੩. ਫੇਣਪਿਣ੍ਡੂਪਮਸੁਤ੍ਤਵਣ੍ਣਨਾ

੯੫. ਤਤਿਯੇ ਗਙ੍ਗਾਯ ਨਦਿਯਾ ਤੀਰੇਤਿ ਅਯੁਜ੍ਝਪੁਰਵਾਸਿਨੋ ਅਪਰਿਮਾਣਭਿਕ੍ਖੁਪਰਿਵਾਰਂ ਚਾਰਿਕਂ ਚਰਮਾਨਂ ਤਥਾਗਤਂ ਅਤ੍ਤਨੋ ਨਗਰਂ ਸਮ੍ਪਤ੍ਤਂ ਦਿਸ੍ਵਾ ਏਕਸ੍ਮਿਂ ਗਙ੍ਗਾਯ ਨਿਵਤ੍ਤਨਟ੍ਠਾਨੇ ਮਹਾਵਨਸਣ੍ਡਮਣ੍ਡਿਤਪ੍ਪਦੇਸੇ ਸਤ੍ਥੁ ਵਿਹਾਰਂ ਕਤ੍ਵਾ ਅਦਂਸੁ. ਭਗਵਾ ਤਤ੍ਥ ਵਿਹਰਤਿ. ਤਂ ਸਨ੍ਧਾਯ ਵੁਤ੍ਤਂ ‘‘ਗਙ੍ਗਾਯ ਨਦਿਯਾ ਤੀਰੇ’’ਤਿ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸੀਤਿ ਤਸ੍ਮਿਂ ਵਿਹਾਰੇ ਵਸਨ੍ਤੋ ਭਗਵਾ ਸਾਯਨ੍ਹਸਮਯਂ ਗਨ੍ਧਕੁਟਿਤੋ ਨਿਕ੍ਖਮਿਤ੍ਵਾ ਗਙ੍ਗਾਤੀਰੇ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਿਨ੍ਨੋ ਗਙ੍ਗਾਯ ਨਦਿਯਾ ਆਗਚ੍ਛਨ੍ਤਂ ਮਹਨ੍ਤਂ ਫੇਣਪਿਣ੍ਡਂ ਦਿਸ੍ਵਾ, ‘‘ਮਮ ਸਾਸਨੇ ਪਞ੍ਚਕ੍ਖਨ੍ਧਨਿਸ੍ਸਿਤਂ ਏਕਂ ਧਮ੍ਮਂ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਪਰਿਵਾਰੇਤ੍ਵਾ ਨਿਸਿਨ੍ਨੇ ਭਿਕ੍ਖੂ ਆਮਨ੍ਤੇਸਿ.

ਮਹਨ੍ਤਂ ਫੇਣਪਿਣ੍ਡਨ੍ਤਿ ਉਟ੍ਠਾਨੁਟ੍ਠਾਨੇ ਬਦਰਪਕ੍ਕਪ੍ਪਮਾਣਤੋ ਪਟ੍ਠਾਯ ਅਨੁਸੋਤਾਗਮਨੇਨ ਅਨੁਪੁਬ੍ਬੇਨ ਪਵਡ੍ਢਿਤ੍ਵਾ ਪਬ੍ਬਤਕੂਟਮਤ੍ਤਂ ਜਾਤਂ, ਯਤ੍ਥ ਉਦਕਸਪ੍ਪਾਦਯੋ ਅਨੇਕਪਾਣਯੋ ਨਿਵਸਨ੍ਤਿ, ਏਵਰੂਪਂ ਮਹਨ੍ਤਂ ਫੇਣਪਿਣ੍ਡਂ. ਆਵਹੇਯ੍ਯਾਤਿ ਆਹਰੇਯ੍ਯ. ਸੋ ਪਨਾਯਂ ਫੇਣਪਿਣ੍ਡੋ ਉਟ੍ਠਿਤਟ੍ਠਾਨੇਪਿ ਭਿਜ੍ਜਤਿ, ਥੋਕਂ ਗਨ੍ਤ੍ਵਾਪਿ, ਏਕਦ੍ਵਿਯੋਜਨਾਦਿਵਸੇਨ ਦੂਰਂ ਗਨ੍ਤ੍ਵਾਪਿ, ਅਨ੍ਤਰਾ ਪਨ ਅਭਿਜ੍ਜਨ੍ਤੋਪਿ ਮਹਾਸਮੁਦ੍ਦਂ ਪਤ੍ਵਾ ਅਵਸ੍ਸਮੇਵ ਭਿਜ੍ਜਤਿ. ਨਿਜ੍ਝਾਯੇਯ੍ਯਾਤਿ ਓਲੋਕੇਯ੍ਯ. ਯੋਨਿਸੋ ਉਪਪਰਿਕ੍ਖੇਯ੍ਯਾਤਿ ਕਾਰਣੇਨ ਉਪਪਰਿਕ੍ਖੇਯ੍ਯ. ਕਿਞ੍ਹਿ ਸਿਯਾ, ਭਿਕ੍ਖਵੇ, ਫੇਣਪਿਣ੍ਡੇ ਸਾਰੋਤਿ, ਭਿਕ੍ਖਵੇ, ਫੇਣਪਿਣ੍ਡਮ੍ਹਿ ਸਾਰੋ ਨਾਮ ਕਿਂ ਭਵੇਯ੍ਯ? ਵਿਲੀਯਿਤ੍ਵਾ ਵਿਦ੍ਧਂਸੇਯ੍ਯੇਵ.

ਏਵਮੇਵ ਖੋਤਿ ਯਥਾ ਫੇਣਪਿਣ੍ਡੋ ਨਿਸ੍ਸਾਰੋ, ਏਵਂ ਰੂਪਮ੍ਪਿ ਨਿਚ੍ਚਸਾਰਧੁਵਸਾਰਅਤ੍ਤਸਾਰਵਿਰਹੇਨ ਨਿਸ੍ਸਾਰਮੇਵ. ਯਥਾ ਚ ਸੋ ‘‘ਇਮਿਨਾ ਪਤ੍ਤਂ ਵਾ ਥਾਲਕਂ ਵਾ ਕਰਿਸ੍ਸਾਮੀ’’ਤਿ ਗਹੇਤੁਂ ਨ ਸਕ੍ਕਾ, ਗਹਿਤੋਪਿ ਤਮਤ੍ਥਂ ਨ ਸਾਧੇਤਿ, ਭਿਜ੍ਜਤਿ ਏਵ, ਏਵਂ ਰੂਪਮ੍ਪਿ ਨਿਚ੍ਚਨ੍ਤਿ ਵਾ ਧੁਵਨ੍ਤਿ ਵਾ ਅਹਨ੍ਤਿ ਵਾ ਮਮਨ੍ਤਿ ਵਾ ਗਹੇਤੁਂ ਨ ਸਕ੍ਕਾ, ਗਹਿਤਮ੍ਪਿ ਨ ਤਥਾ ਤਿਟ੍ਠਤਿ, ਅਨਿਚ੍ਚਂ ਦੁਕ੍ਖਂ ਅਨਤ੍ਤਾ ਅਸੁਭਞ੍ਞੇਵ ਹੋਤੀਤਿ ਏਵਂ ਫੇਣਪਿਣ੍ਡਸਦਿਸਮੇਵ ਹੋਤਿ. ਯਥਾ ਵਾ ਪਨ ਫੇਣਪਿਣ੍ਡੋ ਛਿਦ੍ਦਾਵਛਿਦ੍ਦੋ ਅਨੇਕਸਨ੍ਧਿਘਟਿਤੋ ਬਹੂਨਂ ਉਦਕਸਪ੍ਪਾਦੀਨਂ ਪਾਣਾਨਂ ਆਵਾਸੋ, ਏਵਂ ਰੂਪਮ੍ਪਿ ਛਿਦ੍ਦਾਵਛਿਦ੍ਦਂ ਅਨੇਕਸਨ੍ਧਿਘਟਿਤਂ, ਕੁਲਵਸੇਨੇਵੇਤ੍ਥ ਅਸੀਤਿ ਕਿਮਿਕੁਲਾਨਿ ਵਸਨ੍ਤਿ, ਤਦੇਵ ਤੇਸਂ ਸੂਤਿਘਰਮ੍ਪਿ ਵਚ੍ਚਕੁਟਿਪਿ ਗਿਲਾਨਸਾਲਾਪਿ ਸੁਸਾਨਮ੍ਪਿ, ਨ ਤੇ ਅਞ੍ਞਤ੍ਥ ਗਨ੍ਤ੍ਵਾ ਗਬ੍ਭਵੁਟ੍ਠਾਨਾਦੀਨਿ ਕਰੋਨ੍ਤਿ, ਏਵਮ੍ਪਿ ਫੇਣਪਿਣ੍ਡਸਦਿਸਂ.

ਯਥਾ ਚ ਫੇਣਪਿਣ੍ਡੋ ਆਦਿਤੋ ਬਦਰਪਕ੍ਕਮਤ੍ਤੋ ਹੁਤ੍ਵਾ ਅਨੁਪੁਬ੍ਬੇਨ ਪਬ੍ਬਤਕੂਟਮਤ੍ਤੋਪਿ ਹੋਤਿ, ਏਵਂ ਰੂਪਮ੍ਪਿ ਆਦਿਤੋ ਕਲਲਮਤ੍ਤਂ ਹੁਤ੍ਵਾ ਅਨੁਪੁਬ੍ਬੇਨ ਬ੍ਯਾਮਮਤ੍ਤਮ੍ਪਿ ਗੋਮਹਿਂਸਹਤ੍ਥਿਆਦੀਨਂ ਵਸੇਨ ਪਬ੍ਬਤਕੂਟਾਦਿਮਤ੍ਤਂ ਹੋਤਿ ਮਚ੍ਛਕਚ੍ਛਪਾਦੀਨਂ ਵਸੇਨ ਅਨੇਕਯੋਜਨਸਤਪਮਾਣਮ੍ਪਿ, ਏਵਮ੍ਪਿ ਫੇਣਪਿਣ੍ਡਸਦਿਸਂ. ਯਥਾ ਚ ਫੇਣਪਿਣ੍ਡੋ ਉਟ੍ਠਿਤਮਤ੍ਤੋਪਿ ਭਿਜ੍ਜਤਿ, ਥੋਕਂ ਗਨ੍ਤ੍ਵਾਪਿ, ਦੂਰਂ ਗਨ੍ਤ੍ਵਾਪਿ, ਸਮੁਦ੍ਦਂ ਪਤ੍ਵਾ ਪਨ ਅਵਸ੍ਸਮੇਵ ਭਿਜ੍ਜਤਿ, ਏਵਮੇਵਂ ਰੂਪਮ੍ਪਿ ਕਲਲਭਾਵੇਪਿ ਭਿਜ੍ਜਤਿ ਅਬ੍ਬੁਦਾਦਿਭਾਵੇਪਿ, ਅਨ੍ਤਰਾ ਪਨ ਅਭਿਜ੍ਜਮਾਨਮ੍ਪਿ ਵਸ੍ਸਸਤਾਯੁਕਾਨਂ ਵਸ੍ਸਸਤਂ ਪਤ੍ਵਾ ਅਵਸ੍ਸਮੇਵ ਭਿਜ੍ਜਤਿ, ਮਰਣਮੁਖੇ ਚੁਣ੍ਣਵਿਚੁਣ੍ਣਂ ਹੋਤਿ, ਏਵਮ੍ਪਿ ਫੇਣਪਿਣ੍ਡਸਦਿਸਂ.

ਕਿਞ੍ਹਿ ਸਿਯਾ, ਭਿਕ੍ਖਵੇ, ਵੇਦਨਾਯ ਸਾਰੋਤਿਆਦੀਸੁ ਵੇਦਨਾਦੀਨਂ ਪੁਬ੍ਬੁਲ਼ਾਦੀਹਿ ਏਵਂ ਸਦਿਸਤਾ ਵੇਦਿਤਬ੍ਬਾ. ਯਥਾ ਹਿ ਪੁਬ੍ਬੁਲ਼ੋ ਅਸਾਰੋ ਏਵਂ ਵੇਦਨਾਪਿ. ਯਥਾ ਚ ਸੋ ਅਬਲੋ ਅਗਯ੍ਹੂਪਗੋ, ਨ ਸਕ੍ਕਾ ਤਂ ਗਹੇਤ੍ਵਾ ਫਲਕਂ ਵਾ ਆਸਨਂ ਵਾ ਕਾਤੁਂ, ਗਹਿਤੋਪਿ ਭਿਜ੍ਜਤੇਵ, ਏਵਂ ਵੇਦਨਾਪਿ ਅਬਲਾ ਅਗਯ੍ਹੂਪਗਾ, ਨ ਸਕ੍ਕਾ ਨਿਚ੍ਚਾਤਿ ਵਾ ਧੁਵਾਤਿ ਵਾ ਗਹੇਤੁਂ, ਗਹਿਤਾਪਿ ਨ ਤਥਾ ਤਿਟ੍ਠਤਿ, ਏਵਂ ਅਗਯ੍ਹੂਪਗਤਾਯਪਿ ਵੇਦਨਾ ਪੁਬ੍ਬੁਲ਼ਸਦਿਸਾ. ਯਥਾ ਪਨ ਤਸ੍ਮਿਂ ਤਸ੍ਮਿਂ ਉਦਕਬਿਨ੍ਦੁਮ੍ਹਿ ਪੁਬ੍ਬੁਲ਼ੋ ਉਪ੍ਪਜ੍ਜਤਿ ਚੇਵ ਭਿਜ੍ਜਤਿ ਚ, ਨ ਚਿਰਟ੍ਠਿਤਿਕੋ ਹੋਤਿ, ਏਵਂ ਵੇਦਨਾਪਿ ਉਪ੍ਪਜ੍ਜਤਿ ਚੇਵ ਭਿਜ੍ਜਤਿ ਚ, ਨ ਚਿਰਟ੍ਠਿਤਿਕਾ ਹੋਤਿ. ਏਕਚ੍ਛਰਕ੍ਖਣੇ ਕੋਟਿਸਤਸਹਸ੍ਸਸਙ੍ਖਾ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਤਿ. ਯਥਾ ਚ ਪੁਬ੍ਬੁਲ਼ੋ ਉਦਕਤਲਂ, ਉਦਕਬਿਨ੍ਦੁਂ, ਉਦਕਜਲ੍ਲਂ, ਸਙ੍ਕਡ੍ਢਿਤ੍ਵਾ ਪੁਟਂ ਕਤ੍ਵਾ ਗਹਣਵਾਤਞ੍ਚਾਤਿ ਚਤ੍ਤਾਰਿ ਕਾਰਣਾਨਿ ਪਟਿਚ੍ਚ ਉਪ੍ਪਜ੍ਜਤਿ, ਏਵਂ ਵੇਦਨਾਪਿ ਵਤ੍ਥੁਂ ਆਰਮ੍ਮਣਂ ਕਿਲੇਸਜਲ੍ਲਂ ਫਸ੍ਸਸਙ੍ਘਟ੍ਟਨਞ੍ਚਾਤਿ ਚਤ੍ਤਾਰਿ ਕਾਰਣਾਨਿ ਪਟਿਚ੍ਚ ਉਪ੍ਪਜ੍ਜਤਿ. ਏਵਮ੍ਪਿ ਵੇਦਨਾ ਪੁਬ੍ਬੁਲ਼ਸਦਿਸਾ.

ਸਞ੍ਞਾਪਿ ਅਸਾਰਕਟ੍ਠੇਨ ਮਰੀਚਿਸਦਿਸਾ. ਤਥਾ ਅਗਯ੍ਹੂਪਗਟ੍ਠੇਨ. ਨ ਹਿ ਸਕ੍ਕਾ ਤਂ ਗਹੇਤ੍ਵਾ ਪਿਵਿਤੁਂ ਵਾ ਨ੍ਹਾਯਿਤੁਂ ਵਾ ਭਾਜਨਂ ਵਾ ਪੂਰੇਤੁਂ. ਅਪਿਚ ਯਥਾ ਮਰੀਚਿ ਵਿਪ੍ਫਨ੍ਦਤਿ, ਸਞ੍ਜਾਤੂਮਿਵੇਗਾ ਵਿਯ ਖਾਯਤਿ, ਏਵਂ ਨੀਲਸਞ੍ਞਾਦਿਭੇਦਾ ਸਞ੍ਞਾਪਿ ਨੀਲਾਦਿਅਨੁਭਵਨਤ੍ਥਾਯ ਫਨ੍ਦਤਿ ਵਿਪ੍ਫਨ੍ਦਤਿ. ਯਥਾ ਚ ਮਰੀਚਿ ਮਹਾਜਨਂ ਵਿਪ੍ਪਲਮ੍ਭੇਤਿ ‘‘ਪੁਣ੍ਣਵਾਪਿ ਵਿਯ ਪੁਣ੍ਣਨਦੀ ਵਿਯ ਦਿਸ੍ਸਤੀ’’ਤਿ ਵਦਾਪੇਤਿ, ਏਵਂ ਸਞ੍ਞਾਪਿ ਵਿਪ੍ਪਲਮ੍ਭੇਤਿ, ‘‘ਇਦਂ ਨੀਲਕਂ ਸੁਭਂ ਸੁਖਂ ਨਿਚ੍ਚ’’ਨ੍ਤਿ ਵਦਾਪੇਤਿ. ਪੀਤਕਾਦੀਸੁਪਿ ਏਸੇਵ ਨਯੋ. ਏਵਂ ਸਞ੍ਞਾ ਵਿਪ੍ਪਲਮ੍ਭਨੇਨਾਪਿ ਮਰੀਚਿਸਦਿਸਾ.

ਅਕੁਕ੍ਕੁਕਜਾਤਨ੍ਤਿ ਅਨ੍ਤੋ ਅਸਞ੍ਜਾਤਘਨਦਣ੍ਡਕਂ. ਸਙ੍ਖਾਰਾਪਿ ਅਸਾਰਕਟ੍ਠੇਨ ਕਦਲਿਕ੍ਖਨ੍ਧਸਦਿਸਾ, ਤਥਾ ਅਗਯ੍ਹੂਪਗਟ੍ਠੇਨ. ਯਥੇਵ ਹਿ ਕਦਲਿਕ੍ਖਨ੍ਧਤੋ ਕਿਞ੍ਚਿ ਗਹੇਤ੍ਵਾ ਨ ਸਕ੍ਕਾ ਗੋਪਾਨਸਿਆਦੀਨਂ ਅਤ੍ਥਾਯ ਉਪਨੇਤੁਂ, ਉਪਨੀਤਮ੍ਪਿ ਨ ਤਥਾ ਹੋਤਿ, ਏਵਂ ਸਙ੍ਖਾਰਾਪਿ ਨ ਸਕ੍ਕਾ ਨਿਚ੍ਚਾਦਿਵਸੇਨ ਗਹੇਤੁਂ, ਗਹਿਤਾਪਿ ਨ ਤਥਾ ਹੋਨ੍ਤਿ. ਯਥਾ ਚ ਕਦਲਿਕ੍ਖਨ੍ਧੋ ਬਹੁਪਤ੍ਤਵਟ੍ਟਿਸਮੋਧਾਨੋ ਹੋਤਿ, ਏਵਂ ਸਙ੍ਖਾਰਕ੍ਖਨ੍ਧੋ ਬਹੁਧਮ੍ਮਸਮੋਧਾਨੋ. ਯਥਾ ਚ ਕਦਲਿਕ੍ਖਨ੍ਧੋ ਨਾਨਾਲਕ੍ਖਣੋ. ਅਞ੍ਞੋਯੇਵ ਹਿ ਬਾਹਿਰਾਯ ਪਤ੍ਤਵਟ੍ਟਿਯਾ ਵਣ੍ਣੋ, ਅਞ੍ਞੋ ਤਤੋ ਅਬ੍ਭਨ੍ਤਰਅਬ੍ਭਨ੍ਤਰਾਨਂ, ਏਵਮੇਵ ਸਙ੍ਖਾਰਕ੍ਖਨ੍ਧੇਪਿ ਅਞ੍ਞਦੇਵ ਫਸ੍ਸਸ੍ਸ ਲਕ੍ਖਣਂ, ਅਞ੍ਞਾ ਚੇਤਨਾਦੀਨਂ, ਸਮੋਧਾਨੇਤ੍ਵਾ ਪਨ ਸਙ੍ਖਾਰਕ੍ਖਨ੍ਧੋਵ ਵੁਚ੍ਚਤੀਤਿ ਏਵਮ੍ਪਿ ਸਙ੍ਖਾਰਕ੍ਖਨ੍ਧੋ ਕਦਲਿਕ੍ਖਨ੍ਧਸਦਿਸੋ.

ਚਕ੍ਖੁਮਾ ਪੁਰਿਸੋਤਿ ਮਂਸਚਕ੍ਖੁਨਾ ਚੇਵ ਪਞ੍ਞਾਚਕ੍ਖੁਨਾ ਚਾਤਿ ਦ੍ਵੀਹਿ ਚਕ੍ਖੂਹਿ ਚਕ੍ਖੁਮਾ. ਮਂਸਚਕ੍ਖੁਮ੍ਪਿ ਹਿਸ੍ਸ ਪਰਿਸੁਦ੍ਧਂ ਵਟ੍ਟਤਿ ਅਪਗਤਪਟਲਪਿਲ਼ਕਂ, ਪਞ੍ਞਾਚਕ੍ਖੁਮ੍ਪਿ ਅਸਾਰਭਾਵਦਸ੍ਸਨਸਮਤ੍ਥਂ. ਵਿਞ੍ਞਾਣਮ੍ਪਿ ਅਸਾਰਕਟ੍ਠੇਨ ਮਾਯਾਸਦਿਸਂ, ਤਥਾ ਅਗਯ੍ਹੂਪਗਟ੍ਠੇਨ. ਯਥਾ ਚ ਮਾਯਾ ਇਤ੍ਤਰਾ ਲਹੁਪਚ੍ਚੁਪਟ੍ਠਾਨਾ, ਏਵਂ ਵਿਞ੍ਞਾਣਂ. ਤਞ੍ਹਿ ਤਤੋਪਿ ਇਤ੍ਤਰਤਰਞ੍ਚੇਵ ਲਹੁਪਚ੍ਚੁਪਟ੍ਠਾਨਤਰਞ੍ਚ. ਤੇਨੇਵ ਹਿ ਚਿਤ੍ਤੇਨ ਪੁਰਿਸੋ ਆਗਤੋ ਵਿਯ ਗਤੋ ਵਿਯ ਠਿਤੋ ਵਿਯ ਨਿਸਿਨ੍ਨੋ ਵਿਯ ਹੋਤਿ. ਅਞ੍ਞਦੇਵ ਚ ਆਗਮਨਕਾਲੇ ਚਿਤ੍ਤਂ, ਅਞ੍ਞਂ ਗਮਨਕਾਲਾਦੀਸੁ. ਏਵਮ੍ਪਿ ਵਿਞ੍ਞਾਣਂ ਮਾਯਾਸਦਿਸਂ. ਮਾਯਾ ਚ ਮਹਾਜਨਂ ਵਞ੍ਚੇਤਿ, ਯਂਕਿਞ੍ਚਿਦੇਵ ‘‘ਇਦਂ ਸੁਵਣ੍ਣਂ ਰਜਤਂ ਮੁਤ੍ਤਾ’’ਤਿ ਗਾਹਾਪੇਤਿ, ਵਿਞ੍ਞਾਣਮ੍ਪਿ ਮਹਾਜਨਂ ਵਞ੍ਚੇਤਿ. ਤੇਨੇਵ ਹਿ ਚਿਤ੍ਤੇਨ ਆਗਚ੍ਛਨ੍ਤਂ ਵਿਯ ਗਚ੍ਛਨ੍ਤਂ ਵਿਯ ਠਿਤਂ ਵਿਯ ਨਿਸਿਨ੍ਨਂ ਵਿਯ ਕਤ੍ਵਾ ਗਾਹਾਪੇਤਿ. ਅਞ੍ਞਦੇਵ ਚ ਆਗਮਨੇ ਚਿਤ੍ਤਂ, ਅਞ੍ਞਂ ਗਮਨਾਦੀਸੁ. ਏਵਮ੍ਪਿ ਵਿਞ੍ਞਾਣਂ ਮਾਯਾਸਦਿਸਂ.

ਭੂਰਿਪਞ੍ਞੇਨਾਤਿ ਸਣ੍ਹਪਞ੍ਞੇਨ ਚੇਵ ਵਿਪੁਲਵਿਤ੍ਥਤਪਞ੍ਞੇਨ ਚ. ਆਯੂਤਿ ਜੀਵਿਤਿਨ੍ਦ੍ਰਿਯਂ. ਉਸ੍ਮਾਤਿ ਕਮ੍ਮਜਤੇਜੋਧਾਤੁ. ਪਰਭਤ੍ਤਨ੍ਤਿ ਨਾਨਾਵਿਧਾਨਂ ਕਿਮਿਗਣਾਦੀਨਂ ਭਤ੍ਤਂ ਹੁਤ੍ਵਾ. ਏਤਾਦਿਸਾਯਂ ਸਨ੍ਤਾਨੋਤਿ ਏਤਾਦਿਸੀ ਅਯਂ ਪਵੇਣੀ ਮਤਕਸ੍ਸ ਯਾਵ ਸੁਸਾਨਾ ਘਟ੍ਟੀਯਤੀਤਿ. ਮਾਯਾਯਂ ਬਾਲਲਾਪਿਨੀਤਿ ਯ੍ਵਾਯਂ ਵਿਞ੍ਞਾਣਕ੍ਖਨ੍ਧੋ ਨਾਮ, ਅਯਂ ਬਾਲਮਹਾਜਨਲਪਾਪਨਿਕਮਾਯਾ ਨਾਮ. ਵਧਕੋਤਿ ਦ੍ਵੀਹਿ ਕਾਰਣੇਹਿ ਅਯਂ ਖਨ੍ਧਸਙ੍ਖਾਤੋ ਵਧਕੋ ਅਞ੍ਞਮਞ੍ਞਘਾਤਨੇਨਪਿ, ਖਨ੍ਧੇਸੁ ਸਤਿ ਵਧੋ ਪਞ੍ਞਾਯਤੀਤਿਪਿ. ਏਕਾ ਹਿ ਪਥਵੀਧਾਤੁ ਭਿਜ੍ਜਮਾਨਾ ਸੇਸਧਾਤੁਯੋ ਗਹੇਤ੍ਵਾਵ ਭਿਜ੍ਜਤਿ, ਤਥਾ ਆਪੋਧਾਤੁਆਦਯੋ. ਰੂਪਕ੍ਖਨ੍ਧੋ ਚ ਭਿਜ੍ਜਮਾਨੋ ਅਰੂਪਕ੍ਖਨ੍ਧੇ ਗਹੇਤ੍ਵਾਵ ਭਿਜ੍ਜਤਿ, ਤਥਾ ਅਰੂਪਕ੍ਖਨ੍ਧੇਸੁ ਵੇਦਨਾਦਯੋ ਸਞ੍ਞਾਦਿਕੇ. ਚਤ੍ਤਾਰੋਪਿ ਚੇਤੇ ਵਤ੍ਥੁਰੂਪਨ੍ਤਿ ਏਵਂ ਅਞ੍ਞਮਞ੍ਞਵਧਨੇਨੇਤ੍ਥ ਵਧਕਤਾ ਵੇਦਿਤਬ੍ਬਾ. ਖਨ੍ਧੇਸੁ ਪਨ ਸਤਿ ਵਧਬਨ੍ਧਨਚ੍ਛੇਦਾਦੀਨਿ ਸਮ੍ਭਵਨ੍ਤਿ, ਏਵਂ ਏਤੇਸੁ ਸਤਿ ਵਧਭਾਵਤੋਪਿ ਵਧਕਤਾ ਵੇਦਿਤਬ੍ਬਾ. ਸਬ੍ਬਸਂਯੋਗਨ੍ਤਿ ਸਬ੍ਬਂ ਦਸਵਿਧਮ੍ਪਿ ਸਂਯੋਜਨਂ. ਅਚ੍ਚੁਤਂ ਪਦਨ੍ਤਿ ਨਿਬ੍ਬਾਨਂ. ਤਤਿਯਂ.