੯. ਵੀਣੋਪਮਸੁਤ੍ਤਵਣ੍ਣਨਾ

੨੪੬. ਨਵਮੇ ਯਸ੍ਸ ਕਸ੍ਸਚਿ, ਭਿਕ੍ਖਵੇ, ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾਤਿ ਇਦਂ ਸਤ੍ਥਾ ਯਥਾ ਨਾਮ ਮਹਾਕੁਟੁਮ੍ਬਿਕੋ ਮਹਨ੍ਤਂ ਕਸਿਕਮ੍ਮਂ ਕਤ੍ਵਾ, ਨਿਪ੍ਫਨ੍ਨਸਸ੍ਸੋ ਘਰਦ੍ਵਾਰੇ ਮਣ੍ਡਪਂ ਕਤ੍ਵਾ, ਉਭਤੋਸਙ੍ਘਸ੍ਸ ਦਾਨਂ ਪਵਤ੍ਤੇਯ੍ਯ. ਕਿਞ੍ਚਾਪਿ ਤੇਨ ਉਭਤੋਸਙ੍ਘਸ੍ਸ ਦਾਨਂ ਪਟ੍ਠਪਿਤਂ, ਦ੍ਵੀਸੁ ਪਨ ਪਰਿਸਾਸੁ ਸਨ੍ਤਪ੍ਪਿਤਾਸੁ ਸੇਸਜਨਮ੍ਪਿ ਸਨ੍ਤਪ੍ਪੇਤਿਯੇਵ, ਏਵਮੇਵ ਭਗਵਾ ਸਮਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਪਾਰਮਿਯੋ ਪੂਰੇਤ੍ਵਾ ਬੋਧਿਮਣ੍ਡੇ ਸਬ੍ਬਞ੍ਞੁਤਞ੍ਞਾਣਂ ਅਧਿਗਨ੍ਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਜੇਤਵਨਮਹਾਵਿਹਾਰੇ ਨਿਸਿਨ੍ਨੋ ਭਿਕ੍ਖੁਪਰਿਸਾਯ ਚੇਵ ਭਿਕ੍ਖੁਨਿਪਰਿਸਾਯ ਚ ਮਹਾਧਮ੍ਮਯਾਗਂ ਯਜਨ੍ਤੋ ਵੀਣੋਪਮਸੁਤ੍ਤਂ ਆਰਭਿ. ਤਂ ਪੇਨੇਤਂ ਕਿਞ੍ਚਾਪਿ ਦ੍ਵੇ ਪਰਿਸਾ ਸਨ੍ਧਾਯ ਆਰਦ੍ਧਂ, ਚਤੁਨ੍ਨਮ੍ਪਿ ਪਨ ਪਰਿਸਾਨਂ ਅਵਾਰਿਤਂ. ਤਸ੍ਮਾ ਸਬ੍ਬੇਹਿਪਿ ਸੋਤਬ੍ਬਞ੍ਚੇਵ ਸਦ੍ਧਾਤਬ੍ਬਞ੍ਚ, ਪਰਿਯੋਗਾਹਿਤ੍ਵਾ ਚਸ੍ਸ ਅਤ੍ਥਰਸੋ ਵਿਨ੍ਦਿਤਬ੍ਬੋਤਿ.

ਤਤ੍ਥ ਛਨ੍ਦੋਤਿਆਦੀਸੁ ਛਨ੍ਦੋ ਨਾਮ ਪੁਬ੍ਬੁਪ੍ਪਤ੍ਤਿਕਾ ਦੁਬ੍ਬਲਤਣ੍ਹਾ, ਸੋ ਰਞ੍ਜੇਤੁਂ ਨ ਸਕ੍ਕੋਤਿ. ਅਪਰਾਪਰਂ ਉਪ੍ਪਜ੍ਜਮਾਨਾ ਪਨ ਬਲਵਤਣ੍ਹਾ ਰਾਗੋ ਨਾਮ, ਸੋ ਰਞ੍ਜੇਤੁਂ ਸਕ੍ਕੋਤਿ. ਦਣ੍ਡਾਦਾਨਾਦੀਨਿ ਕਾਤੁਂ ਅਸਮਤ੍ਥੋ ਪੁਬ੍ਬੁਪ੍ਪਤ੍ਤਿਕੋ ਦੁਬ੍ਬਲਕੋਧੋ ਦੋਸੋ ਨਾਮ. ਤਾਨਿ ਕਾਤੁਂ ਸਮਤ੍ਥੋ ਅਪਰਾਪਰੁਪ੍ਪਤ੍ਤਿਕੋ ਬਲਵਕੋਧੋ ਪਟਿਘਂ ਨਾਮ. ਮੋਹੋ ਪਨ ਮੋਹਨਸਮ੍ਮੋਹਨਵਸੇਨ ਉਪ੍ਪਨ੍ਨਂ ਅਞ੍ਞਾਣਂ. ਏਵਮੇਤ੍ਥ ਪਞ੍ਚਹਿਪਿ ਪਦੇਹਿ ਤੀਣਿ ਅਕੁਸਲਮੂਲਾਨਿ ਗਹਿਤਾਨਿ. ਤੇਸੁ ਗਹਿਤੇਸੁ ਸਬ੍ਬੇਪਿ ਤਮ੍ਮੂਲਕਾ ਕਿਲੇਸਾ ਗਹਿਤਾਵ ਹੋਨ੍ਤਿ. ‘‘ਛਨ੍ਦੋ ਰਾਗੋ’’ਤਿ ਵਾ ਪਦਦ੍ਵਯੇਨ ਅਟ੍ਠਲੋਭਸਹਗਤਚਿਤ੍ਤੁਪ੍ਪਾਦਾ, ‘‘ਦੋਸੋ ਪਟਿਘ’’ਨ੍ਤਿ ਪਦਦ੍ਵਯੇਨ ਦ੍ਵੇ ਦੋਮਨਸ੍ਸਸਹਗਤਚਿਤ੍ਤੁਪ੍ਪਾਦਾ, ਮੋਹਪਦੇਨ ਲੋਭਦੋਸਰਹਿਤਾ ਦ੍ਵੇ ਉਦ੍ਧਚ੍ਚਵਿਚਿਕਿਚ੍ਛਾਸਹਗਤਚਿਤ੍ਤੁਪ੍ਪਾਦਾ ਗਹਿਤਾਤਿ. ਏਵਂ ਸਬ੍ਬੇਪਿ ਦ੍ਵਾਦਸ ਚਿਤ੍ਤੁਪ੍ਪਾਦਾ ਦਸ੍ਸਿਤਾਵ ਹੋਨ੍ਤਿ.

ਸਭਯੋਤਿ ਕਿਲੇਸਚੋਰਾਨਂ ਨਿਵਾਸਟ੍ਠਾਨਤ੍ਤਾ ਸਭਯੋ. ਸਪ੍ਪਟਿਭਯੋਤਿ ਵਧਬਨ੍ਧਨਾਦੀਨਂ ਕਾਰਣਤ੍ਤਾ ਸਪ੍ਪਟਿਭਯੋ. ਸਕਣ੍ਟਕੋਤਿ ਰਾਗਾਦੀਹਿ ਕਣ੍ਟਕੇਹਿ ਸਕਣ੍ਟਕੋ. ਸਗਹਨੋਤਿ ਰਾਗਗਹਨਾਦੀਹਿ ਸਗਹਨੋ. ਉਮ੍ਮਗ੍ਗੋਤਿ ਦੇਵਲੋਕਂ ਵਾ ਮਨੁਸ੍ਸਲੋਕਂ ਵਾ ਨਿਬ੍ਬਾਨਂ ਵਾ ਗਚ੍ਛਨ੍ਤਸ੍ਸ ਅਮਗ੍ਗੋ. ਕੁਮ੍ਮਗ੍ਗੋਤਿ ਕੁਚ੍ਛਿਤਜੇਗੁਚ੍ਛਿਭੂਤਟ੍ਠਾਨਗਮਨਏਕਪਦਿਕਮਗ੍ਗੋ ਵਿਯ ਅਪਾਯਸਮ੍ਪਾਪਕਤ੍ਤਾ ਕੁਮ੍ਮਗ੍ਗੋ. ਦੁਹਿਤਿਕੋਤਿ ਏਤ੍ਥ ਇਹਿਤੀਤਿ ਇਰਿਯਨਾ, ਦੁਕ੍ਖਾ ਇਹਿਤਿ ਏਤ੍ਥਾਤਿ, ਦੁਹਿਤਿਕੋ. ਯਸ੍ਮਿਞ੍ਹਿ ਮਗ੍ਗੇ ਮੂਲਫਲਾਦਿਖਾਦਨੀਯਂ ਵਾ ਸਾਯਨੀਯਂ ਵਾ ਨਤ੍ਥਿ, ਤਸ੍ਮਿਂ ਇਰਿਯਨਾ ਦੁਕ੍ਖਾ ਹੋਤਿ, ਨ ਸਕ੍ਕਾ ਤਂ ਪਟਿਪਜ੍ਜਿਤ੍ਵਾ ਇਚ੍ਛਿਤਟ੍ਠਾਨਂ ਗਨ੍ਤੁਂ. ਕਿਲੇਸਮਗ੍ਗਮ੍ਪਿ ਪਟਿਪਜ੍ਜਿਤ੍ਵਾ ਨ ਸਕ੍ਕਾ ਸਮ੍ਪਤ੍ਤਿਭਵਂ ਗਨ੍ਤੁਨ੍ਤਿ ਕਿਲੇਸਮਗ੍ਗੋ ਦੁਹਿਤਿਕੋਤਿ ਵੁਤ੍ਤੋ. ਦ੍ਵੀਹਿਤਿਕੋਤਿਪਿ ਪਾਠੋ, ਏਸੇਵਤ੍ਥੋ. ਅਸਪ੍ਪੁਰਿਸਸੇਵਿਤੋਤਿ ਕੋਕਾਲਿਕਾਦੀਹਿ ਅਸਪ੍ਪੁਰਿਸੇਹਿ ਸੇਵਿਤੋ.

ਤਤੋ ਚਿਤ੍ਤਂ ਨਿਵਾਰਯੇਤਿ ਤੇਹਿ ਚਕ੍ਖੁਵਿਞ੍ਞੇਯ੍ਯੇਹਿ ਰੂਪੇਹਿ ਤਂ ਛਨ੍ਦਾਦਿਵਸੇਨ ਪਵਤ੍ਤਚਿਤ੍ਤਂ ਅਸੁਭਾਵਜ੍ਜਨਾਦੀਹਿ ਉਪਾਯੇਹਿ ਨਿਵਾਰਯੇ. ਚਕ੍ਖੁਦ੍ਵਾਰਸ੍ਮਿਞ੍ਹਿ ਇਟ੍ਠਾਰਮ੍ਮਣੇ ਰਾਗੇ ਉਪ੍ਪਨ੍ਨੇ ਅਸੁਭਤੋ ਆਵਜ੍ਜਨ੍ਤਸ੍ਸ ਚਿਤ੍ਤਂ ਨਿਵਤ੍ਤਤਿ, ਅਨਿਟ੍ਠਾਰਮ੍ਮਣੇ ਦੋਸੇ ਉਪ੍ਪਨ੍ਨੇ ਮੇਤ੍ਤਤੋ ਆਵਜ੍ਜਨ੍ਤਸ੍ਸ ਚਿਤ੍ਤਂ ਨਿਵਤ੍ਤਤਿ, ਮਜ੍ਝਤ੍ਤਾਰਮ੍ਮਣੇ ਮੋਹੇ ਉਪ੍ਪਨ੍ਨੇ ਉਦ੍ਦੇਸਪਰਿਪੁਚ੍ਛਂ ਗਰੁਵਾਸਂ ਆਵਜ੍ਜਨ੍ਤਸ੍ਸ ਚਿਤ੍ਤਂ ਨਿਵਤ੍ਤਤਿ. ਏਵਂ ਅਸਕ੍ਕੋਨ੍ਤੇਨ ਪਨ ਸਤ੍ਥੁਮਹਤ੍ਤਤਂ ਧਮ੍ਮਸ੍ਸ ਸ੍ਵਾਕ੍ਖਾਤਤਾ ਸਙ੍ਘਸ੍ਸ ਸੁਪ੍ਪਟਿਪਤ੍ਤਿ ਚ ਆਵਜ੍ਜਿਤਬ੍ਬਾ. ਸਤ੍ਥੁਮਹਤ੍ਤਤਂ ਪਚ੍ਚਵੇਕ੍ਖਤੋਪਿ ਹਿ ਧਮ੍ਮਸ੍ਸ ਸ੍ਵਾਕ੍ਖਾਤਤਂ ਸਙ੍ਘਸ੍ਸ ਸੁਪ੍ਪਟਿਪਤ੍ਤਿਂ ਪਚ੍ਚਵੇਕ੍ਖਤੋਪਿ ਚਿਤ੍ਤਂ ਨਿਵਤ੍ਤਤਿ. ਤੇਨ ਵੁਤ੍ਤਂ ‘‘ਅਸੁਭਾਵਜ੍ਜਨਾਦੀਹਿ ਉਪਾਯੇਹਿ ਨਿਵਾਰਯੇ’’ਤਿ.

ਕਿਟ੍ਠਨ੍ਤਿ ਕਿਟ੍ਠਟ੍ਠਾਨੇ ਉਪ੍ਪਨ੍ਨਸਸ੍ਸਂ. ਸਮ੍ਪਨ੍ਨਨ੍ਤਿ ਪਰਿਪੁਣ੍ਣਂ ਸੁਨਿਪ੍ਫਨ੍ਨਂ. ਕਿਟ੍ਠਾਦੋਤਿ ਸਸ੍ਸਖਾਦਕੋ. ਏਵਮੇਵ ਖੋਤਿ ਏਤ੍ਥ ਸਮ੍ਪਨ੍ਨਕਿਟ੍ਠਂ ਵਿਯ ਪਞ੍ਚ ਕਾਮਗੁਣਾ ਦਟ੍ਠਬ੍ਬਾ, ਕਿਟ੍ਠਾਦੋ ਗੋਣੋ ਵਿਯ ਕੂਟਚਿਤ੍ਤਂ, ਕਿਟ੍ਠਾਰਕ੍ਖਸ੍ਸ ਪਮਾਦਕਾਲੋ ਵਿਯ ਭਿਕ੍ਖੁਨੋ ਛਸੁ ਦ੍ਵਾਰੇਸੁ ਸਤਿਂ ਪਹਾਯ ਵਿਚਰਣਕਾਲੋ, ਕਿਟ੍ਠਾਰਕ੍ਖਸ੍ਸ ਪਮਾਦਮਾਗਮ੍ਮ ਗੋਣੇਨ ਗਹਿਤਗਬ੍ਭਸ੍ਸ ਕਿਟ੍ਠਸ੍ਸ ਖਾਦਿਤਤ੍ਤਾ ਸਸ੍ਸਸਾਮਿਨੋ ਸਸ੍ਸਫਲਾਨਧਿਗਮੋ ਵਿਯ ਛਦ੍ਵਾਰਰਕ੍ਖਿਕਾਯ ਸਤਿਯਾ ਵਿਪ੍ਪਵਾਸਮਾਗਮ੍ਮ ਪਞ੍ਚਕਾਮਗੁਣਂ ਅਸ੍ਸਾਦੇਨ੍ਤੇਨ ਚਿਤ੍ਤੇਨ ਕੁਸਲਪਕ੍ਖਸ੍ਸ ਨਾਸਿਤਤ੍ਤਾ ਭਿਕ੍ਖੁਨੋ ਸਾਮਞ੍ਞਫਲਾਧਿਗਮਾਭਾਵੋ ਵੇਦਿਤਬ੍ਬੋ.

ਉਪਰਿਘਟਾਯਨ੍ਤਿ ਦ੍ਵਿਨ੍ਨਂ ਸਿਙ੍ਗਾਨਂ ਅਨ੍ਤਰੇ. ਸੁਨਿਗ੍ਗਹਿਤਂ ਨਿਗ੍ਗਣ੍ਹੇਯ੍ਯਾਤਿ ਘਟਾਯਂ ਪਤਿਟ੍ਠਿਤੇ ਨਾਸਾਰਜ੍ਜੁਕੇ ਸੁਟ੍ਠੁ ਨਿਗ੍ਗਹਿਤਂ ਕਤ੍ਵਾ ਨਿਗ੍ਗਣ੍ਹੇਯ੍ਯ. ਦਣ੍ਡੇਨਾਤਿ ਮੁਗ੍ਗਰਸਦਿਸੇਨ ਥੂਲਦਣ੍ਡਕੇਨ. ਏਵਞ੍ਹਿ ਸੋ ਭਿਕ੍ਖਵੇ ਗੋਣੋਤਿ ਏਵਂ ਸੋ ਕਿਟ੍ਠਾਰਕ੍ਖਸ੍ਸ ਪਮਾਦਮਨ੍ਵਾਯ ਯਸ੍ਮਿਂ ਯਸ੍ਮਿਂ ਖਣੇ ਕਿਟ੍ਠਂ ਓਤਰਿਤੁਕਾਮੋ ਹੋਤਿ, ਤਸ੍ਮਿਂ ਤਸ੍ਮਿਂ ਖਣੇ ਏਵਂ ਨਿਗ੍ਗਣ੍ਹਿਤ੍ਵਾ ਤਾਲ਼ੇਤ੍ਵਾ ਓਸਜ੍ਜਨੇਨ ਨਿਬ੍ਬਿਸੇਵਨਭਾਵਂ ਉਪਨੀਤੋ ਗੋਣੋ.

ਏਵਮੇਵ ਖੋਤਿ ਇਧਾਪਿ ਸਮ੍ਪਨ੍ਨਕਿਟ੍ਠਮਿਵ ਪਞ੍ਚ ਕਾਮਗੁਣਾ ਦਟ੍ਠਬ੍ਬਾ, ਕਿਟ੍ਠਾਦੋ ਵਿਯ ਕੂਟਚਿਤ੍ਤਂ, ਕਿਟ੍ਠਾਰਕ੍ਖਸ੍ਸ ਅਪ੍ਪਮਾਦੋ ਵਿਯ ਇਮਸ੍ਸ ਭਿਕ੍ਖੁਨੋ ਛਸੁ ਦ੍ਵਾਰੇਸੁ ਸਤਿਯਾ ਅਵਿਸ੍ਸਜ੍ਜਨਂ, ਦਣ੍ਡੋ ਵਿਯ ਸੁਤ੍ਤਨ੍ਤੋ, ਗੋਣਸ੍ਸ ਕਿਟ੍ਠਾਭਿਮੁਖਕਾਲੇ ਦਣ੍ਡੇਨ ਤਾਲ਼ਨਂ ਵਿਯ ਚਿਤ੍ਤਸ੍ਸ ਬਹਿਦ੍ਧਾ ਪੁਥੁਤ੍ਤਾਰਮ੍ਮਣਾਭਿਮੁਖਕਾਲੇ ਅਨਮਤਗ੍ਗਿਯਦੇਵਦੂਤਆਦਿਤ੍ਤਆਸੀਵਿਸੂਪਮਅਨਾਗਤਭਯਾਦੀਸੁ ਤਂ ਤਂ ਸੁਤ੍ਤਂ ਆਵਜ੍ਜੇਤ੍ਵਾ ਚਿਤ੍ਤੁਪ੍ਪਾਦਸ੍ਸ ਪੁਥੁਤ੍ਤਾਰਮ੍ਮਣਤੋ ਨਿਵਾਰੇਤ੍ਵਾ ਮੂਲਕਮ੍ਮਟ੍ਠਾਨੇ ਓਤਾਰਣਂ ਵੇਦਿਤਬ੍ਬਂ. ਤੇਨਾਹੁ ਪੋਰਾਣਾ –

‘‘ਸੁਭਾਸਿਤਂ ਸੁਤ੍ਵਾ ਮਨੋ ਪਸੀਦਤਿ,

ਦਮੇਤਿ ਨਂ ਪੀਤਿਸੁਖਞ੍ਚ ਵਿਨ੍ਦਤਿ;

ਤਦਸ੍ਸ ਆਰਮ੍ਮਣੇ ਤਿਟ੍ਠਤੇ ਮਨੋ,

ਗੋਣੋਵ ਕਿਟ੍ਠਾਦਕੋ ਦਣ੍ਡਤਜ੍ਜਿਤੋ’’ਤਿ.

ਉਦੁਜਿਤਨ੍ਤਿ ਤਜ੍ਜਿਤਂ. ਸੁਦੁਜਿਤਨ੍ਤਿ ਸੁਤਜ੍ਜਿਤਂ, ਸੁਜਿਤਨ੍ਤਿਪਿ ਅਤ੍ਥੋ. ਉਦੁ, ਸੁਦੂਤਿ ਇਦਂ ਪਨ ਨਿਪਾਤਮਤ੍ਤਮੇਵ. ਅਜ੍ਝਤ੍ਤਨ੍ਤਿ ਗੋਚਰਜ੍ਝਤ੍ਤਂ. ਸਨ੍ਤਿਟ੍ਠਤੀਤਿਆਦੀਸੁ ਪਠਮਜ੍ਝਾਨਵਸੇਨ ਸਨ੍ਤਿਟ੍ਠਤਿ, ਦੁਤਿਯਜ੍ਝਾਨਵਸੇਨ ਸਨ੍ਨਿਸੀਦਤਿ, ਤਤਿਯਜ੍ਝਾਨਵਸੇਨ ਏਕੋਦਿ ਹੋਤਿ, ਚਤੁਤ੍ਥਜ੍ਝਾਨਵਸੇਨ ਸਮਾਧਿਯਤਿ. ਸਬ੍ਬਮ੍ਪਿ ਵਾ ਏਤਂ ਪਠਮਜ੍ਝਾਨਵਸੇਨ ਵੇਦਿਤਬ੍ਬਂ. ਏਤ੍ਤਾਵਤਾ ਹਿ ਸਮ੍ਮਾਸਮ੍ਬੁਦ੍ਧੇਨ ਸਮਥਾਨੁਰਕ੍ਖਣਇਨ੍ਦ੍ਰਿਯਸਂਵਰਸੀਲਂ ਨਾਮ ਕਥਿਤਂ.

ਰਞ੍ਞੋ ਵਾਤਿ ਕਸ੍ਸਚਿਦੇਵ ਪਚ੍ਚਨ੍ਤਰਞ੍ਞੋ ਵਾ. ਸਦ੍ਦਂ ਸੁਣੇਯ੍ਯਾਤਿ ਪਚ੍ਚੂਸਕਾਲੇ ਪਬੁਦ੍ਧੋ ਕੁਸਲੇਨ ਵੀਣਾਵਾਦਕੇਨ ਵਾਦਿਯਮਾਨਾਯ ਮਧੁਰਸਦ੍ਦਂ ਸੁਣੇਯ੍ਯ. ਰਜਨੀਯੋਤਿਆਦੀਸੁ ਚਿਤ੍ਤਂ ਰਞ੍ਜੇਤੀਤਿ ਰਜਨੀਯੋ. ਕਾਮੇਤਬ੍ਬਤਾਯ ਕਮਨੀਯੋ. ਚਿਤ੍ਤਂ ਮਦਯਤੀਤਿ ਮਦਨੀਯੋ. ਚਿਤ੍ਤਂ ਮੁਚ੍ਛਿਤਂ ਵਿਯ ਕਰਣਤੋ ਮੁਚ੍ਛਿਯਤੀਤਿ ਮੁਚ੍ਛਨੀਯੋ. ਆਬਨ੍ਧਿਤ੍ਵਾ ਵਿਯ ਗਹਣਤੋ ਬਨ੍ਧਤੀਤਿ ਬਨ੍ਧਨੀਯੋ. ਅਲਂ ਮੇ, ਭੋਤਿ ਵੀਣਾਯ ਸਣ੍ਠਾਨਂ ਦਿਸ੍ਵਾ ਤਂ ਅਨਿਚ੍ਛਨ੍ਤੋ ਏਵਮਾਹ. ਉਪਧਾਰਣੇਤਿ ਵੇਟ੍ਠਕੇ. ਕੋਣਨ੍ਤਿ ਚਤੁਰਸ੍ਸਂ ਸਾਰਦਣ੍ਡਕਂ.

ਸੋ ਤਂ ਵੀਣਨ੍ਤਿ ਸੋ ਰਾਜਾ ‘‘ਆਹਰਥ ਨਂ ਵੀਣਂ, ਅਹਮਸ੍ਸਾ ਸਦ੍ਦਂ ਪਸਿਸ੍ਸਾਮੀ’’ਤਿ ਤਂ ਵੀਣਂ ਗਹੇਤ੍ਵਾ. ਦਸਧਾ ਵਾਤਿਆਦੀਸੁ ਪਠਮਂ ਤਾਵ ਦਸਧਾ ਫਾਲੇਯ੍ਯ, ਅਥਸ੍ਸਾ ਸਦ੍ਦਂ ਅਪਸ੍ਸਨ੍ਤੋ ਸਤਧਾ ਫਾਲੇਯ੍ਯ, ਤਥਾਪਿ ਅਪਸ੍ਸਨ੍ਤੋ ਸਕਲਿਕਂ ਸਕਲਿਕਂ ਕਰੇਯ੍ਯ, ਤਥਾਪਿ ਅਪਸ੍ਸਨ੍ਤੋ ‘‘ਸਕਲਿਕਾ ਝਾਯਿਸ੍ਸਨ੍ਤਿ, ਸਦ੍ਦੋ ਪਨ ਨਿਕ੍ਖਮਿਤ੍ਵਾ ਪਲਾਯਿਸ੍ਸਤਿ, ਤਦਾ ਨਂ ਪਸ੍ਸਿਸ੍ਸਾਮੀ’’ਤਿ ਅਗ੍ਗਿਨਾ ਡਹੇਯ੍ਯ. ਤਥਾਪਿ ਅਪਸ੍ਸਨ੍ਤੋ ‘‘ਸਲ੍ਲਹੁਕਾਨਿ ਮਸਿਚੁਣ੍ਣਾਨਿ ਵਾਤੇਨ ਭਸ੍ਸਿਸ੍ਸਨ੍ਤਿ, ਸਦ੍ਦੋ ਸਾਰਧਞ੍ਞਂ ਵਿਯ ਪਾਦਮੂਲੇ ਪਤਿਸ੍ਸਤਿ, ਤਦਾ ਨਂ ਪਸ੍ਸਿਸ੍ਸਾਮੀ’’ਤਿ ਮਹਾਵਾਤੇ ਵਾ ਓਫੁਨੇਯ੍ਯ. ਤਥਾਪਿ ਅਪਸ੍ਸਨ੍ਤੋ ‘‘ਮਸਿਚੁਣ੍ਣਾਨਿ ਯਥੋਦਕਂ ਗਮਿਸ੍ਸਨ੍ਤਿ, ਸਦ੍ਦੋ ਪਨ ਪਾਰਂ ਗਚ੍ਛਨ੍ਤੋ ਪੁਰਿਸੋ ਵਿਯ ਨਿਕ੍ਖਮਿਤ੍ਵਾ ਤਰਿਸ੍ਸਤਿ, ਤਦਾ ਨਂ ਪਸ੍ਸਿਸ੍ਸਾਮੀ’’ਤਿ ਨਦਿਯਾ ਵਾ ਸੀਘਸੋਤਾਯ ਪਵਾਹੇਯ੍ਯ.

ਏਵਂ ਵਦੇਯ੍ਯਾਤਿ ਸਬ੍ਬੇਹਿਪਿਮੇਹਿ ਉਪਾਯੇਹਿ ਅਪਸ੍ਸਨ੍ਤੋ ਤੇ ਮਨੁਸ੍ਸੇ ਏਵਂ ਵਦੇਯ੍ਯ. ਅਸਤੀ ਕਿਰਾਯਨ੍ਤਿ ਅਸਤੀ ਕਿਰ ਅਯਂ ਵੀਣਾ, ਲਾਮਿਕਾਤਿ ਅਤ੍ਥੋ. ਅਸਤੀਤਿ ਲਾਮਕਾਧਿਵਚਨਮੇਤਂ. ਯਥਾਹ –

‘‘ਅਸਾ ਲੋਕਿਤ੍ਥਿਯੋ ਨਾਮ, ਵੇਲਾ ਤਾਸਂ ਨ ਵਿਜ੍ਜਤਿ;

ਸਾਰਤ੍ਤਾ ਚ ਪਗਬ੍ਭਾ ਚ, ਸਿਖੀ ਸਬ੍ਬਘਸੋ ਯਥਾ’’ਤਿ. (ਜਾ. ੧.੧.੬੧);

ਯਥੇਵਂ ਯਂਕਿਞ੍ਚਿ ਵੀਣਾ ਨਾਮਾਤਿ ਨ ਕੇਵਲਞ੍ਚ ਵੀਣਾਯੇਵ ਲਾਮਿਕਾ, ਯਥੇਵ ਪਨ ਅਯਂ ਵੀਣਾ ਨਾਮ, ਏਵਂ ਯਂਕਿਞ੍ਚਿ ਅਞ੍ਞਮ੍ਪਿ ਤਨ੍ਤਿਬਦ੍ਧਂ, ਸਬ੍ਬਂ ਤਂ ਲਾਮਕਮੇਵਾਤਿ ਅਤ੍ਥੋ. ਏਵਮੇਵ ਖੋਤਿ ਏਤ੍ਥ ਵੀਣਾ ਵਿਯ ਪਞ੍ਚਕ੍ਖਨ੍ਧਾ ਦਟ੍ਠਬ੍ਬਾ, ਰਾਜਾ ਵਿਯ ਯੋਗਾਵਚਰੋ. ਯਥਾ ਸੋ ਰਾਜਾ ਤਂ ਵੀਣਂ ਦਸਧਾ ਫਾਲਨਤੋ ਪਟ੍ਠਾਯ ਵਿਚਿਨਨ੍ਤੋ ਸਦ੍ਦਂ ਅਦਿਸ੍ਵਾ ਵੀਣਾਯ ਅਨਤ੍ਥਿਕੋ ਹੋਤਿ, ਏਵਂ ਯੋਗਾਵਚਰੋ ਪਞ੍ਚਕ੍ਖਨ੍ਧੇ ਸਮ੍ਮਸਨ੍ਤੋ ਅਹਨ੍ਤਿ ਵਾ ਮਮਨ੍ਤਿ ਵਾ ਗਹੇਤਬ੍ਬਂ ਅਪਸ੍ਸਨ੍ਤੋ ਖਨ੍ਧੇਹਿ ਅਨਤ੍ਥਿਕੋ ਹੋਤਿ. ਤੇਨਸ੍ਸ ਤਂ ਖਨ੍ਧਸਮ੍ਮਸਨਂ ਦਸ੍ਸੇਨ੍ਤੋ ਰੂਪਂ ਸਮਨ੍ਵੇਸਤਿ ਯਾਵਤਾ ਰੂਪਸ੍ਸ ਗਤੀਤਿਆਦਿਮਾਹ.

ਤਤ੍ਥ ਸਮਨ੍ਵੇਸਤੀਤਿ ਪਰਿਯੇਸਤਿ. ਯਾਵਤਾ ਰੂਪਸ੍ਸ ਗਤੀਤਿ ਯਤ੍ਤਕਾ ਰੂਪਸ੍ਸ ਗਤਿ. ਤਤ੍ਥ ਗਤੀਤਿ ਗਤਿਗਤਿ, ਸਞ੍ਜਾਤਿਗਤਿ, ਸਲਕ੍ਖਣਗਤਿ, ਵਿਭਵਗਤਿ, ਭੇਦਗਤੀਤਿ ਪਞ੍ਚਵਿਧਾ ਹੋਨ੍ਤਿ. ਤਤ੍ਥ ਇਦਂ ਰੂਪਂ ਨਾਮ ਹੇਟ੍ਠਾ ਅਵੀਚਿਪਰਿਯਨ੍ਤਂ ਕਤ੍ਵਾ ਉਪਰਿ ਅਕਨਿਟ੍ਠਬ੍ਰਹ੍ਮਲੋਕਂ ਅਨ੍ਤੋ ਕਤ੍ਵਾ ਏਤ੍ਥਨ੍ਤਰੇ ਸਂਸਰਤਿ ਵਤ੍ਤਤਿ, ਅਯਮਸ੍ਸ ਗਤਿਗਤਿ ਨਾਮ.

ਅਯਂ ਪਨ ਕਾਯੋ ਨੇਵ ਪਦੁਮਗਬ੍ਭੇ, ਨ ਪੁਣ੍ਡਰੀਕਨੀਲੁਪ੍ਪਲਾਦੀਸੁ ਸਞ੍ਜਾਯਤਿ, ਆਮਾਸਯਪਕ੍ਕਾਸਯਾਨਂ ਪਨ ਅਨ੍ਤਰੇ ਬਹਲਨ੍ਧਕਾਰੇ ਦੁਗ੍ਗਨ੍ਧਪਵਨਵਿਚਰਿਤੇ ਪਰਮਜੇਗੁਚ੍ਛੇ ਓਕਾਸੇ ਪੂਤਿਮਚ੍ਛਾਦੀਸੁ ਕਿਮਿ ਵਿਯ ਸਞ੍ਜਾਯਤਿ, ਅਯਂ ਰੂਪਸ੍ਸ ਸਞ੍ਜਾਤਿਗਤਿ ਨਾਮ.

ਦੁਵਿਧਂ ਪਨ ਰੂਪਸ੍ਸ ਲਕ੍ਖਣਂ, ‘‘ਰੁਪ੍ਪਤੀਤਿ ਖੋ, ਭਿਕ੍ਖਵੇ, ਤਸ੍ਮਾ ਰੂਪ’’ਨ੍ਤਿ (ਸਂ. ਨਿ. ੩.੭੯) ਏਵਂ ਵੁਤ੍ਤ ਰੁਪ੍ਪਨਸਙ੍ਖਾਤਂ ਪਚ੍ਚਤ੍ਤਲਕ੍ਖਣਞ੍ਚ ਅਨਿਚ੍ਚਾਦਿਭੇਦਂ ਸਾਮਞ੍ਞਲਕ੍ਖਣਞ੍ਚ, ਅਯਮਸ੍ਸ ਸਲਕ੍ਖਣਗਤਿ ਨਾਮ.

‘‘ਗਤਿ ਮਿਗਾਨਂ ਪਵਨਂ, ਆਕਾਸੋ ਪਕ੍ਖਿਨਂ ਗਤਿ;

ਵਿਭਵੋ ਗਤਿ ਧਮ੍ਮਾਨਂ, ਨਿਬ੍ਬਾਨਂ ਅਰਹਤੋ ਗਤੀ’’ਤਿ. (ਪਰਿ. ੩੩੯) –

ਏਵਂ ਵੁਤ੍ਤੋ ਰੂਪਸ੍ਸ ਅਭਾਵੋ ਵਿਭਵਗਤਿ ਨਾਮ. ਯੋ ਪਨਸ੍ਸ ਭੇਦੋ, ਅਯਂ ਭੇਦਗਤਿ ਨਾਮ. ਵੇਦਨਾਦੀਸੁਪਿ ਏਸੇਵ ਨਯੋ. ਕੇਵਲਞ੍ਹੇਤ੍ਥ ਉਪਰਿ ਯਾਵ ਭਵਗ੍ਗਾ ਤੇਸਂ ਸਞ੍ਜਾਤਿਗਤਿ, ਸਲਕ੍ਖਣਗਤਿਯਞ੍ਚ ਵੇਦਯਿਤਸਞ੍ਜਾਨਨਅਭਿਸਙ੍ਖਰਣਵਿਜਾਨਨਵਸੇਨ ਪਚ੍ਚਤ੍ਤਲਕ੍ਖਣਂ ਵੇਦਿਤਬ੍ਬਂ.

ਤਮ੍ਪਿ ਤਸ੍ਸ ਨ ਹੋਤੀਤਿ ਯਦੇਤਂ ਰੂਪਾਦੀਸੁ ਅਹਨ੍ਤਿ ਵਾ ਮਮਨ੍ਤਿ ਵਾ ਅਸ੍ਮੀਤਿ ਵਾ ਏਵਂ ਨਿਦ੍ਦਿਟ੍ਠਂ ਦਿਟ੍ਠਿਤਣ੍ਹਾਮਾਨਗ੍ਗਾਹਤ੍ਤਯਂ, ਤਮ੍ਪਿ ਤਸ੍ਸ ਖੀਣਾਸਵਸ੍ਸ ਨ ਹੋਤੀਤਿ ਯਥਾਨੁਸਨ੍ਧਿਨਾਵ ਸੁਤ੍ਤਾਗਤਂ. ਤੇਨ ਵੁਤ੍ਤਂ ਮਹਾਅਟ੍ਠਕਥਾਯਂ –

‘‘ਆਦਿਮ੍ਹਿ ਸੀਲਂ ਕਥਿਤਂ, ਮਜ੍ਝੇ ਸਮਾਧਿਭਾਵਨਾ;

ਪਰਿਯੋਸਾਨੇ ਚ ਨਿਬ੍ਬਾਨਂ, ਏਸਾ ਵੀਣੋਪਮਾ ਕਥਾ’’ਤਿ.