੨. ਵੇਦਨਾਸਂਯੁਤ੍ਤਂ
੧. ਸਗਾਥਾਵਗ੍ਗੋ
੧. ਸਮਾਧਿਸੁਤ੍ਤਵਣ੍ਣਨਾ
੨੪੯. ਵੇਦਨਾਸਂਯੁਤ੍ਤੇ ਸਗਾਥਾਵਗ੍ਗਸ੍ਸ ਪਠਮੇ ਸਮਾਹਿਤੋਤਿ ਉਪਚਾਰੇਨ ਵਾ ਅਪ੍ਪਨਾਯ ਵਾ ਸਮਾਹਿਤੋ. ਵੇਦਨਾ ਚ ਪਜਾਨਾਤੀਤਿ ਵੇਦਨਾ ਦੁਕ੍ਖਸਚ੍ਚਵਸੇਨ ਪਜਾਨਾਤਿ. ਵੇਦਨਾਨਞ੍ਚ ਸਮ੍ਭਵਨ੍ਤਿ ਤਾਸਂਯੇਵ ਸਮ੍ਭਵਂ ਸਮੁਦਯਸਚ੍ਚਵਸੇਨ ਪਜਾਨਾਤਿ. ਯਤ੍ਥ ਚੇਤਾਤਿ ਯਤ੍ਥੇਤਾ ਵੇਦਨਾ ਨਿਰੁਜ੍ਝਨ੍ਤਿ, ਤਂ ਨਿਬ੍ਬਾਨਂ ਨਿਰੋਧਸਚ੍ਚਵਸੇਨ ਪਜਾਨਾਤਿ. ਖਯਗਾਮਿਨਨ੍ਤਿ ਤਾਸਂਯੇਵ ਵੇਦਨਾਨਂ ਖਯਗਾਮਿਨਂ ਮਗ੍ਗਂ ਮਗ੍ਗਸਚ੍ਚਵਸੇਨ ਪਜਾਨਾਤਿ. ਨਿਚ੍ਛਾਤੋ ਪਰਿਨਿਬ੍ਬੁਤੋਤਿ ਨਿਤ੍ਤਣ੍ਹੋ ਹੁਤ੍ਵਾ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ. ਏਵਮੇਤ੍ਥ ਸੁਤ੍ਤੇ ਸਮ੍ਮਸਨਚਾਰਵੇਦਨਾ ਕਥਿਤਾ. ਗਾਥਾਸੁ ਦ੍ਵੀਹਿ ਪਦੇਹਿ ਸਮਥਵਿਪਸ੍ਸਨਾ ਕਥਿਤਾ, ਸੇਸੇਹਿ ਚਤੁਸਚ੍ਚਂ ਕਥਿਤਂ. ਏਵਮੇਤ੍ਥ ਸਬ੍ਬਸਙ੍ਗਾਹਿਕੋ ਚਤੁਭੂਮਕਧਮ੍ਮਪਰਿਚ੍ਛੇਦੋ ਵੁਤ੍ਤੋ.
੨. ਸੁਖਸੁਤ੍ਤਵਣ੍ਣਨਾ
੨੫੦. ਦੁਤਿਯੇ ਅਦੁਕ੍ਖਮਸੁਖਂ ਸਹਾਤਿ ਅਦੁਕ੍ਖਮਸੁਖਞ੍ਚ ਸੁਖਦੁਕ੍ਖੇਹਿ ਸਹ. ਅਜ੍ਝਤ੍ਤਞ੍ਚ ਬਹਿਦ੍ਧਾ ਚਾਤਿ ਅਤ੍ਤਨੋ ਚ ਪਰਸ੍ਸ ਚ. ਮੋਸਧਮ੍ਮਨ੍ਤਿ ਨਸ੍ਸਨਸਭਾਵਂ. ਪਲੋਕਿਨਨ੍ਤਿ ਪਲੁਜ੍ਜਨਕਂ ਭਿਜ੍ਜਨਸਭਾਵਂ. ਫੁਸ੍ਸ ਫੁਸ੍ਸ ਵਯਂ ਪਸ੍ਸਨ੍ਤਿ ਞਾਣੇਨ ਫੁਸਿਤ੍ਵਾ ਫੁਸਿਤ੍ਵਾ ਵਯਂ ਪਸ੍ਸਨ੍ਤੋ. ਏਵਂ ਤਤ੍ਥ ਵਿਰਜ੍ਜਤੀਤਿ ਏਵਂ ਤਾਸੁ ਵੇਦਨਾਸੁ ਵਿਰਜ੍ਜਤਿ. ਇਧਾਪਿ ਸੁਤ੍ਤੇ ਸਮ੍ਮਸਨਚਾਰਵੇਦਨਾ ਕਥਿਤਾ, ਗਾਥਾਸੁ ਞਾਣਫੁਸਨਂ.
੩. ਪਹਾਨਸੁਤ੍ਤਵਣ੍ਣਨਾ
੨੫੧. ਤਤਿਯੇ ਅਚ੍ਛੇਚ੍ਛਿ ਤਣ੍ਹਨ੍ਤਿ ਸਬ੍ਬਮ੍ਪਿ ਤਣ੍ਹਂ ਛਿਨ੍ਦਿ ਸਮੁਚ੍ਛਿਨ੍ਦਿ. ਵਿਵਤ੍ਤਯਿ ਸਂਯੋਜਨਨ੍ਤਿ ਦਸਵਿਧਮ੍ਪਿ ਸਂਯੋਜਨਂ ਪਰਿਵਤ੍ਤਯਿ ਨਿਮ੍ਮੂਲਕਮਕਾਸਿ. ਸਮ੍ਮਾਤਿ ਹੇਤੁਨਾ ਕਾਰਣੇਨ. ਮਾਨਾਭਿਸਮਯਾਤਿ ਮਾਨਸ੍ਸ ਦਸ੍ਸਨਾਭਿਸਮਯਾ, ਪਹਾਨਾਭਿਸਮਯਾ ਚ. ਅਰਹਤ੍ਤਮਗ੍ਗੋ ਹਿ ਕਿਚ੍ਚਵਸੇਨ ਮਾਨਂ ਸਮ੍ਪਸ੍ਸਤਿ, ਅਯਮਸ੍ਸ ਦਸ੍ਸਨਾਭਿਸਮਯੋ. ਤੇਨ ਦਿਟ੍ਠੋ ਪਨ ਸੋ ਤਾਵਦੇਵ ਪਹੀਯਤਿ, ਦਿਟ੍ਠਵਿਸੇਨ ਦਿਟ੍ਠਸਤ੍ਤਾਨਂ ਜੀਵਿਤਂ ਵਿਯ. ਅਯਮਸ੍ਸ ਪਹਾਨਾਭਿਸਮਯੋ.
ਅਨ੍ਤਮਕਾਸਿ ਦੁਕ੍ਖਸ੍ਸਾਤਿ ਏਵਂ ਅਰਹਤ੍ਤਮਗ੍ਗੇਨ ਮਾਨਸ੍ਸ ਦਿਟ੍ਠਤ੍ਤਾ ਚ ਪਹੀਨਤ੍ਤਾ ਚ ਯੇ ਇਮੇ ‘‘ਕਾਯਬਨ੍ਧਨਸ੍ਸ ਅਨ੍ਤੋ ਜੀਰਤਿ (ਚੂਲ਼ਵ. ੨੭੮) ਹਰਿਤਨ੍ਤਂ ਵਾ’’ਤਿ (ਮ. ਨਿ. ੧.੩੦੪) ਏਵਂ ਵੁਤ੍ਤਅਨ੍ਤਿਮਮਰਿਯਾਦਨ੍ਤੋ ਚ, ‘‘ਅਨ੍ਤਮਿਦਂ, ਭਿਕ੍ਖਵੇ, ਜੀਵਿਕਾਨ’’ਨ੍ਤਿ (ਇਤਿਵੁ. ੯੧; ਸਂ. ਨਿ. ੩.੮੦) ਏਵਂ ਵੁਤ੍ਤਲਾਮਕਨ੍ਤੋ ਚ, ‘‘ਸਕ੍ਕਾਯੋ ਏਕੋ ਅਨ੍ਤੋ’’ਤਿ (ਅ. ਨਿ. ੬.੬੧; ਚੂਲ਼ਨਿ. ਤਿਸ੍ਸਮੇਤ੍ਤੇਯ੍ਯਮਾਣਵਪੁਚ੍ਛਾਨਿਦ੍ਦੇਸ ੧੧) ਏਵਂ ਵੁਤ੍ਤਕੋਟ੍ਠਾਸਨ੍ਤੋ ਚ, ‘‘ਏਸੇਵਨ੍ਤੋ ਦੁਕ੍ਖਸ੍ਸ ਸਬ੍ਬਪਚ੍ਚਯਸਙ੍ਖਯਾ’’ਤਿ (ਸਂ ਨਿ. ੨.੫੧; ੨.੪.੭੧; ਉਦਾ. ੭੧) ਏਵਂ ਵੁਤ੍ਤਕੋਟਨ੍ਤੋ ਚਾਤਿ ਚਤ੍ਤਾਰੋ ਅਨ੍ਤਾ, ਤੇਸੁ ਸਬ੍ਬਸ੍ਸੇਵ ਵਟ੍ਟਦੁਕ੍ਖਸ੍ਸ ਅਦੁਂ ਚਤੁਤ੍ਥਕੋਟਿਸਙ੍ਖਾਤਂ ਅਨ੍ਤਮਕਾਸਿ, ਪਰਿਚ੍ਛੇਦਂ ਪਰਿਵਟੁਮਂ ਅਕਾਸਿ, ਅਨ੍ਤਿਮਸਮੁਸ੍ਸਯਮਤ੍ਤਾਵਸੇਸਂ ਦੁਕ੍ਖਮਕਾਸੀਤਿ ਵੁਤ੍ਤਂ ਹੋਤਿ.
ਸਮ੍ਪਜਞ੍ਞਂ ਨ ਰਿਞ੍ਚਤੀਤਿ ਸਮ੍ਪਜਞ੍ਞਂ ਨ ਜਹਤਿ. ਸਙ੍ਖ੍ਯਂ ਨੋਪੇਤੀਤਿ ਰਤ੍ਤੋ ਦੁਟ੍ਠੋ ਮੂਲ਼੍ਹੋਤਿ ਪਞ੍ਞਤ੍ਤਿਂ ਨ ਉਪੇਤਿ, ਤਂ ਪਞ੍ਞਤ੍ਤਿਂ ਪਹਾਯ ਖੀਣਾਸਵੋ ਨਾਮ ਹੋਤੀਤਿ ਅਤ੍ਥੋ. ਇਮਸ੍ਮਿਂ ਸੁਤ੍ਤੇ ਆਰਮ੍ਮਣਾਨੁਸਯੋ ਕਥਿਤੋ.
੪. ਪਾਤਾਲਸੁਤ੍ਤਵਣ੍ਣਨਾ
੨੫੨. ਚਤੁਤ੍ਥੇ ਪਾਤਾਲੋਤਿ ਪਾਤਸ੍ਸ ਅਲਂ ਪਰਿਯਤ੍ਤੋ, ਨਤ੍ਥਿ ਏਤ੍ਥ ਪਤਿਟ੍ਠਾਤਿ ਪਾਤਾਲੋ. ਅਸਨ੍ਤਂ ਅਵਿਜ੍ਜਮਾਨਨ੍ਤਿ ਅਸਮ੍ਭੂਤਤ੍ਤਂ ਅਪਞ੍ਞਾਯਮਾਨਤ੍ਤਂ. ਏਵਂ ਵਾਚਂ ਭਾਸਤੀਤਿ ਅਤ੍ਥਿ ਮਹਾਸਮੁਦ੍ਦੇ ਪਾਤਾਲੋਤਿ ਏਵਂ ਵਾਚਂ. ਸੋ ਹਿ ਯਂ ਤਂ ਬਲਵਾਮੁਖਂ ਮਹਾਸਮੁਦ੍ਦਸ੍ਸ ਉਦਕਂ ਵੇਗੇਨ ਪਕ੍ਖਨ੍ਦਿਤ੍ਵਾ ਚਕ੍ਕਵਾਲ਼ਂ ਵਾ ਸਿਨੇਰੁਂ ਵਾ ਆਹਚ੍ਚ ਯੋਜਨਦ੍ਵਿਯੋਜਨਦਸਯੋਜਨਪ੍ਪਮਾਣਮ੍ਪਿ ਉਗ੍ਗਨ੍ਤ੍ਵਾ ਪੁਨ ਮਹਾਸਮੁਦ੍ਦੇ ਪਤਤਿ, ਯਸ੍ਸ ਪਤਿਤਟ੍ਠਾਨੇ ਮਹਾਨਰਕਪਪਾਤੋ ਵਿਯ ਹੋਤਿ, ਯਂ ਲੋਕੇ ਬਲਵਾਮੁਖਨ੍ਤਿ ਵੁਚ੍ਚਤਿ. ਤਂ ਸਨ੍ਧਾਯ ਏਵਂ ਵਦਤਿ.
ਯਸ੍ਮਾ ਪਨ ਤਤ੍ਥ ਤਥਾਰੂਪਾਨਂ ਮਚ੍ਛਕਚ੍ਛਪਦੇਵਦਾਨਵਾਨਂ ਪਤਿਟ੍ਠਾਪਿ ਹੋਤਿ ਸੁਖਨਿਵਾਸੋਪਿ, ਤਸ੍ਮਾ ਅਸਨ੍ਤਂ ਅਸਂਵਿਜ੍ਜਮਾਨਂ ਤਂ ਤਂ ਵਾਚਂ ਭਾਸਤਿ ਨਾਮ. ਯਸ੍ਮਾ ਪਨ ਸਬ੍ਬਪੁਥੁਜ੍ਜਨਾ ਸਾਰੀਰਿਕਾਯ ਦੁਕ੍ਖਵੇਦਨਾਯ ਪਤਿਟ੍ਠਾਤੁਂ ਨ ਸਕ੍ਕੋਨ੍ਤਿ, ਤਸ੍ਮਾ ਪਾਤਸ੍ਸ ਅਲਨ੍ਤਿ ਅਤ੍ਥੇਨ ਅਯਮੇਵ ਪਾਤਾਲੋਤਿ ਦਸ੍ਸੇਨ੍ਤੋ ਸਾਰੀਰਿਕਾਨਂ ਖੋ ਏਤਂ ਭਿਕ੍ਖਵੇਤਿਆਦਿਮਾਹ.
ਪਾਤਾਲੇ ਨ ਪਚ੍ਚੁਟ੍ਠਾਸੀਤਿ ਪਾਤਾਲਸ੍ਮਿਂ ਨ ਪਤਿਟ੍ਠਾਸਿ. ਗਾਧਨ੍ਤਿ ਪਤਿਟ੍ਠਂ. ਅਕ੍ਕਨ੍ਦਤੀਤਿ ਅਨਿਬਦ੍ਧਂ ਵਿਪ੍ਪਲਾਪਂ ਵਿਲਪਨ੍ਤੋ ਕਨ੍ਦਤਿ. ਦੁਬ੍ਬਲੋਤਿ ਦੁਬ੍ਬਲਞਾਣੋ. ਅਪ੍ਪਥਾਮਕੋਤਿ ਞਾਣਥਾਮਸ੍ਸ ਪਰਿਤ੍ਤਤਾਯ ਪਰਿਤ੍ਤਥਾਮਕੋ. ਇਮਸ੍ਮਿਂ ਸੁਤ੍ਤੇ ਅਰਿਯਸਾਵਕੋਤਿ ਸੋਤਾਪਨ੍ਨੋ. ਸੋਤਾਪਨ੍ਨੋ ਹਿ ਏਤ੍ਥ ਧੁਰਂ, ਬਲਵਵਿਪਸ੍ਸਕੋ ਨ ਤਿਕ੍ਖਬੁਦ੍ਧਿ ਉਪ੍ਪਨ੍ਨਂ ਵੇਦਨਂ ਅਨਨੁਵਤ੍ਤਿਤ੍ਵਾ ਪਤਿਟ੍ਠਾਤੁਂ ਸਮਤ੍ਥੋ ਯੋਗਾਵਚਰੋਪਿ ਵਟ੍ਟਤਿ.
੫. ਦਟ੍ਠਬ੍ਬਸੁਤ੍ਤਵਣ੍ਣਨਾ
੨੫੩. ਪਞ੍ਚਮੇ ਦੁਕ੍ਖਤੋ ਦਟ੍ਠਬ੍ਬਾਤਿ ਵਿਪਰਿਣਾਮਨਵਸੇਨ ਦੁਕ੍ਖਤੋ ਦਟ੍ਠਬ੍ਬਾ. ਸਲ੍ਲਤੋਤਿ ਦੁਕ੍ਖਾਪਨਵਿਨਿਵਿਜ੍ਝਨਟ੍ਠੇਨ ਸਲ੍ਲਾਤਿ ਦਟ੍ਠਬ੍ਬਾ. ਅਨਿਚ੍ਚਤੋਤਿ ਅਦੁਕ੍ਖਮਸੁਖਾ ਹੁਤ੍ਵਾ ਅਭਾਵਾਕਾਰੇਨ ਅਨਿਚ੍ਚਤੋ ਦਟ੍ਠਬ੍ਬਾ. ਅਦ੍ਦਾਤਿ ਅਦ੍ਦਸ. ਸਨ੍ਤਨ੍ਤਿ ਸਨ੍ਤਸਭਾਵਂ.
੬. ਸਲ੍ਲਸੁਤ੍ਤਵਣ੍ਣਨਾ
੨੫੪. ਛਟ੍ਠੇ ਤਤ੍ਰਾਤਿ ਤੇਸੁ ਦ੍ਵੀਸੁ ਜਨੇਸੁ. ਅਨੁਵੇਧਂ ਵਿਜ੍ਝੇਯ੍ਯਾਤਿ ਤਸ੍ਸੇਵ ਵਣਮੁਖਸ੍ਸ ਅਙ੍ਗੁਲਨ੍ਤਰੇ ਵਾ ਦ੍ਵਙ੍ਗੁਲਨ੍ਤਰੇ ਵਾ ਆਸਨ੍ਨਪਦੇਸੇ ਅਨੁਗਤਵੇਧਂ. ਏਵਂ ਵਿਦ੍ਧਸ੍ਸ ਹਿ ਸਾ ਅਨੁਵੇਧਾ ਵੇਦਨਾ ਪਠਮਵੇਦਨਾਯ ਬਲਵਤਰਾ ਹੋਤਿ, ਪਚ੍ਛਾ ਉਪ੍ਪਜ੍ਜਮਾਨਾ ਦੋਮਨਸ੍ਸਵੇਦਨਾਪਿ ਏਵਮੇਵ ਪੁਰਿਮਵੇਦਨਾਯ ਬਲਵਤਰਾ ਹੋਤਿ. ਦੁਕ੍ਖਾਯ ਵੇਦਨਾਯ ਨਿਸ੍ਸਰਣਨ੍ਤਿ ਦੁਕ੍ਖਾਯ ਵੇਦਨਾਯ ਹਿ ਸਮਾਧਿਮਗ੍ਗਫਲਾਨਿ ਨਿਸ੍ਸਰਣਂ, ਤਂ ਸੋ ਨ ਜਾਨਾਤਿ, ਕਾਮਸੁਖਮੇਵ ਨਿਸ੍ਸਰਣਨ੍ਤਿ ਜਾਨਾਤਿ. ਤਾਸਂ ਵੇਦਨਾਨਨ੍ਤਿ ਤਾਸਂ ਸੁਖਦੁਕ੍ਖਵੇਦਨਾਨਂ. ਸਞ੍ਞੁਤ੍ਤੋ ਨਂ ਵੇਦਯਤੀਤਿ ਕਿਲੇਸੇਹਿ ਸਮ੍ਪਯੁਤ੍ਤੋਵ ਹੁਤ੍ਵਾ ਤਂ ਵੇਦਨਂ ਵੇਦਯਤਿ, ਨ ਵਿਪ੍ਪਯੁਤ੍ਤੋ. ਸਞ੍ਞੁਤ੍ਤੋ ਦੁਕ੍ਖਸ੍ਮਾਤਿ ਕਰਣਤ੍ਥੇ ਨਿਸ੍ਸਕ੍ਕਂ, ਦੁਕ੍ਖੇਨ ਸਮ੍ਪਯੁਤ੍ਤੋਤਿ ਅਤ੍ਥੋ. ਸਙ੍ਖਾਤਧਮ੍ਮਸ੍ਸਾਤਿ ਵਿਦਿਤਧਮ੍ਮਸ੍ਸ ਤੁਲਿਤਧਮ੍ਮਸ੍ਸ. ਬਹੁਸ੍ਸੁਤਸ੍ਸਾਤਿ ਪਰਿਯਤ੍ਤਿਬਹੁਸ੍ਸੁਤਸ੍ਸ ਪਟਿਵੇਧਬਹੁਸ੍ਸੁਤਸ੍ਸ ਚ. ਸਮ੍ਮਾ ਪਜਾਨਾਤਿ ਭਵਸ੍ਸ ਪਾਰਗੂਤਿ ਭਵਸ੍ਸ ਪਾਰਂ ਨਿਬ੍ਬਾਨਂ ਗਤੋ, ਤਦੇਵ ਨਿਬ੍ਬਾਨਂ ਸਮ੍ਮਾ ਪਜਾਨਾਤਿ. ਇਮਸ੍ਮਿਮ੍ਪਿ ਸੁਤ੍ਤੇ ਆਰਮ੍ਮਣਾਨੁਸਯੋਵ ਕਥਿਤੋ. ਅਰਿਯਸਾਵਕੇਸੁ ਚ ਖੀਣਾਸਵੋ ਏਤ੍ਥ ਧੁਰਂ, ਅਨਾਗਾਮੀਪਿ ਵਟ੍ਟਤੀਤਿ ਵਦਨ੍ਤਿ.
੭. ਪਠਮਗੇਲਞ੍ਞਸੁਤ੍ਤਵਣ੍ਣਨਾ
੨੫੫. ਸਤ੍ਤਮੇ ਯੇਨ ਗਿਲਾਨਸਾਲਾ ਤੇਨੁਪਸਙ੍ਕਮੀਤਿ ‘‘ਸਦੇਵਕੇ ਲੋਕੇ ਅਗ੍ਗਪੁਗ੍ਗਲੋ ਤਥਾਗਤੋਪਿ ਗਿਲਾਨੁਪਟ੍ਠਾਨਂ ਗਚ੍ਛਤਿ, ਉਪਟ੍ਠਾਤਬ੍ਬਯੁਤ੍ਤਕਾ ਨਾਮ ਗਿਲਾਨਾਤਿ ਭਿਕ੍ਖੂ ਸਦ੍ਦਹਿਤ੍ਵਾ ਓਕਪ੍ਪੇਤ੍ਵਾ ਗਿਲਾਨੇ ਉਪਟ੍ਠਾਤਬ੍ਬੇ ਮਞ੍ਞਿਸ੍ਸਨ੍ਤੀ’’ਤਿ ਚ ‘‘ਯੇ ਤਤ੍ਥ ਕਮ੍ਮਟ੍ਠਾਨਸਪ੍ਪਾਯਾ, ਤੇਸਂ ਕਮ੍ਮਟ੍ਠਾਨਂ ਕਥੇਸ੍ਸਾਮੀ’’ਤਿ ਚ ਚਿਨ੍ਤੇਤ੍ਵਾ ਉਪਸਙ੍ਕਮਿ. ਕਾਯੇ ਕਾਯਾਨੁਪਸ੍ਸੀਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਪਰਤੋ ਵਕ੍ਖਾਮ. ਅਨਿਚ੍ਚਾਨੁਪਸ੍ਸੀਤਿ ਅਨਿਚ੍ਚਤਂ ਅਨੁਪਸ੍ਸਨ੍ਤੋ. ਵਯਾਨੁਪਸ੍ਸੀਤਿ ਵਯਂ ਅਨੁਪਸ੍ਸਨ੍ਤੋ. ਵਿਰਾਗਾਨੁਪਸ੍ਸੀਤਿ ਵਿਰਾਗਂ ਅਨੁਪਸ੍ਸਨ੍ਤੋ. ਨਿਰੋਧਾਨੁਪਸ੍ਸੀਤਿ ਨਿਰੋਧਂ ਅਨੁਪਸ੍ਸਨ੍ਤੋ. ਪਟਿਨਿਸ੍ਸਗ੍ਗਾਨੁਪਸ੍ਸੀਤਿ ਪਟਿਨਿਸ੍ਸਗ੍ਗਂ ਅਨੁਪਸ੍ਸਨ੍ਤੋ.
ਏਤ੍ਤਾਵਤਾ ਕਿਂ ਦਸ੍ਸਿਤਂ ਹੋਤਿ? ਇਮਸ੍ਸ ਭਿਕ੍ਖੁਨੋ ਆਗਮਨੀਯਪਟਿਪਦਾ, ਸਤਿਪਟ੍ਠਾਨਾਪਿ ਹਿ ਪੁਬ੍ਬਭਾਗਾਯੇਵ, ਸਮ੍ਪਜਞ੍ਞੇਪਿ ਅਨਿਚ੍ਚਾਨੁਪਸ੍ਸਨਾ ਵਯਾਨੁਪਸ੍ਸਨਾ ਵਿਰਾਗਾਨੁਪਸ੍ਸਨਾਤਿ ਚ ਇਮਾਪਿ ਤਿਸ੍ਸੋ ਅਨੁਪਸ੍ਸਨਾ ਪੁਬ੍ਬਭਾਗਾਯੇਵ, ਨਿਰੋਧਾਨੁਪਸ੍ਸਨਾਪਿ ਪਟਿਨਿਸ੍ਸਗ੍ਗਾਨੁਪਸ੍ਸਨਾਪਿ ਇਮਾ ਦ੍ਵੇ ਮਿਸ੍ਸਕਾ. ਏਤ੍ਤਾਵਤਾ ਇਮਸ੍ਸ ਭਿਕ੍ਖੁਨੋ ਭਾਵਨਾਕਾਲੋ ਦਸ੍ਸਿਤੋਤਿ. ਸੇਸਂ ਵੁਤ੍ਤਨਯਮੇਵ.
੮-੯. ਦੁਤਿਯਗੇਲਞ੍ਞਸੁਤ੍ਤਾਦਿਵਣ੍ਣਨਾ
੨੫੬-੨੫੭. ਅਟ੍ਠਮੇ ਇਮਮੇਵ ਫਸ੍ਸਂ ਪਟਿਚ੍ਚਾਤਿ ਵੁਤ੍ਤੇ ਬੁਜ੍ਝਨਕਾਨਂ ਅਜ੍ਝਾਸਯੇਨ ਵੁਤ੍ਤਂ, ਅਤ੍ਥਤੋ ਪਨੇਤਂ ਨਿਨ੍ਨਾਨਾਕਰਣਂ. ਕਾਯੋਵ ਹਿ ਏਤ੍ਥ ਫਸ੍ਸੋਤਿ ਵੁਤ੍ਤੋ. ਨਵਮਂ ਉਤ੍ਤਾਨਮੇਵ.
੧੦. ਫਸ੍ਸਮੂਲਕਸੁਤ੍ਤਵਣ੍ਣਨਾ
੨੫੮. ਦਸਮੇ ਸੁਖਵੇਦਨਿਯਨ੍ਤਿ ਸੁਖਵੇਦਨਾਯ ਪਚ੍ਚਯਭੂਤਂ. ਸੇਸੇਸੁਪਿ ਏਸੇਵ ਨਯੋ. ਅਨੁਪਦਵਣ੍ਣਨਾ ਪਨੇਤ੍ਥ ਹੇਟ੍ਠਾ ਵਿਤ੍ਥਾਰਿਤਾਵ. ਇਮਸ੍ਮਿਂ ਸੁਤ੍ਤਦ੍ਵਯੇ ਸਮ੍ਮਸਨਚਾਰਵੇਦਨਾ ਕਥਿਤਾ.
ਸਗਾਥਾਵਗ੍ਗੋ ਪਠਮੋ.
੨. ਰਹੋਗਤਵਗ੍ਗੋ
੧. ਰਹੋਗਤਸੁਤ੍ਤਵਣ੍ਣਨਾ
੨੫੯. ਰਹੋਗਤਵਗ੍ਗਸ੍ਸ ਪਠਮੇ ਯਂ ਕਿਞ੍ਚਿ ਵੇਦਯਿਤਂ, ਤਂ ਦੁਕ੍ਖਸ੍ਮਿਨ੍ਤਿ ਯਂ ਕਿਞ੍ਚਿ ਵੇਦਯਿਤਂ, ਤਂ ਸਬ੍ਬਂ ਦੁਕ੍ਖਨ੍ਤਿ ਅਤ੍ਥੋ. ਸਙ੍ਖਾਰਾਨਂਯੇਵ ਅਨਿਚ੍ਚਤਨ੍ਤਿਆਦੀਸੁ ਯਾ ਏਸਾ ਸਙ੍ਖਾਰਾਨਂ ਅਨਿਚ੍ਚਤਾ ਖਯਧਮ੍ਮਤਾ ਵਯਧਮ੍ਮਤਾ ਵਿਪਰਿਣਾਮਧਮ੍ਮਤਾ, ਏਤਂ ਸਨ੍ਧਾਯ ਯਂ ਕਿਞ੍ਚਿ ਵੇਦਯਿਤਂ, ਤਂ ਦੁਕ੍ਖਨ੍ਤਿ ਮਯਾ ਭਾਸਿਤਨ੍ਤਿ ਦੀਪੇਤਿ. ਯਾ ਹਿ ਸਙ੍ਖਾਰਾਨਂ ਅਨਿਚ੍ਚਤਾ, ਵੇਦਨਾਨਮ੍ਪਿ ਸਾ ਅਨਿਚ੍ਚਤਾ ਏਵ. ਅਨਿਚ੍ਚਤਾ ਚ ਨਾਮੇਸਾ ਮਰਣਂ, ਮਰਣਤੋ ਉਤ੍ਤਰਿ ਦੁਕ੍ਖਂ ਨਾਮ ਨਤ੍ਥੀਤਿ ਇਮਿਨਾ ਅਧਿਪ੍ਪਾਯੇਨ ਸਬ੍ਬਾ ਵੇਦਨਾ ਦੁਕ੍ਖਾਤਿ ਵੁਤ੍ਤਾ. ਅਥ ਖੋ ਪਨ ਭਿਕ੍ਖੁ ਮਯਾਤਿ ਇਦਂ ਨ ਕੇਵਲਂ ਅਹਂ ਵੇਦਨਾਨਂਯੇਵ ਨਿਰੋਧਂ ਪਞ੍ਞਾਪੇਮਿ, ਇਮੇਸਮ੍ਪਿ ਧਮ੍ਮਾਨਂ ਨਿਰੋਧਂ ਪਞ੍ਞਾਪੇਮੀਤਿ ਦਸ੍ਸਨਤ੍ਥਂ ਆਰਦ੍ਧਂ. ਵੂਪਸਮੋ ਚ ਪਸ੍ਸਦ੍ਧਿਯੋ ਚ ਏਵਰੂਪਾਯ ਦੇਸਨਾਯ ਬੁਜ੍ਝਨਕਾਨਂ ਅਜ੍ਝਾਸਯੇਨ ਵੁਤ੍ਤਾ. ਸਞ੍ਞਾਵੇਦਯਿਤਨਿਰੋਧਗ੍ਗਹਣੇਨ ਚੇਤ੍ਥ ਚਤ੍ਤਾਰੋ ਆਰੁਪ੍ਪਾ ਗਹਿਤਾਵ ਹੋਨ੍ਤੀਤਿ ਵੇਦਿਤਬ੍ਬਾ.
੨-੩. ਪਠਮਆਕਾਸਸੁਤ੍ਤਾਦਿਵਣ੍ਣਨਾ
੨੬੦-੨੬੧. ਦੁਤਿਯੇ ਪੁਥੂ ਵਾਯਨ੍ਤਿ ਮਾਲੁਤਾਤਿ ਬਹੂ ਵਾਤਾ ਵਾਯਨ੍ਤਿ. ਸੇਸਂ ਉਤ੍ਤਾਨਤ੍ਥਮੇਵਾਤਿ. ਤਤਿਯਂ ਵਿਨਾ ਗਾਥਾਹਿ ਬੁਜ੍ਝਨ੍ਤਾਨਂ ਅਜ੍ਝਾਸਯੇਨ ਵੁਤ੍ਤਂ.
੪. ਅਗਾਰਸੁਤ੍ਤਵਣ੍ਣਨਾ
੨੬੨. ਚਤੁਤ੍ਥੇ ਪੁਰਤ੍ਥਿਮਾਤਿ ਪੁਰਤ੍ਥਿਮਾਯ. ਏਵਂ ਸਬ੍ਬਤ੍ਥ. ਸਾਮਿਸਾਪਿ ਸੁਖਾ ਵੇਦਨਾਤਿਆਦੀਸੁ ਸਾਮਿਸਾ ਸੁਖਾ ਨਾਮ ਕਾਮਾਮਿਸਪਟਿਸਂਯੁਤ੍ਤਾ ਵੇਦਨਾ. ਨਿਰਾਮਿਸਾ ਸੁਖਾ ਨਾਮ ਪਠਮਜ੍ਝਾਨਾਦਿਵਸੇਨ ਵਿਪਸ੍ਸਨਾਵਸੇਨ ਅਨੁਸ੍ਸਤਿਵਸੇਨ ਚ ਉਪ੍ਪਨ੍ਨਾ ਵੇਦਨਾ. ਸਾਮਿਸਾ ਦੁਕ੍ਖਾ ਨਾਮ ਕਾਮਾਮਿਸੇਨੇਵ ਸਾਮਿਸਾ ਵੇਦਨਾ, ਨਿਰਾਮਿਸਾ ਦੁਕ੍ਖਾ ਨਾਮ ਅਨੁਤ੍ਤਰੇਸੁ ਵਿਮੋਕ੍ਖੇਸੁ ਪਿਹਂ ਉਪਟ੍ਠਾਪਯਤੋ ਪਿਹਪਚ੍ਚਯਾ ਉਪ੍ਪਨ੍ਨਦੋਮਨਸ੍ਸਵੇਦਨਾ. ਸਾਮਿਸਾ ਅਦੁਕ੍ਖਮਸੁਖਾ ਨਾਮ ਕਾਮਾਮਿਸੇਨੇਵ ਸਾਮਿਸਾ ਵੇਦਨਾ. ਨਿਰਾਮਿਸਾ ਅਦੁਕ੍ਖਮਸੁਖਾ ਨਾਮ ਚਤੁਤ੍ਥਜ੍ਝਾਨਵਸੇਨ ਉਪ੍ਪਨ੍ਨਾ ਅਦੁਕ੍ਖਮਸੁਖਾ ਵੇਦਨਾ.
੫-੮. ਪਠਮਆਨਨ੍ਦਸੁਤ੍ਤਾਦਿਵਣ੍ਣਨਾ
੨੬੩-੨੬੬. ਪਞ੍ਚਮਾਦੀਨਿ ਚਤ੍ਤਾਰਿ ਹੇਟ੍ਠਾ ਕਥਿਤਨਯਾਨੇਵ. ਪੁਰਿਮਾਨਿ ਪਨੇਤ੍ਥ ਦ੍ਵੇ ਪਰਿਪੁਣ੍ਣਪਸ੍ਸਦ੍ਧਿਕਾਨਿ, ਪਚ੍ਛਿਮਾਨਿ ਉਪਡ੍ਢਪਸ੍ਸਦ੍ਧਿਕਾਨਿ. ਦੇਸਨਾਯ ਬੁਜ੍ਝਨਕਾਨਂ ਅਜ੍ਝਾਸਯੇਨ ਵੁਤ੍ਤਾਨਿ.
੯-੧੦. ਪਞ੍ਚਕਙ੍ਗਸੁਤ੍ਤਾਦਿਵਣ੍ਣਨਾ
੨੬੭-੨੬੮. ਨਵਮੇ ਪਞ੍ਚਕਙ੍ਗੋ ਥਪਤੀਤਿ ਪਞ੍ਚਕਙ੍ਗੋਤਿ ਤਸ੍ਸ ਨਾਮਂ, ਵਾਸਿਫਰਸੁਨਿਖਾਦਨਦਣ੍ਡਮੁਗ੍ਗਰਕਾਲ਼ਸੁਤ੍ਤਨਾਲ਼ਿਸਙ੍ਖਾਤੇਹਿ ਵਾ ਪਞ੍ਚਹਿ ਅਙ੍ਗੇਹਿ ਸਮਨ੍ਨਾਗਤਤ੍ਤਾ ਸੋ ਪਞ੍ਚਕਙ੍ਗੋਤਿ ਪਞ੍ਞਾਤੋ. ਥਪਤੀਤਿ ਵਡ੍ਢਕੀਜੇਟ੍ਠਕੋ. ਉਦਾਯੀਤਿ ਪਣ੍ਡਿਤਉਦਾਯਿਤ੍ਥੇਰੋ. ਪਰਿਯਾਯਨ੍ਤਿ ਕਾਰਣਂ. ਦ੍ਵੇਪਾਨਨ੍ਦਾਤਿ ਦ੍ਵੇਪਿ, ਆਨਨ੍ਦ, ਪਰਿਯਾਯੇਨਾਤਿ ਕਾਰਣੇਨ. ਏਤ੍ਥ ਚ ਕਾਯਿਕਚੇਤਸਿਕਵਸੇਨ ਦ੍ਵੇ ਵੇਦਿਤਬ੍ਬਾ, ਸੁਖਾਦਿਵਸੇਨ ਤਿਸ੍ਸੋਪਿ, ਇਨ੍ਦ੍ਰਿਯਵਸੇਨ ਸੁਖਿਨ੍ਦ੍ਰਿਯਾਦਿਕਾ ਪਞ੍ਚ, ਦ੍ਵਾਰਵਸੇਨ ਚਕ੍ਖੁਸਮ੍ਫਸ੍ਸਜਾਦਿਕਾ ਛ, ਉਪਵਿਚਾਰਵਸੇਨ ‘‘ਚਕ੍ਖੁਨਾ ਰੂਪਂ ਦਿਸ੍ਵਾ ਸੋਮਨਸ੍ਸਠਾਨਿਯਂ ਰੂਪਂ ਉਪਵਿਚਰਤੀ’’ਤਿਆਦਿਕਾ ਅਟ੍ਠਾਰਸ, ਛ ਗੇਹਸਿਤਾਨਿ ਸੋਮਨਸ੍ਸਾਨਿ, ਛ ਨੇਕ੍ਖਮ੍ਮਸਿਤਾਨਿ, ਛ ਗੇਹਸਿਤਾਨਿ ਦੋਮਨਸ੍ਸਾਨਿ, ਛ ਨੇਕ੍ਖਮ੍ਮਸਿਤਾਨਿ, ਛ ਗੇਹਸਿਤਾ ਉਪੇਕ੍ਖਾ, ਛ ਨੇਕ੍ਖਮ੍ਮਸਿਤਾਤਿ ਏਵਂ ਛਤ੍ਤਿਂਸ. ਤਾ ਅਤੀਤੇ ਛਤ੍ਤਿਂਸ, ਅਨਾਗਤੇ ਛਤ੍ਤਿਂਸ, ਪਚ੍ਚੁਪ੍ਪਨ੍ਨੇ ਛਤ੍ਤਿਂਸਾਤਿ ਏਵਂ ਅਟ੍ਠਸਤਂ ਵੇਦਨਾ ਵੇਦਿਤਬ੍ਬਾ.
ਪਞ੍ਚਿਮੇ ਆਨਨ੍ਦ ਕਾਮਗੁਣਾਤਿ ਅਯਂ ਪਾਟਿਯੇਕ੍ਕੋ ਅਨੁਸਨ੍ਧਿ. ਨ ਕੇਵਲਞ੍ਹਿ ਦ੍ਵੇ ਆਦਿਂ ਕਤ੍ਵਾ ਵੇਦਨਾ ਭਗਵਤਾ ਪਞ੍ਞਤ੍ਤਾ, ਪਰਿਯਾਯੇਨ ਏਕਾਪਿ ਵੇਦਨਾ ਕਥਿਤਾ, ਤਂ ਦਸ੍ਸੇਨ੍ਤੋ ਪਞ੍ਚਕਙ੍ਗਸ੍ਸ ਥਪਤਿਨੋ ਵਾਦਂ ਉਪਤ੍ਥਮ੍ਭੇਤੁਂ ਇਮਂ ਦੇਸਨਂ ਆਰਭਿ. ਅਭਿਕ੍ਕਨ੍ਤਤਰਨ੍ਤਿ ਸੁਨ੍ਦਰਤਰਂ. ਪਣੀਤਤਰਨ੍ਤਿ ਅਤਪ੍ਪਕਤਰਂ. ਏਤ੍ਥ ਚ ਚਤੁਤ੍ਥਜ੍ਝਾਨਤੋ ਪਟ੍ਠਾਯ ਅਦੁਕ੍ਖਮਸੁਖਾ ਵੇਦਨਾ, ਸਾਪਿ ਸਨ੍ਤਟ੍ਠੇਨ ਪਣੀਤਟ੍ਠੇਨ ਚ ਸੁਖਨ੍ਤਿ ਵੁਤ੍ਤਾ. ਨਿਰੋਧੋ ਅਵੇਦਯਿਤਸੁਖਵਸੇਨ ਸੁਖਂ ਨਾਮ ਜਾਤੋ. ਪਞ੍ਚਕਾਮਗੁਣਵਸੇਨ ਹਿ ਅਟ੍ਠਸਮਾਪਤ੍ਤਿਵਸੇਨ ਚ ਉਪ੍ਪਨ੍ਨਂ ਵੇਦਯਿਤਂ ਸੁਖਂ ਨਾਮ, ਨਿਰੋਧੋ ਅਵੇਦਯਿਤਸੁਖਂ ਨਾਮ. ਇਤਿ ਵੇਦਯਿਤਸੁਖਂ ਵਾ ਹੋਤੁ ਅਵੇਦਯਿਤਸੁਖਂ ਵਾ, ਨਿਦ੍ਦੁਕ੍ਖਭਾਵਸਙ੍ਖਾਤੇਨ ਸੁਖਟ੍ਠੇਨ ਏਕਨ੍ਤਸੁਖਮੇਵ ਜਾਤਂ.
ਯਤ੍ਥ ਯਤ੍ਥਾਤਿ ਯਸ੍ਮਿਂ ਯਸ੍ਮਿਂ ਠਾਨੇ. ਸੁਖਂ ਉਪਲਬ੍ਭਤੀਤਿ ਵੇਦਯਿਤਂ ਸੁਖਂ ਵਾ ਅਵੇਦਯਿਤਂ ਸੁਖਂ ਵਾ ਉਪਲਬ੍ਭਤਿ. ਤਂ ਤਂ ਤਥਾਗਤੋ ਸੁਖਸ੍ਮਿਂ ਪਞ੍ਞਪੇਤਿ, ਤਂ ਸਬ੍ਬਂ ਤਥਾਗਤੋ ਨਿਦ੍ਦੁਕ੍ਖਭਾਵਂ ਸੁਖਸ੍ਮਿਂਯੇਵ ਪਞ੍ਞਪੇਤੀਤਿ ਇਧ ਭਗਵਾ ਨਿਰੋਧਸਮਾਪਤ੍ਤਿਂ ਸੀਸਂ ਕਤ੍ਵਾ ਨੇਯ੍ਯਪੁਗ੍ਗਲਸ੍ਸ ਵਸੇਨ ਅਰਹਤ੍ਤਨਿਕੂਟੇਨੇਵ ਦੇਸਨਂ ਨਿਟ੍ਠਾਪੇਸਿ. ਦਸਮਂ ਉਤ੍ਤਾਨਤ੍ਥਮੇਵਾਤਿ.
ਰਹੋਗਤਵਗ੍ਗੋ ਦੁਤਿਯੋ.
੩. ਅਟ੍ਠਸਤਪਰਿਯਾਯਵਗ੍ਗੋ
੧. ਸੀਵਕਸੁਤ੍ਤਵਣ੍ਣਨਾ
੨੬੯. ਤਤਿਯਵਗ੍ਗਸ੍ਸ ਪਠਮੇ ਮੋਲ਼ਿਯਸੀਵਕੋਤਿ ਸੀਵਕੋਤਿ ਤਸ੍ਸ ਨਾਮਂ. ਚੂਲ਼ਾ ਪਨਸ੍ਸ ਅਤ੍ਥਿ, ਤਸ੍ਮਾ ਮੋਲ਼ਿਯਸੀਵਕੋਤਿ ਵੁਚ੍ਚਤਿ. ਪਰਿਬ੍ਬਾਜਕੋਤਿ ਛਨ੍ਨਪਰਿਬ੍ਬਾਜਕੋ. ਪਿਤ੍ਤਸਮੁਟ੍ਠਾਨਾਨੀਤਿ ਪਿਤ੍ਤਪਚ੍ਚਯਾਨਿ. ਵੇਦਯਿਤਾਨੀਤਿ ਵੇਦਨਾ. ਤਤ੍ਥ ਪਿਤ੍ਤਪਚ੍ਚਯਾ ਤਿਸ੍ਸੋ ਵੇਦਨਾ ਉਪ੍ਪਜ੍ਜਨ੍ਤਿ. ਕਥਂ? ਏਕਚ੍ਚੋ ਹਿ ‘‘ਪਿਤ੍ਤਂ ਮੇ ਕੁਪਿਤਂ ਦੁਜ੍ਜਾਨਂ ਖੋ ਪਨ ਜੀਵਿਤ’’ਨ੍ਤਿ ਦਾਨਂ ਦੇਤਿ, ਸੀਲਂ ਸਮਾਦਿਯਤਿ ਉਪੋਸਥਕਮ੍ਮਂ ਕਰੋਤਿ, ਏਵਮਸ੍ਸ ਕੁਸਲਵੇਦਨਾ ਉਪ੍ਪਜ੍ਜਤਿ. ਏਕਚ੍ਚੋ ‘‘ਪਿਤ੍ਤਭੇਸਜ੍ਜਂ ਕਰਿਸ੍ਸਾਮੀ’’ਤਿ ਪਾਣਂ ਹਨਤਿ, ਅਦਿਨ੍ਨਂ ਆਦਿਯਤਿ, ਮੁਸਾ ਭਣਤਿ, ਦਸ ਦੁਸ੍ਸੀਲ੍ਯਕਮ੍ਮਾਨਿ ਕਰੋਤਿ, ਏਵਮਸ੍ਸ ਅਕੁਸਲਵੇਦਨਾ ਉਪ੍ਪਜ੍ਜਤਿ. ਏਕਚ੍ਚੋ ‘‘ਏਤ੍ਤਕੇਨਪਿ ਮੇ ਭੇਸਜ੍ਜਕਰਣੇਨ ਪਿਤ੍ਤਂ ਨ ਵੂਪਸਮ੍ਮਤਿ, ਅਲਂ ਯਂ ਹੋਤਿ. ਤਂ ਹੋਤੂ’’ਤਿ ਮਜ੍ਝਤ੍ਤੋ ਕਾਯਿਕਵੇਦਨਂ ਅਧਿਵਾਸੇਨ੍ਤੋ ਨਿਪਜ੍ਜਤਿ, ਏਵਂ ਅਸ੍ਸ ਅਬ੍ਯਾਕਤਵੇਦਨਾ ਉਪ੍ਪਜ੍ਜਤਿ.
ਸਾਮਮ੍ਪਿ ਖੋ ਏਤਨ੍ਤਿ ਤਂ ਤਂ ਪਿਤ੍ਤਵਿਕਾਰਂ ਦਿਸ੍ਵਾ ਅਤ੍ਤਨਾਪਿ ਏਤਂ ਵੇਦਿਤਬ੍ਬਂ. ਸਚ੍ਚਸਮ੍ਮਤਨ੍ਤਿ ਭੂਤਸਮ੍ਮਤਂ. ਲੋਕੋਪਿ ਹਿਸ੍ਸ ਸਰੀਰੇ ਸਬਲਵਣ੍ਣਤਾਦਿਪਿਤ੍ਤਵਿਕਾਰਂ ਦਿਸ੍ਵਾ ‘‘ਪਿਤ੍ਤਮਸ੍ਸ ਕੁਪਿਤ’’ਨ੍ਤਿ ਜਾਨਾਤਿ. ਤਸ੍ਮਾਤਿ ਯਸ੍ਮਾ ਸਾਮਞ੍ਚ ਵਿਦਿਤਂ ਲੋਕਸ੍ਸ ਚ ਸਚ੍ਚਸਮ੍ਮਤਂ ਅਤਿਧਾਵਨ੍ਤਿ, ਤਸ੍ਮਾ. ਸੇਮ੍ਹਸਮੁਟ੍ਠਾਨਾਦੀਸੁਪਿ ਏਸੇਵ ਨਯੋ. ਏਤ੍ਥ ਪਨ ਸਨ੍ਨਿਪਾਤਿਕਾਨੀਤਿ ਤਿਣ੍ਣਮ੍ਪਿ ਪਿਤ੍ਤਾਦੀਨਂ ਕੋਪੇਨ ਸਮੁਟ੍ਠਿਤਾਨਿ. ਉਤੁਪਰਿਣਾਮਜਾਨੀਤਿ ਵਿਸਭਾਗਉਤੁਤੋ ਜਾਤਾਨਿ. ਜਙ੍ਗਲਦੇਸਵਾਸੀਨਞ੍ਹਿ ਅਨੁਪਦੇਸੇ ਵਸਨ੍ਤਾਨਂ ਵਿਸਭਾਗੋ ਉਤੁ ਉਪ੍ਪਜ੍ਜਤਿ, ਅਨੁਪਦੇਸਵਾਸੀਨਞ੍ਚ ਜਙ੍ਗਲਦੇਸੇਤਿ ਏਵਂ ਮਲਯਸਮੁਦ੍ਦਤੀਰਾਦਿਵਸੇਨਾਪਿ ਉਤੁਵਿਸਭਾਗਤਾ ਉਪ੍ਪਜ੍ਜਤਿਯੇਵ. ਤਤੋ ਜਾਤਾਤਿ ਉਤੁਪਰਿਣਾਮਜਾਤਾਨਿ ਨਾਮ.
ਵਿਸਮਪਰਿਹਾਰਜਾਨੀਤਿ ਮਹਾਭਾਰਵਹਨਸੁਧਾਕੋਟ੍ਟਨਾਦਿਤੋ ਵਾ ਅਵੇਲਾਯ ਚਰਨ੍ਤਸ੍ਸ ਸਪ੍ਪਡਂਸਕੂਪਪਾਤਾਦਿਤੋ ਵਾ ਵਿਸਮਪਰਿਹਾਰਤੋ ਜਾਤਾਨਿ. ਓਪਕ੍ਕਮਿਕਾਨੀਤਿ ‘‘ਅਯਂ ਚੋਰੋ ਵਾ ਪਾਰਦਾਰਿਕੋ ਵਾ’’ਤਿ ਗਹੇਤ੍ਵਾ ਜਣ੍ਣੁਕਕਪ੍ਪਰਮੁਗ੍ਗਰਾਦੀਹਿ ਨਿਪ੍ਪੋਥਨਉਪਕ੍ਕਮਂ ਪਚ੍ਚਯਂ ਕਤ੍ਵਾ ਉਪ੍ਪਨ੍ਨਾਨਿ. ਏਤਂ ਬਹਿ ਉਪਕ੍ਕਮਂ ਲਭਿਤ੍ਵਾ ਕੋਚਿ ਵੁਤ੍ਤਨਯੇਨੇਵ ਕੁਸਲਂ ਕਰੋਤਿ, ਕੋਚਿ ਅਕੁਸਲਂ, ਕੋਚਿ ਅਧਿਵਾਸੇਨ੍ਤੋ ਨਿਪਜ੍ਜਤਿ. ਕਮ੍ਮਵਿਪਾਕਜਾਨੀਤਿ ਕੇਵਲਂ ਕਮ੍ਮਵਿਪਾਕਤੋ, ਜਾਤਾਨਿ. ਤੇਸੁਪਿ ਹਿ ਉਪ੍ਪਨ੍ਨੇਸੁ ਵੁਤ੍ਤਨਯੇਨੇਵ ਕੋਚਿ ਕੁਸਲਂ ਕਰੋਤਿ, ਕੋਚਿ ਅਕੁਸਲਂ, ਕੋਚਿ ਅਧਿਵਾਸੇਨ੍ਤੋ ਨਿਪਜ੍ਜਤਿ. ਏਵਂ ਸਬ੍ਬਵਾਰੇਸੁ ਤਿਵਿਧਾਵ ਵੇਦਨਾ ਹੋਨ੍ਤਿ.
ਤਤ੍ਥ ਪੁਰਿਮੇਹਿ ਸਤ੍ਤਹਿ ਕਾਰਣੇਹਿ ਉਪ੍ਪਨ੍ਨਾ ਸਾਰੀਰਿਕਾ ਵੇਦਨਾ ਸਕ੍ਕਾ ਪਟਿਬਾਹਿਤੁਂ, ਕਮ੍ਮਵਿਪਾਕਜਾਨਂ ਪਨ ਸਬ੍ਬਭੇਸਜ੍ਜਾਨਿਪਿ ਸਬ੍ਬਪਰਿਤ੍ਤਾਨਿਪਿ ਨਾਲਂ ਪਟਿਘਾਤਾਯ. ਇਮਸ੍ਮਿਂ ਸੁਤ੍ਤੇ ਲੋਕਵੋਹਾਰੋ ਨਾਮ ਕਥਿਤੋਤਿ.
੨-੧੦. ਅਟ੍ਠਸਤਸੁਤ੍ਤਾਦਿਵਣ੍ਣਨਾ
੨੭੦-੨੭੮. ਦੁਤਿਯੇ ਅਟ੍ਠਸਤਪਰਿਯਾਯਨ੍ਤਿ ਅਟ੍ਠਸਤਸ੍ਸ ਕਾਰਣਭੂਤਂ. ਧਮ੍ਮਪਰਿਯਾਯਨ੍ਤਿ ਧਮ੍ਮਕਾਰਣਂ. ਕਾਯਿਕਾ ਚ ਚੇਤਸਿਕਾ ਚਾਤਿ ਏਤ੍ਥ ਕਾਯਿਕਾ ਕਾਮਾਵਚਰੇਯੇਵ ਲਬ੍ਭਨ੍ਤਿ, ਚੇਤਸਿਕਾ ਚਤੁਭੂਮਿਕਾਪਿ. ਸੁਖਾਤਿਆਦੀਸੁ ਸੁਖਾ ਵੇਦਨਾ ਅਰੂਪਾਵਚਰੇ ਨਤ੍ਥਿ, ਸੇਸਾਸੁ ਤੀਸੁ ਭੂਮੀਸੁ ਲਬ੍ਭਨ੍ਤਿ, ਦੁਕ੍ਖਾ ਕਾਮਾਵਚਰਾਵ, ਇਤਰਾ ਚਤੁਭੂਮਿਕਾ. ਪਞ੍ਚਕੇ ਸੁਖਿਨ੍ਦ੍ਰਿਯਦੁਕ੍ਖਿਨ੍ਦ੍ਰਿਯਦੋਮਨਸ੍ਸਿਨ੍ਦ੍ਰਿਯਾਨਿ ਕਾਮਾਵਚਰਾਨੇਵ, ਸੋਮਨਸ੍ਸਿਨ੍ਦ੍ਰਿਯਂ ਤੇਭੂਮਕਂ, ਉਪੇਕ੍ਖਿਨ੍ਦ੍ਰਿਯਂ ਚਤੁਭੂਮਕਂ. ਛਕ੍ਕੇ ਪਞ੍ਚਸੁ ਦ੍ਵਾਰੇਸੁ ਵੇਦਨਾ ਕਾਮਾਵਚਰਾਵ, ਮਨੋਦ੍ਵਾਰੇ ਚਤੁਭੂਮਿਕਾ, ਅਟ੍ਠਾਰਸਕੇ ਛਸੁ ਇਟ੍ਠਾਰਮ੍ਮਣੇਸੁ ਸੋਮਨਸ੍ਸੇਨ ਸਹ ਉਪਵਿਚਰਨ੍ਤੀਤਿ ਸੋਮਨਸ੍ਸੂਪਵਿਚਾਰਾ. ਸੇਸਦ੍ਵਯੇਪਿ ਏਸੇਵ ਨਯੋ. ਇਤਿ ਅਯਂ ਦੇਸਨਾ ਵਿਚਾਰਵਸੇਨ ਆਗਤਾ, ਤਂਸਮ੍ਪਯੁਤ੍ਤਾਨਂ ਪਨ ਸੋਮਨਸ੍ਸਾਦੀਨਂ ਵਸੇਨ ਇਧ ਅਟ੍ਠਾਰਸ ਵੇਦਨਾ ਵੇਦਿਤਬ੍ਬਾ.
ਛ ਗੇਹਸਿਤਾਨਿ ਸੋਮਨਸ੍ਸਾਨੀਤਿਆਦੀਸੁ ‘‘ਚਕ੍ਖੁਵਿਞ੍ਞੇਯ੍ਯਾਨਂ ਰੂਪਾਨਂ ਇਟ੍ਠਾਨਂ ਕਨ੍ਤਾਨਂ ਮਨਾਪਾਨਂ ਮਨੋਰਮਾਨਂ ਲੋਕਾਮਿਸਪਟਿਸਂਯੁਤ੍ਤਾਨਂ ਪਟਿਲਾਭਂ ਵਾ ਪਟਿਲਾਭਤੋ ਸਮਨੁਪਸ੍ਸਤੋ ਪੁਬ੍ਬੇ ਵਾ ਪਟਿਲਦ੍ਧਪੁਬ੍ਬਂ ਅਤੀਤਂ ਨਿਰੁਦ੍ਧਂ ਵਿਪਰਿਣਤਂ ਸਮਨੁਸ੍ਸਰਤੋ ਉਪ੍ਪਜ੍ਜਤਿ ਸੋਮਨਸ੍ਸਂ. ਯਂ ਏਵਰੂਪਂ ਸੋਮਨਸ੍ਸਂ, ਇਦਂ ਵੁਚ੍ਚਤਿ ਗੇਹਸਿਤਂ ਸੋਮਨਸ੍ਸ’’ਨ੍ਤਿ (ਮ. ਨਿ. ੩.੩੦੬). ਏਵਂ ਛਸੁ ਦ੍ਵਾਰੇਸੁ ਵੁਤ੍ਤਕਾਮਗੁਣਨਿਸ੍ਸਿਤਾਨਿ ਸੋਮਨਸ੍ਸਾਨਿ ਛ ਗੇਹਸਿਤਸੋਮਨਸ੍ਸਾਨਿ ਨਾਮ.
‘‘ਰੂਪਾਨਂ ਤ੍ਵੇਵ ਅਨਿਚ੍ਚਤਂ ਵਿਦਿਤ੍ਵਾ ਵਿਪਰਿਣਾਮਵਿਰਾਗਨਿਰੋਧਂ ‘ਪੁਬ੍ਬੇ ਚੇਵ ਰੂਪਾ ਏਤਰਹਿ ਚ, ਸਬ੍ਬੇ ਤੇ ਰੂਪਾ ਅਨਿਚ੍ਚਾ ਦੁਕ੍ਖਾ ਵਿਪਰਿਣਾਮਧਮ੍ਮਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਪਸ੍ਸਤੋ ਉਪ੍ਪਜ੍ਜਤਿ ਸੋਮਨਸ੍ਸਂ. ਯਂ ਏਵਰੂਪਂ ਸੋਮਨਸ੍ਸਂ, ਇਦਂ ਵੁਚ੍ਚਤਿ ਨੇਕ੍ਖਮ੍ਮਸਿਤਂ ਸੋਮਨਸ੍ਸ’’ਨ੍ਤਿ (ਮ. ਨਿ. ੩.੩੦੬) ਏਵਂ ਛਸੁ ਦ੍ਵਾਰੇਸੁ ਇਟ੍ਠਾਰਮ੍ਮਣੇ ਆਪਾਥਗਤੇ ਅਨਿਚ੍ਚਤਾਦਿਵਸੇਨ ਵਿਪਸ੍ਸਨਂ ਪਟ੍ਠਪੇਤ੍ਵਾ ਉਸ੍ਸੁਕ੍ਕਾਪੇਤੁਂ ਸਕ੍ਕੋਨ੍ਤਸ੍ਸ ‘‘ਉਸ੍ਸੁਕ੍ਕਿਤਾ ਮੇ ਵਿਪਸ੍ਸਨਾ’’ਤਿ ਸੋਮਨਸ੍ਸਜਾਤਸ੍ਸ ਉਪ੍ਪਨ੍ਨਸੋਮਨਸ੍ਸਾਨਿ ਛ ਨੇਕ੍ਖਮ੍ਮਸਿਤਸੋਮਨਸ੍ਸਾਨਿ ਨਾਮ.
‘‘ਚਕ੍ਖੁਵਿਞ੍ਞੇਯ੍ਯਾਨਂ ਰੂਪਾਨਂ ਇਟ੍ਠਾਨਂ ਕਨ੍ਤਾਨਂ ਮਨਾਪਾਨਂ ਮਨੋਰਮਾਨਂ ਲੋਕਾਮਿਸਪਟਿਸਂਯੁਤ੍ਤਾਨਂ ਅਪ੍ਪਟਿਲਾਭਂ ਵਾ ਅਪ੍ਪਟਿਲਾਭਤੋ ਸਮਨੁਪਸ੍ਸਤੋ ਪੁਬ੍ਬੇ ਵਾ ਪਟਿਲਦ੍ਧਪੁਬ੍ਬਂ ਅਤੀਤਂ ਨਿਰੁਦ੍ਧਂ ਵਿਪਰਿਣਤਂ ਸਮਨੁਸ੍ਸਰਤੋ ਉਪ੍ਪਜ੍ਜਤਿ ਦੋਮਨਸ੍ਸਂ. ਯਂ ਏਵਰੂਪਂ ਦੋਮਨਸ੍ਸਂ, ਇਦਂ ਵੁਚ੍ਚਤਿ ਗੇਹਸਿਤਂ ਦੋਮਨਸ੍ਸ’’ਨ੍ਤਿ. ਏਵਂ ਛਸੁ ਦ੍ਵਾਰੇਸੁ ‘‘ਇਟ੍ਠਾਰਮ੍ਮਣਂ ਨਾਨੁਭਵਿਸ੍ਸਾਮਿ ਨਾਨੁਭਵਾਮੀ’’ਤਿ ਵਿਤਕ੍ਕਯਤੋ ਉਪ੍ਪਨ੍ਨਾਨਿ ਕਾਮਗੁਣਨਿਸ੍ਸਿਤਦੋਮਨਸ੍ਸਾਨਿ ਛ ਗੇਹਸਿਤਦੋਮਨਸ੍ਸਾਨਿ ਨਾਮ.
‘‘ਰੂਪਾਨਂ ਤ੍ਵੇਵ ਅਨਿਚ੍ਚਤਂ ਵਿਦਿਤ੍ਵਾ ਵਿਪਰਿਣਾਮਵਿਰਾਗਨਿਰੋਧਂ ‘ਪੁਬ੍ਬੇ ਚੇਵ ਰੂਪਾ ਏਤਰਹਿ ਚ, ਸਬ੍ਬੇ ਤੇ ਰੂਪਾ ਅਨਿਚ੍ਚਾ ਦੁਕ੍ਖਾ ਵਿਪਰਿਣਾਮਧਮ੍ਮਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਿਸ੍ਵਾ ਅਨੁਤ੍ਤਰੇਸੁ ਵਿਮੋਕ੍ਖੇਸੁ ਪਿਹਂ ਉਪਟ੍ਠਾਪੇਤਿ ‘ਕੁਦਾਸ੍ਸੁ ਨਾਮਾਹਂ ਤਦਾਯਤਨਂ ਉਪਸਮ੍ਪਜ੍ਜ ਵਿਹਰਿਸ੍ਸਾਮਿ, ਯਦਰਿਯਾ ਏਤਰਹਿ ਆਯਤਨਂ ਉਪਸਮ੍ਪਜ੍ਜ ਵਿਹਰਨ੍ਤੀ’’ਤਿ. ਇਤਿ ਅਨੁਤ੍ਤਰੇਸੁ ਵਿਮੋਕ੍ਖੇਸੁ ਪਿਹਂ ਉਪਟ੍ਠਾਪਯਤੋ ਉਪ੍ਪਜ੍ਜਤਿ ਪਿਹਪਚ੍ਚਯਾ ਦੋਮਨਸ੍ਸਂ. ਯਂ ਏਵਰੂਪਂ ਦੋਮਨਸ੍ਸਂ, ਇਦਂ ਵੁਚ੍ਚਤਿ ਨੇਕ੍ਖਮ੍ਮਸਿਤਂ ਦੋਮਨਸ੍ਸਨ੍ਤਿ; ਏਵਂ ਛਸੁ ਦ੍ਵਾਰੇਸੁ ਇਟ੍ਠਾਰਮ੍ਮਣੇ ਆਪਾਥਗਤੇ ਅਨੁਤ੍ਤਰਵਿਮੋਕ੍ਖਸਙ੍ਖਾਤਅਰਿਯਫਲਧਮ੍ਮੇਸੁ ਪਿਹਂ ਉਪਟ੍ਠਾਪੇਤ੍ਵਾ ਤਦਧਿਗਮਾਯ ਅਨਿਚ੍ਚਤਾਦਿਵਸੇਨ ਵਿਪਸ੍ਸਨਂ ਪਟ੍ਠਪੇਤ੍ਵਾ ਉਸ੍ਸੁਕ੍ਕਾਪੇਤੁਂ ਅਸਕ੍ਕੋਨ੍ਤਸ੍ਸ ‘‘ਇਮਮ੍ਪਿ ਪਕ੍ਖਂ ਇਮਮ੍ਪਿ ਮਾਸਂ ਇਮਮ੍ਪਿ ਸਂਵਚ੍ਛਰਂ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਿਯਭੂਮਿਂ ਪਾਪੁਣਿਤੁਂ ਨਾਸਕ੍ਖਿ’’ਨ੍ਤਿ ਅਨੁਸੋਚਤੋ ਉਪ੍ਪਨ੍ਨਾਨਿ ਦੋਮਨਸ੍ਸਾਨਿ ਛ ਨੇਕ੍ਖਮ੍ਮਸਿਤਦੋਮਨਸ੍ਸਾਨਿ ਨਾਮ.
‘‘ਚਕ੍ਖੁਨਾ ਰੂਪਂ ਦਿਸ੍ਵਾ ਉਪ੍ਪਜ੍ਜਤਿ ਉਪੇਕ੍ਖਾ ਬਾਲਸ੍ਸ ਮੂਲ਼੍ਹਸ੍ਸ ਪੁਥੁਜ੍ਜਨਸ੍ਸ ਅਨੋਧਿਜਿਨਸ੍ਸ ਅਵਿਪਾਕਜਿਨਸ੍ਸ ਅਨਾਦੀਨਵਦਸ੍ਸਾਵਿਨੋ ਅਸ੍ਸੁਤਵਤੋ ਪੁਥੁਜ੍ਜਨਸ੍ਸ. ਯਾ ਏਵਰੂਪਾ ਉਪੇਕ੍ਖਾ, ਰੂਪਂ ਸਾ ਨਾਤਿਵਤ੍ਤਤਿ, ਤਸ੍ਮਾ ਸਾ ਉਪੇਕ੍ਖਾ ਗੇਹਸਿਤਾਤਿ ਵੁਚ੍ਚਤੀ’’ਤਿ; ਏਵਂ ਛਸੁ ਦ੍ਵਾਰੇਸੁ ਇਟ੍ਠਾਰਮ੍ਮਣੇ ਆਪਾਥਗਤੇ ਗੁਲ਼ਪਿਣ੍ਡਕੇ ਨਿਲੀਨਮਕ੍ਖਿਕਾ ਵਿਯ ਰੂਪਾਦੀਨਿ ਅਨਤਿਵਤ੍ਤਮਾਨਾ ਤਤ੍ਥੇਵ ਲਗ੍ਗਾ ਲਗ੍ਗਿਤਾ ਹੁਤ੍ਵਾ ਉਪ੍ਪਨ੍ਨਕਾਮਗੁਣਨਿਸ੍ਸਿਤਾ ਉਪੇਕ੍ਖਾ ਛ ਗੇਹਸਿਤਉਪੇਕ੍ਖਾ ਨਾਮ.
‘‘ਰੂਪਾਨਂ ਤ੍ਵੇਵ ਅਨਿਚ੍ਚਤਂ ਵਿਦਿਤ੍ਵਾ ਵਿਪਰਿਣਾਮਵਿਰਾਗਨਿਰੋਧਂ ਪੁਬ੍ਬੇ ਚੇਵ ਰੂਪਾ ਏਤਰਹਿ ਚ, ‘ਸਬ੍ਬੇ ਤੇ ਰੂਪਾ ਅਨਿਚ੍ਚਾ ਦੁਕ੍ਖਾ ਵਿਪਰਿਣਾਮਧਮ੍ਮਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਪਸ੍ਸਤੋ ਉਪ੍ਪਜ੍ਜਤਿ ਉਪੇਕ੍ਖਾ. ਯਾ ਏਵਰੂਪਾ ਉਪੇਕ੍ਖਾ, ਰੂਪਂ ਸਾ ਅਤਿਵਤ੍ਤਤਿ, ਤਸ੍ਮਾ ਸਾ ਉਪੇਕ੍ਖਾ ਨੇਕ੍ਖਮ੍ਮਸਿਤਾਤਿ ਵੁਚ੍ਚਤੀ’’ਤਿ; ਏਵਂ ਛਸੁ ਦ੍ਵਾਰੇਸੁ ਇਟ੍ਠਾਦਿਆਰਮ੍ਮਣੇ ਆਪਾਥਗਤੇ ਇਟ੍ਠੇ ਅਰਜ੍ਜਨ੍ਤਸ੍ਸ ਅਨਿਟ੍ਠੇ ਅਦੁਸ੍ਸਨ੍ਤਸ੍ਸ ਅਸਮਪੇਕ੍ਖਨੇ ਅਮੁਯ੍ਹਨ੍ਤਸ੍ਸ ਉਪ੍ਪਨ੍ਨਾ ਵਿਪਸ੍ਸਨਾਞਾਣਸਮ੍ਪਯੁਤ੍ਤਾ ਉਪੇਕ੍ਖਾ ਨੇਕ੍ਖਮ੍ਮਸਿਤਉਪੇਕ੍ਖਾ ਨਾਮ. ਇਮਸ੍ਮਿਂ ਸੁਤ੍ਤੇ ਸਬ੍ਬਸਙ੍ਗਾਹਕੋ ਚਤੁਭੂਮਕਧਮ੍ਮਪਰਿਚ੍ਛੇਦੋ ਕਥਿਤੋ. ਤਤਿਯਾਦੀਨਿ ਉਤ੍ਤਾਨਤ੍ਥਾਨੇਵ.
੧੧. ਨਿਰਾਮਿਸਸੁਤ੍ਤਵਣ੍ਣਨਾ
੨੭੯. ਏਕਾਦਸਮੇ ਸਾਮਿਸਾਤਿ ਕਿਲੇਸਾਮਿਸੇਨ ਸਾਮਿਸਾ. ਨਿਰਾਮਿਸਤਰਾਤਿ ਨਿਰਾਮਿਸਾਯਪਿ ਝਾਨਪੀਤਿਯਾ ਨਿਰਾਮਿਸਤਰਾਵ. ਨਨੁ ਚ ਦ੍ਵੀਸੁ ਝਾਨੇਸੁ ਪੀਤਿ ਮਹਗ੍ਗਤਾਪਿ ਹੋਤਿ ਲੋਕੁਤ੍ਤਰਾਪਿ, ਪਚ੍ਚਵੇਕ੍ਖਣਪੀਤਿ ਲੋਕਿਯਾਵ, ਸਾ ਕਸ੍ਮਾ ਨਿਰਾਮਿਸਤਰਾ ਜਾਤਾਤਿ? ਸਨ੍ਤਪਣੀਤਧਮ੍ਮਪਚ੍ਚਵੇਕ੍ਖਣਵਸੇਨ ਉਪ੍ਪਨ੍ਨਤ੍ਤਾ. ਯਥਾ ਹਿ ਰਾਜਵਲ੍ਲਭੋ ਚੂਲ਼ੁਪਟ੍ਠਾਕੋ ਅਪ੍ਪਟਿਹਾਰਿਕਂ ਯਥਾਸੁਖਂ ਰਾਜਕੁਲਂ ਪਵਿਸਨ੍ਤੋ ਸੇਟ੍ਠਿਸੇਨਾਪਤਿਆਦਯੋ ਪਾਦੇਨ ਪਹਰਨ੍ਤੋਪਿ ਨ ਗਣੇਤਿ. ਕਸ੍ਮਾ? ਰਞ੍ਞੋ ਆਸਨ੍ਨਪਰਿਚਾਰਕਤ੍ਤਾ. ਇਤਿ ਸੋ ਤੇਹਿ ਉਤ੍ਤਰਿਤਰੋ ਹੋਤਿ, ਏਵਮਯਮ੍ਪਿ ਸਨ੍ਤਪਣੀਤਧਮ੍ਮਪਚ੍ਚਵੇਕ੍ਖਣਵਸੇਨ ਉਪ੍ਪਨ੍ਨਤ੍ਤਾ ਲੋਕੁਤ੍ਤਰਪੀਤਿਤੋਪਿ ਉਤ੍ਤਰਿਤਰਾਤਿ ਵੇਦਿਤਬ੍ਬਾ. ਸੇਸਵਾਰੇਸੁਪਿ ਏਸੇਵ ਨਯੋ.
ਵਿਮੋਕ੍ਖਵਾਰੇ ਪਨ ਰੂਪਪਟਿਸਂਯੁਤ੍ਤੋ ਵਿਮੋਕ੍ਖੋ ਅਤ੍ਤਨੋ ਆਰਮ੍ਮਣਭੂਤੇਨ ਰੂਪਾਮਿਸਵਸੇਨੇਵ ਸਾਮਿਸੋ ਨਾਮ, ਅਰੂਪਪਟਿਸਂਯੁਤ੍ਤੋ ਰੂਪਾਮਿਸਾਭਾਵੇਨ ਨਿਰਾਮਿਸੋ ਨਾਮਾਤਿ.
ਵੇਦਨਾਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.