੨. ਦੁਤਿਯਅਸ੍ਸੁਤਵਾਸੁਤ੍ਤਵਣ੍ਣਨਾ

੬੨. ਦੁਤਿਯੇ ਸੁਖਵੇਦਨਿਯਨ੍ਤਿ ਸੁਖਵੇਦਨਾਯ ਪਚ੍ਚਯਂ. ਫਸ੍ਸਨ੍ਤਿ ਚਕ੍ਖੁਸਮ੍ਫਸ੍ਸਾਦਿਂ. ਨਨੁ ਚ ਚਕ੍ਖੁਸਮ੍ਫਸ੍ਸੋ ਸੁਖਵੇਦਨਾਯ ਪਚ੍ਚਯੋ ਨ ਹੋਤੀਤਿ? ਸਹਜਾਤਪਚ੍ਚਯੇਨ ਨ ਹੋਤਿ, ਉਪਨਿਸ੍ਸਯਪਚ੍ਚਯੇਨ ਪਨ ਜਵਨਵੇਦਨਾਯ ਹੋਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਸੋਤਸਮ੍ਫਸ੍ਸਾਦੀਸੁਪਿ ਏਸੇਵ ਨਯੋ. ਤਜ੍ਜਨ੍ਤਿ ਤਜ੍ਜਾਤਿਕਂ ਤਸ੍ਸਾਰੁਪ੍ਪਂ, ਤਸ੍ਸ ਫਸ੍ਸਸ੍ਸ ਅਨੁਰੂਪਨ੍ਤਿ ਅਤ੍ਥੋ. ਦੁਕ੍ਖਵੇਦਨਿਯਨ੍ਤਿਆਦਿ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਸਙ੍ਘਟ੍ਟਨਸਮੋਧਾਨਾਤਿ ਸਙ੍ਘਟ੍ਟਨੇਨ ਚੇਵ ਸਮੋਧਾਨੇਨ ਚ, ਸਙ੍ਘਟ੍ਟਨਸਮ੍ਪਿਣ੍ਡਨੇਨਾਤਿ ਅਤ੍ਥੋ. ਉਸ੍ਮਾਤਿ ਉਣ੍ਹਾਕਾਰੋ. ਤੇਜੋ ਅਭਿਨਿਬ੍ਬਤ੍ਤਤੀਤਿ ਅਗ੍ਗਿਚੁਣ੍ਣੋ ਨਿਕ੍ਖਮਤੀਤਿ ਨ ਗਹੇਤਬ੍ਬਂ, ਉਸ੍ਮਾਕਾਰਸ੍ਸੇਵ ਪਨ ਏਤਂ ਵੇਵਚਨਂ. ਤਤ੍ਥ ਦ੍ਵਿਨ੍ਨਂ ਕਟ੍ਠਾਨਨ੍ਤਿ ਦ੍ਵਿਨ੍ਨਂ ਅਰਣੀਨਂ. ਤਤ੍ਥ ਅਧੋਅਰਣੀ ਵਿਯ ਵਤ੍ਥੁ, ਉਤ੍ਤਰਾਰਣੀ ਵਿਯ ਆਰਮ੍ਮਣਂ, ਸਙ੍ਘਟ੍ਟਨਂ ਵਿਯ ਫਸ੍ਸੋ, ਉਸ੍ਮਾਧਾਤੁ ਵਿਯ ਵੇਦਨਾ. ਦੁਤਿਯਂ.