੪. ਜਮ੍ਬੁਖਾਦਕਸਂਯੁਤ੍ਤਂ

੧. ਨਿਬ੍ਬਾਨਪਞ੍ਹਾਸੁਤ੍ਤਵਣ੍ਣਨਾ

੩੧੪. ਜਮ੍ਬੁਖਾਦਕਸਂਯੁਤ੍ਤੇ ਜਮ੍ਬੁਖਾਦਕੋ ਪਰਿਬ੍ਬਾਜਕੋਤਿ ਏਵਂਨਾਮੋ ਥੇਰਸ੍ਸ ਭਾਗਿਨੇਯ੍ਯੋ ਛਨ੍ਨਪਰਿਬ੍ਬਾਜਕੋ. ਯੋ ਖੋ ਆਵੁਸੋ ਰਾਗਕ੍ਖਯੋਤਿ ਨਿਬ੍ਬਾਨਂ ਆਗਮ੍ਮ ਰਾਗੋ ਖੀਯਤਿ, ਤਸ੍ਮਾ ਨਿਬ੍ਬਾਨਂ ਰਾਗਕ੍ਖਯੋਤਿ ਵੁਚ੍ਚਤਿ. ਦੋਸਮੋਹਕ੍ਖਯੇਸੁਪਿ ਏਸੇਵ ਨਯੋ.

ਯੋ ਪਨ ਇਮਿਨਾਵ ਸੁਤ੍ਤੇਨ ਕਿਲੇਸਕ੍ਖਯਮਤ੍ਤਂ ਨਿਬ੍ਬਾਨਨ੍ਤਿ ਵਦੇਯ੍ਯ, ਸੋ ਵਤ੍ਤਬ੍ਬੋ ‘‘ਕਸ੍ਸ ਕਿਲੇਸਾਨਂ ਖਯੋ, ਕਿਂ ਅਤ੍ਤਨੋ, ਉਦਾਹੁ ਪਰੇਸ’’ਨ੍ਤਿ? ਅਦ੍ਧਾ ‘‘ਅਤ੍ਤਨੋ’’ਤਿ ਵਕ੍ਖਤਿ. ਤਤੋ ਪੁਚ੍ਛਿਤਬ੍ਬੋ ‘‘ਗੋਤ੍ਰਭੁਞਾਣਸ੍ਸ ਕਿਂ ਆਰਮ੍ਮਣ’’ਨ੍ਤਿ? ਜਾਨਮਾਨੋ ‘‘ਨਿਬ੍ਬਾਨ’’ਨ੍ਤਿ ਵਕ੍ਖਤਿ. ਕਿਂ ਪਨ ਗੋਤ੍ਰਭੁਞਾਣਕ੍ਖਣੇ ਕਿਲੇਸਾ ਖੀਣਾ ਖੀਯਨ੍ਤਿ ਖੀਯਿਸ੍ਸਨ੍ਤੀਤਿ? ‘‘ਖੀਣਾ’’ਤਿ ਵਾ ‘‘ਖੀਯਨ੍ਤੀ’’ਤਿ ਵਾ ਨ ਵਤ੍ਤਬ੍ਬਾ, ‘‘ਖੀਯਿਸ੍ਸਨ੍ਤੀ’’ਤਿ ਪਨ ਵਤ੍ਤਬ੍ਬਾਤਿ. ਕਿਂ ਪਨ ਤੇਸੁ ਅਖੀਣੇਸੁਯੇਵ ਕਿਲੇਸੇਸੁ ਗੋਤ੍ਰਭੁਞਾਣਂ ਕਿਲੇਸਕ੍ਖਯਂ ਆਰਮ੍ਮਣਂ ਕਰੋਤੀਤਿ? ਅਦ੍ਧਾ ਏਵਂ ਵੁਤ੍ਤੇ ਨਿਰੁਤ੍ਤਰੋ ਭਵਿਸ੍ਸਤਿ.

ਮਗ੍ਗਞਾਣੇਨਾਪਿ ਚੇਤਂ ਯੋਜੇਤਬ੍ਬਂ. ਮਗ੍ਗਕ੍ਖਣੇਪਿ ਹਿ ਕਿਲੇਸਾ ‘‘ਖੀਣਾ’’ਤਿ ਵਾ ‘‘ਖੀਯਿਸ੍ਸਨ੍ਤੀ’’ਤਿ ਵਾ ਨ ਵਤ੍ਤਬ੍ਬਾ, ‘‘ਖੀਯਨ੍ਤੀ’’ਤਿ ਪਨ ਵਤ੍ਤਬ੍ਬਾ, ਨ ਚ ਅਖੀਣੇਸੁਯੇਵ ਕਿਲੇਸੇਸੁ ਕਿਲੇਸਕ੍ਖਯੋ ਆਰਮ੍ਮਣਂ ਹੋਤਿ, ਤਸ੍ਮਾ ਸਮ੍ਪਟਿਚ੍ਛਿਤਬ੍ਬਮੇਤਂ. ਯਂ ਆਗਮ੍ਮ ਰਾਗਾਦਯੋ ਖੀਯਨ੍ਤਿ, ਤਂ ਨਿਬ੍ਬਾਨਂ. ਤਂ ਪਨੇਤਂ ‘‘ਰੂਪਿਨੋ ਧਮ੍ਮਾ ਅਰੂਪਿਨੋ ਧਮ੍ਮਾ’’ਤਿਆਦੀਸੁ (ਧ. ਸ. ਦੁਕਮਾਤਿਕਾ ੧੧) ਦੁਕੇਸੁ ਅਰੂਪਿਨੋ ਧਮ੍ਮਾਤਿ ਸਙ੍ਗਹਿਤਤ੍ਤਾ ਨ ਕਿਲੇਸਕ੍ਖਯਮਤ੍ਤਮੇਵਾਤਿ.

੨. ਅਰਹਤ੍ਤਪਞ੍ਹਾਸੁਤ੍ਤਵਣ੍ਣਨਾ

੩੧੫. ਅਰਹਤ੍ਤਪਞ੍ਹਬ੍ਯਾਕਰਣੇ ਯਸ੍ਮਾ ਅਰਹਤ੍ਤਂ ਰਾਗਦੋਸਮੋਹਾਨਂ ਖੀਣਨ੍ਤੇ ਉਪ੍ਪਜ੍ਜਤਿ, ਤਸ੍ਮਾ ‘‘ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋ’’ਤਿ ਵੁਤ੍ਤਂ.

੩-੧੫. ਧਮ੍ਮਵਾਦੀਪਞ੍ਹਾਸੁਤ੍ਤਾਦਿਵਣ੍ਣਨਾ

੩੧੬-੩੨੮. ਤੇ ਲੋਕੇ ਸੁਗਤਾਤਿ ਤੇ ਰਾਗਾਦਯੋ ਪਹਾਯ ਗਤਤ੍ਤਾ ਸੁਟ੍ਠੁ ਗਤਾਤਿ ਸੁਗਤਾ. ਦੁਕ੍ਖਸ੍ਸ ਖੋ ਆਵੁਸੋ ਪਰਿਞ੍ਞਤ੍ਥਨ੍ਤਿ ਵਟ੍ਟਦੁਕ੍ਖਸ੍ਸ ਪਰਿਜਾਨਨਤ੍ਥਂ. ਦੁਕ੍ਖਤਾਤਿ ਦੁਕ੍ਖਸਭਾਵੋ. ਦੁਕ੍ਖਦੁਕ੍ਖਤਾਤਿਆਦੀਸੁ ਦੁਕ੍ਖਸਙ੍ਖਾਤੋ ਦੁਕ੍ਖਸਭਾਵੋ ਦੁਕ੍ਖਦੁਕ੍ਖਤਾ. ਸੇਸਪਦਦ੍ਵਯੇਪਿ ਏਸੇਵ ਨਯੋ.

੧੬. ਦੁਕ੍ਕਰਪਞ੍ਹਾਸੁਤ੍ਤਵਣ੍ਣਨਾ

੩੨੯. ਅਭਿਰਤੀਤਿ ਪਬ੍ਬਜ੍ਜਾਯ ਅਨੁਕ੍ਕਣ੍ਠਨਤਾ. ਨਚਿਰਂ ਆਵੁਸੋਤਿ ਆਵੁਸੋ ਧਮ੍ਮਾਨੁਧਮ੍ਮਪ੍ਪਟਿਪਨ੍ਨੋ ਭਿਕ੍ਖੁ ‘‘ਪਾਤੋ ਅਨੁਸਿਟ੍ਠੋ ਸਾਯਂ ਵਿਸੇਸਮਧਿਗਮਿਸ੍ਸਤਿ, ਸਾਯਂ ਅਨੁਸਿਟ੍ਠੋ ਪਾਤੋ ਵਿਸੇਸਮਧਿਗਮਿਸ੍ਸਤੀ’’ਤਿ (ਮ. ਨਿ. ੨.੩੪੫) ਵੁਤ੍ਤਤ੍ਤਾ ਘਟੇਨ੍ਤੋ ਵਾਯਮਨ੍ਤੋ ਨਚਿਰਸ੍ਸਂ ਲਹੁਯੇਵ ਅਰਹਂ ਅਸ੍ਸ, ਅਰਹਤ੍ਤੇ ਪਤਿਟ੍ਠਹੇਯ੍ਯਾਤਿ ਦਸ੍ਸੇਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਜਮ੍ਬੁਖਾਦਕਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.