ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਸਂਯੁਤ੍ਤਨਿਕਾਯੇ

ਮਹਾਵਗ੍ਗ-ਅਟ੍ਠਕਥਾ

੧. ਮਗ੍ਗਸਂਯੁਤ੍ਤਂ

੧. ਅਵਿਜ੍ਜਾਵਗ੍ਗੋ

੧-੨. ਅਵਿਜ੍ਜਾਸੁਤ੍ਤਾਦਿਵਣ੍ਣਨਾ

੧-੨. ਮਹਾਵਗ੍ਗਸ੍ਸ ਪਠਮੇ ਪੁਬ੍ਬਙ੍ਗਮਾਤਿ ਸਹਜਾਤਵਸੇਨ ਚ ਉਪਨਿਸ੍ਸਯਵਸੇਨ ਚਾਤਿ ਦ੍ਵੀਹਾਕਾਰੇਹਿ ਪੁਬ੍ਬਙ੍ਗਮਾ. ਸਮਾਪਤ੍ਤਿਯਾਤਿ ਸਮਾਪਜ੍ਜਨਾਯ ਸਭਾਵਪਟਿਲਾਭਾਯ, ਉਪ੍ਪਤ੍ਤਿਯਾਤਿ ਅਤ੍ਥੋ. ਅਨ੍ਵਦੇਵ ਅਹਿਰਿਕਂ ਅਨੋਤ੍ਤਪ੍ਪਨ੍ਤਿ ਸਾ ਪਨੇਸਾ ਯਦੇਤਂ ਅਲਜ੍ਜਨਾਕਾਰਸਣ੍ਠਿਕਂ ਅਹਿਰਿਕਂ, ਅਭਾਯਨਾਕਾਰਸਣ੍ਠਿਤਞ੍ਚ ਅਨੋਤ੍ਤਪ੍ਪਂ, ਏਤਂ ਅਨੁਦੇਵ ਸਹੇਵ ਏਕਤੋਵ, ਨ ਵਿਨਾ ਤੇਨ ਉਪ੍ਪਜ੍ਜਤੀਤਿ ਅਤ੍ਥੋ. ਅਵਿਜ੍ਜਾਗਤਸ੍ਸਾਤਿ ਅਵਿਜ੍ਜਾਯ ਉਪਗਤਸ੍ਸ ਸਮਨ੍ਨਾਗਤਸ੍ਸ. ਮਿਚ੍ਛਾਦਿਟ੍ਠੀਤਿ ਅਯਾਥਾਵਦਿਟ੍ਠਿ ਅਨਿਯ੍ਯਾਨਿਕਦਿਟ੍ਠਿ. ਪਹੋਤੀਤਿ ਹੋਤਿ ਉਪ੍ਪਜ੍ਜਤਿ. ਮਿਚ੍ਛਾਸਙ੍ਕਪ੍ਪਾਦੀਸੁਪਿ ਅਯਾਥਾਵਅਨਿਯ੍ਯਾਨਿਕਵਸੇਨੇਵ ਮਿਚ੍ਛਾਭਾਵੋ ਵੇਦਿਤਬ੍ਬੋ. ਇਤਿ ਇਮਾਨਿ ਅਟ੍ਠਪਿ ਅਕੁਸਲਧਮ੍ਮਸਮਾਪਤ੍ਤਿਯਾ ਮਿਚ੍ਛਤ੍ਤਅਙ੍ਗਾਨਿ ਨਾਮ ਹੋਨ੍ਤਿ. ਤਾਨਿ ਪਨ ਨ ਏਕਕ੍ਖਣੇ ਸਬ੍ਬਾਨਿ ਲਬ੍ਭਨ੍ਤਿ, ਨਾਨਕ੍ਖਣੇ ਲਬ੍ਭਨ੍ਤਿ.

ਕਥਂ? ਯਦਾ ਹਿ ਦਿਟ੍ਠਿਸਮ੍ਪਯੁਤ੍ਤਚਿਤ੍ਤਂ ਕਾਯਵਿਞ੍ਞਤ੍ਤਿਂ ਸਮੁਟ੍ਠਾਪੇਨ੍ਤਂ ਉਪ੍ਪਜ੍ਜਤਿ, ਤਦਾ ਮਿਚ੍ਛਾਦਿਟ੍ਠਿ ਮਿਚ੍ਛਾਸਙ੍ਕਪ੍ਪੋ ਮਿਚ੍ਛਾਵਾਯਾਮੋ ਮਿਚ੍ਛਾਸਤਿ ਮਿਚ੍ਛਾਸਮਾਧਿ ਮਿਚ੍ਛਾਕਮ੍ਮਨ੍ਤੋਤਿ ਛ ਅਙ੍ਗਾਨਿ ਹੋਨ੍ਤਿ. ਯਦਾ ਦਿਟ੍ਠਿਵਿਪ੍ਪਯੁਤ੍ਤਂ, ਤਦਾ ਮਿਚ੍ਛਾਦਿਟ੍ਠਿਵਜ੍ਜਾਨਿ ਪਞ੍ਚ. ਯਦਾ ਤਾਨੇਵ ਦ੍ਵੇ ਵਚੀਵਿਞ੍ਞਤ੍ਤਿਂ ਸਮੁਟ੍ਠਾਪੇਨ੍ਤਿ, ਤਦਾ ਮਿਚ੍ਛਾਕਮ੍ਮਨ੍ਤਟ੍ਠਾਨੇ ਮਿਚ੍ਛਾਵਾਚਾਯ ਸਦ੍ਧਿਂ ਤਾਨੇਵ ਛ ਵਾ ਪਞ੍ਚ ਵਾ. ਅਯਂ ਆਜੀਵੋ ਨਾਮ ਕੁਪ੍ਪਮਾਨੋ ਕਾਯਵਚੀਦ੍ਵਾਰੇਸੁਯੇਵ ਅਞ੍ਞਤਰਸ੍ਮਿਂ ਕੁਪ੍ਪਤਿ, ਨ ਮਨੋਦ੍ਵਾਰੇ. ਤਸ੍ਮਾ ਯਦਾ ਆਜੀਵਸੀਸੇਨ ਤਾਨੇਵ ਚਿਤ੍ਤਾਨਿ ਕਾਯਵਚੀਵਿਞ੍ਞਤ੍ਤਿਯੋ ਸਮੁਟ੍ਠਾਪੇਨ੍ਤਿ, ਤਦਾ ਕਾਯਕਮ੍ਮਂ ਮਿਚ੍ਛਾਜੀਵੋ ਨਾਮ ਹੋਤਿ, ਤਥਾ ਵਚੀਕਮ੍ਮਨ੍ਤਿ ਮਿਚ੍ਛਾਜੀਵਸ੍ਸ ਵਸੇਨ ਤਾਨੇਵ ਛ ਵਾ ਪਞ੍ਚ ਵਾ. ਯਦਾ ਪਨ ਵਿਞ੍ਞਤ੍ਤਿਂ ਅਸਮੁਟ੍ਠਾਪੇਤ੍ਵਾ ਤਾਨਿ ਚਿਤ੍ਤਾਨਿ ਉਪ੍ਪਜ੍ਜਨ੍ਤਿ, ਤਦਾ ਮਿਚ੍ਛਾਦਿਟ੍ਠਿਮਿਚ੍ਛਾਸਙ੍ਕਪ੍ਪਮਿਚ੍ਛਾਵਾਯਾਮਮਿਚ੍ਛਾਸਤਿਮਿਚ੍ਛਾਸਮਾਧਿਵਸੇਨ ਪਞ੍ਚ ਵਾ, ਮਿਚ੍ਛਾਸਙ੍ਕਪ੍ਪਾਦਿਵਸੇਨ ਚਤ੍ਤਾਰਿ ਵਾ ਹੋਨ੍ਤੀਤਿ ਏਵਂ ਨ ਏਕਕ੍ਖਣੇ ਸਬ੍ਬਾਨਿ ਲਬ੍ਭਨ੍ਤਿ, ਨਾਨਕ੍ਖਣੇ ਲਬ੍ਭਨ੍ਤੀਤਿ.

ਸੁਕ੍ਕਪਕ੍ਖੇ ਵਿਜ੍ਜਾਤਿ ਕਮ੍ਮਸ੍ਸਕਤਞਾਣਂ. ਇਹਾਪਿ ਸਹਜਾਤਵਸੇਨ ਚ ਉਪਨਿਸ੍ਸਯਵਸੇਨ ਚਾਤਿ ਦ੍ਵੀਹਾਕਾਰੇਹਿ ਪੁਬ੍ਬਙ੍ਗਮਤਾ ਵੇਦਿਤਬ੍ਬਾ. ਹਿਰੋਤ੍ਤਪ੍ਪਨ੍ਤਿ ਹਿਰੀ ਚ ਓਤ੍ਤਪ੍ਪਞ੍ਚ. ਤਤ੍ਥ ਲਜ੍ਜਨਾਕਾਰਸਣ੍ਠਿਤਾ ਹਿਰੀ, ਭਾਯਨਾਕਾਰਸਣ੍ਠਿਤਂ ਓਤ੍ਤਪ੍ਪਂ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਵਿਸੁਦ੍ਧਿਮਗ੍ਗੇ ਵੁਤ੍ਤੋਵ. ਵਿਜ੍ਜਾਗਤਸ੍ਸਾਤਿ ਵਿਜ੍ਜਾਯ ਉਪਗਤਸ੍ਸ ਸਮਨ੍ਨਾਗਤਸ੍ਸ. ਵਿਦ੍ਦਸੁਨੋਤਿ ਵਿਦੁਨੋ ਪਣ੍ਡਿਤਸ੍ਸ. ਸਮ੍ਮਾਦਿਟ੍ਠੀਤਿ ਯਾਥਾਵਦਿਟ੍ਠਿ ਨਿਯ੍ਯਾਨਿਕਦਿਟ੍ਠਿ. ਸਮ੍ਮਾਕਮ੍ਮਨ੍ਤਾਦੀਸੁਪਿ ਏਸੇਵ ਨਯੋ. ਇਤਿ ਕੁਸਲਧਮ੍ਮਸਮਾਪਤ੍ਤਿਯਾ ਇਮਾਨਿ ਅਟ੍ਠਙ੍ਗਾਨਿ ਹੋਨ੍ਤਿ, ਤਾਨਿ ਲੋਕਿਯਮਗ੍ਗਕ੍ਖਣੇ ਨ ਏਕਤੋ ਸਬ੍ਬਾਨਿ ਲਬ੍ਭਨ੍ਤਿ, ਲੋਕੁਤ੍ਤਰਮਗ੍ਗਕ੍ਖਣੇ ਪਨ ਲਬ੍ਭਨ੍ਤਿ. ਤਾਨਿ ਚ ਖੋ ਪਠਮਜ੍ਝਾਨਿਕਮਗ੍ਗੇ, ਦੁਤਿਯਜ੍ਝਾਨਿਕਾਦੀਸੁ ਪਨ ਸਮ੍ਮਾਸਙ੍ਕਪ੍ਪਵਜ੍ਜਾਨਿ ਸਤ੍ਤੇਵ ਹੋਨ੍ਤਿ.

ਤਤ੍ਥ ਯੋ ਏਵਂ ਵਦੇਯ੍ਯ ‘‘ਯਸ੍ਮਾ ਮਜ੍ਝਿਮਨਿਕਾਯਮ੍ਹਿ ਮਹਾਸਲ਼ਾਯਤਨਿਕਸੁਤ੍ਤੇ (ਮ. ਨਿ. ੩.੪੩੧) ‘ਯਾ ਤਥਾਭੂਤਸ੍ਸ ਦਿਟ੍ਠਿ, ਸਾਸ੍ਸ ਹੋਤਿ ਸਮ੍ਮਾਦਿਟ੍ਠਿ. ਯੋ ਤਥਾਭੂਤਸ੍ਸ, ਸਙ੍ਕਪ੍ਪੋ, ਸ੍ਵਾਸ੍ਸ ਹੋਤਿ ਸਮ੍ਮਾਸਙ੍ਕਪ੍ਪੋ. ਯੋ ਤਥਾਭੂਤਸ੍ਸ ਵਾਯਾਮੋ, ਸ੍ਵਾਸ੍ਸ ਹੋਤਿ ਸਮ੍ਮਾਵਾਯਾਮੋ. ਯਾ ਤਥਾਭੂਤਸ੍ਸ ਸਤਿ, ਸ੍ਵਾਸ੍ਸ ਹੋਤਿ ਸਮ੍ਮਾਸਤਿ. ਯੋ ਤਥਾਭੂਤਸ੍ਸ ਸਮਾਧਿ, ਸ੍ਵਾਸ੍ਸ ਹੋਤਿ ਸਮ੍ਮਾਸਮਾਧਿ. ਪੁਬ੍ਬੇਵ ਖੋ ਪਨਸ੍ਸ ਕਾਯਕਮ੍ਮਂ ਵਚੀਕਮ੍ਮਂ ਆਜੀਵੋ ਚ ਸੁਪਰਿਸੁਦ੍ਧੋ’ਤਿ ਵੁਤ੍ਤਂ ਤਸ੍ਮਾ ਪਞ੍ਚਙ੍ਗਿਕੋਪਿ ਲੋਕੁਤ੍ਤਰਮਗ੍ਗੋ ਹੋਤੀ’’ਤਿ ਸੋ ਵਤ੍ਤਬ੍ਬੋ – ਤਸ੍ਮਿਂਯੇਵ ਸੁਤ੍ਤੇ ‘‘ਏਵਮਸ੍ਸਾਯਂ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਭਾਵਨਾਪਾਰਿਪੂਰਿਂ ਗਚ੍ਛਤੀ’’ਤਿ ਇਦਂ ਕਸ੍ਮਾ ਨ ਪਸ੍ਸਸਿ? ਯਂ ਪਨੇਤਂ ‘‘ਪੁਬ੍ਬੇਵ ਖੋ ਪਨਸ੍ਸਾ’’ਤਿ ਵੁਤ੍ਤਂ, ਤਂ ਪਬ੍ਬਜਿਤਦਿਵਸਤੋ ਪਟ੍ਠਾਯ ਪਰਿਸੁਦ੍ਧਭਾਵਦਸ੍ਸਨਤ੍ਥਂ. ਪਬ੍ਬਜਿਤਦਿਵਸਤੋ ਪਟ੍ਠਾਯ ਹਿ ਪਰਿਸੁਦ੍ਧਾਨਿ ਕਾਯਕਮ੍ਮਾਦੀਨਿ ਲੋਕੁਤ੍ਤਰਮਗ੍ਗਕ੍ਖਣੇ ਅਤਿਪਰਿਸੁਦ੍ਧਾਨਿ ਹੋਨ੍ਤੀਤਿ ਅਯਮਤ੍ਥੋ ਦੀਪਿਤੋ.

ਯਮ੍ਪਿ ਅਭਿਧਮ੍ਮੇ ਵੁਤ੍ਤਂ ‘‘ਤਸ੍ਮਿਂ ਖੋ ਪਨ ਸਮਯੇ ਪਞ੍ਚਙ੍ਗਿਕੋ ਮਗ੍ਗੋ ਹੋਤੀ’’ਤਿ (ਵਿਭ. ੨੧੨), ਤਂ ਏਕਂ ਕਿਚ੍ਚਨ੍ਤਰਂ ਦਸ੍ਸੇਤੁਂ ਵੁਤ੍ਤਂ. ਯਸ੍ਮਿਞ੍ਹਿ ਕਾਲੇ ਮਿਚ੍ਛਾਕਮ੍ਮਨ੍ਤਂ ਪਹਾਯ ਸਮ੍ਮਾਕਮ੍ਮਨ੍ਤਂ ਪੂਰੇਤਿ, ਤਸ੍ਮਿਂ ਕਾਲੇ ਮਿਚ੍ਛਾਵਾਚਾ ਵਾ ਮਿਚ੍ਛਾਜੀਵੋ ਵਾ ਨ ਹੋਤਿ, ਦਿਟ੍ਠਿ ਸਙ੍ਕਪ੍ਪੋ ਵਾਯਾਮੋ ਸਤਿ ਸਮਾਧੀਤਿ ਇਮੇਸੁਯੇਵ ਪਞ੍ਚਸੁ ਕਾਰਕਙ੍ਗੇਸੁ ਸਮ੍ਮਾਕਮ੍ਮਨ੍ਤੋ ਪੂਰਤਿ. ਵਿਰਤਿਵਸੇਨ ਹਿ ਸਮ੍ਮਾਕਮ੍ਮਨ੍ਤੋ ਪੂਰਤਿ ਨਾਮ. ਸਮ੍ਮਾਵਾਚਾਸਮ੍ਮਾਆਜੀਵੇਸੁਪਿ ਏਸੇਵ ਨਯੋ. ਇਤਿ ਇਮਂ ਕਿਚ੍ਚਨ੍ਤਰਂ ਦਸ੍ਸੇਤੁਂ ਏਵਂ ਵੁਤ੍ਤਂ. ਲੋਕਿਯਮਗ੍ਗਕ੍ਖਣੇ ਚ ਪਞ੍ਚੇਵ ਹੋਨ੍ਤਿ, ਵਿਰਤਿ ਪਨ ਅਨਿਯਤਾ. ਤਸ੍ਮਾ ‘‘ਛਅਙ੍ਗਿਕੋ’’ਤਿ ਅਵਤ੍ਵਾ ‘‘ਪਞ੍ਚਙ੍ਗਿਕੋ’’ਤ੍ਵੇਵ ਵੁਤ੍ਤਂ. ‘‘ਯਾ ਚ, ਭਿਕ੍ਖਵੇ, ਅਰਿਯਚਿਤ੍ਤਸ੍ਸ ਅਨਾਸਵਚਿਤ੍ਤਸ੍ਸ ਅਰਿਯਮਗ੍ਗਸਮਙ੍ਗਿਨੋ ਅਰਿਯਮਗ੍ਗਂ ਭਾਵਯਤੋ ਤੀਹਿ ਕਾਯਦੁਚ੍ਚਰਿਤੇਹਿ ਆਰਤਿ ਵਿਰਤਿ ਪਟਿਵਿਰਤਿ ਵੇਰਮਣੀ ਅਕਿਰਿਯਾ ਅਕਰਣਂ, ਅਯਂ ਭਿਕ੍ਖਵੇ ਸਮ੍ਮਾਕਮ੍ਮਨ੍ਤੋ ਅਰਿਯੋ ਅਨਾਸਵੋ ਲੋਕੁਤ੍ਤਰਮਗ੍ਗੋ’’ਤਿ (ਮ. ਨਿ. ੩.੧੩੯). ਏਵਂ ਪਨ ਮਹਾਚਤ੍ਤਾਲੀਸਕਸੁਤ੍ਤਾਦੀਸੁ ਅਨੇਕੇਸੁ ਸੁਤ੍ਤੇਸੁ ਸਮ੍ਮਾਕਮ੍ਮਨ੍ਤਾਦੀਨਞ੍ਚ ਲੋਕੁਤ੍ਤਰਮਗ੍ਗਸ੍ਸ ਅਙ੍ਗਭਾਵਸਿਦ੍ਧਿਤੋ ਅਟ੍ਠਙ੍ਗਿਕੋਵ ਲੋਕੁਤ੍ਤਰਮਗ੍ਗੋ ਹੋਤੀਤਿ ਵੇਦਿਤਬ੍ਬੋਤਿ. ਇਮਸ੍ਮਿਂ ਸੁਤ੍ਤੇ ਅਯਂ ਅਟ੍ਠਙ੍ਗਿਕੋ ਮਗ੍ਗੋ ਲੋਕਿਯਲੋਕੁਤ੍ਤਰਮਿਸ੍ਸਕੋਵ ਕਥਿਤੋ. ਦੁਤਿਯਂ ਕੋਸਲਸਂਯੁਤ੍ਤੇ ਵੁਤ੍ਤਮੇਵ.

੩. ਸਾਰਿਪੁਤ੍ਤਸੁਤ੍ਤਵਣ੍ਣਨਾ

੩. ਤਤਿਯੇ ਸਕਲਮਿਦਂ ਭਨ੍ਤੇਤਿ ਆਨਨ੍ਦਤ੍ਥੇਰੋ ਸਾਵਕਪਾਰਮੀਞਾਣਸ੍ਸ ਮਤ੍ਥਕਂ ਅਪ੍ਪਤ੍ਤਤਾਯ ਸਕਲਮ੍ਪਿ ਮਗ੍ਗਬ੍ਰਹ੍ਮਚਰਿਯਂ ਕਲ੍ਯਾਣਮਿਤ੍ਤਸਨ੍ਨਿਸ੍ਸਯੇਨ ਲਬ੍ਭਤੀਤਿ ਨ ਅਞ੍ਞਾਸਿ, ਧਮ੍ਮਸੇਨਾਪਤਿ ਪਨ ਸਾਵਕਪਾਰਮੀਞਾਣਸ੍ਸ ਮਤ੍ਥਕੇ ਠਿਤਤ੍ਤਾ ਅਞ੍ਞਾਸਿ, ਤਸ੍ਮਾ ਏਵਮਾਹ. ਤੇਨੇਵਸ੍ਸ ਭਗਵਾ ਸਾਧੁ ਸਾਧੂਤਿ ਸਾਧੁਕਾਰਮਦਾਸਿ.

੪. ਜਾਣੁਸ੍ਸੋਣਿਬ੍ਰਾਹ੍ਮਣਸੁਤ੍ਤਵਣ੍ਣਨਾ

੪. ਚਤੁਤ੍ਥੇ ਸਬ੍ਬਸੇਤੇਨ ਵਲ਼ਵਾਭਿਰਥੇਨਾਤਿ ਸਕਲਸੇਤੇਨ ਚਤੂਹਿ ਵਲ਼ਵਾਹਿ ਯੁਤ੍ਤਰਥੇਨ. ਸੋ ਕਿਰ ਸਬ੍ਬੋ ਸਚਕ੍ਕਪਞ੍ਜਰਕੁਬ੍ਬਰੋ ਰਜਤਪਰਿਕ੍ਖਿਤ੍ਤੋ ਹੋਤਿ. ਰਥੋ ਚ ਨਾਮੇਸ ਦੁਵਿਧੋ ਹੋਤਿ – ਯੋਧਰਥੋ, ਅਲਙ੍ਕਾਰਰਥੋਤਿ. ਤਤ੍ਥ ਯੋਧਰਥੋ ਚਤੁਰਸ੍ਸਸਣ੍ਠਾਨੋ ਹੋਤਿ ਨਾਤਿਮਹਾ ਦ੍ਵਿਨ੍ਨਂ ਤਿਣ੍ਣਂ ਵਾ ਜਨਾਨਂ ਗਹਣਸਮਤ੍ਥੋ. ਅਲਙ੍ਕਾਰਰਥੋ ਮਹਾ ਹੋਤਿ ਦੀਘਤੋ ਦੀਘੋ ਪੁਥੁਲਤੋ ਪੁਥੁਲੋ ਚ, ਤਤ੍ਥ ਛਤ੍ਤਗ੍ਗਾਹਕੋ ਵਾਲਬੀਜਨਿਗ੍ਗਾਹਕੋ ਤਾਲਵਣ੍ਟਗ੍ਗਾਹਕੋਤਿ ਏਵਂ ਅਟ੍ਠ ਵਾ ਦਸ ਵਾ ਸੁਖੇਨੇਵ ਠਾਤੁਂ ਵਾ ਨਿਸੀਦਿਤੁਂ ਵਾ ਨਿਪਜ੍ਜਿਤੁਂ ਵਾ ਸਕ੍ਕੋਨ੍ਤਿ. ਅਯਮ੍ਪਿ ਅਲਙ੍ਕਾਰਰਥੋਯੇਵ.

ਸੇਤਾ ਸੁਦਂ ਅਸ੍ਸਾਤਿ ਤਾ ਵਲ਼ਵਾ ਪਕਤਿਯਾ ਸੇਤਵਣ੍ਣਾਵ. ਸੇਤਾਲਙ੍ਕਾਰਾਤਿ ਪਸਾਧਨਂ ਤਾਸਂ ਰਜਤਮਯਂ ਅਹੋਸਿ. ਸੇਤੋ ਰਥੋਤਿ ਰਥੋਪਿ ਵੁਤ੍ਤਨਯੇਨੇਵ ਰਜਤਪਰਿਕ੍ਖਿਤ੍ਤਤ੍ਤਾ ਤਤ੍ਥ ਤਤ੍ਥ ਦਨ੍ਤਕਮ੍ਮਖਚਿਤਤ੍ਤਾ ਚ ਸੇਤੋਵ. ਸੇਤਪਰਿਵਾਰੋਤਿ ਯਥਾ ਅਞ੍ਞੇ ਰਥਾ ਸੀਹਚਮ੍ਮਪਰਿਵਾਰਾਪਿ ਹੋਨ੍ਤਿ, ਬ੍ਯਗ੍ਘਚਮ੍ਮਪਰਿਵਾਰਾਪਿ ਪਣ੍ਡੁਕਮ੍ਬਲਪਰਿਵਾਰਾਪਿ ਹੋਨ੍ਤਿ, ਨ ਏਵਂ ਏਸ. ਏਸ ਪਨ ਘਨਦੁਕੂਲੇਨ ਪਰਿਵਾਰਿਤੋ ਅਹੋਸਿ. ਸੇਤਾ ਰਸ੍ਮਿਯੋਤਿ ਰਸ੍ਮਿਯੋਪਿ ਰਜਤਪਨਾਲ਼ਿਸੁਪਰਿਕ੍ਖਿਤ੍ਤਾ. ਸੇਤਾ ਪਤੋਦਲਟ੍ਠੀਤਿ ਪਤੋਦਲਟ੍ਠਿਪਿ ਰਜਤਪਰਿਕ੍ਖਿਤ੍ਤਾ.

ਸੇਤਂ ਛਤ੍ਤਨ੍ਤਿ ਰਥਮਜ੍ਝੇ ਉਸ੍ਸਾਪਿਤਛਤ੍ਤਮ੍ਪਿ ਸੇਤਮੇਵ ਅਹੋਸਿ. ਸੇਤਂ ਉਣ੍ਹੀਸਨ੍ਤਿ ਅਟ੍ਠਙ੍ਗੁਲਵਿਤ੍ਥਾਰੋ ਰਜਤਮਯੋ ਉਣ੍ਹੀਸਪਟ੍ਟੋ ਸੇਤੋ. ਸੇਤਾਨਿ ਵਤ੍ਥਾਨੀਤਿ ਵਤ੍ਥਾਨਿਪਿ ਸੇਤਾਨਿ ਫੇਣਪੁਞ੍ਜਵਣ੍ਣਾਨਿ. ਤੇਸੁ ਨਿਵਾਸਨਂ ਪਞ੍ਚਸਤਗ੍ਘਨਕਂ, ਉਤ੍ਤਰਾਸਙ੍ਗੋ ਸਹਸ੍ਸਗ੍ਘਨਕੋ. ਸੇਤਾ ਉਪਾਹਨਾਤਿ ਉਪਾਹਨਾ ਨਾਮ ਮਗ੍ਗਾਰੁਲ਼੍ਹਸ੍ਸ ਵਾ ਹੋਨ੍ਤਿ ਅਟਵਿਂ ਵਾ ਪਵਿਸਨ੍ਤਸ੍ਸ. ਅਯਂ ਪਨ ਰਥਂ ਅਭਿਰੁਲ਼੍ਹੋ, ਤੇਨਸ੍ਸ ਤਦਨੁਚ੍ਛਵਿਕੋ ਰਜਤਪਟਿਸੇਵਿਤੋ ਪਾਦਾਲਙ੍ਕਾਰੋ ਨਾਮ ਏਸ ਏਵਂ ਵੁਤ੍ਤੋਤਿ ਵੇਦਿਤਬ੍ਬੋ. ਸੇਤਾਯ ਸੁਦਂ ਵਾਲਬੀਜਨਿਯਾਤਿ ਫਲਿਕਮਯਦਣ੍ਡਾਯ ਸੇਤਚਮਰਵਾਲਬੀਜਨਿਯਾ. ਨ ਕੇਵਲਞ੍ਚ ਏਤ੍ਤਕਮੇਵਸ੍ਸ ਸੇਤਂ ਅਹੋਸਿ, ਸੋ ਪਨ ਬ੍ਰਾਹ੍ਮਣੋ ਸੇਤਵਿਲੇਪਨਂ ਵਿਲਿਮ੍ਪਿ, ਸੇਤਮਾਲਂ ਪਿਲ਼ਨ੍ਧਿ, ਦਸਸੁ ਅਙ੍ਗੁਲੀਸੁ ਅਙ੍ਗੁਲਿਮੁਦ੍ਦਿਕਾ ਕਣ੍ਣੇਸੁ ਕੁਣ੍ਡਲਾਨੀਤਿ ਏਵਮਾਦਿ ਅਲਙ੍ਕਾਰੋਪਿਸ੍ਸ ਰਜਤਮਯੋਵ ਅਹੋਸਿ. ਪਰਿਵਾਰਬ੍ਰਾਹ੍ਮਣਾਪਿਸ੍ਸ ਦਸਸਹਸ੍ਸਮਤ੍ਤਾ ਤਥੇਵ ਸੇਤਵਤ੍ਥਵਿਲੇਪਨਮਾਲਾਲਙ੍ਕਾਰਾ ਅਹੇਸੁਂ.

ਯਂ ਪਨੇਤਂ ਸਾਵਤ੍ਥਿਯਾ ਨਿਯ੍ਯਾਯਨ੍ਤਨ੍ਤਿ ਵੁਤ੍ਤਂ, ਤਤ੍ਰਾਯਂ ਨਿਯ੍ਯਾਯਨਵਿਭਾਵਨਾ – ਸੋ ਕਿਰ ਛਨ੍ਨਂ ਛਨ੍ਨਂ ਮਾਸਾਨਂ ਏਕਵਾਰਂ ਨਗਰਂ ਪਦਕ੍ਖਿਣਂ ਕਰੋਤਿ – ‘‘ਇਤੋ ਏਤ੍ਤਕੇਹਿ ਦਿਵਸੇਹਿ ਨਗਰਂ ਪਦਕ੍ਖਿਣਂ ਕਰਿਸ੍ਸਤੀ’’ਤਿ ਪੁਰੇਤਰਮੇਵ ਘੋਸਨਾ ਕਯਿਰਤਿ. ਤਂ ਸੁਤ੍ਵਾ ਯੇ ਨਗਰਤੋ ਨ ਪਕ੍ਕਨ੍ਤਾ, ਤੇ ਨ ਪਕ੍ਕਮਨ੍ਤਿ. ਯੇਪਿ ਪਕ੍ਕਨ੍ਤਾ, ਤੇਪਿ ‘‘ਪੁਞ੍ਞਵਤੋ ਸਿਰਿਸਮ੍ਪਤ੍ਤਿਂ ਪਸ੍ਸਿਸ੍ਸਾਮਾ’’ਤਿ ਆਗਚ੍ਛਨ੍ਤਿ. ਯਂ ਦਿਵਸਂ ਬ੍ਰਾਹ੍ਮਣੋ ਨਗਰਂ ਅਨੁਵਿਚਰਤਿ, ਤਦਾ ਪਾਤੋਵ ਨਗਰਵੀਥਿਯੋ ਸਮ੍ਮਜ੍ਜਿਤ੍ਵਾ ਵਾਲਿਕਂ ਓਕਿਰਿਤ੍ਵਾ ਲਾਜਪਞ੍ਚਮੇਹਿ ਪੁਪ੍ਫੇਹਿ ਵਿਪ੍ਪਕਿਰਿਤ੍ਵਾ ਪੁਣ੍ਣਘਟੇ ਠਪੇਤ੍ਵਾ ਕਦਲਿਯੋ ਚ ਧਜੇ ਚ ਉਸ੍ਸਾਪੇਤ੍ਵਾ ਸਕਲਨਗਰਂ ਧੂਪਿਤਵਾਸਿਤਂ ਕਰੋਨ੍ਤਿ.

ਬ੍ਰਾਹ੍ਮਣੋ ਪਾਤੋਵ ਸੀਸਂ ਨ੍ਹਾਯਿਤ੍ਵਾ ਪੁਰੇਭਤ੍ਤਂ ਭੁਞ੍ਜਿਤ੍ਵਾ ਵੁਤ੍ਤਨਯੇਨੇਵ ਸੇਤਵਤ੍ਥਾਦੀਹਿ ਅਤ੍ਤਾਨਂ ਅਲਙ੍ਕਰਿਤ੍ਵਾ ਪਾਸਾਦਾ ਓਰੁਯ੍ਹ ਰਥਂ ਅਭਿਰੁਹਤਿ. ਅਥ ਨਂ ਤੇ ਬ੍ਰਾਹ੍ਮਣਾ ਸਬ੍ਬਸੇਤਵਤ੍ਥਵਿਲੇਪਨਮਾਲਾਲਙ੍ਕਾਰਾ ਸੇਤਚ੍ਛਤ੍ਤਾਨਿ ਗਹੇਤ੍ਵਾ ਪਰਿਵਾਰੇਨ੍ਤਿ. ਤਤੋ ਮਹਾਜਨਸ੍ਸ ਸਨ੍ਨਿਪਾਤਤ੍ਥਂ ਪਠਮਂਯੇਵ ਤਰੁਣਦਾਰਕਾਨਂ ਫਲਾਫਲਾਨਿ ਵਿਕਿਰਨ੍ਤਿ, ਤਦਨਨ੍ਤਰਂ ਮਾਸਕਰੂਪਾਦੀਨਿ, ਤਦਨਨ੍ਤਰਂ ਕਹਾਪਣੇ ਵਿਕਿਰਨ੍ਤਿ. ਮਹਾਜਨੋ ਸਨ੍ਨਿਪਤਤਿ, ਉਕ੍ਕੁਟ੍ਠਿਯੋ ਚੇਵ ਚੇਲੁਕ੍ਖੇਪਾ ਚ ਵਤ੍ਤਨ੍ਤਿ. ਅਥ ਬ੍ਰਾਹ੍ਮਣੋ ਮਙ੍ਗਲਿਕਸੋਵਤ੍ਥਿਕਾਦੀਸੁ ਮਙ੍ਗਲਾਨਿ ਚੇਵ ਸੁਵਤ੍ਥਿਯੋ ਚ ਕਰੋਨ੍ਤੇਸੁ ਮਹਾਸਮ੍ਪਤ੍ਤਿਯਾ ਨਗਰਂ ਅਨੁਵਿਚਰਤਿ. ਪੁਞ੍ਞਵਨ੍ਤਾ ਮਨੁਸ੍ਸਾ ਏਕਭੂਮਿਕਾਦਿਪਾਸਾਦੇ ਆਰੁਯ੍ਹ ਸੁਕਪਤ੍ਤਸਦਿਸਾਨਿ ਵਾਤਪਾਨਕਵਾਟਾਨਿ ਵਿਵਰਿਤ੍ਵਾ ਓਲੋਕੇਨ੍ਤਿ. ਬ੍ਰਾਹ੍ਮਣੋਪਿ ਅਤ੍ਤਨੋ ਯਸਸਿਰਿਸਮ੍ਪਤ੍ਤਿਯਾ ਨਗਰਂ ਅਜ੍ਝੋਤ੍ਥਰਨ੍ਤੋ ਵਿਯ ਦਕ੍ਖਿਣਦ੍ਵਾਰਾਭਿਮੁਖੋ ਹੋਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ.

ਤਮੇਨਂ ਜਨੋ ਦਿਸ੍ਵਾਤਿ ਮਹਾਜਨੋ ਤਂ ਰਥਂ ਦਿਸ੍ਵਾ. ਬ੍ਰਹ੍ਮਨ੍ਤਿ ਸੇਟ੍ਠਾਧਿਵਚਨਮੇਤਂ. ਬ੍ਰਹ੍ਮਂ ਵਤ ਭੋ ਯਾਨਨ੍ਤਿ ਸੇਟ੍ਠਯਾਨਸਦਿਸਂ ਵਤ ਭੋ ਯਾਨਨ੍ਤਿ ਅਯਮੇਤ੍ਥ ਅਤ੍ਥੋ. ਇਮਸ੍ਸੇਵ ਖੋ ਏਤਨ੍ਤਿ, ਆਨਨ੍ਦ, ਮਨੁਸ੍ਸਾ ਨਾਮ ਵਣ੍ਣਭਾਣਕਾਨਂ ਧਨਂ ਦਤ੍ਵਾ ਅਤ੍ਤਨੋ ਦਾਰਿਕਾਨਂ ਵਣ੍ਣਗੀਤਂ ਗਾਯਾਪੇਨ੍ਤਿ ‘‘ਅਭਿਰੂਪੋ ਹੋਤਿ ਦਸ੍ਸਨੀਯੋ ਮਹਦ੍ਧਨੋ ਮਹਾਭੋਗੋ’’ਤਿ, ਨ ਚ ਤੇਨ ਵਣ੍ਣਭਣਨਮਤ੍ਤੇਨ ਅਭਿਰੂਪਾ ਵਾ ਹੋਨ੍ਤਿ ਮਹਦ੍ਧਨਾ ਵਾ, ਏਵਮੇਵ ਮਹਾਜਨੋ ਬ੍ਰਾਹ੍ਮਣਸ੍ਸ ਰਥਂ ਦਿਸ੍ਵਾ – ‘‘ਬ੍ਰਹ੍ਮਂ ਵਤ ਭੋ ਯਾਨ’’ਨ੍ਤਿ ਕਿਞ੍ਚਾਪਿ ਏਵਂ ਵਣ੍ਣਂ ਭਣਤਿ, ਨ ਪਨੇਤਂ ਯਾਨਂ ਵਣ੍ਣਭਣਨਮਤ੍ਤੇਨੇਵ ਬ੍ਰਹ੍ਮਯਾਨਂ ਨਾਮ ਹੋਤਿ. ਲਾਮਕਞ੍ਹਿ ਏਤਂ ਛਵਂ. ਪਰਮਤ੍ਥੇਨ ਪਨ ਇਮਸ੍ਸੇਵ ਖੋ ਏਤਂ, ਆਨਨ੍ਦ, ਅਰਿਯਸ੍ਸ ਅਟ੍ਠਙ੍ਗਿਕਸ੍ਸ ਮਗ੍ਗਸ੍ਸ ਅਧਿਵਚਨਂ. ਅਯਞ੍ਹਿ ਸਬ੍ਬਦੋਸਵਿਗਮੇਨ ਸੇਟ੍ਠੋ, ਇਮਿਨਾ ਚ ਅਰਿਯਾ ਨਿਬ੍ਬਾਨਂ ਯਨ੍ਤੀਤਿ ਬ੍ਰਹ੍ਮਯਾਨਂ ਇਤਿਪਿ, ਧਮ੍ਮਭੂਤਤ੍ਤਾ ਯਾਨਤ੍ਤਾ ਚ ਧਮ੍ਮਯਾਨਂ ਇਤਿਪਿ, ਅਨੁਤ੍ਤਰਤ੍ਤਾ ਕਿਲੇਸਸਙ੍ਗਾਮਸ੍ਸ ਚ ਵਿਜਿਤਤ੍ਤਾ ਅਨੁਤ੍ਤਰੋ ਸਙ੍ਗਾਮਵਿਜਯੋ ਇਤਿਪਿ ਵਤ੍ਤੁਂ ਵਟ੍ਟਤਿ.

ਇਦਾਨਿਸ੍ਸ ਨਿਦ੍ਦੋਸਭਾਵਞ੍ਚੇਵ ਸਙ੍ਗਾਮਵਿਜਯਭਾਵਞ੍ਚ ਦਸ੍ਸੇਨ੍ਤੋ ਰਾਗਵਿਨਯਪਰਿਯੋਸਾਨਾਤਿਆਦਿਮਾਹ. ਤਤ੍ਥ ਰਾਗਂ ਵਿਨਯਮਾਨਾ ਪਰਿਯੋਸਾਪੇਤਿ ਪਰਿਯੋਸਾਨਂ ਗਚ੍ਛਤਿ ਨਿਪ੍ਫਜ੍ਜਤੀਤਿ ਰਾਗਵਿਨਯਪਰਿਯੋਸਾਨਾ. ਏਸ ਨਯੋ ਸਬ੍ਬਤ੍ਥ.

ਯਸ੍ਸ ਸਦ੍ਧਾ ਚ ਪਞ੍ਞਾ ਚਾਤਿ ਯਸ੍ਸ ਅਰਿਯਮਗ੍ਗਯਾਨਸ੍ਸ ਸਦ੍ਧਾਨੁਸਾਰਿਵਸੇਨ ਸਦ੍ਧਾ, ਧਮ੍ਮਾਨੁਸਾਰਿਵਸੇਨ ਪਞ੍ਞਾਤਿ ਇਮੇ ਦ੍ਵੇ ਧਮ੍ਮਾ ਸਦਾ ਧੁਰਂ ਯੁਤ੍ਤਾ, ਤਤ੍ਰਮਜ੍ਝਤ੍ਤਤਾਯੁਗੇ ਯੁਤ੍ਤਾਤਿ ਅਤ੍ਥੋ. ਹਿਰੀ ਈਸਾਤਿ ਅਤ੍ਤਨਾ ਸਦ੍ਧਿਂ ਅਧਿਵਿਟ੍ਠੇਨ ਬਹਿਦ੍ਧਾਸਮੁਟ੍ਠਾਨੇਨ ਓਤ੍ਤਪ੍ਪੇਨ ਸਦ੍ਧਿਂ ਅਜ੍ਝਤ੍ਤਸਮੁਟ੍ਠਾਨਾ ਹਿਰੀ ਯਸ੍ਸ ਮਗ੍ਗਰਥਸ੍ਸ ਈਸਾ. ਮਨੋ ਯੋਤ੍ਤਨ੍ਤਿ ਵਿਪਸ੍ਸਨਾਚਿਤ੍ਤਞ੍ਚ ਮਗ੍ਗਚਿਤ੍ਤਞ੍ਚ ਯੋਤ੍ਤਂ. ਯਥਾ ਹਿ ਰਥਸ੍ਸ ਵਾਕਾਦਿਮਯਂ ਯੋਤ੍ਤਂ ਗੋਣੇ ਏਕਾਬਦ੍ਧੇ ਕਰੋਤਿ ਏਕਸਙ੍ਗਹਿਤੇ, ਏਵਂ ਮਗ੍ਗਰਥਸ੍ਸ ਲੋਕਿਯਵਿਪਸ੍ਸਨਾਚਿਤ੍ਤਂ ਅਤਿਰੇਕਪਞ੍ਞਾਸ, ਲੋਕੁਤ੍ਤਰਵਿਪਸ੍ਸਨਾਚਿਤ੍ਤਂ ਅਤਿਰੇਕਸਟ੍ਠਿ ਕੁਸਲਧਮ੍ਮੇ ਏਕਾਬਦ੍ਧੇ ਏਕਸਙ੍ਗਹੇ ਕਰੋਤਿ. ਤੇਨ ਵੁਤ੍ਤਂ ‘‘ਮਨੋ ਯੋਤ੍ਤ’’ਨ੍ਤਿ. ਸਤਿ ਆਰਕ੍ਖਸਾਰਥੀਤਿ ਮਗ੍ਗਸਮ੍ਪਯੁਤ੍ਤਾ ਸਤਿ ਆਰਕ੍ਖਸਾਰਥਿ. ਯਥਾ ਹਿ ਰਥਸ੍ਸ ਆਰਕ੍ਖੋ ਸਾਰਥਿ ਨਾਮ ਯੋਗ੍ਗਿਯੋ. ਧੁਰਂ ਵਾਹੇਤਿ ਯੋਜੇਤਿ ਅਕ੍ਖਂ ਅਬ੍ਭਞ੍ਜਤਿ ਰਥਂ ਪੇਸੇਤਿ ਰਥਯੁਤ੍ਤਕੇ ਨਿਬ੍ਬਿਸੇਵਨੇ ਕਰੋਤਿ, ਏਵਂ ਮਗ੍ਗਰਥਸ੍ਸ ਸਤਿ. ਅਯਞ੍ਹਿ ਆਰਕ੍ਖਪਚ੍ਚੁਪਟ੍ਠਾਨਾ ਚੇਵ ਕੁਸਲਾਕੁਸਲਾਨਞ੍ਚ ਧਮ੍ਮਾਨਂ ਗਤਿਯੋ ਸਮਨ੍ਵੇਸਤੀਤਿ ਵੁਤ੍ਤਾ.

ਰਥੋਤਿ ਅਰਿਯਅਟ੍ਠਙ੍ਗਿਕਮਗ੍ਗਰਥੋ. ਸੀਲਪਰਿਕ੍ਖਾਰੋਤਿ ਚਤੁਪਾਰਿਸੁਦ੍ਧਿਸੀਲਾਲਙ੍ਕਾਰੋ. ਝਾਨਕ੍ਖੋਤਿ ਵਿਪਸ੍ਸਨਾਸਮ੍ਪਯੁਤ੍ਤਾਨਂ ਪਞ੍ਚਨ੍ਨਂ ਝਾਨਙ੍ਗਾਨਂ ਵਸੇਨ ਝਾਨਮਯਅਕ੍ਖੋ. ਚਕ੍ਕਵੀਰਿਯੋਤਿ ਵੀਰਿਯਚਕ੍ਕੋ, ਕਾਯਿਕਚੇਤਸਿਕਸਙ੍ਖਾਤਾਨਿ ਦ੍ਵੇ ਵੀਰਿਯਾਨਿ ਅਸ੍ਸ ਚਕ੍ਕਾਨੀਤਿ ਅਤ੍ਥੋ. ਉਪੇਕ੍ਖਾ ਧੁਰਸਮਾਧੀਤਿ ਧੁਰਸ੍ਸ ਸਮਾਧਿ, ਉਨ੍ਨਤੋਨਤਾਕਾਰਸ੍ਸ ਅਭਾਵੇਨ ਦ੍ਵਿਨ੍ਨਮ੍ਪਿ ਯੁਗਪਦੇਸਾਨਂ ਸਮਤਾਤਿ ਅਤ੍ਥੋ. ਅਯਞ੍ਹਿ ਤਤ੍ਰਮਜ੍ਝਤ੍ਤੁਪੇਕ੍ਖਾ ਚਿਤ੍ਤੁਪ੍ਪਾਦਸ੍ਸ ਲੀਨੁਦ੍ਧਚ੍ਚਭਾਵਂ ਹਰਿਤ੍ਵਾ ਪਯੋਗਮਜ੍ਝਤ੍ਤੇ ਚਿਤ੍ਤਂ ਠਪੇਤਿ, ਤਸ੍ਮਾ ਇਮਸ੍ਸ ਮਗ੍ਗਰਥਸ੍ਸ ‘‘ਧੁਰਸਮਾਧੀ’’ਤਿ ਵੁਤ੍ਤਾ. ਅਨਿਚ੍ਛਾ ਪਰਿਵਾਰਣਨ੍ਤਿ ਬਾਹਿਰਕਰਥਸ੍ਸ ਸੀਹਚਮ੍ਮਾਦੀਨਿ ਵਿਯ ਇਮਸ੍ਸਾਪਿ ਅਰਿਯਮਗ੍ਗਰਥਸ੍ਸ ਅਲੋਭਸਙ੍ਖਾਤਾ ਅਨਿਚ੍ਛਾ ਪਰਿਵਾਰਣਂ ਨਾਮ.

ਅਬ੍ਯਾਪਾਦੋਤਿ ਮੇਤ੍ਤਾ ਚ ਮੇਤ੍ਤਾਪੁਬ੍ਬਭਾਗੋ ਚ. ਅਵਿਹਿਂਸਾਤਿ ਕਰੁਣਾ ਚ ਕਰੁਣਾਪੁਬ੍ਬਭਾਗੋ ਚ. ਵਿਵੇਕੋਤਿ ਕਾਯਵਿਵੇਕਾਦਿ ਤਿਵਿਧਵਿਵੇਕੋ. ਯਸ੍ਸ ਆਵੁਧਨ੍ਤਿ ਯਸ੍ਸ ਅਰਿਯਮਗ੍ਗਰਥੇ ਠਿਤਸ੍ਸ ਕੁਲਪੁਤ੍ਤਸ੍ਸ ਏਤਂ ਪਞ੍ਚਵਿਧਂ ਆਵੁਧਂ. ਯਥਾ ਹਿ ਰਥੇ ਠਿਤੋ ਪਞ੍ਚਹਿ ਆਵੁਧੇਹਿ ਸਪਤ੍ਤੇ ਵਿਜ੍ਝਤਿ, ਏਵਂ ਯੋਗਾਵਚਰੋਪਿ ਇਮਸ੍ਮਿਂ ਲੋਕਿਯਲੋਕੁਤ੍ਤਰਮਗ੍ਗਰਥੇ ਠਿਤੋ ਮੇਤ੍ਤਾਯ ਦੋਸਂ ਵਿਜ੍ਝਤਿ, ਕਰੁਣਾਯ ਵਿਹਿਂਸਂ, ਕਾਯਵਿਵੇਕੇਨ ਗਣਸਙ੍ਗਣਿਕਂ, ਚਿਤ੍ਤਵਿਵੇਕੇਨ ਕਿਲੇਸਸਙ੍ਗਣਿਕਂ, ਉਪਧਿਵਿਵੇਕੇਨ ਸਬ੍ਬਾਕੁਸਲਂ ਵਿਜ੍ਝਤਿ. ਤੇਨਸ੍ਸੇਤਂ ਪਞ੍ਚਵਿਧਂ ‘‘ਆਵੁਧ’’ਨ੍ਤਿ ਵੁਤ੍ਤਂ. ਤਿਤਿਕ੍ਖਾਤਿ ਦੁਰੁਤ੍ਤਾਨਂ ਦੁਰਾਗਤਾਨਂ ਵਚਨਪਥਾਨਂ ਅਧਿਵਾਸਨਕ੍ਖਨ੍ਤਿ. ਚਮ੍ਮਸਨ੍ਨਾਹੋਤਿ ਸਨ੍ਨਦ੍ਧਚਮ੍ਮੋ. ਯਥਾ ਹਿ ਰਥੇ ਠਿਤੋ ਰਥਿਕੋ ਪਟਿਮੁਕ੍ਕਚਮ੍ਮੋ ਆਗਤਾਗਤੇ ਸਰੇ ਖਮਤਿ, ਨ ਨਂ ਤੇ ਵਿਜ੍ਝਨ੍ਤਿ, ਏਵਂ ਅਧਿਵਾਸਨਕ੍ਖਨ੍ਤਿਸਮਨ੍ਨਾਗਤੋ ਭਿਕ੍ਖੁ ਆਗਤਾਗਤੇ ਵਚਨਪਥੇ ਖਮਤਿ, ਨ ਨਂ ਤੇ ਵਿਜ੍ਝਨ੍ਤਿ. ਤਸ੍ਮਾ ‘‘ਤਿਤਿਕ੍ਖਾ ਚਮ੍ਮਸਨ੍ਨਾਹੋ’’ਤਿ ਵੁਤ੍ਤੋ. ਯੋਗਕ੍ਖੇਮਾਯ ਵਤ੍ਤਤੀਤਿ ਚਤੂਹਿ ਯੋਗੇਹਿ ਖੇਮਾਯ ਨਿਬ੍ਬਾਨਾਯ ਵਤ੍ਤਤਿ, ਨਿਬ੍ਬਾਨਾਭਿਮੁਖੋ ਗਚ੍ਛਤਿਯੇਵ, ਨ ਤਿਟ੍ਠਤਿ ਨ ਭਿਜ੍ਜਤੀਤਿ ਅਤ੍ਥੋ.

ਏਤਦਤ੍ਤਨਿ ਸਮ੍ਭੂਤਨ੍ਤਿ ਏਤਂ ਮਗ੍ਗਯਾਨਂ ਅਤ੍ਤਨੋ ਪੁਰਿਸਕਾਰਂ ਨਿਸ੍ਸਾਯ ਲਦ੍ਧਤ੍ਤਾ ਅਤ੍ਤਨਿ ਸਮ੍ਭੂਤਂ ਨਾਮ ਹੋਤਿ. ਬ੍ਰਹ੍ਮਯਾਨਂ ਅਨੁਤ੍ਤਰਨ੍ਤਿ ਅਸਦਿਸਂ ਸੇਟ੍ਠਯਾਨਂ. ਨਿਯ੍ਯਨ੍ਤਿ ਧੀਰਾ ਲੋਕਮ੍ਹਾਤਿ ਯੇਸਂ ਏਤਂ ਯਾਨਂ ਅਤ੍ਥਿ, ਤੇ ਧੀਰਾ ਪਣ੍ਡਿਤਪੁਰਿਸਾ ਲੋਕਮ੍ਹਾ ਨਿਯ੍ਯਨ੍ਤਿ ਗਚ੍ਛਨ੍ਤਿ. ਅਞ੍ਞਦਤ੍ਥੂਤਿ ਏਕਂਸੇਨ. ਜਯਂ ਜਯਨ੍ਤਿ ਰਾਗਾਦਯੋ ਸਪਤ੍ਤੇ ਜਿਨਨ੍ਤਾ ਜਿਨਨ੍ਤਾ.

੫-੬. ਕਿਮਤ੍ਥਿਯਸੁਤ੍ਤਾਦਿਵਣ੍ਣਨਾ

੫-੬. ਪਞ੍ਚਮੇ ਅਯਮੇਵਾਤਿ ਏਵਸਦ੍ਦੋ ਨਿਯਮਤ੍ਥੋ. ਤੇਨ ਅਞ੍ਞਂ ਮਗ੍ਗਂ ਪਟਿਕ੍ਖਿਪਤਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਦੁਕ੍ਖਞ੍ਚੇਵ ਮਿਸ੍ਸਕਮਗ੍ਗੋ ਚ ਕਥਿਤੋ. ਛਟ੍ਠਂ ਉਤ੍ਤਾਨਮੇਵ.

੭. ਦੁਤਿਯਅਞ੍ਞਤਰਭਿਕ੍ਖੁਸੁਤ੍ਤਵਣ੍ਣਨਾ

੭. ਸਤ੍ਤਮੇ ਨਿਬ੍ਬਾਨਧਾਤੁਯਾ ਖੋ ਏਤਂ ਭਿਕ੍ਖੁ ਅਧਿਵਚਨਨ੍ਤਿ ਅਸਙ੍ਖਤਾਯ ਅਮਤਾਯ ਨਿਬ੍ਬਾਨਧਾਤੁਯਾ ਏਤਂ ਅਧਿਵਚਨਂ. ਆਸਵਾਨਂ ਖਯੋ ਤੇਨ ਵੁਚ੍ਚਤੀਤਿ ਅਪਿਚ ਤੇਨ ਰਾਗਾਦਿਵਿਨਯੇਨ ਆਸਵਾਨਂ ਖਯੋਤਿਪਿ ਵੁਚ੍ਚਤਿ. ਆਸਵਕ੍ਖਯੋ ਨਾਮ ਅਰਹਤ੍ਤਂ, ਅਰਹਤ੍ਤਸ੍ਸਾਪਿ ਏਤਂ ਰਾਗਵਿਨਯੋਤਿਆਦਿ ਨਾਮਮੇਵਾਤਿ ਦੀਪੇਤਿ. ਏਤਦਵੋਚਾਤਿ ‘‘ਸਤ੍ਥਾਰਾ ਨਿਬ੍ਬਾਨਧਾਤੂਤਿ ਵਦਨ੍ਤੇਨ ਅਮਤਂ ਨਿਬ੍ਬਾਨਂ ਕਥਿਤਂ, ਮਗ੍ਗੋ ਪਨਸ੍ਸ ਨ ਕਥਿਤੋ. ਤਂ ਕਥਾਪੇਸ੍ਸਾਮੀ’’ਤਿ ਅਨੁਸਨ੍ਧਿਕੁਸਲਤਾਯ ਪੁਚ੍ਛਨ੍ਤੋ ਏਤਂ ਅਵੋਚ.

੮. ਵਿਭਙ੍ਗਸੁਤ੍ਤਵਣ੍ਣਨਾ

੮. ਅਟ੍ਠਮੇ ਕਤਮਾ ਚ ਭਿਕ੍ਖਵੇ ਸਮ੍ਮਾਦਿਟ੍ਠੀਤਿ ਏਕੇਨ ਪਰਿਯਾਯੇਨ ਅਟ੍ਠਙ੍ਗਿਕਮਗ੍ਗਂ ਵਿਭਜਿਤ੍ਵਾ ਪੁਨ ਅਪਰੇਨ ਪਰਿਯਾਯੇਨ ਵਿਭਜਿਤੁਕਾਮੋ ਇਦਂ ਦੇਸਨਂ ਆਰਭਿ. ਤਤ੍ਥ ਦੁਕ੍ਖੇ ਞਾਣਨ੍ਤਿ ਸਵਨਸਮ੍ਮਸਨਪਟਿਵੇਧਪਚ੍ਚਵੇਕ੍ਖਣਵਸੇਨ ਚਤੂਹਾਕਾਰੇਹਿ ਉਪ੍ਪਨ੍ਨਂ ਞਾਣਂ. ਸਮੁਦਯੇਪਿ ਏਸੇਵ ਨਯੋ. ਸੇਸੇਸੁ ਪਨ ਦ੍ਵੀਸੁ ਸਮ੍ਮਸਨਸ੍ਸ ਅਭਾਵਾ ਤਿਵਿਧਮੇਵ ਵਟ੍ਟਤਿ. ਏਵਮੇਤਂ ‘‘ਦੁਕ੍ਖੇ ਞਾਣ’’ਨ੍ਤਿਆਦਿਨਾ ਚਤੁਸਚ੍ਚਕਮ੍ਮਟ੍ਠਾਨਂ ਦਸ੍ਸਿਤਂ.

ਤਤ੍ਥ ਪੁਰਿਮਾਨਿ ਦ੍ਵੇ ਸਚ੍ਚਾਨਿ ਵਟ੍ਟਂ, ਪਚ੍ਛਿਮਾਨਿ ਵਿਵਟ੍ਟਂ. ਤੇਸੁ ਭਿਕ੍ਖੁਨੋ ਵਟ੍ਟੇ ਕਮ੍ਮਟ੍ਠਾਨਾਭਿਨਿਵੇਸੋ ਹੋਤਿ, ਵਿਵਟ੍ਟੇ ਨਤ੍ਥਿ ਅਭਿਨਿਵੇਸੋ. ਪੁਰਿਮਾਨਿ ਹਿ ਦ੍ਵੇ ਸਚ੍ਚਾਨਿ ‘‘ਪਞ੍ਚਕ੍ਖਨ੍ਧਾ ਦੁਕ੍ਖਂ, ਤਣ੍ਹਾ ਸਮੁਦਯੋ’’ਤਿ ਏਵਂ ਸਙ੍ਖੇਪੇਨ ਚ, ‘‘ਕਤਮੇ ਪਞ੍ਚਕ੍ਖਨ੍ਧਾ ਰੂਪਕ੍ਖਨ੍ਧੋ’’ਤਿਆਦਿਨਾ ਨਯੇਨ ਵਿਤ੍ਥਾਰੇਨ ਚ ਆਚਰਿਯਸਨ੍ਤਿਕੇ ਉਗ੍ਗਣ੍ਹਿਤ੍ਵਾ ਵਾਚਾਯ ਪੁਨਪ੍ਪੁਨਂ ਪਰਿਵਤ੍ਤੇਨ੍ਤੋ ਯੋਗਾਵਚਰੋ ਕਮ੍ਮਂ ਕਰੋਤਿ. ਇਤਰੇਸੁ ਪਨ ਦ੍ਵੀਸੁ ਸਚ੍ਚੇਸੁ – ‘‘ਨਿਰੋਧਸਚ੍ਚਂ ਇਟ੍ਠਂ ਕਨ੍ਤਂ ਮਨਾਪਂ, ਮਗ੍ਗਸਚ੍ਚਂ ਇਟ੍ਠਂ ਕਨ੍ਤਂ ਮਨਾਪ’’ਨ੍ਤਿ ਏਵਂ ਸਵਨੇਨੇਵ ਕਮ੍ਮਂ ਕਰੋਤਿ. ਸੋ ਏਵਂ ਕਰੋਨ੍ਤੋ ਚਤ੍ਤਾਰਿ ਸਚ੍ਚਾਨਿ ਏਕਪਟਿਵੇਧੇਨ ਪਟਿਵਿਜ੍ਝਤਿ, ਏਕਾਭਿਸਮਯੇਨ ਅਭਿਸਮੇਤਿ. ਦੁਕ੍ਖਂ ਪਰਿਞ੍ਞਾਪਟਿਵੇਧੇਨ ਪਟਿਵਿਜ੍ਝਤਿ, ਸਮੁਦਯਂ ਪਹਾਨਪਟਿਵੇਧੇਨ, ਨਿਰੋਧਂ ਸਚ੍ਛਿਕਿਰਿਯਪਟਿਵੇਧੇਨ, ਮਗ੍ਗਂ ਭਾਵਨਾਪਟਿਵੇਧੇਨ ਪਟਿਵਿਜ੍ਝਤਿ. ਦੁਕ੍ਖਂ ਪਰਿਞ੍ਞਾਭਿਸਮਯੇਨ…ਪੇ… ਮਗ੍ਗਂ ਭਾਵਨਾਭਿਸਮਯੇਨ ਅਭਿਸਮੇਤਿ.

ਏਵਮਸ੍ਸ ਪੁਬ੍ਬਭਾਗੇ ਦ੍ਵੀਸੁ ਸਚ੍ਚੇਸੁ ਉਗ੍ਗਹਪਰਿਪੁਚ੍ਛਾਸਵਨਧਾਰਣਸਮ੍ਮਸਨਪਟਿਵੇਧੋ ਹੋਤਿ, ਦ੍ਵੀਸੁ ਸਵਨਪਟਿਵੇਧੋਯੇਵ. ਅਪਰਭਾਗੇ ਤੀਸੁ ਕਿਚ੍ਚਤੋ ਪਟਿਵੇਧੋ ਹੋਤਿ, ਨਿਰੋਧੇ ਆਰਮ੍ਮਣਪਟਿਵੇਧੋ. ਪਚ੍ਚਵੇਕ੍ਖਣਾ ਪਨ ਪਤ੍ਤਸਚ੍ਚਸ੍ਸ ਹੋਤਿ. ਇਮਸ੍ਸ ਭਿਕ੍ਖੁਨੋ ਪੁਬ੍ਬੇ ਪਰਿਗ੍ਗਹਤੋ – ‘‘ਦੁਕ੍ਖਂ ਪਰਿਜਾਨਾਮਿ, ਸਮੁਦਯਂ ਪਜਹਾਮਿ, ਨਿਰੋਧਂ ਸਚ੍ਛਿਕਰੋਮਿ, ਮਗ੍ਗਂ ਭਾਵੇਮੀ’’ਤਿ ਆਭੋਗਸਮਨ੍ਨਾਹਾਰਮਨਸਿਕਾਰਪਚ੍ਚਵੇਕ੍ਖਣਾ ਨਤ੍ਥਿ, ਪਰਿਗ੍ਗਹਤੋ ਪਟ੍ਠਾਯ ਹੋਤਿ. ਅਪਰਭਾਗੇ ਪਨ ਦੁਕ੍ਖਂ ਪਰਿਞ੍ਞਾਤਮੇਵ ਹੋਤਿ…ਪੇ… ਮਗ੍ਗੋ ਭਾਵਿਤੋਵ ਹੋਤਿ.

ਤਤ੍ਥ ਦ੍ਵੇ ਸਚ੍ਚਾਨਿ ਦੁਦ੍ਦਸਤ੍ਤਾ ਗਮ੍ਭੀਰਾਨਿ, ਦ੍ਵੇ ਗਮ੍ਭੀਰਤ੍ਤਾ ਦੁਦ੍ਦਸਾਨਿ. ਦੁਕ੍ਖਸਚ੍ਚਞ੍ਹਿ ਉਪ੍ਪਤ੍ਤਿਤੋ ਪਾਕਟਂ, ਖਾਣੁਕਣ੍ਟਕਪਹਾਰਾਦੀਸੁ ‘‘ਅਹੋ ਦੁਕ੍ਖ’’ਨ੍ਤਿ ਵਤ੍ਤਬ੍ਬਤਮ੍ਪਿ ਆਪਜ੍ਜਤਿ. ਸਮੁਦਯਮ੍ਪਿ ਖਾਦਿਤੁਕਾਮਤਾਭੁਞ੍ਜਿਤੁਕਾਮਤਾਦਿਵਸੇਨ ਉਪ੍ਪਤ੍ਤਿਤੋ ਪਾਕਟਂ. ਲਕ੍ਖਣਪਟਿਵੇਧਤੋ ਪਨ ਉਭਯਮ੍ਪਿ ਗਮ੍ਭੀਰਂ. ਇਤਿ ਤਾਨਿ ਦੁਦ੍ਦਸਤ੍ਤਾ ਗਮ੍ਭੀਰਾਨਿ. ਇਤਰੇਸਂ ਦ੍ਵਿਨ੍ਨਂ ਦਸ੍ਸਨਤ੍ਥਾਯ ਪਯੋਗੋ ਭਵਗ੍ਗਗ੍ਗਹਣਤ੍ਥਂ ਹਤ੍ਥਪਸਾਰਣਂ ਵਿਯ ਅਵੀਚਿਫੁਸਨਤ੍ਥਂ ਪਾਦਪਸਾਰਣਂ ਵਿਯ ਸਤਧਾ ਭਿਨ੍ਨਸ੍ਸ ਵਾਲਸ੍ਸ ਕੋਟਿਯਾ ਕੋਟਿਂ ਪਟਿਪਾਦਨਂ ਵਿਯ ਚ ਹੋਤਿ. ਇਤਿ ਤਾਨਿ ਗਮ੍ਭੀਰਤ੍ਤਾ ਦੁਦ੍ਦਸਾਨਿ. ਏਵਂ ਦੁਦ੍ਦਸਤ੍ਤਾ ਗਮ੍ਭੀਰੇਸੁ ਗਮ੍ਭੀਰਤ੍ਤਾ ਚ ਦੁਦ੍ਦਸੇਸੁ ਚਤੂਸੁ ਸਚ੍ਚੇਸੁ ਉਗ੍ਗਹਾਦਿਵਸੇਨ ਇਦਂ ‘‘ਦੁਕ੍ਖੇ ਞਾਣ’’ਨ੍ਤਿਆਦਿ ਵੁਤ੍ਤਂ. ਪਟਿਵੇਧਕ੍ਖਣੇ ਪਨ ਏਕਮੇਵ ਤਂ ਞਾਣਂ ਹੋਤਿ.

ਨੇਕ੍ਖਮ੍ਮਸਙ੍ਕਪ੍ਪਾਦੀਸੁ ਕਾਮਪਚ੍ਚਨੀਕਟ੍ਠੇਨ ਕਾਮਤੋ ਨਿਸ੍ਸਟਭਾਵੇਨ ਵਾ, ਕਾਮਂ ਸਮ੍ਮਸਨ੍ਤਸ੍ਸ ਉਪ੍ਪਨ੍ਨੋਤਿ ਵਾ, ਕਾਮਪਦਘਾਤਂ ਕਾਮਵੂਪਸਮਂ ਕਰੋਨ੍ਤੋ ਉਪ੍ਪਨ੍ਨੋਤਿ ਵਾ, ਕਾਮਵਿਵਿਤ੍ਤਨ੍ਤੇ ਉਪ੍ਪਨ੍ਨੋਤਿ ਵਾ ਨੇਕ੍ਖਮ੍ਮਸਙ੍ਕਪ੍ਪੋ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਸਬ੍ਬੇਪਿ ਚ ਤੇ ਨੇਕ੍ਖਮ੍ਮਸਙ੍ਕਪ੍ਪਾਦਯੋ ਕਾਮਬ੍ਯਾਪਾਦਵਿਹਿਂਸਾਵਿਰਮਣਸਞ੍ਞਾਨਂ ਨਾਨਤ੍ਤਾ ਪੁਬ੍ਬਭਾਗੇ ਨਾਨਾ, ਮਗ੍ਗਕ੍ਖਣੇ ਪਨ ਇਮੇਸੁ ਤੀਸੁ ਠਾਨੇਸੁ ਉਪ੍ਪਨ੍ਨਸ੍ਸ ਅਕੁਸਲਸਙ੍ਕਪ੍ਪਸ੍ਸ ਪਦਚ੍ਛੇਦਤੋ ਅਨੁਪ੍ਪਤ੍ਤਿਸਾਧਨਵਸੇਨ ਮਗ੍ਗਙ੍ਗਂ ਪੂਰਯਮਾਨੋ ਏਕੋਵ ਕੁਸਲਸਙ੍ਕਪ੍ਪੋ ਉਪ੍ਪਜ੍ਜਤਿ. ਅਯਂ ਸਮ੍ਮਾਸਙ੍ਕਪ੍ਪੋ ਨਾਮ.

ਮੁਸਾਵਾਦਾ ਵੇਰਮਣੀਆਦਯੋਪਿ ਮੁਸਾਵਾਦਾਦੀਹਿ ਵਿਰਮਣਸਞ੍ਞਾਨਂ ਨਾਨਤ੍ਤਾ ਪੁਬ੍ਬਭਾਗੇ ਨਾਨਾ, ਮਗ੍ਗਕ੍ਖਣੇ ਪਨ ਇਮੇਸੁ ਚਤੂਸੁ ਠਾਨੇਸੁ ਉਪ੍ਪਨ੍ਨਾਯ ਅਕੁਸਲਦੁਸ੍ਸੀਲ੍ਯਚੇਤਨਾਯ ਪਦਚ੍ਛੇਦਤੋ ਅਨੁਪ੍ਪਤ੍ਤਿਸਾਧਨਵਸੇਨ ਮਗ੍ਗਙ੍ਗਂ ਪੂਰਯਮਾਨਾ ਏਕਾਵ ਕੁਸਲਵੇਰਮਣੀ ਉਪ੍ਪਜ੍ਜਤਿ. ਅਯਂ ਸਮ੍ਮਾਵਾਚਾ ਨਾਮ.

ਪਾਣਾਤਿਪਾਤਾ ਵੇਰਮਣੀ ਆਦਯੋਪਿ ਪਾਣਾਤਿਪਾਤਾਦੀਹਿ ਵਿਰਮਣਸਞ੍ਞਾਨਂ ਨਾਨਤ੍ਤਾ ਪੁਬ੍ਬਭਾਗੇ ਨਾਨਾ, ਮਗ੍ਗਕ੍ਖਣੇ ਪਨ ਇਮੇਸੁ ਤੀਸੁ ਠਾਨੇਸੁ ਉਪ੍ਪਨ੍ਨਾਯ ਅਕੁਸਲਦੁਸ੍ਸੀਲ੍ਯਚੇਤਨਾਯ ਅਕਿਰਿਯਤੋ ਪਦਚ੍ਛੇਦਤੋ ਅਨੁਪ੍ਪਤ੍ਤਿਸਾਧਨਵਸੇਨ ਮਗ੍ਗਙ੍ਗਂ ਪੂਰਯਮਾਨਾ ਏਕਾਵ ਕੁਸਲਵੇਰਮਣੀ ਉਪ੍ਪਜ੍ਜਤਿ. ਅਯਂ ਸਮ੍ਮਾਕਮ੍ਮਨ੍ਤੋ ਨਾਮ.

ਮਿਚ੍ਛਾਆਜੀਵਨ੍ਤਿ ਖਾਦਨੀਯਭੋਜਨੀਯਾਦੀਨਂ ਅਤ੍ਥਾਯ ਪਵਤ੍ਤਿਤਂ ਕਾਯਵਚੀਦੁਚ੍ਚਰਿਤਂ. ਪਹਾਯਾਤਿ ਵਜ੍ਜੇਤ੍ਵਾ. ਸਮ੍ਮਾਆਜੀਵੇਨਾਤਿ ਬੁਦ੍ਧਪਸਤ੍ਥੇਨ ਆਜੀਵੇਨ. ਜੀਵਿਕਂ ਕਪ੍ਪੇਤੀਤਿ ਜੀਵਿਤਵੁਤ੍ਤਿਂ ਪਵਤ੍ਤੇਤਿ. ਸਮ੍ਮਾਜੀਵੋਪਿ ਕੁਹਨਾਦੀਹਿ ਵਿਰਮਣਸਞ੍ਞਾਨਂ ਨਾਨਤ੍ਤਾ ਪੁਬ੍ਬਭਾਗੇ ਨਾਨਾ. ਮਗ੍ਗਕ੍ਖਣੇ ਪਨ ਇਮੇਸੁਯੇਵ ਸਤ੍ਤਸੁ ਠਾਨੇਸੁ ਉਪ੍ਪਨ੍ਨਾਯ ਮਿਚ੍ਛਾਜੀਵਦੁਸ੍ਸੀਲ੍ਯਚੇਤਨਾਯ ਪਦਚ੍ਛੇਦਤੋ ਅਨੁਪ੍ਪਤ੍ਤਿਸਾਧਨਵਸੇਨ ਮਗ੍ਗਙ੍ਗਂ ਪੂਰਯਮਾਨਾ ਏਕਾਵ ਕੁਸਲਵੇਰਮਣੀ ਉਪ੍ਪਜ੍ਜਤਿ. ਅਯਂ ਸਮ੍ਮਾਆਜੀਵੋ ਨਾਮ.

ਅਨੁਪ੍ਪਨ੍ਨਾਨਨ੍ਤਿ ਏਕਸ੍ਮਿਂ ਭਵੇ ਤਥਾਰੂਪੇ ਵਾ ਆਰਮ੍ਮਣੇ ਅਤ੍ਤਨੋ ਨ ਉਪ੍ਪਨ੍ਨਾਨਂ, ਪਰਸ੍ਸ ਪਨ ਉਪ੍ਪਜ੍ਜਮਾਨੇ ਦਿਸ੍ਵਾ – ‘‘ਅਹੋ ਵਤ ਮੇ ਏਵਰੂਪਾ ਪਾਪਕਾ ਧਮ੍ਮਾ ਨ ਉਪ੍ਪਜ੍ਜੇਯ੍ਯੁ’’ਨ੍ਤਿ ਏਵਂ ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯ. ਛਨ੍ਦਨ੍ਤਿ ਤੇਸਂ ਅਕੁਸਲਾਨਂ ਅਨੁਪ੍ਪਾਦਕਪਟਿਪਤ੍ਤਿਸਾਧਕਂ ਵੀਰਿਯਚ੍ਛਨ੍ਦਂ ਜਨੇਤਿ. ਵਾਯਮਤੀਤਿ ਵਾਯਾਮਂ ਕਰੋਤਿ. ਵੀਰਿਯਂ ਆਰਭਤੀਤਿ ਵੀਰਿਯਂ ਪਵਤ੍ਤੇਤਿ. ਚਿਤ੍ਤਂ ਪਗ੍ਗਣ੍ਹਾਤੀਤਿ ਵੀਰਿਯੇਨ ਚਿਤ੍ਤਂ ਪਗ੍ਗਹਿਤਂ ਕਰੋਤਿ. ਪਦਹਤੀਤਿ ‘‘ਕਾਮਂ ਤਚੋ ਚ ਨ੍ਹਾਰੁ ਚ ਅਟ੍ਠਿ ਚ ਅਵਸਿਸ੍ਸਤੂ’’ਤਿ (ਮ. ਨਿ. ੨.੧੮੪) ਪਧਾਨਂ ਪਵਤ੍ਤੇਤਿ. ਉਪ੍ਪਨ੍ਨਾਨਨ੍ਤਿ ਸਮੁਦਾਚਾਰਵਸੇਨ ਅਤ੍ਤਨੋ ਉਪ੍ਪਨ੍ਨਪੁਬ੍ਬਾਨਂ. ਇਦਾਨਿ ਤਾਦਿਸੇ ਨ ਉਪ੍ਪਾਦੇਸ੍ਸਾਮੀਤਿ ਤੇਸਂ ਪਹਾਨਾਯ ਛਨ੍ਦਂ ਜਨੇਤਿ.

ਅਨੁਪ੍ਪਨ੍ਨਾਨਂ ਕੁਸਲਾਨਨ੍ਤਿ ਅਪਟਿਲਦ੍ਧਾਨਂ ਪਠਮਜ੍ਝਾਨਾਦੀਨਂ. ਉਪ੍ਪਨ੍ਨਾਨਨ੍ਤਿ ਤੇਸਂਯੇਵ ਪਟਿਲਦ੍ਧਾਨਂ. ਠਿਤਿਯਾਤਿ ਪੁਨਪ੍ਪੁਨਂ ਉਪ੍ਪਤ੍ਤਿਪਬਨ੍ਧਵਸੇਨ ਠਿਤਤ੍ਥਂ. ਅਸਮ੍ਮੋਸਾਯਾਤਿ ਅਵਿਨਾਸਤ੍ਥਂ. ਭਿਯ੍ਯੋਭਾਵਾਯਾਤਿ ਉਪਰਿਭਾਵਾਯ. ਵੇਪੁਲ੍ਲਾਯਾਤਿ ਵਿਪੁਲਭਾਵਾਯ. ਪਾਰਿਪੂਰਿਯਾਤਿ ਭਾਵਨਾਯ ਪਰਿਪੂਰਣਤ੍ਥਂ. ਅਯਮ੍ਪਿ ਸਮ੍ਮਾਵਾਯਾਮੋ ਅਨੁਪ੍ਪਨ੍ਨਾਨਂ ਅਕੁਸਲਾਨਂ ਅਨੁਪ੍ਪਾਦਨਾਦਿਚਿਤ੍ਤਨਾਨਤ੍ਤਾ ਪੁਬ੍ਬਭਾਗੇ ਨਾਨਾ. ਮਗ੍ਗਕ੍ਖਣੇ ਪਨ ਇਮੇਸੁਯੇਵ ਚਤੂਸੁ ਠਾਨੇਸੁ ਕਿਚ੍ਚਸਾਧਨਵਸੇਨ ਮਗ੍ਗਙ੍ਗਂ ਪੂਰਯਮਾਨਂ ਏਕਮੇਵ ਕੁਸਲਵੀਰਿਯਂ ਉਪ੍ਪਜ੍ਜਤਿ. ਅਯਂ ਸਮ੍ਮਾਵਾਯਾਮੋ ਨਾਮ.

ਸਮ੍ਮਾਸਤਿਪਿ ਕਾਯਾਦਿਪਰਿਗ੍ਗਾਹਕਚਿਤ੍ਤਾਨਂ ਨਾਨਤ੍ਤਾ ਪੁਬ੍ਬਭਾਗੇ ਨਾਨਾ, ਮਗ੍ਗਕ੍ਖਣੇ ਪਨ ਇਮੇਸੁ ਚਤੂਸੁ ਠਾਨੇਸੁ ਕਿਚ੍ਚਸਾਧਨਵਸੇਨ ਮਗ੍ਗਙ੍ਗਂ ਪੂਰਯਮਾਨਾ ਏਕਾ ਸਤਿ ਉਪ੍ਪਜ੍ਜਤਿ. ਅਯਂ ਸਮ੍ਮਾਸਤਿ ਨਾਮ.

ਝਾਨਾਦੀਨਿ ਪੁਬ੍ਬਭਾਗੇਪਿ ਮਗ੍ਗਕ੍ਖਣੇਪਿ ਨਾਨਾ, ਪੁਬ੍ਬਭਾਗੇ ਸਮਾਪਤ੍ਤਿਵਸੇਨ ਨਾਨਾ, ਮਗ੍ਗਕ੍ਖਣੇ ਨਾਨਾਮਗ੍ਗਵਸੇਨ. ਏਕਸ੍ਸ ਹਿ ਪਠਮਮਗ੍ਗੋ ਪਠਮਜ੍ਝਾਨਿਕੋ ਹੋਤਿ, ਦੁਤਿਯਮਗ੍ਗਾਦਯੋਪਿ ਪਠਮਜ੍ਝਾਨਿਕਾ ਵਾ ਦੁਤਿਯਾਦੀਸੁ ਅਞ੍ਞਤਰਜ੍ਝਾਨਿਕਾ ਵਾ. ਏਕਸ੍ਸ ਪਠਮਮਗ੍ਗੋ ਦੁਤਿਯਾਦੀਨਂ ਅਞ੍ਞਤਰਜ੍ਝਾਨਿਕੋ ਹੋਤਿ, ਦੁਤਿਯਾਦਯੋਪਿ ਦੁਤਿਯਾਦੀਨਂ ਅਞ੍ਞਤਰਜ੍ਝਾਨਿਕਾ ਵਾ ਪਠਮਜ੍ਝਾਨਿਕਾ ਵਾ. ਏਵਂ ਚਤ੍ਤਾਰੋਪਿ ਮਗ੍ਗਾ ਝਾਨਵਸੇਨ ਸਦਿਸਾ ਵਾ ਅਸਦਿਸਾ ਵਾ ਏਕਚ੍ਚਸਦਿਸਾ ਵਾ ਹੋਨ੍ਤਿ.

ਅਯਂ ਪਨਸ੍ਸ ਵਿਸੇਸੋ ਪਾਦਕਜ੍ਝਾਨਨਿਯਮੇਨ ਹੋਤਿ. ਪਾਦਕਜ੍ਝਾਨਨਿਯਮੇਨ ਹਿ ਪਠਮਜ੍ਝਾਨਲਾਭਿਨੋ ਪਠਮਜ੍ਝਾਨਾ ਵੁਟ੍ਠਾਯ ਵਿਪਸ੍ਸਨ੍ਤਸ੍ਸ ਉਪ੍ਪਨ੍ਨਮਗ੍ਗੋ ਪਠਮਜ੍ਝਾਨਿਕੋ ਹੋਤਿ, ਮਗ੍ਗਙ੍ਗਬੋਜ੍ਝਙ੍ਗਾਨਿ ਪਨੇਤ੍ਥ ਪਰਿਪੁਣ੍ਣਾਨੇਵ ਹੋਨ੍ਤਿ. ਦੁਤਿਯਜ੍ਝਾਨਤੋ ਵੁਟ੍ਠਾਯ ਵਿਪਸ੍ਸਨ੍ਤਸ੍ਸ ਉਪ੍ਪਨ੍ਨੋ ਦੁਤਿਯਜ੍ਝਾਨਿਕੋ ਹੋਤਿ, ਮਗ੍ਗਙ੍ਗਾਨਿ ਪਨੇਤ੍ਥ ਸਤ੍ਤ ਹੋਨ੍ਤਿ. ਤਤਿਯਜ੍ਝਾਨਤੋ ਵੁਟ੍ਠਾਯ ਵਿਪਸ੍ਸਨ੍ਤਸ੍ਸ ਉਪ੍ਪਨ੍ਨੋ ਤਤਿਯਜ੍ਝਾਨਿਕੋ, ਮਗ੍ਗਙ੍ਗਾਨਿ ਪਨੇਤ੍ਥ ਸਤ੍ਤ, ਬੋਜ੍ਝਙ੍ਗਾਨਿ ਛ ਹੋਨ੍ਤਿ. ਏਸ ਨਯੋ ਚਤੁਤ੍ਥਜ੍ਝਾਨਤੋ ਪਟ੍ਠਾਯ ਯਾਵ ਨੇਵਸਞ੍ਞਾਨਾਸਞ੍ਞਾਯਤਨਾ.

ਆਰੁਪ੍ਪੇ ਚਤੁਕ੍ਕਪਞ੍ਚਕਜ੍ਝਾਨਂ ਉਪ੍ਪਜ੍ਜਤਿ, ਤਞ੍ਚ ਲੋਕੁਤ੍ਤਰਂ, ਨੋ ਲੋਕਿਯਨ੍ਤਿ ਵੁਤ੍ਤਂ. ਏਤ੍ਥ ਕਥਨ੍ਤਿ? ਏਤ੍ਥਾਪਿ ਪਠਮਜ੍ਝਾਨਾਦੀਸੁ ਯਤੋ ਵੁਟ੍ਠਾਯ ਸੋਤਾਪਤ੍ਤਿਮਗ੍ਗਂ ਪਟਿਲਭਿਤ੍ਵਾ ਅਰੂਪਸਮਾਪਤ੍ਤਿਂ ਭਾਵੇਤ੍ਵਾ ਸੋ ਆਰੁਪ੍ਪੇ ਉਪ੍ਪਨ੍ਨੋ, ਤਂਝਾਨਿਕਾਵਸ੍ਸ ਤਤ੍ਥ ਤਯੋ ਮਗ੍ਗਾ ਉਪ੍ਪਜ੍ਜਨ੍ਤਿ. ਏਵਂ ਪਾਦਕਜ੍ਝਾਨਮੇਵ ਨਿਯਮੇਤਿ. ਕੇਚਿ ਪਨ ਥੇਰਾ – ‘‘ਵਿਪਸ੍ਸਨਾਯ ਆਰਮ੍ਮਣਭੂਤਾ ਖਨ੍ਧਾ ਨਿਯਮੇਨ੍ਤੀ’’ਤਿ ਵਦਨ੍ਤਿ. ਕੇਚਿ ‘‘ਪੁਗ੍ਗਲਜ੍ਝਾਸਯੋ ਨਿਯਮੇਤੀ’’ਤਿ ਵਦਨ੍ਤਿ. ਕੇਚਿ ‘‘ਵੁਟ੍ਠਾਨਗਾਮਿਨੀਵਿਪਸ੍ਸਨਾ ਨਿਯਮੇਤੀ’’ਤਿ ਵਦਨ੍ਤਿ. ਤੇਸਂ ਵਾਦਵਿਨਿਚ੍ਛਯੋ ਵਿਸੁਦ੍ਧਿਮਗ੍ਗੇ ਵੁਟ੍ਠਾਨਗਾਮਿਨੀਵਿਪਸ੍ਸਨਾਧਿਕਾਰੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਸਮ੍ਮਾਸਮਾਧੀਤਿ ਅਯਂ ਪੁਬ੍ਬਭਾਗੇ ਲੋਕਿਯੋ, ਅਪਰਭਾਗੇ ਲੋਕੁਤ੍ਤਰੋ ਸਮ੍ਮਾਸਮਾਧੀਤਿ ਵੁਚ੍ਚਤਿ.

੯. ਸੂਕਸੁਤ੍ਤਵਣ੍ਣਨਾ

੯. ਨਵਮੇ ਮਿਚ੍ਛਾਪਣਿਹਿਤਨ੍ਤਿ ਸੂਕਂ ਨਾਮ ਉਦ੍ਧਗ੍ਗਂ ਕਤ੍ਵਾ ਠਪਿਤਂ ਹਤ੍ਥਂ ਵਾ ਪਾਦਂ ਵਾ ਭਿਨ੍ਦਤਿ, ਤਥਾ ਅਟ੍ਠਪਿਤਂ ਪਨ ਮਿਚ੍ਛਾਪਣਿਹਿਤਂ ਨਾਮ. ਮਿਚ੍ਛਾਪਣਿਹਿਤਾਯ ਦਿਟ੍ਠਿਯਾਤਿ ਮਿਚ੍ਛਾਠਪਿਤਾਯ ਕਮ੍ਮਸ੍ਸਕਤਪਞ੍ਞਾਯ. ਅਵਿਜ੍ਜਂ ਭਿਨ੍ਦਿਸ੍ਸਤੀਤਿ ਚਤੁਸਚ੍ਚਪਟਿਚ੍ਛਾਦਕਂ ਅਵਿਜ੍ਜਂ ਭਿਨ੍ਦਿਸ੍ਸਤਿ. ਵਿਜ੍ਜਂ ਉਪ੍ਪਾਦੇਸ੍ਸਤੀਤਿ ਅਰਹਤ੍ਤਮਗ੍ਗਵਿਜ੍ਜਂ ਉਪ੍ਪਾਦੇਸ੍ਸਤਿ. ਮਿਚ੍ਛਾਪਣਿਹਿਤਤ੍ਤਾ, ਭਿਕ੍ਖਵੇ, ਦਿਟ੍ਠਿਯਾਤਿ ਕਮ੍ਮਸ੍ਸਕਤਪਞ੍ਞਾਯ ਚੇਵ ਮਗ੍ਗਭਾਵਨਾਯ ਚ ਮਿਚ੍ਛਾ ਠਪਿਤਤ੍ਤਾ, ਅਪ੍ਪਵਤ੍ਤਿਤਤ੍ਤਾਤਿ ਅਤ੍ਥੋ. ਇਮਸ੍ਮਿਂ ਸੁਤ੍ਤੇ ਕਮ੍ਮਸ੍ਸਕਤਞਾਣਂ ਮਗ੍ਗਨਿਸ੍ਸਿਤਂ ਕਤ੍ਵਾ ਮਿਸ੍ਸਕਮਗ੍ਗੋ ਕਥਿਤੋ.

੧੦. ਨਨ੍ਦਿਯਸੁਤ੍ਤਵਣ੍ਣਨਾ

੧੦. ਦਸਮੇ ਪਰਿਬ੍ਬਾਜਕੋਤਿ ਛਨ੍ਨਪਰਿਬ੍ਬਾਜਕੋ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.

ਅਵਿਜ੍ਜਾਵਗ੍ਗੋ ਪਠਮੋ.

੨. ਵਿਹਾਰਵਗ੍ਗੋ

੧. ਪਠਮਵਿਹਾਰਸੁਤ੍ਤਵਣ੍ਣਨਾ

੧੧. ਦੁਤਿਯਵਗ੍ਗਸ੍ਸ ਪਠਮੇ ਇਚ੍ਛਾਮਹਂ, ਭਿਕ੍ਖਵੇ, ਅਡ੍ਢਮਾਸਂ ਪਟਿਸਲ੍ਲੀਯਿਤੁਨ੍ਤਿ ਅਹਂ, ਭਿਕ੍ਖਵੇ, ਏਕਂ ਅਡ੍ਢਮਾਸਂ ਪਟਿਸਲ੍ਲੀਯਿਤੁਂ ਨਿਲੀਯਿਤੁਂ ਏਕੋਵ ਹੁਤ੍ਵਾ ਵਿਹਰਿਤੁਂ ਇਚ੍ਛਾਮੀਤਿ ਅਤ੍ਥੋ. ਨਮ੍ਹਿ ਕੇਨਚਿ ਉਪਸਙ੍ਕਮਿਤਬ੍ਬੋ ਅਞ੍ਞਤ੍ਰ ਏਕੇਨ ਪਿਣ੍ਡਪਾਤਨੀਹਾਰਕੇਨਾਤਿ ਯੋ ਅਤ੍ਤਨਾ ਪਯੁਤ੍ਤਵਾਚਂ ਅਕਤ੍ਵਾ ਮਮਤ੍ਥਾਯ ਸਦ੍ਧੇਸੁ ਕੁਲੇਸੁ ਪਟਿਯਤ੍ਤਂ ਪਿਣ੍ਡਪਾਤਂ ਨੀਹਰਿਤ੍ਵਾ ਮਯ੍ਹਂ ਉਪਨਾਮੇਯ੍ਯ, ਤਂ ਪਿਣ੍ਡਪਾਤਨੀਹਾਰਕਂ ਏਕਂ ਭਿਕ੍ਖੁਂ ਠਪੇਤ੍ਵਾ ਨਮ੍ਹਿ ਅਞ੍ਞੇਨ ਕੇਨਚਿ ਭਿਕ੍ਖੁਨਾ ਵਾ ਗਹਟ੍ਠੇਨ ਵਾ ਉਪਸਙ੍ਕਮਿਤਬ੍ਬੋਤਿ.

ਕਸ੍ਮਾ ਪਨ ਏਵਮਾਹਾਤਿ? ਤਸ੍ਮਿਂ ਕਿਰ ਅਡ੍ਢਮਾਸੇ ਵਿਨੇਤਬ੍ਬੋ ਸਤ੍ਤੋ ਨਾਹੋਸਿ. ਅਥ ਸਤ੍ਥਾ – ‘‘ਇਮਂ ਅਡ੍ਢਮਾਸਂ ਫਲਸਮਾਪਤ੍ਤਿਸੁਖੇਨੇਵ ਵੀਤਿਨਾਮੇਸ੍ਸਾਮਿ, ਇਤਿ ਮਯ੍ਹਞ੍ਚੇਵ ਸੁਖਵਿਹਾਰੋ ਭਵਿਸ੍ਸਤਿ, ਅਨਾਗਤੇ ਚ ਪਚ੍ਛਿਮਾ ਜਨਤਾ ‘ਸਤ੍ਥਾਪਿ ਗਣਂ ਵਿਹਾਯ ਏਕਕੋ ਵਿਹਾਸਿ, ਕਿਮਙ੍ਗਂ ਪਨ ਮਯ’ਨ੍ਤਿ ਦਿਟ੍ਠਾਨੁਗਤਿਂ ਆਪਜ੍ਜਿਸ੍ਸਤਿ, ਤਦਸ੍ਸਾ ਭਵਿਸ੍ਸਤਿ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ ਇਮਿਨਾ ਕਾਰਣੇਨ ਏਵਮਾਹ. ਭਿਕ੍ਖੁਸਙ੍ਘੋਪਿ ਸਤ੍ਥੁ ਵਚਨਂ ਸਮ੍ਪਟਿਚ੍ਛਿਤ੍ਵਾ ਏਕਂ ਭਿਕ੍ਖੁਂ ਅਦਾਸਿ. ਸੋ ਪਾਤੋਵ ਗਨ੍ਧਕੁਟਿਪਰਿਵੇਣਸਮ੍ਮਜ੍ਜਨਮੁਖੋਦਕਦਨ੍ਤਕਟ੍ਠਦਾਨਾਦੀਨਿ ਸਬ੍ਬਕਿਚ੍ਚਾਨਿ ਤਸ੍ਮਿਂ ਖਣੇ ਕਤ੍ਵਾ ਅਪਗਚ੍ਛਤਿ.

ਯੇਨ ਸ੍ਵਾਹਨ੍ਤਿ ਯੇਨ ਸੋ ਅਹਂ. ਪਠਮਾਭਿਸਮ੍ਬੁਦ੍ਧੋਤਿ ਅਭਿਸਮ੍ਬੁਦ੍ਧੋ ਹੁਤ੍ਵਾ ਪਠਮਂਯੇਵ ਏਕੂਨਪਞ੍ਞਾਸਦਿਵਸਬ੍ਭਨ੍ਤਰੇ. ਵਿਹਰਾਮੀਤਿ ਇਦਂ ਅਤੀਤਤ੍ਥੇ ਵਤ੍ਤਮਾਨਵਚਨਂ. ਤਸ੍ਸ ਪਦੇਸੇਨ ਵਿਹਾਸਿਨ੍ਤਿ ਤਸ੍ਸ ਪਠਮਾਭਿਸਮ੍ਬੁਦ੍ਧਵਿਹਾਰਸ੍ਸ ਪਦੇਸੇਨ. ਤਤ੍ਥ ਪਦੇਸੋ ਨਾਮ ਖਨ੍ਧਪਦੇਸੋ ਆਯਤਨਧਾਤੁਸਚ੍ਚਇਨ੍ਦ੍ਰਿਯਪਚ੍ਚਯਾਕਾਰਸਤਿਪਟ੍ਠਾਨਝਾਨਨਾਮਰੂਪਪਦੇਸੋ ਧਮ੍ਮਪਦੇਸੋਤਿ ਨਾਨਾਵਿਧੋ. ਤਂ ਸਬ੍ਬਮ੍ਪਿ ਸਨ੍ਧਾਯ – ‘‘ਤਸ੍ਸ ਪਦੇਸੇਨ ਵਿਹਾਸਿ’’ਨ੍ਤਿ ਆਹ. ਭਗਵਾ ਹਿ ਪਠਮਬੋਧਿਯਂ ਏਕੂਨਪਞ੍ਞਾਸਦਿਵਸਬ੍ਭਨ੍ਤਰੇ ਯਥਾ ਨਾਮ ਪਤ੍ਤਰਜ੍ਜੋ ਰਾਜਾ ਅਤ੍ਤਨੋ ਵਿਭਵਸਾਰਦਸ੍ਸਨਤ੍ਥਂ ਤਂ ਤਂ ਗਬ੍ਭਂ ਵਿਵਰਾਪੇਤ੍ਵਾ ਸੁਵਣ੍ਣਰਜਤਮੁਤ੍ਤਾਮਣਿਆਦੀਨਿ ਰਤਨਾਨਿ ਪਚ੍ਚਵੇਕ੍ਖਨ੍ਤੋ ਵਿਹਰੇਯ੍ਯ, ਏਵਮੇਵ ਪਞ੍ਚਕ੍ਖਨ੍ਧੇ ਨਿਪ੍ਪਦੇਸੇ ਕਤ੍ਵਾ ਸਮ੍ਮਸਨ੍ਤੋ ਪਚ੍ਚਵੇਕ੍ਖਨ੍ਤੋ ਵਿਹਾਸਿ. ਇਮਸ੍ਮਿਂ ਪਨ ਅਡ੍ਢਮਾਸੇ ਤੇਸਂ ਖਨ੍ਧਾਨਂ ਪਦੇਸਂ ਵੇਦਨਾਕ੍ਖਨ੍ਧਮੇਵ ਪਚ੍ਚਵੇਕ੍ਖਨ੍ਤੋ ਵਿਹਾਸਿ. ਤਸ੍ਸ ‘‘ਇਮੇ ਸਤ੍ਤਾ ਏਵਰੂਪਂ ਨਾਮ ਸੁਖਂ ਪਟਿਸਂਵੇਦੇਨ੍ਤਿ, ਏਵਰੂਪਂ ਦੁਕ੍ਖ’’ਨ੍ਤਿ ਓਲੋਕਯਤੋ ਯਾਵ ਭਵਗ੍ਗਾ ਪਵਤ੍ਤਾ ਸੁਖਵੇਦਨਾ, ਯਾਵ ਅਵੀਚਿਤੋ ਪਵਤ੍ਤਾ ਦੁਕ੍ਖਵੇਦਨਾ, ਸਬ੍ਬਾ ਸਬ੍ਬਾਕਾਰੇਨ ਉਪਟ੍ਠਾਸਿ. ਅਥ ਨਂ ‘‘ਮਿਚ੍ਛਾਦਿਟ੍ਠਿਪਚ੍ਚਯਾਪਿ ਵੇਦਯਿਤ’’ਨ੍ਤਿਆਦਿਨਾ ਨਯੇਨ ਪਰਿਗ੍ਗਣ੍ਹਨ੍ਤੋ ਵਿਹਾਸਿ.

ਤਥਾ ਪਠਮਬੋਧਿਯਂ ਦ੍ਵਾਦਸਾਯਤਨਾਨਿ ਨਿਪ੍ਪਦੇਸਾਨੇਵ ਕਤ੍ਵਾ ਵਿਹਾਸਿ, ਇਮਸ੍ਮਿਂ ਪਨ ਅਡ੍ਢਮਾਸੇ ਤੇਸਂ ਆਯਤਨਾਨਂ ਪਦੇਸਂ ਵੇਦਨਾਵਸੇਨ ਧਮ੍ਮਾਯਤਨੇਕਦੇਸਂ, ਧਾਤੂਨਂ ਪਦੇਸਂ ਵੇਦਨਾਵਸੇਨ ਧਮ੍ਮਧਾਤੁਏਕਦੇਸਂ, ਸਚ੍ਚਾਨਂ ਪਦੇਸਂ ਵੇਦਨਾਕ੍ਖਨ੍ਧਵਸੇਨੇਵ ਦੁਕ੍ਖਸਚ੍ਚੇਕਦੇਸਂ, ਪਚ੍ਚਯਾਨਂ ਪਦੇਸਂ ਫਸ੍ਸਪਚ੍ਚਯਾ ਵੇਦਨਾਵਸੇਨ ਪਚ੍ਚਯੇਕਦੇਸਂ ਝਾਨਾਨਂ ਪਦੇਸਂ ਵੇਦਨਾਵਸੇਨੇਵ ਝਾਨਙ੍ਗੇਕਦੇਸਂ, ਨਾਮਰੂਪਾਨਂ ਪਦੇਸਂ ਵੇਦਨਾਵਸੇਨੇਵ ਨਾਮੇਕਦੇਸਂ ਪਚ੍ਚਵੇਕ੍ਖਨ੍ਤੋ ਵਿਹਾਸਿ. ਪਠਮਬੋਧਿਯਞ੍ਹਿ ਏਕੂਨਪਞ੍ਞਾਸਦਿਵਸਬ੍ਭਨ੍ਤਰੇ ਕੁਸਲਾਦਿਧਮ੍ਮੇ ਨਿਪ੍ਪਦੇਸੇ ਕਤ੍ਵਾ ਅਨਨ੍ਤਨਯਾਨਿ ਸਤ੍ਤ ਪਕਰਣਾਨਿ ਪਚ੍ਚਵੇਕ੍ਖਨ੍ਤੋ ਵਿਹਾਸਿ. ਇਮਸ੍ਮਿਂ ਪਨ ਅਡ੍ਢਮਾਸੇ ਸਬ੍ਬਧਮ੍ਮਾਨਂ ਪਦੇਸਂ ਵੇਦਨਾਤ੍ਤਿਕਮੇਵ ਪਚ੍ਚਵੇਕ੍ਖਨ੍ਤੋ ਵਿਹਾਸਿ. ਤਸ੍ਮਿਂ ਤਸ੍ਮਿਂ ਠਾਨੇ ਸਾ ਸਾ ਚ ਵਿਹਾਰਸਮਾਪਤ੍ਤਿ ਵੇਦਨਾਨੁਭਾਵੇਨ ਜਾਤਾ.

ਇਦਾਨਿ ਯੇਨਾਕਾਰੇਨ ਵਿਹਾਸਿ, ਤਂ ਦਸ੍ਸੇਨ੍ਤੋ ਮਿਚ੍ਛਾਦਿਟ੍ਠਿਪਚ੍ਚਯਾਪੀਤਿਆਦਿਮਾਹ. ਤਤ੍ਥ ਮਿਚ੍ਛਾਦਿਟ੍ਠਿਪਚ੍ਚਯਾਪੀਤਿ ਦਿਟ੍ਠਿਸਮ੍ਪਯੁਤ੍ਤਾ ਵੇਦਨਾਪਿ ਵਟ੍ਟਤਿ. ਦਿਟ੍ਠਿਂ ਉਪਨਿਸ੍ਸਯਂ ਕਤ੍ਵਾ ਉਪ੍ਪਨ੍ਨਾ ਕੁਸਲਾਕੁਸਲਵੇਦਨਾਪਿ ਵਟ੍ਟਤਿ ਵਿਪਾਕਵੇਦਨਾਪਿ. ਤਤ੍ਥ ਮਿਚ੍ਛਾਦਿਟ੍ਠਿਸਮ੍ਪਯੁਤ੍ਤਾ ਅਕੁਸਲਾਵ ਹੋਤਿ, ਦਿਟ੍ਠਿਂ ਪਨ ਉਪਨਿਸ੍ਸਾਯ ਕੁਸਲਾਪਿ ਉਪ੍ਪਜ੍ਜਨ੍ਤਿ ਅਕੁਸਲਾਪਿ. ਮਿਚ੍ਛਾਦਿਟ੍ਠਿਕਾ ਹਿ ਦਿਟ੍ਠਿਂ ਉਪਨਿਸ੍ਸਾਯ ਪਕ੍ਖਦਿਵਸੇਸੁ ਯਾਗੁਭਤ੍ਤਾਦੀਨਿ ਦੇਨ੍ਤਿ, ਅਦ੍ਧਿਕਾਦੀਨਂ ਵਟ੍ਟਂ ਪਟ੍ਠਪੇਨ੍ਤਿ, ਚਤੁਮਹਾਪਥੇ ਸਾਲਂ ਕਰੋਨ੍ਤਿ, ਪੋਕ੍ਖਰਣਿਞ੍ਚ ਖਣਾਪੇਨ੍ਤਿ, ਦੇਵਕੁਲਾਦੀਸੁ ਮਾਲਾਗਚ੍ਛਂ ਰੋਪੇਨ੍ਤਿ, ਨਦੀਵਿਦੁਗ੍ਗਾਦੀਸੁ ਸੇਤੁਂ ਅਤ੍ਥਰਨ੍ਤਿ, ਵਿਸਮਂ ਸਮਂ ਕਰੋਨ੍ਤਿ, ਇਤਿ ਨੇਸਂ ਕੁਸਲਵੇਦਨਾ ਉਪ੍ਪਜ੍ਜਤਿ. ਮਿਚ੍ਛਾਦਿਟ੍ਠਿਂ ਪਨ ਨਿਸ੍ਸਾਯ ਸਮ੍ਮਾਦਿਟ੍ਠਿਕੇ ਅਕ੍ਕੋਸਨ੍ਤਿ ਪਰਿਭਾਸਨ੍ਤਿ, ਵਧਬਨ੍ਧਨਾਦੀਨਿ ਕਰੋਨ੍ਤਿ, ਪਾਣਂ ਵਧਿਤ੍ਵਾ ਦੇਵਤਾਨਂ ਉਪਹਾਰਂ ਉਪਹਰਨ੍ਤਿ, ਇਤਿ ਨੇਸਂ ਅਕੁਸਲਵੇਦਨਾ ਉਪ੍ਪਜ੍ਜਤਿ. ਵਿਪਾਕਵੇਦਨਾ ਪਨ ਭਵਨ੍ਤਰਗਤਾਨਂਯੇਵ ਹੋਤਿ.

ਸਮ੍ਮਾਦਿਟ੍ਠਿਪਚ੍ਚਯਾਤਿ ਏਤ੍ਥਾਪਿ ਸਮ੍ਮਾਦਿਟ੍ਠਿਸਮ੍ਪਯੁਤ੍ਤਾ ਵੇਦਨਾਪਿ ਵਟ੍ਟਤਿ, ਸਮ੍ਮਾਦਿਟ੍ਠਿਂ ਉਪਨਿਸ੍ਸਯਂ ਕਤ੍ਵਾ ਉਪ੍ਪਨ੍ਨਾ ਕੁਸਲਾਕੁਸਲਵੇਦਨਾਪਿ ਵਿਪਾਕਵੇਦਨਾਪਿ. ਤਤ੍ਥ ਸਮ੍ਮਾਦਿਟ੍ਠਿਸਮ੍ਪਯੁਤ੍ਤਾ ਕੁਸਲਾਵ ਹੋਤਿ, ਸਮ੍ਮਾਦਿਟ੍ਠਿਂ ਪਨ ਉਪਨਿਸ੍ਸਾਯ ਬੁਦ੍ਧਪੂਜਂ ਦੀਪਮਾਲਂ ਮਹਾਧਮ੍ਮਸ੍ਸਵਨਂ ਅਪ੍ਪਤਿਟ੍ਠਿਤੇ ਦਿਸਾਭਾਗੇ ਚੇਤਿਯਪਤਿਟ੍ਠਾਪਨਨ੍ਤਿ ਏਵਮਾਦੀਨਿ ਪੁਞ੍ਞਾਨਿ ਕਰੋਨ੍ਤਿ, ਇਤਿ ਨੇਸਂ ਕੁਸਲਾ ਵੇਦਨਾ ਉਪ੍ਪਜ੍ਜਤਿ. ਸਮ੍ਮਾਦਿਟ੍ਠਿਂਯੇਵ ਨਿਸ੍ਸਾਯ ਮਿਚ੍ਛਾਦਿਟ੍ਠਿਕੇ ਅਕ੍ਕੋਸਨ੍ਤਿ ਪਰਿਭਾਸਨ੍ਤਿ, ਅਤ੍ਤਾਨਂ ਉਕ੍ਕਂਸੇਨ੍ਤਿ, ਪਰਂ ਵਮ੍ਭੇਨ੍ਤਿ, ਇਤਿ ਨੇਸਂ ਅਕੁਸਲਵੇਦਨਾ ਉਪ੍ਪਜ੍ਜਤਿ. ਵਿਪਾਕਵੇਦਨਾ ਪਨ ਭਵਨ੍ਤਰਗਤਾਨਂਯੇਵ ਹੋਤਿ. ਮਿਚ੍ਛਾਸਙ੍ਕਪ੍ਪਪਚ੍ਚਯਾਤਿਆਦੀਸੁਪਿ ਏਸੇਵ ਨਯੋ. ਛਨ੍ਦਪਚ੍ਚਯਾਤਿਆਦੀਸੁ ਪਨ ਛਨ੍ਦਪਚ੍ਚਯਾ ਅਟ੍ਠਲੋਭਸਹਗਤਚਿਤ੍ਤਸਮ੍ਪਯੁਤ੍ਤਾ ਵੇਦਨਾ ਵੇਦਿਤਬ੍ਬਾ, ਵਿਤਕ੍ਕਪਚ੍ਚਯਾ ਪਠਮਜ੍ਝਾਨਵੇਦਨਾਵ. ਸਞ੍ਞਾ ਪਚ੍ਚਯਾ ਠਪੇਤ੍ਵਾ ਪਠਮਜ੍ਝਾਨਂ ਸੇਸਾ ਛ ਸਞ੍ਞਾਸਮਾਪਤ੍ਤਿਵੇਦਨਾ.

ਛਨ੍ਦੋ ਚ ਅਵੂਪਸਨ੍ਤੋਤਿਆਦੀਸੁ ਤਿਣ੍ਣਂ ਅਵੂਪਸਮੇ ਅਟ੍ਠਲੋਭਸਹਗਤਚਿਤ੍ਤਸਮ੍ਪਯੁਤ੍ਤਾ ਵੇਦਨਾ ਹੋਤਿ, ਛਨ੍ਦਮਤ੍ਤਸ੍ਸ ਵੂਪਸਮੇ ਪਠਮਜ੍ਝਾਨਵੇਦਨਾਵ. ਛਨ੍ਦਵਿਤਕ੍ਕਾਨਂ ਵੂਪਸਮੇ ਦੁਤਿਯਜ੍ਝਾਨਾਦਿਵੇਦਨਾ ਅਧਿਪ੍ਪੇਤਾ, ਤਿਣ੍ਣਮ੍ਪਿ ਵੂਪਸਮੇ ਨੇਵਸਞ੍ਞਾਨਾਸਞ੍ਞਾਯਤਨਵੇਦਨਾ. ਅਪ੍ਪਤ੍ਤਸ੍ਸ ਪਤ੍ਤਿਯਾਤਿ ਅਰਹਤ੍ਤਫਲਸ੍ਸ ਪਤ੍ਤਤ੍ਥਾਯ. ਅਤ੍ਥਿ ਆਯਾਮਨ੍ਤਿ ਅਤ੍ਥਿ ਵੀਰਿਯਂ. ਤਸ੍ਮਿਮ੍ਪਿ ਠਾਨੇ ਅਨੁਪ੍ਪਤ੍ਤੇਤਿ ਤਸ੍ਸ ਵੀਰਿਯਾਰਮ੍ਭਸ੍ਸ ਵਸੇਨ ਤਸ੍ਸ ਅਰਹਤ੍ਤਫਲਸ੍ਸ ਕਾਰਣੇ ਅਨੁਪ੍ਪਤ੍ਤੇ. ਤਪ੍ਪਚ੍ਚਯਾਪਿ ਵੇਦਯਿਤਨ੍ਤਿ ਅਰਹਤ੍ਤਸ੍ਸ ਠਾਨਪਚ੍ਚਯਾ ਵੇਦਯਿਤਂ. ਏਤੇਨ ਚਤੁਮਗ੍ਗਸਹਜਾਤਾ ਨਿਬ੍ਬਤ੍ਤਿਤਲੋਕੁਤ੍ਤਰਵੇਦਨਾਵ ਗਹਿਤਾ.

੨. ਦੁਤਿਯਵਿਹਾਰਸੁਤ੍ਤਵਣ੍ਣਨਾ

੧੨. ਦੁਤਿਯੇ ਪਟਿਸਲ੍ਲਾਨਕਾਰਣਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਮਿਚ੍ਛਾਦਿਟ੍ਠਿਵੂਪਸਮਪਚ੍ਚਯਾਤਿ ਮਿਚ੍ਛਾਦਿਟ੍ਠਿਵੂਪਸਮੋ ਨਾਮ ਸਮ੍ਮਾਦਿਟ੍ਠਿ. ਤਸ੍ਮਾ ਯਂ ਸਮ੍ਮਾਦਿਟ੍ਠਿਪਚ੍ਚਯਾ ਵੇਦਯਿਤਂ ਵੁਤ੍ਤਂ, ਤਦੇਵ ਮਿਚ੍ਛਾਦਿਟ੍ਠਿਵੂਪਸਮਪਚ੍ਚਯਾ ਵੇਦਿਤਬ੍ਬਂ. ਇਮਸ੍ਮਿਂ ਪਨ ਸੁਤ੍ਤੇ ਵਿਪਾਕਵੇਦਨਂ ਅਤਿਦੂਰੇਤਿ ਮਞ੍ਞਮਾਨਾ ਨ ਗਣ੍ਹਨ੍ਤੀਤਿ ਵੁਤ੍ਤਂ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਯਸ੍ਸ ਯਸ੍ਸ ਹਿ ਵੂਪਸਮਪਚ੍ਚਯਾਤਿ ਵੁਚ੍ਚਤਿ, ਤਸ੍ਸ ਤਸ੍ਸ ਪਟਿਪਕ੍ਖਧਮ੍ਮਪਚ੍ਚਯਾਵ ਤਂ ਤਂ ਵੇਦਯਿਤਂ ਅਧਿਪ੍ਪੇਤਂ. ਛਨ੍ਦਵੂਪਸਮਪਚ੍ਚਯਾਤਿਆਦੀਸੁ ਪਨ ਛਨ੍ਦਵੂਪਸਮਪਚ੍ਚਯਾ ਤਾਵ ਪਠਮਜ੍ਝਾਨਵੇਦਨਾ ਵੇਦਿਤਬ੍ਬਾ. ਵਿਤਕ੍ਕਵੂਪਸਮਪਚ੍ਚਯਾ ਦੁਤਿਯਜ੍ਝਾਨਵੇਦਨਾ. ਸਞ੍ਞਾਪਚ੍ਚਯਾ ਛਸਮਾਪਤ੍ਤਿਵੇਦਨਾ. ਸਞ੍ਞਾਵੂਪਸਮਪਚ੍ਚਯਾ ਨੇਵਸਞ੍ਞਾਨਾਸਞ੍ਞਾਯਤਨਵੇਦਨਾ. ਛਨ੍ਦੋ ਚ ਵੂਪਸਨ੍ਤੋਤਿਆਦੀਨਿ ਵੁਤ੍ਤਤ੍ਥਾਨੇਵ.

੩-੭. ਸੇਕ੍ਖਸੁਤ੍ਤਾਦਿਵਣ੍ਣਨਾ

੧੩-੧੭. ਤਤਿਯੇ ਸੇਕ੍ਖੋਤਿ ਸਿਕ੍ਖਨਸੀਲੋ. ਕਿਂ ਸਿਕ੍ਖਤੀਤਿ? ਤਿਸ੍ਸੋ ਸਿਕ੍ਖਾ. ਸੇਕ੍ਖਾਯਾਤਿ ਤੀਹਿ ਫਲੇਹਿ ਚਤੂਹਿ ਚ ਮਗ੍ਗੇਹਿ ਸਦ੍ਧਿਂ ਉਪ੍ਪਨ੍ਨਾਯ. ਸਾਪਿ ਹਿ ਅਨਿਟ੍ਠਿਤਕਿਚ੍ਚਤ੍ਤਾ ਅਤ੍ਤਨੋ ਕਿਚ੍ਚਂ ਸਿਕ੍ਖਤੇਵਾਤਿ ਸੇਕ੍ਖਾ. ਚਤੁਤ੍ਥਪਞ੍ਚਮਛਟ੍ਠਸਤ੍ਤਮਾਨਿ ਉਤ੍ਤਾਨਤ੍ਥਾਨੇਵਾਤਿ.

੮-੧੦. ਪਠਮਕੁਕ੍ਕੁਟਾਰਾਮਸੁਤ੍ਤਾਦਿਵਣ੍ਣਨਾ

੧੮-੨੦. ਅਟ੍ਠਮੇ ਉਮ੍ਮਙ੍ਗੋਤਿ ਪਞ੍ਞਾਉਮ੍ਮਙ੍ਗੋ, ਪਞ੍ਞਾਵੀਮਂਸਨਂ, ਪਞ੍ਞਾਗਵੇਸਨਨ੍ਤਿ ਅਤ੍ਥੋ. ਏਵਞ੍ਹਿ ਤ੍ਵਂ ਆਵੁਸੋਤਿ ਇਦਂ ਤਸ੍ਸ ਪੁਚ੍ਛਾਪਤਿਟ੍ਠਾਪਨਤ੍ਥਾਯ ਆਹ. ਨਵਮਦਸਮਾਨਿ ਉਤ੍ਤਾਨਤ੍ਥਾਮੇਵਾਤਿ.

ਵਿਹਾਰਵਗ੍ਗੋ ਦੁਤਿਯੋ.

੩. ਮਿਚ੍ਛਤ੍ਤਵਗ੍ਗਵਣ੍ਣਨਾ

੨੧-੩੦. ਤਤਿਯਵਗ੍ਗਸ੍ਸ ਪਠਮੇ ਮਿਚ੍ਛਤ੍ਤਨ੍ਤਿ ਮਿਚ੍ਛਾਸਭਾਵਂ. ਸਮ੍ਮਤ੍ਤਨ੍ਤਿ ਸਮ੍ਮਾਸਭਾਵਂ. ਮਿਚ੍ਛਾਪਟਿਪਤ੍ਤਾਧਿਕਰਣਹੇਤੂਤਿ ਮਿਚ੍ਛਾਪਟਿਪਤ੍ਤਿਕਰਣਹੇਤੁ. ਯਸ੍ਮਾ ਮਿਚ੍ਛਾਪਟਿਪਤ੍ਤਿਂ ਕਰੋਤਿ, ਤਸ੍ਮਾਤਿ ਅਤ੍ਥੋ. ਨਾਰਾਧਕੋਤਿ ਨ ਸਮ੍ਪਾਦਕੋ. ਞਾਯਂ ਧਮ੍ਮਨ੍ਤਿ ਅਰਿਯਮਗ੍ਗਧਮ੍ਮਂ. ਮਿਚ੍ਛਾਞਾਣੀਤਿ ਮਿਚ੍ਛਾਵਿਞ੍ਞਾਣੋ ਮਿਚ੍ਛਾਪਚ੍ਚਵੇਕ੍ਖਣੋ. ਮਿਚ੍ਛਾਵਿਮੁਤ੍ਤੀਤਿ ਅਯਾਥਾਵਵਿਮੁਤ੍ਤਿ, ਅਨਿਯ੍ਯਾਨਿਕਵਿਮੁਤ੍ਤਿ. ਇਮੇਸੁ ਤਤਿਯਾਦੀਸੁ ਚਤੂਸੁ ਸੁਤ੍ਤੇਸੁ ਵਟ੍ਟਵਿਵਟ੍ਟਂ ਕਥਿਤਂ, ਪਚ੍ਛਿਮੇਸੁ ਪਨੇਤ੍ਥ ਦ੍ਵੀਸੁ ਪੁਗ੍ਗਲੋ ਪੁਚ੍ਛਿਤੋ ਧਮ੍ਮੋ ਵਿਭਤ੍ਤੋ, ਏਵਂ ਧਮ੍ਮੇਨ ਪੁਗ੍ਗਲੋ ਦਸ੍ਸਿਤੋਤਿ. ਸੁਪ੍ਪਵਤ੍ਤਿਯੋਤਿ ਸੁਪ੍ਪਵਤ੍ਤਨਿਯੋ. ਯਥਾ ਇਚ੍ਛਿਤਿਚ੍ਛਿਤਂ ਦਿਸਂ ਪਵਤ੍ਤੇਨ੍ਤੋ ਧਾਵਤਿ, ਏਵਂ ਪਵਤ੍ਤੇਤੁਂ ਸਕ੍ਕਾ ਹੋਤੀਤਿ ਅਤ੍ਥੋ. ਸਉਪਨਿਸਂ ਸਪਰਿਕ੍ਖਾਰਨ੍ਤਿ ਸਪ੍ਪਚ੍ਚਯਂ ਸਪਰਿਵਾਰਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਮਿਚ੍ਛਤ੍ਤਵਗ੍ਗੋ ਤਤਿਯੋ.

੪. ਪਟਿਪਤ੍ਤਿਵਗ੍ਗਵਣ੍ਣਨਾ

੩੧-੪੦. ਚਤੁਤ੍ਥੇ ਮਿਚ੍ਛਾਪਟਿਪਤ੍ਤਿਨ੍ਤਿ ਅਯਾਥਾਵਪਟਿਪਤ੍ਤਿਂ. ਮਿਚ੍ਛਾਪਟਿਪਨ੍ਨਨ੍ਤਿ ਅਯਾਥਾਵਪਟਿਪਨ੍ਨਂ. ਇਤਿ ਏਕਂ ਸੁਤ੍ਤਂ ਧਮ੍ਮਵਸੇਨ ਕਥਿਤਂ, ਏਕਂ ਪੁਗ੍ਗਲਵਸੇਨ. ਅਪਾਰਾ ਪਾਰਨ੍ਤਿ ਵਟ੍ਟਤੋ ਨਿਬ੍ਬਾਨਂ. ਪਾਰਗਾਮਿਨੋਤਿ ਏਤ੍ਥ ਯੇਪਿ ਪਾਰਙ੍ਗਤਾ, ਯੇਪਿ ਗਚ੍ਛਨ੍ਤਿ, ਯੇਪਿ ਗਮਿਸ੍ਸਨ੍ਤਿ, ਸਬ੍ਬੇ ਪਾਰਗਾਮਿਨੋਤ੍ਵੇਵ ਵੇਦਿਤਬ੍ਬਾ.

ਤੀਰਮੇਵਾਨੁਧਾਵਤੀਤਿ ਵਟ੍ਟਮੇਵ ਅਨੁਧਾਵਤਿ, ਵਟ੍ਟੇ ਵਿਚਰਤਿ. ਕਣ੍ਹਨ੍ਤਿ ਅਕੁਸਲਧਮ੍ਮਂ. ਸੁਕ੍ਕਨ੍ਤਿ ਕੁਸਲਧਮ੍ਮਂ. ਓਕਾ ਅਨੋਕਨ੍ਤਿ ਵਟ੍ਟਤੋ ਨਿਬ੍ਬਾਨਂ. ਆਗਮ੍ਮਾਤਿ ਆਰਬ੍ਭ ਸਨ੍ਧਾਯ ਪਟਿਚ੍ਚ. ਪਰਿਯੋਦਪੇਯ੍ਯਾਤਿ ਪਰਿਸੁਦ੍ਧਂ ਕਰੇਯ੍ਯ. ਚਿਤ੍ਤਕ੍ਲੇਸੇਹੀਤਿ ਚਿਤ੍ਤਂ ਕਿਲਿਸ੍ਸਾਪੇਨ੍ਤੇਹਿ ਨੀਵਰਣੇਹਿ. ਸਮ੍ਬੋਧਿਯਙ੍ਗੇਸੂਤਿ ਸਤ੍ਤਸੁ ਬੋਜ੍ਝਙ੍ਗੇਸੁ.

ਸਾਮਞ੍ਞਤ੍ਥਨ੍ਤਿ ਨਿਬ੍ਬਾਨਂ. ਤਞ੍ਹਿ ਸਾਮਞ੍ਞੇਨ ਉਪਗਨ੍ਤਬ੍ਬਤੋ ਸਾਮਞ੍ਞਤ੍ਥੋਤਿ ਵੁਚ੍ਚਤਿ. ਬ੍ਰਹ੍ਮਞ੍ਞਨ੍ਤਿ ਸੇਟ੍ਠਭਾਵਂ. ਬ੍ਰਹ੍ਮਞ੍ਞਤ੍ਥਨ੍ਤਿ ਨਿਬ੍ਬਾਨਂ ਬ੍ਰਹ੍ਮਞ੍ਞੇਨ ਉਪਗਨ੍ਤਬ੍ਬਤੋ. ਯਤ੍ਥ ਯਤ੍ਥ ਪਨ ਹੇਟ੍ਠਾ ਚ ਇਮੇਸੁ ਚ ਤੀਸੁ ਸੁਤ੍ਤੇਸੁ ‘‘ਰਾਗਕ੍ਖਯੋ’’ਤਿ ਆਗਤਂ, ਤਤ੍ਥ ਤਤ੍ਥ ਅਰਹਤ੍ਤਮ੍ਪਿ ਵਟ੍ਟਤਿਯੇਵਾਤਿ ਵਦਨ੍ਤਿ.

ਪਟਿਪਤ੍ਤਿਵਗ੍ਗੋ ਚਤੁਤ੍ਥੋ.

੫. ਅਞ੍ਞਤਿਤ੍ਥਿਯਪੇਯ੍ਯਾਲਵਗ੍ਗਵਣ੍ਣਨਾ

੪੧-੪੮. ਅਞ੍ਞਤਿਤ੍ਥਿਯਪੇਯ੍ਯਾਲੇ ਅਦ੍ਧਾਨਪਰਿਞ੍ਞਤ੍ਥਨ੍ਤਿ ਸਂਸਾਰਦ੍ਧਾਨਂ ਨਿਬ੍ਬਾਨਂ ਪਤ੍ਵਾ ਪਰਿਞ੍ਞਾਤਂ ਨਾਮ ਹੋਤਿ. ਤਸ੍ਮਾ ਨਿਬ੍ਬਾਨਂ ‘‘ਅਦ੍ਧਾਨਪਰਿਞ੍ਞਾ’’ਤਿ ਵੁਚ੍ਚਤਿ, ਤਦਤ੍ਥਨ੍ਤਿ ਅਤ੍ਥੋ. ਅਨੁਪਾਦਾਪਰਿਨਿਬ੍ਬਾਨਤ੍ਥਨ੍ਤਿ ਅਪਚ੍ਚਯਪਰਿਨਿਬ੍ਬਾਨਤ੍ਥਂ. ਇਤਿ ਇਮਸ੍ਮਿਂ ਪੇਯ੍ਯਾਲੇ ਵਿਜ੍ਜਾਵਿਮੁਤ੍ਤਿਫਲੇਨ ਅਰਹਤ੍ਤਂ ਕਥਿਤਂ. ਞਾਣਦਸ੍ਸਨੇਨ ਪਚ੍ਚਵੇਕ੍ਖਣਾ, ਸੇਸੇਹਿ ਨਿਬ੍ਬਾਨਨ੍ਤਿ.

ਅਞ੍ਞਤਿਤ੍ਥਿਯਪੇਯ੍ਯਾਲਵਗ੍ਗੋ.

੬. ਸੂਰਿਯਪੇਯ੍ਯਾਲਵਗ੍ਗਵਣ੍ਣਨਾ

੪੯-੬੨. ਸੂਰਿਯਪੇਯ੍ਯਾਲੇ ਅਰੁਣੁਗ੍ਗਂ ਵਿਯ ਕਲ੍ਯਾਣਮਿਤ੍ਤਤ੍ਤਾ, ਕਲ੍ਯਾਣਮਿਤ੍ਤਤਾਯ ਠਤ੍ਵਾ ਨਿਬ੍ਬਤ੍ਤਿਤੋ ਸਵਿਪਸ੍ਸਨਅਰਿਯਮਗ੍ਗੋ ਸੂਰਿਯਪਾਤੁਭਾਵੋ ਵਿਯਾਤਿ ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਸੀਲਸਮ੍ਪਦਾਤਿ ਚਤੁਪਾਰਿਸੁਦ੍ਧਿਸੀਲਂ. ਛਨ੍ਦਸਮ੍ਪਦਾਤਿ ਕੁਸਲਕਤ੍ਤੁਕਮ੍ਯਤਾਛਨ੍ਦੋ. ਅਤ੍ਤਸਮ੍ਪਦਾਤਿ ਸਮ੍ਪਨ੍ਨਚਿਤ੍ਤਤਾ. ਦਿਟ੍ਠਿਸਮ੍ਪਦਾਤਿ ਞਾਣਸਮ੍ਪਤ੍ਤਿ. ਅਪ੍ਪਮਾਦਸਮ੍ਪਦਾਤਿ ਕਾਰਾਪਕਅਪ੍ਪਮਾਦਸਮ੍ਪਤ੍ਤਿ. ਯੋਨਿਸੋਮਨਸਿਕਾਰਸਮ੍ਪਦਾਤਿ ਉਪਾਯਮਨਸਿਕਾਰਸਮ੍ਪਤ੍ਤਿ. ਪੁਨ ਕਲ੍ਯਾਣਮਿਤ੍ਤਤਾਤਿਆਦੀਨਿ ਸਮ੍ਮਾਦਿਟ੍ਠਿਆਦੀਨਂ ਅਞ੍ਞੇਨਪਿ ਆਕਾਰੇਨ ਭਾਵਦਸ੍ਸਨਤ੍ਥਂ ਵੁਤ੍ਤਾਨਿ. ਸਬ੍ਬਾਨੇਵ ਚੇਤਾਨਿ ਸੁਤ੍ਤਾਨਿ ਪਾਟਿਯੇਕ੍ਕਂ ਪੁਗ੍ਗਲਜ੍ਝਾਸਯਵਸੇਨ ਵੁਤ੍ਤਾਨੀਤਿ.

ਸੂਰਿਯਪੇਯ੍ਯਾਲਵਗ੍ਗੋ.

੭. ਏਕਧਮ੍ਮਪੇਯ੍ਯਾਲਵਗ੍ਗਾਦਿਵਣ੍ਣਨਾ

੬੩-੧੩੮. ਏਕਧਮ੍ਮਪੇਯ੍ਯਾਲੋਪਿ ਗਙ੍ਗਾਪੇਯ੍ਯਾਲੋਪਿ ਪਾਟਿਯੇਕ੍ਕਂ ਪੁਗ੍ਗਲਜ੍ਝਾਸਯਵਸੇਨੇਵ ਤਥਾ ਤਥਾ ਵੁਤ੍ਤੇ ਬੁਜ੍ਝਨਕਾਨਂ ਅਜ੍ਝਾਸਯਵਸੇਨ ਕਥਿਤੋ.

੮. ਅਪ੍ਪਮਾਦਪੇਯ੍ਯਾਲਵਗ੍ਗੋ

੧. ਤਥਾਗਤਸੁਤ੍ਤਵਣ੍ਣਨਾ

੧੩੯. ਅਪ੍ਪਮਾਦਪੇਯ੍ਯਾਲੇ ਏਵਮੇਵ ਖੋਤਿ ਏਤ੍ਥ ਯਥਾ ਸਬ੍ਬਸਤ੍ਤਾਨਂ ਸਮ੍ਮਾਸਮ੍ਬੁਦ੍ਧੋ ਅਗ੍ਗੋ, ਏਵਂ ਸਬ੍ਬੇਸਂ ਕੁਸਲਧਮ੍ਮਾਨਂ ਕਾਰਾਪਕਅਪ੍ਪਮਾਦੋ ਅਗ੍ਗੋਤਿ ਦਟ੍ਠਬ੍ਬੋ. ਨਨੁ ਚੇਸ ਲੋਕਿਯੋਵ, ਕੁਸਲਧਮ੍ਮਾ ਪਨ ਲੋਕੁਤ੍ਤਰਾਪਿ. ਅਯਞ੍ਚ ਕਾਮਾਵਚਰੋਵ, ਕੁਸਲਧਮ੍ਮਾ ਪਨ ਚਤੁਭੂਮਕਾ. ਕਥਮੇਸ ਤੇਸਂ ਅਗ੍ਗੋਤਿ? ਪਟਿਲਾਭਕਟ੍ਠੇਨ. ਅਪ੍ਪਮਾਦੇਨ ਹਿ ਤੇ ਪਟਿਲਬ੍ਭਨ੍ਤਿ, ਤਸ੍ਮਾ ਸੋ ਤੇਸਂ ਅਗ੍ਗੋ. ਤੇਨੇਤਂ ਵੁਤ੍ਤਂ ਸਬ੍ਬੇ ਤੇ ਅਪ੍ਪਮਾਦਮੂਲਕਾਤਿਆਦਿ.

੨. ਪਦਸੁਤ੍ਤਵਣ੍ਣਨਾ

੧੪੦. ਜਙ੍ਗਲਾਨਨ੍ਤਿ ਪਥਵੀਤਲਵਾਸੀਨਂ. ਪਾਣਾਨਨ੍ਤਿ ਸਪਾਦਕਪਾਣਾਨਂ. ਪਦਜਾਤਾਨੀਤਿ ਪਦਾਨਿ. ਸਮੋਧਾਨਂ ਗਚ੍ਛਨ੍ਤੀਤਿ ਓਧਾਨਂ ਉਪਕ੍ਖੇਪਂ ਗਚ੍ਛਨ੍ਤਿ. ਅਗ੍ਗਮਕ੍ਖਾਯਤੀਤਿ ਸੇਟ੍ਠਂ ਅਕ੍ਖਾਯਤਿ. ਯਦਿਦਂ ਮਹਨ੍ਤਤ੍ਤੇਨਾਤਿ ਮਹਨ੍ਤਭਾਵੇਨ ਅਗ੍ਗਮਕ੍ਖਾਯਤਿ, ਨ ਗੁਣਵਸੇਨਾਤਿ ਅਤ੍ਥੋ.

੩-੧੦. ਕੂਟਸੁਤ੍ਤਾਦਿਵਣ੍ਣਨਾ

੧੪੧-੧੪੮. ਵਸ੍ਸਿਕਨ੍ਤਿ ਸੁਮਨਪੁਪ੍ਫਂ. ਇਮਂ ਕਿਰ ਸੁਤ੍ਤਂ ਸੁਤ੍ਵਾ ਭਾਤਿਯਮਹਾਰਾਜਾ ਵੀਮਂਸਿਤੁਕਾਮਤਾਯ ਏਕਸ੍ਮਿਂ ਗਬ੍ਭੇ ਚਤੁਜਾਤਿਗਨ੍ਧੇਹਿ ਪਰਿਭਣ੍ਡਂ ਕਾਰੇਤ੍ਵਾ ਸੁਗਨ੍ਧਾਨਿ ਪੁਪ੍ਫਾਨਿ ਆਹਰਾਪੇਤ੍ਵਾ ਏਕਸ੍ਸ ਸਮੁਗ੍ਗਸ੍ਸ ਮਜ੍ਝੇ ਸੁਮਨਪੁਪ੍ਫਮੁਟ੍ਠਿਂ ਠਪੇਤ੍ਵਾ ਸੇਸਾਨਿ ਤਸ੍ਸ ਸਮਨ੍ਤਤੋ ਮੁਟ੍ਠਿਮੁਟ੍ਠਿਂ ਕਤ੍ਵਾ ਠਪੇਤ੍ਵਾ ਦ੍ਵਾਰਂ ਪਿਧਾਯ ਬਹਿ ਨਿਕ੍ਖਨ੍ਤੋ. ਅਥਸ੍ਸ ਮੁਹੁਤ੍ਤਂ ਵੀਤਿਨਾਮੇਤ੍ਵਾ ਦ੍ਵਾਰਂ ਵਿਵਰਿਤ੍ਵਾ ਪਵਿਸਨ੍ਤਸ੍ਸ ਸਬ੍ਬਪਠਮਂ ਸੁਮਨਪੁਪ੍ਫਗਨ੍ਧੋ ਘਾਨਂ ਪਹਰਿ. ਸੋ ਮਹਾਤਲਸ੍ਮਿਂਯੇਵ ਮਹਾਚੇਤਿਯਾਭਿਮੁਖੋ ਨਿਪਜ੍ਜਿਤ੍ਵਾ – ‘‘ਵਸ੍ਸਿਕਂ ਤੇਸਂ ਅਗ੍ਗਨ੍ਤਿ ਕਥੇਨ੍ਤੇਨ ਸੁਕਥਿਤਂ ਸਮ੍ਮਾਸਮ੍ਬੁਦ੍ਧੇਨਾ’’ਤਿ ਚੇਤਿਯਂ ਵਨ੍ਦਿ. ਕੁਟ੍ਟਰਾਜਾਨੋਤਿ ਖੁਦ੍ਦਕਰਾਜਾਨੋ. ‘‘ਖੁਦ੍ਦਰਾਜਾਨੋ’’ਤਿਪਿ ਪਾਠੋ. ਤਨ੍ਤਾਵੁਤਾਨਨ੍ਤਿ ਤਨ੍ਤੇ ਆਵੁਤਾਨਂ, ਤਨ੍ਤਂ ਆਰੋਪੇਤ੍ਵਾ ਵਾਯਿਤਾਨਨ੍ਤਿ ਅਤ੍ਥੋ. ਇਦਞ੍ਚ ਪਚ੍ਚਤ੍ਤੇ ਸਾਮਿਵਚਨਂ. ਯਾਨਿ ਕਾਨਿਚਿ ਤਨ੍ਤਾਵੁਤਾਨਿ ਵਤ੍ਥਾਨੀਤਿ ਅਯਞ੍ਹੇਤ੍ਥ ਅਤ੍ਥੋ. ਅਥ ਵਾ ਤਨ੍ਤਾਵੁਤਾਨਂ ਵਤ੍ਥਾਨਂ ਯਾਨਿ ਕਾਨਿਚਿ ਵਤ੍ਥਾਨੀਤਿ ਏਵਂ ਸਾਵਸੇਸਪਾਠਨਯੇਨਪੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਅਪ੍ਪਮਾਦਵਗ੍ਗੋ ਅਟ੍ਠਮੋ.

੯. ਬਲਕਰਣੀਯਵਗ੍ਗੋ

੧. ਬਲਸੁਤ੍ਤਵਣ੍ਣਨਾ

੧੪੯. ਬਲਕਰਣੀਯਵਗ੍ਗੇ ਬਲਕਰਣੀਯਾਤਿ ਊਰੁਬਲਬਾਹੁਬਲੇਨ ਕਤ੍ਤਬ੍ਬਾ ਧਾਵਨਲਙ੍ਘਨਤਾਪਨਵਹਨਾਦਯੋ ਕਮ੍ਮਨ੍ਤਾ. ਸੀਲੇ ਪਤਿਟ੍ਠਾਯਾਤਿ ਚਤੁਪਾਰਿਸੁਦ੍ਧਿਸੀਲੇ ਠਤ੍ਵਾ. ਅਟ੍ਠਙ੍ਗਿਕਂ ਮਗ੍ਗਨ੍ਤਿ ਸਹਵਿਪਸ੍ਸਨਂ ਅਰਿਯਮਗ੍ਗਂ.

੨. ਬੀਜਸੁਤ੍ਤਵਣ੍ਣਨਾ

੧੫੦. ਬੀਜਗਾਮਭੂਤਗਾਮਾਤਿ ਏਤ੍ਥ ਪਞ੍ਚਵਿਧਮ੍ਪਿ ਬੀਜਂ ਬੀਜਗਾਮੋ ਨਾਮ, ਤਦੇਵ ਪਣ੍ਣਸਮ੍ਪਨ੍ਨਂ ਨੀਲਭਾਵਤੋ ਪਟ੍ਠਾਯ ਭੂਤਗਾਮੋਤਿ ਵੇਦਿਤਬ੍ਬਂ.

੩. ਨਾਗਸੁਤ੍ਤਵਣ੍ਣਨਾ

੧੫੧. ਬਲਂ ਗਾਹੇਨ੍ਤੀਤਿ ਬਲਂ ਗਣ੍ਹਨ੍ਤਿ, ਗਹਿਤਬਲਾ ਥਿਰਸਰੀਰਾ ਹੋਨ੍ਤਿ. ਕੁਸੋਬ੍ਭੇ ਓਤਰਨ੍ਤੀਤਿਆਦੀਸੁ ਅਯਮਨੁਪੁਬ੍ਬਿਕਥਾ – ਨਾਗਿਨਿਯੋ ਕਿਰ ਉਤੁਸਮਯੇ ਪਤਿਟ੍ਠਿਤਗਬ੍ਭਾ ਚਿਨ੍ਤੇਨ੍ਤਿ – ‘‘ਸਚੇ ਮਯਂ ਇਧ ਵਿਜਾਯਿਸ੍ਸਾਮ, ਏਵਂ ਨੋ ਦਾਰਕਾ ਊਮਿਵੇਗਞ੍ਚ ਸੁਪਣ੍ਣਸ੍ਸ ਚ ਪਕ੍ਖਨ੍ਦਿਤ੍ਵਾ ਆਗਤਸ੍ਸ ਵੇਗਂ ਸਹਿਤੁਂ ਨ ਸਕ੍ਖਿਸ੍ਸਨ੍ਤੀ’’ਤਿ ਤਾ ਮਹਾਸਮੁਦ੍ਦੇ ਨਿਮੁਜ੍ਜਿਤ੍ਵਾ ਸਮ੍ਭਜ੍ਜਮੁਖਦ੍ਵਾਰਂ ਪਤ੍ਵਾ ਪਞ੍ਚ ਮਹਾਨਦਿਯੋ ਪਵਿਸਿਤ੍ਵਾ ਹਿਮਵਨ੍ਤਂ ਗਚ੍ਛਨ੍ਤਿ. ਤਤ੍ਥ ਸੁਪਣ੍ਣੇਹਿ ਅਪਕ੍ਖਨ੍ਦਨੀਯਾਸੁ ਸੁਵਣ੍ਣਰਜਤਮਣਿਗੁਹਾਸੁ ਵਸਮਾਨਾ ਵਿਜਾਯਿਤ੍ਵਾ ਨਾਗਪੋਤਕੇ ਗੋਪ੍ਫਕਾਦਿਪਮਾਣੇਸੁ ਉਦਕੇਸੁ ਓਤਾਰੇਤ੍ਵਾ ਉਦਕਤਰਣਂ ਸਿਕ੍ਖਾਪੇਨ੍ਤਿ.

ਅਥ ਯਦਾ ਅਨੁਕ੍ਕਮੇਨ ਤੇ ਨਾਗਾ ਗਙ੍ਗਾਦੀਨਂ ਨਦੀਨਂ ਓਰਿਮਤੀਰਤੋ ਪਰਤੀਰਂ, ਪਰਤੀਰਤੋ ਓਰਿਮਤੀਰਨ੍ਤਿ ਤਰਣਪਟਿਤਰਣਂ ਕਾਤੁਂ ਸਕ੍ਕੋਨ੍ਤਿ, ਤਦਾ ‘‘ਇਦਾਨਿ ਨੋ ਦਾਰਕਾ ਊਮਿਵੇਗਞ੍ਚ ਗਰੁਲ਼ਵੇਗਞ੍ਚ ਸਹਿਤੁਂ ਸਕ੍ਖਿਸ੍ਸਨ੍ਤੀ’’ਤਿ ਞਤ੍ਵਾ ਅਤ੍ਤਨੋ ਆਨੁਭਾਵੇਨ ਮਹਾਮੇਘਂ ਸਮੁਟ੍ਠਾਪੇਤ੍ਵਾ ਸਕਲਹਿਮਵਨ੍ਤਂ ਏਕੋਦਕਂ ਵਿਯ ਕੁਰੁਮਾਨਾ ਦੇਵਂ ਵਸ੍ਸਾਪੇਤ੍ਵਾ ਸੁਵਣ੍ਣਰਜਤਾਦਿਮਯਾ ਨਾਵਾ ਮਾਪੇਤ੍ਵਾ ਉਪਰਿ ਸੁਵਣ੍ਣਤਾਰਕਵਿਚਿਤ੍ਤਂ ਸਮੋਸਰਿਤਗਨ੍ਧਪੁਪ੍ਫਦਾਮਂ ਚੇਲਵਿਤਾਨਂ ਬਨ੍ਧਿਤ੍ਵਾ ਸੁਰਭਿਚਨ੍ਦਨਗਨ੍ਧਪੁਪ੍ਫਾਦੀਨਿ ਆਦਾਯ ਤਾਹਿ ਨਾਵਾਹਿ ਪਞ੍ਚ ਮਹਾਨਦਿਯੋ ਓਗਾਹਿਤ੍ਵਾ ਅਨੁਕ੍ਕਮੇਨ ਮਹਾਸਮੁਦ੍ਦਂ ਪਾਪੁਣਨ੍ਤਿ. ਤਤ੍ਥ ਚ ਵਸਨ੍ਤਾ ਦਸਬ੍ਯਾਮ-ਸਤਬ੍ਯਾਮ-ਸਹਸ੍ਸਬ੍ਯਾਮ-ਸਤਸਹਸ੍ਸਬ੍ਯਾਮ-ਪਮਾਣਤਂ ਆਪਜ੍ਜਨ੍ਤਾ ਮਹਨ੍ਤਤ੍ਤਂ ਵੇਪੁਲ੍ਲਤ੍ਤਂ ਆਪਜ੍ਜਨ੍ਤਿ ਨਾਮ.

ਏਵਮੇਵ ਖੋਤਿ ਏਤ੍ਥ ਹਿਮਵਨ੍ਤਪਬ੍ਬਤੋ ਵਿਯ ਚਤੁਪਾਰਿਸੁਦ੍ਧਿਸੀਲਂ ਦਟ੍ਠਬ੍ਬਂ, ਨਾਗਪੋਤਕਾ ਵਿਯ ਯੋਗਾਵਚਰਾ, ਕੁਸੋਬ੍ਭਾਦਯੋ ਵਿਯ ਅਰਿਯਮਗ੍ਗੋ, ਮਹਾਸਮੁਦ੍ਦੋ ਵਿਯ ਨਿਬ੍ਬਾਨਂ. ਯਥਾ ਨਾਗਪੋਤਕਾ ਹਿਮਵਨ੍ਤੇ ਪਤਿਟ੍ਠਾਯ ਕੁਸੋਬ੍ਭਾਦੀਹਿ ਮਹਾਸਮੁਦ੍ਦਂ ਪਤ੍ਵਾ ਕਾਯਮਹਨ੍ਤਤ੍ਤਂ ਆਪਜ੍ਜਨ੍ਤਿ, ਏਵਂ ਯੋਗਿਨੋ ਸੀਲਂ ਨਿਸ੍ਸਾਯ ਸੀਲੇ ਪਤਿਟ੍ਠਾਯ ਅਰਿਯਮਗ੍ਗੇਨ ਨਿਬ੍ਬਾਨਂ ਪਤ੍ਵਾ ਅਰਹਤ੍ਤਮਗ੍ਗੇਨੇਵ ਆਗਤੇਸੁ ਛਸੁ ਅਭਿਞ੍ਞਾਧਮ੍ਮੇਸੁ ਗੁਣਸਰੀਰਮਹਨ੍ਤਤ੍ਤਂ ਪਾਪੁਣਨ੍ਤੀਤਿ.

੫. ਕੁਮ੍ਭਸੁਤ੍ਤਵਣ੍ਣਨਾ

੧੫੩. ਕੁਮ੍ਭੋਤਿ ਉਦਕਘਟੋ. ਨੋ ਪਚ੍ਚਾਵਮਤੀਤਿ ਨ ਪਤਿਆਵਮਤਿ, ਨ ਅਨ੍ਤੋ ਪਵੇਸੇਤੀਤਿ ਅਤ੍ਥੋ.

੭. ਆਕਾਸਸੁਤ੍ਤਵਣ੍ਣਨਾ

੧੫੫. ਪੁਰਤ੍ਥਿਮਾਤਿ ਪੁਰਤ੍ਥਿਮਦਿਸਤੋ ਆਗਤਵਾਤਾ. ਪਚ੍ਛਿਮਦਿਸਾਦੀਸੁਪਿ ਏਸੇਵ ਨਯੋ. ਚਤ੍ਤਾਰੋਪਿ ਸਤਿਪਟ੍ਠਾਨਾਤਿ ਯਥੇਵ ਹਿ ਏਤੇਸਂ ਪੁਰਤ੍ਥਿਮਾਦਿਭੇਦਾਨਂ ਵਾਤਾਨਂ ਸਨ੍ਨਿਪਾਤੋ ਆਕਾਸੇ ਇਜ੍ਝਤਿ, ਏਵਂ ਇਧਾਪਿ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿਆਦਿਨਾ ਨਯੇਨ ਵੁਤ੍ਤਾ ਬੋਧਿਪਕ੍ਖਿਯਧਮ੍ਮਾ ਸਹਵਿਪਸ੍ਸਨਸ੍ਸ ਅਰਿਯਮਗ੍ਗਸ੍ਸ ਭਾਵਨਾਯ ਇਜ੍ਝਨ੍ਤਿ, ਤੇਨੇਤਂ ਵੁਤ੍ਤਂ.

੮-੯. ਪਠਮਮੇਘਸੁਤ੍ਤਾਦਿਵਣ੍ਣਨਾ

੧੫੬-੧੫੭. ਗਿਮ੍ਹਾਨਂ ਪਚ੍ਛਿਮੇ ਮਾਸੇਤਿ ਆਸਾਲ਼੍ਹਮਾਸੇ. ਊਹਤਨ੍ਤਿ ਦ੍ਵਿਪਦਚਤੁਪ੍ਪਦਾਨਂ ਪਾਦਪ੍ਪਹਾਰੇਨ ਪਥਵੀਤਲੇ ਉਟ੍ਠਹਿਤ੍ਵਾ ਉਦ੍ਧਂ ਗਤਂ ਵਟ੍ਟਿਵਟ੍ਟਿ ਹੁਤ੍ਵਾ ਆਕਾਸੇ ਪਕ੍ਖਨ੍ਤਂ. ਰਜੋਜਲ੍ਲਨ੍ਤਿ ਪਂਸੁਰਜੋਜਲ੍ਲਂ.

੧੦. ਨਾਵਾਸੁਤ੍ਤਵਣ੍ਣਨਾ

੧੫੮. ਸਾਮੁਦ੍ਦਿਕਾਯ ਨਾਵਾਯਾਤਿਆਦਿ ਹੇਟ੍ਠਾ ਵਾਣਿਜਕੋਪਮੇ ਵਿਤ੍ਥਾਰਿਤਮੇਵ.

੧੧-੧੨. ਆਗਨ੍ਤੁਕਸੁਤ੍ਤਾਦਿਵਣ੍ਣਨਾ

੧੫੯-੧੬੦. ਆਗਨ੍ਤੁਕਾਗਾਰਨ੍ਤਿ ਪੁਞ੍ਞਤ੍ਥਿਕੇਹਿ ਨਗਰਮਜ੍ਝੇ ਕਤਂ ਆਗਨ੍ਤੁਕਘਰਂ, ਯਤ੍ਥ ਰਾਜਰਾਜਮਹਾਮਤ੍ਤੇਹਿਪਿ ਸਕ੍ਕਾ ਹੋਤਿ ਨਿਵਾਸਂ ਉਪਗਨ੍ਤੁਂ. ਅਭਿਞ੍ਞਾ ਪਰਿਞ੍ਞੇਯ੍ਯਾਤਿ ਯਥੇਵ ਹਿ ਤੇਸਂ ਪੁਰਤ੍ਥਿਮਦਿਸਾਦੀਹਿ ਆਗਤਾਨਂ ਖਤ੍ਤਿਯਾਦੀਨਂ ਵਾਸੋ ਆਗਨ੍ਤੁਕਾਗਾਰੇ ਇਜ੍ਝਤਿ, ਏਵਂ ਇਮੇਸਂ ਅਭਿਞ੍ਞਾਪਰਿਞ੍ਞੇਯ੍ਯਾਤਿਆਦੀਨਂ ਧਮ੍ਮਾਨਂ ਅਭਿਞ੍ਞਾਪਰਿਜਾਨਨਾਦੀਹਿ ਸਹਵਿਪਸ੍ਸਨਸ੍ਸ ਅਰਿਯਮਗ੍ਗਸ੍ਸ ਭਾਵਨਾਯ ਇਜ੍ਝਨ੍ਤਿ, ਤੇਨੇਤਂ ਵੁਤ੍ਤਂ. ਨਦੀਸੁਤ੍ਤਂ ਹੇਟ੍ਠਾ ਵੁਤ੍ਤਨਯਮੇਵਾਤਿ.

ਬਲਕਰਣੀਯਵਗ੍ਗੋ ਨਵਮੋ.

੧੦. ਏਸਨਾਵਗ੍ਗੋ

੧. ਏਸਨਾਸੁਤ੍ਤਵਣ੍ਣਨਾ

੧੬੧. ਏਸਨਾਵਗ੍ਗੇ ਕਾਮੇਸਨਾਤਿ ਕਾਮਾਨਂ ਏਸਨਾ ਗਵੇਸਨਾ ਮਗ੍ਗਨਾ ਪਤ੍ਥਨਾ. ਭਵੇਸਨਾਤਿ ਭਵਾਨਂ ਏਸਨਾ. ਬ੍ਰਹ੍ਮਚਰਿਯੇਸਨਾਤਿ ਮਿਚ੍ਛਾਦਿਟ੍ਠਿਸਙ੍ਖਾਤਸ੍ਸ ਬ੍ਰਹ੍ਮਚਰਿਯਸ੍ਸ ਏਸਨਾ.

੨-੧੧. ਵਿਧਾਸੁਤ੍ਤਾਦਿਵਣ੍ਣਨਾ

੧੬੨-੧੭੧. ਵਿਧਾਤਿ ਮਾਨਕੋਟ੍ਠਾਸਾ ਮਾਨਠਪਨਾ ਵਾ. ਸੇਯ੍ਯੋਹਮਸ੍ਮੀਤਿ ਵਿਧਾਤਿ ਅਹਮਸ੍ਮਿ ਸੇਯ੍ਯੋਤਿ ਏਵਂ ਮਾਨਕੋਟ੍ਠਾਸੋ ਮਾਨਠਪਨਾ ਵਾ. ਨੀਘਾਤਿ ਦੁਕ੍ਖਾ. ਵਚਨਤ੍ਥੋ ਪਨੇਤ੍ਥ ਯਸ੍ਸ ਉਪ੍ਪਜ੍ਜਨ੍ਤਿ, ਤਂ ਪੁਰਿਸਂ ਨੀਹਨਨ੍ਤੀਤਿ ਨੀਘਾ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.

ਏਸਨਾਵਗ੍ਗੋ ਦਸਮੋ.

੧੧. ਓਘਵਗ੍ਗੋ

੧-੨. ਓਘਸੁਤ੍ਤਾਦਿਵਣ੍ਣਨਾ

੧੭੨-੧੭੩. ਓਘਵਗ੍ਗੇ ਕਾਮੋਘੋਤਿ ਪਞ੍ਚਸੁ ਕਾਮਗੁਣੇਸੁ ਛਨ੍ਦਰਾਗੋ. ਭਵੋਘੋਤਿ ਰੂਪਾਰੂਪਭਵੇਸੁ ਛਨ੍ਦਰਾਗੋ. ਦਿਟ੍ਠੋਘੋਤਿ ਦ੍ਵਾਸਟ੍ਠਿ ਦਿਟ੍ਠਿਯੋ. ਅਵਿਜ੍ਜੋਘੋਤਿ ਚਤੂਸੁ ਸਚ੍ਚੇਸੁ ਅਞ੍ਞਾਣਂ. ਕਾਮਯੋਗਾਦੀਸੁਪਿ ਏਸੇਵ ਨਯੋ.

੩-੪. ਉਪਾਦਾਨਸੁਤ੍ਤਾਦਿਵਣ੍ਣਨਾ

੧੭੪-੧੭੫. ਕਾਮੁਪਾਦਾਨਨ੍ਤਿ ਕਾਮਗ੍ਗਹਣਂ. ਦਿਟ੍ਠੁਪਾਦਾਨਾਦੀਸੁਪਿ ਏਸੇਵ ਨਯੋ. ਗਨ੍ਥਾਤਿ ਗਨ੍ਥਨਾ ਘਟਨਾ. ਕਾਯਗਨ੍ਥੋਤਿ ਨਾਮਕਾਯਸ੍ਸ ਗਨ੍ਥੋ ਗਨ੍ਥਨਘਟਨਕਿਲੇਸੋ. ਇਦਂਸਚ੍ਚਾਭਿਨਿਵੇਸੋਤਿ ਅਨ੍ਤਗ੍ਗਾਹਿਕਦਿਟ੍ਠਿਵਸੇਨ ਉਪ੍ਪਨ੍ਨੋ ‘‘ਇਦਮੇਵ ਸਚ੍ਚ’’ਨ੍ਤਿ ਏਵਂ ਅਭਿਨਿਵੇਸੋ.

੫-੧੦. ਅਨੁਸਯਸੁਤ੍ਤਾਦਿਵਣ੍ਣਨਾ

੧੭੬-੧੮੧. ਕਾਮਰਾਗਾਨੁਸਯੋਤਿ ਥਾਮਗਤਟ੍ਠੇਨ ਕਾਮਰਾਗੋਵ ਅਨੁਸਯੋ ਕਾਮਰਾਗਾਨੁਸਯੋ. ਸੇਸੇਸੁਪਿ ਏਸੇਵ ਨਯੋ. ਓਰਮ੍ਭਾਗਿਯਾਨੀਤਿ ਹੇਟ੍ਠਾਕੋਟ੍ਠਾਸਿਯਾਨਿ. ਸਂਯੋਜਨਾਨੀਤਿ ਬਨ੍ਧਨਾਨਿ. ਉਦ੍ਧਮ੍ਭਾਗਿਯਾਨੀਤਿ ਉਪਰਿਕੋਟ੍ਠਾਸਿਯਾਨਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਓਘਵਗ੍ਗੋ ਏਕਾਦਸਮੋ.

ਮਗ੍ਗਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਬੋਜ੍ਝਙ੍ਗਸਂਯੁਤ੍ਤਂ

੧. ਪਬ੍ਬਤਵਗ੍ਗੋ

੧. ਹਿਮਵਨ੍ਤਸੁਤ੍ਤਵਣ੍ਣਨਾ

੧੮੨. ਬੋਜ੍ਝਙ੍ਗਸਂਯੁਤ੍ਤਸ੍ਸ ਪਠਮੇ ਨਾਗਾਤਿ ਇਮੇਪਿ ਮਹਾਸਮੁਦ੍ਦਪਿਟ੍ਠੇ ਊਮਿਅਨ੍ਤਰਵਾਸਿਨੋਵ, ਨ ਵਿਮਾਨਟ੍ਠਕਨਾਗਾ. ਤੇਸਂ ਹਿਮਵਨ੍ਤਂ ਨਿਸ੍ਸਾਯ ਕਾਯਵਡ੍ਢਨਾਦਿਸਬ੍ਬਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਬੋਜ੍ਝਙ੍ਗੇਤਿ ਏਤ੍ਥ ਬੋਧਿਯਾ, ਬੋਧਿਸ੍ਸ ਵਾ ਅਙ੍ਗਾਤਿ ਬੋਜ੍ਝਙ੍ਗਾ. ਕਿਂ ਵੁਤ੍ਤਂ ਹੋਤਿ? ਯਾ ਹਿ ਅਯਂ ਧਮ੍ਮਸਾਮਗ੍ਗੀ, ਯਾਯ ਲੋਕਿਯਲੋਕੁਤ੍ਤਰਮਗ੍ਗਕ੍ਖਣੇ ਉਪ੍ਪਜ੍ਜਮਾਨਾਯ ਲੀਨੁਦ੍ਧਚ੍ਚਪਤਿਟ੍ਠਾਨਾਯੂਹਨ ਕਾਮਸੁਖਤ੍ਤਕਿਲਮਥਾਨੁਯੋਗਉਚ੍ਛੇਦਸਸ੍ਸਤਾਭਿਨਿਵੇਸਾਦੀਨਂ ਅਨੇਕੇਸਂ ਉਪਦ੍ਦਵਾਨਂ ਪਟਿਪਕ੍ਖਭੂਤਾਯ ਸਤਿਧਮ੍ਮਵਿਚਯਵੀਰਿਯਪੀਤਿਪਸ੍ਸਦ੍ਧਿਸਮਾਧਿਉਪੇਕ੍ਖਾਸਙ੍ਖਾਤਾਯ ਧਮ੍ਮਸਾਮਗ੍ਗਿਯਾ ਅਰਿਯਸਾਵਕੋ ਬੁਜ੍ਝਤੀਤਿ ਕਤ੍ਵਾ ਬੋਧੀਤਿ ਵੁਚ੍ਚਤਿ. ਬੁਜ੍ਝਤੀਤਿ ਕਿਲੇਸਸਨ੍ਤਾਨਨਿਦ੍ਦਾਯ ਉਟ੍ਠਹਤਿ, ਚਤ੍ਤਾਰਿ ਵਾ ਅਰਿਯਸਚ੍ਚਾਨਿ ਪਟਿਵਿਜ੍ਝਤਿ, ਨਿਬ੍ਬਾਨਮੇਵ ਵਾ ਸਚ੍ਛਿਕਰੋਤੀਤਿ ਵੁਤ੍ਤਂ ਹੋਤਿ. ਯਥਾਹ ‘‘ਸਤ੍ਤ ਬੋਜ੍ਝਙ੍ਗੇ ਭਾਵੇਤ੍ਵਾ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ’’ਤਿ (ਸਂ. ਨਿ. ੫.੩੭੮; ਦੀ. ਨਿ. ੩.੧੪੩). ਤਸ੍ਸਾ ਧਮ੍ਮਸਾਮਗ੍ਗਿਸਙ੍ਖਾਤਾਯ ਬੋਧਿਯਾ ਅਙ੍ਗਾਤਿ ਬੋਜ੍ਝਙ੍ਗਾ ਝਾਨਙ੍ਗਮਗ੍ਗਙ੍ਗਾਦਯੋ ਵਿਯ. ਯੋਪੇਸ ਯਥਾਵੁਤ੍ਤਪ੍ਪਕਾਰਾਯ ਏਤਾਯ ਧਮ੍ਮਸਾਮਗ੍ਗਿਯਾ ਬੁਜ੍ਝਤੀਤਿ ਕਤ੍ਵਾ ਅਰਿਯਸਾਵਕੋ ਬੋਧੀਤਿ ਵੁਚ੍ਚਤਿ, ਤਸ੍ਸ ਬੋਧਿਸ੍ਸ ਅਙ੍ਗਾਤਿਪਿ ਬੋਜ੍ਝਙ੍ਗਾ ਸੇਨਙ੍ਗਰਥਙ੍ਗਾਦਯੋ ਵਿਯ. ਤੇਨਾਹੁ ਅਟ੍ਠਕਥਾਚਰਿਯਾ – ‘‘ਬੁਜ੍ਝਨਕਸ੍ਸ ਪੁਗ੍ਗਲਸ੍ਸ ਅਙ੍ਗਾਤਿ ਵਾ ਬੋਜ੍ਝਙ੍ਗਾ’’ਤਿ.

ਅਪਿਚ ‘‘ਬੋਜ੍ਝਙ੍ਗਾਤਿ ਕੇਨਟ੍ਠੇਨ ਬੋਜ੍ਝਙ੍ਗਾ? ਬੋਧਾਯ ਸਂਵਤ੍ਤਨ੍ਤੀਤਿ ਬੋਜ੍ਝਙ੍ਗਾ, ਬੁਜ੍ਝਨ੍ਤੀਤਿ ਬੋਜ੍ਝਙ੍ਗਾ, ਅਨੁਬੁਜ੍ਝਨ੍ਤੀਤਿ ਬੋਜ੍ਝਙ੍ਗਾ, ਪਟਿਬੁਜ੍ਝਨ੍ਤੀਤਿ ਬੋਜ੍ਝਙ੍ਗਾ, ਸਮ੍ਬੁਜ੍ਝਨ੍ਤੀਤਿ ਬੋਜ੍ਝਙ੍ਗਾ’’ਇਚ੍ਚਾਦਿਨਾ (ਪਟਿ. ਮ. ੨.੧੭) ਪਟਿਸਮ੍ਭਿਦਾਨਯੇਨਾਪਿ ਬੋਜ੍ਝਙ੍ਗਤ੍ਥੋ ਵੇਦਿਤਬ੍ਬੋ.

ਸਤਿਸਮ੍ਬੋਜ੍ਝਙ੍ਗਨ੍ਤਿਆਦੀਸੁ ਪਨ ਪਸਤ੍ਥੋ ਸੁਨ੍ਦਰੋ ਚ ਬੋਜ੍ਝਙ੍ਗੋਤਿ ਸਮ੍ਬੋਜ੍ਝਙ੍ਗੋ. ਸਤਿਯੇਵ ਸਮ੍ਬੋਜ੍ਝਙ੍ਗੋਤਿ ਸਤਿਸਮ੍ਬੋਜ੍ਝਙ੍ਗੋ, ਤਂ ਸਤਿਸਮ੍ਬੋਜ੍ਝਙ੍ਗਨ੍ਤਿ ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਭਾਵੇਤੀਤਿ ਵਡ੍ਢੇਤਿ, ਅਤ੍ਤਨੋ ਚਿਤ੍ਤਸਨ੍ਤਾਨੇ ਪੁਨਪ੍ਪੁਨਂ ਜਨੇਤਿ, ਅਭਿਨਿਬ੍ਬਤ੍ਤੇਤੀਤਿ ਅਤ੍ਥੋ. ਵਿਵੇਕਨਿਸ੍ਸਿਤਨ੍ਤਿਆਦੀਨਿ ਕੋਸਲਸਂਯੁਤ੍ਤੇ ‘‘ਸਮ੍ਮਾਦਿਟ੍ਠਿਂ ਭਾਵੇਤਿ ਵਿਵੇਕਨਿਸ੍ਸਿਤ’’ਨ੍ਤਿ ਏਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ.

ਅਯਂ ਪਨ ਵਿਸੇਸੋ – ਤਤ੍ਥ ਤਦਙ੍ਗਵਿਵੇਕਨਿਸ੍ਸਿਤਂ, ਸਮੁਚ੍ਛੇਦਵਿਵੇਕਨਿਸ੍ਸਿਤਂ, ਨਿਸ੍ਸਰਣਵਿਵੇਕਨਿਸ੍ਸਿਤਨ੍ਤਿ, ਵਿਵੇਕਤ੍ਤਯਮੇਵ ਵੁਤ੍ਤਂ, ਬੋਜ੍ਝਙ੍ਗਭਾਵਨਂ ਪਤ੍ਵਾ ਪਨ ਪਞ੍ਚਵਿਧਵਿਵੇਕਨਿਸ੍ਸਿਤਮ੍ਪਿ ਏਕੇ ਵਣ੍ਣਯਨ੍ਤਿ. ਤੇ ਹਿ ਨ ਕੇਵਲਂ ਬਲਵਵਿਪਸ੍ਸਨਾਮਗ੍ਗਫਲਕ੍ਖਣੇਸੁ ਏਵ ਬੋਜ੍ਝਙ੍ਗੇ ਉਦ੍ਧਰਨ੍ਤਿ ਵਿਪਸ੍ਸਨਾਪਾਦਕ-ਕਸਿਣਜ੍ਝਾਨ-ਆਨਾਪਾਨਾਸੁਭ-ਬ੍ਰਹ੍ਮਵਿਹਾਰਜ੍ਝਾਨੇਸੁਪਿ ਉਦ੍ਧਰਨ੍ਤਿ, ਨ ਚ ਪਟਿਸਿਦ੍ਧਾ ਅਟ੍ਠਕਥਾਚਰਿਯੇਹਿ. ਤਸ੍ਮਾ ਤੇਸਂ ਮਤੇਨ ਏਤੇਸਂ ਝਾਨਾਨਂ ਪਵਤ੍ਤਿਕ੍ਖਣੇ ਕਿਚ੍ਚਤੋ ਏਵ ਵਿਕ੍ਖਮ੍ਭਨਵਿਵੇਕਨਿਸ੍ਸਿਤਂ. ਯਥਾ ਚ ਵਿਪਸ੍ਸਨਾਕ੍ਖਣੇ ‘‘ਅਜ੍ਝਾਸਯਤੋ ਨਿਸ੍ਸਰਣਵਿਵੇਕਨਿਸ੍ਸਿਤ’’ਨ੍ਤਿ ਵੁਤ੍ਤਂ, ਏਵਂ ਪਟਿਪਸ੍ਸਦ੍ਧਿਵਿਵੇਕਨਿਸ੍ਸਿਤਮ੍ਪਿ ਭਾਵੇਤੀਤਿ ਵਤ੍ਤੁਂ ਵਟ੍ਟਤਿ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਨਯਮੇਵ.

੨. ਕਾਯਸੁਤ੍ਤਵਣ੍ਣਨਾ

੧੮੩. ਦੁਤਿਯੇ ਆਹਾਰਟ੍ਠਿਤਿਕੋਤਿ ਪਚ੍ਚਯਟ੍ਠਿਤਿਕੋ. ਆਹਾਰਂ ਪਟਿਚ੍ਚਾਤਿ ਪਚ੍ਚਯਂ ਪਟਿਚ੍ਚ. ਸੁਭਨਿਮਿਤ੍ਤਨ੍ਤਿ ਸੁਭਮ੍ਪਿ ਸੁਭਨਿਮਿਤ੍ਤਂ, ਸੁਭਸ੍ਸ ਆਰਮ੍ਮਣਮ੍ਪਿ ਸੁਭਨਿਮਿਤ੍ਤਂ. ਅਯੋਨਿਸੋਮਨਸਿਕਾਰੋਤਿ ਅਨੁਪਾਯਮਨਸਿਕਾਰੋ ਉਪ੍ਪਥਮਨਸਿਕਾਰੋ ਅਨਿਚ੍ਚੇ ‘‘ਨਿਚ੍ਚ’’ਨ੍ਤਿ ਵਾ, ਦੁਕ੍ਖੇ ‘‘ਸੁਖ’’ਨ੍ਤਿ, ਅਨਤ੍ਤਨਿ ‘‘ਅਤ੍ਤਾ’’ਤਿ ਵਾ, ਅਸੁਭੇ ‘‘ਸੁਭ’’ਨ੍ਤਿ ਵਾ, ਮਨਸਿਕਾਰੋ. ਤਂ ਤਸ੍ਮਿਂ ਸੁਭਾਰਮ੍ਮਣੇ ਬਹੁਲਂ ਪਵਤ੍ਤਯਤੋ ਕਾਮਚ੍ਛਨ੍ਦੋ ਉਪ੍ਪਜ੍ਜਤਿ. ਤੇਨ ਵੁਤ੍ਤਂ ‘‘ਅਤ੍ਥਿ, ਭਿਕ੍ਖਵੇ, ਸੁਭਨਿਮਿਤ੍ਤ’’ਨ੍ਤਿਆਦਿ. ਏਵਂ ਸਬ੍ਬਨੀਵਰਣੇਸੁ ਯੋਜਨਾ ਵੇਦਿਤਬ੍ਬਾ.

ਪਟਿਘਨਿਮਿਤ੍ਤਨ੍ਤਿਆਦੀਸੁ ਪਨ ਪਟਿਘੋਪਿ ਪਟਿਘਨਿਮਿਤ੍ਤਂ ਪਟਿਘਾਰਮ੍ਮਣਮ੍ਪਿ. ਅਰਤੀਤਿ ਉਕ੍ਕਣ੍ਠਿਤਾ. ਯਂ ਸਨ੍ਧਾਯ ਵੁਤ੍ਤਂ – ‘‘ਤਤ੍ਥ ਕਤਮਾ ਅਰਤਿ? ਪਨ੍ਤੇਸੁ ਵਾ ਸੇਨਾਸਨੇਸੁ ਅਞ੍ਞਤਰਞ੍ਞਤਰੇਸੁ ਵਾ ਅਧਿਕੁਸਲੇਸੁ ਧਮ੍ਮੇਸੁ ਅਰਤਿ ਅਰਤਿਤਾ ਅਨਭਿਰਤਿ ਅਨਭਿਰਮਨਾ ਉਕ੍ਕਣ੍ਠਿਤਾ ਪਰਿਤਸ੍ਸਿਤਾ, ਅਯਂ ਵੁਚ੍ਚਤਿ ਅਰਤੀ’’ਤਿ (ਵਿਭ. ੮੫੬).

ਤਨ੍ਦੀਤਿ ਅਤਿਸੀਤਾਦਿਪਚ੍ਚਯਾ ਉਪ੍ਪਨ੍ਨਂ ਆਗਨ੍ਤੁਕਕਾਯਾਲਸਿਯਂ. ਯਸ੍ਮਿਂ ਉਪ੍ਪਨ੍ਨੇ ‘‘ਅਤਿਸੀਤਂ ਅਤਿਉਣ੍ਹਂ ਅਤਿਚ੍ਛਾਤੋਸ੍ਮਿ ਅਤਿਧਾਤੋਸ੍ਮਿ ਅਤਿਦੂਰਮਗ੍ਗਂ ਗਤੋਸ੍ਮੀ’’ਤਿ ਵਦਤਿ, ਯਂ ਸਨ੍ਧਾਯ ਵੁਤ੍ਤਂ ‘‘ਤਤ੍ਥ ਕਤਮਾ ਤਨ੍ਦਿ, ਯਾ ਤਨ੍ਦੀ ਤਨ੍ਦਿਯਨਾ ਤਨ੍ਦਿਮਨਕਤਾ ਆਲਸ੍ਯਂ ਆਲਸ੍ਯਾਯਨਾ ਆਲਸ੍ਯਾਯਿਤਤ੍ਤਂ, ਅਯਂ ਵੁਚ੍ਚਤਿ ਤਨ੍ਦੀ’’ਤਿ (ਵਿਭ. ੮੫੭).

ਵਿਜਮ੍ਭਿਤਾਤਿ ਕਿਲੇਸਵਸੇਨ ਕਾਯਵਿਨਮਨਾ. ਯਂ ਸਨ੍ਧਾਯ ਵੁਤ੍ਤਂ – ‘‘ਤਤ੍ਥ ਕਤਮਾ ਵਿਜਮ੍ਭਿਤਾ? ਯਾ ਕਾਯਸ੍ਸ ਜਮ੍ਭਨਾ ਵਿਜਮ੍ਭਨਾ ਆਨਮਨਾ ਵਿਨਮਨਾ ਸਨ੍ਨਮਨਾ ਪਣਮਨਾ ਬ੍ਯਾਧਿਯਕਂ, ਅਯਂ ਵੁਚ੍ਚਤਿ ਵਿਜਮ੍ਭਿਤਾ’’ਤਿ (ਵਿਭ. ੮੫੮).

ਭਤ੍ਤਸਮ੍ਮਦੋਤਿ ਭਤ੍ਤਪਰਿਲ਼ਾਹੋ. ਯਂ ਸਨ੍ਧਾਯ ਵੁਤ੍ਤਂ – ‘‘ਤਤ੍ਥ ਕਤਮੋ ਭਤ੍ਤਸਮ੍ਮਦੋ? ਯਾ ਭੁਤ੍ਤਾਵਿਸ੍ਸ ਭਤ੍ਤਮੁਚ੍ਛਾ ਭਤ੍ਤਕਿਲਮਥੋ ਭਤ੍ਤਪਰਿਲ਼ਾਹੋ ਕਾਯਦੁਟ੍ਠੁਲ੍ਲਂ, ਅਯਂ ਵੁਚ੍ਚਤਿ ਭਤ੍ਤਸਮ੍ਮਦੋ’’ਤਿ (ਵਿਭ. ੮੫੯).

ਚੇਤਸੋ ਚ ਲੀਨਤ੍ਤਨ੍ਤਿ ਚਿਤ੍ਤਸ੍ਸ ਲੀਯਨਾਕਾਰੋ, ਯਂ ਸਨ੍ਧਾਯ ਵੁਤ੍ਤਂ – ‘‘ਤਤ੍ਥ ਕਤਮਂ ਚੇਤਸੋ ਲੀਨਤ੍ਤਂ? ਯਾ ਚਿਤ੍ਤਸ੍ਸ ਅਕਲ੍ਯਤਾ ਅਕਮ੍ਮਞ੍ਞਤਾ ਓਲੀਯਨਾ ਸਲ੍ਲੀਯਨਾ ਲੀਨਂ ਲੀਯਨਾ ਲੀਯਿਤਤ੍ਤਂ ਥਿਨਂ ਥਿਯਨਾ ਥਿਯਿਤਤ੍ਤਂ ਚਿਤ੍ਤਸ੍ਸ, ਇਦਂ ਵੁਚ੍ਚਤਿ ਚੇਤਸੋ ਲੀਨਤ੍ਤ’’ਨ੍ਤਿ (ਵਿਭ. ੮੬੦).

ਚੇਤਸੋ ਅਵੂਪਸਮੋਤਿ ਯਥਾ ਨਾਮ ਵੀਤਚ੍ਚਿਕੋਪਿ ਅਙ੍ਗਾਰੋ ਨੇਵ ਤਾਵ ਸਨ੍ਨਿਸੀਦਤਿ ਪਤਾਪਂ ਕਰੋਤਿਯੇਵ, ਯਥਾ ਚ ਪਤ੍ਤਪਚਨਟ੍ਠਾਨੇ ਨੇਵ ਤਾਵ ਸਨ੍ਨਿਸੀਦਤਿ ਪਤਾਪਂ ਕਰੋਤਿਯੇਵ, ਏਵਂ ਚਿਤ੍ਤਸ੍ਸ ਅਵੂਪਸਨ੍ਤਾਕਾਰੋ, ਅਤ੍ਥਤੋ ਪਨੇਤਂ ਉਦ੍ਧਚ੍ਚਕੁਕ੍ਕੁਚ੍ਚਮੇਵ ਹੋਤਿ.

ਵਿਚਿਕਿਚ੍ਛਟ੍ਠਾਨੀਯਾ ਧਮ੍ਮਾਤਿ ਵਿਚਿਕਿਚ੍ਛਾਯ ਆਰਮ੍ਮਣਧਮ੍ਮਾ. ਅਯੋਨਿਸੋਮਨਸਿਕਾਰੋ ਸਬ੍ਬਤ੍ਥ ਵੁਤ੍ਤਨਯੋਵ. ਏਵਮੇਤ੍ਥ ਕਾਮਚ੍ਛਨ੍ਦੋ ਵਿਚਿਕਿਚ੍ਛਾਤਿ ਇਮੇ ਦ੍ਵੇ ਧਮ੍ਮਾ ਆਰਮ੍ਮਣੇਨ ਕਥਿਤਾ, ਬ੍ਯਾਪਾਦੋ ਆਰਮ੍ਮਣੇਨ ਚ ਉਪਨਿਸ੍ਸਯੇਨ ਚ, ਸੇਸਾ ਸਹਜਾਤੇਨ ਚ ਉਪਨਿਸ੍ਸਯੇਨ ਚਾਤਿ.

ਸਤਿਸਮ੍ਬੋਜ੍ਝਙ੍ਗਟ੍ਠਾਨੀਯਾ ਧਮ੍ਮਾਤਿ ਸਤਿਯਾ ਆਰਮ੍ਮਣਧਮ੍ਮਾ ਸਤ੍ਤਤਿਂਸ ਬੋਧਿਪਕ੍ਖਿਯਾ ਚ ਨਵ ਲੋਕੁਤ੍ਤਰਧਮ੍ਮਾ ਚ. ਤਤ੍ਥ ਯੋਨਿਸੋਮਨਸਿਕਾਰਬਹੁਲੀਕਾਰੋਤਿ ਤਤ੍ਥ ਉਪਾਯਮਨਸਿਕਾਰਸ੍ਸ ਪੁਨਪ੍ਪੁਨਂ ਕਰਣਂ.

ਕੁਸਲਾਕੁਸਲਾ ਧਮ੍ਮਾਤਿਆਦੀਸੁ ਕੁਸਲਾਤਿ ਕੋਸਲ੍ਲਸਮ੍ਭੂਤਾ ਅਨਵਜ੍ਜਸੁਖਵਿਪਾਕਾ. ਅਕੁਸਲਾਤਿ ਅਕੋਸਲ੍ਲਸਮ੍ਭੂਤਾ ਸਾਵਜ੍ਜਦੁਕ੍ਖਵਿਪਾਕਾ. ਸਾਵਜ੍ਜਾਤਿ ਅਕੁਸਲਾ. ਅਨਵਜ੍ਜਾਤਿ ਕੁਸਲਾ. ਹੀਨਪਣੀਤਕਣ੍ਹਸੁਕ੍ਕੇਸੁਪਿ ਏਸੇਵ ਨਯੋ. ਸਪ੍ਪਟਿਭਾਗਾਤਿ ਕਣ੍ਹਸੁਕ੍ਕਾਯੇਵ. ਕਣ੍ਹਾ ਹਿ ਕਣ੍ਹਵਿਪਾਕਦਾਨਤੋ, ਸੁਕ੍ਕਾ ਚ ਸੁਕ੍ਕਵਿਪਾਕਦਾਨਤੋ ਸਪ੍ਪਟਿਭਾਗਾ ਨਾਮ, ਸਦਿਸਵਿਪਾਕਕੋਟ੍ਠਾਸਾਤਿ ਅਤ੍ਥੋ. ਪਟਿਪਕ੍ਖਭੂਤਸ੍ਸ ਵਾ ਭਾਗਸ੍ਸ ਅਤ੍ਥਿਤਾਯ ਸਪ੍ਪਟਿਭਾਗਾ. ਕਣ੍ਹਾਨਞ੍ਹਿ ਸੁਕ੍ਕਾ ਪਟਿਪਕ੍ਖਭਾਗਾ, ਸੁਕ੍ਕਾਨਞ੍ਚ ਕਣ੍ਹਾ ਪਟਿਪਕ੍ਖਭਾਗਾਤਿ ਏਵਮ੍ਪਿ ਸਪ੍ਪਟਿਭਾਗਾ. ਸਪ੍ਪਟਿਬਾਹਿਤਟ੍ਠੇਨ ਵਾ ਸਪ੍ਪਟਿਭਾਗਾ. ਅਕੁਸਲਞ੍ਹਿ ਕੁਸਲਂ ਪਟਿਬਾਹਿਤ੍ਵਾ ਅਤ੍ਤਨੋ ਵਿਪਾਕਂ ਦੇਤਿ, ਕੁਸਲਞ੍ਚ ਅਕੁਸਲਂ ਪਟਿਬਾਹਿਤ੍ਵਾਤਿ ਏਵਮ੍ਪਿ ਕਣ੍ਹਸੁਕ੍ਕਾ ਸਪ੍ਪਟਿਭਾਗਾ.

ਆਰਮ੍ਭਧਾਤੂਤਿ ਪਠਮਾਰਮ੍ਭਵੀਰਿਯਂ. ਨਿਕ੍ਕਮਧਾਤੂਤਿ ਕੋਸਜ੍ਜਤੋ ਨਿਕ੍ਖਨ੍ਤਤ੍ਤਾ ਤਤੋ ਬਲਵਤਰਂ. ਪਰਕ੍ਕਮਧਾਤੂਤਿ ਪਰਂ ਪਰਂ ਠਾਨਂ ਅਕ੍ਕਮਨਤਾਯ ਤਤੋਪਿ ਬਲਵਤਰਨ੍ਤਿ ਤੀਹਿਪਿ ਪਦੇਹਿ ਵੀਰਿਯਮੇਵ ਕਥਿਤਂ.

ਪੀਤਿਸਮ੍ਬੋਜ੍ਝਙ੍ਗਟ੍ਠਾਨੀਯਾਤਿ ਪੀਤਿਯਾ ਆਰਮ੍ਮਣਧਮ੍ਮਾ. ਕਾਯਪਸ੍ਸਦ੍ਧੀਤਿ ਤਿਣ੍ਣਂ ਖਨ੍ਧਾਨਂ ਦਰਥਪਸ੍ਸਦ੍ਧਿ. ਚਿਤ੍ਤਪਸ੍ਸਦ੍ਧੀਤਿ ਵਿਞ੍ਞਾਣਕ੍ਖਨ੍ਧਸ੍ਸ ਦਰਥਪਸ੍ਸਦ੍ਧਿ. ਸਮਥਨਿਮਿਤ੍ਤਨ੍ਤਿ ਸਮਥੋਪਿ ਸਮਥਨਿਮਿਤ੍ਤਂ, ਆਰਮ੍ਮਣਮ੍ਪਿ. ਅਬ੍ਯਗ੍ਗਨਿਮਿਤ੍ਤਨ੍ਤਿ ਤਸ੍ਸੇਵ ਵੇਵਚਨਂ.

ਉਪੇਕ੍ਖਾਸਮ੍ਬੋਜ੍ਝਙ੍ਗਟ੍ਠਾਨੀਯਾਤਿ ਉਪੇਕ੍ਖਾਯ ਆਰਮ੍ਮਣਧਮ੍ਮਾ, ਅਤ੍ਥਤੋ ਪਨ ਮਜ੍ਝਤ੍ਤਾਕਾਰੋ ਉਪੇਕ੍ਖਾਟ੍ਠਾਨੀਯਾ ਧਮ੍ਮੋਤਿ ਵੇਦਿਤਬ੍ਬੋ. ਏਵਮੇਤ੍ਥ ਸਤਿਧਮ੍ਮਵਿਚਯਉਪੇਕ੍ਖਾਸਮ੍ਬੋਜ੍ਝਙ੍ਗਾ ਆਰਮ੍ਮਣੇਨ ਕਥਿਤਾ, ਸੇਸਾ ਆਰਮ੍ਮਣੇਨਪਿ ਉਪਨਿਸ੍ਸਯੇਨਪਿ.

੩. ਸੀਲਸੁਤ੍ਤਵਣ੍ਣਨਾ

੧੮੪. ਤਤਿਯੇ ਸੀਲਸਮ੍ਪਨ੍ਨਾਤਿ ਏਤ੍ਥ ਖੀਣਾਸਵਸ੍ਸ ਲੋਕਿਯਲੋਕੁਤ੍ਤਰਸੀਲਂ ਕਥਿਤਂ, ਤੇਨ ਸਮ੍ਪਨ੍ਨਾਤਿ ਅਤ੍ਥੋ. ਸਮਾਧਿਪਞ੍ਞਾਸੁਪਿ ਏਸੇਵ ਨਯੋ. ਵਿਮੁਤ੍ਤਿ ਪਨ ਫਲਵਿਮੁਤ੍ਤਿਯੇਵ. ਵਿਮੁਤ੍ਤਿਞਾਣਦਸ੍ਸਨਂ ਪਚ੍ਚਵੇਕ੍ਖਣਞਾਣਂ. ਏਵਮੇਤ੍ਥ ਸੀਲਾਦਯੋ ਤਯੋ ਲੋਕਿਯਲੋਕੁਤ੍ਤਰਾ, ਵਿਮੁਤ੍ਤਿ ਲੋਕੁਤ੍ਤਰਾਵ, ਵਿਮੁਤ੍ਤਿਞਾਣਦਸ੍ਸਨਂ ਲੋਕਿਯਮੇਵ.

ਦਸ੍ਸਨਮ੍ਪਾਹਨ੍ਤਿ ਦਸ੍ਸਨਮ੍ਪਿ ਅਹਂ. ਤਂ ਪਨੇਤਂ ਦਸ੍ਸਨਂ – ਚਕ੍ਖੁਦਸ੍ਸਨਂ, ਞਾਣਦਸ੍ਸਨਨ੍ਤਿ ਦੁਵਿਧਂ. ਤਤ੍ਥ ਪਸਨ੍ਨੇਹਿ ਚਕ੍ਖੂਹਿ ਅਰਿਯਾਨਂ ਦਸ੍ਸਨਂ ਓਲੋਕਨਂ ਚਕ੍ਖੁਦਸ੍ਸਨਂ ਨਾਮ. ਅਰਿਯੇਹਿ ਪਨ ਦਿਟ੍ਠਸ੍ਸ ਲਕ੍ਖਣਸ੍ਸ ਦਸ੍ਸਨਂ, ਪਟਿਵਿਦ੍ਧਸ੍ਸ ਚ ਪਟਿਵਿਜ੍ਝਨਂ ਝਾਨੇਨ ਵਾ ਵਿਪਸ੍ਸਨਾਯ ਵਾ ਮਗ੍ਗਫਲੇਹਿ ਵਾ ਞਾਣਦਸ੍ਸਨਂ ਨਾਮ. ਇਮਸ੍ਮਿਂ ਪਨੇਤ੍ਥ ਚਕ੍ਖੁਦਸ੍ਸਨਂ ਅਧਿਪ੍ਪੇਤਂ. ਅਰਿਯਾਨਞ੍ਹਿ ਪਸਨ੍ਨੇਹਿ ਚਕ੍ਖੂਹਿ ਓਲੋਕਨਮ੍ਪਿ ਬਹੁਕਾਰਮੇਵ. ਸਵਨਨ੍ਤਿ ‘‘ਅਸੁਕੋ ਨਾਮ ਖੀਣਾਸਵੋ ਅਸੁਕਸ੍ਮਿਂ ਨਾਮ ਰਟ੍ਠੇ ਵਾ ਜਨਪਦੇ ਵਾ ਗਾਮੇ ਵਾ ਨਿਗਮੇ ਵਾ ਵਿਹਾਰੇ ਵਾ ਲੇਣੇ ਵਾ ਵਸਤੀ’’ਤਿ ਕਥੇਨ੍ਤਾਨਂ ਸੋਤੇਨ ਸਵਨਂ, ਏਤਮ੍ਪਿ ਬਹੁਕਾਰਮੇਵ. ਉਪਸਙ੍ਕਮਨਨ੍ਤਿ ‘‘ਦਾਨਂ ਵਾ ਦਸ੍ਸਾਮਿ, ਪਞ੍ਹਂ ਵਾ ਪੁਚ੍ਛਿਸ੍ਸਾਮਿ, ਧਮ੍ਮਂ ਵਾ ਸੋਸ੍ਸਾਮਿ, ਸਕ੍ਕਾਰਂ ਵਾ ਕਰਿਸ੍ਸਾਮੀ’’ਤਿ ਏਵਰੂਪੇਨ ਚਿਤ੍ਤੇਨ ਅਰਿਯਾਨਂ ਉਪਸਙ੍ਕਮਨਂ. ਪਯਿਰੁਪਾਸਨਨ੍ਤਿ ਪਞ੍ਹਾਪਯਿਰੁਪਾਸਨਂ. ਅਰਿਯਾਨਂ ਗੁਣੇ ਸੁਤ੍ਵਾ ਤੇ ਉਪਸਙ੍ਕਮਿਤ੍ਵਾ ਨਿਮਨ੍ਤੇਤ੍ਵਾ ਦਾਨਂ ਦਤ੍ਵਾ ‘‘ਕਿਂ, ਭਨ੍ਤੇ, ਕੁਸਲ’’ਨ੍ਤਿਆਦਿਨਾ ਨਯੇਨ ਪਞ੍ਹਪੁਚ੍ਛਨਨ੍ਤਿ ਅਤ੍ਥੋ.

ਅਨੁਸ੍ਸਤਿਨ੍ਤਿ ਰਤ੍ਤਿਟ੍ਠਾਨਦਿਵਾਟ੍ਠਾਨੇਸੁ ਨਿਸਿਨ੍ਨਸ੍ਸ ‘‘ਇਦਾਨਿ ਅਰਿਯਾ ਲੇਣਗੁਹਮਣ੍ਡਪਾਦੀਸੁ ਝਾਨਵਿਪਸ੍ਸਨਾਮਗ੍ਗਫਲਸੁਖੇਹਿ ਵੀਤਿਨਾਮੇਨ੍ਤੀ’’ਤਿ ਅਨੁਸ੍ਸਰਣਂ. ਯੋ ਵਾ ਤੇਸਂ ਸਨ੍ਤਿਕੇ ਓਵਾਦੋ ਲਦ੍ਧੋ ਹੋਤਿ, ਤਂ ਆਵਜ੍ਜਿਤ੍ਵਾ ‘‘ਇਮਸ੍ਮਿਂ ਠਾਨੇ ਸੀਲਂ ਕਥਿਤਂ, ਇਮਸ੍ਮਿਂ ਸਮਾਧਿ, ਇਮਸ੍ਮਿਂ ਵਿਪਸ੍ਸਨਾ, ਇਮਸ੍ਮਿਂ ਮਗ੍ਗੋ, ਇਮਸ੍ਮਿਂ ਫਲ’’ਨ੍ਤਿ ਏਵਂ ਅਨੁਸ੍ਸਰਣਂ. ਅਨੁਪਬ੍ਬਜ੍ਜਨ੍ਤਿ ਅਰਿਯੇਸੁ ਚਿਤ੍ਤਂ ਪਸਾਦੇਤ੍ਵਾ ਘਰਾ ਨਿਕ੍ਖਮ੍ਮ ਤੇਸਂ ਸਨ੍ਤਿਕੇ ਪਬ੍ਬਜ੍ਜਂ. ਅਰਿਯਾਨਞ੍ਹਿ ਸਨ੍ਤਿਕੇ ਚਿਤ੍ਤਂ ਪਸਾਦੇਤ੍ਵਾ ਤੇਸਂਯੇਵ ਸਨ੍ਤਿਕੇ ਪਬ੍ਬਜਿਤ੍ਵਾ ਤੇਸਂਯੇਵ ਓਵਾਦਾਨੁਸਾਸਨਿਂ ਪਚ੍ਚਾਸੀਸਮਾਨਸ੍ਸ ਚਰਤੋਪਿ ਪਬ੍ਬਜ੍ਜਾ ਅਨੁਪਬ੍ਬਜ੍ਜਾ ਨਾਮ. ਅਰਿਯੇਸੁ ਪਸਾਦੇਨ ਅਞ੍ਞਤ੍ਥ ਪਬ੍ਬਜਿਤ੍ਵਾ ਅਰਿਯਾਨਂ ਸਨ੍ਤਿਕੇ ਓਵਾਦਾਨੁਸਾਸਨਿਂ ਪਚ੍ਚਾਸੀਸਮਾਨਸ੍ਸ ਚਰਤੋ ਪਬ੍ਬਜ੍ਜਾਪਿ ਅਨੁਪਬ੍ਬਜ੍ਜਾ ਨਾਮ. ਅਞ੍ਞੇਸੁ ਪਨ ਪਸਾਦੇਨ ਅਞ੍ਞੇਸਂਯੇਵ ਸਨ੍ਤਿਕੇ ਪਬ੍ਬਜਿਤ੍ਵਾ ਅਞ੍ਞੇਸਂਯੇਵ ਓਵਾਦਾਨੁਸਾਸਨਿਂ ਪਚ੍ਚਾਸੀਸਮਾਨਸ੍ਸ ਚਰਤੋ ਪਬ੍ਬਜ੍ਜਾ ਅਨੁਪਬ੍ਬਜ੍ਜਾ ਨਾਮ ਨ ਹੋਤਿ.

ਏਵਂ ਪਬ੍ਬਜਿਤੇਸੁ ਪਨ ਮਹਾਕਸ੍ਸਪਤ੍ਥੇਰਸ੍ਸ ਤਾਵ ਅਨੁਪਬ੍ਬਜ੍ਜਂ ਪਬ੍ਬਜਿਤਾ ਸਤਸਹਸ੍ਸਮਤ੍ਤਾ ਅਹੇਸੁਂ, ਤਥਾ ਥੇਰਸ੍ਸੇਵ ਸਦ੍ਧਿਵਿਹਾਰਿਕਸ੍ਸ ਚ ਚਨ੍ਦਗੁਤ੍ਤਤ੍ਥੇਰਸ੍ਸ, ਤਸ੍ਸਾਪਿ ਸਦ੍ਧਿਵਿਹਾਰਿਕਸ੍ਸ ਸੂਰਿਯਗੁਤ੍ਤਤ੍ਥੇਰਸ੍ਸ, ਤਸ੍ਸਾਪਿ ਸਦ੍ਧਿਵਿਹਾਰਿਕਸ੍ਸ ਅਸ੍ਸਗੁਤ੍ਤਤ੍ਥੇਰਸ੍ਸ, ਤਸ੍ਸਾਪਿ ਸਦ੍ਧਿਵਿਹਾਰਿਕਸ੍ਸ ਯੋਨਕਧਮ੍ਮਰਕ੍ਖਿਤਤ੍ਥੇਰਸ੍ਸ, ਤਸ੍ਸ ਪਨ ਸਦ੍ਧਿਵਿਹਾਰਿਕੋ ਅਸੋਕਰਞ੍ਞੋ ਕਨਿਟ੍ਠਭਾਤਾ ਤਿਸ੍ਸਤ੍ਥੇਰੋ ਨਾਮ ਅਹੋਸਿ, ਤਸ੍ਸ ਅਨੁਪਬ੍ਬਜ੍ਜਂ ਪਬ੍ਬਜਿਤਾ ਅਡ੍ਢਤੇਯ੍ਯਕੋਟਿਸਙ੍ਖਾ ਅਹੇਸੁਂ. ਮਹਿਨ੍ਦਤ੍ਥੇਰਸ੍ਸ ਅਨੁਪਬ੍ਬਜਿਤਾਨਂ ਗਣਨਪਰਿਚ੍ਛੇਦੋ ਨਤ੍ਥਿ. ਯਾਵਜ੍ਜਦਿਵਸਾ ਲਙ੍ਕਾਦੀਪੇ ਸਤ੍ਥਰਿ ਪਸਾਦੇਨ ਪਬ੍ਬਜਨ੍ਤਾ ਮਹਿਨ੍ਦਤ੍ਥੇਰਸ੍ਸੇਵ ਪਬ੍ਬਜ੍ਜਂ ਅਨੁਪਬ੍ਬਜਨ੍ਤਿ ਨਾਮ.