੧੧. ਯਵਕਲਾਪਿਸੁਤ੍ਤਵਣ੍ਣਨਾ

੨੪੮. ਏਕਾਦਸਮੇ ਯਵਕਲਾਪੀਤਿ ਲਾਯਿਤ੍ਵਾ ਠਪਿਤਯਵਪੁਞ੍ਜੋ. ਬ੍ਯਾਭਙ੍ਗਿਹਤ੍ਥਾਤਿ ਕਾਜਹਤ੍ਥਾ. ਛਹਿ ਬ੍ਯਾਭਙ੍ਗੀਹਿ ਹਨੇਯ੍ਯੁਨ੍ਤਿ ਛਹਿ ਪੁਥੁਲਕਾਜਦਣ੍ਡਕੇਹਿ ਪੋਥੇਯ੍ਯੁਂ. ਸਤ੍ਤਮੋਤਿ ਤੇਸੁ ਛਸੁ ਜਨੇਸੁ ਯਵੇ ਪੋਥੇਤ੍ਵਾ ਪਸਿਬ੍ਬਕੇ ਪੂਰੇਤ੍ਵਾ ਆਦਾਯ ਗਤੇਸੁ ਅਞ੍ਞੋ ਸਤ੍ਤਮੋ ਆਗਚ੍ਛੇਯ੍ਯ. ਸੁਹਤਤਰਾ ਅਸ੍ਸਾਤਿ ਯਂ ਤਤ੍ਥ ਅਵਸਿਟ੍ਠਂ ਅਤ੍ਥਿ ਭੁਸਪਲਾਪਮਤ੍ਤਮ੍ਪਿ, ਤਸ੍ਸ ਗਹਣਤ੍ਥਂ ਸੁਟ੍ਠੁਤਰਂ ਹਤਾ.

ਏਵਮੇਵ ਖੋਤਿ ਏਤ੍ਥ ਚਤੁਮਹਾਪਥੋ ਵਿਯ ਛ ਆਯਤਨਾਨਿ ਦਟ੍ਠਬ੍ਬਾਨਿ, ਚਤੁਮਹਾਪਥੇ ਨਿਕ੍ਖਿਤ੍ਤਯਵਕਲਾਪੀ ਵਿਯ ਸਤ੍ਤੋ, ਛ ਬ੍ਯਾਭਙ੍ਗਿਯੋ ਵਿਯ ਇਟ੍ਠਾਨਿਟ੍ਠਮਜ੍ਝਤ੍ਤਵਸੇਨ ਅਟ੍ਠਾਰਸ ਆਰਮ੍ਮਣਾਨਿ, ਸਤ੍ਤਮਾ ਬ੍ਯਾਭਙ੍ਗੀ ਵਿਯ ਭਵਪਤ੍ਥਨਾ ਕਿਲੇਸਾ. ਯਥਾ ਚਤੁਮਹਾਪਥੇ ਠਪਿਤਾ ਯਵਕਲਾਪੀ ਛਹਿ ਬ੍ਯਾਭਙ੍ਗੀਹਿ ਹਞ੍ਞਤਿ, ਏਵਮਿਮੇ ਸਤ੍ਤਾ ਅਟ੍ਠਾਰਸਹਿ ਆਰਮ੍ਮਣਦਣ੍ਡਕੇਹਿ ਛਸੁ ਆਯਤਨੇਸੁ ਹਞ੍ਞਨ੍ਤਿ. ਯਥਾ ਸਤ੍ਤਮੇਨ ਸੁਹਤਤਰਾ ਹੋਨ੍ਤਿ, ਏਵਂ ਸਤ੍ਤਾ ਭਵਪਤ੍ਥਨਕਿਲੇਸੇਹਿ ਸੁਹਤਤਰਾ ਹੋਨ੍ਤਿ ਭਵੇਮੂਲਕਂ ਦੁਕ੍ਖਂ ਅਨੁਭਵਮਾਨਾ.

ਇਦਾਨਿ ਨੇਸਂ ਤਂ ਭਵਪਤ੍ਥਨਕਿਲੇਸਂ ਦਸ੍ਸੇਤੁਂ ਭੂਤਪੁਬ੍ਬਂ, ਭਿਕ੍ਖਵੇਤਿਆਦਿਮਾਹ. ਤਤ੍ਰਾਤਿ ਸੁਧਮ੍ਮਾਯਂ ਭੁਮ੍ਮਂ, ਸੁਧਮ੍ਮਾਯ ਦੇਵਸਭਾਯ ਦ੍ਵਾਰੇਤਿ ਅਤ੍ਥੋ. ਧਮ੍ਮਿਕਾ ਖੋ ਦੇਵਾਤਿ ਧਮ੍ਮਿਕਾ ਏਤੇ ਦੇਵਾ ਨਾਮ, ਯੇਹਿ ਮਾਦਿਸਂ ਅਸੁਰਾਧਿਪਤਿਂ ਗਹੇਤ੍ਵਾ ਮਯ੍ਹਂ ਭੇਦਨਮਤ੍ਤਮ੍ਪਿ ਨ ਕਤਨ੍ਤਿ ਸਨ੍ਧਾਯ ਵਦਤਿ. ਅਧਮ੍ਮਿਕਾ ਦੇਵਾਤਿ ਅਧਮ੍ਮਿਕਾ ਏਤੇ ਦੇਵਾ ਨਾਮ, ਯੇ ਮਾਦਿਸਂ ਅਸੁਰਾਧਿਪਤਿਂ ਨਵਗੂਥਸੂਕਰਂ ਵਿਯ ਕਣ੍ਠਪਞ੍ਚਮੇਹਿ ਬਨ੍ਧਨੇਹਿ ਬਨ੍ਧਿਤ੍ਵਾ ਨਿਸੀਦਾਪੇਨ੍ਤਿ. ਏਵਂ ਸੁਖੁਮਂ ਖੋ, ਭਿਕ੍ਖਵੇ, ਵੇਪਚਿਤ੍ਤਿਬਨ੍ਧਨਨ੍ਤਿ ਤਂ ਕਿਰ ਪਦੁਮਨਾਲ਼ਸੁਤ੍ਤਂ ਵਿਯ ਮਕ੍ਕਟਜਾਲਸੁਤ੍ਤਂ ਵਿਯ ਚ ਸੁਖੁਮਂ ਹੋਤਿ, ਛੇਤ੍ਤੁਂ ਪਨ ਨੇਵ ਵਾਸਿਯਾ ਨ ਫਰਸੁਨਾ ਸਕ੍ਕਾ. ਯਸ੍ਮਾ ਪਨ ਚਿਤ੍ਤੇਨੇਵ ਬਜ੍ਝਤਿ, ਚਿਤ੍ਤੇਨ ਮੁਚ੍ਚਤਿ, ਤਸ੍ਮਾ ‘‘ਵੇਪਚਿਤ੍ਤਿਬਨ੍ਧਨ’’ਨ੍ਤਿ ਵੁਤ੍ਤਂ.

ਤਤੋ ਸੁਖੁਮਤਰਂ ਮਾਰਬਨ੍ਧਨਨ੍ਤਿ ਕਿਲੇਸਬਨ੍ਧਨਂ ਪਨੇਸਂ ਤਤੋਪਿ ਸੁਖੁਮਤਰਂ, ਨੇਵ ਚਕ੍ਖੁਸ੍ਸ ਆਪਾਥਂ ਗਚ੍ਛਤਿ, ਨ ਇਰਿਯਾਪਥਂ ਨਿਵਾਰੇਤਿ. ਤੇਨ ਹਿ ਬਦ੍ਧਾ ਸਤ੍ਤਾ ਪਥਵਿਤਲੇਪਿ ਆਕਾਸੇਪਿ ਯੋਜਨਸਤਮ੍ਪਿ ਯੋਜਨਸਹਸ੍ਸਮ੍ਪਿ ਗਚ੍ਛਨ੍ਤਿਪਿ ਆਗਚ੍ਛਨ੍ਤਿਪਿ. ਛਿਜ੍ਜਮਾਨਂ ਪਨੇਤਂ ਞਾਣੇਨੇਵ ਛਿਜ੍ਜਤਿ, ਨ ਅਞ੍ਞੇਨਾਤਿ ‘‘ਞਾਣਮੋਕ੍ਖਂ ਬਨ੍ਧਨ’’ਨ੍ਤਿਪਿ ਵੁਚ੍ਚਤਿ.

ਮਞ੍ਞਮਾਨੋਤਿ ਤਣ੍ਹਾਦਿਟ੍ਠਿਮਾਨਾਨਂ ਵਸੇਨ ਖਨ੍ਧੇ ਮਞ੍ਞਨ੍ਤੋ. ਬਦ੍ਧੋ ਮਾਰਸ੍ਸਾਤਿ ਮਾਰਬਨ੍ਧਨੇਨ ਬਦ੍ਧੋ. ਕਰਣਤ੍ਥੇ ਵਾ ਏਤਂ ਸਾਮਿਵਚਨਂ, ਕਿਲੇਸਮਾਰੇਨ ਬਦ੍ਧੋਤਿ ਅਤ੍ਥੋ. ਮੁਤ੍ਤੋ ਪਾਪਿਮਤੋਤਿ ਮਾਰਸ੍ਸ ਬਨ੍ਧਨੇਨ ਮੁਤ੍ਤੋ. ਕਰਣਤ੍ਥੇਯੇਵ ਵਾ ਇਦਂ ਸਾਮਿਵਚਨਂ, ਪਾਪਿਮਤਾ ਕਿਲੇਸਬਨ੍ਧਨੇਨ ਮੁਤ੍ਤੋਤਿ ਅਤ੍ਥੋ.

ਅਸ੍ਮੀਤਿ ਪਦੇਨ ਤਣ੍ਹਾਮਞ੍ਞਿਤਂ ਵੁਤ੍ਤਂ. ਅਯਮਹਸ੍ਮੀਤਿ ਦਿਟ੍ਠਿਮਞ੍ਞਿਤਂ. ਭਵਿਸ੍ਸਨ੍ਤਿ ਸਸ੍ਸਤਵਸੇਨ ਦਿਟ੍ਠਿਮਞ੍ਞਿਤਮੇਵ. ਨ ਭਵਿਸ੍ਸਨ੍ਤਿ ਉਚ੍ਛੇਦਵਸੇਨ. ਰੂਪੀਤਿਆਦੀਨਿ ਸਸ੍ਸਤਸ੍ਸੇਵ ਪਭੇਦਦੀਪਨਾਨਿ. ਤਸ੍ਮਾਤਿ ਯਸ੍ਮਾ ਮਞ੍ਞਿਤਂ ਆਬਾਧਂ ਅਨ੍ਤੋਦੋਸਨਿਕਨ੍ਤਨਵਸੇਨ ਰੋਗੋ ਚੇਵ ਗਣ੍ਡੋ ਚ ਸਲ੍ਲਞ੍ਚ, ਤਸ੍ਮਾ. ਇਞ੍ਜਿਤਨ੍ਤਿਆਦੀਨਿ ਯਸ੍ਮਾ ਇਮੇਹਿ ਕਿਲੇਸੇਹਿ ਸਤ੍ਤਾ ਇਞ੍ਜਨ੍ਤਿ ਚੇਵ ਫਨ੍ਦਨ੍ਤਿ ਚ ਪਪਞ੍ਚਿਤਾ ਚ ਹੋਨ੍ਤਿ ਪਮਤ੍ਤਾਕਾਰਪਤ੍ਤਾ, ਤਸ੍ਮਾ ਤੇਸਂ ਆਕਾਰਦਸ੍ਸਨਤ੍ਥਂ ਵੁਤ੍ਤਾਨਿ.

ਮਾਨਗਤਵਾਰੇ ਪਨ ਮਾਨਸ੍ਸ ਗਤਂ ਮਾਨਗਤਂ, ਮਾਨਪਵਤ੍ਤੀਤਿ ਅਤ੍ਥੋ. ਮਾਨੋਯੇਵ ਮਾਨਗਤਂ ਗੂਥਗਤਂ ਮੁਤ੍ਤਗਤਂ ਵਿਯ. ਤਤ੍ਥ ਅਸ੍ਮੀਤਿ ਇਦਂ ਤਣ੍ਹਾਯ ਸਮ੍ਪਯੁਤ੍ਤਮਾਨਵਸੇਨ ਵੁਤ੍ਤਂ. ਅਯਮਹਮਸ੍ਮੀਤਿ ਦਿਟ੍ਠਿਵਸੇਨ. ਨਨੁ ਚ ਦਿਟ੍ਠਿਸਮ੍ਪਯੁਤ੍ਤੋ ਨਾਮ ਮਾਨੋ ਨਤ੍ਥੀਤਿ? ਆਮ ਨਤ੍ਥਿ, ਮਾਨਸ੍ਸ ਪਨ ਅਪ੍ਪਹੀਨਤ੍ਤਾ ਦਿਟ੍ਠਿ ਨਾਮ ਹੋਤਿ. ਮਾਨਮੂਲਕਂ ਦਿਟ੍ਠਿਂ ਸਨ੍ਧਾਯੇਤਂ ਵੁਤ੍ਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਆਸੀਵਿਸਵਗ੍ਗੋ.

ਚਤੁਤ੍ਥੋ ਪਣ੍ਣਾਸਕੋ.

ਸਲ਼ਾਯਤਨਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.