੧੦. ਛਪ੍ਪਾਣਕੋਪਮਸੁਤ੍ਤਵਣ੍ਣਨਾ

੨੪੭. ਦਸਮੇ ਅਰੁਗਤ੍ਤੋਤਿ ਵਣਸਰੀਰੋ. ਤੇਸਂਯੇਵ ਅਰੂਨਂ ਪਕ੍ਕਤ੍ਤਾ ਪਕ੍ਕਗਤ੍ਤੋ. ਸਰਵਨਨ੍ਤਿ ਕਣ੍ਡਵਨਂ. ਏਵਮੇਵ ਖੋਤਿ ਅਰੁਗਤ੍ਤੋ ਪੁਰਿਸੋ ਵਿਯ ਦੁਸ੍ਸੀਲਪੁਗ੍ਗਲੋ ਵੇਦਿਤਬ੍ਬੋ. ਤਸ੍ਸ ਕੁਸਕਣ੍ਟਕੇਹਿ ਵਿਦ੍ਧਸ੍ਸ ਸਰਪਤ੍ਤੇਹਿ ਚ ਅਸਿਧਾਰੂਪਮੇਹਿ ਵਿਲਿਖਿਤਗਤ੍ਤਸ੍ਸ ਭਿਯ੍ਯੋਸੋਮਤ੍ਤਾਯ ਦੁਕ੍ਖਦੋਮਨਸ੍ਸਂ ਵਿਯ ਤਤ੍ਥ ਤਤ੍ਥ ਸਬ੍ਰਹ੍ਮਚਾਰੀਹਿ ‘‘ਅਯਂ ਸੋ ਇਮੇਸਞ੍ਚ ਇਮੇਸਞ੍ਚ ਕਮ੍ਮਾਨਂ ਕਾਰਕੋ’’ਤਿ ਵੁਚ੍ਚਮਾਨਸ੍ਸ ਉਪ੍ਪਜ੍ਜਨਦੁਕ੍ਖਂ ਵੇਦਿਤਬ੍ਬਂ.

ਲਭਤਿ ਵਤ੍ਤਾਰਨ੍ਤਿ ਲਭਤਿ ਚੋਦਕਂ. ਏਵਂਕਾਰੀਤਿ ਏਵਰੂਪਾਨਂ ਵੇਜ੍ਜਕਮ੍ਮਦੂਤਕਮ੍ਮਾਦੀਨਂ ਕਾਰਕੋ. ਏਵਂਸਮਾਚਾਰੋਤਿ ਵਿਧਵਾ ਗੋਚਰਾਦਿਵਸੇਨ ਏਵਰੂਪਗੋਚਰੋ. ਅਸੁਚਿਗਾਮਕਣ੍ਟਕੋਤਿ ਅਸੁਦ੍ਧਟ੍ਠੇਨ ਅਸੁਚਿ, ਗਾਮਵਾਸੀਨਂ ਵਿਜ੍ਝਨਟ੍ਠੇਨ ਕਣ੍ਟਕੋਤਿ ਗਾਮਕਣ੍ਟਕੋ.

ਪਕ੍ਖਿਨ੍ਤਿ ਹਤ੍ਥਿਸੋਣ੍ਡਸਕੁਣਂ. ਓਸ੍ਸਜ੍ਜੇਯ੍ਯਾਤਿ ਵਿਸ੍ਸਜ੍ਜੇਯ੍ਯ. ਆਵਿਞ੍ਛੇਯ੍ਯੁਨ੍ਤਿ ਆਕਡ੍ਢੇਯ੍ਯੁਂ. ਪਵੇਕ੍ਖਾਮੀਤਿ ਪਵਿਸਿਸ੍ਸਾਮਿ. ਆਕਾਸਂ ਡੇਸ੍ਸਾਮੀਤਿ ਆਕਾਸਂ ਉਪ੍ਪਤਿਸ੍ਸਾਮਿ.

ਏਤੇਸੁ ਪਨ ਅਹਿ ‘‘ਭੋਗੇਹਿ ਮਣ੍ਡਲਂ ਬਨ੍ਧਿਤ੍ਵਾ ਸੁਪਿਸ੍ਸਾਮੀ’’ਤਿ ਵਮ੍ਮਿਕਂ ਪਵਿਸਿਤੁਕਾਮੋ ਹੋਤਿ. ਸੁਸੁਮਾਰੋ ‘‘ਦੂਰੇ ਬਿਲਂ ਪਵਿਸਿਤ੍ਵਾ ਨਿਪਜ੍ਜਿਸ੍ਸਾਮੀ’’ਤਿ ਉਦਕਂ ਪਵਿਸਿਤੁਕਾਮੋ ਹੋਤਿ. ਪਕ੍ਖੀ ‘‘ਅਜਟਾਕਾਸੇ ਸੁਖਂ ਵਿਚਰਿਸ੍ਸਾਮੀ’’ਤਿ ਆਕਾਸਂ ਡੇਤੁਕਾਮੋ ਹੋਤਿ. ਕੁਕ੍ਕੁਰੋ ‘‘ਉਦ੍ਧਨਟ੍ਠਾਨੇ ਛਾਰਿਕਂ ਬ੍ਯੂਹਿਤ੍ਵਾ ਉਸੁਮਂ ਗਣ੍ਹਨ੍ਤੋ ਨਿਪਜ੍ਜਿਸ੍ਸਾਮੀ’’ਤਿ ਗਾਮਂ ਪਵਿਸਿਤੁਕਾਮੋ ਹੋਤਿ. ਸਿਙ੍ਗਾਲੋ ‘‘ਮਨੁਸ੍ਸਮਂਸਂ ਖਾਦਿਤ੍ਵਾ ਪਿਟ੍ਠਿਂ ਪਸਾਰੇਤ੍ਵਾ ਸਯਿਸ੍ਸਾਮੀ’’ਤਿ ਆਮਕਸੁਸਾਨਂ ਪਵਿਸਿਤੁਕਾਮੋ ਹੋਤਿ. ਮਕ੍ਕਟੋ ‘‘ਉਚ੍ਚੇ ਰੁਕ੍ਖੇ ਅਭਿਰੁਹਿਤ੍ਵਾ ਦਿਸਾਦਿਸਂ ਪਕ੍ਖਨ੍ਦਿਸ੍ਸਾਮੀ’’ਤਿ ਵਨਂ ਪਵਿਸਿਤੁਕਾਮੋ ਹੋਤਿ.

ਅਨੁਵਿਧਾਯੇਯ੍ਯੁਨ੍ਤਿ ਅਨੁਗਚ੍ਛੇਯ੍ਯੁਂ, ਅਨੁਵਿਧਿਯੇਯ੍ਯੁਨ੍ਤਿਪਿ ਪਾਠੋ, ਅਨੁਵਿਧਾਨਂ ਆਪਜ੍ਜੇਯ੍ਯੁਨ੍ਤਿ ਅਤ੍ਥੋ. ਯਤ੍ਥ ਸੋ ਯਾਤਿ, ਤਤ੍ਥੇਵ ਗਚ੍ਛੇਯ੍ਯੁਨ੍ਤਿ ਵੁਤ੍ਤਂ ਹੋਤਿ. ਏਵਮੇਵਾਤਿ ਏਤ੍ਥ ਛ ਪਾਣਕਾ ਵਿਯ ਛਾਯਤਨਾਨਿ ਦਟ੍ਠਬ੍ਬਾਨਿ, ਦਲ਼੍ਹਰਜ੍ਜੁ ਵਿਯ ਤਣ੍ਹਾ, ਮਜ੍ਝੇ ਗਣ੍ਠਿ ਵਿਯ ਅਵਿਜ੍ਜਾ. ਯਸ੍ਮਿਂ ਯਸ੍ਮਿਂ ਦ੍ਵਾਰੇ ਆਰਮ੍ਮਣਂ ਬਲਵਂ ਹੋਤਿ, ਤਂ ਤਂ ਆਯਤਨਂ ਤਸ੍ਮਿਂ ਤਸ੍ਮਿਂ ਆਰਮ੍ਮਣੇ ਆਵਿਞ੍ਛਤਿ.

ਇਮਂ ਪਨ ਉਪਮਂ ਭਗਵਾ ਸਰਿਕ੍ਖਕੇਨ ਵਾ ਆਹਰੇਯ੍ਯ ਆਯਤਨਾਨਂ ਵਾ ਨਾਨਤ੍ਤਦਸ੍ਸਨਵਸੇਨ. ਤਤ੍ਥ ਸਰਿਕ੍ਖਕੇਨ ਤਾਵ ਵਿਸੁਂ ਅਪ੍ਪਨਾਕਿਚ੍ਚਂ ਨਤ੍ਥਿ, ਪਾਲ਼ਿਯਂਯੇਵ ਅਪ੍ਪਿਤਾ. ਆਯਤਨਾਨਂ ਨਾਨਤ੍ਤਦਸ੍ਸਨੇਨ ਪਨ ਅਯਂ ਅਪ੍ਪਨਾ – ਅਹਿ ਨਾਮੇਸ ਬਹਿ ਸਿਤ੍ਤਸਮ੍ਮਟ੍ਠੇ ਠਾਨੇ ਨਾਭਿਰਮਤਿ, ਸਙ੍ਕਾਰਟ੍ਠਾਨਤਿਣਪਣ੍ਣਗਹਨਵਮ੍ਮਿਕਾਨਿਯੇਵ ਪਨ ਪਵਿਸਿਤ੍ਵਾ ਨਿਪਨ੍ਨਕਾਲੇ ਅਭਿਰਮਤਿ, ਏਕਗ੍ਗਤਂ ਆਪਜ੍ਜਤਿ. ਏਵਮੇਵ ਚਕ੍ਖੁਪੇਤਂ ਵਿਸਮਜ੍ਝਾਸਯਂ, ਮਟ੍ਠਾਸੁ ਸੁਵਣ੍ਣਭਿਤ੍ਤਿਆਦੀਸੁ ਨਾਭਿਰਮਤਿ, ਓਲੋਕੇਤੁਮ੍ਪਿ ਨ ਇਚ੍ਛਤਿ, ਰੂਪਚਿਤ੍ਤਪੁਪ੍ਫਲਤਾਦਿਵਿਚਿਤ੍ਤੇਸੁਯੇਵ ਪਨ ਅਭਿਰਮਤਿ. ਤਾਦਿਸੇਸੁ ਹਿ ਠਾਨੇਸੁ ਚਕ੍ਖੁਮ੍ਹਿ ਅਪ੍ਪਹੋਨ੍ਤੇ ਮੁਖਮ੍ਪਿ ਵਿਵਰਿਤ੍ਵਾ ਓਲੋਕੇਤੁਕਾਮੋ ਹੋਤਿ.

ਸੁਸੁਮਾਰੋਪਿ ਬਹਿ ਨਿਕ੍ਖਨ੍ਤੋ ਗਹੇਤਬ੍ਬਂ ਨ ਪਸ੍ਸਤਿ, ਅਕ੍ਖਿਂ ਨਿਮੀਲੇਤ੍ਵਾ ਚਰਤਿ. ਯਦਾ ਪਨ ਬ੍ਯਾਮਸਤਮਤ੍ਤਂ ਉਦਕਂ ਓਗਾਹਿਤ੍ਵਾ ਬਿਲਂ ਪਵਿਸਿਤ੍ਵਾ ਨਿਪਨ੍ਨੋ ਹੋਤਿ, ਤਦਾ ਤਸ੍ਸ ਚਿਤ੍ਤਂ ਏਕਗ੍ਗਂ ਹੋਤਿ, ਸੁਖਂ ਸੁਪਤਿ. ਏਵਮੇਵ ਸੋਤਮ੍ਪੇਤਂ ਬਿਲਜ੍ਝਾਸਯਂ ਆਕਾਸਸਨ੍ਨਿਸ੍ਸਿਤਂ, ਕਣ੍ਣਚ੍ਛਿਦ੍ਦਕੂਪਕੇਯੇਵ ਅਜ੍ਝਾਸਯਂ ਕਰੋਤਿ, ਕਣ੍ਣਚ੍ਛਿਦ੍ਦਾਕਾਸੋਯੇਵ ਤਸ੍ਸ ਸਦ੍ਦਸਵਨੇ ਪਚ੍ਚਯੋ ਹੋਤਿ. ਅਜਟਾਕਾਸੋਪਿ ਵਟ੍ਟਤਿਯੇਵ. ਅਨ੍ਤੋਲੇਣਸ੍ਮਿਞ੍ਹਿ ਸਜ੍ਝਾਯੇ ਕਯਿਰਮਾਨੇ ਨ ਲੇਣਚ੍ਛਦਨਂ ਭਿਨ੍ਦਿਤ੍ਵਾ ਸਦ੍ਦੋ ਬਹਿ ਨਿਕ੍ਖਮਤਿ, ਦ੍ਵਾਰਵਾਤਪਾਨਛਿਦ੍ਦੇਹਿ ਪਨ ਨਿਕ੍ਖਮਿਤ੍ਵਾ ਧਾਤੁਪਰਮ੍ਪਰਾ ਘਟ੍ਟੇਨ੍ਤੋ ਆਗਨ੍ਤ੍ਵਾ ਸੋਤਪਸਾਦਂ ਘਟ੍ਟੇਤਿ. ਅਥ ਤਸ੍ਮਿਂ ਕਾਲੇ ‘‘ਅਸੁਕਂ ਨਾਮ ਸਜ੍ਝਾਯਤੀ’’ਤਿ ਲੇਣਪਿਟ੍ਠੇ ਨਿਸਿਨ੍ਨਾ ਜਾਨਨ੍ਤਿ.

ਏਵਂ ਸਨ੍ਤੇ ਸਮ੍ਪਤ੍ਤਗੋਚਰਤਾ ਹੋਤਿ, ਕਿਂ ਪਨੇਤਂ ਸਮ੍ਪਤ੍ਤਗੋਚਰਨ੍ਤਿ? ਆਮ ਸਮ੍ਪਤ੍ਤਗੋਚਰਂ. ਯਦਿ ਏਵਂ ਦੂਰੇ ਭੇਰਿਆਦੀਸੁ ਵਜ੍ਜਮਾਨੇਸੁ ‘‘ਦੂਰੇ ਸਦ੍ਦੋ’’ਤਿ ਜਾਨਨਂ ਨ ਭਵੇਯ੍ਯਾਤਿ. ਨੋ ਨ ਭਵਤਿ. ਸੋਤਪਸਾਦਸ੍ਮਿਞ੍ਹਿ ਘਟ੍ਟਿਤੇ ‘‘ਦੂਰੇ ਸਦ੍ਦੋ, ਆਸਨ੍ਨੇ ਸਦ੍ਦੋ, ਪਰਤੀਰੇ ਓਰਿਮਤੀਰੇ’’ਤਿ ਤਥਾ ਤਥਾ ਜਾਨਨਾਕਾਰੋ ਹੋਤਿ, ਧਮ੍ਮਤਾ ਏਸਾਤਿ. ਕਿਂ ਏਤਾਯ ਧਮ੍ਮਤਾਯ? ਯਤੋ ਯਤੋ ਛਿਦ੍ਦਂ, ਤਤੋ ਤਤੋ ਸਵਨਂ ਹੋਤਿ ਚਨ੍ਦਿਮਸੂਰਿਯਾਦੀਨਂ ਦਸ੍ਸਨਂ ਵਿਯਾਤਿ ਅਸਮ੍ਪਤ੍ਤਗੋਚਰਮੇਵੇਤਂ.

ਪਕ੍ਖੀਪਿ ਰੁਕ੍ਖੇ ਵਾ ਭੂਮਿਯਂ ਵਾ ਨ ਰਮਤਿ. ਯਦਾ ਪਨ ਏਕਂ ਵਾ ਦ੍ਵੇ ਵਾ ਲੇਡ੍ਡੁਪਾਤੇ ਅਤਿਕ੍ਕਮ੍ਮ ਅਜਟਾਕਾਸਂ ਪਕ੍ਖਨ੍ਦੋ ਹੋਤਿ, ਤਦਾ ਏਕਗ੍ਗਚਿਤ੍ਤਤਂ ਆਪਜ੍ਜਤਿ. ਏਵਮੇਵ ਘਾਨਮ੍ਪਿ ਆਕਾਸਜ੍ਝਾਸਯਂ ਵਾਤੂਪਨਿਸ੍ਸਯਗਨ੍ਧਗੋਚਰਂ. ਤਥਾ ਹਿ ਗਾਵੋ ਨਵਵੁਟ੍ਠੇ ਦੇਵੇ ਭੂਮਿਂ ਘਾਯਿਤ੍ਵਾ ਘਾਯਿਤ੍ਵਾ ਆਕਾਸਾਭਿਮੁਖੋ ਹੁਤ੍ਵਾ ਵਾਤਂ ਆਕਡ੍ਢਨ੍ਤਿ. ਅਙ੍ਗੁਲੀਹਿ ਗਨ੍ਧਪਿਣ੍ਡਂ ਗਹੇਤ੍ਵਾਪਿ ਚ ਉਪਸਿਙ੍ਘਨਕਾਲੇ ਵਾਤਂ ਅਨਾਕਡ੍ਢਨ੍ਤੋ ਨੇਵ ਤਸ੍ਸ ਗਨ੍ਧਂ ਜਾਨਾਤਿ.

ਕੁਕ੍ਕੁਰੋਪਿ ਬਹਿ ਚਰਨ੍ਤੋ ਖੇਮਟ੍ਠਾਨਂ ਨ ਪਸ੍ਸਤਿ, ਲੇਡ੍ਡੁਦਣ੍ਡਾਦੀਹਿ ਉਪਦ੍ਦੁਤੋ ਹੋਤਿ. ਅਨ੍ਤੋਗਾਮਂ ਪਵਿਸਿਤ੍ਵਾ ਉਦ੍ਧਨਟ੍ਠਾਨੇ ਛਾਰਿਕਂ ਬ੍ਯੂਹਿਤ੍ਵਾ ਨਿਪਨ੍ਨਸ੍ਸ ਪਨਸ੍ਸ ਫਾਸੁ ਹੋਤਿ. ਏਵਮੇਵ ਜਿਵ੍ਹਾਪਿ ਗਾਮਜ੍ਝਾਸਯਾ ਆਪੋਸਨ੍ਨਿਸ੍ਸਿਤਰਸਾਰਮ੍ਮਣਾ. ਤਥਾ ਹਿ ਤਿਯਾਮਰਤ੍ਤਿਂ ਸਮਣਧਮ੍ਮਂ ਕਤ੍ਵਾਪਿ ਪਾਤੋਵ ਪਤ੍ਤਚੀਵਰਮਾਦਾਯ ਗਾਮਂ ਪਵਿਸਿਤਬ੍ਬਂ ਹੋਤਿ. ਸੁਕ੍ਖਖਾਦਨੀਯਸ੍ਸ ਚ ਨ ਸਕ੍ਕਾ ਖੇਲ਼ੇਨ ਅਤੇਮਿਤਸ੍ਸ ਰਸਂ ਜਾਨਿਤੁਂ.

ਸਿਙ੍ਗਾਲੋਪਿ ਬਹਿ ਚਰਨ੍ਤੋ ਰਤਿਂ ਨ ਵਿਨ੍ਦਤਿ, ਆਮਕਸੁਸਾਨੇ ਮਨੁਸ੍ਸਮਂਸਂ ਖਾਦਿਤ੍ਵਾ ਨਿਪਨ੍ਨਸ੍ਸੇਵ ਪਨਸ੍ਸ ਫਾਸੁ ਹੋਤਿ. ਏਵਮੇਵ ਕਾਯੋਪਿ ਉਪਾਦਿਣ੍ਣਕਜ੍ਝਾਸਯੋ ਪਥਵੀਸਨ੍ਨਿਸ੍ਸਿਤਫੋਟ੍ਠਬ੍ਬਾਰਮ੍ਮਣੋ. ਤਥਾ ਹਿ ਅਞ੍ਞਂ ਉਪਾਦਿਣ੍ਣਕਂ ਅਲਭਮਾਨਾ ਸਤ੍ਤਾ ਅਤ੍ਤਨੋਵ ਹਤ੍ਥਤਲੇ ਸੀਸਂ ਕਤ੍ਵਾ ਨਿਪਜ੍ਜਨ੍ਤਿ. ਅਜ੍ਝਤ੍ਤਿਕਬਾਹਿਰਾ ਚਸ੍ਸ ਪਥਵੀ ਆਰਮ੍ਮਣਗ੍ਗਹਣੇ ਪਚ੍ਚਯੋ ਹੋਤਿ. ਸੁਸਨ੍ਥਤਸ੍ਸਾਪਿ ਹਿ ਸਯਨਸ੍ਸ ਹੇਟ੍ਠਾਠਿਤਾਨਮ੍ਪਿ ਵਾ ਫਲਕਾਨਂ ਨ ਸਕ੍ਕਾ ਅਨਿਸੀਦਨ੍ਤੇਨ ਵਾ ਅਨੁਪ੍ਪੀਲ਼ਨ੍ਤੇਨ ਵਾ ਥਦ੍ਧਮੁਦੁਭਾਵੋ ਜਾਨਿਤੁਨ੍ਤਿ ਅਜ੍ਝਤ੍ਤਿਕਬਾਹਿਰਾ ਪਥਵੀ ਏਤਸ੍ਸ ਫੋਟ੍ਠਬ੍ਬਜਾਨਨੇ ਪਚ੍ਚਯੋ ਹੋਤਿ.

ਮਕ੍ਕਟੋਪਿ ਭੂਮਿਯਂ ਵਿਚਰਨ੍ਤੋ ਨਾਭਿਰਮਤਿ, ਹਤ੍ਥਸਤੁਬ੍ਬੇਧਂ ਪਨਸ੍ਸ ਰੁਕ੍ਖਂ ਆਰੁਯ੍ਹ ਵਿਟਪਪਿਟ੍ਠੇ ਨਿਸੀਦਿਤ੍ਵਾ ਦਿਸਾਵਿਦਿਸਾ ਓਲੋਕੇਨ੍ਤਸ੍ਸੇਵ ਫਾਸੁਕੋ ਹੋਤਿ. ਏਵਂ ਮਨੋਪਿ ਨਾਨਜ੍ਝਾਸਯੋ ਭਵਙ੍ਗਪਚ੍ਚਯੋ, ਦਿਟ੍ਠਪੁਬ੍ਬੇਪਿ ਨਾਨਾਰਮ੍ਮਣਜ੍ਝਾਸਯਂ ਕਰੋਤਿਯੇਵ ਮੂਲਭਵਙ੍ਗਂ ਪਨਸ੍ਸ ਪਚ੍ਚਯੋ ਹੋਤੀਤਿ ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੇਨ ਪਨ ਆਯਤਨਾਨਂ ਨਾਨਤ੍ਤਂ ਵਿਸੁਦ੍ਧਿਮਗ੍ਗੇ ਆਯਤਨਨਿਦ੍ਦੇਸੇ ਵੁਤ੍ਤਮੇਵ.

ਤਂ ਚਕ੍ਖੁ ਨਾਵਿਞ੍ਛਤੀਤਿ ਤਣ੍ਹਾਰਜ੍ਜੁਕਾਨਂ ਆਯਤਨਪਾਣਕਾਨਂ ਕਾਯਗਤਾਸਤਿਥਮ੍ਭੇ ਬਦ੍ਧਾਨਂ ਨਿਬ੍ਬਿਸੇਵਨਭਾਵਂ ਆਪਨ੍ਨਤ੍ਤਾ ਨਾਕਡ੍ਢਤੀਤਿ ਇਮਸ੍ਮਿਂ ਸੁਤ੍ਤੇ ਪੁਬ੍ਬਭਾਗਵਿਪਸ੍ਸਨਾਵ ਕਥਿਤਾ.