੮. ਕਿਂਸੁਕੋਪਮਸੁਤ੍ਤਵਣ੍ਣਨਾ

੨੪੫. ਅਟ੍ਠਮੇ ਦਸ੍ਸਨਨ੍ਤਿ ਪਠਮਮਗ੍ਗਸ੍ਸੇਤਂ ਅਧਿਵਚਨਂ. ਪਠਮਮਗ੍ਗੋ ਹਿ ਕਿਲੇਸਪਹਾਨਕਿਚ੍ਚਂ ਸਾਧੇਨ੍ਤੋ ਪਠਮਂ ਨਿਬ੍ਬਾਨਂ ਪਸ੍ਸਤਿ, ਤਸ੍ਮਾ ਦਸ੍ਸਨਨ੍ਤਿ ਵੁਚ੍ਚਤਿ. ਗੋਤ੍ਰਭੁਞਾਣਂ ਪਨ ਕਿਞ੍ਚਾਪਿ ਮਗ੍ਗਤੋ ਪਠਮਤਰਂ ਪਸ੍ਸਤਿ, ਪਸ੍ਸਿਤ੍ਵਾ ਪਨ ਕਤ੍ਤਬ੍ਬਕਿਚ੍ਚਸ੍ਸ ਕਿਲੇਸਪਹਾਨਸ੍ਸ ਅਭਾਵੇਨ ਨ ਦਸ੍ਸਨਨ੍ਤਿ ਵੁਚ੍ਚਤਿ. ਅਪਿਚ ਚਤ੍ਤਾਰੋਪਿ ਮਗ੍ਗਾ ਦਸ੍ਸਨਮੇਵ. ਕਸ੍ਮਾ? ਸੋਤਾਪਤ੍ਤਿਮਗ੍ਗਕ੍ਖਣੇ ਦਸ੍ਸਨਂ ਵਿਸੁਜ੍ਝਤਿ, ਫਲਕ੍ਖਣੇ ਵਿਸੁਦ੍ਧਂ. ਸਕਦਾਗਾਮਿਅਨਾਗਾਮਿਅਰਹਤ੍ਤਮਗ੍ਗਕ੍ਖਣੇ ਵਿਸੁਜ੍ਝਤਿ, ਫਲਕ੍ਖਣੇ ਵਿਸੁਦ੍ਧਨ੍ਤਿ ਏਵਂ ਕਥੇਨ੍ਤਾਨਂ ਭਿਕ੍ਖੂਨਂ ਸੁਤ੍ਵਾ ਸੋ ਭਿਕ੍ਖੁ ‘‘ਅਹਮ੍ਪਿ ਦਸ੍ਸਨਂ ਵਿਸੋਧੇਤ੍ਵਾ ਅਰਹਤ੍ਤਫਲੇ ਪਤਿਟ੍ਠਿਤੋ ਦਸ੍ਸਨਵਿਸੁਦ੍ਧਿਕਂ ਨਿਬ੍ਬਾਨਂ ਸਚ੍ਛਿਕਤ੍ਵਾ ਵਿਹਰਿਸ੍ਸਾਮੀ’’ਤਿ ਤਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਵਂ ਪੁਚ੍ਛਿ. ਸੋ ਫਸ੍ਸਾਯਤਨਕਮ੍ਮਟ੍ਠਾਨਿਕੋ ਛਨ੍ਨਂ ਫਸ੍ਸਾਯਤਨਾਨਂ ਵਸੇਨ ਰੂਪਾਰੂਪਧਮ੍ਮੇ ਪਰਿਗ੍ਗਹੇਤ੍ਵਾ ਅਰਹਤ੍ਤਂ ਪਤ੍ਤੋ. ਏਤ੍ਥ ਹਿ ਪੁਰਿਮਾਨਿ ਪਞ੍ਚ ਆਯਤਨਾਨਿ ਰੂਪਂ, ਮਨਾਯਤਨਂ ਅਰੂਪਂ. ਇਤਿ ਸੋ ਅਤ੍ਤਨਾ ਅਧਿਗਤਮਗ੍ਗਮੇਵ ਕਥੇਸਿ.

ਅਸਨ੍ਤੁਟ੍ਠੋਤਿ ਪਦੇਸਸਙ੍ਖਾਰੇਸੁ ਠਤ੍ਵਾ ਕਥਿਤਤ੍ਤਾ ਅਸਨ੍ਤੁਟ੍ਠੋ. ਏਵਂ ਕਿਰਸ੍ਸ ਅਹੋਸਿ – ‘‘ਅਯਂ ਪਦੇਸਸਙ੍ਖਾਰੇਸੁ ਠਤ੍ਵਾ ਕਥੇਸਿ. ਸਕ੍ਕਾ ਨੁ ਖੋ ਪਦੇਸਸਙ੍ਖਾਰੇਸੁ ਠਤ੍ਵਾ ਦਸ੍ਸਨਵਿਸੁਦ੍ਧਿਕਂ ਨਿਬ੍ਬਾਨਂ ਪਾਪੁਣਿਤੁ’’ਨ੍ਤਿ? ਤਤੋ ਨਂ ਪੁਚ੍ਛਿ – ‘‘ਆਵੁਸੋ, ਤ੍ਵਂਯੇਵ ਨੁ ਖੋ ਇਦਂ ਦਸ੍ਸਨਵਿਸੁਦ੍ਧਿਕਂ ਨਿਬ੍ਬਾਨਂ ਜਾਨਾਸਿ, ਉਦਾਹੁ ਅਞ੍ਞੇਪਿ ਜਾਨਨ੍ਤਾ ਅਤ੍ਥੀ’’ਤਿ. ਅਤ੍ਥਾਵੁਸੋ, ਅਸੁਕਵਿਹਾਰੇ ਅਸੁਕਤ੍ਥੇਰੋ ਨਾਮਾਤਿ. ਸੋ ਤਮ੍ਪਿ ਉਪਸਙ੍ਕਮਿਤ੍ਵਾ ਪੁਚ੍ਛਿ. ਏਤੇਨੁਪਾਯੇਨ ਅਞ੍ਞਮ੍ਪਿ ਅਞ੍ਞਮ੍ਪੀਤਿ.

ਏਤ੍ਥ ਚ ਦੁਤਿਯੋ ਪਞ੍ਚਕ੍ਖਨ੍ਧਕਮ੍ਮਟ੍ਠਾਨਿਕੋ ਰੂਪਕ੍ਖਨ੍ਧਵਸੇਨ ਰੂਪਂ, ਸੇਸਕ੍ਖਨ੍ਧਵਸੇਨ ਨਾਮਨ੍ਤਿ ਨਾਮਰੂਪਂ ਵਵਤ੍ਥਪੇਤ੍ਵਾ ਅਨੁਕ੍ਕਮੇਨ ਅਰਹਤ੍ਤਂ ਪਤ੍ਤੋ. ਤਸ੍ਮਾ ਸੋਪਿ ਅਤ੍ਤਨਾ ਅਧਿਗਤਮਗ੍ਗਮੇਵ ਕਥੇਸਿ. ਅਯਂ ਪਨ ‘‘ਇਮੇਸਂ ਅਞ੍ਞਮਞ੍ਞਂ ਨ ਸਮੇਤਿ, ਪਠਮੇਨ ਸਪ੍ਪਦੇਸਸਙ੍ਖਾਰੇਸੁ ਠਤ੍ਵਾਵ ਕਥਿਤਂ, ਇਮਿਨਾ ਨਿਪ੍ਪਦੇਸੇਸੂ’’ਤਿ ਅਸਨ੍ਤੁਟ੍ਠੋ ਹੁਤ੍ਵਾ ਤਥੇਵ ਤਂ ਪੁਚ੍ਛਿਤ੍ਵਾ ਪਕ੍ਕਾਮਿ.

ਤਤਿਯੋ ਮਹਾਭੂਤਕਮ੍ਮਟ੍ਠਾਨਿਕੋ ਚਤ੍ਤਾਰਿ ਮਹਾਭੂਤਾਨਿ ਸਙ੍ਖੇਪਤੋ ਚ ਵਿਤ੍ਥਾਰਤੋ ਚ ਪਰਿਗ੍ਗਹੇਤ੍ਵਾ ਅਰਹਤ੍ਤਂ ਪਤ੍ਤੋ, ਤਸ੍ਮਾ ਅਯਮ੍ਪਿ ਅਤ੍ਤਨਾ ਅਧਿਗਤਮਗ੍ਗਮੇਵ ਕਥੇਸਿ. ਅਯਂ ਪਨ ‘‘ਇਮੇਸਂ ਅਞ੍ਞਮਞ੍ਞਂ ਨ ਸਮੇਤਿ, ਪਠਮੇਨ ਸਪ੍ਪਦੇਸਸਙ੍ਖਾਰੇਸੁ ਠਤ੍ਵਾ ਕਥਿਤਂ, ਦੁਤਿਯੇਨ ਨਿਪ੍ਪਦੇਸੇਸੁ, ਤਤਿਯੇਨ ਅਤਿਸਪ੍ਪਦੇਸੇਸੂ’’ਤਿ ਅਸਨ੍ਤੁਟ੍ਠੋ ਹੁਤ੍ਵਾ ਤਥੇਵ ਤਂ ਪੁਚ੍ਛਿਤ੍ਵਾ ਪਕ੍ਕਾਮਿ.

ਚਤੁਤ੍ਥੋ ਤੇਭੂਮਕਕਮ੍ਮਟ੍ਠਾਨਿਕੋ. ਤਸ੍ਸ ਕਿਰ ਸਮਪ੍ਪਵਤ੍ਤਾ ਧਾਤੁਯੋ ਅਹੇਸੁਂ, ਕਲ੍ਲਸਰੀਰਂ ਬਲਪਤ੍ਤਂ, ਕਮ੍ਮਟ੍ਠਾਨਾਨਿਪਿਸ੍ਸ ਸਬ੍ਬਾਨੇਵ ਸਪ੍ਪਾਯਾਨਿ, ਅਤੀਤਾ ਵਾ ਸਙ੍ਖਾਰਾ ਹੋਨ੍ਤੁ ਅਨਾਗਤਾ ਵਾ ਪਚ੍ਚੁਪ੍ਪਨ੍ਨਾ ਵਾ ਕਾਮਾਵਚਰਾ ਵਾ ਰੂਪਾਵਚਰਾ ਵਾ ਅਰੂਪਾਵਚਰਾ ਵਾ, ਸਬ੍ਬੇਪਿ ਸਪ੍ਪਾਯਾਵ. ਅਸਪ੍ਪਾਯਕਮ੍ਮਟ੍ਠਾਨਂ ਨਾਮ ਨਤ੍ਥਿ. ਕਾਲੇਸੁਪਿ ਪੁਰੇਭਤ੍ਤਂ ਵਾ ਹੋਤੁ ਪਚ੍ਛਾਭਤ੍ਤਂ ਵਾ ਪਠਮਯਾਮਾਦਯੋ ਵਾ, ਅਸਪ੍ਪਾਯੋ ਕਾਲੋ ਨਾਮ ਨਤ੍ਥਿ. ਯਥਾ ਨਾਮ ਚਾਰਿਭੂਮਿਂ ਓਤਿਣ੍ਣੋ ਮਹਾਹਤ੍ਥੀ ਹਤ੍ਥੇਨ ਗਹੇਤਬ੍ਬਂ ਹਤ੍ਥੇਨੇਵ ਲੁਞ੍ਚਿਤ੍ਵਾ ਗਣ੍ਹਾਤਿ, ਪਾਦੇਹਿ ਪਹਰਿਤ੍ਵਾ ਗਹੇਤਬ੍ਬਂ ਪਾਦੇਹਿ ਪਹਰਿਤ੍ਵਾ ਗਣ੍ਹਾਤਿ, ਏਵਮੇਵ ਸਕਲੇ ਤੇਭੂਮਕਧਮ੍ਮੇ ਕਲਾਪਗ੍ਗਾਹੇਨ ਗਹੇਤ੍ਵਾ ਸਮ੍ਮਸਨ੍ਤੋ ਅਰਹਤ੍ਤਂ ਪਤ੍ਤੋ, ਤਸ੍ਮਾ ਏਸੋਪਿ ਅਤ੍ਤਨਾ ਅਧਿਗਤਮਗ੍ਗਮੇਵ ਕਥੇਸਿ. ਅਯਂ ਪਨ ‘‘ਇਮੇਸਂ ਅਞ੍ਞਮਞ੍ਞਂ ਨ ਸਮੇਤਿ. ਪਠਮੇਨ ਸਪ੍ਪਦੇਸਸਙ੍ਖਾਰੇਸੁ ਠਤ੍ਵਾ ਕਥਿਤਂ, ਦੁਤਿਯੇਨ ਨਿਪ੍ਪਦੇਸੇਸੁ, ਪੁਨ ਤਤਿਯੇਨ ਸਪ੍ਪਦੇਸੇਸੁ, ਚਤੁਤ੍ਥੇਨ ਨਿਪ੍ਪਦੇਸੇਸੁਯੇਵਾ’’ਤਿ ਅਸਨ੍ਤੁਟ੍ਠੋ ਹੁਤ੍ਵਾ ਤਂ ਪੁਚ੍ਛਿ – ‘‘ਕਿਂ ਨੁ ਖੋ, ਆਵੁਸੋ, ਇਦਂ ਦਸ੍ਸਨਵਿਸੁਦ੍ਧਿਕਂ ਨਿਬ੍ਬਾਨਂ ਤੁਮ੍ਹੇਹਿ ਅਤ੍ਤਨੋਵ ਧਮ੍ਮਤਾਯ ਞਾਤਂ, ਉਦਾਹੁ ਕੇਨਚਿ ਵੋ ਅਕ੍ਖਾਤ’’ਨ੍ਤਿ? ਆਵੁਸੋ, ਮਯਂ ਕਿਂ ਜਾਨਾਮ? ਅਤ੍ਥਿ ਪਨ ਸਦੇਵਕੇ ਲੋਕੇ ਸਮ੍ਮਾਸਮ੍ਬੁਦ੍ਧੋ, ਤਂ ਨਿਸ੍ਸਾਯੇਤਂ ਅਮ੍ਹੇਹਿ ਞਾਤਨ੍ਤਿ. ਸੋ ਚਿਨ੍ਤੇਸਿ – ‘‘ਇਮੇ ਭਿਕ੍ਖੂ ਮਯ੍ਹਂ ਅਜ੍ਝਾਸਯਂ ਗਹੇਤ੍ਵਾ ਕਥੇਤੁਂ ਨ ਸਕ੍ਕੋਨ੍ਤਿ, ਅਹਂ ਸਬ੍ਬਞ੍ਞੁਬੁਦ੍ਧਮੇਵ ਪੁਚ੍ਛਿਤ੍ਵਾ ਨਿਕ੍ਕਙ੍ਖੋ ਭਵਿਸ੍ਸਾਮੀ’’ਤਿ ਯੇਨ ਭਗਵਾ ਤੇਨੁਪਸਙ੍ਕਮਿ.

ਭਗਵਾ ਤਸ੍ਸ ਵਚਨਂ ਸੁਤ੍ਵਾ ‘‘ਯੇਹਿ ਤੇ ਪਞ੍ਹੋ ਕਥਿਤੋ, ਤੇ ਚਤ੍ਤਾਰੋਪਿ ਖੀਣਾਸਵਾ, ਸੁਕਥਿਤਂ ਤੇਹਿ, ਤ੍ਵਂ ਪਨ ਅਤ੍ਤਨੋ ਅਨ੍ਧਬਾਲਤਾਯ ਤਂ ਨ ਸਲ੍ਲਕ੍ਖੇਸੀ’’ਤਿ ਨ ਏਵਂ ਵਿਹੇਸੇਸਿ. ਕਾਰਕਭਾਵਂ ਪਨਸ੍ਸ ਞਤ੍ਵਾ ‘‘ਅਤ੍ਥਗਵੇਸਕੋ ਏਸ, ਧਮ੍ਮਦੇਸਨਾਯ ਏਵ ਨਂ ਬੁਜ੍ਝਾਪੇਸ੍ਸਾਮੀ’’ਤਿ ਕਿਂਸੁਕੋਪਮਂ ਆਹਰਿ. ਤਤ੍ਥ ਭੂਤਂ ਵਤ੍ਥੁਂ ਕਤ੍ਵਾ ਏਵਮਤ੍ਥੋ ਵਿਭਾਵੇਤਬ੍ਬੋ – ਏਕਸ੍ਮਿਂ ਕਿਰ ਮਹਾਨਗਰੇ ਏਕੋ ਸਬ੍ਬਗਨ੍ਥਧਰੋ ਬ੍ਰਾਹ੍ਮਣਵੇਜ੍ਜੋ ਪਣ੍ਡਿਤੋ ਪਟਿਵਸਤਿ. ਅਥੇਕੋ ਨਗਰਸ੍ਸ ਪਾਚੀਨਦ੍ਵਾਰਗਾਮਵਾਸੀ ਪਣ੍ਡੁਰੋਗਪੁਰਿਸੋ ਤਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ਤਂ ਵਨ੍ਦਿਤ੍ਵਾ ਅਟ੍ਠਾਸਿ. ਵੇਜ੍ਜਪਣ੍ਡਿਤੋ ਤੇਨ ਸਦ੍ਧਿਂ ਸਮ੍ਮੋਦਿਤ੍ਵਾ ‘‘ਕੇਨਤ੍ਥੇਨ ਆਗਤੋਸਿ ਭਦ੍ਰਮੁਖਾ’’ਤਿ, ਪੁਚ੍ਛਿ. ਰੋਗੇਨਮ੍ਹਿ, ਅਯ੍ਯ, ਉਪਦ੍ਦੁਤੋ, ਭੇਸਜ੍ਜਂ ਮੇ ਕਥੇਹੀਤਿ. ਤੇਨ ਹਿ, ਭੋ, ਗਚ੍ਛ, ਕਿਂਸੁਕਰੁਕ੍ਖਂ ਛਿਨ੍ਦਿਤ੍ਵਾ, ਸੋਸੇਤ੍ਵਾ ਝਾਪੇਤ੍ਵਾ, ਤਸ੍ਸ ਖਾਰੋਦਕਂ ਗਹੇਤ੍ਵਾ ਇਮਿਨਾ ਚਿਮਿਨਾ ਚ ਭੇਸਜ੍ਜੇਨ ਯੋਜੇਤ੍ਵਾ, ਅਰਿਟ੍ਠਂ ਕਤ੍ਵਾ ਪਿਵ, ਤੇਨ ਤੇ ਫਾਸੁਕਂ ਭਵਿਸ੍ਸਤੀਤਿ. ਸੋ ਤਥਾ ਕਤ੍ਵਾ ਨਿਰੋਗੋ ਬਲਵਾ ਪਾਸਾਦਿਕੋ ਜਾਤੋ.

ਅਥਞ੍ਞੋ ਦਕ੍ਖਿਣਦ੍ਵਾਰਗਾਮਵਾਸੀ ਪੁਰਿਸੋ ਤੇਨੇਵ ਰੋਗੇਨ ਆਤੁਰੋ ‘‘ਅਸੁਕੋ ਕਿਰ ਭੇਸਜ੍ਜਂ ਕਤ੍ਵਾ ਅਰੋਗੋ ਜਾਤੋ’’ਤਿ ਸੁਤ੍ਵਾ ਤਂ ਉਪਸਙ੍ਕਮਿਤ੍ਵਾ ਪੁਚ੍ਛਿ – ‘‘ਕੇਨ ਤੇ, ਸਮ੍ਮ, ਫਾਸੁਕਂ ਜਾਤ’’ਨ੍ਤਿ. ਕਿਂਸੁਕਾਰਿਟ੍ਠੇਨ ਨਾਮ, ਗਚ੍ਛ ਤ੍ਵਮ੍ਪਿ ਕਰੋਹੀਤਿ. ਸੋਪਿ ਤਥਾ ਕਤ੍ਵਾ ਤਾਦਿਸੋਵ ਜਾਤੋ.

ਅਥਞ੍ਞੋ ਪਚ੍ਛਿਮਦ੍ਵਾਰਗਾਮਵਾਸੀ…ਪੇ… ਉਤ੍ਤਰਦ੍ਵਾਰਗਾਮਵਾਸੀ ਪੁਰਿਸੋ ਤੇਨੇਵ ਰੋਗੇਨ ਆਤੁਰੋ ‘‘ਅਸੁਕੋ ਕਿਰ ਭੇਸਜ੍ਜਂ ਕਤ੍ਵਾ ਅਰੋਗੋ ਜਾਤੋ’’ਤਿ ਤਂ ਉਪਸਙ੍ਕਮਿਤ੍ਵਾ ਪੁਚ੍ਛਿ ‘‘ਕੇਨ ਤੇ, ਸਮ੍ਮ, ਫਾਸੁਕਂ ਜਾਤ’’ਨ੍ਤਿ? ਕਿਂਸੁਕਾਰਿਟ੍ਠੇਨ ਨਾਮ, ਗਚ੍ਛ ਤ੍ਵਮ੍ਪਿ ਕਰੋਹੀਤਿ. ਸੋਪਿ ਤਥਾ ਕਤ੍ਵਾ ਤਾਦਿਸੋਵ ਜਾਤੋ.

ਅਥਞ੍ਞੋ ਪਚ੍ਚਨ੍ਤਵਾਸੀ ਅਦਿਟ੍ਠਪੁਬ੍ਬਕਿਂਸੁਕੋ ਏਕੋ ਪੁਰਿਸੋ ਤੇਨੇਵ ਰੋਗੇਨ ਆਤੁਰੋ ਚਿਰਂ ਤਾਨਿ ਤਾਨਿ ਭੇਸਜ੍ਜਾਨਿ ਕਤ੍ਵਾ ਰੋਗੇ ਅਵੂਪਸਮਮਾਨੇ ‘‘ਅਸੁਕੋ ਕਿਰ ਨਗਰਸ੍ਸ ਪਾਚੀਨਦ੍ਵਾਰਗਾਮਵਾਸੀ ਪੁਰਿਸੋ ਭੇਸਜ੍ਜਂ ਕਤ੍ਵਾ ਅਰੋਗੋ ਜਾਤੋ’’ਤਿ ਸੁਤ੍ਵਾ ‘‘ਗਚ੍ਛਾਮਹਮ੍ਪਿ, ਤੇਨ ਕਤਭੇਸਜ੍ਜਂ ਕਰਿਸ੍ਸਾਮੀ’’ਤਿ ਦਣ੍ਡਮੋਲੁਬ੍ਭ ਅਨੁਪੁਬ੍ਬੇਨ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ, ‘‘ਕੇਨ ਤੇ, ਸਮ੍ਮ, ਫਾਸੁਕਂ ਜਾਤ’’ਨ੍ਤਿ ਪੁਚ੍ਛਿ. ਕਿਂਸੁਕਾਰਿਟ੍ਠੇਨ ਸਮ੍ਮਾਤਿ. ਕੀਦਿਸੋ ਪਨ ਸੋ ਕਿਂਸੁਕੋਤਿ. ਝਾਪਿਤਗਾਮੇ ਠਿਤਝਾਮਥੂਣੋ ਵਿਯਾਤਿ. ਇਤਿ ਸੋ ਪੁਰਿਸੋ ਅਤ੍ਤਨਾ ਦਿਟ੍ਠਾਕਾਰੇਨਵ ਕਿਂਸੁਕਂ ਆਚਿਕ੍ਖਿ. ਤੇਨ ਹਿ ਦਿਟ੍ਠਕਾਲੇ ਕਿਂਸੁਕੋ ਪਤਿਤਪਤ੍ਤੋ ਖਾਣੁਕਕਾਲੇ ਦਿਟ੍ਠਤ੍ਤਾ ਤਾਦਿਸੋਵ ਹੋਤਿ.

ਸੋ ਪਨ ਪੁਰਿਸੋ ਸੁਤਮਙ੍ਗਲਿਕਤ੍ਤਾ ‘‘ਅਯਂ ‘ਝਾਪਿਤਗਾਮੇ ਝਾਮਥੂਣੋ ਵਿਯਾ’ਤਿ ਆਹ, ਅਮਙ੍ਗਲਮੇਤਂ. ਏਤਸ੍ਮਿਞ੍ਹਿ ਮੇ ਭੇਸਜ੍ਜੇ ਕਤੇਪਿ ਰੋਗੋ ਨ ਵੂਪਸਮਿਸ੍ਸਤੀ’’ਤਿ ਤਸ੍ਸ ਵੇਯ੍ਯਾਕਰਣੇਨ ਅਸਨ੍ਤੁਟ੍ਠੋ ਤਂ ਪੁਚ੍ਛਿ – ‘‘ਕਿਂ ਨੁ ਖੋ, ਭੋ, ਤ੍ਵਞ੍ਞੇਵ ਕਿਂਸੁਕਂ ਜਾਨਾਸਿ, ਉਦਾਹੁ ਅਞ੍ਞੋਪਿ ਅਤ੍ਥੀ’’ਤਿ. ਅਤ੍ਥਿ, ਭੋ, ਦਕ੍ਖਿਣਦ੍ਵਾਰਗਾਮੇ ਅਸੁਕੋ ਨਾਮਾਤਿ. ਸੋ ਤਂ ਉਪਸਙ੍ਕਮਿਤ੍ਵਾ ਪੁਚ੍ਛਿ, ਸ੍ਵਾਸ੍ਸ ਪੁਪ੍ਫਿਤਕਾਲੇ ਦਿਟ੍ਠਤ੍ਤਾ ਅਤ੍ਤਨੋ ਦਸ੍ਸਨਾਨੁਰੂਪੇਨ ‘‘ਲੋਹਿਤਕੋ ਕਿਂਸੁਕੋ’’ਤਿ ਆਹ. ਸੋ ‘‘ਅਯਂ ਪੁਰਿਮੇਨ ਵਿਰੁਦ੍ਧਂ ਆਹ, ਕਾਲ਼ਕੋ ਲੋਹਿਤਕਤੋ ਸੁਵਿਦੂਰਦੂਰੇ’’ਤਿ ਤਸ੍ਸਪਿ ਵੇਯ੍ਯਾਕਰਣੇਨ ਅਸਨ੍ਤੁਟ੍ਠੋ ‘‘ਅਤ੍ਥਿ ਪਨ, ਭੋ, ਅਞ੍ਞੋਪਿ ਕੋਚਿ ਕਿਂਸੁਕਦਸ੍ਸਾਵੀ, ਯੇਨ ਕਿਂਸੁਕੋ ਦਿਟ੍ਠਪੁਬ੍ਬੋ’’ਤਿ? ਪੁਚ੍ਛਿਤ੍ਵਾ, ‘‘ਅਤ੍ਥਿ ਪਚ੍ਛਿਮਦ੍ਵਾਰਗਾਮੇ ਅਸੁਕੋ ਨਾਮਾ’’ਤਿ ਵੁਤ੍ਤੇ ਤਮ੍ਪਿ ਉਪਸਙ੍ਕਮਿਤ੍ਵਾ ਪੁਚ੍ਛਿ. ਸ੍ਵਾਸ੍ਸ ਫਲਿਤਕਾਲੇ ਦਿਟ੍ਠਤ੍ਤਾ ਅਤ੍ਤਨੋ ਦਸ੍ਸਨਾਨੁਰੂਪੇਨ ‘‘ਓਚਿਰਕਜਾਤੋ ਆਦਿਨ੍ਨਸਿਪਾਟਿਕੋ’’ਤਿ ਆਹ. ਫਲਿਤਕਾਲਸ੍ਮਿਞ੍ਹਿ ਕਿਂਸੁਕੋ ਓਲਮ੍ਬਮਾਨਚੀਰਕੋ ਵਿਯ ਅਧੋਮੁਖਂ ਕਤ੍ਵਾ ਗਹਿਤਅਸਿਕੋਸੋ ਵਿਯ ਚ ਸਿਰੀਸਰੁਕ੍ਖੋ ਵਿਯ ਚ ਲਮ੍ਬਮਾਨਫਲੋ ਹੋਤਿ. ਸੋ ‘‘ਅਯਂ ਪੁਰਿਮੇਹਿ ਵਿਰੁਦ੍ਧਂ ਆਹ, ਨ ਸਕ੍ਕਾ ਇਮਸ੍ਸ ਵਚਨਂ ਗਹੇਤੁ’’ਨ੍ਤਿ ਤਸ੍ਸਪਿ ਵੇਯ੍ਯਾਕਰਣੇਨ ਅਸਨ੍ਤੁਟ੍ਠੋ ‘‘ਅਤ੍ਥਿ ਪਨ, ਭੋ, ਅਞ੍ਞੋਪਿ ਕੋਚਿ ਕਿਂਸੁਕਦਸ੍ਸਾਵੀ, ਯੇਨ ਕਿਂਸੁਕੋ ਦਿਟ੍ਠਪੁਬ੍ਬੋ’’ਤਿ? ਪੁਚ੍ਛਿਤ੍ਵਾ, ‘‘ਅਤ੍ਥਿ ਉਤ੍ਤਰਦ੍ਵਾਰਗਾਮੇ ਅਸੁਕੋ ਨਾਮਾ’’ਤਿ ਵੁਤ੍ਤੇ ਤਮ੍ਪਿ ਉਪਸਙ੍ਕਮਿਤ੍ਵਾ ਪੁਚ੍ਛਿ. ਸੋ ਅਸ੍ਸ ਸਞ੍ਛਨ੍ਨਪਤ੍ਤਕਾਲੇ ਦਿਟ੍ਠਤ੍ਤਾ ਅਤ੍ਤਨੋ ਦਸ੍ਸਨਾਨੁਰੂਪੇਨ ‘‘ਬਹਲਪਤ੍ਤਪਲਾਸੋ ਸਨ੍ਦਚ੍ਛਾਯੋ’’ਤਿ ਆਹ. ਸਨ੍ਦਚ੍ਛਾਯੋ ਨਾਮ ਸਂਸਨ੍ਦਿਤ੍ਵਾ ਠਿਤਚ੍ਛਾਯੋ.

ਸੋ ‘‘ਅਯਮ੍ਪਿ ਪੁਰਿਮੇਹਿ ਵਿਰੁਦ੍ਧਂ ਆਹ, ਨ ਸਕ੍ਕਾ ਇਮਸ੍ਸ ਵਚਨਂ ਗਹੇਤੁ’’ਨ੍ਤਿ ਤਸ੍ਸਪਿ ਵੇਯ੍ਯਾਕਰਣੇਨ ਅਸਨ੍ਤੁਟ੍ਠੋ ਤਂ ਆਹ, ‘‘ਕਿਂ ਨੁ ਖੋ, ਭੋ, ਤੁਮ੍ਹੇ ਅਤ੍ਤਨੋਵ ਧਮ੍ਮਤਾਯ ਕਿਂਸੁਕਂ ਜਾਨਾਥ, ਉਦਾਹੁ ਕੇਨਚਿ ਵੋ ਅਕ੍ਖਾਤੋ’’ਤਿ? ਕਿਂ, ਭੋ, ਮਯਂ ਜਾਨਾਮ? ਅਤ੍ਥਿ ਪਨ ਮਹਾਨਗਰਸ੍ਸ ਮਜ੍ਝੇ ਅਮ੍ਹਾਕਂ ਆਚਰਿਯੋ ਵੇਜ੍ਜਪਣ੍ਡਿਤੋ, ਤਂ ਨਿਸ੍ਸਾਯ ਅਮ੍ਹੇਹਿ ਞਾਤਨ੍ਤਿ. ‘‘ਤੇਨ ਹਿ ਅਹਮ੍ਪਿ ਆਚਰਿਯਮੇਵ ਉਪਸਙ੍ਕਮਿਤ੍ਵਾ ਨਿਕ੍ਕਙ੍ਖੋ ਭਵਿਸ੍ਸਾਮੀ’’ਤਿ ਤਸ੍ਸ ਸਨ੍ਤਿਕਂ ਉਪਸਙ੍ਕਮਿਤ੍ਵਾ ਤਂ ਵਨ੍ਦਿਤ੍ਵਾ ਅਟ੍ਠਾਸਿ. ਵੇਜ੍ਜਪਣ੍ਡਿਤੋ ਤੇਨ ਸਦ੍ਧਿਂ ਸਮ੍ਮੋਦਿਤ੍ਵਾ, ‘‘ਕੇਨਤ੍ਥੇਨ ਆਗਤੋਸਿ ਭਦ੍ਰਮੁਖਾ’’ਤਿ ਪੁਚ੍ਛਿ. ਰੋਗੇਨਮ੍ਹਿ, ਅਯ੍ਯ, ਉਪਦ੍ਦੁਤੋ, ਭੇਸਜ੍ਜਂ ਮੇ ਕਥੇਥਾਤਿ. ਤੇਨ ਹਿ, ਭੋ, ਗਚ੍ਛ, ਕਿਂਸੁਕਰੁਕ੍ਖਂ ਛਿਨ੍ਦਿਤ੍ਵਾ ਸੋਸੇਤ੍ਵਾ ਝਾਪੇਤ੍ਵਾ ਤਸ੍ਸ ਖਾਰੋਦਕਂ ਗਹੇਤ੍ਵਾ ਇਮਿਨਾ ਚਿਮਿਨਾ ਚ ਭੇਸਜ੍ਜੇਨ ਯੋਜੇਤ੍ਵਾ ਅਰਿਟ੍ਠਂ ਕਤ੍ਵਾ ਪਿਵ, ਏਤੇਨ ਤੇ ਫਾਸੁਕਂ ਭਵਿਸ੍ਸਤੀਤਿ. ਸੋ ਤਥਾ ਕਤ੍ਵਾ ਨਿਰੋਗੋ ਬਲਵਾ ਪਾਸਾਦਿਕੋ ਜਾਤੋ.

ਤਤ੍ਥ ਮਹਾਨਗਰਂ ਵਿਯ ਨਿਬ੍ਬਾਨਨਗਰਂ ਦਟ੍ਠਬ੍ਬਂ. ਵੇਜ੍ਜਪਣ੍ਡਿਤੋ ਵਿਯ ਸਮ੍ਮਾਸਮ੍ਬੁਦ੍ਧੋ. ਵੁਤ੍ਤਮ੍ਪਿ ਚੇ ਤਂ ‘‘ਭਿਸਕ੍ਕੋ ਸਲ੍ਲਕਤ੍ਤੋਤਿ ਖੋ, ਸੁਨਕ੍ਖਤ੍ਤ, ਤਥਾਗਤਸ੍ਸੇਤਂ ਅਧਿਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸਾ’’ਤਿ (ਮ. ਨਿ. ੩.੬੫) ਚਤੂਸੁ ਦ੍ਵਾਰਗਾਮੇਸੁ ਚਤ੍ਤਾਰੋ ਵੇਜ੍ਜਨ੍ਤੇਵਾਸਿਕਾ ਵਿਯ ਚਤ੍ਤਾਰੋ ਦਸ੍ਸਨਵਿਸੁਦ੍ਧਿਪਤ੍ਤਾ ਖੀਣਾਸਵਾ. ਪਚ੍ਚਨ੍ਤਵਾਸੀ ਪਠਮਪੁਰਿਸੋ ਵਿਯ ਪਞ੍ਹਪੁਚ੍ਛਕੋ ਭਿਕ੍ਖੁ. ਪਚ੍ਚਨ੍ਤਵਾਸਿਨੋ ਚਤੁਨ੍ਨਂ ਵੇਜ੍ਜਨ੍ਤੇਵਾਸਿਕਾਨਂ ਕਥਾਯ ਅਸਨ੍ਤੁਟ੍ਠਸ੍ਸ ਆਚਰਿਯਮੇਵ ਉਪਸਙ੍ਕਮਿਤ੍ਵਾ ਪੁਚ੍ਛਨਕਾਲੋ ਵਿਯ ਇਮਸ੍ਸ ਭਿਕ੍ਖੁਨੋ ਚਤੁਨ੍ਨਂ ਦਸ੍ਸਨਵਿਸੁਦ੍ਧਿਪਤ੍ਤਾਨਂ ਖੀਣਾਸਵਾਨਂ ਕਥਾਯ ਅਸਨ੍ਤੁਟ੍ਠਸ੍ਸ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਪੁਚ੍ਛਨਕਾਲੋ.

ਯਥਾ ਯਥਾ ਅਧਿਮੁਤ੍ਤਾਨਨ੍ਤਿ ਯੇਨ ਯੇਨਾਕਾਰੇਨ ਅਧਿਮੁਤ੍ਤਾਨਂ. ਦਸ੍ਸਨਂ ਸੁਵਿਸੁਦ੍ਧਨ੍ਤਿ ਨਿਬ੍ਬਾਨਦਸ੍ਸਨਂ ਸੁਟ੍ਠੁ ਵਿਸੁਦ੍ਧਂ. ਤਥਾ ਤਥਾ ਖੋ ਤੇਹਿ ਸਪ੍ਪੁਰਿਸੇਹਿ ਬ੍ਯਾਕਤਨ੍ਤਿ ਤੇਨ ਤੇਨੇਵਾਕਾਰੇਨ ਤੁਯ੍ਹਂ ਤੇਹਿ ਸਪ੍ਪੁਰਿਸੇਹਿ ਕਥਿਤਂ. ਯਥਾ ਹਿ ‘‘ਕਾਲ਼ਕੋ ਕਿਂਸੁਕੋ’’ਤਿ ਕਥੇਨ੍ਤੋ ਨ ਅਞ੍ਞਂ ਕਥੇਸਿ, ਅਤ੍ਤਨਾ ਦਿਟ੍ਠਨਯੇਨ ਕਿਂਸੁਕਮੇਵ ਕਥੇਸਿ, ਏਵਮੇਵ ਛਫਸ੍ਸਾਯਤਨਾਨਂ ਵਸੇਨ ਦਸ੍ਸਨਵਿਸੁਦ੍ਧਿਪਤ੍ਤਖੀਣਾਸਵੋਪਿ ਇਮਂ ਪਞ੍ਹਂ ਕਥੇਨ੍ਤੋ ਨ ਅਞ੍ਞਂ ਕਥੇਸਿ, ਅਤ੍ਤਨਾ ਅਧਿਗਤਮਗ੍ਗੇਨ ਦਸ੍ਸਨਵਿਸੁਦ੍ਧਿਕਂ ਨਿਬ੍ਬਾਨਮੇਵ ਕਥੇਸਿ.

ਯਥਾ ਚ ‘‘ਲੋਹਿਤਕੋ ਓਚਿਰਕਜਾਤੋ ਬਹਲਪਤ੍ਤਪਲਾਸੋ ਕਿਂਸੁਕੋ’’ਤਿ ਕਥੇਨ੍ਤੋਪਿ ਨ ਅਞ੍ਞਂ ਕਥੇਸਿ, ਅਤ੍ਤਨਾ ਦਿਟ੍ਠਨਯੇਨ ਕਿਂਸੁਕਮੇਵ ਕਥੇਸਿ, ਏਵਮੇਵ ਪਞ੍ਚੁਪਾਦਾਨਕ੍ਖਨ੍ਧਵਸੇਨ ਚਤੁਮਹਾਭੂਤਵਸੇਨ ਤੇਭੂਮਕਧਮ੍ਮਵਸੇਨ ਦਸ੍ਸਨਵਿਸੁਦ੍ਧਿਪਤ੍ਤਖੀਣਾਸਵੋਪਿ ਇਮਂ ਪਞ੍ਹਂ ਕਥੇਨ੍ਤੋ ਨ ਅਞ੍ਞਂ ਕਥੇਸਿ, ਅਤ੍ਤਨਾ ਅਧਿਗਤਮਗ੍ਗੇਨ ਦਸ੍ਸਨਵਿਸੁਦ੍ਧਿਕਂ ਨਿਬ੍ਬਾਨਮੇਵ ਕਥੇਸਿ.

ਤਤ੍ਥ ਯਥਾ ਕਾਲ਼ਕਕਾਲੇ ਕਿਂਸੁਕਦਸ੍ਸਾਵਿਨੋਪਿ ਤਂ ਦਸ੍ਸਨਂ ਭੂਤਂ ਤਚ੍ਛਂ ਨ ਤੇਨ ਅਞ੍ਞਂ ਦਿਟ੍ਠਂ, ਕਿਂਸੁਕੋਵ ਦਿਟ੍ਠੋ, ਏਵਮੇਵ ਛਫਸ੍ਸਾਯਤਨਵਸੇਨ ਦਸ੍ਸਨਵਿਸੁਦ੍ਧਿਪਤ੍ਤਸ੍ਸਾਪਿ ਖੀਣਾਸਵਸ੍ਸ ਦਸ੍ਸਨਂ ਭੂਤਂ ਤਚ੍ਛਂ, ਨ ਤੇਨ ਅਞ੍ਞਂ ਕਥਿਤਂ, ਅਤ੍ਤਨਾ ਅਧਿਗਤਮਗ੍ਗੇਨ ਦਸ੍ਸਨਵਿਸੁਦ੍ਧਿਕਂ ਨਿਬ੍ਬਾਨਮੇਵ ਕਥਿਤਂ. ਯਥਾ ਚ ਲੋਹਿਤਕਾਲੇ ਓਚਿਰਕਜਾਤਕਾਲੇ ਬਹਲਪਤ੍ਤਪਲਾਸਕਾਲੇ ਕਿਂਸੁਕਦਸ੍ਸਾਵਿਨੋਪਿ ਤਂ ਦਸ੍ਸਨਂ ਭੂਤਂ ਤਚ੍ਛਂ, ਨ ਤੇਨ ਅਞ੍ਞਂ ਦਿਟ੍ਠਂ, ਕਿਂਸੁਕੋਵ ਦਿਟ੍ਠੋ, ਏਵਮੇਵ ਪਞ੍ਚੁਪਾਦਾਨਕ੍ਖਨ੍ਧਵਸੇਨ ਚਤੁਮਹਾਭੂਤਵਸੇਨ ਤੇਭੂਮਕਧਮ੍ਮਵਸੇਨ ਦਸ੍ਸਨਵਿਸੁਦ੍ਧਿਪਤ੍ਤਸ੍ਸਾਪਿ ਖੀਣਾਸਵਸ੍ਸ ਦਸ੍ਸਨਂ ਭੂਤਂ ਤਚ੍ਛਂ, ਨ ਤੇਨ ਅਞ੍ਞਂ ਕਥਿਤਂ, ਅਤ੍ਤਨਾ ਅਧਿਗਤਮਗ੍ਗੇਨ ਦਸ੍ਸਨਵਿਸੁਦ੍ਧਿਕਂ ਨਿਬ੍ਬਾਨਮੇਵ ਕਥਿਤਂ.

ਸੇਯ੍ਯਥਾਪਿ, ਭਿਕ੍ਖੁ ਰਞ੍ਞੋ ਪਚ੍ਚਨ੍ਤਿਮਂ ਨਗਰਨ੍ਤਿ ਇਦਂ ਕਸ੍ਮਾ ਆਰਦ੍ਧਂ? ਸਚੇ ਤੇਨ ਭਿਕ੍ਖੁਨਾ ਤਂ ਸਲ੍ਲਕ੍ਖਿਤਂ, ਅਥਸ੍ਸ ਧਮ੍ਮਦੇਸਨਤ੍ਥਂ ਆਰਦ੍ਧਂ. ਸਚੇ ਨ ਸਲ੍ਲਕ੍ਖਿਤਂ, ਅਥਸ੍ਸ ਇਮਿਨਾ ਨਗਰੋਪਮੇਨ ਤਸ੍ਸੇਵਤ੍ਥਸ੍ਸ ਦੀਪਨਤ੍ਥਾਯ ਆਵਿਭਾਵਨਤ੍ਥਾਯ ਆਰਦ੍ਧਂ. ਤਤ੍ਥ ਯਸ੍ਮਾ ਮਜ੍ਝਿਮਪਦੇਸੇ ਨਗਰਸ੍ਸ ਪਾਕਾਰਾਦੀਨਿ ਥਿਰਾਨਿ ਵਾ ਹੋਨ੍ਤੁ ਦੁਬ੍ਬਲਾਨਿ ਵਾ, ਸਬ੍ਬਸੋ ਵਾ ਮਾ ਹੋਨ੍ਤੁ, ਚੋਰਾਸਙ੍ਕਾ ਨ ਹੋਨ੍ਤਿ, ਤਸ੍ਮਾ ਤਂ ਅਗ੍ਗਹੇਤ੍ਵਾ ‘‘ਪਚ੍ਚਨ੍ਤਿਮਂ ਨਗਰ’’ਨ੍ਤਿ ਆਹ. ਦਲ਼੍ਹੁਦ੍ਧਾਪਨ੍ਤਿ ਥਿਰਪਾਕਾਰਂ. ਦਲ਼੍ਹਪਾਕਾਰਤੋਰਣਨ੍ਤਿ ਥਿਰਪਾਕਾਰਞ੍ਚੇਵ ਥਿਰਤੋਰਣਞ੍ਚ. ਤੋਰਣਾਨਿ ਨਾਮ ਹਿ ਪੁਰਿਸੁਬ੍ਬੇਧਾਨਿ ਨਗਰਸ੍ਸ ਅਲਙ੍ਕਾਰਤ੍ਥਂ ਕਰੀਯਨ੍ਤਿ, ਚੋਰਨਿਵਾਰਣਤ੍ਥਾਨਿਪਿ ਹੋਨ੍ਤਿਯੇਵ. ਅਥ ਵਾ ਤੋਰਣਨ੍ਤਿ ਪਿਟ੍ਠਸਙ੍ਘਾਟਸ੍ਸੇਤਂ ਨਾਮਂ, ਥਿਰਪਿਟ੍ਠਸਙ੍ਘਾਟਨ੍ਤਿਪਿ ਅਤ੍ਥੋ. ਛਦ੍ਵਾਰਨ੍ਤਿ ਨਗਰਦ੍ਵਾਰਂ ਨਾਮ ਏਕਮ੍ਪਿ ਹੋਤਿ ਦ੍ਵੇਪਿ ਸਤਮ੍ਪਿ ਸਹਸ੍ਸਮ੍ਪਿ, ਇਧ ਪਨ ਸਤ੍ਥਾ ਛਦ੍ਵਾਰਿਕਨਗਰਂ ਦਸ੍ਸੇਨ੍ਤੋ ਏਵਮਾਹ. ਪਣ੍ਡਿਤੋਤਿ ਪਣ੍ਡਿਚ੍ਚੇਨ ਸਮਨ੍ਨਾਗਤੋ. ਬ੍ਯਤ੍ਤੋਤਿ ਵੇਯ੍ਯਤ੍ਤਿਯੇਨ ਸਮਨ੍ਨਾਗਤੋ ਵਿਸਦਞਾਣੋ. ਮੇਧਾਵੀਤਿ ਠਾਨੁਪ੍ਪਤ੍ਤਿਕਪਞ੍ਞਾਸਙ੍ਖਾਤਾਯ ਮੇਧਾਯ ਸਮਨ੍ਨਾਗਤੋ.

ਪੁਰਤ੍ਥਿਮਾਯ ਦਿਸਾਯਾਤਿਆਦਿਮ੍ਹਿ ਭੂਤਮਤ੍ਥਂ ਕਤ੍ਵਾ ਏਵਮਤ੍ਥੋ ਵੇਦਿਤਬ੍ਬੋ – ਸਮਿਦ੍ਧੇ ਕਿਰ ਮਹਾਨਗਰੇ ਸਤ੍ਤਰਤਨਸਮ੍ਪਨ੍ਨੋ ਰਾਜਾ ਚਕ੍ਕਵਤ੍ਤਿ ਰਜ੍ਜਂ ਅਨੁਸਾਸਤਿ, ਤਸ੍ਸੇਤਂ ਪਚ੍ਚਨ੍ਤਨਗਰਂ ਰਾਜਾਯੁਤ੍ਤਵਿਰਹਿਤਂ, ਅਥ ਪੁਰਿਸਾ ਆਗਨ੍ਤ੍ਵਾ ‘‘ਅਮ੍ਹਾਕਂ, ਦੇਵ, ਨਗਰੇ ਆਯੁਤ੍ਤਕੋ ਨਤ੍ਥਿ, ਦੇਹਿ ਨੋ ਕਿਞ੍ਚਿ ਆਯੁਤ੍ਤਕ’’ਨ੍ਤਿ ਆਹਂਸੁ. ਰਾਜਾ ਏਕਂ ਪੁਤ੍ਤਂ ਦਤ੍ਵਾ ‘‘ਗਚ੍ਛਥ, ਏਤਂ ਆਦਾਯ ਤਤ੍ਥ ਅਭਿਸਿਞ੍ਚਿਤ੍ਵਾ ਵਿਨਿਚ੍ਛਯਟ੍ਠਾਨਾਦੀਨਿ ਕਤ੍ਵਾ ਵਸਥਾ’’ਤਿ. ਤੇ ਤਥਾ ਅਕਂਸੁ. ਰਾਜਪੁਤ੍ਤੋ ਪਾਪਮਿਤ੍ਤਸਂਸਗ੍ਗੇਨ ਕਤਿਪਾਹੇਯੇਵ ਸੁਰਾਸੋਣ੍ਡੋ ਹੁਤ੍ਵਾ, ਸਬ੍ਬਾਨਿ ਵਿਨਿਚ੍ਛਯਟ੍ਠਾਨਾਦੀਨਿ ਹਾਰੇਤ੍ਵਾ, ਨਗਰਮਜ੍ਝੇ ਧੁਤ੍ਤੇਹਿ ਪਰਿਵਾਰਿਤੋ ਸੁਰਂ ਪਿਵਨ੍ਤੋ ਨਚ੍ਚਗੀਤਾਦਿਰਤਿਯਾ ਵੀਤਿਨਾਮੇਤਿ. ਅਥ ਰਞ੍ਞੋ ਆਗਨ੍ਤ੍ਵਾ ਆਰੋਚਯਿਂਸੁ.

ਰਾਜਾ ਏਕਂ ਪਣ੍ਡਿਤਂ ਅਮਚ੍ਚਂ ਆਣਾਪੇਸਿ – ‘‘ਗਚ੍ਛ ਕੁਮਾਰਂ ਓਵਦਿਤ੍ਵਾ, ਵਿਨਿਚ੍ਛਯਟ੍ਠਾਨਾਦੀਨਿ ਕਾਰੇਤ੍ਵਾ, ਪੁਨ ਅਭਿਸੇਕਂ ਕਤ੍ਵਾ, ਏਹੀ’’ਤਿ. ਨ ਸਕ੍ਕਾ, ਦੇਵ, ਕੁਮਾਰਂ ਓਵਦਿਤੁਂ, ਚਣ੍ਡੋ ਕੁਮਾਰੋ ਘਾਤੇਯ੍ਯਾਪਿ ਮਨ੍ਤਿ. ਅਥੇਕਂ ਬਲਸਮ੍ਪਨ੍ਨਂ ਯੋਧਂ ਆਣਾਪੇਸਿ – ‘‘ਤ੍ਵਂ ਇਮਿਨਾ ਸਦ੍ਧਿਂ ਗਨ੍ਤ੍ਵਾ ਸਚੇ ਸੋ ਓਵਾਦੇ ਨ ਤਿਟ੍ਠਤਿ, ਸੀਸਮਸ੍ਸ ਛਿਨ੍ਦਾਹੀ’’ਤਿ. ਇਤਿ ਸੋ ਅਮਚ੍ਚੋ ਯੋਧੋ ਚਾਤਿ ਇਦਂ ਸੀਘਂ ਦੂਤਯੁਗਂ ਤਤ੍ਥ ਗਨ੍ਤ੍ਵਾ ਦੋਵਾਰਿਕਂ ਪੁਚ੍ਛਿ – ‘‘ਕਹਂ, ਭੋ, ਨਗਰਸ੍ਸ ਸਾਮਿ ਕੁਮਾਰੋ’’ਤਿ. ਏਸ ਮਜ੍ਝੇਸਿਙ੍ਘਾਟਕੇ ਸੁਰਂ ਪਿਵਨ੍ਤੋ ਧੁਤ੍ਤਪਰਿਵਾਰਿਤੋ ਗੀਤਾਦਿਰਤਿਂ ਅਨੁਭੋਨ੍ਤੋ ਨਿਸਿਨ੍ਨੋਤਿ. ਅਥ ਤਂ ਦੂਤਯੁਗਂ ਗਨ੍ਤ੍ਵਾ ਅਮਚ੍ਚੋ ਤਾਵੇਤ੍ਥ, ‘‘ਸਾਮਿ, ਵਿਨਿਚ੍ਛਯਟ੍ਠਾਨਾਦੀਨਿ ਕਿਰ ਕਾਰੇਤ੍ਵਾ ਸਾਧੁਕਂ ਰਜ੍ਜਂ ਅਨੁਸਾਸਾ’’ਤਿ ਆਹ. ਕੁਮਾਰੋ ਅਸੁਣਨ੍ਤੋ ਵਿਯ ਨਿਸੀਦਿ. ਅਥ ਨਂ ਯੋਧੋ ਸੀਸੇ ਗਹੇਤ੍ਵਾ, ‘‘ਸਚੇ ਰਞ੍ਞੋ ਆਣਂ ਕਰੋਸਿ, ਕਰ, ਨੋ ਚੇ, ਏਤ੍ਥੇਵ ਤੇ ਸੀਸਂ ਪਾਤੇਸ੍ਸਾਮੀ’’ਤਿ ਖਗ੍ਗਂ ਅਬ੍ਬਾਹਿ. ਪਰਿਚਾਰਕਾ ਧੁਤ੍ਤਾ ਤਾਵਦੇਵ ਦਿਸਾਸੁ ਪਲਾਯਿਂਸੁ. ਕੁਮਾਰੋ ਭੀਤੋ ਸਾਸਨਂ ਸਮ੍ਪਟਿਚ੍ਛਿ. ਅਥਸ੍ਸ ਤੇ ਤਤ੍ਥੇਵ ਅਭਿਸੇਕਂ ਕਤ੍ਵਾ ਸੇਤਚ੍ਛਤ੍ਤਂ ਉਸ੍ਸਾਪੇਤ੍ਵਾ ‘‘ਸਮ੍ਮਾ ਰਜ੍ਜਂ ਅਨੁਸਾਸਾਹੀ’’ਤਿ ਰਞ੍ਞਾ ਵੁਤ੍ਤਂ ਯਥਾਭੂਤਵਚਨਂ ਨਿਯ੍ਯਾਤੇਤ੍ਵਾ ਯਥਾਗਤਮਗ੍ਗਮੇਵ ਪਟਿਪਜ੍ਜਿਂਸੁ. ਇਮਮਤ੍ਥਂ ਆਵਿਕਰੋਨ੍ਤੋ ਭਗਵਾ ‘‘ਪੁਰਤ੍ਥਿਮਾਯ ਦਿਸਾਯਾ’’ਤਿ ਆਹ.

ਤਤ੍ਰਿਦਂ ਓਪਮ੍ਮਸਂਸਨ੍ਦਨਂ – ਸਮਿਦ੍ਧਮਹਾਨਗਰਂ ਵਿਯ ਹਿ ਨਿਬ੍ਬਾਨਨਗਰਂ ਦਟ੍ਠਬ੍ਬਂ, ਸਤ੍ਤਰਤਨਸਮਨ੍ਨਾਗਤੋ ਰਾਜਾ ਚਕ੍ਕਵਤ੍ਤਿ ਵਿਯ ਸਤ੍ਤਬੋਜ੍ਝਙ੍ਗਰਤਨਸਮਨ੍ਨਾਗਤੋ ਧਮ੍ਮਰਾਜਾ ਸਮ੍ਮਾਸਮ੍ਬੁਦ੍ਧੋ, ਪਚ੍ਚਨ੍ਤਿਮਨਗਰਂ ਵਿਯ ਸਕ੍ਕਾਯਨਗਰਂ, ਤਸ੍ਮਿਂ ਨਗਰੇ ਕੂਟਰਾਜਪੁਤ੍ਤੋ ਵਿਯ ਇਮਸ੍ਸ ਭਿਕ੍ਖੁਨੋ ਕੂਟਚਿਤ੍ਤੁਪ੍ਪਾਦੋ, ਕੂਟਰਾਜਪੁਤ੍ਤਸ੍ਸ ਧੁਤ੍ਤੇਹਿ ਪਰਿਵਾਰਿਤਕਾਲੋ ਵਿਯ ਇਮਸ੍ਸ ਭਿਕ੍ਖੁਨੋ ਪਞ੍ਚਹਿ ਨੀਵਰਣੇਹਿ ਸਮਙ੍ਗਿਕਾਲੋ, ਦ੍ਵੇ ਸੀਘਦੂਤਾ ਵਿਯ ਸਮਥਕਮ੍ਮਟ੍ਠਾਨਞ੍ਚ ਵਿਪਸ੍ਸਨਾਕਮ੍ਮਟ੍ਠਾਨਞ੍ਚ, ਮਹਾਯੋਧੇਨ ਸੀਸੇ ਗਹਿਤਕਾਲੋ ਵਿਯ ਉਪ੍ਪਨ੍ਨਪਠਮਜ੍ਝਾਨਸਮਾਧਿਨਾ ਨਿਚ੍ਚਲਂ ਕਤ੍ਵਾ ਚਿਤ੍ਤਗ੍ਗਹਿਤਕਾਲੋ, ਯੋਧੇਨ ਸੀਸੇ ਗਹਿਤਮਤ੍ਤੇ ਧੁਤ੍ਤਾਨਂ ਦਿਸਾਸੁ ਪਲਾਯਿਤ੍ਵਾ ਦੂਰੀਭਾਵੋ ਵਿਯ ਪਠਮਜ੍ਝਾਨਮ੍ਹਿ ਉਪ੍ਪਨ੍ਨਮਤ੍ਤੇ ਨੀਵਰਣਾਨਂ ਦੂਰੀਭਾਵੋ, ‘‘ਕਰਿਸ੍ਸਾਮਿ ਰਞ੍ਞੋ ਸਾਸਨ’’ਨ੍ਤਿ ਸਮ੍ਪਟਿਚ੍ਛਿਤਮਤ੍ਤੇ ਵਿਸ੍ਸਟ੍ਠਕਾਲੋ ਵਿਯ ਝਾਨਤੋ ਵੁਟ੍ਠਿਤਕਾਲੋ, ਅਮਚ੍ਚੇਨ ਰਞ੍ਞੋ ਸਾਸਨਂ ਆਰੋਚਿਤਕਾਲੋ ਵਿਯ ਸਮਾਧਿਨਾ ਚਿਤ੍ਤਂ ਕਮ੍ਮਨਿਯਂ ਕਤ੍ਵਾ ਵਿਪਸ੍ਸਨਾਕਮ੍ਮਟ੍ਠਾਨਸ੍ਸ ਵਡ੍ਢਿਤਕਾਲੋ, ਤਤ੍ਥੇਵਸ੍ਸ ਤੇਹਿ ਦ੍ਵੀਹਿ ਦੂਤੇਹਿ ਕਤਾਭਿਸੇਕਸ੍ਸ ਸੇਤਚ੍ਛਤ੍ਤਉਸ੍ਸਾਪਨਂ ਵਿਯ ਸਮਥਵਿਪਸ੍ਸਨਾਕਮ੍ਮਟ੍ਠਾਨਂ ਨਿਸ੍ਸਾਯ ਅਰਹਤ੍ਤਪ੍ਪਤ੍ਤਸ੍ਸ ਵਿਮੁਤ੍ਤਿਸੇਤਚ੍ਛਤ੍ਤੁਸ੍ਸਾਪਨਂ ਵੇਦਿਤਬ੍ਬਂ.

ਨਗਰਨ੍ਤਿ ਖੋ ਭਿਕ੍ਖੁ ਇਮਸ੍ਸੇਤਂ ਚਾਤੁਮਹਾਭੂਤਿਕਸ੍ਸ ਕਾਯਸ੍ਸ ਅਧਿਵਚਨਨ੍ਤਿਆਦੀਸੁ ਪਨ ਚਾਤੁਮਹਾਭੂਤਿਕਸ੍ਸਾਤਿਆਦੀਨਂ ਪਦਾਨਂ ਅਤ੍ਥੋ ਹੇਟ੍ਠਾ ਵਿਤ੍ਥਾਰਿਤੋਵ. ਕੇਵਲਂ ਪਨ ਵਿਞ੍ਞਾਣਰਾਜਪੁਤ੍ਤਸ੍ਸ ਨਿਵਾਸਟ੍ਠਾਨਤ੍ਤਾ ਏਤ੍ਥ ਕਾਯੋ ‘‘ਨਗਰ’’ਨ੍ਤਿ ਵੁਤ੍ਤੋ, ਤਸ੍ਸੇਵ ਦ੍ਵਾਰਭੂਤਤ੍ਤਾ ਛ ਆਯਤਨਾਨਿ ‘‘ਦ੍ਵਾਰਾਨੀ’’ਤਿ, ਤੇਸੁ ਦ੍ਵਾਰੇਸੁ ਨਿਚ੍ਚਂ ਸੁਪ੍ਪਤਿਟ੍ਠਿਤਤ੍ਤਾ ਸਤਿ ‘‘ਦੋਵਾਰਿਕੋ’’ਤਿ, ਕਮ੍ਮਟ੍ਠਾਨਂ ਆਚਿਕ੍ਖਨ੍ਤੇਨ ਧਮ੍ਮਰਾਜੇਨ ਪੇਸਿਤਤ੍ਤਾ ਸਮਥਵਿਪਸ੍ਸਨਾ ‘‘ਸੀਘਂ ਦੂਤਯੁਗ’’ਨ੍ਤਿ. ਏਤ੍ਥ ਮਹਾਯੋਧੋ ਵਿਯ ਸਮਥੋ, ਪਣ੍ਡਿਤਾਮਚ੍ਚੋ ਵਿਯ ਵਿਪਸ੍ਸਨਾ ਵੇਦਿਤਬ੍ਬਾ.

ਮਜ੍ਝੇ ਸਿਙ੍ਘਾਟਕੋਤਿ ਨਗਰਮਜ੍ਝੇ ਸਿਙ੍ਘਾਟਕੋ. ਮਹਾਭੂਤਾਨਨ੍ਤਿ ਹਦਯਵਤ੍ਥੁਸ੍ਸ ਨਿਸ੍ਸਯਭੂਤਾਨਂ ਮਹਾਭੂਤਾਨਂ. ਵਤ੍ਥੁਰੂਪਸ੍ਸ ਹਿ ਪਚ੍ਚਯਦਸ੍ਸਨਤ੍ਥਮੇਵੇਤਂ ਚਤੁਮਹਾਭੂਤਗ੍ਗਹਣਂ ਕਤਂ. ਨਗਰਮਜ੍ਝੇ ਪਨ ਸੋ ਰਾਜਕੁਮਾਰੋ ਵਿਯ ਸਰੀਰਮਜ੍ਝੇ ਹਦਯਰੂਪਸਿਙ੍ਘਾਟਕੇ ਨਿਸਿਨ੍ਨੋ ਸਮਥਵਿਪਸ੍ਸਨਾਦੂਤੇਹਿ ਅਰਹਤ੍ਤਾਭਿਸੇਕੇਨ ਅਭਿਸਿਞ੍ਚਿਤਬ੍ਬੋ ਵਿਪਸ੍ਸਨਾਵਿਞ੍ਞਾਣਰਾਜਪੁਤ੍ਤੋ ਦਟ੍ਠਬ੍ਬੋ. ਨਿਬ੍ਬਾਨਂ ਪਨ ਯਥਾਭੂਤਸਭਾਵਂ ਅਕੁਪ੍ਪਂ ਅਧਿਕਾਰੀਤਿ ਕਤ੍ਵਾ ਯਥਾਭੂਤਂ ਵਚਨਨ੍ਤਿ ਵੁਤ੍ਤਂ. ਅਰਿਯਮਗ੍ਗੋ ਪਨ ਯਾਦਿਸੋਵ ਪੁਬ੍ਬਭਾਗਵਿਪਸ੍ਸਨਾਮਗ੍ਗੋ, ਅਯਮ੍ਪਿ ਅਟ੍ਠਙ੍ਗਸਮਨ੍ਨਾਗਤਤ੍ਤਾ ਤਾਦਿਸੋਯੇਵਾਤਿ ਕਤ੍ਵਾ ਯਥਾਗਤਮਗ੍ਗੋਤਿ ਵੁਤ੍ਤੋ. ਇਦਂ ਤਾਵੇਤ੍ਥ ਧਮ੍ਮਦੇਸਨਤ੍ਥਂ ਆਭਤਾਯ ਉਪਮਾਯ ਸਂਸਨ੍ਦਨਂ.

ਤਸ੍ਸੇਵਤ੍ਥਸ੍ਸ ਪਾਕਟੀਕਰਣਤ੍ਥਂ ਆਭਤਪਕ੍ਖੇ ਪਨ ਇਦਂ ਸਂਸਨ੍ਦਨਂ – ਏਤ੍ਥ ਹਿ ਛਦ੍ਵਾਰੂਪਮਾ ਛਫਸ੍ਸਾਯਤਨਵਸੇਨ ਦਸ੍ਸਨਵਿਸੁਦ੍ਧਿਪਤ੍ਤਂ ਖੀਣਾਸਵਂ ਦਸ੍ਸੇਤੁਂ ਆਭਤਾ, ਨਗਰਸਾਮਿਉਪਮਾ ਪਞ੍ਚਕ੍ਖਨ੍ਧਵਸੇਨ, ਸਿਙ੍ਘਾਟਕੂਪਮਾ ਚਤੁਮਹਾਭੂਤਵਸੇਨ, ਨਗਰੂਪਮਾ ਤੇਭੂਮਕਧਮ੍ਮਵਸੇਨ ਦਸ੍ਸਨਵਿਸੁਦ੍ਧਿਪਤ੍ਤਂ ਖੀਣਾਸਵਂ ਦਸ੍ਸੇਤੁਂ ਆਭਤਾ. ਸਙ੍ਖੇਪਤੋ ਪਨਿਮਸ੍ਮਿਂ ਸੁਤ੍ਤੇ ਚਤੁਸਚ੍ਚਮੇਵ ਕਥਿਤਂ. ਸਕਲੇਨਪਿ ਹਿ ਨਗਰਸਮ੍ਭਾਰੇਨ ਦੁਕ੍ਖਸਚ੍ਚਮੇਵ ਕਥਿਤਂ, ਯਥਾਭੂਤਵਚਨੇਨ ਨਿਰੋਧਸਚ੍ਚਂ, ਯਥਾਗਤਮਗ੍ਗੇਨ ਮਗ੍ਗਸਚ੍ਚਂ, ਦੁਕ੍ਖਸ੍ਸ ਪਨ ਪਭਾਵਿਕਾ ਤਣ੍ਹਾ ਸਮੁਦਯਸਚ੍ਚਂ. ਦੇਸਨਾਪਰਿਯੋਸਾਨੇ ਪਞ੍ਹਪੁਚ੍ਛਕੋ ਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਿਤੋਤਿ.