੧੨. ਲੋਕਕਾਮਗੁਣਵਗ੍ਗੋ

੧-੨. ਪਠਮਮਾਰਪਾਸਸੁਤ੍ਤਾਦਿਵਣ੍ਣਨਾ

੧੧੪-੧੧੫. ਲੋਕਕਾਮਗੁਣਵਗ੍ਗਸ੍ਸ ਪਠਮੇ ਆਵਾਸਗਤੋਤਿ ਵਸਨਟ੍ਠਾਨਂ ਗਤੋ. ਮਾਰਸ੍ਸ ਵਸਂ ਗਤੋਤਿ ਤਿਵਿਧਸ੍ਸਾਪਿ ਮਾਰਸ੍ਸ ਵਸਂ ਗਤੋ. ਪਟਿਮੁਕ੍ਕ’ਸ੍ਸ ਮਾਰਪਾਸੋਤਿ ਅਸ੍ਸ ਗੀਵਾਯ ਮਾਰਪਾਸੋ ਪਟਿਮੁਕ੍ਕੋ ਪਵੇਸਿਤੋ. ਦੁਤਿਯਂ ਉਤ੍ਤਾਨਮੇਵ.

੩. ਲੋਕਨ੍ਤਗਮਨਸੁਤ੍ਤਵਣ੍ਣਨਾ

੧੧੬. ਤਤਿਯੇ ਲੋਕਸ੍ਸਾਤਿ ਚਕ੍ਕਵਾਲ਼ਲੋਕਸ੍ਸ. ਲੋਕਸ੍ਸ ਅਨ੍ਤਨ੍ਤਿ ਸਙ੍ਖਾਰਲੋਕਸ੍ਸ ਅਨ੍ਤਂ. ਵਿਹਾਰਂ ਪਾਵਿਸੀਤਿ ‘‘ਮਯਿ ਵਿਹਾਰਂ ਪਵਿਟ੍ਠੇ ਇਮੇ ਭਿਕ੍ਖੂ, ਇਮਂ ਉਦ੍ਦੇਸਂ ਆਨਨ੍ਦਂ ਪੁਚ੍ਛਿਸ੍ਸਨ੍ਤਿ, ਸੋ ਚ ਤੇਸਂ ਮਮ ਸਬ੍ਬਞ੍ਞੁਤਞ੍ਞਾਣੇਨ ਸਂਸਨ੍ਦਿਤ੍ਵਾ ਕਥੇਸ੍ਸਤਿ. ਤਤੋ ਨਂ ਥੋਮੇਸ੍ਸਾਮਿ, ਮਮ ਥੋਮਨਂ ਸੁਤ੍ਵਾ ਭਿਕ੍ਖੂ ਆਨਨ੍ਦਂ ਉਪਸਙ੍ਕਮਿਤਬ੍ਬਂ, ਵਚਨਞ੍ਚਸ੍ਸ ਸੋਤਬ੍ਬਂ ਸਦ੍ਧਾਤਬ੍ਬਂ ਮਞ੍ਞਿਸ੍ਸਨ੍ਤਿ, ਤਂ ਨੇਸਂ ਭਵਿਸ੍ਸਤਿ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ ਚਿਨ੍ਤੇਤ੍ਵਾ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥਂ ਅਵਿਭਜਿਤ੍ਵਾਵ ਨਿਸਿਨ੍ਨਾਸਨੇ ਅਨ੍ਤਰਹਿਤੋ ਗਨ੍ਧਕੁਟਿਯਂ ਪਾਤੁਰਹੋਸਿ. ਤੇਨ ਵੁਤ੍ਤਂ ‘‘ਉਟ੍ਠਾਯਾਸਨਾ ਵਿਹਾਰਂ ਪਾਵਿਸੀ’’ਤਿ.

ਸਤ੍ਥੁ ਚੇਵ ਸਂਵਣ੍ਣਿਤੋਤਿ ਸਤ੍ਥਾਰਾ ਚ ਪਸਤ੍ਥੋ. ਵਿਞ੍ਞੂਨਨ੍ਤਿ ਇਦਮ੍ਪਿ ਕਰਣਤ੍ਥੇ ਸਾਮਿਵਚਨਂ, ਪਣ੍ਡਿਤੇਹਿ ਸਬ੍ਰਹ੍ਮਚਾਰੀਹਿ ਚ ਸਮ੍ਭਾਵਿਤੋਤਿ ਅਤ੍ਥੋ. ਪਹੋਤੀਤਿ ਸਕ੍ਕੋਤਿ. ਅਤਿਕ੍ਕਮ੍ਮੇਵ ਮੂਲਂ ਅਤਿਕ੍ਕਮ੍ਮੇਵ ਖਨ੍ਧਨ੍ਤਿ ਸਾਰੋ ਨਾਮ ਮੂਲੇ ਵਾ ਖਨ੍ਧੇ ਵਾ ਭਵੇਯ੍ਯ, ਤਮ੍ਪਿ ਅਤਿਕ੍ਕਮਿਤ੍ਵਾਤਿ ਅਤ੍ਥੋ. ਏਵਂਸਮ੍ਪਦਮਿਦਨ੍ਤਿ ਏਵਂਸਮ੍ਪਤ੍ਤਿਕਂ, ਈਦਿਸਨ੍ਤਿ ਅਤ੍ਥੋ. ਅਤਿਸਿਤ੍ਵਾਤਿ ਅਤਿਕ੍ਕਮਿਤ੍ਵਾ. ਜਾਨਂ ਜਾਨਾਤੀਤਿ ਜਾਨਿਤਬ੍ਬਮੇਵ ਜਾਨਾਤਿ. ਪਸ੍ਸਂ ਪਸ੍ਸਤੀਤਿ ਪਸ੍ਸਿਤਬ੍ਬਮੇਵ ਪਸ੍ਸਤਿ. ਯਥਾ ਵਾ ਏਕਚ੍ਚੋ ਵਿਪਰੀਤਂ ਗਣ੍ਹਨ੍ਤੋ ਜਾਨਨ੍ਤੋਪਿ ਨ ਜਾਨਾਤਿ, ਪਸ੍ਸਨ੍ਤੋਪਿ ਨ ਪਸ੍ਸਤਿ, ਨ ਏਵਂ ਭਗਵਾ. ਭਗਵਾ ਪਨ ਜਾਨਨ੍ਤੋ ਜਾਨਾਤਿ, ਪਸ੍ਸਨ੍ਤੋ ਪਸ੍ਸਤਿਯੇਵ. ਸ੍ਵਾਯਂ ਦਸ੍ਸਨਪਰਿਣਾਯਕਟ੍ਠੇਨ ਚਕ੍ਖੁਭੂਤੋ. ਵਿਦਿਤਕਰਣਟ੍ਠੇਨ ਞਾਣਭੂਤੋ. ਅਵਿਪਰੀਤਸਭਾਵਟ੍ਠੇਨ ਪਰਿਯਤ੍ਤਿਧਮ੍ਮਪਵਤ੍ਤਨਤੋ ਵਾ ਹਦਯੇਨ ਚਿਨ੍ਤੇਤ੍ਵਾ ਵਾਚਾਯ ਨਿਚ੍ਛਾਰਿਤਧਮ੍ਮਮਯੋਤਿ ਧਮ੍ਮਭੂਤੋ. ਸੇਟ੍ਠਟ੍ਠੇਨ ਬ੍ਰਹ੍ਮਭੂਤੋ. ਅਥ ਵਾ ਚਕ੍ਖੁ ਵਿਯ ਭੂਤੋਤਿ ਚਕ੍ਖੁਭੂਤੋ. ਏਵਮੇਤੇਸੁ ਪਦੇਸੁ ਅਤ੍ਥੋ ਵੇਦਿਤਬ੍ਬੋ. ਸ੍ਵਾਯਂ ਧਮ੍ਮਸ੍ਸ ਵਤ੍ਤਨਤੋ ਵਤ੍ਤਾ. ਪਵਤ੍ਤਨਤੋ ਪਵਤ੍ਤਾ. ਅਤ੍ਥਂ ਨੀਹਰਿਤ੍ਵਾ ਨੀਹਰਿਤ੍ਵਾ ਦਸ੍ਸਨਸਮਤ੍ਥਤਾਯ ਅਤ੍ਥਸ੍ਸ ਨਿਨ੍ਨੇਤਾ. ਅਮਤਾਧਿਗਮਾਯ ਪਟਿਪਤ੍ਤਿਂ ਦੇਸੇਤੀਤਿ ਅਮਤਸ੍ਸ ਦਾਤਾ.

ਅਗਰੁਂ ਕਰਿਤ੍ਵਾਤਿ ਪੁਨਪ੍ਪੁਨਂ ਯਾਚਾਪੇਨ੍ਤੋਪਿ ਹਿ ਗਰੁਂ ਕਰੋਤਿ ਨਾਮ. ਅਤ੍ਤਨੋ ਸੇਕ੍ਖਪਟਿਸਮ੍ਭਿਦਾਞਾਣੇ ਠਤ੍ਵਾ ਸਿਨੇਰੁਪਾਦਤੋ ਵਾਲਿਕਂ ਉਦ੍ਧਰਮਾਨੋ ਵਿਯ ਦੁਬ੍ਬਿਞ੍ਞੇਯ੍ਯਂ ਕਤ੍ਵਾ ਕਥੇਨ੍ਤੋਪਿ ਗਰੁਂ ਕਰੋਤਿਯੇਵ ਨਾਮ. ਏਵਂ ਅਕਤ੍ਵਾ ਅਮ੍ਹੇ ਪੁਨਪ੍ਪੁਨਂ ਅਯਾਚਾਪੇਤ੍ਵਾ ਸੁਵਿਞ੍ਞੇਯ੍ਯਮ੍ਪਿ ਨੋ ਕਤ੍ਵਾ ਕਥੇਹੀਤਿ ਵੁਤ੍ਤਂ ਹੋਤਿ.

ਯਂ ਖੋ ਵੋਤਿ ਯਂ ਖੋ ਤੁਮ੍ਹਾਕਂ. ਚਕ੍ਖੁਨਾ ਖੋ, ਆਵੁਸੋ, ਲੋਕਸ੍ਮਿਂ ਲੋਕਸਞ੍ਞੀ ਹੋਤਿ ਲੋਕਮਾਨੀਤਿ ਚਕ੍ਖੁਞ੍ਹਿ ਲੋਕੇ ਅਪ੍ਪਹੀਨਦਿਟ੍ਠਿ ਪੁਥੁਜ੍ਜਨੋ ਸਤ੍ਤਲੋਕਵਸੇਨ ਲੋਕੋਤਿ ਸਞ੍ਜਾਨਾਤਿ ਚੇਵ ਮਞ੍ਞਤਿ ਚ, ਤਥਾ ਚਕ੍ਕਵਾਲ਼ਲੋਕਵਸੇਨ. ਨ ਹਿ ਅਞ੍ਞਤ੍ਰ ਚਕ੍ਖਾਦੀਹਿ ਦ੍ਵਾਦਸਾਯਤਨੇਹਿ ਤਸ੍ਸ ਸਾ ਸਞ੍ਞਾ ਵਾ ਮਾਨੋ ਵਾ ਉਪ੍ਪਜ੍ਜਤਿ. ਤੇਨ ਵੁਤ੍ਤਂ, ‘‘ਚਕ੍ਖੁਨਾ ਖੋ, ਆਵੁਸੋ, ਲੋਕਸ੍ਮਿਂ ਲੋਕਸਞ੍ਞੀ ਹੋਤਿ ਲੋਕਮਾਨੀ’’ਤਿ. ਇਮਸ੍ਸ ਚ ਲੋਕਸ੍ਸ ਗਮਨੇਨ ਅਨ੍ਤੋ ਨਾਮ ਞਾਤੁਂ ਵਾ ਦਟ੍ਠੁਂ ਵਾ ਪਤ੍ਤੁਂ ਵਾ ਨ ਸਕ੍ਕਾ. ਲੁਜ੍ਜਨਟ੍ਠੇਨ ਪਨ ਤਸ੍ਸੇਵ ਚਕ੍ਖਾਦਿਭੇਦਸ੍ਸ ਲੋਕਸ੍ਸ ਨਿਬ੍ਬਾਨਸਙ੍ਖਾਤਂ ਅਨ੍ਤਂ ਅਪ੍ਪਤ੍ਵਾ ਵਟ੍ਟਦੁਕ੍ਖਸ੍ਸ ਅਨ੍ਤਕਿਰਿਯਾ ਨਾਮ ਨਤ੍ਥੀਤਿ ਵੇਦਿਤਬ੍ਬਾ.

ਏਵਂ ਪਞ੍ਹਂ ਵਿਸ੍ਸਜ੍ਜੇਤ੍ਵਾ ਇਦਾਨਿ ‘‘ਸਾਵਕੇਨ ਪਞ੍ਹੋ ਕਥਿਤੋਤਿ ਮਾ ਨਿਕ੍ਕਙ੍ਖਾ ਅਹੁਵਤ੍ਥ, ਅਯਂ ਭਗਵਾ ਸਬ੍ਬਞ੍ਞੁਤਞ੍ਞਾਣਤੁਲਂ ਗਹੇਤ੍ਵਾ ਨਿਸਿਨ੍ਨੋ. ਇਚ੍ਛਮਾਨਾ ਤਮੇਵ ਉਪਸਙ੍ਕਮਿਤ੍ਵਾ ਨਿਕ੍ਕਙ੍ਖਾ ਹੋਥਾ’’ਤਿ ਉਯ੍ਯੋਜੇਨ੍ਤੋ ਆਕਙ੍ਖਮਾਨਾ ਪਨਾਤਿਆਦਿਮਾਹ.

ਇਮੇਹਿ ਆਕਾਰੇਹੀਤਿ ਇਮੇਹਿ ਕਾਰਣੇਹਿ ਚਕ੍ਕਵਾਲ਼ਲੋਕਸ੍ਸ ਅਨ੍ਤਾਭਾਵਕਾਰਣੇਹਿ ਚੇਵ ਸਙ੍ਖਾਰਲੋਕਸ੍ਸ ਅਨ੍ਤਾਪਤ੍ਤਿਕਾਰਣੇਹਿ ਚ. ਇਮੇਹਿ ਪਦੇਹੀਤਿ ਇਮੇਹਿ ਅਕ੍ਖਰਸਮ੍ਪਿਣ੍ਡਨੇਹਿ. ਬ੍ਯਞ੍ਜਨੇਹੀਤਿ ਪਾਟਿਯੇਕ੍ਕਅਕ੍ਖਰੇਹਿ.

ਪਣ੍ਡਿਤੋਤਿ ਪਣ੍ਡਿਚ੍ਚੇਨ ਸਮਨ੍ਨਾਗਤੋ. ਚਤੂਹਿ ਕਾਰਣੇਹਿ ਪਣ੍ਡਿਤੋ ਧਾਤੁਕੁਸਲੋ ਆਯਤਨਕੁਸਲੋ ਪਚ੍ਚਯਾਕਾਰਕੁਸਲੋ ਕਾਰਣਾਕਾਰਣਕੁਸਲੋਤਿ. ਮਹਾਪਞ੍ਞੋਤਿ ਮਹਨ੍ਤੇ ਅਤ੍ਥੇ ਮਹਨ੍ਤੇ ਧਮ੍ਮੇ ਮਹਨ੍ਤਾ ਨਿਰੁਤ੍ਤਿਯੋ ਮਹਨ੍ਤਾਨਿ ਪਟਿਭਾਨਾਨਿ ਪਟਿਗ੍ਗਣ੍ਹਨਸਮਤ੍ਥਤਾਯ ਮਹਾਪਞ੍ਞਾਯ ਸਮਨ੍ਨਾਗਤੋ. ਯਥਾ ਤਂ ਆਨਨ੍ਦੇਨਾਤਿ ਯਥਾ ਆਨਨ੍ਦੇਨ ਬ੍ਯਾਕਤਂ, ਤਂ ਸਨ੍ਧਾਯ ਵੁਤ੍ਤਂ. ਯਥਾ ਆਨਨ੍ਦੇਨ ਤਂ ਬ੍ਯਾਕਤਂ, ਅਹਮ੍ਪਿ ਤਂ ਏਵਮੇਵ ਬ੍ਯਾਕਰੇਯ੍ਯਨ੍ਤਿ ਅਤ੍ਥੋ.

੪. ਕਾਮਗੁਣਸੁਤ੍ਤਵਣ੍ਣਨਾ

੧੧੭. ਚਤੁਤ੍ਥੇ ਯੇ ਮੇਤਿ ਯੇ ਮਮ. ਚੇਤਸੋ ਸਮ੍ਫੁਟ੍ਠਪੁਬ੍ਬਾਤਿ ਚਿਤ੍ਤੇਨ ਅਨੁਭੂਤਪੁਬ੍ਬਾ. ਤਤ੍ਰ ਮੇ ਚਿਤ੍ਤਂ ਬਹੁਲਂ ਗਚ੍ਛਮਾਨਂ ਗਚ੍ਛੇਯ੍ਯਾਤਿ ਤੇਸੁ ਪਾਸਾਦਤ੍ਤਯਤਿਵਿਧਨਾਟਕਾਦਿਭੇਦਸਮ੍ਪਤ੍ਤਿਵਸੇਨ ਅਨੁਭੂਤਪੁਬ੍ਬੇਸੁ ਪਞ੍ਚਸੁ ਕਾਮਗੁਣੇਸੁ ਬਹੂਸੁ ਵਾਰੇਸੁ ਉਪ੍ਪਜ੍ਜਮਾਨਂ ਉਪ੍ਪਜ੍ਜੇਯ੍ਯਾਤਿ ਦੀਪੇਤਿ. ਪਚ੍ਚੁਪ੍ਪਨ੍ਨੇਸੁ ਵਾਤਿ ਇਧ ਪਧਾਨਚਰਿਯਕਾਲੇ ਛਬ੍ਬਸ੍ਸਾਨਿ ਸੁਪੁਪ੍ਫਿਤਵਨਸਣ੍ਡਜਾਤਾਨਂ ਦਿਜਗਣਾਦੀਨਂ ਵਸੇਨ ਦਿਟ੍ਠਸੁਤਾਦਿਭੇਦਂ ਮਨੋਰਮਾਰਮ੍ਮਣਂ ਕਾਮਗੁਣਂ ਕਤ੍ਵਾ ਦਸ੍ਸੇਨ੍ਤੋ ‘‘ਏਵਰੂਪੇਸੁ ਪਚ੍ਚੁਪ੍ਪਨ੍ਨੇਸੁ ਵਾ ਬਹੁਲਂ ਉਪ੍ਪਜ੍ਜੇਯ੍ਯਾ’’ਤਿ ਦਸ੍ਸੇਤਿ. ਅਪ੍ਪਂ ਵਾ ਅਨਾਗਤੇਸੂਤਿ ਅਨਾਗਤੇ ‘‘ਮੇਤ੍ਤੇਯ੍ਯੋ ਨਾਮ ਬੁਦ੍ਧੋ ਭਵਿਸ੍ਸਤਿ, ਸਙ੍ਖੋ ਨਾਮ ਰਾਜਾ, ਕੇਤੁਮਤੀ ਨਾਮ ਰਾਜਧਾਨੀ’’ਤਿਆਦਿਵਸੇਨ (ਦੀ. ਨਿ. ੩.੧੦੬) ਪਰਿਤ੍ਤਕਮੇਵ ਅਨਾਗਤੇਸੁ ਕਾਮਗੁਣੇਸੁ ਉਪ੍ਪਜ੍ਜੇਯ੍ਯਾਤਿ ਦਸ੍ਸੇਤਿ. ਤਤ੍ਰ ਮੇ ਅਤ੍ਤਰੂਪੇਨਾਤਿ ਤਤ੍ਰ ਮਯਾ ਅਤ੍ਤਨੋ ਹਿਤਕਾਮਜਾਤਿਕੇਨ. ਅਪ੍ਪਮਾਦੋਤਿ ਸਾਤਚ੍ਚਕਿਰਿਯਾ ਪਞ੍ਚਸੁ ਕਾਮਗੁਣੇਸੁ ਚਿਤ੍ਤਸ੍ਸ ਅਵੋਸ੍ਸਗ੍ਗੋ. ਸਤੀਤਿ ਆਰਮ੍ਮਣਪਰਿਗ੍ਗਹਿਤਸਤਿ. ਆਰਕ੍ਖੋਤਿ ਅਯਂ ਅਪ੍ਪਮਾਦੋ ਚ ਸਤਿ ਚ ਚੇਤਸੋ ਆਰਕ੍ਖੋ ਕਰਣੀਯੋ, ਏਵਂ ਮੇ ਅਹੋਸੀਤਿ ਦਸ੍ਸੇਤਿ, ਆਰਕ੍ਖਤ੍ਥਾਯ ਇਮੇ ਦ੍ਵੇ ਧਮ੍ਮਾ ਕਾਤਬ੍ਬਾਤਿ ਵੁਤ੍ਤਂ ਹੋਤਿ.

ਤਸ੍ਮਾਤਿਹ, ਭਿਕ੍ਖਵੇ, ਸੇ ਆਯਤਨੇ ਵੇਦਿਤਬ੍ਬੇਤਿ ਯਸ੍ਮਾ ਚੇਤਸੋ ਆਰਕ੍ਖਤ੍ਥਾਯ ਅਪ੍ਪਮਾਦੋ ਚ ਸਤਿ ਚ ਕਾਤਬ੍ਬਾ, ਯਸ੍ਮਾ ਤਸ੍ਮਿਂ ਆਯਤਨੇ ਵਿਦਿਤੇ ਅਪ੍ਪਮਾਦੇਨ ਵਾ ਸਤਿਯਾ ਵਾ ਕਾਤਬ੍ਬਂ ਨਤ੍ਥਿ, ਤਸ੍ਮਾ ਸੇ ਆਯਤਨੇ ਵੇਦਿਤਬ੍ਬੇ, ਤਂ ਕਾਰਣਂ ਜਾਨਿਤਬ੍ਬਨ੍ਤਿ ਅਤ੍ਥੋ. ਸਲ਼ਾਯਤਨਨਿਰੋਧਨ੍ਤਿ ਸਲ਼ਾਯਤਨਨਿਰੋਧੋ ਵੁਚ੍ਚਤਿ ਨਿਬ੍ਬਾਨਂ, ਤਂ ਸਨ੍ਧਾਯ ਭਾਸਿਤਨ੍ਤਿ ਅਤ੍ਥੋ. ਨਿਬ੍ਬਾਨਸ੍ਮਿਞ੍ਹਿ ਚਕ੍ਖੁਆਦੀਨਿ ਚੇਵ ਨਿਰੁਜ੍ਝਨ੍ਤਿ ਰੂਪਸਞ੍ਞਾਦਯੋ ਚ ਨਿਰੁਜ੍ਝਨ੍ਤੀਤਿ. ਸੇਸਂ ਵੁਤ੍ਤਨਯਮੇਵ.

੫-੬. ਸਕ੍ਕਪਞ੍ਹਸੁਤ੍ਤਾਦਿਵਣ੍ਣਨਾ

੧੧੮-੧੧੯. ਪਞ੍ਚਮੇ ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂਯੇਵ ਅਤ੍ਤਭਾਵੇ. ਪਰਿਨਿਬ੍ਬਾਯਨ੍ਤੀਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਨ੍ਤਿ. ਤਨ੍ਨਿਸ੍ਸਿਤਂ ਵਿਞ੍ਞਾਣਂ ਹੋਤੀਤਿ ਤਣ੍ਹਾਨਿਸ੍ਸਿਤਂ ਕਮ੍ਮਵਿਞ੍ਞਾਣਂ ਹੋਤਿ. ਤਦੁਪਾਦਾਨਨ੍ਤਿ ਤਂਗਹਣਂ, ਤਣ੍ਹਾਗਹਣੇਨ ਸਹਗਤਂ ਵਿਞ੍ਞਾਣਂ ਹੋਤੀਤਿ ਅਤ੍ਥੋ. ਛਟ੍ਠਂ ਉਤ੍ਤਾਨਮੇਵ.

੭. ਸਾਰਿਪੁਤ੍ਤਸਦ੍ਧਿਵਿਹਾਰਿਕਸੁਤ੍ਤਵਣ੍ਣਨਾ

੧੨੦. ਸਤ੍ਤਮੇ ਸਨ੍ਤਾਨੇਸ੍ਸਤੀਤਿ ਘਟੇਸ੍ਸਤਿ, ਯੋਗਵਿਚ੍ਛੇਦਮਸ੍ਸ ਪਾਪੁਣਿਤੁਂ ਨ ਦਸ੍ਸਤਿ.

੮. ਰਾਹੁਲੋਵਾਦਸੁਤ੍ਤਵਣ੍ਣਨਾ

੧੨੧. ਅਟ੍ਠਮੇ ਵਿਮੁਤ੍ਤਿਪਰਿਪਾਚਨਿਯਾਤਿ ਵਿਮੁਤ੍ਤਿਂ ਪਰਿਪਾਚੇਨ੍ਤੀਤਿ ਵਿਮੁਤ੍ਤਿਪਰਿਪਾਚਨਿਯਾ. ਧਮ੍ਮਾਤਿ ਪਨ੍ਨਰਸ ਧਮ੍ਮਾ, ਤੇ ਸਦ੍ਧਿਨ੍ਦ੍ਰਿਯਾਦੀਨਂ ਵਿਸੁਦ੍ਧਿਕਰਣਵਸੇਨ ਵੇਦਿਤਬ੍ਬਾ. ਵੁਤ੍ਤਞ੍ਹੇਤਂ –

‘‘ਅਸ੍ਸਦ੍ਧੇ ਪੁਗ੍ਗਲੇ ਪਰਿਵਜ੍ਜਯਤੋ, ਸਦ੍ਧੇ ਪੁਗ੍ਗਲੇ ਸੇਵਤੋ ਭਜਤੋ ਪਯਿਰੁਪਾਸਤੋ, ਪਸਾਦਨੀਯੇ ਸੁਤ੍ਤਨ੍ਤੇ ਪਚ੍ਚਵੇਕ੍ਖਤੋ, ਇਮੇਹਿ ਤੀਹਾਕਾਰੇਹਿ ਸਦ੍ਧਿਨ੍ਦ੍ਰਿਯਂ ਵਿਸੁਜ੍ਝਤਿ. ਕੁਸੀਤੇ ਪੁਗ੍ਗਲੇ ਪਰਿਵਜ੍ਜਯਤੋ, ਆਰਦ੍ਧਵੀਰਿਯੇ ਪੁਗ੍ਗਲੇ ਸੇਵਤੋ ਭਜਤੋ ਪਯਿਰੁਪਾਸਤੋ, ਸਮ੍ਮਪ੍ਪਧਾਨੇ ਪਚ੍ਚਵੇਕ੍ਖਤੋ, ਇਮੇਹਿ ਤੀਹਾਕਾਰੇਹਿ ਵੀਰਿਯਿਨ੍ਦ੍ਰਿਯਂ ਵਿਸੁਜ੍ਝਤਿ. ਮੁਟ੍ਠਸ੍ਸਤੀ ਪੁਗ੍ਗਲੇ ਪਰਿਵਜ੍ਜਯਤੋ, ਉਪਟ੍ਠਿਤਸ੍ਸਤੀ ਪੁਗ੍ਗਲੇ ਸੇਵਤੋ ਭਜਤੋ ਪਯਿਰੁਪਾਸਤੋ, ਸਤਿਪਟ੍ਠਾਨੇ ਪਚ੍ਚਵੇਕ੍ਖਤੋ, ਇਮੇਹਿ ਤੀਹਾਕਾਰੇਹਿ ਸਤਿਨ੍ਦ੍ਰਿਯਂ ਵਿਸੁਜ੍ਝਤਿ. ਅਸਮਾਹਿਤੇ ਪੁਗ੍ਗਲੇ ਪਰਿਵਜ੍ਜਯਤੋ, ਸਮਾਹਿਤੇ ਪੁਗ੍ਗਲੇ ਸੇਵਤੋ ਭਜਤੋ ਪਯਿਰੁਪਾਸਤੋ, ਝਾਨਵਿਮੋਕ੍ਖੇ ਪਚ੍ਚਵੇਕ੍ਖਤੋ, ਇਮੇਹਿ ਤੀਹਾਕਾਰੇਹਿ ਸਮਾਧਿਨ੍ਦ੍ਰਿਯਂ ਵਿਸੁਜ੍ਝਤਿ. ਦੁਪ੍ਪਞ੍ਞੇ ਪੁਗ੍ਗਲੇ ਪਰਿਵਜ੍ਜਯਤੋ, ਪਞ੍ਞਵਨ੍ਤੇ ਪੁਗ੍ਗਲੇ ਸੇਵਤੋ ਭਜਤੋ ਪਯਿਰੁਪਾਸਤੋ, ਗਮ੍ਭੀਰਞਾਣਚਰਿਯਂ ਪਚ੍ਚਵੇਕ੍ਖਤੋ, ਇਮੇਹਿ ਤੀਹਾਕਾਰੇਹਿ ਪਞ੍ਞਿਨ੍ਦ੍ਰਿਯਂ ਵਿਸੁਜ੍ਝਤਿ. ਇਤਿ ਇਮੇ ਪਞ੍ਚ ਪੁਗ੍ਗਲੇ ਪਰਿਵਜ੍ਜਯਤੋ, ਪਞ੍ਚ ਪੁਗ੍ਗਲੇ ਸੇਵਤੋ ਭਜਤੋ ਪਯਿਰੁਪਾਸਤੋ, ਪਞ੍ਚ ਸੁਤ੍ਤਨ੍ਤੇ ਪਚ੍ਚਵੇਕ੍ਖਤੋ, ਇਮੇਹਿ ਪਨ੍ਨਰਸਹਿ ਆਕਾਰੇਹਿ ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਵਿਸੁਜ੍ਝਨ੍ਤੀ’’ਤਿ (ਪਟਿ. ਮ. ੧.੧੮੪).

ਅਪਰੇਪਿ ਪਨ੍ਨਰਸ ਧਮ੍ਮਾ ਵਿਮੁਤ੍ਤਿਪਰਿਪਾਚਨਿਯਾ – ਸਦ੍ਧਾਪਞ੍ਚਮਾਨਿ ਇਨ੍ਦ੍ਰਿਯਾਨਿ, ਅਨਿਚ੍ਚਸਞ੍ਞਾ, ਅਨਿਚ੍ਚੇ ਦੁਕ੍ਖਸਞ੍ਞਾ, ਦੁਕ੍ਖੇ ਅਨਤ੍ਤਸਞ੍ਞਾ, ਪਹਾਨਸਞ੍ਞਾ, ਵਿਰਾਗਸਞ੍ਞਾਤਿ ਇਮਾ ਪਞ੍ਚ ਨਿਬ੍ਬੇਧਭਾਗਿਯਾ ਸਞ੍ਞਾ, ਮੇਘਿਯਤ੍ਥੇਰਸ੍ਸ ਕਥਿਤਾ ਕਲ੍ਯਾਣਮਿਤ੍ਤਤਾਦਯੋ ਪਞ੍ਚ ਧਮ੍ਮਾਤਿ (ਉਦਾ. ੩੧). ਕਾਯ ਪਨ ਵੇਲਾਯ ਭਗਵਤੋ ਏਤਦਹੋਸੀਤਿ? ਪਚ੍ਚੂਸਸਮਯੇ ਲੋਕਂ ਵੋਲੋਕੇਨ੍ਤਸ੍ਸ.

ਅਨੇਕਾਨਿ ਦੇਵਤਾਸਹਸ੍ਸਾਨੀਤਿ ਆਯਸ੍ਮਤਾ ਰਾਹੁਲੇਨ ਪਦੁਮੁਤ੍ਤਰਸ੍ਸ ਭਗਵਤੋ ਪਾਦਮੂਲੇ ਪਾਲਿਤਨਾਗਰਾਜਕਾਲੇ ਪਤ੍ਥਨਂ ਪਟ੍ਠਪੇਨ੍ਤੇਨ ਸਦ੍ਧਿਂ ਪਤ੍ਥਨਂ ਪਟ੍ਠਪਿਤਦੇਵਤਾਸੁ ਪਨ ਕਾਚਿ ਭੂਮਟ੍ਠਕਾ ਦੇਵਤਾ, ਕਾਚਿ ਅਨ੍ਤਲਿਕ੍ਖਟ੍ਠਕਾ, ਕਾਚਿ ਚਾਤੁਮਹਾਰਾਜਿਕਾ, ਕਾਚਿ ਦੇਵਲੋਕੇ, ਕਾਚਿ ਬ੍ਰਹ੍ਮਲੋਕੇ ਨਿਬ੍ਬਤ੍ਤਾ. ਇਮਸ੍ਮਿਂ ਪਨ ਦਿਵਸੇ ਸਬ੍ਬਾਪਿ ਤਾ ਏਕਟ੍ਠਾਨੇ ਅਨ੍ਧਵਨਸ੍ਮਿਂਯੇਵ ਸਨ੍ਨਿਪਤਿਤਾ, ਤਾ ਸਨ੍ਧਾਯਾਹ – ‘‘ਅਨੇਕਾਨਿ ਦੇਵਤਾਸਹਸ੍ਸਾਨੀ’’ਤਿ. ਧਮ੍ਮਚਕ੍ਖੁਨ੍ਤਿ ਇਮਸ੍ਮਿਂ ਸੁਤ੍ਤੇ ਚਤ੍ਤਾਰੋ ਚ ਮਗ੍ਗਾ ਚਤ੍ਤਾਰਿ ਚ ਫਲਾਨਿ ਧਮ੍ਮਚਕ੍ਖੁਨ੍ਤਿ ਵੇਦਿਤਬ੍ਬਾਨਿ. ਤਤ੍ਥ ਹਿ ਕਾਚਿ ਦੇਵਤਾ ਸੋਤਾਪਨ੍ਨਾ ਅਹੇਸੁਂ, ਕਾਚਿ ਸਕਦਾਗਾਮੀ, ਅਨਾਗਾਮੀ, ਖੀਣਾਸਵਾ. ਤਾਸਞ੍ਚ ਪਨ ਦੇਵਤਾਨਂ ਏਤ੍ਤਕਾਤਿ ਗਣਨਵਸੇਨ ਪਰਿਚ੍ਛੇਦੋ ਨਤ੍ਥਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ.

੯-੧੦. ਸਂਯੋਜਨਿਯਧਮ੍ਮਸੁਤ੍ਤਾਦਿਵਣ੍ਣਨਾ

੧੨੨-੧੨੩. ਨਵਮਦਸਮਾਨਿ ਇਟ੍ਠਾਰਮ੍ਮਣਵਸੇਨ ਕਥਿਯਮਾਨੇ ਬੁਜ੍ਝਨਕਾਨਂ ਵਸੇਨ ਵੁਤ੍ਤਾਨੀਤਿ.

ਲੋਕਕਾਮਗੁਣਵਗ੍ਗੋ ਦ੍ਵਾਦਸਮੋ.