੮. ਖਜ੍ਜਨੀਯਵਗ੍ਗੋ
੧-੩. ਅਸ੍ਸਾਦਸੁਤ੍ਤਾਦਿਵਣ੍ਣਨਾ
੭੩-੭੫. ਖਜ੍ਜਨੀਯਵਗ੍ਗਸ੍ਸ ਆਦਿਤੋ ਤੀਸੁ ਸੁਤ੍ਤੇਸੁ ਚਤੁਸਚ੍ਚਮੇਵ ਕਥਿਤਂ. ਪਠਮਾਦੀਨਿ.
੪. ਅਰਹਨ੍ਤਸੁਤ੍ਤਵਣ੍ਣਨਾ
੭੬. ਚਤੁਤ੍ਥੇ ਯਾਵਤਾ, ਭਿਕ੍ਖਵੇ, ਸਤ੍ਤਾਵਾਸਾਤਿ, ਭਿਕ੍ਖਵੇ, ਯਤ੍ਤਕਾ ਸਤ੍ਤਾਵਾਸਾ ਨਾਮ ਅਤ੍ਥਿ. ਯਾਵਤਾ ਭਵਗ੍ਗਨ੍ਤਿ ਯਤ੍ਤਕਂ ਭਵਗ੍ਗਂ ਨਾਮ ਅਤ੍ਥਿ. ਏਤੇ ਅਗ੍ਗਾ ਏਤੇ ਸੇਟ੍ਠਾਤਿ ਏਤੇ ਅਗ੍ਗਭੂਤਾ ਚੇਵ ਸੇਟ੍ਠਭੂਤਾ ਚ. ਯਦਿਦਂ ਅਰਹਨ੍ਤੋਤਿ ਯੇ ਇਮੇ ਅਰਹਨ੍ਤੋ ਨਾਮ. ਇਦਮ੍ਪਿ ਸੁਤ੍ਤਂ ਪੁਰਿਮਨਯੇਨੇਵ ਉਸ੍ਸਦਨਨ੍ਦਿਯਞ੍ਚ ਪਲੋਭਨੀਯਞ੍ਚਾਤਿ ਵੇਦਿਤਬ੍ਬਂ.
ਅਥਾਪਰਂ ਏਤਦਵੋਚਾਤਿ ਤਦਤ੍ਥਪਰਿਦੀਪਨਾਹਿ ਚੇਵ ਵਿਸੇਸਤ੍ਥਪਰਿਦੀਪਨਾਹਿ ਚ ਗਾਥਾਹਿ ਏਤਂ ‘‘ਸੁਖਿਨੋ ਵਤ ਅਰਹਨ੍ਤੋ’’ਤਿਆਦਿਵਚਨਂ ਅਵੋਚ. ਤਤ੍ਥ ਸੁਖਿਨੋਤਿ ਝਾਨਸੁਖੇਨ ਮਗ੍ਗਸੁਖੇਨ ਫਲਸੁਖੇਨ ਚ ਸੁਖਿਤਾ. ਤਣ੍ਹਾ ਤੇਸਂ ਨ ਵਿਜ੍ਜਤੀਤਿ ਤੇਸਂ ਅਪਾਯਦੁਕ੍ਖਜਨਿਕਾ ਤਣ੍ਹਾ ਨ ਵਜ੍ਜਤਿ. ਏਵਂ ਤੇ ਇਮਸ੍ਸਪਿ ਤਣ੍ਹਾਮੂਲਕਸ੍ਸ ਅਭਾਵੇਨ ਸੁਖਿਤਾਵ. ਅਸ੍ਮਿਮਾਨੋ ਸਮੁਚ੍ਛਿਨ੍ਨੋਤਿ ਨਵਵਿਧੋ ਅਸ੍ਮਿਮਾਨੋ ਅਰਹਤ੍ਤਮਗ੍ਗੇਨ ਸਮੁਚ੍ਛਿਨ੍ਨੋ. ਮੋਹਜਾਲਂ ਪਦਾਲਿਤਨ੍ਤਿ ਞਾਣੇਨ ਅਵਿਜ੍ਜਾਜਾਲਂ ਫਾਲਿਤਂ.
ਅਨੇਜਨ੍ਤਿ ਏਜਾਸਙ੍ਖਾਤਾਯ ਤਣ੍ਹਾਯ ਪਹਾਨਭੂਤਂ ਅਰਹਤ੍ਤਂ. ਅਨੁਪਲਿਤ੍ਤਾਤਿ ਤਣ੍ਹਾਦਿਟ੍ਠਿਲੇਪੇਹਿ ਅਲਿਤ੍ਤਾ. ਬ੍ਰਹ੍ਮਭੂਤਾਤਿ ਸੇਟ੍ਠਭੂਤਾ. ਪਰਿਞ੍ਞਾਯਾਤਿ ਤੀਹਿ ਪਰਿਞ੍ਞਾਹਿ ਪਰਿਜਾਨਿਤ੍ਵਾ. ਸਤ੍ਤਸਦ੍ਧਮ੍ਮਗੋਚਰਾਤਿ ਸਦ੍ਧਾ ਹਿਰੀ ਓਤ੍ਤਪ੍ਪਂ ਬਾਹੁਸਚ੍ਚਂ ਆਰਦ੍ਧਵੀਰਿਯਤਾ ਉਪਟ੍ਠਿਤਸ੍ਸਤਿਤਾ ਪਞ੍ਞਾਤਿ ਇਮੇ ਸਤ੍ਤ ਸਦ੍ਧਮ੍ਮਾ ਗੋਚਰੋ ਏਤੇਸਨ੍ਤਿ ਸਤ੍ਤਸਦ੍ਧਮ੍ਮਗੋਚਰਾ.
ਸਤ੍ਤਰਤਨਸਮ੍ਪਨ੍ਨਾਤਿ ਸਤ੍ਤਹਿ ਬੋਜ੍ਝਙ੍ਗਰਤਨੇਹਿ ਸਮਨ੍ਨਾਗਤਾ. ਅਨੁਵਿਚਰਨ੍ਤੀਤਿ ਲੋਕਿਯਮਹਾਜਨਾਪਿ ਅਨੁਵਿਚਰਨ੍ਤਿਯੇਵ. ਇਧ ਪਨ ਖੀਣਾਸਵਾਨਂ ਨਿਰਾਸਙ੍ਕਚਾਰੋ ਨਾਮ ਗਹਿਤੋ. ਤੇਨੇਵਾਹ ‘‘ਪਹੀਨਭਯਭੇਰਵਾ’’ਤਿ. ਤਤ੍ਥ ਭਯਂ ਭਯਮੇਵ, ਭੇਰਵਂ ਬਲਵਭਯਂ. ਦਸਹਙ੍ਗੇਹਿ ਸਮ੍ਪਨ੍ਨਾਤਿ ਅਸੇਕ੍ਖੇਹਿ ਦਸਹਿ ਅਙ੍ਗੇਹਿ ਸਮਨ੍ਨਾਗਤਾ. ਮਹਾਨਾਗਾਤਿ ਚਤੂਹਿ ਕਾਰਣੇਹਿ ਮਹਾਨਾਗਾ. ਸਮਾਹਿਤਾਤਿ ਉਪਚਾਰਪ੍ਪਨਾਹਿ ਸਮਾਹਿਤਾ. ਤਣ੍ਹਾ ਤੇਸਂ ਨ ਵਿਜ੍ਜਤੀਤਿ ‘‘ਊਨੋ ਲੋਕੋ ਅਤਿਤ੍ਤੋ ਤਣ੍ਹਾਦਾਸੋਤਿ ਖੋ, ਮਹਾਰਾਜ, ਤੇਨ ਭਗਵਤਾ’’ਤਿ (ਮ. ਨਿ. ੨.੩੦੫) ਏਵਂ ਵੁਤ੍ਤਾ ਦਾਸਕਾਰਿਕਾ ਤਣ੍ਹਾਪਿ ਤੇਸਂ ਨਤ੍ਥਿ. ਇਮਿਨਾ ਖੀਣਾਸਵਾਨਂ ਭੁਜਿਸ੍ਸਭਾਵਂ ਦਸ੍ਸੇਤਿ.
ਅਸੇਖਞਾਣਨ੍ਤਿ ਅਰਹਤ੍ਤਫਲਞਾਣਂ. ਅਨ੍ਤਿਮੋਯਂ ਸਮੁਸ੍ਸਯੋਤਿ ਪਚ੍ਛਿਮੋ ਅਯਂ ਅਤ੍ਤਭਾਵੋ. ਯੋ ਸਾਰੋ ਬ੍ਰਹ੍ਮਚਰਿਯਸ੍ਸਾਤਿ ਸਾਰੋ ਨਾਮ ਫਲਂ. ਤਸ੍ਮਿਂ ਅਪਰਪਚ੍ਚਯਾਤਿ ਤਸ੍ਮਿਂ ਅਰਿਯਫਲੇ, ਨ ਅਞ੍ਞਂ ਪਤ੍ਤਿਯਾਯਨ੍ਤਿ, ਪਚ੍ਚਕ੍ਖਤੋਵ ਪਟਿਵਿਜ੍ਝਿਤ੍ਵਾ ਠਿਤਾ. ਵਿਧਾਸੁ ਨ ਵਿਕਮ੍ਪਨ੍ਤੀਤਿ ਤੀਸੁ ਮਾਨਕੋਟ੍ਠਾਸੇਸੁ ਨ ਵਿਕਮ੍ਪਨ੍ਤਿ. ਦਨ੍ਤਭੂਮਿਨ੍ਤਿ ਅਰਹਤ੍ਤਂ. ਵਿਜਿਤਾਵਿਨੋਤਿ ਰਾਗਾਦਯੋ ਵਿਜੇਤ੍ਵਾ ਠਿਤਾ.
ਉਦ੍ਧਨ੍ਤਿਆਦੀਸੁ ਉਦ੍ਧਂ ਵੁਚ੍ਚਤਿ ਕੇਸਮਤ੍ਥਕੋ, ਅਪਾਚੀਨਂ ਪਾਦਤਲਂ, ਤਿਰਿਯਂ ਵੇਮਜ੍ਝਂ. ਉਦ੍ਧਂ ਵਾ ਅਤੀਤਂ, ਅਪਾਚੀਨਂ ਅਨਾਗਤਂ, ਤਿਰਿਯਂ ਪਚ੍ਚੁਪ੍ਪਨ੍ਨਂ. ਉਦ੍ਧਂ ਵਾ ਵੁਚ੍ਚਤਿ ਦੇਵਲੋਕੋ, ਅਪਾਚੀਨਂ ਅਪਾਯਲੋਕੋ, ਤਿਰਿਯਂ ਮਨੁਸ੍ਸਲੋਕੋ. ਨਨ੍ਦੀ ਤੇਸਂ ਨ ਵਿਜ੍ਜਤੀਤਿ ਏਤੇਸੁ ਠਾਨੇਸੁ ਸਙ੍ਖੇਪਤੋ ਵਾ ਅਤੀਤਾਨਾਗਤਪਚ੍ਚੁਪ੍ਪਨ੍ਨੇਸੁ ਖਨ੍ਧੇਸੁ ਤੇਸਂ ਤਣ੍ਹਾ ਨਤ੍ਥਿ. ਇਧ ਵਟ੍ਟਮੂਲਕਤਣ੍ਹਾਯ ਅਭਾਵੋ ਦਸ੍ਸਿਤੋ. ਬੁਦ੍ਧਾਤਿ ਚਤੁਨ੍ਨਂ ਸਚ੍ਚਾਨਂ ਬੁਦ੍ਧਤ੍ਤਾ ਬੁਦ੍ਧਾ.
ਇਦਂ ਪਨੇਤ੍ਥ ਸੀਹਨਾਦਸਮੋਧਾਨਂ – ‘‘ਵਿਮੁਤ੍ਤਿਸੁਖੇਨਮ੍ਹਾ ਸੁਖਿਤਾ, ਦੁਕ੍ਖਜਨਿਕਾ ਨੋ ਤਣ੍ਹਾ ਪਹੀਨਾ, ਪਞ੍ਚਕ੍ਖਨ੍ਧਾ ਪਰਿਞ੍ਞਾਤਾ, ਦਾਸਕਾਰਿਕਤਣ੍ਹਾ ਚੇਵ ਵਟ੍ਟਮੂਲਿਕਤਣ੍ਹਾ ਚ ਪਹੀਨਾ, ਅਨੁਤ੍ਤਰਮ੍ਹਾ ਅਸਦਿਸਾ, ਚਤੁਨ੍ਨਂ ਸਚ੍ਚਾਨਂ ਬੁਦ੍ਧਤ੍ਤਾ ਬੁਦ੍ਧਾ’’ਤਿ ਭਵਪਿਟ੍ਠੇ ਠਤ੍ਵਾ ਅਭੀਤਨਾਦਸਙ੍ਖਾਤਂ ਸੀਹਨਾਦਂ ਨਦਨ੍ਤਿ ਖੀਣਾਸਵਾਤਿ. ਚਤੁਤ੍ਥਂ.
੫. ਦੁਤਿਯਅਰਹਨ੍ਤਸੁਤ੍ਤਵਣ੍ਣਨਾ
੭੭. ਪਞ੍ਚਮਂ ਵਿਨਾ ਗਾਥਾਹਿ ਸੁਦ੍ਧਿਕਮੇਵ ਕਤ੍ਵਾ ਕਥਿਯਮਾਨਂ ਬੁਜ੍ਝਨਕਾਨਂ ਅਜ੍ਝਾਸਯੇਨ ਵੁਤ੍ਤਂ. ਪਞ੍ਚਮਂ.
੬. ਸੀਹਸੁਤ੍ਤਵਣ੍ਣਨਾ
੭੮. ਛਟ੍ਠੇ ਸੀਹੋਤਿ ਚਤ੍ਤਾਰੋ ਸੀਹਾ – ਤਿਣਸੀਹੋ, ਕਾਲ਼ਸੀਹੋ, ਪਣ੍ਡੁਸੀਹੋ, ਕੇਸਰਸੀਹੋਤਿ. ਤੇਸੁ ਤਿਣਸੀਹੋ ਕਪੋਤਵਣ੍ਣਗਾਵਿਸਦਿਸੋ ਤਿਣਭਕ੍ਖੋ ਚ ਹੋਤਿ. ਕਾਲ਼ਸੀਹੋ ਕਾਲ਼ਗਾਵਿਸਦਿਸੋ ਤਿਣਭਕ੍ਖੋਯੇਵ. ਪਣ੍ਡੁਸੀਹੋ ਪਣ੍ਡੁਪਲਾਸਵਣ੍ਣਗਾਵਿਸਦਿਸੋ ਮਂਸਭਕ੍ਖੋ. ਕੇਸਰਸੀਹੋ ਲਾਖਾਰਸਪਰਿਕਮ੍ਮਕਤੇਨੇਵ ਮੁਖੇਨ ਅਗ੍ਗਨਙ੍ਗੁਟ੍ਠੇਨ ਚਤੂਹਿ ਚ ਪਾਦਪਰਿਯਨ੍ਤੇਹਿ ਸਮਨ੍ਨਾਗਤੋ, ਮਤ੍ਥਕਤੋਪਿਸ੍ਸ ਪਟ੍ਠਾਯ ਲਾਖਾਤੂਲਿਕਾਯ ਕਤ੍ਵਾ ਵਿਯ ਤਿਸ੍ਸੋ ਰਾਜਿਯੋ ਪਿਟ੍ਠਿਮਜ੍ਝੇਨ ਗਨ੍ਤ੍ਵਾ ਅਨ੍ਤਰਸਤ੍ਥਿਮ੍ਹਿ ਦਕ੍ਖਿਣਾਵਤ੍ਤਾ ਹੁਤ੍ਵਾ ਠਿਤਾ, ਖਨ੍ਧੇ ਪਨਸ੍ਸ ਸਤਸਹਸ੍ਸਗ੍ਘਨਿਕਕਮ੍ਬਲਪਰਿਕ੍ਖੇਪੋ ਵਿਯ ਕੇਸਰਭਾਰੋ ਹੋਤਿ, ਅਵਸੇਸਟ੍ਠਾਨਂ ਪਰਿਸੁਦ੍ਧਂ ਸਾਲਿਪਿਟ੍ਠਸਙ੍ਖਚੁਣ੍ਣਪਿਚੁਵਣ੍ਣਂ ਹੋਤਿ. ਇਮੇਸੁ ਚਤੂਸੁ ਸੀਹੇਸੁ ਅਯਂ ਕੇਸਰਸੀਹੋ ਇਧ ਅਧਿਪ੍ਪੇਤੋ.
ਮਿਗਰਾਜਾਤਿ ਮਿਗਗਣਸ੍ਸ ਰਾਜਾ. ਆਸਯਾਤਿ ਵਸਨਟ੍ਠਾਨਤੋ ਸੁਵਣ੍ਣਗੁਹਤੋ ਵਾ ਰਜਤਮਣਿਫਲਿਕਮਨੋਸਿਲਾਗੁਹਤੋ ਵਾ ਨਿਕ੍ਖਮਤੀਤਿ ਵੁਤ੍ਤਂ ਹੋਤਿ. ਨਿਕ੍ਖਮਮਾਨੋ ਪਨੇਸ ਚਤੂਹਿ ਕਾਰਣੇਹਿ ਨਿਕ੍ਖਮਤਿ ਅਨ੍ਧਕਾਰਪੀਲ਼ਿਤੋ ਵਾ ਆਲੋਕਤ੍ਥਾਯ, ਉਚ੍ਚਾਰਪਸ੍ਸਾਵਪੀਲ਼ਿਤੋ ਵਾ ਤੇਸਂ ਵਿਸ੍ਸਜ੍ਜਨਤ੍ਥਾਯ, ਜਿਘਚ੍ਛਾਪੀਲ਼ਿਤੋ ਵਾ ਗੋਚਰਤ੍ਥਾਯ, ਸਮ੍ਭਵਪੀਲ਼ਿਤੋ ਵਾ ਅਸ੍ਸਦ੍ਧਮ੍ਮਪਟਿਸੇਵਨਤ੍ਥਾਯ. ਇਧ ਪਨ ਗੋਚਰਤ੍ਥਾਯ ਨਿਕ੍ਖਨ੍ਤੋਤਿ ਅਧਿਪ੍ਪੇਤੋ.
ਵਿਜਮ੍ਭਤੀਤਿ ਸੁਵਣ੍ਣਤਲੇ ਵਾ ਰਜਤਮਣਿਫਲਿਕਮਨੋਸਿਲਾਤਲਾਨਂ ਵਾ ਅਞ੍ਞਤਰਸ੍ਮਿਂ ਦ੍ਵੇ ਪਚ੍ਛਿਮਪਾਦੇ ਸਮਂ ਪਤਿਟ੍ਠਾਪੇਤ੍ਵਾ ਪੁਰਿਮਪਾਦੇ ਪੁਰਤੋ ਪਸਾਰੇਤ੍ਵਾ ਸਰੀਰਸ੍ਸ ਪਚ੍ਛਾਭਾਗਂ ਆਕਡ੍ਢਿਤ੍ਵਾ ਪੁਰਿਮਭਾਗਂ ਅਭਿਹਰਿਤ੍ਵਾ ਪਿਟ੍ਠਿਂ ਨਾਮੇਤ੍ਵਾ ਗੀਵਂ ਉਕ੍ਖਿਪਿਤ੍ਵਾ ਅਸਨਿਸਦ੍ਦਂ ਕਰੋਨ੍ਤੋ ਵਿਯ ਨਾਸਪੁਟਾਨਿ ਪੋਥੇਤ੍ਵਾ ਸਰੀਰਲਗ੍ਗਂ ਰਜਂ ਵਿਧੁਨਨ੍ਤੋ ਵਿਜਮ੍ਭਤਿ. ਵਿਜਮ੍ਭਨਭੂਮਿਯਞ੍ਚ ਪਨ ਤਰੁਣਵਚ੍ਛਕੋ ਵਿਯ ਅਪਰਾਪਰਂ ਜਵਤਿ. ਜਵਤੋ ਪਨਸ੍ਸ ਸਰੀਰਂ ਅਨ੍ਧਕਾਰੇ ਪਰਿਬ੍ਭਮਨ੍ਤਂ ਅਲਾਤਂ ਵਿਯ ਖਾਯਤਿ.
ਅਨੁਵਿਲੋਕੇਤੀਤਿ ਕਸ੍ਮਾ ਅਨੁਵਿਲੋਕੇਤਿ? ਪਰਾਨੁਦ੍ਦਯਤਾਯ. ਤਸ੍ਮਿਂ ਕਿਰ ਸੀਹਨਾਦਂ ਨਦਨ੍ਤੇ ਪਪਾਤਾਵਾਟਾਦੀਸੁ ਵਿਸਮਟ੍ਠਾਨੇਸੁ ਚਰਨ੍ਤਾ ਹਤ੍ਥਿਗੋਕਣ੍ਣਮਹਿਂਸਾਦਯੋ ਪਾਣਾ ਪਪਾਤੇਪਿ ਆਵਾਟੇਪਿ ਪਤਨ੍ਤਿ, ਤੇਸਂ ਅਨੁਦ੍ਦਯਾਯ ਅਨੁਵਿਲੋਕੇਤਿ. ਕਿਂ ਪਨਸ੍ਸ ਲੁਦ੍ਦਕਮ੍ਮਸ੍ਸ ਪਰਮਂਸਖਾਦਿਨੋ ਅਨੁਦ੍ਦਯਾ ਨਾਮ ਅਤ੍ਥੀਤਿ? ਆਮ ਅਤ੍ਥਿ. ਤਥਾ ਹੇਸ ‘‘ਕਿਂ ਮੇ ਬਹੂਹਿ ਘਾਤਿਤੇਹੀ’’ਤਿ? ਅਤ੍ਤਨੋ ਗੋਚਰਤ੍ਥਾਯਪਿ ਖੁਦ੍ਦਕੇ ਪਾਣੇ ਨ ਗਣ੍ਹਾਤਿ, ਏਵਂ ਅਨੁਦ੍ਦਯਂ ਕਰੋਤਿ. ਵੁਤ੍ਤਮ੍ਪਿਚੇਤਂ – ‘‘ਮਾਹਂ ਖੋ ਖੁਦ੍ਦਕੇ ਪਾਣੇ ਵਿਸਮਗਤੇ ਸਙ੍ਘਾਤਂ ਆਪਾਦੇਸਿ’’ਨ੍ਤਿ (ਅ. ਨਿ. ੧੦.੨੧).
ਸੀਹਨਾਦਂ ਨਦਤੀਤਿ ਤਿਕ੍ਖਤ੍ਤੁਂ ਤਾਵ ਅਭੀਤਨਾਦਂ ਨਦਤਿ. ਏਵਞ੍ਚ ਪਨਸ੍ਸ ਵਿਜਮ੍ਭਨਭੂਮਿਯਂ ਠਤ੍ਵਾ ਨਦਨ੍ਤਸ੍ਸ ਸਦ੍ਦੋ ਸਮਨ੍ਤਾ ਤਿਯੋਜਨਪਦੇਸਂ ਏਕਨਿਨ੍ਨਾਦਂ ਕਰੋਤਿ, ਤਮਸ੍ਸ ਨਿਨ੍ਨਾਦਂ ਸੁਤ੍ਵਾ ਤਿਯੋਜਨਬ੍ਭਨ੍ਤਰਗਤਾ ਦ੍ਵਿਪਦਚਤੁਪ੍ਪਦਗਣਾ ਯਥਾਠਾਨੇ ਠਾਤੁਂ ਨ ਸਕ੍ਕੋਨ੍ਤਿ. ਗੋਚਰਾਯ ਪਕ੍ਕਮਤੀਤਿ ਆਹਾਰਤ੍ਥਾਯ ਗਚ੍ਛਤਿ. ਕਥਂ? ਸੋ ਹਿ ਵਿਜਮ੍ਭਨਭੂਮਿਯਂ ਠਤ੍ਵਾ ਦਕ੍ਖਿਣਤੋ ਵਾ ਵਾਮਤੋ ਵਾ ਉਪ੍ਪਤਨ੍ਤੋ ਉਸਭਮਤ੍ਤਂ ਠਾਨਂ ਗਣ੍ਹਾਤਿ, ਉਦ੍ਧਂ ਉਪ੍ਪਤਨ੍ਤੋ ਚਤ੍ਤਾਰਿਪਿ ਅਟ੍ਠਪਿ ਉਸਭਾਨਿ ਉਪ੍ਪਤਤਿ, ਸਮਟ੍ਠਾਨੇ ਉਜੁਕਂ ਪਕ੍ਖਨ੍ਦਨ੍ਤੋ ਸੋਲ਼ਸਉਸਭਮਤ੍ਤਮ੍ਪਿ ਵੀਸਤਿਉਸਭਮਤ੍ਤਮ੍ਪਿ ਠਾਨਂ ਪਕ੍ਖਨ੍ਦਤਿ, ਥਲਾ ਵਾ ਪਬ੍ਬਤਾ ਵਾ ਪਕ੍ਖਨ੍ਦਨ੍ਤੋ ਸਟ੍ਠਿਉਸਭਮਤ੍ਤਮ੍ਪਿ ਅਸੀਤਿਉਸਭਮਤ੍ਤਮ੍ਪਿ ਠਾਨਂ ਪਕ੍ਖਨ੍ਦਤਿ, ਅਨ੍ਤਰਾਮਗ੍ਗੇ ਰੁਕ੍ਖਂ ਵਾ ਪਬ੍ਬਤਂ ਵਾ ਦਿਸ੍ਵਾ ਤਂ ਪਰਿਹਰਨ੍ਤੋ ਵਾਮਤੋ ਵਾ ਦਕ੍ਖਿਣਤੋ ਵਾ, ਉਸਭਮਤ੍ਤਮ੍ਪਿ ਅਪਕ੍ਕਮਤਿ. ਤਤਿਯਂ ਪਨ ਸੀਹਨਾਦਂ ਨਦਿਤ੍ਵਾ ਤੇਨੇਵ ਸਦ੍ਧਿਂ ਤਿਯੋਜਨੇ ਠਾਨੇ ਪਞ੍ਞਾਯਤਿ. ਤਿਯੋਜਨਂ ਗਨ੍ਤ੍ਵਾ ਨਿਵਤ੍ਤਿਤ੍ਵਾ ਠਿਤੋ ਅਤ੍ਤਨੋਵ ਨਾਦਸ੍ਸ ਅਨੁਨਾਦਂ ਸੁਣਾਤਿ. ਏਵਂ ਸੀਘੇਨ ਜਵੇਨ ਪਕ੍ਕਮਤੀਤਿ.
ਯੇਭੁਯ੍ਯੇਨਾਤਿ ਪਾਯੇਨ. ਭਯਂ ਸਂਵੇਗਂ ਸਨ੍ਤਾਸਨ੍ਤਿ ਸਬ੍ਬਂ ਚਿਤ੍ਤੁਤ੍ਰਾਸਸ੍ਸੇਵ ਨਾਮਂ. ਸੀਹਸ੍ਸ ਹਿ ਸਦ੍ਦਂ ਸੁਤ੍ਵਾ ਬਹੂ ਸਤ੍ਤਾ ਭਾਯਨ੍ਤਿ, ਅਪ੍ਪਕਾ ਨ ਭਾਯਨ੍ਤਿ. ਕੇ ਪਨ ਤੇਤਿ? ਸਮਸੀਹੋ ਹਤ੍ਥਾਜਾਨੀਯੋ ਅਸ੍ਸਾਜਾਨੀਯੋ ਉਸਭਾਜਾਨੀਯੋ ਪੁਰਿਸਾਜਾਨੀਯੋ ਖੀਣਾਸਵੋਤਿ. ਕਸ੍ਮਾ ਪਨੇਤੇ ਨ ਭਾਯਨ੍ਤੀਤਿ? ਸਮਸੀਹੋ ਨਾਮ ‘‘ਜਾਤਿਗੋਤ੍ਤਕੁਲਸੂਰਭਾਵੇਹਿ ਸਮਾਨੋਸ੍ਮੀ’’ਤਿ ਨ ਭਾਯਤਿ, ਹਤ੍ਥਾਜਾਨੀਯਾਦਯੋ ਅਤ੍ਤਨੋ ਸਕ੍ਕਾਯਦਿਟ੍ਠਿਬਲਵਤਾਯ ਨ ਭਾਯਨ੍ਤਿ, ਖੀਣਾਸਵੋ ਸਕ੍ਕਾਯਦਿਟ੍ਠਿਪਹੀਨਤ੍ਤਾ ਨ ਭਾਯਤਿ.
ਬਿਲਾਸਯਾਤਿ ਬਿਲੇ ਸਯਨ੍ਤਾ ਬਿਲਵਾਸਿਨੋ ਅਹਿਨਕੁਲਗੋਧਾਦਯੋ. ਦਕਾਸਯਾਤਿ ਉਦਕਵਾਸਿਨੋ ਮਚ੍ਛਕਚ੍ਛਪਾਦਯੋ. ਵਨਾਸਯਾਤਿ ਵਨਵਾਸਿਨੋ ਹਤ੍ਥਿਅਸ੍ਸਗੋਕਣ੍ਣਮਿਗਾਦਯੋ. ਪਵਿਸਨ੍ਤੀਤਿ ‘‘ਇਦਾਨਿ ਆਗਨ੍ਤ੍ਵਾ ਗਣ੍ਹਿਸ੍ਸਤੀ’’ਤਿ ਮਗ੍ਗਂ ਓਲੋਕੇਨ੍ਤਾਵ ਪਵਿਸਨ੍ਤਿ. ਦਲ਼੍ਹੇਹੀਤਿ ਥਿਰੇਹਿ. ਵਰਤ੍ਤੇਹੀਤਿ ਚਮ੍ਮਰਜ੍ਜੂਹਿ. ਮਹਿਦ੍ਧਿਕੋਤਿਆਦੀਸੁ ਵਿਜਮ੍ਭਨਭੂਮਿਯਂ ਠਤ੍ਵਾ ਦਕ੍ਖਿਣਪਸ੍ਸਾਦੀਹਿ ਉਸਭਮਤ੍ਤਂ, ਉਜੁਕਂ ਵੀਸਤਿਉਸਭਮਤ੍ਤਾਦਿਲਙ੍ਘਨਵਸੇਨ ਮਹਿਦ੍ਧਿਕਤਾ, ਸੇਸਮਿਗਾਨਂ ਅਧਿਪਤਿਭਾਵੇਨ ਮਹੇਸਕ੍ਖਤਾ, ਸਮਨ੍ਤਾ ਤਿਯੋਜਨੇ ਸਦ੍ਦਂ ਸੁਤ੍ਵਾ ਪਲਾਯਨ੍ਤਾਨਂ ਵਸੇਨ ਮਹਾਨੁਭਾਵਤਾ ਵੇਦਿਤਬ੍ਬਾ.
ਏਵਮੇਵ ਖੋਤਿ ਭਗਵਾ ਤੇਸੁ ਤੇਸੁ ਸੁਤ੍ਤੇਸੁ ਤਥਾ ਤਥਾ ਅਤ੍ਤਾਨਂ ਕਥੇਸਿ. ‘‘ਸੀਹੋਤਿ ਖੋ, ਭਿਕ੍ਖਵੇ, ਤਥਾਗਤਸ੍ਸੇਤਂ ਅਧਿਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸਾ’’ਤਿ (ਅ. ਨਿ. ੫.੯੯; ੧੦.੨੧) ਇਮਸ੍ਮਿਂ ਤਾਵ ਸੁਤ੍ਤੇ ਸੀਹਸਦਿਸਂ ਅਤ੍ਤਾਨਂ ਕਥੇਸਿ. ‘‘ਭਿਸਕ੍ਕੋ ਸਲ੍ਲਕਤ੍ਤੋਤਿ ਖੋ, ਸੁਨਕ੍ਖਤ੍ਤ, ਤਥਾਗਤਸ੍ਸੇਤਂ ਅਧਿਵਚਨ’’ਨ੍ਤਿ (ਮ. ਨਿ. ੩.੬੫) ਇਮਸ੍ਮਿਂ ਵੇਜ੍ਜਸਦਿਸਂ. ‘‘ਬ੍ਰਾਹ੍ਮਣੋਤਿ, ਭਿਕ੍ਖਵੇ, ਤਥਾਗਤਸ੍ਸੇਤਂ ਅਧਿਵਚਨ’’ਨ੍ਤਿ (ਅ. ਨਿ. ੮.੮੫) ਇਮਸ੍ਮਿਂ ਬ੍ਰਾਹ੍ਮਣਸਦਿਸਂ. ‘‘ਪੁਰਿਸੋ ਮਗ੍ਗਕੁਸਲੋਤਿ ਖੋ, ਤਿਸ੍ਸ, ਤਥਾਗਤਸ੍ਸੇਤਂ ਅਧਿਵਚਨ’’ਨ੍ਤਿ (ਸਂ. ਨਿ. ੩.੮੪) ਇਮਸ੍ਮਿਂ ਮਗ੍ਗਦੇਸਕਪੁਰਿਸਸਦਿਸਂ. ‘‘ਰਾਜਾਹਮਸ੍ਮਿ ਸੇਲਾ’’ਤਿ (ਸੁ. ਨਿ. ੫੫੯) ਇਮਸ੍ਮਿਂ ਰਾਜਸਦਿਸਂ. ‘‘ਸੀਹੋਤਿ ਖੋ ਤਥਾਗਤਸ੍ਸੇਤਂ ਅਧਿਵਚਨ’’ਨ੍ਤਿ (ਅ. ਨਿ. ੫.੯੯; ੧੦.੨੧) ਇਮਸ੍ਮਿਂ ਪਨ ਸੁਤ੍ਤੇ ਸੀਹਸਦਿਸਮੇਵ ਕਤ੍ਵਾ ਅਤ੍ਤਾਨਂ ਕਥੇਨ੍ਤੋ ਏਵਮਾਹ.
ਤਤ੍ਰਾਯਂ ਸਦਿਸਤਾ – ਸੀਹਸ੍ਸ ਕਞ੍ਚਨਗੁਹਾਦੀਸੁ ਵਸਨਕਾਲੋ ਵਿਯ ਹਿ ਤਥਾਗਤਸ੍ਸ ਦੀਪਙ੍ਕਰਪਾਦਮੂਲੇ ਕਤਾਭਿਨੀਹਾਰਸ੍ਸ ਅਪਰਿਮਿਤਕਾਲਂ ਪਾਰਮਿਯੋ ਪੂਰੇਤ੍ਵਾ ਪਚ੍ਛਿਮਭਵੇ ਪਟਿਸਨ੍ਧਿਗ੍ਗਹਣੇਨ ਚੇਵ ਮਾਤੁਕੁਚ੍ਛਿਤੋ ਨਿਕ੍ਖਮਨੇਨ ਚ ਦਸਸਹਸ੍ਸਿਲੋਕਧਾਤੁਂ ਕਮ੍ਪੇਤ੍ਵਾ ਵੁਦ੍ਧਿਮਨ੍ਵਾਯ ਦਿਬ੍ਬਸਮ੍ਪਤ੍ਤਿਸਦਿਸਂ ਸਮ੍ਪਤ੍ਤਿਂ ਅਨੁਭਵਮਾਨਸ੍ਸ ਤੀਸੁ ਪਾਸਾਦੇਸੁ ਨਿਵਾਸਕਾਲੋ ਦਟ੍ਠਬ੍ਬੋ. ਸੀਹਸ੍ਸ ਕਞ੍ਚਨਗੁਹਾਦਿਤੋ ਨਿਕ੍ਖਨ੍ਤਕਾਲੋ ਵਿਯ ਤਥਾਗਤਸ੍ਸ ਏਕੂਨਤਿਂਸੇ ਸਂਵਚ੍ਛਰੇ ਵਿਵਟੇਨ ਦ੍ਵਾਰੇਨ ਕਣ੍ਡਕਂ ਆਰੁਯ੍ਹ ਛਨ੍ਨਸਹਾਯਸ੍ਸ ਨਿਕ੍ਖਮਿਤ੍ਵਾ ਤੀਣਿ ਰਜ੍ਜਾਨਿ ਅਤਿਕ੍ਕਮਿਤ੍ਵਾ ਅਨੋਮਾਨਦੀਤੀਰੇ ਬ੍ਰਹ੍ਮੁਨਾ ਦਿਨ੍ਨਾਨਿ ਕਾਸਾਯਾਨਿ ਪਰਿਦਹਿਤ੍ਵਾ ਪਬ੍ਬਜਿਤਸ੍ਸ ਸਤ੍ਤਮੇ ਦਿਵਸੇ ਰਾਜਗਹਂ ਗਨ੍ਤ੍ਵਾ ਤਤ੍ਥ ਪਿਣ੍ਡਾਯ ਚਰਿਤ੍ਵਾ ਪਣ੍ਡਵਗਿਰਿਪਬ੍ਭਾਰੇ ਕਤਭਤ੍ਤਕਿਚ੍ਚਸ੍ਸ ਸਮ੍ਮਾਸਮ੍ਬੋਧਿਂ ਪਤ੍ਵਾ, ਪਠਮਮੇਵ ਮਗਧਰਟ੍ਠਂ ਆਗਮਨਤ੍ਥਾਯ ਯਾਵ ਰਞ੍ਞੋ ਪਟਿਞ੍ਞਾਦਾਨਕਾਲੋ.
ਸੀਹਸ੍ਸ ਵਿਜਮ੍ਭਨਕਾਲੋ ਵਿਯ ਤਥਾਗਤਸ੍ਸ ਦਿਨ੍ਨਪਟਿਞ੍ਞਸ੍ਸ ਆਲ਼ਾਰਕਾਲਾਮਉਪਸਙ੍ਕਮਨਂ ਆਦਿਂ ਕਤ੍ਵਾ ਯਾਵ ਸੁਜਾਤਾਯ ਦਿਨ੍ਨਪਾਯਾਸਸ੍ਸ ਏਕੂਨਪਣ੍ਣਾਸਾਯ ਪਿਣ੍ਡੇਹਿ ਪਰਿਭੁਤ੍ਤਕਾਲੋ ਵੇਦਿਤਬ੍ਬੋ. ਸੀਹਸ੍ਸ ਕੇਸਰਵਿਧੁਨਨਂ ਵਿਯ ਸਾਯਨ੍ਹਸਮਯੇ ਸੋਤ੍ਤਿਯੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਦਸਸਹਸ੍ਸਚਕ੍ਕਵਾਲ਼ਦੇਵਤਾਹਿ ਥੋਮਿਯਮਾਨਸ੍ਸ ਗਨ੍ਧਾਦੀਹਿ ਪੂਜਿਯਮਾਨਸ੍ਸ ਤਿਕ੍ਖਤ੍ਤੁਂ ਬੋਧਿਂ ਪਦਕ੍ਖਿਣਂ ਕਤ੍ਵਾ ਬੋਧਿਮਣ੍ਡਂ ਆਰੁਯ੍ਹ ਚੁਦ੍ਦਸਹਤ੍ਥੁਬ੍ਬੇਧੇ ਠਾਨੇ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਚਤੁਰਙ੍ਗਵੀਰਿਯਂ ਅਧਿਟ੍ਠਾਯ ਨਿਸਿਨ੍ਨਸ੍ਸ ਤਂਖਣਂਯੇਵ ਮਾਰਬਲਂ ਵਿਧਮਿਤ੍ਵਾ ਤੀਸੁ ਯਾਮੇਸੁ ਤਿਸ੍ਸੋ ਵਿਜ੍ਜਾ ਵਿਸੋਧੇਤ੍ਵਾ ਅਨੁਲੋਮਪਟਿਲੋਮਂ ਪਟਿਚ੍ਚਸਮੁਪ੍ਪਾਦਮਹਾਸਮੁਦ੍ਦਂ ਯਮਕਞਾਣਮਨ੍ਥਨੇਨ ਮਨ੍ਥੇਨ੍ਤਸ੍ਸ ਸਬ੍ਬਞ੍ਞੁਤਞ੍ਞਾਣੇ ਪਟਿਵਿਦ੍ਧੇ ਤਦਨੁਭਾਵੇਨ ਦਸਸਹਸ੍ਸਿਲੋਕਧਾਤੁਕਮ੍ਪਨਂ ਵੇਦਿਤਬ੍ਬਂ.
ਸੀਹਸ੍ਸ ਚਤੁਦ੍ਦਿਸਾਵਿਲੋਕਨਂ ਵਿਯ ਪਟਿਵਿਦ੍ਧਸਬ੍ਬਞ੍ਞੁਤਞ੍ਞਾਣਸ੍ਸ ਸਤ੍ਤਸਤ੍ਤਾਹਂ ਬੋਧਿਮਣ੍ਡੇ ਵਿਹਰਿਤ੍ਵਾ ਪਰਿਭੁਤ੍ਤਮਧੁਪਿਣ੍ਡਿਕਾਹਾਰਸ੍ਸ ਅਜਪਾਲਨਿਗ੍ਰੋਧਮੂਲੇ ਮਹਾਬ੍ਰਹ੍ਮੁਨੋ ਧਮ੍ਮਦੇਸਨਾਯਾਚਨਂ ਪਟਿਗ੍ਗਹੇਤ੍ਵਾ ਤਤ੍ਥ ਵਿਹਰਨ੍ਤਸ੍ਸ ਏਕਾਦਸਮੇ ਦਿਵਸੇ ‘‘ਸ੍ਵੇ ਆਸਾਲ਼੍ਹਿਪੁਣ੍ਣਮਾ ਭਵਿਸ੍ਸਤੀ’’ਤਿ ਪਚ੍ਚੂਸਸਮਯੇ ‘‘ਕਸ੍ਸ ਨੁ ਖੋ ਅਹਂ ਪਠਮਂ ਧਮ੍ਮਂ ਦੇਸੇਯ੍ਯ’’ਨ੍ਤਿ? ਆਲ਼ਾਰੁਦਕਾਨਂ ਕਾਲਙ੍ਕਤਭਾਵਂ ਞਤ੍ਵਾ ਧਮ੍ਮਦੇਸਨਤ੍ਥਾਯ ਪਞ੍ਚਵਗ੍ਗਿਯਾਨਂ ਓਲੋਕਨਂ ਦਟ੍ਠਬ੍ਬਂ. ਸੀਹਸ੍ਸ ਗੋਚਰਤ੍ਥਾਯ ਤਿਯੋਜਨਂ ਗਮਨਕਾਲੋ ਵਿਯ ਅਤ੍ਤਨੋ ਪਤ੍ਤਚੀਵਰਮਾਦਾਯ ‘‘ਪਞ੍ਚਵਗ੍ਗਿਯਾਨਂ ਧਮ੍ਮਚਕ੍ਕਂ ਪਵਤ੍ਤੇਸ੍ਸਾਮੀ’’ਤਿ ਪਚ੍ਛਾਭਤ੍ਤੇ ਅਜਪਾਲਨਿਗ੍ਰੋਧਤੋ ਵੁਟ੍ਠਿਤਸ੍ਸ ਅਟ੍ਠਾਰਸਯੋਜਨਮਗ੍ਗਂ ਗਮਨਕਾਲੋ.
ਸੀਹਨਾਦਕਾਲੋ ਵਿਯ ਤਥਾਗਤਸ੍ਸ ਅਟ੍ਠਾਰਸਯੋਜਨਮਗ੍ਗਂ ਗਨ੍ਤ੍ਵਾ ਪਞ੍ਚਵਗ੍ਗਿਯੇ ਸਞ੍ਞਾਪੇਤ੍ਵਾ ਅਚਲਪਲ੍ਲਙ੍ਕੇ ਨਿਸਿਨ੍ਨਸ੍ਸ ਦਸਹਿ ਚਕ੍ਕਵਾਲ਼ਸਹਸ੍ਸੇਹਿ ਸਨ੍ਨਿਪਤਿਤੇਨ ਦੇਵਗਣੇਨ ਪਰਿਵੁਤਸ੍ਸ ‘‘ਦ੍ਵੇਮੇ, ਭਿਕ੍ਖਵੇ, ਅਨ੍ਤਾ ਪਬ੍ਬਜਿਤੇਨ ਨ ਸੇਵਿਤਬ੍ਬਾ’’ਤਿਆਦਿਨਾ (ਸਂ. ਨਿ. ੫.੧੦੮੧; ਮਹਾਵ. ੧੩) ਨਯੇਨ ਧਮ੍ਮਚਕ੍ਕਪ੍ਪਵਤ੍ਤਨਕਾਲੋ ਵੇਦਿਤਬ੍ਬੋ. ਇਮਸ੍ਮਿਞ੍ਚ ਪਨ ਪਦੇ ਦੇਸਿਯਮਾਨੇ ਤਥਾਗਤਸੀਹਸ੍ਸ ਧਮ੍ਮਘੋਸੋ ਹੇਟ੍ਠਾ ਅਵੀਚਿਂ ਉਪਰਿ ਭਵਗ੍ਗਂ ਗਹੇਤ੍ਵਾ ਦਸਸਹਸ੍ਸਿਲੋਕਧਾਤੁਂ ਪਟਿਚ੍ਛਾਦੇਸਿ. ਸੀਹਸ੍ਸ ਸਦ੍ਦੇਨ ਖੁਦ੍ਦਕਪਾਣਾਨਂ ਸਨ੍ਤਾਸਂ ਆਪਜ੍ਜਨਕਾਲੋ ਵਿਯ ਤਥਾਗਤਸ੍ਸ ਤੀਣਿ ਲਕ੍ਖਣਾਨਿ ਦੀਪੇਤ੍ਵਾ ਚਤ੍ਤਾਰਿ ਸਚ੍ਚਾਨਿ ਸੋਲ਼ਸਹਾਕਾਰੇਹਿ ਸਟ੍ਠਿਯਾ ਚ ਨਯਸਹਸ੍ਸੇਹਿ ਵਿਭਜਿਤ੍ਵਾ ਧਮ੍ਮਂ ਕਥੇਨ੍ਤਸ੍ਸ ਦੀਘਾਯੁਕਦੇਵਤਾਨਂ ਞਾਣਸਨ੍ਤਾਸਸ੍ਸ ਉਪ੍ਪਤ੍ਤਿਕਾਲੋ ਵੇਦਿਤਬ੍ਬੋ.
ਯਦਾਤਿ ਯਸ੍ਮਿਂ ਕਾਲੇ. ਤਥਾਗਤੋਤਿ ਅਟ੍ਠਹਿ ਕਾਰਣੇਹਿ ਭਗਵਾ ਤਥਾਗਤੋ – ਤਥਾ ਆਗਤੋਤਿ ਤਥਾਗਤੋ, ਤਥਾ ਗਤੋਤਿ ਤਥਾਗਤੋ, ਤਥਲਕ੍ਖਣਂ ਆਗਤੋਤਿ ਤਥਾਗਤੋ, ਤਥਧਮ੍ਮੇ ਯਾਥਾਵਤੋ ਅਭਿਸਮ੍ਬੁਦ੍ਧੋਤਿ ਤਥਾਗਤੋ, ਤਥਦਸ੍ਸਿਤਾਯ ਤਥਾਗਤੋ, ਤਥਾਵਾਦਿਤਾਯ ਤਥਾਗਤੋ, ਤਥਾਕਾਰਿਤਾਯ ਤਥਾਗਤੋ. ਅਭਿਭਵਨਟ੍ਠੇਨ ਤਥਾਗਤੋਤਿ. ਤੇਸਂ ਵਿਤ੍ਥਾਰੋ ਬ੍ਰਹ੍ਮਜਾਲਵਣ੍ਣਨਾਯਮ੍ਪਿ (ਦੀ. ਨਿ. ਅਟ੍ਠ. ੧.੭) ਮੂਲਪਰਿਯਾਯਵਣ੍ਣਨਾਯਮ੍ਪਿ (ਮ. ਨਿ. ਅਟ੍ਠ. ੧.੧੨) ਵੁਤ੍ਤੋਯੇਵ. ਲੋਕੇਤਿ ਸਤ੍ਤਲੋਕੇ. ਉਪ੍ਪਜ੍ਜਤੀਤਿ ਅਭਿਨੀਹਾਰਤੋ ਪਟ੍ਠਾਯ ਯਾਵ ਬੋਧਿਪਲ੍ਲਙ੍ਕਾ ਵਾ ਅਰਹਤ੍ਤਮਗ੍ਗਞਾਣਾ ਵਾ ਉਪ੍ਪਜ੍ਜਤਿ ਨਾਮ, ਅਰਹਤ੍ਤਫਲੇ ਪਨ ਪਤ੍ਤੇ ਉਪ੍ਪਨ੍ਨੋ ਨਾਮ. ਅਰਹਂ ਸਮ੍ਮਾਸਮ੍ਬੁਦ੍ਧੋਤਿਆਦੀਨਿ ਵਿਸੁਦ੍ਧਿਮਗ੍ਗੇ ਬੁਦ੍ਧਾਨੁਸ੍ਸਤਿਨਿਦ੍ਦੇਸੇ ਵਿਤ੍ਥਾਰਿਤਾਨਿ.
ਇਤਿ ਰੂਪਨ੍ਤਿ ਇਦਂ ਰੂਪਂ ਏਤ੍ਤਕਂ ਰੂਪਂ, ਨ ਇਤੋ ਭਿਯ੍ਯੋ ਰੂਪਂ ਅਤ੍ਥੀਤਿ. ਏਤ੍ਤਾਵਤਾ ਸਭਾਵਤੋ ਸਰਸਤੋ ਪਰਿਯਨ੍ਤਤੋ ਪਰਿਚ੍ਛੇਦਤੋ ਪਰਿਚ੍ਛਿਨ੍ਦਨਤੋ ਯਾਵਤਾ ਚਤ੍ਤਾਰੋ ਚ ਮਹਾਭੂਤਾ ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯਰੂਪਂ, ਤਂ ਸਬ੍ਬਂ ਦਸ੍ਸਿਤਂ ਹੋਤਿ. ਇਤਿ ਰੂਪਸ੍ਸ ਸਮੁਦਯੋਤਿ ਅਯਂ ਰੂਪਸ੍ਸ ਸਮੁਦਯੋ ਨਾਮ. ਏਤ੍ਤਾਵਤਾ ਹਿ ‘‘ਆਹਾਰਸਮੁਦਯੋ ਰੂਪਸਮੁਦਯੋ’’ਤਿਆਦਿ ਸਬ੍ਬਂ ਦਸ੍ਸਿਤਂ ਹੋਤਿ. ਇਤਿ ਰੂਪਸ੍ਸ ਅਤ੍ਥਙ੍ਗਮੋਤਿ ਅਯਂ ਰੂਪਸ੍ਸ ਅਤ੍ਥਙ੍ਗਮੋ. ਇਮਿਨਾਪਿ ‘‘ਆਹਾਰਨਿਰੋਧਾ ਰੂਪਨਿਰੋਧੋ’’ਤਿਆਦਿ ਸਬ੍ਬਂ ਦਸ੍ਸਿਤਂ ਹੋਤਿ. ਇਤਿ ਵੇਦਨਾਤਿਆਦੀਸੁਪਿ ਏਸੇਵ ਨਯੋ.
ਵਣ੍ਣਵਨ੍ਤੋਤਿ ਸਰੀਰਵਣ੍ਣੇਨ ਵਣ੍ਣਵਨ੍ਤੋ. ਧਮ੍ਮਦੇਸਨਂ ਸੁਤ੍ਵਾਤਿ ਇਮਂ ਪਞ੍ਚਸੁ ਖਨ੍ਧੇਸੁ ਪਣ੍ਣਾਸਲਕ੍ਖਣਪਟਿਮਣ੍ਡਿਤਂ ਤਥਾਗਤਸ੍ਸ ਧਮ੍ਮਦੇਸਨਂ ਸੁਤ੍ਵਾ. ਯੇਭੁਯ੍ਯੇਨਾਤਿ ਇਧ ਕੇ ਠਪੇਤਿ? ਅਰਿਯਸਾਵਕੇ ਦੇਵੇ. ਤੇਸਞ੍ਹਿ ਖੀਣਾਸਵਤ੍ਤਾ ਚਿਤ੍ਤੁਤ੍ਰਾਸਭਯਮ੍ਪਿ ਨ ਉਪ੍ਪਜ੍ਜਤਿ, ਸਂਵਿਗ੍ਗਸ੍ਸ ਯੋਨਿਸੋ ਪਧਾਨੇਨ ਪਤ੍ਤਬ੍ਬਂ ਪਤ੍ਤਤਾਯ ਞਾਣਸਂਵੇਗੋਪਿ. ਇਤਰੇਸਂ ਪਨ ਦੇਵਾਨਂ ‘‘ਤਾਸੋ ਹੇਸੋ ਭਿਕ੍ਖੂ’’ਤਿ ਅਨਿਚ੍ਚਤਂ ਮਨਸਿਕਰੋਨ੍ਤਾਨਂ ਚਿਤ੍ਤੁਤ੍ਰਾਸਭਯਮ੍ਪਿ, ਬਲਵਵਿਪਸ੍ਸਨਾਕਾਲੇ ਞਾਣਭਯਮ੍ਪਿ ਉਪ੍ਪਜ੍ਜਤਿ. ਭੋਤਿ ਧਮ੍ਮਾਲਪਨਮਤ੍ਤਮੇਤਂ. ਸਕ੍ਕਾਯਪਰਿਯਾਪਨ੍ਨਾਤਿ ਪਞ੍ਚਕ੍ਖਨ੍ਧਪਰਿਯਾਪਨ੍ਨਾ. ਇਤਿ ਤੇਸਂ ਸਮ੍ਮਾਸਮ੍ਬੁਦ੍ਧੇ ਵਟ੍ਟਦੋਸਂ ਦਸ੍ਸੇਤ੍ਵਾ ਤਿਲਕ੍ਖਣਾਹਤਂ ਕਤ੍ਵਾ ਧਮ੍ਮਂ ਦੇਸੇਨ੍ਤੇ ਞਾਣਭਯਂ ਨਾਮ ਓਕ੍ਕਮਤਿ.
ਅਭਿਞ੍ਞਾਯਾਤਿ ਜਾਨਿਤ੍ਵਾ. ਧਮ੍ਮਚਕ੍ਕਨ੍ਤਿ ਪਟਿਵੇਧਞਾਣਮ੍ਪਿ ਦੇਸਨਾਞਾਣਮ੍ਪਿ. ਪਟਿਵੇਧਞਾਣਂ ਨਾਮ ਯੇਨ ਞਾਣੇਨ ਬੋਧਿਪਲ੍ਲਙ੍ਕੇ ਨਿਸਿਨ੍ਨੋ ਚਤ੍ਤਾਰਿ ਸਚ੍ਚਾਨਿ ਸੋਲ਼ਸਹਾਕਾਰੇਹਿ ਸਟ੍ਠਿਯਾ ਚ ਨਯਸਹਸ੍ਸੇਹਿ ਪਟਿਵਿਜ੍ਝਿ. ਦੇਸਨਾਞਾਣਂ ਨਾਮ ਯੇਨ ਞਾਣੇਨ ਤਿਪਰਿਵਟ੍ਟਂ ਦ੍ਵਾਦਸਾਕਾਰਂ ਧਮ੍ਮਚਕ੍ਕਂ ਪਵਤ੍ਤੇਸਿ. ਉਭਯਮ੍ਪਿ ਤਂ ਦਸਬਲਸ੍ਸ ਉਰੇ ਜਾਤਞਾਣਮੇਵ. ਤੇਸੁ ਇਧ ਦੇਸਨਾਞਾਣਂ ਗਹੇਤਬ੍ਬਂ. ਤਂ ਪਨੇਸ ਯਾਵ ਅਟ੍ਠਾਰਸਹਿ ਬ੍ਰਹ੍ਮਕੋਟੀਹਿ ਸਦ੍ਧਿਂ ਅਞ੍ਞਾਸਿਕੋਣ੍ਡਞ੍ਞਤ੍ਥੇਰਸ੍ਸ ਸੋਤਾਪਤ੍ਤਿਫਲਂ ਉਪ੍ਪਜ੍ਜਤਿ, ਤਾਵ ਪਵਤ੍ਤੇਤਿ ਨਾਮ. ਤਸ੍ਮਿਂ ਉਪ੍ਪਨ੍ਨੇ ਪਵਤ੍ਤਿਤਂ ਨਾਮ ਹੋਤੀਤਿ ਵੇਦਿਤਬ੍ਬਂ. ਅਪ੍ਪਟਿਪੁਗ੍ਗਲੋਤਿ ਸਦਿਸਪੁਗ੍ਗਲਰਹਿਤੋ. ਯਸਸ੍ਸਿਨੋਤਿ ਪਰਿਵਾਰਸਮ੍ਪਨ੍ਨਾ. ਤਾਦਿਨੋਤਿ ਲਾਭਾਲਾਭਾਦੀਹਿ ਏਕਸਦਿਸਸ੍ਸ. ਛਟ੍ਠਂ.
੭. ਖਜ੍ਜਨੀਯਸੁਤ੍ਤਵਣ੍ਣਨਾ
੭੯. ਸਤ੍ਤਮੇ ਪੁਬ੍ਬੇਨਿਵਾਸਨ੍ਤਿ ਨ ਇਦਂ ਅਭਿਞ੍ਞਾਵਸੇਨ ਅਨੁਸ੍ਸਰਣਂ ਸਨ੍ਧਾਯ ਵੁਤ੍ਤਂ, ਵਿਪਸ੍ਸਨਾਵਸੇਨ ਪਨ ਪੁਬ੍ਬੇਨਿਵਾਸਂ ਅਨੁਸ੍ਸਰਨ੍ਤੇ ਸਮਣਬ੍ਰਾਹ੍ਮਣੇ ਸਨ੍ਧਾਯੇਤਂ ਵੁਤ੍ਤਂ. ਤੇਨੇਵਾਹ – ‘‘ਸਬ੍ਬੇਤੇ ਪਞ੍ਚੁਪਾਦਾਨਕ੍ਖਨ੍ਧੇ ਅਨੁਸ੍ਸਰਨ੍ਤਿ, ਏਤੇਸਂ ਵਾ ਅਞ੍ਞਤਰ’’ਨ੍ਤਿ. ਅਭਿਞ੍ਞਾਵਸੇਨ ਹਿ ਸਮਨੁਸ੍ਸਰਨ੍ਤਸ੍ਸ ਖਨ੍ਧਾਪਿ ਉਪਾਦਾਨਕ੍ਖਨ੍ਧਾਪਿ ਖਨ੍ਧਪਟਿਬਦ੍ਧਾਪਿ ਪਣ੍ਣਤ੍ਤਿਪਿ ਆਰਮ੍ਮਣਂ ਹੋਤਿਯੇਵ. ਰੂਪਂਯੇਵ ਅਨੁਸ੍ਸਰਤੀਤਿ ਏਵਞ੍ਹਿ ਅਨੁਸ੍ਸਰਨ੍ਤੋ ਨ ਅਞ੍ਞਂ ਕਿਞ੍ਚਿ ਸਤ੍ਤਂ ਵਾ ਪੁਗ੍ਗਲਂ ਵਾ ਅਨੁਸ੍ਸਰਤਿ, ਅਤੀਤੇ ਪਨ ਨਿਰੁਦ੍ਧਂ ਰੂਪਕ੍ਖਨ੍ਧਮੇਵ ਅਨੁਸ੍ਸਰਤਿ. ਵੇਦਨਾਦੀਸੁਪਿ ਏਸੇਵ ਨਯੋਤਿ. ਸੁਞ੍ਞਤਾਪਬ੍ਬਂ ਨਿਟ੍ਠਿਤਂ.
ਇਦਾਨਿ ਸੁਞ੍ਞਤਾਯ ਲਕ੍ਖਣਂ ਦਸ੍ਸੇਤੁਂ ਕਿਞ੍ਚ, ਭਿਕ੍ਖਵੇ, ਰੂਪਂ ਵਦੇਥਾਤਿਆਦਿਮਾਹ. ਯਥਾ ਹਿ ਨਟ੍ਠਂ ਗੋਣਂ ਪਰਿਯੇਸਮਾਨੋ ਪੁਰਿਸੋ ਗੋਗਣੇ ਚਰਮਾਨੇ ਰਤ੍ਤਂ ਵਾ ਕਾਲ਼ਂ ਵਾ ਬਲੀਬਦ੍ਦਂ ਦਿਸ੍ਵਾਪਿ ਨ ਏਤ੍ਤਕੇਨੇਵ ‘‘ਅਯਂ ਮਯ੍ਹਂ ਗੋਣੋ’’ਤਿ ਸਨ੍ਨਿਟ੍ਠਾਨਂ ਕਾਤੁਂ ਸਕ੍ਕੋਤਿ. ਕਸ੍ਮਾ? ਅਞ੍ਞੇਸਮ੍ਪਿ ਤਾਦਿਸਾਨਂ ਅਤ੍ਥਿਤਾਯ. ਸਰੀਰਪਦੇਸੇ ਪਨਸ੍ਸ ਸਤ੍ਤਿਸੂਲਾਦਿਲਕ੍ਖਣਂ ਦਿਸ੍ਵਾ ‘‘ਅਯਂ ਮਯ੍ਹਂ ਸਨ੍ਤਕੋ’’ਤਿ ਸਨ੍ਨਿਟ੍ਠਾਨਂ ਹੋਤਿ, ਏਵਮੇਵ ਸੁਞ੍ਞਤਾਯ ਕਥਿਤਾਯਪਿ ਯਾਵ ਸੁਞ੍ਞਤਾਲਕ੍ਖਣਂ ਨ ਕਥੀਯਤਿ, ਤਾਵ ਸਾ ਅਕਥਿਤਾਵ ਹੋਤਿ, ਲਕ੍ਖਣੇ ਪਨ ਕਥਿਤੇ ਕਥਿਤਾ ਨਾਮ ਹੋਤਿ. ਗੋਣੋ ਵਿਯ ਹਿ ਸੁਞ੍ਞਤਾ, ਗੋਣਲਕ੍ਖਣਂ ਵਿਯ ਸੁਞ੍ਞਤਾਲਕ੍ਖਣਂ. ਯਥਾ ਗੋਣਲਕ੍ਖਣੇ ਅਸਲ੍ਲਕ੍ਖਿਤੇ ਗੋਣੋ ਨ ਸੁਟ੍ਠੁ ਸਲ੍ਲਕ੍ਖਿਤੋ ਹੋਤਿ, ਤਸ੍ਮਿਂ ਪਨ ਸਲ੍ਲਕ੍ਖਿਤੇ ਸੋ ਸਲ੍ਲਕ੍ਖਿਤੋ ਨਾਮ ਹੋਤਿ, ਏਵਮੇਵ ਸੁਞ੍ਞਤਾਲਕ੍ਖਣੇ ਅਕਥਿਤੇ ਸੁਞ੍ਞਤਾ ਅਕਥਿਤਾਵ ਹੋਤਿ, ਤਸ੍ਮਿਂ ਪਨ ਕਥਿਤੇ ਸਾ ਕਥਿਤਾ ਨਾਮ ਹੋਤੀਤਿ ਸੁਞ੍ਞਤਾਲਕ੍ਖਣਂ ਦਸ੍ਸੇਤੁਂ ਕਿਞ੍ਚ, ਭਿਕ੍ਖਵੇ, ਰੂਪਂ ਵਦੇਥਾਤਿਆਦਿਮਾਹ.
ਤਤ੍ਥ ਕਿਞ੍ਚਾਤਿ ਕਾਰਣਪੁਚ੍ਛਾ, ਕੇਨ ਕਾਰਣੇਨ ਰੂਪਂ ਵਦੇਥ, ਕੇਨ ਕਾਰਣੇਨੇਤਂ ਰੂਪਂ ਨਾਮਾਤਿ ਅਤ੍ਥੋ. ਰੁਪ੍ਪਤੀਤਿ ਖੋਤਿ ਏਤ੍ਥ ਇਤੀਤਿ ਕਾਰਣੁਦ੍ਦੇਸੋ, ਯਸ੍ਮਾ ਰੁਪ੍ਪਤਿ, ਤਸ੍ਮਾ ਰੂਪਨ੍ਤਿ ਵੁਚ੍ਚਤੀਤਿ ਅਤ੍ਥੋ. ਰੁਪ੍ਪਤੀਤਿ ਕੁਪ੍ਪਤਿ ਘਟ੍ਟੀਯਤਿ ਪੀਲ਼ੀਯਤਿ, ਭਿਜ੍ਜਤੀਤਿ ਅਤ੍ਥੋ. ਸੀਤੇਨਪਿ ਰੁਪ੍ਪਤੀਤਿਆਦੀਸੁ ਸੀਤੇਨ ਤਾਵ ਰੁਪ੍ਪਨਂ ਲੋਕਨ੍ਤਰਿਕਨਿਰਯੇ ਪਾਕਟਂ. ਤਿਣ੍ਣਂ ਤਿਣ੍ਣਞ੍ਹਿ ਚਕ੍ਕਵਾਲ਼ਾਨਂ ਅਨ੍ਤਰੇ ਏਕੇਕੋ ਲੋਕਨ੍ਤਰਿਕਨਿਰਯੋ ਨਾਮ ਹੋਤਿ ਅਟ੍ਠਯੋਜਨਸਹਸ੍ਸਪ੍ਪਮਾਣੋ. ਯਸ੍ਸ ਨੇਵ ਹੇਟ੍ਠਾ ਪਥਵੀ ਅਤ੍ਥਿ, ਨ ਉਪਰਿ ਚਨ੍ਦਿਮਸੂਰਿਯਦੀਪਮਣਿਆਲੋਕੋ, ਨਿਚ੍ਚਨ੍ਧਕਾਰੋ. ਤਤ੍ਥ ਨਿਬ੍ਬਤ੍ਤਸਤ੍ਤਾਨਂ ਤਿਗਾਵੁਤੋ ਅਤ੍ਤਭਾਵੋ ਹੋਤਿ, ਤੇ ਵਗ੍ਗੁਲਿਯੋ ਵਿਯ ਪਬ੍ਬਤਪਾਦੇ ਦੀਘਪੁਥੁਲੇਹਿ ਨਖੇਹਿ ਲਗ੍ਗਿਤ੍ਵਾ ਅਵਂਸਿਰਾ ਓਲਮ੍ਬਨ੍ਤਿ. ਯਦਾ ਸਂਸਪ੍ਪਨ੍ਤਾ ਅਞ੍ਞਮਞ੍ਞਸ੍ਸ ਹਤ੍ਥਪਾਸਾਗਤਾ ਹੋਨ੍ਤਿ, ਅਥ ‘‘ਭਕ੍ਖੋ ਨੋ ਲਦ੍ਧੋ’’ਤਿ? ਮਞ੍ਞਮਾਨਾ ਤਤ੍ਥ ਬ੍ਯਾਵਟਾ ਵਿਪਰਿਵਤ੍ਤਿਤ੍ਵਾ ਲੋਕਸਨ੍ਧਾਰਕੇ ਉਦਕੇ ਪਤਨ੍ਤਿ, ਵਾਤੇ ਪਹਰਨ੍ਤੇਪਿ ਮਧੁਕਫਲਾਨਿ ਵਿਯ ਛਿਜ੍ਜਿਤ੍ਵਾ ਉਦਕੇ ਪਤਨ੍ਤਿ, ਪਤਿਤਮਤ੍ਤਾਵ ਅਚ੍ਚਨ੍ਤਖਾਰੇ ਉਦਕੇ ਤਤ੍ਤਤੇਲੇ ਪਤਿਤਪਿਟ੍ਠਪਿਣ੍ਡਿ ਵਿਯ ਪਟਪਟਾਯਮਾਨਾ ਵਿਲੀਯਨ੍ਤਿ. ਏਵਂ ਸੀਤੇਨ ਰੁਪ੍ਪਨਂ ਲੋਕਨ੍ਤਰਿਕਨਿਰਯੇ ਪਾਕਟਂ. ਮਹਿਂਸਕਰਟ੍ਠਾਦੀਸੁਪਿ ਹਿਮਪਾਤਸੀਤਲੇਸੁ ਪਦੇਸੇਸੁ ਏਤਂ ਪਾਕਟਮੇਵ. ਤਤ੍ਥ ਹਿ ਸਤ੍ਤਾ ਸੀਤੇਨ ਭਿਨ੍ਨਸਰੀਰਾ ਜੀਵਿਤਕ੍ਖਯਮ੍ਪਿ ਪਾਪੁਣਨ੍ਤਿ.
ਉਣ੍ਹੇਨ ਰੁਪ੍ਪਨਂ ਅਵੀਚਿਮਹਾਨਿਰਯੇ ਪਾਕਟਂ ਹੋਤਿ. ਜਿਘਚ੍ਛਾਯ ਰੁਪ੍ਪਨਂ ਪੇਤ੍ਤਿਵਿਸਯੇ ਚੇਵ ਦੁਬ੍ਭਿਕ੍ਖਕਾਲੇ ਚ ਪਾਕਟਂ. ਪਿਪਾਸਾਯ ਰੁਪ੍ਪਨਂ ਕਾਲਕਞ੍ਜਿਕਾਦੀਸੁ ਪਾਕਟਂ. ਏਕੋ ਕਿਰ ਕਾਲਕਞ੍ਜਿਕਅਸੁਰੋ ਪਿਪਾਸਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਯੋਜਨਗਮ੍ਭੀਰਵਿਤ੍ਥਾਰਂ ਮਹਾਗਙ੍ਗਂ ਓਤਰਿ, ਤਸ੍ਸ ਗਤਗਤਟ੍ਠਾਨੇ ਉਦਕਂ ਛਿਜ੍ਜਤਿ, ਧੂਮੋ ਉਗ੍ਗਚ੍ਛਤਿ, ਤਤ੍ਤੇ ਪਿਟ੍ਠਿਪਾਸਾਣੇ ਚਙ੍ਕਮਨਕਾਲੋ ਵਿਯ ਹੋਤਿ. ਤਸ੍ਸ ਉਦਕਸਦ੍ਦਂ ਸੁਤ੍ਵਾ ਇਤੋ ਚਿਤੋ ਚ ਵਿਚਰਨ੍ਤਸ੍ਸੇਵ ਰਤ੍ਤਿ ਵਿਭਾਯਿ. ਅਥ ਨਂ ਪਾਤੋਵ ਭਿਕ੍ਖਾਚਾਰਂ ਗਚ੍ਛਨ੍ਤਾ ਤਿਂਸਮਤ੍ਤਾ ਪਿਣ੍ਡਚਾਰਿਕਭਿਕ੍ਖੂ ਦਿਸ੍ਵਾ ‘‘ਕੋ ਨਾਮ ਤ੍ਵਂ ਸਪ੍ਪੁਰਿਸਾ’’ਤਿ? ਪੁਚ੍ਛਿਂਸੁ. ‘‘ਪੇਤੋਹਮਸ੍ਮਿ, ਭਨ੍ਤੇ’’ਤਿ. ‘‘ਕਿਂ ਪਰਿਯੇਸਸੀ’’ਤਿ? ‘‘ਪਾਨੀਯਂ, ਭਨ੍ਤੇ’’ਤਿ. ‘‘ਅਯਂ ਗਙ੍ਗਾ ਪਰਿਪੁਣ੍ਣਾ, ਕਿਂ ਤ੍ਵਂ ਨ ਪਸ੍ਸਸੀ’’ਤਿ? ‘‘ਨ ਉਪਕਪ੍ਪਤਿ, ਭਨ੍ਤੇ’’ਤਿ. ਤੇਨ ਹਿ ਗਙ੍ਗਾਪਿਟ੍ਠੇ ਨਿਪਜ੍ਜ, ਮੁਖੇ ਤੇ ਪਾਨੀਯਂ ਆਸਿਞ੍ਚਿਸ੍ਸਾਮਾ’’ਤਿ. ਸੋ ਵਾਲਿਕਾਪੁਲ਼ਿਨੇ ਉਤ੍ਤਾਨੋ ਨਿਪਜ੍ਜਿ. ਭਿਕ੍ਖੂ ਤਿਂਸਮਤ੍ਤੇ ਪਤ੍ਤੇ ਨੀਹਰਿਤ੍ਵਾ ਉਦਕਂ ਆਹਰਿਤ੍ਵਾ ਤਸ੍ਸ ਮੁਖੇ ਆਸਿਞ੍ਚਿਂਸੁ. ਤੇਸਂ ਤਥਾ ਕਰੋਨ੍ਤਾਨਂਯੇਵ ਵੇਲਾ ਉਪਕਟ੍ਠਾ ਜਾਤਾ. ਤਤੋ ‘‘ਭਿਕ੍ਖਾਚਾਰਕਾਲੋ ਅਮ੍ਹਾਕਂ ਸਪ੍ਪੁਰਿਸ, ਕਚ੍ਚਿ ਤੇ ਅਸ੍ਸਾਦਮਤ੍ਤਾ ਲਦ੍ਧਾ’’ਤਿ ਆਹਂਸੁ. ਪੇਤੋ ‘‘ਸਚੇ ਮੇ, ਭਨ੍ਤੇ, ਤਿਂਸਮਤ੍ਤਾਨਂ ਅਯ੍ਯਾਨਂ ਤਿਂਸਪਤ੍ਤੇਹਿ ਆਸਿਤ੍ਤਉਦਕਤੋ ਅਡ੍ਢਪਸਤਮਤ੍ਤਮ੍ਪਿ ਪਰਗਲਂ ਗਤਂ, ਪੇਤਤ੍ਤਭਾਵਤੋ ਮੋਕ੍ਖੋ ਮਾ ਹੋਤੂ’’ਤਿ ਆਹ. ਏਵਂ ਪਿਪਾਸਾਯ ਰੁਪ੍ਪਨਂ ਪੇਤ੍ਤਿਵਿਸਯੇ ਪਾਕਟਂ.
ਡਂਸਾਦੀਹਿ ਰੁਪ੍ਪਨਂ ਡਂਸਮਕ੍ਖਿਕਾਦਿਬਹੁਲੇਸੁ ਪਦੇਸੇਸੁ ਪਾਕਟਂ. ਏਤ੍ਥ ਚ ਡਂਸਾਤਿ ਪਿਙ੍ਗਲਮਕ੍ਖਿਕਾ. ਮਕਸਾਤਿ ਮਕਸਾਵ. ਵਾਤਾਤਿ ਕੁਚ੍ਛਿਵਾਤਪਿਟ੍ਠਿਵਾਤਾਦਿਵਸੇਨ ਵੇਦਿਤਬ੍ਬਾ. ਸਰੀਰਸ੍ਮਿਞ੍ਹਿ ਵਾਤਰੋਗੋ ਉਪ੍ਪਜ੍ਜਿਤ੍ਵਾ ਹਤ੍ਥਪਾਦਪਿਟ੍ਠਿਆਦੀਨਿ ਭਿਨ੍ਦਤਿ, ਕਾਣਂ ਕਰੋਤਿ, ਖੁਜ੍ਜਂ ਕਰੋਤਿ, ਪੀਠਸਪ੍ਪਿਂ ਕਰੋਤਿ. ਆਤਪੋਤਿ ਸੂਰਿਯਾਤਪੋ. ਤੇਨ ਰੁਪ੍ਪਨਂ ਮਰੁਕਨ੍ਤਾਰਾਦੀਸੁ ਪਾਕਟਂ. ਏਕਾ ਕਿਰ ਇਤ੍ਥੀ ਮਰੁਕਨ੍ਤਾਰੇ ਰਤ੍ਤਿਂ ਸਤ੍ਥਤੋ ਓਹੀਨਾ ਦਿਵਾ ਸੂਰਿਯੇ ਉਗ੍ਗਚ੍ਛਨ੍ਤੇ ਵਾਲਿਕਾਯ ਤਪ੍ਪਮਾਨਾਯ ਪਾਦੇ ਠਪੇਤੁਂ ਅਸਕ੍ਕੋਨ੍ਤੀ ਸੀਸਤੋ ਪਚ੍ਛਿਂ ਓਤਾਰੇਤ੍ਵਾ ਅਕ੍ਕਮਿ. ਕਮੇਨ ਪਚ੍ਛਿਯਾ ਉਣ੍ਹਾਭਿਤਤ੍ਤਾਯ ਠਾਤੁਂ ਅਸਕ੍ਕੋਨ੍ਤੀ ਤਸ੍ਸਾ ਉਪਰਿ ਸਾਟਕਂ ਠਪੇਤ੍ਵਾ ਅਕ੍ਕਮਿ. ਤਸ੍ਮਿਮ੍ਪਿ ਸਨ੍ਤਤ੍ਤੇ ਅਤ੍ਤਨੋ ਅਙ੍ਕੇਨ ਗਹਿਤਪੁਤ੍ਤਕਂ ਅਧੋਮੁਖਂ ਨਿਪਜ੍ਜਾਪੇਤ੍ਵਾ ਕਨ੍ਦਨ੍ਤਂਯੇਵ ਅਕ੍ਕਮਿਤ੍ਵਾ ਸਦ੍ਧਿਂ ਤੇਨ ਤਸ੍ਮਿਂਯੇਵ ਠਾਨੇ ਉਣ੍ਹਾਭਿਤਤ੍ਤਾ ਕਾਲਮਕਾਸਿ.
ਸਰੀਸਪਾਤਿ ਯੇ ਕੇਚਿ ਦੀਘਜਾਤਿਕਾ ਸਰਨ੍ਤਾ ਗਚ੍ਛਨ੍ਤਿ. ਤੇਸਂ ਸਮ੍ਫਸ੍ਸੇਨ ਰੁਪ੍ਪਨਂ ਆਸੀਵਿਸਦਟ੍ਠਕਾਦੀਨਂ ਵਸੇਨ ਵੇਦਿਤਬ੍ਬਂ. ਇਤਿ ਭਗਵਤਾ ਯਾਨਿ ਇਮਾਨਿ ਸਾਮਞ੍ਞਪਚ੍ਚਤ੍ਤਵਸੇਨ ਧਮ੍ਮਾਨਂ ਦ੍ਵੇ ਲਕ੍ਖਣਾਨਿ, ਤੇਸੁ ਰੂਪਕ੍ਖਨ੍ਧਸ੍ਸ ਤਾਵ ਪਚ੍ਚਤ੍ਤਲਕ੍ਖਣਂ ਦਸ੍ਸਿਤਂ. ਰੂਪਕ੍ਖਨ੍ਧਸ੍ਸੇਵ ਹਿ ਏਤਂ, ਨ ਵੇਦਨਾਦੀਨਂ, ਤਸ੍ਮਾ ਪਚ੍ਚਤ੍ਤਲਕ੍ਖਣਨ੍ਤਿ ਵੁਚ੍ਚਤਿ. ਅਨਿਚ੍ਚਦੁਕ੍ਖਾਨਤ੍ਤਲਕ੍ਖਣਂ ਪਨ ਵੇਦਨਾਦੀਨਮ੍ਪਿ ਹੋਤਿ, ਤਸ੍ਮਾ ਤਂ ਸਾਮਞ੍ਞਲਕ੍ਖਣਨ੍ਤਿ ਵੁਚ੍ਚਤਿ.
ਕਿਞ੍ਚ, ਭਿਕ੍ਖਵੇ, ਵੇਦਨਂ ਵਦੇਥਾਤਿਆਦੀਸੁ ਪੁਰਿਮਸਦਿਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਯਂ ਪਨ ਪੁਰਿਮੇਨ ਅਸਦਿਸਂ, ਤਸ੍ਸਾਯਂ ਵਿਭਾਵਨਾ – ਸੁਖਮ੍ਪਿ ਵੇਦਯਤੀਤਿ ਸੁਖਂ ਆਰਮ੍ਮਣਂ ਵੇਦੇਤਿ ਅਨੁਭਵਤਿ. ਪਰਤੋ ਪਦਦ੍ਵਯੇਪਿ ਏਸੇਵ ਨਯੋ. ਕਥਂ ਪਨੇਤਂ ਆਰਮ੍ਮਣਂ ਸੁਖਂ ਦੁਕ੍ਖਂ ਅਦੁਕ੍ਖਮਸੁਖਂ ਨਾਮ ਜਾਤਨ੍ਤਿ? ਸੁਖਾਦੀਨਂ ਪਚ੍ਚਯਤੋ. ਸ੍ਵਾਯਮਤ੍ਥੋ ‘‘ਯਸ੍ਮਾ ਚ ਖੋ, ਮਹਾਲਿ, ਰੂਪਂ ਸੁਖਂ ਸੁਖਾਨੁਪਤਿਤਂ ਸੁਖਾਵਕ੍ਕਨ੍ਤ’’ਨ੍ਤਿ ਇਮਸ੍ਮਿਂ ਮਹਾਲਿਸੁਤ੍ਤੇ (ਸਂ. ਨਿ. ੩.੬੦) ਆਗਤੋਯੇਵ. ਵੇਦਯਤੀਤਿ ਏਤ੍ਥ ਚ ਵੇਦਨਾਵ ਵੇਦਯਤਿ, ਨ ਅਞ੍ਞੋ ਸਤ੍ਤੋ ਵਾ ਪੁਗ੍ਗਲੋ ਵਾ. ਵੇਦਨਾ ਹਿ ਵੇਦਯਿਤਲਕ੍ਖਣਾ, ਤਸ੍ਮਾ ਵਤ੍ਥਾਰਮ੍ਮਣਂ ਪਟਿਚ੍ਚ ਵੇਦਨਾਵ ਵੇਦਯਤੀਤਿ. ਏਵਮਿਧ ਭਗਵਾ ਵੇਦਨਾਯਪਿ ਪਚ੍ਚਤ੍ਤਲਕ੍ਖਣਮੇਵ ਭਾਜੇਤ੍ਵਾ ਦਸ੍ਸੇਸਿ.
ਨੀਲਮ੍ਪਿ ਸਞ੍ਜਾਨਾਤੀਤਿ ਨੀਲਪੁਪ੍ਫੇ ਵਾ ਵਤ੍ਥੇ ਵਾ ਪਰਿਕਮ੍ਮਂ ਕਤ੍ਵਾ ਉਪਚਾਰਂ ਵਾ ਅਪ੍ਪਨਂ ਵਾ ਪਾਪੇਨ੍ਤੋ ਸਞ੍ਜਾਨਾਤਿ. ਅਯਞ੍ਹਿ ਸਞ੍ਞਾ ਨਾਮ ਪਰਿਕਮ੍ਮਸਞ੍ਞਾਪਿ ਉਪਚਾਰਸਞ੍ਞਾਪਿ ਅਪ੍ਪਨਾਸਞ੍ਞਾਪਿ ਵਟ੍ਟਤਿ, ਨੀਲਂ ਨੀਲਨ੍ਤਿ ਉਪ੍ਪਜ੍ਜਨਸਞ੍ਞਾਪਿ ਵਟ੍ਟਤਿਯੇਵ. ਪੀਤਕਾਦੀਸੁਪਿ ਏਸੇਵ ਨਯੋ. ਇਧਾਪਿ ਭਗਵਾ ਸਞ੍ਜਾਨਨਲਕ੍ਖਣਾਯ ਸਞ੍ਞਾਯ ਪਚ੍ਚਤ੍ਤਲਕ੍ਖਣਮੇਵ ਭਾਜੇਤ੍ਵਾ ਦਸ੍ਸੇਸਿ.
ਰੂਪਂ ਰੂਪਤ੍ਤਾਯ ਸਙ੍ਖਤਮਭਿਸਙ੍ਖਰੋਨ੍ਤੀਤਿ ਯਥਾ ਯਾਗੁਮੇਵ ਯਾਗੁਤ੍ਤਾਯ, ਪੂਵਮੇਵ ਪੂਵਤ੍ਤਾਯ ਪਚਤਿ ਨਾਮ, ਏਵਂ ਪਚ੍ਚਯੇਹਿ ਸਮਾਗਨ੍ਤ੍ਵਾ ਕਤਭਾਵੇਨ ਸਙ੍ਖਤਨ੍ਤਿ ਲਦ੍ਧਨਾਮਂ ਰੂਪਮੇਵ ਰੂਪਤ੍ਤਾਯ ਯਥਾ ਅਭਿਸਙ੍ਖਤਂ ਰੂਪਂ ਨਾਮ ਹੋਤਿ, ਤਥਤ੍ਤਾਯ ਰੂਪਭਾਵਾਯ ਅਭਿਸਙ੍ਖਰੋਤਿ ਆਯੂਹਤਿ ਸਮ੍ਪਿਣ੍ਡੇਤਿ, ਨਿਪ੍ਫਾਦੇਤੀਤਿ ਅਤ੍ਥੋ. ਵੇਦਨਾਦੀਸੁਪਿ ਏਸੇਵ ਨਯੋ. ਅਯਂ ਪਨੇਤ੍ਥ ਸਙ੍ਖੇਪੋ – ਅਤ੍ਤਨਾ ਸਹ ਜਾਯਮਾਨਂ ਰੂਪਂ ਸਮ੍ਪਯੁਤ੍ਤੇ ਚ ਵੇਦਨਾਦਯੋ ਧਮ੍ਮੇ ਅਭਿਸਙ੍ਖਰੋਤਿ ਨਿਬ੍ਬਤ੍ਤੇਤੀਤਿ. ਇਧਾਪਿ ਭਗਵਾ ਚੇਤਯਿਤਲਕ੍ਖਣਸ੍ਸ ਸਙ੍ਖਾਰਸ੍ਸ ਪਚ੍ਚਤ੍ਤਲਕ੍ਖਣਮੇਵ ਭਾਜੇਤ੍ਵਾ ਦਸ੍ਸੇਸਿ.
ਅਮ੍ਬਿਲਮ੍ਪਿ ਵਿਜਾਨਾਤੀਤਿ ਅਮ੍ਬਅਮ੍ਬਾਟਕਮਾਤੁਲੁਙ੍ਗਾਦਿਅਮ੍ਬਿਲਂ ‘‘ਅਮ੍ਬਿਲ’’ਨ੍ਤਿ ਵਿਜਾਨਾਤਿ. ਏਸੇਵ ਨਯੋ ਸਬ੍ਬਪਦੇਸੁ. ਅਪਿ ਚੇਤ੍ਥ ਤਿਤ੍ਤਕਨ੍ਤਿ ਨਿਮ੍ਬਪਟੋਲਾਦਿਨਾਨਪ੍ਪਕਾਰਂ ਕਟੁਕਨ੍ਤਿ ਪਿਪ੍ਪਲਿਮਰਿਚਾਦਿਨਾਨਪ੍ਪਕਾਰਂ. ਮਧੁਰਨ੍ਤਿ ਸਪ੍ਪਿਫਾਣਿਤਾਦਿਨਾਨਪ੍ਪਕਾਰਂ. ਖਾਰਿਕਨ੍ਤਿ ਵਾਤਿਙ੍ਗਣਨਾਲ਼ਿਕੇਰ ਚਤੁਰਸ੍ਸਵਲ੍ਲਿਵੇਤ੍ਤਙ੍ਕੁਰਾਦਿਨਾਨਪ੍ਪਕਾਰਂ. ਅਖਾਰਿਕਨ੍ਤਿ ਯਂ ਵਾ ਤਂ ਵਾ ਫਲਜਾਤਂ ਕਾਰਪਣ੍ਣਾਦਿਮਿਸ੍ਸਕਪਣ੍ਣਂ. ਲੋਣਿਕਨ੍ਤਿ ਲੋਣਯਾਗੁਲੋਣਮਚ੍ਛਲੋਣਭਤ੍ਤਾਦਿਨਾਨਪ੍ਪਕਾਰਂ. ਅਲੋਣਿਕਨ੍ਤਿਅਲੋਣਯਾਗੁਅਲੋਣਮਚ੍ਛਅਲੋਣਭਤ੍ਤਾਦਿਨਾਨਪ੍ਪਕਾਰਂ. ਤਸ੍ਮਾ ਵਿਞ੍ਞਾਣਨ੍ਤਿ ਵੁਚ੍ਚਤੀਤਿ ਯਸ੍ਮਾ ਇਮਂ ਅਮ੍ਬਿਲਾਦਿਭੇਦਂ ਅਞ੍ਞਮਞ੍ਞਵਿਸਿਟ੍ਠੇਨ ਅਮ੍ਬਿਲਾਦਿਭਾਵੇਨ ਜਾਨਾਤਿ, ਤਸ੍ਮਾ ਵਿਞ੍ਞਾਣਨ੍ਤਿ ਵੁਚ੍ਚਤੀਤਿ. ਏਵਮਿਧਾਪਿ ਭਗਵਾ ਵਿਜਾਨਨਲਕ੍ਖਣਸ੍ਸ ਵਿਞ੍ਞਾਣਸ੍ਸ ਪਚ੍ਚਤ੍ਤਲਕ੍ਖਣਮੇਵ ਭਾਜੇਤ੍ਵਾ ਦਸ੍ਸੇਸਿ.
ਯਸ੍ਮਾ ਪਨ ਆਰਮ੍ਮਣਸ੍ਸ ਆਕਾਰਸਣ੍ਠਾਨਗਹਣਵਸੇਨ ਸਞ੍ਞਾ ਪਾਕਟਾ ਹੋਤਿ, ਤਸ੍ਮਾ ਸਾ ਚਕ੍ਖੁਦ੍ਵਾਰੇ ਵਿਭਤ੍ਤਾ. ਯਸ੍ਮਾ ਵਿਨਾਪਿ ਆਕਾਰਸਣ੍ਠਾਨਾ ਆਰਮ੍ਮਣਸ੍ਸ ਪਚ੍ਚਤ੍ਤਭੇਦਗਹਣਵਸੇਨ ਵਿਞ੍ਞਾਣਂ ਪਾਕਟਂ ਹੋਤਿ, ਤਸ੍ਮਾ ਤਂ ਜਿਵ੍ਹਾਦ੍ਵਾਰੇ ਵਿਭਤ੍ਤਂ. ਇਮੇਸਂ ਪਨ ਸਞ੍ਞਾਵਿਞ੍ਞਾਣਪਞ੍ਞਾਨਂ ਅਸਮ੍ਮੋਹਤੋ ਸਭਾਵਸਲ੍ਲਕ੍ਖਣਤ੍ਥਂ ਸਞ੍ਜਾਨਾਤਿ, ਵਿਜਾਨਾਤਿ, ਪਜਾਨਾਤੀਤਿ ਏਤ੍ਥ ਵਿਸੇਸਾ ਵੇਦਿਤਬ੍ਬਾ. ਤਤ੍ਥ ਉਪਸਗ੍ਗਮਤ੍ਤਮੇਵ ਵਿਸੇਸੋ, ਜਾਨਾਤੀਤਿ ਪਦਂ ਪਨ ਅਵਿਸੇਸੋ. ਤਸ੍ਸਪਿ ਜਾਨਨਟ੍ਠੇਨ ਵਿਸੇਸੋ ਵੇਦਿਤਬ੍ਬੋ. ਸਞ੍ਞਾ ਹਿ ਨੀਲਾਦਿਵਸੇਨ ਆਰਮ੍ਮਣਸਞ੍ਜਾਨਨਮਤ੍ਤਮੇਵ, ਅਨਿਚ੍ਚਂ ਦੁਕ੍ਖਮਨਤ੍ਤਾਤਿ ਲਕ੍ਖਣਪਟਿਵੇਧਂ ਪਾਪੇਤੁਂ ਨ ਸਕ੍ਕੋਤਿ. ਵਿਞ੍ਞਾਣਂ ਨੀਲਾਦਿਵਸੇਨ ਆਰਮ੍ਮਣਞ੍ਚੇਵ ਜਾਨਾਤਿ, ਅਨਿਚ੍ਚਾਦਿਵਸੇਨ ਲਕ੍ਖਣਪਟਿਵੇਧਞ੍ਚ ਪਾਪੇਤਿ, ਉਸ੍ਸਕ੍ਕਿਤ੍ਵਾ ਪਨ ਮਗ੍ਗਪਾਤੁਭਾਵਂ ਪਾਪੇਤੁਂ ਨ ਸਕ੍ਕੋਤਿ. ਪਞ੍ਞਾ ਨੀਲਾਦਿਵਸੇਨ ਆਰਮ੍ਮਣਮ੍ਪਿ ਜਾਨਾਤਿ, ਅਨਿਚ੍ਚਾਦਿਵਸੇਨ ਲਕ੍ਖਣਪਟਿਵੇਧਮ੍ਪਿ ਪਾਪੇਤਿ, ਉਸ੍ਸਕ੍ਕਿਤ੍ਵਾ ਮਗ੍ਗਪਾਤੁਭਾਵਮ੍ਪਿ ਪਾਪੇਤਿ.
ਯਥਾ ਹਿ ਹੇਰਞ੍ਞਿਕਫਲਕੇ ਕਹਾਪਣਰਾਸਿਮ੍ਹਿ ਕਤੇ ਅਜਾਤਬੁਦ੍ਧਿਦਾਰਕੋ ਗਾਮਿਕਪੁਰਿਸੋ ਮਹਾਹੇਰਞ੍ਞਿਕੋਤਿ ਤੀਸੁ ਜਨੇਸੁ ਓਲੋਕੇਤ੍ਵਾ ਠਿਤੇਸੁ ਅਜਾਤਬੁਦ੍ਧਿਦਾਰਕੋ ਕਹਾਪਣਾਨਂ ਚਿਤ੍ਤਵਿਚਿਤ੍ਤਚਤੁਰਸ੍ਸਮਣ੍ਡਲਾਦਿਭਾਵਮੇਵ ਜਾਨਾਤਿ, ‘‘ਇਦਂ ਮਨੁਸ੍ਸਾਨਂ ਉਪਭੋਗਪਰਿਭੋਗਂ ਰਤਨਸਮ੍ਮਤ’’ਨ੍ਤਿ ਨ ਜਾਨਾਤਿ. ਗਾਮਿਕਪੁਰਿਸੋ ਚਿਤ੍ਤਾਦਿਭਾਵਞ੍ਚ ਜਾਨਾਤਿ, ਮਨੁਸ੍ਸਾਨਂ ਉਪਭੋਗਪਰਿਭੋਗਰਤਨਸਮ੍ਮਤਭਾਵਞ੍ਚ, ‘‘ਅਯਂ ਕੂਟੋ, ਅਯਂ ਛੇਕੋ, ਅਯਂ ਕਰਟੋ, ਅਯਂ ਸਣ੍ਹੋ’’ਤਿ ਨ ਜਾਨਾਤਿ. ਮਹਾਹੇਰਞ੍ਞਿਕੋ ਚਿਤ੍ਤਾਦਿਭਾਵਮ੍ਪਿ ਰਤਨਸਮ੍ਮਤਭਾਵਮ੍ਪਿ ਕੂਟਾਦਿਭਾਵਮ੍ਪਿ ਜਾਨਾਤਿ. ਜਾਨਨ੍ਤੋ ਚ ਪਨ ਰੂਪਂ ਦਿਸ੍ਵਾਪਿ ਸਦ੍ਦਂ ਸੁਤ੍ਵਾਪਿ ਗਨ੍ਧਂ ਘਾਯਿਤ੍ਵਾਪਿ ਰਸਂ ਸਾਯਿਤ੍ਵਾਪਿ ਹਤ੍ਥੇਨ ਗਰੁਲਹੁਭਾਵਂ ਉਪਧਾਰੇਤ੍ਵਾਪਿ ‘‘ਅਸੁਕਗਾਮੇ ਕਤੋ’’ਤਿਪਿ ਜਾਨਾਤਿ, ‘‘ਅਸੁਕਨਿਗਮੇ ਅਸੁਕਨਗਰੇ ਅਸੁਕਪਬ੍ਬਤਚ੍ਛਾਯਾਯ ਅਸੁਕਨਦੀਤੀਰੇ ਕਤੋ’’ਤਿਪਿ, ‘‘ਅਸੁਕਾਚਰਿਯੇਨ ਕਤੋ’’ਤਿਪਿ ਜਾਨਾਤਿ. ਏਵਮੇਵ ਸਞ੍ਞਾ ਅਜਾਤਬੁਦ੍ਧਿਦਾਰਕਸ੍ਸ ਕਹਾਪਣਦਸ੍ਸਨਂ ਵਿਯ ਨੀਲਾਦਿਵਸੇਨ ਆਰਮ੍ਮਣਮਤ੍ਤਮੇਵ ਜਾਨਾਤਿ. ਵਿਞ੍ਞਾਣਂ ਗਾਮਿਕਪੁਰਿਸਸ੍ਸ ਕਹਾਪਣਦਸ੍ਸਨਂ ਵਿਯ ਨੀਲਾਦਿਵਸੇਨ ਆਰਮ੍ਮਣਮ੍ਪਿ ਜਾਨਾਤਿ, ਅਨਿਚ੍ਚਾਦਿਵਸੇਨ ਲਕ੍ਖਣਪਟਿਵੇਧਮ੍ਪਿ ਪਾਪੇਤਿ. ਪਞ੍ਞਾ ਮਹਾਹੇਰਞ੍ਞਿਕਸ੍ਸ ਕਹਾਪਣਦਸ੍ਸਨਂ ਵਿਯ ਨੀਲਾਦਿਵਸੇਨ ਆਰਮ੍ਮਣਮ੍ਪਿ ਜਾਨਾਤਿ, ਅਨਿਚ੍ਚਾਦਿਵਸੇਨ ਲਕ੍ਖਣਪਟਿਵੇਧਮ੍ਪਿ ਪਾਪੇਤਿ, ਉਸ੍ਸਕ੍ਕਿਤ੍ਵਾ ਮਗ੍ਗਪਾਤੁਭਾਵਮ੍ਪਿ ਪਾਪੇਤਿ.
ਸੋ ਪਨ ਨੇਸਂ ਵਿਸੇਸੋ ਦੁਪ੍ਪਟਿਵਿਜ੍ਝੋ. ਤੇਨਾਹ ਆਯਸ੍ਮਾ ਨਾਗਸੇਨੋ –
‘‘ਦੁਕ੍ਕਰਂ, ਮਹਾਰਾਜ, ਭਗਵਤਾ ਕਤਨ੍ਤਿ. ਕਿਂ, ਭਨ੍ਤੇ ਨਾਗਸੇਨ, ਭਗਵਤਾ ਦੁਕ੍ਕਰਂ ਕਤਨ੍ਤਿ? ਦੁਕ੍ਕਰਂ, ਮਹਾਰਾਜ, ਭਗਵਤਾ ਕਤਂ, ਇਮੇਸਂ ਅਰੂਪੀਨਂ ਚਿਤ੍ਤਚੇਤਸਿਕਾਨਂ ਧਮ੍ਮਾਨਂ ਏਕਾਰਮ੍ਮਣੇ ਵਤ੍ਤਮਾਨਾਨਂ ਵਵਤ੍ਥਾਨਂ ਅਕ੍ਖਾਤਂ ‘ਅਯਂ ਫਸ੍ਸੋ, ਅਯਂ ਵੇਦਨਾ, ਅਯਂ ਸਞ੍ਞਾ, ਅਯਂ ਚੇਤਨਾ, ਇਦਂ ਚਿਤ੍ਤ’’’ਨ੍ਤਿ (ਮਿ. ਪ. ੨.੭.੧੬).
ਯਥਾ ਹਿ ਤਿਲਤੇਲਂ ਸਾਸਪਤੇਲਂ ਮਧੁਕਤੇਲਂ ਏਰਣ੍ਡਕਤੇਲਂ ਵਸਾਤੇਲਨ੍ਤਿ ਇਮਾਨਿ ਪਞ੍ਚ ਤੇਲਾਨਿ ਏਕਚਾਟਿਯਂ ਪਕ੍ਖਿਪਿਤ੍ਵਾ ਦਿਵਸਂ ਯਮਕਮਨ੍ਥੇ ਹਿ ਮਨ੍ਥੇਤ੍ਵਾ ਤਤੋ ‘‘ਇਦਂ ਤਿਲਤੇਲਂ, ਇਦਂ ਸਾਸਪਤੇਲ’’ਨ੍ਤਿ ਏਕੇਕਸ੍ਸ ਪਾਟਿਯੇਕ੍ਕਂ ਉਦ੍ਧਰਣਂ ਨਾਮ ਦੁਕ੍ਕਰਂ, ਇਦਂ ਤਤੋ ਦੁਕ੍ਕਰਤਰਂ. ਭਗਵਾ ਪਨ ਸਬ੍ਬਞ੍ਞੁਤਞ੍ਞਾਣਸ੍ਸ ਸੁਪ੍ਪਟਿਵਿਦ੍ਧਤ੍ਤਾ ਧਮ੍ਮਿਸ੍ਸਰੋ ਧਮ੍ਮਰਾਜਾ ਇਮੇਸਂ ਅਰੂਪੀਨਂ ਧਮ੍ਮਾਨਂ ਏਕਾਰਮ੍ਮਣੇ ਵਤ੍ਤਮਾਨਾਨਂ ਵਵਤ੍ਥਾਨਂ ਅਕਾਸਿ. ਪਞ੍ਚਨ੍ਨਂ ਮਹਾਨਦੀਨਂ ਸਮੁਦ੍ਦਂ ਪਵਿਟ੍ਠਟ੍ਠਾਨੇ ‘‘ਇਦਂ ਗਙ੍ਗਾਯ ਉਦਕਂ, ਇਦਂ ਯਮੁਨਾਯਾ’’ਤਿ ਏਵਂ ਪਾਟਿਯੇਕ੍ਕਂ ਉਦਕੁਦ੍ਧਰਣੇਨਾਪਿ ਅਯਮਤ੍ਥੋ ਵੇਦਿਤਬ੍ਬੋ.
ਇਤਿ ਪਠਮਪਬ੍ਬੇਨ ਸੁਞ੍ਞਤਂ, ਦੁਤਿਯੇਨ ਸੁਞ੍ਞਤਾਲਕ੍ਖਣਨ੍ਤਿ ਦ੍ਵੀਹਿ ਪਬ੍ਬੇਹਿ ਅਨਤ੍ਤਲਕ੍ਖਣਂ ਕਥੇਤ੍ਵਾ ਇਦਾਨਿ ਦੁਕ੍ਖਲਕ੍ਖਣਂ ਦਸ੍ਸੇਤੁਂ ਤਤ੍ਰ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਖਜ੍ਜਾਮੀਤਿ ਨ ਰੂਪਂ ਸੁਨਖੋ ਵਿਯ ਮਂਸਂ ਲੁਞ੍ਚਿਤ੍ਵਾ ਲੁਞ੍ਚਿਤ੍ਵਾ ਖਾਦਤਿ, ਯਥਾ ਪਨ ਕਿਲਿਟ੍ਠਵਤ੍ਥਨਿਵਤ੍ਥੋ ਤਤੋਨਿਦਾਨਂ ਪੀਲ਼ਂ ਸਨ੍ਧਾਯ ‘‘ਖਾਦਤਿ ਮਂ ਵਤ੍ਥ’’ਨ੍ਤਿ ਭਣਤਿ, ਏਵਮਿਦਮ੍ਪਿ ਪੀਲ਼ਂ ਉਪ੍ਪਾਦੇਨ੍ਤਂ ਖਾਦਤਿ ਨਾਮਾਤਿ ਵੇਦਿਤਬ੍ਬਂ. ਪਟਿਪਨ੍ਨੋ ਹੋਤੀਤਿ ਸੀਲਂ ਆਦਿਂ ਕਤ੍ਵਾ ਯਾਵ ਅਰਹਤ੍ਤਮਗ੍ਗਾ ਪਟਿਪਨ੍ਨੋ ਹੋਤਿ. ਯੋ ਪਨੇਤ੍ਥ ਬਲਵਞਾਣੋ ਤਿਕ੍ਖਬੁਦ੍ਧਿ ਞਾਣੁਤ੍ਤਰੋ ਯੋਗਾਵਚਰੋ ਪਧਾਨਭੂਮਿਯਂ ਵਾਯਮਨ੍ਤੋ ਖਾਣੁਨਾ ਵਾ ਕਣ੍ਟਕੇਨ ਵਾ ਵਿਦ੍ਧੋ ਆਵੁਧੇਨ ਵਾ ਪਹਟੋ ਬ੍ਯਗ੍ਘਾਦੀਹਿ ਵਾ ਗਹੇਤ੍ਵਾ ਖਜ੍ਜਮਾਨੋ ਤਂ ਵੇਦਨਂ ਅਬ੍ਬੋਹਾਰਿਕਂ ਕਤ੍ਵਾ ਮੂਲਕਮ੍ਮਟ੍ਠਾਨਂ ਸਮ੍ਮਸਨ੍ਤੋ ਅਰਹਤ੍ਤਮੇਵ ਗਣ੍ਹਾਤਿ, ਅਯਂ ਵੇਦਨਾਯ ਨਿਬ੍ਬਿਦਾਯ ਵਿਰਾਗਾਯ ਨਿਰੋਧਾਯ ਪਟਿਪਨ੍ਨੋ ਨਾਮ ਵੁਚ੍ਚਤਿ ਪੀਤਮਲ੍ਲਤ੍ਥੇਰੋ ਵਿਯ ਕੁਟੁਮ੍ਬਿਯਪੁਤ੍ਤਮਹਾਤਿਸ੍ਸਤ੍ਥੇਰੋ ਵਿਯ ਵਤ੍ਤਨਿਅਟਵਿਯਂ ਤਿਂਸਮਤ੍ਤਾਨਂ ਭਿਕ੍ਖੂਨਂ ਅਞ੍ਞਤਰੋ ਬ੍ਯਗ੍ਘਮੁਖੇ ਨਿਪਨ੍ਨਭਿਕ੍ਖੁ ਵਿਯ ਕਣ੍ਟਕੇਨ ਵਿਦ੍ਧਤ੍ਥੇਰੋ ਵਿਯ ਚ.
ਦ੍ਵਾਦਸਸੁ ਕਿਰ ਭਿਕ੍ਖੂਸੁ ਘਣ੍ਟਿਂ ਪਹਰਿਤ੍ਵਾ ਅਰਞ੍ਞੇ ਪਧਾਨਮਨੁਯੁਞ੍ਜਨ੍ਤੇਸੁ ਏਕੋ ਸੂਰਿਯੇ ਅਤ੍ਥਙ੍ਗਤਮਤ੍ਤੇਯੇਵ ਘਣ੍ਟਿਂ ਪਹਰਿਤ੍ਵਾ ਚਙ੍ਕਮਂ ਓਰੁਯ੍ਹ ਚਙ੍ਕਮਨ੍ਤੋ ਤਿਰਿਯਂ ਨਿਮ੍ਮਥੇਨ੍ਤੋ ਤਿਣਪਟਿਚ੍ਛਨ੍ਨਂ ਕਣ੍ਟਕਂ ਅਕ੍ਕਮਿ. ਕਣ੍ਟਕੋ ਪਿਟ੍ਠਿਪਾਦੇਨ ਨਿਕ੍ਖਨ੍ਤੋ. ਤਤ੍ਤਫਾਲੇਨ ਵਿਨਿਵਿਦ੍ਧਕਾਲੋ ਵਿਯ ਵੇਦਨਾ ਵਤ੍ਤਤਿ. ਥੇਰੋ ਚਿਨ੍ਤੇਸਿ – ‘‘ਕਿਂ ਇਮਂ ਕਣ੍ਟਕਂ ਉਦ੍ਧਰਾਮਿ, ਉਦਾਹੁ ਪਕਤਿਯਾ ਵਿਜ੍ਝਿਤ੍ਵਾ ਠਿਤਕਣ੍ਟਕ’’ਨ੍ਤਿ? ਤਸ੍ਸ ਏਵਮਹੋਸਿ – ‘‘ਇਮਿਨਾ ਕਣ੍ਟਕੇਨ ਵਿਦ੍ਧਤ੍ਤਾ ਨਿਰਯਾਦੀਸੁ ਭਯਂ ਨਾਮ ਨਤ੍ਥਿ, ਪਕਤਿਯਾ ਵਿਜ੍ਝਿਤ੍ਵਾ ਠਿਤਕਣ੍ਟਕਂਯੇਵਾ’’ਤਿ. ਸੋ ਤਂ ਵੇਦਨਂ ਅਬ੍ਬੋਹਾਰਿਕਂ ਕਤ੍ਵਾ ਸਬ੍ਬਰਤ੍ਤਿਂ ਚਙ੍ਕਮਿਤ੍ਵਾ ਵਿਭਾਤਾਯ ਰਤ੍ਤਿਯਾ ਅਞ੍ਞਸ੍ਸ ਸਞ੍ਞਂ ਅਦਾਸਿ. ਸੋ ਆਗਨ੍ਤ੍ਵਾ ‘‘ਕਿਂ, ਭਨ੍ਤੇ’’ਤਿ ਪੁਚ੍ਛਿ? ‘‘ਕਣ੍ਟਕੇਨਮ੍ਹਿ, ਆਵੁਸੋ, ਵਿਦ੍ਧੋ’’ਤਿ. ‘‘ਕਾਯ ਵੇਲਾਯ, ਭਨ੍ਤੇ’’ਤਿ? ‘‘ਸਾਯਮੇਵ, ਆਵੁਸੋ’’ਤਿ. ‘‘ਕਸ੍ਮਾ ਨ ਅਮ੍ਹੇ ਪਕ੍ਕੋਸਿਤ੍ਥ, ਕਣ੍ਟਕਂ ਉਦ੍ਧਰਿਤ੍ਵਾ ਤਤ੍ਥ ਤੇਲਮ੍ਪਿ ਸਿਞ੍ਚੇਯ੍ਯਾਮਾ’’ਤਿ? ‘‘ਪਕਤਿਯਾ ਵਿਜ੍ਝਿਤ੍ਵਾ ਠਿਤਕਣ੍ਟਕਮੇਵ ਉਦ੍ਧਰਿਤੁਂ ਵਾਯਮਿਮ੍ਹਾ, ਆਵੁਸੋ’’ਤਿ. ‘‘ਸਕ੍ਕੁਣਿਤ੍ਥ, ਭਨ੍ਤੇ, ਉਦ੍ਧਰਿਤੁ’’ਨ੍ਤਿ. ‘‘ਏਕਦੇਸਮਤ੍ਤੇਨ ਮੇ, ਆਵੁਸੋ, ਉਦ੍ਧਟੋ’’ਤਿ. ਸੇਸਵਤ੍ਥੂਨਿ ਦੀਘਮਜ੍ਝਿਮਟ੍ਠਕਥਾਸੁ (ਦੀ. ਨਿ. ਅਟ੍ਠ. ੨.੩੭੩; ਮ. ਨਿ. ਅਟ੍ਠ. ੧.੧੦੬) ਸਤਿਪਟ੍ਠਾਨਸੁਤ੍ਤਨਿਦ੍ਦੇਸੇ ਵਿਤ੍ਥਾਰਿਤਾਨੇਵ.
ਤਂ ਕਿਂ ਮਞ੍ਞਥ, ਭਿਕ੍ਖਵੇਤਿ ਕਸ੍ਮਾ ਆਰਦ੍ਧਂ? ਇਮਸ੍ਮਿਂ ਪਬ੍ਬੇ ਦੁਕ੍ਖਲਕ੍ਖਣਮੇਵ ਕਥਿਤਂ, ਨ ਅਨਿਚ੍ਚਲਕ੍ਖਣਂ. ਤਂ ਦਸ੍ਸੇਤੁਂ ਇਦਮਾਰਦ੍ਧਂ. ਤੀਣਿ ਲਕ੍ਖਣਾਨਿ ਸਮੋਧਾਨੇਤ੍ਵਾ ਦਸ੍ਸੇਤੁਮ੍ਪਿ ਆਰਦ੍ਧਮੇਵ. ਅਪਚਿਨਾਤਿ ਨੋ ਆਚਿਨਾਤੀਤਿ ਵਟ੍ਟਂ ਵਿਨਾਸੇਤਿ, ਨੇਵ ਚਿਨਾਤਿ. ਪਜਹਤਿ ਨ ਉਪਾਦਿਯਤੀਤਿ ਤਦੇਵ ਵਿਸ੍ਸਜ੍ਜੇਤਿ, ਨ ਗਣ੍ਹਾਤਿ. ਵਿਸਿਨੇਤਿ ਨ ਉਸ੍ਸਿਨੇਤੀਤਿ ਵਿਕਿਰਤਿ ਨ ਸਮ੍ਪਿਣ੍ਡੇਤਿ. ਵਿਧੂਪੇਤਿ ਨ ਸਨ੍ਧੂਪੇਤੀਤਿ ਨਿਬ੍ਬਾਪੇਤਿ ਨ ਜਾਲਾਪੇਤਿ.
ਏਵਂ ਪਸ੍ਸਂ, ਭਿਕ੍ਖਵੇਤਿ ਇਦਂ ਕਸ੍ਮਾ ਆਰਦ੍ਧਂ? ਵਟ੍ਟਂ ਵਿਨਾਸੇਤ੍ਵਾ ਠਿਤਂ ਮਹਾਖੀਣਾਸਵਂ ਦਸ੍ਸੇਸ੍ਸਾਮੀਤਿ ਆਰਦ੍ਧਂ. ਏਤ੍ਤਕੇਨ ਵਾ ਠਾਨੇਨ ਵਿਪਸ੍ਸਨਾ ਕਥਿਤਾ, ਇਦਾਨਿ ਸਹ ਵਿਪਸ੍ਸਨਾਯ ਚਤ੍ਤਾਰੋ ਮਗ੍ਗੇ ਦਸ੍ਸੇਤੁਂ ਇਦਂ ਆਰਦ੍ਧਂ. ਅਥ ਵਾ ਏਤ੍ਤਕੇਨ ਠਾਨੇਨ ਪਠਮਮਗ੍ਗੋ ਕਥਿਤੋ, ਇਦਾਨਿ ਸਹ ਵਿਪਸ੍ਸਨਾਯ ਤਯੋ ਮਗ੍ਗੇ ਦਸ੍ਸੇਤੁਂ ਇਦਮਾਰਦ੍ਧਂ. ਏਤ੍ਤਕੇਨ ਵਾ ਠਾਨੇਨ ਤੀਣਿ ਮਗ੍ਗਾਨਿ ਕਥਿਤਾਨਿ, ਇਦਾਨਿ ਸਹ ਵਿਪਸ੍ਸਨਾਯ ਅਰਹਤ੍ਤਮਗ੍ਗਂ ਦਸ੍ਸੇਤੁਮ੍ਪਿ ਇਦਂ ਆਰਦ੍ਧਮੇਵ.
ਸਪਜਾਪਤਿਕਾਤਿ ਸਦ੍ਧਿਂ ਪਜਾਪਤਿਨਾ ਦੇਵਰਾਜੇਨ. ਆਰਕਾਵ ਨਮਸ੍ਸਨ੍ਤੀਤਿ ਦੂਰਤੋਵ ਨਮਸ੍ਸਨ੍ਤਿ, ਦੂਰੇਪਿ ਠਿਤਂ ਨਮਸ੍ਸਨ੍ਤਿਯੇਵ ਆਯਸ੍ਮਨ੍ਤਂ ਨੀਤਤ੍ਥੇਰਂ ਵਿਯ.
ਥੇਰੋ ਕਿਰ ਪੁਪ੍ਫਚ੍ਛਡ੍ਡਕਕੁਲਤੋ ਨਿਕ੍ਖਮ੍ਮ ਪਬ੍ਬਜਿਤੋ, ਖੁਰਗ੍ਗੇਯੇਵ ਅਰਹਤ੍ਤਂ ਪਤ੍ਵਾ ਚਿਨ੍ਤੇਸਿ – ‘‘ਅਹਂ ਅਜ੍ਜੇਵ ਪਬ੍ਬਜਿਤੋ ਅਜ੍ਜੇਵ ਮੇ ਪਬ੍ਬਜਿਤਕਿਚ੍ਚਂ ਮਤ੍ਥਕਂ ਪਤ੍ਤਂ, ਚਤੁਪਚ੍ਚਯਸਨ੍ਤੋਸਭਾਵਨਾਰਾਮਮਣ੍ਡਿਤਂ ਮਹਾਅਰਿਯਵਂਸਪਟਿਪਦਂ ਪੂਰੇਸ੍ਸਾਮੀ’’ਤਿ. ਸੋ ਪਂਸੁਕੂਲਤ੍ਥਾਯ ਸਾਵਤ੍ਥਿਂ ਪਵਿਸਿਤ੍ਵਾ ਚੋਲ਼ਕਂ ਪਰਿਯੇਸਨ੍ਤੋ ਵਿਚਰਿ. ਅਥੇਕੋ ਮਹਾਬ੍ਰਹ੍ਮਾ ਸਮਾਪਤ੍ਤਿਤੋ ਵੁਟ੍ਠਾਯ ਮਨੁਸ੍ਸਪਥਂ ਓਲੋਕੇਨ੍ਤੋ ਥੇਰਂ ਦਿਸ੍ਵਾ – ‘‘ਅਜ੍ਜੇਵ ਪਬ੍ਬਜਿਤ੍ਵਾ ਅਜ੍ਜੇਵ ਖੁਰਗ੍ਗੇ ਅਰਹਤ੍ਤਂ ਪਤ੍ਵਾ ਮਹਾਅਰਿਯਵਂਸਪਟਿਪਦਂ ਪੂਰੇਤੁਂ ਚੋਲ਼ਕਂ ਪਰਿਯੇਸਤੀ’’ਤਿ ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਮਾਨੋ ਅਟ੍ਠਾਸਿ. ਤਮਞ੍ਞੋ ਮਹਾਬ੍ਰਹ੍ਮਾ ਦਿਸ੍ਵਾ ‘‘ਕਂ ਨਮਸ੍ਸਸੀ’’ਤਿ? ਪੁਚ੍ਛਿ. ਨੀਤਤ੍ਥੇਰਂ ਨਮਸ੍ਸਾਮੀਤਿ. ਕਿਂ ਕਾਰਣਾਤਿ? ਅਜ੍ਜੇਵ ਪਬ੍ਬਜਿਤ੍ਵਾ ਅਜ੍ਜੇਵ ਖੁਰਗ੍ਗੇ ਅਰਹਤ੍ਤਂ ਪਤ੍ਵਾ ਮਹਾਅਰਿਯਵਂਸਪਟਿਪਦਂ ਪੂਰੇਤੁਂ ਚੋਲ਼ਕਂ ਪਰਿਯੇਸਤੀਤਿ. ਸੋਪਿ ਨਂ ਨਮਸ੍ਸਮਾਨੋ ਅਟ੍ਠਾਸਿ. ਅਥਞ੍ਞੋ, ਅਥਞ੍ਞੋਤਿ ਸਤ੍ਤਸਤਾ ਮਹਾਬ੍ਰਹ੍ਮਾਨੋ ਨਮਸ੍ਸਮਾਨਾ ਅਟ੍ਠਂਸੁ. ਤੇਨ ਵੁਤ੍ਤਂ –
‘‘ਤਾ ਦੇਵਤਾ ਸਤ੍ਤਸਤਾ ਉਲ਼ਾਰਾ,
ਬ੍ਰਹ੍ਮਾ ਵਿਮਾਨਾ ਅਭਿਨਿਕ੍ਖਮਿਤ੍ਵਾ;
ਨੀਤਂ ਨਮਸ੍ਸਨ੍ਤਿ ਪਸਨ੍ਨਚਿਤ੍ਤਾ,
‘ਖੀਣਾਸਵੋ ਗਣ੍ਹਤਿ ਪਂਸੁਕੂਲਂ’’’.
‘‘ਤਾ ਦੇਵਤਾ ਸਤ੍ਤਸਤਾ ਉਲ਼ਾਰਾ,
ਬ੍ਰਹ੍ਮਾ ਵਿਮਾਨਾ ਅਭਿਨਿਕ੍ਖਮਿਤ੍ਵਾ;
ਨੀਤਂ ਨਮਸ੍ਸਨ੍ਤਿ ਪਸਨ੍ਨਚਿਤ੍ਤਾ,
‘ਖੀਣਾਸਵੋ ਕਯਿਰਤਿ ਪਂਸੁਕੂਲਂ’’’.
‘‘‘ਖੀਣਾਸਵੋ ਧੋਵਤਿ ਪਂਸੁਕੂਲਂ’;
‘ਖੀਣਾਸਵੋ ਰਜਤਿ ਪਂਸੁਕੂਲਂ’;
‘ਖੀਣਾਸਵੋ ਪਾਰੁਪਤਿ ਪਂਸਕੂਲ’’’ਨ੍ਤਿ.
ਇਤਿ ਭਗਵਾ ਇਮਸ੍ਮਿਂ ਸੁਤ੍ਤੇ ਦੇਸਨਂ ਤੀਹਿ ਭਵੇਹਿ ਵਿਨਿਵਤ੍ਤੇਤ੍ਵਾ ਅਰਹਤ੍ਤਸ੍ਸ ਕੂਟਂ ਗਣ੍ਹਿ. ਦੇਸਨਾਪਰਿਯੋਸਾਨੇ ਪਞ੍ਚਸਤਾ ਭਿਕ੍ਖੂ ਅਰਹਤ੍ਤੇ ਪਤਿਟ੍ਠਹਿਂਸੁ. ਸਤ੍ਤਮਂ.
੮. ਪਿਣ੍ਡੋਲ੍ਯਸੁਤ੍ਤਵਣ੍ਣਨਾ
੮੦. ਅਟ੍ਠਮੇ ਕਿਸ੍ਮਿਞ੍ਚਿਦੇਵ ਪਕਰਣੇਤਿ ਕਿਸ੍ਮਿਞ੍ਚਿਦੇਵ ਕਾਰਣੇ. ਪਣਾਮੇਤ੍ਵਾਤਿ ਨੀਹਰਿਤ੍ਵਾ. ਕਿਸ੍ਮਿਂ ਪਨ ਕਾਰਣੇ ਏਤੇ ਭਗਵਤਾ ਪਣਾਮਿਤਾਤਿ? ਏਕਸ੍ਮਿਞ੍ਹਿ ਅਨ੍ਤੋਵਸ੍ਸੇ ਭਗਵਾ ਸਾਵਤ੍ਥਿਯਂ ਵਸਿਤ੍ਵਾ ਵੁਤ੍ਥਵਸ੍ਸੋ ਪਵਾਰੇਤ੍ਵਾ ਮਹਾਭਿਕ੍ਖੁਸਙ੍ਘਪਰਿਵਾਰੋ ਸਾਵਤ੍ਥਿਤੋ ਨਿਕ੍ਖਮਿਤ੍ਵਾ ਜਨਪਦਚਾਰਿਕਂ ਚਰਨ੍ਤੋ ਕਪਿਲਵਤ੍ਥੁਂ ਪਤ੍ਵਾ ਨਿਗ੍ਰੋਧਾਰਾਮਂ ਪਾਵਿਸਿ. ਸਕ੍ਯਰਾਜਾਨੋ ‘‘ਸਤ੍ਥਾ ਆਗਤੋ’’ਤਿ ਸੁਤ੍ਵਾ ਪਚ੍ਛਾਭਤ੍ਤੇ ਕਪ੍ਪਿਯਾਨਿ ਤੇਲਮਧੁਫਾਣਿਤਾਦੀਨਿ ਚੇਵ ਪਾਨਕਾਨਿ ਚ ਕਾਜਸਤੇਹਿ ਗਾਹਾਪੇਤ੍ਵਾ ਵਿਹਾਰਂ ਗਨ੍ਤ੍ਵਾ ਸਙ੍ਘਸ੍ਸ ਨਿਯ੍ਯਾਤੇਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਪਟਿਸਨ੍ਥਾਰਂ ਕਰੋਨ੍ਤਾ ਏਕਮਨ੍ਤੇ ਨਿਸੀਦਿਂਸੁ. ਸਤ੍ਥਾ ਤੇਸਂ ਮਧੁਰਧਮ੍ਮਕਥਂ ਕਥੇਨ੍ਤੋ ਨਿਸੀਦਿ. ਤਸ੍ਮਿਂ ਖਣੇ ਏਕਚ੍ਚੇ ਭਿਕ੍ਖੂ ਸੇਨਾਸਨਂ ਪਟਿਜਗ੍ਗਨ੍ਤਿ, ਏਕਚ੍ਚੇ ਮਞ੍ਚਪੀਠਾਦੀਨਿ ਪਞ੍ਞਾਪੇਨ੍ਤਿ, ਸਾਮਣੇਰਾ ਅਪ੍ਪਹਰਿਤਂ ਕਰੋਨ੍ਤਿ. ਭਾਜਨੀਯਟ੍ਠਾਨੇ ਸਮ੍ਪਤ੍ਤਭਿਕ੍ਖੂਪਿ ਅਤ੍ਥਿ, ਅਸਮ੍ਪਤ੍ਤਭਿਕ੍ਖੂਪਿ ਅਤ੍ਥਿ. ਸਮ੍ਪਤ੍ਤਾ ਅਸਮ੍ਪਤ੍ਤਾਨਂ ਲਾਭਂ ਗਣ੍ਹਨ੍ਤਾ, ‘‘ਅਮ੍ਹਾਕਂ ਦੇਥ, ਅਮ੍ਹਾਕਂ ਆਚਰਿਯਸ੍ਸ ਦੇਥ ਉਪਜ੍ਝਾਯਸ੍ਸ ਦੇਥਾ’’ਤਿ ਕਥੇਨ੍ਤਾ ਮਹਾਸਦ੍ਦਮਕਂਸੁ. ਸਤ੍ਥਾ ਸੁਤ੍ਵਾ ਥੇਰਂ ਪੁਚ੍ਛਿ ‘‘ਕੇ ਪਨ ਤੇ, ਆਨਨ੍ਦ, ਉਚ੍ਚਾਸਦ੍ਦਾ ਮਹਾਸਦ੍ਦਾ ਕੇਵਟ੍ਟਾ ਮਞ੍ਞੇ ਮਚ੍ਛਵਿਲੋਪੇ’’ਤਿ? ਥੇਰੋ ਏਤਮਤ੍ਥਂ ਆਰੋਚੇਸਿ. ਸਤ੍ਥਾ ਸੁਤ੍ਵਾ ‘‘ਆਮਿਸਹੇਤੁ, ਆਨਨ੍ਦ, ਭਿਕ੍ਖੂ ਮਹਾਸਦ੍ਦਂ ਕਰੋਨ੍ਤੀ’’ਤਿ ਆਹ. ‘‘ਆਮ, ਭਨ੍ਤੇ’’ਤਿ. ‘‘ਅਨਨੁਚ੍ਛਵਿਕਂ, ਆਨਨ੍ਦ, ਅਪ੍ਪਤਿਰੂਪਂ. ਨ ਹਿ ਮਯਾ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਚੀਵਰਾਦਿਹੇਤੁ ਪਾਰਮਿਯੋ ਪੂਰਿਤਾ, ਨਾਪਿ ਇਮੇ ਭਿਕ੍ਖੂ ਚੀਵਰਾਦਿਹੇਤੁ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤਾ, ਅਰਹਤ੍ਤਹੇਤੁ ਪਬ੍ਬਜਿਤ੍ਵਾ ਅਨਤ੍ਥਂ ਅਤ੍ਥਸਦਿਸਂ ਅਸਾਰਂ ਸਾਰਸਦਿਸਂ ਕਰੋਨ੍ਤਿ, ਗਚ੍ਛਾਨਨ੍ਦ, ਤੇ ਭਿਕ੍ਖੂ ਪਣਾਮੇਹੀ’’ਤਿ.
ਪੁਬ੍ਬਣ੍ਹਸਮਯਨ੍ਤਿ ਦੁਤਿਯਦਿਵਸੇ ਪੁਬ੍ਬਣ੍ਹਸਮਯਂ. ਬੇਲੁਵਲਟ੍ਠਿਕਾਯ ਮੂਲੇਤਿ ਤਰੁਣਬੇਲੁਵਰੁਕ੍ਖਮੂਲੇ. ਪਬਾਲ਼੍ਹੋਤਿ ਪਬਾਹਿਤੋ. ਪਵਾਲ਼੍ਹੋਤਿਪਿ ਪਾਠੋ, ਪਵਾਹਿਤੋਤਿ ਅਤ੍ਥੋ. ਉਭਯਮ੍ਪਿ ਨੀਹਟਭਾਵਮੇਵ ਦੀਪੇਤਿ. ਸਿਯਾ ਅਞ੍ਞਥਤ੍ਤਨ੍ਤਿ ਪਸਾਦਞ੍ਞਥਤ੍ਤਂ ਵਾ ਭਾਵਞ੍ਞਥਤ੍ਤਂ ਵਾ ਭਵੇਯ੍ਯ. ਕਥਂ? ‘‘ਸਮ੍ਮਾਸਮ੍ਬੁਦ੍ਧੇਨ ਮਯਂ ਲਹੁਕੇ ਕਾਰਣੇ ਪਣਾਮਿਤਾ’’ਤਿ ਪਸਾਦਂ ਮਨ੍ਦਂ ਕਰੋਨ੍ਤਾਨਂ ਪਸਾਦਞ੍ਞਥਤ੍ਤਂ ਨਾਮ ਹੋਤਿ. ਸਲਿਙ੍ਗੇਨੇਵ ਤਿਤ੍ਥਾਯਤਨਂ ਪਕ੍ਕਮਨ੍ਤਾਨਂ ਭਾਵਞ੍ਞਥਤ੍ਤਂ ਨਾਮ. ਸਿਯਾ ਵਿਪਰਿਣਾਮੋਤਿ ਏਤ੍ਥ ਪਨ ‘‘ਮਯਂ ਸਤ੍ਥੁ ਅਜ੍ਝਾਸਯਂ ਗਣ੍ਹਿਤੁਂ ਸਕ੍ਖਿਸ੍ਸਾਮਾਤਿ ਪਬ੍ਬਜਿਤਾ, ਨਂ ਗਹੇਤੁਂ ਅਸਕ੍ਕੋਨ੍ਤਾਨਂ ਕਿਂ ਅਮ੍ਹਾਕਂ ਪਬ੍ਬਜ੍ਜਾਯਾ’’ਤਿ? ਸਿਕ੍ਖਂ ਪਚ੍ਚਕ੍ਖਾਯ ਹੀਨਾਯਾਵਤ੍ਤਨਂ ਵਿਪਰਿਣਾਮੋਤਿ ਵੇਦਿਤਬ੍ਬੋ. ਵਚ੍ਛਸ੍ਸਾਤਿ ਖੀਰੂਪਕਵਚ੍ਛਸ੍ਸ. ਅਞ੍ਞਥਤ੍ਤਨ੍ਤਿ ਮਿਲਾਯਨਅਞ੍ਞਥਤ੍ਤਂ. ਖੀਰੂਪਕੋ ਹਿ ਵਚ੍ਛੋ ਮਾਤੁ ਅਦਸ੍ਸਨੇਨ ਖੀਰਂ ਅਲਭਨ੍ਤੋ ਮਿਲਾਯਤਿ ਕਮ੍ਪਤਿ ਪਵੇਧਤਿ. ਵਿਪਰਿਣਾਮੋਤਿ ਮਰਣਂ. ਸੋ ਹਿ ਖੀਰਂ ਅਲਭਮਾਨੋ ਖੀਰਪਿਪਾਸਾਯ ਸੁਸ੍ਸਨ੍ਤੋ ਪਤਿਤ੍ਵਾ ਮਰਤਿ.
ਬੀਜਾਨਂ ਤਰੁਣਾਨਨ੍ਤਿ ਉਦਕੇਨ ਅਨੁਗ੍ਗਹੇਤਬ੍ਬਾਨਂ ਵਿਰੂਲ਼੍ਹਬੀਜਾਨਂ. ਅਞ੍ਞਥਤ੍ਤਨ੍ਤਿ ਮਿਲਾਯਨਞ੍ਞਥਤ੍ਤਮੇਵ. ਤਾਨਿ ਹਿ ਉਦਕਂ ਅਲਭਨ੍ਤਾਨਿ ਮਿਲਾਯਨ੍ਤਿ. ਵਿਪਰਿਣਾਮੋਤਿ ਵਿਨਾਸੋ. ਤਾਨਿ ਹਿ ਉਦਕਂ ਅਲਭਨ੍ਤਾਨਿ ਸੁਕ੍ਖਿਤ੍ਵਾ ਵਿਨਸ੍ਸਨ੍ਤਿ, ਪਲਾਲਮੇਵ ਹੋਨ੍ਤਿ. ਅਨੁਗ੍ਗਹਿਤੋਤਿ ਆਮਿਸਾਨੁਗ੍ਗਹੇਨ ਚੇਵ ਧਮ੍ਮਾਨੁਗ੍ਗਹੇਨ ਚ ਅਨੁਗ੍ਗਹਿਤੋ. ਅਨੁਗ੍ਗਣ੍ਹੇਯ੍ਯਨ੍ਤਿ ਦ੍ਵੀਹਿਪਿ ਏਤੇਹਿ ਅਨੁਗ੍ਗਹੇਹਿ ਅਨੁਗ੍ਗਣ੍ਹੇਯ੍ਯਂ. ਅਚਿਰਪਬ੍ਬਜਿਤਾ ਹਿ ਸਾਮਣੇਰਾ ਚੇਵ ਦਹਰਭਿਕ੍ਖੂ ਚ ਚੀਵਰਾਦਿਪਚ੍ਚਯਵੇਕਲ੍ਲੇ ਵਾ ਸਤਿ ਗੇਲਞ੍ਞੇ ਵਾ ਸਤ੍ਥਾਰਾ ਵਾ ਆਚਰਿਯੁਪਜ੍ਝਾਯੇਹਿ ਵਾ ਆਮਿਸਾਨੁਗ੍ਗਹੇਨ ਅਨਨੁਗ੍ਗਹਿਤਾ ਕਿਲਮਨ੍ਤਾ ਨ ਸਕ੍ਕੋਨ੍ਤਿ ਸਜ੍ਝਾਯਂ ਵਾ ਮਨਸਿਕਾਰਂ ਵਾ ਕਾਤੁਂ, ਧਮ੍ਮਾਨੁਗ੍ਗਹੇਨ ਅਨਨੁਗ੍ਗਹਿਤਾ ਉਦ੍ਦੇਸੇਨ ਚੇਵ ਓਵਾਦਾਨੁਸਾਸਨਿਯਾ ਚ ਪਰਿਹਾਯਮਾਨਾ ਨ ਸਕ੍ਕੋਨ੍ਤਿ ਅਕੁਸਲਂ ਪਰਿਵਜ੍ਜੇਤ੍ਵਾ ਕੁਸਲਂ ਭਾਵੇਤੁਂ. ਇਮੇਹਿ ਪਨ ਦ੍ਵੀਹਿ ਅਨੁਗ੍ਗਹੇਹਿ ਅਨੁਗ੍ਗਹਿਤਾ ਕਾਯੇਨ ਅਕਿਲਮਨ੍ਤਾ ਸਜ੍ਝਾਯਮਨਸਿਕਾਰੇ ਪਵਤ੍ਤਿਤ੍ਵਾ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨਾ ਅਪਰਭਾਗੇ ਤਂ ਅਨੁਗ੍ਗਹਂ ਅਲਭਨ੍ਤਾਪਿ ਤੇਨੇਵ ਪੁਰਿਮਾਨੁਗ੍ਗਹੇਨ ਲਦ੍ਧਬਲਾ ਸਾਸਨੇ ਪਤਿਟ੍ਠਹਨ੍ਤਿ, ਤਸ੍ਮਾ ਭਗਵਤੋ ਏਵਂ ਪਰਿਵਿਤਕ੍ਕੋ ਉਦਪਾਦਿ.
ਭਗਵਤੋ ਪੁਰਤੋ ਪਾਤੁਰਹੋਸੀਤਿ ਸਤ੍ਥੁ ਚਿਤ੍ਤਂ ਞਤ੍ਵਾ – ‘‘ਇਮੇ ਭਿਕ੍ਖੂ ਭਗਵਤਾ ਪਣਾਮਿਤਾ, ਇਦਾਨਿ ਨੇਸਂ ਅਨੁਗ੍ਗਹਂ ਕਾਤੁਕਾਮੋ ਏਵਂ ਚਿਨ੍ਤੇਸਿ, ਕਾਰਣਂ ਭਗਵਾ ਚਿਨ੍ਤੇਸਿ, ਅਹਮੇਤ੍ਥ ਉਸ੍ਸਾਹਂ ਜਨੇਸ੍ਸਾਮੀ’’ਤਿ ਪੁਰਤੋ ਪਾਕਟੋ ਅਹੋਸਿ. ਸਨ੍ਤੇਤ੍ਥ ਭਿਕ੍ਖੂਤਿ ਇਦਂ ਸੋ ਮਹਾਬ੍ਰਹ੍ਮਾ ਯਥਾ ਨਾਮ ਬ੍ਯਤ੍ਤੋ ਸੂਦੋ ਯਦੇਵ ਅਮ੍ਬਿਲਗ੍ਗਾਦੀਸੁ ਰਸਜਾਤਂ ਰਞ੍ਞੋ ਰੁਚ੍ਚਤਿ, ਤਂ ਅਭਿਸਙ੍ਖਾਰੇਨ ਸਾਦੁਤਰਂ ਕਤ੍ਵਾ ਪੁਨਦਿਵਸੇ ਉਪਨਾਮੇਤਿ, ਏਵਮੇਵ ਅਤ੍ਤਨੋ ਬ੍ਯਤ੍ਤਤਾਯ ਭਗਵਤਾ ਆਹਟਉਪਮਂਯੇਵ ਏਵਮੇਤਂ ਭਗਵਾਤਿਆਦਿਵਚਨੇਹਿ ਅਭਿਸਙ੍ਖਰਿਤ੍ਵਾ ਭਗਵਨ੍ਤਂ ਯਾਚਨ੍ਤੋ ਭਿਕ੍ਖੁਸਙ੍ਘਸ੍ਸ ਅਨੁਗ੍ਗਹਕਰਣਤ੍ਥਂ ਵਦਤਿ. ਤਤ੍ਥ ਅਭਿਨਨ੍ਦਤੂਤਿ ‘‘ਮਮ ਸਨ੍ਤਿਕਂ ਭਿਕ੍ਖੁਸਙ੍ਘੋ ਆਗਚ੍ਛਤੂ’’ਤਿ. ਏਵਮਸ੍ਸ ਆਗਮਨਂ ਸਮ੍ਪਿਯਾਯਮਾਨੋ ਅਭਿਨਨ੍ਦਤੁ. ਅਭਿਵਦਤੂਤਿ ਆਗਤਸ੍ਸ ਚ ਓਵਾਦਾਨੁਸਾਸਨਿਂ ਦਦਨ੍ਤੋ ਅਭਿਵਦਤੁ.
ਪਟਿਸਲ੍ਲਾਨਾਤਿ ਏਕੀਭਾਵਾ. ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਸੀਤਿ ਇਦ੍ਧਿਂ ਅਕਾਸਿ. ਏਕਦ੍ਵੀਹਿਕਾਯਾਤਿ ਏਕੇਕੋ ਚੇਵ ਦ੍ਵੇ ਦ੍ਵੇ ਚ ਹੁਤ੍ਵਾ. ਸਾਰਜ੍ਜਮਾਨਰੂਪਾਤਿ ਓਤ੍ਤਪ੍ਪਮਾਨਸਭਾਵਾ ਭਾਯਮਾਨਾ. ਕਸ੍ਮਾ ਪਨ ਭਗਵਾ ਤੇਸਂ ਤਥਾ ਉਪਸਙ੍ਕਮਨਾਯ ਇਦ੍ਧਿਮਕਾਸੀਤਿ? ਹਿਤਪਤ੍ਥਨਾਯ. ਯਦਿ ਹਿ ਤੇ ਵਗ੍ਗਵਗ੍ਗਾ ਹੁਤ੍ਵਾ ਆਗਚ੍ਛੇਯ੍ਯੁਂ, ‘‘ਭਗਵਾ ਭਿਕ੍ਖੁਸਙ੍ਘਂ ਪਣਾਮੇਤ੍ਵਾ ਅਰਞ੍ਞਂ ਪਵਿਟ੍ਠੋ ਏਕਦਿਵਸਮ੍ਪਿ ਤਤ੍ਥ ਵਸਿਤੁਂ ਨਾਸਕ੍ਖਿ, ਵੇਗੇਨੇਵ ਆਗਤੋ’’ਤਿ ਕੇਲ਼ਿਮ੍ਪਿ ਕਰੇਯ੍ਯੁਂ. ਅਥ ਨੇਸਂ ਨੇਵ ਬੁਦ੍ਧਗਾਰਵਂ ਪਚ੍ਚੁਪਟ੍ਠਹੇਯ੍ਯ, ਨ ਧਮ੍ਮਦੇਸਨਂ ਸਮ੍ਪਟਿਚ੍ਛਿਤੁਂ ਸਮਤ੍ਥਾ ਭਵੇਯ੍ਯੁਂ. ਸਭਯਾਨਂ ਪਨ ਸਸਾਰਜ੍ਜਾਨਂ ਏਕਦ੍ਵੀਹਿਕਾਯ ਆਗਚ੍ਛਨ੍ਤਾਨਂ ਬੁਦ੍ਧਗਾਰਵਞ੍ਚੇਵ ਪਚ੍ਚੁਪਟ੍ਠਿਤਂ ਭਵਿਸ੍ਸਤਿ, ਧਮ੍ਮਦੇਸਨਞ੍ਚ ਸਮ੍ਪਟਿਚ੍ਛਿਤੁਂ ਸਕ੍ਖਿਸ੍ਸਨ੍ਤੀਤਿ ਚਿਨ੍ਤੇਤ੍ਵਾ ਤੇਸਂ ਹਿਤਪਤ੍ਥਨਾਯ ਤਥਾਰੂਪਂ ਇਦ੍ਧਿਂ ਅਕਾਸਿ.
ਨਿਸੀਦਿਂਸੂਤਿ ਤੇਸੁ ਹਿ ਸਾਰਜ੍ਜਮਾਨਰੂਪੇਸੁ ਆਗਚ੍ਛਨ੍ਤੇਸੁ ਏਕੋ ਭਿਕ੍ਖੁ ‘‘ਮਮਂਯੇਵ ਸਤ੍ਥਾ ਓਲੋਕੇਤਿ, ਮਂਯੇਵ ਮਞ੍ਞੇ ਨਿਗ੍ਗਣ੍ਹਿਤੁਕਾਮੋ’’ਤਿ ਸਣਿਕਂ ਆਗਨ੍ਤ੍ਵਾ ਵਨ੍ਦਿਤ੍ਵਾ ਨਿਸੀਦਿ, ਅਥਞ੍ਞੋ ਅਥਞ੍ਞੋਤਿ ਏਵਂ ਪਞ੍ਚਭਿਕ੍ਖੁਸਤਾਨਿ ਨਿਸੀਦਿਂਸੁ. ਏਵਂ ਨਿਸਿਨ੍ਨਂ ਪਨ ਭਿਕ੍ਖੁਸਙ੍ਘਂ ਸੀਦਨ੍ਤਰੇ ਸਨ੍ਨਿਸਿਨ੍ਨਂ ਮਹਾਸਮੁਦ੍ਦਂ ਵਿਯ ਨਿਵਾਤੇ ਪਦੀਪਂ ਵਿਯ ਚ ਨਿਚ੍ਚਲਂ ਦਿਸ੍ਵਾ ਸਤ੍ਥਾ ਚਿਨ੍ਤੇਸਿ – ‘‘ਇਮੇਸਂ ਭਿਕ੍ਖੂਨਂ ਕੀਦਿਸੀ ਧਮ੍ਮਦੇਸਨਾ ਵਟ੍ਟਤੀ’’ਤਿ? ਅਥਸ੍ਸ ਏਤਦਹੋਸਿ – ‘‘ਇਮੇ ਆਹਾਰਹੇਤੁ ਪਣਾਮਿਤਾ, ਪਿਣ੍ਡਿਯਾਲੋਪਧਮ੍ਮਦੇਸਨਾਵ ਨੇਸਂ ਸਪ੍ਪਾਯਾ, ਤਂ ਦਸ੍ਸੇਤ੍ਵਾ ਮਤ੍ਥਕੇ ਤਿਪਰਿਵਟ੍ਟਦੇਸਨਂ ਦੇਸੇਸ੍ਸਾਮਿ, ਦੇਸਨਾਪਰਿਯੋਸਾਨੇ ਸਬ੍ਬੇ ਅਰਹਤ੍ਤਂ ਪਾਪੁਣਿਸ੍ਸਨ੍ਤੀ’’ਤਿ. ਅਥ ਨੇਸਂ ਤਂ ਧਮ੍ਮਦੇਸਨਂ ਦੇਸੇਨ੍ਤੋ ਅਨ੍ਤਮਿਦਂ, ਭਿਕ੍ਖਵੇਤਿਆਦਿਮਾਹ.
ਤਤ੍ਥ ਅਨ੍ਤਨ੍ਤਿ ਪਚ੍ਛਿਮਂ ਲਾਮਕਂ. ਯਦਿਦਂ ਪਿਣ੍ਡੋਲ੍ਯਨ੍ਤਿ ਯਂ ਏਵਂ ਪਿਣ੍ਡਪਰਿਯੇਸਨੇਨ ਜੀਵਿਕਂ ਕਪ੍ਪੇਨ੍ਤਸ੍ਸ ਜੀਵਿਤਂ. ਅਯਂ ਪਨੇਤ੍ਥ ਪਦਤ੍ਥੋ – ਪਿਣ੍ਡਾਯ ਉਲਤੀਤਿ ਪਿਣ੍ਡੋਲੋ, ਪਿਣ੍ਡੋਲਸ੍ਸ ਕਮ੍ਮਂ ਪਿਣ੍ਡੋਲ੍ਯਂ, ਪਿਣ੍ਡਪਰਿਯੇਸਨੇਨ ਨਿਪ੍ਫਾਦਿਤਜੀਵਿਤਨ੍ਤਿ ਅਤ੍ਥੋ. ਅਭਿਸਾਪੋਤਿ ਅਕ੍ਕੋਸੋ. ਕੁਪਿਤਾ ਹਿ ਮਨੁਸ੍ਸਾ ਅਤ੍ਤਨੋ ਪਚ੍ਚਤ੍ਥਿਕਂ ‘‘ਚੀਵਰਂ ਨਿਵਾਸੇਤ੍ਵਾ ਕਪਾਲਂ ਗਹੇਤ੍ਵਾ ਪਿਣ੍ਡਂ ਪਰਿਯੇਸਮਾਨੋ ਚਰਿਸ੍ਸਤੀ’’ਤਿ ਅਕ੍ਕੋਸਨ੍ਤਿ. ਅਥ ਵਾ ਪਨ ‘‘ਕਿਂ ਤੁਯ੍ਹਂ ਅਕਾਤਬ੍ਬਂ ਅਤ੍ਥਿ, ਯੋ ਤ੍ਵਂ ਏਵਂ ਬਲਵਾ ਵੀਰਿਯਸਮ੍ਪਨ੍ਨੋਪਿ ਹਿਰੋਤ੍ਤਪ੍ਪਂ ਪਹਾਯ ਕਪਣੋ ਵਿਯ ਪਿਣ੍ਡੋਲੋ ਵਿਚਰਸਿ ਪਤ੍ਤਪਾਣੀ’’ਤਿ? ਏਵਮ੍ਪਿ ਅਕ੍ਕੋਸਨ੍ਤਿਯੇਵ. ਤਞ੍ਚ ਖੋ ਏਤਨ੍ਤਿ ਏਵਂ ਤਂ ਅਭਿਸਾਪਂ ਸਮਾਨਮ੍ਪਿ ਪਿਣ੍ਡੋਲ੍ਯਂ. ਕੁਲਪੁਤ੍ਤਾ ਉਪੇਨ੍ਤਿ ਅਤ੍ਥਵਸਿਕਾਤਿ ਮਮ ਸਾਸਨੇ ਜਾਤਿਕੁਲਪੁਤ੍ਤਾ ਚ ਆਚਾਰਕੁਲਪੁਤ੍ਤਾ ਚ ਅਤ੍ਥਵਸਿਕਾ ਕਾਰਣਵਸਿਕਾ ਹੁਤ੍ਵਾ ਕਾਰਣਵਸਂ ਪਟਿਚ੍ਚ ਉਪੇਨ੍ਤਿ.
ਰਾਜਾਭਿਨੀਤਾਤਿਆਦੀਸੁ ਯੇ ਰਞ੍ਞੋ ਸਨ੍ਤਕਂ ਖਾਦਿਤ੍ਵਾ ਰਞ੍ਞਾ ਬਨ੍ਧਨਾਗਾਰੇ ਬਨ੍ਧਾਪਿਤਾ ਪਲਾਯਿਤ੍ਵਾ ਪਬ੍ਬਜਨ੍ਤਿ, ਤੇ ਰਾਜਾਭਿਨੀਤਾ ਨਾਮ. ਤੇ ਹਿ ਰਞ੍ਞਾ ਬਨ੍ਧਨਂ ਅਭਿਨੀਤਤ੍ਤਾ ਰਾਜਾਭਿਨੀਤਾ ਨਾਮ. ਯੇ ਪਨ ਚੋਰੇਹਿ ਅਟਵਿਯਂ ਗਹੇਤ੍ਵਾ ਏਕਚ੍ਚੇਸੁ ਮਾਰਿਯਮਾਨੇਸੁ ਏਕਚ੍ਚੇ ‘‘ਮਯਂ ਸਾਮਿ ਤੁਮ੍ਹੇਹਿ ਵਿਸ੍ਸਟ੍ਠਾ ਗੇਹਂ ਅਨਜ੍ਝਾਵਸਿਤ੍ਵਾ ਪਬ੍ਬਜਿਸ੍ਸਾਮ, ਤਤ੍ਥ ਯਂ ਯਂ ਬੁਦ੍ਧਪੂਜਾਦਿਪੁਞ੍ਞਂ ਕਰਿਸ੍ਸਾਮ, ਤਤੋ ਤੁਮ੍ਹਾਕਂ ਪਤ੍ਤਿਂ ਦਸ੍ਸਾਮਾ’’ਤਿ ਤੇਹਿ ਵਿਸ੍ਸਟ੍ਠਾ ਪਬ੍ਬਜਨ੍ਤਿ, ਤੇ ਚੋਰਾਭਿਨੀਤਾ ਨਾਮ. ਤੇਪਿ ਹਿ ਚੋਰੇਹਿ ਮਾਰੇਤਬ੍ਬਤਂ ਅਭਿਨੀਤਾਤਿ ਚੋਰਾਭਿਨੀਤਾ ਨਾਮ. ਯੇ ਪਨ ਇਣਂ ਗਹੇਤ੍ਵਾ ਪਟਿਦਾਤੁਂ ਅਸਕ੍ਕੋਨ੍ਤਾ ਪਲਾਯਿਤ੍ਵਾ ਪਬ੍ਬਜਨ੍ਤਿ, ਤੇ ਇਣਟ੍ਟਾ ਨਾਮ, ਇਣਪੀਲ਼ਿਤਾਤਿ ਅਤ੍ਥੋ. ਇਣਟ੍ਠਾਤਿਪਿ ਪਾਠੋ, ਇਣੇ ਠਿਤਾਤਿ ਅਤ੍ਥੋ. ਯੇ ਰਾਜਚੋਰਛਾਤਕਰੋਗਭਯਾਨਂ ਅਞ੍ਞਤਰੇਨ ਅਭਿਭੂਤਾ ਉਪਦ੍ਦੁਤਾ ਪਬ੍ਬਜਨ੍ਤਿ, ਤੇ ਭਯਟ੍ਟਾ ਨਾਮ, ਭਯਪੀਲ਼ਿਤਾਤਿ ਅਤ੍ਥੋ. ਭਯਟ੍ਠਾਤਿਪਿ ਪਾਠੋ, ਭਯੇ ਠਿਤਾਤਿ ਅਤ੍ਥੋ. ਆਜੀਵਿਕਾਪਕਤਾਤਿ ਆਜੀਵਿਕਾਯ ਉਪਦ੍ਦੁਤਾ ਅਭਿਭੂਤਾ, ਪੁਤ੍ਤਦਾਰਂ ਪੋਸੇਤੁਂ ਅਸਕ੍ਕੋਨ੍ਤਾਤਿ ਅਤ੍ਥੋ. ਓਤਿਣ੍ਣਾਮ੍ਹਾਤਿ ਅਨ੍ਤੋ ਅਨੁਪਵਿਟ੍ਠਾ.
ਸੋ ਚ ਹੋਤਿ ਅਭਿਜ੍ਝਾਲੂਤਿ ਇਦਂ ਸੋ ਕੁਲਪੁਤ੍ਤੋ ‘‘ਦੁਕ੍ਖਸ੍ਸ ਅਨ੍ਤਂ ਕਰਿਸ੍ਸਾਮੀ’’ਤਿਆਦਿਵਸੇਨ ਚਿਤ੍ਤਂ ਉਪ੍ਪਾਦੇਤ੍ਵਾ ਪਬ੍ਬਜਿਤੋ, ਅਪਰਭਾਗੇ, ਤਂ ਪਬ੍ਬਜ੍ਜਂ ਤਥਾਰੂਪਂ ਕਾਤੁਂ ਨ ਸਕ੍ਕੋਤਿ, ਤਂ ਦਸ੍ਸੇਤੁਂ ਵੁਤ੍ਤਂ. ਤਤ੍ਥ ਅਭਿਜ੍ਝਾਲੂਤਿ ਪਰਭਣ੍ਡਾਨਂ ਅਭਿਜ੍ਝਾਯਿਤਾ. ਤਿਬ੍ਬਸਾਰਾਗੋਤਿ ਬਹਲਰਾਗੋ. ਬ੍ਯਾਪਨ੍ਨਚਿਤ੍ਤੋਤਿ ਪੂਤਿਭਾਵੇਨ ਵਿਪਨ੍ਨਚਿਤ੍ਤੋ. ਪਦੁਟ੍ਠਮਨਸਙ੍ਕਪ੍ਪੋਤਿ ਤਿਖਿਣਸਿਙ੍ਗੋ ਵਿਯ ਗੋਣੋ ਦੁਟ੍ਠਚਿਤ੍ਤੋ. ਮੁਟ੍ਠਸ੍ਸਤੀਤਿ ਭਤ੍ਤਨਿਕ੍ਖਿਤ੍ਤਕਾਕੋ ਵਿਯ ਨਟ੍ਠਸ੍ਸਤਿ, ਇਧ ਕਤਂ ਏਤ੍ਥ ਨਸ੍ਸਤਿ. ਅਸਮ੍ਪਜਾਨੋਤਿ ਨਿਪ੍ਪਞ੍ਞੋ. ਖਨ੍ਧਾਦਿਪਰਿਚ੍ਛੇਦਰਹਿਤੋ. ਅਸਮਾਹਿਤੋਤਿ ਚਣ੍ਡਸੋਤੇ ਬਦ੍ਧਨਾਵਾ ਵਿਯ ਉਪਚਾਰਪ੍ਪਨਾਭਾਵੇਨ ਅਸਣ੍ਠਿਤੋ. ਵਿਬ੍ਭਨ੍ਤਚਿਤ੍ਤੋਤਿ ਬਨ੍ਧਾਰੁਲ਼੍ਹਮਗੋ ਵਿਯ ਸਨ੍ਤਮਨੋ. ਪਾਕਤਿਨ੍ਦ੍ਰਿਯੋਤਿ ਯਥਾ ਗਿਹੀ ਪੁਤ੍ਤਧੀਤਰੋ ਓਲੋਕੇਨ੍ਤੋ ਅਸਂਵੁਤਿਨ੍ਦ੍ਰਿਯੋ ਹੋਤਿ, ਏਵਂ ਅਸਂਵੁਤਿਨ੍ਦ੍ਰਿਯੋ.
ਛਵਾਲਾਤਨ੍ਤਿ ਛਵਾਨਂ ਦਡ੍ਢਟ੍ਠਾਨੇ ਅਲਾਤਂ. ਉਭਤੋਪਦਿਤ੍ਤਂ ਮਜ੍ਝੇ ਗੂਥਗਤਨ੍ਤਿ ਪਮਾਣੇਨ ਅਟ੍ਠਙ੍ਗੁਲਮਤ੍ਤਂ ਦ੍ਵੀਸੁ ਠਾਨੇਸੁ ਆਦਿਤ੍ਤਂ ਮਜ੍ਝੇ ਗੂਥਮਕ੍ਖਿਤਂ. ਨੇਵ ਗਾਮੇਤਿ ਸਚੇ ਹਿ ਤਂ ਯੁਗਨਙ੍ਗਲਗੋਪਾਨਸਿਪਕ੍ਖਪਾਸਕਾਦੀਨਂ ਅਤ੍ਥਾਯ ਉਪਨੇਤੁਂ ਸਕ੍ਕਾ ਅਸ੍ਸ, ਗਾਮੇ ਕਟ੍ਠਤ੍ਥਂ ਫਰੇਯ੍ਯ. ਸਚੇ ਖੇਤ੍ਤਕੁਟਿਯਂ ਕਟ੍ਠਤ੍ਥਰਮਞ੍ਚਕਾਦੀਨਂ ਅਤ੍ਥਾਯ ਉਪਨੇਤੁਂ ਸਕ੍ਕਾ, ਅਰਞ੍ਞੇ ਕਟ੍ਠਤ੍ਥਂ ਫਰੇਯ੍ਯ. ਯਸ੍ਮਾ ਪਨ ਉਭਯਥਾਪਿ ਨ ਸਕ੍ਕਾ, ਤਸ੍ਮਾ ਏਵਂ ਵੁਤ੍ਤਂ. ਗਿਹਿਭੋਗਾ ਚ ਪਰਿਹੀਨੋਤਿ ਯੋ ਅਗਾਰੇ ਵਸਨ੍ਤੇਹਿ ਗਿਹੀਹਿ ਦਾਯਜ੍ਜੇ ਭਾਜਿਯਮਾਨੇ ਭੋਗੋ ਲਦ੍ਧਬ੍ਬੋ ਅਸ੍ਸ, ਤਤੋ ਚ ਪਰਿਹੀਨੋ. ਸਾਮਞ੍ਞਤ੍ਥਞ੍ਚਾਤਿ ਆਚਰਿਯੁਪਜ੍ਝਾਯਾਨਂ ਓਵਾਦੇ ਠਤ੍ਵਾ ਪਰਿਯਤ੍ਤਿਪਟਿਵੇਧਵਸੇਨ ਪਤ੍ਤਬ੍ਬਂ ਸਾਮਞ੍ਞਤ੍ਥਞ੍ਚ. ਇਮਞ੍ਚ ਪਨ ਉਪਮਂ ਸਤ੍ਥਾ ਨ ਦੁਸ੍ਸੀਲਸ੍ਸ ਵਸੇਨ ਆਹਰਿ, ਪਰਿਸੁਦ੍ਧਸੀਲਸ੍ਸ ਪਨ ਅਲਸਸ੍ਸ ਅਭਿਜ੍ਝਾਦੀਹਿ ਦੋਸੇਹਿ ਉਪਹਤਸ੍ਸ ਪੁਗ੍ਗਲਸ੍ਸ ਇਮਂ ਉਪਮਂ ਆਹਰਿ.
ਤਯੋਮੇ, ਭਿਕ੍ਖਵੇਤਿ ਕਸ੍ਮਾ ਆਰਦ੍ਧਂ? ਇਮਸ੍ਸ ਪੁਗ੍ਗਲਸ੍ਸ ਛਵਾਲਾਤਸਦਿਸਭਾਵੋ ਨੇਵ ਮਾਤਾਪਿਤੂਹਿ ਕਤੋ, ਨ ਆਚਰਿਯੁਪਜ੍ਝਾਯੇਹਿ, ਇਮੇਹਿ ਪਨ ਪਾਪਵਿਤਕ੍ਕੇਹਿ ਕਤੋਤਿ ਦਸ੍ਸਨਤ੍ਥਂ ਆਰਦ੍ਧਂ. ਅਨਿਮਿਤ੍ਤਂ ਵਾ ਸਮਾਧਿਨ੍ਤਿ ਵਿਪਸ੍ਸਨਾਸਮਾਧਿਂ. ਸੋ ਹਿ ਨਿਚ੍ਚਨਿਮਿਤ੍ਤਾਦੀਨਂ ਸਮੁਗ੍ਘਾਤਨੇਨ ਅਨਿਮਿਤ੍ਤੋਤਿ ਵੁਚ੍ਚਤਿ. ਏਤ੍ਥ ਚ ਚਤ੍ਤਾਰੋ ਸਤਿਪਟ੍ਠਾਨਾ ਮਿਸ੍ਸਕਾ, ਅਨਿਮਿਤ੍ਤਸਮਾਧਿ ਪੁਬ੍ਬਭਾਗੋ. ਅਨਿਮਿਤ੍ਤਸਮਾਧਿ ਵਾ ਮਿਸ੍ਸਕੋ, ਸਤਿਪਟ੍ਠਾਨਾ ਪੁਬ੍ਬਭਾਗਾਤਿ ਵੇਦਿਤਬ੍ਬਾ.
ਦ੍ਵੇਮਾ, ਭਿਕ੍ਖਵੇ, ਦਿਟ੍ਠਿਯੋਤਿ ਇਦਂ ਪਨ ਨ ਕੇਵਲਂ ਅਨਿਮਿਤ੍ਤਸਮਾਧਿਭਾਵਨਾ ਇਮੇਸਂਯੇਵ ਤਿਣ੍ਣਂ ਮਹਾਵਿਤਕ੍ਕਾਨਂ ਪਹਾਨਾਯ ਸਂਵਤ੍ਤਤਿ, ਸਸ੍ਸਤੁਚ੍ਛੇਦਦਿਟ੍ਠੀਨਮ੍ਪਿ ਪਨ ਸਮੁਗ੍ਘਾਤਂ ਕਰੋਤੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਨ ਵਜ੍ਜਵਾ ਅਸ੍ਸਨ੍ਤਿ ਨਿਦ੍ਦੋਸੋ ਭਵੇਯ੍ਯਂ. ਸੇਸਮੇਤ੍ਥ ਉਤ੍ਤਾਨਮੇਵ. ਇਤਿ ਭਗਵਾ ਇਮਸ੍ਮਿਮ੍ਪਿ ਸੁਤ੍ਤੇ ਦੇਸਨਂ ਤੀਹਿ ਭਵੇਹਿ ਵਿਨਿਵਤ੍ਤੇਤ੍ਵਾ ਅਰਹਤ੍ਤੇਨ ਕੂਟਂ ਗਣ੍ਹਿ. ਦੇਸਨਾਵਸਾਨੇ ਪਞ੍ਚਸਤਾ ਭਿਕ੍ਖੂ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿਂਸੂਤਿ. ਅਟ੍ਠਮਂ.
੯. ਪਾਲਿਲੇਯ੍ਯਸੁਤ੍ਤਵਣ੍ਣਨਾ
੮੧. ਨਵਮੇ ਚਾਰਿਕਂ ਪਕ੍ਕਾਮੀਤਿ ਕੋਸਮ੍ਬਿਕਾਨਂ ਭਿਕ੍ਖੂਨਂ ਕਲਹਕਾਲੇ ਸਤ੍ਥਾ ਏਕਦਿਵਸਂ ਦੀਘੀਤਿਸ੍ਸ ਕੋਸਲਰਞ੍ਞੋ ਵਤ੍ਥੁਂ ਆਹਰਿਤ੍ਵਾ ‘‘ਨ ਹਿ ਵੇਰੇਨ ਵੇਰਾਨਿ, ਸਮ੍ਮਨ੍ਤੀਧ ਕੁਦਾਚਨ’’ਨ੍ਤਿਆਦੀਹਿ (ਧ. ਪ. ੫) ਗਾਥਾਹਿ ਓਵਦਤਿ. ਤਂਦਿਵਸਂ ਤੇਸਂ ਕਲਹਂ ਕਰੋਨ੍ਤਾਨਂਯੇਵ ਰਤ੍ਤਿ ਵਿਭਾਤਾ. ਦੁਤਿਯਦਿਵਸੇਪਿ ਭਗਵਾ ਤਮੇਵ ਵਤ੍ਥੁਂ ਕਥੇਸਿ. ਤਂਦਿਵਸਮ੍ਪਿ ਤੇਸਂ ਕਲਹਂ ਕਰੋਨ੍ਤਾਨਂਯੇਵ ਰਤ੍ਤਿ ਵਿਭਾਤਾ. ਤਤਿਯਦਿਵਸੇਪਿ ਭਗਵਾ ਤਮੇਵ ਵਤ੍ਥੁਂ ਕਥੇਸਿ. ਅਥ ਨਂ ਅਞ੍ਞਤਰੋ ਭਿਕ੍ਖੁ ਏਵਮਾਹ – ‘‘ਅਪ੍ਪੋਸ੍ਸੁਕ੍ਕੋ, ਭਨ੍ਤੇ, ਭਗਵਾ ਦਿਟ੍ਠਧਮ੍ਮਸੁਖਵਿਹਾਰਂ ਅਨੁਯੁਤ੍ਤੋ ਵਿਹਰਤੁ, ਮਯਮੇਤੇਨ ਭਣ੍ਡਨੇਨ ਕਲਹੇਨ ਵਿਗ੍ਗਹੇਨ ਵਿਵਾਦੇਨ ਪਞ੍ਞਾਯਿਸ੍ਸਾਮਾ’’ਤਿ. ਸਤ੍ਥਾ ‘‘ਪਰਿਯਾਦਿਣ੍ਣਰੂਪਚਿਤ੍ਤਾ ਖੋ ਇਮੇ ਮੋਘਪੁਰਿਸਾ, ਨ ਇਮੇ ਸਕ੍ਕਾ ਸਞ੍ਞਾਪੇਤੁ’’ਨ੍ਤਿ ਚਿਨ੍ਤੇਤ੍ਵਾ – ‘‘ਕਿਂ ਮਯ੍ਹਂ ਇਮੇਹਿ, ਏਕਚਾਰਵਾਸਂ ਵਸਿਸ੍ਸਾਮੀ’’ਤਿ? ਸੋ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਕੋਸਮ੍ਬਿਯਂ ਪਿਣ੍ਡਾਯ ਚਰਿਤ੍ਵਾ ਕਞ੍ਚਿਪਿ ਅਨਾਮਨ੍ਤੇਤ੍ਵਾ ਏਕੋਵ ਅਦੁਤਿਯੋ ਚਾਰਿਕਂ ਪਕ੍ਕਾਮਿ.
ਯਸ੍ਮਿਂ, ਆਵੁਸੋ, ਸਮਯੇਤਿ ਇਦਂ ਥੇਰੋ ਯਸ੍ਮਾਸ੍ਸ ਅਜ੍ਜ ਭਗਵਾ ਏਕੇਨ ਭਿਕ੍ਖੁਨਾ ਸਦ੍ਧਿਂ ਪਕ੍ਕਮਿਸ੍ਸਤਿ, ਅਜ੍ਜ ਦ੍ਵੀਹਿ, ਅਜ੍ਜ ਸਤੇਨ, ਅਜ੍ਜ ਸਹਸ੍ਸੇਨ, ਅਜ੍ਜ ਏਕਕੋਵਾਤਿ ਸਬ੍ਬੋ ਭਗਵਤੋ ਚਾਰੋ ਵਿਦਿਤੋ ਪਾਕਟੋ ਪਚ੍ਚਕ੍ਖੋ, ਤਸ੍ਮਾ ਆਹ.
ਅਨੁਪੁਬ੍ਬੇਨਾਤਿ ਗਾਮਨਿਗਮਪਟਿਪਾਟਿਯਾ ਪਿਣ੍ਡਾਯ ਚਰਮਾਨੋ ਏਕਚਾਰਵਾਸਂ ਤਾਵ ਵਸਮਾਨਂ ਭਿਕ੍ਖੁਂ ਪਸ੍ਸਿਤੁਕਾਮੋ ਹੁਤ੍ਵਾ ਬਾਲਕਲੋਣਕਾਰਗਾਮਂ ਅਗਮਾਸਿ. ਤਤ੍ਥ ਭਗੁਤ੍ਥੇਰਸ੍ਸ ਸਕਲਪਚ੍ਛਾਭਤ੍ਤਞ੍ਚੇਵ ਤਿਯਾਮਰਤ੍ਤਿਞ੍ਚ ਏਕਚਾਰਵਾਸੇ ਆਨਿਸਂਸਂ ਕਥੇਤ੍ਵਾ ਪੁਨਦਿਵਸੇ ਤੇਨ ਪਚ੍ਛਾਸਮਣੇਨ ਪਿਣ੍ਡਾਯ ਚਰਿਤ੍ਵਾ ਤਂ ਤਤ੍ਥੇਵ ਨਿਵਤ੍ਤੇਤ੍ਵਾ ‘‘ਸਮਗ੍ਗਵਾਸਂ ਵਸਮਾਨੇ ਤਯੋ ਕੁਲਪੁਤ੍ਤੇ ਪਸ੍ਸਿਸ੍ਸਾਮੀ’’ਤਿ ਪਾਚੀਨਵਂਸਮਿਗਦਾਯਂ ਅਗਮਾਸਿ. ਤੇਸਮ੍ਪਿ ਸਕਲਪਚ੍ਛਾਭਤ੍ਤਞ੍ਚੇਵ ਤਿਯਾਮਰਤ੍ਤਿਞ੍ਚ ਏਕਚਾਰਵਾਸੇ ਆਨਿਸਂਸਂ ਕਥੇਤ੍ਵਾ ਤੇ ਤਤ੍ਥੇਵ ਨਿਵਤ੍ਤੇਤ੍ਵਾ ਏਕਕੋਵ ਪਾਲਿਲੇਯ੍ਯ ਨਗਰਾਭਿਮੁਖੋ ਪਕ੍ਕਮਿਤ੍ਵਾ ਅਨੁਪੁਬ੍ਬੇਨ ਪਾਲਿਲੇਯ੍ਯਨਗਰਂ ਸਮ੍ਪਤ੍ਤੋ. ਤੇਨ ਵੁਤ੍ਤਂ – ‘‘ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਪਾਲਿਲੇਯ੍ਯਕਂ, ਤਦਵਸਰੀ’’ਤਿ.
ਭਦ੍ਦਸਾਲਮੂਲੇਤਿ ਪਾਲਿਲੇਯ੍ਯਵਾਸਿਨੋ ਭਗਵਤੋ ਦਾਨਂ ਦਤ੍ਵਾ ਪਾਲਿਲੇਯ੍ਯਤੋ ਅਵਿਦੂਰੇ ਰਕ੍ਖਿਤਵਨਸਣ੍ਡੋ ਨਾਮ ਅਤ੍ਥਿ, ਤਤ੍ਥ ਭਗਵਤੋ ਪਣ੍ਣਸਾਲਂ ਕਤ੍ਵਾ ‘‘ਏਤ੍ਥ ਵਸਥਾ’’ਤਿ ਪਟਿਞ੍ਞਂ ਕਾਰੇਤ੍ਵਾ ਵਾਸਯਿਂਸੁ. ਭਦ੍ਦਸਾਲੋ ਪਨ ਤਤ੍ਥੇਕੋ ਮਨਾਪੋ ਲਦ੍ਧਕੋ ਸਾਲਰੁਕ੍ਖੋ. ਭਗਵਾ ਤਂ ਨਗਰਂ ਉਪਨਿਸ੍ਸਾਯ ਤਸ੍ਮਿਂ ਵਨਸਣ੍ਡੇ ਪਣ੍ਣਸਾਲਸਮੀਪੇ ਤਸ੍ਮਿਂ ਰੁਕ੍ਖਮੂਲੇ ਵਿਹਰਤਿ. ਤੇਨ ਵੁਤ੍ਤਂ ‘‘ਭਦ੍ਦਸਾਲਮੂਲੇ’’ਤਿ.
ਏਵਂ ਵਿਹਰਨ੍ਤੇ ਪਨੇਤ੍ਥ ਤਥਾਗਤੇ ਅਞ੍ਞਤਰੋ ਹਤ੍ਥਿਨਾਗੋ ਹਤ੍ਥਿਨੀਹਿ ਹਤ੍ਥਿਪੋਤਕਾਦੀਹਿ ਗੋਚਰਭੂਮਿਤਿਤ੍ਥੋਗਾਹਨਾਦੀਸੁ ਉਬ੍ਬਾਲ਼੍ਹੋ ਯੂਥੇ ਉਕ੍ਕਣ੍ਠਿਤੋ ‘‘ਕਿਂ ਮੇ ਇਮੇਹਿ ਹਤ੍ਥੀਹੀ’’ਤਿ? ਯੂਥਂ ਪਹਾਯ ਮਨੁਸ੍ਸਪਥਂ ਗਚ੍ਛਨ੍ਤੋ ਪਾਲਿਲੇਯ੍ਯਕਵਨਸਣ੍ਡੇ ਭਗਵਨ੍ਤਂ ਦਿਸ੍ਵਾ ਘਟਸਹਸ੍ਸੇਨ ਨਿਬ੍ਬਾਪਿਤਸਨ੍ਤਾਪੋ ਵਿਯ ਨਿਬ੍ਬੁਤੋ ਹੁਤ੍ਵਾ ਸਤ੍ਥੁ ਸਨ੍ਤਿਕੇ ਅਟ੍ਠਾਸਿ. ਸੋ ਤਤੋ ਪਟ੍ਠਾਯ ਸਤ੍ਥੁ ਵਤ੍ਤਪਟਿਵਤ੍ਤਂ ਕਰੋਨ੍ਤੋ ਮੁਖਧੋਵਨਂ ਦੇਤਿ, ਨ੍ਹਾਨੋਦਕਂ ਆਹਰਤਿ, ਦਨ੍ਤਕਟ੍ਠਂ ਦੇਤਿ, ਪਰਿਵੇਣਂ ਸਮ੍ਮਜ੍ਜਤਿ, ਅਰਞ੍ਞਤੋ ਮਧੁਰਾਨਿ ਫਲਾਫਲਾਨਿ ਆਹਰਿਤ੍ਵਾ ਸਤ੍ਥੁਨੋ ਦੇਤਿ. ਸਤ੍ਥਾ ਪਰਿਭੋਗਂ ਕਰੋਤਿ.
ਏਕਦਿਵਸਂ ਸਤ੍ਥਾ ਰਤ੍ਤਿਭਾਗਸਮਨਨ੍ਤਰੇ ਚਙ੍ਕਮਿਤ੍ਵਾ ਪਾਸਾਣਫਲਕੇ ਨਿਸੀਦਿ. ਹਤ੍ਥੀਪਿ ਅਵਿਦੂਰੇ ਠਾਨੇ ਅਟ੍ਠਾਸਿ. ਸਤ੍ਥਾ ਪਚ੍ਛਤੋ ਓਲੋਕੇਤ੍ਵਾ ਨ ਕਿਞ੍ਚਿ ਅਦ੍ਦਸ, ਏਵਂ ਪੁਰਤੋ ਚ ਉਭਯਪਸ੍ਸੇਸੁ ਚ. ਅਥਸ੍ਸ ‘‘ਸੁਖਂ ਵਤਾਹਂ ਅਞ੍ਞਤ੍ਰ ਤੇਹਿ ਭਣ੍ਡਨਕਾਰਕੇਹਿ ਵਸਾਮੀ’’ਤਿ ਚਿਤ੍ਤਂ ਉਪ੍ਪਜ੍ਜਿ. ਹਤ੍ਥਿਨੋਪਿ ‘‘ਮਯਾ ਨਾਮਿਤਸਾਖਂ ਅਞ੍ਞੇ ਖਾਦਨ੍ਤਾ ਨਤ੍ਥੀ’’ਤਿਆਦੀਨਿ ਚਿਨ੍ਤੇਤ੍ਵਾ – ‘‘ਸੁਖਂ ਵਤ ਏਕਕੋਵ ਵਸਾਮਿ, ਸਤ੍ਥੁ ਵਤ੍ਤਂ ਕਾਤੁਂ ਲਭਾਮੀ’’ਤਿ ਚਿਤ੍ਤਂ ਉਪ੍ਪਜ੍ਜਿ. ਸਤ੍ਥਾ ਅਤ੍ਤਨੋ ਚਿਤ੍ਤਂ ਓਲੋਕੇਤ੍ਵਾ – ‘‘ਮਮ ਤਾਵ ਈਦਿਸਂ ਚਿਤ੍ਤਂ, ਕੀਦਿਸਂ ਨੁ ਖੋ ਹਤ੍ਥਿਸ੍ਸਾ’’ਤਿ ਤਸ੍ਸਾਪਿ ਤਾਦਿਸਮੇਵ ਦਿਸ੍ਵਾ ‘‘ਸਮੇਤਿ ਨੋ ਚਿਤ੍ਤ’’ਨ੍ਤਿ ਇਮਂ ਉਦਾਨਂ ਉਦਾਨੇਸਿ –
‘‘ਏਤਂ ਨਾਗਸ੍ਸ ਨਾਗੇਨ, ਈਸਾਦਨ੍ਤਸ੍ਸ ਹਤ੍ਥਿਨੋ;
ਸਮੇਤਿ ਚਿਤ੍ਤਂ ਚਿਤ੍ਤੇਨ, ਯਦੇਕੋ ਰਮਤੀ ਵਨੇ’’ਤਿ. (ਮਹਾਵ. ੪੬੭);
ਅਥ ਖੋ ਸਮ੍ਬਹੁਲਾ ਭਿਕ੍ਖੂਤਿ ਅਥ ਏਵਂ ਤਥਾਗਤੇ ਤਤ੍ਥ ਵਿਹਰਨ੍ਤੇ ਪਞ੍ਚਸਤਾ ਦਿਸਾਸੁ ਵਸ੍ਸਂਵੁਤ੍ਥਾ ਭਿਕ੍ਖੂ. ਯੇਨਾਯਸ੍ਮਾ ਆਨਨ੍ਦੋਤਿ ‘‘ਸਤ੍ਥਾ ਕਿਰ ਭਿਕ੍ਖੁਸਙ੍ਘਂ ਪਣਾਮੇਤ੍ਵਾ ਅਰਞ੍ਞਂ ਪਵਿਟ੍ਠੋ’’ਤਿ ਅਤ੍ਤਨੋ ਧਮ੍ਮਤਾਯ ਸਤ੍ਥੁ ਸਨ੍ਤਿਕਂ ਗਨ੍ਤੁਂ ਅਸਕ੍ਕੋਨ੍ਤਾ ਯੇਨਾਯਸ੍ਮਾ ਆਨਨ੍ਦੋ, ਤੇਨੁਪਸਙ੍ਕਮਿਂਸੁ.
ਅਨਨ੍ਤਰਾ ਆਸਵਾਨਂ ਖਯੋਤਿ ਮਗ੍ਗਾਨਨ੍ਤਰਂ ਅਰਹਤ੍ਤਫਲਂ. ਵਿਚਯਸੋਤਿ ਵਿਚਯੇਨ, ਤੇਸਂ ਤੇਸਂ ਧਮ੍ਮਾਨਂ ਸਭਾਵਵਿਚਿਨਨਸਮਤ੍ਥੇਨ ਞਾਣੇਨ ਪਰਿਚ੍ਛਿਨ੍ਦਿਤ੍ਵਾਤਿ ਅਤ੍ਥੋ. ਧਮ੍ਮੋਤਿ ਸਾਸਨਧਮ੍ਮੋ. ਚਤ੍ਤਾਰੋ ਸਤਿਪਟ੍ਠਾਨਾਤਿਆਦਿ ਯੇ ਯੇ ਕੋਟ੍ਠਾਸੇ ਪਰਿਚ੍ਛਿਨ੍ਦਿਤ੍ਵਾ ਧਮ੍ਮੋ ਦੇਸਿਤੋ, ਤੇਸਂ ਪਕਾਸਨਤ੍ਥਾਯ ਵੁਤ੍ਤਂ. ਸਮਨੁਪਸ੍ਸਨਾਤਿ ਦਿਟ੍ਠਿਸਮਨੁਪਸ੍ਸਨਾ. ਸਙ੍ਖਾਰੋ ਸੋਤਿ ਦਿਟ੍ਠਿਸਙ੍ਖਾਰੋ ਸੋ. ਤਤੋਜੋ ਸੋ ਸਙ੍ਖਾਰੋਤਿ ਤਤੋ ਤਣ੍ਹਾਤੋ ਸੋ ਸਙ੍ਖਾਰੋ ਜਾਤੋ. ਤਣ੍ਹਾਸਮ੍ਪਯੁਤ੍ਤੇਸੁ ਚਿਤ੍ਤੇਸੁਪਿ ਚਤੂਸੁ ਚਿਤ੍ਤੇਸੁ ਏਸ ਜਾਯਤਿ. ਸਾਪਿ ਤਣ੍ਹਾਤਿ ਸਾ ਦਿਟ੍ਠਿਸਙ੍ਖਾਰਸ੍ਸ ਪਚ੍ਚਯਭੂਤਾ ਤਣ੍ਹਾ. ਸਾਪਿ ਵੇਦਨਾਤਿ ਸਾ ਤਣ੍ਹਾਯ ਪਚ੍ਚਯਭੂਤਾ ਵੇਦਨਾ. ਸੋਪਿ ਫਸ੍ਸੋਤਿ ਸੋ ਵੇਦਨਾਯ ਪਚ੍ਚਯੋ ਅਵਿਜ੍ਜਾਸਮ੍ਫਸ੍ਸੋ. ਸਾਪਿ ਅਵਿਜ੍ਜਾਤਿ ਸਾ ਫਸ੍ਸਸਮ੍ਪਯੁਤ੍ਤਾ ਅਵਿਜ੍ਜਾ.
ਨੋ ਚਸ੍ਸਂ, ਨੋ ਚ ਮੇ ਸਿਯਾਤਿ ਸਚੇ ਅਹਂ ਨ ਭਵੇਯ੍ਯਂ, ਮਮ ਪਰਿਕ੍ਖਾਰੋਪਿ ਨ ਭਵੇਯ੍ਯ. ਨਾਭਵਿਸ੍ਸਂ, ਨ ਮੇ ਭਵਿਸ੍ਸਤੀਤਿ ਸਚੇ ਪਨ ਆਯਤਿਮ੍ਪਿ ਅਹਂ ਨ ਭਵਿਸ੍ਸਾਮਿ, ਏਵਂ ਮਮ ਪਰਿਕ੍ਖਾਰੋਪਿ ਨ ਭਵਿਸ੍ਸਤਿ. ਏਤ੍ਤਕੇ ਠਾਨੇ ਭਗਵਾ ਤੇਨ ਭਿਕ੍ਖੁਨਾ ਗਹਿਤਗਹਿਤਦਿਟ੍ਠਿਂ ਵਿਸ੍ਸਜ੍ਜਾਪੇਨ੍ਤੋ ਆਗਤੋ ਪੁਗ੍ਗਲਜ੍ਝਾਸਯੇਨਪਿ ਦੇਸਨਾਵਿਲਾਸੇਨਪਿ. ਤਤੋਜੋ ਸੋ ਸਙ੍ਖਾਰੋਤਿ ਤਣ੍ਹਾਸਮ੍ਪਯੁਤ੍ਤਚਿਤ੍ਤੇ ਵਿਚਿਕਿਚ੍ਛਾਵ ਨਤ੍ਥਿ, ਕਥਂ ਵਿਚਿਕਿਚ੍ਛਾਸਙ੍ਖਾਰੋ ਤਣ੍ਹਾਤੋ ਜਾਯਤੀਤਿ? ਅਪ੍ਪਹੀਨਤ੍ਤਾ. ਯਸ੍ਸ ਹਿ ਤਣ੍ਹਾਯ ਅਪ੍ਪਹੀਨਾਯ ਸੋ ਉਪ੍ਪਜ੍ਜਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਦਿਟ੍ਠਿਯਾਪਿ ਏਸੇਵ ਨਯੋ ਲਬ੍ਭਤਿਯੇਵ ਚਤੂਸੁ ਹਿ ਚਿਤ੍ਤੁਪ੍ਪਾਦੇਸੁ ਸਮ੍ਪਯੁਤ੍ਤਦਿਟ੍ਠਿ ਨਾਮ ਨਤ੍ਥਿ. ਯਸ੍ਮਾ ਪਨ ਤਣ੍ਹਾਯ ਅਪ੍ਪਹੀਨਤ੍ਤਾ ਸਾ ਉਪ੍ਪਜ੍ਜਤਿ, ਤਸ੍ਮਾ ਤਂ ਸਨ੍ਧਾਯ ਤਤ੍ਰਾਪਿ ਅਯਮਤ੍ਥੋ ਯੁਜ੍ਜਤਿ. ਇਤਿ ਇਮਸ੍ਮਿਂ ਸੁਤ੍ਤੇ ਤੇਵੀਸਤਿਯਾ ਠਾਨੇਸੁ ਅਰਹਤ੍ਤਂ ਪਾਪੇਤ੍ਵਾ ਵਿਪਸ੍ਸਨਾ ਕਥਿਤਾ. ਨਵਮਂ.
੧੦. ਪੁਣ੍ਣਮਸੁਤ੍ਤਵਣ੍ਣਨਾ
੮੨. ਦਸਮੇ ਤਦਹੁਪੋਸਥੇਤਿਆਦਿ ਪਵਾਰਣਸੁਤ੍ਤੇ ਵਿਤ੍ਥਾਰਿਤਮੇਵ. ਕਿਞ੍ਚਿਦੇਵ ਦੇਸਨ੍ਤਿ ਕਿਞ੍ਚਿ ਕਾਰਣਂ. ਸਕੇ ਆਸਨੇ ਨਿਸੀਦਿਤ੍ਵਾ ਪੁਚ੍ਛ ਯਦਾਕਙ੍ਖਸੀਤਿ ਕਸ੍ਮਾ ਏਵਮਾਹ? ਸੋ ਕਿਰ ਭਿਕ੍ਖੁ ਪਞ੍ਚਸਤਭਿਕ੍ਖੁਪਰਿਵਾਰੋ. ਆਚਰਿਯੇ ਪਨ ਠਿਤਕੇ ਪੁਚ੍ਛਨ੍ਤੇ ਸਚੇ ਤੇ ਭਿਕ੍ਖੂ ਨਿਸੀਦਨ੍ਤਿ, ਸਤ੍ਥਰਿ ਗਾਰਵਂ ਕਤਂ ਹੋਤਿ, ਆਚਰਿਯੇ ਅਗਾਰਵਂ. ਸਚੇ ਉਟ੍ਠਹਨ੍ਤਿ, ਆਚਰਿਯੇ ਗਾਰਵਂ ਕਤਂ ਹੋਤਿ, ਸਤ੍ਥਰਿ ਅਗਾਰਵਂ. ਇਤਿ ਨੇਸਂ ਚਿਤ੍ਤਂ ਅਨੇਕਗ੍ਗਂ ਭਵਿਸ੍ਸਤਿ, ਦੇਸਨਂ ਸਮ੍ਪਟਿਚ੍ਛਿਤੁਂ ਨ ਸਕ੍ਖਿਸ੍ਸਨ੍ਤਿ. ਤਸ੍ਮਿਂ ਪਨ ਨਿਸੀਦਿਤ੍ਵਾ ਪੁਚ੍ਛਨ੍ਤੇ ਤੇਸਂ ਚਿਤ੍ਤਂ ਏਕਗ੍ਗਂ ਭਵਿਸ੍ਸਤਿ, ਦੇਸਨਂ ਸਮ੍ਪਟਿਚ੍ਛਿਤੁਂ ਸਕ੍ਖਿਸ੍ਸਨ੍ਤੀਤਿ ਞਤ੍ਵਾ ਭਗਵਾ ਏਵਮਾਹ. ਇਮੇ ਨੁ ਖੋ, ਭਨ੍ਤੇਤਿ ਅਯਂ ਥੇਰੋ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਆਚਰਿਯੋ, ਪਞ੍ਚਕ੍ਖਨ੍ਧਮਤ੍ਤਮ੍ਪਿ ਨਪ੍ਪਜਾਨਾਤੀਤਿ ਨ ਵਤ੍ਤਬ੍ਬੋ. ਪਞ੍ਹਂ ਪੁਚ੍ਛਨ੍ਤੇਨ ਪਨ ‘‘ਇਮੇ ਪਞ੍ਚੁਪਾਦਾਨਕ੍ਖਨ੍ਧਾ, ਨ ਅਞ੍ਞੇ’’ਤਿ ਏਵਂ ਜਾਨਨ੍ਤੇਨ ਵਿਯ ਹੁਤ੍ਵਾ ਪੁਚ੍ਛਿਤੁਂ ਨ ਵਟ੍ਟਤਿ, ਤਸ੍ਮਾ ਅਜਾਨਨ੍ਤੋ ਵਿਯ ਪੁਚ੍ਛਤਿ. ਤੇਪਿ ਚਸ੍ਸ ਅਨ੍ਤੇਵਾਸਿਕਾ ‘‘ਅਮ੍ਹਾਕਂ ਆਚਰਿਯੋ ‘ਅਹਂ ਜਾਨਾਮੀ’ਤਿ ਨ ਕਥੇਤਿ, ਸਬ੍ਬਞ੍ਞੁਤਞ੍ਞਾਣੇਨ ਪਨ ਸਦ੍ਧਿਂ ਸਂਸਨ੍ਦਿਤ੍ਵਾਵ ਕਥੇਤੀ’’ਤਿ ਸੋਤਬ੍ਬਂ ਸਦ੍ਧਾਤਬ੍ਬਂ ਮਞ੍ਞਿਸ੍ਸਨ੍ਤੀਤਿਪਿ ਅਜਾਨਨ੍ਤੋ ਵਿਯ ਪੁਚ੍ਛਤਿ.
ਛਨ੍ਦਮੂਲਕਾਤਿ ਤਣ੍ਹਾਛਨ੍ਦਮੂਲਕਾ. ਨ ਖੋ ਭਿਕ੍ਖੁ ਤਞ੍ਞੇਵ ਉਪਾਦਾਨਂ ਤੇ ਪਞ੍ਚੁਪਾਦਾਨਕ੍ਖਨ੍ਧਾਤਿ ਯਸ੍ਮਾ ਛਨ੍ਦਰਾਗਮਤ੍ਤਂ ਪਞ੍ਚਕ੍ਖਨ੍ਧਾ ਨ ਹੋਤਿ, ਤਸ੍ਮਾ ਇਦਂ ਵੁਤ੍ਤਂ. ਯਸ੍ਮਾ ਪਨ ਸਹਜਾਤਤੋ ਵਾ ਆਰਮ੍ਮਣਤੋ ਵਾ ਖਨ੍ਧੇ ਮੁਞ੍ਚਿਤ੍ਵਾ ਉਪਾਦਾਨਂ ਨਤ੍ਥਿ, ਤਸ੍ਮਾ ਨਾਪਿ ਅਞ੍ਞਤ੍ਰ ਪਞ੍ਚਹਿ ਉਪਾਦਾਨਕ੍ਖਨ੍ਧੇਹਿ ਉਪਾਦਾਨਨ੍ਤਿ ਵੁਤ੍ਤਂ. ਤਣ੍ਹਾਸਮ੍ਪਯੁਤ੍ਤਸ੍ਮਿਞ੍ਹਿ ਚਿਤ੍ਤੇ ਵਤ੍ਤਮਾਨੇ ਤਂਚਿਤ੍ਤਸਮੁਟ੍ਠਾਨਰੂਪਂ ਰੂਪਕ੍ਖਨ੍ਧੋ, ਠਪੇਤ੍ਵਾ ਤਂ ਤਣ੍ਹਂ ਸੇਸਾ ਅਰੂਪਧਮ੍ਮਾ ਚਤ੍ਤਾਰੋ ਖਨ੍ਧਾਤਿ ਸਹਜਾਤਤੋਪਿ ਖਨ੍ਧੇ ਮੁਞ੍ਚਿਤ੍ਵਾ ਉਪਾਦਾਨਂ ਨਤ੍ਥਿ. ਉਪਾਦਾਨਸ੍ਸ ਪਨ ਰੂਪਾਦੀਸੁ ਅਞ੍ਞਤਰਂ ਆਰਮ੍ਮਣਂ ਕਤ੍ਵਾ ਉਪ੍ਪਜ੍ਜਨਤੋ ਆਰਮ੍ਮਣਤੋਪਿ ਪਞ੍ਚਕ੍ਖਨ੍ਧੇ ਮੁਞ੍ਚਿਤ੍ਵਾ ਉਪਾਦਾਨਂ ਨਤ੍ਥਿ. ਛਨ੍ਦਰਾਗਵੇਮਤ੍ਤਤਾਤਿ ਛਨ੍ਦਰਾਗਨਾਨਤ੍ਤਂ. ਏਵਂ ਖੋ ਭਿਕ੍ਖੂਤਿ ਏਵਂ ਰੂਪਾਰਮ੍ਮਣਸ੍ਸ ਛਨ੍ਦਰਾਗਸ੍ਸ ਵੇਦਨਾਦੀਸੁ ਅਞ੍ਞਤਰਂ ਆਰਮ੍ਮਣਂ ਅਕਰਣਤੋ ਸਿਯਾ ਛਨ੍ਦਰਾਗਵੇਮਤ੍ਤਤਾ. ਖਨ੍ਧਾਧਿਵਚਨਨ੍ਤਿ ਖਨ੍ਧਾਤਿ ਅਯਂ ਪਞ੍ਞਤ੍ਤਿ. ਅਯਂ ਪਨ ਅਨੁਸਨ੍ਧਿ ਨ ਘਟਿਯਤਿ, ਕਿਞ੍ਚਾਪਿ ਨ ਘਟਿਯਤਿ, ਸਾਨੁਸਨ੍ਧਿਕਾਵ ਪੁਚ੍ਛਾ, ਸਾਨੁਸਨ੍ਧਿਕਂ ਵਿਸ੍ਸਜ੍ਜਨਂ. ਅਯਞ੍ਹਿ ਥੇਰੋ ਤੇਸਂ ਤੇਸਂ ਭਿਕ੍ਖੂਨਂ ਅਜ੍ਝਾਸਯੇਨ ਪੁਚ੍ਛਤਿ, ਸਤ੍ਥਾਪਿ ਤੇਸਂ ਤੇਸਂ ਅਜ੍ਝਾਸਯੇਨੇਵ ਵਿਸ੍ਸਜ੍ਜੇਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਦਸਮਂ.
ਇਮਸ੍ਸ ਚ ਪਨ ਵਗ੍ਗਸ੍ਸ ਏਕੇਕਸ੍ਮਿਂ ਸੁਤ੍ਤੇ ਪਞ੍ਚਸਤਾ ਪਞ੍ਚਸਤਾ ਭਿਕ੍ਖੂ ਅਰਹਤ੍ਤਂ ਪਤ੍ਤਾਤਿ.
ਖਜ੍ਜਨੀਯਵਗ੍ਗੋ ਅਟ੍ਠਮੋ.