੩. ਪਠਮਰੂਪਾਰਾਮਸੁਤ੍ਤਵਣ੍ਣਨਾ

੧੩੬. ਤਤਿਯੇ ਰੂਪਸਮ੍ਮੁਦਿਤਾਤਿ ਰੂਪੇ ਸਮ੍ਮੁਦਿਤਾ ਪਮੋਦਿਤਾ. ਦੁਕ੍ਖਾਤਿ ਦੁਕ੍ਖਿਤਾ. ਸੁਖੋਤਿ ਨਿਬ੍ਬਾਨਸੁਖੇਨ ਸੁਖਿਤੋ. ਕੇਵਲਾਤਿ ਸਕਲਾ. ਯਾਵਤਤ੍ਥੀਤਿ ਵੁਚ੍ਚਤੀਤਿ ਯਤ੍ਤਕਾ ਅਤ੍ਥੀਤਿ ਵੁਚ੍ਚਤਿ. ਏਤੇ ਵੋਤਿ ਏਤ੍ਥ ਵੋ-ਕਾਰੋ ਨਿਪਾਤਮਤ੍ਤਂ. ਪਚ੍ਚਨੀਕਮਿਦਂ ਹੋਤਿ, ਸਬ੍ਬਲੋਕੇਨ ਪਸ੍ਸਤਨ੍ਤਿ ਯਂ ਇਦਂ ਪਸ੍ਸਨ੍ਤਾਨਂ ਪਣ੍ਡਿਤਾਨਂ ਦਸ੍ਸਨਂ, ਤਂ ਸਬ੍ਬਲੋਕੇਨ ਪਚ੍ਚਨੀਕਂ ਹੋਤਿ ਵਿਰੁਦ੍ਧਂ. ਲੋਕੋ ਹਿ ਪਞ੍ਚਕ੍ਖਨ੍ਧੇ ਨਿਚ੍ਚਾ ਸੁਖਾ ਅਤ੍ਤਾ ਸੁਭਾਤਿ ਮਞ੍ਞਤਿ, ਪਣ੍ਡਿਤਾ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ ਅਸੁਭਾਤਿ. ਸੁਖਤੋ ਆਹੂਤਿ ਸੁਖਨ੍ਤਿ ਕਥੇਨ੍ਤਿ. ਸੁਖਤੋ ਵਿਦੂਤਿ ਸੁਖਨ੍ਤਿ ਜਾਨਨ੍ਤਿ. ਸਬ੍ਬਮੇਤਂ ਨਿਬ੍ਬਾਨਮੇਵ ਸਨ੍ਧਾਯ ਵੁਤ੍ਤਂ.

ਸਮ੍ਮੂਲ਼੍ਹੇਤ੍ਥਾਤਿ ਏਤ੍ਥ ਨਿਬ੍ਬਾਨੇ ਸਮ੍ਮੂਲ਼੍ਹਾ. ਅਵਿਦ੍ਦਸੂਤਿ ਬਾਲਾ. ਸਬ੍ਬੇਪਿ ਹਿ ਛਨ੍ਨਵੁਤਿਪਾਸਣ੍ਡਿਨੋ ‘‘ਨਿਬ੍ਬਾਨਂ ਪਾਪੁਣਿਸ੍ਸਾਮਾ’’ਤਿ ਸਞ੍ਞਿਨੋ ਹੋਨ੍ਤਿ, ਤੇ ਪਨ ‘‘ਨਿਬ੍ਬਾਨਂ ਨਾਮ ਇਦ’’ਨ੍ਤਿਪਿ ਨ ਜਾਨਨ੍ਤਿ. ਨਿਵੁਤਾਨਨ੍ਤਿ ਕਿਲੇਸਨੀਵਰਣੇਨ ਨਿਵੁਤਾਨਂ ਪਰਿਯੋਨਦ੍ਧਾਨਂ. ਅਨ੍ਧਕਾਰੋ ਅਪਸ੍ਸਤਨ੍ਤਿ ਅਪਸ੍ਸਨ੍ਤਾਨਂ ਅਨ੍ਧਕਾਰੋ ਹੋਤਿ. ਕਿਂ ਤਂ ਏਵਂ ਹੋਤਿ? ਨਿਬ੍ਬਾਨਂ ਵਾ ਨਿਬ੍ਬਾਨਦਸ੍ਸਨਂ ਵਾ ਅਪਸ੍ਸਨ੍ਤਾਨਞ੍ਹਿ ਬਾਲਾਨਂ ਨਿਬ੍ਬਾਨਮ੍ਪਿ ਨਿਬ੍ਬਾਨਦਸ੍ਸਨਮ੍ਪਿ ਕਾਲ਼ਮੇਘਅਵਚ੍ਛਾਦਿਤਂ ਵਿਯ ਚਨ੍ਦਮਣ੍ਡਲਂ ਕਟਾਹੇਨ ਪਟਿਕੁਜ੍ਜਿਤਪਤ੍ਤੋ ਵਿਯ ਚ ਨਿਚ੍ਚਕਾਲਂ ਤਮੋ ਚੇਵ ਅਨ੍ਧਕਾਰੋ ਚ ਸਮ੍ਪਜ੍ਜਤਿ.

ਸਤਞ੍ਚ ਵਿਵਟਂ ਹੋਤਿ, ਆਲੋਕੋ ਪਸ੍ਸਤਾਮਿਵਾਤਿ ਸਤਞ੍ਚ ਸਪ੍ਪੁਰਿਸਾਨਂ ਪਞ੍ਞਾਦਸ੍ਸਨੇਨ ਪਸ੍ਸਨ੍ਤਾਨਂ ਨਿਬ੍ਬਾਨਂ ਆਲੋਕੋ ਵਿਯ ਵਿਵਟਂ ਹੋਤਿ. ਸਨ੍ਤਿਕੇ ਨ ਵਿਜਾਨਨ੍ਤਿ, ਮਗਾ ਧਮ੍ਮਸ੍ਸ ਅਕੋਵਿਦਾਤਿ ਯਂ ਅਤ੍ਤਨੋ ਸਰੀਰੇ ਕੇਸੇ ਵਾ ਲੋਮਾਦੀਸੁ ਵਾ ਅਞ੍ਞਤਰਕੋਟ੍ਠਾਸਂ ਪਰਿਚ੍ਛਿਨ੍ਦਿਤ੍ਵਾ ਅਨਨ੍ਤਰਮੇਵ ਅਧਿਗਨ੍ਤਬ੍ਬਤੋ ਅਤ੍ਤਨੋ ਵਾ ਖਨ੍ਧਾਨਂ ਨਿਰੋਧਮਗ੍ਗਤੋ ਸਨ੍ਤਿਕੇ ਨਿਬ੍ਬਾਨਂ. ਤਂ ਏਵਂ ਸਨ੍ਤਿਕੇ ਸਮਾਨਮ੍ਪਿ ਮਗ੍ਗਭੂਤਾ ਜਨਾ ਮਗ੍ਗਾਮਗ੍ਗਧਮ੍ਮਸ੍ਸ ਚਤੁਸਚ੍ਚਧਮ੍ਮਸ੍ਸ ਵਾ ਅਕੋਵਿਦਾ ਨ ਜਾਨਨ੍ਤਿ.

ਮਾਰਧੇਯ੍ਯਾਨੁਪਨ੍ਨੇਹੀਤਿ ਤੇਭੂਮਕਵਟ੍ਟਂ ਮਾਰਸ੍ਸ ਨਿਵਾਸਟ੍ਠਾਨਂ ਅਨੁਪਨ੍ਨੇਹਿ. ਕੋ ਨੁ ਅਞ੍ਞਤ੍ਰ ਅਰਿਯੇਭੀਤਿ ਠਪੇਤ੍ਵਾ ਅਰਿਯੇ ਕੋ ਨੁ ਅਞ੍ਞੋ ਨਿਬ੍ਬਾਨਪਦਂ ਜਾਨਿਤੁਂ ਅਰਹਤਿ. ਸਮ੍ਮਦਞ੍ਞਾਯ ਪਰਿਨਿਬ੍ਬਨ੍ਤੀਤਿ ਅਰਹਤ੍ਤਪਞ੍ਞਾਯ ਸਮ੍ਮਾ ਜਾਨਿਤ੍ਵਾ ਅਨਨ੍ਤਰਮੇਵ ਅਨਾਸਵਾ ਹੁਤ੍ਵਾ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਨ੍ਤਿ. ਅਥ ਵਾ ਸਮ੍ਮਦਞ੍ਞਾਯ ਅਨਾਸਵਾ ਹੁਤ੍ਵਾ ਅਨ੍ਤੇ ਖਨ੍ਧਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਨ੍ਤਿ.