੨. ਖਣਸੁਤ੍ਤਵਣ੍ਣਨਾ

੧੩੫. ਦੁਤਿਯੇ ਛਫਸ੍ਸਾਯਤਨਿਕਾ ਨਾਮਾਤਿ ਵਿਸੁਂ ਛਫਸ੍ਸਾਯਤਨਿਕਾ ਨਾਮ ਨਿਰਯਾ ਨਤ੍ਥਿ. ਸਬ੍ਬੇਸੁਪਿ ਹਿ ਏਕਤਿਂਸਮਹਾਨਿਰਯੇਸੁ ਛਦ੍ਵਾਰਫਸ੍ਸਾਯਤਨਪਞ੍ਞਤ੍ਤਿ ਹੋਤਿਯੇਵ. ਇਦਂ ਪਨ ਅਵੀਚਿਮਹਾਨਿਰਯਂ ਸਨ੍ਧਾਯ ਵੁਤ੍ਤਂ. ਸਗ੍ਗਾਤਿ ਇਧਾਪਿ ਤਾਵਤਿਂਸਪੁਰਮੇਵ ਅਧਿਪ੍ਪੇਤਂ. ਕਾਮਾਵਚਰਦੇਵਲੋਕੇ ਪਨ ਏਕਸ੍ਮਿਮ੍ਪਿ ਛਫਸ੍ਸਾਯਤਨਪਞ੍ਞਤ੍ਤਿਯਾ ਅਭਾਵੋ ਨਾਮ ਨਤ੍ਥਿ. ਇਮਿਨਾ ਕਿਂ ਦੀਪੇਤਿ? ਨਿਰਯੇ ਏਕਨ੍ਤਦੁਕ੍ਖਸਮਪ੍ਪਿਤਭਾਵੇਨ, ਦੇਵਲੋਕੇ ਚ ਏਕਨ੍ਤਸੁਖਸਮਪ੍ਪਿਤਤ੍ਤਾ ਏਕਨ੍ਤਖਿਡ੍ਡਾਰਤਿਵਸੇਨ ਉਪ੍ਪਨ੍ਨਪਮਾਦੇਨ ਮਗ੍ਗਬ੍ਰਹ੍ਮਚਰਿਯਵਾਸਂ ਵਸਿਤੁਂ ਨ ਸਕ੍ਕਾ. ਮਨੁਸ੍ਸਲੋਕੋ ਪਨ ਵੋਕਿਣ੍ਣਸੁਖਦੁਕ੍ਖੋ, ਇਧੇਵ ਅਪਾਯੋਪਿ ਸਗ੍ਗੋਪਿ ਪਞ੍ਞਾਯਤਿ. ਅਯਂ ਮਗ੍ਗਬ੍ਰਹ੍ਮਚਰਿਯਸ੍ਸ ਕਮ੍ਮਭੂਮਿ ਨਾਮ, ਸਾ ਤੁਮ੍ਹੇਹਿ ਲਦ੍ਧਾ. ਤਸ੍ਮਾ ਯੇ ਵੋ ਇਮੇ ਮਾਨੁਸ੍ਸਕਾ ਖਨ੍ਧਾ ਲਦ੍ਧਾ, ਤੇ ਵੋ ਲਾਭਾ. ਯਞ੍ਚ ਵੋ ਇਦਂ ਮਨੁਸ੍ਸਤ੍ਤਂ ਲਦ੍ਧਂ, ਪਟਿਲਦ੍ਧੋ ਵੋ ਬ੍ਰਹ੍ਮਚਰਿਯਵਾਸਸ੍ਸ ਖਣੋ ਸਮਯੋਤਿ. ਵੁਤ੍ਤਮ੍ਪਿ ਹੇਤਂ ਪੋਰਾਣੇਹਿ –

‘‘ਅਯਂ ਕਮ੍ਮਭੂਮਿ ਇਧ ਮਗ੍ਗਭਾਵਨਾ,

ਠਾਨਾਨਿ ਸਂਵੇਜਨਿਯਾ ਬਹੂ ਇਧ;

ਸਂਵੇਗਸਂਵੇਜਨਿਯੇਸੁ ਵਤ੍ਥੁਸੁ,

ਸਂਵੇਗਜਾਤੋਵ ਪਯੁਞ੍ਚ ਯੋਨਿਸੋ’’ਤਿ.