੯. ਥੇਰਵਗ੍ਗੋ

੧. ਆਨਨ੍ਦਸੁਤ੍ਤਵਣ੍ਣਨਾ

੮੩. ਥੇਰਵਗ੍ਗਸ੍ਸ ਪਠਮੇ ਮਨ੍ਤਾਣਿਪੁਤ੍ਤੋਤਿ, ਮਨ੍ਤਾਣਿਯਾ ਨਾਮ ਬ੍ਰਾਹ੍ਮਣਿਯਾ ਪੁਤ੍ਤੋ. ਉਪਾਦਾਯਾਤਿ ਆਗਮ੍ਮ ਆਰਬ੍ਭ ਸਨ੍ਧਾਯ ਪਟਿਚ੍ਚ. ਅਸ੍ਮੀਤਿ ਹੋਤੀਤਿ ਅਸ੍ਮੀਤਿ ਏਵਂ ਪਵਤ੍ਤਂ ਤਣ੍ਹਾਮਾਨਦਿਟ੍ਠਿਪਪਞ੍ਚਤ੍ਤਯਂ ਹੋਤਿ. ਦਹਰੋਤਿ ਤਰੁਣੋ. ਯੁਵਾਤਿ ਯੋਬ੍ਬਨੇਨ ਸਮਨ੍ਨਾਗਤੋ. ਮਣ੍ਡਨਕਜਾਤਿਕੋਤਿ ਮਣ੍ਡਨਕਸਭਾਵੋ ਮਣ੍ਡਨਕਸੀਲੋ. ਮੁਖਨਿਮਿਤ੍ਤਨ੍ਤਿ ਮੁਖਪਟਿਬਿਮ੍ਬਂ. ਤਞ੍ਹਿ ਪਰਿਸੁਦ੍ਧਂ ਆਦਾਸਮਣ੍ਡਲਂ ਪਟਿਚ੍ਚ ਪਞ੍ਞਾਯਤਿ. ਕਿਂ ਪਨ ਤਂ ਓਲੋਕਯਤੋ ਸਕਮੁਖਂ ਪਞ੍ਞਾਯਤਿ, ਪਰਮੁਖਨ੍ਤਿ? ਯਦਿ ਸਕਂ ਭਵੇਯ੍ਯ, ਪਰਮ੍ਮੁਖਂ ਹੁਤ੍ਵਾ ਪਞ੍ਞਾਯੇਯ੍ਯ, ਅਥ ਪਰਸ੍ਸ ਭਵੇਯ੍ਯ, ਵਣ੍ਣਾਦੀਹਿ ਅਸਦਿਸਂ ਹੁਤ੍ਵਾ ਪਞ੍ਞਾਯੇਯ੍ਯ. ਤਸ੍ਮਾ ਨ ਤਂ ਅਤ੍ਤਨੋ, ਨ ਪਰਸ੍ਸ, ਆਦਾਸਂ ਪਨ ਨਿਸ੍ਸਾਯ ਨਿਭਾਸਰੂਪਂ ਨਾਮ ਤਂ ਪਞ੍ਞਾਯਤੀਤਿ ਵਦਨ੍ਤਿ. ਅਥ ਯਂ ਉਦਕੇ ਪਞ੍ਞਾਯਤਿ, ਤਂ ਕੇਨ ਕਾਰਣੇਨਾਤਿ? ਮਹਾਭੂਤਾਨਂ ਵਿਸੁਦ੍ਧਤਾਯ. ਧਮ੍ਮੋ ਮੇ ਅਭਿਸਮਿਤੋਤਿ ਮਯਾ ਞਾਣੇਨ ਚਤੁਸਚ੍ਚਧਮ੍ਮੋ ਅਭਿਸਮਾਗਤੋ, ਸੋਤਾਪਨ੍ਨੋਸ੍ਮਿ ਜਾਤੋਤਿ ਕਥੇਸਿ. ਪਠਮਂ.

੨. ਤਿਸ੍ਸਸੁਤ੍ਤਵਣ੍ਣਨਾ

੮੪. ਦੁਤਿਯੇ ਮਧੁਰਕਜਾਤੋ ਵਿਯਾਤਿ ਸਞ੍ਜਾਤਗਰੁਭਾਵੋ ਵਿਯ ਅਕਮ੍ਮਞ੍ਞੋ. ਦਿਸਾਪਿ ਮੇਤਿ ਅਯਂ ਪੁਰਤ੍ਥਿਮਾ ਅਯਂ ਦਕ੍ਖਿਣਾਤਿ ਏਵਂ ਦਿਸਾਪਿ ਮਯ੍ਹਂ ਨ ਪਕ੍ਖਾਯਨ੍ਤਿ, ਨ ਪਾਕਟਾ ਹੋਨ੍ਤੀਤਿ ਵਦਤਿ. ਧਮ੍ਮਾਪਿ ਮਂ ਨ ਪਟਿਭਨ੍ਤੀਤਿ ਪਰਿਯਤ੍ਤਿਧਮ੍ਮਾਪਿ ਮਯ੍ਹਂ ਨ ਉਪਟ੍ਠਹਨ੍ਤਿ, ਉਗ੍ਗਹਿਤਂ ਸਜ੍ਝਾਯਿਤਂ ਨ ਦਿਸ੍ਸਤੀਤਿ ਵਦਤਿ. ਵਿਚਿਕਿਚ੍ਛਾਤਿ ਨੋ ਮਹਾਵਿਚਿਕਿਚ੍ਛਾ. ਨ ਹਿ ਤਸ੍ਸ ‘‘ਸਾਸਨਂ ਨਿਯ੍ਯਾਨਿਕਂ ਨੁ ਖੋ, ਨ ਨੁ ਖੋ’’ਤਿ ਵਿਮਤਿ ਉਪ੍ਪਜ੍ਜਤਿ. ਏਵਂ ਪਨਸ੍ਸ ਹੋਤਿ ‘‘ਸਕ੍ਖਿਸ੍ਸਾਮਿ ਨੁ ਖੋ ਸਮਣਧਮ੍ਮਂ ਕਾਤੁਂ, ਉਦਾਹੁ ਪਤ੍ਤਚੀਵਰਧਾਰਣਮਤ੍ਤਮੇਵ ਕਰਿਸ੍ਸਾਮੀ’’ਤਿ.

ਕਾਮਾਨਮੇਤਂ ਅਧਿਵਚਨਨ੍ਤਿ ਯਥਾ ਹਿ ਨਿਨ੍ਨਂ ਪਲ੍ਲਲਂ ਓਲੋਕੇਨ੍ਤਸ੍ਸ ਦਸ੍ਸਨਰਾਮਣੇਯ੍ਯਕਮਤ੍ਤਂ ਅਤ੍ਥਿ, ਯੋ ਪਨੇਤ੍ਥ ਓਤਰਤਿ, ਤਂ ਚਣ੍ਡਮੀਨਾਕੁਲਤਾਯ ਆਕਡ੍ਢਿਤ੍ਵਾ ਅਨਯਬ੍ਯਸਨਂ ਪਾਪੇਤਿ, ਏਵਮੇਵਂ ਪਞ੍ਚਸੁ ਕਾਮਗੁਣੇਸੁ ਚਕ੍ਖੁਦ੍ਵਾਰਾਦੀਨਂ ਆਰਮ੍ਮਣੇ ਰਾਮਣੇਯ੍ਯਕਮਤ੍ਤਂ ਅਤ੍ਥਿ, ਯੋ ਪਨੇਤ੍ਥ ਗੇਧਂ ਆਪਜ੍ਜਤਿ, ਤਂ ਆਕਡ੍ਢਿਤ੍ਵਾ ਨਿਰਯਾਦੀਸੁ ਏਵ ਪਕ੍ਖਿਪਨ੍ਤਿ. ਅਪ੍ਪਸ੍ਸਾਦਾ ਹਿ ਕਾਮਾ ਬਹੁਦੁਕ੍ਖਾ ਬਹੁਪਾਯਾਸਾ, ਆਦੀਨਵੋ ਏਤ੍ਥ ਭਿਯ੍ਯੋਤਿ ਇਮਂ ਅਤ੍ਥਵਸਂ ਪਟਿਚ੍ਚ ‘‘ਕਾਮਾਨਮੇਤਂ ਅਧਿਵਚਨ’’ਨ੍ਤਿ ਵੁਤ੍ਤਂ. ਅਹਮਨੁਗ੍ਗਹੇਨਾਤਿ ਅਹਂ ਧਮ੍ਮਾਮਿਸਾਨੁਗ੍ਗਹੇਹਿ ਅਨੁਗ੍ਗਣ੍ਹਾਮਿ. ਅਭਿਨਨ੍ਦੀਤਿ ਸਮ੍ਪਟਿਚ੍ਛਿ. ਨ ਕੇਵਲਞ੍ਚ ਅਭਿਨਨ੍ਦਿ, ਇਮਂ ਪਨ ਸਤ੍ਥੁ ਸਨ੍ਤਿਕਾ ਅਸ੍ਸਾਸਂ ਲਭਿਤ੍ਵਾ ਘਟੇਨ੍ਤੋ ਵਾਯਮਨ੍ਤੋ ਕਤਿਪਾਹੇਨ ਅਰਹਤ੍ਤੇ ਪਤਿਟ੍ਠਾਸਿ. ਦੁਤਿਯਂ.

੩. ਯਮਕਸੁਤ੍ਤਵਣ੍ਣਨਾ

੮੫. ਤਤਿਯੇ ਦਿਟ੍ਠਿਗਤਨ੍ਤਿ ਸਚੇ ਹਿਸ੍ਸ ਏਵਂ ਭਵੇਯ੍ਯ ‘‘ਸਙ੍ਖਾਰਾ ਉਪ੍ਪਜ੍ਜਨ੍ਤਿ ਚੇਵ ਨਿਰੁਜ੍ਝਨ੍ਤਿ ਚ, ਸਙ੍ਖਾਰਪ੍ਪਵਤ੍ਤਮੇਵ ਅਪ੍ਪਵਤ੍ਤਂ ਹੋਤੀ’’ਤਿ, ਦਿਟ੍ਠਿਗਤਂ ਨਾਮ ਨ ਭਵੇਯ੍ਯ, ਸਾਸਨਾਵਚਰਿਕਂ ਞਾਣਂ ਭਵੇਯ੍ਯ. ਯਸ੍ਮਾ ਪਨਸ੍ਸ ‘‘ਸਤ੍ਤੋ ਉਚ੍ਛਿਜ੍ਜਤਿ ਵਿਨਸ੍ਸਤੀ’’ਤਿ ਅਹੋਸਿ, ਤਸ੍ਮਾ ਦਿਟ੍ਠਿਗਤਂ ਨਾਮ ਜਾਤਂ. ਥਾਮਸਾ ਪਰਾਮਾਸਾਤਿ ਦਿਟ੍ਠਿਥਾਮੇਨ ਚੇਵ ਦਿਟ੍ਠਿਪਰਾਮਾਸੇਨ ਚ.

ਯੇਨਾਯਸ੍ਮਾ ਸਾਰਿਪੁਤ੍ਤੋਤਿ ਯਥਾ ਨਾਮ ਪਚ੍ਚਨ੍ਤੇ ਕੁਪਿਤੇ ਤਂ ਵੂਪਸਮੇਤੁਂ ਅਸਕ੍ਕੋਨ੍ਤਾ ਰਾਜਪੁਰਿਸਾ ਸੇਨਾਪਤਿਸ੍ਸ ਵਾ ਰਞ੍ਞੋ ਵਾ ਸਨ੍ਤਿਕਂ ਗਚ੍ਛਨ੍ਤਿ, ਏਵਂ ਦਿਟ੍ਠਿਗਤਵਸੇਨ ਤਸ੍ਮਿਂ ਥੇਰੇ ਕੁਪਿਤੇ ਤਂ ਵੂਪਸਮੇਤੁਂ ਅਸਕ੍ਕੋਨ੍ਤਾ ਤੇ ਭਿਕ੍ਖੂ ਯੇਨ ਧਮ੍ਮਰਾਜਸ੍ਸ ਧਮ੍ਮਸੇਨਾਪਤਿ ਆਯਸ੍ਮਾ ਸਾਰਿਪੁਤ੍ਤੋ, ਤੇਨੁਪਸਙ੍ਕਮਿਂਸੁ. ਏਵਂਬ੍ਯਾਖੋਤਿ ਤੇਸਂ ਭਿਕ੍ਖੂਨਂ ਸਨ੍ਤਿਕੇ ਵਿਯ ਥੇਰਸ੍ਸ ਸਮ੍ਮੁਖਾ ਪਗ੍ਗਯ੍ਹ ਵਤ੍ਤੁਂ ਅਸਕ੍ਕੋਨ੍ਤੋ ਓਲਮ੍ਬਨ੍ਤੇਨ ਹਦਯੇਨ ‘‘ਏਵਂਬ੍ਯਾਖੋ’’ਤਿ ਆਹ. ਤਂ ਕਿਂ ਮਞ੍ਞਸਿ, ਆਵੁਸੋਤਿ? ਇਦਂ ਥੇਰੋ ਤਸ੍ਸ ਵਚਨਂ ਸੁਤ੍ਵਾ, ‘‘ਨਾਯਂ ਅਤ੍ਤਨੋ ਲਦ੍ਧਿਯਂ ਦੋਸਂ ਪਸ੍ਸਤਿ, ਧਮ੍ਮਦੇਸਨਾਯ ਅਸ੍ਸ ਤਂ ਪਾਕਟਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਿਪਰਿਵਟ੍ਟਂ ਦੇਸਨਂ ਦੇਸੇਤੁਂ ਆਰਭਿ.

ਤਂ ਕਿਂ ਮਞ੍ਞਸਿ, ਆਵੁਸੋ ਯਮਕ, ਰੂਪਂ ਤਥਾਗਤੋਤਿ ਇਦਂ ਕਸ੍ਮਾ ਆਰਦ੍ਧਂ? ਅਨੁਯੋਗਵਤ੍ਤਂ ਦਾਪਨਤ੍ਥਂ. ਤਿਪਰਿਵਟ੍ਟਦੇਸਨਾਵਸਾਨਸ੍ਮਿਞ੍ਹਿ ਥੇਰੋ ਸੋਤਾਪਨ੍ਨੋ ਜਾਤੋ. ਅਥ ਨਂ ਅਨੁਯੋਗਵਤ੍ਤਂ ਦਾਪੇਤੁਂ ‘‘ਤਂ ਕਿਂ ਮਞ੍ਞਸੀ’’ਤਿਆਦਿਮਾਹ? ਤਥਾਗਤੋਤਿ ਸਤ੍ਤੋ. ਰੂਪਂ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਨ੍ਤਿ ਇਮੇ ਪਞ੍ਚਕ੍ਖਨ੍ਧੇ ਸਮ੍ਪਿਣ੍ਡੇਤ੍ਵਾ ‘‘ਤਥਾਗਤੋ’’ਤਿ ਸਮਨੁਪਸ੍ਸਸੀਤਿ ਪੁਚ੍ਛਤਿ. ਏਤ੍ਥ ਚ ਤੇ, ਆਵੁਸੋਤਿ ਇਦਂ ਥੇਰਸ੍ਸ ਅਨੁਯੋਗੇ ਭੁਮ੍ਮਂ. ਇਦਂ ਵੁਤ੍ਤਂ ਹੋਤਿ – ਏਤ੍ਥ ਚ ਤੇ ਏਤ੍ਤਕੇ ਠਾਨੇ ਦਿਟ੍ਠੇਵ ਧਮ੍ਮੇ ਸਚ੍ਚਤੋ ਥਿਰਤੋ ਸਤ੍ਤੇ ਅਨੁਪਲਬ੍ਭਿਯਮਾਨੇਤਿ. ਸਚੇ ਤਂ, ਆਵੁਸੋਤਿ ਇਦਮੇਤਂ ਅਞ੍ਞਂ ਬ੍ਯਾਕਰਾਪੇਤੁਕਾਮੋ ਪੁਚ੍ਛਤਿ. ਯਂ ਦੁਕ੍ਖਂ ਤਂ ਨਿਰੁਦ੍ਧਨ੍ਤਿ ਯਂ ਦੁਕ੍ਖਂ, ਤਦੇਵ ਨਿਰੁਦ੍ਧਂ, ਅਞ੍ਞੋ ਸਤ੍ਤੋ ਨਿਰੁਜ੍ਝਨਕੋ ਨਾਮ ਨਤ੍ਥਿ, ਏਵਂ ਬ੍ਯਾਕਰੇਯ੍ਯਨ੍ਤਿ ਅਤ੍ਥੋ.

ਏਤਸ੍ਸੇਵ ਅਤ੍ਥਸ੍ਸਾਤਿ ਏਤਸ੍ਸ ਪਠਮਮਗ੍ਗਸ੍ਸ. ਭਿਯ੍ਯੋਸੋਮਤ੍ਤਾਯ ਞਾਣਾਯਾਤਿ ਅਤਿਰੇਕਪ੍ਪਮਾਣਸ੍ਸ ਞਾਣਸ੍ਸ ਅਤ੍ਥਾਯ, ਸਹਵਿਪਸ੍ਸਨਕਾਨਂ ਉਪਰਿ ਚ ਤਿਣ੍ਣਂ ਮਗ੍ਗਾਨਂ ਆਵਿਭਾਵਤ੍ਥਾਯਾਤਿ ਅਤ੍ਥੋ. ਆਰਕ੍ਖਸਮ੍ਪਨ੍ਨੋਤਿ ਅਨ੍ਤੋਆਰਕ੍ਖੇਨ ਚੇਵ ਬਹਿਆਰਕ੍ਖੇਨ ਚ ਸਮਨ੍ਨਾਗਤੋ. ਅਯੋਗਕ੍ਖੇਮਕਾਮੋਤਿ ਚਤੂਹਿ ਯੋਗੇਹਿ ਖੇਮਭਾਵਂ ਅਨਿਚ੍ਛਨ੍ਤੋ. ਪਸਯ੍ਹਾਤਿ ਪਸਯ੍ਹਿਤ੍ਵਾ ਅਭਿਭਵਿਤ੍ਵਾ. ਅਨੁਪਖਜ੍ਜਾਤਿ ਅਨੁਪਵਿਸਿਤ੍ਵਾ.

ਪੁਬ੍ਬੁਟ੍ਠਾਯੀਤਿਆਦੀਸੁ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ਆਸਨਤੋ ਪਠਮਤਰਂ ਵੁਟ੍ਠਾਤੀਤਿ ਪੁਬ੍ਬੁਟ੍ਠਾਯੀ. ਤਸ੍ਸ ਆਸਨਂ ਦਤ੍ਵਾ ਤਸ੍ਮਿਂ ਨਿਸਿਨ੍ਨੇ ਪਚ੍ਛਾ ਨਿਪਤਤਿ ਨਿਸੀਦਤੀਤਿ, ਪਚ੍ਛਾਨਿਪਾਤੀ. ਪਾਤੋਵ ਵੁਟ੍ਠਾਯ ‘‘ਏਤ੍ਤਕਾ ਕਸਿਤੁਂ ਗਚ੍ਛਥ, ਏਤ੍ਤਕਾ ਵਪਿਤੁ’’ਨ੍ਤਿ ਵਾ ਸਬ੍ਬਪਠਮਂ ਵੁਟ੍ਠਾਤੀਤਿ ਪੁਬ੍ਬੁਟ੍ਠਾਯੀ. ਸਾਯਂ ਸਬ੍ਬੇਸੁ ਅਤ੍ਤਨੋ ਅਤ੍ਤਨੋ ਵਸਨਟ੍ਠਾਨਂ ਗਤੇਸੁ ਗੇਹਸ੍ਸ ਸਮਨ੍ਤਤੋ ਆਰਕ੍ਖਂ ਸਂਵਿਧਾਯ ਦ੍ਵਾਰਾਨਿ ਥਕੇਤ੍ਵਾ ਸਬ੍ਬਪਚ੍ਛਾ ਨਿਪਜ੍ਜਨਤੋਪਿ ਪਚ੍ਛਾਨਿਪਾਤੀ. ‘‘ਕਿਂ ਕਰੋਮਿ, ਅਯ੍ਯਪੁਤ੍ਤ? ਕਿਂ ਕਰੋਮਿ ਅਯ੍ਯਪੁਤ੍ਤਾ’’ਤਿ? ਮੁਖਂ ਓਲੋਕੇਨ੍ਤੋ ਕਿਂਕਾਰਂ ਪਟਿਸਾਵੇਤੀਤਿ ਕਿਂਕਾਰਪਟਿਸ੍ਸਾਵੀ. ਮਨਾਪਂ ਚਰਤੀਤਿ ਮਨਾਪਚਾਰੀ. ਪਿਯਂ ਵਦਤੀਤਿ ਪਿਯਵਾਦੀ. ਮਿਤ੍ਤਤੋਪਿ ਨਂ ਸਦ੍ਦਹੇਯ੍ਯਾਤਿ ਮਿਤ੍ਤੋ ਮੇ ਅਯਨ੍ਤਿ ਸਦ੍ਦਹੇਯ੍ਯ. ਵਿਸ੍ਸਾਸਂ ਆਪਜ੍ਜੇਯ੍ਯਾਤਿ ਏਕਤੋ ਪਾਨਭੋਜਨਾਦਿਂ ਕਰੋਨ੍ਤੋ ਵਿਸ੍ਸਾਸਿਕੋ ਭਵੇਯ੍ਯ. ਸਂਵਿਸ੍ਸਤ੍ਥੋਤਿ ਸੁਟ੍ਠੁ ਵਿਸ੍ਸਤ੍ਥੋ.

ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਬਾਲਗਹਪਤਿਪੁਤ੍ਤੋ ਵਿਯ ਹਿ ਵਟ੍ਟਸਨ੍ਨਿਸ੍ਸਿਤਕਾਲੇ ਅਸ੍ਸੁਤਵਾ ਪੁਥੁਜ੍ਜਨੋ, ਵਧਕਪਚ੍ਚਾਮਿਤ੍ਤੋ ਵਿਯ ਅਬਲਦੁਬ੍ਬਲਾ ਪਞ੍ਚਕ੍ਖਨ੍ਧਾ, ਵਧਕਪਚ੍ਚਾਮਿਤ੍ਤਸ੍ਸ ‘‘ਬਾਲਗਹਪਤਿਪੁਤ੍ਤਂ ਉਪਟ੍ਠਹਿਸ੍ਸਾਮੀ’’ਤਿ ਉਪਗਤਕਾਲੋ ਵਿਯ ਪਟਿਸਨ੍ਧਿਕ੍ਖਣੇ ਉਪਗਤਾ ਪਞ੍ਚਕ੍ਖਨ੍ਧਾ, ਤਸ੍ਸ ਹਿ ‘‘ਨ ਮੇ ਅਯਂ ਸਹਾਯੋ, ਵਧਕਪਚ੍ਚਤ੍ਥਿਕੋ ਅਯ’’ਨ੍ਤਿ ਅਜਾਨਨਕਾਲੋ ਵਿਯ ਵਟ੍ਟਨਿਸ੍ਸਿਤਪੁਥੁਜ੍ਜਨਸ੍ਸ ਪਞ੍ਚਕ੍ਖਨ੍ਧੇ ‘‘ਨ ਇਮੇ ਮਯ੍ਹ’’ਨ੍ਤਿ ਅਗਹੇਤ੍ਵਾ ‘‘ਮਮ ਰੂਪਂ, ਮਮ ਵੇਦਨਾ, ਮਮ ਸਞ੍ਞਾ, ਮਮ ਸਙ੍ਖਾਰਾ, ਮਮ ਵਿਞ੍ਞਾਣ’’ਨ੍ਤਿ ਗਹਿਤਕਾਲੋ, ਵਧਕਪਚ੍ਚਤ੍ਥਿਕਸ੍ਸ ‘‘ਮਿਤ੍ਤੋ ਮੇ ਅਯ’’ਨ੍ਤਿ ਗਹੇਤ੍ਵਾ ਸਕ੍ਕਾਰਕਰਣਕਾਲੋ ਵਿਯ ‘‘ਮਮ ਇਮੇ’’ਤਿ ਗਹੇਤ੍ਵਾ ਪਞ੍ਚਨ੍ਨਂ ਖਨ੍ਧਾਨਂ ਨ੍ਹਾਪਨਭੋਜਨਾਦੀਹਿ ਸਕ੍ਕਾਰਕਰਣਕਾਲੋ, ‘‘ਅਤਿਵਿਸ੍ਸਤ੍ਥੋ ਮੇ ਅਯ’’ਨ੍ਤਿ ਞਤ੍ਵਾ ਸਕ੍ਕਾਰਂ ਕਰੋਨ੍ਤਸ੍ਸੇਵ ਅਸਿਨਾ ਸੀਸਚ੍ਛਿਨ੍ਦਨਂ ਵਿਯ ਵਿਸ੍ਸਤ੍ਥਸ੍ਸ ਬਾਲਪੁਥੁਜ੍ਜਨਸ੍ਸ ਤਿਖਿਣੇਹਿ ਭਿਜ੍ਜਮਾਨੇਹਿ ਖਨ੍ਧੇਹਿ ਜੀਵਿਤਪਰਿਯਾਦਾਨਂ ਵੇਦਿਤਬ੍ਬਂ.

ਉਪੇਤੀਤਿ ਉਪਗਚ੍ਛਤਿ. ਉਪਾਦਿਯਤੀਤਿ ਗਣ੍ਹਾਤਿ. ਅਧਿਟ੍ਠਾਤੀਤਿ ਅਧਿਤਿਟ੍ਠਤਿ. ਅਤ੍ਤਾ ਮੇਤਿ ਅਯਂ ਮੇ ਅਤ੍ਤਾਤਿ. ਸੁਤਵਾ ਚ ਖੋ, ਆਵੁਸੋ, ਅਰਿਯਸਾਵਕੋਤਿ ਯਥਾ ਪਨ ਪਣ੍ਡਿਤੋ ਗਹਪਤਿਪੁਤ੍ਤੋ ਏਵਂ ਉਪਗਤਂ ਪਚ੍ਚਤ੍ਥਿਕਂ ‘‘ਪਚ੍ਚਤ੍ਥਿਕੋ ਮੇ ਅਯ’’ਨ੍ਤਿ ਞਤ੍ਵਾ ਅਪ੍ਪਮਤ੍ਤੋ ਤਾਨਿ ਤਾਨਿ ਕਮ੍ਮਾਨਿ ਕਾਰੇਤ੍ਵਾ ਅਨਤ੍ਥਂ ਪਰਿਹਰਤਿ, ਅਤ੍ਥਂ ਪਾਪੁਣਾਤਿ, ਏਵਂ ਸੁਤਵਾ ਅਰਿਯਸਾਵਕੋਪਿ ‘‘ਨ ਰੂਪਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿਆਦਿਨਾ ਨਯੇਨ ਪਞ੍ਚਕ੍ਖਨ੍ਧੇ ਅਹਨ੍ਤਿ ਵਾ ਮਮਨ੍ਤਿ ਵਾ ਅਗਹੇਤ੍ਵਾ, ‘‘ਪਚ੍ਚਤ੍ਥਿਕਾ ਮੇ ਏਤੇ’’ਤਿ ਞਤ੍ਵਾ ਰੂਪਸਤ੍ਤਕਅਰੂਪਸਤ੍ਤਕਾਦਿਵਸੇਨ ਵਿਪਸ੍ਸਨਾਯ ਯੋਜੇਤ੍ਵਾਵ ਤਤੋਨਿਦਾਨਂ ਦੁਕ੍ਖਂ ਪਰਿਵਜ੍ਜੇਤ੍ਵਾ ਅਗ੍ਗਫਲਂ ਅਰਹਤ੍ਤਂ ਪਾਪੁਣਾਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਤਤਿਯਂ.

੪. ਅਨੁਰਾਧਸੁਤ੍ਤਵਣ੍ਣਨਾ

੮੬. ਚਤੁਤ੍ਥੇ ਅਰਞ੍ਞਕੁਟਿਕਾਯਨ੍ਤਿ ਤਸ੍ਸੇਵ ਵਿਹਾਰਸ੍ਸ ਪਚ੍ਚਨ੍ਤੇ ਪਣ੍ਣਸਾਲਾਯਂ. ਤਂ ਤਥਾਗਤੋਤਿ ਤੁਮ੍ਹਾਕਂ ਸਤ੍ਥਾ ਤਥਾਗਤੋ ਤਂ ਸਤ੍ਤਂ ਤਥਾਗਤਂ. ਅਞ੍ਞਤ੍ਰ ਇਮੇਹੀਤਿ ਤਸ੍ਸ ਕਿਰ ਏਵਂ ਅਹੋਸਿ ‘‘ਇਮੇ ਸਾਸਨਸ੍ਸ ਪਟਿਪਕ੍ਖਾ ਪਟਿਵਿਲੋਮਾ, ਯਥਾ ਇਮੇ ਭਣਨ੍ਤਿ, ਨ ਏਵਂ ਸਤ੍ਥਾ ਪਞ੍ਞਾਪੇਸ੍ਸਤਿ, ਅਞ੍ਞਥਾ ਪਞ੍ਞਾਪੇਸ੍ਸਤੀ’’ਤਿ. ਤਸ੍ਮਾ ਏਵਮਾਹ. ਏਵਂ ਵੁਤ੍ਤੇ ਤੇ ਅਞ੍ਞਤਿਤ੍ਥਿਯਾਤਿ ਏਵਂ ਥੇਰੇਨ ਅਤ੍ਤਨੋ ਚ ਪਰੇਸਞ੍ਚ ਸਮਯਂ ਅਜਾਨਿਤ੍ਵਾ ਵੁਤ੍ਤੇ ਏਕਦੇਸੇਨ ਸਾਸਨਸਮਯਂ ਜਾਨਨ੍ਤਾ ਥੇਰਸ੍ਸ ਵਾਦੇ ਦੋਸਂ ਦਾਤੁਕਾਮਾ ਤੇ ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਆਯਸ੍ਮਨ੍ਤਂ ਅਨੁਰਾਧਂ ਏਤਦਵੋਚੁਂ.

ਤਂ ਕਿਂ ਮਞ੍ਞਸਿ ਅਨੁਰਾਧਾਤਿ ਸਤ੍ਥਾ ਤਸ੍ਸ ਕਥਂ ਸੁਤ੍ਵਾ ਚਿਨ੍ਤੇਸਿ – ‘‘ਅਯਂ ਭਿਕ੍ਖੁ ਅਤ੍ਤਨੋ ਲਦ੍ਧਿਯਂ ਦੋਸਂ ਨ ਜਾਨਾਤਿ, ਕਾਰਕੋ ਪਨੇਸ ਯੁਤ੍ਤਯੋਗੋ, ਧਮ੍ਮਦੇਸਨਾਯ ਏਵ ਨਂ ਜਾਨਾਪੇਸ੍ਸਾਮੀ’’ਤਿ ਤਿਪਰਿਵਟ੍ਟਂ ਦੇਸਨਂ ਦੇਸੇਤੁਕਾਮੋ ‘‘ਤਂ ਕਿਂ ਮਞ੍ਞਸਿ, ਅਨੁਰਾਧਾ’’ਤਿਆਦਿਮਾਹ. ਅਥਸ੍ਸ ਤਾਯ ਦੇਸਨਾਯ ਅਰਹਤ੍ਤਪ੍ਪਤ੍ਤਸ੍ਸ ਅਨੁਯੋਗਵਤ੍ਤਂ ਆਰੋਪੇਨ੍ਤੋ ਤਂ ਕਿਂ ਮਞ੍ਞਸਿ, ਅਨੁਰਾਧ? ਰੂਪਂ ਤਥਾਗਤੋਤਿਆਦਿਮਾਹ. ਦੁਕ੍ਖਞ੍ਚੇਵ ਪਞ੍ਞਪੇਮਿ, ਦੁਕ੍ਖਸ੍ਸ ਚ ਨਿਰੋਧਨ੍ਤਿ ਵਟ੍ਟਦੁਕ੍ਖਞ੍ਚੇਵ ਵਟ੍ਟਦੁਕ੍ਖਸ੍ਸ ਚ ਨਿਰੋਧਂ ਨਿਬ੍ਬਾਨਂ ਪਞ੍ਞਪੇਮਿ. ਦੁਕ੍ਖਨ੍ਤਿ ਵਾ ਵਚਨੇਨ ਦੁਕ੍ਖਸਚ੍ਚਂ ਗਹਿਤਂ. ਤਸ੍ਮਿਂ ਗਹਿਤੇ ਸਮੁਦਯਸਚ੍ਚਂ ਗਹਿਤਮੇਵ ਹੋਤਿ, ਤਸ੍ਸ ਮੂਲਤ੍ਤਾ. ਨਿਰੋਧਨ੍ਤਿ ਵਚਨੇਨ ਨਿਰੋਧਸਚ੍ਚਂ ਗਹਿਤਂ. ਤਸ੍ਮਿਂ ਗਹਿਤੇ ਮਗ੍ਗਸਚ੍ਚਂ ਗਹਿਤਮੇਵ ਹੋਤਿ ਤਸ੍ਸ ਉਪਾਯਤ੍ਤਾ. ਇਤਿ ਪੁਬ੍ਬੇ ਚਾਹਂ, ਅਨੁਰਾਧ, ਏਤਰਹਿ ਚ ਚਤੁਸਚ੍ਚਮੇਵ ਪਞ੍ਞਪੇਮੀਤਿ ਦਸ੍ਸੇਤਿ. ਏਵਂ ਇਮਸ੍ਮਿਂ ਸੁਤ੍ਤੇ ਵਟ੍ਟਵਿਵਟ੍ਟਮੇਵ ਕਥਿਤਂ. ਚਤੁਤ੍ਥਂ.

੫. ਵਕ੍ਕਲਿਸੁਤ੍ਤਵਣ੍ਣਨਾ

੮੭. ਪਞ੍ਚਮੇ ਕੁਮ੍ਭਕਾਰਨਿਵੇਸਨੇਤਿ ਕੁਮ੍ਭਕਾਰਸਾਲਾਯਂ. ਥੇਰੋ ਕਿਰ ਵੁਤ੍ਥਵਸ੍ਸੋ ਪਵਾਰੇਤ੍ਵਾ ਭਗਵਨ੍ਤਂ ਦਸ੍ਸਨਾਯ ਆਗਚ੍ਛਤਿ. ਤਸ੍ਸ ਨਗਰਮਜ੍ਝੇ ਮਹਾਆਬਾਧੋ ਉਪ੍ਪਜ੍ਜਿ, ਪਾਦਾ ਨ ਵਹਨ੍ਤਿ. ਅਥ ਨਂ ਮਞ੍ਚਕਸਿਵਿਕਾਯ ਕੁਮ੍ਭਕਾਰਸਾਲਂ ਆਹਰਿਂਸੁ. ਸਾ ਚ ਸਾਲਾ ਤੇਸਂ ਕਮ੍ਮਸਾਲਾ, ਨ ਨਿਵੇਸਨਸਾਲਾ. ਤਂ ਸਨ੍ਧਾਯ ਵੁਤ੍ਤਂ ‘‘ਕੁਮ੍ਭਕਾਰਨਿਵੇਸਨੇ ਵਿਹਰਤੀ’’ਤਿ. ਬਾਲ਼੍ਹਗਿਲਾਨੋਤਿ ਅਧਿਮਤ੍ਤਗਿਲਾਨੋ. ਸਮਧੋਸੀਤਿ ਸਮਨ੍ਤਤੋ ਅਧੋਸਿ, ਚਲਨਾਕਾਰੇਨ ਅਪਚਿਤਿਂ ਦਸ੍ਸੇਸਿ. ਵਤ੍ਤਂ ਕਿਰੇਤਂ ਬਾਲ਼੍ਹਗਿਲਾਨੇਨਪਿ ਬੁਡ੍ਢਤਰਂ ਦਿਸ੍ਵਾ ਉਟ੍ਠਾਨਾਕਾਰੇਨ ਅਪਚਿਤਿ ਦਸ੍ਸੇਤਬ੍ਬਾ. ਤੇਨ ਪਨ ‘‘ਮਾ ਚਲਿ ਮਾ ਚਲੀ’’ਤਿ ਵਤ੍ਤਬ੍ਬੋ. ਸਨ੍ਤਿਮਾਨਿ ਆਸਨਾਨੀਤਿ ਬੁਦ੍ਧਕਾਲਸ੍ਮਿਞ੍ਹਿ ਏਕਸ੍ਸਪਿ ਭਿਕ੍ਖੁਨੋ ਵਸਨਟ੍ਠਾਨੇ ‘‘ਸਚੇ ਸਤ੍ਥਾ ਆਗਚ੍ਛਿਸ੍ਸਤਿ, ਇਧ ਨਿਸੀਦਿਸ੍ਸਤੀ’’ਤਿ ਆਸਨਂ ਪਞ੍ਞਤ੍ਤਮੇਵ ਹੋਤਿ ਅਨ੍ਤਮਸੋ ਫਲਕਮਤ੍ਤਮ੍ਪਿ ਪਣ੍ਣਸਨ੍ਥਾਰਮਤ੍ਤਮ੍ਪਿ. ਖਮਨੀਯਂ ਯਾਪਨੀਯਨ੍ਤਿ ਕਚ੍ਚਿ ਦੁਕ੍ਖਂ ਖਮਿਤੁਂ ਇਰਿਯਾਪਥਂ ਵਾ ਯਾਪੇਤੁਂ ਸਕ੍ਕਾਤਿ ਪੁਚ੍ਛਤਿ. ਪਟਿਕ੍ਕਮਨ੍ਤੀਤਿ ਨਿਵਤ੍ਤਨ੍ਤਿ. ਅਭਿਕ੍ਕਮਨ੍ਤੀਤਿ ਅਧਿਗਚ੍ਛਨ੍ਤਿ. ਪਟਿਕ੍ਕਮੋਸਾਨਨ੍ਤਿ ਪਟਿਕ੍ਕਮੋ ਏਤਾਸਂ. ਸੀਲਤੋ ਨ ਉਪਵਦਤੀਤਿ ਸੀਲਂ ਆਰਬ੍ਭ ਸੀਲਭਾਵੇਨ ਨ ਉਪਵਦਤਿ. ਚਿਰਪਟਿਕਾਹਨ੍ਤਿ ਚਿਰਪਟਿਕੋ ਅਹਂ, ਚਿਰਤੋ ਪਟ੍ਠਾਯ ਅਹਨ੍ਤਿ ਅਤ੍ਥੋ. ਪੂਤਿਕਾਯੇਨਾਤਿ ਅਤ੍ਤਨੋ ਸੁਵਣ੍ਣਵਣ੍ਣਮ੍ਪਿ ਕਾਯਂ ਭਗਵਾ ਧੁਵਪਗ੍ਘਰਣਟ੍ਠੇਨ ਏਵਮਾਹ. ਯੋ ਖੋ, ਵਕ੍ਕਲਿ, ਧਮ੍ਮਨ੍ਤਿ ਇਧ ਭਗਵਾ ‘‘ਧਮ੍ਮਕਾਯੋ ਖੋ, ਮਹਾਰਾਜ, ਤਥਾਗਤੋ’’ਤਿ ਵੁਤ੍ਤਂ ਧਮ੍ਮਕਾਯਤਂ ਦਸ੍ਸੇਤਿ. ਨਵਵਿਧੋ ਹਿ ਲੋਕੁਤ੍ਤਰਧਮ੍ਮੋ ਤਥਾਗਤਸ੍ਸ ਕਾਯੋ ਨਾਮ.

ਇਦਾਨਿ ਥੇਰਸ੍ਸ ਤਿਪਰਿਵਟ੍ਟਧਮ੍ਮਦੇਸਨਂ ਆਰਭਨ੍ਤੋ ਤਂ ਕਿਂ ਮਞ੍ਞਸੀਤਿਆਦਿਮਾਹ. ਕਾਲ਼ਸਿਲਾਤਿ ਕਾਲ਼ਸਿਲਾਵਿਹਾਰੋ. ਵਿਮੋਕ੍ਖਾਯਾਤਿ ਮਗ੍ਗਵਿਮੋਕ੍ਖਤ੍ਥਾਯ. ਸੁਵਿਮੁਤ੍ਤੋ ਵਿਮੁਚ੍ਚਿਸ੍ਸਤੀਤਿ ਅਰਹਤ੍ਤਫਲਵਿਮੁਤ੍ਤਿਯਾ ਵਿਮੁਤ੍ਤੋ ਹੁਤ੍ਵਾ ਵਿਮੁਚ੍ਚਿਸ੍ਸਤਿ. ਤਾ ਕਿਰ ਦੇਵਤਾ ‘‘ਯੇਨ ਨੀਹਾਰੇਨ ਇਮਿਨਾ ਵਿਪਸ੍ਸਨਾ ਆਰਦ੍ਧਾ, ਅਨਨ੍ਤਰਾਯੇਨ ਅਰਹਤ੍ਤਂ ਪਾਪੁਣਿਸ੍ਸਤੀ’’ਤਿ ਞਤ੍ਵਾ ਏਵਮਾਹਂਸੁ. ਅਪਾਪਕਨ੍ਤਿ ਅਲਾਮਕਂ. ਸਤ੍ਥਂ ਆਹਰੇਸੀਤਿ ਥੇਰੋ ਕਿਰ ਅਧਿਮਾਨਿਕੋ ਅਹੋਸਿ. ਸੋ ਸਮਾਧਿਵਿਪਸ੍ਸਨਾਹਿ ਵਿਕ੍ਖਮ੍ਭਿਤਾਨਂ ਕਿਲੇਸਾਨਂ ਸਮੁਦਾਚਾਰਂ ਅਪਸ੍ਸਨ੍ਤੋ ‘‘ਖੀਣਾਸਵੋਮ੍ਹੀ’’ਤਿ ਸਞ੍ਞੀ ਹੁਤ੍ਵਾ ‘‘ਕਿਂ ਮੇ ਇਮਿਨਾ ਦੁਕ੍ਖੇਨ ਜੀਵਿਤੇਨ? ਸਤ੍ਥਂ ਆਹਰਿਤ੍ਵਾ ਮਰਿਸ੍ਸਾਮੀ’’ਤਿ ਤਿਖਿਣੇਨ ਸਤ੍ਥੇਨ ਕਣ੍ਠਨਾਲ਼ਂ ਛਿਨ੍ਦਿ. ਅਥਸ੍ਸ ਦੁਕ੍ਖਾ ਵੇਦਨਾ ਉਪ੍ਪਜ੍ਜਿ. ਸੋ ਤਸ੍ਮਿਂ ਖਣੇ ਅਤ੍ਤਨੋ ਪੁਥੁਜ੍ਜਨਭਾਵਂ ਞਤ੍ਵਾ ਅਵਿਸ੍ਸਟ੍ਠਕਮ੍ਮਟ੍ਠਾਨਤ੍ਤਾ ਸੀਘਂ ਮੂਲਕਮ੍ਮਟ੍ਠਾਨਂ ਆਦਾਯ ਸਮ੍ਮਸਨ੍ਤੋ ਅਰਹਤ੍ਤਂ ਪਾਪੁਣਿਤ੍ਵਾਵ ਕਾਲਮਕਾਸਿ. ਪਚ੍ਚਵੇਕ੍ਖਣਾ ਪਨਸ੍ਸ ਚ ਕਥਂ ਅਹੋਸੀਤਿ? ਖੀਣਾਸਵਸ੍ਸ ਏਕੂਨਵੀਸਤਿ ਪਚ੍ਚਵੇਕ੍ਖਣਾ ਨ ਸਬ੍ਬਾਵ ਅਵਸ੍ਸਂ ਲਦ੍ਧਬ੍ਬਾ, ਤਿਖਿਣੇਨਾਪਿ ਪਨ ਅਸਿਨਾ ਸੀਸੇ ਛਿਜ੍ਜਨ੍ਤੇ ਏਕਂ ਦ੍ਵੇ ਞਾਣਾਨਿ ਅਵਸ੍ਸਂ ਉਪ੍ਪਜ੍ਜਨ੍ਤਿ.

ਵਿਵਤ੍ਤਕ੍ਖਨ੍ਧਨ੍ਤਿ ਪਰਿਵਤ੍ਤਕ੍ਖਨ੍ਧਂ. ਸੇਮਾਨਨ੍ਤਿ ਸਯਮਾਨਂ. ਥੇਰੋ ਕਿਰ ਉਤ੍ਤਾਨਕੋ ਨਿਪਨ੍ਨੋ ਸਤ੍ਥਂ ਆਹਰਿ. ਤਸ੍ਸ ਸਰੀਰਂ ਯਥਾਠਿਤਮੇਵ ਅਹੋਸਿ. ਸੀਸਂ ਪਨ ਦਕ੍ਖਿਣਪਸ੍ਸੇਨ ਪਰਿਵਤ੍ਤਿਤ੍ਵਾ ਅਟ੍ਠਾਸਿ. ਅਰਿਯਸਾਵਕਾ ਹਿ ਯੇਭੁਯ੍ਯੇਨ ਦਕ੍ਖਿਣਪਸ੍ਸੇਨੇਵ ਕਾਲਂ ਕਰੋਨ੍ਤਿ. ਤੇਨਸ੍ਸ ਸਰੀਰਂ ਯਥਾਠਿਤਂਯੇਵ ਅਹੋਸਿ. ਸੀਸਂ ਪਨ ਦਕ੍ਖਿਣਪਸ੍ਸੇਨ ਪਰਿਵਤ੍ਤਿਤ੍ਵਾ ਠਿਤਂ. ਤਂ ਸਨ੍ਧਾਯ ਵਿਵਤ੍ਤਕ੍ਖਨ੍ਧੋ ਨਾਮ ਜਾਤੋਤਿਪਿ ਵਦਨ੍ਤਿ. ਧੂਮਾਯਿਤਤ੍ਤਨ੍ਤਿ ਧੂਮਾਯਨਭਾਵਂ. ਤਿਮਿਰਾਯਿਤਤ੍ਤਨ੍ਤਿ ਤਿਮਿਰਾਯਨਭਾਵਂ. ਧੂਮਵਲਾਹਕਂ ਵਿਯ ਤਿਮਿਰਵਲਾਹਕਂ ਵਿਯ ਚਾਤਿ ਅਤ੍ਥੋ. ਪਞ੍ਚਮਂ.

੬. ਅਸ੍ਸਜਿਸੁਤ੍ਤਵਣ੍ਣਨਾ

੮੮. ਛਟ੍ਠੇ ਕਸ੍ਸਪਕਾਰਾਮੇਤਿ ਕਸ੍ਸਪਸੇਟ੍ਠਿਨਾ ਕਾਰਿਤੇ ਆਰਾਮੇ. ਕਾਯਸਙ੍ਖਾਰੇਤਿ ਅਸ੍ਸਾਸਪਸ੍ਸਾਸੇ. ਸੋ ਹਿ ਤੇ ਚਤੁਤ੍ਥਜ੍ਝਾਨੇਨ ਪਸ੍ਸਮ੍ਭਿਤ੍ਵਾ ਪਸ੍ਸਮ੍ਭਿਤ੍ਵਾ ਵਿਹਾਸਿ. ਏਵਂ ਹੋਤੀਤਿ ਇਦਾਨਿ ਤਂ ਸਮਾਧਿਂ ਅਪ੍ਪਟਿਲਭਨ੍ਤਸ੍ਸ ਏਵਂ ਹੋਤਿ. ਨੋ ਚਸ੍ਸਾਹਂ ਪਰਿਹਾਯਾਮੀਤਿ ਕਚ੍ਚਿ ਨੁ ਖੋ ਅਹਂ ਸਾਸਨਤੋ ਨ ਪਰਿਹਾਯਾਮਿ? ਤਸ੍ਸ ਕਿਰ ਆਬਾਧਦੋਸੇਨ ਅਪ੍ਪਿਤਪ੍ਪਿਤਾ ਸਮਾਪਤ੍ਤਿ ਪਰਿਹਾਯਿ, ਤਸ੍ਮਾ ਏਵਂ ਚਿਨ੍ਤੇਸਿ. ਸਮਾਧਿਸਾਰਕਾ ਸਮਾਧਿਸਾਮਞ੍ਞਾਤਿ ਸਮਾਧਿਂਯੇਵ ਸਾਰਞ੍ਚ ਸਾਮਞ੍ਞਞ੍ਚ ਮਞ੍ਞਨ੍ਤਿ. ਮਯ੍ਹਂ ਪਨ ਸਾਸਨੇ ਨ ਏਤਂ ਸਾਰਂ, ਵਿਪਸ੍ਸਨਾਮਗ੍ਗਫਲਾਨਿ ਸਾਰਂ. ਸੋ ਤ੍ਵਂ ਸਮਾਧਿਤੋ ਪਰਿਹਾਯਨ੍ਤੋ ਕਸ੍ਮਾ ਚਿਨ੍ਤੇਸਿ ‘‘ਸਾਸਨਤੋ ਪਰਿਹਾਯਾਮੀ’’ਤਿ. ਏਵਂ ਥੇਰਂ ਅਸ੍ਸਾਸੇਤ੍ਵਾ ਇਦਾਨਿਸ੍ਸ ਤਿਪਰਿਵਟ੍ਟਂ ਧਮ੍ਮਦੇਸਨਂ ਆਰਭਨ੍ਤੋ ਤਂ ਕਿਂ ਮਞ੍ਞਸੀਤਿਆਦਿਮਾਹ. ਅਥਸ੍ਸ ਤਿਪਰਿਵਟ੍ਟਦੇਸਨਾਵਸਾਨੇ ਅਰਹਤ੍ਤਂ ਪਤ੍ਤਸ੍ਸ ਸਤਤਵਿਹਾਰਂ ਦਸ੍ਸੇਨ੍ਤੋ ਸੋ ਸੁਖਂ ਚੇ ਵੇਦਨਂ ਵੇਦਯਤੀਤਿਆਦਿਮਾਹ. ਤਤ੍ਥ ਅਨਭਿਨਨ੍ਦਿਤਾਤਿ ਪਜਾਨਾਤੀਤਿ ਸੁਖਵੇਦਨਾਯ ਤਾਵ ਅਭਿਨਨ੍ਦਨਾ ਹੋਤੁ, ਦੁਕ੍ਖਵੇਦਨਾਯ ਕਥਂ ਹੋਤੀਤਿ? ਦੁਕ੍ਖਂ ਪਤ੍ਵਾ ਸੁਖਂ ਪਤ੍ਥੇਤਿ, ਯਦਗ੍ਗੇਨ ਸੁਖਂ ਪਤ੍ਥੇਤਿ, ਤਦਗ੍ਗੇਨ ਦੁਕ੍ਖਂ ਪਤ੍ਥੇਤਿਯੇਵ. ਸੁਖਵਿਪਰਿਣਾਮੇਨ ਹਿ ਦੁਕ੍ਖਂ ਆਗਤਮੇਵ ਹੋਤੀਤਿ ਏਵਂ ਦੁਕ੍ਖੇ ਅਭਿਨਨ੍ਦਨਾ ਵੇਦਿਤਬ੍ਬਾ. ਸੇਸਂ ਪੁਬ੍ਬੇ ਵੁਤ੍ਤਨਯਮੇਵਾਤਿ. ਛਟ੍ਠਂ.

੭. ਖੇਮਕਸੁਤ੍ਤਵਣ੍ਣਨਾ

੮੯. ਸਤ੍ਤਮੇ ਅਤ੍ਤਨਿਯਨ੍ਤਿ ਅਤ੍ਤਨੋ ਪਰਿਕ੍ਖਾਰਜਾਤਂ. ਅਸ੍ਮੀਤਿ ਅਧਿਗਤਨ੍ਤਿ ਅਸ੍ਮੀਤਿ ਏਵਂ ਪਵਤ੍ਤਾ ਤਣ੍ਹਾਮਾਨਾ ਅਧਿਗਤਾ. ਸਨ੍ਧਾਵਨਿਕਾਯਾਤਿ ਪੁਨਪ੍ਪੁਨਂ ਗਮਨਾਗਮਨੇਨ. ਉਪਸਙ੍ਕਮੀਤਿ ਬਦਰਿਕਾਰਾਮਤੋ ਗਾਵੁਤਮਤ੍ਤਂ ਘੋਸਿਤਾਰਾਮਂ ਅਗਮਾਸਿ. ਦਾਸਕਤ੍ਥੇਰੋ ਪਨ ਚਤੁਕ੍ਖਤ੍ਤੁਂ ਗਮਨਾਗਮਨੇਨ ਤਂਦਿਵਸਂ ਦ੍ਵਿਯੋਜਨਂ ਅਦ੍ਧਾਨਂ ਆਹਿਣ੍ਡਿ. ਕਸ੍ਮਾ ਪਨ ਤਂ ਥੇਰਾ ਪਹਿਣਿਂਸੁ? ਵਿਸ੍ਸੁਤਸ੍ਸ ਧਮ੍ਮਕਥਿਕਸ੍ਸ ਸਨ੍ਤਿਕਾ ਧਮ੍ਮਂ ਸੁਣਿਸ੍ਸਾਮਾਤਿ. ਸਯਂ ਕਸ੍ਮਾ ਨ ਗਤਾਤਿ? ਥੇਰਸ੍ਸ ਵਸਨਟ੍ਠਾਨਂ ਅਰਞ੍ਞਂ ਸਮ੍ਬਾਧਂ, ਤਤ੍ਥ ਸਟ੍ਠਿਮਤ੍ਤਾਨਂ ਥੇਰਾਨਂ ਠਾਤੁਂ ਵਾ ਨਿਸੀਦਿਤੁਂ ਵਾ ਓਕਾਸੋ ਨਤ੍ਥੀਤਿ ਨ ਗਤਾ. ‘‘ਇਧਾਗਨ੍ਤ੍ਵਾ ਅਮ੍ਹਾਕਂ ਧਮ੍ਮਂ ਕਥੇਤੂ’’ਤਿਪਿ ਕਸ੍ਮਾ ਪਨ ਨ ਪਹਿਣਿਂਸੂਤਿ? ਥੇਰਸ੍ਸ ਆਬਾਧਿਕਤ੍ਤਾ. ਅਥ ਕਸ੍ਮਾ ਪੁਨਪ੍ਪੁਨਂ ਪਹਿਣਿਂਸੂਤਿ? ਸਯਮੇਵ ਞਤ੍ਵਾ ਅਮ੍ਹਾਕਂ ਕਥੇਤੁਂ ਆਗਮਿਸ੍ਸਤੀਤਿ. ਥੇਰੋਪਿ ਤੇਸਂ ਅਜ੍ਝਾਸਯਂ ਞਤ੍ਵਾਵ ਅਗਮਾਸੀਤਿ.

ਨ ਖ੍ਵਾਹਂ, ਆਵੁਸੋ, ਰੂਪਨ੍ਤਿ ਯੋ ਹਿ ਰੂਪਮੇਵ ਅਸ੍ਮੀਤਿ ਵਦਤਿ, ਤੇਨ ਇਤਰੇ ਚਤ੍ਤਾਰੋ ਖਨ੍ਧਾ ਪਚ੍ਚਕ੍ਖਾਤਾ ਹੋਨ੍ਤਿ. ਯੋ ਅਞ੍ਞਤ੍ਰ ਰੂਪਾ ਵਦਤਿ, ਤੇਨ ਰੂਪਂ ਪਚ੍ਚਕ੍ਖਾਤਂ ਹੋਤਿ. ਵੇਦਨਾਦੀਸੁਪਿ ਏਸੇਵ ਨਯੋ. ਥੇਰਸ੍ਸ ਪਨ ਸਮੂਹਤੋ ਪਞ੍ਚਸੁਪਿ ਖਨ੍ਧੇਸੁ ਅਸ੍ਮੀਤਿ ਅਧਿਗਤੋ, ਤਸ੍ਮਾ ਏਵਮਾਹ. ਹੋਤੇਵਾਤਿ ਹੋਤਿਯੇਵ. ਅਨੁਸਹਗਤੋਤਿ ਸੁਖੁਮੋ. ਊਸੇਤਿ ਛਾਰਿਕਾਖਾਰੇ. ਖਾਰੇਤਿ ਊਸਖਾਰੇ. ਸਮ੍ਮਦ੍ਦਿਤ੍ਵਾਤਿ ਤੇਮੇਤ੍ਵਾ ਖਾਦੇਤ੍ਵਾ.

ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਕਿਲਿਟ੍ਠਵਤ੍ਥਂ ਵਿਯ ਹਿ ਪੁਥੁਜ੍ਜਨਸ੍ਸ ਚਿਤ੍ਤਾਚਾਰੋ, ਤਯੋ ਖਾਰਾ ਵਿਯ ਤਿਸ੍ਸੋ ਅਨੁਪਸ੍ਸਨਾ, ਤੀਹਿ ਖਾਰੇਹਿ ਧੋਤਵਤ੍ਥਂ ਵਿਯ ਦੇਸਨਾਯ ਮਦ੍ਦਿਤ੍ਵਾ ਠਿਤੋ ਅਨਾਗਾਮਿਨੋ ਚਿਤ੍ਤਾਚਾਰੋ, ਅਨੁਸਹਗਤੋ ਊਸਾਦਿਗਨ੍ਧੋ ਵਿਯ ਅਰਹਤ੍ਤਮਗ੍ਗਵਜ੍ਝਾ ਕਿਲੇਸਾ, ਗਨ੍ਧਕਰਣ੍ਡਕੋ ਵਿਯ ਅਰਹਤ੍ਤਮਗ੍ਗਞਾਣਂ ਗਨ੍ਧਕਰਣ੍ਡਕਂ ਆਗਮ੍ਮ ਅਨੁਸਹਗਤਾਨਂ ਊਸਗਨ੍ਧਾਦੀਨਂ ਸਮੁਗ੍ਘਾਤੋ ਵਿਯ ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸਕ੍ਖਯੋ, ਗਨ੍ਧਪਰਿਭਾਵਿਤਵਤ੍ਥਂ ਨਿਵਾਸੇਤ੍ਵਾ ਛਣਦਿਵਸੇ ਅਨ੍ਤਰਵੀਥਿਯਂ ਸੁਗਨ੍ਧਗਨ੍ਧਿਨੋ ਵਿਚਰਣਂ ਵਿਯ ਖੀਣਾਸਵਸ੍ਸ ਸੀਲਗਨ੍ਧਾਦੀਹਿ ਦਸ ਦਿਸਾ ਉਪਵਾਯਨ੍ਤਸ੍ਸ ਯਥਾਕਾਮਚਾਰੋ.

ਆਚਿਕ੍ਖਿਤੁਨ੍ਤਿ ਕਥੇਤੁਂ. ਦੇਸੇਤੁਨ੍ਤਿ ਪਕਾਸੇਤੁਂ. ਪਞ੍ਞਾਪੇਤੁਨ੍ਤਿ ਜਾਨਾਪੇਤੁਂ. ਪਟ੍ਠਪੇਤੁਨ੍ਤਿ ਪਤਿਟ੍ਠਾਪੇਤੁਂ. ਵਿਵਰਿਤੁਨ੍ਤਿ ਵਿਵਟਂ ਕਾਤੁਂ. ਵਿਭਜਿਤੁਨ੍ਤਿ ਸੁਵਿਭਤ੍ਤਂ ਕਾਤੁਂ. ਉਤ੍ਤਾਨੀਕਾਤੁਨ੍ਤਿ ਉਤ੍ਤਾਨਕਂ ਕਾਤੁਂ. ਸਟ੍ਠਿਮਤ੍ਤਾਨਂ ਥੇਰਾਨਨ੍ਤਿ ਤੇ ਕਿਰ ਥੇਰੇਨ ਕਥਿਤਕਥਿਤਟ੍ਠਾਨੇ ਵਿਪਸ੍ਸਨਂ ਪਟ੍ਠਪੇਤ੍ਵਾ ਉਪਰੂਪਰਿ ਸਮ੍ਮਸਨ੍ਤਾ ਦੇਸਨਾਪਰਿਯੋਸਾਨੇ ਅਰਹਤ੍ਤਂ ਪਾਪੁਣਿਂਸੁ. ਥੇਰੋਪਿ ਅਞ੍ਞੇਨ ਨੀਹਾਰੇਨ ਅਕਥੇਤ੍ਵਾ ਵਿਪਸ੍ਸਨਾਸਹਗਤਚਿਤ੍ਤੇਨੇਵ ਕਥੇਸਿ. ਤਸ੍ਮਾ ਸੋਪਿ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ – ‘‘ਸਟ੍ਠਿਮਤ੍ਤਾਨਂ ਥੇਰਾਨਂ ਭਿਕ੍ਖੂਨਂ ਅਨੁਪਾਦਾਯ ਆਸਵੇਹਿ ਚਿਤ੍ਤਾਨਿ ਵਿਮੁਚ੍ਚਿਂਸੁ ਆਯਸ੍ਮਤੋ ਖੇਮਕਸ੍ਸ ਚਾ’’ਤਿ. ਸਤ੍ਤਮਂ.

੮. ਛਨ੍ਨਸੁਤ੍ਤਵਣ੍ਣਨਾ

੯੦. ਅਟ੍ਠਮੇ ਆਯਸ੍ਮਾ ਛਨ੍ਨੋਤਿ ਤਥਾਗਤੇਨ ਸਦ੍ਧਿਂ ਏਕਦਿਵਸੇ ਜਾਤੋ ਮਹਾਭਿਨਿਕ੍ਖਮਨਦਿਵਸੇ ਸਦ੍ਧਿਂ ਨਿਕ੍ਖਮਿਤ੍ਵਾ ਪੁਨ ਅਪਰਭਾਗੇ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ‘‘ਅਮ੍ਹਾਕਂ ਬੁਦ੍ਧੋ ਅਮ੍ਹਾਕਂ ਧਮ੍ਮੋ’’ਤਿ ਏਵਂ ਮਕ੍ਖੀ ਚੇਵ ਪਲ਼ਾਸੀ ਚ ਹੁਤ੍ਵਾ ਸਬ੍ਰਹ੍ਮਚਾਰੀਨਂ ਫਰੁਸਵਾਚਾਯ ਸਙ੍ਘਟ੍ਟਨਂ ਕਰੋਨ੍ਤੋ ਥੇਰੋ. ਅਵਾਪੁਰਣਂ ਆਦਾਯਾਤਿ ਕੁਞ੍ਚਿਕਂ ਗਹੇਤ੍ਵਾ. ਵਿਹਾਰੇਨ ਵਿਹਾਰਂ ਉਪਸਙ੍ਕਮਿਤ੍ਵਾਤਿ ਏਕਂ ਵਿਹਾਰਂ ਪਵਿਸਿਤ੍ਵਾ ਤਤੋ ਅਞ੍ਞਂ, ਤਤੋ ਅਞ੍ਞਨ੍ਤਿ ਏਵਂ ਤੇਨ ਤੇਨ ਵਿਹਾਰੇਨ ਤਂ ਤਂ ਵਿਹਾਰਂ ਉਪਸਙ੍ਕਮਿਤ੍ਵਾ. ਏਤਦਵੋਚ ਓਵਦਨ੍ਤੁ ਮਨ੍ਤਿ ਕਸ੍ਮਾ ਏਵਂ ਮਹਨ੍ਤੇਨ ਉਸ੍ਸਾਹੇਨ ਤਤ੍ਥ ਤਤ੍ਥ ਗਨ੍ਤ੍ਵਾ ਏਤਂ ਅਵੋਚਾਤਿ? ਉਪ੍ਪਨ੍ਨਸਂਵੇਗਤਾਯ. ਤਸ੍ਸ ਹਿ ਪਰਿਨਿਬ੍ਬੁਤੇ ਸਤ੍ਥਰਿ ਧਮ੍ਮਸਙ੍ਗਾਹਕਤ੍ਥੇਰੇਹਿ ਪੇਸਿਤੋ ਆਯਸ੍ਮਾ ਆਨਨ੍ਦੋ ਕੋਸਮ੍ਬਿਂ ਗਨ੍ਤ੍ਵਾ ਬ੍ਰਹ੍ਮਦਣ੍ਡਂ ਅਦਾਸਿ. ਸੋ ਦਿਨ੍ਨੇ ਬ੍ਰਹ੍ਮਦਣ੍ਡੇ ਸਞ੍ਜਾਤਪਰਿਲ਼ਾਹੋ ਵਿਸਞ੍ਞੀਭੂਤੋ ਪਤਿਤ੍ਵਾ ਪੁਨ ਸਞ੍ਞਂ ਲਭਿਤ੍ਵਾ ਵੁਟ੍ਠਾਯ ਏਕਸ੍ਸ ਭਿਕ੍ਖੁਨੋ ਸਨ੍ਤਿਕਂ ਗਤੋ, ਸੋ ਤੇਨ ਸਦ੍ਧਿਂ ਕਿਞ੍ਚਿ ਨ ਕਥੇਸਿ. ਅਞ੍ਞਸ੍ਸ ਸਨ੍ਤਿਕਂ ਅਗਮਾਸਿ, ਸੋਪਿ ਨ ਕਥੇਸੀਤਿ ਏਵਂ ਸਕਲਵਿਹਾਰਂ ਵਿਚਰਿਤ੍ਵਾ ਨਿਬ੍ਬਿਨ੍ਨੋ ਪਤ੍ਤਚੀਵਰਂ ਆਦਾਯ ਬਾਰਾਣਸਿਂ ਗਨ੍ਤ੍ਵਾ ਉਪ੍ਪਨ੍ਨਸਂਵੇਗੋ ਤਤ੍ਥ ਤਤ੍ਥ ਗਨ੍ਤ੍ਵਾ ਏਵਂ ਅਵੋਚ.

ਸਬ੍ਬੇ ਸਙ੍ਖਾਰਾ ਅਨਿਚ੍ਚਾਤਿ ਸਬ੍ਬੇ ਤੇਭੂਮਕਸਙ੍ਖਾਰਾ ਅਨਿਚ੍ਚਾ. ਸਬ੍ਬੇ ਧਮ੍ਮਾ ਅਨਤ੍ਤਾਤਿ ਸਬ੍ਬੇ ਚਤੁਭੂਮਕਧਮ੍ਮਾ ਅਨਤ੍ਤਾ. ਇਤਿ ਸਬ੍ਬੇਪਿ ਤੇ ਭਿਕ੍ਖੂ ਥੇਰਂ ਓਵਦਨ੍ਤਾ ਅਨਿਚ੍ਚਲਕ੍ਖਣਂ ਅਨਤ੍ਤਲਕ੍ਖਣਨ੍ਤਿ ਦ੍ਵੇਵ ਲਕ੍ਖਣਾਨਿ ਕਥੇਤ੍ਵਾ ਦੁਕ੍ਖਲਕ੍ਖਣਂ ਨ ਕਥਯਿਂਸੁ. ਕਸ੍ਮਾ? ਏਵਂ ਕਿਰ ਨੇਸਂ ਅਹੋਸਿ – ‘‘ਅਯਂ ਭਿਕ੍ਖੁ ਵਾਦੀ ਦੁਕ੍ਖਲਕ੍ਖਣੇ ਪਞ੍ਞਾਪਿਯਮਾਨੇ ਰੂਪਂ ਦੁਕ੍ਖਂ…ਪੇ… ਵਿਞ੍ਞਾਣਂ ਦੁਕ੍ਖਂ, ਮਗ੍ਗੋ ਦੁਕ੍ਖੋ, ਫਲਂ ਦੁਕ੍ਖਨ੍ਤਿ ‘ਤੁਮ੍ਹੇ ਦੁਕ੍ਖਪ੍ਪਤ੍ਤਾ ਭਿਕ੍ਖੂ ਨਾਮਾ’ਤਿ ਗਹਣਂ ਗਣ੍ਹੇਯ੍ਯ, ਯਥਾ ਗਹਣਂ ਗਹੇਤੁਂ ਨ ਸਕ੍ਕੋਤਿ, ਏਵਂ ਨਿਦ੍ਦੋਸਮੇਵਸ੍ਸ ਕਤ੍ਵਾ ਕਥੇਸ੍ਸਾਮਾ’’ਤਿ ਦ੍ਵੇਵ ਲਕ੍ਖਣਾਨਿ ਕਥਯਿਂਸੁ.

ਪਰਿਤਸ੍ਸਨਾ ਉਪਾਦਾਨਂ ਉਪ੍ਪਜ੍ਜਤੀਤਿ ਪਰਿਤਸ੍ਸਨਾ ਚ ਉਪਾਦਾਨਞ੍ਚ ਉਪ੍ਪਜ੍ਜਤਿ. ਪਚ੍ਚੁਦਾਵਤ੍ਤਤਿ ਮਾਨਸਂ, ਅਥ ਕੋ ਚਰਹਿ ਮੇ ਅਤ੍ਤਾਤਿ ਯਦਿ ਰੂਪਾਦੀਸੁ ਏਕੋਪਿ ਅਨਤ੍ਤਾ, ਅਥ ਕੋ ਨਾਮ ਮੇ ਅਤ੍ਤਾਤਿ ਏਵਂ ਪਟਿਨਿਵਤ੍ਤਤਿ ‘‘ਮਯ੍ਹਂ ਮਾਨਸ’’ਨ੍ਤਿ. ਅਯਂ ਕਿਰ ਥੇਰੋ ਪਚ੍ਚਯੇ ਅਪਰਿਗ੍ਗਹੇਤ੍ਵਾ ਵਿਪਸ੍ਸਨਂ ਪਟ੍ਠਪੇਸਿ, ਸਾਸ੍ਸ ਦੁਬ੍ਬਲਵਿਪਸ੍ਸਨਾ ਅਤ੍ਤਗਾਹਂ ਪਰਿਯਾਦਾਤੁਂ ਅਸਕ੍ਕੁਣਨ੍ਤੀ ਸਙ੍ਖਾਰੇਸੁ ਸੁਞ੍ਞਤੋ ਉਪਟ੍ਠਹਨ੍ਤੇਸੁ ‘‘ਉਚ੍ਛਿਜ੍ਜਿਸ੍ਸਾਮਿ ਵਿਨਸ੍ਸਿਸ੍ਸਾਮੀ’’ਤਿ ਉਚ੍ਛੇਦਦਿਟ੍ਠਿਯਾ ਚੇਵ ਪਰਿਤਸ੍ਸਨਾਯ ਚ ਪਚ੍ਚਯੋ ਅਹੋਸਿ. ਸੋ ਚ ਅਤ੍ਤਾਨਂ ਪਾਪਤੇ ਪਪਤਨ੍ਤਂ ਵਿਯ ਦਿਸ੍ਵਾ, ‘‘ਪਰਿਤਸ੍ਸਨਾ ਉਪਾਦਾਨਂ ਉਪ੍ਪਜ੍ਜਤਿ, ਪਚ੍ਚੁਦਾਵਤ੍ਤਤਿ ਮਾਨਸਂ, ਅਥ ਕੋ ਚਰਹਿ ਮੇ ਅਤ੍ਤਾ’’ਤਿ ਆਹ. ਨ ਖੋ ਪਨੇਵਂ ਧਮ੍ਮਂ ਪਸ੍ਸਤੋ ਹੋਤੀਤਿ ਚਤੁਸਚ੍ਚਧਮ੍ਮਂ ਪਸ੍ਸਨ੍ਤਸ੍ਸ ਏਵਂ ਨ ਹੋਤਿ. ਤਾਵਤਿਕਾ ਵਿਸ੍ਸਟ੍ਠੀਤਿ ਤਤ੍ਤਕੋ ਵਿਸ੍ਸਾਸੋ. ਸਮ੍ਮੁਖਾ ਮੇਤਨ੍ਤਿ ਥੇਰੋ ਤਸ੍ਸ ਵਚਨਂ ਸੁਤ੍ਵਾ, ‘‘ਕੀਦਿਸਾ ਨੁ ਖੋ ਇਮਸ੍ਸ ਧਮ੍ਮਦੇਸਨਾ ਸਪ੍ਪਾਯਾ’’ਤਿ? ਚਿਨ੍ਤੇਨ੍ਤੋ ਤੇਪਿਟਕਂ ਬੁਦ੍ਧਵਚਨਂ ਵਿਚਿਨਿਤ੍ਵਾ ਕਚ੍ਚਾਨਸੁਤ੍ਤਂ (ਸਂ. ਨਿ. ੨.੧੫) ਅਦ੍ਦਸ ‘‘ਇਦਂ ਆਦਿਤੋਵ ਦਿਟ੍ਠਿਵਿਨਿਵੇਠਨਂ ਕਤ੍ਵਾ ਮਜ੍ਝੇ ਬੁਦ੍ਧਬਲਂ ਦੀਪੇਤ੍ਵਾ ਸਣ੍ਹਸੁਖੁਮਪਚ੍ਚਯਾਕਾਰਂ ਪਕਾਸਯਮਾਨਂ ਗਤਂ, ਇਦਮਸ੍ਸ ਦੇਸੇਸ੍ਸਾਮੀ’’ਤਿ ਦਸ੍ਸੇਨ੍ਤੋ ‘‘ਸਮ੍ਮੁਖਾ ਮੇਤ’’ਨ੍ਤਿਆਦਿਮਾਹ. ਅਟ੍ਠਮਂ.

੯-੧੦. ਰਾਹੁਲਸੁਤ੍ਤਾਦਿਵਣ੍ਣਨਾ

੯੧-੯੨. ਨਵਮਦਸਮਾਨਿ ਰਾਹੁਲਸਂਯੁਤ੍ਤੇ (ਸਂ. ਨਿ. ੨.੧੮੮) ਵੁਤ੍ਤਤ੍ਥਾਨੇਵ. ਕੇਵਲਂ ਹੇਤਾਨਿ ਅਯਂ ਥੇਰਵਗ੍ਗੋਤਿ ਕਤ੍ਵਾ ਇਧਾਗਤਾਨੀਤਿ. ਨਵਮਦਸਮਾਨਿ.

ਥੇਰਵਗ੍ਗੋ ਨਵਮੋ.