉਪ੍ਪਨ੍ਨਸ੍ਸ ਪਨਸ੍ਸ ਅਰਹਤ੍ਤਮਗ੍ਗੇਨ ਭਾਵਨਾਪਾਰਿਪੂਰੀ ਹੋਤਿ.

ਦਸ ਧਮ੍ਮਾ ਸਮਾਧਿਸਮ੍ਬੋਜ੍ਝਙ੍ਗਸ੍ਸ ਉਪ੍ਪਾਦਾਯ ਸਂਵਤ੍ਤਨ੍ਤਿ – ਵਤ੍ਥੁਵਿਸਦਕਿਰਿਯਤਾ, ਇਨ੍ਦ੍ਰਿਯਸਮਤ੍ਤਪਟਿਪਾਦਨਤਾ, ਨਿਮਿਤ੍ਤਕੁਸਲਤਾ, ਸਮਯੇ ਚਿਤ੍ਤਸ੍ਸ ਪਗ੍ਗਣ੍ਹਨਤਾ, ਸਮਯੇ ਚਿਤ੍ਤਸ੍ਸ ਨਿਗ੍ਗਣ੍ਹਨਤਾ, ਸਮਯੇ ਸਮ੍ਪਹਂਸਨਤਾ, ਸਮਯੇ ਅਜ੍ਝੁਪੇਕ੍ਖਨਤਾ, ਅਸਮਾਹਿਤਪੁਗ੍ਗਲਪਰਿਵਜ੍ਜਨਤਾ, ਸਮਾਹਿਤਪੁਗ੍ਗਲਸੇਵਨਤਾ, ਤਦਧਿਮੁਤ੍ਤਤਾਤਿ. ਤਤ੍ਥ ਵਤ੍ਥੁਵਿਸਦਕਿਰਿਯਤਾ ਚ ਇਨ੍ਦ੍ਰਿਯਸਮਤ੍ਤਪਟਿਪਾਦਨਤਾ ਚ ਵੁਤ੍ਤਨਯੇਨੇਵ ਵੇਦਿਤਬ੍ਬਾ.

ਨਿਮਿਤ੍ਤਕੁਸਲਤਾ ਨਾਮ ਕਸਿਣਨਿਮਿਤ੍ਤਸ੍ਸ ਉਗ੍ਗਹਣਕੁਸਲਤਾ. ਸਮਯੇ ਚਿਤ੍ਤਸ੍ਸ ਪਗ੍ਗਣ੍ਹਨਤਾਤਿ ਯਸ੍ਮਿਂ ਸਮਯੇ ਅਤਿਸਿਥਿਲਵੀਰਿਯਤਾਦੀਹਿ ਲੀਨਂ ਚਿਤ੍ਤਂ ਹੋਤਿ, ਤਸ੍ਮਿਂ ਸਮਯੇ ਧਮ੍ਮਵਿਚਯਵੀਰਿਯਪੀਤਿਸਮ੍ਬੋਜ੍ਝਙ੍ਗਸਮੁਟ੍ਠਾਪਨੇਨ ਤਸ੍ਸ ਪਗ੍ਗਣ੍ਹਨਂ. ਸਮਯੇ ਚਿਤ੍ਤਸ੍ਸ ਨਿਗ੍ਗਣ੍ਹਨਤਾਤਿ ਯਸ੍ਮਿਂ ਸਮਯੇ ਅਚ੍ਚਾਰਦ੍ਧਵੀਰਿਯਤਾਦੀਹਿ ਉਦ੍ਧਤਂ ਚਿਤ੍ਤਂ ਹੋਤਿ, ਤਸ੍ਮਿਂ ਸਮਯੇ ਪਸ੍ਸਦ੍ਧਿਸਮਾਧਿਉਪੇਕ੍ਖਾਸਮ੍ਬੋਜ੍ਝਙ੍ਗਸਮੁਟ੍ਠਾਪਨੇਨ ਤਸ੍ਸ ਨਿਗ੍ਗਣ੍ਹਨਂ. ਸਮਯੇ ਸਮ੍ਪਹਂਸਨਤਾਤਿ ਯਸ੍ਮਿਂ ਸਮਯੇ ਚਿਤ੍ਤਂ ਪਞ੍ਞਾਪਯੋਗਮਨ੍ਦਤਾਯ ਵਾ ਉਪਸਮਸੁਖਾਨਂ ਵਿਗਮੇਨ ਵਾ ਨਿਰਸ੍ਸਾਦਂ ਹੋਤਿ, ਤਸ੍ਮਿਂ ਸਮਯੇ ਅਟ੍ਠਸਂਵੇਗਵਤ੍ਥੁਪਚ੍ਚਵੇਕ੍ਖਣੇਨ ਸਂਵੇਜੇਤਿ. ਅਟ੍ਠ ਸਂਵੇਗਵਤ੍ਥੂਨਿ ਨਾਮ ਜਾਤਿਜਰਾਬ੍ਯਾਧਿਮਰਣਾਨਿ ਚਤ੍ਤਾਰਿ, ਅਪਾਯਦੁਕ੍ਖਂ ਪਞ੍ਚਮਂ, ਅਤੀਤੇ ਵਟ੍ਟਮੂਲਕਂ ਦੁਕ੍ਖਂ, ਅਨਾਗਤੇ ਵਟ੍ਟਮੂਲਕਂ ਦੁਕ੍ਖਂ, ਪਚ੍ਚੁਪ੍ਪਨ੍ਨੇ ਆਹਾਰਪਰਿਯੇਟ੍ਠਿਮੂਲਕਂ ਦੁਕ੍ਖਨ੍ਤਿ. ਰਤਨਤ੍ਤਯਗੁਣਾਨੁਸ੍ਸਰਣੇਨ ਚ ਪਸਾਦਂ ਜਨੇਤਿ, ਅਯਂ ਵੁਚ੍ਚਤਿ ‘‘ਸਮਯੇ ਸਮ੍ਪਹਂਸਨਤਾ’’ਤਿ.

ਸਮਯੇ ਅਜ੍ਝੁਪੇਕ੍ਖਨਤਾ ਨਾਮ ਯਸ੍ਮਿਂ ਸਮਯੇ ਸਮ੍ਮਾਪਟਿਪਤ੍ਤਿਂ ਆਗਮ੍ਮ ਅਲੀਨਂ ਅਨੁਦ੍ਧਤਂ ਅਨਿਰਸ੍ਸਾਦਂ ਆਰਮ੍ਮਣੇ ਸਮਪ੍ਪਵਤ੍ਤਂ ਸਮਥਵੀਥਿਪਟਿਪਨ੍ਨਂ ਚਿਤ੍ਤਂ ਹੋਤਿ, ਤਦਾਸ੍ਸ ਪਗ੍ਗਹਨਿਗ੍ਗਹਸਮ੍ਪਹਂਸਨੇਸੁ ਨ ਬ੍ਯਾਪਾਰਂ ਆਪਜ੍ਜਤਿ ਸਾਰਥਿ ਵਿਯ ਸਮਪ੍ਪਵਤ੍ਤੇਸੁ ਅਸ੍ਸੇਸੁ. ਅਯਂ ਵੁਚ੍ਚਤਿ ‘‘ਸਮਯੇ ਅਜ੍ਝੁਪੇਕ੍ਖਨਤਾ’’ਤਿ. ਅਸਮਾਹਿਤਪੁਗ੍ਗਲਪਰਿਵਜ੍ਜਨਤਾ ਨਾਮ ਉਪਚਾਰਂ ਵਾ ਅਪ੍ਪਨਂ ਵਾ ਅਪ੍ਪਤ੍ਤਾਨਂ ਵਿਕ੍ਖਿਤ੍ਤਚਿਤ੍ਤਾਨਂ ਪੁਗ੍ਗਲਾਨਂ ਆਰਕਾ ਪਰਿਵਜ੍ਜਨਂ. ਸਮਾਹਿਤਪੁਗ੍ਗਲਸੇਵਨਤਾ ਨਾਮ ਉਪਚਾਰੇਨ ਵਾ ਅਪ੍ਪਨਾਯ ਵਾ ਸਮਾਹਿਤਚਿਤ੍ਤਾਨਂ ਸੇਵਨਾ ਭਜਨਾ ਪਯਿਰੁਪਾਸਨਾ. ਤਦਧਿਮੁਤ੍ਤਤਾ ਨਾਮ ਠਾਨਨਿਸਜ੍ਜਾਦੀਸੁ ਸਮਾਧਿਉਪ੍ਪਾਦਨਤ੍ਥਮੇਵ ਨਿਨ੍ਨਪੋਣਪਬ੍ਭਾਰਚਿਤ੍ਤਤਾ. ਏਵਞ੍ਹਿ ਪਟਿਪਜ੍ਜਤੋ ਏਸ ਉਪ੍ਪਜ੍ਜਤਿ. ਏਵਂ ਉਪ੍ਪਨ੍ਨਸ੍ਸ ਪਨਸ੍ਸ ਅਰਹਤ੍ਤਮਗ੍ਗੇਨ ਭਾਵਨਾਪਾਰਿਪੂਰੀ ਹੋਤਿ.

ਪਞ੍ਚ ਧਮ੍ਮਾ ਉਪੇਕ੍ਖਾਸਮ੍ਬੋਜ੍ਝਙ੍ਗਸ੍ਸ ਉਪ੍ਪਾਦਾਯ ਸਂਵਤ੍ਤਨ੍ਤਿ – ਸਤ੍ਤਮਜ੍ਝਤ੍ਤਤਾ, ਸਙ੍ਖਾਰਮਜ੍ਝਤ੍ਤਤਾ, ਸਤ੍ਤਸਙ੍ਖਾਰਕੇਲਾਯਨਪੁਗ੍ਗਲਪਰਿਵਜ੍ਜਨਤਾ, ਸਤ੍ਤਸਙ੍ਖਾਰਮਜ੍ਝਤ੍ਤਪੁਗ੍ਗਲਸੇਵਨਤਾ, ਤਦਧਿਮੁਤ੍ਤਤਾਤਿ. ਤਤ੍ਥ ਦ੍ਵੀਹਾਕਾਰੇਹਿ ਸਤ੍ਤਮਜ੍ਝਤ੍ਤਤਂ ਸਮੁਟ੍ਠਾਪੇਤਿ – ‘‘ਤ੍ਵਂ ਅਤ੍ਤਨੋਵ ਕਮ੍ਮੇਨ ਆਗਨ੍ਤ੍ਵਾ ਅਤ੍ਤਨੋਵ ਕਮ੍ਮੇਨ ਗਮਿਸ੍ਸਸਿ, ਏਸੋਪਿ ਅਤ੍ਤਨੋ ਕਮ੍ਮੇਨ ਆਗਨ੍ਤ੍ਵਾ ਅਤ੍ਤਨੋਵ ਕਮ੍ਮੇਨ ਗਮਿਸ੍ਸਤਿ, ਤ੍ਵਂ ਕਂ ਕੇਲਾਯਸੀ’’ਤਿ ਏਵਂ ਕਮ੍ਮਸ੍ਸਕਤਪਚ੍ਚਵੇਕ੍ਖਣੇਨ ਚ – ‘‘ਪਰਮਤ੍ਥਤੋ ਸਤ੍ਤੋਯੇਵ ਨਤ੍ਥਿ, ਸੋ ਤ੍ਵਂ ਕਂ ਕੇਲਾਯਸੀ’’ਤਿ ਏਵਂ ਨਿਸ੍ਸਤ੍ਤਪਚ੍ਚਵੇਕ੍ਖਣੇਨ ਚ. ਦ੍ਵੀਹੇਵਾਕਾਰੇਹਿ ਸਙ੍ਖਾਰਮਜ੍ਝਤ੍ਤਤਂ ਸਮੁਟ੍ਠਾਪੇਤਿ – ‘‘ਇਦਂ ਚੀਵਰਂ ਅਨੁਪੁਬ੍ਬੇਨ ਵਣ੍ਣਵਿਕਾਰਤਞ੍ਚੇਵ ਜਿਣ੍ਣਭਾਵਞ੍ਚ ਉਪਗਨ੍ਤ੍ਵਾ ਪਾਦਪੁਞ੍ਛਨਚੋਲ਼ਕਂ ਹੁਤ੍ਵਾ ਯਟ੍ਠਿਕੋਟਿਯਾ ਛਡ੍ਡਨੀਯਂ ਭਵਿਸ੍ਸਤਿ, ਸਚੇ ਪਨਸ੍ਸ ਸਾਮਿਕੋ ਭਵੇਯ੍ਯ, ਨਾਯਂ ਏਵਂ ਵਿਨਸ੍ਸਿਤੁਂ ਦਦੇਯ੍ਯਾ’’ਤਿ ਏਵਂ ਅਸ੍ਸਾਮਿਕਭਾਵਪਚ੍ਚਵੇਕ੍ਖਣੇਨ ਚ, ‘‘ਅਨਦ੍ਧਨਿਯਂ ਇਦਂ ਤਾਵਕਾਲਿਕ’’ਨ੍ਤਿ ਏਵਂ ਤਾਵਕਾਲਿਕਭਾਵਪਚ੍ਚਵੇਕ੍ਖਣੇਨ ਚ. ਯਥਾ ਚ ਚੀਵਰੇ, ਏਵਂ ਪਤ੍ਤਾਦੀਸੁਪਿ ਯੋਜਨਾ ਕਾਤਬ੍ਬਾ.

ਸਤ੍ਤਸਙ੍ਖਾਰਕੇਲਾਯਨਪੁਗ੍ਗਲਪਰਿਵਜ੍ਜਨਤਾਤਿ ਏਤ੍ਥ ਯੋ ਪੁਗ੍ਗਲੋ ਗਿਹਿ ਵਾ ਅਤ੍ਤਨੋ ਪੁਤ੍ਤਧੀਤਾਦਿਕੇ, ਪਬ੍ਬਜਿਤੋ ਵਾ ਅਤ੍ਤਨੋ ਅਨ੍ਤੇਵਾਸਿਕਸਮਾਨੁਪਜ੍ਝਾਯਕਾਦਿਕੇ ਮਮਾਯਤਿ, ਸਹਤ੍ਥਾਵ ਨੇਸਂ ਕੇਸਚ੍ਛੇਦਨ-ਸੂਚਿਕਮ੍ਮ-ਚੀਵਰਧੋਵਨ-ਰਜਨ-ਪਤ੍ਤਪਚਨਾਦੀਨਿ ਕਰੋਤਿ, ਮੁਹੁਤ੍ਤਮ੍ਪਿ ਅਪਸ੍ਸਨ੍ਤੋ ‘‘ਅਸੁਕੋ ਸਾਮਣੇਰੋ ਕੁਹਿਂ, ਅਸੁਕੋ ਦਹਰੋ ਕੁਹਿ’’ਨ੍ਤਿ ਭਨ੍ਤਮਿਗੋ ਵਿਯ ਇਤੋ ਚਿਤੋ ਚ ਆਲੋਕੇਤਿ, ਅਞ੍ਞੇਨ ਕੇਸਚ੍ਛੇਦਨਾਦੀਨਂ ਅਤ੍ਥਾਯ ‘‘ਮੁਹੁਤ੍ਤਂ ਤਾਵ ਅਸੁਕਂ ਪੇਸੇਥਾ’’ਤਿ ਯਾਚਿਯਮਾਨੋਪਿ ‘‘ਅਮ੍ਹੇਪਿ ਤਂ ਅਤ੍ਤਨੋ ਕਮ੍ਮਂ ਨ ਕਾਰੇਮ, ਤੁਮ੍ਹੇ ਨਂ ਗਹੇਤ੍ਵਾ ਕਿਲਮੇਸ੍ਸਥਾ’’ਤਿ ਨ ਦੇਤਿ, ਅਯਂ ਸਤ੍ਤਕੇਲਾਯਨੋ ਨਾਮ. ਯੋ ਪਨ ਚੀਵਰਪਤ੍ਤਥਾਲਕਕਤ੍ਤਰਯਟ੍ਠਿਆਦੀਨਿ ਮਮਾਯਤਿ, ਅਞ੍ਞਸ੍ਸ ਹਤ੍ਥੇਨ ਪਰਾਮਸਿਤੁਮ੍ਪਿ ਨ ਦੇਤਿ, ਤਾਵਕਾਲਿਕਂ ਯਾਚਿਤੋਪਿ ‘‘ਮਯਮ੍ਪਿ ਇਮਂ ਧਨਾਯਨ੍ਤਾ ਨ ਪਰਿਭੁਞ੍ਜਾਮ, ਤੁਮ੍ਹਾਕਂ ਕਿਂ ਦਸ੍ਸਾਮਾ’’ਤਿ ਵਦਤਿ, ਅਯਂ ਸਙ੍ਖਾਰਕੇਲਾਯਨੋ ਨਾਮ. ਯੋ ਪਨ ਤੇਸੁ ਦ੍ਵੀਸੁਪਿ ਵਤ੍ਥੂਸੁ ਮਜ੍ਝਤ੍ਤੋ ਉਦਾਸਿਨੋ, ਅਯਂ ਸਤ੍ਤਸਙ੍ਖਾਰਮਜ੍ਝਤ੍ਤੋ ਨਾਮ. ਇਤਿ ਅਯਂ ਉਪੇਕ੍ਖਾਸਮ੍ਬੋਜ੍ਝਙ੍ਗੋ ਏਵਰੂਪਂ ਸਤ੍ਤਸਙ੍ਖਾਰਕੇਲਾਯਨਪੁਗ੍ਗਲਂ ਆਰਕਾ ਪਰਿਵਜ੍ਜੇਨ੍ਤਸ੍ਸਾਪਿ, ਸਤ੍ਤਸਙ੍ਖਾਰਮਜ੍ਝਤ੍ਤਪੁਗ੍ਗਲਂ ਸੇਵਨ੍ਤਸ੍ਸਾਪਿ, ਠਾਨਨਿਸਜ੍ਜਾਦੀਸੁ ਤਦੁਪ੍ਪਾਦਨਤ੍ਥਂ ਨਿਨ੍ਨਪੋਣਪਬ੍ਭਾਰਚਿਤ੍ਤਸ੍ਸਾਪਿ ਉਪ੍ਪਜ੍ਜਤਿ. ਏਵਂ ਉਪ੍ਪਨ੍ਨਸ੍ਸ ਪਨਸ੍ਸ ਅਰਹਤ੍ਤਮਗ੍ਗੇਨ ਭਾਵਨਾਪਾਰਿਪੂਰੀ ਹੋਤਿ.

ਅਸੁਭਨਿਮਿਤ੍ਤਨ੍ਤਿ ਉਦ੍ਧੁਮਾਤਕਾਦਿਭੇਦਾ ਦਸ ਅਸੁਭਾਰਮ੍ਮਣਾ ਧਮ੍ਮਾ. ਯੋਨਿਸੋਮਨਸਿਕਾਰਬਹੁਲੀਕਾਰੋਤਿ ਏਤ੍ਥ ਪਨ ਯੋਨਿਸੋਮਨਸਿਕਾਰੋ ਨਾਮ ਉਪਾਯਮਨਸਿਕਾਰੋ, ਪਥਮਨਸਿਕਾਰੋ, ਉਪ੍ਪਾਦਕਮਨਸਿਕਾਰੋ. ਅਪਿਚ ਛ ਧਮ੍ਮਾ ਕਾਮਚ੍ਛਨ੍ਦਸ੍ਸ ਪਹਾਨਾਯ ਸਂਵਤ੍ਤਨ੍ਤਿ – ਅਸੁਭਨਿਮਿਤ੍ਤਸ੍ਸ ਉਗ੍ਗਹੋ, ਅਸੁਭਭਾਵਨਾਨੁਯੋਗੋ, ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਤਾ, ਭੋਜਨੇ ਮਤ੍ਤਞ੍ਞੁਤਾ, ਕਲ੍ਯਾਣਮਿਤ੍ਤਤਾ, ਸਪ੍ਪਾਯਕਥਾਤਿ.

ਦਸਵਿਧਞ੍ਹਿ ਅਸੁਭਨਿਮਿਤ੍ਤਂ ਉਗ੍ਗਣ੍ਹਨ੍ਤਸ੍ਸਾਪਿ ਕਾਮਚ੍ਛਨ੍ਦੋ ਪਹੀਯਤਿ, ਭਾਵੇਨ੍ਤਸ੍ਸਾਪਿ, ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਸ੍ਸਾਪਿ, ਚਤੁਨ੍ਨਂ ਪਞ੍ਚਨ੍ਨਂ ਆਲੋਪਾਨਂ ਓਕਾਸੇ ਸਤਿ ਉਦਕਂ ਪਿਵਿਤ੍ਵਾ ਯਾਪਨਸੀਲਤਾਯ ਭੋਜਨੇ ਮਤ੍ਤਞ੍ਞੁਨੋਪਿ. ਤੇਨੇਤਂ ਵੁਤ੍ਤਂ –

‘‘ਚਤ੍ਤਾਰੋ ਪਞ੍ਚ ਆਲੋਪੇ, ਅਭੁਤ੍ਵਾ ਉਦਕਂ ਪਿਵੇ;

ਅਲਂ ਫਾਸੁਵਿਹਾਰਾਯ, ਪਹਿਤਤ੍ਤਸ੍ਸ ਭਿਕ੍ਖੁਨੋ’’ਤਿ. (ਥੇਰਗਾ. ੯੮੩);

ਅਸੁਭਕਮ੍ਮਿਕਤਿਸ੍ਸਤ੍ਥੇਰਸਦਿਸੇ ਅਸੁਭਭਾਵਨਾਰਤੇ ਕਲ੍ਯਾਣਮਿਤ੍ਤੇ ਸੇਵਨ੍ਤਸ੍ਸਾਪਿ ਕਾਮਚ੍ਛਨ੍ਦੋ ਪਹੀਯਤਿ, ਠਾਨਨਿਸਜ੍ਜਾਦੀਸੁ ਦਸਅਸੁਭਨਿਮਿਤ੍ਤਾਯ-ਸਪ੍ਪਾਯਕਥਾਯਪਿ ਪਹੀਯਤਿ. ਤੇਨ ਵੁਤ੍ਤਂ ‘‘ਛ ਧਮ੍ਮਾ ਕਾਮਚ੍ਛਨ੍ਦਸ੍ਸ ਪਹਾਨਾਯ ਸਂਵਤ੍ਤਨ੍ਤੀ’’ਤਿ. ਇਮੇਹਿ ਪਨ ਛਹਿ ਧਮ੍ਮੇਹਿ ਪਹੀਨਸ੍ਸ ਕਾਮਚ੍ਛਨ੍ਦਸ੍ਸ ਅਰਹਤ੍ਤਮਗ੍ਗੇਨ ਆਯਤਿਂ ਅਨੁਪ੍ਪਾਦੋ ਹੋਤਿ.

ਮੇਤ੍ਤਾ ਚੇਤੋਵਿਮੁਤ੍ਤੀਤਿ ਏਤ੍ਥ ਮੇਤ੍ਤਾਤਿ ਵੁਤ੍ਤੇ ਅਪ੍ਪਨਾਪਿ ਉਪਚਾਰੋਪਿ ਵਟ੍ਟਤਿ, ਚੇਤੋਵਿਮੁਤ੍ਤੀਤਿ ਅਪ੍ਪਨਾਯੇਵ. ਯੋਨਿਸੋਮਨਸਿਕਾਰੋ ਵੁਤ੍ਤਲਕ੍ਖਣੋਵ. ਅਪਿਚ ਛ ਧਮ੍ਮਾ ਬ੍ਯਾਪਾਦਸ੍ਸ ਪਹਾਨਾਯ ਸਂਵਤ੍ਤਨ੍ਤਿ – ਮੇਤ੍ਤਾਨਿਮਿਤ੍ਤਸ੍ਸ ਉਗ੍ਗਹੋ, ਮੇਤ੍ਤਾਭਾਵਨਾਨੁਯੋਗੋ, ਕਮ੍ਮਸ੍ਸਕਤਾਪਚ੍ਚਵੇਕ੍ਖਣਤਾ, ਪਟਿਸਙ੍ਖਾਨਬਹੁਲਤਾ, ਕਲ੍ਯਾਣਮਿਤ੍ਤਤਾ, ਸਪ੍ਪਾਯਕਥਾਤਿ.

ਓਦਿਸ੍ਸਕਅਨੋਦਿਸ੍ਸਕਦਿਸਾਫਰਣਾਨਞ੍ਹਿ ਅਞ੍ਞਤਰਵਸੇਨ ਮੇਤ੍ਤਂ ਉਗ੍ਗਣ੍ਹਨ੍ਤਸ੍ਸਾਪਿ ਬ੍ਯਾਪਾਦੋ ਪਹੀਯਤਿ, ਤਥਾ ਓਧਿਸੋਅਨੋਧਿਸੋਦਿਸਾਫਰਣਵਸੇਨ ਮੇਤ੍ਤਂ ਭਾਵੇਨ੍ਤਸ੍ਸਾਪਿ. ‘‘ਤ੍ਵਂ ਏਤਸ੍ਸ ਕੁਦ੍ਧੋ ਕਿਂ ਕਰਿਸ੍ਸਸਿ? ਕਿਮਸ੍ਸ ਸੀਲਾਦੀਨਿ ਨਾਸੇਤੁਂ ਸਕ੍ਖਿਸ੍ਸਸਿ? ਨਨੁ ਤ੍ਵਂ ਅਤ੍ਤਨੋ ਕਮ੍ਮੇਨ ਆਗਨ੍ਤ੍ਵਾ ਅਤ੍ਤਨੋ ਕਮ੍ਮੇਨੇਵ ਗਮਿਸ੍ਸਸਿ? ਪਰਸ੍ਸ ਕੁਜ੍ਝਨਂ ਨਾਮ ਵੀਤਚ੍ਚਿਕਙ੍ਗਾਰਤਤ੍ਤਅਯਸਲਾਕਗੂਥਾਦੀਨਿ ਗਹੇਤ੍ਵਾ ਪਰਂ ਪਹਰਿਤੁਕਾਮਤਾਸਦਿਸਂ ਹੋਤਿ. ਏਸੋਪਿ ਤਵ ਕੁਦ੍ਧੋ ਕਿਂ ਕਰਿਸ੍ਸਤਿ? ਕਿਂ ਤੇ ਸੀਲਾਦੀਨਿ ਵਿਨਾਸੇਤੁਂ ਸਕ੍ਖਿਸ੍ਸਤਿ? ਏਸ ਅਤ੍ਤਨੋ ਕਮ੍ਮੇਨ ਆਗਨ੍ਤ੍ਵਾ ਅਤ੍ਤਨੋ ਕਮ੍ਮੇਨੇਵ ਗਮਿਸ੍ਸਤਿ? ਅਪ੍ਪਟਿਚ੍ਛਿਤਪਹੇਣਕਂ ਵਿਯ ਪਟਿਵਾਤਂ ਖਿਤ੍ਤਰਜੋਮੁਟ੍ਠਿ ਵਿਯ ਚ ਏਤਸ੍ਸੇਵੇਸ ਕੋਧੋ ਮਤ੍ਥਕੇ ਪਤਿਸ੍ਸਤੀ’’ਤਿ ਏਵਂ ਅਤ੍ਤਨੋ ਚ ਪਰਸ੍ਸ ਚ ਕਮ੍ਮਸ੍ਸਕਤਂ ਪਚ੍ਚਵੇਕ੍ਖਤੋਪਿ, ਉਭਯਕਮ੍ਮਸ੍ਸਕਤਂ ਪਚ੍ਚਵੇਕ੍ਖਿਤ੍ਵਾ ਪਟਿਸਙ੍ਖਾਨੇ ਠਿਤਸ੍ਸਾਪਿ, ਅਸ੍ਸਗੁਤ੍ਤਤ੍ਥੇਰਸਦਿਸੇ ਮੇਤ੍ਤਾਭਾਵਨਾਰਤੇ ਕਲ੍ਯਾਣਮਿਤ੍ਤੇ ਸੇਵਨ੍ਤਸ੍ਸਾਪਿ ਬ੍ਯਾਪਾਦੋ ਪਹੀਯਤਿ, ਠਾਨਨਿਸਜ੍ਜਾਦੀਸੁ ਮੇਤ੍ਤਾਨਿਸ੍ਸਿਤਸਪ੍ਪਾਯਕਥਾਯਪਿ ਪਹੀਯਤਿ. ਤੇਨ ਵੁਤ੍ਤਂ ‘‘ਛ ਧਮ੍ਮਾ ਬ੍ਯਾਪਾਦਸ੍ਸ ਪਹਾਨਾਯ ਸਂਵਤ੍ਤਨ੍ਤੀ’’ਤਿ. ਇਮੇਹਿ ਪਨ ਛਹਿ ਧਮ੍ਮੇਹਿ ਪਹੀਨਸ੍ਸ ਬ੍ਯਾਪਾਦਸ੍ਸ ਅਨਾਗਾਮਿਮਗ੍ਗੇਨ ਆਯਤਿਂ ਅਨੁਪ੍ਪਾਦੋ ਹੋਤਿ.

ਅਤ੍ਥਿ ਭਿਕ੍ਖਵੇ ਅਰਤੀਤਿਆਦਿ ਵੁਤ੍ਤਤ੍ਥਮੇਵ. ਅਪਿ ਚ ਛ ਧਮ੍ਮਾ ਥਿਨਮਿਦ੍ਧਸ੍ਸ ਪਹਾਨਾਯ ਸਂਵਤ੍ਤਨ੍ਤਿ – ਅਤਿਭੋਜਨੇ ਨਿਮਿਤ੍ਤਗ੍ਗਾਹੋ, ਇਰਿਯਾਪਥਸਮ੍ਪਰਿਵਤ੍ਤਨਤਾ, ਆਲੋਕਸਞ੍ਞਾਮਨਸਿਕਾਰੋ, ਅਬ੍ਭੋਕਾਸਵਾਸੋ, ਕਲ੍ਯਾਣਮਿਤ੍ਤਤਾ, ਸਪ੍ਪਾਯਕਥਾਤਿ.

ਆਹਰਹਤ੍ਥਕਂ, ਭੁਤ੍ਤਵਮਿਤਕਂ, ਤਤ੍ਰਵਟ੍ਟਕਂ, ਅਲਂਸਾਟਕਂ, ਕਾਕਮਾਸਕਭੋਜਨਂ ਭੁਞ੍ਜਿਤ੍ਵਾ ਰਤ੍ਤਿਟ੍ਠਾਨਦਿਵਾਟ੍ਠਾਨੇ ਨਿਸਿਨ੍ਨਸ੍ਸ ਹਿ ਸਮਣਧਮ੍ਮਂ ਕਰੋਤੋ ਥਿਨਮਿਦ੍ਧਂ ਮਹਾਹਤ੍ਥੀ ਵਿਯ ਓਤ੍ਥਰਨ੍ਤਂ ਆਗਚ੍ਛਤਿ, ਚਤੁਪਞ੍ਚਆਲੋਪਓਕਾਸਂ ਪਨ ਠਪੇਤ੍ਵਾ ਪਾਨੀਯਂ ਪਿਵਿਤ੍ਵਾ ਯਾਪਨਸੀਲਸ੍ਸ ਭਿਕ੍ਖੁਨੋ ਤਂ ਨ ਹੋਤੀਤਿ ਏਵਂ ਅਤਿਭੋਜਨੇ ਨਿਮਿਤ੍ਤਂ ਗਣ੍ਹਨ੍ਤਸ੍ਸਪਿ ਥਿਨਮਿਦ੍ਧਂ ਪਹੀਯਤਿ. ਯਸ੍ਮਿਂ ਇਰਿਯਾਪਥੇ ਥਿਨਮਿਦ੍ਧਂ ਓਕ੍ਕਮਤਿ, ਤਤੋ ਅਞ੍ਞਂ ਪਰਿਵਤ੍ਤੇਨ੍ਤਸ੍ਸਾਪਿ, ਰਤ੍ਤਿਂ ਚਨ੍ਦਾਲੋਕਦੀਪਾਲੋਕਉਕ੍ਕਾਲੋਕੇ ਦਿਵਾ ਸੂਰਿਯਾਲੋਕਂ ਮਨਸਿਕਰੋਨ੍ਤਸ੍ਸਾਪਿ, ਅਬ੍ਭੋਕਾਸੇ ਵਸਨ੍ਤਸ੍ਸਾਪਿ, ਮਹਾਕਸ੍ਸਪਤ੍ਥੇਰਸਦਿਸੇ ਪਹੀਨਥਿਨਮਿਦ੍ਧੇ ਕਲ੍ਯਾਣਮਿਤ੍ਤੇ ਸੇਵਨ੍ਤਸ੍ਸਾਪਿ ਥਿਨਮਿਦ੍ਧਂ ਪਹੀਯਤਿ, ਠਾਨਨਿਸਜ੍ਜਾਦੀਸੁ ਧੁਤਙ੍ਗਨਿਸ੍ਸਿਤਸਪ੍ਪਾਯਕਥਾਯਪਿ ਪਹੀਯਤਿ. ਤੇਨ ਵੁਤ੍ਤਂ ‘‘ਛ ਧਮ੍ਮਾ ਥਿਨਮਿਦ੍ਧਸ੍ਸ ਪਹਾਨਾਯ ਸਂਵਤ੍ਤਨ੍ਤੀ’’ਤਿ. ਇਮੇਹਿ ਪਨ ਛਹਿ ਧਮ੍ਮੇਹਿ ਪਹੀਨਸ੍ਸ ਥਿਨਮਿਦ੍ਧਸ੍ਸ ਅਰਹਤ੍ਤਮਗ੍ਗੇਨ ਆਯਤਿਂ ਅਨੁਪ੍ਪਾਦੋ ਹੋਤਿ.

ਅਤ੍ਥਿ ਭਿਕ੍ਖਵੇ ਚੇਤਸੋ ਵੂਪਸਮੋਤਿਆਦੀਨਿ ਵੁਤ੍ਤਤ੍ਥਾਨੇਵ. ਅਪਿਚ ਛ ਧਮ੍ਮਾ ਉਦ੍ਧਚ੍ਚਕੁਕ੍ਕੁਚ੍ਚਸ੍ਸ ਪਹਾਨਾਯ ਸਂਵਤ੍ਤਨ੍ਤਿ – ਬਹੁਸ੍ਸੁਤਤਾ, ਪਰਿਪੁਚ੍ਛਕਤਾ, ਵਿਨਯੇ ਪਕਤਞ੍ਞੁਤਾ, ਵੁਦ੍ਧਸੇਵਿਤਤਾ, ਕਲ੍ਯਾਣਮਿਤ੍ਤਤਾ, ਸਪ੍ਪਾਯਕਥਾਤਿ.

ਬਾਹੁਸਚ੍ਚੇਨਪਿ ਹਿ ਏਕਂ ਵਾ ਦ੍ਵੇ ਵਾ ਤਯੋ ਵਾ ਚਤ੍ਤਾਰੋ ਵਾ ਪਞ੍ਚ ਵਾ ਨਿਕਾਯੇ ਪਾਲ਼ਿਵਸੇਨ ਚ ਅਤ੍ਥਵਸੇਨ ਚ ਉਗ੍ਗਣ੍ਹਨ੍ਤਸ੍ਸਾਪਿ ਉਦ੍ਧਚ੍ਚਕੁਕ੍ਕੁਚ੍ਚਂ ਪਹੀਯਤਿ, ਕਪ੍ਪਿਯਾਕਪ੍ਪਿਯਪਰਿਪੁਚ੍ਛਾਬਹੁਲਸ੍ਸਾਪਿ, ਵਿਨਯਪਞ੍ਞਤ੍ਤਿਯਂ ਚਿਣ੍ਣਵਸੀਭਾਵਤਾਯ ਪਕਤਞ੍ਞੁਨੋਪਿ, ਵੁਦ੍ਧੇ ਮਹਲ੍ਲਕਤ੍ਥੇਰੇ ਉਪਸਙ੍ਕਮਨ੍ਤਸ੍ਸਾਪਿ, ਉਪਾਲਿਤ੍ਥੇਰਸਦਿਸੇ ਵਿਨਯਧਰੇ ਕਲ੍ਯਾਣਮਿਤ੍ਤੇ ਸੇਵਨ੍ਤਸ੍ਸਾਪਿ, ਉਦ੍ਧਚ੍ਚਕੁਕ੍ਕੁਚ੍ਚਂ ਪਹੀਯਤਿ, ਠਾਨਨਿਸਜ੍ਜਾਦੀਸੁ ਕਪ੍ਪਿਯਾਕਪ੍ਪਿਯਨਿਸ੍ਸਿਤਸਪ੍ਪਾਯਕਥਾਯਪਿ ਪਹੀਯਤਿ. ਤੇਨ ਵੁਤ੍ਤਂ ‘‘ਛ ਧਮ੍ਮਾ ਉਦ੍ਧਚ੍ਚਕੁਕ੍ਕੁਚ੍ਚਸ੍ਸ ਪਹਾਨਾਯ ਸਂਵਤ੍ਤਨ੍ਤੀ’’ਤਿ. ਇਮੇਹਿ ਪਨ ਛਹਿ ਧਮ੍ਮੇਹਿ ਪਹੀਨੇ ਉਦ੍ਧਚ੍ਚਕੁਕ੍ਕੁਚ੍ਚੇ ਉਦ੍ਧਚ੍ਚਸ੍ਸ ਅਰਹਤ੍ਤਮਗ੍ਗੇਨ, ਕੁਕ੍ਕੁਚ੍ਚਸ੍ਸ ਅਨਾਗਾਮਿਮਗ੍ਗੇਨ ਆਯਤਿਂ ਅਨੁਪ੍ਪਾਦੋ ਹੋਤੀਤਿ.

ਕੁਸਲਾਕੁਸਲਾ ਧਮ੍ਮਾਤਿਆਦੀਨਿਪਿ ਵੁਤ੍ਤਤ੍ਥਾਨੇਵ. ਅਪਿਚ ਛ ਧਮ੍ਮਾ ਵਿਚਿਕਿਚ੍ਛਾਯ ਪਹਾਨਾਯ ਸਂਵਤ੍ਤਨ੍ਤਿ – ਬਹੁਸ੍ਸੁਤਤਾ, ਪਰਿਪੁਚ੍ਛਕਤਾ, ਵਿਨਯੇ ਪਕਤਞ੍ਞੁਤਾ, ਅਧਿਮੋਕ੍ਖਬਹੁਲਤਾ, ਕਲ੍ਯਾਣਮਿਤ੍ਤਤਾ, ਸਪ੍ਪਾਯਕਥਾਤਿ.

ਬਾਹੁਸਚ੍ਚੇਨਪਿ ਹਿ ਏਕਂ ਵਾ…ਪੇ… ਪਞ੍ਚ ਵਾ ਨਿਕਾਯੇ ਪਾਲ਼ਿਵਸੇਨ ਚ ਅਤ੍ਥਵਸੇਨ ਚ ਉਗ੍ਗਣ੍ਹਨ੍ਤਸ੍ਸਾਪਿ ਵਿਚਿਕਿਚ੍ਛਾ ਪਹੀਯਤਿ, ਤੀਣਿ ਰਤਨਾਨਿ ਆਰਬ੍ਭ ਪਰਿਪੁਚ੍ਛਾਬਹੁਲਸ੍ਸਾਪਿ, ਵਿਨਯੇ ਚਿਣ੍ਣਵਸੀਭਾਵਸ੍ਸਾਪਿ, ਤੀਸੁ ਰਤਨੇਸੁ ਓਕਪ੍ਪਨਿਯਸਦ੍ਧਾਸਙ੍ਖਾਤਅਧਿਮੋਕ੍ਖਬਹੁਲਸ੍ਸਾਪਿ, ਸਦ੍ਧਾਧਿਮੁਤ੍ਤੇ ਵਕ੍ਕਲਿਤ੍ਥੇਰਸਦਿਸੇ ਕਲ੍ਯਾਣਮਿਤ੍ਤੇ ਸੇਵਨ੍ਤਸ੍ਸਾਪਿ ਵਿਚਿਕਿਚ੍ਛਾ ਪਹੀਯਤਿ, ਠਾਨਨਿਸਜ੍ਜਾਦੀਸੁ ਤਿਣ੍ਣਂ ਰਤਨਾਨਂ ਗੁਣਨਿਸ੍ਸਿਤਸਪ੍ਪਾਯਕਥਾਯਪਿ ਪਹੀਯਤਿ. ਤੇਨ ਵੁਤ੍ਤਂ ‘‘ਛ ਧਮ੍ਮਾ ਵਿਚਿਕਿਚ੍ਛਾਯ ਪਹਾਨਾਯ ਸਂਵਤ੍ਤਨ੍ਤੀ’’ਤਿ. ਇਮੇਹਿ ਪਨ ਛਹਿ ਧਮ੍ਮੇਹਿ ਪਹੀਨਾਯ ਵਿਚਿਕਿਚ੍ਛਾਯ ਸੋਤਾਪਤ੍ਤਿਮਗ੍ਗੇਨ ਆਯਤਿਂ ਅਨੁਪ੍ਪਾਦੋ ਹੋਤਿ. ਇਤਿ ਭਗਵਾ ਇਮਸ੍ਮਿਂ ਸੁਤ੍ਤੇ ਦੇਸਨਂ ਤੀਹਿ ਭਵੇਹਿ ਨਿਵਤ੍ਤੇਤ੍ਵਾ ਅਰਹਤ੍ਤੇਨ ਕੂਟਂ ਗਣ੍ਹਿ. ਦੇਸਨਾਪਰਿਯੋਸਾਨੇ ਪਞ੍ਚਸਤਾ ਭਿਕ੍ਖੂ ਅਰਹਤ੍ਤਂ ਪਾਪੁਣਿਂਸੁ.

੨. ਪਰਿਯਾਯਸੁਤ੍ਤਵਣ੍ਣਨਾ

੨੩੩. ਦੁਤਿਯੇ ਸਮ੍ਬਹੁਲਾਤਿ ਵਿਨਯਪਰਿਯਾਯੇਨ ਤਯੋ ਜਨਾ ਸਮ੍ਬਹੁਲਾਤਿ ਵੁਚ੍ਚਨ੍ਤਿ, ਤਤੋ ਪਰਂ ਸਙ੍ਘੋ. ਸੁਤ੍ਤਨ੍ਤਪਰਿਯਾਯੇਨ ਤਯੋ ਤਯੋ ਏਵ, ਤਤੋ ਉਦ੍ਧਂ ਸਮ੍ਬਹੁਲਾ. ਇਧ ਸੁਤ੍ਤਨ੍ਤਪਰਿਯਾਯੇਨ ਸਮ੍ਬਹੁਲਾਤਿ ਵੇਦਿਤਬ੍ਬਾ. ਪਿਣ੍ਡਾਯ ਪਵਿਸਿਂਸੂਤਿ ਪਿਣ੍ਡਾਯ ਪਵਿਟ੍ਠਾ. ਤੇ ਪਨ ਨ ਤਾਵ ਪਵਿਟ੍ਠਾ, ‘‘ਪਵਿਸਿਸ੍ਸਾਮਾ’’ਤਿ ਨਿਕ੍ਖਨ੍ਤਤ੍ਤਾ ਪਨ ਪਵਿਸਿਂਸੂਤਿ ਵੁਤ੍ਤਾ. ਯਥਾ ਕਿਂ? ਯਥਾ ‘‘ਗਾਮਂ ਗਮਿਸ੍ਸਾਮੀ’’ਤਿ ਨਿਕ੍ਖਨ੍ਤਪੁਰਿਸੋ ਤਂ ਗਾਮਂ ਅਪਤ੍ਤੋਪਿ ‘‘ਕਹਂ ਇਤ੍ਥਨ੍ਨਾਮੋ’’ਤਿ ਵੁਤ੍ਤੇ ‘‘ਗਾਮਂ ਗਤੋ’’ਤਿ ਵੁਚ੍ਚਤਿ, ਏਵਂ. ਪਰਿਬ੍ਬਾਜਕਾਨਂ ਆਰਾਮੋਤਿ ਜੇਤਵਨਸ੍ਸ ਅਵਿਦੂਰੇ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਆਰਾਮੋ ਅਤ੍ਥਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਸਮਣੋ ਆਵੁਸੋਤਿ ਆਵੁਸੋ ਤੁਮ੍ਹਾਕਂ ਸਤ੍ਥਾ ਸਮਣੋ ਗੋਤਮੋ.

ਮਯਮ੍ਪਿ ਖੋ ਆਵੁਸੋ ਸਾਵਕਾਨਂ ਏਵਂ ਧਮ੍ਮਂ ਦੇਸੇਮਾਤਿ ਤਿਤ੍ਥਿਯਾਨਂ ਸਮਯੇ ‘‘ਪਞ੍ਚ ਨੀਵਰਣਾ ਪਹਾਤਬ੍ਬਾ, ਸਤ੍ਤ ਬੋਜ੍ਝਙ੍ਗਾ ਭਾਵੇਤਬ੍ਬਾ’’ਤਿ ਏਤਂ ਨਤ੍ਥਿ. ਤੇ ਪਨ ਆਰਾਮਂ ਗਨ੍ਤ੍ਵਾ ਪਰਿਸਪਰਿਯਨ੍ਤੇ ਠਤ੍ਵਾ ਅਞ੍ਞਂ ਓਲੋਕੇਨ੍ਤੋ ਵਿਯ ਅਞ੍ਞਵਿਹਿਤਕਾ ਵਿਯ ਹੁਤ੍ਵਾ ਭਗਵਤੋ ਧਮ੍ਮਦੇਸਨਂ ਸੁਣਨ੍ਤਿ. ਤਤੋ ‘‘ਸਮਣੋ ਗੋਤਮੋ ‘ਇਦਂ ਪਜਹਥ ਇਦਂ ਭਾਵੇਥਾ’ਤਿ ਵਦਤੀ’’ਤਿ ਸਲ੍ਲਕ੍ਖੇਤ੍ਵਾ ਅਤ੍ਤਨੋ ਆਰਾਮਂ ਗਨ੍ਤ੍ਵਾ ਆਰਾਮਮਜ੍ਝੇ ਆਸਨਂ ਪਞ੍ਞਾਪੇਤ੍ਵਾ ਉਪਟ੍ਠਾਯਕਉਪਟ੍ਠਾਯਿਕਾਹਿ ਪਰਿਵੁਤਾ ਸੀਸਂ ਉਕ੍ਖਿਪਿਤ੍ਵਾ ਕਾਯਂ ਉਨ੍ਨਾਮੇਤ੍ਵਾ ਅਤ੍ਤਨੋ ਸਯਮ੍ਭੂਞਾਣੇਨ ਪਟਿਵਿਦ੍ਧਾਕਾਰਂ ਦਸ੍ਸੇਨ੍ਤਾ – ‘‘ਪਞ੍ਚ ਨੀਵਰਣਾ ਨਾਮ ਪਹਾਤਬ੍ਬਾ, ਸਤ੍ਤ ਬੋਜ੍ਝਙ੍ਗਾ ਨਾਮ ਭਾਵੇਤਬ੍ਬਾ’’ਤਿ ਕਥੇਨ੍ਤਿ.

ਇਧ ਨੋ ਆਵੁਸੋਤਿ ਏਤ੍ਥ ਇਧਾਤਿ ਇਮਸ੍ਮਿਂ ਪਞ੍ਞਾਪਨੇ. ਕੋ ਵਿਸੇਸੋਤਿ ਕਿਂ ਅਧਿਕਂ? ਕੋ ਅਧਿਪ੍ਪਯਾਸੋਤਿ ਕੋ ਅਧਿਕਪ੍ਪਯੋਗੋ? ਕਿਂ ਨਾਨਾਕਰਣਨ੍ਤਿ ਕਿਂ ਨਾਨਤ੍ਤਂ? ਧਮ੍ਮਦੇਸਨਾਯ ਵਾ ਧਮ੍ਮਦੇਸਨਨ੍ਤਿ ਯਦਿਦਂ ਸਮਣਸ੍ਸ ਵਾ ਗੋਤਮਸ੍ਸ ਧਮ੍ਮਦੇਸਨਾਯ ਸਦ੍ਧਿਂ ਅਮ੍ਹਾਕਂ ਧਮ੍ਮਦੇਸਨਂ, ਅਮ੍ਹਾਕਂ ਵਾ ਧਮ੍ਮਦੇਸਨਾਯ ਸਦ੍ਧਿਂ ਸਮਣਸ੍ਸ ਗੋਤਮਸ੍ਸ ਧਮ੍ਮਦੇਸਨਂ ਆਰਬ੍ਭ ਨਾਨਾਕਰਣਂ ਵੁਚ੍ਚੇਯ੍ਯ, ਤਂ ਕਿਨ੍ਨਾਮਾਤਿ ਵਦਨ੍ਤਿ. ਦੁਤਿਯਪਦੇਪਿ ਏਸੇਵ ਨਯੋ.

ਨੇਵ ਅਭਿਨਨ੍ਦਿਂਸੂਤਿ ‘‘ਏਵਮੇਵ’’ਨ੍ਤਿ ਨ ਸਮ੍ਪਟਿਚ੍ਛਿਂਸੁ. ਨਪ੍ਪਟਿਕ੍ਕੋਸਿਂਸੂਤਿ ‘‘ਨਯਿਦਂ ਏਵ’’ਨ੍ਤਿ ਨ ਪਟਿਸੇਧਿਂਸੁ. ਕਿਂ ਪਨ ਤੇ ਪਹੋਨ੍ਤਾ ਏਵਂ ਅਕਂਸੁ, ਉਦਾਹੁ ਅਪ੍ਪਹੋਨ੍ਤਾਤਿ? ਪਹੋਨ੍ਤਾ. ਨ ਹਿ ਤੇ ਏਤ੍ਤਕਂ ਕਥਂ ਕਥੇਤੁਂ ਨ ਸਕ੍ਕੋਨ੍ਤਿ ‘‘ਆਵੁਸੋ ਤੁਮ੍ਹਾਕਂ ਸਮਯੇ ਪਞ੍ਚ ਨੀਵਰਣਾ ਪਹਾਤਬ੍ਬਾ ਨਾਮ ਨਤ੍ਥਿ, ਸਤ੍ਤ ਬੋਜ੍ਝਙ੍ਗਾ ਭਾਵੇਤਬ੍ਬਾ ਨਾਮ ਨਤ੍ਥੀ’’ਤਿ. ਏਵਂ ਪਨ ਤੇਸਂ ਅਹੋਸਿ – ‘‘ਅਤ੍ਥਿ ਨੋ ਏਤਂ ਕਥਾਪਾਭਤਂ, ਮਯਂ ਏਤਂ ਸਤ੍ਥੁ ਆਰੋਚੇਸ੍ਸਾਮ, ਅਥ ਨੋ ਸਤ੍ਥਾ ਮਧੁਰਧਮ੍ਮਦੇਸਨਂ ਦੇਸੇਸ੍ਸਤੀ’’ਤਿ.