੮. ਵਙ੍ਗੀਸਸਂਯੁਤ੍ਤਂ
੧. ਨਿਕ੍ਖਨ੍ਤਸੁਤ੍ਤਵਣ੍ਣਨਾ
੨੦੯. ਵਙ੍ਗੀਸਸਂਯੁਤ੍ਤਸ੍ਸ ਪਠਮੇ ਅਗ੍ਗਾਲ਼ਵੇ ਚੇਤਿਯੇਤਿ ਆਲ਼ਵਿਯਂ ਅਗ੍ਗਚੇਤਿਯੇ. ਅਨੁਪ੍ਪਨ੍ਨੇ ਬੁਦ੍ਧੇ ਅਗ੍ਗਾਲ਼ਵਗੋਤਮਕਾਦੀਨਿ ਯਕ੍ਖਨਾਗਾਦੀਨਂ ਭਵਨਾਨਿ, ਚੇਤਿਯਾਨਿ ਅਹੇਸੁਂ. ਉਪ੍ਪਨ੍ਨੇ ਬੁਦ੍ਧੇ ਤਾਨਿ ਅਪਨੇਤ੍ਵਾ ਮਨੁਸ੍ਸਾ ਵਿਹਾਰੇ ਕਰਿਂਸੁ. ਤੇਸਂ ਤਾਨੇਵ ਨਾਮਾਨਿ ਜਾਤਾਨਿ. ਨਿਗ੍ਰੋਧਕਪ੍ਪੇਨਾਤਿ ਨਿਗ੍ਰੋਧਰੁਕ੍ਖਮੂਲਵਾਸਿਨਾ ਕਪ੍ਪਤ੍ਥੇਰੇਨ. ਓਹਿਯ੍ਯਕੋਤਿ ਓਹੀਨਕੋ. ਵਿਹਾਰਪਾਲੋਤਿ ਸੋ ਕਿਰ ਤਦਾ ਅਵਸ੍ਸਿਕੋ ਹੋਤਿ ਪਤ੍ਤਚੀਵਰਗ੍ਗਹਣੇ ਅਕੋਵਿਦੋ. ਅਥ ਨਂ ਥੇਰਾ ਭਿਕ੍ਖੂ – ‘‘ਆਵੁਸੋ, ਇਮਾਨਿ ਛਤ੍ਤੁਪਾਹਨਕਤ੍ਤਰਯਟ੍ਠਿਆਦੀਨਿ ਓਲੋਕੇਨ੍ਤੋ ਨਿਸੀਦਾ’’ਤਿ ਵਿਹਾਰਰਕ੍ਖਕਂ ਕਤ੍ਵਾ ਪਿਣ੍ਡਾਯ ਪਵਿਸਿਂਸੁ. ਤੇਨ ਵੁਤ੍ਤਂ ‘‘ਵਿਹਾਰਪਾਲੋ’’ਤਿ. ਸਮਲਙ੍ਕਰਿਤ੍ਵਾਤਿ ਅਤ੍ਤਨੋ ਵਿਭਵਾਨੁਰੂਪੇਨ ਅਲਙ੍ਕਾਰੇਨ ਅਲਙ੍ਕਰਿਤ੍ਵਾ. ਚਿਤ੍ਤਂ ਅਨੁਦ੍ਧਂਸੇਤੀਤਿ ਕੁਸਲਚਿਤ੍ਤਂ ਵਿਦ੍ਧਂਸੇਤਿ ਵਿਨਾਸੇਤਿ. ਤਂ ਕੁਤੇਤ੍ਥ ਲਬ੍ਭਾਤਿ ਏਤਸ੍ਮਿਂ ਰਾਗੇ ਉਪ੍ਪਨ੍ਨੇ ਤਂ ਕਾਰਣਂ ਕੁਤੋ ਲਬ੍ਭਾ. ਯਂ ਮੇ ਪਰੋਤਿ ਯੇਨ ਮੇ ਕਾਰਣੇਨ ਅਞ੍ਞੋ ਪੁਗ੍ਗਲੋ ਵਾ ਧਮ੍ਮੋ ਵਾ ਅਨਭਿਰਤਿਂ ਵਿਨੋਦੇਤ੍ਵਾ ਇਦਾਨੇਵ ਅਭਿਰਤਿਂ ਉਪ੍ਪਾਦੇਯ੍ਯ ਆਚਰਿਯੁਪਜ੍ਝਾਯਾਪਿ ਮਂ ਵਿਹਾਰੇ ਓਹਾਯ ਗਤਾ.
ਅਗਾਰਸ੍ਮਾਤਿ ਅਗਾਰਤੋ ਨਿਕ੍ਖਨ੍ਤਂ. ਅਨਗਾਰਿਯਨ੍ਤਿ ਪਬ੍ਬਜ੍ਜਂ ਉਪਗਤਨ੍ਤਿ ਅਤ੍ਥੋ. ਕਣ੍ਹਤੋਤਿ ਕਣ੍ਹਪਕ੍ਖਤੋ ਮਾਰਪਕ੍ਖਤੋ ਆਧਾਵਨ੍ਤਿ. ਉਗ੍ਗਪੁਤ੍ਤਾਤਿ ਉਗ੍ਗਤਾਨਂ ਪੁਤ੍ਤਾ ਮਹੇਸਕ੍ਖਾ ਰਾਜਞ੍ਞਭੂਤਾ. ਦਲ਼੍ਹਧਮ੍ਮਿਨੋਤਿ ਦਲ਼੍ਹਧਨੁਨੋ, ਉਤ੍ਤਮਪ੍ਪਮਾਣਂ ਆਚਰਿਯਧਨੁਂ ਧਾਰਯਮਾਨਾ. ਸਹਸ੍ਸਂ ਅਪਲਾਯਿਨਨ੍ਤਿ ਯੇ ਤੇ ਸਮਨ੍ਤਾ ਸਰੇਹਿ ਪਰਿਕਿਰੇਯ੍ਯੁਂ, ਤੇਸਂ ਅਪਲਾਯੀਨਂ ਸਙ੍ਖਂ ਦਸ੍ਸੇਨ੍ਤੋ ‘‘ਸਹਸ੍ਸ’’ਨ੍ਤਿ ਆਹ. ਏਤਤੋ ਭਿਯ੍ਯੋਤਿ ਏਤਸ੍ਮਾ ਸਹਸ੍ਸਾ ਅਤਿਰੇਕਤਰਾ. ਨੇਵ ਮਂ ਬ੍ਯਾਧਯਿਸ੍ਸਨ੍ਤੀਤਿ ਮਂ ਚਾਲੇਤੁਂ ਨ ਸਕ੍ਖਿਸ੍ਸਨ੍ਤਿ. ਧਮ੍ਮੇ ਸਮ੍ਹਿ ਪਤਿਟ੍ਠਿਤਨ੍ਤਿ ਅਨਭਿਰਤਿਂ ਵਿਨੋਦੇਤ੍ਵਾ ਅਭਿਰਤਿਂ ਉਪ੍ਪਾਦਨਸਮਤ੍ਥੇ ਸਕੇ ਸਾਸਨਧਮ੍ਮੇ ਪਤਿਟ੍ਠਿਤਂ. ਇਦਂ ਵੁਤ੍ਤਂ ਹੋਤਿ – ਇਸ੍ਸਾਸਸਹਸ੍ਸੇ ਤਾਵ ਸਮਨ੍ਤਾ ਸਰੇਹਿ ਪਰਿਕਿਰਨ੍ਤੇ ਸਿਕ੍ਖਿਤੋ ਪੁਰਿਸੋ ਦਣ੍ਡਕਂ ਗਹੇਤ੍ਵਾ ਸਬ੍ਬੇ ਸਰੇ ਸਰੀਰੇ ਅਪਤਮਾਨੇ ਅਨ੍ਤਰਾਵ ਪਹਰਿਤ੍ਵਾ ਪਾਦਮੂਲੇ ਪਾਤੇਤਿ. ਤਤ੍ਥ ਏਕੋਪਿ ਇਸ੍ਸਾਸੋ ਦ੍ਵੇ ਸਰੇ ਏਕਤੋ ਨ ਖਿਪਤਿ, ਇਮਾ ਪਨ ਇਤ੍ਥਿਯੋ ਰੂਪਾਰਮ੍ਮਣਾਦਿਵਸੇਨ ਪਞ੍ਚ ਪਞ੍ਚ ਸਰੇ ਏਕਤੋ ਖਿਪਨ੍ਤਿ. ਏਵਂ ਖਿਪਨ੍ਤਿਯੋ ਏਤਾ ਸਚੇਪਿ ਅਤਿਰੇਕਸਹਸ੍ਸਾ ਹੋਨ੍ਤਿ, ਨੇਵ ਮਂ ਚਾਲੇਤੁਂ ਸਕ੍ਖਿਸ੍ਸਨ੍ਤੀਤਿ.
ਸਕ੍ਖੀ ਹਿ ਮੇ ਸੁਤਂ ਏਤਨ੍ਤਿ ਮਯਾ ਹਿ ਸਮ੍ਮੁਖਾ ਏਤਂ ਸੁਤਂ. ਨਿਬ੍ਬਾਨਗਮਨਂ ਮਗ੍ਗਨ੍ਤਿ ਵਿਪਸ੍ਸਨਂ ਸਨ੍ਧਾਯਾਹ. ਸੋ ਹਿ ਨਿਬ੍ਬਾਨਸ੍ਸ ਪੁਬ੍ਬਭਾਗਮਗ੍ਗੋ, ਲਿਙ੍ਗਵਿਪਲ੍ਲਾਸੇਨ ਪਨ ‘‘ਮਗ੍ਗ’’ਨ੍ਤਿ ਆਹ. ਤਤ੍ਥ ਮੇਤਿ ਤਸ੍ਮਿਂ ਮੇ ਅਤ੍ਤਨੋ ਤਰੁਣਵਿਪਸ੍ਸਨਾਸਙ੍ਖਾਤੇ ਨਿਬ੍ਬਾਨਗਮਨਮਗ੍ਗੇ ਮਨੋ ਨਿਰਤੋ. ਪਾਪਿਮਾਤਿ ਕਿਲੇਸਂ ਆਲਪਤਿ. ਮਚ੍ਚੂਤਿਪਿ ਤਮੇਵ ਆਲਪਤਿ. ਨ ਮੇ ਮਗ੍ਗਮ੍ਪਿ ਦਕ੍ਖਸੀਤਿ ਯਥਾ ਮੇ ਭਵਯੋਨਿਆਦੀਸੁ ਗਤਮਗ੍ਗਮ੍ਪਿ ਨ ਪਸ੍ਸਸਿ, ਤਥਾ ਕਰਿਸ੍ਸਾਮੀਤਿ. ਪਠਮਂ.
੨. ਅਰਤੀਸੁਤ੍ਤਵਣ੍ਣਨਾ
੨੧੦. ਦੁਤਿਯੇ ਨਿਕ੍ਖਮਤੀਤਿ ਵਿਹਾਰਾ ਨਿਕ੍ਖਮਤਿ. ਅਪਰਜ੍ਜੁ ਵਾ ਕਾਲੇਤਿ ਦੁਤਿਯਦਿਵਸੇ ਵਾ ਭਿਕ੍ਖਾਚਾਰਕਾਲੇ. ਵਿਹਾਰਗਰੁਕੋ ਕਿਰੇਸ ਥੇਰੋ. ਅਰਤਿਞ੍ਚ ਰਤਿਞ੍ਚਾਤਿ ਸਾਸਨੇ ਅਰਤਿਂ ਕਾਮਗੁਣੇਸੁ ਚ ਰਤਿਂ. ਸਬ੍ਬਸੋ ਗੇਹਸਿਤਞ੍ਚ ਵਿਤਕ੍ਕਨ੍ਤਿ ਪਞ੍ਚਕਾਮਗੁਣਗੇਹਨਿਸ੍ਸਿਤਂ ਪਾਪਵਿਤਕ੍ਕਞ੍ਚ ਸਬ੍ਬਾਕਾਰੇਨ ਪਹਾਯ. ਵਨਥਨ੍ਤਿ ਕਿਲੇਸਮਹਾਵਨਂ. ਕੁਹਿਞ੍ਚੀਤਿ ਕਿਸ੍ਮਿਞ੍ਚਿ ਆਰਮ੍ਮਣੇ. ਨਿਬ੍ਬਨਥੋਤਿ ਨਿਕ੍ਕਿਲੇਸਵਨੋ. ਅਰਤੋਤਿ ਤਣ੍ਹਾਰਤਿਰਹਿਤੋ.
ਪਥਵਿਞ੍ਚ ਵੇਹਾਸਨ੍ਤਿ ਪਥਵਿਟ੍ਠਿਤਞ੍ਚ ਇਤ੍ਥਿਪੁਰਿਸਵਤ੍ਥਾਲਙ੍ਕਾਰਾਦਿਵਣ੍ਣਂ, ਵੇਹਾਸਟ੍ਠਕਞ੍ਚ ਚਨ੍ਦਸੂਰਿਯੋਭਾਸਾਦਿ. ਰੂਪਗਤਨ੍ਤਿ ਰੂਪਮੇਵ. ਜਗਤੋਗਧਨ੍ਤਿ ਜਗਤਿਯਾ ਓਗਧਂ, ਅਨ੍ਤੋਪਥਵਿਯਂ ਨਾਗਭਵਨਗਤਨ੍ਤਿ ਅਤ੍ਥੋ. ਪਰਿਜੀਯਤੀਤਿ ਪਰਿਜੀਰਤਿ. ਸਬ੍ਬਮਨਿਚ੍ਚਨ੍ਤਿ ਸਬ੍ਬਂ ਤਂ ਅਨਿਚ੍ਚਂ. ਅਯਂ ਥੇਰਸ੍ਸ ਮਹਾਵਿਪਸ੍ਸਨਾਤਿ ਵਦਨ੍ਤਿ. ਏਵਂ ਸਮਚ੍ਚਾਤਿ ਏਵਂ ਸਮਾਗਨ੍ਤ੍ਵਾ. ਚਰਨ੍ਤਿ ਮੁਤਤ੍ਤਾਤਿ ਵਿਞ੍ਞਾਤਤ੍ਤਭਾਵਾ ਵਿਹਰਨ੍ਤਿ.
ਉਪਧੀਸੂਤਿ ਖਨ੍ਧਕਿਲੇਸਾਭਿਸਙ੍ਖਾਰੇਸੁ. ਗਧਿਤਾਤਿ ਗਿਦ੍ਧਾ. ਦਿਟ੍ਠਸੁਤੇਤਿ ਚਕ੍ਖੁਨਾ ਦਿਟ੍ਠੇ ਰੂਪੇ, ਸੋਤੇਨ ਸੁਤੇ ਸਦ੍ਦੇ. ਪਟਿਘੇ ਚ ਮੁਤੇ ਚਾਤਿ ਏਤ੍ਥ ਪਟਿਘਪਦੇਨ ਗਨ੍ਧਰਸਾ ਗਹਿਤਾ, ਮੁਤਪਦੇਨ ਫੋਟ੍ਠਬ੍ਬਾਰਮ੍ਮਣਂ. ਯੋ ਏਤ੍ਥ ਨ ਲਿਮ੍ਪਤੀਤਿ ਯੋ ਏਤੇਸੁ ਪਞ੍ਚਕਾਮਗੁਣੇਸੁ ਤਣ੍ਹਾਦਿਟ੍ਠਿਲੇਪੇਹਿ ਨ ਲਿਮ੍ਪਤਿ.
ਅਥ ਸਟ੍ਠਿਨਿਸ੍ਸਿਤਾ ਸਵਿਤਕ੍ਕਾ, ਪੁਥੂ ਜਨਤਾਯ ਅਧਮ੍ਮਾ ਨਿਵਿਟ੍ਠਾਤਿ ਅਥ ਛ ਆਰਮ੍ਮਣਨਿਸ੍ਸਿਤਾ ਪੁਥੂ ਅਧਮ੍ਮਵਿਤਕ੍ਕਾ ਜਨਤਾਯ ਨਿਵਿਟ੍ਠਾਤਿ ਅਤ੍ਥੋ. ਨ ਚ ਵਗ੍ਗਗਤਸ੍ਸ ਕੁਹਿਞ੍ਚੀਤਿ ਤੇਸਂ ਵਸੇਨ ਨ ਕਤ੍ਥਚਿ ਕਿਲੇਸਵਗ੍ਗਗਤੋ ਭਵੇਯ੍ਯ. ਨੋ ਪਨ ਦੁਟ੍ਠੁਲ੍ਲਭਾਣੀਤਿ ਦੁਟ੍ਠੁਲ੍ਲਵਚਨਭਾਣੀਪਿ ਨ ਸਿਯਾ. ਸ ਭਿਕ੍ਖੂਤਿ ਸੋ ਏਵਂਵਿਧੋ ਭਿਕ੍ਖੁ ਨਾਮ ਹੋਤਿ.
ਦਬ੍ਬੋਤਿ ਦਬ੍ਬਜਾਤਿਕੋ ਪਣ੍ਡਿਤੋ. ਚਿਰਰਤ੍ਤਸਮਾਹਿਤੋਤਿ ਦੀਘਰਤ੍ਤਂ ਸਮਾਹਿਤਚਿਤ੍ਤੋ. ਨਿਪਕੋਤਿ ਨੇਪਕ੍ਕੇਨ ਸਮਨ੍ਨਾਗਤੋ ਪਰਿਣਤਪਞ੍ਞੋ. ਅਪਿਹਾਲੂਤਿ ਨਿਤ੍ਤਣ੍ਹੋ. ਸਨ੍ਤਂ ਪਦਨ੍ਤਿ ਨਿਬ੍ਬਾਨਂ. ਅਜ੍ਝਗਮਾ ਮੁਨੀਤਿ ਅਧਿਗਤੋ ਮੁਨਿ. ਪਟਿਚ੍ਚ ਪਰਿਨਿਬ੍ਬੁਤੋ ਕਙ੍ਖਤਿ ਕਾਲਨ੍ਤਿ ਨਿਬ੍ਬਾਨਂ ਪਟਿਚ੍ਚ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ ਪਰਿਨਿਬ੍ਬਾਨਕਾਲਂ ਆਗਮੇਤਿ. ਦੁਤਿਯਂ.
੩. ਪੇਸਲਸੁਤ੍ਤਵਣ੍ਣਨਾ
੨੧੧. ਤਤਿਯੇ ਅਤਿਮਞ੍ਞਤੀਤਿ ‘‘ਕਿਂ ਇਮੇ ਮਹਲ੍ਲਕਾ? ਨ ਏਤੇਸਂ ਪਾਲ਼ਿ, ਨ ਅਟ੍ਠਕਥਾ, ਨ ਪਦਬ੍ਯਞ੍ਜਨਮਧੁਰਤਾ, ਅਮ੍ਹਾਕਂ ਪਨ ਪਾਲ਼ਿਪਿ ਅਟ੍ਠਕਥਾਪਿ ਨਯਸਤੇਨ ਨਯਸਹਸ੍ਸੇਨ ਉਪਟ੍ਠਾਤੀ’’ਤਿ ਅਤਿਕ੍ਕਮਿਤ੍ਵਾ ਮਞ੍ਞਤਿ. ਗੋਤਮਾਤਿ ਗੋਤਮਬੁਦ੍ਧਸਾਵਕਤ੍ਤਾ ਅਤ੍ਤਾਨਂ ਆਲਪਤਿ. ਮਾਨਪਥਨ੍ਤਿ ਮਾਨਾਰਮ੍ਮਣਞ੍ਚੇਵ ਮਾਨਸਹਭੁਨੋ ਚ ਧਮ੍ਮੇ. ਵਿਪ੍ਪਟਿਸਾਰੀਹੁਵਾਤਿ ਵਿਪ੍ਪਟਿਸਾਰੀ ਅਹੁਵਾ, ਅਹੋਸੀਤਿ ਅਤ੍ਥੋ. ਮਗ੍ਗਜਿਨੋਤਿ ਮਗ੍ਗੇਨ ਜਿਤਕਿਲੇਸੋ. ਕਿਤ੍ਤਿਞ੍ਚ ਸੁਖਞ੍ਚਾਤਿ ਵਣ੍ਣਭਣਨਞ੍ਚ ਕਾਯਿਕਚੇਤਸਿਕਸੁਖਞ੍ਚ. ਅਖਿਲੋਧ ਪਧਾਨਵਾਤਿ ਅਖਿਲੋ ਇਧ ਪਧਾਨਵਾ ਵੀਰਿਯਸਮ੍ਪਨ੍ਨੋ. ਵਿਸੁਦ੍ਧੋਤਿ ਵਿਸੁਦ੍ਧੋ ਭਵੇਯ੍ਯ. ਅਸੇਸਨ੍ਤਿ ਨਿਸ੍ਸੇਸਂ ਨਵਵਿਧਂ. ਵਿਜ੍ਜਾਯਨ੍ਤਕਰੋਤਿ ਵਿਜ੍ਜਾਯ ਕਿਲੇਸਾਨਂ ਅਨ੍ਤਕਰੋ. ਸਮਿਤਾਵੀਤਿ ਰਾਗਾਦੀਨਂ ਸਮਿਤਤਾਯ ਸਮਿਤਾਵੀ. ਤਤਿਯਂ.
੪. ਆਨਨ੍ਦਸੁਤ੍ਤਵਣ੍ਣਨਾ
੨੧੨. ਚਤੁਤ੍ਥੇ ਰਾਗੋਤਿ ਆਯਸ੍ਮਾ ਆਨਨ੍ਦੋ ਮਹਾਪੁਞ੍ਞੋ ਸਮ੍ਭਾਵਿਤੋ, ਤਂ ਰਾਜਰਾਜਮਹਾਮਤ੍ਤਾਦਯੋ ਨਿਮਨ੍ਤੇਤ੍ਵਾ ਅਨ੍ਤੋਨਿਵੇਸਨੇ ਨਿਸੀਦਾਪੇਨ੍ਤਿ. ਸਬ੍ਬਾਲਙ੍ਕਾਰਪਟਿਮਣ੍ਡਿਤਾਪਿ ਇਤ੍ਥਿਯੋ ਥੇਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਤਾਲਵਣ੍ਟੇਨ ਬੀਜੇਨ੍ਤਿ, ਉਪਨਿਸੀਦਿਤ੍ਵਾ ਪਞ੍ਹਂ ਪੁਚ੍ਛਨ੍ਤਿ ਧਮ੍ਮਂ ਸੁਣਨ੍ਤਿ. ਤਤ੍ਥ ਆਯਸ੍ਮਤੋ ਵਙ੍ਗੀਸਸ੍ਸ ਨਵਪਬ੍ਬਜਿਤਸ੍ਸ ਆਰਮ੍ਮਣਂ ਪਰਿਗ੍ਗਹੇਤੁਂ ਅਸਕ੍ਕੋਨ੍ਤਸ੍ਸ ਇਤ੍ਥਿਰੂਪਾਰਮ੍ਮਣੇ ਰਾਗੋ ਚਿਤ੍ਤਂ ਅਨੁਦ੍ਧਂਸੇਤਿ. ਸੋ ਸਦ੍ਧਾਪਬ੍ਬਜਿਤਤ੍ਤਾ ਉਜੁਜਾਤਿਕੋ ਕੁਲਪੁਤ੍ਤੋ ‘‘ਅਯਂ ਮੇ ਰਾਗੋ ਵਡ੍ਢਿਤ੍ਵਾ ਦਿਟ੍ਠਧਮ੍ਮਿਕਸਮ੍ਪਰਾਯਿਕਂ ਅਤ੍ਥਂ ਨਾਸੇਯ੍ਯਾ’’ਤਿ ਚਿਨ੍ਤੇਤ੍ਵਾ ਅਨਨ੍ਤਰਂ ਨਿਸਿਨ੍ਨੋਵ ਥੇਰਸ੍ਸ ਅਤ੍ਤਾਨਂ ਆਵਿਕਰੋਨ੍ਤੋ ਕਾਮਰਾਗੇਨਾਤਿਆਦਿਮਾਹ.
ਤਤ੍ਥ ਨਿਬ੍ਬਾਪਨਨ੍ਤਿ ਰਾਗਨਿਬ੍ਬਾਨਕਾਰਣਂ. ਵਿਪਰਿਯੇਸਾਤਿ ਵਿਪਲ੍ਲਾਸੇਨ. ਸੁਭਂ ਰਾਗੂਪਸਞ੍ਹਿਤਨ੍ਤਿ ਰਾਗਟ੍ਠਾਨਿਯਂ ਇਟ੍ਠਾਰਮ੍ਮਣਂ. ਪਰਤੋ ਪਸ੍ਸਾਤਿ ਅਨਿਚ੍ਚਤੋ ਪਸ੍ਸ. ਮਾ ਚ ਅਤ੍ਤਤੋਤਿ ਅਤ੍ਤਤੋ ਮਾ ਪਸ੍ਸ. ਕਾਯਗਤਾ ਤ੍ਯਤ੍ਥੂਤਿ ਕਾਯਗਤਾ ਤੇ ਅਤ੍ਥੁ. ਅਨਿਮਿਤ੍ਤਞ੍ਚ ਭਾਵੇਹੀਤਿ ਨਿਚ੍ਚਾਦੀਨਂ ਨਿਮਿਤ੍ਤਾਨਂ ਉਗ੍ਘਾਟਿਤਤ੍ਤਾ ਵਿਪਸ੍ਸਨਾ ਅਨਿਮਿਤ੍ਤਾ ਨਾਮ, ਤਂ ਭਾਵੇਹੀਤਿ ਵਦਤਿ. ਮਾਨਾਭਿਸਮਯਾਤਿ ਮਾਨਸ੍ਸ ਦਸ੍ਸਨਾਭਿਸਮਯਾ ਚੇਵ ਪਹਾਨਾਭਿਸਮਯਾ ਚ. ਉਪਸਨ੍ਤੋਤਿ ਰਾਗਾਦਿਸਨ੍ਤਤਾਯ ਉਪਸਨ੍ਤੋ. ਚਤੁਤ੍ਥਂ.
੫. ਸੁਭਾਸਿਤਸੁਤ੍ਤਵਣ੍ਣਨਾ
੨੧੩. ਪਞ੍ਚਮੇ ਅਙ੍ਗੇਹੀਤਿ ਕਾਰਣੇਹਿ, ਅਵਯਵੇਹਿ ਵਾ. ਮੁਸਾਵਾਦਾਵੇਰਮਣਿਆਦੀਨਿ ਹਿ ਚਤ੍ਤਾਰਿ ਸੁਭਾਸਿਤਵਾਚਾਯ ਕਾਰਣਾਨਿ, ਸਚ੍ਚਵਚਨਾਦਯੋ ਚਤ੍ਤਾਰੋ ਅਵਯਵਾ. ਕਾਰਣਤ੍ਥੇ ਚ ਅਙ੍ਗਸਦ੍ਦੇ ‘‘ਚਤੂਹੀ’’ਤਿ ਨਿਸ੍ਸਕ੍ਕਵਚਨਂ ਹੋਤਿ, ਅਵਯਵਤ੍ਥੇ ਕਰਣਵਚਨਂ. ਸਮਨ੍ਨਾਗਤਾਤਿ ਸਮਨੁਆਗਤਾ ਪਵਤ੍ਤਾ ਯੁਤ੍ਤਾ ਚ. ਵਾਚਾਤਿ ਸਮੁਲ੍ਲਪਨਵਾਚਾ, ਯਾ ‘‘ਵਾਚਾ ਗਿਰਾ ਬ੍ਯਪ੍ਪਥੋ’’ਤਿ (ਧ. ਸ. ੬੩੬) ਚ, ‘‘ਨੇਲਾ ਕਣ੍ਣਸੁਖਾ’’ਤਿ (ਦੀ. ਨਿ. ੧.੯) ਚ ਆਗਤਾ. ‘‘ਯਾ ਪਨ ਵਾਚਾਯ ਚੇ ਕਤਂ ਕਮ੍ਮ’’ਨ੍ਤਿ ਏਵਂ ਵਿਞ੍ਞਤ੍ਤਿ ਚ ‘‘ਯਾ ਚਤੂਹਿ ਵਚੀਦੁਚ੍ਚਰਿਤੇਹਿ ਆਰਤਿ…ਪੇ… ਅਯਂ ਵੁਚ੍ਚਤਿ ਸਮ੍ਮਾਵਾਚਾ’’ਤਿ (ਵਿਭ. ੨੦੬) ਏਵਂ ਵਿਰਤਿ ਚ, ‘‘ਫਰੁਸਵਾਚਾ, ਭਿਕ੍ਖਵੇ, ਆਸੇਵਿਤਾ ਭਾਵਿਤਾ ਬਹੁਲੀਕਤਾ ਨਿਰਯਸਂਵਤ੍ਤਨਿਕਾ ਹੋਤੀ’’ਤਿ (ਅ. ਨਿ. ੮.੪੦) ਏਵਂ ਚੇਤਨਾ ਚ ਵਾਚਾਤਿ ਆਗਤਾ, ਨ ਸਾ ਇਧ ਅਧਿਪ੍ਪੇਤਾ. ਕਸ੍ਮਾ? ਅਭਾਸਿਤਬ੍ਬਤੋ. ਸੁਭਾਸਿਤਾਤਿ ਸੁਟ੍ਠੁ ਭਾਸਿਤਾ. ਤੇਨਸ੍ਸਾ ਅਤ੍ਥਾਵਹਤਂ ਦੀਪੇਤਿ. ਨੋ ਦੁਬ੍ਭਾਸਿਤਾਤਿ ਨ ਦੁਟ੍ਠੁ ਭਾਸਿਤਾ. ਤੇਨਸ੍ਸਾ ਅਨਤ੍ਥਾਵਹਨਪਹਾਨਤਂ ਦੀਪੇਤਿ. ਅਨਵਜ੍ਜਾਤਿ ਰਾਗਾਦਿਵਜ੍ਜਰਹਿਤਾ. ਇਮਿਨਾਸ੍ਸਾ ਕਾਰਣਸੁਦ੍ਧਿਂ ਚਤੁਦੋਸਾਭਾਵਞ੍ਚ ਦੀਪੇਤਿ. ਅਨਨੁਵਜ੍ਜਾਤਿ ਅਨੁਵਾਦਵਿਮੁਤ੍ਤਾ. ਇਮਿਨਾਸ੍ਸਾ ਸਬ੍ਬਾਕਾਰਸਮ੍ਪਤ੍ਤਿਂ ਦੀਪੇਤਿ. ਵਿਞ੍ਞੂਨਨ੍ਤਿ ਪਣ੍ਡਿਤਾਨਂ. ਤੇਨ ਨਿਨ੍ਦਾਪਸਂਸਾਸੁ ਬਾਲਾ ਅਪ੍ਪਮਾਣਾਤਿ ਦੀਪੇਤਿ.
ਸੁਭਾਸਿਤਂਯੇਵ ਭਾਸਤੀਤਿ ਪੁਗ੍ਗਲਾਧਿਟ੍ਠਾਨਾਯ ਦੇਸਨਾਯ ਚਤੂਸੁ ਵਾਚਙ੍ਗੇਸੁ ਅਞ੍ਞਤਰਨਿਦ੍ਦੋਸਵਚਨਮੇਤਂ. ਨੋ ਦੁਬ੍ਭਾਸਿਤਨ੍ਤਿ ਤਸ੍ਸੇਵ ਵਾਚਙ੍ਗਸ੍ਸ ਪਟਿਪਕ੍ਖਭਾਸਨਨਿਵਾਰਣਂ. ਨੋ ਦੁਬ੍ਭਾਸਿਤਨ੍ਤਿ ਇਮਿਨਾ ਮਿਚ੍ਛਾਵਾਚਪ੍ਪਹਾਨਂ ਦੀਪੇਤਿ. ਸੁਭਾਸਿਤਨ੍ਤਿ ਇਮਿਨਾ ਪਹੀਨਮਿਚ੍ਛਾਵਾਚੇਨ ਭਾਸਿਤਬ੍ਬਵਚਨਲਕ੍ਖਣਂ. ਅਙ੍ਗਪਰਿਦੀਪਨਤ੍ਥਂ ਪਨੇਤ੍ਥ ਅਭਾਸਿਤਬ੍ਬਂ ਪੁਬ੍ਬੇ ਅਵਤ੍ਵਾ ਭਾਸਿਤਬ੍ਬਮੇਵਾਹ. ਏਸ ਨਯੋ ਧਮ੍ਮਂਯੇਵਾਤਿਆਦੀਸੁਪਿ. ਏਤ੍ਥ ਚ ਪਠਮੇਨ ਪਿਸੁਣਦੋਸਰਹਿਤਂ ਸਮਗ੍ਗਕਰਣਂ ਵਚਨਂ ਵੁਤ੍ਤਂ, ਦੁਤਿਯੇਨ ਸਮ੍ਫਪ੍ਪਲਾਪਦੋਸਰਹਿਤਂ ਧਮ੍ਮਤੋ ਅਨਪੇਤਂ ਮਨ੍ਤਾਵਚਨਂ, ਇਤਰੇਹਿ ਦ੍ਵੀਹਿ ਫਰੁਸਾਲਿਕਰਹਿਤਾਨਿ ਪਿਯਸਚ੍ਚਵਚਨਾਨਿ. ਇਮੇਹਿ ਖੋਤਿ ਆਦਿਨਾ ਤਾਨਿ ਅਙ੍ਗਾਨਿ ਪਚ੍ਚਕ੍ਖਤੋ ਦਸ੍ਸੇਨ੍ਤੋ ਤਂ ਵਾਚਂ ਨਿਗਮੇਤਿ. ਯਞ੍ਚ ਅਞ੍ਞੇ ਪਟਿਞ੍ਞਾਦੀਹਿ ਅਵਯਵੇਹਿ, ਨਾਮਾਦੀਹਿ ਪਦੇਹਿ, ਲਿਙ੍ਗਵਚਨਵਿਭਤ੍ਤਿਕਾਲਕਾਰਕਸਮ੍ਪਤ੍ਤੀਹਿ ਚ ਸਮਨ੍ਨਾਗਤਂ ਮੁਸਾਵਾਦਾਦਿਵਾਚਮ੍ਪਿ ਸੁਭਾਸਿਤਨ੍ਤਿ ਮਞ੍ਞਨ੍ਤਿ, ਤਂ ਪਟਿਸੇਧੇਤਿ. ਅਵਯਵਾਦਿਸਮਨ੍ਨਾਗਤਾਪਿ ਹਿ ਤਥਾਰੂਪੀ ਵਾਚਾ ਦੁਬ੍ਭਾਸਿਤਾਵ ਹੋਤਿ ਅਤ੍ਤਨੋ ਚ ਪਰੇਸਞ੍ਚ ਅਨਤ੍ਥਾਵਹਤ੍ਤਾ. ਇਮੇਹਿ ਪਨ ਚਤੂਹਙ੍ਗੇਹਿ ਸਮਨ੍ਨਾਗਤਾ ਸਚੇਪਿ ਮਿਲਕ੍ਖੁਭਾਸਾਪਰਿਯਾਪਨ੍ਨਾ ਘਟਚੇਟਿਕਾਗੀਤਿਕਪਰਿਯਾਪਨ੍ਨਾਪਿ ਹੋਤਿ, ਤਥਾਪਿ ਸੁਭਾਸਿਤਾਵ ਲੋਕਿਯਲੋਕੁਤ੍ਤਰਹਿਤਸੁਖਾਵਹਤ੍ਤਾ. ਤਥਾ ਹਿ ਮਗ੍ਗਪਸ੍ਸੇ ਸਸ੍ਸਂ ਰਕ੍ਖਨ੍ਤਿਯਾ ਸੀਹਲ਼ਚੇਟਿਕਾਯ ਸੀਹਲ਼ਕੇਨੇਵ ਜਾਤਿਜਰਾਮਰਣਯੁਤ੍ਤਂ ਗੀਤਿਕਂ ਗਾਯਨ੍ਤਿਯਾ ਸਦ੍ਦਂ ਸੁਤ੍ਵਾ ਮਗ੍ਗਂ ਗਚ੍ਛਨ੍ਤਾ ਸਟ੍ਠਿਮਤ੍ਤਾ ਵਿਪਸ੍ਸਕਾ ਭਿਕ੍ਖੂ ਅਰਹਤ੍ਤਂ ਪਾਪੁਣਿਂਸੁ. ਤਥਾ ਤਿਸ੍ਸੋ ਨਾਮ ਆਰਦ੍ਧਵਿਪਸ੍ਸਕੋ ਭਿਕ੍ਖੁ ਪਦੁਮਸਰਸਮੀਪੇਨ ਗਚ੍ਛਨ੍ਤੋ ਪਦੁਮਸਰੇ ਪਦੁਮਾਨਿ ਭਞ੍ਜਿਤ੍ਵਾ –
‘‘ਪਾਤੋਵ ਫੁਲ੍ਲਿਤਕੋਕਨਦਂ, ਸੂਰਿਯਾਲੋਕੇਨ ਭਿਜ੍ਜਿਯਤੇ;
ਏਵਂ ਮਨੁਸ੍ਸਤ੍ਤਂ ਗਤਾ ਸਤ੍ਤਾ, ਜਰਾਭਿਵੇਗੇਨ ਮਦ੍ਦਿਯਨ੍ਤੀ’’ਤਿ. –
ਇਮਂ ਗੀਤਿਕਂ ਗਾਯਨ੍ਤਿਯਾ ਚੇਟਿਕਾਯ ਸੁਤ੍ਵਾ ਅਰਹਤ੍ਤਂ ਪਤ੍ਤੋ.
ਬੁਦ੍ਧਨ੍ਤਰੇਪਿ ਅਞ੍ਞਤਰੋ ਪੁਰਿਸੋ ਸਤ੍ਤਹਿ ਪੁਤ੍ਤੇਹਿ ਸਦ੍ਧਿਂ ਅਟਵਿਤੋ ਆਗਮ੍ਮ ਅਞ੍ਞਤਰਾਯ ਇਤ੍ਥਿਯਾ ਮੁਸਲੇਨ ਤਣ੍ਡੁਲੇ ਕੋਟ੍ਟੇਨ੍ਤਿਯਾ –
‘‘ਜਰਾਯ ਪਰਿਮਦ੍ਦਿਤਂ ਏਤਂ, ਮਿਲਾਤਛਵਿਚਮ੍ਮਨਿਸ੍ਸਿਤਂ;
ਮਰਣੇਨ ਭਿਜ੍ਜਤਿ ਏਤਂ, ਮਚ੍ਚੁਸ੍ਸ ਘਾਸਮਾਮਿਸਂ.
‘‘ਕਿਮੀਨਂ ਆਲਯਂ ਏਤਂ, ਨਾਨਾਕੁਣਪੇਨ ਪੂਰਿਤਂ;
ਅਸੁਚਿਸ੍ਸ ਭਾਜਨਂ ਏਤਂ, ਕਦਲਿਕ੍ਖਨ੍ਧਸਮਂ ਇਦ’’ਨ੍ਤਿ. –
ਇਮਂ ਗੀਤਿਕਂ ਸੁਤ੍ਵਾ ਪਚ੍ਚਵੇਕ੍ਖਨ੍ਤੋ ਸਹ ਪੁਤ੍ਤੇਹਿ ਪਚ੍ਚੇਕਬੋਧਿਂ ਪਤ੍ਤੋ. ਏਵਂ ਇਮੇਹਿ ਚਤੂਹਿ ਅਙ੍ਗੇਹਿ ਸਮਨ੍ਨਾਗਤਾ ਵਾਚਾ ਸਚੇਪਿ ਮਿਲਕ੍ਖੁਭਾਸਾਪਰਿਯਾਪਨ੍ਨਾ ਘਟਚੇਟਿਕਾਗੀਤਿਕਪਰਿਯਾਪਨ੍ਨਾਪਿ ਹੋਤਿ, ਤਥਾਪਿ ਸੁਭਾਸਿਤਾਤਿ ਵੇਦਿਤਬ੍ਬਾ. ਸੁਭਾਸਿਤਤ੍ਤਾ ਏਵ ਚ ਅਨਵਜ੍ਜਾ ਚ ਅਨਨੁਵਜ੍ਜਾ ਚ ਵਿਞ੍ਞੂਨਂ ਅਤ੍ਥਤ੍ਥਿਕਾਨਂ ਅਤ੍ਥਪਟਿਸਰਣਾਨਂ, ਨੋ ਬ੍ਯਞ੍ਜਨਪਟਿਸਰਣਾਨਨ੍ਤਿ.
ਸਾਰੁਪ੍ਪਾਹੀਤਿ ਅਨੁਚ੍ਛਵਿਕਾਹਿ. ਅਭਿਤ੍ਥਵੀਤਿ ਪਸਂਸਿ. ਨ ਤਾਪਯੇਤਿ ਵਿਪ੍ਪਟਿਸਾਰੇਨ ਨ ਤਾਪੇਯ੍ਯ ਨ ਵਿਬਾਧੇਯ੍ਯ. ਪਰੇਤਿ ਪਰੇਹਿ ਭਿਨ੍ਦਨ੍ਤੋ ਨਾਭਿਭਵੇਯ੍ਯ ਨ ਬਾਧੇਯ੍ਯ. ਇਤਿ ਇਮਾਯ ਗਾਥਾਯ ਅਪਿਸੁਣਵਾਚਾਵਸੇਨ ਭਗਵਨ੍ਤਂ ਥੋਮੇਤਿ. ਪਟਿਨਨ੍ਦਿਤਾਤਿ ਪਿਯਾਯਿਤਾ. ਯਂ ਅਨਾਦਾਯਾਤਿ ਯਂ ਵਾਚਂ ਭਾਸਨ੍ਤੋ ਪਰੇਸਂ ਪਾਪਾਨਿ ਅਪ੍ਪਿਯਾਨਿ ਫਰੁਸਵਚਨਾਨਿ ਅਨਾਦਾਯ ਅਤ੍ਥਬ੍ਯਞ੍ਜਨਮਧੁਰਂ ਪਿਯਮੇਵ ਭਾਸਤਿ, ਤਂ ਵਾਚਂ ਭਾਸੇਯ੍ਯਾਤਿ ਪਿਯਵਾਚਾਵਸੇਨ ਅਭਿਤ੍ਥਵਿ.
ਅਮਤਾਤਿ ਸਾਧੁਭਾਵੇਨ ਅਮਤਸਦਿਸਾ. ਵੁਤ੍ਤਮ੍ਪਿ ਹੇਤਂ – ‘‘ਸਚ੍ਚਂ ਹਵੇ ਸਾਦੁਤਰਂ ਰਸਾਨ’’ਨ੍ਤਿ (ਸਂ. ਨਿ. ੧.੨੪੬) ਨਿਬ੍ਬਾਨਾਮਤਪਚ੍ਚਯਤ੍ਤਾ ਵਾ ਅਮਤਾ. ਏਸ ਧਮ੍ਮੋ ਸਨਨ੍ਤਨੋਤਿ ਯਾ ਅਯਂ ਸਚ੍ਚਵਾਚਾ ਨਾਮ, ਏਸ ਪੋਰਾਣੋ ਧਮ੍ਮੋ ਚਰਿਯਾ ਪਵੇਣੀ. ਇਦਮੇਵ ਹਿ ਪੋਰਾਣਾਨਂ ਆਚਿਣ੍ਣਂ, ਨ ਤੇ ਅਲਿਕਂ ਭਾਸਿਂਸੁ. ਤੇਨੇਵਾਹ – ਸਚ੍ਚੇ ਅਤ੍ਥੇ ਚ ਧਮ੍ਮੇ ਚ, ਆਹੁ ਸਨ੍ਤੋ ਪਤਿਟ੍ਠਿਤਾਤਿ.
ਤਤ੍ਥ ਸਚ੍ਚੇ ਪਤਿਟ੍ਠਿਤਤ੍ਤਾਵ ਅਤ੍ਤਨੋ ਚ ਪਰੇਸਞ੍ਚ ਅਤ੍ਥੇ ਪਤਿਟ੍ਠਿਤਾ, ਅਤ੍ਥੇ ਪਤਿਟ੍ਠਿਤਤ੍ਤਾ ਏਵ ਧਮ੍ਮੇ ਪਤਿਟ੍ਠਿਤਾ ਹੋਨ੍ਤੀਤਿ ਵੇਦਿਤਬ੍ਬਾ. ਸਚ੍ਚਵਿਸੇਸਨਮੇਵ ਵਾ ਏਤਂ. ਇਦਂ ਹਿ ਵੁਤ੍ਤਂ ਹੋਤਿ – ਸਚ੍ਚੇ ਪਤਿਟ੍ਠਿਤਾ, ਕੀਦਿਸੇ? ਅਤ੍ਥੇ ਚ ਧਮ੍ਮੇ ਚ, ਯਂ ਪਰੇਸਂ ਅਤ੍ਥਤੋ ਅਨਪੇਤਤ੍ਤਾ ਅਤ੍ਥਂ ਅਨੁਪਰੋਧਕਰਂ, ਧਮ੍ਮਤੋ ਅਨਪੇਤਤ੍ਤਾ ਧਮ੍ਮਂ ਧਮ੍ਮਿਕਮੇਵ ਅਤ੍ਥਂ ਸਾਧੇਤੀਤਿ. ਇਤਿ ਇਮਾਯ ਗਾਥਾਯ ਸਚ੍ਚਵਚਨਵਸੇਨ ਅਭਿਤ੍ਥਵਿ.
ਖੇਮਨ੍ਤਿ ਅਭਯਂ ਨਿਰੁਪਦ੍ਦਵਂ. ਕੇਨ ਕਾਰਣੇਨਾਤਿ ਚੇ. ਨਿਬ੍ਬਾਨਪਤ੍ਤਿਯਾ ਦੁਕ੍ਖਸ੍ਸਨ੍ਤਕਿਰਿਯਾਯ, ਯਸ੍ਮਾ ਕਿਲੇਸਨਿਬ੍ਬਾਨਂ ਪਾਪੇਤਿ, ਵਟ੍ਟਦੁਕ੍ਖਸ੍ਸ ਚ ਅਨ੍ਤਕਿਰਿਯਾਯ ਸਂਵਤ੍ਤਤੀਤਿ ਅਤ੍ਥੋ. ਅਥ ਵਾ ਯਂ ਬੁਦ੍ਧੋ ਨਿਬ੍ਬਾਨਪਤ੍ਤਿਯਾ ਦੁਕ੍ਖਸ੍ਸਨ੍ਤਕਿਰਿਯਾਯਾਤਿ ਦ੍ਵਿਨ੍ਨਂ ਨਿਬ੍ਬਾਨਧਾਤੂਨਂ ਅਤ੍ਥਾਯ ਖੇਮਮਗ੍ਗਪ੍ਪਕਾਸਨਤੋ ਖੇਮਂ ਵਾਚਂ ਭਾਸਤਿ, ਸਾ ਵੇ ਵਾਚਾਨਮੁਤ੍ਤਮਾਤਿ ਸਾ ਵਾਚਾ ਸਬ੍ਬਵਾਚਾਨਂ ਸੇਟ੍ਠਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਇਤਿ ਇਮਾਯ ਗਾਥਾਯ ਮਨ੍ਤਾਵਚਨਵਸੇਨ ਭਗਵਨ੍ਤਂ ਅਭਿਤ੍ਥਵਨ੍ਤੋ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਪੇਸੀਤਿ. ਪਞ੍ਚਮਂ.
੬. ਸਾਰਿਪੁਤ੍ਤਸੁਤ੍ਤਵਣ੍ਣਨਾ
੨੧੪. ਛਟ੍ਠੇ ਪੋਰਿਯਾਤਿ ਅਕ੍ਖਰਾਦਿਪਰਿਪੁਣ੍ਣਾਯ. ਵਿਸ੍ਸਟ੍ਠਾਯਾਤਿ ਅਵਿਬਦ੍ਧਾਯ ਅਪਲਿਬੁਦ੍ਧਾਯ. ਧਮ੍ਮਸੇਨਾਪਤਿਸ੍ਸ ਹਿ ਕਥੇਨ੍ਤਸ੍ਸ ਪਿਤ੍ਤਾਦੀਨਂ ਵਸੇਨ ਅਪਲਿਬੁਦ੍ਧਵਚਨਂ ਹੋਤਿ, ਅਯਦਣ੍ਡੇਨ ਪਹਤਕਂਸਤਾਲਤੋ ਸਦ੍ਦੋ ਵਿਯ ਨਿਚ੍ਛਰਤਿ. ਅਨੇਲਗਲਾਯਾਤਿ ਅਨੇਲਾਯ ਅਗਲਾਯ ਨਿਦ੍ਦੋਸਾਯ ਚੇਵ ਅਕ੍ਖਲਿਤਪਦਬ੍ਯਞ੍ਜਨਾਯ ਚ. ਥੇਰਸ੍ਸ ਹਿ ਕਥਯਤੋ ਪਦਂ ਵਾ ਬ੍ਯਞ੍ਜਨਂ ਵਾ ਨ ਪਰਿਹਾਯਤਿ. ਅਤ੍ਥਸ੍ਸ ਵਿਞ੍ਞਾਪਨਿਯਾਤਿ ਅਤ੍ਥਸ੍ਸ ਵਿਞ੍ਞਾਪਨਸਮਤ੍ਥਾਯ. ਭਿਕ੍ਖੁਨਨ੍ਤਿ ਭਿਕ੍ਖੂਨਂ.
ਸਂਖਿਤ੍ਤੇਨਪੀਤਿ ‘‘ਚਤ੍ਤਾਰਿਮਾਨਿ, ਆਵੁਸੋ, ਅਰਿਯਸਚ੍ਚਾਨਿ. ਕਤਮਾਨਿ ਚਤ੍ਤਾਰਿ? ਦੁਕ੍ਖਂ ਅਰਿਯਸਚ੍ਚਂ…ਪੇ… ਇਮਾਨਿ ਖੋ, ਆਵੁਸੋ, ਚਤ੍ਤਾਰਿ ਅਰਿਯਸਚ੍ਚਾਨਿ, ਤਸ੍ਮਾਤਿਹ, ਆਵੁਸੋ, ਇਦਂ ਦੁਕ੍ਖਂ ਅਰਿਯਸਚ੍ਚਨ੍ਤਿ ਯੋਗੋ ਕਰਣੀਯੋ’’ਤਿ (ਸਂ. ਨਿ. ੫.੧੦੯੬-੧੦੯੮) ਏਵਂ ਸਂਖਿਤ੍ਤੇਨਪਿ ਦੇਸੇਤਿ. ਵਿਤ੍ਥਾਰੇਨਪੀਤਿ ‘‘ਕਤਮਂ, ਆਵੁਸੋ, ਦੁਕ੍ਖਂ ਅਰਿਯਸਚ੍ਚ’’ਨ੍ਤਿਆਦਿਨਾ (ਮ. ਨਿ. ੩.੩੭੩) ਨਯੇਨ ਤਾਨੇਵ ਵਿਭਜਨ੍ਤੋ ਵਿਤ੍ਥਾਰੇਨਪਿ ਭਾਸਤਿ. ਖਨ੍ਧਾਦਿਦੇਸਨਾਸੁਪਿ ਏਸੇਵ ਨਯੋ. ਸਾਲ਼ਿਕਾਯਿਵ ਨਿਗ੍ਘੋਸੋਤਿ ਯਥਾ ਮਧੁਰਂ ਅਮ੍ਬਪਕ੍ਕਂ ਸਾਯਿਤ੍ਵਾ ਪਕ੍ਖੇਹਿ ਵਾਤਂ ਦਤ੍ਵਾ ਮਧੁਰਸ੍ਸਰਂ ਨਿਚ੍ਛਾਰੇਨ੍ਤਿਯਾ ਸਾਲ਼ਿਕਸਕੁਣਿਯਾ ਨਿਗ੍ਘੋਸੋ, ਏਵਂ ਥੇਰਸ੍ਸ ਧਮ੍ਮਂ ਕਥੇਨ੍ਤਸ੍ਸ ਮਧੁਰੋ ਨਿਗ੍ਘੋਸੋ ਹੋਤਿ. ਪਟਿਭਾਨਂ ਉਦੀਰਯੀਤਿ ਸਮੁਦ੍ਦਤੋ ਊਮਿਯੋ ਵਿਯ ਅਨਨ੍ਤਂ ਪਟਿਭਾਨਂ ਉਟ੍ਠਹਤਿ. ਓਧੇਨ੍ਤੀਤਿ ਓਦਹਨ੍ਤਿ. ਛਟ੍ਠਂ.
੭. ਪਵਾਰਣਾਸੁਤ੍ਤਵਣ੍ਣਨਾ
੨੧੫. ਸਤ੍ਤਮੇ ਤਦਹੂਤਿ ਤਸ੍ਮਿਂ ਅਹੁ, ਤਸ੍ਮਿਂ ਦਿਵਸੇਤਿ ਅਤ੍ਥੋ. ਉਪਵਸਨ੍ਤਿ ਏਤ੍ਥਾਤਿ ਉਪੋਸਥੋ. ਉਪਵਸਨ੍ਤੀਤਿ ਚ ਸੀਲੇਨ ਵਾ ਅਨਸਨੇਨ ਵਾ ਉਪੇਤਾ ਹੁਤ੍ਵਾ ਵਸਨ੍ਤੀਤਿ ਅਤ੍ਥੋ. ਸੋ ਪਨੇਸ ਉਪੋਸਥਦਿਵਸੋ ਅਟ੍ਠਮੀਚਾਤੁਦ੍ਦਸੀਪਨ੍ਨਰਸੀਭੇਦੇਨ ਤਿਵਿਧੋ, ਤਸ੍ਮਾ ਸੇਸਦ੍ਵਯਨਿਵਾਰਣਤ੍ਥਂ ਪਨ੍ਨਰਸੇਤਿ ਵੁਤ੍ਤਂ. ਪਵਾਰਣਾਯਾਤਿ ਵਸ੍ਸਂ-ਵੁਟ੍ਠ-ਪਵਾਰਣਾਯ. ਵਿਸੁਦ੍ਧਿਪਵਾਰਣਾਤਿਪਿ ਏਤਿਸ੍ਸਾਵ ਨਾਮਂ. ਨਿਸਿਨ੍ਨੋ ਹੋਤੀਤਿ ਸਾਯਨ੍ਹਸਮਯੇ ਸਮ੍ਪਤ੍ਤਪਰਿਸਾਯ ਕਾਲਯੁਤ੍ਤਂ ਧਮ੍ਮਂ ਦੇਸੇਤ੍ਵਾ ਉਦਕਕੋਟ੍ਠਕੇ ਗਤ੍ਤਾਨਿ ਪਰਿਸਿਞ੍ਚਿਤ੍ਵਾ ਨਿਵਤ੍ਥਨਿਵਾਸਨੋ ਏਕਂਸਂ ਸੁਗਤਮਹਾਚੀਵਰਂ ਕਤ੍ਵਾ ਮਜ੍ਝਿਮਤ੍ਥਮ੍ਭਂ ਨਿਸ੍ਸਾਯ ਪਞ੍ਞਤ੍ਤੇ ਵਰਬੁਦ੍ਧਾਸਨੇ ਪੁਰਤ੍ਥਿਮਦਿਸਾਯ ਉਟ੍ਠਹਤੋ ਚਨ੍ਦਮਣ੍ਡਲਸ੍ਸ ਸਿਰਿਂ ਸਿਰਿਯਾ ਅਭਿਭਵਮਾਨੋ ਨਿਸਿਨ੍ਨੋ ਹੋਤਿ. ਤੁਣ੍ਹੀਭੂਤਂ ਤੁਣ੍ਹੀਭੂਤਨ੍ਤਿ ਯਤੋ ਯਤੋ ਅਨੁਵਿਲੋਕੇਤਿ, ਤਤੋ ਤਤੋ ਤੁਣ੍ਹੀਭੂਤਮੇਵ. ਤਤ੍ਥ ਹਿ ਏਕਭਿਕ੍ਖੁਸ੍ਸਾਪਿ ਹਤ੍ਥਕੁਕ੍ਕੁਚ੍ਚਂ ਵਾ ਪਾਦਕੁਕ੍ਕੁਚ੍ਚਂ ਵਾ ਨਤ੍ਥਿ, ਸਬ੍ਬੇ ਨਿਰਵਾ ਸਨ੍ਤੇਨ ਇਰਿਯਾਪਥੇਨ ਨਿਸੀਦਿਂਸੁ. ਅਨੁਵਿਲੋਕੇਤ੍ਵਾਤਿ ਦਿਸ੍ਸਮਾਨਪਞ੍ਚਪਸਾਦੇਹਿ ਨੇਤ੍ਤੇਹਿ ਅਨੁਵਿਲੋਕੇਤ੍ਵਾ. ਹਨ੍ਦਾਤਿ ਵੋਸ੍ਸਗ੍ਗਤ੍ਥੇ ਨਿਪਾਤੋ. ਨ ਚ ਮੇ ਕਿਞ੍ਚਿ ਗਰਹਥਾਤਿ ਏਤ੍ਥ ਨ ਚ ਕਿਞ੍ਚੀਤਿ ਪੁਚ੍ਛਨਤ੍ਥੇ ਨ-ਕਾਰੋ. ਕਿਂ ਮੇ ਕਿਞ੍ਚਿ ਗਰਹਥ? ਯਦਿ ਗਰਹਥ, ਵਦਥ, ਇਚ੍ਛਾਪੇਮਿ ਵੋ ਵਤ੍ਤੁਨ੍ਤਿ ਅਤ੍ਥੋ. ਕਾਯਿਕਂ ਵਾ ਵਾਚਸਿਕਂ ਵਾਤਿ ਇਮਿਨਾ ਕਾਯਵਚੀਦ੍ਵਾਰਾਨੇਵ ਪਵਾਰੇਤਿ, ਨ ਮਨੋਦ੍ਵਾਰਂ. ਕਸ੍ਮਾ? ਅਪਾਕਟਤ੍ਤਾ. ਕਾਯਵਚੀਦ੍ਵਾਰੇਸੁ ਹਿ ਦੋਸੋ ਪਾਕਟੋ ਹੋਤਿ, ਨ ਮਨੋਦ੍ਵਾਰੇ. ‘‘ਏਕਮਞ੍ਚੇ ਸਯਤੋਪਿ ਹਿ ਕਿਂ ਚਿਨ੍ਤੇਸੀ’’ਤਿ? ਪੁਚ੍ਛਿਤ੍ਵਾ ਚਿਤ੍ਤਾਚਾਰਂ ਜਾਨਾਤਿ. ਇਤਿ ਮਨੋਦ੍ਵਾਰਂ ਅਪਾਕਟਤ੍ਤਾ ਨ ਪਵਾਰੇਤਿ, ਨੋ ਅਪਰਿਸੁਦ੍ਧਤ੍ਤਾ. ਬੋਧਿਸਤ੍ਤਭੂਤਸ੍ਸਾਪਿ ਹਿ ਤਸ੍ਸ ਭੂਰਿਦਤ੍ਤਛਦ੍ਦਨ੍ਤਸਙ੍ਖਪਾਲਧਮ੍ਮਪਾਲਾਦਿਕਾਲੇ ਮਨੋਦ੍ਵਾਰਂ ਪਰਿਸੁਦ੍ਧਂ, ਇਦਾਨੇਤ੍ਥ ਵਤ੍ਤਬ੍ਬਮੇਵ ਨਤ੍ਥਿ.
ਏਤਦਵੋਚਾਤਿ ਧਮ੍ਮਸੇਨਾਪਤਿਟ੍ਠਾਨੇ ਠਿਤਤ੍ਤਾ ਭਿਕ੍ਖੁਸਙ੍ਘਸ੍ਸ ਭਾਰਂ ਵਹਨ੍ਤੋ ਏਤਂ ਅਵੋਚ. ਨ ਖੋ ਮਯਂ, ਭਨ੍ਤੇਤਿ, ਭਨ੍ਤੇ, ਮਯਂ ਭਗਵਤੋ ਨ ਕਿਞ੍ਚਿ ਗਰਹਾਮ. ਕਾਯਿਕਂ ਵਾ ਵਾਚਸਿਕਂ ਵਾਤਿ ਇਦਂ ਚਤੁਨ੍ਨਂ ਅਰਕ੍ਖਿਯਤਂ ਸਨ੍ਧਾਯ ਥੇਰੋ ਆਹ. ਭਗਵਤੋ ਹਿ ਚਤ੍ਤਾਰਿ ਅਰਕ੍ਖਿਯਾਨਿ. ਯਥਾਹ –
‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਤਥਾਗਤਸ੍ਸ ਅਰਕ੍ਖਿਯਾਨਿ. ਕਤਮਾਨਿ ਚਤ੍ਤਾਰਿ? ਪਰਿਸੁਦ੍ਧਕਾਯਸਮਾਚਾਰੋ, ਭਿਕ੍ਖਵੇ, ਤਥਾਗਤੋ, ਨਤ੍ਥਿ ਤਥਾਗਤਸ੍ਸ ਕਾਯਦੁਚ੍ਚਰਿਤਂ, ਯਂ ਤਥਾਗਤੋ ਰਕ੍ਖੇਯ੍ਯ ‘ਮਾ ਮੇ ਇਦਂ ਪਰੋ ਅਞ੍ਞਾਸੀ’ਤਿ. ਪਰਿਸੁਦ੍ਧਵਚੀਸਮਾਚਾਰੋ, ਭਿਕ੍ਖਵੇ, ਤਥਾਗਤੋ, ਨਤ੍ਥਿ ਤਥਾਗਤਸ੍ਸ ਵਚੀਦੁਚ੍ਚਰਿਤਂ, ਯਂ ਤਥਾਗਤੋ ਰਕ੍ਖੇਯ੍ਯ, ‘ਮਾ ਮੇ ਇਦਂ ਪਰੋ ਅਞ੍ਞਾਸੀ’ਤਿ. ਪਰਿਸੁਦ੍ਧਮਨੋਸਮਾਚਾਰੋ, ਭਿਕ੍ਖਵੇ, ਤਥਾਗਤੋ, ਨਤ੍ਥਿ ਤਥਾਗਤਸ੍ਸ ਮਨੋਦੁਚ੍ਚਰਿਤਂ, ਯਂ ਤਥਾਗਤੋ ਰਕ੍ਖੇਯ੍ਯ, ‘ਮਾ ਮੇ ਇਦਂ ਪਰੋ ਅਞ੍ਞਾਸੀ’ਤਿ. ਪਰਿਸੁਦ੍ਧਾਜੀਵੋ, ਭਿਕ੍ਖਵੇ, ਤਥਾਗਤੋ, ਨਤ੍ਥਿ ਤਥਾਗਤਸ੍ਸ ਮਿਚ੍ਛਾਆਜੀਵੋ, ਯਂ ਤਥਾਗਤੋ ਰਕ੍ਖੇਯ੍ਯ ‘‘ਮਾ ਮੇ ਇਦਂ ਪਰੋ ਅਞ੍ਞਾਸੀ’’ਤਿ (ਅ. ਨਿ. ੭.੫੮).
ਇਦਾਨਿ ਭਗਵਤੋ ਯਥਾਭੂਤਗੁਣੇ ਕਥੇਨ੍ਤੋ ਭਗਵਾ ਹਿ, ਭਨ੍ਤੇਤਿਆਦਿਮਾਹ. ਤਤ੍ਥ ਅਨੁਪ੍ਪਨ੍ਨਸ੍ਸਾਤਿ ਕਸ੍ਸਪਸਮ੍ਮਾਸਮ੍ਬੁਦ੍ਧਤੋ ਪਟ੍ਠਾਯ ਅਞ੍ਞੇਨ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਅਨੁਪ੍ਪਾਦਿਤਪੁਬ੍ਬਸ੍ਸ. ਅਸਞ੍ਜਾਤਸ੍ਸਾਤਿ ਇਦਂ ਅਨੁਪ੍ਪਨ੍ਨਵੇਵਚਨਮੇਵ. ਅਨਕ੍ਖਾਤਸ੍ਸਾਤਿ ਅਞ੍ਞੇਨ ਅਦੇਸਿਤਸ੍ਸ. ਪਚ੍ਛਾ ਸਮਨ੍ਨਾਗਤਾਤਿ ਪਠਮਗਤਸ੍ਸ ਭਗਵਤੋ ਪਚ੍ਛਾ ਸਮਨੁਆਗਤਾ. ਇਤਿ ਥੇਰੋ ਯਸ੍ਮਾ ਸਬ੍ਬੇਪਿ ਭਗਵਤੋ ਸੀਲਾਦਯੋ ਗੁਣਾ ਅਰਹਤ੍ਤਮਗ੍ਗਮੇਵ ਨਿਸ੍ਸਾਯ ਆਗਤਾ, ਤਸ੍ਮਾ ਅਰਹਤ੍ਤਮਗ੍ਗਮੇਵ ਨਿਸ੍ਸਾਯ ਗੁਣਂ ਕਥੇਸਿ. ਤੇਨ ਸਬ੍ਬਗੁਣਾ ਕਥਿਤਾਵ ਹੋਨ੍ਤਿ. ਅਹਞ੍ਚ ਖੋ, ਭਨ੍ਤੇਤਿ ਇਦਂ ਥੇਰੋ ਸਦੇਵਕੇ ਲੋਕੇ ਅਗ੍ਗਪੁਗ੍ਗਲਸ੍ਸ ਅਤ੍ਤਨੋ ਚੇਵ ਸਙ੍ਘਸ੍ਸ ਚ ਕਾਯਿਕਵਾਚਸਿਕਂ ਪਵਾਰੇਨ੍ਤੋ ਆਹ.
ਪਿਤਰਾ ਪਵਤ੍ਤਿਤਨ੍ਤਿ ਚਕ੍ਕਵਤ੍ਤਿਮ੍ਹਿ ਕਾਲਙ੍ਕਤੇ ਵਾ ਪਬ੍ਬਜਿਤੇ ਵਾ ਸਤ੍ਤਾਹਚ੍ਚਯੇਨ ਚਕ੍ਕਂ ਅਨ੍ਤਰਧਾਯਤਿ, ਤਤੋ ਦਸਵਿਧਂ ਦ੍ਵਾਦਸਵਿਧਂ ਚਕ੍ਕਵਤ੍ਤਿਵਤ੍ਤਂ ਪੂਰੇਤ੍ਵਾ ਨਿਸਿਨ੍ਨਸ੍ਸ ਪੁਤ੍ਤਸ੍ਸ ਅਞ੍ਞਂ ਪਾਤੁਭਵਤਿ, ਤਂ ਸੋ ਪਵਤ੍ਤੇਤਿ. ਰਤਨਮਯਤ੍ਤਾ ਪਨ ਸਦਿਸਟ੍ਠੇਨ ਤਦੇਵ ਵਤ੍ਤਂ ਕਤ੍ਵਾ ‘‘ਪਿਤਰਾ ਪਵਤ੍ਤਿਤ’’ਨ੍ਤਿ ਵੁਤ੍ਤਂ. ਯਸ੍ਮਾ ਵਾ ਸੋ ‘‘ਅਪ੍ਪੋਸ੍ਸੁਕ੍ਕੋ ਤ੍ਵਂ, ਦੇਵ, ਹੋਹਿ, ਅਹਮਨੁਸਾਸਿਸ੍ਸਾਮੀ’’ਤਿ ਆਹ, ਤਸ੍ਮਾ ਪਿਤਰਾ ਪਵਤ੍ਤਿਤਂ ਆਣਾਚਕ੍ਕਂ ਅਨੁਪ੍ਪਵਤ੍ਤੇਤਿ ਨਾਮ. ਸਮ੍ਮਦੇਵ ਅਨੁਪ੍ਪਵਤ੍ਤੇਸੀਤਿ ਸਮ੍ਮਾ ਨਯੇਨ ਹੇਤੁਨਾ ਕਾਰਣੇਨੇਵ ਅਨੁਪ੍ਪਵਤ੍ਤੇਸਿ. ਭਗਵਾ ਹਿ ਚਤੁਸਚ੍ਚਧਮ੍ਮਂ ਕਥੇਤਿ, ਥੇਰੋ ਤਮੇਵ ਅਨੁਕਥੇਤਿ, ਤਸ੍ਮਾ ਏਵਮਾਹ. ਉਭਤੋਭਾਗਵਿਮੁਤ੍ਤਾਤਿ ਦ੍ਵੀਹਿ ਭਾਗੇਹਿ ਵਿਮੁਤ੍ਤਾ, ਅਰੂਪਾਵਚਰਸਮਾਪਤ੍ਤਿਯਾ ਰੂਪਕਾਯਤੋ ਵਿਮੁਤ੍ਤਾ, ਅਗ੍ਗਮਗ੍ਗੇਨ ਨਾਮਕਾਯਤੋਤਿ. ਪਞ੍ਞਾਵਿਮੁਤ੍ਤਾਤਿ ਪਞ੍ਞਾਯ ਵਿਮੁਤ੍ਤਾ ਤੇਵਿਜ੍ਜਾਦਿਭਾਵਂ ਅਪ੍ਪਤ੍ਤਾ ਖੀਣਾਸਵਾ.
ਵਿਸੁਦ੍ਧਿਯਾਤਿ ਵਿਸੁਦ੍ਧਤ੍ਥਾਯ. ਸਂਯੋਜਨਬਨ੍ਧਨਚ੍ਛਿਦਾਤਿ ਸਂਯੋਜਨਸਙ੍ਖਾਤੇ ਚੇਵ ਬਨ੍ਧਨਸਙ੍ਖਾਤੇ ਚ ਕਿਲੇਸੇ ਛਿਨ੍ਦਿਤ੍ਵਾ ਠਿਤਾ. ਵਿਜਿਤਸਙ੍ਗਾਮਨ੍ਤਿ ਵਿਜਿਤਰਾਗਦੋਸਮੋਹਸਙ੍ਗਾਮਂ, ਮਾਰਬਲਸ੍ਸ ਵਿਜਿਤਤ੍ਤਾਪਿ ਵਿਜਿਤਸਙ੍ਗਾਮਂ. ਸਤ੍ਥਵਾਹਨ੍ਤਿ ਅਟ੍ਠਙ੍ਗਿਕਮਗ੍ਗਰਥੇ ਆਰੋਪੇਤ੍ਵਾ ਵੇਨੇਯ੍ਯਸਤ੍ਥਂ ਵਾਹੇਤਿ ਸਂਸਾਰਕਨ੍ਤਾਰਂ ਉਤ੍ਤਾਰੇਤੀਤਿ ਭਗਵਾ ਸਤ੍ਥਵਾਹੋ, ਤਂ ਸਤ੍ਥਵਾਹਂ. ਪਲਾਪੋਤਿ ਅਨ੍ਤੋਤੁਚ੍ਛੋ ਦੁਸ੍ਸੀਲੋ. ਆਦਿਚ੍ਚਬਨ੍ਧੁਨਨ੍ਤਿ ਆਦਿਚ੍ਚਬਨ੍ਧੁਂ ਸਤ੍ਥਾਰਂ ਦਸਬਲਂ ਵਨ੍ਦਾਮੀਤਿ ਵਦਤਿ. ਸਤ੍ਤਮਂ.
੮. ਪਰੋਸਹਸ੍ਸਸੁਤ੍ਤਵਣ੍ਣਨਾ
੨੧੬. ਅਟ੍ਠਮੇ ਪਰੋਸਹਸ੍ਸਨ੍ਤਿ ਅਤਿਰੇਕਸਹਸ੍ਸਂ. ਅਕੁਤੋਭਯਨ੍ਤਿ ਨਿਬ੍ਬਾਨੇ ਕੁਤੋਚਿ ਭਯਂ ਨਤ੍ਥਿ, ਨਿਬ੍ਬਾਨਪ੍ਪਤ੍ਤਸ੍ਸ ਵਾ ਕੁਤੋਚਿ ਭਯਂ ਨਤ੍ਥੀਤਿ ਨਿਬ੍ਬਾਨਂ ਅਕੁਤੋਭਯਂ ਨਾਮ. ਇਸੀਨਂ ਇਸਿਸਤ੍ਤਮੋਤਿ ਵਿਪਸ੍ਸਿਤੋ ਪਟ੍ਠਾਯ ਇਸੀਨਂ ਸਤ੍ਤਮਕੋ ਇਸਿ.
ਕਿਂ ਨੁ ਤੇ ਵਙ੍ਗੀਸਾਤਿ ਇਦਂ ਭਗਵਾ ਅਤ੍ਥੁਪ੍ਪਤ੍ਤਿਵਸੇਨ ਆਹ. ਸਙ੍ਘਮਜ੍ਝੇ ਕਿਰ ਕਥਾ ਉਦਪਾਦਿ ‘‘ਵਙ੍ਗੀਸਤ੍ਥੇਰੋ ਵਿਸ੍ਸਟ੍ਠਵਤ੍ਤੋ, ਨੇਵ ਉਦ੍ਦੇਸੇ, ਨ ਪਰਿਪੁਚ੍ਛਾਯ, ਨ ਯੋਨਿਸੋਮਨਸਿਕਾਰੇ ਕਮ੍ਮਂ ਕਰੋਤਿ, ਗਾਥਾ ਬਨ੍ਧਨ੍ਤੋ ਚੁਣ੍ਣਿਯਪਦਾਨਿ ਕਰੋਨ੍ਤੋ ਵਿਚਰਤੀ’’ਤਿ. ਅਥ ਭਗਵਾ ਚਿਨ੍ਤੇਸਿ – ‘‘ਇਮੇ ਭਿਕ੍ਖੂ ਵਙ੍ਗੀਸਸ੍ਸ ਪਟਿਭਾਨਸਮ੍ਪਤ੍ਤਿਂ ਨ ਜਾਨਨ੍ਤਿ, ਚਿਨ੍ਤੇਤ੍ਵਾ ਚਿਨ੍ਤੇਤ੍ਵਾ ਵਦਤੀਤਿ ਮਞ੍ਞਨ੍ਤਿ, ਪਟਿਭਾਨਸਮ੍ਪਤ੍ਤਿਮਸ੍ਸ ਜਾਨਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ, ‘‘ਕਿਂ ਨੁ ਤੇ ਵਙ੍ਗੀਸਾ’’ਤਿਆਦਿਮਾਹ.
ਉਮ੍ਮਗ੍ਗਪਥਨ੍ਤਿ ਅਨੇਕਾਨਿ ਕਿਲੇਸੁਮ੍ਮੁਜ੍ਜਨਸਤਾਨਿ, ਵਟ੍ਟਪਥਤ੍ਤਾ ਪਨ ਪਥਨ੍ਤਿ ਵੁਤ੍ਤਂ. ਪਭਿਜ੍ਜ ਖਿਲਾਨੀਤਿ ਰਾਗਖਿਲਾਦੀਨਿ ਪਞ੍ਚ ਭਿਨ੍ਦਿਤ੍ਵਾ ਚਰਸਿ. ਤਂ ਪਸ੍ਸਥਾਤਿ ਤਂ ਏਵਂ ਅਭਿਭੁਯ੍ਯ ਭਿਨ੍ਦਿਤ੍ਵਾ ਚਰਨ੍ਤਂ ਬੁਦ੍ਧਂ ਪਸ੍ਸਥ. ਬਨ੍ਧਪਮੁਞ੍ਚਕਰਨ੍ਤਿ ਬਨ੍ਧਨਮੋਚਨਕਰਂ. ਅਸਿਤਨ੍ਤਿ ਅਨਿਸ੍ਸਿਤਂ. ਭਾਗਸੋ ਪਵਿਭਜਨ੍ਤਿ ਸਤਿਪਟ੍ਠਾਨਾਦਿਕੋਟ੍ਠਾਸਵਸੇਨ ਧਮ੍ਮਂ ਵਿਭਜਨ੍ਤਂ. ਪਵਿਭਜ੍ਜਾਤਿ ਵਾ ਪਾਠੋ, ਅਙ੍ਗਪਚ੍ਚਙ੍ਗਕੋਟ੍ਠਾਸਵਸੇਨ ਵਿਭਜਿਤ੍ਵਾ ਵਿਭਜਿਤ੍ਵਾ ਪਸ੍ਸਥਾਤਿ ਅਤ੍ਥੋ.
ਓਘਸ੍ਸਾਤਿ ਚਤੁਰੋਘਸ੍ਸ. ਅਨੇਕਵਿਹਿਤਨ੍ਤਿ ਸਤਿਪਟ੍ਠਾਨਾਦਿਵਸੇਨ ਅਨੇਕਵਿਧਂ. ਤਸ੍ਮਿਂ ਚ ਅਮਤੇ ਅਕ੍ਖਾਤੇਤਿ ਤਸ੍ਮਿਂ ਤੇਨ ਅਕ੍ਖਾਤੇ ਅਮਤੇ. ਧਮ੍ਮਦ੍ਦਸਾਤਿ ਧਮ੍ਮਸ੍ਸ ਪਸ੍ਸਿਤਾਰੋ. ਠਿਤਾ ਅਸਂਹੀਰਾਤਿ ਅਸਂਹਾਰਿਯਾ ਹੁਤ੍ਵਾ ਪਤਿਟ੍ਠਿਤਾ.
ਅਤਿਵਿਜ੍ਝਾਤਿ ਅਤਿਵਿਜ੍ਝਿਤ੍ਵਾ. ਸਬ੍ਬਟ੍ਠਿਤੀਨਨ੍ਤਿ ਸਬ੍ਬੇਸਂ ਦਿਟ੍ਠਿਟ੍ਠਾਨਾਨਂ ਵਿਞ੍ਞਾਣਟ੍ਠਿਤੀਨਂ ਵਾ. ਅਤਿਕ੍ਕਮਮਦ੍ਦਸਾਤਿ ਅਤਿਕ੍ਕਮਭੂਤਂ ਨਿਬ੍ਬਾਨਮਦ੍ਦਸ. ਅਗ੍ਗਨ੍ਤਿ ਉਤ੍ਤਮਧਮ੍ਮਂ. ਅਗ੍ਗੇਤਿ ਵਾ ਪਾਠੋ, ਪਠਮਤਰਨ੍ਤਿ ਅਤ੍ਥੋ. ਦਸਦ੍ਧਾਨਨ੍ਤਿ ਪਞ੍ਚਨ੍ਨਂ, ਅਗ੍ਗਧਮ੍ਮਂ ਪਞ੍ਚਵਗ੍ਗਿਯਾਨਂ, ਅਗ੍ਗੇ ਵਾ ਪਞ੍ਚਵਗ੍ਗਿਯਾਨਂ ਧਮ੍ਮਂ ਦੇਸੇਸੀਤਿ ਅਤ੍ਥੋ. ਤਸ੍ਮਾਤਿ ਯਸ੍ਮਾ ਏਸ ਧਮ੍ਮੋ ਸੁਦੇਸਿਤੋਤਿ ਜਾਨਨ੍ਤੇਨ ਚ ਪਮਾਦੋ ਨ ਕਾਤਬ੍ਬੋ, ਤਸ੍ਮਾ. ਅਨੁਸਿਕ੍ਖੇਤਿ ਤਿਸ੍ਸੋ ਸਿਕ੍ਖਾ ਸਿਕ੍ਖੇਯ੍ਯ. ਅਟ੍ਠਮਂ.
੯. ਕੋਣ੍ਡਞ੍ਞਸੁਤ੍ਤਵਣ੍ਣਨਾ
੨੧੭. ਨਵਮੇ ਅਞ੍ਞਾਸਿਕੋਣ੍ਡਞ੍ਞੋਤਿ ਪਠਮਂ ਧਮ੍ਮਸ੍ਸ ਅਞ੍ਞਾਤਤ੍ਤਾ ਏਵਂ ਗਹਿਤਨਾਮੋ ਥੇਰੋ. ਸੁਚਿਰਸ੍ਸੇਵਾਤਿ ਕੀਵਚਿਰਸ੍ਸ? ਦ੍ਵਾਦਸਨ੍ਨਂ ਸਂਵਚ੍ਛਰਾਨਂ. ਏਤ੍ਤਕਂ ਕਾਲਂ ਕਤ੍ਥ ਵਿਹਾਸੀਤਿ. ਛਦ੍ਦਨ੍ਤਭਵਨੇ ਮਨ੍ਦਾਕਿਨਿਪੋਕ੍ਖਰਣਿਯਾ ਤੀਰੇ ਪਚ੍ਚੇਕਬੁਦ੍ਧਾਨਂ ਵਸਨਟ੍ਠਾਨੇ. ਕਸ੍ਮਾ? ਵਿਹਾਰਗਰੁਤਾਯ. ਸੋ ਹਿ ਪਞ੍ਞਵਾ ਮਹਾਸਾਵਕੋ. ਯਥੇਵ ਭਗਵਤੋ, ਏਵਮਸ੍ਸ ਦਸਸਹਸ੍ਸਚਕ੍ਕਵਾਲ਼ੇ ਦੇਵਮਨੁਸ੍ਸਾਨਂ ਅਬ੍ਭਨ੍ਤਰੇ ਗੁਣਾ ਪਤ੍ਥਟਾਵ. ਦੇਵਮਨੁਸ੍ਸਾ ਤਥਾਗਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਗਨ੍ਧਮਾਲਾਦੀਹਿ ਪੂਜਂ ਕਤ੍ਵਾ ‘‘ਅਗ੍ਗਧਮ੍ਮਂ ਪਟਿਵਿਦ੍ਧਸਾਵਕੋ’’ਤਿ ਅਨਨ੍ਤਰਂ ਥੇਰਂ ਉਪਸਙ੍ਕਮਿਤ੍ਵਾ ਪੂਜੇਨ੍ਤਿ. ਸਨ੍ਤਿਕਂ ਆਗਤਾਨਞ੍ਚ ਨਾਮ ਤਥਾਰੂਪਾ ਧਮ੍ਮਕਥਾ ਵਾ ਪਟਿਸਨ੍ਥਾਰੋ ਵਾ ਕਾਤਬ੍ਬੋ ਹੋਤਿ. ਥੇਰੋ ਚ ਵਿਹਾਰਗਰੁਕੋ, ਤੇਨਸ੍ਸ ਸੋ ਪਪਞ੍ਚੋ ਵਿਯ ਉਪਟ੍ਠਾਤਿ. ਇਤਿ ਵਿਹਾਰਗਰੁਤਾਯ ਤਤ੍ਥ ਗਨ੍ਤ੍ਵਾ ਵਿਹਾਸਿ.
ਅਪਰਮ੍ਪਿ ਕਾਰਣਂ – ਭਿਕ੍ਖਾਚਾਰਵੇਲਾਯਂ ਤਾਵ ਸਬ੍ਬਸਾਵਕਾ ਵਸ੍ਸਗ੍ਗੇਨ ਗਚ੍ਛਨ੍ਤਿ. ਧਮ੍ਮਦੇਸਨਾਕਾਲੇ ਪਨ ਮਜ੍ਝਟ੍ਠਾਨੇ ਅਲਙ੍ਕਤਬੁਦ੍ਧਾਸਨਮ੍ਹਿ ਸਤ੍ਥਰਿ ਨਿਸਿਨ੍ਨੇ ਦਕ੍ਖਿਣਹਤ੍ਥਪਸ੍ਸੇ ਧਮ੍ਮਸੇਨਾਪਤਿ, ਵਾਮਹਤ੍ਥਪਸ੍ਸੇ ਮਹਾਮੋਗ੍ਗਲ੍ਲਾਨਤ੍ਥੇਰੋ ਨਿਸੀਦਤਿ, ਤੇਸਂ ਪਿਟ੍ਠਿਭਾਗੇ ਅਞ੍ਞਾਸਿਕੋਣ੍ਡਞ੍ਞਤ੍ਥੇਰਸ੍ਸ ਆਸਨਂ ਪਞ੍ਞਾਪੇਨ੍ਤਿ. ਸੇਸਾ ਭਿਕ੍ਖੂ ਤਂ ਪਰਿਵਾਰੇਤ੍ਵਾ ਨਿਸੀਦਨ੍ਤਿ. ਦ੍ਵੇ ਅਗ੍ਗਸਾਵਕਾ ਅਗ੍ਗਧਮ੍ਮਪਟਿਵਿਦ੍ਧਤ੍ਤਾ ਚ ਮਹਲ੍ਲਕਤ੍ਤਾ ਚ ਥੇਰੇ ਸਗਾਰਵਾ ਥੇਰਂ ਮਹਾਬ੍ਰਹ੍ਮਂ ਵਿਯ ਅਗ੍ਗਿਕ੍ਖਨ੍ਧਂ ਵਿਯ ਆਸੀਵਿਸਂ ਵਿਯ ਚ ਮਞ੍ਞਮਾਨਾ ਧੁਰਾਸਨੇ ਨਿਸੀਦਨ੍ਤਾ ਓਤ੍ਤਪ੍ਪਨ੍ਤਿ ਹਰਾਯਨ੍ਤਿ. ਥੇਰੋ ਚਿਨ੍ਤੇਸਿ – ‘‘ਇਮੇਹਿ ਧੁਰਾਸਨਤ੍ਥਾਯ ਕਪ੍ਪਸਤਸਹਸ੍ਸਾਧਿਕਂ ਅਸਙ੍ਖ੍ਯੇਯ੍ਯਂ ਪਾਰਮਿਯੋ ਪੂਰਿਤਾ, ਤੇ ਇਦਾਨਿ ਧੁਰਾਸਨੇ ਨਿਸੀਦਨ੍ਤਾ ਮਮ ਓਤ੍ਤਪ੍ਪਨ੍ਤਿ ਹਰਾਯਨ੍ਤਿ, ਫਾਸੁਵਿਹਾਰਂ ਨੇਸਂ ਕਰਿਸ੍ਸਾਮੀ’’ਤਿ. ਸੋ ਪਤਿਰੂਪੇ ਕਾਲੇ ਤਥਾਗਤਂ ਉਪਸਙ੍ਕਮਿਤ੍ਵਾ ‘‘ਇਚ੍ਛਾਮਹਂ, ਭਨ੍ਤੇ, ਜਨਪਦੇ ਵਸਿਤੁ’’ਨ੍ਤਿ ਆਹ, ਸਤ੍ਥਾ ਅਨੁਜਾਨਿ.
ਥੇਰੋ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਛਦ੍ਦਨ੍ਤਭਵਨੇ ਮਨ੍ਦਾਕਿਨਿਤੀਰਂ ਗਤੋ. ਪੁਬ੍ਬੇ ਪਚ੍ਚੇਕਬੁਦ੍ਧਾਨਂ ਪਾਰਿਚਰਿਯਾਯ ਕਤਪਰਿਚਯਾ ਅਟ੍ਠਸਹਸ੍ਸਾ ਹਤ੍ਥਿਨਾਗਾ ਥੇਰਂ ਦਿਸ੍ਵਾਵ ‘‘ਅਮ੍ਹਾਕਂ ਪੁਞ੍ਞਕ੍ਖੇਤ੍ਤਂ ਆਗਤ’’ਨ੍ਤਿ ਨਖੇਹਿ ਚਙ੍ਕਮਨਂ ਨਿਤ੍ਤਿਣਂ ਕਤ੍ਵਾ ਆਵਰਣਸਾਖਾ ਹਰਿਤ੍ਵਾ ਥੇਰਸ੍ਸ ਵਸਨਟ੍ਠਾਨਂ ਪਟਿਜਗ੍ਗਿਤ੍ਵਾ ਵਤ੍ਤਂ ਕਤ੍ਵਾ ਸਬ੍ਬੇ ਸਨ੍ਨਿਪਤਿਤ੍ਵਾ ਮਨ੍ਤਯਿਂਸੁ – ‘‘ਸਚੇ ਹਿ ਮਯਂ ‘ਅਯਂ ਥੇਰਸ੍ਸ ਕਤ੍ਤਬ੍ਬਂ ਕਰਿਸ੍ਸਤਿ, ਅਯਂ ਕਰਿਸ੍ਸਤੀ’ਤਿ ਪਟਿਪਜ੍ਜਿਸ੍ਸਾਮ, ਥੇਰੋ ਬਹੁਞਾਤਿਕਗਾਮਂ ਗਤੋ ਵਿਯ ਯਥਾਧੋਤੇਨੇਵ ਪਤ੍ਤੇਨ ਗਮਿਸ੍ਸਤਿ, ਵਾਰੇਨ ਨਂ ਪਟਿਜਗ੍ਗਿਸ੍ਸਾਮ, ਏਕਸ੍ਸ ਪਨ ਵਾਰੇ ਪਤ੍ਤੇ ਸੇਸੇਹਿਪਿ ਨਪ੍ਪਮਜ੍ਜਿਤਬ੍ਬ’’ਨ੍ਤਿ ਵਾਰਂ ਠਪਯਿਂਸੁ. ਵਾਰਿਕਨਾਗੋ ਪਾਤੋਵ ਥੇਰਸ੍ਸ ਮੁਖੋਦਕਞ੍ਚ ਦਨ੍ਤਕਟ੍ਠਞ੍ਚ ਠਪੇਤਿ, ਵਤ੍ਤਂ ਕਰੋਤਿ.
ਮਨ੍ਦਾਕਿਨਿਪੋਕ੍ਖਰਣੀ ਨਾਮ ਚੇਸਾ ਪਣ੍ਣਾਸਯੋਜਨਾ ਹੋਤਿ. ਤਸ੍ਸਾ ਪਞ੍ਚਵੀਸਤਿਯੋਜਨਮਤ੍ਤੇ ਠਾਨੇ ਸੇਵਾਲੋ ਵਾ ਪਣਕਂ ਵਾ ਨਤ੍ਥਿ, ਫਲਿਕਵਣ੍ਣਂ ਉਦਕਮੇਵ ਹੋਤਿ. ਤਤੋ ਪਰਂ ਪਨ ਕਟਿਪ੍ਪਮਾਣੇ ਉਦਕੇ ਅਡ੍ਢਯੋਜਨਵਿਤ੍ਥਤਂ ਸੇਸਪਦੁਮਵਨਂ ਪਣ੍ਣਾਸਯੋਜਨਂ ਸਰਂ ਪਰਿਕ੍ਖਿਪਿਤ੍ਵਾ ਠਿਤਂ. ਤਦਨਨ੍ਤਰਂ ਤਾਵ ਮਹਨ੍ਤਮੇਵ ਰਤ੍ਤਪਦੁਮਵਨਂ, ਤਦਨਨ੍ਤਰਂ ਰਤ੍ਤਕੁਮੁਦਵਨਂ, ਤਦਨਨ੍ਤਰਂ ਸੇਤਕੁਮੁਦਵਨਂ, ਤਦਨਨ੍ਤਰਂ ਨੀਲੁਪ੍ਪਲਵਨਂ, ਤਦਨਨ੍ਤਰਂ ਰਤ੍ਤੁਪ੍ਪਲਵਨਂ, ਤਦਨਨ੍ਤਰਂ ਸੁਗਨ੍ਧਰਤ੍ਤਸਾਲਿਵਨਂ, ਤਦਨਨ੍ਤਰਂ ਏਲ਼ਾਲੁਕਲਾਬੁਕੁਮ੍ਭਣ੍ਡਾਦੀਨਿ ਮਧੁਰਰਸਾਨਿ ਵਲ੍ਲਿਫਲਾਨਿ, ਤਦਨਨ੍ਤਰਂ ਅਡ੍ਢਯੋਜਨਵਿਤ੍ਥਾਰਮੇਵ ਉਚ੍ਛੁਵਨਂ, ਤਤ੍ਥ ਪੂਗਰੁਕ੍ਖਕ੍ਖਨ੍ਧਪ੍ਪਮਾਣਾ ਉਚ੍ਛੂ, ਤਦਨਨ੍ਤਰਂ ਕਦਲਿਵਨਂ, ਯਤੋ ਦੁਵੇ ਪਕ੍ਕਾਨਿ ਖਾਦਨ੍ਤਾ ਕਿਲਮਨ੍ਤਿ, ਤਦਨਨ੍ਤਰਂ ਚਾਟਿਪ੍ਪਮਾਣਫਲਂ ਪਨਸਵਨਂ, ਤਦਨਨ੍ਤਰਂ ਜਮ੍ਬੁਵਨਂ, ਤਦਨਨ੍ਤਰਂ ਅਮ੍ਬਵਨਂ, ਤਦਨਨ੍ਤਰਂ ਕਪਿਤ੍ਥਵਨਨ੍ਤਿ. ਸਙ੍ਖੇਪਤੋ ਤਸ੍ਮਿਂ ਦਹੇ ਖਾਦਿਤਬ੍ਬਯੁਤ੍ਤਕਂ ਫਲਂ ਨਾਮ ਨਤ੍ਥੀਤਿ ਨ ਵਤ੍ਤਬ੍ਬਂ. ਕੁਸੁਮਾਨਂ ਪੁਪ੍ਫਨਸਮਯੇ ਵਾਤੋ ਰੇਣੁਵਟ੍ਟਿਂ ਉਟ੍ਠਾਪੇਤ੍ਵਾ ਪਦੁਮਿਨਿਪਤ੍ਤੇਸੁ ਠਪੇਤਿ, ਤਤ੍ਥ ਉਦਕਫੁਸਿਤਾਨਿ ਪਤਨ੍ਤਿ. ਤਤੋ ਆਦਿਚ੍ਚਪਾਕੇਨ ਪਚ੍ਚਿਤ੍ਵਾ ਪਕ੍ਕਪਯੋਘਨਿਕਾ ਵਿਯ ਤਿਟ੍ਠਤਿ, ਏਤਂ ਪੋਕ੍ਖਰਮਧੁ ਨਾਮ, ਤਂ ਥੇਰਸ੍ਸ ਆਹਰਿਤ੍ਵਾ ਦੇਨ੍ਤਿ. ਮੁਲ਼ਾਲਂ ਨਙ੍ਗਲਸੀਸਮਤ੍ਤਂ ਹੋਤਿ, ਤਮ੍ਪਿ ਆਹਰਿਤ੍ਵਾ ਦੇਨ੍ਤਿ. ਭਿਸਂ ਮਹਾਭੇਰਿਪੋਕ੍ਖਰਪ੍ਪਮਾਣਂ ਹੋਤਿ, ਤਸ੍ਸ ਏਕਸ੍ਮਿਂ ਪਬ੍ਬੇ ਪਾਦਘਟਕਪ੍ਪਮਾਣਂ ਖੀਰਂ ਹੋਤਿ, ਤਂ ਆਹਰਿਤ੍ਵਾ ਦੇਨ੍ਤਿ. ਪੋਕ੍ਖਰਟ੍ਠੀਨਿ ਮਧੁਸਕ੍ਖਰਾਯ ਯੋਜੇਤ੍ਵਾ ਦੇਨ੍ਤਿ. ਉਚ੍ਛੁਂ ਪਾਸਾਣਪਿਟ੍ਠੇ ਠਪੇਤ੍ਵਾ ਪਾਦੇਨ ਅਕ੍ਕਮਨ੍ਤਿ. ਤਤੋ ਰਸੋ ਪਗ੍ਘਰਿਤ੍ਵਾ ਸੋਣ੍ਡਿਆਵਾਟੇ ਪੂਰੇਤ੍ਵਾ, ਆਦਿਚ੍ਚਪਾਕੇਨ ਪਚ੍ਚਿਤ੍ਵਾ ਖੀਰਪਾਸਾਣਪਿਣ੍ਡੋ ਵਿਯ ਤਿਟ੍ਠਤਿ, ਤਂ ਆਹਰਿਤ੍ਵਾ ਦੇਨ੍ਤਿ. ਪਨਸਕਦਲਿਅਮ੍ਬਪਕ੍ਕਾਦੀਸੁ ਕਥਾਵ ਨਤ੍ਥਿ.
ਕੇਲਾਸਪਬ੍ਬਤੇ ਨਾਗਦਤ੍ਤੋ ਨਾਮ ਦੇਵਪੁਤ੍ਤੋ ਵਸਤਿ. ਥੇਰੋ ਕਾਲੇਨ ਕਾਲਂ ਤਸ੍ਸ ਵਿਮਾਨਦ੍ਵਾਰਂ ਗਚ੍ਛਤਿ. ਸੋ ਨਵਸਪ੍ਪਿਪੋਕ੍ਖਰਮਧੁਚੁਣ੍ਣਯੁਤ੍ਤਸ੍ਸ ਨਿਰੁਦਕਪਾਯਾਸਸ੍ਸ ਪਤ੍ਤਂ ਪੂਰੇਤ੍ਵਾ ਦੇਤਿ. ਸੋ ਕਿਰ ਕਸ੍ਸਪਬੁਦ੍ਧਕਾਲੇ ਵੀਸਤਿਵਸ੍ਸਸਹਸ੍ਸਾਨਿ ਸੁਗਨ੍ਧਸਪ੍ਪਿਨਾ ਖੀਰਸਲਾਕਂ ਅਦਾਸਿ. ਤੇਨਸ੍ਸੇਤਂ ਭੋਜਨਂ ਉਪ੍ਪਜ੍ਜਤਿ. ਏਵਂ ਥੇਰੋ ਦ੍ਵਾਦਸ ਵਸ੍ਸਾਨਿ ਵਸਿਤ੍ਵਾ ਅਤ੍ਤਨੋ ਆਯੁਸਙ੍ਖਾਰਂ ਓਲੋਕੇਨ੍ਤੋ ਪਰਿਕ੍ਖੀਣਭਾਵਂ ਞਤ੍ਵਾ ‘‘ਕਤ੍ਥ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ – ‘‘ਹਤ੍ਥਿਨਾਗੇਹਿ ਮਂ ਦ੍ਵਾਦਸ ਵਸ੍ਸਾਨਿ ਉਪਟ੍ਠਹਨ੍ਤੇਹਿ ਦੁਕ੍ਕਰਂ ਕਤਂ, ਸਤ੍ਥਾਰਂ ਅਨੁਜਾਨਾਪੇਤ੍ਵਾ ਏਤੇਸਂਯੇਵ ਸਨ੍ਤਿਕੇ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਆਕਾਸੇਨ ਭਗਵਤੋ ਸਨ੍ਤਿਕਂ ਅਗਮਾਸਿ. ਤੇਨ ਵੁਤ੍ਤਂ ‘‘ਸੁਚਿਰਸ੍ਸੇਵ ਯੇਨ ਭਗਵਾ ਤੇਨੁਪਸਙ੍ਕਮੀ’’ਤਿ.
ਨਾਮਞ੍ਚਾਤਿ ਕਸ੍ਮਾ ਨਾਮਂ ਸਾਵੇਤਿ? ਥੇਰਞ੍ਹਿ ਕੇਚਿ ਸਞ੍ਜਾਨਨ੍ਤਿ, ਕੇਚਿ ਨ ਸਞ੍ਜਾਨਨ੍ਤਿ. ਤਤ੍ਥ ਥੇਰੋ ਚਿਨ੍ਤੇਸਿ – ‘‘ਯੇ ਮਂ ਅਜਾਨਨ੍ਤਾ ‘ਕੋ ਏਸ ਪਣ੍ਡਰਸੀਸੋ ਓਭਗ੍ਗੋ ਗੋਪਾਨਸਿਵਙ੍ਕੋ ਮਹਲ੍ਲਕੋ ਸਤ੍ਥਾਰਾ ਸਦ੍ਧਿਂ ਪਟਿਸਨ੍ਥਾਰਂ ਕਰੋਤੀ’ਤਿ ਚਿਤ੍ਤਂ ਪਦੂਸੇਸ੍ਸਨ੍ਤਿ, ਤੇ ਅਪਾਯਪੂਰਕਾ ਭਵਿਸ੍ਸਨ੍ਤਿ. ਯੇ ਪਨ ਮਂ ਜਾਨਨ੍ਤਾ – ‘ਦਸਸਹਸ੍ਸਚਕ੍ਕਵਾਲ਼ੇ ਸਤ੍ਥਾ ਵਿਯ ਪਞ੍ਞਾਤੋ ਪਾਕਟੋ ਮਹਾਸਾਵਕੋ’ਤਿ ਚਿਤ੍ਤਂ ਪਸਾਦੇਸ੍ਸਨ੍ਤਿ, ਤੇ ਸਗ੍ਗੂਪਗਾ ਭਵਿਸ੍ਸਨ੍ਤੀ’’ਤਿ, ਸਤ੍ਤਾਨਂ ਅਪਾਯਮਗ੍ਗਂ ਪਿਦਹਿਤ੍ਵਾ ਸਗ੍ਗਮਗ੍ਗਂ ਵਿਵਰਨ੍ਤੋ ਨਾਮਂ ਸਾਵੇਤਿ.
ਬੁਦ੍ਧਾਨੁਬੁਦ੍ਧੋਤਿ ਪਠਮਂ ਸਤ੍ਥਾ ਚਤ੍ਤਾਰਿ ਸਚ੍ਚਾਨਿ ਬੁਜ੍ਝਿ, ਪਚ੍ਛਾ ਥੇਰੋ, ਤਸ੍ਮਾ ਬੁਦ੍ਧਾਨੁਬੁਦ੍ਧੋਤਿ, ਵੁਚ੍ਚਤਿ. ਤਿਬ੍ਬਨਿਕ੍ਕਮੋਤਿ ਬਾਲ਼੍ਹਵੀਰਿਯੋ. ਵਿਵੇਕਾਨਨ੍ਤਿ ਤਿਣ੍ਣਂ ਵਿਵੇਕਾਨਂ. ਤੇਵਿਜ੍ਜੋ, ਚੇਤੋਪਰਿਯਾਯਕੋਵਿਦੋਤਿ ਛਸੁ ਅਭਿਞ੍ਞਾਸੁ ਚਤਸ੍ਸੋ ਵਦਤਿ. ਇਤਰਾ ਦ੍ਵੇ ਕਿਞ੍ਚਾਪਿ ਨ ਵੁਤ੍ਤਾ, ਥੇਰੋ ਪਨ ਛਲ਼ਭਿਞ੍ਞੋਵ. ਇਮਿਸ੍ਸਾ ਚ ਗਾਥਾਯ ਪਰਿਯੋਸਾਨੇ ਪਰਿਸਾ ਸਨ੍ਨਿਸੀਦਿ. ਪਰਿਸਾਯ ਸਨ੍ਨਿਸਿਨ੍ਨਭਾਵਂ ਞਤ੍ਵਾ ਥੇਰੋ ਸਤ੍ਥਾਰਾ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ‘‘ਪਰਿਕ੍ਖੀਣਾ ਮੇ, ਭਨ੍ਤੇ, ਆਯੁਸਙ੍ਖਾਰਾ, ਪਰਿਨਿਬ੍ਬਾਯਿਸ੍ਸਾਮੀ’’ਤਿ, ਪਰਿਨਿਬ੍ਬਾਨਕਾਲਂ ਅਨੁਜਾਨਾਪੇਸਿ. ਕਤ੍ਥ ਪਰਿਨਿਬ੍ਬਾਯਿਸ੍ਸਸਿ ਕੋਣ੍ਡਞ੍ਞਾਤਿ? ਉਪਟ੍ਠਾਕੇਹਿ ਮੇ, ਭਨ੍ਤੇ, ਹਤ੍ਥਿਨਾਗੇਹਿ ਦੁਕ੍ਕਰਂ ਕਤਂ, ਤੇਸਂ ਸਨ੍ਤਿਕੇਤਿ. ਸਤ੍ਥਾ ਅਨੁਜਾਨਿ.
ਥੇਰੋ ਦਸਬਲਂ ਪਦਕ੍ਖਿਣਂ ਕਤ੍ਵਾ – ‘‘ਪੁਬ੍ਬਂ ਤਂ ਮੇ, ਭਨ੍ਤੇ, ਪਠਮਦਸ੍ਸਨਂ, ਇਦਂ ਪਚ੍ਛਿਮਦਸ੍ਸਨ’’ਨ੍ਤਿ ਪਰਿਦੇਵਨ੍ਤੇ ਮਹਾਜਨੇ ਸਤ੍ਥਾਰਂ ਵਨ੍ਦਿਤ੍ਵਾ ਨਿਕ੍ਖਮਿਤ੍ਵਾ, ਦ੍ਵਾਰਕੋਟ੍ਠਕੇ ਠਿਤੋ – ‘‘ਮਾ ਸੋਚਿਤ੍ਥ, ਮਾ ਪਰਿਦੇਵਿਤ੍ਥ, ਬੁਦ੍ਧਾ ਵਾ ਹੋਨ੍ਤੁ ਬੁਦ੍ਧਸਾਵਕਾ ਵਾ, ਉਪ੍ਪਨ੍ਨਾ ਸਙ੍ਖਾਰਾ ਅਭਿਜ੍ਜਨਕਾ ਨਾਮ ਨਤ੍ਥੀ’’ਤਿ ਮਹਾਜਨਂ ਓਵਦਿਤ੍ਵਾ ਪਸ੍ਸਨ੍ਤਸ੍ਸੇਵ ਮਹਾਜਨਸ੍ਸ ਵੇਹਾਸਂ ਅਬ੍ਭੁਗ੍ਗਮ੍ਮ ਮਨ੍ਦਾਕਿਨਿਤੀਰੇ ਓਤਰਿਤ੍ਵਾ ਪੋਕ੍ਖਰਣਿਯਂ ਨ੍ਹਤ੍ਵਾ ਨਿਵਤ੍ਥਨਿਵਾਸਨੋ ਕਤੁਤ੍ਤਰਾਸਙ੍ਗੋ ਸੇਨਾਸਨਂ ਸਂਸਾਮੇਤ੍ਵਾ ਫਲਸਮਾਪਤ੍ਤਿਯਾ ਤਯੋ ਯਾਮੇ ਵੀਤਿਨਾਮੇਤ੍ਵਾ ਬਲਵਪਚ੍ਚੂਸਸਮਯੇ ਪਰਿਨਿਬ੍ਬਾਯਿ. ਥੇਰਸ੍ਸ ਸਹਪਰਿਨਿਬ੍ਬਾਨਾ ਹਿਮਵਤਿ ਸਬ੍ਬਰੁਕ੍ਖਾ ਪੁਪ੍ਫੇਹਿ ਚ ਫਲੇਹਿ ਚ ਓਨਤਵਿਨਤਾ ਅਹੇਸੁਂ. ਵਾਰਿਕਨਾਗੋ ਥੇਰਸ੍ਸ ਪਰਿਨਿਬ੍ਬੁਤਭਾਵਂ ਅਜਾਨਨ੍ਤੋ ਪਾਤੋਵ ਮੁਖੋਦਕਦਨ੍ਤਕਟ੍ਠਾਨਿ ਉਪਟ੍ਠਪੇਤ੍ਵਾ ਵਤ੍ਤਂ ਕਤ੍ਵਾ ਖਾਦਨੀਯਫਲਾਨਿ ਆਹਰਿਤ੍ਵਾ ਚਙ੍ਕਮਨਕੋਟਿਯਂ ਅਟ੍ਠਾਸਿ. ਸੋ ਯਾਵ ਸੂਰਿਯੁਗ੍ਗਮਨਾ ਥੇਰਸ੍ਸ ਨਿਕ੍ਖਮਨਂ ਅਪਸ੍ਸਨ੍ਤੋ ‘‘ਕਿਂ ਨੁ ਖੋ ਏਤਂ? ਪੁਬ੍ਬੇ ਅਯ੍ਯੋ ਪਾਤੋਵ ਚਙ੍ਕਮਤਿ, ਮੁਖਂ ਧੋਵਤਿ. ਅਜ੍ਜ ਪਨ ਪਣ੍ਣਸਾਲਤੋਪਿ ਨ ਨਿਕ੍ਖਮਤੀ’’ਤਿ ਕੁਟਿਦ੍ਵਾਰਂ ਕਮ੍ਪੇਤ੍ਵਾ ਓਲੋਕੇਨ੍ਤੋ ਥੇਰਂ ਨਿਸਿਨ੍ਨਕਮੇਵ ਦਿਸ੍ਵਾ ਹਤ੍ਥਂ ਪਸਾਰੇਤ੍ਵਾ ਪਰਾਮਸਿਤ੍ਵਾ ਅਸ੍ਸਾਸਪਸ੍ਸਾਸੇ ਪਰਿਯੇਸਨ੍ਤੋ ਤੇਸਂ ਅਪ੍ਪਵਤ੍ਤਿਭਾਵਂ ਞਤ੍ਵਾ – ‘‘ਪਰਿਨਿਬ੍ਬੁਤੋ ਥੇਰੋ’’ਤਿ ਸੋਣ੍ਡਂ ਮੁਖੇ ਪਕ੍ਖਿਪਿਤ੍ਵਾ ਮਹਾਰਵਂ ਵਿਰਵਿ. ਸਕਲਹਿਮਵਨ੍ਤੋ ਏਕਨਿਨ੍ਨਾਦੋ ਅਹੋਸਿ. ਅਟ੍ਠਨਾਗਸਹਸ੍ਸਾਨਿ ਸਨ੍ਨਿਪਤਿਤ੍ਵਾ ਥੇਰਂ ਜੇਟ੍ਠਕਨਾਗਸ੍ਸ ਕੁਮ੍ਭੇ ਨਿਸੀਦਾਪੇਤ੍ਵਾ ਸੁਪੁਪ੍ਫਿਤਰੁਕ੍ਖਸਾਖਾ ਗਹੇਤ੍ਵਾ ਪਰਿਵਾਰੇਤ੍ਵਾ ਸਕਲਹਿਮਵਨ੍ਤਂ ਅਨੁਵਿਚਰਿਤ੍ਵਾ ਸਕਟ੍ਠਾਨਮੇਵ ਆਗਤਾ.
ਸਕ੍ਕੋ ਵਿਸ੍ਸਕਮ੍ਮਂ ਆਮਨ੍ਤੇਸਿ – ‘‘ਤਾਤ, ਅਮ੍ਹਾਕਂ ਜੇਟ੍ਠਭਾਤਾ ਪਰਿਨਿਬ੍ਬੁਤੋ, ਸਕ੍ਕਾਰਂ ਕਰਿਸ੍ਸਾਮ, ਨਵਯੋਜਨਿਕਂ ਸਬ੍ਬਰਤਨਮਯਂ ਕੂਟਾਗਾਰਂ ਮਾਪੇਹੀ’’ਤਿ. ਸੋ ਤਥਾ ਕਤ੍ਵਾ ਥੇਰਂ ਤਤ੍ਥ ਨਿਪਜ੍ਜਾਪੇਤ੍ਵਾ ਹਤ੍ਥਿਨਾਗਾਨਂ ਅਦਾਸਿ. ਤੇ ਕੂਟਾਗਾਰਂ ਉਕ੍ਖਿਪਿਤ੍ਵਾ ਤਿਯੋਜਨਸਹਸ੍ਸਂ ਹਿਮਵਨ੍ਤਂ ਪੁਨਪ੍ਪੁਨਂ ਆਵਿਜ੍ਝਿਂਸੁ. ਤੇਸਂ ਹਤ੍ਥਤੋ ਆਕਾਸਟ੍ਠਕਾ ਦੇਵਾ ਗਹੇਤ੍ਵਾ ਸਾਧੁਕੀਲ਼ਿਤਂ ਕੀਲ਼ਿਂਸੁ. ਤਤੋ ਵਸ੍ਸਵਲਾਹਕਾ ਸੀਤਵਲਾਹਕਾ ਉਣ੍ਹਵਲਾਹਕਾ ਚਾਤੁਮਹਾਰਾਜਿਕਾ ਤਾਵਤਿਂਸਾਤਿ ਏਤੇਨੁਪਾਯੇਨ ਯਾਵ ਬ੍ਰਹ੍ਮਲੋਕਾ ਕੂਟਾਗਾਰਂ ਅਗਮਾਸਿ, ਪੁਨ ਬ੍ਰਹ੍ਮਾਨੋ ਦੇਵਾਨਨ੍ਤਿ ਅਨੁਪੁਬ੍ਬੇਨ ਹਤ੍ਥਿਨਾਗਾਨਂਯੇਵ ਕੂਟਾਗਾਰਂ ਅਦਂਸੁ. ਏਕੇਕਾ ਦੇਵਤਾ ਚਤੁਰਙ੍ਗੁਲਮਤ੍ਤਂ ਚਨ੍ਦਨਘਟਿਕਂ ਆਹਰਿ, ਚਿਤਕੋ ਨਵਯੋਜਨਿਕੋ ਅਹੋਸਿ. ਕੂਟਾਗਾਰਂ ਚਿਤਕਂ ਆਰੋਪਯਿਂਸੁ. ਪਞ੍ਚ ਭਿਕ੍ਖੁਸਤਾਨਿ ਆਕਾਸੇਨਾਗਨ੍ਤ੍ਵਾ ਸਬ੍ਬਰਤ੍ਤਿਂ ਸਜ੍ਝਾਯਮਕਂਸੁ. ਅਨੁਰੁਦ੍ਧਤ੍ਥੇਰੋ ਧਮ੍ਮਂ ਕਥੇਸਿ, ਬਹੂਨਂ ਦੇਵਤਾਨਂ ਧਮ੍ਮਾਭਿਸਮਯੋ ਅਹੋਸਿ. ਪੁਨਦਿਵਸੇ ਅਰੁਣੁਗ੍ਗਮਨਵੇਲਾਯਮੇਵ ਚਿਤਕਂ ਨਿਬ੍ਬਾਪੇਤ੍ਵਾ ਸੁਮਨਮਕੁਲ਼ਵਣ੍ਣਾਨਂ ਧਾਤੂਨਂ ਪਰਿਸਾਵਨਂ ਪੂਰੇਤ੍ਵਾ ਭਗਵਤਿ ਨਿਕ੍ਖਮਿਤ੍ਵਾ ਵੇਲ਼ੁਵਨਵਿਹਾਰਕੋਟ੍ਠਕਂ ਸਮ੍ਪਤ੍ਤੇ ਆਹਰਿਤ੍ਵਾ ਸਤ੍ਥੁ ਹਤ੍ਥੇ ਠਪਯਿਂਸੁ. ਸਤ੍ਥਾ ਧਾਤੁਪਰਿਸਾਵਨਂ ਗਹੇਤ੍ਵਾ ਪਥਵਿਯਾ ਹਤ੍ਥਂ ਪਸਾਰੇਸਿ, ਮਹਾਪਥਵਿਂ ਭਿਨ੍ਦਿਤ੍ਵਾ ਰਜਤਬੁਬ੍ਬੁਲ਼ਸਦਿਸਂ ਚੇਤਿਯਂ ਨਿਕ੍ਖਮਿ. ਸਤ੍ਥਾ ਸਹਤ੍ਥੇਨ ਚੇਤਿਯੇ ਧਾਤੁਯੋ ਨਿਧੇਸਿ. ਅਜ੍ਜਾਪਿ ਕਿਰ ਤਂ ਚੇਤਿਯਂ ਧਰਤਿਯੇਵਾਤਿ. ਨਵਮਂ.
੧੦. ਮੋਗ੍ਗਲ੍ਲਾਨਸੁਤ੍ਤਵਣ੍ਣਨਾ
੨੧੮. ਦਸਮੇ ਸਮਨ੍ਨੇਸਤੀਤਿ ਪਰਿਯੇਸਤਿ ਪਚ੍ਚਵੇਕ੍ਖਤਿ. ਨਗਸ੍ਸਾਤਿ ਪਬ੍ਬਤਸ੍ਸ. ਮੁਨਿਨ੍ਤਿ ਬੁਦ੍ਧਮੁਨਿਂ. ਦੁਕ੍ਖਸ੍ਸ ਪਾਰਗੁਨ੍ਤਿ ਦੁਕ੍ਖਪਾਰਂ ਗਤਂ. ਸਮਨ੍ਨੇਸਨ੍ਤਿ ਸਮਨ੍ਨੇਸਨ੍ਤੋ. ਏਵਂ ਸਬ੍ਬਙ੍ਗਸਮ੍ਪਨ੍ਨਨ੍ਤਿ ਏਵਂ ਸਬ੍ਬਗੁਣਸਮ੍ਪਨ੍ਨਂ. ਅਨੇਕਾਕਾਰਸਮ੍ਪਨ੍ਨਨ੍ਤਿ ਅਨੇਕੇਹਿ ਗੁਣੇਹਿ ਸਮਨ੍ਨਾਗਤਂ. ਦਸਮਂ.
੧੧. ਗਗ੍ਗਰਾਸੁਤ੍ਤਵਣ੍ਣਨਾ
੨੧੯. ਏਕਾਦਸਮੇ ਤ੍ਯਾਸ੍ਸੁਦਨ੍ਤਿ ਤੇ ਅਸ੍ਸੁਦਂ. ਅਸ੍ਸੁਦਨ੍ਤਿ ਨਿਪਾਤਮਤ੍ਤਂ. ਵਣ੍ਣੇਨਾਤਿ ਸਰੀਰਵਣ੍ਣੇਨ. ਯਸਸਾਤਿ ਪਰਿਵਾਰੇਨ. ਵਿਗਤਮਲੋਵ ਭਾਣੁਮਾਤਿ ਵਿਗਤਮਲੋ ਆਦਿਚ੍ਚੋ ਵਿਯ. ਏਕਾਦਸਮਂ.
੧੨. ਵਙ੍ਗੀਸਸੁਤ੍ਤਵਣ੍ਣਨਾ
੨੨੦. ਦ੍ਵਾਦਸਮੇ ਆਯਸ੍ਮਾਤਿ ਪਿਯਵਚਨਂ. ਵਙ੍ਗੀਸੋਤਿ ਤਸ੍ਸ ਥੇਰਸ੍ਸ ਨਾਮਂ. ਸੋ ਕਿਰ ਪੁਬ੍ਬੇ ਪਦੁਮੁਤ੍ਤਰਕਾਲੇ ਪਟਿਭਾਨਸਮ੍ਪਨ੍ਨਂ ਸਾਵਕਂ ਦਿਸ੍ਵਾ ਦਾਨਂ ਦਤ੍ਵਾ ਪਤ੍ਥਨਂ ਕਤ੍ਵਾ ਕਪ੍ਪਸਤਸਹਸ੍ਸਂ ਪਾਰਮਿਯੋ ਪੂਰੇਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਸਕਲਜਮ੍ਬੁਦੀਪੇ ਵਾਦਕਾਮਤਾਯ ਜਮ੍ਬੁਸਾਖਂ ਪਰਿਹਰਿਤ੍ਵਾ ਏਕੇਨ ਪਰਿਬ੍ਬਾਜਕੇਨ ਸਦ੍ਧਿਂ ਵਾਦਂ ਕਤ੍ਵਾ ਵਾਦੇ ਜਯਪਰਾਜਯਾਨੁਭਾਵੇਨ ਤੇਨੇਵ ਪਰਿਬ੍ਬਾਜਕੇਨ ਸਦ੍ਧਿਂ ਸਂਵਾਸਂ ਕਪ੍ਪੇਤ੍ਵਾ ਵਸਮਾਨਾਯ ਏਕਿਸ੍ਸਾ ਪਰਿਬ੍ਬਾਜਿਕਾਯ ਕੁਚ੍ਛਿਮ੍ਹਿ ਨਿਬ੍ਬਤ੍ਤੋ ਵਯਂ ਆਗਮ੍ਮ ਮਾਤਿਤੋ ਪਞ੍ਚਵਾਦਸਤਾਨਿ, ਪਿਤਿਤੋ ਪਞ੍ਚਵਾਦਸਤਾਨੀਤਿ ਵਾਦਸਹਸ੍ਸਂ ਉਗ੍ਗਣ੍ਹਿਤ੍ਵਾ ਵਿਚਰਤਿ. ਏਕਞ੍ਚ ਵਿਜ੍ਜਂ ਜਾਨਾਤਿ, ਯਂ ਵਿਜ੍ਜਂ ਪਰਿਜਪ੍ਪਿਤ੍ਵਾ ਮਤਾਨਂ ਸੀਸਂ ਅਙ੍ਗੁਲਿਯਾ ਪਹਰਿਤ੍ਵਾ – ‘‘ਅਸੁਕਟ੍ਠਾਨੇ ਨਿਬ੍ਬਤ੍ਤੋ’’ਤਿ ਜਾਨਾਤਿ. ਸੋ ਅਨੁਪੁਬ੍ਬੇਨ ਗਾਮਨਿਗਮਾਦੀਸੁ ਵਿਚਰਨ੍ਤੋ ਪਞ੍ਚਹਿ ਮਾਣਵਕਸਤੇਹਿ ਸਦ੍ਧਿਂ ਸਾਵਤ੍ਥਿਂ ਅਨੁਪ੍ਪਤ੍ਤੋ ਨਗਰਦ੍ਵਾਰੇ ਸਾਲਾਯ ਨਿਸੀਦਤਿ.
ਤਦਾ ਚ ਨਗਰਵਾਸਿਨੋ ਪੁਰੇਭਤ੍ਤਂ ਦਾਨਂ ਦਤ੍ਵਾ ਪਚ੍ਛਾਭਤ੍ਤਂ ਸੁਦ੍ਧੁਤ੍ਤਰਾਸਙ੍ਗਾ ਗਨ੍ਧਮਾਲਾਦਿਹਤ੍ਥਾ ਧਮ੍ਮਸ੍ਸਵਨਾਯ ਵਿਹਾਰਂ ਗਚ੍ਛਨ੍ਤਿ. ਮਾਣਵੋ ਦਿਸ੍ਵਾ, ‘‘ਕਹਂ ਗਚ੍ਛਥਾ’’ਤਿ? ਪੁਚ੍ਛਿ. ਤੇ ‘‘ਦਸਬਲਸ੍ਸ ਸਨ੍ਤਿਕਂ ਧਮ੍ਮਸ੍ਸਵਨਾਯਾ’’ਤਿ ਆਹਂਸੁ. ਸੋਪਿ ਸਪਰਿਵਾਰੋ ਤੇਹਿ ਸਦ੍ਧਿਂ ਗਨ੍ਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਅਥ ਨਂ ਭਗਵਾ ਆਹ – ‘‘ਵਙ੍ਗੀਸ, ਭਦ੍ਦਕਂ ਕਿਰ ਸਿਪ੍ਪਂ ਜਾਨਾਸੀ’’ਤਿ. ‘‘ਭੋ ਗੋਤਮ, ਅਹਂ ਬਹੁਸਿਪ੍ਪਂ ਜਾਨਾਮਿ. ਤੁਮ੍ਹੇ ਕਤਰਂ ਸਨ੍ਧਾਯ ਵਦਥਾ’’ਤਿ? ਛਵਦੂਸਕਸਿਪ੍ਪਨ੍ਤਿ. ਆਮ, ਭੋ ਗੋਤਮਾਤਿ. ਅਥਸ੍ਸ ਭਗਵਾ ਅਤ੍ਤਨੋ ਆਨੁਭਾਵੇਨ ਨਿਰਯੇ ਨਿਬ੍ਬਤ੍ਤਸ੍ਸ ਸੀਸਂ ਦਸ੍ਸੇਤ੍ਵਾ, ‘‘ਵਙ੍ਗੀਸ, ਅਯਂ ਕਹਂ ਨਿਬ੍ਬਤ੍ਤੋ’’ਤਿ ਪੁਚ੍ਛਿ. ਸੋ ਮਨ੍ਤਂ ਜਪ੍ਪਿਤ੍ਵਾ ਅਙ੍ਗੁਲਿਯਾ ਪਹਰਿਤ੍ਵਾ ‘‘ਨਿਰਯੇ’’ਤਿ ਆਹ. ‘‘ਸਾਧੁ, ਵਙ੍ਗੀਸ, ਸੁਕਥਿਤ’’ਨ੍ਤਿ ਦੇਵਲੋਕੇ ਨਿਬ੍ਬਤ੍ਤਸ੍ਸ ਸੀਸਂ ਦਸ੍ਸੇਸਿ. ਤਮ੍ਪਿ ਸੋ ਤਥੇਵ ਬ੍ਯਾਕਾਸਿ. ਅਥਸ੍ਸ ਖੀਣਾਸਵਸ੍ਸ ਸੀਸਂ ਦਸ੍ਸੇਸਿ. ਸੋ ਪੁਨਪ੍ਪੁਨਂ ਮਨ੍ਤਂ ਪਰਿਵਤ੍ਤੇਤ੍ਵਾਪਿ ਅਙ੍ਗੁਲਿਯਾ ਪਹਰਿਤ੍ਵਾਪਿ ਨਿਬ੍ਬਤ੍ਤਟ੍ਠਾਨਂ ਨ ਪਸ੍ਸਤਿ.
ਅਥ ਨਂ ਭਗਵਾ ‘‘ਕਿਲਮਸਿ, ਵਙ੍ਗੀਸਾ’’ਤਿ ਆਹ? ਆਮ ਭੋ, ਗੋਤਮਾਤਿ. ਪੁਨਪ੍ਪੁਨਂ ਉਪਧਾਰੇਹੀਤਿ. ਤਥਾ ਕਰੋਨ੍ਤੋਪਿ ਅਦਿਸ੍ਵਾ, ‘‘ਤੁਮ੍ਹੇ, ਭੋ ਗੋਤਮ, ਜਾਨਾਥਾ’’ਤਿ ਆਹ. ਆਮ, ਵਙ੍ਗੀਸ, ਮਂ ਨਿਸ੍ਸਾਯ ਚੇਸ ਗਤੋ, ਅਹਮਸ੍ਸ ਗਤਿਂ ਜਾਨਾਮੀਤਿ. ਮਨ੍ਤੇਨ ਜਾਨਾਸਿ, ਭੋ ਗੋਤਮਾਤਿ? ਆਮ, ਵਙ੍ਗੀਸ, ਏਕੇਨ ਮਨ੍ਤੇਨੇਵ ਜਾਨਾਮੀਤਿ. ਭੋ ਗੋਤਮ, ਮਯ੍ਹਂ ਮਨ੍ਤੇਨ ਇਮਂ ਮਨ੍ਤਂ ਦੇਥਾਤਿ. ਅਮੂਲਿਕੋ, ਵਙ੍ਗੀਸ, ਮਯ੍ਹਂ ਮਨ੍ਤੋਤਿ. ਦੇਥ, ਭੋ ਗੋਤਮਾਤਿ. ਨ ਸਕ੍ਕਾ ਮਯ੍ਹਂ ਸਨ੍ਤਿਕੇ ਅਪਬ੍ਬਜਿਤਸ੍ਸ ਦਾਤੁਨ੍ਤਿ. ਸੋ ਅਨ੍ਤੇਵਾਸਿਕੇ ਆਮਨ੍ਤੇਸਿ – ‘‘ਤਾਤਾ ਸਮਣੋ ਗੋਤਮੋ ਅਤਿਰੇਕਸਿਪ੍ਪਂ ਜਾਨਾਤਿ, ਅਹਂ ਇਮਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਸਿਪ੍ਪਂ ਗਣ੍ਹਾਮਿ, ਤਤੋ ਸਕਲਜਮ੍ਬੁਦੀਪੇ ਅਮ੍ਹੇਹਿ ਬਹੁਤਰਂ ਜਾਨਨ੍ਤੋ ਨਾਮ ਨ ਭਵਿਸ੍ਸਤਿ. ਤੁਮ੍ਹੇ ਯਾਵ ਅਹਂ ਆਗਚ੍ਛਾਮਿ, ਤਾਵ ਅਨੁਕ੍ਕਣ੍ਠਿਤ੍ਵਾ ਵਿਚਰਥਾ’’ਤਿ ਤੇ ਉਯ੍ਯੋਜੇਤ੍ਵਾ ‘‘ਪਬ੍ਬਾਜੇਥ ਮ’’ਨ੍ਤਿ ਆਹ. ਸਤ੍ਥਾ ਨਿਗ੍ਰੋਧਕਪ੍ਪਸ੍ਸ ਪਟਿਪਾਦੇਸਿ. ਥੇਰੋ ਤਂ ਅਤ੍ਤਨੋ ਵਸਨਟ੍ਠਾਨਂ ਨੇਤ੍ਵਾ ਪਬ੍ਬਾਜੇਸਿ. ਸੋ ਪਬ੍ਬਜਿਤ੍ਵਾ ਸਤ੍ਥੁ ਸਨ੍ਤਿਕਂ ਆਗਮ੍ਮ ਵਨ੍ਦਿਤ੍ਵਾ ਠਿਤੋ ‘‘ਸਿਪ੍ਪਂ ਦੇਥਾ’’ਤਿ ਯਾਚਿ. ਵਙ੍ਗੀਸ, ਤੁਮ੍ਹੇ ਸਿਪ੍ਪਂ ਗਣ੍ਹਨ੍ਤਾ ਅਲੋਣਭੋਜਨਥਣ੍ਡਿਲਸੇਯ੍ਯਾਦੀਹਿ ਪਰਿਕਮ੍ਮਂ ਕਤ੍ਵਾ ਗਣ੍ਹਥ, ਇਮਸ੍ਸਾਪਿ ਸਿਪ੍ਪਸ੍ਸ ਪਰਿਕਮ੍ਮਂ ਅਤ੍ਥਿ, ਤਂ ਤਾਵ ਕਰੋਹੀਤਿ. ਸਾਧੁ, ਭਨ੍ਤੇਤਿ. ਅਥਸ੍ਸ ਸਤ੍ਥਾ ਦ੍ਵਤ੍ਤਿਂਸਾਕਾਰਕਮ੍ਮਟ੍ਠਾਨਂ ਆਚਿਕ੍ਖਿ. ਸੋ ਤਂ ਅਨੁਲੋਮਪਟਿਲੋਮਂ ਮਨਸਿਕਰੋਨ੍ਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਨੁਕ੍ਕਮੇਨ ਅਰਹਤ੍ਤਂ ਪਾਪੁਣਿ.
ਵਿਮੁਤ੍ਤਿਸੁਖਂ ਪਟਿਸਂਵੇਦੀਤਿ ਏਵਂ ਅਰਹਤ੍ਤਂ ਪਤ੍ਵਾ ਵਿਮੁਤ੍ਤਿਸੁਖਂ ਪਟਿਸਂਵੇਦੇਨ੍ਤੋ. ਕਾਵੇਯ੍ਯਮਤ੍ਤਾਤਿ ਕਾਵੇਯ੍ਯੇਨ ਕਬ੍ਬਕਰਣੇਨ ਮਤ੍ਤਾ. ਖਨ੍ਧਾਯਤਨਧਾਤੁਯੋਤਿ ਇਮਾਨਿ ਖਨ੍ਧਾਦੀਨਿ ਪਕਾਸੇਨ੍ਤੋ ਧਮ੍ਮਂ ਦੇਸੇਸਿ. ਯੇ ਨਿਯਾਮਗਤਦ੍ਦਸਾਤਿ ਯੇ ਨਿਯਾਮਗਤਾ ਚੇਵ ਨਿਯਾਮਦਸ੍ਸਾਤਿ ਚ. ਸ੍ਵਾਗਤਨ੍ਤਿ ਸੁਆਗਮਨਂ. ਇਦ੍ਧਿਪਤ੍ਤੋਮ੍ਹੀਤਿ ਇਮਿਨਾ ਇਦ੍ਧਿਵਿਧਞਾਣਂ ਗਹਿਤਂ. ਚੇਤੋਪਰਿਯਾਯਕੋਵਿਦੋਤਿ ਇਮਿਨਾ ਚੇਤੋਪਰਿਯਞਾਣਂ. ਦਿਬ੍ਬਸੋਤਂ ਪਨ ਅਵੁਤ੍ਤਮ੍ਪਿ ਗਹਿਤਮੇਵ ਹੋਤਿ. ਏਵਂ ਛ ਅਭਿਞ੍ਞਾਪਤ੍ਤੋ ਏਸੋ ਮਹਾਸਾਵਕੋਤਿ ਵੇਦਿਤਬ੍ਬੋ. ਦ੍ਵਾਦਸਮਂ.
ਇਤਿ ਸਾਰਤ੍ਥਪ੍ਪਕਾਸਿਨਿਯਾ
ਸਂਯੁਤ੍ਤਨਿਕਾਯ-ਅਟ੍ਠਕਥਾਯ
ਵਙ੍ਗੀਸਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.