੬. ਖਨ੍ਧਸੁਤ੍ਤਵਣ੍ਣਨਾ

੪੮. ਛਟ੍ਠੇ ਰੂਪਕ੍ਖਨ੍ਧੋ ਕਾਮਾਵਚਰੋ, ਚਤ੍ਤਾਰੋ ਖਨ੍ਧਾ ਚਤੁਭੂਮਕਾ. ਸਾਸਵਨ੍ਤਿ ਆਸਵਾਨਂ ਆਰਮ੍ਮਣਭਾਵੇਨ ਪਚ੍ਚਯਭੂਤਂ. ਉਪਾਦਾਨਿਯਨ੍ਤਿ ਤਥੇਵ ਚ ਉਪਾਦਾਨਾਨਂ ਪਚ੍ਚਯਭੂਤਂ. ਵਚਨਤ੍ਥੋ ਪਨੇਤ੍ਥ – ਆਰਮ੍ਮਣਂ ਕਤ੍ਵਾ ਪਵਤ੍ਤੇਹਿ ਸਹ ਆਸਵੇਹੀਤਿ ਸਾਸਵਂ. ਉਪਾਦਾਤਬ੍ਬਨ੍ਤਿ ਉਪਾਦਾਨਿਯਂ. ਇਧਾਪਿ ਰੂਪਕ੍ਖਨ੍ਧੋ ਕਾਮਾਵਚਰੋ, ਅਵਸੇਸਾ ਤੇਭੂਮਕਾ ਵਿਪਸ੍ਸਨਾਚਾਰਵਸੇਨ ਵੁਤ੍ਤਾ. ਏਵਮੇਤ੍ਥ ਰੂਪਂ ਰਾਸਟ੍ਠੇਨ ਖਨ੍ਧੇਸੁ ਪਵਿਟ੍ਠਂ, ਸਾਸਵਰਾਸਟ੍ਠੇਨ ਉਪਾਦਾਨਕ੍ਖਨ੍ਧੇਸੁ. ਵੇਦਨਾਦਯੋ ਸਾਸਵਾਪਿ ਅਤ੍ਥਿ, ਅਨਾਸਵਾਪਿ ਅਤ੍ਥਿ. ਤੇ ਰਾਸਟ੍ਠੇਨ ਸਬ੍ਬੇਪਿ ਖਨ੍ਧੇਸੁ ਪਵਿਟ੍ਠਾ, ਤੇਭੂਮਕਾ ਪਨੇਤ੍ਥ ਸਾਸਵਟ੍ਠੇਨ ਉਪਾਦਾਨਕ੍ਖਨ੍ਧੇਸੁ ਪਵਿਟ੍ਠਾਤਿ. ਛਟ੍ਠਂ.