੩. ਮਾਤੁਗਾਮਸਂਯੁਤ੍ਤਂ

੧. ਪਠਮਪੇਯ੍ਯਾਲਵਗ੍ਗੋ

੧-੨. ਮਾਤੁਗਾਮਸੁਤ੍ਤਾਦਿਵਣ੍ਣਨਾ

੨੮੦-੨੮੧. ਮਾਤੁਗਾਮਸਂਯੁਤ੍ਤਸ੍ਸ ਪਠਮੇ ਅਙ੍ਗੇਹੀਤਿ ਅਗੁਣਙ੍ਗੇਹਿ. ਨ ਚ ਰੂਪਵਾਤਿ ਨ ਰੂਪਸਮ੍ਪਨ੍ਨੋ ਵਿਰੂਪੋ ਦੁਦ੍ਦਸਿਕੋ. ਨ ਚ ਭੋਗਵਾਤਿ ਨ ਭੋਗਸਮ੍ਪਨ੍ਨੋ ਨਿਦ੍ਧਨੋ. ਨ ਚ ਸੀਲਵਾਤਿ ਨ ਸੀਲਸਮ੍ਪਨ੍ਨੋ ਦੁਸ੍ਸੀਲੋ. ਅਲਸੋ ਚਾਤਿ ਕਨ੍ਤਨਪਚਨਾਦੀਨਿ ਕਮ੍ਮਾਨਿ ਕਾਤੁਂ ਨ ਸਕ੍ਕੋਤਿ, ਕੁਸੀਤੋ ਆਲਸਿਯੋ ਨਿਸਿਨ੍ਨਟ੍ਠਾਨੇ ਨਿਸਿਨ੍ਨੋਵ, ਠਿਤਠਾਨੇ ਠਿਤੋਵ ਨਿਦ੍ਦਾਯਤਿ ਏਵ. ਪਜਞ੍ਚਸ੍ਸ ਨ ਲਭਤੀਤਿ ਅਸ੍ਸ ਪੁਰਿਸਸ੍ਸ ਕੁਲਵਂਸਪਤਿਟ੍ਠਾਪਕਂ ਪੁਤ੍ਤਂ ਨ ਲਭਤਿ, ਵਞ੍ਝਿਤ੍ਥੀ ਨਾਮ ਹੋਤਿ. ਸੁਕ੍ਕਪਕ੍ਖੋ ਵੁਤ੍ਤਵਿਪਰਿਯਾਯੇਨ ਵੇਦਿਤਬ੍ਬੋ. ਦੁਤਿਯਂ ਪਠਮੇ ਵੁਤ੍ਤਨਯੇਨੇਵ ਪਰਿਵਤ੍ਤੇਤਬ੍ਬਂ.

੩. ਆਵੇਣਿਕਦੁਕ੍ਖਸੁਤ੍ਤਵਣ੍ਣਨਾ

੨੮੨. ਤਤਿਯੇ ਆਵੇਣਿਕਾਨੀਤਿ ਪਾਟਿਪੁਗ੍ਗਲਿਕਾਨਿ ਪੁਰਿਸੇਹਿ ਅਸਾਧਾਰਣਾਨਿ. ਪਾਰਿਚਰਿਯਨ੍ਤਿ ਪਰਿਚਾਰਿਕਭਾਵਂ.

੪. ਤੀਹਿਧਮ੍ਮੇਹਿਸੁਤ੍ਤਾਦਿਵਣ੍ਣਨਾ

੨੮੩-੩੦੩. ਚਤੁਤ੍ਥੇ ਮਚ੍ਛੇਰਮਲਪਰਿਯੁਟ੍ਠਿਤੇਨਾਤਿ ਪੁਬ੍ਬਣ੍ਹਸਮਯਸ੍ਮਿਞ੍ਹਿ ਮਾਤੁਗਾਮੋ ਖੀਰਦਧਿਸਙ੍ਗੋਪਨਰਨ੍ਧਨਪਚਨਾਦੀਨਿ ਕਾਤੁਂ ਆਰਦ੍ਧੋ, ਪੁਤ੍ਤਕੇਹਿਪਿ ਯਾਚਿਯਮਾਨੋ ਕਿਞ੍ਚਿ ਦਾਤੁਂ ਨ ਇਚ੍ਛਤਿ. ਤੇਨੇਤਂ ਵੁਤ੍ਤਂ ‘‘ਪੁਬ੍ਬਣ੍ਹਸਮਯਂ ਮਚ੍ਛੇਰਮਲਪਰਿਯੁਟ੍ਠਿਤੇਨ ਚੇਤਸਾ’’ਤਿ. ਮਜ੍ਝਨ੍ਹਿਕਸਮਯੇ ਪਨ ਮਾਤੁਗਾਮੋ ਕੋਧਾਭਿਭੂਤੋਵ ਹੋਤਿ, ਅਨ੍ਤੋਘਰੇ ਕਲਹਂ ਅਲਭਨ੍ਤੋ ਪਟਿਵਿਸ੍ਸਕਘਰਮ੍ਪਿ ਗਨ੍ਤ੍ਵਾ ਕਲਹਂ ਕਰੋਤਿ, ਸਾਮਿਕਸ੍ਸ ਚ ਠਿਤਨਿਸਿਨ੍ਨਟ੍ਠਾਨਾਨਿ ਵਿਲੋਕੇਨ੍ਤੋ ਵਿਚਰਤਿ. ਤੇਨ ਵੁਤ੍ਤਂ ‘‘ਮਜ੍ਝਨ੍ਹਿਕਸਮਯਂ ਇਸ੍ਸਾਪਰਿਯੁਟ੍ਠਿਤੇਨ ਚੇਤਸਾ’’ਤਿ. ਸਾਯਨ੍ਹੇ ਪਨਸ੍ਸਾ ਅਸਦ੍ਧਮ੍ਮਪਟਿਸੇਵਨਾਯ ਚਿਤ੍ਤਂ ਨਮਤਿ. ਤੇਨ ਵੁਤ੍ਤਂ ‘‘ਸਾਯਨ੍ਹਸਮਯਂ ਕਾਮਰਾਗਪਰਿਯੁਟ੍ਠਿਤੇਨ ਚੇਤਸਾ’’ਤਿ. ਪਞ੍ਚਮਾਦੀਨਿ ਉਤ੍ਤਾਨਤ੍ਥਾਨੇਵ.

੩. ਬਲਵਗ੍ਗੋ

੧. ਵਿਸਾਰਦਸੁਤ੍ਤਵਣ੍ਣਨਾ

੩੦੪. ਦਸਮੇ ਰੂਪਬਲਨ੍ਤਿਆਦੀਸੁ ਰੂਪਸਮ੍ਪਤ੍ਤਿ ਰੂਪਬਲਂ, ਭੋਗਸਮ੍ਪਤ੍ਤਿ ਭੋਗਬਲਂ, ਞਾਤਿਸਮ੍ਪਤ੍ਤਿ ਞਾਤਿਬਲਂ, ਪੁਤ੍ਤਸਮ੍ਪਤ੍ਤਿ ਪੁਤ੍ਤਬਲਂ, ਸੀਲਸਮ੍ਪਤ੍ਤਿ ਸੀਲਬਲਂ. ਪਞ੍ਚਸੀਲਦਸਸੀਲਾਨਿ ਅਖਣ੍ਡਾਨਿ ਕਤ੍ਵਾ ਰਕ੍ਖਨ੍ਤਸ੍ਸ ਹਿ ਸੀਲਸਮ੍ਪਤ੍ਤਿਯੇਵ ਸੀਲਬਲਂ ਨਾਮ ਹੋਤਿ. ਇਮਾਨਿ ਖੋ ਭਿਕ੍ਖਵੇ ਪਞ੍ਚ ਬਲਾਨੀਤਿ ਇਮਾਨਿ ਪਞ੍ਚ ਉਪਤ੍ਥਮ੍ਭਨਟ੍ਠੇਨ ਬਲਾਨਿ ਨਾਮ ਵੁਚ੍ਚਨ੍ਤਿ.

੨-੧੦. ਪਸਯ੍ਹਸੁਤ੍ਤਾਦਿਵਣ੍ਣਨਾ

੩੦੫-੩੧੩. ਪਸਯ੍ਹਾਤਿ ਅਭਿਭਵਿਤ੍ਵਾ. ਅਭਿਭੁਯ੍ਯ ਵਤ੍ਤਤੀਤਿ ਅਭਿਭਵਤਿ ਅਜ੍ਝੋਤ੍ਥਰਤਿ. ਨੇਵ ਰੂਪਬਲਂ ਤਾਯਤੀਤਿ ਨੇਵ ਰੂਪਬਲਂ ਤਾਯਿਤੁਂ ਰਕ੍ਖਿਤੁਂ ਸਕ੍ਕੋਤਿ. ਨਾਸੇਨ੍ਤੇਵ ਨਂ, ਕੁਲੇ ਨ ਵਾਸੇਨ੍ਤੀਤਿ ‘‘ਦੁਸ੍ਸੀਲਾ ਸਂਭਿਨ੍ਨਾਚਾਰਾ ਅਤਿਕ੍ਕਨ੍ਤਮਰਿਯਾਦਾ’’ਤਿ ਗੀਵਾਯਂ ਗਹੇਤ੍ਵਾ ਨੀਹਰਨ੍ਤਿ, ਨ ਤਸ੍ਮਿਂ ਕੁਲੇ ਵਾਸੇਨ੍ਤਿ. ਵਾਸੇਨ੍ਤੇਵ ਨਂ ਕੁਲੇ, ਨ ਨਾਸੇਨ੍ਤੀਤਿ ‘‘ਕਿਂ ਰੂਪੇਨ ਭੋਗਾਦੀਹਿ ਵਾ, ਪਰਿਸੁਦ੍ਧਸੀਲਾ ਏਸਾ ਆਚਾਰਸਮ੍ਪਨ੍ਨਾ’’ਤਿ ਞਤ੍ਵਾ ਞਾਤਕਾ ਤਸ੍ਮਿਂ ਕੁਲੇ ਵਾਸੇਨ੍ਤਿਯੇਵ, ਨ ਨਾਸੇਨ੍ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਮਾਤੁਗਾਮਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.