੭. ਮਿਗਜਾਲਵਗ੍ਗੋ
੧. ਪਠਮਮਿਗਜਾਲਸੁਤ੍ਤਵਣ੍ਣਨਾ
੬੩. ਮਿਗਜਾਲਵਗ੍ਗਸ੍ਸ ਪਠਮੇ ਚਕ੍ਖੁਵਿਞ੍ਞੇਯ੍ਯਾਤਿ ਚਕ੍ਖੁਵਿਞ੍ਞਾਣੇਨ ਪਸ੍ਸਿਤਬ੍ਬਾ. ਸੋਤਵਿਞ੍ਞੇਯ੍ਯਾਦੀਸੁਪਿ ਏਸੇਵ ਨਯੋ. ਇਟ੍ਠਾਤਿ ਪਰਿਯਿਟ੍ਠਾ ਵਾ ਹੋਨ੍ਤੁ ਮਾ ਵਾ, ਇਟ੍ਠਾਰਮ੍ਮਣਭੂਤਾਤਿ ਅਤ੍ਥੋ. ਕਨ੍ਤਾਤਿ ਕਮਨੀਯਾ. ਮਨਾਪਾਤਿ ਮਨਵਡ੍ਢਨਕਾ. ਪਿਯਰੂਪਾਤਿ ਪਿਯਜਾਤਿਕਾ. ਕਾਮੂਪਸਂਹਿਤਾਤਿ ਆਰਮ੍ਮਣਂ ਕਤ੍ਵਾ ਉਪ੍ਪਜ੍ਜਮਾਨੇਨ ਕਾਮੇਨ ਉਪਸਂਹਿਤਾ ਰਜਨੀਯਾਤਿ ਰਞ੍ਜਨੀਯਾ, ਰਾਗੁਪ੍ਪਤ੍ਤਿਕਾਰਣਭੂਤਾਤਿ ਅਤ੍ਥੋ. ਨਨ੍ਦੀਤਿ ਤਣ੍ਹਾਨਨ੍ਦੀ. ਸਂਯੋਗੋਤਿ ਸਂਯੋਜਨਂ. ਨਨ੍ਦਿਸਂਯੋਜਨਸਂਯੁਤ੍ਤੋਤਿ ਨਨ੍ਦੀਬਨ੍ਧਨੇਨ ਬਦ੍ਧੋ. ਅਰਞ੍ਞਵਨਪਤ੍ਥਾਨੀਤਿ ਅਰਞ੍ਞਾਨਿ ਚ ਵਨਪਤ੍ਥਾਨਿ ਚ. ਤਤ੍ਥ ਕਿਞ੍ਚਾਪਿ ਅਭਿਧਮ੍ਮੇ ਨਿਪ੍ਪਰਿਯਾਯੇਨ ‘‘ਨਿਕ੍ਖਮਿਤ੍ਵਾ ਬਹਿ ਇਨ੍ਦਖੀਲਾ ਸਬ੍ਬਮੇਤਂ ਅਰਞ੍ਞ’’ਨ੍ਤਿ (ਵਿਭ. ੫੨੯) ਵੁਤ੍ਤਂ, ਤਥਾਪਿ ਯਂ ਤਂ ‘‘ਪਞ੍ਚਧਨੁਸਤਿਕਂ ਪਚ੍ਛਿਮ’’ਨ੍ਤਿ (ਪਾਰਾ. ੬੫੪) ਅਰਞ੍ਞਕਙ੍ਗਨਿਪ੍ਫਾਦਕਂ ਸੇਨਾਸਨਂ ਵੁਤ੍ਤਂ, ਤਦੇਵ ਅਧਿਪ੍ਪੇਤਨ੍ਤਿ ਵੇਦਿਤਬ੍ਬਂ. ਵਨਪਤ੍ਥਨ੍ਤਿ ਗਾਮਨ੍ਤਂ ਅਤਿਕ੍ਕਮਿਤ੍ਵਾ ਮਨੁਸ੍ਸਾਨਂ ਅਨੁਪਚਾਰਟ੍ਠਾਨਂ, ਯਤ੍ਥ ਨ ਕਸੀਯਤਿ ਨ ਵਪੀਯਤਿ. ਵੁਤ੍ਤਮ੍ਪਿ ਚੇਤਂ –
‘‘ਵਨਪਤ੍ਥਨ੍ਤਿ ਦੂਰਾਨਮੇਤਂ ਸੇਨਾਸਨਾਨਂ ਅਧਿਵਚਨਂ. ਵਨਪਤ੍ਥਨ੍ਤਿ ਵਨਸਣ੍ਡਾਨਮੇਤਂ, ਵਨਪਤ੍ਥਨ੍ਤਿ ਭਿਂਸਨਕਾਨਮੇਤਂ, ਵਨਪਤ੍ਥਨ੍ਤਿ ਸਲੋਮਹਂਸਾਨਮੇਤਂ, ਵਨਪਤ੍ਥਨ੍ਤਿ ਪਰਿਯਨ੍ਤਾਨਮੇਤਂ, ਵਨਪਤ੍ਥਨ੍ਤਿ ਅਮਨੁਸ੍ਸੂਪਚਾਰਾਨਂ ਸੇਨਾਸਨਾਨਮੇਤਂ ਅਧਿਵਚਨ’’ਨ੍ਤਿ (ਵਿਭ. ੫੩੧).
ਏਤ੍ਥ ਚ ਪਰਿਯਨ੍ਤਾਨਨ੍ਤਿ ਇਮਂ ਏਕਂ ਪਰਿਯਾਯਂ ਠਪੇਤ੍ਵਾ ਸੇਸਪਰਿਯਾਯੇਹਿ ਵਨਪਤ੍ਥਾਨਿ ਵੇਦਿਤਬ੍ਬਾਨਿ. ਪਨ੍ਤਾਨੀਤਿ ਪਰਿਯਨ੍ਤਾਨਿ ਅਤਿਦੂਰਾਨਿ. ਅਪ੍ਪਸਦ੍ਦਾਨੀਤਿ ਉਦੁਕ੍ਖਲਮੁਸਲਦਾਰਕਸਦ੍ਦਾਦੀਨਂ ਅਭਾਵੇਨ ਅਪ੍ਪਸਦ੍ਦਾਨਿ. ਅਪ੍ਪਨਿਗ੍ਘੋਸਾਨੀਤਿ ਤੇਸਂ ਤੇਸਂ ਨਿਨ੍ਨਾਦਮਹਾਨਿਗ੍ਘੋਸਸ੍ਸ ਅਭਾਵੇਨ ਅਪ੍ਪਨਿਗ੍ਘੋਸਾਨਿ. ਵਿਜਨਵਾਤਾਨੀਤਿ ਸਞ੍ਚਰਣਜਨਸ੍ਸ ਸਰੀਰਵਾਤਵਿਰਹਿਤਾਨਿ. ਮਨੁਸ੍ਸਰਾਹਸ੍ਸੇਯ੍ਯਕਾਨੀਤਿ ਮਨੁਸ੍ਸਾਨਂ ਰਹੋਕਮ੍ਮਸ੍ਸ ਅਨੁਚ੍ਛਵਿਕਾਨਿ. ਪਟਿਸਲ੍ਲਾਨਸਾਰੁਪ੍ਪਾਨੀਤਿ ਨਿਲੀਯਨਸਾਰੁਪ੍ਪਾਨਿ.
੨. ਦੁਤਿਯਮਿਗਜਾਲਸੁਤ੍ਤਵਣ੍ਣਨਾ
੬੪. ਦੁਤਿਯੇ ਨਨ੍ਦਿਨਿਰੋਧਾ ਦੁਕ੍ਖਨਿਰੋਧੋਤਿ ਤਣ੍ਹਾਨਨ੍ਦਿਯਾ ਨਿਰੋਧੇਨ ਵਟ੍ਟਦੁਕ੍ਖਸ੍ਸ ਨਿਰੋਧੋ.
੩-੫. ਪਠਮਸਮਿਦ੍ਧਿਮਾਰਪਞ੍ਹਾਸੁਤ੍ਤਾਦਿਵਣ੍ਣਨਾ
੬੫-੬੭. ਤਤਿਯੇ ਸਮਿਦ੍ਧੀਤਿ ਅਤ੍ਤਭਾਵਸ੍ਸ ਸਮਿਦ੍ਧਤਾਯ ਏਵਂ ਲਦ੍ਧਨਾਮੋ. ਤਸ੍ਸ ਕਿਰ ਥੇਰਸ੍ਸ ਅਤ੍ਤਭਾਵੋ ਅਭਿਰੂਪੋ ਅਹੋਸਿ ਪਾਸਾਦਿਕੋ, ਉਕ੍ਖਿਤ੍ਤਮਾਲਾਪੁਟੋ ਵਿਯ ਅਲਙ੍ਕਤਮਾਲਾਗਬ੍ਭੋ ਵਿਯ ਚ ਸਬ੍ਬਾਕਾਰਪਾਰਿਪੂਰਿਯਾ ਸਮਿਦ੍ਧੋ. ਤਸ੍ਮਾ ਸਮਿਦ੍ਧਿਤ੍ਵੇਵ ਸਙ੍ਖਂ ਗਤੋ. ਮਾਰੋਤਿ ਮਰਣਂ ਪੁਚ੍ਛਤਿ. ਮਾਰਪਞ੍ਞਤ੍ਤੀਤਿ ਮਾਰੋਤਿ ਪਞ੍ਞਤ੍ਤਿ ਨਾਮਂ ਨਾਮਧੇਯ੍ਯਂ. ਅਤ੍ਥਿ ਤਤ੍ਥ ਮਾਰੋ ਵਾ ਮਾਰਪਞ੍ਞਤ੍ਤਿ ਵਾਤਿ ਤਤ੍ਥ ਮਰਣਂ ਵਾ ਮਰਣਨ੍ਤਿ ਇਦਂ ਨਾਮਂ ਵਾ ਅਤ੍ਥੀਤਿ ਦਸ੍ਸੇਤਿ. ਚਤੁਤ੍ਥਂ ਉਤ੍ਤਾਨਮੇਵ, ਤਥਾ ਪਞ੍ਚਮਂ.
੬. ਸਮਿਦ੍ਧਿਲੋਕਪਞ੍ਹਾਸੁਤ੍ਤਵਣ੍ਣਨਾ
੬੮. ਛਟ੍ਠੇ ਲੋਕੋਤਿ ਲੁਜ੍ਜਨਪਲੁਜ੍ਜਨਟ੍ਠੇਨ ਲੋਕੋ. ਇਤਿ ਮਿਗਜਾਲਤ੍ਥੇਰਸ੍ਸ ਆਯਾਚਨਸੁਤ੍ਤਤੋ ਪਟ੍ਠਾਯ ਪਞ੍ਚਸੁਪਿ ਸੁਤ੍ਤੇਸੁ ਵਟ੍ਟਵਿਵਟ੍ਟਮੇਵ ਕਥਿਤਂ.
੭. ਉਪਸੇਨਆਸੀਵਿਸਸੁਤ੍ਤਵਣ੍ਣਨਾ
੬੯. ਸਤ੍ਤਮੇ ਸੀਤਵਨੇਤਿ ਏਵਂਨਾਮਕੇ ਸੁਸਾਨਵਨੇ. ਸਪ੍ਪਸੋਣ੍ਡਿਕਪਬ੍ਭਾਰੇਤਿ ਸਪ੍ਪਫਣਸਦਿਸਤਾਯ ਏਵਂਲਦ੍ਧਨਾਮੇ ਪਬ੍ਭਾਰੇ. ਉਪਸੇਨਸ੍ਸਾਤਿ ਧਮ੍ਮਸੇਨਾਪਤਿਨੋ ਕਨਿਟ੍ਠਭਾਤਿਕਉਪਸੇਨਤ੍ਥੇਰਸ੍ਸ. ਆਸੀਵਿਸੋ ਪਤਿਤੋ ਹੋਤੀਤਿ ਥੇਰੋ ਕਿਰ ਕਤਭਤ੍ਤਕਿਚ੍ਚੋ ਮਹਾਚੀਵਰਂ ਗਹੇਤ੍ਵਾ ਲੇਣਚ੍ਛਾਯਾਯ ਮਨ੍ਦਮਨ੍ਦੇਨ ਵਾਤਪਾਨਵਾਤੇਨ ਬੀਜਿਯਮਾਨੋ ਨਿਸੀਦਿਤ੍ਵਾ ਦੁਪਟ੍ਟਨਿਵਾਸਨੇ ਸੂਚਿਕਮ੍ਮਂ ਕਰੋਤਿ. ਤਸ੍ਮਿਂ ਖਣੇ ਲੇਣਚ੍ਛਦਨੇ ਦ੍ਵੇ ਆਸੀਵਿਸਪੋਤਕਾ ਕੀਲ਼ਨ੍ਤਿ. ਤੇਸੁ ਏਕੋ ਪਤਿਤ੍ਵਾ ਥੇਰਸ੍ਸ ਅਂਸਕੂਟੇ ਅਵਤ੍ਥਾਸਿ. ਸੋ ਚ ਫੁਟ੍ਠਵਿਸੋ ਹੋਤਿ. ਤਸ੍ਮਾ ਪਤਿਤਟ੍ਠਾਨਤੋ ਪਟ੍ਠਾਯ ਥੇਰਸ੍ਸ ਕਾਯੇ ਦੀਪਸਿਖਾ ਵਿਯ ਵਟ੍ਟਿਂ ਪਰਿਯਾਦਿਯਮਾਨਮੇਵਸ੍ਸ ਵਿਸਂ ਓਤਿਣ੍ਣਂ. ਥੇਰੋ ਵਿਸਸ੍ਸ ਤਥਾਗਮਨਂ ਦਿਸ੍ਵਾ ਕਿਞ੍ਚਾਪਿ ਤਂ ਪਤਿਤਮਤ੍ਤਮੇਵ ਯਥਾਪਰਿਚ੍ਛੇਦੇਨ ਗਤਂ, ਅਤ੍ਤਨੋ ਪਨ ਇਦ੍ਧਿਬਲੇਨ ‘‘ਅਯਂ ਅਤ੍ਤਭਾਵੋ ਲੇਣੇ ਮਾ ਵਿਨਸ੍ਸਤੂ’’ਤਿ ਅਧਿਟ੍ਠਹਿਤ੍ਵਾ ਭਿਕ੍ਖੂ ਆਮਨ੍ਤੇਸਿ. ਪੁਰਾਯਂ ਕਾਯੋ ਇਧੇਵ ਵਿਕਿਰਤੀਤਿ ਯਾਵ ਨ ਵਿਕਿਰਤਿ, ਤਾਵ ਨਂ ਬਹਿਦ੍ਧਾ ਨੀਹਰਥਾਤਿ ਅਤ੍ਥੋ. ਅਞ੍ਞਥਤ੍ਤਨ੍ਤਿ ਅਞ੍ਞਥਾਭਾਵਂ. ਇਨ੍ਦ੍ਰਿਯਾਨਂ ਵਾ ਵਿਪਰਿਣਾਮਨ੍ਤਿ ਚਕ੍ਖੁਸੋਤਾਦੀਨਂ ਇਨ੍ਦ੍ਰਿਯਾਨਂ ਪਕਤਿਵਿਜਹਨਭਾਵਂ. ਤਤ੍ਥੇਵ ਵਿਕਿਰੀਤਿ ਬਹਿ ਨੀਹਰਿਤ੍ਵਾ ਠਪਿਤਟ੍ਠਾਨੇ ਮਞ੍ਚਕਸ੍ਮਿਂਯੇਵ ਵਿਕਿਰਿ.
੮. ਉਪਵਾਣਸਨ੍ਦਿਟ੍ਠਿਕਸੁਤ੍ਤਵਣ੍ਣਨਾ
੭੦. ਅਟ੍ਠਮੇ ਰੂਪਪ੍ਪਟਿਸਂਵੇਦੀਤਿ ਨੀਲਪੀਤਾਦਿਭੇਦਂ ਆਰਮ੍ਮਣਂ ਵਵਤ੍ਥਾਪੇਨ੍ਤੋ ਰੂਪਂ ਪਟਿਸਂਵਿਦਿਤਂ ਕਰੋਤਿ, ਤਸ੍ਮਾ ਰੂਪਪ੍ਪਟਿਸਂਵੇਦੀ ਨਾਮ ਹੋਤਿ. ਰੂਪਰਾਗਪ੍ਪਟਿਸਂਵੇਦੀਤਿ ਕਿਲੇਸਸ੍ਸ ਅਤ੍ਥਿਭਾਵੇਨੇਵ ਪਨ ਰੂਪਰਾਗਂ ਪਟਿਸਂਵਿਦਿਤਂ ਕਰੋਤਿ ਨਾਮ, ਤਸ੍ਮਾ ਰੂਪਰਾਗਪ੍ਪਟਿਸਂਵੇਦੀਤਿ ਵੁਚ੍ਚਤਿ. ਸਨ੍ਦਿਟ੍ਠਿਕੋਤਿਆਦੀਨਿ ਵਿਸੁਦ੍ਧਿਮਗ੍ਗੇ ਵੁਤ੍ਤਤ੍ਥਾਨੇਵ. ਨੋ ਚ ਰੂਪਰਾਗਪ੍ਪਟਿਸਂਵੇਦੀਤਿ ਕਿਲੇਸਸ੍ਸ ਨਤ੍ਥਿਭਾਵੇਨੇਵ ਨ ਰੂਪਰਾਗਂ ਪਟਿਸਂਵਿਦਿਤਂ ਕਰੋਤਿ ਨਾਮ, ਤਸ੍ਮਾ ‘‘ਨੋ ਚ ਰੂਪਰਾਗਪ੍ਪਟਿਸਂਵੇਦੀ’’ਤਿ ਵੁਚ੍ਚਤਿ. ਇਮਸ੍ਮਿਂ ਸੁਤ੍ਤੇ ਸੇਖਾਸੇਖਾਨਂ ਪਚ੍ਚਵੇਕ੍ਖਣਾ ਕਥਿਤਾ.
੯. ਪਠਮਛਫਸ੍ਸਾਯਤਨਸੁਤ੍ਤਵਣ੍ਣਨਾ
੭੧. ਨਵਮੇ ਫਸ੍ਸਾਯਤਨਾਨਨ੍ਤਿ ਫਸ੍ਸਾਕਰਾਨਂ. ਅਵੁਸਿਤਨ੍ਤਿ ਅਵੁਟ੍ਠਂ. ਆਰਕਾਤਿ ਦੂਰੇ. ਏਤ੍ਥਾਹਂ, ਭਨ੍ਤੇ, ਅਨਸ੍ਸਸਨ੍ਤਿ, ਭਨ੍ਤੇ, ਅਹਂ ਏਤ੍ਥ ਅਨਸ੍ਸਸਿਂ, ਨਟ੍ਠੋ ਨਾਮ ਅਹਨ੍ਤਿ ਵਦਤਿ. ਭਗਵਾ – ‘‘ਅਯਂ ਭਿਕ੍ਖੁ ‘ਅਹਂ ਨਾਮ ਇਮਸ੍ਮਿਂ ਸਾਸਨੇ ਨਟ੍ਠੋ’ਤਿ ਵਦਤਿ, ਕਿਨ੍ਨੁ ਖ੍ਵਸ੍ਸ ਅਞ੍ਞੇਸੁ ਧਾਤੁਕਮ੍ਮਟ੍ਠਾਨ-ਕਸਿਣਕਮ੍ਮਟ੍ਠਾਨਾਦੀਸੁ ਅਭਿਯੋਗੋ ਅਤ੍ਥੀ’’ਤਿ ਚਿਨ੍ਤੇਤ੍ਵਾ, ਤਮ੍ਪਿ ਅਪਸ੍ਸਨ੍ਤੋ – ‘‘ਕਤਰਂ ਨੁ ਖੋ ਕਮ੍ਮਟ੍ਠਾਨਂ ਇਮਸ੍ਸ ਸਪ੍ਪਾਯਂ ਭਵਿਸ੍ਸਤੀ’’ਤਿ ਚਿਨ੍ਤੇਸਿ. ਤਤੋ ‘‘ਆਯਤਨਕਮ੍ਮਟ੍ਠਾਨਮੇਵ ਸਪ੍ਪਾਯ’’ਨ੍ਤਿ ਦਿਸ੍ਵਾ ਤਂ ਕਥੇਨ੍ਤੋ ਤਂ ਕਿਂ ਮਞ੍ਞਸਿ ਭਿਕ੍ਖੂਤਿਆਦਿਮਾਹ. ਸਾਧੂਤਿ ਤਸ੍ਸ ਬ੍ਯਾਕਰਣੇ ਸਮ੍ਪਹਂਸਨਂ. ਏਸੇਵਨ੍ਤੋ ਦੁਕ੍ਖਸ੍ਸਾਤਿ ਅਯਮੇਵ ਵਟ੍ਟਦੁਕ੍ਖਸ੍ਸਨ੍ਤੋ ਪਰਿਚ੍ਛੇਦੋ, ਨਿਬ੍ਬਾਨਨ੍ਤਿ ਅਤ੍ਥੋ.
੧੦. ਦੁਤਿਯਛਫਸ੍ਸਾਯਤਨਸੁਤ੍ਤਵਣ੍ਣਨਾ
੭੨. ਦਸਮੇ ਅਨਸ੍ਸਸਨ੍ਤਿ ਨਸ੍ਸਸਿਂ, ਨਟ੍ਠੋ ਨਾਮਮ੍ਹਿ ਇਚ੍ਚੇਵ ਅਤ੍ਥੋ. ਆਯਤਿਂ ਅਪੁਨਬ੍ਭਵਾਯਾਤਿ ਏਤ੍ਥ ਆਯਤਿਂ ਅਪੁਨਬ੍ਭਵੋ ਨਾਮ ਨਿਬ੍ਬਾਨਂ, ਨਿਬ੍ਬਾਨਤ੍ਥਾਯ ਪਹੀਨਂ ਭਵਿਸ੍ਸਤੀਤਿ ਅਤ੍ਥੋ.
੧੧. ਤਤਿਯਛਫਸ੍ਸਾਯਤਨਸੁਤ੍ਤਵਣ੍ਣਨਾ
੭੩. ਏਕਾਦਸਮੇ ਅਨਸ੍ਸਸਨ੍ਤਿ ਨਟ੍ਠੋ, ਪਨਸ੍ਸਸਨ੍ਤਿ ਅਤਿਨਟ੍ਠੋ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.
ਮਿਗਜਾਲਵਗ੍ਗੋ ਸਤ੍ਤਮੋ.