੧੧. ਸੋਤਾਪਤ੍ਤਿਸਂਯੁਤ੍ਤਂ
੧. ਵੇਲ਼ੁਦ੍ਵਾਰਵਗ੍ਗੋ
੧. ਚਕ੍ਕਵਤ੍ਤਿਰਾਜਸੁਤ੍ਤਵਣ੍ਣਨਾ
੯੯੭. ਸੋਤਾਪਤ੍ਤਿਸਂਯੁਤ੍ਤਸ੍ਸ ਪਠਮੇ ਕਿਞ੍ਚਾਪੀਤਿ ਅਨੁਗ੍ਗਹਗਰਹਣੇਸੁ ਨਿਪਾਤੋ. ਚਤੁਨ੍ਨਞ੍ਹਿ ਮਹਾਦੀਪਾਨਂ ਇਸ੍ਸਰਿਯਾਧਿਪਚ੍ਚਂ ਰਜ੍ਜਂ ਅਨੁਗ੍ਗਣ੍ਹਨ੍ਤੋ ਚਤੁਨ੍ਨਞ੍ਚ ਅਪਾਯਾਨਂ ਅਪ੍ਪਹੀਨਭਾਵਂ ਗਰਹਨ੍ਤੋ ਸਤ੍ਥਾ ‘‘ਕਿਞ੍ਚਾਪਿ, ਭਿਕ੍ਖਵੇ, ਰਾਜਾ ਚਕ੍ਕਵਤ੍ਤੀ’’ਤਿਆਦਿਮਾਹ. ਤਤ੍ਥ ਚਤੁਨ੍ਨਂ ਦੀਪਾਨਨ੍ਤਿ ਦ੍ਵਿਸਹਸ੍ਸਦੀਪਪਰਿਵਾਰਾਨਂ ਚਤੁਨ੍ਨਂ ਮਹਾਦੀਪਾਨਂ. ਇਸ੍ਸਰਿਯਾਧਿਪਚ੍ਚਨ੍ਤਿ ਇਸ੍ਸਰਭਾਵੋ ਇਸ੍ਸਰਿਯਂ, ਅਧਿਪਤਿਭਾਵੋ ਆਧਿਪਚ੍ਚਂ, ਇਸ੍ਸਰਿਯਂ ਆਧਿਪਚ੍ਚਂ ਏਤਸ੍ਮਿਂ ਰਜ੍ਜੇ, ਨ ਛੇਦਨਭੇਦਨਨ੍ਤਿ ਇਸ੍ਸਰਿਯਾਧਿਪਚ੍ਚਂ. ਕਾਰੇਤ੍ਵਾਤਿ ਏਵਰੂਪਂ ਰਜ੍ਜਂ ਪਵਤ੍ਤਾਪੇਤ੍ਵਾ. ਕਿਞ੍ਚਾਪਿ, ਭਿਕ੍ਖਵੇ, ਅਰਿਯਸਾਵਕੋਤਿ ਏਤ੍ਥ ਅਨੁਗ੍ਗਹਪਸਂਸਾਸੁ ਨਿਪਾਤੋ. ਪਿਣ੍ਡਿਯਾਲੋਪੇਨ ਹਿ ਯਾਪਨਂ ਅਨੁਗ੍ਗਹਨ੍ਤੋ ਚਤੁਨ੍ਨਞ੍ਚ ਅਪਾਯਾਨਂ ਪਹੀਨਭਾਵਂ ਪਸਂਸਨ੍ਤੋ ਸਤ੍ਥਾ ‘‘ਕਿਞ੍ਚਾਪਿ, ਭਿਕ੍ਖਵੇ, ਅਰਿਯਸਾਵਕੋ’’ਤਿਆਦਿਮਾਹ. ਤਤ੍ਥ ਨਨ੍ਤਕਾਨੀਤਿ ਅਨਨ੍ਤਕਾਨਿ. ਤੇਰਸਹਤ੍ਥੋਪਿ ਹਿ ਵਤ੍ਥਸਾਟਕੋ ਦਸਚ੍ਛੇਦਨਤੋ ਪਟ੍ਠਾਯ ਨਨ੍ਤਕਨ੍ਤੇਵ ਸਙ੍ਖਂ ਗਚ੍ਛਤਿ.
ਅਵੇਚ੍ਚਪ੍ਪਸਾਦੇਨਾਤਿ ਅਚਲਪ੍ਪਸਾਦੇਨ. ਸੋ ਪਨਾਯਂ ਪਸਾਦੋ ਕਿਂ ਏਕੋ, ਅਨੇਕੋਤਿ? ਏਕੋਵ, ਸੋ ਮਗ੍ਗੇਨ ਆਗਤਪ੍ਪਸਾਦੋ. ਯੇਸੁ ਪਨ ਵਤ੍ਥੂਸੁ ਅਪੁਬ੍ਬਂ ਅਚਰਿਮਂ ਰੁਹਤਿ, ਤੇਸਂ ਵਸੇਨ ‘‘ਬੁਦ੍ਧੇ ਅਵੇਚ੍ਚਪ੍ਪਸਾਦੇਨਾ’’ਤਿਆਦਿਨਾ ਨਯੇਨ ਤਿਧਾ ਵੁਤ੍ਤੋ. ਯਸ੍ਮਾ ਚ ਏਕੋ, ਤਸ੍ਮਾਵ ਨਿਨ੍ਨਾਨਾਕਰਣੋ ਹੋਤਿ. ਅਰਿਯਸਾਵਕਸ੍ਸ ਹਿ ਬੁਦ੍ਧੇਯੇਵ ਪਸਾਦੋ ਚ ਪੇਮਞ੍ਚ ਗਾਰਵਞ੍ਚ ਮਹਨ੍ਤਂ, ਨ ਧਮ੍ਮੇ ਵਾ ਸਙ੍ਘੇ ਵਾ, ਧਮ੍ਮੇਯੇਵ ਵਾ ਮਹਨ੍ਤਂ, ਨ ਬੁਦ੍ਧੇ ਵਾ ਸਙ੍ਘੇ ਵਾ, ਸਙ੍ਘੇਯੇਵ ਵਾ ਮਹਨ੍ਤਂ, ਨ ਬੁਦ੍ਧੇ ਵਾ ਧਮ੍ਮੇ ਵਾਤਿ ਏਤਂ ਨਤ੍ਥਿ. ਇਤਿਪਿ ਸੋ ਭਗਵਾਤਿਆਦੀਨਿ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਾਨੇਵ.
ਅਰਿਯਕਨ੍ਤੇਹੀਤਿ ਅਰਿਯਾਨਂ ਕਨ੍ਤੇਹਿ ਪਿਯੇਹਿ ਮਨਾਪੇਹਿ. ਪਞ੍ਚ ਹਿ ਸੀਲਾਨਿ ਭਵਨ੍ਤਰਗਤਾਪਿ ਅਰਿਯਾ ਨ ਕੋਪੇਨ੍ਤਿ, ਏਵਂ ਤੇਸਂ ਪਿਯਾਨਿ. ਤਾਨਿ ਸਨ੍ਧਾਯੇਤਂ ਵੁਤ੍ਤਂ. ਅਖਣ੍ਡੇਹੀਤਿਆਦਿ ਸਦਿਸਵਸੇਨ ਵੁਤ੍ਤਂ. ਮੁਖਵਟ੍ਟਿਯਞ੍ਹਿ ਛਿਨ੍ਨੇਕਦੇਸਾ ਪਾਤਿ ਖਣ੍ਡਾਤਿ ਵੁਚ੍ਚਤਿ, ਮਜ੍ਝੇ ਭਿਨ੍ਨਾ ਛਿਦ੍ਦਾਤਿ, ਏਕਸ੍ਮਿਂ ਪਦੇਸੇ ਵਿਸਭਾਗਵਣ੍ਣਾ ਗਾਵੀ ਸਬਲਾਤਿ, ਨਾਨਾਬਿਨ੍ਦੁਚਿਤ੍ਤਾ ਕਮ੍ਮਾਸਾਤਿ, ਏਵਮੇਵ ਪਟਿਪਾਟਿਯਾ ਆਦਿਮ੍ਹਿ ਵਾ ਅਨ੍ਤੇ ਵਾ ਭਿਨ੍ਨਂ ਸੀਲਂ ਖਣ੍ਡਂ ਨਾਮ, ਮਜ੍ਝੇ ਭਿਨ੍ਨਂ ਛਿਦ੍ਦਂ, ਯਤ੍ਥ ਕਤ੍ਥਚਿ ਦ੍ਵਿਨ੍ਨਂ ਵਾ ਤਿਣ੍ਣਂ ਵਾ ਪਟਿਪਾਟਿਯਾ ਭਿਨ੍ਨਤ੍ਤਾ ਸਬਲਂ, ਏਕਨ੍ਤਰਂ ਭਿਨ੍ਨਂ ਕਮ੍ਮਾਸਂ. ਤੇਸਂ ਦੋਸਾਨਂ ਅਭਾਵੇਨ ਅਖਣ੍ਡਾਦਿਤਾ ਵੇਦਿਤਬ੍ਬਾ. ਭੁਜਿਸ੍ਸੇਹੀਤਿ ਭੁਜਿਸ੍ਸਭਾਵਕਰੇਹਿ. ਵਿਞ੍ਞੁਪ੍ਪਸਤ੍ਥੇਹੀਤਿ ਬੁਦ੍ਧਾਦੀਹਿ ਵਿਞ੍ਞੂਹਿ ਪਸਂਸਿਤੇਹਿ. ਅਪਰਾਮਟ੍ਠੇਹੀਤਿ ‘‘ਇਦਂ ਨਾਮ ਤਯਾ ਕਤਂ, ਇਦਂ ਵੀਤਿਕ੍ਕਨ੍ਤ’’ਨ੍ਤਿ ਏਵਂ ਪਰਾਮਸਿਤੁਂ ਅਸਕ੍ਕੁਣੇਯ੍ਯੇਹਿ. ਸਮਾਧਿਸਂਵਤ੍ਤਨਿਕੇਹੀਤਿ ਅਪ੍ਪਨਾਸਮਾਧਿਂ ਉਪਚਾਰਸਮਾਧਿਂ ਵਾ ਸਂਵਤ੍ਤੇਤੁਂ ਸਮਤ੍ਥੇਹਿ.
੨. ਬ੍ਰਹ੍ਮਚਰਿਯੋਗਧਸੁਤ੍ਤਵਣ੍ਣਨਾ
੯੯੮. ਦੁਤਿਯੇ ਯੇਸਂ ਸਦ੍ਧਾਤਿ ਪਦੇਨ ਬੁਦ੍ਧੇ ਪਸਾਦੋ ਗਹਿਤੋ. ਸੀਲਨ੍ਤਿ ਪਦੇਨ ਅਰਿਯਕਨ੍ਤਾਨਿ ਸੀਲਾਨਿ ਗਹਿਤਾਨਿ. ਪਸਾਦੋਤਿ ਪਦੇਨ ਸਙ੍ਘੇ ਪਸਾਦੋ ਗਹਿਤੋ. ਧਮ੍ਮਦਸ੍ਸਨਨ੍ਤਿ ਪਦੇਨ ਧਮ੍ਮੇ ਪਸਾਦੋ ਗਹਿਤੋਤਿ ਏਵਂ ਚਤ੍ਤਾਰਿ ਸੋਤਾਪਤ੍ਤਿਯਙ੍ਗਾਨਿ ਵੁਤ੍ਤਾਨਿ. ਕਾਲੇਨ ਪਚ੍ਚੇਨ੍ਤੀਤਿ ਕਾਲੇਨ ਪਾਪੁਣਨ੍ਤਿ. ਬ੍ਰਹ੍ਮਚਰਿਯੋਗਧਂ ਸੁਖਨ੍ਤਿ ਬ੍ਰਹ੍ਮਚਰਿਯਂ ਓਗਾਹਿਤ੍ਵਾ ਠਿਤਂ ਉਪਰਿਮਗ੍ਗਤ੍ਤਯਸਮ੍ਪਯੁਤ੍ਤਂ ਸੁਖਂ. ਯੋ ਪਨੇਸ ਗਾਥਾਯ ਆਗਤੋ ਪਸਾਦੋ, ਸੋ ਕਤਰਪਸਾਦੋ ਹੋਤੀਤਿ. ਤਿਪਿਟਕਚੂਲ਼ਾਭਯਤ੍ਥੇਰੋ ਤਾਵ ‘‘ਮਗ੍ਗਪਸਾਦੋ’’ਤਿ ਆਹ, ਤਿਪਿਟਕਚੂਲ਼ਨਾਗਤ੍ਥੇਰੋ ‘‘ਆਗਤਮਗ੍ਗਸ੍ਸ ਪਚ੍ਚਵੇਕ੍ਖਣਪ੍ਪਸਾਦੋ’’ਤਿ. ਉਭੋਪਿ ਥੇਰਾ ਪਣ੍ਡਿਤਾ ਬਹੁਸ੍ਸੁਤਾ, ਉਭਿਨ੍ਨਂ ਸੁਭਾਸਿਤਂ. ਮਿਸ੍ਸਕਪ੍ਪਸਾਦੋ ਏਸੋਤਿ.
੩. ਦੀਘਾਵੁਉਪਾਸਕਸੁਤ੍ਤਵਣ੍ਣਨਾ
੯੯੯. ਤਤਿਯੇ ਤਸ੍ਮਾਤਿ ਯਸ੍ਮਾ ਚਤੂਸੁ ਸੋਤਾਪਤ੍ਤਿਯਙ੍ਗੇਸੁ ਸਨ੍ਦਿਸ੍ਸਸਿ, ਤਸ੍ਮਾ. ਵਿਜ੍ਜਾਭਾਗਿਯੇਤਿ ਵਿਜ੍ਜਾਕੋਟ੍ਠਾਸਿਕੇ. ਸਬ੍ਬਸਙ੍ਖਾਰੇਸੂਤਿ ਸਬ੍ਬੇਸੁ ਤੇਭੂਮਕਸਙ੍ਖਾਰੇਸੁ. ਏਵਮਸ੍ਸ ਉਪਰਿ ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ ਕਥਿਤਾ. ਵਿਘਾਤਨ੍ਤਿ ਦੁਕ੍ਖਂ.
੪-੫. ਪਠਮਸਾਰਿਪੁਤ੍ਤਸੁਤ੍ਤਾਦਿਵਣ੍ਣਨਾ
੧੦੦੦-੧੦੦੧. ਚਤੁਤ੍ਥ ਉਤ੍ਤਾਨਮੇਵ. ਪਞ੍ਚਮੇ ਸੋਤਾਪਤ੍ਤਿਯਙ੍ਗਨ੍ਤਿ ਸੋਤਾਪਤ੍ਤਿਯਾ ਪੁਬ੍ਬਭਾਗਪਟਿਲਾਭਙ੍ਗਂ. ਬੁਦ੍ਧੇ ਅਵੇਚ੍ਚਪ੍ਪਸਾਦਾਦਯੋ ਪਨ ਪਟਿਲਦ੍ਧਗੁਣਾ ਸੋਤਾਪਨ੍ਨਸ੍ਸ ਅਙ੍ਗਾ ਨਾਮ, ਤੇਪਿ ਪਨ ਸੋਤਾਪਤ੍ਤਿਯਙ੍ਗਨ੍ਤਿ ਆਗਤਾ. ਤਤ੍ਰਾਯਂ ਦ੍ਵਿਨ੍ਨਮ੍ਪਿ ਵਚਨਤ੍ਥੋ – ਸਪ੍ਪੁਰਿਸੇ ਸੇਵਨ੍ਤੋ ਭਜਨ੍ਤੋ ਪਯਿਰੁਪਾਸਨ੍ਤੋ ਧਮ੍ਮਂ ਸੁਣਨ੍ਤੋ ਯੋਨਿਸੋ ਮਨਸਿਕਰੋਨ੍ਤੋ ਧਮ੍ਮਾਨੁਧਮ੍ਮਂ ਪੁਬ੍ਬਭਾਗਪਟਿਪਦਂ ਪਟਿਪਜ੍ਜਨ੍ਤੋ ਸੋਤਾਪਤ੍ਤਿਂ ਪਟਿਲਭਤੀਤਿ ਸਪ੍ਪੁਰਿਸਸਂਸੇਵਾਦਯੋ ਸੋਤਾਪਤ੍ਤਿਅਤ੍ਥਾਯ ਅਙ੍ਗਨ੍ਤਿ ਸੋਤਾਪਤ੍ਤਿਯਙ੍ਗਂ ਨਾਮ, ਇਤਰੇ ਪਠਮਮਗ੍ਗਸਙ੍ਖਾਤਾਯ ਸੋਤਾਪਤ੍ਤਿਯਾ ਅਙ੍ਗਨ੍ਤਿਪਿ ਸੋਤਾਪਤ੍ਤਿਯਙ੍ਗਂ, ਪਟਿਵਿਦ੍ਧਸੋਤਾਪਤ੍ਤਿਮਗ੍ਗਸ੍ਸ ਸੋਤਾਪਤ੍ਤਿਮਗ੍ਗੋ ਅਙ੍ਗਨ੍ਤਿਪਿ ਸੋਤਾਪਤ੍ਤਿਯਙ੍ਗਂ.
੬. ਥਪਤਿਸੁਤ੍ਤਵਣ੍ਣਨਾ
੧੦੦੨. ਛਟ੍ਠੇ ਸਾਧੁਕੇ ਪਟਿਵਸਨ੍ਤੀਤਿ ਸਾਧੁਕਨਾਮਕੇ ਅਤ੍ਤਨੋ ਭੋਗਗਾਮਕੇ ਵਸਨ੍ਤਿ. ਤੇਸੁ ਇਸਿਦਤ੍ਤੋ ਸਕਦਾਗਾਮੀ, ਪੁਰਾਣੋ ਸੋਤਾਪਨ੍ਨੋ ਸਦਾਰਸਨ੍ਤੁਟ੍ਠੋ. ਮਗ੍ਗੇ ਪੁਰਿਸਂ ਠਪੇਸੁਨ੍ਤਿ ਤੇਸਂ ਕਿਰ ਗਾਮਦ੍ਵਾਰੇਨ ਭਗਵਤੋ ਗਮਨਮਗ੍ਗੋ. ਤਸ੍ਮਾ ‘‘ਭਗਵਾ ਕਾਲੇ ਵਾ ਅਕਾਲੇ ਵਾ ਅਮ੍ਹਾਕਂ ਸੁਤ੍ਤਾਨਂ ਵਾ ਪਮਤ੍ਤਾਨਂ ਵਾ ਗਚ੍ਛੇਯ੍ਯ, ਅਥ ਪਸ੍ਸਿਤੁਂ ਨ ਲਭੇਯ੍ਯਾਮਾ’’ਤਿ ਮਗ੍ਗਮਜ੍ਝੇ ਪੁਰਿਸਂ ਠਪੇਸੁਂ.
ਅਨੁਬਨ੍ਧਿਂਸੂਤਿ ਨ ਦੂਰਤੋਵ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿਂਸੁ, ਭਗਵਾ ਪਨ ਸਕਟਮਗ੍ਗਸ੍ਸ ਮਜ੍ਝੇ ਜਙ੍ਘਮਗ੍ਗੇਨ ਅਗਮਾਸਿ, ਇਤਰੇ ਉਭੋਸੁ ਪਸ੍ਸੇਸੁ ਅਨੁਗਚ੍ਛਨ੍ਤਾ ਅਗਮਂਸੁ. ਮਗ੍ਗਾ ਓਕ੍ਕਮ੍ਮਾਤਿ ਬੁਦ੍ਧਾਨਞ੍ਹਿ ਕੇਨਚਿ ਸਦ੍ਧਿਂ ਗਚ੍ਛਨ੍ਤਾਨਂਯੇਵ ਪਟਿਸਨ੍ਥਾਰਂ ਕਾਤੁਂ ਵਟ੍ਟਤਿ ਕੇਨਚਿ ਸਦ੍ਧਿਂ ਠਿਤਕਾਨਂ, ਕੇਨਚਿ ਸਦ੍ਧਿਂ ਦਿਵਸਭਾਗਂ ਨਿਸਿਨ੍ਨਾਨਂ. ਤਸ੍ਮਾ ਭਗਵਾ ਚਿਨ੍ਤੇਸਿ – ‘‘ਇਮੇਹਿ ਮੇ ਸਦ੍ਧਿਂ ਗਚ੍ਛਨ੍ਤਸ੍ਸ ਪਟਿਸਨ੍ਥਾਰਂ ਕਾਤੁਂ ਅਯੁਤ੍ਤਂ, ਠਿਤਕੇਨਪਿ ਕਾਤੁਂ ਨ ਯੁਤ੍ਤਂ, ਇਮੇ ਹਿ ਮਯ੍ਹਂ ਸਾਸਨੇ ਸਾਮਿਨੋ ਆਗਤਫਲਾ. ਇਮੇਹਿ ਸਦ੍ਧਿਂ ਨਿਸੀਦਿਤ੍ਵਾਵ ਦਿਵਸਭਾਗਂ ਪਟਿਸਨ੍ਥਾਰਂ ਕਰਿਸ੍ਸਾਮੀ’’ਤਿ ਮਗ੍ਗਾ ਓਕ੍ਕਮ੍ਮ ਯੇਨ ਅਞ੍ਞਤਰਂ ਰੁਕ੍ਖਮੂਲਂ ਤੇਨੁਪਸਙ੍ਕਮਿ.
ਪਞ੍ਞਤ੍ਤੇ ਆਸਨੇ ਨਿਸੀਦੀਤਿ ਤੇ ਕਿਰ ਛਤ੍ਤੁਪਾਹਨਂ ਕਤ੍ਤਰਦਣ੍ਡਂ ਪਾਦਬ੍ਭਞ੍ਜਨਤੇਲਾਦੀਨਿ ਚੇਵ ਅਟ੍ਠਵਿਧਞ੍ਚ ਪਾਨਕਂ ਸਰਭਪਾਦਪਲ੍ਲਙ੍ਕਞ੍ਚ ਗਾਹਾਪੇਤ੍ਵਾ ਅਗਮਂਸੁ, ਆਭਤਂ ਪਲ੍ਲਙ੍ਕਮ੍ਪਿ ਪਞ੍ਞਾਪੇਤ੍ਵਾ ਅਦਂਸੁ, ਸਤ੍ਥਾ ਤਸ੍ਮਿਂ ਨਿਸੀਦਿ. ਏਕਮਨ੍ਤਂ ਨਿਸੀਦਿਂਸੂਤਿ ਸੇਸਾਨਿ ਛਤ੍ਤੁਪਾਹਨਾਦੀਨਿ ਭਿਕ੍ਖੁਸਙ੍ਘਸ੍ਸ ਦੇਥਾਤਿ ਵਤ੍ਵਾ ਸਯਮ੍ਪਿ ਭਗਵਨ੍ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ.
ਸਾਵਤ੍ਥਿਯਾ ਕੋਸਲੇਸੁ ਚਾਰਿਕਂ ਪਕ੍ਕਮਿਸ੍ਸਤੀਤਿਆਦਿ ਸਬ੍ਬਂ ਮਜ੍ਝਿਮਪਦੇਸਵਸੇਨਵ ਵੁਤ੍ਤਂ. ਕਸ੍ਮਾ? ਨਿਯਤਤ੍ਤਾ. ਭਗਵਤੋ ਹਿ ਚਾਰਿਕਾਚਰਣਮ੍ਪਿ ਅਰੁਣੁਟ੍ਠਾਪਨਮ੍ਪਿ ਨਿਯਤਂ, ਮਜ੍ਝਿਮਪਦੇਸੇਯੇਵ ਚਾਰਿਕਂ ਚਰਤਿ, ਮਜ੍ਝਿਮਦੇਸੇ ਅਰੁਣਂ ਉਟ੍ਠਪੇਤੀਤਿ ਨਿਯਤਤ੍ਤਾ ਮਜ੍ਝਿਮਦੇਸਵਸੇਨ ਵੁਤ੍ਤਂ. ਆਸਨ੍ਨੇ ਨੋ ਭਗਵਾ ਭਵਿਸ੍ਸਤੀਤਿ ਏਤ੍ਥ ਨ ਕੇਵਲਂ ਆਸਨ੍ਨਤ੍ਤਾਯੇਵ ਤੇਸਂ ਸੋਮਨਸ੍ਸਂ ਹੋਤਿ, ਅਥ ਖੋ ‘‘ਇਦਾਨਿ ਦਾਨਂ ਦਾਤੁਂ ਗਨ੍ਧਮਾਲਾਦੀਹਿ ਪੂਜਂ ਕਾਤੁਂ ਧਮ੍ਮਂ ਸੋਤੁਂ ਪਞ੍ਹਂ ਪੁਚ੍ਛਿਤੁਂ ਲਭਿਸ੍ਸਾਮਾ’’ਤਿ ਤੇਸਂ ਸੋਮਨਸ੍ਸਂ ਹੋਤਿ.
ਤਸ੍ਮਾਤਿਹ ਥਪਤਯੋ ਸਮ੍ਬਾਧੋ ਘਰਾਵਾਸੋਤਿ ਥਪਤਯੋ ਯਸ੍ਮਾ ਤੁਮ੍ਹਾਕਂ ਮਯਿ ਦੂਰੀਭੂਤੇ ਅਨਪ੍ਪਕਂ ਦੋਮਨਸ੍ਸਂ, ਆਸਨ੍ਨੇ ਅਨਪ੍ਪਕਂ ਸੋਮਨਸ੍ਸਂ ਹੋਤਿ, ਤਸ੍ਮਾਪਿ ਵੇਦਿਤਬ੍ਬਮੇਤਂ ‘‘ਸਮ੍ਬਾਧੋ ਘਰਾਵਾਸੋ’’ਤਿ. ਘਰਾਵਾਸਸ੍ਸ ਹਿ ਦੋਸੇਨ ਤੁਮ੍ਹਾਕਂ ਏਵਂ ਹੋਤਿ. ਸਚੇ ਪਨ ਘਰਾਵਾਸਂ ਪਹਾਯ ਪਬ੍ਬਜਿਤਾ, ਅਥ ਏਵਂ ਵੋ ਮਯਾ ਸਦ੍ਧਿਂਯੇਵ ਗਚ੍ਛਨ੍ਤਾਨਞ੍ਚ ਆਗਚ੍ਛਨ੍ਤਾਨਞ੍ਚ ਤਂ ਨ ਭਵੇਯ੍ਯਾਤਿ ਇਮਮਤ੍ਥਂ ਦੀਪੇਨ੍ਤੋ ਏਵਮਾਹ. ਤਤ੍ਥ ਸਕਿਞ੍ਚਨਸਪਲਿਬੋਧਟ੍ਠੇਨ ਸਮ੍ਬਾਧਤਾ ਵੇਦਿਤਬ੍ਬਾ. ਮਹਾਵਾਸੇ ਵਸਨ੍ਤਸ੍ਸਪਿ ਹਿ ਸਕਿਞ੍ਚਨਸਪਲਿਬੋਧਟ੍ਠੇਨ ਘਰਾਵਾਸੋ ਸਮ੍ਬਾਧੋਵ. ਰਜਾਪਥੋਤਿ ਰਾਗਦੋਸਮੋਹਰਜਾਨਂ ਆਪਥੋ, ਆਗਮਨਟ੍ਠਾਨਨ੍ਤਿ ਅਤ੍ਥੋ. ਅਬ੍ਭੋਕਾਸੋ ਪਬ੍ਬਜ੍ਜਾਤਿ ਪਬ੍ਬਜ੍ਜਾ ਪਨ ਅਕਿਞ੍ਚਨਅਪਲਿਬੋਧਟ੍ਠੇਨ ਅਬ੍ਭੋਕਾਸੋ. ਚਤੁਰਤਨਿਕੇਪਿ ਹਿ ਗਬ੍ਭੇ ਦ੍ਵਿਨ੍ਨਂ ਭਿਕ੍ਖੂਨਂ ਪਲ੍ਲਙ੍ਕੇਨ ਪਲ੍ਲਙ੍ਕਂ ਘਟੇਤ੍ਵਾ ਨਿਸਿਨ੍ਨਾਨਮ੍ਪਿ ਅਕਿਞ੍ਚਨਅਪਲਿਬੋਧਟ੍ਠੇਨ ਪਬ੍ਬਜ੍ਜਾ ਅਬ੍ਭੋਕਾਸੋ ਨਾਮ ਹੋਤਿ. ਅਲਞ੍ਚ ਪਨ ਵੋ ਥਪਤਯੋ ਅਪ੍ਪਮਾਦਾਯਾਤਿ ਏਵਂ ਸਮ੍ਬਾਧੇ ਘਰਾਵਾਸੇ ਵਸਨ੍ਤਾਨਂ ਤੁਮ੍ਹਾਕਂ ਅਪ੍ਪਮਾਦਮੇਵ ਕਾਤੁਂ ਯੁਤ੍ਤਨ੍ਤਿ ਅਤ੍ਥੋ.
ਏਕਂ ਪੁਰਤੋ ਏਕਂ ਪਚ੍ਛਤੋ ਨਿਸੀਦਾਪੇਮਾਤਿ ਤੇ ਕਿਰ ਦ੍ਵੇਪਿ ਜਨਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤੇਸੁ ਦ੍ਵੀਸੁ ਨਾਗੇਸੁ ਤਾ ਇਤ੍ਥਿਯੋ ਏਵਂ ਨਿਸੀਦਾਪੇਤ੍ਵਾ ਰਞ੍ਞੋ ਨਾਗਂ ਮਜ੍ਝੇ ਕਤ੍ਵਾ ਉਭੋਸੁ ਪਸ੍ਸੇਸੁ ਗਚ੍ਛਨ੍ਤਿ, ਤਸ੍ਮਾ ਏਵਮਾਹਂਸੁ. ਨਾਗੋਪਿ ਰਕ੍ਖਿਤਬ੍ਬੋਤਿ ਯਥਾ ਕਿਞ੍ਚਿ ਵਿਸੇਵਿਤਂ ਨ ਕਰੋਤਿ, ਏਵਂ ਰਕ੍ਖਿਤਬ੍ਬੋ ਹੋਤਿ. ਤਾਪਿ ਭਗਿਨਿਯੋਤਿ ਯਥਾ ਪਮਾਦਂ ਨਾਪਜ੍ਜਨ੍ਤਿ, ਏਵਂ ਰਕ੍ਖਿਤਬ੍ਬਾ ਹੋਨ੍ਤਿ. ਅਤ੍ਤਾਪੀਤਿ ਸਿਤਹਸਿਤਕਥਿਤਵਿਪੇਕ੍ਖਿਤਾਦੀਨਿ ਅਕਰੋਨ੍ਤੇਹਿ ਅਤ੍ਤਾਪਿ ਰਕ੍ਖਿਤਬ੍ਬੋ ਹੋਤਿ. (ਤੇਹਿ ਤਥਾ ਕਰੋਨ੍ਤੇਹਿ ਨ ਅਤ੍ਤਾਪਿ ਰਕ੍ਖਿਤਬ੍ਬੋ ਹੋਤਿ). ਤਥਾ ਕਰੋਨ੍ਤੋ ਹਿ ‘‘ਸਾਮਿਦੁਬ੍ਭੋ ਏਸੋ’’ਤਿ ਨਿਗ੍ਗਹੇਤਬ੍ਬੋ ਹੋਤਿ. ਤਸ੍ਮਾਤਿਹ ਥਪਤਯੋਤਿ ਯਸ੍ਮਾ ਤੁਮ੍ਹੇ ਰਾਜਾ ਨਿਚ੍ਚਂ ਰਾਜਭਣ੍ਡਂ ਪਟਿਚ੍ਛਾਪੇਤਿ, ਤਸ੍ਮਾਪਿ ਸਮ੍ਬਾਧੋ ਘਰਾਵਾਸੋ ਰਜਾਪਥੋ. ਯਸ੍ਮਾ ਪਨ ਪਂਸੁਕੂਲਿਕਭਿਕ੍ਖੁਂ ਏਵਂ ਪਟਿਚ੍ਛਾਪੇਨ੍ਤੋ ਨਤ੍ਥਿ, ਤਸ੍ਮਾ ਅਬ੍ਭੋਕਾਸੋ ਪਬ੍ਬਜ੍ਜਾ. ਏਵਂ ਸਬ੍ਬਤ੍ਥਾਪਿ ਅਲਞ੍ਚ ਪਨ ਵੋ ਥਪਤਯੋ ਅਪ੍ਪਮਾਦਾਯ ਅਪ੍ਪਮਾਦਮੇਵ ਕਰੋਥਾਤਿ ਦਸ੍ਸੇਤਿ.
ਮੁਤ੍ਤਚਾਗੋਤਿ ਵਿਸ੍ਸਟ੍ਠਚਾਗੋ. ਪਯਤਪਾਣੀਤਿ ਆਗਤਾਗਤਾਨਂ ਦਾਨਤ੍ਥਾਯ ਧੋਤਹਤ੍ਥੋ. ਵੋਸ੍ਸਗ੍ਗਰਤੋਤਿ ਵੋਸ੍ਸਗ੍ਗਸਙ੍ਖਾਤੇ ਚਾਗੇ ਰਤੋ. ਯਾਚਯੋਗੋਤਿ ਯਾਚਿਤਬ੍ਬਕਯੁਤ੍ਤੋ. ਦਾਨਸਂਵਿਭਾਗਰਤੋਤਿ ਦਾਨੇਨ ਚੇਵ ਅਪ੍ਪਮਤ੍ਤਕਮ੍ਪਿ ਕਿਞ੍ਚਿ ਲਦ੍ਧਾ ਤਤੋਪਿ ਸਂਵਿਭਾਗੇ ਰਤੋ. ਅਪ੍ਪਟਿਵਿਭਤ੍ਤਨ੍ਤਿ ‘‘ਇਦਂ ਅਮ੍ਹਾਕਂ ਭਵਿਸ੍ਸਤਿ, ਇਦਂ ਭਿਕ੍ਖੂਨ’’ਨ੍ਤਿ ਏਵਂ ਅਕਤਵਿਭਾਗਂ, ਸਬ੍ਬਂ ਦਾਤਬ੍ਬਮੇਵ ਹੁਤ੍ਵਾ ਠਿਤਨ੍ਤਿ ਅਤ੍ਥੋ.
੭. ਵੇਲ਼ੁਦ੍ਵਾਰੇਯ੍ਯਸੁਤ੍ਤਵਣ੍ਣਨਾ
੧੦੦੩. ਸਤ੍ਤਮੇ ਵੇਲ਼ੁਦ੍ਵਾਰਨ੍ਤਿ ਗਾਮਦ੍ਵਾਰੇ ਪਵੇਣਿਆਗਤਸ੍ਸ ਵੇਲ਼ੁਗਚ੍ਛਸ੍ਸ ਅਤ੍ਥਿਤਾਯ ਏਵਂਲਦ੍ਧਨਾਮੋ ਗਾਮੋ. ਅਤ੍ਤੁਪਨਾਯਿਕਨ੍ਤਿ ਅਤ੍ਤਨਿ ਉਪਨੇਤਬ੍ਬਂ. ਸਮ੍ਫਭਾਸੇਨਾਤਿ ਅਮਨ੍ਤਭਾਸੇਨ. ਸਮ੍ਫਪ੍ਪਲਾਪਭਾਸੇਨਾਤਿ ਸਮ੍ਫਪ੍ਪਲਾਪਸਮ੍ਭਾਸੇਨ ਨਿਰਤ੍ਥਕੇਨ ਅਞ੍ਞਾਣਵਚਨੇਨਾਤਿ ਅਤ੍ਥੋ.
੮-੯. ਪਠਮਗਿਞ੍ਜਕਾਵਸਥਸੁਤ੍ਤਾਦਿਵਣ੍ਣਨਾ
੧੦੦੪-੫. ਅਟ੍ਠਮੇ ਞਾਤਿਕੇਤਿ ਏਕਂ ਤਲ਼ਾਕਂ ਨਿਸ੍ਸਾਯ ਦ੍ਵਿਨ੍ਨਂ ਚੂਲ਼ਪਿਤਿਮਹਾਪਿਤਿਪੁਤ੍ਤਾਨਂ ਦ੍ਵੇ ਗਾਮਾ, ਤੇਸੁ ਏਕਸ੍ਮਿਂ ਗਾਮਕੇ. ਗਿਞ੍ਜਕਾਵਸਥੇਤਿ ਇਟ੍ਠਕਾਮਯੇ ਆਵਸਥੇ. ਓਰਮ੍ਭਾਗਿਯਾਨਨ੍ਤਿ ਹੇਟ੍ਠਾਭਾਗਿਯਾਨਂ, ਕਾਮਭਵੇਯੇਵ ਪਟਿਸਨ੍ਧਿਗ੍ਗਾਹਾਪਕਾਨਨ੍ਤਿ ਅਤ੍ਥੋ. ਓਰਨ੍ਤਿ ਲਦ੍ਧਨਾਮੇਹਿ ਵਾ ਤੀਹਿ ਮਗ੍ਗੇਹਿ ਪਹਾਤਬ੍ਬਾਨੀਤਿਪਿ ਓਰਮ੍ਭਾਗਿਯਾਨਿ. ਤਤ੍ਥ ਕਾਮਚ੍ਛਨ੍ਦੋ ਬ੍ਯਾਪਾਦੋਤਿ ਇਮਾਨਿ ਦ੍ਵੇ ਸਮਾਪਤ੍ਤਿਯਾ ਵਾ ਅਵਿਕ੍ਖਮ੍ਭਿਤਾਨਿ ਮਗ੍ਗੇਨ ਵਾ ਅਸਮੁਚ੍ਛਿਨ੍ਨਾਨਿ ਨਿਬ੍ਬਤ੍ਤਿਵਸੇਨ ਉਦ੍ਧਂ ਭਾਗਂ ਰੂਪਭਵਂ ਅਰੂਪਭਵਂ ਵਾ ਗਨ੍ਤੁਂ ਨ ਦੇਨ੍ਤਿ. ਸਕ੍ਕਾਯਦਿਟ੍ਠਿਆਦੀਨਿ ਤੀਣਿ ਤਤ੍ਥ ਨਿਬ੍ਬਤ੍ਤਮ੍ਪਿ ਆਨੇਤ੍ਵਾ ਪੁਨ ਇਧੇਵ ਨਿਬ੍ਬਤ੍ਤਾਪੇਨ੍ਤੀਤਿ ਸਬ੍ਬਾਨਿਪਿ ਓਰਮ੍ਭਾਗਿਯਾਨੇਵ. ਅਨਾਵਤ੍ਤਿਧਮ੍ਮੋਤਿ ਪਟਿਸਨ੍ਧਿਵਸੇਨ ਅਨਾਗਮਨਸਭਾਵੋ.
ਰਾਗਦੋਸਮੋਹਾਨਂ ਤਨੁਤ੍ਤਾਤਿ ਏਤ੍ਥ ਕਦਾਚਿ ਉਪ੍ਪਤ੍ਤਿਯਾ ਚ ਪਰਿਯੁਟ੍ਠਾਨਮਨ੍ਦਤਾਯ ਚਾਤਿ ਦ੍ਵੇਧਾਪਿ ਤਨੁਭਾਵੋ ਵੇਦਿਤਬ੍ਬੋ. ਸਕਦਾਗਾਮਿਸ੍ਸ ਹਿ ਪੁਥੁਜ੍ਜਨਾਨਂ ਵਿਯ ਅਭਿਣ੍ਹਂ ਰਾਗਾਦਯੋ ਨ ਉਪ੍ਪਜ੍ਜਨ੍ਤਿ, ਕਦਾਚਿ ਕਰਹਚਿ ਉਪ੍ਪਜ੍ਜਨ੍ਤਿ. ਉਪ੍ਪਜ੍ਜਮਾਨਾ ਚ ਨ ਪੁਥੁਜ੍ਜਨਾਨਂ ਵਿਯ ਬਹਲਬਹਲਾ ਉਪ੍ਪਜ੍ਜਨ੍ਤਿ, ਮਕ੍ਖਿਪਤ੍ਤਂ ਵਿਯ ਤਨੁਕਾ ਉਪ੍ਪਜ੍ਜਨ੍ਤਿ. ਦੀਘਭਾਣਕਤਿਪਿਟਕਮਹਾਸੀਵਤ੍ਥੇਰੋ ਪਨਾਹ – ‘‘ਯਸ੍ਮਾ ਸਕਦਾਗਾਮਿਸ੍ਸ ਪੁਤ੍ਤਧੀਤਰੋ ਹੋਨ੍ਤਿ, ਓਰੋਧਾ ਚ ਹੋਨ੍ਤਿ, ਤਸ੍ਮਾ ਬਹਲਾ ਕਿਲੇਸਾ. ਇਦਂ ਪਨ ਭਵਤਨੁਕਵਸੇਨ ਕਥਿਤ’’ਨ੍ਤਿ. ਤਂ ਅਟ੍ਠਕਥਾਯਂ ‘‘ਸੋਤਾਪਨ੍ਨਸ੍ਸ ਸਤ੍ਤ ਭਵੇ ਠਪੇਤ੍ਵਾ ਅਟ੍ਠਮੇ ਭਵੇ ਭਵਤਨੁਕਂ ਨਤ੍ਥਿ, ਸਕਦਾਗਾਮਿਸ੍ਸ ਦ੍ਵੇ ਭਵੇ ਠਪੇਤ੍ਵਾ ਪਞ੍ਚਸੁ ਭਵੇਸੁ ਭਵਤਨੁਕਂ ਨਤ੍ਥਿ, ਅਨਾਗਾਮਿਸ੍ਸ ਰੂਪਾਰੂਪਭਵਂ ਠਪੇਤ੍ਵਾ ਕਾਮਭਵੇ ਭਵਤਨੁਕਂ ਨਤ੍ਥਿ, ਖੀਣਾਸਵਸ੍ਸ ਕਿਸ੍ਮਿਞ੍ਚਿ ਭਵੇ ਭਵਤਨੁਕਂ ਨਤ੍ਥੀ’’ਤਿ ਵੁਤ੍ਤਤ੍ਤਾ ਪਟਿਕ੍ਖਿਤ੍ਤਂ ਹੋਤਿ.
ਇਮਂ ਲੋਕਨ੍ਤਿ ਇਮਂ ਕਾਮਾਵਚਰਲੋਕਂ ਸਨ੍ਧਾਯ ਵੁਤ੍ਤਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਸਚੇ ਹਿ ਮਨੁਸ੍ਸੇਸੁ ਸਕਦਾਗਾਮਿਫਲਂ ਪਤ੍ਤੋ ਦੇਵੇਸੁ ਨਿਬ੍ਬਤ੍ਤਿਤ੍ਵਾ ਅਰਹਤ੍ਤਂ ਸਚ੍ਛਿਕਰੋਤਿ, ਇਚ੍ਚੇਤਂ ਕੁਸਲਂ. ਅਸਕ੍ਕੋਨ੍ਤੋ ਪਨ ਅਵਸ੍ਸਂ ਮਨੁਸ੍ਸਲੋਕਂ ਆਗਨ੍ਤ੍ਵਾ ਸਚ੍ਛਿਕਰੋਤਿ. ਦੇਵੇਸੁ ਸਕਦਾਗਾਮਿਫਲਂ ਪਤ੍ਤੋਪਿ ਸਚੇ ਮਨੁਸ੍ਸੇਸੁ ਨਿਬ੍ਬਤ੍ਤਿਤ੍ਵਾ ਅਰਹਤ੍ਤਂ ਸਚ੍ਛਿਕਰੋਤਿ, ਇਚ੍ਚੇਤਂ ਕੁਸਲਂ. ਅਸਕ੍ਕੋਨ੍ਤੋ ਪਨ ਅਵਸ੍ਸਂ ਦੇਵਲੋਕਂ ਗਨ੍ਤ੍ਵਾ ਸਚ੍ਛਿਕਰੋਤੀਤਿ.
ਵਿਨਿਪਤਨਂ ਵਿਨਿਪਾਤੋ, ਨਾਸ੍ਸ ਵਿਨਿਪਾਤੋ ਧਮ੍ਮੋਤਿ ਅਵਿਨਿਪਾਤਧਮ੍ਮੋ, ਚਤੂਸੁ ਅਪਾਯੇਸੁ ਅਵਿਨਿਪਾਤਨਸਭਾਵੋਤਿ ਅਤ੍ਥੋ. ਨਿਯਤੋਤਿ ਧਮ੍ਮਨਿਯਾਮੇਨ ਨਿਯਤੋ. ਸਮ੍ਬੋਧਿਪਰਾਯਣੋਤਿ ਉਪਰਿਮਗ੍ਗਤ੍ਤਯਸਙ੍ਖਾਤਾ ਸਮ੍ਬੋਧਿ ਪਰਂ ਅਯਨਂ ਅਸ੍ਸ ਗਤਿ ਪਟਿਸਰਣਂ ਅਵਸ੍ਸਂ ਪਤ੍ਤਬ੍ਬਾਤਿ ਸਮ੍ਬੋਧਿਪਰਾਯਣੋ. ਵਿਹੇਸਾਵੇਸਾਤਿ ਤੇਸਂ ਤੇਸਂ ਞਾਣਗਤਿਂ ਞਾਣੂਪਪਤ੍ਤਿਂ ਞਾਣਾਭਿਸਮ੍ਪਰਾਯਂ ਓਲੋਕੇਨ੍ਤਸ੍ਸ ਕਾਯਕਿਲਮਥੋਵ ਏਸ, ਆਨਨ੍ਦ, ਤਥਾਗਤਸ੍ਸਾਤਿ ਦੀਪੇਤਿ. ਚਿਤ੍ਤਵਿਹੇਸਾ ਪਨ ਬੁਦ੍ਧਾਨਂ ਨਤ੍ਥਿ.
ਧਮ੍ਮਾਦਾਸਨ੍ਤਿ ਧਮ੍ਮਮਯਂ ਆਦਾਸਂ. ਯੇਨਾਤਿ ਯੇਨ ਧਮ੍ਮਾਦਾਸੇਨ ਸਮਨ੍ਨਾਗਤੋ. ਖੀਣਾਪਾਯਦੁਗ੍ਗਤਿਵਿਨਿਪਾਤੋਤਿ ਇਦਂ ਨਿਰਯਾਦੀਨਂਯੇਵ ਵੇਵਚਨਵਸੇਨੇਵ ਵੁਤ੍ਤਂ. ਨਿਰਯਾਦਯੋ ਹਿ ਵਡ੍ਢਿਸਙ੍ਖਾਤਤੋ ਅਯਤੋ ਅਪੇਤਤ੍ਤਾ ਅਪਾਯੋ, ਦੁਕ੍ਖਸ੍ਸ ਗਤਿ ਪਟਿਸਰਣਨ੍ਤਿ. ਦੁਗ੍ਗਤਿ, ਦੁਕ੍ਕਟਕਾਰਿਨੋ ਏਤ੍ਥ ਵਿਵਸਾ ਨਿਪਤਨ੍ਤੀਤਿ ਵਿਨਿਪਾਤੋ. ਨਵਮਂ ਉਤ੍ਤਾਨਮੇਵ.
੧੦. ਤਤਿਯਗਿਞ੍ਜਕਾਵਸਥਸੁਤ੍ਤਵਣ੍ਣਨਾ
੧੦੦੬. ਦਸਮੇ ਪਰੋਪਞ੍ਞਾਸਾਤਿ ਅਤਿਰੇਕਪਞ੍ਞਾਸ. ਸਾਧਿਕਨਵੁਤੀਤਿ ਅਤਿਰੇਕਨਵੁਤਿ. ਛਾਤਿਰੇਕਾਨੀਤਿ ਛਹਿ ਅਧਿਕਾਨਿ. ਸੋ ਕਿਰ ਗਾਮੋ ਕਿਞ੍ਚਾਪਿ ਨਾਤਿਮਹਾ ਅਹੋਸਿ, ਅਰਿਯਸਾਵਕਾ ਪਨੇਤ੍ਥ ਬਹੂ. ਤਤ੍ਥ ਤਤ੍ਥ ਅਹਿਵਾਤਰੋਗੇਨ ਏਕਪ੍ਪਹਾਰੇਨੇਵ ਚਤੁਵੀਸਤਿ ਪਾਣਸਤਸਹਸ੍ਸਾਨਿ ਕਾਲਮਕਂਸੁ, ਤੇਸੁ ਅਰਿਯਸਾਵਕਾ ਏਤ੍ਤਕਾ ਨਾਮ ਅਹੇਸੁਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਵੇਲ਼ੁਦ੍ਵਾਰਵਗ੍ਗੋ ਪਠਮੋ.
੨. ਰਾਜਕਾਰਾਮਵਗ੍ਗੋ
੧. ਸਹਸ੍ਸਭਿਕ੍ਖੁਨਿਸਙ੍ਘਸੁਤ੍ਤਵਣ੍ਣਨਾ
੧੦੦੭. ਦੁਤਿਯਸ੍ਸ ਪਠਮੇ ਰਾਜਕਾਰਾਮੇਤਿ ਰਞ੍ਞਾ ਕਾਰਿਤਤ੍ਤਾ ਏਵਂ ਲਦ੍ਧਨਾਮੇ ਆਰਾਮੇ, ਤਂ ਰਞ੍ਞਾ ਪਸੇਨਦਿਕੋਸਲੇਨ ਕਤਂ. ਪਠਮਬੋਧਿਯਂ ਕਿਰ ਲਾਭਗ੍ਗਯਸਗ੍ਗਪਤ੍ਤਂ ਸਤ੍ਥਾਰਂ ਦਿਸ੍ਵਾ ਤਿਤ੍ਥਿਯਾ ਚਿਨ੍ਤਯਿਂਸੁ – ‘‘ਸਮਣੋ ਗੋਤਮੋ ਲਾਭਗ੍ਗਯਸਗ੍ਗਪਤ੍ਤੋ, ਨ ਖੋ ਪਨੇਸ ਅਞ੍ਞਂ ਕਿਞ੍ਚਿ ਸੀਲਂ ਵਾ ਸਮਾਧਿਂ ਵਾ ਨਿਸ੍ਸਾਯ ਏਵਂ ਲਾਭਗ੍ਗਯਸਗ੍ਗਪਤ੍ਤੋ. ਭੂਮਿਸੀਸਂ ਪਨ ਤੇਨ ਗਹਿਤਂ, ਸਚੇ ਮਯਮ੍ਪਿ ਜੇਤਵਨਸਮੀਪੇ ਆਰਾਮਂ ਕਾਰਾਪੇਤੁਂ ਸਕ੍ਕੁਣੇਯ੍ਯਾਮ, ਲਾਭਗ੍ਗਯਸਗ੍ਗਪਤ੍ਤਾ ਭਵੇਯ੍ਯਾਮਾ’’ਤਿ. ਤੇ ਅਤ੍ਤਨੋ ਅਤ੍ਤਨੋ ਉਪਟ੍ਠਾਕੇ ਸਮਾਦਪੇਤ੍ਵਾ ਸਤਸਹਸ੍ਸਮਤ੍ਤੇ ਕਹਾਪਣੇ ਲਭਿਤ੍ਵਾ ਤੇ ਆਦਾਯ ਰਞ੍ਞੋ ਸਨ੍ਤਿਕਂ ਅਗਮਂਸੁ. ਰਾਜਾ ‘‘ਕਿਂ ਏਤ’’ਨ੍ਤਿ? ਪੁਚ੍ਛਿ. ਮਯਂ ਜੇਤਵਨਸਮੀਪੇ ਤਿਤ੍ਥਿਯਾਰਾਮਂ ਕਰੋਮ, ਸਚੇ ਸਮਣੋ ਗੋਤਮੋ ਵਾ ਸਮਣਸ੍ਸ ਗੋਤਮਸ੍ਸ ਸਾਵਕਾ ਵਾ ਆਗਨ੍ਤ੍ਵਾ ਵਾਰੇਸ੍ਸਨ੍ਤਿ, ਵਾਰੇਤੁਂ ਮਾ ਅਦਤ੍ਥਾਤਿ ਲਞ੍ਜਂ ਅਦਂਸੁ. ਰਾਜਾ ਲਞ੍ਜਂ ਗਹੇਤ੍ਵਾ ‘‘ਗਚ੍ਛਥ ਕਾਰੇਥਾ’’ਤਿ ਆਹ.
ਤੇ ਗਨ੍ਤ੍ਵਾ, ਅਤ੍ਤਨੋ ਉਪਟ੍ਠਾਕੇਹਿ ਦਬ੍ਬਸਮ੍ਭਾਰੇ ਆਹਰਾਪੇਤ੍ਵਾ, ਥਮ੍ਭੁਸ੍ਸਾਪਨਾਦੀਨਿ ਕਰੋਨ੍ਤਾ, ਉਚ੍ਚਾਸਦ੍ਦਾ ਮਹਾਸਦ੍ਦਾ ਏਕਕੋਲਾਹਲਂ ਅਕਂਸੁ. ਸਤ੍ਥਾ ਗਨ੍ਧਕੁਟਿਤੋ ਨਿਕ੍ਖਮ੍ਮ ਪਮੁਖੇ ਠਤ੍ਵਾ ‘‘ਕੇ ਪਨ ਤੇ, ਆਨਨ੍ਦ, ਉਚ੍ਚਾਸਦ੍ਦਾ ਮਹਾਸਦ੍ਦਾ ਕੇਵਟ੍ਟਾ ਮਞ੍ਞੇ ਮਚ੍ਛਵਿਲੋਪੇ’’ਤਿ?, ਪੁਚ੍ਛਿ. ਤਿਤ੍ਥਿਯਾ, ਭਨ੍ਤੇ, ਜੇਤਵਨਸਮੀਪੇ ਤਿਤ੍ਥਿਯਾਰਾਮਂ ਕਰੋਨ੍ਤੀਤਿ. ਆਨਨ੍ਦ, ਇਮੇ ਸਾਸਨੇਨ ਪਟਿਵਿਰੁਦ੍ਧਾ ਭਿਕ੍ਖੁਸਙ੍ਘਸ੍ਸ ਅਫਾਸੁਵਿਹਾਰਂ ਕਰਿਸ੍ਸਨ੍ਤਿ, ਰਞ੍ਞੋ ਆਰੋਚੇਤ੍ਵਾ ਵਾਰਾਪੇਹੀਤਿ.
ਥੇਰੋ ਭਿਕ੍ਖੁਸਙ੍ਘੇਨ ਸਦ੍ਧਿਂ ਗਨ੍ਤ੍ਵਾ ਰਾਜਦ੍ਵਾਰੇ ਅਟ੍ਠਾਸਿ. ਰਞ੍ਞੋ ‘‘ਥੇਰਾ, ਦੇਵ, ਆਗਤਾ’’ਤਿ ਨਿਵੇਦਯਿਂਸੁ. ਰਾਜਾ ਲਞ੍ਜਸ੍ਸ ਗਹਿਤਤ੍ਤਾ ਨ ਨਿਕ੍ਖਮਿ. ਥੇਰਾ ਗਨ੍ਤ੍ਵਾ ਸਤ੍ਥੁ ਆਰੋਚਯਿਂਸੁ. ਸਤ੍ਥਾ ਸਾਰਿਪੁਤ੍ਤਮੋਗ੍ਗਲ੍ਲਾਨੇ ਪੇਸੇਸਿ. ਰਾਜਾ ਤੇਸਮ੍ਪਿ ਦਸ੍ਸਨਂ ਨ ਅਦਾਸਿ. ਤੇ ਆਗਨ੍ਤ੍ਵਾ ਸਤ੍ਥੁ ਆਰੋਚਯਿਂਸੁ ‘‘ਨ, ਭਨ੍ਤੇ, ਰਾਜਾ ਨਿਕ੍ਖਨ੍ਤੋ’’ਤਿ. ਸਤ੍ਥਾ ਤਙ੍ਖਣਂਯੇਵ ਬ੍ਯਾਕਾਸਿ – ‘‘ਅਤ੍ਤਨੋ ਰਜ੍ਜੇ ਠਤ੍ਵਾ ਕਾਲਂ ਕਾਤੁਂ ਨ ਲਭਿਸ੍ਸਤੀ’’ਤਿ.
ਦੁਤਿਯਦਿਵਸੇ ਚ ਸਾਮਂਯੇਵ ਭਿਕ੍ਖੁਸਙ੍ਘਪਰਿਵਾਰੋ ਗਨ੍ਤ੍ਵਾ ਰਾਜਦ੍ਵਾਰੇ ਅਟ੍ਠਾਸਿ. ਰਾਜਾ ‘‘ਸਤ੍ਥਾ ਆਗਤੋ’’ਤਿ ਸੁਤ੍ਵਾ ਨਿਕ੍ਖਮਿਤ੍ਵਾ, ਨਿਵੇਸਨਂ ਪਵੇਸੇਤ੍ਵਾ, ਸਾਰਪਲ੍ਲਙ੍ਕੇ ਨਿਸੀਦਾਪੇਤ੍ਵਾ, ਯਾਗੁਖਜ੍ਜਕਂ ਅਦਾਸਿ. ਸਤ੍ਥਾ ਪਰਿਭੁਤ੍ਤਯਾਗੁਖਾਦਨੀਯੋ ‘‘ਯਾਵ ਭਤ੍ਤਂ ਨਿਟ੍ਠਾਤਿ, ਤਾਵ ਸਤ੍ਥੁ ਸਨ੍ਤਿਕੇ ਨਿਸੀਦਿਸ੍ਸਾਮੀ’’ਤਿ ਆਗਨ੍ਤ੍ਵਾ ਨਿਸਿਨ੍ਨਂ ਰਾਜਾਨਂ ‘‘ਤਯਾ, ਮਹਾਰਾਜ, ਇਦਂ ਨਾਮ ਕਤ’’ਨ੍ਤਿ ਅਵਤ੍ਵਾ, ‘‘ਕਾਰਣੇਨੇਵ ਨਂ ਸਞ੍ਞਾਪੇਸ੍ਸਾਮੀ’’ਤਿ ਇਦਂ ਅਤੀਤਕਾਰਣਂ ਆਹਰਿ – ਮਹਾਰਾਜ, ਪਬ੍ਬਜਿਤੇ ਨਾਮ ਅਞ੍ਞਮਞ੍ਞਂ ਯੁਜ੍ਝਾਪੇਤੁਂ ਨ ਵਟ੍ਟਤਿ. ਅਤੀਤੇਪਿ ਇਸਯੋ ਅਞ੍ਞਮਞ੍ਞਂ ਯੁਜ੍ਝਾਪੇਤ੍ਵਾ ਸਹ ਰਟ੍ਠੇਨ ਰਾਜਾ ਸਮੁਦ੍ਦਂ ਪਵਿਟ੍ਠੋਤਿ. ਕਦਾ ਭਗਵਾਤਿ?
ਅਤੀਤੇ, ਮਹਾਰਾਜ, ਭਰੁਰਟ੍ਠੇ ਭਰੁਰਾਜਾ ਨਾਮ ਰਜ੍ਜਂ ਕਾਰੇਤਿ. ਪਞ੍ਚਸਤਾ ਪਞ੍ਚਸਤਾ ਦ੍ਵੇ ਇਸਿਗਣਾ ਪਬ੍ਬਤਪਾਦਤੋ ਲੋਣਮ੍ਬਿਲਸੇਵਨਤ੍ਥਾਯ ਭਰੁਨਗਰਂ ਗਨ੍ਤ੍ਵਾ ਨਗਰਸ੍ਸ ਅਵਿਦੂਰੇ ਦ੍ਵੇ ਰੁਕ੍ਖਾ ਅਤ੍ਥਿ, ਪਠਮਂ ਆਗਤੋ ਇਸਿਗਣੋ ਏਕਸ੍ਸ ਰੁਕ੍ਖਸ੍ਸ ਮੂਲੇ ਨਿਸੀਦਿ, ਪਚ੍ਛਾਗਤੋਪਿ ਏਕਸ੍ਸਾਤਿ. ਤੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਪਬ੍ਬਤਪਾਦਂ ਏਵ ਅਗਮਂਸੁ. ਤੇ ਪੁਨ ਆਗਚ੍ਛਨ੍ਤਾਪਿ ਅਤ੍ਤਨੋ ਰੁਕ੍ਖਮੂਲੇਯੇਵ ਨਿਸੀਦਨ੍ਤਿ. ਅਦ੍ਧਾਨੇ ਗਚ੍ਛਨ੍ਤੇ ਏਕੋ ਰੁਕ੍ਖੋ ਸੁਕ੍ਖਿ, ਤਸ੍ਮਿਂ ਸੁਕ੍ਖੇ ਆਗਤਾ ਤਾਪਸਾ ‘‘ਅਯਂ ਰੁਕ੍ਖੋ ਮਹਾ, ਅਮ੍ਹਾਕਮ੍ਪਿ ਤੇਸਮ੍ਪਿ ਪਹੋਸ੍ਸਤੀ’’ਤਿ ਇਤਰੇਸਂ ਰੁਕ੍ਖਮੂਲਸ੍ਸ ਏਕਪਦੇਸੇ ਨਿਸੀਦਿਂਸੁ. ਤੇ ਪਚ੍ਛਾ ਆਗਚ੍ਛਨ੍ਤਾ ਰੁਕ੍ਖਮੂਲਂ ਅਪਵਿਸਿਤ੍ਵਾ ਬਹਿ ਠਿਤਾਵ ‘‘ਕਸ੍ਮਾ ਤੁਮ੍ਹੇ ਏਤ੍ਥ ਨਿਸੀਦਥਾ’’ਤਿ ਆਹਂਸੁ. ਆਚਰਿਯਾ ਅਮ੍ਹਾਕਂ ਰੁਕ੍ਖੋ ਸੁਕ੍ਖੋ, ਅਯਂ ਰੁਕ੍ਖੋ ਮਹਾ, ਤੁਮ੍ਹੇਪਿ ਪਵਿਸਥ, ਤੁਮ੍ਹਾਕਮ੍ਪਿ ਅਮ੍ਹਾਕਮ੍ਪਿ ਪਹੋਸ੍ਸਤੀਤਿ. ਤੇ ‘‘ਨ ਮਯਂ ਪਵਿਸਾਮ, ਨਿਕ੍ਖਮਥ ਤੁਮ੍ਹੇ’’ਤਿ ਕਥਂ ਵਡ੍ਢੇਤ੍ਵਾ ‘‘ਨ ਤੁਮ੍ਹੇ ਅਤ੍ਤਨੋਵ ਮਨੇਨ ਨਿਕ੍ਖਮਿਸ੍ਸਥਾ’’ਤਿ ਹਤ੍ਥਾਦੀਸੁ ਗਹੇਤ੍ਵਾ ਨਿਕ੍ਕਡ੍ਢਿਂਸੁ. ਤੇ ‘‘ਹੋਤੁ ਸਿਕ੍ਖਾਪੇਸ੍ਸਾਮ ਨੇ’’ਤਿ ਇਦ੍ਧਿਯਾ ਸੋਵਣ੍ਣਮਯਾਨਿ ਦ੍ਵੇ ਚਕ੍ਕਾਨਿ ਰਜਤਮਯਞ੍ਚ ਅਕ੍ਖਂ ਮਾਪੇਤ੍ਵਾ ਪਵਟ੍ਟੇਨ੍ਤਾ ਰਾਜਦ੍ਵਾਰਂ ਅਗਮਿਂਸੁ. ਰਞ੍ਞੋ ‘‘ਏਵਰੂਪਂ, ਦੇਵ, ਤਾਪਸਾ ਪਣ੍ਣਾਕਾਰਂ ਗਹੇਤ੍ਵਾ ਠਿਤਾ’’ਤਿ ਨਿਵੇਦਯਿਂਸੁ. ਰਾਜਾ ਤੁਟ੍ਠੋ ‘‘ਪਕ੍ਕੋਸਥਾ’’ਤਿ ਤੇ ਪਕ੍ਕੋਸਾਪੇਤ੍ਵਾ ‘‘ਮਹਾਕਮ੍ਮਂ ਤੁਮ੍ਹੇਹਿ ਕਤਂ, ਅਤ੍ਥਿ ਵੋ ਕਿਞ੍ਚਿ ਮਯਾ ਕਤ੍ਤਬ੍ਬ’’ਨ੍ਤਿ ਆਹ. ਆਮ, ਮਹਾਰਾਜ, ਅਮ੍ਹਾਕਂ ਨਿਸਿਨ੍ਨਟ੍ਠਾਨਂ ਏਕਰੁਕ੍ਖਮੂਲਂ ਅਤ੍ਥਿ, ਤਂ ਅਞ੍ਞੇਹਿ ਇਸੀਹਿ ਗਹਿਤਂ, ਤਂ ਨੋ ਦਾਪੇਹੀਤਿ. ਰਾਜਾ ਪੁਰਿਸੇ ਪੇਸੇਤ੍ਵਾ ਤਾਪਸੇ ਨਿਕ੍ਕਡ੍ਢਾਪੇਸਿ.
ਤੇ ਬਹਿ ਠਿਤਾ ‘‘ਕਿਂ ਨੁ ਖੋ ਦਤ੍ਵਾ ਲਭਿਂਸੂ’’ਤਿ ਓਲੋਕਯਮਾਨਾ ‘‘ਇਦਂ ਨਾਮਾ’’ਤਿ ਦਿਸ੍ਵਾ ‘‘ਮਯਮ੍ਪਿ ਲਞ੍ਜਂ ਦਤ੍ਵਾ ਪੁਨ ਗਣ੍ਹਿਸ੍ਸਾਮਾ’’ਤਿ ਇਦ੍ਧਿਯਾ ਸੋਵਣ੍ਣਮਯਂ ਰਥਪਞ੍ਜਰਂ ਮਾਪੇਤ੍ਵਾ ਆਦਾਯ ਅਗਮਂਸੁ. ਰਾਜਾ ਦਿਸ੍ਵਾ ਤੁਟ੍ਠੋ – ‘‘ਕਿਂ, ਭਨ੍ਤੇ, ਕਾਤਬ੍ਬ’’ਨ੍ਤਿ?, ਆਹ. ਮਹਾਰਾਜ ਅਮ੍ਹਾਕਂ ਰੁਕ੍ਖਮੂਲੇ ਅਞ੍ਞੋ ਇਸਿਗਣੋ ਨਿਸਿਨ੍ਨੋ, ਤਂ ਨੋ ਰੁਕ੍ਖਮੂਲਂ ਦਾਪੇਹੀਤਿ. ਰਾਜਾ ਪੁਰਿਸੇ ਪੇਸੇਤ੍ਵਾ ਤੇ ਨਿਕ੍ਕਡ੍ਢਾਪੇਸਿ. ਤਾਪਸਾ ਅਞ੍ਞਮਞ੍ਞਂ ਕਲਹਂ ਕਤ੍ਵਾ, ‘‘ਅਨਨੁਚ੍ਛਵਿਕਂ ਅਮ੍ਹੇਹਿ ਕਤ’’ਨ੍ਤਿ ਵਿਪ੍ਪਟਿਸਾਰਿਨੋ ਹੁਤ੍ਵਾ ਪਬ੍ਬਤਪਾਦਮੇਵ ਅਗਮਂਸੁ. ਤਤੋ ਦੇਵਤਾ ‘‘ਅਯਂ ਰਾਜਾ ਦ੍ਵਿਨ੍ਨਂ ਇਸਿਗਣਾਨਂ ਹਤ੍ਥਤੋ ਲਞ੍ਜਂ ਗਹੇਤ੍ਵਾ ਅਞ੍ਞਮਞ੍ਞਂ ਕਲਹਂ ਕਾਰਾਪੇਸੀ’’ਤਿ ਕੁਜ੍ਝਿਤ੍ਵਾ ਮਹਾਸਮੁਦ੍ਦਂ ਉਬ੍ਬਟ੍ਟੇਤ੍ਵਾ ਤਸ੍ਸ ਰਞ੍ਞੋ ਵਿਜਿਤਂ ਯੋਜਨਸਹਸ੍ਸਮਤ੍ਤਟ੍ਠਾਨਂ ਸਮੁਦ੍ਦਮੇਵ ਅਕਂਸੂਤਿ.
‘‘ਇਸੀਨਮਨ੍ਤਰਂ ਕਤ੍ਵਾ, ਭਰੁਰਾਜਾਤਿ ਮੇ ਸੁਤਂ;
ਉਚ੍ਛਿਨ੍ਨੋ ਸਹ ਰਟ੍ਠੇਹਿ, ਸ ਰਾਜਾ ਵਿਭਵਙ੍ਗਤੋ’’ਤਿ. (ਜਾ. ੧.੨.੧੨੫) –
ਏਵਂ ਭਗਵਤਾ ਇਮਸ੍ਮਿਂ ਅਤੀਤੇ ਦਸ੍ਸਿਤੇ ਯਸ੍ਮਾ ਬੁਦ੍ਧਾਨਂ ਨਾਮ ਕਥਾ ਓਕਪ੍ਪਨਿਯਾ ਹੋਤਿ, ‘‘ਤਸ੍ਮਾ ਰਾਜਾ ਅਤ੍ਤਨੋ ਕਿਰਿਯਂ ਸਲ੍ਲਕ੍ਖੇਤ੍ਵਾ ਅਨੁਪਧਾਰੇਤ੍ਵਾ ਮਯਾ ਅਕਤ੍ਤਬ੍ਬਂ ਕਮ੍ਮਂ ਕਤ’’ਨ੍ਤਿ ‘‘ਗਚ੍ਛਥ, ਭਣੇ, ਤਿਤ੍ਥਿਯੇ ਨਿਕ੍ਕਡ੍ਢਥਾ’’ਤਿ ਨਿਕ੍ਕਡ੍ਢਾਪੇਤ੍ਵਾ ਚਿਨ੍ਤੇਸਿ – ‘‘ਮਯਾ ਕਾਰਿਤੋ ਵਿਹਾਰੋ ਨਾਮ ਨਤ੍ਥਿ, ਤਸ੍ਮਿਂਯੇਵ ਠਾਨੇ ਵਿਹਾਰਂ ਕਾਰੇਸ੍ਸਾਮੀ’’ਤਿ ਤੇਸਂ ਦਬ੍ਬਸਮ੍ਭਾਰੇਪਿ ਅਦਤ੍ਵਾ ਵਿਹਾਰਂ ਕਾਰੇਸਿ. ਤਂ ਸਨ੍ਧਾਯੇਤਂ ਵੁਤ੍ਤਂ.
੨-੩. ਬ੍ਰਾਹ੍ਮਣਸੁਤ੍ਤਾਦਿਵਣ੍ਣਨਾ
੧੦੦੮-੯. ਦੁਤਿਯੇ ਉਦਯਗਾਮਿਨਿਨ੍ਤਿ ਅਤ੍ਤਨੋ ਸਮਯੇ ਵਡ੍ਢਿਗਾਮਿਨਿਂ. ਮਰਣਂ ਆਗਮੇਯ੍ਯਾਸੀਤਿ ਮਰਣਂ ਇਚ੍ਛੇਯ੍ਯਾਸਿ, ਪਤ੍ਥੇਯ੍ਯਾਸਿ ਵਾ. ਤਤਿਯਂ ਉਤ੍ਤਾਨਮੇਵ.
੪. ਦੁਗ੍ਗਤਿਭਯਸੁਤ੍ਤਵਣ੍ਣਨਾ
੧੦੧੦. ਚਤੁਤ੍ਥੇ ਸਬ੍ਬਦੁਗ੍ਗਤਿਭਯਂ ਸਮਤਿਕ੍ਕਨ੍ਤੋਤਿ ਮਨੁਸ੍ਸਦੋਭਗ੍ਗਂ ਪਟਿਕ੍ਖਿਤ੍ਤਂ.
੫. ਦੁਗ੍ਗਤਿਵਿਨਿਪਾਤਭਯਸੁਤ੍ਤਵਣ੍ਣਨਾ
੧੦੧੧. ਪਞ੍ਚਮੇ ਸਬ੍ਬਦੁਗ੍ਗਤਿਵਿਨਿਪਾਤਭਯਂ ਸਮਤਿਕ੍ਕਨ੍ਤੋਤਿ ਮਨੁਸ੍ਸਦੋਭਗ੍ਗੇਨ ਸਦ੍ਧਿਂ ਚਤ੍ਤਾਰੋ ਅਪਾਯਾ ਪਟਿਕ੍ਖਿਤ੍ਤਾ.
੬. ਪਠਮਮਿਤ੍ਤਾਮਚ੍ਚਸੁਤ੍ਤਵਣ੍ਣਨਾ
੧੦੧੨. ਛਟ੍ਠੇ ਮਿਤ੍ਤਾਤਿ ਅਞ੍ਞਮਞ੍ਞਸ੍ਸ ਗੇਹੇ ਆਮਿਸਪਰਿਭੋਗਵਸੇਨ ਵੋਹਾਰਮਿਤ੍ਤਾ. ਅਮਚ੍ਚਾਤਿ ਆਮਨ੍ਤਨਪਟਿਮਨ੍ਤਨਇਰਿਯਾਪਥਾਦੀਸੁ ਏਕਤੋ ਪਵਤ੍ਤਕਿਚ੍ਚਾ. ਞਾਤੀਤਿ ਸਸ੍ਸੁਸਸੁਰਪਕ੍ਖਿਕਾ. ਸਾਲੋਹਿਤਾਤਿ ਸਮਾਨਲੋਹਿਤਾ ਭਾਤਿਭਗਿਨਿਮਾਤੁਲਾਦਯੋ.
੭. ਦੁਤਿਯਮਿਤ੍ਤਾਮਚ੍ਚਸੁਤ੍ਤਵਣ੍ਣਨਾ
੧੦੧੩. ਸਤ੍ਤਮੇ ਅਞ੍ਞਥਤ੍ਤਂ ਨਾਮ ਪਸਾਦਞ੍ਞਥਤ੍ਤਂ ਭਾਵਞ੍ਞਥਤ੍ਤਂ ਗਤਿਅਞ੍ਞਥਤ੍ਤਂ ਲਕ੍ਖਣਞ੍ਞਥਤ੍ਤਂ ਵਿਪਰਿਣਾਮਞ੍ਞਥਤ੍ਤਨ੍ਤਿ ਅਨੇਕਵਿਧਂ. ਤਤ੍ਥ ਮਹਾਭੂਤੇਸੁ ਭਾਵਞ੍ਞਥਤ੍ਤਂ ਅਧਿਪ੍ਪੇਤਂ. ਸੁਵਣ੍ਣਾਦਿਭਾਵੇਨ ਹਿ ਘਨਸਣ੍ਠਿਤਾਯ ਪਥਵਿਧਾਤੁਯਾ ਵਿਲੀਯਿਤ੍ਵਾ ਉਦਕਭਾਵਂ ਆਪਜ੍ਜਮਾਨਾਯ ਪੁਰਿਮਭਾਵੋ ਵਿਗਚ੍ਛਤਿ, ਭਾਵਞ੍ਞਥਤ੍ਤਂ ਪਞ੍ਞਾਯਤਿ. ਲਕ੍ਖਣਂ ਪਨ ਨ ਵਿਗਚ੍ਛਤਿ, ਕਕ੍ਖਲ਼ਲਕ੍ਖਣਾਵ ਹੋਤਿ. ਉਚ੍ਛੁਰਸਾਦਿਭਾਵੇਨ ਚ ਯੂਸਾਕਾਰਸਣ੍ਠਿਤਾਯ ਆਪੋਧਾਤੁਯਾ ਸੁਸ੍ਸਿਤ੍ਵਾ ਘਨਪਥਵਿਭਾਵਂ ਆਪਜ੍ਜਮਾਨਾਯ ਪੁਰਿਮਭਾਵੋ ਵਿਗਚ੍ਛਤਿ, ਭਾਵਞ੍ਞਥਤ੍ਤਂ ਪਞ੍ਞਾਯਤਿ. ਲਕ੍ਖਣਂ ਪਨ ਨ ਵਿਗਚ੍ਛਤਿ, ਆਬਨ੍ਧਨਲਕ੍ਖਣਾਵ ਹੋਤਿ. ਤਤ੍ਰਿਦਂ ਅਞ੍ਞਥਤ੍ਤਨ੍ਤਿ ਏਤ੍ਥ ਪਨ ਗਤਿਅਞ੍ਞਥਤ੍ਤਂ ਅਧਿਪ੍ਪੇਤਂ, ਤਞ੍ਹਿ ਅਰਿਯਸਾਵਕਸ੍ਸ ਨਤ੍ਥਿ. ਪਸਾਦਞ੍ਞਥਤ੍ਤਮ੍ਪਿ ਨਤ੍ਥਿਯੇਵ, ਇਧ ਪਨ ਪਸਾਦਫਲਂ ਪਕਾਸੇਤੁਂ ਗਤਿਅਞ੍ਞਥਤ੍ਤਮੇਵ ਦਸ੍ਸਿਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਰਾਜਕਾਰਾਮਵਗ੍ਗੋ ਦੁਤਿਯੋ.
੩. ਸਰਣਾਨਿਵਗ੍ਗੋ
੧-੨. ਪਠਮਮਹਾਨਾਮਸੁਤ੍ਤਾਦਿਵਣ੍ਣਨਾ
੧੦੧੭-੧੮. ਤਤਿਯਸ੍ਸ ਪਠਮੇ ਇਦ੍ਧਨ੍ਤਿ ਤੇਲਮਧੁਫਾਣਿਤਾਦੀਹਿ ਸਮਿਦ੍ਧਂ. ਫੀਤਨ੍ਤਿ ਹਤ੍ਥੂਪਗਸੀਸੂਪਗਗੀਵੂਪਗਾਦਿਅਲਙ੍ਕਾਰਵਸੇਨ ਸੁਪੁਪ੍ਫਿਤਂ. ਆਕਿਣ੍ਣਮਨੁਸ੍ਸਨ੍ਤਿ ਨਿਰਨ੍ਤਰਮਨੁਸ੍ਸਂ. ਸਮ੍ਬਾਧਬ੍ਯੂਹਨ੍ਤਿ ਬ੍ਯੂਹਾ ਵੁਚ੍ਚਨ੍ਤਿ ਅਵਿਨਿਬ੍ਬਿਦ੍ਧਰਚ੍ਛਾਯੋ, ਯਾ ਪਵਿਟ੍ਠਮਗ੍ਗੇਨੇਵ ਨਿਗ੍ਗਚ੍ਛਨ੍ਤਿ, ਤਾ ਸਮ੍ਬਾਧਾ ਬ੍ਯੂਹਾ ਬਹੁਕਾ ਏਤ੍ਥਾਤਿ ਸਮ੍ਬਾਧਬ੍ਯੂਹਂ. ਇਮਿਨਾਪਿ ਨਗਰਸ੍ਸ ਘਨਵਾਸਮੇਵ ਦੀਪੇਤਿ. ਭਨ੍ਤੇਨਾਤਿ ਇਤੋ ਚਿਤੋ ਚ ਪਰਿਬ੍ਭਮਨ੍ਤੇਨ ਉਦ੍ਧਤਚਾਰਿਨਾ. ਦੁਤਿਯਂ ਉਤ੍ਤਾਨਮੇਵ.
੩. ਗੋਧਸਕ੍ਕਸੁਤ੍ਤਵਣ੍ਣਨਾ
੧੦੧੯. ਤਤਿਯੇ ਭਗਵਾਵ ਏਤਂ ਜਾਨੇਯ੍ਯ ਏਤੇਹਿ ਧਮ੍ਮੇਹਿ ਸਮਨ੍ਨਾਗਤਂ ਵਾ ਅਸਮਨ੍ਨਾਗਤਂ ਵਾਤਿ ਇਦਂ ਸੋ ਸਕ੍ਕੋ ਤੀਹਿ ਧਮ੍ਮੇਹਿ ਸਮਨ੍ਨਾਗਤਸ੍ਸ ਪੁਗ੍ਗਲਸ੍ਸ ਸੋਤਾਪਨ੍ਨਭਾਵਂ, ਚਤੂਹਿ ਵਾ ਧਮ੍ਮੇਹਿ ਸਮਨ੍ਨਾਗਤਸ੍ਸ ਸੋਤਾਪਨ੍ਨਭਾਵਂ ਭਗਵਾਵ ਜਾਨਾਤੀਤਿ ਅਧਿਪ੍ਪਾਯੇਨ ਆਹ.
ਕੋਚਿਦੇਵ ਧਮ੍ਮਸਮੁਪ੍ਪਾਦੋ ਉਪ੍ਪਜ੍ਜੇਯ੍ਯਾਤਿ ਕਿਞ੍ਚਿਦੇਵ ਕਾਰਣਂ ਉਪ੍ਪਜ੍ਜੇਯ੍ਯ. ਏਕਤੋ ਅਸ੍ਸ ਭਗਵਾ, ਏਕਤੋ ਭਿਕ੍ਖੁਸਙ੍ਘੋਤਿ ਯਸ੍ਮਿਂ ਕਾਰਣੇ ਉਪ੍ਪਨ੍ਨੇ ਭਗਵਾ ਭਿਕ੍ਖੁਸਙ੍ਘੇਨ ਨਾਨਾਲਦ੍ਧਿਕੋ ਹੁਤ੍ਵਾ ਏਕਂ ਵਾਦਂ ਵਦਨ੍ਤੋ ਏਕਤੋ ਅਸ੍ਸ, ਭਿਕ੍ਖੁਸਙ੍ਘੋਪਿ ਏਕਂ ਵਦਨ੍ਤੋ ਏਕਤੋਤਿ ਅਤ੍ਥੋ. ਤੇਨੇਵਾਹਨ੍ਤਿ ਯਂ ਵਾਦਂ ਤੁਮ੍ਹੇ ਵਦੇਥ, ਤਮੇਵਾਹਂ ਗਣ੍ਹੇਯ੍ਯਨ੍ਤਿ. ਨਨੁ ਚ ਅਰਿਯਸਾਵਕਸ੍ਸ ਰਤਨਤ੍ਤਯੇ ਪਸਾਦਨਾਨਤ੍ਤਂ ਨਤ੍ਥਿ, ਅਥ ਕਸ੍ਮਾ ਏਸ ਏਵਮਾਹਾਤਿ? ਭਗਵਤੋ ਸਬ੍ਬਞ੍ਞੁਤਾਯ. ਏਵਞ੍ਹਿਸ੍ਸ ਹੋਤਿ ‘‘ਭਿਕ੍ਖੁਸਙ੍ਘੋ ਅਤ੍ਤਨੋ ਅਸਬ੍ਬਞ੍ਞੁਤਾਯ ਅਜਾਨਿਤ੍ਵਾਪਿ ਕਥੇਯ੍ਯ, ਸਤ੍ਥੁ ਪਨ ਅਞ੍ਞਾਣਂ ਨਾਮ ਨਤ੍ਥੀ’’ਤਿ. ਤਸ੍ਮਾ ਏਵਮਾਹ. ਅਞ੍ਞਤ੍ਰ ਕਲ੍ਯਾਣਾ ਅਞ੍ਞਤ੍ਰ ਕੁਸਲਾਤਿ ਕਲ੍ਯਾਣਮੇਵ ਕੁਸਲਮੇਵ ਵਦਾਮਿ, ਨ ਕਲ੍ਯਾਣਕੁਸਲਵਿਮੁਤ੍ਤਨ੍ਤਿ. ਅਪਿਚਸ੍ਸ ਅਨਵਜ੍ਜਨਦੋਸੋ ਏਸੋਤਿ.
੪. ਪਠਮਸਰਣਾਨਿਸਕ੍ਕਸੁਤ੍ਤਵਣ੍ਣਨਾ
੧੦੨੦. ਚਤੁਤ੍ਥੇ ਇਧ ਮਹਾਨਾਮ ਏਕਚ੍ਚੋ ਪੁਗ੍ਗਲੋਤਿ ਇਦਂ ਨ ਕੇਵਲਂ ਸਰਣਾਨਿ ਏਵ ਅਪਾਯਤੋ ਮੁਤ੍ਤੋ, ਇਮੇਪਿ ਪੁਗ੍ਗਲਾ ਮੁਤ੍ਤਾਤਿ ਦਸ੍ਸੇਤੁਂ ਆਰਦ੍ਧਂ. ਮਤ੍ਤਸੋ ਨਿਜ੍ਝਾਨਂ ਖਮਨ੍ਤੀਤਿ ਪਮਾਣੇਨ ਚ ਓਲੋਕਨਂ ਖਮਨ੍ਤਿ. ਇਮਿਨਾ ਧਮ੍ਮਾਨੁਸਾਰਿਮਗ੍ਗਟ੍ਠਪੁਗ੍ਗਲਂ ਦਸ੍ਸੇਤਿ. ਅਗਨ੍ਤਾ ਨਿਰਯਨ੍ਤਿ ਮਗ੍ਗਟ੍ਠਪੁਗ੍ਗਲੋ ਹਿ ਅਪਾਯਤੋ ਪਰਿਮੁਤ੍ਤੋਤਿ ਵਾ ਪਰਿਮੁਚ੍ਚਿਸ੍ਸਤੀਤਿ ਵਾ ਵਤ੍ਤੁਂ ਨ ਵਟ੍ਟਤਿ, ਪਰਿਮੁਚ੍ਚਤੀਤਿ ਪਨ ਵਤ੍ਤੁਂ ਵਟ੍ਟਤਿ. ਯਸ੍ਮਾ ਚ ਪਰਿਮੁਚ੍ਚਤਿ, ਤਸ੍ਮਾ ਗਨ੍ਤਾ ਨਾਮ ਨ ਹੋਤੀਤਿ, ‘‘ਅਗਨ੍ਤਾ’’ਤਿ ਵੁਤ੍ਤੋ, ਨ ਗਚ੍ਛਤੀਤਿ ਅਤ੍ਥੋ. ਸਦ੍ਧਾਮਤ੍ਤਂ ਪੇਮਮਤ੍ਤਨ੍ਤਿ ਇਮਿਨਾ ਸਦ੍ਧਾਨੁਸਾਰਿਮਗ੍ਗਟ੍ਠਪੁਗ੍ਗਲਂ ਦਸ੍ਸੇਤਿ. ਮਹਾਸਾਲਾਤਿ ਸਮੀਪੇ ਠਿਤੇਵ ਚਤ੍ਤਾਰੋ ਮਹਾਸਾਰਰੁਕ੍ਖੇ ਦਸ੍ਸੇਨ੍ਤੋ ਆਹ. ਮਰਣਕਾਲੇ ਸਿਕ੍ਖਂ ਸਮਾਦਿਯੀਤਿ ਮਰਣਸਮਯੇ ਤੀਸੁ ਸਿਕ੍ਖਾਸੁ ਪਰਿਪੂਰਕਾਰੀ ਅਹੋਸੀਤਿ ਦਸ੍ਸੇਤਿ.
੫. ਦੁਤਿਯਸਰਣਾਨਿਸਕ੍ਕਸੁਤ੍ਤਵਣ੍ਣਨਾ
੧੦੨੧. ਪਞ੍ਚਮੇ ਦੁਕ੍ਖੇਤ੍ਤਨ੍ਤਿ ਵਿਸਮਖੇਤ੍ਤਂ. ਦੁਬ੍ਭੂਮਨ੍ਤਿ ਊਸਰਭੂਮਿਂ ਲੋਣੂਪਹਤਂ. ਖਣ੍ਡਾਨੀਤਿ ਪਰਿਭਿਨ੍ਨਾਨਿ. ਪੂਤੀਨੀਤਿ ਉਦਕੇਨ ਤੇਮੇਤ੍ਵਾ ਪੂਤਿਭਾਵਂ ਆਪਨ੍ਨਾਨਿ. ਵਾਤਾਤਪਹਤਾਨੀਤਿ ਵਾਤਾਤਪੇਨ ਹਤਤ੍ਤਾ ਨਿਰੋਜਭਾਵਂ ਗਤਾਨਿ. ਅਸਾਰਾਦਾਨੀਤਿ ਅਨਾਦਿਨ੍ਨਸਾਰਾਨਿ ਅਗਹਿਤਸਾਰਾਨਿ. ਅਸੁਖਸਯਿਤਾਨੀਤਿ ਨ ਕੋਟ੍ਠਾਦੀਸੁ ਪਕ੍ਖਿਪਿਤ੍ਵਾ ਸੁਟ੍ਠੁ ਠਪਿਤਾਨਿ. ਸੁਖਸਯਿਤਾਨੀਤਿ ਠਪਿਤਟ੍ਠਾਨਤੋ ਚਤ੍ਤਾਰੋ ਮਾਸੇ ਅਚਲਿਤਾਨਿ.
੬. ਪਠਮਅਨਾਥਪਿਣ੍ਡਿਕਸੁਤ੍ਤਵਣ੍ਣਨਾ
੧੦੨੨. ਛਟ੍ਠੇ ਠਾਨਸੋ ਵੇਦਨਾ ਪਟਿਪ੍ਪਸ੍ਸਮ੍ਭੇਯ੍ਯਾਤਿ ਖਣੇਨ ਵੇਦਨਾ ਪਟਿਪ੍ਪਸ੍ਸਮ੍ਭੇਯ੍ਯ. ਮਿਚ੍ਛਾਞਾਣੇਨਾਤਿ ਮਿਚ੍ਛਾਪਚ੍ਚਵੇਕ੍ਖਣੇਨ ਮਿਚ੍ਛਾਵਿਮੁਤ੍ਤਿਯਾਤਿ ਅਨਿਯ੍ਯਾਨਿਕਵਿਮੁਤ੍ਤਿਯਾ. ਤਸ੍ਮਾ ਸਦ੍ਧਞ੍ਚ ਸੀਲਞ੍ਚਾਤਿ ਗਾਥਾ ਵੁਤ੍ਤਤ੍ਥਾ ਏਵ. ਯਤ੍ਰ ਹਿ ਨਾਮਾਤਿ ਯੋ ਨਾਮ.
੭. ਦੁਤਿਯਅਨਾਥਪਿਣ੍ਡਿਕਸੁਤ੍ਤਵਣ੍ਣਨਾ
੧੦੨੩. ਸਤ੍ਤਮੇ ਸਮ੍ਪਰਾਯਿਕਂ ਮਰਣਭਯਨ੍ਤਿ ਸਮ੍ਪਰਾਯਹੇਤੁਕਂ ਮਰਣਭਯਂ ਗਿਹਿਸਾਮੀਚਿਕਾਨੀਤਿ ਗਿਹੀਨਂ ਅਨੁਚ੍ਛਵਿਕਾਨਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਸਰਣਾਨਿਵਗ੍ਗੋ ਤਤਿਯੋ.
੪. ਪੁਞ੍ਞਾਭਿਸਨ੍ਦਵਗ੍ਗੋ
੧. ਪਠਮਪੁਞ੍ਞਾਭਿਸਨ੍ਦਸੁਤ੍ਤਵਣ੍ਣਨਾ
੧੦੨੭. ਚਤੁਤ੍ਥਸ੍ਸ ਪਠਮੇ ਪੁਞ੍ਞਾਭਿਸਨ੍ਦਾ ਕੁਸਲਾਭਿਸਨ੍ਦਾਤਿ ਪੁਞ੍ਞਨਦਿਯੋ ਕੁਸਲਨਦਿਯੋ. ਸੁਖਸ੍ਸਾਹਾਰਾਤਿ ਸੁਖਸ੍ਸ ਪਚ੍ਚਯਾ.
੪. ਪਠਮਦੇਵਪਦਸੁਤ੍ਤਵਣ੍ਣਨਾ
੧੦੩੦. ਚਤੁਤ੍ਥੇ ਦੇਵਪਦਾਨੀਤਿ ਦੇਵਾਨਂ ਞਾਣੇਨ, ਦੇਵਸ੍ਸ ਵਾ ਞਾਣੇਨ ਅਕ੍ਕਨ੍ਤਪਦਾਨਿ. ਵਿਸੁਦ੍ਧਿਯਾਤਿ ਵਿਸੁਜ੍ਝਨਤ੍ਥਾਯ. ਪਰਿਯੋਦਪਨਾਯਾਤਿ ਪੁਰਿਯੋਦਪਨਤ੍ਥਾਯ ਜੋਤਨਤ੍ਥਾਯ. ਇਮਸ੍ਮਿਂ ਸੁਤ੍ਤੇ ਚਤ੍ਤਾਰੋਪਿ ਫਲਟ੍ਠਪੁਗ੍ਗਲਾ ਵਿਸੁਦ੍ਧਟ੍ਠੇਨ ਦੇਵਾ ਨਾਮ ਜਾਤਾ.
੮. ਵਸ੍ਸਸੁਤ੍ਤਵਣ੍ਣਨਾ
੧੦੩੪. ਅਟ੍ਠਮੇ ਪਾਰਂਗਨ੍ਤ੍ਵਾਤਿ ਪਾਰਂ ਵੁਚ੍ਚਤਿ ਨਿਬ੍ਬਾਨਂ, ਤਂ ਪਤ੍ਵਾਤਿ ਅਤ੍ਥੋ. ਆਸਵਾਨਂ ਖਯਾਯ ਸਂਵਤ੍ਤਨ੍ਤੀਤਿ ਨ ਪਠਮਂ ਨਿਬ੍ਬਾਨਂ ਗਨ੍ਤ੍ਵਾ ਪਚ੍ਛਾ ਸਂਵਤ੍ਤਨ੍ਤਿ, ਗਚ੍ਛਮਾਨਾ ਏਵ ਸਂਵਤ੍ਤਨ੍ਤਿ. ਦੇਸਨਾ ਪਨ ਏਵਂ ਕਤਾ.
੧੦. ਨਨ੍ਦਿਯਸਕ੍ਕਸੁਤ੍ਤਵਣ੍ਣਨਾ
੧੦੩੬. ਦਸਮੇ ਦਿਵਾ ਪਵਿਵੇਕਾਯ ਰਤ੍ਤਿਂ ਪਟਿਸਲ੍ਲਾਨਾਯਾਤਿ ਦਿਵਾ ਪਵਿਵੇਕਤ੍ਥਾਯ ਰਤ੍ਤਿਂ ਪਟਿਸਲ੍ਲਾਨਤ੍ਥਾਯ. ਧਮ੍ਮਾ ਨ ਪਾਤੁਭਵਨ੍ਤੀਤਿ ਸਮਥਵਿਪਸ੍ਸਨਾ ਧਮ੍ਮਾ ਨ ਉਪ੍ਪਜ੍ਜਨ੍ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਪੁਞ੍ਞਾਭਿਸਨ੍ਦਵਗ੍ਗੋ ਚਤੁਤ੍ਥੋ.
੫. ਸਗਾਥਕਪੁਞ੍ਞਾਭਿਸਨ੍ਦਵਗ੍ਗੋ
੧. ਪਠਮਅਭਿਅਸਨ੍ਦਸੁਤ੍ਤਵਣ੍ਣਨਾ
੧੦੩੭. ਪਞ੍ਚਮਸ੍ਸ ਪਠਮੇ ਅਸਙ੍ਖ੍ਯੇਯ੍ਯੋਤਿ ਆਲ਼੍ਹਕਗਣਨਾਯ ਅਸਙ੍ਖ੍ਯੇਯ੍ਯੋ, ਯੋਜਨਵਸੇਨ ਪਨਸ੍ਸ ਸਙ੍ਖ੍ਯਾ ਅਤ੍ਥਿ. ਬਹੁਭੇਰਵਨ੍ਤਿ ਸਵਿਞ੍ਞਾਣਕਅਵਿਞ੍ਞਾਣਕਾਨਂ ਭੇਰਵਾਰਮ੍ਮਣਾਨਂ ਵਸੇਨ ਬਹੁਭੇਰਵਂ. ਪੁਥੂਤਿ ਬਹੁ. ਸਵਨ੍ਤੀਤਿ ਸਨ੍ਦਮਾਨਾ. ਉਪਯਨ੍ਤੀਤਿ ਉਪਗਚ੍ਛਨ੍ਤਿ.
੨. ਦੁਤਿਯਅਭਿਸਨ੍ਦਸੁਤ੍ਤਵਣ੍ਣਨਾ
੧੦੩੮. ਦੁਤਿਯੇ ਯਤ੍ਥਿਮਾ ਮਹਾਨਦਿਯੋ ਸਂਸਨ੍ਦਨ੍ਤਿ ਸਮੇਨ੍ਤੀਤਿ ਯਸ੍ਮਿਂ ਸਂਭਜ੍ਜੇ ਏਤਾ ਮਹਾਨਦਿਯੋ ਏਕੀਭਵਨ੍ਤਿ, ਨਿਰਨ੍ਤਰਾ ਭਵਨ੍ਤੀਤਿ ਅਤ੍ਥੋ.
੩. ਤਤਿਯਅਭਿਸਨ੍ਦਸੁਤ੍ਤਵਣ੍ਣਨਾ
੧੦੩੯. ਤਤਿਯੇ ਪੁਞ੍ਞਕਾਮੋਤਿ ਪੁਞ੍ਞਤ੍ਥਿਕੋ. ਕੁਸਲੇ ਪਤਿਟ੍ਠਿਤੋਤਿ ਮਗ੍ਗਕੁਸਲੇ ਪਤਿਟ੍ਠਿਤੋ. ਭਾਵੇਤਿ ਮਗ੍ਗਂ ਅਮਤਸ੍ਸ ਪਤ੍ਤਿਯਾਤਿ ਨਿਬ੍ਬਾਨਸ੍ਸ ਪਾਪੁਣਨਤ੍ਥਂ ਅਰਹਤ੍ਤਮਗ੍ਗਂ ਭਾਵੇਤਿ. ਧਮ੍ਮਸਾਰਾਧਿਗਮੋਤਿ ਧਮ੍ਮਸਾਰੋ ਵੁਚ੍ਚਤਿ ਅਰਿਯਫਲਂ ਧਮ੍ਮਸਾਰੋ, ਅਧਿਗਮੋ ਅਸ੍ਸਾਤਿ ਧਮ੍ਮਸਾਰਾਧਿਗਮੋ, ਅਧਿਗਤਫਲੋਤਿ ਅਤ੍ਥੋ. ਖਯੇ ਰਤੋਤਿ ਕਿਲੇਸਕ੍ਖਯੇ ਰਤੋ.
੪. ਪਠਮਮਹਦ੍ਧਨਸੁਤ੍ਤਵਣ੍ਣਨਾ
੧੦੪੦. ਚਤੁਤ੍ਥੇ ਅਡ੍ਢੋ ਮਹਦ੍ਧਨੋਤਿ ਸਤ੍ਤਵਿਧੇਨ ਅਰਿਯਧਨੇਨ ਅਡ੍ਢੋ ਚੇਵ ਮਹਦ੍ਧਨੋ ਚ. ਤੇਨੇਵ ਭੋਗੇਨ ਮਹਾਭੋਗੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਸਗਾਥਕਪੁਞ੍ਞਾਭਿਸਨ੍ਦਵਗ੍ਗੋ ਪਞ੍ਚਮੋ.
੬. ਸਪ੍ਪਞ੍ਞਵਗ੍ਗੋ
੨. ਵਸ੍ਸਂਵੁਤ੍ਤਸੁਤ੍ਤਵਣ੍ਣਨਾ
੧੦੪੮. ਛਟ੍ਠਸ੍ਸ ਦੁਤਿਯੇ ਅਯਮਧਿਪ੍ਪਾਯੋ – ਸੋਤਾਪਨ੍ਨੋ ਭਿਕ੍ਖੁ ਏਤ੍ਤਕੇਨ ਵੋਸਾਨਂ ਅਨਾਪਜ੍ਜਿਤ੍ਵਾ ਤਾਨੇਵ ਇਨ੍ਦ੍ਰਿਯਬਲਬੋਜ੍ਝਙ੍ਗਾਨਿ ਸਮੋਧਾਨੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਸਕਦਾਗਾਮਿਮਗ੍ਗਂ ਪਾਪੁਣਿਸ੍ਸਤਿ, ਸਕਦਾਗਾਮੀ ਅਨਾਗਾਮਿਮਗ੍ਗਂ, ਅਨਾਗਾਮੀ ਅਰਹਤ੍ਤਮਗ੍ਗਨ੍ਤਿ ਇਮਮਤ੍ਥਂ ਸਨ੍ਧਾਯ ਭਗਵਤਾ ਇਮਸ੍ਮਿਂ ਸੁਤ੍ਤੇ ਸਾਸਨੇ ਤਨ੍ਤਿ ਪਵੇਣੀ ਕਥਿਤਾਤਿ.
੩. ਧਮ੍ਮਦਿਨ੍ਨਸੁਤ੍ਤਵਣ੍ਣਨਾ
੧੦੪੯. ਤਤਿਯੇ ਧਮ੍ਮਦਿਨ੍ਨੋਤਿ ਸਤ੍ਤਸੁ ਜਨੇਸੁ ਏਕੋ. ਬੁਦ੍ਧਕਾਲਸ੍ਮਿਞ੍ਹਿ ਧਮ੍ਮਦਿਨ੍ਨੋ ਉਪਾਸਕੋ, ਵਿਸਾਖੋ ਉਪਾਸਕੋ, ਉਗ੍ਗੋ ਗਹਪਤਿ, ਚਿਤ੍ਤੋ ਗਹਪਤਿ, ਹਤ੍ਥਕੋ ਆਲ਼ਵਕੋ, ਚੂਲ਼ਅਨਾਥਪਿਣ੍ਡਿਕੋ, ਮਹਾਅਨਾਥਪਿਣ੍ਡਿਕੋਤਿ ਇਮੇ ਸਤ੍ਤ ਜਨਾ ਪਞ੍ਚਸਤਉਪਾਸਕਪਰਿਵਾਰਾ ਅਹੇਸੁਂ. ਏਤੇਸੁ ਏਸ ਅਞ੍ਞਤਰੋ.
ਗਮ੍ਭੀਰਾਤਿ ਧਮ੍ਮਗਮ੍ਭੀਰਾ ਸਲ੍ਲਸੁਤ੍ਤਾਦਯੋ. ਗਮ੍ਭੀਰਤ੍ਥਾਤਿ ਅਤ੍ਥਗਮ੍ਭੀਰਾ ਚੇਤਨਾਸੁਤ੍ਤਨ੍ਤਾਦਯੋ. ਲੋਕੁਤ੍ਤਰਾਤਿ ਲੋਕੁਤ੍ਤਰਤ੍ਥਦੀਪਕਾ ਅਸਙ੍ਖਤਸਂਯੁਤ੍ਤਾਦਯੋ. ਸੁਞ੍ਞਤਪ੍ਪਟਿਸਂਯੁਤ੍ਤਾਤਿ ਸਤ੍ਤਸੁਞ੍ਞਤਾਦੀਪਕਾ ਖਜ੍ਜਨਿਕਸੁਤ੍ਤਨ੍ਤਾਦਯੋ. ਉਪਸਮ੍ਪਜ੍ਜ ਵਿਹਰਿਸ੍ਸਾਮਾਤਿ ਪਟਿਲਭਿਤ੍ਵਾ ਵਿਹਰਿਸ੍ਸਾਮ. ਏਵਞ੍ਹਿ ਵੋ, ਧਮ੍ਮਦਿਨ੍ਨ, ਸਿਕ੍ਖਿਤਬ੍ਬਨ੍ਤਿ ਏਵਂ ਤੁਮ੍ਹੇਹਿ ਚਨ੍ਦੋਪਮਪਟਿਪਦਂ ਰਥਵਿਨੀਤਪਟਿਪਦਂ ਮੋਨੇਯ੍ਯਪਟਿਪਦਂ ਮਹਾਅਰਿਯਵਂਸਪਟਿਪਦਂ ਪੂਰੇਨ੍ਤੇਹਿ ਸਿਕ੍ਖਿਤਬ੍ਬਂ. ਇਤਿ ਸਤ੍ਥਾ ਇਮੇਸਂ ਉਪਾਸਕਾਨਂ ਅਸਯ੍ਹਭਾਰਂ ਆਰੋਪੇਸਿ. ਕਸ੍ਮਾ? ਏਤੇ ਕਿਰ ਨ ਅਤ੍ਤਨੋ ਭੂਮਿਯਂ ਠਤ੍ਵਾ ਓਵਾਦਂ ਯਾਚਿਂਸੁ, ਅਵਿਸੇਸੇਨ ਪਨ ਸਬ੍ਬਭਾਰਂ ਉਕ੍ਖਿਪਿਤੁਂ ਸਮਤ੍ਥਾ ਵਿਯ ‘‘ਓਵਦਤੁ ਨੋ, ਭਨ੍ਤੇ, ਭਗਵਾ’’ਤਿ ਯਾਚਿਂਸੁ. ਤੇਨ ਤੇਸਂ ਸਤ੍ਥਾ ਅਸਯ੍ਹਭਾਰਂ ਆਰੋਪੇਨ੍ਤੋ ਏਵਮਾਹ. ਨ ਖੋ ਨੇਤਨ੍ਤਿ ਨ ਖੋ ਏਤਂ. ਨਕਾਰੋ ਪਨੇਤ੍ਥ ਬ੍ਯਞ੍ਜਨਸਨ੍ਧਿਮਤ੍ਤਮੇਵਾਤਿ ਵੇਦਿਤਬ੍ਬੋ. ਤਸ੍ਮਾਤਿ ਯਸ੍ਮਾ ਇਦਾਨਿ ਅਤ੍ਤਨੋ ਭੂਮਿਯਂ ਠਤ੍ਵਾ ਓਵਾਦਂ ਯਾਚਥ, ਤਸ੍ਮਾ.
੪. ਗਿਲਾਨਸੁਤ੍ਤਵਣ੍ਣਨਾ
੧੦੫੦. ਚਤੁਤ੍ਥੇ ਨ ਖੋ ਪਨੇਤਨ੍ਤਿ ਨ ਖੋ ਅਮ੍ਹੇਹਿ ਏਤਂ. ਸਪ੍ਪਞ੍ਞੋ ਉਪਾਸਕੋਤਿ ਸੋਤਾਪਨ੍ਨੋ ਅਧਿਪ੍ਪੇਤੋ. ਅਸ੍ਸਾਸਨੀਯੇਹਿ ਧਮ੍ਮੇਹੀਤਿ ਅਸ੍ਸਾਸਕਰੇਹਿ ਧਮ੍ਮੇਹਿ. ਅਸ੍ਸਾਸਤਾਯਸ੍ਮਾਤਿ ਅਸ੍ਸਾਸਤੁ ਆਯਸ੍ਮਾ. ਮਾਰਿਸੋਤਿ ਮਰਣਪਟਿਬਦ੍ਧੋ. ਮਰਣਧਮ੍ਮੋਤਿ ਮਰਣਸਭਾਵੋ. ਅਧਿਮੋਚੇਹੀਤਿ ਠਪੇਹਿ. ਅਧਿਮੋਚਿਤਨ੍ਤਿ ਠਪਿਤਂ. ਏਵਂ ਵਿਮੁਤ੍ਤਚਿਤ੍ਤਸ੍ਸਾਤਿ ਏਵਂ ਅਰਹਤ੍ਤਫਲਵਿਮੁਤ੍ਤਿਯਾ ਵਿਮੁਤ੍ਤਚਿਤ੍ਤਸ੍ਸ. ਯਦਿਦਂ ਵਿਮੁਤ੍ਤਿਯਾ ਵਿਮੁਤ੍ਤਨ੍ਤਿ ਯਂ ਇਦਂ ਵਿਮੁਤ੍ਤਿਂ ਆਰਬ੍ਭ ਵਿਮੁਤ੍ਤਿਯਾ ਨਾਨਾਕਰਣਂ ਵਤ੍ਤਬ੍ਬਂ ਸਿਯਾ, ਨ ਤਂ ਵਦਾਮਿ. ਭਿਕ੍ਖੁਸਙ੍ਘਸ੍ਸ ਹਿ ਚੇਤਿਯਙ੍ਗਣਬੋਧਿਯਙ੍ਗਣਵਤ੍ਤੇਸੁ ਚੇਵ ਅਸੀਤਿਕ੍ਖਨ੍ਧਕਵਤ੍ਤੇਸੁ ਚਾਤਿ ਆਗਮਨੀਯਗੁਣੇਸੁ ਪਮਾਣਂ ਨਾਮ ਨਤ੍ਥਿ, ਪਟਿਵਿਦ੍ਧੇ ਪਨ ਮਗ੍ਗੇ ਵਾ ਫਲੇ ਵਾ ਉਪਾਸਕਾਨਞ੍ਚ ਭਿਕ੍ਖੂਨਞ੍ਚ ਨਾਨਾਕਰਣਂ ਨਤ੍ਥਿ.
੯. ਪਞ੍ਞਾਪਟਿਲਾਭਸੁਤ੍ਤਵਣ੍ਣਨਾ
੧੦੫੫. ਨਵਮੇ ਪਞ੍ਞਾਪਟਿਲਾਭਾਯ ਸਂਵਤ੍ਤਨ੍ਤੀਤਿ ਏਤ੍ਥ ਸਤ੍ਤ ਸੇਕ੍ਖਾ ਪਞ੍ਞਂ ਪਟਿਲਭਨ੍ਤਿ ਨਾਮ, ਖੀਣਾਸਵੋ ਪਟਿਲਦ੍ਧਪਞ੍ਞੋ ਨਾਮਾਤਿ ਵੇਦਿਤਬ੍ਬੋ. ਪਰਤੋ ਪਞ੍ਞਾਬੁਦ੍ਧਿਯਾਤਿਆਦੀਸੁਪਿ ਏਸੇਵ ਨਯੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਸਪ੍ਪਞ੍ਞਵਗ੍ਗੋ ਛਟ੍ਠੋ.
੭. ਮਹਾਪਞ੍ਞਵਗ੍ਗੋ
੧. ਮਹਾਪਞ੍ਞਾਸੁਤ੍ਤਵਣ੍ਣਨਾ
੧੦੫੮. ਸਤ੍ਤਮੇ ਮਹਾਪਞ੍ਞਤਾਯ ਸਂਵਤ੍ਤਨ੍ਤੀਤਿਆਦੀਸੁ ‘‘ਮਹਨ੍ਤੇ ਅਤ੍ਥੇ ਪਰਿਗ੍ਗਣ੍ਹਾਤੀਤਿ ਮਹਾਪਞ੍ਞਾ’’ਤਿਆਦਿਨਾ ਪਟਿਸਮ੍ਭਿਦਾਯਂ (ਪਟਿ. ਮ. ੨.੪) ਵੁਤ੍ਤਨਯੇਨੇਵ ਸਬ੍ਬਤ੍ਥ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਸੋਤਾਪਤ੍ਤਿਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.