੩. ਕੁਮ੍ਮੋਪਮਸੁਤ੍ਤਵਣ੍ਣਨਾ

੨੪੦. ਤਤਿਯੇ ਕੁਮ੍ਮੋਤਿ ਅਟ੍ਠਿਕੁਮ੍ਮੋ. ਕਚ੍ਛਪੋਤਿ ਤਸ੍ਸੇਵ ਵੇਵਚਨਂ. ਅਨੁਨਦੀਤੀਰੇਤਿ ਨਦਿਯਾ ਅਨੁਤੀਰੇ. ਗੋਚਰਪਸੁਤੋਤਿ ‘‘ਸਚੇ ਕਿਞ੍ਚਿ ਫਲਾਫਲਂ ਲਭਿਸ੍ਸਾਮਿ, ਖਾਦਿਸ੍ਸਾਮੀ’’ਤਿ ਗੋਚਰਤ੍ਥਾਯ ਪਸੁਤੋ ਉਸ੍ਸੁਕ੍ਕੋ ਤਨ੍ਨਿਬਨ੍ਧੋ. ਸਮੋਦਹਿਤ੍ਵਾਤਿ ਸਮੁਗ੍ਗੇ ਵਿਯ ਪਕ੍ਖਿਪਿਤ੍ਵਾ. ਸਙ੍ਕਸਾਯਤੀਤਿ ਅਚ੍ਛਤਿ. ਸਮੋਦਹਨ੍ਤਿ ਸਮੋਦਹਨ੍ਤੋ ਠਪੇਨ੍ਤੋ. ਇਦਂ ਵੁਤ੍ਤਂ ਹੋਤਿ – ਯਥਾ ਕੁਮ੍ਮੋ ਅਙ੍ਗਾਨਿ ਸਕੇ ਕਪਾਲੇ ਸਮੋਦਹਨ੍ਤੋ ਸਿਙ੍ਗਾਲਸ੍ਸ ਓਤਾਰਂ ਨ ਦੇਤਿ, ਨ ਚ ਨਂ ਸਿਙ੍ਗਾਲੋ ਪਸਹਤਿ, ਏਵਂ ਭਿਕ੍ਖੁ ਅਤ੍ਤਨੋ ਮਨੋਵਿਤਕ੍ਕੇ ਸਕੇ ਆਰਮ੍ਮਣਕਪਾਲੇ ਸਮੋਦਹਨ੍ਤੋ ਕਿਲੇਸਮਾਰਸ੍ਸ ਓਤਾਰਂ ਨ ਦੇਤਿ, ਨ ਚ ਨਂ ਮਾਰੋ ਪਸਹਤਿ.

ਅਨਿਸ੍ਸਿਤੋਤਿ ਤਣ੍ਹਾਦਿਟ੍ਠਿਨਿਸ੍ਸਯੇਹਿ ਅਨਿਸ੍ਸਿਤੋ. ਅਞ੍ਞਮਹੇਠਯਾਨੋਤਿ ਅਞ੍ਞਂ ਕਞ੍ਚਿ ਪੁਗ੍ਗਲਂ ਅਵਿਹੇਠੇਨ੍ਤੋ. ਪਰਿਨਿਬ੍ਬੁਤੋਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ. ਨੂਪਵਦੇਯ੍ਯ ਕਞ੍ਚੀਤਿ ਅਞ੍ਞਂ ਕਞ੍ਚਿ ਪੁਗ੍ਗਲਂ ਸੀਲਵਿਪਤ੍ਤਿਯਾ ਵਾ ਆਚਾਰਵਿਪਤ੍ਤਿਯਾ ਵਾ ਅਤ੍ਤਾਨਂ ਉਕ੍ਕਂਸੇਤੁਕਾਮਤਾਯ ਵਾ ਪਰਂ ਵਮ੍ਭੇਤੁਕਾਮਤਾਯ ਵਾ ਨ ਉਪਵਦੇਯ੍ਯ, ਅਞ੍ਞਦਤ੍ਥੁ ਪਞ੍ਚ ਧਮ੍ਮੇ ਅਜ੍ਝਤ੍ਤਂ ਉਪਟ੍ਠਪੇਤ੍ਵਾ, ‘‘ਕਾਲੇਨ ਵਕ੍ਖਾਮਿ, ਨੋ ਅਕਾਲੇਨ, ਭੂਤੇਨ ਵਕ੍ਖਾਮਿ, ਨੋ ਅਭੂਤੇਨ, ਸਣ੍ਹੇਨ ਵਕ੍ਖਾਮਿ, ਨੋ ਫਰੁਸੇਨ, ਅਤ੍ਥਸਂਹਿਤੇਨ ਵਕ੍ਖਾਮਿ, ਨੋ ਅਨਤ੍ਥਸਂਹਿਤੇਨ, ਮੇਤ੍ਤਚਿਤ੍ਤੋ ਵਕ੍ਖਾਮਿ, ਨੋ ਦੋਸਨ੍ਤਰੋ’’ਤਿ ਏਵਂ ਉਲ੍ਲੁਮ੍ਪਨਸਭਾਵਸਣ੍ਠਿਤੇਨੇਵ ਚਿਤ੍ਤੇਨ ਵਿਹਰਤਿ.