੪-੬. ਗੋਮਯਪਿਣ੍ਡਸੁਤ੍ਤਾਦਿਵਣ੍ਣਨਾ
੯੬-੯੮. ਚਤੁਤ੍ਥੇ ਸਸ੍ਸਤਿਸਮਨ੍ਤਿ ਸਿਨੇਰੁਮਹਾਪਥਵੀਚਨ੍ਦਿਮਸੂਰਿਯਾਦੀਹਿ ਸਸ੍ਸਤੀਹਿ ਸਮਂ. ਪਰਿਤ੍ਤਂ ਗੋਮਯਪਿਣ੍ਡਨ੍ਤਿ ਅਪ੍ਪਮਤ੍ਤਕਂ ਮਧੁਕਪੁਪ੍ਫਪ੍ਪਮਾਣਂ ਗੋਮਯਖਣ੍ਡਂ. ਕੁਤੋ ਪਨਾਨੇਨੇਤਂ ਲਦ੍ਧਨ੍ਤਿ. ਪਰਿਭਣ੍ਡਕਰਣਤ੍ਥਾਯ ਆਭਤਤੋ ਗਹਿਤਨ੍ਤਿ ਏਕੇ. ਅਤ੍ਥਸ੍ਸ ਪਨ ਵਿਞ੍ਞਾਪਨਤ੍ਥਂ ਇਦ੍ਧਿਯਾ ਅਭਿਸਙ੍ਖਰਿਤ੍ਵਾ ਹਤ੍ਥਾਰੁਲ਼੍ਹਂ ਕਤਨ੍ਤਿ ਵੇਦਿਤਬ੍ਬਨ੍ਤਿ. ਅਤ੍ਤਭਾਵਪਟਿਲਾਭੋਤਿ ਪਟਿਲਦ੍ਧਅਤ੍ਤਭਾਵੋ. ਨ ਯਿਦਂ ਬ੍ਰਹ੍ਮਚਰਿਯਵਾਸੋ ਪਞ੍ਞਾਯੇਥਾਤਿ ਅਯਂ ਮਗ੍ਗਬ੍ਰਹ੍ਮਚਰਿਯਵਾਸੋ ਨਾਮ ਨ ਪਞ੍ਞਾਯੇਯ੍ਯ. ਮਗ੍ਗੋ ਹਿ ਤੇਭੂਮਕਸਙ੍ਖਾਰੇ ਵਿਵਟ੍ਟੇਨ੍ਤੋ ਉਪ੍ਪਜ੍ਜਤਿ. ਯਦਿ ਚ ਏਤ੍ਤਕੋ ਅਤ੍ਤਭਾਵੋ ਨਿਚ੍ਚੋ ਭਵੇਯ੍ਯ, ਮਗ੍ਗੋ ਉਪ੍ਪਜ੍ਜਿਤ੍ਵਾਪਿ ਸਙ੍ਖਾਰਵਟ੍ਟਂ ਵਿਵਟ੍ਟੇਤੁਂ ਨ ਸਕ੍ਕੁਣੇਯ੍ਯਾਤਿ ਬ੍ਰਹ੍ਮਚਰਿਯਵਾਸੋ ਨ ਪਞ੍ਞਾਯੇਥ.
ਇਦਾਨਿ ਸਚੇ ਕੋਚਿ ਸਙ੍ਖਾਰੋ ਨਿਚ੍ਚੋ ਭਵੇਯ੍ਯ, ਮਯਾ ਮਹਾਸੁਦਸ੍ਸਨਰਾਜਕਾਲੇ ਅਨੁਭੂਤਾ ਸਮ੍ਪਤ੍ਤਿ ਨਿਚ੍ਚਾ ਭਵੇਯ੍ਯ, ਸਾਪਿ ਚ ਅਨਿਚ੍ਚਾਤਿ ਤਂ ਦਸ੍ਸੇਤੁਂ ਭੂਤਪੁਬ੍ਬਾਹਂ ਭਿਕ੍ਖੁ ਰਾਜਾ ਅਹੋਸਿਨ੍ਤਿਆਦਿਮਾਹ. ਤਤ੍ਥ ਕੁਸਾਵਤੀਰਾਜਧਾਨਿਪ੍ਪਮੁਖਾਨੀਤਿ ਕੁਸਾਵਤੀਰਾਜਧਾਨੀ ਤੇਸਂ ਨਗਰਾਨਂ ਪਮੁਖਾ, ਸਬ੍ਬਸੇਟ੍ਠਾਤਿ ਅਤ੍ਥੋ. ਸਾਰਮਯਾਨੀਤਿ ਰਤ੍ਤਚਨ੍ਦਨਸਾਰਮਯਾਨਿ. ਉਪਧਾਨਂ ਪਨ ਸਬ੍ਬੇਸਂ ਸੁਤ੍ਤਮਯਮੇਵ. ਗੋਣਕਤ੍ਥਤਾਨੀਤਿ ਚਤੁਰਙ੍ਗੁਲਾਧਿਕਲੋਮੇਨ ਕਾਲ਼ਕੋਜਵੇਨ ਅਤ੍ਥਤਾਨਿ, ਯਂ ਮਹਾਪਿਟ੍ਠਿਯਕੋਜਵੋਤਿ ਵਦਨ੍ਤਿ. ਪਟਕਤ੍ਥਤਾਨੀਤਿ ਉਭਤੋਲੋਮੇਨ ਉਣ੍ਣਾਮਯੇਨ ਸੇਤਕਮ੍ਬਲੇਨ ਅਤ੍ਥਤਾਨਿ. ਪਟਲਿਕਤ੍ਥਤਾਨੀਤਿ ਘਨਪੁਪ੍ਫੇਨ ਉਣ੍ਣਾਮਯਅਤ੍ਥਰਣੇਨ ਅਤ੍ਥਤਾਨਿ. ਕਦਲਿਮਿਗਪਵਰਪਚ੍ਚਤ੍ਥਰਣਾਨੀਤਿ ਕਦਲਿਮਿਗਚਮ੍ਮਮਯੇਨ ਉਤ੍ਤਮਪਚ੍ਚਤ੍ਥਰਣੇਨ ਅਤ੍ਥਤਾਨਿ. ਤਂ ਕਿਰ ਪਚ੍ਚਤ੍ਥਰਣਂ ਸੇਤਵਤ੍ਥਸ੍ਸ ਉਪਰਿ ਕਦਲਿਮਿਗਚਮ੍ਮਂ ਅਤ੍ਥਰਿਤ੍ਵਾ ਸਿਬ੍ਬੇਤ੍ਵਾ ਕਰੋਨ੍ਤਿ. ਸਉਤ੍ਤਰਚ੍ਛਦਾਨੀਤਿ ਸਹ ਉਤ੍ਤਰਚ੍ਛਦੇਨ, ਉਪਰਿ ਬਦ੍ਧੇਨ ਰਤ੍ਤਵਿਤਾਨੇਨ ਸਦ੍ਧਿਨ੍ਤਿ ਅਤ੍ਥੋ. ਉਭਤੋਲੋਹਿਤਕੂਪਧਾਨੀਤਿ ਸੀਸੂਪਧਾਨਞ੍ਚ ਪਾਦੂਪਧਾਨਞ੍ਚਾਤਿ ਪਲ੍ਲਙ੍ਕਾਨਂ ਉਭਤੋਲੋਹਿਤਕੂਪਧਾਨਾਨਿ. ਵੇਜਯਨ੍ਤਰਥਪ੍ਪਮੁਖਾਨੀਤਿ ਏਤ੍ਥ ਵੇਜਯਨ੍ਤੋ ਨਾਮ ਤਸ੍ਸ ਰਞ੍ਞੋ ਰਥੋ, ਯਸ੍ਸ ਚਕ੍ਕਾਨਂ ਇਨ੍ਦਨੀਲਮਣਿਮਯਾ ਨਾਭਿ, ਸਤ੍ਤਰਤਨਮਯਾ ਅਰਾ, ਪਵਾਲ਼ਮਯਾ ਨੇਮਿ, ਰਜਤਮਯੋ ਅਕ੍ਖੋ, ਇਨ੍ਦਨੀਲਮਣਿਮਯਂ ਉਪਕ੍ਖਰਂ, ਰਜਤਮਯਂ ਕੁਬ੍ਬਰਂ. ਸੋ ਤੇਸਂ ਰਥਾਨਂ ਪਮੁਖੋ ਅਗ੍ਗੋ. ਦੁਕੂਲਸਨ੍ਦਾਨਾਨੀਤਿ ਦੁਕੂਲਸਨ੍ਥਰਾਨਿ. ਕਂਸੂਪਧਾਰਣਾਨੀਤਿ ਰਜਤਮਯਦੋਹਭਾਜਨਾਨਿ. ਵਤ੍ਥਕੋਟਿਸਹਸ੍ਸਾਨੀਤਿ ਯਥਾਰੁਚਿਤਂ ਪਰਿਭੁਞ੍ਜਿਸ੍ਸਤੀਤਿ ਨ੍ਹਤ੍ਵਾ ਠਿਤਕਾਲੇ ਉਪਨੀਤਵਤ੍ਥਾਨੇਵ ਸਨ੍ਧਾਯੇਤਂ ਵੁਤ੍ਤਂ. ਭਤ੍ਤਾਭਿਹਾਰੋਤਿ ਅਭਿਹਰਿਤਬ੍ਬਭਤ੍ਤਂ.
ਯਮਹਂ ਤੇਨ ਸਮਯੇਨ ਅਜ੍ਝਾਵਸਾਮੀਤਿ ਯਤ੍ਥ ਵਸਾਮਿ, ਤਂ ਏਕਞ੍ਞੇਵ ਨਗਰਂ ਹੋਤਿ, ਅਵਸੇਸੇਸੁ ਪੁਤ੍ਤਧੀਤਾਦਯੋ ਚੇਵ ਦਾਸਮਨੁਸ੍ਸਾ ਚ ਵਸਿਂਸੁ. ਪਾਸਾਦਕੂਟਾਗਾਰਾਦੀਸੁਪਿ ਏਸੇਵ ਨਯੋ. ਪਲ੍ਲਙ੍ਕਾਦੀਸੁ ਏਕਂਯੇਵ ਸਯਂ ਪਰਿਭੁਞ੍ਜਤਿ, ਸੇਸਾ ਪੁਤ੍ਤਾਦੀਨਂ ਪਰਿਭੋਗਾ ਹੋਨ੍ਤਿ. ਇਤ੍ਥੀਸੁ ਏਕਾਵ ਪਚ੍ਚੁਪਟ੍ਠਾਤਿ, ਸੇਸਾ ਪਰਿਵਾਰਮਤ੍ਤਾ ਹੋਨ੍ਤਿ. ਵੇਲਾਮਿਕਾਤਿ ਖਤ੍ਤਿਯਸ੍ਸ ਵਾ ਬ੍ਰਾਹ੍ਮਣਿਯਾ, ਬ੍ਰਾਹ੍ਮਣਸ੍ਸ ਵਾ ਖਤ੍ਤਿਯਾਨਿਯਾ ਕੁਚ੍ਛਿਸ੍ਮਿਂ ਜਾਤਾ. ਪਰਿਦਹਾਮੀਤਿ ਏਕਂਯੇਵ ਦੁਸ੍ਸਯੁਗਂ ਨਿਵਾਸੇਮਿ, ਸੇਸਾਨਿ ਪਰਿਵਾਰੇਤ੍ਵਾ ਵਿਚਰਨ੍ਤਾਨਂ ਅਸੀਤਿਸਹਸ੍ਸਾਧਿਕਾਨਂ ਸੋਲ਼ਸਨ੍ਨਂ ਪੁਰਿਸਸਤਸਹਸ੍ਸਾਨਂ ਹੋਨ੍ਤੀਤਿ ਦਸ੍ਸੇਤਿ. ਭੁਞ੍ਜਾਮੀਤਿ ਪਰਮਪ੍ਪਮਾਣੇਨ ਨਾਲ਼ਿਕੋਦਨਮਤ੍ਤਂ ਭੁਞ੍ਜਾਮਿ, ਸੇਸਂ ਪਰਿਵਾਰੇਤ੍ਵਾ ਵਿਚਰਨ੍ਤਾਨਂ ਚਤ੍ਤਾਲੀਸਸਹਸ੍ਸਾਧਿਕਾਨਂ ਅਟ੍ਠਨ੍ਨਂ ਪੁਰਿਸਸਤਸਹਸ੍ਸਾਨਂ ਹੋਤੀਤਿ ਦਸ੍ਸੇਤਿ. ਏਕਥਾਲਿਪਾਕੋ ਹਿ ਦਸਨ੍ਨਂ ਜਨਾਨਂ ਪਹੋਤਿ.
ਇਤਿ ਇਮਂ ਮਹਾਸੁਦਸ੍ਸਨਕਾਲੇ ਸਮ੍ਪਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਤਸ੍ਸਾ ਅਨਿਚ੍ਚਤਂ ਦਸ੍ਸੇਨ੍ਤੋ ਇਤਿ ਖੋ ਭਿਕ੍ਖੂਤਿਆਦਿਮਾਹ. ਤਤ੍ਥ ਵਿਪਰਿਣਤਾਤਿ ਪਕਤਿਜਹਨੇਨ ਨਿਬ੍ਬੁਤਪਦੀਪੋ ਵਿਯ ਅਪਣ੍ਣਤ੍ਤਿਕਭਾਵਂ ਗਤਾ. ਏਵਂ ਅਨਿਚ੍ਚਾ ਖੋ ਭਿਕ੍ਖੁ ਸਙ੍ਖਾਰਾਤਿ ਏਵਂ ਹੁਤ੍ਵਾਅਭਾਵਟ੍ਠੇਨ ਅਨਿਚ੍ਚਾ. ਏਤ੍ਤਾਵਤਾ ਭਗਵਾ ਯਥਾ ਨਾਮ ਪੁਰਿਸੋ ਸਤਹਤ੍ਥੁਬ੍ਬੇਧੇ ਚਮ੍ਪਕਰੁਕ੍ਖੇ ਨਿਸ੍ਸੇਣਿਂ ਬਨ੍ਧਿਤ੍ਵਾ ਅਭਿਰੁਹਿਤ੍ਵਾ ਚਮ੍ਪਕਪੁਪ੍ਫਂ ਆਦਾਯ ਨਿਸ੍ਸੇਣਿਂ ਮੁਞ੍ਚਨ੍ਤੋ ਓਤਰੇਯ੍ਯ, ਏਵਮੇਵਂ ਨਿਸ੍ਸੇਣਿਂ ਬਨ੍ਧਨ੍ਤੋ ਵਿਯ ਅਨੇਕਵਸ੍ਸਕੋਟਿਸਤਸਹਸ੍ਸੁਬ੍ਬੇਧਂ ਮਹਾਸੁਦਸ੍ਸਨਸਮ੍ਪਤ੍ਤਿਂ ਆਰੁਯ੍ਹ ਸਮ੍ਪਤ੍ਤਿਮਤ੍ਥਕੇ ਠਿਤਂ ਅਨਿਚ੍ਚਲਕ੍ਖਣਂ ਆਦਾਯ ਨਿਸ੍ਸੇਣਿਂ ਮੁਞ੍ਚਨ੍ਤੋ ਵਿਯ ਓਤਿਣ੍ਣੋ. ਏਵਂ ਅਦ੍ਧੁਵਾਤਿ ਏਵਂ ਉਦਕਪੁਬ੍ਬੁਲ਼ਾਦਯੋ ਵਿਯ ਧੁਵਭਾਵਰਹਿਤਾ. ਏਵਂ ਅਨਸ੍ਸਾਸਿਕਾਤਿ ਏਵਂ ਸੁਪਿਨਕੇ ਪੀਤਪਾਨੀਯਂ ਵਿਯ ਅਨੁਲਿਤ੍ਤਚਨ੍ਦਨਂ ਵਿਯ ਚ ਅਸ੍ਸਾਸਵਿਰਹਿਤਾ. ਇਤਿ ਇਮਸ੍ਮਿਂ ਸੁਤ੍ਤੇ ਅਨਿਚ੍ਚਲਕ੍ਖਣਂ ਕਥਿਤਂ. ਪਞ੍ਚਮੇ ਸਬ੍ਬਂ ਵੁਤ੍ਤਨਯਮੇਵ. ਛਟ੍ਠਂ ਤਥਾ ਬੁਜ੍ਝਨਕਸ੍ਸ ਅਜ੍ਝਾਸਯੇਨ ਵੁਤ੍ਤਂ. ਚਤੁਤ੍ਥਾਦੀਨਿ.