੨. ਰਥੋਪਮਸੁਤ੍ਤਵਣ੍ਣਨਾ

੨੩੯. ਦੁਤਿਯੇ ਸੁਖਸੋਮਨਸ੍ਸਬਹੁਲੋਤਿ ਕਾਯਿਕਸੁਖਞ੍ਚੇਵ ਚੇਤਸਿਕਸੋਮਨਸ੍ਸਞ੍ਚ ਬਹੁਲਂ ਅਸ੍ਸਾਤਿ ਸੁਖਸੋਮਨਸ੍ਸਬਹੁਲੋ. ਯੋਨਿ ਚਸ੍ਸ ਆਰਦ੍ਧਾ ਹੋਤੀਤਿ ਕਾਰਣਞ੍ਚਸ੍ਸ ਪਰਿਪੁਣ੍ਣਂ ਹੋਤਿ. ਆਸਵਾਨਂ ਖਯਾਯਾਤਿ ਇਧ ਆਸਵਕ੍ਖਯੋਤਿ ਅਰਹਤ੍ਤਮਗ੍ਗੋ ਅਧਿਪ੍ਪੇਤੋ, ਤਦਤ੍ਥਾਯਾਤਿ ਅਤ੍ਥੋ. ਓਧਸ੍ਤਪਤੋਦੋਤਿ ਰਥਮਜ੍ਝੇ ਤਿਰਿਯਂ ਠਪਿਤਪਤੋਦੋ. ਯੇਨਿਚ੍ਛਕਨ੍ਤਿ ਯੇਨ ਦਿਸਾਭਾਗੇਨ ਇਚ੍ਛਤਿ. ਯਦਿਚ੍ਛਕਨ੍ਤਿ ਯਂ ਯਂ ਗਮਨਂ ਇਚ੍ਛਤਿ. ਸਾਰੇਯ੍ਯਾਤਿ ਪੇਸੇਯ੍ਯ. ਪਚ੍ਚਾਸਾਰੇਯ੍ਯਾਤਿ ਪਟਿਵਿਨਿਵਤ੍ਤੇਯ੍ਯ. ਆਰਕ੍ਖਾਯਾਤਿ ਰਕ੍ਖਣਤ੍ਥਾਯ. ਸਂਯਮਾਯਾਤਿ ਵੇਗਨਿਗ੍ਗਹਣਤ੍ਥਾਯ. ਦਮਾਯਾਤਿ ਨਿਬ੍ਬਿਸੇਵਨਤ੍ਥਾਯ. ਉਪਸਮਾਯਾਤਿ ਕਿਲੇਸੂਪਸਮਤ੍ਥਾਯ.

ਏਵਮੇਵ ਖੋਤਿ ਏਤ੍ਥ ਯਥਾ ਅਕੁਸਲਸ੍ਸ ਸਾਰਥਿਨੋ ਅਦਨ੍ਤੇ ਸਿਨ੍ਧਵੇ ਯੋਜੇਤ੍ਵਾ ਵਿਸਮਮਗ੍ਗੇਨ ਰਥਂ ਪੇਸੇਨ੍ਤਸ੍ਸ ਚਕ੍ਕਾਨਿਪਿ ਭਿਜ੍ਜਨ੍ਤਿ, ਅਕ੍ਖੋਪਿ ਸਿਨ੍ਧਵਾਨਞ੍ਚ ਖੁਰਾ, ਅਤ੍ਤਨਾਪਿ ਅਨਯਬ੍ਯਸਨਂ ਪਾਪੁਣਾਤਿ, ਨ ਚ ਇਚ੍ਛਿਤਿਚ੍ਛਿਤੇਨ ਗਮਨੇਨ ਸਾਰੇਤੁਂ ਸਕ੍ਕੋਤਿ; ਏਵਂ ਛਸੁ ਇਨ੍ਦ੍ਰਿਯੇਸੁ ਅਗੁਤ੍ਤਦ੍ਵਾਰੋ ਭਿਕ੍ਖੁ ਨ ਇਚ੍ਛਿਤਿਚ੍ਛਿਤਂ ਸਮਣਰਤਿਂ ਅਨੁਭਵਿਤੁਂ ਸਕ੍ਕੋਤਿ. ਯਥਾ ਪਨ ਛੇਕੋ ਸਾਰਥਿ ਦਨ੍ਤੇ ਸਿਨ੍ਧਵੇ ਯੋਜੇਤ੍ਵਾ, ਸਮੇ ਭੂਮਿਭਾਗੇ ਰਥਂ ਓਤਾਰੇਤ੍ਵਾ ਰਸ੍ਮਿਯੋ ਗਹੇਤ੍ਵਾ, ਸਿਨ੍ਧਵਾਨਂ ਖੁਰੇਸੁ ਸਤਿਂ ਠਪੇਤ੍ਵਾ, ਪਤੋਦਂ ਆਦਾਯ ਨਿਬ੍ਬਿਸੇਵਨੇ ਕਤ੍ਵਾ, ਪੇਸੇਨ੍ਤੋ ਇਚ੍ਛਿਤਿਚ੍ਛਿਤੇਨ ਗਮਨੇਨ ਸਾਰੇਤਿ. ਏਵਮੇਵ ਛਸੁ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ ਭਿਕ੍ਖੁ ਇਮਸ੍ਮਿਂ ਸਾਸਨੇ ਇਚ੍ਛਿਤਿਚ੍ਛਿਤਂ ਸਮਣਰਤਿਂ ਅਨੁਭੋਤਿ, ਸਚੇ ਅਨਿਚ੍ਚਾਨੁਪਸ੍ਸਨਾਭਿਮੁਖਂ ਞਾਣਂ ਪੇਸੇਤੁਕਾਮੋ ਹੋਤਿ, ਤਦਭਿਮੁਖਂ ਞਾਣਂ ਗਚ੍ਛਤਿ. ਦੁਕ੍ਖਾਨੁਪਸ੍ਸਨਾਦੀਸੁਪਿ ਏਸੇਵ ਨਯੋ.

ਭੋਜਨੇ ਮਤ੍ਤਞ੍ਞੂਤਿ ਭੋਜਨਮ੍ਹਿ ਪਮਾਣਞ੍ਞੂ. ਤਤ੍ਥ ਦ੍ਵੇ ਪਮਾਣਾਨਿ – ਪਟਿਗ੍ਗਹਣਪਮਾਣਞ੍ਚ ਪਰਿਭੋਗਪਮਾਣਞ੍ਚ. ਤਤ੍ਥ ਪਟਿਗ੍ਗਹਣਪਮਾਣੇ ਦਾਯਕਸ੍ਸ ਵਸੋ ਵੇਦਿਤਬ੍ਬੋ, ਦੇਯ੍ਯਧਮ੍ਮਸ੍ਸ ਵਸੋ ਵੇਦਿਤਬ੍ਬੋ, ਅਤ੍ਤਨੋ ਥਾਮੋ ਜਾਨਿਤਬ੍ਬੋ. ਏਵਰੂਪੋ ਹਿ ਭਿਕ੍ਖੁ ਸਚੇ ਦੇਯ੍ਯਧਮ੍ਮੋ ਬਹੁਕੋ ਹੋਤਿ, ਦਾਯਕੋ ਅਪ੍ਪਂ ਦਾਤੁਕਾਮੋ, ਦਾਯਕਸ੍ਸ ਵਸੇਨ ਅਪ੍ਪਂ ਗਣ੍ਹਾਤਿ. ਦੇਯ੍ਯਧਮ੍ਮੋ ਅਪ੍ਪੋ, ਦਾਯਕੋ ਬਹੁਂ ਦਾਤੁਕਾਮੋ, ਦੇਯ੍ਯਧਮ੍ਮਸ੍ਸ ਵਸੇਨ ਅਪ੍ਪਂ ਗਣ੍ਹਾਤਿ. ਦੇਯ੍ਯਧਮ੍ਮੋਪਿ ਬਹੁ, ਦਾਯਕੋਪਿ ਬਹੁਂ ਦਾਤੁਕਾਮੋ, ਅਤ੍ਤਨੋ ਥਾਮਂ ਞਤ੍ਵਾ ਪਮਾਣੇਨ ਗਣ੍ਹਾਤਿ. ਸੋ ਤਾਯ ਪਟਿਗ੍ਗਹਣੇ ਮਤ੍ਤਞ੍ਞੁਤਾਯ ਅਨੁਪ੍ਪਨ੍ਨਞ੍ਚ ਲਾਭਂ ਉਪ੍ਪਾਦੇਤਿ, ਉਪ੍ਪਨ੍ਨਞ੍ਚ ਥਾਵਰਂ ਕਰੋਤਿ ਧਮ੍ਮਿਕਤਿਸ੍ਸਮਹਾਰਾਜਕਾਲੇ ਸਤ੍ਤਵਸ੍ਸਿਕੋ ਸਾਮਣੇਰੋ ਵਿਯ.

ਰਞ੍ਞੋ ਕਿਰ ਪਞ੍ਚਹਿ ਸਕਟਸਤੇਹਿ ਗੁਲ਼ਂ ਆਹਰਿਂਸੁ. ਰਾਜਾ ‘‘ਮਨਾਪੋ ਪਣ੍ਣਾਕਾਰੋ, ਅਯ੍ਯੇਹਿ ਵਿਨਾ ਨ ਖਾਦਿਸ੍ਸਾਮਾ’’ਤਿ ਅਡ੍ਢਤੇਯ੍ਯਾਨਿ ਸਕਟਸਤਾਨਿ ਮਹਾਵਿਹਾਰਂ ਪੇਸੇਤ੍ਵਾ ਸਯਮ੍ਪਿ ਭੁਤ੍ਤਪਾਤਰਾਸੋ ਅਗਮਾਸਿ. ਭੇਰਿਯਾ ਪਹਟਾਯ ਦ੍ਵਾਦਸ ਭਿਕ੍ਖੁਸਹਸ੍ਸਾਨਿ ਸਨ੍ਨਿਪਤਿਂਸੁ. ਰਾਜਾ ਏਕਮਨ੍ਤੇ ਠਿਤੋ ਆਰਾਮਿਕਂ ਪਕ੍ਕੋਸਾਪੇਤ੍ਵਾ ਆਹ – ‘‘ਰਞ੍ਞੋ ਨਾਮ ਦਾਨੇ ਪਤ੍ਤਪੂਰੋਵ ਪਮਾਣਂ, ਗਹਿਤਭਾਜਨਂ ਪੂਰੇਤ੍ਵਾਵ ਦੇਹਿ, ਸਚੇ ਕੋਚਿ ਮਤ੍ਤਪਟਿਗ੍ਗਹਣੇ ਠਿਤੋ ਨ ਗਣ੍ਹਾਤਿ, ਮਯ੍ਹਂ ਆਰੋਚੇਯ੍ਯਾਸੀ’’ਤਿ.

ਅਥੇਕੋ ਮਹਾਥੇਰੋ ‘‘ਮਹਾਬੋਧਿਮਹਾਚੇਤਿਯਾਨਿ ਵਨ੍ਦਿਸ੍ਸਾਮੀ’’ਤਿ ਚੇਤਿਯਪਬ੍ਬਤਾ ਆਗਨ੍ਤ੍ਵਾ, ਵਿਹਾਰਂ ਪਵਿਸਨ੍ਤੋ ਮਹਾਮਣ੍ਡਪਟ੍ਠਾਨੇ ਭਿਕ੍ਖੂ ਗੁਲ਼ਂ ਗਣ੍ਹਨ੍ਤੇ ਦਿਸ੍ਵਾ ਪਚ੍ਛਤੋ ਆਗਚ੍ਛਨ੍ਤਂ ਸਾਮਣੇਰਂ ਆਹ, ‘‘ਨਤ੍ਥਿ ਤੇ ਗੁਲ਼ੇਨ ਅਤ੍ਥੋ’’ਤਿ. ‘‘ਆਮ, ਭਨ੍ਤੇ, ਨਤ੍ਥੀ’’ਤਿ. ਸਾਮਣੇਰ ਮਯਂ ਮਗ੍ਗਕਿਲਨ੍ਤਾ, ਏਕੇਨ ਕਪਿਟ੍ਠਫਲਮਤ੍ਤੇਨ ਪਿਣ੍ਡਕੇਨ ਅਮ੍ਹਾਕਂ ਅਤ੍ਥੋਤਿ. ਸਾਮਣੇਰੋ ਥਾਲਕਂ ਨੀਹਰਿਤ੍ਵਾ ਥੇਰਸ੍ਸ ਵਸ੍ਸਗ੍ਗਪਟਿਪਾਟਿਯਂ ਅਟ੍ਠਾਸਿ. ਆਰਾਮਿਕੋ ਗਹਣਮਾਨਂ ਪੂਰੇਤ੍ਵਾ ਉਕ੍ਖਿਪਿ, ਸਾਮਣੇਰੋ ਅਙ੍ਗੁਲਿਂ ਚਾਲੇਸਿ. ਤਾਤ ਸਾਮਣੇਰ, ਰਾਜਕੁਲਾਨਂ ਦਾਨੇ ਭਾਜਨਪੂਰਮੇਵ ਪਮਾਣਂ, ਥਾਲਕਪੂਰਂ ਗਣ੍ਹਾਹੀਤਿ. ਆਮ, ਉਪਾਸਕ, ਰਾਜਾਨੋ ਨਾਮ ਮਹਜ੍ਝਾਸਯਾ ਹੋਨ੍ਤਿ, ਅਮ੍ਹਾਕਂ ਪਨ ਉਪਜ੍ਝਾਯਸ੍ਸ ਏਤ੍ਤਕੇਨੇਵ ਅਤ੍ਥੋਤਿ.

ਰਾਜਾ ਤਸ੍ਸ ਕਥਂ ਸੁਤ੍ਵਾ, ‘‘ਕਿਂ ਭੋ ਸਾਮਣੇਰੋ ਭਣਤੀ’’ਤਿ? ਤਸ੍ਸ ਸਨ੍ਤਿਕਂ ਗਤੋ. ਆਰਾਮਿਕੋ ਆਹ – ‘‘ਸਾਮਿ, ਸਾਮਣੇਰਸ੍ਸ ਭਾਜਨਂ ਖੁਦ੍ਦਕਂ, ਬਹੁਂ ਨ ਗਣ੍ਹਾਤੀ’’ਤਿ. ਰਾਜਾ ਆਹ, ‘‘ਆਨੀਤਭਾਜਨਂ ਪੂਰੇਤ੍ਵਾ ਗਣ੍ਹਥ, ਭਨ੍ਤੇ’’ਤਿ. ਮਹਾਰਾਜ, ਰਾਜਾਨੋ ਨਾਮ ਮਹਜ੍ਝਾਸਯਾ ਹੋਨ੍ਤਿ, ਉਕ੍ਖਿਤ੍ਤਭਾਜਨਂ ਪੂਰੇਤ੍ਵਾਵ ਦਾਤੁਕਾਮਾ, ਅਮ੍ਹਾਕਂ ਪਨ ਉਪਜ੍ਝਾਯਸ੍ਸ ਏਤ੍ਤਕੇਨੇਵ ਅਤ੍ਥੋਤਿ. ਰਾਜਾ ਚਿਨ੍ਤੇਸਿ – ‘‘ਅਯਂ ਸਤ੍ਤਵਸ੍ਸਿਕਦਾਰਕੋ, ਅਜ੍ਜਾਪਿਸ੍ਸ ਮੁਖਤੋ ਖੀਰਗਨ੍ਧੋ ਨ ਮੁਚ੍ਚਤਿ, ਗਹੇਤ੍ਵਾ ਕੁਟੇ ਵਾ ਕੁਟੁਮ੍ਬੇ ਵਾ ਪੂਰੇਤ੍ਵਾ ਸ੍ਵੇਪਿ ਪੁਨਦਿਵਸੇਪਿ ਖਾਦਿਸ੍ਸਾਮਾਤਿ ਨ ਵਦਤਿ, ਸਕ੍ਕਾ ਬੁਦ੍ਧਸਾਸਨਂ ਪਰਿਗ੍ਗਹੇਤੁ’’ਨ੍ਤਿ ਪੁਰਿਸੇ ਆਣਾਪੇਸਿ, ‘‘ਭੋ, ਪਸਨ੍ਨੋਮ੍ਹਿ ਸਾਮਣੇਰਸ੍ਸ, ਇਤਰਾਨਿਪਿ ਅਡ੍ਢਤੇਯ੍ਯਾਨਿ ਸਕਟਸਤਾਨਿ ਆਨੇਤ੍ਵਾ ਸਘਂਸ੍ਸ ਦੇਥਾ’’ਤਿ.

ਸੋਯੇਵ ਪਨ ਰਾਜਾ ਏਕਦਿਵਸਂ ਤਿਤ੍ਤਿਰਮਂਸਂ ਖਾਦਿਤੁਕਾਮੋ ਚਿਨ੍ਤੇਸਿ – ‘‘ਸਚੇ ਅਹਂ ਅਙ੍ਗਾਰਪਕ੍ਕਂ ਤਿਤ੍ਤਿਰਮਂਸਂ ਖਾਦਿਤੁਕਾਮੋਸ੍ਮੀਤਿ ਅਞ੍ਞਸ੍ਸ ਕਥੇਸ੍ਸਾਮਿ, ਸਮਨ੍ਤਾ ਯੋਜਨਟ੍ਠਾਨੇ ਤਿਤ੍ਤਿਰਸਮੁਗ੍ਘਾਤਂ ਕਰਿਸ੍ਸਨ੍ਤੀ’’ਤਿ ਉਪ੍ਪਨ੍ਨਂ ਪਿਪਾਸਂ ਅਧਿਵਾਸੇਨ੍ਤੋ ਤੀਣਿ ਸਂਵਚ੍ਛਰਾਨਿ ਵੀਤਿਨਾਮੇਸਿ. ਅਥਸ੍ਸ ਕਣ੍ਣੇਸੁ ਪੁਬ੍ਬੋ ਸਣ੍ਠਾਸਿ, ਸੋ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ‘‘ਅਤ੍ਥਿ ਨੁ ਖੋ, ਭੋ, ਅਮ੍ਹਾਕਂ ਕੋਚਿ ਉਪਟ੍ਠਾਕੁਪਾਸਕੋ ਸੀਲਰਕ੍ਖਕੋ’’ਤਿ ਪੁਚ੍ਛਿ. ਆਮ, ਦੇਵ, ਅਤ੍ਥਿ, ਤਿਸ੍ਸੋ ਨਾਮ ਸੋ ਅਖਣ੍ਡਸੀਲਂ ਰਕ੍ਖਤੀਤਿ. ਅਥ ਨਂ ਵੀਮਂਸਿਤੁਕਾਮੋ ਪਕ੍ਕੋਸਾਪੇਸਿ. ਸੋ ਆਗਨ੍ਤ੍ਵਾ ਰਾਜਾਨਂ ਵਨ੍ਦਿਤ੍ਵਾ ਅਟ੍ਠਾਸਿ. ਤਤੋ ਨਂ ਆਹ – ‘‘ਤ੍ਵਂ, ਤਾਤ, ਤਿਸ੍ਸੋ ਨਾਮਾ’’ਤਿ? ‘‘ਆਮ ਦੇਵਾ’’ਤਿ. ਤੇਨ ਹਿ ਗਚ੍ਛਾਤਿ. ਤਸ੍ਮਿਂ ਗਤੇ ਏਕਂ ਕੁਕ੍ਕੁਟਂ ਆਹਰਾਪੇਤ੍ਵਾ ਏਕਂ ਪੁਰਿਸਂ ਆਣਾਪੇਸਿ, ‘‘ਗਚ੍ਛ ਤਿਸ੍ਸਂ ਵਦਾਹਿ, ਇਮਂ ਤੀਹਿ ਪਾਕੇਹਿ ਪਚਿਤ੍ਵਾ ਅਮ੍ਹਾਕਂ ਉਪਟ੍ਠਾਪੇਹੀ’’ਤਿ. ਸੋ ਗਨ੍ਤ੍ਵਾ ਤਥਾ ਅਵੋਚ. ਸੋ ਆਹ – ‘‘ਸਚੇ, ਭੋ, ਅਯਂ ਮਤਕੋ ਅਸ੍ਸ, ਯਥਾ ਜਾਨਾਮਿ, ਤਥਾ ਪਚਿਤ੍ਵਾ ਉਪਟ੍ਠਹੇਯ੍ਯਂ. ਪਾਣਾਤਿਪਾਤਂ ਪਨਾਹਂ ਨ ਕਰੋਮੀ’’ਤਿ. ਸੋ ਆਗਨ੍ਤ੍ਵਾ ਰਞ੍ਞੋ ਆਰੋਚੇਸਿ.

ਰਾਜਾ ਪੁਨ ‘‘ਏਕਵਾਰਂ ਗਚ੍ਛਾ’’ਤਿ ਪੇਸੇਸਿ. ਸੋ ਗਨ੍ਤ੍ਵਾ, ‘‘ਭੋ, ਰਾਜੁਪਟ੍ਠਾਨਂ ਨਾਮ ਭਾਰਿਯਂ, ਮਾ ਏਵਂ ਕਰਿ, ਪੁਨਪਿ ਸੀਲਂ ਸਕ੍ਕਾ ਸਮਾਦਾਤੁਂ, ਪਚੇਤ’’ਨ੍ਤਿ ਆਹ. ਅਥ ਨਂ ਤਿਸ੍ਸੋ ਅਵੋਚ, ‘‘ਭੋ, ਏਕਸ੍ਮਿਂ ਨਾਮ ਅਤ੍ਤਭਾਵੇ ਧੁਵਂ ਏਕਂ ਮਰਣਂ, ਨਾਹਂ ਪਾਣਾਤਿਪਾਤਂ ਕਰਿਸ੍ਸਾਮੀ’’ਤਿ. ਸੋ ਪੁਨਪਿ ਰਞ੍ਞੋ ਆਰੋਚੇਸਿ. ਰਾਜਾ ਤਤਿਯਮ੍ਪਿ ਪੇਸੇਤ੍ਵਾ ਅਸਮ੍ਪਟਿਚ੍ਛਨ੍ਤਂ ਪਕ੍ਕੋਸਾਪੇਤ੍ਵਾ ਅਤ੍ਤਨਾ ਪੁਚ੍ਛਿ. ਰਞ੍ਞੋਪਿ ਤਥੇਵ ਪਟਿਵਚਨਂ ਅਦਾਸਿ. ਅਥ ਰਾਜਾ ਪੁਰਿਸੇ ਆਣਾਪੇਸਿ, ‘‘ਅਯਂ ਰਞ੍ਞੋ ਆਣਂ ਕੋਪੇਤਿ, ਗਚ੍ਛਥੇਤਸ੍ਸ ਆਘਾਤਨਭਣ੍ਡਿਕਾਯਂ ਠਪੇਤ੍ਵਾ, ਸੀਸਂ ਛਿਨ੍ਦਥਾ’’ਤਿ. ਰਹੋ ਚ ਪਨ ਨੇਸਂ ਸਞ੍ਞਮਦਾਸਿ – ‘‘ਇਮਂ ਸਨ੍ਤਜ੍ਜਯਮਾਨਾ ਨੇਤ੍ਵਾ ਸੀਸਮਸ੍ਸ ਆਘਾਤਨਭਣ੍ਡਿਕਾਯਂ ਠਪੇਤ੍ਵਾ ਆਗਨ੍ਤ੍ਵਾ ਮਯ੍ਹਂ ਆਰੋਚੇਥਾ’’ਤਿ.

ਤੇ ਤਂ ਆਘਾਤਨਭਣ੍ਡਿਕਾਯਂ ਨਿਪਜ੍ਜਾਪੇਤ੍ਵਾ ਤਮਸ੍ਸ ਕੁਕ੍ਕੁਟਂ ਹਤ੍ਥੇਸੁ ਠਪਯਿਂਸੁ. ਸੋ ਤਂ ਹਦਯੇ ਠਪੇਤ੍ਵਾ ‘‘ਅਹਂ, ਤਾਤ, ਮਮ ਜੀਵਿਤਂ ਤੁਯ੍ਹਂ ਦੇਮਿ, ਤਵ ਜੀਵਿਤਂ ਅਹਂ ਗਣ੍ਹਾਮਿ, ਤ੍ਵਂ ਨਿਬ੍ਭਯੋ ਗਚ੍ਛਾ’’ਤਿ ਵਿਸ੍ਸਜ੍ਜੇਸਿ. ਕੁਕ੍ਕੁਟੋ ਪਕ੍ਖੇ ਪਪ੍ਫੋਟੇਤ੍ਵਾ ਆਕਾਸੇਨ ਗਨ੍ਤ੍ਵਾ ਵਟਰੁਕ੍ਖੇ ਨਿਲੀਯਿ. ਤਸ੍ਸ ਕੁਕ੍ਕੁਟਸ੍ਸ ਅਭਯਦਿਨ੍ਨਟ੍ਠਾਨਂ ਕੁਕ੍ਕੁਟਗਿਰਿ ਨਾਮ ਜਾਤਂ.

ਰਾਜਾ ਤਂ ਪਵਤ੍ਤਿਂ ਸੁਤ੍ਵਾ ਅਮਚ੍ਚਪੁਤ੍ਤਂ ਪਕ੍ਕੋਸਾਪੇਤ੍ਵਾ ਸਬ੍ਬਾਭਰਣੇਹਿ ਅਲਙ੍ਕਰਿਤ੍ਵਾ ਆਹ – ‘‘ਤਾਤ, ਮਯਾ ਤ੍ਵਂ ਏਤਦਤ੍ਥਮੇਵ ਵੀਮਂਸਿਤੋ, ਮਯ੍ਹਂ ਤਿਤ੍ਤਿਰਮਂਸਂ ਖਾਦਿਤੁਕਾਮਸ੍ਸ ਤੀਣਿ ਸਂਵਚ੍ਛਰਾਨਿ ਅਤਿਕ੍ਕਨ੍ਤਾਨਿ, ਸਕ੍ਖਿਸ੍ਸਸਿ ਮੇ ਤਿਕੋਟਿਪਰਿਸੁਦ੍ਧਂ ਕਤ੍ਵਾ ਉਪਟ੍ਠਾਪੇਤੁ’’ਨ੍ਤਿ. ‘‘ਏਤਂ ਨਾਮ, ਦੇਵ, ਮਯ੍ਹਂ ਕਮ੍ਮ’’ਨ੍ਤਿ ਨਿਕ੍ਖਮਿਤ੍ਵਾ ਦ੍ਵਾਰਨ੍ਤਰੇ ਠਿਤੋ ਏਕਂ ਪੁਰਿਸਂ ਪਾਤੋਵ ਤਯੋ ਤਿਤ੍ਤਿਰੇ ਗਹੇਤ੍ਵਾ ਪਵਿਸਨ੍ਤਂ ਦਿਸ੍ਵਾ, ਦ੍ਵੇ ਕਹਾਪਣੇ ਦਤ੍ਵਾ ਤਿਤ੍ਤਿਰੇ ਆਦਾਯ ਪਰਿਸੋਧੇਤ੍ਵਾ, ਜੀਰਕਾਦੀਹਿ ਵਾਸੇਤ੍ਵਾ, ਅਙ੍ਗਾਰੇਸੁ ਸੁਪਕ੍ਕੇ ਪਚਿਤ੍ਵਾ ਰਞ੍ਞੋ ਉਪਟ੍ਠਾਪੇਸਿ. ਰਾਜਾ ਮਹਾਤਲੇ ਸਿਰੀਪਲ੍ਲਙ੍ਕੇ ਨਿਸਿਨ੍ਨੋਵ ਏਕਂ ਗਹੇਤ੍ਵਾ ਥੋਕਂ ਛਿਨ੍ਦਿਤ੍ਵਾ ਮੁਖੇ ਪਕ੍ਖਿਪਿ, ਤਾਵਦੇਵਸ੍ਸ ਸਤ੍ਤਰਸਹਰਣੀਸਹਸ੍ਸਾਨਿ ਫਰਿਤ੍ਵਾ ਅਟ੍ਠਾਸਿ.

ਤਸ੍ਮਿਂ ਸਮਯੇ ਭਿਕ੍ਖੁਸਙ੍ਘਂ ਸਰਿਤ੍ਵਾ, ‘‘ਮਾਦਿਸੋ ਨਾਮ ਪਥਵਿਸ੍ਸਰੋ ਰਾਜਾ ਤਿਤ੍ਤਿਰਮਂਸਂ ਖਾਦਿਤੁਕਾਮੋ ਤੀਣਿ ਸਂਵਚ੍ਛਰਾਨਿ ਨ ਲਭਿ, ਅਪਚ੍ਚਮਾਨੋ ਭਿਕ੍ਖੁਸਙ੍ਘੋ ਕੁਤੋ ਲਭਿਸ੍ਸਤੀ’’ਤਿ? ਮੁਖੇ ਪਕ੍ਖਿਤ੍ਤਕ੍ਖਣ੍ਡਂ ਭੂਮਿਯਂ ਛਡ੍ਡੇਸਿ. ਅਮਚ੍ਚਪੁਤ੍ਤੋ ਜਣ੍ਣੁਕੇਹਿ ਪਤਿਤ੍ਵਾ ਮੁਖੇਨ ਗਣ੍ਹਿ. ਰਾਜਾ ‘‘ਅਪੇਹਿ, ਤਾਤ, ਜਾਨਾਮਹਂ ਤਵ ਨਿਦ੍ਦੋਸਭਾਵਂ, ਇਮਿਨਾ ਨਾਮ ਕਾਰਣੇਨ ਮਯਾ ਏਤਂ ਛਡ੍ਡਿਤ’’ਨ੍ਤਿ ਕਥੇਤ੍ਵਾ, ‘‘ਸੇਸਕਂ ਤਥੇਵ ਸਙ੍ਗੋਪੇਤ੍ਵਾ ਠਪੇਹੀ’’ਤਿ ਆਹ.

ਪੁਨਦਿਵਸੇ ਰਾਜਕੁਲੂਪਕੋ ਥੇਰੋ ਪਿਣ੍ਡਾਯ ਪਾਵਿਸਿ. ਅਮਚ੍ਚਪੁਤ੍ਤੋ ਤਂ ਦਿਸ੍ਵਾ ਪਤ੍ਤਂ ਗਹੇਤ੍ਵਾ ਰਾਜਗੇਹਂ ਪਵੇਸੇਸਿ. ਅਞ੍ਞਤਰੋ ਵੁਡ੍ਢਪਬ੍ਬਜਿਤੋਪਿ ਥੇਰਸ੍ਸ ਪਚ੍ਛਾਸਮਣੋ ਵਿਯ ਹੁਤ੍ਵਾ ਅਨੁਬਨ੍ਧਨ੍ਤੋ ਪਾਵਿਸਿ. ਥੇਰੋ ‘‘ਰਞ੍ਞਾ ਪਕ੍ਕੋਸਾਪਿਤਭਿਕ੍ਖੁ ਭਵਿਸ੍ਸਤੀ’’ਤਿ ਪਮਜ੍ਜਿ. ਅਮਚ੍ਚਪੁਤ੍ਤੋਪਿ ‘‘ਥੇਰਸ੍ਸ ਉਪਟ੍ਠਾਕੋ ਭਵਿਸ੍ਸਤੀ’’ਤਿ ਪਮਾਦਂ ਆਪਜ੍ਜਿ. ਤੇਸਂ ਨਿਸੀਦਾਪੇਤ੍ਵਾ ਯਾਗੁਂ ਅਦਂਸੁ. ਯਾਗੁਯਾ ਪੀਤਾਯ ਰਾਜਾ ਤਿਤ੍ਤਿਰੇ ਉਪਨੇਸਿ. ਥੇਰੋ ਏਕਂ ਗਣ੍ਹਿ, ਇਤਰੋਪਿ ਏਕਂ ਗਣ੍ਹਿ. ਰਾਜਾ ‘‘ਅਨੁਭਾਗੋ ਅਤ੍ਥਿ, ਅਨਾਪੁਚ੍ਛਿਤ੍ਵਾ ਖਾਦਿਤੁਂ ਨ ਯੁਤ੍ਤ’’ਨ੍ਤਿ ਮਹਾਥੇਰਂ ਆਪੁਚ੍ਛਿ. ਥੇਰੋ ਹਤ੍ਥਂ ਪਿਦਹਿ, ਮਹਲ੍ਲਕਤ੍ਥੇਰੋ ਸਮ੍ਪਟਿਚ੍ਛਿ. ਰਾਜਾ ਅਨਤ੍ਤਮਨੋ ਹੁਤ੍ਵਾ ਕਤਭਤ੍ਤਕਿਚ੍ਚਂ ਥੇਰਂ ਪਤ੍ਤਂ ਆਦਾਯ ਅਨੁਗਚ੍ਛਨ੍ਤੋ ਆਹ – ‘‘ਭਨ੍ਤੇ, ਕੁਲਗੇਹਂ ਆਗਚ੍ਛਨ੍ਤੇਹਿ ਉਗ੍ਗਹਿਤਵਤ੍ਤਂ ਭਿਕ੍ਖੁਂ ਗਹੇਤ੍ਵਾ ਆਗਨ੍ਤੁਂ ਵਟ੍ਟਤੀ’’ਤਿ. ਥੇਰੋ ਤਸ੍ਮਿਂ ਖਣੇ ਅਞ੍ਞਾਸਿ ‘‘ਨ ਏਸ ਰਞ੍ਞਾ ਪਕ੍ਕੋਸਾਪਿਤੋ’’ਤਿ.

ਪੁਨਦਿਵਸੇ ਉਪਟ੍ਠਾਕਸਾਮਣੇਰਂ ਗਹੇਤ੍ਵਾ ਪਾਵਿਸਿ. ਰਾਜਾ ਤਦਾਪਿ ਯਾਗੁਯਾ ਪੀਤਾਯ ਤਿਤ੍ਤਿਰੇ ਉਪਨਾਮੇਸਿ. ਥੇਰੋ ਏਕਂ ਅਗ੍ਗਹੇਸਿ, ਸਾਮਣੇਰੋ ਅਙ੍ਗੁਲਿਂ ਚਾਲੇਤ੍ਵਾ ਮਜ੍ਝੇ ਛਿਨ੍ਦਾਪੇਤ੍ਵਾ ਏਕਕੋਟ੍ਠਾਸਮੇਵ ਅਗ੍ਗਹੇਸਿ. ਰਾਜਾ ਤਂ ਕੋਟ੍ਠਾਸਂ ਮਹਾਥੇਰਸ੍ਸ ਉਪਨਾਮੇਸਿ. ਮਹਾਥੇਰੋ ਹਤ੍ਥਂ ਪਿਦਹਿ, ਸਾਮਣੇਰੋਪਿ ਪਿਦਹਿ. ਰਾਜਾ ਅਵਿਦੂਰੇ ਨਿਸੀਦਿਤ੍ਵਾ ਖਣ੍ਡਾਖਣ੍ਡਂ ਛਿਨ੍ਦਿਤ੍ਵਾ ਖਾਦਨ੍ਤੋ ‘‘ਉਗ੍ਗਹਿਤਵਤ੍ਤੇ ਨਿਸ੍ਸਾਯ ਦਿਯਡ੍ਢਤਿਤ੍ਤਿਰੇ ਖਾਦਿਤੁਂ ਲਭਿਮ੍ਹਾ’’ਤਿ ਆਹ. ਤਸ੍ਸ ਮਂਸੇ ਖਾਦਿਤਮਤ੍ਤੇਵ ਕਣ੍ਣੇਹਿ ਪੁਬ੍ਬੋ ਨਿਕ੍ਖਮਿ. ਤਤੋ ਮੁਖਂ ਵਿਕ੍ਖਾਲੇਤ੍ਵਾ ਸਾਮਣੇਰਂ ਉਪਸਙ੍ਕਮਿਤ੍ਵਾ, ‘‘ਪਸਨ੍ਨੋਸ੍ਮਿ, ਤਾਤ, ਅਟ੍ਠ ਤੇ ਧੁਵਭਤ੍ਤਾਨਿ ਦੇਮੀ’’ਤਿ ਆਹ. ਅਹਂ, ਮਹਾਰਾਜ, ਉਪਜ੍ਝਾਯਸ੍ਸ ਦਮ੍ਮੀਤਿ. ਅਪਰਾਨਿ ਅਟ੍ਠ ਦੇਮੀਤਿ. ਤਾਨਿ ਅਮ੍ਹਾਕਂ ਆਚਰਿਯਸ੍ਸ ਦਮ੍ਮੀਤਿ. ਅਪਰਾਨਿਪਿ ਅਟ੍ਠ ਦੇਮੀਤਿ. ਤਾਨਿ ਸਮਾਨੁਪਜ੍ਝਾਯਾਨਂ ਦਮ੍ਮੀਤਿ. ਅਪਰਾਨਿਪਿ ਅਟ੍ਠ ਦੇਮੀਤਿ. ਤਾਨਿ ਭਿਕ੍ਖੁਸਙ੍ਘਸ੍ਸ ਦਮ੍ਮੀਤਿ. ਅਪਰਾਨਿਪਿ ਅਟ੍ਠ ਦੇਮੀਤਿ. ਸਾਮਣੇਰੋ ਅਧਿਵਾਸੇਸਿ. ਏਵਂ ਪਟਿਗ੍ਗਹਣਮਤ੍ਤਂ ਜਾਨਨ੍ਤੋ ਅਨੁਪ੍ਪਨ੍ਨਞ੍ਚੇਵ ਲਾਭਂ ਉਪ੍ਪਾਦੇਤਿ, ਉਪ੍ਪਨ੍ਨਞ੍ਚ ਥਾਵਰਂ ਕਰੋਤਿ. ਇਦਂ ਪਟਿਗ੍ਗਹਣਪਮਾਣਂ ਨਾਮ. ਤਤ੍ਥ ਪਰਿਭੋਗਪਮਾਣਂ ਪਚ੍ਚਵੇਕ੍ਖਣਪਯੋਜਨਂ, ‘‘ਇਦਮਤ੍ਥਿਯਂ ਭੋਜਨਂ ਭੁਞ੍ਜਾਮੀ’’ਤਿ ਪਨ ਪਚ੍ਚਵੇਕ੍ਖਿਤਪਰਿਭੋਗਸ੍ਸੇਵ ਪਯੋਜਨਤ੍ਤਾ ਪਰਿਭੋਗਪਮਾਣਂਯੇਵ ਨਾਮ, ਤਂ ਇਧ ਅਧਿਪ੍ਪੇਤਂ. ਤੇਨੇਵ ਪਟਿਸਙ੍ਖਾ ਯੋਨਿਸੋਤਿਆਦਿਮਾਹ, ਇਤਰਮ੍ਪਿ ਪਨ ਵਟ੍ਟਤਿਯੇਵ.

ਸੀਹਸੇਯ੍ਯਨ੍ਤਿ ਏਤ੍ਥ ਕਾਮਭੋਗਿਸੇਯ੍ਯਾ, ਪੇਤਸੇਯ੍ਯਾ, ਸੀਹਸੇਯ੍ਯਾ, ਤਥਾਗਤਸੇਯ੍ਯਾਤਿ ਚਤਸ੍ਸੋ ਸੇਯ੍ਯਾ. ਤਤ੍ਥ ‘‘ਯੇਭੁਯ੍ਯੇਨ, ਭਿਕ੍ਖਵੇ, ਕਾਮਭੋਗੀ ਵਾਮੇਨ ਪਸ੍ਸੇਨ ਸੇਨ੍ਤੀ’’ਤਿ (ਅ. ਨਿ. ੪.੨੪੬) ਅਯਂ ਕਾਮਭੋਗਿਸੇਯ੍ਯਾ. ਤੇਸਞ੍ਹਿ ਯੇਭੁਯ੍ਯੇਨ ਦਕ੍ਖਿਣਪਸ੍ਸੇਨ ਸਯਾਨੋ ਨਾਮ ਨਤ੍ਥਿ.

‘‘ਯੇਭੁਯ੍ਯੇਨ, ਭਿਕ੍ਖਵੇ, ਪੇਤਾ ਉਤ੍ਤਾਨਾ ਸੇਨ੍ਤੀ’’ਤਿ (ਅ. ਨਿ. ੪.੨੪੬) ਅਯਂ ਪੇਤਸੇਯ੍ਯਾ. ਪੇਤਾ ਹਿ ਅਪ੍ਪਮਂਸਲੋਹਿਤਤ੍ਤਾ ਅਟ੍ਠਿਸਙ੍ਘਾਟਜਟਿਤਾ ਏਕੇਨ ਪਸ੍ਸੇਨ ਸਯਿਤੁਂ ਨ ਸਕ੍ਕੋਨ੍ਤਿ, ਉਤ੍ਤਾਨਾਵ ਸਯਨ੍ਤਿ.

‘‘ਯੇਭੁਯ੍ਯੇਨ, ਭਿਕ੍ਖਵੇ, ਸੀਹੋ ਮਿਗਰਾਜਾ ਨਙ੍ਗੁਟ੍ਠਂ ਅਨ੍ਤਰਸਤ੍ਥਿਮ੍ਹਿ ਅਨੁਪਕ੍ਖਿਪਿਤ੍ਵਾ ਦਕ੍ਖਿਣੇਨ ਪਸ੍ਸੇਨ ਸਯਤੀ’’ਤਿ ਅਯਂ ਸੀਹਸੇਯ੍ਯਾ. ਤੇਜੁਸ੍ਸਦਤ੍ਤਾ ਹਿ ਸੀਹੋ ਮਿਗਰਾਜਾ ਦ੍ਵੇ ਪੁਰਿਮਪਾਦੇ ਏਕਸ੍ਮਿਂ, ਪਚ੍ਛਿਮਪਾਦੇ ਏਕਸ੍ਮਿਂ ਠਾਨੇ ਠਪੇਤ੍ਵਾ ਨਙ੍ਗੁਟ੍ਠਂ ਅਨ੍ਤਰਸਤ੍ਥਿਮ੍ਹਿ ਪਕ੍ਖਿਪਿਤ੍ਵਾ ਪੁਰਿਮਪਾਦਪਚ੍ਛਿਮਪਾਦਨਙ੍ਗੁਟ੍ਠਾਨਂ ਠਿਤੋਕਾਸਂ ਸਲ੍ਲਕ੍ਖੇਤ੍ਵਾ ਦ੍ਵਿਨ੍ਨਂ ਪੁਰਿਮਪਾਦਾਨਂ ਮਤ੍ਥਕੇ ਸੀਸਂ ਠਪੇਤ੍ਵਾ ਸਯਤਿ, ਦਿਵਸਮ੍ਪਿ ਸਯਿਤ੍ਵਾ ਪਬੁਜ੍ਝਮਾਨੋ ਨ ਉਤ੍ਰਸਨ੍ਤੋ ਪਬੁਜ੍ਝਤਿ, ਸੀਸਂ ਪਨ ਉਕ੍ਖਿਪਿਤ੍ਵਾ ਪੁਰਿਮਪਾਦਾਦੀਨਂ ਠਿਤੋਕਾਸਂ ਸਲ੍ਲਕ੍ਖੇਤਿ. ਸਚੇ ਕਿਞ੍ਚਿ ਠਾਨਂ ਵਿਜਹਿਤ੍ਵਾ ਠਿਤਂ ਹੋਤਿ, ‘‘ਨਯਿਦਂ ਤੁਯ੍ਹਂ ਜਾਤਿਯਾ ਸੂਰਭਾਵਸ੍ਸ ਚ ਅਨੁਰੂਪ’’ਨ੍ਤਿ ਅਨਤ੍ਤਮਨੋ ਹੁਤ੍ਵਾ ਤਤ੍ਥੇਵ ਸਯਤਿ, ਨ ਗੋਚਰਾਯ ਪਕ੍ਕਮਤਿ. ਅਵਿਜਹਿਤ੍ਵਾ ਠਿਤੇ ਪਨ ‘‘ਤੁਯ੍ਹਂ ਜਾਤਿਯਾ ਚ ਸੂਰਭਾਵਸ੍ਸ ਚ ਅਨੁਰੂਪਮਿਦ’’ਨ੍ਤਿ ਹਟ੍ਠਤੁਟ੍ਠੋ ਉਟ੍ਠਾਯ ਸੀਹਵਿਜਮ੍ਭਿਤਂ ਵਿਜਮ੍ਭਿਤ੍ਵਾ ਕੇਸਰਭਾਰਂ ਵਿਧੁਨਿਤ੍ਵਾ ਤਿਕ੍ਖਤ੍ਤੁਂ ਸੀਹਨਾਦਂ ਨਦਿਤ੍ਵਾ ਗੋਚਰਾਯ ਪਕ੍ਕਮਤਿ.

ਚਤੁਤ੍ਥਜ੍ਝਾਨਸੇਯ੍ਯਾ ਪਨ ਤਥਾਗਤਸੇਯ੍ਯਾਤਿ ਵੁਚ੍ਚਤਿ. ਤਾਸੁ ਇਧ ਸੀਹਸੇਯ੍ਯਾ ਆਗਤਾ. ਅਯਞ੍ਹਿ ਤੇਜੁਸ੍ਸਦਇਰਿਯਾਪਥਤ੍ਤਾ ਉਤ੍ਤਮਸੇਯ੍ਯਾ ਨਾਮ.

ਪਾਦੇ ਪਾਦਨ੍ਤਿ ਦਕ੍ਖਿਣਪਾਦੇ ਵਾਮਪਾਦਂ. ਅਚ੍ਚਾਧਾਯਾਤਿ ਅਤਿਆਧਾਯ, ਈਸਕਂ ਅਤਿਕ੍ਕਮ੍ਮ ਠਪੇਤ੍ਵਾ. ਗੋਪ੍ਫਕੇਨ ਹਿ ਗੋਪ੍ਫਕੇ, ਜਾਣੁਨਾ ਵਾ ਜਾਣੁਮ੍ਹਿ ਸਙ੍ਘਟ੍ਟਿਯਮਾਨੇ ਅਭਿਣ੍ਹਂ ਵੇਦਨਾ ਉਪ੍ਪਜ੍ਜਤਿ, ਚਿਤ੍ਤਂ ਏਕਗ੍ਗਂ ਨ ਹੋਤਿ, ਸੇਯ੍ਯਾ ਅਫਾਸੁਕਾ ਹੋਤਿ. ਯਥਾ ਪਨ ਨ ਸਙ੍ਘਂਟ੍ਟੇਤਿ, ਏਵਂ ਅਤਿਕ੍ਕਮ੍ਮ ਠਪਿਤੇ ਵੇਦਨਾ ਨੁਪ੍ਪਜ੍ਜਤਿ, ਚਿਤ੍ਤਂ ਏਕਗ੍ਗਂ ਹੋਤਿ, ਸੇਯ੍ਯਾ ਫਾਸੁਕਾ ਹੋਤਿ. ਤਸ੍ਮਾ ਏਵਂ ਸੇਯ੍ਯਂ ਕਪ੍ਪੇਤਿ.

ਸਤੋ ਸਮ੍ਪਜਾਨੋਤਿ ਸਤਿਯਾ ਚੇਵ ਸਮ੍ਪਜਞ੍ਞੇਨ ਚ ਸਮਨ੍ਨਾਗਤੋ. ਕਥਂ ਨਿਦ੍ਦਾਯਨ੍ਤੋ ਸਤੋ ਸਮ੍ਪਜਾਨੋ ਹੋਤੀਤਿ? ਸਤਿਸਮ੍ਪਜਞ੍ਞਸ੍ਸ ਅਪ੍ਪਹਾਨੇਨ. ਅਯਞ੍ਹਿ ਦਿਵਸਞ੍ਚੇਵ ਸਕਲਯਾਮਞ੍ਚ ਆਵਰਣੀਯੇਹਿ ਧਮ੍ਮੇਹਿ ਚਿਤ੍ਤਂ ਪਰਿਸੋਧੇਤ੍ਵਾ ਪਠਮਯਾਮਾਵਸਾਨੇ ਚਙ੍ਕਮਾ ਓਰੁਯ੍ਹ ਪਾਦੇ ਧੋਵਨ੍ਤੋਪਿ ਮੂਲਕਮ੍ਮਟ੍ਠਾਨਂ ਅਵਿਜਹਨ੍ਤੋਵ ਧੋਵਤਿ, ਤਂ ਅਵਿਜਹਨ੍ਤੋਵ ਦ੍ਵਾਰਂ ਵਿਵਰਤਿ, ਮਞ੍ਚੇ ਨਿਸੀਦਤਿ, ਅਵਿਜਹਨ੍ਤੋਵ ਨਿਦ੍ਦਂ ਓਕ੍ਕਮਤਿ. ਪਬੁਜ੍ਝਨ੍ਤੋ ਪਨ ਮੂਲਕਮ੍ਮਟ੍ਠਾਨਂ ਗਹੇਤ੍ਵਾਵ ਪਬੁਜ੍ਝਤਿ. ਏਵਂ ਨਿਦ੍ਦਂ ਓਕ੍ਕਮਨ੍ਤੋਪਿ ਸਤੋ ਸਮ੍ਪਜਾਨੋ ਹੋਤਿ. ਏਵਂ ਪਨ ਞਾਣਧਾਤੁਕਨ੍ਤਿ ਨ ਰੋਚਯਿਂਸੁ.

ਵੁਤ੍ਤਨਯੇਨ ਪਨੇਸ ਚਿਤ੍ਤਂ ਪਰਿਸੋਧੇਤ੍ਵਾ ਪਠਮਯਾਮਾਵਸਾਨੇ ‘‘ਉਪਾਦਿਨ੍ਨਕਂ ਸਰੀਰਂ ਨਿਦ੍ਦਾਯ ਸਮਸ੍ਸਾਸੇਸ੍ਸਾਮੀ’’ਤਿ ਚਙ੍ਕਮਾ ਓਰੁਯ੍ਹ ਮੂਲਕਮ੍ਮਟ੍ਠਾਨਂ ਅਵਿਜਹਨ੍ਤੋਵ ਪਾਦੇ ਧੋਵਤਿ, ਦ੍ਵਾਰਂ ਵਿਵਰਤਿ, ਮਞ੍ਚੇ ਪਨ ਨਿਸੀਦਿਤ੍ਵਾ ਮੂਲਕਮ੍ਮਟ੍ਠਾਨਂ ਪਹਾਯ, ‘‘ਖਨ੍ਧਾਵ ਖਨ੍ਧੇਸੁ, ਧਾਤੁਯੋਵ ਧਾਤੂਸੁ ਪਟਿਹਞ੍ਞਨ੍ਤੀ’’ਤਿ ਸੇਨਾਸਨਂ ਪਚ੍ਚਵੇਕ੍ਖਨ੍ਤੋ ਕਮੇਨ ਨਿਦ੍ਦਂ ਓਕ੍ਕਮਤਿ, ਪਬੁਜ੍ਝਨ੍ਤੋ ਪਨ ਮੂਲਕਮ੍ਮਟ੍ਠਾਨਂ ਗਹੇਤ੍ਵਾਵ ਪਬੁਜ੍ਝਤਿ. ਏਵਂ ਨਿਦ੍ਦਂ ਓਕ੍ਕਮਨ੍ਤੋਪਿ ਸਤੋ ਸਮ੍ਪਜਾਨੋ ਨਾਮ ਹੋਤੀਤਿ ਵੇਦਿਤਬ੍ਬੋ.

ਇਤਿ ਇਮਸ੍ਮਿਂ ਸੁਤ੍ਤੇ ਤਿਵਙ੍ਗਿਕਾ ਪੁਬ੍ਬਭਾਗਵਿਪਸ੍ਸਨਾਵ ਕਥਿਤਾ. ਏਤ੍ਤਕੇਨੇਵ ਪਨ ਵੋਸਾਨਂ ਅਨਾਪਜ੍ਜਿਤ੍ਵਾ ਤਾਨੇਵ ਇਨ੍ਦ੍ਰਿਯਬਲਬੋਜ੍ਝਙ੍ਗਾਨਿ ਸਮੋਧਾਨੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਭਿਕ੍ਖੁ ਅਰਹਤ੍ਤਂ ਪਾਪੁਣਾਤੀਤਿ. ਏਵਂ ਯਾਵ ਅਰਹਤ੍ਤਾ ਦੇਸਨਾ ਕਥੇਤਬ੍ਬਾ.