੧੩. ਗਹਪਤਿਵਗ੍ਗੋ

੧-੩. ਵੇਸਾਲੀਸੁਤ੍ਤਾਦਿਵਣ੍ਣਨਾ

੧੨੪-੧੨੬. ਗਹਪਤਿਵਗ੍ਗਸ੍ਸ ਪਠਮੇ ਉਗ੍ਗੋਤਿ ਪਣੀਤਦਾਯਕਾਨਂ ਅਗ੍ਗਉਗ੍ਗੋ, ਸੋ ਭਗਵਤਾ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਪਣੀਤਦਾਯਕਾਨਂ ਯਦਿਦਂ ਉਗ੍ਗੋ ਗਹਪਤੀ’’ਤਿ ਏਵਂ ਏਤਦਗ੍ਗੇ ਠਪਿਤੋ. ਸੇਸਮੇਤੇਸੁ ਚੇਵ ਦ੍ਵੀਸੁ, ਤਤਿਯੇ ਚ ਵੁਤ੍ਤਤ੍ਥਮੇਵ.

੪-੫. ਭਾਰਦ੍ਵਾਜਸੁਤ੍ਤਾਦਿਵਣ੍ਣਨਾ

੧੨੭-੧੨੮. ਚਤੁਤ੍ਥੇ ਪਿਣ੍ਡਂ ਉਲਮਾਨੋ ਪਰਿਯੇਸਮਾਨੋ ਪਬ੍ਬਜਿਤੋਤਿ ਪਿਣ੍ਡੋਲੋ. ਸੋ ਕਿਰ ਪਰਿਜਿਣ੍ਣਭੋਗੋ ਬ੍ਰਾਹ੍ਮਣੋ ਅਹੋਸਿ. ਅਥ ਭਿਕ੍ਖੁਸਙ੍ਘਸ੍ਸ ਲਾਭਸਕ੍ਕਾਰਂ ਦਿਸ੍ਵਾ ਪਿਣ੍ਡਤ੍ਥਾਯ ਨਿਕ੍ਖਮਿਤ੍ਵਾ ਪਬ੍ਬਜਿਤੋ. ਸੋ ਮਹਨ੍ਤਂ ਕਪਲ੍ਲਪਤ੍ਤਂ ਗਹੇਤ੍ਵਾ ਚਰਤਿ, ਤੇਨ ਕਪਲ੍ਲਪੂਰਂ ਯਾਗੁਂ ਪਿਵਤਿ, ਕਪਲ੍ਲਪੂਰੇ ਪੂਵੇ ਖਾਦਤਿ, ਕਪਲ੍ਲਪੂਰਂ ਭਤ੍ਤਂ ਭੁਞ੍ਜਤਿ. ਅਥਸ੍ਸ ਮਹਗ੍ਘਸਭਾਵਂ ਸਤ੍ਥੁ ਆਰੋਚਯਿਂਸੁ. ਸਤ੍ਥਾ ਤਸ੍ਸ ਪਤ੍ਤਤ੍ਥਵਿਕਂ ਨਾਨੁਜਾਨਿ. ਹੇਟ੍ਠਾਮਞ੍ਚੇ ਪਤ੍ਤਂ ਨਿਕ੍ਕੁਜ੍ਜਿਤ੍ਵਾ ਠਪੇਤਿ. ਸੋ ਠਪੇਨ੍ਤੋਪਿ ਘਂਸਨ੍ਤੋਵ ਪਣਾਮੇਤ੍ਵਾ ਠਪੇਤਿ, ਗਣ੍ਹਨ੍ਤੋਪਿ ਘਂਸਨ੍ਤੋਵ ਆਕਡ੍ਢਿਤ੍ਵਾ ਗਣ੍ਹਾਤਿ. ਤਂ ਗਚ੍ਛਨ੍ਤੇ ਕਾਲੇ ਧਂਸਨੇਨ ਪਰਿਕ੍ਖੀਣਂ ਨਾਲ਼ਿਕੋਦਨਮਤ੍ਤਮੇਵ ਗਣ੍ਹਨਕਂ ਜਾਤਂ. ਤਤੋ ਸਤ੍ਥੁ ਆਰੋਚੇਸੁਂ, ਅਥਸ੍ਸ ਸਤ੍ਥਾ ਪਤ੍ਤਤ੍ਥਵਿਕਂ ਅਨੁਜਾਨਿ. ਥੇਰੋ ਅਪਰੇਨ ਸਮਯੇਨ ਇਨ੍ਦ੍ਰਿਯਭਾਵਨਂ ਭਾਵੇਤ੍ਵਾ ਅਗ੍ਗਫਲੇ ਅਰਹਤ੍ਤੇ ਪਤਿਟ੍ਠਾਸਿ. ਇਤਿ ਸੋ ਪਿਣ੍ਡਤ੍ਥਾਯ ਪਬ੍ਬਜਿਤਤ੍ਤਾ ਪਿਣ੍ਡੋਲੋ, ਗੋਤ੍ਤੇਨ ਪਨ ਭਾਰਦ੍ਵਾਜੋਤਿ ਉਭਯਂ ਏਕਤੋ ਕਤ੍ਵਾ ਪਿਣ੍ਡੋਲਭਾਰਦ੍ਵਾਜੋਤਿ ਵੁਚ੍ਚਤਿ.

ਉਪਸਙ੍ਕਮੀਤਿ ਉਗ੍ਗਤੁਗ੍ਗਤੇਹਿ ਮਹਾਅਮਚ੍ਚੇਹਿ ਪਰਿਵੁਤੋ ਉਪਸਙ੍ਕਮਿ. ਥੇਰੋ ਕਿਰ ਏਕਦਿਵਸਂ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਕਤਭਤ੍ਤਕਿਚ੍ਚੋ ਨਿਦਾਘਸਮਯੇ ਸੀਤਠਾਨੇ ਦਿਵਾਵਿਹਾਰਂ ਨਿਸੀਦਿਸ੍ਸਾਮੀਤਿ ਆਕਾਸੇਨ ਗਨ੍ਤ੍ਵਾ ਗਙ੍ਗਾਤੀਰੇ ਉਦੇਨਸ੍ਸ ਰਞ੍ਞੋ ਉਦਪਾਨਂ ਨਾਮ ਉਯ੍ਯਾਨਂ ਅਤ੍ਥਿ, ਤਤ੍ਥ ਪਵਿਸਿਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਦਿਵਾਵਿਹਾਰਂ ਨਿਸੀਦਿ ਸੀਤੇਨ ਉਦਕਵਾਤੇਨ ਬੀਜਿਯਮਾਨੋ.

ਉਦੇਨੋਪਿ ਖੋ ਨਾਮ ਰਾਜਾ ਸਤ੍ਤਾਹਂ ਮਹਾਪਾਨਂ ਪਿਵਿਤ੍ਵਾ ਸਤ੍ਤਮੇ ਦਿਵਸੇ ਉਯ੍ਯਾਨਂ ਪਟਿਜਗ੍ਗਾਪੇਤ੍ਵਾ ਮਹਾਜਨਪਰਿਵਾਰੋ ਉਯ੍ਯਾਨਂ ਗਨ੍ਤ੍ਵਾ ਮਙ੍ਗਲਸਿਲਾਪਟ੍ਟੇ ਅਤ੍ਥਤਾਯ ਸੇਯ੍ਯਾਯ ਨਿਪਜ੍ਜਿ. ਤਸ੍ਸ ਏਕਾ ਪਰਿਚਾਰਿਕਾ ਪਾਦੇ ਸਮ੍ਬਾਹਮਾਨਾ ਨਿਸਿਨ੍ਨਾ. ਰਾਜਾ ਕਮੇਨ ਨਿਦ੍ਦਂ ਓਕ੍ਕਮਿ. ਤਸ੍ਮਿਂ ਨਿਦ੍ਦਂ ਓਕ੍ਕਨ੍ਤੇ ਨਾਟਕਿਤ੍ਥਿਯੋ ‘‘ਯਸ੍ਸਤ੍ਥਾਯ ਮਯਂ ਗੀਤਾਦੀਨਿ ਪਯੋਜੇਯ੍ਯਾਮ, ਸੋ ਨਿਦ੍ਦਂ ਉਪਗਤੋ, ਨ ਚ ਨਿਦ੍ਦਾਕਾਲੇ ਮਹਾਸਦ੍ਦਂ ਕਾਤੁਂ ਵਟ੍ਟਤੀ’’ਤਿ ਅਤ੍ਤਨੋ ਅਤ੍ਤਨੋ ਤੂਰਿਯਾਨਿ ਠਪੇਤ੍ਵਾ ਉਯ੍ਯਾਨਂ ਪਕ੍ਕਨ੍ਤਾ. ਤਾ ਤਤ੍ਥ ਤਤ੍ਥ ਫਲਾਫਲਾਨਿ ਖਾਦਮਾਨਾ ਪੁਪ੍ਫਾਨਿ ਪਿਲ਼ਨ੍ਧਮਾਨਾ ਵਿਚਰਨ੍ਤਿਯੋ ਥੇਰਂ ਦਿਸ੍ਵਾ ‘‘ਮਾ ਸਦ੍ਦਂ ਕਰਿਤ੍ਥਾ’’ਤਿ ਅਞ੍ਞਮਞ੍ਞਂ ਨਿਵਾਰਯਮਾਨਾ ਵਨ੍ਦਿਤ੍ਵਾ ਨਿਸੀਦਿਂਸੁ. ਥੇਰੋ ‘‘ਇਸ੍ਸਾ ਪਹਾਤਬ੍ਬਾ, ਮਚ੍ਛੇਰਂ ਵਿਨੋਦੇਤਬ੍ਬ’’ਨ੍ਤਿਆਦਿਨਾ ਨਯੇਨ ਤਾਸਂ ਅਨੁਰੂਪਂ ਧਮ੍ਮਕਥਂ ਕਥੇਸਿ.

ਸਾਪਿ ਖੋ ਰਞ੍ਞੋ ਪਾਦੇ ਸਮ੍ਬਾਹਮਾਨਾ ਨਿਸਿਨ੍ਨਾ ਇਤ੍ਥੀ ਪਾਦੇ ਚਾਲੇਤ੍ਵਾ ਰਾਜਾਨਂ ਪਬੋਧੇਸਿ. ਸੋ ‘‘ਕਹਂ ਤਾ ਗਤਾ’’ਤਿ ਪੁਚ੍ਛਿ. ਕਿਂ ਤਾਸਂ ਤੁਮ੍ਹੇਹਿ? ਤਾ ਏਕਂ ਸਮਣਂ ਪਰਿਵਾਰੇਤ੍ਵਾ ਨਿਸਿਨ੍ਨਾਤਿ. ਰਾਜਾ ਕੁਦ੍ਧੋ ਉਦ੍ਧਨੇ ਪਕ੍ਖਿਤ੍ਤਲੋਣਂ ਵਿਯ ਤਟਤਟਾਯਮਾਨੋ ਉਟ੍ਠਹਿਤ੍ਵਾ ‘‘ਤਮ੍ਬਕਿਪਿਲ੍ਲਿਕਾਹਿ ਨਂ ਖਾਦਾਪੇਸ੍ਸਾਮੀ’’ਤਿ ਗਚ੍ਛਨ੍ਤੋ ਏਕਸ੍ਮਿਂ ਅਸੋਕਰੁਕ੍ਖੇ ਤਮ੍ਬਕਿਪਿਲ੍ਲਿਕਾਨਂ ਪੁਟਂ ਦਿਸ੍ਵਾ ਹਤ੍ਥੇਨਾਕਡ੍ਢਿਤ੍ਵਾ ਸਾਖਂ ਗਣ੍ਹਿਤੁਂ ਨਾਸਕ੍ਖਿ. ਕਿਪਿਲ੍ਲਿਕਪੁਟੋ ਛਿਜ੍ਜਿਤ੍ਵਾ ਰਞ੍ਞੋ ਸੀਸੇ ਪਤਿ, ਸਕਲਸਰੀਰਂ ਸਾਲਿਥੁਸੇਹਿ ਪਰਿਕਿਣ੍ਣਂ ਵਿਯ ਦਣ੍ਡਦੀਪਿਕਾਹਿ ਡਯ੍ਹਮਾਨਂ ਵਿਯ ਚ ਅਹੋਸਿ. ਥੇਰੋ ਰਞ੍ਞੋ ਪਦੁਟ੍ਠਭਾਵਂ ਞਤ੍ਵਾ ਇਦ੍ਧਿਯਾ ਆਕਾਸਂ ਪਕ੍ਖਨ੍ਦਿ. ਤਾਪਿ ਇਤ੍ਥਿਯੋ ਉਟ੍ਠਾਯ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਸਰੀਰਂ ਪੁਞ੍ਛਨ੍ਤਿਯੋ ਵਿਯ ਭੂਮਿਯਂ ਪਤਿਤਪਤਿਤਾ ਕਿਪਿਲ੍ਲਿਕਾਯੋ ਗਹੇਤ੍ਵਾ ਸਰੀਰੇ ਖਿਪਮਾਨਾ ਸਬ੍ਬਾ ਮੁਖਸਤ੍ਤੀਹਿ ਵਿਜ੍ਝਿਂਸੁ – ‘‘ਕਿਂ ਨਾਮੇਤਂ, ਅਞ੍ਞੇ ਰਾਜਾਨੋ ਪਬ੍ਬਜਿਤੇ ਦਿਸ੍ਵਾ ਵਨ੍ਦਨ੍ਤਿ, ਪਞ੍ਹਂ ਪੁਚ੍ਛਨ੍ਤਿ, ਅਯਂ ਪਨ ਰਾਜਾ ਕਿਪਿਲ੍ਲਿਕਪੁਟਂ ਸੀਸੇ ਭਿਨ੍ਦਿਤੁਕਾਮੋ ਜਾਤੋ’’ਤਿ.

ਰਾਜਾ ਅਤ੍ਤਨੋ ਅਪਰਾਧਂ ਦਿਸ੍ਵਾ ਉਯ੍ਯਾਨਪਾਲਂ ਪਕ੍ਕੋਸਾਪੇਤ੍ਵਾ ਪੁਚ੍ਛਿ – ‘‘ਕਿਂ ਏਸ ਪਬ੍ਬਜਿਤੋ? ਅਞ੍ਞੇਸੁਪਿ ਦਿਵਸੇਸੁ ਇਧ ਆਗਚ੍ਛਤੀ’’ਤਿ? ਆਮ, ਦੇਵਾਤਿ. ਇਧ ਤ੍ਵਂ ਆਗਤਦਿਵਸੇ ਮਯ੍ਹਂ ਆਰੋਚੇਯ੍ਯਾਸੀਤਿ. ਥੇਰੋਪਿ ਕਤਿਪਾਹੇਨੇਵ ਪੁਨ ਆਗਨ੍ਤ੍ਵਾ ਰੁਕ੍ਖਮੂਲੇ ਨਿਸੀਦਿ. ਉਯ੍ਯਾਨਪਾਲੋ ਦਿਸ੍ਵਾ – ‘‘ਮਹਨ੍ਤੋ ਮੇ ਅਯਂ ਪਣ੍ਣਾਕਾਰੋ’’ਤਿ ਵੇਗੇਨ ਗਨ੍ਤ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ਉਟ੍ਠਹਿਤ੍ਵਾ ਸਙ੍ਖਪਣਵਾਦਿਸਦ੍ਦਂ ਨਿਵਾਰੇਤ੍ਵਾ ਉਗ੍ਗਤੁਗ੍ਗਤੇਹਿ ਅਮਚ੍ਚੇਹਿ ਸਦ੍ਧਿਂ ਉਯ੍ਯਾਨਂ ਅਗਮਾਸਿ. ਤੇਨ ਵੁਤ੍ਤਂ ‘‘ਉਪਸਙ੍ਕਮੀ’’ਤਿ.

ਅਨਿਕੀਲ਼ਿਤਾਵਿਨੋ ਕਾਮੇਸੂਤਿ ਯਾ ਕਾਮੇਸੁ ਕਾਮਕੀਲ਼ਾ, ਤਂ ਅਕੀਲ਼ਿਤਪੁਬ੍ਬਾ, ਅਪਰਿਭੁਤ੍ਤਕਾਮਾਤਿ ਅਤ੍ਥੋ. ਅਦ੍ਧਾਨਞ੍ਚ ਆਪਾਦੇਨ੍ਤੀਤਿ ਪਵੇਣਿਂ ਪਟਿਪਾਦੇਨ੍ਤਿ, ਦੀਘਰਤ੍ਤਂ ਅਨੁਬਨ੍ਧਾਪੇਨ੍ਤਿ. ਮਾਤੁਮਤ੍ਤੀਸੂਤਿ ਮਾਤੁਪਮਾਣਾਸੁ. ਲੋਕਸ੍ਮਿਞ੍ਹਿ ਮਾਤਾ ਭਗਿਨੀ ਧੀਤਾਤਿ ਇਦਂ ਤਿਵਿਧਂ ਗਰੁਕਾਰਮ੍ਮਣਂ ਨਾਮ, ਇਤਿ ਗਰੁਕਾਰਮ੍ਮਣੇ ਉਪਨਿਬਨ੍ਧਂ ਚਿਤ੍ਤਂ ਵਿਮੋਚੇਤੁਂ ਨ ਲਭਤੀਤਿ ਦਸ੍ਸੇਨ੍ਤੋ ਏਵਮਾਹ. ਅਥਸ੍ਸ ਤੇਨ ਪਞ੍ਹੇਨ ਚਿਤ੍ਤਂ ਅਨੋਤਰਨ੍ਤਂ ਦਿਸ੍ਵਾ ਭਗਵਤਾ ਪਟਿਕੂਲਮਨਸਿਕਾਰਵਸੇਨ ਚਿਤ੍ਤੂਪਨਿਬਨ੍ਧਨਤ੍ਥਂ ਵੁਤ੍ਤਂ ਦ੍ਵਤ੍ਤਿਂਸਾਕਾਰਕਮ੍ਮਟ੍ਠਾਨਂ ਕਥੇਸਿ.

ਅਭਾਵਿਤਕਾਯਾਤਿ ਅਭਾਵਿਤਪਞ੍ਚਦ੍ਵਾਰਿਕਕਾਯਾ. ਤੇਸਂ ਤਂ ਦੁਕ੍ਕਰਂ ਹੋਤੀਤਿ ਤੇਸਂ ਤਂ ਅਸੁਭਕਮ੍ਮਟ੍ਠਾਨਂ ਭਾਵੇਤੁਂ ਦੁਕ੍ਕਰਂ ਹੋਤਿ. ਇਤਿਸ੍ਸ ਇਮਿਨਾਪਿ ਚਿਤ੍ਤਂ ਅਨੋਤਰਨ੍ਤਂ ਦਿਸ੍ਵਾ ਇਨ੍ਦ੍ਰਿਯਸਂਵਰਸੀਲਂ ਕਥੇਸਿ. ਇਨ੍ਦ੍ਰਿਯਸਂਵਰਸ੍ਮਿਞ੍ਹਿ ਉਪਨਿਬਨ੍ਧਚਿਤ੍ਤਂ ਵਿਹੇਠੇਤੁਂ ਨ ਲਭਤਿ. ਰਾਜਾ ਤਂ ਸੁਤ੍ਵਾ ਤਤ੍ਥ ਓਤਿਣ੍ਣਚਿਤ੍ਤੋ ਅਚ੍ਛਰਿਯਂ, ਭੋ ਭਾਰਦ੍ਵਾਜਾਤਿਆਦਿਮਾਹ.

ਅਰਕ੍ਖਿਤੇਨੇਵ ਕਾਯੇਨਾਤਿਆਦੀਸੁ ਹਤ੍ਥਪਾਦੇ ਕੀਲ਼ਾਪੇਨ੍ਤੋ ਗੀਵਂ ਪਰਿਵਤ੍ਤੇਨ੍ਤੋ ਕਾਯਂ ਨ ਰਕ੍ਖਤਿ ਨਾਮ, ਨਾਨਪ੍ਪਕਾਰਂ ਦੁਟ੍ਠੁਲ੍ਲਂ ਕਥੇਨ੍ਤੋ ਵਚਨਂ ਨ ਰਕ੍ਖਤਿ ਨਾਮ, ਕਾਮਵਿਤਕ੍ਕਾਦਯੋ ਵਿਤਕ੍ਕੇਨ੍ਤੋ ਚਿਤ੍ਤਂ ਨ ਰਕ੍ਖਤਿ ਨਾਮ. ਰਕ੍ਖਿਤੇਨੇਵ ਕਾਯੇਨਾਤਿਆਦੀਸੁ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ.

ਅਤਿਵਿਯ ਮਂ ਤਸ੍ਮਿਂ ਸਮਯੇ ਲੋਭਧਮ੍ਮਾ ਪਰਿਸਹਨ੍ਤੀਤਿ ਮਂ ਤਸ੍ਮਿਂ ਸਮਯੇ ਅਤਿਕ੍ਕਮਿਤ੍ਵਾ ਲੋਭੋ ਅਧਿਭਵਤੀਤਿ ਅਤ੍ਥੋ. ਉਪਟ੍ਠਿਤਾਯ ਸਤਿਯਾਤਿ ਕਾਯਗਤਾਯ ਸਤਿਯਾ ਸੁਪਟ੍ਠਿਤਾਯ. ਨ ਮਂ ਤਥਾ ਤਸ੍ਮਿਂ ਸਮਯੇਤਿ ਤਸ੍ਮਿਂ ਸਮਯੇ ਮਂ ਯਥਾ ਪੁਬ੍ਬੇ, ਨ ਤਥਾ ਲੋਭੋ ਅਤਿਕ੍ਕਮਿਤ੍ਵਾ ਉਪ੍ਪਜ੍ਜਤੀਤਿ ਅਤ੍ਥੋ. ਪਰਿਸਹਨ੍ਤੀਤਿ ਪਦਸ੍ਸ ਉਪ੍ਪਜ੍ਜਨ੍ਤੀਤਿਪਿ ਅਤ੍ਥੋਯੇਵ. ਇਤਿ ਇਮਸ੍ਮਿਂ ਸੁਤ੍ਤੇ ਤਯੋ ਕਾਯਾ ਕਥਿਤਾ. ਕਥਂ? ‘‘ਇਮਮੇਵ ਕਾਯ’’ਨ੍ਤਿ ਏਤ੍ਥ ਹਿ ਕਰਜਕਾਯੋ ਕਥਿਤੋ, ‘‘ਭਾਵਿਤਕਾਯੋ’’ਤਿ ਏਤ੍ਥ ਪਞ੍ਚਦ੍ਵਾਰਿਕਕਾਯੋ, ‘‘ਰਕ੍ਖਿਤੇਨੇਵ ਕਾਯੇਨਾ’’ਤਿ ਏਤ੍ਥ ਚੋਪਨਕਾਯੋ, ਕਾਯਵਿਞ੍ਞਤ੍ਤੀਤਿ ਅਤ੍ਥੋ. ਪਞ੍ਚਮਂ ਉਤ੍ਤਾਨਮੇਵ.

੬. ਘੋਸਿਤਸੁਤ੍ਤਵਣ੍ਣਨਾ

੧੨੯. ਛਟ੍ਠੇ ਰੂਪਾ ਚ ਮਨਾਪਾਤਿ ਰੂਪਾ ਚ ਮਨਾਪਾ ਸਂਵਿਜ੍ਜਨ੍ਤਿ. ਚਕ੍ਖੁਵਿਞ੍ਞਾਣਞ੍ਚਾਤਿ ਚਕ੍ਖੁਵਿਞ੍ਞਾਣਞ੍ਚ ਸਂਵਿਜ੍ਜਤਿ. ਸੁਖਵੇਦਨਿਯਂ ਫਸ੍ਸਨ੍ਤਿ ਚਕ੍ਖੁਵਿਞ੍ਞਾਣਸਮ੍ਪਯੁਤ੍ਤਂ ਉਪਨਿਸ੍ਸਯਵਸੇਨ ਜਵਨਕਾਲੇ ਸੁਖਵੇਦਨਾਯ ਪਚ੍ਚਯਭੂਤਂ ਫਸ੍ਸਂ. ਸੁਖਾ ਵੇਦਨਾਤਿ ਏਕਂ ਫਸ੍ਸਂ ਪਟਿਚ੍ਚ ਜਵਨਵਸੇਨ ਸੁਖਵੇਦਨਾ ਉਪ੍ਪਜ੍ਜਤਿ. ਸੇਸਪਦੇਸੁਪਿ ਏਸੇਵ ਨਯੋ.

ਇਤਿ ਇਮਸ੍ਮਿਂ ਸੁਤ੍ਤੇ ਤੇਵੀਸਤਿ ਧਾਤੁਯੋ ਕਥਿਤਾ. ਕਥਂ? ਏਤ੍ਥ ਹਿ ਚਕ੍ਖੁਪਸਾਦੋ ਚਕ੍ਖੁਧਾਤੁ, ਤਸ੍ਸ ਆਰਮ੍ਮਣਂ ਰੂਪਧਾਤੁ, ਚਕ੍ਖੁਵਿਞ੍ਞਾਣਂ ਵਿਞ੍ਞਾਣਧਾਤੁ, ਚਕ੍ਖੁਵਿਞ੍ਞਾਣਧਾਤੁਯਾ ਸਹਜਾਤਾ ਤਯੋ ਖਨ੍ਧਾ ਧਮ੍ਮਧਾਤੁ, ਏਵਂ ਪਞ੍ਚਸੁ ਦ੍ਵਾਰੇਸੁ ਚਤੁਨ੍ਨਂ ਚਤੁਨ੍ਨਂ ਵਸੇਨ ਵੀਸਤਿ. ਮਨੋਦ੍ਵਾਰੇ ‘‘ਮਨੋਧਾਤੂ’’ਤਿ ਆਵਜ੍ਜਨਚਿਤ੍ਤਂ ਗਹਿਤਂ, ਆਰਮ੍ਮਣਞ੍ਚੇਵ ਹਦਯਵਤ੍ਥੁ ਚ ਧਮ੍ਮਧਾਤੁ, ਵਤ੍ਥੁਨਿਸ੍ਸਿਤਂ ਮਨੋਵਿਞ੍ਞਾਣਧਾਤੂਤਿ ਏਵਂ ਤੇਵੀਸਤਿ ਹੋਨ੍ਤਿ. ਏਵਂ ਤੇਵੀਸਤਿਯਾ ਧਾਤੂਨਂ ਵਸੇਨ ਧਾਤੁਨਾਨਤ੍ਤਂ ਵੁਤ੍ਤਂ ਭਗਵਤਾਤਿ ਦਸ੍ਸੇਤਿ.

੭-੮. ਹਾਲਿਦ੍ਦਿਕਾਨਿਸੁਤ੍ਤਾਦਿਵਣ੍ਣਨਾ

੧੩੦-੧੩੧. ਸਤ੍ਤਮੇ ਮਨਾਪਂ ਇਤ੍ਥੇਤਨ੍ਤਿ ਪਜਾਨਾਤੀਤਿ ਯਂ ਅਨੇਨ ਮਨਾਪਂ ਰੂਪਂ ਦਿਟ੍ਠਂ, ਤਂ ਇਤ੍ਥੇਤਨ੍ਤਿ ਏਵਮੇਤਂ ਮਨਾਪਮੇਵ ਤਨ੍ਤਿ ਪਜਾਨਾਤਿ. ਚਕ੍ਖੁਵਿਞ੍ਞਾਣਂ ਸੁਖਵੇਦਨਿਯਞ੍ਚ ਫਸ੍ਸਂ ਪਟਿਚ੍ਚਾਤਿ ਚਕ੍ਖੁਵਿਞ੍ਞਾਣਞ੍ਚੇਵ, ਯੋ ਚ ਉਪਨਿਸ੍ਸਯਕੋਟਿਯਾ ਵਾ ਅਨਨ੍ਤਰਕੋਟਿਯਾ ਵਾ ਸਮਨਨ੍ਤਰਕੋਟਿਯਾ ਵਾ ਸਮ੍ਪਯੁਤ੍ਤਕੋਟਿਯਾ ਵਾ ਸੁਖਵੇਦਨਾਯ ਪਚ੍ਚਯੋ ਫਸ੍ਸੋ, ਤਂ ਸੁਖਵੇਦਨਿਯਂ ਫਸ੍ਸਞ੍ਚ ਪਟਿਚ੍ਚ ਉਪ੍ਪਜ੍ਜਤਿ ਸੁਖਵੇਦਨਾਤਿ. ਏਸ ਨਯੋ ਸਬ੍ਬਤ੍ਥ. ਇਤਿ ਇਮੇਸੁ ਦ੍ਵੀਸੁ ਸੁਤ੍ਤੇਸੁ ਕਿਰਿਯਾਮਨੋਵਿਞ੍ਞਾਣਧਾਤੁ ਆਵਜ੍ਜਨਕਿਚ੍ਚਾ, ਮਨੋਧਾਤੁਯੇਵ ਵਾ ਸਮਾਨਾ ਮਨੋਧਾਤੁਨਾਮੇਨ ਵੁਤ੍ਤਾਤਿ ਵੇਦਿਤਬ੍ਬਾ. ਅਟ੍ਠਮਂ ਉਤ੍ਤਾਨਮੇਵ.

੯. ਲੋਹਿਚ੍ਚਸੁਤ੍ਤਵਣ੍ਣਨਾ

੧੩੨. ਨਵਮੇ ਮਕ੍ਕਰਕਤੇਤਿ ਏਵਂਨਾਮਕੇ ਨਗਰੇ ਅਰਞ੍ਞਕੁਟਿਕਾਯਨ੍ਤਿ ਅਰਞ੍ਞੇ ਕਤਾਯ ਪਾਟਿਯੇਕ੍ਕਾਯ ਕੁਟਿਯਂ, ਨ ਵਿਹਾਰਪਚ੍ਚਨ੍ਤਕੁਟਿਯਂ. ਮਾਣਵਕਾਤਿ ਯੇਪਿ ਤਤ੍ਥ ਮਹਲ੍ਲਕਾ, ਤੇ ਮਹਲ੍ਲਕਕਾਲੇਪਿ ਅਨ੍ਤੇਵਾਸਿਕਤਾਯ ਮਾਣਵਕਾਤ੍ਵੇਵ ਵੁਤ੍ਤਾ. ਤੇਨੁਪਸਙ੍ਕਮਿਂਸੂਤਿ ਪਾਤੋ ਸਿਪ੍ਪਂ ਉਗ੍ਗਣ੍ਹਿਤ੍ਵਾ ਸਾਯਂ ‘‘ਆਚਰਿਯਸ੍ਸ ਕਟ੍ਠਾਨਿ ਆਹਰਿਸ੍ਸਾਮਾ’’ਤਿ ਅਰਞ੍ਞਂ ਪਵਿਸਿਤ੍ਵਾ ਵਿਚਰਨ੍ਤਾ ਯੇਨ ਸਾ ਕੁਟਿਕਾ, ਤੇਨੁਪਸਙ੍ਕਮਿਂਸੁ. ਪਰਿਤੋ ਪਰਿਤੋ ਕੁਟਿਕਾਯਾਤਿ ਤਸ੍ਸਾ ਕੁਟਿਕਾਯ ਸਮਨ੍ਤਤੋ ਸਮਨ੍ਤਤੋ. ਸੇਲੇਯ੍ਯਕਾਨੀਤਿ ਅਞ੍ਞਮਞ੍ਞਸ੍ਸ ਪਿਟ੍ਠਿਂ ਗਹੇਤ੍ਵਾ ਲਙ੍ਘਿਤ੍ਵਾ ਇਤੋ ਚਿਤੋ ਚਙ੍ਕਮਨਕੀਲ਼ਨਾਨਿ.

ਮੁਣ੍ਡਕਾਤਿਆਦੀਸੁ ਮੁਣ੍ਡੇ ਮੁਣ੍ਡਾਤਿ, ਸਮਣੇ ਚ ਸਮਣਾਤਿ ਵਤ੍ਤੁਂ ਵਟ੍ਟੇਯ੍ਯ, ਇਮੇ ਪਨ ਹੀਲ਼ੇਨ੍ਤਾ ‘‘ਮੁਣ੍ਡਕਾ ਸਮਣਕਾ’’ਤਿ ਆਹਂਸੁ. ਇਬ੍ਭਾਤਿ ਗਹਪਤਿਕਾ. ਕਣ੍ਹਾਤਿ ਕਣ੍ਹਾ, ਕਾਲ਼ਕਾਤਿ ਅਤ੍ਥੋ. ਬਨ੍ਧੁਪਾਦਾਪਚ੍ਚਾਤਿ ਏਤ੍ਥ ਬਨ੍ਧੂਤਿ ਬ੍ਰਹ੍ਮਾ ਅਧਿਪ੍ਪੇਤੋ. ਤਞ੍ਹਿ ਬ੍ਰਾਹ੍ਮਣਾ ਪਿਤਾਮਹੋਤਿ ਵੋਹਰਨ੍ਤਿ. ਪਾਦਾਨਂ ਅਪਚ੍ਚਾ ਪਾਦਾਪਚ੍ਚਾ, ਬ੍ਰਹ੍ਮੁਨੋ ਪਿਟ੍ਠਿਪਾਦਤੋ ਜਾਤਾਤਿ ਅਧਿਪ੍ਪਾਯੋ. ਤੇਸਂ ਕਿਰ ਅਯਂ ਲਦ੍ਧਿ ‘‘ਬ੍ਰਾਹ੍ਮਣਾ ਬ੍ਰਹ੍ਮੁਨੋ ਮੁਖਤੋ ਨਿਕ੍ਖਨ੍ਤਾ, ਖਤ੍ਤਿਯਾ ਉਰਤੋ, ਵੇਸ੍ਸਾ ਨਾਭਿਤੋ, ਸੁਦ੍ਦਾ ਜਾਣੁਤੋ, ਸਮਣਾ ਪਿਟ੍ਠਿਪਾਦਤੋ’’ਤਿ. ਭਰਤਕਾਨਨ੍ਤਿ ਕੁਟਿਮ੍ਬਿਕਾਨਂ. ਕੁਟਿਮ੍ਬਿਕਾ ਹਿ ਯਸ੍ਮਾ ਰਟ੍ਠਂ ਭਰਨ੍ਤਿ, ਤਸ੍ਮਾ ਭਰਤਾਤਿ ਵੁਚ੍ਚਨ੍ਤਿ. ਇਮੇ ਪਨ ਪਰਿਭਵਂ ਕਤ੍ਵਾ ਵਦਮਾਨਾ ‘‘ਭਰਤਕਾਨ’’ਨ੍ਤਿ ਆਹਂਸੁ.

ਵਿਹਾਰਾ ਨਿਕ੍ਖਮਿਤ੍ਵਾਤਿ ‘‘ਰਤ੍ਤਿਟ੍ਠਕਾਪਰਿਚ੍ਛਨ੍ਨੇ ਰਜਤਪਟ੍ਟਸਨ੍ਨਿਭਸਮਵਿਪ੍ਪਕਿਣ੍ਣਵਾਲਿਕੇ ਰਮਣੀਯੇ ਪਰਿਵੇਣੇ ਕਟ੍ਠਕਲਾਪੇ ਬਨ੍ਧਿਤ੍ਵਾ ਖਿਪਮਾਨਾ ਵਾਲਿਕਂ ਆਲੁਲ਼ੇਤ੍ਵਾ, ਹਤ੍ਥੇਨ ਹਤ੍ਥਂ ਆਦਾਯ ਪਣ੍ਣਕੁਟਿਂ ਪਰਿਯਾਯਨ੍ਤਾ ‘ਇਮੇ ਇਮੇਸਂ ਭਰਤਕਾਨਂ ਸਕ੍ਕਤਾ, ਇਮੇ ਇਮੇਸਂ ਭਰਤਕਾਨਂ ਸਕ੍ਕਤਾ’ਤਿ ਪੁਨਪ੍ਪੁਨਂ ਵਿਰਵਨ੍ਤਾ ਅਤਿਵਿਯ ਇਮੇ ਮਾਣਵਕਾ ਕੀਲ਼ਂ ਕਰੋਨ੍ਤਿ, ਵਿਹਾਰੇ ਭਿਕ੍ਖੂਨਂ ਅਤ੍ਥਿਭਾਵਮ੍ਪਿ ਨ ਜਾਨਨ੍ਤਿ, ਦਸ੍ਸੇਸ੍ਸਾਮਿ ਨੇਸਂ ਭਿਕ੍ਖੂਨਂ ਅਤ੍ਥਿਭਾਵ’’ਨ੍ਤਿ ਚਿਨ੍ਤੇਤ੍ਵਾ ਪਣ੍ਣਕੁਟਿਤੋ ਨਿਕ੍ਖਮਿ.

ਸੀਲੁਤ੍ਤਮਾ ਪੁਬ੍ਬਤਰਾ ਅਹੇਸੁਨ੍ਤਿ ਗੁਣਵਨ੍ਤਾਨਂ ਗੁਣੇ ਕਥਿਤੇ ਨਿਗ੍ਗੁਣਾਨਂ ਗੁਣਾਭਾਵੋ ਪਾਕਟੋਵ ਭਵਿਸ੍ਸਤੀਤਿ ਪੋਰਾਣਕਬ੍ਰਾਹ੍ਮਣਾਨਂ ਗੁਣੇ ਕਥੇਨ੍ਤੋ ਏਵਮਾਹ. ਤਤ੍ਥ ਸੀਲੁਤ੍ਤਮਾਤਿ ਸੀਲਜੇਟ੍ਠਕਾ. ਸੀਲਞ੍ਹਿ ਤੇਸਂ ਉਤ੍ਤਮਂ, ਨ ਜਾਤਿਗੋਤ੍ਤਂ. ਯੇ ਪੁਰਾਣਂ ਸਰਨ੍ਤੀਤਿ ਯੇ ਪੋਰਾਣਕਂ ਬ੍ਰਾਹ੍ਮਣਧਮ੍ਮਂ ਸਰਨ੍ਤਿ. ਅਭਿਭੁਯ੍ਯ ਕੋਧਨ੍ਤਿ ਕੋਧਂ ਅਭਿਭਵਿਤ੍ਵਾ ਤੇਸਂ ਦ੍ਵਾਰਾਨਿ ਸੁਗੁਤ੍ਤਾਨਿ ਸੁਰਕ੍ਖਿਤਾਨਿ ਅਹੇਸੁਂ. ਧਮ੍ਮੇ ਚ ਝਾਨੇ ਚ ਰਤਾਤਿ ਦਸਵਿਧੇ ਕੁਸਲਕਮ੍ਮਪਥਧਮ੍ਮੇ ਅਟ੍ਠਸਮਾਪਤ੍ਤਿਝਾਨੇਸੁ ਚ ਰਤਾ.

ਏਵਂ ਪੋਰਾਣਾਨਂ ਗੁਣਂ ਕਥੇਤ੍ਵਾ ਅਥੇਤਰਹਿ ਬ੍ਰਾਹ੍ਮਣਾਨਂ ਮਾਨਂ ਨਿਮ੍ਮਦ੍ਦੇਨ੍ਤੋ ਇਮੇ ਚ ਵੋਕ੍ਕਮ੍ਮ ਜਪਾਮਸੇਤਿਆਦਿਮਾਹ. ਤਤ੍ਥ ਵੋਕ੍ਕਮ੍ਮਾਤਿ ਏਤੇਹਿ ਗੁਣੇਹਿ ਅਪਕ੍ਕਮਿਤ੍ਵਾ. ਜਪਾਮਸੇਤਿ ਮਯਂ ਜਪਾਮ ਸਜ੍ਝਾਯਾਮਾਤਿ ਏਤ੍ਤਕੇਨੇਵ ਬ੍ਰਾਹ੍ਮਣਮ੍ਹਾਤਿ ਮਞ੍ਞਮਾਨਾ ਬ੍ਰਾਹ੍ਮਣਾ ਮਯਨ੍ਤਿ ਇਮਿਨਾ ਗੋਤ੍ਤੇਨ ਮਤ੍ਤਾ ਹੁਤ੍ਵਾ ਵਿਸਮਂ ਚਰਨ੍ਤਿ, ਵਿਸਮਾਨਿ ਕਾਯਕਮ੍ਮਾਦੀਨਿ ਕਰੋਨ੍ਤੀਤਿ ਅਤ੍ਥੋ. ਪੁਥੁਅਤ੍ਤਦਣ੍ਡਾਤਿ ਪੁਥੁ ਅਤ੍ਤਾ ਦਣ੍ਡਾ ਏਤੇਹੀਤਿ ਪੁਥੁਅਤ੍ਤਦਣ੍ਡਾ, ਗਹਿਤਨਾਨਾਵਿਧਦਣ੍ਡਾਤਿ ਅਤ੍ਥੋ. ਸਤਣ੍ਹਾਤਣ੍ਹੇਸੂਤਿ ਸਤਣ੍ਹਨਿਤ੍ਤਣ੍ਹੇਸੁ. ਅਗੁਤ੍ਤਦ੍ਵਾਰਸ੍ਸ ਭਵਨ੍ਤਿ ਮੋਘਾਤਿ ਅਸਂਵੁਤਦ੍ਵਾਰਸ੍ਸ ਸਬ੍ਬੇਪਿ ਵਤਸਮਾਦਾਨਾ ਮੋਘਾ ਭਵਨ੍ਤੀਤਿ ਦੀਪੇਤਿ. ਯਥਾ ਕਿਨ੍ਤਿ? ਸੁਪਿਨੇਵ ਲਦ੍ਧਂ ਪੁਰਿਸਸ੍ਸ ਵਿਤ੍ਤਨ੍ਤਿ ਯਥਾ ਸੁਪਿਨੇ ਪੁਰਿਸਸ੍ਸ ਲਦ੍ਧਂ ਮਣਿਮੁਤ੍ਤਾਦਿਨਾਨਾਵਿਧਂ ਵਿਤ੍ਤਂ ਮੋਘਂ ਹੋਤਿ, ਪਬੁਜ੍ਝਿਤ੍ਵਾ ਕਿਞ੍ਚਿ ਨ ਪਸ੍ਸਤਿ, ਏਵਂ ਮੋਘਾ ਭਵਨ੍ਤੀਤਿ ਅਤ੍ਥੋ.

ਅਨਾਸਕਾਤਿ ਏਕਾਹਦ੍ਵੀਹਾਦਿਵਸੇਨ ਅਨਾਹਾਰਕਾ. ਥਣ੍ਡਿਲਸਾਯਿਕਾ ਚਾਤਿ ਹਰਿਤਕੁਸਸਨ੍ਥਤੇ ਭੂਮਿਭਾਗੇ ਸਯਨਂ, ਪਾਤੋ ਸਿਨਾਨਞ੍ਚ ਤਯੋ ਚ ਵੇਦਾਤਿ ਪਾਤੋਵ ਉਦਕਂ ਪਵਿਸਿਤ੍ਵਾ ਨ੍ਹਾਨਞ੍ਚੇਵ ਤਯੋ ਚ ਵੇਦਾ. ਖਰਾਜਿਨਂ ਜਟਾ ਪਙ੍ਕੋਤਿ ਖਰਸਮ੍ਫਸ੍ਸਂ ਅਜਿਨਚਮ੍ਮਞ੍ਚੇਵ ਜਟਾਕਲਾਪੋ ਚ ਪਙ੍ਕੋ ਚ, ਪਙ੍ਕੋ ਨਾਮ ਦਨ੍ਤਮਲਂ. ਮਨ੍ਤਾ ਸੀਲਬ੍ਬਤਂ ਤਪੋਤਿ ਮਨ੍ਤਾ ਚ ਅਜਸੀਲਗੋਸੀਲਸਙ੍ਖਾਤਂ ਸੀਲਂ ਅਜਵਤਗੋਵਤਸਙ੍ਖਾਤਂ ਵਤਞ੍ਚ. ਅਯਂ ਇਦਾਨਿ ਬ੍ਰਾਹ੍ਮਣਾਨਂ ਤਪੋਤਿ ਵਦਤਿ. ਕੁਹਨਾ ਵਙ੍ਕਦਣ੍ਡਾ ਚਾਤਿ ਪਟਿਚ੍ਛਨ੍ਨਕੂਪੋ ਵਿਯ ਪਟਿਚ੍ਛਨ੍ਨਦੋਸਂ ਕੋਹਞ੍ਞਞ੍ਚੇਵ ਵਙ੍ਕਦਣ੍ਡੋ, ਚ ਉਦੁਮ੍ਬਰਪਲਾਸਬੇਲ਼ੁਵਰੁਕ੍ਖਾਨਂ ਅਞ੍ਞਤਰਤੋ ਗਹਿਤਂ ਵਙ੍ਕਦਣ੍ਡਞ੍ਚਾਤਿ ਅਤ੍ਥੋ. ਉਦਕਾਚਮਨਾਨਿ ਚਾਤਿ ਉਦਕੇਨ ਮੁਖਪਰਿਮਜ੍ਜਨਾਨਿ. ਵਣ੍ਣਾ ਏਤੇ ਬ੍ਰਾਹ੍ਮਣਾਨਨ੍ਤਿ ਏਤੇ ਬ੍ਰਾਹ੍ਮਣਾਨਂ ਪਰਿਕ੍ਖਾਰਭਣ੍ਡਕਵਣ੍ਣਾਤਿ ਦਸ੍ਸੇਤਿ. ਕਤ ਕਿਞ੍ਚਿਕ੍ਖਭਾਵਨਾਤਿ ਕਤਾ ਕਿਞ੍ਚਿਕ੍ਖਭਾਵਨਾ. ਅਯਮੇਵ ਵਾ ਪਾਠੋ, ਆਮਿਸਕਿਞ੍ਚਿਕ੍ਖਸ੍ਸ ਵਡ੍ਢਨਤ੍ਥਾਯ ਕਤਨ੍ਤਿ ਅਤ੍ਥੋ.

ਏਵਂ ਏਤਰਹਿ ਬ੍ਰਾਹ੍ਮਣਾਨਂ ਮਾਨਂ ਨਿਮ੍ਮਦ੍ਦਿਤ੍ਵਾ ਪੁਨ ਪੋਰਾਣਕਬ੍ਰਾਹ੍ਮਣਾਨਂ ਵਣ੍ਣਂ ਕਥੇਨ੍ਤੋ ਚਿਤ੍ਤਞ੍ਚ ਸੁਸਮਾਹਿਤਨ੍ਤਿਆਦਿਮਾਹ. ਤਤ੍ਥ ਸੁਸਮਾਹਿਤਨ੍ਤਿ ਤੇਸਂ ਬ੍ਰਾਹ੍ਮਣਾਨਂ ਚਿਤ੍ਤਂ ਉਪਚਾਰਪ੍ਪਨਾਸਮਾਧੀਹਿ ਸੁਸਮਾਹਿਤਂ ਅਹੋਸੀਤਿ ਦਸ੍ਸੇਤਿ. ਅਖਿਲਨ੍ਤਿ ਮੁਦੁ ਅਥਦ੍ਧਂ. ਸੋ ਮਗ੍ਗੋ ਬ੍ਰਹ੍ਮਪਤ੍ਤਿਯਾਤਿ ਸੋ ਸੇਟ੍ਠਪਤ੍ਤਿਯਾ ਮਗ੍ਗੋ, ਤੁਮ੍ਹੇ ਪਨ ਕਿਂ ਬ੍ਰਾਹ੍ਮਣਾ ਨਾਮਾਤਿ ਦੀਪੇਨ੍ਤੋ ਏਵਮਾਹ.

ਆਗਮਂਸੁ ਨੁ ਖ੍ਵਿਧਾਤਿ ਆਗਮਂਸੁ ਨੁ ਖੋ ਇਧ. ਅਧਿਮੁਚ੍ਚਤੀਤਿ ਕਿਲੇਸਵਸੇਨ ਅਧਿਮੁਤ੍ਤੋ ਗਿਦ੍ਧੋ ਹੋਤਿ. ਬ੍ਯਾਪਜ੍ਜਤੀਤਿ ਬ੍ਯਾਪਾਦਵਸੇਨ ਪੂਤਿਚਿਤ੍ਤਂ ਹੋਤਿ. ਪਰਿਤ੍ਤਚੇਤਸੋਤਿ ਅਨੁਪਟ੍ਠਿਤਸਤਿਤਾਯ ਸਂਕਿਲੇਸਚਿਤ੍ਤੇਨ ਪਰਿਤ੍ਤਚਿਤ੍ਤੋ. ਚੇਤੋਵਿਮੁਤ੍ਤਿਨ੍ਤਿ ਫਲਸਮਾਧਿਂ. ਪਞ੍ਞਾਵਿਮੁਤ੍ਤਿਨ੍ਤਿ ਫਲਪਞ੍ਞਂ. ਅਪ੍ਪਮਾਣਚੇਤਸੋਤਿ ਉਪਟ੍ਠਿਤਸਤਿਤਾਯ ਨਿਕ੍ਕਿਲੇਸਚਿਤ੍ਤੇਨ ਅਪ੍ਪਮਾਣਚਿਤ੍ਤੋ.

੧੦. ਵੇਰਹਚ੍ਚਾਨਿਸੁਤ੍ਤਵਣ੍ਣਨਾ

੧੩੩. ਦਸਮੇ ਕਾਮਣ੍ਡਾਯਨ੍ਤਿ ਏਵਂਨਾਮਕੇ ਨਗਰੇ. ਯਗ੍ਘੇਤਿ ਚੋਦਨਤ੍ਥੇ ਨਿਪਾਤੋ. ਸੇਸਂ ਉਤ੍ਤਾਨਮੇਵਾਤਿ.

ਗਹਪਤਿਵਗ੍ਗੋ ਤੇਰਸਮੋ.