੧੧. ਓਘਵਗ੍ਗੋ

੧-੨. ਓਘਸੁਤ੍ਤਾਦਿਵਣ੍ਣਨਾ

੧੭੨-੧੭੩. ਓਘਵਗ੍ਗੇ ਕਾਮੋਘੋਤਿ ਪਞ੍ਚਸੁ ਕਾਮਗੁਣੇਸੁ ਛਨ੍ਦਰਾਗੋ. ਭਵੋਘੋਤਿ ਰੂਪਾਰੂਪਭਵੇਸੁ ਛਨ੍ਦਰਾਗੋ. ਦਿਟ੍ਠੋਘੋਤਿ ਦ੍ਵਾਸਟ੍ਠਿ ਦਿਟ੍ਠਿਯੋ. ਅਵਿਜ੍ਜੋਘੋਤਿ ਚਤੂਸੁ ਸਚ੍ਚੇਸੁ ਅਞ੍ਞਾਣਂ. ਕਾਮਯੋਗਾਦੀਸੁਪਿ ਏਸੇਵ ਨਯੋ.

੩-੪. ਉਪਾਦਾਨਸੁਤ੍ਤਾਦਿਵਣ੍ਣਨਾ

੧੭੪-੧੭੫. ਕਾਮੁਪਾਦਾਨਨ੍ਤਿ ਕਾਮਗ੍ਗਹਣਂ. ਦਿਟ੍ਠੁਪਾਦਾਨਾਦੀਸੁਪਿ ਏਸੇਵ ਨਯੋ. ਗਨ੍ਥਾਤਿ ਗਨ੍ਥਨਾ ਘਟਨਾ. ਕਾਯਗਨ੍ਥੋਤਿ ਨਾਮਕਾਯਸ੍ਸ ਗਨ੍ਥੋ ਗਨ੍ਥਨਘਟਨਕਿਲੇਸੋ. ਇਦਂਸਚ੍ਚਾਭਿਨਿਵੇਸੋਤਿ ਅਨ੍ਤਗ੍ਗਾਹਿਕਦਿਟ੍ਠਿਵਸੇਨ ਉਪ੍ਪਨ੍ਨੋ ‘‘ਇਦਮੇਵ ਸਚ੍ਚ’’ਨ੍ਤਿ ਏਵਂ ਅਭਿਨਿਵੇਸੋ.

੫-੧੦. ਅਨੁਸਯਸੁਤ੍ਤਾਦਿਵਣ੍ਣਨਾ

੧੭੬-੧੮੧. ਕਾਮਰਾਗਾਨੁਸਯੋਤਿ ਥਾਮਗਤਟ੍ਠੇਨ ਕਾਮਰਾਗੋਵ ਅਨੁਸਯੋ ਕਾਮਰਾਗਾਨੁਸਯੋ. ਸੇਸੇਸੁਪਿ ਏਸੇਵ ਨਯੋ. ਓਰਮ੍ਭਾਗਿਯਾਨੀਤਿ ਹੇਟ੍ਠਾਕੋਟ੍ਠਾਸਿਯਾਨਿ. ਸਂਯੋਜਨਾਨੀਤਿ ਬਨ੍ਧਨਾਨਿ. ਉਦ੍ਧਮ੍ਭਾਗਿਯਾਨੀਤਿ ਉਪਰਿਕੋਟ੍ਠਾਸਿਯਾਨਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਓਘਵਗ੍ਗੋ ਏਕਾਦਸਮੋ.

ਮਗ੍ਗਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.