੪. ਪਠਮਦਾਰੁਕ੍ਖਨ੍ਧੋਪਮਸੁਤ੍ਤਵਣ੍ਣਨਾ
੨੪੧. ਚਤੁਤ੍ਥੇ ਅਦ੍ਦਸਾਤਿ ਗਙ੍ਗਾਤੀਰੇ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਿਨ੍ਨੋ ਅਦ੍ਦਸ. ਵੁਯ੍ਹਮਾਨਨ੍ਤਿ ਚਤੁਰਸ੍ਸਂ ਤਚ੍ਛੇਤ੍ਵਾ ਪਬ੍ਬਤਨ੍ਤਰੇ ਠਪਿਤਂ ਵਾਤਾਤਪੇਨ ਸੁਪਰਿਸੁਕ੍ਖਂ ਪਾਵੁਸ੍ਸਕੇ ਮੇਘੇ ਵਸ੍ਸਨ੍ਤੇ ਉਦਕੇਨ ਉਪ੍ਲਵਿਤ੍ਵਾ ਅਨੁਪੁਬ੍ਬੇਨ ਗਙ੍ਗਾਯ ਨਦਿਯਾ ਸੋਤੇ ਪਤਿਤਂ ਤੇਨ ਸੋਤੇਨ ਵੁਯ੍ਹਮਾਨਂ. ਭਿਕ੍ਖੂ ਆਮਨ੍ਤੇਸੀਤਿ ‘‘ਇਮਿਨਾ ਦਾਰੁਕ੍ਖਨ੍ਧੇਨ ਸਦਿਸਂ ਕਤ੍ਵਾ ਮਮ ਸਾਸਨੇ ਸਦ੍ਧਾਪਬ੍ਬਜਿਤਂ ਕੁਲਪੁਤ੍ਤਂ ਦਸ੍ਸੇਸ੍ਸਾਮੀ’’ਤਿ ਧਮ੍ਮਂ ਦੇਸੇਤੁਕਾਮਤਾਯ ਆਮਨ੍ਤੇਸਿ. ਅਮੁਂ ਮਹਨ੍ਤਂ ਦਾਰੁਕ੍ਖਨ੍ਧਂ ਗਙ੍ਗਾਯ ਨਦਿਯਾ ਸੋਤੇਨ ਵੁਯ੍ਹਮਾਨਨ੍ਤਿ ਇਦਂ ਪਨ ਅਟ੍ਠਦੋਸਵਿਮੁਤ੍ਤਤ੍ਤਾ ਸੋਤਪਟਿਪਨ੍ਨਸ੍ਸ ਦਾਰੁਕ੍ਖਨ੍ਧਸ੍ਸ ਅਪਰੇ ਸਮੁਦ੍ਦਪਤ੍ਤਿਯਾ ਅਨ੍ਤਰਾਯਕਰੇ ਅਟ੍ਠ ਦੋਸੇ ਦਸ੍ਸੇਤੁਂ ਆਰਭਿ.
ਤਤ੍ਰਸ੍ਸ ਏਵਂ ਅਟ੍ਠਦੋਸਵਿਮੁਤ੍ਤਤਾ ਵੇਦਿਤਬ੍ਬਾ – ਏਕੋ ਹਿ ਗਙ੍ਗਾਯ ਨਦਿਯਾ ਅਵਿਦੂਰੇ ਪਬ੍ਬਤਤਲੇ ਜਾਤੋ ਨਾਨਾਵਲ੍ਲੀਹਿ ਪਲਿਵੇਠਿਤੋ ਪਣ੍ਡੁਪਲਾਸਤਂ ਆਪਜ੍ਜਿਤ੍ਵਾ ਉਪਚਿਕਾਦੀਹਿ ਖਜ੍ਜਮਾਨੋ ਤਸ੍ਮਿਂਯੇਵ ਠਾਨੇ ਅਪਣ੍ਣਤ੍ਤਿਕਭਾਵਂ ਗਚ੍ਛਤਿ, ਅਯਂ ਦਾਰੁਕ੍ਖਨ੍ਧੋ ਗਙ੍ਗਂ ਓਤਰਿਤ੍ਵਾ ਵਙ੍ਕਟ੍ਠਾਨੇਸੁ ਵਿਲਾਸਮਾਨੋ ਸਾਗਰਂ ਪਤ੍ਵਾ ਮਣਿਵਣ੍ਣੇ ਊਮਿਪਿਟ੍ਠੇ ਸੋਭਿਤੁਂ ਨ ਲਭਤਿ.
ਅਪਰੋ ਗਙ੍ਗਾਤੀਰੇ ਬਹਿਮੂਲੋ ਅਨ੍ਤੋਸਾਖੋ ਹੁਤ੍ਵਾ ਜਾਤੋ, ਅਯਂ ਕਿਞ੍ਚਾਪਿ ਕਾਲੇਨ ਕਾਲਂ ਓਲਮ੍ਬਿਨੀਹਿ ਸਾਖਾਹਿ ਉਦਕਂ ਫੁਸਤਿ, ਬਹਿਮੂਲਤ੍ਤਾ ਪਨ ਗਙ੍ਗਂ ਓਤਰਿਤ੍ਵਾ ਵਙ੍ਕਟ੍ਠਾਨੇਸੁ ਵਿਲਾਸਮਾਨੋ ਸਾਗਰਂ ਪਤ੍ਵਾ ਮਣਿਵਣ੍ਣੇ ਊਮਿਪਿਟ੍ਠੇ ਸੋਭਿਤੁਂ ਨ ਲਭਤਿ.
ਅਪਰੋ ਮਜ੍ਝੇ ਗਙ੍ਗਾਯ ਜਾਤੋ, ਦਲ਼੍ਹਮੂਲੇਨ ਪਨ ਸੁਪ੍ਪਤਿਟ੍ਠਿਤੋ, ਬਹਿ ਚਸ੍ਸ ਗਤਾ ਵਙ੍ਕਸਾਖਾ ਨਾਨਾਵਲ੍ਲੀਹਿ ਆਬਦ੍ਧਾ, ਅਯਮ੍ਪਿ ਦਲ਼੍ਹਮੂਲਤ੍ਤਾ ਬਹਿਦ੍ਧਾ ਵਲ੍ਲੀਹਿ ਆਬਦ੍ਧਤ੍ਤਾ ਚ ਗਙ੍ਗਂ ਓਤਰਿਤ੍ਵਾ…ਪੇ… ਸੋਭਿਤੁਂ ਨ ਲਭਤਿ.
ਅਪਰੋ ਪਤਿਤਟ੍ਠਾਨੇਯੇਵ ਵਾਲਿਕਾਯ ਓਤ੍ਥਟੋ ਪੂਤਿਭਾਵਂ ਆਪਜ੍ਜਤਿ, ਅਯਮ੍ਪਿ ਗਙ੍ਗਂ ਓਤਰਿਤ੍ਵਾ…ਪੇ… ਨ ਲਭਤਿ.
ਅਪਰੋ ਦ੍ਵਿਨ੍ਨਂ ਪਾਸਾਣਾਨਂ ਅਨ੍ਤਰੇ ਜਾਤਤ੍ਤਾ, ਸੁਨਿਖਾਤੋ ਵਿਯ ਨਿਚ੍ਚਲੋ ਠਿਤੋ, ਆਗਤਾਗਤਂ ਉਦਕਂ ਦ੍ਵਿਧਾ ਫਾਲੇਤਿ, ਅਯਂ ਪਾਸਾਣਨ੍ਤਰੇ ਸੁਟ੍ਠੁ ਪਤਿਟ੍ਠਿਤਤ੍ਤਾ ਗਙ੍ਗਂ ਓਤਰਿਤ੍ਵਾ…ਪੇ… ਨ ਲਭਤਿ.
ਅਪਰੋ ਅਬ੍ਭੋਕਾਸਟ੍ਠਾਨੇ ਨਭਂ ਪੂਰੇਤ੍ਵਾ ਵਲ੍ਲੀਹਿ ਆਬਦ੍ਧੋ ਠਿਤੋ. ਏਕਂ ਦ੍ਵੇ ਸਂਵਚ੍ਛਰੇ ਅਤਿਕ੍ਕਮਿਤ੍ਵਾ ਆਗਤੇ ਮਹੋਘੇ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਤੇਮੇਤਿ, ਅਯਮ੍ਪਿ ਨਭਂ ਪੂਰੇਤ੍ਵਾ ਠਿਤਤਾਯ ਚੇਵ ਏਕਸ੍ਸ ਵਾ ਦ੍ਵਿਨ੍ਨਂ ਵਾ ਸਂਵਚ੍ਛਰਾਨਂ ਅਚ੍ਚਯੇਨ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਤੇਮਨਤਾਯ ਚ ਗਙ੍ਗਂ ਓਤਰਿਤ੍ਵਾ…ਪੇ… ਨ ਲਭਤਿ.
ਅਪਰੋਪਿ ਮਜ੍ਝੇ ਗਙ੍ਗਾਯ ਦੀਪਕੇ ਜਾਤੋ ਮੁਦੁਕ੍ਖਨ੍ਧਸਾਖੋ ਓਘੇ ਆਗਤੇ ਅਨੁਸੋਤਂ ਨਿਪਜ੍ਜਿਤ੍ਵਾ, ਉਦਕੇ ਗਤੇ ਸੀਸਂ ਉਕ੍ਖਿਪਿਤ੍ਵਾ, ਨਚ੍ਚਨ੍ਤੋ ਵਿਯ ਤਿਟ੍ਠਤਿ. ਯਸ੍ਸਤ੍ਥਾਯ ਸਾਗਰੋ ਗਙ੍ਗਂ ਏਵਂ ਵਿਯ ਵਦਤਿ, ‘‘ਭੋਤਿ ਗਙ੍ਗੇ ਤ੍ਵਂ ਮਯ੍ਹਂ ਚਨ੍ਦਨਸਾਰਸਲਲ਼ਸਾਰਾਦੀਨਿ ਨਾਨਾਦਾਰੂਨਿ ਆਹਰਸਿ, ਦਾਰੁਕ੍ਖਨ੍ਧਂ ਪਨ ਨਾਹਰਸੀ’’ਤਿ. ਸੁਲਭੋ ਏਸ, ਦੇਵ, ਪੁਨਵਾਰੇ ਜਾਨਿਸ੍ਸਾਮੀਤਿ. ਪੁਨਵਾਰੇ ਤਮ੍ਬਵਣ੍ਣੇਨ ਉਦਕੇਨ ਆਲਿਙ੍ਗਮਾਨਾ ਵਿਯ ਆਗਚ੍ਛਤਿ. ਸੋਪਿ ਤਥੇਵ ਅਨੁਸੋਤਂ ਨਿਪਜ੍ਜਿਤ੍ਵਾ, ਉਦਕੇ ਗਤੇ ਸੀਸਂ ਉਕ੍ਖਿਪਿਤ੍ਵਾ, ਨਚ੍ਚਨ੍ਤੋ ਵਿਯ ਤਿਟ੍ਠਤਿ. ਅਯਂ ਅਤ੍ਤਨੋ ਮੁਦੁਤਾਯ ਗਙ੍ਗਂ ਓਤਰਿਤ੍ਵਾ…ਪੇ… ਨ ਲਭਤਿ.
ਅਪਰੋ ਗਙ੍ਗਾਯ ਨਦਿਯਾ ਤਿਰਿਯਂ ਪਤਿਤੋ ਵਾਲਿਕਾਯ ਓਤ੍ਥਰਿਤੋ ਅਨ੍ਤਰਸੇਤੁ ਵਿਯ ਬਹੂਨਂ ਪਚ੍ਚਯੋ ਜਾਤੋ, ਉਭੋਸੁ ਤੀਰੇਸੁ ਵੇਲ਼ੁਨਲ਼ਕਰਞ੍ਜਕਕੁਧਾਦਯੋ ਉਪ੍ਲਵਿਤ੍ਵਾ ਤਤ੍ਥੇਵ ਲਗ੍ਗਨ੍ਤਿ. ਤਥਾ ਨਾਨਾਵਿਧਾ ਗਚ੍ਛਾ ਵੁਯ੍ਹਮਾਨਾ ਭਿਨ੍ਨਮੁਸਲਭਿਨ੍ਨਸੁਪ੍ਪਅਹਿਕੁਕ੍ਕੁਰਹਤ੍ਥਿਅਸ੍ਸਾਦਿਕੁਣਪਾਨਿਪਿ ਤਤ੍ਥੇਵ ਲਗ੍ਗਨ੍ਤਿ. ਮਹਾਗਙ੍ਗਾਪਿ ਨਂ ਆਸਜ੍ਜ ਭਿਜ੍ਜਿਤ੍ਵਾ ਦ੍ਵਿਧਾ ਗਚ੍ਛਤਿ, ਮਚ੍ਛਕਚ੍ਛਪਕੁਮ੍ਭੀਲਮਕਰਾਦਯੋਪਿ ਤਤ੍ਥੇਵ ਵਾਸਂ ਕਪ੍ਪੇਨ੍ਤਿ. ਅਯਮ੍ਪਿ ਤਿਰਿਯਂ ਪਤਿਤ੍ਵਾ ਮਹਾਜਨਸ੍ਸ ਪਚ੍ਚਯਤ੍ਤਕਤਭਾਵੇਨ ਗਙ੍ਗਂ ਓਤਰਿਤ੍ਵਾ ਵਙ੍ਕਟ੍ਠਾਨੇਸੁ ਵਿਲਾਸਮਾਨੋ ਸਾਗਰਂ ਪਤ੍ਵਾ ਮਣਿਵਣ੍ਣੇ ਊਮਿਪਿਟ੍ਠੇ ਸੋਭਿਤੁਂ ਨ ਲਭਤਿ.
ਇਤਿ ਭਗਵਾ ਇਮੇਹਿ ਅਟ੍ਠਹਿ ਦੋਸੇਹਿ ਵਿਮੁਤ੍ਤਤ੍ਤਾ ਸੋਤਪਟਿਪਨ੍ਨਸ੍ਸ ਦਾਰੁਕ੍ਖਨ੍ਧਸ੍ਸ ਅਪਰੇ ਸਮੁਦ੍ਦਪਤ੍ਤਿਯਾ ਅਨ੍ਤਰਾਯਕਰੇ ਅਟ੍ਠ ਦੋਸੇ ਦਸ੍ਸੇਤੁਂ ਅਮੁਂ ਮਹਨ੍ਤਂ ਦਾਰੁਕ੍ਖਨ੍ਧਂ ਗਙ੍ਗਾਯ ਨਦਿਯਾ ਸੋਤੇਨ ਵੁਯ੍ਹਮਾਨਨ੍ਤਿਆਦਿਮਾਹ. ਤਤ੍ਥ ਨ ਥਲੇ ਉਸ੍ਸੀਦਿਸ੍ਸਤੀਤਿ ਥਲਂ ਨਾਭਿਰੁਹਿਸ੍ਸਤਿ. ਨ ਮਨੁਸ੍ਸਗ੍ਗਾਹੋ ਗਹੇਸ੍ਸਤੀਤਿ ‘‘ਮਹਾ ਵਤਾਯਂ ਦਾਰੁਕ੍ਖਨ੍ਧੋ’’ਤਿ ਦਿਸ੍ਵਾ, ਉਲ਼ੁਮ੍ਪੇਨ ਤਰਮਾਨਾ ਗਨ੍ਤ੍ਵਾ, ਗੋਪਾਨਸੀਆਦੀਨਂ ਅਤ੍ਥਾਯ ਮਨੁਸ੍ਸਾ ਨ ਗਣ੍ਹਿਸ੍ਸਨ੍ਤਿ. ਨ ਅਮਨੁਸ੍ਸਗ੍ਗਾਹੋ ਗਹੇਸ੍ਸਤੀਤਿ ‘‘ਮਹਗ੍ਘੋ ਅਯਂ ਚਨ੍ਦਨਸਾਰੋ, ਵਿਮਾਨਦ੍ਵਾਰੇ ਨਂ ਠਪੇਸ੍ਸਾਮਾ’’ਤਿ ਮਞ੍ਞਮਾਨਾ ਨ ਅਮਨੁਸ੍ਸਾ ਗਣ੍ਹਿਸ੍ਸਨ੍ਤਿ.
ਏਵਮੇਵ ਖੋਤਿ ਏਤ੍ਥ ਸਦ੍ਧਿਂ ਬਾਹਿਰੇਹਿ ਅਟ੍ਠਹਿ ਦੋਸੇਹਿ ਏਵਂ ਓਪਮ੍ਮਸਂਸਨ੍ਦਨਂ ਵੇਦਿਤਬ੍ਬਂ – ਗਙ੍ਗਾਯ ਅਵਿਦੂਰੇ ਪਬ੍ਬਤਤਲੇ ਜਾਤੋ ਤਤ੍ਥੇਵ ਉਪਚਿਕਾਦੀਹਿ ਖਜ੍ਜਮਾਨੋ ਅਪਣ੍ਣਤ੍ਤਿਕਭਾਵਂ ਗਤਦਾਰੁਕ੍ਖਨ੍ਧੋ ਵਿਯ ਹਿ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਕਾਯ ਮਿਚ੍ਛਾਦਿਟ੍ਠਿਯਾ ਸਮਨ੍ਨਾਗਤੋ ਪੁਗ੍ਗਲੋ ਵੇਦਿਤਬ੍ਬੋ. ਅਯਞ੍ਹਿ ਸਾਸਨਸ੍ਸ ਦੂਰੀਭੂਤਤ੍ਤਾ ਅਰਿਯਮਗ੍ਗਂ ਓਰੁਯ੍ਹ ਸਮਾਧਿਕੁਲ੍ਲੇ ਨਿਸਿਨ੍ਨੋ ਨਿਬ੍ਬਾਨਸਾਗਰਂ ਪਾਪੁਣਿਤੁਂ ਨ ਸਕ੍ਕੋਤਿ.
ਗਙ੍ਗਾਤੀਰੇ ਬਹਿਮੂਲੋ ਅਨ੍ਤੋਸਾਖੋ ਹੁਤ੍ਵਾ ਜਾਤੋ ਵਿਯ ਅਚ੍ਛਿਨ੍ਨਗਿਹਿਬਨ੍ਧਨੋ ਸਮਣਕੁਟਿਮ੍ਬਿਕਪੁਗ੍ਗਲੋ ਦਟ੍ਠਬ੍ਬੋ. ਅਯਞ੍ਹਿ ‘‘ਚਿਤ੍ਤਂ ਨਾਮੇਤਂ ਅਨਿਬਦ੍ਧਂ, ‘ਸਮਣੋਮ੍ਹੀ’ਤਿ ਵਦਨ੍ਤੋਵ ਗਿਹੀ ਹੋਤਿ, ‘ਗਿਹੀਮ੍ਹੀ’ਤਿ ਵਦਨ੍ਤੋਵ ਸਮਣੋ ਹੋਤਿ. ਕੋ ਜਾਨਿਸ੍ਸਤਿ, ਕਿਂ ਭਵਿਸ੍ਸਤੀ’’ਤਿ? ਮਹਲ੍ਲਕਕਾਲੇ ਪਬ੍ਬਜਨ੍ਤੋਪਿ ਗਿਹਿਬਨ੍ਧਨਂ ਨ ਵਿਸ੍ਸਜ੍ਜੇਤਿ. ਮਹਲ੍ਲਕਪਬ੍ਬਜਿਤਾਨਞ੍ਚ ਸਮ੍ਪਤ੍ਤਿ ਨਾਮ ਨਤ੍ਥਿ. ਤਸ੍ਸ ਸਚੇ ਚੀਵਰਂ ਪਾਪੁਣਾਤਿ, ਅਨ੍ਤਚ੍ਛਿਨ੍ਨਕਂ ਵਾ ਜਿਣ੍ਣਦੁਬ੍ਬਣ੍ਣਂ ਵਾ ਪਾਪੁਣਾਤਿ. ਸੇਨਾਸਨਮ੍ਪਿ ਵਿਹਾਰਪਚ੍ਚਨ੍ਤੇ ਪਣ੍ਣਸਾਲਾ ਵਾ ਮਣ੍ਡਪੋ ਵਾ ਪਾਪੁਣਾਤਿ. ਪਿਣ੍ਡਾਯ ਚਰਨ੍ਤੇਨਾਪਿ ਪੁਤ੍ਤਨਤ੍ਤਕਾਨਂ ਦਾਰਕਾਨਂ ਪਚ੍ਛਤੋ ਚਰਿਤਬ੍ਬਂ ਹੋਤਿ, ਪਰਿਯਨ੍ਤੇ ਨਿਸੀਦਿਤਬ੍ਬਂ ਹੋਤਿ. ਤੇਨ ਸੋ ਦੁਕ੍ਖੀ ਦੁਮ੍ਮਨੋ ਅਸ੍ਸੂਨਿ ਮੁਞ੍ਚਨ੍ਤੋ, ‘‘ਅਤ੍ਥਿ ਮੇ ਕੁਲਸਨ੍ਤਕਂ ਧਨਂ, ਕਪ੍ਪਤਿ ਨੁ ਖੋ ਤਂ ਖਾਦਨ੍ਤੇਨ ਜੀਵਿਤੁ’’ਨ੍ਤਿ ਚਿਨ੍ਤੇਤ੍ਵਾ ਏਕਂ ਵਿਨਯਧਰਂ ਪੁਚ੍ਛਤਿ – ‘‘ਕਿਂ, ਭਨ੍ਤੇ ਆਚਰਿਯ, ਅਤ੍ਤਨੋ ਸਨ੍ਤਕਂ ਵਿਚਾਰੇਤ੍ਵਾ ਖਾਦਿਤੁਂ ਕਪ੍ਪਤਿ, ਨੋ ਕਪ੍ਪਤੀ’’ਤਿ? ‘‘ਨਤ੍ਥੇਤ੍ਥ ਦੋਸੋ, ਕਪ੍ਪਤੇਤ’’ਨ੍ਤਿ. ਸੋ ਅਤ੍ਤਨੋ ਭਜਮਾਨਕੇ ਕਤਿਪਯੇ ਦੁਬ੍ਬਚੇ ਦੁਰਾਚਾਰੇ ਭਿਕ੍ਖੂ ਗਹੇਤ੍ਵਾ, ਸਾਯਨ੍ਹਸਮਯੇ ਅਨ੍ਤੋਗਾਮਂ ਗਨ੍ਤ੍ਵਾ, ਗਾਮਮਜ੍ਝੇ ਠਿਤੋ ਗਾਮਿਕੇ ਪਕ੍ਕੋਸਾਪੇਤ੍ਵਾ, ‘‘ਅਮ੍ਹਾਕਂ ਪਯੋਗਤੋ ਉਟ੍ਠਿਤਂ ਆਯਂ ਕਸ੍ਸ ਦੇਥਾ’’ਤਿ ਆਹ. ਭਨ੍ਤੇ, ਤੁਮ੍ਹੇ ਪਬ੍ਬਜਿਤਾ, ਮਯਂ ਕਸ੍ਸ ਦਸ੍ਸਾਮਾਤਿ? ਕਿਂ ਪਬ੍ਬਜਿਤਾਨਂ ਅਤ੍ਤਨੋ ਸਨ੍ਤਕਂ ਨ ਵਟ੍ਟਤੀਤਿ? ਕੁਦ੍ਦਾਲ-ਪਿਟਕਂ ਗਹੇਤ੍ਵਾ, ਖੇਤ੍ਤਮਰਿਯਾਦਬਨ੍ਧਨਾਦੀਨਿ ਕਰੋਨ੍ਤੋ ਨਾਨਾਪ੍ਪਕਾਰਂ ਪੁਬ੍ਬਣ੍ਣਾਪਰਣ੍ਣਞ੍ਚੇਵ ਫਲਾਫਲੇ ਚ ਸਙ੍ਗਣ੍ਹਿਤ੍ਵਾ, ਹੇਮਨ੍ਤਗਿਮ੍ਹਵਸ੍ਸਾਨੇਸੁ ਯਂ ਯਂ ਇਚ੍ਛਤਿ, ਤਂ ਤਂ ਪਚਾਪੇਤ੍ਵਾ ਖਾਦਨ੍ਤੋ ਸਮਣਕੁਟੁਮ੍ਬਿਕੋ ਹੁਤ੍ਵਾ ਜੀਵਤਿ. ਕੇਵਲਮਸ੍ਸ ਪਞ੍ਚਚੂਲ਼ਕੇਨ ਦਾਰਕੇਨ ਸਦ੍ਧਿਂ ਪਾਦਪਰਿਚਾਰਿਕਾਵ ਏਕਾ ਨਤ੍ਥਿ. ਅਯਂ ਪੁਗ੍ਗਲੋ ਕਿਞ੍ਚਾਪਿ ਓਲਮ੍ਬਿਨੀਹਿ ਸਾਖਾਹਿ ਉਦਕਂ ਫੁਸਮਾਨੋ ਅਨ੍ਤੋਸਾਖੋ ਰੁਕ੍ਖੋ ਵਿਯ ਚੇਤਿਯਙ੍ਗਣਬੋਧਿਯਙ੍ਗਣਾਦੀਸੁ ਭਿਕ੍ਖੂਨਂ ਕਾਯਸਾਮਗ੍ਗਿਂ ਦੇਤਿ, ਗਿਹਿਬਨ੍ਧਨਸ੍ਸ ਪਨ ਅਚ੍ਛਿਨ੍ਨਤਾਯ ਬਹਿਮੂਲਤ੍ਤਾ ਅਰਿਯਮਗ੍ਗਂ ਓਤਰਿਤ੍ਵਾ ਸਮਾਧਿਕੁਲ੍ਲੇ ਨਿਸਿਨ੍ਨੋ ਨਿਬ੍ਬਾਨਸਾਗਰਂ ਪਾਪੁਣਿਤੁਂ ਨ ਸਕ੍ਕੋਤਿ.
ਗਙ੍ਗਾਯ ਮਜ੍ਝੇ ਜਾਤੋ ਬਹਿਦ੍ਧਾ ਵਲ੍ਲੀਹਿ ਆਬਦ੍ਧਵਙ੍ਕਸਾਖਾ ਵਿਯ ਸਙ੍ਘਸਨ੍ਤਕਂ ਨਿਸ੍ਸਾਯ ਜੀਵਮਾਨੋ ਭਿਨ੍ਨਾਜੀਵਪੁਗ੍ਗਲੋ ਦਟ੍ਠਬ੍ਬੋ. ਏਕਚ੍ਚੋ ਗਿਹਿਬਨ੍ਧਨਂ ਪਹਾਯ ਪਬ੍ਬਜਨ੍ਤੋਪਿ ਸਾਰੁਪ੍ਪਟ੍ਠਾਨੇ ਪਬ੍ਬਜ੍ਜਂ ਨ ਲਭਤਿ. ਪਬ੍ਬਜ੍ਜਾ ਹਿ ਨਾਮੇਸਾ ਪਟਿਸਨ੍ਧਿਗ੍ਗਹਣਸਦਿਸਾ. ਯਥਾ ਮਨੁਸ੍ਸਾ ਯਤ੍ਥ ਪਟਿਸਨ੍ਧਿਂ ਗਣ੍ਹਨ੍ਤਿ, ਤੇਸਂਯੇਵ ਕੁਲਾਨਂ ਆਚਾਰਂ ਸਿਕ੍ਖਨ੍ਤਿ, ਏਵਂ ਭਿਕ੍ਖੂਪਿ ਯੇਸਂ ਸਨ੍ਤਿਕੇ ਪਬ੍ਬਜਨ੍ਤਿ, ਤੇਸਂਯੇਵ ਆਚਾਰਂ ਗਣ੍ਹਨ੍ਤਿ. ਤਸ੍ਮਾ ਏਕਚ੍ਚੋ ਅਸਾਰੁਪ੍ਪਟ੍ਠਾਨੇ ਪਬ੍ਬਜਿਤ੍ਵਾ ਓਵਾਦਾਨੁਸਾਸਨੀਉਦ੍ਦੇਸਪਰਿਪੁਚ੍ਛਾਦੀਹਿ ਪਰਿਬਾਹਿਰੋ ਹੁਤ੍ਵਾ ਪਾਤੋਵ ਮੁਣ੍ਡਘਟਂ ਗਹੇਤ੍ਵਾ ਉਦਕਤਿਤ੍ਥਂ ਗਚ੍ਛਤਿ, ਆਚਰਿਯੁਪਜ੍ਝਾਯਾਨਂ ਭਤ੍ਤਤ੍ਥਾਯ ਖਨ੍ਧੇ ਪਤ੍ਤਂ ਕਤ੍ਵਾ ਭਤ੍ਤਸਾਲਂ ਗਚ੍ਛਤਿ, ਦੁਬ੍ਬਚਸਾਮਣੇਰੇਹਿ ਸਦ੍ਧਿਂ ਨਾਨਾਕੀਲ਼ਂ ਕੀਲ਼ਤਿ, ਆਰਾਮਿਕਦਾਰਕੇਹਿ ਸਂਸਟ੍ਠੋ ਵਿਹਰਤਿ.
ਸੋ ਦਹਰਭਿਕ੍ਖੁਕਾਲੇ ਅਤ੍ਤਨੋ ਅਨੁਰੂਪੇਹਿ ਦਹਰਭਿਕ੍ਖੂਹਿ ਚੇਵ ਆਰਾਮਿਕੇਹਿ ਚ ਸਦ੍ਧਿਂ ਸਙ੍ਘਭੋਗਂ ਗਨ੍ਤ੍ਵਾ, ‘‘ਅਯਂ ਖੀਣਾਸਵੇਹਿ ਅਸੁਕਰਞ੍ਞੋ ਸਨ੍ਤਿਕਾ ਪਟਿਗ੍ਗਹਿਤਸਙ੍ਘਭੋਗੋ, ਤੁਮ੍ਹੇ ਸਙ੍ਘਸ੍ਸ ਇਦਞ੍ਚਿਦਞ੍ਚ ਨ ਦੇਥ, ਨ ਹਿ ਤੁਮ੍ਹਾਕਂ ਪਵਤ੍ਤਿਂ ਸੁਤ੍ਵਾ ਰਾਜਾ ਵਾ ਰਾਜਮਹਾਮਤ੍ਤਾ ਵਾ ਅਤ੍ਤਮਨਾ ਭਵਿਸ੍ਸਨ੍ਤਿ, ਏਥ ਦਾਨਿ ਇਦਞ੍ਚਿਦਞ੍ਚ ਕਰੋਥਾ’’ਤਿ ਕੁਦ੍ਦਾਲ-ਪਿਟਕਾਨਿ ਗਾਹਾਪੇਤ੍ਵਾ ਹੇਟ੍ਠਾ ਤਲ਼ਾਕਮਾਤਿਕਾਸੁ ਕਤ੍ਤਬ੍ਬਕਿਚ੍ਚਾਨਿ ਕਾਰਾਪੇਤ੍ਵਾ ਬਹੁਂ ਪੁਬ੍ਬਣ੍ਣਾਪਰਣ੍ਣਂ ਵਿਹਾਰਂ ਪਵੇਸੇਤ੍ਵਾ ਆਰਾਮਿਕੇਹਿ ਅਤ੍ਤਨੋ ਉਪਕਾਰਭਾਵਂ ਸਙ੍ਘਸ੍ਸ ਆਰੋਚਾਪੇਤਿ. ਸਙ੍ਘੋ ‘‘ਅਯਂ ਦਹਰੋ ਬਹੂਪਕਾਰੋ, ਇਮਸ੍ਸ ਸਤਂ ਵਾ ਦ੍ਵਿਸਤਂ ਵਾ ਦੇਥਾ’’ਤਿ ਦਾਪੇਤਿ. ਇਤਿ ਸੋ ਇਤੋ ਚਿਤੋ ਚ ਸਙ੍ਘਸਨ੍ਤਕੇਨੇਵ ਵਡ੍ਢਨ੍ਤੋ ਬਹਿਦ੍ਧਾ ਏਕਵੀਸਤਿਵਿਧਾਹਿ ਅਨੇਸਨਾਹਿ ਬਦ੍ਧੋ ਅਰਿਯਮਗ੍ਗਂ ਓਤਰਿਤ੍ਵਾ ਸਮਾਧਿਕੁਲ੍ਲੇ ਨਿਸਿਨ੍ਨੋ ਨਿਬ੍ਬਾਨਸਾਗਰਂ ਪਾਪੁਣਿਤੁਂ ਨ ਸਕ੍ਕੋਤਿ.
ਪਤਿਤਟ੍ਠਾਨੇਯੇਵ ਵਾਲਿਕਾਯ ਓਤ੍ਥਰਿਤ੍ਵਾ ਪੂਤਿਭਾਵਂ ਆਪਾਦਿਤਰੁਕ੍ਖੋ ਵਿਯ ਆਲਸਿਯਮਹਗ੍ਘਸੋ ਵੇਦਿਤਬ੍ਬੋ. ਏਵਰੂਪਞ੍ਹਿ ਪੁਗ੍ਗਲਂ ਆਮਿਸਚਕ੍ਖੁਂ ਪਚ੍ਚਯਲੋਲਂ ਵਿਸ੍ਸਟ੍ਠਆਚਰਿਯੁਪਜ੍ਝਾਯਵਤ੍ਤਂ ਉਦ੍ਦੇਸਪਰਿਪੁਚ੍ਛਾਯੋਨਿਸੋਮਨਸਿਕਾਰਵਜ੍ਜਿਤਂ ਸਨ੍ਧਾਯ ਪਞ੍ਚ ਨੀਵਰਣਾਨਿ ਅਤ੍ਥਤੋ ਏਵਂ ਵਦਨ੍ਤਿ – ‘‘ਭੋ, ਕਸ੍ਸ ਸਨ੍ਤਿਕਂ ਗਚ੍ਛਾਮਾ’’ਤਿ? ਅਥ ਥਿਨਮਿਦ੍ਧਂ ਉਟ੍ਠਾਯ ਏਵਮਾਹ – ‘‘ਕਿਂ ਨ ਪਸ੍ਸਥ? ਏਸੋ ਅਸੁਕਵਿਹਾਰਵਾਸੀ ਕੁਸੀਤਪੁਗ੍ਗਲੋ ਅਸੁਕਂ ਨਾਮ ਗਾਮਂ ਗਨ੍ਤ੍ਵਾ ਯਾਗੁਮਤ੍ਥਕੇ ਯਾਗੁਂ, ਪੂਵਮਤ੍ਥਕੇ ਪੂਵਂ, ਭਤ੍ਤਮਤ੍ਥਕੇ ਭਤ੍ਤਂ ਅਜ੍ਝੋਹਰਿਤ੍ਵਾ ਵਿਹਾਰਂ ਆਗਮ੍ਮ ਵਿਸ੍ਸਟ੍ਠਸਬ੍ਬਵਤ੍ਤੋ ਉਦ੍ਦੇਸਾਦਿਵਿਰਹਿਤੋ ਮਞ੍ਚਂ ਉਪਗਚ੍ਛਨ੍ਤੋ ਮਯ੍ਹਂ ਓਕਾਸਂ ਕਰੋਤੀ’’ਤਿ.
ਤਤੋ ਕਾਮਚ੍ਛਨ੍ਦਨੀਵਰਣਂ ਉਟ੍ਠਾਯਾਹ – ‘‘ਭੋ, ਤਵ ਓਕਾਸੇ ਕਤੇ ਮਯ੍ਹਂ ਕਤੋਵ ਹੋਤਿ, ਇਦਾਨੇਵ ਸੋ ਨਿਦ੍ਦਾਯਿਤ੍ਵਾ ਕਿਲੇਸਾਨੁਰਞ੍ਜਿਤੋਵ ਪਬੁਜ੍ਝਿਤ੍ਵਾ ਕਾਮਵਿਤਕ੍ਕਂ ਵਿਤਕ੍ਕੇਸ੍ਸਤੀ’’ਤਿ. ਤਤੋ ਬ੍ਯਾਪਾਦਨੀਵਰਣਂ ਉਟ੍ਠਾਯਾਹ – ‘‘ਤੁਮ੍ਹਾਕਂ ਓਕਾਸੇ ਕਤੇ ਮਯ੍ਹਂ ਕਤੋਵ ਹੋਤਿ. ਇਦਾਨੇਵ ਨਿਦ੍ਦਾਯਿਤ੍ਵਾ ਵੁਟ੍ਠਿਤੋ ‘ਵਤ੍ਤਪਟਿਵਤ੍ਤਂ ਕਰੋਹੀ’ਤਿ ਵੁਚ੍ਚਮਾਨੋ, ‘ਭੋ, ਇਮੇ ਅਤ੍ਤਨੋ ਕਮ੍ਮਂ ਅਕਤ੍ਵਾ ਅਮ੍ਹੇਸੁ ਬ੍ਯਾਵਟਾ’ਤਿ ਨਾਨਪ੍ਪਕਾਰਂ ਫਰੁਸਵਚਨਂ ਵਦਨ੍ਤੋ ਅਕ੍ਖੀਨਿ ਨੀਹਰਿਤ੍ਵਾ ਵਿਚਰਿਸ੍ਸਤੀ’’ਤਿ. ਤਤੋ ਉਦ੍ਧਚ੍ਚਨੀਵਰਣਂ ਉਟ੍ਠਾਯਾਹ – ‘‘ਤੁਮ੍ਹਾਕਂ ਓਕਾਸੇ ਕਤੇ ਮਯ੍ਹਂ ਕਤੋਵ ਹੋਤਿ, ਕੁਸੀਤੋ ਨਾਮ ਵਾਤਾਹਤੋ ਅਗ੍ਗਿਕ੍ਖਨ੍ਧੋ ਵਿਯ ਉਦ੍ਧਤੋ ਹੋਤੀ’’ਤਿ. ਅਥ ਕੁਕੁਚ੍ਚਨੀਵਰਣਂ ਉਟ੍ਠਾਯਾਹ – ‘‘ਤੁਮ੍ਹਾਕਂ ਓਕਾਸੇ ਕਤੇ ਮਯ੍ਹਂ ਕਤੋਵ ਹੋਤਿ, ਕੁਸੀਤੋ ਨਾਮ ਕੁਕ੍ਕੁਚ੍ਚਪਕਤੋਵ ਹੋਤਿ, ਅਕਪ੍ਪਿਯੇ ਕਪ੍ਪਿਯਸਞ੍ਞਂ ਕਪ੍ਪਿਯੇ ਚ ਅਕਪ੍ਪਿਯਸਞ੍ਞਂ ਉਪ੍ਪਾਦੇਤੀ’’ਤਿ. ਅਥ ਵਿਚਿਕਿਚ੍ਛਾਨੀਵਰਣਂ ਉਟ੍ਠਾਯਾਹ – ‘‘ਤੁਮ੍ਹਾਕਂ ਓਕਾਸੇ ਕਤੇ ਮਯ੍ਹਂ ਕਤੋਵ ਹੋਤਿ. ਏਵਰੂਪੋ ਹਿ ਅਟ੍ਠਸੁ ਠਾਨੇਸੁ ਮਹਾਵਿਚਿਕਿਚ੍ਛਂ ਉਪ੍ਪਾਦੇਸੀ’’ਤਿ. ਏਵਂ ਆਲਸਿਯਮਹਗ੍ਘਸਂ ਪਞ੍ਚ ਨੀਵਰਣਾਨਿ ਚਣ੍ਡਸੁਨਖਾਦਯੋ ਵਿਯ ਸਿਙ੍ਗਚ੍ਛਿਨ੍ਨਂ ਜਰਗ੍ਗਵਂ ਅਜ੍ਝੋਤ੍ਥਰਿਤ੍ਵਾ ਗਣ੍ਹਨ੍ਤਿ. ਸੋਪਿ ਅਰਿਯਮਗ੍ਗਸੋਤਂ ਓਤਰਿਤ੍ਵਾ ਸਮਾਧਿਕੁਲ੍ਲੇ ਨਿਸਿਨ੍ਨੋ ਨਿਬ੍ਬਾਨਸਾਗਰਂ ਪਾਪੁਣਿਤੁਂ ਨ ਸਕ੍ਕੋਤਿ.
ਦ੍ਵਿਨ੍ਨਂ ਪਾਸਾਣਾਨਂ ਅਨ੍ਤਰੇ ਨਿਖਾਤਮੂਲਾਕਾਰੇਨ ਠਿਤਰੁਕ੍ਖੋ ਵਿਯ ਦਿਟ੍ਠਿਂ ਉਪ੍ਪਾਦੇਤ੍ਵਾ ਠਿਤੋ ਦਿਟ੍ਠਿਗਤਿਕੋ ਵੇਦਿਤਬ੍ਬੋ. ਸੋ ਹਿ ‘‘ਅਰੂਪਭਵੇ ਰੂਪਂ ਅਤ੍ਥਿ, ਅਸਞ੍ਞੀਭਵੇ ਚਿਤ੍ਤਂ ਪਵਤ੍ਤਤਿ, ਬਹੁਚਿਤ੍ਤਕ੍ਖਣਿਕੋ ਲੋਕੁਤ੍ਤਰਮਗ੍ਗੋ, ਅਨੁਸਯੋ ਚਿਤ੍ਤਵਿਪ੍ਪਯੁਤ੍ਤੋ, ਤੇ ਚ ਸਤ੍ਤਾ ਸਨ੍ਧਾਵਨ੍ਤਿ ਸਂਸਰਨ੍ਤੀ’’ਤਿ ਵਦਨ੍ਤੋ ਅਰਿਟ੍ਠੋ ਵਿਯ ਕਣ੍ਟਕਸਾਮਣੇਰੋ ਵਿਯ ਚ ਵਿਚਰਤਿ. ਪਿਸੁਣਵਾਚੋ ਪਨ ਹੋਤਿ, ਉਪਜ੍ਝਾਯਾਦਯੋ ਸਦ੍ਧਿਵਿਹਾਰਿਕਾਦੀਹਿ ਭਿਨ੍ਦਨ੍ਤੋ ਵਿਚਰਤਿ. ਸੋਪਿ ਅਰਿਯਮਗ੍ਗਸੋਤਂ ਓਤਰਿਤ੍ਵਾ ਸਮਾਧਿਕੁਲ੍ਲੇ ਨਿਸਿਨ੍ਨੋ ਨਿਬ੍ਬਾਨਸਾਗਰਂ ਪਾਪੁਣਿਤੁਂ ਨ ਸਕ੍ਕੋਤਿ.
ਅਬ੍ਭੋਕਾਸੇ ਨਭਂ ਪੂਰੇਤ੍ਵਾ ਵਲ੍ਲੀਹਿ ਆਬਦ੍ਧੋ ਠਿਤੋ ਏਕਂ ਦ੍ਵੇ ਸਂਵਚ੍ਛਰੇ ਅਤਿਕ੍ਕਮਿਤ੍ਵਾ ਆਗਤੇ ਮਹੋਘੇ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਤੇਮਨਰੁਕ੍ਖੋ ਵਿਯ ਮਹਲ੍ਲਕਕਾਲੇ ਪਬ੍ਬਜਿਤ੍ਵਾ ਪਚ੍ਚਨ੍ਤੇ ਵਸਮਾਨੋ ਦੁਲ੍ਲਭਸਙ੍ਘਦਸ੍ਸਨੋ ਚੇਵ ਦੁਲ੍ਲਭਧਮ੍ਮਸ੍ਸਵਨੋ ਚ ਪੁਗ੍ਗਲੋ ਵੇਦਿਤਬ੍ਬੋ. ਏਕਚ੍ਚੋ ਹਿ ਵੁਡ੍ਢਕਾਲੇ ਪਬ੍ਬਜਿਤੋ ਕਤਿਪਾਹੇਨ ਉਪਸਮ੍ਪਦਂ ਲਭਿਤ੍ਵਾ ਪਞ੍ਚਵਸ੍ਸਕਾਲੇ ਪਾਤਿਮੋਕ੍ਖਂ ਪਗੁਣਂ ਕਤ੍ਵਾ ਦਸਵਸ੍ਸਕਾਲੇ ਵਿਨਯਧਰਤ੍ਥੇਰਸ੍ਸ ਸਨ੍ਤਿਕੇ ਵਿਨਯਕਥਾਕਾਲੇ ਮਰਿਚਂ ਵਾ ਹਰੀਤਕਖਣ੍ਡਂ ਵਾ ਮੁਖੇ ਠਪੇਤ੍ਵਾ ਬੀਜਨੇਨ ਮੁਖਂ ਪਿਧਾਯ ਨਿਦ੍ਦਾਯਨ੍ਤੋ ਨਿਸੀਦਿਤ੍ਵਾ ਲੇਸਕਪ੍ਪੇਨ ਕਤਵਿਨਯੋ ਨਾਮ ਹੁਤ੍ਵਾ ਪਤ੍ਤਚੀਵਰਂ ਆਦਾਯ ਪਚ੍ਚਨ੍ਤਂ ਗਚ੍ਛਤਿ. ਤਤ੍ਰ ਨਂ ਮਨੁਸ੍ਸਾ ਸਕ੍ਕਰਿਤ੍ਵਾ ਭਿਕ੍ਖੁਦਸ੍ਸਨਸ੍ਸ ਦੁਲ੍ਲਭਤਾਯ ‘‘ਇਧੇਵ, ਭਨ੍ਤੇ, ਵਸਥਾ’’ਤਿ ਵਿਹਾਰਂ ਕਾਰੇਤ੍ਵਾ ਪੁਪ੍ਫੂਪਗਫਲੂਪਗਰੁਕ੍ਖੇ ਰੋਪੇਤ੍ਵਾ ਤਤ੍ਥ ਵਾਸੇਨ੍ਤਿ.
ਅਥ ਮਹਾਵਿਹਾਰਸਦਿਸਵਿਹਾਰਾ ਬਹੁਸ੍ਸੁਤਾ ਭਿਕ੍ਖੂ, ‘‘ਜਨਪਦੇ ਚੀਵਰਰਜਨਾਦੀਨਿ ਕਤ੍ਵਾ ਆਗਮਿਸ੍ਸਾਮਾ’’ਤਿ ਤਤ੍ਥ ਗਚ੍ਛਨ੍ਤਿ. ਸੋ ਤੇ ਦਿਸ੍ਵਾ, ਹਟ੍ਠਤੁਟ੍ਠੋ ਵਤ੍ਤਪਟਿਵਤ੍ਤਂ ਕਤ੍ਵਾ, ਪੁਨਦਿਵਸੇ ਆਦਾਯ ਭਿਕ੍ਖਾਚਾਰਗਾਮਂ ਪਵਿਸਿਤ੍ਵਾ, ‘‘ਅਸੁਕੋ ਥੇਰੋ ਸੁਤ੍ਤਨ੍ਤਿਕੋ, ਅਸੁਕੋ ਅਭਿਧਮ੍ਮਿਕੋ, ਅਸੁਕੋ ਵਿਨਯਧਰੋ, ਅਸੁਕੋ ਤੇਪਿਟਕੋ, ਏਵਰੂਪੇ ਥੇਰੇ ਕਦਾ ਲਭਿਸ੍ਸਥ, ਧਮ੍ਮਸਵਨਂ ਕਾਰੇਥਾ’’ਤਿ ਵਦਤਿ. ਉਪਾਸਕਾ ‘‘ਧਮ੍ਮਸ੍ਸਵਨਂ ਕਾਰੇਸ੍ਸਾਮਾ’’ਤਿ ਵਿਹਾਰਮਗ੍ਗਂ ਸੋਧੇਤ੍ਵਾ, ਸਪ੍ਪਿਤੇਲਾਦੀਨਿ ਆਦਾਯ, ਮਹਾਥੇਰਂ ਉਪਸਙ੍ਕਮਿਤ੍ਵਾ, ‘‘ਭਨ੍ਤੇ, ਧਮ੍ਮਸ੍ਸਵਨਂ ਕਾਰੇਸ੍ਸਾਮ, ਧਮ੍ਮਕਥਿਕਾਨਂ ਵਿਚਾਰੇਥਾ’’ਤਿ ਵਤ੍ਵਾ ਪੁਨਦਿਵਸੇ ਆਗਨ੍ਤ੍ਵਾ ਧਮ੍ਮਂ ਸੁਣਨ੍ਤਿ.
ਨੇਵਾਸਿਕਤ੍ਥੇਰੋ ਆਗਨ੍ਤੁਕਾਨਂ ਪਤ੍ਤਚੀਵਰਾਨਿ ਪਟਿਸਾਮੇਨ੍ਤੋ ਅਨ੍ਤੋਗਬ੍ਭੇਯੇਵ ਦਿਵਸਭਾਗਂ ਵੀਤਿਨਾਮੇਤਿ. ਦਿਵਾਕਥਿਕੋ ਉਟ੍ਠਿਤੋ ਸਰਭਾਣਕੋ ਘਟੇਨ ਉਦਕਂ ਵਮੇਨ੍ਤੋ ਵਿਯ ਸਰਭਾਣਂ ਭਣਿਤ੍ਵਾ ਉਟ੍ਠਿਤੋ, ਤਮ੍ਪਿ ਸੋ ਨ ਜਾਨਾਤਿ. ਰਤ੍ਤਿਕਥਿਕੋ ਸਾਗਰਂ ਖੋਭੇਨ੍ਤੋ ਵਿਯ ਰਤ੍ਤਿਂ ਕਥੇਤ੍ਵਾ ਉਟ੍ਠਿਤੋ, ਤਮ੍ਪਿ ਸੋ ਨ ਜਾਨਾਤਿ. ਪਚ੍ਚੂਸਕਥਿਕੋ ਕਥੇਤ੍ਵਾ ਉਟ੍ਠਾਸਿ, ਤਮ੍ਪਿ ਸੋ ਨ ਜਾਨਾਤਿ. ਪਾਤੋਵ ਪਨ ਉਟ੍ਠਾਯ ਮੁਖਂ ਧੋਵਿਤ੍ਵਾ, ਥੇਰਾਨਂ ਪਤ੍ਤਚੀਵਰਾਨਿ ਉਪਨਾਮੇਤ੍ਵਾ, ਭਿਕ੍ਖਾਚਾਰਂ ਉਪਗਚ੍ਛਨ੍ਤੋ ਮਹਾਥੇਰਂ ਆਹ – ‘‘ਭਨ੍ਤੇ, ਦਿਵਾਕਥਿਕੋ ਕਤਰਂ ਜਾਤਕਂ ਨਾਮ ਕਥੇਸਿ, ਸਰਭਾਣਕੋ ਕਤਰਂ ਸੁਤ੍ਤਂ ਨਾਮ ਭਣਿ, ਰਤ੍ਤਿਕਥਿਕੋ ਕਤਰਂ ਧਮ੍ਮਕਥਂ ਨਾਮ ਕਥੇਸਿ, ਪਚ੍ਚੂਸਕਥਿਕੋ ਕਤਰਂ ਜਾਤਕਂ ਨਾਮ ਕਥੇਸਿ, ਖਨ੍ਧਾ ਨਾਮ ਕਤਿ, ਧਾਤੁਯੋ ਨਾਮ ਕਤਿ, ਆਯਤਨਾ ਨਾਮ ਕਤੀ’’ਤਿ. ਏਵਰੂਪੋ ਏਕਂ ਦ੍ਵੇ ਸਂਵਚ੍ਛਰਾਨਿ ਅਤਿਕ੍ਕਮਿਤ੍ਵਾ ਭਿਕ੍ਖੁਦਸ੍ਸਨਞ੍ਚੇਵ ਧਮ੍ਮਸ੍ਸਵਨਞ੍ਚ ਲਭਨ੍ਤੋਪਿ ਓਘੇ ਆਗਤੇ ਉਦਕੇਨ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਤੇਮਿਤਰੁਕ੍ਖਸਦਿਸੋ ਹੋਤਿ. ਸੋ ਏਵਂ ਸਙ੍ਘਦਸ੍ਸਨਤੋ ਚ ਧਮ੍ਮਸ੍ਸਵਨਤੋ ਚ ਪਟਿਕ੍ਕਮ੍ਮ ਦੂਰੇ ਵਸਨ੍ਤੋ ਅਰਿਯਮਗ੍ਗਂ ਓਤਰਿਤ੍ਵਾ ਸਮਾਧਿਕੁਲ੍ਲੇ ਨਿਸਿਨ੍ਨੋ ਨਿਬ੍ਬਾਨਸਾਗਰਂ ਪਾਪੁਣਿਤੁਂ ਨ ਸਕ੍ਕੋਤਿ.
ਮਜ੍ਝੇ ਗਙ੍ਗਾਯ ਦੀਪਕੇ ਜਾਤੋ ਮੁਦੁਰੁਕ੍ਖੋ ਵਿਯ ਮਧੁਰਸ੍ਸਰਭਾਣਕਪੁਗ੍ਗਲੋ ਵੇਦਿਤਬ੍ਬੋ. ਸੋ ਹਿ ਅਭਿਞ੍ਞਾਤਾਨਿ ਅਭਿਞ੍ਞਾਤਾਨਿ ਵੇਸ੍ਸਨ੍ਤਰਾਦੀਨਿ ਜਾਤਕਾਨਿ ਉਗ੍ਗਣ੍ਹਿਤ੍ਵਾ, ਦੁਲ੍ਲਭਭਿਕ੍ਖੁਦਸ੍ਸਨਂ ਪਚ੍ਚਨ੍ਤਂ ਗਨ੍ਤ੍ਵਾ, ਤਤ੍ਥ ਧਮ੍ਮਕਥਾਯ ਪਸਾਦਿਤਹਦਯੇਨ ਜਨੇਨ ਉਪਟ੍ਠਿਯਮਾਨੋ ਅਤ੍ਤਾਨਂ ਉਦ੍ਦਿਸ੍ਸ ਕਤੇ ਸਮ੍ਪਨ੍ਨਪੁਪ੍ਫਫਲਰੁਕ੍ਖੇ ਨਨ੍ਦਨਵਨਾਭਿਰਾਮੇ ਵਿਹਾਰੇ ਵਸਤਿ. ਅਥਸ੍ਸ ਭਾਰਹਾਰਭਿਕ੍ਖੂ ਤਂ ਪਵਤ੍ਤਿਂ ਸੁਤ੍ਵਾ, ‘‘ਅਸੁਕੋ ਕਿਰ ਏਵਂ ਉਪਟ੍ਠਾਕੇਸੁ ਪਟਿਬਦ੍ਧਚਿਤ੍ਤੋ ਵਿਹਰਤਿ. ਪਣ੍ਡਿਤੋ ਭਿਕ੍ਖੁ ਪਟਿਬਲੋ ਬੁਦ੍ਧਵਚਨਂ ਵਾ ਉਗ੍ਗਣ੍ਹਿਤੁਂ, ਕਮ੍ਮਟ੍ਠਾਨਂ ਵਾ ਮਨਸਿਕਾਤੁਂ, ਆਨੇਤ੍ਵਾ ਤੇਨ ਸਦ੍ਧਿਂ ਅਸੁਕਤ੍ਥੇਰਸ੍ਸ ਸਨ੍ਤਿਕੇ ਧਮ੍ਮਂ ਉਗ੍ਗਣ੍ਹਿਸ੍ਸਾਮ, ਅਸੁਕਤ੍ਥੇਰਸ੍ਸ ਸਨ੍ਤਿਕੇ ਕਮ੍ਮਟ੍ਠਾਨ’’ਨ੍ਤਿ ਤਤ੍ਥ ਗਚ੍ਛਨ੍ਤਿ.
ਸੋ ਤੇਸਂ ਵਤ੍ਤਂ ਕਤ੍ਵਾ ਸਾਯਨ੍ਹਸਮਯਂ ਵਿਹਾਰਚਾਰਿਕਂ ਨਿਕ੍ਖਨ੍ਤੇਹਿ ਤੇਹਿ ‘‘ਇਮਂ, ਆਵੁਸੋ, ਚੇਤਿਯਂ ਤਯਾ ਕਾਰਿਤ’’ਨ੍ਤਿ ਪੁਟ੍ਠੋ, ‘‘ਆਮ, ਭਨ੍ਤੇ’’ਤਿ ਵਦਤਿ. ‘‘ਅਯਂ ਬੋਧਿ, ਅਯਂ ਮਣ੍ਡਪੋ, ਇਦਂ ਉਪੋਸਥਾਗਾਰਂ, ਏਸਾ ਅਗ੍ਗਿਸਾਲਾ, ਅਯਂ ਚਙ੍ਕਮੋ ਤਯਾ ਕਾਰਿਤੋ. ਇਮੇ ਰੁਕ੍ਖੇ ਰੋਪਾਪੇਤ੍ਵਾ ਤਯਾ ਨਨ੍ਦਨਵਨਾਭਿਰਾਮੋ ਵਿਹਾਰੋ ਕਾਰਿਤੋ’’ਤਿ. ‘‘ਆਮ, ਭਨ੍ਤੇ’’ਤਿ, ਵਦਤਿ.
ਸੋ ਸਾਯਂ ਥੇਰੁਪਟ੍ਠਾਨਂ ਗਨ੍ਤ੍ਵਾ ਵਨ੍ਦਿਤ੍ਵਾ ਪੁਚ੍ਛਤਿ – ‘‘ਕਸ੍ਮਾ, ਭਨ੍ਤੇ, ਆਗਤਤ੍ਥਾ’’ਤਿ? ‘‘ਆਵੁਸੋ, ਤਂ ਆਦਾਯ ਗਨ੍ਤ੍ਵਾ, ਅਸੁਕਤ੍ਥੇਰਸ੍ਸ ਸਨ੍ਤਿਕੇ ਧਮ੍ਮਂ ਉਗ੍ਗਣ੍ਹਿਤ੍ਵਾ, ਅਸੁਕਤ੍ਥੇਰਸ੍ਸ ਸਨ੍ਤਿਕੇ ਕਮ੍ਮਟ੍ਠਾਨਂ, ਅਸੁਕਸ੍ਮਿਂ ਨਾਮ ਅਰਞ੍ਞੇ ਸਮਗ੍ਗਾ ਸਮਣਧਮ੍ਮਂ ਕਰਿਸ੍ਸਾਮਾਤਿ ਇਮਿਨਾ ਕਾਰਣੇਨ ਆਗਤਮ੍ਹਾ’’ਤਿ. ਸਾਧੁ, ਭਨ੍ਤੇ, ਤੁਮ੍ਹੇ ਨਾਮ ਮਯ੍ਹਂ ਅਤ੍ਥਾਯ ਆਗਤਾ, ਅਹਮ੍ਪਿ ਚਿਰਨਿਵਾਸੇਨ ਇਧ ਉਕ੍ਕਣ੍ਠਿਤੋ ਗਚ੍ਛਾਮਿ, ਪਤ੍ਤਚੀਵਰਂ ਗਣ੍ਹਾਮਿ, ਭਨ੍ਤੇਤਿ. ਆਵੁਸੋ, ਸਾਮਣੇਰਦਹਰਾ ਮਗ੍ਗਕਿਲਨ੍ਤਾ, ਅਜ੍ਜ ਵਸਿਤ੍ਵਾ ਸ੍ਵੇ ਪਚ੍ਛਾਭਤ੍ਤਂ ਗਮਿਸ੍ਸਾਮਾਤਿ. ਸਾਧੁ, ਭਨ੍ਤੇਤਿ ਪੁਨਦਿਵਸੇ ਤੇਹਿ ਸਦ੍ਧਿਂ ਪਿਣ੍ਡਾਯ ਪਵਿਸਤਿ. ਗਾਮਵਾਸਿਨੋ ‘‘ਅਮ੍ਹਾਕਂ ਅਯ੍ਯੋ ਬਹੂ ਆਗਨ੍ਤੁਕੇ ਭਿਕ੍ਖੂ ਗਹੇਤ੍ਵਾ ਆਗਤੋ’’ਤਿ ਆਸਨਾਨਿ ਪਞ੍ਞਾਪੇਤ੍ਵਾ ਯਾਗੁਂ ਪਾਯੇਤ੍ਵਾ ਸੁਖਨਿਸਿਨ੍ਨਕਥਂ ਸੁਤ੍ਵਾ ਭਤ੍ਤਂ ਅਦਂਸੁ. ਥੇਰਾ ‘‘ਤ੍ਵਂ, ਆਵੁਸੋ, ਅਨੁਮੋਦਨਂ ਕਤ੍ਵਾ ਨਿਕ੍ਖਮ, ਮਯਂ ਉਦਕਫਾਸੁਕਟ੍ਠਾਨੇ ਭਤ੍ਤਕਿਚ੍ਚਂ ਕਰਿਸ੍ਸਾਮਾ’’ਤਿ ਨਿਕ੍ਖਨ੍ਤਾ.
ਗਾਮਵਾਸਿਨੋ ਅਨੁਮੋਦਨਂ ਸੁਤ੍ਵਾ ਪੁਚ੍ਛਿਂਸੁ, ‘‘ਕੁਤੋ, ਭਨ੍ਤੇ, ਥੇਰਾ ਆਗਤਾ’’ਤਿ? ਏਤੇ ਅਮ੍ਹਾਕਂ ਆਚਰਿਯੁਪਜ੍ਝਾਯਾ ਸਮਾਨੁਪਜ੍ਝਾਯਾ ਸਨ੍ਦਿਟ੍ਠਾ ਸਮ੍ਭਤ੍ਤਾਤਿ. ਕਸ੍ਮਾ ਆਗਤਾਤਿ? ਮਂ ਗਹੇਤ੍ਵਾ ਗਨ੍ਤੁਕਾਮਤਾਯਾਤਿ. ਤੁਮ੍ਹੇ ਪਨ ਗਨ੍ਤੁਕਾਮਾਤਿ? ਆਮਾਵੁਸੋਤਿ. ਕਿਂ ਵਦੇਥ, ਭਨ੍ਤੇ, ਅਮ੍ਹੇਹਿ ਕਸ੍ਸ ਉਪੋਸਥਾਗਾਰਂ ਕਾਰਿਤਂ, ਕਸ੍ਸ ਭੋਜਨਸਾਲਾ, ਕਸ੍ਸ ਅਗ੍ਗਿਸਾਲਾਦਯੋ ਕਾਰਿਤਾ, ਮਯਂ ਮਙ੍ਗਲਾਮਙ੍ਗਲੇਸੁ ਕਸ੍ਸ ਸਨ੍ਤਿਕਂ ਗਮਿਸ੍ਸਾਮਾਤਿ? ਮਹਾਉਪਾਸਿਕਾਯੋਪਿ ਤਤ੍ਥੇਵ ਨਿਸੀਦਿਤ੍ਵਾ ਅਸ੍ਸੂਨਿ ਪਵਤ੍ਤਯਿਂਸੁ. ਦਹਰੋ ‘‘ਤੁਮ੍ਹੇਸੁ ਏਵਂ ਦੁਕ੍ਖਿਤੇਸੁ ਅਹਂ ਗਨ੍ਤ੍ਵਾ ਕਿਂ ਕਰਿਸ੍ਸਾਮਿ? ਥੇਰੇ ਉਯ੍ਯੋਜੇਸ੍ਸਾਮੀ’’ਤਿ ਵਿਹਾਰਂ ਗਤੋ.
ਥੇਰਾਪਿ ਕਤਭਤ੍ਤਕਿਚ੍ਚਾ ਪਤ੍ਤਚੀਵਰਾਨਿ ਗਹੇਤ੍ਵਾ ਨਿਸਿਨ੍ਨਾ ਤਂ ਦਿਸ੍ਵਾਵ, ‘‘ਕਿਂ, ਆਵੁਸੋ, ਚਿਰਾਯਸਿ, ਦਿਵਾ ਹੋਤਿ, ਗਚ੍ਛਾਮਾ’’ਤਿ ਆਹਂਸੁ. ਆਮ, ਭਨ੍ਤੇ, ਤੁਮ੍ਹੇ ਸੁਖਿਤਾ, ਅਸੁਕਗੇਹਸ੍ਸ ਇਟ੍ਠਕਾਮੂਲਂ ਠਿਤਸਣ੍ਠਾਨੇਨੇਵ ਠਿਤਂ, ਅਸੁਕਗੇਹਾਦੀਨਂ ਚਿਤ੍ਤਕਮ੍ਮਮੂਲਾਦੀਨਿ ਅਤ੍ਥਿ, ਗਤਸ੍ਸਾਪਿ ਮੇ ਚਿਤ੍ਤਵਿਕ੍ਖੇਪੋ ਭਵਿਸ੍ਸਤਿ, ਤੁਮ੍ਹੇ ਪੁਰਤੋ ਗਨ੍ਤ੍ਵਾ ਅਸੁਕਵਿਹਾਰੇ ਚੀਵਰਧੋਵਨਰਜਨਾਦੀਨਿ ਕਰੋਥ, ਅਹਂ ਤਤ੍ਥ ਸਮ੍ਪਾਪੁਣਿਸ੍ਸਾਮੀਤਿ. ਤੇ ਤਸ੍ਸ ਓਸਕ੍ਕਿਤੁਕਾਮਤਂ ਞਤ੍ਵਾ ਤ੍ਵਂ ਪਚ੍ਛਾ ਆਗਚ੍ਛੇਯ੍ਯਾਸੀਤਿ ਪਕ੍ਕਮਿਂਸੁ.
ਸੋ ਥੇਰੇ ਅਨੁਗਨ੍ਤ੍ਵਾ ਨਿਵਤ੍ਤੋ ਵਿਹਾਰਮੇਵ ਆਗਨ੍ਤ੍ਵਾ ਭੋਜਨਸਾਲਾਦੀਨਿ ਓਲੋਕੇਨ੍ਤੋ ਵਿਹਾਰਂ ਰਾਮਣੇਯ੍ਯਕਂ ਦਿਸ੍ਵਾ ਚਿਨ੍ਤੇਸਿ – ‘‘ਸਾਧੁ ਵਤਮ੍ਹਿ ਨ ਗਤੋ. ਸਚੇ ਅਗਮਿਸ੍ਸਂ, ਕੋਚਿ, ਦੇਵ, ਧਮ੍ਮਕਥਿਕੋ ਆਗਨ੍ਤ੍ਵਾ, ਸਬ੍ਬੇਸਂ ਮਨਂ ਭਿਨ੍ਦਿਤ੍ਵਾ, ਵਿਹਾਰਂ ਅਤ੍ਤਨੋ ਨਿਕਾਯਸਨ੍ਤਕਂ ਕਰੇਯ੍ਯ, ਅਥ ਮਯਾ ਪਚ੍ਛਾ ਆਗਨ੍ਤ੍ਵਾ ਏਤਸ੍ਸ ਪਚ੍ਛਤੋ ਲਦ੍ਧਪਿਣ੍ਡਂ ਭੁਞ੍ਜਨ੍ਤੇਨ ਚਰਿਤਬ੍ਬਂ ਭਵਿਸ੍ਸਤੀ’’ਤਿ.
ਸੋ ਅਪਰੇਨ ਸਮਯੇਨ ਸੁਣਾਤਿ, ‘‘ਤੇ ਕਿਰ ਭਿਕ੍ਖੂ ਗਤਟ੍ਠਾਨੇ ਏਕਨਿਕਾਯਦ੍ਵੇਨਿਕਾਯਏਕਪਿਟਕਦ੍ਵੇਪਿਟਕਾਦਿਵਸੇਨ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਅਟ੍ਠਕਥਾਚਰਿਯਾ ਜਾਤਾ ਵਿਨਯਧਰਾ ਜਾਤਾ ਸਤਪਰਿਵਾਰਾਪਿ ਸਹਸ੍ਸਪਰਿਵਾਰਾਪਿ ਚਰਨ੍ਤਿ. ਯੇ ਪਨੇਤ੍ਥ ਸਮਣਧਮ੍ਮਂ ਕਾਤੁਂ ਗਤਾ, ਤੇ ਘਟੇਨ੍ਤਾ ਵਾਯਮਨ੍ਤਾ ਸੋਤਾਪਨ੍ਨਾ ਜਾਤਾ, ਸਕਦਾਗਾਮਿਨੋ ਅਨਾਗਾਮਿਨੋ ਅਰਹਨ੍ਤੋ ਜਾਤਾ, ਮਹਾਸਕ੍ਕਾਰੇਨ ਪਰਿਨਿਬ੍ਬੁਤਾ’’ਤਿ. ਸੋ ਚਿਨ੍ਤੇਸਿ – ‘‘ਸਚੇ ਅਹਮ੍ਪਿ ਅਗਮਿਸ੍ਸਂ, ਮਯ੍ਹਮ੍ਪੇਸਾ ਸਮ੍ਪਤ੍ਤਿ ਅਭਵਿਸ੍ਸ, ਇਮਂ ਪਨ ਠਾਨਂ ਮੁਞ੍ਚਿਤੁਂ ਅਸਕ੍ਕੋਨ੍ਤੋ ਅਤਿਵਿਯ ਪਰਿਹੀਨਮ੍ਹੀ’’ਤਿ. ਅਯਂ ਪੁਗ੍ਗਲੋ ਅਤ੍ਤਨੋ ਮੁਦੁਤਾਯ ਤਂ ਠਾਨਂ ਅਮੁਞ੍ਚਨ੍ਤੋ ਅਰਿਯਮਗ੍ਗਂ ਓਤਰਿਤ੍ਵਾ ਸਮਾਧਿਕੁਲ੍ਲੇ ਨਿਸਿਨ੍ਨੋ ਨਿਬ੍ਬਾਨਸਾਗਰਂ ਪਾਪੁਣਿਤੁਂ ਨ ਸਕ੍ਕੋਤਿ.
ਗਙ੍ਗਾਯ ਨਦਿਯਾ ਤਿਰਿਯਂ ਪਤਿਤ੍ਵਾ, ਵਾਲਿਕਾਯ ਓਤ੍ਥਟਭਾਵੇਨ ਅਨ੍ਤਰਸੇਤੁ ਵਿਯ ਹੁਤ੍ਵਾ, ਬਹੂਨਂ ਪਚ੍ਚਯੋ ਜਾਤਰੁਕ੍ਖੋ ਵਿਯ ਰਥਵਿਨੀਤਮਹਾਅਰਿਯਵਂਸਚਨ੍ਦੋਪਮਾਦਿਪਟਿਪਦਾਸੁ ਅਞ੍ਞਤਰਂ ਪਟਿਪਦਂ ਉਗ੍ਗਹੇਤ੍ਵਾ ਠਿਤੋ ਓਲੀਨਵੁਤ੍ਤਿਕੋ ਪੁਗ੍ਗਲੋ ਵੇਦਿਤਬ੍ਬੋ. ਸੋ ਹਿ ਤਂ ਪਟਿਪਤ੍ਤਿਨਿਸ੍ਸਿਤਂ ਧਮ੍ਮਂ ਉਗ੍ਗਹੇਤ੍ਵਾ ਪਕਤਿਯਾ ਮਞ੍ਜੁਸ੍ਸਰੋ ਚਿਤ੍ਤਲਪਬ੍ਬਤਾਦਿਸਦਿਸਂ ਮਹਨ੍ਤਂ ਠਾਨਂ ਗਨ੍ਤ੍ਵਾ ਚੇਤਿਯਙ੍ਗਣਵਤ੍ਤਾਦੀਨਿ ਕਰੋਤਿ. ਅਥ ਨਂ ਧਮ੍ਮਸ੍ਸਵਨਗ੍ਗਂ ਪਤ੍ਤਂ ਆਗਨ੍ਤੁਕਾ ਦਹਰਾ ‘‘ਧਮ੍ਮਂ ਕਥੇਹੀ’’ਤਿ ਵਦਨ੍ਤਿ. ਸੋ ਸਮ੍ਮਾ ਉਗ੍ਗਹਿਤਂ ਧਮ੍ਮਂ ਪਟਿਪਦਂ ਦੀਪੇਤ੍ਵਾ ਕਥੇਤਿ. ਅਥਸ੍ਸ ਪਂਸੁਕੂਲਿਕਪਿਣ੍ਡਪਾਤਿਕਾਦਯੋ ਸਬ੍ਬੇ ਥੇਰਨਵਮਜ੍ਝਿਮਾ ਭਿਕ੍ਖੂ ‘‘ਅਹੋ ਸਪ੍ਪੁਰਿਸੋ’’ਤਿ ਅਤ੍ਤਮਨਾ ਭਵਨ੍ਤਿ.
ਸੋ ਕਸ੍ਸਚਿ ਨਿਦਾਨਮਤ੍ਤਂ, ਕਸ੍ਸਚਿ ਉਪਡ੍ਢਗਾਥਂ, ਕਸ੍ਸਚਿ ਗਾਥਂ ਉਪਟ੍ਠਾਪੇਨ੍ਤੋ ਅਯਪਟ੍ਟਕੇਨ ਆਬਨ੍ਧਨ੍ਤੋ ਵਿਯ ਦਹਰਸਾਮਣੇਰੇ ਸਙ੍ਗਣ੍ਹਿਤ੍ਵਾ ਮਹਾਥੇਰੇ ਉਪਸਙ੍ਕਮਿਤ੍ਵਾ, ‘‘ਭਨ੍ਤੇ, ਅਯਂ ਪੋਰਾਣਕਵਿਹਾਰੋ ਅਤ੍ਥਿ, ਏਤ੍ਥ ਕੋਚਿ ਤਤ੍ਰੁਪ੍ਪਾਦੋ’’ਤਿ?, ਪੁਚ੍ਛਤਿ. ਥੇਰਾ – ‘‘ਕਿਂ ਵਦੇਸਿ, ਆਵੁਸੋ, ਚਤੁਵੀਸਤਿ ਕਰੀਸਸਹਸ੍ਸਾਨਿ ਤਤ੍ਰੁਪ੍ਪਾਦੋ’’ਤਿ. ਭਨ੍ਤੇ, ਤੁਮ੍ਹੇ ਏਵਂ ਵਦੇਥ, ਉਦ੍ਧਨੇ ਪਨ ਅਗ੍ਗਿਪਿ ਨ ਜਲਤੀਤਿ. ਆਵੁਸੋ, ਮਹਾਵਿਹਾਰਵਾਸੀਹਿ ਲਦ੍ਧਾ ਨਾਮ ਏਵਮੇਵ ਨਸ੍ਸਨ੍ਤਿ, ਨ ਕੋਚਿ ਸਣ੍ਠਪੇਤੀਤਿ. ਭਨ੍ਤੇ, ਪੋਰਾਣਕਰਾਜੂਹਿ ਦਿਨ੍ਨਂ ਖੀਣਾਸਵੇਹਿ ਪਟਿਗ੍ਗਹਿਤਂ ਕਸ੍ਮਾ ਏਤੇ ਨਾਸੇਨ੍ਤੀਤਿ? ਆਵੁਸੋ, ਤਾਦਿਸੇਨ ਧਮ੍ਮਕਥਿਕੇਨ ਸਕ੍ਕਾ ਭਵੇਯ੍ਯ ਲਦ੍ਧੁਨ੍ਤਿ. ਭਨ੍ਤੇ, ਮਾ ਏਵਂ ਵਦੇਥ, ਅਮ੍ਹੇ ਪਟਿਪਤ੍ਤਿਦੀਪਕਧਮ੍ਮਕਥਿਕਾ ਨਾਮ, ਤੁਮ੍ਹੇ ਮਂ ‘‘ਸਙ੍ਘਕੁਟੁਮ੍ਬਿਕੋ ਵਿਹਾਰੁਪਟ੍ਠਾਕੋ’’ਤਿ ਮਞ੍ਞਮਾਨਾ ਕਾਤੁਕਾਮਾਤਿ. ਕਿਂ ਨੁ ਖੋ, ਆਵੁਸੋ, ਅਕਪ੍ਪਿਯਮੇਤਂ, ਤੁਮ੍ਹਾਦਿਸੇਹਿ ਪਨ ਕਥਿਤੇ ਅਮ੍ਹਾਕਂ ਉਪ੍ਪਜ੍ਜੇਯ੍ਯਾਤਿ? ਤੇਨ ਹਿ, ਭਨ੍ਤੇ, ਆਰਾਮਿਕੇਸੁ ਆਗਤੇਸੁ ਅਮ੍ਹਾਕਂ ਭਾਰਂ ਕਰੋਥ, ਏਕਂ ਕਪ੍ਪਿਯਦ੍ਵਾਰਂ ਕਥੇਸ੍ਸਾਮਾਤਿ.
ਸੋ ਪਾਤੋਵ ਗਨ੍ਤ੍ਵਾ, ਸਨ੍ਨਿਪਾਤਸਾਲਾਯਂ ਠਤ੍ਵਾ, ਆਰਾਮਿਕੇਸੁ ਆਗਤੇਸੁ ‘‘ਉਪਾਸਕਾ ਅਸੁਕਖੇਤ੍ਤੇ ਭਾਗੋ ਕੁਹਿਂ, ਅਸੁਕਖੇਤ੍ਤੇ ਕਹਾਪਣਂ ਕੁਹਿ’’ਨ੍ਤਿਆਦੀਨਿ ਵਤ੍ਵਾ, ਅਞ੍ਞਸ੍ਸ ਖੇਤ੍ਤਂ ਗਹੇਤ੍ਵਾ, ਅਞ੍ਞਸ੍ਸ ਦੇਤਿ. ਏਵਂ ਅਨੁਕ੍ਕਮੇਨ ਤਂ ਤਂ ਪਟਿਸੇਧੇਨ੍ਤੋ ਤਸ੍ਸ ਤਸ੍ਸ ਦੇਨ੍ਤੋ ਤਥਾ ਅਕਾਸਿ, ਯਥਾ ਯਾਗੁਹਤ੍ਥਾ ਪੂਵਹਤ੍ਥਾ ਭਤ੍ਤਹਤ੍ਥਾ ਤੇਲਮਧੁਫਾਣਿਤਘਤਾਦਿਹਤ੍ਥਾ ਚ ਅਤ੍ਤਨੋਵ ਸਨ੍ਤਿਕਂ ਆਗਚ੍ਛਨ੍ਤਿ. ਸਕਲਵਿਹਾਰੋ ਏਕਕੋਲਾਹਲੋ ਹੋਤਿ, ਪੇਸਲਾ ਭਿਕ੍ਖੂ ਨਿਬ੍ਬਿਜ੍ਜ ਅਪਕ੍ਕਮਿਂਸੁ.
ਸੋਪਿ ਆਚਰਿਯੁਪਜ੍ਝਾਯੇਹਿ ਵਿਸ੍ਸਟ੍ਠਕਾਨਂ ਬਹੂਨਂ ਦੁਬ੍ਬਚਪੁਗ੍ਗਲਾਨਂ ਉਪਜ੍ਝਂ ਦੇਨ੍ਤੋ ਵਿਹਾਰਂ ਪੂਰੇਤਿ. ਆਗਨ੍ਤੁਕਾ ਭਿਕ੍ਖੂ ਵਿਹਾਰਦ੍ਵਾਰੇ ਠਤ੍ਵਾਵ ‘‘ਵਿਹਾਰੇ ਕੇ ਵਸਨ੍ਤੀ’’ਤਿ, ਪੁਚ੍ਛਿਤ੍ਵਾ, ‘‘ਏਵਰੂਪਾ ਨਾਮ ਭਿਕ੍ਖੂ’’ਤਿ ਸੁਤ੍ਵਾ ਬਾਹਿਰੇਨੇਵ ਪਕ੍ਕਮਨ੍ਤਿ. ਅਯਂ ਪੁਗ੍ਗਲੋ ਸਾਸਨੇ ਤਿਰਿਯਂ ਨਿਪਨ੍ਨਤਾਯ ਮਹਾਜਨਸ੍ਸ ਪਚ੍ਚਯਭਾਵਂ ਉਪਗਤੋ ਅਰਿਯਮਗ੍ਗਂ ਓਤਰਿਤ੍ਵਾ ਸਮਾਧਿਕੁਲ੍ਲੇ ਨਿਸਿਨ੍ਨੋ ਨਿਬ੍ਬਾਨਸਾਗਰਂ ਪਾਪੁਣਿਤੁਂ ਨ ਸਕ੍ਕੋਤਿ.
ਭਗਵਨ੍ਤਂ ਏਤਦਵੋਚਾਤਿ ‘‘ਨਿਬ੍ਬਾਨਪਬ੍ਭਾਰਾ’’ਤਿ ਪਦੇਨ ਓਸਾਪਿਤਂ ਧਮ੍ਮਦੇਸਨਂ ਞਤ੍ਵਾ ਅਨੁਸਨ੍ਧਿਕੁਸਲਤਾਯ ਏਤਂ ‘‘ਕਿਂ ਨੁ ਖੋ, ਭਨ੍ਤੇ’’ਤਿਆਦਿਵਚਨਂ ਅਵੋਚ. ਤਥਾਗਤੋਪਿ ਹਿ ਇਮਿਸ੍ਸਂ ਪਰਿਸਤਿ ਨਿਸਿਨ੍ਨੋ ‘‘ਅਨੁਸਨ੍ਧਿਕੁਸਲੋ ਭਿਕ੍ਖੁ ਅਤ੍ਥਿ, ਸੋ ਮਂ ਪਞ੍ਹਂ ਪੁਚ੍ਛਿਸ੍ਸਤੀ’’ਤਿ ਤਸ੍ਸੇਵ ਓਕਾਸਕਰਣਤ੍ਥਾਯ ਇਮਸ੍ਮਿਂ ਠਾਨੇ ਦੇਸਨਂ ਨਿਟ੍ਠਾਪੇਸਿ.
ਇਦਾਨਿ ਓਰਿਮਂ ਤੀਰਨ੍ਤਿਆਦਿਨਾ ਨਯੇਨ ਵੁਤ੍ਤੇਸੁ ਅਜ੍ਝਤ੍ਤਿਕਾਯਤਨਾਦੀਸੁ ਏਵਂ ਉਪਗਮਨਾਨੁਪਗਮਨਾਦੀਨਿ ਵੇਦਿਤਬ੍ਬਾਨਿ. ‘‘ਮਯ੍ਹਂ ਚਕ੍ਖੁ-ਪਸਨ੍ਨਂ, ਅਹਂ ਅਪ੍ਪਮਤ੍ਤਕਮ੍ਪਿ ਰੂਪਾਰਮ੍ਮਣਂ ਪਟਿਵਿਜ੍ਝਿਤੁਂ ਸਕ੍ਕੋਮੀ’’ਤਿ ਏਤਂ ਨਿਸ੍ਸਾਯ ਚਕ੍ਖੁਂ ਅਸ੍ਸਾਦੇਨ੍ਤੋਪਿ ਤਿਮਿਰਕਵਾਤਾਦੀਹਿ ਉਪਹਤਪਸਾਦੋ ‘‘ਅਮਨਾਪਂ ਮਯ੍ਹਂ ਚਕ੍ਖੁ, ਮਹਨ੍ਤਮ੍ਪਿ ਰੂਪਾਰਮ੍ਮਣਂ ਵਿਭਾਵੇਤੁਂ ਨ ਸਕ੍ਕੋਮੀ’’ਤਿ ਦੋਮਨਸ੍ਸਂ ਆਪਜ੍ਜਨ੍ਤੋਪਿ ਚਕ੍ਖਾਯਤਨਂ ਉਪਗਚ੍ਛਤਿ ਨਾਮ. ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਤਿਣ੍ਣਂ ਲਕ੍ਖਣਾਨਂ ਵਸੇਨ ਵਿਪਸ੍ਸਨ੍ਤੋ ਪਨ ਨ ਉਪਗਚ੍ਛਤਿ ਨਾਮ. ਸੋਤਾਦੀਸੁਪਿ ਏਸੇਵ ਨਯੋ.
ਮਨਾਯਤਨੇ ਪਨ ‘‘ਮਨਾਪਂ ਵਤ ਮੇ ਮਨੋ, ਕਿਞ੍ਚਿ ਵਾਮਤੋ ਅਗ੍ਗਹੇਤ੍ਵਾ ਸਬ੍ਬਂ ਦਕ੍ਖਿਣਤੋਵ ਗਣ੍ਹਾਤੀ’’ਤਿ ਵਾ ‘‘ਮਨੇਨ ਮੇ ਚਿਨ੍ਤਿਤਚਿਨ੍ਤਿਤਸ੍ਸ ਅਲਾਭੋ ਨਾਮ ਨਤ੍ਥੀ’’ਤਿ ਵਾ ਏਵਂ ਅਸ੍ਸਾਦੇਨ੍ਤੋਪਿ, ‘‘ਦੁਚਿਨ੍ਤਿਤਚਿਨ੍ਤਿਤਸ੍ਸ ਮੇ ਮਨੋ ਅਪ੍ਪਦਕ੍ਖਿਣਗ੍ਗਾਹੀ’’ਤਿ ਏਵਂ ਦੋਮਨਸ੍ਸਂ ਉਪ੍ਪਾਦੇਨ੍ਤੋਪਿ ਮਨਾਯਤਨਂ ਉਪਗਚ੍ਛਤਿ ਨਾਮ. ਇਟ੍ਠੇ ਪਨ ਰੂਪੇ ਰਾਗਂ, ਅਨਿਟ੍ਠੇ ਪਟਿਘਂ ਉਪ੍ਪਾਦੇਨ੍ਤੋ ਰੂਪਾਯਤਨਂ ਉਪਗਚ੍ਛਤਿ ਨਾਮ. ਸਦ੍ਦਾਯਤਨਾਦੀਸੁਪਿ ਏਸੇਵ ਨਯੋ.
ਨਨ੍ਦੀਰਾਗਸ੍ਸੇਤਂ ਅਧਿਵਚਨਨ੍ਤਿ ਯਥਾ ਹਿ ਮਜ੍ਝੇ ਸਂਸੀਦਿਤ੍ਵਾ ਥਲਂ ਪਤ੍ਤਂ ਦਾਰੁਕ੍ਖਨ੍ਧਂ ਸਣ੍ਹਥੂਲਵਾਲਿਕਾ ਪਿਦਹਤਿ, ਸੋ ਪੁਨ ਸੀਸਂ ਉਕ੍ਖਿਪਿਤੁਂ ਨ ਸਕ੍ਕੋਤਿ, ਏਵਂ ਨਨ੍ਦੀਰਾਗੇਨ ਆਬਦ੍ਧੋ ਪੁਗ੍ਗਲੋ ਚਤੂਸੁ ਮਹਾਅਪਾਯੇਸੁ ਪਤਿਤੋ ਮਹਾਦੁਕ੍ਖੇਨ ਪਿਧੀਯਤਿ, ਸੋ ਅਨੇਕੇਹਿਪਿ ਵਸ੍ਸਸਹਸ੍ਸੇਹਿ ਪੁਨ ਸੀਸਂ ਉਕ੍ਖਿਪਿਤੁਂ ਨ ਸਕ੍ਕੋਤਿ. ਤੇਨ ਵੁਤ੍ਤਂ ‘‘ਨਨ੍ਦੀਰਾਗਸ੍ਸੇਤਂ ਅਧਿਵਚਨ’’ਨ੍ਤਿ.
ਅਸ੍ਮਿਮਾਨਸ੍ਸੇਤਂ ਅਧਿਵਚਨਨ੍ਤਿ ਯਥਾ ਹਿ ਥਲੇ ਆਰੁਲ਼੍ਹੋ ਦਾਰੁਕ੍ਖਨ੍ਧੋ ਹੇਟ੍ਠਾ ਗਙ੍ਗੋਦਕੇਨ ਚੇਵ ਉਪਰਿ ਵਸ੍ਸੇਨ ਚ ਤੇਮੇਨ੍ਤੋ ਅਨੁਕ੍ਕਮੇਨ ਸੇਵਾਲਪਰਿਯੋਨਦ੍ਧੋ ‘‘ਪਾਸਾਣੋ ਨੁ ਖੋ ਏਸ ਖਾਣੁਕੋ’’ਤਿ ਵਤ੍ਤਬ੍ਬਤਂ ਆਪਜ੍ਜਤਿ, ਏਵਮੇਵ ਅਸ੍ਮਿਮਾਨੇਨ ਉਨ੍ਨਤੋ ਪੁਗ੍ਗਲੋ ਪਂਸੁਕੂਲਿਕਟ੍ਠਾਨੇ ਪਂਸੁਕੂਲਿਕੋ ਹੋਤਿ, ਧਮ੍ਮਕਥਿਕਟ੍ਠਾਨੇ ਧਮ੍ਮਕਥਿਕੋ, ਭਣ੍ਡਨਕਾਰਕਟ੍ਠਾਨੇ ਭਣ੍ਡਨਕਾਰਕੋ, ਵੇਜ੍ਜਟ੍ਠਾਨੇ ਵੇਜ੍ਜੋ, ਪਿਸੁਣਟ੍ਠਾਨੇ ਪਿਸੁਣੋ. ਸੋ ਨਾਨਪ੍ਪਕਾਰਂ ਅਨੇਸਨਂ ਆਪਜ੍ਜਨ੍ਤੋ ਤਾਹਿ ਤਾਹਿ ਆਪਤ੍ਤੀਹਿ ਪਲਿਵੇਠਿਤੋ ‘‘ਅਤ੍ਥਿ ਨੁ ਖੋ ਅਸ੍ਸ ਅਬ੍ਭਨ੍ਤਰੇ ਕਿਞ੍ਚਿ ਸੀਲਂ, ਉਦਾਹੁ ਨਤ੍ਥੀ’’ਤਿ ਵਤ੍ਤਬ੍ਬਤਂ ਆਪਜ੍ਜਤਿ. ਤੇਨ ਵੁਤ੍ਤਂ ‘‘ਅਸ੍ਮਿਮਾਨਸ੍ਸੇਤਂ ਅਧਿਵਚਨ’’ਨ੍ਤਿ.
ਪਞ੍ਚਨ੍ਨੇਤਂ ਕਾਮਗੁਣਾਨਂ ਅਧਿਵਚਨਨ੍ਤਿ ਯਥਾ ਹਿ ਆਵਟ੍ਟੇ ਪਤਿਤਦਾਰੁਖਨ੍ਧੋ ਅਨ੍ਤੋਯੇਵ ਪਾਸਾਣਾਦੀਸੁ ਆਹਤਸਮਬ੍ਭਾਹਤੋ ਭਿਜ੍ਜਿਤ੍ਵਾ ਚੁਣ੍ਣਵਿਚੁਣ੍ਣਂ ਹੋਤਿ, ਏਵਂ ਪਞ੍ਚਕਾਮਗੁਣਾਵਟ੍ਟੇ ਪਤਿਤਪੁਗ੍ਗਲੋ ਚਤੂਸੁ ਅਪਾਯੇਸੁ ਕਮ੍ਮਕਾਰਣਖੁਪ੍ਪਿਪਾਸਾਦਿਦੁਕ੍ਖੇਹਿ ਆਹਤਸਮਬ੍ਭਾਹਤੋ ਦੀਘਰਤ੍ਤਂ ਚੁਣ੍ਣਵਿਚੁਣ੍ਣਤਂ ਆਪਜ੍ਜਤਿ. ਤੇਨ ਵੁਤ੍ਤਂ ‘‘ਪਞ੍ਚਨ੍ਨੇਤਂ ਕਾਮਗੁਣਾਨਂ ਅਧਿਵਚਨ’’ਨ੍ਤਿ.
ਦੁਸ੍ਸੀਲੋਤਿ ਨਿਸ੍ਸੀਲੋ. ਪਾਪਧਮ੍ਮੋਤਿ ਲਾਮਕਧਮ੍ਮੋ. ਅਸੁਚੀਤਿ ਨ ਸੁਚਿ. ਸਙ੍ਕਸ੍ਸਰਸਮਾਚਾਰੋਤਿ ‘‘ਇਮਸ੍ਸ ਮਞ੍ਞੇ ਇਮਸ੍ਸ ਮਞ੍ਞੇ ਇਦਂ ਕਮ੍ਮ’’ਨ੍ਤਿ ਏਵਂ ਪਰੇਹਿ ਸਙ੍ਕਾਯ ਸਰਿਤਬ੍ਬਸਮਾਚਾਰੋ. ਸਙ੍ਕਾਯ ਵਾ ਪਰੇਸਂ ਸਮਾਚਾਰਂ ਸਰਤੀਤਿਪਿ ਸਙ੍ਕਸ੍ਸਰਸਮਾਚਾਰੋ. ਤਸ੍ਸ ਹਿ ਦ੍ਵੇ ਤਯੋ ਜਨੇ ਕਥੇਨ੍ਤੇ ਦਿਸ੍ਵਾ, ‘‘ਮਮ ਦੋਸਂ ਮਞ੍ਞੇ ਕਥੇਨ੍ਤੀ’’ਤਿ ਤੇਸਂ ਸਮਾਚਾਰਂ ਸਙ੍ਕਸ੍ਸਰਤਿ ਧਾਵਤੀਤਿ ਸਙ੍ਕਸ੍ਸਰਸਮਾਚਾਰੋ.
ਸਮਣਪਟਿਞ੍ਞੋਤਿ ਸਲਾਕਗ੍ਗਹਣਾਦੀਸੁ ‘‘ਕਿਤ੍ਤਕਾ ਵਿਹਾਰੇ ਸਮਣਾ’’ਤਿ ਗਣਨਾਯ ਆਰਦ੍ਧਾਯ ‘‘ਅਹਮ੍ਪਿ ਸਮਣੋ, ਅਹਮ੍ਪਿ ਸਮਣੋ’’ਤਿ ਪਟਿਞ੍ਞਂ ਦੇਤਿ, ਸਲਾਕਗ੍ਗਹਣਾਦੀਨਿ ਕਰੋਤਿ. ਬ੍ਰਹ੍ਮਚਾਰਿਪਟਿਞ੍ਞੋਤਿ ਉਪੋਸਥਪਵਾਰਣਾਦੀਸੁ ‘‘ਅਹਮ੍ਪਿ ਬ੍ਰਹ੍ਮਚਾਰੀ’’ਤਿ ਪਟਿਞ੍ਞਾਯ ਤਾਨਿ ਕਮ੍ਮਾਨਿ ਪਵਿਸਤਿ. ਅਨ੍ਤੋਪੂਤੀਤਿ ਵਕ੍ਕਹਦਯਾਦੀਸੁ ਅਪੂਤਿਕਸ੍ਸਪਿ ਗੁਣਾਨਂ ਪੂਤਿਭਾਵੇਨ, ਅਨ੍ਤੋਪੂਤਿ. ਅਵਸ੍ਸੁਤੋਤਿ ਰਾਗੇਨ ਤਿਨ੍ਤੋ. ਕਸਮ੍ਬੁਜਾਤੋਤਿ ਰਾਗਾਦੀਹਿ ਕਿਲੇਸੇਹਿ ਕਚਵਰਜਾਤੋ.
ਏਤਦਵੋਚਾਤਿ ਗੋਗਣਂ ਗਙ੍ਗਾਤੀਰਾਭਿਮੁਖਂ ਕਤ੍ਵਾ ਪਰਿਸਪਰਿਯਨ੍ਤੇ ਠਿਤੋ ਆਦਿਤੋ ਪਟ੍ਠਾਯ ਯਾਵ ਪਰਿਯੋਸਾਨਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ, ‘‘ਸਤ੍ਥਾ ਓਰਿਮਤੀਰਾਦੀਨਂ ਅਨੁਪਗਚ੍ਛਨ੍ਤਾਦਿਵਸੇਨ ਸਕ੍ਕਾ ਪਟਿਪਤ੍ਤਿਂ ਪੂਰੇਤੁਨ੍ਤਿ ਵਦਤਿ. ਯਦਿ ਏਵਂ ਪੂਰੇਤੁਂ ਸਕ੍ਕਾ, ਅਹਂ ਪਬ੍ਬਜਿਤ੍ਵਾ ਪੂਰੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਤਂ ‘‘ਅਹਂ ਖੋ, ਭਨ੍ਤੇ’’ਤਿਆਦਿਵਚਨਂ ਅਵੋਚ.
ਵਚ੍ਛਗਿਦ੍ਧਿਨਿਯੋਤਿ ਵਚ੍ਛੇਸੁ ਸਸ੍ਨੇਹਾ ਥਨੇਹਿ ਖੀਰਂ ਪਗ੍ਘਰਨ੍ਤੇਹਿ ਵਚ੍ਛਕਸ੍ਨੇਹੇਨ ਸਯਮੇਵ ਗਮਿਸ੍ਸਨ੍ਤੀਤਿ. ਨਿਯ੍ਯਾਤੇਹੇਵਾਤਿ ਨਿਯ੍ਯਾਤੇਹਿਯੇਵ. ਗਾਵੀਸੁ ਹਿ ਅਨਿਯ੍ਯਾਤਿਤਾਸੁ ਗੋਸਾਮਿਕਾ ਆਗਨ੍ਤ੍ਵਾ, ‘‘ਏਕਾ ਗਾਵੀ ਨ ਦਿਸ੍ਸਤਿ, ਏਕੋ ਗੋਣੋ, ਏਕੋ ਵਚ੍ਛਕੋ ਨ ਦਿਸ੍ਸਤੀ’’ਤਿ ਤੁਯ੍ਹਂ ਪਿਟ੍ਠਿਤੋ ਪਿਟ੍ਠਿਤੋ ਵਿਚਰਿਸ੍ਸਨ੍ਤਿ, ਇਤਿ ਤੇ ਅਫਾਸੁਕਂ ਭਵਿਸ੍ਸਤਿ. ਪਬ੍ਬਜ੍ਜਾ ਚ ਨਾਮੇਸਾ ਸਇਣਸ੍ਸ ਨ ਰੁਹਤਿ, ਅਣਣਾ ਪਬ੍ਬਜ੍ਜਾ ਚ ਬੁਦ੍ਧਾਦੀਹਿ ਸਂਵਣ੍ਣਿਤਾਤਿ ਦਸ੍ਸਨਤ੍ਥਂ ਏਵਮਾਹ. ਨਿਯ੍ਯਾਤਾਤਿ ਨਿਯ੍ਯਾਤਿਤਾ. ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਂ ਕਥਿਤਂ.