੮. ਗਿਲਾਨਵਗ੍ਗੋ

੧-੫. ਪਠਮਗਿਲਾਨਸੁਤ੍ਤਾਦਿਵਣ੍ਣਨਾ

੭੪-੭੮. ਗਿਲਾਨਵਗ੍ਗਸ੍ਸ ਪਠਮੇ ਅਮੁਕਸ੍ਮਿਨ੍ਤਿ ਅਸੁਕਸ੍ਮਿਂ. ਅਯਮੇਵ ਵਾ ਪਾਠੋ. ਅਪ੍ਪਞ੍ਞਾਤੋਤਿ ਅਞ੍ਞਾਤੋ ਅਪਾਕਟੋ. ਨਵੋਪਿ ਹਿ ਕੋਚਿ ਪਞ੍ਞਾਤੋ ਹੋਤਿ ਰਾਹੁਲਤ੍ਥੇਰੋ ਵਿਯ ਸੁਮਨਸਾਮਣੇਰੋ ਵਿਯ ਚ, ਅਯਂ ਪਨ ਨਵੋ ਚੇਵ ਅਪਞ੍ਞਾਤੋ ਚ. ਸੇਸਮੇਤ੍ਥ ਵੁਤ੍ਤਨਯਮੇਵਾਤਿ. ਤਥਾ ਇਤੋ ਪਰੇਸੁ ਚਤੂਸੁ.

੬. ਪਠਮਅਵਿਜ੍ਜਾਪਹਾਨਸੁਤ੍ਤਵਣ੍ਣਨਾ

੭੯. ਛਟ੍ਠੇ ਅਨਿਚ੍ਚਤੋ ਜਾਨਤੋਤਿ ਦੁਕ੍ਖਾਨਤ੍ਤਵਸੇਨ ਜਾਨਤੋਪਿ ਪਹੀਯਤਿਯੇਵ, ਇਦਂ ਪਨ ਅਨਿਚ੍ਚਲਕ੍ਖਣਂ ਦਸ੍ਸੇਤ੍ਵਾ ਵੁਤ੍ਤੇ ਬੁਜ੍ਝਨਕਸ੍ਸ ਅਜ੍ਝਾਸਯੇਨ ਵੁਤ੍ਤਂ.

੭. ਦੁਤਿਯਅਵਿਜ੍ਜਾਪਹਾਨਸੁਤ੍ਤਵਣ੍ਣਨਾ

੮੦. ਸਤ੍ਤਮੇ ਸਬ੍ਬੇ ਧਮ੍ਮਾਤਿ ਸਬ੍ਬੇ ਤੇਭੂਮਕਧਮ੍ਮਾ. ਨਾਲਂ ਅਭਿਨਿਵੇਸਾਯਾਤਿ ਅਭਿਨਿਵੇਸਪਰਾਮਾਸਗ੍ਗਾਹੇਨ ਗਣ੍ਹਿਤੁਂ ਨ ਯੁਤ੍ਤਾ. ਸਬ੍ਬਨਿਮਿਤ੍ਤਾਨੀਤਿ ਸਬ੍ਬਾਨਿ ਸਙ੍ਖਾਰਨਿਮਿਤ੍ਤਾਨਿ. ਅਞ੍ਞਤੋ ਪਸ੍ਸਤੀਤਿ ਯਥਾ ਅਪਰਿਞ੍ਞਾਤਾਭਿਨਿਵੇਸੋ ਜਨੋ ਪਸ੍ਸਤਿ, ਤਤੋ ਅਞ੍ਞਤੋ ਪਸ੍ਸਤਿ. ਅਪਰਿਞ੍ਞਾਤਾਭਿਨਿਵੇਸੋ ਹਿ ਜਨੋ ਸਬ੍ਬਨਿਮਿਤ੍ਤਾਨਿਪਿ ਅਤ੍ਤਤੋ ਪਸ੍ਸਤਿ. ਪਰਿਞ੍ਞਾਤਾਭਿਨਿਵੇਸੋ ਪਨ ਅਨਤ੍ਤਤੋ ਪਸ੍ਸਤਿ, ਨੋ ਅਤ੍ਤਤੋਤਿ ਏਵਂ ਇਮਸ੍ਮਿਂ ਸੁਤ੍ਤੇ ਅਨਤ੍ਤਲਕ੍ਖਣਮੇਵ ਕਥਿਤਂ.

੮. ਸਮ੍ਬਹੁਲਭਿਕ੍ਖੁਸੁਤ੍ਤਵਣ੍ਣਨਾ

੮੧. ਅਟ੍ਠਮੇ ਇਧ ਨੋਤਿ ਏਤ੍ਥ ਨੋ-ਕਾਰੋ ਨਿਪਾਤਮਤ੍ਤਮੇਵ. ਸੇਸਂ ਉਤ੍ਤਾਨਤ੍ਥਮੇਵ. ਕੇਵਲਂ ਇਧ ਦੁਕ੍ਖਲਕ੍ਖਣਂ ਕਥਿਤਨ੍ਤਿ ਵੇਦਿਤਬ੍ਬਂ.

੯. ਲੋਕਪਞ੍ਹਾਸੁਤ੍ਤਵਣ੍ਣਨਾ

੮੨. ਨਵਮੇ ਲੁਜ੍ਜਤੀਤਿ ਪਲੁਜ੍ਜਤਿ ਭਿਜ੍ਜਤਿ. ਇਧ ਅਨਿਚ੍ਚਲਕ੍ਖਣਂ ਕਥਿਤਂ.

੧੦. ਫਗ੍ਗੁਨਪਞ੍ਹਾਸੁਤ੍ਤਵਣ੍ਣਨਾ

੮੩. ਦਸਮੇ ਛਿਨ੍ਨਪਪਞ੍ਚੇਤਿ ਤਣ੍ਹਾਪਪਞ੍ਚਸ੍ਸ ਛਿਨ੍ਨਤ੍ਤਾ ਛਿਨ੍ਨਪਪਞ੍ਚੇ. ਛਿਨ੍ਨਵਟੁਮੇਤਿ ਤਣ੍ਹਾਵਟੁਮਸ੍ਸੇਵ ਛਿਨ੍ਨਤ੍ਤਾ ਛਿਨ੍ਨਵਟੁਮੇ. ਕਿਂ ਪੁਚ੍ਛਾਮੀਤਿ ਪੁਚ੍ਛਤਿ? ਅਤਿਕ੍ਕਨ੍ਤਬੁਦ੍ਧੇਹਿ ਪਰਿਹਰਿਤਾਨਿ ਚਕ੍ਖੁਸੋਤਾਦੀਨਿ ਪੁਚ੍ਛਾਮੀਤਿ ਪੁਚ੍ਛਤਿ. ਅਥ ਵਾ ਸਚੇ ਮਗ੍ਗੇ ਭਾਵਿਤੇਪਿ ਅਨਾਗਤੇ ਚਕ੍ਖੁਸੋਤਾਦਿਵਟ੍ਟਂ ਵਡ੍ਢੇਯ੍ਯ, ਤਂ ਪੁਚ੍ਛਾਮੀਤਿ ਪੁਚ੍ਛਤੀਤਿ.

ਗਿਲਾਨਵਗ੍ਗੋ ਅਟ੍ਠਮੋ.