੧੨. ਸਚ੍ਚਸਂਯੁਤ੍ਤਂ
੧. ਸਮਾਧਿਵਗ੍ਗੋ
੧. ਸਮਾਧਿਸੁਤ੍ਤਵਣ੍ਣਨਾ
੧੦੭੧. ਸਚ੍ਚਸਂਯੁਤ੍ਤਸ੍ਸ ਪਠਮੇ ਸਮਾਧਿਂ, ਭਿਕ੍ਖਵੇਤਿ ਤੇ ਕਿਰ ਭਿਕ੍ਖੂ ਚਿਤ੍ਤੇਕਗ੍ਗਤਾਯ ਪਰਿਹਾਯਨ੍ਤਿ, ਅਥ ਨੇਸਂ ਸਤ੍ਥਾ – ‘‘ਏਵਮੇਤੇ ਚਿਤ੍ਤੇਕਗ੍ਗਤਂ ਲਭਿਤ੍ਵਾ, ਕਮ੍ਮਟ੍ਠਾਨਂ ਵਡ੍ਢੇਤ੍ਵਾ, ਵਿਸੇਸਂ ਪਾਪੁਣਿਸ੍ਸਨ੍ਤੀ’’ਤਿ ਇਮਂ ਦੇਸਨਂ ਆਰਭਿ. ਤਸ੍ਮਾਤਿਹ, ਭਿਕ੍ਖਵੇ, ‘‘ਇਦਂ ਦੁਕ੍ਖ’’ਨ੍ਤਿ ਯੋਗੋ ਕਰਣੀਯੋਤਿ ਏਤ੍ਥ ਯਥਾਭੂਤਾਦਿਵਸੇਨ ਕਾਰਣਚ੍ਛੇਦੋ ਵੇਦਿਤਬ੍ਬੋ. ਇਦਞ੍ਹਿ ਵੁਤ੍ਤਂ ਹੋਤਿ – ਭਿਕ੍ਖਵੇ, ਯਸ੍ਮਾ ਸਮਾਹਿਤੋ ਭਿਕ੍ਖੁ ਚਤ੍ਤਾਰਿ ਸਚ੍ਚਾਨਿ ਯਥਾਭੂਤਂ ਪਜਾਨਾਤਿ, ਤਸ੍ਮਾ ਤੁਮ੍ਹੇਹਿ ਚ ਸਮਾਹਿਤੇਹਿ ਚਤੁਨ੍ਨਂ ਸਚ੍ਚਾਨਂ ਯਥਾਭੂਤਂ ਪਜਾਨਨਤ੍ਥਾਯ ‘‘ਇਦਂ ਦੁਕ੍ਖ’’ਨ੍ਤਿ ਯੋਗੋ ਕਰਣੀਯੋ. ਤਥਾ ਯਸ੍ਮਾ ਚਤ੍ਤਾਰਿ ਸਚ੍ਚਾਨਿ ਤਥਾਗਤਸ੍ਸੇਵ ਪਾਤੁਭਾਵਾ ਪਾਕਟਾਨਿ ਹੋਨ੍ਤਿ, ਯਸ੍ਮਾ ਚ ਤਥਾਗਤੇਨ ਸੁਵਿਭਤ੍ਤਾਨਿ, ਯਸ੍ਮਾ ਚ ਤੇਸੁ ਅਪਰਿਮਾਣਾ ਵਣ੍ਣਾ ਅਪਰਿਮਾਣਾਨਿ ਪਦਬ੍ਯਞ੍ਜਨਾਨਿ, ਯਸ੍ਮਾ ਚ ਤੇਸਂ ਅਪ੍ਪਟਿਵਿਦ੍ਧਤ੍ਤਾ ਵਟ੍ਟਂ ਵਡ੍ਢਤਿ, ਤੇਸਂ ਪਟਿਵਿਦ੍ਧਕਾਲਤੋ ਪਟ੍ਠਾਯ ਨ ਵਡ੍ਢਤਿ, ਤਸ੍ਮਾ ‘‘ਏਵਂ ਨੋ ਵਟ੍ਟਂ ਨ ਵਡ੍ਢਿਸ੍ਸਤੀ’’ਤਿ ਤੁਮ੍ਹੇਹਿ ‘‘ਇਦਂ ਦੁਕ੍ਖ’’ਨ੍ਤਿ ਯੋਗੋ ਕਰਣੀਯੋ.
੨. ਪਟਿਸਲ੍ਲਾਨਸੁਤ੍ਤਵਣ੍ਣਨਾ
੧੦੭੨. ਦੁਤਿਯਂ ਕਾਯਵਿਵੇਕਵਿਕਲਾਨਂ ਕਾਯਵਿਵੇਕਪਟਿਲਾਭਤ੍ਥਾਯ ਵੁਤ੍ਤਂ.
੩. ਪਠਮਕੁਲਪੁਤ੍ਤਸੁਤ੍ਤਾਦਿਵਣ੍ਣਨਾ
੧੦੭੩-੭੫. ਤਤਿਯੇ ਅਭਿਸਮਯਾਯਾਤਿ ਅਭਿਸਮਯਤ੍ਥਾਯ. ਸਮਣਬ੍ਰਾਹ੍ਮਣਾਤਿ ਚੇਤ੍ਥ ਸਾਸਨਾਵਚਰਾ ਅਧਿਪ੍ਪੇਤਾ. ਤਥਾ ਚਤੁਤ੍ਥਪਞ੍ਚਮੇਸੁ, ਤੇਨ ਤੇਨ ਅਭਿਲਾਪੇਨ ਬੁਜ੍ਝਨਕਾਨਂ ਪਨ ਅਜ੍ਝਾਸਯੇਨੇਤਾਨਿ ਵੁਤ੍ਤਾਨਿ.
੬. ਦੁਤਿਯਸਮਣਬ੍ਰਾਹ੍ਮਣਸੁਤ੍ਤਵਣ੍ਣਨਾ
੧੦੭੬. ਛਟ੍ਠੇ ਅਭਿਸਮ੍ਬੁਦ੍ਧਂ ਪਕਾਸੇਸੁਨ੍ਤਿ ਅਭਿਸਮ੍ਬੁਦ੍ਧੋ ਅਹਨ੍ਤਿ ਏਵਂ ਅਤ੍ਤਾਨਂ ਅਭਿਸਮ੍ਬੁਦ੍ਧਂ ਪਕਾਸਯਿਂਸੁ. ਇਮਸ੍ਮਿਞ੍ਹਿ ਸੁਤ੍ਤੇ ਸਬ੍ਬਞ੍ਞੁਬੁਦ੍ਧਾ ਚ ਸਮਣਗਹਣੇਨ ਗਹਿਤਾ.
੧੦. ਤਿਰਚ੍ਛਾਨਕਥਾਸੁਤ੍ਤਵਣ੍ਣਨਾ
੧੦੮੦. ਦਸਮੇ ਅਨੇਕਵਿਹਿਤਨ੍ਤਿ ਅਨੇਕਵਿਧਂ. ਤਿਰਚ੍ਛਾਨਕਥਨ੍ਤਿ ਅਨਿਯ੍ਯਾਨਿਕਤ੍ਤਾ ਸਗ੍ਗਮੋਕ੍ਖਮਗ੍ਗਾਨਂ ਤਿਰਚ੍ਛਾਨਭੂਤਂ ਕਥਂ. ਰਾਜਕਥਨ੍ਤਿਆਦੀਸੁ ਰਾਜਾਨਂ ਆਰਬ੍ਭ ‘‘ਮਹਾਸਮ੍ਮਤੋ ਮਨ੍ਧਾਤਾ ਧਮ੍ਮਾਸੋਕੋ ਏਵਂ ਮਹਾਨੁਭਾਵੋ’’ਤਿਆਦਿਨਾ ਨਯੇਨ ਪਵਤ੍ਤਕਥਾ ਰਾਜਕਥਾ. ਏਸ ਨਯੋ ਚੋਰਕਥਾਦੀਸੁ. ਤੇਸੁ ‘‘ਅਸੁਕੋ ਰਾਜਾ ਅਭਿਰੂਪੋ ਦਸ੍ਸਨੀਯੋ’’ਤਿਆਦਿਨਾ ਨਯੇਨ ਗੇਹਸਿਤਕਥਾਵ ਤਿਰਚ੍ਛਾਨਕਥਾ ਹੋਤਿ. ‘‘ਸੋਪਿ ਨਾਮ ਏਵਂ ਮਹਾਨੁਭਾਵੋ ਖਯਂ ਗਤੋ’’ਤਿ ਏਵਂ ਪਵਤ੍ਤਾ ਪਨ ਕਮ੍ਮਟ੍ਠਾਨਭਾਵੇ ਤਿਟ੍ਠਤਿ. ਚੋਰੇਸੁਪਿ ‘‘ਮੂਲਦੇਵੋ ਏਵਂ ਮਹਾਨੁਭਾਵੋ ਮੇਘਮਾਲੋ ਏਵਂ ਮਹਾਨੁਭਾਵੋ’’ਤਿ ਤੇਸਂ ਕਮ੍ਮਂ ਪਟਿਚ੍ਚ ‘‘ਅਹੋ ਸੂਰਾ’’ਤਿ ਗੇਹਸਿਤਕਥਾਵ ਤਿਰਚ੍ਛਾਨਕਥਾ. ਯੁਦ੍ਧੇਪਿ ਭਾਰਤਯੁਦ੍ਧਾਦੀਸੁ ‘‘ਅਸੁਕੇਨ ਅਸੁਕੋ ਏਵਂ ਮਾਰਿਤੋ ਏਵਂ ਵਿਦ੍ਧੋ’’ਤਿ ਕਾਮਸ੍ਸਾਦਵਸੇਨੇਵ ਕਥਾ ਤਿਰਚ੍ਛਾਨਕਥਾ, ‘‘ਤੇਪਿ ਨਾਮ ਖਯਂ ਗਤਾ’’ਤਿ ਏਵਂ ਪਵਤ੍ਤਾ ਪਨ ਸਬ੍ਬਤ੍ਥ ਕਮ੍ਮਟ੍ਠਾਨਮੇਵ ਹੋਤਿ. ਅਪਿਚ ਅਨ੍ਨਾਦੀਸੁ ‘‘ਏਵਂ ਵਣ੍ਣਵਨ੍ਤਂ ਗਨ੍ਧਵਨ੍ਤਂ ਰਸਵਨ੍ਤਂ ਫਸ੍ਸਸਮ੍ਪਨ੍ਨਂ ਖਾਦਿਮ੍ਹ ਭੁਞ੍ਜਿਮ੍ਹ ਪਿਵਿਮ੍ਹ ਪਰਿਭੁਞ੍ਜਿਮ੍ਹਾ’’ਤਿ ਕਾਮਸ੍ਸਾਦਵਸੇਨ ਕਥੇਤੁਂ ਨ ਵਟ੍ਟਤਿ. ਸਾਤ੍ਥਕਂ ਪਨ ਕਤ੍ਵਾ ‘‘ਪੁਬ੍ਬੇ ਏਵਂ ਵਣ੍ਣਾਦਿਸਮ੍ਪਨ੍ਨਂ ਅਨ੍ਨਂ ਪਾਨਂ ਵਤ੍ਥਂ ਸਯਨਂ ਮਾਲਂ ਗਨ੍ਧਂ ਵਿਲੇਪਨਂ ਸੀਲਵਨ੍ਤਾਨਂ ਅਦਮ੍ਹ, ਚੇਤਿਯੇ ਪੂਜਂ ਅਕਰਿਮ੍ਹਾ’’ਤਿ ਕਥੇਤੁਂ ਵਟ੍ਟਤਿ.
ਞਾਤਿਕਥਾਦੀਸੁਪਿ ‘‘ਅਮ੍ਹਾਕਂ ਞਾਤਕਾ ਸੂਰਾ ਸਮਤ੍ਥਾ’’ਤਿ ਵਾ, ‘‘ਪੁਬ੍ਬੇ ਮਯਂ ਏਵਂ ਵਿਚਿਤ੍ਰੇਹਿ ਯਾਨੇਹਿ ਵਿਚਰਿਮ੍ਹਾ’’ਤਿ ਵਾ ਅਸ੍ਸਾਦਵਸੇਨ ਵਤ੍ਤੁਂ ਨ ਵਟ੍ਟਤਿ. ਸਾਤ੍ਥਕਂ ਪਨ ਕਤ੍ਵਾ ‘‘ਤੇਪਿ ਨੋ ਞਾਤਕਾ ਖਯਂ ਗਤਾ’’ਤਿ ਵਾ, ‘‘ਪੁਬ੍ਬੇ ਮਯਂ ਏਵਰੂਪਾ ਉਪਾਹਨਾ ਸਙ੍ਘਸ੍ਸ ਅਦਮ੍ਹਾ’’ਤਿ ਵਾ ਕਥੇਤਬ੍ਬਾ. ਗਾਮਕਥਾਦੀਸੁਪਿ ਸੁਨਿਵਿਟ੍ਠਦੁਨ੍ਨਿਵਿਟ੍ਠਸੁਭਿਕ੍ਖਦੁਬ੍ਭਿਕ੍ਖਾਦਿਵਸੇਨ ਵਾ ‘‘ਅਸੁਕਗਾਮਵਾਸਿਨੋ ਸੂਰਾ ਸਮਤ੍ਥਾ’’ਤਿ ਵਾ ਏਵਂ ਅਸ੍ਸਾਦਵਸੇਨ ਵਤ੍ਤੁਂ ਨ ਵਟ੍ਟਤਿ, ਸਾਤ੍ਥਕਂ ਪਨ ਕਤ੍ਵਾ ‘‘ਸਦ੍ਧਾ ਪਸਨ੍ਨਾ’’ਤਿ ਵਾ, ‘‘ਖਯਂ ਗਤਾ’’ਤਿ ਵਾ ਵਤ੍ਤੁਂ ਵਟ੍ਟਤਿ. ਨਿਗਮਨਗਰਜਨਪਦਕਥਾਸੁਪਿ ਏਸੇਵ ਨਯੋ.
ਇਤ੍ਥਿਕਥਾਪਿ ਵਣ੍ਣਸਣ੍ਠਾਨਾਦੀਨਿ ਪਟਿਚ੍ਚ ਅਸ੍ਸਾਦਵਸੇਨ ਵਤ੍ਤੁਂ ਨ ਵਟ੍ਟਤਿ, ‘‘ਸਦ੍ਧਾ ਪਸਨ੍ਨਾ ਖਯਂ ਗਤਾ’’ਤਿ ਏਵਮੇਵ ਵਟ੍ਟਤਿ. ਸੂਰਕਥਾਪਿ ‘‘ਨਨ੍ਦਿਮਿਤ੍ਤੋ ਨਾਮ ਯੋਧੋ ਸੂਰੋ ਅਹੋਸੀ’’ਤਿ ਅਸ੍ਸਾਦਵਸੇਨ ਵਤ੍ਤੁਂ ਨ ਵਟ੍ਟਤਿ, ‘‘ਸਦ੍ਧੋ ਪਸਨ੍ਨੋ ਅਹੋਸਿ, ਖਯਂ ਗਤੋ’’ਤਿ ਏਵਮੇਵ ਵਟ੍ਟਤਿ. ਸੁਰਾਕਥਾਤਿਪਿ ਪਾਠੋ. ਸਾਪਿ ਚੇਸਾ ਸੁਰਾਕਥਾ ‘‘ਏਵਰੂਪਾ ਨਾਮ ਸੁਰਾ ਪੀਤਾ ਰਤਿਜਨਨੀ ਹੋਤੀ’’ਤਿ ਅਸ੍ਸਾਦਵਸੇਨੇਵ ਨ ਵਟ੍ਟਤਿ, ਆਦੀਨਵਵਸੇਨ ਪਨ ‘‘ਉਮ੍ਮਤ੍ਤਕਸਂਵਤ੍ਤਨਿਕਾ’’ਤਿਆਦਿਨਾ ਨਯੇਨ ਵਟ੍ਟਤਿ. ਵਿਸਿਖਾਕਥਾਪਿ ‘‘ਅਸੁਕਵਿਸਿਖਾ ਸੁਨਿਵਿਟ੍ਠਾ ਦੁਨ੍ਨਿਵਿਟ੍ਠਾ’’ਤਿ ਵਾ, ‘‘ਅਸੁਕਵਿਸਿਖਾਯ ਵਾਸਿਨੋ ਸੂਰਾ ਸਮਤ੍ਥਾ’’ਤਿ ਵਾ ਅਸ੍ਸਾਦਵਸੇਨੇਵ ਵਤ੍ਤੁਂ ਨ ਵਟ੍ਟਤਿ, ‘‘ਸਦ੍ਧਾ ਪਸਨ੍ਨਾ ਖਯਂ ਗਤਾ’’ਤਿ ਏਚ੍ਚੇਵਂ ਵਟ੍ਟਤਿ. ਕੁਮ੍ਭਟ੍ਠਾਨਕਥਾਤਿ ਉਦਕਤਿਤ੍ਥਕਥਾ ਵੁਚ੍ਚਤਿ, ਕੁਮ੍ਭਦਾਸਿਕਥਾ ਵਾ. ਸਾਪਿ ‘‘ਪਾਸਾਦਿਕਾ ਨਚ੍ਚਿਤੁਂ ਗਾਯਿਤੁਂ ਛੇਕਾ’’ਤਿ ਅਸ੍ਸਾਦਵਸੇਨ ਨ ਵਟ੍ਟਤਿ, ‘‘ਸਦ੍ਧਾ ਪਸਨ੍ਨਾ’’ਤਿਆਦਿਨਾ ਨਯੇਨੇਵ ਵਟ੍ਟਤਿ.
ਪੁਬ੍ਬਪੇਤਕਥਾਤਿ ਅਤੀਤਞਾਤਿਕਥਾ. ਤਤ੍ਥ ਵਤ੍ਤਮਾਨਞਾਤਿਕਥਾਸਦਿਸੋਵ ਵਿਨਿਚ੍ਛਯੋ. ਨਾਨਤ੍ਤਕਥਾਤਿ ਪੁਰਿਮਪਚ੍ਛਿਮਕਥਾਹਿ ਵਿਮੁਤ੍ਤਾ ਅਵਸੇਸਾ ਨਾਨਾਸਭਾਵਾ ਨਿਰਤ੍ਥਕਕਥਾ. ਲੋਕਕ੍ਖਾਯਿਕਾਤਿ ‘‘ਅਯਂ ਲੋਕੋ ਕੇਨ ਨਿਮ੍ਮਿਤੋ, ਅਸੁਕੇਨ ਨਾਮ ਨਿਮ੍ਮਿਤੋ, ਕਾਕੋ ਸੇਤੋ ਅਟ੍ਠੀਨਂ ਸੇਤਤ੍ਤਾ, ਬਲਾਕਾ ਰਤ੍ਤਾ ਲੋਹਿਤਸ੍ਸ ਰਤ੍ਤਤ੍ਤਾ’’ਤਿ ਏਵਮਾਦਿਕਾ ਲੋਕਾਯਤਵਿਤਣ੍ਡਸਲ੍ਲਾਪਕਥਾ. ਸਮੁਦ੍ਦਕ੍ਖਾਯਿਕਾ ਨਾਮ ‘‘ਕਸ੍ਮਾ ਸਮੁਦ੍ਦੋ ਸਾਗਰੋ, ਸਾਗਰਦੇਵੇਨ ਖਨਿਤਤ੍ਤਾ ਸਾਗਰੋ, ਖਤੋ ਮੇਤਿ ਹਤ੍ਥਮੁਦ੍ਦਾਯ ਨਿਵੇਦਿਤਤ੍ਤਾ ਸਮੁਦ੍ਦੋ’’ਤਿ ਏਵਮਾਦਿਕਾ ਨਿਰਤ੍ਥਕਸਮੁਦ੍ਦਕ੍ਖਾਯਿਕਕਥਾ. ਇਤਿ ਭਵੋ ਇਤਿ ਅਭਵੋਤਿ ਯਂ ਵਾ ਤਂ ਵਾ ਨਿਰਤ੍ਥਕਕਾਰਣਂ ਵਤ੍ਵਾ ਪਵਤ੍ਤਿਤਕਥਾ ਇਤਿਭਵਾਭਵਕਥਾ. ਏਤ੍ਥ ਚ ਭਵੋਤਿ ਸਸ੍ਸਤਂ, ਅਭਵੋਤਿ ਉਚ੍ਛੇਦਂ. ਭਵੋਤਿ ਵੁਦ੍ਧਿ, ਅਭਵੋਤਿ ਹਾਨਿ. ਭਵੋਤਿ ਕਾਮਸੁਖਂ, ਅਭਵੋਤਿ ਅਤ੍ਤਕਿਲਮਥੋ. ਇਤਿ ਇਮਾਯ ਛਬ੍ਬਿਧਾਯ ਇਤਿਭਵਾਭਵਕਥਾਯ ਸਦ੍ਧਿਂ ਬਾਤ੍ਤਿਂਸ ਤਿਰਚ੍ਛਾਨਕਥਾ ਨਾਮ ਹੋਨ੍ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਪਠਮੋ ਵਗ੍ਗੋ.
੨. ਧਮ੍ਮਚਕ੍ਕਪ੍ਪਵਤ੍ਤਨਵਗ੍ਗੋ
੧. ਧਮ੍ਮਚਕ੍ਕਪ੍ਪਵਤ੍ਤਨਸੁਤ੍ਤਵਣ੍ਣਨਾ
੧੦੮੧. ਦੁਤਿਯਸ੍ਸ ਪਠਮੇ ਬਾਰਾਣਸਿਯਨ੍ਤਿ ਏਵਂਨਾਮਕੇ ਨਗਰੇ. ਇਸਿਪਤਨੇ ਮਿਗਦਾਯੇਤਿ ਇਸੀਨਂ ਪਤਨੁਪ੍ਪਤਨਵਸੇਨ ਏਵਂਲਦ੍ਧਨਾਮੇ ਮਿਗਾਨਂ ਅਭਯਦਾਨਵਸੇਨ ਦਿਨ੍ਨਤ੍ਤਾ ਮਿਗਦਾਯਸਙ੍ਖਾਤੇ ਆਰਾਮੇ. ਏਤ੍ਥ ਹਿ ਉਪ੍ਪਨ੍ਨੁਪ੍ਪਨ੍ਨਾ ਸਬ੍ਬਞ੍ਞੁਇਸਯੋ ਪਤਨ੍ਤਿ, ਧਮ੍ਮਚਕ੍ਕਪ੍ਪਵਤ੍ਤਨਤ੍ਥਂ ਨਿਸੀਦਨ੍ਤੀਤਿ ਅਤ੍ਥੋ. ਨਨ੍ਦਮੂਲਕਪਬ੍ਭਾਰਤੋ ਸਤ੍ਤਾਹਚ੍ਚਯੇਨ ਨਿਰੋਧਸਮਾਪਤ੍ਤਿਤੋ ਵੁਟ੍ਠਿਤਾ ਅਨੋਤਤ੍ਤਦਹੇ ਕਤਮੁਖਧੋਵਨਾਦਿਕਿਚ੍ਚਾ ਆਕਾਸੇਨ ਆਗਨ੍ਤ੍ਵਾ ਪਚ੍ਚੇਕਬੁਦ੍ਧਇਸਯੋਪੇਤ੍ਥ ਓਤਰਣਵਸੇਨ ਪਤਨ੍ਤਿ, ਉਪੋਸਥਤ੍ਥਞ੍ਚ ਅਨੁਪੋਸਥਤ੍ਥਞ੍ਚ ਸਨ੍ਨਿਪਤਨ੍ਤਿ, ਗਨ੍ਧਮਾਦਨਂ ਪਟਿਗਚ੍ਛਨ੍ਤਾਪਿ ਤਤੋਵ ਉਪ੍ਪਤਨ੍ਤੀਤਿ ਇਮਿਨਾ ਇਸੀਨਂ ਪਤਨੁਪ੍ਪਤਨਵਸੇਨ ਤਂ ‘‘ਇਸਿਪਤਨ’’ਨ੍ਤਿ ਵੁਚ੍ਚਤਿ.
ਆਮਨ੍ਤੇਸੀਤਿ ਦੀਪਙ੍ਕਰਪਾਦਮੂਲੇ ਕਤਾਭਿਨੀਹਾਰਤੋ ਪਟ੍ਠਾਯ ਪਾਰਮਿਯੋ ਪੂਰੇਨ੍ਤੋ ਅਨੁਪੁਬ੍ਬੇਨ ਪਚ੍ਛਿਮਭਵੇ ਕਤਾਭਿਨਿਕ੍ਖਮਨੋ ਅਨੁਪੁਬ੍ਬੇਨ ਬੋਧਿਮਣ੍ਡਂ ਪਤ੍ਵਾ ਤਤ੍ਥ ਅਪਰਾਜਿਤਪਲ੍ਲਙ੍ਕੇ ਨਿਸਿਨ੍ਨੋ ਮਾਰਬਲਂ ਭਿਨ੍ਦਿਤ੍ਵਾ ਪਠਮਯਾਮੇ ਪੁਬ੍ਬੇਨਿਵਾਸਂ ਅਨੁਸ੍ਸਰਿਤ੍ਵਾ ਮਜ੍ਝਿਮਯਾਮੇ ਦਿਬ੍ਬਚਕ੍ਖੁਂ ਵਿਸੋਧੇਤ੍ਵਾ ਪਚ੍ਛਿਮਯਾਮਾਵਸਾਨੇ ਦਸਸਹਸ੍ਸਿਲੋਕਧਾਤੁਂ ਉਨ੍ਨਾਦੇਨ੍ਤੋ ਸਬ੍ਬਞ੍ਞੁਤਂ ਪਤ੍ਵਾ ਸਤ੍ਤ ਸਤ੍ਤਾਹਾਨਿ ਬੋਧਿਮਣ੍ਡੇ ਵੀਤਿਨਾਮੇਤ੍ਵਾ ਮਹਾਬ੍ਰਹ੍ਮੁਨਾ ਆਯਾਚਿਤਧਮ੍ਮਦੇਸਨੋ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਤ੍ਵਾ ਲੋਕਾਨੁਗ੍ਗਹੇਨ ਬਾਰਾਣਸਿਂ ਗਨ੍ਤ੍ਵਾ ਪਞ੍ਚਵਗ੍ਗਿਯੇ ਸਞ੍ਞਾਪੇਤ੍ਵਾ ਧਮ੍ਮਚਕ੍ਕਂ ਪਵਤ੍ਤੇਤੁਕਾਮੋ ਆਮਨ੍ਤੇਸਿ.
ਦ੍ਵੇਮੇ, ਭਿਕ੍ਖਵੇ, ਅਨ੍ਤਾਤਿ ਦ੍ਵੇ ਇਮੇ, ਭਿਕ੍ਖਵੇ, ਕੋਟ੍ਠਾਸਾ. ਇਮਸ੍ਸ ਪਨ ਪਦਸ੍ਸ ਸਹ ਸਮੁਦਾਹਾਰੇਨ ਸਮੁਦਾਹਾਰਨਿਗ੍ਘੋਸੋ ਹੇਟ੍ਠਾ ਅਵੀਚਿਂ ਉਪਰਿ ਭਵਗ੍ਗਂ ਪਤ੍ਵਾ ਦਸਸਹਸ੍ਸਿਲੋਕਧਾਤੁਂ ਪਤ੍ਥਰਿਤ੍ਵਾ ਅਟ੍ਠਾਸਿ. ਤਸ੍ਮਿਂਯੇਵ ਸਮਯੇ ਅਟ੍ਠਾਰਸਕੋਟਿਸਙ੍ਖਾ ਬ੍ਰਹ੍ਮਾਨੋ ਸਮਾਗਚ੍ਛਿਂਸੁ, ਪਚ੍ਛਿਮਦਿਸਾਯ ਸੂਰਿਯੋ ਅਤ੍ਥਮੇਤਿ, ਪਾਚੀਨਦਿਸਾਯ ਆਸਾਲ਼੍ਹਨਕ੍ਖਤ੍ਤੇਨ ਯੁਤ੍ਤੋ ਪੁਣ੍ਣਚਨ੍ਦੋ ਉਗ੍ਗਚ੍ਛਤਿ. ਤਸ੍ਮਿਂ ਸਮਯੇ ਭਗਵਾ ਇਮਂ ਧਮ੍ਮਚਕ੍ਕਪ੍ਪਵਤ੍ਤਨਸੁਤ੍ਤਂ ਆਰਭਨ੍ਤੋ ‘‘ਦ੍ਵੇਮੇ, ਭਿਕ੍ਖਵੇ, ਅਨ੍ਤਾ’’ਤਿਆਦਿਮਾਹ.
ਤਤ੍ਥ ਪਬ੍ਬਜਿਤੇਨਾਤਿ ਗਿਹਿਸਂਯੋਜਨਂ ਛਿਨ੍ਦਿਤ੍ਵਾ ਪਬ੍ਬਜ੍ਜੁਪਗਤੇਨ. ਨ ਸੇਵਿਤਬ੍ਬਾਤਿ ਨ ਵਲ਼ਞ੍ਜੇਤਬ੍ਬਾ. ਯੋ ਚਾਯਂ ਕਾਮੇਸੁ ਕਾਮਸੁਖਲ੍ਲਿਕਾਨੁਯੋਗੋਤਿ ਯੋ ਚ ਅਯਂ ਵਤ੍ਥੁਕਾਮੇਸੁ ਕਿਲੇਸਕਾਮਸੁਖਸ੍ਸ ਅਨੁਯੋਗੋ. ਹੀਨੋਤਿ ਲਾਮਕੋ. ਗਮ੍ਮੋਤਿ ਗਾਮਵਾਸੀਨਂ ਸਨ੍ਤਕੋ. ਪੋਥੁਜ੍ਜਨਿਕੋਤਿ ਅਨ੍ਧਬਾਲਜਨੇਨ ਆਚਿਣ੍ਣੋ. ਅਨਰਿਯੋਤਿ ਨ ਅਰਿਯੋ ਨ ਵਿਸੁਦ੍ਧੋ ਨ ਉਤ੍ਤਮੋ ਨ ਵਾ ਅਰਿਯਾਨਂ ਸਨ੍ਤਕੋ. ਅਨਤ੍ਥਸਂਹਿਤੋਤਿ ਨ ਅਤ੍ਥਸਂਹਿਤੋ, ਹਿਤਸੁਖਾਵਹਕਾਰਣਂ ਅਨਿਸ੍ਸਿਤੋਤਿ ਅਤ੍ਥੋ. ਅਤ੍ਤਕਿਲਮਥਾਨੁਯੋਗੋਤਿ ਅਤ੍ਤਨੋ ਕਿਲਮਥਸ੍ਸ ਅਨੁਯੋਗੋ, ਅਤ੍ਤਨੋ ਦੁਕ੍ਖਕਰਣਨ੍ਤਿ ਅਤ੍ਥੋ. ਦੁਕ੍ਖੋਤਿ ਕਣ੍ਟਕਾਪਸ੍ਸਯਸੇਯ੍ਯਾਦੀਹਿ ਅਤ੍ਤਮਾਰਣੇਹਿ ਦੁਕ੍ਖਾਵਹੋ.
ਪਞ੍ਞਾਚਕ੍ਖੁਂ ਕਰੋਤੀਤਿ ਚਕ੍ਖੁਕਰਣੀ. ਦੁਤਿਯਪਦਂ ਤਸ੍ਸੇਵ ਵੇਵਚਨਂ. ਉਪਸਮਾਯਾਤਿ ਕਿਲੇਸੂਪਸਮਤ੍ਥਾਯ. ਅਭਿਞ੍ਞਾਯਾਤਿ ਚਤੁਨ੍ਨਂ ਸਚ੍ਚਾਨਂ ਅਭਿਜਾਨਨਤ੍ਥਾਯ. ਸਮ੍ਬੋਧਾਯਾਤਿ ਤੇਸਂਯੇਵ ਸਮ੍ਬੁਜ੍ਝਨਤ੍ਥਾਯ. ਨਿਬ੍ਬਾਨਾਯਾਤਿ ਨਿਬ੍ਬਾਨਸਚ੍ਛਿਕਿਰਿਯਾਯ. ਸੇਸਮੇਤ੍ਥ ਯਂ ਵਤ੍ਤਬ੍ਬਂ ਸਿਯਾ, ਤਂ ਹੇਟ੍ਠਾ ਤਤ੍ਥ ਤਤ੍ਥ ਵੁਤ੍ਤਮੇਵ. ਸਚ੍ਚਕਥਾਪਿ ਸਬ੍ਬਾਕਾਰੇਨੇਵ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੫੨੯) ਵਿਤ੍ਥਾਰਿਤਾ.
ਤਿਪਰਿਵਟ੍ਟਨ੍ਤਿ ਸਚ੍ਚਞਾਣਕਿਚ੍ਚਞਾਣਕਤਞਾਣਸਙ੍ਖਾਤਾਨਂ ਤਿਣ੍ਣਂ ਪਰਿਵਟ੍ਟਾਨਂ ਵਸੇਨ ਤਿਪਰਿਵਟ੍ਟਂ. ਏਤ੍ਥ ਹਿ ‘‘ਇਦਂ ਦੁਕ੍ਖਂ ਅਰਿਯਸਚ੍ਚਂ, ਇਦਂ ਦੁਕ੍ਖਸਮੁਦਯ’’ਨ੍ਤਿ ਏਵਂ ਚਤੂਸੁ ਸਚ੍ਚੇਸੁ ਯਥਾਭੂਤਂ ਞਾਣਂ ਸਚ੍ਚਞਾਣਂ ਨਾਮ. ਤੇਸੁਯੇਵ ‘‘ਪਰਿਞ੍ਞੇਯ੍ਯਂ ਪਹਾਤਬ੍ਬ’’ਨ੍ਤਿ ਏਵਂ ਕਤ੍ਤਬ੍ਬਕਿਚ੍ਚਜਾਨਨਞਾਣਂ ਕਿਚ੍ਚਞਾਣਂ ਨਾਮ. ‘‘ਪਰਿਞ੍ਞਾਤਂ ਪਹੀਨ’’ਨ੍ਤਿ ਏਵਂ ਤਸ੍ਸ ਤਸ੍ਸ ਕਿਚ੍ਚਸ੍ਸ ਕਤਭਾਵਜਾਨਨਞਾਣਂ ਕਤਞਾਣਂ ਨਾਮ. ਦ੍ਵਾਦਸਾਕਾਰਨ੍ਤਿ ਤੇਸਂਯੇਵ ਏਕੇਕਸ੍ਮਿਂ ਸਚ੍ਚੇ ਤਿਣ੍ਣਂ ਤਿਣ੍ਣਂ ਆਕਾਰਾਨਂ ਵਸੇਨ ਦ੍ਵਾਦਸਾਕਾਰਂ. ਞਾਣਦਸ੍ਸਨਨ੍ਤਿ ਏਤੇਸਂ ਤਿਪਰਿਵਟ੍ਟਾਨਂ ਦ੍ਵਾਦਸਨ੍ਨਂ ਆਕਾਰਾਨਂ ਵਸੇਨ ਉਪ੍ਪਨ੍ਨਞਾਣਸਙ੍ਖਾਤਂ ਦਸ੍ਸਨਂ. ਧਮ੍ਮਚਕ੍ਖੁਨ੍ਤਿ ਅਞ੍ਞਤ੍ਥ ਤਯੋ ਮਗ੍ਗਾ ਤੀਣਿ ਚ ਫਲਾਨਿ ਧਮ੍ਮਚਕ੍ਖੁ ਨਾਮ ਹੋਨ੍ਤਿ, ਇਧ ਪਠਮਮਗ੍ਗੋਵ.
ਧਮ੍ਮਚਕ੍ਕੇਤਿ ਪਟਿਵੇਧਞਾਣੇ ਚੇਵ ਦੇਸਨਾਞਾਣੇ ਚ. ਬੋਧਿਪਲ੍ਲਙ੍ਕੇ ਨਿਸਿਨ੍ਨਸ੍ਸ ਹਿ ਚਤੂਸੁ ਸਚ੍ਚੇਸੁ ਉਪ੍ਪਨ੍ਨਂ ਦ੍ਵਾਦਸਾਕਾਰਂ ਪਟਿਵੇਧਞਾਣਮ੍ਪਿ, ਇਸਿਪਤਨੇ ਨਿਸਿਨ੍ਨਸ੍ਸ ਦ੍ਵਾਦਸਾਕਾਰਾਯ ਸਚ੍ਚਦੇਸਨਾਯ ਪਵਤ੍ਤਿਤਂ ਦੇਸਨਾਞਾਣਮ੍ਪਿ ਧਮ੍ਮਚਕ੍ਕਂ ਨਾਮ. ਉਭਯਮ੍ਪਿ ਹੇਤਂ ਦਸਬਲਸ੍ਸ ਉਰੇ ਪਵਤ੍ਤਞਾਣਮੇਵ. ਇਮਾਯ ਦੇਸਨਾਯ ਪਕਾਸੇਨ੍ਤੇਨ ਭਗਵਤਾ ਧਮ੍ਮਚਕ੍ਕਂ ਪਵਤ੍ਤਿਤਂ ਨਾਮ. ਤਂ ਪਨੇਤਂ ਧਮ੍ਮਚਕ੍ਕਂ ਯਾਵ ਅਞ੍ਞਾਸਿਕੋਣ੍ਡਞ੍ਞਤ੍ਥੇਰੋ ਅਟ੍ਠਾਰਸਹਿ ਬ੍ਰਹ੍ਮਕੋਟੀਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਾਤਿ, ਤਾਵ ਨਂ ਭਗਵਾ ਪਵਤ੍ਤੇਤਿ ਨਾਮ, ਪਤਿਟ੍ਠਿਤੇ ਚ ਪਵਤ੍ਤਿਤਂ ਨਾਮ. ਤਂ ਸਨ੍ਧਾਯ ਪਵਤ੍ਤਿਤੇ ਚ ਪਨ ਭਗਵਤਾ ਧਮ੍ਮਚਕ੍ਕੇ ਭੁਮ੍ਮਾ ਦੇਵਾ ਸਦ੍ਦਮਨੁਸ੍ਸਾਵੇਸੁਨ੍ਤਿਆਦਿ ਵੁਤ੍ਤਂ.
ਤਤ੍ਥ ਭੁਮ੍ਮਾਤਿ ਭੂਮਟ੍ਠਕਦੇਵਤਾ. ਸਦ੍ਦਮਨੁਸ੍ਸਾਵੇਸੁਨ੍ਤਿ ਏਕਪ੍ਪਹਾਰੇਨੇਵ ਸਾਧੁਕਾਰਂ ਦਤ੍ਵਾ – ‘‘ਏਤਂ ਭਗਵਤਾ’’ਤਿਆਦੀਨਿ ਵਦਨ੍ਤਾ ਅਨੁਸਾਵਯਿਂਸੁ. ਓਭਾਸੋਤਿ ਸਬ੍ਬਞ੍ਞੁਤਞ੍ਞਾਣੋਭਾਸੋ. ਸੋ ਹਿ ਤਦਾ ਦੇਵਾਨਂ ਦੇਵਾਨੁਭਾਵਂ ਅਤਿਕ੍ਕਮਿਤ੍ਵਾ ਵਿਰੋਚਿਤ੍ਥ. ਅਞ੍ਞਾਸਿ ਵਤ, ਭੋ, ਕੋਣ੍ਡਞ੍ਞੋਤਿ ਇਮਸ੍ਸਪਿ ਉਦਾਨਸ੍ਸ ਉਦਾਹਾਰਨਿਗ੍ਘੋਸੋ ਦਸਸਹਸ੍ਸਿਲੋਕਧਾਤੁਂ ਫਰਿਤ੍ਵਾ ਅਟ੍ਠਾਸਿ.
੯. ਸਙ੍ਕਾਸਨਸੁਤ੍ਤਵਣ੍ਣਨਾ
੧੦੮੯. ਨਵਮੇ ਅਪਰਿਮਾਣਾ ਵਣ੍ਣਾਤਿ ਅਪ੍ਪਮਾਣਾਨਿ ਅਕ੍ਖਰਾਨਿ. ਬ੍ਯਞ੍ਜਨਾਤਿ ਤੇਸਂਯੇਵ ਵੇਵਚਨਂ, ਵਣ੍ਣਾਨਂ ਵਾ ਏਕਦੇਸਾ ਯਦਿਦਂ ਬ੍ਯਞ੍ਜਨਾ ਨਾਮ. ਸਙ੍ਕਾਸਨਾਤਿ ਵਿਭਤ੍ਤਿਯੋ. ਏਕਮੇਕਸ੍ਮਿਞ੍ਹਿ ਸਚ੍ਚੇ ਸਬ੍ਬਾਕਾਰੇਨ ਵਿਤ੍ਥਾਰਿਯਮਾਨੇ ਵਣ੍ਣਾਦੀਨਂ ਅਨ੍ਤੋ ਨਾਮ ਨਤ੍ਥਿ. ਤਸ੍ਮਾ ਏਵਮਾਹ.
੧੦. ਤਥਸੁਤ੍ਤਵਣ੍ਣਨਾ
੧੦੯੦. ਦਸਮੇ ਸਭਾਵਾਵਿਜਹਨਟ੍ਠੇਨ ਤਥਂ. ਦੁਕ੍ਖਞ੍ਹਿ ਦੁਕ੍ਖਮੇਵ ਵੁਤ੍ਤਂ. ਸਭਾਵਸ੍ਸ ਅਮੋਘਤਾਯ ਅਵਿਤਥਂ. ਨ ਹਿ ਦੁਕ੍ਖਂ ਅਦੁਕ੍ਖਂ ਨਾਮ ਹੋਤਿ. ਅਞ੍ਞਭਾਵਾਨੁਪਗਮੇਨ ਅਨਞ੍ਞਥਂ. ਨ ਹਿ ਦੁਕ੍ਖਂ ਸਮੁਦਯਾਦਿਭਾਵਂ ਉਪਗਚ੍ਛਤਿ. ਸਮੁਦਯਾਦੀਸੁਪਿ ਏਸੇਵ ਨਯੋਤਿ.
ਧਮ੍ਮਚਕ੍ਕਪ੍ਪਵਤ੍ਤਨਵਗ੍ਗੋ ਦੁਤਿਯੋ.
੩. ਕੋਟਿਗਾਮਵਗ੍ਗੋ
੧. ਕੋਟਿਗਾਮਸੁਤ੍ਤਵਣ੍ਣਨਾ
੧੦੯੧. ਤਤਿਯਸ੍ਸ ਪਠਮੇ ਅਨਨੁਬੋਧਾਤਿ ਅਨਨੁਬੁਜ੍ਝਨੇਨ. ਅਪ੍ਪਟਿਵੇਧਾਤਿ ਅਪ੍ਪਟਿਵਿਜ੍ਝਨੇਨ.
੨. ਦੁਤਿਯਕੋਟਿਗਾਮਸੁਤ੍ਤਵਣ੍ਣਨਾ
੧੦੯੨. ਦੁਤਿਯੇ ਚੇਤੋਵਿਮੁਤ੍ਤਿ ਪਞ੍ਞਾਵਿਮੁਤ੍ਤੀਤਿ ਫਲਸਮਾਪਤ੍ਤਿਫਲਪਞ੍ਞਾਨਂ ਨਾਮਂ.
੭. ਤਥਸੁਤ੍ਤਵਣ੍ਣਨਾ
੧੦੯੭. ਸਤ੍ਤਮੇ ਤਸ੍ਮਾ ਅਰਿਯਸਚ੍ਚਾਨੀਤਿ ਯਸ੍ਮਾ ਤਥਾਨਿ ਅਵਿਤਥਾਨਿ ਅਨਞ੍ਞਥਾਨਿ, ਤਸ੍ਮਾ ਅਰਿਯਾਨਂ ਸਚ੍ਚਾਨੀਤਿ ਵੁਚ੍ਚਨ੍ਤਿ. ਨ ਹਿ ਵਿਤਥਾਨਿ ਅਰਿਯਾ ਅਰਿਯਸਚ੍ਚਤੋ ਪਟਿਵਿਜ੍ਝਨ੍ਤਿ.
੮. ਲੋਕਸੁਤ੍ਤਵਣ੍ਣਨਾ
੧੦੯੮. ਅਟ੍ਠਮੇ ਤਥਾਗਤੋ ਅਰਿਯੋ, ਤਸ੍ਮਾ ‘‘ਅਰਿਯਸਚ੍ਚਾਨੀ’’ਤਿ ਯਸ੍ਮਾ ਅਰਿਯੇਨ ਤਥਾਗਤੇਨ ਪਟਿਵਿਦ੍ਧਤ੍ਤਾ ਦੇਸਿਤਤ੍ਤਾ ਚ ਤਾਨਿ ਅਰਿਯਸਨ੍ਤਕਾਨਿ ਹੋਨ੍ਤਿ, ਤਸ੍ਮਾ ਅਰਿਯਸ੍ਸ ਸਚ੍ਚਤ੍ਤਾ ਅਰਿਯਸਚ੍ਚਾਨੀਤਿ ਅਤ੍ਥੋ.
੧੦. ਗਵਮ੍ਪਤਿਸੁਤ੍ਤਵਣ੍ਣਨਾ
੧੧੦੦. ਦਸਮੇ ਸਹਞ੍ਚਨਿਕੇਤਿ ਸਹਞ੍ਚਨਿਯਨਗਰੇ. ਯੋ, ਭਿਕ੍ਖਵੇ, ਦੁਕ੍ਖਂ ਪਸ੍ਸਤਿ, ਦੁਕ੍ਖਸਮੁਦਯਮ੍ਪਿ ਸੋ ਪਸ੍ਸਤੀਤਿਆਦਿ ਏਕਪਟਿਵੇਧਵਸੇਨ ਵੁਤ੍ਤਂ, ਇਮਸ੍ਮਿਞ੍ਹਿ ਸੁਤ੍ਤੇ ਏਕਪਟਿਵੇਧੋਵ ਕਥਿਤੋ.
ਕੋਟਿਗਾਮਵਗ੍ਗੋ ਤਤਿਯੋ.
੪. ਸੀਸਪਾਵਨਵਗ੍ਗੋ
੧. ਸੀਸਪਾਵਨਸੁਤ੍ਤਵਣ੍ਣਨਾ
੧੧੦੧. ਚਤੁਤ੍ਥਸ੍ਸ ਪਠਮੇ ਯਦਿਦਂ ਉਪਰੀਤਿ ਯਾਨਿ ਇਮਾਨਿ ਉਪਰਿ. ਸੀਸਪਾਵਨੇਤਿ ਸੀਸਪਾਰੁਕ੍ਖੇ.
੨. ਖਦਿਰਪਤ੍ਤਸੁਤ੍ਤਵਣ੍ਣਨਾ
੧੧੦੨. ਦੁਤਿਯੇ ਅਨਭਿਸਮੇਚ੍ਚਾਤਿ ਞਾਣੇਨ ਅਨਭਿਸਮਾਗਨ੍ਤ੍ਵਾ, ਅਪ੍ਪਟਿਵਿਜ੍ਝਿਤ੍ਵਾਤਿ ਅਤ੍ਥੋ.
੩. ਦਣ੍ਡਸੁਤ੍ਤਵਣ੍ਣਨਾ
੧੧੦੩. ਤਤਿਯੇ ਅਸ੍ਮਾ ਲੋਕਾ ਪਰਂ ਲੋਕਨ੍ਤਿ ਇਮਮ੍ਹਾ ਮਨੁਸ੍ਸਲੋਕਾ ਪਰਂ ਨਿਰਯਮ੍ਪਿ, ਤਿਰਚ੍ਛਾਨਯੋਨਿਮ੍ਪਿ, ਪੇਤ੍ਤਿਵਿਸਯਮ੍ਪਿ, ਮਨੁਸ੍ਸਲੋਕਮ੍ਪਿ, ਦੇਵਲੋਕਮ੍ਪਿ, ਗਚ੍ਛਨ੍ਤਿ, ਪੁਨਪ੍ਪੁਨਂ ਵਟ੍ਟਸ੍ਮਿਂਯੇਵ ਨਿਬ੍ਬਤ੍ਤਨ੍ਤੀਤਿ ਅਤ੍ਥੋ.
੫. ਸਤ੍ਤਿਸਤਸੁਤ੍ਤਵਣ੍ਣਨਾ
੧੧੦੫. ਪਞ੍ਚਮੇ ਏਵਞ੍ਚੇਤਂ, ਭਿਕ੍ਖਵੇ, ਅਸ੍ਸਾਤਿ, ਭਿਕ੍ਖਵੇ, ਏਵਂ ਚੇ ਏਤਂ ਭਵੇਯ੍ਯ, ਨਿਰਨ੍ਤਰਂ ਸਤ੍ਤਿਸਤੇਹਿ ਹਞ੍ਞਮਾਨਸ੍ਸ ਦੁਕ੍ਖਦੋਮਨਸ੍ਸੇਹਿ ਸਹੇਵੇਸ ਸਚ੍ਚਾਭਿਸਮਯੋ ਭਵੇਯ੍ਯ ਚੇਤਿ ਅਤ੍ਥੋ.
੯. ਇਨ੍ਦਖੀਲਸੁਤ੍ਤਵਣ੍ਣਨਾ
੧੧੦੯. ਨਵਮੇ ਮੁਖਂ ਓਲੋਕੇਨ੍ਤੀਤਿ ਅਜ੍ਝਾਸਯਂ ਓਲੋਕੇਨ੍ਤਿ. ਅਜ੍ਝਾਸਯੋ ਇਧ ਮੁਖਨ੍ਤਿ ਅਧਿਪ੍ਪੇਤੋ.
੧੦. ਵਾਦਤ੍ਥਿਕਸੁਤ੍ਤਵਣ੍ਣਨਾ
੧੧੧੦. ਦਸਮੇ ਸਿਲਾਯੂਪੋਤਿ ਸਿਲਾਥਮ੍ਭੋ. ਸੋਲ਼ਸਕੁਕ੍ਕੁਕੋਤਿ ਸੋਲ਼ਸਹਤ੍ਥੋ. ਸੋਲ਼ਸਕੁਕ੍ਕੂਤਿਪਿ ਪਾਠੋ. ਹੇਟ੍ਠਾ ਨੇਮਙ੍ਗਮਾਤਿ ਹੇਟ੍ਠਾ ਆਵਾਟਂ ਪਵਿਟ੍ਠਾ. ਅਟ੍ਠ ਕੁਕ੍ਕੁ ਉਪਰਿਨੇਮਸ੍ਸਾਤਿ ਅਟ੍ਠ ਹਤ੍ਥਾ ਆਵਾਟਸ੍ਸ ਉਪਰਿ ਉਗ੍ਗਨ੍ਤ੍ਵਾ ਠਿਤਾ ਭਵੇਯ੍ਯੁਂ. ਭੁਸਾਤਿ ਬਲਵਤੀ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਸੀਸਪਾਵਨਵਗ੍ਗੋ ਚਤੁਤ੍ਥੋ.
੫. ਪਪਾਤਵਗ੍ਗੋ
੧. ਲੋਕਚਿਨ੍ਤਾਸੁਤ੍ਤਵਣ੍ਣਨਾ
੧੧੧੧. ਪਞ੍ਚਮਸ੍ਸ ਪਠਮੇ ਸੁਮਾਗਧਾਯ ਪੋਕ੍ਖਰਣਿਯਾਤਿ ਏਵਂਨਾਮਿਕਾਯ ਪੋਕ੍ਖਰਣਿਯਾ. ਲੋਕਚਿਨ੍ਤਂ ਚਿਨ੍ਤੇਨ੍ਤੋਤਿ, ‘‘ਕੇਨ ਨੁ ਖੋ ਚਨ੍ਦਿਮਸੂਰਿਯਾ ਕਤਾ, ਕੇਨ ਮਹਾਪਥਵੀ, ਕੇਨ ਮਹਾਸਮੁਦ੍ਦੋ, ਕੇਨ ਸਤ੍ਤਾ ਉਪ੍ਪਾਦਿਤਾ, ਕੇਨ ਪਬ੍ਬਤਾ, ਕੇਨ ਅਮ੍ਬਤਾਲਨਾਲ਼ਿਕੇਰਾਦਯੋ’’ਤਿ ਏਵਰੂਪਂ ਲੋਕਚਿਨ੍ਤਂ ਚਿਨ੍ਤੇਨ੍ਤੋ ਨਿਸੀਦਿ.
ਵਿਚੇਤੋਤਿ ਵਿਗਤਚਿਤ੍ਤੋ ਵਿਕ੍ਖਿਤ੍ਤਚਿਤ੍ਤੋ ਵਾ. ਭੂਤਂਯੇਵ ਅਦ੍ਦਸਾਤਿ ਤੇ ਕਿਰ ਅਸੁਰਾ ਸਮ੍ਬਰਿਮਾਯਂ ਸਮ੍ਪਰਿਵਤ੍ਤੇਤ੍ਵਾ ਯਥਾ ਨੇ ਸੋ ਪੁਰਿਸੋ ਹਤ੍ਥਿਅਸ੍ਸਾਦੀਸੁ ਆਰੁਹਨ੍ਤੇ ਉਕ੍ਖਿਪਿਤ੍ਵਾ, ਭਿਸਮੁਲ਼ਾਲਚ੍ਛਿਦ੍ਦੇਹਿ ਪਵਿਸਨ੍ਤੇ ਪਸ੍ਸਤਿ, ਏਵਂ ਅਧਿਟ੍ਠਹਿਂਸੁ. ਤਂ ਸਨ੍ਧਾਯ ਸਤ੍ਥਾ ‘‘ਭੂਤਂਯੇਵ ਅਦ੍ਦਸਾ’’ਤਿ ਆਹ. ਦੇਵਾਨਂਯੇਵ ਮੋਹਯਮਾਨਾਤਿ ਦੇਵਾਨਂ ਚਿਤ੍ਤਂ ਮੋਹਯਨ੍ਤਾ. ਤਸ੍ਮਾਤਿ ਯਸ੍ਮਾ ਲੋਕਚਿਨ੍ਤਂ ਚਿਨ੍ਤੇਨ੍ਤੋ ਉਮ੍ਮਤ੍ਤਕੋਪਿ ਹੋਤਿ, ਤਸ੍ਮਾ.
੨-੩. ਪਪਾਤਸੁਤ੍ਤਾਦਿਵਣ੍ਣਨਾ
੧੧੧੨-੧੩. ਦੁਤਿਯੇ ਪਟਿਭਾਨਕੂਟੋਤਿ ਏਕੋ ਮਹਨ੍ਤੋ ਪਬ੍ਬਤਸਦਿਸੋ ਮਰਿਯਾਦਪਾਸਾਣੋ. ਤਤਿਯੇ ਅਨਿਟ੍ਠਰੂਪਨ੍ਤਿ ਅਨਿਟ੍ਠਸਭਾਵਂ.
੪. ਕੂਟਾਗਾਰਸੁਤ੍ਤਵਣ੍ਣਨਾ
੧੧੧੪. ਚਤੁਤ੍ਥੇ ਹੇਟ੍ਠਿਮਂ ਘਰਂ ਅਕਰਿਤ੍ਵਾਤਿ ਥਮ੍ਭਭਿਤ੍ਤਿਪਾਦੁਸ੍ਸਾਪਨਾਦਿਨਾ ਘਰਸ੍ਸ ਹੇਟ੍ਠਿਮਭਾਗਂ ਅਕਤ੍ਵਾ.
੫. ਵਾਲਸੁਤ੍ਤਵਣ੍ਣਨਾ
੧੧੧੫. ਪਞ੍ਚਮੇ ਸਨ੍ਥਾਗਾਰੇਤਿ ਸਿਪ੍ਪੁਗ੍ਗਣ੍ਹਨਸਾਲਾਯਂ. ਉਪਾਸਨਂ ਕਰੋਨ੍ਤੇਤਿ ਕਣ੍ਡਖਿਪਨਸਿਪ੍ਪਂ ਕਰੋਨ੍ਤੇ. ਅਸਨਂ ਅਤਿਪਾਤੇਨ੍ਤੇਤਿ ਕਣ੍ਡਂ ਅਤਿਕ੍ਕਮੇਨ੍ਤੇ. ਪੋਙ੍ਖਾਨੁਪੋਙ੍ਖਨ੍ਤਿ ਏਕਂ ਕਣ੍ਡਂ ਖਿਪਿਤ੍ਵਾ ਯਥਾ ਅਸ੍ਸ ਸਰਸ੍ਸ ਪੋਙ੍ਖਂ ਵਿਜ੍ਝਤਿ, ਅਪਰਂ ਅਨੁਪੋਙ੍ਖਂ ਨਾਮ ਦੁਤਿਯਸ੍ਸ ਪੋਙ੍ਖਂ, ਪੁਨ ਅਪਰਂ ਤਸ੍ਸ ਪੋਙ੍ਖਨ੍ਤਿ ਏਵਂ ਅਤਿਪਾਤੇਨ੍ਤੇ ਅਦ੍ਦਸ. ਯਤ੍ਰ ਹਿ ਨਾਮਾਤਿ ਯੇ ਨਾਮ. ਦੁਰਭਿਸਮ੍ਭਵਤਰਨ੍ਤਿ ਦੁਕ੍ਕਰਤਰਂ. ਸਤ੍ਤਧਾ ਭਿਨ੍ਨਸ੍ਸ ਵਾਲਸ੍ਸ ਕੋਟਿਯਾ ਕੋਟਿਂ ਪਟਿਵਿਜ੍ਝੇਯ੍ਯਾਤਿ ਏਕਂ ਵਾਲਂ ਸਤ੍ਤਧਾ ਭਿਨ੍ਦਿਤ੍ਵਾ, ਤਸ੍ਸ ਏਕਂ ਭੇਦਂ ਗਹੇਤ੍ਵਾ, ਵਾਤਿਙ੍ਗਣਮਜ੍ਝੇ ਬਨ੍ਧਿਤ੍ਵਾ, ਅਪਰਂ ਭੇਦਂ ਕਣ੍ਡਸ੍ਸ ਅਗ੍ਗਕੋਟਿਯਂ ਬਨ੍ਧਿਤ੍ਵਾ, ਉਸਭਮਤ੍ਤੇ ਠਿਤੋ ਕਣ੍ਡਬਦ੍ਧਾਯ ਕੋਟਿਯਾ ਤਂ ਵਾਤਿਙ੍ਗਣਬਦ੍ਧਕੋਟਿਂ ਪਟਿਵਿਜ੍ਝੇਯ੍ਯਾਤਿ ਅਤ੍ਥੋ. ਤਸ੍ਮਾਤਿ ਯਸ੍ਮਾ ਏਵਂ ਦੁਪ੍ਪਟਿਵਿਜ੍ਝਾਨਿ ਚਤ੍ਤਾਰਿ ਸਚ੍ਚਾਨਿ, ਤਸ੍ਮਾ.
੭. ਪਠਮਛਿਗ੍ਗਲ਼ਯੁਗਸੁਤ੍ਤਵਣ੍ਣਨਾ
੧੧੧੭. ਸਤ੍ਤਮੇ ਅਞ੍ਞਮਞ੍ਞਖਾਦਿਕਾਤਿ ਅਞ੍ਞਮਞ੍ਞਂ ਖਾਦਨਂ. ਦੁਬ੍ਬਲਖਾਦਿਕਾਤਿ ਬਲਵਨ੍ਤੇਹਿ ਮਚ੍ਛਾਦੀਹਿ ਦੁਬ੍ਬਲਾਨਂ ਮਚ੍ਛਾਦੀਨਂ ਖਾਦਨਂ.
੮. ਦੁਤਿਯਛਿਗ੍ਗਲ਼ਯੁਗਸੁਤ੍ਤਵਣ੍ਣਨਾ
੧੧੧੮. ਅਟ੍ਠਮੇ ਮਹਾਪਥਵੀਤਿ ਚਕ੍ਕਵਾਲ਼ਗਬ੍ਭਨ੍ਤਰਾ ਮਹਾਪਥਵੀ. ਅਧਿਚ੍ਚਮਿਦਂ, ਭਨ੍ਤੇਤਿ ਇਦਂ ਅਧਿਚ੍ਚੁਪ੍ਪਤ੍ਤਿਕਂ ਸਚੇ ਤਂ ਯੁਗਂ ਨ ਪੂਤਿ ਭਵੇਯ੍ਯ, ਸਮੁਦ੍ਦੇ ਉਦਕਂ ਨ ਸੁਸ੍ਸੇਯ੍ਯ, ਸੋ ਚ ਕਚ੍ਛਪੋ ਨ ਮਰੇਯ੍ਯ, ਅਪਿ ਨਾਮ ਯਦਿਚ੍ਛਾਵਸੇਨ ਸਿਯਾਤਿ ਅਤ੍ਥੋ.
ਏਵਂ ਅਧਿਚ੍ਚਮਿਦਂ, ਭਿਕ੍ਖਵੇਤਿ ਏਤ੍ਥ ਮਹਾਸੀਵਤ੍ਥੇਰੋ ਚਤ੍ਤਾਰਿ ਯੁਗਾਨਿ ਦਸ੍ਸੇਤਿ – ਪੁਰਤ੍ਥਿਮਚਕ੍ਕਵਾਲ਼ਮੁਖਵਟ੍ਟਿਯਂ ਠਿਤੇਨ ਪੁਰਿਸੇਨ ਪਕ੍ਖਿਤ੍ਤਯੁਗਸ੍ਸ ਹਿ ਛਿਗ੍ਗਲ਼ੇਨ ਤਸ੍ਸ ਅਨ੍ਧਕਚ੍ਛਪਸ੍ਸ ਗੀਵਾਯ ਪਵੇਸਨਂ ਵਿਯ ਮਨੁਸ੍ਸਪਟਿਲਾਭੋ ਅਧਿਚ੍ਚਪਟਿਲਾਭੀ. ਦਕ੍ਖਿਣਚਕ੍ਕਵਾਲ਼ਮੁਖਵਟ੍ਟਿਯਂ ਠਿਤੇਨ ਪਕ੍ਖਿਤ੍ਤਸ੍ਸ ਪਨ ਪਰਿਬ੍ਭਮਨ੍ਤਸ੍ਸ ਪੁਰਿਮਯੁਗਂ ਪਤ੍ਵਾ ਛਿਗ੍ਗਲ਼ੇਨ ਛਿਗ੍ਗਲ਼ੁਪਰਿ ਆਰੁਲ਼੍ਹਸ੍ਸ ਛਿਗ੍ਗਲ਼ੇਨ ਗੀਵਪ੍ਪਵੇਸਨਂ ਵਿਯ ਤਥਾਗਤੁਪ੍ਪਾਦੋ ਅਧਿਚ੍ਚਤਰਸਮ੍ਭਵੋ. ਪਚ੍ਛਿਮਚਕ੍ਕਵਾਲ਼ਮੁਖਵਟ੍ਟਿਯਂ ਠਿਤੇਨ ਪਕ੍ਖਿਤ੍ਤਸ੍ਸ ਪਨ ਪਰਿਬ੍ਭਮਨ੍ਤਸ੍ਸ ਪੁਰਿਮਯੁਗਦ੍ਵਯਂ ਪਤ੍ਵਾ ਛਿਗ੍ਗਲ਼ੇਨ ਛਿਗ੍ਗਲ਼ੁਪਰਿ ਆਰੁਲ਼੍ਹਸ੍ਸ ਛਿਗ੍ਗਲ਼ੇਨ ਗੀਵਪ੍ਪਵੇਸਨਂ ਵਿਯ ਤਥਾਗਤਪ੍ਪਵੇਦਿਤਸ੍ਸ ਧਮ੍ਮਵਿਨਯਸ੍ਸ ਦੀਪਨਂ ਅਧਿਚ੍ਚਤਰਸਮ੍ਭਵਂ. ਉਤ੍ਤਰਚਕ੍ਕਵਾਲ਼ਮੁਖਵਟ੍ਟਿਯਂ ਠਿਤੇਨ ਪਕ੍ਖਿਤ੍ਤਸ੍ਸ ਪਨ ਪਰਿਬ੍ਭਮਨ੍ਤਸ੍ਸ ਪੁਰਿਮਯੁਗਤ੍ਤਯਂ ਪਤ੍ਵਾ ਛਿਗ੍ਗਲ਼ੇਨ ਛਿਗ੍ਗਲ਼ੁਪਰਿ ਆਰੁਲ਼੍ਹਸ੍ਸ ਛਿਗ੍ਗਲ਼ੇਨ ਗੀਵਪ੍ਪਵੇਸਨਂ ਵਿਯ ਚਤੁਸਚ੍ਚਪਟਿਵੇਧੋ ਅਤਿਵਿਯ ਅਧਿਚ੍ਚਤਰਸਮ੍ਭਵੋ ਵੇਦਿਤਬ੍ਬੋ. ਨਵਮਾਦੀਨਿ ਅਭਿਸਮਯਸਂਯੁਤ੍ਤੇ ਵੁਤ੍ਤਨਯਾਨੇਵਾਤਿ.
ਪਪਾਤਵਗ੍ਗੋ ਪਞ੍ਚਮੋ.
੬. ਅਭਿਸਮਯਵਗ੍ਗਵਣ੍ਣਨਾ
੧੧੨੧. ਅਭਿਸਮਯਵਗ੍ਗੋ ਨਿਦਾਨਵਗ੍ਗੇ ਅਭਿਸਮਯਸਂਯੁਤ੍ਤੇ ਵਿਤ੍ਥਾਰਿਤੋਵ.
੭. ਪਠਮਆਮਕਧਞ੍ਞਪੇਯ੍ਯਾਲਵਗ੍ਗੋ
੩. ਪਞ੍ਞਾਸੁਤ੍ਤਵਣ੍ਣਨਾ
੧੧੩੩. ਆਮਕਧਞ੍ਞਪੇਯ੍ਯਾਲੇ ਅਰਿਯੇਨ ਪਞ੍ਞਾਚਕ੍ਖੁਨਾਤਿ ਵਿਪਸ੍ਸਨਂ ਆਦਿਂ ਕਤ੍ਵਾ ਲੋਕਿਯਲੋਕੁਤ੍ਤਰੇਨ ਞਾਣਚਕ੍ਖੁਨਾ.
੪. ਸੁਰਾਮੇਰਯਸੁਤ੍ਤਵਣ੍ਣਨਾ
੧੧੩੪. ਸੁਰਾਮੇਰਯਮਜ੍ਜਪ੍ਪਮਾਦਟ੍ਠਾਨਾ ਪਟਿਵਿਰਤਾਤਿ ਏਤ੍ਥ ਸੁਰਾ ਨਾਮ ਪਿਟ੍ਠਸੁਰਾ, ਓਦਨਸੁਰਾ, ਪੂਵਸੁਰਾ, ਕਿਣ੍ਣਪਕ੍ਖਿਤ੍ਤਾ, ਸਮ੍ਭਾਰਸਂਯੁਤ੍ਤਾਤਿ ਪਞ੍ਚਵਿਧਾ. ਮੇਰਯਂ ਨਾਮ ਪੁਪ੍ਫਾਸਵੋ, ਫਲਾਸਵੋਤਿ, ਏਵਂ ਵੁਤ੍ਤੋ ਯੋ ਕੋਚਿ ਆਸਵੋ. ਮਜ੍ਜਨ੍ਤਿ ਤਦੇਵ ਉਭਯਂ, ਯਂ ਵਾ ਪਨਞ੍ਞਮ੍ਪਿ ਸੁਰਾਸਵਵਿਨਿਮੁਤ੍ਤਂ ਮਦਨੀਯਂ. ਯਾਯ ਚੇਤਨਾਯ ਤਂ ਪਿਵਨ੍ਤਿ, ਸਾ ਪਮਾਦਸ੍ਸ ਕਾਰਣਤ੍ਤਾ ਪਮਾਦਟ੍ਠਾਨਂ ਨਾਮ, ਤਤੋ ਪਟਿਵਿਰਤਾਤਿ ਅਤ੍ਥੋ.
੬-੭. ਮਤ੍ਤੇਯ੍ਯਸੁਤ੍ਤਾਦਿਵਣ੍ਣਨਾ
੧੧੩੬-੩੭. ਮਤ੍ਤੇਯ੍ਯਾਤਿ ਮਾਤੁਹਿਤਾ, ਮਾਤਰਿ ਸਮ੍ਮਾਪਟਿਪਨ੍ਨਾਤਿ ਅਤ੍ਥੋ. ਪੇਤ੍ਤੇਯ੍ਯਾਦੀਸੁ ਪਿਤੁਹਿਤਾ ਪੇਤ੍ਤੇਯ੍ਯਾ.
੮-੯. ਸਾਮਞ੍ਞਸੁਤ੍ਤਾਦਿਵਣ੍ਣਨਾ
੧੧੩੮-੩੯. ਸਮਣਾਨਂ ਹਿਤਾ ਸਾਮਞ੍ਞਾ. ਬ੍ਰਾਹ੍ਮਣਾਨਂ ਹਿਤਾ ਬ੍ਰਹ੍ਮਞ੍ਞਾ. ਤੇਸੁ ਤੇਸੁ ਸਮ੍ਮਾ ਪਟਿਪਨ੍ਨਾਨਂਯੇਵੇਤਂ ਅਧਿਵਚਨਂ.
੧੦. ਪਚਾਯਿਕਸੁਤ੍ਤਵਣ੍ਣਨਾ
੧੧੪੦. ਕੁਲੇ ਜੇਟ੍ਠਾਪਚਾਯਿਨੋਤਿ ਕੁਲੇ ਜੇਟ੍ਠਾਨਂ ਅਪਚਾਯਿਨੋ, ਨੀਚਵੁਤ੍ਤਿਨੋਤਿ ਅਤ੍ਥੋ.
੮. ਦੁਤਿਯਆਮਕਧਞ੍ਞਪੇਯ੍ਯਾਲਵਗ੍ਗੋ
੮. ਬੀਜਗਾਮਸੁਤ੍ਤਵਣ੍ਣਨਾ
੧੧੪੮. ਬੀਜਗਾਮਭੂਤਗਾਮਸਮਾਰਮ੍ਭਾਤਿ ਮੂਲਬੀਜਂ, ਖਨ੍ਧਬੀਜਂ, ਫਲ਼ੁਬੀਜਂ, ਅਗ੍ਗਬੀਜਂ, ਬੀਜਬੀਜਨ੍ਤਿ ਪਞ੍ਚਵਿਧਸ੍ਸ ਬੀਜਗਾਮਸ੍ਸ ਚੇਵ ਯਸ੍ਸ ਕਸ੍ਸਚਿ ਨੀਲਤਿਣਰੁਕ੍ਖਾਦਿਕਸ੍ਸ ਭੂਤਗਾਮਸ੍ਸ ਚ ਸਮਾਰਮ੍ਭਾ, ਛੇਦਨਪਚਨਾਦਿਭਾਵੇਨ ਵਿਕੋਪਨਾ ਪਟਿਵਿਰਤਾਤਿ ਅਤ੍ਥੋ.
੯. ਵਿਕਾਲਭੋਜਨਸੁਤ੍ਤਵਣ੍ਣਨਾ
੧੧੪੯. ਵਿਕਾਲਭੋਜਨਾਤਿ ਕਾਲਾਤਿਕ੍ਕਨ੍ਤਭੋਜਨਾ, ਮਜ੍ਝਨ੍ਹਿਕਾਤਿਕ੍ਕਮਤੋ ਪਟ੍ਠਾਯ ਯਾਵਕਾਲਿਕਪਰਿਭੋਗਾਤਿ ਅਤ੍ਥੋ.
੧੦. ਗਨ੍ਧਵਿਲੇਪਨਸੁਤ੍ਤਵਣ੍ਣਨਾ
੧੧੫੦. ਮਾਲਾਦੀਸੁ ਮਾਲਾਤਿ ਯਂ ਕਿਞ੍ਚਿ ਪੁਪ੍ਫਂ. ਗਨ੍ਧਨ੍ਤਿ ਯਂ ਕਿਞ੍ਚਿ ਗਨ੍ਧਜਾਤਂ. ਵਿਲੇਪਨਨ੍ਤਿ ਛਵਿਰਾਗਕਰਣਂ. ਤਤ੍ਥ ਪਿਲ਼ਨ੍ਧਨ੍ਤਾ ਧਾਰੇਨ੍ਤਿ ਨਾਮ, ਊਨਟ੍ਠਾਨਂ ਪੂਰੇਨ੍ਤਾ ਮਣ੍ਡੇਨ੍ਤਿ ਨਾਮ, ਗਨ੍ਧਵਸੇਨ ਛਵਿਰਾਗਵਸੇਨ ਚ ਸਾਦਿਯਨ੍ਤਾ ਵਿਭੂਸੇਨ੍ਤਿ ਨਾਮ. ਠਾਨਂ ਵੁਚ੍ਚਤਿ ਕਾਰਣਂ. ਤਸ੍ਮਾ ਯਾਯ ਦੁਸ੍ਸੀਲ੍ਯਚੇਤਨਾਯ ਤਾਨਿ ਮਾਲਾਧਾਰਣਾਦੀਨਿ ਮਹਾਜਨੋ ਕਰੋਤਿ, ਤਤੋ ਪਟਿਵਿਰਤਾਤਿ ਅਤ੍ਥੋ.
੯. ਤਤਿਯਆਮਕਧਞ੍ਞਪੇਯ੍ਯਾਲਵਗ੍ਗੋ
੧. ਨਚ੍ਚਗੀਤਸੁਤ੍ਤਵਣ੍ਣਨਾ
੧੧੫੧. ਸਾਸਨਸ੍ਸ ਅਨਨੁਲੋਮਤ੍ਤਾ ਵਿਸੂਕਂ ਪਟਾਣੀਭੂਤਂ ਦਸ੍ਸਨਨ੍ਤਿ ਵਿਸੂਕਦਸ੍ਸਨਂ. ਅਤ੍ਤਨਾ ਨਚ੍ਚਨਨਚ੍ਚਾਪਨਾਦਿਵਸੇਨ ਨਚ੍ਚਾ ਚ ਗੀਤਾ ਚ ਵਾਦਿਤਾ ਚ ਅਨ੍ਤਮਸੋ ਮਯੂਰਨਚ੍ਚਾਦਿਵਸੇਨਾਪਿ ਪਵਤ੍ਤਾਨਂ ਨਚ੍ਚਾਦੀਨਂ ਵਿਸੂਕਭੂਤਾ ਦਸ੍ਸਨਾ ਚਾਤਿ ਨਚ੍ਚਗੀਤਵਾਦਿਤਵਿਸੂਕਦਸ੍ਸਨਾ. ਨਚ੍ਚਾਦੀਨਿ ਹਿ ਅਤ੍ਤਨਾ ਪਯੋਜੇਤੁਂ ਵਾ ਪਰੇਹਿ ਪਯੋਜਾਪੇਤੁਂ ਵਾ ਪਯੁਤ੍ਤਾਨਿ ਪਸ੍ਸਿਤੁਂ ਵਾ ਨੇਵ ਭਿਕ੍ਖੂਨਂ, ਨ ਭਿਕ੍ਖੁਨੀਨਂ ਵਟ੍ਟਨ੍ਤਿ.
੨. ਉਚ੍ਚਾਸਯਨਸੁਤ੍ਤਵਣ੍ਣਨਾ
੧੧੫੨. ਉਚ੍ਚਾਸਯਨਂ ਵੁਚ੍ਚਤਿ ਪਮਾਣਾਤਿਕ੍ਕਨ੍ਤਂ. ਮਹਾਸਯਨਂ ਅਕਪ੍ਪਿਯਤ੍ਥਰਣਂ, ਤਤੋ ਪਟਿਵਿਰਤਾਤਿ ਅਤ੍ਥੋ.
੩. ਜਾਤਰੂਪਸੁਤ੍ਤਵਣ੍ਣਨਾ
੧੧੫੩. ਜਾਤਰੂਪਨ੍ਤਿ ਸੁਵਣ੍ਣਂ. ਰਜਤਨ੍ਤਿ ਕਹਾਪਣੋ – ਲੋਹਮਾਸਕੋ, ਜਤੁਮਾਸਕੋ, ਦਾਰੁਮਾਸਕੋਤਿ ਯੇ ਵੋਹਾਰਂ ਗਚ੍ਛਨ੍ਤਿ, ਤਸ੍ਸ ਉਭਯਸ੍ਸਾਪਿ ਪਟਿਗ੍ਗਹਣਾ ਪਟਿਵਿਰਤਾ. ਨੇਵ ਨਂ ਉਗ੍ਗਣ੍ਹਨ੍ਤਿ ਨ ਉਗ੍ਗਣ੍ਹਾਪੇਨ੍ਤਿ, ਨ ਉਪਨਿਕ੍ਖਿਤ੍ਤਂ ਸਾਦਿਯਨ੍ਤੀਤਿ ਅਤ੍ਥੋ.
੪. ਆਮਕਧਞ੍ਞਸੁਤ੍ਤਵਣ੍ਣਨਾ
੧੧੫੪. ਆਮਕਧਞ੍ਞਪਟਿਗ੍ਗਹਣਾਤਿ ਸਾਲਿ-ਵੀਹਿ-ਯਵ-ਗੋਧੁਮ-ਕਙ੍ਗੁ-ਵਰਕ-ਕੁਦ੍ਰੂਸਕਸਙ੍ਖਾਤਸ੍ਸ ਸਤ੍ਤਵਿਧਸ੍ਸਾਪਿ ਆਮਕਧਞ੍ਞਸ੍ਸ ਪਟਿਗ੍ਗਹਣਾ. ਨ ਕੇਵਲਞ੍ਚ ਏਤੇਸਂ ਪਟਿਗ੍ਗਹਣਮੇਵ, ਆਮਸਨਮ੍ਪਿ ਭਿਕ੍ਖੂਨਂ ਨ ਵਟ੍ਟਤਿਯੇਵ.
੫. ਆਮਕਮਂਸਸੁਤ੍ਤਵਣ੍ਣਨਾ
੧੧੫੫. ਆਮਕਮਂਸਪਟਿਗ੍ਗਹਣਾਤਿ ਏਤ੍ਥ ਅਞ੍ਞਤ੍ਰ ਉਦ੍ਦਿਸ੍ਸ ਅਨੁਞ੍ਞਾਤਾ ਆਮਕਮਂਸਮਚ੍ਛਾਨਂ ਪਟਿਗ੍ਗਹਣਮੇਵ ਭਿਕ੍ਖੂਨਂ ਨ ਵਟ੍ਟਤਿ, ਨੋ ਆਮਸਨਂ.
੬. ਕੁਮਾਰਿਕਸੁਤ੍ਤਵਣ੍ਣਨਾ
੧੧੫੬. ਇਤ੍ਥਿਕੁਮਾਰਿਕਪਟਿਗ੍ਗਹਣਾਤਿ ਏਤ੍ਥ ਇਤ੍ਥੀਤਿ ਪੁਰਿਸਨ੍ਤਰਗਤਾ, ਇਤਰਾ ਕੁਮਾਰਿਕਾ ਨਾਮ. ਤਾਸਂ ਪਟਿਗ੍ਗਹਣਮ੍ਪਿ ਆਮਸਨਮ੍ਪਿ ਅਕਪ੍ਪਿਯਮੇਵ.
੭. ਦਾਸਿਦਾਸਸੁਤ੍ਤਵਣ੍ਣਨਾ
੧੧੫੭. ਦਾਸਿਦਾਸਪਟਿਗ੍ਗਹਣਾਤਿ ਏਤ੍ਥ ਦਾਸਿਦਾਸਵਸੇਨੇਵ ਤੇਸਂ ਪਟਿਗ੍ਗਹਣਂ ਨ ਵਟ੍ਟਤਿ, ‘‘ਕਪ੍ਪਿਯਕਾਰਕਂ ਦਮ੍ਮਿ, ਆਰਾਮਿਕਂ ਦਮ੍ਮੀ’’ਤਿ ਏਵਂ ਵੁਤ੍ਤੇ ਪਨ ਵਟ੍ਟਤਿ.
੧੦. ਚਤੁਤ੍ਥਆਮਕਧਞ੍ਞਪੇਯ੍ਯਾਲਵਗ੍ਗੋ
੧. ਖੇਤ੍ਤਵਤ੍ਥੁਸੁਤ੍ਤਵਣ੍ਣਨਾ
੧੧੬੧. ਅਜੇਲ਼ਕਾਦੀਸੁ ਖੇਤ੍ਤਵਤ੍ਥੁਪਰਿਯੋਸਾਨੇਸੁ ਕਪ੍ਪਿਯਾਕਪ੍ਪਿਯਨਯੋ ਵਿਨਯਵਸੇਨ ਉਪਪਰਿਕ੍ਖਿਤਬ੍ਬੋ. ਤਤ੍ਥ ਖੇਤ੍ਤਂ ਨਾਮ ਯਸ੍ਮਿਂ ਪੁਬ੍ਬਣ੍ਣਂ ਰੁਹਤਿ. ਵਤ੍ਥੁ ਨਾਮ ਯਸ੍ਮਿਂ ਅਪਰਣ੍ਣਂ ਰੁਹਤਿ. ਯਤ੍ਥ ਵਾ ਉਭਯਂ ਰੁਹਤਿ, ਤਂ ਖੇਤ੍ਤਂ. ਤਦਤ੍ਥਾਯ ਅਕਤਭੂਮਿਭਾਗੋ ਵਤ੍ਥੁ. ਖੇਤ੍ਤਵਤ੍ਥੁਸੀਸੇਨ ਚੇਤ੍ਥ ਵਾਪਿਤਲ਼ਾਕਾਦੀਨਿਪਿ ਸਙ੍ਗਹਿਤਾਨੇਵ.
੨-੩. ਕਯਵਿਕ੍ਕਯਸੁਤ੍ਤਾਦਿਵਣ੍ਣਨਾ
੧੧੬੨-੬੩. ਕਯਵਿਕ੍ਕਯਾਤਿ ਕਯਾ ਚ ਵਿਕ੍ਕਯਾ ਚ. ਦੂਤੇਯ੍ਯਂ ਵੁਚ੍ਚਤਿ ਦੂਤਕਮ੍ਮਂ, ਗਿਹੀਨਂ ਪਣ੍ਣਂ ਵਾ ਸਾਸਨਂ ਵਾ ਗਹੇਤ੍ਵਾ ਤਤ੍ਥ ਤਤ੍ਥ ਗਮਨਂ. ਪਹਿਣਗਮਨਂ ਵੁਚ੍ਚਤਿ ਘਰਾ ਘਰਂ ਪੇਸਿਤਸ੍ਸ ਖੁਦ੍ਦਕਗਮਨਂ. ਅਨੁਯੋਗੋ ਨਾਮ ਤਦੁਭਯਕਰਣਂ. ਤਸ੍ਮਾ ਦੂਤੇਯ੍ਯਪਹਿਣਗਮਨਾਨੁਯੋਗਾਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ.
੪. ਤੁਲਾਕੂਟਸੁਤ੍ਤਵਣ੍ਣਨਾ
੧੧੬੪. ਤੁਲਾਕੂਟਾਦੀਸੁ ਕੂਟਨ੍ਤਿ ਵਞ੍ਚਨਂ. ਤਤ੍ਥ ਤੁਲਾਕੂਟਂ ਤਾਵ ਰੂਪਕੂਟਂ, ਅਙ੍ਗਕੂਟਂ, ਗਹਣਕੂਟਂ, ਪਟਿਚ੍ਛਨ੍ਨਕੂਟਨ੍ਤਿ ਚਤੁਬ੍ਬਿਧਂ ਹੋਤਿ. ਤਤ੍ਥ ਰੂਪਕੂਟਂ ਨਾਮ ਦ੍ਵੇ ਤੁਲਾ ਸਮਰੂਪਾ ਕਤ੍ਵਾ ਗਣ੍ਹਨ੍ਤੋ ਮਹਤਿਯਾ ਗਣ੍ਹਾਤਿ, ਦਦਨ੍ਤੋ ਖੁਦ੍ਦਿਕਾਯ ਦੇਤਿ. ਅਙ੍ਗਕੂਟਂ ਨਾਮ ਗਣ੍ਹਨ੍ਤੋ ਪਚ੍ਛਾਭਾਗੇ ਹਤ੍ਥੇਨ ਤੁਲਂ ਅਕ੍ਕਮਤਿ, ਦਦਨ੍ਤੋ ਪੁਬ੍ਬਭਾਗੇ. ਗਹਣਕੂਟਂ ਨਾਮ ਗਣ੍ਹਨ੍ਤੋ ਮੂਲੇ ਰਜ੍ਜੁਂ ਗਣ੍ਹਾਤਿ, ਦਦਨ੍ਤੋ ਅਗ੍ਗੇ. ਪਟਿਚ੍ਛਨ੍ਨਕੂਟਂ ਨਾਮ ਤੁਲਂ ਸੁਸਿਰਂ ਕਤ੍ਵਾ ਅਨ੍ਤੋ ਅਯਚੁਣ੍ਣਂ ਪਕ੍ਖਿਪਿਤ੍ਵਾ ਗਣ੍ਹਨ੍ਤੋ ਤਂ ਪਚ੍ਛਾਭਾਗੇ ਕਰੋਤਿ, ਦਦਨ੍ਤੋ ਅਗ੍ਗਭਾਗੇ.
ਕਂਸੋ ਵੁਚ੍ਚਤਿ ਸੁਵਣ੍ਣਪਾਤਿ, ਤਾਯ ਵਞ੍ਚਨਂ ਕਂਸਕੂਟਂ. ਕਥਂ? ਏਕਂ ਸੁਵਣ੍ਣਪਾਤਿਂ ਕਤ੍ਵਾ ਅਞ੍ਞਾ ਦ੍ਵੇ ਤਿਸ੍ਸੋ ਲੋਹਪਾਤਿਯੋ ਸੁਵਣ੍ਣਵਣ੍ਣਾ ਕਰੋਨ੍ਤਿ. ਤਤੋ ਜਨਪਦਂ ਗਨ੍ਤ੍ਵਾ, ਕਿਞ੍ਚਿਦੇਵ ਅਡ੍ਢਕੁਲਂ ਪਵਿਸਿਤ੍ਵਾ, ‘‘ਸੁਵਣ੍ਣਭਾਜਨਾਨਿ ਕਿਣਥਾ’’ਤਿ ਵਤ੍ਵਾ, ਅਗ੍ਘੇ ਪੁਚ੍ਛਿਤੇ ਸਮਗ੍ਘਤਰਂ ਦਾਤੁਕਾਮਾ ਹੋਨ੍ਤਿ, ਤਤੋ ਤੇਹਿ ‘‘ਕਥਂ ਇਮੇਸਂ ਸੁਵਣ੍ਣਭਾਵੋ ਜਾਨਿਤਬ੍ਬੋ’’ਤਿ ਵੁਤ੍ਤੇ ‘‘ਵੀਮਂਸਿਤ੍ਵਾ ਗਣ੍ਹਥਾ’’ਤਿ ਸੁਵਣ੍ਣਪਾਤਿਂ ਪਾਸਾਣੇ ਘਂਸਿਤ੍ਵਾ ਸਬ੍ਬਪਾਤਿਯੋ ਦਤ੍ਵਾ ਗਚ੍ਛਨ੍ਤਿ.
ਮਾਨਕੂਟਂ ਹਦਯਭੇਦ-ਸਿਖਾਭੇਦ-ਰਜ੍ਜੁਭੇਦਵਸੇਨ ਤਿਵਿਧਂ ਹੋਤਿ. ਤਤ੍ਥ ਹਦਯਭੇਦੋ ਸਪ੍ਪਿਤੇਲਾਦਿਮਿਨਨਕਾਲੇ ਲਬ੍ਭਤਿ. ਤਾਨਿ ਹਿ ਗਣ੍ਹਨ੍ਤੋ ਹੇਟ੍ਠਾਛਿਦ੍ਦੇਨ ਮਾਨੇਨ ‘‘ਸਣਿਕਂ ਆਸਿਞ੍ਚਾ’’ਤਿ ਵਤ੍ਵਾ ਅਨ੍ਤੋਭਾਜਨੇ ਬਹੁਂ ਪਗ੍ਘਰਾਪੇਤ੍ਵਾ ਗਣ੍ਹਾਤਿ, ਦਦਨ੍ਤੋ ਛਿਦ੍ਦਂ ਪਿਧਾਯ ਸੀਘਂ ਪੂਰੇਤ੍ਵਾ ਦੇਤਿ. ਸਿਖਾਭੇਦੋ ਤਿਲਤਣ੍ਡੁਲਾਦਿਮਿਨਨਕਾਲੇ ਲਬ੍ਭਤਿ. ਤਾਨਿ ਹਿ ਗਣ੍ਹਨ੍ਤੋ ਸਣਿਕਂ ਸਿਖਂ ਉਸ੍ਸਾਪੇਤ੍ਵਾ ਗਣ੍ਹਾਤਿ, ਦਦਨ੍ਤੋ ਵੇਗੇਨ ਸਿਖਂ ਭਿਨ੍ਦਨ੍ਤੋ ਦੇਤਿ. ਰਜ੍ਜੁਭੇਦੋ ਖੇਤ੍ਤਵਤ੍ਥੁਮਿਨਨਕਾਲੇ ਲਬ੍ਭਤਿ. ਲਞ੍ਜਂ ਅਲਭਨ੍ਤਾ ਹਿ ਖੇਤ੍ਤਂ ਅਮਹਨ੍ਤਂ ਮਹਨ੍ਤਂ ਕਤ੍ਵਾ ਮਿਨਨ੍ਤਿ.
੫. ਉਕ੍ਕੋਟਨਸੁਤ੍ਤਵਣ੍ਣਨਾ
੧੧੬੫. ਉਕ੍ਕੋਟਨਾਦੀਸੁ ਉਕ੍ਕੋਟਨਨ੍ਤਿ ਸਾਮਿਕੇ ਅਸ੍ਸਾਮਿਕੇ ਕਾਤੁਂ ਲਞ੍ਜਗ੍ਗਹਣਂ. ਵਞ੍ਚਨਨ੍ਤਿ ਤੇਹਿ ਤੇਹਿ ਉਪਾਯੇਹਿ ਪਰੇਸਂ ਵਞ੍ਚਨਂ. ਤਤ੍ਰਿਦਮੇਕਂਵਤ੍ਥੁ – ਏਕੋ ਕਿਰ ਲੁਦ੍ਦਕੋ ਮਿਗਞ੍ਚ ਮਿਗਪੋਤਕਞ੍ਚ ਗਹੇਤ੍ਵਾ ਆਗਚ੍ਛਤਿ. ਤਮੇਕੋ ਧੁਤ੍ਤੋ ‘‘ਕਿਂ, ਭੋ, ਮਿਗੋ ਅਗ੍ਘਤਿ, ਕਿਂ ਮਿਗਪੋਤਕੋ’’ਤਿ?, ਆਹ. ‘‘ਮਿਗੋ ਦ੍ਵੇ ਕਹਾਪਣੇ, ਮਿਗਪੋਤਕੋ ਏਕ’’ਨ੍ਤਿ ਚ ਵੁਤ੍ਤੇ ਕਹਾਪਣਂ ਦਤ੍ਵਾ, ਮਿਗਪੋਤਕਂ ਗਹੇਤ੍ਵਾ ਥੋਕਂ ਗਨ੍ਤ੍ਵਾ ਨਿਵਤ੍ਤੋ ‘‘ਨ ਮੇ, ਭੋ, ਮਿਗਪੋਤਕੇਨ ਅਤ੍ਥੋ, ਮਿਗਂ ਮੇ ਦੇਹੀ’’ਤਿ ਆਹ. ਤੇਨ ਹਿ ਦ੍ਵੇ ਕਹਾਪਣੇ ਦੇਹੀਤਿ. ਨਨੁ, ਭੋ, ਮਯਾ ਪਠਮਂ ਏਕੋ ਕਹਾਪਣੋ ਦਿਨ੍ਨੋਤਿ. ਆਮ ਦਿਨ੍ਨੋਤਿ. ਇਮਮ੍ਪਿ ਮਿਗਪੋਤਕਂ ਗਣ੍ਹ, ਏਵਂ ਸੋ ਚ ਕਹਾਪਣੋ, ਅਯਞ੍ਚ ਕਹਾਪਣਗ੍ਘਨਕੋ ਮਿਗਪੋਤਕੋਤਿ ਦ੍ਵੇ ਕਹਾਪਣਾ ਭਵਿਸ੍ਸਨ੍ਤੀਤਿ. ਸੋ ‘‘ਕਾਰਣਂ ਵਦਤੀ’’ਤਿ ਸਲ੍ਲਕ੍ਖੇਤ੍ਵਾ ਮਿਗਪੋਤਕਂ ਗਹੇਤ੍ਵਾ ਮਿਗਂ ਅਦਾਸੀਤਿ.
ਨਿਕਤੀਤਿ ਯੋਗਵਸੇਨ ਵਾ ਮਾਯਾਵਸੇਨ ਵਾ ਅਪਾਮਙ੍ਗਂ ਪਾਮਙ੍ਗਨ੍ਤਿ ਅਮਣਿਂ ਮਣਿਨ੍ਤਿ, ਅਸੁਵਣ੍ਣਂ ਸੁਵਣ੍ਣਨ੍ਤਿ ਕਤ੍ਵਾ ਪਤਿਰੂਪਕੇਨ ਵਞ੍ਚਨਂ. ਸਾਚਿਯੋਗੋਤਿ ਕੁਟਿਲਯੋਗੋ. ਏਤੇਸਂਯੇਵ ਉਕ੍ਕੋਟਨਾਦੀਨਮੇਤਂ ਨਾਮਂ. ਤਸ੍ਮਾ ਉਕ੍ਕੋਟਨਸਾਚਿਯੋਗਾ ਵਞ੍ਚਨਸਾਚਿਯੋਗਾ ਨਿਕਤਿਸਾਚਿਯੋਗਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਕੇਚਿ ਅਞ੍ਞਂ ਦਸ੍ਸੇਤ੍ਵਾ ਅਞ੍ਞਸ੍ਸ ਪਰਿਵਤ੍ਤਨਂ ਸਾਚਿਯੋਗੋਤਿ ਵਦਨ੍ਤਿ. ਤਂ ਪਨ ਵਞ੍ਚਨੇਨੇਵ ਸਙ੍ਗਹਿਤਂ.
੬-੧੧. ਛੇਦਨਸੁਤ੍ਤਾਦਿਵਣ੍ਣਨਾ
੧੧੬੬-੭੧. ਛੇਦਨਾਦੀਸੁ ਛੇਦਨਨ੍ਤਿ ਹਤ੍ਥਚ੍ਛੇਦਨਾਦਿ. ਵਧੋਤਿ ਮਰਣਂ. ਬਨ੍ਧੋਤਿ ਰਜ੍ਜੁਬਨ੍ਧਨਾਦੀਹਿ ਬਨ੍ਧਨਂ. ਵਿਪਰਾਮੋਸੋਤਿ ਹਿਮਵਿਪਰਾਮੋਸੋ, ਗੁਮ੍ਬਵਿਪਰਾਮੋਸੋਤਿ ਦੁਵਿਧੋ. ਯਂ ਹਿਮਪਾਤਸਮਯੇ ਹਿਮੇਨ ਪਟਿਚ੍ਛਨ੍ਨਾ ਹੁਤ੍ਵਾ ਮਗ੍ਗਪਟਿਪਨ੍ਨਂ ਜਨਂ ਮੁਸਨ੍ਤਿ, ਅਯਂ ਹਿਮਵਿਪਰਾਮੋਸੋ. ਯਂ ਗੁਮ੍ਬਾਦਿਪਟਿਚ੍ਛਨ੍ਨਾ ਮੁਸਨ੍ਤਿ, ਅਯਂ ਗੁਮ੍ਬਵਿਪਰਾਮੋਸੋ.
ਆਲੋਪੋ ਵੁਚ੍ਚਤਿ ਗਾਮਨਿਗਮਾਦੀਨਂ ਵਿਲੋਪਕਰਣਂ. ਸਹਸਾਕਾਰੋਤਿ ਸਾਹਸਕਿਰਿਯਾ, ਗੇਹਂ ਪਵਿਸਿਤ੍ਵਾ, ਮਨੁਸ੍ਸਾਨਂ ਉਰੇ ਸਤ੍ਥਂ ਠਪੇਤ੍ਵਾ, ਇਚ੍ਛਿਤਭਣ੍ਡਗ੍ਗਹਣਂ. ਏਵਮੇਤਸ੍ਮਾ ਛੇਦਨਵਧਬਨ੍ਧਨਵਿਪਰਾਮੋਸਆਲੋਪਸਹਸਾਕਾਰਾ ਪਟਿਵਿਰਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਆਮਕਧਞ੍ਞਪੇਯ੍ਯਾਲਵਣ੍ਣਨਾ ਨਿਟ੍ਠਿਤਾ.
ਇਤਿ ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ
ਮਹਾਵਗ੍ਗਵਣ੍ਣਨਾ ਨਿਟ੍ਠਿਤਾ.