੭. ਮਹਾਵਗ੍ਗੋ

੧. ਅਸ੍ਸੁਤਵਾਸੁਤ੍ਤਵਣ੍ਣਨਾ

੬੧. ਮਹਾਵਗ੍ਗਸ੍ਸ ਪਠਮੇ ਅਸ੍ਸੁਤਵਾਤਿ ਖਨ੍ਧਧਾਤੁਆਯਤਨਪਚ੍ਚਯਾਕਾਰਸਤਿਪਟ੍ਠਾਨਾਦੀਸੁ ਉਗ੍ਗਹਪਰਿਪੁਚ੍ਛਾਵਿਨਿਚ੍ਛਯਰਹਿਤੋ. ਪੁਥੁਜ੍ਜਨੋਤਿ ਪੁਥੂਨਂ ਨਾਨਪ੍ਪਕਾਰਾਨਂ ਕਿਲੇਸਾਦੀਨਂ ਜਨਨਾਦਿਕਾਰਣੇਹਿ ਪੁਥੁਜ੍ਜਨੋ. ਵੁਤ੍ਤਞ੍ਹੇਤਂ – ‘‘ਪੁਥੁ ਕਿਲੇਸੇ ਜਨੇਨ੍ਤੀਤਿ ਪੁਥੁਜ੍ਜਨਾ’’ਤਿ ਸਬ੍ਬਂ ਵਿਤ੍ਥਾਰੇਤਬ੍ਬਂ. ਅਪਿਚ ਪੁਥੂਨਂ ਗਣਨਪਥਮਤੀਤਾਨਂ ਅਰਿਯਧਮ੍ਮਪਰਮ੍ਮੁਖਾਨਂ ਨੀਚਧਮ੍ਮਸਮਾਚਾਰਾਨਂ ਜਨਾਨਂ ਅਨ੍ਤੋਗਧਤ੍ਤਾਪਿ ਪੁਥੁਜ੍ਜਨੋ, ਪੁਥੁ ਵਾ ਅਯਂ ਵਿਸੁਂਯੇਵ ਸਙ੍ਖਂ ਗਤੋ, ਵਿਸਂਸਟ੍ਠੋ ਸੀਲਸੁਤਾਦਿਗੁਣਯੁਤ੍ਤੇਹਿ ਅਰਿਯੇਹਿ ਜਨੋਤਿ ਪੁਥੁਜ੍ਜਨੋ. ਏਵਮੇਤੇਹਿ ‘‘ਅਸ੍ਸੁਤਵਾ ਪੁਥੁਜ੍ਜਨੋ’’ਤਿ ਦ੍ਵੀਹਿਪਿ ਪਦੇਹਿ ਯੇ ਤੇ –

‘‘ਦੁਵੇ ਪੁਥੁਜ੍ਜਨਾ ਵੁਤ੍ਤਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ;

ਅਨ੍ਧੋ ਪੁਥੁਜ੍ਜਨੋ ਏਕੋ, ਕਲ੍ਯਾਣੇਕੋ ਪੁਥੁਜ੍ਜਨੋ’’ਤਿ. (ਮਹਾਨਿ. ੯੪); –

ਦ੍ਵੇ ਪੁਥੁਜ੍ਜਨਾ ਵੁਤ੍ਤਾ, ਤੇਸੁ ਅਨ੍ਧਪੁਥੁਜ੍ਜਨੋ ਗਹਿਤੋ. ਇਮਸ੍ਮਿਨ੍ਤਿ ਪਚ੍ਚੁਪ੍ਪਨ੍ਨਪਚ੍ਚਕ੍ਖਕਾਯਂ ਦਸ੍ਸੇਤਿ. ਚਾਤੁਮਹਾਭੂਤਿਕਸ੍ਮਿਨ੍ਤਿ ਚਤੁਮਹਾਭੂਤਕਾਯੇ ਚਤੁਮਹਾਭੂਤੇਹਿ ਨਿਬ੍ਬਤ੍ਤੇ ਚਤੁਮਹਾਭੂਤਮਯੇਤਿ ਅਤ੍ਥੋ. ਨਿਬ੍ਬਿਨ੍ਦੇਯ੍ਯਾਤਿ ਉਕ੍ਕਣ੍ਠੇਯ੍ਯ. ਵਿਰਜ੍ਜੇਯ੍ਯਾਤਿ ਨ ਰਜ੍ਜੇਯ੍ਯ. ਵਿਮੁਚ੍ਚੇਯ੍ਯਾਤਿ ਮੁਚ੍ਚਿਤੁਕਾਮੋ ਭਵੇਯ੍ਯ. ਆਚਯੋਤਿ ਵੁਡ੍ਢਿ. ਅਪਚਯੋਤਿ ਪਰਿਹਾਨਿ. ਆਦਾਨਨ੍ਤਿ ਨਿਬ੍ਬਤ੍ਤਿ. ਨਿਕ੍ਖੇਪਨਨ੍ਤਿ ਭੇਦੋ.

ਤਸ੍ਮਾਤਿ ਯਸ੍ਮਾ ਇਮੇ ਚਤ੍ਤਾਰੋ ਵੁਡ੍ਢਿਹਾਨਿਨਿਬ੍ਬਤ੍ਤਿਭੇਦਾ ਪਞ੍ਞਾਯਨ੍ਤਿ, ਤਸ੍ਮਾ ਤਂਕਾਰਣਾਤਿ ਅਤ੍ਥੋ. ਇਤਿ ਭਗਵਾ ਚਾਤੁਮਹਾਭੂਤਿਕੇ ਕਾਯੇ ਰੂਪਂ ਪਰਿਗ੍ਗਹੇਤੁਂ ਅਯੁਤ੍ਤਰੂਪਂ ਕਤ੍ਵਾ ਅਰੂਪਂ ਪਰਿਗ੍ਗਹੇਤੁਂ ਯੁਤ੍ਤਰੂਪਂ ਕਰੋਤਿ. ਕਸ੍ਮਾ? ਤੇਸਞ੍ਹਿ ਭਿਕ੍ਖੂਨਂ ਰੂਪਸ੍ਮਿਂ ਗਾਹੋ ਬਲਵਾ ਅਧਿਮਤ੍ਤੋ, ਤੇਨ ਤੇਸਂ ਰੂਪੇ ਗਾਹਸ੍ਸ ਪਰਿਗ੍ਗਹੇਤਬ੍ਬਰੂਪਤਂ ਦਸ੍ਸੇਤ੍ਵਾ ਨਿਕ੍ਕਡ੍ਢਨ੍ਤੋ ਅਰੂਪੇ ਪਤਿਟ੍ਠਾਪਨਤ੍ਥਂ ਏਵਮਾਹ.

ਚਿਤ੍ਤਨ੍ਤਿਆਦਿ ਸਬ੍ਬਂ ਮਨਾਯਤਨਸ੍ਸੇਵ ਨਾਮਂ. ਤਞ੍ਹਿ ਚਿਤ੍ਤਵਤ੍ਥੁਤਾਯ ਚਿਤ੍ਤਗੋਚਰਤਾਯ ਸਮ੍ਪਯੁਤ੍ਤਧਮ੍ਮਚਿਤ੍ਤਤਾਯ ਚ ਚਿਤ੍ਤਂ, ਮਨਨਟ੍ਠੇਨ ਮਨੋ, ਵਿਜਾਨਨਟ੍ਠੇਨ ਵਿਞ੍ਞਾਣਨ੍ਤਿ ਵੁਚ੍ਚਤਿ. ਨਾਲਨ੍ਤਿ ਨ ਸਮਤ੍ਥੋ. ਅਜ੍ਝੋਸਿਤਨ੍ਤਿ ਤਣ੍ਹਾਯ ਗਿਲਿਤ੍ਵਾ ਪਰਿਨਿਟ੍ਠਪੇਤ੍ਵਾ ਗਹਿਤਂ. ਮਮਾਯਿਤਨ੍ਤਿ ਤਣ੍ਹਾਮਮਤ੍ਤੇਨ ਮਮ ਇਦਨ੍ਤਿ ਗਹਿਤਂ. ਪਰਾਮਟ੍ਠਨ੍ਤਿ ਦਿਟ੍ਠਿਯਾ ਪਰਾਮਸਿਤ੍ਵਾ ਗਹਿਤਂ. ਏਤਂ ਮਮਾਤਿ ਤਣ੍ਹਾਗਾਹੋ, ਤੇਨ ਅਟ੍ਠਸਤਤਣ੍ਹਾਵਿਚਰਿਤਂ ਗਹਿਤਂ ਹੋਤਿ. ਏਸੋਹਮਸ੍ਮੀਤਿ ਮਾਨਗਾਹੋ, ਤੇਨ ਨਵ ਮਾਨਾ ਗਹਿਤਾ ਹੋਨ੍ਤਿ. ਏਸੋ ਮੇ ਅਤ੍ਤਾਤਿ ਦਿਟ੍ਠਿਗਾਹੋ, ਤੇਨ ਦ੍ਵਾਸਟ੍ਠਿ ਦਿਟ੍ਠਿਯੋ ਗਹਿਤਾ ਹੋਨ੍ਤਿ. ਤਸ੍ਮਾਤਿ ਯਸ੍ਮਾ ਏਵਂ ਦੀਘਰਤ੍ਤਂ ਗਹਿਤਂ, ਤਸ੍ਮਾ ਨਿਬ੍ਬਿਨ੍ਦਿਤੁਂ ਨ ਸਮਤ੍ਥੋ.

ਵਰਂ, ਭਿਕ੍ਖਵੇਤਿ ਇਦਂ ਕਸ੍ਮਾ ਆਹ? ਪਠਮਞ੍ਹਿ ਤੇਨ ਰੂਪਂ ਪਰਿਗ੍ਗਹੇਤੁਂ ਅਯੁਤ੍ਤਰੂਪਂ ਕਤਂ, ਅਰੂਪਂ ਯੁਤ੍ਤਰੂਪਂ, ਅਥ ‘‘ਤੇਸਂ ਭਿਕ੍ਖੂਨਂ ਰੂਪਤੋ ਗਾਹੋ ਨਿਕ੍ਖਮਿਤ੍ਵਾ ਅਰੂਪਂ ਗਤੋ’’ਤਿ ਞਤ੍ਵਾ ਤਂ ਨਿਕ੍ਕਡ੍ਢਿਤੁਂ ਇਮਂ ਦੇਸਨਂ ਆਰਭਿ. ਤਤ੍ਥ ਅਤ੍ਤਤੋ ਉਪਗਚ੍ਛੇਯ੍ਯਾਤਿ ਅਤ੍ਤਾਤਿ ਗਣ੍ਹੇਯ੍ਯ. ਭਿਯ੍ਯੋਪੀਤਿ ਵਸ੍ਸਸਤਤੋ ਉਦ੍ਧਮ੍ਪਿ. ਕਸ੍ਮਾ ਪਨ ਭਗਵਾ ਏਵਮਾਹ? ਕਿਂ ਅਤਿਰੇਕਵਸ੍ਸਸਤਂ ਤਿਟ੍ਠਮਾਨਂ ਰੂਪਂ ਨਾਮ ਅਤ੍ਥਿ? ਨਨੁ ਪਠਮਵਯੇ ਪਵਤ੍ਤਂ ਰੂਪਂ ਮਜ੍ਝਿਮਵਯਂ ਨ ਪਾਪੁਣਾਤਿ, ਮਜ੍ਝਿਮਵਯੇ ਪਵਤ੍ਤਂ ਪਚ੍ਛਿਮਵਯਂ, ਪੁਰੇਭਤ੍ਤੇ ਪਵਤ੍ਤਂ ਪਚ੍ਛਾਭਤ੍ਤਂ, ਪਚ੍ਛਾਭਤ੍ਤੇ ਪਵਤ੍ਤਂ ਪਠਮਯਾਮਂ, ਪਠਮਯਾਮੇ ਪਵਤ੍ਤਂ ਮਜ੍ਝਿਮਯਾਮਂ, ਮਜ੍ਝਿਮਯਾਮੇ ਪਵਤ੍ਤਂ ਪਚ੍ਛਿਮਯਾਮਂ ਨ ਪਾਪੁਣਾਤਿ? ਤਥਾ ਗਮਨੇ ਪਵਤ੍ਤਂ ਠਾਨਂ, ਠਾਨੇ ਪਵਤ੍ਤਂ ਨਿਸਜ੍ਜਂ, ਨਿਸਜ੍ਜਾਯ ਪਵਤ੍ਤਂ ਸਯਨਂ ਨ ਪਾਪੁਣਾਤਿ. ਏਕਇਰਿਯਾਪਥੇਪਿ ਪਾਦਸ੍ਸ ਉਦ੍ਧਰਣੇ ਪਵਤ੍ਤਂ ਅਤਿਹਰਣਂ, ਅਤਿਹਰਣੇ ਪਵਤ੍ਤਂ ਵੀਤਿਹਰਣਂ, ਵੀਤਿਹਰਣੇ ਪਵਤ੍ਤਂ ਵੋਸ੍ਸਜ੍ਜਨਂ, ਵੋਸ੍ਸਜ੍ਜਨੇ ਪਵਤ੍ਤਂ ਸਨ੍ਨਿਕ੍ਖੇਪਨਂ, ਸਨ੍ਨਿਕ੍ਖੇਪਨੇ ਪਵਤ੍ਤਂ ਸਨ੍ਨਿਰੁਜ੍ਝਨਂ ਨ ਪਾਪੁਣਾਤਿ, ਤਤ੍ਥ ਤਤ੍ਥੇਵ ਓਧਿ ਓਧਿ ਪਬ੍ਬਂ ਪਬ੍ਬਂ ਹੁਤ੍ਵਾ ਤਤ੍ਤਕਪਾਲੇ ਪਕ੍ਖਿਤ੍ਤਤਿਲਾ ਵਿਯ ਪਟਪਟਾਯਨ੍ਤਾ ਸਙ੍ਖਾਰਾ ਭਿਜ੍ਜਨ੍ਤੀਤਿ? ਸਚ੍ਚਮੇਤਂ. ਯਥਾ ਪਨ ਪਦੀਪਸ੍ਸ ਜਲਤੋ ਜਾਤਾ ਤਂ ਤਂ ਵਟ੍ਟਿਪ੍ਪਦੇਸਂ ਅਨਤਿਕ੍ਕਮਿਤ੍ਵਾ ਤਤ੍ਥ ਤਤ੍ਥੇਵ ਭਿਜ੍ਜਤਿ, ਅਥ ਚ ਪਨ ਪਵੇਣਿਸਮ੍ਬਨ੍ਧਵਸੇਨ ਸਬ੍ਬਰਤ੍ਤਿਂ ਜਲਿਤੋ ਪਦੀਪੋਤਿ ਵੁਚ੍ਚਤਿ, ਏਵਮਿਧਾਪਿ ਪਵੇਣਿਵਸੇਨ ਅਯਮ੍ਪਿ ਕਾਯੋ ਏਵਂ ਚਿਰਟ੍ਠਿਤਿਕੋ ਵਿਯ ਕਤ੍ਵਾ ਦਸ੍ਸਿਤੋ.

ਰਤ੍ਤਿਯਾ ਚ ਦਿਵਸਸ੍ਸ ਚਾਤਿ ਰਤ੍ਤਿਮ੍ਹਿ ਚ ਦਿਵਸੇ ਚ. ਭੁਮ੍ਮਤ੍ਥੇ ਹੇਤਂ ਸਾਮਿਵਚਨਂ. ਅਞ੍ਞਦੇਵ ਉਪ੍ਪਜ੍ਜਤਿ, ਅਞ੍ਞਂ ਨਿਰੁਜ੍ਝਤੀਤਿ ਯਂ ਰਤ੍ਤਿਂ ਉਪ੍ਪਜ੍ਜਤਿ ਚ ਨਿਰੁਜ੍ਝਤਿ ਚ, ਤਤੋ ਅਞ੍ਞਦੇਵ ਦਿਵਾ ਉਪ੍ਪਜ੍ਜਤਿ ਚ ਨਿਰੁਜ੍ਝਤਿ ਚਾਤਿ ਅਤ੍ਥੋ. ਅਞ੍ਞਂ ਉਪ੍ਪਜ੍ਜਤਿ, ਅਨੁਪ੍ਪਨ੍ਨਮੇਵ ਅਞ੍ਞਂ ਨਿਰੁਜ੍ਝਤੀਤਿ ਏਵਂ ਪਨ ਅਤ੍ਥੋ ਨ ਗਹੇਤਬ੍ਬੋ. ‘‘ਰਤ੍ਤਿਯਾ ਚ ਦਿਵਸਸ੍ਸ ਚਾ’’ਤਿ ਇਦਂ ਪੁਰਿਮਪਵੇਣਿਤੋ ਪਰਿਤ੍ਤਕਂ ਪਵੇਣਿਂ ਗਹੇਤ੍ਵਾ ਪਵੇਣਿਵਸੇਨੇਵ ਵੁਤ੍ਤਂ, ਏਕਰਤ੍ਤਿਂ ਪਨ ਏਕਦਿਵਸਂ ਵਾ ਏਕਮੇਵ ਚਿਤ੍ਤਂ ਠਾਤੁਂ ਸਮਤ੍ਥਂ ਨਾਮ ਨਤ੍ਥਿ. ਏਕਸ੍ਮਿਞ੍ਹਿ ਅਚ੍ਛਰਾਕ੍ਖਣੇ ਅਨੇਕਾਨਿ ਚਿਤ੍ਤਕੋਟਿਸਤਸਹਸ੍ਸਾਨਿ ਉਪ੍ਪਜ੍ਜਨ੍ਤਿ. ਵੁਤ੍ਤਮ੍ਪਿ ਚੇਤਂ ਮਿਲਿਨ੍ਦਪਞ੍ਹੇ –

‘‘ਵਾਹਸਤਂ ਖੋ, ਮਹਾਰਾਜ, ਵੀਹੀਨਂ, ਅਡ੍ਢਚੂਲ਼ਞ੍ਚ ਵਾਹਾ, ਵੀਹਿਸਤ੍ਤਮ੍ਬਣਾਨਿ, ਦ੍ਵੇ ਚ ਤੁਮ੍ਬਾ, ਏਕਚ੍ਛਰਾਕ੍ਖਣੇ ਪਵਤ੍ਤਸ੍ਸ ਚਿਤ੍ਤਸ੍ਸ ਏਤ੍ਤਕਾ ਵੀਹੀ ਲਕ੍ਖਂ ਠਪੀਯਮਾਨਾ ਪਰਿਕ੍ਖਯਂ ਪਰਿਯਾਦਾਨਂ ਗਚ੍ਛੇਯ੍ਯੁ’’ਨ੍ਤਿ.

ਪਵਨੇਤਿ ਮਹਾਵਨੇ. ਤਂ ਮੁਞ੍ਚਿਤ੍ਵਾ ਅਞ੍ਞਂ ਗਣ੍ਹਾਤਿ, ਤਂ ਮੁਞ੍ਚਿਤ੍ਵਾ ਅਞ੍ਞਂ ਗਣ੍ਹਾਤੀਤਿ ਇਮਿਨਾ ਨ ਸੋ ਗਣ੍ਹਿਤਬ੍ਬਸਾਖਂ ਅਲਭਿਤ੍ਵਾ ਭੂਮਿਂ ਓਤਰਤਿ. ਅਥ ਖੋ ਤਸ੍ਮਿਂ ਮਹਾਵਨੇ ਵਿਚਰਨ੍ਤੋ ਤਂ ਤਂ ਸਾਖਂ ਗਣ੍ਹਨ੍ਤੋਯੇਵ ਚਰਤੀਤਿ ਅਯਮਤ੍ਥੋ ਦਸ੍ਸਿਤੋ.

ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਅਰਞ੍ਞਮਹਾਵਨਂ ਵਿਯ ਹਿ ਆਰਮ੍ਮਣਵਨਂ ਵੇਦਿਤਬ੍ਬਂ. ਤਸ੍ਮਿਂ ਵਨੇ ਵਿਚਰਣਮਕ੍ਕਟੋ ਵਿਯ ਆਰਮ੍ਮਣਵਨੇ ਉਪ੍ਪਜ੍ਜਨਕਚਿਤ੍ਤਂ. ਸਾਖਾਗਹਣਂ ਵਿਯ ਆਰਮ੍ਮਣੇ ਲੁਬ੍ਭਨਂ. ਯਥਾ ਸੋ ਅਰਞ੍ਞੇ ਵਿਚਰਨ੍ਤੋ ਮਕ੍ਕਟੋ ਤਂ ਤਂ ਸਾਖਂ ਪਹਾਯ ਤਂ ਤਂ ਸਾਖਂ ਗਣ੍ਹਾਤਿ, ਏਵਮਿਦਂ ਆਰਮ੍ਮਣਵਨੇ ਵਿਚਰਨ੍ਤਂ ਚਿਤ੍ਤਮ੍ਪਿ ਕਦਾਚਿ ਰੂਪਾਰਮ੍ਮਣਂ ਗਹੇਤ੍ਵਾ ਉਪ੍ਪਜ੍ਜਤਿ, ਕਦਾਚਿ ਸਦ੍ਦਾਦੀਸੁ ਅਞ੍ਞਤਰਂ, ਕਦਾਚਿ ਅਤੀਤਂ, ਕਦਾਚਿ ਅਨਾਗਤਂ ਵਾ ਪਚ੍ਚੁਪ੍ਪਨ੍ਨਂ ਵਾ, ਤਥਾ ਕਦਾਚਿ ਅਜ੍ਝਤ੍ਤਂ, ਕਦਾਚਿ ਬਾਹਿਰਂ. ਯਥਾ ਚ ਸੋ ਅਰਞ੍ਞੇ ਵਿਚਰਨ੍ਤੋ ਮਕ੍ਕਟੋ ਸਾਖਂ ਅਲਭਿਤ੍ਵਾ ਓਰੁਯ੍ਹ ਭੂਮਿਯਂ ਨਿਸਿਨ੍ਨੋਤਿ ਨ ਵਤ੍ਤਬ੍ਬੋ, ਏਕਂ ਪਨ ਪਣ੍ਣਸਾਖਂ ਗਹੇਤ੍ਵਾਵ ਨਿਸੀਦਤਿ, ਏਵਮੇਵ ਆਰਮ੍ਮਣਵਨੇ ਵਿਚਰਨ੍ਤਂ ਚਿਤ੍ਤਮ੍ਪਿ ਏਕਂ ਓਲੁਬ੍ਭਾਰਮ੍ਮਣਂ ਅਲਭਿਤ੍ਵਾ ਉਪ੍ਪਨ੍ਨਨ੍ਤਿ ਨ ਵਤ੍ਤਬ੍ਬਂ, ਏਕਜਾਤਿਯਂ ਪਨ ਆਰਮ੍ਮਣਂ ਗਹੇਤ੍ਵਾਵ ਉਪ੍ਪਜ੍ਜਤੀਤਿ ਵੇਦਿਤਬ੍ਬਂ. ਏਤ੍ਤਾਵਤਾ ਚ ਪਨ ਭਗਵਤਾ ਰੂਪਤੋ ਨੀਹਰਿਤ੍ਵਾ ਅਰੂਪੇ ਗਾਹੋ ਪਤਿਟ੍ਠਾਪਿਤੋ, ਅਰੂਪਤੋ ਨੀਹਰਿਤ੍ਵਾ ਰੂਪੇ.

ਇਦਾਨਿ ਤਂ ਉਭਯਤੋ ਨਿਕ੍ਕਡ੍ਢਿਤੁਕਾਮੋ ਤਤ੍ਰ, ਭਿਕ੍ਖਵੇ, ਸੁਤਵਾ ਅਰਿਯਸਾਵਕੋਤਿ ਦੇਸਨਂ ਆਰਭਿ. ਅਯਂ ਪਨਤ੍ਥੋ ਆਸੀਵਿਸਦਟ੍ਠੂਪਮਾਯ ਦੀਪੇਤਬ੍ਬੋ – ਏਕੋ ਕਿਰ ਪੁਰਿਸੋ ਆਸੀਵਿਸੇਨ ਦਟ੍ਠੋ, ਅਥਸ੍ਸ ਵਿਸਂ ਹਰਿਸ੍ਸਾਮੀਤਿ ਛੇਕੋ ਭਿਸਕ੍ਕੋ ਆਗਨ੍ਤ੍ਵਾ ਵਮਨਂ ਕਾਰੇਤ੍ਵਾ ਹੇਟ੍ਠਾ ਗਰੁਲ਼ੋ, ਉਪਰਿ ਨਾਗੋਤਿ ਮਨ੍ਤਂ ਪਰਿਵਤ੍ਤੇਤ੍ਵਾ ਵਿਸਂ ਉਪਰਿ ਆਰੋਪੇਸਿ. ਸੋ ਯਾਵ ਅਕ੍ਖਿਪ੍ਪਦੇਸਾ ਆਰੁਲ਼੍ਹਭਾਵਂ ਞਤ੍ਵਾ ‘‘ਇਤੋ ਪਰਂ ਅਭਿਰੁਹਿਤੁਂ ਨ ਦਸ੍ਸਾਮਿ, ਦਟ੍ਠਟ੍ਠਾਨੇਯੇਵ ਠਪੇਸ੍ਸਾਮੀ’’ਤਿ ਉਪਰਿ ਗਰੁਲ਼ੋ, ਹੇਟ੍ਠਾ ਨਾਗੋਤਿ ਮਨ੍ਤਂ ਪਰਿਵਤ੍ਤੇਤ੍ਵਾ ਕਣ੍ਣੇ ਧੁਮੇਤ੍ਵਾ ਦਣ੍ਡਕੇਨ ਪਹਰਿਤ੍ਵਾ ਵਿਸਂ ਓਤਾਰੇਤ੍ਵਾ ਦਟ੍ਠਟ੍ਠਾਨੇਯੇਵ ਠਪੇਸਿ. ਤਤ੍ਰਸ੍ਸ ਠਿਤਭਾਵਂ ਞਤ੍ਵਾ ਅਗਦਲੇਪੇਨ ਵਿਸਂ ਨਿਮ੍ਮਥੇਤ੍ਵਾ ਨ੍ਹਾਪੇਤ੍ਵਾ ‘‘ਸੁਖੀ ਹੋਹੀ’’ਤਿ ਵਤ੍ਵਾ ਯੇਨਕਾਮਂ ਪਕ੍ਕਾਮਿ.

ਤਤ੍ਥ ਆਸੀਵਿਸੇਨ ਦਟ੍ਠਸ੍ਸ ਕਾਯੇ ਵਿਸਪਤਿਟ੍ਠਾਨਂ ਵਿਯ ਇਮੇਸਂ ਭਿਕ੍ਖੂਨਂ ਰੂਪੇ ਅਧਿਮਤ੍ਤਗਾਹਕਾਲੋ, ਛੇਕੋ ਭਿਸਕ੍ਕੋ ਵਿਯ ਤਥਾਗਤੋ, ਮਨ੍ਤਂ ਪਰਿਵਤ੍ਤੇਤ੍ਵਾ ਉਪਰਿ ਵਿਸਸ੍ਸ ਆਰੋਪਿਤਕਾਲੋ ਵਿਯ ਤਥਾਗਤੇਨ ਤੇਸਂ ਭਿਕ੍ਖੂਨਂ ਰੂਪਤੋ ਗਾਹਂ ਨੀਹਰਿਤ੍ਵਾ ਅਰੂਪੇ ਪਤਿਟ੍ਠਾਪਿਤਕਾਲੋ, ਯਾਵ ਅਕ੍ਖਿਪ੍ਪਦੇਸਾ ਆਰੁਲ਼੍ਹਵਿਸਸ੍ਸ ਉਪਰਿ ਅਭਿਰੁਹਿਤੁਂ ਅਦਤ੍ਵਾ ਪੁਨ ਮਨ੍ਤਬਲੇਨ ਓਤਾਰੇਤ੍ਵਾ ਦਟ੍ਠਟ੍ਠਾਨੇਯੇਵ ਠਪਨਂ ਵਿਯ ਸਤ੍ਥਾਰਾ ਤੇਸਂ ਭਿਕ੍ਖੂਨਂ ਅਰੂਪਤੋ ਗਾਹਂ ਨੀਹਰਿਤ੍ਵਾ ਰੂਪੇ ਪਤਿਟ੍ਠਾਪਿਤਕਾਲੋ. ਦਟ੍ਠਟ੍ਠਾਨੇ ਠਿਤਸ੍ਸ ਵਿਸਸ੍ਸ ਅਗਦਲੇਪੇਨ ਨਿਮ੍ਮਥਨਂ ਵਿਯ ਉਭਯਤੋ ਗਾਹਂ ਨੀਹਰਣਤ੍ਥਾਯ ਇਮਿਸ੍ਸਾ ਦੇਸਨਾਯ ਆਰਦ੍ਧਕਾਲੋ ਵੇਦਿਤਬ੍ਬੋ. ਤਤ੍ਥ ਨਿਬ੍ਬਿਨ੍ਦਂ ਵਿਰਜ੍ਜਤੀਤਿ ਇਮਿਨਾ ਮਗ੍ਗੋ ਕਥਿਤੋ, ਵਿਰਾਗਾ ਵਿਮੁਚ੍ਚਤੀਤਿ ਫਲਂ, ਵਿਮੁਤ੍ਤਸ੍ਮਿਨ੍ਤਿਆਦਿਨਾ ਪਚ੍ਚਵੇਕ੍ਖਣਾ. ਪਠਮਂ.

੨. ਦੁਤਿਯਅਸ੍ਸੁਤਵਾਸੁਤ੍ਤਵਣ੍ਣਨਾ

੬੨. ਦੁਤਿਯੇ ਸੁਖਵੇਦਨਿਯਨ੍ਤਿ ਸੁਖਵੇਦਨਾਯ ਪਚ੍ਚਯਂ. ਫਸ੍ਸਨ੍ਤਿ ਚਕ੍ਖੁਸਮ੍ਫਸ੍ਸਾਦਿਂ. ਨਨੁ ਚ ਚਕ੍ਖੁਸਮ੍ਫਸ੍ਸੋ ਸੁਖਵੇਦਨਾਯ ਪਚ੍ਚਯੋ ਨ ਹੋਤੀਤਿ? ਸਹਜਾਤਪਚ੍ਚਯੇਨ ਨ ਹੋਤਿ, ਉਪਨਿਸ੍ਸਯਪਚ੍ਚਯੇਨ ਪਨ ਜਵਨਵੇਦਨਾਯ ਹੋਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਸੋਤਸਮ੍ਫਸ੍ਸਾਦੀਸੁਪਿ ਏਸੇਵ ਨਯੋ. ਤਜ੍ਜਨ੍ਤਿ ਤਜ੍ਜਾਤਿਕਂ ਤਸ੍ਸਾਰੁਪ੍ਪਂ, ਤਸ੍ਸ ਫਸ੍ਸਸ੍ਸ ਅਨੁਰੂਪਨ੍ਤਿ ਅਤ੍ਥੋ. ਦੁਕ੍ਖਵੇਦਨਿਯਨ੍ਤਿਆਦਿ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਸਙ੍ਘਟ੍ਟਨਸਮੋਧਾਨਾਤਿ ਸਙ੍ਘਟ੍ਟਨੇਨ ਚੇਵ ਸਮੋਧਾਨੇਨ ਚ, ਸਙ੍ਘਟ੍ਟਨਸਮ੍ਪਿਣ੍ਡਨੇਨਾਤਿ ਅਤ੍ਥੋ. ਉਸ੍ਮਾਤਿ ਉਣ੍ਹਾਕਾਰੋ. ਤੇਜੋ ਅਭਿਨਿਬ੍ਬਤ੍ਤਤੀਤਿ ਅਗ੍ਗਿਚੁਣ੍ਣੋ ਨਿਕ੍ਖਮਤੀਤਿ ਨ ਗਹੇਤਬ੍ਬਂ, ਉਸ੍ਮਾਕਾਰਸ੍ਸੇਵ ਪਨ ਏਤਂ ਵੇਵਚਨਂ. ਤਤ੍ਥ ਦ੍ਵਿਨ੍ਨਂ ਕਟ੍ਠਾਨਨ੍ਤਿ ਦ੍ਵਿਨ੍ਨਂ ਅਰਣੀਨਂ. ਤਤ੍ਥ ਅਧੋਅਰਣੀ ਵਿਯ ਵਤ੍ਥੁ, ਉਤ੍ਤਰਾਰਣੀ ਵਿਯ ਆਰਮ੍ਮਣਂ, ਸਙ੍ਘਟ੍ਟਨਂ ਵਿਯ ਫਸ੍ਸੋ, ਉਸ੍ਮਾਧਾਤੁ ਵਿਯ ਵੇਦਨਾ. ਦੁਤਿਯਂ.

੩. ਪੁਤ੍ਤਮਂਸੂਪਮਸੁਤ੍ਤਵਣ੍ਣਨਾ

੬੩. ਤਤਿਯੇ ਚਤ੍ਤਾਰੋਮੇ, ਭਿਕ੍ਖਵੇ, ਆਹਾਰਾਤਿਆਦਿ ਵੁਤ੍ਤਨਯਮੇਵ. ਯਸ੍ਮਾ ਪਨਸ੍ਸ ਅਟ੍ਠੁਪ੍ਪਤ੍ਤਿਕੋ ਨਿਕ੍ਖੇਪੋ, ਤਸ੍ਮਾ ਤਂ ਦਸ੍ਸੇਤ੍ਵਾਵੇਤ੍ਥ ਅਨੁਪੁਬ੍ਬਪਦਵਣ੍ਣਨਂ ਕਰਿਸ੍ਸਾਮਿ. ਕਤਰਾਯ ਪਨ ਇਦਂ ਅਟ੍ਠੁਪ੍ਪਤ੍ਤਿਯਾ ਨਿਕ੍ਖਿਤ੍ਤਨ੍ਤਿ? ਲਾਭਸਕ੍ਕਾਰੇਨ. ਭਗਵਤੋ ਕਿਰ ਮਹਾਲਾਭਸਕ੍ਕਾਰੋ ਉਪ੍ਪਜ੍ਜਿ, ਯਥਾ ਤਂ ਚਤ੍ਤਾਰੋ ਅਸਙ੍ਖ੍ਯੇਯ੍ਯੇ ਪੂਰਿਤਦਾਨਪਾਰਮੀਸਞ੍ਚਯਸ੍ਸ. ਸਬ੍ਬਦਿਸਾਸੁ ਹਿਸ੍ਸ ਯਮਕਮਹਾਮੇਘੋ ਵੁਟ੍ਠਹਿਤ੍ਵਾ ਮਹੋਘਂ ਵਿਯ ਸਬ੍ਬਪਾਰਮਿਯੋ ‘‘ਏਕਸ੍ਮਿਂ ਅਤ੍ਤਭਾਵੇ ਵਿਪਾਕਂ ਦਸ੍ਸਾਮਾ’’ਤਿ ਸਮ੍ਪਿਣ੍ਡਿਤਾ ਵਿਯ ਲਾਭਸਕ੍ਕਾਰਮਹੋਘਂ ਨਿਬ੍ਬਤ੍ਤਯਿਂਸੁ. ਤਤੋ ਤਤੋ ਅਨ੍ਨਪਾਨਯਾਨਵਤ੍ਥਮਾਲਾਗਨ੍ਧਵਿਲੇਪਨਾਦਿਹਤ੍ਥਾ ਖਤ੍ਤਿਯਬ੍ਰਾਹ੍ਮਣਾਦਯੋ ਆਗਨ੍ਤ੍ਵਾ, ‘‘ਕਹਂ ਬੁਦ੍ਧੋ, ਕਹਂ ਭਗਵਾ, ਕਹਂ ਦੇਵਦੇਵੋ ਨਰਾਸਭੋ ਪੁਰਿਸਸੀਹੋ’’ਤਿ? ਭਗਵਨ੍ਤਂ ਪਰਿਯੇਸਨ੍ਤਿ. ਸਕਟਸਤੇਹਿਪਿ ਪਚ੍ਚਯੇ ਆਹਰਿਤ੍ਵਾ ਓਕਾਸਂ ਅਲਭਮਾਨਾ ਸਮਨ੍ਤਾ ਗਾਵੁਤਪ੍ਪਮਾਣਮ੍ਪਿ ਸਕਟਧੁਰੇਨ ਸਕਟਧੁਰਂ ਆਹਚ੍ਚ ਤਿਟ੍ਠਨ੍ਤਿ ਚੇਵ ਅਨੁਪ੍ਪਵਤ੍ਤਨ੍ਤਿ ਚ ਅਨ੍ਧਕਵਿਨ੍ਦਬ੍ਰਾਹ੍ਮਣਾਦਯੋ ਵਿਯ. ਸਬ੍ਬਂ ਖਨ੍ਧਕੇ ਤੇਸੁ ਤੇਸੁ ਸੁਤ੍ਤੇਸੁ ਚ ਆਗਤਨਯੇਨ ਵੇਦਿਤਬ੍ਬਂ.

ਯਥਾ ਭਗਵਤੋ, ਏਵਂ ਭਿਕ੍ਖੁਸਙ੍ਘਸ੍ਸਾਪਿ. ਵੁਤ੍ਤਞ੍ਚੇਤਂ –

‘‘ਤੇਨ ਖੋ ਪਨ ਸਮਯੇਨ ਭਗਵਾ ਸਕ੍ਕਤੋ ਹੋਤਿ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ ਲਾਭੀ ਚੀਵਰ-ਪਿਣ੍ਡਪਾਤ-ਸੇਨਾਸਨ-ਗਿਲਾਨ-ਪਚ੍ਚਯ-ਭੇਸਜ੍ਜ-ਪਰਿਕ੍ਖਾਰਾਨਂ. ਭਿਕ੍ਖੁਸਙ੍ਘੋਪਿ ਖੋ ਸਕ੍ਕਤੋ ਹੋਤਿ…ਪੇ… ਪਰਿਕ੍ਖਾਰਾਨ’’ਨ੍ਤਿ (ਉਦਾ. ੧੪; ਸਂ. ਨਿ. ੨.੭੦).

ਤਥਾ ‘‘ਯਾਵਤਾ ਖੋ, ਚੁਨ੍ਦ, ਏਤਰਹਿ ਸਙ੍ਘੋ ਵਾ ਗਣੋ ਵਾ ਲੋਕੇ ਉਪ੍ਪਨ੍ਨੋ, ਨਾਹਂ, ਚੁਨ੍ਦ, ਅਞ੍ਞਂ ਏਕਸਙ੍ਘਮ੍ਪਿ ਸਮਨੁਪਸ੍ਸਾਮਿ ਏਵਂ ਲਾਭਗ੍ਗਯਸਗ੍ਗਪਤ੍ਤਂ ਯਥਰਿਵਾਯਂ, ਚੁਨ੍ਦ, ਭਿਕ੍ਖੁਸਙ੍ਘੋ’’ਤਿ (ਦੀ. ਨਿ. ੩.੧੭੬).

ਸ੍ਵਾਯਂ ਭਗਵਤੋ ਚ ਸਙ੍ਘਸ੍ਸ ਚ ਉਪ੍ਪਨ੍ਨੋ ਲਾਭਸਕ੍ਕਾਰੋ ਏਕਤੋ ਹੁਤ੍ਵਾ ਦ੍ਵਿਨ੍ਨਂ ਮਹਾਨਦੀਨਂ ਉਦਕਂ ਵਿਯ ਅਪ੍ਪਮੇਯ੍ਯੋ ਅਹੋਸਿ. ਅਥ ਸਤ੍ਥਾ ਰਹੋਗਤੋ ਚਿਨ੍ਤੇਸਿ – ‘‘ਮਹਾਲਾਭਸਕ੍ਕਾਰੋ ਅਤੀਤਬੁਦ੍ਧਾਨਮ੍ਪਿ ਏਵਰੂਪੋ ਅਹੋਸਿ, ਅਨਾਗਤਾਨਮ੍ਪਿ ਏਵਰੂਪੋ ਭਵਿਸ੍ਸਤਿ. ਕਿਂ ਨੁ ਖੋ ਭਿਕ੍ਖੂ ਆਹਾਰਪਰਿਗ੍ਗਾਹਕੇਨ ਸਤਿਸਮ੍ਪਜਞ੍ਞੇਨ ਸਮਨ੍ਨਾਗਤਾ ਮਜ੍ਝਤ੍ਤਾ ਨਿਚ੍ਛਨ੍ਦਰਾਗਾ ਹੁਤ੍ਵਾ ਆਹਾਰਂ ਪਰਿਭੁਞ੍ਜਿਤੁਂ ਸਕ੍ਕੋਨ੍ਤਿ, ਨ ਸਕ੍ਕੋਨ੍ਤੀ’’ਤਿ?

ਸੋ ਅਦ੍ਦਸ ਏਕਚ੍ਚੇ ਅਧੁਨਾ ਪਬ੍ਬਜਿਤੇ ਕੁਲਪੁਤ੍ਤੇ ਅਪਚ੍ਚਵੇਕ੍ਖਿਤ੍ਵਾ ਆਹਾਰਂ ਪਰਿਭੁਞ੍ਜਮਾਨੇ. ਦਿਸ੍ਵਾਨਸ੍ਸ ਏਤਦਹੋਸਿ – ‘‘ਮਯਾ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਪਾਰਮਿਯੋ ਪੂਰੇਨ੍ਤੇਨ ਨ ਚੀਵਰਾਦਿਹੇਤੁ ਪੂਰਿਤਾ, ਉਤ੍ਤਮਫਲਸ੍ਸ ਪਨ ਅਰਹਤ੍ਤਸ੍ਸਤ੍ਥਾਯ ਪੂਰਿਤਾ. ਇਮੇਪਿ ਭਿਕ੍ਖੂ ਮਮ ਸਨ੍ਤਿਕੇ ਪਬ੍ਬਜਨ੍ਤਾ ਨ ਚੀਵਰਾਦਿਹੇਤੁ ਪਬ੍ਬਜਿਤਾ, ਅਰਹਤ੍ਤਸ੍ਸੇਵ ਪਨ ਅਤ੍ਥਾਯ ਪਬ੍ਬਜਿਤਾ. ਤੇ ਇਦਾਨਿ ਅਸਾਰਮੇਵ ਸਾਰਂ ਅਨਤ੍ਥਮੇਵ ਚ ਅਤ੍ਥਂ ਕਰੋਨ੍ਤੀ’’ਤਿ ਏਵਮਸ੍ਸ ਧਮ੍ਮਸਂਵੇਗੋ ਉਦਪਾਦਿ. ਤਤੋ ਚਿਨ੍ਤੇਸਿ – ‘‘ਸਚੇ ਪਞ੍ਚਮਂ ਪਾਰਾਜਿਕਂ ਪਞ੍ਞਪੇਤੁਂ ਸਕ੍ਕਾ ਅਭਵਿਸ੍ਸ, ਅਪਚ੍ਚਵੇਕ੍ਖਿਤਾਹਾਰਪਰਿਭੋਗੋ ਪਞ੍ਚਮਂ ਪਾਰਾਜਿਕਂ ਕਤ੍ਵਾ ਪਞ੍ਞਪੇਤਬ੍ਬੋ ਭਵੇਯ੍ਯ. ਨ ਪਨ ਸਕ੍ਕਾ ਏਵਂ ਕਾਤੁਂ, ਧੁਵਪਟਿਸੇਵਨਟ੍ਠਾਨਞ੍ਹੇਤਂ ਸਤ੍ਤਾਨਂ. ਯਥਾ ਪਨ ਕਥਿਤੇ ਪਞ੍ਚਮਂ ਪਾਰਾਜਿਕਂ ਵਿਯ ਨਂ ਪਸ੍ਸਿਸ੍ਸਨ੍ਤਿ. ਏਵਂ ਧਮ੍ਮਾਦਾਸਂ ਸਂਵਰਂ ਮਰਿਯਾਦਂ ਠਪੇਸ੍ਸਾਮਿ, ਯਂ ਆਵਜ੍ਜਿਤ੍ਵਾ ਆਵਜ੍ਜਿਤ੍ਵਾ ਅਨਾਗਤੇ ਭਿਕ੍ਖੂ ਚਤ੍ਤਾਰੋ ਪਚ੍ਚਯੇ ਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਿਸ੍ਸਨ੍ਤੀ’’ਤਿ. ਇਮਾਯ ਅਟ੍ਠੁਪ੍ਪਤ੍ਤਿਯਾ ਇਮਂ ਪੁਤ੍ਤਮਂਸੂਪਮਸੁਤ੍ਤਨ੍ਤਂ ਨਿਕ੍ਖਿਪਿ. ਤਤ੍ਥ ਚਤ੍ਤਾਰੋਮੇ, ਭਿਕ੍ਖਵੇ, ਆਹਾਰਾਤਿਆਦਿ ਹੇਟ੍ਠਾ ਵੁਤ੍ਤਤ੍ਥਮੇਵ.

ਚਤ੍ਤਾਰੋ ਪਨ ਆਹਾਰੇ ਵਿਤ੍ਥਾਰੇਤ੍ਵਾ ਇਦਾਨਿ ਤੇਸੁ ਆਦੀਨਵਂ ਦਸ੍ਸੇਤੁਂ ਕਥਞ੍ਚ, ਭਿਕ੍ਖਵੇ, ਕਬਲ਼ੀਕਾਰੋ ਆਹਾਰੋ ਦਟ੍ਠਬ੍ਬੋਤਿਆਦਿਮਾਹ? ਤਤ੍ਥ ਜਾਯਮ੍ਪਤਿਕਾਤਿ ਜਾਯਾ ਚੇਵ ਪਤਿ ਚ. ਪਰਿਤ੍ਤਂ ਸਮ੍ਬਲਨ੍ਤਿ ਪੁਟਭਤ੍ਤਸਤ੍ਤੁਮੋਦਕਾਦੀਨਂ ਅਞ੍ਞਤਰਂ ਅਪ੍ਪਮਤ੍ਤਕਂ ਪਾਥੇਯ੍ਯਂ. ਕਨ੍ਤਾਰਮਗ੍ਗਨ੍ਤਿ ਕਨ੍ਤਾਰਭੂਤਂ ਮਗ੍ਗਂ, ਕਨ੍ਤਾਰੇ ਵਾ ਮਗ੍ਗਂ. ਕਨ੍ਤਾਰਨ੍ਤਿ ਚੋਰਕਨ੍ਤਾਰਂ ਵਾਲ਼ਕਨ੍ਤਾਰਂ ਅਮਨੁਸ੍ਸਕਨ੍ਤਾਰਂ ਨਿਰੁਦਕਕਨ੍ਤਾਰਂ ਅਪ੍ਪਭਕ੍ਖਕਨ੍ਤਾਰਨ੍ਤਿ ਪਞ੍ਚਵਿਧਂ. ਤੇਸੁ ਯਤ੍ਥ ਚੋਰਭਯਂ ਅਤ੍ਥਿ, ਤਂ ਚੋਰਕਨ੍ਤਾਰਂ. ਯਤ੍ਥ ਸੀਹਬ੍ਯਗ੍ਘਾਦਯੋ ਵਾਲ਼ਾ ਅਤ੍ਥਿ, ਤਂ ਵਾਲ਼ਕਨ੍ਤਾਰਂ. ਯਤ੍ਥ ਬਲਵਾਮੁਖਯਕ੍ਖਿਨਿਆਦੀਨਂ ਅਮਨੁਸ੍ਸਾਨਂ ਵਸੇਨ ਭਯਂ ਅਤ੍ਥਿ, ਤਂ ਅਮਨੁਸ੍ਸਕਨ੍ਤਾਰਂ. ਯਤ੍ਥ ਪਾਤੁਂ ਵਾ ਨ੍ਹਾਯਿਤੁਂ ਵਾ ਉਦਕਂ ਨਤ੍ਥਿ, ਤਂ ਨਿਰੁਦਕਕਨ੍ਤਾਰਂ. ਯਤ੍ਥ ਖਾਦਿਤਬ੍ਬਂ ਵਾ ਭੁਞ੍ਜਿਤਬ੍ਬਂ ਵਾ ਅਨ੍ਤਮਸੋ ਕਨ੍ਦਮੂਲਾਦਿਮਤ੍ਤਮ੍ਪਿ ਨਤ੍ਥਿ, ਤਂ ਅਪ੍ਪਭਕ੍ਖਕਨ੍ਤਾਰਂ ਨਾਮ. ਯਤ੍ਥ ਪਨੇਤਂ ਪਞ੍ਚਵਿਧਮ੍ਪਿ ਭਯਂ ਅਤ੍ਥਿ, ਤਂ ਕਨ੍ਤਾਰਮੇਵ. ਤਂ ਪਨੇਤਂ ਏਕਾਹਦ੍ਵੀਹਤੀਹਾਦਿਵਸੇਨ ਨਿਤ੍ਥਰਿਤਬ੍ਬਮ੍ਪਿ ਅਤ੍ਥਿ, ਨ ਤਂ ਇਧ ਅਧਿਪ੍ਪੇਤਂ. ਇਧ ਪਨ ਨਿਰੁਦਕਂ ਅਪ੍ਪਭਕ੍ਖਂ ਯੋਜਨਸਤਿਕਕਨ੍ਤਾਰਂ ਅਧਿਪ੍ਪੇਤਂ. ਏਵਰੂਪੇ ਕਨ੍ਤਾਰੇ ਮਗ੍ਗਂ. ਪਟਿਪਜ੍ਜੇਯ੍ਯੁਨ੍ਤਿ ਛਾਤਕਭਯੇਨ ਚੇਵ ਰੋਗਭਯੇਨ ਚ ਰਾਜਭਯੇਨ ਚ ਉਪਦ੍ਦੁਤਾ ਪਟਿਪਜ੍ਜੇਯ੍ਯੁਂ ‘‘ਏਤਂ ਕਨ੍ਤਾਰਂ ਨਿਤ੍ਥਰਿਤ੍ਵਾ ਧਮ੍ਮਿਕਸ੍ਸ ਰਞ੍ਞੋ ਨਿਰੁਪਦ੍ਦਵੇ ਰਟ੍ਠੇ ਸੁਖਂ ਵਸਿਸ੍ਸਾਮਾ’’ਤਿ ਮਞ੍ਞਮਾਨਾ.

ਏਕਪੁਤ੍ਤਕੋਤਿ ਉਕ੍ਖਿਪਿਤ੍ਵਾ ਗਹਿਤੋ ਅਨੁਕਮ੍ਪਿਤਬ੍ਬਯੁਤ੍ਤੋ ਅਥਿਰਸਰੀਰੋ ਏਕਪੁਤ੍ਤਕੋ. ਵਲ੍ਲੂਰਞ੍ਚ ਸੋਣ੍ਡਿਕਞ੍ਚਾਤਿ ਘਨਘਨਟ੍ਠਾਨਤੋ ਗਹੇਤ੍ਵਾ ਵਲ੍ਲੂਰਂ, ਅਟ੍ਠਿਨਿਸ੍ਸਿਤਸਿਰਾਨਿਸ੍ਸਿਤਟ੍ਠਾਨਾਨਿ ਗਹੇਤ੍ਵਾ ਸੂਲਮਂਸਞ੍ਚਾਤਿ ਅਤ੍ਥੋ. ਪਟਿਪਿਸੇਯ੍ਯੁਨ੍ਤਿ ਪਹਰੇਯ੍ਯੁਂ. ਕਹਂ ਏਕਪੁਤ੍ਤਕਾਤਿ ਅਯਂ ਤੇਸਂ ਪਰਿਦੇਵਨਾਕਾਰੋ.

ਅਯਂ ਪਨੇਤ੍ਥ ਭੂਤਮਤ੍ਥਂ ਕਤ੍ਵਾ ਆਦਿਤੋ ਪਟ੍ਠਾਯ ਸਙ੍ਖੇਪਤੋ ਅਤ੍ਥਵਣ੍ਣਨਾ – ਦ੍ਵੇ ਕਿਰ ਜਾਯਮ੍ਪਤਿਕਾ ਪੁਤ੍ਤਂ ਗਹੇਤ੍ਵਾ ਪਰਿਤ੍ਤੇਨ ਪਾਥੇਯ੍ਯੇਨ ਯੋਜਨਸਤਿਕਂ ਕਨ੍ਤਾਰਮਗ੍ਗਂ ਪਟਿਪਜ੍ਜਿਂਸੁ. ਤੇਸਂ ਪਞ੍ਞਾਸਯੋਜਨਾਨਿ ਗਨ੍ਤ੍ਵਾ ਪਾਥੇਯ੍ਯਂ ਨਿਟ੍ਠਾਸਿ, ਤੇ ਖੁਪ੍ਪਿਪਾਸਾਤੁਰਾ ਵਿਰਲ਼ਚ੍ਛਾਯਾਯਂ ਨਿਸੀਦਿਂਸੁ. ਤਤੋ ਪੁਰਿਸੋ ਭਰਿਯਂ ਆਹ – ‘‘ਭਦ੍ਦੇ ਇਤੋ ਸਮਨ੍ਤਾ ਪਞ੍ਞਾਸਯੋਜਨਾਨਿ ਗਾਮੋ ਵਾ ਨਿਗਮੋ ਵਾ ਨਤ੍ਥਿ. ਤਸ੍ਮਾ ਯਂ ਤਂ ਪੁਰਿਸੇਨ ਕਾਤਬ੍ਬਂ ਬਹੁਮ੍ਪਿ ਕਸਿਗੋਰਕ੍ਖਾਦਿਕਮ੍ਮਂ, ਨ ਦਾਨਿ ਸਕ੍ਕਾ ਤਂ ਮਯਾ ਕਾਤੁਂ, ਏਹਿ ਮਂ ਮਾਰੇਤ੍ਵਾ ਉਪਡ੍ਢਮਂਸਂ ਖਾਦਿਤ੍ਵਾ ਉਪਡ੍ਢਂ ਪਾਥੇਯ੍ਯਂ ਕਤ੍ਵਾ ਪੁਤ੍ਤੇਨ ਸਦ੍ਧਿਂ ਕਨ੍ਤਾਰਂ ਨਿਤ੍ਥਰਾਹੀ’’ਤਿ. ਪੁਨ ਸਾਪਿ ਤਂ ਆਹ – ‘‘ਸਾਮਿ ਮਯਾ ਦਾਨਿ ਯਂ ਤਂ ਇਤ੍ਥਿਯਾ ਕਾਤਬ੍ਬਂ ਬਹੁਮ੍ਪਿ ਸੁਤ੍ਤਕਨ੍ਤਨਾਦਿਕਮ੍ਮਂ, ਤਂ ਕਾਤੁਂ ਨ ਸਕ੍ਕਾ, ਏਹਿ ਮਂ ਮਾਰੇਤ੍ਵਾ ਉਪਡ੍ਢਮਂਸਂ ਖਾਦਿਤ੍ਵਾ ਉਪਡ੍ਢਂ ਪਾਥੇਯ੍ਯਂ ਕਤ੍ਵਾ ਪੁਤ੍ਤੇਨ ਸਦ੍ਧਿਂ ਕਨ੍ਤਾਰਂ ਨਿਤ੍ਥਰਾਹੀ’’ਤਿ. ਪੁਨ ਸੋਪਿ ਤਂ ਆਹ – ‘‘ਭਦ੍ਦੇ ਮਾਤੁਗਾਮਮਰਣੇਨ ਦ੍ਵਿਨ੍ਨਂ ਮਰਣਂ ਪਞ੍ਞਾਯਤਿ. ਨ ਹਿ ਮਨ੍ਦੋ ਕੁਮਾਰੋ ਮਾਤਰਾ ਵਿਨਾ ਜੀਵਿਤੁਂ ਸਕ੍ਕੋਤਿ. ਯਦਿ ਪਨ ਮਯਂ ਜੀਵਾਮ. ਪੁਨ ਦਾਰਕਂ ਲਭੇਯ੍ਯਾਮ. ਹਨ੍ਦ ਦਾਨਿ ਪੁਤ੍ਤਕਂ ਮਾਰੇਤ੍ਵਾ, ਮਂਸਂ ਗਹੇਤ੍ਵਾ ਕਨ੍ਤਾਰਂ ਨਿਤ੍ਥਰਾਮਾ’’ਤਿ. ਤਤੋ ਮਾਤਾ ਪੁਤ੍ਤਮਾਹ – ‘‘ਤਾਤ, ਪਿਤੁਸਨ੍ਤਿਕਂ ਗਚ੍ਛਾ’’ਤਿ, ਸੋ ਅਗਮਾਸਿ. ਅਥਸ੍ਸ ਪਿਤਾ, ‘‘ਮਯਾ ‘ਪੁਤ੍ਤਕਂ ਪੋਸੇਸ੍ਸਾਮੀ’ਤਿ ਕਸਿਗੋਰਕ੍ਖਾਦੀਹਿ ਅਨਪ੍ਪਕਂ ਦੁਕ੍ਖਮਨੁਭੂਤਂ, ਨ ਸਕ੍ਕੋਮਿ ਅਹਂ ਪੁਤ੍ਤਂ ਮਾਰੇਤੁਂ, ਤ੍ਵਂਯੇਵ ਤਵ ਪੁਤ੍ਤਂ ਮਾਰੇਹੀ’’ਤਿ ਵਤ੍ਵਾ, ‘‘ਤਾਤ ਮਾਤੁਸਨ੍ਤਿਕਂ ਗਚ੍ਛਾ’’ਤਿ ਆਹ. ਸੋ ਅਗਮਾਸਿ. ਅਥਸ੍ਸ ਮਾਤਾਪਿ, ‘‘ਮਯਾ ਪੁਤ੍ਤਂ ਪਤ੍ਥੇਨ੍ਤਿਯਾ ਗੋਵਤਕੁਕ੍ਕੁਰਵਤਦੇਵਤਾਯਾਚਨਾਦੀਹਿਪਿ ਤਾਵ ਅਨਪ੍ਪਕਂ ਦੁਕ੍ਖਮਨੁਭੂਤਂ, ਕੋ ਪਨ ਵਾਦੋ ਕੁਚ੍ਛਿਨਾ ਪਰਿਹਰਨ੍ਤਿਯਾ? ਨ ਸਕ੍ਕੋਮਿ ਅਹਂ ਪੁਤ੍ਤਂ ਮਾਰੇਤੁ’’ਨ੍ਤਿ ਵਤ੍ਵਾ ‘‘ਤਾਤ, ਪਿਤੁਸਨ੍ਤਿਕਮੇਵ ਗਚ੍ਛਾ’’ਤਿ ਆਹ. ਏਵਂ ਸੋ ਦ੍ਵਿਨ੍ਨਮਨ੍ਤਰਾ ਗਚ੍ਛਨ੍ਤੋਯੇਵ ਮਤੋ. ਤੇ ਤਂ ਦਿਸ੍ਵਾ ਪਰਿਦੇਵਿਤ੍ਵਾ ਵੁਤ੍ਤਨਯੇਨ ਮਂਸਾਨਿ ਗਹੇਤ੍ਵਾ ਖਾਦਨ੍ਤਾ ਪਕ੍ਕਮਿਂਸੁ.

ਤੇਸਂ ਸੋ ਪੁਤ੍ਤਮਂਸਾਹਾਰੋ ਨਵਹਿ ਕਾਰਣੇਹਿ ਪਟਿਕੂਲਤ੍ਤਾ ਨੇਵ ਦਵਾਯ ਹੋਤਿ, ਨ ਮਦਾਯ, ਨ ਮਣ੍ਡਨਾਯ, ਨ ਵਿਭੂਸਨਾਯ, ਕੇਵਲਂ ਕਨ੍ਤਾਰਨਿਤ੍ਥਰਣਤ੍ਥਾਯੇਵ ਹੋਤਿ. ਕਤਮੇਹਿ ਨਵਹਿ ਕਾਰਣੇਹਿ ਪਟਿਕੂਲੋਤਿ ਚੇ? ਸਜਾਤਿਮਂਸਤਾਯ ਞਾਤਿਮਂਸਤਾਯ ਪੁਤ੍ਤਮਂਸਤਾਯ ਪਿਯਪੁਤ੍ਤਮਂਸਤਾਯ ਤਰੁਣਮਂਸਤਾਯ ਆਮਕਮਂਸਤਾਯ ਅਭੋਗਮਂਸਤਾਯ ਅਲੋਣਤਾਯ ਅਧੂਪਿਤਤਾਯਾਤਿ. ਏਵਞ੍ਹਿ ਤੇ ਨਵਹਿ ਕਾਰਣੇਹਿ ਪਟਿਕੂਲਂ ਤਂ ਪੁਤ੍ਤਮਂਸਂ ਖਾਦਨ੍ਤਾ ਨ ਸਾਰਤ੍ਤਾ ਗਿਦ੍ਧਮਾਨਸਾ ਹੁਤ੍ਵਾ ਖਾਦਿਂਸੁ, ਮਜ੍ਝਤ੍ਤਭਾਵੇਯੇਵ ਪਨ ਨਿਚ੍ਛਨ੍ਦਰਾਗਪਰਿਭੋਗੇ ਠਿਤਾ ਖਾਦਿਂਸੁ. ਨ ਅਟ੍ਠਿਨ੍ਹਾਰੁਚਮ੍ਮਨਿਸ੍ਸਿਤਟ੍ਠਾਨਾਨਿ ਅਪਨੇਤ੍ਵਾ ਥੂਲਥੂਲਂ ਵਰਮਂਸਮੇਵ ਖਾਦਿਂਸੁ, ਹਤ੍ਥਸਮ੍ਪਤ੍ਤਂ ਮਂਸਮੇਵ ਪਨ ਖਾਦਿਂਸੁ. ਨ ਯਾਵਦਤ੍ਥਂ ਕਣ੍ਠਪ੍ਪਮਾਣਂ ਕਤ੍ਵਾ ਖਾਦਿਂਸੁ, ਥੋਕਂ ਥੋਕਂ ਪਨ ਏਕਦਿਵਸਂ ਯਾਪਨਮਤ੍ਤਮੇਵ ਖਾਦਿਂਸੁ. ਨ ਅਞ੍ਞਮਞ੍ਞਂ ਮਚ੍ਛਰਾਯਨ੍ਤਾ ਖਾਦਿਂਸੁ, ਵਿਗਤਮਚ੍ਛੇਰਮਲੇਨ ਪਨ ਪਰਿਸੁਦ੍ਧੇਨੇਵ ਚੇਤਸਾ ਖਾਦਿਂਸੁ. ਨ ਅਞ੍ਞਂ ਕਿਞ੍ਚਿ ਮਿਗਮਂਸਂ ਵਾ ਮੋਰਮਂਸਾਦੀਨਂ ਵਾ ਅਞ੍ਞਤਰਂ ਖਾਦਾਮਾਤਿ ਸਮ੍ਮੂਲ਼੍ਹਾ ਖਾਦਿਂਸੁ, ਪਿਯਪੁਤ੍ਤਮਂਸਭਾਵਂ ਪਨ ਜਾਨਨ੍ਤਾਵ ਖਾਦਿਂਸੁ. ਨ ‘‘ਅਹੋ ਵਤ ਮਯਂ ਪੁਨਪਿ ਏਵਰੂਪਂ ਪੁਤ੍ਤਮਂਸਂ ਖਾਦੇਯ੍ਯਾਮਾ’’ਤਿ ਪਤ੍ਥਨਂ ਕਤ੍ਵਾ ਖਾਦਿਂਸੁ, ਪਤ੍ਥਨਂ ਪਨ ਵੀਤਿਵਤ੍ਤਾਵ ਹੁਤ੍ਵਾ ਖਾਦਿਂਸੁ. ਨ ‘‘ਏਤ੍ਤਕਂ ਕਨ੍ਤਾਰੇ ਖਾਦਿਤ੍ਵਾ ਅਵਸਿਟ੍ਠਂ ਕਨ੍ਤਾਰਂ ਅਤਿਕ੍ਕਮ੍ਮ ਲੋਣਮ੍ਬਿਲਾਦੀਹਿ ਯੋਜੇਤ੍ਵਾ ਖਾਦਿਸ੍ਸਾਮਾ’’ਤਿ ਸਨ੍ਨਿਧਿਂ ਅਕਂਸੁ, ਕਨ੍ਤਾਰਪਰਿਯੋਸਾਨੇ ਪਨ ‘‘ਪੁਰੇ ਮਹਾਜਨੋ ਪਸ੍ਸਤੀ’’ਤਿ ਭੂਮਿਯਂ ਵਾ ਨਿਖਣਿਂਸੁ, ਅਗ੍ਗਿਨਾ ਵਾ ਝਾਪਯਿਂਸੁ. ਨ ‘‘ਕੋਚਿ ਅਞ੍ਞੋ ਅਮ੍ਹੇ ਵਿਯ ਏਵਰੂਪਂ ਪੁਤ੍ਤਮਂਸਂ ਖਾਦਿਤੁਂ ਨ ਲਭਤੀ’’ਤਿ ਮਾਨਂ ਵਾ ਦਪ੍ਪਂ ਵਾ ਅਕਂਸੁ, ਨਿਹਤਮਾਨਾ ਪਨ ਨਿਹਤਦਪ੍ਪਾ ਹੁਤ੍ਵਾ ਖਾਦਿਂਸੁ. ‘‘ਕਿਂ ਇਮਿਨਾ ਅਲੋਣੇਨ ਅਨਮ੍ਬਿਲੇਨ ਅਧੂਪਿਤੇਨ ਦੁਗ੍ਗਨ੍ਧੇਨਾ’’ਤਿ ਨ ਹੀਲ਼ੇਤ੍ਵਾ ਖਾਦਿਂਸੁ, ਹੀਲ਼ਨਂ ਪਨ ਵੀਤਿਵਤ੍ਤਾ ਹੁਤ੍ਵਾ ਖਾਦਿਂਸੁ. ਨ ‘‘ਤੁਯ੍ਹਂ ਭਾਗੋ ਮਯ੍ਹਂ ਭਾਗੋ ਤਵ ਪੁਤ੍ਤੋ ਮਮ ਪੁਤ੍ਤੋ’’ਤਿ ਅਞ੍ਞਮਞ੍ਞਂ ਅਤਿਮਞ੍ਞਿਂਸੁ. ਸਮਗ੍ਗਾ ਪਨ ਸਮ੍ਮੋਦਮਾਨਾ ਹੁਤ੍ਵਾ ਖਾਦਿਂਸੁ. ਇਮਂ ਨੇਸਂ ਏਵਰੂਪਂ ਨਿਚ੍ਛਨ੍ਦਰਾਗਾਦਿਪਰਿਭੋਗਂ ਸਮ੍ਪਸ੍ਸਮਾਨੋ ਸਤ੍ਥਾ ਭਿਕ੍ਖੁਸਙ੍ਘਮ੍ਪਿ ਤਂ ਕਾਰਣਂ ਅਨੁਜਾਨਾਪੇਨ੍ਤੋ ਤਂ ਕਿਂ ਮਞ੍ਞਥ, ਭਿਕ੍ਖਵੇ, ਅਪਿ ਨੁ ਤੇ ਦਵਾਯ ਵਾ ਆਹਾਰਂ ਆਹਾਰੇਯ੍ਯੁਨ੍ਤਿਆਦਿਮਾਹ. ਤਤ੍ਥ ਦਵਾਯ ਵਾਤਿਆਦੀਨਿ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੮) ਵਿਤ੍ਥਾਰਿਤਾਨੇਵ. ਕਨ੍ਤਾਰਸ੍ਸਾਤਿ ਨਿਤ੍ਤਿਣ੍ਣਾਵਸੇਸਸ੍ਸ ਕਨ੍ਤਾਰਸ੍ਸ.

ਏਵਮੇਵ ਖੋਤਿ ਨਵਨ੍ਨਂ ਪਾਟਿਕੁਲ੍ਯਾਨਂ ਵਸੇਨ ਪਿਯਪੁਤ੍ਤਮਂਸਸਦਿਸੋ ਕਤ੍ਵਾ ਦਟ੍ਠਬ੍ਬੋਤਿ ਅਤ੍ਥੋ. ਕਤਮੇਸਂ ਨਵਨ੍ਨਂ? ਗਮਨਪਾਟਿਕੁਲ੍ਯਤਾਦੀਨਂ. ਗਮਨਪਾਟਿਕੁਲ੍ਯਤਂ ਪਚ੍ਚਵੇਕ੍ਖਨ੍ਤੋਪਿ ਕਬਲ਼ੀਕਾਰਾਹਾਰਂ ਪਰਿਗ੍ਗਣ੍ਹਾਤਿ, ਪਰਿਯੇਸਨਪਾਟਿਕੁਲ੍ਯਤਂ ਪਚ੍ਚਵੇਕ੍ਖਨ੍ਤੋਪਿ, ਪਰਿਭੋਗਨਿਧਾਨਆਸਯਪਰਿਪਕ੍ਕਾਪਰਿਪਕ੍ਕਸਮ੍ਮਕ੍ਖਣਨਿਸ੍ਸਨ੍ਦਪਾਟਿਕੁਲ੍ਯਤਂ ਪਚ੍ਚਵੇਕ੍ਖਨ੍ਤੋਪਿ, ਤਾਨਿ ਪਨੇਤਾਨਿ ਗਮਨਪਾਟਿਕੁਲ੍ਯਤਾਦੀਨਿ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੨੯੪) ਆਹਾਰਪਾਟਿਕੁਲ੍ਯਤਾਨਿਦ੍ਦੇਸੇ ਵਿਤ੍ਥਾਰਿਤਾਨੇਵ. ਇਤਿ ਇਮੇਸਂ ਨਵਨ੍ਨਂ ਪਾਟਿਕੁਲ੍ਯਾਨਂ ਵਸੇਨ ਪੁਤ੍ਤਮਂਸੂਪਮਂ ਕਤ੍ਵਾ ਆਹਾਰੋ ਪਰਿਭੁਞ੍ਜਿਤਬ੍ਬੋ.

ਯਥਾ ਤੇ ਜਾਯਮ੍ਪਤਿਕਾ ਪਾਟਿਕੁਲ੍ਯਂ ਪਿਯਪੁਤ੍ਤਮਂਸਂ ਖਾਦਨ੍ਤਾ ਨ ਸਾਰਤ੍ਤਾ ਗਿਦ੍ਧਮਾਨਸਾ ਹੁਤ੍ਵਾ ਖਾਦਿਂਸੁ, ਮਜ੍ਝਤ੍ਤਭਾਵੇਯੇਵ ਨਿਚ੍ਛਨ੍ਦਰਾਗਪਰਿਭੋਗੇ ਠਿਤਾ ਖਾਦਿਂਸੁ, ਏਵਂ ਨਿਚ੍ਛਨ੍ਦਰਾਗਪਰਿਭੋਗਂ ਕਤ੍ਵਾ ਪਰਿਭੁਞ੍ਜਿਤਬ੍ਬੋ. ਯਥਾ ਚ ਤੇ ਨ ਅਟ੍ਠਿਨ੍ਹਾਰੁਚਮ੍ਮਨਿਸ੍ਸਿਤਂ ਅਪਨੇਤ੍ਵਾ ਥੂਲਥੂਲਂ ਵਰਮਂਸਮੇਵ ਖਾਦਿਂਸੁ, ਹਤ੍ਥਸਮ੍ਪਤ੍ਤਮੇਵ ਪਨ ਖਾਦਿਂਸੁ, ਏਵਂ ਸੁਕ੍ਖਭਤ੍ਤਮਨ੍ਦਬ੍ਯਞ੍ਜਨਾਦੀਨਿ ਪਿਟ੍ਠਿਹਤ੍ਥੇਨ ਅਪਟਿਕ੍ਖਿਪਿਤ੍ਵਾ ਵਟ੍ਟਕੇਨ ਵਿਯ ਕੁਕ੍ਕੁਟੇਨ ਵਿਯ ਚ ਓਧਿਂ ਅਦਸ੍ਸੇਤ੍ਵਾ ਤਤੋ ਤਤੋ ਸਪ੍ਪਿਮਂਸਾਦਿਸਂਸਟ੍ਠਵਰਭੋਜਨਂਯੇਵ ਵਿਚਿਨਿਤ੍ਵਾ ਅਭੁਞ੍ਜਨ੍ਤੇਨ ਸੀਹੇਨ ਵਿਯ ਸਪਦਾਨਂ ਪਰਿਭੁਞ੍ਜਿਤਬ੍ਬੋ.

ਯਥਾ ਚ ਤੇ ਨ ਯਾਵਦਤ੍ਥਂ ਕਣ੍ਠਪ੍ਪਮਾਣਂ ਖਾਦਿਂਸੁ, ਥੋਕਂ ਥੋਕਂ ਪਨ ਏਕੇਕਦਿਵਸਂ ਯਾਪਨਮਤ੍ਤਮੇਵ ਖਾਦਿਂਸੁ, ਏਵਮੇਵ ਆਹਰਹਤ੍ਥਕਾਦਿਬ੍ਰਾਹ੍ਮਣਾਨਂ ਅਞ੍ਞਤਰੇਨ ਵਿਯ ਯਾਵਦਤ੍ਥਂ ਉਦਰਾਵਦੇਹਕਂ ਅਭੁਞ੍ਜਨ੍ਤੇਨ ਚਤੁਨ੍ਨਂ ਪਞ੍ਚਨ੍ਨਂ ਵਾ ਆਲੋਪਾਨਂ ਓਕਾਸਂ ਠਪੇਤ੍ਵਾਵ ਧਮ੍ਮਸੇਨਾਪਤਿਨਾ ਵਿਯ ਪਰਿਭੁਞ੍ਜਿਤਬ੍ਬੋ. ਸੋ ਕਿਰ ਪਞ੍ਚਚਤ੍ਤਾਲੀਸ ਵਸ੍ਸਾਨਿ ਤਿਟ੍ਠਮਾਨੋ ‘‘ਪਚ੍ਛਾਭਤ੍ਤੇ ਅਮ੍ਬਿਲੁਗ੍ਗਾਰਸਮੁਟ੍ਠਾਪਕਂ ਕਤ੍ਵਾ ਏਕਦਿਵਸਮ੍ਪਿ ਆਹਾਰਂ ਨ ਆਹਾਰੇਸਿ’’ਨ੍ਤਿ ਵਤ੍ਵਾ ਸੀਹਨਾਦਂ ਨਦਨ੍ਤੋ ਇਮਂ ਗਾਥਮਾਹ –

‘‘ਚਤ੍ਤਾਰੋ ਪਞ੍ਚ ਆਲੋਪੇ, ਅਭੁਤ੍ਵਾ ਉਦਕਂ ਪਿਵੇ;

ਅਲਂ ਫਾਸੁਵਿਹਾਰਾਯ, ਪਹਿਤਤ੍ਤਸ੍ਸ ਭਿਕ੍ਖੁਨੋ’’ਤਿ. (ਥੇਰਗਾ. ੯੮੩);

ਯਥਾ ਚ ਤੇ ਨ ਅਞ੍ਞਮਞ੍ਞਂ ਮਚ੍ਛਰਾਯਨ੍ਤਾ ਖਾਦਿਂਸੁ, ਵਿਗਤਮਲਮਚ੍ਛੇਰੇਨ ਪਨ ਪਰਿਸੁਦ੍ਧੇਨੇਵ ਚੇਤਸਾ ਖਾਦਿਂਸੁ, ਏਵਮੇਵ ਪਿਣ੍ਡਪਾਤਂ ਲਭਿਤ੍ਵਾ ਅਮਚ੍ਛਰਾਯਿਤ੍ਵਾ ‘‘ਇਮਂ ਸਬ੍ਬਂ ਗਣ੍ਹਨ੍ਤਸ੍ਸ ਸਬ੍ਬਂ ਦਸ੍ਸਾਮਿ, ਉਪਡ੍ਢਂ ਗਣ੍ਹਨ੍ਤਸ੍ਸ ਉਪਡ੍ਢਂ, ਸਚੇ ਗਹਿਤਾਵਸੇਸੋ ਭਵਿਸ੍ਸਤਿ, ਅਤ੍ਤਨਾ ਪਰਿਭੁਞ੍ਜਿਸ੍ਸਾਮੀ’’ਤਿ ਸਾਰਣੀਯਧਮ੍ਮੇ ਠਿਤੇਨੇਵ ਪਰਿਭੁਞ੍ਜਿਤਬ੍ਬੋ. ਯਥਾ ਚ ਤੇ ਨ ‘‘ਅਞ੍ਞਂ ਕਿਞ੍ਚਿ ਮਯਂ ਮਿਗਮਂਸਂ ਵਾ ਮੋਰਮਂਸਾਦੀਨਂ ਵਾ ਅਞ੍ਞਤਰਂ ਖਾਦਾਮਾ’’ਤਿ ਸਮ੍ਮੂਲ਼੍ਹਾ ਖਾਦਿਂਸੁ, ਪਿਯਪੁਤ੍ਤਮਂਸਭਾਵਂ ਪਨ ਜਾਨਨ੍ਤਾਵ ਖਾਦਿਂਸੁ, ਏਵਮੇਵ ਪਿਣ੍ਡਪਾਤਂ ਲਭਿਤ੍ਵਾ ‘‘ਅਹਂ ਖਾਦਾਮਿ ਭੁਞ੍ਜਾਮੀ’’ਤਿ ਅਤ੍ਤੂਪਲਦ੍ਧਿਸਮ੍ਮੋਹਂ ਅਨੁਪ੍ਪਾਦੇਤ੍ਵਾ ‘‘ਕਬਲ਼ੀਕਾਰਾਹਾਰੋ ਨ ਜਾਨਾਤਿ ‘ਚਾਤੁਮਹਾਭੂਤਿਕਕਾਯਂ ਵਡ੍ਢੇਮੀ’ਤਿ, ਕਾਯੋਪਿ ਨ ਜਾਨਾਤਿ ‘ਕਬਲ਼ੀਕਾਰਾਹਾਰੋ ਮਂ ਵਡ੍ਢੇਤੀ’’’ਤਿ, ਏਵਂ ਸਮ੍ਮੋਹਂ ਪਹਾਯ ਪਰਿਭੁਞ੍ਜਿਤਬ੍ਬੋ. ਸਤਿਸਮ੍ਪਜਞ੍ਞਵਸੇਨਾਪਿ ਚੇਸ ਅਸਮ੍ਮੂਲ਼੍ਹੇਨੇਵ ਹੁਤ੍ਵਾ ਪਰਿਭੁਞ੍ਜਿਤਬ੍ਬੋ.

ਯਥਾ ਚ ਤੇ ਨ ‘‘ਅਹੋ ਵਤ ਮਯਂ ਪੁਨਪਿ ਏਵਰੂਪਂ ਪੁਤ੍ਤਮਂਸਂ ਖਾਦੇਯ੍ਯਾਮਾ’’ਤਿ ਪਤ੍ਥਨਂ ਕਤ੍ਵਾ ਖਾਦਿਂਸੁ, ਪਤ੍ਥਨਂ ਪਨ ਵੀਤਿਵਤ੍ਤਾਵ ਹੁਤ੍ਵਾ ਖਾਦਿਂਸੁ, ਏਵਮੇਵ ਪਣੀਤਭੋਜਨਂ ਲਦ੍ਧਾ ‘ਅਹੋ ਵਤਾਹਂ ਸ੍ਵੇਪਿ ਪੁਨਦਿਵਸੇਪਿ ਏਵਰੂਪਂ ਲਭੇਯ੍ਯਂ’, ਲੂਖਂ ਵਾ ਪਨ ਲਦ੍ਧਾ ‘‘ਹਿਯ੍ਯੋ ਵਿਯ ਮੇ ਅਜ੍ਜ ਪਣੀਤਭੋਜਨਂ ਨ ਲਦ੍ਧ’’ਨ੍ਤਿ ਪਤ੍ਥਨਂ ਵਾ ਅਨੁਸੋਚਨਂ ਵਾ ਅਕਤ੍ਵਾ ਨਿਤ੍ਤਣ੍ਹੇਨ –

‘‘ਅਤੀਤਂ ਨਾਨੁਸੋਚਾਮਿ, ਨਪ੍ਪਜਪ੍ਪਾਮਿਨਾਗਤਂ;

ਪਚ੍ਚੁਪ੍ਪਨ੍ਨੇਨ ਯਾਪੇਮਿ, ਤੇਨ ਵਣ੍ਣੋ ਪਸੀਦਤੀ’’ਤਿ. (ਜਾ. ੨.੨੨.੯੦) –

ਇਮਂ ਓਵਾਦਂ ਅਨੁਸ੍ਸਰਨ੍ਤੇਨ ‘‘ਪਚ੍ਚੁਪ੍ਪਨ੍ਨੇਨੇਵ ਯਾਪੇਸ੍ਸਾਮੀ’’ਤਿ ਪਰਿਭੁਞ੍ਜਿਤਬ੍ਬੋ.

ਯਥਾ ਚ ਤੇ ਨ ‘‘ਏਤ੍ਤਕਂ ਕਨ੍ਤਾਰੇ ਖਾਦਿਤ੍ਵਾ ਅਵਸਿਟ੍ਠਂ ਕਨ੍ਤਾਰਂ ਅਤਿਕ੍ਕਮ੍ਮ ਲੋਣਮ੍ਬਿਲਾਦੀਹਿ ਯੋਜੇਤ੍ਵਾ ਖਾਦਿਸ੍ਸਾਮਾ’’ਤਿ ਸਨ੍ਨਿਧਿਂ ਅਕਂਸੁ, ਕਨ੍ਤਾਰਪਰਿਯੋਸਾਨੇ ਪਨ ‘‘ਪੁਰੇ ਮਹਾਜਨੋ ਪਸ੍ਸਤੀ’’ਤਿ ਭੂਮਿਯਂ ਵਾ ਨਿਖਣਿਂਸੁ, ਅਗ੍ਗਿਨਾ ਵਾ ਝਾਪਯਿਂਸੁ, ਏਵਮੇਵ –

‘‘ਅਨ੍ਨਾਨਮਥੋ ਪਾਨਾਨਂ,

ਖਾਦਨੀਯਾਨਂ ਅਥੋਪਿ ਵਤ੍ਥਾਨਂ;

ਲਦ੍ਧਾ ਨ ਸਨ੍ਨਿਧਿਂ ਕਯਿਰਾ,

ਨ ਚ ਪਰਿਤ੍ਤਸੇ ਤਾਨਿ ਅਲਭਮਾਨੋ’’ਤਿ. (ਸੁ. ਨਿ. ੯੩੦); –

ਇਮਂ ਓਵਾਦਂ ਅਨੁਸ੍ਸਰਨ੍ਤੇਨ ਚਤੂਸੁ ਪਚ੍ਚਯੇਸੁ ਯਂ ਯਂ ਲਭਤਿ, ਤਤੋ ਤਤੋ ਅਤ੍ਤਨੋ ਯਾਪਨਮਤ੍ਤਂ ਗਹੇਤ੍ਵਾ, ਸੇਸਂ ਸਬ੍ਰਹ੍ਮਚਾਰੀਨਂ ਵਿਸ੍ਸਜ੍ਜੇਤ੍ਵਾ ਸਨ੍ਨਿਧਿਂ ਪਰਿਵਜ੍ਜਨ੍ਤੇਨ ਪਰਿਭੁਞ੍ਜਿਤਬ੍ਬੋ. ਯਥਾ ਚ ਤੇ ਨ ‘‘ਕੋਚਿ ਅਞ੍ਞੋ ਅਮ੍ਹੇ ਵਿਯ ਏਵਰੂਪਂ ਪੁਤ੍ਤਮਂਸਂ ਖਾਦਿਤੁਂ ਨ ਲਭਤੀ’’ਤਿ ਮਾਨਂ ਵਾ ਦਪ੍ਪਂ ਵਾ ਅਕਂਸੁ, ਨਿਹਤਮਾਨਾ ਪਨ ਨਿਹਤਦਪ੍ਪਾ ਹੁਤ੍ਵਾ ਖਾਦਿਂਸੁ, ਏਵਮੇਵ ਪਣੀਤਭੋਜਨਂ ਲਭਿਤ੍ਵਾ ‘‘ਅਹਮਸ੍ਮਿ ਲਾਭੀ ਚੀਵਰਪਿਣ੍ਡਪਾਤਾਦੀਨ’’ਨ੍ਤਿ ਨ ਮਾਨੋ ਵਾ ਦਪ੍ਪੋ ਵਾ ਕਾਤਬ੍ਬੋ. ‘‘ਨਾਯਂ ਪਬ੍ਬਜ੍ਜਾ ਚੀਵਰਾਦਿਹੇਤੁ, ਅਰਹਤ੍ਤਹੇਤੁ ਪਨਾਯਂ ਪਬ੍ਬਜ੍ਜਾ’’ਤਿ ਪਚ੍ਚਵੇਕ੍ਖਿਤ੍ਵਾ ਨਿਹਤਮਾਨਦਪ੍ਪੇਨੇਵ ਪਰਿਭੁਞ੍ਜਿਤਬ੍ਬੋ.

ਯਥਾ ਚ ਤੇ ‘‘ਕਿਂ ਇਮਿਨਾ ਅਲੋਣੇਨ ਅਨਮ੍ਬਿਲੇਨ ਅਧੂਪਿਤੇਨ ਦੁਗ੍ਗਨ੍ਧੇਨਾ’’ਤਿ ਹੀਲ਼ੇਤ੍ਵਾ ਨ ਖਾਦਿਂਸੁ, ਹੀਲ਼ਨਂ ਪਨ ਵੀਤਿਵਤ੍ਤਾ ਹੁਤ੍ਵਾ ਖਾਦਿਂਸੁ, ਏਵਮੇਵ ਪਿਣ੍ਡਪਾਤਂ ਲਭਿਤ੍ਵਾ ‘‘ਕਿਂ ਇਮਿਨਾ ਅਸ੍ਸਗੋਣਭਤ੍ਤਸਦਿਸੇਨ ਲੂਖੇਨ ਨਿਰਸੇਨ, ਸੁਵਾਨਦੋਣਿਯਂ ਤਂ ਪਕ੍ਖਿਪਥਾ’’ਤਿ ਏਵਂ ਪਿਣ੍ਡਪਾਤਂ ਵਾ ‘‘ਕੋ ਇਮਂ ਭੁਞ੍ਜਿਸ੍ਸਤਿ, ਕਾਕਸੁਨਖਾਦੀਨਂ ਦੇਹੀ’’ਤਿ ਏਵਂ ਦਾਯਕਂ ਵਾ ਅਹੀਲ਼ੇਨ੍ਤੇਨ –

‘‘ਸ ਪਤ੍ਤਪਾਣਿ ਵਿਚਰਨ੍ਤੋ, ਅਮੂਗੋ ਮੂਗਸਮ੍ਮਤੋ;

ਅਪ੍ਪਂ ਦਾਨਂ ਨ ਹੀਲ਼ੇਯ੍ਯ, ਦਾਤਾਰਂ ਨਾਵਜਾਨਿਯਾ’’ਤਿ. (ਸੁ. ਨਿ. ੭੧੮); –

ਇਮਂ ਓਵਾਦਂ ਅਨੁਸ੍ਸਰਨ੍ਤੇਨ ਪਰਿਭੁਞ੍ਜਿਤਬ੍ਬੋ. ਯਥਾ ਚ ਤੇ ਨ ‘‘ਤੁਯ੍ਹਂ ਭਾਗੋ, ਮਯ੍ਹਂ ਭਾਗੋ, ਤਵ ਪੁਤ੍ਤੋ ਮਮ ਪੁਤ੍ਤੋ’’ਤਿ ਅਞ੍ਞਮਞ੍ਞਂ ਅਤਿਮਞ੍ਞਿਂਸੁ, ਸਮਗ੍ਗਾ ਪਨ, ਸਮ੍ਮੋਦਮਾਨਾ ਹੁਤ੍ਵਾ ਖਾਦਿਂਸੁ, ਏਵਮੇਵਂ ਪਿਣ੍ਡਪਾਤਂ ਲਭਿਤ੍ਵਾ ਯਥਾ ਏਕਚ੍ਚੋ ‘‘ਕੋ ਤੁਮ੍ਹਾਦਿਸਾਨਂ ਦਸ੍ਸਤਿ ਨਿਕ੍ਕਾਰਣਾ ਉਮ੍ਮਾਰੇਸੁ ਪਕ੍ਖਲਨ੍ਤਾਨਂ ਆਹਿਣ੍ਡਨ੍ਤਾਨਂ ਵਿਜਾਤਮਾਤਾਪਿ ਵੋ ਦਾਤਬ੍ਬਂ ਨ ਮਞ੍ਞਤਿ, ਮਯਂ ਪਨ ਗਤਗਤਟ੍ਠਾਨੇ ਪਣੀਤਾਨਿ ਚੀਵਰਾਦੀਨਿ ਲਭਾਮਾ’’ਤਿ ਸੀਲਵਨ੍ਤੇ ਸਬ੍ਰਹ੍ਮਚਾਰੀ ਅਤਿਮਞ੍ਞਤਿ, ਯਂ ਸਨ੍ਧਾਯ ਵੁਤ੍ਤਂ –

‘‘ਸੋ ਤੇਨ ਲਾਭਸਕ੍ਕਾਰਸਿਲੋਕੇਨ ਅਭਿਭੂਤੋ ਪਰਿਯਾਦਿਣ੍ਣਚਿਤ੍ਤੋ ਅਞ੍ਞੇ ਪੇਸਲੇ ਭਿਕ੍ਖੂ ਅਤਿਮਞ੍ਞਤਿ. ਤਞ੍ਹਿ ਤਸ੍ਸ, ਭਿਕ੍ਖਵੇ, ਮੋਘਪੁਰਿਸਸ੍ਸ ਹੋਤਿ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯਾ’’ਤਿ (ਸਂ. ਨਿ. ੨.੧੬੧).

ਏਵਂ ਕਞ੍ਚਿ ਅਨਤਿਮਞ੍ਞਿਤ੍ਵਾ ਸਬ੍ਬੇਹਿ ਸਬ੍ਰਹ੍ਮਚਾਰੀਹਿ ਸਦ੍ਧਿਂ ਸਮਗ੍ਗੇਨ ਸਮ੍ਮੋਦਮਾਨੇਨ ਹੁਤ੍ਵਾ ਪਰਿਭੁਞ੍ਜਿਤਬ੍ਬਂ.

ਪਰਿਞ੍ਞਾਤੇਤਿ ਞਾਤਪਰਿਞ੍ਞਾ ਤੀਰਣਪਰਿਞ੍ਞਾ ਪਹਾਨਪਰਿਞ੍ਞਾਤਿ ਇਮਾਹਿ ਤੀਹਿ ਪਰਿਞ੍ਞਾਹਿ ਪਰਿਞ੍ਞਾਤੇ. ਕਥਂ? ਇਧ ਭਿਕ੍ਖੁ ‘‘ਕਬਲ਼ੀਕਾਰਾਹਾਰੋ ਨਾਮ ਅਯਂ ਸਵਤ੍ਥੁਕਵਸੇਨ ਓਜਟ੍ਠਮਕਰੂਪਂ ਹੋਤਿ, ਓਜਟ੍ਠਮਕਰੂਪਂ ਕਤ੍ਥ ਪਟਿਹਞ੍ਞਤਿ? ਜਿਵ੍ਹਾਪਸਾਦੇ, ਜਿਵ੍ਹਾਪਸਾਦੋ ਕਿਨ੍ਨਿਸ੍ਸਿਤੋ? ਚਤੁਮਹਾਭੂਤਨਿਸ੍ਸਿਤੋ. ਇਤਿ ਓਜਟ੍ਠਮਕਂ ਜਿਵ੍ਹਾਪਸਾਦੋ ਤਸ੍ਸ ਪਚ੍ਚਯਾਨਿ ਮਹਾਭੂਤਾਨੀਤਿ ਇਮੇ ਧਮ੍ਮਾ ਰੂਪਕ੍ਖਨ੍ਧੋ ਨਾਮ, ਤਂ ਪਰਿਗ੍ਗਣ੍ਹਤੋ ਉਪ੍ਪਨ੍ਨਾ ਫਸ੍ਸਪਞ੍ਚਮਕਾ ਧਮ੍ਮਾ ਚਤ੍ਤਾਰੋ ਅਰੂਪਕ੍ਖਨ੍ਧਾ. ਇਤਿ ਸਬ੍ਬੇਪਿਮੇ ਪਞ੍ਚਕ੍ਖਨ੍ਧਾ ਸਙ੍ਖੇਪਤੋ ਨਾਮਰੂਪਮਤ੍ਤਂ ਹੋਤੀ’’ਤਿ ਪਜਾਨਾਤਿ. ਸੋ ਤੇ ਧਮ੍ਮੇ ਸਰਸਲਕ੍ਖਣਤੋ ਵਵਤ੍ਥਪੇਤ੍ਵਾ ਤੇਸਂ ਪਚ੍ਚਯਂ ਪਰਿਯੇਸਨ੍ਤੋ ਅਨੁਲੋਮਪਟਿਲੋਮਂ ਪਟਿਚ੍ਚਸਮੁਪ੍ਪਾਦਂ ਪਸ੍ਸਤਿ. ਏਤ੍ਤਾਵਤਾਨੇਨ ਕਬਲ਼ੀਕਾਰਾਹਾਰਮੁਖੇਨ ਸਪ੍ਪਚ੍ਚਯਸ੍ਸ ਨਾਮਰੂਪਸ੍ਸ ਯਾਥਾਵਤੋ ਦਿਟ੍ਠਤ੍ਤਾ ਕਬਲ਼ੀਕਾਰਾਹਾਰੋ ਞਾਤਪਰਿਞ੍ਞਾਯ ਪਰਿਞ੍ਞਾਤੋ ਹੋਤਿ. ਸੋ ਤਦੇਵ ਸਪ੍ਪਚ੍ਚਯਂ ਨਾਮਰੂਪਂ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਤੀਣਿ ਲਕ੍ਖਣਾਨਿ ਆਰੋਪੇਤ੍ਵਾ ਸਤ੍ਤਨ੍ਨਂ ਅਨੁਪਸ੍ਸਨਾਨਂ ਵਸੇਨ ਸਮ੍ਮਸਤਿ. ਏਤ੍ਤਾਵਤਾਨੇਨ ਸੋ ਤਿਲਕ੍ਖਣਪਟਿਵੇਧਸਮ੍ਮਸਨਞਾਣਸਙ੍ਖਾਤਾਯ ਤੀਰਣਪਰਿਞ੍ਞਾਯ ਪਰਿਞ੍ਞਾਤੋ ਹੋਤਿ. ਤਸ੍ਮਿਂਯੇਵ ਨਾਮਰੂਪੇ ਛਨ੍ਦਰਾਗਾਵਕਡ੍ਢਨੇਨ ਅਨਾਗਾਮਿਮਗ੍ਗੇਨ ਪਰਿਜਾਨਤਾ ਪਹਾਨਪਰਿਞ੍ਞਾਯ ਪਰਿਞ੍ਞਾਤੋ ਹੋਤੀਤਿ.

ਪਞ੍ਚਕਾਮਗੁਣਿਕੋਤਿ ਪਞ੍ਚਕਾਮਗੁਣਸਮ੍ਭਵੋ ਰਾਗੋ ਪਰਿਞ੍ਞਾਤੋ ਹੋਤਿ. ਏਤ੍ਥ ਪਨ ਤਿਸ੍ਸੋ ਪਰਿਞ੍ਞਾ ਏਕਪਰਿਞ੍ਞਾ ਸਬ੍ਬਪਰਿਞ੍ਞਾ ਮੂਲਪਰਿਞ੍ਞਾਤਿ. ਕਤਮਾ ਏਕਪਰਿਞ੍ਞਾ? ਯੋ ਭਿਕ੍ਖੁ ਜਿਵ੍ਹਾਦ੍ਵਾਰੇ ਏਕਰਸਤਣ੍ਹਂ ਪਰਿਜਾਨਾਤਿ, ਤੇਨ ਪਞ੍ਚਕਾਮਗੁਣਿਕੋ ਰਾਗੋ ਪਰਿਞ੍ਞਾਤੋਵ ਹੋਤੀਤਿ. ਕਸ੍ਮਾ? ਤਸ੍ਸਾਯੇਵ ਤਤ੍ਥ ਉਪ੍ਪਜ੍ਜਨਤੋ. ਸਾਯੇਵ ਹਿ ਤਣ੍ਹਾ ਚਕ੍ਖੁਦ੍ਵਾਰੇ ਉਪ੍ਪਨ੍ਨਾ ਰੂਪਰਾਗੋ ਨਾਮ ਹੋਤਿ, ਸੋਤਦ੍ਵਾਰਾਦੀਸੁ ਉਪ੍ਪਨ੍ਨਾ ਸਦ੍ਦਰਾਗਾਦਯੋ. ਇਤਿ ਯਥਾ ਏਕਸ੍ਸੇਵ ਚੋਰਸ੍ਸ ਪਞ੍ਚਮਗ੍ਗੇ ਹਨਤੋ ਏਕਸ੍ਮਿਂ ਮਗ੍ਗੇ ਗਹੇਤ੍ਵਾ ਸੀਸੇ ਛਿਨ੍ਨੇ ਪਞ੍ਚਪਿ ਮਗ੍ਗਾ ਖੇਮਾ ਹੋਨ੍ਤਿ, ਏਵਂ ਜਿਵ੍ਹਾਦ੍ਵਾਰੇ ਰਸਤਣ੍ਹਾਯ ਪਰਿਞ੍ਞਾਤਾਯ ਪਞ੍ਚਕਾਮਗੁਣਿਕੋ ਰਾਗੋ ਪਰਿਞ੍ਞਾਤੋ ਹੋਤੀਤਿ ਅਯਂ ਏਕਪਰਿਞ੍ਞਾ ਨਾਮ.

ਕਤਮਾ ਸਬ੍ਬਪਰਿਞ੍ਞਾ? ਪਤ੍ਤੇ ਪਕ੍ਖਿਤ੍ਤਪਿਣ੍ਡਪਾਤਸ੍ਮਿਞ੍ਹਿ ਏਕਸ੍ਮਿਂਯੇਵ ਪਞ੍ਚਕਾਮਗੁਣਿਕਰਾਗੋ ਲਬ੍ਭਤਿ. ਕਥਂ? ਪਰਿਸੁਦ੍ਧਂ ਤਾਵਸ੍ਸ ਵਣ੍ਣਂ ਓਲੋਕਯਤੋ ਰੂਪਰਾਗੋ ਹੋਤਿ, ਉਣ੍ਹੇ ਸਪ੍ਪਿਮ੍ਹਿ ਤਤ੍ਥ ਆਸਿਞ੍ਚਨ੍ਤੇ ਪਟਪਟਾਤਿ ਸਦ੍ਦੋ ਉਟ੍ਠਹਤਿ, ਤਥਾਰੂਪਂ ਖਾਦਨੀਯਂ ਵਾ ਖਾਦਨ੍ਤਸ੍ਸ ਮੁਰੁਮੁਰੂਤਿ ਸਦ੍ਦੋ ਉਪ੍ਪਜ੍ਜਤਿ, ਤਂ ਅਸ੍ਸਾਦਯਤੋ ਸਦ੍ਦਰਾਗੋ. ਜੀਰਕਾਦਿਵਸਗਨ੍ਧਂ ਅਸ੍ਸਾਦੇਨ੍ਤਸ੍ਸ ਗਨ੍ਧਰਾਗੋ, ਸਾਦੁਰਸਵਸੇਨ ਰਸਰਾਗੋ. ਮੁਦੁਭੋਜਨਂ ਫਸ੍ਸਵਨ੍ਤਨ੍ਤਿ ਅਸ੍ਸਾਦਯਤੋ ਫੋਟ੍ਠਬ੍ਬਰਾਗੋ. ਇਤਿ ਇਮਸ੍ਮਿਂ ਆਹਾਰੇ ਸਤਿਸਮ੍ਪਜਞ੍ਞੇਨ ਪਰਿਗ੍ਗਹੇਤ੍ਵਾ ਨਿਚ੍ਛਨ੍ਦਰਾਗਪਰਿਭੋਗੇਨ ਪਰਿਭੁਤ੍ਤੇ ਸਬ੍ਬੋਪਿ ਸੋ ਪਰਿਞ੍ਞਾਤੋ ਹੋਤੀਤਿ ਅਯਂ ਸਬ੍ਬਪਰਿਞ੍ਞਾ ਨਾਮ.

ਕਤਮਾ ਮੂਲਪਰਿਞ੍ਞਾ? ਪਞ੍ਚਕਾਮਗੁਣਿਕਰਾਗਸ੍ਸ ਹਿ ਕਬਲ਼ੀਕਾਰਾਹਾਰੋ ਮੂਲਂ. ਕਸ੍ਮਾ? ਤਸ੍ਮਿਂ ਸਤਿ ਤਸ੍ਸੁਪ੍ਪਤ੍ਤਿਤੋ. ਬ੍ਰਾਹ੍ਮਣਤਿਸ੍ਸਭਯੇ ਕਿਰ ਦ੍ਵਾਦਸ ਵਸ੍ਸਾਨਿ ਜਾਯਮ੍ਪਤਿਕਾਨਂ ਉਪਨਿਜ੍ਝਾਨਚਿਤ੍ਤਂ ਨਾਮ ਨਾਹੋਸਿ. ਕਸ੍ਮਾ? ਆਹਾਰਮਨ੍ਦਤਾਯ. ਭਯੇ ਪਨ ਵੂਪਸਨ੍ਤੇ ਯੋਜਨਸਤਿਕੋ ਤਮ੍ਬਪਣ੍ਣਿਦੀਪੋ ਦਾਰਕਾਨਂ ਜਾਤਮਙ੍ਗਲੇਹਿ ਏਕਮਙ੍ਗਲੋ ਅਹੋਸਿ. ਇਤਿ ਮੂਲਭੂਤੇ ਆਹਾਰੇ ਪਰਿਞ੍ਞਾਤੇ ਪਞ੍ਚਕਾਮਗੁਣਿਕੋ ਰਾਗੋ ਪਰਿਞ੍ਞਾਤੋਵ ਹੋਤੀਤਿ ਅਯਂ ਮੂਲਪਰਿਞ੍ਞਾ ਨਾਮ.

ਨਤ੍ਥਿ ਤਂ ਸਂਯੋਜਨਨ੍ਤਿ ਤੇਨ ਰਾਗੇਨ ਸਦ੍ਧਿਂ ਪਹਾਨੇਕਟ੍ਠਤਾਯ ਪਹੀਨਤ੍ਤਾ ਨਤ੍ਥਿ. ਏਵਮਯਂ ਦੇਸਨਾ ਯਾਵ ਅਨਾਗਾਮਿਮਗ੍ਗਾ ਕਥਿਤਾ. ‘‘ਏਤ੍ਤਕੇਨ ਪਨ ਮਾ ਵੋਸਾਨਂ ਆਪਜ੍ਜਿਂਸੂ’’ਤਿ ਏਤੇਸਂਯੇਵ ਰੂਪਾਦੀਨਂ ਵਸੇਨ ਪਞ੍ਚਸੁ ਖਨ੍ਧੇਸੁ ਵਿਪਸ੍ਸਨਂ ਵਡ੍ਢੇਤ੍ਵਾ ਯਾਵ ਅਰਹਤ੍ਤਾ ਕਥੇਤੁਂ ਵਟ੍ਟਤੀਤਿ. ਪਠਮਾਹਾਰੋ (ਨਿਟ੍ਠਿਤੋ).

ਦੁਤਿਯੇ ਨਿਚ੍ਚਮ੍ਮਾਤਿ ਖੁਰਤੋ ਪਟ੍ਠਾਯ ਯਾਵ ਸਿਙ੍ਗਮੂਲਾ ਸਕਲਸਰੀਰਤੋ ਉਦ੍ਦਾਲਿਤਚਮ੍ਮਾ ਕਿਂਸੁਕਰਾਸਿਵਣ੍ਣਾ. ਕਸ੍ਮਾ ਪਨ ਅਞ੍ਞਂ ਹਤ੍ਥਿਅਸ੍ਸਗੋਣਾਦਿਉਪਮਂ ਅਗਹੇਤ੍ਵਾ ਨਿਚ੍ਚਮ੍ਮਗਾਵੂਪਮਾ ਗਹਿਤਾਤਿ? ਤਿਤਿਕ੍ਖਿਤੁਂ ਅਸਮਤ੍ਥਭਾਵਦੀਪਨਤ੍ਥਂ. ਮਾਤੁਗਾਮੋ ਹਿ ਉਪ੍ਪਨ੍ਨਂ ਦੁਕ੍ਖਵੇਦਨਂ ਤਿਤਿਕ੍ਖਿਤੁਂ ਅਧਿਵਾਸੇਤੁਂ ਨ ਸਕ੍ਕੋਤਿ, ਏਵਮੇਵ ਫਸ੍ਸਾਹਾਰੋ ਅਬਲੋ ਦੁਬ੍ਬਲੋਤਿ ਦਸ੍ਸਨਤ੍ਥਂ ਸਦਿਸਮੇਵ ਉਪਮਂ ਆਹਰਿ. ਕੁਟ੍ਟਨ੍ਤਿ ਸਿਲਾਕੁਟ੍ਟਾਦੀਨਂ ਅਞ੍ਞਤਰਂ. ਕੁਟ੍ਟਨਿਸ੍ਸਿਤਾ ਪਾਣਾ ਨਾਮ ਉਣ੍ਣਨਾਭਿਸਰਬੂਮੂਸਿਕਾਦਯੋ. ਰੁਕ੍ਖਨਿਸ੍ਸਿਤਾਤਿ ਉਚ੍ਚਾਲਿਙ੍ਗਪਾਣਕਾਦਯੋ. ਉਦਕਨਿਸ੍ਸਿਤਾਤਿ ਮਚ੍ਛਸੁਂਸੁਮਾਰਾਦਯੋ. ਆਕਾਸਨਿਸ੍ਸਿਤਾਤਿ ਡਂਸਮਕਸਕਾਕਕੁਲਲਾਦਯੋ. ਖਾਦੇਯ੍ਯੁਨ੍ਤਿ ਲੁਞ੍ਚਿਤ੍ਵਾ ਖਾਦੇਯ੍ਯੁਂ. ਸਾ ਤਸ੍ਮਿਂ ਤਸ੍ਮਿਂ ਠਾਨੇ ਤਂ ਤਂਠਾਨਸਨ੍ਨਿਸ੍ਸਯਮੂਲਿਕਂ ਪਾਣਖਾਦਨਭਯਂ ਸਮ੍ਪਸ੍ਸਮਾਨਾ ਨੇਵ ਅਤ੍ਤਨੋ ਸਕ੍ਕਾਰਸਮ੍ਮਾਨਂ, ਨ ਪਿਟ੍ਠਿਪਰਿਕਮ੍ਮਸਰੀਰਸਮ੍ਬਾਹਨਉਣ੍ਹੋਦਕਾਨਿ ਇਚ੍ਛਤਿ, ਏਵਮੇਵ ਭਿਕ੍ਖੁ ਫਸ੍ਸਾਹਾਰਮੂਲਕਂ ਕਿਲੇਸਪਾਣਕਖਾਦਨਭਯਂ ਸਮ੍ਪਸ੍ਸਮਾਨੋ ਤੇਭੂਮਕਫਸ੍ਸੇਨ ਅਨਤ੍ਥਿਕੋ ਹੋਤਿ.

ਫਸ੍ਸੇ, ਭਿਕ੍ਖਵੇ, ਆਹਾਰੇ ਪਰਿਞ੍ਞਾਤੇਤਿ ਤੀਹਿ ਪਰਿਞ੍ਞਾਹਿ ਪਰਿਞ੍ਞਾਤੇ. ਇਧਾਪਿ ਤਿਸ੍ਸੋ ਪਰਿਞ੍ਞਾ. ਤਤ੍ਥ ‘‘ਫਸ੍ਸੋ ਸਙ੍ਖਾਰਕ੍ਖਨ੍ਧੋ, ਤਂਸਮ੍ਪਯੁਤ੍ਤਾ ਵੇਦਨਾ ਵੇਦਨਾਕ੍ਖਨ੍ਧੋ, ਸਞ੍ਞਾ ਸਞ੍ਞਾਕ੍ਖਨ੍ਧੋ, ਚਿਤ੍ਤਂ ਵਿਞ੍ਞਾਣਕ੍ਖਨ੍ਧੋ, ਤੇਸਂ ਵਤ੍ਥਾਰਮ੍ਮਣਾਨਿ ਰੂਪਕ੍ਖਨ੍ਧੋ’’ਤਿ ਏਵਂ ਸਪ੍ਪਚ੍ਚਯਸ੍ਸ ਨਾਮਰੂਪਸ੍ਸ ਯਾਥਾਵਤੋ ਦਸ੍ਸਨਂ ਞਾਤਪਰਿਞ੍ਞਾ. ਤਤ੍ਥੇਵ ਤਿਲਕ੍ਖਣਂ ਆਰੋਪੇਤ੍ਵਾ ਸਤ੍ਤਨ੍ਨਂ ਅਨੁਪਸ੍ਸਨਾਨਂ ਵਸੇਨ ਅਨਿਚ੍ਚਾਦਿਤੋ ਤੁਲਨਂ ਤੀਰਣਪਰਿਞ੍ਞਾ. ਤਸ੍ਮਿਂਯੇਵ ਪਨ ਨਾਮਰੂਪੇ ਛਨ੍ਦਰਾਗਨਿਕ੍ਕਡ੍ਢਨੋ ਅਰਹਤ੍ਤਮਗ੍ਗੋ ਪਹਾਨਪਰਿਞ੍ਞਾ. ਤਿਸ੍ਸੋ ਵੇਦਨਾਤਿ ਏਵਂ ਫਸ੍ਸਾਹਾਰੇ ਤੀਹਿ ਪਰਿਞ੍ਞਾਹਿ ਪਰਿਞ੍ਞਾਤੇ ਤਿਸ੍ਸੋ ਵੇਦਨਾ ਪਰਿਞ੍ਞਾਤਾਵ ਹੋਨ੍ਤਿ ਤਮ੍ਮੂਲਕਤ੍ਤਾ ਤਂਸਮ੍ਪਯੁਤ੍ਤਤ੍ਤਾ ਚ. ਇਤਿ ਫਸ੍ਸਾਹਾਰਵਸੇਨ ਦੇਸਨਾ ਯਾਵ ਅਰਹਤ੍ਤਾ ਕਥਿਤਾ. ਦੁਤਿਯਾਹਾਰੋ.

ਤਤਿਯੇ ਅਙ੍ਗਾਰਕਾਸੂਤਿ ਅਙ੍ਗਾਰਾਨਂ ਕਾਸੁ. ਕਾਸੂਤਿ ਰਾਸਿਪਿ ਵੁਚ੍ਚਤਿ ਆਵਾਟੋਪਿ.

‘‘ਅਙ੍ਗਾਰਕਾਸੁਂ ਅਪਰੇ ਫੁਣਨ੍ਤਿ,

ਨਰਾ ਰੁਦਨ੍ਤਾ ਪਰਿਦਡ੍ਢਗਤ੍ਤਾ;

ਭਯਞ੍ਹਿ ਮਂ ਵਿਨ੍ਦਤਿ ਸੂਤ ਦਿਸ੍ਵਾ,

ਪੁਚ੍ਛਾਮਿ ਤਂ ਮਾਤਲਿ ਦੇਵਸਾਰਥੀ’’ਤਿ. (ਜਾ. ੨.੨੨.੪੬੨); –

ਏਤ੍ਥ ਰਾਸਿ ‘‘ਕਾਸੂ’’ਤਿ ਵੁਤ੍ਤੋ.

‘‘ਕਿਨ੍ਨੁ ਸਨ੍ਤਰਮਾਨੋਵ, ਕਾਸੁਂ ਖਨਸਿ ਸਾਰਥੀ’’ਤਿ? (ਜਾ. ੨.੨੨.੩). –

ਏਤ੍ਥ ਆਵਾਟੋ. ਇਧਾਪਿ ਅਯਮੇਵ ਅਧਿਪ੍ਪੇਤੋ. ਸਾਧਿਕਪੋਰਿਸਾਤਿ ਅਤਿਰੇਕਪੋਰਿਸਾ ਪਞ੍ਚਰਤਨਪ੍ਪਮਾਣਾ. ਵੀਤਚ੍ਚਿਕਾਨਂ ਵੀਤਧੂਮਾਨਨ੍ਤਿ ਏਤੇਨਸ੍ਸ ਮਹਾਪਰਿਲ਼ਾਹਤਂ ਦਸ੍ਸੇਤਿ. ਜਾਲਾਯ ਵਾ ਹਿ ਧੂਮੇ ਵਾ ਸਤਿ ਵਾਤੋ ਸਮੁਟ੍ਠਾਤਿ, ਪਰਿਲ਼ਾਹੋ ਮਹਾ ਨ ਹੋਤਿ, ਤਦਭਾਵੇ ਵਾਤਾਭਾਵਤੋ ਪਰਿਲ਼ਾਹੋ ਮਹਾ ਹੋਤਿ. ਆਰਕਾਵਸ੍ਸਾਤਿ ਦੂਰੇਯੇਵ ਭਵੇਯ੍ਯ.

ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਅਙ੍ਗਾਰਕਾਸੁ ਵਿਯ ਹਿ ਤੇਭੂਮਕਵਟ੍ਟਂ ਦਟ੍ਠਬ੍ਬਂ. ਜੀਵਿਤੁਕਾਮੋ ਪੁਰਿਸੋ ਵਿਯ ਵਟ੍ਟਨਿਸ੍ਸਿਤੋ ਬਾਲਪੁਥੁਜ੍ਜਨੋ. ਦ੍ਵੇ ਬਲਵਨ੍ਤੋ ਪੁਰਿਸਾ ਵਿਯ ਕੁਸਲਾਕੁਸਲਕਮ੍ਮਂ. ਤੇਸਂ ਤਂ ਪੁਰਿਸਂ ਨਾਨਾਬਾਹਾਸੁ ਗਹੇਤ੍ਵਾ ਅਙ੍ਗਾਰਕਾਸੁਂ ਉਪਕਡ੍ਢਨਕਾਲੋ ਵਿਯ ਪੁਥੁਜ੍ਜਨਸ੍ਸ ਕਮ੍ਮਾਯੂਹਨਕਾਲੋ. ਕਮ੍ਮਞ੍ਹਿ ਆਯੂਹਿਯਮਾਨਮੇਵ ਪਟਿਸਨ੍ਧਿਂ ਆਕਡ੍ਢਤਿ ਨਾਮ. ਅਙ੍ਗਾਰਕਾਸੁਨਿਦਾਨਂ ਦੁਕ੍ਖਂ ਵਿਯ ਕਮ੍ਮਨਿਦਾਨਂ ਵਟ੍ਟਦੁਕ੍ਖਂ ਵੇਦਿਤਬ੍ਬਂ.

ਪਰਿਞ੍ਞਾਤੇਤਿ ਤੀਹਿ ਪਰਿਞ੍ਞਾਹਿ ਪਰਿਞ੍ਞਾਤੇ. ਪਰਿਞ੍ਞਾਯੋਜਨਾ ਪਨੇਤ੍ਥ ਫਸ੍ਸੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਤਿਸ੍ਸੋ ਤਣ੍ਹਾਤਿ ਕਾਮਤਣ੍ਹਾ ਭਵਤਣ੍ਹਾ ਵਿਭਵਤਣ੍ਹਾਤਿ ਇਮਾ ਪਰਿਞ੍ਞਾਤਾ ਹੋਨ੍ਤਿ. ਕਸ੍ਮਾ? ਤਣ੍ਹਾਮੂਲਕਤ੍ਤਾ ਮਨੋਸਞ੍ਚੇਤਨਾਯ. ਨ ਹਿ ਹੇਤੁਮ੍ਹਿ ਅਪ੍ਪਹੀਨੇ ਫਲਂ ਪਹੀਯਤਿ. ਇਤਿ ਮਨੋਸਞ੍ਚੇਤਨਾਹਾਰਵਸੇਨਪਿ ਯਾਵ ਅਰਹਤ੍ਤਾ ਦੇਸਨਾ ਕਥਿਤਾ. ਤਤਿਯਾਹਾਰੋ.

ਚਤੁਤ੍ਥੇ ਆਗੁਚਾਰਿਨ੍ਤਿ ਪਾਪਚਾਰਿਂ ਦੋਸਕਾਰਕਂ. ਕਥਂ ਸੋ ਪੁਰਿਸੋਤਿ ਸੋ ਪੁਰਿਸੋ ਕਥਂਭੂਤੋ, ਕਿਂ ਯਾਪੇਤਿ, ਨ ਯਾਪੇਤੀਤਿ ਪੁਚ੍ਛਤਿ? ਤਥੇਵ ਦੇਵ ਜੀਵਤੀਤਿ ਯਥਾ ਪੁਬ੍ਬੇ, ਇਦਾਨਿਪਿ ਤਥੇਵ ਜੀਵਤਿ.

ਏਵਮੇਵ ਖੋਤਿ ਇਧਾਪਿ ਇਦਂ ਓਪਮ੍ਮਸਂਸਨ੍ਦਨਂ – ਰਾਜਾ ਵਿਯ ਹਿ ਕਮ੍ਮਂ ਦਟ੍ਠਬ੍ਬਂ, ਆਗੁਚਾਰੀ ਪੁਰਿਸੋ ਵਿਯ ਵਟ੍ਟਸਨ੍ਨਿਸ੍ਸਿਤੋ ਬਾਲਪੁਥੁਜ੍ਜਨੋ, ਤੀਣਿ ਸਤ੍ਤਿਸਤਾਨਿ ਵਿਯ ਪਟਿਸਨ੍ਧਿਵਿਞ੍ਞਾਣਂ, ਆਗੁਚਾਰਿਂ ਪੁਰਿਸਂ ‘‘ਤੀਹਿ ਸਤ੍ਤਿਸਤੇਹਿ ਹਨਥਾ’’ਤਿ ਰਞ੍ਞਾ ਆਣਤ੍ਤਕਾਲੋ ਵਿਯ ਕਮ੍ਮਰਞ੍ਞਾ ਵਟ੍ਟਸਨ੍ਨਿਸ੍ਸਿਤਪੁਥੁਜ੍ਜਨਂ ਗਹੇਤ੍ਵਾ ਪਟਿਸਨ੍ਧਿਯਂ ਪਕ੍ਖਿਪਨਕਾਲੋ. ਤਤ੍ਥ ਕਿਞ੍ਚਾਪਿ ਤੀਣਿ ਸਤ੍ਤਿਸਤਾਨਿ ਵਿਯ ਪਟਿਸਨ੍ਧਿਵਿਞ੍ਞਾਣਂ, ਸਤ੍ਤੀਸੁ ਪਨ ਦੁਕ੍ਖਂ ਨਤ੍ਥਿ, ਸਤ੍ਤੀਹਿ ਪਹਟਵਣਮੂਲਕਂ ਦੁਕ੍ਖਂ, ਏਵਮੇਵ ਪਟਿਸਨ੍ਧਿਯਮ੍ਪਿ ਦੁਕ੍ਖਂ ਨਤ੍ਥਿ, ਦਿਨ੍ਨਾਯ ਪਨ ਪਟਿਸਨ੍ਧਿਯਾ ਪਵਤ੍ਤੇ ਵਿਪਾਕਦੁਕ੍ਖਂ ਸਤ੍ਤਿਪਹਟਵਣਮੂਲਕਂ ਦੁਕ੍ਖਂ ਵਿਯ ਹੋਤਿ.

ਪਰਿਞ੍ਞਾਤੇਤਿ ਤੀਹੇਵ ਪਰਿਞ੍ਞਾਹਿ ਪਰਿਞ੍ਞਾਤੇ. ਇਧਾਪਿ ਪਰਿਞ੍ਞਾਯੋਜਨਾ ਫਸ੍ਸਾਹਾਰੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਨਾਮਰੂਪਨ੍ਤਿ ਵਿਞ੍ਞਾਣਪਚ੍ਚਯਾ ਨਾਮਰੂਪਂ. ਵਿਞ੍ਞਾਣਸ੍ਮਿਞ੍ਹਿ ਪਰਿਞ੍ਞਾਤੇ ਤਂ ਪਰਿਞ੍ਞਾਤਮੇਵ ਹੋਤਿ ਤਮ੍ਮੂਲਕਤ੍ਤਾ ਸਹੁਪ੍ਪਨ੍ਨਤ੍ਤਾ ਚ. ਇਤਿ ਵਿਞ੍ਞਾਣਾਹਾਰਵਸੇਨਪਿ ਯਾਵ ਅਰਹਤ੍ਤਾ ਦੇਸਨਾ ਕਥਿਤਾਤਿ. ਚਤੁਤ੍ਥਾਹਾਰੋ. ਤਤਿਯਂ.

੪. ਅਤ੍ਥਿਰਾਗਸੁਤ੍ਤਵਣ੍ਣਨਾ

੬੪. ਚਤੁਤ੍ਥੇ ਰਾਗੋਤਿਆਦੀਨਿ ਲੋਭਸ੍ਸੇਵ ਨਾਮਾਨਿ. ਸੋ ਹਿ ਰਞ੍ਜਨਵਸੇਨ ਰਾਗੋ, ਨਨ੍ਦਨਵਸੇਨ ਨਨ੍ਦੀ, ਤਣ੍ਹਾਯਨਵਸੇਨ ਤਣ੍ਹਾਤਿ ਵੁਚ੍ਚਤਿ. ਪਤਿਟ੍ਠਿਤਂ ਤਤ੍ਥ ਵਿਞ੍ਞਾਣਂ ਵਿਰੂਲ਼੍ਹਨ੍ਤਿ ਕਮ੍ਮਂ ਜਵਾਪੇਤ੍ਵਾ ਪਟਿਸਨ੍ਧਿਆਕਡ੍ਢਨਸਮਤ੍ਥਤਾਯ ਪਤਿਟ੍ਠਿਤਞ੍ਚੇਵ ਵਿਰੂਲ਼੍ਹਞ੍ਚ. ਯਤ੍ਥਾਤਿ ਤੇਭੂਮਕਵਟ੍ਟੇ ਭੁਮ੍ਮਂ, ਸਬ੍ਬਤ੍ਥ ਵਾ ਪੁਰਿਮਪੁਰਿਮਪਦੇ ਏਤਂ ਭੁਮ੍ਮਂ. ਅਤ੍ਥਿ ਤਤ੍ਥ ਸਙ੍ਖਾਰਾਨਂ ਵੁਦ੍ਧੀਤਿ ਇਦਂ ਇਮਸ੍ਮਿਂ ਵਿਪਾਕਵਟ੍ਟੇ ਠਿਤਸ੍ਸ ਆਯਤਿਵਟ੍ਟਹੇਤੁਕੇ ਸਙ੍ਖਾਰੇ ਸਨ੍ਧਾਯ ਵੁਤ੍ਤਂ. ਯਤ੍ਥ ਅਤ੍ਥਿ ਆਯਤਿਂ ਪੁਨਬ੍ਭਵਾਭਿਨਿਬ੍ਬਤ੍ਤੀਤਿ ਯਸ੍ਮਿਂ ਠਾਨੇ ਆਯਤਿਂ ਪੁਨਬ੍ਭਵਾਭਿਨਿਬ੍ਬਤ੍ਤਿ ਅਤ੍ਥਿ.

ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਰਜਕਚਿਤ੍ਤਕਾਰਾ ਵਿਯ ਹਿ ਸਹਕਮ੍ਮਸਮ੍ਭਾਰਂ ਕਮ੍ਮਂ, ਫਲਕਭਿਤ੍ਤਿਦੁਸ੍ਸਪਟਾ ਵਿਯ ਤੇਭੂਮਕਵਟ੍ਟਂ. ਯਥਾ ਰਜਕਚਿਤ੍ਤਕਾਰਾ ਪਰਿਸੁਦ੍ਧੇਸੁ ਫਲਕਾਦੀਸੁ ਰੂਪਂ ਸਮੁਟ੍ਠਾਪੇਨ੍ਤਿ, ਏਵਮੇਵ ਸਸਮ੍ਭਾਰਕਕਮ੍ਮਂ ਭਵੇਸੁ ਰੂਪਂ ਸਮੁਟ੍ਠਾਪੇਤਿ. ਤਤ੍ਥ ਯਥਾ ਅਕੁਸਲੇਨ ਚਿਤ੍ਤਕਾਰੇਨ ਸਮੁਟ੍ਠਾਪਿਤਂ ਰੂਪਂ ਵਿਰੂਪਂ ਹੋਤਿ ਦੁਸ੍ਸਣ੍ਠਿਤਂ ਅਮਨਾਪਂ, ਏਵਮੇਵ ਏਕਚ੍ਚੋ ਕਮ੍ਮਂ ਕਰੋਨ੍ਤੋ ਞਾਣਵਿਪ੍ਪਯੁਤ੍ਤੇਨ ਚਿਤ੍ਤੇਨ ਕਰੋਤਿ, ਤਂ ਕਮ੍ਮਂ ਰੂਪਂ ਸਮੁਟ੍ਠਾਪੇਨ੍ਤਂ ਚਕ੍ਖਾਦੀਨਂ ਸਮ੍ਪਤ੍ਤਿਂ ਅਦਤ੍ਵਾ ਦੁਬ੍ਬਣ੍ਣਂ ਦੁਸ੍ਸਣ੍ਠਿਤਂ ਮਾਤਾਪਿਤੂਨਮ੍ਪਿ ਅਮਨਾਪਂ ਰੂਪਂ ਸਮੁਟ੍ਠਾਪੇਤਿ. ਯਥਾ ਪਨ ਕੁਸਲੇਨ ਚਿਤ੍ਤਕਾਰੇਨ ਸਮੁਟ੍ਠਾਪਿਤਂ ਰੂਪਂ ਸੁਰੂਪਂ ਹੋਤਿ ਸੁਸਣ੍ਠਿਤਂ ਮਨਾਪਂ, ਏਵਮੇਵ ਏਕਚ੍ਚੋ ਕਮ੍ਮਂ ਕਰੋਨ੍ਤੋ ਞਾਣਸਮ੍ਪਯੁਤ੍ਤੇਨ ਚਿਤ੍ਤੇਨ ਕਰੋਤਿ, ਤਂ ਕਮ੍ਮਂ ਰੂਪਂ ਸਮੁਟ੍ਠਾਪੇਨ੍ਤਂ ਚਕ੍ਖਾਦੀਨਂ ਸਮ੍ਪਤ੍ਤਿਂ ਦਤ੍ਵਾ ਸੁਵਣ੍ਣਂ ਸੁਸਣ੍ਠਿਤਂ ਅਲਙ੍ਕਤਪਟਿਯਤ੍ਤਂ ਵਿਯ ਰੂਪਂ ਸਮੁਟ੍ਠਾਪੇਤਿ.

ਏਤ੍ਥ ਚ ਆਹਾਰਂ ਵਿਞ੍ਞਾਣੇਨ ਸਦ੍ਧਿਂ ਸਙ੍ਖਿਪਿਤ੍ਵਾ ਆਹਾਰਨਾਮਰੂਪਾਨਂ ਅਨ੍ਤਰੇ ਏਕੋ ਸਨ੍ਧਿ, ਵਿਪਾਕਵਿਧਿਂ ਨਾਮਰੂਪੇਨ ਸਙ੍ਖਿਪਿਤ੍ਵਾ ਨਾਮਰੂਪਸਙ੍ਖਾਰਾਨਂ ਅਨ੍ਤਰੇ ਏਕੋ ਸਨ੍ਧਿ, ਸਙ੍ਖਾਰਾਨਞ੍ਚ ਆਯਤਿਭਵਸ੍ਸ ਚ ਅਨ੍ਤਰੇ ਏਕੋ ਸਨ੍ਧੀਤਿ ਵੇਦਿਤਬ੍ਬੋ.

ਕੂਟਾਗਾਰਨ੍ਤਿ ਏਕਕਣ੍ਣਿਕਂ ਗਾਹਾਪੇਤ੍ਵਾ ਕਤਂ ਅਗਾਰਂ. ਕੂਟਾਗਾਰਸਾਲਾਤਿ ਦ੍ਵੇ ਕਣ੍ਣਿਕੇ ਗਹੇਤ੍ਵਾ ਕਤਸਾਲਾ. ਏਵਮੇਵ ਖੋਤਿ ਏਤ੍ਥ ਖੀਣਾਸਵਸ੍ਸ ਕਮ੍ਮਂ ਸੂਰਿਯਰਸ੍ਮਿਸਮਂ ਵੇਦਿਤਬ੍ਬਂ. ਸੂਰਿਯਰਸ੍ਮਿ ਪਨ ਅਤ੍ਥਿ, ਸਾ ਕੇਵਲਂ ਪਤਿਟ੍ਠਾਯ ਅਭਾਵੇਨ ਅਪ੍ਪਤਿਟ੍ਠਾ ਨਾਮ ਜਾਤਾ, ਖੀਣਾਸਵਸ੍ਸ ਕਮ੍ਮਂ ਨਤ੍ਥਿਤਾਯ ਏਵ ਅਪ੍ਪਤਿਟ੍ਠਂ. ਤਸ੍ਸ ਹਿ ਕਾਯਾਦਯੋ ਅਤ੍ਥਿ, ਤੇਹਿ ਪਨ ਕਤਕਮ੍ਮਂ ਕੁਸਲਾਕੁਸਲਂ ਨਾਮ ਨ ਹੋਤਿ, ਕਿਰਿਯਮਤ੍ਤੇ ਠਤ੍ਵਾ ਅਵਿਪਾਕਂ ਹੋਤਿ. ਏਵਮਸ੍ਸ ਕਮ੍ਮਂ ਨਤ੍ਥਿਤਾਯ ਏਵ ਅਪ੍ਪਤਿਟ੍ਠਂ ਨਾਮ ਜਾਤਨ੍ਤਿ. ਚਤੁਤ੍ਥਂ.

੫. ਨਗਰਸੁਤ੍ਤਵਣ੍ਣਨਾ

੬੫. ਪਞ੍ਚਮੇ ਨਾਮਰੂਪੇ ਖੋ ਸਤਿ ਵਿਞ੍ਞਾਣਨ੍ਤਿ ਏਤ੍ਥ ‘‘ਸਙ੍ਖਾਰੇਸੁ ਸਤਿ ਵਿਞ੍ਞਾਣ’’ਨ੍ਤਿ ਚ ‘‘ਅਵਿਜ੍ਜਾਯ ਸਤਿ ਸਙ੍ਖਾਰਾ’’ਤਿ ਚ ਵਤ੍ਤਬ੍ਬਂ ਭਵੇਯ੍ਯ, ਤਦੁਭਯਮ੍ਪਿ ਨ ਵੁਤ੍ਤਂ. ਕਸ੍ਮਾ? ਅਵਿਜ੍ਜਾਸਙ੍ਖਾਰਾ ਹਿ ਤਤਿਯੋ ਭਵੋ, ਤੇਹਿ ਸਦ੍ਧਿਂ ਅਯਂ ਵਿਪਸ੍ਸਨਾ ਨ ਘਟੀਯਤਿ. ਮਹਾਪੁਰਿਸੋ ਹਿ ਪਚ੍ਚੁਪ੍ਪਨ੍ਨਪਞ੍ਚਵੋਕਾਰਵਸੇਨ ਅਭਿਨਿਵਿਟ੍ਠੋਤਿ.

ਨਨੁ ਚ ਅਵਿਜ੍ਜਾਸਙ੍ਖਾਰੇਸੁ ਅਦਿਟ੍ਠੇਸੁ ਨ ਸਕ੍ਕਾ ਬੁਦ੍ਧੇਨ ਭਵਿਤੁਨ੍ਤਿ. ਸਚ੍ਚਂ ਨ ਸਕ੍ਕਾ, ਇਮਿਨਾ ਪਨ ਤੇ ਭਵਉਪਾਦਾਨਤਣ੍ਹਾਵਸੇਨ ਦਿਟ੍ਠਾਵ. ਤਸ੍ਮਾ ਯਥਾ ਨਾਮ ਗੋਧਂ ਅਨੁਬਨ੍ਧਨ੍ਤੋ ਪੁਰਿਸੋ ਤਂ ਕੂਪਂ ਪਵਿਟ੍ਠਂ ਦਿਸ੍ਵਾ ਓਤਰਿਤ੍ਵਾ ਪਵਿਟ੍ਠਟ੍ਠਾਨਂ ਖਣਿਤ੍ਵਾ ਗੋਧਂ ਗਹੇਤ੍ਵਾ ਪਕ੍ਕਮੇਯ੍ਯ, ਨ ਪਰਭਾਗਂ ਖਨੇਯ੍ਯ, ਕਸ੍ਮਾ? ਕਸ੍ਸਚਿ ਨਤ੍ਥਿਤਾਯ. ਏਵਂ ਮਹਾਪੁਰਿਸੋਪਿ ਗੋਧਂ ਅਨੁਬਨ੍ਧਨ੍ਤੋ ਪੁਰਿਸੋ ਵਿਯ ਬੋਧਿਪਲ੍ਲਙ੍ਕੇ ਨਿਸਿਨ੍ਨੋ ਜਰਾਮਰਣਤੋ ਪਟ੍ਠਾਯ ‘‘ਇਮਸ੍ਸ ਅਯਂ ਪਚ੍ਚਯੋ, ਇਮਸ੍ਸ ਅਯਂ ਪਚ੍ਚਯੋ’’ਤਿ ਪਰਿਯੇਸਨ੍ਤੋ ਯਾਵ ਨਾਮਰੂਪਧਮ੍ਮਾਨਂ ਪਚ੍ਚਯਂ ਦਿਸ੍ਵਾ ਤਸ੍ਸਪਿ ਪਚ੍ਚਯਂ ਪਰਿਯੇਸਨ੍ਤੋ ਵਿਞ੍ਞਾਣਮੇਵ ਅਦ੍ਦਸ. ਤਤੋ ‘‘ਏਤ੍ਤਕੋ ਪਞ੍ਚਵੋਕਾਰਭਵਵਸੇਨ ਸਮ੍ਮਸਨਚਾਰੋ’’ਤਿ ਵਿਪਸ੍ਸਨਂ ਪਟਿਨਿਵਤ੍ਤੇਸਿ, ਪਰਤੋ ਤੁਚ੍ਛਕੂਪਸ੍ਸ ਅਭਿਨ੍ਨਟ੍ਠਾਨਂ ਵਿਯ ਅਵਿਜ੍ਜਾਸਙ੍ਖਾਰਦ੍ਵਯਂ ਅਤ੍ਥਿ, ਤਦੇਤਂ ਹੇਟ੍ਠਾ ਵਿਪਸ੍ਸਨਾਯ ਗਹਿਤਤ੍ਤਾ ਪਾਟਿਯੇਕ੍ਕਂ ਸਮ੍ਮਸਨੂਪਗਂ ਨ ਹੋਤੀਤਿ ਨ ਅਗ੍ਗਹੇਸਿ.

ਪਚ੍ਚੁਦਾਵਤ੍ਤਤੀਤਿ ਪਟਿਨਿਵਤ੍ਤਤਿ. ਕਤਮਂ ਪਨੇਤ੍ਥ ਵਿਞ੍ਞਾਣਂ ਪਚ੍ਚੁਦਾਵਤ੍ਤਤੀਤਿ? ਪਟਿਸਨ੍ਧਿਵਿਞ੍ਞਾਣਮ੍ਪਿ ਵਿਪਸ੍ਸਨਾਵਿਞ੍ਞਾਣਮ੍ਪਿ. ਤਤ੍ਥ ਪਟਿਸਨ੍ਧਿਵਿਞ੍ਞਾਣਂ ਪਚ੍ਚਯਤੋ ਪਟਿਨਿਵਤ੍ਤਤਿ, ਵਿਪਸ੍ਸਨਾਵਿਞ੍ਞਾਣਂ ਆਰਮ੍ਮਣਤੋ. ਉਭਯਮ੍ਪਿ ਨਾਮਰੂਪਂ ਨਾਤਿਕ੍ਕਮਤਿ, ਨਾਮਰੂਪਤੋ ਪਰਂ ਨ ਗਚ੍ਛਤਿ. ਏਤ੍ਤਾਵਤਾ ਜਾਯੇਥ ਵਾਤਿਆਦੀਸੁ ਵਿਞ੍ਞਾਣੇ ਨਾਮਰੂਪਸ੍ਸ ਪਚ੍ਚਯੇ ਹੋਨ੍ਤੇ, ਨਾਮਰੂਪੇ ਵਿਞ੍ਞਾਣਸ੍ਸ ਪਚ੍ਚਯੇ ਹੋਨ੍ਤੇ, ਦ੍ਵੀਸੁਪਿ ਅਞ੍ਞਮਞ੍ਞਪਚ੍ਚਯੇਸੁ ਹੋਨ੍ਤੇਸੁ ਏਤ੍ਤਕੇਨ ਜਾਯੇਥ ਵਾ ਉਪਪਜ੍ਜੇਥ ਵਾ. ਇਤੋ ਹਿ ਪਰਂ ਕਿਮਞ੍ਞਂ ਜਾਯੇਥ ਵਾ ਉਪਪਜ੍ਜੇਥ ਵਾ, ਨਨੁ ਏਤਦੇਵ ਜਾਯਤਿ ਚ ਉਪਪਜ੍ਜਤਿ ਚਾਤਿ?

ਏਵਂ ਸਦ੍ਧਿਂ ਅਪਰਾਪਰਚੁਤਿਪਟਿਸਨ੍ਧੀਹਿ ਪਞ੍ਚ ਪਦਾਨਿ ਦਸ੍ਸੇਤ੍ਵਾ ਪੁਨ ਤਂ ਏਤ੍ਤਾਵਤਾਤਿ ਵੁਤ੍ਤਮਤ੍ਥਂ ਨਿਯ੍ਯਾਤੇਨ੍ਤੋ ਯਦਿਦਂ ਨਾਮਰੂਪਪਚ੍ਚਯਾ ਵਿਞ੍ਞਾਣਂ, ਵਿਞ੍ਞਾਣਪਚ੍ਚਯਾ ਨਾਮਰੂਪਨ੍ਤਿ ਵਤ੍ਵਾ ਤਤੋ ਪਰਂ ਅਨੁਲੋਮਪਚ੍ਚਯਾਕਾਰਵਸੇਨ ਵਿਞ੍ਞਾਣਪਚ੍ਚਯਾ ਨਾਮਰੂਪਮੂਲਕਂ ਆਯਤਿਜਰਾਮਰਣਂ ਦਸ੍ਸੇਤੁਂ ਨਾਮਰੂਪਪਚ੍ਚਯਾ ਸਲ਼ਾਯਤਨਨ੍ਤਿਆਦਿਮਾਹ.

ਅਞ੍ਜਸਨ੍ਤਿ ਮਗ੍ਗਸ੍ਸੇਵ ਵੇਵਚਨਂ. ਉਦ੍ਧਾਪਵਨ੍ਤਨ੍ਤਿ ਆਪਤੋ ਉਗ੍ਗਤਤ੍ਤਾ ਉਦ੍ਧਾਪਨ੍ਤਿ ਲਦ੍ਧਵੋਹਾਰੇਨ ਪਾਕਾਰਵਤ੍ਥੁਨਾ ਸਮਨ੍ਨਾਗਤਂ. ਰਮਣੀਯਨ੍ਤਿ ਸਮਨ੍ਤਾ ਚਤੁਨ੍ਨਂ ਦ੍ਵਾਰਾਨਂ ਅਬ੍ਭਨ੍ਤਰੇ ਚ ਨਾਨਾਭਣ੍ਡਾਨਂ ਸਮ੍ਪਤ੍ਤਿਯਾ ਰਮਣੀਯਂ. ਮਾਪੇਹੀਤਿ ਮਹਾਜਨਂ ਪੇਸੇਤ੍ਵਾ ਵਾਸਂ ਕਾਰੇਹਿ. ਮਾਪੇਯ੍ਯਾਤਿ ਵਾਸਂ ਕਾਰੇਯ੍ਯ. ਕਾਰੇਨ੍ਤੋ ਚ ਪਠਮਂ ਅਟ੍ਠਾਰਸ ਮਨੁਸ੍ਸਕੋਟਿਯੋ ਪੇਸੇਤ੍ਵਾ ‘‘ਸਮ੍ਪੁਣ੍ਣ’’ਨ੍ਤਿ ਪੁਚ੍ਛਿਤ੍ਵਾ ‘‘ਨ ਤਾਵ ਸਮ੍ਪੁਣ੍ਣ’’ਨ੍ਤਿ ਵੁਤ੍ਤੇ ਅਪਰਾਨਿ ਪਞ੍ਚਕੁਲਾਨਿ ਪੇਸੇਯ੍ਯ. ਪੁਨ ਪੁਚ੍ਛਿਤ੍ਵਾ ‘‘ਨ ਤਾਵ ਸਮ੍ਪੁਣ੍ਣ’’ਨ੍ਤਿ ਵੁਤ੍ਤੇ ਅਪਰਾਨਿ ਪਞ੍ਚਪਞ੍ਞਾਸਕੁਲਾਨਿ ਪੇਸੇਯ੍ਯ. ਪੁਨ ਪੁਚ੍ਛਿਤ੍ਵਾ ‘‘ਨ ਤਾਵ ਸਮ੍ਪੁਣ੍ਣ’’ਨ੍ਤਿ ਵੁਤ੍ਤੇ ਅਪਰਾਨਿ ਤਿਂਸ ਕੁਲਾਨਿ ਪੇਸੇਯ੍ਯ. ਪੁਨ ਪੁਚ੍ਛਿਤ੍ਵਾ ‘‘ਨ ਤਾਵ ਸਮ੍ਪੁਣ੍ਣ’’ਨ੍ਤਿ ਵੁਤ੍ਤੇ ਅਪਰਂ ਕੁਲਸਹਸ੍ਸਂ ਪੇਸੇਯ੍ਯ. ਪੁਨ ਪੁਚ੍ਛਿਤ੍ਵਾ ‘‘ਨ ਤਾਵ ਸਮ੍ਪੁਣ੍ਣ’’ਨ੍ਤਿ ਵੁਤ੍ਤੇ ਅਪਰਾਨਿ ਏਕਾਦਸਨਹੁਤਾਨਿ ਕੁਲਾਨਿ ਪੇਸੇਯ੍ਯ. ਪੁਨ ਪੁਚ੍ਛਿਤ੍ਵਾ ‘‘ਨ ਤਾਵ ਸਮ੍ਪੁਣ੍ਣ’’ਨ੍ਤਿ ਵੁਤ੍ਤੇ ਅਪਰਾਨਿ ਚਤੁਰਾਸੀਤਿਕੁਲਸਹਸ੍ਸਾਨਿ ਪੇਸੇਯ੍ਯ. ਪੁਨ ‘‘ਸਮ੍ਪੁਣ੍ਣ’’ਨ੍ਤਿ ਪੁਚ੍ਛਿਤੇ, ‘‘ਮਹਾਰਾਜ, ਕਿਂ ਵਦੇਸਿ? ਮਹਨ੍ਤਂ ਨਗਰਂ ਅਸਮ੍ਬਾਧਂ, ਇਮਿਨਾ ਨਯੇਨ ਕੁਲਾਨਿ ਪੇਸੇਤ੍ਵਾ ਨ ਸਕ੍ਕਾ ਪੂਰੇਤੁਂ, ਭੇਰਿਂ ਪਨ ਚਰਾਪੇਤ੍ਵਾ ‘ਅਮ੍ਹਾਕਂ ਨਗਰਂ ਇਮਾਯ ਚ ਇਮਾਯ ਚ ਸਮ੍ਪਤ੍ਤਿਯਾ ਸਮ੍ਪਨ੍ਨਂ, ਯੇ ਤਤ੍ਥ ਵਸਿਤੁਕਾਮਾ, ਯਥਾਸੁਖਂ ਗਚ੍ਛਨ੍ਤੁ, ਇਮਞ੍ਚਿਮਞ੍ਚ ਪਰਿਹਾਰਂ ਲਭਿਸ੍ਸਨ੍ਤੀ’ਤਿ ਨਗਰਸ੍ਸ ਚੇਵ ਵਣ੍ਣਂ ਲੋਕਸ੍ਸ ਚ ਪਰਿਹਾਰਲਾਭਂ ਘੋਸਾਪੇਥਾ’’ਤਿ ਵਦੇਯ੍ਯ. ਸੋ ਏਵਂ ਕਰੇਯ੍ਯ. ਤਤੋ ਮਨੁਸ੍ਸਾ ਨਗਰਗੁਣਞ੍ਚੇਵ ਪਰਿਹਾਰਲਾਭਞ੍ਚ ਸੁਤ੍ਵਾ ਸਬ੍ਬਦਿਸਾਹਿ ਸਮੋਸਰਿਤ੍ਵਾ ਨਗਰਂ ਪੂਰੇਯ੍ਯੁਂ. ਤਂ ਅਪਰੇਨ ਸਮਯੇਨ ਇਦ੍ਧਞ੍ਚੇਵ ਅਸ੍ਸ ਫੀਤਞ੍ਚ. ਤਂ ਸਨ੍ਧਾਯ ਤਦਸ੍ਸ ਨਗਰਂ ਅਪਰੇਨ ਸਮਯੇਨ ਇਦ੍ਧਞ੍ਚੇਵ ਫੀਤਞ੍ਚਾਤਿਆਦਿ ਵੁਤ੍ਤਂ.

ਤਤ੍ਥ ਇਦ੍ਧਨ੍ਤਿ ਸਮਿਦ੍ਧਂ ਸੁਭਿਕ੍ਖਂ. ਫੀਤਨ੍ਤਿ ਸਬ੍ਬਸਮ੍ਪਤ੍ਤੀਹਿ ਪੁਪ੍ਫਿਤਂ. ਬਾਹੁਜਞ੍ਞਨ੍ਤਿ ਬਹੂਹਿ ਞਾਤਬ੍ਬਂ, ਬਹੁਜਨਾਨਂ ਹਿਤਂ ਵਾ. ‘‘ਬਹੁਜਨ’’ਨ੍ਤਿਪਿ ਪਾਠੋ. ਆਕਿਣ੍ਣਮਨੁਸ੍ਸਨ੍ਤਿ ਮਨੁਸ੍ਸੇਹਿ ਆਕਿਣ੍ਣਂ ਨਿਰਨ੍ਤਰਂ ਫੁਟ੍ਠਂ. ਵੁਡ੍ਢਿਵੇਪੁਲ੍ਲਪ੍ਪਤ੍ਤਨ੍ਤਿ ਵੁਡ੍ਢਿਪ੍ਪਤ੍ਤਞ੍ਚੇਵ ਵੇਪੁਲ੍ਲਪ੍ਪਤ੍ਤਞ੍ਚ, ਸੇਟ੍ਠਭਾਵਞ੍ਚੇਵ ਵਿਪੁਲਭਾਵਞ੍ਚ ਪਤ੍ਤਂ, ਦਸਸਹਸ੍ਸਚਕ੍ਕਵਾਲ਼ੇ ਅਗ੍ਗਨਗਰਂ ਜਾਤਨ੍ਤਿ ਅਤ੍ਥੋ.

ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਅਰਞ੍ਞਪਵਨੇ ਚਰਮਾਨਪੁਰਿਸੋ ਵਿਯ ਹਿ ਦੀਪਙ੍ਕਰਪਾਦਮੂਲਤੋ ਪਟ੍ਠਾਯ ਪਾਰਮਿਯੋ ਪੂਰਯਮਾਨੋ ਮਹਾਪੁਰਿਸੋ ਦਟ੍ਠਬ੍ਬੋ, ਤਸ੍ਸ ਪੁਰਿਸਸ੍ਸ ਪੁਬ੍ਬਕੇਹਿ ਮਨੁਸ੍ਸੇਹਿ ਅਨੁਯਾਤਮਗ੍ਗਦਸ੍ਸਨਂ ਵਿਯ ਮਹਾਸਤ੍ਤਸ੍ਸ ਅਨੁਪੁਬ੍ਬੇਨ ਬੋਧਿਪਲ੍ਲਙ੍ਕੇ ਨਿਸਿਨ੍ਨਸ੍ਸ ਪੁਬ੍ਬਭਾਗੇ ਅਟ੍ਠਙ੍ਗਿਕਸ੍ਸ ਵਿਪਸ੍ਸਨਾਮਗ੍ਗਸ੍ਸ ਦਸ੍ਸਨਂ, ਪੁਰਿਸਸ੍ਸ ਤਂ ਏਕਪਦਿਕਮਗ੍ਗਂ ਅਨੁਗਚ੍ਛਤੋ ਅਪਰਭਾਗੇ ਮਹਾਮਗ੍ਗਦਸ੍ਸਨਂ ਵਿਯ ਮਹਾਸਤ੍ਤਸ੍ਸ ਉਪਰਿਵਿਪਸ੍ਸਨਾਯ ਚਿਣ੍ਣਨ੍ਤੇ ਲੋਕੁਤ੍ਤਰਮਗ੍ਗਦਸ੍ਸਨਂ, ਪੁਰਿਸਸ੍ਸ ਤੇਨੇਵ ਮਗ੍ਗੇਨ ਗਚ੍ਛਤੋ ਪੁਰਤੋ ਨਗਰਦਸ੍ਸਨਂ ਵਿਯ ਤਥਾਗਤਸ੍ਸ ਨਿਬ੍ਬਾਨਨਗਰਦਸ੍ਸਨਂ, ਬਹਿਨਗਰਂ ਪਨੇਤ੍ਥ ਅਞ੍ਞੇਨ ਦਿਟ੍ਠਂ, ਅਞ੍ਞੇਨ ਮਨੁਸ੍ਸਵਾਸਂ ਕਤਂ, ਨਿਬ੍ਬਾਨਨਗਰਂ ਸਤ੍ਥਾ ਸਯਮੇਵ ਪਸ੍ਸਿ, ਸਯਂ ਵਾਸਮਕਾਸਿ. ਤਸ੍ਸ ਪੁਰਿਸਸ੍ਸ ਚਤੁਨ੍ਨਂ ਦ੍ਵਾਰਾਨਂ ਦਿਟ੍ਠਕਾਲੋ ਵਿਯ ਤਥਾਗਤਸ੍ਸ ਚਤੁਨ੍ਨਂ ਮਗ੍ਗਾਨਂ ਦਿਟ੍ਠਕਾਲੋ, ਤਸ੍ਸ ਚਤੂਹਿ ਦ੍ਵਾਰੇਹਿ ਨਗਰਂ ਪਵਿਟ੍ਠਕਾਲੋ ਵਿਯ ਤਥਾਗਤਸ੍ਸ ਚਤੂਹਿ ਮਗ੍ਗੇਹਿ ਨਿਬ੍ਬਾਨਂ ਪਵਿਟ੍ਠਕਾਲੋ, ਤਸ੍ਸ ਨਗਰਬ੍ਭਨ੍ਤਰੇ ਭਣ੍ਡਵਵਤ੍ਥਾਨਕਾਲੋ ਵਿਯ ਤਥਾਗਤਸ੍ਸ ਪਚ੍ਚਵੇਕ੍ਖਣਞਾਣੇਨ ਪਰੋਪਣ੍ਣਾਸਕੁਸਲਧਮ੍ਮਵਵਤ੍ਥਾਨਕਾਲੋ. ਨਗਰਸ੍ਸ ਅਗਾਰਕਰਣਤ੍ਥਂ ਕੁਲਪਰਿਯੇਸਨਕਾਲੋ ਵਿਯ ਸਤ੍ਥੁ ਫਲਸਮਾਪਤ੍ਤਿਤੋ ਵੁਟ੍ਠਾਯ ਵੇਨੇਯ੍ਯਸਤ੍ਤੇ ਵੋਲੋਕਨਕਾਲੋ, ਤੇਨ ਪੁਰਿਸੇਨ ਯਾਚਿਤਸ੍ਸ ਰਞ੍ਞੋ ਏਕਂ ਮਹਾਕੁਟੁਮ੍ਬਿਕਂ ਦਿਟ੍ਠਕਾਲੋ ਵਿਯ ਮਹਾਬ੍ਰਹ੍ਮੁਨਾ ਯਾਚਿਤਸ੍ਸ ਭਗਵਤੋ ਅਞ੍ਞਾਸਿਕੋਣ੍ਡਞ੍ਞਤ੍ਥੇਰਂ ਦਿਟ੍ਠਕਾਲੋ, ਰਞ੍ਞੋ ਮਹਾਕੁਟੁਮ੍ਬਿਕਂ ਪਕ੍ਕੋਸਾਪੇਤ੍ਵਾ ‘‘ਨਗਰਵਾਸਂ ਕਰੋਹੀ’’ਤਿ ਪਹਿਤਕਾਲੋ ਵਿਯ ਭਗਵਤੋ ਏਕਸ੍ਮਿਂ ਪਚ੍ਛਾਭਤ੍ਤੇ ਅਟ੍ਠਾਰਸਯੋਜਨਮਗ੍ਗਂ ਗਨ੍ਤ੍ਵਾ ਆਸਾਲ਼੍ਹਿਪੁਣ੍ਣਮਦਿਵਸੇ ਬਾਰਾਣਸਿਯਂ ਇਸਿਪਤਨਂ ਪਵਿਸਿਤ੍ਵਾ ਥੇਰਂ ਕਾਯਸਕ੍ਖਿਂ ਕਤ੍ਵਾ ਧਮ੍ਮਂ ਦੇਸਿਤਕਾਲੋ, ਮਹਾਕੁਟੁਮ੍ਬਿਕੇਨ ਅਟ੍ਠਾਰਸ ਪੁਰਿਸਕੋਟਿਯੋ ਗਹੇਤ੍ਵਾ ਨਗਰਂ ਅਜ੍ਝਾਵੁਟ੍ਠਕਾਲੋ ਵਿਯ ਤਥਾਗਤੇਨ ਧਮ੍ਮਚਕ੍ਕੇ ਪਵਤ੍ਤਿਤੇ ਥੇਰਸ੍ਸ ਅਟ੍ਠਾਰਸਹਿ ਬ੍ਰਹ੍ਮਕੋਟੀਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਿਤਕਾਲੋ, ਏਵਂ ਨਿਬ੍ਬਾਨਨਗਰਂ ਪਠਮਂ ਆਵਾਸਿਤਂ, ਤਤੋ ਸਮ੍ਪੁਣ੍ਣਂ ਨਗਰਨ੍ਤਿ ਪੁਚ੍ਛਿਤ੍ਵਾ ਨ ਤਾਵਾਤਿ ਵੁਤ੍ਤੇ ਪਞ੍ਚ ਕੁਲਾਨਿ ਆਦਿਂ ਕਤ੍ਵਾ ਯਾਵ ਚਤੁਰਾਸੀਤਿਕੁਲਸਹਸ੍ਸਪੇਸਨਂ ਵਿਯ ਤਥਾਗਤਸ੍ਸ ਪਞ੍ਚਮਦਿਵਸਤੋ ਪਟ੍ਠਾਯ ਅਨਤ੍ਤਲਕ੍ਖਣਸੁਤ੍ਤਾਦੀਨਿ ਦੇਸੇਤ੍ਵਾ ਪਞ੍ਚਵਗ੍ਗਿਯੇ ਆਦਿਂ ਕਤ੍ਵਾ ਯਸਪਮੁਖਾ ਪਞ੍ਚਪਣ੍ਣਾਸ ਕੁਲਪੁਤ੍ਤਾ, ਤਿਂਸ ਭਦ੍ਦਵਗ੍ਗਿਯਾ, ਸਹਸ੍ਸਪੁਰਾਣਜਟਿਲਾ, ਬਿਮ੍ਬਿਸਾਰਪਮੁਖਾਨਿ ਏਕਾਦਸਪੁਰਿਸਨਹੁਤਾਨਿ, ਤਿਰੋਕੁਟ੍ਟਾਨੁਮੋਦਨੇ ਚਤੁਰਾਸੀਤਿਸਹਸ੍ਸਾਨੀਤਿ ਏਤ੍ਤਕਸ੍ਸ ਜਨਸ੍ਸ ਅਰਿਯਮਗ੍ਗਂ ਓਤਾਰੇਤ੍ਵਾ ਨਿਬ੍ਬਾਨਨਗਰਂ ਪੇਸਿਤਕਾਲੋ, ਅਥ ਤੇਨ ਨਯੇਨ ਨਗਰੇ ਅਪੂਰਿਯਮਾਨੇ ਭੇਰਿਂ ਚਰਾਪੇਤ੍ਵਾ ਨਗਰਸ੍ਸ ਵਣ੍ਣਘੋਸਨਂ ਕੁਲਾਨਂ ਪਰਿਹਾਰਲਾਭਘੋਸਨਂ ਵਿਯ ਚ ਮਾਸਸ੍ਸ ਅਟ੍ਠ ਦਿਵਸੇ ਤਤ੍ਥ ਤਤ੍ਥ ਨਿਸੀਦਿਤ੍ਵਾ ਧਮ੍ਮਕਥਿਕਾਨਂ ਨਿਬ੍ਬਾਨਵਣ੍ਣਸ੍ਸ ਚੇਵ ਨਿਬ੍ਬਾਨਪ੍ਪਤ੍ਤਾਨਂ ਜਾਤਿਕਨ੍ਤਾਰਾਦਿਨਿਤ੍ਥਰਣਾਨਿਸਂਸਸ੍ਸ ਚ ਘੋਸਨਂ, ਤਤੋ ਸਬ੍ਬਦਿਸਾਹਿ ਆਗਨ੍ਤ੍ਵਾ ਮਨੁਸ੍ਸਾਨਂ ਨਗਰਸਮੋਸਰਣਂ ਵਿਯ ਤਤ੍ਥ ਤਤ੍ਥ ਧਮ੍ਮਕਥਂ ਸੁਤ੍ਵਾ ਤਤੋ ਤਤੋ ਨਿਕ੍ਖਮਿਤ੍ਵਾ ਪਬ੍ਬਜ੍ਜਂ ਆਦਿਂ ਕਤ੍ਵਾ ਅਨੁਲੋਮਪਟਿਪਦਂ ਪਟਿਪਨ੍ਨਾਨਂ ਅਪਰਿਮਾਣਾਨਂ ਕੁਲਪੁਤ੍ਤਾਨਂ ਨਿਬ੍ਬਾਨਸਮੋਸਰਣਂ ਦਟ੍ਠਬ੍ਬਂ.

ਪੁਰਾਣਂ ਮਗ੍ਗਨ੍ਤਿ ਅਰਿਯਂ ਅਟ੍ਠਙ੍ਗਿਕਂ ਮਗ੍ਗਂ. ਅਯਞ੍ਹਿ ਅਰਿਯਮਗ੍ਗੋ ਪਵਾਰਣਸੁਤ੍ਤੇ (ਸਂ. ਨਿ. ੧.੨੧੫) ਅਵਤ੍ਤਮਾਨਕਟ੍ਠੇਨ ‘‘ਅਨੁਪ੍ਪਨ੍ਨਮਗ੍ਗੋ’’ਤਿ ਵੁਤ੍ਤੋ, ਇਮਸ੍ਮਿਂ ਸੁਤ੍ਤੇ ਅਵਲ਼ਞ੍ਜਨਟ੍ਠੇਨ ‘‘ਪੁਰਾਣਮਗ੍ਗੋ’’ਤਿ. ਬ੍ਰਹ੍ਮਚਰਿਯਨ੍ਤਿ ਸਿਕ੍ਖਤ੍ਤਯਸਙ੍ਗਹਂ ਸਕਲਸਾਸਨਂ. ਇਦ੍ਧਨ੍ਤਿ ਝਾਨਸ੍ਸਾਦੇਨ ਸਮਿਦ੍ਧਂ ਸੁਭਿਕ੍ਖਂ. ਫੀਤਨ੍ਤਿ ਅਭਿਞ੍ਞਾਭਰਣੇਹਿ ਪੁਪ੍ਫਿਤਂ. ਵਿਤ੍ਥਾਰਿਕਨ੍ਤਿ ਵਿਤ੍ਥਿਣ੍ਣਂ. ਬਾਹੁਜਞ੍ਞਨ੍ਤਿ ਬਹੁਜਨਵਿਞ੍ਞੇਯ੍ਯਂ. ਯਾਵ ਦੇਵਮਨੁਸ੍ਸੇਹਿ ਸੁਪ੍ਪਕਾਸਿਤਨ੍ਤਿ ਯਾਵ ਦਸਸਹਸ੍ਸਚਕ੍ਕਵਾਲ਼ੇ ਦੇਵਮਨੁਸ੍ਸੇਹਿ ਪਰਿਚ੍ਛੇਦੋ ਅਤ੍ਥਿ, ਏਤਸ੍ਮਿਂ ਅਨ੍ਤਰੇ ਸੁਪ੍ਪਕਾਸਿਤਂ ਸੁਦੇਸਿਤਂ ਤਥਾਗਤੇਨਾਤਿ. ਪਞ੍ਚਮਂ.

੬. ਸਮ੍ਮਸਸੁਤ੍ਤਵਣ੍ਣਨਾ

੬੬. ਛਟ੍ਠੇ ਆਮਨ੍ਤੇਸੀਤਿ ਕਸ੍ਮਾ ਆਮਨ੍ਤੇਸਿ? ਯਸ੍ਮਾਸ੍ਸ ਸੁਖੁਮਾ ਤਿਲਕ੍ਖਣਾਹਤਾ ਧਮ੍ਮਦੇਸਨਾ ਉਪਟ੍ਠਾਸਿ. ਤਸ੍ਮਿਂ ਕਿਰ ਜਨਪਦੇ ਮਨੁਸ੍ਸਾ ਸਹੇਤੁਕਾ ਪਞ੍ਞਵਨ੍ਤੋ. ਸਿਨਿਦ੍ਧਾਨਿ ਕਿਰੇਤ੍ਥ ਭੋਜਨਾਨਿ, ਤਾਨਿਸੇਵਤੋ ਜਨਸ੍ਸ ਪਞ੍ਞਾ ਵਡ੍ਢਤਿ, ਤੇ ਗਮ੍ਭੀਰਂ ਤਿਲਕ੍ਖਣਾਹਤਂ ਧਮ੍ਮਕਥਂ ਪਟਿਵਿਜ੍ਝਿਤੁਂ ਸਮਤ੍ਥਾ ਹੋਨ੍ਤਿ. ਤੇਨੇਵ ਭਗਵਾ ਦੀਘਮਜ੍ਝਿਮੇਸੁ ਮਹਾਸਤਿਪਟ੍ਠਾਨਾਨਿ (ਦੀ. ਨਿ. ੨.੩੭੨ ਆਦਯੋ) ਮਹਾਨਿਦਾਨਂ (ਦੀ. ਨਿ. ੨.੯੫ ਆਦਯੋ), ਆਨੇਞ੍ਜਸਪ੍ਪਾਯਂ (ਮ. ਨਿ. ੩.੬੬ ਆਦਯੋ), ਸਂਯੁਤ੍ਤਕੇ ਚੂਲ਼ਨਿਦਾਨਾਦਿਸੁਤ੍ਤਨ੍ਤਿ ਏਵਮਾਦੀਨਿ ਅਞ੍ਞਾਨਿ ਗਮ੍ਭੀਰਾਨਿ ਸੁਤ੍ਤਾਨਿ ਤਤ੍ਥੇਵ ਕਥੇਸਿ. ਸਮ੍ਮਸਥ ਨੋਤਿ ਸਮ੍ਮਸਥ ਨੁ. ਅਨ੍ਤਰਂ ਸਮ੍ਮਸਨ੍ਤਿ ਅਬ੍ਭਨ੍ਤਰਂ ਪਚ੍ਚਯਸਮ੍ਮਸਨਂ. ਨ ਸੋ ਭਿਕ੍ਖੁ ਭਗਵਤੋ ਚਿਤ੍ਤਂ ਆਰਾਧੇਸੀਤਿ ਪਚ੍ਚਯਾਕਾਰਵਸੇਨ ਬ੍ਯਾਕਾਰਾਪੇਤੁਕਾਮਸ੍ਸ ਭਗਵਤੋ ਤਥਾ ਅਬ੍ਯਾਕਰਿਤ੍ਵਾ ਦ੍ਵਤ੍ਤਿਂਸਾਕਾਰਵਸੇਨ ਬ੍ਯਾਕਰੋਨ੍ਤੋ ਅਜ੍ਝਾਸਯਂ ਗਹੇਤੁਂ ਨਾਸਕ੍ਖਿ.

ਏਤਦਵੋਚਾਤਿ ਦੇਸਨਾ ਯਥਾਨੁਸਨ੍ਧਿਂ ਨ ਗਤਾ, ਦੇਸਨਾਯ ਯਥਾਨੁਸਨ੍ਧਿਗਮਨਤ੍ਥਂ ਏਤਦਵੋਚ. ਤੇਨਹਾਨਨ੍ਦ, ਸੁਣਾਥਾਤਿ ਇਦਂ ਤੇਪਿਟਕੇ ਬੁਦ੍ਧਵਚਨੇ ਅਸਮ੍ਭਿਨ੍ਨਪਦਂ. ਅਞ੍ਞਤ੍ਥ ਹਿ ਏਵਂ ਵੁਤ੍ਤਂ ਨਾਮ ਨਤ੍ਥਿ. ਉਪਧਿਨਿਦਾਨਨ੍ਤਿ ਖਨ੍ਧੁਪਧਿਨਿਦਾਨਂ. ਖਨ੍ਧਪਞ੍ਚਕਞ੍ਹੇਤ੍ਥ ਉਪਧੀਤਿ ਅਧਿਪ੍ਪੇਤਂ. ਉਪ੍ਪਜ੍ਜਤੀਤਿ ਜਾਯਤਿ. ਨਿਵਿਸਤੀਤਿ ਪੁਨਪ੍ਪੁਨਂ ਪਵਤ੍ਤਿਵਸੇਨ ਪਤਿਟ੍ਠਹਤਿ.

ਯਂ ਖੋ ਲੋਕੇ ਪਿਯਰੂਪਂ ਸਾਤਰੂਪਨ੍ਤਿ ਯਂ ਲੋਕਸ੍ਮਿਂ ਪਿਯਸਭਾਵਞ੍ਚੇਵ ਮਧੁਰਸਭਾਵਞ੍ਚ. ਚਕ੍ਖੁਂ ਲੋਕੇਤਿਆਦੀਸੁ ਲੋਕਸ੍ਮਿਞ੍ਹਿ ਚਕ੍ਖਾਦੀਸੁ ਮਮਤ੍ਤੇਨ ਅਭਿਨਿਵਿਟ੍ਠਾ ਸਤ੍ਤਾ ਸਮ੍ਪਤ੍ਤਿਯਂ ਪਤਿਟ੍ਠਿਤਾ ਅਤ੍ਤਨੋ ਚਕ੍ਖੁਂ ਆਦਾਸਾਦੀਸੁ ਨਿਮਿਤ੍ਤਗ੍ਗਹਣਾਨੁਸਾਰੇਨ ਵਿਪ੍ਪਸਨ੍ਨਪਞ੍ਚਪਸਾਦਂ ਸੁਵਣ੍ਣਵਿਮਾਨੇ ਉਗ੍ਘਾਟਿਤਮਣਿਸੀਹਪਞ੍ਜਰਂ ਵਿਯ ਮਞ੍ਞਨ੍ਤਿ, ਸੋਤਂ ਰਜਤਪਨਾਲ਼ਿਕਂ ਵਿਯ ਪਾਮਙ੍ਗਸੁਤ੍ਤਂ ਵਿਯ ਚ ਮਞ੍ਞਨ੍ਤਿ, ਤੁਙ੍ਗਨਾਸਾਤਿ ਲਦ੍ਧਵੋਹਾਰਂ ਘਾਨਂ ਵਟ੍ਟੇਤ੍ਵਾ ਠਪਿਤਹਰਿਤਾਲਵਟ੍ਟਿਂ ਵਿਯ ਮਞ੍ਞਨ੍ਤਿ, ਜਿਵ੍ਹਂ ਰਤ੍ਤਕਮ੍ਬਲਪਟਲਂ ਵਿਯ ਮੁਦੁਸਿਨਿਦ੍ਧਮਧੁਰਰਸਦਂ ਮਞ੍ਞਨ੍ਤਿ, ਕਾਯਂ ਸਾਲਲਟ੍ਠਿਂ ਵਿਯ ਸੁਵਣ੍ਣਤੋਰਣਂ ਵਿਯ ਚ ਮਞ੍ਞਨ੍ਤਿ, ਮਨਂ ਅਞ੍ਞੇਸਂ ਮਨੇਨ ਅਸਦਿਸਂ ਉਲ਼ਾਰਂ ਮਞ੍ਞਨ੍ਤਿ.

ਨਿਚ੍ਚਤੋ ਅਦ੍ਦਕ੍ਖੁਨ੍ਤਿ ਨਿਚ੍ਚਨ੍ਤਿ ਅਦ੍ਦਸਂਸੁ. ਸੇਸਪਦੇਸੁਪਿ ਏਸੇਵ ਨਯੋ. ਨ ਪਰਿਮੁਚ੍ਚਿਂਸੁ ਦੁਕ੍ਖਸ੍ਮਾਤਿ ਸਕਲਸ੍ਮਾਪਿ ਵਟ੍ਟਦੁਕ੍ਖਾ ਨ ਪਰਿਮੁਚ੍ਚਿਂਸੁ. ਦਕ੍ਖਿਸ੍ਸਨ੍ਤੀਤਿ ਪਸ੍ਸਿਸ੍ਸਨ੍ਤਿ. ਆਪਾਨੀਯਕਂਸੋਤਿ ਸਰਕਸ੍ਸ ਨਾਮਂ. ਯਸ੍ਮਾ ਪਨੇਤ੍ਥ ਆਪਂ ਪਿਵਨ੍ਤਿ, ਤਸ੍ਮਾ ‘‘ਆਪਾਨੀਯੋ’’ਤਿ ਵੁਚ੍ਚਤਿ. ਆਪਾਨੀਯੋ ਚ ਸੋ ਕਂਸੋ ਚਾਤਿ ਆਪਾਨੀਯਕਂਸੋ. ਸੁਰਾਮਣ੍ਡਸਰਕਸ੍ਸੇਤਂ ਨਾਮਂ. ‘‘ਵਣ੍ਣਸਮ੍ਪਨ੍ਨੋ’’ਤਿਆਦਿਵਚਨਤੋ ਪਨ ਕਂਸੇ ਠਿਤਪਾਨਮੇਵ ਏਵਂ ਵੁਤ੍ਤਂ. ਘਮ੍ਮਾਭਿਤਤ੍ਤੋਤਿ ਘਮ੍ਮੇਨ ਅਭਿਤਤ੍ਤੋ. ਘਮ੍ਮਪਰੇਤੋਤਿ ਘਮ੍ਮੇਨ ਫੁਟ੍ਠੋ, ਅਨੁਗਤੋਤਿ ਅਤ੍ਥੋ. ਪਿਵਤੋ ਹਿ ਖੋ ਤਂ ਛਾਦੇਸ੍ਸਤੀਤਿ ਪਿਵਨ੍ਤਸ੍ਸ ਤਂ ਪਾਨੀਯਂ ਵਣ੍ਣਾਦਿਸਮ੍ਪਤ੍ਤਿਯਾ ਰੁਚ੍ਚਿਸ੍ਸਤਿ, ਸਕਲਸਰੀਰਂ ਵਾ ਫਰਿਤ੍ਵਾ ਤੁਟ੍ਠਿਂ ਉਪ੍ਪਾਦਯਮਾਨਂ ਠਸ੍ਸਤਿ. ਅਪ੍ਪਟਿਸਙ੍ਖਾਤਿ ਅਪਚ੍ਚਵੇਕ੍ਖਿਤ੍ਵਾ.

ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਆਪਾਨੀਯਕਂਸੋ ਵਿਯ ਹਿ ਲੋਕੇ ਪਿਯਰੂਪਂ ਸਾਤਰੂਪਂ ਆਰਮ੍ਮਣਂ ਦਟ੍ਠਬ੍ਬਂ, ਘਮ੍ਮਾਭਿਤਤ੍ਤਪੁਰਿਸੋ ਵਿਯ ਵਟ੍ਟਨਿਸ੍ਸਿਤੋ ਪੁਥੁਜ੍ਜਨੋ, ਆਪਾਨੀਯਕਂਸੇਨ ਨਿਮਨ੍ਤਨਪੁਰਿਸੋ ਵਿਯ ਲੋਕੇ ਪਿਯਰੂਪੇਨ ਸਾਤਰੂਪੇਨ ਆਰਮ੍ਮਣੇਨ ਨਿਮਨ੍ਤਕਜਨੋ, ਆਪਾਨੀਯਕਂਸੇ ਸਮ੍ਪਤ੍ਤਿਞ੍ਚ ਆਦੀਨਵਞ੍ਚ ਆਰੋਚੇਨ੍ਤੋ ਆਪਾਨਕਮਨੁਸ੍ਸੋ ਵਿਯ ਆਚਰਿਯੁਪਜ੍ਝਾਯਾਦਿਕੋ ਕਲ੍ਯਾਣਮਿਤ੍ਤੋ. ਯਥੇਵ ਹਿ ਤਸ੍ਸ ਪੁਰਿਸਸ੍ਸ ਅਪਲੋਕਿਤਮਨੁਸ੍ਸੋ ਆਪਾਨੀਯਕਂਸੇ ਗੁਣਞ੍ਚ ਆਦੀਨਵਞ੍ਚ ਆਰੋਚੇਤਿ, ਏਵਮੇਵ ਆਚਰਿਯੋ ਵਾ ਉਪਜ੍ਝਾਯੋ ਵਾ ਭਿਕ੍ਖੁਨੋ ਪਞ੍ਚਸੁ ਕਾਮਗੁਣੇਸੁ ਅਸ੍ਸਾਦਞ੍ਚ ਨਿਸ੍ਸਰਣਞ੍ਚ ਕਥੇਤਿ.

ਤਤ੍ਥ ਯਥਾ ਆਪਾਨੀਯਕਂਸਮ੍ਹਿ ਗੁਣੇ ਚ ਆਦੀਨਵੇ ਚ ਆਰੋਚਿਤੇ ਸੋ ਪੁਰਿਸੋ ਪਿਯਵਣ੍ਣਾਦਿਸਮ੍ਪਦਾਯਮੇਵ ਸਞ੍ਜਾਤਵੇਗੋ ‘‘ਸਚੇ ਮਰਣਂ ਭਵਿਸ੍ਸਤਿ, ਪਚ੍ਛਾ ਜਾਨਿਸ੍ਸਾਮੀ’’ਤਿ ਸਹਸਾ ਅਪ੍ਪਟਿਸਙ੍ਖਾਯ ਤਂ ਪਿਵਿਤ੍ਵਾ ਮਰਣਂ ਵਾ ਮਰਣਮਤ੍ਤਂ ਵਾ ਦੁਕ੍ਖਂ ਨਿਗਚ੍ਛਤਿ, ਏਵਮੇਵ, ਭਿਕ੍ਖੁ, ‘‘ਪਞ੍ਚਸੁ ਕਾਮਗੁਣੇਸੁ ਦਸ੍ਸਨਾਦਿਵਸੇਨ ਉਪ੍ਪਨ੍ਨਸੋਮਨਸ੍ਸਮਤ੍ਤਮੇਵ ਅਸ੍ਸਾਦੋ, ਆਦੀਨਵੋ ਪਨ ਦਿਟ੍ਠਧਮ੍ਮਿਕਸਮ੍ਪਰਾਯਿਕੋ ਬਹੁ ਨਾਨਪ੍ਪਕਾਰੋ, ਅਪ੍ਪਸ੍ਸਾਦਾ ਕਾਮਾ ਬਹੁਦੁਕ੍ਖਾ ਬਹੁਪਾਯਾਸਾ’’ਤਿ ਏਵਂ ਆਚਰਿਯੁਪਜ੍ਝਾਯੇਹਿ ਆਨਿਸਂਸਞ੍ਚ ਆਦੀਨਵਞ੍ਚ ਕਥੇਤ੍ਵਾ – ‘‘ਸਮਣਪਟਿਪਦਂ ਪਟਿਪਜ੍ਜ, ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ ਭਵ ਭੋਜਨੇ ਮਤ੍ਤਞ੍ਞੂ ਜਾਗਰਿਯਂ ਅਨੁਯੁਤ੍ਤੋ’’ਤਿ ਏਵਂ ਓਵਦਿਤੋਪਿ ਅਸ੍ਸਾਦਬਦ੍ਧਚਿਤ੍ਤਤਾਯ ‘‘ਸਚੇ ਵੁਤ੍ਤਪ੍ਪਕਾਰੋ ਆਦੀਨਵੋ ਭਵਿਸ੍ਸਤਿ, ਪਚ੍ਛਾ ਜਾਨਿਸ੍ਸਾਮੀ’’ਤਿ ਆਚਰਿਯੁਪਜ੍ਝਾਯੇ ਅਪਸਾਦੇਤ੍ਵਾ ਉਦ੍ਦੇਸਪਰਿਪੁਚ੍ਛਾਦੀਨਿ ਚੇਵ ਵਤ੍ਤਪਟਿਪਤ੍ਤਿਞ੍ਚ ਪਹਾਯ ਲੋਕਾਮਿਸਕਥਂ ਕਥੇਨ੍ਤੋ ਕਾਮੇ ਪਰਿਭੁਞ੍ਜਿਤੁਕਾਮਤਾਯ ਸਿਕ੍ਖਂ ਪਚ੍ਚਕ੍ਖਾਯ ਹੀਨਾਯਾਵਤ੍ਤਤਿ. ਤਤੋ ਦੁਚ੍ਚਰਿਤਾਨਿ ਪੂਰੇਨ੍ਤੋ ਸਨ੍ਧਿਚ੍ਛੇਦਨਾਦਿਕਾਲੇ ‘‘ਚੋਰੋ ਅਯ’’ਨ੍ਤਿ ਗਹੇਤ੍ਵਾ ਰਞ੍ਞੋ ਦਸ੍ਸਿਤੋ ਇਧੇਵ ਹਤ੍ਥਪਾਦਾਦਿਛੇਦਨਂ ਪਤ੍ਵਾ ਸਮ੍ਪਰਾਯੇ ਚਤੂਸੁ ਅਪਾਯੇਸੁ ਮਹਾਦੁਕ੍ਖਂ ਅਨੁਭੋਤਿ.

ਪਾਨੀਯੇਨ ਵਾ ਵਿਨੇਤੁਨ੍ਤਿ ਸੀਤੇਨ ਵਾਰਿਨਾ ਹਰਿਤੁਂ. ਦਧਿਮਣ੍ਡਕੇਨਾਤਿ ਦਧਿਮਣ੍ਡਨਮਤ੍ਤੇਨ. ਭਟ੍ਠਲੋਣਿਕਾਯਾਤਿ ਸਲੋਣੇਨ ਸਤ੍ਤੁਪਾਨੀਯੇਨ. ਲੋਣਸੋਵੀਰਕੇਨਾਤਿ ਸਬ੍ਬਧਞ੍ਞਫਲਕਲ਼ੀਰਾਦੀਨਿ ਪਕ੍ਖਿਪਿਤ੍ਵਾ ਲੋਣਸੋਵੀਰਕਂ ਨਾਮ ਕਰੋਨ੍ਤਿ, ਤੇਨ.

ਓਪਮ੍ਮਸਂਸਨ੍ਦਨਂ ਪਨੇਤ੍ਥ – ਘਮ੍ਮਾਭਿਤਤ੍ਤਪੁਰਿਸੋ ਵਿਯ ਵਟ੍ਟਸਨ੍ਨਿਸ੍ਸਿਤਕਾਲੇ ਯੋਗਾਵਚਰੋ ਦਟ੍ਠਬ੍ਬੋ, ਤਸ੍ਸ ਪੁਰਿਸਸ੍ਸ ਪਟਿਸਙ੍ਖਾ ਆਪਾਨੀਯਕਂਸਂ ਪਹਾਯ ਪਾਨੀਯਾਦੀਹਿ ਪਿਪਾਸਸ੍ਸ ਵਿਨੋਦਨਂ ਵਿਯ ਭਿਕ੍ਖੁਨੋ ਆਚਰਿਯੁਪਜ੍ਝਾਯਾਨਂ ਓਵਾਦੇ ਠਤ੍ਵਾ ਛਦ੍ਵਾਰਾਦੀਨਿ ਪਰਿਗ੍ਗਹੇਤ੍ਵਾ ਅਨੁਕ੍ਕਮੇਨ ਵਿਪਸ੍ਸਨਂ ਵਡ੍ਢੇਨ੍ਤਸ੍ਸ ਅਰਹਤ੍ਤਫਲਾਧਿਗਮੋ, ਪਾਨੀਯਾਦੀਨਿ ਚਤ੍ਤਾਰਿ ਪਾਨਾਨਿ ਵਿਯ ਹਿ ਚਤ੍ਤਾਰੋ ਮਗ੍ਗਾ, ਤੇਸੁ ਅਞ੍ਞਤਰਂ ਪਿਵਿਤ੍ਵਾ ਸੁਰਾਪਿਪਾਸਿਤਂ ਵਿਨੋਦੇਤ੍ਵਾ ਸੁਖਿਨੋ ਯੇਨ ਕਾਮਂ ਗਮਨਂ ਵਿਯ ਖੀਣਾਸਵਸ੍ਸ ਚਤੁਮਗ੍ਗਪਾਨਂ ਪਿਵਿਤ੍ਵਾ ਤਣ੍ਹਂ ਵਿਨੋਦੇਤ੍ਵਾ ਅਗਤਪੁਬ੍ਬਂ ਨਿਬ੍ਬਾਨਦਿਸਂ ਗਮਨਕਾਲੋ ਵੇਦਿਤਬ੍ਬੋ. ਛਟ੍ਠਂ.

੭. ਨਲ਼ਕਲਾਪੀਸੁਤ੍ਤਵਣ੍ਣਨਾ

੬੭. ਸਤ੍ਤਮੇ ਕਿਨ੍ਨੁ ਖੋ, ਆਵੁਸੋਤਿ ਕਸ੍ਮਾ ਪੁਚ੍ਛਤਿ? ‘‘ਏਵਂ ਪੁਟ੍ਠੋ ਕਥਂ ਨੁ ਖੋ ਬ੍ਯਾਕਰੇਯ੍ਯਾ’’ਤਿ. ਥੇਰਸ੍ਸ ਅਜ੍ਝਾਸਯਜਾਨਨਤ੍ਥਂ. ਅਪਿਚ ਅਤੀਤੇ ਦ੍ਵੇ ਅਗ੍ਗਸਾਵਕਾ ਇਮਂ ਪਞ੍ਹਂ ਵਿਨਿਚ੍ਛਯਿਂਸੂਤਿ ਅਨਾਗਤੇ ਭਿਕ੍ਖੂ ਜਾਨਿਸ੍ਸਨ੍ਤੀਤਿਪਿ ਪੁਚ੍ਛਤਿ. ਇਦਾਨੇਵ ਖੋ ਮਯਨ੍ਤਿ ਇਦਂ ਥੇਰੋ ਯਸ੍ਸ ਨਾਮਰੂਪਸ੍ਸ ਵਿਞ੍ਞਾਣਂ ਪਚ੍ਚਯੋਤਿ ਵੁਤ੍ਤਂ, ਤਦੇਵ ਨਾਮਰੂਪਂ ਵਿਞ੍ਞਾਣਸ੍ਸ ਪਚ੍ਚਯੋਤਿ ਵੁਤ੍ਤਤ੍ਤਾ ਆਹ. ਨਲ਼ਕਲਾਪਿਯੋਤਿ ਇਧ ਪਨ ਅਯਕਲਾਪਾਦਿਵਸੇਨ ਉਪਮਂ ਅਨਾਹਰਿਤ੍ਵਾ ਵਿਞ੍ਞਾਣਨਾਮਰੂਪਾਨਂ ਅਬਲਦੁਬ੍ਬਲਭਾਵਦਸ੍ਸਨਤ੍ਥਂ ਅਯਂ ਉਪਮਾ ਆਭਤਾ.

ਨਿਰੋਧੋ ਹੋਤੀਤਿ ਏਤ੍ਤਕੇ ਠਾਨੇ ਪਚ੍ਚਯੁਪ੍ਪਨ੍ਨਪਞ੍ਚਵੋਕਾਰਭਵਵਸੇਨ ਦੇਸਨਾ ਕਥਿਤਾ. ਛਤ੍ਤਿਂਸਾਯ ਵਤ੍ਥੂਹੀਤਿ ਹੇਟ੍ਠਾ ਵਿਸ੍ਸਜ੍ਜਿਤੇਸੁ ਦ੍ਵਾਦਸਸੁ ਪਦੇਸੁ ਏਕੇਕਸ੍ਮਿਂ ਤਿਣ੍ਣਂ ਤਿਣ੍ਣਂ ਵਸੇਨ ਛਤ੍ਤਿਂਸਾਯ ਕਾਰਣੇਹਿ. ਏਤ੍ਥ ਚ ਪਠਮੋ ਧਮ੍ਮਕਥਿਕਗੁਣੋ, ਦੁਤਿਯਾ ਪਟਿਪਤ੍ਤਿ, ਤਤਿਯਂ ਪਟਿਪਤ੍ਤਿਫਲਂ. ਤਤ੍ਥ ਪਠਮਨਯੇਨ ਦੇਸਨਾਸਮ੍ਪਤ੍ਤਿ ਕਥਿਤਾ, ਦੁਤਿਯੇਨ ਸੇਕ੍ਖਭੂਮਿ, ਤਤਿਯੇਨ ਅਸੇਕ੍ਖਭੂਮੀਤਿ. ਸਤ੍ਤਮਂ.

੮. ਕੋਸਮ੍ਬਿਸੁਤ੍ਤਵਣ੍ਣਨਾ

੬੮. ਅਟ੍ਠਮੇ ਅਞ੍ਞਤ੍ਰੇਵਾਤਿ ਏਕਚ੍ਚੋ ਹਿ ਪਰਸ੍ਸ ਸਦ੍ਦਹਿਤ੍ਵਾ ਯਂ ਏਸ ਭਣਤਿ, ਤਂ ਭੂਤਨ੍ਤਿ ਗਣ੍ਹਾਤਿ. ਅਪਰਸ੍ਸ ਨਿਸੀਦਿਤ੍ਵਾ ਚਿਨ੍ਤੇਨ੍ਤਸ੍ਸ ਯਂ ਕਾਰਣਂ ਰੁਚ੍ਚਤਿ, ਸੋ ‘‘ਅਤ੍ਥਿ ਏਤ’’ਨ੍ਤਿ ਰੁਚਿਯਾ ਗਣ੍ਹਾਤਿ. ਏਕੋ ‘‘ਚਿਰਕਾਲਤੋ ਪਟ੍ਠਾਯ ਏਵਂ ਅਨੁਸ੍ਸਵੋ ਅਤ੍ਥਿ, ਭੂਤਮੇਤ’’ਨ੍ਤਿ ਅਨੁਸ੍ਸਵੇਨ ਗਣ੍ਹਾਤਿ. ਅਞ੍ਞਸ੍ਸ ਵਿਤਕ੍ਕਯਤੋ ਏਕਂ ਕਾਰਣਂ ਉਪਟ੍ਠਾਤਿ, ਸੋ ‘‘ਅਤ੍ਥੇਤ’’ਨ੍ਤਿ ਆਕਾਰਪਰਿਵਿਤਕ੍ਕੇਨ ਗਣ੍ਹਾਤਿ. ਅਪਰਸ੍ਸ ਚਿਨ੍ਤਯਤੋ ਏਕਾ ਦਿਟ੍ਠਿ ਉਪ੍ਪਜ੍ਜਤਿ, ਯਾਯਸ੍ਸ ਤਂ ਕਾਰਣਂ ਨਿਜ੍ਝਾਯਨ੍ਤਸ੍ਸ ਖਮਤਿ, ਸੋ ‘‘ਅਤ੍ਥੇਤ’’ਨ੍ਤਿ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿਯਾ ਗਣ੍ਹਾਤਿ. ਥੇਰੋ ਪਨ ਪਞ੍ਚਪਿ ਏਤਾਨਿ ਕਾਰਣਾਨਿ ਪਟਿਕ੍ਖਿਪਿਤ੍ਵਾ ਪਚ੍ਚਕ੍ਖਞਾਣੇਨ ਪਟਿਵਿਦ੍ਧਭਾਵਂ ਪੁਚ੍ਛਨ੍ਤੋ ਅਞ੍ਞਤ੍ਰੇਵ, ਆਵੁਸੋ ਮੁਸਿਲ, ਸਦ੍ਧਾਯਾਤਿਆਦਿਮਾਹ. ਤਤ੍ਥ ਅਞ੍ਞਤ੍ਰੇਵਾਤਿ ਸਦ੍ਧਾਦੀਨਿ ਕਾਰਣਾਨਿ ਠਪੇਤ੍ਵਾ, ਵਿਨਾ ਏਤੇਹਿ ਕਾਰਣੇਹੀਤਿ ਅਤ੍ਥੋ. ਭਵਨਿਰੋਧੋ ਨਿਬ੍ਬਾਨਨ੍ਤਿ ਪਞ੍ਚਕ੍ਖਨ੍ਧਨਿਰੋਧੋ ਨਿਬ੍ਬਾਨਂ.

ਤੁਣ੍ਹੀ ਅਹੋਸੀਤਿ ਥੇਰੋ ਖੀਣਾਸਵੋ, ਅਹਂ ਪਨ ਖੀਣਾਸਵੋਤਿ ਵਾ ਨ ਵਾਤਿ ਵਾ ਅਵਤ੍ਵਾ ਤੁਣ੍ਹੀਯੇਵ ਅਹੋਸਿ. ਆਯਸ੍ਮਾ ਨਾਰਦੋ ਆਯਸ੍ਮਨ੍ਤਂ ਪਵਿਟ੍ਠਂ ਏਤਦਵੋਚਾਤਿ ਕਸ੍ਮਾ ਅਵੋਚ? ਸੋ ਕਿਰ ਚਿਨ੍ਤੇਸਿ – ‘‘ਭਵਨਿਰੋਧੋ ਨਿਬ੍ਬਾਨਂ ਨਾਮਾਤਿ ਸੇਖੇਹਿਪਿ ਜਾਨਿਤਬ੍ਬੋ ਪਞ੍ਹੋ ਏਸ, ਅਯਂ ਪਨ ਥੇਰੋ ਇਮਂ ਥੇਰਂ ਅਸੇਖਭੂਮਿਯਾ ਕਾਰੇਤਿ, ਇਮਂ ਠਾਨਂ ਜਾਨਾਪੇਸ੍ਸਾਮੀ’’ਤਿ ਏਤਂ ਅਵੋਚ.

ਸਮ੍ਮਪ੍ਪਞ੍ਞਾਯ ਸੁਦਿਟ੍ਠਨ੍ਤਿ ਸਹ ਵਿਪਸ੍ਸਨਾਯ ਮਗ੍ਗਪਞ੍ਞਾਯ ਸੁਟ੍ਠੁ ਦਿਟ੍ਠਂ. ਨ ਚਮ੍ਹਿ ਅਰਹਨ੍ਤਿ ਅਨਾਗਾਮਿਮਗ੍ਗੇ ਠਿਤਤ੍ਤਾ ਅਰਹਂ ਨ ਹੋਮੀਤਿ ਦੀਪੇਤਿ. ਯਂ ਪਨਸ੍ਸ ਇਦਾਨਿ ‘‘ਭਵਨਿਰੋਧੋ ਨਿਬ੍ਬਾਨ’’ਨ੍ਤਿ ਞਾਣਂ, ਤਂ ਏਕੂਨਵੀਸਤਿਯਾ ਪਚ੍ਚਵੇਕ੍ਖਣਞਾਣੇਹਿ ਵਿਮੁਤ੍ਤਂ ਪਚ੍ਚਵੇਕ੍ਖਣਞਾਣਂ. ਉਦਪਾਨੋਤਿ ਵੀਸਤਿਂਸਹਤ੍ਥਗਮ੍ਭੀਰੋ ਪਾਨੀਯਕੂਪੋ. ਉਦਕਵਾਰਕੋਤਿ ਉਦਕਉਸ੍ਸਿਞ੍ਚਨਵਾਰਕੋ. ਉਦਕਨ੍ਤਿ ਹਿ ਖੋ ਞਾਣਂ ਅਸ੍ਸਾਤਿ ਤੀਰੇ ਠਿਤਸ੍ਸ ਓਲੋਕਯਤੋ ਏਵਂ ਞਾਣਂ ਭਵੇਯ੍ਯ. ਨ ਚ ਕਾਯੇਨ ਫੁਸਿਤ੍ਵਾਤਿ ਉਦਕਂ ਪਨ ਨੀਹਰਿਤ੍ਵਾ ਕਾਯੇਨ ਫੁਸਿਤ੍ਵਾ ਵਿਹਰਿਤੁਂ ਨ ਸਕ੍ਕੁਣੇਯ੍ਯ. ਉਦਪਾਨੇ ਉਦਕਦਸ੍ਸਨਂ ਵਿਯ ਹਿ ਅਨਾਗਾਮਿਨੋ ਨਿਬ੍ਬਾਨਦਸ੍ਸਨਂ, ਘਮ੍ਮਾਭਿਤਤ੍ਤਪੁਰਿਸੋ ਵਿਯ ਅਨਾਗਾਮੀ, ਉਦਕਵਾਰਕੋ ਵਿਯ ਅਰਹਤ੍ਤਮਗ੍ਗੋ, ਯਥਾ ਘਮ੍ਮਾਭਿਤਤ੍ਤਪੁਰਿਸੋ ਉਦਪਾਨੇ ਉਦਕਂ ਪਸ੍ਸਤਿ. ਏਵਂ ਅਨਾਗਾਮੀ ਪਚ੍ਚਵੇਕ੍ਖਣਞਾਣੇਨ ‘‘ਉਪਰਿ ਅਰਹਤ੍ਤਫਲਸਮਯੋ ਨਾਮ ਅਤ੍ਥੀ’’ਤਿ ਜਾਨਾਤਿ. ਯਥਾ ਪਨ ਸੋ ਪੁਰਿਸੋ ਉਦਕਵਾਰਕਸ੍ਸ ਨਤ੍ਥਿਤਾਯ ਉਦਕਂ ਨੀਹਰਿਤ੍ਵਾ ਕਾਯੇਨ ਫੁਸਿਤੁਂ ਨ ਲਭਤਿ, ਏਵਂ ਅਨਾਗਾਮੀ ਅਰਹਤ੍ਤਮਗ੍ਗਸ੍ਸ ਨਤ੍ਥਿਤਾਯ ਨਿਬ੍ਬਾਨਂ ਆਰਮ੍ਮਣਂ ਕਤ੍ਵਾ ਅਰਹਤ੍ਤਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਿਤੁਂ ਨ ਲਭਤਿ. ਅਟ੍ਠਮਂ.

੯. ਉਪਯਨ੍ਤਿਸੁਤ੍ਤਵਣ੍ਣਨਾ

੬੯. ਨਵਮੇ ਉਪਯਨ੍ਤੋਤਿ ਉਦਕਵਡ੍ਢਨਸਮਯੇ ਉਪਰਿ ਗਚ੍ਛਨ੍ਤੋ. ਮਹਾਨਦਿਯੋਤਿ ਗਙ੍ਗਾਯਮੁਨਾਦਿਕਾ ਮਹਾਸਰਿਤਾਯੋ. ਉਪਯਾਪੇਤੀਤਿ ਉਪਰਿ ਯਾਪੇਤਿ, ਵਡ੍ਢੇਤਿ ਪੂਰੇਤੀਤਿ ਅਤ੍ਥੋ. ਅਵਿਜ੍ਜਾ ਉਪਯਨ੍ਤੀਤਿ ਅਵਿਜ੍ਜਾ ਉਪਰਿ ਗਚ੍ਛਨ੍ਤੀ ਸਙ੍ਖਾਰਾਨਂ ਪਚ੍ਚਯੋ ਭਵਿਤੁਂ ਸਕ੍ਕੁਣਨ੍ਤੀ. ਸਙ੍ਖਾਰੇ ਉਪਯਾਪੇਤੀਤਿ ਸਙ੍ਖਾਰੇ ਉਪਰਿ ਯਾਪੇਤਿ ਵਡ੍ਢੇਤਿ. ਏਵਂ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ. ਅਪਯਨ੍ਤੋਤਿ ਅਪਗਚ੍ਛਨ੍ਤੋ ਓਸਰਨ੍ਤੋ. ਅਵਿਜ੍ਜਾ ਅਪਯਨ੍ਤੀਤਿ ਅਵਿਜ੍ਜਾ ਅਪਗਚ੍ਛਮਾਨਾ ਓਸਰਮਾਨਾ ਉਪਰਿ ਸਙ੍ਖਾਰਾਨਂ ਪਚ੍ਚਯੋ ਭਵਿਤੁਂ ਨ ਸਕ੍ਕੁਣਨ੍ਤੀਤਿ ਅਤ੍ਥੋ. ਸਙ੍ਖਾਰੇ ਅਪਯਾਪੇਤੀਤਿ ਸਙ੍ਖਾਰੇ ਅਪਗਚ੍ਛਾਪੇਤਿ. ਏਸ ਨਯੋ ਸਬ੍ਬਪਦੇਸੁ. ਨਵਮਂ.

੧੦. ਸੁਸਿਮਸੁਤ੍ਤਵਣ੍ਣਨਾ

੭੦. ਦਸਮੇ ਗਰੁਕਤੋਤਿ ਸਬ੍ਬੇਹਿ ਦੇਵਮਨੁਸ੍ਸੇਹਿ ਪਾਸਾਣਚ੍ਛਤ੍ਤਂ ਵਿਯ ਚਿਤ੍ਤੇਨ ਗਰੁਕਤੋ. ਮਾਨਿਤੋਤਿ ਮਨੇਨ ਪਿਯਾਯਿਤੋ. ਪੂਜਿਤੋਤਿ ਚਤੁਪਚ੍ਚਯਪੂਜਾਯ ਪੂਜਿਤੋ. ਅਪਚਿਤੋਤਿ ਨੀਚਵੁਤ੍ਤਿਕਰਣੇਨ ਅਪਚਿਤੋ. ਸਤ੍ਥਾਰਞ੍ਹਿ ਦਿਸ੍ਵਾ ਮਨੁਸ੍ਸਾ ਹਤ੍ਥਿਕ੍ਖਨ੍ਧਾਦੀਹਿ ਓਤਰਨ੍ਤਿ ਮਗ੍ਗਂ ਦੇਨ੍ਤਿ, ਅਂਸਕੂਟਤੋ ਸਾਟਕਂ ਅਪਨੇਨ੍ਤਿ, ਆਸਨਤੋ ਵੁਟ੍ਠਹਨ੍ਤਿ ਵਨ੍ਦਨ੍ਤਿ. ਏਵਂ ਸੋ ਤੇਹਿ ਅਪਚਿਤੋ ਨਾਮ ਹੋਤਿ. ਸੁਸਿਮੋਤਿ ਏਵਂਨਾਮਕੋ ਵੇਦਙ੍ਗੇਸੁ ਕੁਸਲੋ ਪਣ੍ਡਿਤਪਰਿਬ੍ਬਾਜਕੋ. ਏਹਿ ਤ੍ਵਨ੍ਤਿ ਤੇਸਂ ਕਿਰ ਏਤਦਹੋਸਿ – ‘‘ਸਮਣੋ ਗੋਤਮੋ ਨ ਜਾਤਿਗੋਤ੍ਤਾਦੀਨਿ ਆਗਮ੍ਮ ਲਾਭਗ੍ਗਪ੍ਪਤ੍ਤੋ ਜਾਤੋ, ਕਵਿਸੇਟ੍ਠੋ ਪਨੇਸ ਉਤ੍ਤਮਕਵਿਤਾਯ ਸਾਵਕਾਨਂ ਗਨ੍ਥਂ ਬਨ੍ਧਿਤ੍ਵਾ ਦੇਤਿ, ਤਂ ਤੇ ਉਗ੍ਗਣ੍ਹਿਤ੍ਵਾ ਉਪਟ੍ਠਾਕਾਨਂ ਉਪਨਿਸਿਨ੍ਨਕਥਮ੍ਪਿ ਅਨੁਮੋਦਨਮ੍ਪਿ ਸਰਭਞ੍ਞਮ੍ਪੀਤਿ ਏਵਮਾਦੀਨਿ ਕਥੇਨ੍ਤਿ, ਤੇ ਤੇਸਂ ਪਸਨ੍ਨਾ ਲਾਭਂ ਉਪਸਂਹਰਨ੍ਤਿ. ਸਚੇ ਮਯਂ ਯਂ ਸਮਣੋ ਗੋਤਮੋ ਜਾਨਾਤਿ, ਤਤੋ ਥੋਕਂ ਜਾਨੇਯ੍ਯਾਮ, ਅਤ੍ਤਨੋ ਸਮਯਂ ਤਤ੍ਥ ਪਕ੍ਖਿਪਿਤ੍ਵਾ ਮਯਮ੍ਪਿ ਉਪਟ੍ਠਾਕਾਨਂ ਕਥੇਯ੍ਯਾਮ, ਤਤੋ ਏਤੇਹਿ ਲਾਭਿਤਰਾ ਭਵੇਯ੍ਯਾਮ. ਕੋ ਨੁ ਖੋ ਸਮਣਸ੍ਸ ਗੋਤਮਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਖਿਪ੍ਪਮੇਵ ਉਗ੍ਗਣ੍ਹਿਤੁਂ ਸਕ੍ਖਿਸ੍ਸਤੀ’’ਤਿ. ਤੇ ਏਵਂ ਚਿਨ੍ਤੇਤ੍ਵਾ ‘‘ਸੁਸਿਮੋ ਪਟਿਬਲੋ’’ਤਿ ਦਿਸ੍ਵਾ ਤਂ ਉਪਸਙ੍ਕਮਿਤ੍ਵਾ ਏਵਮਾਹਂਸੁ.

ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਏਵਂ ਕਿਰਸ੍ਸ ਅਹੋਸਿ, ‘‘ਕਸ੍ਸ ਨੁ ਖੋ ਸਨ੍ਤਿਕਂ ਗਨ੍ਤ੍ਵਾ ਅਹਂ ਇਮਂ ਧਮ੍ਮਂ ਖਿਪ੍ਪਂ ਲਦ੍ਧੁਂ ਸਕ੍ਖਿਸ੍ਸਾਮੀ’’ਤਿ? ਤਤੋ ਚਿਨ੍ਤੇਸਿ – ‘‘ਸਮਣੋ ਗੋਤਮੋ ਗਰੁ ਤੇਜੁਸ੍ਸਦੋ ਨਿਯਮਮਨੁਯੁਤ੍ਤੋ, ਨ ਸਕ੍ਕਾ ਅਕਾਲੇ ਉਪਸਙ੍ਕਮਿਤੁਂ, ਅਞ੍ਞੇਪਿ ਬਹੂ ਖਤ੍ਤਿਯਾਦਯੋ ਸਮਣਂ ਗੋਤਮਂ ਉਪਸਙ੍ਕਮਨ੍ਤਿ, ਤਸ੍ਮਿਮ੍ਪਿ ਸਮਯੇ ਨ ਸਕ੍ਕਾ ਉਪਸਙ੍ਕਮਿਤੁਂ. ਸਾਵਕੇਸੁਪਿਸ੍ਸ ਸਾਰਿਪੁਤ੍ਤੋ ਮਹਾਪਞ੍ਞੋ ਵਿਪਸ੍ਸਨਾਲਕ੍ਖਣਮ੍ਹਿ ਏਤਦਗ੍ਗੇ ਠਪਿਤੋ, ਮਹਾਮੋਗ੍ਗਲ੍ਲਾਨੋ ਸਮਾਧਿਲਕ੍ਖਣਸ੍ਮਿਂ ਏਤਦਗ੍ਗੇ ਠਪਿਤੋ, ਮਹਾਕਸ੍ਸਪੋ ਧੁਤਙ੍ਗਧਰੇਸੁ ਅਨੁਰੁਦ੍ਧੋ ਦਿਬ੍ਬਚਕ੍ਖੁਕੇਸੁ, ਪੁਣ੍ਣੋ ਮਨ੍ਤਾਣਿਪੁਤ੍ਤੋ ਧਮ੍ਮਕਥਿਕੇਸੁ, ਉਪਾਲਿਤ੍ਥੇਰੋ ਵਿਨਯਧਰੇਸੁ ਏਤਦਗ੍ਗੇ ਠਪਿਤੋ, ਅਯਂ ਪਨ ਆਨਨ੍ਦੋ ਬਹੁਸ੍ਸੁਤੋ ਤਿਪਿਟਕਧਰੋ, ਸਤ੍ਥਾਪਿਸ੍ਸ ਤਤ੍ਥ ਤਤ੍ਥ ਕਥਿਤਂ ਧਮ੍ਮਂ ਆਹਰਿਤ੍ਵਾ ਕਥੇਤਿ, ਪਞ੍ਚਸੁ ਠਾਨੇਸੁ ਏਤਦਗ੍ਗੇ ਠਪਿਤੋ, ਅਟ੍ਠਨ੍ਨਂ ਵਰਾਨਂ ਲਾਭੀ, ਚਤੂਹਿ ਅਚ੍ਛਰਿਯਬ੍ਭੁਤਧਮ੍ਮੇਹਿ ਸਮਨ੍ਨਾਗਤੋ, ਤਸ੍ਸ ਸਮੀਪਂ ਗਤੋ ਖਿਪ੍ਪਂ ਧਮ੍ਮਂ ਲਦ੍ਧੁਂ ਸਕ੍ਖਿਸ੍ਸਾਮੀ’’ਤਿ. ਤਸ੍ਮਾ ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ.

ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਕਸ੍ਮਾ ਸਯਂ ਅਪਬ੍ਬਾਜੇਤ੍ਵਾ ਉਪਸਙ੍ਕਮਿ? ਏਵਂ ਕਿਰਸ੍ਸ ਅਹੋਸਿ – ‘‘ਅਯਂ ਤਿਤ੍ਥਿਯਸਮਯੇ ਪਾਟਿਯੇਕ੍ਕੋ ‘ਅਹਂ ਸਤ੍ਥਾ’ਤਿ ਪਟਿਜਾਨਨ੍ਤੋ ਚਰਤਿ, ਪਬ੍ਬਜਿਤ੍ਵਾ ਸਾਸਨਸ੍ਸ ਅਲਾਭਾਯਪਿ ਪਰਿਸਕ੍ਕੇਯ੍ਯ. ਨ ਖੋ ਪਨਸ੍ਸਾਹਂ ਅਜ੍ਝਾਸਯਂ ਆਜਾਨਾਮਿ, ਸਤ੍ਥਾ ਜਾਨਿਸ੍ਸਤੀ’’ਤਿ. ਤਸ੍ਮਾ ਤਂ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ. ਤੇਨਹਾਨਨ੍ਦ, ਸੁਸਿਮਂ ਪਬ੍ਬਾਜੇਥਾਤਿ ਸਤ੍ਥਾ ਕਿਰ ਚਿਨ੍ਤੇਸਿ – ‘‘ਅਯਂ ਪਰਿਬ੍ਬਾਜਕੋ ਤਿਤ੍ਥਿਯਸਮਯੇ ‘ਅਹਂ ਪਾਟਿਯੇਕ੍ਕੋ ਸਤ੍ਥਾ’ਤਿ ਪਟਿਜਾਨਮਾਨੋ ਚਰਤਿ, ‘ਇਧ ਮਗ੍ਗਬ੍ਰਹ੍ਮਚਰਿਯਂ ਚਰਿਤੁਂ ਇਚ੍ਛਾਮੀ’ਤਿ ਕਿਰ ਵਦਤਿ. ਕਿਂ ਨੁ ਖੋ ਮਯਿ ਪਸਨ੍ਨੋ, ਉਦਾਹੁ ਮਯ੍ਹਂ ਸਾਵਕੇਸੁ, ਉਦਾਹੁ ਮਯ੍ਹਂ ਵਾ ਮਮ ਸਾਵਕਾਨਂ ਵਾ ਧਮ੍ਮਕਥਾਯ ਪਸਨ੍ਨੋ’’ਤਿ? ਅਥਸ੍ਸ ਏਕਟ੍ਠਾਨੇਪਿ ਪਸਾਦਾਭਾਵਂ ਞਤ੍ਵਾ, ‘‘ਅਯਂ ਮਮ ਸਾਸਨੇ ਧਮ੍ਮਂ ਥੇਨੇਸ੍ਸਾਮੀਤਿ ਪਬ੍ਬਜਤਿ. ਇਤਿਸ੍ਸ ਆਗਮਨਂ ਅਪਰਿਸੁਦ੍ਧਂ; ਨਿਪ੍ਫਤ੍ਤਿ ਨੁ ਖੋ ਕੀਦਿਸਾ’’ਤਿ? ਓਲੋਕੇਨ੍ਤੋ ‘‘ਕਿਞ੍ਚਾਪਿ ‘ਧਮ੍ਮਂ ਥੇਨੇਸ੍ਸਾਮੀ’ਤਿ ਪਬ੍ਬਜਤਿ, ਕਤਿਪਾਹੇਨੇਵ ਪਨ ਘਟੇਤ੍ਵਾ ਅਰਹਤ੍ਤਂ ਗਣ੍ਹਿਸ੍ਸਤੀ’’ਤਿ ਞਤ੍ਵਾ ‘‘ਤੇਨਹਾਨਨ੍ਦ, ਸੁਸਿਮਂ ਪਬ੍ਬਾਜੇਥਾ’’ਤਿ ਆਹ.

ਅਞ੍ਞਾ ਬ੍ਯਾਕਤਾ ਹੋਤੀਤਿ ਤੇ ਕਿਰ ਭਿਕ੍ਖੂ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਤੇਮਾਸਂ ਵਸ੍ਸਂ ਵਸਨ੍ਤਾ ਤਸ੍ਮਿਂਯੇਵ ਅਨ੍ਤੋਤੇਮਾਸੇ ਘਟੇਨ੍ਤਾ ਵਾਯਮਨ੍ਤਾ ਅਰਹਤ੍ਤਂ ਪਟਿਲਭਿਂਸੁ. ਤੇ ‘‘ਪਟਿਲਦ੍ਧਗੁਣਂ ਸਤ੍ਥੁ ਆਰੋਚੇਸ੍ਸਾਮਾ’’ਤਿ ਪਵਾਰਿਤਪਵਾਰਣਾ ਸੇਨਾਸਨਂ ਸਂਸਾਮੇਤ੍ਵਾ ਸਤ੍ਥੁ ਸਨ੍ਤਿਕਂ ਆਗਨ੍ਤ੍ਵਾ ਅਤ੍ਤਨੋ ਪਟਿਲਦ੍ਧਗੁਣਂ ਆਰੋਚੇਸੁਂ. ਤਂ ਸਨ੍ਧਾਯੇਤਂ ਵੁਤ੍ਤਂ. ਅਞ੍ਞਾਤਿ ਅਰਹਤ੍ਤਸ੍ਸ ਨਾਮਂ. ਬ੍ਯਾਕਤਾਤਿ ਆਰੋਚਿਤਾ. ਅਸ੍ਸੋਸੀਤਿ ਸੋ ਕਿਰ ਓਹਿਤਸੋਤੋ ਹੁਤ੍ਵਾ ਤੇਸਂ ਤੇਸਂ ਭਿਕ੍ਖੂਨਂ ਠਿਤਟ੍ਠਾਨਂ ਗਚ੍ਛਤਿ ਤਂ ਤਂ ਕਥਂ ਸੁਣਿਤੁਕਾਮੋ. ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਤਂ ਕਿਰਸ੍ਸ ਪਵਤ੍ਤਿਂ ਸੁਤ੍ਵਾ ਏਤਦਹੋਸਿ – ‘‘ਅਞ੍ਞਾ ਨਾਮ ਇਮਸ੍ਮਿਂ ਸਾਸਨੇ ਪਰਮਪ੍ਪਮਾਣਂ ਸਾਰਭੂਤਾ ਆਚਰਿਯਮੁਟ੍ਠਿ ਮਞ੍ਞੇ ਭਵਿਸ੍ਸਤਿ, ਪੁਚ੍ਛਿਤ੍ਵਾ ਨਂ ਜਾਨਿਸ੍ਸਾਮੀ’’ਤਿ. ਤਸ੍ਮਾ ਉਪਸਙ੍ਕਮਿ.

ਅਨੇਕਵਿਹਿਤਨ੍ਤਿ ਅਨੇਕਵਿਧਂ. ਇਦ੍ਧਿਵਿਧਨ੍ਤਿ ਇਦ੍ਧਿਕੋਟ੍ਠਾਸਂ. ਆਵਿਭਾਵਂ ਤਿਰੋਭਾਵਨ੍ਤਿ ਆਵਿਭਾਵਂ ਗਹੇਤ੍ਵਾ ਤਿਰੋਭਾਵਂ, ਤਿਰੋਭਾਵਂ ਗਹੇਤ੍ਵਾ ਆਵਿਭਾਵਂ ਕਾਤੁਂ ਸਕ੍ਕੋਥਾਤਿ ਪੁਚ੍ਛਤਿ. ਤਿਰੋਕੁਟ੍ਟਨ੍ਤਿ ਪਰਕੁਟ੍ਟਂ. ਇਤਰਪਦਦ੍ਵਯੇਪਿ ਏਸੇਵ ਨਯੋ. ਉਮ੍ਮੁਜ੍ਜਨਿਮੁਜ੍ਜਨ੍ਤਿ ਉਮ੍ਮੁਜ੍ਜਨਞ੍ਚ ਨਿਮੁਜ੍ਜਨਞ੍ਚ. ਪਲ੍ਲਙ੍ਕੇਨਾਤਿ ਪਲ੍ਲਙ੍ਕਬਨ੍ਧਨੇਨ. ਕਮਥਾਤਿ ਨਿਸੀਦਿਤੁਂ ਵਾ ਗਨ੍ਤੁਂ ਵਾ ਸਕ੍ਕੋਥਾਤਿ ਪੁਚ੍ਛਤਿ? ਪਕ੍ਖੀ ਸਕੁਣੋਤਿ ਪਕ੍ਖਯੁਤ੍ਤੋ ਸਕੁਣੋ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨ ਇਮਸ੍ਸ ਇਦ੍ਧਿਵਿਧਸ੍ਸ, ਇਤੋ ਪਰੇਸਂ ਦਿਬ੍ਬਸੋਤਾਦੀਨਞ੍ਚ ਵਣ੍ਣਨਾਨਯੋ ਵਿਸੁਦ੍ਧਿਮਗ੍ਗੇ ਵੁਤ੍ਤਨਯੇਨ ਵੇਦਿਤਬ੍ਬੋਤਿ.

ਸਨ੍ਤਾ ਵਿਮੋਕ੍ਖਾਤਿ ਅਙ੍ਗਸਨ੍ਤਤਾਯ ਚੇਵ ਆਰਮ੍ਮਣਸਨ੍ਤਤਾਯ ਚ ਸਨ੍ਤਾ ਆਰੁਪ੍ਪਵਿਮੋਕ੍ਖਾ. ਕਾਯੇਨ ਫੁਸਿਤ੍ਵਾਤਿ ਨਾਮਕਾਯੇਨ ਫੁਸਿਤ੍ਵਾ ਪਟਿਲਭਿਤ੍ਵਾ. ਪਞ੍ਞਾਵਿਮੁਤ੍ਤਾ ਖੋ ਮਯਂ, ਆਵੁਸੋਤਿ, ਆਵੁਸੋ, ਮਯਂ ਨਿਜ੍ਝਾਨਕਾ ਸੁਕ੍ਖਵਿਪਸ੍ਸਕਾ ਪਞ੍ਞਾਮਤ੍ਤੇਨੇਵ ਵਿਮੁਤ੍ਤਾਤਿ ਦਸ੍ਸੇਤਿ. ਆਜਾਨੇਯ੍ਯਾਸਿ ਵਾ ਤ੍ਵਂ, ਆਵੁਸੋ ਸੁਸਿਮ, ਨ ਵਾ ਤ੍ਵਂ ਆਜਾਨੇਯ੍ਯਾਸੀਤਿ ਕਸ੍ਮਾ ਏਵਮਾਹਂਸੁ? ਏਵਂ ਕਿਰ ਨੇਸਂ ਅਹੋਸਿ – ‘‘ਮਯਂ ਇਮਸ੍ਸ ਅਜ੍ਝਾਸਯਂ ਗਹੇਤ੍ਵਾ ਕਥੇਤੁਂ ਨ ਸਕ੍ਖਿਸ੍ਸਾਮ, ਦਸਬਲਂ ਪਨ ਪੁਚ੍ਛਿਤ੍ਵਾ ਨਿਕ੍ਕਙ੍ਖੋ ਭਵਿਸ੍ਸਤੀ’’ਤਿ. ਧਮ੍ਮਟ੍ਠਿਤਿਞਾਣਨ੍ਤਿ ਵਿਪਸ੍ਸਨਾਞਾਣਂ, ਤਂ ਪਠਮਤਰਂ ਉਪ੍ਪਜ੍ਜਤਿ. ਨਿਬ੍ਬਾਨੇ ਞਾਣਨ੍ਤਿ ਵਿਪਸ੍ਸਨਾਯ ਚਿਣ੍ਣਨ੍ਤੇ ਪਵਤ੍ਤਮਗ੍ਗਞਾਣਂ, ਤਂ ਪਚ੍ਛਾ ਉਪ੍ਪਜ੍ਜਤਿ. ਤਸ੍ਮਾ ਭਗਵਾ ਏਵਮਾਹ.

ਆਜਾਨੇਯ੍ਯਾਸਿ ਵਾਤਿਆਦਿ ਕਸ੍ਮਾ ਵੁਤ੍ਤਂ? ਵਿਨਾਪਿ ਸਮਾਧਿਂ ਏਵਂ ਞਾਣੁਪ੍ਪਤ੍ਤਿਦਸ੍ਸਨਤ੍ਥਂ. ਇਦਞ੍ਹਿ ਵੁਤ੍ਤਂ ਹੋਤਿ – ਸੁਸਿਮ, ਮਗ੍ਗੋ ਵਾ ਫਲਂ ਵਾ ਨ ਸਮਾਧਿਨਿਸ੍ਸਨ੍ਦੋ, ਨ ਸਮਾਧਿਆਨਿਸਂਸੋ, ਨ ਸਮਾਧਿਸ੍ਸ ਨਿਪ੍ਫਤ੍ਤਿ, ਵਿਪਸ੍ਸਨਾਯ ਪਨੇਸੋ ਨਿਸ੍ਸਨ੍ਦੋ, ਵਿਪਸ੍ਸਨਾਯ ਆਨਿਸਂਸੋ, ਵਿਪਸ੍ਸਨਾਯ ਨਿਪ੍ਫਤ੍ਤਿ, ਤਸ੍ਮਾ ਜਾਨੇਯ੍ਯਾਸਿ ਵਾ ਤ੍ਵਂ, ਨ ਵਾ ਤ੍ਵਂ ਜਾਨੇਯ੍ਯਾਸਿ, ਅਥ ਖੋ ਧਮ੍ਮਟ੍ਠਿਤਿਞਾਣਂ ਪੁਬ੍ਬੇ, ਪਚ੍ਛਾ ਨਿਬ੍ਬਾਨੇ ਞਾਣਨ੍ਤਿ.

ਇਦਾਨਿਸ੍ਸ ਪਟਿਵੇਧਭਬ੍ਬਤਂ ਞਤ੍ਵਾ ਤੇਪਰਿਵਟ੍ਟਂ ਧਮ੍ਮਦੇਸਨਂ ਦੇਸੇਨ੍ਤੋ ਤਂ ਕਿਂ ਮਞ੍ਞਸਿ, ਸੁਸਿਮ? ਰੂਪਂ ਨਿਚ੍ਚਂ ਵਾ ਅਨਿਚ੍ਚਂ ਵਾਤਿਆਦਿਮਾਹ? ਤੇ ਪਰਿਵਟ੍ਟਦੇਸਨਾਵਸਾਨੇ ਪਨ ਥੇਰੋ ਅਰਹਤ੍ਤਂ ਪਤ੍ਤੋ. ਇਦਾਨਿਸ੍ਸ ਅਨੁਯੋਗਂ ਆਰੋਪੇਨ੍ਤੋ ਜਾਤਿਪਚ੍ਚਯਾ ਜਰਾਮਰਣਨ੍ਤਿ, ਸੁਸਿਮ, ਪਸ੍ਸਸੀਤਿਆਦਿਮਾਹ. ਅਪਿ ਪਨ ਤ੍ਵਂ, ਸੁਸਿਮਾਤਿ ਇਦਂ ਕਸ੍ਮਾ ਆਰਭਿ? ਨਿਜ੍ਝਾਨਕਾਨਂ ਸੁਕ੍ਖਵਿਪਸ੍ਸਕਭਿਕ੍ਖੂਨਂ ਪਾਕਟਕਰਣਤ੍ਥਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਨ ਕੇਵਲਂ ਤ੍ਵਮੇਵ ਨਿਜ੍ਝਾਨਕੋ ਸੁਕ੍ਖਵਿਪਸ੍ਸਕੋ, ਏਤੇਪਿ ਭਿਕ੍ਖੂ ਏਵਰੂਪਾਯੇਵਾਤਿ. ਸੇਸਂ ਸਬ੍ਬਤ੍ਥ ਪਾਕਟਮੇਵਾਤਿ. ਦਸਮਂ.

ਮਹਾਵਗ੍ਗੋ ਸਤ੍ਤਮੋ.