੧. ਆਸੀਵਿਸੋਪਮਸੁਤ੍ਤਵਣ੍ਣਨਾ

੨੩੮. ਆਸੀਵਿਸਵਗ੍ਗਸ੍ਸ ਪਠਮੇ ਭਿਕ੍ਖੂ ਆਮਨ੍ਤੇਸੀਤਿ ਏਕਚਾਰਿਕਦ੍ਵਿਚਾਰਿਕਤਿਚਾਰਿਕਚਤੁਚਾਰਿਕਪਞ੍ਚਚਾਰਿਕੇ ਸਭਾਗਵੁਤ੍ਤਿਨੋ ਕਾਰਕੇ ਯੁਤ੍ਤਪਯੁਤ੍ਤੇ ਸਬ੍ਬੇਪਿ ਦੁਕ੍ਖਲਕ੍ਖਣਕਮ੍ਮਟ੍ਠਾਨਿਕੇ ਪਰਿਵਾਰੇਤ੍ਵਾ ਨਿਸਿਨ੍ਨੇ ਯੋਗਾਵਚਰੇ ਭਿਕ੍ਖੂ ਆਮਨ੍ਤੇਸਿ. ਇਦਞ੍ਹਿ ਸੁਤ੍ਤਂ ਪੁਗ੍ਗਲਜ੍ਝਾਸਯੇਨ ਵੁਤ੍ਤਂ. ਪੁਗ੍ਗਲੇਸੁਪਿ ਵਿਪਞ੍ਚਿਤਞ੍ਞੂਨਂ ਦਿਸਾਵਾਸਿਕਾਨਂ ਦੁਕ੍ਖਲਕ੍ਖਣਕਮ੍ਮਟ੍ਠਾਨਿਕਾਨਂ ਉਪਟ੍ਠਾਨਵੇਲਾਯ ਆਗਨ੍ਤ੍ਵਾ ਸਤ੍ਥਾਰਂ ਪਰਿਵਾਰੇਤ੍ਵਾ ਨਿਸਿਨ੍ਨਾਨਂ ਵਸੇਨ ਵੁਤ੍ਤਂ. ਏਵਂ ਸਨ੍ਤੇਪਿ ਉਗ੍ਘਟਿਤਞ੍ਞੂਆਦੀਨਂ ਚਤੁਨ੍ਨਮ੍ਪਿ ਪੁਗ੍ਗਲਾਨਂ ਪਚ੍ਚਯਭੂਤਮੇਵੇਤਂ. ਉਗ੍ਘਟਿਤਞ੍ਞੂ ਪੁਗ੍ਗਲੋ ਹਿ ਇਮਸ੍ਸ ਸੁਤ੍ਤਸ੍ਸ ਮਾਤਿਕਾਨਿਕ੍ਖੇਪੇਨੇਵ ਅਰਹਤ੍ਤਂ ਪਾਪੁਣਿਸ੍ਸਤਿ, ਵਿਪਞ੍ਚਿਤਞ੍ਞੂ ਮਾਤਿਕਾਯ ਵਿਤ੍ਥਾਰਭਾਜਨੇਨ, ਨੇਯ੍ਯਪੁਗ੍ਗਲੋ ਇਮਮੇਵ ਸੁਤ੍ਤਂ ਸਜ੍ਝਾਯਨ੍ਤੋ ਪਰਿਪੁਚ੍ਛਨ੍ਤੋ ਯੋਨਿਸੋ ਮਨਸਿਕਰੋਨ੍ਤੋ ਕਲ੍ਯਾਣਮਿਤ੍ਤੇ ਸੇਵਨ੍ਤੋ ਭਜਨ੍ਤੋ ਪਯਿਰੁਪਾਸਨ੍ਤੋ ਅਰਹਤ੍ਤਂ ਪਾਪੁਣਿਸ੍ਸਤਿ. ਪਦਪਰਮਸ੍ਸੇਤਂ ਸੁਤ੍ਤਂ ਅਨਾਗਤੇ ਵਾਸਨਾ ਭਵਿਸ੍ਸਤੀਤਿ ਏਵਂ ਸਬ੍ਬੇਸਮ੍ਪਿ ਉਪਕਾਰਭਾਵਂ ਞਤ੍ਵਾ ਭਗਵਾ ਸਿਨੇਰੁਂ ਉਕ੍ਖਿਪਨ੍ਤੋ ਵਿਯ ਆਕਾਸਂ ਵਿਤ੍ਥਾਰੇਨ੍ਤੋ ਵਿਯ ਚਕ੍ਕਵਾਲ਼ਪਬ੍ਬਤਂ ਕਮ੍ਪੇਨ੍ਤੋ ਵਿਯ ਚ ਮਹਨ੍ਤੇਨ ਉਸ੍ਸਾਹੇਨ ਸੇਯ੍ਯਥਾਪਿ, ਭਿਕ੍ਖਵੇਤਿ ਇਮਂ ਆਸੀਵਿਸੋਪਮਸੁਤ੍ਤਂ ਆਰਭਿ.

ਤਤ੍ਥ ਚਤ੍ਤਾਰੋ ਆਸੀਵਿਸਾਤਿ ਕਟ੍ਠਮੁਖੋ, ਪੂਤਿਮੁਖੋ, ਅਗ੍ਗਿਮੁਖੋ, ਸਤ੍ਥਮੁਖੋਤਿ ਇਮੇ ਚਤ੍ਤਾਰੋ. ਤੇਸੁ ਕਟ੍ਠਮੁਖੇਨ ਦਟ੍ਠਸ੍ਸ ਸਕਲਸਰੀਰਂ ਸੁਕ੍ਖਕਟ੍ਠਂ ਵਿਯ ਥਦ੍ਧਂ ਹੋਤਿ, ਸਨ੍ਧਿਪਬ੍ਬੇਸੁ ਅਧਿਮਤ੍ਤਂ ਅਯਸੂਲਸਮਪ੍ਪਿਤਂ ਵਿਯ ਤਿਟ੍ਠਤਿ. ਪੂਤਿਮੁਖੇਨ ਦਟ੍ਠਸ੍ਸ ਪਕ੍ਕਪੂਤਿਪਨਸਂ ਵਿਯ ਵਿਪੁਬ੍ਬਕਭਾਵਂ ਆਪਜ੍ਜਿਤ੍ਵਾ ਪਗ੍ਘਰਤਿ, ਚਙ੍ਗਵਾਰੇ ਪਕ੍ਖਿਤ੍ਤਉਦਕਂ ਵਿਯ ਹੋਤਿ. ਅਗ੍ਗਿਮੁਖੇਨ ਦਟ੍ਠਸ੍ਸ ਸਕਲਸਰੀਰਂ ਝਾਯਿਤ੍ਵਾ ਭਸ੍ਮਮੁਟ੍ਠਿ ਵਿਯ ਥੁਸਮੁਟ੍ਠਿ ਵਿਯ ਚ ਵਿਪ੍ਪਕਿਰੀਯਤਿ. ਸਤ੍ਤਮੁਖੇਨ ਦਟ੍ਠਸ੍ਸ ਸਕਲਸਰੀਰਂ ਭਿਜ੍ਜਤਿ, ਅਸਨਿਪਾਤਟ੍ਠਾਨਂ ਵਿਯ ਮਹਾਨਿਖਾਦਨੇਨ ਖਤਸਨ੍ਧਿਮੁਖਂ ਵਿਯ ਚ ਹੋਤਿ. ਏਵਂ ਵਿਸਵਸੇਨ ਵਿਭਤ੍ਤਾ ਚਤ੍ਤਾਰੋ ਆਸੀਵਿਸਾ.

ਵਿਸਵੇਗਵਿਕਾਰੇਨ ਪਨੇਤੇ ਸੋਲ਼ਸ ਹੋਨ੍ਤਿ. ਕਟ੍ਠਮੁਖੋ ਹਿ ਦਟ੍ਠਵਿਸੋ, ਦਿਟ੍ਠਵਿਸੋ, ਫੁਟ੍ਠਵਿਸੋ, ਵਾਤਵਿਸੋਤਿ ਚਤੁਬ੍ਬਿਧੋ ਹੋਤਿ. ਤੇਨ ਹਿ ਦਟ੍ਠਮ੍ਪਿ ਦਿਟ੍ਠਮ੍ਪਿ ਫੁਟ੍ਠਮ੍ਪਿ ਤਸ੍ਸ ਵਾਤੇਨ ਪਹਟਮ੍ਪਿ ਸਰੀਰਂ ਵੁਤ੍ਤਪ੍ਪਕਾਰੇਨ ਥਦ੍ਧਂ ਹੋਤਿ. ਸੇਸੇਸੁਪਿ ਏਸੇਵ ਨਯੋਤਿ. ਏਵਂ ਵਿਸਵੇਗਵਿਕਾਰਵਸੇਨ ਸੋਲ਼ਸ ਹੋਨ੍ਤਿ.

ਪੁਨ ਪੁਗ੍ਗਲਪਣ੍ਣਤ੍ਤਿਵਸੇਨ ਚਤੁਸਟ੍ਠਿ ਹੋਨ੍ਤਿ. ਕਥਂ? ਕਟ੍ਠਮੁਖੇਸੁ ਤਾਵ ਦਟ੍ਠਵਿਸੋ ਚ ਆਗਤਵਿਸੋ ਨੋ ਘੋਰਵਿਸੋ, ਘੋਰਵਿਸੋ ਨੋ ਆਗਤਵਿਸੋ, ਆਗਤਵਿਸੋ ਚੇਵ ਘੋਰਵਿਸੋ ਚ, ਨੇਵਾਗਤਵਿਸੋ ਨ ਘੋਰਵਿਸੋਤਿ ਚਤੁਬ੍ਬਿਧੋ ਹੋਤਿ. ਤਤ੍ਥ ਯਸ੍ਸ ਵਿਸਂ ਸਮ੍ਪਜ੍ਜਲਿਤਤਿਣੁਕ੍ਕਾਯ ਅਗ੍ਗਿ ਵਿਯ ਸੀਘਂ ਅਭਿਰੁਹਿਤ੍ਵਾ ਅਕ੍ਖੀਨਿ ਗਹੇਤ੍ਵਾ ਖਨ੍ਧਂ ਗਹੇਤ੍ਵਾ ਸੀਸਂ ਗਹੇਤ੍ਵਾ ਠਿਤਨ੍ਤਿ ਵਤ੍ਤਬ੍ਬਤਂ ਆਪਜ੍ਜਤਿ ਮਣਿਸਪ੍ਪਾਦੀਨਂ ਵਿਸਂ ਵਿਯ, ਮਨ੍ਤਂ ਪਨ ਪਰਿਵਤ੍ਤੇਤ੍ਵਾ ਕਣ੍ਣਵਾਤਂ ਦਤ੍ਵਾ ਦਣ੍ਡਕੇਨ ਪਹਟਮਤ੍ਤੇ ਓਤਰਿਤ੍ਵਾ ਦਟ੍ਠਟ੍ਠਾਨੇਯੇਵ ਤਿਟ੍ਠਤਿ, ਅਯਂ ਆਗਤਵਿਸੋ ਨੋ ਘੋਰਵਿਸੋ ਨਾਮ. ਯਸ੍ਸ ਪਨ ਵਿਸਂ ਸਣਿਕਂ ਅਭਿਰੁਹਤਿ, ਆਰੁਲ਼੍ਹਾਰੁਲ਼੍ਹਟ੍ਠਾਨੇ ਪਨ ਅਯਂ ਸੀਤਉਦਕਂ ਵਿਯ ਹੋਤਿ ਉਦਕਸਪ੍ਪਾਦੀਨਂ ਵਿਸਂ ਵਿਯ, ਦ੍ਵਾਦਸਵਸ੍ਸਚ੍ਚਯੇਨਾਪਿ ਕਣ੍ਣਪਿਟ੍ਠਿਖਨ੍ਧਪਿਟ੍ਠਿਕਾਦੀਸੁ ਗਣ੍ਡਪਿਲ਼ਕਾਦਿਵਸੇਨ ਪਞ੍ਞਾਯਤਿ, ਮਨ੍ਤਪਰਿਵਤ੍ਤਨਾਦੀਸੁ ਚ ਕਯਿਰਮਾਨਾਸੁ ਸੀਘਂ ਨ ਓਤਰਤਿ, ਅਯਂ ਘੋਰਵਿਸੋ ਨੋ ਆਗਤਵਿਸੋ ਨਾਮ. ਯਸ੍ਸ ਪਨ ਵਿਸਂ ਸੀਘਂ ਅਭਿਰੁਹਤਿ, ਨ ਸੀਘਂ ਓਤਰਤਿ ਅਨੇਲ਼ਕਸਪ੍ਪਾਦੀਨਂ ਵਿਸਂ ਵਿਯ, ਅਯਂ ਆਗਤਵਿਸੋ ਚੇਵ ਘੋਰਵਿਸੋ ਚ. ਯਸ੍ਸ ਪਨ ਵਿਸਂ ਮਨ੍ਦਂ ਹੋਤਿ, ਓਤਾਰਿਯਮਾਨਮ੍ਪਿ ਸੁਖੇਨੇਵ ਓਤਰਤਿ ਨੀਲਸਪ੍ਪਧਮ੍ਮਨਿਸਪ੍ਪਾਦੀਨਂ ਵਿਸਂ ਵਿਯ, ਅਯਂ ਨੇਵਾਗਤਵਿਸੋ ਨ ਘੋਰਵਿਸੋ ਨਾਮ. ਇਮਿਨਾ ਉਪਾਯੇਨ ਕਟ੍ਠਮੁਖੇ ਦਟ੍ਠਵਿਸਾਦਯੋ ਪੂਤਿਮੁਖਾਦੀਸੁ ਚ ਦਟ੍ਠਵਿਸਾਦਯੋ ਵੇਦਿਤਬ੍ਬਾਤਿ. ਏਵਂ ਪੁਗ੍ਗਲਪਣ੍ਣਤ੍ਤਿਵਸੇਨ ਚਤੁਸਟ੍ਠਿ.

ਤੇਸੁ ‘‘ਅਣ੍ਡਜਾ ਨਾਗਾ’’ਤਿਆਦਿਨਾ (ਸਂ. ਨਿ. ੩.੩੪੨-੩੪੪) ਯੋਨਿਵਸੇਨ ਏਕੇਕਂ ਚਤੁਧਾ ਵਿਭਜਿਤ੍ਵਾ ਛਪਣ੍ਣਾਸਾਧਿਕਾਨਿ ਦ੍ਵੇ ਸਤਾਨਿ ਹੋਨ੍ਤਿ. ਤੇ ਜਲਜਾਥਲਜਾਤਿ ਦ੍ਵਿਗੁਣਿਤਾ ਦ੍ਵਾਦਸਾਧਿਕਾਨਿ ਪਞ੍ਚਸਤਾਨਿ ਹੋਨ੍ਤਿ, ਤੇ ਕਾਮਰੂਪਅਕਾਮਰੂਪਾਨਂ ਵਸੇਨ ਦ੍ਵਿਗੁਣਿਤਾ ਚਤੁਵੀਸਾਧਿਕਸਹਸ੍ਸਸਙ੍ਖਾ ਹੋਨ੍ਤਿ. ਪੁਨ ਗਤਮਗ੍ਗਸ੍ਸ ਪਟਿਲੋਮਤੋ ਸਂਖਿਪ੍ਪਮਾਨਾ ਕਟ੍ਠਮੁਖਾਦਿਵਸੇਨ ਚਤ੍ਤਾਰੋਵ ਹੋਨ੍ਤੀਤਿ. ਤੇ ਸਨ੍ਧਾਯ ਭਗਵਾ ‘‘ਸੇਯ੍ਯਥਾਪਿ, ਭਿਕ੍ਖਵੇ, ਚਤ੍ਤਾਰੋ ਆਸੀਵਿਸਾ’’ਤਿ ਆਹ. ਕੁਲਵਸੇਨ ਹਿ ਏਤੇ ਗਹਿਤਾ.

ਤਤ੍ਥ ਆਸੀਵਿਸਾਤਿ ਆਸਿਤ੍ਤਵਿਸਾਤਿਪਿ ਆਸੀਵਿਸਾ, ਅਸਿਤਵਿਸਾਤਿਪਿ ਆਸੀਵਿਸਾ, ਅਸਿਸਦਿਸਵਿਸਾਤਿਪਿ ਆਸੀਵਿਸਾ. ਆਸਿਤ੍ਤਵਿਸਾਤਿ ਸਕਲਕਾਯੇ ਆਸਿਞ੍ਚਿਤ੍ਵਾ ਵਿਯ ਠਪਿਤਵਿਸਾ, ਪਰਸ੍ਸ ਚ ਅਤ੍ਤਨੋ ਸਰੀਰੇ ਚ ਆਸਿਞ੍ਚਨਵਿਸਾਤਿ ਅਤ੍ਥੋ. ਅਸਿਤਵਿਸਾਤਿ ਯਂ ਯਂ ਏਤੇਹਿ ਅਸਿਤਂ ਹੋਤਿ ਪਰਿਭੁਤ੍ਤਂ, ਤਂ ਤਂ ਵਿਸਮੇਵ ਸਮ੍ਪਜ੍ਜਤਿ, ਤਸ੍ਮਾ ਅਸਿਤਂ ਵਿਸਂ ਹੋਤਿ ਏਤੇਸਨ੍ਤਿ ਆਸੀਵਿਸਾ. ਅਸਿਸਦਿਸਵਿਸਾਤਿ ਅਸਿਵਿਯ ਤਿਖਿਣਂ ਪਰਮਮ੍ਮਚ੍ਛੇਦਨਸਮਤ੍ਥਂ ਵਿਸਂ ਏਤੇਸਨ੍ਤਿ ਆਸੀਵਿਸਾਤਿ ਏਵਮੇਤ੍ਥ ਵਚਨਤ੍ਥੋ ਵੇਦਿਤਬ੍ਬੋ. ਉਗ੍ਗਤੇਜਾਤਿ ਉਗ੍ਗਤਤੇਜਾ ਬਲਵਤੇਜਾ. ਘੋਰਵਿਸਾਤਿ ਦੁਨ੍ਨਿਮ੍ਮਦ੍ਦਨਵਿਸਾ.

ਏਵਂ ਵਦੇਯ੍ਯੁਨ੍ਤਿ ਪਟਿਜਗ੍ਗਾਪਨਤ੍ਥਂ ਏਵਂ ਵਦੇਯ੍ਯੁਂ. ਰਾਜਾਨੋ ਹਿ ਆਸੀਵਿਸੇ ਗਾਹਾਪੇਤ੍ਵਾ – ‘‘ਤਥਾਰੂਪੇ ਚੋਰੇ ਵਾ ਏਤੇਹਿ ਡਂਸਾਪੇਤ੍ਵਾ ਮਾਰੇਸ੍ਸਾਮ, ਨਗਰੂਪਰੋਧਕਾਲੇ ਪਰਸੇਨਾਯ ਵਾ ਤਂ ਖਿਪਿਸ੍ਸਾਮ, ਪਰਬਲਂ ਨਿਮ੍ਮਦ੍ਦੇਤੁਂ ਅਸਕ੍ਕੋਨ੍ਤਾ ਸੁਭੋਜਨਂ ਭੁਞ੍ਜਿਤ੍ਵਾ ਵਰਸਯਨਂ ਆਰੁਯ੍ਹ ਏਤੇਹਿ ਅਤ੍ਤਾਨਂ ਡਂਸਾਪੇਤ੍ਵਾ ਸਤ੍ਤੂਨਂ ਵਸਂ ਅਨਾਗਚ੍ਛਨ੍ਤਾ ਅਤ੍ਤਨੋ ਰੁਚਿਯਾ ਮਰਿਸ੍ਸਾਮਾ’’ਤਿ ਆਸੀਵਿਸੇ ਜਗ੍ਗਾਪੇਨ੍ਤਿ. ਤੇ ਯਂ ਚੋਰਂ ਸਹਸਾਵ ਮਾਰੇਤੁਂ ਨ ਇਚ੍ਛਨ੍ਤਿ, ‘‘ਏਵਮੇਤੇ ਦੀਘਰਤ੍ਤਂ ਦੁਕ੍ਖਪ੍ਪਤ੍ਤੋ ਹੁਤ੍ਵਾ ਮਰਿਸ੍ਸਨ੍ਤੀ’’ਤਿ ਇਚ੍ਛਨ੍ਤਾ ਤਂ ਪੁਰਿਸਂ ਏਵਂ ਵਦਨ੍ਤਿ ਇਮੇ ਤੇ ਅਮ੍ਭੋ ਪੁਰਿਸ ਚਤ੍ਤਾਰੋ ਆਸੀਵਿਸਾਤਿ.

ਤਤ੍ਥ ਕਾਲੇਨ ਕਾਲਨ੍ਤਿ ਕਾਲੇ ਕਾਲੇ. ਸਂਵੇਸੇਤਬ੍ਬਾਤਿ ਨਿਪਜ੍ਜਾਪੇਤਬ੍ਬਾ. ਅਞ੍ਞਤਰੋ ਵਾ ਅਞ੍ਞਤਰੋ ਵਾਤਿ ਕਟ੍ਠਮੁਖਾਦੀਸੁ ਯੋ ਕੋਚਿ. ਯਂ ਤੇ ਅਮ੍ਭੋ ਪੁਰਿਸ ਕਰਣੀਯਂ, ਤਂ ਕਰੋਹੀਤਿ ਇਦਂ ਅਤ੍ਥਚਰਕਸ੍ਸ ਵਚਨਂ ਵੇਦਿਤਬ੍ਬਂ. ਤਸ੍ਸ ਕਿਰ ਪੁਰਿਸਸ੍ਸ ਏਵਂ ਆਸੀਵਿਸੇ ਪਟਿਪਾਦੇਤ੍ਵਾ ‘ਅਯਂ ਵੋ ਉਪਟ੍ਠਾਕੋ’ਤਿ ਚਤੂਸੁ ਪੇਲ਼ਾਸੁ ਠਪਿਤਾਨਂ ਆਸੀਵਿਸਾਨਂ ਆਰੋਚੇਨ੍ਤਿ. ਅਥੇਕੋ ਨਿਕ੍ਖਮਿਤ੍ਵਾ ਆਗਮ੍ਮ ਤਸ੍ਸ ਪੁਰਿਸਸ੍ਸ ਦਕ੍ਖਿਣਪਾਦਾਨੁਸਾਰੇਨ ਅਭਿਰੁਹਿਤ੍ਵਾ ਦਕ੍ਖਿਣਹਤ੍ਥਂ ਮਣਿਬਨ੍ਧਤੋ ਪਟ੍ਠਾਯ ਵੇਠੇਤ੍ਵਾ ਦਕ੍ਖਿਣਕਣ੍ਣਸੋਤਮੂਲੇ ਫਣਂ ਕਤ੍ਵਾ ਸੁਸੂਤਿ ਕਰੋਨ੍ਤੋ ਨਿਪਜ੍ਜਿ. ਅਪਰੋ ਵਾਮਪਾਦਾਨੁਸਾਰੇਨ ਅਭਿਰੁਹਿਤ੍ਵਾ ਤਥੇਵ ਵਾਮਹਤ੍ਥਂ ਵੇਠੇਤ੍ਵਾ ਵਾਮਕਣ੍ਣਸੋਤਮੂਲੇ ਫਣਂ ਕਤ੍ਵਾ ਸੁਸੂਤਿ ਕਰੋਨ੍ਤੋ ਨਿਪਜ੍ਜਿ, ਤਤਿਯੋ ਨਿਕ੍ਖਮਿਤ੍ਵਾ ਅਭਿਮੁਖਂ ਅਭਿਰੁਹਿਤ੍ਵਾ ਕੁਚ੍ਛਿਂ ਵੇਠੇਤ੍ਵਾ ਗਲਵਾਟਕਮੂਲੇ ਫਣਂ ਕਤ੍ਵਾ ਸੁਸੂਤਿ ਕਰੋਨ੍ਤੋ ਨਿਪਜ੍ਜਿ, ਚਤੁਤ੍ਥੋ ਪਿਟ੍ਠਿਭਾਗੇਨ ਅਭਿਰੁਹਿਤ੍ਵਾ ਗੀਵਂ ਵੇਠੇਤ੍ਵਾ ਉਪਰਿਮੁਦ੍ਧਨਿ ਫਣਂ ਠਪੇਤ੍ਵਾ ਸੁਸੂਤਿ ਕਰੋਨ੍ਤੋ ਨਿਪਜ੍ਜਿ.

ਏਵਂ ਚਤੂਸੁ ਆਸੀਵਿਸੇਸੁ ਸਰੀਰਟ੍ਠਕੇਸੁਯੇਵ ਜਾਤੇਸੁ ਏਕੋ ਤਸ੍ਸ ਪੁਰਿਸਸ੍ਸ ਅਤ੍ਥਚਰਕਪੁਰਿਸੋ ਤਂ ਦਿਸ੍ਵਾ ‘‘ਕਿਂ ਤੇ, ਭੋ ਪੁਰਿਸ, ਲਦ੍ਧ’’ਨ੍ਤਿ, ਪੁਚ੍ਛਿ. ਤਤੋ ਤੇਨ ‘‘ਇਮੇ ਮੇ, ਭੋ, ਹਤ੍ਥੇਸੁ ਹਤ੍ਥਕਟਕਂ ਵਿਯ ਬਾਹਾਸੁ ਕੇਯੂਰਂ ਵਿਯ ਕੁਚ੍ਛਿਮ੍ਹਿ ਕੁਚ੍ਛਿਵੇਠਨਸਾਟਕੋ ਵਿਯ ਕਣ੍ਣੇਸੁ ਕਣ੍ਣਚੂਲ਼ਿਕਾ ਵਿਯ ਗਲੇ ਮੁਤ੍ਤਾਵਲਿਯੋ ਵਿਯ ਸੀਸੇ ਸੀਸਪਸਾਧਨਂ ਵਿਯ ਕੇਚਿ ਅਲਙ੍ਕਾਰਵਿਸੇਸਾ ਰਞ੍ਞਾ ਦਿਨ੍ਨਾ’’ਤਿ ਵੁਤ੍ਤੇ ਸੋ ਆਹ – ‘‘ਭੋ ਅਨ੍ਧਬਾਲ, ਮਾ ਏਵਂ ਮਞ੍ਞਿਤ੍ਥ ‘ਰਞ੍ਞਾ ਮੇ ਤੁਟ੍ਠੇਨੇਤਂ ਪਸਾਧਨਂ ਦਿਨ੍ਨ’ਨ੍ਤਿ. ਤ੍ਵਂ ਰਞ੍ਞੋ ਆਗੁਚਾਰੀ ਚੋਰੋ, ਇਮੇ ਚ ਚਤ੍ਤਾਰੋ ਆਸੀਵਿਸਾ ਦੁਰੁਪਟ੍ਠਾਹਾ ਦੁਪ੍ਪਟਿਜਗ੍ਗਿਯਾ, ਏਕਸ੍ਮਿਂ ਉਟ੍ਠਾਤੁਕਾਮੇ ਏਕੋ ਨ੍ਹਾਯਿਤੁਕਾਮੋ ਹੋਤਿ, ਏਕਸ੍ਮਿਂ ਨ੍ਹਾਯਿਤੁਕਾਮੇ ਏਕੋ ਭੁਞ੍ਜਿਤੁਕਾਮੋ, ਏਕਸ੍ਮਿਂ ਭੁਞ੍ਜਿਤੁਕਾਮੇ ਏਕੋ ਨਿਪਜ੍ਜਿਤੁਕਾਮੋ. ਤੇਸੁ ਯਸ੍ਸੇਵ ਇਚ੍ਛਾ ਨ ਪੂਰਤਿ, ਸੋ ਤਤ੍ਥੇਵ ਡਂਸਿਤ੍ਵਾ ਮਾਰੇਤੀ’’ਤਿ. ਅਤ੍ਥਿ ਪਨ, ਭੋ, ਏਵਂ ਸਨ੍ਤੇ ਕੋਚਿ ਸੋਤ੍ਥਿਮਗ੍ਗੋਤਿ? ਆਮ, ਰਾਜਪੁਰਿਸਾਨਂ ਵਿਕ੍ਖਿਤ੍ਤਭਾਵਂ ਞਤ੍ਵਾ ਪਲਾਯਨਂ ਸੋਤ੍ਥਿਭਾਵੋਤਿ ਵਤ੍ਵਾ ‘‘ਯਂ ਤੇ ਕਰਣੀਯਂ, ਤਂ ਕਰੋਹੀ’’ਤਿ ਵਦੇਯ੍ਯ.

ਤਂ ਸੁਤ੍ਵਾ ਇਤਰੋ ਚਤੁਨ੍ਨਂ ਆਸੀਵਿਸਾਨਂ ਪਮਾਦਕ੍ਖਣਂ ਰਾਜਪੁਰਿਸੇਹਿ ਚ ਪਵਿਵਿਤ੍ਤਂ ਦਿਸ੍ਵਾ, ਵਾਮਹਤ੍ਥੇਨ ਦਕ੍ਖਿਣਹਤ੍ਥਂ ਵੇਠੇਤ੍ਵਾ, ਦਕ੍ਖਿਣਕਣ੍ਣਚੂਲ਼ਿਕਾਯ ਫਣਂ ਠਪੇਤ੍ਵਾ, ਸਯਿਤਾਸੀਵਿਸਸ੍ਸ ਸਰੀਰਂ ਪਰਿਮਜ੍ਜਨ੍ਤੋ ਵਿਯ ਸਣਿਕਂ ਤਂ ਅਪਨੇਤ੍ਵਾ, ਏਤੇਨੇਵ ਉਪਾਯੇਨ ਸੇਸੇਪਿ ਅਪਨੇਤ੍ਵਾ ਤੇਸਂ ਭੀਤੋ ਪਲਾਯੇਯ੍ਯ. ਅਥ ਨਂ ਤੇ ਆਸੀਵਿਸਾ ‘‘ਅਯਂ ਅਮ੍ਹਾਕਂ ਰਞ੍ਞਾ ਉਪਟ੍ਠਾਕੋ ਦਿਨ੍ਨੋ’’ਤਿ ਅਨੁਬਨ੍ਧਮਾਨਾ ਆਗਚ੍ਛੇਯ੍ਯੁਂ. ਇਦਂ ਸਨ੍ਧਾਯ ਅਥ ਖੋ ਸੋ, ਭਿਕ੍ਖਵੇ, ਪੁਰਿਸੋ ਭੀਤੋ ਚਤੁਨ੍ਨਂ ਆਸੀਵਿਸਾਨਂ…ਪੇ… ਪਲਾਯੇਥਾਤਿ ਵੁਤ੍ਤਂ.

ਤਸ੍ਮਿਂ ਪਨ ਪੁਰਿਸੇ ਏਵਂ ਆਗਤਮਗ੍ਗਂ ਓਲੋਕੇਤ੍ਵਾ ਓਲੋਕੇਤ੍ਵਾ ਪਲਾਯਨ੍ਤੇ ਰਾਜਾ ‘‘ਪਲਾਤੋ ਸੋ ਪੁਰਿਸੋ’’ਤਿ ਸੁਤ੍ਵਾ ‘‘ਕੋ ਨੁ ਖੋ ਤਂ ਅਨੁਬਨ੍ਧਿਤ੍ਵਾ ਘਾਤੇਤੁਂ ਸਕ੍ਖਿਸ੍ਸਤੀ’’ਤਿ ਵਿਚਿਨਨ੍ਤੋ ਤਸ੍ਸੇਵ ਪਚ੍ਚਤ੍ਥਿਕੇ ਪਞ੍ਚ ਜਨੇ ਲਭਿਤ੍ਵਾ ‘‘ਗਚ੍ਛਥ ਨਂ ਅਨੁਬਨ੍ਧਿਤ੍ਵਾ ਘਾਤੇਥਾ’’ਤਿ ਪੇਸੇਯ੍ਯ. ਅਥਸ੍ਸ ਅਤ੍ਥਚਰਾ ਪੁਰਿਸਾ ਤਂ ਪਵਤ੍ਤਿਂ ਞਤ੍ਵਾ ਆਰੋਚੇਯ੍ਯੁਂ. ਸੋ ਭਿਯ੍ਯੋਸੋਮਤ੍ਤਾਯ ਭੀਤੋ ਪਲਾਯੇਥ. ਇਮਮਤ੍ਥਂ ਸਨ੍ਧਾਯ ਤਮੇਨਂ ਏਵਂ ਵਦੇਯ੍ਯੁਨ੍ਤਿਆਦਿ ਵੁਤ੍ਤਂ.

ਛਟ੍ਠੋ ਅਨ੍ਤਰਚਰੋ ਵਧਕੋਤਿ ‘‘ਪਠਮਂ ਆਸੀਵਿਸੇਹਿ ਅਨੁਬਦ੍ਧੋ ਇਤੋ ਚਿਤੋ ਚ ਤੇ ਵਞ੍ਚੇਨ੍ਤੋ ਪਲਾਯਿ, ਇਦਾਨਿ ਪਞ੍ਚਹਿ ਪਚ੍ਚਤ੍ਥਿਕੇਹਿ ਅਨੁਬਦ੍ਧੋ ਸੁਟ੍ਠੁਤਰਂ ਪਲਾਯਤਿ, ਨ ਸਕ੍ਕਾ ਸੋ ਏਵਂ ਗਹੇਤੁਂ, ਉਪਲਾਲ਼ਨਾਯ ਪਨ ਸਕ੍ਕਾ, ਤਸ੍ਮਾ ਦਹਰਕਾਲਤੋ ਪਟ੍ਠਾਯ ਏਕਤੋ ਖਾਦਿਤ੍ਵਾ ਚ ਪਿਵਿਤ੍ਵਾ ਚ ਸਨ੍ਥਵਂ ਅਨ੍ਤਰਚਰਂ ਵਧਕਮਸ੍ਸ ਪੇਸੇਥਾ’’ਤਿ ਅਮਚ੍ਚੇਹਿ ਵੁਤ੍ਤੇਨ ਰਞ੍ਞਾ ਪਰਿਯੇਸਿਤ੍ਵਾ ਪੇਸਿਤੋ ਅਨ੍ਤਰਚਰੋ ਵਧਕੋ.

ਸੋ ਪਸ੍ਸੇਯ੍ਯ ਸੁਞ੍ਞਂ ਗਾਮਨ੍ਤਿ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ਪਦਂ ਘਾਯਿਤ੍ਵਾ ਘਾਯਿਤ੍ਵਾ ਵੇਗੇਨਾਗਚ੍ਛਨ੍ਤੇ ਚਤ੍ਤਾਰੋ ਆਸੀਵਿਸੇ ਪਞ੍ਚ ਵਧਕੇ ਪਚ੍ਚਤ੍ਥਿਕੇ ਛਟ੍ਠਞ੍ਚ ਅਨ੍ਤਰਚਰਂ ਵਧਕਂ ‘‘ਨਿਵਤ੍ਤ ਭੋ, ਮਾ ਪਲਾਯਿ, ਪੁਤ੍ਤਦਾਰੇਨ ਸਦ੍ਧਿਂ ਕਾਮੇ ਪਰਿਭੁਞ੍ਜਨ੍ਤੋ ਸੁਖਂ ਵਸਿਸ੍ਸਸੀ’’ਤਿ ਵਤ੍ਵਾ ਆਗਚ੍ਛਨ੍ਤਂ ਦਿਸ੍ਵਾ, ਭਿਯ੍ਯੋਸੋਮਤ੍ਤਾਯ ਯੇਨ ਵਾ ਤੇਨ ਵਾ ਪਲਾਯਨ੍ਤੋ ਪਚ੍ਚਨ੍ਤਰਟ੍ਠੇ ਅਭਿਮੁਖਗਤਂ ਏਕਂ ਛਕੁਟਿਕਂ ਸੁਞ੍ਞਂ ਗਾਮਂ ਪਸ੍ਸੇਯ੍ਯ. ਰਿਤ੍ਤਕਞ੍ਞੇਵ ਪਵਿਸੇਯ੍ਯਾਤਿ ਧਨਧਞ੍ਞਮਞ੍ਚਪੀਠਾਦੀਹਿ ਵਿਰਹਿਤਤ੍ਤਾ ਰਿਤ੍ਤਕਞ੍ਞੇਵ ਪਵਿਸੇਯ੍ਯ. ਤੁਚ੍ਛਕਂ ਸੁਞ੍ਞਕਨ੍ਤਿ ਏਤਸ੍ਸੇਵ ਵੇਵਚਨਂ. ਪਰਿਮਸੇਯ੍ਯਾਤਿ ‘‘ਸਚੇ ਪਾਨੀਯਂ ਭਵਿਸ੍ਸਤਿ, ਪਿਵਿਸ੍ਸਾਮਿ, ਸਚੇ ਭਤ੍ਤਂ ਭਵਿਸ੍ਸਤਿ, ਭੁਞ੍ਜਿਸ੍ਸਾਮੀ’’ਤਿ ਭਾਜਨਂ ਵਿਵਰਿਤ੍ਵਾ ਹਤ੍ਥਂ ਅਨ੍ਤੋ ਪਵੇਸੇਤ੍ਵਾ ਪਰਿਮਸੇਯ੍ਯ.

ਤਮੇਨਂ ਏਵਂ ਵਦੇਯ੍ਯੁਨ੍ਤਿ ਛਨ੍ਨਂ ਘਰਾਨਂ ਏਕਘਰੇਪਿ ਕਿਞ੍ਚਿ ਅਲਭਿਤ੍ਵਾ ਗਾਮਮਜ੍ਝੇ ਏਕੋ ਸਨ੍ਦਚ੍ਛਾਯੋ ਰੁਕ੍ਖੋ ਅਤ੍ਥਿ, ਤਤ੍ਥ ਵਙ੍ਕਫਲਕਂ ਅਤ੍ਥਤਂ ਦਿਸ੍ਵਾ, ‘‘ਇਧ ਤਾਵ ਨਿਸੀਦਿਸ੍ਸਾਮੀ’’ਤਿ ਗਨ੍ਤ੍ਵਾ, ਤਤ੍ਥ ਨਿਸਿਨ੍ਨਂ ਮਨ੍ਦਮਨ੍ਦੇਨ ਵਾਤੇਨ ਬੀਜਿਯਮਾਨਂ ਤਤ੍ਤਕਮਤ੍ਤਮ੍ਪਿ ਸੁਖਂ ਸਨ੍ਤਤੋ ਅਸ੍ਸਾਦਯਮਾਨਂ, ਤਮੇਨਂ ਪੁਰਿਸਂ ਕੇਚਿਦੇਵ ਅਤ੍ਥਚਰਕਾ ਬਹਿ ਪਵਤ੍ਤਿਂ ਞਤ੍ਵਾ ਆਗਤਾ ਏਵਂ ਵਦੇਯ੍ਯੁਂ. ਇਦਾਨਿ ਅਮ੍ਭੋ ਪੁਰਿਸਾਤਿ ਅਮ੍ਭੋ, ਪੁਰਿਸ, ਇਦਾਨਿ. ਚੋਰਾ ਗਾਮਘਾਤਕਾਤਿ ‘‘ਯਦੇਵੇਤ੍ਥ ਲਭਿਸ੍ਸਾਮ, ਤਂ ਗਣ੍ਹਿਸ੍ਸਾਮ ਵਾ ਘਾਤੇਸ੍ਸਾਮ ਵਾ’’ਤਿ ਆਗਤਾ ਛ ਗਾਮਘਾਤਕਚੋਰਾ.

ਉਦਕਣ੍ਣਵਨ੍ਤਿ ਗਮ੍ਭੀਰਂ ਪੁਥੁਲਂ ਉਦਕਂ. ਗਮ੍ਭੀਰਮ੍ਪਿ ਹਿ ਅਪੁਥੁਲਂ, ਪੁਥੁਲਂ ਵਾ ਅਗਮ੍ਭੀਰਂ, ਨ ਅਣ੍ਣਵੋਤਿ ਵੁਚ੍ਚਤਿ, ਯਮ੍ਪਨ ਗਮ੍ਭੀਰਞ੍ਚ ਪੁਥੁਲਞ੍ਚ, ਤਸ੍ਸੇਵੇਤਂ ਨਾਮਂ. ਸਾਸਙ੍ਕਂ ਸਪ੍ਪਟਿਭਯਨ੍ਤਿ ਚਤੁਨ੍ਨਂ ਆਸੀਵਿਸਾਨਂ ਪਞ੍ਚਨ੍ਨਂ ਵਧਕਾਨਂ ਛਟ੍ਠਸ੍ਸ ਅਨ੍ਤਰਚਰਸ੍ਸ ਛਨ੍ਨਞ੍ਚ ਗਾਮਘਾਤਕਚੋਰਾਨਂ ਵਸੇਨ ਸਾਸਙ੍ਕਂ ਸਪ੍ਪਟਿਭਯਂ. ਖੇਮਂ ਅਪ੍ਪਟਿਭਯਨ੍ਤਿ ਤੇਸਂਯੇਵ ਆਸੀਵਿਸਾਦੀਨਂ ਅਭਾਵੇਨ ਖੇਮਞ੍ਚ ਨਿਬ੍ਭਯਞ੍ਚ ਵਿਚਿਤ੍ਰਉਯ੍ਯਾਨਵਰਂ ਬਹ੍ਵਨ੍ਨਪਾਨਂ ਦੇਵਨਗਰਸਦਿਸਂ. ਨ ਚਸ੍ਸ ਨਾਵਾ ਸਨ੍ਤਾਰਣੀਤਿ ‘‘ਇਮਾਯ ਨਾਵਾਯ ਓਰਿਮਤੀਰਤੋ ਪਰਤੀਰਂ ਗਮਿਸ੍ਸਨ੍ਤੀ’’ਤਿ ਏਵਂ ਠਪਿਤਾ ਚ ਸਨ੍ਤਾਰਣੀ ਨਾਵਾ ਨ ਭਵੇਯ੍ਯ. ਉਤ੍ਤਰਸੇਤੁ ਵਾਤਿ ਰੁਕ੍ਖਸੇਤੁ-ਜਙ੍ਘਸੇਤੁ-ਸਕਟਸੇਤੂਨਂ ਅਞ੍ਞਤਰੋ ਉਤ੍ਤਰਸੇਤੁ ਵਾ ਨ ਭਵੇਯ੍ਯ. ਤਿਟ੍ਠਤਿ ਬ੍ਰਾਹ੍ਮਣੋਤਿ ਨ ਖੋ ਏਸ ਬ੍ਰਾਹ੍ਮਣੋ. ਕਸ੍ਮਾ ਨਂ ਬ੍ਰਾਹ੍ਮਣੋਤਿ ਆਹ? ਏਤ੍ਤਕਾਨਂ ਪਚ੍ਚਤ੍ਥਿਕਾਨਂ ਬਾਹਿਤਤ੍ਤਾ, ਦੇਸਨਂ ਵਾ ਵਿਨਿਵਤ੍ਤੇਨ੍ਤੋ ਏਕਂ ਖੀਣਾਸਵਬ੍ਰਾਹ੍ਮਣਂ ਦਸ੍ਸੇਤੁਮ੍ਪਿ ਏਵਮਾਹ.

ਤਸ੍ਮਿਂ ਪਨ ਏਵਂ ਉਤ੍ਤਿਣ੍ਣੇ ਚਤ੍ਤਾਰੋ ਆਸੀਵਿਸਾ ‘‘ਨ ਲਦ੍ਧੋ ਵਤਾਸਿ ਅਮ੍ਹੇਹਿ, ਅਜ੍ਜ ਤੇ ਮੁਰੁਮੁਰਾਯ ਜੀਵਿਤਂ ਖਾਦਿਤ੍ਵਾ ਛਡ੍ਡੇਯ੍ਯਾਮ’’. ਪਞ੍ਚ ਪਚ੍ਚਤ੍ਥਿਕਾ ‘‘ਨ ਲਦ੍ਧੋ ਵਤਾਸਿ ਅਮ੍ਹੇਹਿ, ਅਜ੍ਜ ਤੇ ਪਰਿਵਾਰੇਤ੍ਵਾ ਅਙ੍ਗਮਙ੍ਗਾਨਿ ਛਿਨ੍ਦਿਤ੍ਵਾ ਰਞ੍ਞੋ ਸਨ੍ਤਿਕਂ ਗਤਾ ਸਤਂ ਵਾ ਸਹਸ੍ਸਂ ਵਾ ਲਭੇਯ੍ਯਾਮ’’. ਛਟ੍ਠੋ ਅਨ੍ਤਰਚਰੋ ‘‘ਨ ਲਦ੍ਧੋ ਵਤਾਸਿ ਮਯਾ, ਅਜ੍ਜ ਤੇ ਫਲਿਕਵਣ੍ਣੇਨ ਅਸਿਨਾ ਸੀਸਂ ਛਿਨ੍ਦਿਤ੍ਵਾ, ਸੇਨਾਪਤਿਟ੍ਠਾਨਂ ਲਭਿਤ੍ਵਾ ਸਮ੍ਪਤ੍ਤਿਂ ਅਨੁਭਵੇਯ੍ਯਂ’’. ਛ ਚੋਰਾ ‘‘ਨ ਲਦ੍ਧੋ ਵਤਾਸਿ ਅਮ੍ਹੇਹਿ, ਅਜ੍ਜ ਤੇ ਵਿਵਿਧਾਨਿ ਕਮ੍ਮਕਾਰਣਾਨਿ ਕਾਰੇਤ੍ਵਾ ਬਹੁਧਨਂ ਆਹਰਾਪੇਸ੍ਸਾਮਾ’’ਤਿ ਚਿਨ੍ਤੇਤ੍ਵਾ, ਉਦਕਣ੍ਣਵਂ ਓਤਰਿਤੁਂ ਅਸਕ੍ਕੋਨ੍ਤਾ ਰਞ੍ਞੋ ਆਣਾਯ ਕੋਪਿਤਤ੍ਤਾ ਪਰਤੋ ਗਨ੍ਤੁਮ੍ਪਿ ਅਵਿਸਹਨ੍ਤਾ ਤਤ੍ਥੇਵ ਸੁਸ੍ਸਿਤ੍ਵਾ ਮਰੇਯ੍ਯੁਂ.

ਉਪਮਾ ਖੋ ਮ੍ਯਾਯਨ੍ਤਿ ਏਤ੍ਥ ਏਵਂ ਆਦਿਤੋ ਪਟ੍ਠਾਯ ਓਪਮ੍ਮਸਂਸਨ੍ਦਨਂ ਵੇਦਿਤਬ੍ਬਂ – ਰਾਜਾ ਵਿਯ ਹਿ ਕਮ੍ਮਂ ਦਟ੍ਠਬ੍ਬਂ, ਰਾਜਾਪਰਾਧਿਕਪੁਰਿਸੋ ਵਿਯ ਵਟ੍ਟਨਿਸ੍ਸਿਤੋ ਪੁਥੁਜ੍ਜਨੋ. ਚਤ੍ਤਾਰੋ ਆਸੀਵਿਸਾ ਵਿਯ ਚਤ੍ਤਾਰਿ ਮਹਾਭੂਤਾਨਿ, ਰਞ੍ਞੋ ਤਸ੍ਸ ਚਤ੍ਤਾਰੋ ਆਸੀਵਿਸੇ ਪਟਿਚ੍ਛਾਪਿਤਕਾਲੋ ਵਿਯ ਕਮ੍ਮੁਨਾ ਪੁਥੁਜ੍ਜਨਸ੍ਸ ਪਟਿਸਨ੍ਧਿਕ੍ਖਣੇਯੇਵ ਚਤੁਨ੍ਨਂ ਮਹਾਭੂਤਾਨਂ ਦਿਨ੍ਨਕਾਲੋ. ‘‘ਇਮੇਸਂ ਆਸੀਵਿਸਾਨਂ ਪਮਾਦਕ੍ਖਣੇ ਰਾਜਪੁਰਿਸਾਨਞ੍ਚ ਵਿਵਿਤ੍ਤਕ੍ਖਣੇ ਨਿਕ੍ਖਮਿਤ੍ਵਾ ਯਂ ਤੇ ਅਮ੍ਭੋ, ਪੁਰਿਸ, ਕਰਣੀਯਂ, ਤਂ ਕਰੋਹੀ’’ਤਿ ਵਚਨੇਨ ‘‘ਪਲਾਯਸ੍ਸੂ’’ਤਿ ਵੁਤ੍ਤਕਾਲੋ ਵਿਯ ਸਤ੍ਥਾਰਾ ਇਮਸ੍ਸ ਭਿਕ੍ਖੁਨੋ ਮਹਾਭੂਤਕਮ੍ਮਟ੍ਠਾਨਂ ਕਥੇਤ੍ਵਾ ‘‘ਇਮੇਸੁ ਚਤੂਸੁ ਮਹਾਭੂਤੇਸੁ ਨਿਬ੍ਬਿਨ੍ਦ ਵਿਰਜ੍ਜ, ਏਵਂ ਵਟ੍ਟਤੋ ਪਰਿਮੁਚ੍ਚਿਸ੍ਸਸੀ’’ਤਿ ਕਥਿਤਕਾਲੋ, ਤਸ੍ਸ ਪੁਰਿਸਸ੍ਸ ਅਤ੍ਥਚਰਕਵਚਨਂ ਸੁਤ੍ਵਾ ਚਤੁਨ੍ਨਂ ਆਸੀਵਿਸਾਨਂ ਪਮਾਦਕ੍ਖਣੇ ਰਾਜਪੁਰਿਸਾਨਞ੍ਚ ਵਿਵਿਤ੍ਤਕ੍ਖਣੇ ਨਿਕ੍ਖਮਿਤ੍ਵਾ ਯੇਨ ਵਾ ਤੇਨ ਵਾ ਪਲਾਯਨਂ ਵਿਯ ਇਮਸ੍ਸ ਭਿਕ੍ਖੁਨੋ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਲਭਿਤ੍ਵਾ ਮਹਾਭੂਤਾਸੀਵਿਸੇਹਿ ਪਰਿਮੁਚ੍ਚਨਤ੍ਥਾਯ ਞਾਣਪਲਾਯਨੇਨ ਪਲਾਯਨਂ.

ਇਦਾਨਿ ਚਤੁਨ੍ਨੇਤਂ ਮਹਾਭੂਤਾਨਂ ਅਧਿਵਚਨਂ ਪਥਵੀਧਾਤੁਯਾ ਆਪੋਧਾਤੁਯਾਤਿਆਦੀਸੁ ਚਤੁਮਹਾਭੂਤਕਥਾ ਚ ਪਞ੍ਚੁਪਾਦਾਨਕ੍ਖਨ੍ਧਕਥਾ ਚ ਆਯਤਨਕਥਾ ਚ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਨਯੇਨੇਵ ਵੇਦਿਤਬ੍ਬਾ. ਏਤ੍ਥ ਚ ਕਟ੍ਠਮੁਖਆਸੀਵਿਸੋ ਵਿਯ ਪਥਵੀਧਾਤੁ ਦਟ੍ਠਬ੍ਬਾ, ਪੂਤਿਮੁਖਅਗ੍ਗਿਮੁਖਸਤ੍ਥਮੁਖਾ ਵਿਯ ਸੇਸਧਾਤੁਯੋ. ਯਥੇਵ ਹਿ ਕਟ੍ਠਮੁਖੇਨ ਦਟ੍ਠਸ੍ਸ ਸਕਲਕਾਯੋ ਥਦ੍ਧੋ ਹੋਤਿ, ਏਵਂ ਪਥਵੀਧਾਤੁਪਕੋਪੇਨਾਪਿ. ਯਥਾ ਚ ਪੂਤਿਮੁਖਾਦੀਹਿ ਦਟ੍ਠਸ੍ਸ ਪਗ੍ਘਰਤਿ ਚੇਵ ਝਾਯਤਿ ਚ ਛਿਜ੍ਜਤਿ ਚ, ਏਵਂ ਆਪੋਧਾਤੁਤੇਜੋਧਾਤੁਵਾਯੋਧਾਤੁਪਕੋਪੇਨਾਪੀਤਿ. ਤੇਨਾਹੁ ਅਟ੍ਠਕਥਾਚਰਿਯਾ –

‘‘ਪਤ੍ਥਦ੍ਧੋ ਭਵਤੀ ਕਾਯੋ, ਦਟ੍ਠੋ ਕਟ੍ਠਮੁਖੇਨ ਵਾ;

ਪਥਵੀਧਾਤੁਪਕੋਪੇਨ, ਹੋਤਿ ਕਟ੍ਠਮੁਖੇਵ ਸੋ.

‘‘ਪੂਤਿਕੋ ਭਵਤੀ ਕਾਯੋ, ਦਟ੍ਠੋ ਪੂਤਿਮੁਖੇਨ ਵਾ;

ਆਪੋਧਾਤੁਪਕੋਪੇਨ, ਹੋਤਿ ਪੂਤਿਮੁਖੇਵ ਸੋ.

‘‘ਸਨ੍ਤਤ੍ਤੋ ਭਵਤੀ ਕਾਯੋ, ਦਟ੍ਠੋ ਅਗ੍ਗਿਮੁਖੇਨ ਵਾ;

ਤੇਜੋਧਾਤੁਪਕੋਪੇਨ, ਹੋਤਿ ਅਗ੍ਗਿਮੁਖੇਵ ਸੋ.

‘‘ਸਞ੍ਛਿਨ੍ਨੋ ਭਵਤੀ ਕਾਯੋ, ਦਟ੍ਠੋ ਸਤ੍ਥਮੁਖੇਨ ਵਾ;

ਵਾਯੋਧਾਤੁਪਕੋਪੇਨ, ਹੋਤਿ ਸਤ੍ਥਮੁਖੇਵ ਸੋ’’ਤਿ. –

ਏਵਂ ਤਾਵੇਤ੍ਥ ਵਿਸੇਸਤੋ ਸਦਿਸਭਾਵੋ ਵੇਦਿਤਬ੍ਬੋ.

ਅਵਿਸੇਸਤੋ ਪਨ ਆਸਯਤੋ ਵਿਸਵੇਗਵਿਕਾਰਤੋ ਅਨਤ੍ਥਗ੍ਗਹਣਤੋ ਦੁਰੁਪਟ੍ਠਾਨਤੋ ਦੁਰਾਸਦਤੋ ਅਕਤਞ੍ਞੁਤਤੋ ਅਵਿਸੇਸਕਾਰਿਤੋ ਅਨਨ੍ਤਦੋਸੂਪਦ੍ਦਵਤੋਤਿ ਇਮੇਹਿ ਕਾਰਣੇਹਿ ਏਤੇਸਂ ਆਸੀਵਿਸਸਦਿਸਤਾ ਵੇਦਿਤਬ੍ਬਾ. ਤਤ੍ਥ ਆਸਯਤੋਤਿ ਆਸੀਵਿਸਾਨਞ੍ਹਿ ਵਮ੍ਮਿਕੋ ਆਸਯੋ, ਤਤ੍ਥੇਵ ਤੇ ਵਸਨ੍ਤਿ. ਮਹਾਭੂਤਾਨਮ੍ਪਿ ਕਾਯਵਮ੍ਮਿਕੋ ਆਸਯੋ. ਆਸੀਵਿਸਾਨਞ੍ਚ ਰੁਕ੍ਖਸੁਸਿਰਤਿਣਪਣ੍ਣਗਹਨਸਙ੍ਕਾਰਟ੍ਠਾਨਾਨਿਪਿ ਆਸਯੋ. ਏਤੇਸੁਪਿ ਹਿ ਤੇ ਵਸਨ੍ਤਿ. ਮਹਾਭੂਤਾਨਮ੍ਪਿ ਕਾਯਸੁਸਿਰਂ ਕਾਯਗਹਨਂ ਕਾਯਸਙ੍ਕਾਰਟ੍ਠਾਨਂ ਆਸਯੋਤਿ. ਏਵਂ ਤਾਵ ਆਸਯਤੋ ਸਦਿਸਤਾ ਵੇਦਿਤਬ੍ਬਾ.

ਵਿਸਵੇਗਵਿਕਾਰਤੋਤਿ ਆਸੀਵਿਸਾ ਹਿ ਕੁਲਵਸੇਨ ਕਟ੍ਠਮੁਖਾਦਿਭੇਦਤੋ ਚਤ੍ਤਾਰੋ. ਤਤ੍ਥ ਏਕੇਕੋ ਵਿਸਵਿਕਾਰਤੋ ਵਿਭਜ੍ਜਮਾਨੋ ਦਟ੍ਠਵਿਸਾਦਿਵਸੇਨ ਚਤੁਬ੍ਬਿਧੋ ਹੋਤਿ. ਮਹਾਭੂਤਾਨਿਪਿ ਪਚ੍ਚਤ੍ਤਲਕ੍ਖਣਵਸੇਨ ਪਥਵੀਆਦਿਭੇਦਤੋ ਚਤ੍ਤਾਰਿ. ਏਤ੍ਥ ਏਕੇਕਂ ਕਮ੍ਮਸਮੁਟ੍ਠਾਨਾਦਿਵਸੇਨ ਚਤੁਬ੍ਬਿਧਂ ਹੋਤਿ. ਏਵਂ ਵਿਸਵੇਗਵਿਕਾਰਤੋ ਸਦਿਸਤਾ ਵੇਦਿਤਬ੍ਬਾ.

ਅਨਤ੍ਥਗ੍ਗਹਣਤੋਤਿ ਆਸੀਵਿਸੇ ਗਣ੍ਹਨ੍ਤਾ ਪਞ੍ਚ ਅਨਤ੍ਥੇ ਗਣ੍ਹਨ੍ਤਿ – ਦੁਗ੍ਗਨ੍ਧਂ ਗਣ੍ਹਨ੍ਤਿ, ਅਸੁਚਿਂ ਗਣ੍ਹਨ੍ਤਿ, ਬ੍ਯਾਧਿਂ ਗਣ੍ਹਨ੍ਤਿ, ਵਿਸਂ ਗਣ੍ਹਨ੍ਤਿ, ਮਰਣਂ ਗਣ੍ਹਨ੍ਤਿ. ਮਹਾਭੂਤਾਨਿਪਿ ਗਣ੍ਹਨ੍ਤਾ ਪਞ੍ਚ ਅਨਤ੍ਥੇ ਗਣ੍ਹਨ੍ਤਿ – ਦੁਗ੍ਗਨ੍ਧਂ ਗਣ੍ਹਨ੍ਤਿ, ਅਸੁਚਿਂ ਗਣ੍ਹਨ੍ਤਿ, ਬ੍ਯਾਧਿਂ ਗਣ੍ਹਨ੍ਤਿ, ਜਰਂ ਗਣ੍ਹਨ੍ਤਿ, ਮਰਣਂ ਗਣ੍ਹਨ੍ਤਿ. ਤੇਨਾਹੁ ਪੋਰਾਣਾ –

‘‘ਯੇਕੇਚਿ ਸਪ੍ਪਂ ਗਣ੍ਹਨ੍ਤਿ, ਮੀਲ਼੍ਹਲਿਤ੍ਤਂ ਮਹਾਵਿਸਂ;

ਪਞ੍ਚ ਗਣ੍ਹਨ੍ਤੁਨਤ੍ਥਾਨਿ, ਲੋਕੇ ਸਪ੍ਪਾਭਿਨਨ੍ਦਿਨੋ.

‘‘ਦੁਗ੍ਗਨ੍ਧਂ ਅਸੁਚਿਂ ਬ੍ਯਾਧਿਂ, ਵਿਸਂ ਮਰਣਪਞ੍ਚਮਂ;

ਅਨਤ੍ਥਾ ਹੋਨ੍ਤਿ ਪਞ੍ਚੇਤੇ, ਮੀਲ਼੍ਹਲਿਤ੍ਤੇ ਭੁਜਙ੍ਗਮੇ.

‘‘ਏਵਮੇਵਂ ਅਕੁਸਲਾ, ਅਨ੍ਧਬਾਲਪੁਥੁਜ੍ਜਨਾ;

ਪਞ੍ਚ ਗਣ੍ਹਨ੍ਤੁਨਤ੍ਥਾਨਿ, ਭਵੇ ਜਾਤਾਭਿਨਨ੍ਦਿਨੋ.

‘‘ਦੁਗ੍ਗਨ੍ਧਂ ਅਸੁਚਿਂ ਬ੍ਯਾਧਿਂ, ਜਰਂ ਮਰਣਪਞ੍ਚਮਂ;

ਅਨਤ੍ਥਾ ਹੋਨ੍ਤਿ ਪਞ੍ਚੇਤੇ, ਮੀਲ਼੍ਹਲਿਤ੍ਤੇਵ ਪਨ੍ਨਗੇ’’ਤਿ. –

ਏਵਂ ਅਨਤ੍ਥਗ੍ਗਹਣਤੋ ਸਦਿਸਤਾ ਵੇਦਿਤਬ੍ਬਾ.

ਦੁਰੁਪਟ੍ਠਾਨਤੋਤਿ ਤੇ ਆਸੀਵਿਸਾ ਦੁਰੁਪਟ੍ਠਾਨਾ, ਏਕਸ੍ਮਿਂ ਉਟ੍ਠਾਤੁਕਾਮੇ ਏਕੋ ਨ੍ਹਾਯਿਤੁਕਾਮੋ ਹੋਤਿ, ਤਸ੍ਮਿਂ ਨ੍ਹਾਯਿਤੁਕਾਮੇ ਅਪਰੋ ਭੁਞ੍ਜਿਤੁਕਾਮੋ, ਤਸ੍ਮਿਂ ਭੁਞ੍ਜਿਤੁਕਾਮੇ ਅਞ੍ਞੋ ਨਿਪਜ੍ਜਿਤੁਕਾਮੋ ਹੋਤਿ. ਤੇਸੁ ਯਸ੍ਸ ਯਸ੍ਸੇਵ ਅਜ੍ਝਾਸਯੋ ਨ ਪੂਰਤਿ, ਸੋ ਤਤ੍ਥੇਵ ਡਂਸਿਤ੍ਵਾ ਮਾਰੇਤਿ. ਇਮੇਹਿ ਪਨ ਆਸੀਵਿਸੇਹਿ ਭੂਤਾਨੇਵ ਦੁਰੁਪਟ੍ਠਾਨਤਰਾਨਿ. ਪਥਵੀਧਾਤੁਯਾ ਹਿ ਭੇਸਜ੍ਜੇ ਕਯਿਰਮਾਨੇ ਆਪੋਧਾਤੁ ਕੁਪ੍ਪਤਿ, ਤਸ੍ਸੇਵ ਭੇਸਜ੍ਜਂ ਕਰੋਨ੍ਤਸ੍ਸ ਤੇਜੋਧਾਤੂਤਿ ਏਵਂ ਏਕਿਸ੍ਸਾ ਭੇਸਜ੍ਜੇ ਕਯਿਰਮਾਨੇ ਅਪਰਾ ਕੁਪ੍ਪਨ੍ਤੀਤਿ. ਏਵਂ ਦੁਰੁਪਟ੍ਠਾਨਤੋ ਸਦਿਸਤਾ ਵੇਦਿਤਬ੍ਬਾ.

ਦੁਰਾਸਦਤੋਤਿ ਦੁਰਾਸਦਾ ਹਿ ਆਸੀਵਿਸਾ, ਗੇਹਸ੍ਸ ਪੁਰਿਮਭਾਗੇ ਆਸੀਵਿਸਂ ਦਿਸ੍ਵਾ ਪਚ੍ਛਿਮਭਾਗੇਨ ਪਲਾਯਨ੍ਤਿ, ਪਚ੍ਛਿਮਭਾਗੇ ਦਿਸ੍ਵਾ ਪੁਰਿਮਭਾਗੇਨ, ਗੇਹਮਜ੍ਝੇ ਦਿਸ੍ਵਾ ਗਬ੍ਭਂ ਪਵਿਸਨ੍ਤਿ, ਗਬ੍ਭੇ ਦਿਸ੍ਵਾ ਮਞ੍ਚਪੀਠਂ ਅਭਿਰੁਹਨ੍ਤਿ. ਮਹਾਭੂਤਾਨਿ ਤਤੋਪਿ ਦੁਰਾਸਦਤਰਾਨਿ. ਤਥਾਰੂਪੇਨ ਹਿ ਕੁਟ੍ਠਰੋਗੇਨ ਫੁਟ੍ਠਸ੍ਸ ਕਣ੍ਣਨਾਸਾਦੀਨਿ ਛਿਨ੍ਦਿਤ੍ਵਾ ਪਤਨ੍ਤਿ, ਸਰੀਰਂ ਸਮ੍ਫੁਟਤਿ ਨੀਲਮਕ੍ਖਿਕਾ ਪਰਿਵਾਰੇਨ੍ਤਿ, ਸਰੀਰਗਨ੍ਧੋ ਦੂਰਤੋਵ ਉਬ੍ਬਾਹਤਿ. ਤਂ ਪੁਰਿਸਂ ਅਕ੍ਕੋਸਮਾਨਮ੍ਪਿ ਪਰਿਦੇਵਮਾਨਮ੍ਪਿ ਨੇਵ ਰੋਸਵਸੇਨ, ਨ ਕਾਰੁਞ੍ਞੇਨ, ਉਪਸਙ੍ਕਮਿਤੁਂ ਸਕ੍ਕੋਨ੍ਤਿ, ਨਾਸਿਕਂ ਪਿਦਹਿਤ੍ਵਾ ਖੇਲ਼ਂ ਪਾਤੇਨ੍ਤਾ ਦੂਰਤੋਵ ਨਂ ਵਿਵਜ੍ਜੇਨ੍ਤਿ. ਏਵਂ ਅਞ੍ਞੇਸਮ੍ਪਿ ਭਗਨ੍ਦਰਕੁਚ੍ਛਿਰੋਗਵਾਤਰੋਗਾਦੀਨਂ ਬੀਭਚ੍ਛਜੇਗੁਚ੍ਛਭਾਵਕਰਾਨਞ੍ਚ ਰੋਗਾਨਂ ਵਸੇਨ ਅਯਮੇਵਤ੍ਥੋ ਵਿਭਾਵੇਤਬ੍ਬੋਤਿ. ਏਵਂ ਦੁਰਾਸਦਤੋ ਸਦਿਸਤਾ ਵੇਦਿਤਬ੍ਬਾ.

ਅਕਤਞ੍ਞੁਤਤੋਤਿ ਆਸੀਵਿਸਾ ਹਿ ਅਕਤਞ੍ਞੁਨੋ ਹੋਨ੍ਤਿ, ਨ੍ਹਾਪਿਯਮਾਨਾਪਿ ਭੋਜਿਯਮਾਨਾਪਿ ਗਨ੍ਧਮਾਲਾਦੀਹਿ ਪੂਜਿਯਮਾਨਾਪਿ ਪੇਲ਼ਾਯਂ ਪਕ੍ਖਿਪਿਤ੍ਵਾ ਪਰਿਹਰਿਯਮਾਨਾਪਿ ਓਤਾਰਮੇਵ ਗਵੇਸਨ੍ਤਿ. ਯਤ੍ਥ ਓਤਾਰਂ ਲਭਨ੍ਤਿ, ਤਤ੍ਥੇਵ ਨਂ ਡਂਸਿਤ੍ਵਾ ਮਾਰੇਨ੍ਤਿ. ਆਸੀਵਿਸੇਹਿਪਿ ਮਹਾਭੂਤਾਨੇਵ ਅਕਤਞ੍ਞੁਤਰਾਨਿ. ਏਤੇਸਞ੍ਹਿ ਕਤਂ ਨਾਮ ਨਤ੍ਥਿ, ਸੀਤੇਨ ਵਾ ਉਣ੍ਹੇਨ ਵਾ ਨਿਮ੍ਮਲੇਨ ਜਲੇਨ ਨ੍ਹਾਪਿਯਮਾਨਾਨਿਪਿ ਗਨ੍ਧਮਾਲਾਦੀਹਿ ਸਕ੍ਕਰਿਯਮਾਨਾਨਿਪਿ ਮੁਦੁਵਤ੍ਥਮੁਦੁਸਯਨਮੁਦੁਯਾਨਾਦੀਹਿ ਪਰਿਹਰਿਯਮਾਨਾਨਿਪਿ, ਵਰਭੋਜਨਂ ਭੋਜਿਯਮਾਨਾਨਿਪਿ, ਵਰਪਾਨਂ ਪਾਯਾਪਿਯਮਾਨਾਨਿਪਿ ਓਤਾਰਮੇਵ ਗਵੇਸਨ੍ਤਿ. ਯਤ੍ਥ ਓਤਾਰਂ ਲਭਨ੍ਤਿ, ਤਤ੍ਥੇਵ ਕੁਪ੍ਪਿਤ੍ਵਾ ਅਨਯਬ੍ਯਸਨਂ ਪਾਪੇਨ੍ਤੀਤਿ. ਏਵਂ ਅਕਤਞ੍ਞੁਤਤੋ ਸਦਿਸਤਾ ਵੇਦਿਤਬ੍ਬਾ.

ਅਵਿਸੇਸਕਾਰਿਤੋਤਿ ਆਸੀਵਿਸਾ ਹਿ ‘‘ਅਯਂ ਖਤ੍ਤਿਯੋ ਵਾ ਬ੍ਰਾਹ੍ਮਣੋ ਵਾ ਵੇਸ੍ਸੋ ਵਾ ਸੁਦ੍ਦੋ ਵਾ ਗਹਟ੍ਠੋ ਵਾ ਪਬ੍ਬਜਿਤੋ ਵਾ’’ਤਿ ਵਿਸੇਸਂ ਨ ਕਰੋਨ੍ਤਿ, ਸਮ੍ਪਤ੍ਤਸਮ੍ਪਤ੍ਤਮੇਵ ਡਂਸਿਤ੍ਵਾ ਮਾਰੇਨ੍ਤਿ. ਮਹਾਭੂਤਾਨਿਪਿ ‘‘ਅਯਂ ਖਤ੍ਤਿਯੋ ਵਾ ਬ੍ਰਾਹ੍ਮਣੋ ਵਾ ਵੇਸ੍ਸੋ ਵਾ ਸੁਦ੍ਦੋ ਵਾ ਗਹਟ੍ਠੋ ਵਾ ਪਬ੍ਬਜਿਤੋ ਵਾ ਦੇਵੋ ਵਾ ਮਨੁਸ੍ਸੋ ਵਾ ਮਾਰੋ ਵਾ ਬ੍ਰਹ੍ਮਾ ਵਾ ਨਿਗ੍ਗੁਣੋ ਵਾ ਸਗੁਣੋ ਵਾ’’ਤਿ ਵਿਸੇਸਂ ਨ ਕਰੋਨ੍ਤਿ. ਯਦਿ ਹਿ ਨੇਸਂ ‘‘ਅਯਂ ਗੁਣਵਾ’’ਤਿ ਲਜ੍ਜਾ ਉਪ੍ਪਜ੍ਜੇਯ੍ਯ, ਸਦੇਵਕੇ ਲੋਕੇ ਅਗ੍ਗਪੁਗ੍ਗਲੇ ਤਥਾਗਤੇ ਲਜ੍ਜਂ ਉਪ੍ਪਾਦੇਯ੍ਯੁਂ. ਅਥਾਪਿ ਨੇਸਂ ‘‘ਅਯਂ ਮਹਾਪਞ੍ਞੋ ਅਯਂ ਮਹਿਦ੍ਧਿਕੋ ਅਯਂ ਧੁਤਵਾਦੋ’’ਤਿਆਦਿਨਾ ਨਯੇਨ ਲਜ੍ਜਾ ਉਪ੍ਪਜ੍ਜੇਯ੍ਯ, ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰਾਦੀਸੁ ਲਜ੍ਜਂ ਉਪ੍ਪਾਦੇਯ੍ਯੁਂ. ਅਥਾਪਿ ਨੇਸਂ ‘‘ਅਯਂ ਨਿਗ੍ਗੁਣੋ ਦਾਰੁਣੋ ਥਦ੍ਧੋ’’ਤਿ ਭਯਂ ਉਪ੍ਪਜ੍ਜੇਯ੍ਯ, ਸਦੇਵਕੇ ਲੋਕੇ ਨਿਗ੍ਗੁਣਥਦ੍ਧਦਾਰੁਣਾਨਂ ਅਗ੍ਗਸ੍ਸ ਦੇਵਦਤ੍ਤਸ੍ਸ ਛਨ੍ਨਂ ਵਾ ਸਤ੍ਥਾਰਾਨਂ ਭਾਯੇਯ੍ਯੁਂ, ਨ ਚ ਲਜ੍ਜਨ੍ਤਿ ਨ ਚ ਭਾਯਨ੍ਤਿ, ਕੁਪ੍ਪਿਤ੍ਵਾ ਯਂਕਿਞ੍ਚਿ ਅਨਯਬ੍ਯਸਨਂ ਆਪਾਦੇਨ੍ਤਿਯੇਵ. ਏਵਂ ਅਵਿਸੇਸਕਾਰਿਤੋ ਸਦਿਸਤਾ ਵੇਦਿਤਬ੍ਬਾ.

ਅਨਨ੍ਤਦੋਸੂਪਦ੍ਦਵਤੋਤਿ ਆਸੀਵਿਸੇ ਨਿਸ੍ਸਾਯ ਉਪ੍ਪਜ੍ਜਨਕਾਨਞ੍ਹਿ ਦੋਸੂਪਦ੍ਦਵਾਨਂ ਪਮਾਣਂ ਨਤ੍ਥਿ. ਤਥਾ ਹੇਤੇ ਡਂਸਿਤ੍ਵਾ ਕਾਣਮ੍ਪਿ ਕਰੋਨ੍ਤਿ ਖੁਜ੍ਜਮ੍ਪਿ ਪੀਠਸਪ੍ਪਿਮ੍ਪਿ ਏਕਪਕ੍ਖਲਮ੍ਪੀਤਿ ਏਵਂ ਅਪਰਿਮਾਣਂ ਵਿਪ੍ਪਕਾਰਂ ਦਸ੍ਸੇਨ੍ਤਿ. ਭੂਤਾਨਿਪਿ ਕੁਪ੍ਪਿਤਾਨਿ ਨ ਕਾਣਾਦਿਭਾਵੇਸੁ ਨ ਕਿਞ੍ਚਿ ਵਿਪ੍ਪਕਾਰਂ ਨ ਕਰੋਨ੍ਤਿ, ਅਪ੍ਪਮਾਣੋ ਏਤੇਸਂ ਦੋਸੂਪਦ੍ਦਵੋਤਿ. ਏਵਂ ਅਨਨ੍ਤਦੋਸੂਪਦ੍ਦਵਤੋ ਸਦਿਸਤਾ ਵੇਦਿਤਬ੍ਬਾ.

ਇਦਾਨੇਤ੍ਥ ਚਤੁਮਹਾਭੂਤਵਸੇਨ ਯਾਵ ਅਰਹਤ੍ਤਾ ਕਮ੍ਮਟ੍ਠਾਨਂ ਕਥੇਤਬ੍ਬਂ ਸਿਯਾ, ਤਂ ਵਿਸੁਦ੍ਧਿਮਗ੍ਗੇ ਚਤੁਧਾਤੁਵਵਤ੍ਥਾਨਨਿਦ੍ਦੇਸੇ ਕਥਿਤਮੇਵ.

ਪਞ੍ਚ ਵਧਕਾ ਪਚ੍ਚਤ੍ਥਿਕਾਤਿ ਖੋ ਭਿਕ੍ਖਵੇ ਪਞ੍ਚਨ੍ਨੇਤਂ ਉਪਾਦਾਨਕ੍ਖਨ੍ਧਾਨਂ ਅਧਿਵਚਨਨ੍ਤਿ ਏਤ੍ਥ ਦ੍ਵੀਹਿ ਆਕਾਰੇਹਿ ਖਨ੍ਧਾਨਂ ਵਧਕਪਚ੍ਚਤ੍ਥਿਕਸਦਿਸਤਾ ਵੇਦਿਤਬ੍ਬਾ. ਖਨ੍ਧਾ ਹਿ ਅਞ੍ਞਮਞ੍ਞਞ੍ਚ ਵਧੇਨ੍ਤਿ, ਤੇਸੁ ਚ ਸਨ੍ਤੇਸੁ ਵਧੋ ਨਾਮ ਪਞ੍ਞਾਯਤਿ. ਕਥਂ? ਰੂਪਂ ਤਾਵ ਰੂਪਮ੍ਪਿ ਵਧੇਤਿ ਅਰੂਪਮ੍ਪਿ, ਤਥਾ ਅਰੂਪਂ ਅਰੂਪਮ੍ਪਿ ਵਧੇਤਿ ਰੂਪਮ੍ਪਿ. ਕਥਂ? ਅਯਞ੍ਹਿ ਪਥਵੀਧਾਤੁ ਭਿਜ੍ਜਮਾਨਾ ਇਤਰਾ ਤਿਸ੍ਸੋ ਧਾਤੁਯੋ ਗਹੇਤ੍ਵਾਵ ਭਿਜ੍ਜਤਿ, ਆਪੋਧਾਤੁਆਦੀਸੁਪਿ ਏਸੇਵ ਨਯੋ, ਏਵਂ ਤਾਵ ਰੂਪਂ ਰੂਪਮੇਵ ਵਧੇਤਿ. ਰੂਪਕ੍ਖਨ੍ਧੋ ਪਨ ਭਿਜ੍ਜਮਾਨੋ ਚਤ੍ਤਾਰੋ ਅਰੂਪਕ੍ਖਨ੍ਧੇ ਗਹੇਤ੍ਵਾਵ ਭਿਜ੍ਜਤਿ, ਏਵਂ ਰੂਪਂ ਅਰੂਪਮ੍ਪਿ ਵਧੇਤਿ. ਵੇਦਨਾਕ੍ਖਨ੍ਧੋਪਿ ਭਿਜ੍ਜਮਾਨੋ ਸਞ੍ਞਾਸਙ੍ਖਾਰਵਿਞ੍ਞਾਣਕ੍ਖਨ੍ਧੇ ਗਹੇਤ੍ਵਾਵ ਭਿਜ੍ਜਤਿ. ਸਞ੍ਞਾਕ੍ਖਨ੍ਧਾਦੀਸੁਪਿ ਏਸੇਵ ਨਯੋ. ਏਵਂ ਅਰੂਪਂ ਅਰੂਪਮੇਵ ਵਧੇਤਿ. ਚੁਤਿਕ੍ਖਣੇ ਪਨ ਚਤ੍ਤਾਰੋ ਅਰੂਪਕ੍ਖਨ੍ਧਾ ਭਿਜ੍ਜਮਾਨਾ ਵਤ੍ਥੁਰੂਪਮ੍ਪਿ ਗਹੇਤ੍ਵਾਵ ਭਿਜ੍ਜਨ੍ਤਿ, ਏਵਂ ਅਰੂਪਂ ਰੂਪਮ੍ਪਿ ਵਧੇਤਿ. ਏਵਂ ਤਾਵ ਅਞ੍ਞਮਞ੍ਞਂ ਵਧੇਨ੍ਤੀਤਿ ਵਧਕਾ. ਯਤ੍ਥ ਪਨ ਖਨ੍ਧਾ ਅਤ੍ਥਿ, ਤਤ੍ਥ ਛੇਦਨਭੇਦਨਵਧਬਨ੍ਧਨਾਦਯੋ ਹੋਨ੍ਤਿ, ਨ ਅਞ੍ਞਤ੍ਥਾਤਿ. ਏਵਂ ਖਨ੍ਧੇਸੁ ਸਨ੍ਤੇਸੁ ਵਧੋ ਪਞ੍ਞਾਯਤੀਤਿਪਿ ਵਧਕਾ.

ਇਦਾਨਿ ਪਞ੍ਚਕ੍ਖਨ੍ਧੇ ਰੂਪਾਰੂਪਵਸੇਨ ਦ੍ਵੇ ਕੋਟ੍ਠਾਸੇ ਕਤ੍ਵਾ, ਰੂਪਵਸੇਨ ਵਾ ਨਾਮਵਸੇਨ ਵਾ ਰੂਪਪਰਿਗ੍ਗਹਂ ਆਦਿਂ ਕਤ੍ਵਾ, ਯਾਵ ਅਰਹਤ੍ਤਾ ਕਮ੍ਮਟ੍ਠਾਨਂ ਕਥੇਤਬ੍ਬਂ ਸਿਯਾ ਤਮ੍ਪਿ ਵਿਸੁਦ੍ਧਿਮਗ੍ਗੇ ਕਥਿਤਮੇਵ.

ਛਟ੍ਠੋ ਅਨ੍ਤਰਚਰੋ ਵਧਕੋ ਉਕ੍ਖਿਤ੍ਤਾਸਿਕੋਤਿ ਖੋ, ਭਿਕ੍ਖਵੇ, ਨਨ੍ਦੀਰਾਗਸ੍ਸੇਤਂ ਅਧਿਵਚਨਨ੍ਤਿ ਏਤ੍ਥ ਦ੍ਵੀਹਾਕਾਰੇਹਿ ਨਨ੍ਦੀਰਾਗਸ੍ਸ ਉਕ੍ਖਿਤ੍ਤਾਸਿਕਵਧਕਸਦਿਸਤਾ ਵੇਦਿਤਬ੍ਬਾ ਪਞ੍ਞਾਸਿਰਪਾਤਨਤੋ ਚ ਯੋਨਿਸਮ੍ਪਟਿਪਾਦਨਤੋ ਚ. ਕਥਂ? ਚਕ੍ਖੁਦ੍ਵਾਰਸ੍ਮਿਞ੍ਹਿ ਇਟ੍ਠਾਰਮ੍ਮਣੇ ਆਪਾਥਗਤੇ ਤਂ ਆਰਮ੍ਮਣਂ ਨਿਸ੍ਸਾਯ ਲੋਭੋ ਉਪ੍ਪਜ੍ਜਤਿ, ਏਤ੍ਤਾਵਤਾ ਪਞ੍ਞਾਸੀਸਂ ਪਤਿਤਂ ਨਾਮ ਹੋਤਿ, ਸੋਤਦ੍ਵਾਰਾਦੀਸੁਪਿ ਏਸੇਵ ਨਯੋ. ਏਵਂ ਤਾਵ ਪਞ੍ਞਾਸਿਰਪਾਤਨਤੋ ਸਦਿਸਤਾ ਵੇਦਿਤਬ੍ਬਾ. ਨਨ੍ਦੀਰਾਗੋ ਪਨੇਸ ਅਣ੍ਡਜਾਦਿਭੇਦਾ ਚਤਸ੍ਸੋ ਯੋਨਿਯੋ ਉਪਨੇਤਿ. ਤਸ੍ਸ ਯੋਨਿਉਪਗਮਨਮੂਲਕਾਨਿ ਪਞ੍ਚਵੀਸਤਿ ਮਹਾਭਯਾਨਿ ਦ੍ਵਤ੍ਤਿਂਸ ਕਮ੍ਮਕਾਰਣਾਨਿ ਚ ਆਗਤਾਨੇਵ ਹੋਨ੍ਤੀਤਿ ਏਵਂ ਯੋਨਿਸਮ੍ਪਟਿਪਾਦਨਤੋਪਿਸ੍ਸ ਉਕ੍ਖਿਤ੍ਤਾਸਿਕਵਧਕਸਦਿਸਤਾ ਵੇਦਿਤਬ੍ਬਾ.

ਇਤਿ ਨਨ੍ਦੀਰਾਗਵਸੇਨਾਪਿ ਏਕਸ੍ਸ ਭਿਕ੍ਖੁਨੋ ਕਮ੍ਮਟ੍ਠਾਨਂ ਕਥਿਤਮੇਵ ਹੋਤਿ. ਕਥਂ? ਅਯਞ੍ਹਿ ਨਨ੍ਦੀਰਾਗੋ ਸਙ੍ਖਾਰਕ੍ਖਨ੍ਧੋ, ਤਂ ਸਙ੍ਖਾਰਕ੍ਖਨ੍ਧੋਤਿ ਵਵਤ੍ਥਪੇਤ੍ਵਾ ਤਂਸਮ੍ਪਯੁਤ੍ਤਾ ਵੇਦਨਾ ਵੇਦਨਾਕ੍ਖਨ੍ਧੋ, ਸਞ੍ਞਾ ਸਞ੍ਞਾਕ੍ਖਨ੍ਧੋ, ਚਿਤ੍ਤਂ ਵਿਞ੍ਞਾਣਕ੍ਖਨ੍ਧੋ, ਤੇਸਂ ਵਤ੍ਥਾਰਮ੍ਮਣਂ ਰੂਪਕ੍ਖਨ੍ਧੋਤਿ, ਏਵਂ ਪਞ੍ਚਕ੍ਖਨ੍ਧੇ ਵਵਤ੍ਥਪੇਤਿ. ਇਦਾਨਿ ਤੇ ਪਞ੍ਚਕ੍ਖਨ੍ਧੇ ਨਾਮਰੂਪਵਸੇਨ ਵਵਤ੍ਥਪੇਤ੍ਵਾ, ਤੇਸਂ ਪਚ੍ਚਯਪਰਿਯੇਸਨਤੋ ਪਟ੍ਠਾਯ ਵਿਪਸ੍ਸਨਂ ਵਡ੍ਢੇਤ੍ਵਾ, ਅਨੁਪੁਬ੍ਬੇਨ ਏਕੋ ਅਰਹਤ੍ਤਂ ਪਾਪੁਣਾਤੀਤਿ ਏਵਂ ਨਨ੍ਦੀਰਾਗਵਸੇਨ ਕਮ੍ਮਟ੍ਠਾਨਂ ਕਥਿਤਂ ਹੋਤਿ.

ਛਨ੍ਨਂ ਅਜ੍ਝਤ੍ਤਿਕਾਯਤਨਾਨਂ ਸੁਞ੍ਞਗਾਮੇਨ ਸਦਿਸਤਾ ਪਾਲ਼ਿਯਂਯੇਵ ਆਗਤਾ. ਅਯਂ ਪਨੇਤ੍ਥ ਕਮ੍ਮਟ੍ਠਾਨਨਯੋ – ਯਥਾ ਚ ਤੇ ਛ ਚੋਰਾ ਛਕੁਟਿਕਂ ਸੁਞ੍ਞਂ ਗਾਮਂ ਪਵਿਸਿਤ੍ਵਾ ਅਪਰਾਪਰਂ ਵਿਚਰਨ੍ਤਾ ਕਿਞ੍ਚਿ ਅਲਭਿਤ੍ਵਾ ਗਾਮੇਨ ਅਨਤ੍ਥਿਕਾ ਹੋਨ੍ਤਿ, ਏਵਮੇਵਂ ਭਿਕ੍ਖੁ ਛਸੁ ਅਜ੍ਝਤ੍ਤਿਕਾਯਤਨੇਸੁ ਅਭਿਨਿਵਿਸਿਤ੍ਵਾ ਵਿਚਿਨਨ੍ਤੋ ‘‘ਅਹ’’ਨ੍ਤਿ ਵਾ ‘‘ਮਮ’’ਨ੍ਤਿ ਵਾ ਗਹੇਤਬ੍ਬਂ ਕਿਞ੍ਚਿ ਅਦਿਸ੍ਵਾ ਤੇਹਿ ਅਨਤ੍ਥਿਕੋ ਹੋਤਿ. ਸੋ ‘‘ਵਿਪਸ੍ਸਨਂ ਪਟ੍ਠਪੇਸ੍ਸਾਮੀ’’ਤਿ ਉਪਾਦਾਰੂਪਕਮ੍ਮਟ੍ਠਾਨਵਸੇਨ ਚਕ੍ਖੁਪਸਾਦਾਦਯੋ ਪਰਿਗ੍ਗਹੇਤ੍ਵਾ ‘‘ਅਯਂ ਰੂਪਕ੍ਖਨ੍ਧੋ’’ਤਿ ਵਵਤ੍ਥਪੇਤਿ, ਮਨਾਯਤਨਂ ‘‘ਅਰੂਪਕ੍ਖਨ੍ਧੋ’’ਤਿ. ਇਤਿ ਸਬ੍ਬਾਨਿਪੇਤਾਨਿ ਨਾਮਞ੍ਚੇਵ ਰੂਪਞ੍ਚਾਤਿ ਨਾਮਰੂਪਵਸੇਨ ਵਵਤ੍ਥਪੇਤ੍ਵਾ, ਤੇਸਂ ਪਚ੍ਚਯਂ ਪਰਿਯੇਸਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ, ਸਙ੍ਖਾਰੇ ਸਮ੍ਮਸਨ੍ਤੋ ਅਨੁਪੁਬ੍ਬੇਨ ਅਰਹਤ੍ਤੇ ਪਤਿਟ੍ਠਾਤਿ. ਇਦਂ ਏਕਸ੍ਸ ਭਿਕ੍ਖੁਨੋ ਯਾਵ ਅਰਹਤ੍ਤਾ ਕਮ੍ਮਟ੍ਠਾਨਂ ਕਥਿਤਂ ਹੋਤਿ.

ਇਦਾਨਿ ਬਾਹਿਰਾਨਂ ਗਾਮਘਾਤਕਚੋਰੇਹਿ ਸਦਿਸਤਂ ਦਸ੍ਸੇਨ੍ਤੋ ਚੋਰਾ ਗਾਮਘਾਤਕਾਤਿ ਖੋਤਿਆਦਿਮਾਹ. ਤਤ੍ਥ ਮਨਾਪਾਮਨਾਪੇਸੂਤਿ ਕਰਣਤ੍ਥੇ ਭੁਮ੍ਮਂ, ਮਨਾਪਾਮਨਾਪੇਹੀਤਿ ਅਤ੍ਥੋ. ਤਤ੍ਥ ਚੋਰੇਸੁ ਗਾਮਂ ਹਨਨ੍ਤੇਸੁ ਪਞ੍ਚ ਕਿਚ੍ਚਾਨਿ ਵਤ੍ਤਨ੍ਤਿ – ਚੋਰਾ ਤਾਵ ਗਾਮਂ ਪਰਿਵਾਰੇਤ੍ਵਾ ਠਿਤਾ ਅਗ੍ਗਿਂ ਦਤ੍ਵਾ ਕਟਕਟਸਦ੍ਦਂ ਉਟ੍ਠਾਪੇਨ੍ਤਿ, ਤਤੋ ਮਨੁਸ੍ਸਾ ਹਤ੍ਥਸਾਰਂ ਗਹੇਤ੍ਵਾ ਬਹਿ ਨਿਕ੍ਖਮਨ੍ਤਿ. ਤਤੋ ਤੇਹਿ ਸਦ੍ਧਿਂ ਭਣ੍ਡਕਸ੍ਸ ਕਾਰਣਾ ਹਤ੍ਥਪਰਾਮਾਸਂ ਕਰੋਨ੍ਤਿ. ਕੇਚਿ ਪਨੇਤ੍ਥ ਪਹਾਰਂ ਪਾਪੁਣਨ੍ਤਿ, ਕੇਚਿ ਪਹਾਰਟ੍ਠਾਨੇ ਪਤਨ੍ਤਿ, ਅਵਸੇਸੇ ਪਨ ਅਰੋਗਜਨੇ ਬਨ੍ਧਿਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਨੇਤ੍ਵਾ ਰਜ੍ਜੁਬਨ੍ਧਨਾਦੀਹਿ ਬਨ੍ਧਿਤ੍ਵਾ ਦਾਸਪਰਿਭੋਗੇਨ ਪਰਿਭੁਞ੍ਜਨ੍ਤਿ.

ਤਤ੍ਥ ਗਾਮਘਾਤਕਚੋਰਾਨਂ ਗਾਮਂ ਪਰਿਵਾਰੇਤ੍ਵਾ ਅਗ੍ਗਿਦਾਨਂ ਵਿਯ ਛਸੁ ਦ੍ਵਾਰੇਸੁ ਆਰਮ੍ਮਣੇ ਆਪਾਥਗਤੇ ਕਿਲੇਸਪਰਿਲ਼ਾਹੁਪ੍ਪਤ੍ਤਿ ਵੇਦਿਤਬ੍ਬਾ, ਹਤ੍ਥਸਾਰਂ ਆਦਾਯ ਬਹਿ ਨਿਕ੍ਖਮਨਂ ਵਿਯ. ਤਙ੍ਖਣੇ ਕੁਸਲਧਮ੍ਮਂ ਪਹਾਯ ਅਕੁਸਲਸਮਙ੍ਗਿਤਾ, ਭਣ੍ਡਕਸ੍ਸ ਕਾਰਣਾ ਹਤ੍ਥਪਰਾਮਸਨਾਪਜ੍ਜਨਂ ਵਿਯ ਦੁਕ੍ਕਟਦੁਬ੍ਭਾਸਿਤਪਾਚਿਤ੍ਤਿਯਥੁਲ੍ਲਚ੍ਚਯਾਨਂ ਆਪਜ੍ਜਨਕਾਲੋ, ਪਹਾਰਲਦ੍ਧਕਾਲੋ ਵਿਯ ਸਙ੍ਘਾਦਿਸੇਸਂ ਆਪਜ੍ਜਨਕਾਲੋ, ਪਹਾਰਂ ਲਦ੍ਧਾ ਪਨ ਪਹਾਰਟ੍ਠਾਨੇ ਪਤਿਤਕਾਲੋ ਵਿਯ ਪਾਰਾਜਿਕਂ ਆਪਜ੍ਜਿਤ੍ਵਾ ਅਸ੍ਸਮਣਕਾਲੋ, ਅਵਸੇਸਜਨਸ੍ਸ ਬਨ੍ਧਿਤ੍ਵਾ ਵਸਨਟ੍ਠਾਨਂ ਨੇਤ੍ਵਾ ਦਾਸਪਰਿਭੋਗੇਨ ਪਰਿਭੁਞ੍ਜਨਕਾਲੋ ਵਿਯ ਤਮੇਵ ਆਰਮ੍ਮਣਂ ਨਿਸ੍ਸਾਯ ਸਬ੍ਬੇਸਂ ਪਸ੍ਸਨ੍ਤਾਨਂਯੇਵ ਚੂਲ਼ਸੀਲਮਜ੍ਝਿਮਸੀਲਮਹਾਸੀਲਾਨਿ ਭਿਨ੍ਦਿਤ੍ਵਾ ਸਿਕ੍ਖਂ ਪਚ੍ਚਕ੍ਖਾਯ ਗਿਹਿਭਾਵਂ ਆਪਜ੍ਜਨਕਾਲੋ. ਤਤ੍ਰਸ੍ਸ ਪੁਤ੍ਤਦਾਰਂ ਪੋਸੇਨ੍ਤਸ੍ਸ ਸਨ੍ਦਿਟ੍ਠਿਕੋ ਦੁਕ੍ਖਕ੍ਖਨ੍ਧੋ ਵੇਦਿਤਬ੍ਬੋ, ਕਾਲਂ ਕਤ੍ਵਾ ਅਪਾਯੇ ਨਿਬ੍ਬਤ੍ਤਸ੍ਸ ਸਮ੍ਪਰਾਯਿਕੋ.

ਇਮਾਨਿਪਿ ਬਾਹਿਰਾਯਤਨਾਨਿ ਏਕਸ੍ਸ ਭਿਕ੍ਖੁਨੋ ਕਮ੍ਮਟ੍ਠਾਨਵਸੇਨੇਵ ਕਥਿਤਾਨਿ. ਏਤ੍ਥ ਹਿ ਰੂਪਾਦੀਨਿ ਚਤ੍ਤਾਰਿ ਉਪਾਦਾਰੂਪਾਨਿ, ਫੋਟ੍ਠਬ੍ਬਾਯਤਨਂ ਤਿਸ੍ਸੋ ਧਾਤੁਯੋ, ਧਮ੍ਮਾਯਤਨੇ ਆਪੋਧਾਤੁਯਾ ਸਦ੍ਧਿਂ ਤਾ ਚਤਸ੍ਸੋਤਿ ਇਮਾਨਿ ਚਤ੍ਤਾਰਿ ਭੂਤਾਨਿ, ਤੇਸਂ ਪਰਿਚ੍ਛੇਦਵਸੇਨ ਆਕਾਸਧਾਤੁ, ਲਹੁਤਾਦਿਵਸੇਨ ਲਹੁਤਾਦਯੋਤਿ ਏਵਮਿਦਂ ਸਬ੍ਬਮ੍ਪਿ ਭੂਤੁਪਾਦਾਯਰੂਪਂ ਰੂਪਕ੍ਖਨ੍ਧੋ, ਤਦਾਰਮ੍ਮਣਾ ਵੇਦਨਾਦਯੋ ਚਤ੍ਤਾਰੋ ਅਰੂਪਕ੍ਖਨ੍ਧਾ. ਤਤ੍ਥ ‘‘ਰੂਪਕ੍ਖਨ੍ਧੋ ਰੂਪਂ, ਚਤ੍ਤਾਰੋ ਅਰੂਪਿਨੋ ਖਨ੍ਧਾ ਨਾਮ’’ਨ੍ਤਿ. ਨਾਮਰੂਪਂ ਵਵਤ੍ਥਪੇਤ੍ਵਾ ਪੁਰਿਮਨਯੇਨੇਵ ਪਟਿਪਜ੍ਜਨ੍ਤਸ੍ਸ ਯਾਵ ਅਰਹਤ੍ਤਾ ਕਮ੍ਮਟ੍ਠਾਨਂ ਕਥਿਤਂ ਹੋਤਿ.

ਓਘਾਨਨ੍ਤਿ ਏਤ੍ਥ ਦੁਰੁਤ੍ਤਰਣਟ੍ਠੋ ਓਘਟ੍ਠੋ. ਏਤੇ ਹਿ ‘‘ਸੀਲਸਂਵਰਂ ਪੂਰੇਤ੍ਵਾ ਅਰਹਤ੍ਤਂ ਪਾਪੁਣਿਸ੍ਸਾਮੀ’’ਤਿ ਅਜ੍ਝਾਸਯਂ ਸਮੁਟ੍ਠਾਪੇਤ੍ਵਾ ਕਲ੍ਯਾਣਮਿਤ੍ਤੇ ਨਿਸ੍ਸਾਯ ਸਮ੍ਮਾ ਵਾਯਮਨ੍ਤੇਨ ਤਰਿਤਬ੍ਬਾ, ਯੇਨ ਵਾ ਤੇਨ ਵਾ ਦੁਰੁਤ੍ਤਰਾ. ਇਮਿਨਾ ਦੁਰੁਤ੍ਤਰਣਟ੍ਠੇਨ ਓਘਾਤਿ ਵੁਚ੍ਚਨ੍ਤਿ. ਤੇਪਿ ਏਕਸ੍ਸ ਭਿਕ੍ਖੁਨੋ ਕਮ੍ਮਟ੍ਠਾਨਵਸੇਨ ਕਥਿਤਾ. ਚਤ੍ਤਾਰੋਪਿ ਹਿ ਏਤੇ ਏਕੋ ਸਙ੍ਖਾਰਕ੍ਖਨ੍ਧੋ ਵਾਤਿ. ਸੇਸਂ ਨਨ੍ਦੀਰਾਗੇ ਵੁਤ੍ਤਨਯੇਨੇਵ ਯੋਜੇਤ੍ਵਾ ਵਿਤ੍ਥਾਰੇਤਬ੍ਬਂ.

ਸਕ੍ਕਾਯਸ੍ਸੇਤਂ ਅਧਿਵਚਨਨ੍ਤਿ, ਸਕ੍ਕਾਯੋਪਿ ਹਿ ਆਸੀਵਿਸਾਦੀਹਿ ਉਦਕਣ੍ਣਵਸ੍ਸ ਓਰਿਮਤੀਰਂ ਵਿਯ ਚਤੁਮਹਾਭੂਤਾਦੀਹਿ ਸਾਸਙ੍ਕੋ ਸਪ੍ਪਟਿਭਯੋ, ਸੋਪਿ ਏਕਸ੍ਸ ਭਿਕ੍ਖੁਨੋ ਕਮ੍ਮਟ੍ਠਾਨਵਸੇਨੇਵ ਕਥਿਤੋ. ਸਕ੍ਕਾਯੋ ਹਿ ਤੇਭੂਮਕਪਞ੍ਚਕ੍ਖਨ੍ਧਾ, ਤੇ ਚ ਸਮਾਸਤੋ ਨਾਮਰੂਪਮੇਵਾਤਿ. ਏਵਮੇਤ੍ਥ ਨਾਮਰੂਪਵਵਤ੍ਥਾਨਂ ਆਦਿਂ ਕਤ੍ਵਾ ਯਾਵ ਅਰਹਤ੍ਤਾ ਕਮ੍ਮਟ੍ਠਾਨਂ ਵਿਤ੍ਥਾਰੇਤਬ੍ਬਨ੍ਤਿ.

ਨਿਬ੍ਬਾਨਸ੍ਸੇਤਂ ਅਧਿਵਚਨਨ੍ਤਿ ਨਿਬ੍ਬਾਨਞ੍ਹਿ ਉਦਕਣ੍ਣਵਸ੍ਸ ਪਾਰਿਮਤੀਰਂ ਵਿਯ ਚਤੁਮਹਾਭੂਤਾਦੀਹਿ ਖੇਮਂ ਅਪ੍ਪਟਿਭਯਂ. ਵੀਰਿਯਾਰਮ੍ਭਸ੍ਸੇਤਂ ਅਧਿਵਚਨਨ੍ਤਿ ਏਤ੍ਥ ਚਿਤ੍ਤਕਿਰਿਯਦਸ੍ਸਨਤ੍ਥਂ ਹੇਟ੍ਠਾ ਵੁਤ੍ਤਵਾਯਾਮਮੇਵ ਵੀਰਿਯਨ੍ਤਿ ਗਣ੍ਹਿਤ੍ਵਾ ਦਸ੍ਸੇਤਿ. ਤਿਣ੍ਣੋ ਪਾਰਙ੍ਗਤੋਤਿ ਤਰਿਤ੍ਵਾ ਪਾਰਂ ਗਤੋ.

ਤਤ੍ਥ ਯਥਾ ਸਾਸਙ੍ਕਓਰਿਮਤੀਰੇ ਠਿਤੇਨ ਉਦਕਣ੍ਣਵਂ ਤਰਿਤੁਕਾਮੇਨ ਕਤਿਪਾਹਂ ਵਸਿਤ੍ਵਾ ਸਣਿਕਂ ਨਾਵਂ ਸਜ੍ਜੇਤ੍ਵਾ ਉਦਕਕੀਲ਼ਂ ਕੀਲ਼ਨ੍ਤੇਨ ਵਿਯ ਨ ਨਾਵਾ ਅਭਿਰੁਹਿਤਬ੍ਬਾ. ਏਵਂ ਕਰੋਨ੍ਤੋ ਹਿ ਅਨਾਰੁਲ਼੍ਹੋਵ ਬ੍ਯਸਨਂ ਪਾਪੁਣਾਤਿ. ਏਵਮੇਵ ਕਿਲੇਸਣ੍ਣਵਂ ਤਰਿਤੁਕਾਮੇਨ ‘‘ਤਰੁਣੋ ਤਾਵਮ੍ਹਿ, ਮਹਲ੍ਲਕਕਾਲੇ ਅਟ੍ਠਙ੍ਗਿਕਮਗ੍ਗਕੁਲ੍ਲਂ ਬਨ੍ਧਿਸ੍ਸਾਮੀ’’ਤਿ ਪਪਞ੍ਚੋ ਨ ਕਾਤਬ੍ਬੋ. ਏਵਂ ਕਰੋਨ੍ਤੋ ਹਿ ਮਹਲ੍ਲਕਕਾਲਂ ਅਪਤ੍ਵਾਪਿ ਵਿਨਾਸਂ ਪਾਪੁਣਾਤਿ, ਪਤ੍ਵਾਪਿ ਕਾਤੁਂ ਨ ਸਕ੍ਕੋਤਿ. ਭਦ੍ਦੇਕਰਤ੍ਤਾਦੀਨਿ ਪਨ ਅਨੁਸ੍ਸਰਿਤ੍ਵਾ ਵੇਗੇਨੇਵ ਅਯਂ ਅਰਿਯਮਗ੍ਗਕੁਲ੍ਲੋ ਬਨ੍ਧਿਤਬ੍ਬੋ.

ਯਥਾ ਚ ਕੁਲ੍ਲਂ ਬਨ੍ਧਨ੍ਤਸ੍ਸ ਹਤ੍ਥਪਾਦਪਾਰਿਪੂਰਿ ਇਚ੍ਛਿਤਬ੍ਬਾ. ਕੁਣ੍ਠਪਾਦੋ ਹਿ ਖਞ੍ਜਪਾਦੋ ਵਾ ਪਤਿਟ੍ਠਾਤੁਂ ਨ ਸਕ੍ਕੋਤਿ, ਫਣਹਤ੍ਥਕਾਦਯੋ ਤਿਣਪਣ੍ਣਾਦੀਨਿ ਗਹੇਤੁਂ ਨ ਸਕ੍ਕੋਨ੍ਤਿ. ਏਵਮਿਮਮ੍ਪਿ ਅਰਿਯਮਗ੍ਗਕੁਲ੍ਲਂ ਬਨ੍ਧਨ੍ਤਸ੍ਸ ਸੀਲਪਾਦਾਨਞ੍ਚੇਵ ਸਦ੍ਧਾਹਤ੍ਥਸ੍ਸ ਚ ਪਾਰਿਪੂਰਿ ਇਚ੍ਛਿਤਬ੍ਬਾ. ਨ ਹਿ ਦੁਸ੍ਸੀਲੋ ਅਸ੍ਸਦ੍ਧੋ ਸਾਸਨੇ ਅਪ੍ਪਤਿਟ੍ਠਿਤੋ ਪਟਿਪਤ੍ਤਿਂ ਅਸ੍ਸਦ੍ਦਹਨ੍ਤੋ ਅਰਿਯਮਗ੍ਗਕੁਲ੍ਲਂ ਬਨ੍ਧਿਤੁਂ ਸਕ੍ਕੋਤਿ. ਯਥਾ ਚ ਪਰਿਪੁਣ੍ਣਹਤ੍ਥਪਾਦੋਪਿ ਦੁਬ੍ਬਲੋ ਬ੍ਯਾਧਿਪੀਲ਼ਿਤੋ ਕੁਲ੍ਲਂ ਬਨ੍ਧਿਤੁਂ ਨ ਸਕ੍ਕੋਤਿ, ਥਾਮਸਮ੍ਪਨ੍ਨੋਵ ਸਕ੍ਕੋਤਿ, ਏਵਂ ਸੀਲਵਾ ਸਦ੍ਧੋਪਿ ਅਲਸੋ ਕੁਸੀਤੋ ਇਮਂ ਮਗ੍ਗਕੁਲ੍ਲਂ ਬਨ੍ਧਿਤੁਂ ਨ ਸਕ੍ਕੋਤਿ, ਆਰਦ੍ਧਵੀਰਿਯੋਵ ਸਕ੍ਕੋਤੀਤਿ ਇਮਂ ਬਨ੍ਧਿਤੁਕਾਮੇਨ ਆਰਦ੍ਧਵੀਰਿਯੇਨ ਭਵਿਤਬ੍ਬਂ. ਯਥਾ ਸੋ ਪੁਰਿਸੋ ਕੁਲ੍ਲਂ ਬਨ੍ਧਿਤ੍ਵਾ ਤੀਰੇ ਠਤ੍ਵਾ ਯੋਜਨਵਿਤ੍ਥਾਰਂ ਉਦਕਣ੍ਣਵਂ ‘‘ਅਯਂ ਮਯਾ ਪਚ੍ਚਤ੍ਤਪੁਰਿਸਕਾਰਂ ਨਿਸ੍ਸਾਯ ਨਿਤ੍ਥਰਿਤਬ੍ਬੋ’’ਤਿ ਮਾਨਸਂ ਬਨ੍ਧਤਿ, ਏਵਂ ਯੋਗਿਨਾਪਿ ਚਙ੍ਕਮਾ ਓਰੁਯ੍ਹ ‘‘ਅਜ੍ਜ ਮਯਾ ਚਤੁਮਗ੍ਗਵਜ੍ਝਂ ਕਿਲੇਸਣ੍ਣਵਂ ਤਰਿਤ੍ਵਾ ਅਰਹਤ੍ਤੇ ਪਤਿਟ੍ਠਾਤਬ੍ਬ’’ਨ੍ਤਿ ਮਾਨਸਂ ਬਨ੍ਧਿਤਬ੍ਬਂ.

ਯਥਾ ਚ ਸੋ ਪੁਰਿਸੋ ਕੁਲ੍ਲਂ ਨਿਸ੍ਸਾਯ ਉਦਕਣ੍ਣਵਂ ਤਰਨ੍ਤੋ ਗਾਵੁਤਮਤ੍ਤਂ ਗਨ੍ਤ੍ਵਾ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ‘‘ਏਕਕੋਟ੍ਠਾਸਂ ਅਤਿਕ੍ਕਨ੍ਤੋਮ੍ਹਿ, ਅਞ੍ਞੇ ਤਯੋ ਸੇਸਾ’’ਤਿ ਜਾਨਾਤਿ, ਅਪਰਮ੍ਪਿ ਗਾਵੁਤਮਤ੍ਤਂ ਗਨ੍ਤ੍ਵਾ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ‘‘ਦ੍ਵੇ ਅਤਿਕ੍ਕਨ੍ਤੋਮ੍ਹਿ, ਦ੍ਵੇ ਸੇਸਾ’’ਤਿ ਜਾਨਾਤਿ, ਅਪਰਮ੍ਪਿ ਗਾਵੁਤਮਤ੍ਤਂ ਗਨ੍ਤ੍ਵਾ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ‘‘ਤਯੋ ਅਤਿਕ੍ਕਨ੍ਤੋਮ੍ਹਿ, ਏਕੋ ਸੇਸੋ’’ਤਿ ਜਾਨਾਤਿ, ਤਮ੍ਪਿ ਅਤਿਕ੍ਕਮ੍ਮ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ‘‘ਚਤ੍ਤਾਰੋਪਿ ਮੇ ਕੋਟ੍ਠਸਾ ਅਤਿਕ੍ਕਨ੍ਤਾ’’ਤਿ ਜਾਨਾਤਿ, ਤਞ੍ਚ ਕੁਲ੍ਲਂ ਪਾਦੇਨ ਅਕ੍ਕਮਿਤ੍ਵਾ ਸੋਤਾਭਿਮੁਖਂ ਖਿਪਿਤ੍ਵਾ ਉਤ੍ਤਰਿਤ੍ਵਾ ਤੀਰੇ ਤਿਟ੍ਠਤਿ. ਏਵਂ ਅਯਮ੍ਪਿ ਭਿਕ੍ਖੁ ਅਰਿਯਮਗ੍ਗਕੁਲ੍ਲਂ ਨਿਸ੍ਸਾਯ ਕਿਲੇਸਣ੍ਣਵਂ ਤਰਨ੍ਤੋ ਸੋਤਾਪਤ੍ਤਿਮਗ੍ਗੇਨ ਪਠਮਮਗ੍ਗਵਜ੍ਝੇ ਕਿਲੇਸੇ ਤਰਿਤ੍ਵਾ ਮਗ੍ਗਾਨਨ੍ਤਰੇ ਫਲੇ ਠਿਤੋ ਪਚ੍ਚਵੇਕ੍ਖਣਞਾਣੇਨ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ‘‘ਚਤੁਮਗ੍ਗਵਜ੍ਝਾਨਂ ਮੇ ਕਿਲੇਸਾਨਂ ਏਕੋ ਕੋਟ੍ਠਾਸੋ ਪਹੀਨੋ, ਇਤਰੇ ਤਯੋ ਸੇਸਾ’’ਤਿ ਜਾਨਾਤਿ. ਪੁਨ ਤਥੇਵ ਇਨ੍ਦ੍ਰਿਯਬਲਬੋਜ੍ਝਙ੍ਗਾਨਿ ਸਮੋਧਾਨੇਤ੍ਵਾ ਸਙ੍ਖਾਰੇ ਸਮ੍ਮਸਨ੍ਤੋ ਸਕਦਾਗਾਮਿਮਗ੍ਗੇਨ ਦੁਤਿਯਮਗ੍ਗਵਜ੍ਝੇ ਕਿਲੇਸੇ ਤਰਿਤ੍ਵਾ ਮਗ੍ਗਾਨਨ੍ਤਰੇ ਫਲੇ ਠਿਤੋ ਪਚ੍ਚਵੇਕ੍ਖਣਞਾਣੇਨ ਨਿਵਤ੍ਤਿਤ੍ਵਾ, ਓਲੋਕੇਨ੍ਤੋ ‘‘ਚਤੁਮਗ੍ਗਵਜ੍ਝਾਨਂ ਮੇ ਕਿਲੇਸਾਨਂ ਦ੍ਵੇ ਕੋਟ੍ਠਾਸਾ ਪਹੀਨਾ, ਇਤਰੇ ਦ੍ਵੇ ਸੇਸਾ’’ਤਿ ਜਾਨਾਤਿ. ਪੁਨ ਤਥੇਵ ਇਨ੍ਦ੍ਰਿਯਬਲਬੋਜ੍ਝਙ੍ਗਾਨਿ ਸਮੋਧਾਨੇਤ੍ਵਾ ਸਙ੍ਖਾਰੇ ਸਮ੍ਮਸਨ੍ਤੋ ਅਨਾਗਾਮਿਮਗ੍ਗੇਨ ਤਤਿਯਮਗ੍ਗਵਜ੍ਝੇ ਕਿਲੇਸੇ ਤਰਿਤ੍ਵਾ ਮਗ੍ਗਾਨਨ੍ਤਰੇ ਫਲੇ ਠਿਤੋ ਪਚ੍ਚਵੇਕ੍ਖਣਞਾਣੇਨ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ‘‘ਚਤੁਮਗ੍ਗਵਜ੍ਝਾਨਂ ਮੇ ਕਿਲੇਸਾਨਂ ਤਯੋ ਕੋਟ੍ਠਾਸਾ ਪਹੀਨਾ, ਏਕੋ ਸੇਸੋ’’ਤਿ ਜਾਨਾਤਿ. ਪੁਨ ਤਥੇਵ ਇਨ੍ਦ੍ਰਿਯਬਲਬੋਜ੍ਝਙ੍ਗਾਨਿ ਸਮੋਧਾਨੇਤ੍ਵਾ ਸਙ੍ਖਾਰੇ ਸਮ੍ਮਸਨ੍ਤੋ ਅਰਹਤ੍ਤਮਗ੍ਗੇਨ ਚਤੁਤ੍ਥਮਗ੍ਗਵਜ੍ਝੇ ਕਿਲੇਸੇ ਤਰਿਤ੍ਵਾ ਮਗ੍ਗਾਨਨ੍ਤਰੇ ਫਲੇ ਠਿਤੋ ਪਚ੍ਚਵੇਕ੍ਖਣਞਾਣੇਨ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ‘‘ਸਬ੍ਬਕਿਲੇਸਾ ਮੇ ਪਹੀਨਾ’’ਤਿ ਜਾਨਾਤਿ.

ਯਥਾ ਸੋ ਪੁਰਿਸੋ ਤਂ ਕੁਲ੍ਲਂ ਸੋਤੇ ਪਵਾਹੇਤ੍ਵਾ ਉਤ੍ਤਰਿਤ੍ਵਾ ਥਲੇ ਠਿਤੋ ਨਗਰਂ ਪਵਿਸਿਤ੍ਵਾ ਉਪਰਿਪਾਸਾਦਵਰਗਤੋ ‘‘ਏਤ੍ਤਕੇਨ ਵਤਮ੍ਹਿ ਅਨਤ੍ਥੇਨ ਮੁਤ੍ਤੋ’’ਤਿ ਏਕਗ੍ਗਚਿਤ੍ਤੋ ਤੁਟ੍ਠਮਾਨਸੋ ਨਿਸੀਦਤਿ, ਏਵਂ ਤਸ੍ਮਿਂਯੇਵ ਵਾ ਆਸਨੇ ਅਞ੍ਞੇਸੁ ਵਾ ਰਤ੍ਤਿਟ੍ਠਾਨਦਿਵਾਟ੍ਠਾਨਾਦੀਸੁ ਯਤ੍ਥ ਕਤ੍ਥਚਿ ਨਿਸਿਨ੍ਨੋ ‘‘ਏਤ੍ਤਕੇਨ ਵਤਮ੍ਹਿ ਅਨਤ੍ਥੇਨ ਮੁਤ੍ਤੋ’’ਤਿ ਨਿਬ੍ਬਾਨਾਰਮ੍ਮਣਂ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਏਕਗ੍ਗਚਿਤ੍ਤੋ ਤੁਟ੍ਠਮਾਨਸੋ ਨਿਸੀਦਤਿ. ਇਦਂ ਵਾ ਸਨ੍ਧਾਯ ਵੁਤ੍ਤਂ ਤਿਣ੍ਣੋ ਪਾਰਙ੍ਗਤੋ ਥਲੇ ਤਿਟ੍ਠਤਿ ਬ੍ਰਾਹ੍ਮਣੋਤਿ ਖੋ, ਭਿਕ੍ਖਵੇ, ਅਰਹਤੋ ਏਤਂ ਅਧਿਵਚਨਨ੍ਤਿ. ਏਵਂ ਤਾਵੇਤ੍ਥ ਨਾਨਾਕਮ੍ਮਟ੍ਠਾਨਾਨਿ ਕਥਿਤਾਨਿ, ਸਮੋਧਾਨੇਤ੍ਵਾ ਪਨ ਸਬ੍ਬਾਨਿਪਿ ਏਕਮੇਵ ਕਤ੍ਵਾ ਦਸ੍ਸੇਤਬ੍ਬਾਨਿ. ਏਕਂ ਕਤ੍ਵਾ ਦਸ੍ਸੇਨ੍ਤੇਨਾਪਿ ਪਞ੍ਚਕ੍ਖਨ੍ਧਵਸੇਨੇਵ ਵਿਨਿਵਤ੍ਤੇਤਬ੍ਬਾਨਿ.

ਕਥਂ? ਏਤ੍ਥ ਹਿ ਚਤ੍ਤਾਰਿ ਮਹਾਭੂਤਾਨਿ ਅਜ੍ਝਤ੍ਤਿਕਾਨਿ ਪਞ੍ਚਾਯਤਨਾਨਿ ਬਾਹਿਰਾਨਿ ਪਞ੍ਚਾਯਤਨਾਨਿ ਧਮ੍ਮਾਯਤਨੇ ਪਨ੍ਨਰਸ ਸੁਖੁਮਰੂਪਾਨਿ ਸਕ੍ਕਾਯਸ੍ਸ ਏਕਦੇਸੋਤਿ ਅਯਂ ਰੂਪਕ੍ਖਨ੍ਧੋ, ਮਨਾਯਤਨਂ ਵਿਞ੍ਞਾਣਕ੍ਖਨ੍ਧੋ ਧਮ੍ਮਾਯਤਨੇਕਦੇਸੋ ਚਤ੍ਤਾਰੋ ਓਘਾ ਸਕ੍ਕਾਯੇਕਦੇਸੋਤਿ ਇਮੇ ਚਤ੍ਤਾਰੋ ਅਰੂਪਿਨੋ ਖਨ੍ਧਾ. ਤਤ੍ਥ ਰੂਪਕ੍ਖਨ੍ਧੋ ਰੂਪਂ, ਚਤ੍ਤਾਰੋ ਅਰੂਪਿਨੋ ਖਨ੍ਧਾ ਨਾਮਨ੍ਤਿ ਇਦਂ ਨਾਮਰੂਪਂ. ਤਸ੍ਸ ਨਨ੍ਦੀਰਾਗੋ ਕਾਮੋਘੋ ਭਵੋਘੋ ਧਮ੍ਮਾਯਤਨੇਕਦੇਸੋ ਸਕ੍ਕਾਯੇਕਦੇਸੋਤਿ ਇਮੇ ਪਚ੍ਚਯਾ. ਇਤਿ ਸਪ੍ਪਚ੍ਚਯਂ ਨਾਮਰੂਪਂ ਵਵਤ੍ਥਪੇਤਿ ਨਾਮ. ਸਪ੍ਪਚ੍ਚਯਂ ਨਾਮਰੂਪਂ ਵਵਤ੍ਥਪੇਤ੍ਵਾ ਤਿਲਕ੍ਖਣਂ ਆਰੋਪੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਸਙ੍ਖਾਰੇ ਸਮ੍ਮਸਨ੍ਤੋ ਅਰਹਤ੍ਤਂ ਪਾਪੁਣਾਤੀਤਿ ਇਦਂ ਏਕਸ੍ਸ ਭਿਕ੍ਖੁਨੋ ਨਿਯ੍ਯਾਨਮੁਖਂ.

ਤਤ੍ਥ ਚਤ੍ਤਾਰੋ ਮਹਾਭੂਤਾ ਪਞ੍ਚੁਪਾਦਾਨਕ੍ਖਨ੍ਧਾ ਅਜ੍ਝਤ੍ਤਿਕਬਾਹਿਰਾਨਿ ਏਕਾਦਸਾਯਤਨਾਨਿ ਧਮ੍ਮਾਯਤਨੇਕਦੇਸੋ ਦਿਟ੍ਠੋਘੋ ਅਵਿਜ੍ਜੋਘੋ ਸਕ੍ਕਾਯੇਕਦੇਸੋਤਿ ਇਦਂ ਦੁਕ੍ਖਸਚ੍ਚਂ, ਨਨ੍ਦੀਰਾਗੋ ਧਮ੍ਮਾਯਤਨੇਕਦੇਸੋ ਕਾਮੋਘੋ ਭਵੋਘੋ ਸਕ੍ਕਾਯੇਕਦੇਸੋਤਿ ਇਦਂ ਸਮੁਦਯਸਚ੍ਚਂ, ਪਾਰਿਮਤੀਰਸਙ੍ਖਾਤਂ ਨਿਬ੍ਬਾਨਂ ਨਿਰੋਧਸਚ੍ਚਂ, ਅਰਿਯਮਗ੍ਗੋ ਮਗ੍ਗਸਚ੍ਚਂ. ਤਤ੍ਥ ਦ੍ਵੇ ਸਚ੍ਚਾਨਿ ਵਟ੍ਟਂ, ਦ੍ਵੇ ਵਿਵਟ੍ਟਂ, ਦ੍ਵੇ ਲੋਕਿਯਾਨਿ, ਦ੍ਵੇ ਲੋਕੁਤ੍ਤਰਾਨੀਤਿ ਚਤ੍ਤਾਰਿ ਸਚ੍ਚਾਨਿ ਸੋਲ਼ਸਹਾਕਾਰੇਹਿ ਸਟ੍ਠਿਨਯਸਹਸ੍ਸੇਹਿ ਵਿਭਜਿਤ੍ਵਾ ਦਸ੍ਸੇਤਬ੍ਬਾਨੀਤਿ. ਦੇਸਨਾਪਰਿਯੋਸਾਨੇ ਵਿਪਞ੍ਚਿਤਞ੍ਞੂ ਪਞ੍ਚਸਤਾ ਭਿਕ੍ਖੂ ਅਰਹਤ੍ਤੇ ਪਤਿਟ੍ਠਹਿਂਸੁ. ਸੁਤ੍ਤਂ ਪਨ ਦੁਕ੍ਖਲਕ੍ਖਣਵਸੇਨ ਕਥਿਤਂ.