੬. ਘੋਸਿਤਸੁਤ੍ਤਵਣ੍ਣਨਾ

੧੨੯. ਛਟ੍ਠੇ ਰੂਪਾ ਚ ਮਨਾਪਾਤਿ ਰੂਪਾ ਚ ਮਨਾਪਾ ਸਂਵਿਜ੍ਜਨ੍ਤਿ. ਚਕ੍ਖੁਵਿਞ੍ਞਾਣਞ੍ਚਾਤਿ ਚਕ੍ਖੁਵਿਞ੍ਞਾਣਞ੍ਚ ਸਂਵਿਜ੍ਜਤਿ. ਸੁਖਵੇਦਨਿਯਂ ਫਸ੍ਸਨ੍ਤਿ ਚਕ੍ਖੁਵਿਞ੍ਞਾਣਸਮ੍ਪਯੁਤ੍ਤਂ ਉਪਨਿਸ੍ਸਯਵਸੇਨ ਜਵਨਕਾਲੇ ਸੁਖਵੇਦਨਾਯ ਪਚ੍ਚਯਭੂਤਂ ਫਸ੍ਸਂ. ਸੁਖਾ ਵੇਦਨਾਤਿ ਏਕਂ ਫਸ੍ਸਂ ਪਟਿਚ੍ਚ ਜਵਨਵਸੇਨ ਸੁਖਵੇਦਨਾ ਉਪ੍ਪਜ੍ਜਤਿ. ਸੇਸਪਦੇਸੁਪਿ ਏਸੇਵ ਨਯੋ.

ਇਤਿ ਇਮਸ੍ਮਿਂ ਸੁਤ੍ਤੇ ਤੇਵੀਸਤਿ ਧਾਤੁਯੋ ਕਥਿਤਾ. ਕਥਂ? ਏਤ੍ਥ ਹਿ ਚਕ੍ਖੁਪਸਾਦੋ ਚਕ੍ਖੁਧਾਤੁ, ਤਸ੍ਸ ਆਰਮ੍ਮਣਂ ਰੂਪਧਾਤੁ, ਚਕ੍ਖੁਵਿਞ੍ਞਾਣਂ ਵਿਞ੍ਞਾਣਧਾਤੁ, ਚਕ੍ਖੁਵਿਞ੍ਞਾਣਧਾਤੁਯਾ ਸਹਜਾਤਾ ਤਯੋ ਖਨ੍ਧਾ ਧਮ੍ਮਧਾਤੁ, ਏਵਂ ਪਞ੍ਚਸੁ ਦ੍ਵਾਰੇਸੁ ਚਤੁਨ੍ਨਂ ਚਤੁਨ੍ਨਂ ਵਸੇਨ ਵੀਸਤਿ. ਮਨੋਦ੍ਵਾਰੇ ‘‘ਮਨੋਧਾਤੂ’’ਤਿ ਆਵਜ੍ਜਨਚਿਤ੍ਤਂ ਗਹਿਤਂ, ਆਰਮ੍ਮਣਞ੍ਚੇਵ ਹਦਯਵਤ੍ਥੁ ਚ ਧਮ੍ਮਧਾਤੁ, ਵਤ੍ਥੁਨਿਸ੍ਸਿਤਂ ਮਨੋਵਿਞ੍ਞਾਣਧਾਤੂਤਿ ਏਵਂ ਤੇਵੀਸਤਿ ਹੋਨ੍ਤਿ. ਏਵਂ ਤੇਵੀਸਤਿਯਾ ਧਾਤੂਨਂ ਵਸੇਨ ਧਾਤੁਨਾਨਤ੍ਤਂ ਵੁਤ੍ਤਂ ਭਗਵਤਾਤਿ ਦਸ੍ਸੇਤਿ.