੧੦. ਯਕ੍ਖਸਂਯੁਤ੍ਤਂ

੧. ਇਨ੍ਦਕਸੁਤ੍ਤਵਣ੍ਣਨਾ

੨੩੫. ਯਕ੍ਖਸਂਯੁਤ੍ਤਸ੍ਸ ਪਠਮੇ ਇਨ੍ਦਕਸ੍ਸਾਤਿ ਇਨ੍ਦਕੂਟਨਿਵਾਸਿਨੋ ਯਕ੍ਖਸ੍ਸ. ਯਕ੍ਖਤੋ ਹਿ ਕੂਟੇਨ, ਕੂਟਤੋ ਚ ਯਕ੍ਖੇਨ ਨਾਮਂ ਲਦ੍ਧਂ. ਰੂਪਂ ਨ ਜੀਵਨ੍ਤਿ ਵਦਨ੍ਤੀਤਿ ਯਦਿ ਬੁਦ੍ਧਾ ਰੂਪਂ ਜੀਵਨ੍ਤਿ ਨ ਵਦਨ੍ਤਿ, ਯਦਿ ਰੂਪਂ ਸਤ੍ਤੋ ਪੁਗ੍ਗਲੋਤਿ ਏਵਂ ਨ ਵਦਨ੍ਤੀਤਿ ਅਤ੍ਥੋ. ਕਥਂ ਨ੍ਵਯਨ੍ਤਿ ਕਥਂ ਨੁ ਅਯਂ? ਕੁਤਸ੍ਸ ਅਟ੍ਠੀਯਕਪਿਣ੍ਡਮੇਤੀਤਿ ਅਸ੍ਸ ਸਤ੍ਤਸ੍ਸ ਅਟ੍ਠਿਯਕਪਿਣ੍ਡਞ੍ਚ ਕੁਤੋ ਆਗਚ੍ਛਤਿ? ਏਤ੍ਥ ਚ ਅਟ੍ਠਿਗ੍ਗਹਣੇਨ ਤੀਣਿ ਅਟ੍ਠਿਸਤਾਨਿ, ਯਕਪਿਣ੍ਡਗ੍ਗਹਣੇਨ ਨਵ ਮਂਸਪੇਸਿਸਤਾਨਿ ਗਹਿਤਾਨਿ. ਯਦਿ ਰੂਪਂ ਨ ਜੀਵੋ, ਅਥਸ੍ਸ ਇਮਾਨਿ ਚ ਅਟ੍ਠੀਨਿ ਇਮਾ ਚ ਮਂਸਪੇਸਿਯੋ ਕੁਤੋ ਆਗਚ੍ਛਨ੍ਤੀਤਿ ਪੁਚ੍ਛਤਿ. ਕਥਂ ਨ੍ਵਯਂ ਸਜ੍ਜਤਿ ਗਬ੍ਭਰਸ੍ਮਿਨ੍ਤਿ ਕੇਨ ਨੁ ਕਾਰਣੇਨ ਅਯਂ ਸਤ੍ਤੋ ਮਾਤੁਕੁਚ੍ਛਿਸ੍ਮਿਂ ਸਜ੍ਜਤਿ ਲਗ੍ਗਤਿ, ਤਿਟ੍ਠਤੀਤਿ? ਪੁਗ੍ਗਲਵਾਦੀ ਕਿਰੇਸ ਯਕ੍ਖੋ, ‘‘ਏਕਪ੍ਪਹਾਰੇਨੇਵ ਸਤ੍ਤੋ ਮਾਤੁਕੁਚ੍ਛਿਸ੍ਮਿਂ ਨਿਬ੍ਬਤ੍ਤਤੀ’’ਤਿ ਗਹੇਤ੍ਵਾ ਗਬ੍ਭਸੇਯ੍ਯਕਸਤ੍ਤਸ੍ਸ ਮਾਤਾ ਮਚ੍ਛਮਂਸਾਦੀਨਿ ਖਾਦਤਿ, ਸਬ੍ਬਾਨਿ ਏਕਰਤ੍ਤਿਵਾਸੇਨ ਪਚਿਤ੍ਵਾ ਫੇਣਂ ਵਿਯ ਵਿਲੀਯਨ੍ਤਿ. ਯਦਿ ਰੂਪਂ ਸਤ੍ਤੋ ਨ ਭਵੇਯ੍ਯ, ਏਵਮੇਵ ਵਿਲੀਯੇਯ੍ਯਾਤਿ ਲਦ੍ਧਿਯਾ ਏਵਮਾਹ. ਅਥਸ੍ਸ ਭਗਵਾ – ‘‘ਨ ਮਾਤੁਕੁਚ੍ਛਿਸ੍ਮਿਂ ਏਕਪ੍ਪਹਾਰੇਨੇਵ ਨਿਬ੍ਬਤ੍ਤਤਿ, ਅਨੁਪੁਬ੍ਬੇਨ ਪਨ ਵਡ੍ਢਤੀ’’ਤਿ ਦਸ੍ਸੇਨ੍ਤੋ ਪਠਮਂ ਕਲਲਂ ਹੋਤੀਤਿਆਦਿਮਾਹ. ਤਤ੍ਥ ਪਠਮਨ੍ਤਿ ਪਠਮੇਨ ਪਟਿਸਨ੍ਧਿਵਿਞ੍ਞਾਣੇਨ ਸਦ੍ਧਿਂ ਤਿਸ੍ਸੋਤਿ ਵਾ ਫੁਸ੍ਸੋਤਿ ਵਾ ਨਾਮਂ ਨਤ੍ਥਿ, ਅਥ ਖੋ ਤੀਹਿ ਜਾਤਿਉਣ੍ਣਂਸੂਹਿ ਕਤਸੁਤ੍ਤਗ੍ਗੇ ਸਣ੍ਠਿਤਤੇਲਬਿਨ੍ਦੁਪ੍ਪਮਾਣਂ ਕਲਲਂ ਹੋਤਿ, ਯਂ ਸਨ੍ਧਾਯ ਵੁਤ੍ਤਂ –

‘‘ਤਿਲਤੇਲਸ੍ਸ ਯਥਾ ਬਿਨ੍ਦੁ, ਸਪ੍ਪਿਮਣ੍ਡੋ ਅਨਾਵਿਲੋ;

ਏਵਂ ਵਣ੍ਣਪ੍ਪਟਿਭਾਗਂ, ਕਲਲਂ ਸਮ੍ਪਵੁਚ੍ਚਤੀ’’ਤਿ.

ਕਲਲਾ ਹੋਤਿ ਅਬ੍ਬੁਦਨ੍ਤਿ ਤਸ੍ਮਾ ਕਲਲਾ ਸਤ੍ਤਾਹਚ੍ਚਯੇਨ ਮਂਸਧੋਵਨਉਦਕਵਣ੍ਣਂ ਅਬ੍ਬੁਦਂ ਨਾਮ ਹੋਤਿ, ਕਲਲਨ੍ਤਿ ਨਾਮਂ ਅਨ੍ਤਰਧਾਯਤਿ. ਵੁਤ੍ਤਮ੍ਪਿ ਚੇਤਂ –

‘‘ਸਤ੍ਤਾਹਂ ਕਲਲਂ ਹੋਤਿ, ਪਰਿਪਕ੍ਕਂ ਸਮੂਹਤਂ;

ਵਿਵਟ੍ਟਮਾਨਂ ਤਬ੍ਭਾਵਂ, ਅਬ੍ਬੁਦਂ ਨਾਮ ਜਾਯਤੀ’’ਤਿ.

ਅਬ੍ਬੁਦਾ ਜਾਯਤੇ ਪੇਸੀਤਿ ਤਸ੍ਮਾਪਿ ਅਬ੍ਬੁਦਾ ਸਤ੍ਤਾਹਚ੍ਚਯੇਨ ਵਿਲੀਨਤਿਪੁਸਦਿਸਾ ਪੇਸਿ ਨਾਮ ਸਞ੍ਜਾਯਤਿ. ਸਾ ਮਰਿਚਫਾਣਿਤੇਨ ਦੀਪੇਤਬ੍ਬਾ. ਗਾਮਦਾਰਿਕਾ ਹਿ ਸੁਪਕ੍ਕਾਨਿ ਮਰਿਚਾਨਿ ਗਹੇਤ੍ਵਾ ਸਾਟਕਨ੍ਤੇ ਭਣ੍ਡਿਕਂ ਕਤ੍ਵਾ ਪੀਲ਼ੇਤ੍ਵਾ ਮਣ੍ਡਂ ਆਦਾਯ ਕਪਾਲੇ ਪਕ੍ਖਿਪਿਤ੍ਵਾ ਆਤਪੇ ਠਪੇਨ੍ਤਿ, ਤਂ ਸੁਕ੍ਖਮਾਨਂ ਸਬ੍ਬਭਾਗੇਹਿ ਮੁਚ੍ਚਤਿ. ਏਵਰੂਪਾ ਪੇਸਿ ਹੋਤਿ, ਅਬ੍ਬੁਦਨ੍ਤਿ ਨਾਮਂ ਅਨ੍ਤਰਧਾਯਤਿ. ਵੁਤ੍ਤਮ੍ਪਿ ਚੇਤਂ –

‘‘ਸਤ੍ਤਾਹਂ ਅਬ੍ਬੁਦਂ ਹੋਤਿ, ਪਰਿਪਕ੍ਕਂ ਸਮੂਹਤਂ;

ਵਿਵਟ੍ਟਮਾਨਂ ਤਬ੍ਭਾਵਂ, ਪੇਸਿ ਨਾਮ ਪਜਾਯਤੀ’’ਤਿ.

ਪੇਸਿ ਨਿਬ੍ਬਤ੍ਤਤੀ ਘਨੋਤਿ ਤਤੋ ਪੇਸਿਤੋ ਸਤ੍ਤਾਹਚ੍ਚਯੇਨ ਕੁਕ੍ਕੁਟਣ੍ਡਸਣ੍ਠਾਨੋ ਘਨੋ ਨਾਮ ਮਂਸਪਿਣ੍ਡੋ ਨਿਬ੍ਬਤ੍ਤਤਿ, ਪੇਸੀਤਿ ਨਾਮਂ ਅਨ੍ਤਰਧਾਯਤਿ. ਵੁਤ੍ਤਮ੍ਪਿ ਚੇਤਂ –

‘‘ਸਤ੍ਤਾਹਂ ਪੇਸਿ ਭਵਤਿ, ਪਰਿਪਕ੍ਕਂ ਸਮੂਹਤਂ;

ਵਿਵਟ੍ਟਮਾਨਂ ਤਬ੍ਭਾਵਂ, ਘਨੋਤਿ ਨਾਮ ਜਾਯਤਿ.

‘‘ਯਥਾ ਕੁਕ੍ਕੁਟਿਯਾ ਅਣ੍ਡਂ, ਸਮਨ੍ਤਾ ਪਰਿਮਣ੍ਡਲਂ;

ਏਵਂ ਘਨਸ੍ਸ ਸਣ੍ਠਾਨਂ, ਨਿਬ੍ਬਤ੍ਤਂ ਕਮ੍ਮਪਚ੍ਚਯਾ’’ਤਿ.

ਘਨਾ ਪਸਾਖਾ ਜਾਯਨ੍ਤੀਤਿ ਪਞ੍ਚਮੇ ਸਤ੍ਤਾਹੇ ਦ੍ਵਿਨ੍ਨਂ ਹਤ੍ਥਪਾਦਾਨਂ ਸੀਸਸ੍ਸ ਚਤ੍ਥਾਯ ਪਞ੍ਚ ਪੀਲ਼ਕਾ ਜਾਯਨ੍ਤਿ, ਯਂ ਸਨ੍ਧਾਯੇਤਂ ਵੁਤ੍ਤਂ ‘‘ਪਞ੍ਚਮੇ, ਭਿਕ੍ਖਵੇ, ਸਤ੍ਤਾਹੇ ਪਞ੍ਚ ਪੀਲ਼ਕਾ ਸਣ੍ਠਹਨ੍ਤਿ ਕਮ੍ਮਤੋ’’ਤਿ.

ਇਤੋ ਪਰਂ ਛਟ੍ਠਸਤ੍ਤਮਾਦੀਨਿ ਸਤ੍ਤਾਹਾਨਿ ਅਤਿਕ੍ਕਮ੍ਮ ਦੇਸਨਂ ਸਙ੍ਖਿਪਿਤ੍ਵਾ ਦ੍ਵਾਚਤ੍ਤਾਲੀਸੇ ਸਤ੍ਤਾਹੇ ਪਰਿਣਤਕਾਲਂ ਗਹੇਤ੍ਵਾ ਦਸ੍ਸੇਨ੍ਤੋ ਕੇਸਾਤਿਆਦਿਮਾਹ. ਤਤ੍ਥ ਕੇਸਾ ਲੋਮਾ ਨਖਾਪਿ ਚਾਤਿ ਦ੍ਵਾਚਤ੍ਤਾਲੀਸੇ ਸਤ੍ਤਾਹੇ ਏਤਾਨਿ ਜਾਯਨ੍ਤਿ.

ਤੇਨ ਸੋ ਤਤ੍ਥ ਯਾਪੇਤੀਤਿ ਤਸ੍ਸ ਹਿ ਨਾਭਿਤੋ ਉਟ੍ਠਿਤੋ ਨਾਲ਼ੋ ਮਾਤੁ ਉਦਰਪਟਲੇਨ ਏਕਾਬਦ੍ਧੋ ਹੋਤਿ, ਸੋ ਉਪ੍ਪਲਦਣ੍ਡਕੋ ਵਿਯ ਛਿਦ੍ਦੋ, ਤੇਨ ਆਹਾਰਰਸੋ ਸਂਸਰਿਤ੍ਵਾ ਆਹਾਰਸਮੁਟ੍ਠਾਨਰੂਪਂ ਸਮੁਟ੍ਠਾਪੇਤਿ. ਏਵਂ ਸੋ ਦਸ ਮਾਸੇ ਯਾਪੇਤਿ. ਮਾਤੁਕੁਚ੍ਛਿਗਤੋ ਨਰੋਤਿ ਮਾਤੁਯਾ ਤਿਰੋਕੁਚ੍ਛਿਗਤੋ, ਕੁਚ੍ਛਿਯਾ ਅਬ੍ਭਨ੍ਤਰਗਤੋਤਿ ਅਤ੍ਥੋ. ਇਤਿ ਭਗਵਾ ‘‘ਏਵਂ ਖੋ, ਯਕ੍ਖ, ਅਯਂ ਸਤ੍ਤੋ ਅਨੁਪੁਬ੍ਬੇਨ ਮਾਤੁਕੁਚ੍ਛਿਯਂ ਵਡ੍ਢਤਿ, ਨ ਏਕਪ੍ਪਹਾਰੇਨੇਵ ਨਿਬ੍ਬਤ੍ਤਤੀ’’ਤਿ ਦਸ੍ਸੇਤਿ. ਪਠਮਂ.

੨. ਸਕ੍ਕਨਾਮਸੁਤ੍ਤਵਣ੍ਣਨਾ

੨੩੬. ਦੁਤਿਯੇ ਸਕ੍ਕਨਾਮਕੋਤਿ ਏਵਂ ਨਾਮਕੋ ਏਕੋ ਯਕ੍ਖੋ, ਸੋ ਕਿਰ ਮਾਰਪਕ੍ਖਿਕਯਕ੍ਖੋ. ਵਿਪ੍ਪਮੁਤ੍ਤਸ੍ਸਾਤਿ ਤੀਹਿ ਭਵੇਹਿ ਵਿਪ੍ਪਮੁਤ੍ਤਸ੍ਸ. ਯਦਞ੍ਞਨ੍ਤਿ ਯਂ ਅਞ੍ਞਂ. ਵਣ੍ਣੇਨਾਤਿ ਕਾਰਣੇਨ. ਸਂਵਾਸੋਤਿ ਏਕਤੋ ਵਾਸੋ, ਸਕ੍ਖਿਧਮ੍ਮੋ ਮਿਤ੍ਤਧਮ੍ਮੋਤਿ ਅਤ੍ਥੋ. ਸਪ੍ਪਞ੍ਞੋਤਿ ਸੁਪਞ੍ਞੋ ਸਮ੍ਬੁਦ੍ਧੋ. ਦੁਤਿਯਂ.

੩. ਸੂਚਿਲੋਮਸੁਤ੍ਤਵਣ੍ਣਨਾ

੨੩੭. ਤਤਿਯੇ ਗਯਾਯਨ੍ਤਿ ਗਯਾਗਾਮੇ, ਗਯਾਯ ਅਵਿਦੂਰੇ ਨਿਵਿਟ੍ਠਗਾਮਂ ਉਪਨਿਸ੍ਸਾਯਾਤਿ ਅਤ੍ਥੋ. ਟਙ੍ਕਿਤਮਞ੍ਚੇਤਿ ਦੀਘਮਞ੍ਚੇ ਪਾਦਮਜ੍ਝੇ ਵਿਜ੍ਝਿਤ੍ਵਾ ਅਟਨਿਯੋ ਪਵੇਸੇਤ੍ਵਾ ਕਤਮਞ੍ਚੇ. ਤਸ੍ਸ ‘‘ਇਦਂ ਉਪਰਿ, ਇਦਂ ਹੇਟ੍ਠਾ’’ਤਿ ਨਤ੍ਥਿ, ਪਰਿਵਤ੍ਤੇਤ੍ਵਾ ਅਤ੍ਥਤੋਪਿ ਤਾਦਿਸੋਵ ਹੋਤਿ, ਤਂ ਦੇਵਟ੍ਠਾਨੇ ਠਪੇਨ੍ਤਿ. ਚਤੁਨ੍ਨਂ ਪਾਸਾਣਾਨਂ ਉਪਰਿ ਪਾਸਾਣਂ ਅਤ੍ਥਰਿਤ੍ਵਾ ਕਤਗੇਹਮ੍ਪਿ ‘‘ਟਙ੍ਕਿਤਮਞ੍ਚੋ’’ਤਿ ਵੁਚ੍ਚਤਿ. ਸੂਚਿਲੋਮਸ੍ਸਾਤਿ ਕਥਿਨਸੂਚਿਸਦਿਸਲੋਮਸ੍ਸ. ਸੋ ਕਿਰ ਕਸ੍ਸਪਸ੍ਸ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾ ਦੂਰਟ੍ਠਾਨਤੋ ਆਗਤੋ ਸੇਦਮਲਗ੍ਗਹਿਤੇਨ ਗਤ੍ਤੇਨ ਸੁਪਞ੍ਞਤ੍ਤਂ ਸਙ੍ਘਿਕਮਞ੍ਚਂ ਅਨਾਦਰੇਨ ਅਪਚ੍ਚਤ੍ਥਰਿਤ੍ਵਾ ਨਿਪਜ੍ਜਿ, ਤਸ੍ਸ ਪਰਿਸੁਦ੍ਧਸੀਲਸ੍ਸ ਤਂ ਕਮ੍ਮਂ ਸੁਦ੍ਧਵਤ੍ਥੇ ਕਾਲ਼ਕਂ ਵਿਯ ਅਹੋਸਿ. ਸੋ ਤਸ੍ਮਿਂ ਅਤ੍ਤਭਾਵੇ ਵਿਸੇਸਂ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤੋ ਕਾਲਂਕਤ੍ਵਾ ਗਯਾਗਾਮਦ੍ਵਾਰੇ ਸਙ੍ਕਾਰਟ੍ਠਾਨੇ ਯਕ੍ਖੋ ਹੁਤ੍ਵਾ ਨਿਬ੍ਬਤ੍ਤਿ. ਨਿਬ੍ਬਤ੍ਤਮਤ੍ਤਸ੍ਸੇਵ ਚਸ੍ਸ ਸਕਲਸਰੀਰਂ ਕਥਿਨਸੂਚੀਹਿ ਗਵਿਚ੍ਛਿਵਿਜ੍ਝਿਤਂ ਵਿਯ ਜਾਤਂ.

ਅਥੇਕਦਿਵਸਂ ਭਗਵਾ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋ ਤਂ ਯਕ੍ਖਂ ਪਠਮਾਵਜ੍ਜਨਸ੍ਸੇਵ ਆਪਾਥਂ ਆਗਤਂ ਦਿਸ੍ਵਾ – ‘‘ਅਯਂ ਏਕਂ ਬੁਦ੍ਧਨ੍ਤਰਂ ਮਹਾਦੁਕ੍ਖਂ ਅਨੁਭਵਿ. ਕਿਂ ਨੁ ਖ੍ਵਾਸ੍ਸ ਮਂ ਆਗਮ੍ਮ ਸੋਤ੍ਥਿਕਾਰਣਂ ਭਵੇਯ੍ਯਾ’’ਤਿ? ਆਵਜ੍ਜੇਨ੍ਤੋ ਪਠਮਮਗ੍ਗਸ੍ਸ ਉਪਨਿਸ੍ਸਯਂ ਅਦ੍ਦਸ. ਅਥਸ੍ਸ ਸਙ੍ਗਹਂ ਕਾਤੁਕਾਮੋ ਸੁਰਤ੍ਤਦੁਪਟ੍ਟਂ ਨਿਵਾਸੇਤ੍ਵਾ ਸੁਗਤਮਹਾਚੀਵਰਂ ਪਾਰੁਪਿਤ੍ਵਾ ਦੇਵਵਿਮਾਨਕਪ੍ਪਂ ਗਨ੍ਧਕੁਟਿਂ ਪਹਾਯ ਹਤ੍ਥਿਗਵਾਸ੍ਸਮਨੁਸ੍ਸਕੁਕ੍ਕੁਰਾਦਿਕੁਣਪਦੁਗ੍ਗਨ੍ਧਂ ਸਙ੍ਕਾਰਟ੍ਠਾਨਂ ਗਨ੍ਤ੍ਵਾ ਤਤ੍ਥ ਮਹਾਗਨ੍ਧਕੁਟਿਯਂ ਵਿਯ ਨਿਸੀਦਿ. ਤਂ ਸਨ੍ਧਾਯ ਵੁਤ੍ਤਂ ‘‘ਸੂਚਿਲੋਮਸ੍ਸ ਯਕ੍ਖਸ੍ਸ ਭਵਨੇ’’ਤਿ.

ਖਰੋਤਿ ਸੁਂਸੁਮਾਰਪਿਟ੍ਠਿ ਵਿਯ ਛਦਨਿਟ੍ਠਕਾਹਿ ਵਿਸਮਚ੍ਛਦਨਪਿਟ੍ਠਿ ਵਿਯ ਚ ਖਰਸਰੀਰੋ. ਸੋ ਕਿਰ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਸੀਲਸਮ੍ਪਨ੍ਨੋ ਉਪਾਸਕੋ ਏਕਦਿਵਸੇ ਵਿਹਾਰੇ ਚਿਤ੍ਤਤ੍ਥਰਣਾਦੀਹਿ ਅਤ੍ਥਤਾਯ ਭੂਮਿਯਾ ਸਙ੍ਘਿਕੇ ਅਤ੍ਥਰਣੇ ਅਤ੍ਤਨੋ ਉਤ੍ਤਰਾਸਙ੍ਗਂ ਅਪਚ੍ਚਤ੍ਥਰਿਤ੍ਵਾ ਨਿਪਜ੍ਜਿ. ਸਙ੍ਘਿਕਂ ਤੇਲਂ ਅਭਾਜੇਤ੍ਵਾ ਅਤ੍ਤਨੋ ਉਤ੍ਤਰਾਸਙ੍ਗਂ ਅਪਚ੍ਚਤ੍ਥਰਿਤ੍ਵਾ ਨਿਪਜ੍ਜਿ. ਸਙ੍ਘਿਕਂ ਤੇਲਂ ਅਭਾਜੇਤ੍ਵਾ ਅਤ੍ਤਨੋ ਹਤ੍ਥੇਹਿ ਸਰੀਰਂ ਮਕ੍ਖੇਸੀਤਿਪਿ ਵਦਨ੍ਤਿ. ਸੋ ਤੇਨ ਕਮ੍ਮੇਨ ਸਗ੍ਗੇ ਨਿਬ੍ਬਤ੍ਤਿਤੁਂ ਅਸਕ੍ਕੋਨ੍ਤੋ ਤਸ੍ਸੇਵ ਗਾਮਸ੍ਸ ਦ੍ਵਾਰੇ ਸਙ੍ਕਾਰਟ੍ਠਾਨੇ ਯਕ੍ਖੋ ਹੁਤ੍ਵਾ ਨਿਬ੍ਬਤ੍ਤਿ. ਨਿਬ੍ਬਤ੍ਤਮਤ੍ਤਸ੍ਸ ਚਸ੍ਸ ਸਕਲਸਰੀਰਂ ਵੁਤ੍ਤਪ੍ਪਕਾਰਂ ਅਹੋਸਿ. ਤੇ ਉਭੋਪਿ ਸਹਾਯਾ ਜਾਤਾ. ਇਤਿ ਖਰਸ੍ਸ ਖਰਭਾਵੋ ਵੇਦਿਤਬ੍ਬੋ.

ਅਵਿਦੂਰੇ ਅਤਿਕ੍ਕਮਨ੍ਤੀਤਿ ਗੋਚਰਂ ਪਰਿਯੇਸਨ੍ਤਾ ਸਮਾਗਮਟ੍ਠਾਨਂ ਵਾ ਗਚ੍ਛਨ੍ਤਾ ਆਸਨ੍ਨੇ ਠਾਨੇ ਗਚ੍ਛਨ੍ਤਿ. ਤੇਸੁ ਸੂਚਿਲੋਮੋ ਸਤ੍ਥਾਰਂ ਨ ਪਸ੍ਸਤਿ, ਖਰਲੋਮੋ ਪਠਮਤਰਂ ਦਿਸ੍ਵਾ ਸੂਚਿਲੋਮਂ ਯਕ੍ਖਂ ਏਤਦਵੋਚ – ‘‘ਏਸੋ ਸਮਣੋ’’ਤਿ, ਸਮ੍ਮ, ਏਸ ਤਵ ਭਵਨਂ ਪਵਿਸਿਤ੍ਵਾ ਨਿਸਿਨ੍ਨੋ ਏਕੋ ਸਮਣੋਤਿ. ਨੇਸੋ ਸਮਣੋ, ਸਮਣਕੋ ਏਸੋਤਿ ਸੋ ਕਿਰ ਯੋ ਮਂ ਪਸ੍ਸਿਤ੍ਵਾ ਭੀਤੋ ਪਲਾਯਤਿ, ਤਂ ਸਮਣਕੋਤਿ ਵਦਤਿ. ਯੋ ਨ ਭਾਯਤਿ, ਤਂ ਸਮਣੋਤਿ. ਤਸ੍ਮਾ ‘‘ਅਯਂ ਮਂ ਦਿਸ੍ਵਾ ਭੀਤੋ ਪਲਾਯਿਸ੍ਸਤੀ’’ਤਿ ਮਞ੍ਞਮਾਨੋ ਏਵਮਾਹ.

ਕਾਯਂ ਉਪਨਾਮੇਸੀਤਿ ਭੇਰਵਰੂਪਂ ਨਿਮ੍ਮਿਨਿਤ੍ਵਾ ਮਹਾਮੁਖਂ ਵਿਵਰਿਤ੍ਵਾ ਸਕਲਸਰੀਰੇ ਲੋਮਾਨਿ ਉਟ੍ਠਾਪੇਤ੍ਵਾ ਕਾਯਂ ਉਪਨਾਮੇਸਿ. ਅਪਨਾਮੇਸੀਤਿ ਰਤਨਸਤਿਕਂ ਸੁਵਣ੍ਣਗ੍ਘਨਿਕਂ ਵਿਯ ਥੋਕਂ ਅਪਨਾਮੇਸਿ. ਪਾਪਕੋਤਿ ਲਾਮਕੋ ਅਮਨੁਞ੍ਞੋ. ਸੋ ਗੂਥਂ ਵਿਯ ਅਗ੍ਗਿ ਵਿਯ ਕਣ੍ਹਸਪ੍ਪੋ ਵਿਯ ਚ ਪਰਿਵਜ੍ਜੇਤਬ੍ਬੋ, ਨ ਇਮਿਨਾ ਸੁਵਣ੍ਣਵਣ੍ਣੇਨ ਸਰੀਰੇਨ ਸਮ੍ਪਟਿਚ੍ਛਿਤਬ੍ਬੋ. ਏਵਂ ਵੁਤ੍ਤੇ ਪਨ ਸੂਚਿਲੋਮੋ ‘‘ਪਾਪਕੋ ਕਿਰ ਮੇ ਸਮ੍ਫਸ੍ਸੋ’’ਤਿ ਕੁਦ੍ਧੋ ਪਞ੍ਹਂ ਤਂ, ਸਮਣਾਤਿਆਦਿਮਾਹ. ਚਿਤ੍ਤਂ ਵਾ ਤੇ ਖਿਪਿਸ੍ਸਾਮੀਤਿ ਯੇਸਞ੍ਹਿ ਅਮਨੁਸ੍ਸਾ ਚਿਤ੍ਤਂ ਖਿਪਿਤੁਕਾਮਾ ਹੋਨ੍ਤਿ, ਤੇਸਂ ਸੇਤਮੁਖਂ ਨੀਲੋਦਰਂ ਸੁਰਤ੍ਤਹਤ੍ਥਪਾਦਂ ਮਹਾਸੀਸਂ ਪਜ੍ਜਲਿਤਨੇਤ੍ਤਂ ਭੇਰਵਂ ਵਾ ਅਤ੍ਤਭਾਵਂ ਨਿਮ੍ਮਿਨਿਤ੍ਵਾ ਦਸ੍ਸੇਨ੍ਤਿ, ਭੇਰਵਂ ਵਾ ਸਦ੍ਦਂ ਸਾਵੇਨ੍ਤਿ, ਕਥੇਨ੍ਤਾਨਂਯੇਵ ਵਾ ਮੁਖੇ ਹਤ੍ਥਂ ਪਕ੍ਖਿਪਿਤ੍ਵਾ ਹਦਯਂ ਮਦ੍ਦਨ੍ਤਿ, ਤੇਨ ਤੇ ਸਤ੍ਤਾ ਉਮ੍ਮਤ੍ਤਕਾ ਹੋਨ੍ਤਿ ਖਿਤ੍ਤਚਿਤ੍ਤਾ. ਤਂ ਸਨ੍ਧਾਯੇਵਮਾਹ. ਪਾਰਗਙ੍ਗਾਯਾਤਿ ਦ੍ਵੀਸੁ ਪਾਦੇਸੁ ਗਹੇਤ੍ਵਾ ਤਂ ਆਵਿਞ੍ਛੇਤ੍ਵਾ ਯਥਾ ਨ ਪੁਨਾਗਚ੍ਛਸਿ, ਏਵਂ ਪਾਰਂ ਵਾ ਗਙ੍ਗਾਯ ਖਿਪਿਸ੍ਸਾਮੀਤਿ ਵਦਤਿ. ਸਦੇਵਕੇਤਿਆਦਿ ਵੁਤ੍ਤਤ੍ਥਮੇਵ. ਪੁਚ੍ਛ ਯਦਾਕਙ੍ਖਸੀਤਿ ਯਂਕਿਞ੍ਚਿ ਆਕਙ੍ਖਸਿ, ਤਂ ਸਬ੍ਬਂ ਪੁਚ੍ਛ, ਅਸੇਸਂ ਤੇ ਬ੍ਯਾਕਰਿਸ੍ਸਾਮੀਤਿ ਸਬ੍ਬਞ੍ਞੁਪਵਾਰਣਂ ਪਵਾਰੇਤਿ.

ਕੁਤੋਨਿਦਾਨਾਤਿ ਕਿਂਨਿਦਾਨਾ, ਕਿਂਪਚ੍ਚਯਾਤਿ ਅਤ੍ਥੋ? ਕੁਮਾਰਕਾ ਧਙ੍ਕਮਿਵੋਸ੍ਸਜਨ੍ਤੀਤਿ ਯਥਾ ਕੁਮਾਰਕਾ ਕਾਕਂ ਗਹੇਤ੍ਵਾ ਓਸ੍ਸਜਨ੍ਤਿ ਖਿਪਨ੍ਤਿ, ਏਵਂ ਪਾਪਵਿਤਕ੍ਕਾ ਕੁਤੋ ਸਮੁਟ੍ਠਾਯ ਚਿਤ੍ਤਂ ਓਸ੍ਸਜਨ੍ਤੀਤਿ ਪੁਚ੍ਛਤਿ?

ਇਤੋਨਿਦਾਨਾਤਿ ਅਯਂ ਅਤ੍ਤਭਾਵੋ ਨਿਦਾਨਂ ਏਤੇਸਨ੍ਤਿ ਇਤੋ ਨਿਦਾਨਾ. ਇਤੋਜਾਤਿ ਇਤੋ ਅਤ੍ਤਭਾਵਤੋ ਜਾਤਾ. ਇਤੋ ਸਮੁਟ੍ਠਾਯ ਮਨੋਵਿਤਕ੍ਕਾਤਿ ਯਥਾ ਦੀਘਸੁਤ੍ਤਕੇਨ ਪਾਦੇ ਬਦ੍ਧਂ ਕਾਕਂ ਕੁਮਾਰਕਾ ਤਸ੍ਸ ਸੁਤ੍ਤਪਰਿਯਨ੍ਤਂ ਅਙ੍ਗੁਲਿਯਂ ਵੇਠੇਤ੍ਵਾ ਓਸ੍ਸਜਨ੍ਤਿ, ਸੋ ਦੂਰਂ ਗਨ੍ਤ੍ਵਾਪਿ ਪੁਨ ਤੇਸਂ ਪਾਦਮੂਲੇਯੇਵ ਪਤਤਿ, ਏਵਮੇਵ ਇਤੋ ਅਤ੍ਤਭਾਵਤੋ ਸਮੁਟ੍ਠਾਯ ਪਾਪਵਿਤਕ੍ਕਾ ਚਿਤ੍ਤਂ ਓਸ੍ਸਜਨ੍ਤਿ.

ਸ੍ਨੇਹਜਾਤਿ ਤਣ੍ਹਾਸਿਨੇਹਤੋ ਜਾਤਾ. ਅਤ੍ਤਸਮ੍ਭੂਤਾਤਿ ਅਤ੍ਤਨਿ ਸਮ੍ਭੂਤਾ. ਨਿਗ੍ਰੋਧਸ੍ਸੇਵ ਖਨ੍ਧਜਾਤਿ ਨਿਗ੍ਰੋਧਖਨ੍ਧੇ ਜਾਤਾ ਪਾਰੋਹਾ ਵਿਯ. ਪੁਥੂਤਿ ਬਹੂ ਅਨੇਕਪ੍ਪਕਾਰਾ ਪਾਪਵਿਤਕ੍ਕਾ ਤਂਸਮ੍ਪਯੁਤ੍ਤਕਿਲੇਸਾ ਚ. ਵਿਸਤ੍ਤਾਤਿ ਲਗ੍ਗਾ ਲਗ੍ਗਿਤਾ. ਕਾਮੇਸੂਤਿ ਵਤ੍ਥੁਕਾਮੇਸੁ. ਮਾਲੁਵਾਵ ਵਿਤਤਾ ਵਨੇਤਿ ਯਥਾ ਵਨੇ ਮਾਲੁਵਾ ਲਤਾ ਯਂ ਰੁਕ੍ਖਂ ਨਿਸ੍ਸਾਯ ਜਾਯਤਿ, ਤਂ ਮੂਲਤੋ ਯਾਵ ਅਗ੍ਗਾ, ਅਗ੍ਗਤੋ ਯਾਵ ਮੂਲਾ ਪੁਨਪ੍ਪੁਨਂ ਸਂਸਿਬ੍ਬਿਤ੍ਵਾ ਅਜ੍ਝੋਤ੍ਥਰਿਤ੍ਵਾ ਓਤਤਵਿਤਤਾ ਤਿਟ੍ਠਤਿ. ਏਵਂ ਵਤ੍ਥੁਕਾਮੇਸੁ ਪੁਥੂ ਕਿਲੇਸਕਾਮਾ ਵਿਸਤ੍ਤਾ, ਪੁਥੂ ਵਾ ਸਤ੍ਤਾ ਤੇਹਿ ਕਿਲੇਸਕਾਮੇਹਿ ਵਤ੍ਥੁਕਾਮੇਸੁ ਵਿਸਤ੍ਤਾ. ਯੇ ਨਂ ਪਜਾਨਨ੍ਤੀਤਿ ਯੇ ‘‘ਅਤ੍ਤਸਮ੍ਭੂਤਾ’’ਤਿ ਏਤ੍ਥ ਵੁਤ੍ਤਂ ਅਤ੍ਤਭਾਵਂ ਜਾਨਨ੍ਤਿ.

ਯਤੋਨਿਦਾਨਨ੍ਤਿ ਯਂ ਨਿਦਾਨਮਸ੍ਸ ਅਤ੍ਤਭਾਵਸ੍ਸ ਤਞ੍ਚ ਜਾਨਨ੍ਤਿ. ਤੇ ਨਂ ਵਿਨੋਦੇਨ੍ਤੀਤਿ ਤੇ ਏਵਂ ਅਤ੍ਤਭਾਵਸਙ੍ਖਾਤਸ੍ਸ ਦੁਕ੍ਖਸਚ੍ਚਸ੍ਸ ਨਿਦਾਨਭੂਤਂ ਸਮੁਦਯਸਚ੍ਚਂ ਮਗ੍ਗਸਚ੍ਚੇਨ ਵਿਨੋਦੇਨ੍ਤਿ. ਤੇ ਦੁਤ੍ਤਰਨ੍ਤਿ ਤੇ ਸਮੁਦਯਸਚ੍ਚਂ ਨੀਹਰਨ੍ਤਾ ਇਦਂ ਦੁਤ੍ਤਰਂ ਕਿਲੇਸੋਘਂ ਤਰਨ੍ਤਿ. ਅਤਿਣ੍ਣਪੁਬ੍ਬਨ੍ਤਿ ਅਨਮਤਗ੍ਗੇ ਸਂਸਾਰੇ ਸੁਪਿਨਨ੍ਤੇਪਿ ਨ ਤਿਣ੍ਣਪੁਬ੍ਬਂ. ਅਪੁਨਬ੍ਭਵਾਯਾਤਿ ਅਪੁਨਬ੍ਭਵਸਙ੍ਖਾਤਸ੍ਸ ਨਿਰੋਧਸਚ੍ਚਸ੍ਸਤ੍ਥਾਯ. ਇਤਿ ਇਮਾਯ ਗਾਥਾਯ ਚਤ੍ਤਾਰਿ ਸਚ੍ਚਾਨਿ ਪਕਾਸੇਨ੍ਤੋ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਪੇਸਿ. ਦੇਸਨਾਵਸਾਨੇ ਸੂਚਿਲੋਮੋ ਤਸ੍ਮਿਂਯੇਵ ਪਦੇਸੇ ਠਿਤੋ ਦੇਸਨਾਨੁਸਾਰੇਨ ਞਾਣਂ ਪੇਸੇਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਿਤੋ. ਸੋਤਾਪਨ੍ਨਾ ਚ ਨਾਮ ਨ ਕਿਲਿਟ੍ਠਤ੍ਤਭਾਵੇ ਤਿਟ੍ਠਨ੍ਤੀਤਿ ਸਹ ਫਲਪਟਿਲਾਭੇਨਸ੍ਸ ਸਰੀਰੇ ਸੇਤਕਣ੍ਡੁਪੀਲ਼ਕਸੂਚਿਯੋ ਸਬ੍ਬਾ ਪਤਿਤਾ. ਸੋ ਦਿਬ੍ਬਵਤ੍ਥਨਿਵਤ੍ਥੋ ਦਿਬ੍ਬਵਰਦੁਕੂਲੁਤ੍ਤਰਾਸਙ੍ਗੋ ਦਿਬ੍ਬਵੇਠਨਵੇਠਿਤੋ ਦਿਬ੍ਬਾਭਰਣਗਨ੍ਧਮਾਲਧਰੋ ਸੁਵਣ੍ਣਵਣ੍ਣੋ ਹੁਤ੍ਵਾ ਭੁਮ੍ਮਦੇਵਤਾਪਰਿਹਾਰਂ ਪਟਿਲਭੀਤਿ. ਤਤਿਯਂ.

੪. ਮਣਿਭਦ੍ਦਸੁਤ੍ਤਵਣ੍ਣਨਾ

੨੩੮. ਚਤੁਤ੍ਥੇ ਸੁਖਮੇਧਤੀਤਿ, ਸੁਖਂ ਪਟਿਲਭਤਿ. ਸੁਵੇ ਸੇਯ੍ਯੋਤਿ ਸੁਵੇ ਸੁਵੇ ਸੇਯ੍ਯੋ, ਨਿਚ੍ਚਮੇਵ ਸੇਯ੍ਯੋਤਿ ਅਤ੍ਥੋ. ਵੇਰਾ ਨ ਪਰਿਮੁਚ੍ਚਤੀਤਿ ਅਹਂ ਸਤਿਮਾਤਿ ਏਤ੍ਤਕੇਨ ਵੇਰਤੋ ਨ ਮੁਚ੍ਚਤਿ. ਯਸ੍ਸਾਤਿ ਯਸ੍ਸ ਅਰਹਤੋ. ਅਹਿਂਸਾਯਾਤਿ ਕਰੁਣਾਯ ਚੇਵ ਕਰੁਣਾਪੁਬ੍ਬਭਾਗੇ ਚ. ਮੇਤ੍ਤਂਸੋਤਿ ਸੋ ਮੇਤ੍ਤਞ੍ਚੇਵ ਮੇਤ੍ਤਾਪੁਬ੍ਬਭਾਗਞ੍ਚ ਭਾਵੇਤਿ. ਅਥ ਵਾ ਅਂਸੋਤਿ ਕੋਟ੍ਠਾਸੋ ਵੁਚ੍ਚਤਿ. ਮੇਤ੍ਤਾ ਅਂਸੋ ਏਤਸ੍ਸਾਤਿ ਮੇਤ੍ਤਂਸੋ. ਇਦਂ ਵੁਤ੍ਤਂ ਹੋਤਿ – ਯਸ੍ਸ ਅਰਹਤੋ ਸਬ੍ਬਕਾਲਂ ਅਹਿਂਸਾਯ ਰਤੋ ਮਨੋ, ਯਸ੍ਸ ਚ ਸਬ੍ਬਭੂਤੇਸੁ ਮੇਤ੍ਤਾਕੋਟ੍ਠਾਸੋ ਅਤ੍ਥਿ, ਤਸ੍ਸ ਕੇਨਚਿ ਪੁਗ੍ਗਲੇਨ ਸਦ੍ਧਿਂ ਵੇਰਂ ਨਾਮ ਨਤ੍ਥਿ ਯਕ੍ਖਾਤਿ. ਚਤੁਤ੍ਥਂ.

੫. ਸਾਨੁਸੁਤ੍ਤਵਣ੍ਣਨਾ

੨੩੯. ਪਞ੍ਚਮੇ ਯਕ੍ਖੇਨ ਗਹਿਤੋ ਹੋਤੀਤਿ ਸੋ ਕਿਰ ਤਸ੍ਸਾ ਉਪਾਸਿਕਾਯ ਏਕਪੁਤ੍ਤਕੋ. ਅਥ ਨਂ ਸਾ ਦਹਰਕਾਲੇਯੇਵ ਪਬ੍ਬਾਜੇਸਿ. ਸੋ ਪਬ੍ਬਜਿਤਕਾਲਤੋ ਪਟ੍ਠਾਯ ਸੀਲਵਾ ਅਹੋਸਿ ਵਤ੍ਤਸਮ੍ਪਨ੍ਨੋ, ਆਚਰਿਯੁਪਜ੍ਝਾਯਆਗਨ੍ਤੁਕਾਦੀਨਂ ਵਤ੍ਤਂ ਕਤਮੇਵ ਹੋਤਿ, ਮਾਸਸ੍ਸ ਅਟ੍ਠਮੀਦਿਵਸੇ ਪਾਤੋ ਵੁਟ੍ਠਾਯ ਉਦਕਮਾਲ਼ਕੇ ਉਦਕਂ ਉਪਟ੍ਠਾਪੇਤ੍ਵਾ ਧਮ੍ਮਸ੍ਸਵਨਗ੍ਗਂ ਸਮ੍ਮਜ੍ਜਿਤ੍ਵਾ ਦੀਪਂ ਜਾਲੇਤ੍ਵਾ ਮਧੁਰਸ੍ਸਰੇਨ ਧਮ੍ਮਸ੍ਸਵਨਂ ਘੋਸੇਤਿ. ਭਿਕ੍ਖੂ ਤਸ੍ਸ ਥਾਮਂ ਞਤ੍ਵਾ ‘‘ਸਰਭਾਣਂ ਭਣ, ਸਾਮਣੇਰਾ’’ਤਿ ਅਜ੍ਝੇਸਨ੍ਤਿ. ਸੋ ‘‘ਮਯ੍ਹਂ ਹਦਯਵਾਤੋ ਰੁਜਤਿ, ਕਾਸੋ ਵਾ ਬਾਧਤੀ’’ਤਿ ਕਿਞ੍ਚਿ ਪਚ੍ਚਾਹਾਰਂ ਅਕਤ੍ਵਾ ਧਮ੍ਮਾਸਨਂ ਅਭਿਰੁਹਿਤ੍ਵਾ ਆਕਾਸਗਙ੍ਗਂ ਓਤਾਰੇਨ੍ਤੋ ਵਿਯ ਸਰਭਾਣਂ ਵਤ੍ਵਾ ਓਤਰਨ੍ਤੋ – ‘‘ਮਯ੍ਹਂ ਮਾਤਾਪਿਤੂਨਮ੍ਪਿ ਇਮਸ੍ਮਿਂ ਸਰਭਞ੍ਞੇ ਪਤ੍ਤੀ’’ਤਿ ਵਦਤਿ. ਤਸ੍ਸ ਮਨੁਸ੍ਸਾ ਮਾਤਾਪਿਤਰੋ ਪਤ੍ਤਿਯਾ ਦਿਨ੍ਨਭਾਵਂ ਨ ਜਾਨਨ੍ਤਿ. ਅਨਨ੍ਤਰਤ੍ਤਭਾਵੇ ਪਨਸ੍ਸ ਮਾਤਾ ਯਕ੍ਖਿਨੀ ਜਾਤਾ. ਸਾ ਦੇਵਤਾਹਿ ਸਦ੍ਧਿਂ ਆਗਤਾ, ਧਮ੍ਮਂ ਸੁਤ੍ਵਾ – ‘‘ਸਾਮਣੇਰੇਨ ਦਿਨ੍ਨਪਤ੍ਤਿਂ ਅਨੁਮੋਦਾਮਿ, ਤਾਤਾ’’ਤਿ ਵਦਤਿ. ਸੀਲਸਮ੍ਪਨ੍ਨਾ ਚ ਨਾਮ ਭਿਕ੍ਖੂ ਸਦੇਵਕਸ੍ਸ ਲੋਕਸ੍ਸ ਪਿਯਾ ਹੋਨ੍ਤੀਤਿ ਤਸ੍ਮਿਂ ਸਾਮਣੇਰੇ ਦੇਵਤਾ ਸਲਜ੍ਜਾ ਸਗਾਰਵਾ ਮਹਾਬ੍ਰਹ੍ਮਂ ਵਿਯ ਅਗ੍ਗਿਕ੍ਖਨ੍ਧਂ ਵਿਯ ਚ ਨਂ ਮਞ੍ਞਨ੍ਤਿ. ਸਾਮਣੇਰੇ ਗਾਰਵੇਨ ਤਂ ਯਕ੍ਖਿਨਿਂ ਗਰੁਂ ਕਤ੍ਵਾ ਪਸ੍ਸਨ੍ਤਿ. ਧਮ੍ਮਸ੍ਸਵਨਯਕ੍ਖਸਮਾਗਮਾਦੀਸੁ ‘‘ਸਾਨੁਮਾਤਾ ਸਾਨੁਮਾਤਾ’’ਤਿ ਯਕ੍ਖਿਨਿਯਾ ਅਗ੍ਗਾਸਨਂ ਅਗ੍ਗੋਦਕਂ ਅਗ੍ਗਪਿਣ੍ਡਂ ਦੇਨ੍ਤਿ. ਮਹੇਸਕ੍ਖਾਪਿ ਯਕ੍ਖਾ ਤਂ ਦਿਸ੍ਵਾ ਮਗ੍ਗਾ ਓਕ੍ਕਮਨ੍ਤਿ, ਆਸਨਾ ਵੁਟ੍ਠਹਨ੍ਤਿ.

ਅਥ ਖੋ ਸਾਮਣੇਰੋ ਵੁਡ੍ਢਿਮਨ੍ਵਾਯ ਪਰਿਪਕ੍ਕਿਨ੍ਦ੍ਰਿਯੋ ਅਨਭਿਰਤਿਪੀਲ਼ਿਤੋ ਅਨਭਿਰਤਿਂ ਵਿਨੋਦੇਤੁਂ ਅਸਕ੍ਕੋਨ੍ਤੋ ਪਰੂਲ਼੍ਹਕੇਸਨਖੋ ਕਿਲਿਟ੍ਠਨਿਵਾਸਨਪਾਰੁਪਨੋ ਕਸ੍ਸਚਿ ਅਨਾਰੋਚੇਤ੍ਵਾ ਪਤ੍ਤਚੀਵਰਮਾਦਾਯ ਏਕਕੋਵ ਮਾਤੁ ਘਰਂ ਗਤੋ. ਉਪਾਸਿਕਾ ਪੁਤ੍ਤਂ ਦਿਸ੍ਵਾ, ਵਨ੍ਦਿਤ੍ਵਾ ਆਹ – ‘‘ਤਾਤ, ਤ੍ਵਂ ਪੁਬ੍ਬੇ ਆਚਰਿਯੁਪਜ੍ਝਾਯੇਹਿ ਵਾ ਦਹਰਸਾਮਣੇਰੇਹਿ ਵਾ ਸਦ੍ਧਿਂ ਇਧਾਗਚ੍ਛਸਿ. ਕਸ੍ਮਾ ਏਕਕੋਵ ਅਜ੍ਜ ਆਗਤੋ’’ਤਿ? ਸੋ ਉਕ੍ਕਣ੍ਠਿਤਭਾਵਂ ਆਰੋਚੇਸਿ. ਸਦ੍ਧਾ ਉਪਾਸਿਕਾ ਨਾਨਪ੍ਪਕਾਰੇਨ ਘਰਾਵਾਸੇ ਆਦੀਨਵਂ ਦਸ੍ਸੇਤ੍ਵਾ ਪੁਤ੍ਤਂ ਓਵਦਮਾਨਾਪਿ ਤਂ ਸਞ੍ਞਾਪੇਤੁਂ ਅਸਕ੍ਕੋਨ੍ਤੀ, ‘‘ਅਪ੍ਪੇਵ ਨਾਮ ਅਤ੍ਤਨੋ ਧਮ੍ਮਤਾਯਪਿ ਸਲ੍ਲਕ੍ਖੇਸ੍ਸਤੀ’’ਤਿ ਅਨੁਯੋਜੇਤ੍ਵਾਵ – ‘‘ਤਿਟ੍ਠ, ਤਾਤ, ਯਾਵ ਤੇ ਯਾਗੁਭਤ੍ਤਂ ਸਮ੍ਪਾਦੇਮਿ, ਯਾਗੁਂ ਪਿਵਿਤ੍ਵਾ ਕਤਭਤ੍ਤਕਿਚ੍ਚਸ੍ਸ ਤੇ ਮਨਾਪਾਨਿ ਵਤ੍ਥਾਨਿ ਨੀਹਰਿਤ੍ਵਾ ਦਸ੍ਸਾਮੀ’’ਤਿ ਵਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਨਿਸੀਦਿ ਸਾਮਣੇਰੋ. ਉਪਾਸਿਕਾ ਮੁਹੁਤ੍ਤੇਨੇਵ ਯਾਗੁਖਜ੍ਜਕਂ ਸਮ੍ਪਾਦੇਤ੍ਵਾ ਅਦਾਸਿ. ਤਤੋ ‘‘ਭਤ੍ਤਂ ਸਮ੍ਪਾਦੇਸ੍ਸਾਮੀ’’ਤਿ ਅਵਿਦੂਰੇ ਨਿਸਿਨ੍ਨਾ ਤਣ੍ਡੁਲੇ ਧੋਵਤਿ. ਤਸ੍ਮਿਂ ਸਮਯੇ ਸਾ ਯਕ੍ਖਿਨੀ ‘‘ਕਹਂ ਨੁ ਖੋ ਸਾਮਣੇਰੋ? ਕਿਞ੍ਚਿ ਭਿਕ੍ਖਾਹਾਰਂ ਲਭਤਿ, ਉਦਾਹੁ ਨੋ’’ਤਿ? ਆਵਜ੍ਜਮਾਨਾ ਤਸ੍ਸ ਵਿਬ੍ਭਮਿਤੁਕਾਮਤਾਯ ਨਿਸਿਨ੍ਨਭਾਵਂ ਞਤ੍ਵਾ, ‘‘ਮਾ ਹੇਵ ਖੋ ਮੇ ਦੇਵਤਾਨਂ ਅਨ੍ਤਰੇ ਲਜ੍ਜਂ ਉਪ੍ਪਾਦੇਯ੍ਯ, ਗਚ੍ਛਾਮਿਸ੍ਸ ਵਿਬ੍ਭਮਨੇ ਅਨ੍ਤਰਾਯਂ ਕਰੋਮੀ’’ਤਿ ਆਗਨ੍ਤ੍ਵਾ ਸਰੀਰੇ ਅਧਿਮੁਚ੍ਚਿਤ੍ਵਾ ਗੀਵਂ ਪਰਿਵਤ੍ਤੇਤ੍ਵਾ ਭੂਮਿਯਂ ਪਾਤੇਸਿ. ਸੋ ਅਕ੍ਖੀਹਿ ਵਿਪਰਿਵਤ੍ਤੇਹਿ ਖੇਲ਼ੇਨ ਪਗ੍ਘਰਨ੍ਤੇਨ ਭੂਮਿਯਂ ਵਿਪ੍ਫਨ੍ਦਤਿ. ਤੇਨ ਵੁਤ੍ਤਂ ‘‘ਯਕ੍ਖੇਨ ਗਹਿਤੋ ਹੋਤੀ’’ਤਿ.

ਅਭਾਸੀਤਿ ਉਪਾਸਿਕਾ ਪੁਤ੍ਤਸ੍ਸ ਤਂ ਵਿਪ੍ਪਕਾਰਂ ਦਿਸ੍ਵਾ ਵੇਗੇਨ ਗਨ੍ਤ੍ਵਾ ਪੁਤ੍ਤਂ ਆਲਿਙ੍ਗੇਤ੍ਵਾ ਊਰੂਸੁ ਨਿਪਜ੍ਜਾਪੇਸਿ. ਸਕਲਗਾਮਵਾਸਿਨੋ ਆਗਨ੍ਤ੍ਵਾ ਬਲਿਕਮ੍ਮਾਦੀਨਿ ਕਰੋਨ੍ਤਿ. ਉਪਾਸਿਕਾ ਪਰਿਦੇਵਮਾਨਾ ਇਮਾ ਗਾਥਾਯੋ ਅਭਾਸਿ.

ਪਾਟਿਹਾਰਿਯਪਕ੍ਖਞ੍ਚਾਤਿ ਮਨੁਸ੍ਸਾ ‘‘ਅਟ੍ਠਮੀਉਪੋਸਥਸ੍ਸ ਪਚ੍ਚੁਗ੍ਗਮਨਞ੍ਚ ਅਨੁਗ੍ਗਮਨਞ੍ਚ ਕਰਿਸ੍ਸਾਮਾ’’ਤਿ ਸਤ੍ਤਮਿਯਾਪਿ ਨਵਮਿਯਾਪਿ ਉਪੋਸਥਙ੍ਗਾਨਿ ਸਮਾਦਿਯਨ੍ਤਿ, ਚਾਤੁਦ੍ਦਸੀਪਨ੍ਨਰਸੀਨਂ ਪਚ੍ਚੁਗ੍ਗਮਨਾਨੁਗ੍ਗਮਨਂ ਕਰੋਨ੍ਤਾ ਤੇਰਸਿਯਾਪਿ ਪਾਟਿਪਦੇਪਿ ਸਮਾਦਿਯਨ੍ਤਿ, ‘‘ਵਸ੍ਸਾਵਾਸਸ੍ਸ ਅਨੁਗ੍ਗਮਨਂ ਕਰਿਸ੍ਸਾਮਾ’’ਤਿ ਦ੍ਵਿਨ੍ਨਂ ਪਵਾਰਣਾਨਂ ਅਨ੍ਤਰੇ ਅਡ੍ਢਮਾਸਂ ਨਿਬਦ੍ਧੁਪੋਸਥਿਕਾ ਭਵਨ੍ਤਿ. ਇਦਂ ਸਨ੍ਧਾਯ ਵੁਤ੍ਤਂ ‘‘ਪਾਟਿਹਾਰਿਯਪਕ੍ਖਞ੍ਚਾ’’ਤਿ. ਅਟ੍ਠਙ੍ਗਸੁਸਮਾਗਤਨ੍ਤਿ ਅਟ੍ਠਙ੍ਗੇਹਿ ਸੁਟ੍ਠੁ ਸਮਾਗਤਂ, ਸਮ੍ਪਯੁਤ੍ਤਨ੍ਤਿ ਅਤ੍ਥੋ. ਬ੍ਰਹ੍ਮਚਰਿਯਨ੍ਤਿ ਸੇਟ੍ਠਚਰਿਯਂ. ਨ ਤੇ ਹਿ ਯਕ੍ਖਾ ਕੀਲ਼ਨ੍ਤੀਤਿ ਨ ਤੇ ਗਹੇਤ੍ਵਾ ਯਕ੍ਖਾ ਕਿਲਮੇਨ੍ਤਿ.

ਪੁਨ ਚਾਤੁਦ੍ਦਸਿਨ੍ਤਿ ਇਮਾਯ ਗਾਥਾਯ ਸਾਮਣੇਰਸ੍ਸ ਕਾਯੇ ਅਧਿਮੁਤ੍ਤਾ ਯਕ੍ਖਿਨੀ ਆਹ. ਆਵਿ ਵਾ ਯਦਿ ਵਾ ਰਹੋਤਿ ਕਸ੍ਸਚਿ ਸਮ੍ਮੁਖੇ ਵਾ ਪਰਮ੍ਮੁਖੇ ਵਾ. ਪਮੁਤ੍ਯਤ੍ਥੀਤਿ ਪਮੁਤ੍ਤਿ ਅਤ੍ਥਿ. ਉਪ੍ਪਚ੍ਚਾਪੀਤਿ ਉਪ੍ਪਤਿਤ੍ਵਾਪਿ. ਸਚੇਪਿ ਸਕੁਣੋ ਵਿਯ ਉਪ੍ਪਤਿਤ੍ਵਾ ਪਲਾਯਸਿ, ਤਥਾਪਿ ਤੇ ਮੋਕ੍ਖੋ ਨਤ੍ਥੀਤਿ ਵਦਤਿ. ਏਵਞ੍ਚ ਪਨ ਵਤ੍ਵਾ ਸਾਮਣੇਰਂ ਮੁਞ੍ਚਿ. ਸਾਮਣੇਰੋ ਅਕ੍ਖੀਨਿ ਉਮ੍ਮੀਲੇਸਿ, ਮਾਤਾ ਕੇਸੇ ਪਕਿਰਿਯ ਅਸ੍ਸਸਨ੍ਤੀ ਪਸ੍ਸਸਨ੍ਤੀ ਰੋਦਤਿ. ਸੋ ‘‘ਅਮਨੁਸ੍ਸੇਨ ਗਹਿਤੋਮ੍ਹੀ’’ਤਿ ਨ ਜਾਨਾਤਿ. ਓਲੋਕੇਨ੍ਤੋ ਪਨ ‘‘ਅਹਂ ਪੁਬ੍ਬੇ ਪੀਠੇ ਨਿਸਿਨ੍ਨੋ. ਮਾਤਾ ਮੇ ਅਵਿਦੂਰੇ ਨਿਸੀਦਿਤ੍ਵਾ ਤਣ੍ਡੁਲੇ ਧੋਵਤਿ. ਇਦਾਨਿ ਪਨਮ੍ਹਿ ਭੂਮਿਯਂ ਨਿਸਿਨ੍ਨੋ, ਮਾਤਾਪਿ ਮੇ ਅਸ੍ਸਸਨ੍ਤੀ ਪਸ੍ਸਸਨ੍ਤੀ ਰੋਦਤਿ, ਸਕਲਗਾਮਵਾਸਿਨੋਪਿ ਸਨ੍ਨਿਪਤਿਤਾ. ਕਿਂ ਨੁ ਖੋ ਏਤ’’ਨ੍ਤਿ? ਨਿਪਨ੍ਨਕੋਵ ਮਤਂ ਵਾ ਅਮ੍ਮਾਤਿ ਗਾਥਮਾਹ.

ਕਾਮੇ ਚਜਿਤ੍ਵਾਨਾਤਿ ਦੁਵਿਧੇਪਿ ਕਾਮੇ ਪਹਾਯ. ਪੁਨਰਾਗਚ੍ਛਤੇਤਿ ਵਿਬ੍ਭਮਨਵਸੇਨ ਆਗਚ੍ਛਤਿ. ਪੁਨ ਜੀਵਂ ਮਤੋ ਹਿ ਸੋਤਿ ਉਪ੍ਪਬ੍ਬਜਿਤ੍ਵਾ ਪੁਨ ਜੀਵਨ੍ਤੋਪਿ ਸੋ ਮਤਕੋਵ, ਤਸ੍ਮਾ ਤਮ੍ਪਿ ਰੋਦਨ੍ਤੀਤਿ ਵਦਤਿ.

ਇਦਾਨਿਸ੍ਸ ਘਰਾਵਾਸੇ ਆਦੀਨਵਂ ਦਸ੍ਸੇਨ੍ਤੀ ਕੁਕ੍ਕੁਲ਼ਾਤਿਆਦਿਮਾਹ. ਤਤ੍ਥ ਕੁਕ੍ਕੁਲ਼ਾਤਿ ਘਰਾਵਾਸੋ ਕਿਰ ਉਣ੍ਹਟ੍ਠੇਨ ਕੁਕ੍ਕੁਲ਼ਾ ਨਾਮ ਹੋਤਿ. ਕਸ੍ਸ ਉਜ੍ਝਾਪਯਾਮਸੇਤਿ – ‘‘ਅਭਿਧਾਵਥ, ਭਦ੍ਦਂ ਤੇ ਹੋਤੂ’’ਤਿ ਏਵਂ ਵਤ੍ਵਾ – ‘‘ਯਂ ਤ੍ਵਂ ਵਿਬ੍ਭਮਿਤੁਕਾਮੋ ਯਕ੍ਖੇਨ ਪਾਪਿਤੋ, ਇਮਂ ਵਿਪ੍ਪਕਾਰਂ ਕਸ੍ਸ ਮਯਂ ਉਜ੍ਝਾਪਯਾਮ ਨਿਜ੍ਝਾਪਯਾਮ ਆਰੋਚਯਾਮਾ’’ਤਿ ਵਦਤਿ. ਪੁਨ ਡਯ੍ਹਿਤੁਮਿਚ੍ਛਸੀਤਿਆਦਿਤ੍ਤਘਰਤੋ ਨੀਹਟਭਣ੍ਡਂ ਵਿਯ ਘਰਾ ਨੀਹਰਿਤ੍ਵਾ ਬੁਦ੍ਧਸਾਸਨੇ ਪਬ੍ਬਜਿਤੋ ਪੁਨ ਮਹਾਡਾਹਸਦਿਸੇ ਘਰਾਵਾਸੇ ਡਯ੍ਹਿਤੁਂ ਇਚ੍ਛਸੀਤਿ ਅਤ੍ਥੋ. ਸੋ ਮਾਤਰਿ ਕਥੇਨ੍ਤਿਯਾ ਕਥੇਨ੍ਤਿਯਾ ਸਲ੍ਲਕ੍ਖੇਤ੍ਵਾ ਹਿਰੋਤ੍ਤਪ੍ਪਂ ਪਟਿਲਭਿਤ੍ਵਾ, ‘‘ਨਤ੍ਥਿ ਮਯ੍ਹਂ ਗਿਹਿਭਾਵੇਨ ਅਤ੍ਥੋ’’ਤਿ ਆਹ. ਅਥਸ੍ਸ ਮਾਤਾ ‘‘ਸਾਧੁ, ਤਾਤਾ’’ਤਿ ਤੁਟ੍ਠਾ ਪਣੀਤਭੋਜਨਂ ਭੋਜੇਤ੍ਵਾ, ‘‘ਕਤਿ ਵਸ੍ਸੋਸਿ, ਤਾਤਾ’’ਤਿ ਪੁਚ੍ਛਿ. ਪਰਿਪੁਣ੍ਣਵਸ੍ਸੋਮ੍ਹਿ ਉਪਾਸਿਕੇਤਿ. ‘‘ਤੇਨ ਹਿ, ਤਾਤ, ਉਪਸਮ੍ਪਦਂ ਕਰੋਹੀ’’ਤਿ ਚੀਵਰਸਾਟਕੇ ਅਦਾਸਿ. ਸੋ ਤਿਚੀਵਰਂ ਕਾਰਾਪੇਤ੍ਵਾ ਉਪਸਮ੍ਪਨ੍ਨੋ ਬੁਦ੍ਧਵਚਨਂ ਉਗ੍ਗਣ੍ਹਨ੍ਤੋ ਤੇਪਿਟਕੋ ਹੁਤ੍ਵਾ ਸੀਲਾਦੀਨਂ ਆਗਤਟ੍ਠਾਨੇ ਤਂ ਤਂ ਪੂਰੇਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਵਾ ਮਹਾਧਮ੍ਮਕਥਿਕੋ ਹੁਤ੍ਵਾ ਵੀਸਵਸ੍ਸਸਤਂ ਠਤ੍ਵਾ ਸਕਲਜਮ੍ਬੁਦੀਪਂ ਖੋਭੇਤ੍ਵਾ ਪਰਿਨਿਬ੍ਬਾਯਿ. ਪਞ੍ਚਮਂ.

੬. ਪਿਯਙ੍ਕਰਸੁਤ੍ਤਵਣ੍ਣਨਾ

੨੪੦. ਛਟ੍ਠੇ ਜੇਤਵਨੇਤਿ ਜੇਤਵਨਸ੍ਸ ਪਚ੍ਚਨ੍ਤੇ ਕੋਸਮ੍ਬਕਕੁਟਿ ਨਾਮ ਅਤ੍ਥਿ, ਤਤ੍ਥ ਵਿਹਰਤਿ. ਧਮ੍ਮਪਦਾਨੀਤਿ ਇਧ ਪਾਟਿਯੇਕ੍ਕਂ ਸਙ੍ਗਹਂ ਆਰੁਲ਼੍ਹਾ ਛਬ੍ਬੀਸਤਿਵਗ੍ਗਾ ਤਨ੍ਤਿ ਅਧਿਪ੍ਪੇਤਾ. ਤਤ੍ਰ ਥੇਰੋ ਤਸ੍ਮਿਂ ਸਮਯੇ ਅਨ੍ਤੋਵਿਹਾਰੇ ਨਿਸਿਨ੍ਨੋ ਮਧੁਰਸ੍ਸਰੇਨ ਸਰਭਞ੍ਞਂ ਕਤ੍ਵਾ ਅਪ੍ਪਮਾਦਵਗ੍ਗਂ ਭਾਸਤਿ. ਏਵਂ ਤੋਸੇਸੀਤਿ ਸਾ ਕਿਰ ਪੁਤ੍ਤਂ ਪਿਯਙ੍ਕਰਂ ਅਙ੍ਕੇਨਾਦਾਯ ਜੇਤਵਨਸ੍ਸ ਪਚ੍ਛਿਮਭਾਗਤੋ ਪਟ੍ਠਾਯ ਗੋਚਰਂ ਪਰਿਯੇਸਨ੍ਤੀ ਅਨੁਪੁਬ੍ਬੇਨ ਨਗਰਾਭਿਮੁਖੀ ਹੁਤ੍ਵਾ ਉਚ੍ਚਾਰਪਸ੍ਸਾਵਖੇਲ਼ਸਿਙ੍ਘਾਣਿਕਦੁਬ੍ਭੋਜਨਾਨਿ ਪਰਿਯੇਸਮਾਨਾ ਥੇਰਸ੍ਸ ਵਸਨਟ੍ਠਾਨਂ ਪਤ੍ਵਾ ਮਧੁਰਸ੍ਸਰਂ ਅਸ੍ਸੋਸਿ. ਤਸ੍ਸਾ ਸੋ ਸਦ੍ਦੋ ਛਵਿਆਦੀਨਿ ਛੇਤ੍ਵਾ ਅਟ੍ਠਿਮਿਞ੍ਜਂ ਆਹਚ੍ਚ ਹਦਯਙ੍ਗਮਨੀਯੋ ਹੁਤ੍ਵਾ ਅਟ੍ਠਾਸਿ. ਅਥਸ੍ਸਾ ਗੋਚਰਪਰਿਯੇਸਨੇ ਚਿਤ੍ਤਮ੍ਪਿ ਨ ਉਪ੍ਪਜ੍ਜਿ, ਓਹਿਤਸੋਤਾ ਧਮ੍ਮਮੇਵ ਸੁਣਨ੍ਤੀ ਠਿਤਾ. ਯਕ੍ਖਦਾਰਕਸ੍ਸ ਪਨ ਦਹਰਤਾਯ ਧਮ੍ਮਸ੍ਸਵਨੇ ਚਿਤ੍ਤਂ ਨਤ੍ਥਿ. ਸੋ ਜਿਘਚ੍ਛਾਯ ਪੀਲ਼ਿਤਤ੍ਤਾ, ‘‘ਕਸ੍ਮਾ ਅਮ੍ਮਾ ਗਤਗਤਟ੍ਠਾਨੇ ਖਾਣੁਕੋ ਵਿਯ ਤਿਟ੍ਠਸਿ? ਨ ਮਯ੍ਹਂ ਖਾਦਨੀਯਂ ਵਾ ਭੋਜਨੀਯਂ ਵਾ ਪਰਿਯੇਸਸੀ’’ਤਿ ਪੁਨਪ੍ਪੁਨਂ ਮਾਤਰਂ ਚੋਦੇਤਿ. ਸਾ ‘‘ਧਮ੍ਮਸ੍ਸਵਨਸ੍ਸ ਮੇ ਅਨ੍ਤਰਾਯਂ ਕਰੋਤੀ’’ਤਿ ਪੁਤ੍ਤਕਂ ‘‘ਮਾ ਸਦ੍ਦਂ ਕਰਿ, ਪਿਯਙ੍ਕਰਾ’’ਤਿ ਏਵਂ ਤੋਸੇਸਿ. ਤਤ੍ਥ ਮਾ ਸਦ੍ਦਂ ਕਰੀਤਿ ਸਦ੍ਦਂ ਮਾ ਕਰਿ.

ਪਾਣੇਸੁ ਚਾਤਿ ਗਾਥਾਯ ਸਾ ਅਤ੍ਤਨੋ ਧਮ੍ਮਤਾਯ ਸਮਾਦਿਣ੍ਣਂ ਪਞ੍ਚਸੀਲਂ ਦਸ੍ਸੇਤਿ. ਤਤ੍ਥ ਸਂਯਮਾਮਸੇਤਿ ਸਂਯਮਾਮ ਸਂਯਤਾ ਹੋਮ. ਇਮਿਨਾ ਪਾਣਾਤਿਪਾਤਾ ਵਿਰਤਿ ਗਹਿਤਾ, ਦੁਤਿਯਪਦੇਨ ਮੁਸਾਵਾਦਾ ਵਿਰਤਿ, ਤਤਿਯਪਦੇਨ ਸੇਸਾ ਤਿਸ੍ਸੋ ਵਿਰਤਿਯੋ. ਅਪਿ ਮੁਚ੍ਚੇਮ ਪਿਸਾਚਯੋਨਿਯਾਤਿ ਅਪਿ ਨਾਮ ਯਕ੍ਖਲੋਕੇ ਉਪ੍ਪਨ੍ਨਾਨਿ ਪਞ੍ਚ ਵੇਰਾਨਿ ਪਹਾਯ, ਯੋਨਿਸੋ ਪਟਿਪਜ੍ਜਿਤ੍ਵਾ ਇਮਾਯ ਛਾਤਕਦੁਬ੍ਭਿਕ੍ਖਾਯ ਪਿਸਾਚਯਕ੍ਖਯੋਨਿਯਾ ਮੁਚ੍ਚੇਮ, ਤਾਤਾਤਿ ਵਦਤਿ. ਛਟ੍ਠਂ.

੭. ਪੁਨਬ੍ਬਸੁਸੁਤ੍ਤਵਣ੍ਣਨਾ

੨੪੧. ਸਤ੍ਤਮੇ ਤੇਨ ਖੋ ਪਨ ਸਮਯੇਨਾਤਿ ਕਤਰਸਮਯੇਨ? ਸੂਰਿਯਸ੍ਸ ਅਤ੍ਥਙ੍ਗਮਨਸਮਯੇਨ. ਤਦਾ ਕਿਰ ਭਗਵਾ ਪਚ੍ਛਾਭਤ੍ਤੇ ਮਹਾਜਨਸ੍ਸ ਧਮ੍ਮਂ ਦੇਸੇਤ੍ਵਾ ਮਹਾਜਨਂ ਉਯ੍ਯੋਜੇਤ੍ਵਾ ਨ੍ਹਾਨਕੋਟ੍ਠਕੇ ਨ੍ਹਤ੍ਵਾ ਗਨ੍ਧਕੁਟਿਪਰਿਵੇਣੇ ਪਞ੍ਞਤ੍ਤਵਰਬੁਦ੍ਧਾਸਨੇ ਪੁਰਤ੍ਥਿਮਲੋਕਧਾਤੁਂ ਓਲੋਕਯਮਾਨੋ ਨਿਸੀਦਿ. ਅਥੇਕਚਾਰਿਕਦ੍ਵਿਚਾਰਿਕਾਦਯੋ ਪਂਸੁਕੂਲਿਕਪਿਣ੍ਡਪਾਤਿਕਭਿਕ੍ਖੂ ਅਤ੍ਤਨੋ ਅਤ੍ਤਨੋ ਵਸਨਟ੍ਠਾਨੇਹਿ ਨਿਕ੍ਖਮਿਤ੍ਵਾ ਆਗਮ੍ਮ ਦਸਬਲਂ ਵਨ੍ਦਿਤ੍ਵਾ ਰਤ੍ਤਸਾਣਿਯਾ ਪਰਿਕ੍ਖਿਪਮਾਨਾ ਵਿਯ ਨਿਸੀਦਿਂਸੁ. ਅਥ ਨੇਸਂ ਅਜ੍ਝਾਸਯਂ ਵਿਦਿਤ੍ਵਾ ਸਤ੍ਥਾ ਨਿਬ੍ਬਾਨਪਟਿਸਂਯੁਤ੍ਤਂ ਧਮ੍ਮਕਥਂ ਕਥੇਸਿ.

ਏਵਂ ਤੋਸੇਸੀਤਿ ਸਾ ਕਿਰ ਧੀਤਰਂ ਅਙ੍ਕੇਨਾਦਾਯ ਪੁਤ੍ਤਂ ਅਙ੍ਗੁਲਿਯਾ ਗਹੇਤ੍ਵਾ ਜੇਤਵਨਪਿਟ੍ਠਿਯਂ ਪਾਕਾਰਪਰਿਕ੍ਖੇਪਸਮੀਪੇ ਉਚ੍ਚਾਰਪਸ੍ਸਾਵਖੇਲ਼ਸਿਙ੍ਘਾਣਿਕਂ ਪਰਿਯੇਸਮਾਨਾ ਅਨੁਪੁਬ੍ਬੇਨ ਜੇਤਵਨਦ੍ਵਾਰਕੋਟ੍ਠਕਂ ਸਮ੍ਪਤ੍ਤਾ. ਭਗਵਤੋ ਚ, ‘‘ਆਨਨ੍ਦ, ਪਤ੍ਤਂ ਆਹਰ, ਚੀਵਰਂ ਆਹਰ, ਵਿਘਾਸਾਦਾਨਂ ਦਾਨਂ ਦੇਹੀ’’ਤਿ ਕਥੇਨ੍ਤਸ੍ਸ ਸਦ੍ਦੋ ਸਮਨ੍ਤਾ ਦ੍ਵਾਦਸਹਤ੍ਥਮਤ੍ਤਮੇਵ ਗਣ੍ਹਾਤਿ. ਧਮ੍ਮਂ ਦੇਸੇਨ੍ਤਸ੍ਸ ਸਚੇਪਿ ਚਕ੍ਕਵਾਲ਼ਪਰਿਯਨ੍ਤਂ ਕਤ੍ਵਾ ਪਰਿਸਾ ਨਿਸੀਦਤਿ, ਯਥਾ ਪਰਿਸਂ ਗਚ੍ਛਤਿ, ਬਹਿਪਰਿਸਾਯ ਏਕਙ੍ਗੁਲਿਮਤ੍ਤਮ੍ਪਿ ਨ ਨਿਗ੍ਗਚ੍ਛਤਿ, ‘‘ਮਾ ਅਕਾਰਣਾ ਮਧੁਰਸਦ੍ਦੋ ਨਸ੍ਸੀ’’ਤਿ. ਤਤ੍ਰਾਯਂ ਯਕ੍ਖਿਨੀ ਬਹਿਪਰਿਸਾਯ ਠਿਤਾ ਸਦ੍ਦਂ ਨ ਸੁਣਾਤਿ, ਦ੍ਵਾਰਕੋਟ੍ਠਕੇ ਠਿਤਾਯ ਪਨਸ੍ਸਾ ਮਹਤਿਯਾ ਬੁਦ੍ਧਵੀਥਿਯਾ ਅਭਿਮੁਖੇ ਠਿਤਾ ਗਨ੍ਧਕੁਟਿ ਪਞ੍ਞਾਯਿ. ਸਾ ਨਿਵਾਤੇ ਦੀਪਸਿਖਾ ਵਿਯ ਬੁਦ੍ਧਗਾਰਵੇਨ ਹਤ੍ਥਕੁਕ੍ਕੁਚ੍ਚਾਦਿਰਹਿਤਂ ਨਿਚ੍ਚਲਂ ਪਰਿਸਂ ਦਿਸ੍ਵਾ – ‘‘ਨੂਨ ਮੇਤ੍ਥ ਕਿਞ੍ਚਿ ਭਾਜਨੀਯਭਣ੍ਡਂ ਭਵਿਸ੍ਸਤਿ, ਯਤੋ ਅਹਂ ਸਪ੍ਪਿਤੇਲਮਧੁਫਾਣਿਤਾਦੀਸੁ ਕਿਞ੍ਚਿਦੇਵ ਪਤ੍ਤਤੋ ਵਾ ਹਤ੍ਥਤੋ ਵਾ ਪਗ੍ਘਰਨ੍ਤਂ ਭੂਮਿਯਂ ਵਾ ਪਨ ਪਤਿਤਂ ਲਭਿਸ੍ਸਾਮੀ’’ਤਿ ਅਨ੍ਤੋਵਿਹਾਰਂ ਪਾਵਿਸਿ. ਦ੍ਵਾਰਕੋਟ੍ਠਕੇ ਅਵਰੁਦ੍ਧਕਾਨਂ ਨਿਵਾਰਣਤ੍ਥਾਯ ਠਿਤਾ ਆਰਕ੍ਖਦੇਵਤਾ ਯਕ੍ਖਿਨਿਯਾ ਉਪਨਿਸ੍ਸਯਂ ਦਿਸ੍ਵਾ ਨ ਨਿਵਾਰੇਸਿ. ਤਸ੍ਸਾ ਸਹ ਪਰਿਸਾਯ ਏਕੀਭਾਵਗਮਨੇਨ ਮਧੁਰਸ੍ਸਰੋ ਛਵਿਆਦੀਨਿ ਛਿਨ੍ਦਿਤ੍ਵਾ ਅਟ੍ਠਿਮਿਞ੍ਜਂ ਆਹਚ੍ਚ ਅਟ੍ਠਾਸਿ. ਤਂ ਧਮ੍ਮਸ੍ਸਵਨਤ੍ਥਾਯ ਨਿਚ੍ਚਲਂ ਠਿਤਂ ਪੁਰਿਮਨਯੇਨੇਵ ਪੁਤ੍ਤਕਾ ਚੋਦਯਿਂਸੁ. ਸਾ ‘‘ਧਮ੍ਮਸ੍ਸਵਨਸ੍ਸ ਮੇ ਅਨ੍ਤਰਾਯਂ ਕਰੋਨ੍ਤੀ’’ਤਿ ਪੁਤ੍ਤਕੇ ਤੁਣ੍ਹੀ ਉਤ੍ਤਰਿਕੇ ਹੋਹੀਤਿ ਏਵਂ ਤੋਸੇਸਿ.

ਤਤ੍ਥ ਯਾਵਾਤਿ ਯਾਵ ਧਮ੍ਮਂ ਸੁਣਾਮਿ, ਤਾਵ ਤੁਣ੍ਹੀ ਹੋਹੀਤਿ ਅਤ੍ਥੋ. ਸਬ੍ਬਗਨ੍ਥਪ੍ਪਮੋਚਨਨ੍ਤਿ ਨਿਬ੍ਬਾਨਂ ਆਗਮ੍ਮ ਸਬ੍ਬੇ ਗਨ੍ਥਾ ਪਮੁਚ੍ਚਨ੍ਤਿ, ਤਸ੍ਮਾ ਤਂ ਸਬ੍ਬਗਨ੍ਥਪ੍ਪਮੋਚਨਨ੍ਤਿ ਵੁਚ੍ਚਤਿ. ਅਤਿਵੇਲਾਤਿ ਵੇਲਾਤਿਕ੍ਕਨ੍ਤਾ ਪਮਾਣਾਤਿਕ੍ਕਨ੍ਤਾ. ਪਿਯਾਯਨਾਤਿ ਮਗ੍ਗਨਾ ਪਤ੍ਥਨਾ. ਤਤੋ ਪਿਯਤਰਨ੍ਤਿ ਯਾ ਅਯਂ ਅਸ੍ਸ ਧਮ੍ਮਸ੍ਸ ਮਗ੍ਗਨਾ ਪਤ੍ਥਨਾ, ਇਦਂ ਮਯ੍ਹਂ ਤਤੋ ਪਿਯਤਰਨ੍ਤਿ ਅਤ੍ਥੋ. ਪਿਯਤਰਾਤਿ ਵਾ ਪਾਠੋ. ਪਾਣਿਨਨ੍ਤਿ ਯਥਾ ਪਾਣੀਨਂ ਦੁਕ੍ਖਾ ਮੋਚੇਤਿ. ਕੇ ਮੋਚੇਤੀਤਿ? ਪਾਣਿਨੇਤਿ ਆਹਰਿਤ੍ਵਾ ਵਤ੍ਤਬ੍ਬਂ. ਯਂ ਧਮ੍ਮਂ ਅਭਿਸਮ੍ਬੁਦ੍ਧਨ੍ਤਿ, ਯਂ ਧਮ੍ਮਂ ਭਗਵਾ ਅਭਿਸਮ੍ਬੁਦ੍ਧੋ. ਤੁਣ੍ਹੀਭੂਤਾਯਮੁਤ੍ਤਰਾਤਿ ਨ ਕੇਵਲਂ ਅਹਮੇਵ, ਅਯਂ ਮੇ ਭਗਿਨੀ ਉਤ੍ਤਰਾਪਿ ਤੁਣ੍ਹੀਭੂਤਾਤਿ ਵਦਤਿ. ਸਦ੍ਧਮ੍ਮਸ੍ਸ ਅਨਞ੍ਞਾਯਾਤਿ, ਅਮ੍ਮ, ਮਯਂ ਪੁਬ੍ਬੇਪਿ ਇਮਂ ਸਦ੍ਧਮ੍ਮਮੇਵ ਅਜਾਨਿਤ੍ਵਾ ਇਦਾਨਿ ਇਦਂ ਖੁਪ੍ਪਿਪਾਸਾਦਿਦੁਕ੍ਖਂ ਅਨੁਭਵਨ੍ਤਾ ਦੁਕ੍ਖਂ ਚਰਾਮ ਵਿਹਰਾਮ.

ਚਕ੍ਖੁਮਾਤਿ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਾ. ਧਮ੍ਮਂ ਦੇਸੇਨ੍ਤੋਯੇਵ ਭਗਵਾ ਪਰਿਸਂ ਸਲ੍ਲਕ੍ਖਯਮਾਨੋ ਤਸ੍ਸਾ ਯਕ੍ਖਿਨਿਯਾ ਚੇਵ ਯਕ੍ਖਦਾਰਕਸ੍ਸ ਚ ਸੋਤਾਪਤ੍ਤਿਫਲਸ੍ਸ ਉਪਨਿਸ੍ਸਯਂ ਦਿਸ੍ਵਾ ਦੇਸਨਂ ਵਿਨਿਵਟ੍ਟੇਤ੍ਵਾ ਚਤੁਸਚ੍ਚਕਥਂ ਦੀਪੇਤਿ, ਤਂ ਸੁਤ੍ਵਾ ਤਸ੍ਮਿਂਯੇਵ ਦੇਸੇ ਠਿਤਾ ਯਕ੍ਖਿਨੀ ਸਦ੍ਧਿਂ ਪੁਤ੍ਤੇਨ ਸੋਤਾਪਤ੍ਤਿਫਲੇ ਪਤਿਟ੍ਠਿਤਾ. ਧੀਤੁਯਾਪਿ ਪਨਸ੍ਸਾ ਉਪਨਿਸ੍ਸਯੋ ਅਤ੍ਥਿ, ਅਤਿਦਹਰਤ੍ਤਾ ਪਨ ਦੇਸਨਂ ਸਮ੍ਪਟਿਚ੍ਛਿਤੁਂ ਨਾਸਕ੍ਖਿ.

ਇਦਾਨਿ ਸਾ ਯਕ੍ਖਿਨੀ ਪੁਤ੍ਤਸ੍ਸ ਅਨੁਮੋਦਨਂ ਕਰੋਨ੍ਤੀ ਸਾਧੁ ਖੋ ਪਣ੍ਡਿਤੋ ਨਾਮਾਤਿਆਦਿਮਾਹ. ਅਜ੍ਜਾਹਮ੍ਹਿ ਸਮੁਗ੍ਗਤਾਤਿ ਅਹਮ੍ਹਿ ਅਜ੍ਜ ਵਟ੍ਟਤੋ ਉਗ੍ਗਤਾ ਸਮੁਗ੍ਗਤਾ ਸਾਸਨੇ ਵਾ ਉਗ੍ਗਤਾ ਸਮੁਗ੍ਗਤਾ, ਤ੍ਵਮ੍ਪਿ ਸੁਖੀ ਹੋਹੀਤਿ. ਦਿਟ੍ਠਾਨੀਤਿ ਮਯਾ ਚ ਤਯਾ ਚ ਦਿਟ੍ਠਾਨਿ. ਉਤ੍ਤਰਾਪਿ ਸੁਣਾਤੁ ਮੇਤਿ, ‘‘ਅਮ੍ਹਾਕਂ ਚਤੁਸਚ੍ਚਪਟਿਵੇਧਭਾਵਂ, ਧੀਤਾ ਮੇ ਉਤ੍ਤਰਾਪਿ, ਸੁਣਾਤੂ’’ਤਿ ਵਦਤਿ. ਸਹ ਸਚ੍ਚਪਟਿਵੇਧੇਨੇਵ ਸਾਪਿ ਸੂਚਿਲੋਮੋ ਵਿਯ ਸਬ੍ਬਂ ਸੇਤਕਣ੍ਡੁਕਚ੍ਛੁਆਦਿਭਾਵਂ ਪਹਾਯ ਦਿਬ੍ਬਸਮ੍ਪਤ੍ਤਿਂ ਪਟਿਲਭਤਿ ਸਦ੍ਧਿਂ ਪੁਤ੍ਤੇਨ. ਧੀਤਾ ਪਨਸ੍ਸਾ ਯਥਾ ਨਾਮ ਲੋਕੇ ਮਾਤਾਪਿਤੂਹਿ ਇਸ੍ਸਰਿਯੇ ਲਦ੍ਧੇ ਪੁਤ੍ਤਾਨਮ੍ਪਿ ਤਂ ਹੋਤਿ, ਏਵਂ ਮਾਤੁ-ਆਨੁਭਾਵੇਨੇਵ ਸਮ੍ਪਤ੍ਤਿਂ ਲਭਿ. ਤਤੋ ਪਟ੍ਠਾਯ ਚ ਸਾ ਸਦ੍ਧਿਂ ਪੁਤ੍ਤਕੇਹਿ ਗਨ੍ਧਕੁਟਿਸਮੀਪਰੁਕ੍ਖੇਯੇਵ ਨਿਵਾਸਰੁਕ੍ਖਂ ਲਭਿਤ੍ਵਾ ਸਾਯਂ ਪਾਤਂ ਬੁਦ੍ਧਦਸ੍ਸਨਂ ਲਭਮਾਨਾ ਧਮ੍ਮਂ ਸੁਣਮਾਨਾ ਦੀਘਰਤ੍ਤਂ ਤਤ੍ਥੇਵ ਵਸਿ. ਸਤ੍ਤਮਂ.

੮. ਸੁਦਤ੍ਤਸੁਤ੍ਤਵਣ੍ਣਨਾ

੨੪੨. ਅਟ੍ਠਮੇ ਕੇਨਚਿਦੇਵ ਕਰਣੀਯੇਨਾਤਿ ਵਾਣਿਜ੍ਜਕਮ੍ਮਂ ਅਧਿਪ੍ਪੇਤਂ. ਅਨਾਥਪਿਣ੍ਡਿਕੋ ਚ ਰਾਜਗਹਸੇਟ੍ਠਿ ਚ ਅਞ੍ਞਮਞ੍ਞਂ ਭਗਿਨਿਪਤਿਕਾ ਹੋਨ੍ਤਿ. ਯਦਾ ਰਾਜਗਹੇ ਉਟ੍ਠਾਨਕਭਣ੍ਡਕਂ ਮਹਗ੍ਘਂ ਹੋਤਿ, ਤਦਾ ਰਾਜਗਹਸੇਟ੍ਠਿ ਤਂ ਗਹੇਤ੍ਵਾ ਪਞ੍ਚਸਕਟਸਤੇਹਿ ਸਾਵਤ੍ਥਿਂ ਗਨ੍ਤ੍ਵਾ ਯੋਜਨਮਤ੍ਤੇ ਠਿਤੋ ਅਤ੍ਤਨੋ ਆਗਤਭਾਵਂ ਜਾਨਾਪੇਤਿ. ਅਨਾਥਪਿਣ੍ਡਿਕੋ ਪਚ੍ਚੁਗ੍ਗਨ੍ਤ੍ਵਾ ਤਸ੍ਸ ਮਹਾਸਕ੍ਕਾਰਂ ਕਤ੍ਵਾ ਏਕਯਾਨਂ ਆਰੋਪੇਤ੍ਵਾ ਸਾਵਤ੍ਥਿਂ ਪਵਿਸਤਿ. ਸੋ ਸਚੇ ਭਣ੍ਡਂ ਲਹੁਕਂ ਵਿਕ੍ਕੀਯਤਿ, ਵਿਕ੍ਕਿਣਾਤਿ. ਨੋ ਚੇ, ਭਗਿਨਿਘਰੇ ਠਪੇਤ੍ਵਾ ਪਕ੍ਕਮਤਿ. ਅਨਾਥਪਿਣ੍ਡਿਕੋਪਿ ਤਥੇਵ ਕਰੋਤਿ. ਸ੍ਵਾਯਂ ਤਦਾਪਿ ਤੇਨੇਵ ਕਰਣੀਯੇਨ ਅਗਮਾਸਿ. ਤਂ ਸਨ੍ਧਾਯੇਤਂ ਵੁਤ੍ਤਂ.

ਤਂ ਦਿਵਸਂ ਪਨ ਰਾਜਗਹਸੇਟ੍ਠਿ ਯੋਜਨਮਤ੍ਤੇ ਠਿਤੇਨ ਅਨਾਥਪਿਣ੍ਡਿਕੇਨ ਆਗਤਭਾਵਜਾਨਨਤ੍ਥਂ ਪੇਸਿਤਂ ਪਣ੍ਣਂ ਨ ਸੁਣਿ, ਧਮ੍ਮਸ੍ਸਵਨਤ੍ਥਾਯ ਵਿਹਾਰਂ ਅਗਮਾਸਿ. ਸੋ ਧਮ੍ਮਕਥਂ ਸੁਤ੍ਵਾ ਸ੍ਵਾਤਨਾਯ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਅਤ੍ਤਨੋ ਘਰੇ ਉਦ੍ਧਨਖਣਾਪਨਦਾਰੁਫਾਲਨਾਦੀਨਿ ਕਾਰੇਸਿ. ਅਨਾਥਪਿਣ੍ਡਿਕੋਪਿ ‘‘ਇਦਾਨਿ ਮਯ੍ਹਂ ਪਚ੍ਚੁਗ੍ਗਮਨਂ ਕਰਿਸ੍ਸਤਿ, ਇਦਾਨਿ ਕਰਿਸ੍ਸਤੀ’’ਤਿ ਘਰਦ੍ਵਾਰੇਪਿ ਪਚ੍ਚੁਗ੍ਗਮਨਂ ਅਲਭਿਤ੍ਵਾ ਅਨ੍ਤੋਘਰਂ ਪਵਿਟ੍ਠੋ ਪਟਿਸਨ੍ਥਾਰਮ੍ਪਿ ਨ ਬਹੁਂ ਅਲਤ੍ਥ. ‘‘ਕਿਂ, ਮਹਾਸੇਟ੍ਠਿ, ਕੁਸਲਂ ਦਾਰਕਰੂਪਾਨਂ? ਨਸਿ ਮਗ੍ਗੇ ਕਿਲਨ੍ਤੋ’’ਤਿ? ਏਤ੍ਤਕੋਵ ਪਟਿਸਨ੍ਥਾਰੋ ਅਹੋਸਿ. ਸੋ ਤਸ੍ਸ ਮਹਾਬ੍ਯਾਪਾਰਂ ਦਿਸ੍ਵਾ, ‘‘ਕਿਂ ਨੁ ਤੇ, ਗਹਪਤਿ, ਆਵਾਹੋ ਵਾ ਭਵਿਸ੍ਸਤੀ’’ਤਿ? ਖਨ੍ਧਕੇ (ਚੂਲ਼ਵ. ੩੦੪) ਆਗਤਨਯੇਨੇਵ ਕਥਂ ਪਵਤ੍ਤੇਤ੍ਵਾ ਤਸ੍ਸ ਮੁਖਤੋ ਬੁਦ੍ਧਸਦ੍ਦਂ ਸੁਤ੍ਵਾ ਪਞ੍ਚਵਣ੍ਣਂ ਪੀਤਿਂ ਪਟਿਲਭਿ. ਸਾ ਤਸ੍ਸ ਸੀਸੇਨ ਉਟ੍ਠਾਯ ਯਾਵ ਪਾਦਪਿਟ੍ਠਿਯਾ, ਪਾਦਪਿਟ੍ਠਿਯਾ ਉਟ੍ਠਾਯ ਯਾਵ ਸੀਸਾ ਗਚ੍ਛਤਿ, ਉਭਤੋ ਉਟ੍ਠਾਯ ਮਜ੍ਝੇ ਓਸਰਤਿ, ਮਜ੍ਝੇ ਉਟ੍ਠਾਯ ਉਭਤੋ ਗਚ੍ਛਤਿ. ਸੋ ਪੀਤਿਯਾ ਨਿਰਨ੍ਤਰਂ ਫੁਟ੍ਠੋ, ‘‘ਬੁਦ੍ਧੋਤਿ ਤ੍ਵਂ, ਗਹਪਤਿ, ਵਦੇਸਿ? ਬੁਦ੍ਧੋ ਤਾਹਂ, ਗਹਪਤਿ, ਵਦਾਮੀ’’ਤਿ ਏਵਂ ਤਿਕ੍ਖਤ੍ਤੁਂ ਪੁਚ੍ਛਿਤ੍ਵਾ, ‘‘ਘੋਸੋਪਿ ਖੋ ਏਸੋ ਦੁਲ੍ਲਭੋ ਲੋਕਸ੍ਮਿਂ ਯਦਿਦਂ ਬੁਦ੍ਧੋ’’ਤਿ ਆਹ. ਇਦਂ ਸਨ੍ਧਾਯ ਵੁਤ੍ਤਂ ‘‘ਅਸ੍ਸੋਸਿ ਖੋ ਅਨਾਥਪਿਣ੍ਡਿਕੋ, ਗਹਪਤਿ, ਬੁਦ੍ਧੋ ਕਿਰ ਲੋਕੇ ਉਪ੍ਪਨ੍ਨੋ’’ਤਿ.

ਏਤਦਹੋਸਿ ਅਕਾਲੋ ਖੋ ਅਜ੍ਜਾਤਿ ਸੋ ਕਿਰ ਤਂ ਸੇਟ੍ਠਿਂ ਪੁਚ੍ਛਿ, ‘‘ਕੁਹਿਂ ਗਹਪਤਿ ਸਤ੍ਥਾ ਵਿਹਰਤੀ’’ਤਿ? ਅਥਸ੍ਸ ਸੋ – ‘‘ਬੁਦ੍ਧਾ ਨਾਮ ਦੁਰਾਸਦਾ ਆਸੀਵਿਸਸਦਿਸਾ ਹੋਨ੍ਤਿ, ਸਤ੍ਥਾ ਸਿਵਥਿਕਾਯ ਵਸਤਿ, ਨ ਸਕ੍ਕਾ ਤਤ੍ਥ ਤੁਮ੍ਹਾਦਿਸੇਹਿ ਇਮਾਯ ਵੇਲਾਯ ਗਨ੍ਤੁ’’ਨ੍ਤਿ ਆਚਿਕ੍ਖਿ. ਅਥਸ੍ਸ ਏਤਦਹੋਸਿ. ਬੁਦ੍ਧਗਤਾਯ ਸਤਿਯਾ ਨਿਪਜ੍ਜੀਤਿ ਤਂਦਿਵਸਂ ਕਿਰਸ੍ਸ ਭਣ੍ਡਸਕਟੇਸੁ ਵਾ ਉਪਟ੍ਠਾਕੇਸੁ ਵਾ ਚਿਤ੍ਤਮ੍ਪਿ ਨ ਉਪ੍ਪਜ੍ਜਿ, ਸਾਯਮਾਸਮ੍ਪਿ ਨ ਅਕਾਸਿ, ਸਤ੍ਤਭੂਮਿਕਂ ਪਨ ਪਾਸਾਦਂ ਆਰੁਯ੍ਹ ਸੁਪਞ੍ਞਤ੍ਤਾਲਙ੍ਕਤਵਰਸਯਨੇ ‘‘ਬੁਦ੍ਧੋ ਬੁਦ੍ਧੋ’’ਤਿ ਸਜ੍ਝਾਯਂ ਕਰੋਨ੍ਤੋਵ ਨਿਪਜ੍ਜਿਤ੍ਵਾ ਨਿਦ੍ਦਂ ਓਕ੍ਕਮਿ. ਤੇਨ ਵੁਤ੍ਤਂ ‘‘ਬੁਦ੍ਧਗਤਾਯ ਸਤਿਯਾ ਨਿਪਜ੍ਜੀ’’ਤਿ.

ਰਤ੍ਤਿਯਾ ਸੁਦਂ ਤਿਕ੍ਖਤ੍ਤੁਂ ਉਟ੍ਠਾਸਿ ਪਭਾਤਨ੍ਤਿ ਮਞ੍ਞਮਾਨੋਤਿ ਪਠਮਯਾਮੇ ਤਾਵ ਵੀਤਿਵਤ੍ਤੇ ਉਟ੍ਠਾਯ ਬੁਦ੍ਧਂ ਅਨੁਸ੍ਸਰਿ, ਅਥਸ੍ਸ ਬਲਵਪ੍ਪਸਾਦੋ ਉਦਪਾਦਿ, ਪੀਤਿਆਲੋਕੋ ਅਹੋਸਿ, ਸਬ੍ਬਤਮਂ ਵਿਗਚ੍ਛਿ, ਦੀਪਸਹਸ੍ਸੁਜ੍ਜਲਂ ਵਿਯ ਚਨ੍ਦੁਟ੍ਠਾਨਂ ਸੂਰਿਯੁਟ੍ਠਾਨਂ ਵਿਯ ਚ ਜਾਤਂ. ਸੋ ‘‘ਪਪਾਦਂ ਆਪਨ੍ਨੋ ਵਤਮ੍ਹਿ, ਸੂਰਿਯੋ ਉਗ੍ਗਤੋ’’ਤਿ ਉਟ੍ਠਾਯ ਆਕਾਸਤਲੇ ਠਿਤਂ ਚਨ੍ਦਂ ਉਲ੍ਲੋਕੇਤ੍ਵਾ ‘‘ਏਕੋਵ ਯਾਮੋ ਗਤੋ, ਅਞ੍ਞੇ ਦ੍ਵੇ ਅਤ੍ਥੀ’’ਤਿ ਪੁਨ ਪਵਿਸਿਤ੍ਵਾ ਨਿਪਜ੍ਜਿ. ਏਤੇਨੁਪਾਯੇਨ ਮਜ੍ਝਿਮਯਾਮਾਵਸਾਨੇਪਿ ਪਚ੍ਛਿਮਯਾਮਾਵਸਾਨੇਪੀਤਿ ਤਿਕ੍ਖਤ੍ਤੁਂ ਉਟ੍ਠਾਸਿ. ਪਚ੍ਛਿਮਯਾਮਾਵਸਾਨੇ ਪਨ ਬਲਵਪਚ੍ਚੂਸੇਯੇਵ ਉਟ੍ਠਾਯ ਆਕਾਸਤਲਂ ਆਗਨ੍ਤ੍ਵਾ ਮਹਾਦ੍ਵਾਰਾਭਿਮੁਖੋਵ ਅਹੋਸਿ, ਸਤ੍ਤਭੂਮਿਕਦ੍ਵਾਰਂ ਸਯਮੇਵ ਵਿਵਟਂ ਅਹੋਸਿ. ਸੋ ਪਾਸਾਦਾ ਓਰੁਯ੍ਹ ਅਨ੍ਤਰਵੀਥਿਂ ਪਟਿਪਜ੍ਜਿ.

ਵਿਵਰਿਂਸੂਤਿ ‘‘ਅਯਂ ਮਹਾਸੇਟ੍ਠਿ ‘ਬੁਦ੍ਧੁਪਟ੍ਠਾਨਂ ਗਮਿਸ੍ਸਾਮੀ’ਤਿ ਨਿਕ੍ਖਨ੍ਤੋ, ਪਠਮਦਸ੍ਸਨੇਨੇਵ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਤਿਣ੍ਣਂ ਰਤਨਾਨਂ ਅਗ੍ਗੁਪਟ੍ਠਾਕੋ ਹੁਤ੍ਵਾ ਅਸਦਿਸਂ ਸਙ੍ਘਾਰਾਮਂ ਕਤ੍ਵਾ ਚਾਤੁਦ੍ਦਿਸਸ੍ਸ ਅਰਿਯਗਣਸ੍ਸ ਅਨਾਵਟਦ੍ਵਾਰੋ ਭਵਿਸ੍ਸਤਿ, ਨ ਯੁਤ੍ਤਮਸ੍ਸ ਦ੍ਵਾਰਂ ਪਿਦਹਿਤੁ’’ਨ੍ਤਿ ਚਿਨ੍ਤੇਤ੍ਵਾ ਵਿਵਰਿਂਸੁ. ਅਨ੍ਤਰਧਾਯੀਤਿ ਰਾਜਗਹਂ ਕਿਰ ਆਕਿਣ੍ਣਮਨੁਸ੍ਸਂ ਅਨ੍ਤੋਨਗਰੇ ਨਵ ਕੋਟਿਯੋ, ਬਹਿਨਗਰੇ ਨਵਾਤਿ ਤਂ ਉਪਨਿਸ੍ਸਾਯ ਅਟ੍ਠਾਰਸ ਮਨੁਸ੍ਸਕੋਟਿਯੋ ਵਸਨ੍ਤਿ. ਅਵੇਲਾਯ ਮਤਮਨੁਸ੍ਸੇ ਬਹਿ ਨੀਹਰਿਤੁਂ ਅਸਕ੍ਕੋਨ੍ਤਾ ਅਟ੍ਟਾਲਕੇ ਠਤ੍ਵਾ ਬਹਿਦ੍ਵਾਰੇ ਖਿਪਨ੍ਤਿ. ਮਹਾਸੇਟ੍ਠਿ ਨਗਰਤੋ ਬਹਿਨਿਕ੍ਖਨ੍ਤਮਤ੍ਤੋਵ ਅਲ੍ਲਸਰੀਰਂ ਪਾਦੇਨ ਅਕ੍ਕਮਿ, ਅਪਰਮ੍ਪਿ ਪਿਟ੍ਠਿਪਾਦੇਨ ਪਹਰਿ. ਮਕ੍ਖਿਕਾ ਉਪ੍ਪਤਿਤ੍ਵਾ ਪਰਿਕਿਰਿਂਸੁ. ਦੁਗ੍ਗਨ੍ਧੋ ਨਾਸਪੁਟਂ ਅਭਿਹਨਿ. ਬੁਦ੍ਧਪ੍ਪਸਾਦੋ ਤਨੁਤ੍ਤਂ ਗਤੋ. ਤੇਨਸ੍ਸ ਆਲੋਕੋ ਅਨ੍ਤਰਧਾਯਿ, ਅਨ੍ਧਕਾਰੋ ਪਾਤੁਰਹੋਸਿ. ਸਦ੍ਦਮਨੁਸ੍ਸਾਵੇਸੀਤਿ ‘‘ਸੇਟ੍ਠਿਸ੍ਸ ਉਸ੍ਸਾਹਂ ਜਨੇਸ੍ਸਾਮੀ’’ਤਿ ਸੁਵਣ੍ਣਕਿਙ੍ਕਿਣਿਕਂ ਘਟ੍ਟੇਨ੍ਤੋ ਵਿਯ ਮਧੁਰਸ੍ਸਰੇਨ ਸਦ੍ਦਂ ਅਨੁਸ੍ਸਾਵੇਸਿ.

ਸਤਂ ਕਞ੍ਞਾਸਹਸ੍ਸਾਨੀਤਿ ਪੁਰਿਮਪਦਾਨਿਪਿ ਇਮਿਨਾਵ ਸਹਸ੍ਸਪਦੇਨ ਸਦ੍ਧਿਂ ਸਮ੍ਬਨ੍ਧਨੀਯਾਨਿ. ਯਥੇਵ ਹਿ ਸਤਂ ਕਞ੍ਞਾਸਹਸ੍ਸਾਨਿ, ਸਤਂ ਸਹਸ੍ਸਾਨਿ ਹਤ੍ਥੀ, ਸਤਂ ਸਹਸ੍ਸਾਨਿ ਅਸ੍ਸਾ, ਸਤਂ ਸਹਸ੍ਸਾਨਿ ਰਥਾਤਿ ਅਯਮੇਤ੍ਥ ਅਤ੍ਥੋ. ਇਤਿ ਏਕੇਕਸਤਸਹਸ੍ਸਮੇਵ ਦੀਪਿਤਂ. ਪਦਵੀਤਿਹਾਰਸ੍ਸਾਤਿ ਪਦਵੀਤਿਹਾਰੋ ਨਾਮ ਸਮਗਮਨੇ ਦ੍ਵਿਨ੍ਨਂ ਪਦਾਨਂ ਅਨ੍ਤਰੇ ਮੁਟ੍ਠਿਰਤਨਮਤ੍ਤਂ. ਕਲਂ ਨਾਗ੍ਘਨ੍ਤਿ ਸੋਲ਼ਸਿਨ੍ਤਿ ਤਂ ਏਕਂ ਪਦਵੀਤਿਹਾਰਂ ਸੋਲ਼ਸਭਾਗੇ ਕਤ੍ਵਾ ਤਤੋ ਏਕੋ ਕੋਟ੍ਠਾਸੋ ਪੁਨ ਸੋਲ਼ਸਧਾ, ਤਤੋ ਏਕੋ ਸੋਲ਼ਸਧਾਤਿ ਏਵਂ ਸੋਲ਼ਸ ਵਾਰੇ ਸੋਲ਼ਸਧਾ ਭਿਨ੍ਨਸ੍ਸ ਏਕੋ ਕੋਟ੍ਠਾਸੋ ਸੋਲ਼ਸਿਕਲਾ ਨਾਮ, ਤਂ ਸੋਲ਼ਸਿਕਲਂ ਏਤਾਨਿ ਚਤ੍ਤਾਰਿ ਸਤਸਹਸ੍ਸਾਨਿ ਨ ਅਗ੍ਘਨ੍ਤਿ. ਇਦਂ ਵੁਤ੍ਤਂ ਹੋਤਿ – ਸਤਂ ਹਤ੍ਥਿਸਹਸ੍ਸਾਨਿ ਸਤਂ ਅਸ੍ਸਸਹਸ੍ਸਾਨਿ ਸਤਂ ਰਥਸਹਸ੍ਸਾਨਿ ਸਤਂ ਕਞ੍ਞਾਸਹਸ੍ਸਾਨਿ, ਤਾ ਚ ਖੋ ਆਮੁਕ੍ਕਮਣਿਕੁਣ੍ਡਲਾ ਸਕਲਜਮ੍ਬੁਦੀਪਰਾਜਧੀਤਰੋ ਵਾਤਿ ਇਮਸ੍ਮਾ ਏਤ੍ਤਕਾ ਲਾਭਾ ਵਿਹਾਰਂ ਗਚ੍ਛਨ੍ਤਸ੍ਸ ਤਸ੍ਮਿਂ ਸੋਲ਼ਸਿਕਲਸਙ੍ਖਾਤੇ ਪਦੇਸੇ ਪਵਤ੍ਤਚੇਤਨਾਵ ਉਤ੍ਤਰਿਤਰਾਤਿ. ਇਦਂ ਪਨ ਵਿਹਾਰਗਮਨਂ ਕਸ੍ਸ ਵਸੇਨ ਗਹਿਤਨ੍ਤਿ? ਵਿਹਾਰਂ ਗਨ੍ਤ੍ਵਾ ਅਨਨ੍ਤਰਾਯੇਨ ਸੋਤਾਪਤ੍ਤਿਫਲੇ ਪਤਿਟ੍ਠਹਨ੍ਤਸ੍ਸ. ‘‘ਗਨ੍ਧਮਾਲਾਦੀਹਿ ਪੂਜਂ ਕਰਿਸ੍ਸਾਮਿ, ਚੇਤਿਯਂ ਵਨ੍ਦਿਸ੍ਸਾਮਿ, ਧਮ੍ਮਂ ਸੋਸ੍ਸਾਮਿ, ਦੀਪਪੂਜਂ ਕਰਿਸ੍ਸਾਮਿ, ਸਙ੍ਘਂ ਨਿਮਨ੍ਤੇਤ੍ਵਾ ਦਾਨਂ ਦਸ੍ਸਾਮਿ, ਸਿਕ੍ਖਾਪਦੇਸੁ ਵਾ ਸਰਣੇਸੁ ਵਾ ਪਤਿਟ੍ਠਹਿਸ੍ਸਾਮੀ’’ਤਿ ਗਚ੍ਛਤੋਪਿ ਵਸੇਨ ਵਟ੍ਟਤਿਯੇਵ.

ਅਨ੍ਧਕਾਰੋ ਅਨ੍ਤਰਧਾਯੀਤਿ ਸੋ ਕਿਰ ਚਿਨ੍ਤੇਸਿ – ‘‘ਅਹਂ ਏਕਕੋਤਿ ਸਞ੍ਞਂ ਕਰੋਮਿ, ਅਨੁਯੁਤ੍ਤਾਪਿ ਮੇ ਅਤ੍ਥਿ, ਕਸ੍ਮਾ ਭਾਯਾਮੀ’’ਤਿ ਸੂਰੋ ਅਹੋਸਿ. ਅਥਸ੍ਸ ਬਲਵਾ ਬੁਦ੍ਧਪ੍ਪਸਾਦੋ ਉਦਪਾਦਿ. ਤਸ੍ਮਾ ਅਨ੍ਧਕਾਰੋ ਅਨ੍ਤਰਧਾਯੀਤਿ. ਸੇਸਵਾਰੇਸੁਪਿ ਏਸੇਵ ਨਯੋ. ਅਪਿਚ ਪੁਰਤੋ ਪੁਰਤੋ ਗਚ੍ਛਨ੍ਤੋ ਭਿਂਸਨਕੇ ਸੁਸਾਨਮਗ੍ਗੇ ਅਟ੍ਠਿਕਸਙ੍ਖਲਿਕਸਮਂਸਲੋਹਿਤਨ੍ਤਿਆਦੀਨਿ ਅਨੇਕਵਿਧਾਨਿ ਕੁਣਪਾਨਿ ਅਦ੍ਦਸ. ਸੋਣਸਿਙ੍ਗਾਲਾਦੀਨਂ ਸਦ੍ਦਂ ਅਸ੍ਸੋਸਿ. ਤਂ ਸਬ੍ਬਂ ਪਰਿਸ੍ਸਯਂ ਪੁਨਪ੍ਪੁਨਂ ਬੁਦ੍ਧਗਤਂ ਪਸਾਦਂ ਵਡ੍ਢੇਤ੍ਵਾ ਮਦ੍ਦਨ੍ਤੋ ਅਗਮਾਸਿਯੇਵ.

ਏਹਿ ਸੁਦਤ੍ਤਾਤਿ ਸੋ ਕਿਰ ਸੇਟ੍ਠਿ ਗਚ੍ਛਮਾਨੋਵ ਚਿਨ੍ਤੇਸਿ – ‘‘ਇਮਸ੍ਮਿਂ ਲੋਕੇ ਬਹੂ ਪੂਰਣਕਸ੍ਸਪਾਦਯੋ ਤਿਤ੍ਥਿਯਾ ‘ਮਯਂ ਬੁਦ੍ਧਾ ਮਯਂ ਬੁਦ੍ਧਾ’ਤਿ ਵਦਨ੍ਤਿ, ਕਥਂ ਨੁ ਖੋ ਅਹਂ ਸਤ੍ਥੁ ਬੁਦ੍ਧਭਾਵਂ ਜਾਨੇਯ੍ਯ’’ਨ੍ਤਿ? ਅਥਸ੍ਸ ਏਤਦਹੋਸਿ – ‘‘ਮਯ੍ਹਂ ਗੁਣਵਸੇਨ ਉਪ੍ਪਨ੍ਨਂ ਨਾਮਂ ਮਹਾਜਨੋ ਜਾਨਾਤਿ, ਕੁਲਦਤ੍ਤਿਯਂ ਪਨ ਮੇ ਨਾਮਂ ਅਞ੍ਞਤ੍ਰ ਮਯਾ ਨ ਕੋਚਿ ਜਾਨਾਤਿ. ਸਚੇ ਬੁਦ੍ਧੋ ਭਵਿਸ੍ਸਤਿ, ਕੁਲਦਤ੍ਤਿਕਨਾਮੇਨ ਮਂ ਆਲਪਿਸ੍ਸਤੀ’’ਤਿ. ਸਤ੍ਥਾ ਤਸ੍ਸ ਚਿਤ੍ਤਂ ਞਤ੍ਵਾ ਏਵਮਾਹ.

ਪਰਿਨਿਬ੍ਬੁਤੋਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ. ਆਸਤ੍ਤਿਯੋਤਿ ਤਣ੍ਹਾਯੋ. ਸਨ੍ਤਿਨ੍ਤਿ ਕਿਲੇਸਵੂਪਸਮਂ. ਪਪ੍ਪੁਯ੍ਯਾਤਿ ਪਤ੍ਵਾ. ਇਦਞ੍ਚ ਪਨ ਵਤ੍ਵਾ ਸਤ੍ਥਾ ਤਸ੍ਸ ਅਨੁਪੁਬ੍ਬਿਕਥਂ ਕਥੇਤ੍ਵਾ ਮਤ੍ਥਕੇ ਚਤ੍ਤਾਰਿ ਸਚ੍ਚਾਨਿ ਪਕਾਸੇਸਿ. ਸੇਟ੍ਠਿ ਧਮ੍ਮਦੇਸਨਂ ਸੁਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਪੁਨਦਿਵਸਤੋ ਪਟ੍ਠਾਯ ਮਹਾਦਾਨਂ ਦਾਤੁਂ ਆਰਭਿ. ਬਿਮ੍ਬਿਸਾਰਾਦਯੋ ਸੇਟ੍ਠਿਸ੍ਸ ਸਾਸਨਂ ਪੇਸੇਨ੍ਤਿ – ‘‘ਤ੍ਵਂ ਆਗਨ੍ਤੁਕੋ, ਯਂ ਨਪ੍ਪਹੋਤਿ, ਤਂ ਇਤੋ ਆਹਰਾਪੇਹੀ’’ਤਿ. ਸੋ ‘‘ਅਲਂ ਤੁਮ੍ਹੇ ਬਹੁਕਿਚ੍ਚਾ’’ਤਿ ਸਬ੍ਬੇ ਪਟਿਕ੍ਖਿਪਿਤ੍ਵਾ ਪਞ੍ਚਹਿ ਸਕਟਸਤੇਹਿ ਆਨੀਤਵਿਭਵੇਨ ਸਤ੍ਤਾਹਂ ਮਹਾਦਾਨਂ ਅਦਾਸਿ. ਦਾਨਪਰਿਯੋਸਾਨੇ ਚ ਭਗਵਨ੍ਤਂ ਸਾਵਤ੍ਥਿਯਂ ਵਸ੍ਸਾਵਾਸਂ ਪਟਿਜਾਨਾਪੇਤ੍ਵਾ ਰਾਜਗਹਸ੍ਸ ਚ ਸਾਵਤ੍ਥਿਯਾ ਚ ਅਨ੍ਤਰੇ ਯੋਜਨੇ ਯੋਜਨੇ ਸਤਸਹਸ੍ਸਂ ਦਤ੍ਵਾ ਪਞ੍ਚਚਤ੍ਤਾਲੀਸ ਵਿਹਾਰੇ ਕਾਰੇਨ੍ਤੋ ਸਾਵਤ੍ਥਿਂ ਗਨ੍ਤ੍ਵਾ ਜੇਤਵਨਮਹਾਵਿਹਾਰਂ ਕਾਰੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਨਿਯ੍ਯਾਦੇਸੀਤਿ. ਅਟ੍ਠਮਂ.

੯. ਪਠਮਸੁਕ੍ਕਾਸੁਤ੍ਤਵਣ੍ਣਨਾ

੨੪੩. ਨਵਮੇ ਰਥਿਕਾਯ ਰਥਿਕਨ੍ਤਿ ਏਕਂ ਰਥਿਕਂ ਗਹੇਤ੍ਵਾ ਤਤੋ ਅਪਰਂ ਗਚ੍ਛਨ੍ਤੋ ਰਥਿਕਾਯ ਰਥਿਕਂ ਉਪਸਙ੍ਕਮਨ੍ਤੋ ਨਾਮ ਹੋਤਿ. ਸਿਙ੍ਘਾਟਕੇਪਿ ਏਸੇਵ ਨਯੋ. ਏਤ੍ਥ ਚ ਰਥਿਕਾਤਿ ਰਚ੍ਛਾ. ਸਿਙ੍ਘਾਟਕਨ੍ਤਿ ਚਤੁਕ੍ਕਂ. ਕਿਂ ਮੇ ਕਤਾਤਿ ਕਿਂ ਇਮੇ ਕਤਾ? ਕਿਂ ਕਰੋਨ੍ਤੀਤਿ ਅਤ੍ਥੋ. ਮਧੁਪੀਤਾਵ ਸੇਯਰੇਤਿ ਗਨ੍ਧਮਧੁਪਾਨਂ ਪੀਤਾ ਵਿਯ ਸਯਨ੍ਤਿ. ਗਨ੍ਧਮਧੁਪਾਨਂ ਪੀਤੋ ਕਿਰ ਸੀਸਂ ਉਕ੍ਖਿਪਿਤੁਂ ਨ ਸਕ੍ਕੋਤਿ, ਅਸਞ੍ਞੀ ਹੁਤ੍ਵਾ ਸਯਤੇਵ. ਤਸ੍ਮਾ ਏਵਮਾਹ.

ਤਞ੍ਚ ਪਨ ਅਪ੍ਪਟਿਵਾਨੀਯਨ੍ਤਿ ਤਞ੍ਚ ਪਨ ਧਮ੍ਮਂ ਅਪ੍ਪਟਿਵਾਨੀਯਂ ਦੇਸੇਤਿ. ਬਾਹਿਰਕਞ੍ਹਿ ਸੁਮਧੁਰਮ੍ਪਿ ਭੋਜਨਂ ਪੁਨਪ੍ਪੁਨਂ ਭੁਞ੍ਜਨ੍ਤਸ੍ਸ ਨ ਰੁਚ੍ਚਤਿ, ‘‘ਅਪਨੇਥ, ਕਿਂ ਇਮਿਨਾ’’ਤਿ? ਪਟਿਵਾਨੇਤਬ੍ਬਂ ਅਪਨੇਤਬ੍ਬਂ ਹੋਤਿ, ਨ ਏਵਮਯਂ ਧਮ੍ਮੋ. ਇਮਂ ਹਿ ਧਮ੍ਮਂ ਪਣ੍ਡਿਤਾ ਵਸ੍ਸਸਤਮ੍ਪਿ ਵਸ੍ਸਸਹਸ੍ਸਮ੍ਪਿ ਸੁਣਨ੍ਤਾ ਤਿਤ੍ਤਿਂ ਨ ਗਚ੍ਛਨ੍ਤਿ. ਤੇਨਾਹ ‘‘ਅਪ੍ਪਟਿਵਾਨੀਯ’’ਨ੍ਤਿ. ਅਸੇਚਨਕਮੋਜਵਨ੍ਤਿ ਅਨਾਸਿਤ੍ਤਕਂ ਓਜਵਨ੍ਤਂ. ਯਥਾ ਹਿ ਬਾਹਿਰਾਨਿ ਅਸਮ੍ਭਿਨ੍ਨਪਾਯਾਸਾਦੀਨਿਪਿ ਸਪ੍ਪਿਮਧੁਸਕ੍ਖਰਾਹਿ ਆਸਿਤ੍ਤਾਨਿ ਯੋਜਿਤਾਨੇਵ ਮਧੁਰਾਨਿ ਓਜਵਨ੍ਤਾਨਿ ਹੋਨ੍ਤਿ, ਨ ਏਵਮਯਂ ਧਮ੍ਮੋ. ਅਯਂ ਹਿ ਅਤ੍ਤਨੋ ਧਮ੍ਮਤਾਯ ਮਧੁਰੋ ਚੇਵ ਓਜਵਾ ਚ, ਨ ਅਞ੍ਞੇਨ ਉਪਸਿਤ੍ਤੋ. ਤੇਨਾਹ ‘‘ਅਸੇਚਨਕਮੋਜਵ’’ਨ੍ਤਿ. ਪਿਵਨ੍ਤਿ ਮਞ੍ਞੇ ਸਪ੍ਪਞ੍ਞਾਤਿ ਪਣ੍ਡਿਤਪੁਰਿਸਾ ਪਿਵਨ੍ਤਿ ਵਿਯ. ਵਲਾਹਕਮੇਵ ਪਨ੍ਥਗੂਤਿ ਵਲਾਹਕਨ੍ਤਰਤੋ ਨਿਕ੍ਖਨ੍ਤਉਦਕਂ ਘਮ੍ਮਾਭਿਤਤ੍ਤਾ ਪਥਿਕਾ ਵਿਯ. ਨਵਮਂ.

੧੦-੧੧. ਦੁਤਿਯਸੁਕ੍ਕਾਸੁਤ੍ਤਾਦਿਵਣ੍ਣਨਾ

੨੪੪. ਦਸਮੇ ਪੁਞ੍ਞਂ ਵਤ ਪਸਵਿ ਬਹੁਨ੍ਤਿ ਬਹੁਂ ਵਤ ਪੁਞ੍ਞਂ ਪਸਵਤੀਤਿ. ਦਸਮਂ.

੨੪੫. ਏਕਾਦਸਮਂ ਉਤ੍ਤਾਨਮੇਵ. ਏਕਾਦਸਮਂ.

੧੨. ਆਲ਼ਵਕਸੁਤ੍ਤਵਣ੍ਣਨਾ

੨੪੬. ਦ੍ਵਾਦਸਮੇ ਆਲ਼ਵਿਯਨ੍ਤਿ ਆਲ਼ਵੀਤਿ ਤਂ ਰਟ੍ਠਮ੍ਪਿ ਨਗਰਮ੍ਪਿ. ਤਞ੍ਚ ਭਵਨਂ ਨਗਰਸ੍ਸ ਅਵਿਦੂਰੇ ਗਾਵੁਤਮਤ੍ਤੇ ਠਿਤਂ. ਭਗਵਾ ਤਤ੍ਥ ਵਿਹਰਨ੍ਤੋ ਤਂ ਨਗਰਂ ਉਪਨਿਸ੍ਸਾਯ ਆਲ਼ਵਿਯਂ ਵਿਹਰਤੀਤਿ ਵੁਤ੍ਤੋ. ਆਲ਼ਵਕਸ੍ਸ ਯਕ੍ਖਸ੍ਸ ਭਵਨੇਤਿ ਏਤ੍ਥ ਪਨ ਅਯਮਨੁਪੁਬ੍ਬਿਕਥਾ – ਆਲ਼ਵਕੋ ਕਿਰ ਰਾਜਾ ਵਿਵਿਧਨਾਟਕੂਪਭੋਗਂ ਛਡ੍ਡੇਤ੍ਵਾ ਚੋਰਪਟਿਬਾਹਨਤ੍ਥਂ ਪਟਿਰਾਜਨਿਸੇਧਨਤ੍ਥਂ ਬ੍ਯਾਯਾਮਕਰਣਤ੍ਥਞ੍ਚ ਸਤ੍ਤਮੇ ਸਤ੍ਤਮੇ ਦਿਵਸੇ ਮਿਗਵਂ ਗਚ੍ਛਨ੍ਤੋ ਏਕਦਿਵਸਂ ਬਲਕਾਯੇਨ ਸਦ੍ਧਿਂ ਕਤਿਕਂ ਅਕਾਸਿ – ‘‘ਯਸ੍ਸ ਪਸ੍ਸੇਨ ਮਿਗੋ ਪਲਾਯਤਿ, ਤਸ੍ਸੇਵ ਸੋ ਭਾਰੋ’’ਤਿ. ਅਥ ਤਸ੍ਸੇਵ ਪਸ੍ਸੇਨ ਮਿਗੋ ਪਲਾਯਿ, ਜਵਸਮ੍ਪਨ੍ਨੋ ਰਾਜਾ ਧਨੁਂ ਗਹੇਤ੍ਵਾ ਪਤ੍ਤਿਕੋਵ ਤਿਯੋਜਨਂ ਤਂ ਮਿਗਂ ਅਨੁਬਨ੍ਧਿ. ਏਣਿਮਿਗਾ ਚ ਤਿਯੋਜਨਵੇਗਾ ਏਵ ਹੋਨ੍ਤਿ. ਅਥ ਪਰਿਕ੍ਖੀਣਜਵਂ ਤਂ ਉਦਕਂ ਵਿਯ ਪਵਿਸਿਤ੍ਵਾ ਠਿਤਂ ਵਧਿਤ੍ਵਾ ਦ੍ਵਿਧਾ ਛੇਤ੍ਵਾ ਅਨਤ੍ਥਿਕੋਪਿ ਮਂਸੇਨ ‘‘ਨਾਸਕ੍ਖਿ ਮਿਗਂ ਗਹੇਤੁ’’ਨ੍ਤਿ ਅਪਵਾਦਮੋਚਨਤ੍ਥਂ ਕਾਜੇਨਾਦਾਯ ਆਗਚ੍ਛਨ੍ਤੋ ਨਗਰਸ੍ਸਾਵਿਦੂਰੇ ਬਹਲਪਤ੍ਤਪਲਾਸਂ ਮਹਾਨਿਗ੍ਰੋਧਂ ਦਿਸ੍ਵਾ ਪਰਿਸ੍ਸਮਵਿਨੋਦਨਤ੍ਥਂ ਤਸ੍ਸ ਮੂਲਮੁਪਗਤੋ. ਤਸ੍ਮਿਞ੍ਚ ਨਿਗ੍ਰੋਧੇ ਆਲ਼ਵਕੋ ਯਕ੍ਖੋ ਮਹਾਰਾਜਸਨ੍ਤਿਕਾ ਭਵਨਂ ਲਭਿਤ੍ਵਾ ਮਜ੍ਝਨ੍ਹਿਕਸਮਯੇ ਤਸ੍ਸ ਰੁਕ੍ਖਸ੍ਸ ਛਾਯਾਯ ਫੁਟ੍ਠੋਕਾਸਂ ਪਵਿਟ੍ਠੇ ਪਾਣਿਨੋ ਖਾਦਨ੍ਤੋ ਪਟਿਵਸਤਿ. ਸੋ ਤਂ ਦਿਸ੍ਵਾ ਖਾਦਿਤੁਂ ਉਪਗਤੋ. ਰਾਜਾ ਤੇਨ ਸਦ੍ਧਿਂ ਕਤਿਕਂ ਅਕਾਸਿ – ‘‘ਮੁਞ੍ਚ ਮਂ, ਅਹਂ ਤੇ ਦਿਵਸੇ ਦਿਵਸੇ ਮਨੁਸ੍ਸਞ੍ਚ ਥਾਲਿਪਾਕਞ੍ਚ ਪੇਸੇਸ੍ਸਾਮੀ’’ਤਿ. ਯਕ੍ਖੋ – ‘‘ਤ੍ਵਂ ਰਾਜੂਪਭੋਗੇਨ ਪਮਤ੍ਤੋ ਨ ਸਰਿਸ੍ਸਸਿ, ਅਹਂ ਪਨ ਭਵਨਂ ਅਨੁਪਗਤਞ੍ਚ ਅਨਨੁਞ੍ਞਾਤਞ੍ਚ ਖਾਦਿਤੁਂ ਨ ਲਭਾਮਿ, ਸ੍ਵਾਹਂ ਭਵਨ੍ਤਮ੍ਪਿ ਜੀਯੇਯ੍ਯ’’ਨ੍ਤਿ ਨ ਮੁਞ੍ਚਿ. ਰਾਜਾ ‘‘ਯਂ ਦਿਵਸਂ ਨ ਪੇਸੇਮਿ, ਤਂ ਦਿਵਸਂ ਮਂ ਗਹੇਤ੍ਵਾ ਖਾਦਾ’’ਤਿ ਅਤ੍ਤਾਨਂ ਅਨੁਜਾਨਿਤ੍ਵਾ ਤੇਨ ਮੁਤ੍ਤੋ ਨਗਰਾਭਿਮੁਖੋ ਅਗਮਾਸਿ.

ਬਲਕਾਯੋ ਮਗ੍ਗੇ ਖਨ੍ਧਾਵਾਰਂ ਬਨ੍ਧਿਤ੍ਵਾ ਠਿਤੋ ਰਾਜਾਨਂ ਦਿਸ੍ਵਾ, ‘‘ਕਿਂ, ਮਹਾਰਾਜ, ਅਯਸਮਤ੍ਤਭਯਾ ਏਵਂ ਕਿਲਨ੍ਤੋਸੀ’’ਤਿ? ਵਦਨ੍ਤੋ ਪਚ੍ਚੁਗ੍ਗਨ੍ਤ੍ਵਾ ਪਟਿਗ੍ਗਹੇਸਿ. ਰਾਜਾ ਤਂ ਪਵਤ੍ਤਿਂ ਅਨਾਰੋਚੇਤ੍ਵਾ ਨਗਰਂ ਗਨ੍ਤ੍ਵਾ ਕਤਪਾਤਰਾਸੋ ਨਗਰਗੁਤ੍ਤਿਕਂ ਆਮਨ੍ਤੇਤ੍ਵਾ ਏਤਮਤ੍ਥਂ ਆਰੋਚੇਸਿ. ਨਗਰਗੁਤ੍ਤਿਕੋ – ‘‘ਕਿਂ, ਦੇਵ, ਕਾਲਪਰਿਚ੍ਛੇਦੋ ਕਤੋ’’ਤਿ ਆਹ? ਨ ਕਤੋ ਭਣੇਤਿ. ਦੁਟ੍ਠੁ ਕਤਂ, ਦੇਵ, ਅਮਨੁਸ੍ਸਾ ਹਿ ਪਰਿਚ੍ਛਿਨ੍ਨਮਤ੍ਤਮੇਵ ਲਭਨ੍ਤਿ, ਅਪਰਿਚ੍ਛਿਨ੍ਨੇ ਪਨ ਜਨਪਦਸ੍ਸਾਬਾਧੋ ਭਵਿਸ੍ਸਤਿ, ਹੋਤੁ ਦੇਵ, ਕਿਞ੍ਚਾਪਿ ਏਵਮਕਾਸਿ, ਅਪ੍ਪੋਸ੍ਸੁਕ੍ਕੋ ਤ੍ਵਂ ਰਜ੍ਜਸੁਖਮਨੁਭੋਹਿ, ਅਹਮੇਤ੍ਥ ਕਾਤਬ੍ਬਂ ਕਰਿਸ੍ਸਾਮੀਤਿ. ਸੋ ਕਾਲਸ੍ਸੇਵ ਵੁਟ੍ਠਾਯ ਬਨ੍ਧਨਾਗਾਰਦ੍ਵਾਰੇ ਠਤ੍ਵਾ ਯੇ ਯੇ ਵਜ੍ਝਾ ਹੋਨ੍ਤਿ, ਤੇ ਤੇ ਸਨ੍ਧਾਯ ‘‘ਯੋ ਜੀਵਿਤਤ੍ਥਿਕੋ, ਸੋ ਨਿਕ੍ਖਮਤੂ’’ਤਿ ਭਣਤਿ. ਯੋ ਪਠਮਂ ਨਿਕ੍ਖਮਤਿ, ਤਂ ਗੇਹਂ ਨੇਤ੍ਵਾ ਨ੍ਹਾਪੇਤ੍ਵਾ ਭੋਜੇਤ੍ਵਾ ਚ ‘‘ਇਮਂ ਥਾਲਿਪਾਕਂ ਯਕ੍ਖਸ੍ਸ ਦੇਹੀ’’ਤਿ ਪੇਸੇਤਿ. ਤਂ ਰੁਕ੍ਖਮੂਲਂ ਪਵਿਟ੍ਠਮਤ੍ਤਂਯੇਵ ਯਕ੍ਖੋ ਭੇਰਵਂ ਅਤ੍ਤਭਾਵਂ ਨਿਮ੍ਮਿਨਿਤ੍ਵਾ ਮੂਲਕਨ੍ਦਂ ਵਿਯ ਖਾਦਿ. ਯਕ੍ਖਾਨੁਭਾਵੇਨ ਕਿਰ ਮਨੁਸ੍ਸਾਨਂ ਕੇਸਾਦੀਨਿ ਉਪਾਦਾਯ ਸਕਲਸਰੀਰਂ ਨਵਨੀਤਪਿਣ੍ਡਂ ਵਿਯ ਹੋਤਿ, ਯਕ੍ਖਸ੍ਸ ਭਤ੍ਤਂ ਗਾਹਾਪੇਤੁਂ ਗਤਪੁਰਿਸਾ ਤਂ ਦਿਸ੍ਵਾ ਭੀਤਾ ਯਥਾਮਿਤ੍ਤਂ ਆਰੋਚੇਸੁਂ. ਤਤੋ ਪਭੁਤਿ ‘‘ਰਾਜਾ ਚੋਰੇ ਗਹੇਤ੍ਵਾ ਯਕ੍ਖਸ੍ਸ ਦੇਤੀ’’ਤਿ ਮਨੁਸ੍ਸਾ ਚੋਰਕਮ੍ਮਤੋ ਪਟਿਵਿਰਤਾ. ਤਤੋ ਅਪਰੇਨ ਸਮਯੇਨ ਨਵਚੋਰਾਨਂ ਅਭਾਵੇਨ ਪੁਰਾਣਚੋਰਾਨਞ੍ਚ ਪਰਿਕ੍ਖਯੇਨ ਬਨ੍ਧਨਾਗਾਰਾਨਿ ਸੁਞ੍ਞਾਨਿ ਅਹੇਸੁਂ.

ਅਥ ਨਗਰਗੁਤ੍ਤਿਕੋ ਰਞ੍ਞੋ ਆਰੋਚੇਸਿ. ਰਾਜਾ ਅਤ੍ਤਨੋ ਧਨਂ ਨਗਰਰਚ੍ਛਾਸੁ ਛਡ੍ਡਾਪੇਸਿ ‘‘ਅਪ੍ਪੇਵ ਨਾਮ ਕੋਚਿ ਲੋਭੇਨ ਗਣ੍ਹੇਯ੍ਯਾ’’ਤਿ. ਤਂ ਪਾਦੇਨਪਿ ਕੋਚਿ ਨਚ੍ਛੁਪਿ. ਸੋ ਚੋਰੇ ਅਲਭਨ੍ਤੋ ਅਮਚ੍ਚਾਨਂ ਆਰੋਚੇਸਿ. ਅਮਚ੍ਚਾ ‘‘ਕੁਲਪਟਿਪਾਟਿਯਾ ਏਕਮੇਕਂ ਜਿਣ੍ਣਕਂ ਪੇਸੇਮ, ਸੋ ਪਕਤਿਯਾਪਿ ਮਚ੍ਚੁਪਥੇ ਵਤ੍ਤਤੀ’’ਤਿ ਆਹਂਸੁ. ਰਾਜਾ ‘‘ਅਮ੍ਹਾਕਂ ਪਿਤਰਂ ਅਮ੍ਹਾਕਂ ਪਿਤਾਮਹਂ ਪੇਸੇਤੀਤਿ ਮਨੁਸ੍ਸਾ ਖੋਭਂ ਕਰਿਸ੍ਸਨ੍ਤਿ, ਮਾ ਵੋ ਏਤਂ ਰੁਚ੍ਚੀ’’ਤਿ ਵਾਰੇਸਿ. ‘‘ਤੇਨ ਹਿ, ਦੇਵ, ਦਾਰਕਂ ਪੇਸੇਮ ਉਤ੍ਤਾਨਸੇਯ੍ਯਕਂ, ਤਥਾਵਿਧਸ੍ਸ ਹਿ ‘ਮਾਤਾ ਮੇ’ਤਿ ‘ਪਿਤਾ ਮੇ’ਤਿ ਸਿਨੇਹੋ ਨਤ੍ਥੀ’’ਤਿ ਆਹਂਸੁ. ਰਾਜਾ ਅਨੁਜਾਨਿ. ਤੇ ਤਥਾ ਅਕਂਸੁ. ਨਗਰੇ ਦਾਰਕਮਾਤਰੋ ਚ ਦਾਰਕੇ ਗਹੇਤ੍ਵਾ ਗਬ੍ਭਿਨਿਯੋ ਚ ਪਲਾਯਿਤ੍ਵਾ ਪਰਜਨਪਦੇ ਦਾਰਕੇ ਸਂਵਡ੍ਢੇਤ੍ਵਾ ਆਨੇਨ੍ਤਿ. ਏਵਂ ਦ੍ਵਾਦਸ ਵਸ੍ਸਾਨਿ ਗਤਾਨਿ.

ਤਤੋ ਏਕਦਿਵਸਂ ਸਕਲਨਗਰਂ ਵਿਚਿਨਿਤ੍ਵਾ ਏਕਮ੍ਪਿ ਦਾਰਕਂ ਅਲਭਿਤ੍ਵਾ ਅਮਚ੍ਚਾ ਰਞ੍ਞੋ ਆਰੋਚੇਸੁਂ – ‘‘ਨਤ੍ਥਿ, ਦੇਵ, ਨਗਰੇ ਦਾਰਕੋ ਠਪੇਤ੍ਵਾ ਅਨ੍ਤੇਪੁਰੇ ਤਵ ਪੁਤ੍ਤਂ ਆਲ਼ਵਕਕੁਮਾਰ’’ਨ੍ਤਿ. ਰਾਜਾ ‘‘ਯਥਾ ਮਮ ਪੁਤ੍ਤੋ ਪਿਯੋ, ਏਵਂ ਸਬ੍ਬਲੋਕਸ੍ਸ, ਅਤ੍ਤਨਾ ਪਨ ਪਿਯਤਰਂ ਨਤ੍ਥਿ, ਗਚ੍ਛਥ ਤਮ੍ਪਿ ਦਤ੍ਵਾ ਮਮ ਜੀਵਿਤਂ ਰਕ੍ਖਥਾ’’ਤਿ. ਤੇਨ ਚ ਸਮਯੇਨ ਆਲ਼ਵਕਸ੍ਸ ਮਾਤਾ ਪੁਤ੍ਤਂ ਨ੍ਹਾਪੇਤ੍ਵਾ ਮਣ੍ਡੇਤ੍ਵਾ ਦੁਕੂਲਚੁਮ੍ਬਟਕੇ ਕਤ੍ਵਾ ਅਙ੍ਕੇ ਸਯਾਪੇਤ੍ਵਾ ਨਿਸਿਨ੍ਨਾ ਹੋਤਿ. ਰਾਜਪੁਰਿਸਾ ਰਞ੍ਞੋ ਆਣਾਯ ਤਤ੍ਥ ਗਨ੍ਤ੍ਵਾ ਵਿਪ੍ਪਲਪਨ੍ਤਿਯਾ ਤਸ੍ਸਾ ਸੋਲ਼ਸਨ੍ਨਞ੍ਚ ਦੇਵਿਸਹਸ੍ਸਾਨਂ ਸਦ੍ਧਿਂ ਧਾਤਿਯਾ ਤਂ ਆਦਾਯ ਪਕ੍ਕਮਿਂਸੁ, ‘‘ਸ੍ਵੇ ਯਕ੍ਖਭਕ੍ਖੋ ਭਵਿਸ੍ਸਤੀ’’ਤਿ. ਤਂਦਿਵਸਞ੍ਚ ਭਗਵਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਜੇਤਵਨਵਿਹਾਰੇ ਗਨ੍ਧਕੁਟਿਯਂ ਮਹਾਕਰੁਣਾਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਬੁਦ੍ਧਚਕ੍ਖੁਨਾ ਲੋਕਂ ਓਲੋਕੇਨ੍ਤੋ ਅਦ੍ਦਸ ਆਲ਼ਵਕਸ੍ਸ ਕੁਮਾਰਸ੍ਸ ਅਨਾਗਾਮਿਫਲੁਪ੍ਪਤ੍ਤਿਯਾ ਉਪਨਿਸ੍ਸਯਂ ਯਕ੍ਖਸ੍ਸ ਚ ਸੋਤਾਪਤ੍ਤਿਫਲੁਪ੍ਪਤ੍ਤਿਯਾ, ਦੇਸਨਾਪਰਿਯੋਸਾਨੇ ਚ ਚਤੁਰਾਸੀਤਿਪਾਣਸਹਸ੍ਸਾਨਂ ਧਮ੍ਮਚਕ੍ਖੁਪਟਿਲਾਭਸ੍ਸਾਤਿ. ਸੋ ਵਿਭਾਤਾਯ ਰਤ੍ਤਿਯਾ ਪੁਰਿਮਭਤ੍ਤਕਿਚ੍ਚਂ ਕਤ੍ਵਾ ਸੁਨਿਟ੍ਠਿਤਪਚ੍ਛਾਭਤ੍ਤਕਿਚ੍ਚੋ ਕਾਲ਼ਪਕ੍ਖੂਪੋਸਥਦਿਵਸੇ ਵਤ੍ਤਮਾਨੇ ਓਗ੍ਗਤੇ ਸੂਰਿਯੇ ਏਕੋ ਅਦੁਤਿਯੋ ਪਤ੍ਤਚੀਵਰਮਾਦਾਯ ਪਾਦਮਗ੍ਗੇਨੇਵ ਸਾਵਤ੍ਥਿਤੋ ਤਿਂਸ ਯੋਜਨਾਨਿ ਗਨ੍ਤ੍ਵਾ ਤਸ੍ਸ ਯਕ੍ਖਸ੍ਸ ਭਵਨਂ ਪਾਵਿਸਿ. ਤੇਨ ਵੁਤ੍ਤਂ ‘‘ਆਲ਼ਵਕਸ੍ਸ ਯਕ੍ਖਸ੍ਸ ਭਵਨੇ’’ਤਿ.

ਕਿਂ ਪਨ ਭਗਵਾ ਯਸ੍ਮਿਂ ਨਿਗ੍ਰੋਧੇ ਆਲ਼ਵਕਸ੍ਸ ਭਵਨਂ, ਤਸ੍ਸ ਮੂਲੇ ਵਿਹਾਸਿ, ਉਦਾਹੁ ਭਵਨੇਯੇਵਾਤਿ? ਭਵਨੇਯੇਵ. ਯਥੇਵ ਹਿ ਯਕ੍ਖਾ ਅਤ੍ਤਨੋ ਭਵਨਂ ਪਸ੍ਸਨ੍ਤਿ, ਤਥਾ ਭਗਵਾਪਿ. ਸੋ ਤਤ੍ਥ ਗਨ੍ਤ੍ਵਾ ਭਵਨਦ੍ਵਾਰੇ ਅਟ੍ਠਾਸਿ. ਤਦਾ ਆਲ਼ਵਕੋ ਹਿਮਵਨ੍ਤੇ ਯਕ੍ਖਸਮਾਗਮਂ ਗਤੋ ਹੋਤਿ. ਤਤੋ ਆਲ਼ਵਕਸ੍ਸ ਦ੍ਵਾਰਪਾਲੋ ਗਦ੍ਰਭੋ ਨਾਮ ਯਕ੍ਖੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ, ‘‘ਕਿਂ, ਭਨ੍ਤੇ, ਭਗਵਾ ਵਿਕਾਲੇ ਆਗਤੋ’’ਤਿ ਆਹ. ਆਮ, ਗਦ੍ਰਭ, ਆਗਤੋਮ੍ਹਿ, ਸਚੇ ਤੇ ਅਗਰੁ, ਵਿਹਰੇਯ੍ਯਾਮੇਕਰਤ੍ਤਂ ਆਲ਼ਵਕਸ੍ਸ ਭਵਨੇਤਿ. ਨ ਮੇ, ਭਨ੍ਤੇ, ਗਰੁ, ਅਪਿਚ ਖੋ ਸੋ ਯਕ੍ਖੋ ਕਕ੍ਖਲ਼ੋ ਫਰੁਸੋ, ਮਾਤਾਪਿਤੂਨਮ੍ਪਿ ਅਭਿਵਾਦਨਾਦੀਨਿ ਨ ਕਰੋਤਿ, ਮਾ ਰੁਚ੍ਚਿ ਭਗਵਤੋ ਇਧ ਵਾਸੋਤਿ. ਜਾਨਾਮਿ, ਗਦ੍ਰਭ, ਤਸ੍ਸ ਸਭਾਵਂ, ਨ ਕੋਚਿ ਮਮਨ੍ਤਰਾਯੋ ਭਵਿਸ੍ਸਤਿ. ਸਚੇ ਤੇ ਅਗਰੁ, ਵਿਹਰੇਯ੍ਯਾਮੇਕਰਤ੍ਤਨ੍ਤਿ.

ਦੁਤਿਯਮ੍ਪਿ ਗਦ੍ਰਭੋ ਯਕ੍ਖੋ ਭਗਵਨ੍ਤਂ ਏਤਦਵੋਚ – ‘‘ਅਗ੍ਗਿਤਤ੍ਤਕਪਾਲਸਦਿਸੋ, ਭਨ੍ਤੇ, ਆਲ਼ਵਕੋ, ਮਾਤਾਪਿਤਰੋਤਿ ਵਾ ਸਮਣਬ੍ਰਾਹ੍ਮਣਾਤਿ ਵਾ ਧਮ੍ਮੋਤਿ ਵਾ ਨ ਜਾਨਾਤਿ, ਇਧਾਗਤਾਨਂ ਪਨ ਚਿਤ੍ਤਕ੍ਖੇਪਮ੍ਪਿ ਕਰੋਤਿ, ਹਦਯਮ੍ਪਿ ਫਾਲੇਤਿ, ਪਾਦੇਪਿ ਗਹੇਤ੍ਵਾ ਪਰਸਮੁਦ੍ਦਂ ਵਾ ਪਰਚਕ੍ਕਵਾਲ਼ਂ ਵਾ ਖਿਪਤੀ’’ਤਿ. ਦੁਤਿਯਮ੍ਪਿ ਭਗਵਾ ਆਹ – ‘‘ਜਾਨਾਮਿ, ਗਦ੍ਰਭ, ਸਚੇਪਿ ਤੇ ਅਗਰੁ, ਵਿਹਰੇਯ੍ਯਾਮੇਕਰਤ੍ਤ’’ਨ੍ਤਿ. ਨ ਮੇ, ਭਨ੍ਤੇ, ਗਰੁ, ਅਪਿਚ ਖੋ ਸੋ ਯਕ੍ਖੋ ਅਤ੍ਤਨੋ ਅਨਾਰੋਚੇਤ੍ਵਾ ਅਨੁਜਾਨਨ੍ਤਂ ਮਂ ਜੀਵਿਤਾਪਿ ਵੋਰੋਪੇਯ੍ਯ, ਆਰੋਚੇਮਿ, ਭਨ੍ਤੇ, ਤਸ੍ਸਾਤਿ. ਯਥਾਸੁਖਂ, ਗਦ੍ਰਭ, ਆਰੋਚੇਹੀਤਿ. ‘‘ਤੇਨ ਹਿ, ਭਨ੍ਤੇ, ਤ੍ਵਮੇਵ ਜਾਨਾਹੀ’’ਤਿ ਭਗਵਨ੍ਤਂ ਅਭਿਵਾਦੇਤ੍ਵਾ ਹਿਮਵਨ੍ਤਾਭਿਮੁਖੋ ਪਕ੍ਕਾਮਿ. ਭਵਨਦ੍ਵਾਰਮ੍ਪਿ ਸਯਮੇਵ ਭਗਵਤੋ ਵਿਵਰਮਦਾਸਿ. ਭਗਵਾ ਅਨ੍ਤੋਭਵਨਂ ਪਵਿਸਿਤ੍ਵਾ ਯਤ੍ਥ ਅਭਿਲਕ੍ਖਿਤੇਸੁ ਮਙ੍ਗਲਦਿਵਸਾਦੀਸੁ ਨਿਸੀਦਿਤ੍ਵਾ ਆਲ਼ਵਕੋ ਸਿਰਿਂ ਅਨੁਭੋਤਿ, ਤਸ੍ਮਿਂਯੇਵ ਦਿਬ੍ਬਰਤਨਮਯੇ ਪਲ੍ਲਙ੍ਕੇ ਨਿਸੀਦਿਤ੍ਵਾ ਸੁਵਣ੍ਣਾਭਂ ਮੁਞ੍ਚਿ. ਤਂ ਦਿਸ੍ਵਾ ਯਕ੍ਖਸ੍ਸ ਇਤ੍ਥਿਯੋ ਆਗਨ੍ਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਸਮ੍ਪਰਿਵਾਰੇਤ੍ਵਾ ਨਿਸੀਦਿਂਸੁ. ਭਗਵਾ ‘‘ਪੁਬ੍ਬੇ ਤੁਮ੍ਹੇ ਦਾਨਂ ਦਤ੍ਵਾ ਸੀਲਂ ਸਮਾਦਿਯਿਤ੍ਵਾ ਪੂਜਨੇਯ੍ਯਂ ਪੂਜੇਤ੍ਵਾ ਇਮਂ ਸਮ੍ਪਤ੍ਤਿਂ ਪਤ੍ਤਾ, ਇਦਾਨਿਪਿ ਤਥੇਵ ਕਰੋਥ, ਮਾ ਅਞ੍ਞਮਞ੍ਞਂ ਇਸ੍ਸਾਮਚ੍ਛਰਿਯਾਭਿਭੂਤਾ ਵਿਹਰਥਾ’’ਤਿਆਦਿਨਾ ਨਯੇਨ ਤਾਸਂ ਪਕਿਣ੍ਣਕਧਮ੍ਮਕਥਂ ਕਥੇਸਿ. ਤਾ ਭਗਵਤੋ ਮਧੁਰਨਿਗ੍ਘੋਸਂ ਸੁਤ੍ਵਾ ਸਾਧੁਕਾਰਸਹਸ੍ਸਾਨਿ ਦਤ੍ਵਾ ਭਗਵਨ੍ਤਂ ਸਮ੍ਪਰਿਵਾਰੇਤ੍ਵਾ ਨਿਸੀਦਿਂਸੁਯੇਵ. ਗਦ੍ਰਭੋਪਿ ਹਿਮਵਨ੍ਤਂ ਗਨ੍ਤ੍ਵਾ ਆਲ਼ਵਕਸ੍ਸਾਰੋਚੇਸਿ – ‘‘ਯਗ੍ਘੇ, ਮਾਰਿਸ, ਜਾਨੇਯ੍ਯਾਸਿ ਵਿਮਾਨੇ ਤੇ ਭਗਵਾ ਨਿਸਿਨ੍ਨੋ’’ਤਿ. ਸੋ ਗਦ੍ਰਭਸ੍ਸ ਸਞ੍ਞਂ ਅਕਾਸਿ ‘‘ਤੁਣ੍ਹੀ ਹੋਹਿ, ਗਨ੍ਤ੍ਵਾ ਕਤ੍ਤਬ੍ਬਂ ਕਰਿਸ੍ਸਾਮੀ’’ਤਿ. ਪੁਰਿਸਮਾਨੇਨ ਕਿਰ ਲਜ੍ਜਿਤੋ ਅਹੋਸਿ, ਤਸ੍ਮਾ ‘‘ਮਾ ਕੋਚਿ ਪਰਿਸਮਜ੍ਝੇ ਸੁਣੇਯ੍ਯਾ’’ਤਿ ਏਵਮਕਾਸਿ.

ਤਦਾ ਸਾਤਾਗਿਰਹੇਮਵਤਾ ਭਗਵਨ੍ਤਂ ਜੇਤਵਨੇਯੇਵ ਵਨ੍ਦਿਤ੍ਵਾ ‘‘ਯਕ੍ਖਸਮਾਗਮਂ ਗਮਿਸ੍ਸਾਮਾ’’ਤਿ ਸਪਰਿਵਾਰਾ ਨਾਨਾਯਾਨੇਹਿ ਆਕਾਸੇਨ ਗਚ੍ਛਨ੍ਤਿ. ਆਕਾਸੇ ਚ ਯਕ੍ਖਾਨਂ ਸਬ੍ਬਤ੍ਥ ਮਗ੍ਗੋ ਨਤ੍ਥਿ, ਆਕਾਸਟ੍ਠਾਨਿ ਵਿਮਾਨਾਨਿ ਪਰਿਹਰਿਤ੍ਵਾ ਮਗ੍ਗਟ੍ਠਾਨੇਨੇਵ ਮਗ੍ਗੋ ਹੋਤਿ. ਆਲ਼ਵਕਸ੍ਸ ਪਨ ਵਿਮਾਨਂ ਭੂਮਟ੍ਠਂ ਸੁਗੁਤ੍ਤਂ ਪਾਕਾਰਪਰਿਕ੍ਖਿਤ੍ਤਂ ਸੁਸਂਵਿਹਿਤਦ੍ਵਾਰਅਟ੍ਟਾਲਕਗੋਪੁਰਂ ਉਪਰਿ ਕਂਸਜਾਲਸਞ੍ਛਨ੍ਨਂ ਮਞ੍ਜੂਸਸਦਿਸਂ ਤਿਯੋਜਨਂ ਉਬ੍ਬੇਧੇਨ, ਤਸ੍ਸ ਉਪਰਿ ਮਗ੍ਗੋ ਹੋਤਿ. ਤੇ ਤਂ ਪਦੇਸਮਾਗਮ੍ਮ ਗਨ੍ਤੁਂ ਨਾਸਕ੍ਖਿਂਸੁ. ਬੁਦ੍ਧਾਨਂ ਹਿ ਨਿਸਿਨ੍ਨੋਕਾਸਸ੍ਸ ਉਪਰਿਭਾਗੇਨ ਯਾਵ ਭਵਗ੍ਗਾ ਕੋਚਿ ਗਨ੍ਤੁਂ ਨ ਸਕ੍ਕੋਤਿ. ਤੇ ‘‘ਕਿਮਿਦ’’ਨ੍ਤਿ? ਆਵਜ੍ਜੇਤ੍ਵਾ ਭਗਵਨ੍ਤਂ ਦਿਸ੍ਵਾ ਆਕਾਸੇ ਖਿਤ੍ਤਲੇਡ੍ਡੁ ਵਿਯ ਓਰੁਯ੍ਹ ਵਨ੍ਦਿਤ੍ਵਾ ਧਮ੍ਮਂ ਸੁਤ੍ਵਾ ਪਦਕ੍ਖਿਣਂ ਕਤ੍ਵਾ, ‘‘ਯਕ੍ਖਸਮਾਗਮਂ ਗਚ੍ਛਾਮ ਭਗਵਾ’’ਤਿ ਤੀਣਿ ਵਤ੍ਥੂਨਿ ਪਸਂਸਨ੍ਤਾ ਯਕ੍ਖਸਮਾਗਮਂ ਅਗਮਂਸੁ. ਆਲ਼ਵਕੋ ਤੇ ਦਿਸ੍ਵਾ, ‘‘ਇਧ ਨਿਸੀਦਥਾ’’ਤਿ ਪਟਿਕ੍ਕਮ੍ਮ ਓਕਾਸਮਦਾਸਿ. ਤੇ ਆਲ਼ਵਕਸ੍ਸ ਨਿਵੇਦੇਸੁਂ – ‘‘ਲਾਭਾ ਤੇ, ਆਲ਼ਵਕ, ਯਸ੍ਸ ਤੇ ਭਵਨੇ ਭਗਵਾ ਵਿਹਰਤਿ, ਗਚ੍ਛਾਵੁਸੋ, ਭਗਵਨ੍ਤਂ ਪਯਿਰੁਪਾਸਸ੍ਸੂ’’ਤਿ. ਏਵਂ ਭਗਵਾ ਭਵਨੇਯੇਵ ਵਿਹਾਸਿ, ਨ ਯਸ੍ਮਿਂ ਨਿਗ੍ਰੋਧੇ ਆਲ਼ਵਕਸ੍ਸ ਭਵਨਂ, ਤਸ੍ਸ ਮੂਲੇਤਿ. ਤੇਨ ਵੁਤ੍ਤਂ – ‘‘ਏਕਂ ਸਮਯਂ ਭਗਵਾ ਆਲ਼ਵਿਯਂ ਵਿਹਰਤਿ ਆਲ਼ਵਕਸ੍ਸ ਯਕ੍ਖਸ੍ਸ ਭਵਨੇ’’ਤਿ.

ਅਥ ਖੋ ਆਲ਼ਵਕੋ…ਪੇ… ਏਤਦਵੋਚ – ‘‘ਨਿਕ੍ਖਮ, ਸਮਣਾ’’ਤਿ ਕਸ੍ਮਾ ਪਨਾਯਂ ਏਤਦਵੋਚ? ਰੋਸੇਤੁਕਾਮਤਾਯ. ਤਤ੍ਰੇਵਂ ਆਦਿਤੋ ਪਭੁਤਿ ਸਮ੍ਬਨ੍ਧੋ ਵੇਦਿਤਬ੍ਬੋ – ਅਯਂ ਹਿ ਯਸ੍ਮਾ ਅਸ੍ਸਦ੍ਧਸ੍ਸ ਸਦ੍ਧਾਕਥਾ ਦੁਕ੍ਕਥਾ ਹੋਤਿ ਦੁਸ੍ਸੀਲਾਦੀਨਂ ਸੀਲਾਦਿਕਥਾ ਵਿਯ, ਤਸ੍ਮਾ ਤੇਸਂ ਯਕ੍ਖਾਨਂ ਸਨ੍ਤਿਕਾ ਭਗਵਤੋ ਪਸਂਸਂ ਸੁਤ੍ਵਾਯੇਵ ਅਗ੍ਗਿਮ੍ਹਿ ਪਕ੍ਖਿਤ੍ਤਲੋਣਸਕ੍ਖਰਾ ਵਿਯ ਅਬ੍ਭਨ੍ਤਰੇ ਕੋਪੇਨ ਤਟਤਟਾਯਮਾਨਹਦਯੋ ਹੁਤ੍ਵਾ ‘‘ਕੋ ਸੋ ਭਗਵਾ ਨਾਮ, ਯੋ ਮਮ ਭਵਨਂ ਪਵਿਟ੍ਠੋ’’ਤਿ ਆਹ. ਤੇ ਅਹਂਸੁ – ‘‘ਨ ਤ੍ਵਂ, ਆਵੁਸੋ, ਜਾਨਾਸਿ ਭਗਵਨ੍ਤਂ ਅਮ੍ਹਾਕਂ ਸਤ੍ਥਾਰਂ, ਯੋ ਤੁਸਿਤਭਵਨੇ ਠਿਤੋ ਪਞ੍ਚਮਹਾਵਿਲੋਕਿਤਂ ਵਿਲੋਕੇਤ੍ਵਾ’’ਤਿਆਦਿਨਾ ਨਯੇਨ ਯਾਵ ਧਮ੍ਮਚਕ੍ਕਪਵਤ੍ਤਨਾ ਕਥੇਨ੍ਤਾ ਪਟਿਸਨ੍ਧਿਆਦੀਸੁ ਦ੍ਵਤ੍ਤਿਂਸ ਪੁਬ੍ਬਨਿਮਿਤ੍ਤਾਨਿ ਵਤ੍ਵਾ, ‘‘ਇਮਾਨਿਪਿ ਤ੍ਵਂ, ਆਵੁਸੋ, ਅਚ੍ਛਰਿਯਾਨਿ ਨਾਦ੍ਦਸਾ’’ਤਿ? ਚੋਦੇਸੁਂ. ਸੋ ਦਿਸ੍ਵਾਪਿ ਕੋਧਵਸੇਨ ‘‘ਨਾਦ੍ਦਸ’’ਨ੍ਤਿ ਆਹ. ਆਵੁਸੋ ਆਲ਼ਵਕ, ਪਸ੍ਸੇਯ੍ਯਾਸਿ ਵਾ ਤ੍ਵਂ, ਨ ਵਾ, ਕੋ ਤਯਾ ਅਤ੍ਥੋ ਪਸ੍ਸਤਾ ਵਾ ਅਪਸ੍ਸਤਾ ਵਾ? ਕਿਂ ਤ੍ਵਂ ਕਰਿਸ੍ਸਸਿ ਅਮ੍ਹਾਕਂ ਸਤ੍ਥੁਨੋ, ਯੋ ਤ੍ਵਂ ਤਂ ਉਪਨਿਧਾਯ ਚਲਕ੍ਕਕੁਧ-ਮਹਾਉਸਭਸਮੀਪੇ ਤਦਹੁਜਾਤਵਚ੍ਛਕੋ ਵਿਯ, ਤਿਧਾ ਪਭਿਨ੍ਨਮਤ੍ਤਵਾਰਣਸਮੀਪੇ ਭਿਙ੍ਕਪੋਤਕੋ ਵਿਯ, ਭਾਸੁਰਵਿਲਮ੍ਬਿਤਕੇਸਰਸੋਭਿਤਕ੍ਖਨ੍ਧਸ੍ਸ ਮਿਗਰਞ੍ਞੋ ਸਮੀਪੇ ਜਰਸਿਙ੍ਗਾਲੋ ਵਿਯ, ਦਿਯਡ੍ਢਯੋਜਨਸਤਪਵਡ੍ਢਕਾਯਸੁਪਣ੍ਣਰਾਜਸਮੀਪੇ ਛਿਨ੍ਨਪਕ੍ਖਕਾਕਪੋਤਕੋ ਵਿਯ ਖਾਯਸਿ, ਗਚ੍ਛ ਯਂ ਤੇ ਕਰਣੀਯਂ, ਤਂ ਕਰੋਹੀਤਿ. ਏਵਂ ਵੁਤ੍ਤੇ ਦੁਟ੍ਠੋ ਆਲ਼ਵਕੋ ਉਟ੍ਠਹਿਤ੍ਵਾ ਮਨੋਸਿਲਾਤਲੇ ਵਾਮਪਾਦੇਨ ਠਤ੍ਵਾ – ‘‘ਪਸ੍ਸਥ ਦਾਨਿ ਤੁਮ੍ਹਾਕਂ ਵਾ ਸਤ੍ਥਾ ਮਹਾਨੁਭਾਵੋ, ਅਹਂ ਵਾ’’ਤਿ ਦਕ੍ਖਿਣਪਾਦੇਨ ਸਟ੍ਠਿਯੋਜਨਮਤ੍ਤਂ ਕੇਲਾਸਪਬ੍ਬਤਕੂਟਂ ਅਕ੍ਕਮਿ. ਤਂ ਅਯੋਕੂਟਪਹਟੋ ਵਿਯ ਨਿਦ੍ਧਨ੍ਤਅਯੋਪਿਣ੍ਡੋ ਪਪਟਿਕਾਯੋ ਮੁਞ੍ਚਿ, ਸੋ ਤਤ੍ਰ ਠਤ੍ਵਾ, ‘‘ਅਹਂ ਆਲ਼ਵਕੋ’’ਤਿ ਉਗ੍ਘੋਸੇਸਿ. ਸਕਲਜਮ੍ਬੁਦੀਪਂ ਸਦ੍ਦੋ ਫਰਿ.

ਚਤ੍ਤਾਰੋ ਕਿਰ ਸਦ੍ਦਾ ਸਕਲਜਮ੍ਬੁਦੀਪੇ ਸੂਯਿਂਸੁ – ਯਞ੍ਚ ਪੁਣ੍ਣਕੋ ਯਕ੍ਖਸੇਨਾਪਤਿ ਧਨਞ੍ਜਯਕੋਰਬ੍ਯਰਾਜਾਨਂ ਜੂਤਂ ਜਿਨਿਤ੍ਵਾ ਅਪ੍ਫੋਟੇਤ੍ਵਾ ‘‘ਅਹਂ ਜਿਨਿ’’ਨ੍ਤਿ ਉਗ੍ਘੋਸੇਸਿ; ਯਞ੍ਚ ਸਕ੍ਕੋ ਦੇਵਾਨਮਿਨ੍ਦੋ ਕਸ੍ਸਪਭਗਵਤੋ ਸਾਸਨੇ ਓਸਕ੍ਕਨ੍ਤੇ ਵਿਸ੍ਸਕਮ੍ਮਦੇਵਪੁਤ੍ਤਂ ਸੁਨਖਂ ਕਰਿਤ੍ਵਾ – ‘‘ਅਹਂ ਪਾਪਭਿਕ੍ਖੂ ਚ ਪਾਪਭਿਕ੍ਖੁਨਿਯੋ ਚ ਉਪਾਸਕੇ ਚ ਉਪਾਸਿਕਾਯੋ ਚ ਸਬ੍ਬੇਵ ਚ ਅਧਮ੍ਮਵਾਦਿਨੋ ਖਾਦਾਮੀ’’ਤਿ ਉਗ੍ਘੋਸਾਪੇਸਿ; ਯਞ੍ਚ ਕੁਸਜਾਤਕੇ ਪਭਾਵਤਿਹੇਤੁ ਸਤ੍ਤਹਿ ਰਾਜੂਹਿ ਨਗਰੇ ਉਪਰੁਦ੍ਧੇ ਪਭਾਵਤਿਂ ਅਤ੍ਤਨਾ ਸਹ ਹਤ੍ਥਿਕ੍ਖਨ੍ਧੇ ਆਰੋਪੇਤ੍ਵਾ ਨਗਰਾ ਨਿਕ੍ਖਮ੍ਮ – ‘‘ਅਹਂ ਸੀਹਸ੍ਸਰਮਹਾਕੁਸਰਾਜਾ’’ਤਿ ਮਹਾਪੁਰਿਸੋ ਉਗ੍ਘੋਸੇਸਿ; ਯਞ੍ਚ ਕੇਲਾਸਮੁਦ੍ਧਨਿ ਠਤ੍ਵਾ ਆਲ਼ਵਕੋਤਿ. ਤਦਾ ਹਿ ਸਕਲਜਮ੍ਬੁਦੀਪੇ ਦ੍ਵਾਰੇ ਠਤ੍ਵਾ ਉਗ੍ਘੋਸਿਤਸਦਿਸਂ ਅਹੋਸਿ. ਤਿਯੋਜਨਸਹਸ੍ਸਵਿਤ੍ਥਤੋ ਚ ਹਿਮਵਾਪਿ ਸਙ੍ਕਮ੍ਪਿ ਯਕ੍ਖਸ੍ਸਾਨੁਭਾਵੇਨ.

ਸੋ ਵਾਤਮਣ੍ਡਲਂ ਸਮੁਟ੍ਠਾਪੇਸਿ – ‘‘ਏਤੇਨੇਵ ਸਮਣਂ ਪਲਾਪੇਸ੍ਸਾਮੀ’’ਤਿ. ਤੇ ਪੁਰਤ੍ਥਿਮਾਦਿਭੇਦਾ ਵਾਤਾ ਸਮੁਟ੍ਠਹਿਤ੍ਵਾ ਅਡ੍ਢਯੋਜਨਯੋਜਨਦ੍ਵਿਯੋਜਨਤਿਯੋਜਨਪ੍ਪਮਾਣਾਨਿ ਪਬ੍ਬਤਕੂਟਾਨਿ ਪਦਾਲੇਤ੍ਵਾ ਵਨਗਚ੍ਛਰੁਕ੍ਖਾਦੀਨਿ ਉਮ੍ਮੂਲਂ ਕਤ੍ਵਾ, ਆਲ਼ਵਿਨਗਰਂ ਪਕ੍ਖਨ੍ਤਾ ਜਿਣ੍ਣਹਤ੍ਥਿਸਾਲਾਦੀਨਿ ਚੁਣ੍ਣੇਨ੍ਤਾ ਛਦਨਿਟ੍ਠਕਾ ਆਕਾਸੇ ਵਿਧਮੇਨ੍ਤਾ. ਭਗਵਾ ‘‘ਮਾ ਕਸ੍ਸਚਿ ਉਪਰੋਧੋ ਹੋਤੂ’’ਤਿ ਅਧਿਟ੍ਠਾਸਿ. ਤੇ ਵਾਤਾ ਦਸਬਲਂ ਪਤ੍ਵਾ ਚੀਵਰਕਣ੍ਣਮਤ੍ਤਮ੍ਪਿ ਚਾਲੇਤੁਂ ਨਾਸਕ੍ਖਿਂਸੁ. ਤਤੋ ਮਹਾਵਸ੍ਸਂ ਸਮੁਟ੍ਠਾਪੇਸਿ. ‘‘ਉਦਕੇਨ ਅਜ੍ਝੋਤ੍ਥਰਿਤ੍ਵਾ ਸਮਣਂ ਮਾਰੇਸ੍ਸਾਮੀ’’ਤਿ. ਤਸ੍ਸਾਨੁਭਾਵੇਨ ਉਪਰੂਪਰਿ ਸਤਪਟਲਸਹਸ੍ਸਪਟਲਾਦਿਭੇਦਾ ਵਲਾਹਕਾ ਉਟ੍ਠਹਿਤ੍ਵਾ ਪਵਸ੍ਸਿਂਸੁ. ਵੁਟ੍ਠਿਧਾਰਾਵੇਗੇਨ ਪਥਵੀ ਛਿਦ੍ਦਾ ਅਹੋਸਿ. ਵਨਰੁਕ੍ਖਾਦੀਨਂ ਉਪਰਿ ਮਹੋਘੋ ਆਗਨ੍ਤ੍ਵਾ ਦਸਬਲਸ੍ਸ ਚੀਵਰੇ ਉਸ੍ਸਾਵਬਿਨ੍ਦੁਮਤ੍ਤਮ੍ਪਿ ਤੇਮੇਤੁਂ ਨਾਸਕ੍ਖਿ. ਤਤੋ ਪਾਸਾਣਵਸ੍ਸਂ ਸਮੁਟ੍ਠਾਪੇਸਿ. ਮਹਨ੍ਤਾਨਿ ਮਹਨ੍ਤਾਨਿ ਪਬ੍ਬਤਕੂਟਾਨਿ ਧੂਮਾਯਨ੍ਤਾਨਿ ਪਜ੍ਜਲਨ੍ਤਾਨਿ ਆਕਾਸੇਨਾਗਨ੍ਤ੍ਵਾ ਦਸਬਲਂ ਪਤ੍ਵਾ ਦਿਬ੍ਬਮਾਲਾਗੁਲ਼ਾਨਿ ਸਮ੍ਪਜ੍ਜਿਂਸੁ. ਤਤੋ ਪਹਰਣਵਸ੍ਸਂ ਸਮੁਟ੍ਠਾਪੇਸਿ. ਏਕਤੋਧਾਰਾਉਭਤੋਧਾਰਾਅਸਿਸਤ੍ਤਿਖੁਰਪ੍ਪਾਦਯੋ ਧੂਮਾਯਨ੍ਤਾ ਪਜ੍ਜਲਨ੍ਤਾ ਆਕਾਸੇਨਾਗਨ੍ਤ੍ਵਾ ਦਸਬਲਂ ਪਤ੍ਵਾ ਦਿਬ੍ਬਪੁਪ੍ਫਾਨਿ ਅਹੇਸੁਂ. ਤਤੋ ਅਙ੍ਗਾਰਵਸ੍ਸਂ ਸਮੁਟ੍ਠਾਪੇਸਿ. ਕਿਂਸੁਕ ਵਣ੍ਣਾ ਅਙ੍ਗਾਰਾ ਆਕਾਸੇਨਾਗਨ੍ਤ੍ਵਾ ਦਸਬਲਸ੍ਸ ਪਾਦਮੂਲੇ ਦਿਬ੍ਬਪੁਪ੍ਫਾਨਿ ਹੁਤ੍ਵਾ ਵਿਕੀਰਯਿਂਸੁ. ਤਤੋ ਕੁਕ੍ਕੁਲਵਸ੍ਸਂ ਸਮੁਟ੍ਠਾਪੇਸਿ. ਅਚ੍ਚੁਣ੍ਹਾ ਕੁਕ੍ਕੁਲਾ ਆਕਾਸੇਨਾਗਨ੍ਤ੍ਵਾ ਦਸਬਲਸ੍ਸ ਪਾਦਮੂਲੇ ਚਨ੍ਦਨਚੁਣ੍ਣਂ ਹੁਤ੍ਵਾ ਨਿਪਤਿਂਸੁ. ਤਤੋ ਵਾਲਿਕਵਸ੍ਸਂ ਸਮੁਟ੍ਠਾਪੇਸਿ. ਅਤਿਸੁਖੁਮਵਾਲਿਕਾ ਧੂਮਾਯਨ੍ਤਾ ਪਜ੍ਜਲਨ੍ਤਾ ਆਕਾਸੇਨਾਗਨ੍ਤ੍ਵਾ ਦਸਬਲਸ੍ਸ ਪਾਦਮੂਲੇ ਦਿਬ੍ਬਪੁਪ੍ਫਾਨਿ ਹੁਤ੍ਵਾ ਨਿਪਤਿਂਸੁ. ਤਤੋ ਕਲਲਵਸ੍ਸਂ ਸਮੁਟ੍ਠਾਪੇਸਿ. ਤਂ ਕਲਲਵਸ੍ਸਂ ਧੂਮਾਯਨ੍ਤਂ ਪਜ੍ਜਲਨ੍ਤਂ ਆਕਾਸੇਨਾਗਨ੍ਤ੍ਵਾ ਦਸਬਲਸ੍ਸ ਪਾਦਮੂਲੇ ਦਿਬ੍ਬਗਨ੍ਧਂ ਹੁਤ੍ਵਾ ਨਿਪਤਿ. ਤਤੋ ਅਨ੍ਧਕਾਰਂ ਸਮੁਟ੍ਠਾਪੇਸਿ ‘‘ਭਿਂਸੇਤ੍ਵਾ ਸਮਣਂ ਪਲਾਪੇਸ੍ਸਾਮੀ’’ਤਿ. ਤਂ ਚਤੁਰਙ੍ਗਸਮਨ੍ਨਾਗਤਂ ਅਨ੍ਧਕਾਰਸਦਿਸਂ ਹੁਤ੍ਵਾ ਦਸਬਲਂ ਪਤ੍ਵਾ ਸੂਰਿਯਪ੍ਪਭਾਵਿਹਤਮਿਵ ਅਨ੍ਧਕਾਰਂ ਅਨ੍ਤਰਧਾਯਿ.

ਏਵਂ ਯਕ੍ਖੋ ਇਮਾਹਿ ਨਵਹਿ ਵਾਤਵਸ੍ਸਪਾਸਾਣਪਹਰਣਙ੍ਗਾਰਕੁਕ੍ਕੁਲਵਾਲਿਕਕਲਲਨ੍ਧਕਾਰਵੁਟ੍ਠੀਹਿ ਭਗਵਨ੍ਤਂ ਪਲਾਪੇਤੁਂ ਅਸਕ੍ਕੋਨ੍ਤੋ ਨਾਨਾਵਿਧਪਹਰਣਹਤ੍ਥਾਯ ਅਨੇਕਪ੍ਪਕਾਰਰੂਪਭੂਤਗਣਸਮਾਕੁਲਾਯ ਚਤੁਰਙ੍ਗਿਨਿਯਾ ਸੇਨਾਯ ਸਯਮੇਵ ਭਗਵਨ੍ਤਂ ਅਭਿਗਤੋ. ਤੇ ਭੂਤਗਣਾ ਅਨੇਕਪ੍ਪਕਾਰੇ ਵਿਕਾਰੇ ਕਤ੍ਵਾ ‘‘ਗਣ੍ਹਥ ਹਨਥਾ’’ਤਿ ਭਗਵਤੋ ਉਪਰਿ ਆਗਚ੍ਛਨ੍ਤਾ ਵਿਯ ਹੋਨ੍ਤਿ. ਅਪਿਚ ਖੋ ਨਿਦ੍ਧਨ੍ਤਲੋਹਪਿਣ੍ਡਂ ਵਿਯ ਮਕ੍ਖਿਕਾ, ਭਗਵਨ੍ਤਂ ਅਲ੍ਲੀਯਿਤੁਂ ਅਸਮਤ੍ਥਾਵ ਅਹੇਸੁਂ. ਏਵਂ ਸਨ੍ਤੇਪਿ ਯਥਾ ਬੋਧਿਮਣ੍ਡੇ ਮਾਰੋ ਆਗਤਵੇਲਾਯਮੇਵ ਨਿਵਤ੍ਤੋ, ਤਥਾ ਅਨਿਵਤ੍ਤੇਤ੍ਵਾ ਉਪਡ੍ਢਰਤ੍ਤਿਮਤ੍ਤਂ ਬ੍ਯਾਕੁਲਮਕਂਸੁ. ਏਵਂ ਉਪਡ੍ਢਰਤ੍ਤਿਮਤ੍ਤਂ ਅਨੇਕਪ੍ਪਕਾਰਵਿਭਿਂਸਨਕਦਸ੍ਸਨੇਨਪਿ ਭਗਵਨ੍ਤਂ ਚਾਲੇਤੁਂ ਅਸਕ੍ਕੋਨ੍ਤੋ ਆਲ਼ਵਕੋ ਚਿਨ੍ਤੇਸਿ – ‘‘ਯਂਨੂਨਾਹਂ ਕੇਨਚਿ ਅਜੇਯ੍ਯਂ ਦੁਸ੍ਸਾਵੁਧਂ ਮੁਞ੍ਚੇਯ੍ਯ’’ਨ੍ਤਿ.

ਚਤ੍ਤਾਰਿ ਕਿਰ ਆਵੁਧਾਨਿ ਲੋਕੇ ਸੇਟ੍ਠਾਨਿ – ਸਕ੍ਕਸ੍ਸ ਵਜਿਰਾਵੁਧਂ, ਵੇਸ੍ਸਵਣਸ੍ਸ ਗਦਾਵੁਧਂ, ਯਮਸ੍ਸ ਨਯਨਾਵੁਧਂ, ਆਲ਼ਵਕਸ੍ਸ ਦੁਸ੍ਸਾਵੁਧਨ੍ਤਿ. ਯਦਿ ਹਿ ਸਕ੍ਕੋ ਦੁਟ੍ਠੋ ਵਜਿਰਾਵੁਧਂ ਸਿਨੇਰੁਮਤ੍ਥਕੇ ਪਹਰੇਯ੍ਯ, ਅਟ੍ਠਸਟ੍ਠਿਸਹਸ੍ਸਾਧਿਕਯੋਜਨਸਤਸਹਸ੍ਸਂ ਵਿਨਿਵਿਜ੍ਝਿਤ੍ਵਾ ਹੇਟ੍ਠਤੋ ਗਚ੍ਛੇਯ੍ਯ. ਵੇਸ੍ਸਵਣੇਨ ਕੁਜ੍ਝਨਕਾਲੇ ਵਿਸ੍ਸਜ੍ਜਿਤਂ ਗਦਾਵੁਧਂ ਬਹੂਨਂ ਯਕ੍ਖਸਹਸ੍ਸਾਨਂ ਸੀਸਂ ਪਾਤੇਤ੍ਵਾ ਪੁਨ ਹਤ੍ਥਪਾਸਂ ਆਗਨ੍ਤ੍ਵਾ ਤਿਟ੍ਠਤਿ. ਯਮੇਨ ਦੁਟ੍ਠੇਨ ਨਯਨਾਵੁਧੇਨ ਓਲੋਕਿਤਮਤ੍ਤੇ ਅਨੇਕਾਨਿ ਕੁਮ੍ਭਣ੍ਡਸਹਸ੍ਸਾਨਿ ਤਤ੍ਤਕਪਾਲੇ ਤਿਲਾ ਵਿਯ ਫਰਨ੍ਤਾਨਿ ਵਿਨਸ੍ਸਨ੍ਤਿ. ਆਲ਼ਵਕੋ ਦੁਟ੍ਠੋ ਸਚੇ ਆਕਾਸੇ ਦੁਸ੍ਸਾਵੁਧਂ ਮੁਞ੍ਚੇਯ੍ਯ, ਦ੍ਵਾਦਸ ਵਸ੍ਸਾਨਿ ਦੇਵੋ ਨ ਵਸ੍ਸੇਯ੍ਯ. ਸਚੇ ਪਥਵਿਯਂ ਮੁਞ੍ਚੇਯ੍ਯ. ਸਬ੍ਬਰੁਕ੍ਖਤਿਣਾਦੀਨਿ ਸੁਸ੍ਸਿਤ੍ਵਾ ਦ੍ਵਾਦਸਵਸ੍ਸਨ੍ਤਰੇ ਨ ਪੁਨ ਵਿਰੁਹੇਯ੍ਯੁਂ. ਸਚੇ ਸਮੁਦ੍ਦੇ ਮੁਞ੍ਚੇਯ੍ਯ, ਤਤ੍ਤਕਪਾਲੇ ਉਦਕਬਿਨ੍ਦੁ ਵਿਯ ਸਬ੍ਬਮੁਦਕਂ ਸੁਸ੍ਸੇਯ੍ਯ. ਸਚੇ ਸਿਨੇਰੁਸਦਿਸੇਪਿ ਪਬ੍ਬਤੇ ਮੁਞ੍ਚੇਯ੍ਯ, ਖਣ੍ਡਾਖਣ੍ਡਂ ਹੁਤ੍ਵਾ ਵਿਕਿਰੇਯ੍ਯ. ਸੋ ਏਵਂ ਮਹਾਨੁਭਾਵਂ ਦੁਸ੍ਸਾਵੁਧਂ ਉਤ੍ਤਰਿਸਾਟਕਂ ਮੁਞ੍ਚਿਤ੍ਵਾ ਅਗ੍ਗਹੇਸਿ. ਯੇਭੁਯ੍ਯੇਨ ਦਸਸਹਸ੍ਸੀਲੋਕਧਾਤੁਦੇਵਤਾ ਵੇਗੇਨ ਸਨ੍ਨਿਪਤਿਂਸੁ ‘‘ਅਜ੍ਜ ਭਗਵਾ ਆਲ਼ਵਕਂ ਦਮੇਸ੍ਸਤਿ, ਤਤ੍ਥ ਧਮ੍ਮਂ ਸੋਸ੍ਸਾਮਾ’’ਤਿ ਯੁਦ੍ਧਦਸ੍ਸਨਕਾਮਾਪਿ ਦੇਵਤਾ ਸਨ੍ਨਿਪਤਿਂਸੁ. ਏਵਂ ਸਕਲਮ੍ਪਿ ਆਕਾਸਂ ਦੇਵਤਾਹਿ ਪਰਿਪੁਣ੍ਣਮਹੋਸਿ.

ਅਥ ਆਲ਼ਵਕੋ ਭਗਵਤੋ ਸਮੀਪੇ ਉਪਰੂਪਰਿ ਵਿਚਰਿਤ੍ਵਾ ਵਤ੍ਥਾਵੁਧਂ ਮੁਞ੍ਚਿ. ਤਂ ਅਸਨਿਵਿਚਕ੍ਕਂ ਵਿਯ ਆਕਾਸੇ ਭੇਰਵਸਦ੍ਦਂ ਕਰੋਨ੍ਤਂ ਧੂਮਾਯਨ੍ਤਂ ਪਜ੍ਜਲਨ੍ਤਂ ਭਗਵਨ੍ਤਂ ਪਤ੍ਵਾ ਯਕ੍ਖਮਾਨਮਦ੍ਦਨਤ੍ਥਂ ਪਾਦਪੁਞ੍ਛਨਚੋਲ਼ਂ ਹੁਤ੍ਵਾ ਪਾਦਮੂਲੇ ਨਿਪਤਿ. ਆਲ਼ਵਕੋ ਤਂ ਦਿਸ੍ਵਾ ਛਿਨ੍ਨਵਿਸਾਣੋ ਵਿਯ ਉਸਭੋ ਉਦ੍ਧਤਦਾਠੋ ਵਿਯ ਸਪ੍ਪੋ ਨਿਤ੍ਤੇਜੋ ਨਿਮ੍ਮਦੋ ਨਿਪਤਿਤਮਾਨਦ੍ਧਜੋ ਹੁਤ੍ਵਾ ਚਿਨ੍ਤੇਸਿ – ‘‘ਦੁਸ੍ਸਾਵੁਧਮ੍ਪਿ ਮੇ ਸਮਣਂ ਨਾਭਿਭੋਸਿ. ਕਿਂ ਨੁ ਖੋ ਕਾਰਣ’’ਨ੍ਤਿ? ‘‘ਇਦਂ ਕਾਰਣਂ, ਮੇਤ੍ਤਾਵਿਹਾਰਯੁਤ੍ਤੋ ਸਮਣੋ, ਹਨ੍ਦ ਨਂ ਰੋਸੇਤ੍ਵਾ ਮੇਤ੍ਤਾਯ ਵਿਯੋਜੇਮੀ’’ਤਿ ਇਮਿਨਾ ਸਮ੍ਬਨ੍ਧੇਨੇਤਂ ਵੁਤ੍ਤਂ – ਅਥ ਖੋ ਆਲ਼ਵਕੋ ਯਕ੍ਖੋ ਯੇਨ ਭਗਵਾ…ਪੇ… ਨਿਕ੍ਖਮ ਸਮਣਾਤਿ. ਤਤ੍ਥਾਯਮਧਿਪ੍ਪਾਯੋ – ਕਸ੍ਮਾ ਮਯਾ ਅਨਨੁਞ੍ਞਾਤੋ ਮਮ ਭਵਨਂ ਪਵਿਸਿਤ੍ਵਾ ਘਰਸਾਮਿਕੋ ਵਿਯ ਇਤ੍ਥਾਗਾਰਸ੍ਸ ਮਜ੍ਝੇ ਨਿਸਿਨ੍ਨੋਸਿ? ਅਨਨੁਯੁਤ੍ਤਮੇਤਂ ਸਮਣਸ੍ਸ ਯਦਿਦਂ ਅਦਿਨ੍ਨਪਰਿਭੋਗੋ ਇਤ੍ਥਿਸਂਸਗ੍ਗੋ ਚ? ਤਸ੍ਮਾ ਯਦਿ ਤ੍ਵਂ ਸਮਣਧਮ੍ਮੇ ਠਿਤੋ, ਨਿਕ੍ਖਮ ਸਮਣਾਤਿ. ਏਕੇ ਪਨ – ‘‘ਏਤਾਨਿ ਅਞ੍ਞਾਨਿ ਚ ਫਰੁਸਵਚਨਾਨਿ ਵਤ੍ਵਾ ਏਵਾਯਂ ਏਤਦਵੋਚਾ’’ਤਿ ਭਣਨ੍ਤਿ.

ਅਥ ਭਗਵਾ – ‘‘ਯਸ੍ਮਾ ਥਦ੍ਧੋ ਪਟਿਥਦ੍ਧਭਾਵੇਨ ਵਿਨੇਤੁਂ ਨ ਸਕ੍ਕਾ, ਸੋ ਹਿ ਪਟਿਥਦ੍ਧਭਾਵੇ ਕਯਿਰਮਾਨੇ, ਸੇਯ੍ਯਥਾਪਿ ਚਣ੍ਡਸ੍ਸ ਕੁਕ੍ਕੁਰਸ੍ਸ ਨਾਸਾਯ ਪਿਤ੍ਤਂ ਭਿਨ੍ਦੇਯ੍ਯ, ਸੋ ਭਿਯ੍ਯੋਸੋਮਤ੍ਤਾਯ ਚਣ੍ਡਤਰੋ ਅਸ੍ਸ, ਏਵਂ ਥਦ੍ਧਤਰੋ ਹੋਤਿ, ਮੁਦੁਨਾ ਪਨ ਸੋ ਸਕ੍ਕਾ ਵਿਨੇਤੁ’’ਨ੍ਤਿ ਞਤ੍ਵਾ, ਸਾਧਾਵੁਸੋਤਿ ਪਿਯਵਚਨੇਨ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਨਿਕ੍ਖਮਿ. ਤੇਨ ਵੁਤ੍ਤਂ ਸਾਧਾਵੁਸੋਤਿ ਭਗਵਾ ਨਿਕ੍ਖਮੀਤਿ.

ਤਤੋ ਆਲ਼ਵਕੋ – ‘‘ਸੁਬ੍ਬਚੋ ਵਤਾਯਂ ਸਮਣੋ ਏਕਵਚਨੇਨੇਵ ਨਿਕ੍ਖਨ੍ਤੋ, ਏਵਂ ਨਾਮ ਨਿਕ੍ਖਮੇਤੁਂ ਸੁਖਂ ਸਮਣਂ ਅਕਾਰਣੇਨੇਵਾਹਂ ਸਕਲਰਤ੍ਤਿਂ ਯੁਦ੍ਧੇਨ ਅਬ੍ਭੁਯ੍ਯਾਸਿ’’ਨ੍ਤਿ ਮੁਦੁਚਿਤ੍ਤੋ ਹੁਤ੍ਵਾ ਪੁਨ ਚਿਨ੍ਤੇਸਿ – ‘‘ਇਦਾਨਿਪਿ ਨ ਸਕ੍ਕਾ ਜਾਨਿਤੁਂ, ਕਿਂ ਨੁ ਖੋ ਸੁਬ੍ਬਚਤਾਯ ਨਿਕ੍ਖਨ੍ਤੋ ਉਦਾਹੁ ਕੋਧਨੋ. ਹਨ੍ਦਾਹਂ ਵੀਮਂਸਾਮੀ’’ਤਿ. ਤਤੋ ਪਵਿਸ, ਸਮਣਾਤਿ ਆਹ. ਅਥ ਸੁਬ੍ਬਚੋਤਿ ਮੁਦੁਭੂਤਚਿਤ੍ਤਵਵਤ੍ਥਾਨਕਰਣਤ੍ਥਂ ਪੁਨ ਪਿਯਵਚਨਂ ਵਦਨ੍ਤੋ ਸਾਧਾਵੁਸੋਤਿ ਭਗਵਾ ਪਾਵਿਸਿ. ਆਲ਼ਵਕੋ ਪੁਨਪ੍ਪੁਨਂ ਤਮੇਵ ਸੁਬ੍ਬਚਭਾਵਂ ਵੀਮਂਸਨ੍ਤੋ ਦੁਤਿਯਮ੍ਪਿ ਤਤਿਯਮ੍ਪਿ ਨਿਕ੍ਖਮ ਪਵਿਸਾਤਿ ਆਹ. ਭਗਵਾਪਿ ਤਥਾ ਅਕਾਸਿ. ਯਦਿ ਨ ਕਰੇਯ੍ਯ, ਪਕਤਿਯਾਪਿ ਥਦ੍ਧਯਕ੍ਖਸ੍ਸ ਚਿਤ੍ਤਂ ਥਦ੍ਧਤਰਂ ਹੁਤ੍ਵਾ ਧਮ੍ਮਕਥਾਯ ਭਾਜਨਂ ਨ ਭਵੇਯ੍ਯ. ਤਸ੍ਮਾ ਯਥਾ ਨਾਮ ਮਾਤਾ ਰੋਦਨ੍ਤਂ ਪੁਤ੍ਤਕਂ ਯਂ ਸੋ ਇਚ੍ਛਤਿ, ਤਂ ਦਤ੍ਵਾ ਵਾ ਕਤ੍ਵਾ ਵਾ ਸਞ੍ਞਾਪੇਸਿ ਤਥਾ ਭਗਵਾ ਕਿਲੇਸਰੋਦਨੇਨ ਰੋਦਨ੍ਤਂ ਯਕ੍ਖਂ ਸਞ੍ਞਾਪੇਤੁਂ ਯਂ ਸੋ ਭਣਤਿ, ਤਂ ਅਕਾਸਿ. ਯਥਾ ਚ ਧਾਤੀ ਥਞ੍ਞਂ ਅਪਿਵਨ੍ਤਂ ਦਾਰਕਂ ਕਿਞ੍ਚਿ ਦਤ੍ਵਾ ਉਪਲਾਲ਼ੇਤ੍ਵਾ ਪਾਯੇਤਿ, ਤਥਾ ਭਗਵਾ ਯਕ੍ਖਂ ਲੋਕੁਤ੍ਤਰਧਮ੍ਮਖੀਰਂ ਪਾਯੇਤੁਂ ਤਸ੍ਸ ਪਤ੍ਥਿਤਵਚਨਕਰਣੇਨ ਉਪਲਾਲ਼ੇਨ੍ਤੋ ਏਵਮਕਾਸਿ. ਯਥਾ ਚ ਪੁਰਿਸੋ ਲਾਬੁਮ੍ਹਿ ਚਤੁਮਧੁਰਂ ਪੂਰੇਤੁਕਾਮੋ ਤਸ੍ਸਬ੍ਭਨ੍ਤਰਂ ਸੋਧੇਤਿ, ਏਵਂ ਭਗਵਾ ਯਕ੍ਖਸ੍ਸ ਚਿਤ੍ਤੇ ਲੋਕੁਤ੍ਤਰਚਤੁਮਧੁਰਂ ਪੂਰੇਤੁਕਾਮੋ ਤਸ੍ਸਬ੍ਭਨ੍ਤਰੇ ਕੋਧਮਲਂ ਸੋਧੇਤੁਂ ਯਾਵ ਤਤਿਯਂ ਨਿਕ੍ਖਮਨਪਵਿਸਨਂ ਅਕਾਸਿ.

ਅਥ ਆਲ਼ਵਕੋ ‘‘ਸੁਬ੍ਬਚੋ ਅਯਂ ਸਮਣੋ ‘ਨਿਕ੍ਖਮਾ’ਤਿ ਵੁਤ੍ਤੋ ਨਿਕ੍ਖਮਤਿ, ‘ਪਵਿਸਾ’ਤਿ ਵੁਤ੍ਤੋ ਪਵਿਸਤਿ. ਯਂਨੂਨਾਹਂ ਇਮਂ ਸਮਣਂ ਏਵਮੇਵ ਸਕਲਰਤ੍ਤਿਂ ਕਿਲਮੇਤ੍ਵਾ ਪਾਦੇ ਗਹੇਤ੍ਵਾ ਪਾਰਗਙ੍ਗਾਯ ਖਿਪੇਯ੍ਯ’’ਨ੍ਤਿ? ਪਾਪਕਂ ਚਿਤ੍ਤਂ ਉਪ੍ਪਾਦੇਤ੍ਵਾ ਚਤੁਤ੍ਥਵਾਰਂ ਆਹ ਨਿਕ੍ਖਮ, ਸਮਣਾਤਿ. ਤਂ ਞਤ੍ਵਾ ਭਗਵਾ ਨ ਖ੍ਵਾਹਂ ਤਨ੍ਤਿ ਆਹ. ਏਵਂ ਵਾ ਵੁਤ੍ਤੇ ਤਦੁਤ੍ਤਰਿਕਰਣੀਯਂ ਪਰਿਯੇਸਮਾਨੋ ਪਞ੍ਹਂ ਪੁਚ੍ਛਿਤਬ੍ਬਂ ਮਞ੍ਞਿਸ੍ਸਤਿ. ਤਂ ਧਮ੍ਮਕਥਾਯ ਮੁਖਂ ਭਵਿਸ੍ਸਤੀਤਿ ਞਤ੍ਵਾ, ਨ ਖ੍ਵਾਹਂ ਤਨ੍ਤਿ ਆਹ. ਤਤ੍ਥ ਨ-ਇਤਿ ਪਟਿਕ੍ਖੇਪੇ. ਖੋਤਿ ਅਵਧਾਰਣੇ. ਅਹਨ੍ਤਿ ਅਤ੍ਤਨਿਦਸ੍ਸਨਂ. ਤਨ੍ਤਿ ਹੇਤੁਵਚਨਂ. ਤੇਨੇਵੇਤ੍ਥ ‘‘ਯਸ੍ਮਾ ਤ੍ਵਂ ਏਵਂ ਚਿਨ੍ਤੇਸਿ, ਤਸ੍ਮਾ ਅਹਂ, ਆਵੁਸੋ, ਨੇਵ ਨਿਕ੍ਖਮਿਸ੍ਸਾਮਿ, ਯਂ ਤੇ ਕਰਣੀਯਂ, ਤਂ ਕਰੋਹੀ’’ਤਿ ਏਵਮਤ੍ਥੋ ਦਟ੍ਠਬ੍ਬੋ.

ਤਤੋ ਆਲ਼ਵਕੋ ਯਸ੍ਮਾ ਪੁਬ੍ਬੇਪਿ ਆਕਾਸੇਨ ਗਮਨਵੇਲਾਯ – ‘‘ਕਿਂ ਨੁ ਖੋ ਏਤਂ ਸੁਵਣ੍ਣਵਿਮਾਨਂ, ਉਦਾਹੁ ਰਜਤਮਣਿਵਿਮਾਨਾਨਂ ਅਞ੍ਞਤਰਂ, ਹਨ੍ਦ ਨਂ ਪਸ੍ਸਾਮਾ’’ਤਿ ਏਵਂ ਅਤ੍ਤਨੋ ਵਿਮਾਨਂ ਆਗਤੇ ਇਦ੍ਧਿਮਨ੍ਤੇ ਤਾਪਸਪਰਿਬ੍ਬਾਜਕੇ ਪਞ੍ਹਂ ਪੁਚ੍ਛਿਤ੍ਵਾ ਵਿਸ੍ਸਜ੍ਜੇਤੁਂ ਅਸਕ੍ਕੋਨ੍ਤੇ ਚਿਤ੍ਤਕ੍ਖੇਪਾਦੀਹਿ ਵਿਹੇਠੇਤਿ, ਤਸ੍ਮਾ ਭਗਵਨ੍ਤਮ੍ਪਿ ਤਥਾ ਵਿਹੇਠੇਸ੍ਸਾਮੀਤਿ ਮਞ੍ਞਮਾਨੋ ਪਞ੍ਹਂ ਤਨ੍ਤਿਆਦਿਮਾਹ.

ਕੁਤੋ ਪਨਸ੍ਸ ਪਞ੍ਹਾਤਿ? ਤਸ੍ਸ ਕਿਰ ਮਾਤਾਪਿਤਰੋ ਕਸ੍ਸਪਂ ਭਗਵਨ੍ਤਂ ਪਯਿਰੁਪਾਸਿਤ੍ਵਾ ਅਟ੍ਠ ਪਞ੍ਹੇ ਸਹ ਵਿਸ੍ਸਜ੍ਜਨੇਨ ਉਗ੍ਗਹੇਸੁਂ. ਤੇ ਦਹਰਕਾਲੇ ਆਲ਼ਵਕਂ ਪਰਿਯਾਪੁਣਾਪੇਸੁਂ; ਸੋ ਕਾਲਚ੍ਚਯੇਨ ਵਿਸ੍ਸਜ੍ਜਨਂ ਸਮ੍ਮੁਸ੍ਸਿ. ਤਤੋ ‘‘ਇਮੇ ਪਞ੍ਹਾਪਿ ਮਾ ਵਿਨਸ੍ਸਨ੍ਤੂ’’ਤਿ ਸੁਵਣ੍ਣਪਟ੍ਠੇ ਜਾਤਿਹਿਙ੍ਗੁਲਕੇਨ ਲੇਖਾਪੇਤ੍ਵਾ ਵਿਮਾਨੇ ਨਿਕ੍ਖਿਪਿ. ਏਵਮੇਤੇ ਪੁਟ੍ਠਪਞ੍ਹਾ ਬੁਦ੍ਧਵਿਸਯਾਵ ਹੋਨ੍ਤਿ. ਭਗਵਾ ਤਂ ਸੁਤ੍ਵਾ ਯਸ੍ਮਾ ਬੁਦ੍ਧਾਨਂ ਪਰਿਚ੍ਚਤ੍ਤਲਾਭਨ੍ਤਰਾਯੋ ਵਾ ਜੀਵਿਤਨ੍ਤਰਾਯੋ ਵਾ ਸਬ੍ਬਞ੍ਞੁਤਞ੍ਞਾਣਬ੍ਯਾਮਪ੍ਪਭਾਦਿਪਟਿਘਾਤੋ ਵਾ ਨ ਸਕ੍ਕਾ ਕੇਨਚਿ ਕਾਤੁਂ, ਤਸ੍ਮਾ ਨਂ ਲੋਕੇ ਅਸਾਧਾਰਣਂ ਬੁਦ੍ਧਾਨੁਭਾਵਂ ਦਸ੍ਸੇਨ੍ਤੋ ਨ ਖ੍ਵਾਹਂ ਤਂ, ਆਵੁਸੋ, ਪਸ੍ਸਾਮਿ ਸਦੇਵਕੇ ਲੋਕੇਤਿਆਦਿਮਾਹ.

ਏਵਂ ਭਗਵਾ ਤਸ੍ਸ ਬਾਧਨਚਿਤ੍ਤਂ ਪਟਿਸੇਧੇਤ੍ਵਾ ਪਞ੍ਹਾਪੁਚ੍ਛਨੇ ਉਸ੍ਸਾਹਂ ਜਨੇਨ੍ਤੋ ਆਹ ਅਪਿਚ ਤ੍ਵਂ, ਆਵੁਸੋ, ਪੁਚ੍ਛ, ਯਦਾਕਙ੍ਖਸੀਤਿ. ਤਸ੍ਸਤ੍ਥੋ – ਪੁਚ੍ਛ, ਯਦਿ ਆਕਾਙ੍ਖਸਿ, ਨ ਮੇ ਪਞ੍ਹਾਵਿਸ੍ਸਜ੍ਜਨੇ ਭਾਰੋ ਅਤ੍ਥਿ. ਅਥ ਵਾ ਪੁਚ੍ਛ, ਯਂ ਆਕਙ੍ਖਸਿ. ਸਬ੍ਬਂ ਤੇ ਵਿਸ੍ਸਜ੍ਜੇਸ੍ਸਾਮੀਤਿ ਸਬ੍ਬਞ੍ਞੁਪਵਾਰਣਂ ਪਵਾਰੇਸਿ ਅਸਾਧਾਰਣਂ ਪਚ੍ਚੇਕਬੁਦ੍ਧਅਗ੍ਗਸਾਵਕਮਹਾਸਾਵਕੇਹਿ. ਏਵਂ ਭਗਵਤੋ ਸਬ੍ਬਞ੍ਞੁਪਵਾਰਣਾਯ ਪਵਾਰਿਤਾਯ ਅਥ ਖੋ ਆਲ਼ਵਕੋ ਯਕ੍ਖੋ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ.

ਤਤ੍ਥ ਕਿਂ ਸੂਧ ਵਿਤ੍ਤਨ੍ਤਿ, ਕਿਂ ਸੁ ਇਧ ਵਿਤ੍ਤਂ. ਵਿਤ੍ਤਨ੍ਤਿ ਧਨਂ. ਤਂ ਹਿ ਪੀਤਿਸਙ੍ਖਾਤਂ ਵਿਤ੍ਤਿਂ ਕਰੋਤਿ, ਤਸ੍ਮਾ ‘‘ਵਿਤ੍ਤ’’ਨ੍ਤਿ ਵੁਚ੍ਚਤਿ. ਸੁਚਿਣ੍ਣਨ੍ਤਿ ਸੁਕਤਂ. ਸੁਖਨ੍ਤਿ ਕਾਯਿਕਚੇਤਸਿਕਂ ਸਾਤਂ. ਆਵਹਾਤੀਤਿ ਆਵਹਤਿ ਆਨੇਤਿ ਦੇਤਿ ਅਪ੍ਪੇਤਿ. ਹਵੇ-ਇਤਿ ਦਲ਼੍ਹਤ੍ਥੇ ਨਿਪਾਤੋ. ਸਾਦੁਤਰਨ੍ਤਿ ਅਤਿਸਯੇਨ ਸਾਦੁ. ‘‘ਸਾਧੁਤਰ’’ਨ੍ਤਿਪਿ ਪਾਠੋ. ਰਸਾਨਨ੍ਤਿ ਰਸਸਞ੍ਞਿਤਾਨਂ ਧਮ੍ਮਾਨਂ. ਕਥਨ੍ਤਿ ਕੇਨ ਪਕਾਰੇਨ. ਕਥਂਜੀਵਿਨੋ ਜੀਵਿਤਂ ਕਥਂਜੀਵਿਂਜੀਵਿਤਂ. ਗਾਥਾਬਨ੍ਧਸੁਖਤ੍ਥਂ ਪਨ ਸਾਨੁਨਾਸਿਕਂ ਵੁਚ੍ਚਤਿ. ਕਥਂਜੀਵਿਂ ਜੀਵਤਨ੍ਤਿ ਵਾ ਪਾਠੋ, ਤਸ੍ਸ ‘‘ਜੀਵਨ੍ਤਾਨਂ ਕਥਂਜੀਵਿ’’ਨ੍ਤਿ ਅਤ੍ਥੋ. ਏਵਂ ਇਮਾਯ ਗਾਥਾਯ ‘‘ਕਿਂ ਸੁ ਇਧ ਲੋਕੇ ਪੁਰਿਸਸ੍ਸ ਵਿਤ੍ਤਂ ਸੇਟ੍ਠਂ? ਕਿਂ ਸੁ ਸੁਚਿਣ੍ਣਂ ਸੁਖਮਾਵਹਾਤਿ? ਕਿਂ ਰਸਾਨਂ ਸਾਦੁਤਰਂ? ਕਥਂਜੀਵਿਂ ਜੀਵਿਤਂ ਸੇਟ੍ਠਮਾਹੂ’’ਤਿ? ਇਮੇ ਚਤ੍ਤਾਰੋ ਪਞ੍ਹੇ ਪੁਚ੍ਛਿ.

ਅਥਸ੍ਸ ਭਗਵਾ ਕਸ੍ਸਪਦਸਬਲੇਨ ਵਿਸ੍ਸਜ੍ਜਿਤਨਯੇਨੇਵ ਵਿਸ੍ਸਜ੍ਜੇਨ੍ਤੋ ਇਮਂ ਗਾਥਮਾਹ ਸਦ੍ਧੀਧ ਵਿਤ੍ਤਨ੍ਤਿ. ਤਤ੍ਥ ਯਥਾ ਹਿਰਞ੍ਞਸੁਵਣ੍ਣਾਦਿ ਵਿਤ੍ਤਂ ਉਪਭੋਗਸੁਖਂ ਆਵਹਤਿ, ਖੁਪ੍ਪਿਪਾਸਾਦਿਦੁਕ੍ਖਂ ਪਟਿਬਾਹਤਿ, ਦਾਲਿਦ੍ਦਿਯਂ ਵੂਪਸਮੇਤਿ, ਮੁਤ੍ਤਾਦਿਰਤਨਪਟਿਲਾਭਹੇਤੁ ਹੋਤਿ, ਲੋਕਸਨ੍ਤਤਿਞ੍ਚ ਆਵਹਤਿ, ਏਵਂ ਲੋਕਿਯਲੋਕੁਤ੍ਤਰਾ ਸਦ੍ਧਾਪਿ ਯਥਾਸਮ੍ਭਵਂ ਲੋਕਿਯਲੋਕੁਤ੍ਤਰਂ ਵਿਪਾਕਂ ਸੁਖਮਾਵਹਤਿ, ਸਦ੍ਧਾਧੁਰੇਨ ਪਟਿਪਨ੍ਨਾਨਂ ਜਾਤਿਜਰਾਦਿਦੁਕ੍ਖਂ ਪਟਿਬਾਹਤਿ, ਗੁਣਦਾਲਿਦ੍ਦਿਯਂ ਵੂਪਸਮੇਤਿ, ਸਤਿਸਮ੍ਬੋਜ੍ਝਙ੍ਗਾਦਿਰਤਨਪਟਿਲਾਭਹੇਤੁ ਹੋਤਿ.

‘‘ਸਦ੍ਧੋ ਸੀਲੇਨ ਸਮ੍ਪਨ੍ਨੋ, ਯਸੋ ਭੋਗਸਮਪ੍ਪਿਤੋ;

ਯਂ ਯਂ ਪਦੇਸਂ ਭਜਤਿ, ਤਤ੍ਥ ਤਤ੍ਥੇਵ ਪੂਜਿਤੋ’’ਤਿ. (ਧ. ਪ. ੩੦੩) –

ਵਚਨਤੋ ਲੋਕਸਨ੍ਤਤਿਞ੍ਚ ਆਵਹਤੀਤਿ ਕਤ੍ਵਾ ‘‘ਵਿਤ੍ਤ’’ਨ੍ਤਿ ਵੁਤ੍ਤਂ. ਯਸ੍ਮਾ ਪਨ ਤੇਸਂ ਸਦ੍ਧਾਵਿਤ੍ਤਂ ਅਨੁਗਾਮਿਕਂ ਅਨਞ੍ਞਸਾਧਾਰਣਂ ਸਬ੍ਬਸਮ੍ਪਤ੍ਤਿਹੇਤੁ, ਲੋਕਿਯਸ੍ਸ ਹਿਰਞ੍ਞਸੁਵਣ੍ਣਾਦਿਵਿਤ੍ਤਸ੍ਸਾਪਿ ਨਿਦਾਨਂ. ਸਦ੍ਧੋਯੇਵ ਹਿ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਵਿਤ੍ਤਂ ਅਧਿਗਚ੍ਛਤਿ, ਅਸ੍ਸਦ੍ਧਸ੍ਸ ਪਨ ਵਿਤ੍ਤਂ ਯਾਵਦੇਵ ਅਨਤ੍ਥਾਯ ਹੋਤਿ, ਤਸ੍ਮਾ ਸੇਟ੍ਠਨ੍ਤਿ ਵੁਤ੍ਤਂ. ਪੁਰਿਸਸ੍ਸਾਤਿ ਉਕ੍ਕਟ੍ਠਪਰਿਚ੍ਛੇਦਦੇਸਨਾ. ਤਸ੍ਮਾ ਨ ਕੇਵਲਂ ਪੁਰਿਸਸ੍ਸ, ਇਤ੍ਥਿਆਦੀਨਮ੍ਪਿ ਸਦ੍ਧਾਵਿਤ੍ਤਮੇਵ ਸੇਟ੍ਠਨ੍ਤਿ ਵੇਦਿਤਬ੍ਬਂ.

ਧਮ੍ਮੋਤਿ ਦਸਕੁਸਲਧਮ੍ਮੋ, ਦਾਨਸੀਲਭਾਵਨਾਧਮ੍ਮੋ ਵਾ. ਸੁਚਿਣ੍ਣੋਤਿ ਸੁਕਤੋ ਸੁਚਰਿਤੋ. ਸੁਖਮਾਵਹਤੀਤਿ ਸੋਣਸੇਟ੍ਠਿਪੁਤ੍ਤਰਟ੍ਠਪਾਲਾਦੀਨਂ ਵਿਯ ਮਨੁਸ੍ਸਸੁਖਂ, ਸਕ੍ਕਾਦੀਨਂ ਵਿਯ ਦਿਬ੍ਬਸੁਖਂ, ਪਰਿਯੋਸਾਨੇ ਮਹਾਪਦੁਮਾਦੀਨਂ ਵਿਯ ਨਿਬ੍ਬਾਨਸੁਖਞ੍ਚ ਆਵਹਤਿ.

ਸਚ੍ਚਨ੍ਤਿ ਅਯਂ ਸਚ੍ਚਸਦ੍ਦੋ ਅਨੇਕੇਸੁ ਅਤ੍ਥੇਸੁ ਦਿਸ੍ਸਤਿ. ਸੇਯ੍ਯਥਿਦਂ – ‘‘ਸਚ੍ਚਂ ਭਣੇ ਨ ਕੁਜ੍ਝੇਯ੍ਯਾ ’’ ਤਿਆਦੀਸੁ (ਧ. ਪ. ੨੨੪) ਵਾਚਾਸਚ੍ਚੇ. ‘‘ਸਚ੍ਚੇ ਠਿਤਾ ਸਮਣਬ੍ਰਾਹ੍ਮਣਾ ਚਾ’’ਤਿਆਦੀਸੁ (ਜਾ. ੨.੨੧.੪੩੩) ਵਿਰਤਿਸਚ੍ਚੇ. ‘‘ਕਸ੍ਮਾ ਨੁ ਸਚ੍ਚਾਨਿ ਵਦਨ੍ਤਿ ਨਾਨਾ, ਪਵਾਦਿਯਾਸੇ ਕੁਸਲਾ ਵਦਾਨਾ’’ਤਿਆਦੀਸੁ (ਸੁ. ਨਿ. ੮੯੧) ਦਿਟ੍ਠਿਸਚ੍ਚੇ. ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਬ੍ਰਾਹ੍ਮਣਸਚ੍ਚਾਨੀ’’ਤਿਆਦੀਸੁ (ਅ. ਨਿ. ੪.੧੮੫) ਬ੍ਰਾਹ੍ਮਣਸਚ੍ਚੇ. ‘‘ਏਕਂ ਹਿ ਸਚ੍ਚਂ ਨ ਦੁਤਿਯਮਤ੍ਥੀ’’ਤਿਆਦੀਸੁ (ਸੁ. ਨਿ. ੮੯੦; ਮਹਾਨਿ. ੧੧੯) ਪਰਮਤ੍ਥਸਚ੍ਚੇ. ‘‘ਚਤੁਨ੍ਨਂ ਸਚ੍ਚਾਨਂ ਕਤਿ ਕੁਸਲਾ’’ਤਿਆਦੀਸੁ (ਵਿਭ. ੨੧੬) ਅਰਿਯਸਚ੍ਚੇ. ਇਧ ਪਨ ਪਰਮਤ੍ਥਸਚ੍ਚਂ ਨਿਬ੍ਬਾਨਂ ਵਿਰਤਿਸਚ੍ਚਞ੍ਚ ਅਬ੍ਭਨ੍ਤਰਂ ਕਤ੍ਵਾ ਵਾਚਾਸਚ੍ਚਂ ਅਧਿਪ੍ਪੇਤਂ, ਯਸ੍ਸਾਨੁਭਾਵੇਨ ਉਦਕਾਦੀਨਿ ਵਸੇ ਵਤ੍ਤੇਨ੍ਤਿ, ਜਾਤਿਜਰਾਮਰਣਪਾਰਂ ਤਰਨ੍ਤਿ. ਯਥਾਹ –

‘‘ਸਚ੍ਚੇਨ ਵਾਚੇਨੁਦਕਮ੍ਹਿ ਧਾਵਤਿ,

ਵਿਸਮ੍ਪਿ ਸਚ੍ਚੇਨ ਹਨਨ੍ਤਿ ਪਣ੍ਡਿਤਾ;

ਸਚ੍ਚੇਨ ਦੇਵੋ ਥਨਯਂ ਪਵਸ੍ਸਤਿ,

ਸਚੇ ਠਿਤਾ ਨਿਬ੍ਬੁਤਿਂ ਪਤ੍ਥਯਨ੍ਤਿ.

‘‘ਯੇ ਕੇਚਿਮੇ ਅਤ੍ਥਿ ਰਸਾ ਪਥਬ੍ਯਾ,

ਸਚ੍ਚਂ ਤੇਸਂ ਸਾਦੁਤਰਂ ਰਸਾਨਂ;

ਸਚ੍ਚੇ ਠਿਤਾ ਸਮਣਬ੍ਰਾਹ੍ਮਣਾ ਚ,

ਤਰਨ੍ਤਿ ਜਾਤਿਮਰਣਸ੍ਸ ਪਾਰ’’ਨ੍ਤਿ. (ਜਾ. ੨.੨੧.੪੩੩);

ਸਾਦੁਤਰਨ੍ਤਿ ਮਧੁਰਤਰਂ ਪਣੀਤਤਰਂ. ਰਸਾਨਨ੍ਤਿ ਯੇ ਇਮੇ ‘‘ਮੂਲਰਸੋ ਖਨ੍ਧਰਸੋ’’ਤਿਆਦਿਨਾ (ਧ. ਸ. ੬੨੮-੬੩੦) ਨਯੇਨ ਸਾਯਨੀਯਧਮ੍ਮਾ, ਯੇਚਿਮੇ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਫਲਰਸਂ (ਮਹਾਵ. ੩੦੦), ਅਰਸਰੂਪੋ ਭਵਂ ਗੋਤਮੋ, ਯੇ ਤੇ, ਬ੍ਰਾਹ੍ਮਣ, ਰੂਪਰਸਾ ਸਦ੍ਦਰਸਾ (ਪਾਰਾ. ੩; ਅ. ਨਿ. ੮.੧੧), ਅਨਾਪਤ੍ਤਿ ਰਸਰਸੇ (ਪਾਚਿ. ੬੦੫-੬੧੧), ਅਯਂ ਧਮ੍ਮਵਿਨਯੋ ਏਕਰਸੋ ਵਿਮੁਤ੍ਤਿਰਸੋ (ਚੂਲ਼ਵ. ੩੮੫; ਅ. ਨਿ. ੮.੧੯), ਭਾਗੀ ਵਾ ਭਗਵਾ ਅਤ੍ਥਰਸਸ੍ਸ ਧਮ੍ਮਰਸਸ੍ਸਾ’’ਤਿਆਦਿਨਾ (ਮਹਾਨਿ. ੧੪੯) ਨਯੇਨ ਰੂਪਾਚਾਰਰਸੁਪਵਜ੍ਜਾ ਅਵਸੇਸਾ ਬ੍ਯਞ੍ਜਨਾਦਯੋ ‘‘ਧਮ੍ਮਰਸਾ’’ਤਿ ਵੁਚ੍ਚਨ੍ਤਿ. ਤੇਸਂ ਰਸਾਨਂ ਸਚ੍ਚਂ ਹਵੇ ਸਾਦੁਤਰਂ ਸਚ੍ਚਮੇਵ ਸਾਦੁਤਰਂ. ਸਾਧੁਤਰਂ ਵਾ, ਸੇਟ੍ਠਤਰਂ, ਉਤ੍ਤਮਤਰਂ. ਮੂਲਰਸਾਦਯੋ ਹਿ ਸਰੀਰਮੁਪਬ੍ਰੂਹੇਨ੍ਤਿ, ਸਂਕਿਲੇਸਿਕਞ੍ਚ ਸੁਖਮਾਵਹਨ੍ਤਿ. ਸਚ੍ਚਰਸੇ ਵਿਰਤਿਸਚ੍ਚਵਾਚਾਸਚ੍ਚਰਸਾ ਸਮਥਵਿਪਸ੍ਸਨਾਦੀਹਿ ਚਿਤ੍ਤਂ ਉਪਬ੍ਰੂਹੇਤਿ, ਅਸਂਕਿਲੇਸਿਕਞ੍ਚ ਸੁਖਮਾਵਹਤਿ. ਵਿਮੁਤ੍ਤਿਰਸੋ ਪਰਮਤ੍ਥਸਚ੍ਚਰਸਪਰਿਭਾਵਿਤਤ੍ਤਾ ਸਾਦੁ, ਅਤ੍ਥਰਸਧਮ੍ਮਰਸਾ ਚ ਤਦਧਿਗਮੂਪਾਯਭੂਤਂ ਅਤ੍ਥਞ੍ਚ ਧਮ੍ਮਞ੍ਚ ਨਿਸ੍ਸਾਯ ਪਵਤ੍ਤਿਤੋਤਿ.

ਪਞ੍ਞਾਜੀਵਿਂਜੀਵਿਤਨ੍ਤਿ ਏਤ੍ਥ ਪਨ ਯ੍ਵਾਯਂ ਅਨ੍ਧੇਕਚਕ੍ਖੁਦ੍ਵਿਚਕ੍ਖੁਕੇਸੁ ਦ੍ਵਿਚਕ੍ਖੁਪੁਗ੍ਗਲੋ ਗਹਟ੍ਠੋ ਵਾ ਕਮ੍ਮਨ੍ਤਾਨੁਟ੍ਠਾਨ-ਸਰਣਗਮਨਦਾਨ-ਸਂਵਿਭਾਗ-ਸੀਲਸਮਾਦਾਨੁਪੋਸਥਕਮ੍ਮਾਦਿ ਗਹਟ੍ਠਪਟਿਪਦਂ, ਪਬ੍ਬਜਿਤੋ ਵਾ ਅਵਿਪ੍ਪਟਿਸਾਰਕਰਸੀਲਸਙ੍ਖਾਤਂ ਤਦੁਤ੍ਤਰਿਚਿਤ੍ਤਵਿਸੁਦ੍ਧਿਆਦਿਭੇਦਮ੍ਪਿ ਪਬ੍ਬਜਿਤਪਟਿਪਦਂ ਪਞ੍ਞਾਯ ਆਰਾਧੇਤ੍ਵਾ ਜੀਵਤਿ, ਤਸ੍ਸ ਪਞ੍ਞਾਯ ਜੀਵਿਨੋ ਜੀਵਿਤਂ, ਤਂ ਵਾ ਪਞ੍ਞਾਜੀਵਿਤਂ ਸੇਟ੍ਠਮਾਹੂਤਿ ਏਵਮਤ੍ਥੋ ਦਟ੍ਠਬ੍ਬੋ.

ਏਵਂ ਭਗਵਤਾ ਵਿਸ੍ਸਜ੍ਜਿਤੇ ਚਤ੍ਤਾਰੋਪਿ ਪਞ੍ਹੇ ਸੁਤ੍ਵਾ ਅਤ੍ਤਮਨੋ ਯਕ੍ਖੋ ਅਵਸੇਸੇਪਿ ਚਤ੍ਤਾਰੋ ਪਞ੍ਹੇ ਪੁਚ੍ਛਨ੍ਤੋ ਕਥਂਸੁ ਤਰਤਿ ਓਘਨ੍ਤਿ ਗਾਥਮਾਹ. ਅਥਸ੍ਸ ਭਗਵਾ ਪੁਰਿਮਨਯੇਨੇਵ ਵਿਸ੍ਸਜ੍ਜੇਨ੍ਤੋ ਸਦ੍ਧਾਯ ਤਰਤੀਤਿ ਗਾਥਮਾਹ. ਤਤ੍ਥ ਕਿਞ੍ਚਾਪਿ ਯੋ ਚਤੁਬ੍ਬਿਧਮੋਘਂ ਤਰਤਿ, ਸੋ ਸਂਸਾਰਣ੍ਣਵਮ੍ਪਿ ਤਰਤਿ, ਵਟ੍ਟਦੁਕ੍ਖਮ੍ਪਿ ਅਚ੍ਚੇਤਿ, ਕਿਲੇਸਮਲਾਪਿ ਪਰਿਸੁਜ੍ਝਤਿ, ਏਵਂ ਸਨ੍ਤੇਪਿ ਪਨ ਯਸ੍ਮਾ ਅਸ੍ਸਦ੍ਧੋ ਓਘਤਰਣਂ ਅਸਦ੍ਦਹਨ੍ਤੋ ਨ ਪਕ੍ਖਨ੍ਦਤਿ, ਪਞ੍ਚਸੁ ਕਾਮਗੁਣੇਸੁ ਚਿਤ੍ਤਵੋਸ੍ਸਗ੍ਗੇਨ ਪਮਤ੍ਤੋ ਤਤ੍ਥੇਵ ਵਿਸਤ੍ਤਤ੍ਤਾ ਸਂਸਾਰਣ੍ਣਵਂ ਨ ਤਰਤਿ, ਕੁਸੀਤੋ ਦੁਕ੍ਖਂ ਵਿਹਰਤਿ ਵੋਕਿਣ੍ਣੋ ਅਕੁਸਲੇਹਿ ਧਮ੍ਮੇਹਿ, ਅਪ੍ਪਞ੍ਞੋ ਸੁਦ੍ਧਿਮਗ੍ਗਂ ਅਜਾਨਨ੍ਤੋ ਨ ਪਰਿਸੁਜ੍ਝਤਿ, ਤਸ੍ਮਾ ਤਪ੍ਪਟਿਪਕ੍ਖਂ ਦਸ੍ਸੇਨ੍ਤੇਨ ਭਗਵਤਾ ਅਯਂ ਗਾਥਾ ਵੁਤ੍ਤਾ.

ਏਵਂ ਵੁਤ੍ਤਾਯ ਚੇਤਾਯ ਯਸ੍ਮਾ ਸੋਤਾਪਤ੍ਤਿਯਙ੍ਗਪਦਟ੍ਠਾਨਂ ਸਦ੍ਧਿਨ੍ਦ੍ਰਿਯਂ, ਤਸ੍ਮਾ ਸਦ੍ਧਾਯ ਤਰਤਿ ਓਘਨ੍ਤਿ ਇਮਿਨਾ ਪਦੇਨ ਦਿਟ੍ਠੋਘਤਰਣਂ ਸੋਤਾਪਤ੍ਤਿਮਗ੍ਗਂ ਸੋਤਾਪਨ੍ਨਞ੍ਚ ਪਕਾਸੇਤਿ. ਯਸ੍ਮਾ ਪਨ ਸੋਤਾਪਨ੍ਨੋ ਕੁਸਲਾਨਂ ਧਮ੍ਮਾਨਂ ਭਾਵਨਾਯ ਸਾਤਚ੍ਚਕਿਰਿਯਸਙ੍ਖਤੇਨ ਅਪ੍ਪਮਾਦੇਨ ਸਮਨ੍ਨਾਗਤੋ ਦੁਤਿਯਮਗ੍ਗਂ ਆਰਾਧੇਤ੍ਵਾ ਠਪੇਤ੍ਵਾ ਸਕਿਦੇਵਿਮਂ ਲੋਕਂ ਆਗਮਨਮਗ੍ਗਂ ਅਵਸੇਸਂ ਸੋਤਾਪਤ੍ਤਿਮਗ੍ਗੇਨ ਅਤਿਣ੍ਣਂ ਭਵੋਘਵਤ੍ਥੁਂ ਸਂਸਾਰਣ੍ਣਵਂ ਤਰਤਿ, ਤਸ੍ਮਾ ਅਪ੍ਪਮਾਦੇਨ ਅਣ੍ਣਵਨ੍ਤਿ ਇਮਿਨਾ ਪਦੇਨ ਭਵੋਘਤਰਣਂ ਸਕਦਾਗਾਮਿਮਗ੍ਗਂ ਸਕਦਾਗਾਮਿਞ੍ਚ ਪਕਾਸੇਤਿ. ਯਸ੍ਮਾ ਚ ਸਕਦਾਗਾਮੀ ਵੀਰਿਯੇਨ ਤਤਿਯਮਗ੍ਗਂ ਆਰਾਧੇਤ੍ਵਾ ਸਕਦਾਗਾਮਿਮਗ੍ਗੇਨ ਅਨਤੀਤਂ ਕਾਮੋਘਵਤ੍ਥੁਂ ਕਾਮੋਘਸਞ੍ਞਿਤਞ੍ਚ ਕਾਮਦੁਕ੍ਖਮਚ੍ਚੇਤਿ, ਤਸ੍ਮਾ ਵੀਰਿਯੇਨ ਦੁਕ੍ਖਮਚ੍ਚੇਤੀਤਿ ਇਮਿਨਾ ਪਦੇਨ ਕਾਮੋਘਤਰਣਂ ਅਨਾਗਾਮਿਮਗ੍ਗਂ ਅਨਾਗਾਮਿਞ੍ਚ ਪਕਾਸੇਤਿ. ਯਸ੍ਮਾ ਪਨ ਅਨਾਗਾਮੀ ਵਿਗਤਕਾਮਸਞ੍ਞਾਯ ਪਰਿਸੁਦ੍ਧਾਯ ਪਞ੍ਞਾਯ ਏਕਨ੍ਤਪਰਿਸੁਦ੍ਧਂ ਚਤੁਤ੍ਥਮਗ੍ਗਪਞ੍ਞਂ ਆਰਾਧੇਤ੍ਵਾ ਅਨਾਗਾਮਿਮਗ੍ਗੇਨ ਅਪ੍ਪਹੀਨਂ ਅਵਿਜ੍ਜਾਸਙ੍ਖਾਤਂ ਪਰਮਮਲਂ ਪਜਹਤਿ, ਤਸ੍ਮਾ ਪਞ੍ਞਾਯ ਪਰਿਸੁਜ੍ਝਤੀਤਿ, ਇਮਿਨਾ ਪਦੇਨ ਅਵਿਜ੍ਜੋਘਤਰਣਂ ਅਰਹਤ੍ਤਮਗ੍ਗਞ੍ਚ ਅਰਹਤ੍ਤਞ੍ਚ ਪਕਾਸੇਤਿ. ਇਮਾਯ ਚ ਅਰਹਤ੍ਤਨਿਕੂਟੇਨ ਕਥਿਤਾਯ ਗਾਥਾਯ ਪਰਿਯੋਸਾਨੇ ਯਕ੍ਖੋ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ.

ਇਦਾਨਿ ਤਮੇਵ ‘‘ਪਞ੍ਞਾਯ ਪਰਿਸੁਜ੍ਝਤੀ’’ਤਿ ਏਤ੍ਥ ਵੁਤ੍ਤਂ ਪਞ੍ਞਾਪਦਂ ਗਹੇਤ੍ਵਾ ਅਤ੍ਤਨੋ ਪਟਿਭਾਨੇਨ ਲੋਕਿਯਲੋਕੁਤ੍ਤਰਮਿਸ੍ਸਕਂ ਪਞ੍ਹਂ ਪੁਚ੍ਛਨ੍ਤੋ ਕਥਂਸੁ ਲਭਤੇ ਪਞ੍ਞਨ੍ਤਿ ਇਮਂ ਛਪ੍ਪਦਂ ਗਾਥਮਾਹ. ਤਤ੍ਥ ਕਥਂਸੂਤਿ ਸਬ੍ਬਤ੍ਥੇਵ ਅਤ੍ਥਯੁਤ੍ਤਿਪੁਚ੍ਛਾ ਹੋਨ੍ਤਿ. ਅਯਂ ਹਿ ਪਞ੍ਞਾਦਿਅਤ੍ਥਂ ਞਤ੍ਵਾ ਤਸ੍ਸ ਯੁਤ੍ਤਿਂ ਪੁਚ੍ਛਤਿ – ‘‘ਕਥਂ, ਕਾਯ ਯੁਤ੍ਤਿਯਾ, ਕੇਨ ਕਾਰਣੇਨ ਪਞ੍ਞਂ ਲਭਤੀ’’ਤਿ? ਏਸ ਨਯੋ ਧਨਾਦੀਸੁ.

ਅਥਸ੍ਸ ਭਗਵਾ ਚਤੂਹਿ ਕਾਰਣੇਹਿ ਪਞ੍ਞਾਲਾਭਂ ਦਸ੍ਸੇਨ੍ਤੋ ਸਦ੍ਦਹਾਨੋਤਿਆਦਿਮਾਹ. ਤਸ੍ਸਤ੍ਥੋ – ਯੇਨ ਪੁਬ੍ਬਭਾਗੇ ਕਾਯਸੁਚਰਿਤਾਦਿਭੇਦੇਨ ਅਪਰਭਾਗੇ ਚ ਸਤ੍ਤਤਿਂਸਬੋਧਿਪਕ੍ਖਿਯਭੇਦੇਨ ਧਮ੍ਮੇਨ ਅਰਹਨ੍ਤੋ ਬੁਦ੍ਧਪਚ੍ਚੇਕਬੁਦ੍ਧਸਾਵਕਾ ਨਿਬ੍ਬਾਨਂ ਪਤ੍ਤਾ, ਤਂ ਸਦ੍ਦਹਾਨੋ ਅਰਹਤਂ ਧਮ੍ਮਂ ਨਿਬ੍ਬਾਨਪਤ੍ਤਿਯਾ ਲੋਕਿਯਲੋਕੁਤ੍ਤਰਪਞ੍ਞਂ ਲਭਤਿ, ਤਞ੍ਚ ਖੋ ਨ ਸਦ੍ਧਾਮਤ੍ਤਕੇਨੇਵ. ਯਸ੍ਮਾ ਪਨ ਸਦ੍ਧਾਜਾਤੋ ਉਪਸਙ੍ਕਮਤਿ, ਉਪਸਙ੍ਕਮਨ੍ਤੋ ਪਯਿਰੁਪਾਸਤਿ, ਪਯਿਰੁਪਾਸਨ੍ਤੋ ਸੋਤਂ ਓਦਹਤਿ, ਓਹਿਤਸੋਤੋ ਧਮ੍ਮਂ ਸੁਣਾਤਿ, ਤਸ੍ਮਾ ਉਪਸਙ੍ਕਮਨਤੋ ਪਭੁਤਿ ਯਾਵ ਧਮ੍ਮਸ੍ਸਵਨੇਨ ਸੁਸ੍ਸੂਸਂ ਲਭਤਿ. ਕਿਂ ਵੁਤ੍ਤਂ ਹੋਤਿ – ਤਂ ਧਮ੍ਮਂ ਸਦ੍ਦਹਿਤ੍ਵਾਪਿ ਆਚਰਿਯੁਪਜ੍ਝਾਯੇ ਕਾਲੇਨ ਉਪਸਙ੍ਕਮਿਤ੍ਵਾ ਵਤ੍ਤਕਰਣੇਨ ਪਯਿਰੁਪਾਸਿਤ੍ਵਾ ਯਦਾ ਪਯਿਰੁਪਾਸਨਾਯ ਆਰਾਧਿਤਚਿਤ੍ਤਾ ਕਿਞ੍ਚਿ ਵਤ੍ਤੁਕਾਮਾ ਹੋਨ੍ਤਿ. ਅਥ ਅਧਿਗਤਾਯ ਸੋਤੁਕਾਮਤਾਯ ਸੋਤਂ ਓਦਹਿਤ੍ਵਾ ਸੁਣਨ੍ਤੋ ਲਭਤੀਤਿ. ਏਵਂ ਸੁਸ੍ਸੂਸਮ੍ਪਿ ਚ ਸਤਿਅਵਿਪ੍ਪਵਾਸੇਨ ਅਪ੍ਪਮਤ੍ਤੋ ਸੁਭਾਸਿਤਦੁਬ੍ਭਾਸਿਤਞ੍ਞੁਤਾਯ ਵਿਚਕ੍ਖਣੋ ਏਵ ਲਭਤਿ, ਨ ਇਤਰੋ. ਤੇਨਾਹ ‘‘ਅਪ੍ਪਮਤ੍ਤੋ ਵਿਚਕ੍ਖਣੋ’’ਤਿ.

ਏਵਂ ਯਸ੍ਮਾ ਸਦ੍ਧਾਯ ਪਞ੍ਞਲਾਭਸਂਵਤ੍ਤਨਿਕਂ ਪਟਿਪਦਂ ਪਟਿਪਜ੍ਜਤਿ, ਸੁਸ੍ਸੂਸਾਯ ਸਕ੍ਕਚ੍ਚਂ ਪਞ੍ਞਾਧਿਗਮੂਪਾਯਂ ਸੁਣਾਤਿ, ਅਪ੍ਪਮਾਦੇਨ ਗਹਿਤਂ ਨ ਪਮੁਸ੍ਸਤਿ. ਵਿਚਕ੍ਖਣਤਾਯ ਅਨੂਨਾਧਿਕਂ ਅਵਿਪਰੀਤਞ੍ਚ ਗਹੇਤ੍ਵਾ ਵਿਤ੍ਥਾਰਿਕਂ ਕਰੋਤਿ. ਸੁਸ੍ਸੂਸਾਯ ਵਾ ਓਹਿਤਸੋਤੋ ਪਞ੍ਞਾਪਟਿਲਾਭਹੇਤੁਂ ਧਮ੍ਮਂ ਸੁਣਾਤਿ, ਅਪ੍ਪਮਾਦੇਨ ਸੁਤਧਮ੍ਮਂ ਧਾਰੇਤਿ, ਵਿਚਕ੍ਖਣਤਾਯ ਧਤਾਨਂ ਧਮ੍ਮਾਨਂ ਅਤ੍ਥਮੁਪਪਰਿਕ੍ਖਤਿ, ਅਥਾਨੁਪੁਬ੍ਬੇਨ ਪਰਮਤ੍ਥਸਚ੍ਚਂ ਸਚ੍ਛਿਕਰੋਤਿ, ਤਸ੍ਮਾਸ੍ਸ ਭਗਵਾ ‘‘ਕਥਂਸੁ ਲਭਤੇ ਪਞ੍ਞ’’ਨ੍ਤਿ ਪੁਟ੍ਠੋ ਇਮਾਨਿ ਚਤ੍ਤਾਰਿ ਕਾਰਣਾਨਿ ਦਸ੍ਸੇਨ੍ਤੋ ਇਮਂ ਗਾਥਮਾਹ.

ਇਦਾਨਿ ਤਤੋ ਪਰੇ ਤਯੋ ਪਞ੍ਹੇ ਵਿਸ੍ਸਜ੍ਜੇਨ੍ਤੋ ਪਤਿਰੂਪਕਾਰੀਤਿ ਇਮਂ ਗਾਥਮਾਹ. ਤਤ੍ਥ ਦੇਸਕਾਲਾਦੀਨਿ ਅਹਾਪੇਤ੍ਵਾ ਲੋਕਿਯਸ੍ਸ ਲੋਕੁਤ੍ਤਰਸ੍ਸ ਵਾ ਧਨਸ੍ਸ ਪਤਿਰੂਪਂ ਅਧਿਗਮੂਪਾਯਂ ਕਰੋਤੀਤਿ ਪਤਿਰੂਪਕਾਰੀ. ਧੁਰਵਾਤਿ ਚੇਤਸਿਕਵੀਰਿਯਵਸੇਨ ਅਨਿਕ੍ਖਿਤ੍ਤਧੁਰੋ. ਉਟ੍ਠਾਤਾਤਿ, ‘‘ਯੋ ਚ ਸੀਤਞ੍ਚ ਉਣ੍ਹਞ੍ਚ, ਤਿਣਾ ਭਿਯ੍ਯੋ ਨ ਮਞ੍ਞਤੀ’’ਤਿਆਦਿਨਾ (ਥੇਰਗਾ. ੨੩੨) ਨਯੇਨ ਕਾਯਿਕਵੀਰੀਯਵਸੇਨ ਉਟ੍ਠਾਨਸਮ੍ਪਨ੍ਨੋ ਅਸਿਥਿਲਪਰਕ੍ਕਮੋ. ਵਿਨ੍ਦਤੇ ਧਨਨ੍ਤਿ ਏਕਮੂਸਿਕਾਯ ਨਚਿਰਸ੍ਸੇਵ ਚਤੁਸਤਸਹਸ੍ਸਸਙ੍ਖਂ ਚੂਲ਼ਨ੍ਤੇਵਾਸੀ ਵਿਯ ਲੋਕਿਯਧਨਞ੍ਚ, ਮਹਲ੍ਲਕਮਹਾਤਿਸ੍ਸਤ੍ਥੇਰੋ ਵਿਯ ਲੋਕੁਤ੍ਤਰਧਨਞ੍ਚ ਲਭਤਿ. ਸੋ ‘‘ਤੀਹਿਯੇਵ ਇਰਿਯਾਪਥੇਹਿ ਵਿਹਰਿਸ੍ਸਾਮੀ’’ਤਿ ਵਤ੍ਤਂ ਕਤ੍ਵਾ ਥਿਨਮਿਦ੍ਧਾਗਮਨਵੇਲਾਯ ਪਲਾਲਚੁਮ੍ਬਟਕਂ ਤੇਮੇਤ੍ਵਾ ਸੀਸੇ ਕਤ੍ਵਾ ਗਲਪ੍ਪਮਾਣਂ ਉਦਕਂ ਪਵਿਸਿਤ੍ਵਾ ਥਿਨਮਿਦ੍ਧਂ ਪਟਿਬਾਹਨ੍ਤੋ ਦਸਹਿ ਵਸ੍ਸੇਹਿ ਅਰਹਤ੍ਤਂ ਪਾਪੁਣਿ. ਸਚ੍ਚੇਨਾਤਿ ਵਚੀਸਚ੍ਚੇਨਾਪਿ ‘‘ਸਚ੍ਚਵਾਦੀ ਭੂਤਵਾਦੀ’’ਤਿ, ਪਰਮਤ੍ਥਸਚ੍ਚੇਨਾਪਿ ‘‘ਬੁਦ੍ਧੋ ਪਚ੍ਚੇਕਬੁਦ੍ਧੋ ਅਰਿਯਸਾਵਕੋ’’ਤਿ ਏਵਂ ਕਿਤ੍ਤਿਂ ਪਪ੍ਪੋਤਿ. ਦਦਨ੍ਤਿ ਯਂਕਿਞ੍ਚਿ ਇਚ੍ਛਿਤਪਤ੍ਥਿਤਂ ਦਦਨ੍ਤੋ ਮਿਤ੍ਤਾਨਿ ਗਨ੍ਥਤਿ, ਸਮ੍ਪਾਦੇਤਿ ਕਰੋਤੀਤਿ ਅਤ੍ਥੋ. ਦੁਦ੍ਦਦਂ ਵਾ ਦਦਂ ਤਂ ਗਨ੍ਥਤਿ. ਦਾਨਮੁਖੇਨ ਵਾ ਚਤ੍ਤਾਰਿਪਿ ਸਙ੍ਗਹਵਤ੍ਥੂਨਿ ਗਹਿਤਾਨੀਤਿ ਵੇਦਿਤਬ੍ਬਾਨਿ, ਤੇਹਿ ਮਿਤ੍ਤਾਨਿ ਕਰੋਤੀਤਿ ਵੁਤ੍ਤਂ ਹੋਤਿ.

ਏਵਂ ਗਹਟ੍ਠਪਬ੍ਬਜਿਤਾਨਂ ਸਾਧਾਰਣੇਨ ਲੋਕਿਯਲੋਕੁਤ੍ਤਰਮਿਸ੍ਸਕੇਨ ਨਯੇਨ ਚਤ੍ਤਾਰੋ ਪਞ੍ਹੇ ਵਿਸ੍ਸਜ੍ਜੇਤ੍ਵਾ ਇਦਾਨਿ ‘‘ਕਥਂ ਪੇਚ੍ਚ ਨ ਸੋਚਤੀ’’ਤਿ ਇਮਂ ਪਞ੍ਚਮਂ ਪਞ੍ਹਂ ਗਹਟ੍ਠਵਸੇਨ ਵਿਸ੍ਸਜ੍ਜੇਨ੍ਤੋ ਯਸ੍ਸੇਤੇਤਿਆਦੀਮਾਹ. ਤਸ੍ਸਤ੍ਥੋ – ਯਸ੍ਸ ‘‘ਸਦ੍ਦਹਾਨੋ ਅਰਹਤ’’ਨ੍ਤਿ ਏਤ੍ਥ ਵੁਤ੍ਤਾਯ ਸਬ੍ਬਕਲ੍ਯਾਣਧਮ੍ਮੁਪ੍ਪਾਦਿਕਾਯ ਸਦ੍ਧਾਯ ਸਮਨ੍ਨਾਗਤਤ੍ਤਾ ਸਦ੍ਧਸ੍ਸ, ਘਰਮੇਸਿਨੋਤਿ ਘਰਾਵਾਸਂ ਪਞ੍ਚ ਵਾ ਕਾਮਗੁਣੇ ਏਸਨ੍ਤਸ੍ਸ ਗਵੇਸਨ੍ਤਸ੍ਸ ਕਾਮਭੋਗਿਨੋ ਗਹਟ੍ਠਸ੍ਸ ‘‘ਸਚ੍ਚੇਨ ਕਿਤ੍ਤਿਂ ਪਪ੍ਪੋਤੀ’’ਤਿ ਏਤ੍ਥ ਵੁਤ੍ਤਪ੍ਪਕਾਰਂ ਸਚ੍ਚਂ. ‘‘ਸੁਸ੍ਸੂਸਂ ਲਭਤੇ ਪਞ੍ਞ’’ਨ੍ਤਿ ਏਤ੍ਥ ਸੁਸ੍ਸੂਸਪਞ੍ਞਾਨਾਮੇਨ ਵੁਤ੍ਤੋਵ ਦਮੋ. ‘‘ਧੁਰਵਾ ਉਟ੍ਠਾਤਾ’’ਤਿ ਏਤ੍ਥ ਧੁਰਨਾਮੇਨ ਉਟ੍ਠਾਨਨਾਮੇਨ ਚ ਵੁਤ੍ਤਾ ਧਿਤਿ. ‘‘ਦਦਂ ਮਿਤ੍ਤਾਨਿ ਗਨ੍ਥਤੀ’’ਤਿ ਏਤ੍ਥ ਵੁਤ੍ਤਪ੍ਪਕਾਰੋ ਚਾਗੋ ਚਾਤਿ ਏਤੇ ਚਤੁਰੋ ਧਮ੍ਮਾ ਸਨ੍ਤਿ. ਸ ਵੇ ਪੇਚ੍ਚ ਨ ਸੋਚਤੀਤਿ ਇਧਲੋਕਾ ਪਰਲੋਕਂ ਗਨ੍ਤ੍ਵਾ ਸ ਵੇ ਨ ਸੋਚਤੀਤਿ.

ਏਵਂ ਭਗਵਾ ਪਞ੍ਚਮਮ੍ਪਿ ਪਞ੍ਹਂ ਵਿਸ੍ਸਜ੍ਜੇਤ੍ਵਾ ਤਂ ਯਕ੍ਖਂ ਚੋਦੇਨ੍ਤੋ ਇਙ੍ਘ ਅਞ੍ਞੇਪੀਤਿਆਦਿਮਾਹ. ਤਤ੍ਥ ਇਙ੍ਘਾਤਿ ਚੋਦਨਤ੍ਥੇ ਨਿਪਾਤੋ. ਅਞ੍ਞੇਪੀਤਿ ਅਞ੍ਞੇਪਿ ਧਮ੍ਮੇ ਪੁਥੂ ਸਮਣਬ੍ਰਾਹ੍ਮਣੇ ਪੁਚ੍ਛਸ੍ਸੁ. ਅਞ੍ਞੇਪਿ ਵਾ ਪੂਰਣਾਦਯੋ ਸਬ੍ਬਞ੍ਞੁਪਟਿਞ੍ਞੇ ਪੁਥੂ ਸਮਣਬ੍ਰਾਹ੍ਮਣੇ ਪੁਚ੍ਛਸ੍ਸੁ. ਯਦਿ ਅਮ੍ਹੇਹਿ ‘‘ਸਚ੍ਚੇਨ ਕਿਤ੍ਤਿਂ ਪਪ੍ਪੋਤੀ’’ਤਿ ਏਤ੍ਥ ਵੁਤ੍ਤਪ੍ਪਕਾਰਾ ਸਚ੍ਚਾ ਭਿਯ੍ਯੋ ਕਿਤ੍ਤਿਪ੍ਪਤ੍ਤਿਕਾਰਣਂ ਵਾ, ‘‘ਸੁਸ੍ਸੂਸਂ ਲਭਤੇ ਪਞ੍ਞ’’ਨ੍ਤਿ ਏਤ੍ਥ ਸੁਸ੍ਸੂਸਾਤਿ ਪਞ੍ਞਾਪਦੇਸੇਨ ਵੁਤ੍ਤਾ ਦਮ੍ਮਾ ਭਿਯ੍ਯੋ ਲੋਕਿਯਲੋਕੁਤ੍ਤਰਪਞ੍ਞਾਪਟਿਲਾਭਕਾਰਣਂ ਵਾ, ‘‘ਦਦਂ ਮਿਤ੍ਤਾਨਿ ਗਨ੍ਥਤੀ’’ਤਿ ਏਤ੍ਥ ਵੁਤ੍ਤਪ੍ਪਕਾਰਾ ਚਾਗਾ ਭਿਯ੍ਯੋ ਮਿਤ੍ਤਗਨ੍ਥਨਕਾਰਣਂ ਵਾ, ‘‘ਧੁਰਵਾ ਉਟ੍ਠਾਤਾ’’ਤਿ ਏਤ੍ਥ ਤਂ ਤਂ ਅਤ੍ਥਵਸਂ ਪਟਿਚ੍ਚ ਧੁਰਨਾਮੇਨ ਉਟ੍ਠਾਨਨਾਮੇਨ ਚ ਵੁਤ੍ਤਾਯ ਮਹਾਭਾਰਸਹਨਤ੍ਥੇਨ ਉਸ੍ਸੋਲ਼੍ਹਿਭਾਵਪ੍ਪਤ੍ਤਾਯ ਵੀਰਿਯਸਙ੍ਖਾਤਾਯ ਖਨ੍ਤ੍ਯਾ ਭਿਯ੍ਯੋ ਲੋਕਿਯਲੋਕੁਤ੍ਤਰਧਨਵਿਨ੍ਦਨਕਾਰਣਂ ਵਾ, ‘‘ਸਚ੍ਚਂ ਦਮ੍ਮੋ ਧਿਤਿ ਚਾਗੋ’’ਤਿ ਏਵਂ ਵੁਤ੍ਤੇਹਿ ਇਮੇਹੇਵ ਚਤੂਹਿ ਧਮ੍ਮੇਹਿ ਭਿਯ੍ਯੋ ਅਸ੍ਮਾ ਲੋਕਾ ਪਰਂ ਲੋਕਂ ਪੇਚ੍ਚ ਅਸੋਚਨਕਾਰਣਂ ਵਾ ਇਧ ਵਿਜ੍ਜਤੀਤਿ ਅਯਮੇਤ੍ਥ ਸਦ੍ਧਿਂ ਸਙ੍ਖੇਪਯੋਜਨਾਯ ਅਤ੍ਥਵਣ੍ਣਨਾ. ਵਿਤ੍ਥਾਰਤੋ ਪਨ ਏਕਮੇਕਂ ਪਦਂ ਅਤ੍ਥੁਦ੍ਧਾਰਪਦੁਦ੍ਧਾਰਪਦਵਣ੍ਣਨਾਨਯੇਹਿ ਵਿਭਜਿਤ੍ਵਾ ਵੇਦਿਤਬ੍ਬਾ.

ਏਵਂ ਵੁਤ੍ਤੇ ਯਕ੍ਖੋ ਯੇਨ ਸਂਸਯੇਨ ਅਞ੍ਞੇ ਪੁਚ੍ਛੇਯ੍ਯ, ਤਸ੍ਸ ਪਹੀਨਤ੍ਤਾ ਕਥਂ ਨੁ ਦਾਨਿ ਪੁਚ੍ਛੇਯ੍ਯਂ, ਪੁਥੂ ਸਮਣਬ੍ਰਾਹ੍ਮਣੇਤਿ ਵਤ੍ਵਾ ਯੇਪਿਸ੍ਸ ਅਪੁਚ੍ਛਨਕਾਰਣਂ ਨ ਜਾਨਨ੍ਤਿ, ਤੇਪਿ ਜਾਨਾਪੇਨ੍ਤੋ ਯੋਹਂ ਅਜ੍ਜਪਜਾਨਾਮਿ, ਯੋ ਅਤ੍ਥੋ ਸਮ੍ਪਰਾਯਿਕੋਤਿ ਆਹ. ਤਤ੍ਥ ਅਜ੍ਜਾਤਿ ਅਜ੍ਜਾਦਿਂ ਕਤ੍ਵਾਤਿ ਅਧਿਪ੍ਪਾਯੋ. ਪਜਾਨਾਮੀਤਿ ਯਥਾਵੁਤ੍ਤੇਨ ਪਕਾਰੇਨ ਜਾਨਾਮਿ. ਯੋ ਅਤ੍ਥੋਤਿ ਏਤ੍ਤਾਵਤਾ ‘‘ਸੁਸ੍ਸੂਸਂ ਲਭਤੇ ਪਞ੍ਞ’’ਨ੍ਤਿਆਦਿਨਾ ਨਯੇਨ ਵੁਤ੍ਤਂ ਦਿਟ੍ਠਧਮ੍ਮਿਕਂ ਦਸ੍ਸੇਤਿ. ਸਮ੍ਪਰਾਯਿਕੋਤਿ ਇਮਿਨਾ ‘‘ਯਸ੍ਸੇਤੇ ਚਤੁਰੋ ਧਮ੍ਮਾ’’ਤਿ ਵੁਤ੍ਤਂ ਪੇਚ੍ਚ ਸੋਕਾਭਾਵਕਾਰਣਂ ਸਮ੍ਪਰਾਯਿਕਂ. ਅਤ੍ਥੋਤਿ ਚ ਕਾਰਣਸ੍ਸੇਤਂ ਅਧਿਵਚਨਂ. ਅਯਂ ਹਿ ਅਤ੍ਥਸਦ੍ਦੋ ‘‘ਸਾਤ੍ਥਂ ਸਬ੍ਯਞ੍ਜਨ’’ਨ੍ਤਿ ਏਵਮਾਦੀਸੁ (ਪਾਰਾ. ੧; ਦੀ. ਨਿ. ੧.੨੫੫) ਪਾਠਤ੍ਥੇ ਵਤ੍ਤਤਿ. ‘‘ਅਤ੍ਥੋ ਮੇ, ਗਹਪਤਿ, ਹਿਰਞ੍ਞਸੁਵਣ੍ਣੇਨਾ’’ਤਿਆਦੀਸੁ (ਦੀ. ਨਿ. ੨.੨੫੦; ਮ. ਨਿ. ੩.੨੫੮) ਵਿਚਕ੍ਖਣੇ. ‘‘ਹੋਤਿ ਸੀਲਵਤਂ ਅਤ੍ਥੋ’’ਤਿਆਦੀਸੁ (ਜਾ. ੧.੧.੧੧) ਵੁਡ੍ਢਿਮ੍ਹਿ. ‘‘ਬਹੁਜਨੋ ਭਜਤੇ ਅਤ੍ਥਹੇਤੂ’’ਤਿਆਦੀਸੁ ਧਨੇ. ‘‘ਉਭਿਨ੍ਨਮਤ੍ਥਂ ਚਰਤੀ’’ਤਿਆਦੀਸੁ (ਜਾ. ੧.੭.੬੬; ਸਂ. ਨਿ. ੧.੨੫੦; ਥੇਰਗਾ. ੪੪੩) ਹਿਤੇ. ‘‘ਅਤ੍ਥੇ ਜਾਤੇ ਚ ਪਣ੍ਡਿਤ’’ਨ੍ਤਿਆਦੀਸੁ (ਜਾ. ੧.੧.੯੨) ਕਾਰਣੇ. ਇਧ ਪਨ ਕਾਰਣੇ. ਤਸ੍ਮਾ ਯਂ ਪਞ੍ਞਾਦਿਲਾਭਾਦੀਨਂ ਕਾਰਣਂ ਦਿਟ੍ਠਧਮ੍ਮਿਕਂ, ਯਞ੍ਚ ਪੇਚ੍ਚ ਸੋਕਾਭਾਵਸ੍ਸ ਕਾਰਣਂ ਸਮ੍ਪਰਾਯਿਕਂ, ਤਂ ਯੋਹਂ ਅਜ੍ਜ ਭਗਵਤਾ ਵੁਤ੍ਤਨਯੇਨ ਸਾਮਂਯੇਵ ਪਜਾਨਾਮਿ, ਸੋ ਕਥਂ ਨੁ ਦਾਨਿ ਪੁਚ੍ਛੇਯ੍ਯਂ ਪੁਥੂ ਸਮਣਬ੍ਰਾਹ੍ਮਣੇਤਿ ਏਵਮੇਤ੍ਥ ਸਙ੍ਖੇਪਤੋ ਅਤ੍ਥੋ ਵੇਦਿਤਬ੍ਬੋ.

ਏਵਂ ਯਕ੍ਖੋ ‘‘ਪਜਾਨਾਮਿ ਯੋ ਅਤ੍ਥੋ ਸਮ੍ਪਰਾਯਿਕੋ’’ਤਿ ਵਤ੍ਵਾ ਤਸ੍ਸ ਞਾਣਸ੍ਸ ਭਗਵਂਮੂਲਕਤ੍ਤਂ ਦਸ੍ਸੇਨ੍ਤੋ ਅਤ੍ਥਾਯ ਵਤ ਮੇ ਬੁਦ੍ਧੋਤਿ ਆਹ. ਤਤ੍ਥ ਅਤ੍ਥਾਯਾਤਿ ਹਿਤਾਯ ਵੁਡ੍ਢਿਯਾ ਚ. ਯਤ੍ਥ ਦਿਨ੍ਨਂ ਮਹਪ੍ਫਲਨ੍ਤਿ ‘‘ਯਸ੍ਸੇਤੇ ਚਤੁਰੋ ਧਮ੍ਮਾ’’ਤਿ ਏਤ੍ਥ ਵੁਤ੍ਤਚਾਗੇਨ ਯਤ੍ਥ ਦਿਨ੍ਨਂ ਮਹਪ੍ਫਲਂ, ਤਂ ਅਗ੍ਗਦਕ੍ਖਿਣੇਯ੍ਯਂ ਬੁਦ੍ਧਂ ਪਜਾਨਾਮੀਤਿ ਅਤ੍ਥੋ. ਕੇਚਿ ਪਨ ‘‘ਸਙ੍ਘਂ ਸਨ੍ਧਾਯ ਏਵਮਾਹਾ’’ਤਿ ਭਣਨ੍ਤਿ.

ਏਵਂ ਇਮਾਯ ਗਾਥਾਯ ਅਤ੍ਤਨੋ ਹਿਤਾਧਿਗਮਂ ਦਸ੍ਸੇਤ੍ਵਾ ਇਦਾਨਿ ਸਹਿਤਪਟਿਪਤ੍ਤਿਂ ਦੀਪੇਨ੍ਤੋ ਸੋ ਅਹਂ ਵਿਚਰਿਸ੍ਸਾਮੀਤਿਆਦਿਮਾਹ. ਤਤ੍ਥ ਗਾਮਾ ਗਾਮਨ੍ਤਿ ਦੇਵਗਾਮਾ ਦੇਵਗਾਮਂ. ਪੁਰਾ ਪੁਰਨ੍ਤਿ ਦੇਵਨਗਰਤੋ ਦੇਵਨਗਰਂ. ਨਮਸ੍ਸਮਾਨੋ ਸਮ੍ਬੁਦ੍ਧਂ, ਧਮ੍ਮਸ੍ਸ ਚ ਸੁਧਮ੍ਮਤਨ੍ਤਿ ‘‘ਸਮ੍ਮਾਸਮ੍ਬੁਦ੍ਧੋ ਵਤ ਭਗਵਾ, ਸ੍ਵਾਕ੍ਖਾਤੋ ਵਤ ਭਗਵਤੋ ਧਮ੍ਮੋ’’ਤਿਆਦਿਨਾ ਨਯੇਨ ਬੁਦ੍ਧਸੁਬੋਧਿਤਞ੍ਚ ਧਮ੍ਮਸੁਧਮ੍ਮਤਞ੍ਚ ਚ-ਸਦ੍ਦੇਨ ‘‘ਸੁਪ੍ਪਟਿਪਨ੍ਨੋ ਵਤ ਭਗਵਤੋ ਸਾਵਕਸਙ੍ਘੋ’’ਤਿਆਦਿਨਾ ਸਙ੍ਘਸੁਪ੍ਪਟਿਪਤ੍ਤਿਞ੍ਚ ਅਭਿਤ੍ਥਵਿਤ੍ਵਾ ਨਮਸ੍ਸਮਾਨੋ ਧਮ੍ਮਘੋਸਕੋ ਹੁਤ੍ਵਾ ਵਿਚਰਿਸ੍ਸਾਮੀਤਿ ਵੁਤ੍ਤਂ ਹੋਤਿ.

ਏਵਮਿਮਾਯ ਗਾਥਾਯ ਪਰਿਯੋਸਾਨਞ੍ਚ ਰਤ੍ਤਿਵਿਭਾਵਨਞ੍ਚ ਸਾਧੁਕਾਰਸਦ੍ਦੁਟ੍ਠਾਨਞ੍ਚ ਆਲ਼ਵਕਕੁਮਾਰਸ੍ਸ ਯਕ੍ਖਭਵਨਂ ਆਨਯਨਞ੍ਚ ਏਕਕ੍ਖਣੇਯੇਵ ਅਹੋਸਿ. ਰਾਜਪੁਰਿਸਾ ਸਾਧੁਕਾਰਸਦ੍ਦਂ ਸੁਤ੍ਵਾ – ‘‘ਏਵਰੂਪੋ ਸਾਧੁਕਾਰਸਦ੍ਦੋ ਠਪੇਤ੍ਵਾ ਬੁਦ੍ਧੇ ਨ ਅਞ੍ਞੇਸਂ ਅਬ੍ਭੁਗ੍ਗਚ੍ਛਤਿ, ਆਗਤੋ ਨੁ ਖੋ ਭਗਵਾ’’ਤਿ ਆਵਜ੍ਜੇਨ੍ਤਾ ਭਗਵਤੋ ਸਰੀਰਪ੍ਪਭਂ ਦਿਸ੍ਵਾ ਪੁਬ੍ਬੇ ਵਿਯ ਬਹਿ ਅਟ੍ਠਤ੍ਵਾ ਨਿਬ੍ਬਿਸਙ੍ਕਾ ਅਨ੍ਤੋਯੇਵ ਪਵਿਸਿਤ੍ਵਾ ਅਦ੍ਦਸਂਸੁ ਭਗਵਨ੍ਤਂ ਯਕ੍ਖਸ੍ਸ ਭਵਨੇ ਨਿਸਿਨ੍ਨਂ, ਯਕ੍ਖਞ੍ਚ ਅਞ੍ਜਲਿਂ ਪਗ੍ਗਹੇਤ੍ਵਾ ਠਿਤਂ. ਦਿਸ੍ਵਾਨ ਯਕ੍ਖਂ ਆਹਂਸੁ – ‘‘ਅਯਂ ਤੇ, ਮਹਾਯਕ੍ਖ, ਰਾਜਕੁਮਾਰੋ ਬਲਿਕਮ੍ਮਾਯ ਆਨੀਤੋ, ਹਨ੍ਦ ਨਂ ਖਾਦ ਵਾ ਭੁਞ੍ਜ ਵਾ, ਯਥਾਪਚ੍ਚਯਂ ਵਾ ਕਰੋਹੀ’’ਤਿ. ਸੋ ਸੋਤਾਪਨ੍ਨਤ੍ਤਾ ਲਜ੍ਜਿਤੋ ਵਿਸੇਸੇਨ ਚ ਭਗਵਤੋ ਪੁਰਤੋ ਏਵਂ ਵੁਚ੍ਚਮਾਨੋ ਅਥ ਤਂ ਕੁਮਾਰਂ ਉਭੋਹਿ ਹਤ੍ਥੇਹਿ ਪਟਿਗ੍ਗਹੇਤ੍ਵਾ ਭਗਵਤੋ ਉਪਨਾਮੇਸਿ ‘‘ਅਯਂ, ਭਨ੍ਤੇ, ਕੁਮਾਰੋ ਮਯ੍ਹਂ ਪੇਸਿਤੋ, ਇਮਾਹਂ ਭਗਵਤੋ ਦਮ੍ਮਿ, ਹਿਤਾਨੁਕਮ੍ਪਕਾ ਬੁਦ੍ਧਾ, ਪਟਿਗ੍ਗਣ੍ਹਾਤੁ, ਭਨ੍ਤੇ, ਭਗਵਾ ਇਮਂ ਦਾਰਕਂ ਇਮਸ੍ਸ ਹਿਤਤ੍ਥਾਯ ਸੁਖਤ੍ਥਾਯਾ’’ਤਿ ਇਮਞ੍ਚ ਗਾਥਮਾਹ –

‘‘ਇਮਂ ਕੁਮਾਰਂ ਸਤਪੁਞ੍ਞਲਕ੍ਖਣਂ,

ਸਬ੍ਬਙ੍ਗੁਪੇਤਂ ਪਰਿਪੁਣ੍ਣਬ੍ਯਞ੍ਜਨਂ;

ਉਦਗ੍ਗਚਿਤ੍ਤੋ ਸੁਮਨੋ ਦਦਾਮਿ ਤੇ,

ਪਟਿਗ੍ਗਹ ਲੋਕਹਿਤਾਯ ਚਕ੍ਖੁਮਾ’’ਤਿ.

ਪਟਿਗ੍ਗਹੇਸਿ ਭਗਵਾ ਕੁਮਾਰਂ. ਪਟਿਗ੍ਗਣ੍ਹਨ੍ਤੋ ਚ ਯਕ੍ਖਸ੍ਸ ਚ ਕੁਮਾਰਸ੍ਸ ਚ ਮਙ੍ਗਲਕਰਣਤ੍ਥਂ ਪਾਦੂਨਗਾਥਂ ਅਭਾਸਿ. ਤਂ ਯਕ੍ਖੋ ਕੁਮਾਰਂ ਸਰਣਂ ਗਮੇਨ੍ਤੋ ਤਿਕ੍ਖਤ੍ਤੁਂ ਚਤੁਤ੍ਥਪਾਦੇਨ ਪੂਰੇਸਿ. ਸੇਯ੍ਯਥਿਦਂ –

‘‘ਦੀਘਾਯੁਕੋ ਹੋਤੁ ਅਯਂ ਕੁਮਾਰੋ,

ਤੁਵਞ੍ਚ ਯਕ੍ਖ ਸੁਖਿਤੋ ਭਵਾਹਿ;

ਅਬ੍ਯਾਧਿਤਾ ਲੋਕਹਿਤਾਯ ਤਿਟ੍ਠਥ,

ਅਯਂ ਕੁਮਾਰੋ ਸਰਣਮੁਪੇਤਿ ਬੁਦ੍ਧਂ;

ਅਯਂ ਕੁਮਾਰੋ ਸਰਣਮੁਪੇਤਿ ਧਮ੍ਮਂ;

ਅਯਂ ਕੁਮਾਰੋ ਸਰਣਮੁਪੇਤਿ ਸਙ੍ਘ’’ਨ੍ਤਿ.

ਅਥ ਭਗਵਾ ਕੁਮਾਰਂ ਰਾਜਪੁਰਿਸਾਨਂ ਅਦਾਸਿ – ‘‘ਇਮਂ ਵਡ੍ਢੇਤ੍ਵਾ ਪੁਨ ਮਮੇਵ ਦੇਥਾ’’ਤਿ. ਏਵਂ ਸੋ ਕੁਮਾਰੋ ਰਾਜਪੁਰਿਸਾਨਂ ਹਤ੍ਥਤੋ ਯਕ੍ਖਸ੍ਸ ਹਤ੍ਥਂ, ਯਕ੍ਖਸ੍ਸ ਹਤ੍ਥਤੋ ਭਗਵਤੋ ਹਤ੍ਥਂ, ਭਗਵਤੋ ਹਤ੍ਥਤੋ ਪੁਨ ਰਾਜਪੁਰਿਸਾਨਂ ਹਤ੍ਥਂ ਗਤਤ੍ਤਾ ਨਾਮਤੋ ‘‘ਹਤ੍ਥਕੋ ਆਲ਼ਵਕੋ’’ਤਿ ਜਾਤੋ. ਤਂ ਆਦਾਯ ਪਟਿਨਿਵਤ੍ਤੇ ਰਾਜਪੁਰਿਸੇ ਦਿਸ੍ਵਾ ਕਸ੍ਸਕਵਨਕਮ੍ਮਿਕਾਦਯੋ ‘‘ਕਿਂ ਯਕ੍ਖੋ ਕੁਮਾਰਂ ਅਤਿਦਹਰਤ੍ਤਾ ਨ ਇਚ੍ਛੀ’’ਤਿ? ਭੀਤਾ ਪੁਚ੍ਛਿਂਸੁ. ਰਾਜਪੁਰਿਸਾ ‘‘ਮਾ ਭਾਯਥ. ਖੇਮਂ ਕਤਂ ਭਗਵਤਾ’’ਤਿ ਸਬ੍ਬਮਾਰੋਚੇਸੁਂ. ਤਤੋ ‘‘ਸਾਧੁ ਸਾਧੂ’’ਤਿ ਸਕਲਂ ਆਲ਼ਵਿਨਗਰਂ ਏਕਕੋਲਾਹਲੇਨ ਯਕ੍ਖਾਭਿਮੁਖਂ ਅਹੋਸਿ. ਯਕ੍ਖੋਪਿ ਭਗਵਤੋ ਭਿਕ੍ਖਾਚਾਰਕਾਲੇ ਅਨੁਪ੍ਪਤ੍ਤੇ ਪਤ੍ਤਚੀਵਰਂ ਗਹੇਤ੍ਵਾ ਉਪਡ੍ਢਮਗ੍ਗਂ ਅਨੁਗਨ੍ਤ੍ਵਾ ਨਿਵਤ੍ਤਿ.

ਅਥ ਭਗਵਾ ਨਗਰੇ ਪਿਣ੍ਡਾਯ ਚਰਿਤ੍ਵਾ ਕਤਭਤ੍ਤਕਿਚ੍ਚੋ ਨਗਰਦ੍ਵਾਰੇ ਅਞ੍ਞਤਰਸ੍ਮਿਂ ਵਿਵਿਤ੍ਤੇ ਰੁਕ੍ਖਮੂਲੇ ਪਞ੍ਞਤ੍ਤਬੁਦ੍ਧਾਸਨੇ ਨਿਸੀਦਿ. ਤਤੋ ਮਹਾਜਨਕਾਯੇਨ ਸਦ੍ਧਿਂ ਰਾਜਾ ਚ ਨਾਗਰਾ ਚ ਏਕਤੋ ਸਮ੍ਪਿਣ੍ਡਿਤ੍ਵਾ ਭਗਵਨ੍ਤਂ ਉਪਸਙ੍ਕਮ੍ਮ ਵਨ੍ਦਿਤ੍ਵਾ ਪਰਿਵਾਰੇਤ੍ਵਾ ਨਿਸਿਨ੍ਨਾ – ‘‘ਕਥਂ, ਭਨ੍ਤੇ, ਏਵਂ ਦਾਰੁਣਂ ਯਕ੍ਖਂ ਦਮਯਿਤ੍ਥਾ’’ਤਿ ਪੁਚ੍ਛਿਂਸੁ. ਤੇਸਂ ਭਗਵਾ ਯੁਦ੍ਧਮਾਦਿਂ ਕਤ੍ਵਾ ‘‘ਏਵਂ ਨਵਵਿਧਂ ਵਸ੍ਸਂ ਵਸ੍ਸੇਤ੍ਵਾ ਏਵਂ ਵਿਭਿਂਸਨਕਂ ਅਕਾਸਿ, ਏਵਂ ਪਞ੍ਹਂ ਪੁਚ੍ਛਿ. ਤਸ੍ਸਾਹਂ ਏਵਂ ਵਿਸ੍ਸਜ੍ਜੇਸਿ’’ਨ੍ਤਿ ਤਮੇਵਾਲ਼ਵਕਸੁਤ੍ਤਂ ਕਥੇਸਿ. ਕਥਾਪਰਿਯੋਸਾਨੇ ਚਤੁਰਾਸੀਤਿਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਤਤੋ ਰਾਜਾ ਚੇਵ ਨਾਗਰਾ ਚ ਵੇਸ੍ਸਵਣਮਹਾਰਾਜਸ੍ਸ ਭਵਨਸਮੀਪੇ ਯਕ੍ਖਸ੍ਸ ਭਵਨਂ ਕਤ੍ਵਾ ਪੁਪ੍ਫਗਨ੍ਧਾਦਿਸਕ੍ਕਾਰੁਪੇਤਂ ਨਿਚ੍ਚਬਲਿਂ ਪਵਤ੍ਤੇਸੁਂ. ਤਞ੍ਚ ਕੁਮਾਰਂ ਵਿਞ੍ਞੁਤਂ ਪਤ੍ਤਂ ‘‘ਤ੍ਵਂ ਭਗਵਨ੍ਤਂ ਨਿਸ੍ਸਾਯ ਜੀਵਿਤਂ ਲਭਿ, ਗਚ੍ਛ ਭਗਵਨ੍ਤਂਯੇਵ ਪਯਿਰੁਪਾਸਸ੍ਸੁ ਭਿਕ੍ਖੁਸਙ੍ਘਞ੍ਚਾ’’ਤਿ ਵਿਸ੍ਸਜ੍ਜੇਸੁਂ. ਸੋ ਭਗਵਨ੍ਤਞ੍ਚ ਭਿਕ੍ਖੁਸਙ੍ਘਞ੍ਚ ਪਯਿਰੁਪਾਸਮਾਨੋ ਨਚਿਰਸ੍ਸੇਵ ਅਨਾਗਾਮਿਫਲੇ ਪਤਿਟ੍ਠਾਯ ਸਬ੍ਬਂ ਬੁਦ੍ਧਵਚਨਂ ਉਗ੍ਗਹੇਤ੍ਵਾ ਪਞ੍ਚਸਤਉਪਾਸਕਪਰਿਵਾਰੋ ਅਹੋਸਿ. ਭਗਵਾ ਚ ਨਂ ਏਤਦਗ੍ਗੇ ਨਿਦ੍ਦਿਸਿ – ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਉਪਾਸਕਾਨਂ ਚਤੂਹਿ ਸਙ੍ਗਹਵਤ੍ਥੂਹਿ ਪਰਿਸਂ ਸਙ੍ਗਣ੍ਹਨ੍ਤਾਨਂ ਯਦਿਦਂ ਹਤ੍ਥਕੋ ਆਲ਼ਵਕੋ’’ਤਿ (ਅ. ਨਿ. ੧.੨੫੧). ਦ੍ਵਾਦਸਮਂ.

ਇਤਿ ਸਾਰਤ੍ਥਪ੍ਪਕਾਸਿਨਿਯਾ

ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਯਕ੍ਖਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.