੯. ਵਨਸਂਯੁਤ੍ਤਂ

੧. ਵਿਵੇਕਸੁਤ੍ਤਵਣ੍ਣਨਾ

੨੨੧. ਵਨਸਂਯੁਤ੍ਤਸ੍ਸ ਪਠਮੇ ਕੋਸਲੇਸੁ ਵਿਹਰਤੀਤਿ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਤਸ੍ਸ ਜਨਪਦਸ੍ਸ ਸੁਲਭਭਿਕ੍ਖਤਾਯ ਤਤ੍ਥ ਗਨ੍ਤ੍ਵਾ ਵਿਹਰਤਿ. ਸਂਵੇਜੇਤੁਕਾਮਾਤਿ ਵਿਵੇਕਂ ਪਟਿਪਜ੍ਜਾਪੇਤੁਕਾਮਾ. ਵਿਵੇਕਕਾਮੋਤਿ ਤਯੋ ਵਿਵੇਕੇ ਪਤ੍ਥਯਨ੍ਤੋ. ਨਿਚ੍ਛਰਤੀ ਬਹਿਦ੍ਧਾਤਿ ਬਾਹਿਰੇਸੁ ਪੁਥੁਤ੍ਤਾਰਮ੍ਮਣੇਸੁ ਚਰਤਿ. ਜਨੋ ਜਨਸ੍ਮਿਨ੍ਤਿ ਤ੍ਵਂ ਜਨੋ ਅਞ੍ਞਸ੍ਮਿਂ ਜਨੇ ਛਨ੍ਦਰਾਗਂ ਵਿਨਯਸ੍ਸੁ. ਪਜਹਾਸੀਤਿ ਪਜਹ. ਭਵਾਸੀਤਿ ਭਵ. ਸਤਂ ਤਂ ਸਾਰਯਾਮਸੇਤਿ ਸਤਿਮਨ੍ਤਂ ਪਣ੍ਡਿਤਂ ਤਂ ਮਯਮ੍ਪਿ ਸਾਰਯਾਮ, ਸਤਂ ਵਾ ਧਮ੍ਮਂ ਮਯਂ ਤਂ ਸਾਰਯਾਮਾਤਿ ਅਤ੍ਥੋ. ਪਾਤਾਲਰਜੋਤਿ ਅਪ੍ਪਤਿਟ੍ਠਟ੍ਠੇਨ ਪਾਤਾਲਸਙ੍ਖਾਤੋ ਕਿਲੇਸਰਜੋ. ਮਾ ਤਂ ਕਾਮਰਜੋਤਿ ਅਯਂ ਕਾਮਰਾਗਰਜੋ ਤਂ ਮਾ ਅਵਹਰਿ, ਅਪਾਯਮੇਵ ਮਾ ਨੇਤੂਤਿ ਅਤ੍ਥੋ. ਪਂਸੁਕੁਨ੍ਥਿਤੋਤਿ ਪਂਸੁਮਕ੍ਖਿਤੋ. ਵਿਧੁਨਨ੍ਤਿ ਵਿਧੁਨਨ੍ਤੋ. ਸਿਤਂ ਰਜਨ੍ਤਿ ਸਰੀਰਲਗ੍ਗਂ ਰਜਂ. ਸਂਵੇਗਮਾਪਾਦੀਤਿ ਦੇਵਤਾਪਿ ਨਾਮ ਮਂ ਏਵਂ ਸਾਰੇਤੀਤਿ ਵਿਵੇਕਮਾਪਨ੍ਨੋ, ਉਤ੍ਤਮਵੀਰਿਯਂ ਵਾ ਪਗ੍ਗਯ੍ਹ ਪਰਮਵਿਵੇਕਂ ਮਗ੍ਗਮੇਵ ਪਟਿਪਨ੍ਨੋਤਿ. ਪਠਮਂ.

੨. ਉਪਟ੍ਠਾਨਸੁਤ੍ਤਵਣ੍ਣਨਾ

੨੨੨. ਦੁਤਿਯੇ ਸੁਪਤੀਤਿ ਅਯਂ ਕਿਰ ਖੀਣਾਸਵੋ, ਸੋ ਦੂਰੇ ਭਿਕ੍ਖਾਚਾਰਗਾਮਂ ਗਨ੍ਤ੍ਵਾ ਆਗਤੋ ਪਣ੍ਣਸਾਲਾਯ ਪਤ੍ਤਚੀਵਰਂ ਪਟਿਸਾਮੇਤ੍ਵਾ ਅਵਿਦੂਰੇ ਜਾਤਸ੍ਸਰਂ ਓਤਰਿਤ੍ਵਾ ਗਤ੍ਤਾਨਿ ਉਤੁਂ ਗਾਹਾਪੇਤ੍ਵਾ ਦਿਵਾਟ੍ਠਾਨਂ ਸਮ੍ਮਜ੍ਜਿਤ੍ਵਾ ਤਤ੍ਥ ਨੀਚਮਞ੍ਚਕਂ ਪਞ੍ਞਾਪੇਤ੍ਵਾ ਨਿਦ੍ਦਂ ਅਨੋਕ੍ਕਮਨ੍ਤੋਵ ਨਿਪਨ੍ਨੋ. ਖੀਣਾਸਵਸ੍ਸਾਪਿ ਹਿ ਕਾਯਦਰਥੋ ਹੋਤਿਯੇਵਾਤਿ ਤਸ੍ਸ ਵਿਨੋਦਨਤ੍ਥਂ, ਤਂ ਸਨ੍ਧਾਯ ਸੁਪਤੀਤਿ ਵੁਤ੍ਤਂ. ਅਜ੍ਝਭਾਸੀਤਿ ‘‘ਅਯਂ ਭਿਕ੍ਖੁ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਦਿਵਾ ਸੁਪਤਿ, ਦਿਵਾਸੋਪ੍ਪਞ੍ਚ ਨਾਮੇਤਂ ਵਡ੍ਢਿਤਂ ਦਿਟ੍ਠਧਮ੍ਮਿਕਸਮ੍ਪਰਾਯਿਕਂ ਅਤ੍ਥਂ ਨਾਸੇਤੀ’’ਤਿ ਮਞ੍ਞਮਾਨਾ ‘‘ਚੋਦੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਅਭਾਸਿ.

ਆਤੁਰਸ੍ਸਾਤਿ ਜਰਾਤੁਰੋ ਰੋਗਾਤੁਰੋ ਕਿਲੇਸਾਤੁਰੋਤਿ ਤਯੋ ਆਤੁਰਾ, ਤੇਸੁ ਕਿਲੇਸਾਤੁਰਂ ਸਨ੍ਧਾਯੇਵਮਾਹ. ਸਲ੍ਲਵਿਦ੍ਧਸ੍ਸਾਤਿ ਸਵਿਸੇਨ ਸਤ੍ਤਿਸਲ੍ਲੇਨ ਵਿਯ ਅਵਿਜ੍ਜਾਵਿਸਵਿਟ੍ਠੇਨ ਤਣ੍ਹਾਸਲ੍ਲੇਨ ਹਦਯੇ ਵਿਦ੍ਧਸ੍ਸ. ਰੁਪ੍ਪਤੋਤਿ ਘਟ੍ਟਿਯਮਾਨਸ੍ਸ.

ਇਦਾਨਿਸ੍ਸ ਕਾਮੇਸੁ ਆਦੀਨਵਂ ਕਥਯਨ੍ਤੀ ਅਨਿਚ੍ਚਾਤਿਆਦਿਮਾਹ. ਤਤ੍ਥ ਅਸਿਤਨ੍ਤਿ ਤਣ੍ਹਾਦਿਟ੍ਠਿਨਿਸ੍ਸਯੇਨ ਅਨਿਸ੍ਸਿਤਂ. ਕਸ੍ਮਾ ਪਬ੍ਬਜਿਤਂ ਤਪੇਤਿ ਏਵਰੂਪਂ ਖੀਣਾਸਵਂ ਦਿਵਾਸੋਪ੍ਪਂ ਨ ਤਪਤਿ, ਤਾਦਿਸਂ ਪਨ ਕਸ੍ਮਾ ਨ ਤਪੇਸ੍ਸਤੀਤਿ? ਵਦਤਿ. ਥੇਰਸ੍ਸੇਵ ਵਾ ਏਤਂ ਵਚਨਂ, ਤਸ੍ਮਾ ਅਯਮੇਤ੍ਥ ਅਤ੍ਥੋ – ਬਦ੍ਧੇਸੁ ਮੁਤ੍ਤਂ ਅਸਿਤਂ ਮਾਦਿਸਂ ਖੀਣਾਸਵਪਬ੍ਬਜਿਤਂ ਕਸ੍ਮਾ ਦਿਵਾਸੋਪ੍ਪਂ ਤਪੇ, ਨ ਤਪੇਸ੍ਸਤੀਤਿ? ਸੇਸਗਾਥਾਸੁਪਿ ਏਸੇਵ ਨਯੋ. ਦੇਵਤਾਯ ਹਿ ਵਚਨਪਕ੍ਖੇ – ‘‘ਏਵਰੂਪਂ ਖੀਣਾਸਵਪਬ੍ਬਜਿਤਂ ਦਿਵਾਸੋਪ੍ਪਂ ਨ ਤਪਤਿ, ਤਾਦਿਸਂ ਪਨ ਕਸ੍ਮਾ ਨ ਤਪੇਸ੍ਸਤਿ? ਤਪੇਸ੍ਸਤਿਯੇਵਾ’’ਤਿ ਅਤ੍ਥੋ. ਥੇਰਸ੍ਸ ਵਚਨਪਕ੍ਖੇ – ‘‘ਏਵਰੂਪਂ ਮਾਦਿਸਂ ਖੀਣਾਸਵਪਬ੍ਬਜਿਤਂ ਕਸ੍ਮਾ ਦਿਵਾਸੋਪ੍ਪਂ ਤਪੇ? ਨ ਤਪਤਿਯੇਵਾ’’ਤਿ ਅਤ੍ਥੋ. ਅਯਂ ਪਨੇਤ੍ਥ ਅਨੁਤ੍ਤਾਨਪਦਵਣ੍ਣਨਾ. ਵਿਨਯਾਤਿ ਵਿਨਯੇਨ. ਸਮਤਿਕ੍ਕਮਾਤਿ ਵਟ੍ਟਮੂਲਿਕਾਯ ਅਵਿਜ੍ਜਾਯ ਸਮਤਿਕ੍ਕਮੇਨ. ਤਂ ਞਾਣਨ੍ਤਿ ਤਂ ਚਤੁਸਚ੍ਚਞਾਣਂ. ਪਰਮੋਦਾਨਨ੍ਤਿ ਪਰਮਪਰਿਸੁਦ੍ਧਂ. ਪਬ੍ਬਜਿਤਨ੍ਤਿ ਏਵਰੂਪੇਨ ਞਾਣੇਨ ਸਮਨ੍ਨਾਗਤਂ ਪਬ੍ਬਜਿਤਂ. ਵਿਜ੍ਜਾਯਾਤਿ ਚਤੁਤ੍ਥਮਗ੍ਗਵਿਜ੍ਜਾਯ. ਆਰਦ੍ਧਵੀਰਿਯਨ੍ਤਿ ਪਗ੍ਗਹਿਤਵੀਰਿਯਂ ਪਰਿਪੁਣ੍ਣਵੀਰਿਯਂ. ਦੁਤਿਯਂ.

੩. ਕਸ੍ਸਪਗੋਤ੍ਤਸੁਤ੍ਤਵਣ੍ਣਨਾ

੨੨੩. ਤਤਿਯੇ ਛੇਤਨ੍ਤਿ ਏਕਂ ਮਿਗਲੁਦ੍ਦਕਂ. ਓਵਦਤੀਤਿ ਸੋ ਕਿਰ ਮਿਗਲੁਦ੍ਦਕੋ ਪਾਤੋਵ ਭੁਞ੍ਜਿਤ੍ਵਾ ‘‘ਮਿਗੇ ਵਧਿਸ੍ਸਾਮੀ’’ਤਿ ਅਰਞ੍ਞਂ ਪਵਿਟ੍ਠੋ ਏਕਂ ਰੋਹਿਤਮਿਗਂ ਦਿਸ੍ਵਾ ‘‘ਸਤ੍ਤਿਯਾ ਨਂ ਪਹਰਿਸ੍ਸਾਮੀ’’ਤਿ ਅਨੁਬਨ੍ਧਮਾਨੋ ਥੇਰਸ੍ਸ ਪਠਮਸੁਤ੍ਤੇ ਵੁਤ੍ਤਨਯੇਨੇਵ ਦਿਵਾਵਿਹਾਰਂ ਨਿਸਿਨ੍ਨਸ੍ਸ ਅਵਿਦੂਰੇਨ ਪਕ੍ਕਮਤਿ. ਅਥ ਨਂ ਥੇਰੋ – ‘‘ਉਪਾਸਕ, ਪਾਣਾਤਿਪਾਤੋ ਨਾਮੇਸ ਅਪਾਯਸਂਵਤ੍ਤਨਿਕੋ ਅਪ੍ਪਾਯੁਕਸਂਵਤ੍ਤਨਿਕੋ, ਸਕ੍ਕਾ ਅਞ੍ਞੇਨਪਿ ਕਸਿਵਣਿਜ੍ਜਾਦਿਕਮ੍ਮੇਨ ਦਾਰਭਰਣਂ ਕਾਤੁਂ, ਮਾ ਏਵਰੂਪਂ ਕਕ੍ਖਲ਼ਕਮ੍ਮਂ ਕਰੋਹੀ’’ਤਿ ਆਹ. ਸੋਪਿ ‘‘ਮਹਾਪਂਸੁਕੂਲਿਕਤ੍ਥੇਰੋ ਕਥੇਤੀ’’ਤਿ ਗਾਰਵੇਨ ਠਤ੍ਵਾ ਸੋਤੁਂ ਆਰਦ੍ਧੋ. ਅਥਸ੍ਸ ਸੋਤੁਕਾਮਤਂ ਜਨੇਸ੍ਸਾਮੀਤਿ ਥੇਰੋ ਅਙ੍ਗੁਟ੍ਠਕਂ ਜਾਲਾਪੇਸਿ. ਸੋ ਅਕ੍ਖੀਹਿਪਿ ਪਸ੍ਸਤਿ, ਕਣ੍ਣੇਹਿਪਿ ਸੁਣਾਤਿ, ਚਿਤ੍ਤਂ ਪਨਸ੍ਸ ‘‘ਅਸੁਕਟ੍ਠਾਨਂ ਮਿਗੋ ਗਤੋ ਭਵਿਸ੍ਸਤਿ, ਅਸੁਕਤਿਤ੍ਥਂ ਓਤਿਣ੍ਣੋ, ਤਤ੍ਥ ਨਂ ਗਨ੍ਤ੍ਵਾ ਘਾਤੇਤ੍ਵਾ ਯਾਵਦਿਚ੍ਛਕਂ ਮਂਸਂ ਖਾਦਿਤ੍ਵਾ ਸੇਸਂ ਕਾਜੇਨਾਦਾਯ ਗਨ੍ਤ੍ਵਾ ਪੁਤ੍ਤਕੇ ਤੋਸੇਸ੍ਸਾਮੀ’’ਤਿ ਏਵਂ ਮਿਗਸ੍ਸੇਵ ਅਨੁਪਦਂ ਧਾਵਤਿ. ਏਵਂ ਵਿਕ੍ਖਿਤ੍ਤਚਿਤ੍ਤਸ੍ਸ ਧਮ੍ਮਂ ਦੇਸੇਨ੍ਤਂ ਥੇਰਂ ਸਨ੍ਧਾਯ ਵੁਤ੍ਤਂ ‘‘ਓਵਦਤੀ’’ਤਿ. ਅਜ੍ਝਭਾਸੀਤਿ ‘‘ਅਯਂ ਥੇਰੋ ਅਦਾਰੁਂ ਤਚ੍ਛਨ੍ਤੋ ਵਿਯ ਅਖੇਤ੍ਤੇ ਵਪ੍ਪਨ੍ਤੋ ਵਿਯ ਅਤ੍ਤਨੋਪਿ ਕਮ੍ਮਂ ਨਾਸੇਤਿ, ਏਤਸ੍ਸਾਪਿ ਚੋਦੇਸ੍ਸਾਮਿ ਨ’’ਨ੍ਤਿ ਅਭਾਸਿ.

ਅਪ੍ਪਪਞ੍ਞਨ੍ਤਿ ਨਿਪ੍ਪਞ੍ਞਂ. ਅਚੇਤਸਨ੍ਤਿ ਕਾਰਣਜਾਨਨਸਮਤ੍ਥੇਨ ਚਿਤ੍ਤੇਨ ਰਹਿਤਂ. ਮਨ੍ਦੋਵਾਤਿ ਅਨ੍ਧਬਾਲੋ ਵਿਯ. ਸੁਣਾਤੀਤਿ ਤਵ ਧਮ੍ਮਕਥਂ ਸੁਣਾਤਿ. ਨ ਵਿਜਾਨਾਤੀਤਿ ਅਤ੍ਥਮਸ੍ਸ ਨ ਜਾਨਾਤਿ. ਆਲੋਕੇਤੀਤਿ ਤਵ ਪੁਥੁਜ੍ਜਨਿਕਇਦ੍ਧਿਯਾ ਜਲਨ੍ਤਂ ਅਙ੍ਗੁਟ੍ਠਕਂ ਆਲੋਕੇਤਿ. ਨ ਪਸ੍ਸਤੀਤਿ ਏਤ੍ਥ ‘‘ਨੇਵ ਤੇਲਂ ਨ ਵਟ੍ਟਿ ਨ ਦੀਪਕਪਲ੍ਲਿਕਾ, ਥੇਰਸ੍ਸ ਪਨ ਆਨੁਭਾਵੇਨਾਯਂ ਜਲਤੀ’’ਤਿ ਇਮਂ ਕਾਰਣਂ ਨ ਪਸ੍ਸਤਿ. ਦਸ ਪਜ੍ਜੋਤੇਤਿ ਦਸਸੁ ਅਙ੍ਗੁਲੀਸੁ ਦਸ ਪਦੀਪੇ. ਰੂਪਾਨੀਤਿ ਕਾਰਣਰੂਪਾਨਿ. ਚਕ੍ਖੂਤਿ ਪਞ੍ਞਾਚਕ੍ਖੁ. ਸਂਵੇਗਮਾਪਾਦੀਤਿ ਕਿਂ ਮੇ ਇਮਿਨਾਤਿ? ਵੀਰਿਯਂ ਪਗ੍ਗਯ੍ਹ ਪਰਮਵਿਵੇਕਂ ਅਰਹਤ੍ਤਮਗ੍ਗਂ ਪਟਿਪਜ੍ਜਿ. ਤਤਿਯਂ.

੪. ਸਮ੍ਬਹੁਲਸੁਤ੍ਤਵਣ੍ਣਨਾ

੨੨੪. ਚਤੁਤ੍ਥੇ ਸਮ੍ਬਹੁਲਾਤਿ ਬਹੂ ਸੁਤ੍ਤਨ੍ਤਿਕਾ ਆਭਿਧਮ੍ਮਿਕਾ ਵਿਨਯਧਰਾ ਚ. ਵਿਹਰਨ੍ਤੀਤਿ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਵਿਹਰਨ੍ਤਿ. ਪਕ੍ਕਮਿਂਸੂਤਿ ਤੇ ਕਿਰ ਤਸ੍ਮਿਂ ਜਨਪਦੇ ਅਞ੍ਞਤਰਂ ਗਾਮਂ ਉਪਸਙ੍ਕਮਨ੍ਤੇ ਦਿਸ੍ਵਾ ਮਨੁਸ੍ਸਾ ਪਸਨ੍ਨਚਿਤ੍ਤਾ ਆਸਨਸਾਲਾਯ ਕੋਜਵਤ੍ਥਰਣਾਦੀਨਿ ਪਞ੍ਞਾਪੇਤ੍ਵਾ ਯਾਗੁਖਜ੍ਜਕਾਨਿ ਦਤ੍ਵਾ ਉਪਨਿਸੀਦਿਂਸੁ. ਮਹਾਥੇਰੋ ਏਕਂ ਧਮ੍ਮਕਥਿਕਂ ‘‘ਧਮ੍ਮਂ ਕਥੇਹੀ’’ਤਿ ਆਹ. ਸੋ ਚਿਤ੍ਤਂ ਧਮ੍ਮਕਥਂ ਕਥੇਸਿ. ਮਨੁਸ੍ਸਾ ਪਸੀਦਿਤ੍ਵਾ ਭੋਜਨਵੇਲਾਯਂ ਪਣੀਤਭੋਜਨਂ ਅਦਂਸੁ. ਮਹਾਥੇਰੋ ਮਨੁਞ੍ਞਂ ਭਤ੍ਤਾਨੁਮੋਦਨਮਕਾਸਿ. ਮਨੁਸ੍ਸਾ ਭਿਯ੍ਯੋਸੋਮਤ੍ਤਾਯ ਪਸਨ੍ਨਾ ‘‘ਇਧੇਵ, ਭਨ੍ਤੇ, ਤੇਮਾਸਂ ਵਸਥਾ’’ਤਿ ਪਟਿਞ੍ਞਂ ਕਾਰੇਤ੍ਵਾ ਗਮਨਾਗਮਨਸਮ੍ਪਨ੍ਨੇ ਠਾਨੇ ਸੇਨਾਸਨਾਨਿ ਕਾਰੇਤ੍ਵਾ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿਂਸੁ. ਮਹਾਥੇਰੋ ਵਸ੍ਸੂਪਨਾਯਿਕਦਿਵਸੇ ਭਿਕ੍ਖੂ ਓਵਦਿ – ‘‘ਆਵੁਸੋ, ਤੁਮ੍ਹੇਹਿ ਗਰੁਕਸ੍ਸ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹਿਤਂ, ਬੁਦ੍ਧਪਾਤੁਭਾਵੋ ਨਾਮ ਦੁਲ੍ਲਭੋ. ਮਾਸਸ੍ਸ ਅਟ੍ਠ ਦਿਵਸੇ ਧਮ੍ਮਸ੍ਸਵਨਂ ਕਤ੍ਵਾ ਗਣਸਙ੍ਗਣਿਕਂ ਪਹਾਯ ਅਪ੍ਪਮਤ੍ਤਾ ਵਿਹਰਥਾ’’ਤਿ. ਤੇ ਤਤੋ ਪਟ੍ਠਾਯ ਯੁਞ੍ਜਨ੍ਤਿ ਘਟੇਨ੍ਤਿ. ਕਦਾਚਿ ਸਬ੍ਬਰਤ੍ਤਿਕਂ ਧਮ੍ਮਸ੍ਸਵਨਂ ਕਰੋਨ੍ਤਿ, ਕਦਾਚਿ ਪਞ੍ਹਂ ਵਿਸ੍ਸਜ੍ਜੇਨ੍ਤਿ, ਕਦਾਚਿ ਪਧਾਨਂ ਕਰੋਨ੍ਤਿ. ਤੇਸਂ ਧਮ੍ਮਸ੍ਸਵਨਦਿਵਸੇ ਧਮ੍ਮਂ ਕਥੇਨ੍ਤਾਨਂਯੇਵ ਅਰੁਣੋ ਉਗ੍ਗਚ੍ਛਤਿ. ਪਞ੍ਹਾਵਿਸ੍ਸਜ੍ਜਨਦਿਵਸੇ ਬ੍ਯਤ੍ਤੋ ਭਿਕ੍ਖੁ ਪਞ੍ਹਂ ਪੁਚ੍ਛਤਿ, ਪਣ੍ਡਿਤੋ ਵਿਸ੍ਸਜ੍ਜੇਤੀਤਿ ਪੁਚ੍ਛਨਵਿਸ੍ਸਜ੍ਜਨਂ ਕਰੋਨ੍ਤਾਨਂਯੇਵ. ਪਧਾਨਦਿਵਸੇ ਸੂਰਿਯਤ੍ਥਙ੍ਗਮਨੇ ਗਣ੍ਡਿਂ ਪਹਰਿਤ੍ਵਾਵ ਚਙ੍ਕਮਂ ਓਤਰਿਤ੍ਵਾ ਪਧਾਨਂ ਕਰੋਨ੍ਤਾਨਂਯੇਵ. ਤੇ ਏਵਂ ਵਸ੍ਸਂ ਵਸ੍ਸਿਤ੍ਵਾ ਪਵਾਰੇਤ੍ਵਾ ਪਕ੍ਕਮਿਂਸੁ. ਤਂ ਸਨ੍ਧਾਯੇਤਂ ਵੁਤ੍ਤਂ. ਪਰਿਦੇਵਮਾਨਾਤਿ ‘‘ਇਦਾਨਿ ਤਥਾਰੂਪਂ ਮਧੁਰਂ ਧਮ੍ਮਸ੍ਸਵਨਂ ਪਞ੍ਹਾਕਥਨਂ ਕੁਤੋ ਲਭਿਸ੍ਸਾਮੀ’’ਤਿਆਦੀਨਿ ਵਤ੍ਵਾ ਰੋਦਮਾਨਾ.

ਖਾਯਤੀਤਿ ਪਞ੍ਞਾਯਤਿ ਉਪਟ੍ਠਾਤਿ. ਕੋ ਮੇਤਿ ਕਹਂ ਇਮੇ. ਵਜ੍ਜਿਭੂਮਿਯਾਤਿ ਵਜ੍ਜਿਰਟ੍ਠਾਭਿਮੁਖਾ ਗਤਾ. ਮਗਾ ਵਿਯਾਤਿ ਯਥਾ ਮਗਾ ਤਸ੍ਮਿਂ ਤਸ੍ਮਿਂ ਪਬ੍ਬਤਪਾਦੇ ਵਾ ਵਨਸਣ੍ਡੇ ਵਾ ਵਿਚਰਨ੍ਤਾ – ‘‘ਇਦਂ ਅਮ੍ਹਾਕਂ ਮਾਤੁਸਨ੍ਤਕਂ ਪਿਤੁਸਨ੍ਤਕਂ ਪਵੇਣਿਆਗਤ’’ਨ੍ਤਿ ਅਗਹੇਤ੍ਵਾ, ਯਤ੍ਥੇਵ ਨੇਸਂ ਗੋਚਰਫਾਸੁਤਾ ਚ ਹੋਤਿ ਪਰਿਪਨ੍ਥਾਭਾਵੋ ਚ, ਤਤ੍ਥ ਵਿਚਰਨ੍ਤਿ. ਏਵਂ ਅਨਿਕੇਤਾ ਅਗੇਹਾ ਭਿਕ੍ਖਵੋਪਿ ‘‘ਅਯਂ, ਆਵੁਸੋ, ਅਮ੍ਹਾਕਂ ਆਚਰਿਯੁਪਜ੍ਝਾਯਾਨਂ ਸਨ੍ਤਕੋ ਪਵੇਣਿਆਗਤੋ’’ਤਿ ਅਗਹੇਤ੍ਵਾ ਯਤ੍ਥੇਵ ਨੇਸਂ ਉਤੁਸਪ੍ਪਾਯਂ ਭੋਜਨਸਪ੍ਪਾਯਂ ਪੁਗ੍ਗਲਸਪ੍ਪਾਯਂ ਸੇਨਾਸਨਸਪ੍ਪਾਯਂ ਧਮ੍ਮਸ੍ਸਵਨਸਪ੍ਪਾਯਞ੍ਚ ਸੁਲਭਂ ਹੋਤਿ, ਤਤ੍ਥ ਵਿਹਰਨ੍ਤਿ. ਚਤੁਤ੍ਥਂ.

੫. ਆਨਨ੍ਦਸੁਤ੍ਤਵਣ੍ਣਨਾ

੨੨੫. ਪਞ੍ਚਮੇ ਆਨਨ੍ਦੋਤਿ ਧਮ੍ਮਭਣ੍ਡਾਗਾਰਿਕਤ੍ਥੇਰੋ. ਅਤਿਵੇਲਨ੍ਤਿ ਅਤਿਕ੍ਕਨ੍ਤਂ ਵੇਲਂ. ਗਿਹਿਸਞ੍ਞਤ੍ਤਿਬਹੁਲੋਤਿ ਰਤ੍ਤਿਞ੍ਚ ਦਿਵਾ ਚ ਬਹੁਕਾਲਂ ਗਿਹੀ ਸਞ੍ਞਾਪਯਨ੍ਤੋ. ਭਗਵਤਿ ਪਰਿਨਿਬ੍ਬੁਤੇ ਮਹਾਕਸ੍ਸਪਤ੍ਥੇਰੋ ਥੇਰਂ ਆਹ – ‘‘ਆਵੁਸੋ, ਮਯਂ ਰਾਜਗਹੇ ਵਸ੍ਸਂ ਉਪਗਨ੍ਤ੍ਵਾ ਧਮ੍ਮਂ ਸਙ੍ਗਾਯਿਸ੍ਸਾਮ, ਗਚ੍ਛ ਤ੍ਵਂ ਅਰਞ੍ਞਂ ਪਵਿਸਿਤ੍ਵਾ ਉਪਰਿਮਗ੍ਗਤ੍ਤਯਤ੍ਥਾਯ ਵਾਯਾਮਂ ਕਰੋਹੀ’’ਤਿ. ਸੋ ਭਗਵਤੋ ਪਤ੍ਤਚੀਵਰਮਾਦਾਯ ਕੋਸਲਰਟ੍ਠਂ ਗਨ੍ਤ੍ਵਾ ਏਕਸ੍ਮਿਂ ਅਰਞ੍ਞਾਵਾਸੇ ਵਸਿਤ੍ਵਾ ਪੁਨਦਿਵਸੇ ਏਕਂ ਗਾਮਂ ਪਾਵਿਸਿ. ਮਨੁਸ੍ਸਾ ਥੇਰਂ ਦਿਸ੍ਵਾ – ‘‘ਭਨ੍ਤੇ ਆਨਨ੍ਦ, ਤੁਮ੍ਹੇ ਪੁਬ੍ਬੇ ਸਤ੍ਥਾਰਾ ਸਦ੍ਧਿਂ ਆਗਚ੍ਛਥ. ਅਜ੍ਜ ਏਕਕਾਵ ਆਗਤਾ. ਕਹਂ ਸਤ੍ਥਾਰਂ ਠਪੇਤ੍ਵਾ ਆਗਤਤ੍ਥ? ਇਦਾਨਿ ਕਸ੍ਸ ਪਤ੍ਤਚੀਵਰਂ ਗਹੇਤ੍ਵਾ ਵਿਚਰਥ? ਕਸ੍ਸ ਮੁਖੋਦਕਂ ਦਨ੍ਤਕਟ੍ਠਂ ਦੇਥ, ਪਰਿਵੇਣਂ ਸਮ੍ਮਜ੍ਜਥ, ਵਤ੍ਤਪਟਿਵਤ੍ਤਂ ਕਰੋਥਾ’’ਤਿ ਬਹੁਂ ਵਤ੍ਵਾ ਪਰਿਦੇਵਿਂਸੁ. ਥੇਰੋ – ‘‘ਮਾ, ਆਵੁਸੋ, ਸੋਚਿਤ੍ਥ, ਮਾ ਪਰਿਦੇਵਿਤ੍ਥ, ਅਨਿਚ੍ਚਾ ਸਙ੍ਖਾਰਾ’’ਤਿਆਦੀਨਿ ਵਤ੍ਵਾ ਤੇ ਸਞ੍ਞਾਪੇਤ੍ਵਾ ਭਤ੍ਤਕਿਚ੍ਚਾਵਸਾਨੇ ਵਸਨਟ੍ਠਾਨਮੇਵ ਗਚ੍ਛਤਿ. ਮਨੁਸ੍ਸਾ ਸਾਯਮ੍ਪਿ ਤਤ੍ਥ ਗਨ੍ਤ੍ਵਾ ਤਥੇਵ ਪਰਿਦੇਵਨ੍ਤਿ. ਥੇਰੋਪਿ ਤਥੇਵ ਓਵਦਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਅਜ੍ਝਭਾਸੀਤਿ ‘‘ਅਯਂ ਥੇਰੋ ਭਿਕ੍ਖੁਸਙ੍ਘਸ੍ਸ ਕਥਂ ਸੁਤ੍ਵਾ ‘ਸਮਣਧਮ੍ਮਂ ਕਰਿਸ੍ਸਾਮੀ’ਤਿ ਅਰਞ੍ਞਂ ਪਵਿਸਿਤ੍ਵਾ ਇਦਾਨਿ ਗਿਹੀ ਸਞ੍ਞਾਪੇਨ੍ਤੋ ਵਿਹਰਤਿ, ਸਤ੍ਥੁ ਸਾਸਨਂ ਅਸਙ੍ਗਹਿਤਪੁਪ੍ਫਰਾਸਿ ਵਿਯ ਠਿਤਂ, ਧਮ੍ਮਸਙ੍ਗਹਂ ਨ ਕਰੋਤਿ, ਚੋਦੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਅਭਾਸਿ.

ਪਸਕ੍ਕਿਯਾਤਿ ਪਵਿਸਿਤ੍ਵਾ. ਹਦਯਸ੍ਮਿਂ ਓਪਿਯਾਤਿ ਕਿਚ੍ਚਤੋ ਚ ਆਰਮ੍ਮਣਤੋ ਚ ਹਦਯਮ੍ਹਿ ਪਕ੍ਖਿਪਿਤ੍ਵਾ. ‘‘ਨਿਬ੍ਬਾਨਂ ਪਾਪੁਣਿਸ੍ਸਾਮੀ’’ਤਿ ਵੀਰਿਯਂ ਕਰੋਨ੍ਤੋ ਨਿਬ੍ਬਾਨਂ ਕਿਚ੍ਚਤੋ ਹਦਯਮ੍ਹਿ ਓਪੇਤਿ ਨਾਮ, ਨਿਬ੍ਬਾਨਾਰਮ੍ਮਣਂ ਪਨ ਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਨ੍ਤੋ ਆਰਮ੍ਮਣਤੋ. ਤਦੁਭਯਮ੍ਪਿ ਸਨ੍ਧਾਯੇਸਾ ਭਾਸਤਿ. ਝਾਯਾਤਿ ਦ੍ਵੀਹਿ ਝਾਨੇਹਿ ਝਾਯਿਕੋ ਭਵ. ਬਿਲ਼ਿਬਿਲ਼ਿਕਾਤਿ ਅਯਂ ਗਿਹੀਹਿ ਸਦ੍ਧਿਂ ਬਿਲ਼ਿਬਿਲ਼ਿਕਥਾ. ਪਞ੍ਚਮਂ.

੬. ਅਨੁਰੁਦ੍ਧਸੁਤ੍ਤਵਣ੍ਣਨਾ

੨੨੬. ਛਟ੍ਠੇ ਪੁਰਾਣਦੁਤਿਯਿਕਾਤਿ ਅਨਨ੍ਤਰੇ ਅਤ੍ਤਭਾਵੇ ਅਗ੍ਗਮਹੇਸੀ. ਸੋਭਸੀਤਿ ਪੁਬ੍ਬੇਪਿ ਸੋਭਸਿ, ਇਦਾਨਿਪਿ ਸੋਭਸਿ. ਦੁਗ੍ਗਤਾਤਿ ਨ ਗਤਿਦੁਗ੍ਗਤਿਯਾ ਦੁਗ੍ਗਤਾ. ਤਾ ਹਿ ਸੁਗਤਿਯਂ ਠਿਤਾ ਸਮ੍ਪਤ੍ਤਿਂ ਅਨੁਭਵਨ੍ਤਿ, ਪਟਿਪਤ੍ਤਿਦੁਗ੍ਗਤਿਯਾ ਪਨ ਦੁਗ੍ਗਤਾ. ਤਤੋ ਚੁਤਾ ਹਿ ਤਾ ਨਿਰਯੇਪਿ ਉਪਪਜ੍ਜਨ੍ਤੀਤਿ ਦੁਗ੍ਗਤਾ. ਪਤਿਟ੍ਠਿਤਾਤਿ ਸਕ੍ਕਾਯਸ੍ਮਿਂ ਹਿ ਪਤਿਟ੍ਠਹਨ੍ਤੋ ਅਟ੍ਠਹਿ ਕਾਰਣੇਹਿ ਪਤਿਟ੍ਠਾਤਿ – ਰਤ੍ਤੋ ਰਾਗਵਸੇਨ ਪਤਿਟ੍ਠਾਤਿ, ਦੁਟ੍ਠੋ ਦੋਸਵਸੇਨ… ਮੂਲ਼੍ਹੋ ਮੋਹਵਸੇਨ… ਵਿਨਿਬਦ੍ਧੋ ਮਾਨਵਸੇਨ… ਪਰਾਮਟ੍ਠੋ ਦਿਟ੍ਠਿਵਸੇਨ… ਥਾਮਗਤੋ ਅਨੁਸਯਵਸੇਨ… ਅਨਿਟ੍ਠਙ੍ਗਤੋ ਵਿਚਿਕਿਚ੍ਛਾਵਸੇਨ… ਵਿਕ੍ਖੇਪਗਤੋ ਉਦ੍ਧਚ੍ਚਵਸੇਨ ਪਤਿਟ੍ਠਾਤਿ. ਤਾਪਿ ਏਵਂ ਪਤਿਟ੍ਠਿਤਾਵ. ਨਰਦੇਵਾਨਨ੍ਤਿ ਦੇਵਨਰਾਨਂ.

ਨਤ੍ਥਿ ਦਾਨੀਤਿ ਸਾ ਕਿਰ ਦੇਵਧੀਤਾ ਥੇਰੇ ਬਲਵਸਿਨੇਹਾ ਅਹੋਸਿ, ਪਟਿਗਨ੍ਤੁਂ ਨਾਸਕ੍ਖਿ. ਕਾਲੇਨ ਆਗਨ੍ਤ੍ਵਾ ਪਰਿਵੇਣਂ ਸਮ੍ਮਜ੍ਜਤਿ, ਮੁਖੋਦਕਂ ਦਨ੍ਤਕਟ੍ਠਂ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਪੇਤਿ. ਥੇਰੋ ਅਨਾਵਜ੍ਜਨੇਨ ਪਰਿਭੁਞ੍ਜਤਿ. ਏਕਸ੍ਮਿਂ ਦਿਵਸੇ ਥੇਰਸ੍ਸ ਜਿਣ੍ਣਚੀਵਰਸ੍ਸ ਚੋਲ਼ਕਭਿਕ੍ਖਂ ਚਰਤੋ ਸਙ੍ਕਾਰਕੂਟੇ ਦਿਬ੍ਬਦੁਸ੍ਸਂ ਠਪੇਤ੍ਵਾ ਪਕ੍ਕਮਿ. ਥੇਰੋ ਤਂ ਦਿਸ੍ਵਾ ਉਕ੍ਖਿਪਿਤ੍ਵਾ, ਓਲੋਕੇਨ੍ਤੋ ਦੁਸ੍ਸਨ੍ਤਂ ਦਿਸ੍ਵਾ ‘‘ਦੁਸ੍ਸਮੇਤ’’ਨ੍ਤਿ ਞਤ੍ਵਾ, ‘‘ਅਲਂ ਏਤ੍ਤਾਵਤਾ’’ਤਿ ਅਗ੍ਗਹੇਸਿ. ਤੇਨੇਵਸ੍ਸ ਚੀਵਰਂ ਨਿਟ੍ਠਾਸਿ. ਅਥ ਦ੍ਵੇ ਅਗ੍ਗਸਾਵਕਾ ਅਨੁਰੁਦ੍ਧਤ੍ਥੇਰੋ ਚਾਤਿ ਤਯੋ ਜਨਾ ਚੀਵਰਂ ਕਰਿਂਸੁ. ਸਤ੍ਥਾ ਸੂਚਿਂ ਯੋਜੇਤ੍ਵਾ ਅਦਾਸਿ. ਨਿਟ੍ਠਿਤਚੀਵਰਸ੍ਸ ਪਿਣ੍ਡਾਯ ਚਰਤੋ ਦੇਵਤਾ ਪਿਣ੍ਡਪਾਤਂ ਸਮਾਦਪੇਤਿ. ਸਾ ਕਾਲੇਨ ਏਕਿਕਾ, ਕਾਲੇਨ ਅਤ੍ਤਦੁਤਿਯਾ ਥੇਰਸ੍ਸ ਸਨ੍ਤਿਕਂ ਆਗਚ੍ਛਤਿ. ਤਦਾ ਪਨ ਅਤ੍ਤਤਤਿਯਾ ਆਗਨ੍ਤ੍ਵਾ ਦਿਵਾਟ੍ਠਾਨੇ ਥੇਰਂ ਉਪਸਙ੍ਕਮਿਤ੍ਵਾ – ‘‘ਮਯਂ ਮਨਾਪਕਾਯਿਕਾ ਨਾਮ ਮਨਸਾ ਇਚ੍ਛਿਤਿਚ੍ਛਿਤਰੂਪਂ ਮਾਪੇਮਾ’’ਤਿ ਆਹ. ਥੇਰੋ – ‘‘ਏਤਾ ਏਵਂ ਵਦਨ੍ਤਿ, ਵੀਮਂਸਿਸ੍ਸਾਮਿ, ਸਬ੍ਬਾ ਨੀਲਕਾ ਹੋਨ੍ਤੂ’’ਤਿ ਚਿਨ੍ਤੇਸਿ. ਤਾ ਥੇਰਸ੍ਸ ਮਨਂ ਞਤ੍ਵਾ ਸਬ੍ਬਾਵ ਨੀਲਵਣ੍ਣਾ ਅਹੇਸੁਂ, ਏਵਂ ਪੀਤਲੋਹਿਤਓਦਾਤਵਣ੍ਣਾਤਿ. ਤਤੋ ਚਿਨ੍ਤਯਿਂਸੁ – ‘‘ਥੇਰੋ ਅਮ੍ਹਾਕਂ ਦਸ੍ਸਨਂ ਅਸ੍ਸਾਦੇਤੀ’’ਤਿ ਤਾ ਸਮਜ੍ਜਂ ਕਾਤੁਂ ਆਰਦ੍ਧਾ, ਏਕਾਪਿ ਗਾਯਿ, ਏਕਾਪਿ ਨਚ੍ਚਿ, ਏਕਾਪਿ ਅਚ੍ਛਰਂ ਪਹਰਿ. ਥੇਰੋ ਇਨ੍ਦ੍ਰਿਯਾਨਿ ਓਕ੍ਖਿਪਿ. ਤਤੋ – ‘‘ਨ ਅਮ੍ਹਾਕਂ ਦਸ੍ਸਨਂ ਥੇਰੋ ਅਸ੍ਸਾਦੇਤੀ’’ਤਿ ਞਤ੍ਵਾ ਸਿਨੇਹਂ ਵਾ ਸਨ੍ਥਵਂ ਵਾ ਅਲਭਮਾਨਾ ਨਿਬ੍ਬਿਨ੍ਦਿਤ੍ਵਾ ਗਨ੍ਤੁਮਾਰਦ੍ਧਾ. ਥੇਰੋ ਤਾਸਂ ਗਮਨਭਾਵਂ ਞਤ੍ਵਾ – ‘‘ਮਾ ਪੁਨਪ੍ਪੁਨਂ ਆਗਚ੍ਛਿਂਸੂ’’ਤਿ ਅਰਹਤ੍ਤਂ ਬ੍ਯਾਕਰੋਨ੍ਤੋ ਇਮਂ ਗਾਥਮਾਹ. ਤਤ੍ਥ ਵਿਕ੍ਖੀਣੋਤਿ ਖੀਣੋ. ਜਾਤਿਸਂਸਾਰੋਤਿ ਤਤ੍ਥ ਤਤ੍ਥ ਜਾਤਿਸਙ੍ਖਾਤੋ ਸਂਸਾਰੋ. ਛਟ੍ਠਂ.

੭. ਨਾਗਦਤ੍ਤਸੁਤ੍ਤਵਣ੍ਣਨਾ

੨੨੭. ਸਤ੍ਤਮੇ ਅਤਿਕਾਲੇਨਾਤਿ ਸਬ੍ਬਰਤ੍ਤਿਂ ਨਿਦ੍ਦਾਯਿਤ੍ਵਾ ਬਲਵਪਚ੍ਚੂਸੇ ਕੋਟਿਸਮ੍ਮੁਞ੍ਜਨਿਯਾ ਥੋਕਂ ਸਮ੍ਮਜ੍ਜਿਤ੍ਵਾ ਮੁਖਂ ਧੋਵਿਤ੍ਵਾ ਯਾਗੁਭਿਕ੍ਖਾਯ ਪਾਤੋਵ ਪਵਿਸਤਿ. ਅਤਿਦਿਵਾਤਿ ਯਾਗੁਂ ਆਦਾਯ ਆਸਨਸਾਲਂ ਗਨ੍ਤ੍ਵਾ ਪਿਵਿਤ੍ਵਾ ਏਕਸ੍ਮਿਂ ਠਾਨੇ ਨਿਪਨ੍ਨੋ ਨਿਦ੍ਦਾਯਿਤ੍ਵਾ – ‘‘ਮਨੁਸ੍ਸਾਨਂ ਭੋਜਨਵੇਲਾਯ ਪਣੀਤਂ ਭਿਕ੍ਖਂ ਲਭਿਸ੍ਸਾਮੀ’’ਤਿ ਉਪਕਟ੍ਠੇ ਮਜ੍ਝਨ੍ਹਿਕੇ ਉਟ੍ਠਾਯ ਧਮ੍ਮਕਰਣੇਨ ਉਦਕਂ ਗਹੇਤ੍ਵਾ ਅਕ੍ਖੀਨਿ ਪਮਜ੍ਜਿਤ੍ਵਾ ਪਿਣ੍ਡਾਯ ਚਰਿਤ੍ਵਾ ਯਾਵਦਤ੍ਥਂ ਭੁਞ੍ਜਿਤ੍ਵਾ ਮਜ੍ਝਨ੍ਹਿਕੇ ਵੀਤਿਵਤ੍ਤੇ ਪਟਿਕ੍ਕਮਤਿ. ਦਿਵਾ ਚ ਆਗਨ੍ਤ੍ਵਾਤਿ ਅਤਿਕਾਲੇ ਪਵਿਟ੍ਠੇਨ ਨਾਮ ਅਞ੍ਞੇਹਿ ਭਿਕ੍ਖੂਹਿ ਪਠਮਤਰਂ ਆਗਨ੍ਤਬ੍ਬਂ ਹੋਤਿ, ਤ੍ਵਂ ਪਨ ਅਤਿਵਿਯ ਦਿਵਾ ਆਗਨ੍ਤ੍ਵਾ ਗਤਾਸੀਤਿ ਅਤ੍ਥੋ. ਭਾਯਾਮਿ ਨਾਗਦਤ੍ਤਨ੍ਤਿ ਤਂ ਨਾਗਦਤ੍ਤਂ ਅਹਂ ਭਾਯਾਮਿ. ਸੁਪ੍ਪਗਬ੍ਭਨ੍ਤਿ ਸੁਟ੍ਠੁ ਪਗਬ੍ਭਂ. ਕੁਲੇਸੂਤਿ ਖਤ੍ਤਿਯਕੁਲਾਦਿਉਪਟ੍ਠਾਕਕੁਲੇਸੁ. ਸਤ੍ਤਮਂ.

੮. ਕੁਲਘਰਣੀਸੁਤ੍ਤਵਣ੍ਣਨਾ

੨੨੮. ਅਟ੍ਠਮੇ ਅਜ੍ਝੋਗਾਲ਼੍ਹਪ੍ਪਤ੍ਤੋਤਿ ਓਗਾਹਪ੍ਪਤ੍ਤੋ. ਸੋ ਕਿਰ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਤਂ ਵਨਸਣ੍ਡਂ ਪਵਿਸਿਤ੍ਵਾ ਦੁਤਿਯਦਿਵਸੇ ਗਾਮਂ ਪਿਣ੍ਡਾਯ ਪਾਵਿਸਿ ਪਾਸਾਦਿਕੇਹਿ ਅਭਿਕ੍ਕਨ੍ਤਾਦੀਹਿ. ਅਞ੍ਞਤਰਂ ਕੁਲਂ ਤਸ੍ਸ ਇਰਿਯਾਪਥੇ ਪਸੀਦਿਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਪਿਣ੍ਡਪਾਤਂ ਅਦਾਸਿ. ਭਤ੍ਤਾਨੁਮੋਦਨਂ ਪੁਨ ਸੁਤ੍ਵਾ ਅਤਿਰੇਕਤਰਂ ਪਸੀਦਿਤ੍ਵਾ, ‘‘ਭਨ੍ਤੇ, ਨਿਚ੍ਚਕਾਲਂ ਇਧੇਵ ਭਿਕ੍ਖਂ ਗਣ੍ਹਥਾ’’ਤਿ ਨਿਮਨ੍ਤੇਸਿ. ਥੇਰੋ ਅਧਿਵਾਸੇਤ੍ਵਾ ਤੇਸਂ ਆਹਾਰਂ ਪਰਿਭੁਞ੍ਜਮਾਨੋ ਵੀਰਿਯਂ ਪਗ੍ਗਯ੍ਹ ਘਟੇਨ੍ਤੋ ਅਰਹਤ੍ਤਂ ਪਤ੍ਵਾ ਚਿਨ੍ਤੇਸਿ – ‘‘ਬਹੂਪਕਾਰਂ ਮੇ ਏਤਂ ਕੁਲਂ, ਅਞ੍ਞਤ੍ਥ ਗਨ੍ਤ੍ਵਾ ਕਿਂ ਕਰਿਸ੍ਸਾਮੀ’’ਤਿ? ਫਲਸਮਾਪਤ੍ਤਿਸੁਖਂ ਅਨੁਭਵਨ੍ਤੋ ਤਤ੍ਥੇਵ ਵਸਿ. ਅਜ੍ਝਭਾਸੀਤਿ ਸਾ ਕਿਰ ਥੇਰਸ੍ਸ ਖੀਣਾਸਵਭਾਵਂ ਅਜਾਨਨ੍ਤੀ ਚਿਨ੍ਤੇਸਿ – ‘‘ਅਯਂ ਥੇਰੋ ਨੇਵ ਅਞ੍ਞਂ ਗਾਮਂ ਗਚ੍ਛਤਿ, ਨ ਅਞ੍ਞਂ ਘਰਂ, ਨ ਰੁਕ੍ਖਮੂਲਆਸਨਸਾਲਾਦੀਸੁ ਨਿਸੀਦਤਿ, ਨਿਚ੍ਚਕਾਲਂ ਘਰਂ ਪਵਿਸਿਤ੍ਵਾਵ ਨਿਸੀਦਤਿ, ਉਭੋਪੇਤੇ ਓਗਾਧਪ੍ਪਤ੍ਤਾ ਪਟਿਗਾਧਪ੍ਪਤ੍ਤਾ, ਕਦਾਚਿ ਏਸ ਇਮਂ ਕੁਲਂ ਦੂਸੇਯ੍ਯ, ਚੋਦੇਸ੍ਸਾਮਿ ਨ’’ਨ੍ਤਿ. ਤਸ੍ਮਾ ਅਭਾਸਿ.

ਸਣ੍ਠਾਨੇਤਿ ਨਗਰਦ੍ਵਾਰਸ੍ਸ ਆਸਨ੍ਨੇ ਮਨੁਸ੍ਸਾਨਂ ਭਣ੍ਡਕਂ ਓਤਾਰੇਤ੍ਵਾ ਵਿਸ੍ਸਮਨਟ੍ਠਾਨੇ. ਸਙ੍ਗਮ੍ਮਾਤਿ ਸਮਾਗਨ੍ਤ੍ਵਾ. ਮਨ੍ਤੇਨ੍ਤੀਤਿ ਕਥੇਨ੍ਤਿ. ਮਞ੍ਚ ਤਞ੍ਚਾਤਿ ਮਞ੍ਚ ਕਥੇਨ੍ਤਿ ਤਞ੍ਚ ਕਥੇਨ੍ਤਿ. ਕਿਮਨ੍ਤਰਨ੍ਤਿ ਕਿਂ ਕਾਰਣਂ? ਬਹੂ ਹਿ ਸਦ੍ਦਾ ਪਚ੍ਚੂਹਾਤਿ ਬਹੁਕਾ ਏਤੇ ਲੋਕਸ੍ਮਿਂ ਪਟਿਲੋਮਸਦ੍ਦਾ. ਨ ਤੇਨਾਤਿ ਤੇਨ ਕਾਰਣੇਨ, ਤੇਨ ਵਾ ਤਪਸ੍ਸਿਨਾ ਨ ਮਙ੍ਕੁ ਹੋਤਬ੍ਬਂ. ਨ ਹਿ ਤੇਨਾਤਿ ਨ ਹਿ ਤੇਨ ਪਰੇਹਿ ਵੁਤ੍ਤਵਚਨੇਨ ਸਤ੍ਤੋ ਕਿਲਿਸ੍ਸਤਿ, ਅਤ੍ਤਨਾ ਕਤੇਨ ਪਨ ਪਾਪਕਮ੍ਮੇਨੇਵ ਕਿਲਿਸ੍ਸਤੀਤਿ ਦਸ੍ਸੇਤਿ. ਵਾਤਮਿਗੋ ਯਥਾਤਿ ਯਥਾ ਵਨੇ ਵਾਤਮਿਗੋ ਵਾਤੇਰਿਤਾਨਂ ਪਣ੍ਣਾਦੀਨਂ ਸਦ੍ਦੇਨ ਪਰਿਤਸ੍ਸਤਿ, ਏਵਂ ਯੋ ਸਦ੍ਦਪਰਿਤ੍ਤਾਸੀ ਹੋਤੀਤਿ ਅਤ੍ਥੋ. ਨਾਸ੍ਸ ਸਮ੍ਪਜ੍ਜਤੇ ਵਤਨ੍ਤਿ ਤਸ੍ਸ ਲਹੁਚਿਤ੍ਤਸ੍ਸ ਵਤਂ ਨ ਸਮ੍ਪਜ੍ਜਤਿ. ਥੇਰੋ ਪਨ ਖੀਣਾਸਵਤ੍ਤਾ ਸਮ੍ਪਨ੍ਨਵਤੋਤਿ ਵੇਦਿਤਬ੍ਬੋ. ਅਟ੍ਠਮਂ.

੯. ਵਜ੍ਜਿਪੁਤ੍ਤਸੁਤ੍ਤਵਣ੍ਣਨਾ

੨੨੯. ਨਵਮੇ ਵਜ੍ਜਿਪੁਤ੍ਤਕੋਤਿ ਵਜ੍ਜਿਰਟ੍ਠੇ ਰਾਜਪੁਤ੍ਤੋ ਛਤ੍ਤਂ ਪਹਾਯ ਪਬ੍ਬਜਿਤੋ. ਸਬ੍ਬਰਤ੍ਤਿਚਾਰੋਤਿ ਕਤ੍ਤਿਕਨਕ੍ਖਤ੍ਤਂ ਘੋਸੇਤ੍ਵਾ ਸਕਲਨਗਰਂ ਧਜਪਟਾਕਾਦੀਹਿ ਪਟਿਮਣ੍ਡੇਤ੍ਵਾ ਪਵਤ੍ਤਿਤੋ ਸਬ੍ਬਰਤ੍ਤਿਚਾਰੋ. ਇਦਞ੍ਹਿ ਨਕ੍ਖਤ੍ਤਂ ਯਾਵ ਚਾਤੁਮਹਾਰਾਜਿਕੇਹਿ ਏਕਾਬਦ੍ਧਂ ਹੋਤਿ. ਤੂਰਿਯਤਾਲ਼ਿਤਵਾਦਿਤਨਿਗ੍ਘੋਸਸਦ੍ਦਨ੍ਤਿ ਭੇਰਿਆਦਿਤੂਰਿਯਾਨਂ ਤਾਲ਼ਿਤਾਨਂ ਵੀਣਾਦੀਨਞ੍ਚ ਵਾਦਿਤਾਨਂ ਨਿਗ੍ਘੋਸਸਦ੍ਦਂ. ਅਭਾਸੀਤਿ ਵੇਸਾਲਿਯਂ ਕਿਰ ਸਤ੍ਤ ਰਾਜਸਹਸ੍ਸਾਨਿ ਸਤ੍ਤਸਤਾਨਿ ਸਤ੍ਤ ਚ ਰਾਜਾਨੋ, ਤਤ੍ਤਕਾਵ ਤੇਸਂ ਉਪਰਾਜਸੇਨਾਪਤਿਆਦਯੋ. ਤੇਸੁ ਅਲਙ੍ਕਤਪਟਿਯਤ੍ਤੇਸੁ ਨਕ੍ਖਤ੍ਤਕੀਲ਼ਨਤ੍ਥਾਯ ਵੀਥਿਂ ਓਤਿਣ੍ਣੇਸੁ ਸਟ੍ਠਿਹਤ੍ਥੇ ਮਹਾਚਙ੍ਕਮੇ ਚਙ੍ਕਮਮਾਨੋ ਨਭਸ੍ਸ ਮਜ੍ਝੇ ਠਿਤਂ ਚਨ੍ਦਂ ਦਿਸ੍ਵਾ ਚਙ੍ਕਮਨਕੋਟਿਯਂ ਫਲਕਂ ਨਿਸ੍ਸਾਯ ਠਿਤੋ ਅਭਾਸਿ. ਅਪਵਿਦ੍ਧਂਵ ਵਨਸ੍ਮਿਂ ਦਾਰੁਕਨ੍ਤਿ ਵਤ੍ਥਵੇਠਨਾਲਙ੍ਕਾਰਰਹਿਤਤ੍ਤਾ ਵਨੇ ਛਡ੍ਡਿਤਦਾਰੁਕਂ ਵਿਯ ਜਾਤਂ. ਪਾਪਿਯੋਤਿ ਲਾਮਕਤਰੋ ਅਮ੍ਹੇਹਿ ਅਞ੍ਞੋ ਕੋਚਿ ਅਤ੍ਥਿ. ਪਿਹਯਨ੍ਤੀਤਿ ਥੇਰੋ ਆਰਞ੍ਞਿਕੋ ਪਂਸੁਕੂਲਿਕੋ ਪਿਣ੍ਡਪਾਤਿਕੋ ਸਪਦਾਨਚਾਰਿਕੋ ਅਪ੍ਪਿਚ੍ਛੋ ਸਨ੍ਤੁਟ੍ਠੋਤਿ ਬਹੂ ਤੁਯ੍ਹਂ ਪਤ੍ਥਯਨ੍ਤੀਤਿ ਅਤ੍ਥੋ. ਸਗ੍ਗਗਾਮਿਨਨ੍ਤਿ ਸਗ੍ਗਂ ਗਚ੍ਛਨ੍ਤਾਨਂ ਗਤਾਨਮ੍ਪਿ. ਨਵਮਂ.

੧੦. ਸਜ੍ਝਾਯਸੁਤ੍ਤਵਣ੍ਣਨਾ

੨੩੦. ਦਸਮੇ ਯਂ ਸੁਦਨ੍ਤਿ ਨਿਪਾਤਮਤ੍ਤਂ. ਸਜ੍ਝਾਯਬਹੁਲੋਤਿ ਨਿਸ੍ਸਰਣਪਰਿਯਤ੍ਤਿਵਸੇਨ ਸਜ੍ਝਾਯਨਤੋ ਬਹੁਤਰਂ ਕਾਲਂ ਸਜ੍ਝਾਯਨ੍ਤੋ. ਸੋ ਕਿਰ ਆਚਰਿਯਸ੍ਸ ਦਿਵਾਟ੍ਠਾਨਂ ਸਮ੍ਮਜ੍ਜਿਤ੍ਵਾ ਆਚਰਿਯਂ ਉਦਿਕ੍ਖਨ੍ਤੋ ਤਿਟ੍ਠਤਿ. ਅਥ ਨਂ ਆਗਚ੍ਛਨ੍ਤਂ ਦਿਸ੍ਵਾਵ ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤ੍ਵਾ ਪਞ੍ਞਤ੍ਤਾਸਨੇ ਨਿਸਿਨ੍ਨਸ੍ਸ ਤਾਲਵਣ੍ਟਵਾਤਂ ਦਤ੍ਵਾ ਪਾਨੀਯਂ ਆਪੁਚ੍ਛਿਤ੍ਵਾ ਪਾਦੇ ਧੋਵਿਤ੍ਵਾ ਤੇਲਂ ਮਕ੍ਖੇਤ੍ਵਾ ਵਨ੍ਦਿਤ੍ਵਾ ਠਿਤੋ ਉਦ੍ਦੇਸਂ ਗਹੇਤ੍ਵਾ ਯਾਵ ਸੂਰਿਯਤ੍ਥਙ੍ਗਮਾ ਸਜ੍ਝਾਯਂ ਕਰੋਤਿ. ਸੋ ਨ੍ਹਾਨਕੋਟ੍ਠਕੇ ਉਦਕਂ ਉਪਟ੍ਠਪੇਤ੍ਵਾ ਅਙ੍ਗਾਰਕਪਲ੍ਲੇ ਅਗ੍ਗਿਂ ਕਰੋਤਿ. ਆਚਰਿਯਸ੍ਸ ਨ੍ਹਤ੍ਵਾ ਆਗਤਸ੍ਸ ਪਾਦੇਸੁ ਉਦਕਂ ਪੁਞ੍ਛਿਤ੍ਵਾ ਪਿਟ੍ਠਿਪਰਿਕਮ੍ਮਂ ਕਤ੍ਵਾ ਵਨ੍ਦਿਤ੍ਵਾ ਉਦ੍ਦੇਸਂ ਗਹੇਤ੍ਵਾ ਪਠਮਯਾਮੇ ਸਜ੍ਝਾਯਂ ਕਤ੍ਵਾ ਮਜ੍ਝਿਮਯਾਮੇ ਸਰੀਰਂ ਸਮਸ੍ਸਾਸੇਤ੍ਵਾ ਪਚ੍ਛਿਮਯਾਮੇ ਉਦ੍ਦੇਸਂ ਗਹੇਤ੍ਵਾ ਯਾਵ ਅਰੁਣੁਗ੍ਗਮਨਾ ਸਜ੍ਝਾਯਂ ਕਤ੍ਵਾ ਨਿਰੁਦ੍ਧਸਦ੍ਦਂ ਖਯਤੋ ਸਮ੍ਮਸਤਿ. ਤਤੋ ਸੇਸਂ ਉਪਾਦਾਯਰੂਪਂ ਭੂਤਰੂਪਂ ਨਾਮਰੂਪਨ੍ਤਿ ਪਞ੍ਚਸੁ ਖਨ੍ਧੇਸੁ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਅਪ੍ਪੋਸ੍ਸੁਕ੍ਕੋਤਿ ਉਦ੍ਦੇਸਗ੍ਗਹਣੇ ਚ ਸਜ੍ਝਾਯਕਰਣੀਯੇ ਚ ਨਿਰੁਸ੍ਸੁਕ੍ਕੋ. ਸਙ੍ਕਸਾਯਤੀਤਿ ਯਸ੍ਸ ਦਾਨਿ ਅਤ੍ਥਾਯ ਅਹਂ ਸਜ੍ਝਾਯਂ ਕਰੇਯ੍ਯਂ, ਸੋ ਮੇ ਅਤ੍ਥੋ ਮਤ੍ਥਕਂ ਪਤ੍ਤੋ. ਕਿਂ ਮੇ ਇਦਾਨਿ ਸਜ੍ਝਾਯੇਨਾਤਿ ਫਲਸਮਾਪਤ੍ਤਿਸੁਖੇਨ ਕਾਲਂ ਅਤਿਵਤ੍ਤੇਤਿ. ਅਜ੍ਝਭਾਸੀਤਿ, ‘‘ਕਿਂ ਨੁ ਖੋ ਅਸ੍ਸ ਥੇਰਸ੍ਸ ਅਫਾਸੁਕਂ ਜਾਤਂ, ਉਦਾਹੁਸ੍ਸ ਆਚਰਿਯਸ੍ਸ? ਕੇਨ ਨੁ ਖੋ ਕਾਰਣੇਨ ਪੁਬ੍ਬੇ ਵਿਯ ਮਧੁਰਸ੍ਸਰੇਨ ਨ ਸਜ੍ਝਾਯਤੀ’’ਤਿ? ਆਗਨ੍ਤ੍ਵਾ ਸਨ੍ਤਿਕੇ ਠਿਤਾ ਅਭਾਸਿ.

ਧਮ੍ਮਪਦਾਨੀਤਿ ਇਧ ਸਬ੍ਬਮ੍ਪਿ ਬੁਦ੍ਧਵਚਨਂ ਅਧਿਪ੍ਪੇਤਂ. ਨਾਧੀਯਸੀਤਿ ਨ ਸਜ੍ਝਾਯਸਿ. ਨਾਦਿਯਸੀਤਿ ਵਾ ਪਾਠੋ, ਨ ਗਣ੍ਹਾਸੀਤਿ ਅਤ੍ਥੋ. ਪਸਂਸਨ੍ਤਿ ਧਮ੍ਮਭਾਣਕੋ ਪਸਂਸਂ ਲਭਤਿ, ਆਭਿਧਮ੍ਮਿਕੋ ਸੁਤ੍ਤਨ੍ਤਿਕੋ ਵਿਨਯਧਰੋਤਿਸ੍ਸ ਪਸਂਸਿਤਾ ਭਵਨ੍ਤਿ. ਵਿਰਾਗੇਨਾਤਿ ਅਰਿਯਮਗ੍ਗੇਨ. ਅਞ੍ਞਾਯਾਤਿ ਜਾਨਿਤ੍ਵਾ. ਨਿਕ੍ਖੇਪਨਨ੍ਤਿ ਤਸ੍ਸ ਦਿਟ੍ਠਸੁਤਾਦਿਨੋ ਵਿਸ੍ਸਜ੍ਜਨਂ ਸਨ੍ਤੋ ਵਦਨ੍ਤੀਤਿ ਦੀਪੇਤਿ, ਨ ਬੁਦ੍ਧਵਚਨਸ੍ਸ. ਏਤ੍ਤਾਵਤਾ ‘‘ਥੇਰੋ ਬੁਦ੍ਧਵਚਨਂ ਨ ਵਿਸ੍ਸਜ੍ਜਾਪੇਤੀ’’ਤਿ ਨ ਨਿਚ੍ਚਕਾਲਂ ਸਜ੍ਝਾਯਨ੍ਤੇਨੇਵ ਭਵਿਤਬ੍ਬਂ, ਸਜ੍ਝਾਯਿਤ੍ਵਾ ਪਨ – ‘‘ਏਤ੍ਤਕਸ੍ਸਾਹਂ ਅਤ੍ਥਸ੍ਸ ਵਾ ਧਮ੍ਮਸ੍ਸ ਵਾ ਆਧਾਰੋ ਭਵਿਤੁਂ ਸਮਤ੍ਥੋ’’ਤਿ ਞਤ੍ਵਾ ਵਟ੍ਟਦੁਕ੍ਖਸ੍ਸ ਅਨ੍ਤਕਿਰਿਯਾਯ ਪਟਿਪਜ੍ਜਿਤਬ੍ਬਂ. ਦਸਮਂ.

੧੧. ਅਕੁਸਲਵਿਤਕ੍ਕਸੁਤ੍ਤਵਣ੍ਣਨਾ

੨੩੧. ਏਕਾਦਸਮੇ ਅਕੁਸਲੇ ਵਿਤਕ੍ਕੇਤਿ ਕਾਮਵਿਤਕ੍ਕਾਦਯੋ ਤਯੋ ਮਹਾਵਿਤਕ੍ਕੇ. ਅਯੋਨਿਸੋ ਮਨਸਿਕਾਰਾਤਿ ਅਨੁਪਾਯਮਨਸਿਕਾਰੇਨ. ਸੋਤਿ ਸੋ ਤ੍ਵਂ. ਅਯੋਨਿਸੋ ਪਟਿਨਿਸ੍ਸਜ੍ਜਾਤਿ ਏਤਂ ਅਨੁਪਾਯਮਨਸਿਕਾਰਂ ਵਜ੍ਜੇਹਿ. ਸਤ੍ਥਾਰਨ੍ਤਿ ਇਮਾਯ ਗਾਥਾਯ ਪਾਸਾਦਿਕਕਮ੍ਮਟ੍ਠਾਨਂ ਕਥੇਤਿ. ਪੀਤਿਸੁਖਮਸਂਸਯਨ੍ਤਿ ਏਕਂਸੇਨੇਵ ਬਲਵਪੀਤਿਞ੍ਚ ਸੁਖਞ੍ਚ ਅਧਿਗਮਿਸ੍ਸਸਿ. ਏਕਾਦਸਮਂ.

੧੨. ਮਜ੍ਝਨ੍ਹਿਕਸੁਤ੍ਤਵਣ੍ਣਨਾ

੨੩੨. ਦ੍ਵਾਦਸਮੇ ਯਂ ਵਤ੍ਤਬ੍ਬਂ, ਤਂ ਦੇਵਤਾਸਂਯੁਤ੍ਤੇ ਨਨ੍ਦਨਵਗ੍ਗੇ ਵੁਤ੍ਤਮੇਵ. ਦ੍ਵਾਦਸਮਂ.

੧੩. ਪਾਕਤਿਨ੍ਦ੍ਰਿਯਸੁਤ੍ਤਵਣ੍ਣਨਾ

੨੩੩. ਤੇਰਸਮਂ ਦੇਵਪੁਤ੍ਤਸਂਯੁਤ੍ਤੇ ਜਨ੍ਤੁਦੇਵਪੁਤ੍ਤਸੁਤ੍ਤੇ ਵਿਤ੍ਥਾਰਿਤਮੇਵ. ਤੇਰਸਮਂ.

੧੪. ਗਨ੍ਧਤ੍ਥੇਨਸੁਤ੍ਤਵਣ੍ਣਨਾ

੨੩੪. ਚੁਦ੍ਦਸਮੇ ਅਜ੍ਝਭਾਸੀਤਿ ਤਂ ਭਿਕ੍ਖੁਂ ਨਾਲ਼ੇ ਗਹੇਤ੍ਵਾ ਪਦੁਮਂ ਸਿਙ੍ਘਮਾਨਂ ਦਿਸ੍ਵਾਵ – ‘‘ਅਯਂ ਭਿਕ੍ਖੁ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਸਮਣਧਮ੍ਮਂ ਕਾਤੁਂ ਅਰਞ੍ਞਂ ਪਵਿਟ੍ਠੋ ਗਨ੍ਧਾਰਮ੍ਮਣਂ ਉਪਨਿਜ੍ਝਾਯਤਿ, ਸ੍ਵਾਯਂ ਅਜ੍ਜ ਉਪਸਿਙ੍ਘਂ ਸ੍ਵੇਪਿ ਪੁਨਦਿਵਸੇਪਿ ਉਪਸਿਙ੍ਘਿਸ੍ਸਤਿ, ਏਵਮਸ੍ਸ ਸਾ ਗਨ੍ਧਤਣ੍ਹਾ ਵਡ੍ਢਿਤ੍ਵਾ ਦਿਟ੍ਠਧਮ੍ਮਿਕਸਮ੍ਪਰਾਯਿਕਂ ਅਤ੍ਥਂ ਨਾਸੇਸ੍ਸਤਿ, ਮਾ ਮਯਿ ਪਸ੍ਸਨ੍ਤਿਯਾ ਨਸ੍ਸਤੁ, ਚੋਦੇਸ੍ਸਾਮਿ ਨ’’ਨ੍ਤਿ ਉਪਸਙ੍ਕਮਿਤ੍ਵਾ ਅਭਾਸਿ.

ਏਕਙ੍ਗਮੇਤਂ ਥੇਯ੍ਯਾਨਨ੍ਤਿ ਥੇਨਿਤਬ੍ਬਾਨਂ ਰੂਪਾਰਮ੍ਮਣਾਦੀਨਂ ਪਞ੍ਚਕੋਟ੍ਠਾਸਾਨਂ ਇਦਂ ਏਕਙ੍ਗਂ, ਏਕਕੋਟ੍ਠਾਸੋਤਿ ਅਤ੍ਥੋ. ਨ ਹਰਾਮੀਤਿ ਨ ਗਹੇਤ੍ਵਾ ਗਚ੍ਛਾਮਿ. ਆਰਾਤਿ ਦੂਰੇ ਨਾਲ਼ੇ ਗਹੇਤ੍ਵਾ ਨਾਮੇਤ੍ਵਾ ਦੂਰੇ ਠਿਤੋ ਉਪਸਿਙ੍ਘਾਮੀਤਿ ਵਦਤਿ. ਵਣ੍ਣੇਨਾਤਿ ਕਾਰਣੇਨ.

ਯ੍ਵਾਯਨ੍ਤਿ ਯੋ ਅਯਂ. ਤਸ੍ਮਿਂ ਕਿਰ ਦੇਵਤਾਯ ਸਦ੍ਧਿਂ ਕਥੇਨ੍ਤੇਯੇਵ ਏਕੋ ਤਾਪਸੋ ਓਤਰਿਤ੍ਵਾ ਭਿਸਖਨਨਾਦੀਨਿ ਕਾਤੁਂ ਆਰਦ੍ਧੋ, ਤਂ ਸਨ੍ਧਾਯੇਵਮਾਹ. ਆਕਿਣ੍ਣਕਮ੍ਮਨ੍ਤੋਤਿ ਏਵਂ ਅਪਰਿਸੁਦ੍ਧਕਮ੍ਮਨ੍ਤੋ. ਅਖੀਣਕਮ੍ਮਨ੍ਤੋਤਿਪਿ ਪਾਠੋ, ਕਕ੍ਖਲ਼ਕਮ੍ਮਨ੍ਤੋਤਿ ਅਤ੍ਥੋ. ਨ ਵੁਚ੍ਚਤੀਤਿ ਗਨ੍ਧਚੋਰੋਤਿ ਵਾ ਪੁਪ੍ਫਚੋਰੋਤਿ ਵਾ ਕਸ੍ਮਾ ਨ ਵੁਚ੍ਚਤਿ.

ਆਕਿਣ੍ਣਲੁਦ੍ਦੋਤਿ ਬਹੁਪਾਪੋ ਗਾਲ਼੍ਹਪਾਪੋ ਵਾ, ਤਸ੍ਮਾ ਨ ਵੁਚ੍ਚਤਿ. ਧਾਤਿਚੇਲਂਵ ਮਕ੍ਖਿਤੋਤਿ ਯਥਾ ਧਾਤਿਯਾ ਨਿਵਤ੍ਥਕਿਲਿਟ੍ਠਵਤ੍ਥਂ ਉਚ੍ਚਾਰਪਸ੍ਸਾਵਪਂਸੁਮਸਿਕਦ੍ਦਮਾਦੀਹਿ ਮਕ੍ਖਿਤਂ, ਏਵਮੇਵਂ ਰਾਗਦੋਸਾਦੀਹਿ ਮਕ੍ਖਿਤੋ. ਅਰਹਾਮਿ ਵਤ੍ਤਵੇਤਿ ਅਰਹਾਮਿ ਵਤ੍ਤੁਂ. ਦੇਵਤਾਯ ਚੋਦਨਾ ਕਿਰ ਸੁਗਤਾਨੁਸਿਟ੍ਠਿਸਦਿਸਾ, ਨ ਤਂ ਲਾਮਕਾ ਹੀਨਾਧਿਮੁਤ੍ਤਿਕਾ ਮਿਚ੍ਛਾਪਟਿਪਨ੍ਨਕਪੁਗ੍ਗਲਾ ਲਭਨ੍ਤਿ. ਤਸ੍ਮਿਂ ਪਨ ਅਤ੍ਤਭਾਵੇ ਮਗ੍ਗਫਲਾਨਂ ਭਬ੍ਬਰੂਪਾ ਪੁਗ੍ਗਲਾ ਤਂ ਲਭਨ੍ਤਿ, ਤਸ੍ਮਾ ਏਵਮਾਹ.

ਸੁਚਿਗਵੇਸਿਨੋਤਿ ਸੁਚੀਨਿ ਸੀਲਸਮਾਧਿਞਾਣਾਨਿ ਗਵੇਸਨ੍ਤਸ੍ਸ. ਅਬ੍ਭਾਮਤ੍ਤਂ ਵਾਤਿ ਵਲਾਹਕਕੂਟਮਤ੍ਤਂ ਵਿਯ. ਜਾਨਾਸੀਤਿ ਸੁਦ੍ਧੋ ਅਯਨ੍ਤਿ ਜਾਨਾਸਿ. ਵਜ੍ਜਾਸੀਤਿ ਵਦੇਯ੍ਯਾਸਿ. ਨੇਵ ਤਂ ਉਪਜੀਵਾਮਾਤਿ ਦੇਵਤਾ ਕਿਰ ਚਿਨ੍ਤੇਸਿ – ‘‘ਅਯਂ ਭਿਕ੍ਖੁ ਅਤ੍ਥਿ ਮੇ ਹਿਤਕਾਮਾ ਦੇਵਤਾ, ਸਾ ਮਂ ਚੋਦੇਸ੍ਸਤਿ ਸਾਰੇਸ੍ਸਤੀਤਿ ਪਮਾਦਮ੍ਪਿ ਅਨੁਯੁਞ੍ਜੇਯ੍ਯ, ਨਾਸ੍ਸ ਵਚਨਂ ਸਮ੍ਪਟਿਚ੍ਛਿਸ੍ਸਾਮੀ’’ਤਿ. ਤਸ੍ਮਾ ਏਵਮਾਹ. ਤ੍ਵਮੇਵਾਤਿ ਤ੍ਵਂਯੇਵ. ਜਾਨੇਯ੍ਯਾਤਿ ਜਾਨੇਯ੍ਯਾਸਿ. ਯੇਨਾਤਿ ਯੇਨ ਕਮ੍ਮੇਨ ਸੁਗਤਿਂ ਗਚ੍ਛੇਯ੍ਯਾਸਿ, ਤਂ ਕਮ੍ਮਂ ਤ੍ਵਂਯੇਵ ਜਾਨੇਯ੍ਯਾਸੀਤਿ. ਚੁਦ੍ਦਸਮਂ.

ਇਤਿ ਸਾਰਤ੍ਥਪ੍ਪਕਾਸਿਨਿਯਾ

ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਵਨਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.