੧੧. ਨਿਰਾਮਿਸਸੁਤ੍ਤਵਣ੍ਣਨਾ
੨੭੯. ਏਕਾਦਸਮੇ ਸਾਮਿਸਾਤਿ ਕਿਲੇਸਾਮਿਸੇਨ ਸਾਮਿਸਾ. ਨਿਰਾਮਿਸਤਰਾਤਿ ਨਿਰਾਮਿਸਾਯਪਿ ਝਾਨਪੀਤਿਯਾ ਨਿਰਾਮਿਸਤਰਾਵ. ਨਨੁ ਚ ਦ੍ਵੀਸੁ ਝਾਨੇਸੁ ਪੀਤਿ ਮਹਗ੍ਗਤਾਪਿ ਹੋਤਿ ਲੋਕੁਤ੍ਤਰਾਪਿ, ਪਚ੍ਚਵੇਕ੍ਖਣਪੀਤਿ ਲੋਕਿਯਾਵ, ਸਾ ਕਸ੍ਮਾ ਨਿਰਾਮਿਸਤਰਾ ਜਾਤਾਤਿ? ਸਨ੍ਤਪਣੀਤਧਮ੍ਮਪਚ੍ਚਵੇਕ੍ਖਣਵਸੇਨ ਉਪ੍ਪਨ੍ਨਤ੍ਤਾ. ਯਥਾ ਹਿ ਰਾਜਵਲ੍ਲਭੋ ਚੂਲ਼ੁਪਟ੍ਠਾਕੋ ਅਪ੍ਪਟਿਹਾਰਿਕਂ ਯਥਾਸੁਖਂ ਰਾਜਕੁਲਂ ਪਵਿਸਨ੍ਤੋ ਸੇਟ੍ਠਿਸੇਨਾਪਤਿਆਦਯੋ ਪਾਦੇਨ ਪਹਰਨ੍ਤੋਪਿ ਨ ਗਣੇਤਿ. ਕਸ੍ਮਾ? ਰਞ੍ਞੋ ਆਸਨ੍ਨਪਰਿਚਾਰਕਤ੍ਤਾ. ਇਤਿ ਸੋ ਤੇਹਿ ਉਤ੍ਤਰਿਤਰੋ ਹੋਤਿ, ਏਵਮਯਮ੍ਪਿ ਸਨ੍ਤਪਣੀਤਧਮ੍ਮਪਚ੍ਚਵੇਕ੍ਖਣਵਸੇਨ ਉਪ੍ਪਨ੍ਨਤ੍ਤਾ ਲੋਕੁਤ੍ਤਰਪੀਤਿਤੋਪਿ ਉਤ੍ਤਰਿਤਰਾਤਿ ਵੇਦਿਤਬ੍ਬਾ. ਸੇਸਵਾਰੇਸੁਪਿ ਏਸੇਵ ਨਯੋ.
ਵਿਮੋਕ੍ਖਵਾਰੇ ਪਨ ਰੂਪਪਟਿਸਂਯੁਤ੍ਤੋ ਵਿਮੋਕ੍ਖੋ ਅਤ੍ਤਨੋ ਆਰਮ੍ਮਣਭੂਤੇਨ ਰੂਪਾਮਿਸਵਸੇਨੇਵ ਸਾਮਿਸੋ ਨਾਮ, ਅਰੂਪਪਟਿਸਂਯੁਤ੍ਤੋ ਰੂਪਾਮਿਸਾਭਾਵੇਨ ਨਿਰਾਮਿਸੋ ਨਾਮਾਤਿ.
ਵੇਦਨਾਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.