੧੦. ਆਨਾਪਾਨਸਂਯੁਤ੍ਤਂ
੧. ਏਕਧਮ੍ਮਵਗ੍ਗੋ
੧. ਏਕਧਮ੍ਮਸੁਤ੍ਤਵਣ੍ਣਨਾ
੯੭੭. ਆਨਾਪਾਨਸਂਯੁਤ੍ਤਸ੍ਸ ਪਠਮੇ ਏਕਧਮ੍ਮੋਤਿ ਏਕੋ ਧਮ੍ਮੋ. ਸੇਸਮੇਤ੍ਥ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਸਬ੍ਬਾਕਾਰੇਨ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੨੧੫) ਆਨਾਪਾਨਸ੍ਸਤਿਕਮ੍ਮਟ੍ਠਾਨਨਿਦ੍ਦੇਸੇ ਵੁਤ੍ਤਮੇਵ.
੬. ਅਰਿਟ੍ਠਸੁਤ੍ਤਵਣ੍ਣਨਾ
੯੮੨. ਛਟ੍ਠੇ ਭਾਵੇਥ ਨੋਤਿ ਭਾਵੇਥ ਨੁ. ਕਾਮਚ੍ਛਨ੍ਦੋਤਿ ਪਞ੍ਚਕਾਮਗੁਣਿਕਰਾਗੋ. ਅਜ੍ਝਤ੍ਤਂ ਬਹਿਦ੍ਧਾ ਚ ਧਮ੍ਮੇਸੂਤਿ ਅਜ੍ਝਤ੍ਤਿਕਬਾਹਿਰੇਸੁ ਦ੍ਵਾਦਸਸੁ ਆਯਤਨਧਮ੍ਮੇਸੁ. ਪਟਿਘਸਞ੍ਞਾ ਸੁਪ੍ਪਟਿਵਿਨੀਤਾਤਿ ਪਟਿਘਸਮ੍ਪਯੁਤ੍ਤਸਞ੍ਞਾ ਸੁਟ੍ਠੁ ਪਟਿਵਿਨੀਤਾ, ਸਮੁਚ੍ਛਿਨ੍ਨਾਤਿ ਅਤ੍ਥੋ. ਇਮਿਨਾ ਅਤ੍ਤਨੋ ਅਨਾਗਾਮਿਮਗ੍ਗਂ ਕਥੇਤਿ. ਇਦਾਨਿ ਅਰਹਤ੍ਤਮਗ੍ਗਸ੍ਸ ਵਿਪਸ੍ਸਨਂ ਦਸ੍ਸੇਨ੍ਤੋ ਸੋ ਸਤੋਵ ਅਸ੍ਸਸਿਸ੍ਸਾਮੀਤਿਆਦਿਮਾਹ.
੭. ਮਹਾਕਪ੍ਪਿਨਸੁਤ੍ਤਵਣ੍ਣਨਾ
੯੮੩. ਸਤ੍ਤਮੇ ਇਞ੍ਜਿਤਤ੍ਤਂ ਵਾ ਫਨ੍ਦਿਤਤ੍ਤਂ ਵਾਤਿ ਉਭਯੇਨਪਿ ਚਲਨਮੇਵ ਕਥਿਤਂ.
੮. ਪਦੀਪੋਪਮਸੁਤ੍ਤਵਣ੍ਣਨਾ
੯੮੪. ਅਟ੍ਠਮੇ ਨੇਵ ਕਾਯੋਪਿ ਕਿਲਮਤਿ ਨ ਚਕ੍ਖੂਨੀਤਿ ਅਞ੍ਞੇਸੁ ਹਿ ਕਮ੍ਮਟ੍ਠਾਨੇਸੁ ਕਮ੍ਮਂ ਕਰੋਨ੍ਤਸ੍ਸ ਕਾਯੋਪਿ ਕਿਲਮਤਿ, ਚਕ੍ਖੂਨਿਪਿ ਵਿਹਞ੍ਞਨ੍ਤਿ. ਧਾਤੁਕਮ੍ਮਟ੍ਠਾਨਸ੍ਮਿਞ੍ਹਿ ਕਮ੍ਮਂ ਕਰੋਨ੍ਤਸ੍ਸ ਕਾਯੋ ਕਿਲਮਤਿ, ਯਨ੍ਤੇ ਪਕ੍ਖਿਪਿਤ੍ਵਾ ਪੀਲ਼ਨਾਕਾਰਪ੍ਪਤ੍ਤੋ ਵਿਯ ਹੋਤਿ. ਕਸਿਣਕਮ੍ਮਟ੍ਠਾਨੇ ਕਮ੍ਮਂ ਕਰੋਨ੍ਤਸ੍ਸ ਚਕ੍ਖੂਨਿ ਫਨ੍ਦਨ੍ਤਿ ਕਿਲਮਨ੍ਤਿ, ਨਿਕ੍ਖਮਿਤ੍ਵਾ ਪਤਨਾਕਾਰਪ੍ਪਤ੍ਤਾਨਿ ਵਿਯ ਹੋਨ੍ਤਿ. ਇਮਸ੍ਮਿਂ ਪਨ ਕਮ੍ਮਟ੍ਠਾਨੇ ਕਮ੍ਮਂ ਕਰੋਨ੍ਤਸ੍ਸ ਨੇਵ ਕਾਯੋ ਕਿਲਮਤਿ, ਨ ਅਕ੍ਖੀਨਿ ਵਿਹਞ੍ਞਨ੍ਤਿ. ਤਸ੍ਮਾ ਏਵਮਾਹ.
ਸਬ੍ਬਸੋ ਰੂਪਸਞ੍ਞਾਨਨ੍ਤਿਆਦਿ ਕਸ੍ਮਾ ਵੁਤ੍ਤਂ, ਕਿਂ ਆਨਾਪਾਨੇ ਕਸਿਣੁਗ੍ਘਾਟਨਂ ਲਬ੍ਭਤੀਤਿ? ਤਿਪਿਟਕਚੂਲ਼ਾਭਯਤ੍ਥੇਰੋ ਪਨਾਹ – ‘‘ਯਸ੍ਮਾ ਆਨਾਪਾਨਨਿਮਿਤ੍ਤਂ ਤਾਰਕਰੂਪਮੁਤ੍ਤਾਵਲਿਕਾਦਿਸਦਿਸਂ ਹੁਤ੍ਵਾ ਪਞ੍ਞਾਯਤਿ, ਤਸ੍ਮਾ ਤਤ੍ਥ ਕਸਿਣੁਗ੍ਘਾਟਨਂ ਲਬ੍ਭਤੀ’’ਤਿ. ਤਿਪਿਟਕਚੂਲ਼ਨਾਗਤ੍ਥੇਰੋ ‘‘ਨ ਲਬ੍ਭਤੇਵਾ’’ਤਿ ਆਹ. ਅਲਬ੍ਭਨ੍ਤੇ ਅਯਂ ਅਰਿਯਿਦ੍ਧਿਆਦਿਕੋ ਪਭੇਦੋ ਕਸ੍ਮਾ ਗਹਿਤੋਤਿ? ਆਨਿਸਂਸਦਸ੍ਸਨਤ੍ਥਂ. ਅਰਿਯਂ ਵਾ ਹਿ ਇਦ੍ਧਿਂ ਚਤ੍ਤਾਰਿ ਵਾ ਰੂਪਾਵਚਰਜ੍ਝਾਨਾਨਿ ਚਤਸ੍ਸੋ ਵਾ ਅਰੂਪਸਮਾਪਤ੍ਤਿਯੋ ਨਿਰੋਧਸਮਾਪਤ੍ਤਿਂ ਵਾ ਪਤ੍ਥਯਮਾਨੇਨ ਭਿਕ੍ਖੁਨਾ ਅਯਂ ਆਨਾਪਾਨਸ੍ਸਤਿਸਮਾਧਿ ਸਾਧੁਕਂ ਮਨਸਿਕਾਤਬ੍ਬੋ. ਯਥਾ ਹਿ ਨਗਰੇ ਲਦ੍ਧੇ ਯਂ ਚਤੂਸੁ ਦਿਸਾਸੁ ਉਟ੍ਠਾਨਕਭਣ੍ਡਂ, ਤਂ ਚਤੂਹਿ ਦ੍ਵਾਰੇਹਿ ਨਗਰਮੇਵ ਪਵਿਸਤੀਤਿ, ਜਨਪਦੋ ਲਦ੍ਧੋ ਚ ਹੋਤਿ. ਨਗਰਸ੍ਸੇਵ ਹੇਸੋ ਆਨਿਸਂਸੋ. ਏਵਂ ਆਨਾਪਾਨਸ੍ਸਤਿਸਮਾਧਿਭਾਵਨਾਯ ਆਨਿਸਂਸੋ ਏਸ ਅਰਿਯਿਦ੍ਧਿਆਦਿਕੋ ਪਭੇਦੋ, ਸਬ੍ਬਾਕਾਰੇਨ ਭਾਵਿਤੇ ਆਨਾਪਾਨਸ੍ਸਤਿਸਮਾਧਿਸ੍ਮਿਂ ਸਬ੍ਬਮੇਤਂ ਯੋਗਿਨੋ ਨਿਪ੍ਫਜ੍ਜਤੀਤਿ ਆਨਿਸਂਸਦਸ੍ਸਨਤ੍ਥਂ ਵੁਤ੍ਤਂ. ਸੁਖਞ੍ਚੇਤਿ ਏਤ੍ਥ ਸੋਤਿ ਕਸ੍ਮਾ ਨ ਵੁਤ੍ਤਂ? ਯਸ੍ਮਾ ਭਿਕ੍ਖੂਤਿ ਇਮਸ੍ਮਿਂ ਵਾਰੇ ਨਾਗਤਂ.
੯. ਵੇਸਾਲੀਸੁਤ੍ਤਵਣ੍ਣਨਾ
੯੮੫. ਨਵਮੇ ਵੇਸਾਲਿਯਨ੍ਤਿ ਏਵਂਨਾਮਕੇ ਇਤ੍ਥਿਲਿਙ੍ਗਵਸੇਨ ਪਵਤ੍ਤਵੋਹਾਰੇ ਨਗਰੇ. ਤਞ੍ਹਿ ਨਗਰਂ ਤਿਕ੍ਖਤ੍ਤੁਂ ਪਾਕਾਰਪਰਿਕ੍ਖੇਪਵਡ੍ਢਨੇਨ ਵਿਸਾਲੀਭੂਤਤ੍ਤਾ ਵੇਸਾਲੀਤਿ ਵੁਚ੍ਚਤਿ. ਇਦਮ੍ਪਿ ਚ ਨਗਰਂ ਸਬ੍ਬਞ੍ਞੁਤਂ ਪਤ੍ਤੇਯੇਵ ਸਮ੍ਮਾਸਮ੍ਬੁਦ੍ਧੇ ਸਬ੍ਬਾਕਾਰਵੇਪੁਲ੍ਲਤਂ ਪਤ੍ਤਨ੍ਤਿ ਵੇਦਿਤਬ੍ਬਂ. ਏਵਂ ਗੋਚਰਗਾਮਂ ਦਸ੍ਸੇਤ੍ਵਾ ਨਿਵਾਸਟ੍ਠਾਨਮਾਹ ਮਹਾਵਨੇ ਕੂਟਾਗਾਰਸਾਲਾਯਨ੍ਤਿ. ਤਤ੍ਥ ਮਹਾਵਨਂ ਨਾਮ ਸਯਂਜਾਤਂ ਅਰੋਪਿਮਂ ਸਪਰਿਚ੍ਛੇਦਂ ਮਹਨ੍ਤਂ ਵਨਂ. ਕਪਿਲਵਤ੍ਥੁਸਾਮਨ੍ਤਾ ਪਨ ਮਹਾਵਨਂ ਹਿਮਵਨ੍ਤੇਨ ਸਹ ਏਕਾਬਦ੍ਧਂ ਅਪਰਿਚ੍ਛੇਦਂ ਹੁਤ੍ਵਾ ਮਹਾਸਮੁਦ੍ਦਂ ਆਹਚ੍ਚ ਠਿਤਂ. ਇਦਂ ਤਾਦਿਸਂ ਨ ਹੋਤਿ, ਸਪਰਿਚ੍ਛੇਦਂ ਮਹਨ੍ਤਂ ਵਨਨ੍ਤਿ ਮਹਾਵਨਂ. ਕੂਟਾਗਾਰਸਾਲਾ ਪਨ ਮਹਾਵਨਂ ਨਿਸ੍ਸਾਯ ਕਤੇ ਆਰਾਮੇ ਕੂਟਾਗਾਰਂ ਅਨ੍ਤੋਕਤ੍ਵਾ ਹਂਸਵਟ੍ਟਕਚ੍ਛਨ੍ਨੇਨ ਕਤਾ ਸਬ੍ਬਾਕਾਰਸਮ੍ਪਨ੍ਨਾ ਬੁਦ੍ਧਸ੍ਸ ਭਗਵਤੋ ਗਨ੍ਧਕੁਟੀਤਿ ਵੇਦਿਤਬ੍ਬਾ.
ਅਨੇਕਪਰਿਯਾਯੇਨ ਅਸੁਭਕਥਂ ਕਥੇਤੀਤਿ ਅਨੇਕੇਹਿ ਕਾਰਣੇਹਿ ਅਸੁਭਾਕਾਰਸਨ੍ਦਸ੍ਸਨਪ੍ਪਵਤ੍ਤਂ ਕਾਯਵਿਚ੍ਛਨ੍ਦਨੀਯਕਥਂ ਕਥੇਤਿ. ਸੇਯ੍ਯਥਿਦਂ – ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ ਲੋਮਾ ਨਖਾ ਦਨ੍ਤਾ…ਪੇ… ਮੁਤ੍ਤਨ੍ਤਿ. ਕਿਂ ਵੁਤ੍ਤਂ ਹੋਤਿ? ਭਿਕ੍ਖਵੇ, ਇਮਸ੍ਮਿਂ ਬ੍ਯਾਮਮਤ੍ਤੇ ਕਲ਼ੇਵਰੇ ਸਬ੍ਬਾਕਾਰੇਨਪਿ ਵਿਚਿਨਨ੍ਤੋ ਨ ਕੋਚਿ ਕਿਞ੍ਚਿ ਮੁਤ੍ਤਂ ਵਾ ਮਣਿਂ ਵਾ ਵੇਲ਼ੁਰਿਯਂ ਵਾ ਅਗਰੁਂ ਵਾ ਚਨ੍ਦਨਂ ਵਾ ਕੁਙ੍ਕੁਮਂ ਵਾ ਕਪ੍ਪੁਰਂ ਵਾ ਵਾਸਚੁਣ੍ਣਾਦਿਂ ਵਾ ਅਣੁਮਤ੍ਤਮ੍ਪਿ ਸੁਚਿਭਾਵਂ ਪਸ੍ਸਤਿ, ਅਥ ਖੋ ਪਰਮਦੁਗ੍ਗਨ੍ਧਂ ਜੇਗੁਚ੍ਛਅਸ੍ਸਿਰਿਕਦਸ੍ਸਨਂ ਕੇਸਲੋਮਾਦਿਨਾਨਪ੍ਪਕਾਰਂ ਅਸੁਚਿਮੇਵ ਪਸ੍ਸਤਿ, ਤਸ੍ਮਾ ਨ ਏਤ੍ਥ ਛਨ੍ਦੋ ਵਾ ਰਾਗੋ ਵਾ ਕਰਣੀਯੋ. ਯੇਪਿ ਉਤ੍ਤਮਙ੍ਗੇ ਸਿਰਸਿ ਜਾਤਾ ਕੇਸਾ ਨਾਮ, ਤੇਪਿ ਅਸੁਭਾ ਚੇਵ ਅਸੁਚਿਨੋ ਚ ਪਟਿਕੂਲਾ ਚ. ਸੋ ਚ ਨੇਸਂ ਅਸੁਭਾਸੁਚਿਪਟਿਕੂਲਭਾਵੋ ਵਣ੍ਣਤੋਪਿ ਸਣ੍ਠਾਨਤੋਪਿ ਗਨ੍ਧਤੋਪਿ ਆਸਯਤੋਪਿ ਓਕਾਸਤੋਪੀਤਿ ਪਞ੍ਚਹਾਕਾਰੇਹਿ ਵੇਦਿਤਬ੍ਬੋ. ਏਵਂ ਲੋਮਾਦੀਨਮ੍ਪੀਤਿ ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੩੦੭) ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਇਤਿ ਭਗਵਾ ਏਕਮੇਕਸ੍ਮਿਂ ਕੋਟ੍ਠਾਸੇ ਪਞ੍ਚਪਞ੍ਚਪ੍ਪਭੇਦੇਨ ਅਨੇਕਪਰਿਯਾਯੇਨ ਅਸੁਭਕਥਂ ਕਥੇਤਿ.
ਅਸੁਭਾਯ ਵਣ੍ਣਂ ਭਾਸਤੀਤਿ ਉਦ੍ਧੁਮਾਤਕਾਦਿਵਸੇਨ ਅਸੁਭਮਾਤਿਕਂ ਨਿਕ੍ਖਿਪਿਤ੍ਵਾ ਪਦਭਾਜਨੀਯੇਨ ਤਂ ਵਿਭਜਨ੍ਤੋ ਵਣ੍ਣੇਨ੍ਤੋ ਅਸੁਭਾਯ ਵਣ੍ਣਂ ਭਾਸਤਿ. ਅਸੁਭਭਾਵਨਾਯ ਵਣ੍ਣਂ ਭਾਸਤੀਤਿ ਯਾ ਅਯਂ ਕੇਸਾਦੀਸੁ ਵਾ ਉਦ੍ਧੁਮਾਤਕਾਦੀਸੁ ਵਾ ਅਜ੍ਝਤ੍ਤਬਹਿਦ੍ਧਾਵਤ੍ਥੂਸੁ ਅਸੁਭਾਕਾਰਂ ਗਹੇਤ੍ਵਾ ਪਵਤ੍ਤਸ੍ਸ ਚਿਤ੍ਤਸ੍ਸ ਭਾਵਨਾ ਵਡ੍ਢਨਾ ਫਾਤਿਕਮ੍ਮਂ, ਤਸ੍ਸਾ ਅਸੁਭਭਾਵਨਾਯ ਆਨਿਸਂਸਂ ਦਸ੍ਸੇਨ੍ਤੋ ਵਣ੍ਣਂ ਭਾਸਤਿ, ਗੁਣਂ ਪਰਿਕਿਤ੍ਤੇਤਿ. ਸੇਯ੍ਯਥਿਦਂ – ‘‘ਅਸੁਭਭਾਵਨਾਭਿਯੁਤ੍ਤੋ, ਭਿਕ੍ਖਵੇ, ਭਿਕ੍ਖੁ ਕੇਸਾਦੀਸੁ ਵਾ ਵਤ੍ਥੂਸੁ ਉਦ੍ਧੁਮਾਤਕਾਦੀਸੁ ਵਾ ਪਞ੍ਚਙ੍ਗਵਿਪ੍ਪਹੀਨਂ ਪਞ੍ਚਙ੍ਗਸਮਨ੍ਨਾਗਤਂ ਤਿਵਿਧਕਲ੍ਯਾਣਂ ਦਸਲਕ੍ਖਣਸਮ੍ਪਨ੍ਨਂ ਪਠਮਜ੍ਝਾਨਂ ਪਟਿਲਭਤਿ. ਸੋ ਤਂ ਪਠਮਜ੍ਝਾਨਸਙ੍ਖਾਤਂ ਚਿਤ੍ਤਮਞ੍ਜੂਸਂ ਨਿਸ੍ਸਾਯ ਵਿਪਸ੍ਸਨਂ ਵਡ੍ਢੇਤ੍ਵਾ ਉਤ੍ਤਮਤ੍ਥਂ ਅਰਹਤ੍ਤਂ ਪਾਪੁਣਾਤੀ’’ਤਿ.
ਇਚ੍ਛਾਮਹਂ, ਭਿਕ੍ਖਵੇ, ਅਡ੍ਢਮਾਸਂ ਪਟਿਸਲ੍ਲੀਯਿਤੁਨ੍ਤਿ ਅਹਂ, ਭਿਕ੍ਖਵੇ, ਏਕਂ ਅਡ੍ਢਮਾਸਂ ਪਟਿਸਲ੍ਲੀਯਿਤੁਂ ਨਿਲੀਯਿਤੁਂ ਏਕਕੋਵ ਹੁਤ੍ਵਾ ਵਿਹਰਿਤੁਂ ਇਚ੍ਛਾਮੀਤਿ ਅਤ੍ਥੋ. ਨਾਮ੍ਹਿ ਕੇਨਚਿ ਉਪਸਙ੍ਕਮਿਤਬ੍ਬੋ ਅਞ੍ਞਤ੍ਰ ਏਕੇਨ ਪਿਣ੍ਡਪਾਤਨੀਹਾਰਕੇਨਾਤਿ ਯੋ ਅਤ੍ਤਨਾ ਪਯੁਤ੍ਤਵਾਚਂ ਅਕਤ੍ਵਾ ਮਮਤ੍ਥਾਯ ਸਦ੍ਧੇਸੁ ਕੁਲੇਸੁ ਪਟਿਯਤ੍ਤਪਿਣ੍ਡਪਾਤਂ ਨੀਹਰਿਤ੍ਵਾ ਮਯ੍ਹਂ ਉਪਨਾਮੇਤਿ, ਤਂ ਪਿਣ੍ਡਪਾਤਨੀਹਾਰਕਂ ਏਕਂ ਭਿਕ੍ਖੁਂ ਠਪੇਤ੍ਵਾ ਨਾਮ੍ਹਿ ਅਞ੍ਞੇਨ ਕੇਨਚਿ ਭਿਕ੍ਖੁਨਾ ਵਾ ਗਹਟ੍ਠੇਨ ਵਾ ਉਪਸਙ੍ਕਮਿਤਬ੍ਬੋਤਿ.
ਕਸ੍ਮਾ ਪਨ ਏਵਮਾਹਾਤਿ? ਅਤੀਤੇ ਕਿਰ ਪਞ੍ਚਸਤਾ ਮਿਗਲੁਦ੍ਦਕਾ ਮਹਤੀਹਿ ਦਣ੍ਡਵਾਗੁਰਾਦੀਹਿ ਅਰਞ੍ਞਂ ਪਰਿਕ੍ਖਿਪਿਤ੍ਵਾ ਹਟ੍ਠਤੁਟ੍ਠਾ ਏਕਤੋਯੇਵ ਯਾਵਜੀਵਂ ਮਿਗਪਕ੍ਖਿਘਾਤਕਮ੍ਮੇਨ ਜੀਵਿਕਂ ਕਪ੍ਪੇਤ੍ਵਾ ਨਿਰਯੇ ਉਪ੍ਪਨ੍ਨਾ. ਤੇ ਤਤ੍ਥ ਪਚ੍ਚਿਤ੍ਵਾ ਪੁਬ੍ਬੇ ਕਤੇਨ ਕੇਨਚਿਦੇਵ ਕੁਸਲਕਮ੍ਮੇਨ ਮਨੁਸ੍ਸੇਸੁ ਉਪ੍ਪਨ੍ਨਾ ਕਲ੍ਯਾਣੂਪਨਿਸ੍ਸਯਵਸੇਨ ਸਬ੍ਬੇਪਿ ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਞ੍ਚ ਉਪਸਮ੍ਪਦਞ੍ਚ ਲਭਿਂਸੁ. ਤੇਸਂ ਤਤੋ ਮੂਲਾਕੁਸਲਕਮ੍ਮਤੋ ਅਵਿਪਕ੍ਕਵਿਪਾਕਾ ਅਪਰਾਪਰਚੇਤਨਾ ਤਸ੍ਮਿਂ ਅਡ੍ਢਮਾਸਬ੍ਭਨ੍ਤਰੇ ਅਤ੍ਤੂਪਕ੍ਕਮੇਨ ਚ ਪਰੂਪਕ੍ਕਮੇਨ ਚ ਜੀਵਿਤੂਪਚ੍ਛੇਦਾਯ ਓਕਾਸਮਕਾਸਿ. ਤਂ ਭਗਵਾ ਅਦ੍ਦਸ. ਕਮ੍ਮਵਿਪਾਕੋ ਚ ਨਾਮ ਨ ਸਕ੍ਕਾ ਕੇਨਚਿ ਪਟਿਬਾਹਿਤੁਂ. ਤੇਸੁ ਚ ਭਿਕ੍ਖੂਸੁ ਪੁਥੁਜ੍ਜਨਾਪਿ ਅਤ੍ਥਿ, ਸੋਤਾਪਨ੍ਨਸਕਦਾਗਾਮਿਅਨਾਗਾਮਿਖੀਣਾਸਵਾਪਿ. ਤਤ੍ਥ ਖੀਣਾਸਵਾ ਅਪ੍ਪਟਿਸਨ੍ਧਿਕਾ, ਇਤਰੇ ਅਰਿਯਸਾਵਕਾ ਨਿਯਤਗਤਿਕਾ ਸੁਗਤਿਪਰਾਯਣਾ, ਪੁਥੁਜ੍ਜਨਾਨਂ ਗਤਿ ਅਨਿਯਤਾ.
ਅਥ ਭਗਵਾ ਚਿਨ੍ਤੇਸਿ – ‘‘ਇਮੇ ਅਤ੍ਤਭਾਵੇ ਛਨ੍ਦਰਾਗੇਨ ਮਰਣਭਯਭੀਤਾ ਨ ਸਕ੍ਖਿਸ੍ਸਨ੍ਤਿ ਗਤਿਂ ਵਿਸੋਧੇਤੁਂ, ਹਨ੍ਦ ਨੇਸਂ ਛਨ੍ਦਰਾਗਪ੍ਪਹਾਨਾਯ ਅਸੁਭਕਥਂ ਕਥੇਮਿ. ਤਂ ਸੁਤ੍ਵਾ ਅਤ੍ਤਭਾਵੇ ਵਿਗਤਚ੍ਛਨ੍ਦਰਾਗਤਾਯ ਗਤਿਵਿਸੋਧਨਂ ਕਤ੍ਵਾ ਸਗ੍ਗੇ ਪਟਿਸਨ੍ਧਿਂ ਗਣ੍ਹਿਸ੍ਸਨ੍ਤਿ, ਏਵਂ ਤੇਸਂ ਮਮ ਸਨ੍ਤਿਕੇ ਪਬ੍ਬਜ੍ਜਾ ਸਾਤ੍ਥਿਕਾ ਭਵਿਸ੍ਸਤੀ’’ਤਿ. ਤਤੋ ਤੇਸਂ ਅਨੁਗ੍ਗਹਾਯ ਅਸੁਭਕਥਂ ਕਥੇਸਿ ਕਮ੍ਮਟ੍ਠਾਨਸੀਸੇਨ, ਨੋ ਮਰਣਵਣ੍ਣਸਂਵਣ੍ਣਨਾਧਿਪ੍ਪਾਯੇਨ. ਕਥੇਤ੍ਵਾ ਚ ਪਨਸ੍ਸ ਏਤਦਹੋਸਿ – ‘‘ਸਚੇ ਇਮਂ ਅਡ੍ਢਮਾਸਂ ਮਂ ਭਿਕ੍ਖੂ ਪਸ੍ਸਿਸ੍ਸਨ੍ਤਿ, ‘ਅਜ੍ਜ ਏਕੋ ਭਿਕ੍ਖੁ ਮਤੋ, ਅਜ੍ਜ ਦ੍ਵੇ…ਪੇ… ਅਜ੍ਜ ਦਸਾ’ਤਿ ਆਗਨ੍ਤ੍ਵਾ ਆਰੋਚੇਸ੍ਸਨ੍ਤਿ, ਅਯਞ੍ਚ ਕਮ੍ਮਵਿਪਾਕੋ ਨ ਸਕ੍ਕਾ ਮਯਾ ਵਾ ਅਞ੍ਞੇਨ ਵਾ ਪਟਿਬਾਹਿਤੁਂ, ਸ੍ਵਾਹਂ ਤਂ ਸੁਤ੍ਵਾਪਿ ਕਿਂ ਕਰਿਸ੍ਸਾਮਿ, ਕਿਂ ਮੇ ਅਨਤ੍ਥਕੇਨ ਅਨਯਬ੍ਯਸਨੇਨ ਸੁਤੇਨ, ਹਨ੍ਦਾਹਂ ਭਿਕ੍ਖੂਨਂ ਅਦਸ੍ਸਨਂ ਉਪਗਚ੍ਛਾਮੀ’’ਤਿ. ਤਸ੍ਮਾ ਏਵਮਾਹ – ‘‘ਇਚ੍ਛਾਮਹਂ, ਭਿਕ੍ਖਵੇ, ਅਡ੍ਢਮਾਸਂ ਪਟਿਸਲ੍ਲੀਯਿਤੁਂ, ਨਾਮ੍ਹਿ ਕੇਨਚਿ ਉਪਸਙ੍ਕਮਿਤਬ੍ਬੋ ਅਞ੍ਞਤ੍ਰ ਏਕੇਨ ਪਿਣ੍ਡਪਾਤਨੀਹਾਰਕੇਨਾ’’ਤਿ.
ਅਪਰੇ ਪਨਾਹੁ – ‘‘ਪਰੂਪਵਾਦਵਿਵਜ੍ਜਨਤ੍ਥਂ ਏਵਂ ਵਤ੍ਵਾ ਪਟਿਸਲ੍ਲੀਨੋ’’ਤਿ. ਪਰੇ ਕਿਰ ਭਗਵਨ੍ਤਂ ਉਪਵਦਿਸ੍ਸਨ੍ਤਿ – ‘‘ਅਯਂ ‘ਸਬ੍ਬਞ੍ਞੂ ਅਹਂ ਸਦ੍ਧਮ੍ਮਵਰਚਕ੍ਕਵਤ੍ਤੀ’ਤਿ ਪਟਿਜਾਨਮਾਨੋ ਅਤ੍ਤਨੋਪਿ ਸਾਵਕੇ ਅਞ੍ਞਮਞ੍ਞਂ ਘਾਤੇਨ੍ਤੇ ਨਿਵਾਰੇਤੁਂ ਨ ਸਕ੍ਕੋਤਿ, ਕਿਂ ਅਞ੍ਞਂ ਸਕ੍ਖਿਸ੍ਸਤੀ’’ਤਿ? ਤਤ੍ਰ ਪਣ੍ਡਿਤਾ ਵਕ੍ਖਨ੍ਤਿ – ‘‘ਭਗਵਾ ਪਟਿਸਲ੍ਲਾਨਮਨੁਯੁਤ੍ਤੋ ਨ ਇਮਂ ਪਵਤ੍ਤਿਂ ਜਾਨਾਤਿ, ਕੋਚਿਸ੍ਸ ਆਰੋਚਯਿਤਾਪਿ ਨਤ੍ਥਿ, ਸਚੇ ਜਾਨੇਯ੍ਯ ਅਦ੍ਧਾ ਨਿਵਾਰੇਯ੍ਯਾ’’ਤਿ. ਇਦਂ ਪਨ ਇਚ੍ਛਾਮਤ੍ਤਂ, ਪਠਮਮੇਵੇਤ੍ਥ ਕਾਰਣਂ. ਨਾਸ੍ਸੁਧਾਤਿ ਏਤ੍ਥ ਅਸ੍ਸੁਧਾਤਿ ਪਦਪੂਰਣਮਤ੍ਤੇ ਅਵਧਾਰਣਤ੍ਥੇ ਵਾ ਨਿਪਾਤੋ, ਨੇਵ ਕੋਚਿ ਭਗਵਨ੍ਤਂ ਉਪਸਙ੍ਕਮੀਤਿ ਅਤ੍ਥੋ.
ਅਨੇਕੇਹਿ ਵਣ੍ਣਸਣ੍ਠਾਨਾਦੀਹਿ ਕਾਰਣੇਹਿ ਵੋਕਾਰੋ ਅਸ੍ਸਾਤਿ ਅਨੇਕਾਕਾਰਵੋਕਾਰੋ. ਅਨੇਕਾਕਾਰਵੋਕਿਣ੍ਣੋ ਅਨੇਕਾਕਾਰੇਨ ਸਮ੍ਮਿਸ੍ਸੋਤਿ ਵੁਤ੍ਤਂ ਹੋਤਿ. ਕੋ ਸੋ? ਅਸੁਭਭਾਵਨਾਨੁਯੋਗੋ, ਤਂ ਅਨੇਕਾਕਾਰਵੋਕਾਰਂ. ਅਸੁਭਭਾਵਨਾਨੁਯੋਗਮਨੁਯੁਤ੍ਤਾ ਵਿਹਰਨ੍ਤੀਤਿ ਯੁਤ੍ਤਪ੍ਪਯੁਤ੍ਤਾ ਵਿਹਰਨ੍ਤਿ. ਅਟ੍ਟੀਯਮਾਨਾਤਿ ਤੇਨ ਕਾਯੇਨ ਅਟ੍ਟਾ ਦੁਕ੍ਖਿਤਾ ਹੋਨ੍ਤਿ. ਹਰਾਯਮਾਨਾਤਿ ਲਜ੍ਜਮਾਨਾ. ਜਿਗੁਚ੍ਛਮਾਨਾਤਿ ਜਿਗੁਚ੍ਛਂ ਉਪ੍ਪਾਦਯਮਾਨਾ. ਸਤ੍ਥਹਾਰਕਂ ਪਰਿਯੇਸਨ੍ਤੀਤਿ ਜੀਵਿਤਹਰਣਕਸਤ੍ਥਂ ਪਰਿਯੇਸਨ੍ਤਿ. ਨ ਕੇਵਲਞ੍ਚ ਤੇ ਸਤ੍ਥਂ ਪਰਿਯੇਸਿਤ੍ਵਾ ਅਤ੍ਤਨਾ ਵਾ ਅਤ੍ਤਾਨਂ ਜੀਵਿਤਾ ਵੋਰੋਪੇਨ੍ਤਿ, ਮਿਗਲਣ੍ਡਿਕਮ੍ਪਿ ਪਨ ਸਮਣਕੁਤ੍ਤਕਂ ਉਪਸਙ੍ਕਮਿਤ੍ਵਾ, ‘‘ਸਾਧੁ ਨੋ, ਆਵੁਸੋ, ਜੀਵਿਤਾ ਵੋਰੋਪੇਹੀ’’ਤਿ ਵਦਨ੍ਤਿ. ਏਤ੍ਥ ਚ ਅਰਿਯਾ ਨੇਵ ਪਾਣਾਤਿਪਾਤਂ ਕਰਿਂਸੁ, ਨ ਸਮਾਦਪੇਸੁਂ, ਨ ਸਮਨੁਞ੍ਞਾ ਅਹੇਸੁਂ. ਪੁਥੁਜ੍ਜਨਾ ਪਨ ਸਬ੍ਬਮਕਂਸੁ.
ਪਟਿਸਲ੍ਲਾਨਾ ਵੁਟ੍ਠਿਤੋਤਿ ਤੇਸਂ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਜੀਵਿਤਕ੍ਖਯਪ੍ਪਤ੍ਤਭਾਵਂ ਞਤ੍ਵਾ ਤਤੋ ਏਕੀਭਾਵਤੋ ਵੁਟ੍ਠਿਤੋ ਜਾਨਨ੍ਤੋਪਿ ਅਜਾਨਨ੍ਤੋ ਵਿਯ ਕਥਾਸਮੁਟ੍ਠਾਪਨਤ੍ਥਂ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ. ਕਿਂ ਨੁ ਖੋ, ਆਨਨ੍ਦ, ਤਨੁਭੂਤੋ ਵਿਯ ਭਿਕ੍ਖੁਸਙ੍ਘੋਤਿ ਇਤੋ, ਆਨਨ੍ਦ, ਪੁਬ੍ਬੇ ਬਹੂ ਭਿਕ੍ਖੂ ਏਕਤੋ ਉਪਟ੍ਠਾਨਂ ਆਗਚ੍ਛਨ੍ਤਿ, ਉਦ੍ਦੇਸਂ ਪਰਿਪੁਚ੍ਛਂ ਗਣ੍ਹਨ੍ਤਿ, ਸਜ੍ਝਾਯਨ੍ਤਿ, ਏਕਪਜ੍ਜੋਤੋ ਵਿਯ ਆਰਾਮੋ ਦਿਸ੍ਸਤਿ. ਇਦਾਨਿ ਪਨ ਅਡ੍ਢਮਾਸਮਤ੍ਤਸ੍ਸ ਅਚ੍ਚਯੇਨ ਤਨੁਭੂਤੋ ਵਿਯ ਤਨੁਕੋ ਮਨ੍ਦੋ ਅਪ੍ਪਕੋ ਵਿਰਲ਼ੋ ਵਿਯ ਜਾਤੋ ਭਿਕ੍ਖੁਸਙ੍ਘੋ. ਕਿਂ ਨੁ ਖੋ ਕਾਰਣਂ? ਕਿਂ ਦਿਸਾਸੁ ਪਕ੍ਕਨ੍ਤਾ ਭਿਕ੍ਖੂਤਿ?
ਅਥਾਯਸ੍ਮਾ ਆਨਨ੍ਦੋ ਕਮ੍ਮਵਿਪਾਕੇਨ ਤੇਸਂ ਜੀਵਿਤਕ੍ਖਯਪ੍ਪਤ੍ਤਿਂ ਅਸਲ੍ਲਕ੍ਖੇਨ੍ਤੋ ਅਸੁਭਕਮ੍ਮਟ੍ਠਾਨਾਨੁਯੋਗਪਚ੍ਚਯਾ ਪਨ ਸਲ੍ਲਕ੍ਖੇਨ੍ਤੋ ਤਥਾ ਹਿ ਪਨ, ਭਨ੍ਤੇ ਭਗਵਾਤਿਆਦਿਂ ਵਤ੍ਵਾ ਭਿਕ੍ਖੂਨਂ ਅਰਹਤ੍ਤਪ੍ਪਤ੍ਤਿਯਾ ਅਞ੍ਞਂ ਕਮ੍ਮਟ੍ਠਾਨਂ ਯਾਚਨ੍ਤੋ, ਸਾਧੁ, ਭਨ੍ਤੇ, ਭਗਵਾਤਿਆਦਿਮਾਹ. ਤਸ੍ਸਤ੍ਥੋ – ਸਾਧੁ, ਭਨ੍ਤੇ, ਭਗਵਾ ਅਞ੍ਞਂ ਕਾਰਣਂ ਆਚਿਕ੍ਖਤੁ, ਯੇਨ ਭਿਕ੍ਖੁਸਙ੍ਘੋ ਅਰਹਤ੍ਤੇ ਪਤਿਟ੍ਠਹੇਯ੍ਯ. ਮਹਾਸਮੁਦ੍ਦਂ ਓਰੋਹਣਤਿਤ੍ਥਾਨਿ ਵਿਯ ਅਞ੍ਞਾਨਿਪਿ ਦਸਾਨੁਸ੍ਸਤਿ, ਦਸਕਸਿਣ, ਚਤੁਧਾਤੁਵਵਤ੍ਥਾਨ, ਬ੍ਰਹ੍ਮਵਿਹਾਰ, ਆਨਾਪਾਨਸ੍ਸਤਿਪਭੇਦਾਨਿ ਬਹੂਨਿ ਨਿਬ੍ਬਾਨੋਰੋਹਣਕਮ੍ਮਟ੍ਠਾਨਾਨਿ ਸਨ੍ਤਿ, ਤੇਸੁ ਭਗਵਾ ਭਿਕ੍ਖੂ ਸਮਸ੍ਸਾਸੇਤ੍ਵਾ ਅਞ੍ਞਤਰਂ ਕਮ੍ਮਟ੍ਠਾਨਂ ਆਚਿਕ੍ਖਤੂਤਿ ਅਧਿਪ੍ਪਾਯੋ.
ਅਥ ਭਗਵਾ ਤਥਾ ਕਾਤੁਕਾਮੋ ਥੇਰਂ ਉਯ੍ਯੋਜੇਨ੍ਤੋ ਤੇਨਹਾਨਨ੍ਦਾਤਿਆਦਿਮਾਹ. ਤਤ੍ਥ ਵੇਸਾਲਿਂ ਉਪਨਿਸ੍ਸਾਯਾਤਿ ਵੇਸਾਲਿਯਂ ਉਪਨਿਸ੍ਸਾਯ ਸਮਨ੍ਤਾ ਗਾਵੁਤੇਪਿ ਅਡ੍ਢਯੋਜਨੇਪਿ ਯਾਵਤਿਕਾ ਵਿਹਰਨ੍ਤਿ, ਤੇ ਸਬ੍ਬੇ ਸਨ੍ਨਿਪਾਤੇਹੀਤਿ ਅਤ੍ਥੋ. ਸਬ੍ਬੇ ਉਪਟ੍ਠਾਨਸਾਲਾਯਂ ਸਨ੍ਨਿਪਾਤੇਤ੍ਵਾਤਿ ਅਤ੍ਤਨਾ ਗਨ੍ਤੁਂ ਯੁਤ੍ਤਟ੍ਠਾਨਂ ਸਯਂ ਗਨ੍ਤ੍ਵਾ ਅਞ੍ਞਤ੍ਥ ਦਹਰਭਿਕ੍ਖੂ ਪਹਿਣਿਤ੍ਵਾ ਮੁਹੁਤ੍ਤੇਨੇਵ ਅਨਵਸੇਸੇ ਭਿਕ੍ਖੂ ਉਪਟ੍ਠਾਨਸਾਲਾਯਂ ਸਮੂਹਂ ਕਤ੍ਵਾ. ਯਸ੍ਸਦਾਨਿ, ਭਨ੍ਤੇ, ਭਗਵਾ ਕਾਲਂ ਮਞ੍ਞਤੀਤਿ ਏਤ੍ਥ ਅਯਮਧਿਪ੍ਪਾਯੋ – ਭਗਵਾ ਭਿਕ੍ਖੁਸਙ੍ਘੋ ਸਨ੍ਨਿਪਤਿਤੋ, ਏਸ ਕਾਲੋ ਭਿਕ੍ਖੂਨਂ ਧਮ੍ਮਕਥਂ ਕਾਤੁਂ, ਅਨੁਸਾਸਨਿਂ ਦਾਤੁਂ, ਇਦਾਨਿ ਯਸ੍ਸ ਤੁਮ੍ਹੇ ਕਾਲਂ ਜਾਨਾਥ, ਤਂ ਕਾਤਬ੍ਬਨ੍ਤਿ.
ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ, ਅਯਮ੍ਪਿ ਖੋ, ਭਿਕ੍ਖਵੇਤਿ. ਆਮਨ੍ਤੇਤ੍ਵਾ ਚ ਪਨ ਭਿਕ੍ਖੂਨਂ ਅਰਹਤ੍ਤਪ੍ਪਤ੍ਤਿਯਾ ਪੁਬ੍ਬੇ ਆਚਿਕ੍ਖਿਤਅਸੁਭਕਮ੍ਮਟ੍ਠਾਨਤੋ ਅਞ੍ਞਂ ਪਰਿਯਾਯਂ ਆਚਿਕ੍ਖਨ੍ਤੋ ਆਨਾਪਾਨਸ੍ਸਤਿਸਮਾਧੀਤਿਆਦਿਮਾਹ. ਤਤ੍ਥ ਆਨਾਪਾਨਸ੍ਸਤਿਸਮਾਧੀਤਿ ਆਨਾਪਾਨਪਰਿਗ੍ਗਾਹਿਕਾਯ ਸਤਿਯਾ ਸਦ੍ਧਿਂ ਸਮ੍ਪਯੁਤ੍ਤੋ ਸਮਾਧਿ, ਆਨਾਪਾਨਸ੍ਸਤਿਯਂ ਵਾ ਸਮਾਧਿ, ਆਨਾਪਾਨਸ੍ਸਤਿਸਮਾਧਿ. ਭਾਵਿਤੋਤਿ ਉਪ੍ਪਾਦਿਤੋ ਵਡ੍ਢਿਤੋ ਵਾ. ਬਹੁਲੀਕਤੋਤਿ ਪੁਨਪ੍ਪੁਨਂ ਕਤੋ. ਸਨ੍ਤੋ ਚੇਵ ਪਣੀਤੋ ਚਾਤਿ ਸਨ੍ਤੋ ਚੇਵ ਪਣੀਤੋ ਚੇਵ. ਉਭਯਤ੍ਥ ਏਵਸਦ੍ਦੇਨ ਨਿਯਮੋ ਵੇਦਿਤਬ੍ਬੋ. ਕਿਂ ਵੁਤ੍ਤਂ ਹੋਤਿ? ਅਯਞ੍ਹਿ ਯਥਾ ਅਸੁਭਕਮ੍ਮਟ੍ਠਾਨਂ ਕੇਵਲਂ ਪਟਿਵੇਧਵਸੇਨ ਸਨ੍ਤਞ੍ਚ ਪਣੀਤਞ੍ਚ, ਓਲ਼ਾਰਿਕਾਰਮ੍ਮਣਤ੍ਤਾ ਪਨ ਪਟਿਕੂਲਾਰਮ੍ਮਣਤ੍ਤਾ ਚ ਆਰਮ੍ਮਣਵਸੇਨ ਨੇਵ ਸਨ੍ਤਂ ਨ ਪਣੀਤਂ, ਨ ਏਵਂ ਕੇਨਚਿ ਪਰਿਯਾਯੇਨ ਅਸਨ੍ਤੋ ਵਾ ਅਪ੍ਪਣੀਤੋ ਵਾ, ਅਪਿਚ ਖੋ ਆਰਮ੍ਮਣਸਨ੍ਤਤਾਯਪਿ ਸਨ੍ਤੋ ਵੂਪਸਨ੍ਤੋ ਨਿਬ੍ਬੁਤੋ, ਪਟਿਵੇਧਸਙ੍ਖਾਤਾਯ ਅਙ੍ਗਸਨ੍ਤਤਾਯਪਿ, ਆਰਮ੍ਮਣਪਣੀਤਤਾਯ ਪਣੀਤੋ ਅਤਿਤ੍ਤਿਕਰੋ, ਅਙ੍ਗਪਣੀਤਤਾਯਪੀਤਿ. ਤੇਨ ਵੁਤ੍ਤਂ ‘‘ਸਨ੍ਤੋ ਚੇਵ ਪਣੀਤੋ ਚਾ’’ਤਿ.
ਅਸੇਚਨਕੋ ਚ ਸੁਖੋ ਚ ਵਿਹਾਰੋਤਿ ਏਤ੍ਥ ਪਨ ਨਾਸ੍ਸ ਸੇਚਨਨ੍ਤਿ ਅਸੇਚਨਕੋ, ਅਨਾਸਿਤ੍ਤਕੋ ਅਬ੍ਬੋਕਿਣ੍ਣੋ ਪਾਟਿਯੇਕ੍ਕੋ ਆਵੇਣਿਕੋ, ਨਤ੍ਥਿ ਏਤ੍ਥ ਪਰਿਕਮ੍ਮੇਨ ਵਾ ਉਪਚਾਰੇਨ ਵਾ ਸਨ੍ਤਤਾ, ਆਦਿਸਮਨ੍ਨਾਹਾਰਤੋ ਪਭੁਤਿ ਅਤ੍ਤਨੋ ਸਭਾਵੇਨੇਵ ਸਨ੍ਤੋ ਚ ਪਣੀਤੋ ਚਾਤਿ ਅਤ੍ਥੋ. ਕੇਚਿ ‘‘ਅਸੇਚਨਕੋ’’ਤਿ ਅਨਾਸਿਤ੍ਤਕੋ ਓਜਵਨ੍ਤੋ, ਸਭਾਵੇਨੇਵ ਮਧੁਰੋ’’ਤਿ ਵਦਨ੍ਤਿ. ਏਵਮਯਂ ਅਸੇਚਨਕੋ ਚ ਅਪ੍ਪਿਤਪ੍ਪਿਤਕ੍ਖਣੇ ਕਾਯਿਕਚੇਤਸਿਕਸੁਖਪ੍ਪਟਿਲਾਭਾਯ ਸਂਵਤ੍ਤਨਤੋ ਸੁਖੋ ਚ ਵਿਹਾਰੋਤਿ ਵੇਦਿਤਬ੍ਬੋ.
ਉਪ੍ਪਨ੍ਨੁਪ੍ਪਨ੍ਨੇਤਿ ਅਵਿਕ੍ਖਮ੍ਭਿਤੇ. ਪਾਪਕੇਤਿ ਲਾਮਕੇ. ਅਕੁਸਲੇ ਧਮ੍ਮੇਤਿ ਅਕੋਸਲ੍ਲਸਮ੍ਭੂਤੇ ਧਮ੍ਮੇ. ਠਾਨਸੋ ਅਨ੍ਤਰਧਾਪੇਤੀਤਿ ਖਣੇਨੇਵ ਅਨ੍ਤਰਧਾਪੇਤਿ ਵਿਕ੍ਖਮ੍ਭੇਤਿ. ਵੂਪਸਮੇਤੀਤਿ ਸੁਟ੍ਠੁ ਉਪਸਮੇਤਿ, ਨਿਬ੍ਬੇਧਭਾਗਿਯਤ੍ਤਾ ਅਨੁਪੁਬ੍ਬੇਨ ਅਰਿਯਮਗ੍ਗਵੁਦ੍ਧਿਪ੍ਪਤ੍ਤੋ ਸਮੁਚ੍ਛਿਨ੍ਦਤਿ, ਪਟਿਪ੍ਪਸ੍ਸਮ੍ਭੇਤੀਤਿ ਵੁਤ੍ਤਂ ਹੋਤਿ. ਗਿਮ੍ਹਾਨਂ ਪਚ੍ਛਿਮੇ ਮਾਸੇਤਿ ਆਸਾਲ਼੍ਹਮਾਸੇ. ਊਹਤਂ ਰਜੋਜਲ੍ਲਨ੍ਤਿ ਅਟ੍ਠ ਮਾਸੇ ਵਾਤਾਤਪਸੁਕ੍ਖਾਯ ਗੋਮਹਿਂਸਾਦਿਪਾਦਪ੍ਪਹਾਰਸਮ੍ਭਿਨ੍ਨਾਯ ਪਥਵਿਯਾ ਉਦ੍ਧਂ ਹਤਂ ਊਹਤਂ ਆਕਾਸੇ ਸਮੁਟ੍ਠਿਤਂ ਰਜਞ੍ਚ ਰੇਣੁਞ੍ਚ. ਮਹਾ ਅਕਾਲਮੇਘੋਤਿ ਸਬ੍ਬਂ ਨਭਂ ਅਜ੍ਝੋਤ੍ਥਰਿਤ੍ਵਾ ਉਟ੍ਠਿਤੋ ਆਸਾਲ਼੍ਹਜੁਣ੍ਹਪਕ੍ਖੇ ਸਕਲਂ ਅਡ੍ਢਮਾਸਂ ਵਸ੍ਸਨਕਮੇਘੋ. ਸੋ ਹਿ ਅਸਮ੍ਪਤ੍ਤੇ ਵਸ੍ਸਕਾਲੇ ਉਪ੍ਪਨ੍ਨਤ੍ਤਾ ਅਕਾਲਮੇਘੋਤਿ ਇਧ ਅਧਿਪ੍ਪੇਤੋ. ਠਾਨਸੋ ਅਨ੍ਤਰਾਧਾਪੇਤਿ ਵੂਪਸਮੇਤੀਤਿ ਖਣੇਨੇਵ ਅਦਸ੍ਸਨਂ ਨੇਤਿ ਪਥਵਿਯਂ ਸਨ੍ਨਿਸੀਦਾਪੇਤਿ. ਏਵਮੇਵ ਖੋਤਿ ਓਪਮ੍ਮਨਿਦਸ੍ਸਨਮੇਤਂ. ਤਤੋ ਪਰਂ ਵੁਤ੍ਤਨਯਮੇਵ.
੧੦. ਕਿਮਿਲਸੁਤ੍ਤਵਣ੍ਣਨਾ
੯੮੬. ਦਸਮੇ ਕਿਮਿਲਾਯਨ੍ਤਿ ਏਵਂਨਾਮਕੇ ਨਗਰੇ. ਏਤਦਵੋਚਾਤਿ ਥੇਰੋ ਕਿਰ ਚਿਨ੍ਤੇਸਿ – ‘‘ਅਯਂ ਦੇਸਨਾ ਨ ਯਥਾਨੁਸਨ੍ਧਿਕਾ ਕਤਾ, ਯਥਾਨੁਸਨ੍ਧਿਂ ਗਮੇਸ੍ਸਾਮੀ’’ਤਿ ਦੇਸਨਾਨੁਸਨ੍ਧਿਂ ਘਟੇਨ੍ਤੋ ਏਤਂ ਅਵੋਚ. ਕਾਯਞ੍ਞਤਰਨ੍ਤਿ ਪਥਵੀਆਦੀਸੁ ਕਾਯੇਸੁ ਅਞ੍ਞਤਰਂ ਵਦਾਮਿ ਵਾਯੋਕਾਯਂ ਵਦਾਮੀਤਿ ਅਤ੍ਥੋ. ਅਥ ਵਾ ਚਕ੍ਖਾਯਤਨਂ…ਪੇ… ਕਬਲ਼ੀਕਾਰੋ ਆਹਾਰੋਤਿ ਪਞ੍ਚਵੀਸਤਿ ਰੂਪਕੋਟ੍ਠਾਸਾ ਰੂਪਕਾਯੋ ਨਾਮ, ਤੇਸੁ ਆਨਾਪਾਨਂ ਫੋਟ੍ਠਬ੍ਬਾਯਤਨੇ ਸਙ੍ਗਹਿਤਤ੍ਤਾ ਕਾਯਞ੍ਞਤਰਂ ਹੋਤਿ, ਤਸ੍ਮਾਪਿ ਏਵਮਾਹ. ਤਸ੍ਮਾਤਿਹਾਤਿ ਯਸ੍ਮਾ ਚਤੂਸੁ ਕਾਯੇਸੁ ਅਞ੍ਞਤਰਂ ਵਾਯੋਕਾਯਂ, ਪਞ੍ਚਵੀਸਤਿ ਕੋਟ੍ਠਾਸੇ ਵਾ ਰੂਪਕਾਯੇ ਅਞ੍ਞਤਰਂ ਆਨਾਪਾਨਂ ਅਨੁਪਸ੍ਸਤਿ, ਤਸ੍ਮਾ ਕਾਯੇ ਕਾਯਾਨੁਪਸ੍ਸੀਤਿ ਅਤ੍ਥੋ. ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਵੇਦਨਾਞ੍ਞਤਰਨ੍ਤਿ ਤੀਸੁ ਵੇਦਨਾਸੁ ਅਞ੍ਞਤਰਂ, ਸੁਖਵੇਦਨਂ ਸਨ੍ਧਾਯੇਤਂ ਵੁਤ੍ਤਂ.
ਸਾਧੁਕਂ ਮਨਸਿਕਾਰਨ੍ਤਿ ਪੀਤਿਪਟਿਸਂਵੇਦਿਤਾਦਿਵਸੇਨ ਉਪ੍ਪਨ੍ਨਂ ਸੁਨ੍ਦਰਂ ਮਨਸਿਕਾਰਂ. ਕਿਂ ਪਨ ਮਨਸਿਕਾਰੋ ਸੁਖਾ ਵੇਦਨਾ ਹੋਤੀਤਿ? ਨ ਹੋਤਿ, ਦੇਸਨਾਸੀਸਂ ਪਨੇਤਂ. ਯਥੇਵ ਹਿ ‘‘ਅਨਿਚ੍ਚਸਞ੍ਞਾਭਾਵਨਾਨੁਯੋਗਮਨੁਯੁਤ੍ਤਾ’’ਤਿ (ਮ. ਨਿ. ੩.੧੪੭) ਏਤ੍ਥ ਸਞ੍ਞਾਨਾਮੇਨ ਪਞ੍ਞਾ ਵੁਤ੍ਤਾ, ਏਵਮਿਧਾਪਿ ਮਨਸਿਕਾਰਨਾਮੇਨ ਝਾਨਵੇਦਨਾ ਵੁਤ੍ਤਾਤਿ ਵੇਦਿਤਬ੍ਬਾ. ਏਤਸ੍ਮਿਞ੍ਹਿ ਚਤੁਕ੍ਕੇ ਪਠਮਪਦੇ ਪੀਤਿਸੀਸੇਨ ਵੇਦਨਾ ਵੁਤ੍ਤਾ, ਦੁਤਿਯਪਦੇ ਸੁਖਨ੍ਤਿ ਸਰੂਪੇਨੇਵ ਵੁਤ੍ਤਾ. ਚਿਤ੍ਤਸਙ੍ਖਾਰਪਦਦ੍ਵਯੇ ‘‘ਸਞ੍ਞਾ ਚ ਵੇਦਨਾ ਚ ਚੇਤਸਿਕਾ ਏਤੇ ਧਮ੍ਮਾ ਚਿਤ੍ਤਪ੍ਪਟਿਬਦ੍ਧਾ ਚਿਤ੍ਤਸਙ੍ਖਾਰਾ’’ਤਿ (ਪਟਿ. ਮ. ੧.੧੭੪) ਵਚਨਤੋ ‘‘ਵਿਤਕ੍ਕਵਿਚਾਰੇ ਠਪੇਤ੍ਵਾ ਸਬ੍ਬੇਪਿ ਚਿਤ੍ਤਸਮ੍ਪਯੁਤ੍ਤਕਾ ਧਮ੍ਮਾ ਚਿਤ੍ਤਸਙ੍ਖਾਰੇ ਸਙ੍ਗਹਿਤਾ’’ਤਿ ਵਚਨਤੋ ਚਿਤ੍ਤਸਙ੍ਖਾਰਨਾਮੇਨ ਵੇਦਨਾ ਵੁਤ੍ਤਾ. ਤਂ ਸਬ੍ਬਂ ਮਨਸਿਕਾਰਨਾਮੇਨ ਸਙ੍ਗਹੇਤ੍ਵਾ ਇਧ ‘‘ਸਾਧੁਕਂ ਮਨਸਿਕਾਰ’’ਨ੍ਤਿ ਆਹ.
ਏਵਂ ਸਨ੍ਤੇਪਿ ਯਸ੍ਮਾ ਏਸਾ ਵੇਦਨਾ ਆਰਮ੍ਮਣਂ ਨ ਹੋਤਿ, ਤਸ੍ਮਾ ਵੇਦਨਾਨੁਪਸ੍ਸਨਾ ਨ ਯੁਜ੍ਜਤੀਤਿ. ਨੋ ਨ ਯੁਜ੍ਜਤਿ, ਮਹਾਸਤਿਪਟ੍ਠਾਨਾਦੀਸੁਪਿ ਹਿ ਤਂ ਤਂ ਸੁਖਾਦੀਨਂ ਵਤ੍ਥੁਂ ਆਰਮ੍ਮਣਂ ਕਤ੍ਵਾ ਵੇਦਨਾ ਵੇਦਯਤਿ, ਤਂ ਪਨ ਵੇਦਨਾਪਵਤ੍ਤਿਂ ਉਪਾਦਾਯ ‘‘ਅਹਂ ਵੇਦਯਾਮੀ’’ਤਿ ਵੋਹਾਰਮਤ੍ਤਂ ਹੋਤਿ, ਤਂ ਸਨ੍ਧਾਯ ‘‘ਸੁਖਂ ਵੇਦਨਂ ਵੇਦਯਮਾਨੋ ਸੁਖਂ ਵੇਦਨਂ ਵੇਦਯਾਮੀ’’ਤਿਆਦਿ ਵੁਤ੍ਤਂ. ਅਪਿਚ ‘‘ਪੀਤਿਪ੍ਪਟਿਸਂਵੇਦੀ’’ਤਿਆਦੀਨਂ ਅਤ੍ਥਵਣ੍ਣਨਾਯਮੇਤਸ੍ਸ ਪਰਿਹਾਰੋ ਵੁਤ੍ਤੋਯੇਵ. ਵੁਤ੍ਤਞ੍ਹੇਤਂ ਵਿਸੁਦ੍ਧਿਮਗ੍ਗੇ –
‘‘ਦ੍ਵੀਹਾਕਾਰੇਹਿ ਪੀਤਿ ਪਟਿਸਂਵਿਦਿਤਾ ਹੋਤਿ – ਆਰਮ੍ਮਣਤੋ ਚ ਅਸਮ੍ਮੋਹਤੋ ਚ. ਕਥਂ ਆਰਮ੍ਮਣਤੋ ਪੀਤਿ ਪਟਿਸਂਵਿਦਿਤਾ ਹੋਤਿ? ਸਪ੍ਪੀਤਿਕੇ ਦ੍ਵੇ ਝਾਨੇ ਸਮਾਪਜ੍ਜਤਿ, ਤਸ੍ਸ ਸਮਾਪਤ੍ਤਿਕ੍ਖਣੇ ਝਾਨਪਟਿਲਾਭੇਨ ਆਰਮ੍ਮਣਤੋ ਪੀਤਿ ਪਟਿਸਂਵਿਦਿਤਾ ਹੋਤਿ ਆਰਮ੍ਮਣਸ੍ਸ ਪਟਿਸਂਵਿਦਿਤਤ੍ਤਾ. ਕਥਂ ਅਸਮ੍ਮੋਹਤੋ ਪੀਤਿ ਪਟਿਸਂਵਿਦਿਤਾ ਹੋਤਿ? ਸਪ੍ਪੀਤਿਕੇ ਦ੍ਵੇ ਝਾਨੇ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਝਾਨਸਮ੍ਪਯੁਤ੍ਤਪੀਤਿਂ ਖਯਤੋ ਵਯਤੋ ਸਮ੍ਮਸਤਿ, ਤਸ੍ਸ ਵਿਪਸ੍ਸਨਾਕ੍ਖਣੇ ਲਕ੍ਖਣਪ੍ਪਟਿਵੇਧੇਨ ਅਸਮ੍ਮੋਹਤੋ ਪੀਤਿ ਪਟਿਸਂਵਿਦਿਤਾ ਹੋਤਿ. ਵੁਤ੍ਤਞ੍ਹੇਤਂ ਪਟਿਸਮ੍ਭਿਦਾਯਂ (ਪਟਿ. ਮ. ੧.੧੭੨) ‘‘‘ਦੀਘਂ ਅਸ੍ਸਾਸਵਸੇਨ ਚਿਤ੍ਤਸ੍ਸ ਏਕਗ੍ਗਤਂ ਅਵਿਕ੍ਖੇਪਂ ਪਜਾਨਤੋ ਸਤਿ ਉਪਟ੍ਠਿਤਾ ਹੋਤਿ, ਤਾਯ ਸਤਿਯਾ ਤੇਨ ਞਾਣੇਨ ਸਾ ਪੀਤਿ ਪਟਿਸਂਵਿਦਿਤਾ ਹੋਤੀ’ਤਿ. ਏਤੇਨੇਵ ਨਯੇਨ ਅਵਸੇਸਪਦਾਨਿਪਿ ਅਤ੍ਥਤੋ ਵੇਦਿਤਬ੍ਬਾਨੀ’’ਤਿ.
ਇਤਿ ਯਥੇਵ ਝਾਨਪਟਿਲਾਭੇਨ ਆਰਮ੍ਮਣਤੋ ਪੀਤਿਸੁਖਚਿਤ੍ਤਸਙ੍ਖਾਰਾ ਪਟਿਸਂਵਿਦਿਤਾ ਹੋਨ੍ਤਿ, ਏਵਂ ਇਮਿਨਾਪਿ ਝਾਨਸਮ੍ਪਯੁਤ੍ਤੇਨ ਵੇਦਨਾਸਙ੍ਖਾਤਮਨਸਿਕਾਰਪਟਿਲਾਭੇਨ ਆਰਮ੍ਮਣਤੋ ਵੇਦਨਾ ਪਟਿਸਂਵਿਦਿਤਾ ਹੋਤਿ. ਤਸ੍ਮਾ ਸੁਵੁਤ੍ਤਮੇਤਂ ‘‘ਵੇਦਨਾਸੁ ਵੇਦਨਾਨੁਪਸ੍ਸੀ ਭਿਕ੍ਖੁ ਤਸ੍ਮਿਂ ਸਮਯੇ ਵਿਹਰਤੀ’’ਤਿ.
ਨਾਹਂ, ਆਨਨ੍ਦ, ਮੁਟ੍ਠਸ੍ਸਤਿਸ੍ਸ ਅਸਮ੍ਪਜਾਨਸ੍ਸਾਤਿ ਏਤ੍ਥ ਅਯਮਧਿਪ੍ਪਾਯੋ – ਯਸ੍ਮਾ ‘‘ਚਿਤ੍ਤਪਟਿਸਂਵੇਦੀ ਅਸ੍ਸਾਸਿਸ੍ਸਾਮੀ’’ਤਿਆਦਿਨਾ ਨਯੇਨ ਪਵਤ੍ਤੋ ਭਿਕ੍ਖੁ ਕਿਞ੍ਚਾਪਿ ਅਸ੍ਸਾਸਪਸ੍ਸਾਸਨਿਮਿਤ੍ਤਮਾਰਮ੍ਮਣਂ ਕਰੋਤਿ, ਤਸ੍ਸ ਪਨ ਚਿਤ੍ਤਸ੍ਸ ਆਰਮ੍ਮਣੇ ਸਤਿਞ੍ਚ ਸਮ੍ਪਜਞ੍ਞਞ੍ਚ ਉਪਟ੍ਠਾਪੇਤ੍ਵਾ ਪਵਤ੍ਤਨਤੋ ਚਿਤ੍ਤੇ ਚਿਤ੍ਤਾਨੁਪਸ੍ਸੀਯੇਵ ਨਾਮੇਸ ਹੋਤਿ. ਨ ਹਿ ਮੁਟ੍ਠਸ੍ਸਤਿਸ੍ਸ ਅਸਮ੍ਪਜਾਨਸ੍ਸ ਆਨਾਪਾਨਸ੍ਸਤਿਸਮਾਧਿਭਾਵਨਾ ਅਤ੍ਥਿ, ਤਸ੍ਮਾ ਆਰਮ੍ਮਣਤੋ ਚਿਤ੍ਤਪਟਿਸਂਵਿਦਿਤਵਸੇਨ ‘‘ਚਿਤ੍ਤੇ ਚਿਤ੍ਤਾਨੁਪਸ੍ਸੀ ਭਿਕ੍ਖੁ ਤਸ੍ਮਿਂ ਸਮਯੇ ਵਿਹਰਤੀ’’ਤਿ.
ਸੋ ਯਂ ਤਂ ਹੋਤਿ ਅਭਿਜ੍ਝਾਦੋਮਨਸ੍ਸਾਨਂ ਪਹਾਨਂ, ਤਂ ਪਞ੍ਞਾਯ ਦਿਸ੍ਵਾ ਸਾਧੁਕਂ ਅਜ੍ਝੁਪੇਕ੍ਖਿਤਾ ਹੋਤੀਤਿ ਏਤ੍ਥ ਅਭਿਜ੍ਝਾ ਕਾਮਚ੍ਛਨ੍ਦਨੀਵਰਣਮੇਵ, ਦੋਮਨਸ੍ਸਵਸੇਨ ਬ੍ਯਾਪਾਦਨੀਵਰਣਂ ਦਸ੍ਸਿਤਂ. ਇਦਞ੍ਹਿ ਚਤੁਕ੍ਕਂ ਵਿਪਸ੍ਸਨਾਵਸੇਨੇਵ ਵੁਤ੍ਤਂ, ਧਮ੍ਮਾਨੁਪਸ੍ਸਨਾ ਚ ਨੀਵਰਣਪਬ੍ਬਾਦਿਵਸੇਨ ਪਞ੍ਚਵਿਧਾ ਹੋਤਿ, ਤਸ੍ਸਾ ਨੀਵਰਣਪਬ੍ਬਂ ਆਦਿ, ਤਸ੍ਸਾਪਿ ਇਦਂ ਨੀਵਰਣਦ੍ਵਯਂ ਆਦਿ. ਇਤਿ ਧਮ੍ਮਾਨੁਪਸ੍ਸਨਾਯ ਆਦਿਂ ਦਸ੍ਸੇਤੁਂ ਅਭਿਜ੍ਝਾਦੋਮਨਸ੍ਸਾਨਨ੍ਤਿ ਆਹ. ਪਹਾਨਨ੍ਤਿ ਅਨਿਚ੍ਚਾਨੁਪਸ੍ਸਨਾਯ ਨਿਚ੍ਚਸਞ੍ਞਂ ਪਜਹਤੀਤਿ ਏਵਂ ਪਹਾਨਕਰਞਾਣਂ ਅਧਿਪ੍ਪੇਤਂ. ਤਂ ਪਞ੍ਞਾਯ ਦਿਸ੍ਵਾਤਿ ਤਂ ਅਨਿਚ੍ਚਵਿਰਾਗਨਿਰੋਧਪਟਿਨਿਸ੍ਸਗ੍ਗਞਾਣਸਙ੍ਖਾਤਂ ਪਹਾਨਞਾਣਂ ਅਪਰਾਯ ਵਿਪਸ੍ਸਨਾਪਞ੍ਞਾਯ, ਤਮ੍ਪਿ ਅਪਰਾਯਾਤਿ ਏਵਂ ਵਿਪਸ੍ਸਨਾਪਰਮ੍ਪਰਂ ਦਸ੍ਸੇਤਿ. ਅਜ੍ਝੁਪੇਕ੍ਖਿਤਾ ਹੋਤੀਤਿ ਯਞ੍ਚਸ੍ਸ ਪਥਪਟਿਪਨ੍ਨਂ ਅਜ੍ਝੁਪੇਕ੍ਖਤਿ, ਯਞ੍ਚ ਏਕਤੋ ਉਪਟ੍ਠਾਨਂ ਅਜ੍ਝੁਪੇਕ੍ਖਤੀਤਿ ਦ੍ਵਿਧਾ ਅਜ੍ਝੁਪੇਕ੍ਖਤਿ ਨਾਮ. ਤਤ੍ਥ ਸਹਜਾਤਾਨਮ੍ਪਿਅਜ੍ਝੁਪੇਕ੍ਖਨਾ ਹੋਤਿ ਆਰਮ੍ਮਣਸ੍ਸਾਪਿ ਅਜ੍ਝੁਪੇਕ੍ਖਨਾ. ਇਧ ਆਰਮ੍ਮਣ ਅਜ੍ਝੁਪੇਕ੍ਖਨਾ ਅਧਿਪ੍ਪੇਤਾ. ਤਸ੍ਮਾਤਿਹਾਨਨ੍ਦਾਤਿ ਯਸ੍ਮਾ ‘‘ਅਨਿਚ੍ਚਾਨੁਪਸ੍ਸੀ ਅਸ੍ਸਾਸਿਸ੍ਸਾਮੀ’’ਤਿਆਦਿਨਾ ਨਯੇਨ ਪਵਤ੍ਤੋ ਨ ਕੇਵਲਂ ਨੀਵਰਣਾਦਿਧਮ੍ਮੇ, ਅਭਿਜ੍ਝਾਦੋਮਨਸ੍ਸਸੀਸੇਨ ਪਨ ਵੁਤ੍ਤਾਨਂ ਧਮ੍ਮਾਨਂ ਪਹਾਨਕਰਞਾਣਮ੍ਪਿ ਪਞ੍ਞਾਯ ਦਿਸ੍ਵਾ ਅਜ੍ਝੁਪੇਕ੍ਖਿਤਾ ਹੋਤਿ, ਤਸ੍ਮਾ ਧਮ੍ਮੇਸੁ ਧਮ੍ਮਾਨੁਪਸ੍ਸੀ ਭਿਕ੍ਖੁ ਤਸ੍ਮਿਂ ਸਮਯੇ ਵਿਹਰਤੀਤਿ ਵੇਦਿਤਬ੍ਬੋ.
ਏਵਮੇਵ ਖੋਤਿ ਏਤ੍ਥ ਚਤੁਮਹਾਪਥੋ ਵਿਯ ਛ ਆਯਤਨਾਨਿ ਦਟ੍ਠਬ੍ਬਾਨਿ. ਤਸ੍ਮਿਂ ਪਂਸੁਪੁਞ੍ਜੋ ਵਿਯ ਛਸੁ ਆਯਤਨੇਸੁ ਕਿਲੇਸਾ. ਚਤੂਹਿ ਦਿਸਾਹਿ ਆਗਚ੍ਛਨ੍ਤਾ ਸਕਟਰਥਾ ਵਿਯ ਚਤੂਸੁ ਆਰਮ੍ਮਣੇਸੁ ਪਵਤ੍ਤਾ ਚਤ੍ਤਾਰੋ ਸਤਿਪਟ੍ਠਾਨਾ. ਏਕੇਨ ਸਕਟੇਨ ਵਾ ਰਥੇਨ ਵਾ ਪਂਸੁਪੁਞ੍ਜਸ੍ਸ ਉਪਹਨਨਂ ਵਿਯ ਕਾਯਾਨੁਪਸ੍ਸਨਾਦੀਹਿ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਉਪਘਾਤੋ ਵੇਦਿਤਬ੍ਬੋਤਿ.
ਏਕਧਮ੍ਮਵਗ੍ਗੋ ਪਠਮੋ.
੨. ਦੁਤਿਯਵਗ੍ਗੋ
੧-੨. ਇਚ੍ਛਾਨਙ੍ਗਲਸੁਤ੍ਤਾਦਿਵਣ੍ਣਨਾ
੯੮੭-੯੮੮. ਦੁਤਿਯਵਗ੍ਗਸ੍ਸ ਪਠਮੇ ਏਵਂ ਬ੍ਯਾਕਰੇਯ੍ਯਾਥਾਤਿ ਕਸ੍ਮਾ ਅਤ੍ਤਨੋ ਵਿਹਾਰਸਮਾਪਤ੍ਤਿਂ ਆਚਿਕ੍ਖਤਿ? ਉਪਾਰਮ੍ਭਮੋਚਨਤ੍ਥਂ. ਸਚੇ ਹਿ ਤੇ ‘‘ਨ ਜਾਨਾਮਾ’’ਤਿ ਵਦੇਯ੍ਯੁਂ, ਅਥ ਨੇਸਂ ਤਿਤ੍ਥਿਯਾ ‘‘ਤੁਮ੍ਹੇ ‘ਅਸੁਕਸਮਾਪਤ੍ਤਿਯਾ ਨਾਮ ਨੋ ਸਤ੍ਥਾ ਤੇਮਾਸਂ ਵਿਹਾਸੀ’ਤਿਪਿ ਨ ਜਾਨਾਥ, ਅਥ ਕਸ੍ਮਾ ਨਂ ਉਪਟ੍ਠਹਨ੍ਤਾ ਵਿਹਰਥਾ’’ਤਿ ਉਪਾਰਮ੍ਭਂ ਆਰੋਪੇਯ੍ਯੁਂ, ਤਤੋ ਮੋਚਨਤ੍ਥਂ ਏਵਮਾਹ.
ਅਥ ਕਸ੍ਮਾ ਯਥਾ ਅਞ੍ਞਤ੍ਥ ‘‘ਸਤੋਵ ਅਸ੍ਸਸਤਿ, ਦੀਘਂ ਵਾ ਅਸ੍ਸਸਨ੍ਤੋ’’ਤਿ (ਦੀ. ਨਿ. ੨.੩੭੪; ਮ. ਨਿ. ੧.੧੦੭; ਸਂ. ਨਿ. ੫.੯੭੭) ਏਵ-ਵਾਕਾਰੋ ਵੁਤ੍ਤੋ. ਏਵਂ ਇਧ ਨ ਵੁਤ੍ਤੋਤਿ? ਏਕਨ੍ਤਸਨ੍ਤਤ੍ਤਾ. ਅਞ੍ਞੇਸਞ੍ਹਿ ਅਸ੍ਸਾਸੋ ਵਾ ਪਾਕਟੋ ਹੋਤਿ ਪਸ੍ਸਾਸੋ ਵਾ, ਭਗਵਤੋ ਉਭਯਮ੍ਪੇਤਂ ਪਾਕਟਮੇਵ ਨਿਚ੍ਚਂ ਉਪਟ੍ਠਿਤਸ੍ਸਤਿਤਾਯਾਤਿ ਏਕਨ੍ਤਸਨ੍ਤਤ੍ਤਾ ਨ ਵੁਤ੍ਤੋ. ਅਥ ‘‘ਸਿਕ੍ਖਾਮੀ’’ਤਿ ਅਵਤ੍ਵਾ ਕਸ੍ਮਾ ‘‘ਅਸ੍ਸਸਾਮੀ’’ਤਿ ਏਤ੍ਤਕਮੇਵ ਵੁਤ੍ਤਨ੍ਤਿ? ਸਿਕ੍ਖਿਤਬ੍ਬਾਭਾਵਾ. ਸਤ੍ਤ ਹਿ ਸੇਖਾ ਸਿਕ੍ਖਿਤਬ੍ਬਭਾਵਾ ਸੇਖਾ ਨਾਮ, ਖੀਣਾਸਵਾ ਸਿਕ੍ਖਿਤਬ੍ਬਾਭਾਵਾ ਅਸੇਖਾ ਨਾਮ, ਤਥਾਗਤਾ ਅਸਿਕ੍ਖਿਤਬ੍ਬਾ ਅਸੇਕ੍ਖਾ ਨਾਮ ਨਤ੍ਥਿ ਤੇਸਂ ਸਿਕ੍ਖਿਤਬ੍ਬਕਿਚ੍ਚਨ੍ਤਿ ਸਿਕ੍ਖਿਤਬ੍ਬਾਭਾਵਾ ਨ ਵੁਤ੍ਤਂ. ਦੁਤਿਯਂ ਉਤ੍ਤਾਨਮੇਵ.
੩-੧੦. ਪਠਮਆਨਨ੍ਦਸੁਤ੍ਤਾਦਿਵਣ੍ਣਨਾ
੯੮੯-੯੯੬. ਤਤਿਯੇ ਪਵਿਚਿਨਤੀਤਿ ਅਨਿਚ੍ਚਾਦਿਵਸੇਨ ਪਵਿਚਿਨਤਿ. ਇਤਰਂ ਪਦਦ੍ਵਯਂ ਏਤਸ੍ਸੇਵ ਵੇਵਚਨਂ. ਨਿਰਾਮਿਸਾਤਿ ਨਿਕ੍ਕਿਲੇਸਾ ਕਾਯਿਕਚੇਤਸਿਕਦਰਥਪਟਿਪਸ੍ਸਦ੍ਧਿਯਾ ਕਾਯੋਪਿ ਚਿਤ੍ਤਮ੍ਪਿ ਪਸ੍ਸਮ੍ਭਤਿ. ਸਮਾਧਿਯਤੀਤਿ ਸਮ੍ਮਾ ਠਪਿਯਤਿ, ਅਪ੍ਪਨਾਚਿਤ੍ਤਂ ਵਿਯ ਹੋਤਿ. ਅਜ੍ਝੁਪੇਕ੍ਖਿਤਾ ਹੋਤੀਤਿ ਸਹਜਾਤਅਜ੍ਝੁਪੇਕ੍ਖਨਾਯ ਅਜ੍ਝੁਪੇਕ੍ਖਿਤਾ ਹੋਤਿ.
ਏਵਂ ਚੁਦ੍ਦਸਵਿਧੇਨ ਕਾਯਪਰਿਗ੍ਗਾਹਕਸ੍ਸ ਭਿਕ੍ਖੁਨੋ ਤਸ੍ਮਿਂ ਕਾਯੇ ਸਤਿ ਸਤਿਸਮ੍ਬੋਜ੍ਝਙ੍ਗੋ, ਤਾਯ ਸਤਿਯਾ ਸਮ੍ਪਯੁਤ੍ਤਞਾਣਂ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ, ਤਂਸਮ੍ਪਯੁਤ੍ਤਮੇਵ ਕਾਯਿਕਚੇਤਸਿਕਵੀਰਿਯਂ ਵੀਰਿਯਸਮ੍ਬੋਜ੍ਝਙ੍ਗੋ, ਪੀਤਿਪਸ੍ਸਦ੍ਧਿਚਿਤ੍ਤੇਕਗ੍ਗਤਾ ਪੀਤਿਪਸ੍ਸਦ੍ਧਿਸਮਾਧਿਸਮ੍ਬੋਜ੍ਝਙ੍ਗਾ, ਇਮੇਸਂ ਛਨ੍ਨਂ ਬੋਜ੍ਝਙ੍ਗਾਨਂ ਅਨੋਸਕ੍ਕਨਅਨਤਿਵਤ੍ਤਨਸਙ੍ਖਾਤੋ ਮਜ੍ਝਤ੍ਤਾਕਾਰੋ ਉਪੇਕ੍ਖਾਸਮ੍ਬੋਜ੍ਝਙ੍ਗੋ. ਯਥੇਵ ਹਿ ਸਮਪ੍ਪਵਤ੍ਤੇਸੁ ਅਸ੍ਸੇਸੁ ਸਾਰਥਿਨੋ ‘‘ਅਯਂ ਓਲੀਯਤੀ’’ਤਿ ਤੁਦਨਂ ਵਾ, ‘‘ਅਯਂ ਅਤਿਧਾਵਤੀ’’ਤਿ ਆਕਡ੍ਢਨਂ ਵਾ ਨਤ੍ਥਿ, ਕੇਵਲਂ ਏਵਂ ਪਸ੍ਸਮਾਨਸ੍ਸ ਠਿਤਾਕਾਰੋਵ ਹੋਤਿ, ਏਵਮੇਵ ਇਮੇਸਂ ਛਨ੍ਨਂ ਬੋਜ੍ਝਙ੍ਗਾਨਂ ਅਨੋਸਕ੍ਕਨਅਨਤਿਵਤ੍ਤਨਸਙ੍ਖਾਤੋ ਮਜ੍ਝਤ੍ਤਾਕਾਰੋ ਉਪੇਕ੍ਖਾਸਮ੍ਬੋਜ੍ਝਙ੍ਗੋ ਨਾਮ ਹੋਤਿ. ਏਤ੍ਤਾਵਤਾ ਕਿਂ ਕਥਿਤਂ? ਏਕਚਿਤ੍ਤਕ੍ਖਣਿਕਾ ਨਾਨਾਸਰਸਲਕ੍ਖਣਾ ਵਿਪਸ੍ਸਨਾਬੋਜ੍ਝਙ੍ਗਾ ਨਾਮ ਕਥਿਤਾ.
ਵਿਵੇਕਨਿਸ੍ਸਿਤਨ੍ਤਿਆਦੀਨਿ ਵੁਤ੍ਤਤ੍ਥਾਨੇਵ. ਏਤ੍ਥ ਪਨ ਸੋਲ਼ਸਕ੍ਖਤ੍ਤੁਕਾ ਆਨਾਪਾਨਸ੍ਸਤਿ ਮਿਸ੍ਸਕਾ ਕਥਿਤਾ, ਆਨਾਪਾਨਮੂਲਕਾ ਸਤਿਪਟ੍ਠਾਨਾ ਪੁਬ੍ਬਭਾਗਾ, ਤੇਸਂ ਮੂਲਭੂਤਾ ਆਨਾਪਾਨਸ੍ਸਤਿ ਪੁਬ੍ਬਭਾਗਾ. ਬੋਜ੍ਝਙ੍ਗਮੂਲਕਾ ਸਤਿਪਟ੍ਠਾਨਾ ਪੁਬ੍ਬਭਾਗਾ, ਤੇਪਿ ਬੋਜ੍ਝਙ੍ਗਾ ਪੁਬ੍ਬਭਾਗਾਵ. ਵਿਜ੍ਜਾਵਿਮੁਤ੍ਤਿਪੂਰਕਾ ਪਨ ਬੋਜ੍ਝਙ੍ਗਾ ਨਿਬ੍ਬਤ੍ਤਿਤਲੋਕੁਤ੍ਤਰਾ, ਵਿਜ੍ਜਾਵਿਮੁਤ੍ਤਿਯੋ ਅਰਿਯਫਲਸਮ੍ਪਯੁਤ੍ਤਾ. ਵਿਜ੍ਜਾ ਵਾ ਚਤੁਤ੍ਥਮਗ੍ਗਸਮ੍ਪਯੁਤ੍ਤਾ, ਵਿਮੁਤ੍ਤਿ ਫਲਸਮ੍ਪਯੁਤ੍ਤਾਤਿ. ਚਤੁਤ੍ਥਪਞ੍ਚਮਛਟ੍ਠਾਨਿਪਿ ਇਮਿਨਾਵ ਸਮਾਨਪਰਿਚ੍ਛੇਦਾਨਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਆਨਾਪਾਨਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.