੧੨. ਖੋਮਦੁਸ੍ਸਸੁਤ੍ਤਵਣ੍ਣਨਾ
੨੦੮. ਦ੍ਵਾਦਸਮੇ ਖੋਮਦੁਸ੍ਸਂ ਨਾਮਾਤਿ ਖੋਮਦੁਸ੍ਸਾਨਂ ਉਸ੍ਸਨ੍ਨਤ੍ਤਾ ਏਵਂਲਦ੍ਧਨਾਮਂ. ਸਭਾਯਨ੍ਤਿ ਸਾਲਾਯਂ. ਫੁਸਾਯਤੀਤਿ ਫੁਸਿਤਾਨਿ ਮੁਞ੍ਚਤਿ ਵਸ੍ਸਤਿ. ਸਤ੍ਥਾ ਕਿਰ ਤਂ ਸਭਂ ਉਪਸਙ੍ਕਮਿਤੁਕਾਮੋ – ‘‘ਮਯਿ ਏਵਮੇਵਂ ਉਪਸਙ੍ਕਮਨ੍ਤੇ ਅਫਾਸੁਕਧਾਤੁਕਂ ਹੋਤਿ, ਏਕਂ ਕਾਰਣਂ ਪਟਿਚ੍ਚ ਉਪਸਙ੍ਕਮਿਸ੍ਸਾਮੀ’’ਤਿ ਅਧਿਟ੍ਠਾਨਵਸੇਨ ਵੁਟ੍ਠਿਂ ਉਪ੍ਪਾਦੇਸਿ. ਸਭਾਧਮ੍ਮਨ੍ਤਿ ਸੁਖਨਿਸਿਨ੍ਨੇ ਕਿਰ ਅਸਞ੍ਚਾਲੇਤ੍ਵਾ ਏਕਪਸ੍ਸੇਨ ਪਵਿਸਨਂ ਤੇਸਂ ਸਭਾਧਮ੍ਮੋ ਨਾਮ, ਨ ਮਹਾਜਨਂ ਚਾਲੇਤ੍ਵਾ ਉਜੁਕਮੇਵ ਪਵਿਸਨਂ. ਭਗਵਾ ਚ ਉਜੁਕਮੇਵ ਆਗਚ੍ਛਤਿ, ਤੇਨ ਤੇ ਕੁਪਿਤਾ ਭਗਵਨ੍ਤਂ ਹੀਲ਼ੇਨ੍ਤਾ ‘‘ਕੇ ਚ ਮੁਣ੍ਡਕਾ ਸਮਣਕਾ, ਕੇ ਚ ਸਭਾਧਮ੍ਮਂ ਜਾਨਿਸ੍ਸਨ੍ਤੀ’’ਤਿ ਆਹਂਸੁ. ਸਨ੍ਤੋਤਿ ਪਣ੍ਡਿਤਾ ਸਪ੍ਪੁਰਿਸਾ. ਪਹਾਯਾਤਿ ਏਤੇ ਰਾਗਾਦਯੋ ਜਹਿਤ੍ਵਾ ਰਾਗਾਦਿਵਿਨਯਾਯ ਧਮ੍ਮਂ ਭਣਨ੍ਤਿ, ਤਸ੍ਮਾ ਤੇ ਸਨ੍ਤੋ ਨਾਮਾਤਿ. ਦ੍ਵਾਦਸਮਂ.
ਉਪਾਸਕਵਗ੍ਗੋ ਦੁਤਿਯੋ.
ਇਤਿ ਸਾਰਤ੍ਥਪ੍ਪਕਾਸਿਨਿਯਾ
ਸਂਯੁਤ੍ਤਨਿਕਾਯ-ਅਟ੍ਠਕਥਾਯ
ਬ੍ਰਾਹ੍ਮਣਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.